3. уппалахаттхийаттхераапада̄наван̣н̣ана̄

тивара̄йам̣ нива̄сӣхантиа̄дикам̣ а̄йасмато уппалахаттхакаттхерасса апада̄нам̣. айампи пуримаджинаваресу катакусало таттха таттха бхаве виват̣т̣ӯпаниссайа̄ни пун̃н̃а̄ни упачинанто сиддхаттхасса бхагавато ка̄ле ма̄ла̄ка̄ракуле ниббатто вуддхиманва̄йа ма̄ла̄ка̄ракаммена анека̄ни пуппха̄ни виккин̣анто джӣвати. атхекадивасам̣ пуппха̄ни гахетва̄ чаранто бхагавантам̣ ратанаггхикамива чарама̄нам̣ дисва̄ раттуппалакала̄пена пӯджеси. со тато чуто тенева пун̃н̃ена сугатӣсу пун̃н̃аманубхавитва̄ имасмим̣ буддхуппа̄де кулагехе ниббатто вуддхиманва̄йа саддха̄джа̄то паббаджитва̄ начирассева араха̄ ахоси.

13. со апарабха̄ге аттано пуббакаммам̣ саритва̄ соманассаджа̄то пуббачарита̄пада̄нам̣ пака̄сенто тивара̄йам̣ нива̄сӣхантиа̄дима̄ха. таттха тивара̄ти тӣхи ва̄рехи ка̄ритам̣ сан̃чаритам̣ пат̣иччханнам̣ нагарам̣, тассам̣ тивара̄йам̣ нива̄сӣ, васанасӣло нива̄санат̣т̣ха̄нагехе ва̄ васанто аханти аттхо. ахосим̣ ма̄лико тада̄ти тада̄ нибба̄наттха̄йа пун̃н̃асамбха̄ракаран̣асамайе ма̄лико ма̄ла̄ка̄рова пуппха̄ни кайавиккайам̣ катва̄ джӣванто ахосинти аттхо.

14. пуппхахаттхамада̄саханти сиддхаттхам̣ бхагавантам̣ дисва̄ уппалакала̄пам̣ ада̄сим̣ пӯджесинти аттхо. сесам̣ саббаттха утта̄наттхамева̄ти.

уппалахаттхакаттхераапада̄наван̣н̣ана̄ саматта̄.