2. н̃а̄н̣асан̃н̃икаттхераапада̄наван̣н̣ана̄

суван̣н̣аван̣н̣ам̣ самбуддхантиа̄дикам̣ а̄йасмато н̃а̄н̣асан̃н̃икаттхерасса апада̄нам̣. ка̄ уппатти? айампи пуримабуддхесу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто сиддхаттхасса бхагавато ка̄ле кулагехе ниббатто вуддхиманва̄йа саддха̄джа̄то саддхаммассаване са̄даро са̄лайо бхагавато дхаммадесана̄нуса̄рена н̃а̄н̣ам̣ песетва̄ гхосапама̄н̣атта̄ бхагавато н̃а̄н̣е пасанно пан̃чан̇гаат̣т̣хан̇ганамакка̄равасена пан̣а̄мам̣ катва̄ пакка̄ми. со тато чуто девалокесу уппанно таттха чха ка̄ма̄вачаре диббасампаттиманубхаванто тато чавитва̄ мануссалоке джа̄то таттхаггабхӯта̄ чаккаваттисампада̄дайо анубхавитва̄ имасмим̣ буддхуппа̄де вибхавасампанне екасмим̣ кулагехе ниббатто вуддхиманва̄йа саттхари пасӣдитва̄ паббаджито начирассева араха̄ ахоси.

7. со апарабха̄ге аттано пуббакаммам̣ саритва̄ соманассаджа̄то пуббачарита̄пада̄нам̣ пака̄сенто суван̣н̣аван̣н̣ам̣ самбуддхантиа̄дима̄ха. там̣ вуттаттхамева. нисабха̄джа̄нийам̣ йатха̄ти гавасатасахассаджет̣т̣хо нисабхо, нисабхо ча со а̄джа̄нийо сет̣т̣хо уттамо чети нисабха̄джа̄нийо. йатха̄ нисабха̄джа̄нийо, татхева бхагава̄ти аттхо. локависайасан̃н̃а̄там̣ пан̃н̃аттивасена евам̣ вуттам̣. анупамеййо хи бхагава̄. сесам̣ саббаттха утта̄наттхамева̄ти.

н̃а̄н̣асан̃н̃икаттхераапада̄наван̣н̣ана̄ саматта̄.