10. рен̣упӯджакаттхераапада̄наван̣н̣ана̄

суван̣н̣аван̣н̣ам̣ самбуддхантиа̄дикам̣ а̄йасмато рен̣упӯджакаттхерасса апада̄нам̣. айампи пуримаджинаваресу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто випассисса бхагавато ка̄ле кулагехе ниббатто вуддхиманва̄йа саттхари пасанно вин̃н̃утам̣ патто аггиккхандхам̣ вийа виджджотама̄нам̣ бхагавантам̣ дисва̄ пасаннама̄насо на̄гапуппхакесарам̣ гахетва̄ пӯджеси. атха бхагава̄ анумоданамака̄си.

62-3. со тена пун̃н̃ена тато чуто девамануссесу сам̣саранто убхайасампаттийо анубхавитва̄ уппаннуппаннабхаве саббаттха пӯджито имасмим̣ буддхуппа̄де кулагехе ниббатто вин̃н̃утам̣ патто пуббава̄сана̄балена саттхари пасанно са̄сане паббаджито начирассева араха̄ хутва̄ диббачаккхуна̄ аттано пуббакаммам̣ дисва̄ соманассаджа̄то пуббачарита̄пада̄нам̣ пака̄сенто суван̣н̣аван̣н̣ам̣ самбуддхантиа̄дима̄ха. там̣ хет̣т̣ха̄ вуттаттхамева. сатарам̣сим̣ва бха̄н̣уманти сатаматта̄ сатаппама̄н̣а̄ рам̣си пабха̄ йасса сӯрийасса со сатарам̣си, га̄тха̄бандхасукхаттхам̣ сатарам̣сӣти вуттам̣, анекасатасса анекасатасахассарам̣сӣти аттхо. бха̄н̣у вуччати пабха̄, бха̄н̣у пабха̄ йасса со бха̄н̣ума̄, бха̄н̣умасан̇кха̄там̣ сӯрийам̣ ива випассим̣ бхагавантам̣ дисва̄ сакесарам̣ на̄гапуппхам̣ гахетва̄ абхиропайим̣ пӯджесинти аттхо. сесам̣ утта̄намева̄ти.

рен̣упӯджакаттхераапада̄наван̣н̣ана̄ саматта̄.

ека̄дасамаваггаван̣н̣ана̄ саматта̄.