1. бхиккха̄да̄йакаттхераапада̄наван̣н̣ана̄

суван̣н̣аван̣н̣ам̣ самбуддхантиа̄дикам̣ а̄йасмато бхиккха̄да̄йакаттхерасса апада̄нам̣. айампи пуримаджинаваресу ката̄дхика̄ро таттха таттха бхаве виват̣т̣ӯпаниссайа̄ни пун̃н̃а̄ни упачинанто сиддхаттхасса бхагавато ка̄ле екасмим̣ кулагехе ниббатто вуддхиманва̄йа вибхавасампанно саддха̄джа̄то виха̄рато никкхамитва̄ пин̣д̣а̄йа чарама̄нам̣ сиддхаттхам̣ бхагавантам̣ дисва̄ пасаннама̄насо а̄ха̄рамада̄си. бхагава̄ там̣ пат̣иггахетва̄ анумоданам̣ ватва̄ пакка̄ми. со тенева кусалена йа̄вата̄йукам̣ т̣хатва̄ а̄йупарийоса̄не девалоке ниббатто таттха чха ка̄ма̄вачарасампаттийо анубхавитва̄ мануссесу ча мануссасампаттиманубхавитва̄ имасмим̣ буддхуппа̄де кулагехе ниббатто вуддхиманва̄йа саддха̄джа̄то паббаджитва̄ начирассева араха̄ ахоси.

1. со апарабха̄ге аттано пуббакаммам̣ ануссаритва̄ соманассаджа̄то пуббачарита̄пада̄нам̣ пака̄сенто суван̣н̣аван̣н̣ам̣ самбуддхантиа̄дима̄ха. там̣ саббам̣ хет̣т̣ха̄ вуттанайамева. павара̄ абхиниккхантанти пака̄рена варитаббам̣ паттхетаббанти паварам̣, раммабхӯтато вивекабхӯтато сакавиха̄рато абхи висесена никкхантанти аттхо. ва̄на̄ нибба̄нама̄гатанти ва̄нам̣ вуччати тан̣ха̄, тато никкхантатта̄ нибба̄нам̣, ва̄нана̄мам̣ тан̣хам̣ падха̄нам̣ катва̄ саббакилесе паха̄йа нибба̄нам̣ паттанти аттхо.

2. кат̣аччхубхиккхам̣ датва̄на̄ти караталена гахетабба̄ дабби кат̣аччху, бхиккхӣйати а̄йа̄чӣйатӣти бхиккха̄, абхи висесена кха̄дитабба̄ бхаккхитабба̄ти ва̄ бхиккха̄, кат̣аччхуна̄ гахетабба̄ бхиккха̄ кат̣аччхубхиккха̄, даббийа̄ бхаттам̣ датва̄ти аттхо. сесам̣ саббаттха утта̄наттхамева̄ти.

бхиккха̄да̄йакаттхераапада̄наван̣н̣ана̄ саматта̄.