6. сампайуттава̄раван̣н̣ана̄

392-400. сампайуттава̄ре кусалам̣ дхаммам̣ сампайуттоти кусалам̣ дхаммам̣ сампайуттапаччайам̣ катва̄ти аттхо. сесаметтха сам̣сат̣т̣хава̄ре вуттанайенева ведитаббам̣. аваса̄не панасса ‘‘сам̣сат̣т̣хаттам̣ на̄ма сампайуттаттам̣, сампайуттаттам̣ на̄ма сам̣сат̣т̣хатта’’нти идам̣ убхиннампи етесам̣ ва̄ра̄нам̣ аттхато нинна̄на̄каран̣абха̄вадассанаттхам̣ вуттам̣. аттхато хи етепи пат̣иччасахаджа̄та̄ вийа паччайаниссайа̄ вийа ча нинна̄на̄каран̣а̄. евам̣ сантепи ан̃н̃аман̃н̃асса аттханийаманаттхам̣ вутта̄. ‘‘сам̣сат̣т̣ха̄ йоджита̄ хайа̄’’тиа̄дӣсу (джа̄. 2.22.70) хи асампайуттампи сам̣сат̣т̣ханти вуччати. ‘‘йа̄ са̄ вӣмам̣са̄ косаджджасахагата̄ косаджджасампайутта̄’’тиа̄дӣсу (сам̣. ни. 5.832) асам̣сат̣т̣хам̣ вокин̣н̣ампи сампайуттанти. ити сам̣сат̣т̣хава̄рена екуппа̄далаккхан̣асса сампайуттасса сам̣сат̣т̣хабха̄вам̣ сампайуттава̄рена ча сам̣сат̣т̣хасса екуппа̄да̄дилаккхан̣асса сампайуттабха̄вам̣ нийаметум̣ убхопете вутта̄. апича татха̄ буджджханака̄нам̣ аджджха̄сайавасена десана̄вила̄сена нируттипат̣исамбхида̄пабхедаджа̄нанавасена ча̄пи ете убхопи вутта̄ти.

сампайуттава̄раван̣н̣ана̄.

етесу пана чхасу ва̄ресу аттхи кочи паччайо екантам̣ ануломато на тит̣т̣хати, паччанӣкатова тит̣т̣хати; аттхи екантам̣ паччанӣкато на тит̣т̣хати, ануломатова тит̣т̣хати; аттхи анекантам̣ ануломато чева тит̣т̣хати, паччанӣкато ча̄ти идам̣ пакин̣н̣акам̣ ведитаббам̣. таттха пат̣хамо пан̃хо паччха̄джа̄тасса, дутийо маха̄чатуккасса, татийо йуджджама̄нака̄нам̣ сеса̄нам̣ васена ведитабботи.