5. сам̣сат̣т̣хава̄раван̣н̣ана̄

338-346. сам̣сат̣т̣хава̄ре кусалам̣ дхаммам̣ сам̣сат̣т̣хоти кусалам̣ дхаммам̣ екуппа̄да̄дилаккхан̣ена сампайогат̣т̣хена паччайам̣ катва̄ти аттхо. кусалам̣ екам̣ кхандхам̣ сам̣сат̣т̣хоти кусалам̣ екам̣ кхандхам̣ сампайуттапаччайам̣ катва̄ тайо кхандха̄ уппаджджанти хетупаччайа̄ти вуттам̣ хоти. имина̄ упа̄йена саббападесу аттхо ведитаббо. имасмим̣ пана хетупаччайе арӯпадхаммассева сампайогат̣т̣хена паччайам̣ катва̄ тайо пан̃ха̄ виссаджджита̄. йатха̄ ча хетупаччайе, татха̄ а̄рамман̣апаччайа̄дӣсупи, кевалам̣ випа̄капаччайе екамева виссаджджанам̣.

347-350. ида̄ни йатха̄ладдха̄ни виссаджджана̄ни ган̣анавасена дассетум̣ хетуйа̄ тӣн̣ӣтиа̄ди вуттам̣. таттха саббатикесу кусалена кусалам̣, акусалена акусалам̣, абйа̄катена абйа̄катанти айамева нийамо. екаке пана абйа̄катена абйа̄катамева лаббхатӣти еваметтха ба̄вӣсатийа̄ паччайесу тӣн̣и, випа̄ке еканти две париччхеда̄. паччха̄джа̄те ануломам̣ наттхи. тасма̄ тӣн̣и еканти имесан̃н̃ева васена дукатика̄дӣсу паччайасам̣сандане йаттха випа̄капаччайо пависати; таттха екам̣, сесесу тӣн̣ӣти евам̣ ган̣ана̄ ведитабба̄. сесаметтха ануломе утта̄наттхамева.

351-354. паччанӣйе пана кусалам̣ на лаббхатӣти акусаламева а̄дим̣ катва̄ виссаджджанам̣ катам̣, там̣ утта̄наттхамева.

359. йам̣ панеттха паччанӣйе виссаджджанапариччхедам̣ ган̣анато дассетум̣ нахетуйа̄ дветиа̄ди вуттам̣, таттха две тӣн̣и еканти тайо париччхеда̄. тесам̣ васена дукатика̄дӣсу паччайасам̣сандане ган̣ана̄ ведитабба̄. идха̄пи адхикатараган̣ана̄нам̣ ӯнатараган̣анена саддхим̣ сам̣сандане ӯнатараган̣анамева лаббхати, самаган̣анена саддхим̣ самаган̣анам̣. йасма̄ четтха арӯпадхамма̄йева паччайуппанна̄, тасма̄ нахетуна̄дхипатинапуреджа̄танапаччха̄джа̄тана̄севананакамманавипа̄канаджха̄нанамагганавиппайуттавасена дасева паччайа̄ паччанӣкато дассита̄, сеса̄ чуддаса на лаббханти. йепи лаббханти, тесупи випа̄ке паччайуппанне накамманавипа̄ка̄ на лаббханти.

360-368. нахетупаччайа̄ на̄дхипатийа̄ двети нахетуйа̄ ладдхам̣ двайамева. сесадвайесупи есева найо. накамме еканти ахетукакирийачетанам̣ паччайуппаннам̣ катва̄ абйа̄катена абйа̄катам̣. навипа̄ке двети ахетукамохакирийавасена две. наджха̄не еканти ахетукапан̃чавин̃н̃а̄н̣авасена абйа̄катависсаджджанам̣ ведитаббам̣. намагге еканти ахетукавипа̄какирийавасена абйа̄катависсаджджанам̣. имина̄вупа̄йена саббасам̣санданесу аттхо ведитабботи.

369-383. ануломапаччанӣйе хет̣т̣ха̄ вутта̄ нахетуа̄дайо дасева паччанӣйато лаббханти, на сеса̄. йепи лаббханти, тесу хетумхи ануломато т̣хите джха̄намагга̄ паччанӣйато на лаббхантӣти саббам̣ хет̣т̣ха̄ вуттанайенева ведитаббанти.

384-391. паччанӣйа̄нуломе нахетупаччайуппаннесу ахетукамохова джха̄намаггапаччайам̣ лабхати, сеса̄ на лабханти. наджха̄напаччайе ат̣т̣ха̄хетукачитта̄нипи. накаммапаччайа̄ нахетупаччайа̄ на̄дхипатипаччайа̄ напуреджа̄тапаччайа̄ а̄рамман̣е еканти а̄руппе ахетукакирийачетана̄васена абйа̄катена абйа̄катам̣. имина̄ упа̄йена йам̣ лаббхати, йан̃ча на лаббхати, тасса васена саббаттха ган̣ана̄ ведитабба̄ти.

сам̣сат̣т̣хава̄раван̣н̣ана̄.