2. сахаджа̄тава̄раван̣н̣ана̄

234-242. сахаджа̄тава̄ре кусалам̣ дхаммам̣ сахаджа̄тоти кусалам̣ дхаммам̣ пат̣ичча тена сахаджа̄то хутва̄ти аттхо. сесаметтха пат̣иччава̄ре вуттанайенева ведитаббам̣. аваса̄не панасса ‘‘пат̣иччаттам̣ на̄ма сахаджа̄таттам̣, сахаджа̄таттам̣ на̄ма пат̣иччатта’’нти идам̣ убхиннампи етесам̣ ва̄ра̄нам̣ аттхато нинна̄на̄каран̣абха̄вадассанаттхам̣ вуттам̣. аттхато хи ете двепи нинна̄на̄каран̣а̄. евам̣ сантепи ан̃н̃аман̃н̃асса аттханийаманаттхам̣ вутта̄. ‘‘чаккхун̃ча пат̣ичча рӯпе ча̄’’тиа̄дӣсу хи асахаджа̄тампи пат̣ичча уппаджджатӣти вуччати. сахаджа̄тампи ча упа̄да̄рӯпам̣ бхӯтарӯпасса паччайо на хоти. ити пат̣иччава̄рена сахаджа̄тапаччайабха̄вам̣, сахаджа̄тава̄рена ча пат̣ичча̄ти вуттасса сахаджа̄табха̄вам̣ нийаметум̣ убхопете вутта̄. апича татха̄ буджджханака̄нам̣ аджджха̄сайавасена десана̄вила̄сена нируттипат̣исамбхида̄ппабхедаджа̄нанавасена ча̄пи ете убхопи вутта̄ти.

сахаджа̄тава̄раван̣н̣ана̄ нит̣т̣хита̄.