паччайапаччанӣйаван̣н̣ана̄

86-87. паччайапаччанӣйам̣ пана йасма̄ кусалападе на лаббхати кусаладхаммасса хетупаччайена вина̄ ануппаттито, тасма̄ акусалам̣ дхаммам̣ пат̣ичча̄тиа̄ди а̄раддхам̣. таттха нахетупаччайа̄ти хетупаччайапат̣иккхепо хетупаччайам̣ вина̄ ан̃н̃ена паччайена уппаджджатӣти аттхо. вичикиччха̄сахагато уддхаччасахагато мохоти айан̃хи сампайуттадхамма̄нан̃чева читтасамут̣т̣ха̄нарӯпасса ча сайам̣ хетупаччайо хоти, ан̃н̃асса пана сампайуттахетуно абха̄ва̄ на хетупаччайа̄ уппаджджатӣти т̣хапетва̄ хетупаччайам̣ сесехи аттано анурӯпапаччайехи уппаджджати. имина̄ найена саббапаччайапат̣иккхепесу аттхо ведитаббо. ахетукам̣ випа̄ка̄бйа̄катанти идам̣ рӯпасамут̣т̣ха̄пакавасенева ведитаббам̣. ан̃н̃есупи еварӯпесу есева найо.

88. наадхипатипаччайе ка̄мам̣ адхипатипи аттана̄ саддхим̣ дутийасса адхипатино абха̄ва̄ наадхипатипаччайам̣ лабхати, йатха̄ пана вичикиччхуддхаччасахагато мохо ахетуко, на татха̄ адхипатайо ева нира̄дхипати. чханда̄дӣсу пана ан̃н̃атарам̣ адхипатим̣ акатва̄ кусала̄дӣнам̣ уппаттика̄ле саббепи кусала̄дайо нира̄дхипатино. тасма̄ мохам̣ вийа висум̣ адхипатиматтамева ануддхаритва̄ саббасан̇га̄хикавасена еса̄ ‘‘екам̣ кхандхам̣ пат̣ичча тайо кхандха̄’’тиа̄дика̄ десана̄ ката̄ти ведитабба̄.

89. на̄нантаранасаманантаресу на̄рамман̣е вийа рӯпамева паччайуппаннам̣. тена вуттам̣ ‘‘на̄рамман̣апаччайасадиса’’нти. сахаджа̄тапаччайо парихӣно. йатха̄ чеса, татха̄ ниссайааттхиавигатапаччайа̄пи. ким̣ ка̄ран̣а̄? етехи вина̄ кассачи ануппаттито. сахаджа̄таниссайааттхиавигатапаччайепи хи паччаккха̄йа екопи рӯпа̄рӯпадхаммо нуппаджджати, тасма̄ те парихӣна̄.

90. наан̃н̃аман̃н̃апаччайавибхан̇ге пат̣исандхиккхан̣е випа̄ка̄бйа̄кате кхандхе пат̣ичча кат̣атта̄рӯпанти хадайаваттхуваджджам̣ ведитаббам̣.

91. наупаниссайапаччайавибхан̇ге рӯпамева паччайуппаннам̣, тан̃хи упаниссайам̣ на лабхати. арӯпам̣ пана кин̃ча̄пи а̄рамман̣ӯпаниссайапакатӯпаниссайе на лабхеййа, анантарӯпаниссайамуттакам̣ пана наттхи. тена вуттам̣ ‘‘на̄рамман̣апаччайасадиса’’нти.

92. напуреджа̄те читтасамут̣т̣ха̄нарӯпанти пан̃чавока̄равасена вуттам̣.

93. напаччха̄джа̄тапаччайа̄ти еттха сахаджа̄тапуреджа̄тапаччайа̄ сан̇гахам̣ гаччханти. тасма̄ сахаджа̄тапаччайасадиса̄ еттха па̄л̣и, са̄ наадхипатипаччайе виттха̄рита̄ти идха сан̇кхитта̄. на̄севанапаччайе кусала̄кусала̄ пат̣хамаджаванавасена ведитабба̄, татха̄ кирийа̄бйа̄катам̣. па̄л̣и пана идха̄пи наадхипатипаччайе виттха̄ритавасена ведитабба̄. тенева̄ха – ‘‘напаччха̄джа̄тапаччайампи на̄севанапаччайампи на̄дхипатипаччайасадиса’’нти.

94-97. накаммапаччайе випа̄качетана̄ на̄на̄ккхан̣икакаммапаччайам̣ лабхатӣти на гахита̄. на̄ха̄рапаччайе екаччам̣ рӯпамева паччайуппаннам̣, татха̄ наиндрийапаччайе.

98. наджха̄напаччайе пан̃чавин̃н̃а̄н̣адхамма̄ чева екаччан̃ча рӯпам̣ паччайуппаннам̣. пан̃чавин̃н̃а̄н̣асмин̃хи ведана̄ ча читтекаггата̄ ча дуббалатта̄ упаниджджха̄налаккхан̣ам̣ на па̄пун̣антӣти джха̄напаччайе на гахита̄.

99-102. намаггапаччайе ахетукавипа̄какирийан̃чева екаччан̃ча рӯпам̣ паччайуппаннам̣. насампайуттанонаттхиновигатесу рӯпамева паччайуппаннам̣. тена вуттам̣ ‘‘на̄рамман̣апаччайасадиса’’нти.

103. нахетуйа̄ двети екамӯлакаган̣ана̄йа йатха̄па̄л̣имева ниййа̄ти.

104. думӯлаке нахетупаччайа̄ на̄рамман̣е еканти еттха кин̃ча̄пи бахуган̣анена саддхим̣ ӯнатараган̣анасса сам̣сандане ӯнатараган̣анавасена нахетуйа̄ вийа двӣхи бхавитаббам̣. на̄рамман̣авасена пана арӯпадхамма̄нам̣ парихӣнатта̄ абйа̄катам̣ пат̣ичча рӯпа̄бйа̄катасса уппаттим̣ сандха̄йа ‘‘ека’’нти вуттам̣. саббесу екакесупи есева найо. двети вуттат̣т̣ха̄не пана нахетуйа̄ ладдхавасена ва̄радвайам̣ ведитаббам̣.

105-106. тимӯлака̄дӣсу пана саббесу на̄рамман̣апаччайасса апарихӣнатта̄ екамева виссаджджананти айам̣ паччанӣйе нахетупаччайам̣ а̄дим̣ катва̄ екамӯлака̄дӣсу ган̣ана̄.

107-130. на̄рамман̣апаччайа̄дайо пана екамӯлаке та̄ва пуримена садисатта̄ идха̄пи на дассита̄йева. на̄рамман̣апаччайавасена думӯлаке на̄рамман̣апаччайа̄, нахетуйа̄ еканти нахетудумӯлаке вуттамева. на̄дхипатийа̄ пан̃ча̄ти на̄рамман̣апаччайе ладдхавасена ведитабба̄ти евам̣ саббасам̣санданесу ӯнатараган̣анассева паччайасса васена ган̣ана̄ ведитабба̄. йаттха йаттха ча на̄рамман̣апаччайо пависати, таттха таттха рӯпамева паччайуппаннам̣. на̄нантаранасаманантаранаан̃н̃аман̃н̃анаупаниссайана̄ха̄ранаиндрийанасампайуттанонаттхиновигатапаччайа̄нам̣ павит̣т̣хат̣т̣ха̄непи есева найо. на̄ха̄ранаиндрийанаджха̄нанамаггапаччайа̄ саббаттха садисависсаджджана̄. насахаджа̄та̄дичатуккам̣ идха̄пи парихӣнамева̄ти идаметтха лаккхан̣ам̣. имина̄ пана лаккхан̣ена саббесу думӯлака̄дӣсу ‘‘айам̣ паччайо мӯлам̣, айаметтха думӯлако, айам̣ тимӯлако, айам̣ саббамӯлако’’ти саллаккхетва̄ ӯнатараган̣анасса паччайасса васена ган̣ана̄ ведитабба̄ти.

паччайапаччанӣйаван̣н̣ана̄.