10. пуреджа̄тапаччайаниддесаван̣н̣ана̄

10. пуреджа̄тапаччайаниддесе пуреджа̄тапаччайена паччайоти еттха пуреджа̄там̣ на̄ма йасса паччайо хоти, тато пуриматарам̣ джа̄там̣ джа̄тиккхан̣ам̣ атиккамитва̄ т̣хитиккхан̣аппаттам̣. чаккха̄йатанантиа̄ди ваттхупуреджа̄тавасена вуттам̣. рӯпа̄йатанантиа̄ди а̄рамман̣апуреджа̄тавасена. кин̃чика̄ле пуреджа̄тапаччайена̄ти паваттим̣ сандха̄йа вуттам̣. кин̃чика̄ле на пуреджа̄тапаччайена̄ти пат̣исандхим̣ сандха̄йа вуттам̣. евам̣ саббатха̄пи пан̃чадва̄ре ваттха̄рамман̣авасена, манодва̄ре ваттхувасенева̄йам̣ па̄л̣и а̄гата̄, пан̃ха̄ва̄ре пана ‘‘а̄рамман̣апуреджа̄там̣ – секкха̄ ва̄ путхуджджана̄ ва̄ чаккхум̣ аниччато дуккхато анаттато випассантӣ’’ти а̄гататта̄ манодва̄репи а̄рамман̣апуреджа̄там̣ лаббхатева. идха пана са̄васесавасена десана̄ ката̄ти айам̣ та̄веттха па̄л̣иван̣н̣ана̄.

айам̣ пана пуреджа̄тапаччайо суддхарӯпамева хоти. тан̃ча кхо уппа̄даккхан̣ам̣ атиккамитва̄ т̣хитиппаттам̣ ат̣т̣ха̄расавидхам̣ рӯпарӯпамева. там̣ саббампи ваттхупуреджа̄там̣ а̄рамман̣апуреджа̄танти двидха̄ т̣хитам̣. таттха чаккха̄йатанам̣…пе… ка̄йа̄йатанам̣ ваттхурӯпанти идам̣ ваттхупуреджа̄там̣ на̄ма. сесам̣ има̄йа па̄л̣ийа̄ а̄гатан̃ча ана̄гатан̃ча ван̣н̣о саддо гандхо расо чатассо дха̄туйо тӣн̣и индрийа̄ни кабал̣ӣка̄ро а̄ха̄роти два̄дасавидхам̣ рӯпам̣ а̄рамман̣апуреджа̄тапаччайо на̄ма̄ти еваметтха на̄наппака̄рабхедато вин̃н̃а̄таббо виниччхайо.

евам̣ бхинне панеттха чаккха̄йатанам̣ двиннам̣ чаккхувин̃н̃а̄н̣а̄нам̣ пуреджа̄тапаччайена паччайо, татха̄ итара̄ни чатта̄ри сотавин̃н̃а̄н̣а̄дӣнам̣. ваттхурӯпам̣ пана т̣хапетва̄ двипан̃чавин̃н̃а̄н̣а̄ни чатта̄ро ча а̄руппавипа̄ке сеса̄нам̣ саббесампи чатубхӯмака̄нам̣ кусала̄кусала̄бйа̄ката̄нам̣ читтачетасика̄нам̣ пуреджа̄тапаччайо хоти. рӯпа̄дӣни пана пан̃ча̄рамман̣а̄ни двипан̃чавин̃н̃а̄н̣а̄нан̃чева манодха̄тӯнан̃ча екантенева пуреджа̄тапаччайа̄ хонти. ат̣т̣ха̄расавидхампи панетам̣ рӯпарӯпам̣ ка̄ма̄вачаракусаласса рӯпа̄вачарато абхин̃н̃а̄кусаласса акусаласса тада̄рамман̣абха̄вино ка̄ма̄вачаравипа̄касса ка̄ма̄вачаракирийасса рӯпа̄вачарато абхин̃н̃а̄кирийасса̄ти имесам̣ чханнам̣ ра̄сӣнам̣ пуреджа̄тапаччайо хотӣти еваметтха паччайуппаннатопи вин̃н̃а̄таббо виниччхайоти.

пуреджа̄тапаччайаниддесаван̣н̣ана̄.