1. асан̃чиччакатха̄ван̣н̣ана̄

857-862. ида̄ни асан̃чиччакатха̄ на̄ма хоти. таттха ‘‘а̄нантарийаваттхӯни на̄ма гарӯни бха̄рийа̄ни, тасма̄ асан̃чичча̄пи тесу ваттхӯсу викопитесу а̄нантарико хотӣ’’ти йесам̣ ладдхи, сеййатха̄пи екачча̄нам̣ уттара̄патхака̄нам̣; те сандха̄йа асан̃чичча̄ти пуччха̄ сакава̄дисса, ладдхивасена пат̣ин̃н̃а̄ итарасса. атха нам̣ ‘‘йасма̄ а̄нантарийакаммам̣ на̄ма каммапатхаппаттам̣. йади ча асан̃чичча каммапатхабхедо сийа̄, авасеса̄ па̄н̣а̄типа̄та̄дайопи асан̃чичча бхавеййу’’нти чоданаттхам̣ асан̃чиччапа̄н̣ам̣ хантва̄тиа̄дима̄ха. итаро татха̄рӯпа̄йа ладдхийа̄ абха̄вена пат̣иккхипати. сесам̣ йатха̄па̄л̣имева ниййа̄ти. на ваттаббам̣ ма̄тугха̄такоти пуччха̄ парава̄дисса, рогапат̣ика̄ра̄дика̄ле асан̃чичча гха̄там̣ сандха̄йа пат̣ин̃н̃а̄ сакава̄дисса. нану ма̄та̄ джӣвита̄ воропита̄ти пан̃хепи асан̃чичча воропитам̣ сандха̄йа пат̣ин̃н̃а̄ сакава̄диссева. евам̣ адхиппа̄йам̣ пана аггахетва̄ хан̃чӣти ладдхипатит̣т̣ха̄панам̣ итарасса. там̣ айонисо патит̣т̣ха̄питатта̄ аппатит̣т̣хитамева. питугха̄така̄дӣсупи есева найо. сан̇гхабхедаке пана дхаммасан̃н̃им̣ сандха̄йа сан̇гхабхедо а̄нантарикоти пуччха̄ сакава̄дисса, ‘‘сан̇гхам̣ самаггам̣ бхетва̄на, каппам̣ нирайамхи паччатӣ’’ти вачанам̣ айонисо гахетва̄ пат̣ин̃н̃а̄ парава̄дисса. пуна саббети пут̣т̣хо сакапаккхе дхаммасан̃н̃им̣ сандха̄йа пат̣иккхипати, парапаккхе дхаммасан̃н̃им̣ сандха̄йа пат̣иджа̄на̄ти. дхаммасан̃н̃ӣти пан̃хадвайепи есева найо. нану вуттам̣ бхагавата̄ти суттам̣ екантенева дхаммава̄дисса а̄нантарикабха̄вадассанаттхам̣ вуттам̣. а̄па̄йико нерайикоти га̄тха̄йапи адхаммава̄дӣйева адхиппето. итаро пана адхиппа̄йам̣ аггахетва̄ ладдхим̣ патит̣т̣хапети. са̄ айонисо патит̣т̣ха̄питатта̄ аппатит̣т̣хита̄йева̄ти.

асан̃чиччакатха̄ван̣н̣ана̄.