3. саббамидам̣ камматотикатха̄ван̣н̣ана̄

783. ида̄ни саббамидам̣ камматотикатха̄ на̄ма хоти. таттха ‘‘каммуна̄ ваттати локо’’ти суттам̣ нисса̄йа ‘‘саббамидам̣ каммакилесавипа̄кават̣т̣ам̣ камматова хотӣ’’ти йесам̣ ладдхи, сеййатха̄пи ра̄джагирика̄нан̃чева сиддхаттхика̄нан̃ча; те сандха̄йа саббамиданти пуччха̄ сакава̄дисса, пат̣ин̃н̃а̄ итарасса. атха нам̣ ‘‘евам̣ санте каммампи каммато а̄паджджатӣ’’ти чодетум̣ каммампи камматоти а̄ха. итаро йади каммампи камматова на̄ма там̣ каммам̣ випа̄койева сийа̄ти пат̣иккхипати. пуббекатахетӯти ‘‘йади саббамидам̣ каммато, пуббекатахетуна̄ тена бхавитабба’’нти чодетум̣ пуччхати, итаро пуббекатахетува̄дабхайена пат̣иккхипати.

784. каммавипа̄катоти ‘‘йади саббамидам̣ каммато, йам̣ атӣтабхаве паваттасса хетубхӯтам̣ каммам̣, тампи пуриматаре бхаве камматоти каммавипа̄ко сампаджджати, тена те саббамидам̣ каммавипа̄като а̄паджджатӣ’’ти чодетум̣ пуччхати. итаро бӣджато ам̣курассева паччуппаннапаваттасса каммато ниббаттим̣ сандха̄йа пат̣иккхипати. дутийам̣ пут̣т̣хо тасса̄пи каммасса бӣджасса пуримабӣджато вийа пуримакаммато паваттатта̄ пат̣иджа̄на̄ти. па̄н̣ам̣ ханеййа̄тиа̄ди ‘‘йади саббам̣ каммавипа̄като, па̄н̣а̄типа̄та̄дӣни каммавипа̄кенева кареййа̄’’ти чодетум̣ вуттам̣. итаро дуссӣлйачетана̄пи пуримакамманиббатта̄ екена парийа̄йена випа̄койева̄ти ладдхийа̄ пат̣иджа̄на̄ти. атха нам̣ ‘‘йади те па̄н̣а̄типа̄то каммавипа̄като ниббаттати, па̄н̣а̄типа̄то вийа випа̄копи сапхало а̄паджджатӣ’’ти чодетум̣ сапхалоти а̄ха. итаро па̄н̣а̄типа̄тасса нирайасам̣ваттаника̄дибха̄вато сапхалатам̣ пассанто пат̣иджа̄на̄ти. каммавипа̄касса пана идам̣ на̄ма пхаланти вуттат̣т̣ха̄нам̣ апассанто пат̣иккхипати. адинна̄да̄на̄дӣсупи есева найо. гила̄напаччайабхесаджджапариккха̄ро сапхалоти деййадхаммавасена да̄напхалам̣ пуччхати. каммуна̄ ваттатӣти суттам̣ ‘‘наттхи камма’’нти акаммава̄дитам̣ пат̣иккхипитва̄ ‘‘аттхи камма’’нти каммава̄дитам̣ каммассакатам̣ дӣпети. на саббассева каммато ниббаттим̣, тасма̄ аса̄дхаканти.

саббамидам̣ камматотикатха̄ван̣н̣ана̄.