4. индрийабаддхакатха̄ван̣н̣ана̄

786-787. ида̄ни индрийабаддхакатха̄ на̄ма хоти. таттха дувидхам̣ дуккхам̣ – индрийабаддхам̣, аниндрийабаддхан̃ча. индрийабаддхам̣ дуккхаваттхута̄йа дуккхам̣, аниндрийабаддхам̣ удайаббайапат̣ипӣл̣анат̣т̣хена ‘‘йаданиччам̣ там̣ дуккха’’нти сан̇гахитатта̄ дуккхам̣. имам̣ вибха̄гам̣ аггахетва̄ ‘‘йасса парин̃н̃а̄йа бхагавати брахмачарийам̣ вуссати, там̣ индрийабаддхамева дуккхам̣, на итара’’нти йесам̣ ладдхи, сеййатха̄пи хетува̄да̄нам̣, тесам̣ итарасса̄пи дуккхабха̄вам̣ дассетум̣ индрийабаддхан̃н̃ева̄ти пуччха̄ сакава̄дисса, пат̣ин̃н̃а̄ итарасса. атха нам̣ ‘‘йасма̄ бхагавата̄ ‘йаданиччам̣ там̣ дуккха’нти вуттам̣, тасма̄ индрийабаддхенева тена аниччена бхавитабба’’нти чодетум̣ индрийабаддхан̃н̃ева аниччантиа̄дима̄ха. нану аниндрийабаддхам̣ аниччанти нану патхавӣпаббатапа̄са̄н̣а̄ди аниндрийабаддхампи аниччанти аттхо.

788. на ваттаббам̣ индрийабаддхан̃н̃ева дуккханти пан̃хе а̄манта̄ти пат̣ин̃н̃а̄ сакава̄дисса. аниндрийабаддхан̃хи дуккхадоманасса̄нам̣ а̄рамман̣ам̣ хоти. ун̣хака̄ласмин̃хи агги сӣтака̄ле ча ва̄то дуккхасса а̄рамман̣ам̣, ниччампи бхогавина̄са̄дайо доманассасса. тасма̄ вина̄пи аниччат̣т̣хена аниндрийабаддхам̣ дуккханти ваттаббам̣. каммакилесехи пана аниббаттатта̄ дуккхам̣ арийасаччанти на ваттаббам̣, татха̄ маггена апарин̃н̃еййатта̄. йасма̄ пана тин̣акат̣т̣ха̄диниродхо ва̄ утубӣджа̄диниродхо ва̄ дуккханиродхам̣ арийасаччам̣ на̄ма на хоти, тасма̄ индрийабаддхам̣ дуккхан̃чева арийасаччан̃ча, итарам̣ пана дуккхамева̄ти идам̣ на̄наттам̣ дассетум̣ пат̣иджа̄на̄ти. йатха̄ индрийабаддхасса̄тиа̄дивачанам̣ индрийабаддхасса парин̃н̃а̄йа брахмачарийава̄сам̣ парин̃н̃а̄тасса пуна ануппаттим̣ дӣпети. теневеттха сакава̄дина̄ пат̣иккхепо като. ‘‘йаданиччам̣ там̣ дуккха’’нти вачанена пана сан̇гахитасса аниндрийабаддхасса дуккхабха̄вам̣ пат̣иседхетум̣ на сакка̄ти, тасма̄ аса̄дхаканти.

индрийабаддхакатха̄ван̣н̣ана̄.