2. наттхи арахато ака̄ламаччӯтикатха̄ван̣н̣ана̄

780. ида̄ни наттхи арахато ака̄ламаччӯтикатха̄ на̄ма хоти. таттха ‘‘на̄хам̣, бхиккхаве, сан̃четаника̄нам̣ камма̄нам̣ ката̄нам̣ упачита̄нам̣ апат̣исам̣ведитва̄ бйантӣбха̄вам̣ вада̄мӣ’’ти (а. ни. 10.217) суттасса аттхам̣ айонисо гахетва̄ ‘‘арахата̄ на̄ма саббакаммавипа̄кам̣ пат̣исам̣ведайитва̄ва паринибба̄йитаббам̣, тасма̄ наттхи, арахато ака̄ламаччӯ’’ти йесам̣ ладдхи, сеййатха̄пи ра̄джагирика̄нан̃чева сиддхаттхика̄нан̃ча; те сандха̄йа пуччха̄ сакава̄дисса, пат̣ин̃н̃а̄ итарасса. атха нам̣ ‘‘саче тасса наттхи ака̄ламаччу, арахантагха̄такена на̄ма на бхавитабба’’нти чодетум̣ наттхи арахантагха̄такоти а̄ха. итаро а̄нантарийакаммасса чева та̄диса̄нан̃ча пуггала̄нам̣ саббха̄вато пат̣иккхипати.

781. висам̣ на камеййа̄ти пан̃хе ‘‘йа̄ва пуббе катакаммам̣ париккхайам̣ на гаччхати, та̄ва на каматӣ’’ти ладдхийа̄ пат̣иккхипати. сесаметтха йатха̄па̄л̣имева ниййа̄ти.

782. на̄хам̣, бхиккхавети суттам̣ идам̣ сандха̄йа вуттам̣ – сан̃четаника̄нам̣ камма̄нам̣ ката̄нам̣ випа̄кам̣ апат̣исам̣ведитва̄ авиндитва̄ ананубхавитва̄ бйантӣбха̄вам̣ тесам̣ камма̄нам̣ париват̣умапариччхиннабха̄вам̣ на вада̄ми, тан̃ча кхо дит̣т̣хадхаммаведанӣйа̄нам̣ дит̣т̣хева дхамме, на тато парам̣, упападжджаведанӣйа̄нам̣ анантарам̣ упапаттим̣ упападжджитва̄ва на тато парам̣, апара̄парийаведанӣйа̄нам̣ йада̄ випа̄кока̄сам̣ лабханти, татха̄рӯпе апара̄паре ва̄ парийа̄йе. евам̣ саббатха̄пи сам̣са̄рапаватте сати ладдхавипа̄кава̄ре камме на виджджатесо джагатиппадесо, йаттхат̣т̣хито муччеййа па̄пакамма̄ти. евам̣ санте йадетам̣ ‘‘аладдхавипа̄кава̄рампи каммам̣ авассам̣ арахато пат̣исам̣ведитабба’’нти каппана̄васена ‘‘наттхи арахато ака̄ламаччӯ’’ти ладдхипатит̣т̣ха̄панам̣ катам̣, там̣ дуккат̣амева̄ти.

наттхи арахато ака̄ламаччӯтикатха̄ван̣н̣ана̄.