11. каммӯпачайакатха̄ван̣н̣ана̄

737. ида̄ни каммӯпачайакатха̄ на̄ма хоти. таттха йесам̣ каммӯпачайо на̄ма каммато ан̃н̃о читтавиппайутто абйа̄като ана̄рамман̣оти ладдхи, сеййатха̄пи андхака̄нан̃чева саммитийа̄нан̃ча; те сандха̄йа ан̃н̃ам̣ камманти пуччха̄ сакава̄дисса, пат̣ин̃н̃а̄ итарасса. атха нам̣ ‘‘йади каммато ан̃н̃о каммӯпачайо, пхасса̄дитопи ан̃н̃ена пхассӯпачайа̄дина̄ бхавитабба’’нти чодетум̣ ан̃н̃о пхассотиа̄дима̄ха. итаро ладдхийа̄ абха̄вена пат̣иккхипати.

738-739. каммена сахаджа̄тоти пан̃хесу читтавиппайуттам̣ сандха̄йа пат̣иккхипати, читтасампайуттам̣ сандха̄йа пат̣иджа̄на̄ти. кусалоти пан̃хесупи читтавиппайуттам̣ сандха̄йа пат̣иджа̄на̄ти. парато акусалотипан̃хесупи есева найо.

740. са̄рамман̣оти пут̣т̣хо пана екантам̣ ана̄рамман̣амева иччхати, тасма̄ пат̣иккхипати. читтам̣ бхиджджама̄нанти йада̄ читтам̣ бхиджджама̄нам̣ хоти, тада̄ каммам̣ бхиджджатӣти аттхо. бхумматтхе ва̄ паччаттам̣, читте бхиджджама̄нети аттхо. айамева ва̄ па̄т̣хо. таттха йасма̄ сампайутто бхиджджати, виппайутто на бхиджджати, тасма̄ пат̣иджа̄на̄ти чева пат̣иккхипати ча.

741. каммамхи каммӯпачайоти камме сати каммӯпачайо, камме ва̄ патит̣т̣хите каммӯпачайо, каммӯпачайатова випа̄ко ниббаттати. тасмим̣ пана камме нируддхе йа̄ва ам̣куруппа̄да̄ бӣджам̣ вийа йа̄ва випа̄куппа̄да̄ каммӯпачайо тит̣т̣хатӣтисса ладдхи, тасма̄ пат̣иджа̄на̄ти. тан̃н̃ева каммам̣, со каммӯпачайо, со каммавипа̄коти йасма̄ каммамхи каммӯпачайо, со ча йа̄ва випа̄куппа̄да̄ тит̣т̣хатӣтисса ладдхи, тасма̄ нам̣ тесам̣ тин̣н̣ампи екаттам̣ пуччхати випа̄ко са̄рамман̣оти идам̣ випа̄ко вийа випа̄кадхаммадхаммопи а̄рамман̣апат̣ибаддхойева̄ти чоданаттхам̣ пуччхати. итаро пана ладдхивасенекам̣ пат̣иджа̄на̄ти, екам̣ пат̣иккхипати. пат̣иломепи есева найо. сесаметтха йатха̄па̄л̣имева ниййа̄тӣти.

каммӯпачайакатха̄ван̣н̣ана̄.

паннарасамо вагго.

татийапан̣н̣а̄сако саматто.