8. аса̄тара̄гакатха̄ван̣н̣ана̄

674. ида̄ни аса̄тара̄гакатха̄ на̄ма хоти. таттха ‘‘йам̣кин̃чи веданам̣ ведети сукхам̣ ва̄ дуккхам̣ ва̄ адуккхамасукхам̣ ва̄, со там̣ веданам̣ абхинандати абхивадатӣ’’ти (ма. ни. 1.409) сутте дит̣т̣ха̄бхинанданавасена вуттам̣. ‘‘абхинандатӣ’’тивачанам̣ нисса̄йа ‘‘дуккхаведана̄йапи ра̄гасса̄давасена абхинандана̄ хоти. тасма̄ аттхи аса̄тара̄го’’ти йесам̣ ладдхи, сеййатха̄пи уттара̄патхака̄нам̣; те сандха̄йа аттхи аса̄тара̄готи пуччха̄ сакава̄дисса. таттха аса̄тара̄готи аса̄те дуккхаведайите ‘‘ахо вата ме етадева бхавеййа̄’’ти раджджана̄. а̄манта̄ти ладдхивасена пат̣ин̃н̃а̄ итарасса. сесаметтха утта̄наттхамева.

675. со там̣ веданам̣ абхинандатӣти сутте пана виниват̣т̣етва̄ дуккхаведанамева а̄раббха ра̄гуппатти на̄ма наттхи, самӯхаггахан̣ена пана ведайиталаккхан̣ам̣ дхаммам̣ дуккхаведанамева ва̄ аттато саманупассанто дит̣т̣химан̃н̃ана̄сан̇кха̄та̄йа дит̣т̣ха̄бхинандана̄йа веданам̣ абхинандати, дуккха̄йа ведана̄йа випарин̣а̄мам̣ абхинандати, дуккха̄йа ведана̄йа абхибхӯто тасса̄ пат̣ипаккхам̣ ка̄масукхам̣ паттхайантопи дуккхаведанам̣ абхинандати на̄ма. евам̣ дуккхаведана̄йа абхинандана̄ хотӣти адхиппа̄йо. тасма̄ аса̄дхакаметам̣ аса̄тара̄гасса̄ти.

аса̄тара̄гакатха̄ван̣н̣ана̄.