7. патхавӣкаммавипа̄котикатха̄ван̣н̣ана̄

492. ида̄ни патхавӣ каммавипа̄котикатха̄ на̄ма хоти. таттха йасма̄ ‘‘аттхи иссарийасам̣ваттанийам̣ каммам̣, а̄дхипаччасам̣ваттанийам̣ камма’’нти еттха иссара̄нам̣ бха̄во иссарийам̣ на̄ма, адхипатӣнан̃ча бха̄во а̄дхипаччам̣ на̄ма, патхависсарийаа̄дхипаччасам̣ваттаникан̃ча каммам̣ аттхӣти вуттам̣. тасма̄ йесам̣ ‘‘патхавӣ каммавипа̄ко’’ти ладдхи, сеййатха̄пи андхака̄нам̣; те сандха̄йа патхавӣти пуччха̄ сакава̄дисса, пат̣ин̃н̃а̄ итарасса. сукхаведанӣйа̄тиа̄ди каммавипа̄касабха̄вадассанавасена вуттам̣. ‘‘пхассо хотӣ’’тиа̄дина̄ найена ниддит̣т̣хесу випа̄кесу пхассо сукхаведанӣйа̄дибхедо хоти. со ча сан̃н̃а̄дайо ча сукхаведана̄дӣхи сампайутта̄, ведана̄дайо сан̃н̃а̄дӣхи, саббепи са̄рамман̣а̄, аттхи ча несам̣ пуреча̄рикаа̄ват̣т̣ана̄дисан̇кха̄там̣ а̄ваджджанам̣, каммапаччайабхӯта̄ четана̄, йо таттха ит̣т̣хавипа̄ко, тасса паттхана̄, пан̣идха̄навасена паватта̄ мӯлатан̣ха̄, ким̣ те еварӯпа̄ патхавӣти пуччхати. итаро пат̣иккхипати. пат̣иломапуччха̄дӣни утта̄наттха̄нева.

493. каммавипа̄ко паресам̣ са̄дха̄ран̣оти пан̃хе пхасса̄дайо сандха̄йа пат̣иккхипати, каммасамут̣т̣ха̄нам̣ рӯпан̃ча патхавӣа̄дӣнам̣йева ча са̄дха̄ран̣абха̄вам̣ сандха̄йа пат̣иджа̄на̄ти. аса̄дха̄ран̣аман̃н̃есанти суттам̣ парасамайато а̄харитва̄ дасситам̣. саббе сатта̄ патхавим̣ парибхун̃джантӣти пан̃хе патхавим̣ аниссите сандха̄йа пат̣иккхипати, ниссите сандха̄йа пат̣иджа̄на̄ти. патхавим̣ апарибхун̃джитва̄ паринибба̄йантӣти пан̃хе а̄руппе паринибба̄йанта̄нам̣ васена пат̣иджа̄на̄ти. каммавипа̄кам̣ акхепетва̄ти идам̣ парасамайавасена вуттам̣. каммавипа̄кан̃хи кхепетва̄ва паринибба̄йантӣти тесам̣ ладдхи. сакасамайе пана катока̄сасса каммасса уппаннам̣ випа̄кам̣ акхепетва̄ паринибба̄нам̣ наттхи. тесан̃ча ладдхийа̄ патхавӣ са̄дха̄ран̣авипа̄катта̄ уппаннавипа̄койева хоти. там̣ випа̄кабха̄вена т̣хитам̣ акхепетва̄ паринибба̄нам̣ на йуджджатӣти чодетум̣ ват̣т̣ати. итаро ладдхивасена пат̣иккхипати. чаккаваттисаттасса каммавипа̄канти пан̃хе аса̄дха̄ран̣ам̣ пхасса̄дим̣ сандха̄йа пат̣иккхипати, са̄дха̄ран̣ам̣ сандха̄йа пат̣иджа̄на̄ти. патхавӣсамуддасӯрийачандима̄дайо хи саббесам̣ са̄дха̄ран̣акаммавипа̄коти тесам̣ ладдхи.

494. иссарийасам̣ваттанийанти еттха иссарийам̣ на̄ма бахудханата̄. а̄дхипаччам̣ на̄ма сесаджане аттано васе ваттетва̄ техи гарука̄таббат̣т̣хена адхипатибха̄во. таттха каммам̣ пат̣ила̄бхавасена там̣сам̣ваттаникам̣ на̄ма хоти, на джанакавасена. тасма̄ випа̄кабха̄ве аса̄дхакаметанти.

патхавӣ каммавипа̄котикатха̄ван̣н̣ана̄.