8. ана̄гатан̃а̄н̣акатха̄ван̣н̣ана̄

439-440. ида̄ни ана̄гатан̃а̄н̣акатха̄ на̄ма хоти. таттха ана̄гатам̣ на̄ма антарампи аттхи, анантарампи. тесу анантаре екантенева н̃а̄н̣ам̣ наттхи. йатха̄ ча анантаре, татха̄ екавӣтхиекаджаванапарийа̄паннепи. таттха йе саббасмимпи ана̄гате н̃а̄н̣ам̣ иччханти, сеййатха̄пи андхака̄; те сандха̄йа пуччха̄ сакава̄дисса, пат̣ин̃н̃а̄ итарасса. атха нам̣ ‘‘йам̣ те ана̄гате н̃а̄н̣ам̣, ким̣ тена анантарам̣ ана̄гатам̣ мӯла̄дивасена джа̄на̄тӣ’’ти чодетум̣ ана̄гатам̣ мӯлатотиа̄дима̄ха. таттха мӯлатотиа̄дӣни сабба̄ни ка̄ран̣авевачана̄нева. ка̄ран̣ан̃хи йам̣ аттано пхалам̣ кароти, там̣ таттха мӯлайати патит̣т̣ха̄тӣти мӯлам̣. тато ча там̣ хиноти паваттайатӣти хету. тадева там̣ нидети ‘‘ханда нам̣ ган̣хатха̄’’ти. ниййа̄тети вийа̄ти нида̄нам̣. тато там̣ самбхаватӣти самбхаво. пабхаватӣти пабхаво. таттха ча там̣ самут̣т̣ха̄ти, там̣ ва̄ нам̣ самут̣т̣ха̄петӣти самут̣т̣ха̄нам̣. тадева нам̣ а̄харатӣти а̄ха̄ро. тан̃часса апариччаджитаббат̣т̣хена а̄рамман̣ам̣. тадева четам̣ пат̣ичча етӣти паччайо. тато нам̣ самудетӣти самудайоти вуччати. йасма̄ пана анантарам̣ читтам̣ етеха̄ка̄рехи на сакка̄ джа̄нитум̣, тасма̄ на хеванти пат̣иккхипати. ана̄гатам̣ хетупаччайатанти йа̄ анантара̄на̄гате читте хетупаччайата̄, там̣ джа̄на̄ти. йе таттха дхамма̄ хетупаччайа̄ хонти, те джа̄на̄тӣти аттхо. сесападесупи есева найо. готрабхунотиа̄ди йасмим̣ ана̄гате н̃а̄н̣ам̣ на уппаджджати, там̣ сарӯпато дассетум̣ вуттам̣. па̄т̣алипуттасса̄ти суттам̣ йасмим̣ ана̄гате н̃а̄н̣ам̣ уппаджджати, там̣ дассетум̣ а̄хат̣ам̣. йасма̄ панетам̣ на саббасмим̣ ана̄гате н̃а̄н̣асса са̄дхакам̣; тасма̄ ана̄хат̣амева̄ти.

ана̄гатан̃а̄н̣акатха̄ван̣н̣ана̄.