𑀅𑀩𑁆𑀬𑀸𑀓𑀢𑀧𑀤𑀁

𑀅𑀳𑁂𑀢𑀼𑀓𑀓𑀼𑀲𑀮𑀯𑀺𑀧𑀸𑀓𑀯𑀡𑁆𑀡𑀦𑀸

𑁪𑁩𑁧. 𑀓𑀸𑀫𑀸𑀯𑀘𑀭…𑀧𑁂… 𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 ‘‘𑀉𑀧𑀘𑀺𑀢𑀢𑁆𑀢𑀸’’𑀢𑀺 𑀧𑀤𑀁 𑀲𑀗𑁆𑀕𑀬𑁆𑀳𑀢𑀺 ‘‘𑀅𑀲𑀸𑀥𑀸𑀭𑀡𑀓𑀫𑁆𑀫𑀧𑀘𑁆𑀘𑀬𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸. ‘‘𑀉𑀧𑀘𑀺𑀢𑀢𑁆𑀢𑀸𑀢𑀺 𑀮𑀤𑁆𑀥𑀸𑀲𑁂𑀯𑀦𑀢𑁆𑀢𑀸’’𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀢𑀁 𑀧𑀞𑀫𑀚𑀯𑀦𑀲𑁆𑀲 𑀦 𑀬𑀼𑀚𑁆𑀚𑀢𑀺 𑀅𑀦𑀸𑀲𑁂𑀯𑀦𑀢𑁆𑀢𑀸. 𑀢𑀣𑀸 𑀘 𑀲𑀢𑀺 𑀢𑀲𑁆𑀲 𑀯𑀺𑀧𑀸𑀓𑀤𑀸𑀦𑀫𑁂𑀯 𑀦 𑀲𑀺𑀬𑀸𑀢𑀺 𑀢𑀢𑁄 𑀅𑀜𑁆𑀜𑀣𑀸 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀧𑀸𑀓𑀸𑀪𑀺𑀫𑀼𑀔𑀦𑁆𑀢𑀺 𑀯𑀺𑀧𑀸𑀓𑀤𑀸𑀦𑀸𑀪𑀺𑀫𑀼𑀔𑀁 𑀓𑀢𑁄𑀓𑀸𑀲𑀁. 𑀓𑀢𑁄𑀓𑀸𑀲𑀢𑀸 𑀘 𑀅𑀦𑀸𑀤𑀺𑀫𑁆𑀳𑀺 𑀲𑀁𑀲𑀸𑀭𑁂 𑀅𑀦𑁂𑀓𑁂𑀲𑀁 𑀓𑀫𑁆𑀫𑀸𑀦𑀁 𑀓𑀢𑀸𑀦𑀁 𑀅𑀢𑁆𑀣𑀺𑀢𑀸𑀬 𑀧𑀭𑀲𑁆𑀲 𑀧𑀝𑀺𑀩𑀸𑀳𑀦𑁂𑀦 𑀳𑁄𑀢𑀻𑀢𑀺 ‘‘𑀅𑀜𑁆𑀜𑀲𑁆𑀲 𑀯𑀺𑀧𑀸𑀓𑀁 𑀧𑀝𑀺𑀩𑀸𑀳𑀺𑀢𑁆𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀯𑀟𑁆𑀠𑀺𑀢𑀢𑀸 𑀘 𑀲𑀓𑀫𑁆𑀫𑀲𑁆𑀲 𑀩𑀮𑀤𑀸𑀦𑀲𑀫𑀢𑁆𑀣𑀢𑀸𑀯𑀲𑁂𑀦 𑀅𑀢𑁆𑀢𑀦𑁄 𑀓𑀸𑀭𑀡𑁂𑀳𑀺 𑀅𑀪𑀺𑀲𑀗𑁆𑀔𑀢𑀢𑀸. 𑀅𑀲𑀸𑀥𑀸𑀭𑀡𑁂𑀦 𑀦𑀸𑀫𑀁 𑀉𑀤𑁆𑀥𑀝𑀁 ‘‘𑀪𑁂𑀭𑀻𑀲𑀤𑁆𑀤𑁄 𑀬𑀯𑀗𑁆𑀓𑀼𑀭𑁄’’𑀢𑀺 𑀬𑀣𑀸. 𑀯𑀺𑀜𑁆𑀜𑀸𑀡𑀸𑀦𑀦𑁆𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁. 𑀯𑀺𑀲𑁂𑀲𑀧𑀘𑁆𑀘𑀬𑀢𑁆𑀢𑀸𑀢𑀺 𑀅𑀥𑀺𑀓𑀧𑀘𑁆𑀘𑀬𑀢𑁆𑀢𑀸.

𑀘𑀓𑁆𑀔𑀼𑀲𑀦𑁆𑀦𑀺𑀲𑁆𑀲𑀺𑀢𑀜𑁆𑀘 𑀢𑀁 𑀭𑀽𑀧𑀯𑀺𑀚𑀸𑀦𑀦𑀜𑁆𑀘𑀸𑀢𑀺 𑀏𑀢𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀢𑀁 𑀲𑀫𑀸𑀲𑀲𑁆𑀲 𑀤𑀲𑁆𑀲𑁂𑀦𑁆𑀢𑁄 𑀢𑀢𑁆𑀣 𑀘 ‘‘𑀘𑀓𑁆𑀔𑀼𑀲𑀦𑁆𑀦𑀺𑀲𑁆𑀲𑀺𑀢’’𑀦𑁆𑀢𑀺𑀆𑀤𑀺𑀧𑀤𑀤𑁆𑀯𑀬𑀲𑁆𑀲 𑀦𑀻𑀮𑀼𑀧𑁆𑀧𑀮𑀲𑀤𑁆𑀤𑀸𑀤𑀻𑀦𑀁 𑀯𑀺𑀬 𑀅𑀜𑁆𑀜𑀫𑀜𑁆𑀜𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑀫𑀸𑀳. 𑀅𑀜𑁆𑀜𑀯𑀺𑀜𑁆𑀜𑀸𑀡𑀦𑁆𑀢𑀺 𑀭𑀽𑀧𑀸𑀭𑀫𑁆𑀫𑀡𑀁 𑀫𑀦𑁄𑀯𑀺𑀜𑁆𑀜𑀸𑀡𑀁. 𑀭𑀽𑀧𑀁𑀬𑁂𑀯𑀸𑀭𑀫𑁆𑀫𑀡𑀦𑁆𑀢𑀺 𑀧𑀦 𑀅𑀢𑁆𑀣𑁂 𑀤𑀺𑀩𑁆𑀩𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀤𑀝𑁆𑀞𑀩𑁆𑀩𑀁 𑀢𑀁𑀲𑀤𑀺𑀲𑀸𑀦𑀁 𑀢𑀤𑀼𑀧𑀘𑀸𑀭𑀁 𑀓𑀢𑁆𑀯𑀸 𑀬𑀣𑀸 ‘‘𑀲𑀸 𑀏𑀯 𑀢𑀺𑀢𑁆𑀢𑀺𑀭𑀻 𑀢𑀸𑀦𑀺 𑀏𑀯 𑀑𑀲𑀥𑀸𑀦𑀻’’𑀢𑀺. 𑀛𑀸𑀦𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑁂 𑀦 𑀛𑀸𑀦𑀗𑁆𑀕𑀢𑀸 𑀦𑀢𑁆𑀣𑀻𑀢𑀺 𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀲𑀼 𑀉𑀧𑁂𑀓𑁆𑀔𑀸𑀤𑀻𑀦𑀁 𑀉𑀧𑀘𑀭𑀺𑀢𑀛𑀸𑀦𑀗𑁆𑀕𑀢𑀁 𑀲𑀸𑀥𑁂𑀢𑀺. 𑀦 𑀳𑀺 𑀛𑀸𑀦𑀗𑁆𑀕𑀸𑀦𑀁 𑀛𑀸𑀦𑀧𑀘𑁆𑀘𑀬𑀢𑀁 𑀯𑀢𑁆𑀯𑀸 𑀢𑁂𑀲𑀁 𑀛𑀸𑀦𑀧𑀘𑁆𑀘𑀬𑀪𑀸𑀯𑁄 𑀧𑀝𑀺𑀓𑁆𑀔𑀺𑀢𑁆𑀢𑁄𑀢𑀺. 𑀬𑀤𑀺 𑀏𑀯𑀁 𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀲𑀼 𑀉𑀧𑁂𑀓𑁆𑀔𑀸𑀤𑀬𑁄 𑀛𑀸𑀦𑀭𑀸𑀲𑀺𑀝𑁆𑀞𑀸𑀦𑁂 𑀦 𑀯𑀢𑁆𑀢𑀩𑁆𑀩𑀸 𑀲𑀺𑀬𑀼𑀦𑁆𑀢𑀺 𑀆𑀳 ‘‘𑀛𑀸𑀦𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑁂’’𑀢𑀺𑀆𑀤𑀺. 𑀉𑀧𑁂𑀓𑁆𑀔𑀸𑀤𑀺𑀪𑀸𑀯𑀢𑁄𑀢𑀺 𑀉𑀧𑁂𑀓𑁆𑀔𑀸𑀲𑀼𑀔𑀤𑀼𑀓𑁆𑀔𑁂𑀓𑀕𑁆𑀕𑀢𑀸𑀪𑀸𑀯𑀢𑁄. 𑀅𑀜𑁆𑀜𑀝𑁆𑀞𑀸𑀦𑀸𑀪𑀸𑀯𑀢𑁄𑀢𑀺 𑀘𑀺𑀢𑁆𑀢𑀝𑁆𑀞𑀺𑀢𑀺𑀁 𑀏𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁪𑁩𑁬. 𑀅𑀓𑀼𑀲𑀮𑀁 𑀪𑀯𑀗𑁆𑀕𑀦𑀺𑀲𑁆𑀲𑀦𑁆𑀤𑁂𑀦 ‘‘𑀧𑀡𑁆𑀟𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀪𑀯𑀗𑁆𑀕𑁂 𑀅𑀧𑀡𑁆𑀟𑀭𑁂 𑀢𑀁𑀫𑀽𑀮𑀺𑀓𑀸 𑀓𑀼𑀢𑁄 𑀅𑀓𑀼𑀲𑀮𑀲𑁆𑀲 𑀧𑀡𑁆𑀟𑀭𑀢𑀸𑀢𑀺 ‘‘𑀅𑀓𑀼𑀲𑀮𑀲𑁆𑀲 𑀘𑀸’’𑀢𑀺 𑀯𑀼𑀢𑁆𑀢𑀁. 𑀧𑀡𑁆𑀟𑀭𑀢𑀸𑀬 𑀓𑀸𑀭𑀡𑀁 𑀯𑀢𑁆𑀢𑀩𑁆𑀩𑀁, 𑀬𑀤𑀺 𑀅𑀜𑁆𑀜𑀓𑀸𑀭𑀡𑀸 𑀧𑀡𑁆𑀟𑀭𑀢𑀸, 𑀲𑀪𑀸𑀯𑁄𑀯𑀸𑀬𑀦𑁆𑀢𑀺 𑀘𑀺𑀢𑁆𑀢𑀲𑁆𑀲 𑀅𑀓𑀺𑀮𑁂𑀲𑀲𑀪𑀸𑀯𑀢𑀸𑀬 𑀯𑀼𑀢𑁆𑀢𑀁, 𑀦 𑀘𑁂𑀢𑁆𑀣 𑀨𑀲𑁆𑀲𑀸𑀤𑀻𑀦𑀫𑁆𑀧𑀺 𑀧𑀡𑁆𑀟𑀭𑀢𑀸𑀧𑀢𑁆𑀢𑀺. 𑀬𑀢𑁄 𑀥𑀫𑁆𑀫𑀸𑀦𑀁 𑀲𑀪𑀸𑀯𑀓𑀺𑀘𑁆𑀘𑀯𑀺𑀲𑁂𑀲𑀜𑁆𑀜𑀼𑀦𑀸 𑀪𑀕𑀯𑀢𑀸 𑀯𑀺𑀜𑁆𑀜𑀸𑀡𑀁𑀬𑁂𑀯 𑀢𑀣𑀸 𑀦𑀺𑀤𑁆𑀤𑀺𑀝𑁆𑀞𑀦𑁆𑀢𑀺.

𑁪𑁩𑁯. 𑀅𑀦𑀢𑀺𑀓𑁆𑀓𑀫𑀦𑁂𑀦 𑀪𑀸𑀯𑀦𑀸𑀬. 𑀧𑀲𑀸𑀤𑀖𑀝𑁆𑀝𑀦𑀁 𑀯𑀺𑀲𑀬𑀲𑁆𑀲 𑀬𑁄𑀕𑁆𑀬𑀤𑁂𑀲𑁂 𑀅𑀯𑀝𑁆𑀞𑀸𑀦𑀦𑁆𑀢𑀺 ‘‘𑀧𑀲𑀸𑀤𑀁 𑀖𑀝𑁆𑀝𑁂𑀢𑁆𑀯𑀸 𑀆𑀧𑀸𑀣𑀁 𑀕𑀦𑁆𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀫𑀳𑀸𑀪𑀽𑀢𑁂𑀲𑀼 𑀧𑀝𑀺𑀳𑀜𑁆𑀜𑀢𑀻𑀢𑀺 𑀏𑀢𑁆𑀣 𑀦 𑀲𑀬𑀁 𑀓𑀺𑀜𑁆𑀘𑀺 𑀧𑀝𑀺𑀳𑀜𑁆𑀜𑀢𑀺, 𑀦𑀸𑀧𑀺 𑀓𑁂𑀦𑀘𑀺 𑀧𑀝𑀺𑀳𑀜𑁆𑀜𑀻𑀬𑀢𑀺 𑀅𑀨𑁄𑀝𑁆𑀞𑀩𑁆𑀩𑀲𑀪𑀸𑀯𑀢𑁆𑀢𑀸. 𑀯𑀺𑀲𑀬𑀯𑀺𑀲𑀬𑀻𑀪𑀽𑀢𑀁 𑀧𑀦 𑀅𑀪𑀺𑀫𑀼𑀔𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀬𑀸 𑀳𑁂𑀢𑀼𑀢𑀸𑀬 𑀯𑀺𑀲𑀺𑀝𑁆𑀞𑀪𑀸𑀯𑀧𑁆𑀧𑀢𑁆𑀢𑀁 𑀧𑀝𑀺𑀳𑀢𑀧𑀝𑀺𑀖𑀸𑀢𑀓𑀪𑀸𑀯𑁂𑀦 𑀯𑁄𑀳𑀭𑀻𑀬𑀢𑀺, 𑀢𑀲𑁆𑀫𑀸 𑀢𑁂𑀲𑀼 𑀲𑀧𑁆𑀧𑀝𑀺𑀖𑀯𑁄𑀳𑀸𑀭𑁄. ‘‘𑀉𑀧𑀸𑀤𑀸𑀭𑀽𑀧𑀁 𑀖𑀝𑁆𑀝𑁂𑀢𑀻𑀢𑀺 𑀏𑀯𑀫𑀸𑀤𑀺 𑀘 𑀉𑀧𑀘𑀸𑀭𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁. 𑀫𑀳𑀸𑀪𑀽𑀢𑀸𑀭𑀫𑁆𑀫𑀡𑁂𑀦 𑀧𑀦 𑀓𑀸𑀬𑀧𑁆𑀧𑀲𑀸𑀤𑀦𑀺𑀲𑁆𑀲𑀬𑀪𑀽𑀢𑁂𑀲𑀼 𑀫𑀳𑀸𑀪𑀽𑀢𑁂𑀲𑀼 𑀖𑀝𑁆𑀝𑀺𑀬𑀫𑀸𑀦𑁂𑀲𑀼 𑀧𑀲𑀸𑀤𑁄𑀧𑀺 𑀖𑀝𑁆𑀝𑀺𑀢𑁄 𑀏𑀯 𑀦𑀸𑀫 𑀳𑁄𑀢𑀻𑀢𑀺 𑀯𑀢𑁆𑀯𑀸 𑀯𑀻𑀫𑀁𑀲𑀺𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑀺. 𑀬𑀣𑀸𑀥𑀺𑀧𑁆𑀧𑁂𑀢𑁂𑀦 𑀏𑀓𑀤𑁂𑀲𑀲𑀸𑀫𑀜𑁆𑀜𑁂𑀦 𑀉𑀧𑀫𑀸𑀯𑀘𑀦𑀢𑁄 𑀦𑀺𑀲𑁆𑀲𑀺𑀢𑀦𑀺𑀲𑁆𑀲𑀬𑀖𑀝𑁆𑀝𑀦𑀸𑀦𑀁 𑀲𑀢𑀺𑀧𑀺 𑀧𑀼𑀩𑁆𑀩𑀸𑀧𑀭𑀪𑀸𑀯𑁂 𑀉𑀧𑀫𑀢𑁆𑀢𑁂 𑀉𑀧𑀫𑀸𑀪𑀸𑀯𑁂𑀦 𑀕𑀳𑁂𑀢𑀩𑁆𑀩𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀉𑀪𑀬𑀖𑀝𑁆𑀝𑀦𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺 𑀆𑀳.

𑁪𑁫𑁫. 𑀤𑀲𑁆𑀲𑀦𑀸𑀤𑀺𑀧𑁆𑀧𑀯𑀢𑁆𑀢𑀺𑀪𑀸𑀯𑀢𑁄𑀢𑀺 𑀫𑀦𑁄𑀥𑀸𑀢𑀼𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀽𑀦𑀁 𑀅𑀤𑀲𑁆𑀲𑀦𑀸𑀤𑀺𑀢𑀸𑀬 𑀲𑀸 𑀏𑀢𑁂𑀲𑀁 𑀏𑀯 𑀯𑀺𑀲𑁂𑀲𑁄. 𑀅𑀦𑀜𑁆𑀜𑀦𑀺𑀲𑁆𑀲𑀬𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀢𑀸𑀬𑀸𑀢𑀺 𑀅𑀜𑁆𑀜𑀦𑀺𑀲𑁆𑀲𑀬𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀢𑁆𑀢𑀸𑀪𑀸𑀯𑀢𑁄. 𑀅𑀜𑁆𑀜𑀦𑀺𑀲𑁆𑀲𑀬𑀯𑀺𑀜𑁆𑀜𑀸𑀡𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑁂𑀦𑀸𑀢𑀺 𑀇𑀫𑀺𑀦𑀸 𑀓𑀺𑀭𑀺𑀬𑀸𑀫𑀦𑁄𑀥𑀸𑀢𑀼𑀢𑁄𑀧𑀺 𑀯𑀺𑀲𑁂𑀲𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 ‘‘𑀫𑀦𑁄𑀤𑁆𑀯𑀸𑀭𑀦𑀺𑀕𑁆𑀕𑀫𑀦𑀫𑀼𑀔𑀪𑀸𑀯𑀸𑀪𑀸𑀯𑀢𑁄’’𑀢𑀺 𑀯𑀼𑀢𑁆𑀢𑀁, 𑀦 𑀯𑀼𑀢𑁆𑀢𑀁 ‘‘𑀦𑀺𑀕𑁆𑀕𑀫𑀦𑀧𑀯𑁂𑀲𑀫𑀼𑀔𑀪𑀸𑀯𑀸𑀪𑀸𑀯𑀢𑁄’’𑀢𑀺. 𑀢𑀺𑀯𑀺𑀥𑁂𑀦𑀧𑀺 𑀳𑀺 𑀫𑀦𑁄𑀥𑀸𑀢𑀼𑀯𑀺𑀜𑁆𑀜𑀸𑀡𑀥𑀸𑀢𑀽𑀳𑀺 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀯𑀺𑀲𑁂𑀲𑁄 𑀤𑀲𑁆𑀲𑀺𑀢𑁄𑀢𑀺. 𑀢𑀢𑁄 𑀏𑀯 𑀯𑀺𑀚𑀸𑀦𑀦𑀯𑀺𑀲𑁂𑀲𑀯𑀺𑀭𑀳𑀢𑁄𑀬𑁂𑀯. 𑀬𑀤𑀺 𑀫𑀦𑁄𑀥𑀸𑀢𑀼 ‘‘𑀫𑀦𑁄𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀦 𑀯𑀼𑀘𑁆𑀘𑀢𑀺, 𑀙𑀯𑀺𑀜𑁆𑀜𑀸𑀡𑀓𑀸𑀬𑀸𑀢𑀺 𑀓𑀣𑀁 𑀫𑀦𑁄𑀥𑀸𑀢𑀼𑀬𑀸 𑀢𑀢𑁆𑀣 𑀲𑀗𑁆𑀕𑀳𑁄 𑀳𑁄𑀢𑀻𑀢𑀺? 𑀲𑀗𑁆𑀕𑀳𑁄 𑀏𑀯 𑀧𑀭𑀺𑀬𑀸𑀬𑀤𑁂𑀲𑀦𑀢𑁆𑀢𑀸. 𑀅𑀢𑁆𑀣𑀺 𑀳𑀺 𑀏𑀲 𑀧𑀭𑀺𑀬𑀸𑀬𑁄 ‘‘𑀫𑀦𑀦𑀫𑀢𑁆𑀢𑀁 𑀯𑀺𑀜𑁆𑀜𑀸𑀡𑀁 𑀫𑀦𑁄𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀬𑀣𑀸 ‘‘𑀫𑀦𑀦𑀫𑀢𑁆𑀢𑀸 𑀥𑀸𑀢𑀼 𑀫𑀦𑁄𑀥𑀸𑀢𑀽’’𑀢𑀺. 𑀅𑀧𑀺𑀘 𑀯𑀢𑁆𑀣𑀼𑀓𑀺𑀘𑁆𑀘𑁂𑀳𑀺 𑀫𑀦𑁄𑀯𑀺𑀜𑁆𑀜𑀸𑀡𑀲𑀪𑀸𑀕𑀢𑁆𑀢𑀸 𑀢𑀲𑁆𑀲 𑀉𑀧𑀭𑀫𑀼𑀧𑁆𑀧𑀸𑀤𑀪𑀸𑀯𑀢𑁄 𑀅𑀦𑁆𑀢𑀸𑀤𑀺𑀪𑀸𑀯𑀢𑁄 𑀘 𑀫𑀦𑁄𑀯𑀺𑀜𑁆𑀜𑀸𑀡𑀓𑀸𑀬𑀲𑀗𑁆𑀕𑀳𑀺𑀢𑀸 𑀫𑀦𑁄𑀥𑀸𑀢𑀼, 𑀦 𑀲𑁂𑀲𑀯𑀺𑀜𑁆𑀜𑀸𑀡𑀓𑀸𑀬𑀲𑀗𑁆𑀕𑀳𑀺𑀢𑀸 𑀅𑀢𑀁𑀲𑀪𑀸𑀕𑀢𑁆𑀢𑀸, 𑀇𑀥 𑀧𑀦 𑀦𑀺𑀧𑁆𑀧𑀭𑀺𑀬𑀸𑀬𑀓𑀢𑀢𑁆𑀢𑀸 𑀫𑀦𑀲𑁄 𑀲𑀫𑁆𑀪𑀽𑀬 𑀯𑀺𑀲𑀺𑀝𑁆𑀞𑀫𑀦𑁄𑀓𑀺𑀘𑁆𑀘𑀬𑀼𑀢𑁆𑀢𑀁 𑀫𑀦𑁄𑀯𑀺𑀜𑁆𑀜𑀸𑀡𑀦𑁆𑀢𑀺 𑀢𑀤𑀪𑀸𑀯𑀢𑁄 ‘‘𑀫𑀦𑁄𑀯𑀺𑀜𑁆𑀜𑀸𑀡𑀦𑁆𑀢𑀺𑀧𑀺 𑀦 𑀯𑀼𑀘𑁆𑀘𑀢𑀻’’𑀢𑀺 𑀇𑀫𑀫𑁂𑀯𑀢𑁆𑀣𑀁 𑀲𑀸𑀥𑁂𑀢𑀼𑀁 ‘‘𑀦 𑀳𑀺 𑀢𑀁 𑀯𑀺𑀜𑁆𑀜𑀸𑀡𑀁 𑀫𑀦𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦 𑀫𑀦𑁄𑀥𑀸𑀢𑀼𑀬𑀸 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀫𑀦𑁄𑀯𑀺𑀜𑁆𑀜𑀸𑀡𑀓𑀺𑀘𑁆𑀘𑀯𑀺𑀭𑀳𑀁𑀬𑁂𑀯 𑀤𑀲𑁆𑀲𑁂𑀢𑀺. 𑀤𑀲𑁆𑀲𑀦𑀸𑀤𑀻𑀦𑀁 𑀧𑀦𑀸𑀢𑀺𑀆𑀤𑀺𑀦𑀸 𑀅𑀜𑁆𑀜𑀯𑀺𑀜𑁆𑀜𑀸𑀡𑀯𑀺𑀥𑀼𑀭𑀁 𑀫𑀦𑁄𑀥𑀸𑀢𑀼𑀬𑀸 𑀘 𑀲𑀪𑀸𑀯𑀁 𑀤𑀲𑁆𑀲𑁂𑀢𑀺.

𑀬𑀤𑀺 𑀚𑀦𑀓𑀲𑀤𑀺𑀲𑀢𑀸 𑀦𑀸𑀫 𑀫𑀳𑀸𑀯𑀺𑀧𑀸𑀓𑁂𑀲𑀼 𑀯𑀺𑀢𑀓𑁆𑀓𑀸𑀤𑀻𑀦𑀁 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀺𑀢𑀸, 𑀢𑀺𑀳𑁂𑀢𑀼𑀓𑀢𑁄 𑀦𑀺𑀩𑁆𑀩𑀢𑁆𑀢𑀸𑀦𑀁 𑀢𑀺𑀳𑁂𑀢𑀼𑀓𑀸𑀦𑀁, 𑀤𑀼𑀳𑁂𑀢𑀼𑀓𑀢𑁄 𑀦𑀺𑀩𑁆𑀩𑀢𑁆𑀢𑀸𑀦𑀁 𑀤𑀼𑀳𑁂𑀢𑀼𑀓𑀸𑀦𑀜𑁆𑀘 𑀪𑀯𑀢𑀼 𑀲𑀫𑁆𑀫𑀸𑀲𑀗𑁆𑀓𑀧𑁆𑀧𑀸𑀤𑀺𑀢𑀸, 𑀢𑀺𑀳𑁂𑀢𑀼𑀓𑀢𑁄 𑀧𑀦 𑀦𑀺𑀩𑁆𑀩𑀢𑁆𑀢𑀤𑀼𑀳𑁂𑀢𑀼𑀓𑀸𑀦𑀁 𑀓𑀣𑀦𑁆𑀢𑀺 𑀆𑀳 ‘‘𑀢𑀢𑁆𑀣 𑀳𑀻’’𑀢𑀺𑀆𑀤𑀺. 𑀢𑀁𑀲𑁄𑀢𑀧𑀢𑀺𑀢𑀢𑀸 𑀦 𑀲𑀺𑀬𑀸 𑀢𑀲𑁆𑀲𑀸 𑀅𑀦𑀸𑀦𑀦𑁆𑀢𑀭𑀢𑁆𑀢𑀸. 𑀢𑀢𑁄 𑀏𑀯 𑀳𑀻𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀲𑁄𑀢𑀧𑀢𑀺𑀢𑀁 𑀏𑀯𑀸𑀦𑀦𑁆𑀢𑀭𑁂𑀦 𑀯𑀘𑀦𑁂𑀦 𑀲𑀫𑀢𑁆𑀣𑀬𑀢𑀺. 𑀬𑀤𑀺 𑀯𑀺𑀚𑁆𑀚𑀫𑀸𑀦𑀸𑀦𑀫𑁆𑀧𑀺 𑀫𑀦𑁄𑀥𑀸𑀢𑀼𑀆𑀤𑀻𑀲𑀼 𑀯𑀺𑀢𑀓𑁆𑀓𑀸𑀤𑀻𑀦𑀁 𑀧𑀜𑁆𑀘𑀯𑀺𑀜𑁆𑀜𑀸𑀡𑁂𑀲𑀼 𑀯𑀺𑀬 𑀅𑀕𑀡𑀦𑀽𑀧𑀕𑀪𑀸𑀯𑁄, 𑀏𑀯𑀁 𑀲𑀦𑁆𑀢𑁂 𑀧𑀝𑁆𑀞𑀸𑀦𑁂 𑀓𑀣𑀁 𑀢𑁂𑀲𑀁 𑀛𑀸𑀦𑀧𑀘𑁆𑀘𑀬𑀢𑀸𑀯𑀘𑀦𑀁. ‘‘𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲 𑀥𑀫𑁆𑀫𑀲𑁆𑀲 𑀛𑀸𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁩𑁧), ‘‘𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸𑀦𑀺 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸𑀦𑀺 𑀛𑀸𑀦𑀗𑁆𑀕𑀸𑀦𑀺 𑀲𑀫𑁆𑀧𑀬𑀼𑀢𑁆𑀢𑀓𑀸𑀦𑀁 𑀔𑀦𑁆𑀥𑀸𑀦𑀁 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀭𑀽𑀧𑀸𑀦𑀁 𑀛𑀸𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁩𑁧) 𑀳𑀺 𑀯𑀼𑀢𑁆𑀢𑀁. 𑀧𑀘𑁆𑀘𑀦𑀻𑀬𑁂𑀧𑀺 ‘‘𑀅𑀩𑁆𑀬𑀸𑀓𑀢𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦 𑀛𑀸𑀦𑀧𑀘𑁆𑀘𑀬𑀸, 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀳𑀺𑀢𑀁 𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘 𑀢𑀬𑁄 𑀔𑀦𑁆𑀥𑀸’’𑀢𑀺𑀆𑀤𑀺𑀦𑀸 (𑀧𑀝𑁆𑀞𑀸. 𑁧.𑁧.𑁯𑁮) 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺 𑀏𑀯 𑀉𑀤𑁆𑀥𑀝𑀸𑀦𑀺, 𑀦 𑀫𑀦𑁄𑀥𑀸𑀢𑀼𑀆𑀤𑀻𑀦𑀻𑀢𑀺 𑀆𑀳 ‘‘𑀛𑀸𑀦𑀧𑀘𑁆𑀘𑀬𑀓𑀺𑀘𑁆𑀘𑀫𑀢𑁆𑀢𑀢𑁄’’𑀢𑀺𑀆𑀤𑀺. 𑀦 𑀳𑁂𑀢𑁆𑀣 𑀛𑀸𑀦𑀗𑁆𑀕𑀸𑀦𑀁 𑀩𑀮𑀯𑀤𑀼𑀩𑁆𑀩𑀮𑀪𑀸𑀯𑁄 𑀅𑀥𑀺𑀓𑀢𑁄, 𑀅𑀣 𑀔𑁄 𑀛𑀸𑀦𑀧𑀘𑁆𑀘𑀬𑀪𑀸𑀯𑀫𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁬𑁯. 𑀲𑀫𑀸𑀦𑀯𑀢𑁆𑀣𑀼𑀓𑀁 𑀅𑀦𑀦𑁆𑀢𑀭𑀧𑀘𑁆𑀘𑀬𑀁 𑀮𑀪𑀺𑀢𑁆𑀯𑀸𑀢𑀺 𑀤𑀲𑁆𑀲𑀦𑀸𑀤𑀺𑀢𑁄 𑀫𑀦𑁄𑀥𑀸𑀢𑀼𑀬𑀸 𑀘 𑀩𑀮𑀯𑀪𑀸𑀯𑁂 𑀓𑀸𑀭𑀡𑀯𑀘𑀦𑀁. 𑀬𑀣𑀸𑀭𑀫𑁆𑀫𑀡𑀦𑁆𑀢𑀺 𑀆𑀭𑀫𑁆𑀫𑀡𑀸𑀦𑀼𑀭𑀽𑀧𑀁. 𑀬𑀤𑀺 𑀲𑀫𑀸𑀦𑀦𑀺𑀲𑁆𑀲𑀬𑀢𑀸𑀬 𑀫𑀦𑁄𑀥𑀸𑀢𑀼𑀢𑁄 𑀩𑀮𑀯𑀢𑀭𑀢𑁆𑀢𑀁 𑀯𑀺𑀧𑀸𑀓𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀲𑁄𑀫𑀦𑀲𑁆𑀲𑀲𑀳𑀕𑀢𑀸𑀬, 𑀯𑁄𑀝𑁆𑀞𑀩𑁆𑀩𑀦𑀁 𑀓𑀣𑀁 𑀫𑀚𑁆𑀛𑀢𑁆𑀢𑀯𑁂𑀤𑀦𑀦𑁆𑀢𑀺 𑀅𑀦𑀼𑀬𑁄𑀕𑀁 𑀫𑀦𑀲𑀺 𑀓𑀢𑁆𑀯𑀸 𑀢𑀲𑁆𑀲 𑀩𑀮𑀯𑀪𑀸𑀯𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀦𑁆𑀢𑀢𑀺𑀧𑀭𑀺𑀡𑀸𑀫𑀦𑀩𑁆𑀬𑀸𑀧𑀸𑀭𑀯𑀺𑀲𑁂𑀲𑀸 𑀦 𑀲𑁄𑀫𑀦𑀲𑁆𑀲𑀯𑁂𑀤𑀦𑀦𑁆𑀢𑀺 𑀧𑀭𑀺𑀳𑀸𑀭𑀁 𑀯𑀤𑀦𑁆𑀢𑁄 ‘‘𑀯𑁄𑀝𑁆𑀞𑀩𑁆𑀩𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀯𑀺𑀧𑀸𑀓𑁄 𑀯𑀺𑀬 𑀅𑀦𑀼𑀪𑀯𑀦𑀫𑁂𑀯 𑀦 𑀳𑁄𑀢𑀻𑀢𑀺 𑀲𑀢𑀺 𑀲𑀫𑀢𑁆𑀣𑀢𑀸𑀬 𑀯𑀺𑀧𑀸𑀓𑀸𑀦𑀁 𑀏𑀓𑀦𑁆𑀢𑁂𑀦 𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀢𑀸𑀬 𑀯𑀼𑀢𑁆𑀢𑀁.

𑀅𑀳𑁂𑀢𑀼𑀓𑀓𑀼𑀲𑀮𑀯𑀺𑀧𑀸𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀝𑁆𑀞𑀫𑀳𑀸𑀯𑀺𑀧𑀸𑀓𑀘𑀺𑀢𑁆𑀢𑀯𑀡𑁆𑀡𑀦𑀸

𑁪𑁯𑁮. 𑀯𑀺𑀧𑀸𑀓𑀥𑀫𑁆𑀫𑀸𑀦𑀁 𑀓𑀫𑁆𑀫𑀤𑁆𑀯𑀸𑀭𑀁 𑀯𑀼𑀢𑁆𑀢𑀁 𑀤𑁆𑀯𑀸𑀭𑀓𑀣𑀸𑀬𑀁 ‘‘𑀢𑁂𑀪𑀽𑀫𑀓𑀓𑀼𑀲𑀮𑀸𑀓𑀼𑀲𑀮𑁄 𑀏𑀓𑀽𑀦𑀢𑀺𑀁𑀲𑀯𑀺𑀥𑁄 𑀫𑀦𑁄’’𑀢𑀺 (𑀥. 𑀲. 𑀅𑀝𑁆𑀞. 𑀫𑀦𑁄𑀓𑀫𑁆𑀫𑀤𑁆𑀯𑀸𑀭𑀓𑀣𑀸). 𑀧𑀬𑁄𑀕𑁂𑀦𑀸𑀢𑀺 𑀅𑀢𑁆𑀢𑀦𑀸 𑀧𑀭𑁂𑀳𑀺 𑀯𑀸 𑀓𑀢𑁂𑀦 𑀉𑀲𑁆𑀲𑀸𑀳𑀦𑀧𑀬𑁄𑀕𑁂𑀦. 𑀓𑀼𑀲𑀮𑀸𑀓𑀼𑀲𑀮𑀸𑀦𑀺 𑀯𑀺𑀬 𑀬𑁂𑀲𑀁 𑀢𑀁 𑀢𑀤𑀸𑀭𑀫𑁆𑀫𑀡𑀁 𑀅𑀦𑀼𑀩𑀦𑁆𑀥𑀪𑀽𑀢𑀁. 𑀧𑀞𑀫𑀧𑀜𑁆𑀘𑀫𑀘𑀺𑀢𑁆𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀩𑀮𑀯𑀤𑀼𑀩𑁆𑀩𑀮𑀪𑀸𑀯𑀯𑀺𑀘𑀸𑀭𑁂𑀦 𑀤𑀼𑀢𑀺𑀬𑀙𑀝𑁆𑀞𑀸𑀤𑀻𑀦𑀫𑁆𑀧𑀺 𑀲𑁄 𑀯𑀺𑀘𑀸𑀭𑀺𑀢𑁄 𑀳𑁄𑀢𑀻𑀢𑀺 ‘‘𑀏𑀢𑁂𑀲𑀼 𑀩𑀮𑀯𑀁 𑀤𑀼𑀩𑁆𑀩𑀮𑀜𑁆𑀘 𑀯𑀺𑀘𑀸𑀭𑁂𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀲𑀸𑀮𑀺𑀆𑀤𑀻𑀦𑀁 𑀣𑀤𑁆𑀥𑀫𑀼𑀤𑀼𑀪𑀽𑀫𑀺𑀯𑀲𑁂𑀦 𑀢𑀺𑀡𑀸𑀤𑀻𑀦𑀁 𑀅𑀦𑀻𑀳𑀭𑀡𑀦𑀻𑀳𑀭𑀡𑀯𑀲𑁂𑀦 𑀉𑀢𑀼𑀆𑀤𑀺𑀅𑀯𑀲𑁂𑀲𑀧𑀘𑁆𑀘𑀬𑀸𑀦𑀁 𑀯𑀺𑀧𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀯𑀲𑁂𑀦 𑀘 𑀨𑀮𑀯𑀺𑀲𑁂𑀲𑀬𑁄𑀕𑁄, 𑀏𑀯𑀁 𑀓𑀫𑁆𑀫𑀲𑁆𑀲 𑀲𑀼𑀕𑀢𑀺𑀤𑀼𑀕𑁆𑀕𑀢𑀺𑀯𑀲𑁂𑀦 𑀅𑀯𑀺𑀲𑀼𑀤𑁆𑀥𑀯𑀺𑀲𑀼𑀤𑁆𑀥𑀧𑀬𑁄𑀕𑀯𑀲𑁂𑀦 𑀉𑀧𑀧𑀢𑁆𑀢𑀺𑀬𑀸 𑀯𑀺𑀧𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀯𑀲𑁂𑀦 𑀘 𑀯𑀺𑀲𑀺𑀝𑁆𑀞𑀨𑀮𑀢𑀸𑀬 𑀧𑀭𑀺𑀡𑀫𑀦𑀁, 𑀏𑀯𑀫𑁂𑀯 𑀕𑀺𑀫𑁆𑀳𑀯𑀲𑁆𑀲𑀓𑀸𑀮𑀸𑀤𑀻𑀲𑀼 𑀩𑀻𑀚𑀸𑀦𑀁 𑀨𑀮𑀯𑀺𑀲𑁂𑀲𑀬𑁄𑀕𑁄 𑀯𑀺𑀬 𑀢𑀁𑀢𑀁𑀓𑀸𑀮𑀯𑀺𑀲𑁂𑀲𑁂𑀦 𑀓𑀫𑁆𑀫𑀲𑁆𑀲 𑀨𑀮𑀯𑀺𑀲𑁂𑀲𑀬𑁄𑀕𑁄 𑀳𑁄𑀢𑀻𑀢𑀺 𑀆𑀳 ‘‘𑀓𑀸𑀮𑀯𑀲𑁂𑀦 𑀧𑀭𑀺𑀡𑀫𑀢𑀻’’𑀢𑀺. 𑀲𑀼𑀓𑁆𑀓𑀲𑁄𑀡𑀺𑀢𑀧𑀘𑁆𑀘𑀬𑀸𑀦𑀦𑁆𑀢𑀺 𑀓𑀫𑁆𑀫𑀯𑀺𑀲𑁂𑀲𑀧𑀭𑀺𑀪𑀸𑀯𑀺𑀢𑀲𑀦𑁆𑀢𑀸𑀦𑀼𑀧𑁆𑀧𑀦𑁆𑀦𑀢𑀸𑀬 𑀲𑀼𑀓𑁆𑀓𑀲𑁄𑀡𑀺𑀢𑀸𑀦𑀁 𑀆𑀬𑀼𑀯𑀺𑀲𑁂𑀲𑀳𑁂𑀢𑀼𑀪𑀸𑀯𑀫𑀸𑀳 𑀲𑀼𑀓𑁆𑀓𑀲𑁄𑀡𑀺𑀢𑀯𑀲𑁂𑀦𑀧𑀺 𑀯𑀡𑁆𑀡𑀸𑀤𑀺𑀯𑀺𑀲𑁂𑀲𑀤𑀲𑁆𑀲𑀦𑀢𑁄, 𑀬𑁂𑀦 ‘‘𑀧𑀺𑀢𑀽𑀦𑀁 𑀆𑀓𑀸𑀭𑀁 𑀧𑀼𑀢𑁆𑀢𑁄 𑀅𑀦𑀼𑀯𑀺𑀤𑀳𑀢𑀻’’𑀢𑀺 𑀯𑀼𑀘𑁆𑀘𑀢𑀺. 𑀢𑀁𑀫𑀽𑀮𑀓𑀸𑀦𑀦𑁆𑀢𑀺 𑀅𑀧𑁆𑀧𑀸𑀬𑀼𑀓𑀲𑀁𑀯𑀢𑁆𑀢𑀦𑀺𑀬𑀓𑀫𑁆𑀫𑀫𑀽𑀮𑀓𑀸𑀦𑀁. 𑀆𑀳𑀸𑀭𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑀺𑀲𑀫𑀽𑀧𑀓𑁆𑀓𑀫𑀸𑀤𑀬𑁄 𑀧𑀭𑀺𑀕𑁆𑀕𑀡𑁆𑀳𑀸𑀢𑀺.

𑀯𑀺𑀧𑀸𑀓𑀼𑀤𑁆𑀥𑀸𑀭𑀓𑀣𑀸𑀯𑀡𑁆𑀡𑀦𑀸

𑀬𑀢𑁄 𑀢𑀺𑀳𑁂𑀢𑀼𑀓𑀸𑀤𑀺𑀓𑀫𑁆𑀫𑀢𑁄. 𑀬𑀲𑁆𑀫𑀺𑀜𑁆𑀘 𑀞𑀸𑀦𑁂𑀢𑀺 𑀧𑀝𑀺𑀲𑀦𑁆𑀥𑀺𑀆𑀤𑀺𑀝𑁆𑀞𑀸𑀦𑁂, 𑀲𑀼𑀕𑀢𑀺𑀤𑀼𑀕𑁆𑀕𑀢𑀺𑀬𑀁 𑀯𑀸. 𑀢𑀺𑀳𑁂𑀢𑀼𑀓𑀢𑁄 𑀤𑀼𑀳𑁂𑀢𑀼𑀓𑀁 𑀅𑀦𑀺𑀘𑁆𑀙𑀦𑁆𑀢𑁄 𑀧𑀝𑀺𑀲𑀦𑁆𑀥𑀺𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀯𑀢𑁆𑀢𑀺𑀯𑀺𑀧𑀸𑀓𑀁 𑀧𑀦 𑀢𑀺𑀳𑁂𑀢𑀼𑀓𑀢𑁄 𑀤𑀼𑀳𑁂𑀢𑀼𑀓𑀫𑁆𑀧𑀺 𑀇𑀘𑁆𑀙𑀢𑀺 𑀏𑀯. 𑀢𑀣𑀸 𑀳𑀺 𑀯𑀓𑁆𑀔𑀢𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀬𑀁 𑀧𑀼𑀭𑀺𑀫𑀸𑀬 𑀳𑁂𑀢𑀼𑀓𑀺𑀢𑁆𑀢𑀦𑀮𑀤𑁆𑀥𑀺𑀬𑀸 𑀦 𑀬𑀼𑀚𑁆𑀚𑀢𑀻’’𑀢𑀺 (𑀥. 𑀲. 𑀅𑀝𑁆𑀞. 𑁪𑁯𑁮).

𑀬𑁂 ‘‘𑀢𑀲𑁆𑀲𑁂𑀯 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀸𑀯𑀲𑁂𑀲𑁂𑀦𑀸’’𑀢𑀺, ‘‘𑀏𑀓𑀧𑀼𑀧𑁆𑀨𑀁 𑀬𑀚𑀺𑀢𑁆𑀯𑀸𑀦, 𑀅𑀲𑀻𑀢𑀺 𑀓𑀧𑁆𑀧𑀓𑁄𑀝𑀺𑀬𑁄 (𑀣𑁂𑀭𑀕𑀸. 𑁯𑁬). 𑀤𑀼𑀕𑁆𑀕𑀢𑀺𑀁 𑀦𑀸𑀪𑀺𑀚𑀸𑀦𑀸𑀫𑀻’’𑀢𑀺 (𑀅𑀧. 𑀣𑁂𑀭 𑁨.𑁪𑁬.𑁬𑁪) 𑀘 𑀏𑀯𑀫𑀸𑀤𑀺𑀯𑀘𑀦𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀅𑀚𑀸𑀦𑀦𑁆𑀢𑀸 ‘‘𑀓𑀺𑀁 𑀦𑀼 𑀔𑁄 𑀏𑀓𑁂𑀦𑀧𑀺 𑀓𑀫𑁆𑀫𑁂𑀦 𑀅𑀦𑁂𑀓𑀸 𑀧𑀝𑀺𑀲𑀦𑁆𑀥𑀺 𑀳𑁄𑀢𑀻’’𑀢𑀺, ‘‘𑀤𑀺𑀲𑁆𑀯𑀸 𑀓𑀼𑀫𑀸𑀭𑀁 𑀲𑀢𑀧𑀼𑀜𑁆𑀜𑀮𑀓𑁆𑀔𑀡’’𑀦𑁆𑀢𑀺𑀆𑀤𑀺𑀯𑀘𑀦𑀲𑁆𑀲 (𑀤𑀻. 𑀦𑀺. 𑁩.𑁨𑁦𑁫) 𑀅𑀢𑁆𑀣𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀓𑀺𑀦𑁆𑀦𑀼 𑀔𑁄 𑀦𑀸𑀦𑀸𑀓𑀫𑁆𑀫𑁂𑀳𑀺 𑀏𑀓𑀸 𑀧𑀝𑀺𑀲𑀦𑁆𑀥𑀺 𑀳𑁄𑀢𑀻’’𑀢𑀺 𑀲𑀁𑀲𑀬𑀧𑀓𑁆𑀔𑀦𑁆𑀤𑀸, 𑀢𑁂𑀲𑀁 𑀩𑀻𑀚𑀗𑁆𑀓𑀼𑀭𑁄𑀧𑀫𑀸𑀬 ‘‘𑀏𑀓𑀲𑁆𑀫𑀸 𑀏𑀓𑀸, 𑀅𑀦𑁂𑀓𑀲𑁆𑀫𑀸 𑀘 𑀅𑀦𑁂𑀓𑀸 𑀧𑀝𑀺𑀲𑀦𑁆𑀥𑀺 𑀳𑁄𑀢𑀻’’𑀢𑀺 𑀯𑀺𑀦𑀺𑀘𑁆𑀙𑀺𑀢𑀢𑁆𑀢𑀸 𑀓𑀫𑁆𑀫𑀧𑀝𑀺𑀲𑀦𑁆𑀥𑀺𑀯𑀯𑀢𑁆𑀣𑀸𑀦𑀢𑁄 𑀲𑀸𑀓𑁂𑀢𑀧𑀜𑁆𑀳𑁂 𑀯𑀺𑀧𑀸𑀓𑀼𑀤𑁆𑀥𑀸𑀭𑀓𑀣𑀸𑀬 𑀉𑀲𑁆𑀲𑀤𑀓𑀺𑀢𑁆𑀢𑀦𑀕𑀳𑀡𑀲𑁆𑀲 𑀲𑀫𑁆𑀩𑀦𑁆𑀥𑀁 𑀆𑀳 ‘‘𑀓𑀫𑁆𑀫𑀯𑀲𑁂𑀦…𑀧𑁂… 𑀤𑀲𑁆𑀲𑁂𑀢𑀼’’𑀦𑁆𑀢𑀺. 𑀧𑀝𑀺𑀲𑀦𑁆𑀥𑀺𑀚𑀦𑀓𑀓𑀫𑁆𑀫𑀯𑀲𑁂𑀦 𑀧𑀝𑀺𑀲𑀦𑁆𑀥𑀺𑀯𑀺𑀧𑀸𑀓𑁄 𑀏𑀯 𑀅𑀮𑁄𑀪𑀮𑁄𑀪𑀸𑀤𑀺𑀕𑀼𑀡𑀤𑁄𑀲𑀸𑀢𑀺𑀭𑁂𑀓𑀪𑀸𑀯𑀳𑁂𑀢𑀽𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀲𑁄 𑀢𑁂𑀦 𑀓𑀫𑁆𑀫𑁂𑀦 𑀤𑀺𑀦𑁆𑀦𑀧𑀝𑀺𑀲𑀦𑁆𑀥𑀺𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑁄 𑀮𑀼𑀤𑁆𑀥𑁄 𑀳𑁄𑀢𑀻’’𑀢𑀺𑀆𑀤𑀺. 𑀏𑀢𑁆𑀣 𑀘 𑀮𑁄𑀪𑀯𑀲𑁂𑀦, 𑀤𑁄𑀲, 𑀫𑁄𑀳, 𑀮𑁄𑀪𑀤𑁄𑀲, 𑀮𑁄𑀪𑀫𑁄𑀳, 𑀤𑁄𑀲𑀫𑁄𑀳, 𑀮𑁄𑀪𑀤𑁄𑀲𑀫𑁄𑀳𑀯𑀲𑁂𑀦𑀸𑀢𑀺 𑀢𑀬𑁄 𑀏𑀓𑀓𑀸, 𑀢𑀬𑁄 𑀤𑁆𑀯𑀺𑀓𑀸, 𑀏𑀓𑁄 𑀢𑀺𑀓𑁄𑀢𑀺 𑀮𑁄𑀪𑀸𑀤𑀺𑀤𑀲𑁆𑀲𑀦𑀯𑀲𑁂𑀦 𑀅𑀓𑀼𑀲𑀮𑀧𑀓𑁆𑀔𑁂𑀬𑁂𑀯 𑀲𑀢𑁆𑀢 𑀯𑀸𑀭𑀸. 𑀢𑀣𑀸 𑀓𑀼𑀲𑀮𑀧𑀓𑁆𑀔𑁂 𑀅𑀮𑁄𑀪𑀸𑀤𑀺𑀤𑀲𑁆𑀲𑀦𑀯𑀲𑁂𑀦𑀸𑀢𑀺 𑀘𑀼𑀤𑁆𑀤𑀲 𑀯𑀸𑀭𑀸 𑀮𑀩𑁆𑀪𑀦𑁆𑀢𑀺.

𑀢𑀢𑁆𑀣 ‘‘𑀅𑀮𑁄𑀪𑀤𑁄𑀲𑀸𑀫𑁄𑀳𑀸, 𑀅𑀮𑁄𑀪𑀸𑀤𑁄𑀲𑀫𑁄𑀳𑀸, 𑀅𑀮𑁄𑀪𑀤𑁄𑀲𑀸𑀫𑁄𑀳𑀸 𑀩𑀮𑀯𑀦𑁆𑀢𑁄’’𑀢𑀺 𑀆𑀕𑀢𑁂𑀳𑀺 𑀓𑀼𑀲𑀮𑀧𑀓𑁆𑀔𑁂 𑀢𑀢𑀺𑀬𑀤𑀼𑀢𑀺𑀬𑀧𑀞𑀫𑀯𑀸𑀭𑁂𑀳𑀺 𑀤𑁄𑀲𑀼𑀲𑁆𑀲𑀤𑀫𑁄𑀳𑀼𑀲𑁆𑀲𑀤𑀤𑁄𑀲𑀫𑁄𑀳𑀼𑀲𑁆𑀲𑀤𑀯𑀸𑀭𑀸 𑀕𑀳𑀺𑀢𑀸. 𑀢𑀣𑀸 𑀅𑀓𑀼𑀲𑀮𑀧𑀓𑁆𑀔𑁂 ‘‘𑀮𑁄𑀪𑀸𑀤𑁄𑀲𑀫𑁄𑀳𑀸, 𑀮𑁄𑀪𑀤𑁄𑀲𑀸𑀫𑁄𑀳𑀸, 𑀮𑁄𑀪𑀸𑀤𑁄𑀲𑀸𑀫𑁄𑀳𑀸 𑀩𑀮𑀯𑀦𑁆𑀢𑁄’’𑀢𑀺 𑀆𑀕𑀢𑁂𑀳𑀺 𑀢𑀢𑀺𑀬𑀤𑀼𑀢𑀺𑀬𑀧𑀞𑀫𑀯𑀸𑀭𑁂𑀳𑀺 𑀅𑀤𑁄𑀲𑀼𑀲𑁆𑀲𑀤𑀅𑀫𑁄𑀳𑀼𑀲𑁆𑀲𑀤𑀅𑀤𑁄𑀲𑀸𑀫𑁄𑀳𑀼𑀲𑁆𑀲𑀤𑀯𑀸𑀭𑀸 𑀕𑀳𑀺𑀢𑀸𑀬𑁂𑀯𑀸𑀢𑀺 𑀅𑀓𑀼𑀲𑀮𑀓𑀼𑀲𑀮𑀧𑀓𑁆𑀔𑁂 𑀢𑀬𑁄 𑀢𑀬𑁄 𑀯𑀸𑀭𑁂 𑀅𑀦𑁆𑀢𑁄𑀕𑀥𑁂 𑀓𑀢𑁆𑀯𑀸 𑀅𑀝𑁆𑀞𑁂𑀯 𑀯𑀸𑀭𑀸 𑀤𑀲𑁆𑀲𑀺𑀢𑀸. 𑀬𑁂 𑀧𑀦 𑀉𑀪𑀬𑁂𑀲𑀁 𑀯𑁄𑀫𑀺𑀲𑁆𑀲𑀢𑀸𑀯𑀲𑁂𑀦𑁂𑀯 𑀮𑁄𑀪𑀸𑀮𑁄𑀪𑀼𑀲𑁆𑀲𑀤𑀯𑀸𑀭𑀸𑀤𑀬𑁄 𑀅𑀧𑀭𑁂 𑀏𑀓𑀽𑀦𑀧𑀜𑁆𑀜𑀸𑀲 𑀯𑀸𑀭𑀸 𑀤𑀲𑁆𑀲𑁂𑀢𑀩𑁆𑀩𑀸, 𑀢𑁂 𑀅𑀲𑀫𑁆𑀪𑀯𑀢𑁄 𑀏𑀯 𑀦 𑀤𑀲𑁆𑀲𑀺𑀢𑀸. 𑀦 𑀳𑀺 𑀏𑀓𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀅𑀦𑁆𑀢𑀭𑁂𑀦 𑀅𑀯𑀢𑁆𑀣𑀦𑁆𑀢𑀭𑀁 𑀮𑁄𑀪𑁄 𑀩𑀮𑀯𑀸 𑀅𑀮𑁄𑀪𑁄 𑀘𑀸𑀢𑀺 𑀬𑀼𑀚𑁆𑀚𑀢𑀺. 𑀧𑀝𑀺𑀧𑀓𑁆𑀔𑀢𑁄𑀬𑁂𑀯 𑀳𑀺 𑀏𑀢𑁂𑀲𑀁 𑀩𑀮𑀯𑀤𑀼𑀩𑁆𑀩𑀮𑀪𑀸𑀯𑁄, 𑀲𑀳𑀚𑀸𑀢𑀥𑀫𑁆𑀫𑀢𑁄 𑀯𑀸. 𑀢𑁂𑀲𑀼 𑀮𑁄𑀪𑀲𑁆𑀲 𑀢𑀸𑀯 𑀧𑀝𑀺𑀧𑀓𑁆𑀔𑀢𑁄 𑀅𑀮𑁄𑀪𑁂𑀦 𑀅𑀦𑀪𑀺𑀪𑀽𑀢𑀢𑀸𑀬 𑀩𑀮𑀯𑀪𑀸𑀯𑁄, 𑀢𑀣𑀸 𑀤𑁄𑀲𑀫𑁄𑀳𑀸𑀦𑀁 𑀅𑀤𑁄𑀲𑀸𑀫𑁄𑀳𑁂𑀳𑀺. 𑀅𑀮𑁄𑀪𑀸𑀤𑀻𑀦𑀁 𑀧𑀦 𑀮𑁄𑀪𑀸𑀤𑀺𑀅𑀪𑀺𑀪𑀯𑀦𑀢𑁄 𑀲𑀩𑁆𑀩𑁂𑀲𑀜𑁆𑀘 𑀲𑀫𑀸𑀦𑀚𑀸𑀢𑀺𑀬𑀁 𑀲𑀫𑀪𑀺𑀪𑀽𑀬 𑀧𑀯𑀢𑁆𑀢𑀺𑀯𑀲𑁂𑀦𑁂𑀯 𑀲𑀳𑀚𑀸𑀢𑀥𑀫𑁆𑀫𑀢𑁄 𑀩𑀮𑀯𑀪𑀸𑀯𑁄. 𑀢𑁂𑀦 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀮𑁄𑀪𑁄 𑀩𑀮𑀯𑀸, 𑀅𑀮𑁄𑀪𑁄 𑀫𑀦𑁆𑀤𑁄, 𑀅𑀤𑁄𑀲𑀸𑀫𑁄𑀳𑀸 𑀩𑀮𑀯𑀦𑁆𑀢𑁄, 𑀤𑁄𑀲𑀫𑁄𑀳𑀸 𑀫𑀦𑁆𑀤𑀸’’𑀢𑀺. 𑀲𑁄 𑀘 𑀢𑁂𑀲𑀁 𑀫𑀦𑁆𑀤𑀩𑀮𑀯𑀪𑀸𑀯𑁄 𑀧𑀼𑀭𑀺𑀫𑀽𑀧𑀦𑀺𑀲𑁆𑀲𑀬𑀢𑁄 𑀆𑀲𑀬𑀲𑁆𑀲 𑀧𑀭𑀺𑀪𑀸𑀯𑀺𑀢𑀢𑀸𑀬 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀘 𑀧𑀞𑀫𑀤𑀼𑀢𑀺𑀬𑁂𑀳𑀺, 𑀲𑀢𑁆𑀢𑀫𑀧𑀞𑀫𑁂𑀳𑀺 𑀯𑀸 𑀯𑀸𑀭𑁂𑀳𑀺 𑀢𑀺𑀳𑁂𑀢𑀼𑀓𑀓𑀫𑁆𑀫𑀢𑁄 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀺𑀯𑀲𑁂𑀦 𑀢𑀺𑀳𑁂𑀢𑀼𑀓𑀯𑀺𑀧𑀸𑀓𑁄, 𑀇𑀢𑀭𑁂𑀳𑀺 𑀢𑀺𑀳𑁂𑀢𑀼𑀓𑀤𑀼𑀳𑁂𑀢𑀼𑀓𑀓𑀫𑁆𑀫𑀢𑁄 𑀬𑀣𑀸𑀲𑀫𑁆𑀪𑀯𑀁 𑀧𑀝𑀺𑀲𑀦𑁆𑀥𑀺𑀧𑀯𑀢𑁆𑀢𑀺𑀯𑀲𑁂𑀦 𑀤𑀼𑀳𑁂𑀢𑀼𑀓𑀸𑀳𑁂𑀢𑀼𑀓𑀯𑀺𑀧𑀸𑀓𑀸 𑀤𑀲𑁆𑀲𑀺𑀢𑀸𑀢𑀺 𑀅𑀬𑀫𑁆𑀧𑀺 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄.

𑀇𑀥𑀸𑀢𑀺 𑀯𑀺𑀧𑀸𑀓𑀼𑀤𑁆𑀥𑀸𑀭𑀫𑀸𑀢𑀺𑀓𑀸𑀬𑀁. 𑀢𑁂𑀦 𑀳𑁂𑀢𑀼𑀓𑀺𑀢𑁆𑀢𑀦𑀁 𑀯𑀺𑀲𑁂𑀲𑁂𑀢𑀺. 𑀚𑀘𑁆𑀘𑀦𑁆𑀥𑀸𑀤𑀺𑀯𑀺𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀫𑁄𑀳𑁄, 𑀲𑀩𑁆𑀩𑀸𑀓𑀼𑀲𑀮𑀁 𑀯𑀸. 𑀬𑀁 𑀧𑀦 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀢𑁂𑀦 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑀯𑀘𑀦𑁂𑀦. 𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀲𑀢𑀺 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑁂 𑀧𑀝𑀺𑀲𑀦𑁆𑀥𑀺𑀫𑁆𑀳𑀺 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂. 𑀅𑀜𑁆𑀜𑀢𑁆𑀣𑀸𑀢𑀺 𑀦𑀺𑀓𑀦𑁆𑀢𑀺𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂𑀲𑀼. 𑀓𑀫𑁆𑀫𑀲𑀭𑀺𑀓𑁆𑀔𑀓𑁄𑀢𑀺 𑀇𑀥 𑀲𑀸𑀢𑀺𑀲𑀬𑁄 𑀲𑀭𑀺𑀓𑁆𑀔𑀪𑀸𑀯𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀇𑀢𑀭𑀣𑀸 𑀢𑀺𑀳𑁂𑀢𑀼𑀓𑀤𑀼𑀳𑁂𑀢𑀼𑀓𑀸𑀧𑀺 𑀅𑀜𑁆𑀜𑀫𑀜𑁆𑀜𑀁 𑀲𑀭𑀺𑀓𑁆𑀔𑀸𑀬𑁂𑀯𑀸𑀢𑀺 𑀤𑀲𑁆𑀲𑀺𑀢𑀫𑁂𑀢𑀦𑁆𑀢𑀺. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀻𑀢𑀺 𑀏𑀢𑁆𑀣 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀺 𑀯𑀺𑀬 𑀅𑀧𑀼𑀩𑁆𑀩𑀦𑀺𑀲𑁆𑀲𑀬𑀧𑀯𑀢𑁆𑀢𑀺𑀦𑀻 𑀯𑀺𑀚𑀸𑀦𑀦𑀯𑀺𑀲𑁂𑀲𑀭𑀳𑀺𑀢𑀸 𑀘 𑀫𑀦𑁄𑀥𑀸𑀢𑀼 𑀇𑀝𑁆𑀞𑀸𑀤𑀺𑀪𑀸𑀕𑀕𑁆𑀕𑀳𑀡𑁂 𑀦 𑀲𑀫𑀢𑁆𑀣𑀸𑀢𑀺 ‘‘𑀧𑀸𑀓𑀝𑀸𑀬𑁂𑀯𑀸’’𑀢𑀺 𑀦 𑀯𑀼𑀢𑁆𑀢𑀸, 𑀆𑀤𑀺-𑀲𑀤𑁆𑀤𑁂𑀦 𑀯𑀸 𑀲𑀗𑁆𑀕𑀳𑀺𑀢𑀸. 𑀢𑀤𑀸𑀭𑀫𑁆𑀫𑀡𑀧𑀘𑁆𑀘𑀬𑀲𑀩𑁆𑀩𑀚𑀯𑀦𑀯𑀢𑀸𑀢𑀺 𑀢𑀤𑀸𑀭𑀫𑁆𑀫𑀡𑀲𑁆𑀲 𑀧𑀘𑁆𑀘𑀬𑀪𑀽𑀢𑀲𑀓𑀮𑀚𑀯𑀦𑀧𑁆𑀧𑀯𑀢𑁆𑀢𑀺𑀲𑀳𑀺𑀢𑁂𑀦. 𑀬𑀁 𑀲𑀦𑁆𑀥𑀸𑀬 ‘‘𑀇𑀥 𑀧𑀭𑀺𑀧𑀓𑁆𑀓𑀢𑁆𑀢𑀸 𑀆𑀬𑀢𑀦𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀓𑀸𑀮𑁂𑀢𑀺 𑀅𑀩𑀼𑀤𑁆𑀥𑀺𑀧𑀯𑀢𑁆𑀢𑀺𑀓𑀸𑀮𑁂.

𑀅𑀦𑀼𑀮𑁄𑀫𑁂𑀢𑀺 𑀥𑀫𑁆𑀫𑀸𑀦𑀼𑀮𑁄𑀫𑁂. 𑀆𑀲𑁂𑀯𑀦𑀧𑀘𑁆𑀘𑀬𑀸𑀢𑀺 𑀆𑀲𑁂𑀯𑀦𑀪𑀽𑀢𑀸 𑀧𑀘𑁆𑀘𑀬𑀸. 𑀦 𑀫𑀕𑁆𑀕𑁂 𑀅𑀫𑀕𑁆𑀕𑀧𑀘𑁆𑀘𑀬𑁂. 𑀲𑁄𑀧𑀺 𑀫𑁄𑀖𑀯𑀸𑀭𑁄 𑀮𑀩𑁆𑀪𑁂𑀬𑁆𑀬𑀸𑀢𑀺 𑀬𑀤𑀺 𑀯𑁄𑀝𑁆𑀞𑀩𑁆𑀩𑀦𑀫𑁆𑀧𑀺 𑀆𑀲𑁂𑀯𑀦𑀧𑀘𑁆𑀘𑀬𑁄 𑀲𑀺𑀬𑀸, 𑀬𑀣𑀸 ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀆𑀲𑁂𑀯𑀦𑀧𑀘𑁆𑀘𑀬𑀸 𑀦 (𑀧𑀝𑁆𑀞𑀸. 𑁧.𑁨.𑁩) 𑀫𑀕𑁆𑀕𑀧𑀘𑁆𑀘𑀬𑀸’’𑀢𑀺 (𑀧𑀝𑁆𑀞𑀸. 𑁧.𑁨.𑁧𑁪) 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑁂, 𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑁂 𑀘 ‘‘𑀲𑀼𑀔𑀸…𑀧𑁂… 𑀦 𑀫𑀕𑁆𑀕𑀧𑀘𑁆𑀘𑀬𑀸 𑀆𑀲𑁂𑀯𑀦𑀧𑀘𑁆𑀘𑀬𑀸’’𑀢𑀺 𑀘 𑀯𑀼𑀢𑁆𑀢𑀁 𑀳𑀲𑀺𑀢𑀼𑀧𑁆𑀧𑀸𑀤𑀘𑀺𑀢𑁆𑀢𑀯𑀲𑁂𑀦, 𑀏𑀯𑀁 𑀯𑁄𑀝𑁆𑀞𑀩𑁆𑀩𑀦𑀯𑀲𑁂𑀦 ‘‘𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘𑀸’’𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦 𑀧𑀸𑀞𑁄 𑀲𑀺𑀬𑀸, 𑀢𑀣𑀸 𑀘 𑀲𑀢𑀺 𑀯𑀸𑀭𑀤𑁆𑀯𑀬𑀯𑀲𑁂𑀦 𑀕𑀡𑀦𑀸𑀬𑀁 ‘‘𑀆𑀲𑁂𑀯𑀦𑀧𑀘𑁆𑀘𑀬𑀸 𑀦 𑀫𑀕𑁆𑀕𑁂 𑀤𑁆𑀯𑁂. 𑀦 𑀫𑀕𑁆𑀕𑀧𑀘𑁆𑀘𑀬𑀸 𑀆𑀲𑁂𑀯𑀦𑁂 𑀤𑁆𑀯𑁂’’𑀢𑀺 𑀘 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦 𑀧𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀦 𑀮𑀩𑁆𑀪𑁂𑀬𑁆𑀬𑀸𑀬𑀁 𑀫𑁄𑀖𑀯𑀸𑀭𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀯𑁄𑀝𑁆𑀞𑀩𑁆𑀩𑀦𑀫𑁆𑀧𑀺 𑀬𑀤𑀺 𑀆𑀲𑁂𑀯𑀦𑀧𑀘𑁆𑀘𑀬𑁄 𑀲𑀺𑀬𑀸, 𑀤𑀼𑀢𑀺𑀬𑀫𑁄𑀖𑀯𑀸𑀭𑁂 𑀅𑀢𑁆𑀢𑀦𑁄 𑀯𑀺𑀬 𑀢𑀢𑀺𑀬𑀘𑀢𑀼𑀢𑁆𑀣𑀯𑀸𑀭𑁂𑀲𑀼𑀧𑀺 𑀲𑀺𑀬𑀸, 𑀢𑀣𑀸 𑀲𑀢𑀺 𑀅𑀢𑁆𑀢𑀦𑀸𑀧𑀺 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀲𑀺𑀬𑀸. 𑀦 𑀳𑀺…𑀧𑁂… 𑀅𑀯𑀼𑀢𑁆𑀢𑁄 𑀅𑀢𑁆𑀣𑀺 ‘‘𑀧𑀼𑀭𑀺𑀫𑀸 𑀧𑀼𑀭𑀺𑀫𑀸 𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺𑀆𑀤𑀺𑀦𑀸 𑀅𑀦𑀯𑀲𑁂𑀲𑀢𑁄 𑀯𑀼𑀢𑁆𑀢𑀢𑁆𑀢𑀸. 𑀯𑁄𑀝𑁆𑀞𑀩𑁆𑀩𑀦𑀲𑁆𑀲…𑀧𑁂… 𑀅𑀯𑀼𑀢𑁆𑀢𑁄 ‘‘𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲 𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀅𑀓𑀼𑀲𑀮𑀲𑁆𑀲…𑀧𑁂… 𑀧𑀘𑁆𑀘𑀬𑁄’’𑀢𑀺 𑀯𑀘𑀦𑀸𑀪𑀸𑀯𑀢𑁄. 𑀦 𑀓𑁂𑀯𑀮𑀁 𑀅𑀯𑀼𑀢𑁆𑀢𑁄, 𑀅𑀣 𑀔𑁄 𑀓𑀼𑀲𑀮𑀁…𑀧𑁂… 𑀧𑀝𑀺𑀓𑁆𑀔𑀺𑀢𑁆𑀢𑁄𑀯. 𑀅𑀣𑀸𑀧𑀺 𑀲𑀺𑀬𑀸𑀢𑀺𑀆𑀤𑀺 𑀫𑀕𑁆𑀕𑀲𑁄𑀥𑀦𑀢𑁆𑀣𑀫𑁂𑀯 𑀯𑀼𑀘𑁆𑀘𑀢𑀺. 𑀲𑀫𑀸𑀦𑀯𑁂𑀤𑀦𑀸𑀦𑀁 𑀏𑀯 𑀆𑀲𑁂𑀯𑀦𑀧𑀘𑁆𑀘𑀬𑀪𑀸𑀯𑀲𑁆𑀲 𑀤𑀲𑁆𑀲𑀦𑀢𑁄 ‘‘𑀅𑀲𑀫𑀸𑀦𑀯𑁂𑀤𑀦𑀸𑀦𑀁 𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀁 ‘‘𑀆𑀲𑁂𑀯𑀦 𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀧𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀲𑀫𑀸𑀦𑀯𑁂𑀤𑀦𑀸𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀪𑀺𑀦𑁆𑀦𑀚𑀸𑀢𑀺𑀓𑀲𑁆𑀲 𑀘𑀸𑀢𑀺 𑀘-𑀲𑀤𑁆𑀤𑁄 𑀅𑀪𑀺𑀦𑁆𑀦𑀯𑁂𑀤𑀦𑀲𑁆𑀲 𑀘𑀸𑀢𑀺 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀯𑁂𑀤𑀦𑀸𑀢𑁆𑀢𑀺𑀓𑁂𑀧𑀺 𑀯𑁄𑀝𑁆𑀞𑀩𑁆𑀩𑀦𑀲𑁆𑀲 𑀆𑀲𑁂𑀯𑀦𑀧𑀘𑁆𑀘𑀬𑀢𑁆𑀢𑀲𑁆𑀲 𑀅𑀪𑀸𑀯𑀸𑀢𑀺 𑀬𑁄𑀚𑀦𑀸. 𑀓𑀼𑀲𑀮𑀢𑁆𑀢𑀺𑀓𑀸𑀤𑀻𑀲𑀼 𑀬𑀣𑀸𑀤𑀲𑁆𑀲𑀺𑀢𑀧𑀸𑀴𑀺𑀧𑁆𑀧𑀤𑁂𑀲𑁂𑀲𑀼𑀧𑀻𑀢𑀺 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄 𑀧𑀺-𑀲𑀤𑁆𑀤𑁄. 𑀕𑀡𑀦𑀸𑀬 𑀓𑀸𑀭𑀡𑀪𑀽𑀢𑀸𑀬 𑀕𑀡𑀦𑀸𑀬 𑀦𑀺𑀤𑁆𑀥𑀸𑀭𑀺𑀬𑀫𑀸𑀦𑀸𑀬 𑀲𑀢𑀺 𑀕𑀡𑀦𑀸𑀬 𑀯𑀸 𑀅𑀩𑁆𑀪𑀦𑁆𑀢𑀭𑁂. 𑀤𑀼𑀢𑀺𑀬𑁄 𑀫𑁄𑀖𑀯𑀸𑀭𑁄 𑀯𑀻𑀫𑀁𑀲𑀺𑀢𑀩𑁆𑀩𑁄𑀢𑀺 𑀆𑀲𑁂𑀯𑀦𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀸 𑀚𑀯𑀦𑀝𑁆𑀞𑀸𑀦𑁂 𑀞𑀸𑀢𑀼𑀁 𑀦 𑀬𑀼𑀚𑁆𑀚𑀢𑀺. 𑀦 𑀳𑀺 𑀯𑀺𑀦𑀸 𑀆𑀲𑁂𑀯𑀦𑀁 𑀚𑀯𑀦𑀧𑁆𑀧𑀯𑀢𑁆𑀢𑀺 𑀅𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀧𑀺𑀘𑁂𑀢𑁆𑀣 ‘‘𑀬𑀁 𑀚𑀯𑀦𑀪𑀸𑀯𑀧𑁆𑀧𑀢𑁆𑀢𑀁, 𑀢𑀁 𑀙𑀺𑀦𑁆𑀦𑀫𑀽𑀮𑀓𑀭𑀼𑀓𑁆𑀔𑀧𑀼𑀧𑁆𑀨𑀁 𑀯𑀺𑀬𑀸’’𑀢𑀺 (𑀥. 𑀲. 𑀅𑀝𑁆𑀞. 𑁫𑁬𑁬) 𑀯𑀓𑁆𑀔𑀫𑀸𑀦𑀢𑁆𑀢𑀸 𑀅𑀦𑀼𑀧𑀘𑁆𑀙𑀺𑀦𑁆𑀦𑀪𑀯𑀫𑀽𑀮𑀸𑀦𑀁 𑀧𑀯𑀢𑁆𑀢𑀫𑀸𑀦𑀲𑁆𑀲 𑀯𑁄𑀝𑁆𑀞𑀩𑁆𑀩𑀦𑀲𑁆𑀲 𑀓𑀺𑀭𑀺𑀬𑀪𑀸𑀯𑁄 𑀦 𑀲𑀺𑀬𑀸, 𑀯𑀼𑀢𑁆𑀢𑁄 𑀘 ‘‘𑀬𑀲𑁆𑀫𑀺𑀁 𑀲𑀫𑀬𑁂 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀉𑀧𑁆𑀧𑀦𑁆𑀦𑀸 𑀳𑁄𑀢𑀺 𑀓𑀺𑀭𑀺𑀬𑀸 𑀦𑁂𑀯 𑀓𑀼𑀲𑀮𑀸 𑀦𑀸𑀓𑀼𑀲𑀮𑀸 𑀦 𑀘 𑀓𑀫𑁆𑀫𑀯𑀺𑀧𑀸𑀓𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀸’’𑀢𑀺, 𑀢𑀲𑁆𑀫𑀸 ‘‘𑀚𑀯𑀦𑀝𑁆𑀞𑀸𑀦𑁂 𑀞𑀢𑁆𑀯𑀸𑀢𑀺 𑀚𑀯𑀦𑀲𑁆𑀲 𑀉𑀧𑁆𑀧𑀚𑁆𑀚𑀦𑀝𑁆𑀞𑀸𑀦𑁂 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀺𑀢𑁆𑀯𑀸, 𑀦 𑀚𑀯𑀦𑀪𑀸𑀯𑁂𑀦𑀸’’𑀢𑀺, ‘‘𑀆𑀲𑁂𑀯𑀦𑀁 𑀮𑀪𑀺𑀢𑁆𑀯𑀸𑀢𑀺 𑀘 𑀆𑀲𑁂𑀯𑀦𑀁 𑀯𑀺𑀬 𑀆𑀲𑁂𑀯𑀦’’𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑁂 𑀦 𑀓𑁄𑀘𑀺 𑀯𑀺𑀭𑁄𑀥𑁄, 𑀯𑀺𑀧𑁆𑀨𑀸𑀭𑀺𑀓𑀲𑁆𑀲 𑀧𑀦 𑀲𑀢𑁄 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀺𑀬𑁂𑀯𑁂𑀢𑁆𑀣 𑀆𑀲𑁂𑀯𑀦𑀲𑀤𑀺𑀲𑀢𑀸. 𑀯𑀺𑀧𑁆𑀨𑀸𑀭𑀺𑀓𑀢𑀸𑀬 𑀳𑀺 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀢𑁆𑀢𑀜𑁆𑀘𑀲𑁆𑀲 𑀯𑀼𑀘𑁆𑀘𑀢𑀺. 𑀯𑀺𑀧𑁆𑀨𑀸𑀭𑀺𑀓𑀫𑁆𑀧𑀺 𑀚𑀯𑀦𑀁 𑀯𑀺𑀬 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀅𑀧𑁆𑀧𑀯𑀢𑁆𑀢𑀺𑀬𑀸 𑀤𑀼𑀩𑁆𑀩𑀮𑀢𑁆𑀢𑀸 𑀦 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀆𑀲𑁂𑀯𑀦𑀧𑀘𑁆𑀘𑀬𑀪𑀸𑀯𑁂𑀦 𑀧𑀯𑀢𑁆𑀢𑁂𑀬𑁆𑀬𑀸𑀢𑀺 𑀦 𑀇𑀫𑀲𑁆𑀲 𑀧𑀸𑀞𑁂 𑀆𑀲𑁂𑀯𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀧𑀭𑀺𑀬𑀸𑀬𑀢𑁄 𑀯𑀼𑀢𑁆𑀢𑀁 𑀬𑀣𑀸 ‘‘𑀨𑀮𑀘𑀺𑀢𑁆𑀢𑁂𑀲𑀼 𑀫𑀕𑁆𑀕𑀗𑁆𑀕𑀁 𑀫𑀕𑁆𑀕𑀧𑀭𑀺𑀬𑀸𑀧𑀦𑁆𑀦’’𑀦𑁆𑀢𑀺. 𑀅𑀬𑀫𑁂𑀢𑁆𑀣 𑀅𑀢𑁆𑀢𑀦𑁄𑀫𑀢𑀺. 𑀅𑀬𑀫𑁆𑀧𑀺 𑀧𑁄𑀭𑀸𑀡𑀓𑁂𑀳𑀺 𑀅𑀲𑀁𑀯𑀡𑁆𑀡𑀺𑀢𑀢𑁆𑀢𑀸 𑀲𑀸𑀥𑀼𑀓𑀁 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑁄.

𑀏𑀯𑀜𑁆𑀘 𑀓𑀢𑁆𑀯𑀸𑀢𑀺 𑀯𑁄𑀝𑁆𑀞𑀩𑁆𑀩𑀦𑀸𑀯𑀚𑁆𑀚𑀦𑀸𑀦𑀁 𑀅𑀦𑀢𑁆𑀣𑀦𑁆𑀢𑀭𑀪𑀸𑀯𑀢𑁄 ‘‘𑀆𑀯𑀚𑁆𑀚𑀦𑀸’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀁, 𑀯𑁄𑀝𑁆𑀞𑀩𑁆𑀩𑀦𑀝𑁆𑀞𑀸𑀦𑁂𑀧𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀯𑁄𑀝𑁆𑀞𑀩𑁆𑀩𑀦𑀁 𑀆𑀯𑀚𑁆𑀚𑀦𑀸𑀬𑁂𑀯 𑀅𑀢𑁆𑀣𑀢𑁄 𑀉𑀧𑁂𑀓𑁆𑀔𑀸𑀲𑀳𑀕𑀢𑀸𑀳𑁂𑀢𑀼𑀓𑀓𑀺𑀭𑀺𑀬𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀪𑀸𑀯𑀢𑁄, 𑀢𑀲𑁆𑀫𑀸. 𑀢𑀁 𑀆𑀯𑀚𑁆𑀚𑀦𑀸 𑀯𑀺𑀬 𑀲𑀢𑀺 𑀉𑀧𑁆𑀧𑀢𑁆𑀢𑀺𑀬𑀁 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑀚𑀯𑀦𑀸𑀦𑀁 𑀏𑀓𑀦𑁆𑀢𑀢𑁄 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑁂𑀦𑁂𑀯 𑀯𑀢𑁆𑀢𑁂𑀬𑁆𑀬, 𑀦𑁄 𑀅𑀜𑁆𑀜𑀣𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀯𑁄𑀝𑁆𑀞𑀩𑁆𑀩𑀦𑀢𑁄’’𑀢𑀺𑀆𑀤𑀺𑀫𑀸𑀳. 𑀘𑀢𑀼𑀦𑁆𑀦𑀦𑁆𑀢𑀺 𑀫𑀼𑀜𑁆𑀙𑀸𑀫𑀭𑀡𑀸𑀲𑀦𑁆𑀦𑀯𑁂𑀮𑀸𑀤𑀻𑀲𑀼 𑀫𑀦𑁆𑀤𑀻𑀪𑀽𑀢𑀯𑁂𑀕𑀢𑀸𑀬 𑀘𑀢𑁆𑀢𑀸𑀭𑀺𑀧𑀺 𑀚𑀯𑀦𑀸𑀦𑀺 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁. 𑀅𑀬𑀫𑁂𑀢𑀲𑁆𑀲 𑀲𑀪𑀸𑀯𑁄𑀢𑀺 𑀆𑀭𑀫𑁆𑀫𑀡𑀫𑀼𑀔𑁂𑀦𑀧𑀺 𑀘𑀺𑀢𑁆𑀢𑀦𑀺𑀬𑀸𑀫𑀁𑀬𑁂𑀯 𑀤𑀲𑁆𑀲𑁂𑀢𑀺. 𑀬𑀤𑀺𑀧𑀺 ‘‘𑀚𑀯𑀦𑀸𑀧𑀸𑀭𑀺𑀧𑀽𑀭𑀺𑀬𑀸…𑀧𑁂… 𑀬𑀼𑀢𑁆𑀢𑁄’’𑀢𑀺 𑀯𑀼𑀢𑁆𑀢𑀁, ‘‘𑀆𑀯𑀚𑁆𑀚𑀦𑀸𑀤𑀻𑀦𑀁 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀦 𑀲𑀓𑁆𑀓𑁄𑀢𑀻’’𑀢𑀺 𑀧𑀦 𑀯𑀼𑀢𑁆𑀢𑀢𑁆𑀢𑀸 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀧𑀞𑀫𑀫𑁄𑀖𑀯𑀸𑀭𑀢𑁄 𑀏𑀢𑀲𑁆𑀲 𑀦 𑀓𑁄𑀘𑀺 𑀯𑀺𑀲𑁂𑀲𑁄. 𑀢𑁂𑀦𑁂𑀯𑀸𑀳 ‘‘𑀅𑀬𑀫𑁆𑀧𑀺…𑀧𑁂… 𑀭𑁂𑀢𑀩𑁆𑀩𑁄’’𑀢𑀺. 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑁂𑀬𑁂𑀯 𑀧𑀯𑀢𑁆𑀢𑀺𑀬𑀁 ‘‘𑀪𑀯𑀗𑁆𑀕’’𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑁂 𑀦 𑀢𑀲𑁆𑀲 𑀳𑁂𑀢𑀼𑀯𑀲𑁂𑀦 𑀪𑁂𑀤𑁄𑀢𑀺 ‘‘𑀲𑀳𑁂𑀢𑀼𑀓𑀁 𑀪𑀯𑀗𑁆𑀕𑀁 𑀅𑀳𑁂𑀢𑀼𑀓𑀲𑁆𑀲 𑀪𑀯𑀗𑁆𑀕𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁩.𑁧.𑁧𑁦𑁨) 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀯𑀼𑀢𑁆𑀢𑀜𑁆𑀘, 𑀢𑀲𑁆𑀫𑀸 𑀲𑀳𑁂𑀢𑀼𑀓𑀁 𑀪𑀯𑀗𑁆𑀕𑀦𑁆𑀢𑀺 𑀢𑀤𑀸𑀭𑀫𑁆𑀫𑀡𑀁 𑀯𑀼𑀢𑁆𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺.

𑀲𑀪𑀸𑀯𑀓𑀺𑀘𑁆𑀘𑁂𑀳𑀺 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀧𑀘𑁆𑀘𑀬𑀪𑀸𑀯𑁄, 𑀲𑀪𑀸𑀯𑀓𑀺𑀘𑁆𑀘𑀸𑀦𑀁 𑀯𑀸 𑀨𑀮𑀪𑀽𑀢𑀸𑀦𑀁 𑀧𑀘𑁆𑀘𑀬𑀪𑀸𑀯𑁄 𑀲𑀪𑀸𑀯𑀓𑀺𑀘𑁆𑀘𑀧𑀘𑁆𑀘𑀬𑀪𑀸𑀯𑁄. 𑀅𑀧𑁆𑀧𑀝𑀺𑀲𑀺𑀤𑁆𑀥𑀁 𑀤𑀝𑁆𑀞𑀩𑁆𑀩𑀦𑁆𑀢𑀺 ‘‘𑀤𑀼𑀳𑁂𑀢𑀼𑀓𑀲𑁄𑀫𑀦𑀲𑁆𑀲𑀲𑀳𑀕𑀢𑀅𑀲𑀗𑁆𑀔𑀸𑀭𑀺𑀓𑀚𑀯𑀦𑀸𑀯𑀲𑀸𑀦𑁂 𑀏𑀯𑀸’’𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸. 𑀬𑀣𑀸 𑀘 𑀅𑀳𑁂𑀢𑀼𑀓𑀤𑀼𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀸𑀦𑀁 𑀢𑀺𑀳𑁂𑀢𑀼𑀓𑀚𑀯𑀦𑀸𑀯𑀲𑀸𑀦𑁂 𑀅𑀳𑁂𑀢𑀼𑀓𑀤𑀼𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀁 𑀅𑀧𑁆𑀧𑀝𑀺𑀲𑀺𑀤𑁆𑀥𑀁, 𑀏𑀯𑀁 𑀢𑀺𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀢𑀺𑀳𑁂𑀢𑀼𑀓𑀚𑀯𑀦𑀸𑀦𑀦𑁆𑀢𑀭𑀁 𑀤𑀼𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀁, 𑀤𑀼𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀓𑀲𑁆𑀲 𑀘 𑀤𑀼𑀳𑁂𑀢𑀼𑀓𑀸𑀦𑀦𑁆𑀢𑀭𑀁 𑀅𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀁 𑀅𑀧𑁆𑀧𑀝𑀺𑀲𑀺𑀤𑁆𑀥𑀁 𑀤𑀝𑁆𑀞𑀩𑁆𑀩𑀁. ‘‘𑀢𑀺𑀳𑁂𑀢𑀼𑀓𑀓𑀫𑁆𑀫𑀁 𑀢𑀺𑀳𑁂𑀢𑀼𑀓𑀫𑁆𑀧𑀺 𑀤𑀼𑀳𑁂𑀢𑀼𑀓𑀫𑁆𑀧𑀺 𑀅𑀳𑁂𑀢𑀼𑀓𑀫𑁆𑀧𑀺 𑀯𑀺𑀧𑀸𑀓𑀁 𑀤𑁂𑀢𑀻’’𑀢𑀺 (𑀥. 𑀲. 𑀅𑀝𑁆𑀞. 𑁪𑁯𑁮) 𑀳𑀺 𑀯𑀼𑀢𑁆𑀢𑀁. 𑀧𑀭𑀺𑀧𑀼𑀡𑁆𑀡𑀯𑀺𑀧𑀸𑀓𑀲𑁆𑀲𑀸𑀢𑀺 𑀇𑀫𑀺𑀦𑀸𑀧𑀺 𑀢𑀺𑀳𑁂𑀢𑀼𑀓𑀚𑀯𑀦𑀢𑁄 𑀬𑀣𑀸𑀯𑀼𑀢𑁆𑀢𑀢𑀤𑀸𑀭𑀫𑁆𑀫𑀡𑀲𑁆𑀲 𑀅𑀧𑁆𑀧𑀝𑀺𑀲𑀺𑀤𑁆𑀥𑀁𑀬𑁂𑀯 𑀲𑀸𑀥𑁂𑀢𑀺. 𑀦 𑀳𑀺 𑀧𑀘𑁆𑀘𑀬𑀦𑁆𑀢𑀭𑀲𑀸𑀫𑀕𑁆𑀕𑀺𑀬𑀸 𑀅𑀲𑀢𑀺 𑀢𑀤𑀸𑀭𑀫𑁆𑀫𑀡𑀁 𑀲𑀩𑁆𑀩𑀁 𑀅𑀯𑀺𑀧𑀘𑁆𑀘𑀦𑁆𑀢𑀁 𑀓𑀫𑁆𑀫𑀁 𑀧𑀭𑀺𑀧𑀼𑀡𑁆𑀡𑀯𑀺𑀧𑀸𑀓𑀁 𑀳𑁄𑀢𑀻𑀢𑀺. 𑀫𑀼𑀔𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀯 𑀬𑀣𑀸𑀯𑀼𑀢𑁆𑀢𑀢𑀤𑀸𑀭𑀫𑁆𑀫𑀡𑀧𑁆𑀧𑀯𑀢𑁆𑀢𑀺𑀬𑀸 𑀅𑀯𑀺𑀪𑀸𑀯𑀺𑀢𑀢𑁆𑀢𑀸. 𑀢𑀺𑀳𑁂𑀢𑀼𑀓𑀸𑀤𑀺𑀓𑀫𑁆𑀫𑀲𑁆𑀲 𑀳𑀺 𑀉𑀓𑁆𑀓𑀝𑁆𑀞𑀲𑁆𑀲 𑀢𑀺𑀳𑁂𑀢𑀼𑀓𑀓𑀫𑁆𑀫𑀲𑁆𑀲 𑀲𑁄𑀴𑀲, 𑀇𑀢𑀭𑀲𑁆𑀲 𑀤𑁆𑀯𑀸𑀤𑀲, 𑀉𑀓𑁆𑀓𑀝𑁆𑀞𑀲𑁆𑀲𑁂𑀯 𑀤𑀼𑀳𑁂𑀢𑀼𑀓𑀓𑀫𑁆𑀫𑀲𑁆𑀲 𑀤𑁆𑀯𑀸𑀤𑀲, 𑀇𑀢𑀭𑀲𑁆𑀲 𑀅𑀝𑁆𑀞𑀸𑀢𑀺 𑀏𑀯𑀁 𑀲𑁄𑀴𑀲𑀯𑀺𑀧𑀸𑀓𑀘𑀺𑀢𑁆𑀢𑀸𑀤𑀻𑀦𑀺 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀧𑀭𑀺𑀧𑀼𑀡𑁆𑀡𑀯𑀺𑀧𑀸𑀓𑀲𑁆𑀲 𑀧𑀝𑀺𑀲𑀦𑁆𑀥𑀺𑀚𑀦𑀓𑀓𑀫𑁆𑀫𑀲𑁆𑀲 𑀯𑀲𑁂𑀦 𑀯𑀺𑀧𑀸𑀓𑀯𑀺𑀪𑀸𑀯𑀦𑀸𑀬 𑀫𑀼𑀔𑀦𑀺𑀤𑀲𑁆𑀲𑀦𑀫𑀢𑁆𑀢𑀫𑁂𑀯𑁂𑀢𑀁, 𑀢𑀲𑁆𑀫𑀸.

𑀏𑀯𑀜𑁆𑀘 𑀓𑀢𑁆𑀯𑀸𑀢𑀺 𑀦𑀸𑀦𑀸𑀓𑀫𑁆𑀫𑀢𑁄 𑀢𑀤𑀸𑀭𑀫𑁆𑀫𑀡𑀼𑀧𑁆𑀧𑀢𑁆𑀢𑀺𑀬𑀁 𑀇𑀢𑁄 𑀅𑀜𑁆𑀜𑀣𑀸𑀧𑀺 𑀲𑀫𑁆𑀪𑀯𑀢𑁄𑀢𑀺 𑀅𑀢𑁆𑀣𑁄. ‘‘𑀉𑀧𑁂𑀓𑁆𑀔𑀸…𑀧𑁂… 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀏𑀢𑁆𑀣 𑀓𑁂𑀦 𑀓𑀺𑀘𑁆𑀘𑁂𑀦 𑀉𑀧𑁆𑀧𑀚𑁆𑀚𑀢𑀻𑀢𑀺? 𑀢𑀤𑀸𑀭𑀫𑁆𑀫𑀡𑀓𑀺𑀘𑁆𑀘𑀁 𑀢𑀸𑀯 𑀦 𑀳𑁄𑀢𑀺 𑀚𑀯𑀦𑀸𑀭𑀫𑁆𑀫𑀡𑀲𑁆𑀲 𑀅𑀦𑀸𑀮𑀫𑁆𑀩𑀡𑀢𑁄, 𑀦𑀸𑀧𑀺 𑀲𑀦𑁆𑀢𑀻𑀭𑀡𑀓𑀺𑀘𑁆𑀘𑀁 𑀢𑀣𑀸 𑀅𑀧𑁆𑀧𑀯𑀢𑁆𑀢𑀦𑀢𑁄, 𑀧𑀝𑀺𑀲𑀦𑁆𑀥𑀺𑀘𑀼𑀢𑀻𑀲𑀼 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺, 𑀧𑀸𑀭𑀺𑀲𑁂𑀲𑀢𑁄 𑀪𑀯𑀗𑁆𑀕𑀓𑀺𑀘𑁆𑀘𑀦𑁆𑀢𑀺 𑀬𑀼𑀢𑁆𑀢𑀁 𑀲𑀺𑀬𑀸. 𑀦 𑀳𑀺 𑀧𑀝𑀺𑀲𑀦𑁆𑀥𑀺𑀪𑀽𑀢𑀁𑀬𑁂𑀯 𑀘𑀺𑀢𑁆𑀢𑀁 ‘‘𑀪𑀯𑀗𑁆𑀕’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺.

𑀢𑀦𑁆𑀦𑀺𑀦𑁆𑀦𑀦𑁆𑀢𑀺 𑀆𑀧𑀸𑀣𑀕𑀢𑀯𑀺𑀲𑀬𑀦𑀺𑀦𑁆𑀦𑀁 𑀆𑀯𑀚𑁆𑀚𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑀲𑁆𑀲 𑀯𑀺𑀬 𑀧𑀞𑀫𑀚𑁆𑀛𑀸𑀦𑀸𑀤𑀺𑀓𑀲𑁆𑀲 𑀯𑀺𑀬. 𑀏𑀢𑀲𑁆𑀲𑀧𑀺 𑀲𑀸𑀯𑀚𑁆𑀚𑀦𑀢𑀸𑀬 𑀪𑀯𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀢𑀤𑀢𑁆𑀣𑀸𑀢𑀺 𑀏𑀢𑁆𑀣 𑀢𑀁-𑀲𑀤𑁆𑀤𑁂𑀦 𑀦𑀺𑀭𑁄𑀥𑀁 𑀧𑀘𑁆𑀘𑀸𑀫𑀲𑀢𑀺. 𑀉𑀧𑁆𑀧𑀢𑁆𑀢𑀺𑀬𑀸𑀢𑀺 𑀉𑀧𑁆𑀧𑀢𑁆𑀢𑀺𑀢𑁄. 𑀢𑀦𑁆𑀢𑀺 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀁. 𑀢𑀲𑁆𑀲 𑀦𑀺𑀭𑁄𑀥𑀲𑁆𑀲. 𑀢𑀣𑀸 𑀘 𑀉𑀧𑁆𑀧𑀚𑁆𑀚𑀢𑀻𑀢𑀺 ‘‘𑀅𑀦𑀦𑁆𑀢𑀭𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀯𑀺𑀯𑀭𑀢𑀺. 𑀬𑀣𑀸𑀯𑀼𑀢𑁆𑀢𑀸 𑀯𑀼𑀢𑁆𑀢𑀧𑁆𑀧𑀓𑀸𑀭𑀸. 𑀯𑁄𑀤𑀸𑀦𑀁 𑀤𑀼𑀢𑀺𑀬𑀫𑀕𑁆𑀕𑀸𑀤𑀻𑀦𑀁 𑀧𑀼𑀭𑁂𑀘𑀸𑀭𑀺𑀓𑀜𑀸𑀡𑀁. 𑀏𑀢𑁂𑀲𑀦𑁆𑀢𑀺 𑀅𑀭𑀺𑀬𑀫𑀕𑁆𑀕𑀘𑀺𑀢𑁆𑀢𑀫𑀕𑁆𑀕𑀸𑀦𑀦𑁆𑀢𑀭𑀨𑀮𑀘𑀺𑀢𑁆𑀢𑀸𑀦𑀁. 𑀏𑀢𑀲𑁆𑀲𑀸𑀢𑀺 𑀬𑀣𑀸𑀯𑀼𑀢𑁆𑀢𑀯𑀺𑀧𑀸𑀓𑀘𑀺𑀢𑁆𑀢𑀲𑁆𑀲.

𑀉𑀧𑀦𑀺𑀲𑁆𑀲𑀬𑀢𑁄 𑀢𑀲𑁆𑀲𑁂𑀯 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀯𑀺𑀧𑀸𑀓𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀘𑀓𑁆𑀔𑀸𑀤𑀻𑀦𑀁 𑀤𑀲𑁆𑀲𑀦𑀸𑀤𑀺𑀅𑀢𑁆𑀣𑀢𑁄 𑀤𑀲𑁆𑀲𑀦𑀸𑀤𑀺𑀨𑀮𑀢𑁄, 𑀤𑀲𑁆𑀲𑀦𑀸𑀤𑀺𑀧𑁆𑀧𑀬𑁄𑀚𑀦𑀢𑁄 𑀯𑀸. 𑀧𑀼𑀭𑀺𑀫𑀘𑀺𑀢𑁆𑀢𑀸𑀦𑀺 𑀆𑀯𑀚𑁆𑀚𑀦𑀸𑀤𑀻𑀦𑀺. 𑀯𑀢𑁆𑀣𑀦𑁆𑀢𑀭𑀭𑀳𑀺𑀢𑀢𑁆𑀢𑁂 𑀤𑀲𑁆𑀲𑁂𑀢𑀩𑁆𑀩𑁂 𑀯𑀢𑁆𑀣𑀦𑁆𑀢𑀭𑁂 𑀯𑀺𑀬 𑀆𑀭𑀫𑁆𑀫𑀡𑀦𑁆𑀢𑀭𑁂𑀧𑀺 𑀦 𑀯𑀢𑁆𑀢𑀢𑀻𑀢𑀺 ‘‘𑀯𑀢𑁆𑀣𑀸𑀭𑀫𑁆𑀫𑀡𑀦𑁆𑀢𑀭𑀭𑀳𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀬𑀤𑀺 𑀯𑀺𑀧𑀸𑀓𑁂𑀦 𑀓𑀫𑁆𑀫𑀲𑀭𑀺𑀓𑁆𑀔𑁂𑀦𑁂𑀯 𑀪𑀯𑀺𑀢𑀩𑁆𑀩𑀁, 𑀏𑀯𑀁 𑀲𑀢𑀺 𑀇𑀫𑀲𑁆𑀫𑀺𑀁 𑀯𑀸𑀭𑁂 𑀅𑀳𑁂𑀢𑀼𑀓𑀯𑀺𑀧𑀸𑀓𑀸𑀦𑀁 𑀅𑀲𑀫𑁆𑀪𑀯𑁄 𑀏𑀯 𑀲𑀺𑀬𑀸 𑀢𑁂𑀲𑀁 𑀅𑀓𑀫𑁆𑀫𑀲𑀭𑀺𑀓𑁆𑀔𑀓𑀢𑁆𑀢𑀸𑀢𑀺 𑀇𑀫𑀫𑀢𑁆𑀣𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀅𑀳𑁂𑀢𑀼𑀓𑀸𑀦𑀁 𑀧𑀦𑀸’’𑀢𑀺. 𑀅𑀪𑀺𑀦𑀺𑀧𑀸𑀢𑀫𑀢𑁆𑀢𑀦𑁆𑀢𑀺 𑀧𑀜𑁆𑀘𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀓𑀺𑀘𑁆𑀘𑀫𑀸𑀳. 𑀢𑁂 𑀳𑀺 𑀆𑀧𑀸𑀣𑀕𑀢𑁂𑀲𑀼 𑀭𑀽𑀧𑀸𑀤𑀻𑀲𑀼 𑀅𑀪𑀺𑀦𑀺𑀧𑀸𑀢𑀦𑀫𑀢𑁆𑀢𑁂𑀦𑁂𑀯 𑀯𑀢𑁆𑀢𑀦𑁆𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀻𑀦𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀓𑀼𑀲𑀮𑁂𑀲𑀼 𑀓𑀼𑀲𑀮𑀸𑀓𑀼𑀲𑀮𑀓𑀺𑀭𑀺𑀬𑁂𑀲𑀼𑀧𑀺 𑀯𑀸 𑀯𑀺𑀚𑁆𑀚𑀫𑀸𑀦𑀸 𑀲𑀲𑀗𑁆𑀔𑀸𑀭𑀺𑀓𑀸𑀲𑀗𑁆𑀔𑀸𑀭𑀺𑀓𑀢𑀸 𑀅𑀜𑁆𑀜𑀫𑀜𑁆𑀜𑀁 𑀅𑀲𑀭𑀺𑀓𑁆𑀔𑀢𑁆𑀢𑀸 𑀧𑀳𑀸𑀦𑀸𑀯𑀝𑁆𑀞𑀸𑀦𑀢𑁄 𑀘 𑀯𑀺𑀭𑀼𑀤𑁆𑀥𑀸 𑀯𑀺𑀬𑀸𑀢𑀺 𑀯𑀺𑀧𑀸𑀓𑁂𑀲𑀼 𑀲𑀸 𑀢𑀤𑀦𑀼𑀓𑀽𑀮𑀸 𑀲𑀺𑀬𑀸, 𑀲𑀸 𑀧𑀦 𑀫𑀽𑀮𑀸𑀪𑀸𑀯𑁂𑀦 𑀦 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸𑀦𑀁 𑀲𑀯𑀺𑀲𑀬𑀸𑀪𑀺𑀦𑀺𑀧𑀢𑀦𑀫𑀢𑁆𑀢𑀸𑀤𑀺𑀯𑀼𑀢𑁆𑀢𑀻𑀦𑀁 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 ‘‘𑀦 𑀲𑀲𑀗𑁆𑀔𑀸𑀭𑀺𑀓𑀯𑀺𑀭𑀼𑀤𑁆𑀥𑁄’’𑀢𑀺𑀆𑀤𑀺. 𑀉𑀪𑀬𑁂𑀦𑀧𑀺 𑀢𑁂𑀲𑀁 𑀦𑀺𑀩𑁆𑀩𑀢𑁆𑀢𑀺𑀁 𑀅𑀦𑀼𑀚𑀸𑀦𑀸𑀢𑀺 𑀬𑀣𑀸 ‘‘𑀓𑀝𑀢𑁆𑀢𑀸𑀭𑀽𑀧𑀸𑀦’’𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁄 𑀯𑀺𑀧𑀸𑀓𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁂 𑀔𑀦𑁆𑀥𑁂 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀯𑀺𑀧𑀲𑁆𑀲𑀢𑀺, 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺, 𑀢𑀁 𑀆𑀭𑀩𑁆𑀪 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺, 𑀓𑀼𑀲𑀮𑀸𑀓𑀼𑀲𑀮𑁂 𑀦𑀺𑀭𑀼𑀤𑁆𑀥𑁂’’𑀢𑀺𑀆𑀤𑀺𑀦𑀸 (𑀧𑀝𑁆𑀞𑀸. 𑁧.𑁩.𑁯𑁩) 𑀯𑀺𑀧𑀸𑀓𑀢𑁆𑀢𑀺𑀓𑁂 𑀯𑀺𑀬 𑀲𑀺𑀬𑀸 𑀓𑀼𑀲𑀮𑀢𑁆𑀢𑀺𑀓𑁂𑀧𑀺 𑀧𑀸𑀴𑀻𑀢𑀺 𑀓𑀢𑁆𑀯𑀸 ‘‘𑀓𑀼𑀲𑀮𑀢𑁆𑀢𑀺𑀓𑁂 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀺 ‘‘𑀓𑀼𑀲𑀮𑁄 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 ‘‘𑀲𑁂𑀓𑁆𑀔𑀸 𑀯𑀸 𑀧𑀼𑀣𑀼𑀚𑁆𑀚𑀦𑀸 𑀯𑀸 𑀓𑀼𑀲𑀮𑀁 𑀅𑀦𑀺𑀘𑁆𑀘𑀢𑁄 𑀤𑀼𑀓𑁆𑀔𑀢𑁄 𑀅𑀦𑀢𑁆𑀢𑀢𑁄 𑀯𑀺𑀧𑀲𑁆𑀲𑀦𑁆𑀢𑀺, 𑀓𑀼𑀲𑀮𑁂 𑀦𑀺𑀭𑀼𑀤𑁆𑀥𑁂 𑀯𑀺𑀧𑀸𑀓𑁄 𑀢𑀤𑀸𑀭𑀫𑁆𑀫𑀡𑀢𑀸 𑀉𑀧𑁆𑀧𑀚𑁆𑀚𑀢𑀺, 𑀓𑀼𑀲𑀮𑀁 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀺, 𑀢𑀁 𑀆𑀭𑀩𑁆𑀪 𑀭𑀸𑀕𑁄 𑀉𑀧𑁆𑀧𑀚𑁆𑀚𑀢𑀺, 𑀤𑀺𑀝𑁆𑀞𑀺, 𑀯𑀺𑀘𑀺𑀓𑀺𑀘𑁆𑀙𑀸, 𑀉𑀤𑁆𑀥𑀘𑁆𑀘𑀁, 𑀤𑁄𑀫𑀦𑀲𑁆𑀲𑀁 𑀉𑀧𑁆𑀧𑀚𑁆𑀚𑀢𑀺, 𑀅𑀓𑀼𑀲𑀮𑁂 𑀦𑀺𑀭𑀼𑀤𑁆𑀥𑁂 𑀯𑀺𑀧𑀸𑀓𑁄 𑀢𑀤𑀸𑀭𑀫𑁆𑀫𑀡𑀢𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀏𑀯 𑀅𑀯𑀘𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀢𑀢𑁆𑀣 𑀬𑀼𑀢𑁆𑀢𑀺𑀁 𑀤𑀲𑁆𑀲𑁂𑀢𑀺 ‘‘𑀯𑀺𑀧𑁆𑀨𑀸𑀭𑀺𑀓𑀜𑁆𑀳𑀻’’𑀢𑀺𑀆𑀤𑀺𑀦𑀸.

𑀏𑀢𑁆𑀣 𑀓𑁂𑀘𑀺 ‘‘𑀙𑀴𑀗𑁆𑀕𑀼𑀧𑁂𑀓𑁆𑀔𑀸𑀯𑀢𑁄𑀧𑀺 𑀓𑀺𑀭𑀺𑀬𑀫𑀬𑀘𑀺𑀢𑁆𑀢𑀢𑀸𑀬 𑀓𑀺𑀭𑀺𑀬𑀚𑀯𑀦𑀲𑁆𑀲 𑀯𑀺𑀧𑁆𑀨𑀸𑀭𑀺𑀓𑀓𑀺𑀭𑀺𑀬𑀪𑀸𑀯𑁄 𑀦 𑀲𑀓𑁆𑀓𑀸 𑀦𑀺𑀲𑁂𑀥𑁂𑀢𑀼𑀦𑁆𑀢𑀺 𑀦𑀺𑀤𑀲𑁆𑀲𑀦𑀪𑀸𑀯𑁂𑀦 𑀧𑀡𑁆𑀡𑀧𑀼𑀝𑀫𑀼𑀧𑀦𑀻𑀢𑀁 𑀅𑀲𑀫𑀸𑀦𑀁. 𑀓𑀺𑀭𑀺𑀬𑀚𑀯𑀦𑀸𑀦𑀦𑁆𑀢𑀭𑀁 𑀢𑀤𑀸𑀭𑀫𑁆𑀫𑀡𑀸𑀪𑀸𑀯𑀲𑁆𑀲 𑀧𑀸𑀴𑀺𑀬𑀁 𑀅𑀯𑀘𑀦𑀫𑁆𑀧𑀺 𑀅𑀓𑀸𑀭𑀡𑀁 𑀮𑀩𑁆𑀪𑀫𑀸𑀦𑀲𑁆𑀲𑀧𑀺 𑀓𑀢𑁆𑀣𑀘𑀺 𑀓𑁂𑀦𑀘𑀺 𑀅𑀥𑀺𑀧𑁆𑀧𑀸𑀬𑁂𑀦 𑀅𑀯𑀘𑀦𑀢𑁄. 𑀢𑀣𑀸 𑀳𑀺 𑀥𑀫𑁆𑀫𑀲𑀗𑁆𑀕𑀳𑁂 𑀅𑀓𑀼𑀲𑀮𑀦𑀺𑀤𑁆𑀤𑁂𑀲𑁂 𑀮𑀩𑁆𑀪𑀫𑀸𑀦𑁄𑀧𑀺 𑀅𑀥𑀺𑀧𑀢𑀺 𑀦 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀓𑀺𑀭𑀺𑀬𑀚𑀯𑀦𑀸𑀦𑀦𑁆𑀢𑀭𑀁 𑀢𑀤𑀸𑀭𑀫𑁆𑀫𑀡𑀸𑀪𑀸𑀯𑁄 𑀯𑀻𑀫𑀁𑀲𑀺𑀢𑀩𑁆𑀩𑁄’’𑀢𑀺 𑀯𑀤𑀦𑁆𑀢𑀺. 𑀲𑀢𑀺𑀧𑀺 𑀓𑀺𑀭𑀺𑀬𑀫𑀬𑀢𑁆𑀢𑁂 𑀲𑀩𑁆𑀩𑀢𑁆𑀣 𑀢𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑀸𑀦𑀁 𑀔𑀻𑀡𑀸𑀲𑀯𑀸𑀦𑀁 𑀚𑀯𑀦𑀘𑀺𑀢𑁆𑀢𑀁 𑀦 𑀇𑀢𑀭𑁂𑀲𑀁 𑀯𑀺𑀬 𑀯𑀺𑀧𑁆𑀨𑀸𑀭𑀺𑀓𑀁, 𑀲𑀦𑁆𑀢𑀲𑀪𑀸𑀯𑀢𑀸𑀬 𑀧𑀦 𑀲𑀦𑁆𑀦𑀺𑀲𑀺𑀦𑁆𑀦𑀭𑀲𑀁 𑀲𑀺𑀬𑀸𑀢𑀺 𑀢𑀲𑁆𑀲 𑀧𑀡𑁆𑀡𑀧𑀼𑀝𑀁 𑀤𑀲𑁆𑀲𑀺𑀢𑀁. 𑀥𑀫𑁆𑀫𑀲𑀗𑁆𑀕𑀳𑁂 𑀅𑀓𑀼𑀲𑀮𑀦𑀺𑀤𑁆𑀤𑁂𑀲𑁂 𑀅𑀥𑀺𑀧𑀢𑀺𑀦𑁄 𑀯𑀺𑀬 𑀧𑀝𑁆𑀞𑀸𑀦𑁂 𑀓𑀺𑀭𑀺𑀬𑀚𑀯𑀦𑀸𑀦𑀦𑁆𑀢𑀭𑀁 𑀢𑀤𑀸𑀭𑀫𑁆𑀫𑀡𑀲𑁆𑀲 𑀮𑀩𑁆𑀪𑀫𑀸𑀦𑀲𑁆𑀲 𑀅𑀯𑀘𑀦𑁂 𑀦 𑀓𑀺𑀜𑁆𑀘𑀺 𑀓𑀸𑀭𑀡𑀁 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀢𑀢𑁆𑀣 𑀅𑀝𑁆𑀞𑀓𑀣𑀸𑀬𑀁 ‘‘𑀳𑁂𑀝𑁆𑀞𑀸 𑀤𑀲𑁆𑀲𑀺𑀢𑀦𑀬𑀢𑁆𑀢𑀸’’𑀢𑀺 (𑀥. 𑀲. 𑀅𑀝𑁆𑀞. 𑁪𑁨𑁯). 𑀦 𑀘𑁂𑀢𑁆𑀣 𑀤𑀲𑁆𑀲𑀺𑀢𑀦𑀬𑀢𑁆𑀢𑀸𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑁂𑀳𑀺 𑀓𑀼𑀲𑀮𑀸𑀓𑀼𑀲𑀮𑁂𑀳𑀺 𑀅𑀢𑀁𑀲𑀪𑀸𑀯𑀸𑀦𑀁 𑀦𑀬𑀤𑀲𑁆𑀲𑀦𑀲𑁆𑀲 𑀅𑀬𑀼𑀚𑁆𑀚𑀫𑀸𑀦𑀓𑀢𑁆𑀢𑀸. 𑀅𑀧𑀺𑀘 𑀢𑀢𑁆𑀣 𑀯𑀻𑀫𑀁𑀲𑀸𑀬 𑀓𑁂𑀲𑀼𑀘𑀺 𑀲𑀩𑁆𑀩𑁂𑀲𑀜𑁆𑀘 𑀅𑀥𑀺𑀧𑀢𑀻𑀦𑀁 𑀅𑀪𑀸𑀯𑀢𑁄 𑀏𑀓𑀭𑀲𑀁 𑀤𑁂𑀲𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀉𑀤𑁆𑀥𑀝𑁄’’𑀢𑀺 𑀘 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀇𑀥 𑀧𑀦 𑀦 𑀢𑀸𑀤𑀺𑀲𑀁 𑀅𑀯𑀘𑀦𑁂 𑀓𑀸𑀭𑀡𑀁 𑀮𑀩𑁆𑀪𑀢𑀻𑀢𑀺 ‘‘𑀅𑀯𑀘𑀦𑁂 𑀓𑀸𑀭𑀡𑀁 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁.

𑀅𑀥𑀺𑀧𑁆𑀧𑀸𑀬𑁂𑀦𑀸𑀢𑀺 𑀅𑀓𑀼𑀲𑀮𑀸𑀦𑀦𑁆𑀢𑀭𑀁 𑀲𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀁 𑀦𑀢𑁆𑀣𑀻𑀢𑀺 𑀢𑀲𑁆𑀲 𑀣𑁂𑀭𑀲𑁆𑀲 𑀫𑀢𑀺𑀫𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. ‘‘𑀓𑀼𑀲𑀮𑀸𑀓𑀼𑀲𑀮𑁂 𑀦𑀺𑀭𑀼𑀤𑁆𑀥𑁂 𑀲𑀳𑁂𑀢𑀼𑀓𑁄 𑀯𑀺𑀧𑀸𑀓𑁄 𑀢𑀤𑀸𑀭𑀫𑁆𑀫𑀡𑀢𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀧𑀝𑁆𑀞𑀸. 𑁩.𑁧.𑁯𑁮) 𑀯𑀘𑀦𑀢𑁄 𑀧𑀦 𑀅𑀓𑀼𑀲𑀮𑀸𑀦𑀦𑁆𑀢𑀭𑀁 𑀲𑀳𑁂𑀢𑀼𑀓𑀢𑀤𑀸𑀭𑀫𑁆𑀫𑀡𑀫𑁆𑀧𑀺 𑀯𑀺𑀚𑁆𑀚𑀢𑀺𑀬𑁂𑀯𑀸𑀢𑀺 𑀉𑀧𑁆𑀧𑀢𑁆𑀢𑀺𑀁 𑀯𑀤𑀦𑁆𑀢𑀲𑁆𑀲 𑀬𑀼𑀢𑁆𑀢𑀕𑁆𑀕𑀳𑀡𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀦 𑀏𑀢𑁆𑀣 𑀓𑀸𑀭𑀡𑀁 𑀤𑀺𑀲𑁆𑀲𑀢𑀻𑀢𑀺 𑀏𑀢𑁂𑀦 𑀢𑀺𑀳𑁂𑀢𑀼𑀓𑀚𑀯𑀦𑀸𑀦𑀦𑁆𑀢𑀭𑀁 𑀢𑀺𑀯𑀺𑀥𑀫𑁆𑀧𑀺 𑀢𑀤𑀸𑀭𑀫𑁆𑀫𑀡𑀁 𑀬𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀬𑁂𑀦 𑀅𑀥𑀺𑀧𑁆𑀧𑀸𑀬𑁂𑀦𑀸𑀢𑀺 𑀧𑀞𑀫𑀣𑁂𑀭𑁂𑀦 𑀢𑀸𑀯 𑀏𑀓𑁂𑀦 𑀓𑀫𑁆𑀫𑀼𑀦𑀸 𑀅𑀦𑁂𑀓𑀢𑀤𑀸𑀭𑀫𑁆𑀫𑀡𑀁 𑀦𑀺𑀩𑁆𑀩𑀢𑁆𑀢𑀫𑀸𑀦𑀁 𑀓𑀫𑁆𑀫𑀯𑀺𑀲𑁂𑀲𑀸𑀪𑀸𑀯𑀸 𑀢𑀁𑀢𑀁𑀚𑀯𑀦𑀲𑀗𑁆𑀔𑀸𑀢𑀧𑀘𑁆𑀘𑀬𑀯𑀺𑀲𑁂𑀲𑁂𑀦 𑀯𑀺𑀲𑀺𑀝𑁆𑀞𑀁 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 𑀚𑀯𑀦𑀯𑀲𑁂𑀦 𑀢𑀤𑀸𑀭𑀫𑁆𑀫𑀡𑀲𑁆𑀲 𑀲𑀲𑀗𑁆𑀔𑀸𑀭𑀸𑀤𑀺𑀯𑀺𑀥𑀸𑀦𑀁 𑀯𑀼𑀢𑁆𑀢𑀁, 𑀯𑀺𑀧𑀸𑀓𑁂𑀦 𑀦𑀸𑀫 𑀓𑀫𑁆𑀫𑀲𑀭𑀺𑀓𑁆𑀔𑁂𑀦 𑀪𑀯𑀺𑀢𑀩𑁆𑀩𑀁, 𑀦 𑀓𑀫𑁆𑀫𑀯𑀺𑀭𑀼𑀤𑁆𑀥𑀲𑀪𑀸𑀯𑁂𑀦. 𑀅𑀜𑁆𑀜𑀣𑀸 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑁄 𑀲𑀺𑀬𑀸𑀢𑀺 𑀏𑀯𑀫𑀥𑀺𑀧𑁆𑀧𑀸𑀬𑁂𑀦 𑀤𑀼𑀢𑀺𑀬𑀢𑁆𑀣𑁂𑀭𑁄 𑀓𑀫𑁆𑀫𑀯𑀲𑁂𑀦𑁂𑀯 𑀢𑀤𑀸𑀭𑀫𑁆𑀫𑀡𑀯𑀺𑀲𑁂𑀲𑀁 𑀆𑀳. 𑀜𑀸𑀡𑀲𑁆𑀲 𑀚𑀘𑁆𑀘𑀦𑁆𑀥𑀸𑀤𑀺𑀤𑀼𑀕𑁆𑀕𑀢𑀺𑀯𑀺𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀧𑀝𑀺𑀧𑀓𑁆𑀔𑀢𑀸 𑀯𑀺𑀬 𑀲𑀼𑀕𑀢𑀺𑀯𑀺𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀧𑀝𑀺𑀧𑀓𑁆𑀔𑀢𑀸𑀧𑀺 𑀲𑀺𑀬𑀸𑀢𑀺 𑀫𑀜𑁆𑀜𑀫𑀸𑀦𑁄 𑀢𑀢𑀺𑀬𑀢𑁆𑀣𑁂𑀭𑁄 ‘‘𑀢𑀺𑀳𑁂𑀢𑀼𑀓𑀓𑀫𑁆𑀫𑀢𑁄 𑀤𑀼𑀳𑁂𑀢𑀼𑀓𑀧𑀝𑀺𑀲𑀦𑁆𑀥𑀺𑀫𑁆𑀧𑀺 𑀦𑀸𑀦𑀼𑀚𑀸𑀦𑀸𑀢𑀻’’𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀢𑁂𑀲𑀼 𑀯𑀸𑀤𑁂𑀲𑀼 𑀅𑀥𑀺𑀧𑁆𑀧𑀸𑀬𑀸𑀯𑀺𑀭𑁄𑀥𑀯𑀲𑁂𑀦 𑀬𑀼𑀢𑁆𑀢𑀁 𑀕𑀳𑁂𑀢𑀩𑁆𑀩𑀁. 𑀫𑀳𑀸𑀧𑀓𑀭𑀡𑁂 𑀆𑀕𑀢𑀧𑀸𑀴𑀺𑀬𑀸𑀢𑀺 ‘‘𑀲𑀳𑁂𑀢𑀼𑀓𑁄 𑀥𑀫𑁆𑀫𑁄 𑀅𑀳𑁂𑀢𑀼𑀓𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁩.𑁧.𑁧𑁦𑁨) 𑀇𑀫𑀲𑁆𑀲 𑀯𑀺𑀪𑀗𑁆𑀕𑁂 ‘‘𑀲𑀳𑁂𑀢𑀼𑀓𑀁 𑀪𑀯𑀗𑁆𑀕𑀁 𑀅𑀳𑁂𑀢𑀼𑀓𑀲𑁆𑀲 𑀪𑀯𑀗𑁆𑀕𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀲𑀳𑁂𑀢𑀼𑀓𑀸 𑀔𑀦𑁆𑀥𑀸 𑀯𑀼𑀝𑁆𑀞𑀸𑀦𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀯𑀫𑀸𑀤𑀺𑀦𑀸 𑀧𑀝𑁆𑀞𑀸𑀦𑁂 𑀲𑀳𑁂𑀢𑀼𑀓𑀤𑀼𑀓𑀸𑀤𑀻𑀲𑀼 𑀆𑀕𑀢𑀧𑀸𑀴𑀺𑀬𑀸𑀢𑀺 𑀅𑀢𑁆𑀣𑁄.

𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀺𑀧𑀸𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀓𑀣𑀸𑀯𑀡𑁆𑀡𑀦𑀸

𑁪𑁯𑁯. 𑀢𑀲𑁆𑀫𑀺𑀁 𑀔𑀡𑁂 𑀯𑀺𑀚𑁆𑀚𑀫𑀸𑀦𑀸𑀦𑀁 𑀙𑀦𑁆𑀤𑀸𑀤𑀻𑀦𑀦𑁆𑀢𑀺 𑀏𑀢𑁂𑀦 𑀯𑀺𑀧𑀸𑀓𑀚𑁆𑀛𑀸𑀦𑁂 𑀤𑀼𑀓𑁆𑀔𑀸𑀧𑀝𑀺𑀧𑀤𑀸𑀤𑀺𑀪𑀸𑀯𑀲𑁆𑀲 𑀅𑀯𑀺𑀚𑁆𑀚𑀫𑀸𑀦𑀢𑀁 𑀤𑀲𑁆𑀲𑁂𑀢𑀺. 𑀦 𑀳𑀺 𑀓𑀼𑀲𑀮𑀚𑁆𑀛𑀸𑀦𑀁 𑀯𑀺𑀬 𑀯𑀺𑀧𑀸𑀓𑀚𑁆𑀛𑀸𑀦𑀁 𑀧𑀭𑀺𑀓𑀫𑁆𑀫𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀢𑀻𑀢𑀺. 𑀦 𑀘𑁂𑀢𑁆𑀣 𑀧𑀝𑀺𑀧𑀤𑀸𑀪𑁂𑀤𑁄 𑀯𑀺𑀬 𑀓𑀼𑀲𑀮𑀸𑀦𑀼𑀭𑀽𑀧𑁄 𑀯𑀺𑀧𑀸𑀓𑀲𑁆𑀲 𑀆𑀭𑀫𑁆𑀫𑀡𑀪𑁂𑀤𑁄𑀧𑀺 𑀦 𑀧𑀭𑀫𑀢𑁆𑀣𑀺𑀓𑁄 𑀲𑀺𑀬𑀸𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀏𑀓𑀦𑁆𑀢𑁂𑀦 𑀲𑀸𑀭𑀫𑁆𑀫𑀡𑀢𑁆𑀢𑀸 𑀅𑀭𑀽𑀧𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑀲𑁆𑀲 𑀘 𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑀢𑀸𑀬 𑀅𑀜𑁆𑀜𑀢𑁆𑀭𑀸𑀧𑀺 𑀯𑀺𑀚𑁆𑀚𑀫𑀸𑀦𑀢𑁆𑀢𑀸. 𑀦𑀸𑀦𑀸𑀓𑁆𑀔𑀡𑁂𑀲𑀼 𑀦𑀸𑀦𑀸𑀥𑀺𑀧𑀢𑁂𑀬𑁆𑀬𑀦𑁆𑀢𑀺 ‘‘𑀬𑀲𑁆𑀫𑀺𑀁 𑀔𑀡𑁂 𑀬𑀁 𑀛𑀸𑀦𑀁 𑀬𑀤𑀥𑀺𑀧𑀢𑀺𑀓𑀁, 𑀢𑀢𑁄 𑀅𑀜𑁆𑀜𑀲𑁆𑀫𑀺𑀁 𑀔𑀡𑁂 𑀢𑀁 𑀛𑀸𑀦𑀁 𑀏𑀓𑀦𑁆𑀢𑁂𑀦 𑀢𑀤𑀥𑀺𑀧𑀢𑀺𑀓𑀁 𑀦 𑀳𑁄𑀢𑀻’’𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑁆𑀲𑁂𑀯𑀸𑀢𑀺 𑀘 𑀧𑀝𑀺𑀧𑀤𑀸 𑀯𑀺𑀬 𑀅𑀥𑀺𑀧𑀢𑀬𑁄 𑀦 𑀏𑀓𑀦𑁆𑀢𑀺𑀓𑀸𑀢𑀺 𑀇𑀫𑀫𑁂𑀯𑀢𑁆𑀣𑀁 𑀤𑀲𑁆𑀲𑁂𑀢𑀺.

𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀯𑀺𑀧𑀸𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀓𑀣𑀸𑀯𑀡𑁆𑀡𑀦𑀸

𑁫𑁦𑁫. 𑀢𑀡𑁆𑀳𑀸𑀯𑀺𑀚𑁆𑀚𑀸𑀤𑀻𑀳𑀺 𑀆𑀳𑀺𑀢𑀯𑀺𑀲𑁂𑀲𑀁 𑀮𑁄𑀓𑀺𑀬𑀓𑀫𑁆𑀫𑀁 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀁 𑀳𑁄𑀢𑀺, 𑀦 𑀅𑀜𑁆𑀜𑀣𑀸𑀢𑀺 𑀯𑀼𑀢𑁆𑀢𑀁 ‘‘𑀢𑀡𑁆𑀳𑀸𑀤𑀻𑀳𑀺 𑀅𑀪𑀺𑀲𑀗𑁆𑀔𑀢’’𑀦𑁆𑀢𑀺. 𑀇𑀢𑀭𑀲𑁆𑀲𑀸𑀢𑀺 𑀲𑀼𑀜𑁆𑀜𑀢𑀸𑀧𑁆𑀧𑀡𑀺𑀳𑀺𑀢𑀦𑀸𑀫𑀭𑀳𑀺𑀢𑀲𑁆𑀲. 𑀬𑁄 𑀲𑀼𑀤𑁆𑀥𑀺𑀓𑀧𑀝𑀺𑀧𑀤𑀸𑀬 𑀯𑀺𑀪𑀸𑀯𑀺𑀢𑁄, 𑀬𑁄 𑀘 𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑀸𑀬𑁂𑀦 𑀅𑀦𑀺𑀫𑀺𑀢𑁆𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀢𑁂𑀦𑁂𑀯𑀸𑀳 ‘‘𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀦𑀦𑁆𑀢𑀭𑀲𑁆𑀲𑀧𑀺 𑀫𑀕𑁆𑀕𑀲𑁆𑀲𑀸’’𑀢𑀺𑀆𑀤𑀺. 𑀯𑀴𑀜𑁆𑀚𑀦…𑀧𑁂… 𑀪𑁂𑀤𑁄 𑀳𑁄𑀢𑀺 𑀫𑀕𑁆𑀕𑀸𑀕𑀫𑀦𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀫𑀕𑁆𑀕𑀸𑀦𑀦𑁆𑀢𑀭𑀨𑀮𑀘𑀺𑀢𑁆𑀢𑀲𑁆𑀫𑀺𑀁 𑀬𑁂𑀯𑀸’’𑀢𑀺 𑀯𑀘𑀦𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 ‘‘𑀲𑀼𑀜𑁆𑀜𑀢𑀸𑀤𑀺𑀦𑀸𑀫𑀮𑀸𑀪𑁂 𑀲𑀢𑀻’’𑀢𑀺 𑀲𑀸𑀲𑀗𑁆𑀓𑀁 𑀆𑀳. 𑀅𑀦𑀺𑀫𑀺𑀢𑁆𑀢𑀦𑀸𑀫𑀜𑁆𑀘 𑀮𑀪𑀢𑀺 𑀫𑀕𑁆𑀕𑀸𑀕𑀫𑀦𑀢𑁄 𑀨𑀮𑀲𑁆𑀲 𑀦𑀸𑀫𑀮𑀸𑀪𑁂 𑀯𑀺𑀲𑁂𑀲𑀸𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀸𑀤𑀺𑀲𑀸𑀬 𑀏𑀯𑀸𑀢𑀺 𑀬𑀸𑀤𑀺𑀲𑀸 𑀫𑀕𑁆𑀕𑁂 𑀲𑀤𑁆𑀥𑀸, 𑀢𑀸𑀤𑀺𑀲𑀸𑀬 𑀏𑀯 𑀨𑀮𑁂 𑀲𑀤𑁆𑀥𑀸𑀬.

𑁫𑁫𑁫. ‘‘𑀓𑀢𑀫𑁂 𑀥𑀫𑁆𑀫𑀸 𑀦𑀺𑀬𑁆𑀬𑀸𑀦𑀺𑀓𑀸? 𑀘𑀢𑁆𑀢𑀸𑀭𑁄 𑀫𑀕𑁆𑀕𑀸’’𑀢𑀺 𑀯𑀘𑀦𑀢𑁄 (𑀥. 𑀲. 𑁧𑁨𑁯𑁫, 𑁧𑁬𑁦𑁯) 𑀅𑀦𑀺𑀬𑁆𑀬𑀸𑀦𑀺𑀓𑀧𑀤𑀦𑀺𑀤𑁆𑀤𑁂𑀲𑁂 𑀘 ‘‘𑀘𑀢𑀽𑀲𑀼 𑀪𑀽𑀫𑀻𑀲𑀼 𑀯𑀺𑀧𑀸𑀓𑁄’’𑀢𑀺 (𑀥. 𑀲. 𑁧𑁬𑁧𑁦) 𑀯𑀼𑀢𑁆𑀢𑀢𑁆𑀢𑀸 𑀦 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀨𑀮𑀁 𑀦𑀺𑀬𑁆𑀬𑀸𑀦𑀲𑀪𑀸𑀯𑀁, 𑀦𑀺𑀬𑁆𑀬𑀸𑀦𑀲𑀪𑀸𑀯𑀲𑁆𑀲 𑀧𑀦 𑀯𑀺𑀧𑀸𑀓𑁄 𑀓𑀺𑀮𑁂𑀲𑀸𑀦𑀁 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀧𑁆𑀧𑀳𑀸𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑁄 𑀧𑀭𑀺𑀬𑀸𑀬𑀢𑁄 𑀢𑀣𑀸 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀦𑀺𑀬𑁆𑀬𑀸𑀦𑀺𑀓𑀲𑀪𑀸𑀯𑀲𑁆𑀲𑀸’’𑀢𑀺𑀆𑀤𑀺. 𑀧𑀜𑁆𑀘𑀗𑁆𑀕𑀺𑀓𑁄 𑀘𑀸𑀢𑀺 𑀏𑀢𑁂𑀦 𑀫𑀕𑁆𑀕𑀯𑀺𑀪𑀗𑁆𑀕𑁂 𑀲𑀩𑁆𑀩𑀯𑀸𑀭𑁂𑀲𑀼𑀧𑀺 𑀨𑀮𑀲𑁆𑀲 𑀫𑀕𑁆𑀕𑀧𑀭𑀺𑀬𑀸𑀬𑁄 𑀆𑀕𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀳𑀺 𑀅𑀭𑀺𑀬𑀫𑀕𑁆𑀕𑀓𑁆𑀔𑀡𑁂 𑀯𑀺𑀚𑁆𑀚𑀫𑀸𑀦𑀸𑀲𑀼𑀧𑀺 𑀯𑀺𑀭𑀢𑀻𑀲𑀼 𑀢𑀤𑀯𑀲𑀺𑀝𑁆𑀞𑀸𑀦𑀁 𑀧𑀜𑁆𑀘𑀦𑁆𑀦𑀁 𑀓𑀸𑀭𑀸𑀧𑀓𑀗𑁆𑀕𑀸𑀦𑀁 𑀅𑀢𑀺𑀭𑁂𑀓𑀓𑀺𑀘𑁆𑀘𑀢𑀸𑀤𑀲𑁆𑀲𑀦𑀢𑁆𑀣𑀁 𑀧𑀸𑀴𑀺𑀬𑀁 𑀧𑀜𑁆𑀘𑀗𑁆𑀕𑀺𑀓𑁄𑀧𑀺 𑀫𑀕𑁆𑀕𑁄 𑀉𑀤𑁆𑀥𑀝𑁄𑀢𑀺. 𑀏𑀯𑀁 𑀩𑁄𑀚𑁆𑀛𑀗𑁆𑀕𑀸𑀧𑀻𑀢𑀺 𑀬𑀣𑀸 𑀫𑀕𑁆𑀕𑁄, 𑀏𑀯𑀁 𑀫𑀕𑁆𑀕𑀩𑁄𑀚𑁆𑀛𑀗𑁆𑀕𑀯𑀺𑀪𑀗𑁆𑀕𑁂𑀲𑀼 𑀨𑀮𑁂𑀲𑀼 𑀘 𑀩𑁄𑀚𑁆𑀛𑀗𑁆𑀕𑀸 𑀉𑀤𑁆𑀥𑀝𑀸𑀢𑀺 𑀅𑀢𑁆𑀣𑁄.

𑀮𑁄𑀓𑀼𑀢𑁆𑀢𑀭𑀯𑀺𑀧𑀸𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀓𑀣𑀸𑀯𑀡𑁆𑀡𑀦𑀸

𑁫𑁬𑁮. 𑀧𑀼𑀭𑀺𑀫𑀸 𑀧𑀯𑀢𑁆𑀢𑀻𑀢𑀺 𑀫𑀳𑀸𑀓𑀺𑀭𑀺𑀬𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀁 𑀆𑀳. 𑀢𑀸𑀬 𑀳𑀺 𑀔𑀻𑀡𑀸𑀲𑀯𑁄 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀢𑁂𑀦𑁂𑀯𑀸𑀳 ‘‘𑀇𑀤𑀁 𑀧𑀦 𑀘𑀺𑀢𑁆𑀢𑀁 𑀯𑀺𑀘𑀸𑀭𑀡𑀧𑀜𑁆𑀜𑀸𑀭𑀳𑀺𑀢’’𑀦𑁆𑀢𑀺. 𑀏𑀯𑀦𑁆𑀢𑀺 𑀬𑀣𑀸 𑀲𑁄𑀢𑀤𑁆𑀯𑀸𑀭𑁂, 𑀏𑀯𑀁 𑀖𑀸𑀦𑀤𑁆𑀯𑀸𑀭𑀸𑀤𑀻𑀲𑀼𑀧𑀺 𑀫𑀳𑀸𑀓𑀺𑀭𑀺𑀬𑀘𑀺𑀢𑁆𑀢𑁂𑀳𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀯𑀺𑀲𑀬𑁂 𑀇𑀤𑀫𑀢𑁆𑀣𑀺𑀓𑀢𑀸𑀬 𑀧𑀭𑀺𑀘𑁆𑀙𑀺𑀦𑁆𑀦𑀸𑀬 𑀇𑀤𑀁 𑀘𑀺𑀢𑁆𑀢𑀁 𑀯𑀢𑁆𑀢𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀜𑁆𑀘𑀤𑁆𑀯𑀸𑀭𑀸𑀦𑀼𑀕𑀢𑀁 𑀳𑀼𑀢𑁆𑀯𑀸 𑀮𑀩𑁆𑀪𑀫𑀸𑀦𑀦𑁆𑀢𑀺 𑀧𑀜𑁆𑀘𑀤𑁆𑀯𑀸𑀭𑁂 𑀧𑀯𑀢𑁆𑀢𑀫𑀳𑀸𑀓𑀺𑀭𑀺𑀬𑀘𑀺𑀢𑁆𑀢𑀸𑀦𑀁 𑀧𑀺𑀝𑁆𑀞𑀺𑀯𑀝𑁆𑀝𑀓𑀪𑀸𑀯𑁂𑀦 𑀇𑀫𑀲𑁆𑀲 𑀘𑀺𑀢𑁆𑀢𑀲𑁆𑀲 𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀧𑀜𑁆𑀘𑀤𑁆𑀯𑀸𑀭𑁂 𑀏𑀯 𑀯𑀸 𑀇𑀤𑀫𑁂𑀯 𑀧𑀯𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀮𑁄𑀮𑀼𑀧𑁆𑀧…𑀧𑁂… 𑀪𑀽𑀢’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀜𑁆𑀘𑀤𑁆𑀯𑀸𑀭𑁂 𑀧𑀞𑀫𑀁 𑀇𑀫𑀺𑀦𑀸 𑀘𑀺𑀢𑁆𑀢𑁂𑀦 𑀲𑁄𑀫𑀦𑀲𑁆𑀲𑀺𑀢𑁄 𑀳𑀼𑀢𑁆𑀯𑀸 𑀧𑀘𑁆𑀙𑀸 𑀫𑀳𑀸𑀓𑀺𑀭𑀺𑀬𑀘𑀺𑀢𑁆𑀢𑁂𑀳𑀺 𑀢𑀁 𑀢𑀁 𑀅𑀢𑁆𑀣𑀁 𑀯𑀺𑀘𑀺𑀦𑁄𑀢𑀻𑀢𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄 𑀯𑀺𑀬 𑀤𑀺𑀲𑁆𑀲𑀢𑀺. 𑀧𑀼𑀩𑁆𑀩𑁂𑀬𑁂𑀯 𑀧𑀦 𑀫𑀦𑁄𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑁂𑀦 𑀧𑀥𑀸𑀦𑀲𑀸𑀭𑀼𑀧𑁆𑀧𑀝𑁆𑀞𑀸𑀦𑀸𑀤𑀺𑀁 𑀧𑀭𑀺𑀘𑁆𑀙𑀺𑀦𑁆𑀤𑀦𑁆𑀢𑀲𑁆𑀲 𑀧𑀜𑁆𑀘𑀤𑁆𑀯𑀸𑀭𑁂 𑀢𑀸𑀤𑀺𑀲𑀲𑁆𑀲𑁂𑀯 𑀢𑀸𑀤𑀺𑀲𑁂𑀲𑀼 𑀭𑀽𑀧𑀸𑀤𑀻𑀲𑀼 𑀇𑀤𑀁 𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑀻𑀢𑀺 𑀯𑀤𑀦𑁆𑀢𑀺. 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀧𑀜𑁆𑀘𑀤𑁆𑀯𑀸𑀭𑁂 𑀏𑀯 𑀧𑀯𑀢𑁆𑀢𑀁 𑀮𑁄𑀮𑀼𑀧𑁆𑀧𑀢𑀡𑁆𑀳𑀸𑀧𑀳𑀸𑀦𑀸𑀤𑀺𑀧𑀘𑁆𑀘𑀯𑁂𑀓𑁆𑀔𑀡𑀸𑀳𑁂𑀢𑀼 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑀪𑀽𑀢𑀁 𑀚𑀸𑀢𑀦𑁆𑀢𑀺 𑀏𑀯𑀁 𑀬𑁄𑀚𑁂𑀢𑁆𑀯𑀸 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀏𑀯𑀜𑁆𑀘 𑀲𑀢𑀺 𑀇𑀫𑀲𑁆𑀲 𑀘𑀺𑀢𑁆𑀢𑀲𑁆𑀲 𑀧𑀘𑁆𑀘𑀬𑀪𑀽𑀢𑀸 𑀧𑀼𑀭𑀺𑀫𑀸 𑀧𑀯𑀢𑁆𑀢𑀻𑀢𑀺 𑀇𑀤𑀫𑁆𑀧𑀺 𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀳𑁄𑀢𑀺.

𑀏𑀢𑁆𑀣 𑀘 𑀧𑀜𑁆𑀘𑀤𑁆𑀯𑀸𑀭𑁂 𑀇𑀫𑀺𑀦𑀸 𑀘𑀺𑀢𑁆𑀢𑁂𑀦 𑀲𑁄𑀫𑀦𑀲𑁆𑀲𑀼𑀧𑁆𑀧𑀸𑀤𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁, 𑀦 𑀳𑀸𑀲𑀼𑀧𑁆𑀧𑀸𑀤𑀦𑀁 𑀧𑀜𑁆𑀘𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑀸𑀦𑀁 𑀅𑀯𑀺𑀜𑁆𑀜𑀢𑁆𑀢𑀺𑀚𑀦𑀓𑀢𑁆𑀢𑀸, 𑀫𑀦𑁄𑀤𑁆𑀯𑀸𑀭𑁂 𑀧𑀦 𑀳𑀸𑀲𑀼𑀧𑁆𑀧𑀸𑀤𑀦𑀁 𑀳𑁄𑀢𑀺. 𑀢𑁂𑀦𑁂𑀯 𑀳𑀺 𑀅𑀝𑁆𑀞𑀓𑀣𑀸𑀬𑀁 𑀧𑀜𑁆𑀘𑀤𑁆𑀯𑀸𑀭𑁂 ‘‘𑀲𑁄𑀫𑀦𑀲𑁆𑀲𑀺𑀢𑁄 𑀳𑁄𑀢𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁, 𑀫𑀦𑁄𑀤𑁆𑀯𑀸𑀭𑁂 𑀘 ‘‘𑀳𑀸𑀲𑀬𑀫𑀸𑀦’’𑀦𑁆𑀢𑀺. 𑀇𑀫𑀺𑀦𑀸 𑀳𑀲𑀺𑀢𑀼𑀧𑁆𑀧𑀸𑀤𑀘𑀺𑀢𑁆𑀢𑁂𑀦 𑀧𑀯𑀢𑁆𑀢𑀺𑀬𑀫𑀸𑀦𑀫𑁆𑀧𑀺 𑀪𑀕𑀯𑀢𑁄 𑀲𑀺𑀢𑀓𑀭𑀡𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀅𑀦𑀸𑀕𑀢𑀁𑀲𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀸𑀦𑀁 𑀅𑀦𑀼𑀯𑀢𑁆𑀢𑀓𑀢𑁆𑀢𑀸 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺𑀬𑁂𑀯𑀸𑀢𑀺. 𑀏𑀯𑀁 𑀧𑀦 𑀜𑀸𑀡𑀸𑀦𑀼𑀧𑀭𑀺𑀯𑀢𑁆𑀢𑀺𑀪𑀸𑀯𑁂 𑀲𑀢𑀺 𑀦 𑀓𑁄𑀘𑀺 𑀧𑀸𑀴𑀺𑀅𑀝𑁆𑀞𑀓𑀣𑀸𑀦𑀁 𑀯𑀺𑀭𑁄𑀥𑁄, 𑀏𑀯𑀜𑁆𑀘 𑀓𑀢𑁆𑀯𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀢𑁂𑀲𑀁 𑀜𑀸𑀡𑀸𑀦𑀁 𑀘𑀺𑀡𑁆𑀡𑀧𑀭𑀺𑀬𑀦𑁆𑀢𑁂 𑀇𑀤𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀯𑀲𑁆𑀲𑀜𑁆𑀘 𑀏𑀢𑀁 𑀏𑀯𑀁 𑀇𑀘𑁆𑀙𑀺𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀆𑀯𑀚𑁆𑀚𑀦𑀘𑀺𑀢𑁆𑀢𑀲𑁆𑀲𑀧𑀺 𑀪𑀕𑀯𑀢𑁄 𑀧𑀯𑀢𑁆𑀢𑀺 𑀦 𑀬𑀼𑀚𑁆𑀚𑁂𑀬𑁆𑀬. 𑀢𑀲𑁆𑀲𑀧𑀺 𑀳𑀺 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀪𑀸𑀯𑀲𑁆𑀲 𑀦𑀺𑀘𑁆𑀙𑀺𑀢𑀢𑁆𑀢𑀸, 𑀦 𑀘 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀢𑁆𑀢𑁂 𑀢𑀁𑀲𑀫𑀼𑀝𑁆𑀞𑀺𑀢𑀸𑀬 𑀯𑀺𑀜𑁆𑀜𑀢𑁆𑀢𑀺𑀬𑀸 𑀓𑀸𑀬𑀓𑀫𑁆𑀫𑀸𑀤𑀺𑀪𑀸𑀯𑀁 𑀆𑀯𑀚𑁆𑀚𑀦𑀪𑀸𑀯𑁄 𑀯𑀺𑀩𑀦𑁆𑀥𑀢𑀻𑀢𑀺.

𑀢𑀢𑁄 𑀏𑀯𑀸𑀢𑀺 𑀫𑀽𑀮𑀸𑀪𑀸𑀯𑁂𑀦 𑀦 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀢𑁆𑀢𑀸 𑀏𑀯. ‘‘𑀅𑀳𑁂𑀢𑀼𑀓𑀸𑀦𑀁 𑀛𑀸𑀦𑀗𑁆𑀕𑀸𑀦𑀺 𑀩𑀮𑀸𑀦𑀺 𑀘𑀸’’𑀢𑀺 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄 𑀛𑀸𑀦𑀗𑁆𑀕𑀸𑀦𑀺 𑀘𑀸𑀢𑀺 𑀘-𑀲𑀤𑁆𑀤𑁄. 𑀬𑀤𑀺 𑀅𑀧𑀭𑀺𑀧𑀼𑀡𑁆𑀡𑀢𑁆𑀢𑀸 𑀩𑀮𑀪𑀸𑀯𑀲𑁆𑀲 𑀇𑀫𑀲𑁆𑀫𑀺𑀁 𑀅𑀳𑁂𑀢𑀼𑀓𑀤𑁆𑀯𑀬𑁂 𑀩𑀮𑀸𑀦𑀺 𑀅𑀦𑀼𑀤𑁆𑀤𑀺𑀝𑁆𑀞𑀸𑀦𑀺 𑀅𑀲𑀗𑁆𑀕𑀳𑀺𑀢𑀸𑀦𑀺 𑀘, 𑀅𑀣 𑀓𑀲𑁆𑀫𑀸 𑀦𑀺𑀤𑁆𑀤𑀺𑀝𑁆𑀞𑀸𑀦𑀻𑀢𑀺 𑀆𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺. 𑀲𑀫𑁆𑀫𑀸 𑀦𑀺𑀬𑁆𑀬𑀸𑀦𑀺𑀓𑀲𑀪𑀸𑀯𑀸𑀦𑀁 𑀓𑀼𑀲𑀮𑀸𑀦𑀁 𑀧𑀝𑀺𑀪𑀸𑀕𑀪𑀽𑀢𑁄 𑀯𑀺𑀧𑀸𑀓𑁄𑀧𑀺 𑀨𑀮𑀁 𑀯𑀺𑀬 𑀢𑀁𑀲𑀪𑀸𑀯𑁄 𑀲𑀺𑀬𑀸𑀢𑀺 𑀲𑀳𑁂𑀢𑀼𑀓𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺 𑀅𑀕𑁆𑀕𑀳𑁂𑀢𑁆𑀯𑀸 𑀓𑀺𑀭𑀺𑀬𑀘𑀺𑀢𑁆𑀢𑀓𑀢𑀢𑁆𑀢𑀸 𑀯𑀸 ‘‘𑀫𑀳𑀸𑀓𑀺𑀭𑀺𑀬𑀘𑀺𑀢𑁆𑀢𑁂𑀲𑀽’’𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀫𑀳𑀸𑀓𑀺𑀭𑀺𑀬𑀘𑀺𑀢𑁆𑀢𑁂𑀲𑀼𑀘𑀸𑀢𑀺 𑀘-𑀲𑀤𑁆𑀤𑁂𑀦 𑀲𑀳𑁂𑀢𑀼𑀓𑀯𑀺𑀧𑀸𑀓𑀘𑀺𑀢𑁆𑀢𑀸𑀦𑀺𑀧𑀺 𑀕𑀳𑀺𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺.

𑁫𑁭𑁪. ‘‘𑀇𑀦𑁆𑀤𑁆𑀭𑀺𑀬 …𑀧𑁂… 𑀇𑀫𑀲𑁆𑀲𑀸𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀻’’𑀢𑀺 𑀯𑀼𑀢𑁆𑀢𑀁 𑀢𑁂𑀲𑀁 𑀜𑀸𑀡𑀸𑀦𑀁 𑀓𑀸𑀫𑀸𑀯𑀘𑀭𑀢𑁆𑀢𑀸. 𑀇𑀢𑀭𑁂𑀲𑀁 𑀫𑀳𑀕𑁆𑀕𑀢𑀢𑁆𑀢𑀸 ‘‘𑀧𑀭𑀺𑀓𑀫𑁆𑀫𑀸𑀦𑀦𑁆𑀢𑀭𑀸𑀦𑀻’’𑀢𑀺 𑀯𑀼𑀢𑁆𑀢𑀁.

𑁫𑁭𑁭. 𑀆𑀳𑀺𑀢𑁄 𑀅𑀳𑀁 𑀫𑀸𑀦𑁄 𑀏𑀢𑁆𑀣𑀸𑀢𑀺 𑀅𑀢𑁆𑀢𑀸, 𑀲𑁄 𑀏𑀯 𑀪𑀯𑀢𑀺 𑀉𑀧𑁆𑀧𑀚𑁆𑀚𑀢𑀺, 𑀦 𑀧𑀭𑀧𑀭𑀺𑀓𑀧𑁆𑀧𑀺𑀢𑁄 𑀯𑀺𑀬 𑀦𑀺𑀘𑁆𑀘𑁄𑀢𑀺 𑀅𑀢𑁆𑀢𑀪𑀸𑀯𑁄. 𑀅𑀢𑁆𑀢𑀸𑀢𑀺 𑀯𑀸 𑀤𑀺𑀝𑁆𑀞𑀺𑀕𑀢𑀺𑀓𑁂𑀳𑀺 𑀕𑀳𑁂𑀢𑀩𑁆𑀩𑀸𑀓𑀸𑀭𑁂𑀦 𑀪𑀯𑀢𑀺 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀢𑀪𑀸𑀯𑁄.

𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.