𑁧. 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑀁

𑀢𑀺𑀓𑀫𑀸𑀢𑀺𑀓𑀸𑀧𑀤𑀯𑀡𑁆𑀡𑀦𑀸

𑁧. 𑀢𑁂𑀦𑀸𑀢𑀺 𑀯𑁂𑀤𑀦𑀸𑀲𑀤𑁆𑀤𑁂𑀦. 𑀲𑀩𑁆𑀩𑀧𑀤𑁂𑀳𑀻𑀢𑀺 𑀢𑀻𑀳𑀺 𑀧𑀤𑁂𑀳𑀺 𑀮𑀤𑁆𑀥𑀦𑀸𑀫𑁄 𑀳𑁄𑀢𑀺 𑀅𑀯𑀬𑀯𑀥𑀫𑁆𑀫𑁂𑀦𑀸𑀧𑀺 𑀲𑀫𑀼𑀤𑀸𑀬𑀲𑁆𑀲 𑀅𑀧𑀤𑀺𑀲𑀺𑀢𑀩𑁆𑀩𑀢𑁄 𑀬𑀣𑀸 ‘‘𑀲𑀫𑀁 𑀘𑀼𑀡𑁆𑀡’’𑀦𑁆𑀢𑀺. 𑀘𑁄𑀤𑀓𑁄 𑀬𑀣𑀸𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀅𑀧𑁆𑀧𑀝𑀺𑀧𑀚𑁆𑀚𑀫𑀸𑀦𑁄 𑀯𑀺𑀪𑀢𑁆𑀢𑀺𑀅𑀦𑁆𑀢𑀲𑁆𑀲𑁂𑀯 𑀧𑀤𑀪𑀸𑀯𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀦𑀦𑀼 𑀲𑀼𑀔𑀸𑀬𑀸’’𑀢𑀺𑀆𑀤𑀺𑀦𑀸 𑀘𑁄𑀤𑁂𑀢𑀺. 𑀇𑀢𑀭𑁄 ‘‘𑀅𑀥𑀺𑀧𑁆𑀧𑁂𑀢𑀧𑁆𑀧𑀓𑀸𑀭𑀢𑁆𑀣𑀕𑀫𑀓𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀢𑀺. 𑀢𑁂𑀦 ‘‘𑀯𑀸𑀓𑁆𑀬𑀁 𑀇𑀥 𑀧𑀤𑀦𑁆𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀳𑁂𑀢𑀼𑀧𑀤𑀲𑀳𑁂𑀢𑀼𑀓𑀧𑀤𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀦𑀳𑁂𑀢𑀼𑀧𑀤𑀅𑀳𑁂𑀢𑀼𑀓𑀧𑀤𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀧𑀤𑀸𑀦𑀺 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀫𑁆𑀧𑀺 𑀯𑀸 𑀲𑀗𑁆𑀕𑀡𑁆𑀳𑀸𑀢𑀺.

𑀉𑀪𑀬𑁂𑀓𑀧𑀤𑀯𑀲𑁂𑀦𑀸𑀢𑀺 𑀉𑀪𑀬𑀧𑀤𑀯𑀲𑁂𑀦 𑀳𑁂𑀢𑀼𑀤𑀼𑀓𑀲𑀫𑁆𑀩𑀦𑁆𑀥𑁄, 𑀏𑀓𑀧𑀤𑀯𑀲𑁂𑀦 𑀲𑀳𑁂𑀢𑀼𑀓𑀤𑀼𑀓𑀲𑀫𑁆𑀩𑀦𑁆𑀥𑁄. 𑀢𑀣𑀸𑀢𑀺 𑀉𑀪𑀬𑁂𑀓𑀧𑀤𑀯𑀲𑁂𑀦. 𑀏𑀢𑁆𑀣 𑀘 𑀲𑀳𑁂𑀢𑀼𑀓𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑀸𑀢𑀺𑀆𑀤𑀺𑀦𑀸 𑀬𑀣𑀸 𑀳𑁂𑀢𑀼𑀕𑁄𑀘𑁆𑀙𑀓𑁂 𑀧𑀞𑀫𑀤𑀼𑀓𑀲𑀫𑁆𑀩𑀦𑁆𑀥𑀸 𑀤𑀼𑀢𑀺𑀬𑀢𑀢𑀺𑀬𑀤𑀼𑀓𑀸, 𑀧𑀞𑀫𑀤𑀼𑀓𑀤𑀼𑀢𑀺𑀬𑀤𑀼𑀓𑀲𑀫𑁆𑀩𑀦𑁆𑀥𑀸 𑀘𑀢𑀼𑀢𑁆𑀣𑀙𑀝𑁆𑀞𑀤𑀼𑀓𑀸, 𑀧𑀞𑀫𑀤𑀼𑀓𑀢𑀢𑀺𑀬𑀤𑀼𑀓𑀲𑀫𑁆𑀩𑀦𑁆𑀥𑁄 𑀧𑀜𑁆𑀘𑀫𑁄 𑀤𑀼𑀓𑁄, 𑀏𑀯𑀁 𑀆𑀲𑀯𑀕𑁄𑀘𑁆𑀙𑀓𑀸𑀤𑀻𑀲𑀼𑀧𑀻𑀢𑀺 𑀦𑀬𑀁 𑀤𑀲𑁆𑀲𑁂𑀢𑀺. 𑀲𑀓𑁆𑀓𑀸 𑀳𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀢𑁂𑀲𑀼𑀧𑀺 𑀤𑀼𑀓𑀦𑁆𑀢𑀭𑀲𑀫𑁆𑀩𑀦𑁆𑀥𑁄 𑀯𑀺𑀜𑁆𑀜𑀸𑀢𑀼𑀁, 𑀓𑁂𑀯𑀮𑀁 𑀧𑀦 𑀆𑀲𑀯𑀕𑁄𑀘𑁆𑀙𑀓𑀸𑀤𑀻𑀲𑀼 𑀤𑀼𑀢𑀺𑀬𑀤𑀼𑀓𑀢𑀢𑀺𑀬𑀤𑀼𑀓𑀲𑀫𑁆𑀩𑀦𑁆𑀥𑁄 𑀑𑀲𑀸𑀦𑀤𑀼𑀓𑁄, 𑀓𑀺𑀮𑁂𑀲𑀕𑁄𑀘𑁆𑀙𑀓𑁂 𑀘 𑀤𑀼𑀢𑀺𑀬𑀘𑀢𑀼𑀢𑁆𑀣𑀤𑀼𑀓𑀲𑀫𑁆𑀩𑀦𑁆𑀥𑁄𑀢𑀺. 𑀥𑀫𑁆𑀫𑀸𑀦𑀁 𑀲𑀸𑀯𑀲𑁂𑀲𑀦𑀺𑀭𑀯𑀲𑁂𑀲𑀪𑀸𑀯𑁂𑀦 𑀢𑀺𑀓𑀤𑀼𑀓𑀸𑀦𑀁 𑀲𑀧𑁆𑀧𑀤𑁂𑀲𑀦𑀺𑀧𑁆𑀧𑀤𑁂𑀲𑀢𑀸 𑀯𑀼𑀢𑁆𑀢𑀸𑀢𑀺 𑀬𑁂𑀳𑀺 𑀢𑀺𑀓𑀤𑀼𑀓𑀸 𑀲𑀸𑀯𑀲𑁂𑀲𑀸𑀢𑀺 𑀧𑀤𑀺𑀲𑁆𑀲𑀦𑁆𑀢𑀺 𑀅𑀧𑀤𑀺𑀲𑁆𑀲𑀦𑁆𑀢𑀺, 𑀢𑁂 𑀅𑀲𑀗𑁆𑀕𑀳𑀺𑀢𑀥𑀫𑁆𑀫𑀸𑀧𑀤𑁂𑀲𑁄. 𑀏𑀯𑀁 𑀲𑀢𑀺 ‘‘𑀅𑀲𑀗𑁆𑀕𑀳𑀺𑀢𑁄’’𑀢𑀺 𑀯𑀺𑀲𑁂𑀲𑀦𑀁 𑀓𑀺𑀫𑀢𑁆𑀣𑀺𑀬𑀦𑁆𑀢𑀺? 𑀏𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀧𑀸𑀓𑀝𑀓𑀭𑀡𑀢𑁆𑀣𑀁 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀧𑀤𑀺𑀲𑁆𑀲𑀢𑀺 𑀏𑀢𑁂𑀦 𑀲𑀫𑀼𑀤𑀸𑀬𑁄𑀢𑀺 𑀧𑀤𑁂𑀲𑁄, 𑀅𑀯𑀬𑀯𑁄. ‘‘𑀲𑀸𑀫𑀜𑁆𑀜𑀚𑁄𑀢𑀦𑀸 𑀯𑀺𑀲𑁂𑀲𑁂 𑀅𑀯𑀢𑀺𑀝𑁆𑀞𑀢𑀻’’𑀢𑀺 𑀬𑀣𑀸𑀥𑀺𑀧𑁆𑀧𑁂𑀢𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀲𑀗𑁆𑀕𑀳𑀺𑀢𑁄’’𑀢𑀺 𑀆𑀳.

𑀅𑀦𑀯𑀚𑁆𑀚𑀢𑁆𑀣𑁄 𑀅𑀯𑀚𑁆𑀚𑀯𑀺𑀭𑀳𑀢𑁆𑀣𑁄. 𑀦𑀸𑀫𑀁 𑀲𑀜𑁆𑀜𑀸, 𑀓𑀺𑀭𑀺𑀬𑀸 𑀓𑀭𑀡𑀁, 𑀧𑀬𑁄𑀚𑀦𑀁 𑀭𑀣𑀭𑀣𑀗𑁆𑀕𑀯𑀺𑀪𑀸𑀯𑀦𑁂𑀦 𑀢𑁂𑀲𑀁 𑀧𑀓𑀸𑀭𑀢𑁄 𑀬𑁄𑀚𑀦𑀁. 𑀓𑀼𑀲𑁂𑀦 𑀜𑀸𑀡𑁂𑀦 𑀮𑀸𑀢𑀩𑁆𑀩𑀸𑀢𑀺 𑀓𑀼𑀲𑀮𑀸𑀢𑀺 𑀅𑀬𑀫𑀢𑁆𑀣𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀢𑀸𑀯 𑀳𑁄𑀢𑀼, 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀓𑀣𑀦𑁆𑀢𑀺 𑀆𑀳 ‘‘𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀫𑁆𑀧𑀻’’𑀢𑀺𑀆𑀤𑀺. 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀧𑀺 𑀳𑀺 𑀜𑀸𑀡𑁂𑀦𑁂𑀯 𑀧𑀯𑀢𑁆𑀢𑀺𑀬𑀦𑁆𑀢𑀺 𑀳𑀺𑀢𑀲𑀼𑀔𑀳𑁂𑀢𑀼𑀪𑀽𑀢𑀸𑀬 𑀧𑀯𑀢𑁆𑀢𑀺𑀬𑀸 𑀧𑀜𑁆𑀜𑀯𑀦𑁆𑀢𑀸𑀦𑀁 𑀧𑀝𑀺𑀧𑀢𑁆𑀢𑀺𑀪𑀸𑀯𑀢𑁄. 𑀦 𑀳𑀺 𑀅𑀦𑁆𑀢𑀭𑁂𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀓𑀼𑀲𑀮𑀼𑀧𑁆𑀧𑀢𑁆𑀢𑀺 𑀅𑀢𑁆𑀣𑀻𑀢𑀺. ‘‘𑀬𑀤𑀺 𑀓𑀼𑀲𑀮𑀲𑁆𑀲 𑀉𑀪𑀬𑀪𑀸𑀕𑀕𑀢𑀁 𑀲𑀁𑀓𑀺𑀮𑁂𑀲𑀮𑀯𑀦𑀁 𑀧𑀸𑀓𑀝𑀁 𑀲𑀺𑀬𑀸, 𑀓𑀼𑀲𑀸 𑀯𑀺𑀬 𑀮𑀼𑀦𑀦𑁆𑀢𑀻𑀢𑀺 𑀓𑀼𑀲𑀮𑀸𑀢𑀺 𑀅𑀬𑀫𑀢𑁆𑀣𑁄 𑀬𑀼𑀢𑁆𑀢𑁄 𑀲𑀺𑀬𑀸’’𑀢𑀺 𑀓𑁄𑀘𑀺 𑀯𑀤𑁂𑀬𑁆𑀬𑀸𑀢𑀺 𑀆𑀲𑀗𑁆𑀓𑀸𑀬 𑀆𑀳 ‘‘𑀲𑀫𑁆𑀫𑀧𑁆𑀧𑀥𑀸𑀦𑀤𑁆𑀯𑀬𑀁 𑀯𑀺𑀬𑀸’’𑀢𑀺.

𑀦 𑀘𑀸𑀢𑀺𑀆𑀤𑀺𑀦𑀸 ‘‘𑀲𑀪𑀸𑀯𑀁 𑀥𑀸𑀭𑁂𑀦𑁆𑀢𑀻’’𑀢𑀺 𑀏𑀢𑁆𑀣 𑀧𑀭𑀫𑀢𑁆𑀣𑀢𑁄 𑀓𑀢𑁆𑀢𑀼𑀓𑀫𑁆𑀫𑀲𑁆𑀲 𑀘 𑀪𑁂𑀤𑁄 𑀦𑀢𑁆𑀣𑀺, 𑀓𑀧𑁆𑀧𑀦𑀸𑀲𑀺𑀤𑁆𑀥𑁄 𑀏𑀯 𑀧𑀦 𑀪𑁂𑀤𑁄𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀦𑀸𑀫𑀯𑀲𑁂𑀦 𑀯𑀺𑀜𑁆𑀜𑀸𑀢𑀸𑀯𑀺𑀜𑁆𑀜𑀸𑀢𑁂𑀢𑀺 𑀬𑁂𑀲𑀁 ‘‘𑀥𑀫𑁆𑀫𑀸’’𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀅𑀯𑀺𑀜𑁆𑀜𑀸𑀢𑀸 𑀲𑀪𑀸𑀯𑀸, ‘‘𑀲𑀪𑀸𑀯𑀁 𑀥𑀸𑀭𑁂𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀘 𑀧𑀭𑀺𑀬𑀸𑀬𑁂𑀦 𑀯𑀺𑀜𑁆𑀜𑀸𑀢𑀸, 𑀢𑁂𑀲𑀁 𑀯𑀲𑁂𑀦 𑀏𑀯𑀁 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀧𑀞𑀫𑁄 𑀅𑀢𑁆𑀣𑁄 𑀲𑀗𑁆𑀔𑀢𑀸𑀲𑀗𑁆𑀔𑀢𑀥𑀫𑁆𑀫𑀯𑀲𑁂𑀦 𑀯𑀼𑀢𑁆𑀢𑁄, 𑀤𑀼𑀢𑀺𑀬𑁄 𑀲𑀗𑁆𑀔𑀢𑀯𑀲𑁂𑀦, 𑀢𑀢𑀺𑀬𑁄 𑀲𑀗𑁆𑀔𑀢𑀸𑀲𑀗𑁆𑀔𑀢𑀧𑀜𑁆𑀜𑀢𑁆𑀢𑀺𑀥𑀫𑁆𑀫𑀯𑀲𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀓𑀼𑀲𑀮𑀧𑀝𑀺𑀲𑁂𑀥𑀦𑀁 𑀓𑀼𑀲𑀮𑀸𑀪𑀸𑀯𑁄 𑀏𑀯. 𑀅𑀪𑀸𑀯𑁄 𑀳𑀺 𑀲𑀢𑁆𑀢𑀸𑀧𑀝𑀺𑀲𑁂𑀥𑁄𑀢𑀺. 𑀥𑀫𑁆𑀫𑁄𑀢𑀺 𑀲𑀪𑀸𑀯𑀥𑀫𑁆𑀫𑁄. 𑀅𑀓𑀼𑀲𑀮𑀯𑀘𑀦𑁂𑀦 𑀦 𑀓𑁄𑀘𑀺 𑀅𑀢𑁆𑀣𑁄 𑀲𑀪𑀸𑀯𑀥𑀫𑁆𑀫𑀲𑁆𑀲 𑀅𑀩𑁄𑀥𑀓𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀣 𑀲𑀺𑀬𑀸 𑀅𑀓𑀼𑀲𑀮𑀯𑀘𑀦𑁂𑀦 𑀓𑁄𑀘𑀺 𑀅𑀢𑁆𑀣𑁄 𑀅𑀲𑀪𑀸𑀯𑀥𑀫𑁆𑀫𑀩𑁄𑀥𑀓𑀢𑁆𑀢𑁂𑀧𑀺 ‘‘𑀧𑀜𑁆𑀜𑀢𑁆𑀢𑀺𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 𑀯𑀺𑀬, 𑀏𑀯𑀁 𑀲𑀢𑀺 ‘‘𑀅𑀦𑀩𑁆𑀬𑀸𑀓𑀢𑀸’’𑀢𑀺 𑀘 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀢𑁄 𑀘𑀸𑀬𑀁 𑀘𑀢𑀼𑀓𑁆𑀓𑁄 𑀆𑀧𑀚𑁆𑀚𑀢𑀺, 𑀦 𑀢𑀺𑀓𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀤𑀼𑀓𑀘𑀢𑀼𑀓𑁆𑀓𑀪𑀸𑀯𑁄 𑀅𑀦𑀩𑁆𑀬𑀸𑀓𑀢𑀯𑁄𑀳𑀸𑀭𑁄 𑀘 𑀦𑀢𑁆𑀣𑀺, 𑀲𑁄 𑀘 𑀯𑀼𑀢𑁆𑀢𑀦𑀬𑁂𑀦 𑀅𑀪𑀸𑀯𑀫𑀢𑁆𑀢𑀯𑀘𑀦𑁂 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸. 𑀲𑀪𑀸𑀯𑀥𑀸𑀭𑀡𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀥𑀸𑀭𑀻𑀬𑀦𑁆𑀢𑀺 𑀧𑀘𑁆𑀘𑀬𑁂𑀳𑀻’’𑀢𑀺 𑀅𑀬𑀫𑀢𑁆𑀣𑁄 𑀲𑀗𑁆𑀕𑀳𑀺𑀢𑁄. 𑀜𑁂𑀬𑁆𑀬𑀧𑀭𑀺𑀬𑀸𑀬𑁂𑀦 𑀧𑀦 𑀥𑀫𑁆𑀫-𑀲𑀤𑁆𑀤𑁂𑀦𑀸𑀬𑀁 𑀤𑁄𑀲𑁄𑀢𑀺 𑀦𑀦𑀼 𑀅𑀜𑁂𑀬𑁆𑀬𑀧𑀭𑀺𑀬𑀸𑀬𑁂𑀧𑀺 𑀥𑀫𑁆𑀫-𑀲𑀤𑁆𑀤𑁂 𑀦 𑀓𑁄𑀘𑀺 𑀤𑁄𑀲𑁄𑀢𑀺? 𑀦, 𑀯𑀼𑀢𑁆𑀢𑀤𑁄𑀲𑀸𑀦𑀢𑀺𑀯𑀢𑁆𑀢𑀦𑀢𑁄.

𑀧𑀸𑀭𑀺𑀲𑁂𑀲𑁂𑀦𑀸𑀢𑀺 𑀏𑀢𑁆𑀣 𑀦𑀦𑀼 𑀅𑀬𑀫𑀓𑀸𑀭𑁄 𑀦-𑀅𑀢𑁆𑀣𑀢𑁆𑀢𑀬𑀲𑁆𑀲𑁂𑀯 𑀚𑁄𑀢𑀓𑁄, 𑀅𑀣 𑀔𑁄 ‘‘𑀅𑀳𑁂𑀢𑀼𑀓𑀸 𑀥𑀫𑁆𑀫𑀸, 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄’’𑀢𑀺 𑀢𑀁𑀬𑁄𑀕𑀦𑀺𑀯𑀢𑁆𑀢𑀺𑀬𑀸, ‘‘𑀅𑀧𑁆𑀧𑀘𑁆𑀘𑀬𑀸 𑀥𑀫𑁆𑀫𑀸’’𑀢𑀺 𑀢𑀁𑀲𑀫𑁆𑀩𑀦𑁆𑀥𑀺𑀪𑀸𑀯𑀦𑀺𑀯𑀢𑁆𑀢𑀺𑀬𑀸. 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀜𑁆𑀳𑀺 𑀧𑀘𑁆𑀘𑀬𑀲𑀫𑁆𑀩𑀦𑁆𑀥𑀻𑀢𑀺 𑀅𑀧𑁆𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁆𑀢𑀸 𑀅𑀲𑀫𑁆𑀩𑀦𑁆𑀥𑀺𑀢𑀸 𑀏𑀢𑁆𑀣 𑀚𑁄𑀢𑀻𑀬𑀢𑀺. ‘‘𑀅𑀦𑀺𑀤𑀲𑁆𑀲𑀦𑀸 𑀥𑀫𑁆𑀫𑀸’’𑀢𑀺 𑀢𑀁𑀲𑀪𑀸𑀯𑀦𑀺𑀯𑀢𑁆𑀢𑀺𑀬𑀸. 𑀦𑀺𑀤𑀲𑁆𑀲𑀦𑀜𑁆𑀳𑀺 𑀤𑀝𑁆𑀞𑀩𑁆𑀩𑀢𑀸. 𑀅𑀣 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀦𑀺𑀤𑀲𑁆𑀲𑀦𑀁, 𑀢𑀕𑁆𑀕𑀬𑁆𑀳𑀪𑀸𑀯𑀦𑀺𑀯𑀢𑁆𑀢𑀺𑀬𑀸, 𑀢𑀣𑀸 ‘‘𑀅𑀦𑀸𑀲𑀯𑀸 𑀥𑀫𑁆𑀫𑀸’’𑀢𑀺. ‘‘𑀅𑀧𑁆𑀧𑀝𑀺𑀖𑀸 𑀥𑀫𑁆𑀫𑀸 𑀅𑀦𑀸𑀭𑀫𑁆𑀫𑀡𑀸 𑀥𑀫𑁆𑀫𑀸’’𑀢𑀺 𑀢𑀁𑀓𑀺𑀘𑁆𑀘𑀦𑀺𑀯𑀢𑁆𑀢𑀺𑀬𑀸. ‘‘𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑀅𑀘𑁂𑀢𑀲𑀺𑀓𑀸 𑀥𑀫𑁆𑀫𑀸’’𑀢𑀺 𑀢𑀩𑁆𑀪𑀸𑀯𑀦𑀺𑀯𑀢𑁆𑀢𑀺𑀬𑀸. 𑀢𑀤𑀜𑁆𑀜𑀢𑀸 𑀳𑀺 𑀏𑀢𑁆𑀣 𑀧𑀓𑀸𑀲𑀻𑀬𑀢𑀺. ‘‘𑀅𑀫𑀦𑀼𑀲𑁆𑀲𑁄’’𑀢𑀺 𑀢𑀩𑁆𑀪𑀸𑀯𑀫𑀢𑁆𑀢𑀦𑀺𑀯𑀢𑁆𑀢𑀺𑀬𑀸. 𑀫𑀦𑀼𑀲𑁆𑀲𑀢𑁆𑀢𑀫𑀢𑁆𑀢𑀁 𑀦𑀢𑁆𑀣𑀺 𑀅𑀜𑁆𑀜𑀁 𑀲𑀫𑀸𑀦𑀦𑁆𑀢𑀺 𑀲𑀤𑀺𑀲𑀢𑀸 𑀳𑁂𑀢𑁆𑀣 𑀲𑀽𑀘𑀺𑀬𑀢𑀺. ‘‘𑀅𑀲𑀫𑀡𑁄 𑀲𑀫𑀡𑀧𑀝𑀺𑀜𑁆𑀜𑁄 𑀅𑀧𑀼𑀢𑁆𑀢𑁄’’𑀢𑀺 𑀢𑀁𑀲𑀫𑁆𑀪𑀸𑀯𑀦𑀕𑀼𑀡𑀦𑀺𑀯𑀢𑁆𑀢𑀺𑀬𑀸. 𑀕𑀭𑀳𑀸 𑀳𑀺 𑀏𑀢𑁆𑀣 𑀜𑀸𑀬𑀢𑀺. ‘‘𑀓𑀘𑁆𑀘𑀺 𑀦𑀼 𑀪𑁄𑀢𑁄 𑀅𑀦𑀸𑀫𑀬𑀸, 𑀅𑀦𑀼𑀤𑀭𑀸 𑀓𑀜𑁆𑀜𑀸’’𑀢𑀺 𑀢𑀤𑀧𑁆𑀧𑀪𑀸𑀯𑀦𑀺𑀯𑀢𑁆𑀢𑀺𑀬𑀸. ‘‘𑀅𑀦𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸’’𑀢𑀺 𑀢𑀁𑀲𑀤𑀺𑀲𑀪𑀸𑀯𑀦𑀺𑀯𑀢𑁆𑀢𑀺𑀬𑀸. 𑀅𑀢𑀻𑀢𑀸𑀦𑀜𑁆𑀳𑀺 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀢𑁆𑀢𑀸 𑀉𑀧𑀸𑀤𑀺𑀥𑀫𑁆𑀫𑀸𑀦𑀜𑁆𑀘 𑀧𑀘𑁆𑀘𑀬𑁂𑀓𑀤𑁂𑀲𑀦𑀺𑀧𑁆𑀨𑀢𑁆𑀢𑀺𑀬𑀸 𑀆𑀭𑀤𑁆𑀥𑀼𑀧𑁆𑀧𑀸𑀤𑀪𑀸𑀯𑀢𑁄 𑀓𑀸𑀮𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀘 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀉𑀧𑁆𑀧𑀦𑁆𑀦𑀸𑀦𑀼𑀓𑀽𑀮𑀢𑀸, 𑀧𑀕𑁂𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀢𑀩𑁆𑀩𑀺𑀥𑀼𑀭𑀪𑀸𑀯𑁄 𑀏𑀢𑁆𑀣 𑀯𑀺𑀜𑁆𑀜𑀸𑀬𑀢𑀺. ‘‘𑀅𑀲𑁂𑀓𑁆𑀔𑀸 𑀥𑀫𑁆𑀫𑀸’’𑀢𑀺 𑀢𑀤𑀧𑀭𑀺𑀬𑁄𑀲𑀸𑀦𑀦𑀺𑀯𑀢𑁆𑀢𑀺𑀬𑀸. 𑀢𑀁𑀦𑀺𑀝𑁆𑀞𑀸𑀦𑀜𑁆𑀳𑁂𑀢𑁆𑀣 𑀧𑀓𑀸𑀲𑀻𑀬𑀢𑀻𑀢𑀺 𑀏𑀯𑀫𑀦𑁂𑀓𑁂𑀲𑀁 𑀅𑀢𑁆𑀣𑀸𑀦𑀁 𑀚𑁄𑀢𑀓𑁄, 𑀢𑀢𑁆𑀣 𑀓𑀺𑀁 𑀯𑀼𑀘𑁆𑀘𑀢𑁂 𑀅𑀢𑁆𑀣𑀤𑁆𑀯𑀬𑀫𑁂𑀯 𑀯𑀢𑁆𑀯𑀸 𑀧𑀸𑀭𑀺𑀲𑁂𑀲𑁂𑀦𑀸𑀢𑀺? 𑀇𑀢𑀭𑁂𑀲𑀁 𑀏𑀢𑁆𑀣 𑀲𑀼𑀯𑀺𑀤𑀽𑀭𑀪𑀸𑀯𑀢𑁄. 𑀦 𑀳𑀺 𑀓𑀼𑀲𑀮𑀯𑀺𑀧𑁆𑀧𑀬𑀼𑀢𑁆𑀢𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀅𑀓𑀼𑀲𑀮𑀪𑀸𑀯𑁄 𑀬𑀼𑀚𑁆𑀚𑀢𑀺.

𑀅𑀓𑀼𑀲𑀮𑀲𑀤𑁆𑀤𑀲𑁆𑀲 𑀉𑀘𑁆𑀘𑀸𑀭𑀡𑀸𑀦𑀦𑁆𑀢𑀭𑀁 𑀯𑀺𑀦𑁂𑀬𑁆𑀬𑀸𑀦𑀁 𑀓𑀼𑀲𑀮𑀧𑀝𑀺𑀧𑀓𑁆𑀔𑀪𑀽𑀢𑁂 𑀅𑀢𑁆𑀣𑁂 𑀧𑀝𑀺𑀧𑀢𑁆𑀢𑀺𑀪𑀸𑀯𑀢𑁄 𑀢𑀢𑁆𑀣 𑀦𑀺𑀭𑀼𑀴𑁆𑀳𑀢𑀸 𑀤𑀝𑁆𑀞𑀩𑁆𑀩𑀸. ‘‘𑀯𑀺𑀭𑀼𑀤𑁆𑀥𑀲𑀪𑀸𑀯𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁 𑀓𑀺𑀘𑁆𑀘𑀯𑀺𑀭𑁄𑀥𑀸𑀤𑀻𑀦𑀫𑁆𑀧𑀺 𑀢𑀤𑀦𑁆𑀢𑁄𑀕𑀥𑀢𑁆𑀢𑀸, 𑀯𑀺𑀭𑀼𑀤𑁆𑀥𑀲𑀪𑀸𑀯𑀢𑁆𑀢𑁂𑀧𑀺 𑀯𑀺𑀦𑀸𑀲𑀓𑀯𑀺𑀦𑀸𑀲𑀺𑀢𑀩𑁆𑀩𑀪𑀸𑀯𑁄 𑀓𑀼𑀲𑀮𑀸𑀓𑀼𑀲𑀮𑁂𑀲𑀼 𑀦𑀺𑀬𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀧𑁆𑀧𑀳𑁂𑀬𑁆𑀬𑀪𑀸𑀯𑀢𑁄’’𑀢𑀺 𑀆𑀳. 𑀇𑀢𑀭𑀣𑀸 𑀓𑀼𑀲𑀮𑀸𑀦𑀫𑁆𑀧𑀺 𑀅𑀓𑀼𑀲𑀮𑁂𑀳𑀺 𑀧𑀳𑀸𑀢𑀩𑁆𑀩𑀪𑀸𑀯𑁂 𑀅𑀘𑁆𑀘𑀦𑁆𑀢𑀁 𑀲𑀫𑀼𑀘𑁆𑀙𑀺𑀦𑁆𑀦𑀓𑀼𑀲𑀮𑀫𑀽𑀮𑀢𑁆𑀢𑀸 𑀅𑀧𑀸𑀬𑀧𑀽𑀭𑀓𑀸 𑀏𑀯 𑀲𑀢𑁆𑀢𑀸 𑀲𑀺𑀬𑀼𑀁. 𑀬𑀁 𑀧𑀦 ‘‘𑀥𑀫𑁆𑀫𑀸𑀧𑀺 𑀯𑁄, 𑀪𑀺𑀓𑁆𑀔𑀯𑁂, 𑀧𑀳𑀸𑀢𑀩𑁆𑀩𑀸’’𑀢𑀺 (𑀫. 𑀦𑀺. 𑁧.𑁨𑁪𑁦) 𑀯𑀼𑀢𑁆𑀢𑀁, 𑀢𑀁 ‘‘𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁, 𑀢𑀁 𑀧𑀚𑀳𑀣𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁩.𑁩𑁩) 𑀯𑀺𑀬 𑀢𑀤𑀸𑀭𑀫𑁆𑀫𑀡𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑀯𑀲𑁂𑀦 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀁. 𑀬𑀣𑀸𑀳 ‘‘𑀦 𑀳𑀺 𑀓𑀼𑀲𑀮𑀸 𑀅𑀓𑀼𑀲𑀮𑁂𑀳𑀺 𑀧𑀳𑀸𑀢𑀩𑁆𑀩𑀸’’𑀢𑀺 (𑀥. 𑀲. 𑀫𑀽𑀮𑀝𑀻 𑁧).

𑀨𑀲𑁆𑀲𑀸𑀤𑀺𑀯𑀘𑀦𑁂𑀳𑀺 𑀢𑀁𑀦𑀺𑀤𑁆𑀤𑁂𑀲𑀪𑀽𑀢𑁂𑀳𑀺. 𑀢𑀩𑁆𑀩𑀘𑀦𑀻𑀬𑀪𑀸𑀯𑁂𑀦𑀸𑀢𑀺 𑀢𑁂𑀳𑀺 ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸’’𑀢𑀺𑀆𑀤𑀺𑀯𑀘𑀦𑁂𑀳𑀺 𑀅𑀪𑀺𑀥𑁂𑀬𑁆𑀬𑀪𑀸𑀯𑁂𑀦. 𑀬𑀣𑀸 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀸𑀤𑀺𑀅𑀢𑁆𑀣𑀸 𑀓𑀼𑀲𑀮𑀸𑀤𑀺𑀯𑀘𑀦𑁂𑀳𑀺, 𑀏𑀯𑀁 𑀅𑀯𑀺𑀧𑀸𑀓𑀢𑁆𑀣𑀸 𑀅𑀩𑁆𑀬𑀸𑀓𑀢𑀯𑀘𑀦𑁂𑀦 𑀩𑁄𑀥𑀺𑀢𑀸 𑀏𑀯𑀸𑀢𑀺 𑀆𑀳 ‘‘𑀅𑀩𑁆𑀬𑀸𑀓𑀢𑀯𑀘𑀦𑁂𑀦𑁂𑀯 𑀘𑀸’’𑀢𑀺. 𑀓𑀸𑀭𑀡𑀁 𑀅𑀯𑀢𑁆𑀯𑀸𑀢𑀺 𑀇𑀥 𑀯𑀼𑀢𑁆𑀢𑀪𑀸𑀯𑁂𑀦 𑀅𑀦𑀼𑀯𑀢𑁆𑀢𑀫𑀸𑀦𑀢𑁆𑀢𑀸𑀢𑀺 𑀓𑀸𑀭𑀡𑀁 𑀅𑀯𑀢𑁆𑀯𑀸. 𑀅𑀜𑁆𑀜𑀸…𑀧𑁂… 𑀦𑀺𑀯𑀸𑀭𑁂𑀢𑀩𑁆𑀩𑁄𑀢𑀺 𑀏𑀢𑁂𑀦 𑀓𑀼𑀲𑀮𑀸𑀓𑀼𑀲𑀮𑀲𑀤𑁆𑀤𑀸 𑀯𑀺𑀬 𑀓𑀼𑀲𑀮𑀸𑀓𑀼𑀲𑀮𑀲𑀪𑀸𑀯𑀸𑀦𑀁 𑀢𑀤𑀼𑀪𑀬𑀯𑀺𑀧𑀭𑀻𑀢𑀲𑀪𑀸𑀯𑀸𑀦𑀁 𑀥𑀫𑁆𑀫𑀸𑀦𑀁 𑀅𑀩𑁆𑀬𑀸𑀓𑀢𑀲𑀤𑁆𑀤𑁄 𑀩𑁄𑀥𑀓𑁄𑀢𑀺 𑀤𑀲𑁆𑀲𑁂𑀢𑀺. 𑀦 𑀳𑀺 𑀅𑀯𑀺𑀧𑀸𑀓𑀯𑀘𑀦𑀁 𑀯𑀼𑀢𑁆𑀢𑀁, 𑀅𑀓𑀼𑀲𑀮𑀯𑀘𑀦𑀜𑁆𑀘 𑀅𑀯𑀼𑀢𑁆𑀢𑀁. 𑀬𑀢𑁄 𑀅𑀯𑀺𑀧𑀸𑀓𑀯𑀘𑀦𑀲𑁆𑀲 𑀅𑀥𑀺𑀓𑀢𑀪𑀸𑀯𑁄 𑀅𑀓𑀼𑀲𑀮𑀲𑁆𑀲 𑀘 𑀢𑀩𑁆𑀩𑀘𑀦𑀻𑀬𑀪𑀸𑀯𑁂𑀦 𑀅𑀓𑀣𑀺𑀢𑀪𑀸𑀯𑁄 𑀲𑀺𑀬𑀸, 𑀢𑀲𑁆𑀫𑀸 𑀦 𑀅𑀓𑀼𑀲𑀮𑀸𑀦𑀁 𑀅𑀩𑁆𑀬𑀸𑀓𑀢𑀢𑀸𑀢𑀺 𑀅𑀬𑀁 𑀅𑀓𑀼𑀲𑀮𑀸𑀦𑀁 𑀅𑀦𑀩𑁆𑀬𑀸𑀓𑀢𑀪𑀸𑀯𑁂 𑀬𑁄𑀚𑀦𑀸.

𑀢𑀁 𑀧𑀭𑀺𑀳𑀭𑀺𑀢𑀼𑀦𑁆𑀢𑀺 𑀅𑀩𑁆𑀬𑀸𑀓𑀢𑀦𑀺𑀯𑀢𑁆𑀢𑀦𑀫𑀸𑀳. 𑀬𑀤𑀺 𑀏𑀯𑀁 ‘‘𑀲𑀼𑀔𑀯𑀺𑀧𑀸𑀓𑀸𑀦𑀯𑀚𑁆𑀚𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀅𑀦𑀯𑀚𑁆𑀚𑀸 𑀳𑀺 𑀩𑁆𑀬𑀪𑀺𑀘𑀸𑀭𑀺𑀢𑀸𑀬 𑀯𑀺𑀲𑁂𑀲𑀺𑀢𑀩𑁆𑀩𑀸𑀢𑀺? 𑀦, 𑀲𑀼𑀔𑀯𑀺𑀧𑀸𑀓𑀯𑀘𑀦𑀲𑁆𑀲 𑀯𑀺𑀲𑁂𑀲𑀦𑀪𑀸𑀯𑁂𑀦 𑀅𑀕𑁆𑀕𑀳𑀺𑀢𑀢𑁆𑀢𑀸. 𑀲𑀼𑀔𑀯𑀺𑀧𑀸𑀓𑀯𑀘𑀦𑁂𑀦 𑀳𑀺 𑀓𑀼𑀲𑀮𑀪𑀸𑀯𑁂 𑀲𑀫𑀢𑁆𑀢𑁄 𑀯𑀺𑀜𑁆𑀜𑀸𑀬𑀢𑀺, 𑀅𑀦𑀯𑀚𑁆𑀚𑀯𑀘𑀦𑀁 𑀧𑀦𑁂𑀢𑁆𑀣 𑀓𑀼𑀲𑀮𑀸𑀦𑀁 𑀅𑀕𑀭𑀳𑀺𑀢𑀩𑁆𑀩𑀢𑀸𑀲𑀗𑁆𑀔𑀸𑀢𑀁 𑀓𑀜𑁆𑀘𑀺 𑀯𑀺𑀲𑁂𑀲𑀫𑀸𑀳. 𑀢𑁂𑀦𑁂𑀯 𑀘 𑀢𑀲𑁆𑀲 𑀯𑀺𑀲𑁂𑀲𑀦𑀪𑀸𑀯𑁂𑀦 𑀯𑀼𑀢𑁆𑀢𑀲𑁆𑀲 𑀧𑀯𑀢𑁆𑀢𑀺𑀲𑀼𑀔𑀢𑀸𑀤𑀺𑀤𑀲𑁆𑀲𑀦𑀪𑀸𑀯𑀁 𑀲𑀬𑀫𑁂𑀯 𑀯𑀓𑁆𑀔𑀢𑀻𑀢𑀺. 𑀫𑀦𑁄𑀲𑀫𑀸𑀘𑀸𑀭𑀯𑀺𑀲𑁂𑀲𑀪𑀽𑀢𑀸 𑀨𑀮𑀥𑀫𑁆𑀫𑀸 𑀯𑀺𑀲𑁂𑀲𑁂𑀦 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸𑀯𑀚𑁆𑀚𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀲𑀫𑀸𑀘𑀸𑀭𑀢𑁆𑀢𑀬𑀯𑀲𑁂𑀦 𑀢𑀲𑁆𑀫𑀺𑀁 𑀲𑀼𑀢𑁆𑀢𑁂 𑀅𑀦𑀯𑀚𑁆𑀚𑀥𑀫𑁆𑀫𑀸𑀦𑀁 𑀯𑀼𑀢𑁆𑀢𑀢𑁆𑀢𑀸 𑀘 𑀢𑁂 𑀅𑀦𑀯𑀲𑁂𑀲𑀢𑁄 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀭𑀳𑀺𑀢𑀸𑀯𑀚𑁆𑀚𑀫𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀅𑀯𑀚𑁆𑀚𑀯𑀺𑀦𑀸𑀲𑀦𑀪𑀸𑀯𑁄 𑀤𑀲𑁆𑀲𑀺𑀢𑁄 𑀓𑀡𑁆𑀳𑀲𑀼𑀓𑁆𑀓𑀥𑀫𑁆𑀫𑀸𑀦𑀁 𑀯𑀚𑁆𑀛𑀖𑀸𑀢𑀓𑀪𑀸𑀯𑀲𑁆𑀲 𑀦𑀺𑀬𑀢𑀢𑁆𑀢𑀸. 𑀲𑀯𑀺𑀧𑀸𑀓𑀢𑀸 𑀯𑀺𑀧𑀸𑀓𑀥𑀫𑁆𑀫𑀢𑀸. 𑀲𑀼𑀔𑁄 𑀯𑀺𑀧𑀸𑀓𑁄 𑀏𑀢𑁂𑀲𑀦𑁆𑀢𑀺 𑀲𑀼𑀔𑀯𑀺𑀧𑀸𑀓𑀸𑀢𑀺 𑀇𑀫𑀺𑀦𑀸 𑀲𑀫𑀸𑀲𑁂𑀦 𑀓𑀼𑀲𑀮𑀸𑀦𑀁 𑀲𑀼𑀔𑀯𑀺𑀧𑀸𑀓𑀯𑀦𑁆𑀢𑀢𑀸 𑀯𑀼𑀢𑁆𑀢𑀸. 𑀲𑀸 𑀘 𑀦𑁂𑀲𑀁 𑀦 𑀢𑀁𑀲𑀫𑀗𑁆𑀕𑀺𑀢𑀸𑀬 𑀅𑀲𑀳𑀯𑀢𑁆𑀢𑀦𑀢𑁄𑀢𑀺 𑀢𑀤𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀼𑀔𑀯𑀺𑀧𑀸𑀓𑀯𑀺𑀧𑀘𑁆𑀘𑀦𑀲𑀪𑀸𑀯𑀁 𑀤𑀲𑁆𑀲𑁂𑀢𑀻’’𑀢𑀺. 𑀬𑀼𑀢𑁆𑀢𑀫𑁂𑀢𑀦𑁆𑀢𑀺 𑀧𑀭𑀫𑀢𑁆𑀣𑀢𑁄 𑀪𑁂𑀤𑀸𑀪𑀸𑀯𑁂𑀧𑀺 𑀬𑀣𑀸𑀯𑀼𑀢𑁆𑀢𑀯𑀘𑀦𑀯𑀘𑀦𑀻𑀬𑀪𑀸𑀯𑀲𑀗𑁆𑀔𑀸𑀢𑁄 𑀪𑁂𑀤𑁄 𑀢𑀲𑁆𑀫𑀺𑀁 𑀅𑀪𑀺𑀥𑁂𑀬𑁆𑀬𑀢𑁆𑀣𑀪𑀽𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀉𑀧𑀘𑀸𑀭𑁂𑀦 𑀳𑁄𑀢𑀻𑀢𑀺 𑀬𑀼𑀢𑁆𑀢𑀫𑁂𑀢𑁆𑀣 𑀮𑀓𑁆𑀔𑀡𑀮𑀓𑁆𑀔𑀺𑀢𑀩𑁆𑀩𑀪𑀸𑀯𑁂𑀦 𑀪𑁂𑀤𑀯𑀘𑀦𑀁. 𑀪𑀯𑀢𑀺 𑀳𑀺 𑀲𑀤𑁆𑀤𑀢𑁆𑀣𑀯𑀺𑀲𑁂𑀲𑀫𑀢𑁆𑀢𑁂𑀦𑀧𑀺 𑀅𑀪𑀺𑀦𑁆𑀦𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑁂𑀤𑀯𑀘𑀦𑀁 𑀬𑀣𑀸 ‘‘𑀲𑀺𑀮𑀸𑀧𑀼𑀢𑁆𑀢𑀓𑀲𑁆𑀲 𑀲𑀭𑀻𑀭’’𑀦𑁆𑀢𑀺.

𑀯𑀺𑀦𑀸𑀧𑀺 𑀪𑀸𑀯𑀸𑀪𑀺𑀥𑀸𑀬𑀺𑀦𑀸 𑀲𑀤𑁆𑀤𑁂𑀦 𑀪𑀸𑀯𑀧𑁆𑀧𑀥𑀸𑀦𑁄 𑀦𑀺𑀤𑁆𑀤𑁂𑀲𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀦𑀯𑀚𑁆𑀚𑀯𑀘𑀦𑁂𑀦 𑀅𑀦𑀯𑀚𑁆𑀚𑀢𑁆𑀢𑀁 𑀆𑀳𑀸’’𑀢𑀺. 𑀏𑀯𑀜𑁆𑀘𑁂𑀢𑁆𑀣 𑀧𑀤𑀯𑀺𑀕𑁆𑀕𑀳𑁄 𑀕𑀳𑁂𑀢𑀩𑁆𑀩𑁄 𑁋 𑀦 𑀅𑀯𑀚𑁆𑀚𑀁 𑀅𑀦𑀯𑀚𑁆𑀚𑀁, 𑀅𑀯𑀚𑁆𑀚𑀧𑀝𑀺𑀧𑀓𑁆𑀔𑀢𑀸𑀬 𑀅𑀕𑀭𑀳𑀺𑀢𑀩𑁆𑀩𑀲𑀪𑀸𑀯𑁄. 𑀲𑀼𑀔𑁄 𑀯𑀺𑀧𑀸𑀓𑁄 𑀅𑀲𑁆𑀲𑀸𑀢𑀺 𑀲𑀼𑀔𑀯𑀺𑀧𑀸𑀓𑀁, 𑀲𑀼𑀔𑀯𑀺𑀧𑀸𑀓𑀯𑀺𑀧𑀘𑁆𑀘𑀦𑀲𑀫𑀢𑁆𑀣𑀢𑀸. 𑀅𑀦𑀯𑀚𑁆𑀚𑀜𑁆𑀘 𑀢𑀁 𑀲𑀼𑀔𑀯𑀺𑀧𑀸𑀓𑀜𑁆𑀘𑀸𑀢𑀺 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀁, 𑀢𑀁 𑀮𑀓𑁆𑀔𑀡𑀁 𑀏𑀢𑁂𑀲𑀦𑁆𑀢𑀺 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀮𑀓𑁆𑀔𑀡𑀸. 𑀅𑀣 𑀯𑀸 𑀧𑀼𑀩𑁆𑀩𑁂 𑀯𑀺𑀬 𑀅𑀦𑀯𑀚𑁆𑀚𑀁, 𑀯𑀺𑀧𑀘𑁆𑀘𑀦𑀁 𑀯𑀺𑀧𑀸𑀓𑁄, 𑀲𑀼𑀔𑀲𑁆𑀲 𑀯𑀺𑀧𑀸𑀓𑁄 𑀲𑀼𑀔𑀯𑀺𑀧𑀸𑀓𑁄, 𑀅𑀦𑀯𑀚𑁆𑀚𑀜𑁆𑀘 𑀲𑀼𑀔𑀯𑀺𑀧𑀸𑀓𑁄 𑀘 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀁 𑀏𑀓𑀢𑁆𑀢𑀯𑀲𑁂𑀦. 𑀢𑀁 𑀮𑀓𑁆𑀔𑀡𑀁 𑀏𑀢𑁂𑀲𑀦𑁆𑀢𑀺 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀮𑀓𑁆𑀔𑀡𑀸. 𑀓𑀺𑀁 𑀧𑀦𑁂𑀢𑁆𑀣 𑀓𑀸𑀭𑀡𑀁 𑀧𑀤𑀤𑁆𑀯𑀬𑀧𑀭𑀺𑀕𑁆𑀕𑀳𑁂, 𑀦𑀦𑀼 𑀏𑀓𑁂𑀦𑁂𑀯 𑀧𑀤𑁂𑀦 𑀇𑀝𑁆𑀞𑀧𑁆𑀧𑀲𑀺𑀤𑁆𑀥𑀺. 𑀬𑀤𑀺𑀧𑀺 ‘‘𑀅𑀯𑀚𑁆𑀚𑀭𑀳𑀺𑀢𑀁 𑀅𑀦𑀯𑀚𑁆𑀚’’𑀦𑁆𑀢𑀺 𑀇𑀫𑀲𑁆𑀫𑀺𑀁 𑀧𑀦 𑀧𑀓𑁆𑀔𑁂 𑀅𑀩𑁆𑀬𑀸𑀓𑀢𑀦𑀺𑀯𑀢𑁆𑀢𑀦𑀢𑁆𑀣𑀁 𑀲𑀼𑀔𑀯𑀺𑀧𑀸𑀓𑀕𑁆𑀕𑀳𑀡𑀁 𑀓𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀲𑀼𑀔𑀯𑀺𑀧𑀸𑀓𑀕𑁆𑀕𑀳𑀡𑁂 𑀧𑀦 𑀓𑀢𑁂 𑀅𑀦𑀯𑀚𑁆𑀚𑀕𑁆𑀕𑀳𑀡𑀁 𑀦 𑀓𑀢𑁆𑀢𑀩𑁆𑀩𑀫𑁂𑀯. ‘‘𑀅𑀯𑀚𑁆𑀚𑀧𑀝𑀺𑀧𑀓𑁆𑀔𑀸 𑀅𑀦𑀯𑀚𑁆𑀚𑀸’’𑀢𑀺 𑀏𑀢𑀲𑁆𑀫𑀺𑀁 𑀧𑀦 𑀧𑀓𑁆𑀔𑁂 𑀲𑀼𑀔𑀯𑀺𑀧𑀸𑀓𑀕𑁆𑀕𑀳𑀡𑀜𑁆𑀘𑀸𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀢𑀢𑁆𑀣 𑀅𑀦𑀯𑀚𑁆𑀚𑀯𑀘𑀦𑁂𑀦𑀸’’𑀢𑀺𑀆𑀤𑀺. 𑀢𑁂𑀦 𑀧𑀯𑀢𑁆𑀢𑀺𑀲𑀼𑀔𑀲𑀼𑀔𑀯𑀺𑀧𑀸𑀓𑀢𑀸𑀅𑀢𑁆𑀢𑀲𑀼𑀤𑁆𑀥𑀺𑀯𑀺𑀲𑀼𑀤𑁆𑀥𑀯𑀺𑀧𑀸𑀓𑀢𑀸𑀅𑀓𑀼𑀲𑀮𑀅𑀩𑁆𑀬𑀸𑀓𑀢𑀲𑀪𑀸𑀯𑀦𑀺𑀯𑀢𑁆𑀢𑀺𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀯𑀺𑀲𑁂𑀲𑀤𑀻𑀧𑀦𑀢𑁄 𑀏𑀯𑀁 𑀯𑀺𑀧𑀼𑀮𑀧𑁆𑀧𑀬𑁄𑀚𑀦𑀢𑁆𑀣𑁄 𑀧𑀤𑀤𑁆𑀯𑀬𑀧𑀭𑀺𑀕𑁆𑀕𑀳𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀼𑀔-𑀲𑀤𑁆𑀤𑀲𑁆𑀲 𑀇𑀝𑁆𑀞𑀧𑀭𑀺𑀬𑀸𑀬𑀢𑀸 𑀯𑀺𑀬 ‘‘𑀦𑀺𑀩𑁆𑀩𑀸𑀦𑀧𑀭𑀫𑀁 𑀲𑀼𑀔𑀁 (𑀥. 𑀧. 𑁨𑁦𑁩-𑁨𑁦𑁪), 𑀲𑀼𑀔𑀸 𑀯𑀺𑀭𑀸𑀕𑀢𑀸 𑀮𑁄𑀓𑁂 (𑀉𑀤𑀸. 𑁧𑁧), 𑀢𑁂𑀲𑀁 𑀯𑀽𑀧𑀲𑀫𑁄 𑀲𑀼𑀔𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁨𑁨𑁧, 𑁨𑁭𑁨) 𑀲𑀗𑁆𑀔𑀸𑀭𑀤𑀼𑀓𑁆𑀔𑀽𑀧𑀲𑀫𑀧𑀭𑀺𑀬𑀸𑀬𑀢𑀸𑀧𑀺 𑀯𑀺𑀚𑁆𑀚𑀢𑀺, 𑀢𑀁𑀅𑀯𑀺𑀧𑀸𑀓𑀢𑀸𑀬 𑀧𑀦 𑀇𑀥 𑀲𑀼𑀔𑀯𑀺𑀧𑀸𑀓𑀪𑀸𑀯𑁄 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀗𑁆𑀔𑀸…𑀧𑁂… 𑀦𑀢𑁆𑀣𑀻’’𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑁂𑀪𑀽𑀫𑀓𑀓𑀼𑀲𑀮𑀸𑀦𑀫𑁆𑀧𑀺 𑀯𑀺𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀬𑀪𑀸𑀯𑁂𑀦 𑀧𑀯𑀢𑁆𑀢𑀺𑀲𑀪𑀸𑀯𑀢𑁆𑀢𑀸 𑀓𑀺𑀜𑁆𑀘𑀸𑀧𑀺 𑀲𑀩𑁆𑀩𑁂 𑀓𑀼𑀲𑀮𑀸 𑀲𑀗𑁆𑀔𑀸𑀭𑀤𑀼𑀓𑁆𑀔𑀽𑀧𑀲𑀫𑀲𑀼𑀔𑀦𑀺𑀧𑁆𑀨𑀸𑀤𑀓𑀸 𑀲𑀫𑁆𑀪𑀯𑀦𑁆𑀢𑀺, 𑀬𑀣𑀸𑀯𑀼𑀢𑁆𑀢𑀲𑀼𑀔𑀲𑁆𑀲 𑀧𑀦 𑀅𑀯𑀺𑀧𑀸𑀓𑀪𑀸𑀯𑀢𑁄 𑀦 𑀏𑀢𑁂𑀦 𑀧𑀤𑁂𑀦 𑀓𑀼𑀲𑀮𑀸𑀦𑀁 𑀲𑀼𑀔𑀯𑀺𑀧𑀸𑀓𑀢𑀸 𑀲𑀫𑁆𑀪𑀯𑀢𑀻𑀢𑀺. 𑀯𑀺𑀧𑀓𑁆𑀓𑀪𑀸𑀯𑀫𑀸𑀧𑀦𑁆𑀦𑁂𑀲𑀼 𑀅𑀭𑀽𑀧𑀥𑀫𑁆𑀫𑁂𑀲𑀼 𑀦𑀺𑀭𑀼𑀴𑁆𑀳𑀢𑁆𑀢𑀸 𑀯𑀺𑀧𑀸𑀓-𑀲𑀤𑁆𑀤𑀲𑁆𑀲 ‘‘𑀬𑀤𑀺 𑀧𑀦𑀸’’𑀢𑀺 𑀲𑀸𑀲𑀗𑁆𑀓𑀁 𑀯𑀤𑀢𑀺.

𑀬𑀣𑀸𑀲𑀫𑁆𑀪𑀯𑀦𑁆𑀢𑀺 𑀲𑀳 𑀅𑀯𑀚𑁆𑀚𑁂𑀦𑀸𑀢𑀺 𑀲𑀸𑀯𑀚𑁆𑀚𑀸, 𑀕𑀭𑀳𑀺𑀢𑀩𑁆𑀩𑀪𑀸𑀯𑀬𑀼𑀢𑁆𑀢𑀸. 𑀢𑁂𑀦 𑀦𑁂𑀲𑀁 𑀕𑀭𑀳𑀺𑀢𑀩𑁆𑀩𑀲𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀤𑀼𑀓𑁆𑀔𑀪𑀸𑀯𑁂𑀦 𑀕𑀭𑀳𑀺𑀢𑀩𑁆𑀩𑀲𑀪𑀸𑀯𑀸 𑀅𑀓𑀼𑀲𑀮𑀯𑀺𑀧𑀸𑀓𑀸𑀢𑀺 𑀲𑀸𑀯𑀚𑁆𑀚𑀯𑀘𑀦𑀫𑀢𑁆𑀢𑁂𑀦 𑀢𑁂𑀲𑀫𑁆𑀧𑀺 𑀅𑀓𑀼𑀲𑀮𑀢𑀸𑀧𑀢𑁆𑀢𑀺𑀤𑁄𑀲𑀁 𑀤𑀺𑀲𑁆𑀯𑀸 𑀢𑀁 𑀧𑀭𑀺𑀳𑀭𑀺𑀢𑀼𑀁 𑀤𑀼𑀓𑁆𑀔𑀯𑀺𑀧𑀸𑀓𑀯𑀘𑀦𑀫𑀸𑀳. 𑀅𑀯𑀚𑁆𑀚-𑀲𑀤𑁆𑀤𑁄 𑀯𑀸 𑀭𑀸𑀕𑀸𑀤𑀻𑀲𑀼 𑀏𑀓𑀦𑁆𑀢𑀸𑀓𑀼𑀲𑀮𑁂𑀲𑀼 𑀦𑀺𑀭𑀼𑀴𑁆𑀳𑁄𑀢𑀺 𑀢𑀁𑀲𑀳𑀯𑀢𑁆𑀢𑀺𑀥𑀫𑁆𑀫𑀸𑀦𑀁 𑀏𑀯 𑀲𑀸𑀯𑀚𑁆𑀚𑀪𑀸𑀯𑁂 𑀓𑀼𑀲𑀮𑀸𑀩𑁆𑀬𑀸𑀓𑀢𑁂𑀳𑀺 𑀅𑀓𑀼𑀲𑀮𑀸𑀦𑀁 𑀯𑀺𑀲𑁂𑀲𑁄 𑀲𑀸𑀯𑀚𑁆𑀚𑀯𑀘𑀦𑁂𑀦𑁂𑀯 𑀤𑀲𑁆𑀲𑀺𑀢𑁄. 𑀅𑀩𑁆𑀬𑀸𑀓𑀢𑁂𑀳𑀺 𑀧𑀦 𑀯𑀺𑀲𑀺𑀝𑁆𑀞𑀁 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀲𑀸𑀥𑀸𑀭𑀡𑀁 𑀲𑀯𑀺𑀧𑀸𑀓𑀢𑀸𑀮𑀓𑁆𑀔𑀡𑀦𑁆𑀢𑀺 𑀢𑀲𑁆𑀫𑀺𑀁 𑀮𑀓𑁆𑀔𑀡𑁂 𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 𑀤𑀼𑀓𑁆𑀔𑀯𑀺𑀧𑀸𑀓𑀮𑀓𑁆𑀔𑀡𑀁 𑀯𑀼𑀢𑁆𑀢𑀁. 𑀇𑀢𑁄 𑀧𑀭𑀁 ‘‘𑀤𑀼𑀓𑁆𑀔𑁄 𑀯𑀺𑀧𑀸𑀓𑁄 𑀏𑀢𑁂𑀲𑀦𑁆𑀢𑀺 𑀤𑀼𑀓𑁆𑀔𑀯𑀺𑀧𑀸𑀓𑀸’’𑀢𑀺𑀆𑀤𑀺𑀦𑀸 𑀲𑀼𑀔𑀯𑀺𑀧𑀸𑀓𑀅𑀦𑀯𑀚𑁆𑀚𑀓𑀼𑀲𑀮𑀧𑀤𑀸𑀦𑀁 𑀞𑀸𑀦𑁂 𑀤𑀼𑀓𑁆𑀔𑀯𑀺𑀧𑀸𑀓𑀲𑀸𑀯𑀚𑁆𑀚𑀅𑀓𑀼𑀲𑀮𑀧𑀤𑀸𑀦𑀺 𑀞𑀧𑁂𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑁄𑀚𑀦𑀸 𑀘 𑀲𑀸𑀯𑀚𑁆𑀚𑀯𑀘𑀦𑁂𑀦 𑀅𑀓𑀼𑀲𑀮𑀸𑀦𑀁 𑀧𑀯𑀢𑁆𑀢𑀺𑀤𑀼𑀓𑁆𑀔𑀢𑀁 𑀤𑀲𑁆𑀲𑁂𑀢𑀺, 𑀤𑀼𑀓𑁆𑀔𑀯𑀺𑀧𑀸𑀓𑀯𑀘𑀦𑁂𑀦 𑀯𑀺𑀧𑀸𑀓𑀤𑀼𑀓𑁆𑀔𑀢𑀁. 𑀧𑀼𑀭𑀺𑀫𑀜𑁆𑀳𑀺 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀲𑀪𑀸𑀯𑀯𑀲𑁂𑀦 𑀮𑀓𑁆𑀔𑀡𑀯𑀘𑀦𑀁, 𑀧𑀘𑁆𑀙𑀺𑀫𑀁 𑀓𑀸𑀮𑀦𑁆𑀢𑀭𑁂 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸𑀬𑀸𑀢𑀺. 𑀢𑀣𑀸 𑀧𑀼𑀭𑀺𑀫𑁂𑀦 𑀅𑀓𑀼𑀲𑀮𑀸𑀦𑀁 𑀅𑀯𑀺𑀲𑀼𑀤𑁆𑀥𑀲𑀪𑀸𑀯𑀢𑀁 𑀤𑀲𑁆𑀲𑁂𑀢𑀺, 𑀧𑀘𑁆𑀙𑀺𑀫𑁂𑀦 𑀅𑀯𑀺𑀲𑀼𑀤𑁆𑀥𑀯𑀺𑀧𑀸𑀓𑀢𑀁. 𑀧𑀼𑀭𑀺𑀫𑁂𑀦 𑀘 𑀅𑀓𑀼𑀲𑀮𑁂 𑀓𑀼𑀲𑀮𑀲𑀪𑀸𑀯𑀢𑁄 𑀦𑀺𑀯𑀢𑁆𑀢𑁂𑀢𑀺, 𑀧𑀘𑁆𑀙𑀺𑀫𑁂𑀦 𑀅𑀩𑁆𑀬𑀸𑀓𑀢𑀲𑀪𑀸𑀯𑀢𑁄 𑀲𑀯𑀺𑀧𑀸𑀓𑀢𑁆𑀢𑀤𑀻𑀧𑀓𑀢𑁆𑀢𑀸 𑀧𑀘𑁆𑀙𑀺𑀫𑀲𑁆𑀲. 𑀧𑀼𑀭𑀺𑀫𑁂𑀦 𑀯𑀸 𑀅𑀯𑀚𑁆𑀚𑀯𑀦𑁆𑀢𑀢𑀸𑀤𑀲𑁆𑀲𑀦𑀢𑁄 𑀓𑀺𑀘𑁆𑀘𑀝𑁆𑀞𑁂𑀦 𑀭𑀲𑁂𑀦 𑀅𑀦𑀢𑁆𑀣𑀚𑀦𑀦𑀭𑀲𑀢𑀁 𑀤𑀲𑁆𑀲𑁂𑀢𑀺, 𑀧𑀘𑁆𑀙𑀺𑀫𑁂𑀦 𑀲𑀫𑁆𑀧𑀢𑁆𑀢𑀺𑀅𑀢𑁆𑀣𑁂𑀦 𑀅𑀦𑀺𑀝𑁆𑀞𑀯𑀺𑀧𑀸𑀓𑀭𑀲𑀢𑀁. 𑀧𑀼𑀭𑀺𑀫𑁂𑀦 𑀘 𑀉𑀧𑀝𑁆𑀞𑀸𑀦𑀸𑀓𑀸𑀭𑀝𑁆𑀞𑁂𑀦 𑀧𑀘𑁆𑀘𑀼𑀧𑀝𑁆𑀞𑀸𑀦𑁂𑀦 𑀲𑀁𑀓𑀺𑀮𑁂𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑀁, 𑀧𑀘𑁆𑀙𑀺𑀫𑁂𑀦 𑀨𑀮𑀝𑁆𑀞𑁂𑀦 𑀤𑀼𑀓𑁆𑀔𑀯𑀺𑀧𑀸𑀓𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑀁. 𑀧𑀼𑀭𑀺𑀫𑁂𑀦 𑀘 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀅𑀓𑀼𑀲𑀮𑀸𑀦𑀁 𑀧𑀤𑀝𑁆𑀞𑀸𑀦𑀁 𑀧𑀓𑀸𑀲𑁂𑀢𑀺. 𑀢𑀢𑁄 𑀳𑀺 𑀢𑁂 𑀲𑀸𑀯𑀚𑁆𑀚𑀸 𑀚𑀸𑀢𑀸𑀢𑀺. 𑀧𑀘𑁆𑀙𑀺𑀫𑁂𑀦 𑀅𑀓𑀼𑀲𑀮𑀸𑀦𑀁 𑀅𑀜𑁆𑀜𑁂𑀲𑀁 𑀧𑀤𑀝𑁆𑀞𑀸𑀦𑀪𑀸𑀯𑀁 𑀯𑀺𑀪𑀸𑀯𑁂𑀢𑀺. 𑀢𑁂 𑀳𑀺 𑀤𑀼𑀓𑁆𑀔𑀯𑀺𑀧𑀸𑀓𑀲𑁆𑀲 𑀓𑀸𑀭𑀡𑀁 𑀳𑁄𑀢𑀻𑀢𑀺. 𑀏𑀢𑁆𑀣 𑀘 𑀤𑀼𑀓𑁆𑀔-𑀲𑀤𑁆𑀤𑁄 𑀅𑀦𑀺𑀝𑁆𑀞𑀧𑀭𑀺𑀬𑀸𑀬𑀯𑀘𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀦𑀺𑀝𑁆𑀞𑀘𑀢𑀼𑀓𑁆𑀔𑀦𑁆𑀥𑀯𑀺𑀧𑀸𑀓𑀸 𑀳𑀺 𑀅𑀓𑀼𑀲𑀮𑀸, 𑀦 𑀤𑀼𑀓𑁆𑀔𑀯𑁂𑀤𑀦𑀸𑀯𑀺𑀧𑀸𑀓𑀸𑀯. 𑀯𑀺𑀧𑀸𑀓-𑀲𑀤𑁆𑀤𑀲𑁆𑀲 𑀨𑀮𑀧𑀭𑀺𑀬𑀸𑀬𑀪𑀸𑀯𑁂 𑀧𑀦 𑀦𑀺𑀲𑁆𑀲𑀦𑁆𑀤𑀯𑀺𑀧𑀸𑀓𑁂𑀦 𑀅𑀦𑀺𑀝𑁆𑀞𑀭𑀽𑀧𑁂𑀦𑀧𑀺 𑀤𑀼𑀓𑁆𑀔𑀯𑀺𑀧𑀸𑀓𑀢𑀸 𑀬𑁄𑀚𑁂𑀢𑀩𑁆𑀩𑀸. 𑀯𑀺𑀧𑀸𑀓𑀥𑀫𑁆𑀫𑀢𑀸𑀧𑀝𑀺𑀲𑁂𑀥𑀯𑀲𑁂𑀦 𑀅𑀩𑁆𑀬𑀸𑀓𑀢𑀸𑀦𑀁 𑀅𑀯𑀺𑀧𑀸𑀓𑀮𑀓𑁆𑀔𑀡𑀸𑀢𑀺 𑀮𑀓𑁆𑀔𑀡𑀁 𑀯𑀼𑀢𑁆𑀢𑀦𑁆𑀢𑀺 𑀢𑀤𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀯𑀺𑀧𑀸𑀓𑀸𑀭𑀳𑀲𑀪𑀸𑀯𑀸’’𑀢𑀺 𑀆𑀳. 𑀏𑀯𑀁𑀧𑀓𑀸𑀭𑀸𑀦𑀦𑁆𑀢𑀺 𑀅𑀪𑀺𑀜𑁆𑀜𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺.

𑀙𑀳𑀺 𑀧𑀤𑁂𑀳𑀺 𑀢𑀺𑀓𑁂𑀲𑀼, 𑀘𑀢𑀽𑀳𑀺 𑀤𑀼𑀓𑁂𑀲𑀼 𑀬𑀣𑀸𑀓𑁆𑀓𑀫𑀁 𑀙 𑀘𑀢𑁆𑀢𑀸𑀭𑁄 𑀅𑀢𑁆𑀣𑀸 𑀯𑀼𑀢𑁆𑀢𑀸. 𑀙𑀓𑁆𑀓𑀪𑀸𑀯𑁄 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀏𑀢𑁂𑀦 𑀘𑀢𑀼𑀓𑁆𑀓𑀪𑀸𑀯𑀸𑀪𑀸𑀯𑁄 𑀤𑀲𑁆𑀲𑀺𑀢𑀦𑀬𑀢𑁆𑀢𑀸 𑀘𑁄𑀤𑀺𑀢𑁄𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀢𑁆𑀣𑀪𑁂𑀤𑁄 𑀉𑀧𑀧𑀚𑁆𑀚𑀢𑀻𑀢𑀺 𑀓𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀁, 𑀦𑀦𑀼 𑀢𑀻𑀳𑀺 𑀥𑀫𑁆𑀫𑀲𑀤𑁆𑀤𑁂𑀳𑀺 𑀯𑀼𑀘𑁆𑀘𑀫𑀸𑀦𑁄 𑀲𑀪𑀸𑀯𑀥𑀸𑀭𑀡𑀸𑀤𑀺𑀅𑀢𑁆𑀣𑁂𑀦 𑀅𑀪𑀺𑀦𑁆𑀦𑁄 𑀏𑀯 𑀲𑁄 𑀅𑀢𑁆𑀣𑁄𑀢𑀺? 𑀦, 𑀚𑀸𑀢𑀺𑀆𑀤𑀺𑀪𑁂𑀤𑁂𑀦 𑀪𑁂𑀤𑀲𑀩𑁆𑀪𑀸𑀯𑀢𑁄. 𑀪𑁂𑀤𑀓𑀸 𑀳𑀺 𑀚𑀸𑀢𑀺𑀆𑀤𑀬𑁄. 𑀫𑀸𑀲𑀧𑀤𑀢𑁆𑀣𑀢𑀸𑀬𑀸𑀢𑀺 𑀫𑀸𑀲-𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑀪𑀸𑀯𑁂𑀦. 𑀢𑀩𑁆𑀩𑀘𑀦𑀻𑀬𑀪𑀺𑀦𑁆𑀦𑀢𑁆𑀣𑀸𑀦𑀦𑁆𑀢𑀺 𑀢𑁂𑀳𑀺 𑀓𑀸𑀮𑀲𑀤𑁆𑀤𑀸𑀤𑀻𑀳𑀺 𑀯𑀢𑁆𑀢𑀩𑁆𑀩𑀸𑀦𑀁 𑀯𑀺𑀲𑀺𑀝𑁆𑀞𑀢𑁆𑀣𑀸𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀬𑀣𑀸 𑀓𑀸𑀮𑀲𑀤𑁆𑀤𑀸𑀤𑀺𑀅𑀪𑀺𑀥𑁂𑀬𑁆𑀬𑀸𑀦𑀁 𑀓𑀸𑀮𑀸𑀤𑀺𑀅𑀢𑁆𑀣𑀸𑀦𑀁 𑀪𑀺𑀦𑁆𑀦𑀲𑀪𑀸𑀯𑀸𑀦𑀫𑁆𑀧𑀺 𑀫𑀸𑀲-𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑀪𑀸𑀯𑁂𑀦 𑀅𑀪𑁂𑀤𑁄, 𑀏𑀯𑀁 𑀚𑀸𑀢𑀺𑀆𑀤𑀺𑀪𑁂𑀤𑁂𑀦 𑀪𑀺𑀦𑁆𑀦𑀸𑀦𑀫𑁆𑀧𑀺 𑀢𑁂𑀲𑀁 𑀢𑀺𑀡𑁆𑀡𑀁 𑀤𑁆𑀯𑀺𑀦𑁆𑀦𑀜𑁆𑀘 𑀅𑀢𑁆𑀣𑀸𑀦𑀁 𑀥𑀫𑁆𑀫-𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑀪𑀸𑀯𑁂𑀦 𑀦𑀢𑁆𑀣𑀺 𑀪𑁂𑀤𑁄’’𑀢𑀺. 𑀯𑀺𑀦𑀺…𑀧𑁂… 𑀫𑀸𑀦𑀸𑀢𑀺 𑀥𑀫𑁆𑀫-𑀲𑀤𑁆𑀤𑀲𑁆𑀲 𑀭𑀽𑀧𑀸𑀪𑁂𑀤𑁂𑀧𑀺 𑀪𑁂𑀤𑀓𑀸𑀭𑀡𑀫𑀸𑀳. 𑀪𑀺𑀦𑁆𑀦𑀚𑀸𑀢𑀺𑀬𑀢𑁆𑀣𑀯𑀘𑀦𑀻𑀬𑀢𑀸𑀬 𑀳𑀺 𑀢𑀲𑁆𑀲𑁂𑀯𑀢𑁆𑀣𑀪𑁂𑀤𑁄𑀢𑀺.

𑀲𑀸𑀥𑁂𑀢𑀼𑀦𑁆𑀢𑀺 𑀩𑁄𑀥𑁂𑀢𑀼𑀁. 𑀳𑁄𑀢𑀼 𑀅𑀲𑀫𑁆𑀩𑀦𑁆𑀥𑁄, 𑀓𑀸 𑀦𑁄 𑀳𑀸𑀦𑀻𑀢𑀺 𑀓𑀤𑀸𑀘𑀺 𑀯𑀤𑁂𑀬𑁆𑀬𑀸𑀢𑀺 𑀆𑀲𑀗𑁆𑀓𑀸𑀬 𑀆𑀳 ‘‘𑀧𑀼𑀩𑁆𑀩𑀸…𑀧𑁂… 𑀦𑀸𑀫 𑀳𑁄𑀦𑁆𑀢𑀻’’𑀢𑀺. 𑀲𑁄 𑀘𑀸𑀢𑀺 𑀲𑀪𑀸𑀯𑀥𑀸𑀭𑀡𑀧𑀘𑁆𑀘𑀬𑀥𑀭𑀺𑀬𑀫𑀸𑀦𑀢𑀸𑀲𑀗𑁆𑀔𑀸𑀢𑁄 𑀅𑀢𑁆𑀣𑁄 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀅𑀪𑀸𑀯𑀲𑁆𑀲 𑀅𑀧𑁂𑀓𑁆𑀔𑀸𑀯𑀼𑀢𑁆𑀢𑀺𑀢𑀸𑀬 𑀯𑀼𑀢𑁆𑀢𑀁. 𑀦 𑀳𑀺 𑀅𑀧𑁂𑀓𑁆𑀔𑀸𑀯𑀼𑀢𑁆𑀢𑀺𑀦𑁄 𑀅𑀦𑁆𑀢𑀭𑁂𑀦 𑀅𑀧𑁂𑀓𑁆𑀔𑀺𑀢𑀩𑁆𑀩𑀁 𑀮𑀪𑀦𑁆𑀢𑀺. 𑀲𑀢𑀺𑀧𑀺 𑀲𑀪𑀸𑀯𑀥𑀸𑀭𑀡𑀸𑀤𑀺𑀅𑀢𑁆𑀣𑀲𑀸𑀫𑀜𑁆𑀜𑁂 𑀓𑀼𑀲𑀮𑀚𑀸𑀢𑀺𑀆𑀤𑀺𑀯𑀺𑀲𑀺𑀝𑁆𑀞𑀲𑁆𑀲𑁂𑀯 𑀢𑀲𑁆𑀲 𑀇𑀥 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀏𑀓𑀢𑁆𑀣𑀢𑀸 𑀦 𑀅𑀦𑀼𑀜𑁆𑀜𑀸𑀢𑀸𑀢𑀺 𑀯𑀼𑀢𑁆𑀢𑀁, 𑀯𑀘𑀦𑀲𑀺𑀮𑁂𑀲𑀯𑀲𑁂𑀦 𑀯𑀸. 𑀅𑀣 𑀯𑀸𑀢𑀺𑀆𑀤𑀺𑀦𑀸 𑀢𑀺𑀡𑁆𑀡𑀁 𑀥𑀫𑁆𑀫𑀲𑀤𑁆𑀤𑀸𑀦𑀁 𑀅𑀪𑀸𑀯𑀢𑁆𑀢𑀁 𑀅𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀦𑀸𑀦𑀢𑁆𑀣𑀢𑀸𑀪𑀸𑀯𑀤𑁄𑀲𑀁 𑀧𑀭𑀺𑀳𑀭𑀢𑀺.

𑀜𑀸𑀧𑀓𑀳𑁂𑀢𑀼𑀪𑀸𑀯𑀢𑁄 𑀉𑀧𑀧𑀢𑁆𑀢𑀺 𑀇𑀥 𑀓𑀸𑀭𑀡𑀦𑁆𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀓𑀸𑀭𑀡𑀁 𑀦𑀸𑀫 𑀬𑀼𑀢𑁆𑀢𑀻’’𑀢𑀺. 𑀧𑀼𑀦𑀭𑀼𑀢𑁆𑀢𑀻𑀢𑀺𑀆𑀤𑀺𑀦𑀸 𑀦𑀦𑀼 ‘‘𑀓𑀼𑀲𑀮𑀸𑀤𑀻𑀦𑀫𑁆𑀧𑀺 𑀏𑀓𑀢𑁆𑀢𑀁 𑀆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀏𑀓𑀢𑁆𑀢𑀸𑀧𑀢𑁆𑀢𑀺𑀧𑀺 𑀯𑀢𑁆𑀢𑀩𑁆𑀩𑀸𑀢𑀺? 𑀲𑀘𑁆𑀘𑀁 𑀯𑀢𑁆𑀢𑀩𑁆𑀩𑀸, 𑀲𑀸 𑀧𑀦 𑀅𑀪𑀸𑀯𑀸𑀧𑀢𑁆𑀢𑀺𑀬𑀁 𑀏𑀯 𑀅𑀦𑁆𑀢𑁄𑀕𑀥𑀸 𑀦𑀸𑀦𑀢𑁆𑀢𑀸𑀪𑀸𑀯𑀘𑁄𑀤𑀦𑀸𑀲𑀸𑀫𑀜𑁆𑀜𑁂𑀦. 𑀪𑁂𑀤𑀸𑀪𑁂𑀤𑀦𑀺𑀩𑀦𑁆𑀥𑀦𑀢𑁆𑀢𑀸 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑀲𑁆𑀲 𑀲𑁄 𑀅𑀘𑁆𑀘𑀦𑁆𑀢𑀫𑀪𑀺𑀦𑁆𑀦𑁂𑀲𑀼 𑀦𑀺𑀬𑀫𑁂𑀦 𑀦𑀢𑁆𑀣𑀻𑀢𑀺 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀸𑀪𑀸𑀯𑁂𑀦 𑀅𑀘𑁆𑀘𑀦𑁆𑀢𑀸𑀪𑁂𑀤𑀁 𑀤𑀲𑁆𑀲𑁂𑀢𑀺, 𑀦 𑀧𑀦 𑀅𑀘𑁆𑀘𑀦𑁆𑀢𑀁 𑀅𑀪𑀺𑀦𑁆𑀦𑁂𑀲𑀼𑀬𑁂𑀯 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀸𑀪𑀸𑀯𑀁. 𑀅𑀣 𑀯𑀸 𑀅𑀘𑁆𑀘𑀦𑁆𑀢𑀁 𑀅𑀪𑀺𑀦𑁆𑀦𑁂𑀲𑀼 𑀅𑀯𑀺𑀯𑀝𑀲𑀤𑁆𑀤𑀢𑁆𑀣𑀯𑀺𑀯𑀭𑀡𑀢𑁆𑀣𑀁 𑀧𑀯𑀢𑁆𑀢𑀸. 𑀓𑀲𑁆𑀫𑀸? 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀸𑀪𑀸𑀯𑀢𑁄𑀢𑀺 𑀏𑀯𑀁 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀅𑀫𑀺𑀢𑁆𑀢𑀁 𑀅𑀪𑀺𑀪𑀯𑀺𑀢𑀼𑀁 𑀲𑀓𑁆𑀓𑀼𑀡𑀸𑀢𑀻𑀢𑀺 𑀲𑀓𑁆𑀓𑁄, 𑀇𑀦𑁆𑀤𑀢𑀻𑀢𑀺 𑀇𑀦𑁆𑀤𑁄, 𑀧𑀼𑀭𑀺𑀫𑁂 𑀤𑀤𑀸𑀢𑀻𑀢𑀺 𑀧𑀼𑀭𑀺𑀦𑁆𑀤𑀤𑁄𑀢𑀺 𑀏𑀯𑀁 𑀓𑀺𑀭𑀺𑀬𑀸𑀕𑀼𑀡𑀸𑀤𑀺𑀧𑀭𑀺𑀕𑁆𑀕𑀳𑀯𑀺𑀲𑁂𑀲𑁂𑀦.

𑀪𑁂𑀤𑀸𑀪𑁂𑀤𑀯𑀦𑁆𑀢𑁂𑀲𑀽𑀢𑀺 𑀯𑀺𑀲𑁂𑀲𑀲𑀸𑀫𑀜𑁆𑀜𑀯𑀦𑁆𑀢𑁂𑀲𑀼. 𑀦𑀻𑀮-𑀲𑀤𑁆𑀤𑁄 𑀳𑀺 𑀉𑀧𑁆𑀧𑀮𑀲𑀤𑁆𑀤𑀲𑀫𑀸𑀬𑁄𑀕𑁄 𑀭𑀢𑁆𑀢𑀼𑀧𑁆𑀧𑀮𑀲𑁂𑀢𑀼𑀧𑁆𑀧𑀮𑀸𑀤𑀺𑀉𑀧𑁆𑀧𑀮𑀚𑀸𑀢𑀺𑀲𑀸𑀫𑀜𑁆𑀜𑀢𑁄 𑀯𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀦𑀻𑀮𑀕𑀼𑀡𑀬𑀼𑀢𑁆𑀢𑀫𑁂𑀯 𑀉𑀧𑁆𑀧𑀮𑀚𑀸𑀢𑀺𑀯𑀺𑀲𑁂𑀲𑀁 𑀚𑁄𑀢𑁂𑀢𑀺. 𑀉𑀧𑁆𑀧𑀮-𑀲𑀤𑁆𑀤𑁄𑀧𑀺 𑀦𑀻𑀮-𑀲𑀤𑁆𑀤𑀲𑀫𑀸𑀬𑀼𑀢𑁆𑀢𑁄 𑀪𑀫𑀭𑀗𑁆𑀕𑀸𑀭𑀓𑁄𑀓𑀺𑀮𑀸𑀤𑀺𑀕𑀢𑀦𑀻𑀮𑀕𑀼𑀡𑀲𑀸𑀫𑀜𑁆𑀜𑀢𑁄 𑀅𑀯𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀉𑀧𑁆𑀧𑀮𑀯𑀢𑁆𑀣𑀼𑀕𑀢𑀫𑁂𑀯 𑀦𑀻𑀮𑀕𑀼𑀡𑀁 𑀧𑀓𑀸𑀲𑁂𑀢𑀻𑀢𑀺 𑀯𑀺𑀲𑁂𑀲𑀢𑁆𑀣𑀲𑀸𑀫𑀜𑁆𑀜𑀢𑁆𑀣𑀬𑀼𑀢𑁆𑀢𑀢𑀸 𑀧𑀤𑀤𑁆𑀯𑀬𑀲𑁆𑀲 𑀤𑀝𑁆𑀞𑀩𑁆𑀩𑀸. 𑀇𑀫𑀺𑀦𑀸 𑀦𑀬𑁂𑀦 𑀇𑀢𑀭𑀢𑁆𑀭𑀸𑀧𑀺 𑀪𑁂𑀤𑀸𑀪𑁂𑀤𑀯𑀦𑁆𑀢𑀢𑀸 𑀬𑁄𑀚𑁂𑀢𑀩𑁆𑀩𑀸. 𑀢𑀸𑀬 𑀢𑀸𑀬 𑀅𑀦𑀼𑀫𑀢𑀺𑀬𑀸𑀢𑀺 𑀢𑁂𑀦 𑀢𑁂𑀦 𑀲𑀗𑁆𑀓𑁂𑀢𑁂𑀦. 𑀢𑁂 𑀢𑁂 𑀯𑁄𑀳𑀸𑀭𑀸𑀢𑀺 𑀅𑀘𑁆𑀘𑀦𑁆𑀢𑀁 𑀅𑀪𑀺𑀦𑁆𑀦𑁂 𑀅𑀢𑁆𑀣𑁂 𑀧𑀭𑀺𑀬𑀸𑀬𑀪𑀸𑀯𑁂𑀦 𑀅𑀘𑁆𑀘𑀦𑁆𑀢𑀁 𑀪𑀺𑀦𑁆𑀦𑁂 𑀬𑀣𑀸𑀲𑀓𑀁 𑀅𑀢𑁆𑀣𑀯𑀺𑀯𑀭𑀡𑀪𑀸𑀯𑁂𑀦 𑀪𑁂𑀤𑀸𑀪𑁂𑀤𑀯𑀦𑁆𑀢𑁂 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁂𑀦 𑀢𑀸 𑀢𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺𑀬𑁄 𑀲𑀺𑀤𑁆𑀥𑀸𑀢𑀺 𑀅𑀢𑁆𑀣𑁄. 𑀲𑀫𑀸𑀦𑁂𑀢𑀺 𑀏𑀓𑀲𑁆𑀫𑀺𑀁. 𑀓𑀼𑀲𑀮𑀸𑀤𑀺𑀪𑀸𑀯𑀦𑁆𑀢𑀺 𑀓𑀼𑀘𑁆𑀙𑀺𑀢𑀲𑀮𑀦𑀸𑀤𑀺𑀪𑀸𑀯𑀁. 𑀅𑀪𑀺𑀥𑀸𑀦𑀢𑁆𑀣𑁄𑀧𑀺 𑀳𑀺 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀸𑀤𑀺𑀅𑀪𑀺𑀥𑁂𑀬𑁆𑀬𑀢𑁆𑀣𑁄 𑀯𑀺𑀬 𑀲𑀪𑀸𑀯𑀥𑀸𑀭𑀡𑀸𑀤𑀺𑀲𑀸𑀫𑀜𑁆𑀜𑀢𑁆𑀣𑀁 𑀯𑀺𑀲𑁂𑀲𑁂𑀢𑀻𑀢𑀺.

𑀏𑀢𑁆𑀣𑀸𑀳 ‘‘𑀓𑀺𑀁 𑀧𑀦 𑀓𑀸𑀭𑀡𑀁 𑀢𑀺𑀓𑀸 𑀏𑀯 𑀧𑀞𑀫𑀁 𑀯𑀼𑀢𑁆𑀢𑀸, 𑀦 𑀤𑀼𑀓𑀸, 𑀢𑀺𑀓𑁂𑀲𑀼𑀧𑀺 𑀓𑀼𑀲𑀮𑀢𑁆𑀢𑀺𑀓𑁄𑀯, 𑀦 𑀅𑀜𑁆𑀜𑁄’’𑀢𑀺? 𑀯𑀼𑀘𑁆𑀘𑀢𑁂 𑁋 𑀲𑀼𑀔𑀕𑁆𑀕𑀳𑀡𑀢𑁄 𑀅𑀧𑁆𑀧𑀪𑁂𑀤𑀢𑁄 𑀘 𑀢𑀺𑀓𑀸 𑀏𑀯 𑀧𑀞𑀫𑀁 𑀯𑀼𑀢𑁆𑀢𑀸. 𑀬𑀲𑁆𑀫𑀸 𑀢𑀺𑀓𑁂𑀳𑀺 𑀩𑁄𑀥𑀺𑀢𑁂 𑀓𑀼𑀲𑀮𑀸𑀤𑀺𑀪𑁂𑀤𑁂 𑀢𑀩𑁆𑀩𑀺𑀪𑀸𑀕𑀪𑀺𑀦𑁆𑀦𑀸 𑀳𑁂𑀢𑀼𑀆𑀤𑀬𑁄 𑀯𑀼𑀘𑁆𑀘𑀫𑀸𑀦𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀸 𑀳𑁄𑀦𑁆𑀢𑀺. 𑀢𑀣𑀸 𑀳𑀺 ‘‘𑀢𑀬𑁄 𑀓𑀼𑀲𑀮𑀳𑁂𑀢𑀽’’𑀢𑀺𑀆𑀤𑀺𑀦𑀸 𑀓𑀼𑀲𑀮𑀸𑀤𑀺𑀫𑀼𑀔𑁂𑀦 𑀳𑁂𑀢𑀼𑀆𑀤𑀬𑁄 𑀯𑀺𑀪𑀢𑁆𑀢𑀸, 𑀓𑀢𑀺𑀧𑀬𑀪𑁂𑀤𑀸 𑀘 𑀢𑀺𑀓𑀸 𑀤𑁆𑀯𑀸𑀯𑀻𑀲𑀢𑀺𑀧𑀭𑀺𑀫𑀸𑀡𑀢𑁆𑀢𑀸.

𑀢𑁂𑀲𑀼 𑀧𑀦 𑀲𑀩𑁆𑀩𑀲𑀗𑁆𑀕𑀳𑀅𑀲𑀗𑁆𑀓𑀭𑀆𑀤𑀺𑀓𑀮𑁆𑀬𑀸𑀡𑀪𑀸𑀯𑁂𑀦 𑀧𑀞𑀫𑀁 𑀓𑀼𑀲𑀮𑀢𑁆𑀢𑀺𑀓𑀁 𑀯𑀼𑀢𑁆𑀢𑀁. 𑀦𑀺𑀭𑀯𑀲𑁂𑀲𑀸 𑀳𑀺 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀓𑀼𑀲𑀮𑀢𑁆𑀢𑀺𑀓𑁂𑀦 𑀲𑀗𑁆𑀕𑀳𑀺𑀢𑀸, 𑀦 𑀢𑀣𑀸 𑀯𑁂𑀤𑀦𑀸𑀢𑁆𑀢𑀺𑀓𑀸𑀤𑀻𑀳𑀺. 𑀦𑀦𑀼 𑀯𑀺𑀧𑀸𑀓𑀢𑁆𑀢𑀺𑀓𑀸𑀤𑀻𑀳𑀺𑀧𑀺 𑀦𑀺𑀭𑀯𑀲𑁂𑀲𑀸 𑀥𑀫𑁆𑀫𑀸 𑀲𑀗𑁆𑀕𑀳𑀺𑀢𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀢𑁂𑀲𑀼 𑀧𑀦 𑀅𑀦𑀯𑀚𑁆𑀚𑀲𑀸𑀯𑀚𑁆𑀚𑀥𑀫𑁆𑀫𑀸 𑀦 𑀅𑀲𑀗𑁆𑀓𑀭𑀢𑁄 𑀯𑀼𑀢𑁆𑀢𑀸 𑀬𑀣𑀸 𑀓𑀼𑀲𑀮𑀢𑁆𑀢𑀺𑀓𑁂. 𑀦𑀦𑀼 𑀘 𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀢𑁆𑀢𑀺𑀓𑀸𑀤𑀻𑀲𑀼𑀧𑀺 𑀢𑁂 𑀅𑀲𑀗𑁆𑀓𑀭𑀢𑁄 𑀯𑀼𑀢𑁆𑀢𑀸𑀢𑀺? 𑀏𑀯𑀫𑁂𑀢𑀁, 𑀢𑁂 𑀧𑀦 𑀅𑀓𑀮𑁆𑀬𑀸𑀡𑀪𑀽𑀢𑁂 𑀧𑀸𑀧𑀥𑀫𑁆𑀫𑁂 𑀆𑀤𑀺𑀁 𑀓𑀢𑁆𑀯𑀸 𑀯𑀼𑀢𑁆𑀢𑀸, 𑀦 𑀏𑀯𑀫𑀬𑀁. 𑀅𑀬𑀁 𑀧𑀦 𑀓𑀮𑁆𑀬𑀸𑀡𑀪𑀽𑀢𑁂 𑀧𑀼𑀚𑁆𑀚𑀪𑀯𑀧𑀭𑀺𑀦𑀺𑀩𑁆𑀩𑀼𑀢𑀺𑀦𑀺𑀧𑁆𑀨𑀸𑀤𑀓𑁂 𑀧𑀼𑀜𑁆𑀜𑀥𑀫𑁆𑀫𑁂 𑀆𑀤𑀺𑀁 𑀓𑀢𑁆𑀯𑀸 𑀯𑀼𑀢𑁆𑀢𑁄. 𑀇𑀢𑀺 𑀪𑀕𑀯𑀸 𑀲𑀡𑁆𑀳𑀲𑀼𑀔𑀼𑀫𑀁 𑀭𑀽𑀧𑀸𑀭𑀽𑀧𑀤𑁂𑀲𑀦𑀁 𑀆𑀭𑀪𑀦𑁆𑀢𑁄 𑀲𑀩𑁆𑀩𑀲𑀗𑁆𑀕𑀳𑀅𑀲𑀗𑁆𑀓𑀭𑀆𑀤𑀺𑀓𑀮𑁆𑀬𑀸𑀡𑀕𑀼𑀡𑀬𑁄𑀕𑀢𑁄 𑀧𑀞𑀫𑀁 𑀓𑀼𑀲𑀮𑀢𑁆𑀢𑀺𑀓𑀁 𑀤𑁂𑀲𑁂𑀢𑀺, 𑀓𑀺𑀜𑁆𑀘 𑀢𑀤𑀜𑁆𑀜𑀢𑁆𑀢𑀺𑀓𑀸𑀦𑀁 𑀲𑀼𑀔𑀕𑁆𑀕𑀳𑀡𑀢𑁄. 𑀢𑀣𑀸 𑀳𑀺 𑀓𑀼𑀲𑀮𑀢𑁆𑀢𑀺𑀓𑀫𑀼𑀔𑁂𑀦 ‘‘𑀓𑀸𑀫𑀸𑀯𑀘𑀭𑀓𑀼𑀲𑀮𑀢𑁄 𑀘𑀢𑁆𑀢𑀸𑀭𑁄 𑀲𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸’’𑀢𑀺𑀆𑀤𑀺𑀦𑀸 𑀯𑁂𑀤𑀦𑀸𑀢𑁆𑀢𑀺𑀓𑀸𑀤𑀬𑁄 𑀯𑀺𑀪𑀢𑁆𑀢𑀸𑀢𑀺.

𑀓𑀼𑀲𑀮𑀢𑁆𑀢𑀺𑀓𑁂𑀧𑀺 𑀘 𑀧𑀥𑀸𑀦𑀧𑀸𑀲𑀁𑀲𑀉𑀪𑀬𑀳𑀺𑀢𑀪𑀸𑀯𑀢𑁄 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀞𑀫𑀁 𑀯𑀼𑀢𑁆𑀢𑀸. 𑀓𑀼𑀲𑀮𑀸 𑀳𑀺 𑀥𑀫𑁆𑀫𑀸 𑀲𑀼𑀔𑀯𑀺𑀧𑀸𑀓𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀉𑀢𑁆𑀢𑀫𑀸 𑀅𑀯𑀚𑁆𑀚𑀯𑀺𑀥𑀫𑀦𑀢𑁄 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸 𑀇𑀥𑀮𑁄𑀓𑀧𑀭𑀮𑁄𑀓𑁂𑀲𑀼 𑀅𑀢𑁆𑀣𑀸𑀯𑀳𑀸 𑀦𑀺𑀲𑁆𑀲𑀭𑀡𑀸𑀯𑀳𑀸 𑀘, 𑀢𑀲𑁆𑀫𑀸 𑀧𑀥𑀸𑀦𑀸𑀤𑀺𑀪𑀸𑀯𑁂𑀦 𑀧𑀞𑀫𑀁 𑀯𑀼𑀢𑁆𑀢𑀸, 𑀢𑀧𑁆𑀧𑀝𑀺𑀧𑀓𑁆𑀔𑀢𑁆𑀢𑀸 𑀢𑀤𑀦𑀦𑁆𑀢𑀭𑀁 𑀅𑀓𑀼𑀲𑀮𑀸, 𑀢𑀤𑀼𑀪𑀬𑀯𑀺𑀧𑀭𑀻𑀢𑀲𑀪𑀸𑀯𑀸 𑀢𑀤𑀦𑀦𑁆𑀢𑀭𑀁 𑀅𑀩𑁆𑀬𑀸𑀓𑀢𑀸 𑀯𑀼𑀢𑁆𑀢𑀸. 𑀓𑀼𑀲𑀮𑀯𑀲𑁂𑀦 𑀯𑀸 𑀅𑀲𑁆𑀲𑀸𑀤𑁄, 𑀅𑀓𑀼𑀲𑀮𑀯𑀲𑁂𑀦 𑀆𑀤𑀻𑀦𑀯𑁄, 𑀅𑀩𑁆𑀬𑀸𑀓𑀢𑀥𑀫𑁆𑀫𑁂𑀲𑀼 𑀦𑀺𑀩𑁆𑀩𑀸𑀦𑀯𑀲𑁂𑀦 𑀦𑀺𑀲𑁆𑀲𑀭𑀡𑀦𑁆𑀢𑀺 𑀇𑀫𑀺𑀦𑀸 𑀅𑀲𑁆𑀲𑀸𑀤𑀸𑀤𑀺𑀓𑁆𑀓𑀫𑁂𑀦, 𑀓𑀼𑀲𑀮𑁂𑀲𑀼 𑀧𑀢𑀺𑀝𑁆𑀞𑀸𑀬 𑀧𑀡𑁆𑀟𑀺𑀢𑀸 𑀅𑀓𑀼𑀲𑀮𑁂 𑀧𑀚𑀳𑀦𑁆𑀢𑀸 𑀅𑀩𑁆𑀬𑀸𑀓𑀢𑀥𑀫𑁆𑀫𑀪𑀽𑀢𑀫𑀕𑁆𑀕𑀨𑀮𑀁 𑀦𑀺𑀩𑁆𑀩𑀸𑀦𑀜𑁆𑀘 𑀲𑀘𑁆𑀙𑀺𑀓𑀭𑁄𑀦𑁆𑀢𑀻𑀢𑀺 𑀇𑀫𑀺𑀦𑀸 𑀯𑀸 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁂𑀦 𑀅𑀬𑀫𑀦𑀼𑀧𑀼𑀩𑁆𑀩𑀻 𑀞𑀧𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀲𑁂𑀓𑁆𑀔𑀢𑁆𑀢𑀺𑀓𑀸𑀤𑀻𑀲𑀼 𑀯𑀺𑀬 𑀲𑀭𑀽𑀧𑀢𑁄 𑀧𑀼𑀭𑀺𑀫𑀧𑀤𑀤𑁆𑀯𑀬𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀢𑀢𑀺𑀬𑀧𑀤𑀁 𑀦 𑀯𑀼𑀢𑁆𑀢𑀁 ‘‘𑀦𑁂𑀯𑀓𑀼𑀲𑀮𑀸 𑀦𑀸𑀓𑀼𑀲𑀮𑀸’’𑀢𑀺? 𑀯𑀺𑀲𑁂𑀲𑀤𑀻𑀧𑀦𑀢𑁆𑀣𑀁. 𑀬𑀣𑀸 𑀳𑀺 𑀲𑁂𑀓𑁆𑀔𑀸𑀲𑁂𑀓𑁆𑀔𑀲𑀪𑀸𑀯𑁂𑀲𑀼 𑀥𑀫𑁆𑀫𑁂𑀲𑀼 𑀓𑁄𑀘𑀺𑀧𑀺 𑀥𑀫𑁆𑀫𑁄 𑀢𑀤𑀼𑀪𑀬𑀲𑀪𑀸𑀯𑁂𑀦 𑀓𑁂𑀦𑀘𑀺𑀧𑀺 𑀧𑀭𑀺𑀬𑀸𑀬𑁂𑀦 𑀓𑀤𑀸𑀘𑀺 𑀅𑀩𑁆𑀬𑀸𑀓𑀭𑀡𑀻𑀬𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀲𑁂𑀓𑁆𑀔𑀢𑁆𑀢𑀺𑀓𑁂 𑀧𑀤𑀤𑁆𑀯𑀬𑀧𑀝𑀺𑀓𑁆𑀔𑁂𑀧𑀯𑀲𑁂𑀦 ‘‘𑀦𑁂𑀯𑀲𑁂𑀓𑁆𑀔𑀸 𑀦𑀸𑀲𑁂𑀓𑁆𑀔𑀸’’𑀢𑁆𑀯𑁂𑀯 𑀯𑀼𑀢𑁆𑀢𑀁, 𑀦 𑀏𑀯𑀁 𑀇𑀥. 𑀇𑀥 𑀧𑀦 𑀓𑀼𑀲𑀮𑀲𑀪𑀸𑀯𑀸 𑀏𑀯 𑀥𑀫𑁆𑀫𑀸 𑀅𑀕𑁆𑀕𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀢𑀣𑀸 𑀦 𑀩𑁆𑀬𑀸𑀓𑀭𑀡𑀻𑀬𑀸 𑀳𑁄𑀦𑁆𑀢𑀻𑀢𑀺 𑀇𑀫𑀲𑁆𑀲 𑀯𑀺𑀲𑁂𑀲𑀲𑁆𑀲 𑀤𑀻𑀧𑀦𑀢𑁆𑀣𑀁 ‘‘𑀅𑀩𑁆𑀬𑀸𑀓𑀢𑀸’’𑀢𑀺 𑀯𑀼𑀢𑁆𑀢𑀁. 𑀯𑀘𑀦𑀫𑀢𑁆𑀢𑁂 𑀏𑀯 𑀯𑀸 𑀇𑀤𑀁 𑀦𑀸𑀦𑀸𑀓𑀭𑀡𑀁 ‘‘𑀅𑀩𑁆𑀬𑀸𑀓𑀢𑀸 𑀦𑁂𑀯𑀓𑀼𑀲𑀮𑀸 𑀦𑀸𑀓𑀼𑀲𑀮𑀸’’𑀢𑀺 𑀩𑁆𑀬𑀸𑀓𑀢-𑀲𑀤𑁆𑀤𑁂𑀦 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀩𑁄𑀥𑀺𑀢𑀢𑁆𑀢𑀸𑀢𑀺.

𑀏𑀢𑁆𑀣 𑀘 𑀅𑀓𑀼𑀲𑀮𑁂𑀲𑀼 𑀢𑀡𑁆𑀳𑀸𑀬 𑀲𑀩𑁆𑀩𑀸𑀓𑀼𑀲𑀮𑁂𑀳𑀺, 𑀢𑁂𑀪𑀽𑀫𑀓𑀓𑀼𑀲𑀮𑀸𑀓𑀼𑀲𑀮𑁂𑀳𑀺 𑀯𑀸 𑀲𑀫𑀼𑀤𑀬𑀲𑀘𑁆𑀘𑀁, 𑀢𑀁𑀢𑀁𑀅𑀯𑀲𑀺𑀝𑁆𑀞𑀢𑁂𑀪𑀽𑀫𑀓𑀥𑀫𑁆𑀫𑁂𑀳𑀺 𑀤𑀼𑀓𑁆𑀔𑀲𑀘𑁆𑀘𑀁, 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑁂𑀦 𑀫𑀕𑁆𑀕𑀲𑀘𑁆𑀘𑀁, 𑀅𑀯𑀲𑀺𑀝𑁆𑀞𑀅𑀩𑁆𑀬𑀸𑀓𑀢𑀯𑀺𑀲𑁂𑀲𑁂𑀦 𑀦𑀺𑀭𑁄𑀥𑀲𑀘𑁆𑀘𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀢𑀢𑁆𑀣 𑀲𑀫𑀼𑀤𑀬𑁂𑀦 𑀅𑀲𑁆𑀲𑀸𑀤𑁄, 𑀤𑀼𑀓𑁆𑀔𑁂𑀦 𑀆𑀤𑀻𑀦𑀯𑁄, 𑀫𑀕𑁆𑀕𑀦𑀺𑀭𑁄𑀥𑁂𑀳𑀺 𑀦𑀺𑀲𑁆𑀲𑀭𑀡𑀁. 𑀓𑀺𑀜𑁆𑀘𑀸𑀧𑀺 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀪𑀸𑀯𑀢𑁄 𑀲𑀪𑀸𑀯𑀥𑀫𑁆𑀫𑀦𑀺𑀤𑁆𑀥𑀸𑀭𑀡𑀧𑀥𑀸𑀦𑀸 𑀅𑀪𑀺𑀥𑀫𑁆𑀫𑀓𑀣𑀸, 𑀢𑁂𑀲𑀁 𑀧𑀦 𑀓𑀼𑀲𑀮𑀸𑀤𑀺𑀯𑀺𑀲𑁂𑀲𑁂 𑀦𑀺𑀤𑁆𑀥𑀸𑀭𑀺𑀢𑁂 𑀢𑀲𑁆𑀲 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀢𑀸𑀤𑀺𑀧𑀺 𑀅𑀢𑁆𑀣𑀢𑁄 𑀯𑀼𑀢𑁆𑀢𑀫𑁂𑀯 𑀳𑁄𑀢𑀺. 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀲𑀫𑁆𑀧𑀤𑀸𑀬 ‘‘𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡𑀁, 𑀓𑀼𑀲𑀮𑀲𑁆𑀲 𑀉𑀧𑀲𑀫𑁆𑀧𑀤𑀸’’𑀢𑀺 (𑀥. 𑀧. 𑁧𑁮𑁩; 𑀤𑀻. 𑀦𑀺. 𑁨.𑁯𑁦) 𑀏𑀯𑀫𑀸𑀤𑀺𑀯𑀘𑀦𑀢𑁄 𑀳𑀺 𑀓𑀼𑀲𑀮𑀸𑀤𑀻𑀦𑀁 𑀉𑀧𑀲𑀫𑁆𑀧𑀸𑀤𑀦𑀸𑀤𑀺𑀤𑀲𑁆𑀲𑀦𑀧𑀭𑀁 𑀪𑀕𑀯𑀢𑁄 𑀲𑀸𑀲𑀦𑀁, 𑀢𑀲𑁆𑀫𑀸 𑀓𑀼𑀲𑀮𑀸𑀦𑀁 𑀉𑀧𑀲𑀫𑁆𑀧𑀸𑀤𑀦𑀁 𑀅𑀓𑀼𑀲𑀮𑀸𑀦𑀁 𑀧𑀳𑀸𑀦𑀜𑁆𑀘 𑀉𑀧𑀸𑀬𑁄, 𑀅𑀩𑁆𑀬𑀸𑀓𑀢𑀯𑀺𑀲𑁂𑀲𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸 𑀨𑀮𑀁, 𑀓𑀼𑀲𑀮𑀸𑀤𑀻𑀦𑀁 𑀉𑀧𑀲𑀫𑁆𑀧𑀸𑀤𑀦𑀸𑀤𑀺𑀅𑀢𑁆𑀣𑀸 𑀤𑁂𑀲𑀦𑀸 𑀆𑀡𑀢𑁆𑀢𑀻𑀢𑀺 𑀅𑀬𑀁 𑀤𑁂𑀲𑀦𑀸𑀳𑀸𑀭𑁄.

𑀆𑀭𑁄𑀕𑁆𑀬𑀝𑁆𑀞𑁂𑀦 𑀅𑀦𑀯𑀚𑁆𑀚𑀝𑁆𑀞𑁂𑀦 𑀓𑁄𑀲𑀮𑁆𑀬𑀲𑀫𑁆𑀪𑀽𑀢𑀝𑁆𑀞𑁂𑀦 𑀘 𑀓𑀼𑀲𑀮𑀸, 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀅𑀓𑀼𑀲𑀮𑀸, 𑀢𑀤𑀼𑀪𑀬𑀯𑀺𑀧𑀭𑀻𑀢𑀢𑁄 𑀅𑀩𑁆𑀬𑀸𑀓𑀢𑀸, 𑀲𑀪𑀸𑀯𑀥𑀸𑀭𑀡𑀸𑀤𑀺𑀅𑀢𑁆𑀣𑁂𑀦 𑀥𑀫𑁆𑀫𑀸𑀢𑀺 𑀅𑀦𑀼𑀧𑀤𑀯𑀺𑀘𑀺𑀦𑀦𑀁 𑀯𑀺𑀘𑀬𑁄 𑀳𑀸𑀭𑁄.

𑀧𑀼𑀚𑁆𑀚𑀪𑀯𑀨𑀮𑀧𑀭𑀺𑀦𑀺𑀩𑁆𑀩𑀼𑀢𑀺𑀦𑀺𑀧𑁆𑀨𑀢𑁆𑀢𑀺 𑀓𑀼𑀲𑀮𑁂𑀳𑀻𑀢𑀺 𑀬𑀼𑀚𑁆𑀚𑀢𑀺 𑀲𑀼𑀔𑀯𑀺𑀧𑀸𑀓𑀢𑁆𑀢𑀸, 𑀅𑀧𑀸𑀬𑀤𑀼𑀓𑁆𑀔𑀲𑀁𑀲𑀸𑀭𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺 𑀅𑀓𑀼𑀲𑀮𑁂𑀳𑀻𑀢𑀺 𑀬𑀼𑀚𑁆𑀚𑀢𑀺 𑀅𑀦𑀺𑀝𑁆𑀞𑀨𑀮𑀢𑁆𑀢𑀸, 𑀢𑀤𑀼𑀪𑀬𑀨𑀮𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺 𑀅𑀩𑁆𑀬𑀸𑀓𑀢𑁂𑀳𑀻𑀢𑀺 𑀬𑀼𑀚𑁆𑀚𑀢𑀺 𑀅𑀯𑀺𑀧𑀸𑀓𑀥𑀫𑁆𑀫𑀢𑁆𑀢𑀸𑀢𑀺 𑀅𑀬𑀁 𑀬𑀼𑀢𑁆𑀢𑀺 𑀳𑀸𑀭𑁄.

𑀓𑀼𑀲𑀮𑀸 𑀥𑀫𑁆𑀫𑀸 𑀲𑀼𑀔𑀯𑀺𑀧𑀸𑀓𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀅𑀓𑀼𑀲𑀮𑀸 𑀤𑀼𑀓𑁆𑀔𑀯𑀺𑀧𑀸𑀓𑀲𑁆𑀲, 𑀅𑀩𑁆𑀬𑀸𑀓𑀢𑀸 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀥𑀫𑁆𑀫𑀸𑀦𑀦𑁆𑀢𑀺 𑀅𑀬𑀁 𑀧𑀤𑀝𑁆𑀞𑀸𑀦𑁄 𑀳𑀸𑀭𑁄.

𑀓𑀼𑀲𑀮𑀕𑁆𑀕𑀳𑀡𑁂𑀦 𑀬𑁂 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀸 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸 𑀅𑀦𑀼𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀸𑀦𑀺𑀬𑀸…𑀧𑁂… 𑀅𑀭𑀡𑀸 𑀥𑀫𑁆𑀫𑀸, 𑀢𑁂 𑀩𑁄𑀥𑀺𑀢𑀸 𑀪𑀯𑀦𑁆𑀢𑀺 𑀓𑀼𑀲𑀮𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸. 𑀢𑀣𑀸 𑀅𑀓𑀼𑀲𑀮𑀕𑁆𑀕𑀳𑀡𑁂𑀦 𑀬𑁂 𑀲𑀸𑀯𑀚𑁆𑀚𑀤𑀼𑀓𑁆𑀔𑀯𑀺𑀧𑀸𑀓𑀸 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸 𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀸…𑀧𑁂… 𑀲𑀭𑀡𑀸 𑀥𑀫𑁆𑀫𑀸, 𑀢𑁂 𑀩𑁄𑀥𑀺𑀢𑀸 𑀪𑀯𑀦𑁆𑀢𑀺 𑀅𑀓𑀼𑀲𑀮𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸. 𑀢𑀣𑀸 𑀅𑀩𑁆𑀬𑀸𑀓𑀢𑀕𑁆𑀕𑀳𑀡𑁂𑀦 𑀬𑁂 𑀅𑀯𑀺𑀧𑀸𑀓𑀸𑀭𑀳𑀸 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀯𑀺𑀧𑀸𑀓𑀸 𑀥𑀫𑁆𑀫𑀸 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸 𑀅𑀦𑀼𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀸𑀦𑀺𑀬𑀸…𑀧𑁂… 𑀅𑀭𑀡𑀸 𑀥𑀫𑁆𑀫𑀸, 𑀢𑁂 𑀩𑁄𑀥𑀺𑀢𑀸 𑀪𑀯𑀦𑁆𑀢𑀺 𑀅𑀩𑁆𑀬𑀸𑀓𑀢𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸𑀢𑀺 𑀅𑀬𑀁 𑀮𑀓𑁆𑀔𑀡𑁄 𑀳𑀸𑀭𑁄.

‘‘𑀓𑀼𑀘𑁆𑀙𑀺𑀢𑁂 𑀧𑀸𑀧𑀥𑀫𑁆𑀫𑁂 𑀲𑀮𑀬𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀦𑀺𑀭𑀼𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀓𑀼𑀲𑀮𑀸𑀤𑀺𑀫𑀼𑀔𑁂𑀦 𑀭𑀽𑀧𑀸𑀭𑀽𑀧𑀥𑀫𑁆𑀫𑁂 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀺𑀲𑀼𑀤𑁆𑀥𑀺𑀧𑀭𑀫𑁆𑀧𑀭𑀸𑀬 ‘‘𑀓𑀣𑀁 𑀦𑀼 𑀔𑁄 𑀲𑀢𑁆𑀢𑀸 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀪𑀸𑀕𑀺𑀦𑁄 𑀪𑀯𑁂𑀬𑁆𑀬𑀼’’𑀦𑁆𑀢𑀺 𑀅𑀬𑀫𑁂𑀢𑁆𑀣 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄, 𑀦𑀺𑀤𑀸𑀦𑀁 𑀅𑀲𑀸𑀥𑀸𑀭𑀡𑀢𑁄 𑀓𑀼𑀲𑀮𑀸𑀤𑀺𑀪𑁂𑀤𑁂𑀦 𑀩𑀼𑀚𑁆𑀛𑀦𑀓𑀲𑀢𑁆𑀢𑀸. 𑀲𑀸𑀥𑀸𑀭𑀡𑀢𑁄 𑀧𑀦 𑀧𑀸𑀓𑀝𑀫𑁂𑀯. 𑀧𑀞𑀫𑀁 𑀓𑀼𑀲𑀮𑀢𑁆𑀢𑀺𑀓𑀲𑁆𑀲 𑀤𑁂𑀲𑀦𑀸 𑀯𑀺𑀘𑀸𑀭𑀺𑀢𑀸𑀬𑁂𑀯𑀸𑀢𑀺 𑀅𑀬𑀁 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄.

𑀓𑀼𑀲𑀮𑀕𑁆𑀕𑀳𑀡𑁂𑀦 𑀓𑀮𑁆𑀬𑀸𑀡𑀫𑀺𑀢𑁆𑀢𑀧𑀭𑀺𑀕𑁆𑀕𑀳𑁄 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀭𑀺𑀕𑁆𑀕𑀳𑁄 𑀘. 𑀢𑀢𑁆𑀣 𑀧𑀞𑀫𑁂𑀦 𑀲𑀓𑀮𑀁 𑀩𑁆𑀭𑀳𑁆𑀫𑀘𑀭𑀺𑀬𑀫𑀸𑀯𑀢𑁆𑀢𑀢𑀺, 𑀤𑀼𑀢𑀺𑀬𑁂𑀦 𑀘 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀫𑀽𑀮𑀓𑀸 𑀥𑀫𑁆𑀫𑀸. 𑀅𑀓𑀼𑀲𑀮𑀕𑁆𑀕𑀳𑀡𑁂𑀦 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀅𑀩𑁆𑀬𑀸𑀓𑀢𑀕𑁆𑀕𑀳𑀡𑁂𑀦 𑀧𑀦 𑀲𑀓𑀮𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀧𑀓𑁆𑀔𑁄 𑀬𑀣𑀸𑀭𑀳𑀫𑀸𑀯𑀢𑁆𑀢𑀢𑀻𑀢𑀺 𑀅𑀬𑀁 𑀆𑀯𑀢𑁆𑀢𑁄 𑀳𑀸𑀭𑁄.

𑀢𑀢𑁆𑀣 𑀓𑀼𑀲𑀮𑀸 𑀪𑀽𑀫𑀺𑀢𑁄 𑀘𑀢𑀼𑀥𑀸 𑀯𑀺𑀪𑀢𑁆𑀢𑀸, 𑀲𑀫𑁆𑀧𑀬𑀼𑀢𑁆𑀢𑀧𑀯𑀢𑁆𑀢𑀺𑀆𑀓𑀸𑀭𑀸𑀤𑀺𑀢𑁄 𑀧𑀦 𑀅𑀦𑁂𑀓𑀥𑀸. 𑀅𑀓𑀼𑀲𑀮𑀸 𑀪𑀽𑀫𑀺𑀢𑁄 𑀏𑀓𑀥𑀸 𑀯𑀺𑀪𑀢𑁆𑀢𑀸, 𑀲𑀫𑁆𑀧𑀬𑀼𑀢𑁆𑀢𑀸𑀤𑀺𑀢𑁄 𑀅𑀦𑁂𑀓𑀥𑀸. 𑀅𑀩𑁆𑀬𑀸𑀓𑀢𑀸 𑀧𑀦 𑀯𑀺𑀧𑀸𑀓𑀓𑀺𑀭𑀺𑀬𑀭𑀽𑀧𑀦𑀺𑀩𑁆𑀩𑀸𑀦𑀯𑀲𑁂𑀦 𑀘𑀢𑀼𑀥𑀸 𑀪𑀽𑀫𑀺𑀲𑀫𑁆𑀧𑀬𑀼𑀢𑁆𑀢𑀸𑀤𑀺𑀢𑁄 𑀅𑀦𑁂𑀓𑀥𑀸 𑀘 𑀯𑀺𑀪𑀢𑁆𑀢𑀸𑀢𑀺 𑀅𑀬𑀁 𑀯𑀺𑀪𑀢𑁆𑀢𑀺 𑀳𑀸𑀭𑁄.

𑀓𑀼𑀲𑀮𑀸 𑀥𑀫𑁆𑀫𑀸 𑀅𑀓𑀼𑀲𑀮𑀸𑀦𑀁 𑀢𑀤𑀗𑁆𑀕𑀸𑀤𑀺𑀧𑁆𑀧𑀳𑀸𑀦𑀸𑀬 𑀯𑀻𑀢𑀺𑀓𑁆𑀓𑀫𑀸𑀤𑀺𑀧𑁆𑀧𑀳𑀸𑀦𑀸𑀬 𑀘 𑀲𑀁𑀯𑀢𑁆𑀢𑀦𑁆𑀢𑀺, 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀓𑀼𑀲𑀮𑀸𑀦𑀁 𑀅𑀦𑀼𑀧𑀲𑀫𑁆𑀧𑀚𑁆𑀚𑀦𑀸𑀬, 𑀅𑀩𑁆𑀬𑀸𑀓𑀢𑁂𑀲𑀼 𑀅𑀲𑀗𑁆𑀔𑀢𑀥𑀸𑀢𑀼 𑀲𑀩𑁆𑀩𑀲𑀗𑁆𑀔𑀢𑀦𑀺𑀲𑁆𑀲𑀭𑀡𑀸𑀬𑀸𑀢𑀺 𑀅𑀬𑀁 𑀧𑀭𑀺𑀯𑀢𑁆𑀢𑁄 𑀳𑀸𑀭𑁄.

𑀓𑀼𑀲𑀮𑀸 𑀅𑀦𑀯𑀚𑁆𑀚𑀸 𑀧𑀼𑀜𑁆𑀜𑀸𑀦𑀻𑀢𑀺 𑀧𑀭𑀺𑀬𑀸𑀬𑀯𑀘𑀦𑀁, 𑀅𑀓𑀼𑀲𑀮𑀸 𑀲𑀸𑀯𑀚𑁆𑀚𑀸 𑀅𑀧𑀼𑀜𑁆𑀜𑀸𑀦𑀻𑀢𑀺 𑀧𑀭𑀺𑀬𑀸𑀬 𑀯𑀘𑀦𑀁, 𑀅𑀩𑁆𑀬𑀸𑀓𑀢𑀸 𑀅𑀯𑀺𑀧𑀸𑀓𑀸𑀭𑀳𑀸 𑀦𑁂𑀯𑀆𑀘𑀬𑀕𑀸𑀫𑀻 𑀦𑀅𑀧𑀘𑀬𑀕𑀸𑀫𑀻𑀦𑁄𑀢𑀺 𑀧𑀭𑀺𑀬𑀸𑀬𑀯𑀘𑀦𑀦𑁆𑀢𑀺 𑀅𑀬𑀁 𑀯𑁂𑀯𑀘𑀦𑁄 𑀳𑀸𑀭𑁄.

𑀓𑀼𑀲𑀮𑀸𑀤𑀬𑁄 ‘‘𑀬𑀲𑁆𑀫𑀺𑀁 𑀲𑀫𑀬𑁂’’𑀢𑀺𑀆𑀤𑀺𑀦𑀸 𑀧𑀪𑀯𑀪𑀽𑀫𑀺𑀯𑁂𑀯𑀘𑀦𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀬𑀣𑀸𑀲𑀫𑁆𑀪𑀯𑀁 𑀧𑀭𑀺𑀜𑁆𑀜𑀸𑀤𑀺𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀘 𑀧𑀜𑁆𑀜𑀢𑁆𑀢𑀸𑀢𑀺 𑀅𑀬𑀁 𑀧𑀜𑁆𑀜𑀢𑁆𑀢𑀺 𑀳𑀸𑀭𑁄.

𑀅𑀓𑀼𑀲𑀮𑀸𑀦𑀁 𑀓𑀼𑀘𑁆𑀙𑀺𑀢𑀸𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀲𑀮𑀦𑀁 𑀓𑀼𑀲𑀸𑀦𑀁 𑀯𑀺𑀬 𑀓𑀼𑀲𑀸𑀦𑀁 𑀯𑀸 𑀭𑀸𑀕𑀸𑀤𑀻𑀦𑀁 𑀮𑀯𑀦𑀁 𑀏𑀯𑀁𑀥𑀫𑁆𑀫𑀢𑀸𑀢𑀺 𑀅𑀬𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀫𑀼𑀔𑁂𑀦 𑀅𑀯𑀢𑀭𑀡𑀁, 𑀢𑀣𑀸 𑀓𑀼𑀲𑁂𑀦 𑀮𑀸𑀢𑀩𑁆𑀩𑀸 𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀸 𑀘𑀸𑀢𑀺 𑀧𑀘𑁆𑀘𑀬𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸𑀬 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤…𑀧𑁂… 𑀅𑀯𑀢𑀭𑀡𑀁, 𑀧𑀘𑁆𑀘𑀬𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸𑀬 𑀯𑀸 𑀆𑀤𑀺𑀅𑀦𑁆𑀢𑀯𑀦𑁆𑀢𑀸 𑀅𑀦𑀺𑀘𑁆𑀘𑀦𑁆𑀢𑀺𑀓𑀸 𑀘𑀸𑀢𑀺 𑀅𑀦𑀺𑀘𑁆𑀘𑀢𑀸𑀫𑀼𑀔𑁂𑀦 𑀅𑀯𑀢𑀭𑀡𑀁, 𑀅𑀦𑀺𑀘𑁆𑀘𑀢𑀸 𑀏𑀯 𑀉𑀤𑀬𑀩𑁆𑀩𑀬𑀧𑀝𑀺𑀧𑀻𑀴𑀺𑀢𑀢𑀸𑀬 𑀤𑀼𑀓𑁆𑀔𑀸𑀢𑀺 𑀤𑀼𑀓𑁆𑀔𑀢𑀸𑀫𑀼𑀔𑁂𑀦 𑀅𑀯𑀢𑀭𑀡𑀁, 𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀝𑁆𑀞𑁂𑀦 𑀥𑀫𑁆𑀫𑀸𑀢𑀺 𑀅𑀩𑁆𑀬𑀸𑀧𑀸𑀭𑀢𑁄 𑀲𑀼𑀜𑁆𑀜𑀢𑀸𑀫𑀼𑀔𑁂𑀦 𑀅𑀯𑀢𑀭𑀡𑀁, 𑀏𑀯𑀁 𑀓𑀼𑀲𑀮𑀸𑀢𑀺 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀤𑁆𑀯𑀸𑀬𑀢𑀦𑀸𑀦𑀺 𑀤𑁆𑀯𑁂 𑀥𑀸𑀢𑀼𑀬𑁄𑀢𑀺𑀆𑀤𑀺𑀦𑀸 𑀔𑀦𑁆𑀥𑀸𑀬𑀢𑀦𑀥𑀸𑀢𑀸𑀤𑀺𑀫𑀼𑀔𑁂𑀦𑀧𑀺 𑀅𑀯𑀢𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀺𑀦𑀸 𑀦𑀬𑁂𑀦 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑁂𑀲𑀼𑀧𑀺 𑀅𑀯𑀢𑀭𑀡𑀁 𑀤𑀲𑁆𑀲𑁂𑀢𑀩𑁆𑀩𑀦𑁆𑀢𑀺 𑀅𑀬𑀁 𑀅𑀯𑀢𑀭𑀡𑁄 𑀳𑀸𑀭𑁄.

𑀓𑀼𑀲𑀮𑀸𑀢𑀺 𑀆𑀭𑀫𑁆𑀪𑁄, 𑀥𑀫𑁆𑀫𑀸𑀢𑀺 𑀧𑀤𑀲𑀼𑀤𑁆𑀥𑀺, 𑀦𑁄 𑀆𑀭𑀫𑁆𑀪𑀲𑀼𑀤𑁆𑀥𑀺. 𑀢𑀣𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸𑀢𑀺, 𑀥𑀫𑁆𑀫𑀸𑀢𑀺 𑀧𑀦 𑀧𑀤𑀲𑀼𑀤𑁆𑀥𑀺 𑀆𑀭𑀫𑁆𑀪𑀲𑀼𑀤𑁆𑀥𑀺 𑀘𑀸𑀢𑀺 𑀅𑀬𑀁 𑀲𑁄𑀥𑀦𑁄 𑀳𑀸𑀭𑁄.

𑀥𑀫𑁆𑀫𑀸𑀢𑀺 𑀲𑀸𑀫𑀜𑁆𑀜𑀢𑁄 𑀅𑀥𑀺𑀝𑁆𑀞𑀸𑀦𑀁, 𑀢𑀁 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀯𑀺𑀲𑁂𑀲𑀯𑀘𑀦𑀁 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀢𑀺. 𑀢𑀣𑀸 𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑀲𑀸𑀫𑀜𑁆𑀜𑀢𑁄 𑀅𑀥𑀺𑀝𑁆𑀞𑀸𑀦𑀁, 𑀢𑀁 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀓𑀸𑀫𑀸𑀯𑀘𑀭𑀁 𑀲𑁄𑀫𑀦𑀲𑁆𑀲𑀲𑀳𑀕𑀢𑀦𑁆𑀢𑀺𑀆𑀤𑀺 𑀯𑀺𑀲𑁂𑀲𑀯𑀘𑀦𑀁. 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀅𑀬𑀁 𑀅𑀥𑀺𑀝𑁆𑀞𑀸𑀦𑁄 𑀳𑀸𑀭𑁄.

𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀦𑀯𑀫𑁄 𑀔𑀡𑁄 𑀘𑀢𑁆𑀢𑀸𑀭𑀺 𑀘 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑀸𑀦𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀏𑀯 𑀯𑀸 𑀳𑁂𑀢𑀼, 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀳𑁂𑀢𑀼, 𑀓𑀼𑀲𑀮𑀸𑀓𑀼𑀲𑀮𑀸 𑀥𑀫𑁆𑀫𑀸 𑀬𑀣𑀸𑀲𑀫𑁆𑀪𑀯𑀁 𑀅𑀩𑁆𑀬𑀸𑀓𑀢𑀸𑀦𑀁 𑀥𑀫𑁆𑀫𑀸𑀦𑀁 𑀳𑁂𑀢𑀽𑀢𑀺 𑀅𑀬𑀁 𑀧𑀭𑀺𑀓𑁆𑀔𑀸𑀭𑁄 𑀳𑀸𑀭𑁄.

𑀓𑀼𑀲𑀮𑀸𑀢𑀺 𑀧𑀭𑀺𑀜𑁆𑀜𑁂𑀬𑁆𑀬𑀕𑁆𑀕𑀳𑀡𑀜𑁆𑀘𑁂𑀯 𑀪𑀸𑀯𑁂𑀢𑀩𑁆𑀩𑀕𑁆𑀕𑀳𑀡𑀜𑁆𑀘. 𑀅𑀓𑀼𑀲𑀮𑀸𑀢𑀺 𑀧𑀭𑀺𑀜𑁆𑀜𑁂𑀬𑁆𑀬𑀕𑁆𑀕𑀳𑀡𑀜𑁆𑀘𑁂𑀯 𑀧𑀳𑀸𑀢𑀩𑁆𑀩𑀕𑁆𑀕𑀳𑀡𑀜𑁆𑀘. 𑀅𑀩𑁆𑀬𑀸𑀓𑀢𑀸𑀢𑀺 𑀧𑀭𑀺𑀜𑁆𑀜𑁂𑀬𑁆𑀬𑀕𑁆𑀕𑀳𑀡𑀜𑁆𑀘𑁂𑀯 𑀲𑀘𑁆𑀙𑀺𑀓𑀸𑀢𑀩𑁆𑀩𑀕𑁆𑀕𑀳𑀡𑀜𑁆𑀘. 𑀥𑀫𑁆𑀫𑀸𑀢𑀺 𑀧𑀭𑀺𑀜𑁆𑀜𑀸𑀤𑀻𑀦𑀁 𑀧𑀯𑀢𑁆𑀢𑀦𑀸𑀓𑀸𑀭𑀕𑁆𑀕𑀳𑀡𑀁. 𑀢𑁂𑀦 𑀧𑀭𑀺𑀜𑁆𑀜𑁂𑀬𑁆𑀬𑀧𑁆𑀧𑀳𑀸𑀦𑀪𑀸𑀯𑀦𑀸𑀲𑀘𑁆𑀙𑀺𑀓𑀭𑀡𑀸𑀦𑀺 𑀤𑀻𑀧𑀺𑀢𑀸𑀦𑀻𑀢𑀺 𑀢𑀤𑀗𑁆𑀕𑀸𑀤𑀺𑀯𑀻𑀢𑀺𑀓𑁆𑀓𑀫𑀸𑀤𑀺𑀧𑁆𑀧𑀳𑀸𑀦𑀸𑀦𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀘 𑀪𑀸𑀯𑀦𑀸 𑀤𑀲𑁆𑀲𑀺𑀢𑀸𑀢𑀺 𑀅𑀬𑀁 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄.

𑀓𑀸𑀫𑀜𑁆𑀘𑁂𑀢𑀁 𑀅𑀯𑀺𑀲𑁂𑀲𑀢𑁄 𑀲𑀪𑀸𑀯𑀥𑀫𑁆𑀫𑀓𑀣𑀦𑀁, 𑀯𑀺𑀲𑁂𑀲𑀯𑀦𑁆𑀢𑁄 𑀧𑀦 𑀥𑀫𑁆𑀫𑀸 𑀯𑀺𑀲𑁂𑀲𑀢𑁄 𑀦𑀺𑀤𑁆𑀥𑀸𑀭𑀺𑀢𑀸. 𑀢𑀣𑀸 𑀳𑀺 𑀘𑀺𑀢𑁆𑀢𑁂𑀦𑁂𑀯 𑀲𑀫𑀬𑁄 𑀦𑀺𑀬𑀫𑀺𑀢𑁄, 𑀢𑀲𑁆𑀫𑀸 𑀓𑀼𑀲𑀮𑀕𑁆𑀕𑀳𑀡𑁂𑀦 𑀯𑀺𑀲𑁂𑀲𑀢𑁄 𑀲𑀸𑀥𑀺𑀝𑁆𑀞𑀸𑀦𑁄 𑀲𑀫𑀣𑁄 𑀯𑀺𑀧𑀲𑁆𑀲𑀦𑀸 𑀘 𑀤𑀲𑁆𑀲𑀺𑀢𑀸𑀢𑀺. 𑀢𑀣𑀸 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀅𑀓𑀼𑀲𑀮𑀕𑁆𑀕𑀳𑀡𑁂𑀦 𑀲𑀸𑀥𑀺𑀝𑁆𑀞𑀸𑀦𑀸 𑀢𑀡𑁆𑀳𑀸 𑀅𑀯𑀺𑀚𑁆𑀚𑀸 𑀘, 𑀅𑀩𑁆𑀬𑀸𑀓𑀢𑀕𑁆𑀕𑀳𑀡𑁂𑀦 𑀲𑀧𑀭𑀺𑀯𑀸𑀭𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺 𑀘𑀸𑀢𑀺 𑀅𑀬𑀁 𑀦𑀦𑁆𑀤𑀺𑀬𑀸𑀯𑀢𑁆𑀢𑀲𑁆𑀲 𑀦𑀬𑀲𑁆𑀲 𑀪𑀽𑀫𑀺.

𑀢𑀣𑀸 𑀓𑀼𑀲𑀮𑀕𑁆𑀕𑀳𑀡𑁂𑀦 𑀫𑀽𑀮𑀪𑀸𑀯𑀯𑀺𑀲𑁂𑀲𑀢𑁄 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺, 𑀢𑁂𑀲𑀼 𑀘 𑀅𑀤𑁄𑀲𑁂𑀦 𑀲𑀻𑀮𑀓𑁆𑀔𑀦𑁆𑀥𑁄, 𑀅𑀮𑁄𑀪𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁄, 𑀅𑀫𑁄𑀳𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁄 𑀦𑀻𑀬𑀢𑀺. 𑀢𑀣𑀸 𑀅𑀓𑀼𑀲𑀮𑀕𑁆𑀕𑀳𑀡𑁂𑀦 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺, 𑀢𑁂𑀲𑀼 𑀘 𑀮𑁄𑀪𑁂𑀦 𑀢𑀤𑁂𑀓𑀝𑁆𑀞𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸. 𑀢𑀣𑀸 𑀤𑁄𑀲𑀫𑁄𑀳𑁂𑀳𑀺 𑀢𑀁𑀢𑀤𑁂𑀓𑀝𑁆𑀞𑀸. 𑀅𑀩𑁆𑀬𑀸𑀓𑀢𑀕𑁆𑀕𑀳𑀡𑁂𑀦 𑀅𑀧𑁆𑀧𑀡𑀺𑀳𑀺𑀢𑀸𑀦𑀺𑀫𑀺𑀢𑁆𑀢𑀲𑀼𑀜𑁆𑀜𑀢𑀸 𑀦𑀻𑀬𑀦𑁆𑀢𑀻𑀢𑀺 𑀅𑀬𑀁 𑀢𑀺𑀧𑀼𑀓𑁆𑀔𑀮𑀲𑁆𑀲 𑀦𑀬𑀲𑁆𑀲 𑀪𑀽𑀫𑀺.

𑀢𑀣𑀸 𑀓𑀼𑀲𑀮𑀕𑁆𑀕𑀳𑀡𑁂𑀦 𑀬𑀢𑁄 𑀓𑁄𑀲𑀮𑁆𑀮𑀢𑁄 𑀲𑀫𑁆𑀪𑀽𑀢𑀸 𑀓𑀼𑀲𑀮𑀸, 𑀢𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀢𑀁𑀲𑀳𑀚𑀸𑀢𑀸 𑀢𑀤𑀼𑀧𑀦𑀺𑀲𑁆𑀲𑀬𑀸 𑀘 𑀲𑀤𑁆𑀤𑀳𑀦𑀼𑀲𑁆𑀲𑀳𑀦𑀸𑀧𑀺𑀮𑀸𑀧𑀸𑀯𑀺𑀓𑁆𑀔𑁂𑀧𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺. 𑀢𑁂𑀳𑀺 𑀘 𑀲𑀩𑁆𑀩𑁂 𑀲𑀤𑁆𑀥𑀫𑁆𑀫𑀸 𑀩𑁄𑀥𑀺𑀢𑀸 𑀪𑀯𑀦𑁆𑀢𑀺. 𑀅𑀓𑀼𑀲𑀮𑀕𑁆𑀕𑀳𑀡𑁂𑀦 𑀅𑀓𑁄𑀲𑀮𑁆𑀮𑀧𑀝𑀺𑀘𑁆𑀙𑀸𑀤𑀺𑀢𑀸𑀤𑀻𑀦𑀯𑁂𑀲𑀼 𑀓𑀸𑀬𑀯𑁂𑀤𑀦𑀸𑀘𑀺𑀢𑁆𑀢𑀥𑀫𑁆𑀫𑁂𑀲𑀼 𑀲𑀼𑀪𑀲𑀼𑀔𑀦𑀺𑀘𑁆𑀘𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑀪𑀽𑀢𑀸 𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑀸. 𑀅𑀩𑁆𑀬𑀸𑀓𑀢𑀕𑁆𑀕𑀳𑀡𑁂𑀦 𑀬𑀣𑀸𑀯𑀼𑀢𑁆𑀢𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸𑀦𑀺 𑀬𑀣𑀸𑀯𑀼𑀢𑁆𑀢𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑀪𑀽𑀢𑀸𑀦𑀺 𑀘 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀩𑁄𑀥𑀺𑀢𑀸𑀦𑀻𑀢𑀺 𑀅𑀬𑀁 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀲𑁆𑀲 𑀦𑀬𑀲𑁆𑀲 𑀪𑀽𑀫𑀻𑀢𑀺 𑀇𑀫𑁂 𑀢𑀬𑁄 𑀅𑀢𑁆𑀣𑀦𑀬𑀸.

𑀢𑁂𑀳𑀺 𑀘 𑀲𑀺𑀤𑁆𑀥𑁂𑀳𑀺 𑀤𑁆𑀯𑁂 𑀓𑀫𑁆𑀫𑀦𑀬𑀸𑀧𑀺 𑀲𑀺𑀤𑁆𑀥𑀸 𑀳𑁄𑀦𑁆𑀢𑀻𑀢𑀺. 𑀅𑀬𑀁 𑀢𑀺𑀓𑁄 𑀲𑀩𑁆𑀩𑀥𑀫𑁆𑀫𑀲𑀗𑁆𑀕𑀳𑀺𑀢𑀲𑀩𑁆𑀩𑀪𑀸𑀕𑀺𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀇𑀤𑀁 𑀲𑀸𑀲𑀦𑀧𑀝𑁆𑀞𑀸𑀦𑀁.

𑀅𑀬𑀁 𑀢𑀸𑀯 𑀦𑁂𑀢𑁆𑀢𑀺𑀦𑀬𑁂𑀦 𑀓𑀼𑀲𑀮𑀢𑁆𑀢𑀺𑀓𑀯𑀡𑁆𑀡𑀦𑀸.

𑀏𑀯𑀁 𑀯𑁂𑀤𑀦𑀸𑀢𑁆𑀢𑀺𑀓𑀸𑀤𑀻𑀲𑀼𑀧𑀺 𑀬𑀣𑀸𑀲𑀫𑁆𑀪𑀯𑀁 𑀘𑀢𑀼𑀲𑀘𑁆𑀘𑀦𑀺𑀤𑁆𑀥𑀸𑀭𑀡𑀸𑀤𑀺𑀯𑀺𑀥𑀺𑀦𑀸 𑀲𑁄𑀴𑀲 𑀳𑀸𑀭𑀸 𑀧𑀜𑁆𑀘 𑀦𑀬𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀅𑀢𑀺𑀯𑀺𑀢𑁆𑀣𑀸𑀭𑀪𑀬𑁂𑀦 𑀧𑀦 𑀦 𑀯𑀺𑀢𑁆𑀣𑀸𑀭𑀬𑀸𑀫. 𑀲𑀓𑁆𑀓𑀸 𑀳𑀺 𑀇𑀫𑀺𑀦𑀸 𑀦𑀬𑁂𑀦 𑀢𑁂𑀲𑀼 𑀢𑁂𑀲𑀼 𑀢𑀺𑀓𑀤𑀼𑀓𑁂𑀲𑀼 𑀢𑀁𑀢𑀁𑀳𑀸𑀭𑀦𑀬𑀬𑁄𑀚𑀦𑀸𑀦𑀼𑀭𑀽𑀧𑀥𑀫𑁆𑀫𑀦𑀺𑀤𑁆𑀥𑀸𑀭𑀡𑀯𑀲𑁂𑀦 𑀢𑁂 𑀢𑁂 𑀳𑀸𑀭𑀦𑀬𑀸 𑀯𑀺𑀜𑁆𑀜𑀼𑀦𑀸 𑀦𑀺𑀤𑁆𑀤𑀺𑀲𑀺𑀢𑀼𑀦𑁆𑀢𑀺.

𑁨. 𑀢𑀜𑁆𑀘 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀲𑀼𑀔𑀯𑁂𑀤𑀦𑀸 𑀏𑀯 𑀳𑁄𑀢𑀺 𑀲𑀸𑀫𑀜𑁆𑀜𑀲𑁆𑀲 𑀪𑁂𑀤𑀧𑀭𑀺𑀬𑀸𑀤𑀸𑀦𑀢𑁄, 𑀪𑁂𑀤𑀲𑁆𑀲 𑀘 𑀲𑀸𑀫𑀜𑁆𑀜𑀧𑀭𑀺𑀘𑁆𑀘𑀸𑀕𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀲𑁆𑀫𑀸 𑀧𑀦 𑀯𑀺𑀲𑁂𑀲𑀲𑀸𑀫𑀜𑁆𑀜𑀸𑀦𑀺 𑀅𑀯𑀬𑀯𑀲𑀫𑀼𑀤𑀸𑀬𑀸 𑀯𑀺𑀬 𑀅𑀜𑁆𑀜𑀫𑀜𑁆𑀜𑀢𑁄 𑀪𑀺𑀦𑁆𑀦𑀸𑀦𑀺, 𑀢𑀲𑁆𑀫𑀸 ‘‘𑀦 𑀧𑀦…𑀧𑁂… 𑀲𑀫𑀸𑀦𑀢𑁆𑀣𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀢𑀫𑁂𑀯 𑀦𑁂𑀲𑀁 𑀪𑀺𑀦𑁆𑀦𑀢𑀢𑁆𑀯𑀁 ‘‘𑀅𑀬𑀜𑁆𑀳𑀻’’𑀢𑀺𑀆𑀤𑀺𑀦𑀸 𑀯𑀺𑀯𑀭𑀢𑀺. 𑀢𑀦𑁆𑀢𑀺 𑀲𑀼𑀔𑀳𑁂𑀢𑀽𑀦𑀁 𑀓𑀸𑀭𑀡𑀁. 𑀢𑁂𑀦 𑀲𑀼𑀔𑀲𑁆𑀲 𑀓𑀸𑀭𑀡𑀁 𑀲𑀼𑀔𑀳𑁂𑀢𑀼, 𑀲𑀼𑀔𑀲𑁆𑀲 𑀓𑀸𑀭𑀡𑀓𑀸𑀭𑀡𑀁 𑀲𑀼𑀔𑀫𑀽𑀮𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑀼𑀔𑀳𑁂𑀢𑀽𑀦𑀦𑁆𑀢𑀺 𑀏𑀢𑁆𑀣 𑀳𑁂𑀢𑀼-𑀲𑀤𑁆𑀤𑁂𑀦 𑀓𑀸𑀭𑀡𑀪𑀸𑀯𑀲𑀸𑀫𑀜𑁆𑀜𑀢𑁄 𑀳𑁂𑀢𑀼𑀧𑀘𑁆𑀘𑀬𑀸 𑀲𑀗𑁆𑀕𑀳𑀺𑀢𑀸𑀢𑀺 𑀆𑀳 ‘‘𑀧𑀼𑀜𑁆𑀜𑀧𑀲𑁆𑀲𑀤𑁆𑀥𑀺𑀆𑀤𑀻𑀦’’𑀦𑁆𑀢𑀺. 𑀏𑀢𑁆𑀣 𑀘 𑀲𑀼𑀔𑀫𑀽𑀮𑀲𑀼𑀔𑀳𑁂𑀢𑀽𑀲𑀼 𑀨𑀮𑀽𑀧𑀘𑀸𑀭𑁂𑀦, 𑀲𑀼𑀔𑀸𑀭𑀫𑁆𑀫𑀡𑀲𑀼𑀔𑀧𑀘𑁆𑀘𑀬𑀝𑁆𑀞𑀸𑀦𑁂𑀲𑀼 𑀲𑀼𑀔𑀲𑀳𑀘𑀭𑀺𑀬𑀸𑀬, 𑀅𑀩𑁆𑀬𑀸𑀧𑀚𑁆𑀚𑀦𑀺𑀩𑁆𑀩𑀸𑀦𑁂𑀲𑀼 𑀤𑀼𑀓𑁆𑀔𑀸𑀧𑀕𑀫𑀪𑀸𑀯𑁂𑀦 𑀲𑀼𑀔𑀧𑀭𑀺𑀬𑀸𑀬𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀇𑀝𑁆𑀞𑀸𑀲𑀽𑀢𑀺 𑀲𑀼𑀔𑀼𑀧𑁂𑀓𑁆𑀔𑀸𑀦𑀁 𑀯𑀺𑀧𑀭𑀺𑀡𑀸𑀫𑀸𑀜𑁆𑀜𑀸𑀡𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀬 𑀅𑀦𑀺𑀝𑁆𑀞𑀪𑀸𑀯𑁄𑀧𑀺 𑀅𑀢𑁆𑀣𑀻𑀢𑀺 𑀯𑀺𑀲𑁂𑀲𑁂𑀢𑀺. 𑀉𑀧𑁂𑀓𑁆𑀔𑀫𑁂𑀯 𑀯𑀸 𑀅𑀧𑁂𑀓𑁆𑀔𑀺𑀢𑁆𑀯𑀸 𑀯𑀺𑀲𑁂𑀲𑀦𑀁 𑀓𑀢𑀁. 𑀲𑀸 𑀳𑀺 𑀅𑀓𑀼𑀲𑀮𑀯𑀺𑀧𑀸𑀓𑀪𑀽𑀢𑀸 𑀅𑀦𑀺𑀝𑁆𑀞𑀸𑀧𑀺 𑀅𑀢𑁆𑀣𑀻𑀢𑀺. 𑀏𑀯𑀫𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀲𑁄𑀯𑀕𑁆𑀕𑀺𑀓𑀁 𑀲𑀼𑀔𑀯𑀺𑀧𑀸𑀓’’𑀦𑁆𑀢𑀺 (𑀤𑀻. 𑀦𑀺. 𑁧.𑁧𑁬𑁩) 𑀏𑀯𑀫𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀇𑀝𑁆𑀞𑀧𑀭𑀺𑀬𑀸𑀬𑁄 𑀳𑀺 𑀏𑀢𑁆𑀣 𑀲𑀼𑀔-𑀲𑀤𑁆𑀤𑁄𑀢𑀺.

𑀲𑀗𑁆𑀔𑀸𑀭𑀤𑀼𑀓𑁆𑀔𑀸𑀤𑀻𑀲𑀽𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 ‘‘𑀞𑀺𑀢𑀺𑀲𑀼𑀔𑀁 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀁, 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀤𑀼𑀓𑁆𑀔𑀼𑀤𑁆𑀭𑀬𑀁 𑀤𑀼𑀓𑁆𑀔𑀯𑀺𑀧𑀸𑀓’’𑀦𑁆𑀢𑀺𑀆𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀬𑀣𑀸𑀓𑁆𑀓𑀫𑀁 𑀲𑀼𑀔𑀯𑁂𑀤𑀦𑀸 𑀤𑀼𑀓𑁆𑀔𑀅𑀦𑀺𑀝𑁆𑀞𑀧𑀭𑀺𑀬𑀸𑀬𑁄 𑀳𑀺 𑀏𑀢𑁆𑀣 𑀤𑀼𑀓𑁆𑀔-𑀲𑀤𑁆𑀤𑁄𑀢𑀺. 𑀤𑀼𑀓𑁆𑀔𑀯𑁂𑀤𑀦𑀸𑀤𑀼𑀓𑁆𑀔𑀯𑀢𑁆𑀣𑀼𑀆𑀤𑀻𑀲𑀼 𑀤𑀼𑀓𑁆𑀔𑀲𑀤𑁆𑀤𑀧𑁆𑀧𑀯𑀢𑁆𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀸. 𑀯𑀺𑀧𑀸𑀓𑀸𑀯𑀺𑀧𑀸𑀓𑀪𑁂𑀤𑀸𑀬 𑀲𑀩𑁆𑀩𑀸𑀬𑀧𑀺 𑀲𑀼𑀔𑀯𑁂𑀤𑀦𑀸𑀬 𑀯𑀲𑁂𑀦 𑀮𑀓𑁆𑀔𑀡𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀢𑀤𑀼𑀪𑀬𑀸𑀦𑀼𑀓𑀽𑀮𑀫𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀲𑀪𑀸𑀯𑀢𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀧𑀸𑀓𑀸 𑀲𑀪𑀸𑀯𑀢𑁄 𑀇𑀝𑁆𑀞𑀲𑁆𑀲 𑀅𑀦𑀼𑀪𑀯𑀦𑀮𑀓𑁆𑀔𑀡𑀸. 𑀇𑀢𑀭𑀸 𑀲𑀪𑀸𑀯𑀢𑁄 𑀲𑀗𑁆𑀓𑀧𑁆𑀧𑀢𑁄 𑀘 𑀇𑀝𑁆𑀞𑀲𑁆𑀲 𑀇𑀝𑁆𑀞𑀸𑀓𑀸𑀭𑀲𑁆𑀲 𑀯𑀸 𑀅𑀦𑀼𑀪𑀯𑀦𑀮𑀓𑁆𑀔𑀡𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀲𑀫𑀸𑀦𑀧𑀘𑁆𑀘𑀬𑁂𑀳𑀺 𑀏𑀓𑀚𑁆𑀛𑀁 𑀉𑀧𑁆𑀧𑀢𑁆𑀢𑀺𑀢𑁄 𑀲𑀫𑀸𑀦𑀧𑀘𑁆𑀘𑀬𑁂𑀳𑀺 𑀏𑀓𑀚𑁆𑀛𑀁 𑀉𑀧𑁆𑀧𑀢𑁆𑀢𑀺 𑀲𑀸𑀢𑀺𑀲𑀬𑀸𑀢𑀺 𑀉𑀓𑁆𑀓𑀁𑀲𑀕𑀢𑀺𑀯𑀺𑀚𑀸𑀦𑀦𑀯𑀲𑁂𑀦 ‘‘𑀲𑀫𑀸𑀦𑀧𑀘𑁆𑀘𑀬𑁂𑀳𑀺 𑀲𑀳𑀼𑀧𑁆𑀧𑀢𑁆𑀢𑀺𑀓𑀸𑀢𑀺 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀉𑀧𑁆𑀧𑀚𑁆𑀚𑀦𑀁 𑀉𑀧𑁆𑀧𑀸𑀤𑁄, 𑀉𑀧𑁆𑀧𑀚𑁆𑀚𑀢𑀺 𑀏𑀢𑀲𑁆𑀫𑀸𑀢𑀺 𑀉𑀧𑁆𑀧𑀸𑀤𑁄𑀢𑀺 𑀤𑀼𑀯𑀺𑀥𑁄𑀧𑀺 𑀉𑀧𑁆𑀧𑀸𑀤𑁄 𑀏𑀓𑀼𑀧𑁆𑀧𑀸𑀤𑀸𑀢𑀺 𑀏𑀢𑁆𑀣 𑀏𑀓𑀲𑁂𑀲𑀦𑀬𑁂𑀦 𑀲𑀗𑁆𑀕𑀳𑀺𑀢𑁄𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀲𑀫𑀸…𑀧𑁂… 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁 𑀲𑀺𑀬𑀸. 𑀢𑁂𑀦 𑀢𑀸𑀦𑀺 𑀏𑀓𑀯𑀢𑁆𑀣𑀼𑀓𑀸𑀦𑀻𑀢𑀺 𑀏𑀢𑀲𑁆𑀲 𑀘 ‘‘𑀓𑀧𑁆𑀧𑁂𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀧𑀼𑀭𑀺𑀫𑀯𑀺𑀓𑀧𑁆𑀧𑁂 𑀏𑀓𑀁 𑀯𑀢𑁆𑀣𑀼 𑀦𑀺𑀲𑁆𑀲𑀬𑁄 𑀏𑀢𑁂𑀲𑀦𑁆𑀢𑀺 𑀬𑁄𑀚𑀦𑀸, 𑀦 𑀏𑀓𑀁𑀬𑁂𑀯 𑀯𑀢𑁆𑀣𑀽𑀢𑀺. 𑀏𑀓𑁂𑀓𑀪𑀽𑀢𑀲𑁆𑀲 𑀪𑀽𑀢𑀢𑁆𑀢𑀬𑀦𑀺𑀲𑁆𑀲𑀺𑀢𑀢𑁆𑀢𑀸 𑀘𑀢𑀼𑀪𑀽𑀢𑀦𑀺𑀲𑁆𑀲𑀺𑀢𑀢𑁆𑀢𑀸 𑀘 𑀉𑀧𑀸𑀤𑀸𑀭𑀽𑀧𑀸𑀦𑀁. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀧𑀦 𑀏𑀓𑀁𑀬𑁂𑀯 𑀯𑀢𑁆𑀣𑀼 𑀏𑀢𑁂𑀲𑀼 𑀦𑀺𑀲𑁆𑀲𑀺𑀢𑀦𑁆𑀢𑀺 𑀬𑁄𑀚𑀦𑀸. 𑀦𑀺𑀲𑁆𑀲𑀬𑀦𑀺𑀲𑁆𑀲𑀺𑀢𑀢𑀸𑀲𑀗𑁆𑀔𑀸𑀢𑀉𑀧𑀓𑀸𑀭𑁄𑀧𑀓𑀢𑁆𑀢𑀩𑁆𑀩𑀪𑀸𑀯𑀤𑀻𑀧𑀦𑀁 𑀏𑀓𑀯𑀢𑁆𑀣𑀼𑀓𑀯𑀘𑀦𑀦𑁆𑀢𑀺 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀫𑀳𑀸𑀪𑀽𑀢𑀯𑀲𑁂𑀦 𑀬𑁄𑀚𑀦𑀸 𑀓𑀢𑀸. 𑀇𑀢𑀭𑀣𑀸 𑀏𑀓𑀁 𑀯𑀢𑁆𑀣𑀼 𑀏𑀢𑁂𑀲𑀽𑀢𑀺 𑀲𑀫𑀸𑀲𑀢𑁆𑀣𑀪𑀸𑀯𑁂𑀦 𑀉𑀧𑀸𑀤𑀸𑀭𑀽𑀧𑀸𑀦𑀫𑁆𑀧𑀺 𑀧𑀭𑀺𑀕𑁆𑀕𑀳𑁄 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸. 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑁆𑀧𑀝𑀺𑀘𑁆𑀙𑀦𑀸𑀦𑀦𑁆𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀺𑀭𑀺𑀬𑀫𑀦𑁄𑀥𑀸𑀢𑀼𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀬𑁄𑀧𑀺 𑀳𑀺 𑀏𑀓𑀸𑀭𑀫𑁆𑀫𑀡𑀸𑀪𑀺𑀦𑁆𑀦𑀯𑀢𑁆𑀣𑀼𑀓𑀸 𑀘𑀸𑀢𑀺 𑀧𑀸𑀓𑀝𑁄𑀬𑀫𑀢𑁆𑀣𑁄𑀢𑀺. 𑀲𑀦𑁆𑀢𑀻𑀭𑀡𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑁄𑀝𑁆𑀞𑀩𑁆𑀩𑀦𑀚𑀯𑀦𑀢𑀤𑀸𑀭𑀫𑁆𑀫𑀡𑀸𑀦𑀺 𑀲𑀗𑁆𑀕𑀬𑁆𑀳𑀦𑁆𑀢𑀺, 𑀏𑀢𑀸𑀦𑀺 𑀘 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀻𑀦𑀺 𑀘𑀼𑀢𑀺𑀆𑀲𑀦𑁆𑀦𑀸𑀦𑀺 𑀇𑀥𑀸𑀥𑀺𑀧𑁆𑀧𑁂𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀸𑀦𑀺 𑀳𑀺 𑀢𑀤𑀼𑀤𑁆𑀥𑀁 𑀓𑀫𑁆𑀫𑀚𑀭𑀽𑀧𑀲𑁆𑀲 𑀅𑀦𑀼𑀧𑁆𑀧𑀢𑁆𑀢𑀺𑀢𑁄 𑀏𑀓𑀲𑁆𑀫𑀺𑀁𑀬𑁂𑀯 𑀳𑀤𑀬𑀯𑀢𑁆𑀣𑀼𑀲𑁆𑀫𑀺𑀁 𑀯𑀢𑁆𑀢𑀦𑁆𑀢𑀺, 𑀇𑀢𑀭𑀸𑀦𑀺 𑀧𑀦 𑀧𑀼𑀭𑀺𑀫𑀧𑀼𑀭𑀺𑀫𑀘𑀺𑀢𑁆𑀢𑀓𑁆𑀔𑀡𑀼𑀧𑁆𑀧𑀦𑁆𑀦𑁂 𑀳𑀤𑀬𑀯𑀢𑁆𑀣𑀼𑀲𑁆𑀫𑀺𑀁 𑀉𑀢𑁆𑀢𑀭𑀼𑀢𑁆𑀢𑀭𑀸𑀦𑀺 𑀧𑀯𑀢𑁆𑀢𑀦𑁆𑀢𑀻𑀢𑀺. 𑀙𑀲𑀼 𑀯𑀸 𑀯𑀢𑁆𑀣𑀽𑀲𑀼 𑀏𑀓𑀁 𑀳𑀤𑀬𑀯𑀢𑁆𑀣𑀼𑀬𑁂𑀯 𑀯𑀢𑁆𑀣𑀼 𑀏𑀢𑁂𑀲𑀦𑁆𑀢𑀺 𑀏𑀯𑀁 𑀧𑀦 𑀅𑀢𑁆𑀣𑁂 𑀲𑀢𑀺 𑀘𑀼𑀢𑀺𑀆𑀲𑀦𑁆𑀦𑀢𑁄 𑀇𑀢𑀭𑁂𑀲𑀁 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀻𑀦𑀁 𑀕𑀳𑀡𑀁 𑀲𑀺𑀬𑀸𑀢𑀺 𑀜𑀸𑀢𑀩𑁆𑀩𑀁.

𑀏𑀢𑁆𑀣𑀸𑀳 𑁋 ‘‘𑀓𑀲𑁆𑀫𑀸 𑀧𑀦𑁂𑀢𑁆𑀣 𑀓𑀼𑀲𑀮𑀢𑁆𑀢𑀺𑀓𑀸𑀦𑀦𑁆𑀢𑀭𑀁 𑀯𑁂𑀤𑀦𑀸𑀢𑁆𑀢𑀺𑀓𑁄𑀯 𑀯𑀼𑀢𑁆𑀢𑁄’’𑀢𑀺? 𑀓𑀺𑀲𑁆𑀫𑀺𑀁 𑀧𑀦 𑀯𑀼𑀘𑁆𑀘𑀫𑀸𑀦𑁂 𑀅𑀬𑀫𑀦𑀼𑀬𑁄𑀕𑁄 𑀦 𑀲𑀺𑀬𑀸, 𑀅𑀧𑀺𑀘 𑀅𑀯𑀬𑀯𑀸𑀦𑀁 𑀅𑀦𑁂𑀓𑀪𑁂𑀤𑀢𑀸𑀤𑀲𑁆𑀲𑀦𑀢𑁆𑀣𑀸 𑀢𑀺𑀓𑀦𑁆𑀢𑀭𑀤𑁂𑀲𑀦𑀸. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀳𑀺 𑀓𑀼𑀲𑀮𑀢𑁆𑀢𑀺𑀓𑁂𑀦 𑀲𑀩𑁆𑀩𑀥𑀫𑁆𑀫𑀸𑀦𑀁 𑀢𑀺𑀥𑀸 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀢𑀤𑀯𑀬𑀯𑀸𑀦𑀁 𑀓𑀼𑀲𑀮𑀸𑀤𑀻𑀦𑀫𑁆𑀧𑀺 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑀢𑀁 𑀤𑀲𑁆𑀲𑁂𑀦𑁆𑀢𑁂𑀦 𑀢𑁂𑀲𑀁 𑀯𑁂𑀤𑀦𑀸𑀲𑀫𑁆𑀧𑀬𑁄𑀕𑀯𑀺𑀪𑀸𑀕𑀯𑀺𑀪𑀸𑀯𑀦𑀢𑁆𑀣𑀁 ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀓𑀼𑀲𑀮𑀸 𑀳𑀺 𑀥𑀫𑁆𑀫𑀸 𑀲𑀺𑀬𑀸 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸, 𑀲𑀺𑀬𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸. 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀺𑀬𑀸 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸, 𑀲𑀺𑀬𑀸 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸, 𑀲𑀺𑀬𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸, 𑀢𑀣𑀸 𑀅𑀩𑁆𑀬𑀸𑀓𑀢𑀸 𑀲𑀫𑁆𑀧𑀬𑁄𑀕𑀸𑀭𑀳𑀸𑀢𑀺. 𑀏𑀯𑀁 𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀁 𑀧𑀘𑁆𑀘𑁂𑀓𑀁 𑀯𑁂𑀤𑀦𑀸𑀪𑁂𑀤𑁂𑀦 𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀁 𑀓𑀼𑀲𑀮𑀢𑁆𑀢𑀺𑀓𑀸𑀦𑀦𑁆𑀢𑀭𑀁 𑀯𑁂𑀤𑀦𑀸𑀢𑁆𑀢𑀺𑀓𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀲𑀼𑀔𑀲𑀫𑁆𑀧𑀬𑀼𑀢𑁆𑀢𑀸𑀤𑀻𑀦𑀁 𑀧𑀘𑁆𑀘𑁂𑀓𑀁 𑀯𑀺𑀧𑀸𑀓𑀸𑀤𑀺𑀪𑁂𑀤𑀪𑀺𑀦𑁆𑀦𑀢𑀁 𑀤𑀲𑁆𑀲𑁂𑀢𑀼𑀁 𑀯𑁂𑀤𑀦𑀸𑀢𑁆𑀢𑀺𑀓𑀸𑀦𑀦𑁆𑀢𑀭𑀁 𑀯𑀺𑀧𑀸𑀓𑀢𑁆𑀢𑀺𑀓𑁄 𑀯𑀼𑀢𑁆𑀢𑁄. 𑀲𑀼𑀔𑀲𑀫𑁆𑀧𑀬𑀼𑀢𑁆𑀢𑀸 𑀳𑀺 𑀥𑀫𑁆𑀫𑀸 𑀲𑀺𑀬𑀸 𑀯𑀺𑀧𑀸𑀓𑀸, 𑀲𑀺𑀬𑀸 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸, 𑀲𑀺𑀬𑀸 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸. 𑀢𑀣𑀸 𑀅𑀤𑀼𑀓𑁆𑀔𑀫𑀲𑀼𑀔𑀲𑀫𑁆𑀧𑀬𑀼𑀢𑁆𑀢𑀸, 𑀤𑀼𑀓𑁆𑀔𑀲𑀫𑁆𑀧𑀬𑀼𑀢𑁆𑀢𑀸 𑀧𑀦 𑀲𑀺𑀬𑀸 𑀯𑀺𑀧𑀸𑀓𑀸, 𑀲𑀺𑀬𑀸 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀯𑀲𑁂𑀲𑀢𑁆𑀢𑀺𑀓𑀸𑀦𑀁 𑀤𑀼𑀓𑀸𑀦𑀜𑁆𑀘 𑀢𑀲𑁆𑀲 𑀢𑀲𑁆𑀲 𑀅𑀦𑀦𑁆𑀢𑀭𑀯𑀘𑀦𑁂 𑀧𑀬𑁄𑀚𑀦𑀁 𑀯𑀺𑀪𑀸𑀯𑁂𑀢𑀩𑁆𑀩𑀁.

𑁩. 𑀯𑀺𑀧𑀸𑀓𑀦𑀺𑀭𑀼𑀢𑁆𑀢𑀺𑀜𑁆𑀘 𑀮𑀪𑀦𑁆𑀢𑀻𑀢𑀺 𑀢𑁂𑀲𑀼 𑀯𑀺𑀧𑀸𑀓𑀲𑀤𑁆𑀤𑀲𑁆𑀲 𑀦𑀺𑀭𑀼𑀴𑁆𑀳𑀢𑀁 𑀤𑀲𑁆𑀲𑁂𑀢𑀺. 𑀲𑀼𑀓𑁆𑀓𑀓𑀡𑁆𑀳𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀓𑀡𑁆𑀳𑀅𑀲𑀼𑀓𑁆𑀓𑀨𑀲𑁆𑀲𑀸𑀤𑀺𑀪𑀸𑀯𑁄 𑀧𑀭𑀺𑀕𑁆𑀕𑀳𑀺𑀢𑁄. 𑀲𑀢𑀺 𑀧𑀦 𑀧𑀸𑀓-𑀲𑀤𑁆𑀤𑀲𑁆𑀲 𑀨𑀮𑀧𑀭𑀺𑀬𑀸𑀬𑀪𑀸𑀯𑁂 𑀭𑀽𑀧𑀁 𑀯𑀺𑀬 𑀦 𑀦𑀺𑀳𑀻𑀦𑁄 𑀧𑀓𑁆𑀓𑀁 𑀯𑀺𑀬 𑀯𑀺𑀲𑀺𑀝𑁆𑀞𑁄 𑀧𑀸𑀓𑁄𑀢𑀺 𑀯𑀺𑀧𑀸𑀓𑁄𑀢𑀺 𑀏𑀯𑀁 𑀯𑀸 𑀏𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑀩𑁆𑀬𑀸𑀧𑀸𑀭𑀢𑀸𑀢𑀺 𑀲𑀉𑀲𑁆𑀲𑀸𑀳𑀢𑀸. 𑀲𑀦𑁆𑀢𑀸𑀦𑁂 𑀲𑀩𑁆𑀬𑀸𑀧𑀸𑀭𑀢𑀸𑀢𑀺 𑀏𑀢𑁂𑀦 𑀘𑀺𑀢𑁆𑀢𑀧𑁆𑀧𑀬𑁄𑀕𑀲𑀗𑁆𑀔𑀸𑀢𑁂𑀦 𑀓𑀺𑀭𑀺𑀬𑀸𑀪𑀸𑀯𑁂𑀦 𑀯𑀺𑀧𑀸𑀓𑀥𑀫𑁆𑀫𑀸𑀦𑀁 𑀲𑀦𑁆𑀢𑀸𑀦𑀯𑀺𑀲𑁂𑀲𑀫𑀸𑀳 ‘‘𑀬𑀢𑁄 𑀬𑀲𑁆𑀫𑀺𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀓𑀼𑀲𑀮𑀸𑀓𑀼𑀲𑀮𑀸 𑀘𑁂𑀢𑀦𑀸, 𑀢𑀁𑀲𑀦𑁆𑀢𑀸𑀦𑁂 𑀏𑀯 𑀢𑀲𑁆𑀲𑀸 𑀯𑀺𑀧𑀸𑀓𑀼𑀧𑁆𑀧𑀢𑁆𑀢𑀻’’𑀢𑀺. 𑀏𑀢𑁆𑀣 𑀘 ‘‘𑀲𑀩𑁆𑀬𑀸𑀧𑀸𑀭𑀢𑀸’’𑀢𑀺 𑀏𑀢𑁂𑀦 𑀆𑀯𑀚𑁆𑀚𑀦𑀤𑁆𑀯𑀬𑀁 𑀯𑀺𑀧𑀸𑀓𑀜𑁆𑀘 𑀦𑀺𑀯𑀢𑁆𑀢𑁂𑀢𑀺, ‘‘𑀅𑀦𑀼𑀧𑀘𑁆𑀙𑀺𑀦𑁆𑀦𑀸𑀯𑀺𑀚𑁆𑀚𑀸𑀢𑀡𑁆𑀳𑀸𑀫𑀸𑀦𑁂’’𑀢𑀺 𑀇𑀫𑀺𑀦𑀸 𑀅𑀯𑀲𑀺𑀝𑁆𑀞𑀁 𑀓𑀺𑀭𑀺𑀬𑀁 𑀦𑀺𑀯𑀢𑁆𑀢𑁂𑀢𑀺. 𑀉𑀪𑀬𑁂𑀦𑀧𑀺 𑀅𑀦𑀼𑀲𑀬𑀲𑀳𑀸𑀬𑀲𑀉𑀲𑁆𑀲𑀸𑀳𑀢𑀸𑀮𑀓𑁆𑀔𑀡𑀸 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀸𑀦𑀫𑁆𑀧𑀺 𑀳𑀺 𑀅𑀦𑀼𑀲𑀬𑀸 𑀉𑀧𑀦𑀺𑀲𑁆𑀲𑀬𑀸 𑀳𑁄𑀦𑁆𑀢𑀺, 𑀬𑀢𑁄 ‘‘𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀮𑁄𑀓𑀼𑀢𑁆𑀢𑀭𑀁…𑀧𑁂… 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁩𑁪𑁨) 𑀅𑀭𑀺𑀬𑀫𑀕𑁆𑀕𑀘𑁂𑀢𑀦𑀸𑀬 𑀅𑀯𑀺𑀚𑁆𑀚𑀸𑀉𑀧𑀦𑀺𑀲𑁆𑀲𑀬𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀺𑀪𑀗𑁆𑀕𑁂 𑀧𑀓𑀸𑀲𑀺𑀢𑀸. 𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢𑀪𑀸𑀯𑀮𑀓𑁆𑀔𑀡𑀸 𑀯𑀺𑀧𑀸𑀓𑀸, 𑀉𑀪𑀬𑀯𑀺𑀧𑀭𑀻𑀢𑀮𑀓𑁆𑀔𑀡𑀸 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸𑀢𑀺.

𑀅𑀪𑀺𑀜𑁆𑀜𑀸𑀤𑀺𑀓𑀼𑀲𑀮𑀸𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀅𑀳𑁄𑀲𑀺 𑀓𑀫𑁆𑀫𑀁 𑀦𑀸𑀳𑁄𑀲𑀺 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺 (𑀧𑀝𑀺. 𑀫. 𑁧.𑁨𑁩𑁪) 𑀇𑀫𑀺𑀦𑀸 𑀢𑀺𑀓𑁂𑀦 𑀲𑀗𑁆𑀕𑀳𑀺𑀢𑀁 𑀕𑀢𑀺𑀉𑀧𑀥𑀺𑀓𑀸𑀮𑀧𑀬𑁄𑀕𑀸𑀪𑀸𑀯𑁂𑀦 𑀅𑀯𑀺𑀧𑀸𑀓𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀁 𑀧𑀦 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺𑀬𑀁 𑀅𑀳𑁄𑀲𑀺𑀓𑀫𑁆𑀫𑀸𑀤𑀺𑀪𑀸𑀯𑀁 𑀦 𑀪𑀚𑀢𑀺. 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀉𑀪𑀬𑀫𑁆𑀧𑀺 ‘‘𑀯𑀺𑀧𑀸𑀓𑀸𑀦𑀼𑀧𑁆𑀧𑀸𑀤𑀦𑁂’’𑀢𑀺 𑀯𑀘𑀦𑀢𑁄 𑀕𑀢𑀺𑀉𑀧𑀥𑀺𑀓𑀸𑀮𑀧𑀬𑁄𑀕𑀸𑀪𑀸𑀯𑁂𑀦 𑀅𑀦𑀼𑀧𑁆𑀧𑀦𑁆𑀦𑀯𑀺𑀧𑀸𑀓𑀫𑁂𑀯 𑀅𑀥𑀺𑀧𑁆𑀧𑁂𑀢𑀁 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀲𑁆𑀲𑀧𑀺 𑀧𑀯𑀢𑁆𑀢𑀺𑀯𑀺𑀧𑀸𑀓𑀲𑁆𑀲 𑀅𑀦𑀼𑀚𑀸𑀦𑀦𑀢𑁄. 𑀬𑁂𑀲𑀁 𑀧𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸 𑀅𑀯𑀺𑀧𑀸𑀓𑀸, 𑀢𑁂𑀲𑀁 𑀫𑀢𑁂𑀦 𑀆𑀤𑀺-𑀲𑀤𑁆𑀤𑁂𑀦 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀲𑁆𑀲 𑀅𑀳𑁄𑀲𑀺𑀓𑀫𑁆𑀫𑀦𑁆𑀢𑀺 𑀏𑀯𑀁𑀧𑀓𑀸𑀭𑀲𑁆𑀲𑁂𑀯 𑀧𑀭𑀺𑀕𑁆𑀕𑀳𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁪. ‘‘𑀓𑀣𑀫𑀸𑀤𑀺𑀦𑁆𑀦𑀸’’𑀢𑀺 𑀅𑀬𑀫𑁆𑀧𑀺 𑀧𑀜𑁆𑀳𑁄 𑀮𑀩𑁆𑀪𑀢𑀺. ‘‘𑀨𑀮𑀪𑀸𑀯𑁂𑀦𑀸’’𑀢𑀺 𑀳𑀺 𑀆𑀤𑀸𑀦𑀧𑁆𑀧𑀓𑀸𑀭𑀯𑀘𑀦𑀁. 𑀓𑁂𑀲𑀜𑁆𑀘𑀺 𑀕𑁄𑀢𑁆𑀭𑀪𑀼𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀻𑀦𑀁 𑀉𑀧𑁂𑀢𑀓𑀺𑀭𑀺𑀬𑀪𑀽𑀢𑀸𑀦𑀁 𑀢𑀁𑀓𑀢𑁆𑀢𑀼𑀪𑀽𑀢𑀸𑀦𑀜𑁆𑀘 𑀅𑀢𑁆𑀣𑀸𑀦𑀁 𑀉𑀧𑁂𑀢𑀩𑁆𑀩𑀲𑀫𑁆𑀩𑀦𑁆𑀥𑀪𑀸𑀯𑀢𑁄 𑀢𑀤𑀪𑀺𑀥𑀸𑀬𑀺𑀦𑁄𑀧𑀺 𑀲𑀤𑁆𑀤𑀸 𑀲𑀫𑁆𑀩𑀦𑁆𑀥𑀸 𑀏𑀯𑀸𑀢𑀺 ‘‘𑀉𑀧𑁂𑀢𑀲𑀤𑁆𑀤𑀲𑀫𑁆𑀩𑀦𑁆𑀥𑀺𑀦𑀸’’𑀢𑀺 𑀯𑀼𑀢𑁆𑀢𑀁. 𑀉𑀧𑁂𑀢𑀦𑁆𑀢𑀺 𑀳𑀺 𑀉𑀧𑁂𑀢𑀩𑁆𑀩𑀢𑁆𑀣𑁂 𑀯𑀼𑀘𑁆𑀘𑀫𑀸𑀦𑁂 𑀅𑀯𑀲𑁆𑀲𑀁 𑀉𑀧𑁂𑀢𑀓𑀺𑀭𑀺𑀬𑀸 𑀉𑀧𑁂𑀢𑀸 𑀘 𑀜𑀸𑀬𑀢𑀻𑀢𑀺. ‘‘𑀭𑀽𑀧𑀥𑀸𑀢𑀼𑀬𑀸 𑀔𑁄 𑀧𑀦, 𑀕𑀳𑀧𑀢𑀺, 𑀬𑁄 𑀙𑀦𑁆𑀤𑁄 𑀬𑁄 𑀭𑀸𑀕𑁄 𑀬𑀸 𑀦𑀦𑁆𑀤𑀻 𑀬𑀸 𑀢𑀡𑁆𑀳𑀸 𑀬𑁂 𑀉𑀧𑀬𑀼𑀧𑀸𑀤𑀸𑀦𑀸, 𑀘𑁂𑀢𑀲𑁄 𑀅𑀥𑀺𑀝𑁆𑀞𑀸𑀦𑀸 𑀅𑀪𑀺𑀦𑀺𑀯𑁂𑀲𑀸 𑀅𑀦𑀼𑀲𑀬𑀸’’𑀢𑀺𑀆𑀤𑀻𑀲𑀼 ‘‘𑀉𑀧𑀬𑁄’’𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀬𑁄 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀉𑀧𑀬…𑀧𑁂… 𑀤𑀺𑀝𑁆𑀞𑀻𑀳𑀻’’𑀢𑀺. 𑀬𑀣𑀸𑀲𑀫𑁆𑀪𑀯𑀦𑁆𑀢𑀺 ‘‘𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦𑀸’’𑀢𑀺𑀆𑀤𑀺𑀦𑀸 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀅𑀢𑁆𑀣𑁂𑀲𑀼 𑀬𑁄 𑀬𑁄 𑀲𑀫𑁆𑀪𑀯𑀢𑀺 𑀬𑁄𑀚𑁂𑀢𑀼𑀁, 𑀲𑁄 𑀲𑁄𑀢𑀺 𑀅𑀢𑁆𑀣𑁄. 𑀦 𑀯𑀘𑀦𑀸𑀦𑀼𑀧𑀼𑀩𑁆𑀩𑁂𑀦𑀸𑀢𑀺 ‘‘𑀓𑀺𑀁 𑀧𑀦 𑀢𑀁 𑀉𑀧𑁂𑀢’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀯𑀘𑀦𑀸𑀦𑀼𑀧𑀼𑀩𑁆𑀩𑁂𑀦 𑀦 𑀬𑁄𑀚𑁂𑀢𑀩𑁆𑀩𑁄. 𑀲𑀩𑁆𑀩𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀲𑀩𑁆𑀩𑀢𑁂𑀪𑀽𑀫𑀓𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁. 𑀦𑀸𑀧𑀚𑁆𑀚𑀢𑀺 𑀲𑀸𑀫𑀜𑁆𑀜𑀚𑁄𑀢𑀦𑀸𑀬 𑀯𑀺𑀲𑁂𑀲𑁂 𑀅𑀯𑀝𑁆𑀞𑀸𑀦𑀢𑁄 𑀯𑀺𑀲𑁂𑀲𑀢𑁆𑀣𑀺𑀦𑀸 𑀘 𑀯𑀺𑀲𑁂𑀲𑁄 𑀅𑀦𑀼𑀧𑀬𑀼𑀚𑁆𑀚𑀢𑀻𑀢𑀺 𑀢𑀁 𑀧𑀦 𑀯𑀺𑀲𑁂𑀲𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀩𑁄𑀥𑀦𑁂𑀬𑁆𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀉𑀧𑁂𑀢𑀁 𑀤𑀻𑀧𑁂𑀢𑀻𑀢𑀺 𑀬𑀣𑀸 ‘‘𑀧𑀸𑀘𑀭𑀺𑀬𑁄’’𑀢𑀺 𑀏𑀢𑁆𑀣 𑀧𑀕𑀢𑁄 𑀆𑀘𑀭𑀺𑀬𑁄 𑀧𑀸𑀘𑀭𑀺𑀬𑁄𑀢𑀺 𑀧-𑀲𑀤𑁆𑀤𑁄 𑀧𑀕𑀢𑀁 𑀤𑀻𑀧𑁂𑀢𑀺, 𑀏𑀯𑀁 𑀉𑀧-𑀲𑀤𑁆𑀤𑁄 𑀉𑀧𑁂𑀢𑀁 𑀤𑀻𑀧𑁂𑀢𑀺 𑀏𑀯, 𑀦 𑀘𑁂𑀢𑁆𑀣 𑀕𑀢𑀸𑀤𑀺𑀅𑀢𑁆𑀣𑀸𑀦𑀁 𑀏𑀓𑀦𑁆𑀢𑁂𑀦 𑀧𑀘𑁆𑀘𑀢𑁆𑀢𑀯𑀘𑀦𑀬𑁄𑀕𑁄 𑀇𑀘𑁆𑀙𑀺𑀢𑁄𑀢𑀺. 𑀅𑀢𑀺𑀲𑀤𑁆𑀤𑁄 𑀯𑀺𑀬𑀸𑀢𑀺 𑀘 𑀇𑀤𑀁 𑀲𑀲𑀸𑀥𑀦𑀓𑀺𑀭𑀺𑀬𑀸𑀤𑀻𑀧𑀦𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀘𑁆𑀘𑀬𑀪𑀸𑀯𑁂𑀦𑀸𑀢𑀺 𑀏𑀢𑁂𑀦 𑀧𑀼𑀭𑀺𑀫𑀦𑀺𑀩𑁆𑀩𑀢𑁆𑀢𑀺𑀁 𑀯𑀺𑀲𑁂𑀲𑁂𑀢𑀺. 𑀢𑁂𑀦 𑀲𑀳𑀚𑀸𑀢𑀲𑁆𑀲𑀧𑀺 𑀉𑀧𑀸𑀤𑀸𑀦𑀲𑁆𑀲 𑀲𑀗𑁆𑀕𑀳𑁄 𑀓𑀢𑁄 𑀳𑁄𑀢𑀺. 𑀲𑀳𑀚𑀸𑀢𑁄𑀧𑀺 𑀳𑀺 𑀥𑀫𑁆𑀫𑁄 𑀧𑀘𑁆𑀘𑀬𑀪𑀽𑀢𑁄 𑀧𑀼𑀭𑀺𑀫𑀦𑀺𑀧𑁆𑀨𑀦𑁆𑀦𑁄 𑀯𑀺𑀬 𑀯𑁄𑀳𑀭𑀻𑀬𑀢𑀺 𑀬𑀣𑀸 ‘‘𑀏𑀓𑀁 𑀫𑀳𑀸𑀪𑀽𑀢𑀁 𑀧𑀝𑀺𑀘𑁆𑀘 𑀢𑀬𑁄 𑀫𑀳𑀸𑀪𑀽𑀢𑀸’’𑀢𑀺, ‘‘𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘 𑀢𑀬𑁄 𑀔𑀦𑁆𑀥𑀸’’𑀢𑀺 (𑀧𑀝𑁆𑀞𑀸. 𑁧.𑁧.𑁫𑁩) 𑀘. 𑀥𑀸𑀢𑀼𑀓𑀣𑀸𑀬𑀁 𑀧𑀓𑀸𑀲𑀺𑀢𑀦𑁆𑀢𑀺 ‘‘𑀉𑀧𑀧𑀢𑁆𑀢𑀺𑀪𑀯𑁄 𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺 𑀏𑀓𑀸𑀤𑀲𑀳𑀸𑀬𑀢𑀦𑁂𑀳𑀺 𑀲𑀢𑁆𑀢𑀭𑀲𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑁄. 𑀓𑀢𑀺𑀳𑀺 𑀅𑀲𑀗𑁆𑀕𑀳𑀺𑀢𑁄. 𑀦 𑀓𑁂𑀳𑀺𑀘𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀅𑀲𑀗𑁆𑀕𑀳𑀺𑀢𑁄’’𑀢𑀺 (𑀥𑀸𑀢𑀼. 𑁬𑁭) 𑀏𑀯𑀫𑀸𑀤𑀺𑀁 𑀲𑀦𑁆𑀥𑀸𑀬𑀸𑀳. 𑀢𑀲𑁆𑀫𑀸 𑀏𑀯𑀸𑀢𑀺 𑀉𑀧𑀸𑀤𑀺𑀦𑁆𑀦𑀲𑀤𑁆𑀤𑀸𑀦𑀧𑁂𑀓𑁆𑀔𑀢𑁆𑀢𑀸 𑀏𑀯. 𑀅𑀯𑀺𑀲𑁂𑀲𑁂𑀢𑁆𑀯𑀸𑀢𑀺 𑀉𑀧𑀸𑀤𑀺𑀦𑁆𑀦𑀸𑀦𑀼𑀧𑀸𑀤𑀺𑀦𑁆𑀦𑀯𑀺𑀲𑁂𑀲𑀁 𑀅𑀓𑀢𑁆𑀯𑀸. 𑀉𑀧𑀸𑀤𑀸𑀦𑀸𑀦𑀁 𑀆𑀭𑀫𑁆𑀫𑀡𑀪𑀸𑀯𑀸𑀦𑀢𑀺𑀯𑀢𑁆𑀢𑀦𑀢𑁄 𑀉𑀧𑀸𑀤𑀸𑀦𑁂𑀳𑀺 𑀉𑀧𑀸𑀤𑀸𑀢𑀩𑁆𑀩𑀸𑀢𑀺 𑀯𑀸 𑀉𑀧𑀸𑀤𑀸𑀦𑀺𑀬𑀸, 𑀉𑀧𑀸𑀤𑀸𑀢𑀼𑀁 𑀯𑀸 𑀅𑀭𑀳𑀦𑁆𑀢𑀻𑀢𑀺 𑀉𑀧𑀸𑀤𑀸𑀦𑀺𑀬𑀸, 𑀉𑀧𑀸𑀤𑀸𑀦𑁂 𑀦𑀺𑀬𑀼𑀢𑁆𑀢𑀸𑀢𑀺 𑀯𑀸 𑀉𑀧𑀸𑀤𑀸𑀦𑀺𑀬𑀸 𑀓-𑀓𑀸𑀭𑀲𑁆𑀲 𑀬-𑀓𑀸𑀭𑀁 𑀓𑀢𑁆𑀯𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄𑀢𑀺.

𑁫. 𑀯𑀺𑀩𑀸𑀥𑀦𑀁 𑀧𑀻𑀴𑀦𑀁 𑀓𑀺𑀮𑀫𑀦𑀁 𑀉𑀧𑀢𑀸𑀧𑁄 𑀧𑀭𑀺𑀴𑀸𑀳𑁄 𑀅𑀧𑁆𑀧𑀲𑁆𑀲𑀤𑁆𑀥𑀺𑀪𑀸𑀯𑁄. 𑀯𑀺𑀤𑀽𑀲𑀺𑀢𑀸 𑀫𑀮𑀻𑀦𑀸 𑀘 𑀬𑀢𑁄 𑀓𑁂𑀘𑀺 𑀅𑀓𑀺𑀮𑁂𑀲𑀲𑀪𑀸𑀯𑀸𑀧𑀺 𑀅𑀦𑀺𑀝𑁆𑀞𑀨𑀮𑀸 𑀕𑀸𑀭𑀬𑁆𑀳𑀸 𑀘 𑀚𑀸𑀢𑀸.

𑁬. ‘‘𑀲𑀻𑀮𑀫𑀢𑁆𑀢𑀓𑀁, 𑀧𑀭𑀁 𑀯𑀺𑀬 𑀫𑀢𑁆𑀢𑀸𑀬𑀸’’𑀢𑀺𑀆𑀤𑀻𑀲𑀼 𑀫𑀢𑁆𑀢𑀸-𑀲𑀤𑁆𑀤𑀲𑁆𑀲 𑀧𑀫𑀸𑀡𑀯𑀸𑀘𑀓𑀢𑀸 𑀤𑀝𑁆𑀞𑀩𑁆𑀩𑀸. 𑀫𑀭𑀺𑀬𑀸𑀤𑀯𑀸𑀘𑀓𑁄 𑀯𑀸 𑀫𑀢𑁆𑀢𑀸-𑀲𑀤𑁆𑀤𑁄. 𑀯𑀺𑀘𑀸𑀭𑁄 𑀳𑁂𑀢𑁆𑀣 𑀛𑀸𑀦𑀗𑁆𑀕𑁂𑀲𑀼 𑀳𑁂𑀝𑁆𑀞𑀺𑀫𑀫𑀭𑀺𑀬𑀸𑀤𑁄, 𑀦 𑀧𑀞𑀫𑀚𑁆𑀛𑀸𑀦𑀉𑀧𑀘𑀸𑀭𑀚𑁆𑀛𑀸𑀦𑁂𑀲𑀼 𑀯𑀺𑀬 𑀯𑀺𑀢𑀓𑁆𑀓𑁄. 𑀲𑀸 𑀧𑀦 𑀯𑀺𑀘𑀸𑀭𑀫𑀭𑀺𑀬𑀸𑀤𑀢𑀸 𑀯𑀺𑀢𑀓𑁆𑀓𑀸𑀪𑀸𑀯𑁂𑀦 𑀏𑀢𑁂𑀲𑀁 𑀚𑀸𑀢𑀸𑀢𑀺 𑀅𑀯𑀺𑀢𑀓𑁆𑀓𑀕𑁆𑀕𑀳𑀡𑀁 𑀓𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀯𑀺𑀢𑀓𑁆𑀓𑀸 𑀳𑀼𑀢𑁆𑀯𑀸 𑀯𑀺𑀘𑀸𑀭𑀫𑀭𑀺𑀬𑀸𑀤𑀛𑀸𑀦𑀗𑁆𑀕𑁂𑀲𑀼 𑀯𑀺𑀘𑀸𑀭𑀳𑁂𑀝𑁆𑀞𑀺𑀫𑀓𑁄𑀝𑀺𑀓𑀸𑀢𑀺. 𑀅𑀣 𑀯𑀸 𑀈𑀲𑀤𑀢𑁆𑀣𑁄 𑀫𑀢𑁆𑀢𑀸-𑀲𑀤𑁆𑀤𑁄 ‘‘𑀫𑀢𑁆𑀢𑀸𑀲𑀼𑀔𑀧𑀭𑀺𑀘𑁆𑀘𑀸𑀕𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁨𑁯𑁦) 𑀯𑀺𑀬. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀯𑀺𑀢𑀓𑁆𑀓𑀭𑀳𑀺𑀢𑀸 𑀪𑀸𑀯𑀦𑀸𑀬 𑀅𑀢𑀺𑀲𑀼𑀔𑀼𑀫𑀪𑀽𑀢𑀯𑀺𑀘𑀸𑀭𑀢𑁆𑀢𑀸 𑀈𑀲𑀁 𑀯𑀺𑀘𑀸𑀭𑀸 𑀘 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸𑀢𑀺. 𑀦 𑀳𑀺 𑀇𑀢𑁄 𑀧𑀭𑀁 𑀯𑀺𑀘𑀸𑀭𑁄 𑀅𑀢𑁆𑀣𑀻𑀢𑀺. 𑀬𑀤𑀺 𑀯𑀺𑀢𑀓𑁆𑀓𑀯𑀺𑀲𑁂𑀲𑀭𑀳𑀺𑀢𑀸 𑀯𑀺𑀘𑀸𑀭𑀫𑀢𑁆𑀢𑀸, 𑀏𑀯𑀁 𑀲𑀦𑁆𑀢𑁂 𑀅𑀯𑀺𑀢𑀓𑁆𑀓𑀯𑀘𑀦𑀁 𑀓𑀺𑀫𑀢𑁆𑀣𑀺𑀬𑀦𑁆𑀢𑀺 𑀆𑀳 ‘‘𑀯𑀺𑀘𑀸𑀭𑀫𑀢𑁆𑀢𑀯𑀘𑀦𑁂𑀦𑀸’’𑀢𑀺𑀆𑀤𑀺. 𑀬𑀤𑀺 𑀯𑀺𑀘𑀸𑀭𑀫𑀢𑁆𑀢𑀢𑁄 𑀅𑀜𑁆𑀜𑁂𑀲𑀫𑁆𑀧𑀺 𑀅𑀯𑀺𑀢𑀓𑁆𑀓𑀸𑀦𑀁 𑀅𑀢𑁆𑀣𑀺𑀪𑀸𑀯𑀚𑁄𑀢𑀦𑀢𑁆𑀣𑀁 𑀅𑀯𑀺𑀢𑀓𑁆𑀓𑀯𑀘𑀦𑀁, 𑀅𑀯𑀺𑀢𑀓𑁆𑀓𑀸 𑀘 𑀯𑀺𑀘𑀸𑀭𑀫𑀢𑁆𑀢𑀸 𑀅𑀯𑀺𑀘𑀸𑀭𑀸𑀢𑀺 𑀦𑀺𑀯𑀢𑁆𑀢𑁂𑀢𑀩𑁆𑀩𑀸 𑀕𑀳𑁂𑀢𑀩𑁆𑀩𑀸 𑀘, 𑀏𑀯𑀁 𑀲𑀢𑀺 𑀯𑀺𑀘𑀸𑀭𑀫𑀢𑁆𑀢𑀸 𑀯𑀺𑀲𑁂𑀲𑀦𑀁, 𑀅𑀯𑀺𑀢𑀓𑁆𑀓𑀸 𑀯𑀺𑀲𑁂𑀲𑀺𑀢𑀩𑁆𑀩𑀸𑀢𑀺 𑀯𑀺𑀘𑀸𑀭𑀫𑀢𑁆𑀢𑀸𑀯𑀺𑀢𑀓𑁆𑀓𑀸𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁄’’𑀢𑀺𑀆𑀤𑀺. 𑀬𑀣𑀸𑀓𑀸𑀫𑀦𑁆𑀢𑀺 𑀯𑀢𑁆𑀢𑀼𑀇𑀘𑁆𑀙𑀸𑀦𑀼𑀭𑀽𑀧𑀁. 𑀬𑁂𑀦 𑀬𑁂𑀦 𑀳𑀺 𑀧𑀓𑀸𑀭𑁂𑀦 𑀥𑀫𑁆𑀫𑁂𑀲𑀼 𑀦𑀺𑀯𑀢𑁆𑀢𑁂𑀢𑀩𑁆𑀩𑀕𑀳𑁂𑀢𑀩𑁆𑀩𑀪𑀸𑀯𑀸 𑀮𑀩𑁆𑀪𑀦𑁆𑀢𑀺, 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁄 𑀲𑀫𑁆𑀪𑀯𑀢𑀻𑀢𑀺. 𑀧𑀤𑀸𑀦𑀁 𑀅𑀦𑀼𑀓𑁆𑀓𑀫𑁄 𑀧𑀤𑀸𑀦𑀼𑀓𑁆𑀓𑀫𑁄.

𑀅𑀯𑀺𑀢𑀓𑁆𑀓𑀸 𑀲𑀯𑀺𑀢𑀓𑁆𑀓𑀸 𑀘 𑀲𑀯𑀺𑀘𑀸𑀭𑀸 𑀅𑀯𑀺𑀘𑀸𑀭𑀸 𑀘𑀸𑀢𑀺 𑀅𑀯𑀺𑀢𑀓𑁆𑀓𑀸𑀲𑀯𑀺𑀘𑀸𑀭𑀸 𑀲𑀯𑀺𑀢𑀓𑁆𑀓𑀸 𑀅𑀯𑀺𑀘𑀸𑀭𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀉𑀪𑀬𑁂𑀓𑀤𑁂𑀲𑀤𑀲𑁆𑀲𑀦𑀫𑁆𑀧𑀺 𑀉𑀪𑀬𑀤𑀲𑁆𑀲𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀬𑀤𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀢𑀭𑀫𑁆𑀧𑀺 𑀧𑀓𑀸𑀲𑁂𑀢𑀼𑀦𑁆𑀢𑀺 𑀇𑀤𑀁 𑀬𑀣𑀸 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁂𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀯𑀺𑀢𑀓𑁆𑀓𑁄 𑀅𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀢𑀸𑀬 ‘‘𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁄’’𑀢𑀺 𑀯𑀼𑀢𑁆𑀢𑁄, 𑀏𑀯𑀁 𑀬𑀣𑀸𑀯𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀯𑀺𑀘𑀸𑀭𑁄 ‘‘𑀲𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑁄’’𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀺𑀢𑀓𑁆𑀓𑀸𑀪𑀸𑀯𑁂𑀦 𑀏𑀢𑁂 𑀯𑀺𑀘𑀸𑀭𑀫𑀢𑁆𑀢𑀸𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀺𑀲𑁂𑀲𑀦𑀺𑀯𑀢𑁆𑀢𑀺𑀅𑀢𑁆𑀣𑀁𑀬𑁂𑀯 𑀫𑀢𑁆𑀢𑀸-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑁄. 𑀯𑀺𑀘𑀸𑀭𑀫𑀢𑁆𑀢𑀸𑀢𑀺 𑀳𑀺 𑀯𑀺𑀘𑀸𑀭𑀫𑀢𑁆𑀢𑀯𑀦𑁆𑀢𑁄𑀢𑀺 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸 𑀢𑀤𑀜𑁆𑀜𑀯𑀺𑀲𑁂𑀲𑀯𑀺𑀭𑀳𑀲𑀸𑀫𑀜𑁆𑀜𑀢𑁄 𑀦𑀺𑀯𑀢𑁆𑀢𑁂𑀢𑁆𑀯𑀸 𑀯𑀺𑀢𑀓𑁆𑀓𑀯𑀺𑀲𑁂𑀲𑀯𑀺𑀭𑀳𑀲𑀗𑁆𑀔𑀸𑀢𑁂 𑀅𑀯𑀺𑀢𑀓𑁆𑀓-𑀲𑀤𑁆𑀤𑁄 𑀲𑀦𑁆𑀦𑀺𑀥𑀸𑀧𑀺𑀢𑁄 𑀯𑀺𑀲𑁂𑀲𑁂𑀢𑀺 𑀤𑀼𑀢𑀺𑀬𑀚𑁆𑀛𑀸𑀦𑀥𑀫𑁆𑀫𑁂𑀢𑀺. 𑀬𑀣𑀸𑀳 ‘‘𑀦 𑀯𑀺𑀘𑀸𑀭𑀢𑁄’’𑀢𑀺𑀆𑀤𑀺.

𑁭. 𑀯𑁂𑀤𑀬𑀫𑀸𑀦𑀸𑀢𑀺 𑀅𑀦𑀼𑀪𑀯𑀫𑀸𑀦𑀸. 𑀲𑀼𑀔𑀸𑀓𑀸𑀭𑁂𑀢𑀺 𑀇𑀝𑁆𑀞𑀸𑀓𑀸𑀭𑁂, 𑀇𑀝𑁆𑀞𑀸𑀦𑀼𑀪𑀯𑀦𑀸𑀓𑀸𑀭𑁂 𑀯𑀸. 𑀉𑀤𑀸𑀲𑀺𑀦𑀸𑀢𑀺 𑀦𑀢𑀺𑀅𑀧𑀦𑀢𑀺𑀭𑀳𑀺𑀢𑀸. 𑀲𑀼𑀔𑀤𑀼𑀓𑁆𑀔𑀸𑀦𑀁 𑀅𑀯𑀺𑀭𑀼𑀤𑁆𑀥𑀸 𑀢𑁂𑀲𑀁 𑀩𑁆𑀬𑀯𑀥𑀸𑀬𑀺𑀓𑀸𑀪𑀸𑀯𑀢𑁄. 𑀲𑀼𑀔𑀤𑀼𑀓𑁆𑀔𑀸𑀦𑀺 𑀯𑀺𑀬 𑀳𑀺 𑀲𑀼𑀔𑀤𑀼𑀓𑁆𑀔𑀸𑀦𑀁 𑀅𑀦𑀦𑁆𑀢𑀭𑀁 𑀧𑀯𑀢𑁆𑀢𑀦𑀢𑁄 𑀩𑁆𑀬𑀯𑀥𑀸𑀬𑀺𑀓𑀸𑀪𑀽𑀢𑀸 𑀦 𑀢𑁂𑀳𑀺 𑀯𑀺𑀭𑀼𑀚𑁆𑀛𑀢𑀺, 𑀦 𑀧𑀦 𑀲𑀼𑀔𑀤𑀼𑀓𑁆𑀔𑀸𑀦𑀺 𑀅𑀦𑀦𑁆𑀢𑀭𑀸𑀧𑀯𑀢𑁆𑀢𑀺𑀢𑁄. ‘‘𑀉𑀧𑀧𑀢𑁆𑀢𑀺𑀢𑁄 𑀇𑀓𑁆𑀔𑀢𑀻𑀢𑀺 𑀉𑀧𑁂𑀓𑁆𑀔𑀸’’𑀢𑀺 𑀅𑀬𑀁 𑀧𑀦𑀢𑁆𑀣𑁄 𑀇𑀥 𑀉𑀧𑁂𑀓𑁆𑀔𑀸-𑀲𑀤𑁆𑀤𑀲𑁆𑀲 𑀲𑀩𑁆𑀩𑀼𑀧𑁂𑀓𑁆𑀔𑀸𑀧𑀭𑀺𑀬𑀸𑀤𑀸𑀦𑀢𑁄 𑀦 𑀯𑀼𑀢𑁆𑀢𑁄. 𑀦 𑀳𑀺 𑀮𑁄𑀪𑀲𑀫𑁆𑀧𑀬𑀼𑀢𑁆𑀢𑀸𑀤𑀺𑀉𑀧𑁂𑀓𑁆𑀔𑀸 𑀉𑀧𑀧𑀢𑁆𑀢𑀺𑀢𑁄 𑀇𑀓𑁆𑀔𑀢𑀻𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀧𑀻𑀢𑀺𑀲𑀳𑀕𑀢𑀸𑀬𑁂𑀯 𑀦 𑀲𑀼𑀔𑀲𑀳𑀕𑀢𑀸, 𑀲𑀼𑀔𑀲𑀳𑀕𑀢𑀸𑀧𑀺 𑀦 𑀧𑀻𑀢𑀺𑀲𑀳𑀕𑀢𑀸 𑀏𑀯𑀸𑀢𑀺 𑀧𑀻𑀢𑀺𑀲𑀳𑀕𑀢𑀸 𑀲𑀼𑀔𑀲𑀳𑀕𑀢𑀸 𑀘 𑀅𑀜𑁆𑀜𑀫𑀜𑁆𑀜𑀁 𑀪𑀺𑀦𑁆𑀦𑀸, 𑀢𑀲𑁆𑀫𑀸. 𑀲𑀢𑀺𑀧𑀺 𑀲𑀼𑀔𑀲𑀳𑀕𑀢𑀸𑀦𑀁 𑀬𑁂𑀪𑀼𑀬𑁆𑀬𑁂𑀦 𑀧𑀻𑀢𑀺𑀲𑀳𑀕𑀢𑀪𑀸𑀯𑁂 𑀬𑁂𑀦 𑀲𑀼𑀔𑁂𑀦 𑀲𑀫𑀦𑁆𑀦𑀸𑀕𑀢𑀸 𑀲𑀼𑀔𑀲𑀳𑀕𑀢𑀸 𑀏𑀯 𑀳𑁄𑀦𑁆𑀢𑀺, 𑀦 𑀧𑀻𑀢𑀺𑀲𑀳𑀕𑀢𑀸, 𑀢𑀁 𑀲𑀼𑀔𑀁 𑀦𑀺𑀧𑁆𑀧𑀻𑀢𑀺𑀓𑀲𑀼𑀔𑀦𑁆𑀢𑀺 𑀅𑀬𑀁 𑀯𑀺𑀲𑁂𑀲𑁄 𑀇𑀫𑀺𑀦𑀸 𑀢𑀺𑀓𑁂𑀦 𑀤𑀲𑁆𑀲𑀺𑀢𑁄𑀢𑀺 𑀇𑀫𑀫𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀧𑀻𑀢𑀺𑀲𑀳𑀕𑀢𑀸𑀢𑀺 𑀯𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳.

𑀲𑀺𑀤𑁆𑀥𑁄𑀢𑀺 𑀲𑀸𑀯𑀲𑁂𑀲𑀁 𑀦𑀺𑀭𑀯𑀲𑁂𑀲𑀜𑁆𑀘 𑀲𑀼𑀔𑀧𑀻𑀢𑀺𑀬𑁄 𑀲𑀗𑁆𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑁂𑀳𑀺 𑀧𑀞𑀫𑀤𑀼𑀢𑀺𑀬𑀧𑀤𑁂𑀳𑀺 𑀬𑁄 𑀧𑀻𑀢𑀺𑀲𑀳𑀕𑀢𑁄 𑀥𑀫𑁆𑀫𑀯𑀺𑀲𑁂𑀲𑁄, 𑀢𑀁 𑀲𑀼𑀔𑀁, 𑀬𑁄 𑀘 𑀲𑀼𑀔𑀲𑀳𑀕𑀢𑁄 𑀥𑀫𑁆𑀫𑀯𑀺𑀲𑁂𑀲𑁄, 𑀲𑀸 𑀧𑀻𑀢𑀻𑀢𑀺 𑀲𑀢𑀺𑀧𑀺 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀝𑁆𑀞𑀪𑀸𑀯𑁂 𑀧𑀤𑀦𑁆𑀢𑀭𑀲𑀗𑁆𑀕𑀳𑀺𑀢𑀪𑀸𑀯𑀤𑀻𑀧𑀦𑀢𑁄𑀲𑀺𑀤𑁆𑀥𑁄 𑀜𑀸𑀢𑁄 𑀯𑀺𑀤𑀺𑀢𑁄𑀢𑀺 𑀅𑀢𑁆𑀣𑁄. ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀼𑀔𑀁 𑀅𑀢𑀺𑀧𑀡𑀻𑀢𑀲𑀼𑀔𑀦𑁆𑀢𑀺 𑀑𑀴𑀸𑀭𑀺𑀓𑀗𑁆𑀕𑀢𑁄 𑀦𑀻𑀳𑀭𑀺𑀢𑁆𑀯𑀸 𑀢𑀲𑁆𑀲 𑀧𑀡𑀻𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀅𑀬𑀁 𑀢𑀺𑀓𑁄 𑀯𑀼𑀢𑁆𑀢𑁄’’𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀢𑀤𑁂𑀢𑀁 𑀲𑀩𑁆𑀩𑁂𑀲𑀁 𑀲𑀼𑀔𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀇𑀥 ‘‘𑀲𑀼𑀔𑀲𑀳𑀕𑀢𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀢𑀣𑀸 𑀳𑀺 ‘‘𑀲𑀼𑀔𑀪𑀽𑀫𑀺𑀬𑀁 𑀓𑀸𑀫𑀸𑀯𑀘𑀭𑁂’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁨𑁮𑁩) ‘‘𑀓𑀸𑀫𑀸𑀯𑀘𑀭𑀓𑀼𑀲𑀮𑀢𑁄 𑀘𑀢𑁆𑀢𑀸𑀭𑁄 𑀲𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁫𑁯𑁮) 𑀘 𑀦𑀺𑀤𑁆𑀤𑁂𑀲𑁄 𑀧𑀯𑀢𑁆𑀢𑁄𑀢𑀺.

𑁮. 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑀁 𑀲𑀦𑁆𑀥𑀸𑀬𑀸𑀳, 𑀦 𑀦𑀺𑀩𑁆𑀩𑀸𑀦𑀧𑀝𑀺𑀯𑀺𑀚𑁆𑀛𑀦𑀁, 𑀇𑀢𑀭𑀣𑀸 𑀕𑁄𑀢𑁆𑀭𑀪𑀼𑀲𑁆𑀲 𑀤𑀲𑁆𑀲𑀦𑀪𑀸𑀯𑀸𑀧𑀢𑁆𑀢𑀺 𑀅𑀘𑁄𑀤𑀦𑀻𑀬𑀸 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀦𑀼 𑀘 𑀤𑀺𑀲𑁆𑀯𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀓𑀭𑀡𑁂𑀦 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄𑀯 𑀤𑀲𑁆𑀲𑀦𑀦𑁆𑀢𑀺 𑀉𑀓𑁆𑀓𑀁𑀲𑀕𑀢𑀺𑀯𑀺𑀚𑀸𑀦𑀦𑁂𑀦 𑀦𑀺𑀩𑁆𑀩𑀸𑀦𑀲𑁆𑀲 𑀧𑀝𑀺𑀯𑀺𑀚𑁆𑀛𑀦𑀫𑁂𑀯 𑀤𑀲𑁆𑀲𑀦𑀦𑁆𑀢𑀺 𑀕𑁄𑀢𑁆𑀭𑀪𑀼𑀲𑁆𑀲 𑀤𑀲𑁆𑀲𑀦𑀪𑀸𑀯𑀸𑀧𑀢𑁆𑀢𑀺 𑀦 𑀘𑁄𑀤𑁂𑀢𑀩𑁆𑀩𑀸𑀯𑀸𑀢𑀺? 𑀦, 𑀤𑀲𑁆𑀲𑀦𑀲𑀸𑀫𑀜𑁆𑀜𑀲𑁆𑀲𑁂𑀯 𑀲𑀼𑀬𑁆𑀬𑀫𑀸𑀦𑀢𑁆𑀢𑀸 𑀤𑀲𑁆𑀲𑀦𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀓𑀭𑀡𑀸𑀦𑀜𑁆𑀘 𑀪𑁂𑀤𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀢𑀢𑁆𑀣 𑀬𑀤𑀺𑀧𑀺 ‘‘𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁧𑁮𑁨) 𑀯𑀺𑀬 𑀅𑀪𑀺𑀦𑁆𑀦𑀓𑀸𑀮𑀲𑁆𑀲𑀧𑀺 𑀪𑀺𑀦𑁆𑀦𑀓𑀸𑀮𑀲𑁆𑀲 𑀯𑀺𑀬 𑀪𑁂𑀤𑁄𑀧𑀘𑀸𑀭𑀤𑀲𑁆𑀲𑀦𑀢𑁄 𑀪𑁂𑀤𑀯𑀘𑀦𑀁 𑀬𑀼𑀢𑁆𑀢𑀁, 𑀤𑀲𑁆𑀲𑀦𑀯𑀺𑀲𑁂𑀲𑁂 𑀧𑀦 𑀅𑀥𑀺𑀧𑁆𑀧𑁂𑀢𑁂 𑀤𑀲𑁆𑀲𑀦𑀲𑀸𑀫𑀜𑁆𑀜𑀯𑀘𑀦𑀁 𑀦 𑀓𑀢𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑀦𑀲𑀸𑀫𑀜𑁆𑀜𑀫𑀢𑁆𑀢𑀁 𑀕𑀳𑁂𑀢𑁆𑀯𑀸 𑀘𑁄𑀤𑀦𑀸 𑀓𑀢𑀸𑀢𑀺 ‘‘𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑀁 𑀲𑀦𑁆𑀥𑀸𑀬𑀸𑀳𑀸’’𑀢𑀺 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀢𑀢𑀺𑀬𑀫𑀕𑁆𑀕𑀸𑀦𑀫𑁆𑀧𑀺 𑀥𑀫𑁆𑀫𑀘𑀓𑁆𑀔𑀼𑀧𑀭𑀺𑀬𑀸𑀬𑀲𑀩𑁆𑀪𑀸𑀯𑀢𑁄 ‘‘𑀪𑀸𑀯𑀦𑀸𑀪𑀸𑀯𑀁 𑀅𑀧𑁆𑀧𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀪𑀸𑀯𑀦𑀸 𑀯𑀟𑁆𑀠𑀦𑀸. 𑀲𑀸 𑀘 𑀩𑀳𑀼𑀮𑀁 𑀉𑀧𑁆𑀧𑀢𑁆𑀢𑀺𑀬𑀸 𑀳𑁄𑀢𑀻𑀢𑀺 𑀆𑀳 ‘‘𑀧𑀼𑀦𑀧𑁆𑀧𑀼𑀦𑀁 𑀦𑀺𑀩𑁆𑀩𑀢𑁆𑀢𑀦𑁂𑀦𑀸’’𑀢𑀺. 𑀢𑀣𑀸 𑀳𑀺 𑀲𑀢𑀻𑀢𑀺 ‘‘𑀉𑀪𑀬𑀧𑀝𑀺𑀓𑁆𑀔𑁂𑀧𑀯𑀲𑁂𑀦𑀸’’𑀢𑀺 𑀧𑀤𑀲𑁆𑀲 𑀤𑀲𑁆𑀲𑀦𑀪𑀸𑀯𑀦𑀸𑀧𑀝𑀺𑀓𑁆𑀔𑁂𑀧𑀯𑀲𑁂𑀦𑀸𑀢𑀺 𑀅𑀢𑁆𑀣𑁂 𑀲𑀢𑀺. 𑀦𑀦𑀼 𑀮𑁄𑀓𑀺𑀬𑀲𑀫𑀣𑀯𑀺𑀧𑀲𑁆𑀲𑀦𑀸𑀧𑀺 𑀬𑀣𑀸𑀩𑀮𑀁 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀦𑀁 𑀧𑀳𑀸𑀬𑀓𑀸, 𑀢𑀢𑁆𑀭 𑀓𑀣𑀫𑀺𑀤𑀁 𑀯𑀼𑀢𑁆𑀢𑀁, 𑀦 𑀘 𑀅𑀜𑁆𑀜𑁄 𑀧𑀳𑀸𑀬𑀓𑁄 𑀅𑀢𑁆𑀣𑀻𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀜𑁆𑀜𑁂𑀳𑀻’’𑀢𑀺𑀆𑀤𑀺.

𑁯. 𑀅𑀧𑁆𑀧𑀳𑀸𑀢𑀩𑁆𑀩𑀳𑁂𑀢𑀼𑀫𑀢𑁆𑀢𑁂𑀲𑀽𑀢𑀺 𑀅𑀧𑁆𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀫𑀢𑁆𑀢𑁂𑀲𑀼. 𑀲𑀩𑁆𑀩𑁄 𑀓𑀼𑀲𑀮𑀸𑀩𑁆𑀬𑀸𑀓𑀢𑀥𑀫𑁆𑀫𑁄 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑁄. 𑀲𑀫𑀸𑀲𑁄 𑀦 𑀉𑀧𑀧𑀚𑁆𑀚𑀢𑀺 𑀅𑀲𑀫𑀢𑁆𑀣𑀪𑀸𑀯𑀢𑁄. 𑀬𑁂𑀲𑀦𑁆𑀢𑀺 𑀬𑁂 𑀢𑀢𑀺𑀬𑀭𑀸𑀲𑀺𑀪𑀸𑀯𑁂𑀦 𑀯𑀼𑀢𑁆𑀢𑀸 𑀥𑀫𑁆𑀫𑀸, 𑀅𑀢𑁆𑀣𑁄 𑀢𑁂𑀲𑀁. 𑀉𑀪𑀺𑀦𑁆𑀦𑀦𑁆𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀬𑁄𑀚𑁂𑀢𑀩𑁆𑀩𑀢𑀸𑀬 𑀤𑁆𑀯𑁂 𑀧𑀳𑀸𑀢𑀩𑁆𑀩𑀳𑁂𑀢𑀼𑀲𑀤𑁆𑀤𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀏𑀢𑀦𑁆𑀢𑀺 ‘‘𑀦𑁂𑀯𑀤𑀲𑁆𑀲𑀦𑁂𑀦 𑀦𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑁄 𑀳𑁂𑀢𑀼 𑀏𑀢𑁂𑀲𑀁 𑀅𑀢𑁆𑀣𑀻’’𑀢𑀺 𑀏𑀢𑀁 𑀯𑀘𑀦𑀁. 𑀢𑁂𑀳𑀺 𑀤𑀲𑁆𑀲𑀦𑀪𑀸𑀯𑀦𑀸𑀧𑀤𑁂𑀳𑀺 𑀬𑀼𑀢𑁆𑀢𑁂𑀦 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀧𑀤𑁂𑀦. 𑀏𑀯𑀜𑁆𑀘 𑀓𑀢𑁆𑀯𑀸𑀢𑀺 𑀏𑀯𑀁 𑀤𑀲𑁆𑀲𑀦𑀪𑀸𑀯𑀦𑀸𑀧𑀤𑁂𑀳𑀺 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀧𑀤𑀲𑁆𑀲 𑀯𑀺𑀲𑀼𑀁 𑀯𑀺𑀲𑀼𑀁 𑀬𑁄𑀚𑀦𑀢𑁄. 𑀏𑀯𑀜𑁆𑀳𑀺 𑀧𑀼𑀭𑀺𑀫𑀧𑀤𑀤𑁆𑀯𑀬…𑀧𑁂… 𑀤𑀲𑁆𑀲𑀦𑀫𑁂𑀢𑀁 𑀳𑁄𑀢𑀻𑀢𑀺. 𑀏𑀯𑀦𑁆𑀢𑀺 𑀤𑀲𑁆𑀲𑀦𑀪𑀸𑀯𑀦𑀸𑀳𑀺 𑀦𑀧𑀳𑀸𑀢𑀩𑁆𑀩𑁄 𑀳𑁂𑀢𑀼 𑀏𑀢𑁂𑀲𑀦𑁆𑀢𑀺 𑀏𑀯𑀁 𑀅𑀢𑁆𑀣𑁂 𑀲𑀢𑀺. ‘‘𑀳𑁂𑀢𑀼…𑀧𑁂… 𑀲𑀺𑀬𑀸’’𑀢𑀺 𑀏𑀢𑀲𑁆𑀲 ‘‘𑀧𑀼𑀭𑀺𑀫𑀲𑁆𑀫𑀺𑀜𑁆𑀳𑀺 𑀅𑀢𑁆𑀣𑁂’’𑀢𑀺𑀆𑀤𑀺𑀦𑀸 𑀅𑀳𑁂𑀢𑀼𑀓𑀸𑀦𑀁 𑀅𑀕𑁆𑀕𑀳𑀺𑀢𑀪𑀸𑀯𑀤𑀲𑁆𑀲𑀦𑀯𑀲𑁂𑀦 𑀅𑀢𑁆𑀣𑀁 𑀯𑀢𑁆𑀯𑀸 𑀇𑀤𑀸𑀦𑀺 ‘‘𑀅𑀣 𑀯𑀸’’𑀢𑀺𑀆𑀤𑀺𑀦𑀸 𑀤𑀼𑀢𑀺𑀬𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀬𑀼𑀢𑁆𑀢𑀪𑀸𑀯𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀕𑀳𑁂𑀢𑀩𑁆𑀩𑀢𑁆𑀣𑀲𑁆𑀲𑁂𑀯𑀸’’𑀢𑀺𑀆𑀤𑀺𑀫𑀸𑀳. 𑀲𑁄 𑀳𑀺 ‘‘𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀕𑀳𑁂𑀢𑀩𑁆𑀩𑀢𑁆𑀣𑁄.

𑁧𑁦. 𑀅𑀜𑁆𑀜𑀣𑀸𑀢𑀺 𑀆𑀭𑀫𑁆𑀫𑀡𑀓𑀭𑀡𑀫𑀢𑁆𑀢𑁂 𑀅𑀥𑀺𑀧𑁆𑀧𑁂𑀢𑁂. 𑀓𑀣𑀁 𑀧𑀦𑁂𑀢𑀁 𑀚𑀸𑀦𑀺𑀢𑀩𑁆𑀩𑀁 ‘‘𑀆𑀭𑀫𑁆𑀫𑀡𑀁 𑀓𑀢𑁆𑀯𑀸𑀢𑀺 𑀏𑀢𑁂𑀦 𑀘𑀢𑀼𑀓𑀺𑀘𑁆𑀘𑀲𑀸𑀥𑀓𑀁 𑀆𑀭𑀫𑁆𑀫𑀡𑀓𑀭𑀡𑀁 𑀯𑀼𑀘𑁆𑀘𑀢𑀻’’𑀢𑀺? 𑀲𑀸𑀫𑀜𑁆𑀜𑀚𑁄𑀢𑀦𑀸𑀬 𑀯𑀺𑀲𑁂𑀲𑁂 𑀅𑀯𑀝𑁆𑀞𑀸𑀦𑀢𑁄 𑀅𑀭𑀺𑀬𑀫𑀕𑁆𑀕𑀥𑀫𑁆𑀫𑀸𑀦𑀁𑀬𑁂𑀯 𑀘 𑀅𑀧𑀘𑀬𑀕𑀸𑀫𑀺𑀪𑀸𑀯𑀢𑁄. ‘‘𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀅𑀧𑀭𑀺𑀬𑀸𑀧𑀦𑁆𑀦𑀸 𑀅𑀧𑀘𑀬𑀕𑀸𑀫𑀺𑀦𑁄’’𑀢𑀺 (𑀥. 𑀲. 𑁧𑁦𑁨𑁧) 𑀳𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀅𑀭𑀺𑀬𑀫𑀕𑁆𑀕𑀸𑀦𑀁 𑀏𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀏𑀢𑁂𑀦𑁂𑀯 𑀯𑀸 𑀯𑀺𑀲𑁂𑀲𑀼𑀧𑀮𑀓𑁆𑀔𑀡𑀳𑁂𑀢𑀼𑀪𑀽𑀢𑁂𑀦 𑀯𑀘𑀦𑁂𑀦 𑀬𑀣𑀸𑀯𑀼𑀢𑁆𑀢𑁄 𑀆𑀭𑀫𑁆𑀫𑀡𑀓𑀭𑀡𑀯𑀺𑀲𑁂𑀲𑁄 𑀯𑀺𑀜𑁆𑀜𑀸𑀬𑀢𑀺. 𑀉𑀓𑁆𑀓𑀁𑀲𑀕𑀢𑀺𑀯𑀺𑀚𑀸𑀦𑀦𑁂𑀦 𑀯𑀸 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀻𑀦𑀦𑁆𑀢𑀺 𑀯𑁄𑀤𑀸𑀦𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀳𑁂𑀢𑀼𑀪𑀸𑀯𑁂𑀦𑀸𑀢𑀺 𑀲𑀫𑁆𑀧𑀸𑀧𑀓𑀳𑁂𑀢𑀼𑀪𑀸𑀯𑁂𑀦. 𑀜𑀸𑀧𑀓𑁄 𑀓𑀸𑀭𑀓𑁄 𑀲𑀫𑁆𑀧𑀸𑀧𑀓𑁄𑀢𑀺 𑀢𑀺𑀯𑀺𑀥𑁄 𑀳𑀺 𑀳𑁂𑀢𑀼, 𑀢𑀣𑀸 𑀜𑀸𑀧𑁂𑀢𑀩𑁆𑀩𑀸𑀤𑀺𑀪𑀸𑀯𑁂𑀦 𑀨𑀮𑀁. 𑀬𑀣𑀸 𑀦𑀺𑀭𑀬𑀸𑀤𑀺𑀫𑀦𑀼𑀲𑁆𑀲𑀪𑀸𑀯𑀸𑀤𑀺𑀕𑀸𑀫𑀺𑀧𑀝𑀺𑀧𑀤𑀸𑀪𑀸𑀯𑀢𑁄 𑀅𑀓𑀼𑀲𑀮𑀮𑁄𑀓𑀺𑀬𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸 ‘‘𑀆𑀘𑀬𑀕𑀸𑀫𑀺𑀦𑁄 𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀸, 𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀆𑀤𑀺𑀮𑁄𑀓𑀺𑀬𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀺𑀥𑀫𑁆𑀫𑀸 𑀏𑀯, 𑀏𑀯𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀧𑀝𑀺𑀧𑀤𑀸𑀪𑀸𑀯𑀢𑁄 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸 ‘‘𑀅𑀧𑀘𑀬𑀕𑀸𑀫𑀺𑀦𑁄’’𑀢𑀺 𑀤𑀝𑁆𑀞𑀩𑁆𑀩𑀸, 𑀦 𑀅𑀭𑀺𑀬𑀫𑀕𑁆𑀕𑀥𑀫𑁆𑀫𑀸 𑀏𑀯𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀼𑀭𑀺𑀫𑀧𑀘𑁆𑀙𑀺𑀫𑀸𑀦’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀅𑀭𑀺𑀬𑀫𑀕𑁆𑀕𑀲𑁆𑀲𑁂𑀯 𑀦𑀺𑀩𑁆𑀩𑀸𑀦𑀕𑀸𑀫𑀺𑀧𑀝𑀺𑀧𑀤𑀸𑀪𑀸𑀯𑁄 𑀧𑀭𑀺𑀩𑁆𑀬𑀢𑁆𑀢𑁄𑀢𑀺 𑀢𑀲𑁆𑀲𑁂𑀯 𑀅𑀧𑀘𑀬𑀕𑀸𑀫𑀺𑀪𑀸𑀯𑁄 𑀬𑀼𑀢𑁆𑀢𑁄, 𑀢𑀤𑀦𑀼𑀯𑀢𑁆𑀢𑀓𑀢𑁆𑀢𑀸 𑀧𑀦 𑀲𑁂𑀲𑀥𑀫𑁆𑀫𑁂 𑀲𑀗𑁆𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀧𑀘𑀬𑁂 𑀤𑀼𑀓𑁆𑀔𑀧𑀭𑀺𑀚𑀸𑀦𑀦𑀸𑀤𑀺𑀦𑀸 𑀲𑀸𑀢𑀺𑀲𑀬𑀁 𑀕𑀫𑀦𑀁 𑀬𑁂𑀲𑀦𑁆𑀢𑁂 𑀅𑀧𑀘𑀬𑀕𑀸𑀫𑀺𑀦𑁄𑀢𑀺 ‘‘𑀫𑀕𑁆𑀕𑀸 𑀏𑀯 𑀅𑀧𑀘𑀬𑀕𑀸𑀫𑀺𑀦𑁄’’𑀢𑀺 𑀯𑀼𑀢𑁆𑀢𑀁. 𑀧𑀼𑀭𑀺𑀫𑀧𑀘𑁆𑀙𑀺𑀫𑀸𑀦𑀦𑁆𑀢𑀺 𑀘 𑀇𑀫𑀲𑁆𑀫𑀺𑀁 𑀢𑀺𑀓𑁂 𑀧𑀞𑀫𑀧𑀤𑀤𑀼𑀢𑀺𑀬𑀧𑀤𑀲𑀗𑁆𑀕𑀳𑀺𑀢𑀸𑀦𑀁 𑀅𑀢𑁆𑀣𑀸𑀦𑀦𑁆𑀢𑀺 𑀅𑀢𑁆𑀣𑁄. ‘‘𑀚𑀬𑀁 𑀯𑁂𑀭𑀁 𑀧𑀲𑀯𑀢𑀺 (𑀥. 𑀧. 𑁨𑁦𑁧), 𑀘𑀭𑀁 𑀯𑀸 𑀬𑀤𑀺 𑀯𑀸 𑀢𑀺𑀝𑁆𑀞’’𑀦𑁆𑀢𑀺𑀆𑀤𑀻𑀲𑀼 (𑀇𑀢𑀺𑀯𑀼. 𑁮𑁬, 𑁧𑁧𑁦; 𑀲𑀼. 𑀦𑀺. 𑁧𑁯𑁫) 𑀯𑀺𑀬 𑀲𑀸𑀦𑀼𑀦𑀸𑀲𑀺𑀓𑁄 𑀆𑀘𑀬-𑀲𑀤𑁆𑀤𑁄𑀢𑀺 ‘‘𑀅𑀦𑀼𑀦𑀸𑀲𑀺𑀓𑀮𑁄𑀧𑁄 𑀓𑀢𑁄’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 ‘‘𑀆𑀘𑀺𑀦’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀆𑀘𑀬’’𑀦𑁆𑀢𑀺 𑀩𑁆𑀬𑀢𑁆𑀢𑀬𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀆𑀘𑀬𑀸 𑀳𑀼𑀢𑁆𑀯𑀸 𑀕𑀘𑁆𑀙𑀦𑁆𑀢𑀻𑀢𑀺 𑀏𑀢𑁂𑀦 𑀅𑀧𑀘𑀺𑀦𑀦𑁆𑀢𑀻𑀢𑀺 𑀅𑀧𑀘𑀬𑀸, 𑀅𑀧𑀘𑀬𑀸 𑀳𑀼𑀢𑁆𑀯𑀸 𑀕𑀘𑁆𑀙𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀬𑀫𑀢𑁆𑀣𑁄 𑀦𑀬𑀢𑁄 𑀤𑀲𑁆𑀲𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁧. 𑀮𑁄𑀓𑀺𑀬𑁂𑀲𑀼 𑀅𑀲𑁂𑀓𑁆𑀔𑀪𑀸𑀯𑀸𑀦𑀸𑀧𑀢𑁆𑀢𑀺 𑀤𑀝𑁆𑀞𑀩𑁆𑀩𑀸𑀢𑀺 𑀓𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀁, 𑀦𑀦𑀼 𑁋

‘‘𑀲𑀺𑀓𑁆𑀔𑀢𑀻𑀢𑀺 𑀔𑁄 𑀪𑀺𑀓𑁆𑀔𑀼 𑀢𑀲𑁆𑀫𑀸 𑀲𑁂𑀓𑁆𑀔𑁄𑀢𑀺 𑀯𑀼𑀘𑁆𑀘𑀢𑀺. 𑀓𑀺𑀜𑁆𑀘 𑀲𑀺𑀓𑁆𑀔𑀢𑀺, 𑀅𑀥𑀺𑀲𑀻𑀮𑀫𑁆𑀧𑀺 𑀲𑀺𑀓𑁆𑀔𑀢𑀺 𑀅𑀥𑀺𑀘𑀺𑀢𑁆𑀢𑀫𑁆𑀧𑀺 𑀲𑀺𑀓𑁆𑀔𑀢𑀺 𑀅𑀥𑀺𑀧𑀜𑁆𑀜𑀫𑁆𑀧𑀺 𑀲𑀺𑀓𑁆𑀔𑀢𑀺. 𑀲𑀺𑀓𑁆𑀔𑀢𑀻𑀢𑀺 𑀔𑁄 𑀪𑀺𑀓𑁆𑀔𑀼 𑀢𑀲𑁆𑀫𑀸 𑀲𑁂𑀓𑁆𑀔𑁄𑀢𑀺 𑀯𑀼𑀘𑁆𑀘𑀢𑀺 (𑀅. 𑀦𑀺. 𑁩.𑁮𑁬). 𑀬𑁄𑀧𑀺 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑁄 𑀅𑀦𑀼𑀮𑁄𑀫𑀧𑀝𑀺𑀧𑀤𑀸𑀬 𑀧𑀭𑀺𑀧𑀽𑀭𑀓𑀸𑀭𑀻 𑀲𑀻𑀮𑀲𑀫𑁆𑀧𑀦𑁆𑀦𑁄 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀧𑀼𑀩𑁆𑀩𑀭𑀢𑁆𑀢𑀸𑀧𑀭𑀭𑀢𑁆𑀢𑀁 𑀩𑁄𑀥𑀺𑀧𑀓𑁆𑀔𑀺𑀬𑀸𑀦𑀁 𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺 ‘𑀅𑀚𑁆𑀚 𑀯𑀸 𑀲𑁆𑀯𑁂 𑀯𑀸 𑀅𑀜𑁆𑀜𑀢𑀭𑀁 𑀲𑀸𑀫𑀜𑁆𑀜𑀨𑀮𑀁 𑀅𑀥𑀺𑀕𑀫𑀺𑀲𑁆𑀲𑀸𑀫𑀻’𑀢𑀺, 𑀲𑁄𑀧𑀺 𑀲𑀺𑀓𑁆𑀔𑀢𑀻𑀢𑀺 𑀲𑁂𑀓𑁆𑀔𑁄’’𑀢𑀺 𑁋

𑀯𑀘𑀦𑀢𑁄 𑀬𑀣𑀸𑀯𑀼𑀢𑁆𑀢𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀲𑁆𑀲𑀧𑀺 𑀲𑀻𑀮𑀸𑀤𑀺𑀥𑀫𑁆𑀫𑀸 𑀲𑁂𑀓𑁆𑀔𑀸𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺? 𑀦, 𑀧𑀭𑀺𑀬𑀸𑀬𑀪𑀸𑀯𑀢𑁄. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀳𑀺 𑀲𑁂𑀓𑁆𑀔𑀸𑀲𑁂𑀓𑁆𑀔𑀪𑀸𑀯𑁄 𑀬𑀣𑀸𑀲𑀫𑁆𑀪𑀯𑀁 𑀫𑀕𑁆𑀕𑀨𑀮𑀥𑀫𑁆𑀫𑁂𑀲𑀼 𑀏𑀯𑀸𑀢𑀺 𑀮𑁄𑀓𑀺𑀬𑁂𑀲𑀼 𑀲𑁂𑀓𑁆𑀔𑀪𑀸𑀯𑀸𑀲𑀗𑁆𑀓𑀸𑀪𑀸𑀯𑀢𑁄 𑀅𑀲𑁂𑀓𑁆𑀔𑀪𑀸𑀯𑀸𑀦𑀸𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀢𑁂𑀦𑁂𑀯𑀸𑀳 ‘‘𑀲𑀻𑀮𑀲𑀫𑀸𑀥𑀻’’𑀢𑀺𑀆𑀤𑀺. 𑀅𑀭𑀳𑀢𑁆𑀢𑀨𑀮𑀥𑀫𑁆𑀫𑀸𑀧𑀺 𑀲𑀺𑀓𑁆𑀔𑀸𑀨𑀮𑀪𑀸𑀯𑁂𑀦 𑀧𑀯𑀢𑁆𑀢𑀦𑀢𑁄 𑀳𑁂𑀝𑁆𑀞𑀺𑀫𑀨𑀮𑀥𑀫𑁆𑀫𑀸 𑀯𑀺𑀬 𑀲𑀺𑀓𑁆𑀔𑀸𑀲𑀼 𑀚𑀸𑀢𑀸𑀢𑀺𑀆𑀤𑀺𑀅𑀢𑁆𑀣𑁂𑀳𑀺 𑀲𑁂𑀓𑁆𑀔𑀸 𑀲𑀺𑀬𑀼𑀁, 𑀳𑁂𑀝𑁆𑀞𑀺𑀫𑀨𑀮𑀥𑀫𑁆𑀫𑀸𑀧𑀺 𑀯𑀸 𑀲𑀺𑀓𑁆𑀔𑀸𑀨𑀮𑀪𑀸𑀯𑁂𑀦 𑀧𑀯𑀢𑁆𑀢𑀦𑀢𑁄 𑀅𑀭𑀳𑀢𑁆𑀢𑀨𑀮𑀥𑀫𑁆𑀫𑀸 𑀯𑀺𑀬 𑀅𑀲𑁂𑀓𑁆𑀔𑀸𑀢𑀺 𑀘𑁄𑀤𑀦𑀁 𑀫𑀦𑀲𑀺𑀓𑀢𑁆𑀯𑀸 ‘‘𑀧𑀭𑀺𑀦𑀺𑀝𑁆𑀞𑀺𑀢𑀲𑀺𑀓𑁆𑀔𑀸𑀓𑀺𑀘𑁆𑀘𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁, 𑀢𑀣𑀸 ‘‘𑀳𑁂𑀝𑁆𑀞𑀺𑀫𑀨𑀮𑁂𑀲𑀼 𑀧𑀦𑀸’’𑀢𑀺𑀆𑀤𑀺. ‘‘𑀢𑀁 𑀏𑀯 𑀲𑀸𑀮𑀺𑀁 𑀪𑀼𑀜𑁆𑀚𑀸𑀫𑀺, 𑀲𑀸 𑀏𑀯 𑀢𑀺𑀢𑁆𑀢𑀺𑀭𑀻, 𑀢𑀸𑀦𑀺 𑀏𑀯 𑀑𑀲𑀥𑀸𑀦𑀻’’𑀢𑀺𑀆𑀤𑀻𑀲𑀼 𑀢𑀁𑀲𑀤𑀺𑀲𑁂𑀲𑀼 𑀢𑀩𑁆𑀩𑁄𑀳𑀸𑀭𑁄 𑀤𑀝𑁆𑀞𑀩𑁆𑀩𑁄. 𑀏𑀢𑁂𑀦 𑀘 𑀲𑁂𑀓𑁆𑀔𑀲𑀤𑀺𑀲𑀸 𑀅𑀲𑁂𑀓𑁆𑀔𑀸 𑀬𑀣𑀸 ‘‘𑀅𑀫𑀦𑀼𑀲𑁆𑀲𑁄’’𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀅𑀜𑁆𑀜𑁂. 𑀅𑀜𑁆𑀜𑀢𑁆𑀣 ‘‘𑀅𑀭𑀺𑀝𑁆𑀞’’𑀦𑁆𑀢𑀺𑀆𑀤𑀻𑀲𑀼 𑀯𑀼𑀤𑁆𑀥𑀺𑀅𑀢𑁆𑀣𑁂𑀧𑀺 𑀅-𑀓𑀸𑀭𑁄 𑀤𑀺𑀲𑁆𑀲𑀢𑀻𑀢𑀺 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀸 𑀲𑁂𑀓𑁆𑀔𑀸 𑀅𑀲𑁂𑀓𑁆𑀔𑀸𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄.

𑁧𑁨. 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀲𑀫𑀢𑁆𑀣𑀢𑀸𑀬𑀸𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀯𑀺𑀢𑀓𑁆𑀓𑀸𑀤𑀺𑀯𑀺𑀓𑁆𑀔𑀫𑁆𑀪𑀦𑀲𑀫𑀢𑁆𑀣𑀢𑀸𑀧𑀺 𑀳𑁂𑀢𑁆𑀣 𑀮𑀩𑁆𑀪𑀢𑀻𑀢𑀺. 𑀅𑀓𑀼𑀲𑀮𑀯𑀺𑀤𑁆𑀥𑀁𑀲𑀦𑀭𑀲𑀢𑁆𑀢𑀸 𑀯𑀸 𑀓𑀼𑀲𑀮𑀸𑀦𑀁 𑀢𑀢𑁆𑀣 𑀲𑀸𑀢𑀺𑀲𑀬𑀓𑀺𑀘𑁆𑀘𑀬𑀼𑀢𑁆𑀢𑀢𑀁 𑀧𑀭𑀺𑀢𑁆𑀢𑀥𑀫𑁆𑀫𑁂𑀳𑀺 𑀫𑀳𑀕𑁆𑀕𑀢𑀸𑀦𑀁 𑀧𑀓𑀸𑀲𑁂𑀢𑀼𑀁 ‘‘𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀲𑀫𑀢𑁆𑀣𑀢𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀯𑀺𑀧𑀸𑀓𑀓𑀺𑀭𑀺𑀬𑁂𑀲𑀼 𑀤𑀻𑀖𑀲𑀦𑁆𑀢𑀸𑀦𑀢𑀸𑀯, 𑀦 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀲𑀫𑀢𑁆𑀣𑀢𑀸 𑀯𑀺𑀧𑀼𑀮𑀨𑀮𑀢𑀸 𑀘𑀸𑀢𑀺 𑀅𑀢𑁆𑀣𑁄. ‘‘𑀯𑀺𑀧𑀼𑀮𑀁 𑀨𑀮𑀁 𑀯𑀺𑀧𑀼𑀮𑀨𑀮’’𑀦𑁆𑀢𑀺 𑀏𑀯𑀁 𑀧𑀦 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂 𑀯𑀺𑀧𑀸𑀓𑁂𑀲𑀼𑀧𑀺 𑀯𑀺𑀧𑀼𑀮𑀨𑀮𑀢𑀸 𑀮𑀩𑁆𑀪𑀢𑁂𑀯. 𑀲𑁄𑀧𑀺 𑀏𑀓𑀲𑁂𑀲𑀦𑀬𑁂𑀦 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀫𑀳𑀦𑁆𑀢𑁂𑀳𑀺 𑀕𑀢𑀸 𑀧𑀝𑀺𑀧𑀦𑁆𑀦𑀸𑀢𑀺 𑀅𑀬𑀁 𑀧𑀦𑀢𑁆𑀣𑁄 𑀢𑀺𑀡𑁆𑀡𑀫𑁆𑀧𑀺 𑀲𑀸𑀥𑀸𑀭𑀡𑁄𑀢𑀺. 𑀕𑀼𑀡𑀢𑁄 𑀅𑀬𑀁 𑀏𑀢𑁆𑀢𑀓𑁄𑀢𑀺 𑀲𑀢𑁆𑀢𑀸𑀦𑀁 𑀧𑀫𑀸𑀡𑀁 𑀓𑀭𑁄𑀦𑁆𑀢𑀸 𑀯𑀺𑀬 𑀧𑀯𑀢𑁆𑀢𑀦𑁆𑀢𑀻𑀢𑀺 𑀑𑀴𑀸𑀭𑀺𑀓𑀸 𑀓𑀺𑀮𑁂𑀲𑀸 ‘‘𑀧𑀫𑀸𑀡𑀓𑀭𑀸’’𑀢𑀺 𑀯𑀼𑀢𑁆𑀢𑀸. 𑀢𑁂𑀳𑀺 𑀧𑀭𑀺𑀢𑁄 𑀔𑀡𑁆𑀟𑀺𑀢𑀸 𑀧𑀭𑀺𑀘𑁆𑀙𑀺𑀦𑁆𑀦𑀸𑀢𑀺 𑀧𑀭𑀺𑀢𑁆𑀢𑀸. 𑀲𑀢𑀺𑀧𑀺 𑀓𑁂𑀳𑀺𑀘𑀺 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑁂 𑀫𑀳𑀸𑀧𑀫𑀸𑀡𑀪𑀸𑀯𑁂𑀦 𑀕𑀢𑀸 𑀧𑀯𑀢𑁆𑀢𑀸𑀢𑀺 𑀫𑀳𑀕𑁆𑀕𑀢𑀸. 𑀧𑀭𑀺𑀘𑁆𑀙𑁂𑀤𑀓𑀭𑀸𑀦𑀁 𑀓𑀺𑀮𑁂𑀲𑀸𑀦𑀁 𑀲𑀼𑀔𑀼𑀫𑀸𑀦𑀫𑁆𑀧𑀺 𑀅𑀕𑁄𑀘𑀭𑀪𑀸𑀯𑀢𑁄 𑀢𑁂𑀳𑀺 𑀦 𑀓𑀣𑀜𑁆𑀘𑀺𑀧𑀺 𑀧𑀭𑀺𑀘𑁆𑀙𑀺𑀦𑁆𑀦𑀸 𑀯𑀻𑀢𑀺𑀓𑁆𑀓𑀦𑁆𑀢𑀸𑀢𑀺 𑀅𑀧𑀭𑀺𑀘𑁆𑀙𑀺𑀦𑁆𑀦𑀸 𑀅𑀧𑁆𑀧𑀫𑀸𑀡𑀸, 𑀬𑀢𑁄 𑀢𑁂 ‘‘𑀅𑀧𑀭𑀺𑀬𑀸𑀧𑀦𑁆𑀦𑀸’’𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺.

𑁧𑁪. 𑀢𑀺𑀢𑁆𑀢𑀺𑀁 𑀦 𑀚𑀦𑁂𑀦𑁆𑀢𑀺 𑀲𑀦𑁆𑀢𑀢𑀭𑀢𑀸𑀬 𑀅𑀲𑁂𑀘𑀦𑀓𑀪𑀸𑀯𑀢𑁄. 𑀏𑀢𑁆𑀣 𑀘 ‘‘𑀧𑀫𑀸𑀡𑀓𑀭𑁂𑀳𑀻’’𑀢𑀺𑀆𑀤𑀺𑀓𑁄 𑀅𑀢𑁆𑀣𑀯𑀺𑀓𑀧𑁆𑀧𑁄 ‘‘𑀅𑀢𑀧𑁆𑀧𑀓𑀢𑁆𑀣𑁂𑀦𑀸’’𑀢𑀺𑀆𑀤𑀺𑀓𑀸𑀬 𑀳𑀻𑀦𑀢𑁆𑀢𑀺𑀓𑀧𑀤𑀯𑀡𑁆𑀡𑀦𑀸𑀬 𑀧𑀭𑀢𑁄 𑀩𑀳𑀽𑀲𑀼 𑀧𑁄𑀢𑁆𑀣𑀓𑁂𑀲𑀼 𑀮𑀺𑀔𑀻𑀬𑀢𑀺, 𑀬𑀣𑀸𑀞𑀸𑀦𑁂 𑀏𑀯 𑀧𑀦 𑀆𑀦𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑁄.

𑁧𑁫. 𑀮𑁄𑀓𑀺𑀬𑀲𑀸𑀥𑀼𑀚𑀦𑁂𑀳𑀺𑀧𑀺 𑀅𑀢𑀺𑀚𑀺𑀕𑀼𑀘𑁆𑀙𑀦𑀻𑀬𑁂𑀲𑀼 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀦𑀢𑁆𑀣𑀺𑀓𑀯𑀸𑀤𑀸𑀤𑀻𑀲𑀼 𑀧𑀯𑀢𑁆𑀢𑀺 𑀯𑀺𑀦𑀸 𑀯𑀺𑀧𑀮𑁆𑀮𑀸𑀲𑀩𑀮𑀯𑀪𑀸𑀯𑁂𑀦 𑀦 𑀳𑁄𑀢𑀻𑀢𑀺 ‘‘𑀯𑀺𑀧𑀭𑀺𑀬𑀸𑀲𑀤𑀴𑁆𑀳𑀢𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀏𑀢𑁂𑀦𑀸𑀢𑀺 ‘‘𑀯𑀺𑀧𑀸𑀓𑀤𑀸𑀦𑁂 𑀲𑀢𑀻’’𑀢𑀺𑀆𑀤𑀺𑀦𑀸 𑀲𑀢𑀺𑀧𑀺 𑀓𑀸𑀮𑀦𑀺𑀬𑀫𑁂 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑁂 𑀲𑀸𑀲𑀗𑁆𑀓𑀯𑀘𑀦𑁂𑀦. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀦𑀺𑀬𑀢𑀢𑀸𑀬 𑀅𑀢𑀺𑀧𑁆𑀧𑀲𑀗𑁆𑀕𑁄 𑀤𑀼𑀦𑁆𑀦𑀺𑀯𑀸𑀭𑁄, 𑀢𑀲𑁆𑀫𑀸. 𑀩𑀮𑀯𑀢𑀸…𑀧𑁂… 𑀧𑀯𑀢𑁆𑀢𑀻𑀢𑀺 𑀏𑀢𑁂𑀦 𑀅𑀲𑀫𑀸𑀦𑀚𑀸𑀢𑀺𑀓𑁂𑀦 𑀅𑀦𑀺𑀯𑀢𑁆𑀢𑀦𑀻𑀬𑀯𑀺𑀧𑀸𑀓𑀢𑀁, 𑀲𑀫𑀸𑀦𑀚𑀸𑀢𑀺𑀓𑁂𑀦 𑀘 𑀯𑀺𑀧𑀸𑀓𑀸𑀦𑀼𑀧𑁆𑀧𑀸𑀤𑀦𑁂𑀧𑀺 𑀅𑀦𑀦𑁆𑀢𑀭𑀁 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸𑀬 𑀅𑀯𑀺𑀳𑀦𑁆𑀢𑀩𑁆𑀩𑀢𑀁 𑀅𑀦𑀦𑁆𑀢𑀭𑀺𑀓𑀸𑀦𑀁 𑀤𑀲𑁆𑀲𑁂𑀢𑀺. 𑀬𑀢𑁄 𑀢𑁂𑀲𑀁 𑀯𑀺𑀧𑀸𑀓𑀥𑀫𑁆𑀫𑀢𑀸 𑀯𑀺𑀬 𑀲𑀪𑀸𑀯𑀲𑀺𑀤𑁆𑀥𑀸 𑀦𑀺𑀬𑀢𑀸𑀦𑀦𑁆𑀢𑀭𑀺𑀬𑀢𑀸. 𑀅𑀜𑁆𑀜𑀲𑁆𑀲…𑀧𑁂… 𑀤𑀸𑀦𑀢𑁄𑀢𑀺 𑀇𑀫𑀺𑀦𑀸𑀧𑀺 𑀅𑀲𑀫𑀸𑀦𑀚𑀸𑀢𑀺𑀓𑀸𑀤𑀻𑀳𑀺 𑀅𑀦𑀺𑀯𑀢𑁆𑀢𑀦𑀻𑀬𑀨𑀮𑀢𑀁 𑀏𑀯 𑀯𑀺𑀪𑀸𑀯𑁂𑀢𑀺.

𑀘𑁄𑀤𑀓𑁄 𑀅𑀥𑀺𑀧𑁆𑀧𑀸𑀬𑀁 𑀅𑀚𑀸𑀦𑀦𑁆𑀢𑁄 ‘‘𑀦𑀦𑀽’’𑀢𑀺𑀆𑀤𑀺𑀦𑀸 𑀅𑀢𑀺𑀧𑁆𑀧𑀲𑀗𑁆𑀕𑀫𑁂𑀯 𑀘𑁄𑀤𑁂𑀢𑀺. 𑀇𑀢𑀭𑁄 ‘‘𑀦𑀸𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀢𑀺. 𑀏𑀓𑀦𑁆𑀢𑁂𑀢𑀺 𑀅𑀯𑀲𑁆𑀲𑀫𑁆𑀪𑀸𑀯𑀺𑀦𑀺. 𑀲𑀦𑁆𑀦𑀺𑀬𑀢𑀢𑁆𑀢𑀸𑀢𑀺 𑀲𑀫𑁆𑀧𑀸𑀤𑀦𑁂 𑀚𑀦𑀦𑁂 𑀦𑀺𑀬𑀢𑀪𑀸𑀯𑀢𑁄. 𑀉𑀧𑀭𑀢𑀸 𑀅𑀯𑀺𑀧𑀘𑁆𑀘𑀦𑀲𑀪𑀸𑀯𑀸𑀲𑀗𑁆𑀓𑀸 𑀬𑁂𑀲𑀼 𑀢𑀸𑀦𑀺 𑀉𑀧𑀭𑀢𑀸𑀯𑀺𑀧𑀘𑁆𑀘…𑀧𑁂… 𑀲𑀗𑁆𑀓𑀸𑀦𑀺, 𑀢𑀩𑁆𑀪𑀸𑀯𑁄 𑀉𑀧…𑀧𑁂… 𑀲𑀗𑁆𑀓𑀢𑁆𑀢𑀁, 𑀢𑀲𑁆𑀫𑀸. ‘‘𑀦 𑀲𑀫𑀢𑁆𑀣𑀢𑀸𑀯𑀺𑀖𑀸𑀢𑀢𑁆𑀢𑀸𑀢𑀺 𑀩𑀮𑀯𑀢𑀸𑀧𑀺 𑀆𑀦𑀦𑁆𑀢𑀭𑀺𑀬𑁂𑀦 𑀅𑀦𑀼𑀧𑀳𑀦𑁆𑀢𑀩𑁆𑀩𑀢𑀁 𑀆𑀳. 𑀉𑀧𑀢𑁆𑀣𑀫𑁆𑀪𑀓𑀸𑀦𑀺 𑀅𑀦𑀼𑀩𑀮𑀧𑁆𑀧𑀤𑀸𑀬𑀓𑀸𑀦𑀺 𑀳𑁄𑀦𑁆𑀢𑀺 𑀉𑀧𑁆𑀧𑀢𑁆𑀢𑀺𑀬𑀸 𑀲𑀦𑁆𑀢𑀸𑀦𑀲𑁆𑀲 𑀯𑀺𑀲𑁂𑀲𑀺𑀢𑀢𑁆𑀢𑀸. 𑀢𑁂𑀦 𑀦𑁂𑀲𑀁 𑀯𑀺𑀧𑀸𑀓𑀸𑀦𑀼𑀧𑁆𑀧𑀸𑀤𑀦𑁂𑀧𑀺 𑀅𑀫𑁄𑀖𑀯𑀼𑀢𑁆𑀢𑀺𑀢𑀁 𑀆𑀳.

𑁧𑁬. 𑀫𑀕𑁆𑀕𑀓𑀺𑀘𑁆𑀘𑀁 𑀧𑀭𑀺𑀜𑁆𑀜𑀸𑀤𑀺. 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸𑀮𑁄𑀪𑀸𑀤𑁄𑀲𑀲𑀗𑁆𑀔𑀸𑀢𑁂𑀳𑀺 𑀫𑀕𑁆𑀕𑀳𑁂𑀢𑀽𑀳𑀺 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀔𑀦𑁆𑀥𑀲𑁂𑀲𑀫𑀕𑁆𑀕𑀗𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀻𑀦𑀁 𑀲𑀳𑁂𑀢𑀼𑀓𑀪𑀸𑀯𑀤𑀲𑁆𑀲𑀦𑀢𑁄 𑀢𑀺𑀡𑁆𑀡𑀁 𑀦𑀬𑀸𑀦𑀁 𑀅𑀲𑀗𑁆𑀕𑀳𑀺𑀢𑀲𑀗𑁆𑀕𑀡𑁆𑀳𑀦𑀯𑀲𑁂𑀦𑀸𑀢𑀺 𑀯𑀼𑀢𑁆𑀢𑀁. 𑀳𑁂𑀢𑀼𑀩𑀳𑀼𑀢𑀸𑀯𑀲𑁂𑀦𑀸𑀢𑀺 𑀩𑀳𑀼𑀳𑁂𑀢𑀼𑀓𑀲𑁆𑀲 𑀧𑀞𑀫𑀦𑀬𑀲𑁆𑀲 𑀅𑀦𑀦𑁆𑀢𑀭𑀁 𑀩𑀳𑀼𑀳𑁂𑀢𑀼𑀓𑀢𑀸𑀲𑀸𑀫𑀜𑁆𑀜𑁂𑀦 𑀦𑀺𑀓𑁆𑀔𑁂𑀧𑀓𑀡𑁆𑀟𑀧𑀸𑀴𑀺𑀬𑀁 𑀢𑀢𑀺𑀬𑀁 𑀯𑀼𑀢𑁆𑀢𑀦𑀬𑁄 𑀇𑀥 𑀅𑀝𑁆𑀞𑀓𑀣𑀸𑀬𑀁 𑀤𑀼𑀢𑀺𑀬𑀁 𑀯𑀼𑀢𑁆𑀢𑁄. 𑀬𑀣𑀸𑀲𑀓𑀁 𑀧𑀘𑁆𑀘𑀬𑁂𑀳𑀺 𑀧𑀯𑀢𑁆𑀢𑀫𑀸𑀦𑁂𑀲𑀼 𑀦𑀺𑀭𑀻𑀳𑀓𑁂𑀲𑀼 𑀥𑀫𑁆𑀫𑁂𑀲𑀼 𑀓𑁂𑀲𑀜𑁆𑀘𑀺 𑀅𑀦𑀼𑀯𑀢𑁆𑀢𑀦𑀻𑀬𑀪𑀸𑀯𑁄 𑀦 𑀓𑁂𑀯𑀮𑀁 𑀥𑀫𑁆𑀫𑀲𑀪𑀸𑀯𑀢𑁄𑀬𑁂𑀯, 𑀅𑀣 𑀔𑁄 𑀧𑀼𑀭𑀺𑀫𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀯𑀺𑀲𑁂𑀲𑁂𑀦𑀧𑀺 𑀳𑁄𑀢𑀻𑀢𑀺 𑀆𑀳 ‘‘𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦𑀸’’𑀢𑀺. 𑀧𑀯𑀢𑁆𑀢𑀺𑀯𑀺𑀲𑁂𑀲𑁄 𑀳𑀺 𑀧𑀼𑀭𑀺𑀫𑀧𑀼𑀭𑀺𑀫𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀉𑀢𑁆𑀢𑀭𑀼𑀢𑁆𑀢𑀭𑁂𑀲𑀼 𑀯𑀺𑀲𑁂𑀲𑀸𑀥𑀸𑀦𑀁 𑀪𑀸𑀯𑀦𑀸𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑁄𑀢𑀺. 𑀅𑀦𑀼𑀯𑀢𑁆𑀢𑀬𑀫𑀸𑀦𑁄𑀢𑀺 𑀕𑀭𑀼𑀓𑀸𑀭𑀬𑀫𑀸𑀦𑁄. 𑀉𑀤𑀸𑀳𑀭𑀡𑀯𑀲𑁂𑀦𑀸𑀢𑀺 𑀦𑀺𑀤𑀲𑁆𑀲𑀦𑀯𑀲𑁂𑀦, 𑀦 𑀦𑀺𑀭𑀯𑀲𑁂𑀲𑀤𑀲𑁆𑀲𑀦𑀯𑀲𑁂𑀦. 𑀬𑀲𑁆𑀫𑀸 𑀧𑀦𑀸𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀁 𑀅𑀢𑁆𑀣𑀁 𑀧𑀸𑀞𑀦𑁆𑀢𑀭𑁂𑀦 𑀲𑀸𑀥𑁂𑀢𑀺. 𑀢𑀢𑁆𑀣 𑀳𑀺 𑀅𑀥𑀺𑀧𑀢𑀺𑀧𑀘𑁆𑀘𑀬𑀲𑁆𑀲 𑀧𑀘𑁆𑀘𑀦𑀻𑀬𑁂 𑀞𑀺𑀢𑀢𑁆𑀢𑀸 𑀫𑀕𑁆𑀕𑁄 𑀅𑀥𑀺𑀧𑀢𑀺 𑀫𑀕𑁆𑀕𑀸𑀥𑀺𑀧𑀢𑀻𑀢𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀻𑀢𑀺. 𑀲𑀫𑀸𑀦𑀲𑀤𑁆𑀤𑀢𑁆𑀣𑀯𑀲𑁂𑀦𑀸𑀢𑀺 𑀲𑀢𑀺𑀧𑀺 𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀦𑀸𑀥𑀺𑀓𑀭𑀡𑀲𑀫𑀸𑀲𑀢𑁆𑀣𑀪𑁂𑀤𑁂 𑀫𑀕𑁆𑀕𑀸𑀥𑀺𑀧𑀢𑀺𑀲𑀤𑁆𑀤𑀢𑁆𑀣𑀪𑁂𑀤𑀸𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁧𑁭. 𑀉𑀧𑁆𑀧𑀦𑁆𑀦-𑀲𑀤𑁆𑀤𑁄 𑀉𑀧𑁆𑀧𑀸𑀤𑀸𑀤𑀺𑀁 𑀧𑀝𑀺𑀧𑀚𑁆𑀚𑀫𑀸𑀦𑁄, 𑀧𑀢𑁆𑀯𑀸 𑀯𑀺𑀕𑀢𑁄 𑀘𑀸𑀢𑀺 𑀤𑀼𑀯𑀺𑀥𑁂𑀲𑀼 𑀅𑀢𑁆𑀣𑁂𑀲𑀼 𑀉𑀪𑀬𑁂𑀲𑀫𑁆𑀧𑀺 𑀯𑀸𑀘𑀓𑁄, 𑀦 𑀧𑀼𑀭𑀺𑀫𑀸𑀦𑀁𑀬𑁂𑀯𑀸𑀢𑀺 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀼𑀧𑁆𑀧𑀦𑁆𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀧𑁆𑀧𑀦𑁆𑀦𑀪𑀸𑀯𑁄 𑀉𑀧𑁆𑀧𑀸𑀤𑀸𑀤𑀺𑀧𑁆𑀧𑀢𑁆𑀢𑀢𑀸. 𑀢𑁂𑀦 𑀅𑀢𑀻𑀢𑀸𑀧𑀺 𑀲𑀗𑁆𑀕𑀳𑀺𑀢𑀸 𑀳𑁄𑀦𑁆𑀢𑀺. 𑀢𑁂𑀦𑁂𑀯𑀸𑀳 ‘‘𑀲𑀩𑁆𑀩𑁄 𑀉𑀧𑁆𑀧𑀦𑁆𑀦𑀪𑀸𑀯𑁄’’𑀢𑀺. 𑀉𑀧𑁆𑀧𑀦𑁆𑀦𑀥𑀫𑁆𑀫𑀪𑀸𑀯𑁄 ‘‘𑀉𑀧𑁆𑀧𑀦𑁆𑀦𑀸 𑀥𑀫𑁆𑀫𑀸’’𑀢𑀺 𑀧𑀤𑁂𑀦 𑀕𑀳𑀺𑀢𑀥𑀫𑁆𑀫𑀪𑀸𑀯𑁄, 𑀯𑀢𑁆𑀢𑀫𑀸𑀦𑀥𑀫𑁆𑀫𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀬𑁄 𑀯𑀸 𑀉𑀧𑁆𑀧𑀸𑀤𑀸𑀤𑀺𑀧𑁆𑀧𑀢𑁆𑀢𑁄 𑀅𑀢𑁆𑀢𑀦𑁄 𑀘 𑀲𑀪𑀸𑀯𑀁 𑀥𑀸𑀭𑁂𑀢𑀺 𑀧𑀘𑁆𑀘𑀬𑁂𑀳𑀺 𑀘 𑀥𑀸𑀭𑀻𑀬𑀢𑀺, 𑀲𑁄 𑀉𑀧𑁆𑀧𑀦𑁆𑀦𑀥𑀫𑁆𑀫𑁄𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑁄 𑀉𑀧𑁆𑀧𑀦𑁆𑀦𑀥𑀫𑁆𑀫𑀪𑀸𑀯𑁄𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀉𑀧𑁆𑀧𑀦𑁆𑀦𑀥𑀫𑁆𑀫𑁂 𑀯𑀢𑁆𑀯𑀸 ‘‘𑀅𑀦𑀼𑀧𑁆𑀧𑀦𑁆𑀦𑀸’’𑀢𑀺 𑀯𑀘𑀦𑀁 𑀦 𑀬𑀣𑀸𑀥𑀺𑀕𑀢𑀧𑀝𑀺𑀲𑁂𑀥𑀦𑀦𑁆𑀢𑀺 𑀓𑀣𑀫𑀺𑀤𑀁 𑀧𑀘𑁆𑀘𑁂𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀬𑀤𑀺 𑀳𑀻’’𑀢𑀺𑀆𑀤𑀺. 𑀓𑁂𑀘𑀺 𑀧𑀦𑁂𑀢𑁆𑀣 ‘‘𑀉𑀧𑁆𑀧𑀦𑁆𑀦𑀸𑀢𑀺 𑀧𑀤𑁂𑀦 𑀅𑀢𑀻𑀢𑀸𑀧𑀺 𑀲𑀗𑁆𑀕𑀳𑀺𑀢𑀸. 𑀬𑀤𑀺 𑀦 𑀲𑀗𑁆𑀕𑀳𑀺𑀢𑀸, 𑀦𑀺𑀩𑁆𑀩𑀸𑀦𑀁 𑀯𑀺𑀬 𑀢𑁂𑀧𑀺 𑀦𑀯𑀢𑁆𑀢𑀩𑁆𑀩𑀸𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦 𑀘 𑀢𑀣𑀸 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀧𑀦 𑀢𑁂𑀲𑀁 𑀫𑀢𑀺𑀫𑀢𑁆𑀢𑀫𑁂𑀯. 𑀅𑀬𑀁 𑀧𑀦 𑀢𑀺𑀓𑁄 𑀤𑁆𑀯𑀺𑀦𑁆𑀦𑀁 𑀅𑀤𑁆𑀥𑀸𑀦𑀁 𑀯𑀲𑁂𑀦 𑀧𑀽𑀭𑁂𑀢𑁆𑀯𑀸 𑀤𑀲𑁆𑀲𑀺𑀢𑁄𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀓𑁆𑀔𑀢𑀻𑀢𑀺. 𑀏𑀯𑀁 𑀲𑀦𑁆𑀢𑁂 𑀓𑀲𑁆𑀫𑀸 𑀅𑀢𑀻𑀢𑀸 𑀦𑀯𑀢𑁆𑀢𑀩𑁆𑀩𑀸𑀢𑀺 𑀦 𑀯𑀼𑀢𑁆𑀢𑀸𑀢𑀺? 𑀥𑀫𑁆𑀫𑀯𑀲𑁂𑀦 𑀅𑀲𑀗𑁆𑀕𑀳𑀺𑀢𑀢𑁆𑀢𑀸𑀪𑀸𑀯𑀢𑁄. 𑀥𑀫𑁆𑀫𑀯𑀲𑁂𑀦 𑀳𑀺 𑀅𑀲𑀗𑁆𑀕𑀳𑀺𑀢𑀁 𑀦𑀺𑀩𑁆𑀩𑀸𑀦𑀁 𑀢𑀢𑁆𑀣 𑀦𑀯𑀢𑁆𑀢𑀩𑁆𑀩𑀁 𑀚𑀸𑀢𑀁, 𑀦 𑀘 𑀦𑀺𑀬𑁄𑀕𑀢𑁄 𑀅𑀢𑀻𑀢𑀸 𑀦𑀸𑀫 𑀥𑀫𑁆𑀫𑀸 𑀓𑁂𑀘𑀺 𑀅𑀢𑁆𑀣𑀺, 𑀬𑁂 𑀇𑀥 𑀅𑀲𑀗𑁆𑀕𑀳𑀺𑀢𑀢𑁆𑀢𑀸 𑀦𑀯𑀢𑁆𑀢𑀩𑁆𑀩𑀸 𑀲𑀺𑀬𑀼𑀦𑁆𑀢𑀺. 𑀨𑀮𑀦𑀺𑀩𑁆𑀩𑀢𑁆𑀢𑀺𑀢𑁄 𑀓𑀸𑀭𑀡𑀲𑁆𑀲 𑀧𑀼𑀭𑁂𑀢𑀭𑀁 𑀦𑀺𑀩𑁆𑀩𑀢𑁆𑀢𑀺 𑀇𑀥 𑀧𑀭𑀺𑀦𑀺𑀝𑁆𑀞𑀺𑀢𑀲𑀤𑁆𑀤𑁂𑀦 𑀯𑀼𑀘𑁆𑀘𑀢𑀺, 𑀦 𑀢𑀲𑁆𑀲 𑀳𑀼𑀢𑁆𑀯𑀸 𑀯𑀺𑀕𑀢𑀪𑀸𑀯𑁄𑀢𑀺 𑀆𑀳 ‘‘𑀅𑀦𑀸𑀕𑀢𑁂 𑀯𑀸’’𑀢𑀺. 𑀬𑀢𑁄 𑀫𑁂𑀢𑁆𑀢𑁂𑀬𑁆𑀬𑀲𑁆𑀲 𑀪𑀕𑀯𑀢𑁄 𑀉𑀧𑁆𑀧𑀚𑁆𑀚𑀦𑀓𑀨𑀮𑀫𑁆𑀧𑀺 ‘‘𑀉𑀧𑁆𑀧𑀸𑀤𑀻’’𑀢𑀺 𑀯𑀼𑀘𑁆𑀘𑀢𑀺.

𑁨𑁦. 𑀬𑀲𑁆𑀲 𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸𑀢𑀺𑀆𑀤𑀺𑀦𑀸 ‘‘𑀢𑁂𑀦𑀸𑀦𑀦𑁆𑀤𑀸’’𑀢𑀺𑀆𑀤𑀺𑀧𑀸𑀴𑀺𑀬𑀸 𑀳𑁂𑀝𑁆𑀞𑀸𑀧𑀸𑀴𑀺𑀁 𑀅𑀢𑁆𑀣𑀯𑀲𑁂𑀦 𑀤𑀲𑁆𑀲𑁂𑀢𑀺. 𑀅𑀬𑀜𑁆𑀳𑀺 𑀢𑀢𑁆𑀣 𑀧𑀸𑀴𑀺 𑁋

‘‘𑀓𑀣𑀜𑁆𑀘𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀲𑀡𑁆𑀞𑀧𑁂𑀢𑀺 𑀲𑀦𑁆𑀦𑀺𑀲𑀸𑀤𑁂𑀢𑀺 𑀏𑀓𑁄𑀤𑀺𑀁 𑀓𑀭𑁄𑀢𑀺 𑀲𑀫𑀸𑀤𑀳𑀢𑀺. 𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀏𑀯𑀁 𑀔𑁄…𑀧𑁂… 𑀲𑀫𑀸𑀤𑀳𑀢𑀺. 𑀲𑁄 𑀅𑀚𑁆𑀛𑀢𑁆𑀢𑀁 𑀲𑀼𑀜𑁆𑀜𑀢𑀁 𑀫𑀦𑀲𑀺 𑀓𑀭𑁄𑀢𑀺, 𑀢𑀲𑁆𑀲 𑀅𑀚𑁆𑀛𑀢𑁆𑀢𑀁 𑀲𑀼𑀜𑁆𑀜𑀢𑀁 𑀫𑀦𑀲𑀺𑀓𑀭𑁄𑀢𑁄 𑀲𑀼𑀜𑁆𑀜𑀢𑀸𑀬 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀺…𑀧𑁂… 𑀫𑀼𑀘𑁆𑀘𑀢𑀺. 𑀏𑀯𑀁 𑀲𑀦𑁆𑀢𑀫𑁂𑀢𑀁, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀏𑀯𑀁 𑀲𑀫𑁆𑀧𑀚𑀸𑀦𑀸𑀢𑀺 𑀅𑀚𑁆𑀛𑀢𑁆𑀢𑀁 𑀔𑁄 𑀫𑁂 𑀲𑀼𑀜𑁆𑀜𑀢𑀁 𑀫𑀦𑀲𑀺𑀓𑀭𑁄𑀢𑁄 𑀅𑀚𑁆𑀛𑀢𑁆𑀢𑀁 𑀲𑀼𑀜𑁆𑀜𑀢𑀸𑀬 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀺…𑀧𑁂… 𑀫𑀼𑀘𑁆𑀘𑀢𑀻𑀢𑀺, 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. 𑀲𑁄 𑀩𑀳𑀺𑀤𑁆𑀥𑀸 𑀲𑀼𑀜𑁆𑀜𑀢𑀁…𑀧𑁂… 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀲𑀼𑀜𑁆𑀜𑀢𑀁…𑀧𑁂… 𑀲𑁄 𑀆𑀦𑁂𑀜𑁆𑀚𑀁 𑀫𑀦𑀲𑀺 𑀓𑀭𑁄𑀢𑀺, 𑀢𑀲𑁆𑀲 𑀆𑀦𑁂𑀜𑁆𑀚𑀁 𑀫𑀦𑀲𑀺𑀓𑀭𑁄𑀢𑁄 𑀆𑀦𑁂𑀜𑁆𑀚𑀸𑀬 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀺…𑀧𑁂… 𑀫𑀼𑀘𑁆𑀘𑀢𑀻𑀢𑀺, 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. 𑀢𑁂𑀦𑀸𑀦𑀦𑁆𑀤, 𑀪𑀺𑀓𑁆𑀔𑀼𑀦𑀸’’𑀢𑀺 (𑀫. 𑀦𑀺. 𑁩.𑁧𑁮𑁮).

𑀢𑀢𑁆𑀣 𑀅𑀚𑁆𑀛𑀢𑁆𑀢𑀲𑀼𑀜𑁆𑀜𑀢𑀸𑀤𑀻𑀲𑀽𑀢𑀺 𑀅𑀚𑁆𑀛𑀢𑁆𑀢𑀁 𑀩𑀳𑀺𑀤𑁆𑀥𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀘 𑀲𑀼𑀜𑁆𑀜𑀢𑀸𑀬 𑀆𑀦𑁂𑀜𑁆𑀚𑁂 𑀘. 𑀧𑀞𑀫𑀚𑁆𑀛𑀸𑀦𑀸𑀤𑀺𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑁂𑀢𑀺 𑀧𑀸𑀤𑀓𑀪𑀽𑀢𑀧𑀞𑀫𑀚𑁆𑀛𑀸𑀦𑀸𑀤𑀺𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑁂. 𑀅𑀧𑀕𑀼𑀡𑀧𑀸𑀤𑀓𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀺𑀢𑀲𑁆𑀲 𑀳𑀺 𑀅𑀚𑁆𑀛𑀢𑁆𑀢𑀁 𑀲𑀼𑀜𑁆𑀜𑀢𑀁 𑀫𑀦𑀲𑀺𑀓𑀭𑁄𑀢𑁄 𑀢𑀢𑁆𑀣 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀺. 𑀢𑀢𑁄 ‘‘𑀧𑀭𑀲𑁆𑀲 𑀲𑀦𑁆𑀢𑀸𑀦𑁂 𑀦𑀼 𑀔𑁄 𑀓𑀣’’𑀦𑁆𑀢𑀺 𑀩𑀳𑀺𑀤𑁆𑀥𑀸 𑀫𑀦𑀲𑀺 𑀓𑀭𑁄𑀢𑀺, 𑀢𑀢𑁆𑀣𑀧𑀺 𑀦 𑀧𑀓𑁆𑀔𑀦𑁆𑀤𑀢𑀺. 𑀢𑀢𑁄 ‘‘𑀓𑀸𑀮𑁂𑀦 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂, 𑀓𑀸𑀮𑁂𑀦 𑀧𑀭𑀲𑁆𑀲 𑀲𑀦𑁆𑀢𑀸𑀦𑁂 𑀦𑀼 𑀔𑁄 𑀓𑀣’’𑀦𑁆𑀢𑀺 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀫𑀦𑀲𑀺 𑀓𑀭𑁄𑀢𑀺, 𑀢𑀢𑁆𑀣𑀧𑀺 𑀦 𑀧𑀓𑁆𑀔𑀦𑁆𑀤𑀢𑀺. 𑀢𑀢𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀳𑁄𑀢𑀼𑀓𑀸𑀫𑁄 ‘‘𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑀁 𑀦𑀼 𑀔𑁄 𑀓𑀣’’𑀦𑁆𑀢𑀺 𑀆𑀦𑁂𑀜𑁆𑀚𑀁 𑀫𑀦𑀲𑀺 𑀓𑀭𑁄𑀢𑀺, 𑀢𑀢𑁆𑀣𑀧𑀺 𑀦 𑀧𑀓𑁆𑀔𑀦𑁆𑀤𑀢𑀺. ‘‘𑀇𑀤𑀸𑀦𑀺 𑀫𑁂 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀻’’𑀢𑀺 𑀯𑀺𑀲𑁆𑀲𑀝𑁆𑀞𑀯𑀻𑀭𑀺𑀬𑁂𑀦 𑀦 𑀪𑀯𑀺𑀢𑀩𑁆𑀩𑀁, 𑀧𑀸𑀤𑀓𑀚𑁆𑀛𑀸𑀦𑀫𑁂𑀯 𑀧𑀦 𑀲𑀸𑀥𑀼𑀓𑀁 𑀧𑀼𑀦𑀧𑁆𑀧𑀼𑀦𑀁 𑀫𑀦𑀲𑀺 𑀓𑀸𑀢𑀩𑁆𑀩𑀁, 𑀏𑀯𑀫𑀲𑁆𑀲 𑀭𑀼𑀓𑁆𑀔𑀁 𑀙𑀺𑀦𑁆𑀤𑀢𑁄 𑀨𑀭𑀲𑀼𑀫𑁆𑀳𑀺 𑀅𑀯𑀳𑀦𑁆𑀢𑁂 𑀧𑀼𑀦𑀧𑁆𑀧𑀼𑀦𑀁 𑀦𑀺𑀲𑀺𑀢𑀦𑀺𑀲𑀺𑀢𑀁 𑀓𑀸𑀭𑁂𑀢𑁆𑀯𑀸 𑀙𑀺𑀦𑁆𑀤𑀦𑁆𑀢𑀲𑁆𑀲 𑀙𑀺𑀚𑁆𑀚𑁂 𑀨𑀭𑀲𑀼 𑀯𑀺𑀬 𑀓𑀫𑁆𑀫𑀝𑁆𑀞𑀸𑀦𑁂 𑀫𑀦𑀲𑀺𑀓𑀸𑀭𑁄 𑀯𑀳𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀫𑀺𑀁𑀬𑁂𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺.

𑀅𑀢𑁆𑀣𑀢𑁄 𑀘 𑀅𑀲𑀫𑀸𑀦𑀢𑁆𑀢𑀸𑀢𑀺 𑀇𑀤𑀁 𑀓𑀲𑁆𑀫𑀸 𑀯𑀼𑀢𑁆𑀢𑀁. 𑀦𑀦𑀼 𑀬𑁂𑀲𑀼 𑀅𑀢𑁆𑀣𑁂𑀲𑀼 𑀅𑀚𑁆𑀛𑀢𑁆𑀢-𑀲𑀤𑁆𑀤𑁄 𑀯𑀢𑁆𑀢𑀢𑀺, 𑀢𑁂 𑀲𑀩𑁆𑀩𑁂 𑀤𑀲𑁆𑀲𑁂𑀢𑁆𑀯𑀸 𑀇𑀥𑀸𑀥𑀺𑀧𑁆𑀧𑁂𑀢𑀢𑁆𑀣𑀦𑀺𑀤𑁆𑀥𑀸𑀭𑀡𑀢𑁆𑀣𑀁 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀘𑀓𑁆𑀔𑀸𑀤𑀻𑀲𑀼 𑀘 𑀅𑀚𑁆𑀛𑀢𑁆𑀢𑀺𑀓-𑀲𑀤𑁆𑀤𑁄 𑀅𑀚𑁆𑀛𑀢𑁆𑀢𑀸𑀦𑀁 𑀅𑀩𑁆𑀪𑀦𑁆𑀢𑀭𑀢𑀸𑀯𑀺𑀲𑁂𑀲𑀫𑀼𑀧𑀸𑀤𑀸𑀬 𑀧𑀯𑀢𑁆𑀢𑀢𑀺, 𑀬𑀢𑁄 𑀢𑁂 𑀅𑀚𑁆𑀛𑀢𑁆𑀢𑀅𑀚𑁆𑀛𑀢𑁆𑀢𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀧𑀺𑀘 ‘‘𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀻’’𑀢𑀺 𑀇𑀤𑀁 𑀅𑀚𑁆𑀛𑀢𑁆𑀢𑀺𑀓-𑀲𑀤𑁆𑀤𑀲𑁆𑀲 𑀘𑀓𑁆𑀔𑀸𑀤𑀻𑀦𑀁 𑀅𑀚𑁆𑀛𑀢𑁆𑀢𑀪𑀸𑀯𑀯𑀺𑀪𑀸𑀯𑀦𑀲𑀩𑁆𑀪𑀸𑀯𑀢𑁄 𑀇𑀥 𑀉𑀤𑀸𑀳𑀭𑀡𑀯𑀲𑁂𑀦 𑀯𑀼𑀢𑁆𑀢𑀁. 𑀢𑁂𑀦𑁂𑀯 𑀳𑀺 𑀅𑀝𑁆𑀞𑀓𑀣𑀸𑀬𑀁 𑀅𑀚𑁆𑀛𑀢𑁆𑀢𑀺𑀓𑀤𑀼𑀓𑁂 ‘‘𑀅𑀚𑁆𑀛𑀢𑁆𑀢𑀸𑀯 𑀅𑀚𑁆𑀛𑀢𑁆𑀢𑀺𑀓𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀜𑁆𑀘 𑀲𑀢𑀺 𑀦 𑀏𑀢𑁆𑀣 𑀲𑀤𑁆𑀤𑀢𑁄 𑀅𑀲𑀫𑀸𑀦𑀢𑀸𑀧𑀺 𑀲𑀺𑀬𑀸, 𑀢𑀲𑁆𑀫𑀸𑀬𑁂𑀯 𑀬𑀣𑀸𑀯𑀼𑀢𑁆𑀢𑀘𑁄𑀤𑀦𑀁 𑀯𑀺𑀲𑁄𑀥𑁂𑀦𑁆𑀢𑁄 ‘‘𑀅𑀬𑀁 𑀧𑀦𑁂𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑁂𑀦𑀸𑀢𑀺 𑀢𑀲𑁆𑀫𑀸. 𑀢𑀁𑀯𑀸𑀘𑀓𑀲𑁆𑀲𑀸𑀢𑀺 𑀅𑀚𑁆𑀛𑀢𑁆𑀢𑀚𑁆𑀛𑀢𑁆𑀢𑀯𑀸𑀘𑀓𑀲𑁆𑀲 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀢𑀤𑀢𑁆𑀣𑀲𑁆𑀲 𑀅𑀚𑁆𑀛𑀢𑁆𑀢𑀪𑀸𑀯𑀲𑀩𑁆𑀪𑀸𑀯𑀢𑁄.

‘‘𑀦 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀲𑁄𑀪𑀢𑀺 𑀲𑀗𑁆𑀕𑀡𑀺𑀓𑀸𑀭𑀸𑀫𑁄 𑀲𑀗𑁆𑀕𑀡𑀺𑀓𑀸𑀭𑀢𑁄 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁧𑁮𑁬) 𑀧𑀩𑁆𑀩𑀚𑀺𑀢𑀸𑀲𑀸𑀭𑀼𑀧𑁆𑀧𑀲𑁆𑀲 𑀦𑁂𑀓𑁆𑀔𑀫𑁆𑀫𑀲𑀼𑀔𑀸𑀤𑀺𑀦𑀺𑀓𑀸𑀫𑀮𑀸𑀪𑀺𑀢𑀸𑀬 𑀅𑀪𑀸𑀯𑀲𑁆𑀲 𑀘 𑀤𑀲𑁆𑀲𑀦𑁂𑀦 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀸𑀬, ‘‘𑀦𑀸𑀳𑀁, 𑀆𑀦𑀦𑁆𑀤, 𑀏𑀓𑀁 𑀭𑀽𑀧𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑀢𑁆𑀣 𑀭𑀢𑁆𑀢𑀲𑁆𑀲 𑀬𑀣𑀸𑀪𑀺𑀭𑀢𑀲𑁆𑀲 𑀭𑀽𑀧𑀲𑁆𑀲 𑀯𑀺𑀧𑀭𑀺𑀡𑀸𑀫𑀜𑁆𑀜𑀣𑀸𑀪𑀸𑀯𑀸 𑀦 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀲𑁄𑀓𑀧𑀭𑀺…𑀧𑁂… 𑀉𑀧𑀸𑀬𑀸𑀲𑀸’’𑀢𑀺 (𑀫. 𑀦𑀺. 𑁩.𑁧𑁮𑁬) 𑀏𑀯𑀁 𑀭𑀽𑀧𑀸𑀤𑀺𑀭𑀢𑀺𑀬𑀸 𑀘 𑀆𑀤𑀻𑀦𑀯𑀁 𑀯𑀢𑁆𑀯𑀸 𑀲𑀘𑁂 𑀓𑁄𑀘𑀺 𑀤𑀼𑀧𑁆𑀧𑀜𑁆𑀜𑀚𑀸𑀢𑀺𑀓𑁄 𑀧𑀩𑁆𑀩𑀚𑀺𑀢𑁄 𑀯𑀤𑁂𑀬𑁆𑀬 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀔𑁂𑀢𑁆𑀢𑁂 𑀧𑀯𑀺𑀝𑁆𑀞𑀸 𑀕𑀸𑀯𑀺𑀬𑁄 𑀯𑀺𑀬 𑀅𑀫𑁆𑀳𑁂𑀬𑁂𑀯 𑀕𑀡𑀢𑁄 𑀦𑀻𑀳𑀭𑀢𑀺, 𑀏𑀓𑀻𑀪𑀸𑀯𑁂 𑀦𑀺𑀬𑁄𑀚𑁂𑀢𑀺, 𑀲𑀬𑀁 𑀧𑀦 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀳𑀺 𑀧𑀭𑀺𑀯𑀼𑀢𑁄 𑀯𑀺𑀳𑀭𑀢𑀻’’𑀢𑀺, 𑀢𑀲𑁆𑀲 𑀯𑀘𑀦𑁄𑀓𑀸𑀲𑀼𑀧𑀘𑁆𑀙𑁂𑀤𑀦𑀢𑁆𑀣𑀁 𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀸𑀬 𑀧𑀭𑀺𑀲𑀸𑀬 𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄𑀧𑀺 𑀢𑀣𑀸𑀕𑀢𑁄 𑀏𑀓𑀓𑁄𑀯𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀅𑀬𑀁 𑀔𑁄 𑀧𑀦𑀸’’𑀢𑀺 𑀤𑁂𑀲𑀦𑀸 𑀆𑀭𑀤𑁆𑀥𑀸𑀢𑀺 𑀆𑀳 ‘‘𑀢𑀧𑁆𑀧𑀝𑀺𑀧𑀓𑁆𑀔𑀯𑀺𑀳𑀸𑀭𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺. 𑀢𑀢𑁆𑀣 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀦𑁆𑀢𑀺 𑀭𑀽𑀧𑀸𑀤𑀻𑀦𑀁 𑀲𑀗𑁆𑀔𑀢𑀦𑀺𑀫𑀺𑀢𑁆𑀢𑀸𑀦𑀁. 𑀅𑀚𑁆𑀛𑀢𑁆𑀢𑀦𑁆𑀢𑀺 𑀯𑀺𑀲𑀬𑀚𑁆𑀛𑀢𑁆𑀢𑀁. 𑀲𑀼𑀜𑁆𑀜𑀢𑀦𑁆𑀢𑀺 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀦𑀼𑀪𑀸𑀯𑀦𑀺𑀩𑁆𑀩𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀁. 𑀢𑁂𑀦𑁂𑀯𑀸𑀳 ‘‘𑀅𑀚𑁆𑀛𑀢𑁆𑀢’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀤𑀼𑀢𑀺𑀬𑁂 𑀯𑀺𑀓𑀧𑁆𑀧𑁂 𑀞𑀸𑀦-𑀲𑀤𑁆𑀤𑁄 𑀓𑀸𑀭𑀡𑀧𑀭𑀺𑀬𑀸𑀬𑁄 𑀤𑀝𑁆𑀞𑀩𑁆𑀩𑁄. 𑀲𑀘𑁆𑀘𑀓𑀲𑀼𑀢𑁆𑀢𑁂𑀦𑀸𑀢𑀺 𑀫𑀳𑀸𑀲𑀘𑁆𑀘𑀓𑀲𑀼𑀢𑁆𑀢𑁂𑀦. 𑀢𑀢𑁆𑀣 𑀳𑀺 𑁋

‘‘𑀅𑀪𑀺𑀚𑀸𑀦𑀸𑀫𑀺 𑀔𑁄 𑀧𑀦𑀸𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀅𑀦𑁂𑀓𑀲𑀢𑀸𑀬 𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀸, 𑀅𑀧𑀺𑀲𑁆𑀲𑀼 𑀫𑀁 𑀏𑀓𑀫𑁂𑀓𑁄 𑀏𑀯𑀁 𑀫𑀜𑁆𑀜𑀢𑀺 ‘𑀫𑀫𑁂𑀯𑀸𑀭𑀩𑁆𑀪 𑀲𑀫𑀡𑁄 𑀕𑁄𑀢𑀫𑁄 𑀥𑀫𑁆𑀫𑀁 𑀤𑁂𑀲𑁂𑀢𑀻’𑀢𑀺. 𑀦 𑀔𑁄 𑀧𑀦𑁂𑀢𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀬𑀸𑀯𑀤𑁂𑀯 𑀯𑀺𑀜𑁆𑀜𑀸𑀧𑀦𑀢𑁆𑀣𑀸𑀬 𑀢𑀣𑀸𑀕𑀢𑁄 𑀧𑀭𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺. 𑀲𑁄 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀢𑀲𑁆𑀲𑀸𑀬𑁂𑀯 𑀓𑀣𑀸𑀬 𑀧𑀭𑀺𑀬𑁄𑀲𑀸𑀦𑁂 𑀢𑀲𑁆𑀫𑀺𑀁𑀬𑁂𑀯 𑀧𑀼𑀭𑀺𑀫𑀲𑁆𑀫𑀺𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑁂 𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀲𑀡𑁆𑀞𑀧𑁂𑀫𑀺 𑀲𑀦𑁆𑀦𑀺𑀲𑀸𑀤𑁂𑀫𑀺, 𑀏𑀓𑁄𑀤𑀺𑀁 𑀓𑀭𑁄𑀫𑀺, 𑀲𑀫𑀸𑀤𑀳𑀸𑀫𑀺 ‘𑀬𑁂𑀦 𑀲𑀼𑀤𑀁 𑀦𑀺𑀘𑁆𑀘𑀓𑀧𑁆𑀧𑀁 𑀯𑀺𑀳𑀭𑀸𑀫𑀻’’𑀢𑀺 (𑀫. 𑀦𑀺. 𑁧.𑁩𑁮𑁭) 𑁋

𑀆𑀕𑀢𑀦𑁆𑀢𑀺.

𑁨𑁨. 𑀅𑀜𑁆𑀜𑁂𑀳𑀺 𑀅𑀦𑀺𑀤𑀲𑁆𑀲𑀦𑁂𑀳𑀺 𑀅𑀜𑁆𑀜𑀁 𑀯𑀺𑀬 𑀓𑀢𑁆𑀯𑀸 𑀬𑀣𑀸 ‘‘𑀲𑀺𑀮𑀸𑀧𑀼𑀢𑁆𑀢𑀓𑀲𑁆𑀲 𑀲𑀭𑀻𑀭’’𑀦𑁆𑀢𑀺. 𑀥𑀫𑁆𑀫𑀲𑀪𑀸𑀯𑀲𑀸𑀫𑀜𑁆𑀜𑁂𑀦𑀸𑀢𑀺𑀆𑀤𑀺𑀦𑀸 𑀓𑀺𑀜𑁆𑀘𑀸𑀧𑀺 𑀭𑀽𑀧𑀸𑀬𑀢𑀦𑀢𑁄 𑀅𑀜𑁆𑀜𑁄 𑀦𑀺𑀤𑀲𑁆𑀲𑀦𑀪𑀸𑀯𑁄 𑀦𑀸𑀫 𑀦𑀢𑁆𑀣𑀺, 𑀥𑀫𑁆𑀫𑀲𑀪𑀸𑀯𑁄 𑀧𑀦 𑀅𑀢𑁆𑀣𑀺. 𑀢𑀢𑁄 𑀘 𑀭𑀽𑀧𑀸𑀬𑀢𑀦𑀲𑁆𑀲 𑀯𑀺𑀲𑁂𑀲𑁄 𑀦𑀺𑀤𑀲𑁆𑀲𑀦𑀪𑀸𑀯𑁂𑀦 𑀓𑀢𑁄𑀢𑀺 𑀢𑀤𑀜𑁆𑀜𑀥𑀫𑁆𑀫𑀯𑀺𑀲𑁂𑀲𑀓𑀭𑁄 𑀦𑀺𑀤𑀲𑁆𑀲𑀦𑀪𑀸𑀯𑁄 𑀭𑀽𑀧𑀸𑀬𑀢𑀦𑀢𑁄 𑀅𑀦𑀜𑁆𑀜𑁄𑀧𑀺 𑀅𑀜𑁆𑀜𑁄 𑀯𑀺𑀬 𑀓𑀢𑁆𑀯𑀸 𑀉𑀧𑀘𑀭𑀺𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀢𑁆𑀣𑀯𑀺𑀲𑁂𑀲𑁄 𑀲𑀸𑀫𑀜𑁆𑀜𑀯𑀺𑀲𑁂𑀲𑀢𑁆𑀣𑀪𑁂𑀤𑁄. 𑀲𑀬𑀁 𑀲𑀫𑁆𑀧𑀢𑁆𑀢𑀸𑀦𑀁 𑀨𑁄𑀝𑁆𑀞𑀩𑁆𑀩𑀥𑀫𑁆𑀫𑀸𑀦𑀁, 𑀦𑀺𑀲𑁆𑀲𑀬𑀯𑀲𑁂𑀦 𑀲𑀫𑁆𑀧𑀢𑁆𑀢𑀸𑀦𑀁 𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀸𑀦𑀁 𑀕𑀦𑁆𑀥𑀭𑀲𑀸𑀦𑀜𑁆𑀘, 𑀇𑀢𑀭𑁂𑀲𑀁 𑀅𑀲𑀫𑁆𑀧𑀢𑁆𑀢𑀸𑀦𑀁. 𑀅𑀜𑁆𑀜𑀫𑀜𑁆𑀜𑀧𑀢𑀦𑀁 𑀅𑀜𑁆𑀜𑀫𑀜𑁆𑀜𑀲𑁆𑀲 𑀬𑁄𑀕𑁆𑀬𑀤𑁂𑀲𑁂 𑀅𑀯𑀝𑁆𑀞𑀸𑀦𑀁, 𑀬𑁂𑀦 𑀧𑀝𑀺𑀳𑀦𑀦𑀪𑀸𑀯𑁂𑀦. 𑀩𑁆𑀬𑀸𑀧𑀸𑀭𑀸𑀤𑀻𑀢𑀺 𑀘𑀺𑀢𑁆𑀢𑀓𑀺𑀭𑀺𑀬𑀸𑀯𑀸𑀬𑁄𑀥𑀸𑀢𑀼𑀯𑀺𑀧𑁆𑀨𑀸𑀭𑀯𑀲𑁂𑀦 𑀅𑀓𑁆𑀔𑀺𑀧𑀝𑀮𑀸𑀤𑀻𑀦𑀁 𑀳𑁂𑀝𑁆𑀞𑀸 𑀉𑀧𑀭𑀺 𑀘 𑀲𑀁𑀲𑀻𑀤𑀦𑀮𑀗𑁆𑀖𑀦𑀸𑀤𑀺𑀧𑁆𑀧𑀯𑀢𑁆𑀢𑀺𑀫𑀸𑀳. 𑀯𑀺𑀓𑀸𑀭𑀼𑀧𑁆𑀧𑀢𑁆𑀢𑀺 𑀯𑀺𑀲𑀤𑀺𑀲𑀼𑀧𑁆𑀧𑀢𑁆𑀢𑀺, 𑀯𑀺𑀲𑀬𑀲𑁆𑀲 𑀇𑀝𑁆𑀞𑀸𑀦𑀺𑀝𑁆𑀞𑀪𑀸𑀯𑁂𑀦 𑀅𑀦𑀼𑀕𑁆𑀕𑀳𑁄 𑀉𑀧𑀖𑀸𑀢𑁄 𑀘𑀸𑀢𑀺 𑀅𑀢𑁆𑀣𑁄.

𑀢𑀺𑀓𑀫𑀸𑀢𑀺𑀓𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀓𑀫𑀸𑀢𑀺𑀓𑀸𑀧𑀤𑀯𑀡𑁆𑀡𑀦𑀸

𑁧-𑁬. 𑀲𑀫𑀸𑀦𑀤𑁂𑀲𑀕𑁆𑀕𑀳𑀡𑀸𑀦𑀁 𑀏𑀓𑀲𑁆𑀫𑀺𑀁𑀬𑁂𑀯 𑀯𑀢𑁆𑀣𑀼𑀲𑁆𑀫𑀺𑀁 𑀕𑀳𑁂𑀢𑀩𑁆𑀩𑀸𑀦𑀁, 𑀏𑀓𑀯𑀢𑁆𑀣𑀼𑀯𑀺𑀲𑀬𑀸𑀦𑀁 𑀯𑀸. 𑀅𑀣 𑀯𑀸 𑀲𑀫𑀸𑀦𑀤𑁂𑀲𑀸𑀦𑀁 𑀏𑀓𑀯𑀢𑁆𑀣𑀼𑀓𑀢𑁆𑀢𑀸 𑀲𑀫𑀸𑀦𑀕𑀳𑁂𑀢𑀩𑁆𑀩𑀪𑀸𑀯𑀸𑀦𑀁 𑀏𑀓𑀼𑀧𑁆𑀧𑀸𑀤𑀺𑀢𑁄𑀢𑀺 𑀅𑀢𑁆𑀣𑁄. 𑀬𑁂 𑀥𑀫𑁆𑀫𑀸 𑀳𑁂𑀢𑀼𑀲𑀳𑀕𑀢𑀸, 𑀢𑁂 𑀳𑁂𑀢𑀽𑀳𑀺 𑀲𑀳 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀬𑁄 𑀘 𑀢𑁂𑀲𑀁 𑀲𑀳𑁂𑀢𑀼𑀓𑀪𑀸𑀯𑁄, 𑀲𑁄 𑀲𑀳𑀚𑀸𑀢𑀸𑀤𑀻𑀳𑀺 𑀳𑁂𑀢𑀽𑀳𑀺 𑀓𑀢𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀲𑀫𑀸…𑀧𑁂… 𑀲𑀩𑁆𑀪𑀸𑀯’’𑀦𑁆𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀘𑁂𑀢𑁆𑀣 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑀸𑀤𑀺𑀳𑁂𑀢𑀼𑀩𑁆𑀬𑀸𑀧𑀸𑀭𑁂 𑀧𑀭𑀺𑀕𑁆𑀕𑀡𑁆𑀳𑀸𑀢𑀺. 𑀏𑀓𑀻𑀪𑀸𑀯𑀽𑀧𑀕𑀫𑀦𑀦𑁆𑀢𑀺 𑀏𑀓𑀓𑀮𑀸𑀧𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀲𑀁𑀲𑀝𑁆𑀞𑀢𑀸𑀬 𑀲𑀫𑀽𑀳𑀖𑀦𑀪𑀸𑀯𑁂𑀦 𑀤𑀼𑀯𑀺𑀜𑁆𑀜𑁂𑀬𑁆𑀬𑀦𑀸𑀦𑀸𑀓𑀭𑀡𑀢𑀁𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀥𑀫𑁆𑀫𑀦𑀸𑀦𑀢𑁆𑀢𑀸𑀪𑀸𑀯𑁂𑀧𑀻𑀢𑀺 𑀲𑀪𑀸𑀯𑀢𑁆𑀣𑀪𑁂𑀤𑀸𑀪𑀸𑀯𑁂𑀧𑀺. 𑀧𑀤𑀢𑁆𑀣𑀦𑀸𑀦𑀢𑁆𑀢𑁂𑀦𑀸𑀢𑀺 𑀦𑀸𑀦𑀸𑀧𑀤𑀸𑀪𑀺𑀥𑁂𑀬𑁆𑀬𑀢𑀸𑀪𑁂𑀤𑁂𑀦. 𑀏𑀢𑁂𑀦 𑀧𑀓𑀸𑀭𑀦𑁆𑀢𑀭𑀸𑀧𑁂𑀓𑁆𑀔𑀁 𑀤𑀼𑀓𑀦𑁆𑀢𑀭𑀯𑀘𑀦𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀦𑁂𑀓𑀧𑁆𑀧𑀓𑀸𑀭𑀸 𑀳𑀺 𑀥𑀫𑁆𑀫𑀸. 𑀢𑁂𑀦𑁂𑀯 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀲𑀩𑁆𑀩𑀸𑀓𑀸𑀭𑁂𑀦 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀫𑀼𑀔𑁂 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀻’’𑀢𑀺 (𑀫𑀳𑀸𑀦𑀺. 𑁧𑁫𑁬; 𑀘𑀽𑀴𑀦𑀺. 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮𑁫) 𑀯𑀼𑀢𑁆𑀢𑀁. 𑀅𑀬𑀜𑁆𑀘 𑀅𑀢𑁆𑀣𑁄 𑀢𑀺𑀓𑁂𑀲𑀼𑀧𑀺 𑀤𑀝𑁆𑀞𑀩𑁆𑀩𑁄. 𑀬𑁂𑀲𑀁 𑀯𑀺𑀦𑁂𑀬𑁆𑀬𑀸𑀦𑀁 𑀬𑁂𑀳𑀺 𑀧𑀓𑀸𑀭𑀯𑀺𑀲𑁂𑀲𑁂𑀳𑀺 𑀥𑀫𑁆𑀫𑀸𑀦𑀁 𑀯𑀺𑀪𑀸𑀯𑀦𑁂 𑀓𑀢𑁂 𑀧𑀝𑀺𑀯𑁂𑀥𑁄 𑀳𑁄𑀢𑀺, 𑀢𑁂𑀲𑀁 𑀢𑀧𑁆𑀧𑀓𑀸𑀭𑀪𑁂𑀤𑁂𑀳𑀺 𑀥𑀫𑁆𑀫𑀸𑀦𑀁 𑀯𑀺𑀪𑀸𑀯𑀦𑀁. 𑀬𑁂𑀲𑀁 𑀧𑀦 𑀬𑁂𑀦 𑀏𑀓𑁂𑀦𑁂𑀯 𑀧𑀓𑀸𑀭𑁂𑀦 𑀯𑀺𑀪𑀸𑀯𑀦𑁂 𑀧𑀝𑀺𑀯𑁂𑀥𑁄 𑀳𑁄𑀢𑀺, 𑀢𑁂𑀲𑀫𑁆𑀧𑀺 𑀢𑀁 𑀯𑀢𑁆𑀯𑀸 𑀥𑀫𑁆𑀫𑀺𑀲𑁆𑀲𑀭𑀢𑁆𑀢𑀸 𑀢𑀤𑀜𑁆𑀜𑀦𑀺𑀭𑀯𑀲𑁂𑀲𑀧𑁆𑀧𑀓𑀸𑀭𑀯𑀺𑀪𑀸𑀯𑀦𑀜𑁆𑀘 𑀤𑁂𑀲𑀦𑀸𑀯𑀺𑀮𑀸𑀲𑁄𑀢𑀺 𑀆𑀳 ‘‘𑀤𑁂𑀲𑁂𑀢𑀩𑁆𑀩𑀧𑁆𑀧𑀓𑀸𑀭𑀚𑀸𑀦𑀦’’𑀦𑁆𑀢𑀺𑀆𑀤𑀺. 𑀦𑀦𑀼 𑀏𑀓𑁂𑀦 𑀧𑀓𑀸𑀭𑁂𑀦 𑀚𑀸𑀦𑀦𑁆𑀢𑀲𑁆𑀲 𑀢𑀤𑀜𑁆𑀜𑀧𑁆𑀧𑀓𑀸𑀭𑀯𑀺𑀪𑀸𑀯𑀦𑀁 𑀅𑀨𑀮𑀁 𑀳𑁄𑀢𑀻𑀢𑀺? 𑀦 𑀳𑁄𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀧𑁆𑀧𑀪𑁂𑀤𑀲𑁆𑀲 𑀉𑀧𑀦𑀺𑀲𑁆𑀲𑀬𑀢𑁆𑀢𑀸. 𑀢𑁂 𑀧𑀓𑀸𑀭𑀸 𑀏𑀢𑁂𑀲𑀦𑁆𑀢𑀺 𑀢𑀧𑁆𑀧𑀓𑀸𑀭𑀸, 𑀢𑀩𑁆𑀪𑀸𑀯𑁄 𑀢𑀧𑁆𑀧𑀓𑀸𑀭𑀢𑀸. 𑀇𑀫𑀺𑀦𑀸 𑀥𑀫𑁆𑀫𑀸𑀦𑀁 𑀯𑀺𑀚𑁆𑀚𑀫𑀸𑀦𑀲𑁆𑀲𑁂𑀯 𑀧𑀓𑀸𑀭𑀯𑀺𑀲𑁂𑀲𑀲𑁆𑀲 𑀯𑀺𑀪𑀸𑀯𑀦𑀁 𑀤𑁂𑀲𑀦𑀸𑀯𑀺𑀮𑀸𑀲𑁄𑀢𑀺 𑀤𑀲𑁆𑀲𑁂𑀢𑀺.

𑀅𑀜𑁆𑀜𑀢𑁆𑀣𑀸𑀧𑀻𑀢𑀺 ‘‘𑀅𑀳𑁂𑀢𑀼𑀓𑀸 𑀘𑁂𑀯 𑀥𑀫𑁆𑀫𑀸 𑀦 𑀘 𑀳𑁂𑀢𑀽’’𑀢𑀺𑀆𑀤𑀻𑀲𑀼. 𑀬𑀣𑀸 𑀧𑀞𑀫𑀤𑀼𑀓𑁂𑀓𑀤𑁂𑀲𑁂 𑀕𑀳𑁂𑀢𑁆𑀯𑀸 𑀤𑀼𑀢𑀺𑀬𑀢𑀢𑀺𑀬𑀤𑀼𑀓𑁂𑀳𑀺 𑀲𑀤𑁆𑀥𑀺𑀁 𑀙𑀝𑁆𑀞𑀤𑀼𑀓𑀦𑀬𑁂 𑀬𑁄𑀚𑀦𑀸 ‘‘𑀳𑁂𑀢𑀽 𑀥𑀫𑁆𑀫𑀸 𑀲𑀳𑁂𑀢𑀼𑀓𑀸𑀧𑀺 𑀅𑀳𑁂𑀢𑀼𑀓𑀸𑀧𑀻’’𑀢𑀺𑀆𑀤𑀬𑁄 𑀢𑀬𑁄 𑀤𑀼𑀓𑀸 𑀮𑀩𑁆𑀪𑀦𑁆𑀢𑀺, 𑀏𑀯𑀁 𑀤𑀼𑀢𑀺𑀬𑀢𑀢𑀺𑀬𑀤𑀼𑀓𑁂𑀓𑀤𑁂𑀲𑁂 𑀕𑀳𑁂𑀢𑁆𑀯𑀸 𑀧𑀞𑀫𑀤𑀼𑀓𑁂𑀦 𑀲𑀤𑁆𑀥𑀺𑀁 𑀬𑁄𑀚𑀦𑀸𑀬 ‘‘𑀲𑀳𑁂𑀢𑀼𑀓𑀸 𑀥𑀫𑁆𑀫𑀸 𑀳𑁂𑀢𑀽𑀧𑀺 𑀦 𑀳𑁂𑀢𑀽𑀧𑀺, 𑀅𑀳𑁂𑀢𑀼𑀓𑀸 𑀥𑀫𑁆𑀫𑀸 𑀳𑁂𑀢𑀽𑀧𑀺 𑀦 𑀳𑁂𑀢𑀽𑀧𑀺, 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸 𑀳𑁂𑀢𑀽𑀧𑀺 𑀦 𑀳𑁂𑀢𑀽𑀧𑀺, 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸 𑀳𑁂𑀢𑀽𑀧𑀺 𑀦 𑀳𑁂𑀢𑀽𑀧𑀻’’𑀢𑀺 𑀘𑀢𑁆𑀢𑀸𑀭𑁄 𑀤𑀼𑀓𑀸 𑀮𑀩𑁆𑀪𑀦𑁆𑀢𑀺, 𑀢𑁂 𑀧𑀦 𑀯𑀼𑀢𑁆𑀢𑀦𑀬𑁂𑀦𑁂𑀯 𑀲𑀓𑁆𑀓𑀸 𑀤𑀲𑁆𑀲𑁂𑀢𑀼𑀦𑁆𑀢𑀺 𑀦 𑀤𑀲𑁆𑀲𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀅𑀣 𑀯𑀸 𑀧𑀸𑀴𑀺𑀬𑀁 𑀯𑀼𑀢𑁆𑀢𑁂𑀳𑀺 𑀘𑀢𑀼𑀢𑁆𑀣𑀧𑀜𑁆𑀘𑀫𑁂𑀳𑀺 𑀅𑀝𑁆𑀞𑀓𑀣𑀸𑀬𑀁 𑀤𑀲𑁆𑀲𑀺𑀢𑁂𑀳𑀺 𑀧𑀼𑀭𑀺𑀫𑁂𑀳𑀺 𑀤𑁆𑀯𑀻𑀳𑀺 𑀦𑀺𑀦𑁆𑀦𑀸𑀦𑀸𑀓𑀭𑀡𑀢𑁄 𑀏𑀢𑁂 𑀦 𑀯𑀼𑀢𑁆𑀢𑀸. 𑀲𑀦𑁆𑀦𑀺𑀯𑁂𑀲𑀯𑀺𑀲𑁂𑀲𑀫𑀢𑁆𑀢𑀫𑁂𑀯 𑀳𑁂𑀢𑁆𑀣 𑀯𑀺𑀲𑁂𑀲𑁄𑀢𑀺. 𑀢𑁂𑀦𑁂𑀯 𑀳𑀺 𑀦𑀺𑀦𑁆𑀦𑀸𑀦𑀢𑁆𑀣𑀢𑁆𑀢𑀸 𑀧𑀸𑀴𑀺𑀬𑀁 𑀆𑀕𑀢𑀤𑀼𑀓𑁂𑀲𑀼 𑀬𑀣𑀸𑀦𑀺𑀤𑁆𑀥𑀸𑀭𑀺𑀢𑀤𑀼𑀓𑀸𑀦𑀁 𑀬𑀣𑀸𑀲𑀫𑁆𑀪𑀯𑀁 𑀅𑀯𑀭𑁄𑀥𑀦𑁂𑀦 𑀅𑀯𑀼𑀢𑁆𑀢𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁂𑀲𑀼 𑀧𑀦𑀸’’𑀢𑀺𑀆𑀤𑀺𑀫𑀸𑀳.

𑀅𑀣 𑀯𑀸 ‘‘𑀏𑀢𑁂𑀦 𑀯𑀸 𑀕𑀢𑀺𑀤𑀲𑁆𑀲𑀦𑁂𑀦𑀸’’𑀢𑀺𑀆𑀤𑀺𑀦𑀸 𑀯𑀓𑁆𑀔𑀫𑀸𑀦𑀦𑀬𑁂𑀦 ‘‘𑀳𑁂𑀢𑀽 𑀘𑁂𑀯 𑀥𑀫𑁆𑀫𑀸 𑀅𑀳𑁂𑀢𑀼𑀓𑀸 𑀘𑀸’’𑀢𑀺𑀆𑀤𑀻𑀦𑀁 𑀲𑀫𑁆𑀪𑀯𑀦𑁆𑀢𑀸𑀦𑀁 𑀤𑀼𑀓𑀸𑀦𑀁 𑀲𑀗𑁆𑀕𑀳𑁂 𑀲𑀢𑀺 𑀏𑀢𑁂𑀲𑀫𑁆𑀧𑀺 𑀲𑀗𑁆𑀕𑀳𑁄 𑀲𑀺𑀬𑀸. 𑀬𑀢𑁄 𑀯𑀸 𑀤𑀼𑀓𑀢𑁄 𑀧𑀤𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀤𑀼𑀓𑀦𑁆𑀢𑀭𑀁 𑀯𑀼𑀘𑁆𑀘𑀢𑀺, 𑀢𑁂𑀦 𑀲𑀢𑀺 𑀘 𑀦𑀸𑀦𑀢𑁆𑀢𑁂 𑀤𑀼𑀓𑀦𑁆𑀢𑀭𑀁 𑀮𑀩𑁆𑀪𑀢𑀺, 𑀦 𑀘𑁂𑀢𑁆𑀣 𑀓𑁄𑀘𑀺 𑀯𑀺𑀲𑁂𑀲𑁄 𑀬𑀣𑀸𑀯𑀼𑀢𑁆𑀢𑀤𑀼𑀓𑁂𑀳𑀻𑀢𑀺 𑀲𑀁𑀯𑀡𑁆𑀡𑀦𑀸𑀲𑀼 𑀦 𑀤𑀲𑁆𑀲𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁆𑀣 𑀘 𑀬𑀣𑀸 𑀲𑀳𑁂𑀢𑀼𑀓𑀤𑀼𑀓𑀢𑁄 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑀲𑁆𑀲, 𑀳𑁂𑀢𑀼𑀲𑀳𑁂𑀢𑀼𑀓𑀤𑀼𑀓𑀢𑁄 𑀘 𑀳𑁂𑀢𑀼𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑀲𑁆𑀲 𑀧𑀤𑀢𑁆𑀣𑀫𑀢𑁆𑀢𑀢𑁄 𑀦𑀸𑀦𑀢𑁆𑀢𑀁, 𑀦 𑀲𑀪𑀸𑀯𑀢𑁆𑀣𑀢𑁄. 𑀏𑀯𑀁 𑀲𑀦𑁆𑀢𑁂𑀧𑀺 𑀲𑀳𑁂𑀢𑀼𑀓𑀳𑁂𑀢𑀼𑀲𑀳𑁂𑀢𑀼𑀓𑀤𑀼𑀓𑁂 𑀯𑀢𑁆𑀯𑀸 𑀇𑀢𑀭𑁂𑀧𑀺 𑀯𑀼𑀢𑁆𑀢𑀸, 𑀏𑀯𑀁 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀳𑁂𑀢𑀼𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑀸𑀤𑀻𑀳𑀺 𑀲𑀪𑀸𑀯𑀢𑁆𑀣𑀦𑀸𑀦𑀢𑁆𑀢𑀸𑀪𑀸𑀯𑁂𑀧𑀺 𑀧𑀤𑀢𑁆𑀣𑀦𑀸𑀦𑀢𑁆𑀢𑀲𑀫𑁆𑀪𑀯𑀢𑁄 𑀥𑀫𑁆𑀫𑀦𑀸𑀦𑀢𑁆𑀢𑀸𑀪𑀸𑀯𑁂𑀧𑀺 𑀧𑀤𑀢𑁆𑀣𑀦𑀸𑀦𑀢𑁆𑀢𑁂𑀦 𑀤𑀼𑀓𑀦𑁆𑀢𑀭𑀁 𑀯𑀼𑀘𑁆𑀘𑀢𑀻𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀳𑁂𑀢𑀼𑀲𑀳𑀕𑀢𑀸 𑀥𑀫𑁆𑀫𑀸, 𑀦 𑀳𑁂𑀢𑀼𑀲𑀳𑀕𑀢𑀸 𑀥𑀫𑁆𑀫𑀸, 𑀳𑁂𑀢𑀼𑀲𑀳𑀚𑀸𑀢𑀸 𑀥𑀫𑁆𑀫𑀸, 𑀦 𑀳𑁂𑀢𑀼𑀲𑀳𑀚𑀸𑀢𑀸 𑀥𑀫𑁆𑀫𑀸. 𑀳𑁂𑀢𑀼𑀲𑀁𑀲𑀝𑁆𑀞𑀸 𑀥𑀫𑁆𑀫𑀸, 𑀳𑁂𑀢𑀼𑀯𑀺𑀲𑀁𑀲𑀝𑁆𑀞𑀸 𑀥𑀫𑁆𑀫𑀸. 𑀳𑁂𑀢𑀼𑀲𑀫𑀼𑀝𑁆𑀞𑀸𑀦𑀸 𑀥𑀫𑁆𑀫𑀸, 𑀦 𑀳𑁂𑀢𑀼𑀲𑀫𑀼𑀝𑁆𑀞𑀸𑀦𑀸 𑀥𑀫𑁆𑀫𑀸. 𑀳𑁂𑀢𑀼𑀲𑀳𑀪𑀼𑀦𑁄 𑀥𑀫𑁆𑀫𑀸, 𑀦 𑀳𑁂𑀢𑀼𑀲𑀳𑀪𑀼𑀦𑁄 𑀥𑀫𑁆𑀫𑀸’’𑀢𑀺𑀆𑀤𑀻𑀦𑀁, 𑀢𑀣𑀸 ‘‘𑀳𑁂𑀢𑀽 𑀘𑁂𑀯 𑀥𑀫𑁆𑀫𑀸 𑀳𑁂𑀢𑀼𑀲𑀳𑀕𑀢𑀸 𑀘𑀸’’𑀢𑀺𑀆𑀤𑀻𑀦𑀁, ‘‘𑀦 𑀳𑁂𑀢𑀽 𑀔𑁄 𑀧𑀦 𑀥𑀫𑁆𑀫𑀸 𑀳𑁂𑀢𑀼𑀲𑀳𑀕𑀢𑀸𑀧𑀺, 𑀦 𑀳𑁂𑀢𑀼𑀲𑀳𑀕𑀢𑀸𑀧𑀻’’𑀢𑀺𑀆𑀤𑀻𑀦𑀜𑁆𑀘 𑀲𑀫𑁆𑀪𑀯𑀦𑁆𑀢𑀸𑀦𑀁 𑀅𑀦𑁂𑀓𑁂𑀲𑀁 𑀤𑀼𑀓𑀸𑀦𑀁 𑀲𑀗𑁆𑀕𑀳𑁄 𑀅𑀦𑀼𑀜𑁆𑀜𑀸𑀢𑁄 𑀯𑀺𑀬 𑀤𑀺𑀲𑁆𑀲𑀢𑀺. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀏𑀢𑁂𑀦 𑀯𑀸 𑀕𑀢𑀺𑀤𑀲𑁆𑀲𑀦𑁂𑀦𑀸’’𑀢𑀺𑀆𑀤𑀺. 𑀏𑀯𑀁 𑀆𑀲𑀯𑀕𑁄𑀘𑁆𑀙𑀓𑀸𑀤𑀻𑀲𑀼𑀧𑀺 𑀅𑀬𑀫𑀢𑁆𑀣𑁄 𑀬𑀣𑀸𑀲𑀫𑁆𑀪𑀯𑀁 𑀯𑀢𑁆𑀢𑀩𑁆𑀩𑁄. 𑀥𑀫𑁆𑀫𑀸𑀦𑀁 𑀯𑀸 𑀲𑀪𑀸𑀯𑀓𑀺𑀘𑁆𑀘𑀸𑀤𑀺𑀁 𑀩𑁄𑀥𑁂𑀢𑀩𑁆𑀩𑀸𑀓𑀸𑀭𑀜𑁆𑀘 𑀬𑀸𑀣𑀸𑀯𑀢𑁄 𑀚𑀸𑀦𑀦𑁆𑀢𑁂𑀦 𑀥𑀫𑁆𑀫𑀲𑀸𑀫𑀺𑀦𑀸 𑀬𑀢𑁆𑀢𑀓𑀸 𑀤𑀼𑀓𑀸 𑀯𑀼𑀢𑁆𑀢𑀸, 𑀢𑀢𑁆𑀢𑀓𑁂𑀲𑀼 𑀞𑀸𑀢𑀩𑁆𑀩𑀁. 𑀅𑀤𑁆𑀥𑀸 𑀳𑀺 𑀢𑁂 𑀤𑀼𑀓𑀸 𑀦 𑀯𑀢𑁆𑀢𑀩𑁆𑀩𑀸, 𑀬𑁂 𑀪𑀕𑀯𑀢𑀸 𑀦 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦 𑀳𑁂𑀢𑀼𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑁄 𑀙𑀝𑁆𑀞𑀤𑀼𑀓𑁂𑀦 𑀦𑀺𑀦𑁆𑀦𑀸𑀦𑀢𑁆𑀣𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀲𑀽𑀢𑀺 𑀧𑀞𑀫𑀤𑀼𑀓𑀢𑀢𑀺𑀬𑀤𑀼𑀓𑁂𑀲𑀼. 𑀬𑀤𑀺 𑀤𑀼𑀓𑀦𑁆𑀢𑀭𑁂𑀳𑀺 𑀤𑀼𑀓𑀦𑁆𑀢𑀭𑀧𑀤𑁂𑀳𑀺 𑀘 𑀲𑀫𑀸𑀦𑀢𑁆𑀣𑀢𑁆𑀢𑀸 𑀏𑀢𑁂𑀲𑀁 𑀤𑀼𑀓𑀸𑀦𑀁 𑀤𑀼𑀓𑀦𑁆𑀢𑀭𑀧𑀤𑀸𑀦𑀜𑁆𑀘 𑀅𑀯𑀘𑀦𑀁, 𑀏𑀯𑀁 𑀲𑀢𑀺 𑀙𑀝𑁆𑀞𑀤𑀼𑀓𑁂 𑀧𑀞𑀫𑀧𑀤𑀫𑁆𑀧𑀺 𑀦 𑀯𑀢𑁆𑀢𑀩𑁆𑀩𑀁 𑀘𑀢𑀼𑀢𑁆𑀣𑀤𑀼𑀓𑁂 𑀤𑀼𑀢𑀺𑀬𑀧𑀤𑁂𑀦 𑀲𑀫𑀸𑀦𑀢𑁆𑀣𑀢𑁆𑀢𑀸. 𑀢𑀣𑀸 𑀘 𑀙𑀝𑁆𑀞𑀤𑀼𑀓𑁄𑀬𑁂𑀯 𑀦 𑀳𑁄𑀢𑀻𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀘𑀢𑀼𑀢𑁆𑀣𑀤𑀼𑀓𑁂’’𑀢𑀺𑀆𑀤𑀺. 𑀤𑀼𑀓𑀧𑀽𑀭𑀡𑀢𑁆𑀣𑀦𑁆𑀢𑀺 𑀇𑀤𑀁 𑀲𑀫𑀸𑀦𑀢𑁆𑀣𑀢𑀁𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀤𑁂𑀲𑀦𑀸𑀯𑀺𑀲𑁂𑀲𑁄 𑀧𑀦 𑀯𑀺𑀚𑁆𑀚𑀢𑀺𑀬𑁂𑀯. 𑀅𑀢𑁆𑀣𑀦𑁆𑀢𑀭𑀢𑀸𑀪𑀸𑀯𑁂𑀧𑀺 𑀧𑀓𑀸𑀭𑀪𑁂𑀤𑀳𑁂𑀢𑀼𑀓𑀁 𑀤𑀼𑀓𑀦𑁆𑀢𑀭𑀯𑀘𑀦𑀦𑁆𑀢𑀺 𑀤𑀲𑁆𑀲𑀺𑀢𑁄 𑀳𑀺 𑀅𑀬𑀫𑀢𑁆𑀣𑁄𑀢𑀺. 𑀏𑀢𑁂𑀦 𑀕𑀢𑀺𑀤𑀲𑁆𑀲𑀦𑁂𑀦𑀸𑀢𑀺 𑀅𑀢𑁆𑀣𑀯𑀺𑀲𑁂𑀲𑀸𑀪𑀸𑀯𑁂𑀧𑀺 𑀙𑀝𑁆𑀞𑀤𑀼𑀓𑀧𑀽𑀭𑀡𑀲𑀗𑁆𑀔𑀸𑀢𑁂𑀦 𑀦𑀬𑀤𑀲𑁆𑀲𑀦𑁂𑀦. 𑀧𑀞𑀫𑀤𑀼𑀓𑁂…𑀧𑁂… 𑀤𑀲𑁆𑀲𑀺𑀢𑁄 𑀧𑀸𑀴𑀺𑀬𑀁 𑀯𑀼𑀢𑁆𑀢𑁂𑀳𑀺 𑀘𑀢𑀼𑀢𑁆𑀣𑀧𑀜𑁆𑀘𑀫𑁂𑀳𑀺, 𑀅𑀝𑁆𑀞𑀓𑀣𑀸𑀬𑀁 𑀤𑀲𑁆𑀲𑀺𑀢𑁂𑀳𑀺 𑀧𑀼𑀭𑀺𑀫𑁂𑀳𑀺 𑀤𑁆𑀯𑀻𑀳𑀺, 𑀇𑀥 𑀤𑀲𑁆𑀲𑀺𑀢𑁂𑀳𑀺 𑀘𑀢𑀽𑀳𑀺. 𑀢𑁂𑀲𑀽𑀢𑀺 𑀤𑀼𑀢𑀺𑀬𑀢𑀢𑀺𑀬𑀤𑀼𑀓𑁂𑀲𑀼. 𑀧𑀞𑀫𑀤𑀼𑀓𑀧𑀓𑁆𑀔𑁂𑀧𑁂𑀦 𑀤𑀲𑁆𑀲𑀺𑀢𑁄 𑀧𑀸𑀴𑀺𑀬𑀁 𑀙𑀝𑁆𑀞𑀤𑀼𑀓𑁂𑀦 𑀇𑀢𑀭𑀢𑁆𑀭 𑀘 𑀇𑀢𑀭𑀤𑀼𑀓𑁂𑀳𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁭-𑁧𑁩. 𑀧𑀘𑁆𑀘𑀬𑀪𑀸𑀯𑀫𑀢𑁆𑀢𑁂𑀦…𑀧𑁂… 𑀅𑀢𑁆𑀣𑀺𑀢𑀦𑁆𑀢𑀺 𑀏𑀢𑁂𑀦 𑀦 𑀧𑀝𑀺𑀮𑀤𑁆𑀥𑀢𑁆𑀢𑀢𑀸𑀲𑀗𑁆𑀔𑀸𑀢𑀸 𑀲𑀲𑀪𑀸𑀯𑀢𑀸𑀯 𑀅𑀢𑁆𑀣𑀺𑀢𑀸, 𑀅𑀣 𑀔𑁄 𑀧𑀝𑀺𑀧𑀓𑁆𑀔𑁂𑀦 𑀅𑀦𑀺𑀭𑁄𑀥𑁄 𑀅𑀧𑁆𑀧𑀳𑀻𑀦𑀢𑀸 𑀅𑀦𑀺𑀧𑁆𑀨𑀸𑀤𑀺𑀢𑀨𑀮𑀢𑀸 𑀓𑀸𑀭𑀡𑀸𑀲𑀫𑀼𑀕𑁆𑀖𑀸𑀢𑁂𑀦 𑀨𑀮𑀦𑀺𑀩𑁆𑀩𑀢𑁆𑀢𑀦𑀸𑀭𑀳𑀢𑀸 𑀘𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀢𑀣𑀸 𑀳𑀺 ‘‘𑀇𑀫𑀲𑁆𑀫𑀺𑀁 𑀲𑀢𑀺 𑀇𑀤𑀁 𑀳𑁄𑀢𑀻’’𑀢𑀺 𑀏𑀢𑁆𑀣 ‘‘𑀲𑀢𑀻’’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀬𑁂𑀦 𑀯𑀺𑀦𑀸 𑀬𑀁 𑀦 𑀳𑁄𑀢𑀺, 𑀢𑀁 𑀅𑀢𑀻𑀢𑀸𑀤𑀺𑀧𑀺 𑀓𑀸𑀭𑀡𑀁 𑀲𑀗𑁆𑀕𑀳𑀺𑀢𑀫𑁂𑀯𑀸𑀢𑀺. 𑀢𑁂𑀦𑁂𑀯𑀸𑀳 ‘‘𑀦 𑀲𑀳𑁂𑀢𑀼…𑀧𑁂… 𑀓𑀸𑀮𑀸𑀦𑀫𑁂𑀯𑀸’’𑀢𑀺. 𑀲𑀫𑁂…𑀧𑁂… 𑀤𑀻𑀧𑁂𑀢𑀺 𑀲𑀫𑁂𑀘𑁆𑀘 𑀲𑀫𑁆𑀪𑀽𑀬 𑀧𑀘𑁆𑀘𑀬𑁂𑀳𑀺 𑀓𑀢𑀦𑁆𑀢𑀺 𑀲𑀗𑁆𑀔𑀢𑀦𑁆𑀢𑀺. 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄𑀢𑀺 𑀅𑀬𑀁 𑀧𑀘𑁆𑀘𑀬𑀦𑀺𑀩𑁆𑀩𑀢𑁆𑀢𑀸𑀦𑀁 𑀧𑀘𑁆𑀘𑀬𑀯𑀦𑁆𑀢𑀢𑀸 𑀅𑀦𑁂𑀓𑀧𑀘𑁆𑀘𑀬𑀦𑀺𑀧𑁆𑀨𑀸𑀤𑀺𑀢𑀢𑀸 𑀘 𑀤𑀼𑀓𑀤𑁆𑀯𑀬𑁂 𑀧𑀼𑀭𑀺𑀫𑀧𑀤𑀢𑁆𑀣𑀸𑀦𑀁 𑀪𑁂𑀤𑁄, 𑀇𑀢𑀭𑁂𑀲𑀁 𑀧𑀦 𑀧𑀼𑀭𑀺𑀫𑀧𑀤𑀲𑀗𑁆𑀕𑀳𑀺𑀢𑀥𑀫𑁆𑀫𑀯𑀺𑀥𑀼𑀭𑀲𑀪𑀸𑀯𑀢𑀸𑀬𑀸𑀢𑀺. 𑀅𑀯𑀺𑀦𑀺…𑀧𑁂… 𑀞𑀧𑀦𑀢𑁄𑀢𑀺 ‘‘𑀏𑀢𑁆𑀢𑀓𑀸’’𑀢𑀺 𑀧𑀪𑁂𑀤𑀧𑀭𑀺𑀘𑁆𑀙𑁂𑀤𑀦𑀺𑀤𑁆𑀥𑀸𑀭𑀡𑀯𑀲𑁂𑀦 𑀅𑀪𑀺𑀥𑀫𑁆𑀫𑀫𑀸𑀢𑀺𑀓𑀸𑀬𑀁 𑀥𑀫𑁆𑀫𑀸𑀦𑀁 𑀅𑀯𑀼𑀢𑁆𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀲𑀼𑀢𑁆𑀢𑀦𑁆𑀢𑀫𑀸𑀢𑀺𑀓𑀸𑀬𑀁 𑀧𑀦 𑀦𑀺𑀤𑁆𑀥𑀸𑀭𑀺𑀢𑀲𑀭𑀽𑀧𑀲𑀗𑁆𑀔𑀸𑀯𑀺𑀲𑁂𑀲𑀢𑁆𑀢𑀸 𑀯𑀺𑀦𑀺𑀘𑁆𑀙𑀺𑀢𑀢𑁆𑀣𑀧𑀭𑀺𑀘𑁆𑀙𑁂𑀤𑀸𑀬𑁂𑀯 𑀅𑀯𑀺𑀚𑁆𑀚𑀸𑀤𑀬𑁄 𑀯𑀼𑀢𑁆𑀢𑀸𑀢𑀺. ‘‘𑀧𑀣𑀯𑀻𑀆𑀤𑀺 𑀭𑀽𑀧’’𑀦𑁆𑀢𑀺 𑀏𑀢𑀲𑁆𑀫𑀺𑀁 𑀅𑀢𑁆𑀣𑀯𑀺𑀓𑀧𑁆𑀧𑁂 𑀅𑀦𑁂𑀓𑀳𑁂𑀢𑀼𑀓𑁂𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀳𑁂𑀢𑀽𑀦𑀁 𑀲𑀳𑁂𑀢𑀼𑀓𑀪𑀸𑀯𑁄 𑀯𑀺𑀬 𑀲𑀩𑁆𑀩𑁂𑀲𑀁 𑀧𑀣𑀯𑀻𑀆𑀤𑀻𑀦𑀁 𑀭𑀽𑀧𑀺𑀪𑀸𑀯𑁄 𑀲𑀺𑀤𑁆𑀥𑁄𑀢𑀺 𑀆𑀳 ‘‘𑀧𑀼𑀭𑀺𑀫…𑀧𑁂… 𑀧𑀚𑁆𑀚𑀢𑀻’’𑀢𑀺. 𑀦 𑀳𑀺 𑀢𑁂𑀲𑀼 𑀦𑀺𑀬𑀢𑁄 𑀓𑀢𑁆𑀣𑀘𑀺 𑀲𑀁𑀲𑀸𑀫𑀺𑀪𑀸𑀯𑁄𑀢𑀺. 𑀅𑀦𑀺𑀘𑁆𑀘𑀸𑀦𑀼𑀧𑀲𑁆𑀲𑀦𑀸𑀬 𑀯𑀸 𑀮𑀼𑀚𑁆𑀚𑀢𑀺 𑀙𑀺𑀚𑁆𑀚𑀢𑀺 𑀯𑀺𑀦𑀲𑁆𑀲𑀢𑀻𑀢𑀺 𑀕𑀳𑁂𑀢𑀩𑁆𑀩𑁄 𑀮𑁄𑀓𑁄𑀢𑀺 𑀢𑀁𑀕𑀳𑀡𑀭𑀳𑀺𑀢𑀸𑀦𑀁 𑀮𑁄𑀓𑀼𑀢𑁆𑀢𑀭𑀸𑀦𑀁 𑀦𑀢𑁆𑀣𑀺 𑀮𑁄𑀓𑀢𑀸. 𑀢𑁂𑀦𑁂𑀯𑀸𑀢𑀺 𑀤𑀼𑀓𑁆𑀔𑀲𑀘𑁆𑀘𑀪𑀸𑀯𑁂𑀦 𑀧𑀭𑀺𑀜𑁆𑀜𑁂𑀬𑁆𑀬𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄.

𑀤𑀼𑀓𑀩𑀳𑀼𑀢𑀸 𑀆𑀧𑀚𑁆𑀚𑀢𑀻𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀯𑀻𑀲𑀢𑀺 𑀤𑀼𑀓𑀸 𑀯𑀺𑀪𑀢𑁆𑀢𑀸, ‘‘𑀅𑀯𑀼𑀢𑁆𑀢𑁄𑀧𑀺 𑀬𑀣𑀸𑀮𑀸𑀪𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀘 𑀯𑀓𑁆𑀔𑀢𑀻𑀢𑀺 𑀤𑀼𑀓𑀩𑀳𑀼𑀢𑀸 𑀇𑀘𑁆𑀙𑀺𑀢𑀸 𑀏𑀯𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀢𑀁𑀬𑁂𑀯 𑀧𑀦 𑀤𑀼𑀓𑀩𑀳𑀼𑀢𑀁 𑀅𑀦𑀺𑀘𑁆𑀙𑀦𑁆𑀢𑁄 𑀏𑀯𑀫𑀸𑀳. 𑀅𑀧𑀺𑀘 𑀤𑀼𑀓𑀩𑀳𑀼𑀢𑀸 𑀆𑀧𑀚𑁆𑀚𑀢𑀺, 𑀲𑀸 𑀘 𑀔𑁄 𑀯𑀺𑀜𑁆𑀜𑀸𑀡𑀪𑁂𑀤𑀸𑀦𑀼𑀲𑀸𑀭𑀺𑀦𑀻, 𑀢𑀢𑁆𑀭𑀸𑀧𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀢𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀦𑀺, 𑀢𑀣𑀸 𑀫𑀳𑀸𑀓𑀺𑀭𑀺𑀬𑀢𑁄 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀦𑁆𑀢𑀺 𑀏𑀯𑀁𑀧𑀓𑀸𑀭𑀸𑀦𑀁 𑀲𑀩𑁆𑀩𑀥𑀫𑁆𑀫𑀸𑀭𑀫𑁆𑀫𑀡𑀯𑀺𑀜𑁆𑀜𑀸𑀡𑀸𑀦𑀁 𑀅𑀦𑀸𑀫𑀲𑀦𑀢𑁄 𑀦 𑀩𑁆𑀬𑀸𑀧𑀺𑀦𑀻𑀢𑀺 𑀤𑀲𑁆𑀲𑁂𑀢𑀺 ‘‘𑀤𑀼𑀓𑀩𑀳𑀼𑀢𑀸’’𑀢𑀺𑀆𑀤𑀺𑀦𑀸. 𑀅𑀩𑁆𑀬𑀸𑀧𑀺𑀪𑀸𑀯𑁂 𑀧𑀦 𑀤𑁄𑀲𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀣𑀸 𑀘…𑀧𑁂… 𑀲𑀺𑀬𑀸’’𑀢𑀺 𑀆𑀳. 𑀦𑀺𑀤𑁆𑀤𑁂𑀲𑁂𑀦 𑀘 𑀯𑀺𑀭𑀼𑀤𑁆𑀥𑀦𑁆𑀢𑀺 ‘‘𑀬𑁂 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸 𑀭𑀽𑀧𑀸𑀬𑀢𑀦𑀸𑀤𑀻𑀦𑀁 𑀧𑀘𑁆𑀘𑁂𑀓𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀦𑀸 𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀢𑀁, 𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀺𑀦𑀸 𑀓𑁂𑀦𑀘𑀺 𑀦𑀯𑀺𑀜𑁆𑀜𑁂𑀬𑁆𑀬𑀢𑀜𑁆𑀘 𑀤𑀲𑁆𑀲𑁂𑀦𑁆𑀢𑁂𑀦 𑀦𑀺𑀓𑁆𑀔𑁂𑀧𑀭𑀸𑀲𑀺𑀦𑀺𑀤𑁆𑀤𑁂𑀲𑁂𑀦 ‘‘𑀤𑁆𑀯𑀺𑀦𑁆𑀦𑀫𑁆𑀧𑀺 𑀧𑀤𑀸𑀦𑀁 𑀅𑀢𑁆𑀣𑀦𑀸𑀦𑀢𑁆𑀢𑀢𑁄 𑀤𑀼𑀓𑁄 𑀳𑁄𑀢𑀻’’𑀢𑀺 𑀇𑀤𑀁 𑀯𑀘𑀦𑀁 𑀯𑀺𑀭𑀼𑀤𑁆𑀥𑀁, 𑀢𑀣𑀸 𑀅𑀢𑁆𑀣𑀼𑀤𑁆𑀥𑀸𑀭𑀦𑀺𑀤𑁆𑀤𑁂𑀲𑁂𑀦𑀧𑀺 𑀅𑀢𑁆𑀣𑀢𑁄 𑀦 𑀲𑀫𑁂𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀢𑀺 𑀢𑀲𑁆𑀲𑀁 𑀦𑀺𑀓𑁆𑀔𑁂𑀧𑀭𑀸𑀲𑀺𑀲𑀁𑀯𑀡𑁆𑀡𑀦𑀸𑀬𑀁. 𑀬𑁄 𑀘 𑀧𑀝𑀺𑀲𑁂𑀥𑁄 𑀓𑀢𑁄 𑀅𑀢𑁆𑀣𑀦𑀸𑀦𑀢𑁆𑀢𑀢𑁄 𑀤𑀼𑀓𑀁 𑀤𑀲𑁆𑀲𑁂𑀢𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀲𑀫…𑀧𑁂… 𑀲𑁂𑀥𑁂𑀢𑀼𑀦𑁆𑀢𑀺 𑀏𑀢𑁂𑀦 ‘‘𑀬𑁂 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸’’𑀢𑀺 𑀏𑀢𑁆𑀢𑀓𑁂𑀲𑀼 𑀦𑀺𑀤𑁆𑀤𑁂𑀲𑀧𑀤𑁂𑀲𑀼 𑀤𑀼𑀓𑀧𑀤𑀤𑁆𑀯𑀬𑀧𑁆𑀧𑀯𑀢𑁆𑀢𑀺 𑀧𑀸𑀴𑀺𑀢𑁄 𑀏𑀯 𑀯𑀺𑀜𑁆𑀜𑀸𑀬𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀢𑀣𑁂𑀯𑀸𑀢𑀺 𑀉𑀪𑀺𑀦𑁆𑀦𑀁 𑀓𑁂𑀘𑀺𑀦-𑀲𑀤𑁆𑀤𑀸𑀦𑀁 𑀅𑀦𑀺𑀬𑀫𑀢𑁄 𑀘𑀓𑁆𑀔𑀼𑀲𑁄𑀢𑀸𑀤𑀺𑀦𑀺𑀲𑁆𑀲𑀬𑀯𑁄𑀳𑀸𑀭𑁂𑀦 𑀘𑀓𑁆𑀔𑀼𑀲𑁄𑀢𑀯𑀺𑀜𑁆𑀜𑀸𑀡𑀸𑀤𑀺𑀓𑁄 𑀪𑀺𑀦𑁆𑀦𑀲𑀪𑀸𑀯𑁄𑀬𑁂𑀯 𑀥𑀫𑁆𑀫𑁄 𑀅𑀢𑁆𑀣𑁄𑀢𑀺 𑀤𑀲𑁆𑀲𑀦𑀯𑀲𑁂𑀦. 𑀭𑀽𑀧𑀸𑀬𑀢𑀦𑀫𑁂𑀯 𑀳𑀺 𑀘𑀓𑁆𑀔𑀼𑀲𑁄𑀢𑀯𑀺𑀜𑁆𑀜𑀸𑀡𑁂𑀳𑀺 𑀯𑀺𑀜𑁆𑀜𑁂𑀬𑁆𑀬𑀸𑀯𑀺𑀜𑁆𑀜𑁂𑀬𑁆𑀬𑀪𑀸𑀯𑀢𑁄 ‘‘𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀁 𑀓𑁂𑀦𑀘𑀺 𑀦𑀯𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺 𑀘 𑀯𑀼𑀘𑁆𑀘𑀢𑀻𑀢𑀺. 𑀬𑀤𑀺 𑀏𑀯𑀁 𑀇𑀫𑀲𑁆𑀫𑀺𑀫𑁆𑀧𑀺 𑀧𑀓𑁆𑀔𑁂 𑀤𑀼𑀓𑀩𑀳𑀼𑀢𑀸 𑀆𑀧𑀚𑁆𑀚𑀢𑀻𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀦 𑀘𑁂𑀢𑁆𑀣𑀸’’𑀢𑀺𑀆𑀤𑀺. 𑀯𑀺𑀜𑁆𑀜𑀸𑀢𑀩𑁆𑀩𑀪𑁂𑀤𑁂𑀦𑀸𑀢𑀺 𑀯𑀺𑀜𑁆𑀜𑀸𑀢𑀩𑁆𑀩𑀯𑀺𑀲𑁂𑀲𑁂𑀦, 𑀯𑀺𑀜𑁆𑀜𑁂𑀬𑁆𑀬𑁂𑀓𑀤𑁂𑀲𑁂𑀦𑀸𑀢𑀺 𑀅𑀢𑁆𑀣𑁄. 𑀤𑀼𑀓𑀪𑁂𑀤𑁄𑀢𑀺 𑀤𑀼𑀓𑀯𑀺𑀲𑁂𑀲𑁄, 𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀤𑀼𑀓𑁄, 𑀢𑀧𑁆𑀧𑀪𑁂𑀤𑁄𑀬𑁂𑀯 𑀯𑀸. 𑀲𑀫𑀢𑁆𑀢𑁄 𑀧𑀭𑀺𑀬𑀢𑁆𑀢𑁄 𑀧𑀭𑀺𑀧𑀼𑀡𑁆𑀡𑁄𑀢𑀺 𑀅𑀢𑁆𑀣𑁄. 𑀬𑀢𑁆𑀢𑀓𑀸 𑀯𑀺𑀜𑁆𑀜𑀸𑀢𑀩𑁆𑀩𑀸 𑀢𑀢𑁆𑀢𑀓𑀸 𑀤𑀼𑀓𑀸𑀢𑀺 𑀤𑀼𑀓𑀪𑁂𑀤𑀸𑀧𑀚𑁆𑀚𑀦𑀧𑁆𑀧𑀓𑀸𑀭𑀤𑀲𑁆𑀲𑀦𑀁. 𑀏𑀯𑀜𑁆𑀘 𑀲𑀢𑀻𑀢𑀺𑀆𑀤𑀺𑀦𑀸 𑀇𑀫𑀺𑀲𑁆𑀲𑀸 𑀲𑀁𑀯𑀡𑁆𑀡𑀦𑀸𑀬 𑀮𑀤𑁆𑀥𑀕𑀼𑀡𑀁 𑀤𑀲𑁆𑀲𑁂𑀢𑀺. ‘‘𑀬𑁂 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸’’𑀢𑀺 𑀭𑀽𑀧𑀸𑀬𑀢𑀦𑀲𑁆𑀲𑁂𑀯 𑀯𑀼𑀢𑁆𑀢𑀢𑁆𑀢𑀸 𑀅𑀢𑁆𑀣𑀪𑁂𑀤𑀸𑀪𑀸𑀯𑀢𑁄 𑀓𑀣𑀫𑀬𑀁 𑀤𑀼𑀓𑁄 𑀳𑁄𑀢𑀻𑀢𑀺 𑀆𑀳 ‘‘𑀯𑀺𑀜𑁆𑀜𑀸𑀡𑀦𑀸𑀦𑀢𑁆𑀢𑁂𑀦𑀸’’𑀢𑀺𑀆𑀤𑀺. 𑀬𑀤𑀺 𑀧𑀦 𑀲𑀩𑁆𑀩𑀯𑀺𑀜𑁆𑀜𑀸𑀢𑀩𑁆𑀩𑀲𑀗𑁆𑀕𑀳𑁂 𑀤𑀼𑀓𑁄𑀲𑀫𑀢𑁆𑀢𑁄 𑀳𑁄𑀢𑀺, 𑀦𑀺𑀓𑁆𑀔𑁂𑀧𑀭𑀸𑀲𑀺𑀦𑀺𑀤𑁆𑀤𑁂𑀲𑁄 𑀓𑀣𑀁 𑀦𑀻𑀬𑀢𑀻𑀢𑀺 𑀆𑀳 ‘‘𑀏𑀢𑀲𑁆𑀲 𑀧𑀦𑀸’’𑀢𑀺𑀆𑀤𑀺.

𑀏𑀢𑁆𑀣 𑀧𑀦 𑀬𑀣𑀸 𑀯𑀺𑀜𑁆𑀜𑀸𑀡𑀦𑀸𑀦𑀢𑁆𑀢𑁂𑀦 𑀯𑀺𑀜𑁆𑀜𑀸𑀢𑀩𑁆𑀩𑀁 𑀪𑀺𑀦𑁆𑀤𑀺𑀢𑁆𑀯𑀸 𑀤𑀼𑀓𑁂 𑀯𑀼𑀘𑁆𑀘𑀫𑀸𑀦𑁂 𑀲𑀢𑀺𑀧𑀺 𑀯𑀺𑀜𑁆𑀜𑀸𑀢𑀩𑁆𑀩𑀸𑀦𑀁 𑀩𑀳𑀼𑀪𑀸𑀯𑁂 𑀬𑀢𑁆𑀢𑀓𑀸 𑀯𑀺𑀜𑁆𑀜𑀸𑀢𑀩𑁆𑀩𑀸, 𑀢𑀢𑁆𑀢𑀓𑀸 𑀤𑀼𑀓𑀸𑀢𑀺 𑀦𑀢𑁆𑀣𑀺 𑀤𑀼𑀓𑀩𑀳𑀼𑀢𑀸 𑀤𑀼𑀓𑀲𑀗𑁆𑀕𑀳𑀺𑀢𑀥𑀫𑁆𑀫𑁂𑀓𑀤𑁂𑀲𑁂𑀲𑀼 𑀤𑀼𑀓𑀧𑀤𑀤𑁆𑀯𑀬𑀧𑁆𑀧𑀯𑀢𑁆𑀢𑀺𑀤𑀲𑁆𑀲𑀦𑀪𑀸𑀯𑀢𑁄. 𑀏𑀯𑀁 𑀤𑁆𑀯𑀺𑀦𑁆𑀦𑀫𑁆𑀧𑀺 𑀧𑀤𑀸𑀦𑀁 𑀅𑀢𑁆𑀣𑀦𑀸𑀦𑀢𑁆𑀢𑁂𑀦 𑀤𑀼𑀓𑁂 𑀯𑀼𑀘𑁆𑀘𑀫𑀸𑀦𑁂𑀧𑀺 𑀬𑀢𑁆𑀢𑀓𑀸𑀦𑀺 𑀯𑀺𑀜𑁆𑀜𑀸𑀡𑀸𑀦𑀺, 𑀢𑀢𑁆𑀢𑀓𑀸 𑀤𑀼𑀓𑀸𑀢𑀺 𑀦𑀢𑁆𑀣𑀺 𑀤𑀼𑀓𑀩𑀳𑀼𑀢𑀸 𑀤𑀼𑀓𑀲𑀗𑁆𑀕…𑀧𑁂… 𑀪𑀸𑀯𑀢𑁄 𑀏𑀯. 𑀦 𑀳𑀺 𑀏𑀓𑀁𑀬𑁂𑀯 𑀯𑀺𑀜𑁆𑀜𑀸𑀡𑀁 ‘‘𑀓𑁂𑀦𑀘𑀺 𑀓𑁂𑀦𑀘𑀻’’𑀢𑀺 𑀯𑀼𑀢𑁆𑀢𑀁, 𑀓𑀺𑀦𑁆𑀢𑀼 𑀅𑀧𑀭𑀫𑁆𑀧𑀻𑀢𑀺 𑀲𑀩𑁆𑀩𑀯𑀺𑀜𑁆𑀜𑀸𑀡𑀲𑀗𑁆𑀕𑀳𑁂 𑀤𑀼𑀓𑁄 𑀲𑀫𑀢𑁆𑀢𑁄 𑀳𑁄𑀢𑀺, 𑀦 𑀘 𑀓𑀢𑁆𑀣𑀘𑀺 𑀤𑀼𑀓𑀲𑁆𑀲 𑀧𑀘𑁆𑀙𑁂𑀤𑁄 𑀅𑀢𑁆𑀣𑀺 𑀇𑀦𑁆𑀤𑁆𑀭𑀺𑀬𑀯𑀺𑀜𑁆𑀜𑀸𑀡𑀸𑀦𑀁 𑀯𑀺𑀬 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲𑀧𑀺 𑀯𑀺𑀲𑀬𑀲𑁆𑀲 𑀪𑀺𑀦𑁆𑀦𑀢𑁆𑀢𑀸. 𑀦 𑀳𑀺 𑀅𑀢𑀻𑀢𑀸𑀭𑀫𑁆𑀫𑀡𑀁 𑀯𑀺𑀜𑁆𑀜𑀸𑀡𑀁 𑀅𑀦𑀸𑀕𑀢𑀸𑀤𑀺𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀅𑀦𑀸𑀕𑀢𑀸𑀭𑀫𑁆𑀫𑀡𑀁 𑀯𑀸 𑀅𑀢𑀻𑀢𑀸𑀤𑀺𑀆𑀭𑀫𑁆𑀫𑀡𑀁, 𑀢𑀲𑁆𑀫𑀸 𑀬𑀣𑀸𑀮𑀤𑁆𑀥𑀯𑀺𑀲𑁂𑀲𑁂𑀦 𑀯𑀺𑀲𑀺𑀝𑁆𑀞𑁂𑀲𑀼 𑀫𑀦𑁄𑀯𑀺𑀜𑁆𑀜𑀸𑀡𑀪𑁂𑀤𑁂𑀲𑀼 𑀢𑀲𑁆𑀲 𑀢𑀲𑁆𑀲 𑀯𑀺𑀲𑀬𑀲𑁆𑀲 𑀆𑀮𑀫𑁆𑀩𑀦𑀸𑀦𑀸𑀮𑀫𑁆𑀩𑀦𑀯𑀲𑁂𑀦 𑀤𑀼𑀓𑀧𑀤𑀤𑁆𑀯𑀬𑀧𑁆𑀧𑀯𑀢𑁆𑀢𑀺 𑀦 𑀲𑀓𑁆𑀓𑀸 𑀦𑀺𑀯𑀸𑀭𑁂𑀢𑀼𑀁. 𑀢𑁂𑀦𑁂𑀯 𑀘 𑀅𑀝𑁆𑀞𑀓𑀣𑀸𑀬𑀁 ‘‘𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀧𑀦 𑀓𑁂𑀦𑀘𑀺 𑀯𑀺𑀜𑁆𑀜𑁂𑀬𑁆𑀬𑀜𑁆𑀘𑁂𑀯 𑀅𑀯𑀺𑀜𑁆𑀜𑁂𑀬𑁆𑀬𑀜𑁆𑀘𑀸𑀢𑀺 𑀅𑀬𑀫𑀢𑁆𑀣𑁄 𑀅𑀢𑁆𑀣𑀺, 𑀢𑀲𑁆𑀫𑀸 𑀲𑁄 𑀅𑀯𑀼𑀢𑁆𑀢𑁄𑀧𑀺 𑀬𑀣𑀸𑀮𑀸𑀪𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀪𑀽𑀫𑀺𑀪𑁂𑀤𑀯𑀲𑁂𑀦 𑀬𑀣𑀸𑀮𑀸𑀪𑀁 𑀤𑀲𑁆𑀲𑁂𑀲𑁆𑀲𑀢𑀺. ‘‘𑀯𑀯𑀢𑁆𑀣𑀸𑀦𑀸𑀪𑀸𑀯𑀢𑁄’’𑀢𑀺 𑀇𑀤𑀫𑁆𑀧𑀺 𑀅𑀦𑀸𑀫𑀝𑁆𑀞𑀯𑀺𑀲𑁂𑀲𑀁 𑀫𑀦𑁄𑀯𑀺𑀜𑁆𑀜𑀸𑀡𑀲𑀸𑀫𑀜𑁆𑀜𑀫𑁂𑀯 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀧𑀸𑀴𑀺 𑀧𑀦 𑀇𑀦𑁆𑀤𑁆𑀭𑀺𑀬𑀯𑀺𑀜𑁆𑀜𑀸𑀡𑁂𑀳𑀺 𑀦𑀬𑀤𑀲𑁆𑀲𑀦𑀯𑀲𑁂𑀦 𑀆𑀕𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀇𑀫𑀺𑀲𑁆𑀲𑀸𑀧𑀺 𑀅𑀢𑁆𑀣𑀯𑀡𑁆𑀡𑀦𑀸𑀬 ‘‘𑀓𑁂𑀦𑀘𑀻’’𑀢𑀺 𑀧𑀤𑀁 𑀅𑀦𑀺𑀬𑀫𑁂𑀦 𑀲𑀩𑁆𑀩𑀯𑀺𑀜𑁆𑀜𑀸𑀡𑀲𑀗𑁆𑀕𑀸𑀳𑀓𑀦𑁆𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺, 𑀦𑀺𑀤𑁆𑀤𑁂𑀲𑁂𑀦 𑀘 𑀦 𑀓𑁄𑀘𑀺 𑀯𑀺𑀭𑁄𑀥𑁄. 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀦𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀪𑀸𑀯𑁂𑀳𑀺 𑀤𑀼𑀓𑀧𑀤𑀤𑁆𑀯𑀬𑀧𑁆𑀧𑀯𑀢𑁆𑀢𑀺 𑀤𑀲𑁆𑀲𑀺𑀢𑀸, 𑀦 𑀧𑀦 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀪𑀸𑀯𑁂𑀳𑀺 𑀯𑀺𑀲𑁂𑀲𑀓𑀸𑀭𑀡𑀸𑀪𑀸𑀯𑀢𑁄. 𑀓𑀺𑀜𑁆𑀘 ‘‘𑀬𑁂 𑀯𑀸 𑀧𑀦𑀸’’𑀢𑀺 𑀧𑀤𑀦𑁆𑀢𑀭𑀲𑀫𑁆𑀧𑀺𑀡𑁆𑀟𑀦𑀢𑁄𑀧𑀺 ‘‘𑀬𑁂 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸…𑀧𑁂… 𑀦 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸’’𑀢𑀺 (𑀥. 𑀲. 𑁧𑁧𑁦𑁧) 𑀏𑀢𑁆𑀢𑀸𑀯𑀢𑀸 𑀤𑀼𑀓𑀧𑀤𑀤𑁆𑀯𑀬𑀧𑁆𑀧𑀯𑀢𑁆𑀢𑀺 𑀤𑀲𑁆𑀲𑀺𑀢𑀸𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀧𑀤𑀦𑁆𑀢𑀭𑀪𑀸𑀯𑀤𑀲𑁆𑀲𑀦𑀢𑁆𑀣𑁄 𑀳𑀺 𑀬𑁂𑀯𑀸𑀧𑀦-𑀲𑀤𑁆𑀤𑁄 𑀬𑀣𑀸 ‘‘𑀬𑁂 𑀓𑁂𑀘𑀺 𑀓𑀼𑀲𑀮𑀸 𑀥𑀫𑁆𑀫𑀸, 𑀲𑀩𑁆𑀩𑁂 𑀢𑁂 𑀓𑀼𑀲𑀮𑀫𑀽𑀮𑀸. 𑀬𑁂 𑀯𑀸 𑀧𑀦 𑀓𑀼𑀲𑀮𑀫𑀽𑀮𑀸, 𑀲𑀩𑁆𑀩𑁂 𑀢𑁂 𑀥𑀫𑁆𑀫𑀸 𑀓𑀼𑀲𑀮𑀸’’𑀢𑀺𑀆𑀤𑀻𑀲𑀼 (𑀬𑀫. 𑁧.𑀫𑀽𑀮𑀬𑀫𑀓.𑁧). 𑀅𑀜𑁆𑀜𑀣𑀸 ‘‘𑀬𑁂 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸. 𑀬𑁂 𑀢𑁂 𑀥𑀫𑁆𑀫𑀸 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸, 𑀦 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸’’𑀢𑀺 𑀧𑀸𑀴𑀺 𑀅𑀪𑀯𑀺𑀲𑁆𑀲. 𑀬𑀁 𑀧𑀦 𑀯𑀤𑀦𑁆𑀢𑀺 ‘‘𑀬𑁂 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸…𑀧𑁂… 𑀦 𑀢𑁂 𑀥𑀫𑁆𑀫𑀸 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀇𑀫𑀺𑀦𑀸 𑀅𑀢𑁆𑀣𑀢𑁄 𑀤𑁆𑀯𑁂 𑀤𑀼𑀓𑀸 𑀯𑀼𑀢𑁆𑀢𑀸 𑀳𑁄𑀦𑁆𑀢𑀻’’𑀢𑀺, 𑀢𑀤𑀧𑀺 𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀸𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀢𑀁 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀸𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀢𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀧𑀦 ‘‘𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀦𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀢𑀁 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑀦𑀘𑀓𑁆𑀔𑀼𑀯𑀺𑀜𑁆𑀜𑁂𑀬𑁆𑀬𑀢𑀜𑁆𑀘𑀸’’𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀢𑁂𑀦 𑀧𑀸𑀴𑀺𑀧𑀝𑀺𑀲𑁂𑀥𑀦𑀜𑁆𑀘 𑀦𑀺𑀯𑀸𑀭𑀺𑀢𑀁 𑀤𑀝𑁆𑀞𑀩𑁆𑀩𑀁 𑀧𑀝𑀺𑀲𑁂𑀥𑀦𑀲𑁆𑀲𑁂𑀯 𑀅𑀪𑀸𑀯𑀢𑁄. 𑀢𑀣𑀸 𑀬𑀲𑁆𑀲 𑀆𑀭𑀫𑁆𑀫𑀡𑀲𑁆𑀲 𑀯𑀺𑀚𑀸𑀦𑀦𑀪𑀸𑀯𑁂𑀦 𑀬𑁄 𑀅𑀢𑁆𑀣𑁄 𑀯𑀼𑀘𑁆𑀘𑀫𑀸𑀦𑁄 𑀅𑀦𑀺𑀬𑀫𑀤𑀲𑁆𑀲𑀦𑀢𑁆𑀣𑀁 ‘‘𑀓𑁂𑀦𑀘𑀻’’𑀢𑀺 𑀯𑀼𑀢𑁆𑀢𑁄, 𑀲𑁄𑀬𑁂𑀯 𑀢𑀢𑁄 𑀅𑀜𑁆𑀜𑀲𑁆𑀲 𑀅𑀯𑀺𑀚𑀸𑀦𑀦𑀪𑀸𑀯𑁂𑀦 𑀯𑀼𑀘𑁆𑀘𑀫𑀸𑀦𑁄 𑀅𑀦𑀺𑀬𑀫𑀤𑀲𑁆𑀲𑀦𑀢𑁆𑀣𑀁 𑀧𑀼𑀦 ‘‘𑀓𑁂𑀦𑀘𑀻’’𑀢𑀺 𑀯𑀼𑀢𑁆𑀢𑁄𑀢𑀺 𑀢𑀤𑀢𑁆𑀣𑀤𑀲𑁆𑀲𑀦𑁂 𑀢𑁂𑀦𑁂𑀯𑀸𑀢𑀺 𑀅𑀬𑀁 𑀧𑀤𑀢𑁆𑀣𑁄 𑀦 𑀲𑀫𑁆𑀪𑀯𑀢𑀻𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺. 𑀏𑀯𑀫𑁂𑀢𑁆𑀣 𑀬𑀣𑀸 𑀅𑀝𑁆𑀞𑀓𑀣𑀸 𑀅𑀯𑀝𑁆𑀞𑀺𑀢𑀸, 𑀢𑀣𑀸 𑀅𑀢𑁆𑀣𑁄 𑀬𑀼𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁪-𑁧𑁯. 𑀲𑀦𑁆𑀢𑀸𑀦𑀲𑁆𑀲 𑀅𑀚𑀜𑁆𑀜𑀫𑀮𑀻𑀦𑀪𑀸𑀯𑀓𑀭𑀡𑀢𑁄 𑀓𑀡𑁆𑀳𑀓𑀫𑁆𑀫𑀯𑀺𑀧𑀸𑀓𑀳𑁂𑀢𑀼𑀢𑁄 𑀘 𑀅𑀧𑀭𑀺𑀲𑀼𑀤𑁆𑀥𑀢𑁆𑀢𑀸 ‘‘𑀅𑀲𑀼𑀘𑀺𑀪𑀸𑀯𑁂𑀦 𑀲𑀦𑁆𑀤𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 𑀯𑀡𑁂. 𑀧𑀕𑁆𑀖𑀭𑀡𑀓…𑀧𑁂… 𑀲𑀤𑁆𑀤𑁄𑀢𑀺 𑀏𑀢𑁂𑀦 𑀆𑀲𑀯𑁄 𑀯𑀺𑀬 𑀆𑀲𑀯𑁄𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀤𑀲𑁆𑀲𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀕𑁄𑀢𑁆𑀭𑀪𑀼…𑀧𑁂… 𑀯𑀼𑀢𑁆𑀢𑀸𑀦𑀻𑀢𑀺 𑀏𑀢𑁂𑀦 𑀕𑁄𑀢𑁆𑀭𑀪𑀼𑀕𑁆𑀕𑀳𑀡𑀁 𑀉𑀧𑀮𑀓𑁆𑀔𑀡𑀁 𑀬𑀣𑀸 ‘‘𑀓𑀸𑀓𑁂𑀳𑀺 𑀲𑀧𑁆𑀧𑀺 𑀭𑀓𑁆𑀔𑀺𑀢𑀩𑁆𑀩’’𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀕𑁄𑀢𑁆𑀭𑀪𑀼𑀲𑀤𑀺𑀲𑀸 𑀕𑁄𑀢𑁆𑀭𑀪𑀽𑀢𑀺 𑀧𑀦 𑀅𑀢𑁆𑀣𑁂 𑀲𑀢𑀺 𑀕𑀼𑀡𑀧𑁆𑀧𑀥𑀸𑀦𑀢𑁆𑀣𑀸𑀦𑀁 𑀏𑀓𑁂𑀦 𑀲𑀤𑁆𑀤𑁂𑀦 𑀅𑀯𑀘𑀦𑀻𑀬𑀢𑁆𑀢𑀸 𑀯𑁄𑀤𑀸𑀦𑀸𑀤𑀬𑁄𑀯 𑀯𑀼𑀢𑁆𑀢𑀸 𑀪𑀯𑁂𑀬𑁆𑀬𑀼𑀁. 𑀅𑀣 𑀯𑀸 𑀕𑁄𑀢𑁆𑀭𑀪𑀽𑀢𑀺 𑀏𑀓𑀲𑁂𑀲𑁂𑀦 𑀲𑀸𑀫𑀜𑁆𑀜𑁂𑀦 𑀯𑀸 𑀅𑀬𑀁 𑀦𑀺𑀤𑁆𑀤𑁂𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀪𑀺𑀯𑀺𑀥𑀺𑀯𑀺𑀲𑀬𑀁 𑀅𑀯𑀥𑀺𑀦𑁆𑀢𑀺 𑀯𑀺𑀪𑀢𑁆𑀢𑀺𑀁 𑀧𑀭𑀺𑀡𑀸𑀫𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀁.

𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀆𑀲𑀯𑁂𑀳𑀺 𑀢𑀁𑀲𑀳𑀺𑀢𑀢𑀸 𑀆𑀲𑀯𑀲𑀳𑀺𑀢𑀢𑀸. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀲𑀳𑁂𑀢𑀼𑀓𑀸𑀦𑀁 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀳𑁂𑀢𑀽𑀳𑀺 𑀲𑀳𑁂𑀢𑀼𑀓𑀢𑀸, 𑀦 𑀏𑀯𑀁 𑀲𑀸𑀲𑀯𑀸𑀢𑀺 𑀯𑀼𑀢𑁆𑀢𑀥𑀫𑁆𑀫𑀸𑀦𑀁 𑀲𑀫𑁆𑀧𑀬𑀼𑀢𑁆𑀢𑁂𑀳𑀺 𑀆𑀲𑀯𑁂𑀳𑀺 𑀲𑀸𑀲𑀯𑀢𑀸, 𑀅𑀣 𑀔𑁄 𑀯𑀺𑀧𑁆𑀧𑀬𑀼𑀢𑁆𑀢𑁂𑀳𑀻𑀢𑀺. 𑀤𑀼𑀓𑀦𑁆𑀢𑀭𑁂 𑀅𑀯𑀼𑀢𑁆𑀢𑀧𑀤𑀪𑀸𑀯𑁄𑀬𑁂𑀯𑁂𑀢𑁆𑀣 𑀤𑀼𑀓𑀬𑁄𑀚𑀦𑀸𑀬 𑀜𑀸𑀬𑀸𑀕𑀢𑀢𑀸. 𑀬𑀤𑀺 𑀏𑀯𑀁 𑀳𑁂𑀢𑀼𑀕𑁄𑀘𑁆𑀙𑀓𑁂 𑀓𑀣𑀦𑁆𑀢𑀺 𑀆𑀳 ‘‘𑀳𑁂𑀢𑀼𑀕𑁄𑀘𑁆𑀙𑀓𑁂 𑀧𑀦𑀸’’𑀢𑀺𑀆𑀤𑀺. 𑀧𑀞𑀫𑁂 𑀤𑀼𑀓𑁂 𑀤𑀼𑀢𑀺𑀬𑀲𑁆𑀲 𑀧𑀓𑁆𑀔𑁂𑀧𑁂 𑀏𑀓𑁄𑀢𑀺 𑀘𑀢𑀼𑀢𑁆𑀣𑀤𑀼𑀓𑀫𑀸𑀳. 𑀧𑀞𑀫𑁂 𑀤𑀼𑀓𑁂 𑀢𑀢𑀺𑀬𑀲𑁆𑀲 𑀧𑀓𑁆𑀔𑁂𑀧𑁂 𑀤𑁆𑀯𑁂𑀢𑀺 ‘‘𑀆𑀲𑀯𑀸 𑀘𑁂𑀯 𑀥𑀫𑁆𑀫𑀸 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸 𑀘, 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸 𑀘𑁂𑀯 𑀥𑀫𑁆𑀫𑀸 𑀦𑁄 𑀘 𑀆𑀲𑀯𑀸’’𑀢𑀺 𑀇𑀫𑀺𑀦𑀸 𑀲𑀤𑁆𑀥𑀺𑀁 𑀧𑀜𑁆𑀘𑀫𑀤𑀼𑀓𑀫𑀸𑀳. 𑀧𑀞𑀫𑀲𑁆𑀲 𑀤𑀼𑀢𑀺𑀬𑁂 𑀤𑀼𑀓𑁂 𑀧𑀓𑁆𑀔𑁂𑀧𑁂 𑀏𑀓𑁄𑀢𑀺 ‘‘𑀦𑁄 𑀆𑀲𑀯𑀸 𑀥𑀫𑁆𑀫𑀸 𑀲𑀸𑀲𑀯𑀸𑀧𑀺 𑀅𑀦𑀸𑀲𑀯𑀸𑀧𑀻’’𑀢𑀺 𑀅𑀬𑀫𑁂𑀓𑁄. 𑀢𑀢𑀺𑀬𑁂 𑀧𑀞𑀫𑀲𑁆𑀲 𑀧𑀓𑁆𑀔𑁂𑀧𑁂 𑀤𑁆𑀯𑁂𑀢𑀺 ‘‘𑀆𑀲𑀯𑀸 𑀥𑀫𑁆𑀫𑀸 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸𑀧𑀺, 𑀦𑁄 𑀆𑀲𑀯𑀸𑀥𑀫𑁆𑀫𑀸 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸𑀧𑀻’’𑀢𑀺 𑀇𑀫𑁂 𑀤𑁆𑀯𑁂. 𑀢𑀢𑀺𑀬𑁂 𑀤𑀼𑀢𑀺𑀬𑀲𑁆𑀲 𑀧𑀓𑁆𑀔𑁂𑀧𑁂 𑀏𑀓𑁄𑀢𑀺 ‘‘𑀲𑀸𑀲𑀯𑀸 𑀥𑀫𑁆𑀫𑀸 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸𑀧𑀻’’𑀢𑀺 𑀏𑀓𑁄. 𑀤𑀼𑀢𑀺𑀬𑁂 𑀢𑀢𑀺𑀬𑀲𑁆𑀲 𑀧𑀓𑁆𑀔𑁂𑀧𑁂 𑀏𑀓𑁄𑀢𑀺 𑀙𑀝𑁆𑀞𑀤𑀼𑀓𑀫𑀸𑀳. 𑀢𑀻𑀳𑀻𑀢𑀺 𑀘𑀢𑀼𑀢𑁆𑀣𑀧𑀜𑁆𑀘𑀫𑀙𑀝𑁆𑀞𑁂𑀳𑀺. 𑀇𑀢𑀭𑁂𑀢𑀺 𑀢𑀤𑀯𑀲𑀺𑀝𑁆𑀞𑀸 𑀧𑀜𑁆𑀘. 𑀢𑁂 𑀧𑀦 𑀧𑀞𑀫𑁂 𑀢𑀢𑀺𑀬𑀤𑀼𑀓𑀤𑀼𑀢𑀺𑀬𑀧𑀤𑀧𑀓𑁆𑀔𑁂𑀧𑁂 𑀏𑀓𑁄, 𑀤𑀼𑀢𑀺𑀬𑁂 𑀧𑀞𑀫𑀤𑀼𑀓𑀤𑀼𑀢𑀺𑀬𑀧𑀤𑀧𑀓𑁆𑀔𑁂𑀧𑁂 𑀏𑀓𑁄, 𑀢𑀢𑀺𑀬𑁂 𑀧𑀞𑀫𑀲𑁆𑀲 𑀏𑀓𑁂𑀓𑀧𑀤𑀧𑀓𑁆𑀔𑁂𑀧𑁂 𑀤𑁆𑀯𑁂, 𑀢𑀢𑀺𑀬𑁂 𑀤𑀼𑀢𑀺𑀬𑀤𑀼𑀓𑀧𑀞𑀫𑀧𑀤𑀧𑀓𑁆𑀔𑁂𑀧𑁂 𑀏𑀓𑁄𑀢𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸. ‘‘𑀲𑀸𑀲𑀯𑀸 𑀥𑀫𑁆𑀫𑀸 𑀆𑀲𑀯𑀸𑀧𑀺 𑀦𑁄 𑀆𑀲𑀯𑀸𑀧𑀺. 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸 𑀆𑀲𑀯𑀸𑀧𑀺 𑀦𑁄 𑀆𑀲𑀯𑀸𑀧𑀺. 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸 𑀆𑀲𑀯𑀸𑀧𑀺 𑀦𑁄 𑀆𑀲𑀯𑀸𑀧𑀻’’𑀢𑀺 𑀏𑀢𑁂𑀲𑀫𑁆𑀧𑀺, ‘‘𑀆𑀲𑀯𑀲𑀳𑀕𑀢𑀸 𑀥𑀫𑁆𑀫𑀸 𑀦𑁄 𑀆𑀲𑀯𑀲𑀳𑀕𑀢𑀸 𑀥𑀫𑁆𑀫𑀸’’𑀢𑀺 𑀏𑀯𑀫𑀸𑀤𑀻𑀦𑀜𑁆𑀘 𑀅𑀕𑁆𑀕𑀳𑀡𑁂 𑀓𑀸𑀭𑀡𑀁 𑀕𑀳𑀡𑀦𑀬𑁄 𑀘 𑀧𑀼𑀩𑁆𑀩𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀏𑀲 𑀦𑀬𑁄𑀢𑀺 𑀬𑁄 𑀏𑀲 𑀧𑀞𑀫𑀤𑀼𑀓𑁂 𑀤𑀼𑀢𑀺𑀬𑀤𑀼𑀓𑀧𑀓𑁆𑀔𑁂𑀧𑀸𑀤𑀺𑀓𑁄 𑀉𑀧𑀸𑀬𑁄 𑀇𑀥 𑀆𑀲𑀯𑀕𑁄𑀘𑁆𑀙𑀓𑁂 𑀯𑀼𑀢𑁆𑀢𑁄, 𑀏𑀲 𑀦𑀬𑁄 𑀲𑀁𑀬𑁄𑀚𑀦𑀕𑁄𑀘𑁆𑀙𑀓𑀸𑀤𑀻𑀲𑀼 𑀤𑀼𑀓𑀦𑁆𑀢𑀭𑀦𑀺𑀤𑁆𑀥𑀸𑀭𑀡𑁂𑀢𑀺 𑀅𑀢𑁆𑀣𑁄. 𑀢𑀢𑁆𑀣 𑀧𑀸𑀴𑀺𑀬𑀁 𑀅𑀦𑀸𑀕𑀢𑀤𑀼𑀓𑀸 𑀲𑀁𑀬𑁄𑀚𑀦𑀕𑁄𑀘𑁆𑀙𑀓𑁂 𑀢𑀸𑀯 ‘‘𑀲𑀁𑀬𑁄𑀚𑀦𑀸 𑀘𑁂𑀯 𑀥𑀫𑁆𑀫𑀸 𑀲𑀁𑀬𑁄𑀚𑀦𑀯𑀺𑀧𑁆𑀧𑀬𑀼𑀢𑁆𑀢𑀸 𑀘, 𑀲𑀁𑀬𑁄𑀚𑀦𑀯𑀺𑀧𑁆𑀧𑀬𑀼𑀢𑁆𑀢𑀸 𑀘𑁂𑀯 𑀥𑀫𑁆𑀫𑀸 𑀦𑁄 𑀘 𑀲𑀁𑀬𑁄𑀚𑀦𑀸, 𑀲𑀁𑀬𑁄𑀚𑀦𑀸 𑀥𑀫𑁆𑀫𑀸 𑀲𑀁𑀬𑁄𑀚𑀦𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀲𑀁𑀬𑁄𑀚𑀦𑀯𑀺𑀧𑁆𑀧𑀬𑀼𑀢𑁆𑀢𑀸𑀧𑀺, 𑀦𑁄 𑀲𑀁𑀬𑁄𑀚𑀦𑀸 𑀥𑀫𑁆𑀫𑀸 𑀲𑀁𑀬𑁄𑀚𑀦𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀲𑀁𑀬𑁄𑀚𑀦𑀯𑀺𑀧𑁆𑀧𑀬𑀼𑀢𑁆𑀢𑀸𑀧𑀺, 𑀦𑁄 𑀲𑀁𑀬𑁄𑀚𑀦𑀸 𑀥𑀫𑁆𑀫𑀸 𑀲𑀁𑀬𑁄𑀚𑀦𑀺𑀬𑀸𑀧𑀺 𑀅𑀲𑀁𑀬𑁄𑀚𑀦𑀺𑀬𑀸𑀧𑀺, 𑀲𑀁𑀬𑁄𑀚𑀦𑀺𑀬𑀸 𑀥𑀫𑁆𑀫𑀸 𑀲𑀁𑀬𑁄𑀚𑀦𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀲𑀁𑀬𑁄𑀚𑀦𑀯𑀺𑀧𑁆𑀧𑀬𑀼𑀢𑁆𑀢𑀸𑀧𑀻’’𑀢𑀺 𑀧𑀜𑁆𑀘. 𑀏𑀯𑀁 𑀕𑀦𑁆𑀣𑀑𑀖𑀬𑁄𑀕𑀉𑀧𑀸𑀤𑀸𑀦𑀕𑁄𑀘𑁆𑀙𑀓𑁂𑀲𑀼 𑀧𑀘𑁆𑀘𑁂𑀓𑀁 𑀧𑀜𑁆𑀘. 𑀦𑀻𑀯𑀭𑀡𑀕𑁄𑀘𑁆𑀙𑀓𑁂 𑀧𑀦 𑀦𑀻𑀯𑀭𑀡𑀸𑀦𑀁 𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀪𑀸𑀯𑀸𑀪𑀸𑀯𑀢𑁄 ‘‘𑀦𑁄 𑀦𑀻𑀯𑀭𑀡𑀸 𑀥𑀫𑁆𑀫𑀸 𑀦𑀻𑀯𑀭𑀡𑀺𑀬𑀸𑀧𑀺 𑀅𑀦𑀻𑀯𑀭𑀡𑀺𑀬𑀸𑀧𑀺, 𑀦𑁄 𑀦𑀻𑀯𑀭𑀡𑀸 𑀥𑀫𑁆𑀫𑀸 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀧𑀺, 𑀦𑀻𑀯𑀭𑀡𑀺𑀬𑀸 𑀥𑀫𑁆𑀫𑀸 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀦𑀻𑀯𑀭𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀧𑀻’’𑀢𑀺 𑀢𑀬𑁄. 𑀢𑀣𑀸 𑀧𑀭𑀸𑀫𑀸𑀲𑀕𑁄𑀘𑁆𑀙𑀓𑁂 ‘‘𑀦𑁄 𑀧𑀭𑀸𑀫𑀸𑀲𑀸 𑀥𑀫𑁆𑀫𑀸 𑀧𑀭𑀸𑀫𑀝𑁆𑀞𑀸𑀧𑀺 𑀅𑀧𑀭𑀸𑀫𑀝𑁆𑀞𑀸𑀧𑀺, 𑀦𑁄 𑀧𑀭𑀸𑀫𑀸𑀲𑀸 𑀥𑀫𑁆𑀫𑀸 𑀧𑀭𑀸𑀫𑀸𑀲𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢𑀸𑀧𑀺, 𑀧𑀭𑀸𑀫𑀝𑁆𑀞𑀸 𑀥𑀫𑁆𑀫𑀸 𑀧𑀭𑀸𑀫𑀸𑀲𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀧𑀭𑀸𑀫𑀸𑀲𑀯𑀺𑀧𑁆𑀧𑀬𑀼𑀢𑁆𑀢𑀸𑀧𑀻’’𑀢𑀺. 𑀓𑀺𑀮𑁂𑀲𑀕𑁄𑀘𑁆𑀙𑀓𑁂 ‘‘𑀦𑁄 𑀓𑀺𑀮𑁂𑀲𑀸 𑀥𑀫𑁆𑀫𑀸 𑀲𑀁𑀓𑀺𑀮𑁂𑀲𑀺𑀓𑀸𑀧𑀺 𑀅𑀲𑀁𑀓𑀺𑀮𑁂𑀲𑀺𑀓𑀸𑀧𑀺, 𑀦𑁄 𑀓𑀺𑀮𑁂𑀲𑀸 𑀥𑀫𑁆𑀫𑀸 𑀲𑀁𑀓𑀺𑀮𑀺𑀝𑁆𑀞𑀸𑀧𑀺 𑀅𑀲𑀁𑀓𑀺𑀮𑀺𑀝𑁆𑀞𑀸𑀧𑀺, 𑀦𑁄 𑀓𑀺𑀮𑁂𑀲𑀸 𑀥𑀫𑁆𑀫𑀸 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀓𑀺𑀮𑁂𑀲𑀯𑀺𑀧𑁆𑀧𑀬𑀼𑀢𑁆𑀢𑀸𑀧𑀺, 𑀲𑀁𑀓𑀺𑀮𑁂𑀲𑀺𑀓𑀸 𑀥𑀫𑁆𑀫𑀸 𑀲𑀁𑀓𑀺𑀮𑀺𑀝𑁆𑀞𑀸𑀧𑀺 𑀅𑀲𑀁𑀓𑀺𑀮𑀺𑀝𑁆𑀞𑀸𑀧𑀺, 𑀲𑀁𑀓𑀺𑀮𑁂𑀲𑀺𑀓𑀸 𑀥𑀫𑁆𑀫𑀸 𑀓𑀺𑀮𑁂𑀲𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀓𑀺𑀮𑁂𑀲𑀯𑀺𑀧𑁆𑀧𑀬𑀼𑀢𑁆𑀢𑀸𑀧𑀺, 𑀅𑀲𑀁𑀓𑀺𑀮𑀺𑀝𑁆𑀞𑀸 𑀥𑀫𑁆𑀫𑀸 𑀲𑀁𑀓𑀺𑀮𑁂𑀲𑀺𑀓𑀸𑀧𑀺 𑀅𑀲𑀁𑀓𑀺𑀮𑁂𑀲𑀺𑀓𑀸𑀧𑀻’’𑀢𑀺 𑀙 𑀤𑀼𑀓𑀸𑀢𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀁 𑀯𑀼𑀢𑁆𑀢𑀦𑀬𑀫𑁂𑀯.

𑁨𑁦-𑁨𑁫. 𑀧𑀘𑁆𑀘𑀬𑀪𑀸𑀯𑁂𑀦𑀸𑀢𑀺 𑀲𑀁𑀬𑁄𑀚𑀦𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀬𑀣𑀸𑀲𑀓𑀁 𑀧𑀘𑁆𑀘𑀬𑀪𑀸𑀯𑁄 𑀏𑀯 𑀳𑀺 𑀓𑀸𑀫𑀭𑀸𑀕𑀸𑀤𑀻𑀦𑀁 𑀯𑀝𑁆𑀝𑀲𑀁𑀬𑁄𑀚𑀦𑀦𑁆𑀢𑀺. 𑀬𑀤𑀺 𑀏𑀯𑀁 𑀓𑀣𑀁 𑀓𑀸𑀫𑀭𑀸𑀕𑀸𑀤𑀻𑀦𑀁𑀬𑁂𑀯 𑀲𑀁𑀬𑁄𑀚𑀦𑀪𑀸𑀯𑁄𑀢𑀺 𑀆𑀳 ‘‘𑀲𑀢𑀺𑀧𑀻’’𑀢𑀺𑀆𑀤𑀺. 𑀅𑀜𑁆𑀜𑁂𑀲𑀦𑁆𑀢𑀺 𑀲𑀁𑀬𑁄𑀚𑀦𑁂𑀳𑀺 𑀅𑀜𑁆𑀜𑁂𑀲𑀁 𑀓𑀺𑀮𑁂𑀲𑀸𑀪𑀺𑀲𑀗𑁆𑀔𑀸𑀭𑀸𑀤𑀻𑀦𑀁. 𑀢𑀧𑁆𑀧𑀘𑁆𑀘𑀬𑀪𑀸𑀯𑁂𑀢𑀺 𑀢𑁂𑀲𑀁 𑀓𑀺𑀮𑁂𑀲𑀓𑀫𑁆𑀫𑀯𑀺𑀧𑀸𑀓𑀯𑀝𑁆𑀝𑀸𑀦𑀁 𑀧𑀘𑁆𑀘𑀬𑀪𑀸𑀯𑁂. 𑀑𑀭𑀫𑁆𑀪𑀸𑀕𑀺𑀬𑀼𑀤𑁆𑀥𑀁𑀪𑀸𑀕𑀺𑀬𑀪𑀸𑀯𑁂𑀦 𑀲𑀗𑁆𑀕𑀳𑀺𑀢𑀸 𑀧𑀭𑀺𑀘𑁆𑀙𑀺𑀦𑁆𑀦𑀸 𑀑𑀭…𑀧𑁂… 𑀲𑀗𑁆𑀕𑀳𑀺𑀢𑀸, 𑀢𑁂𑀳𑀺 𑀓𑀸𑀫𑀭𑀸𑀕𑀸𑀤𑀻𑀳𑀺 𑀯𑀺𑀲𑁂𑀲𑀧𑀘𑁆𑀘𑀬𑀪𑀽𑀢𑁂𑀳𑀺. 𑀓𑀸𑀫𑀓𑀫𑁆𑀫𑀪𑀯𑀸𑀤𑀻𑀦𑀁 𑀓𑀸𑀫𑀽𑀧𑀧𑀢𑁆𑀢𑀺𑀪𑀯𑀸𑀤𑀺𑀦𑀺𑀧𑁆𑀨𑀸𑀤𑀦𑁂𑀧𑀺 𑀦𑀺𑀬𑀫𑁄𑀢𑀺 𑀓𑀢𑁆𑀯𑀸 𑀆𑀳 ‘‘𑀢𑀁𑀢𑀁…𑀧𑁂… 𑀳𑁄𑀢𑀻’’𑀢𑀺. 𑀢𑁂𑀦 𑀲𑀁𑀬𑁄𑀚𑀦𑀸𑀦𑀁 𑀪𑀸𑀯𑁂 𑀬𑀣𑀸𑀯𑀼𑀢𑁆𑀢𑀦𑀺𑀬𑀫𑀸𑀦𑀁 𑀓𑀫𑁆𑀫𑀽𑀧𑀧𑀢𑁆𑀢𑀺𑀪𑀯𑀸𑀦𑀁 𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀢𑀤𑀪𑀸𑀯𑁂 𑀅𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀘𑀸’’𑀢𑀺𑀆𑀤𑀺𑀫𑀸𑀳. 𑀩𑀦𑁆𑀥𑀦𑀁 𑀅𑀲𑁂𑀭𑀺𑀪𑀸𑀯𑀓𑀭𑀡𑀁 𑀅𑀦𑁆𑀤𑀼𑀩𑀦𑁆𑀥𑀦𑀸𑀤𑀬𑁄 𑀯𑀺𑀬. 𑀕𑀦𑁆𑀣𑀓𑀭𑀡𑀁 𑀅𑀯𑀘𑁆𑀙𑀺𑀦𑁆𑀦𑀢𑀸𑀓𑀭𑀡𑀁. 𑀘𑀓𑁆𑀓𑀮𑀓𑀁 𑀧𑀸𑀤𑀧𑀼𑀜𑁆𑀙𑀦𑀭𑀚𑁆𑀚𑀼𑀫𑀡𑁆𑀟𑀮𑀁. 𑀦 𑀘𑁄𑀤𑁂𑀢𑀩𑁆𑀩𑀦𑁆𑀢𑀺 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀧𑀘𑀼𑀭𑀚𑀦𑀲𑁆𑀲 𑀧𑀲𑁆𑀲𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑀯𑀺𑀲𑁂𑀲𑀲𑁆𑀲 𑀲𑀤𑁆𑀥𑁂𑀬𑁆𑀬𑀢𑀁 𑀆𑀳. 𑀢𑀺𑀯𑀺𑀥𑁄 𑀳𑀺 𑀅𑀢𑁆𑀣𑁄 𑀓𑁄𑀘𑀺 𑀧𑀘𑁆𑀘𑀓𑁆𑀔𑀲𑀺𑀤𑁆𑀥𑁄 𑀬𑁄 𑀭𑀽𑀧𑀸𑀤𑀺𑀥𑀫𑁆𑀫𑀸𑀦𑀁 𑀧𑀘𑁆𑀘𑀢𑁆𑀢𑀯𑁂𑀤𑀦𑀻𑀬𑁄 𑀅𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸𑀓𑀸𑀭𑁄, 𑀲𑀩𑁆𑀩𑀥𑀫𑁆𑀫𑀸𑀦𑀁 𑀲𑀪𑀸𑀯𑀮𑀓𑁆𑀔𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑁄𑀘𑀺 𑀅𑀦𑀼𑀫𑀸𑀦𑀲𑀺𑀤𑁆𑀥𑁄 𑀬𑁄 𑀖𑀝𑀸𑀤𑀻𑀲𑀼 𑀧𑀝𑀸𑀤𑀻𑀲𑀼 𑀘 𑀧𑀲𑀺𑀤𑁆𑀥𑁂𑀦 𑀧𑀘𑁆𑀘𑀬𑀸𑀬𑀢𑁆𑀢𑀪𑀸𑀯𑁂𑀦 𑀖𑀝𑀧𑀝-𑀲𑀤𑁆𑀤𑀸𑀤𑀻𑀦𑀁 𑀅𑀦𑀺𑀘𑁆𑀘𑀢𑀸𑀤𑀺𑀆𑀓𑀸𑀭𑁄, 𑀓𑁄𑀘𑀺 𑀑𑀓𑀧𑁆𑀧𑀦𑀲𑀺𑀤𑁆𑀥𑁄 𑀬𑁄 𑀧𑀘𑀼𑀭𑀚𑀦𑀲𑁆𑀲 𑀅𑀘𑁆𑀘𑀦𑁆𑀢𑀫𑀤𑀺𑀝𑁆𑀞𑁄 𑀲𑀤𑁆𑀥𑀸𑀯𑀺𑀲𑀬𑁄 𑀲𑀕𑁆𑀕𑀦𑀺𑀩𑁆𑀩𑀸𑀦𑀸𑀤𑀺. 𑀢𑀢𑁆𑀣 𑀬𑀲𑁆𑀲 𑀲𑀢𑁆𑀣𑀼𑀦𑁄 𑀯𑀘𑀦𑀁 𑀧𑀘𑁆𑀘𑀓𑁆𑀔𑀲𑀺𑀤𑁆𑀥𑁂 𑀅𑀦𑀼𑀫𑀸𑀦𑀲𑀺𑀤𑁆𑀥𑁂 𑀘 𑀅𑀢𑁆𑀣𑁂 𑀦 𑀯𑀺𑀲𑀁𑀯𑀸𑀤𑁂𑀢𑀺 𑀅𑀯𑀺𑀧𑀭𑀻𑀢𑀧𑁆𑀧𑀯𑀢𑁆𑀢𑀺𑀬𑀸, 𑀢𑀲𑁆𑀲 𑀯𑀘𑀦𑁂𑀦 𑀲𑀤𑁆𑀥𑁂𑀬𑁆𑀬𑀢𑁆𑀣𑀲𑀺𑀤𑁆𑀥𑀻𑀢𑀺 𑀢𑀣𑀸𑀭𑀽𑀧𑁄 𑀘 𑀪𑀕𑀯𑀸𑀢𑀺 ‘‘𑀥𑀫𑁆𑀫𑀸𑀦𑀁 𑀲𑀪𑀸𑀯…𑀧𑁂… 𑀦 𑀘𑁄𑀤𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀲 𑀦𑀬𑁄 𑀇𑀢𑁄 𑀧𑀭𑁂𑀲𑀼𑀧𑀺 𑀏𑀯𑀭𑀽𑀧𑁂𑀲𑀼.

𑁨𑁬-𑁩𑁭. 𑀬𑀣𑀸 𑀲𑀭𑀪𑁂𑀳𑀺 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑀸 𑀧𑀩𑁆𑀩𑀢𑀭𑀸𑀚𑀺 𑀲𑀭𑀪𑀦𑀺𑀬𑀸, 𑀏𑀯𑀁 𑀑𑀖𑀦𑀺𑀬𑀸𑀢𑀺 𑀲𑀤𑁆𑀤𑀲𑀺𑀤𑁆𑀥𑀻𑀢𑀺 𑀆𑀳 ‘‘𑀢𑁂𑀦𑀸’’𑀢𑀺𑀆𑀤𑀺.

𑁫𑁦-𑁫𑁪. 𑀯𑀺𑀧𑀭𑀺𑀬𑁂𑀲𑀕𑁆𑀕𑀸𑀳𑁄 𑀧𑀭𑀸𑀫𑀲𑀦𑀦𑁆𑀢𑀺 ‘‘𑀧𑀭𑀢𑁄’’𑀢𑀺 𑀏𑀢𑁆𑀣 𑀦 𑀥𑀫𑁆𑀫𑀲𑀪𑀸𑀯𑀢𑁄 𑀅𑀜𑁆𑀜𑀣𑀸𑀫𑀢𑁆𑀢𑀁 𑀧𑀭𑀦𑁆𑀢𑀺 𑀅𑀥𑀺𑀧𑁆𑀧𑁂𑀢𑀁, 𑀅𑀣 𑀔𑁄 𑀢𑀩𑁆𑀩𑀺𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀧𑀭𑀢𑁄𑀢𑀺 𑀦𑀺𑀘𑁆𑀘𑀸𑀤𑀺𑀢𑁄’’𑀢𑀺.

𑁫𑁫-𑁬𑁮. 𑀬𑀤𑀺 𑀲𑀪𑀸𑀯𑀢𑁄 𑀅𑀯𑀺𑀚𑁆𑀚𑀫𑀸𑀦𑀁, 𑀓𑀣𑀫𑀸𑀭𑀫𑁆𑀫𑀡𑀪𑀸𑀯𑁄𑀢𑀺 𑀆𑀳 ‘‘𑀯𑀺𑀘𑀺𑀢𑁆𑀢𑀲𑀜𑁆𑀜𑀸𑀬 𑀲𑀜𑁆𑀜𑀺𑀢’’𑀦𑁆𑀢𑀺, 𑀧𑀭𑀺𑀓𑀧𑁆𑀧𑀦𑀸𑀫𑀢𑁆𑀢𑀲𑀺𑀤𑁆𑀥𑀦𑁆𑀢𑀺 𑀅𑀢𑁆𑀣𑁄. 𑀤𑀼𑀯𑀺𑀜𑁆𑀜𑁂𑀬𑁆𑀬𑀦𑀸𑀦𑀢𑁆𑀢𑀢𑀸𑀬 𑀦𑀺𑀭𑀦𑁆𑀢𑀭𑀪𑀸𑀯𑀽𑀧𑀕𑀫𑀦𑀁 𑀲𑀁𑀲𑀝𑁆𑀞𑀪𑀸𑀯𑁄𑀢𑀺 ‘‘𑀲𑀼𑀯𑀺𑀜𑁆𑀜𑁂𑀬𑁆𑀬𑀦𑀸𑀦𑀢𑁆𑀢𑀢𑁆𑀢𑀸 𑀦 𑀲𑀁𑀲𑀝𑁆𑀞𑀢𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀲𑀁 𑀅𑀭𑀽𑀧𑀓𑁆𑀔𑀦𑁆𑀥𑀸𑀦𑀁. 𑀇𑀢𑀭𑁂𑀳𑀺 𑀭𑀽𑀧𑀦𑀺𑀩𑁆𑀩𑀸𑀦𑁂𑀳𑀺. 𑀓𑀺𑀁 𑀧𑀦 𑀓𑀸𑀭𑀡𑀁 𑀲𑀫𑀸𑀦𑀼𑀧𑁆𑀧𑀸𑀤𑀦𑀺𑀭𑁄𑀥𑀸𑀦𑀁 𑀏𑀓𑀓𑀮𑀸𑀧𑀪𑀽𑀢𑀸𑀦𑀁 𑀅𑀭𑀽𑀧𑀥𑀫𑁆𑀫𑀸𑀦𑀫𑁂𑀯 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀝𑁆𑀞𑀢𑀸 𑀯𑀼𑀘𑁆𑀘𑀢𑀺, 𑀦 𑀧𑀦 𑀢𑀣𑀸𑀪𑀽𑀢𑀸𑀦𑀫𑁆𑀧𑀺 𑀭𑀽𑀧𑀥𑀫𑁆𑀫𑀸𑀦𑀦𑁆𑀢𑀺 𑀆𑀳 ‘‘𑀏𑀲 𑀳𑀺 𑀢𑁂𑀲𑀁 𑀲𑀪𑀸𑀯𑁄’’𑀢𑀺. 𑀢𑁂𑀦 𑀬𑀤𑀺𑀧𑀺 𑀓𑁂𑀘𑀺 𑀅𑀭𑀽𑀧𑀥𑀫𑁆𑀫𑀸 𑀯𑀺𑀲𑀼𑀁 𑀆𑀭𑀫𑁆𑀫𑀡𑀁 𑀳𑁄𑀦𑁆𑀢𑀺, 𑀤𑀦𑁆𑀥𑀧𑁆𑀧𑀯𑀢𑁆𑀢𑀺𑀓𑀢𑁆𑀢𑀸 𑀧𑀦 𑀭𑀽𑀧𑀥𑀫𑁆𑀫𑀸𑀦𑀁𑀬𑁂𑀯 𑀲𑀼𑀯𑀺𑀜𑁆𑀜𑁂𑀬𑁆𑀬𑀦𑀸𑀦𑀢𑁆𑀢𑀁, 𑀦 𑀅𑀭𑀽𑀧𑀥𑀫𑁆𑀫𑀸𑀦𑀦𑁆𑀢𑀺 𑀢𑁂𑀲𑀁 𑀲𑀁𑀲𑀝𑁆𑀞𑀪𑀸𑀯𑁄 𑀢𑀤𑀪𑀸𑀯𑁄 𑀘 𑀇𑀢𑀭𑁂𑀲𑀁 𑀲𑀪𑀸𑀯𑀲𑀺𑀤𑁆𑀥𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀫𑀽𑀳𑀖𑀦𑀢𑀸𑀬 𑀯𑀸 𑀤𑀼𑀩𑁆𑀩𑀺𑀪𑀸𑀕𑀢𑀭𑀢𑁆𑀢𑀸 𑀦𑀢𑁆𑀣𑀺 𑀅𑀭𑀽𑀧𑀥𑀫𑁆𑀫𑀸𑀦𑀁 𑀯𑀺𑀲𑀼𑀁 𑀆𑀭𑀫𑁆𑀫𑀡𑀪𑀸𑀯𑁄𑀢𑀺 𑀤𑀼𑀯𑀺𑀜𑁆𑀜𑁂𑀬𑁆𑀬𑀦𑀸𑀦𑀢𑁆𑀢𑀢𑁆𑀢𑀸 𑀢𑁂𑀲𑀁𑀬𑁂𑀯 𑀲𑀁𑀲𑀝𑁆𑀞𑀢𑀸. 𑀅𑀫𑀼𑀜𑁆𑀘𑀺𑀢𑁆𑀯𑀸 𑀢𑀤𑀥𑀻𑀦𑀯𑀼𑀢𑁆𑀢𑀺𑀢𑀸𑀬 𑀕𑀳𑁂𑀢𑀩𑁆𑀩𑀢𑁄 𑀩𑀼𑀤𑁆𑀥𑀺𑀬𑀸.

𑁮𑁩-𑁧𑁦𑁦. 𑀓𑀸𑀫𑀢𑀡𑁆𑀳𑀸 𑀓𑀸𑀫𑁄 𑀉𑀢𑁆𑀢𑀭𑀧𑀤𑀮𑁄𑀧𑁂𑀦 𑀬𑀣𑀸 𑀭𑀽𑀧𑀪𑀯𑁄 𑀭𑀽𑀧𑀁. 𑀏𑀯𑀁 𑀲𑁂𑀲𑁂𑀲𑀼𑀧𑀺. 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦𑀸𑀢𑀺 𑀏𑀢𑁂𑀦 𑀓𑀸𑀫𑀭𑀽𑀧𑀸𑀭𑀽𑀧𑀢𑀡𑁆𑀳𑀸𑀦𑀁 𑀯𑀺𑀲𑀬𑀪𑀸𑀯𑁄 𑀬𑀣𑀸𑀓𑁆𑀓𑀫𑀁 𑀓𑀸𑀫𑀭𑀽𑀧𑀸𑀭𑀽𑀧𑀸𑀯𑀘𑀭𑀢𑀸𑀬 𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀯𑀲𑁆𑀲𑀜𑁆𑀘𑁂𑀢𑀫𑁂𑀯𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀓𑀸𑀫𑀸𑀯𑀘𑀭𑀸𑀤𑀺𑀪𑀸𑀯𑁄 𑀅𑀧𑀭𑀺𑀧𑀼𑀡𑁆𑀡𑀯𑀺𑀲𑀬𑁄 𑀲𑀺𑀬𑀸. 𑀬𑀤𑀺 𑀳𑀺 𑀆𑀮𑀫𑁆𑀩𑀺𑀢𑀩𑁆𑀩𑀥𑀫𑁆𑀫𑀯𑀲𑁂𑀦 𑀪𑀽𑀫𑀺𑀧𑀭𑀺𑀘𑁆𑀙𑁂𑀤𑁄, 𑀏𑀯𑀁 𑀲𑀢𑀺 𑀅𑀦𑀸𑀭𑀫𑁆𑀫𑀡𑀸𑀦𑀁 𑀲𑀗𑁆𑀕𑀳𑁄 𑀦 𑀲𑀺𑀬𑀸. 𑀅𑀣 𑀯𑀺𑀧𑀸𑀓𑀤𑀸𑀦𑀯𑀲𑁂𑀦, 𑀏𑀯𑀫𑁆𑀧𑀺 𑀅𑀯𑀺𑀧𑀸𑀓𑀸𑀦𑀁 𑀲𑀗𑁆𑀕𑀳𑁄 𑀦 𑀲𑀺𑀬𑀸, 𑀢𑀲𑁆𑀫𑀸 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀪𑀽𑀫𑀺𑀧𑀭𑀺𑀘𑁆𑀙𑁂𑀤𑁄 𑀓𑀸𑀢𑀩𑁆𑀩𑁄. 𑀏𑀯𑀜𑁆𑀳𑀺 𑀲𑀢𑀺 𑀓𑀸𑀫𑀸𑀯𑀘𑀭𑀸𑀤𑀺𑀪𑀸𑀯𑁄 𑀧𑀭𑀺𑀧𑀼𑀡𑁆𑀡𑀯𑀺𑀲𑀬𑁄 𑀲𑀺𑀬𑀸. 𑀢𑁂𑀦𑁂𑀯𑀸𑀳 ‘‘𑀏𑀯𑀜𑁆𑀳𑀺 𑀲𑀢𑀻’’𑀢𑀺𑀆𑀤𑀺. 𑀅𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀧𑀦 𑀮𑁄𑀓𑀢𑁄 𑀉𑀢𑁆𑀢𑀺𑀡𑁆𑀡𑀪𑀸𑀯𑁂𑀦 𑀅𑀦𑀼𑀢𑁆𑀢𑀭𑀪𑀽𑀫𑀺𑀢𑀸. 𑀅𑀓𑀸𑀫𑀸𑀯𑀘𑀭𑀸𑀤𑀺𑀢𑀸 𑀦𑀸𑀧𑀚𑁆𑀚𑀢𑀻𑀢𑀺 𑀅𑀩𑁆𑀬𑀸𑀧𑀺𑀢𑀤𑁄𑀲𑀁 𑀧𑀭𑀺𑀳𑀭𑀢𑀺, 𑀓𑀸𑀫𑀸𑀯𑀘𑀭𑀸𑀤𑀺𑀢𑀸 𑀦𑀸𑀧𑀚𑁆𑀚𑀢𑀻𑀢𑀺 𑀅𑀢𑀺𑀩𑁆𑀬𑀸𑀧𑀺𑀢𑀤𑁄𑀲𑀁. 𑀦𑀦𑀼 𑀘 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀓𑀸𑀫𑀢𑀡𑁆𑀳𑀸 𑀓𑀢𑀫𑀸, 𑀓𑀸𑀫𑀸𑀯𑀘𑀭𑀥𑀫𑁆𑀫𑀸𑀭𑀫𑁆𑀫𑀡𑀸 𑀢𑀡𑁆𑀳𑀸, 𑀓𑀸𑀫𑀸𑀯𑀘𑀭𑀥𑀫𑁆𑀫𑀸 𑀓𑀢𑀫𑁂, 𑀓𑀸𑀫𑀢𑀡𑁆𑀳𑀸𑀯𑀺𑀲𑀬𑀸𑀢𑀺 𑀇𑀢𑀭𑀻𑀢𑀭𑀦𑀺𑀲𑁆𑀲𑀬𑀢𑀸 𑀤𑁄𑀲𑁄𑀢𑀺? 𑀦, 𑀅𑀯𑀻𑀘𑀺𑀆𑀤𑀺𑀏𑀓𑀸𑀤𑀲𑁄𑀓𑀸𑀲𑀦𑀺𑀦𑁆𑀦𑀢𑀸𑀬 𑀓𑀺𑀜𑁆𑀘𑀺 𑀢𑀡𑁆𑀳𑀁 𑀓𑀸𑀫𑀢𑀡𑁆𑀳𑀸𑀪𑀸𑀯𑁂𑀦 𑀕𑀳𑁂𑀢𑁆𑀯𑀸 𑀢𑀁𑀲𑀪𑀸𑀯𑀸𑀬 𑀯𑀺𑀲𑀬𑀪𑀸𑀯𑁂𑀦 𑀓𑀸𑀫𑀸𑀯𑀘𑀭𑀥𑀫𑁆𑀫𑀸𑀦𑀁 𑀉𑀧𑀮𑀓𑁆𑀔𑁂𑀢𑀩𑁆𑀩𑀢𑁆𑀢𑀸.

𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀧𑀸𑀞𑁂𑀦 𑀲𑀫𑀢𑁆𑀣𑁂𑀦𑁆𑀢𑁄 ‘‘𑀦𑀺𑀓𑁆𑀔𑁂𑀧𑀓𑀡𑁆𑀟𑁂𑀧𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀳𑀺 𑀓𑀸𑀫𑀢𑀡𑁆𑀳𑀸𑀬 𑀆𑀮𑀫𑁆𑀩𑀺𑀢𑀩𑁆𑀩𑀢𑁆𑀢𑀸 𑀓𑀸𑀫𑀥𑀸𑀢𑀼𑀧𑀭𑀺𑀬𑀸𑀧𑀦𑁆𑀦𑀥𑀫𑁆𑀫𑀸 𑀘 𑀓𑀸𑀫𑀪𑀯𑀲𑀗𑁆𑀔𑀸𑀢𑁂 𑀓𑀸𑀫𑁂 𑀑𑀕𑀸𑀴𑁆𑀳𑀸 𑀳𑀼𑀢𑁆𑀯𑀸 𑀘𑀭𑀦𑁆𑀢𑀺, 𑀦𑀸𑀜𑁆𑀜𑀢𑁆𑀣𑀸𑀢𑀺 𑀏𑀢𑁆𑀣𑀸𑀯𑀘𑀭𑀸𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀯𑀺𑀲𑁂𑀲𑀢𑁆𑀣𑀺𑀦𑀸 𑀯𑀺𑀲𑁂𑀲𑁄 𑀅𑀦𑀼𑀧𑀬𑀼𑀚𑁆𑀚𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀮𑁄𑀓𑀲𑁆𑀲 𑀯𑀲𑁂𑀦 𑀧𑀭𑀺𑀬𑀸𑀧𑀦𑁆𑀦𑀦𑀺𑀘𑁆𑀙𑀬𑀢𑁄’’𑀢𑀺. 𑀢𑁂𑀦 𑀮𑁄𑀓𑀺𑀬𑀥𑀫𑁆𑀫𑁂𑀲𑀼 𑀧𑀭𑀺𑀬𑀸𑀧𑀦𑁆𑀦-𑀲𑀤𑁆𑀤𑀲𑁆𑀲 𑀦𑀺𑀭𑀼𑀴𑁆𑀳𑀢𑀁 𑀤𑀲𑁆𑀲𑁂𑀢𑀺 𑀪𑀕𑀯𑀢𑁄 𑀢𑀤𑀼𑀘𑁆𑀘𑀸𑀭𑀡𑀸𑀦𑀦𑁆𑀢𑀭𑀁 𑀯𑀺𑀦𑁂𑀬𑁆𑀬𑀸𑀦𑀁 𑀢𑀤𑀢𑁆𑀣𑀧𑀝𑀺𑀧𑀢𑁆𑀢𑀺𑀢𑁄. 𑀧𑀭𑀺𑀘𑁆𑀙𑁂𑀤𑀓𑀸𑀧𑁂𑀓𑁆𑀔𑀸 𑀧𑀭𑀺𑀘𑁆𑀙𑀺𑀦𑁆𑀦𑀢𑀸𑀢𑀺 ‘‘𑀧𑀭𑀺𑀘𑁆𑀙𑁂𑀤𑀓𑀸𑀭𑀺𑀓𑀸𑀬 𑀢𑀡𑁆𑀳𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀲𑀸 𑀳𑀺 𑀥𑀫𑁆𑀫𑀸𑀦𑀁 𑀓𑀸𑀫𑀸𑀯𑀘𑀭𑀸𑀤𑀺𑀪𑀸𑀯𑀁 𑀧𑀭𑀺𑀘𑁆𑀙𑀺𑀦𑁆𑀤𑀢𑀺. 𑀧𑀭𑀺-𑀲𑀤𑁆𑀤𑁄 𑀘𑁂𑀢𑁆𑀣 ‘‘𑀉𑀧𑀸𑀤𑀺𑀦𑁆𑀦𑀸’’𑀢𑀺𑀆𑀤𑀻𑀲𑀼 𑀉𑀧-𑀲𑀤𑁆𑀤𑁄 𑀯𑀺𑀬 𑀲𑀲𑀸𑀥𑀦𑀁 𑀓𑀺𑀭𑀺𑀬𑀁 𑀤𑀻𑀧𑁂𑀢𑀻𑀢𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀦𑀺𑀬𑁆𑀬𑀸𑀦𑀓𑀭𑀡𑀲𑀻𑀮𑀸 𑀦𑀺𑀬𑁆𑀬𑀸𑀦𑀺𑀓𑀸 𑀬𑀣𑀸 ‘‘𑀅𑀧𑀽𑀧𑀪𑀓𑁆𑀔𑀦𑀲𑀻𑀮𑁄 𑀆𑀧𑀽𑀧𑀺𑀓𑁄’’𑀢𑀺, 𑀦𑀺𑀬𑁆𑀬𑀸𑀦𑀲𑀻𑀮𑀸 𑀏𑀯 𑀯𑀸. 𑀭𑀸𑀕𑀤𑁄𑀲𑀫𑁄𑀳𑀸𑀯 𑀕𑀳𑀺𑀢𑀸𑀢𑀺 𑀜𑀸𑀬𑀢𑀺, 𑀇𑀢𑀭𑀣𑀸 𑀧𑀳𑀸𑀦𑁂𑀓𑀝𑁆𑀞𑀢𑀸𑀯𑀘𑀦𑀁 𑀦𑀺𑀧𑁆𑀧𑀬𑁄𑀚𑀦𑀁 𑀲𑀺𑀬𑀸. ‘‘𑀭𑀡𑁄𑀳𑀢𑀸 𑀦 𑀚𑁄𑀢𑀦𑁆𑀢𑀺, 𑀘𑀦𑁆𑀤𑀲𑀽𑀭𑀺𑀬𑀸 𑀲𑀢𑀸𑀭𑀓𑀸’’𑀢𑀺𑀆𑀤𑀻𑀲𑀼 𑀭𑀡-𑀲𑀤𑁆𑀤𑀲𑁆𑀲 𑀭𑁂𑀡𑀼𑀧𑀭𑀺𑀬𑀸𑀬𑀢𑀸 𑀤𑀝𑁆𑀞𑀩𑁆𑀩𑀸. 𑀲𑀫𑁆𑀧𑀳𑀸𑀭𑀧𑀭𑀺𑀬𑀸𑀬𑀢𑁆𑀢𑀸 𑀬𑀼𑀤𑁆𑀥-𑀲𑀤𑁆𑀤𑀲𑁆𑀲 𑀲𑀫𑁆𑀧𑀳𑀸𑀭𑁄 𑀘 𑀧𑀳𑀭𑀺𑀢𑀩𑁆𑀩𑀸𑀥𑀸𑀭𑁄𑀢𑀺 𑀅𑀓𑀼𑀲𑀮𑀲𑁂𑀦𑀸𑀯 ‘‘𑀲𑀭𑀡𑀸’’𑀢𑀺 𑀯𑀼𑀢𑁆𑀢𑀸. 𑀤𑀼𑀓𑁆𑀔𑀸𑀤𑀻𑀦𑀦𑁆𑀢𑀺 𑀨𑀮𑀪𑀽𑀢𑀸𑀦𑀁 𑀤𑀼𑀓𑁆𑀔𑀯𑀺𑀖𑀸𑀢𑀉𑀧𑀸𑀬𑀸𑀲𑀧𑀭𑀺𑀴𑀸𑀳𑀸𑀦𑀁 𑀲𑀪𑀸𑀕𑀪𑀽𑀢𑀸𑀬 𑀘 𑀫𑀺𑀘𑁆𑀙𑀸𑀧𑀝𑀺𑀧𑀤𑀸𑀬. 𑀢𑀦𑁆𑀦𑀺𑀩𑁆𑀩𑀢𑁆𑀢𑀓𑀲𑀪𑀸𑀯𑀸𑀦𑀁 𑀅𑀓𑀼𑀲𑀮𑀸𑀦𑀦𑁆𑀢𑀺 𑀏𑀢𑁂𑀦 𑀲𑀩𑁆𑀩𑁂𑀲𑀫𑁆𑀧𑀺 𑀅𑀓𑀼𑀲𑀮𑀸𑀦𑀁 𑀲𑀭𑀡𑀢𑀁 𑀤𑀲𑁆𑀲𑁂𑀢𑀺.

𑀅𑀪𑀺𑀥𑀫𑁆𑀫𑀤𑀼𑀓𑀫𑀸𑀢𑀺𑀓𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀼𑀢𑁆𑀢𑀦𑁆𑀢𑀺𑀓𑀤𑀼𑀓𑀫𑀸𑀢𑀺𑀓𑀸𑀧𑀤𑀯𑀡𑁆𑀡𑀦𑀸

𑁧𑁦𑁧-𑁧𑁦𑁮. 𑀯𑀺𑀚𑁆𑀚𑀸𑀲𑀪𑀸𑀕𑀢𑀸𑀬, 𑀦 𑀲𑀗𑁆𑀓𑀧𑁆𑀧𑀸𑀤𑀬𑁄 𑀯𑀺𑀬 𑀯𑀺𑀚𑁆𑀚𑀸𑀬 𑀉𑀧𑀓𑀸𑀭𑀓𑀪𑀸𑀯𑀢𑁄. ‘‘𑀅𑀪𑁂𑀚𑁆𑀚𑀁…𑀧𑁂… 𑀭𑀼𑀳𑀢𑀻’’𑀢𑀺 𑀉𑀪𑀬𑀫𑁆𑀧𑀺 𑀅𑀦𑀯𑀲𑁂𑀲𑀧𑁆𑀧𑀳𑀸𑀦𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀺𑀜𑁆𑀘𑀸𑀧𑀺 𑀳𑀺 𑀳𑁂𑀝𑁆𑀞𑀺𑀫𑀫𑀕𑁆𑀕𑁂𑀳𑀺𑀧𑀺 𑀧𑀳𑀻𑀬𑀫𑀸𑀦𑀸 𑀓𑀺𑀮𑁂𑀲𑀸 𑀢𑁂𑀦 𑀢𑁂𑀦 𑀑𑀥𑀺𑀦𑀸 𑀅𑀦𑀯𑀲𑁂𑀲𑀫𑁂𑀯 𑀧𑀳𑀻𑀬𑀦𑁆𑀢𑀺, 𑀬𑁂 𑀧𑀦 𑀅𑀯𑀲𑀺𑀝𑁆𑀞𑀸 𑀪𑀺𑀦𑁆𑀤𑀺𑀢𑀩𑁆𑀩𑀸, 𑀢𑁂 𑀮𑁄𑀪𑀸𑀤𑀺𑀓𑀺𑀮𑁂𑀲𑀪𑀸𑀯𑀲𑀸𑀫𑀜𑁆𑀜𑀢𑁄 𑀧𑀼𑀦 𑀯𑀺𑀭𑀼𑀴𑁆𑀳𑀸 𑀯𑀺𑀬 𑀳𑁄𑀦𑁆𑀢𑀺. 𑀅𑀭𑀳𑀢𑁆𑀢𑀫𑀕𑁆𑀕𑁂 𑀧𑀦 𑀉𑀧𑁆𑀧𑀦𑁆𑀦𑁂 𑀦 𑀏𑀯𑀁 𑀅𑀯𑀲𑀺𑀝𑁆𑀞𑀸𑀪𑀸𑀯𑀢𑁄. 𑀢𑀤𑀼𑀧𑀘𑀸𑀭𑁂𑀦 𑀦𑀺𑀲𑁆𑀲𑀬𑀯𑁄𑀳𑀸𑀭𑁂𑀦. 𑀓𑀼𑀲𑀮𑁂𑀳𑀺 𑀢𑀸𑀧𑁂𑀢𑀩𑁆𑀩𑀸𑀢𑀺 𑀯𑀸 𑀢𑀧𑀦𑀺𑀬𑀸, 𑀢𑀤𑀗𑁆𑀕𑀸𑀤𑀺𑀯𑀲𑁂𑀦 𑀩𑀸𑀥𑀺𑀢𑀩𑁆𑀩𑀸 𑀧𑀳𑀸𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀲𑀫𑀸𑀦𑀢𑁆𑀣𑀸𑀦𑀺 𑀅𑀥𑀺𑀯𑀘𑀦𑀸𑀤𑀻𑀦𑀁 𑀲𑀗𑁆𑀔𑀸𑀤𑀺𑀪𑀸𑀯𑀢𑁄. ‘‘𑀲𑀩𑁆𑀩𑁂𑀯 𑀥𑀫𑁆𑀫𑀸 𑀅𑀥𑀺𑀯𑀘𑀦𑀧𑀣𑀸’’𑀢𑀺𑀆𑀤𑀺𑀦𑀸 𑀅𑀥𑀺𑀯𑀘𑀦𑀸𑀤𑀻𑀦𑀁 𑀯𑀺𑀲𑀬𑀪𑀸𑀯𑁂 𑀦 𑀓𑁄𑀘𑀺 𑀥𑀫𑁆𑀫𑁄 𑀯𑀚𑁆𑀚𑀺𑀢𑁄, 𑀯𑀘𑀦𑀪𑀸𑀯𑁄 𑀏𑀯 𑀘 𑀅𑀥𑀺𑀯𑀘𑀦𑀸𑀤𑀻𑀦𑀁 𑀯𑀓𑁆𑀔𑀫𑀸𑀦𑁂𑀦 𑀦𑀬𑁂𑀦 𑀬𑀼𑀚𑁆𑀚𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀲𑀩𑁆𑀩𑀜𑁆𑀘 𑀯𑀘𑀦𑀁 𑀅𑀥𑀺𑀯𑀘𑀦𑀸𑀤𑀺𑀪𑀸𑀯𑀁 𑀪𑀚𑀢𑀻’’𑀢𑀺.

𑁧𑁦𑁯-𑁧𑁧𑁮. 𑀅𑀜𑁆𑀜𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀲𑀬𑀫𑁂𑀯 𑀅𑀢𑁆𑀢𑀦𑁄 𑀦𑀸𑀫𑀓𑀭𑀡𑀲𑀪𑀸𑀯𑁄 𑀦𑀸𑀫𑀓𑀭𑀡𑀝𑁆𑀞𑁄𑀢𑀺, 𑀢𑁂𑀦 𑀅𑀭𑀽𑀧𑀥𑀫𑁆𑀫𑀸𑀦𑀁 𑀯𑀺𑀬 𑀑𑀧𑀧𑀸𑀢𑀺𑀓𑀦𑀸𑀫𑀢𑀸𑀬 𑀧𑀣𑀯𑀻𑀆𑀤𑀻𑀦𑀫𑁆𑀧𑀺 𑀦𑀸𑀫𑀪𑀸𑀯𑁄 𑀲𑀺𑀬𑀸𑀢𑀺 𑀆𑀲𑀗𑁆𑀓𑀸𑀬 𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀦𑀸𑀫𑀦𑁆𑀢𑀭𑀸𑀦𑀸𑀧𑀚𑁆𑀚𑀦𑀢𑁄’’𑀢𑀺 𑀆𑀳. 𑀦 𑀳𑀺 𑀯𑀺𑀦𑀸 𑀧𑀣𑀯𑀻𑀆𑀤𑀺𑀦𑀸𑀫𑁂𑀦𑀧𑀺 𑀭𑀽𑀧𑀥𑀫𑁆𑀫𑀸 𑀯𑀺𑀬 𑀓𑁂𑀲𑀸𑀤𑀺𑀦𑀸𑀫𑁂𑀳𑀺 𑀯𑀺𑀦𑀸 𑀯𑁂𑀤𑀦𑀸𑀤𑀺𑀦𑀸𑀫𑁂𑀳𑀺 𑀅𑀜𑁆𑀜𑁂𑀦 𑀦𑀸𑀫𑁂𑀦 𑀅𑀭𑀽𑀧𑀥𑀫𑁆𑀫𑀸 𑀧𑀺𑀡𑁆𑀟𑀸𑀓𑀸𑀭𑀢𑁄 𑀯𑁄𑀳𑀭𑀻𑀬𑀦𑁆𑀢𑀻𑀢𑀺. 𑀬𑀁 𑀧𑀦 𑀧𑀭𑀲𑁆𑀲 𑀦𑀸𑀫𑀁 𑀓𑀭𑁄𑀢𑀺, 𑀢𑀲𑁆𑀲 𑀅𑀜𑁆𑀜𑀸𑀧𑁂𑀓𑁆𑀔𑀁 𑀦𑀸𑀫𑀓𑀭𑀡𑀦𑁆𑀢𑀺 𑀦𑀸𑀫𑀓𑀭𑀡𑀲𑀪𑀸𑀯𑀢𑀸 𑀦𑀢𑁆𑀣𑀻𑀢𑀺 𑀲𑀸𑀫𑀜𑁆𑀜𑀦𑀸𑀫𑀸𑀤𑀺𑀓𑀭𑀡𑀸𑀦𑀁 𑀦𑀸𑀫𑀪𑀸𑀯𑁄 𑀦𑀸𑀧𑀚𑁆𑀚𑀢𑀺. 𑀬𑀲𑁆𑀲 𑀘𑀜𑁆𑀜𑁂𑀳𑀺 𑀦𑀸𑀫𑀁 𑀓𑀭𑀻𑀬𑀢𑀺, 𑀢𑀲𑁆𑀲 𑀦𑀸𑀫𑀓𑀭𑀡𑀲𑀪𑀸𑀯𑀢𑀸𑀬 𑀅𑀪𑀸𑀯𑁄𑀬𑁂𑀯𑀸𑀢𑀺 𑀦𑀢𑁆𑀣𑀺 𑀦𑀸𑀫𑀪𑀸𑀯𑁄. 𑀬𑁂 𑀧𑀦 𑀅𑀦𑀸𑀧𑀦𑁆𑀦𑀦𑀸𑀫𑀦𑁆𑀢𑀭𑀸 𑀲𑀪𑀸𑀯𑀲𑀺𑀤𑁆𑀥𑀦𑀸𑀫𑀸 𑀘, 𑀢𑁂 𑀯𑁂𑀤𑀦𑀸𑀤𑀬𑁄𑀯 𑀦𑀸𑀫𑀁 𑀦𑀸𑀫𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀢𑁆𑀢𑀦𑀸𑀯𑀸’’𑀢𑀺𑀆𑀤𑀺𑀫𑀸𑀳. 𑀨𑀲𑁆𑀲𑀸𑀤𑀻𑀦𑀁 𑀆𑀭𑀫𑁆𑀫𑀡𑀸𑀪𑀺𑀫𑀼𑀔𑀢𑀸 𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 𑀅𑀧𑁆𑀧𑀯𑀢𑁆𑀢𑀺𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀯𑀺𑀦𑀸𑀪𑀸𑀯𑀢𑁄’’𑀢𑀺 𑀯𑀼𑀢𑁆𑀢𑀁. 𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑁄 𑀫𑀦𑁄𑀲𑀫𑁆𑀨𑀲𑁆𑀲𑁄, 𑀲𑁄 𑀦𑀸𑀫𑀫𑀦𑁆𑀢𑀭𑁂𑀦 𑀕𑀳𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀧𑀸𑀓𑀝𑁄𑀢𑀺 𑀦𑀺𑀤𑀲𑁆𑀲𑀦𑀪𑀸𑀯𑁂𑀦 𑀯𑀼𑀢𑁆𑀢𑁄. 𑀭𑀼𑀧𑁆𑀧𑀦𑀲𑀪𑀸𑀯𑁂𑀦𑀸𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀧𑀓𑀸𑀲𑀓𑀧𑀓𑀸𑀲𑀺𑀢𑀩𑁆𑀩𑀪𑀸𑀯𑁂𑀦𑀧𑀺 𑀳𑀺 𑀯𑀺𑀦𑀸𑀧𑀺 𑀦𑀸𑀫𑁂𑀦 𑀭𑀽𑀧𑀥𑀫𑁆𑀫𑀸 𑀧𑀸𑀓𑀝𑀸 𑀳𑁄𑀦𑁆𑀢𑀻𑀢𑀺. 𑀅𑀣 𑀯𑀸 𑀧𑀓𑀸𑀲𑀓𑀧𑀓𑀸𑀲𑀺𑀢𑀩𑁆𑀩𑀪𑀸𑀯𑁄 𑀯𑀺𑀲𑀬𑀺𑀯𑀺𑀲𑀬𑀪𑀸𑀯𑁄 𑀘𑀓𑁆𑀔𑀼𑀭𑀽𑀧𑀸𑀤𑀻𑀦𑀁 𑀲𑀪𑀸𑀯𑁄, 𑀲𑁄 𑀭𑀼𑀧𑁆𑀧𑀦𑀲𑀪𑀸𑀯𑁂 𑀲𑀸𑀫𑀜𑁆𑀜𑁂 𑀅𑀦𑁆𑀢𑁄𑀕𑀥𑁄𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁧𑁯-𑁧𑁨𑁩. 𑀇𑀢𑁄 𑀧𑀼𑀩𑁆𑀩𑁂 𑀧𑀭𑀺𑀓𑀫𑁆𑀫𑀦𑁆𑀢𑀺𑀆𑀤𑀺𑀦𑀸 𑀲𑀫𑀸𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀓𑀼𑀲𑀮𑀢𑀸 𑀯𑀺𑀬 𑀲𑀫𑀸𑀧𑀢𑁆𑀢𑀺𑀓𑀼𑀲𑀮𑀢𑀸𑀧𑀺 𑀛𑀸𑀦𑀮𑀸𑀪𑀻𑀦𑀁𑀬𑁂𑀯 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺. ‘‘𑀇𑀢𑀭𑁂𑀲𑀫𑁆𑀧𑀺 𑀅𑀦𑀼𑀲𑁆𑀲𑀯𑀯𑀲𑁂𑀦 𑀲𑀫𑀸𑀧𑀢𑁆𑀢𑀻𑀦𑀁 𑀅𑀧𑁆𑀧𑀦𑀸𑀧𑀭𑀺𑀘𑁆𑀙𑁂𑀤𑀧𑀜𑁆𑀜𑀸 𑀮𑀩𑁆𑀪𑀢𑀻’’𑀢𑀺 𑀯𑀤𑀦𑁆𑀢𑀺. ‘‘𑀏𑀯𑀁 𑀲𑀻𑀮𑀯𑀺𑀲𑁄𑀥𑀦𑀸𑀤𑀺𑀦𑀸 𑀲𑀫𑀸𑀧𑀢𑁆𑀢𑀺𑀁 𑀅𑀧𑁆𑀧𑁂𑀢𑀻𑀢𑀺 𑀚𑀸𑀦𑀦𑀓𑀧𑀜𑁆𑀜𑀸 𑀲𑀳 𑀧𑀭𑀺𑀓𑀫𑁆𑀫𑁂𑀦 𑀅𑀧𑁆𑀧𑀦𑀸𑀧𑀭𑀺𑀘𑁆𑀙𑁂𑀤𑀚𑀸𑀦𑀦𑀓𑀧𑀜𑁆𑀜𑀸’’𑀢𑀺 𑀓𑁂𑀘𑀺. 𑀯𑀼𑀝𑁆𑀞𑀸𑀦𑁂 𑀓𑀼𑀲𑀮𑀪𑀸𑀯𑁄 𑀯𑀼𑀝𑁆𑀞𑀸𑀦𑀯𑀲𑀺𑀢𑀸. 𑀧𑀼𑀩𑁆𑀩𑁂𑀢𑀺 𑀲𑀫𑀸𑀧𑀚𑁆𑀚𑀦𑀢𑁄 𑀧𑀼𑀩𑁆𑀩𑁂.

𑁧𑁨𑁪-𑁧𑁩𑁪. 𑀲𑁄𑀪𑀦𑁂 𑀭𑀢𑁄 𑀲𑀼𑀭𑀢𑁄, 𑀢𑀲𑁆𑀲 𑀪𑀸𑀯𑁄 𑀲𑁄𑀭𑀘𑁆𑀘𑀦𑁆𑀢𑀺 𑀆𑀳 ‘‘𑀲𑁄𑀪𑀦𑀓𑀫𑁆𑀫𑀭𑀢𑀢𑀸’’𑀢𑀺. 𑀲𑀼𑀝𑁆𑀞𑀼 𑀯𑀸 𑀑𑀭𑀢𑁄 𑀯𑀺𑀭𑀢𑁄 𑀲𑁄𑀭𑀢𑁄, 𑀢𑀲𑁆𑀲 𑀪𑀸𑀯𑁄 𑀲𑁄𑀭𑀘𑁆𑀘𑀦𑁆𑀢𑀺. 𑀅𑀬𑀁 𑀧𑀦𑀢𑁆𑀣𑁄 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄 𑀏𑀯. 𑀅𑀧𑁆𑀧𑀝𑀺𑀲𑀗𑁆𑀔𑀸𑀦𑀁 𑀫𑁄𑀳𑁄. 𑀓𑀼𑀲𑀮𑀪𑀸𑀯𑀦𑀸 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸𑀦𑀁 𑀯𑀟𑁆𑀠𑀦𑀸. 𑀲𑀜𑁆𑀜𑀸𑀡𑀁 𑀉𑀧𑀮𑀓𑁆𑀔𑀡𑀁. 𑀲𑀯𑀺𑀕𑁆𑀕𑀳𑀁 𑀲𑀩𑀺𑀫𑁆𑀩𑀓𑀁. 𑀉𑀧𑀮𑀓𑁆𑀔𑁂𑀢𑀩𑁆𑀩𑀸𑀓𑀸𑀭𑀁 𑀥𑀫𑁆𑀫𑀚𑀸𑀢𑀁, 𑀆𑀭𑀫𑁆𑀫𑀡𑀁 𑀯𑀸. 𑀅𑀯𑀺𑀓𑁆𑀔𑁂𑀧𑁄𑀢𑀺 𑀘𑀺𑀢𑁆𑀢𑀯𑀺𑀓𑁆𑀔𑁂𑀧𑀧𑀝𑀺𑀧𑀓𑁆𑀔𑁄. 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑀢𑀸𑀬 𑀳𑀺 𑀧𑀳𑀸𑀦𑀯𑀼𑀝𑁆𑀞𑀸𑀦𑁂𑀦 𑀘 𑀅𑀯𑀺𑀓𑁆𑀔𑁂𑀧𑁄 𑀯𑀺𑀓𑁆𑀔𑁂𑀧𑀁 𑀧𑀝𑀺𑀓𑁆𑀔𑀺𑀧𑀢𑀺, 𑀧𑀯𑀢𑁆𑀢𑀺𑀢𑀼𑀁 𑀦 𑀤𑁂𑀢𑀻𑀢𑀺.

𑁧𑁩𑁫-𑁧𑁪𑁨. 𑀓𑀸𑀭𑀡𑀲𑀻𑀮𑀁 𑀮𑁄𑀓𑀺𑀬𑀁. 𑀨𑀮𑀲𑀻𑀮𑀁 𑀮𑁄𑀓𑀼𑀢𑁆𑀢𑀭𑀁 𑀢𑁂𑀦 𑀲𑀺𑀚𑁆𑀛𑀢𑀻𑀢𑀺 𑀓𑀢𑁆𑀯𑀸, 𑀮𑁄𑀓𑀺𑀬𑀲𑁆𑀲𑀧𑀺 𑀯𑀸 𑀲𑀻𑀮𑀲𑁆𑀲 𑀓𑀸𑀭𑀡𑀨𑀮𑀪𑀸𑀯𑁄 𑀧𑀼𑀩𑁆𑀩𑀸𑀧𑀭𑀪𑀸𑀯𑁂𑀦 𑀤𑀝𑁆𑀞𑀩𑁆𑀩𑁄. 𑀲𑀫𑁆𑀧𑀦𑁆𑀦𑀲𑀫𑀼𑀤𑀸𑀬𑀲𑁆𑀲 𑀧𑀭𑀺𑀧𑀼𑀡𑁆𑀡𑀲𑀫𑀽𑀳𑀲𑁆𑀲. 𑀅𑀓𑀼𑀲𑀮𑀸 𑀲𑀻𑀮𑀸 𑀅𑀓𑀼𑀲𑀮𑀸 𑀲𑀫𑀸𑀘𑀸𑀭𑀸. 𑀲𑀻𑀮𑀲𑀫𑁆𑀧𑀤𑀸 𑀲𑀻𑀮𑀲𑀫𑁆𑀧𑀢𑁆𑀢𑀺 𑀲𑀻𑀮𑀕𑀼𑀡𑀸𑀢𑀺 𑀅𑀢𑁆𑀣𑁄. 𑀲𑀳𑁄𑀢𑁆𑀢𑀧𑁆𑀧𑀁 𑀜𑀸𑀡𑀦𑁆𑀢𑀺 𑀑𑀢𑁆𑀢𑀧𑁆𑀧𑀲𑁆𑀲 𑀜𑀸𑀡𑀧𑁆𑀧𑀥𑀸𑀦𑀢𑀁 𑀆𑀳, 𑀦 𑀧𑀦 𑀜𑀸𑀡𑀲𑁆𑀲 𑀑𑀢𑁆𑀢𑀧𑁆𑀧𑀲𑀳𑀺𑀢𑀢𑀸𑀫𑀢𑁆𑀢𑀁. 𑀦 𑀳𑀺 𑀑𑀢𑁆𑀢𑀧𑁆𑀧𑀭𑀳𑀺𑀢𑀁 𑀜𑀸𑀡𑀁 𑀅𑀢𑁆𑀣𑀻𑀢𑀺. 𑀅𑀥𑀺𑀫𑀼𑀢𑁆𑀢𑀢𑀸 𑀅𑀪𑀺𑀭𑀢𑀺𑀯𑀲𑁂𑀦 𑀦𑀺𑀭𑀸𑀲𑀗𑁆𑀓𑀸𑀧𑀯𑀢𑁆𑀢𑀺. 𑀦𑀺𑀲𑁆𑀲𑀝𑀢𑀸 𑀯𑀺𑀲𑀁𑀬𑀼𑀢𑁆𑀢𑀢𑀸. 𑀏𑀢𑁆𑀣 𑀘 𑀅𑀥𑀺𑀫𑀼𑀢𑁆𑀢𑀢𑀸𑀦𑀺𑀲𑁆𑀲𑀝𑀢𑀸𑀯𑀘𑀦𑁂𑀳𑀺 𑀢𑀤𑀼𑀪𑀬𑀧𑀭𑀺𑀬𑀸𑀬𑀸 𑀤𑁆𑀯𑁂 𑀯𑀺𑀫𑀼𑀢𑁆𑀢𑀺𑀬𑁄 𑀏𑀓𑀲𑁂𑀲𑀦𑀬𑁂𑀦 𑀇𑀥 ‘‘𑀯𑀺𑀫𑀼𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀘𑀺𑀢𑁆𑀢𑀲𑁆𑀲 𑀘 𑀅𑀥𑀺𑀫𑀼𑀢𑁆𑀢𑀺 𑀦𑀺𑀩𑁆𑀩𑀸𑀦𑀜𑁆𑀘𑀸’’𑀢𑀺. 𑀉𑀧𑁆𑀧𑀚𑁆𑀚𑀢𑀺 𑀏𑀢𑁂𑀦𑀸𑀢𑀺 𑀉𑀧𑁆𑀧𑀸𑀤𑁄, 𑀦 𑀉𑀧𑁆𑀧𑀸𑀤𑁄𑀢𑀺 𑀅𑀦𑀼𑀧𑁆𑀧𑀸𑀤𑁄, 𑀢𑀩𑁆𑀪𑀽𑀢𑁂 𑀅𑀦𑀼𑀧𑁆𑀧𑀸𑀤𑀧𑀭𑀺𑀬𑁄𑀲𑀸𑀦𑁂 𑀯𑀺𑀫𑁄𑀓𑁆𑀔𑀦𑁆𑀢𑁂 𑀅𑀦𑀼𑀧𑁆𑀧𑀸𑀤𑀲𑁆𑀲 𑀅𑀭𑀺𑀬𑀫𑀕𑁆𑀕𑀲𑁆𑀲 𑀓𑀺𑀮𑁂𑀲𑀸𑀦𑀁 𑀯𑀸 𑀅𑀦𑀼𑀧𑁆𑀧𑀚𑁆𑀚𑀦𑀲𑁆𑀲 𑀧𑀭𑀺𑀬𑁄𑀲𑀸𑀦𑁂𑀢𑀺 𑀞𑀸𑀦𑀨𑀮𑁂𑀳𑀺 𑀅𑀭𑀺𑀬𑀨𑀮𑀫𑁂𑀯 𑀉𑀧𑀮𑀓𑁆𑀔𑀻𑀬𑀢𑀻𑀢𑀺 𑀤𑀝𑁆𑀞𑀩𑁆𑀩𑀁.

𑀫𑀸𑀢𑀺𑀓𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀸𑀫𑀸𑀯𑀘𑀭𑀓𑀼𑀲𑀮𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁧. 𑀅𑀧𑁆𑀧𑁂𑀢𑀼𑀦𑁆𑀢𑀺 𑀦𑀺𑀕𑀫𑁂𑀢𑀼𑀁. ‘‘𑀧𑀤𑀪𑀸𑀚𑀦𑀻𑀬𑀁 𑀦 𑀯𑀼𑀢𑁆𑀢’’𑀦𑁆𑀢𑀺 𑀧𑀤𑀪𑀸𑀚𑀦𑀻𑀬𑀸𑀯𑀘𑀦𑁂𑀦 𑀅𑀧𑁆𑀧𑀦𑀸𑀯𑀭𑁄𑀥𑀁 𑀲𑀸𑀥𑁂𑀢𑁆𑀯𑀸 𑀧𑀤𑀪𑀸𑀚𑀦𑀻𑀬𑀸𑀯𑀘𑀦𑀲𑁆𑀲 𑀓𑀸𑀭𑀡𑀁 𑀯𑀤𑀦𑁆𑀢𑁄 ‘‘𑀲𑀭𑀽𑀧𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀨𑀲𑁆𑀲𑁄 𑀳𑁄𑀢𑀻’’𑀢𑀺𑀆𑀤𑀻𑀲𑀼 𑀳𑁄𑀢𑀺-𑀲𑀤𑁆𑀤𑁄 𑀅𑀢𑁆𑀣𑀺-𑀲𑀤𑁆𑀤𑁂𑀦 𑀅𑀦𑀸𑀦𑀢𑁆𑀣𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁 ‘‘𑀤𑀼𑀢𑀺𑀬𑁂𑀦 𑀳𑁄𑀢𑀺-𑀲𑀤𑁆𑀤𑁂𑀦𑀸’’𑀢𑀺. 𑀧𑀼𑀩𑁆𑀩𑁂 𑀅𑀝𑁆𑀞𑀓𑀣𑀸𑀥𑀺𑀧𑁆𑀧𑀸𑀬𑁂𑀦 𑀯𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑀲𑁆𑀲 𑀧𑀸𑀴𑀺𑀧𑁆𑀧𑀤𑁂𑀲𑀲𑁆𑀲 𑀅𑀧𑁆𑀧𑀦𑀸𑀯𑀭𑁄𑀥𑁄 𑀲𑀫𑀢𑁆𑀣𑀺𑀢𑁄𑀢𑀺 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀗𑁆𑀔𑁂𑀧𑁂𑀦𑀸’’𑀢𑀺𑀆𑀤𑀺𑀫𑀸𑀳.

𑀜𑀸𑀢𑀼𑀁 𑀇𑀘𑁆𑀙𑀺𑀢𑁄𑀢𑀺 𑀮𑀓𑁆𑀔𑀡𑀲𑁆𑀲 𑀧𑀼𑀘𑁆𑀙𑀸𑀯𑀺𑀲𑀬𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀬𑁂𑀦 𑀓𑁂𑀦𑀘𑀻𑀢𑀺 𑀤𑀲𑁆𑀲𑀦𑀸𑀤𑀺𑀯𑀺𑀲𑁂𑀲𑀬𑀼𑀢𑁆𑀢𑁂𑀦, 𑀇𑀢𑀭𑁂𑀦 𑀯𑀸. 𑀅𑀯𑀢𑁆𑀣𑀸𑀯𑀺𑀲𑁂𑀲𑁄 𑀳𑀺 𑀜𑀸𑀡𑀲𑁆𑀲 𑀤𑀲𑁆𑀲𑀦𑀢𑀼𑀮𑀦𑀢𑀻𑀭𑀡𑀸𑀦𑀺. ‘‘𑀅𑀤𑀺𑀝𑁆𑀞𑀢’’𑀦𑁆𑀢𑀺𑀆𑀤𑀻𑀲𑀼 𑀆𑀳𑀸𑀢𑀺 𑀬𑁄𑀚𑁂𑀢𑀩𑁆𑀩𑀁, 𑀲𑀩𑁆𑀩𑀢𑁆𑀣 𑀘 𑀮𑀓𑁆𑀔𑀡𑀲𑁆𑀲𑀸𑀢𑀺. 𑀢𑀜𑁆𑀳𑁂𑀢𑁆𑀣 𑀅𑀥𑀺𑀓𑀢𑀦𑁆𑀢𑀺. 𑀅𑀤𑀺𑀝𑁆𑀞𑀁 𑀚𑁄𑀢𑀻𑀬𑀢𑀺 𑀏𑀢𑀸𑀬𑀸𑀢𑀺 𑀏𑀢𑁂𑀦 𑀤𑀺𑀝𑁆𑀞𑀁 𑀲𑀁𑀲𑀦𑁆𑀤𑀢𑀺 𑀏𑀢𑀸𑀬𑀸𑀢𑀺 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸. 𑀯𑀺𑀫𑀢𑀺𑀁 𑀙𑀺𑀦𑁆𑀤𑀢𑀺 𑀏𑀢𑀸𑀬𑀸𑀢𑀺 𑀯𑀺𑀫𑀢𑀺𑀘𑁆𑀙𑁂𑀤𑀦𑀸𑀢𑀺 𑀏𑀢𑀸𑀲𑀫𑁆𑀧𑀺 𑀲𑀤𑁆𑀤𑀢𑁆𑀣𑁄 𑀦𑀬𑀢𑁄 𑀤𑀲𑁆𑀲𑀺𑀢𑁄, 𑀅𑀢𑁆𑀣𑀢𑁄 𑀧𑀦 𑀲𑀩𑁆𑀩𑀸𑀧𑀺 𑀢𑀣𑀸𑀧𑀯𑀢𑁆𑀢𑀁 𑀯𑀘𑀦𑀁, 𑀢𑀤𑀼𑀧𑁆𑀧𑀸𑀤𑀓𑁄 𑀯𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀜𑁆𑀜𑀫𑀜𑁆𑀜𑀢𑁄 𑀧𑀪𑀺𑀚𑁆𑀚𑀢𑀻𑀢𑀺 𑀧𑀪𑁂𑀤𑁄, 𑀯𑀺𑀲𑁂𑀲𑁄, 𑀢𑁂𑀦 𑀧𑀪𑁂𑀤𑁂𑀦. 𑀥𑀫𑁆𑀫𑀸𑀦𑀁 𑀤𑁂𑀲𑀦𑀦𑁆𑀢𑀺 𑀓𑀺𑀜𑁆𑀘𑀸𑀧𑀺 𑀲𑀫𑀬𑀪𑀽𑀫𑀺𑀚𑀸𑀢𑀺𑀆𑀭𑀫𑁆𑀫𑀡𑀲𑀪𑀸𑀯𑀸𑀤𑀺𑀯𑀲𑁂𑀦 𑀅𑀦𑀯𑀲𑁂𑀲𑀧𑁆𑀧𑀪𑁂𑀤𑀧𑀭𑀺𑀕𑁆𑀕𑀳𑀢𑁄 𑀦𑀺𑀤𑁆𑀤𑁂𑀲𑀤𑁂𑀲𑀦𑀸𑀯 𑀯𑀢𑁆𑀢𑀼𑀁 𑀬𑀼𑀢𑁆𑀢𑀸, 𑀢𑀣𑀸𑀧𑀺 𑀓𑀼𑀲𑀮𑀸𑀤𑀺𑀫𑀸𑀢𑀺𑀓𑀸𑀧𑀤𑀲𑀗𑁆𑀕𑀳𑀺𑀢𑀯𑀺𑀲𑁂𑀲𑁄𑀬𑁂𑀯 𑀇𑀥 𑀧𑀪𑁂𑀤𑁄𑀢𑀺 𑀅𑀥𑀺𑀧𑁆𑀧𑁂𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀧𑀪𑁂𑀤…𑀧𑁂… 𑀤𑁂𑀲𑀦𑀁 𑀆𑀳𑀸’’𑀢𑀺. 𑀢𑁂𑀦𑁂𑀯𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀓𑀼𑀲𑀮…𑀧𑁂… 𑀤𑀻𑀧𑁂𑀢𑁆𑀯𑀸𑀢𑀺 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀻’’𑀢𑀺 (𑀥. 𑀲. 𑀅𑀝𑁆𑀞. 𑀥𑀫𑁆𑀫𑀼𑀤𑁆𑀤𑁂𑀲𑀯𑀸𑀭 𑀨𑀲𑁆𑀲𑀧𑀜𑁆𑀘𑀫𑀓𑀭𑀸𑀲𑀺𑀯𑀡𑁆𑀡𑀦𑀸). ‘‘𑀨𑀲𑁆𑀲𑁄 𑀨𑀼𑀲𑀦𑀸’’𑀢𑀺𑀆𑀤𑀺𑀦𑀸 𑀘 𑀧𑀪𑁂𑀤𑀯𑀦𑁆𑀢𑁄𑀯 𑀲𑀸𑀢𑀺𑀲𑀬𑀁 𑀦𑀺𑀤𑁆𑀤𑀺𑀝𑁆𑀞𑀸, 𑀦 𑀧𑀦 𑀫𑀸𑀢𑀺𑀓𑀸𑀬𑀁 𑀯𑀼𑀢𑁆𑀢𑀧𑁆𑀧𑀪𑁂𑀤𑁄𑀢𑀺 𑀧𑀪𑁂𑀤𑀯𑀦𑁆𑀢𑀤𑀲𑁆𑀲𑀦𑀁 𑀦𑀺𑀤𑁆𑀤𑁂𑀲𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺𑀆𑀤𑀺𑀦𑀸 ‘‘𑀧𑀪𑁂𑀤𑁂…𑀧𑁂… 𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺 𑀇𑀫𑀲𑁆𑀲 𑀯𑀸𑀓𑁆𑀬𑀲𑁆𑀲 𑀧𑀺𑀡𑁆𑀟𑀢𑁆𑀣𑀫𑀸𑀳. 𑀬𑀤𑀺 𑀥𑀫𑁆𑀫𑀸 𑀏𑀯 𑀧𑀼𑀘𑁆𑀙𑀺𑀢𑀩𑁆𑀩𑀸 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀸 𑀘, 𑀓𑀲𑁆𑀫𑀸 𑀓𑀼𑀲𑀮𑀸𑀢𑀺 𑀧𑀪𑁂𑀤𑀯𑀘𑀦𑀦𑁆𑀢𑀺 𑀆𑀳 ‘‘𑀢𑁂 𑀧𑀦𑀸’’𑀢𑀺𑀆𑀤𑀺. 𑀦 𑀳𑀺 𑀧𑀪𑁂𑀤𑁂𑀳𑀺 𑀯𑀺𑀦𑀸 𑀧𑀪𑁂𑀤𑀯𑀦𑁆𑀢𑁄 𑀅𑀢𑁆𑀣𑀻𑀢𑀺. ‘‘𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸’’𑀢𑀺 𑀏𑀢𑁂𑀦 ‘‘𑀨𑀲𑁆𑀲𑁄 𑀳𑁄𑀢𑀻’’𑀢𑀺, ‘‘𑀨𑀲𑁆𑀲𑁄 𑀨𑀼𑀲𑀦𑀸’’𑀢𑀺 𑀘 𑀆𑀤𑀺𑀦𑀸 𑀉𑀤𑁆𑀤𑀺𑀝𑁆𑀞𑀦𑀺𑀤𑁆𑀤𑀺𑀝𑁆𑀞𑀸𑀦𑀁 𑀥𑀫𑁆𑀫𑀸𑀦𑀁 𑀓𑀼𑀲𑀮𑀪𑀸𑀯𑁄 𑀯𑀺𑀲𑁆𑀲𑀚𑁆𑀚𑀺𑀢𑁄 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸𑀢𑀺 𑀯𑀺𑀲𑁆𑀲𑀚𑁆𑀚𑀦𑁂𑀧𑀻’’𑀢𑀺 𑀆𑀳. 𑀇𑀫𑀲𑁆𑀫𑀺𑀜𑁆𑀳𑀻𑀢𑀺 𑀳𑀺-𑀲𑀤𑁆𑀤𑁄 𑀓𑀸𑀭𑀡𑀢𑁆𑀣𑁄. 𑀢𑁂𑀦 𑀬𑀲𑁆𑀫𑀸 𑀥𑀫𑁆𑀫𑀸𑀯 𑀤𑁂𑀲𑁂𑀢𑀩𑁆𑀩𑀸, 𑀢𑁂 𑀘 𑀓𑀼𑀲𑀮𑀸…𑀧𑁂… 𑀪𑁂𑀤𑀸 𑀤𑁂𑀲𑁂𑀢𑀩𑁆𑀩𑀸, 𑀢𑀲𑁆𑀫𑀸𑀢𑀺 𑀏𑀯𑀁 𑀯𑀸 𑀬𑁄𑀚𑀦𑀸. 𑀥𑀫𑁆𑀫𑀸𑀦𑀫𑁂𑀯𑀸𑀢𑀺 𑀅𑀯𑀥𑀸𑀭𑀡𑀨𑀮𑀁 𑀤𑀲𑁆𑀲𑁂𑀢𑀺 ‘‘𑀅𑀯𑁄𑀳𑀸𑀭𑀤𑁂𑀲𑀦𑀸𑀢𑁄’’𑀢𑀺. 𑀅𑀢𑁆𑀣𑀸𑀦𑀜𑁆𑀘𑀸𑀢𑀺 𑀘-𑀲𑀤𑁆𑀤𑁂𑀦 ‘‘𑀨𑀲𑁆𑀲𑁄 𑀨𑀼𑀲𑀦𑀸’’𑀢𑀺 𑀏𑀯𑀫𑀸𑀤𑀺𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀁 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀸𑀤𑀺𑀜𑀸𑀡𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀇𑀢𑀺 𑀏𑀯𑀁 𑀅𑀬𑀁 𑀧𑀯𑀢𑁆𑀢𑁂𑀢𑀩𑁆𑀩𑁄 𑀦𑀺𑀯𑀢𑁆𑀢𑁂𑀢𑀩𑁆𑀩𑁄 𑀘𑀸’’𑀢𑀺 𑀢𑀣𑀸 𑀢𑀣𑀸 𑀯𑀺𑀥𑁂𑀢𑀩𑁆𑀩𑀪𑀸𑀯𑁄 𑀇𑀢𑀺𑀓𑀢𑁆𑀢𑀩𑁆𑀩𑀢𑀸, 𑀢𑀸𑀬 𑀬𑀼𑀢𑁆𑀢𑁄 𑀇𑀢𑀺…𑀧𑁂… 𑀬𑀼𑀢𑁆𑀢𑁄, 𑀢𑀲𑁆𑀲 𑀯𑀺𑀥𑁂𑀢𑀩𑁆𑀩𑀲𑁆𑀲𑀸𑀢𑀺 𑀅𑀢𑁆𑀣𑁄, 𑀯𑀺𑀲𑁂𑀲𑀦𑀢𑁆𑀢𑀸 𑀧𑀪𑁂𑀤𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀢𑀺𑀓𑀢𑁆𑀢𑀩𑁆𑀩𑀢𑀸𑀬𑀼𑀢𑁆𑀢𑀲𑁆𑀲 𑀯𑀺𑀲𑁂𑀲𑀺𑀢𑀩𑁆𑀩𑀢𑁆𑀢𑀸 𑀉𑀤𑁆𑀤𑁂𑀲𑁄 𑀥𑀫𑁆𑀫𑀧𑁆𑀧𑀥𑀸𑀦𑁄, 𑀢𑀲𑁆𑀫𑀸 𑀢𑀢𑁆𑀣 𑀥𑀫𑁆𑀫𑀲𑁆𑀲 𑀯𑀺𑀲𑁂𑀲𑀺𑀢𑀩𑁆𑀩𑀢𑁆𑀢𑀸 ‘‘𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺 𑀅𑀬𑀁 𑀧𑀤𑀸𑀦𑀼𑀓𑁆𑀓𑀫𑁄 𑀓𑀢𑁄. 𑀧𑀼𑀘𑁆𑀙𑀸 𑀲𑀁𑀲𑀬𑀺𑀢𑀧𑁆𑀧𑀥𑀸𑀦𑀸 𑀅𑀦𑀺𑀘𑁆𑀙𑀺𑀢𑀦𑀺𑀘𑁆𑀙𑀬𑀦𑀸𑀬 𑀧𑀯𑀢𑁆𑀢𑁂𑀢𑀩𑁆𑀩𑀢𑁆𑀢𑀸. 𑀢𑁂𑀦 𑀲𑀩𑁆𑀩𑀥𑀫𑁆𑀫𑁂𑀲𑀼 𑀲𑀫𑀼𑀕𑁆𑀖𑀸𑀝𑀺𑀢𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀸𑀦𑀫𑁆𑀧𑀺 𑀧𑀼𑀘𑁆𑀙𑀸 𑀤𑁂𑀲𑁂𑀢𑀩𑁆𑀩𑀧𑀼𑀕𑁆𑀕𑀮𑀕𑀢𑀲𑀁𑀲𑀬𑀸𑀧𑀢𑁆𑀢𑀺𑀁 𑀅𑀢𑁆𑀢𑀦𑀺 𑀆𑀭𑁄𑀧𑁂𑀢𑁆𑀯𑀸 𑀲𑀁𑀲𑀬𑀸𑀧𑀦𑁆𑀦𑁂𑀳𑀺 𑀯𑀺𑀬 𑀧𑀯𑀢𑁆𑀢𑀻𑀬𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀸𑀫𑀸𑀯𑀘𑀭𑀸𑀤𑀺𑀪𑁂𑀤𑁄 𑀯𑀺𑀬 𑀓𑀼𑀲𑀮𑀸𑀤𑀺𑀪𑀸𑀯𑁂𑀦 𑀓𑀼𑀲𑀮𑀸𑀤𑀺𑀪𑁂𑀤𑁄 𑀥𑀫𑁆𑀫𑀪𑀸𑀯𑁂𑀦 𑀦𑀺𑀬𑀢𑁄𑀢𑀺 𑀥𑀫𑁆𑀫𑀸𑀢𑀺 𑀯𑀼𑀢𑁆𑀢𑁂 𑀦𑀺𑀘𑁆𑀙𑀬𑀸𑀪𑀸𑀯𑀢𑁄 ‘‘𑀓𑀼𑀲𑀮𑀸 𑀦𑀼 𑀔𑁄 𑀅𑀓𑀼𑀲𑀮𑀸 𑀦𑀼 𑀔𑁄’’𑀢𑀺𑀆𑀤𑀺𑀦𑀸 𑀲𑀁𑀲𑀬𑁄 𑀳𑁄𑀢𑀻𑀢𑀺 𑀆𑀳 ‘‘𑀓𑀼𑀲𑀮𑀸𑀤𑀺𑀪𑁂𑀤𑁄 𑀧𑀦 𑀲𑀁𑀲𑀬𑀺𑀢𑁄’’𑀢𑀺. 𑀥𑀫𑁆𑀫𑀪𑀸𑀯𑁄 𑀧𑀦 𑀓𑀼𑀲𑀮𑀸𑀤𑀻𑀲𑀼 𑀏𑀓𑀦𑁆𑀢𑀺𑀓𑀢𑁆𑀢𑀸 𑀦𑀺𑀘𑁆𑀙𑀺𑀢𑁄𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀦 𑀘 𑀥𑀫𑁆𑀫𑀪𑀸𑀯𑁄 𑀲𑀁𑀲𑀬𑀺𑀢𑁄’’𑀢𑀺. 𑀢𑁂𑀦 𑀲𑀁𑀲𑀬𑀺𑀢𑁄 𑀦𑀺𑀘𑁆𑀙𑁂𑀢𑀩𑁆𑀩𑀪𑀸𑀯𑁂𑀦 𑀧𑀥𑀸𑀦𑁄 𑀏𑀢𑁆𑀣 𑀓𑀼𑀲𑀮𑀪𑀸𑀯𑁄, 𑀦 𑀢𑀣𑀸 𑀥𑀫𑁆𑀫𑀪𑀸𑀯𑁄𑀢𑀺 𑀥𑀫𑁆𑀫𑀸 𑀓𑀼𑀲𑀮𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀫𑀬𑁂𑀢𑀺 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀦𑀲𑀫𑀬𑁂. ‘‘𑀅𑀣 𑀯𑀺𑀚𑁆𑀚𑀫𑀸𑀦𑁂’’𑀢𑀺 𑀏𑀢𑁆𑀣 𑀅𑀣-𑀲𑀤𑁆𑀤𑀲𑁆𑀲 𑀅𑀢𑁆𑀣𑀫𑀸𑀳 ‘‘𑀧𑀘𑁆𑀙𑀸’’𑀢𑀺. 𑀪𑁄𑀚𑀦𑀕𑀫𑀦𑀸𑀤𑀻𑀳𑀺 𑀲𑀫𑀬𑁂𑀓𑀤𑁂𑀲𑀦𑀸𑀦𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀅𑀯𑀲𑁂𑀲𑀦𑀸𑀦𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀫𑀯𑀸𑀬𑀸𑀤𑀻’’𑀢𑀺 𑀯𑀼𑀢𑁆𑀢𑀁. 𑀯𑀺𑀲𑁂𑀲𑀺𑀢𑀸𑀢𑀺 𑀏𑀢𑁂𑀦 ‘‘𑀦𑀺𑀬𑀫𑀺𑀢𑀸’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀯𑀺𑀯𑀭𑀢𑀺, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀘𑀺𑀢𑁆𑀢𑀯𑀺𑀲𑁂𑀲𑀺𑀢𑀩𑁆𑀩𑀢𑁄 𑀲𑀫𑀬𑀢𑁄𑀢𑀺 𑀅𑀢𑁆𑀣𑁄. 𑀬𑀣𑀸𑀥𑀺𑀧𑁆𑀧𑁂𑀢𑀸𑀦𑀦𑁆𑀢𑀺 𑀓𑀸𑀫𑀸𑀯𑀘𑀭𑀸𑀤𑀺𑀯𑀺𑀲𑁂𑀲𑀬𑀼𑀢𑁆𑀢𑀸𑀦𑀁. ‘‘𑀢𑀲𑁆𑀫𑀺𑀁 𑀲𑀫𑀬𑁂’’𑀢𑀺 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀸 𑀯𑀺𑀲𑁂𑀲𑀺𑀢𑀩𑁆𑀩𑁄𑀧𑀺 𑀲𑀫𑀬𑁄 𑀬𑁂𑀦 𑀘𑀺𑀢𑁆𑀢𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑁂𑀦 𑀯𑀺𑀲𑁂𑀲𑀻𑀬𑀢𑀺, 𑀢𑀲𑁆𑀲𑁂𑀯 𑀘𑀺𑀢𑁆𑀢𑀲𑁆𑀲 ‘‘𑀬𑀲𑁆𑀫𑀺𑀁 𑀲𑀫𑀬𑁂’’𑀢𑀺 𑀏𑀢𑁆𑀣 𑀲𑀬𑀁 𑀯𑀺𑀲𑁂𑀲𑀦𑀪𑀸𑀯𑀁 𑀆𑀧𑀚𑁆𑀚𑀢𑀺. 𑀢𑀣𑀸 ‘‘𑀢𑀲𑁆𑀫𑀺𑀁 𑀲𑀫𑀬𑁂’’𑀢𑀺 𑀏𑀢𑁆𑀣 𑀯𑀺𑀲𑁂𑀲𑀦𑀪𑀽𑀢𑀁 𑀘𑀺𑀢𑁆𑀢𑀁 𑀅𑀢𑁆𑀢𑀦𑀸 𑀯𑀺𑀲𑁂𑀲𑀺𑀢𑀩𑁆𑀩𑀲𑀫𑀬𑀲𑁆𑀲 𑀉𑀧𑀓𑀸𑀭𑀢𑁆𑀣𑀁 ‘‘𑀬𑀲𑁆𑀫𑀺𑀁 𑀲𑀫𑀬𑁂…𑀧𑁂… 𑀘𑀺𑀢𑁆𑀢’’𑀦𑁆𑀢𑀺 𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑀁 𑀆𑀧𑀚𑁆𑀚𑀢𑀺. 𑀉𑀧𑀓𑀸𑀭𑁄𑀢𑀺 𑀘 𑀅𑀜𑁆𑀜𑀫𑀜𑁆𑀜𑀁 𑀅𑀯𑀘𑁆𑀙𑁂𑀤𑀓𑀸𑀯𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀪𑀸𑀯𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀼𑀭𑀺𑀫𑀥𑀫𑁆𑀫𑀸𑀦𑀁 𑀪𑀗𑁆𑀕𑀲𑀫𑀓𑀸𑀮𑀁, 𑀪𑀗𑁆𑀕𑀸𑀦𑀦𑁆𑀢𑀭𑀫𑁂𑀯 𑀯𑀸 𑀧𑀘𑁆𑀙𑀺𑀫𑀥𑀫𑁆𑀫𑀸𑀦𑀁 𑀉𑀧𑁆𑀧𑀢𑁆𑀢𑀺 𑀧𑀼𑀭𑀺𑀫𑀧𑀘𑁆𑀙𑀺𑀫𑀸𑀦𑀁 𑀦𑀺𑀭𑀦𑁆𑀢𑀭𑀢𑀸 𑀓𑁂𑀦𑀘𑀺 𑀅𑀦𑀦𑁆𑀢𑀭𑀺𑀢𑀢𑀸. 𑀬𑀸𑀬 𑀪𑀸𑀯𑀧𑀓𑁆𑀔𑀲𑁆𑀲 𑀩𑀮𑀯𑀪𑀸𑀯𑁂𑀦 𑀧𑀝𑀺𑀘𑁆𑀙𑀸𑀤𑀺𑀢𑁄 𑀯𑀺𑀬 𑀳𑀼𑀢𑁆𑀯𑀸 𑀅𑀪𑀸𑀯𑀧𑀓𑁆𑀔𑁄 𑀦 𑀧𑀜𑁆𑀜𑀸𑀬𑀢𑀻𑀢𑀺 𑀢𑀤𑁂𑀯𑁂𑀢𑀦𑁆𑀢𑀺 𑀕𑀳𑀡𑀯𑀲𑁂𑀦 𑀧𑀘𑀼𑀭𑀚𑀦𑁄 𑀯𑀺𑀧𑀭𑀺𑀬𑁂𑀲𑀺𑀢𑁄, 𑀲𑁄𑀬𑀫𑀢𑁆𑀣𑁄 𑀅𑀮𑀸𑀢𑀘𑀓𑁆𑀓𑁂𑀦 𑀲𑀼𑀧𑀸𑀓𑀝𑁄 𑀳𑁄𑀢𑀺. 𑀢𑁂𑀦𑁂𑀯𑀸𑀳 ‘‘𑀏𑀓𑀻𑀪𑀽𑀢𑀸𑀦𑀫𑀺𑀯𑀸’’𑀢𑀺. 𑀏𑀓𑀲𑀫𑀽𑀳𑀯𑀲𑁂𑀦 𑀏𑀓𑀻𑀪𑀽𑀢𑀸𑀦𑀫𑀺𑀯 𑀧𑀯𑀢𑁆𑀢𑀺 𑀲𑀫𑀽𑀳𑀖𑀦𑀢𑀸, 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀓𑀺𑀘𑁆𑀘𑀪𑁂𑀤𑀯𑀲𑁂𑀦 𑀏𑀓𑀻𑀪𑀽𑀢𑀸𑀦𑀫𑀺𑀯 𑀧𑀯𑀢𑁆𑀢𑀺 𑀓𑀺𑀘𑁆𑀘𑀖𑀦𑀢𑀸𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀘 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀸𑀦𑀁 𑀅𑀦𑁂𑀓𑁂𑀲𑀁 𑀥𑀫𑁆𑀫𑀸𑀦𑀁 𑀓𑀸𑀮𑀲𑀪𑀸𑀯𑀩𑁆𑀬𑀸𑀧𑀸𑀭𑀸𑀭𑀫𑁆𑀫𑀡𑁂𑀳𑀺 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀪𑁂𑀤𑀢𑀸𑀬 𑀏𑀓𑀻𑀪𑀽𑀢𑀸𑀦𑀫𑀺𑀯 𑀕𑀳𑁂𑀢𑀩𑁆𑀩𑀢𑀸 𑀬𑀣𑀸𑀓𑁆𑀓𑀫𑀁 𑀲𑀦𑁆𑀢𑀢𑀺𑀖𑀦𑀢𑀸𑀤𑀬𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀳𑀓𑀸𑀭𑀻𑀓𑀸𑀭𑀡𑀲𑀦𑁆𑀦𑀺𑀚𑁆𑀛𑀁 𑀲𑀫𑁂𑀢𑀻𑀢𑀺 𑀲𑀫𑀬𑁄, 𑀲𑀫𑀯𑁂𑀢𑀻𑀢𑀺 𑀅𑀢𑁆𑀣𑁄𑀢𑀺 𑀲𑀫𑀬-𑀲𑀤𑁆𑀤𑀲𑁆𑀲 𑀲𑀫𑀯𑀸𑀬𑀢𑁆𑀣𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀘𑁆𑀘𑀬𑀲𑀸𑀫𑀕𑁆𑀕𑀺’’𑀦𑁆𑀢𑀺 𑀆𑀳. 𑀲𑀫𑁂𑀢𑀺 𑀲𑀫𑀸𑀕𑀘𑁆𑀙𑀢𑀺 𑀏𑀢𑁆𑀣 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁 𑀢𑀤𑀸𑀥𑀸𑀭𑀧𑀼𑀕𑁆𑀕𑀮𑁂𑀳𑀻𑀢𑀺 𑀲𑀫𑀬𑁄, 𑀔𑀡𑁄. 𑀲𑀫𑁂𑀦𑁆𑀢𑀺 𑀏𑀢𑁆𑀣, 𑀏𑀢𑁂𑀦 𑀯𑀸, 𑀲𑀫𑀸𑀕𑀘𑁆𑀙𑀦𑁆𑀢𑀺 𑀥𑀫𑁆𑀫𑀸 𑀲𑀳𑀚𑀸𑀢𑀥𑀫𑁆𑀫𑁂𑀳𑀺 𑀉𑀧𑁆𑀧𑀸𑀤𑀸𑀤𑀻𑀳𑀺 𑀯𑀸𑀢𑀺 𑀲𑀫𑀬𑁄, 𑀓𑀸𑀮𑁄. 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑀢𑀸𑀬 𑀅𑀢𑁆𑀣𑀢𑁄 𑀅𑀪𑀽𑀢𑁄𑀧𑀺 𑀳𑀺 𑀓𑀸𑀮𑁄 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀸 𑀅𑀥𑀺𑀓𑀭𑀡𑀁 𑀓𑀭𑀡𑀁 𑀯𑀺𑀬 𑀘 𑀧𑀭𑀺𑀓𑀧𑁆𑀧𑀦𑀸𑀫𑀢𑁆𑀢𑀲𑀺𑀤𑁆𑀥𑁂𑀦 𑀭𑀽𑀧𑁂𑀦 𑀯𑁄𑀳𑀭𑀻𑀬𑀢𑀻𑀢𑀺. 𑀲𑀫𑀁, 𑀲𑀳 𑀯𑀸 𑀅𑀯𑀬𑀯𑀸𑀦𑀁 𑀅𑀬𑀦𑀁 𑀧𑀯𑀢𑁆𑀢𑀺 𑀅𑀯𑀝𑁆𑀞𑀸𑀦𑀦𑁆𑀢𑀺 𑀲𑀫𑀬𑁄, 𑀲𑀫𑀽𑀳𑁄 𑀬𑀣𑀸 ‘‘𑀲𑀫𑀼𑀤𑀸𑀬𑁄’’𑀢𑀺. 𑀅𑀯𑀬𑀯𑀲𑀳𑀸𑀯𑀝𑁆𑀞𑀸𑀦𑀫𑁂𑀯 𑀳𑀺 𑀲𑀫𑀽𑀳𑁄. 𑀧𑀘𑁆𑀘𑀬𑀦𑁆𑀢𑀭𑀲𑀫𑀸𑀕𑀫𑁂 𑀏𑀢𑀺 𑀨𑀮𑀁 𑀏𑀢𑀲𑁆𑀫𑀸 𑀉𑀧𑁆𑀧𑀚𑁆𑀚𑀢𑀺 𑀧𑀯𑀢𑁆𑀢𑀢𑀺 𑀘𑀸𑀢𑀺 𑀲𑀫𑀬𑁄, 𑀳𑁂𑀢𑀼 𑀬𑀣𑀸 ‘‘𑀲𑀫𑀼𑀤𑀬𑁄’’𑀢𑀺. 𑀲𑀫𑁂𑀢𑀺 𑀲𑀫𑁆𑀩𑀦𑁆𑀥𑁄 𑀏𑀢𑀺 𑀲𑀯𑀺𑀲𑀬𑁂 𑀧𑀯𑀢𑁆𑀢𑀢𑀺, 𑀲𑀫𑁆𑀩𑀦𑁆𑀥𑀸 𑀯𑀸 𑀅𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀲𑀫𑀬𑁄, 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑁂𑀦 𑀳𑀺 𑀲𑀢𑁆𑀢𑀸 𑀅𑀢𑀺𑀯𑀺𑀬 𑀩𑀚𑁆𑀛𑀦𑁆𑀢𑀻𑀢𑀺. 𑀲𑀫𑀬𑀦𑀁 𑀲𑀗𑁆𑀕𑀢𑀺 𑀲𑀫𑁄𑀥𑀸𑀦𑀦𑁆𑀢𑀺 𑀲𑀫𑀬𑁄, 𑀧𑀝𑀺𑀮𑀸𑀪𑁄. 𑀲𑀫𑀲𑁆𑀲 𑀦𑀺𑀭𑁄𑀥𑀲𑁆𑀲 𑀬𑀸𑀦𑀁, 𑀲𑀫𑁆𑀫𑀸 𑀯𑀸 𑀬𑀸𑀦𑀁 𑀅𑀧𑀕𑀫𑁄 𑀅𑀧𑁆𑀧𑀯𑀢𑁆𑀢𑀻𑀢𑀺 𑀲𑀫𑀬𑁄, 𑀧𑀳𑀸𑀦𑀁. 𑀅𑀪𑀺𑀫𑀼𑀔𑀪𑀸𑀯𑁂𑀦 𑀲𑀫𑁆𑀫𑀸 𑀏𑀢𑀩𑁆𑀩𑁄 𑀅𑀪𑀺𑀲𑀫𑁂𑀢𑀩𑁆𑀩𑁄 𑀅𑀥𑀺𑀕𑀦𑁆𑀢𑀩𑁆𑀩𑁄𑀢𑀺 𑀅𑀯𑀺𑀧𑀭𑀻𑀢𑁄 𑀲𑀪𑀸𑀯𑁄 𑀅𑀪𑀺𑀲𑀫𑀬𑁄. 𑀅𑀪𑀺𑀫𑀼𑀔𑀪𑀸𑀯𑁂𑀦 𑀲𑀫𑁆𑀫𑀸 𑀯𑀸 𑀏𑀢𑀺 𑀕𑀘𑁆𑀙𑀢𑀺 𑀩𑀼𑀚𑁆𑀛𑀢𑀻𑀢𑀺 𑀅𑀪𑀺𑀲𑀫𑀬𑁄, 𑀅𑀯𑀺𑀭𑀸𑀥𑁂𑀢𑁆𑀯𑀸 𑀥𑀫𑁆𑀫𑀸𑀦𑀁 𑀅𑀯𑀺𑀧𑀭𑀻𑀢𑀲𑀪𑀸𑀯𑀸𑀯𑀩𑁄𑀥𑁄. 𑀏𑀢𑁆𑀣 𑀘 𑀉𑀧𑀲𑀕𑁆𑀕𑀸𑀦𑀁 𑀚𑁄𑀢𑀓𑀫𑀢𑁆𑀢𑀢𑁆𑀢𑀸 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀸𑀘𑀓𑁄 𑀲𑀫𑀬-𑀲𑀤𑁆𑀤𑁄 𑀏𑀯𑀸𑀢𑀺 𑀲𑀉𑀧𑀲𑀕𑁆𑀕𑁄𑀧𑀺 𑀯𑀼𑀢𑁆𑀢𑁄. 𑀢𑀸𑀦𑁂𑀯𑀸𑀢𑀺 𑀧𑀻𑀴𑀦𑀸𑀤𑀻𑀦𑁂𑀯. 𑀯𑀺𑀧𑁆𑀨𑀸𑀭𑀺𑀓𑀢𑀸 𑀲𑁂𑀭𑀺𑀪𑀸𑀯𑁂𑀦 𑀓𑀺𑀭𑀺𑀬𑀸𑀲𑀼 𑀉𑀲𑁆𑀲𑀸𑀳𑀦𑀧𑀭𑀺𑀦𑀺𑀧𑁆𑀨𑀦𑁆𑀦𑁄.

𑀓𑁂𑀲𑀼𑀘𑀻𑀢𑀺 𑀅𑀓𑀼𑀲𑀮𑀯𑀺𑀧𑀸𑀓𑀸𑀤𑀻𑀲𑀼. 𑀔𑀡𑀲𑁆𑀲 𑀅𑀲𑀫𑁆𑀪𑀯𑁄 𑀢𑁂𑀦 𑀯𑀺𑀦𑀸𑀪𑀸𑀯𑁄𑀢𑀺 𑀆𑀳 ‘‘𑀦𑀦𑀽’’𑀢𑀺𑀆𑀤𑀺. 𑀥𑀫𑁆𑀫𑁂𑀦𑁂𑀯𑀸𑀢𑀺 𑀯𑀺𑀲𑁂𑀲𑀦𑁆𑀢𑀭𑀭𑀳𑀺𑀢𑁂𑀦. 𑀢𑀁𑀬𑁂𑀯 𑀳𑀺 𑀅𑀯𑀥𑀸𑀭𑀡𑁂𑀦 𑀦𑀺𑀯𑀢𑁆𑀢𑀺𑀢𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀺 ‘‘𑀦 𑀢𑀲𑁆𑀲 𑀧𑀯𑀢𑁆𑀢𑀺𑀢𑁆𑀣𑀸’’𑀢𑀺𑀆𑀤𑀺𑀦𑀸. 𑀬𑀣𑀸 𑀯𑀸 𑀢𑀣𑀸 𑀯𑀸𑀢𑀺 𑀓𑀸𑀮𑁂𑀦 𑀮𑁄𑀓𑁄 𑀧𑀯𑀢𑁆𑀢𑀢𑀺 𑀦𑀺𑀯𑀢𑁆𑀢𑀢𑀻𑀢𑀺 𑀯𑀸 𑀓𑀸𑀮𑁄 𑀦𑀸𑀫 𑀪𑀸𑀯𑁄 𑀯𑀢𑁆𑀢𑀦𑀮𑀓𑁆𑀔𑀡𑁄 𑀪𑀸𑀯𑀸𑀦𑀁 𑀧𑀯𑀢𑁆𑀢𑀺𑀑𑀓𑀸𑀲𑀤𑀸𑀬𑀓𑁄𑀢𑀺 𑀯𑀸 𑀬𑁂𑀦 𑀢𑁂𑀦 𑀧𑀓𑀸𑀭𑁂𑀦. 𑀇𑀥 𑀉𑀢𑁆𑀢𑀫𑀳𑁂𑀢𑀼𑀦𑁄 𑀲𑀫𑁆𑀪𑀯𑁄 𑀏𑀯 𑀦𑀢𑁆𑀣𑀻𑀢𑀺 𑀳𑁂𑀢𑀼𑀳𑁂𑀢𑀼𑀲𑀸𑀥𑀸𑀭𑀡𑀳𑁂𑀢𑀽𑀬𑁂𑀯 𑀧𑀝𑀺𑀲𑁂𑀥𑁂𑀢𑀺. 𑀢𑀧𑁆𑀧𑀘𑁆𑀘𑀬𑀢𑀁 𑀅𑀦𑁂𑀓𑀧𑀘𑁆𑀘𑀬𑀢𑀁.

𑀧𑀓𑀢𑀺𑀲𑁆𑀲𑀭𑀯𑀸𑀤𑀕𑁆𑀕𑀳𑀡𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀧𑀚𑀸𑀧𑀢𑀺𑀧𑀼𑀭𑀺𑀲𑀓𑀸𑀮𑀯𑀸𑀤𑀸𑀤𑀬𑁄𑀧𑀺 ‘‘𑀏𑀓𑀓𑀸𑀭𑀡𑀯𑀸𑀤𑁄’’𑀢𑀺. 𑀯𑀸-𑀲𑀤𑁆𑀤𑁂𑀦 𑀯𑀸 𑀢𑁂𑀲𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀅𑀯𑀬𑀯…𑀧𑁂… 𑀤𑀸𑀬𑁄 𑀯𑀼𑀢𑁆𑀢𑁄 𑀅𑀯𑀬𑀯𑀥𑀫𑁆𑀫𑁂𑀦 𑀲𑀫𑀼𑀤𑀸𑀬𑀲𑁆𑀲 𑀅𑀧𑀤𑀺𑀲𑀺𑀢𑀩𑁆𑀩𑀢𑁆𑀢𑀸, 𑀬𑀣𑀸 ‘‘𑀲𑀫𑀁 𑀘𑀼𑀡𑁆𑀡𑀁, 𑀅𑀮𑀗𑁆𑀓𑀢𑁄 𑀤𑁂𑀯𑀤𑀢𑁆𑀢𑁄’’𑀢𑀺 𑀘. 𑀅𑀦𑀺𑀧𑁆𑀨𑀸𑀤𑀦𑀁 𑀦𑀺𑀧𑁆𑀨𑀸𑀤𑀦𑀸𑀪𑀸𑀯𑁄 𑀅𑀳𑁂𑀢𑀼𑀪𑀸𑀯𑁄. 𑀦𑀺𑀧𑁆𑀨𑀸𑀤𑁂𑀢𑀼𑀁 𑀅𑀲𑀫𑀢𑁆𑀣𑀲𑁆𑀲 𑀧𑀦 𑀧𑀘𑁆𑀘𑀬𑀦𑁆𑀢𑀭𑀸𑀦𑀁 𑀲𑀳𑀲𑁆𑀲𑁂𑀧𑀺 𑀲𑀫𑀸𑀕𑀢𑁂 𑀦𑀢𑁆𑀣𑁂𑀯 𑀲𑀫𑀢𑁆𑀣𑀢𑀸𑀢𑀺 𑀆𑀳 ‘‘𑀦𑀺𑀧𑁆𑀨𑀸𑀤𑀦𑀲𑀫𑀢𑁆𑀣𑀲𑁆𑀲𑀸’’𑀢𑀺. 𑀏𑀢𑁆𑀣 𑀘 𑀲𑀳𑀓𑀸𑀭𑀻𑀓𑀸𑀭𑀡𑀸𑀬𑀢𑁆𑀢𑀸 𑀨𑀮𑀼𑀧𑁆𑀧𑀸𑀤𑀦𑀸 𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀸𑀧𑁂𑀓𑁆𑀔𑀸𑀢𑀺 𑀯𑀼𑀢𑁆𑀢𑀸𑀢𑀺 𑀅𑀧𑁂𑀓𑁆𑀔𑀸 𑀯𑀺𑀬𑀸𑀢𑀺 𑀅𑀧𑁂𑀓𑁆𑀔𑀸 𑀤𑀝𑁆𑀞𑀩𑁆𑀩𑀸.

𑀦𑀺𑀩𑁆𑀬𑀸𑀧𑀸𑀭𑁂𑀲𑀼 𑀅𑀩𑁆𑀬𑀸𑀯𑀝𑁂𑀲𑀼. 𑀏𑀓𑁂𑀓𑀲𑁆𑀫𑀺𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀆𑀫𑁂𑀟𑀺𑀢𑀯𑀘𑀦𑀲𑁆𑀲 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑀢𑀁 𑀤𑀲𑁆𑀲𑁂𑀢𑀺. 𑀲𑀢𑀺 𑀘 𑀆𑀫𑁂𑀟𑀺𑀢𑁂 𑀲𑀺𑀤𑁆𑀥𑁄 𑀩𑀳𑀼𑀪𑀸𑀯𑁄𑀢𑀺. 𑀅𑀦𑁆𑀥𑀲𑀢𑀁 𑀧𑀲𑁆𑀲𑀢𑀻𑀢𑀺 𑀘 𑀧𑀘𑁆𑀘𑀢𑁆𑀢𑀯𑀘𑀦𑀁 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀯𑀲𑁂𑀦 𑀧𑀭𑀺𑀡𑀸𑀫𑁂𑀢𑁆𑀯𑀸 ‘‘𑀅𑀦𑁆𑀥𑀲𑀢𑁂’’𑀢𑀺 𑀆𑀳. 𑀢𑀣𑀸 𑀏𑀓𑁂𑀓𑀲𑁆𑀫𑀺𑀦𑁆𑀢𑀺 𑀇𑀫𑀺𑀦𑀸 𑀯𑀺𑀲𑀼𑀁 𑀅𑀲𑀫𑀢𑁆𑀣𑀢𑀸 𑀚𑁄𑀢𑀺𑀢𑀸𑀢𑀺 𑀅𑀦𑁆𑀥𑀲𑀢𑀁 𑀧𑀲𑁆𑀲𑀢𑀻𑀢𑀺 𑀲𑀫𑀼𑀤𑀺𑀢𑀁 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑀢𑁄 𑀅𑀬𑀫𑀢𑁆𑀣𑁄 𑀆𑀧𑀦𑁆𑀦𑁄𑀢𑀺 𑀆𑀳 ‘‘𑀅𑀦𑁆𑀥𑀲𑀢𑀁 𑀲𑀳𑀺𑀢𑀁 𑀧𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺. 𑀅𑀜𑁆𑀜𑀣𑀸𑀢𑀺 𑀬𑀣𑀸𑀭𑀼𑀢𑀯𑀲𑁂𑀦 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂. 𑀬𑀲𑁆𑀫𑀸 𑀅𑀲𑀸…𑀧𑁂… 𑀲𑀺𑀤𑁆𑀥𑁄 𑀲𑀺𑀯𑀺𑀓𑀼𑀩𑁆𑀩𑀳𑀦𑀸𑀤𑀻𑀲𑀼, 𑀢𑀲𑁆𑀫𑀸 𑀦𑀸𑀬𑀫𑀢𑁆𑀣𑁄 𑀲𑀸𑀥𑁂𑀢𑀩𑁆𑀩𑁄. 𑀇𑀤𑀸𑀦𑀺 𑀢𑀲𑁆𑀲𑀢𑁆𑀣𑀲𑁆𑀲 𑀲𑀼𑀧𑀸𑀓𑀝𑀪𑀸𑀯𑁂𑀦 𑀅𑀲𑀸𑀥𑁂𑀢𑀩𑁆𑀩𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀲𑀼’’𑀦𑁆𑀢𑀺𑀆𑀤𑀺𑀫𑀸𑀳.

𑀏𑀢𑁂𑀦𑀼𑀧𑀸𑀬𑁂𑀦𑀸𑀢𑀺 𑀬𑁄𑀬𑀁 𑀔𑀡𑀲𑀗𑁆𑀔𑀸𑀢𑁄 𑀲𑀫𑀬𑁄 𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀬𑀸 𑀤𑀼𑀮𑁆𑀮𑀪𑀪𑀸𑀯𑀁 𑀤𑀻𑀧𑁂𑀢𑀺. 𑀅𑀢𑁆𑀢𑀦𑁄 𑀤𑀼𑀮𑁆𑀮𑀪𑀢𑀸𑀬𑀸𑀢𑀺 𑀏𑀢𑁆𑀣 𑀔𑀡𑀢𑁆𑀣𑁄 𑀯𑀸 𑀲𑀫𑀬-𑀲𑀤𑁆𑀤𑁄 𑀔𑀡𑀲𑀗𑁆𑀔𑀸𑀢𑁄 𑀲𑀫𑀬𑁄𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀏𑀢𑁂𑀦 𑀉𑀧𑀸𑀬𑀪𑀽𑀢𑁂𑀦 𑀦𑀬𑀪𑀽𑀢𑁂𑀦. 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸𑀢𑀺 𑀏𑀢𑁆𑀣𑀸𑀬𑀁 𑀬𑁄𑀚𑀦𑀸 𑁋 𑀲𑀫𑀯𑀸𑀬…𑀧𑁂… 𑀯𑀼𑀢𑁆𑀢𑀺𑀁 𑀤𑀻𑀧𑁂𑀢𑀺 𑀲𑀬𑀁 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀪𑀸𑀯𑀢𑁄, 𑀲𑀫𑀯𑀸𑀬𑀢𑁆𑀣𑁄 𑀯𑀸 𑀲𑀫𑀬-𑀲𑀤𑁆𑀤𑁄 𑀲𑀫𑀯𑀸𑀬𑀲𑀗𑁆𑀔𑀸𑀢𑁄 𑀲𑀫𑀬𑁄. 𑀲𑁄 𑀬𑀸𑀬 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀸 𑀲𑀢𑀻𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀧𑀓𑀸𑀲𑀦𑀯𑀲𑁂𑀦 𑀥𑀫𑁆𑀫𑀸𑀦𑀁 𑀅𑀦𑁂𑀓𑀳𑁂𑀢𑀼𑀢𑁄 𑀯𑀼𑀢𑁆𑀢𑀺𑀁 𑀤𑀻𑀧𑁂𑀢𑀺. 𑀓𑀸𑀮…𑀧𑁂… 𑀧𑀭𑀺𑀢𑁆𑀢𑀢𑀁 𑀤𑀻𑀧𑁂𑀢𑀺 𑀅𑀢𑁆𑀢𑀦𑁄 𑀅𑀢𑀺𑀧𑀭𑀺𑀢𑁆𑀢𑀢𑀸𑀬. 𑀲𑀫𑀽𑀳…𑀧𑁂… 𑀲𑀳𑀼𑀧𑁆𑀧𑀢𑁆𑀢𑀺𑀁 𑀤𑀻𑀧𑁂𑀢𑀺 𑀲𑀬𑀁 𑀥𑀫𑁆𑀫𑀸𑀦𑀁 𑀲𑀫𑀼𑀤𑀸𑀬𑀪𑀸𑀯𑀢𑁄. 𑀳𑁂𑀢𑀼…𑀧𑁂… 𑀯𑀼𑀢𑁆𑀢𑀺𑀢𑀁 𑀤𑀻𑀧𑁂𑀢𑀺 𑀲𑀢𑀺 𑀏𑀯 𑀅𑀢𑁆𑀢𑀦𑀺 𑀅𑀢𑁆𑀢𑀦𑁄 𑀨𑀮𑀸𑀦𑀁 𑀲𑀫𑁆𑀪𑀯𑀢𑁄𑀢𑀺. 𑀅𑀢𑁆𑀣𑀧𑀓𑁆𑀔𑁂 𑀘 𑀲𑀤𑁆𑀤𑀧𑀓𑁆𑀔𑁂 𑀘 𑀬𑀲𑁆𑀫𑀺𑀁 𑀅𑀢𑀺𑀧𑀭𑀺𑀢𑁆𑀢𑁂 𑀓𑀸𑀮𑁂 𑀬𑀲𑁆𑀫𑀺𑀁 𑀥𑀫𑁆𑀫𑀲𑀫𑀼𑀤𑀸𑀬𑁂 𑀬𑀫𑁆𑀳𑀺 𑀳𑁂𑀢𑀼𑀫𑁆𑀳𑀺 𑀲𑀢𑀻𑀢𑀺 𑀏𑀢𑀲𑁆𑀲 𑀅𑀢𑁆𑀣𑀲𑁆𑀲 𑀜𑀸𑀧𑀦𑀯𑀲𑁂𑀦 𑀢𑀤𑀸𑀥𑀸𑀭𑀸𑀬 𑀢𑀤𑀥𑀻𑀦𑀸𑀬 𑀘 𑀓𑀼𑀲𑀮𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀸 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀢𑀁 𑀅𑀦𑁂𑀓𑁂𑀲𑀁 𑀲𑀳𑀼𑀧𑁆𑀧𑀢𑁆𑀢𑀺𑀁 𑀧𑀭𑀸𑀥𑀻𑀦𑀧𑁆𑀧𑀢𑁆𑀢𑀺𑀜𑁆𑀘 𑀤𑀻𑀧𑁂𑀢𑀻𑀢𑀺.

𑀤𑀴𑁆𑀳𑀥𑀫𑁆𑀫𑀸 𑀥𑀦𑀼𑀕𑁆𑀕𑀳𑀸𑀢𑀺 𑀤𑀴𑁆𑀳𑀥𑀦𑀼𑀦𑁄 𑀇𑀲𑁆𑀲𑀸𑀲𑀸. 𑀤𑀴𑁆𑀳𑀥𑀦𑀼 𑀦𑀸𑀫 𑀤𑁆𑀯𑀺𑀲𑀳𑀲𑁆𑀲𑀣𑀸𑀫𑀁 𑀯𑀼𑀘𑁆𑀘𑀢𑀺. 𑀤𑁆𑀯𑀺𑀲𑀳𑀲𑁆𑀲𑀣𑀸𑀫𑀦𑁆𑀢𑀺 𑀘 𑀬𑀲𑁆𑀲 𑀆𑀭𑁄𑀧𑀺𑀢𑀲𑁆𑀲 𑀚𑀺𑀬𑀸𑀩𑀤𑁆𑀥𑁄 𑀮𑁄𑀳𑀲𑀻𑀲𑀸𑀤𑀻𑀦𑀁 𑀪𑀸𑀭𑁄 𑀤𑀡𑁆𑀟𑁂 𑀕𑀳𑁂𑀢𑁆𑀯𑀸 𑀬𑀸𑀯 𑀓𑀡𑁆𑀟𑀧𑁆𑀧𑀫𑀸𑀡𑀸 𑀉𑀓𑁆𑀔𑀺𑀢𑁆𑀢𑀲𑁆𑀲 𑀧𑀣𑀯𑀺𑀢𑁄 𑀫𑀼𑀘𑁆𑀘𑀢𑀺. 𑀲𑀺𑀓𑁆𑀔𑀺𑀢𑀸𑀢𑀺 𑀤𑀲𑀤𑁆𑀯𑀸𑀤𑀲𑀯𑀲𑁆𑀲𑀸𑀦𑀺 𑀆𑀘𑀭𑀺𑀬𑀓𑀼𑀮𑁂 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑀸. 𑀓𑀢𑀳𑀢𑁆𑀣𑀸𑀢𑀺 𑀥𑀦𑀼𑀲𑁆𑀫𑀺𑀁 𑀘𑀺𑀡𑁆𑀡𑀯𑀲𑀻𑀪𑀸𑀯𑀸. 𑀓𑁄𑀘𑀺 𑀲𑀺𑀧𑁆𑀧𑀫𑁂𑀯 𑀉𑀕𑁆𑀕𑀡𑁆𑀳𑀸𑀢𑀺, 𑀓𑀢𑀳𑀢𑁆𑀣𑁄 𑀦 𑀳𑁄𑀢𑀺, 𑀇𑀫𑁂 𑀧𑀦 𑀦 𑀢𑀣𑀸𑀢𑀺 𑀤𑀲𑁆𑀲𑁂𑀢𑀺. 𑀓𑀢𑀼𑀧𑀸𑀲𑀦𑀸𑀢𑀺 𑀭𑀸𑀚𑀓𑀼𑀮𑀸𑀤𑀻𑀲𑀼 𑀤𑀲𑁆𑀲𑀺𑀢𑀲𑀺𑀧𑁆𑀧𑀸. 𑀘𑀢𑀼𑀤𑁆𑀤𑀺𑀲𑀸 𑀞𑀺𑀢𑀸 𑀅𑀲𑁆𑀲𑀽𑀢𑀺 𑀏𑀓𑀲𑁆𑀫𑀺𑀁𑀬𑁂𑀯 𑀧𑀤𑁂𑀲𑁂 𑀣𑀫𑁆𑀪𑀁 𑀯𑀸 𑀭𑀼𑀓𑁆𑀔𑀁 𑀯𑀸 𑀬𑀁 𑀓𑀺𑀜𑁆𑀘𑀺 𑀏𑀓𑀁𑀬𑁂𑀯 𑀦𑀺𑀲𑁆𑀲𑀸𑀬 𑀘𑀢𑀼𑀤𑁆𑀤𑀺𑀲𑀸𑀪𑀺𑀫𑀼𑀔𑀸 𑀞𑀺𑀢𑀸 𑀲𑀺𑀬𑀼𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀁 𑀯𑀼𑀢𑁆𑀢𑀚𑀯𑀦𑀧𑀼𑀭𑀺𑀲𑀲𑁆𑀲𑀸𑀢𑀺 𑀦 𑀏𑀯𑀭𑀽𑀧𑁄 𑀧𑀼𑀭𑀺𑀲𑁄 𑀓𑁄𑀘𑀺 𑀪𑀽𑀢𑀧𑀼𑀩𑁆𑀩𑁄 𑀅𑀜𑁆𑀜𑀢𑁆𑀭 𑀩𑁄𑀥𑀺𑀲𑀢𑁆𑀢𑁂𑀦. 𑀲𑁄 𑀳𑀺 𑀚𑀯𑀦𑀳𑀁𑀲𑀓𑀸𑀮𑁂 𑀏𑀯𑀭𑀽𑀧𑀫𑀓𑀸𑀲𑀺. 𑀲𑀼𑀢𑁆𑀢𑁂 𑀧𑀦 𑀅𑀪𑀽𑀢𑀧𑀭𑀺𑀓𑀧𑁆𑀧𑀦𑀯𑀲𑁂𑀦 𑀉𑀧𑀫𑀸𑀫𑀢𑁆𑀢𑀁 𑀆𑀳𑀝𑀁. 𑀢𑀧𑁆𑀧𑀭𑀪𑀸𑀯𑀸𑀢𑀺 𑀢𑀧𑁆𑀧𑀭𑀪𑀸𑀯𑀢𑁄 𑀳𑁂𑀢𑀼𑀲𑀗𑁆𑀔𑀸𑀢𑀲𑁆𑀲 𑀲𑀫𑀬𑀲𑁆𑀲 𑀧𑀭𑀸𑀬𑀢𑁆𑀢𑀯𑀼𑀢𑁆𑀢𑀺𑀤𑀻𑀧𑀦𑁂 𑀏𑀓𑀦𑁆𑀢𑀩𑁆𑀬𑀸𑀯𑀝𑀲𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀬𑁂 𑀧𑀦 ‘‘𑀢𑀧𑁆𑀧𑀭𑀪𑀸𑀯𑁄’’𑀢𑀺 𑀧𑀞𑀦𑁆𑀢𑀺, 𑀢𑁂𑀲𑀁 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀤𑀻𑀧𑀦𑀢𑁄 𑀢𑀧𑁆𑀧𑀭𑀪𑀸𑀯𑁄 𑀳𑁂𑀢𑀼𑀲𑀗𑁆𑀔𑀸𑀢𑀲𑁆𑀲 𑀲𑀫𑀬𑀲𑁆𑀲, 𑀢𑀲𑁆𑀫𑀸 𑀢𑀲𑁆𑀲 𑀧𑀭𑀸𑀬𑀢𑁆𑀢𑀯𑀼𑀢𑁆𑀢𑀺𑀤𑀻𑀧𑀦𑀢𑀸 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸. 𑀲𑀫𑀼𑀤𑀸𑀬𑀸𑀬𑀢𑁆𑀢𑀢𑀸𑀤𑀻𑀧𑀦𑁂 𑀢𑀧𑁆𑀧𑀭𑁄, 𑀢𑀤𑁂𑀓𑀤𑁂𑀲𑀸𑀬𑀢𑁆𑀢𑀢𑀸𑀤𑀻𑀧𑀦𑁂 𑀢𑀧𑁆𑀧𑀭𑁄 𑀦 𑀳𑁄𑀢𑀻𑀢𑀺 𑀆𑀳 ‘‘𑀅𑀢𑀧𑁆𑀧𑀭𑀪𑀸𑀯𑀢𑁄’’𑀢𑀺.

𑀦𑀦𑀼 𑀘 𑀢𑀁 𑀢𑀁 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑁄 𑀓𑀸𑀮𑁄 𑀯𑁄𑀳𑀸𑀭𑀫𑀢𑁆𑀢𑀓𑁄, 𑀲𑁄 𑀓𑀣𑀁 𑀆𑀥𑀸𑀭𑁄 𑀢𑀢𑁆𑀣 𑀯𑀼𑀢𑁆𑀢𑀥𑀫𑁆𑀫𑀸𑀦𑀦𑁆𑀢𑀺 𑀆𑀳 ‘‘𑀓𑀸𑀮𑁄𑀧𑀺 𑀳𑀻’’𑀢𑀺𑀆𑀤𑀺. 𑀬𑀤𑀺 𑀓𑀺𑀭𑀺𑀬𑀸𑀬 𑀓𑀺𑀭𑀺𑀬𑀦𑁆𑀢𑀭𑀮𑀓𑁆𑀔𑀡𑀁 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀁, 𑀓𑀸 𑀧𑀦𑁂𑀢𑁆𑀣 𑀮𑀓𑁆𑀔𑀡𑀓𑀺𑀭𑀺𑀬𑀸𑀢𑀺 𑀆𑀳 ‘‘𑀇𑀳𑀸𑀧𑀻’’𑀢𑀺𑀆𑀤𑀺. 𑀮𑀓𑁆𑀔𑀡𑀪𑀽𑀢𑀪𑀸𑀯𑀬𑀼𑀢𑁆𑀢𑁄𑀢𑀺 𑀇𑀢𑀺-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀲𑁆𑀫𑀸 𑀲𑀢𑁆𑀢𑀸𑀲𑀗𑁆𑀔𑀸𑀢𑀸𑀬 𑀮𑀓𑁆𑀔𑀡𑀓𑀺𑀭𑀺𑀬𑀸𑀬 𑀬𑀼𑀢𑁆𑀢𑁄 𑀲𑀫𑀬𑁄, 𑀢𑀲𑁆𑀫𑀸 𑀢𑀢𑁆𑀣 𑀪𑀽𑀫𑀺𑀦𑀺𑀤𑁆𑀤𑁂𑀲𑁄𑀢𑀺.

𑀉𑀤𑁆𑀤𑀸𑀦𑀢𑁄𑀢𑀺 𑀬𑀤𑀺 𑀲𑀗𑁆𑀔𑁂𑀧𑀢𑁄𑀢𑀺 𑀅𑀢𑁆𑀣𑁄. 𑀦𑀦𑀼 𑀘 𑀅𑀯𑀲𑀺𑀝𑁆𑀞𑀓𑀺𑀮𑁂𑀲𑀸𑀤𑀬𑁄 𑀯𑀺𑀬 𑀓𑀺𑀮𑁂𑀲𑀓𑀸𑀫𑁄𑀧𑀺 𑀅𑀲𑁆𑀲𑀸𑀤𑁂𑀢𑀩𑁆𑀩𑀢𑀸𑀬 𑀯𑀢𑁆𑀣𑀼𑀓𑀸𑀫𑁂 𑀲𑀫𑀯𑀭𑀼𑀤𑁆𑀥𑁄 𑀜𑀸𑀡𑀁 𑀯𑀺𑀬 𑀜𑁂𑀬𑁆𑀬𑁂𑀢𑀺 𑀲𑀗𑁆𑀔𑁂𑀧𑀢𑁄 𑀏𑀓𑁄𑀬𑁂𑀯 𑀓𑀸𑀫𑁄 𑀲𑀺𑀬𑀸𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬𑀸𑀳 ‘‘𑀓𑀺𑀮𑁂𑀲𑀓𑀸𑀫𑁄’’𑀢𑀺𑀆𑀤𑀺. 𑀲𑀳𑀺𑀢𑀲𑁆𑀲𑀸𑀢𑀺 𑀯𑀺𑀲𑀬𑀯𑀺𑀲𑀬𑀺𑀪𑀸𑀯𑁂𑀦 𑀅𑀯𑀝𑁆𑀞𑀺𑀢𑀲𑁆𑀲. ‘‘𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸’’𑀢𑀺 𑀓𑀺𑀜𑁆𑀘𑀸𑀧𑀺 𑀲𑀩𑁆𑀩𑁂 𑀓𑀸𑀫𑀸 𑀉𑀤𑁆𑀤𑀺𑀝𑁆𑀞𑀸, ‘‘𑀘𑀢𑀼𑀦𑁆𑀦𑀁 𑀅𑀧𑀸𑀬𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀧𑀦 𑀯𑀺𑀲𑀬𑀲𑁆𑀲 𑀯𑀺𑀲𑁂𑀲𑀺𑀢𑀢𑁆𑀢𑀸 𑀑𑀭𑀫𑁆𑀪𑀸𑀕𑀺𑀬𑀓𑀺𑀮𑁂𑀲𑀪𑀽𑀢𑁄 𑀓𑀸𑀫𑀭𑀸𑀕𑁄 𑀇𑀥 𑀓𑀺𑀮𑁂𑀲𑀓𑀸𑀫𑁄𑀢𑀺 𑀕𑀳𑀺𑀢𑁄𑀢𑀺 ‘‘𑀢𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀘𑁄𑀤𑀓𑁄 𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀅𑀚𑀸𑀦𑀦𑁆𑀢𑁄 ‘‘𑀦𑀦𑀼 𑀘𑀸’’𑀢𑀺𑀆𑀤𑀺𑀦𑀸 𑀅𑀦𑀼𑀬𑀼𑀜𑁆𑀚𑀢𑀺. 𑀇𑀢𑀭𑁄 𑀧𑀦 ‘‘𑀩𑀳𑀮𑀓𑀺𑀮𑁂𑀲𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀢𑀺.

𑀓𑀸𑀫𑀸𑀯𑀘𑀭𑀥𑀫𑁆𑀫𑁂𑀲𑀼 𑀯𑀺𑀫𑀸𑀦𑀓𑀧𑁆𑀧𑀭𑀼𑀓𑁆𑀔𑀸𑀤𑀺𑀧𑁆𑀧𑀓𑀸𑀭𑁂𑀲𑀼 𑀧𑀭𑀺𑀢𑁆𑀢𑀓𑀼𑀲𑀮𑀸𑀤𑀻𑀲𑀼 𑀯𑀸. 𑀦𑀦𑀼 𑀘 ‘‘𑀘𑀢𑀼𑀦𑁆𑀦𑀁 𑀅𑀧𑀸𑀬𑀸𑀦’’𑀦𑁆𑀢𑀺 𑀯𑀺𑀲𑀬𑀲𑁆𑀲 𑀯𑀺𑀲𑁂𑀲𑀺𑀢𑀢𑁆𑀢𑀸 𑀭𑀽𑀧𑀸𑀭𑀽𑀧𑀥𑀸𑀢𑀼𑀕𑁆𑀕𑀳𑀡𑀲𑁆𑀲 𑀅𑀲𑀫𑁆𑀪𑀯𑁄𑀬𑁂𑀯𑀸𑀢𑀺? 𑀦, ‘‘𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸’’𑀢𑀺 𑀦𑀺𑀭𑀯𑀲𑁂𑀲𑀢𑁄 𑀓𑀸𑀫𑀸𑀦𑀁 𑀉𑀤𑁆𑀤𑀺𑀝𑁆𑀞𑀢𑁆𑀢𑀸. 𑀉𑀤𑁆𑀤𑀺𑀝𑁆𑀞𑁂𑀧𑀺 𑀳𑀺 𑀓𑀸𑀫𑀲𑀫𑀼𑀤𑀸𑀬𑁂 𑀬𑀣𑀸 𑀢𑀤𑁂𑀓𑀤𑁂𑀲𑁄𑀯 𑀕𑀬𑁆𑀳𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀤𑀼𑀯𑀺𑀥𑁄’’𑀢𑀺𑀆𑀤𑀺𑀫𑀸𑀳. 𑀓𑀸𑀫𑀭𑀸𑀕𑁄 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁄 𑀭𑀸𑀕𑁄. 𑀓𑀸𑀫𑀢𑀡𑁆𑀳𑀸 𑀓𑀸𑀫𑀸𑀯𑀘𑀭𑀥𑀫𑁆𑀫𑀯𑀺𑀲𑀬𑀸 𑀢𑀡𑁆𑀳𑀸. 𑀦𑀺𑀭𑁄𑀥𑀢𑀡𑁆𑀳𑀸 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀲𑀳𑀕𑀢𑁄 𑀭𑀸𑀕𑁄. 𑀇𑀥𑀸𑀢𑀺 𑀏𑀓𑀸𑀤𑀲𑀯𑀺𑀥𑁂 𑀧𑀤𑁂𑀲𑁂. 𑀬𑀤𑀺 𑀅𑀦𑀯𑀲𑁂𑀲𑀧𑁆𑀧𑀯𑀢𑁆𑀢𑀺 𑀅𑀥𑀺𑀧𑁆𑀧𑁂𑀢𑀸, ‘‘𑀤𑀼𑀯𑀺𑀥𑁄𑀧𑁂𑀲𑁄’’𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀯𑀢𑁆𑀣𑀼𑀓𑀸𑀫𑁂𑀓𑀤𑁂𑀲𑀲𑁆𑀲 𑀇𑀥 𑀅𑀧𑁆𑀧𑀯𑀢𑁆𑀢𑀦𑀢𑁄𑀢𑀺 𑀅𑀦𑀼𑀬𑁄𑀕𑁂𑀦 𑀬𑁂𑀪𑀼𑀬𑁆𑀬𑀪𑀸𑀯𑀢𑁄 𑀅𑀦𑀯𑀲𑁂𑀲𑁄 𑀯𑀺𑀬 𑀅𑀦𑀯𑀲𑁂𑀲𑁄𑀢𑀺 𑀯𑀸 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀢𑁆𑀣𑀼𑀓𑀸𑀫𑁄𑀧𑀻’’𑀢𑀺𑀆𑀤𑀺𑀫𑀸𑀳. 𑀅𑀦𑀯𑀲𑁂𑀲𑀲𑀤𑀺𑀲𑀢𑀸 𑀘𑁂𑀢𑁆𑀣 𑀲𑀪𑀸𑀯𑀪𑀺𑀦𑁆𑀦𑀲𑁆𑀲 𑀓𑀲𑁆𑀲𑀘𑀺 𑀅𑀦𑀯𑀲𑁂𑀲𑀢𑁄. 𑀏𑀯𑀜𑁆𑀘 𑀓𑀢𑁆𑀯𑀸𑀢𑀺 𑀓𑀺𑀮𑁂𑀲𑀓𑀸𑀫𑀯𑀢𑁆𑀣𑀼𑀓𑀸𑀫𑀸𑀦𑀁 𑀅𑀦𑀯𑀲𑁂𑀲𑀧𑀭𑀺𑀧𑀼𑀡𑁆𑀡𑀪𑀸𑀯𑁂𑀦 𑀅𑀪𑀺𑀮𑀓𑁆𑀔𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀘𑀸𑀲𑀤𑁆𑀤𑀲𑁆𑀲 𑀭𑀲𑁆𑀲𑀢𑁆𑀢𑀁 𑀓𑀢𑀦𑁆𑀢𑀺 𑀓𑀸𑀫𑀸𑀯𑀘𑀭𑀲𑀤𑁆𑀤𑁂 𑀳𑁂𑀢𑀼𑀓𑀢𑁆𑀢𑀼𑀅𑀢𑁆𑀣𑁄 𑀅𑀦𑁆𑀢𑁄𑀦𑀻𑀢𑁄𑀢𑀺 𑀤𑀲𑁆𑀲𑁂𑀢𑀺.

𑀯𑀺𑀲𑀬𑁂𑀢𑀺 𑀯𑀢𑁆𑀣𑀼𑀲𑁆𑀫𑀺𑀁 𑀅𑀪𑀺𑀥𑁂𑀬𑁆𑀬𑀢𑁆𑀣𑁂𑀢𑀺 𑀅𑀢𑁆𑀣𑁄. 𑀦𑀺𑀫𑀺𑀢𑁆𑀢𑀯𑀺𑀭𑀳𑁂𑀢𑀺 𑀏𑀢𑁂𑀦 𑀭𑀼𑀴𑁆𑀳𑀻𑀲𑀼 𑀓𑀺𑀭𑀺𑀬𑀸 𑀯𑀺𑀪𑀸𑀕𑀓𑀭𑀡𑀸𑀬, 𑀦 𑀅𑀢𑁆𑀢𑀓𑀺𑀭𑀺𑀬𑀸𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀓𑀼𑀲𑀮𑀪𑀸𑀯𑀦𑁆𑀢𑀺 𑀚𑀸𑀢𑀓𑀩𑀸𑀳𑀺𑀢𑀺𑀓𑀲𑀼𑀢𑁆𑀢𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂𑀦 𑀓𑀣𑀺𑀢𑀁 𑀓𑀼𑀲𑀮𑀢𑁆𑀢𑀁. 𑀢𑀲𑁆𑀲𑀸𑀢𑀺 𑀲𑀼𑀔𑀯𑀺𑀧𑀸𑀓𑀪𑀸𑀯𑀲𑁆𑀲. 𑀢𑀲𑁆𑀲 𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑀁 𑀯𑀢𑁆𑀢𑀼𑀓𑀸𑀫𑀢𑀸𑀬𑀸𑀢𑀺 𑀏𑀢𑁂𑀦 ‘‘𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀮𑀓𑁆𑀔𑀡’’𑀦𑁆𑀢𑀺 𑀏𑀢𑁆𑀣 𑀲𑀼𑀔𑀲𑀤𑁆𑀤𑁄 𑀇𑀝𑁆𑀞𑀧𑀭𑀺𑀬𑀸𑀬𑁄 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀜𑁆𑀜𑀸𑀧𑀜𑁆𑀜𑀸𑀓𑀺𑀘𑁆𑀘𑀁 𑀲𑀜𑁆𑀜𑀸𑀡𑀓𑀭𑀡𑀧𑀝𑀺𑀯𑀺𑀚𑁆𑀛𑀦𑀸𑀦𑀺, 𑀢𑀤𑀼𑀪𑀬𑀯𑀺𑀥𑀼𑀭𑀸 𑀆𑀭𑀫𑁆𑀫𑀡𑀽𑀧𑀮𑀤𑁆𑀥𑀺 ‘‘𑀯𑀺𑀚𑀸𑀦𑀸𑀢𑀻’’𑀢𑀺 𑀇𑀫𑀺𑀦𑀸 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀲𑀜𑁆𑀜𑀸…𑀧𑁂… 𑀕𑀳𑀡’’𑀦𑁆𑀢𑀺. 𑀦𑀦𑀼 𑀘 𑀨𑀲𑁆𑀲𑀸𑀤𑀺𑀓𑀺𑀘𑁆𑀘𑀢𑁄𑀧𑀺 𑀯𑀺𑀲𑀺𑀝𑁆𑀞𑀓𑀺𑀘𑁆𑀘𑀁 𑀘𑀺𑀢𑁆𑀢𑀦𑁆𑀢𑀺? 𑀲𑀘𑁆𑀘𑀫𑁂𑀢𑀁, 𑀲𑁄 𑀧𑀦 𑀯𑀺𑀲𑁂𑀲𑁄 𑀦 𑀢𑀣𑀸 𑀤𑀼𑀭𑀯𑀩𑁄𑀥𑁄, 𑀬𑀣𑀸 𑀲𑀜𑁆𑀜𑀸𑀧𑀜𑁆𑀜𑀸𑀯𑀺𑀜𑁆𑀜𑀸𑀡𑀸𑀦𑀦𑁆𑀢𑀺 𑀲𑀜𑁆𑀜𑀸𑀧𑀜𑁆𑀜𑀸𑀓𑀺𑀘𑁆𑀘𑀯𑀺𑀲𑀺𑀝𑁆𑀞𑀮𑀓𑁆𑀔𑀡𑀢𑀸𑀬 𑀯𑀺𑀜𑁆𑀜𑀸𑀡𑀮𑀓𑁆𑀔𑀡𑀫𑀸𑀳. 𑀅𑀦𑀦𑁆𑀢𑀭𑀥𑀫𑁆𑀫𑀸𑀦𑀁 𑀧𑀕𑀼𑀡𑀩𑀮𑀯𑀪𑀸𑀯𑀲𑁆𑀲 𑀓𑀸𑀭𑀡𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑁄 𑀲𑀦𑁆𑀢𑀸𑀦𑀁 𑀘𑀺𑀦𑁄𑀢𑀺 𑀦𑀸𑀫. 𑀢𑀣𑀸𑀧𑀯𑀢𑁆𑀢𑀺 𑀘 𑀆𑀲𑁂𑀯𑀦𑀧𑀘𑁆𑀘𑀬𑀪𑀸𑀯𑁄𑀢𑀺 𑀆𑀳 ‘‘𑀆𑀲𑁂𑀯𑀦𑀧𑀘𑁆𑀘𑀬𑀪𑀸𑀯𑁂𑀦 𑀘𑀺𑀦𑁄𑀢𑀻’’𑀢𑀺.

𑀘𑀺𑀢𑁆𑀢𑀓𑀢𑀫𑁂𑀯𑀸𑀢𑀺 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀓𑀢𑀫𑁂𑀯. 𑀦𑀸𑀦𑀢𑁆𑀢𑀸𑀤𑀻𑀦𑀁 𑀯𑀯𑀢𑁆𑀣𑀸𑀦𑀦𑁆𑀢𑀺 𑀏𑀢𑁆𑀣 𑀯𑀯𑀢𑁆𑀣𑀸𑀦𑀁 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁. 𑀯𑀯𑀢𑁆𑀣𑀸𑀦𑀁 𑀧𑀭𑀺𑀘𑁆𑀙𑁂𑀤𑁄 𑀅𑀲𑀗𑁆𑀓𑀭𑀪𑀸𑀯𑁄. 𑀢𑁂𑀦 𑀘 𑀥𑀫𑁆𑀫𑁄 𑀦𑀺𑀘𑁆𑀙𑀺𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀦𑀺𑀘𑁆𑀙𑀺𑀢𑀢𑀸’’𑀢𑀺. 𑀮𑀺𑀗𑁆𑀕𑀦𑀸𑀦𑀢𑁆𑀢𑀸𑀤𑀻𑀦𑀻𑀢𑀺 𑀏𑀢𑁆𑀣 𑀇𑀢𑁆𑀣𑀺𑀧𑀼𑀭𑀺𑀲𑀲𑀡𑁆𑀞𑀸𑀦𑀯𑀲𑁂𑀦 𑀮𑀺𑀗𑁆𑀕𑀦𑀸𑀦𑀢𑁆𑀢𑀁. 𑀤𑁂𑀯𑀫𑀦𑀼𑀲𑁆𑀲𑀢𑀺𑀭𑀘𑁆𑀙𑀸𑀦𑀸𑀤𑀺𑀯𑀲𑁂𑀦 𑀇𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀧𑀼𑀣𑀼𑀢𑁆𑀢𑀁, 𑀢𑀣𑀸 𑀧𑀼𑀭𑀺𑀲𑀮𑀺𑀗𑁆𑀕𑀲𑁆𑀲. 𑀤𑁂𑀯𑀸𑀤𑀺𑀪𑁂𑀤𑁂 𑀇𑀢𑁆𑀣𑀺𑀮𑀺𑀗𑁆𑀕𑁂 𑀧𑀘𑁆𑀘𑁂𑀓𑀁 𑀦𑀸𑀦𑀢𑁆𑀢𑀓𑀸𑀬𑀢𑀸𑀲𑀗𑁆𑀔𑀸𑀢𑀲𑁆𑀲 𑀅𑀜𑁆𑀜𑀫𑀜𑁆𑀜𑀯𑀺𑀲𑀤𑀺𑀲𑀲𑀪𑀸𑀯𑀲𑁆𑀲 𑀤𑁂𑀲𑀸𑀤𑀺𑀪𑁂𑀤𑀪𑀺𑀦𑁆𑀦𑀲𑁆𑀲 𑀘 𑀯𑀺𑀲𑁂𑀲𑀲𑁆𑀲 𑀯𑀲𑁂𑀦 𑀧𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸 𑀧𑀼𑀭𑀺𑀲𑀮𑀺𑀗𑁆𑀕𑁂. 𑀮𑀺𑀗𑁆𑀕𑀦𑀺𑀩𑁆𑀩𑀢𑁆𑀢𑀓𑀲𑁆𑀲 𑀯𑀸 𑀓𑀫𑁆𑀫𑀲𑁆𑀲 𑀬𑀣𑀸𑀯𑀼𑀢𑁆𑀢𑀦𑀸𑀦𑀢𑁆𑀢𑀸𑀤𑀺𑀯𑀲𑁂𑀦 𑀮𑀺𑀗𑁆𑀕𑀲𑁆𑀲 𑀦𑀸𑀦𑀢𑁆𑀢𑀸𑀤𑀻𑀦𑀺 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀮𑀺𑀗𑁆𑀕𑀦𑀸𑀦𑀢𑁆𑀢𑀸𑀤𑀻𑀲𑀼 𑀧𑀯𑀢𑁆𑀢𑀢𑁆𑀢𑀸 𑀲𑀜𑁆𑀜𑀸𑀤𑀻𑀦𑀁 𑀦𑀸𑀦𑀢𑁆𑀢𑀸𑀤𑀻𑀦𑀺. 𑀢𑁂𑀦𑁂𑀯𑀸𑀳 ‘‘𑀓𑀫𑁆𑀫𑀦𑀸𑀦𑀢𑁆𑀢𑀸𑀤𑀻𑀳𑀺 𑀦𑀺𑀩𑁆𑀩𑀢𑁆𑀢𑀸𑀦𑀺 𑀳𑀺 𑀢𑀸𑀦𑀻’’𑀢𑀺. 𑀅𑀧𑀤𑀸𑀤𑀺𑀦𑀸𑀦𑀸𑀓𑀭𑀡𑀤𑀲𑁆𑀲𑀦𑁂𑀦 𑀮𑀺𑀗𑁆𑀕𑀦𑀸𑀦𑀢𑁆𑀢𑀁 𑀤𑀲𑁆𑀲𑀺𑀢𑀁. 𑀢𑀲𑁆𑀫𑀺𑀜𑁆𑀘 𑀤𑀲𑁆𑀲𑀺𑀢𑁂 𑀲𑀜𑁆𑀜𑀸𑀦𑀸𑀦𑀢𑁆𑀢𑀸𑀤𑀬𑁄 𑀤𑀲𑁆𑀲𑀺𑀢𑀸 𑀏𑀯𑀸𑀢𑀺 𑀆𑀯𑀢𑁆𑀢𑀢𑀺 𑀪𑀯𑀘𑀓𑁆𑀓𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀦𑀸𑀕…𑀧𑁂… 𑀖𑀝𑁂𑀦𑁆𑀢𑁄’’𑀢𑀺. 𑀇𑀢𑁆𑀣𑀺𑀮𑀺𑀗𑁆𑀕𑀧𑀼𑀭𑀺𑀲𑀮𑀺𑀗𑁆𑀕𑀸𑀤𑀺 𑀯𑀺𑀜𑁆𑀜𑀸𑀡𑀸𑀥𑀺𑀝𑁆𑀞𑀺𑀢𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀲𑀦𑁆𑀦𑀺𑀯𑁂𑀲𑀯𑀺𑀲𑁂𑀲𑁄. 𑀲𑀜𑁆𑀜𑀸𑀲𑀻𑀲𑁂𑀦 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀯𑀼𑀢𑁆𑀢𑀸. 𑀯𑁄𑀳𑀸𑀭𑀯𑀘𑀦𑁂𑀦 𑀘 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀯𑁄𑀳𑀭𑀺𑀢𑀩𑁆𑀩𑀪𑀸𑀯𑁂𑀦 𑀧𑀯𑀢𑁆𑀢𑀺 𑀤𑀻𑀧𑀺𑀢𑀸, 𑀬𑀸 𑀲𑀸 𑀢𑀡𑁆𑀳𑀸𑀤𑀺𑀝𑁆𑀞𑀺𑀅𑀪𑀺𑀦𑀺𑀯𑁂𑀲𑀳𑁂𑀢𑀽𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀮𑀺𑀗𑁆𑀕𑀸𑀤𑀺…𑀧𑁂… 𑀬𑁄𑀲𑀸𑀦𑀸𑀦𑀻’’𑀢𑀺 𑀆𑀳.

‘‘𑀬𑁂 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀅𑀓𑀼𑀲𑀮𑀸 𑀅𑀓𑀼𑀲𑀮𑀪𑀸𑀕𑀺𑀬𑀸, 𑀲𑀩𑁆𑀩𑁂𑀢𑁂 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸’’𑀢𑀺 (𑀅. 𑀦𑀺. 𑁧.𑁫𑁬-𑁫𑁭), ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸’’𑀢𑀺 (𑀥. 𑀧. 𑁧, 𑁨) 𑀘 𑀏𑀯𑀫𑀸𑀤𑀺𑀯𑀘𑀦𑀢𑁄 𑀘𑀺𑀢𑁆𑀢𑀳𑁂𑀢𑀼𑀓𑀁 𑀓𑀫𑁆𑀫𑀦𑁆𑀢𑀺 𑀆𑀳 ‘‘𑀓𑀫𑁆𑀫𑀜𑁆𑀳𑀺 𑀘𑀺𑀢𑁆𑀢𑀢𑁄 𑀦𑀺𑀩𑁆𑀩𑀢𑁆𑀢’’𑀦𑁆𑀢𑀺. 𑀬𑀣𑀸𑀲𑀗𑁆𑀔𑁆𑀬𑀦𑁆𑀢𑀺 𑀓𑀫𑁆𑀫𑀢𑁄 𑀮𑀺𑀗𑁆𑀕𑀁 𑀮𑀺𑀗𑁆𑀕𑀢𑁄 𑀲𑀜𑁆𑀜𑀸𑀢𑀺 𑀅𑀢𑁆𑀣𑁄. 𑀦 𑀧𑀼𑀭𑀺𑀫𑀯𑀺𑀓𑀧𑁆𑀧𑁂 𑀯𑀺𑀬 𑀓𑀫𑁆𑀫𑀢𑁄 𑀮𑀺𑀗𑁆𑀕𑀲𑀜𑁆𑀜𑀸 𑀮𑀺𑀗𑁆𑀕𑀢𑁄 𑀮𑀺𑀗𑁆𑀕𑀲𑀜𑁆𑀜𑀸𑀢𑀺 𑀉𑀪𑀬𑀢𑁄 𑀉𑀪𑀬𑀧𑁆𑀧𑀯𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦. ‘‘𑀪𑁂𑀤𑀁 𑀕𑀘𑁆𑀙𑀦𑁆𑀢𑀺 𑀇𑀢𑁆𑀣𑀸𑀬𑀁 𑀧𑀼𑀭𑀺𑀲𑁄𑀢𑀺 𑀯𑀸’’𑀢𑀺 𑀪𑁂𑀤𑀲𑁆𑀲 𑀯𑀺𑀲𑁂𑀲𑀺𑀢𑀢𑁆𑀢𑀸 𑀇𑀢𑁆𑀣𑀸𑀤𑀺𑀪𑀸𑀯𑁂𑀦 𑀯𑁄𑀳𑀭𑀺𑀢𑀩𑁆𑀩𑀪𑀸𑀯𑁄 𑀇𑀥 𑀪𑁂𑀤𑁄𑀢𑀺 ‘‘𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀯𑁄𑀳𑀸𑀭𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀤𑁆𑀥𑀤𑁆𑀯𑀬𑀯𑀲𑁂𑀦𑀸𑀢𑀺 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀤𑁆𑀥𑀤𑁆𑀯𑀬𑀯𑀲𑁂𑀦. 𑀕𑀼𑀡𑀸𑀪𑀺𑀩𑁆𑀬𑀸𑀧𑀦𑀁 𑀓𑀺𑀢𑁆𑀢𑀻𑀢𑀺 𑀆𑀳 ‘‘𑀧𑀢𑁆𑀣𑀝𑀬𑀲𑀢’’𑀦𑁆𑀢𑀺. 𑀓𑀫𑁆𑀫𑀦𑀸𑀦𑀸𑀓𑀭𑀡𑁂𑀦 𑀯𑀺𑀦𑀸 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀦𑀸𑀦𑀸𑀓𑀸𑀭𑀡𑀸𑀪𑀸𑀯𑀢𑁄 ‘‘𑀓𑀫𑁆𑀫𑀚𑁂𑀳𑀺…𑀧𑁂… 𑀦𑀸𑀦𑀸𑀓𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀯𑀺𑀧𑀘𑁆𑀘𑀦𑁄𑀓𑀸𑀲𑁄 𑀅𑀝𑁆𑀞𑀸𑀦𑀪𑀽𑀢𑀸, 𑀕𑀢𑀺𑀓𑀸𑀮𑁄𑀧𑀺 𑀯𑀸. 𑀓𑀸𑀫𑀸𑀯𑀘𑀭𑀁 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁 𑀭𑀽𑀧𑀥𑀸𑀢𑀼𑀬𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀁 𑀚𑀦𑁂𑀢𑁆𑀯𑀸 𑀅𑀦𑁄𑀓𑀸𑀲𑀢𑀸𑀬 𑀢𑀤𑀸𑀭𑀫𑁆𑀫𑀡𑀁 𑀅𑀚𑀦𑁂𑀦𑁆𑀢𑀁 𑀏𑀢𑁆𑀣 𑀦𑀺𑀤𑀲𑁆𑀲𑁂𑀢𑀩𑁆𑀩𑀁. 𑀏𑀓𑀘𑁆𑀘𑀘𑀺𑀢𑁆𑀢𑀓𑀭𑀡𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀘𑀓𑁆𑀔𑀸𑀤𑀺𑀯𑁂𑀓𑀮𑁆𑀮𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀅𑀚𑀦𑀓𑀁 𑀓𑀫𑁆𑀫𑀯𑀺𑀜𑁆𑀜𑀸𑀡𑀁 𑀅𑀯𑀲𑁂𑀲𑀧𑀘𑁆𑀘𑀬𑀯𑀺𑀓𑀮𑁂 𑀅𑀦𑁄𑀕𑀥𑀁 𑀤𑀝𑁆𑀞𑀩𑁆𑀩𑀁. 𑀢𑀤𑀧𑀺 𑀓𑀸𑀮𑀕𑀢𑀺𑀧𑀬𑁄𑀕𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀗𑁆𑀕𑀳𑀺𑀢𑀦𑁆𑀢𑀺. 𑀏𑀢𑁆𑀣 𑀘 ‘‘𑀲𑀳𑀓𑀸𑀭𑀻𑀓𑀸𑀭𑀡𑀯𑀺𑀓𑀮𑀁 𑀯𑀺𑀧𑀸𑀓𑀲𑁆𑀲 𑀅𑀘𑁆𑀘𑀦𑁆𑀢𑀁 𑀑𑀓𑀸𑀲𑀫𑁂𑀯 𑀦 𑀮𑀪𑀢𑀺, 𑀇𑀢𑀭𑀁 𑀯𑀺𑀧𑀸𑀓𑁂𑀓𑀤𑁂𑀲𑀲𑁆𑀲 𑀮𑀤𑁆𑀥𑁄𑀓𑀸𑀲𑀦𑁆𑀢𑀺, 𑀇𑀤𑀫𑁂𑀢𑁂𑀲𑀁 𑀦𑀸𑀦𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀯𑀺𑀧𑀸𑀓𑀲𑁆𑀲 𑀑𑀓𑀸𑀲𑀮𑀸𑀪𑁂 𑀲𑀢𑀺 𑀲𑀳𑀸𑀬𑀓𑀸𑀭𑀡𑀯𑀺𑀓𑀮𑀢𑀸𑀯 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁.

𑀪𑀯𑀢𑀼 𑀢𑀸𑀯 𑀪𑀯𑀺𑀢𑁆𑀯𑀸 𑀅𑀧𑀕𑀢𑀁 𑀪𑀽𑀢𑀸𑀧𑀕𑀢𑀁, 𑀅𑀦𑀼𑀪𑀯𑀺𑀢𑁆𑀯𑀸 𑀅𑀧𑀕𑀢𑀁 𑀧𑀦 𑀓𑀣𑀦𑁆𑀢𑀺 𑀆𑀳 ‘‘𑀅𑀦𑀼𑀪𑀽𑀢𑀪𑀽𑀢𑀸’’𑀢𑀺𑀆𑀤𑀺. 𑀢𑁂𑀦 𑀅𑀦𑀼𑀪𑀽𑀢-𑀲𑀤𑁆𑀤𑁂𑀦 𑀬𑁄 𑀅𑀢𑁆𑀣𑁄 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀪𑀽𑀢-𑀲𑀤𑁆𑀤𑁄𑀬𑁂𑀯 𑀯𑀸𑀘𑀓𑁄, 𑀦 𑀅𑀦𑀼-𑀲𑀤𑁆𑀤𑁄, 𑀅𑀦𑀼-𑀲𑀤𑁆𑀤𑁄 𑀧𑀦 𑀚𑁄𑀢𑀓𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀸𑀔𑀸𑀪𑀗𑁆𑀕𑀲𑀤𑀺𑀲𑀸 𑀳𑀺 𑀦𑀺𑀧𑀸𑀢𑁄𑀧𑀲𑀕𑁆𑀕𑀸𑀢𑀺. 𑀓𑀺𑀭𑀺𑀬𑀸𑀯𑀺𑀲𑁂𑀲𑀓𑀢𑁆𑀢𑀜𑁆𑀘 𑀉𑀧𑀲𑀕𑁆𑀕𑀸𑀦𑀁 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀼𑀲𑀤𑁆𑀤𑀸𑀦𑀁 𑀢𑁂𑀳𑀺 𑀯𑀢𑁆𑀢𑀩𑁆𑀩𑀯𑀺𑀲𑁂𑀲𑀲𑁆𑀲 𑀚𑁄𑀢𑀦𑀪𑀸𑀯𑁂𑀦𑁂𑀯 𑀅𑀯𑀘𑁆𑀙𑀺𑀦𑁆𑀤𑀦𑀦𑁆𑀢𑀺 𑀬𑀢𑁆𑀢𑀓𑀸 𑀥𑀸𑀢𑀼𑀲𑀤𑁆𑀤𑁂𑀦 𑀅𑀪𑀺𑀥𑀸𑀢𑀩𑁆𑀩𑀸 𑀅𑀢𑁆𑀣𑀯𑀺𑀲𑁂𑀲𑀸, 𑀢𑁂𑀲𑀁 𑀬𑀁 𑀲𑀸𑀫𑀜𑁆𑀜𑀁 𑀅𑀯𑀺𑀲𑁂𑀲𑁄, 𑀢𑀲𑁆𑀲 𑀯𑀺𑀲𑁂𑀲𑁂 𑀅𑀯𑀝𑁆𑀞𑀸𑀧𑀦𑀁 𑀢𑀲𑁆𑀲 𑀢𑀲𑁆𑀲 𑀯𑀺𑀲𑁂𑀲𑀲𑁆𑀲 𑀚𑁄𑀢𑀦𑀫𑁂𑀯𑀸𑀢𑀺 𑀆𑀳 ‘‘𑀲𑀸𑀫𑀜𑁆𑀜…𑀧𑁂… 𑀯𑀺𑀲𑁂𑀲𑀻𑀬𑀢𑀻’’𑀢𑀺. 𑀅𑀦𑀼𑀪𑀽𑀢-𑀲𑀤𑁆𑀤𑁄 𑀩𑀳𑀼𑀮𑀁 𑀓𑀫𑁆𑀫𑀢𑁆𑀣𑁂 𑀏𑀯 𑀤𑀺𑀲𑁆𑀲𑀢𑀻𑀢𑀺 𑀢𑀲𑁆𑀲 𑀇𑀥 𑀓𑀢𑁆𑀢𑀼𑀅𑀢𑁆𑀣𑀯𑀸𑀘𑀺𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀼𑀪𑀽𑀢𑀲𑀤𑁆𑀤𑁄 𑀘𑀸’’𑀢𑀺𑀆𑀤𑀺𑀫𑀸𑀳. 𑀲𑀢𑀺𑀧𑀺 𑀲𑀩𑁆𑀩𑁂𑀲𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀲𑀯𑁂𑀤𑀬𑀺𑀢𑀪𑀸𑀯𑀢𑁄 𑀆𑀭𑀫𑁆𑀫𑀡𑀸𑀦𑀼𑀪𑀯𑀦𑁂, 𑀲𑀯𑀺𑀧𑀮𑁆𑀮𑀸𑀲𑁂 𑀧𑀦 𑀲𑀦𑁆𑀢𑀸𑀦𑁂 𑀘𑀺𑀢𑁆𑀢𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀧𑀯𑀢𑁆𑀢𑀺𑀢𑁄 𑀅𑀩𑁆𑀬𑀸𑀓𑀢𑁂𑀳𑀺 𑀯𑀺𑀲𑀺𑀝𑁆𑀞𑁄 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀲𑀸𑀢𑀺𑀲𑀬𑁄 𑀯𑀺𑀲𑀬𑀸𑀦𑀼𑀪𑀯𑀦𑀸𑀓𑀸𑀭𑁄𑀢𑀺 𑀅𑀬𑀫𑀢𑁆𑀣𑁄 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀢𑁆𑀢𑀼𑀁 𑀅𑀥𑀺𑀧𑁆𑀧𑀸𑀬𑀯𑀲𑁂𑀦𑀸’’𑀢𑀺 𑀆𑀳. 𑀪𑀽𑀢𑀸𑀧𑀕𑀢𑀪𑀸𑀯𑀸𑀪𑀺𑀥𑀸𑀦𑀸𑀥𑀺𑀧𑁆𑀧𑀸𑀬𑁂𑀦𑀸𑀢𑀺 𑀓𑀼𑀲𑀮𑀸𑀓𑀼𑀲𑀮𑀲𑁆𑀲 𑀆𑀓𑀟𑁆𑀠𑀦𑀼𑀧𑀸𑀬𑀫𑀸𑀳.

𑀉𑀧𑁆𑀧𑀢𑀺𑀢𑀓𑀺𑀘𑁆𑀘𑀦𑀺𑀧𑁆𑀨𑀸𑀤𑀦𑀢𑁄 𑀉𑀧𑁆𑀧𑀢𑀺𑀢𑀲𑀤𑀺𑀲𑀢𑁆𑀢𑀸 ‘‘𑀉𑀧𑁆𑀧𑀢𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀧𑁆𑀧𑀚𑁆𑀚𑀺𑀢𑀼𑀁 𑀆𑀭𑀤𑁆𑀥𑁄𑀢𑀺 𑀅𑀦𑀸𑀕𑀢𑀲𑁆𑀲𑀧𑀺 𑀢𑀲𑁆𑀲𑁂𑀯 𑀉𑀧𑁆𑀧𑀦𑁆𑀦-𑀲𑀤𑁆𑀤𑁂𑀦 𑀯𑀼𑀢𑁆𑀢𑀢𑀸𑀬 𑀓𑀸𑀭𑀡𑀫𑀸𑀳. 𑀏𑀢𑁆𑀣 𑀘 𑀭𑀚𑁆𑀚𑀦𑀸𑀤𑀺𑀯𑀲𑁂𑀦 𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀁 𑀲𑀸𑀢𑀺𑀲𑀬𑀦𑁆𑀢𑀺 𑀅𑀓𑀼𑀲𑀮𑀜𑁆𑀘 𑀓𑀼𑀲𑀮𑀜𑁆𑀘 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀢𑀸𑀲𑀸𑀫𑀜𑁆𑀜𑁂𑀦 ‘‘𑀲𑀩𑁆𑀩𑀲𑀗𑁆𑀔𑀢𑀁 𑀪𑀽𑀢𑀸𑀧𑀕𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 𑀧𑀦 ‘‘𑀯𑀺𑀧𑀸𑀓𑀸𑀦𑀼𑀪𑀯𑀦𑀯𑀲𑁂𑀦 𑀢𑀤𑀸𑀭𑀫𑁆𑀫𑀡𑀁. 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀲𑁆𑀲 𑀲𑀩𑁆𑀩𑀣𑀸 𑀅𑀯𑀺𑀕𑀢𑀢𑁆𑀢𑀸 𑀪𑀯𑀺𑀢𑁆𑀯𑀸 𑀯𑀺𑀕𑀢𑀢𑀸𑀫𑀢𑁆𑀢𑀯𑀲𑁂𑀦𑀓𑀫𑁆𑀫𑀜𑁆𑀘 𑀪𑀽𑀢𑀸𑀧𑀕𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯 𑀢𑀢𑁆𑀣 𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑀦𑁆𑀢𑀺 𑀯𑀺𑀧𑀸𑀓𑀫𑁂𑀯𑀸𑀳. 𑀇𑀥 𑀧𑀦 𑀓𑀫𑁆𑀫𑀫𑁆𑀧𑀻𑀢𑀺. 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀪𑀯𑀢𑀺 𑀏𑀢𑁆𑀣 𑀓𑀺𑀮𑁂𑀲𑀚𑀸𑀢𑀦𑁆𑀢𑀺 𑀪𑀽𑀫𑀻𑀢𑀺 𑀯𑀼𑀢𑁆𑀢𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀅𑀕𑁆𑀕𑀺𑀆𑀳𑀺𑀢𑁄 𑀯𑀺𑀬𑀸𑀢𑀺 𑀪𑀽𑀫𑀺𑀮𑀤𑁆𑀥𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀸𑀬 𑀉𑀧𑀸𑀬𑀁 𑀤𑀲𑁆𑀲𑁂𑀢𑀺. 𑀏𑀢𑁂𑀦𑀸𑀢𑀺 𑀓𑀫𑁆𑀫𑀁. 𑀏𑀢𑀲𑁆𑀲𑀸𑀢𑀺 𑀯𑀺𑀧𑀸𑀓𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸𑀢𑀺 𑀅𑀯𑀺𑀦𑁄𑀤𑀺𑀢𑀢𑁆𑀢𑀸. 𑀲𑀪𑀽𑀫𑀺𑀬𑀦𑁆𑀢𑀺 𑀲𑀓𑀪𑀽𑀫𑀺𑀬𑀁. 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀧𑀼𑀦 𑀉𑀧𑁆𑀧𑀚𑁆𑀚𑀺𑀢𑀼𑀁 𑀅𑀤𑀢𑁆𑀯𑀸. 𑀔𑀡𑀢𑁆𑀢𑀬𑁂𑀓𑀤𑁂𑀲𑀕𑀢𑀁 𑀔𑀡𑀢𑁆𑀢𑀬𑀕𑀢𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀉𑀤𑀸𑀳𑀭𑀡𑀲𑁆𑀲 𑀉𑀧𑀘𑀸𑀭𑀪𑀸𑀯𑀫𑀸𑀳. 𑀢𑁂𑀦 𑀉𑀧𑁆𑀧𑀦𑁆𑀦𑀸 𑀥𑀫𑁆𑀫𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸𑀢𑀺 𑀇𑀤𑀫𑁂𑀢𑁆𑀣 𑀉𑀤𑀸𑀳𑀭𑀡𑀁 𑀬𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀧𑀥𑀸𑀦𑁂𑀦𑀸𑀢𑀺 𑀧𑀥𑀸𑀦𑀪𑀸𑀯𑁂𑀦. 𑀤𑁂𑀲𑀦𑀸𑀬 𑀘𑀺𑀢𑁆𑀢𑀁 𑀧𑀼𑀩𑁆𑀩𑀗𑁆𑀕𑀫𑀦𑁆𑀢𑀺 𑀮𑁄𑀓𑀺𑀬𑀥𑀫𑁆𑀫𑁂 𑀤𑁂𑀲𑁂𑀢𑀩𑁆𑀩𑁂 𑀘𑀺𑀢𑁆𑀢𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀤𑁂𑀲𑀦𑀸 𑀪𑀕𑀯𑀢𑀸 𑀉𑀘𑀺𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀥𑀫𑁆𑀫𑀲𑀪𑀸𑀯𑀁 𑀯𑀸 𑀲𑀦𑁆𑀥𑀸𑀬𑀸𑀢𑀺 𑀮𑁄𑀓𑀺𑀬𑀥𑀫𑁆𑀫𑀸𑀦𑀁 𑀅𑀬𑀁 𑀲𑀪𑀸𑀯𑁄 𑀬𑀤𑀺𑀤𑀁 𑀢𑁂 𑀘𑀺𑀢𑁆𑀢𑀚𑁂𑀝𑁆𑀞𑀓𑀸 𑀘𑀺𑀢𑁆𑀢𑀧𑀼𑀩𑁆𑀩𑀗𑁆𑀕𑀫𑀸 𑀧𑀯𑀢𑁆𑀢𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦 𑀢𑁂𑀲𑀁 𑀢𑀣𑀸𑀤𑁂𑀲𑀦𑀸𑀬 𑀓𑀸𑀭𑀡𑀫𑀸𑀳, 𑀲𑀩𑁆𑀩𑁂 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀘𑀺𑀢𑁆𑀢𑀯𑀚𑁆𑀚𑀸𑀢𑀺 𑀅𑀢𑁆𑀣𑁄. 𑀓𑁂𑀘𑀻𑀢𑀺 𑀧𑀤𑀓𑀸𑀭𑀸. 𑀨𑀲𑁆𑀲𑀸𑀤𑀬𑁄𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀭𑀸𑀕𑀸𑀤𑀬𑁄 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀓𑀸𑀮𑀪𑁂𑀤𑀸𑀪𑀸𑀯𑁂𑀧𑀺 𑀧𑀘𑁆𑀘𑀬𑀪𑀸𑀯𑁂𑀦 𑀅𑀧𑁂𑀓𑁆𑀔𑀺𑀢𑁄 𑀥𑀫𑁆𑀫𑁄 𑀧𑀼𑀭𑀺𑀫𑀦𑀺𑀧𑁆𑀨𑀦𑁆𑀦𑁄 𑀯𑀺𑀬 𑀯𑁄𑀳𑀭𑀻𑀬𑀢𑀻𑀢𑀺 𑀆𑀳 ‘‘𑀧𑀞𑀫𑀁 𑀉𑀧𑁆𑀧𑀦𑁆𑀦𑁄 𑀯𑀺𑀬𑀸’’𑀢𑀺. 𑀅𑀦𑀼𑀧𑀘𑀭𑀺𑀢𑀫𑁂𑀯𑀲𑁆𑀲 𑀧𑀼𑀩𑁆𑀩𑀗𑁆𑀕𑀫𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀦𑁆𑀢𑀭𑀧𑀘𑁆𑀘𑀬𑀫𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀔𑀻𑀡𑀸 𑀪𑀯𑀦𑁂𑀢𑁆𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 (𑀤𑀻. 𑀦𑀺. 𑁨.𑁧𑁫𑁫; 𑀦𑁂𑀢𑁆𑀢𑀺. 𑁧𑁧𑁪) 𑀦𑁂𑀢𑁆𑀢𑀺𑀪𑀽𑀢𑀸𑀬 𑀢𑀡𑁆𑀳𑀸𑀬 𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀦𑀸𑀬𑀓𑀦𑁆𑀢𑀺 𑀆𑀳 ‘‘𑀢𑀡𑁆𑀳𑀸𑀲𑀫𑁆𑀧𑀬𑀼𑀢𑁆𑀢𑀁 𑀯𑀸’’𑀢𑀺.

‘‘𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑁂𑀢𑀲𑀺𑀓𑀁 𑀲𑀸𑀢’’𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀲𑁄𑀫𑀦𑀲𑁆𑀲𑀯𑁂𑀤𑀦𑀸 𑀲𑀸𑀢𑀲𑀪𑀸𑀯𑀸𑀢𑀺 𑀆𑀳 ‘‘𑀲𑀪𑀸𑀯𑀯𑀲𑁂𑀦 𑀯𑀼𑀢𑁆𑀢’’𑀦𑁆𑀢𑀺. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀫𑀥𑀼𑀭-𑀲𑀤𑁆𑀤𑁄 𑀭𑀲𑀯𑀺𑀲𑁂𑀲𑀧𑀭𑀺𑀬𑀸𑀬𑁄, 𑀇𑀝𑁆𑀞𑀪𑀸𑀯𑀲𑀸𑀫𑀜𑁆𑀜𑁂𑀦 𑀇𑀥 𑀉𑀧𑀘𑀸𑀭𑁂𑀦 𑀯𑀼𑀢𑁆𑀢𑁄𑀢𑀺𑀆𑀳 ‘‘𑀫𑀥𑀼𑀭𑀁 𑀯𑀺𑀬𑀸’’𑀢𑀺. 𑀧𑀭𑀫𑀢𑁆𑀣𑀢𑁄 𑀢𑀡𑁆𑀳𑀸𑀯𑀺𑀦𑀺𑀫𑀼𑀢𑁆𑀢𑁄 𑀦𑀦𑁆𑀤𑀺𑀭𑀸𑀕𑁄 𑀦𑀦𑁆𑀤𑀺𑀭𑀸𑀕𑀪𑀸𑀯𑁄 𑀯𑀸 𑀦𑀢𑁆𑀣𑀻𑀢𑀺 ‘‘𑀦 𑀏𑀢𑁆𑀣 𑀲𑀫𑁆𑀧𑀬𑁄𑀕𑀯𑀲𑁂𑀦 𑀲𑀳𑀕𑀢𑀪𑀸𑀯𑁄 𑀅𑀢𑁆𑀣𑀻’’𑀢𑀺, ‘‘𑀦𑀦𑁆𑀤𑀺𑀭𑀸𑀕𑀲𑀳𑀕𑀢𑀸’’𑀢𑀺 𑀘 𑀯𑀼𑀘𑁆𑀘𑀢𑀺. 𑀢𑁂𑀦 𑀯𑀺𑀜𑁆𑀜𑀸𑀬𑀢𑀺 ‘‘𑀲𑀳𑀕𑀢𑀲𑀤𑁆𑀤𑁄 𑀢𑀡𑁆𑀳𑀸𑀬 𑀦𑀦𑁆𑀤𑀺𑀭𑀸𑀕𑀪𑀸𑀯𑀁 𑀚𑁄𑀢𑁂𑀢𑀻’’𑀢𑀺. 𑀅𑀯𑀢𑁆𑀣𑀸𑀯𑀺𑀲𑁂𑀲𑀯𑀸𑀘𑀓𑁄 𑀯𑀸 𑀲𑀳-𑀲𑀤𑁆𑀤𑁄 ‘‘𑀲𑀦𑀺𑀤𑀲𑁆𑀲𑀦𑀸’’𑀢𑀺𑀆𑀤𑀻𑀲𑀼 𑀯𑀺𑀬, 𑀲𑀩𑁆𑀩𑀸𑀲𑀼𑀧𑀺 𑀅𑀯𑀢𑁆𑀣𑀸𑀲𑀼 𑀦𑀦𑁆𑀤𑀺𑀭𑀸𑀕𑀲𑀪𑀸𑀯𑀸𑀯𑀺𑀚𑀳𑀦𑀤𑀻𑀧𑀦𑀯𑀲𑁂𑀦 𑀦𑀦𑁆𑀤𑀺𑀭𑀸𑀕𑀪𑀸𑀯𑀁 𑀕𑀢𑀸 𑀦𑀦𑁆𑀤𑀺𑀭𑀸𑀕𑀲𑀳𑀕𑀢𑀸𑀢𑀺 𑀢𑀡𑁆𑀳𑀸 𑀯𑀼𑀢𑁆𑀢𑀸. 𑀕𑀢-𑀲𑀤𑁆𑀤𑀲𑁆𑀲 𑀯𑀸 ‘‘𑀤𑀺𑀝𑁆𑀞𑀺𑀕𑀢’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀅𑀢𑁆𑀣𑀦𑁆𑀢𑀭𑀸𑀪𑀸𑀯𑀢𑁄 𑀦𑀦𑁆𑀤𑀺𑀭𑀸𑀕𑀲𑀪𑀸𑀯𑀸 𑀢𑀡𑁆𑀳𑀸 ‘‘𑀦𑀦𑁆𑀤𑀺𑀭𑀸𑀕𑀲𑀳𑀕𑀢𑀸’’𑀢𑀺 𑀯𑀼𑀢𑁆𑀢𑀸, 𑀦𑀦𑁆𑀤𑀺𑀭𑀸𑀕𑀲𑀪𑀸𑀯𑀸𑀢𑀺 𑀅𑀢𑁆𑀣𑁄. 𑀇𑀥𑀸𑀧𑀻𑀢𑀺 𑀇𑀫𑀺𑀲𑁆𑀲𑀁 𑀅𑀝𑁆𑀞𑀓𑀣𑀸𑀬𑀁. 𑀇𑀫𑀲𑁆𑀫𑀺𑀫𑁆𑀧𑀺 𑀧𑀤𑁂𑀢𑀺 ‘‘𑀲𑁄𑀫𑀦𑀲𑁆𑀲𑀲𑀳𑀕𑀢’’𑀦𑁆𑀢𑀺 𑀏𑀢𑀲𑁆𑀫𑀺𑀫𑁆𑀧𑀺 𑀧𑀤𑁂. 𑀅𑀬𑀫𑁂𑀯𑀢𑁆𑀣𑁄𑀢𑀺 𑀲𑀁𑀲𑀝𑁆𑀞𑁄 𑀏𑀯. 𑀬𑀣𑀸𑀤𑀲𑁆𑀲𑀺𑀢𑀲𑀁𑀲𑀝𑁆𑀞𑀲𑀤𑁆𑀤𑁄𑀢𑀺 𑀅𑀢𑁆𑀣𑀼𑀤𑁆𑀥𑀸𑀭𑀧𑁆𑀧𑀲𑀗𑁆𑀕𑁂𑀦 𑀧𑀸𑀴𑀺𑀢𑁄 𑀅𑀝𑁆𑀞𑀓𑀣𑀸𑀬 𑀆𑀕𑀢𑀲𑀁𑀲𑀝𑁆𑀞𑀲𑀤𑁆𑀤𑁄. 𑀲𑀳𑀚𑀸𑀢𑁂𑀢𑀺 𑀲𑀳𑀚𑀸𑀢𑀢𑁆𑀣𑁂.

𑀓𑀸𑀮𑀯𑀺𑀲𑁂𑀲𑀸𑀦𑀧𑁂𑀓𑁆𑀔𑁄 𑀓𑀫𑁆𑀫𑀲𑀸𑀥𑀦𑁄 𑀆𑀪𑀝𑁆𑀞-𑀲𑀤𑁆𑀤𑁄 𑀪𑀸𑀲𑀺𑀢𑀧𑀭𑀺𑀬𑀸𑀬𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀪𑀸𑀲𑀺𑀢𑀩𑁆𑀩𑀢𑀸 𑀅𑀦𑀸𑀪𑀝𑁆𑀞𑀢𑀸’’𑀢𑀺. 𑀧𑀸𑀴𑀺𑀬𑀦𑁆𑀢𑀺 𑀇𑀫𑀺𑀲𑁆𑀲𑀸 𑀧𑀞𑀫𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀸𑀴𑀺𑀬𑀁. 𑀅𑀪𑀸𑀲𑀺𑀢𑀢𑁆𑀢𑀸 𑀏𑀯𑀸𑀢𑀺 𑀅𑀲𑀗𑁆𑀔𑀸𑀭𑀺𑀓𑀪𑀸𑀯𑀲𑁆𑀲 𑀅𑀯𑀼𑀢𑁆𑀢𑀢𑁆𑀢𑀸 𑀏𑀯. 𑀓𑀸𑀭𑀡𑀧𑀭𑀺𑀬𑀸𑀬𑀢𑁆𑀢𑀸 𑀯𑀢𑁆𑀣𑀼𑀲𑀤𑁆𑀤𑀲𑁆𑀲 𑀧𑀘𑁆𑀘𑀬𑀪𑀸𑀯𑀲𑀸𑀫𑀜𑁆𑀜𑀢𑁄 𑀤𑁆𑀯𑀸𑀭𑀪𑀽𑀢𑀥𑀫𑁆𑀫𑀸𑀦𑀫𑁆𑀧𑀺 𑀲𑀺𑀬𑀸 𑀯𑀢𑁆𑀣𑀼𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀤𑁆𑀯𑀸𑀭𑀁 𑀯𑀢𑁆𑀣𑀽𑀢𑀺 𑀯𑀼𑀢𑁆𑀢’’𑀦𑁆𑀢𑀺. 𑀢𑁂𑀦 𑀯𑀢𑁆𑀣𑀼 𑀯𑀺𑀬 𑀯𑀢𑁆𑀣𑀽𑀢𑀺 𑀤𑀲𑁆𑀲𑁂𑀢𑀺. 𑀫𑀦𑁄𑀤𑁆𑀯𑀸𑀭𑀪𑀽𑀢𑀸 𑀥𑀫𑁆𑀫𑀸 𑀬𑁂𑀪𑀼𑀬𑁆𑀬𑁂𑀦 𑀳𑀤𑀬𑀯𑀢𑁆𑀣𑀼𑀦𑀸 𑀲𑀳 𑀘𑀭𑀦𑁆𑀢𑀻𑀢𑀺 𑀤𑁆𑀯𑀸𑀭𑁂𑀦…𑀧𑁂… 𑀳𑀤𑀬𑀯𑀢𑁆𑀣𑀼 𑀯𑀼𑀢𑁆𑀢𑀦𑁆𑀢𑀺 𑀆𑀳 𑀬𑀣𑀸 ‘‘𑀓𑀼𑀦𑁆𑀢𑀸 𑀧𑀘𑀭𑀦𑁆𑀢𑀻’’𑀢𑀺. 𑀲𑀓𑀺𑀘𑁆𑀘𑀪𑀸𑀯𑁂𑀦𑀸𑀢𑀺 𑀅𑀢𑁆𑀢𑀦𑁄 𑀓𑀺𑀘𑁆𑀘𑀪𑀸𑀯𑁂𑀦, 𑀓𑀺𑀘𑁆𑀘𑀲𑀳𑀺𑀢𑀢𑀸𑀬 𑀯𑀸. 𑀅𑀜𑁆𑀜𑀸𑀲𑀸𑀥𑀸𑀭𑀡𑁄𑀢𑀺 𑀲-𑀲𑀤𑁆𑀤𑀲𑁆𑀲 𑀅𑀢𑁆𑀣𑀫𑀸𑀳. 𑀲𑀓𑁄 𑀳𑀺 𑀭𑀲𑁄 𑀲𑀭𑀲𑁄𑀢𑀺.

𑀅𑀦𑀦𑁆𑀢𑀭𑀘𑀺𑀢𑁆𑀢𑀳𑁂𑀢𑀼𑀓𑀢𑁆𑀢𑀸 𑀘𑀺𑀢𑁆𑀢𑀲𑁆𑀲 𑀏𑀓𑀲𑀫𑀼𑀝𑁆𑀞𑀸𑀦𑀢𑀸 𑀯𑀼𑀢𑁆𑀢𑀸, 𑀲𑀳𑀚𑀸𑀢𑀘𑀺𑀢𑁆𑀢𑀨𑀲𑁆𑀲𑀳𑁂𑀢𑀼𑀓𑀢𑁆𑀢𑀸 𑀘𑁂𑀢𑀲𑀺𑀓𑀸𑀦𑀁 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀢𑀸. ‘‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀥𑀫𑁆𑀫𑀸, 𑀨𑀼𑀝𑁆𑀞𑁄 𑀪𑀺𑀓𑁆𑀔𑀯𑁂 𑀯𑁂𑀤𑁂𑀢𑀺, 𑀨𑀼𑀝𑁆𑀞𑁄 𑀲𑀜𑁆𑀚𑀸𑀦𑀸𑀢𑀺, 𑀨𑀼𑀝𑁆𑀞𑁄 𑀘𑁂𑀢𑁂𑀢𑀻’’𑀢𑀺 (𑀲𑀁. 𑀦𑀺. 𑁪.𑁯𑁩) 𑀳𑀺 𑀯𑀼𑀢𑁆𑀢𑀁.

𑀲𑀼𑀔𑀼𑀫𑀭𑀚𑀸𑀤𑀺𑀭𑀽𑀧𑀦𑁆𑀢𑀺 𑀅𑀡𑀼𑀢𑀚𑁆𑀚𑀸𑀭𑀺𑀭𑀽𑀧𑀫𑀸𑀳. 𑀧𑀭𑀫𑀸𑀡𑀼𑀭𑀽𑀧𑁂 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀯𑀢𑁆𑀣𑀼𑀧𑀭𑀺𑀢𑁆𑀢𑀢𑀸𑀬𑀸𑀢𑀺 𑀏𑀢𑁂𑀦 𑀅𑀦𑁂𑀓𑀓𑀮𑀸𑀧𑀕𑀢𑀸𑀦𑀺 𑀩𑀳𑀽𑀦𑀺𑀬𑁂𑀯 𑀭𑀽𑀧𑀸𑀬𑀢𑀦𑀸𑀦𑀺 𑀲𑀫𑀼𑀤𑀺𑀢𑀸𑀦𑀺 𑀲𑀁𑀳𑀘𑁆𑀘𑀓𑀸𑀭𑀺𑀢𑀸𑀬 𑀲𑀺𑀯𑀺𑀓𑀼𑀩𑁆𑀩𑀳𑀦𑀜𑀸𑀬𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁄, 𑀦 𑀏𑀓𑀁 𑀓𑀢𑀺𑀧𑀬𑀸𑀦𑀺 𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀦𑀦𑀼 𑀘 𑀏𑀯𑀁 𑀲𑀦𑁆𑀢𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀲𑀫𑀼𑀤𑀸𑀬𑀸𑀭𑀫𑁆𑀫𑀡𑀁 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺 𑀲𑀫𑀼𑀤𑀸𑀬𑀲𑁆𑀲𑁂𑀯 𑀅𑀪𑀸𑀯𑀢𑁄. 𑀦 𑀳𑀺 𑀧𑀭𑀫𑀢𑁆𑀣𑀢𑁄 𑀲𑀫𑀼𑀤𑀸𑀬𑁄 𑀦𑀸𑀫 𑀓𑁄𑀘𑀺 𑀅𑀢𑁆𑀣𑀺. 𑀯𑀡𑁆𑀡𑀸𑀬𑀢𑀦𑀫𑁂𑀯 𑀳𑀺 𑀬𑀢𑁆𑀢𑀓𑀁 𑀬𑁄𑀕𑁆𑀬𑀤𑁂𑀲𑁂 𑀅𑀯𑀝𑁆𑀞𑀺𑀢𑀁, 𑀲𑀢𑀺 𑀧𑀘𑁆𑀘𑀬𑀦𑁆𑀢𑀭𑀲𑀫𑀸𑀬𑁄𑀕𑁂 𑀢𑀢𑁆𑀢𑀓𑀁 𑀬𑀣𑀸𑀯𑀼𑀢𑁆𑀢𑁂𑀦 𑀜𑀸𑀬𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺 𑀅𑀯𑀺𑀓𑀧𑁆𑀧𑀓𑀢𑁆𑀢𑀸 𑀢𑀲𑁆𑀲. 𑀢𑀤𑀪𑀺𑀦𑀺𑀳𑀝𑀁 𑀧𑀦 𑀫𑀦𑁄𑀯𑀺𑀜𑁆𑀜𑀸𑀡𑀁 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀧𑀼𑀭𑀺𑀫𑀲𑀺𑀤𑁆𑀥𑀓𑀧𑁆𑀧𑀦𑀸𑀯𑀲𑁂𑀦 𑀲𑀫𑀽𑀳𑀸𑀓𑀸𑀭𑁂𑀦 𑀲𑀡𑁆𑀞𑀸𑀦𑀸𑀤𑀺𑀆𑀓𑀸𑀭𑁂𑀦 𑀘 𑀧𑀯𑀢𑁆𑀢𑀢𑀻𑀢𑀺 𑀓𑀺𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀏𑀓𑀁 𑀯𑀡𑁆𑀡𑀸𑀬𑀢𑀦𑀁 𑀆𑀭𑀫𑁆𑀫𑀡𑀁, 𑀉𑀤𑀸𑀳𑀼 𑀅𑀦𑁂𑀓𑀸𑀦𑀻𑀢𑀺 𑀦 𑀘𑁄𑀤𑁂𑀢𑀩𑁆𑀩𑀫𑁂𑀢𑀁. 𑀦 𑀳𑀺 𑀧𑀘𑁆𑀘𑀓𑁆𑀔𑀯𑀺𑀲𑀬𑁂 𑀬𑀼𑀢𑁆𑀢𑀺𑀫𑀕𑁆𑀕𑀦𑀸 𑀬𑀼𑀢𑁆𑀢𑀸. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀓𑁆𑀔𑀡𑁂𑀦 𑀅𑀦𑁂𑀓𑀓𑁄𑀝𑀺𑀲𑀗𑁆𑀔𑀸𑀬 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀸 𑀧𑀯𑀢𑁆𑀢𑀦𑀢𑁄 𑀘𑀺𑀢𑁆𑀢𑀲𑁆𑀲 𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑀸𑀬 𑀲𑀫𑀸𑀦𑁂𑀧𑀺 𑀖𑀝𑀲𑀭𑀸𑀯𑀸𑀤𑀺𑀯𑀡𑁆𑀡𑀸𑀦𑀁 𑀬𑁄𑀕𑁆𑀬𑀤𑁂𑀲𑀸𑀯𑀝𑁆𑀞𑀸𑀦𑁂 𑀧𑀼𑀭𑀺𑀫𑀫𑀦𑀲𑀺𑀓𑀸𑀭𑀸𑀦𑀼𑀭𑀽𑀧𑀁 ‘‘𑀖𑀝𑁄’’𑀢𑀺 𑀯𑀸 ‘‘𑀲𑀭𑀸𑀯𑁄’’𑀢𑀺 𑀯𑀸 𑀧𑀞𑀫𑀁 𑀢𑀸𑀯 𑀏𑀓𑁄 𑀫𑀦𑁄𑀯𑀺𑀜𑁆𑀜𑀸𑀡𑀲𑀦𑁆𑀢𑀸𑀦𑁂𑀦 𑀧𑀭𑀺𑀘𑁆𑀙𑀺𑀚𑁆𑀚𑀢𑀺, 𑀧𑀘𑁆𑀙𑀸 𑀇𑀢𑀭𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀩𑁆𑀬𑀯𑀳𑀺𑀢𑁂𑀦𑀸𑀢𑀺 𑀅𑀯𑀺𑀲𑁂𑀲𑀯𑀺𑀤𑀼𑀢𑀸𑀬 𑀧𑀦 𑀖𑀝𑀲𑀭𑀸𑀯𑀸𑀤𑀺𑀩𑀼𑀤𑁆𑀥𑀺𑀬𑀸 𑀅𑀪𑁂𑀤𑀸𑀧𑀢𑁆𑀢𑀺𑀧𑀭𑀺𑀓𑀧𑁆𑀧𑀦𑀸𑀢𑀺. 𑀈𑀤𑀺𑀲𑀻𑀧𑁂𑀢𑁆𑀣 𑀘𑁄𑀤𑀦𑀸 𑀅𑀘𑁄𑀤𑀦𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀔𑀡𑀧𑀭𑀺𑀢𑁆𑀢𑀢𑀸𑀬𑀸𑀢𑀺 𑀧𑀩𑀦𑁆𑀥𑀓𑁆𑀔𑀡𑀲𑁆𑀲 𑀇𑀢𑁆𑀢𑀭𑀢𑀸𑀬. 𑀧𑀩𑀦𑁆𑀥𑀯𑀲𑁂𑀦 𑀳𑀺 𑀧𑀘𑁆𑀘𑁂𑀓𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀯𑀺𑀭𑁄𑀥𑀺𑀅𑀯𑀺𑀭𑁄𑀥𑀺𑀧𑀘𑁆𑀘𑀬𑀲𑀫𑀸𑀬𑁄𑀕𑁂 𑀮𑀳𑀼𑀁 𑀤𑀦𑁆𑀥𑀜𑁆𑀘 𑀦𑀺𑀭𑀼𑀚𑁆𑀛𑀦𑀢𑁄 𑀧𑀭𑀺𑀢𑁆𑀢𑀓𑀸𑀮𑀸 𑀤𑀻𑀖𑀓𑀸𑀮𑀸 𑀘 𑀳𑁄𑀦𑁆𑀢𑀺, 𑀲𑀪𑀸𑀯𑀮𑀓𑁆𑀔𑀡𑀯𑀲𑁂𑀦 𑀧𑀦 𑀏𑀓𑀧𑀭𑀺𑀘𑁆𑀙𑁂𑀤𑀸 𑀏𑀯𑀸𑀢𑀺. 𑀬𑀣𑀸 𑀘 𑀭𑀽𑀧𑀸𑀬𑀢𑀦𑀁, 𑀏𑀯𑀁 𑀇𑀢𑀭𑀸𑀦𑀺𑀧𑀺. 𑀲𑀤𑁆𑀤𑀸𑀤𑀬𑁄𑀧𑀺 𑀳𑀺 𑀯𑀢𑁆𑀣𑀼𑀧𑀭𑀺𑀢𑁆𑀢𑀢𑀸𑀤𑀺𑀪𑀸𑀯𑁂𑀦 𑀮𑀩𑁆𑀪𑀦𑁆𑀢𑀻𑀢𑀺. 𑀅𑀘𑁆𑀘𑀸𑀲𑀦𑁆𑀦𑀸𑀤𑀺𑀢𑀸𑀬𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀦𑀸𑀯𑀚𑁆𑀚𑀦𑀁 𑀓𑁂𑀦𑀘𑀺 𑀧𑀝𑀺𑀘𑁆𑀙𑀦𑁆𑀦𑀢𑀸𑀢𑀺 𑀏𑀯𑀫𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀺𑀲𑀬𑀺𑀥𑀫𑁆𑀫𑀁 𑀯𑀺𑀲𑁂𑀲𑀢𑁄 𑀲𑀺𑀦𑁄𑀢𑀺 𑀩𑀦𑁆𑀥𑀢𑀻𑀢𑀺 𑀯𑀺𑀲𑀬𑁄𑀢𑀺 𑀅𑀦𑀜𑁆𑀜𑀢𑁆𑀣𑀪𑀸𑀯𑀸𑀧𑁂𑀓𑁆𑀔𑁄 𑀯𑀺𑀲𑀬𑁄𑀢𑀺 𑀆𑀳 ‘‘𑀯𑀺𑀲𑀬𑁄 𑀅𑀦𑀜𑁆𑀜𑀢𑁆𑀣𑀪𑀸𑀯𑁂𑀦𑀸’’𑀢𑀺. 𑀦 𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀬𑁄 𑀭𑀽𑀧𑀸𑀬𑀢𑀦𑀸𑀤𑀺𑀢𑁄 𑀅𑀜𑁆𑀜𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀦𑁆𑀢𑀻𑀢𑀺. 𑀕𑀸𑀯𑁄 𑀘𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀕𑁄𑀘𑀭𑁄, 𑀕𑁄𑀘𑀭𑁄 𑀯𑀺𑀬𑀸𑀢𑀺 𑀕𑁄𑀘𑀭𑁄𑀢𑀺 𑀲𑀫𑁆𑀩𑀳𑀼𑀮𑀘𑀸𑀭𑀺𑀢𑀸𑀧𑁂𑀓𑁆𑀔𑁄 𑀕𑁄𑀘𑀭𑁄𑀢𑀺 𑀆𑀳 ‘‘𑀕𑁄𑀘𑀭𑁄 𑀢𑀢𑁆𑀣 𑀘𑀭𑀡𑁂𑀦𑀸’’𑀢𑀺. 𑀩𑀳𑀼𑀮𑀜𑁆𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀳𑀺 𑀭𑀽𑀧𑀸𑀤𑀬𑁄 𑀕𑀬𑁆𑀳𑀦𑁆𑀢𑀺, 𑀦 𑀢𑀣𑀸 𑀫𑀦𑁄𑀯𑀺𑀜𑁆𑀜𑀸𑀡𑁂𑀦𑀸𑀢𑀺. 𑀢𑁂𑀲𑀦𑁆𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀕𑀬𑁆𑀳𑀫𑀸𑀦𑀸𑀦𑀁 𑀭𑀽𑀧𑀸𑀬𑀢𑀦𑀸𑀤𑀻𑀦𑀁. ‘‘𑀯𑀘𑀦𑀲𑁆𑀲 𑀅𑀦𑀼𑀧𑀧𑀢𑁆𑀢𑀺𑀢𑁄’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀧𑀜𑁆𑀘𑀤𑁆𑀯𑀸𑀭𑁂 𑀧𑀯𑀢𑁆𑀢𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀁 𑀲𑀦𑁆𑀥𑀸𑀬 𑀢𑁂𑀲𑀁 𑀕𑁄𑀘𑀭𑀯𑀺𑀲𑀬𑀁 𑀧𑀘𑁆𑀘𑀦𑀼𑀪𑁄𑀢𑀻𑀢𑀺 𑀯𑀘𑀦𑀁 𑀉𑀧𑀧𑀚𑁆𑀚𑀢𑀺𑀬𑁂𑀯𑀸𑀢𑀺? 𑀦, 𑀦𑀺𑀬𑀫𑀸𑀪𑀸𑀯𑀢𑁄. 𑀦 𑀳𑀺 𑀧𑀜𑁆𑀘𑀤𑁆𑀯𑀸𑀭𑀸𑀪𑀺𑀦𑀺𑀳𑀝𑀁𑀬𑁂𑀯 𑀫𑀦𑁄 𑀇𑀥 ‘‘𑀫𑀦𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀦𑀺𑀬𑀫𑀳𑁂𑀢𑀼 𑀅𑀢𑁆𑀣𑀻𑀢𑀺, 𑀏𑀢𑀁𑀬𑁂𑀯 𑀯𑀸 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀸𑀤𑀺𑀕𑁆𑀕𑀳𑀡𑀁 𑀓𑀢𑀁. 𑀏𑀯𑀁𑀯𑀡𑁆𑀡𑁄𑀢𑀺𑀆𑀤𑀺𑀯𑀘𑀦𑀢𑁄 𑀧𑀼𑀩𑁆𑀩𑁂𑀦𑀺𑀯𑀸𑀲𑀅𑀢𑀻𑀢𑀸𑀦𑀸𑀕𑀢𑀁𑀲𑀜𑀸𑀡𑀸𑀤𑀬𑁄𑀧𑀺 𑀇𑀥 𑀲𑀫𑁆𑀪𑀯𑀦𑁆𑀢𑀺. 𑀇𑀢𑀭𑀣𑀸𑀢𑀺 𑀭𑀽𑀧𑀁 𑀲𑀤𑁆𑀤𑀦𑁆𑀢𑀺𑀆𑀤𑀺𑀦𑀸.

𑀪𑁄𑀚𑀦 …𑀧𑁂… 𑀉𑀲𑁆𑀲𑀸𑀳𑀸𑀤𑀻𑀳𑀻𑀢𑀺 𑀇𑀤𑀁 𑀬𑀸𑀬 𑀓𑀫𑁆𑀫𑀜𑁆𑀜𑀢𑀸𑀬 𑀭𑀽𑀧𑀓𑀸𑀬𑀲𑁆𑀲 𑀓𑀮𑁆𑀮𑀢𑀸 𑀳𑁄𑀢𑀺, 𑀢𑀲𑁆𑀲𑀸 𑀧𑀘𑁆𑀘𑀬𑀦𑀺𑀤𑀲𑁆𑀲𑀦𑀁. 𑀪𑁄𑀚𑀦𑁂 𑀳𑀺 𑀲𑀫𑁆𑀫𑀸𑀧𑀭𑀺𑀡𑀢𑁂 𑀲𑀧𑁆𑀧𑀸𑀬𑁂 𑀘 𑀉𑀢𑀼𑀪𑁄𑀚𑀦𑁂 𑀲𑀫𑁆𑀫𑀼𑀧𑀬𑀼𑀢𑁆𑀢𑁂 𑀲𑀫𑁆𑀫𑀸𑀧𑀬𑁄𑀕𑀲𑀗𑁆𑀔𑀸𑀢𑁂 𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑁂 𑀘 𑀲𑀫𑀸𑀭𑀤𑁆𑀥𑁂 𑀮𑀳𑀼𑀢𑀸𑀤𑀺𑀲𑀩𑁆𑀪𑀸𑀯𑁂𑀦 𑀓𑀸𑀬𑁄 𑀓𑀫𑁆𑀫𑀓𑁆𑀔𑀫𑁄 𑀳𑁄𑀢𑀺 𑀲𑀩𑁆𑀩𑀓𑀺𑀭𑀺𑀬𑀸𑀦𑀼𑀓𑀽𑀮𑁄𑀢𑀺. 𑀅𑀣 𑀯𑀸 𑀪𑁄𑀚𑀦…𑀧𑁂… 𑀉𑀲𑁆𑀲𑀸𑀳𑀸𑀤𑀻𑀳𑀻𑀢𑀺 𑀇𑀤𑀁 𑀓𑀸𑀬𑀲𑁆𑀲 𑀓𑀮𑁆𑀬𑀢𑀸𑀬 𑀯𑀺𑀬 𑀉𑀧𑀤𑁆𑀤𑀼𑀢𑀢𑀸𑀬𑀧𑀺 𑀓𑀸𑀭𑀡𑀯𑀘𑀦𑀁. 𑀯𑀺𑀲𑀫𑀪𑁄𑀚𑀦𑀸𑀧𑀭𑀺𑀡𑀸𑀫𑀸𑀤𑀺𑀢𑁄 𑀳𑀺 𑀓𑀸𑀬𑀲𑁆𑀲 𑀉𑀧𑀤𑁆𑀤𑀯𑀓𑀭𑀸 𑀯𑀸𑀢𑀸𑀤𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺. 𑀅𑀦𑀼𑀯𑀢𑁆𑀢𑀦𑁆𑀢𑀲𑁆𑀲𑀸𑀢𑀺 𑀧𑀤𑀁 ‘‘𑀚𑀬𑀁 𑀯𑁂𑀭𑀁 𑀧𑀲𑀯𑀢𑀻’’𑀢𑀺𑀆𑀤𑀻𑀲𑀼 (𑀥. 𑀧. 𑁨𑁦𑁧) 𑀯𑀺𑀬 𑀳𑁂𑀢𑀼𑀅𑀢𑁆𑀣𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀚𑀸𑀕𑀭𑀡𑀦𑀺𑀫𑀺𑀢𑁆𑀢𑀜𑁆𑀳𑀺 𑀇𑀥 𑀅𑀦𑀼𑀯𑀢𑁆𑀢𑀦𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺. 𑀅𑀣 𑀯𑀸 𑀅𑀦𑀼𑀯𑀢𑁆𑀢𑀦𑁆𑀢𑀲𑁆𑀲𑀸𑀢𑀺 𑀇𑀤𑀁 𑀧𑀓𑀢𑀺𑀬𑀸 𑀤𑀺𑀝𑁆𑀞𑀸𑀤𑀺𑀯𑀲𑁂𑀦 𑀆𑀧𑀸𑀣𑀕𑀫𑀦𑀼𑀧𑀦𑀺𑀲𑁆𑀲𑀬𑀸𑀦𑀁 𑀓𑀮𑁆𑀬𑀢𑀸𑀤𑀺𑀦𑀺𑀩𑁆𑀩𑀢𑁆𑀢𑀸𑀦𑀁 𑀓𑀸𑀬𑀺𑀓𑀲𑀼𑀔𑀸𑀤𑀻𑀦𑀁 𑀲𑀫𑁆𑀪𑀯𑀤𑀲𑁆𑀲𑀦𑀁. 𑀓𑀸𑀬𑀓𑀮𑁆𑀬𑀢𑀸𑀤𑀺𑀁 𑀅𑀦𑀦𑀼𑀯𑀢𑁆𑀢𑀦𑁆𑀢𑀲𑁆𑀲 𑀳𑀺 𑀬𑀣𑀸𑀯𑀼𑀢𑁆𑀢𑀉𑀧𑀦𑀺𑀲𑁆𑀲𑀬𑀸𑀪𑁄𑀕𑀸𑀪𑀸𑀯𑁂𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀆𑀧𑀸𑀣𑀕𑀫𑀦𑀁 𑀦 𑀲𑀺𑀬𑀸𑀢𑀺. 𑀬𑀣𑀸𑀦𑀼𑀪𑀽𑀢𑁂 𑀭𑀽𑀧𑀸𑀤𑀺𑀯𑀺𑀲𑀬𑁂 𑀘𑀺𑀢𑁆𑀢𑀲𑁆𑀲 𑀞𑀧𑀦𑀁 𑀆𑀯𑀚𑁆𑀚𑀦𑀁 𑀘𑀺𑀢𑁆𑀢𑀧𑀡𑀺𑀤𑀳𑀦𑀁. 𑀬𑀣𑀸𑀦𑀼𑀪𑀽𑀢𑁂𑀦 𑀭𑀽𑀧𑀸𑀤𑀺𑀦𑀸 𑀲𑀤𑀺𑀲𑀁 𑀅𑀲𑀤𑀺𑀲𑀁 𑀲𑀫𑁆𑀩𑀦𑁆𑀥𑀜𑁆𑀘 𑀲𑀤𑀺𑀲𑀸𑀲𑀤𑀺𑀲𑀲𑀫𑁆𑀩𑀦𑁆𑀥𑀁, 𑀢𑀲𑁆𑀲 𑀤𑀲𑁆𑀲𑀦𑀸𑀤𑀺 𑀲𑀤𑀺𑀲𑀸𑀲𑀤𑀺𑀲𑀲𑀫𑁆𑀩𑀦𑁆𑀥𑀤𑀲𑁆𑀲𑀦𑀸𑀤𑀺, 𑀘𑀺𑀢𑁆𑀢𑀧𑀡𑀺𑀤𑀳𑀦𑀜𑁆𑀘 𑀲𑀤𑀺𑀲𑀸𑀲𑀤𑀺𑀲…𑀧𑁂… 𑀤𑀲𑁆𑀲𑀦𑀸𑀤𑀺 𑀘 𑀘𑀺𑀢𑁆𑀢…𑀧𑁂… 𑀤𑀲𑁆𑀲𑀦𑀸𑀤𑀬𑁄 𑀢𑁂 𑀧𑀘𑁆𑀘𑀬𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀥𑀸𑀢𑀼𑀓𑁆𑀔𑁄𑀪𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀤𑁂𑀯𑀢𑀽𑀧𑀲𑀁𑀳𑀸𑀭𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀁𑀲𑀤𑀺𑀲𑀢𑀸 𑀤𑀺𑀝𑁆𑀞𑀲𑀼𑀢𑀲𑀤𑀺𑀲𑀢𑀸. 𑀢𑀁𑀲𑀫𑁆𑀧𑀬𑀼𑀢𑁆𑀢𑀢𑀸 𑀤𑀺𑀝𑁆𑀞𑀲𑀼𑀢𑀧𑀝𑀺𑀩𑀤𑁆𑀥𑀢𑀸. 𑀓𑁂𑀦𑀘𑀺 𑀯𑀼𑀢𑁆𑀢𑁂𑀢𑀺 𑀇𑀫𑀺𑀦𑀸 𑀲𑀤𑁆𑀥𑀸𑀬 𑀅𑀦𑀼𑀲𑁆𑀲𑀯𑀦𑀺𑀩𑁆𑀩𑀢𑁆𑀢𑀢𑀁 𑀆𑀳. 𑀆𑀓𑀸𑀭𑀯𑀺𑀘𑀸𑀭𑀡𑀦𑁆𑀢𑀺 𑀢𑁂𑀲𑀁 𑀢𑁂𑀲𑀁 𑀅𑀢𑁆𑀣𑀸𑀦𑀁 𑀉𑀧𑀝𑁆𑀞𑀸𑀦𑀸𑀓𑀸𑀭𑀯𑀺𑀘𑀸𑀭𑀡𑀁. 𑀓𑀢𑁆𑀣𑀘𑀺 𑀅𑀢𑁆𑀣𑁂.

𑀦𑀺𑀬𑀫𑀺𑀢𑀲𑁆𑀲𑀸𑀢𑀺 𑀓𑀼𑀲𑀮𑀫𑁂𑀯 𑀫𑀬𑀸 𑀉𑀧𑁆𑀧𑀸𑀤𑁂𑀢𑀩𑁆𑀩𑀦𑁆𑀢𑀺 𑀏𑀯𑀁 𑀦𑀺𑀬𑀫𑀺𑀢𑀲𑁆𑀲. 𑀧𑀲𑀸𑀤𑀲𑀺𑀦𑁂𑀳𑀸𑀪𑀸𑀯𑁄 𑀤𑁄𑀲𑀩𑀳𑀼𑀮𑀢𑀸𑀬 𑀳𑁄𑀢𑀻𑀢𑀺 𑀮𑀽𑀔𑀧𑀼𑀕𑁆𑀕𑀮𑀸 𑀤𑁄𑀲𑀩𑀳𑀼𑀮𑀸𑀢𑀺 𑀆𑀳.

𑀆𑀬𑀢𑀦𑀪𑀸𑀯𑀢𑁄𑀢𑀺 𑀓𑀸𑀭𑀡𑀪𑀸𑀯𑀢𑁄.

𑀯𑀺𑀚𑁆𑀚𑀫𑀸𑀦𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀏𑀢𑁂𑀦 ‘‘𑀯𑀺𑀦𑀸𑀧𑀺 𑀤𑁂𑀬𑁆𑀬𑀥𑀫𑁆𑀫𑀧𑀭𑀺𑀘𑁆𑀘𑀸𑀕𑁂𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦𑁂𑀯 𑀤𑀸𑀦𑀫𑀬𑀁 𑀓𑀼𑀲𑀮𑀁 𑀉𑀧𑀘𑀺𑀢𑀁 𑀳𑁄𑀢𑀻’’𑀢𑀺 𑀓𑁂𑀲𑀜𑁆𑀘𑀺 𑀅𑀢𑀺𑀥𑀸𑀯𑀦𑀁 𑀦𑀺𑀯𑀢𑁆𑀢𑀺𑀢𑀁 𑀳𑁄𑀢𑀻𑀢𑀺.

𑀥𑀫𑁆𑀫𑀲𑀯𑀦𑀲𑁆𑀲 𑀖𑁄𑀲𑀦𑀁 𑀥𑀫𑁆𑀫𑀲𑀯𑀦𑀖𑁄𑀲𑀦𑀁. 𑀢𑀲𑁆𑀲𑀸𑀢𑀺 ‘‘𑀲𑀤𑁆𑀤𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀲𑀤𑁆𑀤𑀯𑀢𑁆𑀣𑀽𑀦𑀁 𑀞𑀸𑀦𑀓𑀭𑀡𑀪𑁂𑀭𑀺𑀆𑀤𑀻𑀦𑀁 𑀲𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀓𑀭𑀡𑀲𑁆𑀲. 𑀘𑀺𑀦𑁆𑀢𑀦𑀁 𑀢𑀣𑀸 𑀢𑀣𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀦𑀁. 𑀅𑀜𑁆𑀜𑀢𑁆𑀣𑀸𑀢𑀺 𑀲𑀼𑀢𑁆𑀢𑁂𑀲𑀼. 𑀅𑀧𑀭𑀢𑁆𑀣𑀸𑀢𑀺 𑀅𑀪𑀺𑀥𑀫𑁆𑀫𑀧𑀤𑁂𑀲𑀼. 𑀅𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀧𑀤𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸 ‘‘𑀧𑀭𑀺𑀪𑁄𑀕𑀭𑀲𑁄’’𑀢𑀺𑀆𑀤𑀺𑀓𑀸𑀬 𑀅𑀢𑁆𑀣𑀯𑀡𑁆𑀡𑀦𑀸𑀬 𑀧𑀭𑀢𑁄 𑀩𑀳𑀽𑀲𑀼 𑀧𑁄𑀢𑁆𑀣𑀓𑁂𑀲𑀼 𑀮𑀺𑀔𑀻𑀬𑀢𑀺, 𑀬𑀣𑀸𑀞𑀸𑀦𑁂𑀬𑁂𑀯 𑀧𑀦 𑀆𑀦𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀸. 𑀢𑀢𑁆𑀣 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀮𑀓𑁆𑀔𑀡𑀧𑀜𑁆𑀜𑀢𑁆𑀢𑀺𑀬𑁄 𑀅𑀜𑁆𑀜𑀸𑀬𑀢𑀦𑀢𑁆𑀢𑀸 𑀙 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀸𑀦𑀺 𑀅𑀲𑀗𑁆𑀕𑀳𑀺𑀢𑀸 𑀥𑀫𑁆𑀫𑀸𑀬𑀢𑀦𑁂𑀦𑀸𑀢𑀺 𑀬𑁄𑀚𑁂𑀢𑀩𑁆𑀩𑀁.

‘‘𑀏𑀓𑀤𑁆𑀯𑀸𑀭𑀺𑀓𑀓𑀫𑁆𑀫𑀁 𑀅𑀜𑁆𑀜𑀲𑁆𑀫𑀺𑀁 𑀤𑁆𑀯𑀸𑀭𑁂 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀭𑀽𑀧𑀸𑀤𑀻𑀲𑀼 𑀏𑀓𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑀁 𑀬𑀣𑀸 𑀦 𑀅𑀜𑁆𑀜𑀸𑀭𑀫𑁆𑀫𑀡𑀁 𑀳𑁄𑀢𑀺 𑀘𑀺𑀢𑁆𑀢𑀯𑀺𑀲𑁂𑀲𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸, 𑀏𑀯𑀁 𑀓𑀫𑁆𑀫𑀯𑀺𑀲𑁂𑀲𑁂 𑀅𑀥𑀺𑀧𑁆𑀧𑁂𑀢𑁂 𑀓𑀸𑀬𑀤𑁆𑀯𑀸𑀭𑀸𑀤𑀻𑀲𑀼 𑀏𑀓𑀤𑁆𑀯𑀸𑀭𑀺𑀓𑀓𑀫𑁆𑀫𑀁 𑀅𑀜𑁆𑀜𑀲𑁆𑀫𑀺𑀁 𑀤𑁆𑀯𑀸𑀭𑁂 𑀦 𑀉𑀧𑁆𑀧𑀚𑁆𑀚𑀢𑀺 𑀢𑀢𑁆𑀣𑁂𑀯 𑀧𑀭𑀺𑀬𑁄𑀲𑀺𑀢𑀢𑁆𑀢𑀸, 𑀅𑀣 𑀓𑀫𑁆𑀫𑀲𑀸𑀫𑀜𑁆𑀜𑀁 𑀅𑀥𑀺𑀧𑁆𑀧𑁂𑀢𑀁, 𑀭𑀽𑀧𑀸𑀤𑀻𑀲𑀼 𑀏𑀓𑀸𑀭𑀫𑁆𑀫𑀡𑀦𑁆𑀢𑀺 𑀇𑀤𑀁 𑀉𑀤𑀸𑀳𑀭𑀡𑀁 𑀦 𑀲𑀺𑀬𑀸𑀢𑀺? 𑀦, 𑀅𑀲𑀤𑀺𑀲𑀪𑀸𑀯𑀯𑀺𑀪𑀸𑀯𑀦𑀯𑀲𑁂𑀦 𑀉𑀤𑀸𑀳𑀝𑀢𑁆𑀢𑀸, 𑀇𑀢𑀭𑀣𑀸 𑀫𑀦𑁄𑀯𑀺𑀜𑁆𑀜𑀸𑀡𑀪𑀽𑀢𑀁 𑀇𑀤𑀁 𑀘𑀺𑀢𑁆𑀢𑀁 𑀙𑀲𑀼𑀧𑀺 𑀯𑀺𑀲𑀬𑁂𑀲𑀼 𑀧𑀯𑀢𑁆𑀢𑀦𑀢𑁄 𑀅𑀦𑀺𑀩𑀤𑁆𑀥𑀸𑀭𑀫𑁆𑀫𑀡𑀦𑁆𑀢𑀺 𑀆𑀭𑀫𑁆𑀫𑀡𑀁 𑀲𑀤𑀺𑀲𑀽𑀤𑀸𑀳𑀭𑀡𑀪𑀸𑀯𑁂𑀦 𑀯𑀼𑀘𑁆𑀘𑁂𑀬𑁆𑀬 𑀆𑀭𑀫𑁆𑀫𑀡𑀁 𑀯𑀺𑀬 𑀤𑁆𑀯𑀸𑀭𑀫𑁆𑀧𑀺 𑀅𑀦𑀺𑀩𑀤𑁆𑀥𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀲𑀢𑀺𑀧𑀺 𑀓𑀫𑁆𑀫𑀸𑀦𑀁 𑀤𑁆𑀯𑀸𑀭𑀦𑁆𑀢𑀭𑀘𑀭𑀡𑁂 𑀬𑁂𑀪𑀼𑀬𑁆𑀬𑁂𑀦 𑀯𑀼𑀢𑁆𑀢𑀺𑀬𑀸 𑀢𑀩𑁆𑀩𑀳𑀼𑀮𑀯𑀼𑀢𑁆𑀢𑀺𑀬𑀸 𑀘 𑀤𑁆𑀯𑀸𑀭𑀓𑀫𑁆𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀯𑀯𑀢𑁆𑀣𑀸𑀦𑀁 𑀯𑀓𑁆𑀔𑀢𑀺, 𑀢𑀲𑁆𑀫𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀪𑀸𑀯𑀲𑀸𑀫𑀜𑁆𑀜𑁂𑀦 𑀓𑀫𑁆𑀫𑀁 𑀏𑀓𑀢𑁆𑀢𑀦𑀬𑀯𑀲𑁂𑀦 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀯𑀘𑀻𑀤𑁆𑀯𑀸𑀭𑀸𑀤𑀻𑀲𑀼 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄 𑀓𑀫𑁆𑀫𑀲𑁆𑀲 𑀅𑀦𑀺𑀩𑀤𑁆𑀥𑀢𑁆𑀢𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀓𑀸𑀬𑀤𑁆𑀯𑀸𑀭𑀸𑀤𑀻𑀲𑀼 𑀏𑀓𑀤𑁆𑀯𑀸𑀭𑀺𑀓𑀓𑀫𑁆𑀫𑀁 𑀅𑀜𑁆𑀜𑀲𑁆𑀫𑀺𑀁 𑀤𑁆𑀯𑀸𑀭𑁂 𑀦 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺. 𑀭𑀽𑀧𑀸𑀤𑀻𑀲𑀼 𑀧𑀦 𑀏𑀓𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑀁 𑀢𑁂𑀦𑁂𑀯𑀸𑀭𑀫𑁆𑀫𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀯𑀺𑀲𑀺𑀝𑁆𑀞𑀫𑁂𑀯 𑀕𑀳𑀺𑀢𑀦𑁆𑀢𑀺 𑀆𑀭𑀫𑁆𑀫𑀡𑀫𑁂𑀯 𑀦𑀺𑀩𑀤𑁆𑀥𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀘𑀺𑀢𑁆𑀢𑀯𑀺𑀲𑁂𑀲𑁄 𑀏𑀯 𑀕𑀳𑀺𑀢𑁄, 𑀦 𑀘𑀺𑀢𑁆𑀢𑀲𑀸𑀫𑀜𑁆𑀜𑀁. ‘‘𑀦𑀦𑀼 𑀘 𑀭𑀽𑀧𑀸𑀭𑀫𑁆𑀫𑀡𑀁 𑀯𑀸…𑀧𑁂… 𑀥𑀫𑁆𑀫𑀸𑀭𑀫𑁆𑀫𑀡𑀁 𑀯𑀸 𑀬𑀁 𑀬𑀁 𑀯𑀸 𑀧𑀦𑀸’’𑀢𑀺 𑀆𑀭𑀫𑁆𑀫𑀡𑀫𑁆𑀧𑀺 𑀅𑀦𑀺𑀬𑀫𑁂𑀦𑁂𑀯 𑀯𑀼𑀢𑁆𑀢𑀦𑁆𑀢𑀺? 𑀲𑀘𑁆𑀘𑀫𑁂𑀢𑀁, 𑀢𑀢𑁆𑀣 𑀧𑀦 𑀬𑀁 𑀭𑀽𑀧𑀸𑀤𑀻𑀲𑀼 𑀏𑀓𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑀁, 𑀢𑀁 𑀢𑁂𑀦 𑀯𑀺𑀦𑀸 𑀦𑀧𑁆𑀧𑀯𑀢𑁆𑀢𑀢𑀺, 𑀓𑀫𑁆𑀫𑀁 𑀧𑀦 𑀓𑀸𑀬𑀤𑁆𑀯𑀸𑀭𑀺𑀓𑀸𑀤𑀺𑀪𑁂𑀤𑀁 𑀯𑀘𑀻𑀤𑁆𑀯𑀸𑀭𑀸𑀤𑀻𑀲𑀼 𑀦 𑀦𑀧𑁆𑀧𑀯𑀢𑁆𑀢𑀢𑀻𑀢𑀺 𑀇𑀫𑀲𑁆𑀲 𑀯𑀺𑀲𑁂𑀲𑀲𑁆𑀲 𑀚𑁄𑀢𑀦𑀢𑁆𑀣𑀁 𑀧𑀸𑀴𑀺𑀬𑀁 𑀆𑀭𑀫𑁆𑀫𑀡𑀫𑁂𑀯 𑀕𑀳𑀺𑀢𑀁, 𑀤𑁆𑀯𑀸𑀭𑀁 𑀦 𑀕𑀳𑀺𑀢𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀆𑀭𑀫𑁆𑀫𑀡𑀫𑁂𑀯 𑀦𑀺𑀩𑀤𑁆𑀥’’𑀦𑁆𑀢𑀺𑀆𑀤𑀺𑀦𑀸. 𑀯𑀘𑀻𑀤𑁆𑀯𑀸𑀭𑁂 𑀉𑀧𑁆𑀧𑀚𑁆𑀚𑀫𑀸𑀦𑀫𑁆𑀧𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀢𑀺 𑀅𑀢𑁆𑀣𑁄.

𑀓𑀸𑀫𑀸𑀯𑀘𑀭𑀓𑀼𑀲𑀮𑀁

𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑀓𑀫𑁆𑀫𑀤𑁆𑀯𑀸𑀭𑀸𑀦𑀦𑁆𑀢𑀺𑀆𑀤𑀺𑀦𑀸 𑀧𑀓𑀸𑀲𑁂𑀢𑀩𑁆𑀩𑀲𑁆𑀲 𑀲𑀭𑀽𑀧𑀁 𑀧𑀓𑀸𑀲𑀦𑀼𑀧𑀸𑀬𑀜𑁆𑀘 𑀤𑀲𑁆𑀲𑁂𑀢𑀺. 𑀦𑀺𑀬𑀢𑀭𑀽𑀧𑀭𑀽𑀧𑀯𑀲𑁂𑀦𑀸𑀢𑀺 𑀥𑀫𑁆𑀫𑀲𑀗𑁆𑀕𑀳𑁂 𑀦𑀺𑀤𑁆𑀤𑀺𑀝𑁆𑀞𑀦𑀺𑀬𑀢𑀭𑀽𑀧𑀭𑀽𑀧𑀯𑀲𑁂𑀦. 𑀅𑀜𑁆𑀜𑀣𑀸 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀺𑀓𑀓𑀸𑀬𑁂 𑀳𑀤𑀬𑀯𑀢𑁆𑀣𑀼𑀧𑀺 𑀕𑀳𑁂𑀢𑀩𑁆𑀩𑀁 𑀲𑀺𑀬𑀸. 𑀏𑀓𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑁄 𑀉𑀧𑀸𑀤𑀺𑀦𑁆𑀦𑀓𑀓𑀸𑀬𑁄 𑀇𑀥 𑀕𑀳𑀺𑀢𑁄𑀢𑀺 𑀘𑀓𑁆𑀔𑀸𑀬𑀢𑀦𑀸𑀤𑀻𑀢𑀺 𑀯𑀼𑀢𑁆𑀢𑁂𑀲𑀼 𑀏𑀓𑁄 𑀪𑀸𑀯𑁄 𑀳𑀤𑀬𑀯𑀢𑁆𑀣𑀼 𑀘 𑀕𑀳𑀺𑀢𑀦𑁆𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 ‘‘𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀸𑀦𑀻’’𑀢𑀺 𑀲𑀦𑁆𑀦𑀺𑀯𑁂𑀲𑀲𑁆𑀲 𑀯𑀺𑀪𑀸𑀯𑀺𑀢𑀢𑁆𑀢𑀸.

𑀯𑀺𑀧𑁆𑀨𑀦𑁆𑀤𑀫𑀸𑀦𑀯𑀡𑁆𑀡𑀕𑁆𑀕𑀳𑀡𑀸𑀦𑀦𑁆𑀢𑀭𑀁 𑀯𑀺𑀜𑁆𑀜𑀢𑁆𑀢𑀺𑀕𑁆𑀕𑀳𑀡𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸 𑀘𑀮𑀦𑀸𑀓𑀸𑀭𑀸𑀯 𑀯𑀸𑀬𑁄𑀥𑀸𑀢𑀼 𑀯𑀺𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑀲𑀳𑀺𑀢𑀸𑀢𑀺 𑀓𑀤𑀸𑀘𑀺 𑀆𑀲𑀗𑁆𑀓𑁂𑀬𑁆𑀬𑀸𑀢𑀺 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀧𑀞𑀫𑀚𑀯𑀦𑀲𑀫𑀼𑀝𑁆𑀞𑀺𑀢𑀸’’𑀢𑀺 𑀆𑀳. 𑀤𑁂𑀲𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑁂𑀦 𑀘𑀸𑀮𑁂𑀢𑀼𑀦𑁆𑀢𑀺 𑀏𑀢𑁂𑀦 𑀤𑁂𑀲𑀦𑁆𑀢𑀭𑀼𑀧𑁆𑀧𑀢𑁆𑀢𑀺 𑀘𑀮𑀦𑀁, 𑀢𑀁𑀦𑀺𑀫𑀺𑀢𑁆𑀢𑁂 𑀘 𑀓𑀢𑁆𑀢𑀼𑀪𑀸𑀯𑁄 𑀉𑀧𑀘𑀭𑀺𑀢𑁄𑀢𑀺 𑀤𑀲𑁆𑀲𑁂𑀢𑀺, 𑀅𑀜𑁆𑀜𑀣𑀸 𑀔𑀡𑀺𑀓𑀢𑀸 𑀅𑀩𑁆𑀬𑀸𑀧𑀸𑀭𑀢𑀸 𑀘 𑀥𑀫𑁆𑀫𑀸𑀦𑀁 𑀦 𑀲𑀫𑁆𑀪𑀯𑁂𑀬𑁆𑀬𑀸𑀢𑀺. 𑀢𑀤𑀪𑀺𑀫𑀼𑀔𑀪𑀸𑀯𑀯𑀺𑀓𑀸𑀭𑀯𑀢𑀻𑀢𑀺 𑀢𑀁𑀤𑀺𑀲𑀫𑀪𑀺𑀫𑀼𑀔𑁄 𑀢𑀤𑀪𑀺𑀫𑀼𑀔𑁄, 𑀢𑀲𑁆𑀲 𑀪𑀸𑀯𑁄 𑀢𑀤𑀪𑀺𑀫𑀼𑀔𑀪𑀸𑀯𑁄, 𑀲𑁄 𑀏𑀯 𑀯𑀺𑀓𑀸𑀭𑁄, 𑀢𑀁𑀲𑀫𑀗𑁆𑀕𑀺𑀦𑀻 𑀯𑀸𑀬𑁄𑀥𑀸𑀢𑀼 𑀢𑀤𑀪𑀺𑀫𑀼𑀔𑀪𑀸𑀯𑀯𑀺𑀓𑀸𑀭𑀯𑀢𑀻. 𑀇𑀤𑀸𑀦𑀺 𑀢𑀤𑀪𑀺𑀫𑀼𑀔𑀪𑀸𑀯𑀯𑀺𑀓𑀸 𑀭𑀲𑁆𑀲 𑀯𑀺𑀜𑁆𑀜𑀢𑁆𑀢𑀺𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀥𑀺𑀧𑁆𑀧𑀸𑀬𑀲𑀳𑀪𑀸𑀯𑀻’’𑀢𑀺𑀆𑀤𑀺. 𑀏𑀯𑀜𑁆𑀘 𑀓𑀢𑁆𑀯𑀸𑀢𑀺𑀆𑀤𑀺𑀦𑀸 𑀇𑀫𑀺𑀲𑁆𑀲𑀸 𑀅𑀢𑁆𑀣𑀯𑀡𑁆𑀡𑀦𑀸𑀬 𑀮𑀤𑁆𑀥𑀕𑀼𑀡𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀆𑀯𑀚𑁆𑀚𑀦𑀲𑁆𑀲𑀸𑀢𑀺 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑁆𑀲. 𑀬𑀢𑁄 𑀩𑀸𑀢𑁆𑀢𑀺𑀁𑀲𑀸𑀢𑀺𑀆𑀤𑀺𑀦𑀸 𑀢𑀲𑁆𑀲 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀢𑀸 𑀦 𑀲𑀓𑁆𑀓𑀸 𑀧𑀝𑀺𑀲𑁂𑀥𑁂𑀢𑀼𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀲𑀫𑀢𑁆𑀣𑁄𑀢𑀺 𑀏𑀢𑁂𑀦 𑀬𑀣𑀸𑀯𑀼𑀢𑁆𑀢𑀯𑀸𑀬𑁄𑀥𑀸𑀢𑀼𑀬𑀸 𑀣𑀫𑁆𑀪𑀦𑀘𑀮𑀦𑀲𑀗𑁆𑀔𑀸𑀢𑀓𑀺𑀘𑁆𑀘𑀦𑀺𑀧𑁆𑀨𑀸𑀤𑀦𑁂 𑀢𑀲𑁆𑀲 𑀆𑀓𑀸𑀭𑀯𑀺𑀲𑁂𑀲𑀲𑁆𑀲 𑀲𑀳𑀓𑀸𑀭𑀻𑀓𑀸𑀭𑀡𑀪𑀸𑀯𑀫𑀸𑀳. 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀢𑀸𑀤𑀬𑁄 𑀯𑀺𑀬 𑀫𑀳𑀸𑀪𑀽𑀢𑀸𑀦𑀁 𑀅𑀯𑀢𑁆𑀣𑀸𑀯𑀺𑀲𑁂𑀲𑀫𑀢𑁆𑀢𑀁 𑀲𑁄 𑀆𑀓𑀸𑀭𑀯𑀺𑀲𑁂𑀲𑁄𑀢𑀺 𑀧𑀭𑀫𑀢𑁆𑀣𑀢𑁄 𑀦 𑀓𑀺𑀜𑁆𑀘𑀺 𑀳𑁄𑀢𑀻𑀢𑀺 ‘‘𑀧𑀭𑀫𑀢𑁆𑀣𑀢𑁄 𑀅𑀪𑀸𑀯𑀁 𑀤𑀲𑁆𑀲𑁂𑀢𑀻’’𑀢𑀺 𑀆𑀳. 𑀧𑀭𑀫𑀢𑁆𑀣𑀢𑁄 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀪𑀸𑀯𑁄 𑀧𑀝𑀺𑀲𑁂𑀥𑀺𑀢𑁄. 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀤𑀺𑀪𑀸𑀯𑀲𑁆𑀲 𑀧𑀦 𑀲𑀫𑁆𑀪𑀯𑁄𑀬𑁂𑀯 𑀦𑀢𑁆𑀣𑀻𑀢𑀺 𑀬𑀣𑀸𑀯𑀼𑀢𑁆𑀢𑀯𑀺𑀓𑀸𑀭𑀲𑁆𑀲 𑀧𑀭𑀫𑀢𑁆𑀣𑀢𑁄 𑀲𑀩𑁆𑀪𑀸𑀯𑁂 𑀦𑀓𑀼𑀢𑁄𑀘𑀺𑀲𑀫𑀼𑀝𑁆𑀞𑀺𑀢𑀢𑁆𑀢𑀸 𑀅𑀧𑁆𑀧𑀘𑁆𑀘𑀬𑀢𑁆𑀢𑀁 𑀆𑀧𑀦𑁆𑀦𑀁. 𑀦 𑀳𑀺 𑀭𑀽𑀧𑀁 𑀅𑀧𑁆𑀧𑀘𑁆𑀘𑀬𑀁 𑀅𑀢𑁆𑀣𑀺, 𑀅𑀧𑁆𑀧𑀘𑁆𑀘𑀬𑀢𑁆𑀢𑁂 𑀘 𑀲𑀢𑀺 𑀦𑀺𑀘𑁆𑀘𑀪𑀸𑀯𑁄 𑀆𑀧𑀚𑁆𑀚𑀢𑀺, 𑀦 𑀘 𑀦𑀺𑀩𑁆𑀩𑀸𑀦𑀯𑀚𑁆𑀚𑁄 𑀅𑀢𑁆𑀣𑁄 𑀲𑀪𑀸𑀯𑀥𑀫𑁆𑀫𑁄 𑀦𑀺𑀘𑁆𑀘𑁄 𑀅𑀢𑁆𑀣𑀺. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀪𑀸𑀯𑁄 𑀯𑀺𑀬𑀸𑀢𑀺 𑀯𑀺𑀜𑁆𑀜𑀢𑁆𑀢𑀺𑀬𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀉𑀧𑀸𑀤𑀸𑀭𑀽𑀧𑀪𑀸𑀯𑁄 𑀉𑀧𑀘𑀸𑀭𑀲𑀺𑀤𑁆𑀥𑁄𑀢𑀺 𑀤𑀲𑁆𑀲𑁂𑀢𑀺.

𑀯𑀺𑀜𑁆𑀜𑀢𑁆𑀢𑀺𑀬𑀸 𑀓𑀭𑀡𑀪𑀽𑀢𑀸𑀬. 𑀬𑀁 𑀓𑀭𑀡𑀦𑁆𑀢𑀺 𑀬𑀁 𑀘𑀺𑀢𑁆𑀢𑀓𑀺𑀭𑀺𑀬𑀁 𑀘𑀺𑀢𑁆𑀢𑀩𑁆𑀬𑀸𑀧𑀸𑀭𑀁. 𑀯𑀺𑀜𑁆𑀜𑀢𑁆𑀢𑀺𑀬𑀸 𑀯𑀺𑀜𑁆𑀜𑀸𑀢𑀢𑁆𑀢𑀦𑁆𑀢𑀺 𑀇𑀤𑀫𑁂𑀲 𑀓𑀸𑀭𑁂𑀢𑀻𑀢𑀺 𑀬𑀤𑁂𑀢𑀁 𑀅𑀥𑀺𑀧𑁆𑀧𑀸𑀬𑀯𑀺𑀪𑀸𑀯𑀦𑀁, 𑀏𑀢𑀁 𑀯𑀺𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑀭𑀳𑀺𑀢𑁂𑀲𑀼 𑀭𑀼𑀓𑁆𑀔𑀘𑀮𑀦𑀸𑀤𑀻𑀲𑀼 𑀦 𑀤𑀺𑀝𑁆𑀞𑀁, 𑀳𑀢𑁆𑀣𑀘𑀮𑀦𑀸𑀤𑀻𑀲𑀼 𑀧𑀦 𑀤𑀺𑀝𑁆𑀞𑀁, 𑀢𑀲𑁆𑀫𑀸 𑀯𑀺𑀧𑁆𑀨𑀦𑁆𑀤𑀫𑀸𑀦𑀯𑀡𑁆𑀡𑀯𑀺𑀦𑀺𑀫𑀼𑀢𑁆𑀢𑁄 𑀓𑁄𑀘𑀺 𑀯𑀺𑀓𑀸𑀭𑁄 𑀅𑀢𑁆𑀣𑀺 𑀓𑀸𑀬𑀺𑀓𑀓𑀭𑀡𑀲𑀗𑁆𑀔𑀸𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑀲𑁆𑀲 𑀜𑀸𑀧𑀓𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀜𑀸𑀧𑀓𑁄 𑀘 𑀳𑁂𑀢𑀼 𑀜𑀸𑀧𑁂𑀢𑀩𑁆𑀩𑀫𑀢𑁆𑀣𑀁 𑀲𑀬𑀁 𑀜𑀸𑀢𑁄𑀬𑁂𑀯 𑀜𑀸𑀧𑁂𑀢𑀺, 𑀦 𑀲𑀩𑁆𑀪𑀸𑀯𑀫𑀢𑁆𑀢𑁂𑀦𑀸𑀢𑀺 𑀯𑀡𑁆𑀡𑀕𑁆𑀕𑀳𑀡𑀸𑀦𑀦𑁆𑀢𑀭𑀁 𑀯𑀺𑀓𑀸𑀭𑀕𑁆𑀕𑀳𑀡𑀫𑁆𑀧𑀺 𑀯𑀺𑀜𑁆𑀜𑀸𑀬𑀢𑀺. 𑀢𑀣𑀸 𑀳𑀺 𑀯𑀺𑀲𑀬𑀪𑀸𑀯𑀫𑀸𑀧𑀦𑁆𑀦𑁄 𑀏𑀯 𑀲𑀤𑁆𑀤𑁄 𑀅𑀢𑁆𑀣𑀁 𑀧𑀓𑀸𑀲𑁂𑀢𑀺, 𑀦𑁂𑀢𑀭𑁄. 𑀢𑁂𑀦𑁂𑀯𑀸𑀳 ‘‘𑀦 𑀳𑀺 𑀯𑀺𑀜𑁆𑀜𑀢𑁆𑀢𑀻’’𑀢𑀺𑀆𑀤𑀺. 𑀬𑀤𑀺 𑀧𑀦 𑀘𑀺𑀢𑁆𑀢𑀚𑀭𑀽𑀧𑀸𑀦𑀁 𑀘𑀮𑀦𑀸𑀓𑀸𑀭𑁄 𑀯𑀺𑀜𑁆𑀜𑀢𑁆𑀢𑀺, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀧𑁆𑀨𑀦𑁆𑀤𑀫𑀸𑀦𑀯𑀡𑁆𑀡𑀸𑀭𑀫𑁆𑀫𑀡𑀢𑁆𑀢𑀸 𑀢𑁂𑀦𑀧𑀺 𑀲𑀸 𑀕𑀳𑀺𑀢𑀸 𑀲𑀺𑀬𑀸𑀢𑀺 𑀆𑀲𑀗𑁆𑀓𑀸𑀬 𑀦𑀺𑀯𑀢𑁆𑀢𑀦𑀢𑁆𑀣𑀁 𑀆𑀳 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲𑀸’’𑀢𑀺𑀆𑀤𑀺.

𑀢𑀸𑀮𑀧𑀡𑁆𑀡𑀸𑀤𑀺𑀭𑀽𑀧𑀸𑀦𑀻𑀢𑀺𑀆𑀤𑀺𑀦𑀸𑀧𑀺 𑀯𑀺𑀜𑁆𑀜𑀢𑁆𑀢𑀺𑀬𑀸 𑀯𑀺𑀜𑁆𑀜𑀸𑀢𑀩𑁆𑀩𑀢𑀁 𑀫𑀦𑁄𑀯𑀺𑀜𑁆𑀜𑀸𑀡𑁂𑀦𑁂𑀯 𑀘 𑀯𑀺𑀜𑁆𑀜𑀸𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑀺. 𑀲𑀜𑁆𑀚𑀸𑀦𑀸𑀢𑀺 𑀏𑀢𑁂𑀦𑀸𑀢𑀺 𑀲𑀜𑁆𑀜𑀸𑀡𑀁, 𑀢𑀲𑁆𑀲 𑀉𑀤𑀓𑀸𑀤𑀺𑀦𑁄 𑀲𑀜𑁆𑀜𑀸𑀡𑀁 𑀢𑀁𑀲𑀜𑁆𑀜𑀸𑀡𑀁, 𑀢𑀲𑁆𑀲 𑀆𑀓𑀸𑀭𑁄 𑀢𑀁𑀲𑀜𑁆𑀜𑀸𑀡𑀸𑀓𑀸𑀭𑁄, 𑀉𑀤𑀓𑀸𑀤𑀺𑀲𑀳𑀘𑀸𑀭𑀺𑀧𑁆𑀧𑀓𑀸𑀭𑁄 𑀘 𑀲𑁄 𑀢𑀁𑀲𑀜𑁆𑀜𑀸𑀡𑀸𑀓𑀸𑀭𑁄 𑀘𑀸𑀢𑀺 𑀉𑀤𑀓𑀸…𑀧𑁂… 𑀓𑀸𑀭𑁄, 𑀢𑀁 𑀕𑀳𑁂𑀢𑁆𑀯𑀸 𑀚𑀸𑀦𑀺𑀢𑁆𑀯𑀸. 𑀢𑀤𑀸𑀓𑀸𑀭𑀲𑁆𑀲𑀸𑀢𑀺 𑀉𑀤𑀓𑀸𑀤𑀺𑀜𑀸𑀧𑀦𑀸𑀓𑀸𑀭𑀲𑁆𑀲. 𑀬𑀤𑀺 𑀬𑀣𑀸𑀯𑀼𑀢𑁆𑀢𑀯𑀺𑀓𑀸𑀭𑀕𑁆𑀕𑀳𑀡𑀁𑀬𑁂𑀯 𑀓𑀸𑀭𑀡𑀁 𑀅𑀥𑀺𑀧𑁆𑀧𑀸𑀬𑀕𑁆𑀕𑀳𑀡𑀲𑁆𑀲, 𑀅𑀣 𑀓𑀲𑁆𑀫𑀸 𑀅𑀕𑁆𑀕𑀳𑀺𑀢𑀲𑀗𑁆𑀓𑁂𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑀕𑁆𑀕𑀳𑀡𑀁 𑀦 𑀳𑁄𑀢𑀻𑀢𑀺? 𑀦 𑀓𑁂𑀯𑀮𑀁 𑀯𑀺𑀓𑀸𑀭𑀕𑁆𑀕𑀳𑀡𑀫𑁂𑀯 𑀅𑀥𑀺𑀧𑁆𑀧𑀸𑀬𑀕𑁆𑀕𑀳𑀡𑀲𑁆𑀲 𑀓𑀸𑀭𑀡𑀁, 𑀓𑀺𑀜𑁆𑀘𑀭𑀳𑀻𑀢𑀺 𑀆𑀳 ‘‘𑀏𑀢𑀲𑁆𑀲 𑀧𑀦𑀸’’𑀢𑀺𑀆𑀤𑀺.

𑀅𑀣 𑀧𑀦𑀸𑀢𑀺𑀆𑀤𑀺𑀦𑀸 𑀯𑀺𑀜𑁆𑀜𑀢𑁆𑀢𑀺𑀬𑀸 𑀅𑀦𑀼𑀫𑀸𑀦𑁂𑀦 𑀕𑀳𑁂𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑀺. 𑀲𑀸𑀥𑀺𑀧𑁆𑀧𑀸𑀬…𑀧𑁂… 𑀦𑀦𑁆𑀢𑀭𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑀲𑀳𑀺𑀢𑀯𑀺𑀓𑀸𑀭𑁂𑀦 𑀲𑀳𑀚𑀸𑀢𑀯𑀡𑁆𑀡𑀸𑀬𑀢𑀦𑀕𑁆𑀕𑀳𑀡𑀲𑀗𑁆𑀔𑀸𑀢𑀲𑁆𑀲 𑀘𑀓𑁆𑀔𑀼𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑀲𑀦𑁆𑀢𑀸𑀦𑀲𑁆𑀲 𑀅𑀦𑀦𑁆𑀢𑀭𑀁. 𑀅𑀥𑀺𑀧𑁆𑀧𑀸𑀬𑀕𑁆𑀕𑀳𑀡𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑀯𑀯𑀢𑁆𑀣𑀸𑀧𑀓𑀲𑁆𑀲 𑀢𑀢𑀺𑀬𑀯𑀸𑀭𑁂 𑀚𑀯𑀦𑀲𑁆𑀲. 𑀅𑀥𑀺𑀧𑁆𑀧𑀸𑀬𑀲𑀳𑀪𑀽 𑀯𑀺𑀓𑀸𑀭𑀸𑀪𑀸𑀯𑁂 𑀅𑀪𑀸𑀯𑀢𑁄𑀢𑀺 𑀏𑀢𑁂𑀦 𑀬𑀣𑀸𑀯𑀼𑀢𑁆𑀢𑀯𑀺𑀓𑀸𑀭𑀁 𑀅𑀥𑀺𑀧𑁆𑀧𑀸𑀬𑀕𑁆𑀕𑀳𑀡𑁂𑀦 𑀅𑀦𑀼𑀫𑀺𑀦𑁄𑀢𑀺. 𑀏𑀯𑀁 𑀲𑀢𑀻𑀢𑀺𑀆𑀤𑀺𑀦𑀸 𑀬𑀣𑀸𑀦𑀼𑀫𑀺𑀢𑀫𑀢𑁆𑀣𑀁 𑀦𑀺𑀕𑀫𑀦𑀯𑀲𑁂𑀦 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀉𑀤𑀓𑀸𑀤𑀺𑀕𑁆𑀕𑀳𑀡𑁂𑀦𑁂𑀯𑀸𑀢𑀺 𑀢𑀸𑀮𑀧𑀡𑁆𑀡𑀸𑀤𑀻𑀦𑀁 𑀯𑀡𑁆𑀡𑀕𑁆𑀕𑀳𑀡𑀸𑀦𑀦𑁆𑀢𑀭𑁂𑀦 𑀧𑀼𑀭𑀺𑀫𑀲𑀺𑀤𑁆𑀥𑀲𑀫𑁆𑀩𑀦𑁆𑀥𑀸𑀦𑀼𑀕𑁆𑀕𑀳𑀺𑀢𑁂𑀦 𑀉𑀤𑀓𑀸𑀤𑀻𑀦𑀁 𑀢𑀢𑁆𑀣 𑀅𑀢𑁆𑀣𑀺𑀪𑀸𑀯𑀯𑀺𑀚𑀸𑀦𑀦𑁂𑀦𑁂𑀯. 𑀬𑀣𑀸 𑀢𑀸𑀮𑀧𑀡𑁆𑀡𑀸𑀤𑀻𑀦𑀁 𑀉𑀤𑀓𑀸𑀤𑀺𑀲𑀳𑀘𑀸𑀭𑀺𑀧𑁆𑀧𑀓𑀸𑀭𑀢𑀁 𑀲𑀜𑁆𑀜𑀸𑀡𑀸𑀓𑀸𑀭𑁄 𑀯𑀺𑀜𑁆𑀜𑀸𑀢𑁄𑀬𑁂𑀯 𑀳𑁄𑀢𑀺 𑀦𑀸𑀦𑀦𑁆𑀢𑀭𑀺𑀬𑀓𑀢𑁆𑀢𑀸, 𑀏𑀯𑀁 𑀯𑀺𑀧𑁆𑀨𑀦𑁆𑀤𑀫𑀸𑀦𑀯𑀡𑁆𑀡𑀕𑁆𑀕𑀳𑀡𑀸𑀦𑀦𑁆𑀢𑀭𑁂𑀦 𑀧𑀼𑀭𑀺𑀫𑀲𑀺𑀤𑁆𑀥𑀲𑀫𑁆𑀩𑀦𑁆𑀥𑀸𑀦𑀼𑀕𑁆𑀕𑀳𑀺𑀢𑁂𑀦 𑀕𑀦𑁆𑀢𑀼𑀓𑀸𑀫𑀢𑀸𑀤𑀺𑀅𑀥𑀺𑀧𑁆𑀧𑀸𑀬𑀯𑀺𑀚𑀸𑀦𑀦𑁂𑀦𑁂𑀯 𑀯𑀺𑀜𑁆𑀜𑀢𑁆𑀢𑀺 𑀯𑀺𑀜𑁆𑀜𑀸𑀢𑀸 𑀳𑁄𑀢𑀺 𑀢𑀤𑀪𑀸𑀯𑁂 𑀅𑀪𑀸𑀯𑀢𑁄𑀢𑀺 𑀉𑀧𑀫𑀸𑀬𑁄𑀚𑀦𑀸.

𑀲𑀪𑀸𑀯𑀪𑀽𑀢𑀦𑁆𑀢𑀺 𑀅𑀦𑁆𑀯𑀢𑁆𑀣𑀪𑀽𑀢𑀁. 𑀤𑁆𑀯𑀺𑀥𑀸𑀢𑀺 𑀯𑀺𑀜𑁆𑀜𑀸𑀧𑀦𑀢𑁄 𑀯𑀺𑀜𑁆𑀜𑁂𑀬𑁆𑀬𑀢𑁄 𑀘. 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀬𑀸 𑀢𑀣𑀸𑀧𑀯𑀢𑁆𑀢𑀫𑀸𑀦𑀸𑀬 𑀘𑁂𑀢𑀦𑀸𑀲𑀗𑁆𑀔𑀸𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀸𑀬𑀓𑀫𑁆𑀫𑀪𑀸𑀯𑁄 𑀦𑀺𑀧𑁆𑀨𑀚𑁆𑀚𑀢𑀺 𑀢𑀸𑀬 𑀉𑀧𑀮𑀓𑁆𑀔𑀺𑀢𑀩𑁆𑀩𑀢𑁆𑀢𑀸, 𑀦 𑀧𑀦 𑀘𑀢𑀼𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀲𑀼 𑀓𑁂𑀦𑀘𑀺 𑀧𑀘𑁆𑀘𑀬𑀪𑀸𑀯𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀲𑁆𑀫𑀺𑀁 𑀤𑁆𑀯𑀸𑀭𑁂 𑀲𑀺𑀤𑁆𑀥𑀸’’𑀢𑀺𑀆𑀤𑀺𑀫𑀸𑀳. 𑀢𑁂𑀦 𑀯𑀘𑀻𑀤𑁆𑀯𑀸𑀭𑀼𑀧𑁆𑀧𑀦𑁆𑀦𑀸𑀧𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄 𑀲𑀗𑁆𑀕𑀳𑀺𑀢𑀸𑀢𑀺 𑀢𑁂𑀲𑀁 𑀲𑀗𑁆𑀕𑀳𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀅𑀣 𑀯𑀸 𑀓𑀸𑀬𑀤𑁆𑀯𑀸𑀭𑀼𑀧𑁆𑀧𑀦𑁆𑀦𑀸𑀬 𑀓𑀸𑀬𑀓𑀫𑁆𑀫𑀪𑀽𑀢𑀸𑀬 𑀘𑁂𑀢𑀦𑀸𑀬 𑀯𑀲𑁂𑀦 ‘‘𑀢𑁂𑀦 𑀤𑁆𑀯𑀸𑀭𑁂𑀦 𑀯𑀺𑀜𑁆𑀜𑀸𑀢𑀩𑁆𑀩𑀪𑀸𑀯𑀢𑁄’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀲𑀸𑀬𑁂𑀯 𑀤𑁆𑀯𑀸𑀭𑀦𑁆𑀢𑀭𑀼𑀧𑁆𑀧𑀦𑁆𑀦𑀸𑀬 𑀯𑀲𑁂𑀦 ‘‘𑀢𑁂𑀦 𑀤𑁆𑀯𑀸𑀭𑁂𑀦 𑀦𑀸𑀫𑀮𑀸𑀪𑀢𑁄’’𑀢𑀺. 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑁆𑀲𑀧𑀺 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀪𑀸𑀯𑁄 𑀦𑀺𑀘𑁆𑀙𑀺𑀢𑁄𑀢𑀺 ‘‘𑀏𑀓𑀸𑀤𑀲𑀦𑁆𑀦𑀁 𑀓𑀺𑀭𑀺𑀬𑀘𑀺𑀢𑁆𑀢𑀸𑀦’’𑀦𑁆𑀢𑀺 𑀆𑀳.

𑀤𑁆𑀯𑀸𑀭𑀦𑁆𑀢𑀭𑀘𑀸𑀭𑀺𑀦𑁄𑀢𑀺 𑀤𑁆𑀯𑀸𑀭𑀦𑁆𑀢𑀭𑀪𑀸𑀯𑁂𑀦 𑀧𑀯𑀢𑁆𑀢𑀦𑀓𑀸. 𑀤𑁆𑀯𑀸𑀭𑀲𑀫𑁆𑀪𑁂𑀤𑀸𑀢𑀺 𑀤𑁆𑀯𑀸𑀭𑀸𑀦𑀁 𑀲𑀗𑁆𑀓𑀭𑀡𑀢𑁄. 𑀤𑁆𑀯𑀸𑀭𑀸𑀦𑀜𑁆𑀳𑀺 𑀤𑁆𑀯𑀸𑀭𑀦𑁆𑀢𑀭𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀲𑀢𑀺 𑀓𑀸𑀬𑀤𑁆𑀯𑀸𑀭𑀲𑁆𑀲 𑀯𑀘𑀻𑀤𑁆𑀯𑀸𑀭𑀸𑀤𑀺𑀪𑀸𑀯𑁄, 𑀯𑀘𑀻𑀤𑁆𑀯𑀸𑀭𑀲𑁆𑀲 𑀘 𑀓𑀸𑀬𑀤𑁆𑀯𑀸𑀭𑀸𑀤𑀺𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺 𑀢𑀁𑀢𑀁𑀤𑁆𑀯𑀸𑀭𑀼𑀧𑁆𑀧𑀦𑁆𑀦𑀓𑀫𑁆𑀫𑀸𑀦𑀫𑁆𑀧𑀺 𑀲𑀗𑁆𑀓𑀭𑁄 𑀲𑀺𑀬𑀸. 𑀢𑁂𑀦𑀸𑀳 ‘‘𑀓𑀫𑁆𑀫𑀲𑀫𑁆𑀪𑁂𑀤𑁄𑀧𑀻’’𑀢𑀺. 𑀏𑀯𑀁 𑀲𑀢𑀺 𑀓𑀸𑀬𑀓𑀫𑁆𑀫𑀁…𑀧𑁂… 𑀯𑀯𑀢𑁆𑀣𑀸𑀦𑀁 𑀦 𑀲𑀺𑀬𑀸. 𑀬𑀤𑀺 𑀓𑀫𑁆𑀫𑀸𑀦𑀺 𑀓𑀫𑁆𑀫𑀦𑁆𑀢𑀭𑀘𑀸𑀭𑀻𑀦𑀺 𑀳𑁄𑀦𑁆𑀢𑀺, 𑀓𑀸𑀬𑀓𑀫𑁆𑀫𑀸𑀤𑀺𑀓𑀲𑁆𑀲 𑀯𑀘𑀻𑀓𑀫𑁆𑀫𑀸𑀤𑀺𑀓𑀪𑀸𑀯𑀸𑀧𑀢𑁆𑀢𑀺𑀢𑁄 ‘‘𑀓𑀫𑁆𑀫𑀲𑀫𑁆𑀪𑁂𑀤𑀸 𑀤𑁆𑀯𑀸𑀭𑀲𑀫𑁆𑀪𑁂𑀤𑁄𑀧𑀻’’𑀢𑀺 𑀓𑀸𑀬𑀓𑀫𑁆𑀫𑀁 𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀯𑀯𑀢𑁆𑀣𑀸𑀦𑀁 𑀦 𑀲𑀺𑀬𑀸𑀢𑀺 𑀇𑀫𑀫𑀢𑁆𑀣𑀫𑀸𑀳 ‘‘𑀓𑀫𑁆𑀫𑀸𑀦𑀫𑁆𑀧𑀺 𑀓𑀫𑁆𑀫𑀦𑁆𑀢𑀭𑀘𑀭𑀡𑁂 𑀏𑀲𑁂𑀯 𑀦𑀬𑁄’’𑀢𑀺. 𑀓𑀫𑁆𑀫𑀦𑁆𑀢𑀭𑀘𑀭𑀡𑀁 𑀓𑀫𑁆𑀫𑀦𑁆𑀢𑀭𑀽𑀧𑀮𑀓𑁆𑀔𑀡𑀢𑀸. 𑀢𑁂𑀦𑁂𑀯𑀸𑀳 ‘‘𑀤𑁆𑀯𑀸𑀭𑀪𑀸𑀯𑁂𑀦𑀸’’𑀢𑀺. 𑀤𑁆𑀯𑀸𑀭𑀦𑁆𑀢𑀭𑀘𑀭𑀡𑀁 𑀤𑁆𑀯𑀸𑀭𑀦𑁆𑀢𑀭𑀼𑀧𑁆𑀧𑀢𑁆𑀢𑀺. 𑀤𑁆𑀯𑀸𑀭𑁂𑀢𑀺 𑀅𑀢𑁆𑀢𑀦𑁄 𑀤𑁆𑀯𑀸𑀭𑁂. 𑀅𑀜𑁆𑀜𑀲𑁆𑀫𑀺𑀦𑁆𑀢𑀺 𑀤𑁆𑀯𑀸𑀭𑀦𑁆𑀢𑀭𑁂. 𑀓𑀫𑁆𑀫𑀸𑀦𑀻𑀢𑀺 𑀢𑀁𑀢𑀁𑀤𑁆𑀯𑀸𑀭𑀺𑀓𑀓𑀫𑁆𑀫𑀸𑀦𑀺. 𑀅𑀜𑁆𑀜𑀸𑀦𑀻𑀢𑀺 𑀅𑀜𑁆𑀜𑀤𑁆𑀯𑀸𑀭𑀺𑀓𑀓𑀫𑁆𑀫𑀸𑀦𑀺. 𑀤𑁆𑀯𑀸𑀭𑁂 𑀤𑁆𑀯𑀸𑀭𑀸𑀦𑀺 𑀦 𑀘𑀭𑀦𑁆𑀢𑀻𑀢𑀺 𑀤𑁆𑀯𑀸𑀭𑀦𑁆𑀢𑀭𑀪𑀸𑀯𑁂𑀦 𑀦𑀧𑁆𑀧𑀯𑀢𑁆𑀢𑀦𑁆𑀢𑀺, 𑀤𑁆𑀯𑀸𑀭𑀦𑁆𑀢𑀭𑀁 𑀯𑀸 𑀦 𑀲𑀗𑁆𑀓𑀫𑀦𑁆𑀢𑀺. 𑀓𑀺𑀜𑁆𑀘𑀸𑀧𑀺 𑀯𑀺𑀜𑁆𑀜𑀢𑁆𑀢𑀺𑀬𑀸 𑀘𑀢𑀼𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀘𑁂𑀢𑀦𑀸𑀬 𑀧𑀘𑁆𑀘𑀬𑀪𑀸𑀯𑁄 𑀦𑀢𑁆𑀣𑀺, 𑀢𑀣𑀸 𑀧𑀦 𑀯𑀺𑀜𑁆𑀜𑀢𑁆𑀢𑀺𑀬𑀸 𑀧𑀯𑀢𑁆𑀢𑀫𑀸𑀦𑀸𑀬 𑀏𑀯 𑀧𑀸𑀡𑀸𑀢𑀺𑀧𑀸𑀢𑀸𑀤𑀺 𑀳𑁄𑀢𑀺, 𑀦𑀸𑀜𑁆𑀜𑀣𑀸𑀢𑀺 𑀲𑀺𑀬𑀸 𑀯𑀺𑀜𑁆𑀜𑀢𑁆𑀢𑀺𑀬𑀸 𑀳𑁂𑀢𑀼𑀪𑀸𑀯𑁄 𑀘𑁂𑀢𑀦𑀸𑀬𑀸𑀢𑀺 𑀯𑀼𑀢𑁆𑀢𑀁 ‘‘𑀤𑁆𑀯𑀸𑀭𑁂𑀳𑀺 𑀓𑀸𑀭𑀡𑀪𑀽𑀢𑁂𑀳𑀻’’𑀢𑀺. 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀦𑁆𑀢𑀺 𑀓𑀫𑁆𑀫𑀯𑀯𑀢𑁆𑀣𑀸𑀦𑀲𑁆𑀲𑁂𑀯 𑀯𑀸 𑀓𑀸𑀭𑀡𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀤𑁆𑀯𑀸𑀭𑁂𑀳𑀺 𑀓𑀸𑀭𑀡𑀪𑀽𑀢𑁂𑀳𑀻’’𑀢𑀺 𑀯𑀼𑀢𑁆𑀢𑀁. 𑀬𑀤𑀺𑀧𑀺 ‘‘𑀤𑁆𑀯𑀸𑀭𑁂𑀳𑀺 𑀓𑀫𑁆𑀫𑀸𑀦𑀻’’𑀢𑀺 𑀯𑀼𑀢𑁆𑀢𑀁, ‘‘𑀅𑀜𑁆𑀜𑀫𑀜𑁆𑀜𑀁 𑀯𑀯𑀢𑁆𑀣𑀺𑀢𑀸’’𑀢𑀺 𑀧𑀦 𑀯𑀼𑀢𑁆𑀢𑀢𑁆𑀢𑀸 𑀓𑀫𑁆𑀫𑁂𑀳𑀺𑀧𑀺 𑀤𑁆𑀯𑀸𑀭𑀸𑀦𑀺 𑀯𑀯𑀢𑁆𑀣𑀺𑀢𑀸𑀦𑀻𑀢𑀺 𑀅𑀬𑀫𑀢𑁆𑀣𑁄𑀧𑀺 𑀲𑀺𑀤𑁆𑀥𑁄𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦 𑀓𑁂𑀯𑀮’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀤𑁆𑀯𑀸𑀭𑀘𑀸𑀭𑀻𑀳𑀻𑀢𑀺 𑀤𑁆𑀯𑀸𑀭𑀸𑀦𑀁 𑀲𑀬𑀁 𑀯𑀯𑀢𑁆𑀣𑀺𑀢𑀪𑀸𑀯𑀫𑀸𑀳, 𑀦 𑀧𑀦 𑀅𑀯𑀯𑀢𑁆𑀣𑀸𑀦𑀁, 𑀯𑀯𑀢𑁆𑀣𑀸𑀦𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀸𑀦𑀺 𑀢𑀁 𑀯𑀯𑀢𑁆𑀣𑀸𑀦𑀁 𑀯𑀺𑀪𑀸𑀯𑁂𑀢𑀺 𑀓𑀫𑁆𑀫𑀸𑀦𑀧𑁂𑀓𑁆𑀔𑀸𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀲𑀫𑀬𑀦𑀺𑀬𑀫𑀺𑀢𑁂𑀦 𑀘𑀺𑀢𑁆𑀢𑁂𑀦 𑀲𑀫𑀬𑁄 𑀯𑀺𑀬 𑀤𑁆𑀯𑀸𑀭𑀦𑀺𑀬𑀫𑀺𑀢𑁂𑀳𑀺 𑀓𑀫𑁆𑀫𑁂𑀳𑀺 𑀤𑁆𑀯𑀸𑀭𑀸𑀦𑀺 𑀦𑀺𑀬𑀫𑀺𑀢𑀸𑀦𑀻𑀢𑀺 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄.

𑀏𑀯𑀁𑀲𑀪𑀸𑀯𑀢𑁆𑀢𑀸𑀢𑀺 𑀤𑁆𑀯𑀸𑀭𑀪𑀽𑀢𑁂𑀳𑀺 𑀓𑀸𑀬𑀸𑀤𑀻𑀳𑀺 𑀉𑀧𑀮𑀓𑁆𑀔𑀡𑀻𑀬𑀲𑀪𑀸𑀯𑀢𑁆𑀢𑀸. 𑀆𑀡𑀢𑁆𑀢𑀺…𑀧𑁂… 𑀫𑀸𑀦𑀲𑁆𑀲𑀸𑀢𑀺 𑀓𑀸𑀬𑀯𑀘𑀻𑀓𑀫𑁆𑀫𑀸𑀦𑀁 𑀯𑀘𑀻𑀓𑀸𑀬𑀯𑀺𑀜𑁆𑀜𑀢𑁆𑀢𑀻𑀳𑀺 𑀧𑀓𑀸𑀲𑁂𑀢𑀩𑁆𑀩𑀢𑀁 𑀆𑀳. 𑀓𑀸𑀬𑀸𑀤𑀻𑀳𑀻𑀢𑀺 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀻𑀳𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀤𑁆𑀯𑀸𑀭𑀦𑁆𑀢𑀭𑁂 𑀘𑀭𑀦𑁆𑀢𑀸𑀦𑀺𑀧𑀺 𑀓𑀫𑁆𑀫𑀸𑀦𑀺 𑀲𑀓𑁂𑀦 𑀤𑁆𑀯𑀸𑀭𑁂𑀦 𑀉𑀧𑀮𑀓𑁆𑀔𑀺𑀢𑀸𑀦𑁂𑀯 𑀘𑀭𑀦𑁆𑀢𑀺, 𑀢𑀲𑁆𑀫𑀸. 𑀦𑀸𑀧𑀺 𑀓𑀫𑁆𑀫𑀁 𑀤𑁆𑀯𑀸𑀭𑀲𑁆𑀲𑀸𑀢𑀺 𑀬𑀲𑁆𑀫𑀺𑀁 𑀤𑁆𑀯𑀸𑀭𑀦𑁆𑀢𑀭𑁂 𑀓𑀫𑁆𑀫𑀁 𑀘𑀭𑀢𑀺, 𑀢𑀲𑁆𑀲 𑀤𑁆𑀯𑀸𑀭𑀲𑁆𑀲 𑀅𑀦𑀢𑁆𑀢𑀦𑀺𑀬𑀲𑁆𑀲. 𑀢𑀁𑀢𑀁𑀤𑁆𑀯𑀸𑀭𑀫𑁂𑀯𑀸𑀢𑀺 𑀲𑀓𑀤𑁆𑀯𑀸𑀭𑀫𑁂𑀯. 𑀓𑀫𑁆𑀫𑀲𑁆𑀲𑀸𑀢𑀺 𑀲𑀓𑀲𑀓𑀓𑀫𑁆𑀫𑀲𑁆𑀲. 𑀬𑀤𑀺 𑀓𑀫𑁆𑀫𑁂𑀳𑀺 𑀤𑁆𑀯𑀸𑀭𑀸𑀦𑀺 𑀯𑀯𑀢𑁆𑀣𑀺𑀢𑀸𑀦𑀺, ‘‘𑀓𑀫𑁆𑀫𑀲𑁆𑀲 𑀅𑀦𑀺𑀩𑀤𑁆𑀥𑀢𑁆𑀢𑀸’’𑀢𑀺 𑀇𑀤𑀁 𑀓𑀣𑀁 𑀦𑀻𑀬𑀢𑀻𑀢𑀺 𑀆𑀳 ‘‘𑀧𑀼𑀩𑁆𑀩𑁂 𑀧𑀦𑀸’’𑀢𑀺𑀆𑀤𑀺.

𑀲𑀸𑀢𑀺 𑀯𑀺𑀜𑁆𑀜𑀢𑁆𑀢𑀺. 𑀢𑀲𑁆𑀲𑀸𑀢𑀺 𑀓𑀫𑁆𑀫𑀲𑁆𑀲. 𑀓𑁂𑀦𑀘𑀺 𑀧𑀓𑀸𑀭𑁂𑀦𑀸𑀢𑀺 𑀘𑀢𑀼𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑀧𑁆𑀧𑀓𑀸𑀭𑁂𑀲𑀼 𑀓𑁂𑀦𑀘𑀺 𑀧𑀓𑀸𑀭𑁂𑀦. 𑀢𑀁𑀲𑀳𑀚𑀸𑀢𑀸𑀢𑀺 𑀏𑀢𑁂𑀦 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀬𑀸 𑀲𑀩𑁆𑀪𑀸𑀯𑁂𑀬𑁂𑀯 𑀓𑀸𑀬𑀓𑀫𑁆𑀫𑀲𑁆𑀲 𑀲𑀩𑁆𑀪𑀸𑀯𑁄, 𑀦𑀸𑀜𑁆𑀜𑀣𑀸𑀢𑀺 𑀧𑀭𑀺𑀬𑀸𑀬𑁂𑀦 𑀯𑀺𑀜𑁆𑀜𑀢𑁆𑀢𑀺𑀬𑀸 𑀓𑀫𑁆𑀫𑀲𑁆𑀲 𑀓𑀸𑀭𑀡𑀪𑀸𑀯𑀁 𑀯𑀺𑀪𑀸𑀯𑁂𑀢𑀺. 𑀢𑁂𑀦𑁂𑀯𑀸𑀳 ‘‘𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑁂𑀦 𑀯𑀼𑀢𑁆𑀢𑀸’’𑀢𑀺. 𑀬𑀣𑀸𑀯𑀼𑀢𑁆𑀢𑀦𑀺𑀬𑀫𑁂𑀦𑀸𑀢𑀺𑀆𑀤𑀺𑀦𑀸 𑀓𑀫𑁆𑀫𑀲𑁆𑀲 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑁂 𑀩𑁆𑀬𑀪𑀺𑀘𑀸𑀭𑀸𑀪𑀸𑀯𑀫𑀸𑀳. 𑀢𑀢𑁆𑀣 𑀬𑀣𑀸𑀯𑀼𑀢𑁆𑀢𑀦𑀺𑀬𑀫𑁂𑀦𑀸𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀯𑀯𑀢𑁆𑀣𑀸𑀦𑀬𑀼𑀢𑁆𑀢𑀺𑀲𑀗𑁆𑀔𑀸𑀢𑁂𑀦 𑀦𑀺𑀬𑀫𑁂𑀦. 𑀤𑁆𑀯𑀸𑀭𑀘𑀭𑀡𑁂𑀢𑀺 𑀅𑀜𑁆𑀜𑀤𑁆𑀯𑀸𑀭𑀘𑀭𑀡𑁂.

𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀘𑀻𑀓𑀫𑁆𑀫𑀤𑁆𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑀘𑀢𑀽𑀳𑀺 𑀅𑀗𑁆𑀕𑁂𑀳𑀻𑀢𑀺 𑀏𑀢𑁆𑀣 ‘‘𑀲𑀼𑀪𑀸𑀲𑀺𑀢𑀁𑀬𑁂𑀯 𑀪𑀸𑀲𑀢𑀺, 𑀦𑁄 𑀤𑀼𑀩𑁆𑀪𑀸𑀲𑀺𑀢𑀁. 𑀥𑀫𑁆𑀫𑀁𑀬𑁂𑀯, 𑀧𑀺𑀬𑀁𑀬𑁂𑀯, 𑀲𑀘𑁆𑀘𑀁𑀬𑁂𑀯 𑀪𑀸𑀲𑀢𑀺, 𑀦𑁄 𑀅𑀮𑀺𑀓’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁧𑁩; 𑀲𑀼. 𑀦𑀺. 𑀲𑀼𑀪𑀸𑀲𑀺𑀢𑀲𑀼𑀢𑁆𑀢) 𑀬𑀸𑀦𑀺 𑀅𑀗𑁆𑀕𑀸𑀦𑀺 𑀲𑀼𑀢𑁆𑀢𑁂 𑀯𑀼𑀢𑁆𑀢𑀸𑀦𑀺, 𑀢𑁂𑀲𑀁 𑀘𑁂𑀢𑀦𑀸𑀲𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀪𑀸𑀲𑀺𑀢𑀪𑀸𑀲𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀣𑀸𑀧𑀯𑀢𑁆𑀢𑀸𑀢𑀺 𑀲𑀼𑀪𑀸𑀲𑀺𑀢𑀪𑀸𑀲𑀦𑀸𑀤𑀺𑀪𑀸𑀯𑁂𑀦 𑀧𑀯𑀢𑁆𑀢𑀸. 𑀲𑀳 𑀲𑀫𑁆𑀪𑀽𑀢𑀢𑁆𑀢𑀸𑀢𑀺 𑀲𑀳𑁂𑀯 𑀉𑀧𑁆𑀧𑀦𑁆𑀦𑀢𑁆𑀢𑀸. 𑀦 𑀳𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀲𑀤𑁆𑀤𑀭𑀳𑀺𑀢𑀸 𑀅𑀢𑁆𑀣𑀺. 𑀢𑀣𑀸 𑀳𑀺 ‘‘𑀬𑀸 𑀢𑀸𑀬 𑀯𑀸𑀘𑀸𑀬 𑀯𑀺𑀜𑁆𑀜𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀯𑀸𑀘𑀸𑀕𑀺𑀭𑀸 𑀩𑁆𑀬𑀧𑀣𑁄’’𑀢𑀺𑀆𑀤𑀺𑀦𑀸 (𑀥. 𑀲. 𑁬𑁩𑁬) 𑀦𑀸𑀢𑀺𑀲𑀼𑀔𑀼𑀫𑀁𑀬𑁂𑀯 𑀲𑀤𑁆𑀤𑀯𑀸𑀘𑀁 𑀯𑀢𑁆𑀯𑀸 ‘‘𑀬𑀸 𑀢𑀸𑀬 𑀯𑀸𑀘𑀸𑀬 𑀯𑀺𑀜𑁆𑀜𑀢𑁆𑀢𑀻’’𑀢𑀺, 𑀢𑀸𑀬 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀬𑀸 𑀯𑀼𑀢𑁆𑀢𑀢𑁆𑀢𑀸 𑀭𑀽𑀧𑀸𑀬𑀢𑀦𑀁 𑀯𑀺𑀬 𑀯𑀢𑁆𑀣𑀼𑀧𑀭𑀺𑀢𑁆𑀢𑀢𑀸𑀤𑀺𑀦𑀸 𑀲𑀤𑁆𑀤𑀸𑀬𑀢𑀦𑀫𑁆𑀧𑀺 𑀅𑀦𑀺𑀦𑁆𑀤𑁆𑀭𑀺𑀬𑀕𑁄𑀘𑀭𑁄 𑀅𑀢𑁆𑀣𑀻𑀢𑀺 𑀘 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀬𑀸 𑀢𑀸𑀬…𑀧𑁂… 𑀯𑀺𑀜𑁆𑀜𑀸𑀬𑀢𑀻’’𑀢𑀺 𑀆𑀳.

𑀇𑀤𑀸𑀦𑀺 𑀅𑀯𑀺𑀲𑁂𑀲𑁂𑀦 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑀤𑁆𑀤𑀲𑁆𑀲 𑀲𑁄𑀢𑀯𑀺𑀜𑁆𑀜𑀸𑀡𑀸𑀭𑀫𑁆𑀫𑀡𑀢𑀸 𑀧𑀸𑀴𑀺𑀬𑀁 𑀯𑀼𑀢𑁆𑀢𑀸𑀢𑀺 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀲𑀤𑁆𑀤𑁄 𑀦 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀯𑀸𑀤𑀲𑁆𑀲 𑀧𑀸𑀴𑀺𑀬𑀸 𑀯𑀺𑀭𑁄𑀥𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀗𑁆𑀕𑀳𑀓𑀸𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑁂 𑀞𑀢𑁆𑀯𑀸 𑀫𑀳𑀸𑀅𑀝𑁆𑀞𑀓𑀣𑀸𑀯𑀸𑀤𑀲𑁆𑀲 𑀧𑀝𑀺𑀲𑁂𑀥𑁂𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑁂 𑀞𑀢𑁆𑀯𑀸 𑀢𑀁 𑀧𑀭𑀺𑀳𑀭𑀺𑀢𑀼𑀁 ‘‘𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀲𑀗𑁆𑀖𑀝𑁆𑀝𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸𑀦𑀁 𑀪𑀽𑀢𑀸𑀦𑀁 𑀲𑀤𑁆𑀤𑀲𑁆𑀲 𑀦𑀺𑀲𑁆𑀲𑀬𑀪𑀸𑀯𑀢𑁄 𑀲𑀗𑁆𑀖𑀝𑁆𑀝𑀦𑁂𑀦 𑀲𑀳𑁂𑀯 𑀲𑀤𑁆𑀤𑁄 𑀉𑀧𑁆𑀧𑀚𑁆𑀚𑀢𑀺. 𑀢𑀧𑁆𑀧𑀘𑁆𑀘𑀬𑀪𑀸𑀯𑁄𑀢𑀺 𑀉𑀧𑀸𑀤𑀺𑀦𑁆𑀦𑀓𑀖𑀝𑁆𑀝𑀦𑀲𑁆𑀲 𑀧𑀘𑁆𑀘𑀬𑀪𑀸𑀯𑁄. 𑀘𑀺𑀢𑁆𑀢𑀚𑀧𑀣𑀯𑀻𑀥𑀸𑀢𑀼𑀬𑀸 𑀉𑀧𑀸𑀤𑀺𑀦𑁆𑀦𑀓𑀖𑀝𑁆𑀝𑀦𑁂 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀲𑀫𑀢𑁆𑀣𑁄 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀫𑀳𑀸𑀪𑀽𑀢𑀸𑀦𑀁 𑀏𑀓𑁄 𑀆𑀓𑀸𑀭𑀯𑀺𑀲𑁂𑀲𑁄 𑀅𑀢𑁆𑀣𑀺. 𑀢𑀤𑀸𑀓𑀸𑀭𑀢𑁆𑀢𑀸 𑀳𑀺 𑀢𑁂𑀲𑀁 𑀧𑀣𑀯𑀻𑀥𑀸𑀢𑀼 𑀉𑀧𑀸𑀤𑀺𑀦𑁆𑀦𑀓𑀁 𑀖𑀝𑁆𑀝𑁂𑀢𑀻𑀢𑀺 𑀇𑀫𑀫𑀢𑁆𑀣𑀁 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀢𑁆𑀢𑀸 ‘‘𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀯𑀸 𑀢𑀫𑁂𑀯 𑀯𑀼𑀢𑁆𑀢𑀦𑀬𑀁 ‘‘𑀢𑀩𑁆𑀩𑀺𑀓𑀸𑀭𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀪𑀸𑀯𑁂𑀢𑀺. 𑀢𑀢𑁆𑀣 𑀅𑀜𑁆𑀜𑀫𑀜𑁆𑀜𑀲𑁆𑀲 𑀧𑀘𑁆𑀘𑀬𑀪𑀸𑀯𑁄 𑀢𑀧𑁆𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀫𑁆𑀧𑀺 𑀲𑀩𑁆𑀩𑀁 𑀯𑀺𑀥𑀸𑀦𑀦𑁆𑀢𑀺 ‘‘𑀦 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀢𑀺 𑀏𑀢𑁂𑀦 𑀧𑀭𑀫𑀢𑁆𑀣𑀢𑁄 𑀅𑀪𑀸𑀯𑀁 𑀤𑀲𑁆𑀲𑁂𑀢𑀻’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑀸 𑀯𑀼𑀢𑁆𑀢𑀯𑀺𑀥𑀸𑀦𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀯𑀼𑀢𑁆𑀢𑀯𑀺𑀥𑀸𑀦𑀁 ‘‘𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀫𑁂𑀯𑀸𑀢𑀺.