𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀅𑀪𑀺𑀥𑀫𑁆𑀫𑀧𑀺𑀝𑀓𑁂

𑀥𑀫𑁆𑀫𑀲𑀗𑁆𑀕𑀡𑀻-𑀅𑀦𑀼𑀝𑀻𑀓𑀸

𑀯𑀻𑀲𑀢𑀺𑀕𑀸𑀣𑀸𑀯𑀡𑁆𑀡𑀦𑀸

𑁧. 𑀅𑀪𑀺𑀥𑀫𑁆𑀫𑀲𑀁𑀯𑀡𑁆𑀡𑀦𑀸𑀬 𑀅𑀢𑁆𑀣𑀁 𑀲𑀁𑀯𑀡𑁆𑀡𑁂𑀢𑀼𑀓𑀸𑀫𑁄 𑀢𑀲𑁆𑀲𑀸 𑀆𑀤𑀺𑀕𑀸𑀣𑀸𑀬 𑀢𑀸𑀯 𑀧𑀬𑁄𑀚𑀦𑀲𑀫𑁆𑀩𑀦𑁆𑀥𑀸𑀪𑀺𑀥𑀸𑀦𑀧𑀼𑀩𑁆𑀩𑀗𑁆𑀕𑀫𑀁 𑀅𑀢𑁆𑀣𑀁 𑀦𑀺𑀤𑁆𑀥𑀸𑀭𑁂𑀦𑁆𑀢𑁄 𑀉𑀴𑀸𑀭𑀚𑁆𑀛𑀸𑀲𑀬𑀸𑀦𑀁 𑀦𑀺𑀲𑀫𑁆𑀫𑀓𑀸𑀭𑀻𑀦𑀁 𑀧𑀝𑀺𑀧𑀢𑁆𑀢𑀺 𑀧𑀭𑁂𑀲𑀁 𑀯𑀺𑀯𑀺𑀥𑀳𑀺𑀢𑀲𑀼𑀔𑀦𑀺𑀧𑁆𑀨𑀸𑀤𑀦𑀧𑁆𑀧𑀬𑁄𑀚𑀦𑀸𑀢𑀺 𑀆𑀘𑀭𑀺𑀬𑀲𑁆𑀲𑀸𑀧𑀺 𑀥𑀫𑁆𑀫𑀲𑀁𑀯𑀡𑁆𑀡𑀦𑀸𑀬 𑀆𑀤𑀺𑀫𑁆𑀳𑀺 𑀲𑀢𑁆𑀣𑀭𑀺 𑀦𑀺𑀧𑀘𑁆𑀘𑀓𑀸𑀭𑀲𑁆𑀲 𑀅𑀦𑁆𑀢𑀭𑀸𑀬𑀯𑀺𑀲𑁄𑀲𑀦𑀢𑁆𑀣𑀢𑀸 𑀯𑀺𑀬 𑀲𑀢𑁆𑀣𑀭𑀺 𑀥𑀫𑁆𑀫𑁂 𑀘 𑀧𑀭𑁂𑀲𑀁 𑀅𑀘𑁆𑀘𑀦𑁆𑀢𑀲𑀼𑀔𑀧𑁆𑀧𑀝𑀺𑀮𑀸𑀪𑀲𑀁𑀯𑀢𑁆𑀢𑀦𑀺𑀬𑀲𑀤𑁆𑀥𑀸𑀭𑀢𑀦𑀼𑀧𑁆𑀧𑀸𑀤𑀦𑀢𑁆𑀣𑀢𑀸𑀧𑀺 𑀲𑀺𑀬𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀥𑀫𑁆𑀫𑀲𑀁𑀯𑀡𑁆𑀡𑀦𑀸𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀬𑀣𑀸𑀦𑀼𑀲𑀺𑀝𑁆𑀞𑀁 𑀧𑀝𑀺𑀧𑀚𑁆𑀚𑀫𑀸𑀦𑁂 𑀅𑀧𑀸𑀬𑁂𑀲𑀼 𑀅𑀧𑀢𑀫𑀸𑀦𑁂 𑀥𑀸𑀭𑁂𑀢𑀻𑀢𑀺 𑀥𑀫𑁆𑀫𑁄𑀢𑀺 𑀲𑀸𑀫𑀜𑁆𑀜𑀯𑀘𑀦𑁄𑀧𑀺 𑀥𑀫𑁆𑀫-𑀲𑀤𑁆𑀤𑁄 𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑁂𑀦 𑀇𑀥 𑀧𑀭𑀺𑀬𑀢𑁆𑀢𑀺𑀯𑀺𑀲𑁂𑀲𑀯𑀺𑀲𑀬𑁄. 𑀲𑀁𑀯𑀡𑁆𑀡𑀻𑀬𑀢𑀺 𑀅𑀢𑁆𑀣𑁄 𑀏𑀢𑀸𑀬𑀸𑀢𑀺 𑀲𑀁𑀯𑀡𑁆𑀡𑀦𑀸, 𑀅𑀝𑁆𑀞𑀓𑀣𑀸.

𑀢𑀺𑀯𑀺𑀥𑀬𑀸𑀦𑀫𑀼𑀔𑁂𑀦 𑀯𑀺𑀫𑀼𑀢𑁆𑀢𑀺𑀥𑀫𑁆𑀫𑀁 𑀬𑀣𑀸𑀭𑀳𑀫𑀦𑀼𑀲𑀸𑀲𑀢𑀻𑀢𑀺 𑀲𑀢𑁆𑀣𑀸. 𑀧𑀡𑀫𑀦𑀁 𑀧𑀡𑀸𑀫𑁄, 𑀓𑀸𑀬𑀯𑀸𑀘𑀸𑀘𑀺𑀢𑁆𑀢𑁂𑀳𑀺 𑀲𑀢𑁆𑀣𑀼 𑀕𑀼𑀡𑀦𑀺𑀦𑁆𑀦𑀢𑀸. 𑀓𑀺𑀭𑀺𑀬𑀸 𑀓𑀭𑀡𑀁, 𑀧𑀡𑀸𑀫𑀲𑁆𑀲 𑀓𑀭𑀡𑀁 𑀧𑀡𑀸𑀫𑀓𑀭𑀡𑀁, 𑀯𑀦𑁆𑀤𑀦𑀸𑀧𑀬𑁄𑀕𑁄. 𑀲𑁄 𑀘 𑀓𑀺𑀜𑁆𑀘𑀸𑀧𑀺 ‘‘𑀇𑀤𑀸𑀦𑀺 𑀅𑀥𑀺𑀧𑁆𑀧𑁂𑀢𑀁 𑀧𑀡𑀸𑀫𑀁 𑀓𑀭𑁄𑀦𑁆𑀢𑁄’’𑀢𑀺𑀆𑀤𑀺𑀦𑀸 ‘‘𑀢𑀲𑁆𑀲 𑀧𑀸𑀤𑁂 𑀦𑀫𑀲𑁆𑀲𑀺𑀢𑁆𑀯𑀸’’𑀢𑀺𑀆𑀤𑀺𑀓𑀲𑁆𑀲 𑀅𑀥𑀺𑀧𑁆𑀧𑁂𑀢𑀧𑀡𑀸𑀫𑀪𑀸𑀯𑀁 𑀤𑀲𑁆𑀲𑁂𑀲𑁆𑀲𑀢𑀺, ‘‘𑀓𑀭𑀼𑀡𑀸 𑀯𑀺𑀬𑀸’’𑀢𑀺𑀆𑀤𑀺𑀓𑀲𑁆𑀲 𑀧𑀦 𑀲𑀩𑁆𑀩𑀲𑁆𑀲 𑀣𑁄𑀫𑀦𑀸𑀯𑀲𑁂𑀦 𑀯𑀼𑀢𑁆𑀢𑀲𑁆𑀲𑀧𑀺 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀲𑁄 𑀳𑀺 𑀲𑀢𑁆𑀣𑀼 𑀫𑀳𑀸𑀓𑀭𑀼𑀡𑀸𑀤𑀺𑀕𑀼𑀡𑀯𑀺𑀲𑁂𑀲𑀓𑀺𑀢𑁆𑀢𑀦𑀯𑀲𑁂𑀦 𑀧𑀯𑀢𑁆𑀢𑁄 𑀫𑀳𑀸𑀓𑀭𑀼𑀡𑀸𑀤𑀺𑀕𑀼𑀡𑀯𑀺𑀲𑁂𑀲𑀸𑀯𑀺𑀦𑀸𑀪𑀸𑀯𑀺𑀦𑀸 𑀲𑀁𑀯𑀡𑁆𑀡𑀺𑀬𑀫𑀸𑀦𑀲𑀁𑀯𑀡𑁆𑀡𑀦𑀸𑀥𑀫𑁆𑀫𑀯𑀺𑀪𑀸𑀯𑀺𑀢𑁂𑀦 𑀥𑀫𑁆𑀫𑀲𑁆𑀲 𑀲𑁆𑀯𑀸𑀓𑁆𑀔𑀸𑀢𑀪𑀸𑀯𑁂𑀦 𑀲𑁆𑀯𑀸𑀓𑁆𑀔𑀸𑀢𑀥𑀫𑁆𑀫𑁂 𑀲𑀢𑁆𑀣𑀭𑀺 𑀅𑀦𑀼𑀧𑁆𑀧𑀦𑁆𑀦𑀲𑀤𑁆𑀥𑀸𑀦𑀁 𑀲𑀤𑁆𑀥𑀸𑀚𑀦𑀦𑀸𑀬, 𑀉𑀧𑁆𑀧𑀦𑁆𑀦𑀲𑀤𑁆𑀥𑀸𑀦𑀜𑁆𑀘 𑀪𑀺𑀬𑁆𑀬𑁄𑀪𑀸𑀯𑀸𑀬 𑀳𑁄𑀢𑀺. 𑀲𑀢𑁆𑀣𑀼𑀦𑁄 𑀘 𑀅𑀯𑀺𑀧𑀭𑀻𑀢𑀥𑀫𑁆𑀫𑀤𑁂𑀲𑀦𑀪𑀸𑀯𑁂𑀦 𑀅𑀯𑀺𑀢𑀣𑀤𑁂𑀲𑀦𑀸𑀪𑀽𑀢𑁂 𑀥𑀫𑁆𑀫𑁂𑀢𑀺 𑀏𑀢𑁂𑀦 𑀲𑀢𑁆𑀣𑀼𑀦𑁄 𑀫𑀳𑀸𑀓𑀭𑀼𑀡𑀸𑀤𑀺𑀕𑀼𑀡𑀸𑀦𑀁𑀬𑁂𑀯 𑀘 𑀨𑀮𑀯𑀺𑀲𑁂𑀲𑀦𑀺𑀧𑁆𑀨𑀸𑀤𑀦𑀲𑀫𑀢𑁆𑀣𑀢𑀸𑀬 𑀧𑀲𑀸𑀤𑀸𑀯𑀳𑀢𑀁 𑀆𑀳. 𑀥𑀫𑁆𑀫𑁂𑀦 𑀳𑀺 𑀲𑀢𑁆𑀣𑀼𑀲𑀺𑀤𑁆𑀥𑀺, 𑀲𑀢𑁆𑀣𑀸𑀭𑀸 𑀘 𑀥𑀫𑁆𑀫𑀲𑀺𑀤𑁆𑀥𑀺, 𑀥𑀫𑁆𑀫𑀲𑀫𑁆𑀧𑀢𑁆𑀢𑀺𑀬𑀸𑀧𑀺 𑀲𑀢𑁆𑀣𑀼𑀕𑀼𑀡𑀢𑀸𑀬 𑀲𑀢𑁆𑀣𑀼𑀕𑀼𑀡𑀯𑀺𑀪𑀸𑀯𑀦𑁂𑀦 𑀲𑀫𑁆𑀧𑀚𑁆𑀚𑀢𑀻𑀢𑀺.

𑀏𑀯𑀁 𑀲𑀢𑁆𑀣𑀭𑀺 𑀧𑀡𑀸𑀫𑀓𑀭𑀡𑀲𑁆𑀲 𑀏𑀓𑀁 𑀧𑀬𑁄𑀚𑀦𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀲𑀫𑁆𑀩𑀦𑁆𑀥𑀁 𑀯𑀺𑀪𑀸𑀯𑁂𑀢𑀺 ‘‘𑀢𑀤𑀼𑀪𑀬𑀧𑁆𑀧𑀲𑀸𑀤𑀸 𑀳𑀻’’𑀢𑀺𑀆𑀤𑀺𑀦𑀸. 𑀦 𑀳𑀺 𑀲𑀢𑁆𑀣𑀭𑀺 𑀥𑀫𑁆𑀫𑁂 𑀯𑀸 𑀅𑀧𑁆𑀧𑀲𑀦𑁆𑀦𑁄 𑀲𑀁𑀯𑀡𑁆𑀡𑀺𑀬𑀫𑀸𑀦𑁂 𑀢𑀤𑀥𑀺𑀕𑀦𑁆𑀢𑀩𑁆𑀩𑁂 𑀘 𑀥𑀫𑁆𑀫𑁂 𑀲𑀫𑁆𑀫𑀸 𑀧𑀝𑀺𑀧𑀚𑁆𑀚𑀢𑀺, 𑀦𑀸𑀧𑀺 𑀲𑀻𑀮𑀸𑀤𑀺𑀅𑀦𑀼𑀧𑀸𑀤𑀸𑀧𑀭𑀺𑀦𑀺𑀩𑁆𑀩𑀸𑀦𑀦𑁆𑀢𑀁 𑀫𑀳𑀦𑁆𑀢𑀁 𑀅𑀢𑁆𑀣𑀁 𑀲𑀸𑀥𑁂𑀢𑀺, 𑀢𑀲𑁆𑀫𑀸 𑀥𑀫𑁆𑀫𑀲𑀁𑀯𑀡𑁆𑀡𑀦𑀸𑀲𑀼 𑀧𑀭𑁂𑀲𑀁 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀆𑀓𑀗𑁆𑀔𑀸𑀬 𑀢𑀣𑀸𑀭𑀽𑀧𑀥𑀫𑁆𑀫𑀧𑀝𑀺𑀕𑁆𑀕𑀸𑀳𑀓𑁂𑀳𑀺 𑀘 𑀯𑀺𑀦𑀺𑀬𑁄𑀚𑀺𑀢𑁂𑀦 𑀲𑀢𑁆𑀣𑀭𑀺 𑀥𑀫𑁆𑀫𑁂 𑀘 𑀧𑀲𑀸𑀤𑀼𑀧𑁆𑀧𑀸𑀤𑀦𑀁 𑀲𑀢𑁆𑀣𑀭𑀺 𑀧𑀡𑀸𑀫𑀓𑀭𑀡𑀁 𑀯𑀺𑀳𑀺𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀪𑀕𑀯𑀢𑁄 𑀕𑀼𑀡𑀲𑀁𑀓𑀺𑀢𑁆𑀢𑀦𑀁 𑀢𑀲𑁆𑀲 𑀥𑀫𑁆𑀫𑀲𑀗𑁆𑀖𑀸𑀦𑀫𑁆𑀧𑀺 𑀣𑁄𑀫𑀦𑀸 𑀳𑁄𑀢𑀺𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀭𑀢𑀦𑀢𑁆𑀢𑀬𑀧𑀡𑀸𑀫𑀯𑀘𑀦’’𑀦𑁆𑀢𑀺. 𑀢𑀣𑀸 𑀘 𑀯𑀓𑁆𑀔𑀢𑀺 ‘‘𑀪𑀕𑀯𑀢𑁄 𑀣𑁄𑀫𑀦𑁂𑀦𑁂𑀯𑀸’’𑀢𑀺𑀆𑀤𑀺 (𑀥. 𑀲. 𑀫𑀽𑀮𑀝𑀻. 𑁬). 𑀯𑀓𑁆𑀔𑀫𑀸𑀦𑀁 𑀯𑀸 ‘‘𑀲𑀤𑁆𑀥𑀫𑁆𑀫𑀜𑁆𑀘𑀲𑁆𑀲 𑀧𑀽𑀚𑁂𑀢𑁆𑀯𑀸’’𑀢𑀺𑀆𑀤𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀺𑀜𑁆𑀜𑀸𑀧𑀦𑀢𑁆𑀣𑀁 𑀧𑀭𑁂𑀲𑀁 𑀯𑀺𑀜𑁆𑀜𑀽𑀦𑀦𑁆𑀢𑀺 𑀯𑀸 𑀲𑀫𑁆𑀩𑀦𑁆𑀥𑀦𑀻𑀬𑀁. 𑀅𑀯𑀺𑀜𑁆𑀜𑀽𑀦𑀁 𑀅𑀧𑁆𑀧𑀫𑀸𑀡𑀢𑀸𑀬 𑀅𑀪𑀸𑀚𑀦𑀢𑀸𑀬 𑀘 𑀯𑀺𑀜𑁆𑀜𑀽𑀦𑀁 𑀕𑀳𑀡𑀁. 𑀢𑁂 𑀳𑀺 𑀩𑀼𑀤𑁆𑀥𑀸𑀤𑀻𑀲𑀼 𑀲𑀕𑀸𑀭𑀯𑀲𑁆𑀲 𑀧𑀫𑀸𑀡𑀪𑀽𑀢𑀢𑀁 𑀚𑀸𑀦𑀦𑁆𑀢𑀸 𑀢𑀲𑁆𑀲 𑀯𑀘𑀦𑀁 𑀲𑁄𑀢𑀩𑁆𑀩𑀁 𑀲𑀤𑁆𑀥𑀸𑀢𑀩𑁆𑀩𑀁 𑀫𑀜𑁆𑀜𑀦𑁆𑀢𑀺, 𑀲𑀫𑁆𑀫𑀤𑁂𑀯 𑀘 𑀦𑀁 𑀅𑀦𑀼𑀢𑀺𑀝𑁆𑀞𑀦𑁆𑀢𑀸 𑀢𑀤𑀥𑀺𑀧𑁆𑀧𑀸𑀬𑀁 𑀧𑀽𑀭𑁂𑀦𑁆𑀢𑀺. 𑀇𑀥𑀸𑀧𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄 𑀧𑀲𑀸𑀤𑀯𑀺𑀜𑁆𑀜𑀸𑀧𑀦𑀸𑀤𑀺𑀫𑀼𑀔𑁂𑀦𑀧𑀺 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀆𑀓𑀗𑁆𑀔𑀸𑀬 𑀧𑀯𑁂𑀤𑀺𑀢𑀢𑁆𑀢𑀸.

𑀏𑀢𑁆𑀣 𑀘 𑀧𑀞𑀫𑁄 𑀅𑀢𑁆𑀣𑀯𑀺𑀓𑀧𑁆𑀧𑁄 𑀲𑀤𑁆𑀥𑀸𑀦𑀼𑀲𑀸𑀭𑀻𑀦𑀁 𑀧𑀼𑀕𑁆𑀕𑀮𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑁄, 𑀤𑀼𑀢𑀺𑀬𑁄 𑀥𑀫𑁆𑀫𑀸𑀦𑀼𑀲𑀸𑀭𑀻𑀦𑀁. 𑀧𑀞𑀫𑁄 𑀯𑀸 𑀅𑀲𑀁𑀲𑀺𑀤𑁆𑀥𑀲𑀢𑁆𑀣𑀼𑀥𑀫𑁆𑀫𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑁄, 𑀤𑀼𑀢𑀺𑀬𑁄 𑀲𑀁𑀲𑀺𑀤𑁆𑀥𑀲𑀢𑁆𑀣𑀼𑀥𑀫𑁆𑀫𑀸𑀦𑀁. 𑀢𑀣𑀸 𑀧𑀞𑀫𑁄 𑀧𑀞𑀫𑁂 𑀭𑀢𑀦𑁂 𑀧𑀡𑀸𑀫𑀓𑀺𑀭𑀺𑀬𑀸𑀤𑀲𑁆𑀲𑀦𑀧𑀭𑁄, 𑀤𑀼𑀢𑀺𑀬𑁄 𑀇𑀢𑀭𑁂𑀲𑀼𑀧𑀻𑀢𑀺 𑀅𑀬𑀁 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄.

𑀧𑀡𑀸𑀫𑁄 𑀓𑀭𑀻𑀬𑀢𑀺 𑀏𑀢𑀸𑀬𑀸𑀢𑀺 𑀧𑀡𑀸𑀫𑀓𑀭𑀡𑀁, 𑀧𑀡𑀸𑀫𑀓𑀺𑀭𑀺𑀬𑀸𑀪𑀺𑀦𑀺𑀧𑁆𑀨𑀸𑀤𑀺𑀓𑀸 𑀘𑁂𑀢𑀦𑀸. 𑀲𑀸 𑀳𑀺 𑀔𑁂𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸 𑀆𑀘𑀭𑀺𑀬𑀲𑁆𑀲 𑀘 𑀅𑀚𑁆𑀛𑀸𑀲𑀬𑀲𑀫𑁆𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀪𑀽𑀢𑀸 𑀬𑀣𑀸𑀮𑀤𑁆𑀥𑀲𑀫𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀓𑀲𑁆𑀲 𑀓𑀫𑁆𑀫𑀲𑁆𑀲 𑀩𑀮𑀸𑀦𑀼𑀧𑁆𑀧𑀤𑀸𑀦𑀯𑀲𑁂𑀦 𑀧𑀼𑀭𑀺𑀫𑀓𑀫𑁆𑀫𑀦𑀺𑀧𑁆𑀨𑀦𑁆𑀦𑀲𑁆𑀲 𑀯𑀺𑀧𑀸𑀓𑀲𑀦𑁆𑀢𑀸𑀦𑀲𑁆𑀲 𑀅𑀦𑁆𑀢𑀭𑀸 𑀯𑁂𑀫𑀚𑁆𑀛𑁂 𑀆𑀬𑀦𑁆𑀢𑀺 𑀆𑀧𑀢𑀦𑁆𑀢𑀻𑀢𑀺 𑀅𑀦𑁆𑀢𑀭𑀸𑀬𑀸𑀢𑀺 𑀮𑀤𑁆𑀥𑀦𑀸𑀫𑀸𑀦𑀁 𑀭𑁄𑀕𑀸𑀤𑀺𑀅𑀦𑀢𑁆𑀣𑀸𑀦𑀁 𑀯𑀺𑀥𑀸𑀬𑀓𑀲𑁆𑀲 𑀉𑀧𑀧𑀻𑀴𑀓𑀲𑁆𑀲 𑀉𑀧𑀘𑁆𑀙𑁂𑀤𑀓𑀲𑁆𑀲 𑀯𑀸 𑀓𑀫𑁆𑀫𑀲𑁆𑀲 𑀯𑀺𑀤𑁆𑀥𑀁𑀲𑀦𑀲𑀫𑀢𑁆𑀣𑁄 𑀧𑀼𑀜𑁆𑀜𑀸𑀢𑀺𑀲𑀬𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀭𑀢𑀦𑀢𑁆𑀢𑀬𑀧𑀡𑀸𑀫…𑀧𑁂… 𑀯𑀺𑀲𑁂𑀲𑀪𑀸𑀯𑀢𑁄’’𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀭𑀸𑀕𑀸𑀤𑀺𑀧𑀭𑀺𑀬𑀼𑀝𑁆𑀞𑀸𑀦𑀸𑀪𑀸𑀯𑀯𑀘𑀦𑁂𑀦 𑀅𑀦𑁆𑀢𑀭𑀸𑀬𑀲𑁆𑀲 𑀓𑀸𑀭𑀡𑀪𑀽𑀢𑀸𑀬 𑀧𑀬𑁄𑀕𑀯𑀺𑀧𑀢𑁆𑀢𑀺𑀬𑀸 𑀅𑀪𑀸𑀯𑀲𑁆𑀲, 𑀅𑀢𑁆𑀣𑀮𑀸𑀪𑀸𑀤𑀺𑀯𑀘𑀦𑁂𑀦 𑀅𑀦𑀦𑁆𑀢𑀭𑀸𑀬𑀢𑀸𑀳𑁂𑀢𑀼𑀪𑀽𑀢𑀸𑀬 𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀩𑁆𑀪𑀸𑀯𑀲𑁆𑀲, ‘‘𑀲𑀩𑁆𑀬𑀸𑀧𑀚𑁆𑀛𑀸𑀬 𑀧𑀚𑀸𑀬 𑀅𑀩𑁆𑀬𑀸𑀧𑀚𑁆𑀛𑁄 𑀯𑀺𑀳𑀭𑀢𑀻’’𑀢𑀺 (𑀅. 𑀦𑀺. 𑁬.𑁧𑁦; 𑁧𑁧.𑁧𑁧) 𑀯𑀘𑀦𑁂𑀦 𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀲𑀼𑀔𑀯𑀺𑀳𑀸𑀭𑀺𑀢𑀸𑀬 𑀘 𑀧𑀓𑀸𑀲𑀦𑀁 𑀫𑀳𑀸𑀦𑀸𑀫𑀲𑀼𑀢𑁆𑀢𑀁𑀬𑁂𑀯 𑀉𑀤𑀸𑀳𑀝𑀁.

𑀕𑀼𑀡𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀏𑀢𑁂𑀦 𑀲𑀢𑀺𑀧𑀺 𑀓𑀸𑀬𑀫𑀦𑁄𑀧𑀡𑀸𑀫𑀸𑀦𑀁 𑀅𑀦𑁆𑀢𑀭𑀸𑀬𑀯𑀺𑀲𑁄𑀲𑀦𑀲𑀫𑀢𑁆𑀣𑀪𑀸𑀯𑁂 𑀢𑁂𑀳𑀺 𑀧𑀡𑀸𑀫𑀯𑀺𑀲𑀬𑀲𑁆𑀲 𑀧𑀡𑀸𑀫𑀸𑀭𑀳𑀪𑀸𑀯𑀯𑀺𑀪𑀸𑀯𑀦𑁂𑀦 𑀲𑀸𑀢𑀺𑀲𑀬𑁄 𑀯𑀘𑀻𑀧𑀡𑀸𑀫𑁄 𑀯𑀺𑀳𑀺𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀕𑀼𑀡𑀯𑀺𑀲𑁂𑀲𑀯𑀸 𑀳𑀻𑀢𑀺𑀆𑀤𑀺𑀦𑀸 𑀆𑀘𑀭𑀺𑀬𑀲𑁆𑀲 𑀬𑀼𑀢𑁆𑀢𑀧𑀢𑁆𑀢𑀓𑀸𑀭𑀺𑀢𑀁 𑀤𑀲𑁆𑀲𑁂𑀢𑀺. 𑀤𑁂𑀲𑀦𑀸 𑀯𑀺𑀦𑀬𑀧𑀺𑀝𑀓𑁂𑀢𑀺 𑀏𑀢𑁆𑀣 𑀦𑀦𑀼 𑀯𑀺𑀦𑀬𑀧𑀺𑀝𑀓𑀲𑁆𑀲𑀧𑀺 𑀤𑁂𑀲𑀦𑀸𑀪𑀸𑀯𑀢𑁄 𑀤𑁂𑀲𑀦𑀸𑀯𑀺𑀦𑀬𑀧𑀺𑀝𑀓𑀸𑀦𑀁 𑀪𑁂𑀤𑀯𑀘𑀦𑀁 𑀦 𑀬𑀼𑀢𑁆𑀢𑀦𑁆𑀢𑀺? 𑀦𑁄 𑀦 𑀬𑀼𑀢𑁆𑀢𑀁 ‘‘𑀢𑀻𑀲𑀼𑀧𑀺 𑀘𑁂𑀢𑁂𑀲𑀼 𑀏𑀢𑁂 𑀥𑀫𑁆𑀫𑀢𑁆𑀣𑀤𑁂𑀲𑀦𑀸𑀧𑀝𑀺𑀯𑁂𑀥𑀸’’𑀢𑀺 (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸; 𑀤𑀻. 𑀦𑀺. 𑀅𑀝𑁆𑀞. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸; 𑀧𑀸𑀭𑀸. 𑀅𑀝𑁆𑀞. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸) 𑀏𑀢𑁆𑀣 𑀯𑀺𑀬 𑀲𑀫𑀼𑀤𑀸𑀬𑀤𑁂𑀲𑀦𑀸𑀬 𑀅𑀯𑀬𑀯𑀤𑁂𑀲𑀦𑀸𑀦𑀁 𑀆𑀥𑀸𑀭𑀪𑀸𑀯𑀢𑁄. 𑀤𑁂𑀲𑀦𑀸𑀓𑀸𑀮𑁂 𑀯𑀸 𑀫𑀦𑀲𑀸 𑀯𑀯𑀢𑁆𑀣𑀸𑀧𑀺𑀢𑀸𑀬 𑀯𑀺𑀦𑀬𑀢𑀦𑁆𑀢𑀺𑀬𑀸 𑀯𑀺𑀦𑀬𑀧𑀺𑀝𑀓𑀪𑀸𑀯𑀢𑁄 𑀢𑀤𑀢𑁆𑀣𑀧𑀜𑁆𑀜𑀸𑀧𑀦𑀲𑁆𑀲 𑀘 𑀤𑁂𑀲𑀦𑀸𑀪𑀸𑀯𑀢𑁄 𑀪𑁂𑀤𑀯𑀘𑀦𑀁. 𑀅𑀣 𑀯𑀸 𑀤𑁂𑀲𑀻𑀬𑀢𑀺 𑀏𑀢𑁂𑀦𑀸𑀢𑀺 𑀤𑁂𑀲𑀦𑀸, 𑀤𑁂𑀲𑀦𑀸𑀲𑀫𑀼𑀝𑁆𑀞𑀸𑀧𑀓𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄, 𑀢𑀲𑁆𑀲 𑀘 𑀯𑀺𑀦𑀬𑀧𑀺𑀝𑀓𑀯𑀺𑀲𑀬𑁄 𑀓𑀭𑀼𑀡𑀸𑀧𑀼𑀩𑁆𑀩𑀗𑁆𑀕𑀫𑁄 𑀘 𑀲𑁄𑀢𑀺 𑀏𑀯𑀫𑁂𑀢𑁆𑀣 𑀪𑁂𑀤𑀯𑀘𑀦𑁄𑀧𑀧𑀢𑁆𑀢𑀺 𑀤𑀝𑁆𑀞𑀩𑁆𑀩𑀸. 𑀲𑀼𑀢𑁆𑀢𑀦𑁆𑀢𑀧𑀺𑀝𑀓𑁂𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄.

𑀓𑀣𑀁 𑀧𑀦 𑀪𑀕𑀯𑀢𑁄 𑀤𑁂𑀲𑀦𑀸 𑀯𑀺𑀦𑀬𑀧𑀺𑀝𑀓𑁂 𑀓𑀭𑀼𑀡𑀸𑀧𑁆𑀧𑀥𑀸𑀦𑀸, 𑀲𑀼𑀢𑁆𑀢𑀸𑀪𑀺𑀥𑀫𑁆𑀫𑀧𑀺𑀝𑀓𑁂𑀲𑀼 𑀘 𑀧𑀜𑁆𑀜𑀸𑀓𑀭𑀼𑀡𑀸𑀧𑀜𑁆𑀜𑀸𑀧𑁆𑀧𑀥𑀸𑀦𑀸𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺? 𑀬𑀢𑁄 𑀉𑀓𑁆𑀓𑀁𑀲𑀧𑀭𑀺𑀬𑀦𑁆𑀢𑀕𑀢𑀳𑀺𑀭𑁄𑀢𑁆𑀢𑀧𑁆𑀧𑁄𑀧𑀺 𑀪𑀕𑀯𑀸 𑀮𑁄𑀓𑀺𑀬𑀲𑀸𑀥𑀼𑀚𑀦𑁂𑀳𑀺𑀧𑀺 𑀧𑀭𑀺𑀳𑀭𑀺𑀢𑀩𑁆𑀩𑀸𑀦𑀺 ‘‘𑀲𑀺𑀔𑀭𑀡𑀻’’𑀢𑀺𑀆𑀤𑀻𑀦𑀺 𑀯𑀘𑀦𑀸𑀦𑀺 𑀬𑀣𑀸𑀧𑀭𑀸𑀥𑀜𑁆𑀘 𑀕𑀭𑀳𑀯𑀘𑀦𑀸𑀦𑀺 𑀯𑀺𑀦𑀬𑀧𑀺𑀝𑀓𑀤𑁂𑀲𑀦𑀸𑀬𑀁 𑀫𑀳𑀸𑀓𑀭𑀼𑀡𑀸𑀲𑀜𑁆𑀘𑁄𑀤𑀺𑀢𑀫𑀸𑀦𑀲𑁄 𑀫𑀳𑀸𑀧𑀭𑀺𑀲𑀫𑀚𑁆𑀛𑁂 𑀅𑀪𑀸𑀲𑀺, 𑀢𑀁𑀢𑀁𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀓𑀸𑀭𑀡𑀸𑀧𑁂𑀓𑁆𑀔𑀸𑀬 𑀯𑁂𑀭𑀜𑁆𑀚𑀸𑀤𑀻𑀲𑀼 𑀲𑀸𑀭𑀻𑀭𑀺𑀓𑀜𑁆𑀘 𑀔𑁂𑀤𑀫𑀦𑀼𑀪𑁄𑀲𑀺, 𑀢𑀲𑁆𑀫𑀸 𑀓𑀺𑀜𑁆𑀘𑀸𑀧𑀺 𑀪𑀽𑀫𑀦𑁆𑀢𑀭𑀧𑀘𑁆𑀘𑀬𑀸𑀓𑀸𑀭𑀲𑀫𑀬𑀦𑁆𑀢𑀭𑀓𑀣𑀸𑀦𑀁 𑀯𑀺𑀬 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸𑀧𑀺 𑀲𑀫𑀼𑀝𑁆𑀞𑀸𑀧𑀺𑀓𑀸 𑀧𑀜𑁆𑀜𑀸 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑀸𑀬 𑀅𑀢𑀺𑀲𑀬𑀓𑀺𑀘𑁆𑀘𑀯𑀢𑀻, 𑀢𑀢𑁄𑀧𑀺 𑀓𑀭𑀼𑀡𑀸𑀬 𑀓𑀺𑀘𑁆𑀘𑀁 𑀅𑀥𑀺𑀓𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁 ‘‘𑀯𑀺𑀦𑀬𑀧𑀺𑀝𑀓𑁂 𑀓𑀭𑀼𑀡𑀸𑀧𑁆𑀧𑀥𑀸𑀦𑀸’’𑀢𑀺. 𑀓𑀭𑀼𑀡𑀸𑀩𑁆𑀬𑀸𑀧𑀸𑀭𑀸𑀥𑀺𑀓𑀢𑀸𑀬 𑀳𑀺 𑀤𑁂𑀲𑀦𑀸𑀬 𑀓𑀭𑀼𑀡𑀸𑀧𑁆𑀧𑀥𑀸𑀦𑀢𑀸, 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀩𑀳𑀼𑀮𑁄 𑀯𑁂𑀦𑁂𑀬𑁆𑀬𑀲𑀦𑁆𑀢𑀸𑀦𑁂𑀲𑀼 𑀢𑀤𑀚𑁆𑀛𑀸𑀲𑀬𑀸𑀦𑀼𑀮𑁄𑀫𑁂𑀦 𑀕𑀫𑁆𑀪𑀻𑀭𑀫𑀢𑁆𑀣𑀧𑀤𑀁 𑀧𑀢𑀺𑀝𑁆𑀞𑀧𑁂𑀲𑀻𑀢𑀺 𑀓𑀭𑀼𑀡𑀸𑀧𑀜𑁆𑀜𑀸𑀧𑁆𑀧𑀥𑀸𑀦𑀢𑀸, 𑀅𑀪𑀺𑀥𑀫𑁆𑀫𑀤𑁂𑀲𑀦𑀸𑀬 𑀧𑀦 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀲𑁆𑀲 𑀯𑀺𑀲𑀬𑀪𑀸𑀯𑀧𑁆𑀧𑀳𑁄𑀦𑀓𑁄 𑀭𑀽𑀧𑀸𑀭𑀽𑀧𑀧𑀭𑀺𑀘𑁆𑀙𑁂𑀤𑁄 𑀥𑀫𑁆𑀫𑀲𑀪𑀸𑀯𑀸𑀦𑀼𑀭𑁄𑀥𑁂𑀦 𑀧𑀯𑀢𑁆𑀢𑀺𑀢𑁄𑀢𑀺 𑀧𑀜𑁆𑀜𑀸𑀧𑁆𑀧𑀥𑀸𑀦𑀢𑀸. 𑀢𑁂𑀦𑁂𑀯 𑀘 𑀓𑀸𑀭𑀡𑁂𑀦𑀸𑀢𑀺𑀆𑀤𑀺𑀦𑀸 𑀤𑁂𑀲𑀦𑀸𑀦𑀼𑀭𑀽𑀧𑀢𑀁𑀢𑀁𑀲𑀁𑀯𑀡𑁆𑀡𑀦𑀸𑀬 𑀣𑁄𑀫𑀦𑀸 𑀆𑀘𑀭𑀺𑀬𑀲𑁆𑀲 𑀧𑀓𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀓𑀼𑀲𑀮𑀸 𑀭𑀽𑀧𑀁 𑀘𑀓𑁆𑀔𑀼𑀫𑀸 𑀤𑀲 𑀤𑀸𑀴𑀺𑀫𑀸𑀤𑀺 𑀲𑀫𑀽𑀳𑀯𑀲𑁂𑀦 𑀅𑀢𑁆𑀣𑀸𑀦𑀯𑀩𑁄𑀥𑀦𑀢𑁆𑀣𑁄 𑀯𑀺𑀬 𑀅𑀢𑁆𑀣𑀸𑀯𑀩𑁄𑀥𑀦𑀢𑁆𑀣𑁄 𑀳𑀺 𑀲𑀤𑁆𑀤𑀧𑁆𑀧𑀬𑁄𑀕𑁄 𑀅𑀢𑁆𑀢𑀧𑀭𑀸𑀥𑀻𑀦𑁄 𑀓𑁂𑀯𑀮𑁄 𑀅𑀢𑁆𑀣𑀧𑀤𑀢𑁆𑀣𑀓𑁄, 𑀲𑁄 𑀧𑀤𑀢𑁆𑀣𑀯𑀺𑀧𑀭𑀺𑀬𑁂𑀲𑀓𑀸𑀭𑀺𑀦𑀸 𑀇𑀢𑀺-𑀲𑀤𑁆𑀤𑁂𑀦 𑀲𑀤𑁆𑀤𑀧𑀤𑀢𑁆𑀣𑀓𑁄 𑀚𑀸𑀬𑀢𑀻𑀢𑀺 𑀆𑀳 ‘‘𑀓𑀭𑀼𑀡𑀸 𑀯𑀺𑀬𑀸𑀢𑀺 𑀦𑀺𑀤𑀲𑁆𑀲𑀦𑀯𑀘𑀦’’𑀦𑁆𑀢𑀺. 𑀦𑀺𑀤𑀲𑁆𑀲𑀦𑀜𑁆𑀳𑀺 𑀦𑀸𑀫 𑀦𑀺𑀤𑀲𑁆𑀲𑀺𑀢𑀩𑁆𑀩𑀥𑀫𑁆𑀫𑁂 𑀢𑁂𑀦 𑀘 𑀲𑀫𑁆𑀩𑀦𑁆𑀥𑁂 𑀲𑀢𑀺 𑀳𑁄𑀢𑀺, 𑀦𑀸𑀜𑁆𑀜𑀣𑀸𑀢𑀺 𑀢𑀲𑁆𑀲 𑀦𑀺𑀤𑀲𑁆𑀲𑀦𑀪𑀸𑀯𑀁 𑀯𑀺𑀪𑀸𑀯𑁂𑀦𑁆𑀢𑁄 𑀆𑀳 ‘‘𑀬𑀲𑁆𑀲 𑀬𑀣𑀸…𑀧𑁂… 𑀧𑀯𑀢𑁆𑀢𑀺𑀢𑁆𑀣𑀸𑀢𑀺 𑀅𑀢𑁆𑀣𑁄’’𑀢𑀺.

‘‘𑀢𑀢𑁆𑀣 𑀓𑀭𑀼𑀡𑀸 𑀯𑀺𑀬𑀸𑀢𑀺 𑀦𑀺𑀤𑀲𑁆𑀲𑀦𑀯𑀘𑀦’’𑀦𑁆𑀢𑀺𑀆𑀤𑀺𑀦𑀸 𑀦𑀺𑀤𑀲𑁆𑀲𑀦𑀦𑀺𑀤𑀲𑁆𑀲𑀺𑀢𑀩𑁆𑀩𑀥𑀫𑁆𑀫𑀸𑀦𑀁 𑀆𑀥𑀸𑀭𑀯𑀺𑀲𑀬𑀩𑁆𑀬𑀸𑀧𑀸𑀭𑁂𑀳𑀺 𑀲𑀯𑀺𑀲𑁂𑀲𑀦𑁂𑀳𑀺 𑀲𑀳 𑀧𑀓𑀸𑀲𑀦𑀯𑀲𑁂𑀦 𑀕𑀸𑀣𑀸𑀬 𑀅𑀢𑁆𑀣𑀢𑀢𑁆𑀯𑀁 𑀤𑀲𑁆𑀲𑁂𑀢𑁆𑀯𑀸 𑀅𑀯𑀬𑀯𑀪𑁂𑀤𑀯𑀲𑁂𑀦 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀺𑀭𑀢𑀻𑀢𑀺 𑀓𑀭𑀼𑀡𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀺𑀘𑁆𑀙𑀦𑁆𑀤𑀭𑀸𑀕𑀸𑀦𑀁 𑀪𑀽𑀢𑀧𑀼𑀩𑁆𑀩𑀕𑀢𑀺𑀬𑀸 𑀯𑀸 𑀲𑀢𑁆𑀢𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀓𑀲𑁆𑀲𑀧𑀺 𑀥𑀫𑁆𑀫𑀲𑁆𑀲 𑀅𑀦𑁂𑀓𑀲𑀸𑀫𑀜𑁆𑀜𑀸𑀓𑀸𑀭𑀯𑀦𑁆𑀢𑀢𑀸𑀬 ‘‘𑀬𑀣𑀸𑀲𑀪𑀸𑀯𑀁 𑀧𑀓𑀸𑀭𑁂𑀳𑀻’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑁋 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀲𑀩𑁆𑀩𑀸𑀓𑀸𑀭𑁂𑀦𑀸’’𑀢𑀺 (𑀫𑀳𑀸𑀦𑀺. 𑁧𑁫𑁬; 𑀘𑀽𑀴𑀦𑀺. 𑀫𑁄𑀖𑀭𑀸𑀚𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁮𑁫; 𑀧𑀝𑀺. 𑀫. 𑁩.𑁫) 𑀥𑀫𑁆𑀫𑀸𑀦𑀁 𑀅𑀜𑁆𑀜𑁂𑀬𑁆𑀬𑀢𑁆𑀢𑀁 𑀧𑀝𑀺𑀓𑁆𑀔𑀺𑀧𑀢𑀺 𑀜𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸𑀪𑀸𑀯𑀢𑁄. 𑀏𑀢𑁂𑀦 𑀢𑀲𑁆𑀲𑀸 𑀧𑀜𑁆𑀜𑀸𑀬 𑀅𑀓𑀺𑀘𑁆𑀙𑀯𑀼𑀢𑁆𑀢𑀺𑀢𑀁 𑀆𑀳. 𑀬𑀣𑁂𑀯 𑀳𑀺 ‘‘𑀜𑁂𑀬𑁆𑀬𑁂𑀲𑀼 𑀲𑀩𑁆𑀩𑁂𑀲𑀼 𑀧𑀯𑀢𑁆𑀢𑀺𑀢𑁆𑀣𑀸’’𑀢𑀺 𑀏𑀢𑁆𑀢𑀸𑀯𑀢𑀸 𑀅𑀥𑀺𑀧𑁆𑀧𑁂𑀢𑀢𑁆𑀣𑁂 𑀲𑀺𑀤𑁆𑀥𑁂 𑀢𑁂𑀲𑀁 𑀅𑀢𑁆𑀢𑀢𑁆𑀢𑀦𑀺𑀬𑀢𑀸𑀯𑀺𑀭𑀳𑀲𑀁𑀲𑀽𑀘𑀦𑀢𑁆𑀣𑀁 𑀧𑀭𑁂𑀲𑀁 𑀲𑀢𑁆𑀢𑀸𑀤𑀺𑀫𑀺𑀘𑁆𑀙𑀸𑀕𑀸𑀳𑀧𑀝𑀺𑀲𑁂𑀥𑀦𑁂𑀦 𑀥𑀫𑁆𑀫-𑀲𑀤𑁆𑀤𑁂𑀦 𑀜𑁂𑀬𑁆𑀬𑀸 𑀯𑀺𑀲𑁂𑀲𑀺𑀢𑀩𑁆𑀩𑀸, 𑀏𑀯𑀁 ‘‘𑀥𑀫𑁆𑀫𑁂𑀲𑀼 𑀲𑀩𑁆𑀩𑁂𑀲𑀼 𑀧𑀯𑀢𑁆𑀢𑀺𑀢𑁆𑀣𑀸’’𑀢𑀺 𑀏𑀢𑁆𑀢𑀸𑀯𑀢𑀸 𑀘 𑀅𑀥𑀺𑀧𑁆𑀧𑁂𑀢𑀢𑁆𑀣𑁂 𑀲𑀺𑀤𑁆𑀥𑁂 𑀥𑀫𑁆𑀫𑁂𑀲𑀼 𑀢𑀲𑁆𑀲𑀸 𑀧𑀜𑁆𑀜𑀸𑀬 𑀆𑀓𑀗𑁆𑀔𑀧𑁆𑀧𑀝𑀺𑀩𑀤𑁆𑀥𑀢𑀸𑀬 𑀅𑀓𑀺𑀘𑁆𑀙𑀯𑀼𑀢𑁆𑀢𑀺𑀢𑀁 𑀤𑀲𑁆𑀲𑁂𑀢𑀼𑀁 𑀅𑀜𑁆𑀜𑁂𑀬𑁆𑀬𑀢𑁆𑀢𑀧𑀝𑀺𑀲𑁂𑀥𑀦𑁂𑀦 𑀜𑁂𑀬𑁆𑀬-𑀲𑀤𑁆𑀤𑁂𑀦 𑀥𑀫𑁆𑀫𑀸 𑀯𑀺𑀲𑁂𑀲𑀺𑀢𑀸𑀢𑀺. 𑀜𑁂𑀬𑁆𑀬𑀥𑀫𑁆𑀫-𑀲𑀤𑁆𑀤𑀸 𑀦𑀻𑀮𑀼𑀧𑁆𑀧𑀮𑀲𑀤𑁆𑀤𑀸 𑀯𑀺𑀬 𑀅𑀜𑁆𑀜𑀫𑀜𑁆𑀜𑀁 𑀪𑁂𑀤𑀸𑀪𑁂𑀤𑀬𑀼𑀢𑁆𑀢𑀸𑀢𑀺 ‘‘𑀜𑁂𑀬𑁆𑀬𑀸 𑀘 𑀢𑁂 𑀥𑀫𑁆𑀫𑀸 𑀘𑀸’’𑀢𑀺 𑀯𑀼𑀢𑁆𑀢𑀁. 𑀬𑀸 𑀬𑀸𑀢𑀺 𑀬𑀣𑀸-𑀲𑀤𑁆𑀤𑀲𑁆𑀲𑀢𑁆𑀣𑀁 𑀤𑀲𑁆𑀲𑁂𑀢𑀺. 𑀩𑁆𑀬𑀸𑀧𑀦𑀺𑀘𑁆𑀙𑀸𑀬𑀜𑁆𑀳𑀺 𑀅𑀬𑀁 𑀬𑀣𑀸-𑀲𑀤𑁆𑀤𑁄, 𑀢𑀧𑁆𑀧𑀪𑁂𑀤𑀸 𑀧𑀜𑁆𑀜𑀸 𑀧𑀯𑀢𑁆𑀢𑀺𑀢𑁆𑀣𑀸𑀢𑀺 𑀲𑀫𑁆𑀩𑀦𑁆𑀥𑁄𑀢𑀺.

𑀪𑀕𑀯𑀢𑀺 𑀧𑀯𑀢𑁆𑀢𑀸𑀯𑀸𑀢𑀺 𑀇𑀤𑀁 𑀬𑁂𑀪𑀼𑀬𑁆𑀬𑁂𑀦 𑀉𑀧𑀫𑀸𑀦𑁄𑀧𑀫𑁂𑀬𑁆𑀬𑀢𑁆𑀣𑀸𑀦𑀁 𑀪𑀺𑀦𑁆𑀦𑀸𑀥𑀸𑀭𑀢𑀸𑀬 𑀪𑀺𑀦𑁆𑀦𑀸𑀥𑀸𑀭𑀲𑁆𑀲 𑀘 𑀉𑀧𑀫𑀸𑀦𑀢𑁆𑀣𑀲𑁆𑀲 𑀇𑀥 𑀅𑀲𑀫𑁆𑀪𑀯𑀢𑁄 𑀯𑀼𑀢𑁆𑀢𑀁. 𑀪𑀕𑀯𑀢𑁄 𑀓𑀭𑀼𑀡𑀸𑀬 𑀅𑀜𑁆𑀜𑁂𑀳𑀺 𑀅𑀲𑀸𑀥𑀸𑀭𑀡𑀪𑀸𑀯𑁄 𑀲𑀢𑁆𑀢𑁂 𑀲𑀁𑀲𑀸𑀭𑀤𑀼𑀓𑁆𑀔𑀢𑁄 𑀉𑀤𑁆𑀥𑀭𑀺𑀢𑁆𑀯𑀸 𑀅𑀘𑁆𑀘𑀦𑁆𑀢𑀲𑀼𑀔𑁂 𑀦𑀺𑀩𑁆𑀩𑀸𑀦𑁂 𑀧𑀢𑀺𑀝𑁆𑀞𑀧𑁂𑀢𑀼𑀁 𑀅𑀢𑁆𑀢𑀦𑁄 𑀲𑀭𑀻𑀭𑀚𑀻𑀯𑀺𑀢𑀧𑀭𑀺𑀘𑁆𑀘𑀸𑀕𑁂𑀦𑀧𑀺 𑀏𑀓𑀦𑁆𑀢𑀳𑀺𑀢𑀚𑁆𑀛𑀸𑀲𑀬𑀢𑀸𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄, 𑀬𑀢𑁄 𑀯𑀺𑀦𑁂𑀬𑁆𑀬𑀸𑀦𑀁 𑀓𑁄𑀲𑁄𑀳𑀺𑀢𑀯𑀢𑁆𑀣𑀕𑀼𑀬𑁆𑀳𑀧𑀳𑀽𑀢𑀚𑀺𑀯𑁆𑀳𑀸𑀯𑀺𑀤𑀁𑀲𑀦𑀫𑁆𑀧𑀺 𑀓𑀢𑀁, 𑀬𑀜𑁆𑀘 𑀬𑀤𑀺𑀫𑁂 𑀲𑀢𑁆𑀢𑀸 𑀚𑀸𑀦𑁂𑀬𑁆𑀬𑀼𑀁, 𑀪𑀕𑀯𑀢𑁄 𑀲𑀸𑀲𑀦𑁂𑀦 𑀭𑀳𑀤𑀫𑀺𑀯 𑀲𑀻𑀢𑀮𑀁 𑀲𑀫𑁆𑀧𑀚𑁆𑀚𑀮𑀺𑀢𑀁 𑀅𑀕𑁆𑀕𑀺𑀓𑁆𑀔𑀦𑁆𑀥𑀫𑁆𑀧𑀺 𑀲𑀫𑁄𑀕𑀸𑀳𑁂𑀬𑁆𑀬. 𑀅𑀜𑁆𑀜𑁂𑀲𑀁 𑀧𑀲𑁆𑀲𑀦𑁆𑀢𑀸𑀦𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀉𑀤𑁆𑀥𑀝𑀸𑀢𑀺 𑀧𑀤𑀁 𑀅𑀧𑁂𑀓𑁆𑀔𑀺𑀢𑁆𑀯𑀸 𑀫𑀳𑁄𑀖𑀧𑀓𑁆𑀔𑀦𑁆𑀤𑀸𑀦𑀁 𑀲𑀢𑁆𑀢𑀸𑀦𑀦𑁆𑀢𑀺 𑀓𑀫𑁆𑀫𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀅𑀬𑀜𑁆𑀳𑁂𑀢𑁆𑀣 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀓𑀸𑀫𑀸𑀤𑀺𑀫𑀳𑁄𑀖𑀧𑀓𑁆𑀔𑀦𑁆𑀤𑁂 𑀲𑀢𑁆𑀢𑁂 𑀢𑀢𑁄 𑀉𑀤𑁆𑀥𑀝𑀸 𑀦𑀢𑁆𑀣𑀜𑁆𑀜𑁄 𑀓𑁄𑀘𑀺 𑀫𑀁 𑀞𑀧𑁂𑀢𑁆𑀯𑀸𑀢𑀺 𑀧𑀲𑁆𑀲𑀢𑁄 𑀬𑀣𑀸 𑀪𑀕𑀯𑀢𑁄 𑀓𑀭𑀼𑀡𑀸𑀬 𑀆𑀯𑀺𑀲𑀦𑀁 𑀳𑁄𑀢𑀺, 𑀦 𑀏𑀯𑀁 𑀅𑀜𑁆𑀜𑁂𑀲𑀁 𑀢𑀣𑀸𑀤𑀲𑁆𑀲𑀦𑀲𑁆𑀲𑁂𑀯 𑀅𑀪𑀸𑀯𑀢𑁄. 𑀅𑀣 𑀯𑀸 𑀅𑀜𑁆𑀜𑁂𑀲𑀁 𑀧𑀲𑁆𑀲𑀦𑁆𑀢𑀸𑀦𑀦𑁆𑀢𑀺 𑀬𑀤𑀺𑀧𑀺 𑀧𑀭𑁂 𑀧𑀲𑁆𑀲𑁂𑀬𑁆𑀬𑀼𑀁, 𑀢𑀣𑀸𑀧𑀺 𑀦 𑀢𑁂𑀲𑀁 𑀪𑀕𑀯𑀢𑁄 𑀯𑀺𑀬 𑀓𑀭𑀼𑀡𑁄𑀓𑁆𑀓𑀫𑀦𑀁 𑀅𑀢𑁆𑀣𑀺 𑀅𑀧𑁆𑀧𑀝𑀺𑀧𑀢𑁆𑀢𑀺𑀢𑁄 𑀅𑀢𑁆𑀢𑀳𑀺𑀢𑀫𑀢𑁆𑀢𑀧𑀝𑀺𑀧𑀢𑁆𑀢𑀺𑀢𑁄 𑀘𑀸𑀢𑀺 𑀅𑀢𑁆𑀣𑁄.

𑀅𑀦𑀸𑀯𑀭𑀡𑀸 𑀢𑀻𑀲𑀼 𑀓𑀸𑀮𑁂𑀲𑀼 𑀲𑀩𑁆𑀩𑀢𑁆𑀣 𑀅𑀧𑁆𑀧𑀝𑀺𑀳𑀢𑀯𑀼𑀢𑁆𑀢𑀺𑀢𑀸𑀬, 𑀅𑀲𑀸𑀥𑀸𑀭𑀡𑀸 𑀲𑀩𑁆𑀩𑀥𑀫𑁆𑀫𑀸𑀦𑀁 𑀦𑀺𑀭𑀯𑀲𑁂𑀲𑀳𑁂𑀢𑀼𑀧𑀘𑁆𑀘𑀬𑀧𑀭𑀺𑀕𑁆𑀕𑀳𑀯𑀲𑁂𑀦 𑀢𑁂𑀲𑀜𑁆𑀘 𑀲𑀪𑀸𑀯𑀓𑀺𑀘𑁆𑀘𑀸𑀤𑀺𑀅𑀯𑀢𑁆𑀣𑀸𑀯𑀺𑀲𑁂𑀲𑀸𑀤𑀺𑀧𑀭𑀺𑀚𑀸𑀦𑀦𑁂𑀦 𑀆𑀬𑀽𑀳𑀦𑀯𑁂𑀮𑀸𑀬𑀫𑁂𑀯 𑀢𑀁𑀢𑀁𑀓𑀫𑁆𑀫𑀸𑀦𑀁 𑀢𑀁𑀢𑀁𑀨𑀮𑀯𑀺𑀲𑁂𑀲𑀳𑀻𑀦𑀫𑀚𑁆𑀛𑀺𑀫𑀧𑀡𑀻𑀢𑀸𑀤𑀺𑀯𑀺𑀪𑀸𑀕𑀲𑁆𑀲 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑁂𑀲𑀼 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑁂𑀲𑀼 𑀘 𑀅𑀢𑀺𑀲𑀼𑀔𑀼𑀫𑀢𑀺𑀭𑁄𑀳𑀺𑀢𑀯𑀺𑀤𑀽𑀭𑀯𑀼𑀢𑁆𑀢𑀺𑀅𑀢𑀻𑀢𑀸𑀦𑀸𑀕𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑀸𑀦𑀁 𑀭𑀽𑀧𑀥𑀫𑁆𑀫𑀸𑀦𑀁 𑀢𑀁𑀢𑀁𑀓𑀸𑀭𑀡𑀲𑀫𑀯𑀸𑀬𑀯𑀺𑀪𑀸𑀯𑀦𑁂𑀦𑁂𑀯 𑀢𑀁𑀢𑀁𑀨𑀮𑁂𑀲𑀼 𑀯𑀡𑁆𑀡𑀲𑀡𑁆𑀞𑀸𑀦𑀕𑀦𑁆𑀥𑀭𑀲𑀨𑀲𑁆𑀲𑀸𑀤𑀺𑀯𑀺𑀲𑁂𑀲𑀲𑁆𑀲 𑀦𑀺𑀭𑀯𑀲𑁂𑀲𑀢𑁄 𑀧𑀝𑀺𑀯𑀺𑀚𑁆𑀛𑀦𑁂𑀦 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀜𑁆𑀘 𑀅𑀢𑁆𑀣𑁄 𑀪𑀕𑀯𑀢𑁄 𑀅𑀦𑁂𑀓𑀥𑀸𑀢𑀼𑀦𑀸𑀦𑀸𑀥𑀸𑀢𑀼𑀮𑁄𑀓𑀁 𑀬𑀣𑀸𑀪𑀽𑀢𑀁 𑀜𑀸𑀡𑀸𑀤𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀬𑀣𑀸 𑀘 𑀧𑀲𑁆𑀲𑀦𑁆𑀢𑀲𑁆𑀲𑀸𑀢𑀺 𑀇𑀤𑀁 𑀭𑀸𑀕𑀕𑁆𑀕𑀺𑀆𑀤𑀻𑀳𑀺 𑀮𑁄𑀓𑀲𑀦𑁆𑀦𑀺𑀯𑀸𑀲𑀲𑁆𑀲 𑀆𑀤𑀺𑀢𑁆𑀢𑀢𑀸𑀤𑀺𑀆𑀓𑀸𑀭𑀤𑀲𑁆𑀲𑀦𑀁 𑀪𑀕𑀯𑀢𑁄 𑀫𑀳𑀸𑀓𑀭𑀼𑀡𑁄𑀓𑁆𑀓𑀫𑀦𑀼𑀧𑀸𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀁 𑀧𑀦 𑀩𑀳𑀼𑀓𑁂𑀳𑀺 𑀆𑀓𑀸𑀭𑁂𑀳𑀺 𑀧𑀲𑁆𑀲𑀦𑁆𑀢𑀸𑀦𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀲𑀢𑁆𑀢𑁂𑀲𑀼 𑀫𑀳𑀸𑀓𑀭𑀼𑀡𑀸 𑀑𑀓𑁆𑀓𑀫𑀢𑀺. ‘‘𑀆𑀤𑀺𑀢𑁆𑀢𑁄 𑀮𑁄𑀓𑀲𑀦𑁆𑀦𑀺𑀯𑀸𑀲𑁄…𑀧𑁂… 𑀉𑀬𑁆𑀬𑀼𑀢𑁆𑀢𑁄…𑀧𑁂… 𑀧𑀬𑀸𑀢𑁄…𑀧𑁂… 𑀓𑀼𑀫𑁆𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑁄…𑀧𑁂… 𑀉𑀧𑀦𑀻𑀬𑀢𑀺 𑀮𑁄𑀓𑁄 𑀅𑀥𑀼𑀯𑁄…𑀧𑁂… 𑀅𑀢𑀸𑀡𑁄 𑀮𑁄𑀓𑁄 𑀅𑀦𑀪𑀺𑀲𑁆𑀲𑀭𑁄…𑀧𑁂… 𑀅𑀲𑁆𑀲𑀓𑁄 𑀮𑁄𑀓𑁄 𑀲𑀩𑁆𑀩𑀁 𑀧𑀳𑀸𑀬 𑀕𑀫𑀦𑀻𑀬𑀁…𑀧𑁂… 𑀊𑀦𑁄 𑀮𑁄𑀓𑁄 𑀅𑀢𑀺𑀢𑁆𑀢𑁄 𑀢𑀡𑁆𑀳𑀸𑀤𑀸𑀲𑁄𑀢𑀺 𑀧𑀲𑁆𑀲𑀦𑁆𑀢𑀸𑀦𑀁 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁 𑀲𑀢𑁆𑀢𑁂𑀲𑀼 𑀫𑀳𑀸𑀓𑀭𑀼𑀡𑀸 𑀑𑀓𑁆𑀓𑀫𑀢𑀻’’𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁧.𑁧𑁧𑁭) 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑀧𑀭𑁄𑀲𑀢𑀁 𑀆𑀓𑀸𑀭𑁂𑀳𑀺 𑀤𑀲𑁆𑀲𑀺𑀢𑀦𑁆𑀢𑀺 𑀕𑀦𑁆𑀣𑀯𑀺𑀢𑁆𑀣𑀸𑀭𑀁 𑀧𑀭𑀺𑀳𑀭𑀺𑀢𑀼𑀁 𑀲𑀁𑀯𑀡𑁆𑀡𑀬𑀺𑀢𑀼𑀜𑁆𑀘 𑀉𑀧𑀸𑀬𑀁 𑀤𑀲𑁆𑀲𑁂𑀢𑀼𑀁 𑀆𑀳 ‘‘𑀢𑀁 𑀲𑀩𑁆𑀩𑀁 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑀫𑀳𑀸𑀓𑀭𑀼𑀡𑀸𑀜𑀸𑀡𑀯𑀺𑀪𑀗𑁆𑀕𑀯𑀲𑁂𑀦 𑀚𑀸𑀦𑀺𑀢𑀩𑁆𑀩’’𑀦𑁆𑀢𑀺. 𑀇𑀦𑁆𑀤𑁆𑀭𑀺𑀬𑀧𑀭𑁄𑀧𑀭𑀺𑀬𑀢𑁆𑀢𑀆𑀲𑀬𑀸𑀦𑀼𑀲𑀬 𑀬𑀫𑀓𑀧𑀸𑀝𑀺𑀳𑀸𑀭𑀺𑀬 𑀲𑀩𑁆𑀩𑀜𑁆𑀜𑀼𑀢𑀸𑀦𑀸𑀯𑀭𑀡𑀜𑀸𑀡𑀸𑀦𑀺 𑀲𑁂𑀲𑀸𑀲𑀸𑀥𑀸𑀭𑀡𑀜𑀸𑀡𑀸𑀦𑀺. 𑀢𑁂𑀲𑀫𑁆𑀧𑀺 𑀳𑀺 𑀯𑀺𑀪𑀗𑁆𑀕𑁄 ‘‘𑀇𑀥 𑀢𑀣𑀸𑀕𑀢𑁄 𑀲𑀢𑁆𑀢𑁂 𑀧𑀲𑁆𑀲𑀢𑀺 𑀅𑀧𑁆𑀧𑀭𑀚𑀓𑁆𑀔𑁂’’𑀢𑀺𑀆𑀤𑀺𑀦𑀸 (𑀧𑀝𑀺. 𑀫. 𑁧.𑁧𑁧𑁧) 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 𑀦𑀸𑀦𑀧𑁆𑀧𑀓𑀸𑀭𑁂𑀦 𑀤𑀲𑁆𑀲𑀺𑀢𑁄𑀢𑀺 𑀧𑀼𑀭𑀺𑀫𑀦𑀬𑁂𑀦𑁂𑀯 𑀅𑀢𑀺𑀤𑀺𑀲𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀢𑀢𑁆𑀣 𑀯𑀺𑀪𑀢𑁆𑀢𑀸𑀦𑀁 𑀧𑀝𑀺𑀲𑀫𑁆𑀪𑀺𑀤𑀸𑀲𑀘𑁆𑀘𑀜𑀸𑀡𑀸𑀤𑀻𑀦𑀁 𑀲𑀗𑁆𑀕𑀳𑁄 𑀓𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀦𑀺𑀧𑁆𑀧𑀤𑁂𑀲𑀲𑀧𑁆𑀧𑀤𑁂𑀲𑀯𑀺𑀲𑀬𑀸 𑀓𑀭𑀼𑀡𑀸 𑀯𑀺𑀬 𑀪𑀕𑀯𑀢𑁄 𑀧𑀜𑁆𑀜𑀸𑀧𑀺 𑀇𑀥 𑀦𑀺𑀧𑁆𑀧𑀤𑁂𑀲𑀲𑀧𑁆𑀧𑀤𑁂𑀲𑀯𑀺𑀲𑀬𑀸 𑀦𑀺𑀭𑀯𑀲𑁂𑀲𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀢𑀲𑁆𑀲𑀸 𑀓𑀢𑀺𑀧𑀬𑀪𑁂𑀤𑀤𑀲𑁆𑀲𑀦𑁂𑀦 𑀦𑀬𑀢𑁄 𑀢𑀤𑀯𑀲𑀺𑀝𑁆𑀞𑀪𑁂𑀤𑀸 𑀕𑀳𑁂𑀢𑀩𑁆𑀩𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀜𑁆𑀜𑀸𑀕𑁆𑀕𑀳𑀡𑁂𑀦 𑀘𑀸’’𑀢𑀺𑀆𑀤𑀺𑀫𑀸𑀳. 𑀢𑁂 𑀧𑀦 𑀲𑀻𑀮𑀲𑀫𑀸𑀥𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦, 𑀤𑁆𑀯𑀸𑀘𑀢𑁆𑀢𑀸𑀮𑀻𑀲𑀲𑀢𑀤𑀼𑀓𑀥𑀫𑁆𑀫, 𑀩𑀸𑀯𑀻𑀲𑀢𑀺𑀢𑀺𑀓𑀥𑀫𑁆𑀫, 𑀘𑀢𑀼𑀲𑀢𑀺𑀧𑀝𑁆𑀞𑀸𑀦 𑀲𑀫𑁆𑀫𑀧𑁆𑀧𑀥𑀸𑀦 𑀇𑀤𑁆𑀥𑀺𑀧𑀸𑀤 𑀲𑀸𑀫𑀜𑁆𑀜𑀨𑀮 𑀅𑀭𑀺𑀬𑀯𑀁𑀲𑀸𑀤𑀺, 𑀧𑀜𑁆𑀘𑀕𑀢𑀺 𑀧𑀜𑁆𑀘𑀧𑀥𑀸𑀦𑀺𑀬𑀗𑁆𑀕𑀧𑀜𑁆𑀘𑀗𑁆𑀕𑀺𑀓𑀲𑀫𑀸𑀥𑀺 𑀇𑀦𑁆𑀤𑁆𑀭𑀺𑀬 𑀩𑀮 𑀦𑀺𑀲𑁆𑀲𑀸𑀭𑀡𑀻𑀬𑀥𑀸𑀢𑀼 𑀯𑀺𑀫𑀼𑀢𑁆𑀢𑀸𑀬𑀢𑀦 𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀥𑀫𑁆𑀫𑀲𑀜𑁆𑀜𑀸𑀤𑀺, 𑀙𑀲𑀸𑀭𑀡𑀻𑀬𑀥𑀫𑁆𑀫 𑀅𑀦𑀼𑀲𑁆𑀲𑀢𑀺𑀝𑁆𑀞𑀸𑀦 𑀅𑀕𑀸𑀭𑀯𑀕𑀸𑀭𑀯 𑀦𑀺𑀲𑁆𑀲𑀸𑀭𑀡𑀺𑀬𑀥𑀸𑀢𑀼 𑀲𑀢𑀢𑀯𑀺𑀳𑀸𑀭 𑀅𑀦𑀼𑀢𑁆𑀢𑀭𑀺𑀬 𑀦𑀺𑀩𑁆𑀩𑁂𑀥𑀪𑀸𑀕𑀺𑀬𑀧𑀜𑁆𑀜𑀸𑀤𑀺, 𑀲𑀢𑁆𑀢𑀅𑀧𑀭𑀺𑀳𑀸𑀦𑀺𑀬𑀥𑀫𑁆𑀫 𑀅𑀭𑀺𑀬𑀥𑀦 𑀩𑁄𑀚𑁆𑀛𑀗𑁆𑀕 𑀲𑀧𑁆𑀧𑀼𑀭𑀺𑀲𑀥𑀫𑁆𑀫𑀦𑀺𑀚𑁆𑀚𑀭𑀯𑀢𑁆𑀣𑀼 𑀲𑀜𑁆𑀜𑀸 𑀤𑀓𑁆𑀔𑀺𑀡𑁂𑀬𑁆𑀬𑀧𑀼𑀕𑁆𑀕𑀮𑀔𑀻𑀡𑀸𑀲𑀯𑀩𑀮𑀸𑀤𑀺, 𑀅𑀝𑁆𑀞𑀧𑀜𑁆𑀜𑀸𑀧𑀝𑀺𑀮𑀸𑀪𑀳𑁂𑀢𑀼 𑀫𑀺𑀘𑁆𑀙𑀢𑁆𑀢 𑀲𑀫𑁆𑀫𑀢𑁆𑀢 𑀮𑁄𑀓𑀥𑀫𑁆𑀫 𑀅𑀭𑀺𑀬𑀸𑀦𑀭𑀺𑀬𑀯𑁄𑀳𑀸𑀭 𑀆𑀭𑀫𑁆𑀪𑀯𑀢𑁆𑀣𑀼 𑀓𑀼𑀲𑀻𑀢𑀯𑀢𑁆𑀣𑀼 𑀅𑀓𑁆𑀔𑀡 𑀫𑀳𑀸𑀧𑀼𑀭𑀺𑀲𑀯𑀺𑀢𑀓𑁆𑀓 𑀅𑀪𑀺𑀪𑀸𑀬𑀢𑀦 𑀯𑀺𑀫𑁄𑀓𑁆𑀔𑀸𑀤𑀺, 𑀦𑀯𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀫𑀽𑀮𑀥𑀫𑁆𑀫𑀧𑀸𑀭𑀺𑀲𑀼𑀤𑁆𑀥𑀺𑀧𑀥𑀸𑀦𑀺𑀬𑀗𑁆𑀕 𑀲𑀢𑁆𑀢𑀸𑀯𑀸𑀲 𑀆𑀖𑀸𑀢𑀯𑀢𑁆𑀣𑀼 𑀆𑀖𑀸𑀢𑀧𑀝𑀺𑀯𑀺𑀦𑀬 𑀲𑀜𑁆𑀜𑀸𑀦𑀸𑀦𑀢𑁆𑀢 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀸𑀤𑀺, 𑀤𑀲𑀦𑀸𑀣𑀓𑀭𑀥𑀫𑁆𑀫 𑀓𑀲𑀺𑀡𑀸𑀬𑀢𑀦 𑀅𑀓𑀼𑀲𑀮𑀓𑀫𑁆𑀫𑀧𑀣 𑀓𑀼𑀲𑀮𑀓𑀫𑁆𑀫𑀧𑀣 𑀫𑀺𑀘𑁆𑀙𑀢𑁆𑀢 𑀲𑀫𑁆𑀫𑀢𑁆𑀢 𑀅𑀭𑀺𑀬𑀯𑀸𑀲 𑀤𑀲𑀩𑀮𑀜𑀸𑀡 𑀅𑀲𑁂𑀓𑁆𑀔𑀥𑀫𑁆𑀫𑀸𑀤𑀺, 𑀏𑀓𑀸𑀤𑀲𑀫𑁂𑀢𑁆𑀢𑀸𑀦𑀺𑀲𑀁𑀲 𑀲𑀻𑀮𑀸𑀦𑀺𑀲𑀁𑀲 𑀥𑀫𑁆𑀫𑀢𑀸 𑀩𑀼𑀤𑁆𑀥𑀺𑀳𑁂𑀢𑀼, 𑀤𑁆𑀯𑀸𑀤𑀲𑀸𑀬𑀢𑀦𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤 𑀥𑀫𑁆𑀫𑀘𑀓𑁆𑀓𑀸𑀓𑀸𑀭, 𑀢𑁂𑀭𑀲𑀥𑀼𑀢𑀕𑀼𑀡, 𑀘𑀼𑀤𑁆𑀤𑀲𑀩𑀼𑀤𑁆𑀥𑀜𑀸𑀡, 𑀧𑀜𑁆𑀘𑀤𑀲𑀘𑀭𑀡𑀯𑀺𑀫𑀼𑀢𑁆𑀢𑀺𑀧𑀭𑀺𑀧𑀸𑀘𑀦𑀻𑀬𑀥𑀫𑁆𑀫, 𑀲𑁄𑀴𑀲𑀆𑀦𑀸𑀧𑀸𑀦𑀲𑁆𑀲𑀢𑀺 𑀲𑀘𑁆𑀘𑀸𑀓𑀸𑀭 𑀲𑀼𑀢𑁆𑀢𑀦𑁆𑀢𑀧𑀝𑁆𑀞𑀸𑀦, 𑀅𑀝𑁆𑀞𑀸𑀭𑀲 𑀩𑀼𑀤𑁆𑀥𑀥𑀫𑁆𑀫𑀥𑀸𑀢𑀼 𑀪𑁂𑀤𑀓𑀭𑀯𑀢𑁆𑀣𑀼, 𑀏𑀓𑀽𑀦𑀯𑀻𑀲𑀢𑀺𑀧𑀘𑁆𑀘𑀯𑁂𑀓𑁆𑀔𑀡, 𑀘𑀢𑀼𑀯𑀻𑀲𑀢𑀺𑀧𑀘𑁆𑀘𑀬, 𑀅𑀝𑁆𑀞𑀯𑀻𑀲𑀢𑀺𑀲𑀼𑀢𑁆𑀢𑀦𑁆𑀢𑀧𑀝𑁆𑀞𑀸𑀦, 𑀧𑀡𑁆𑀡𑀸𑀲𑀉𑀤𑀬𑀩𑁆𑀩𑀬𑀤𑀲𑁆𑀲𑀦, 𑀧𑀭𑁄𑀧𑀡𑁆𑀡𑀸𑀲𑀓𑀼𑀲𑀮𑀥𑀫𑁆𑀫, 𑀤𑁆𑀯𑀸𑀲𑀝𑁆𑀞𑀺𑀤𑀺𑀝𑁆𑀞𑀺𑀕𑀢, 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀤𑀺𑀪𑁂𑀤𑀸𑀦𑀁 𑀥𑀫𑁆𑀫𑀸𑀦𑀁 𑀧𑀝𑀺𑀯𑀺𑀚𑁆𑀛𑀦𑀤𑁂𑀲𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀸, 𑀬𑁂 𑀘 𑀘𑀢𑀼𑀯𑀻𑀲𑀢𑀺𑀓𑁄𑀝𑀺𑀲𑀢𑀲𑀳𑀲𑁆𑀲𑀲𑀫𑀸𑀧𑀢𑁆𑀢𑀺𑀲𑀜𑁆𑀘𑀸𑀭𑀺𑀫𑀳𑀸𑀯𑀚𑀺𑀭𑀜𑀸𑀡𑀧𑁆𑀧𑀪𑁂𑀤𑀸, 𑀬𑁂 𑀘 𑀅𑀦𑀦𑁆𑀢𑀦𑀬𑀲𑀫𑀦𑁆𑀢𑀧𑀝𑁆𑀞𑀸𑀦𑀧𑀯𑀺𑀘𑀬𑀤𑁂𑀲𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀸, 𑀬𑁂 𑀘 𑀅𑀦𑀦𑁆𑀢𑀸𑀲𑀼 𑀮𑁄𑀓𑀥𑀸𑀢𑀽𑀲𑀼 𑀅𑀦𑀦𑁆𑀢𑀸𑀦𑀁 𑀲𑀢𑁆𑀢𑀸𑀦𑀁 𑀆𑀲𑀬𑀸𑀦𑀼𑀲𑀬𑀘𑀭𑀺𑀢𑀸𑀤𑀺𑀯𑀺𑀪𑀸𑀯𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀸𑀢𑀺 𑀏𑀯𑀁𑀧𑀓𑀸𑀭𑀸 𑀪𑀕𑀯𑀢𑁄 𑀧𑀜𑁆𑀜𑀸𑀧𑀪𑁂𑀤𑀸, 𑀲𑀩𑁆𑀩𑁂𑀧𑀺 𑀇𑀥 𑀆𑀤𑀺-𑀲𑀤𑁆𑀤𑁂𑀦 𑀦𑀬𑀢𑁄 𑀲𑀗𑁆𑀕𑀬𑁆𑀳𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑁄 𑀳𑀺 𑀲𑀫𑀢𑁆𑀣𑁄 𑀪𑀕𑀯𑀢𑁄 𑀧𑀜𑁆𑀜𑀸𑀬 𑀧𑀪𑁂𑀤𑁂 𑀅𑀦𑀼𑀧𑀤𑀁 𑀦𑀺𑀭𑀯𑀲𑁂𑀲𑀢𑁄 𑀤𑀲𑁆𑀲𑁂𑀢𑀼𑀁. 𑀢𑁂𑀦𑁂𑀯 𑀪𑀕𑀯𑀦𑁆𑀢𑀁 𑀞𑀧𑁂𑀢𑁆𑀯𑀸 𑀧𑀜𑁆𑀜𑀯𑀦𑁆𑀢𑀸𑀦𑀁 𑀅𑀕𑁆𑀕𑀪𑀽𑀢𑁄 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑁄𑀧𑀺 𑀩𑀼𑀤𑁆𑀥𑀕𑀼𑀡𑀧𑀭𑀺𑀘𑁆𑀙𑁂𑀤𑀦𑀁 𑀧𑀢𑀺𑀅𑀦𑀼𑀬𑀼𑀢𑁆𑀢𑁄 ‘‘𑀅𑀧𑀺𑀘 𑀫𑁂, 𑀪𑀦𑁆𑀢𑁂, 𑀥𑀫𑁆𑀫𑀦𑁆𑀯𑀬𑁄 𑀯𑀺𑀤𑀺𑀢𑁄’’𑀢𑀺 (𑀤𑀻. 𑀦𑀺. 𑁨.𑁧𑁪𑁬) 𑀆𑀳𑀸𑀢𑀺.

𑀲𑀁𑀲𑀸𑀭𑀫𑀳𑁄𑀖𑀧𑀓𑁆𑀔𑀦𑁆𑀤𑀸𑀦𑀁 𑀲𑀢𑁆𑀢𑀸𑀦𑀁 𑀢𑀢𑁄 𑀲𑀦𑁆𑀢𑀸𑀭𑀡𑀢𑁆𑀣𑀁 𑀧𑀝𑀺𑀧𑀦𑁆𑀦𑁄 𑀢𑁂𑀳𑀺 𑀧𑀬𑁄𑀚𑀺𑀢𑁄 𑀦𑀸𑀫 𑀳𑁄𑀢𑀺 𑀅𑀲𑀢𑀺𑀧𑀺 𑀢𑁂𑀲𑀁 𑀢𑀣𑀸𑀯𑀺𑀥𑁂 𑀅𑀪𑀺𑀲𑀦𑁆𑀥𑀺𑀬𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀲𑀢𑁆𑀢𑀸 𑀳𑀺 𑀫𑀳𑀸𑀩𑁄𑀥𑀺𑀁 𑀧𑀬𑁄𑀚𑁂𑀦𑁆𑀢𑀻’’𑀢𑀺. 𑀏𑀢𑁂𑀦 𑀲𑀩𑁆𑀩𑁂𑀦𑀸𑀢𑀺 𑀫𑀳𑀸𑀩𑁄𑀥𑀺𑀫𑀽𑀮𑀸𑀤𑀺𑀤𑀲𑁆𑀲𑀦𑁂𑀦. 𑀅𑀧𑀕𑀫𑀦𑀁 𑀦𑀺𑀭𑀼𑀧𑀓𑁆𑀓𑀺𑀮𑁂𑀲𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀚𑀸𑀢𑀲𑀁𑀯𑀤𑁆𑀥𑀪𑀸𑀯𑀤𑀲𑁆𑀲𑀦𑁂𑀦 ‘‘𑀅𑀦𑀸𑀤𑀺 𑀅𑀦𑀺𑀥𑀦𑁄 𑀘 𑀲𑀢𑁆𑀢𑁄’’𑀢𑀺 𑀏𑀯𑀁𑀧𑀓𑀸𑀭𑀸 𑀫𑀺𑀘𑁆𑀙𑀸𑀯𑀸𑀤𑀸 𑀧𑀝𑀺𑀲𑁂𑀥𑀺𑀢𑀸 𑀳𑁄𑀦𑁆𑀢𑀺. 𑀲𑀫𑀜𑁆𑀜𑀸…𑀧𑁂… 𑀤𑀲𑁆𑀲𑁂𑀢𑀺 𑀲𑀢𑁆𑀢𑁂 𑀧𑀭𑀫𑀢𑁆𑀣𑀢𑁄 𑀅𑀲𑀢𑀺𑀧𑀺 𑀲𑀢𑁆𑀢𑀧𑀜𑁆𑀜𑀢𑁆𑀢𑀺𑀯𑁄𑀳𑀸𑀭𑀲𑀽𑀘𑀦𑀢𑁄. 𑀓𑀭𑀼𑀡𑀸 𑀆𑀤𑀺𑀧𑀜𑁆𑀜𑀸 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀇𑀤𑀁 𑀲𑀫𑁆𑀪𑀭𑀡𑀦𑀺𑀧𑁆𑀨𑀢𑁆𑀢𑀺𑀓𑀸𑀮𑀸𑀧𑁂𑀓𑁆𑀔𑀸𑀬 𑀯𑀼𑀢𑁆𑀢𑀁, 𑀦 𑀧𑀭𑀺𑀘𑁆𑀙𑁂𑀤𑀯𑀦𑁆𑀢𑀢𑀸𑀬. 𑀢𑁂𑀦𑁂𑀯𑀸𑀳 ‘‘𑀢𑀦𑁆𑀦𑀺𑀤𑀸𑀦𑀪𑀸𑀯𑀢𑁄 𑀢𑀢𑁄 𑀉𑀢𑁆𑀢𑀭𑀺𑀓𑀭𑀡𑀻𑀬𑀸𑀪𑀸𑀯𑀢𑁄’’𑀢𑀺. 𑀲𑀩𑁆𑀩𑁂 𑀩𑀼𑀤𑁆𑀥𑀕𑀼𑀡𑀸 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺 𑀦𑀬𑀢𑁄 𑀤𑀲𑁆𑀲𑀺𑀢𑀢𑁆𑀢𑀸. 𑀏𑀲𑁄 𑀏𑀯 𑀳𑀺 𑀅𑀦𑀯𑀲𑁂𑀲𑀢𑁄 𑀩𑀼𑀤𑁆𑀥𑀕𑀼𑀡𑀤𑀲𑁆𑀲𑀦𑀼𑀧𑀸𑀬𑁄 𑀬𑀤𑀺𑀤𑀁 𑀦𑀬𑀕𑁆𑀕𑀸𑀳𑀡𑀁. 𑀧𑀭𑀥𑀦𑀳𑀭𑀡𑀸𑀤𑀺𑀢𑁄𑀧𑀺 𑀯𑀺𑀭𑀢𑀺 𑀧𑀭𑁂𑀲𑀁 𑀅𑀦𑀢𑁆𑀣𑀧𑀭𑀺𑀳𑀭𑀡𑀯𑀲𑀧𑁆𑀧𑀯𑀢𑁆𑀢𑀺𑀬𑀸 𑀲𑀺𑀬𑀸 𑀓𑀭𑀼𑀡𑀽𑀧𑀦𑀺𑀲𑁆𑀲𑀬𑀸𑀢𑀺 𑀓𑀭𑀼𑀡𑀸𑀦𑀺𑀤𑀸𑀦𑀁 𑀲𑀻𑀮𑀁. 𑀢𑀢𑁄 𑀏𑀯 ‘‘𑀢𑀢𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑀺𑀭𑀢𑀺𑀧𑁆𑀧𑀯𑀢𑁆𑀢𑀺𑀢𑁄’’𑀢𑀺 𑀯𑀼𑀢𑁆𑀢𑀁.

𑁨. 𑀬𑀲𑁆𑀲𑀸 𑀲𑀁𑀯𑀡𑁆𑀡𑀦𑀦𑁆𑀢𑀺𑀆𑀤𑀺𑀦𑀸 ‘‘𑀤𑀬𑀸𑀬𑀸’’𑀢𑀺𑀆𑀤𑀺𑀣𑁄𑀫𑀦𑀸𑀬 𑀲𑀫𑁆𑀩𑀦𑁆𑀥𑀁 𑀤𑀲𑁆𑀲𑁂𑀢𑀺. 𑀧𑀬𑁄𑀚𑀦𑀁 𑀧𑀦 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀅𑀩𑁆𑀪𑀦𑁆𑀢𑀭𑀁 𑀦𑀺𑀬𑀓𑀚𑁆𑀛𑀢𑁆𑀢𑀁, 𑀢𑀢𑁄 𑀩𑀳𑀺𑀪𑀽𑀢𑀁 𑀩𑀸𑀳𑀺𑀭𑀁. 𑀤𑀬𑀸𑀢𑀺 𑀓𑀭𑀼𑀡𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀤𑀬𑀸-𑀲𑀤𑁆𑀤𑀲𑁆𑀲 𑀫𑁂𑀢𑁆𑀢𑀸𑀓𑀭𑀼𑀡𑀸𑀦𑀁 𑀯𑀸𑀘𑀓𑀢𑁆𑀢𑀸 𑀯𑀓𑁆𑀔𑀫𑀸𑀦𑀜𑁆𑀘 𑀅𑀦𑀼𑀬𑁄𑀕𑀁 𑀫𑀦𑀲𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀸𑀬 𑀳𑀺 𑀲𑀫𑀼𑀲𑁆𑀲𑀸𑀳𑀺𑀢𑁄, 𑀦 𑀫𑁂𑀢𑁆𑀢𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀲𑁆𑀲 𑀧𑀝𑀺𑀦𑀺𑀤𑁆𑀤𑁂𑀲𑁄 𑀳𑁄𑀢𑀻𑀢𑀺 𑀢-𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀆𑀳. 𑀢𑀦𑁆𑀢𑀺 𑀧𑀜𑁆𑀜𑀁 𑀯𑀺𑀲𑁂𑀲𑁂𑀢𑁆𑀯𑀸 𑀉𑀧𑀫𑀸𑀪𑀸𑀯𑁂𑀦 𑀯𑀺𑀦𑀺𑀯𑀢𑁆𑀢𑀸 𑀘𑀭𑀺𑀢𑀢𑁆𑀣𑀢𑀸𑀬. 𑀧𑀝𑀺𑀦𑀺𑀤𑁆𑀤𑁂𑀲𑀁 𑀦𑀸𑀭𑀳𑀢𑀺 𑀧𑀥𑀸𑀦𑀸𑀧𑀥𑀸𑀦𑁂𑀲𑀼 𑀧𑀥𑀸𑀦𑁂 𑀓𑀺𑀘𑁆𑀘𑀤𑀲𑁆𑀲𑀦𑀢𑁄. 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁…𑀧𑁂… 𑀯𑀢𑁄𑀢𑀺 𑀓𑀭𑀼𑀡𑀸𑀯𑀸𑀘𑀺𑀦𑀸 𑀤𑀬𑀸-𑀲𑀤𑁆𑀤𑁂𑀦 𑀏𑀓𑀸𑀥𑀺𑀓𑀭𑀡𑀪𑀸𑀯𑁂𑀦 𑀯𑀼𑀘𑁆𑀘𑀫𑀸𑀦𑁄 𑀢-𑀲𑀤𑁆𑀤𑁄 𑀢𑀢𑁄 𑀅𑀜𑁆𑀜𑀥𑀫𑁆𑀫𑀯𑀺𑀲𑀬𑁄 𑀪𑀯𑀺𑀢𑀼𑀁 𑀦 𑀬𑀼𑀢𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀧𑀭𑀺𑀬𑀸𑀬𑀲𑀤𑁆𑀤𑀸𑀦𑀁 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁄 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁂 𑀲𑀢𑀺 𑀳𑁄𑀢𑀺, 𑀦𑀸𑀜𑁆𑀜𑀣𑀸𑀢𑀺 𑀆𑀳 ‘‘𑀲𑀫𑀸𑀦𑀸…𑀧𑁂… 𑀳𑁄𑀢𑀻’’𑀢𑀺. 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁂𑀦 𑀳𑁂𑀢𑁆𑀣 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁄 𑀲𑀸𑀥𑀻𑀬𑀢𑀺, 𑀲𑀸 𑀘 𑀲𑀫𑀸𑀦𑀸𑀥𑀺𑀓𑀭𑀡𑀢𑀸 𑀯𑀺𑀲𑀺𑀝𑁆𑀞𑀯𑀺𑀪𑀢𑁆𑀢𑀺𑀓𑀸𑀦𑀁 𑀦 𑀳𑁄𑀢𑀻𑀢𑀺 𑀲𑀫𑀸𑀦𑀯𑀺𑀪𑀢𑁆𑀢𑀺𑀢𑀸𑀬𑀧𑀺 𑀢𑀫𑁂𑀯 𑀲𑀸𑀥𑀻𑀬𑀢𑀻𑀢𑀺 ‘‘𑀤𑀬𑀸…𑀧𑁂… 𑀘𑀺𑀤’’𑀦𑁆𑀢𑀺 𑀇𑀤𑀁 𑀤𑀬𑀸𑀬 𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁂 𑀓𑀸𑀭𑀡𑀯𑀘𑀦𑀁. 𑀧𑀥𑀸𑀦𑀢𑀸𑀬 𑀳𑀺 𑀲𑀸𑀫𑀜𑁆𑀜𑀢𑀸𑀬 𑀘 𑀲𑀸 𑀯𑀺𑀲𑁂𑀲𑀺𑀢𑀩𑁆𑀩𑀸 𑀚𑀸𑀢𑀸. 𑀢𑀢𑁆𑀣 𑀪𑀕𑀯𑀢𑁄 𑀢𑀤𑀜𑁆𑀜𑁂𑀲𑀜𑁆𑀘 𑀓𑀭𑀼𑀡𑀸𑀦𑀁 𑀯𑀸𑀘𑀓𑀢𑁆𑀢𑀸 𑀲𑀸𑀫𑀜𑁆𑀜𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀲𑁆𑀲 𑀘𑀸𑀢𑀺 𑀤𑀬𑀸-𑀲𑀤𑁆𑀤𑀲𑁆𑀲. ‘‘𑀧𑀥𑀸𑀦𑀜𑁆𑀘 𑀧𑀜𑁆𑀜’’𑀦𑁆𑀢𑀺𑀆𑀤𑀺𑀦𑀸 𑀓𑀺𑀜𑁆𑀘𑀸𑀧𑀺 𑀧𑀼𑀭𑀺𑀫𑀕𑀸𑀣𑀸𑀬 𑀧𑀜𑁆𑀜𑀸𑀧𑁆𑀧𑀥𑀸𑀦𑀸, ‘‘𑀢𑀸𑀬𑀸’’𑀢𑀺 𑀧𑀦 𑀓𑁂𑀯𑀮𑀁 𑀅𑀯𑀢𑁆𑀯𑀸 𑀤𑀬𑀸𑀯𑀺𑀲𑁂𑀲𑀦𑀪𑀸𑀯𑁂𑀦 𑀯𑀼𑀢𑁆𑀢𑀢𑁆𑀢𑀸 𑀅𑀧𑁆𑀧𑀥𑀸𑀦𑀸𑀬𑀧𑀺 𑀓𑀭𑀼𑀡𑀸𑀬 𑀧𑀝𑀺𑀦𑀺𑀤𑁆𑀤𑁂𑀲𑁄 𑀬𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀧𑁆𑀧𑀥𑀸𑀦𑀢𑀸 𑀘 𑀓𑀭𑀼𑀡𑀸𑀬 𑀧𑀼𑀭𑀺𑀫𑀕𑀸𑀣𑀸𑀬 𑀯𑀲𑁂𑀦 𑀯𑀼𑀢𑁆𑀢𑀸, 𑀇𑀥 𑀧𑀦 𑀧𑀥𑀸𑀦𑀸 𑀏𑀯. 𑀢𑀣𑀸 𑀘 𑀯𑀼𑀢𑁆𑀢𑀁 ‘‘𑀤𑀬𑀸𑀲𑀫𑀼𑀲𑁆𑀲𑀸𑀳𑀺𑀦𑀻𑀢𑀺 𑀧𑀥𑀸𑀦𑀸’’𑀢𑀺 (𑀥. 𑀲. 𑀫𑀽𑀮𑀝𑀻. 𑁨).

𑀓𑀣𑀁 𑀧𑀦…𑀧𑁂… 𑀜𑀸𑀢𑀩𑁆𑀩𑀸𑀢𑀺 𑀯𑀓𑁆𑀔𑀫𑀸𑀦𑀜𑁆𑀜𑁂𑀯 𑀅𑀢𑁆𑀣𑀁 𑀳𑀤𑀬𑁂 𑀞𑀧𑁂𑀢𑁆𑀯𑀸 𑀘𑁄𑀤𑁂𑀢𑀺. 𑀬𑀤𑀺 𑀏𑀯𑀦𑁆𑀢𑀺 𑀬𑀤𑀺 𑀅𑀝𑁆𑀞𑀓𑀣𑀸𑀬 𑀅𑀥𑀺𑀧𑁆𑀧𑀸𑀬𑀁 𑀅𑀕𑁆𑀕𑀳𑁂𑀢𑁆𑀯𑀸 𑀯𑀘𑀦𑀫𑀢𑁆𑀢𑀫𑁂𑀯 𑀕𑀡𑁆𑀳𑀲𑀺. 𑀫𑁂𑀢𑁆𑀢𑀸𑀢𑀺 𑀘 𑀦 𑀬𑀼𑀚𑁆𑀚𑁂𑀬𑁆𑀬𑀸𑀢𑀺 𑀬𑀣𑀸 ‘‘𑀫𑁂𑀢𑁆𑀢𑀘𑀺𑀢𑁆𑀢𑀢𑀁 𑀆𑀧𑀦𑁆𑀦𑁄’’𑀢𑀺 𑀏𑀢𑀺𑀲𑁆𑀲𑀸 𑀅𑀝𑁆𑀞𑀓𑀣𑀸𑀬 𑀯𑀲𑁂𑀦 𑀦 𑀤𑀬𑀸 𑀓𑀭𑀼𑀡𑀸, 𑀏𑀯𑀁 ‘‘𑀦𑀺𑀓𑁆𑀓𑀭𑀼𑀡𑀢𑀁 𑀆𑀧𑀦𑁆𑀦𑁄’’𑀢𑀺 𑀏𑀢𑀺𑀲𑁆𑀲𑀸 𑀅𑀝𑁆𑀞𑀓𑀣𑀸𑀬 𑀯𑀲𑁂𑀦 𑀦 𑀤𑀬𑀸 𑀫𑁂𑀢𑁆𑀢𑀸𑀢𑀺 𑀯𑀘𑀦𑀫𑀢𑁆𑀢𑀕𑁆𑀕𑀳𑀡𑁂 𑀅𑀝𑁆𑀞𑀓𑀣𑀸𑀦𑀫𑁆𑀧𑀺 𑀯𑀺𑀭𑁄𑀥𑀁 𑀤𑀲𑁆𑀲𑁂𑀢𑀺. ‘‘𑀅𑀥𑀺𑀧𑁆𑀧𑀸𑀬𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑁄’’𑀢𑀺 𑀯𑀢𑁆𑀯𑀸 𑀢𑀫𑁂𑀯 𑀅𑀥𑀺𑀧𑁆𑀧𑀸𑀬𑀁 𑀤𑀬𑀸-𑀲𑀤𑁆𑀤𑁄 𑀳𑀻𑀢𑀺𑀆𑀤𑀺𑀦𑀸 𑀯𑀺𑀯𑀭𑀢𑀺. 𑀅𑀓𑁆𑀔𑀭𑀘𑀺𑀦𑁆𑀢𑀓𑀸 𑀳𑀺 𑀤𑀬𑀸-𑀲𑀤𑁆𑀤𑀁 𑀤𑀸𑀦𑀕𑀢𑀺𑀭𑀓𑁆𑀔𑀡𑁂𑀲𑀼 𑀧𑀞𑀦𑁆𑀢𑀺. 𑀅𑀦𑀼𑀭𑀓𑁆𑀔𑀡𑀜𑁆𑀘 𑀫𑁂𑀢𑁆𑀢𑀸𑀓𑀭𑀼𑀡𑀸𑀦𑀁 𑀳𑀺𑀢𑀽𑀧𑀲𑀁𑀳𑀸𑀭𑀤𑀼𑀓𑁆𑀔𑀸𑀧𑀦𑀬𑀦𑀸𑀓𑀸𑀭𑀯𑀼𑀢𑁆𑀢𑀻𑀦𑀁 𑀲𑀫𑀸𑀦𑀓𑀺𑀘𑁆𑀘𑀁, 𑀢𑀲𑁆𑀫𑀸 𑀉𑀪𑀬𑀢𑁆𑀣 𑀤𑀬𑀸-𑀲𑀤𑁆𑀤𑁄 𑀧𑀯𑀢𑁆𑀢𑀢𑀻𑀢𑀺 𑀯𑀼𑀢𑁆𑀢𑀁. 𑀅𑀦𑁆𑀢𑁄𑀦𑀻𑀢𑀦𑁆𑀢𑀺 𑀅𑀦𑁆𑀢𑁄𑀕𑀥𑀁, 𑀭𑀼𑀓𑁆𑀔𑀢𑁆𑀣𑁄 𑀯𑀺𑀬 𑀥𑀯𑀔𑀤𑀺𑀭𑀸𑀤𑀻𑀦𑀁 𑀅𑀦𑀼𑀭𑀓𑁆𑀔𑀡𑀢𑁆𑀣𑁄 𑀫𑁂𑀢𑁆𑀢𑀸𑀓𑀭𑀼𑀡𑀸𑀦𑀁 𑀲𑀸𑀫𑀜𑁆𑀜𑀦𑁆𑀢𑀺 𑀅𑀢𑁆𑀣𑁄, 𑀅𑀥𑀺𑀧𑁆𑀧𑀸𑀬𑁄 𑀧𑀦 ‘‘𑀤𑀬𑀸𑀧𑀦𑁆𑀦𑁄’’𑀢𑀺 𑀏𑀢𑁆𑀣 𑀲𑀩𑁆𑀩𑀧𑀸𑀡𑀪𑀽𑀢𑀳𑀺𑀢𑀸𑀦𑀼𑀓𑀫𑁆𑀧𑀻𑀢𑀺 𑀅𑀦𑀦𑁆𑀢𑀭𑀁 𑀓𑀭𑀼𑀡𑀸𑀬 𑀯𑀼𑀢𑁆𑀢𑀢𑁆𑀢𑀸 𑀤𑀬𑀸-𑀲𑀤𑁆𑀤𑁄 𑀫𑁂𑀢𑁆𑀢𑀸𑀧𑀭𑀺𑀬𑀸𑀬𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀫𑁂𑀢𑁆𑀢𑀸𑀧𑀺 𑀳𑀺 𑀓𑀭𑀼𑀡𑀸 𑀯𑀺𑀬 𑀧𑀸𑀡𑀸𑀢𑀺𑀧𑀸𑀢𑀯𑀺𑀭𑀢𑀺𑀬𑀸 𑀓𑀸𑀭𑀡𑀦𑁆𑀢𑀺. ‘‘𑀅𑀤𑀬𑀸𑀧𑀦𑁆𑀦𑁄’’𑀢𑀺 𑀏𑀢𑁆𑀣 𑀧𑀦 𑀓𑀸𑀭𑀼𑀡𑀺𑀓𑁄 𑀅𑀯𑀺𑀳𑀺𑀁 𑀲𑀚𑁆𑀛𑀸𑀲𑀬𑀢𑁆𑀢𑀸 𑀧𑀭𑁂𑀲𑀁 𑀯𑀺𑀳𑁂𑀲𑀸𑀫𑀢𑁆𑀢𑀫𑁆𑀧𑀺 𑀦 𑀓𑀭𑁄𑀢𑀺, 𑀓𑁄 𑀧𑀦 𑀯𑀸𑀤𑁄 𑀧𑀸𑀡𑀸𑀢𑀺𑀧𑀸𑀢𑀦𑁂𑀢𑀺 𑀦𑀺𑀓𑁆𑀓𑀭𑀼𑀡𑀢𑀸𑀬 𑀧𑀸𑀡𑀸𑀢𑀺𑀧𑀸𑀢𑀺𑀢𑀸 𑀤𑀲𑁆𑀲𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀢𑀫𑁂𑀯𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀏𑀯𑀜𑁆𑀳𑀺 𑀅𑀝𑁆𑀞𑀓𑀣𑀸𑀦𑀁 𑀅𑀯𑀺𑀭𑁄𑀥𑁄 𑀳𑁄𑀢𑀻’’𑀢𑀺 𑀆𑀳. 𑀬𑀤𑀺 𑀤𑀬𑀸-𑀲𑀤𑁆𑀤𑁄 𑀫𑁂𑀢𑁆𑀢𑀸𑀓𑀭𑀼𑀡𑀸𑀦𑀁 𑀯𑀸𑀘𑀓𑁄, 𑀏𑀯𑀫𑁆𑀧𑀺𑀓𑀣𑀁 𑀧𑀦 𑀓𑀭𑀼𑀡𑀸 ‘‘𑀤𑀬𑀸’’𑀢𑀺 𑀚𑀸𑀦𑀺𑀢𑀩𑁆𑀩𑀸𑀢𑀺 𑀅𑀦𑀼𑀬𑁄𑀕𑁄 𑀢𑀤𑀯𑀢𑁆𑀣𑁄 𑀏𑀯𑀸𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀓𑀭𑀼𑀡𑀸 𑀘 𑀤𑁂𑀲𑀦𑀸𑀬𑀸𑀢𑀺𑀆𑀤𑀺𑀦𑀸 𑀓𑀭𑀼𑀡𑀸𑀬 𑀏𑀯 𑀕𑀳𑀡𑁂 𑀓𑀸𑀭𑀡𑀫𑀸𑀳.

𑀦𑀦𑀼 𑀢𑀸𑀬𑀸𑀢𑀺𑀆𑀤𑀺𑀦𑀸 𑀲𑀸𑀫𑀢𑁆𑀣𑀺𑀬𑀢𑁄𑀧𑀺 𑀧𑀓𑀭𑀡𑀁 𑀩𑀮𑀯𑀦𑁆𑀢𑀺 𑀧𑀓𑀭𑀡𑀯𑀲𑁂𑀦𑁂𑀯 𑀓𑀭𑀼𑀡𑀸𑀯𑀺𑀲𑀬𑀲𑁆𑀲 𑀜𑀸𑀢𑀢𑀁 𑀤𑀲𑁆𑀲𑁂𑀢𑀺. 𑀬𑀣𑀸𑀭𑀼𑀘𑀺 𑀧𑀯𑀢𑁆𑀢𑀺𑀢𑁆𑀣𑀸𑀢𑀺 𑀏𑀢𑀁 𑀧𑀼𑀭𑀺𑀫𑀕𑀸𑀣𑀸𑀬 𑀲𑀧𑁆𑀧𑀤𑁂𑀲𑀦𑀺𑀧𑁆𑀧𑀤𑁂𑀲𑀲𑀢𑁆𑀢𑀯𑀺𑀲𑀬𑀸𑀬 𑀓𑀭𑀼𑀡𑀸𑀬 𑀕𑀳𑀺𑀢𑀪𑀸𑀯𑀲𑁆𑀲 𑀓𑀸𑀭𑀡𑀯𑀘𑀦𑀁. 𑀬𑀣𑀸𑀭𑀼𑀘𑀺𑀧𑀯𑀢𑁆𑀢𑀺 𑀳𑀺 𑀏𑀓𑀲𑁆𑀫𑀺𑀁 𑀅𑀦𑁂𑀓𑁂𑀲𑀼 𑀘 𑀇𑀘𑁆𑀙𑀸𑀦𑀼𑀭𑀽𑀧𑀧𑁆𑀧𑀯𑀢𑁆𑀢𑀻𑀢𑀺. ‘‘𑀇𑀥 𑀧𑀦 𑀦𑀺𑀧𑁆𑀧𑀤𑁂𑀲𑀲𑀢𑁆𑀢𑀯𑀺𑀲𑀬𑀢𑀁 𑀕𑀳𑁂𑀢𑀼’’𑀦𑁆𑀢𑀺 𑀏𑀢𑁂𑀦 𑀲𑀺𑀤𑁆𑀥𑁂 𑀲𑀢𑀺 𑀆𑀭𑀫𑁆𑀪𑁄 𑀜𑀸𑀧𑀓𑀢𑁆𑀣𑁄 𑀳𑁄𑀢𑀻𑀢𑀺 𑀧𑀼𑀦 ‘‘𑀲𑀢𑁆𑀢𑁂𑀲𑀽’’𑀢𑀺 𑀯𑀘𑀦𑀁 𑀇𑀫𑀫𑀢𑁆𑀣𑀯𑀺𑀲𑁂𑀲𑀁 𑀩𑁄𑀥𑁂𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀦 𑀤𑁂𑀯𑁂𑀲𑀼𑀬𑁂𑀯𑀸𑀢𑀺𑀆𑀤𑀺𑀦𑀸𑀧𑀺 𑀤𑀬𑀸𑀲𑀸𑀥𑀦𑀲𑁆𑀲 𑀲𑀫𑀼𑀲𑁆𑀲𑀸𑀳𑀦𑀲𑁆𑀲 𑀲𑀢𑁆𑀢𑀯𑀺𑀲𑀬𑀪𑀸𑀯𑁂 𑀲𑀸𑀫𑀢𑁆𑀣𑀺𑀬𑀮𑀤𑁆𑀥𑁂𑀧𑀺 ‘‘𑀲𑀢𑁆𑀢𑁂𑀲𑀽’’𑀢𑀺 𑀯𑀘𑀦𑀁 𑀢𑀲𑁆𑀲 𑀦𑀺𑀧𑁆𑀧𑀤𑁂𑀲𑀲𑀢𑁆𑀢𑀯𑀺𑀲𑀬𑀪𑀸𑀯𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀇𑀫𑀁 𑀯𑀺𑀲𑁂𑀲𑀁 𑀜𑀸𑀧𑁂𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀓𑀸𑀮𑀤𑁂𑀲𑀤𑁂𑀲𑀓𑀧𑀭𑀺𑀲𑀸𑀤𑀺𑀧𑀭𑀺𑀤𑀻𑀧𑀦𑀁 𑀩𑀸𑀳𑀺𑀭𑀦𑀺𑀤𑀸𑀦𑀦𑁆𑀢𑀺 𑀓𑀸𑀮𑀸𑀤𑀻𑀦𑀺 𑀦𑀺𑀤𑁆𑀥𑀸𑀭𑁂𑀦𑁆𑀢𑁄 ‘‘𑀬𑀲𑁆𑀫𑀺𑀁 𑀓𑀸𑀮𑁂’’𑀢𑀺𑀆𑀤𑀺𑀫𑀸𑀳. 𑀅𑀯𑀲𑀸𑀦𑀫𑁆𑀳𑀺 𑀯𑀲𑀦𑁆𑀢𑁄 𑀢𑀺𑀤𑀲𑀸𑀮𑀬𑁂𑀢𑀺 𑀯𑀘𑀦𑀢𑁄𑀢𑀺 𑀏𑀢𑁂𑀦 𑀢𑀲𑁆𑀲 𑀧𑀸𑀝𑀺𑀳𑀸𑀭𑀺𑀬𑀲𑁆𑀲 𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑁂𑀦 𑀅𑀯𑀘𑁆𑀙𑀺𑀦𑁆𑀦𑀢𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀧𑀯𑀢𑁆𑀢𑀯𑁄𑀳𑀸𑀭𑁂𑀦 𑀘 𑀦 𑀲𑀓𑁆𑀓𑀸𑀢𑀺 𑀧𑀼𑀣𑀼𑀚𑁆𑀚𑀦𑀲𑀦𑁆𑀢𑀸𑀦𑁂𑀧𑀺 𑀭𑀸𑀕𑀸𑀤𑀺𑀧𑀝𑀺𑀧𑀓𑁆𑀔𑀳𑀭𑀡𑀲𑁆𑀲 𑀅𑀪𑀸𑀯𑀢𑁄 𑀦𑀺𑀘𑁆𑀙𑀦𑁆𑀤𑀭𑀸𑀕𑁂𑀲𑀼 𑀲𑀢𑁆𑀢𑀯𑁄𑀳𑀸𑀭𑁄 𑀯𑀺𑀬 𑀧𑀼𑀣𑀼𑀚𑁆𑀚𑀦𑀲𑀦𑁆𑀢𑀸𑀦𑁂 𑀭𑀸𑀕𑀸𑀤𑀺𑀧𑀝𑀺𑀧𑀓𑁆𑀔𑀳𑀭𑀡𑀯𑀲𑁂𑀦 𑀧𑀯𑀢𑁆𑀢𑀁 𑀢𑀤𑀪𑀸𑀯𑁂𑀧𑀺 𑀪𑀕𑀯𑀢𑁄 𑀲𑀦𑁆𑀢𑀸𑀦𑁂 𑀭𑀼𑀴𑁆𑀳𑀻𑀯𑀲𑁂𑀦 𑀧𑀸𑀝𑀺𑀳𑀸𑀭𑀺𑀬𑀦𑁆𑀢𑁆𑀯𑁂𑀯 𑀯𑀼𑀘𑁆𑀘𑀢𑀻𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀤𑀺𑀝𑁆𑀞𑀺𑀳𑀭𑀡𑀯𑀲𑁂𑀦 𑀬𑁂 𑀲𑀫𑁆𑀫𑀸𑀤𑀺𑀝𑁆𑀞𑀺𑀓𑀸 𑀚𑀸𑀢𑀸 𑀅𑀘𑁂𑀮𑀓𑀓𑀲𑁆𑀲𑀧𑀸𑀤𑀬𑁄 𑀯𑀺𑀬, 𑀤𑀺𑀝𑁆𑀞𑀺𑀧𑁆𑀧𑀓𑀸𑀲𑀦𑁂 𑀅𑀲𑀫𑀢𑁆𑀣𑀪𑀸𑀯𑁂𑀦 𑀅𑀧𑁆𑀧𑀝𑀺𑀪𑀸𑀦𑀪𑀸𑀯𑀸𑀤𑀺𑀧𑁆𑀧𑀢𑁆𑀢𑀺𑀬𑀸 𑀲𑀘𑁆𑀘𑀓𑀸𑀤𑀬𑁄 𑀯𑀺𑀬.

𑁩. 𑀲𑀻𑀢𑀧𑀩𑁆𑀩𑀢𑀸 𑀦𑀸𑀫 ‘‘𑀲𑀺𑀦𑁂𑀭𑀼𑀁 𑀧𑀭𑀺𑀯𑀸𑀭𑁂𑀢𑁆𑀯𑀸 𑀞𑀺𑀢𑀸 𑀬𑀼𑀕𑀦𑁆𑀥𑀭𑁄…𑀧𑁂… 𑀕𑀺𑀭𑀺 𑀩𑁆𑀭𑀳𑀸’’𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁧𑁩𑁭; 𑀧𑀸𑀭𑀸. 𑀅𑀝𑁆𑀞. 𑁧.𑁧 𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸) 𑀏𑀯𑀁 𑀯𑀼𑀢𑁆𑀢𑀧𑀩𑁆𑀩𑀢𑀸.

𑁪-𑁫. 𑀲𑀩𑁆𑀩𑀲𑁄 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀳𑀺 𑀲𑀩𑁆𑀩𑀲𑁄 𑀆𑀕𑀫𑁆𑀫 𑀲𑀩𑁆𑀩𑀲𑁄 𑀲𑀦𑁆𑀦𑀺𑀲𑀺𑀦𑁆𑀦𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑀯𑀲𑁂𑀦 𑀢𑀬𑁄 𑀯𑀺𑀓𑀧𑁆𑀧𑀸 𑀬𑀼𑀢𑁆𑀢𑀸, 𑀲𑀩𑁆𑀩𑀲𑁄 𑀘𑀓𑁆𑀓𑀯𑀸𑀴𑀲𑀳𑀲𑁆𑀲𑁂𑀳𑀺 𑀤𑀲𑀳𑀺 𑀤𑀲𑀳𑀻𑀢𑀺 𑀧𑀦 𑀅𑀦𑀺𑀝𑁆𑀞𑀲𑀸𑀥𑀦𑀢𑁄 𑀧𑀝𑀺𑀲𑁂𑀥𑀺𑀢𑁄. 𑀯𑀚𑁆𑀚𑀺𑀢𑀩𑁆𑀩𑁂𑀢𑀺 𑀬𑁂 𑀯𑀚𑁆𑀚𑁂𑀢𑀼𑀁 𑀲𑀓𑁆𑀓𑀸 ‘‘𑀅𑀢𑀺𑀲𑀫𑁆𑀫𑀼𑀔𑀸 𑀅𑀢𑀺𑀲𑀫𑀻𑀧𑀁 𑀉𑀦𑁆𑀦𑀢𑀧𑁆𑀧𑀤𑁂𑀲𑁄’’𑀢𑀺, 𑀏𑀢𑁂. 𑀇𑀢𑀭𑁂 𑀧𑀦 𑀢𑀲𑁆𑀲𑀸 𑀧𑀭𑀺𑀲𑀸𑀬 𑀫𑀳𑀦𑁆𑀢𑀪𑀸𑀯𑁂𑀦 𑀦 𑀲𑀓𑁆𑀓𑀸 𑀧𑀭𑀺𑀳𑀭𑀺𑀢𑀼𑀁.

‘‘𑀲𑀩𑁆𑀩𑀜𑁂𑀬𑁆𑀬…𑀧𑁂… 𑀲𑀫𑀢𑁆𑀣𑀸’’𑀢𑀺 𑀯𑀢𑁆𑀯𑀸 𑀢𑁂𑀲𑀁 𑀤𑁂𑀲𑁂𑀢𑀩𑁆𑀩𑀧𑁆𑀧𑀓𑀸𑀭𑀚𑀸𑀦𑀦𑀲𑀫𑀢𑁆𑀣𑀸𑀢𑀺 𑀯𑀘𑀦𑀁 𑀅𑀢𑁆𑀢𑀦𑀸 𑀧𑀝𑀺𑀯𑀺𑀤𑁆𑀥𑀸𑀓𑀸𑀭𑀲𑁆𑀲 𑀥𑀫𑁆𑀫𑀲𑀸𑀫𑀺𑀦𑀸𑀧𑀺 𑀧𑀭𑁂𑀲𑀁 𑀤𑁂𑀲𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀯𑀼𑀢𑁆𑀢𑀁. 𑀅𑀜𑁆𑀜𑀣𑀸 𑀲𑀩𑁆𑀩𑁂𑀧𑀺 𑀲𑀢𑁆𑀢𑀸 𑀤𑀺𑀝𑁆𑀞𑀲𑀘𑁆𑀘𑀸 𑀏𑀯 𑀪𑀯𑁂𑀬𑁆𑀬𑀼𑀁. 𑀲𑀩𑁆𑀩𑀜𑁂𑀬𑁆𑀬𑀥𑀫𑁆𑀫𑀸𑀦𑀁 𑀬𑀣𑀸𑀲𑀪𑀸𑀯𑀚𑀸𑀦𑀦𑀲𑀫𑀢𑁆𑀣𑀢𑀸𑀤𑀺𑀬𑁂𑀯 𑀬𑀣𑀸𑀯𑀼𑀢𑁆𑀢𑀩𑀮𑀁. 𑀢𑁂𑀲𑀁 𑀕𑀳𑀡𑀲𑀫𑀢𑁆𑀣𑀢𑀁 𑀤𑀻𑀧𑁂𑀢𑀺, 𑀅𑀥𑀺𑀓𑀯𑀘𑀦𑀫𑀜𑁆𑀜𑀫𑀢𑁆𑀣𑀁 𑀩𑁄𑀥𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁬. 𑀢𑀣𑀸𑀕𑀢𑁄 𑀯𑀦𑁆𑀤𑀦𑀻𑀬𑁄𑀢𑀺𑀆𑀤𑀺𑀦𑀸 ‘‘𑀦𑀫𑀲𑁆𑀲𑀺𑀢𑁆𑀯𑀸’’𑀢𑀺𑀆𑀤𑀺𑀓𑀺𑀭𑀺𑀬𑀸𑀯𑀺𑀲𑁂𑀲𑀸𑀦𑀁 𑀢𑀁𑀢𑀁𑀲𑀼𑀢𑁆𑀢𑀸𑀦𑀼𑀭𑁄𑀥𑁂𑀦 𑀧𑀯𑀢𑁆𑀢𑀺𑀢𑀫𑀸𑀳. 𑀲𑀭𑀻𑀭𑀲𑁄𑀪𑀕𑁆𑀕𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀓𑀮𑁆𑀬𑀸𑀡𑀯𑀸𑀓𑁆𑀓𑀭𑀡𑀢𑀸𑀆𑀥𑀺𑀧𑀘𑁆𑀘𑀧𑀭𑀺𑀯𑀸𑀭𑀲𑀫𑁆𑀧𑀢𑁆𑀢𑀺𑀆𑀤𑀺 𑀲𑀗𑁆𑀕𑀬𑁆𑀳𑀢𑀺.

𑁭. 𑀅𑀦𑁆𑀢𑀭𑀥𑀸𑀧𑁂𑀢𑁆𑀯𑀸𑀢𑀺 𑀦𑀺𑀭𑁄𑀥𑁂𑀢𑁆𑀯𑀸. 𑀦𑀺𑀭𑁄𑀥𑀦𑀜𑁆𑀘𑁂𑀢𑁆𑀣 𑀉𑀧𑁆𑀧𑀸𑀤𑀓𑀳𑁂𑀢𑀼𑀧𑀭𑀺𑀳𑀭𑀡𑀯𑀲𑁂𑀦 𑀢𑁂𑀲𑀁 𑀅𑀦𑀼𑀧𑁆𑀧𑀢𑁆𑀢𑀺𑀓𑀭𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻𑀢𑀺 𑀲𑀫𑁆𑀩𑀦𑁆𑀥𑁄𑀢𑀺 ‘‘𑀲𑁄𑀲𑁂𑀢𑁆𑀯𑀸’’𑀢𑀺 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀬 𑀅𑀧𑀭𑀓𑀸𑀮𑀓𑀺𑀭𑀺𑀬𑀸𑀧𑁂𑀓𑁆𑀔𑀢𑀸𑀬 𑀯𑀼𑀢𑁆𑀢𑀁.

𑁮. 𑀤𑀼𑀓𑁆𑀓𑀭𑀪𑀸𑀯𑀁 𑀤𑀻𑀧𑁂𑀢𑀼𑀦𑁆𑀢𑀺 𑀅𑀤𑀼𑀓𑁆𑀓𑀭𑀲𑁆𑀲 𑀢𑀣𑀸𑀅𑀪𑀺𑀬𑀸𑀘𑁂𑀢𑀩𑁆𑀩𑀢𑀸𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀸𑀭𑀸𑀚𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑀸𑀦𑀁 𑀲𑀻𑀮𑀯𑀺𑀧𑀢𑁆𑀢𑀺𑀪𑀸𑀯𑀢𑁄 𑀣𑀼𑀮𑁆𑀮𑀘𑁆𑀘𑀬𑀸𑀤𑀻𑀦𑀜𑁆𑀘 𑀬𑁂𑀪𑀼𑀬𑁆𑀬𑁂𑀦 𑀆𑀘𑀸𑀭𑀯𑀺𑀧𑀢𑁆𑀢𑀺𑀪𑀸𑀯𑀢𑁄 𑀆𑀘𑀸𑀭𑀲𑀻𑀮𑀸𑀦𑀁 𑀢𑀣𑀸 𑀬𑁄𑀚𑀦𑀸 𑀓𑀢𑀸, 𑀢𑀣𑀸 𑀘𑀸𑀭𑀺𑀢𑁆𑀢𑀲𑀻𑀮𑀲𑁆𑀲 𑀆𑀘𑀸𑀭𑀲𑀪𑀸𑀯𑀢𑁆𑀢𑀸 𑀇𑀢𑀭𑀁 𑀲𑀪𑀸𑀯𑁂𑀦𑁂𑀯 𑀕𑀳𑁂𑀢𑁆𑀯𑀸 𑀤𑀼𑀢𑀺𑀬𑀸. 𑀅𑀲𑀓𑁆𑀓𑀼𑀡𑁂𑀬𑁆𑀬𑀦𑁆𑀢𑀺 𑀯𑀺𑀲𑀼𑀤𑁆𑀥𑀸𑀘𑀸𑀭𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀢𑁂𑀦 𑀲𑀩𑁆𑀭𑀳𑁆𑀫𑀘𑀸𑀭𑀺𑀦𑀸 𑀲𑀤𑁆𑀥𑀫𑁆𑀫𑀘𑀺𑀭𑀝𑁆𑀞𑀺𑀢𑀢𑁆𑀣𑀁 𑀲𑀸𑀤𑀭𑀁 𑀅𑀪𑀺𑀬𑀸𑀘𑀺𑀢𑁂𑀦 𑀢𑁂𑀦 𑀘 𑀅𑀪𑀺𑀥𑀫𑁆𑀫𑀢𑁆𑀣𑀧𑁆𑀧𑀓𑀸𑀲𑀦𑁂 𑀲𑀫𑀢𑁆𑀣𑁄𑀢𑀺 𑀬𑀸𑀣𑀸𑀯𑀢𑁄 𑀧𑀫𑀸𑀡𑀺𑀢𑁂𑀦 𑀢𑀩𑁆𑀩𑀺𑀫𑀼𑀔𑀪𑀸𑀯𑁄 𑀦 𑀲𑀼𑀓𑀭𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁯. 𑀤𑁂𑀯𑀤𑁂𑀯-𑀲𑀤𑁆𑀤𑀲𑁆𑀲 𑀅𑀢𑁆𑀣𑁄 𑀧𑀝𑁆𑀞𑀸𑀦𑀲𑀁𑀯𑀡𑁆𑀡𑀦𑀸𑀝𑀻𑀓𑀸𑀬𑀁 𑀯𑀺𑀧𑀜𑁆𑀘𑀺𑀢𑁄𑀢𑀺 𑀦 𑀯𑀺𑀢𑁆𑀣𑀸𑀭𑀬𑀺𑀫𑁆𑀳.

𑁧𑁩. 𑀧𑀞𑀫𑀲𑀗𑁆𑀕𑀻𑀢𑀺𑀬𑀁 𑀬𑀸 𑀅𑀝𑁆𑀞𑀓𑀣𑀸 𑀲𑀗𑁆𑀕𑀻𑀢𑀸𑀢𑀺 𑀯𑀘𑀦𑁂𑀦 𑀲𑀸 𑀪𑀕𑀯𑀢𑁄 𑀥𑀭𑀫𑀸𑀦𑀓𑀸𑀮𑁂𑀧𑀺 𑀅𑀝𑁆𑀞𑀓𑀣𑀸 𑀲𑀁𑀯𑀺𑀚𑁆𑀚𑀢𑀺, 𑀢𑁂𑀦 𑀧𑀸𑀞𑁄 𑀯𑀺𑀬 𑀪𑀕𑀯𑀁𑀫𑀽𑀮𑀺𑀓𑀸𑀯𑀸𑀢𑀺 𑀯𑀺𑀜𑁆𑀜𑀸𑀬𑀢𑀺. ‘‘𑀅𑀪𑀺𑀥𑀫𑁆𑀫𑀲𑁆𑀲𑀸’’𑀢𑀺 𑀧𑀤𑀁 ‘‘𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻’’𑀢𑀺 𑀏𑀢𑀤𑀧𑁂𑀓𑁆𑀔𑀦𑁆𑀢𑀺 ‘‘𑀓𑀲𑁆𑀲 𑀧𑀦 𑀲𑀸 𑀅𑀝𑁆𑀞𑀓𑀣𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀅𑀥𑀺𑀓𑀸𑀭𑀯𑀲𑁂𑀦 𑀢𑀫𑁂𑀯 𑀅𑀪𑀺𑀥𑀫𑁆𑀫𑀧𑀤𑀁 𑀆𑀓𑀟𑁆𑀠𑀢𑀺. 𑀆𑀯𑀼𑀢𑁆𑀢𑀺𑀆𑀤𑀺𑀯𑀲𑁂𑀦 𑀯𑀸 𑀅𑀬𑀫𑀢𑁆𑀣𑁄 𑀯𑀺𑀪𑀸𑀯𑁂𑀢𑀩𑁆𑀩𑁄.

𑁧𑁬. 𑀅𑀭𑀺𑀬𑀫𑀕𑁆𑀕𑀲𑁆𑀲 𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀗𑁆𑀕𑀛𑀸𑀦𑀗𑁆𑀕𑀯𑀺𑀲𑁂𑀲𑀁 𑀧𑀸𑀤𑀓𑀚𑁆𑀛𑀸𑀦𑀫𑁂𑀯 𑀦𑀺𑀬𑀫𑁂𑀢𑀻𑀢𑀺𑀆𑀤𑀺𑀦𑀬𑀧𑁆𑀧𑀯𑀢𑁆𑀢𑁄 𑀢𑀺𑀧𑀺𑀝𑀓𑀘𑀽𑀴𑀦𑀸𑀕𑀢𑁆𑀣𑁂𑀭𑀯𑀸𑀤𑁄 𑀆𑀤𑀺-𑀲𑀤𑁆𑀤𑁂𑀦 𑀯𑀺𑀧𑀲𑁆𑀲𑀦𑀸𑀬 𑀆𑀭𑀫𑁆𑀫𑀡𑀪𑀽𑀢𑀸 𑀔𑀦𑁆𑀥𑀸 𑀦𑀺𑀬𑀫𑁂𑀦𑁆𑀢𑀺, 𑀧𑀼𑀕𑁆𑀕𑀮𑀚𑁆𑀛𑀸𑀲𑀬𑁄 𑀦𑀺𑀬𑀫𑁂𑀢𑀻𑀢𑀺 𑀏𑀯𑀫𑀸𑀤𑀬𑁄 𑀫𑁄𑀭𑀯𑀸𑀧𑀺𑀯𑀸𑀲𑀺𑀫𑀳𑀸𑀤𑀢𑁆𑀢𑀢𑁆𑀣𑁂𑀭𑀢𑀺𑀧𑀺𑀝𑀓𑀘𑀽𑀴𑀸𑀪𑀬𑀢𑁆𑀣𑁂𑀭𑀯𑀸𑀤𑀸𑀤𑀬𑁄 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀢𑀧𑁆𑀧𑀓𑀸𑀲𑀦𑁂𑀦𑁂𑀯𑀸𑀢𑀺 𑀅𑀪𑀺𑀥𑀫𑁆𑀫𑀲𑁆𑀲 𑀅𑀢𑁆𑀣𑀧𑁆𑀧𑀓𑀸𑀲𑀦𑁂𑀦𑁂𑀯. 𑀲𑁄𑀢𑀺 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀯𑀺𑀦𑀺𑀘𑁆𑀙𑀬𑁄. 𑀢𑀣𑀸𑀢𑀺 𑀅𑀲𑀫𑁆𑀫𑀺𑀲𑁆𑀲𑀸𑀦𑀸𑀓𑀼𑀮𑀪𑀸𑀯𑁂𑀦. 𑀅𑀲𑀫𑁆𑀫𑀺𑀲𑁆𑀲𑀸𑀦𑀸𑀓𑀼𑀮𑀪𑀽𑀢𑁄 𑀯𑀸 𑀯𑀺𑀦𑀺𑀘𑁆𑀙𑀬𑁄 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀲𑀦𑁆𑀢𑀓𑀪𑀸𑀯𑁂𑀦, 𑀏𑀢𑁂𑀦 𑀅𑀪𑀺𑀥𑀫𑁆𑀫𑀲𑁆𑀲 𑀅𑀢𑁆𑀣𑀧𑁆𑀧𑀓𑀸𑀲𑀦𑁂𑀦𑁂𑀯 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀯𑀺𑀦𑀺𑀘𑁆𑀙𑀬𑁄 𑀇𑀥 𑀅𑀪𑀺𑀦𑀺𑀧𑁆𑀨𑀸𑀤𑀻𑀬𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀣 𑀯𑀸 𑀢𑀧𑁆𑀧𑀓𑀸𑀲𑀦𑁂𑀦𑁂𑀯𑀸𑀢𑀺 𑀅𑀲𑀫𑁆𑀫𑀺𑀲𑁆𑀲𑀸𑀦𑀸𑀓𑀼𑀮𑀪𑀸𑀯𑀧𑁆𑀧𑀓𑀸𑀲𑀦𑁂𑀦𑁂𑀯. 𑀲𑁄𑀢𑀺 𑀧𑀓𑀸𑀲𑀺𑀬𑀫𑀸𑀦𑁄 𑀅𑀪𑀺𑀥𑀫𑁆𑀫𑀢𑁆𑀣𑁄. 𑀢𑀣𑀸𑀢𑀺 𑀫𑀳𑀸𑀯𑀺𑀳𑀸𑀭𑀯𑀸𑀲𑀻𑀦𑀁 𑀯𑀺𑀦𑀺𑀘𑁆𑀙𑀬𑀪𑀸𑀯𑁂𑀦. 𑀇𑀫𑀲𑁆𑀫𑀺𑀁 𑀅𑀢𑁆𑀣𑀯𑀺𑀓𑀧𑁆𑀧𑁂 ‘‘𑀅𑀲𑀫𑁆𑀫𑀺𑀲𑁆𑀲𑀁 𑀅𑀦𑀸𑀓𑀼𑀮𑀁 𑀅𑀢𑁆𑀣𑀁 𑀧𑀓𑀸𑀲𑀬𑀺𑀲𑁆𑀲𑀸𑀫𑀻’’𑀢𑀺 𑀲𑀫𑁆𑀩𑀦𑁆𑀥𑀦𑀻𑀬𑀁.

𑁧𑁭. 𑀅𑀜𑁆𑀜𑀜𑁆𑀘 𑀲𑀩𑁆𑀩𑀁 𑀅𑀢𑁆𑀣𑀧𑁆𑀧𑀓𑀸𑀲𑀦𑀁 𑀳𑁄𑀢𑀻𑀢𑀺 𑀢𑁄𑀲𑀦𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 ‘‘𑀲𑀩𑁆𑀩𑁂𑀦 𑀢𑁂𑀦 𑀢𑁄𑀲𑀦𑀁 𑀓𑀢𑀁 𑀳𑁄𑀢𑀻’’𑀢𑀺. 𑀬𑀼𑀢𑁆𑀢𑀭𑀽𑀧𑀸 𑀬𑁄𑀚𑀦𑀸.

𑀯𑀻𑀲𑀢𑀺𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀤𑀸𑀦𑀓𑀣𑀸𑀯𑀡𑁆𑀡𑀦𑀸

𑀧𑀭𑀺𑀘𑁆𑀙𑁂𑀤𑁄 𑀲𑀢𑁆𑀢𑀧𑁆𑀧𑀓𑀭𑀡𑀪𑀸𑀯𑁄. 𑀲𑀦𑁆𑀦𑀺𑀯𑁂𑀲𑁄 𑀲𑀢𑁆𑀢𑀦𑁆𑀦𑀁 𑀧𑀓𑀭𑀡𑀸𑀦𑀁 𑀢𑀤𑀯𑀬𑀯𑀸𑀦𑀜𑁆𑀘 𑀯𑀯𑀢𑁆𑀣𑀸𑀦𑀁. 𑀲𑀸𑀕𑀭𑁂𑀳𑀺 𑀢𑀣𑀸 𑀘𑀺𑀦𑁆𑀢𑀸𑀢𑀺 ‘‘𑀇𑀫𑀲𑁆𑀲 𑀅𑀪𑀺𑀥𑀫𑁆𑀫𑀲𑁆𑀲 𑀕𑀫𑁆𑀪𑀻𑀭𑀪𑀸𑀯𑀯𑀺𑀚𑀸𑀦𑀦𑀢𑁆𑀣𑀁 𑀘𑀢𑁆𑀢𑀸𑀭𑁄 𑀲𑀸𑀕𑀭𑀸 𑀯𑁂𑀤𑀺𑀢𑀩𑁆𑀩𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀚𑀮𑀲𑀸𑀕𑀭𑀸𑀤𑀻𑀳𑀺 𑀲𑀳 𑀦𑀬𑀲𑀸𑀕𑀭𑀯𑀺𑀘𑀸𑀭𑁄. ‘‘𑀲𑀢𑀪𑀸𑀕𑁂𑀦 𑀲𑀳𑀲𑁆𑀲𑀪𑀸𑀕𑁂𑀦 𑀥𑀫𑁆𑀫𑀦𑁆𑀢𑀭𑀸 𑀥𑀫𑁆𑀫𑀦𑁆𑀢𑀭𑀁 𑀲𑀗𑁆𑀓𑀫𑀺𑀢𑁆𑀯𑀸 𑀲𑀗𑁆𑀓𑀫𑀺𑀢𑁆𑀯𑀸 𑀤𑁂𑀲𑁂𑀲𑀻’’𑀢𑀺𑀆𑀤𑀺𑀦𑀸 𑀤𑁂𑀲𑀦𑀸𑀪𑁂𑀤𑁂𑀳𑀺 𑀅𑀪𑀺𑀥𑀫𑁆𑀫𑀲𑁆𑀲 𑀕𑀫𑁆𑀪𑀻𑀭𑀪𑀸𑀯𑀓𑀣𑀸 𑀤𑁂𑀲𑀦𑀸𑀳𑀺 𑀕𑀫𑁆𑀪𑀻𑀭𑀢𑀸.

‘‘𑀏𑀯𑀁 𑀢𑁂𑀫𑀸𑀲𑀁 𑀦𑀺𑀭𑀦𑁆𑀢𑀭𑀁 𑀤𑁂𑀲𑁂𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀤𑁂𑀲𑀦𑀸𑀓𑀸𑀮𑁂 𑀪𑀕𑀯𑀢𑁄 𑀲𑀭𑀻𑀭𑀲𑁆𑀲 𑀬𑀸𑀧𑀺𑀢𑀸𑀓𑀸𑀭𑀯𑀺𑀘𑀸𑀭𑁄 𑀤𑁂𑀲𑀦𑀸…𑀧𑁂… 𑀕𑀳𑀡𑀁. 𑀢𑀣𑀸 𑀣𑁂𑀭𑀲𑁆𑀲…𑀧𑁂…𑀧𑀺 𑀘𑀸𑀢𑀺 ‘‘𑀅𑀪𑀺𑀥𑀫𑁆𑀫𑁂 𑀯𑀸𑀘𑀦𑀸𑀫𑀕𑁆𑀕𑁄 𑀦𑀸𑀫𑀸’’𑀢𑀺𑀆𑀤𑀺𑀦𑀸 𑀅𑀪𑀺𑀥𑀫𑁆𑀫𑁂 𑀯𑀸𑀘𑀦𑀸𑀫𑀕𑁆𑀕𑀲𑁆𑀲 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑀫𑁆𑀩𑀦𑁆𑀥𑀺𑀢𑀢𑀸 𑀢𑀲𑁆𑀲 𑀘 𑀢𑁂𑀦𑁂𑀯 𑀉𑀧𑁆𑀧𑀸𑀤𑀺𑀢𑀢𑀸. 𑀬𑁄 𑀳𑀺 𑀪𑀕𑀯𑀢𑀸 𑀤𑁂𑀯𑀢𑀸𑀦𑀁 𑀤𑁂𑀲𑀺𑀢𑀸𑀓𑀸𑀭𑁄, 𑀲𑁄 𑀅𑀧𑀭𑀺𑀘𑁆𑀙𑀺𑀦𑁆𑀦𑀯𑀸𑀭𑀦𑀬𑀢𑀦𑁆𑀢𑀺𑀢𑀸𑀬 𑀅𑀦𑀦𑁆𑀢𑁄 𑀅𑀧𑀭𑀺𑀫𑀸𑀡𑁄 𑀦 𑀪𑀺𑀓𑁆𑀔𑀽𑀦𑀁 𑀯𑀸𑀘𑀦𑀸𑀬𑁄𑀕𑁆𑀕𑁄, 𑀬𑁄 𑀘 𑀣𑁂𑀭𑀲𑁆𑀲 𑀤𑁂𑀲𑀺𑀢𑀸𑀓𑀸𑀭𑁄, 𑀲𑁄 𑀅𑀢𑀺𑀲𑀁𑀔𑀺𑀢𑁆𑀢𑀢𑀸𑀬. 𑀦𑀸𑀢𑀺𑀲𑀗𑁆𑀔𑁂𑀧𑀦𑀸𑀢𑀺𑀯𑀺𑀢𑁆𑀣𑀸𑀭𑀪𑀽𑀢𑁄 𑀧𑀦 𑀧𑀸𑀞𑀦𑀬𑁄 𑀣𑁂𑀭𑀧𑁆𑀧𑀪𑀸𑀯𑀺𑀢𑁄 𑀯𑀸𑀘𑀦𑀸𑀫𑀕𑁆𑀕𑁄𑀢𑀺.

𑀯𑀘𑀦𑀢𑁆𑀣𑀯𑀺𑀚𑀸𑀦𑀦𑁂𑀦𑀸𑀢𑀺𑀆𑀤𑀺𑀦𑀸 𑀓𑀼𑀲𑀮𑀸 𑀥𑀫𑁆𑀫𑀸𑀢𑀺𑀆𑀤𑀺𑀧𑀤𑀸𑀦𑀜𑁆𑀜𑁂𑀯 𑀅𑀢𑁆𑀣𑀯𑀡𑁆𑀡𑀦𑀁 𑀅𑀓𑀢𑁆𑀯𑀸 𑀅𑀪𑀺𑀥𑀫𑁆𑀫-𑀲𑀤𑁆𑀤𑀯𑀺𑀘𑀸𑀭𑀲𑁆𑀲 𑀲𑀫𑁆𑀩𑀦𑁆𑀥𑀫𑀸𑀳. ‘‘𑀬𑁂 𑀢𑁂 𑀫𑀬𑀸 𑀥𑀫𑁆𑀫𑀸 𑀅𑀪𑀺𑀜𑁆𑀜𑀸 𑀤𑁂𑀲𑀺𑀢𑀸. 𑀲𑁂𑀬𑁆𑀬𑀣𑀺𑀤𑀁 𑁋 𑀘𑀢𑁆𑀢𑀸𑀭𑁄 𑀲𑀢𑀺𑀧𑀝𑁆𑀞𑀸𑀦𑀸…𑀧𑁂… 𑀲𑀺𑀓𑁆𑀔𑀺𑀢𑀁 𑀲𑀺𑀓𑁆𑀔𑀺𑀁𑀲𑀼 𑀤𑁆𑀯𑁂 𑀪𑀺𑀓𑁆𑀔𑀽 𑀅𑀪𑀺𑀥𑀫𑁆𑀫𑁂 𑀦𑀸𑀦𑀸𑀯𑀸𑀤𑀸’’𑀢𑀺𑀆𑀤𑀺𑀲𑀼𑀢𑁆𑀢𑀯𑀲𑁂𑀦 𑀓𑀺𑀜𑁆𑀘𑀸𑀧𑀺 𑀩𑁄𑀥𑀺𑀧𑀓𑁆𑀔𑀺𑀬𑀥𑀫𑁆𑀫𑀸 ‘‘𑀅𑀪𑀺𑀥𑀫𑁆𑀫𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀥𑀫𑁆𑀫-𑀲𑀤𑁆𑀤𑁄 𑀘 𑀲𑀫𑀸𑀥𑀺𑀆𑀤𑀻𑀲𑀼 𑀤𑀺𑀝𑁆𑀞𑀧𑁆𑀧𑀬𑁄𑀕𑁄, 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄 𑀏𑀯 𑀧𑀦 𑀇𑀥 𑀅𑀥𑀺𑀧𑁆𑀧𑁂𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀼𑀢𑁆𑀢𑀦𑁆𑀢𑀸𑀥𑀺𑀓𑀸 𑀧𑀸𑀴𑀻𑀢𑀺 𑀅𑀢𑁆𑀣𑁄’’𑀢𑀺 𑀆𑀳. 𑀢𑀢𑁆𑀣 𑀥𑀫𑁆𑀫𑀩𑁆𑀬𑀪𑀺𑀘𑀸𑀭𑀪𑀸𑀯𑁂𑀦 𑀯𑀺𑀲𑁂𑀲𑀢𑁄 𑀅𑀪𑀺𑀥𑀫𑁆𑀫𑁄 𑀯𑀺𑀬 𑀲𑀼𑀢𑁆𑀢𑀦𑁆𑀢𑁄𑀧𑀺 ‘‘𑀥𑀫𑁆𑀫𑁄’’𑀢𑀺 𑀯𑀼𑀘𑁆𑀘𑀢𑀺. ‘‘𑀬𑁄 𑀯𑁄, 𑀆𑀦𑀦𑁆𑀤, 𑀫𑀬𑀸 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘 𑀤𑁂𑀲𑀺𑀢𑁄 𑀧𑀜𑁆𑀜𑀢𑁆𑀢𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁧.𑁨𑁧𑁬) 𑀅𑀜𑁆𑀜𑀢𑁆𑀣 𑀘 𑀲𑀫𑁆𑀪𑀯𑀢𑁄 𑀅𑀪𑀺-𑀲𑀤𑁆𑀤𑁂𑀦 𑀦𑀺𑀯𑀢𑁆𑀢𑁂𑀢𑀩𑁆𑀩𑀢𑁆𑀣𑀁 𑀤𑀻𑀧𑁂𑀢𑀼𑀁 ‘‘𑀲𑀼𑀢𑁆𑀢𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀦𑀦𑀼 𑀘 𑀅𑀢𑀺𑀭𑁂𑀓𑀯𑀺𑀲𑁂𑀲𑀝𑁆𑀞𑀸 𑀪𑀺𑀦𑁆𑀦𑀲𑀪𑀸𑀯𑀸 𑀬𑀢𑁄 𑀢𑁂 𑀬𑀣𑀸𑀓𑁆𑀓𑀫𑀁 𑀅𑀥𑀺𑀓𑀯𑀺𑀘𑀺𑀢𑁆𑀢𑀧𑀭𑀺𑀬𑀸𑀬𑁂𑀳𑀺 𑀩𑁄𑀥𑀺𑀢𑀸, 𑀢𑀲𑁆𑀫𑀸 ‘‘𑀥𑀫𑁆𑀫𑀸𑀢𑀺𑀭𑁂𑀓𑀥𑀫𑁆𑀫𑀯𑀺𑀲𑁂𑀲𑀝𑁆𑀞𑁂𑀳𑀻’’𑀢𑀺 𑀩𑀳𑀼𑀯𑀘𑀦𑁂𑀦 𑀪𑀯𑀺𑀢𑀩𑁆𑀩𑀁, 𑀦 𑀏𑀓𑀯𑀘𑀦𑁂𑀦𑀸𑀢𑀺 𑀅𑀦𑀼𑀬𑁄𑀕𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀤𑁆𑀯𑀺𑀦𑁆𑀦𑀫𑁆𑀧𑀺…𑀧𑁂… 𑀏𑀓𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄’’𑀢𑀺.

𑀧𑀬𑁄𑀕𑀫𑁂𑀯 𑀦𑀸𑀭𑀳𑀢𑀺 𑀉𑀧𑀲𑀕𑁆𑀕-𑀲𑀤𑁆𑀤𑀸𑀦𑀁 𑀥𑀸𑀢𑀼-𑀲𑀤𑁆𑀤𑀲𑁆𑀲𑁂𑀯 𑀧𑀼𑀭𑀢𑁄 𑀧𑀬𑁄𑀚𑀦𑀻𑀬𑀢𑁆𑀢𑀸. 𑀅𑀣𑀸𑀧𑀺 𑀧𑀬𑀼𑀚𑁆𑀚𑁂𑀬𑁆𑀬 𑀅𑀢𑀺𑀫𑀸𑀮𑀸𑀤𑀻𑀲𑀼 𑀅𑀢𑀺-𑀲𑀤𑁆𑀤𑀸𑀤𑀬𑁄 𑀯𑀺𑀬. 𑀏𑀯𑀫𑁆𑀧𑀺 𑀬𑀣𑀸 ‘‘𑀅𑀢𑀺𑀫𑀸𑀮𑀸’’𑀢𑀺 𑀏𑀢𑁆𑀣 𑀲𑀫𑀸𑀲𑀯𑀲𑁂𑀦 𑀅𑀦𑀸𑀯𑀺𑀪𑀽𑀢𑀸𑀬 𑀓𑀫𑀦𑀓𑀺𑀭𑀺𑀬𑀸𑀬 𑀯𑀺𑀲𑁂𑀲𑀓𑁄 𑀅𑀢𑀺-𑀲𑀤𑁆𑀤𑁄, 𑀦 𑀫𑀸𑀮𑀸𑀬, 𑀏𑀯𑀫𑀺𑀥𑀸𑀧𑀺 𑀅𑀪𑀺-𑀲𑀤𑁆𑀤𑁄 𑀦 𑀥𑀫𑁆𑀫𑀯𑀺𑀲𑁂𑀲𑀓𑁄 𑀬𑀼𑀢𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀜𑁆𑀜𑀲𑁆𑀲𑀧𑀺 𑀳𑀺 𑀉𑀧𑀲𑀕𑁆𑀕𑀲𑁆𑀲𑀸𑀢𑀺 𑀇𑀤𑀁 𑀭𑀼𑀴𑁆𑀳𑀻𑀯𑀲𑁂𑀦, 𑀅𑀢𑁆𑀣𑁂 𑀉𑀧𑀲𑀚𑁆𑀚𑀢𑀻𑀢𑀺 𑀯𑀸 𑀉𑀧𑀲𑀕𑁆𑀕𑀲𑁆𑀲 𑀅𑀦𑁆𑀯𑀢𑁆𑀣𑀲𑀜𑁆𑀜𑀢𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀢𑀺𑀙𑀢𑁆𑀢𑀸𑀤𑀻𑀲𑀼 𑀳𑀺 𑀅𑀢𑀺-𑀲𑀤𑁆𑀤𑁄 𑀇𑀥 𑀉𑀧𑀲𑀕𑁆𑀕𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀢𑀢𑁆𑀣 𑀬𑀣𑀸 𑀓𑀮𑁆𑀬𑀸𑀡𑁄 𑀧𑀽𑀚𑀺𑀢𑁄 𑀯𑀸 𑀧𑀼𑀭𑀺𑀲𑁄 𑀅𑀢𑀺𑀧𑀼𑀭𑀺𑀲𑁄𑀢𑀺 𑀪𑀯𑀢𑀺, 𑀏𑀯𑀁 𑀅𑀢𑀺𑀭𑁂𑀓𑀯𑀺𑀲𑁂𑀲𑀝𑁆𑀞𑀸𑀦𑀫𑁆𑀧𑀺 𑀓𑀮𑁆𑀬𑀸𑀡𑀧𑀽𑀚𑀺𑀢𑀢𑁆𑀣𑀪𑀸𑀯𑀲𑀫𑁆𑀪𑀯𑀢𑁄 𑀓𑀮𑁆𑀬𑀸𑀡𑀁 𑀯𑀸 𑀧𑀽𑀚𑀺𑀢𑀁 𑀯𑀸 𑀙𑀢𑁆𑀢𑀁 𑀅𑀢𑀺𑀙𑀢𑁆𑀢𑀦𑁆𑀢𑀺 𑀲𑀤𑁆𑀤𑀦𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀓𑀮𑁆𑀬𑀸𑀡𑀧𑀽𑀚𑀺𑀢𑀪𑀸𑀯𑀸 𑀳𑀺 𑀕𑀼𑀡𑀯𑀺𑀲𑁂𑀲𑀬𑁄𑀕𑁂𑀦 𑀇𑀘𑁆𑀙𑀺𑀢𑀩𑁆𑀩𑀸. 𑀕𑀼𑀡𑀯𑀺𑀲𑁂𑀲𑁄 𑀘𑁂𑀲 𑀬𑀤𑀺𑀤𑀁 𑀧𑀫𑀸𑀡𑀸𑀢𑀺𑀭𑁂𑀓𑁄 𑀘 𑀯𑀺𑀘𑀺𑀢𑁆𑀢𑀭𑀽𑀧𑀢𑀸 𑀘. 𑀏𑀯𑀜𑁆𑀘 𑀧𑀦 𑀓𑀢𑁆𑀯𑀸 ‘‘𑀅𑀓𑀺𑀭𑀺𑀬𑀸𑀬𑀧𑀻’’𑀢𑀺 𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀪𑀯𑀢𑀺. 𑀬𑀣𑀸 𑀘 𑀅𑀢𑀺𑀙𑀢𑁆𑀢𑀸𑀤𑀻𑀲𑀼, 𑀏𑀯𑀁 𑀅𑀪𑀺𑀥𑀫𑁆𑀫-𑀲𑀤𑁆𑀤𑁂𑀧𑀺 𑀤𑀝𑁆𑀞𑀩𑁆𑀩𑀁. 𑀅𑀦𑁂𑀓𑀢𑁆𑀣𑀸 𑀳𑀺 𑀦𑀺𑀧𑀸𑀢𑀸𑀢𑀺. 𑀢𑀩𑁆𑀪𑀸𑀯𑀤𑀻𑀧𑀓𑀢𑁆𑀢𑀸𑀢𑀺 𑀅𑀢𑀺𑀭𑁂𑀓𑀯𑀺𑀲𑁂𑀲𑀪𑀸𑀯𑀤𑀻𑀧𑀓𑀢𑁆𑀢𑀸.

𑀏𑀓𑀢𑁄 𑀅𑀦𑀸𑀕𑀢𑀢𑁆𑀢𑀸𑀢𑀺 𑀇𑀤𑀁 𑀲𑀼𑀢𑁆𑀢𑀦𑁆𑀢𑁂 𑀏𑀓𑀢𑁄 𑀆𑀕𑀢𑀸𑀦𑀁 𑀔𑀦𑁆𑀥𑀸𑀬𑀢𑀦𑀸𑀤𑀻𑀦𑀁 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀲𑁆𑀲 𑀤𑀺𑀝𑁆𑀞𑀢𑁆𑀢𑀸 ‘‘𑀙 𑀇𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀇𑀦𑁆𑀤𑁆𑀭𑀺𑀬𑀸𑀦𑀻’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁫.𑁪𑁯𑁫-𑁪𑁯𑁬) 𑀘𑀓𑁆𑀔𑀸𑀤𑀻𑀦𑀁 𑀙𑀦𑁆𑀦𑀁 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀢𑀺𑀡𑁆𑀡𑀁 𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀧𑀜𑁆𑀘𑀦𑁆𑀦𑀁 𑀅𑀦𑀜𑁆𑀜𑀸𑀢𑀜𑁆𑀜𑀲𑁆𑀲𑀸𑀫𑀻𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀜𑁆𑀘 𑀢𑀺𑀡𑁆𑀡𑀁 𑀯𑀲𑁂𑀦 𑀯𑀺𑀲𑀼𑀁 𑀯𑀺𑀲𑀼𑀁 𑀲𑀼𑀢𑁆𑀢𑀦𑁆𑀢𑀪𑀸𑀯𑁂𑀦 𑀆𑀕𑀢𑀢𑁆𑀢𑀸 𑀏𑀓𑀲𑀼𑀢𑁆𑀢𑀪𑀸𑀯𑁂𑀦 𑀅𑀦𑀸𑀕𑀢𑀸𑀦𑀁 𑀩𑀸𑀯𑀻𑀲𑀢𑀺𑀬𑀸 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀲𑁆𑀲 𑀅𑀤𑀺𑀝𑁆𑀞𑀢𑁆𑀢𑀸 𑀘 𑀯𑀼𑀢𑁆𑀢𑀁, 𑀦 𑀲𑀼𑀢𑁆𑀢𑀦𑁆𑀢𑁂 𑀏𑀓𑀢𑁄 𑀆𑀕𑀫𑀦𑀲𑁆𑀲 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀲𑁆𑀲 𑀓𑀸𑀭𑀡𑀢𑁆𑀢𑀸. 𑀲𑀼𑀢𑁆𑀢𑀦𑁆𑀢𑁂 𑀏𑀓𑀢𑁄 𑀲𑀩𑁆𑀩𑁂𑀦 𑀲𑀩𑁆𑀩𑀜𑁆𑀘 𑀅𑀦𑀸𑀕𑀢𑀸 𑀳𑀺 𑀪𑀽𑀫𑀦𑁆𑀢𑀭𑀧𑀭𑀺𑀘𑁆𑀙𑁂𑀤𑀧𑀝𑀺𑀲𑀫𑁆𑀪𑀺𑀤𑀸 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀯𑀲𑁂𑀦 𑀯𑀺𑀪𑀢𑁆𑀢𑀸 𑀤𑀺𑀲𑁆𑀲𑀦𑁆𑀢𑀺, 𑀏𑀓𑀢𑁄 𑀆𑀕𑀢𑀸𑀦𑀺 𑀘 𑀲𑀺𑀓𑁆𑀔𑀸𑀧𑀤𑀸𑀦𑀺 𑀢𑀣𑀸 𑀦 𑀯𑀺𑀪𑀢𑁆𑀢𑀸𑀦𑀺. 𑀯𑁂𑀭𑀫𑀡𑀻𑀦𑀁 𑀯𑀺𑀬 𑀧𑀦 𑀲𑀪𑀸𑀯𑀓𑀺𑀘𑁆𑀘𑀸𑀤𑀺𑀯𑀺𑀪𑀸𑀕𑀯𑀺𑀦𑀺𑀫𑀼𑀢𑁆𑀢𑁄 𑀩𑀸𑀯𑀻𑀲𑀢𑀺𑀬𑀸 𑀇𑀦𑁆𑀤𑁆𑀭𑀺𑀬𑀸𑀦𑀁 𑀲𑀫𑀸𑀦𑁄 𑀯𑀺𑀪𑀚𑀦𑀧𑁆𑀧𑀓𑀸𑀭𑁄 𑀦𑀢𑁆𑀣𑀺, 𑀬𑁄 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁 𑀲𑀺𑀬𑀸𑀢𑀺 𑀇𑀦𑁆𑀤𑁆𑀭𑀺𑀬𑀯𑀺𑀪𑀗𑁆𑀕𑁂 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀻𑀬𑀁 𑀦𑀢𑁆𑀣𑀻𑀢𑀺 𑀬𑀼𑀢𑁆𑀢𑀁 𑀲𑀺𑀬𑀸.

𑀬𑀤𑀺𑀧𑀺 𑀧𑀘𑁆𑀘𑀬𑀥𑀫𑁆𑀫𑀯𑀺𑀦𑀺𑀫𑀼𑀢𑁆𑀢𑁄 𑀧𑀘𑁆𑀘𑀬𑀪𑀸𑀯𑁄 𑀦𑀸𑀫 𑀦𑀢𑁆𑀣𑀺, 𑀬𑀣𑀸 𑀧𑀦 𑀧𑀯𑀢𑁆𑀢𑁄 𑀧𑀘𑁆𑀘𑀬𑀥𑀫𑁆𑀫𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑁄 𑀳𑁄𑀢𑀺, 𑀲𑁄 𑀢𑀲𑁆𑀲 𑀧𑀯𑀢𑁆𑀢𑀺𑀆𑀓𑀸𑀭𑀯𑀺𑀲𑁂𑀲𑁄 𑀳𑁂𑀢𑀼𑀆𑀤𑀺𑀪𑀸𑀯𑁄 𑀢𑀢𑁄 𑀅𑀜𑁆𑀜𑁄 𑀯𑀺𑀬 𑀧𑀘𑁆𑀘𑀬𑀥𑀫𑁆𑀫𑀲𑁆𑀲 𑀧𑀘𑁆𑀘𑀬𑀪𑀸𑀯𑁄𑀢𑀺 𑀯𑀼𑀢𑁆𑀢𑁄, 𑀲𑁄 𑀘 ‘‘𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸 𑀲𑀫𑁆𑀪𑀯𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀧𑀥𑀸𑀦𑀪𑀸𑀯𑁂𑀦 𑀯𑀼𑀢𑁆𑀢𑁄. 𑀢𑀢𑁆𑀣 𑀘 𑀕𑀼𑀡𑀻𑀪𑀽𑀢𑀸 𑀳𑁂𑀢𑀼𑀳𑁂𑀢𑀼𑀨𑀮𑀪𑀽𑀢𑀸 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀤𑀬𑁄𑀢𑀺 𑀯𑀼𑀢𑁆𑀢𑀁 ‘‘𑀧𑀘𑁆𑀘𑀬𑀪𑀸𑀯𑁄 𑀉𑀤𑁆𑀤𑀺𑀝𑁆𑀞𑁄’’𑀢𑀺. 𑀉𑀤𑁆𑀤𑀺𑀝𑁆𑀞𑀥𑀫𑁆𑀫𑀸𑀦𑀦𑁆𑀢𑀺𑀆𑀤𑀺 𑀉𑀤𑁆𑀤𑁂𑀲𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀸𑀦𑀁𑀬𑁂𑀯 𑀔𑀦𑁆𑀥𑀸𑀤𑀻𑀦𑀁 𑀔𑀦𑁆𑀥𑀯𑀺𑀪𑀗𑁆𑀕𑀸𑀤𑀻𑀲𑀼 𑀧𑀜𑁆𑀳𑀧𑀼𑀘𑁆𑀙𑀓𑀦𑀬𑁄 𑀤𑀲𑁆𑀲𑀺𑀢𑁄, 𑀦 𑀇𑀢𑁄 𑀅𑀜𑁆𑀜𑀣𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑀲𑀼𑀢𑁆𑀢𑀦𑁆𑀢𑁂 𑀲𑀗𑁆𑀕𑀻𑀢𑀺𑀲𑀼𑀢𑁆𑀢𑀦𑁆𑀢𑀸𑀤𑀺𑀓𑁂. 𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀸𑀡𑀸𑀢𑀺𑀧𑀸𑀢𑀸…𑀧𑁂… 𑀧𑀫𑀸𑀤𑀝𑁆𑀞𑀸𑀦𑀸 𑀯𑁂𑀭𑀫𑀡𑀻𑀢𑀺 𑀏𑀯𑀁 𑀉𑀤𑁆𑀤𑀺𑀝𑁆𑀞𑀸𑀦𑀺. 𑀅𑀜𑁆𑀜𑁄 𑀧𑀦 𑀯𑁂𑀭𑀫𑀡𑀻𑀦𑀁 𑀯𑀺𑀪𑀚𑀺𑀢𑀩𑁆𑀩𑀧𑁆𑀧𑀓𑀸𑀭𑁄 𑀦𑀢𑁆𑀣𑀻𑀢𑀺 𑀇𑀤𑀁 𑀅𑀢𑀻𑀢𑀸𑀦𑀺𑀘𑁆𑀘𑀸𑀤𑀺𑀯𑀺𑀪𑀸𑀕𑁄 𑀯𑁂𑀭𑀫𑀡𑀻𑀦𑀁 𑀔𑀦𑁆𑀥𑀸𑀬𑀢𑀦𑀸𑀤𑀻𑀲𑀼 𑀅𑀦𑁆𑀢𑁄𑀕𑀥𑀢𑁆𑀢𑀸 𑀢𑀩𑁆𑀩𑀲𑁂𑀦𑁂𑀯 𑀯𑀺𑀚𑀸𑀦𑀺𑀢𑀩𑁆𑀩𑁄, 𑀢𑀢𑁄 𑀧𑀦 𑀅𑀜𑁆𑀜𑁄 𑀅𑀪𑀺𑀥𑀫𑁆𑀫𑀦𑀬𑀯𑀺𑀥𑀼𑀭𑁄 𑀯𑁂𑀭𑀫𑀡𑀻𑀦𑀁 𑀯𑀺𑀪𑀚𑀺𑀢𑀩𑁆𑀩𑀧𑁆𑀧𑀓𑀸𑀭𑁄 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁. 𑀢𑀣𑀸 𑀘 𑀧𑀝𑀺𑀲𑀫𑁆𑀪𑀺𑀤𑀸𑀫𑀕𑁆𑀕𑁂 ‘‘𑀘𑀓𑁆𑀔𑀼𑀁 𑀅𑀦𑀺𑀘𑁆𑀘𑀁…𑀧𑁂… 𑀚𑀭𑀸𑀫𑀭𑀡𑀁 𑀅𑀦𑀺𑀘𑁆𑀘’’𑀦𑁆𑀢𑀺 𑀅𑀦𑀼𑀧𑀤𑀥𑀫𑁆𑀫𑀲𑀫𑁆𑀫𑀲𑀦𑀓𑀣𑀸𑀬𑀁 𑀦 𑀯𑁂𑀭𑀫𑀡𑀺𑀬𑁄 𑀉𑀤𑁆𑀥𑀝𑀸.

𑀦𑀦𑀼 𑀥𑀫𑁆𑀫𑀲𑀗𑁆𑀕𑀡𑀻𑀥𑀸𑀢𑀼𑀓𑀣𑀸𑀤𑀻𑀦𑀫𑁆𑀧𑀺 𑀯𑀲𑁂𑀦 𑀅𑀪𑀺𑀥𑀫𑁆𑀫𑀧𑀸𑀴𑀺𑀬𑀸 𑀅𑀢𑀺𑀭𑁂𑀓𑀯𑀺𑀲𑁂𑀲𑀪𑀸𑀯𑁄 𑀤𑀲𑁆𑀲𑁂𑀢𑀩𑁆𑀩𑁄𑀢𑀺? 𑀲𑀘𑁆𑀘𑀫𑁂𑀢𑀁, 𑀲𑁄 𑀧𑀦 𑀏𑀓𑀦𑁆𑀢𑀅𑀪𑀺𑀥𑀫𑁆𑀫𑀦𑀬𑀦𑀺𑀲𑁆𑀲𑀺𑀢𑁄 𑀅𑀯𑀼𑀢𑁆𑀢𑁄𑀧𑀺 𑀲𑀺𑀤𑁆𑀥𑁄𑀢𑀺 𑀓𑀢𑁆𑀯𑀸 𑀦 𑀤𑀲𑁆𑀲𑀺𑀢𑁄. 𑀏𑀢𑁂𑀦 𑀯𑀸 𑀦𑀺𑀤𑀲𑁆𑀲𑀦𑁂𑀦 𑀲𑁄𑀧𑀺 𑀲𑀩𑁆𑀩𑁄 𑀦𑁂𑀢𑀩𑁆𑀩𑁄. 𑀅𑀪𑀺𑀥𑀫𑁆𑀫𑀦𑀬𑀲𑀸𑀫𑀜𑁆𑀜𑁂𑀦 𑀯𑀸 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀧𑀜𑁆𑀳𑀧𑀼𑀘𑁆𑀙𑀓𑁂𑀳𑀺 𑀲𑁄 𑀯𑀼𑀢𑁆𑀢𑁄 𑀏𑀯𑀸𑀢𑀺 𑀦 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄.

𑀧𑀜𑁆𑀳𑀯𑀸𑀭𑀸𑀢𑀺 𑀧𑀼𑀘𑁆𑀙𑀦𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑀸 𑀧𑀸𑀴𑀺𑀦𑀬𑀸. 𑀏𑀢𑁆𑀣𑁂𑀯𑀸𑀢𑀺 𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑁂 𑀏𑀯. 𑀅𑀧𑁂𑀓𑁆𑀔𑀸𑀯𑀲𑀺𑀓𑀢𑁆𑀢𑀸 𑀅𑀧𑁆𑀧𑀫𑀳𑀦𑁆𑀢𑀪𑀸𑀯𑀲𑁆𑀲 𑀬𑀢𑁄 𑀅𑀧𑁆𑀧𑀫𑀢𑁆𑀢𑀺𑀓𑀸 𑀫𑀳𑀸𑀥𑀸𑀢𑀼𑀓𑀣𑀸𑀢𑀦𑁆𑀢𑀺 𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑀯𑀘𑀦𑀯𑀲𑁂𑀦 𑀅𑀯𑀲𑁂𑀲𑀸, 𑀢𑀁 𑀤𑀲𑁆𑀲𑀦𑀢𑁆𑀣𑀁 ‘‘𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑁂 𑀅𑀦𑀸𑀕𑀦𑁆𑀢𑁆𑀯𑀸 𑀫𑀳𑀸𑀥𑀫𑁆𑀫𑀳𑀤𑀬𑁂 𑀆𑀕𑀢𑀢𑀦𑁆𑀢𑀺𑀢𑁄’’𑀢𑀺 𑀯𑀼𑀢𑁆𑀢𑀁. 𑀥𑀫𑁆𑀫𑀳𑀤𑀬…𑀧𑁂… 𑀆𑀕𑀢𑀢𑀦𑁆𑀢𑀺𑀢𑁄 𑀭𑀽𑀧𑀓𑀡𑁆𑀟𑀥𑀸𑀢𑀼𑀯𑀺𑀪𑀗𑁆𑀕𑀸𑀤𑀻𑀲𑀼 𑀅𑀦𑀸𑀕𑀦𑁆𑀢𑁆𑀯𑀸 𑀫𑀳𑀸𑀥𑀸𑀢𑀼𑀓𑀣𑀸𑀬𑀁 𑀆𑀕𑀢𑀢𑀦𑁆𑀢𑀺 𑀅𑀧𑁆𑀧𑀫𑀢𑁆𑀢𑀺𑀓𑀸𑀯𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀣 𑀥𑀸𑀢𑀼𑀓𑀣𑀸𑀬 𑀯𑀺𑀢𑁆𑀣𑀸𑀭𑀓𑀣𑀸 𑀫𑀳𑀸𑀥𑀸𑀢𑀼𑀓𑀣𑀸 𑀥𑀫𑁆𑀫𑀳𑀤𑀬𑀯𑀺𑀪𑀗𑁆𑀕𑁂 𑀅𑀦𑀸𑀕𑀦𑁆𑀢𑁆𑀯𑀸 𑀫𑀳𑀸𑀥𑀫𑁆𑀫𑀳𑀤𑀬𑁂 𑀆𑀕𑀢𑀢𑀦𑁆𑀢𑀺𑀢𑁄 𑀥𑀸𑀢𑀼𑀓𑀣𑀸𑀬𑀁 𑀅𑀦𑀸𑀕𑀦𑁆𑀢𑁆𑀯𑀸 𑀫𑀳𑀸𑀥𑀸𑀢𑀼𑀓𑀣𑀸𑀬 𑀆𑀕𑀢𑀢𑀦𑁆𑀢𑀺 𑀅𑀧𑁆𑀧𑀫𑀢𑁆𑀢𑀺𑀓𑀸𑀯𑀸𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀉𑀧𑀮𑀩𑁆𑀪𑀢𑀻𑀢𑀺 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀧𑀜𑁆𑀘𑀓𑀲𑁆𑀲, 𑀦𑀼𑀧𑀮𑀩𑁆𑀪𑀢𑀻𑀢𑀺 𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑀧𑀜𑁆𑀘𑀓𑀲𑁆𑀲 𑀉𑀧𑀮𑀓𑁆𑀔𑀡𑀯𑀲𑁂𑀦 𑀯𑀼𑀢𑁆𑀢𑀁. 𑀲𑀘𑁆𑀘𑀺𑀓𑀝𑁆𑀞𑀁 𑀦𑀺𑀲𑁆𑀲𑀬𑀦𑁆𑀢𑀺 ‘‘𑀲𑀩𑁆𑀩𑀢𑁆𑀣𑀸’’𑀢𑀺𑀆𑀤𑀺𑀦𑀸 𑀤𑁂𑀲𑀸𑀤𑀺𑀅𑀦𑀸𑀫𑀲𑀦𑁂𑀦 𑀭𑀽𑀧𑀸𑀤𑀺𑀲𑀢𑁆𑀢𑀧𑀜𑁆𑀜𑀸𑀲𑀥𑀫𑁆𑀫𑀧𑁆𑀧𑀪𑁂𑀤𑀁 𑀲𑀘𑁆𑀘𑀺𑀓𑀝𑁆𑀞𑀫𑁂𑀯 𑀦𑀺𑀲𑁆𑀲𑀬𑀪𑀽𑀢𑀁. 𑀲𑀩𑁆𑀩𑀢𑁆𑀣𑀸𑀢𑀺 𑀏𑀢𑁆𑀣𑀸𑀧𑀺 ‘‘𑀉𑀧𑀮𑀩𑁆𑀪𑀢𑀺 𑀦𑀼𑀧𑀮𑀩𑁆𑀪𑀢𑀻𑀢𑀺 𑀧𑀝𑀺𑀜𑁆𑀜𑀸𑀬 𑀕𑀳𑀺𑀢𑀸𑀬 𑀧𑀝𑀺𑀓𑁆𑀔𑁂𑀧𑀕𑁆𑀕𑀳𑀡𑀢𑁆𑀣’’𑀦𑁆𑀢𑀺 𑀆𑀦𑁂𑀢𑁆𑀯𑀸 𑀲𑀫𑁆𑀩𑀦𑁆𑀥𑀦𑀻𑀬𑀁, 𑀢𑀣𑀸 𑀲𑀩𑁆𑀩𑀤𑀸 𑀲𑀩𑁆𑀩𑁂𑀲𑀽𑀢𑀺 𑀏𑀢𑁆𑀣𑀸𑀧𑀺. 𑀬𑀤𑀺 𑀔𑀦𑁆𑀥𑀸𑀬𑀢𑀦𑀸𑀤𑀬𑁄 𑀕𑀳𑀺𑀢𑀸 𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀦𑀬𑁂𑀦, 𑀅𑀣 𑀧𑀦 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀬𑁄 𑀲𑀘𑁆𑀘𑀺𑀓𑀝𑁆𑀞𑁄𑀢𑀺 𑀲𑀘𑁆𑀘𑀺𑀓𑀝𑁆𑀞𑀦𑀺𑀲𑁆𑀲𑀬𑀁 𑀉𑀧𑀮𑀓𑁆𑀔𑁂𑀢𑀺. 𑀏𑀢𑁂𑀳𑀻𑀢𑀺 𑀏𑀢𑁂𑀳𑀺 𑀯𑀘𑀦𑁂𑀳𑀺. 𑀲𑀘𑁆𑀘𑀺𑀓𑀝𑁆𑀞𑀤𑁂𑀲𑀓𑀸𑀮𑀧𑁆𑀧𑀤𑁂𑀲𑁂𑀳𑀺 𑀓𑀣𑀁 𑀲𑀘𑁆𑀘𑀺𑀓𑀝𑁆𑀞𑀸𑀤𑀻𑀦𑀁 𑀧𑀤𑁂𑀲𑁄 𑀏𑀓𑀤𑁂𑀲𑀪𑀽𑀢𑁄 𑀲𑀩𑁆𑀩𑁄𑀢𑀺 𑀯𑀼𑀘𑁆𑀘𑀢𑀺? 𑀧𑀤𑁂𑀲𑀸𑀦𑀁 𑀧𑀼𑀣𑀼𑀢𑁆𑀢𑀸. ‘‘𑀲𑀩𑁆𑀩𑁂𑀲𑀼 𑀧𑀤𑁂𑀲𑁂𑀲𑀽’’𑀢𑀺 𑀧𑀘𑁆𑀘𑁂𑀓𑀁 𑀪𑁂𑀤𑀸𑀫𑀲𑀦𑀯𑀲𑁂𑀦 𑀘𑀸𑀬𑀁 𑀧𑀜𑁆𑀳𑁄 𑀧𑀯𑀢𑁆𑀢𑁄𑀢𑀺 𑀦 𑀧𑀼𑀭𑀺𑀫𑁂𑀳𑀺 𑀅𑀯𑀲𑁂𑀲𑁄.

𑀉𑀧𑀮𑀩𑁆𑀪𑀢𑀺…𑀧𑁂… 𑀫𑀺𑀘𑁆𑀙𑀸𑀢𑀺 𑀏𑀓𑀦𑁆𑀢𑀺 𑀉𑀧𑀮𑀩𑁆𑀪𑀢𑀻𑀢𑀺 𑀧𑀝𑀺𑀜𑁆𑀜𑀸𑀕𑁆𑀕𑀳𑀡𑀧𑀝𑀺𑀓𑁆𑀔𑁂𑀧𑀕𑁆𑀕𑀳𑀡𑀦𑀺𑀕𑁆𑀕𑀡𑁆𑀳𑀦𑀸𑀦𑀁 𑀅𑀦𑀼𑀮𑁄𑀫𑀧𑀝𑀺𑀮𑁄𑀫𑀢𑁄 𑀧𑀝𑀺𑀜𑁆𑀜𑀸𑀞𑀧𑀦𑀦𑀺𑀕𑁆𑀕𑀳𑀧𑀸𑀧𑀦𑀸𑀭𑁄𑀧𑀦𑀸𑀦𑀜𑁆𑀘 𑀯𑀲𑁂𑀦 𑀧𑀯𑀢𑁆𑀢𑀸 𑀢𑀦𑁆𑀢𑀺 𑀧𑀞𑀫𑀧𑀜𑁆𑀘𑀓𑀲𑁆𑀲 𑀏𑀓𑀁 𑀅𑀗𑁆𑀕𑀁 𑀏𑀓𑁄 𑀅𑀯𑀬𑀯𑁄𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀦𑁂𑀢𑀩𑁆𑀩𑀁. 𑀦𑀺𑀕𑁆𑀕𑀳𑀲𑁆𑀲 𑀲𑀼𑀦𑀺𑀕𑁆𑀕𑀳𑀪𑀸𑀯𑀁 𑀇𑀘𑁆𑀙𑀢𑁄 𑀲𑀓𑀯𑀸𑀤𑀺𑀦𑁄 ‘‘𑀢𑁆𑀯𑀁 𑀘𑁂 𑀧𑀦 𑀫𑀜𑁆𑀜𑀲𑀺 𑀯𑀢𑁆𑀢𑀩𑁆𑀩𑁂 𑀔𑁄 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀻’’𑀢𑀺𑀆𑀤𑀺𑀦𑀸 (𑀓𑀣𑀸. 𑁩) 𑀧𑀝𑀺𑀜𑁆𑀜𑀸𑀞𑀧𑀦𑁂𑀦, 𑀢𑁂𑀦 ‘‘𑀢𑀯 𑀢𑀢𑁆𑀣 𑀳𑁂𑀢𑀸𑀬 𑀧𑀝𑀺𑀜𑁆𑀜𑀸𑀬 𑀳𑁂𑀯𑀁 𑀧𑀝𑀺𑀚𑀸𑀦𑀦𑁆𑀢𑁄 𑀳𑁂𑀯𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑁂 𑀅𑀣 𑀢𑀁 𑀦𑀺𑀕𑁆𑀕𑀡𑁆𑀳𑀸𑀫 𑀲𑀼𑀦𑀺𑀕𑁆𑀕𑀳𑀺𑀢𑁄 𑀘 𑀳𑁄𑀢𑀻’’𑀢𑀺 𑀯𑀢𑁆𑀯𑀸 ‘‘𑀳𑀜𑁆𑀘𑀺 𑀧𑀼𑀕𑁆𑀕𑀮𑁄 𑀦𑀼𑀧𑀮𑀩𑁆𑀪𑀢𑀻’’𑀢𑀺𑀆𑀤𑀺𑀦𑀸 (𑀓𑀣𑀸. 𑁨) 𑀧𑀭𑀯𑀸𑀤𑀺𑀦𑁄 𑀅𑀢𑁆𑀢𑀦𑁄 𑀧𑀝𑀺𑀓𑀫𑁆𑀫𑀁 𑀬𑀣𑀸 𑀲𑀓𑀯𑀸𑀤𑀻 𑀦 𑀦𑀺𑀩𑁆𑀩𑁂𑀞𑁂𑀢𑀺, 𑀏𑀯𑀁 𑀓𑀭𑀡𑀁 𑀧𑀝𑀺𑀓𑀫𑁆𑀫𑀯𑁂𑀞𑀦𑀁. 𑀧𑀭𑀯𑀸𑀤𑀺𑀦𑁄 𑀧𑀝𑀺𑀓𑀫𑁆𑀫𑀲𑁆𑀲 𑀤𑀼𑀧𑁆𑀧𑀝𑀺𑀓𑀫𑁆𑀫𑀪𑀸𑀯𑀁 𑀇𑀘𑁆𑀙𑀢𑁄 𑀲𑀓𑀯𑀸𑀤𑀺𑀦𑁄 𑀢𑀁𑀦𑀺𑀤𑀲𑁆𑀲𑀦𑁂𑀦 ‘‘𑀏𑀲𑁄 𑀘𑁂 𑀤𑀼𑀦𑁆𑀦𑀺𑀕𑁆𑀕𑀳𑀺𑀢𑁄 𑀳𑁂𑀯’’𑀦𑁆𑀢𑀺 𑀧𑀝𑀺𑀓𑀫𑁆𑀫𑀦𑀺𑀤𑀲𑁆𑀲𑀦𑁂𑀦, ‘‘𑀯𑀢𑁆𑀢𑀩𑁆𑀩𑁂 𑀔𑁄 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺…𑀧𑁂… 𑀧𑀭𑀫𑀢𑁆𑀣𑁂𑀦𑀸𑀢𑀺 (𑀓𑀣𑀸. 𑁧). 𑀦𑁄 𑀘 𑀫𑀬𑀁 𑀢𑀬𑀸 𑀢𑀢𑁆𑀣 𑀳𑁂𑀢𑀸𑀬 𑀧𑀝𑀺𑀜𑁆𑀜𑀸𑀬 𑀳𑁂𑀯𑀁 𑀧𑀝𑀺𑀚𑀸𑀦𑀦𑁆𑀢𑁄 𑀳𑁂𑀯𑀁 𑀦𑀺𑀕𑁆𑀕𑀳𑁂𑀢𑀩𑁆𑀩𑀸. 𑀅𑀣 𑀅𑀫𑁆𑀳𑁂 𑀦𑀺𑀕𑁆𑀕𑀡𑁆𑀳𑀸𑀲𑀺 𑀤𑀼𑀦𑁆𑀦𑀺𑀕𑁆𑀕𑀳𑀺𑀢𑀸 𑀘 𑀳𑁄𑀫𑀸’’𑀢𑀺 𑀯𑀢𑁆𑀯𑀸 ‘‘𑀳𑀜𑁆𑀘𑀺 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻’’𑀢𑀺𑀆𑀤𑀺𑀦𑀸 (𑀓𑀣𑀸. 𑁫) 𑀦𑀺𑀕𑁆𑀕𑀳𑀲𑁆𑀲 𑀤𑀼𑀦𑁆𑀦𑀺𑀕𑁆𑀕𑀳𑀺𑀢𑀪𑀸𑀯𑀤𑀲𑁆𑀲𑀦𑁂𑀦 𑀅𑀦𑀺𑀕𑁆𑀕𑀳𑀺𑀢𑀪𑀸𑀯𑀓𑀭𑀡𑀁 𑀦𑀺𑀕𑁆𑀕𑀳𑀦𑀺𑀩𑁆𑀩𑁂𑀞𑀦𑀁. ‘‘𑀢𑁂𑀦 𑀳𑀺 𑀬𑀁 𑀦𑀺𑀕𑁆𑀕𑀡𑁆𑀳𑀸𑀲𑀺 𑀳𑀜𑁆𑀘𑀺 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻’’𑀢𑀺𑀆𑀤𑀺𑀁 𑀯𑀢𑁆𑀯𑀸 ‘‘𑀢𑁂𑀦 𑀳𑀺 𑀬𑁂 𑀓𑀢𑁂 𑀦𑀺𑀕𑁆𑀕𑀳𑁂 𑀲𑁂 𑀦𑀺𑀕𑁆𑀕𑀳𑁂 𑀤𑀼𑀓𑁆𑀓𑀝𑁂 𑀲𑀼𑀓𑀢𑁂 𑀧𑀝𑀺𑀓𑀫𑁆𑀫𑁂 𑀲𑀼𑀓𑀢𑀸 𑀧𑀝𑀺𑀧𑀸𑀤𑀦𑀸’’𑀢𑀺 𑀲𑀓𑀯𑀸𑀤𑀺𑀦𑁄 𑀦𑀺𑀕𑁆𑀕𑀳𑀲𑁆𑀲, 𑀅𑀦𑀺𑀕𑁆𑀕𑀳𑀪𑀸𑀯𑀸𑀭𑁄𑀧𑀦𑁂𑀦 𑀅𑀢𑁆𑀢𑀦𑁄 𑀧𑀝𑀺𑀓𑀫𑁆𑀫𑀲𑁆𑀲 𑀲𑀼𑀧𑀝𑀺𑀓𑀫𑁆𑀫𑀪𑀸𑀯𑀓𑀭𑀡𑁂𑀦 𑀘 𑀲𑀓𑀯𑀸𑀤𑀺𑀦𑁄 𑀦𑀺𑀕𑁆𑀕𑀳𑀲𑁆𑀲 𑀙𑁂𑀤𑁄 𑀯𑀺𑀦𑀸𑀲𑀦𑀁 𑀧𑀼𑀕𑁆𑀕𑀮𑀯𑀸𑀤𑀦𑀺𑀲𑁂𑀥𑀦𑀯𑀲𑁂𑀦 𑀲𑀫𑀼𑀝𑁆𑀞𑀺𑀢𑀢𑁆𑀢𑀸. 𑀥𑀫𑁆𑀫𑀢𑀸𑀬 𑀅𑀦𑀼𑀮𑁄𑀫𑀦𑀯𑀲𑁂𑀦 𑀉𑀝𑁆𑀞𑀳𑀺𑀢𑁆𑀯𑀸 𑀢𑀩𑁆𑀩𑀺𑀮𑁄𑀫𑀦𑀯𑀲𑁂𑀦 𑀧𑀯𑀢𑁆𑀢𑁄 𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀓𑀧𑀜𑁆𑀘𑀓𑁄 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀤𑀼𑀢𑀺𑀬𑀧𑀜𑁆𑀘𑀓𑁄 𑀯𑁂𑀤𑀺𑀢𑀩𑁆𑀩𑁄.

𑀢𑀤𑀸𑀥𑀸𑀭𑁄𑀢𑀺 𑀢𑁂 𑀲𑀘𑁆𑀘𑀺𑀓𑀝𑁆𑀞𑀧𑀭𑀫𑀢𑁆𑀣𑀸 𑀭𑀽𑀧𑀸𑀤𑀬𑁄 𑀆𑀥𑀸𑀭𑀸 𑀏𑀢𑀲𑁆𑀲𑀸𑀢𑀺 𑀢𑀤𑀸𑀥𑀸𑀭𑁄. 𑀏𑀢𑁂𑀦 ‘‘𑀭𑀽𑀧𑀲𑁆𑀫𑀺𑀁 𑀅𑀢𑁆𑀢𑀸’’𑀢𑀺 𑀏𑀯𑀁𑀧𑀓𑀸𑀭𑁄 𑀧𑀼𑀕𑁆𑀕𑀮𑀯𑀸𑀤𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀢𑁂𑀲𑀁 𑀯𑀸 𑀆𑀥𑀸𑀭𑀪𑀽𑀢𑁄𑀢𑀺 𑀏𑀢𑁂𑀦 ‘‘𑀅𑀢𑁆𑀢𑀦𑀺 𑀭𑀽𑀧’’𑀦𑁆𑀢𑀺 𑀏𑀯𑀁𑀧𑀓𑀸𑀭𑁄. 𑀅𑀜𑁆𑀜𑀢𑁆𑀭 𑀯𑀸 𑀢𑁂𑀳𑀻𑀢𑀺 𑀢𑁂𑀳𑀺 𑀭𑀽𑀧𑀸𑀤𑀻𑀳𑀺 𑀯𑀺𑀦𑀸. 𑀆𑀥𑀸𑀭𑀸𑀥𑁂𑀬𑁆𑀬𑀸𑀤𑀺𑀪𑀸𑀯𑁂𑀦 𑀅𑀲𑀁𑀲𑀝𑁆𑀞𑁄 𑀯𑀺𑀲𑀼𑀁𑀬𑁂𑀯 𑀯𑀺𑀦𑀸. 𑀢𑁂𑀦 𑀲𑀢𑁆𑀢𑀸𑀤𑀺𑀕𑀼𑀡𑁂𑀳𑀺 𑀅𑀯𑁄𑀓𑀺𑀡𑁆𑀡𑁄 𑀧𑀼𑀭𑀺𑀲𑁄𑀢𑀺 𑀏𑀯𑀫𑀸𑀤𑀺𑀓𑁄. 𑀢𑀁𑀲𑀸𑀫𑀺𑀪𑀽𑀢𑀢𑀸𑀬 𑀯𑀸 𑀢𑀤𑀥𑀻𑀦𑀪𑀸𑀯𑁂𑀦 ‘‘𑀅𑀜𑁆𑀜𑀢𑁆𑀭 𑀯𑀸 𑀢𑁂𑀳𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 ‘‘𑀭𑀽𑀧𑀯𑀸 𑀅𑀢𑁆𑀢𑀸’’𑀢𑀺 𑀏𑀯𑀁𑀧𑀓𑀸𑀭𑁄 𑀧𑀼𑀕𑁆𑀕𑀮𑀯𑀸𑀤𑁄 𑀤𑀲𑁆𑀲𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀦𑀜𑁆𑀜𑁄𑀢𑀺 𑀏𑀢𑁂𑀦 ‘‘𑀭𑀽𑀧𑀁 𑀅𑀢𑁆𑀢𑀸’’𑀢𑀺 𑀏𑀯𑀁𑀧𑀓𑀸𑀭𑁄. 𑀭𑀼𑀧𑁆𑀧𑀦𑀸𑀤𑀺𑀲𑀪𑀸𑀯𑁄 𑀭𑀽𑀧𑀓𑁆𑀔𑀦𑁆𑀥𑀸𑀤𑀻𑀦𑀁 𑀯𑀺𑀲𑁂𑀲𑀮𑀓𑁆𑀔𑀡𑀁, 𑀲𑀧𑁆𑀧𑀘𑁆𑀘𑀬𑀸𑀤𑀺𑀲𑀪𑀸𑀯𑁄 𑀲𑀸𑀫𑀜𑁆𑀜𑀮𑀓𑁆𑀔𑀡𑀁. 𑀭𑀽𑀧𑀸𑀤𑀺𑀢𑁄 𑀅𑀜𑁆𑀜𑁄 𑀅𑀦𑀜𑁆𑀜𑁄 𑀯𑀸 𑀅𑀜𑁆𑀜𑀢𑁆𑀢𑁂 𑀘 𑀢𑀤𑀸𑀥𑀸𑀭𑀸𑀤𑀺𑀪𑀽𑀢𑁄 𑀉𑀧𑀮𑀩𑁆𑀪𑀫𑀸𑀦𑁄 𑀆𑀧𑀚𑁆𑀚𑀢𑀻𑀢𑀺 𑀅𑀦𑀼𑀬𑀼𑀜𑁆𑀚𑀢𑀺 𑀲𑀓𑀯𑀸𑀤𑀻 𑀧𑀓𑀸𑀭𑀦𑁆𑀢𑀭𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀧𑀼𑀕𑁆𑀕𑀮𑀯𑀸𑀤𑀻 𑀧𑀼𑀕𑁆𑀕𑀮𑀲𑁆𑀲 𑀭𑀽𑀧𑀸𑀤𑀻𑀳𑀺 𑀦 𑀅𑀜𑁆𑀜𑀢𑁆𑀢𑀁 𑀇𑀘𑁆𑀙𑀢𑀺 𑀭𑀽𑀧𑀸𑀤𑀺 𑀯𑀺𑀬 𑀧𑀘𑁆𑀘𑀓𑁆𑀔𑀢𑁄 𑀅𑀦𑀼𑀫𑀸𑀦𑀢𑁄 𑀯𑀸 𑀕𑀸𑀳𑀬𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀢𑀲𑁆𑀲 𑀘 𑀓𑀸𑀭𑀓𑀯𑁂𑀤𑀓𑀪𑀸𑀯𑀲𑁆𑀲 𑀅𑀬𑀼𑀚𑁆𑀚𑀫𑀸𑀦𑀓𑀢𑁆𑀢𑀸. 𑀦𑀸𑀧𑀺 𑀅𑀦𑀜𑁆𑀜𑀢𑁆𑀢𑀁 𑀭𑀼𑀧𑁆𑀧𑀦𑀲𑀧𑁆𑀧𑀘𑁆𑀘𑀬𑀸𑀤𑀺𑀲𑀪𑀸𑀯𑀧𑁆𑀧𑀲𑀗𑁆𑀕𑀢𑁄 𑀧𑀼𑀕𑁆𑀕𑀮𑀲𑁆𑀲𑁂𑀯 𑀅𑀪𑀸𑀯𑀧𑁆𑀧𑀲𑀗𑁆𑀕𑀢𑁄 𑀘. 𑀬𑀣𑁂𑀯 𑀳𑀺 𑀦 𑀯𑀺𑀦𑀸 𑀇𑀦𑁆𑀥𑀦𑁂𑀦 𑀅𑀕𑁆𑀕𑀺 𑀧𑀜𑁆𑀜𑀸𑀧𑀺𑀬𑀢𑀺, 𑀦 𑀘 𑀅𑀜𑁆𑀜𑀁 𑀇𑀦𑁆𑀥𑀦𑀢𑁄 𑀅𑀕𑁆𑀕𑀺𑀁 𑀲𑀓𑁆𑀓𑀸 𑀧𑀝𑀺𑀚𑀸𑀦𑀺𑀢𑀼𑀁, 𑀦𑀸𑀧𑀺 𑀅𑀦𑀜𑁆𑀜𑀁. 𑀬𑀤𑀺 𑀳𑀺 𑀅𑀜𑁆𑀜𑁄 𑀲𑀺𑀬𑀸, 𑀦 𑀉𑀡𑁆𑀳𑀁 𑀇𑀦𑁆𑀥𑀦𑀁 𑀲𑀺𑀬𑀸. 𑀅𑀣 𑀅𑀦𑀜𑁆𑀜𑁄, 𑀦𑀺𑀤𑁆𑀤𑀳𑀺𑀢𑀩𑁆𑀩𑀁𑀬𑁂𑀯 𑀤𑀸𑀳𑀓𑀁 𑀲𑀺𑀬𑀸. 𑀏𑀯𑀫𑁂𑀯 𑀦 𑀯𑀺𑀦𑀸 𑀭𑀽𑀧𑀸𑀤𑀻𑀳𑀺 𑀧𑀼𑀕𑁆𑀕𑀮𑁄 𑀧𑀜𑁆𑀜𑀸𑀧𑀺𑀬𑀢𑀺, 𑀦 𑀘 𑀢𑁂𑀳𑀺 𑀅𑀜𑁆𑀜𑁄, 𑀦𑀸𑀧𑀺 𑀅𑀦𑀜𑁆𑀜𑁄 𑀲𑀲𑁆𑀲𑀢𑀼𑀘𑁆𑀙𑁂𑀤𑀪𑀸𑀯𑀧𑁆𑀧𑀲𑀗𑁆𑀕𑀢𑁄𑀢𑀺 𑀮𑀤𑁆𑀥𑀺𑀬𑀁 𑀞𑀢𑁆𑀯𑀸 𑀧𑀼𑀕𑁆𑀕𑀮𑀯𑀸𑀤𑀻 ‘‘𑀦 𑀳𑁂𑀯𑀸’’𑀢𑀺 𑀧𑀝𑀺𑀓𑁆𑀔𑀺𑀧𑀢𑀺. 𑀢𑀢𑁆𑀣 𑀅𑀕𑁆𑀕𑀺𑀦𑁆𑀥𑀦𑁄𑀧𑀫𑀸 𑀢𑀸𑀯 𑀬𑀤𑀺 𑀮𑁄𑀓𑀯𑁄𑀳𑀸𑀭𑁂𑀦 𑀯𑀼𑀢𑁆𑀢𑀸, 𑀅𑀧𑀴𑀺𑀢𑁆𑀢𑀁 𑀓𑀝𑁆𑀞𑀸𑀤𑀺𑀇𑀦𑁆𑀥𑀦𑀁 𑀦𑀺𑀤𑁆𑀤𑀳𑀺𑀢𑀩𑁆𑀩𑀜𑁆𑀘, 𑀧𑀴𑀺𑀢𑁆𑀢𑀁 𑀪𑀸𑀲𑀼𑀭𑀼𑀡𑁆𑀳𑀁 𑀅𑀕𑁆𑀕𑀺 𑀤𑀸𑀳𑀓𑀜𑁆𑀘, 𑀢𑀜𑁆𑀘 𑀑𑀚𑀝𑁆𑀞𑀫𑀓𑀭𑀽𑀧𑀁 𑀧𑀼𑀭𑀺𑀫𑀧𑀘𑁆𑀙𑀺𑀫𑀓𑀸𑀮𑀺𑀓𑀁 𑀅𑀦𑀺𑀘𑁆𑀘𑀁 𑀲𑀗𑁆𑀔𑀢𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀁, 𑀬𑀤𑀺 𑀏𑀯𑀁 𑀧𑀼𑀕𑁆𑀕𑀮𑁄 𑀭𑀽𑀧𑀸𑀤𑀻𑀳𑀺 𑀅𑀜𑁆𑀜𑁄 𑀅𑀦𑀺𑀘𑁆𑀘𑁄 𑀘 𑀆𑀧𑀦𑁆𑀦𑁄. 𑀅𑀣 𑀧𑀭𑀫𑀢𑁆𑀣𑀢𑁄, 𑀢𑀲𑁆𑀫𑀺𑀁𑀬𑁂𑀯 𑀓𑀝𑁆𑀞𑀸𑀤𑀺𑀓𑁂 𑀧𑀴𑀺𑀢𑁆𑀢𑁂 𑀬𑀁 𑀉𑀲𑀼𑀫𑀁 𑀲𑁄 𑀅𑀕𑁆𑀕𑀺, 𑀢𑀁𑀲𑀳𑀚𑀸𑀢𑀸𑀦𑀺 𑀢𑀻𑀡𑀺 𑀪𑀽𑀢𑀸𑀦𑀺 𑀇𑀦𑁆𑀥𑀦𑀁, 𑀏𑀯𑀫𑁆𑀧𑀺 𑀲𑀺𑀤𑁆𑀥𑀁 𑀮𑀓𑁆𑀔𑀡𑀪𑁂𑀤𑀢𑁄 𑀅𑀕𑁆𑀕𑀺𑀦𑁆𑀥𑀦𑀸𑀦𑀁 𑀅𑀜𑁆𑀜𑀢𑁆𑀢𑀦𑁆𑀢𑀺 𑀅𑀕𑁆𑀕𑀺 𑀯𑀺𑀬 𑀇𑀦𑁆𑀥𑀦𑀢𑁄 𑀭𑀽𑀧𑀸𑀤𑀻𑀳𑀺 𑀅𑀜𑁆𑀜𑁄 𑀧𑀼𑀕𑁆𑀕𑀮𑁄 𑀅𑀦𑀺𑀘𑁆𑀘𑁄 𑀘 𑀆𑀧𑀦𑁆𑀦𑁄𑀢𑀺 𑀩𑁆𑀬𑀸𑀳𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀻𑀢𑀺 𑀧𑀝𑀺𑀚𑀸𑀦𑀦𑁆𑀢𑀲𑁆𑀲 𑀧𑀓𑀸𑀭𑀦𑁆𑀢𑀭𑀲𑁆𑀲 𑀅𑀲𑀫𑁆𑀪𑀯𑀢𑁄 𑀯𑀼𑀢𑁆𑀢𑁂𑀲𑀼 𑀧𑀓𑀸𑀭𑁂𑀲𑀼 𑀏𑀓𑁂𑀦 𑀧𑀓𑀸𑀭𑁂𑀦 𑀉𑀧𑀮𑀩𑁆𑀪𑀫𑀸𑀦𑁄 𑀉𑀧𑀮𑀩𑁆𑀪𑀢𑀻𑀢𑀺 ‘‘𑀆𑀧𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀧𑀝𑀺𑀜𑁆𑀜𑀸𑀬 𑀏𑀓𑀢𑁆𑀢𑀸𑀧𑀦𑁆𑀦’’𑀦𑁆𑀢𑀺. 𑀏𑀓𑀢𑁆𑀢𑀸𑀧𑀦𑁆𑀦𑀢𑁆𑀢𑀸 𑀏𑀯 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀁, 𑀧𑀼𑀕𑁆𑀕𑀮𑁂 𑀧𑀝𑀺𑀲𑀺𑀤𑁆𑀥𑁂 𑀢𑀤𑀪𑀺𑀦𑀺𑀯𑁂𑀲𑁄𑀧𑀺 𑀅𑀬𑀸𑀣𑀸𑀯𑀢𑁄 𑀧𑀼𑀕𑁆𑀕𑀮𑀯𑀸𑀤𑀺𑀦𑁄 𑀕𑀳𑀺𑀢𑀸𑀓𑀸𑀭𑀲𑀼𑀜𑁆𑀜𑀢𑀸𑀯𑀺𑀪𑀸𑀯𑀦𑁂𑀦 𑀲𑀓𑀝𑁆𑀞𑀸𑀦𑀢𑁄 𑀘𑀸𑀯𑀺𑀢𑁄 𑀧𑀝𑀺𑀲𑁂𑀥𑀺𑀢𑁄 𑀏𑀯 𑀦𑀸𑀫 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀼𑀕𑁆𑀕𑀮𑀤𑀺𑀝𑁆𑀞𑀺𑀁 𑀧𑀝𑀺𑀲𑁂𑀥𑁂𑀦𑁆𑀢𑁄’’𑀢𑀺. 𑀧𑀼𑀕𑁆𑀕𑀮𑁄𑀬𑁂𑀯 𑀯𑀸 𑀢𑀣𑀸 𑀧𑀲𑁆𑀲𑀺𑀢𑀩𑁆𑀩𑀢𑁆𑀢𑀸 𑀤𑀺𑀝𑁆𑀞𑀺. ‘‘𑀲𑀸𑀫𑀻 𑀦𑀺𑀯𑀸𑀲𑀻 𑀓𑀸𑀭𑀓𑁄 𑀯𑁂𑀤𑀓𑁄 𑀦𑀺𑀘𑁆𑀘𑁄 𑀥𑀼𑀯𑁄’’𑀢𑀺 𑀅𑀪𑀺𑀦𑀺𑀯𑁂𑀲𑀯𑀺𑀲𑀬𑀪𑀽𑀢𑁄 𑀳𑀺 𑀧𑀭𑀺𑀓𑀧𑁆𑀧𑀫𑀢𑁆𑀢𑀲𑀺𑀤𑁆𑀥𑁄 𑀧𑀼𑀕𑁆𑀕𑀮𑁄 𑀇𑀥 𑀧𑀝𑀺𑀓𑁆𑀔𑀺𑀧𑀻𑀬𑀢𑀺, ‘‘𑀦 𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀕𑁆𑀕𑀮𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀯𑁄𑀳𑀸𑀭𑀧𑀼𑀕𑁆𑀕𑀮𑁄𑀢𑀺 𑀅𑀦𑀦𑀼𑀬𑁄𑀕𑁄 𑀆𑀓𑀸𑀲𑀓𑀼𑀲𑀼𑀫𑀲𑁆𑀲 𑀭𑀢𑁆𑀢𑀦𑀻𑀮𑀸𑀤𑀺𑀪𑀸𑀯𑀯𑀺𑀘𑀸𑀭𑀡𑀸 𑀯𑀺𑀬𑀸𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑁂 ‘‘𑀦𑀼𑀧𑀮𑀩𑁆𑀪𑀢𑀻’’𑀢𑀺 𑀧𑀝𑀺𑀚𑀸𑀦𑀺𑀢𑁆𑀯𑀸 𑀯𑀺𑀲𑁂𑀲𑀘𑁄𑀤𑀦𑀸𑀬 𑀅𑀦𑀸𑀧𑀚𑁆𑀚𑀦𑀢𑁄 𑀧𑀼𑀦 ‘‘𑀦 𑀳𑁂𑀯𑀸’’𑀢𑀺 𑀧𑀝𑀺𑀓𑁆𑀔𑁂𑀧𑁄 𑀧𑀝𑀺𑀜𑁆𑀜𑀸𑀬 𑀆𑀧𑀚𑁆𑀚𑀦𑀮𑁂𑀲𑁄. 𑀯𑀜𑁆𑀛𑀸𑀧𑀼𑀢𑁆𑀢𑀓𑀲𑁆𑀲 𑀤𑀻𑀖𑀭𑀲𑁆𑀲𑀢𑀸𑀦𑀼𑀬𑁄𑀕𑀲𑁆𑀲 𑀯𑀺𑀬 𑀲𑀩𑁆𑀩𑁂𑀦 𑀲𑀩𑁆𑀩𑀁 𑀧𑀭𑀫𑀢𑁆𑀣𑀢𑁄 𑀅𑀦𑀼𑀧𑀮𑀩𑁆𑀪𑀫𑀸𑀦𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀭𑀽𑀧𑀸𑀤𑀻𑀳𑀺 𑀅𑀜𑁆𑀜𑀸𑀦𑀜𑁆𑀜𑀢𑀸𑀦𑀼𑀬𑁄𑀕𑀲𑁆𑀲 𑀅𑀦𑀦𑀼𑀬𑁄𑀕𑀪𑀸𑀯𑁄 𑀏𑀯 𑀇𑀥 𑀅𑀯𑀺𑀧𑀭𑀻𑀢𑀢𑁆𑀣𑁄.

𑀬𑀁𑀓𑀸𑀭𑀡𑀸𑀢𑀺 𑀏𑀢𑁂𑀦 ‘‘𑀬𑀢𑁄𑀦𑀺𑀤𑀸𑀦’’𑀦𑁆𑀢𑀺 𑀏𑀢𑁆𑀣 𑀯𑀺𑀪𑀢𑁆𑀢𑀺𑀅𑀮𑁄𑀧𑁄 𑀤𑀝𑁆𑀞𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀚𑁆𑀛𑀸𑀘𑀭𑀦𑁆𑀢𑀻𑀢𑀺 𑀅𑀪𑀺𑀪𑀯𑀦𑁆𑀢𑀺. 𑀅𑀪𑀺𑀦𑀦𑁆𑀤𑀦𑀸𑀤𑀬𑁄 𑀢𑀡𑁆𑀳𑀸𑀤𑀻𑀳𑀺 𑀬𑀣𑀸𑀲𑀗𑁆𑀔𑁆𑀬𑀁 𑀬𑁄𑀚𑁂𑀢𑀩𑁆𑀩𑀸, 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀯𑀸 𑀅𑀪𑀺𑀦𑀦𑁆𑀤𑀦𑀚𑁆𑀛𑁄𑀲𑀸𑀦𑀸𑀦𑀺, 𑀢𑀻𑀳𑀺𑀧𑀺 𑀅𑀪𑀺𑀯𑀤𑀦𑀁 𑀅𑀯𑀺𑀲𑁂𑀲𑁂𑀦 𑀯𑀸 𑀢𑀻𑀳𑀺𑀧𑀺 𑀢𑀬𑁄 𑀬𑁄𑀚𑁂𑀢𑀩𑁆𑀩𑀸. 𑀏𑀢𑁆𑀣 𑀘𑁂 𑀦𑀢𑁆𑀣𑀺 𑀅𑀪𑀺𑀦𑀦𑁆𑀤𑀺𑀢𑀩𑁆𑀩𑀦𑁆𑀢𑀺𑀆𑀤𑀺𑀦𑀸 𑀅𑀪𑀺𑀦𑀦𑁆𑀤𑀦𑀸𑀤𑀻𑀦𑀁 𑀅𑀪𑀸𑀯𑀲𑀽𑀘𑀦𑁂𑀦 𑀨𑀮𑀽𑀧𑀘𑀸𑀭𑀢𑁄 𑀅𑀪𑀺𑀦𑀦𑁆𑀤𑀦𑀸𑀤𑀻𑀦𑀁 𑀲𑀫𑀼𑀘𑁆𑀙𑁂𑀤𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀪𑀽𑀢𑀁 𑀫𑀕𑁆𑀕𑀨𑀮𑀁 𑀯𑀼𑀘𑁆𑀘𑀢𑀺, 𑀢𑀁 𑀧𑀘𑁆𑀘𑀸𑀫𑀲𑀦𑀜𑁆𑀘 𑀏𑀲𑁂𑀯𑀸𑀢𑀺 𑀇𑀤𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀅𑀪𑀺…𑀧𑁂… 𑀨𑀮𑀁 𑀯𑀸’’𑀢𑀺.

‘‘𑀜𑀸𑀬𑀢𑀻𑀢𑀺 𑀚𑀸𑀦’’𑀦𑁆𑀢𑀺 𑀉𑀓𑁆𑀓𑀁𑀲𑀕𑀢𑀺𑀯𑀺𑀚𑀸𑀦𑀦𑁂𑀦 𑀦𑀺𑀭𑀯𑀲𑁂𑀲𑀁 𑀜𑁂𑀬𑁆𑀬𑀚𑀸𑀢𑀁 𑀧𑀭𑀺𑀕𑁆𑀕𑀬𑁆𑀳𑀢𑀻𑀢𑀺 𑀢𑀩𑁆𑀩𑀺𑀲𑀬𑀸𑀬 𑀚𑀸𑀦𑀸𑀢𑀺𑀓𑀺𑀭𑀺𑀬𑀸𑀬 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁂𑀯 𑀓𑀭𑀡𑀁 𑀪𑀯𑀺𑀢𑀼𑀫𑀭𑀳𑀢𑀻𑀢𑀺 ‘‘𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑁂𑀦 𑀚𑀸𑀦𑀺𑀢𑀩𑁆𑀩𑀁 𑀚𑀸𑀦𑀸𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀧𑀓𑀭𑀡𑀯𑀲𑁂𑀦, ‘‘𑀪𑀕𑀯𑀸’’𑀢𑀺 𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑁂𑀦 𑀯𑀸 𑀅𑀬𑀁 𑀅𑀢𑁆𑀣𑁄 𑀯𑀺𑀪𑀸𑀯𑁂𑀢𑀩𑁆𑀩𑁄. 𑀧𑀲𑁆𑀲𑀁 𑀧𑀲𑁆𑀲𑀢𑀻𑀢𑀺 𑀏𑀢𑁆𑀣𑀸𑀧𑀺 𑀏𑀲𑁂𑀯 𑀦𑀬𑁄. 𑀚𑀸𑀦𑀦𑁆𑀢𑀸𑀧𑀺 𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀚𑀸𑀦𑀦𑁆𑀢𑀺 𑀢𑀺𑀢𑁆𑀣𑀺𑀬𑀸 𑀧𑀞𑀫𑀚𑁆𑀛𑀸𑀦𑀅𑀭𑀽𑀧𑀚𑁆𑀛𑀸𑀦𑁂𑀳𑀺 𑀓𑀸𑀫𑀭𑀽𑀧𑀧𑀭𑀺𑀜𑁆𑀜𑀸𑀯𑀸𑀤𑀺𑀦𑁄. 𑀚𑀸𑀦𑀦𑁆𑀢𑁄 𑀚𑀸𑀦𑀸𑀢𑀺𑀬𑁂𑀯 𑀪𑀕𑀯𑀸 𑀅𑀦𑀸𑀕𑀸𑀫𑀺𑀅𑀭𑀳𑀢𑁆𑀢𑀫𑀕𑁆𑀕𑁂𑀳𑀺 𑀢𑀁𑀧𑀭𑀺𑀜𑁆𑀜𑀸𑀯𑀸𑀤𑀺𑀢𑀸𑀬. 𑀅𑀬𑀜𑁆𑀘 𑀅𑀢𑁆𑀣𑁄 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑀼𑀢𑁆𑀢𑀯𑀲𑁂𑀦 (𑀫. 𑀦𑀺. 𑁧.𑁧𑁬𑁩, 𑁧𑁭𑁫 𑀆𑀤𑀬𑁄) 𑀯𑀺𑀪𑀸𑀯𑁂𑀢𑀩𑁆𑀩𑁄. 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀉𑀧𑁆𑀧𑀦𑁆𑀦𑀢𑁆𑀢𑀸 𑀯𑀸 𑀘𑀓𑁆𑀔𑀼𑀪𑀽𑀢𑁄. 𑀜𑀸𑀡𑀪𑀽𑀢𑁄𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄. 𑀅𑀣 𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀆𑀤𑀺𑀓𑀁 𑀧𑀜𑁆𑀘𑀯𑀺𑀥𑀫𑁆𑀧𑀺 𑀘𑀓𑁆𑀔𑀼𑀁 𑀪𑀽𑀢𑁄 𑀧𑀢𑁆𑀢𑁄𑀢𑀺 𑀘𑀓𑁆𑀔𑀼𑀪𑀽𑀢𑁄. 𑀏𑀯𑀁 𑀜𑀸𑀡𑀪𑀽𑀢𑁄𑀢𑀺𑀆𑀤𑀻𑀲𑀼𑀧𑀺 𑀤𑀝𑁆𑀞𑀩𑁆𑀩𑀁. 𑀲𑀸𑀫𑀼𑀓𑁆𑀓𑀁𑀲𑀺𑀓𑀸𑀬 𑀥𑀫𑁆𑀫𑀤𑁂𑀲𑀦𑀸𑀬 𑀲𑀸𑀢𑀺𑀲𑀬𑁄 𑀪𑀕𑀯𑀢𑁄 𑀯𑀢𑁆𑀢𑀼𑀆𑀤𑀺𑀪𑀸𑀯𑁄𑀢𑀺 𑀯𑀼𑀢𑁆𑀢𑀁 ‘‘𑀘𑀢𑀼𑀲𑀘𑁆𑀘𑀥𑀫𑁆𑀫𑁂 𑀯𑀤𑀢𑀻𑀢𑀺 𑀯𑀢𑁆𑀢𑀸’’𑀢𑀺𑀆𑀤𑀺. ‘‘𑀧𑀯𑀢𑁆𑀢𑀸’’𑀢𑀺 𑀏𑀢𑁆𑀣 𑀧-𑀓𑀸𑀭𑀲𑁆𑀲 𑀧𑀓𑀝𑁆𑀞𑀢𑁆𑀣𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀺𑀭𑀁…𑀧𑁂… 𑀧𑀯𑀢𑁆𑀢𑀸’’𑀢𑀺 𑀆𑀳. 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀦𑁂𑀢𑀸 𑀦𑀺𑀦𑁆𑀦𑁂𑀢𑀸.

‘‘𑀏𑀓𑀽𑀦𑀦𑀯𑀼𑀢𑀺 𑀘𑀺𑀢𑁆𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀸 𑀘𑀺𑀢𑁆𑀢𑀲𑀳𑀘𑀭𑀺𑀬𑀸𑀬 𑀬𑀣𑀸 ‘‘𑀓𑀼𑀦𑁆𑀢𑀸 𑀧𑀘𑀭𑀦𑁆𑀢𑀻’’𑀢𑀺. 𑀢𑁂𑀲𑀜𑁆𑀘 𑀧𑀸𑀴𑀺𑀧𑀤𑁂𑀲𑀸𑀦𑀁 𑀏𑀓𑁂𑀓𑀁 𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸𑀧𑀺 𑀓𑀺𑀜𑁆𑀘𑀸𑀧𑀺 𑀓𑀼𑀲𑀮𑀢𑁆𑀢𑀺𑀓𑀧𑀤𑀸𑀦𑀺𑀬𑁂𑀯 𑀉𑀤𑁆𑀥𑀭𑀺𑀢𑁆𑀯𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁂 𑀘𑀺𑀢𑁆𑀢𑀸𑀦𑀺 𑀯𑀺𑀪𑀢𑁆𑀢𑀸𑀦𑀺, 𑀓𑀼𑀲𑀮𑀢𑁆𑀢𑀺𑀓𑁂𑀦 𑀧𑀦 𑀲𑀪𑀸𑀯𑀥𑀫𑁆𑀫𑀲𑀗𑁆𑀕𑀳𑀺𑀢𑀸𑀦𑀁 𑀲𑁂𑀲𑀢𑁆𑀢𑀺𑀓𑀤𑀼𑀓𑀧𑀤𑀸𑀦𑀁 𑀅𑀲𑀗𑁆𑀕𑀳𑀺𑀢𑀸𑀦𑀁 𑀅𑀪𑀸𑀯𑀢𑁄 𑀓𑀼𑀲𑀮𑀢𑁆𑀢𑀺𑀓𑀧𑀤𑀼𑀤𑁆𑀥𑀸𑀭𑁂𑀦 𑀦𑀬𑀤𑀲𑁆𑀲𑀦𑀪𑀽𑀢𑁂𑀦 𑀇𑀢𑀭𑀢𑁆𑀢𑀺𑀓𑀤𑀼𑀓𑀧𑀤𑀸𑀦𑀺𑀧𑀺 𑀉𑀤𑁆𑀥𑀝𑀸𑀦𑁂𑀯𑀸𑀢𑀺 𑀯𑀼𑀢𑁆𑀢𑀁. 𑀏𑀯𑀜𑁆𑀘 𑀓𑀢𑁆𑀯𑀸 𑀫𑀸𑀢𑀺𑀓𑀸𑀕𑁆𑀕𑀳𑀡𑀁 𑀲𑀫𑀢𑁆𑀣𑀺𑀢𑀁 𑀪𑀯𑀢𑀺.

𑀲𑁄 𑀘 𑀥𑀫𑁆𑀫𑁄𑀢𑀺 ‘‘𑀢𑀬𑁄 𑀓𑀼𑀲𑀮𑀳𑁂𑀢𑀽’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁦𑁬𑁦) 𑀧𑀼𑀭𑀺𑀫𑀸𑀬 𑀧𑀼𑀭𑀺𑀫𑀸𑀬 𑀧𑀸𑀴𑀺𑀬𑀸 𑀧𑀘𑁆𑀙𑀺𑀫𑀸 𑀧𑀘𑁆𑀙𑀺𑀫𑀸 𑀅𑀢𑁆𑀣𑀦𑀺𑀤𑁆𑀤𑁂𑀲𑁄𑀢𑀺 𑀯𑀼𑀢𑁆𑀢𑀁. ‘‘𑀲𑀫𑀸𑀦𑁂𑀦𑁆𑀢𑀻’’𑀢𑀺𑀲𑀤𑁆𑀤𑀲𑁆𑀲 𑀧𑀝𑀧𑀝𑀸𑀬𑀢𑀺-𑀲𑀤𑁆𑀤𑀲𑁆𑀲 𑀯𑀺𑀬 𑀲𑀤𑁆𑀤𑀦𑀬𑁄 𑀤𑀝𑁆𑀞𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀫𑀸𑀦𑀁 𑀓𑀭𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑀫𑀸𑀦𑀓𑀭𑀡𑀜𑁆𑀘 𑀊𑀦𑀧𑀓𑁆𑀔𑀺𑀧𑀦𑁂𑀦 𑀅𑀥𑀺𑀓𑀸𑀧𑀦𑀬𑀦𑁂𑀦 𑀯𑀸 𑀳𑁄𑀢𑀺, 𑀇𑀥 𑀊𑀦𑀧𑀓𑁆𑀔𑀺𑀧𑀦𑁂𑀦𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀧𑀽𑀭𑁂𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑀫𑀸𑀦𑁂𑀢𑀩𑁆𑀩𑀦𑁆𑀢𑀺 𑀏𑀢𑁆𑀣𑀸𑀧𑀻𑀢𑀺 ‘‘𑀧𑀝𑁆𑀞𑀸𑀦𑀁 𑀲𑀫𑀸𑀦𑁂𑀢𑀩𑁆𑀩’’𑀦𑁆𑀢𑀺 𑀏𑀢𑁆𑀣.

𑀩𑀮𑀯𑀢𑀸 𑀜𑀸𑀡𑀯𑁂𑀕𑁂𑀦 𑀅𑀪𑀺𑀥𑀫𑁆𑀫𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑀧𑁆𑀧𑀯𑀢𑁆𑀢𑁂𑀦. 𑀩𑀮𑀯𑀢𑁄 𑀜𑀸𑀡𑀯𑁂𑀕𑀲𑁆𑀲 𑀲𑀩𑁆𑀩𑀓𑀺𑀮𑁂𑀲𑀓𑁆𑀔𑁂𑀧𑀦𑀯𑀲𑀧𑁆𑀧𑀯𑀢𑁆𑀢𑀲𑁆𑀲. 𑀕𑀫𑁆𑀪𑀻𑀭𑀫𑁂𑀯 𑀕𑀫𑁆𑀪𑀻𑀭𑀕𑀢𑀁 𑀤𑀺𑀝𑁆𑀞𑀺𑀕𑀢𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀦𑀺𑀭𑀯𑀲𑁂𑀲𑁂𑀦𑀸𑀢𑀺 𑀦 𑀓𑀜𑁆𑀘𑀺 𑀅𑀯𑀲𑁂𑀲𑁂𑀢𑁆𑀯𑀸. 𑀧𑀜𑁆𑀘𑀔𑀻𑀮𑀭𑀳𑀺𑀢𑁂𑀦𑀸𑀢𑀺 𑀧𑀜𑁆𑀘𑀘𑁂𑀢𑁄𑀔𑀻𑀮𑀭𑀳𑀺𑀢𑁂𑀦.

𑀏𑀓𑀸𑀥𑀺𑀓𑁂𑀲𑀼 𑀅𑀝𑁆𑀞𑀲𑀼 𑀓𑀺𑀮𑁂𑀲𑀲𑀢𑁂𑀲𑀽𑀢𑀺 ‘‘𑀚𑀸𑀢𑀺𑀫𑀤𑁄’’𑀢𑀺𑀆𑀤𑀺𑀦𑀸 𑀏𑀓𑀓𑀯𑀲𑁂𑀦 𑀆𑀕𑀢𑀸 𑀢𑁂𑀲𑀢𑁆𑀢𑀢𑀺, ‘‘𑀓𑁄𑀥𑁄 𑀘 𑀉𑀧𑀦𑀸𑀳𑁄 𑀘𑀸’’𑀢𑀺𑀆𑀤𑀺𑀦𑀸 𑀤𑀼𑀓𑀯𑀲𑁂𑀦 𑀙𑀢𑁆𑀢𑀺𑀁𑀲, ‘‘𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀻’’𑀢𑀺𑀆𑀤𑀺𑀦𑀸 𑀢𑀺𑀓𑀯𑀲𑁂𑀦 𑀧𑀜𑁆𑀘𑀸𑀥𑀺𑀓𑀁 𑀲𑀢𑀁, ‘‘𑀘𑀢𑁆𑀢𑀸𑀭𑁄 𑀆𑀲𑀯𑀸’’𑀢𑀺𑀆𑀤𑀺𑀦𑀸 𑀘𑀢𑀼𑀓𑁆𑀓𑀯𑀲𑁂𑀦 𑀙𑀧𑁆𑀧𑀜𑁆𑀜𑀸𑀲, ‘‘𑀧𑀜𑁆𑀘𑁄𑀭𑀫𑁆𑀪𑀸𑀕𑀺𑀬𑀸𑀦𑀺 𑀲𑀁𑀬𑁄𑀚𑀦𑀸𑀦𑀻’’𑀢𑀺𑀆𑀤𑀺𑀦𑀸 𑀧𑀜𑁆𑀘𑀓𑀯𑀲𑁂𑀦 𑀧𑀜𑁆𑀘𑀲𑀢𑁆𑀢𑀢𑀺, ‘‘𑀙 𑀯𑀺𑀯𑀸𑀤𑀫𑀽𑀮𑀸𑀦𑀻’’𑀢𑀺𑀆𑀤𑀺𑀦𑀸 𑀙𑀓𑁆𑀓𑀯𑀲𑁂𑀦 𑀘𑀢𑀼𑀭𑀸𑀲𑀻𑀢𑀺, ‘‘𑀲𑀢𑁆𑀢 𑀅𑀦𑀼𑀲𑀬𑀸’’𑀢𑀺𑀆𑀤𑀺𑀦𑀸 𑀲𑀢𑁆𑀢𑀓𑀯𑀲𑁂𑀦 𑀏𑀓𑀽𑀦𑀧𑀜𑁆𑀜𑀸𑀲, ‘‘𑀅𑀝𑁆𑀞 𑀓𑀺𑀮𑁂𑀲𑀯𑀢𑁆𑀣𑀽𑀦𑀻’’𑀢𑀺𑀆𑀤𑀺𑀦𑀸 𑀅𑀝𑁆𑀞𑀓𑀯𑀲𑁂𑀦 𑀘𑀢𑀼𑀲𑀝𑁆𑀞𑀺, ‘‘𑀦𑀯 𑀆𑀖𑀸𑀢𑀯𑀢𑁆𑀣𑀽𑀦𑀻’’𑀢𑀺𑀆𑀤𑀺𑀦𑀸 𑀦𑀯𑀓𑀯𑀲𑁂𑀦 𑀏𑀓𑀸𑀲𑀻𑀢𑀺, ‘‘𑀤𑀲 𑀓𑀺𑀮𑁂𑀲𑀯𑀢𑁆𑀣𑀽𑀦𑀻’’𑀢𑀺𑀆𑀤𑀺𑀦𑀸 𑀤𑀲𑀓𑀯𑀲𑁂𑀦 𑀲𑀢𑁆𑀢𑀢𑀺, ‘‘𑀅𑀚𑁆𑀛𑀢𑁆𑀢𑀺𑀓𑀲𑁆𑀲𑀼𑀧𑁆𑀧𑀸𑀤𑀸𑀬 𑀅𑀝𑁆𑀞𑀸𑀭𑀲 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀻’’𑀢𑀺𑀆𑀤𑀺𑀦𑀸 𑀅𑀝𑁆𑀞𑀸𑀭𑀲𑀓𑀯𑀲𑁂𑀦 𑀅𑀝𑁆𑀞𑀲𑀢𑀦𑁆𑀢𑀺 𑀏𑀯𑀁 𑀏𑀓𑀸𑀥𑀺𑀓𑁂𑀲𑀼 𑀅𑀝𑁆𑀞𑀲𑀼 𑀓𑀺𑀮𑁂𑀲𑀲𑀢𑁂𑀲𑀼. 𑀲𑁂𑀲𑀸 𑀢𑁂𑀦𑀯𑀼𑀢𑀸𑀥𑀺𑀓𑀁 𑀙𑀲𑀢𑀁 𑀓𑀺𑀮𑁂𑀲𑀸. 𑀢𑁂 𑀩𑁆𑀭𑀳𑁆𑀫𑀚𑀸𑀮𑀲𑀼𑀢𑁆𑀢𑀸𑀕𑀢𑀸𑀳𑀺 𑀤𑁆𑀯𑀸𑀲𑀝𑁆𑀞𑀺𑀬𑀸 𑀤𑀺𑀝𑁆𑀞𑀻𑀳𑀺 𑀲𑀳 𑀧𑀜𑁆𑀘𑀧𑀜𑁆𑀜𑀸𑀲𑀸𑀥𑀺𑀓𑀁 𑀲𑀢𑁆𑀢𑀲𑀢𑀁 𑀳𑁄𑀦𑁆𑀢𑀺.

𑀅𑀣 𑀯𑀸 𑀘𑀼𑀤𑁆𑀤𑀲𑁂𑀓𑀦𑁆𑀢𑀸𑀓𑀼𑀲𑀮𑀸, 𑀧𑀜𑁆𑀘𑀯𑀻𑀲𑀢𑀺 𑀓𑀼𑀲𑀮𑀸𑀩𑁆𑀬𑀸𑀓𑀢𑀲𑀸𑀥𑀸𑀭𑀡𑀸, 𑀘𑀼𑀤𑁆𑀤𑀲 𑀓𑀼𑀲𑀮𑀢𑁆𑀢𑀺𑀓𑀲𑀸𑀥𑀸𑀭𑀡𑀸, 𑀉𑀧𑀘𑀬𑀸𑀤𑀺𑀤𑁆𑀯𑀬𑀁 𑀏𑀓𑀁 𑀓𑀢𑁆𑀯𑀸 𑀲𑀢𑁆𑀢𑀯𑀻𑀲𑀢𑀺 𑀭𑀽𑀧𑀸𑀦𑀺 𑀘𑀸𑀢𑀺 𑀇𑀫𑁂 𑀅𑀲𑀻𑀢𑀺 𑀥𑀫𑁆𑀫𑀸, 𑀇𑀫𑁂𑀲𑀼 𑀪𑀸𑀯𑀤𑁆𑀯𑀬𑁂 𑀏𑀓𑀁 𑀞𑀧𑁂𑀢𑁆𑀯𑀸 𑀅𑀚𑁆𑀛𑀢𑁆𑀢𑀺𑀓𑀸 𑀏𑀓𑀽𑀦𑀸𑀲𑀻𑀢𑀺, 𑀩𑀸𑀳𑀺𑀭𑀸 𑀏𑀓𑀽𑀦𑀸𑀲𑀻𑀢𑀻𑀢𑀺 𑀲𑀩𑁆𑀩𑁂𑀧𑀺 𑀅𑀝𑁆𑀞𑀧𑀜𑁆𑀜𑀸𑀲𑀸𑀥𑀺𑀓𑀁 𑀲𑀢𑀁 𑀳𑁄𑀦𑁆𑀢𑀺. 𑀇𑀫𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀤𑀲𑀦𑁆𑀦𑀁 𑀤𑀲𑀦𑁆𑀦𑀁 𑀓𑀺𑀮𑁂𑀲𑀸𑀦𑀁 𑀉𑀧𑁆𑀧𑀚𑁆𑀚𑀦𑀢𑁄 𑀅𑀲𑀻𑀢𑀺𑀅𑀥𑀺𑀓𑀁 𑀤𑀺𑀬𑀟𑁆𑀠𑀓𑀺𑀮𑁂𑀲𑀲𑀳𑀲𑁆𑀲𑀁 𑀳𑁄𑀦𑁆𑀢𑀺.

𑀅𑀣 𑀯𑀸 𑀢𑁂𑀧𑀜𑁆𑀜𑀸𑀲 𑀅𑀭𑀽𑀧𑀥𑀫𑁆𑀫𑀸, 𑀅𑀝𑁆𑀞𑀸𑀭𑀲 𑀭𑀽𑀧𑀭𑀽𑀧𑀸𑀦𑀺, 𑀆𑀓𑀸𑀲𑀥𑀸𑀢𑀼, 𑀮𑀓𑁆𑀔𑀡𑀭𑀽𑀧𑀸𑀦𑀺 𑀘𑀸𑀢𑀺 𑀧𑀜𑁆𑀘𑀲𑀢𑁆𑀢𑀢𑀺 𑀥𑀫𑁆𑀫𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀪𑁂𑀤𑀢𑁄 𑀧𑀜𑁆𑀜𑀸𑀲𑀲𑀢𑀁 𑀳𑁄𑀦𑁆𑀢𑀺. 𑀢𑀢𑁆𑀣 𑀏𑀓𑁂𑀓𑀲𑁆𑀫𑀺𑀁 𑀤𑀲 𑀤𑀲 𑀓𑀺𑀮𑁂𑀲𑀸𑀢𑀺𑀧𑀺 𑀤𑀺𑀬𑀟𑁆𑀠𑀓𑀺𑀮𑁂𑀲𑀲𑀳𑀲𑁆𑀲𑀁. 𑀢𑀣𑀸 𑀏𑀢𑁆𑀣 𑀯𑁂𑀤𑀦𑀁 𑀲𑀼𑀔𑀺𑀦𑁆𑀤𑁆𑀭𑀺𑀬𑀸𑀤𑀺𑀯𑀲𑁂𑀦 𑀧𑀜𑁆𑀘𑀯𑀺𑀥𑀁 𑀓𑀢𑁆𑀯𑀸 𑀲𑀢𑁆𑀢𑀧𑀜𑁆𑀜𑀸𑀲 𑀅𑀭𑀽𑀧𑀥𑀫𑁆𑀫𑀸, 𑀅𑀝𑁆𑀞𑀸𑀭𑀲 𑀭𑀽𑀧𑀭𑀽𑀧𑀸𑀦𑀺 𑀘𑀸𑀢𑀺 𑀧𑀜𑁆𑀘𑀲𑀢𑁆𑀢𑀢𑀺 𑀯𑀺𑀧𑀲𑁆𑀲𑀦𑀽𑀧𑀕𑀥𑀫𑁆𑀫𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀪𑁂𑀤𑀢𑁄 𑀧𑀜𑁆𑀜𑀸𑀲𑀲𑀢𑀁 𑀳𑁄𑀦𑁆𑀢𑀺. 𑀏𑀢𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀤𑀲 𑀤𑀲 𑀓𑀺𑀮𑁂𑀲𑀸𑀢𑀺𑀧𑀺 𑀤𑀺𑀬𑀟𑁆𑀠𑀓𑀺𑀮𑁂𑀲𑀲𑀳𑀲𑁆𑀲𑀁.

𑀅𑀧𑀭𑁄 𑀦𑀬𑁄 𑁋 𑀤𑁆𑀯𑀸𑀤𑀲𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀧𑀞𑀫𑁂 𑀙 𑀓𑀺𑀮𑁂𑀲𑀸, 𑀤𑀼𑀢𑀺𑀬𑁂 𑀲𑀢𑁆𑀢, 𑀢𑀢𑀺𑀬𑁂 𑀙, 𑀘𑀢𑀼𑀢𑁆𑀣𑁂 𑀲𑀢𑁆𑀢, 𑀧𑀜𑁆𑀘𑀫𑁂 𑀙, 𑀙𑀝𑁆𑀞𑁂 𑀲𑀢𑁆𑀢, 𑀲𑀢𑁆𑀢𑀫𑁂 𑀙, 𑀅𑀝𑁆𑀞𑀫𑁂 𑀲𑀢𑁆𑀢, 𑀦𑀯𑀫𑁂 𑀧𑀜𑁆𑀘, 𑀤𑀲𑀫𑁂 𑀙, 𑀏𑀓𑀸𑀤𑀲𑀫𑁂 𑀧𑀜𑁆𑀘, 𑀤𑁆𑀯𑀸𑀤𑀲𑀫𑁂 𑀘𑀢𑁆𑀢𑀸𑀭𑁄𑀢𑀺 𑀲𑀩𑁆𑀩𑁂 𑀤𑁆𑀯𑀸𑀲𑀢𑁆𑀢𑀢𑀺, 𑀇𑀫𑁂 𑀧𑀜𑁆𑀘𑀤𑁆𑀯𑀸𑀭𑀺𑀓𑀸 𑀧𑀜𑁆𑀘𑀲𑀼 𑀭𑀽𑀧𑀸𑀤𑀻𑀲𑀼 𑀆𑀭𑀫𑁆𑀫𑀡𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀤𑁆𑀯𑀸𑀲𑀢𑁆𑀢𑀢𑀻𑀢𑀺 𑀲𑀝𑁆𑀞𑀺𑀅𑀥𑀺𑀓𑀸𑀦𑀺 𑀢𑀻𑀡𑀺 𑀲𑀢𑀸𑀦𑀺, 𑀫𑀦𑁄𑀤𑁆𑀯𑀸𑀭𑀺𑀓𑀸 𑀧𑀦 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀏𑀓𑁂𑀓𑀲𑁆𑀫𑀺𑀁 𑀤𑁆𑀯𑀸𑀲𑀢𑁆𑀢𑀢𑀺 𑀤𑁆𑀯𑀸𑀲𑀢𑁆𑀢𑀢𑀻𑀢𑀺 𑀓𑀢𑁆𑀯𑀸 𑀤𑁆𑀯𑀢𑁆𑀢𑀺𑀁𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀲𑀢𑀸𑀦𑀺, 𑀲𑀩𑁆𑀩𑀸𑀦𑀺𑀧𑀺 𑀤𑁆𑀯𑀸𑀦𑀯𑀼𑀢𑀺𑀅𑀥𑀺𑀓𑀸𑀦𑀺 𑀲𑀢𑁆𑀢𑀲𑀢𑀸𑀦𑀺, 𑀢𑀸𑀦𑀺 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀯𑀺𑀲𑀬𑀢𑀸𑀬 𑀘𑀢𑀼𑀭𑀸𑀲𑀻𑀢𑀺𑀅𑀥𑀺𑀓𑀁 𑀤𑀺𑀬𑀟𑁆𑀠𑀓𑀺𑀮𑁂𑀲𑀲𑀳𑀲𑁆𑀲𑀁 𑀳𑁄𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀣 𑀯𑀸 𑀭𑀽𑀧𑀸𑀭𑀫𑁆𑀫𑀡𑀸𑀤𑀻𑀦𑀺 𑀧𑀜𑁆𑀘, 𑀅𑀯𑀲𑁂𑀲𑀭𑀽𑀧𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀯𑀲𑁂𑀦 𑀧𑀜𑁆𑀘 𑀥𑀫𑁆𑀫𑀸𑀭𑀫𑁆𑀫𑀡𑀓𑀸 𑀲𑁂𑀲𑀸 𑀘𑀸𑀢𑀺 𑀤𑀲, 𑀢𑁂 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀪𑁂𑀤𑀢𑁄 𑀯𑀻𑀲𑀢𑀺, 𑀧𑀜𑁆𑀜𑀢𑁆𑀢𑀺 𑀘𑀸𑀢𑀺 𑀏𑀓𑀯𑀻𑀲𑀢𑀺𑀬𑀸 𑀆𑀭𑀫𑁆𑀫𑀡𑁂𑀲𑀼 𑀤𑁆𑀯𑀸𑀲𑀢𑁆𑀢𑀢𑀺 𑀤𑁆𑀯𑀸𑀲𑀢𑁆𑀢𑀢𑀺 𑀓𑀺𑀮𑁂𑀲𑀸𑀢𑀺 𑀤𑁆𑀯𑀸𑀤𑀲𑀸𑀥𑀺𑀓𑀁 𑀤𑀺𑀬𑀟𑁆𑀠𑀓𑀺𑀮𑁂𑀲𑀲𑀳𑀲𑁆𑀲𑀁 𑀳𑁄𑀦𑁆𑀢𑀺.

𑀅𑀣 𑀯𑀸 𑀤𑁆𑀯𑀸𑀤𑀲𑀲𑀼 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀧𑀞𑀫𑁂 𑀯𑀻𑀲𑀢𑀺 𑀥𑀫𑁆𑀫𑀸, 𑀤𑀼𑀢𑀺𑀬𑁂 𑀤𑁆𑀯𑀸𑀯𑀻𑀲𑀢𑀺, 𑀢𑀢𑀺𑀬𑁂 𑀯𑀻𑀲𑀢𑀺, 𑀘𑀢𑀼𑀢𑁆𑀣𑁂 𑀤𑁆𑀯𑀸𑀯𑀻𑀲𑀢𑀺, 𑀧𑀜𑁆𑀘𑀫𑁂 𑀏𑀓𑀽𑀦𑀯𑀻𑀲𑀢𑀺, 𑀙𑀝𑁆𑀞𑁂 𑀏𑀓𑀽𑀦𑀯𑀻𑀲𑀢𑀺, 𑀲𑀢𑁆𑀢𑀫𑁂 𑀏𑀓𑀽𑀦𑀯𑀻𑀲𑀢𑀺, 𑀅𑀝𑁆𑀞𑀫𑁂 𑀏𑀓𑀯𑀻𑀲𑀢𑀺, 𑀦𑀯𑀫𑁂 𑀏𑀓𑀽𑀦𑀯𑀻𑀲𑀢𑀺, 𑀤𑀲𑀫𑁂 𑀏𑀓𑀯𑀻𑀲𑀢𑀺, 𑀏𑀓𑀸𑀤𑀲𑀫𑁂 𑀲𑁄𑀴𑀲, 𑀤𑁆𑀯𑀸𑀤𑀲𑀫𑁂 𑀲𑁄𑀴𑀲𑀸𑀢𑀺 𑀲𑀩𑁆𑀩𑁂 𑀅𑀓𑀼𑀲𑀮𑀥𑀫𑁆𑀫𑀸 𑀙𑀢𑁆𑀢𑀺𑀁𑀲𑀸𑀥𑀺𑀓𑀸𑀦𑀺 𑀤𑁆𑀯𑁂 𑀲𑀢𑀸𑀦𑀺, 𑀇𑀫𑁂 𑀙𑀲𑀼 𑀆𑀭𑀫𑁆𑀫𑀡𑁂𑀲𑀼 𑀧𑀘𑁆𑀘𑁂𑀓𑀁 𑀙𑀢𑁆𑀢𑀺𑀁 𑀲𑀸𑀥𑀺𑀓𑀸𑀦𑀺 𑀤𑁆𑀯𑁂 𑀲𑀢𑀸𑀦𑀺, 𑀲𑀩𑁆𑀩𑁂 𑀲𑁄𑀴𑀲𑀸𑀥𑀺𑀓𑀸𑀦𑀺 𑀘𑀢𑁆𑀢𑀸𑀭𑀺 𑀲𑀢𑀸𑀦𑀺 𑀘 𑀲𑀳𑀲𑁆𑀲𑀁 𑀳𑁄𑀦𑁆𑀢𑀻𑀢𑀺 𑀏𑀯𑀫𑁆𑀧𑀺 𑀤𑀺𑀬𑀟𑁆𑀠𑀓𑀺𑀮𑁂𑀲𑀲𑀳𑀲𑁆𑀲𑀁 𑀯𑁂𑀤𑀺𑀢𑀩𑁆𑀩𑀁.

𑀇𑀢𑀭𑁂𑀲𑀦𑁆𑀢𑀺 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀁 ‘‘𑀅𑀢𑀻𑀢𑀸𑀦𑀺 𑀙𑀢𑁆𑀢𑀺𑀁𑀲𑀸’’𑀢𑀺𑀆𑀤𑀺𑀦𑀸 𑀅𑀢𑀻𑀢𑀸𑀤𑀺𑀪𑀸𑀯𑀸𑀫𑀲𑀦𑀢𑁄. 𑀔𑁂𑀧𑀦𑁂𑀢𑀺 𑀅𑀭𑀺𑀬𑀫𑀕𑁆𑀕𑁂𑀦 𑀲𑀫𑀼𑀘𑁆𑀙𑀺𑀦𑁆𑀤𑀦𑁂. ‘‘𑀤𑀺𑀬𑀟𑁆𑀠𑀓𑀺𑀮𑁂𑀲𑀲𑀳𑀲𑁆𑀲𑀁 𑀔𑁂𑀧𑁂𑀢𑁆𑀯𑀸’’𑀢𑀺 𑀳𑀺 𑀯𑀼𑀢𑁆𑀢𑀁. 𑀧𑀭𑀫𑀢𑁆𑀣𑀢𑁄 𑀅𑀢𑀻𑀢𑀸𑀤𑀻𑀦𑀁 𑀫𑀕𑁆𑀕𑁂𑀦 𑀅𑀧𑁆𑀧𑀳𑀸𑀢𑀩𑁆𑀩𑀢𑁆𑀢𑀸 ‘‘𑀅𑀢𑀻𑀢𑀸𑀤𑀺𑀪𑀸𑀯𑀸𑀫𑀲𑀦𑀸 𑀅𑀕𑁆𑀕𑀳𑀡𑀁 𑀔𑁂𑀧𑀦𑁂’’𑀢𑀺 𑀯𑀼𑀢𑁆𑀢𑀁. 𑀬𑀁 𑀧𑀦 𑀧𑀝𑁆𑀞𑀸𑀦𑁂 ‘‘𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑁄 𑀥𑀫𑁆𑀫𑁄 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀲𑁆𑀲 𑀥𑀫𑁆𑀫𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺𑀆𑀤𑀺𑀦𑀸 𑀢𑀺𑀓𑁂, 𑀢𑀣𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸𑀢𑀻𑀢𑀢𑀺𑀓𑀢𑀺𑀓𑁂 ‘‘𑀅𑀢𑀻𑀢𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸’’𑀢𑀺𑀆𑀤𑀺𑀦𑀸 𑀘 𑀢𑀻𑀲𑀼 𑀓𑀸𑀮𑁂𑀲𑀼 𑀤𑀲𑁆𑀲𑀦𑀸𑀤𑀺𑀧𑀳𑀸𑀢𑀩𑁆𑀩𑀯𑀘𑀦𑀁 𑀓𑀢𑀁, 𑀢𑀁 𑀅𑀢𑀻𑀢𑀸𑀤𑀻𑀦𑀁 𑀲𑀁𑀓𑀺𑀮𑀺𑀝𑁆𑀞𑀢𑀸𑀬 𑀅𑀧𑀸𑀬𑀕𑀫𑀦𑀻𑀬𑀢𑀸𑀬 𑀘 𑀤𑀲𑁆𑀲𑀦𑀧𑀳𑀸𑀢𑀩𑁆𑀩𑁂𑀳𑀺 𑀦𑀺𑀭𑀢𑀺𑀲𑀬𑀢𑁆𑀢𑀸 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀦 𑀪𑀸𑀲𑀺𑀢𑀢𑁆𑀣𑀯𑀘𑀦𑀦𑁆𑀢𑀺 𑀇𑀤𑀁 ‘‘𑀳𑀺𑀢𑀧𑀭𑀺𑀬𑀸𑀬𑀯𑀘𑀦’’𑀦𑁆𑀢𑀺 𑀏𑀢𑁂𑀦 𑀦𑀺𑀯𑀢𑁆𑀢𑀺𑀢𑀲𑁆𑀲 𑀏𑀓𑀤𑁂𑀲𑀓𑀣𑀦𑀁. 𑀬𑀣𑀸 𑀳𑀺 𑀅𑀬𑀁 𑀅𑀢𑁆𑀣-𑀲𑀤𑁆𑀤𑁄 𑀦 𑀪𑀸𑀲𑀺𑀢𑀢𑁆𑀣𑀯𑀘𑀦𑀁, 𑀏𑀯𑀁 𑀯𑀺𑀲𑀬𑀧𑁆𑀧𑀬𑁄𑀚𑀦𑀸𑀤𑀺𑀯𑀘𑀦𑀫𑁆𑀧𑀺 𑀦 𑀳𑁄𑀢𑀻𑀢𑀺. 𑀬𑀣𑀸𑀯𑀼𑀢𑁆𑀢𑀲𑁆𑀲𑀸𑀢𑀺 𑀳𑀺𑀢𑀧𑀭𑀺𑀬𑀸𑀬𑀲𑁆𑀲. ‘‘𑀦 𑀳𑀜𑁆𑀜𑀤𑀢𑁆𑀣𑀢𑁆𑀣𑀺𑀧𑀲𑀁𑀲𑀮𑀸𑀪𑀸’’𑀢𑀺 𑀧𑀤𑀲𑁆𑀲 𑀦𑀺𑀤𑁆𑀤𑁂𑀲𑁂 ‘‘𑀅𑀢𑁆𑀢𑀢𑁆𑀣𑁄 𑀯𑀸 𑀧𑀭𑀢𑁆𑀣𑁄 𑀯𑀸’’𑀢𑀺𑀆𑀤𑀺𑀦𑀸 (𑀫𑀳𑀸𑀦𑀺. 𑁬𑁯) 𑀓𑀺𑀜𑁆𑀘𑀸𑀧𑀺 𑀲𑀼𑀢𑁆𑀢𑀦𑀺𑀭𑀧𑁂𑀓𑁆𑀔𑀁 𑀅𑀢𑁆𑀢𑀢𑁆𑀣𑀸𑀤𑀬𑁄 𑀯𑀼𑀢𑁆𑀢𑀸 𑀲𑀼𑀢𑁆𑀢𑀢𑁆𑀣𑀪𑀸𑀯𑁂𑀦 𑀅𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸, 𑀢𑁂𑀲𑀼 𑀧𑀦 𑀏𑀓𑁄𑀧𑀺 𑀅𑀢𑁆𑀣𑀧𑁆𑀧𑀪𑁂𑀤𑁄 𑀲𑀼𑀢𑁆𑀢𑁂𑀦 𑀤𑀻𑀧𑁂𑀢𑀩𑁆𑀩𑀢𑀁 𑀦𑀸𑀢𑀺𑀓𑁆𑀓𑀫𑀢𑀻𑀢𑀺 𑀆𑀳 ‘‘𑀢𑁂 𑀲𑀼𑀢𑁆𑀢𑀁 𑀲𑀽𑀘𑁂𑀢𑀻’’𑀢𑀺. 𑀇𑀫𑀲𑁆𑀫𑀺𑀁 𑀯𑀺𑀓𑀧𑁆𑀧𑁂 𑀅𑀢𑁆𑀣-𑀲𑀤𑁆𑀤𑁄 𑀪𑀸𑀲𑀺𑀢𑀢𑁆𑀣𑀯𑀘𑀦𑀫𑁆𑀧𑀺 𑀳𑁄𑀢𑀺. 𑀧𑀼𑀭𑀺𑀫𑀓𑀸 𑀳𑀺 𑀧𑀜𑁆𑀘 𑀅𑀢𑁆𑀣𑀧𑁆𑀧𑀪𑁂𑀤𑀸 𑀳𑀺𑀢𑀧𑀭𑀺𑀬𑀸𑀬𑀸, 𑀢𑀢𑁄 𑀧𑀭𑁂 𑀙 𑀪𑀸𑀲𑀺𑀢𑀢𑁆𑀣𑀧𑁆𑀧𑀪𑁂𑀤𑀸, 𑀧𑀘𑁆𑀙𑀺𑀫𑀓𑀸 𑀧𑀦 𑀉𑀪𑀬𑀲𑀪𑀸𑀯𑀸. 𑀢𑀢𑁆𑀣 𑀤𑀼𑀭𑀥𑀺𑀕𑀫𑀢𑀸𑀬 𑀯𑀺𑀪𑀸𑀯𑀦𑁂 𑀅𑀮𑀤𑁆𑀥𑀕𑀸𑀥𑁄 𑀕𑀫𑁆𑀪𑀻𑀭𑁄, 𑀦 𑀯𑀺𑀯𑀝𑁄 𑀕𑀼𑀴𑁆𑀳𑁄, 𑀫𑀽𑀮𑀼𑀤𑀓𑀸𑀤𑀬𑁄 𑀯𑀺𑀬 𑀧𑀁𑀲𑀼𑀦𑀸 𑀅𑀓𑁆𑀔𑀭𑀲𑀦𑁆𑀦𑀺𑀯𑁂𑀲𑀸𑀤𑀺𑀦𑀸 𑀢𑀺𑀭𑁄𑀳𑀺𑀢𑁄 𑀧𑀝𑀺𑀘𑁆𑀙𑀦𑁆𑀦𑁄, 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀜𑀸𑀧𑁂𑀢𑀩𑁆𑀩𑁄 𑀦𑁂𑀬𑁆𑀬𑁄, 𑀬𑀣𑀸𑀭𑀼𑀢𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄 𑀦𑀻𑀢𑁄. 𑀅𑀦𑀯𑀚𑁆𑀚𑀦𑀺𑀓𑁆𑀓𑀺𑀮𑁂𑀲𑀯𑁄𑀤𑀸𑀦𑀸 𑀧𑀭𑀺𑀬𑀸𑀬𑀯𑀲𑁂𑀦 𑀯𑀼𑀢𑁆𑀢𑀸, 𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀥𑀫𑁆𑀫𑀯𑀲𑁂𑀦 𑀯𑀸. 𑀧𑀭𑀫𑀢𑁆𑀣𑁄 𑀦𑀺𑀩𑁆𑀩𑀸𑀦𑀁, 𑀅𑀯𑀺𑀧𑀭𑀻𑀢𑀲𑀪𑀸𑀯𑁄 𑀏𑀯 𑀯𑀸. 𑀲𑀸𑀢𑀺𑀲𑀬𑀁 𑀧𑀓𑀸𑀲𑀺𑀢𑀸𑀦𑀺 𑀢𑀧𑁆𑀧𑀭𑀪𑀸𑀯𑁂𑀦 𑀧𑀓𑀸𑀲𑀺𑀢𑀢𑁆𑀢𑀸. ‘‘𑀏𑀢𑁆𑀢𑀓𑀁 𑀢𑀲𑁆𑀲 𑀪𑀕𑀯𑀢𑁄 𑀲𑀼𑀢𑁆𑀢𑀸𑀕𑀢𑀁 𑀲𑀼𑀢𑁆𑀢𑀧𑀭𑀺𑀬𑀸𑀧𑀦𑁆𑀦’’𑀦𑁆𑀢𑀺 (𑀧𑀸𑀘𑀺. 𑁧𑁨𑁪𑁨), ‘‘𑀲𑀓𑀯𑀸𑀤𑁂 𑀧𑀜𑁆𑀘𑀲𑀼𑀢𑁆𑀢𑀲𑀢𑀸𑀦𑀻’’𑀢𑀺 (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸; 𑀓𑀣𑀸. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸) 𑀘 𑀏𑀯𑀫𑀸𑀤𑀻𑀲𑀼 𑀲𑀼𑀢𑁆𑀢-𑀲𑀤𑁆𑀤𑁄 𑀉𑀧𑀘𑀭𑀺𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀇𑀤𑀫𑁂𑀯 𑀅𑀢𑁆𑀣𑀸𑀦𑀁 𑀲𑀽𑀘𑀦𑀢𑁄 𑀲𑀼𑀢𑁆𑀢𑀦𑁆𑀢𑀺 𑀯𑀼𑀢𑁆𑀢’’𑀦𑁆𑀢𑀺. 𑀏𑀓𑀦𑁆𑀢𑀳𑀺𑀢𑀧𑀝𑀺𑀮𑀸𑀪𑀲𑀁𑀯𑀢𑁆𑀢𑀦𑀺𑀓𑀸 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀢𑀺 𑀇𑀤𑀫𑁆𑀧𑀺 𑀯𑀺𑀦𑁂𑀬𑁆𑀬𑀸𑀦𑀁 𑀳𑀺𑀢𑀲𑀫𑁆𑀧𑀸𑀧𑀦𑁂 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬 𑀢𑀧𑁆𑀧𑀭𑀪𑀸𑀯𑀁𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀧𑁆𑀧𑀭𑀪𑀸𑀯𑁄 𑀘 𑀯𑀺𑀦𑁂𑀬𑁆𑀬𑀚𑁆𑀛𑀸𑀲𑀬𑀸𑀦𑀼𑀮𑁄𑀫𑀢𑁄 𑀤𑀝𑁆𑀞𑀩𑁆𑀩𑁄, 𑀢𑀣𑀸 𑀅𑀢𑁆𑀢𑀢𑁆𑀣𑀸𑀤𑀺𑀧𑁆𑀧𑀓𑀸𑀲𑀦𑀧𑀥𑀸𑀦𑀢𑀸𑀧𑀺. 𑀇𑀢𑀭𑁂𑀳𑀻𑀢𑀺 𑀯𑀺𑀦𑀬𑀸𑀪𑀺𑀥𑀫𑁆𑀫𑁂𑀳𑀺.

𑀭𑀢𑁆𑀢𑀺𑀆𑀤𑀻𑀲𑀽𑀢𑀺 𑀭𑀢𑁆𑀢𑀺𑀭𑀸𑀚𑀯𑀺𑀦𑀬𑁂𑀲𑀼 𑀯𑀺𑀲𑀬𑀪𑀽𑀢𑁂𑀲𑀼. 𑀦𑀦𑀼 𑀘 ‘‘𑀅𑀪𑀺𑀭𑀢𑁆𑀢𑀻’’𑀢𑀺 𑀅𑀯𑀼𑀢𑁆𑀢𑀢𑁆𑀢𑀸 𑀭𑀢𑁆𑀢𑀺𑀕𑁆𑀕𑀳𑀡𑀁 𑀦 𑀓𑀢𑁆𑀢𑀩𑁆𑀩𑀁, ‘‘𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀮𑀓𑁆𑀔𑀺𑀢𑀸’’𑀢𑀺 𑀘 𑀜𑀸𑀡𑀮𑀓𑁆𑀔𑀡𑀓𑀺𑀭𑀺𑀬𑀸𑀯𑀺𑀲𑁂𑀲𑀓𑁄 𑀅𑀪𑀺-𑀲𑀤𑁆𑀤𑁄𑀢𑀺? 𑀦, ‘‘𑀅𑀪𑀺𑀜𑁆𑀜𑀸𑀢𑀸 𑀅𑀪𑀺𑀮𑀓𑁆𑀔𑀺𑀢𑀸’’𑀢𑀺 𑀅𑀪𑀺-𑀲𑀤𑁆𑀤𑀯𑀺𑀲𑀺𑀝𑁆𑀞𑀸𑀦𑀁 𑀜𑀸𑀢𑀮𑀓𑁆𑀔𑀺𑀢𑀲𑀤𑁆𑀤𑀸𑀦𑀁 𑀭𑀢𑁆𑀢𑀺𑀲𑀤𑁆𑀤𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀢𑀸𑀬 𑀭𑀢𑁆𑀢𑀺𑀯𑀺𑀲𑀬𑀢𑁆𑀢𑀸. 𑀏𑀢𑁆𑀣 𑀘 𑀯𑀸𑀘𑀓𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂 𑀦𑀺𑀧𑀸𑀢𑀸𑀦𑀁 𑀢𑀤𑀢𑁆𑀣𑀚𑁄𑀢𑀓𑀫𑀢𑁆𑀢𑀢𑁆𑀢𑀸 𑀮𑀓𑁆𑀔𑀺𑀢𑀲𑀤𑁆𑀤𑀢𑁆𑀣𑀚𑁄𑀢𑀓𑁄 𑀅𑀪𑀺-𑀲𑀤𑁆𑀤𑁄 𑀮𑀓𑁆𑀔𑀡𑁂 𑀯𑀢𑁆𑀢𑀢𑀻𑀢𑀺 𑀯𑀼𑀢𑁆𑀢𑁄. 𑀅𑀪𑀺𑀮𑀓𑁆𑀔𑀺𑀢𑀲𑀤𑁆𑀤𑀧𑀭𑀺𑀬𑀸𑀬𑁄 𑀘 𑀅𑀪𑀺𑀜𑁆𑀜𑀸𑀢𑀲𑀤𑁆𑀤𑁄𑀢𑀺 𑀤𑀝𑁆𑀞𑀩𑁆𑀩𑁄, 𑀅𑀪𑀺𑀯𑀺𑀦𑀬𑀲𑀤𑁆𑀤𑀲𑁆𑀲 𑀧𑀦 𑀅𑀪𑀺𑀧𑀼𑀭𑀺𑀲𑀲𑁆𑀲 𑀯𑀺𑀬 𑀲𑀫𑀸𑀲𑀲𑀺𑀤𑁆𑀥𑀺 𑀤𑀝𑁆𑀞𑀩𑁆𑀩𑀸. 𑀅𑀦𑁂𑀓𑀢𑁆𑀣𑀸 𑀳𑀺 𑀦𑀺𑀧𑀸𑀢𑀸, 𑀅𑀦𑁂𑀓𑀢𑁆𑀣𑀪𑁂𑀤𑁄 𑀘 𑀲𑀤𑁆𑀤𑀸𑀦𑀁 𑀧𑀬𑁄𑀕𑀯𑀺𑀲𑀬𑁄𑀢𑀺.

𑀓𑀺𑀜𑁆𑀘𑀸𑀧𑀺 𑀤𑁂𑀲𑀦𑀸𑀤𑀬𑁄 𑀤𑁂𑀲𑁂𑀢𑀩𑁆𑀩𑀸𑀤𑀺𑀦𑀺𑀭𑀧𑁂𑀓𑁆𑀔𑀸 𑀦 𑀲𑀦𑁆𑀢𑀺, 𑀆𑀡𑀸𑀤𑀬𑁄 𑀧𑀦 𑀯𑀺𑀲𑁂𑀲𑀢𑁄 𑀤𑁂𑀲𑀓𑀸𑀤𑀺𑀅𑀥𑀻𑀦𑀸𑀢𑀺 𑀢𑀁𑀢𑀁𑀯𑀺𑀲𑁂𑀲𑀬𑁄𑀕𑀯𑀲𑁂𑀦 𑀢𑁂𑀲𑀁 𑀪𑁂𑀤𑁄 𑀯𑀼𑀢𑁆𑀢𑁄. 𑀬𑀣𑀸 𑀳𑀺 𑀆𑀡𑀸𑀯𑀺𑀥𑀸𑀦𑀁 𑀯𑀺𑀲𑁂𑀲𑀢𑁄 𑀆𑀡𑀸𑀭𑀳𑀸𑀥𑀻𑀦𑀁 𑀢𑀢𑁆𑀣 𑀓𑁄𑀲𑀮𑁆𑀮𑀬𑁄𑀕𑀢𑁄, 𑀏𑀯𑀁 𑀯𑁄𑀳𑀸𑀭𑀧𑀭𑀫𑀢𑁆𑀣𑀯𑀺𑀥𑀸𑀦𑀸𑀦𑀺 𑀘 𑀯𑀺𑀥𑀸𑀬𑀓𑀸𑀥𑀻𑀦𑀸𑀦𑀻𑀢𑀺 𑀆𑀡𑀸𑀤𑀺𑀯𑀺𑀥𑀺𑀦𑁄 𑀤𑁂𑀲𑀓𑀸𑀬𑀢𑁆𑀢𑀢𑀸 𑀯𑀼𑀢𑁆𑀢𑀸. 𑀅𑀧𑀭𑀸𑀥𑀚𑁆𑀛𑀸𑀲𑀬𑀸𑀦𑀼𑀭𑀽𑀧𑀁 𑀯𑀺𑀬 𑀥𑀫𑁆𑀫𑀸𑀦𑀼𑀭𑀽𑀧𑀫𑁆𑀧𑀺 𑀲𑀸𑀲𑀦𑀁 𑀯𑀺𑀲𑁂𑀲𑀢𑁄 𑀢𑀣𑀸𑀯𑀺𑀦𑁂𑀢𑀩𑁆𑀩𑀧𑀼𑀕𑁆𑀕𑀮𑀸𑀧𑁂𑀓𑁆𑀔𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀲𑀸𑀲𑀺𑀢𑀩𑁆𑀩…𑀧𑁂… 𑀢𑀩𑁆𑀩𑀪𑀸𑀯𑁂𑀦𑀸’’𑀢𑀺. 𑀲𑀁𑀯𑀭𑀸𑀲𑀁𑀯𑀭𑀦𑀸𑀫𑀭𑀽𑀧𑀸𑀦𑀁 𑀯𑀺𑀬 𑀯𑀺𑀦𑀺𑀯𑁂𑀞𑁂𑀢𑀩𑁆𑀩𑀸𑀬 𑀤𑀺𑀝𑁆𑀞𑀺𑀬𑀸𑀧𑀺 𑀓𑀣𑀦𑀁 𑀲𑀢𑀺 𑀯𑀸𑀘𑀸𑀯𑀢𑁆𑀣𑀼𑀲𑁆𑀫𑀺𑀁, 𑀦𑀸𑀲𑀢𑀻𑀢𑀺 𑀯𑀺𑀲𑁂𑀲𑀢𑁄 𑀢𑀤𑀥𑀻𑀦𑀦𑁆𑀢𑀺 𑀆𑀳 ‘‘𑀓𑀣𑁂𑀢𑀩𑁆𑀩𑀲𑁆𑀲…𑀧𑁂… 𑀓𑀣𑀸’’𑀢𑀺. 𑀉𑀧𑀸𑀭𑀫𑁆𑀪𑀸𑀤𑀻𑀢𑀺 𑀉𑀧𑀸𑀭𑀫𑁆𑀪𑀦𑀺𑀲𑁆𑀲𑀭𑀡𑀥𑀫𑁆𑀫𑀓𑁄𑀲𑀭𑀓𑁆𑀔𑀡𑀸𑀦𑀺. 𑀧𑀭𑀺𑀬𑀸𑀧𑀼𑀡𑀦𑀸𑀤𑀻𑀢𑀺 𑀧𑀭𑀺𑀬𑀸𑀧𑀼𑀡𑀦𑀲𑀼𑀧𑁆𑀧𑀝𑀺𑀧𑀢𑁆𑀢𑀺𑀤𑀼𑀧𑁆𑀧𑀝𑀺𑀧𑀢𑁆𑀢𑀺𑀬𑁄.

𑀢𑀦𑁆𑀢𑀺𑀲𑀫𑀼𑀤𑀸𑀬𑁄 𑀅𑀯𑀬𑀯𑀢𑀦𑁆𑀢𑀺𑀬𑀸 𑀆𑀥𑀸𑀭𑁄 𑀬𑀣𑀸 ‘‘𑀭𑀼𑀓𑁆𑀔𑁂 𑀲𑀸𑀔𑀸’’𑀢𑀺. 𑀦 𑀘𑁄𑀤𑁂𑀢𑀩𑁆𑀩𑀫𑁂𑀢𑀁 𑀲𑀫𑀼𑀔𑁂𑀦, 𑀯𑀺𑀲𑀬𑀯𑀺𑀲𑀬𑀺𑀫𑀼𑀔𑁂𑀦 𑀯𑀸 𑀯𑀺𑀦𑀬𑀸𑀤𑀻𑀦𑀁𑀬𑁂𑀯 𑀕𑀫𑁆𑀪𑀻𑀭𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀥𑀫𑁆𑀫𑁄 𑀳𑀺 𑀯𑀺𑀦𑀬𑀸𑀤𑀬𑁄, 𑀢𑁂𑀲𑀜𑁆𑀘 𑀯𑀺𑀲𑀬𑁄 𑀅𑀢𑁆𑀣𑁄, 𑀥𑀫𑁆𑀫𑀢𑁆𑀣𑀯𑀺𑀲𑀬𑀸 𑀘 𑀤𑁂𑀲𑀦𑀸𑀧𑀝𑀺𑀯𑁂𑀥𑀸𑀢𑀺. ‘‘𑀧𑀝𑀺𑀯𑁂𑀥𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀥𑀫𑁆𑀫𑀢𑁆𑀣𑀸𑀦𑀁 𑀤𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸 𑀤𑁂𑀲𑀦𑀸𑀬 𑀉𑀧𑁆𑀧𑀸𑀤𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀧𑀝𑀺𑀯𑁂𑀥𑀲𑁆𑀲 𑀉𑀧𑁆𑀧𑀸𑀤𑁂𑀢𑀼𑀜𑁆𑀘 𑀧𑀝𑀺𑀯𑀺𑀚𑁆𑀛𑀺𑀢𑀼𑀜𑁆𑀘 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁆𑀢𑀸 𑀤𑀼𑀓𑁆𑀔𑁄𑀕𑀸𑀳𑀢𑀁 𑀤𑀲𑁆𑀲𑁂𑀢𑀺.

𑀥𑀫𑁆𑀫𑀸𑀦𑀼𑀭𑀽𑀧𑀁 𑀬𑀣𑀸𑀥𑀫𑁆𑀫𑀦𑁆𑀢𑀺 𑀘 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺. 𑀤𑁂𑀲𑀦𑀸𑀧𑀺 𑀳𑀺 𑀧𑀝𑀺𑀯𑁂𑀥𑁄 𑀯𑀺𑀬 𑀅𑀯𑀺𑀧𑀭𑀻𑀢𑀁 𑀲𑀯𑀺𑀲𑀬𑀯𑀺𑀪𑀸𑀯𑀦𑀢𑁄 𑀥𑀫𑁆𑀫𑀸𑀦𑀼𑀭𑀽𑀧𑀁 𑀧𑀯𑀢𑁆𑀢𑀢𑀺 𑀬𑀢𑁄 ‘‘𑀅𑀯𑀺𑀧𑀭𑀻𑀢𑀸𑀪𑀺𑀮𑀸𑀧𑁄’’𑀢𑀺 𑀯𑀼𑀘𑁆𑀘𑀢𑀺. 𑀥𑀫𑁆𑀫𑀦𑀺𑀭𑀼𑀢𑁆𑀢𑀺𑀁 𑀤𑀲𑁆𑀲𑁂𑀢𑀻𑀢𑀺 𑀏𑀢𑁂𑀦 𑀤𑁂𑀲𑀦𑀸𑀲𑀤𑁆𑀤𑀲𑀪𑀸𑀯𑀸𑀢𑀺 𑀤𑀻𑀧𑁂𑀢𑀺. 𑀢𑀣𑀸 𑀳𑀺 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸𑀬 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀤𑀺𑀪𑀸𑀯𑁄 𑀧𑀸𑀴𑀺𑀬𑀁 𑀯𑀼𑀢𑁆𑀢𑁄, 𑀅𑀝𑁆𑀞𑀓𑀣𑀸𑀬𑀜𑁆𑀘 ‘‘𑀢𑀁𑀢𑀁𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀲𑀤𑁆𑀤𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀲𑀤𑁆𑀤𑀸𑀭𑀫𑁆𑀫𑀡𑀢𑀸. 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀅𑀬𑀁 𑀲𑀤𑁆𑀤𑁄 𑀯𑀸𑀘𑀓𑁄𑀢𑀺 𑀯𑀘𑀦𑀯𑀘𑀦𑀻𑀬𑀁 𑀯𑀯𑀢𑁆𑀣𑀧𑁂𑀢𑁆𑀯𑀸 𑀢𑀁𑀢𑀁𑀯𑀘𑀦𑀻𑀬𑀯𑀺𑀪𑀸𑀯𑀦𑀯𑀲𑁂𑀦 𑀧𑀯𑀢𑁆𑀢𑀺𑀢𑁄 𑀳𑀺 𑀲𑀤𑁆𑀤𑁄 𑀤𑁂𑀲𑀦𑀸𑀢𑀺. 𑀦𑀦𑀼 𑀘 ‘‘𑀥𑀫𑁆𑀫𑁄 𑀢𑀦𑁆𑀢𑀻’’𑀢𑀺 𑀇𑀫𑀲𑁆𑀫𑀺𑀁 𑀧𑀓𑁆𑀔𑁂 𑀥𑀫𑁆𑀫𑀲𑁆𑀲𑀧𑀺 𑀲𑀤𑁆𑀤𑀲𑀪𑀸𑀯𑀢𑁆𑀢𑀸 𑀥𑀫𑁆𑀫𑀤𑁂𑀲𑀦𑀸𑀦𑀁 𑀯𑀺𑀲𑁂𑀲𑁄 𑀦 𑀲𑀺𑀬𑀸𑀢𑀺? 𑀦, 𑀢𑁂𑀲𑀁 𑀢𑁂𑀲𑀁 𑀅𑀢𑁆𑀣𑀸𑀦𑀁 𑀩𑁄𑀥𑀓𑀪𑀸𑀯𑁂𑀦 𑀜𑀸𑀢𑁄 𑀉𑀕𑁆𑀕𑀳𑀺𑀢𑀸𑀤𑀺𑀯𑀲𑁂𑀦 𑀘 𑀧𑀼𑀩𑁆𑀩𑁂 𑀧𑀯𑀢𑁆𑀢𑀺𑀢𑁄 𑀲𑀤𑁆𑀤𑀧𑁆𑀧𑀩𑀦𑁆𑀥𑁄 𑀥𑀫𑁆𑀫𑁄, 𑀧𑀘𑁆𑀙𑀸 𑀧𑀭𑁂𑀲𑀁 𑀅𑀯𑀩𑁄𑀥𑀦𑀢𑁆𑀣𑀁 𑀧𑀯𑀢𑁆𑀢𑀺𑀢𑁄 𑀢𑀤𑀢𑁆𑀣𑀧𑁆𑀧𑀓𑀸𑀲𑀦𑀓𑁄 𑀲𑀤𑁆𑀤𑁄 𑀤𑁂𑀲𑀦𑀸𑀢𑀺. 𑀅𑀣 𑀯𑀸 𑀬𑀣𑀸𑀯𑀼𑀢𑁆𑀢𑀲𑀤𑁆𑀤𑀲𑀫𑀼𑀝𑁆𑀞𑀸𑀧𑀓𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀤𑁂𑀲𑀦𑀸 𑀫𑀼𑀲𑀸𑀯𑀸𑀤𑀸𑀤𑀬𑁄 𑀯𑀺𑀬. 𑀯𑀘𑀦𑀲𑁆𑀲 𑀧𑀯𑀢𑁆𑀢𑀦𑀦𑁆𑀢𑀺 𑀘 𑀬𑀣𑀸𑀯𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀸𑀳. 𑀲𑁄 𑀳𑀺 𑀯𑀘𑀦𑀁 𑀧𑀯𑀢𑁆𑀢𑁂𑀢𑀺, 𑀢𑀁 𑀯𑀸 𑀏𑀢𑁂𑀦 𑀧𑀯𑀢𑁆𑀢𑀻𑀬𑀢𑀻𑀢𑀺 𑀧𑀯𑀢𑁆𑀢𑀦𑀁. 𑀤𑁂𑀲𑀻𑀬𑀢𑀺 𑀅𑀢𑁆𑀣𑁄 𑀏𑀢𑁂𑀦𑀸𑀢𑀺 𑀤𑁂𑀲𑀦𑀸. 𑀧𑀓𑀸𑀭𑁂𑀳𑀺 𑀜𑀸𑀧𑀻𑀬𑀢𑀺 𑀏𑀢𑁂𑀦, 𑀧𑀓𑀸𑀭𑀢𑁄 𑀜𑀸𑀧𑁂𑀢𑀻𑀢𑀺 𑀯𑀸 𑀧𑀜𑁆𑀜𑀢𑁆𑀢𑀻𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀢𑁂𑀦𑁂𑀯𑀸𑀳 ‘‘𑀅𑀥𑀺𑀧𑁆𑀧𑀸𑀬𑁄’’𑀢𑀺𑀆𑀤𑀺. 𑀅𑀪𑀺𑀲𑀫𑁂𑀢𑀺, 𑀅𑀪𑀺𑀲𑀫𑀻𑀬𑀢𑀺 𑀯𑀸 𑀏𑀢𑁂𑀦𑀸𑀢𑀺 𑀅𑀪𑀺𑀲𑀫𑀬𑁄𑀢𑀺 𑀏𑀯𑀫𑁆𑀧𑀺 𑀅𑀪𑀺𑀲𑀫𑀬𑀢𑁆𑀣𑁄 𑀲𑀫𑁆𑀪𑀯𑀢𑀺. 𑀅𑀪𑀺𑀲𑀫𑁂𑀢𑀩𑁆𑀩𑀢𑁄 𑀧𑀦 𑀅𑀪𑀺𑀲𑀫𑀬𑁄𑀢𑀺 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀧𑀝𑀺𑀯𑁂𑀥𑁄𑀬𑁂𑀯𑀸𑀢𑀺.

𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀸𑀢𑀺 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀭𑀸𑀤𑀻𑀦𑀁 𑀥𑀫𑁆𑀫𑀢𑁆𑀣𑀸𑀦𑀁 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀢𑀸𑀬 𑀤𑀼𑀓𑁆𑀔𑁄𑀕𑀸𑀳𑀢𑀸, 𑀢𑁂𑀲𑀁 𑀧𑀜𑁆𑀜𑀸𑀧𑀦𑀲𑁆𑀲 𑀤𑀼𑀓𑁆𑀓𑀭𑀪𑀸𑀯𑀢𑁄 𑀢𑀁𑀤𑁂𑀲𑀦𑀸𑀬 𑀧𑀝𑀺𑀯𑁂𑀥𑀦𑀲𑀗𑁆𑀔𑀸𑀢𑀲𑁆𑀲 𑀧𑀝𑀺𑀯𑁂𑀥𑀲𑁆𑀲 𑀉𑀧𑁆𑀧𑀸𑀤𑀦𑀯𑀺𑀲𑀬𑀺𑀓𑀭𑀡𑀸𑀦𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀤𑀼𑀓𑁆𑀔𑁄𑀕𑀸𑀳𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀓𑀸𑀭𑀡𑁂 𑀨𑀮𑀯𑁄𑀳𑀸𑀭𑁂𑀦 𑀢𑁂 𑀥𑀫𑁆𑀫𑀸 𑀤𑀼𑀓𑁆𑀔𑀸𑀬 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀉𑀧𑀸𑀭𑀫𑁆𑀪…𑀧𑁂… 𑀳𑁂𑀢𑀼𑀪𑀸𑀯𑁂𑀦𑀸’’𑀢𑀺. 𑀅𑀜𑁆𑀜𑀁 𑀅𑀢𑁆𑀣𑀦𑁆𑀢𑀺 𑀉𑀧𑀸𑀭𑀫𑁆𑀪𑀁 𑀦𑀺𑀲𑁆𑀲𑀭𑀡𑀜𑁆𑀘. 𑀦𑀺𑀝𑁆𑀞𑀸𑀧𑁂𑀢𑁆𑀯𑀸𑀢𑀺 𑀓𑀣𑀦𑀯𑀲𑁂𑀦 𑀧𑀭𑀺𑀬𑁄𑀲𑀸𑀧𑁂𑀢𑁆𑀯𑀸. 𑀢𑀲𑁆𑀲 ‘‘𑀆𑀭𑀤𑁆𑀥’’𑀦𑁆𑀢𑀺 𑀏𑀢𑁂𑀦 𑀲𑀫𑁆𑀩𑀦𑁆𑀥𑁄. 𑀉𑀤𑁆𑀤𑀸𑀦𑀲𑀗𑁆𑀕𑀳𑀸𑀤𑀺𑀪𑁂𑀤𑁄 𑀲𑀗𑁆𑀕𑀻𑀢𑁄𑀢𑀺 𑀧𑀸𑀞𑁄 𑀬𑀼𑀢𑁆𑀢𑁄, ‘‘𑀲𑀗𑁆𑀕𑀻𑀢𑀺𑀬𑀸’’𑀢𑀺 𑀧𑀦 𑀮𑀺𑀔𑀦𑁆𑀢𑀺. 𑀧𑀼𑀭𑀺𑀫𑀁 𑀯𑀸 𑀲𑀗𑁆𑀕𑀻𑀢𑀺𑀬𑀸𑀢𑀺 𑀪𑀸𑀯𑁂𑀦 𑀪𑀸𑀯𑀮𑀓𑁆𑀔𑀡𑁂 𑀪𑀼𑀫𑁆𑀫𑀁, 𑀧𑀘𑁆𑀙𑀺𑀫𑀁 𑀅𑀥𑀺𑀓𑀭𑀡𑁂. 𑀧𑀺𑀝𑀓𑀸𑀤𑀻𑀢𑀺 𑀧𑀺𑀝𑀓𑀦𑀺𑀓𑀸𑀬𑀗𑁆𑀕𑀥𑀫𑁆𑀫𑀓𑁆𑀔𑀦𑁆𑀥𑀸𑀦𑀺.

𑀢𑀢𑁆𑀣 𑀅𑀗𑁆𑀕𑁂𑀲𑀼 𑀲𑀼𑀢𑁆𑀢𑀗𑁆𑀕𑀫𑁂𑀯 𑀦 𑀲𑀫𑁆𑀪𑀯𑀢𑀺 ‘‘𑀲𑀕𑀸𑀣𑀓𑀁 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁, 𑀦𑀺𑀕𑁆𑀕𑀸𑀣𑀓𑀁 𑀲𑀼𑀢𑁆𑀢𑀁 𑀯𑁂𑀬𑁆𑀬𑀸𑀓𑀭𑀡’’𑀦𑁆𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸; 𑀧𑀸𑀭𑀸. 𑀅𑀝𑁆𑀞. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸; 𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸) 𑀯𑀼𑀢𑁆𑀢𑀢𑁆𑀢𑀸, 𑀫𑀗𑁆𑀕𑀮𑀲𑀼𑀢𑁆𑀢𑀸𑀤𑀻𑀦𑀜𑁆𑀘 𑀲𑀼𑀢𑁆𑀢𑀗𑁆𑀕𑀲𑀗𑁆𑀕𑀳𑁄 𑀦 𑀲𑀺𑀬𑀸 𑀕𑀸𑀣𑀸𑀪𑀸𑀯𑀢𑁄 𑀥𑀫𑁆𑀫𑀧𑀤𑀸𑀤𑀻𑀦𑀁 𑀯𑀺𑀬, 𑀕𑁂𑀬𑁆𑀬𑀗𑁆𑀕𑀲𑀗𑁆𑀕𑀳𑁄 𑀯𑀸 𑀲𑀺𑀬𑀸 𑀲𑀕𑀸𑀣𑀓𑀢𑁆𑀢𑀸 𑀲𑀕𑀸𑀣𑀸𑀯𑀕𑁆𑀕𑀲𑁆𑀲 𑀯𑀺𑀬, 𑀢𑀣𑀸 𑀉𑀪𑀢𑁄𑀯𑀺𑀪𑀗𑁆𑀕𑀸𑀤𑀻𑀲𑀼 𑀲𑀕𑀸𑀣𑀓𑀧𑀤𑁂𑀲𑀸𑀦𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋

𑀲𑀼𑀢𑁆𑀢𑀦𑁆𑀢𑀺 𑀲𑀸𑀫𑀜𑁆𑀜𑀯𑀺𑀥𑀺, 𑀯𑀺𑀲𑁂𑀲𑀯𑀺𑀥𑀬𑁄 𑀧𑀭𑁂;

𑀲𑀦𑀺𑀫𑀺𑀢𑁆𑀢𑀸 𑀦𑀺𑀭𑀼𑀴𑁆𑀳𑀢𑁆𑀢𑀸, 𑀲𑀳𑀢𑀸𑀜𑁆𑀜𑁂𑀦 𑀦𑀸𑀜𑁆𑀜𑀢𑁄. (𑀦𑁂𑀢𑁆𑀢𑀺. 𑀅𑀝𑁆𑀞. 𑀲𑀗𑁆𑀕𑀳𑀯𑀸𑀭𑀯𑀡𑁆𑀡𑀦𑀸);

𑀲𑀩𑁆𑀩𑀲𑁆𑀲𑀧𑀺 𑀳𑀺 𑀩𑀼𑀤𑁆𑀥𑀯𑀘𑀦𑀲𑁆𑀲 𑀲𑀼𑀢𑁆𑀢𑀦𑁆𑀢𑀺 𑀅𑀬𑀁 𑀲𑀸𑀫𑀜𑁆𑀜𑀯𑀺𑀥𑀺. 𑀢𑁂𑀦𑁂𑀯𑀸𑀳 𑀆𑀬𑀲𑁆𑀫𑀸 𑀫𑀳𑀸𑀓𑀘𑁆𑀘𑀸𑀬𑀦𑁄 𑀦𑁂𑀢𑁆𑀢𑀺𑀬𑀁 ‘‘𑀦𑀯𑀯𑀺𑀥𑀲𑀼𑀢𑁆𑀢𑀦𑁆𑀢𑀧𑀭𑀺𑀬𑁂𑀝𑁆𑀞𑀻’’𑀢𑀺 (𑀦𑁂𑀢𑁆𑀢𑀺. 𑀲𑀗𑁆𑀕𑀳𑀯𑀸𑀭). ‘‘𑀏𑀢𑁆𑀢𑀓𑀁 𑀢𑀲𑁆𑀲 𑀪𑀕𑀯𑀢𑁄 𑀲𑀼𑀢𑁆𑀢𑀸𑀕𑀢𑀁 𑀲𑀼𑀢𑁆𑀢𑀧𑀭𑀺𑀬𑀸𑀧𑀦𑁆𑀦𑀁 (𑀧𑀸𑀘𑀺. 𑁧𑁨𑁪𑁨) 𑀲𑀓𑀯𑀸𑀤𑁂 𑀧𑀜𑁆𑀘 𑀲𑀼𑀢𑁆𑀢𑀲𑀢𑀸𑀦𑀻’’𑀢𑀺 (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸; 𑀓𑀣𑀸. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸) 𑀏𑀯𑀫𑀸𑀤𑀺 𑀘 𑀏𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀸𑀥𑀓𑀁, 𑀢𑀤𑁂𑀓𑀤𑁂𑀲𑁂𑀲𑀼 𑀧𑀦 𑀕𑁂𑀬𑁆𑀬𑀸𑀤𑀬𑁄 𑀯𑀺𑀲𑁂𑀲𑀯𑀺𑀥𑀬𑁄 𑀢𑁂𑀦 𑀢𑁂𑀦 𑀦𑀺𑀫𑀺𑀢𑁆𑀢𑁂𑀦 𑀧𑀢𑀺𑀝𑁆𑀞𑀺𑀢𑀢𑁆𑀢𑀸. 𑀢𑀣𑀸 𑀳𑀺 𑀕𑁂𑀬𑁆𑀬𑀲𑁆𑀲 𑀲𑀕𑀸𑀣𑀓𑀢𑁆𑀢𑀁 𑀢𑀩𑁆𑀪𑀸𑀯𑀦𑀺𑀫𑀺𑀢𑁆𑀢𑀁. 𑀮𑁄𑀓𑁂𑀧𑀺 𑀳𑀺 𑀲𑀲𑀺𑀮𑁄𑀓𑀁 𑀲𑀕𑀸𑀣𑀓𑀁 𑀯𑀸 𑀘𑀼𑀡𑁆𑀡𑀺𑀬𑀕𑀦𑁆𑀣𑀁 ‘‘𑀕𑁂𑀬𑁆𑀬’’𑀦𑁆𑀢𑀺 𑀯𑀤𑀦𑁆𑀢𑀺. 𑀕𑀸𑀣𑀸𑀯𑀺𑀭𑀳𑁂 𑀧𑀦 𑀲𑀢𑀺 𑀧𑀼𑀘𑁆𑀙𑀁 𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀪𑀸𑀯𑁄 𑀯𑁂𑀬𑁆𑀬𑀸𑀓𑀭𑀡𑀲𑁆𑀲. 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀜𑁆𑀳𑀺 𑀩𑁆𑀬𑀸𑀓𑀭𑀡𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀩𑁆𑀬𑀸𑀓𑀭𑀡𑀫𑁂𑀯 𑀯𑁂𑀬𑁆𑀬𑀸𑀓𑀭𑀡𑀦𑁆𑀢𑀺.

𑀏𑀯𑀁 𑀲𑀦𑁆𑀢𑁂 𑀲𑀕𑀸𑀣𑀓𑀸𑀦𑀫𑁆𑀧𑀺 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀯𑁂𑀬𑁆𑀬𑀸𑀓𑀭𑀡𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺 𑀯𑁂𑀬𑁆𑀬𑀸𑀓𑀭𑀡𑀸𑀤𑀺𑀲𑀜𑁆𑀜𑀸𑀦𑀁 𑀅𑀦𑁄𑀓𑀸𑀲𑀪𑀸𑀯𑀢𑁄 ‘‘𑀕𑀸𑀣𑀸𑀯𑀺𑀭𑀳𑁂 𑀧𑀦 𑀲𑀢𑀻’’𑀢𑀺 𑀯𑀺𑀲𑁂𑀲𑀺𑀢𑀢𑁆𑀢𑀸 𑀘. 𑀢𑀣𑀸 𑀳𑀺 𑀥𑀫𑁆𑀫𑀧𑀤𑀸𑀤𑀻𑀲𑀼 𑀓𑁂𑀯𑀮𑀁 𑀕𑀸𑀣𑀸𑀩𑀦𑁆𑀥𑁂𑀲𑀼 𑀲𑀕𑀸𑀣𑀓𑀢𑁆𑀢𑁂𑀧𑀺 𑀲𑁄𑀫𑀦𑀲𑁆𑀲𑀜𑀸𑀡𑀫𑀬𑀺𑀓𑀕𑀸𑀣𑀸𑀧𑀝𑀺𑀲𑀁𑀬𑀼𑀢𑁆𑀢𑁂𑀲𑀼 ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺𑀆𑀤𑀺𑀯𑀘𑀦𑀲𑀫𑁆𑀩𑀦𑁆𑀥𑁂𑀲𑀼 𑀅𑀩𑁆𑀪𑀼𑀢𑀥𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑁂𑀲𑀼 𑀘 𑀲𑀼𑀢𑁆𑀢𑀯𑀺𑀲𑁂𑀲𑁂𑀲𑀼 𑀬𑀣𑀸𑀓𑁆𑀓𑀫𑀁 𑀕𑀸𑀣𑀸𑀉𑀤𑀸𑀦𑀇𑀢𑀺𑀯𑀼𑀢𑁆𑀢𑀓𑀅𑀩𑁆𑀪𑀼𑀢𑀥𑀫𑁆𑀫𑀲𑀜𑁆𑀜𑀸 𑀧𑀢𑀺𑀝𑁆𑀞𑀺𑀢𑀸, 𑀢𑀣𑀸 𑀲𑀢𑀺𑀧𑀺 𑀕𑀸𑀣𑀸𑀩𑀦𑁆𑀥𑀪𑀸𑀯𑁂 𑀪𑀕𑀯𑀢𑁄 𑀅𑀢𑀻𑀢𑀸𑀲𑀼 𑀚𑀸𑀢𑀻𑀲𑀼 𑀘𑀭𑀺𑀬𑀸𑀦𑀼𑀪𑀸𑀯𑀧𑁆𑀧𑀓𑀸𑀲𑀓𑁂𑀲𑀼 𑀚𑀸𑀢𑀓𑀲𑀜𑁆𑀜𑀸. 𑀲𑀢𑀺𑀧𑀺 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀪𑀸𑀯𑁂 𑀲𑀕𑀸𑀣𑀓𑀢𑁆𑀢𑁂 𑀘 𑀓𑁂𑀲𑀼𑀘𑀺 𑀲𑀼𑀢𑁆𑀢𑀦𑁆𑀢𑁂𑀲𑀼 𑀯𑁂𑀤𑀲𑁆𑀲 𑀮𑀪𑀸𑀧𑀦𑀢𑁄 𑀯𑁂𑀤𑀮𑁆𑀮𑀲𑀜𑁆𑀜𑀸 𑀧𑀢𑀺𑀝𑁆𑀞𑀺𑀢𑀸𑀢𑀺 𑀏𑀯𑀁 𑀢𑁂𑀦 𑀢𑁂𑀦 𑀲𑀕𑀸𑀣𑀓𑀢𑁆𑀢𑀸𑀤𑀺𑀦𑀸 𑀦𑀺𑀫𑀺𑀢𑁆𑀢𑁂𑀦 𑀢𑁂𑀲𑀼 𑀢𑁂𑀲𑀼 𑀲𑀼𑀢𑁆𑀢𑀯𑀺𑀲𑁂𑀲𑁂𑀲𑀼 𑀕𑁂𑀬𑁆𑀬𑀸𑀤𑀺𑀲𑀜𑁆𑀜𑀸 𑀧𑀢𑀺𑀝𑁆𑀞𑀺𑀢𑀸𑀢𑀺 𑀯𑀺𑀲𑁂𑀲𑀯𑀺𑀥𑀬𑁄 𑀲𑀼𑀢𑁆𑀢𑀗𑁆𑀕𑀢𑁄 𑀧𑀭𑁂 𑀕𑁂𑀬𑁆𑀬𑀗𑁆𑀕𑀸𑀤𑀬𑁄. 𑀬𑀁 𑀧𑀦𑁂𑀢𑁆𑀣 𑀕𑁂𑀬𑁆𑀬𑀗𑁆𑀕𑀸𑀤𑀺𑀦𑀺𑀫𑀺𑀢𑁆𑀢𑀭𑀳𑀺𑀢𑀁, 𑀢𑀁 𑀲𑀼𑀢𑁆𑀢𑀗𑁆𑀕𑀁 𑀯𑀺𑀲𑁂𑀲𑀲𑀜𑁆𑀜𑀸𑀧𑀭𑀺𑀳𑀸𑀭𑁂𑀦 𑀲𑀸𑀫𑀜𑁆𑀜𑀲𑀜𑁆𑀜𑀸𑀬 𑀧𑀯𑀢𑁆𑀢𑀦𑀢𑁄𑀢𑀺.

𑀦𑀦𑀼 𑀘 𑀲𑀕𑀸𑀣𑀓𑀁 𑀲𑀼𑀢𑁆𑀢𑀁 𑀕𑁂𑀬𑁆𑀬𑀁, 𑀦𑀺𑀕𑁆𑀕𑀸𑀣𑀓𑀁 𑀲𑀼𑀢𑁆𑀢𑀁 𑀯𑁂𑀬𑁆𑀬𑀸𑀓𑀭𑀡𑀦𑁆𑀢𑀺 𑀲𑀼𑀢𑁆𑀢𑀗𑁆𑀕𑀁 𑀦 𑀲𑀫𑁆𑀪𑀯𑀢𑀻𑀢𑀺 𑀘𑁄𑀤𑀦𑀸 𑀢𑀤𑀯𑀢𑁆𑀣𑀸𑀢𑀺? 𑀦, 𑀲𑁄𑀥𑀺𑀢𑀢𑁆𑀢𑀸. 𑀲𑁄𑀥𑀺𑀢𑀜𑁆𑀳𑀺 𑀧𑀼𑀩𑁆𑀩𑁂 𑀕𑀸𑀣𑀸𑀯𑀺𑀭𑀳𑁂 𑀲𑀢𑀺 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀪𑀸𑀯𑁄 𑀯𑁂𑀬𑁆𑀬𑀸𑀓𑀭𑀡𑀪𑀸𑀯𑀲𑁆𑀲 𑀦𑀺𑀫𑀺𑀢𑁆𑀢𑀦𑁆𑀢𑀺. 𑀬𑀜𑁆𑀘 𑀯𑀼𑀢𑁆𑀢𑀁 ‘‘𑀕𑀸𑀣𑀸𑀪𑀸𑀯𑀢𑁄 𑀫𑀗𑁆𑀕𑀮𑀲𑀼𑀢𑁆𑀢𑀸𑀤𑀻𑀦𑀁 𑀲𑀼𑀢𑁆𑀢𑀗𑁆𑀕𑀲𑀗𑁆𑀕𑀳𑁄 𑀦 𑀲𑀺𑀬𑀸’’𑀢𑀺, 𑀢𑀁 𑀦, 𑀦𑀺𑀭𑀼𑀴𑁆𑀳𑀢𑁆𑀢𑀸. 𑀦𑀺𑀭𑀼𑀴𑁆𑀳𑁄 𑀳𑀺 𑀫𑀗𑁆𑀕𑀮𑀲𑀼𑀢𑁆𑀢𑀸𑀤𑀻𑀲𑀼 𑀲𑀼𑀢𑁆𑀢𑀪𑀸𑀯𑁄. 𑀦 𑀳𑀺 𑀢𑀸𑀦𑀺 𑀥𑀫𑁆𑀫𑀧𑀤𑀩𑀼𑀤𑁆𑀥𑀯𑀁𑀲𑀸𑀤𑀬𑁄 𑀯𑀺𑀬 𑀕𑀸𑀣𑀸𑀪𑀸𑀯𑁂𑀦 𑀧𑀜𑁆𑀜𑀸𑀢𑀸𑀦𑀺, 𑀓𑀺𑀦𑁆𑀢𑀼 𑀲𑀼𑀢𑁆𑀢𑀪𑀸𑀯𑁂𑀦𑁂𑀯. 𑀢𑁂𑀦𑁂𑀯 𑀳𑀺 𑀅𑀝𑁆𑀞𑀓𑀣𑀸𑀬𑀁 𑀲𑀼𑀢𑁆𑀢𑀦𑀸𑀫𑀓𑀦𑁆𑀢𑀺 𑀦𑀸𑀫𑀕𑁆𑀕𑀳𑀡𑀁 𑀓𑀢𑀁. 𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀲𑀕𑀸𑀣𑀓𑀢𑁆𑀢𑀸 𑀕𑁂𑀬𑁆𑀬𑀗𑁆𑀕𑀲𑀗𑁆𑀕𑀳𑁄 𑀯𑀸 𑀲𑀺𑀬𑀸’’𑀢𑀺, 𑀢𑀤𑀧𑀺 𑀦𑀢𑁆𑀣𑀺. 𑀬𑀲𑁆𑀫𑀸 𑀲𑀳𑀢𑀸𑀜𑁆𑀜𑁂𑀦. 𑀲𑀳 𑀕𑀸𑀣𑀸𑀳𑀻𑀢𑀺 𑀲𑀕𑀸𑀣𑀓𑀁, 𑀲𑀳𑀪𑀸𑀯𑁄 𑀘 𑀦𑀸𑀫 𑀅𑀢𑁆𑀢𑀢𑁄 𑀅𑀜𑁆𑀜𑁂𑀦 𑀳𑁄𑀢𑀺, 𑀦 𑀘 𑀫𑀗𑁆𑀕𑀮𑀲𑀼𑀢𑁆𑀢𑀸𑀤𑀻𑀲𑀼 𑀕𑀸𑀣𑀸𑀯𑀺𑀦𑀺𑀫𑀼𑀢𑁆𑀢𑁄 𑀓𑁄𑀘𑀺 𑀲𑀼𑀢𑁆𑀢𑀧𑁆𑀧𑀤𑁂𑀲𑁄 𑀅𑀢𑁆𑀣𑀺, 𑀬𑁄 ‘‘𑀲𑀳 𑀕𑀸𑀣𑀸𑀳𑀻’’𑀢𑀺 𑀯𑀼𑀘𑁆𑀘𑁂𑀬𑁆𑀬, 𑀦 𑀘 𑀲𑀫𑀼𑀤𑀸𑀬𑁄 𑀦𑀸𑀫 𑀓𑁄𑀘𑀺 𑀅𑀢𑁆𑀣𑀺. 𑀬𑀤𑀧𑀺 𑀯𑀼𑀢𑁆𑀢𑀁 ‘‘𑀉𑀪𑀢𑁄𑀯𑀺𑀪𑀗𑁆𑀕𑀸𑀤𑀻𑀲𑀼 𑀲𑀕𑀸𑀣𑀓𑀧𑁆𑀧𑀤𑁂𑀲𑀸𑀦𑀁 𑀕𑁂𑀬𑁆𑀬𑀗𑁆𑀕𑀲𑀗𑁆𑀕𑀳𑁄 𑀲𑀺𑀬𑀸’’𑀢𑀺, 𑀢𑀤𑀧𑀺 𑀦, 𑀅𑀜𑁆𑀜𑀢𑁄. 𑀅𑀜𑁆𑀜𑀸 𑀏𑀯 𑀳𑀺 𑀢𑀸 𑀕𑀸𑀣𑀸 𑀚𑀸𑀢𑀓𑀸𑀤𑀺𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸. 𑀅𑀢𑁄 𑀦 𑀢𑀸𑀳𑀺 𑀉𑀪𑀢𑁄𑀯𑀺𑀪𑀗𑁆𑀕𑀸𑀤𑀻𑀦𑀁 𑀕𑁂𑀬𑁆𑀬𑀗𑁆𑀕𑀪𑀸𑀯𑁄𑀢𑀺 𑀏𑀯𑀁 𑀲𑀼𑀢𑁆𑀢𑀸𑀤𑀻𑀦𑀁 𑀅𑀗𑁆𑀕𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑀗𑁆𑀓𑀭𑀸𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄.

𑀚𑀺𑀦𑀲𑀸𑀲𑀦𑀁 𑀅𑀪𑀺𑀥𑀫𑁆𑀫𑁄. 𑀧𑀝𑀺𑀯𑀺𑀤𑁆𑀥𑀝𑁆𑀞𑀸𑀦𑀁 𑀧𑀝𑀺𑀯𑁂𑀥𑀪𑀽𑀫𑀺 𑀧𑀝𑀺𑀯𑁂𑀥𑀸𑀯𑀢𑁆𑀣𑀸, 𑀧𑀝𑀺𑀯𑁂𑀥𑀳𑁂𑀢𑀼 𑀯𑀸. ‘‘𑀲𑁄 𑀏𑀯𑀁 𑀧𑀚𑀸𑀦𑀸𑀫𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸𑀧𑀺 𑀯𑁂𑀤𑀬𑀺𑀢’’𑀦𑁆𑀢𑀺 (𑀲𑀁. 𑀦𑀺. 𑁫.𑁧𑁧-𑁧𑁨) 𑀯𑀼𑀢𑁆𑀢𑀁. 𑀧𑀸𑀴𑀺𑀬𑀁 𑀧𑀦 ‘‘𑀲𑁄 𑀏𑀯𑀁 𑀧𑀚𑀸𑀦𑀸𑀫𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸𑀧𑀺 𑀯𑁂𑀤𑀬𑀺𑀢𑀁. 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀸𑀧𑀺 𑀯𑁂𑀤𑀬𑀺𑀢’’𑀦𑁆𑀢𑀺 𑀆𑀕𑀢𑀁 (𑀲𑀁. 𑀦𑀺. 𑁫.𑁧𑁧-𑁧𑁨). 𑀧𑀘𑁆𑀘𑀬𑀸𑀤𑀻𑀳𑀻𑀢𑀺 𑀧𑀘𑁆𑀘𑀬𑀲𑀪𑀸𑀯𑀯𑀽𑀧𑀲𑀫𑀢𑀤𑀼𑀧𑀸𑀬𑀸𑀤𑀻𑀳𑀺. 𑀧𑀭𑀯𑀸𑀤𑀺𑀘𑁄𑀤𑀦𑀁 𑀧𑀢𑁆𑀯𑀸𑀢𑀺 𑀅𑀝𑁆𑀞𑀓𑀣𑀸𑀬𑀁 𑀆𑀕𑀢𑀁 𑀧𑀭𑀯𑀸𑀤𑀺𑀘𑁄𑀤𑀦𑀁 𑀧𑀢𑁆𑀯𑀸. 𑀅𑀥𑀺𑀕…𑀧𑁂… 𑀭𑀽𑀧𑁂𑀦𑀸𑀢𑀺 𑀅𑀥𑀺𑀕𑀦𑁆𑀢𑀩𑁆𑀩𑁄 𑀘 𑀲𑁄 𑀤𑁂𑀲𑁂𑀢𑀩𑁆𑀩𑁄 𑀘𑀸𑀢𑀺 𑀅𑀥𑀺𑀕𑀦𑁆𑀢𑀩𑁆𑀩𑀤𑁂𑀲𑁂𑀢𑀩𑁆𑀩𑁄, 𑀲𑁄 𑀏𑀯 𑀥𑀫𑁆𑀫𑁄, 𑀢𑀤𑀦𑀼𑀭𑀽𑀧𑁂𑀦. 𑀏𑀢𑁆𑀣 𑀘 𑀬𑀣𑀸𑀥𑀫𑁆𑀫𑀲𑀸𑀲𑀦𑀢𑁆𑀢𑀸 𑀬𑀣𑀸𑀥𑀺𑀕𑀢𑀥𑀫𑁆𑀫𑀤𑁂𑀲𑀦𑀸𑀪𑀸𑀯𑀢𑁄 𑀅𑀪𑀺𑀥𑀫𑁆𑀫𑀲𑁆𑀲 𑀅𑀪𑀺𑀲𑀫𑁆𑀩𑁄𑀥𑀺 𑀅𑀥𑀺𑀕𑀫𑀦𑀺𑀤𑀸𑀦𑀁. 𑀤𑁂𑀲𑀓𑀸𑀮𑀸𑀤𑀺𑀬𑁂𑀯 𑀤𑁂𑀲𑀦𑀸𑀦𑀺𑀤𑀸𑀦𑀁. 𑀬𑀁 𑀧𑀦 𑀅𑀝𑁆𑀞𑀓𑀣𑀸𑀬𑀁 ‘‘𑀤𑁂𑀲𑀦𑀸𑀦𑀺𑀤𑀸𑀦𑀁 𑀬𑀸𑀯 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀅𑀪𑀺𑀥𑀫𑁆𑀫𑀤𑁂𑀲𑀦𑀸𑀯𑀺𑀲𑁂𑀲𑁂𑀦 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀥𑀫𑁆𑀫𑀘𑀓𑁆𑀓𑀧𑁆𑀧𑀯𑀢𑁆𑀢𑀦𑀲𑀼𑀢𑁆𑀢𑁂 𑀯𑀸 𑀤𑁂𑀲𑀺𑀢𑁂𑀳𑀺 𑀅𑀭𑀺𑀬𑀲𑀘𑁆𑀘𑁂𑀳𑀺 𑀲𑀓𑀮𑀸𑀪𑀺𑀥𑀫𑁆𑀫𑀧𑀤𑀢𑁆𑀣𑀲𑀗𑁆𑀕𑀳𑀢𑁄, 𑀧𑀭𑀫𑀢𑁆𑀣𑀢𑁄 𑀅𑀪𑀺𑀥𑀫𑁆𑀫𑀪𑀽𑀢𑀸𑀦𑀁 𑀯𑀸 𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀻𑀦𑀁 𑀢𑀢𑁆𑀣 𑀤𑁂𑀲𑀺𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀢𑀢𑁆𑀢𑀓𑀸𑀦𑀁𑀬𑁂𑀯 𑀤𑁂𑀲𑀦𑀸𑀭𑀼𑀴𑁆𑀳𑀢𑀸𑀬 𑀅𑀟𑁆𑀠𑀙𑀓𑁆𑀓𑁂𑀲𑀼 𑀚𑀸𑀢𑀓𑀲𑀢𑁂𑀲𑀼 𑀧𑀭𑀺𑀧𑀸𑀘𑀦𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦 𑀳𑀺 𑀏𑀢𑁆𑀢𑀓𑀸𑀲𑀼 𑀏𑀯 𑀚𑀸𑀢𑀻𑀲𑀼 𑀧𑀼𑀜𑁆𑀜𑀸𑀤𑀺𑀲𑀫𑁆𑀪𑀸𑀭𑀲𑀫𑁆𑀪𑀭𑀡𑀁, 𑀓𑀺𑀁 𑀧𑀦 𑀓𑀸𑀭𑀡𑀁 𑀏𑀢𑁆𑀢𑀓𑀸 𑀏𑀯 𑀚𑀸𑀢𑀺𑀬𑁄 𑀤𑁂𑀲𑀺𑀢𑀸𑀢𑀺? 𑀢𑀤𑀜𑁆𑀜𑁂𑀲𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄.

𑀲𑀼𑀫𑁂𑀥𑀓𑀣𑀸𑀯𑀡𑁆𑀡𑀦𑀸

𑀉𑀧𑁆𑀧𑀦𑁆𑀦𑁂 𑀩𑀼𑀤𑁆𑀥𑁂 𑀢𑀢𑁄 𑀅𑀢𑁆𑀢𑀸𑀦𑀁 𑀲𑁂𑀬𑁆𑀬𑀢𑁄 𑀯𑀸 𑀲𑀤𑀺𑀲𑀢𑁄 𑀯𑀸 𑀤𑀳𑀦𑁆𑀢𑁄 𑀛𑀸𑀦𑀸𑀪𑀺𑀜𑁆𑀜𑀸𑀳𑀺 𑀧𑀭𑀺𑀳𑀸𑀬𑀢𑀺, 𑀦 𑀢𑀣𑀸 𑀲𑀼𑀫𑁂𑀥𑀧𑀡𑁆𑀟𑀺𑀢𑁄 𑀅𑀝𑁆𑀞𑀸𑀲𑀻𑀢𑀺 𑀢𑀲𑁆𑀲 𑀛𑀸𑀦𑀸𑀪𑀺𑀜𑁆𑀜𑀸𑀳𑀺 𑀅𑀧𑀭𑀺𑀳𑀸𑀦𑀺 𑀤𑀝𑁆𑀞𑀩𑁆𑀩𑀸. 𑀢𑁂𑀦𑁂𑀯𑀸𑀳 ‘‘𑀢𑀸𑀧𑀲𑁂𑀳𑀺 𑀅𑀲𑀫𑁄’’𑀢𑀺. 𑀬𑀣𑀸 𑀦𑀺𑀩𑁆𑀩𑀸𑀦𑀁, 𑀅𑀜𑁆𑀜𑀁 𑀯𑀸 𑀦𑀺𑀘𑁆𑀘𑀸𑀪𑀺𑀫𑀢𑀁 𑀅𑀯𑀺𑀧𑀭𑀻𑀢𑀯𑀼𑀢𑁆𑀢𑀺𑀢𑀸𑀬 𑀲𑀩𑁆𑀩𑀓𑀸𑀮𑀁 𑀢𑀣𑀸𑀪𑀸𑀯𑁂𑀦 ‘‘𑀲𑀲𑁆𑀲𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀩𑀼𑀤𑁆𑀥𑀸𑀦𑀁 𑀯𑀘𑀦𑀦𑁆𑀢𑀺 𑀢𑀲𑁆𑀲 𑀲𑀲𑁆𑀲𑀢𑀢𑀸 𑀯𑀼𑀢𑁆𑀢𑀸. 𑀢𑁂𑀦𑁂𑀯𑀸𑀳 ‘‘𑀅𑀯𑀺𑀧𑀭𑀻𑀢𑀫𑁂𑀯𑀸’’𑀢𑀺. 𑀉𑀧𑀧𑀸𑀭𑀫𑀻𑀆𑀤𑀺𑀯𑀺𑀪𑀸𑀕𑁂𑀦 𑀅𑀦𑁂𑀓𑀧𑁆𑀧𑀓𑀸𑀭𑀢𑀸. 𑀲𑀫𑀸𑀤𑀸𑀦𑀸𑀥𑀺𑀝𑁆𑀞𑀸𑀦𑀦𑁆𑀢𑀺 𑀲𑀫𑀸𑀤𑀸𑀦𑀲𑁆𑀲 𑀅𑀥𑀺𑀝𑁆𑀞𑀸𑀦𑀁 𑀧𑀯𑀢𑁆𑀢𑀦𑀁 𑀓𑀭𑀡𑀦𑁆𑀢𑀺 𑀅𑀢𑁆𑀣𑁄. 𑀜𑀸𑀡𑀢𑁂𑀚𑁂𑀦𑀸𑀢𑀺 𑀧𑀸𑀭𑀫𑀻𑀧𑀯𑀺𑀘𑀬𑀜𑀸𑀡𑀧𑁆𑀧𑀪𑀸𑀯𑁂𑀦. 𑀫𑀳𑀸𑀦𑀼𑀪𑀸𑀯𑀜𑁆𑀳𑀺 𑀢𑀁 𑀜𑀸𑀡𑀁 𑀩𑁄𑀥𑀺𑀲𑀫𑁆𑀪𑀸𑀭𑁂𑀲𑀼 𑀅𑀦𑀸𑀯𑀭𑀡𑀁 𑀅𑀦𑀸𑀘𑀭𑀺𑀬𑀓𑀁 𑀫𑀳𑀸𑀩𑁄𑀥𑀺𑀲𑀫𑀼𑀧𑁆𑀧𑀢𑁆𑀢𑀺𑀬𑀸 𑀅𑀦𑀼𑀭𑀽𑀧𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀪𑀽𑀢𑀁. 𑀢𑀣𑀸 𑀳𑀺 𑀢𑀁 𑀫𑀦𑀼𑀲𑁆𑀲𑀧𑀼𑀭𑀺𑀲𑀪𑀸𑀯𑀸𑀤𑀺𑀆𑀥𑀸𑀭𑀫𑁂𑀯 𑀚𑀸𑀢𑀁. 𑀓𑀸𑀬𑀸𑀤𑀻𑀲𑀼 𑀅𑀲𑀼𑀪𑀲𑀜𑁆𑀜𑀸𑀤𑀺𑀪𑀸𑀯𑁂𑀦 𑀲𑀼𑀤𑁆𑀥𑀕𑁄𑀘𑀭𑀸. ‘‘𑀅𑀜𑁆𑀜𑀣𑀸’’𑀢𑀺 𑀧𑀤𑀲𑁆𑀲 𑀧𑀓𑀭𑀡𑀧𑀭𑀺𑀘𑁆𑀙𑀺𑀦𑁆𑀦𑀁 𑀅𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀮𑀻𑀦𑀢𑀸’’𑀢𑀺 𑀆𑀳. 𑀮𑀻𑀦𑀢𑀸𑀢𑀺 𑀘 𑀲𑀗𑁆𑀓𑁄𑀘𑁄 𑀯𑀻𑀭𑀺𑀬𑀳𑀸𑀦𑀺 𑀯𑀻𑀭𑀺𑀬𑀸𑀭𑀫𑁆𑀪𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑁂𑀦𑀸𑀳 ‘‘𑀏𑀲𑀸 𑀫𑁂 𑀯𑀻𑀭𑀺𑀬𑀧𑀸𑀭𑀫𑀻’’𑀢𑀺.

𑀦𑀺𑀤𑀸𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑀁

𑀢𑀺𑀓𑀫𑀸𑀢𑀺𑀓𑀸𑀧𑀤𑀯𑀡𑁆𑀡𑀦𑀸

𑁧. 𑀢𑁂𑀦𑀸𑀢𑀺 𑀯𑁂𑀤𑀦𑀸𑀲𑀤𑁆𑀤𑁂𑀦. 𑀲𑀩𑁆𑀩𑀧𑀤𑁂𑀳𑀻𑀢𑀺 𑀢𑀻𑀳𑀺 𑀧𑀤𑁂𑀳𑀺 𑀮𑀤𑁆𑀥𑀦𑀸𑀫𑁄 𑀳𑁄𑀢𑀺 𑀅𑀯𑀬𑀯𑀥𑀫𑁆𑀫𑁂𑀦𑀸𑀧𑀺 𑀲𑀫𑀼𑀤𑀸𑀬𑀲𑁆𑀲 𑀅𑀧𑀤𑀺𑀲𑀺𑀢𑀩𑁆𑀩𑀢𑁄 𑀬𑀣𑀸 ‘‘𑀲𑀫𑀁 𑀘𑀼𑀡𑁆𑀡’’𑀦𑁆𑀢𑀺. 𑀘𑁄𑀤𑀓𑁄 𑀬𑀣𑀸𑀥𑀺𑀧𑁆𑀧𑁂𑀢𑀫𑀢𑁆𑀣𑀁 𑀅𑀧𑁆𑀧𑀝𑀺𑀧𑀚𑁆𑀚𑀫𑀸𑀦𑁄 𑀯𑀺𑀪𑀢𑁆𑀢𑀺𑀅𑀦𑁆𑀢𑀲𑁆𑀲𑁂𑀯 𑀧𑀤𑀪𑀸𑀯𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀦𑀦𑀼 𑀲𑀼𑀔𑀸𑀬𑀸’’𑀢𑀺𑀆𑀤𑀺𑀦𑀸 𑀘𑁄𑀤𑁂𑀢𑀺. 𑀇𑀢𑀭𑁄 ‘‘𑀅𑀥𑀺𑀧𑁆𑀧𑁂𑀢𑀧𑁆𑀧𑀓𑀸𑀭𑀢𑁆𑀣𑀕𑀫𑀓𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀢𑀺. 𑀢𑁂𑀦 ‘‘𑀯𑀸𑀓𑁆𑀬𑀁 𑀇𑀥 𑀧𑀤𑀦𑁆𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀳𑁂𑀢𑀼𑀧𑀤𑀲𑀳𑁂𑀢𑀼𑀓𑀧𑀤𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀦𑀳𑁂𑀢𑀼𑀧𑀤𑀅𑀳𑁂𑀢𑀼𑀓𑀧𑀤𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀧𑀤𑀸𑀦𑀺 𑀳𑁂𑀢𑀼𑀯𑀺𑀧𑁆𑀧𑀬𑀼𑀢𑁆𑀢𑀧𑀤𑀫𑁆𑀧𑀺 𑀯𑀸 𑀲𑀗𑁆𑀕𑀡𑁆𑀳𑀸𑀢𑀺.

𑀉𑀪𑀬𑁂𑀓𑀧𑀤𑀯𑀲𑁂𑀦𑀸𑀢𑀺 𑀉𑀪𑀬𑀧𑀤𑀯𑀲𑁂𑀦 𑀳𑁂𑀢𑀼𑀤𑀼𑀓𑀲𑀫𑁆𑀩𑀦𑁆𑀥𑁄, 𑀏𑀓𑀧𑀤𑀯𑀲𑁂𑀦 𑀲𑀳𑁂𑀢𑀼𑀓𑀤𑀼𑀓𑀲𑀫𑁆𑀩𑀦𑁆𑀥𑁄. 𑀢𑀣𑀸𑀢𑀺 𑀉𑀪𑀬𑁂𑀓𑀧𑀤𑀯𑀲𑁂𑀦. 𑀏𑀢𑁆𑀣 𑀘 𑀲𑀳𑁂𑀢𑀼𑀓𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀤𑀼𑀓𑀸𑀢𑀺𑀆𑀤𑀺𑀦𑀸 𑀬𑀣𑀸 𑀳𑁂𑀢𑀼𑀕𑁄𑀘𑁆𑀙𑀓𑁂 𑀧𑀞𑀫𑀤𑀼𑀓𑀲𑀫𑁆𑀩𑀦𑁆𑀥𑀸 𑀤𑀼𑀢𑀺𑀬𑀢𑀢𑀺𑀬𑀤𑀼𑀓𑀸, 𑀧𑀞𑀫𑀤𑀼𑀓𑀤𑀼𑀢𑀺𑀬𑀤𑀼𑀓𑀲𑀫𑁆𑀩𑀦𑁆𑀥𑀸 𑀘𑀢𑀼𑀢𑁆𑀣𑀙𑀝𑁆𑀞𑀤𑀼𑀓𑀸, 𑀧𑀞𑀫𑀤𑀼𑀓𑀢𑀢𑀺𑀬𑀤𑀼𑀓𑀲𑀫𑁆𑀩𑀦𑁆𑀥𑁄 𑀧𑀜𑁆𑀘𑀫𑁄 𑀤𑀼𑀓𑁄, 𑀏𑀯𑀁 𑀆𑀲𑀯𑀕𑁄𑀘𑁆𑀙𑀓𑀸𑀤𑀻𑀲𑀼𑀧𑀻𑀢𑀺 𑀦𑀬𑀁 𑀤𑀲𑁆𑀲𑁂𑀢𑀺. 𑀲𑀓𑁆𑀓𑀸 𑀳𑀺 𑀇𑀫𑀺𑀦𑀸𑀯 𑀦𑀬𑁂𑀦 𑀢𑁂𑀲𑀼𑀧𑀺 𑀤𑀼𑀓𑀦𑁆𑀢𑀭𑀲𑀫𑁆𑀩𑀦𑁆𑀥𑁄 𑀯𑀺𑀜𑁆𑀜𑀸𑀢𑀼𑀁, 𑀓𑁂𑀯𑀮𑀁 𑀧𑀦 𑀆𑀲𑀯𑀕𑁄𑀘𑁆𑀙𑀓𑀸𑀤𑀻𑀲𑀼 𑀤𑀼𑀢𑀺𑀬𑀤𑀼𑀓𑀢𑀢𑀺𑀬𑀤𑀼𑀓𑀲𑀫𑁆𑀩𑀦𑁆𑀥𑁄 𑀑𑀲𑀸𑀦𑀤𑀼𑀓𑁄, 𑀓𑀺𑀮𑁂𑀲𑀕𑁄𑀘𑁆𑀙𑀓𑁂 𑀘 𑀤𑀼𑀢𑀺𑀬𑀘𑀢𑀼𑀢𑁆𑀣𑀤𑀼𑀓𑀲𑀫𑁆𑀩𑀦𑁆𑀥𑁄𑀢𑀺. 𑀥𑀫𑁆𑀫𑀸𑀦𑀁 𑀲𑀸𑀯𑀲𑁂𑀲𑀦𑀺𑀭𑀯𑀲𑁂𑀲𑀪𑀸𑀯𑁂𑀦 𑀢𑀺𑀓𑀤𑀼𑀓𑀸𑀦𑀁 𑀲𑀧𑁆𑀧𑀤𑁂𑀲𑀦𑀺𑀧𑁆𑀧𑀤𑁂𑀲𑀢𑀸 𑀯𑀼𑀢𑁆𑀢𑀸𑀢𑀺 𑀬𑁂𑀳𑀺 𑀢𑀺𑀓𑀤𑀼𑀓𑀸 𑀲𑀸𑀯𑀲𑁂𑀲𑀸𑀢𑀺 𑀧𑀤𑀺𑀲𑁆𑀲𑀦𑁆𑀢𑀺 𑀅𑀧𑀤𑀺𑀲𑁆𑀲𑀦𑁆𑀢𑀺, 𑀢𑁂 𑀅𑀲𑀗𑁆𑀕𑀳𑀺𑀢𑀥𑀫𑁆𑀫𑀸𑀧𑀤𑁂𑀲𑁄. 𑀏𑀯𑀁 𑀲𑀢𑀺 ‘‘𑀅𑀲𑀗𑁆𑀕𑀳𑀺𑀢𑁄’’𑀢𑀺 𑀯𑀺𑀲𑁂𑀲𑀦𑀁 𑀓𑀺𑀫𑀢𑁆𑀣𑀺𑀬𑀦𑁆𑀢𑀺? 𑀏𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀧𑀸𑀓𑀝𑀓𑀭𑀡𑀢𑁆𑀣𑀁 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀧𑀤𑀺𑀲𑁆𑀲𑀢𑀺 𑀏𑀢𑁂𑀦 𑀲𑀫𑀼𑀤𑀸𑀬𑁄𑀢𑀺 𑀧𑀤𑁂𑀲𑁄, 𑀅𑀯𑀬𑀯𑁄. ‘‘𑀲𑀸𑀫𑀜𑁆𑀜𑀚𑁄𑀢𑀦𑀸 𑀯𑀺𑀲𑁂𑀲𑁂 𑀅𑀯𑀢𑀺𑀝𑁆𑀞𑀢𑀻’’𑀢𑀺 𑀬𑀣𑀸𑀥𑀺𑀧𑁆𑀧𑁂𑀢𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀲𑀗𑁆𑀕𑀳𑀺𑀢𑁄’’𑀢𑀺 𑀆𑀳.

𑀅𑀦𑀯𑀚𑁆𑀚𑀢𑁆𑀣𑁄 𑀅𑀯𑀚𑁆𑀚𑀯𑀺𑀭𑀳𑀢𑁆𑀣𑁄. 𑀦𑀸𑀫𑀁 𑀲𑀜𑁆𑀜𑀸, 𑀓𑀺𑀭𑀺𑀬𑀸 𑀓𑀭𑀡𑀁, 𑀧𑀬𑁄𑀚𑀦𑀁 𑀭𑀣𑀭𑀣𑀗𑁆𑀕𑀯𑀺𑀪𑀸𑀯𑀦𑁂𑀦 𑀢𑁂𑀲𑀁 𑀧𑀓𑀸𑀭𑀢𑁄 𑀬𑁄𑀚𑀦𑀁. 𑀓𑀼𑀲𑁂𑀦 𑀜𑀸𑀡𑁂𑀦 𑀮𑀸𑀢𑀩𑁆𑀩𑀸𑀢𑀺 𑀓𑀼𑀲𑀮𑀸𑀢𑀺 𑀅𑀬𑀫𑀢𑁆𑀣𑁄 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀢𑀸𑀯 𑀳𑁄𑀢𑀼, 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀁 𑀓𑀣𑀦𑁆𑀢𑀺 𑀆𑀳 ‘‘𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀦𑀫𑁆𑀧𑀻’’𑀢𑀺𑀆𑀤𑀺. 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀸𑀧𑀺 𑀳𑀺 𑀜𑀸𑀡𑁂𑀦𑁂𑀯 𑀧𑀯𑀢𑁆𑀢𑀺𑀬𑀦𑁆𑀢𑀺 𑀳𑀺𑀢𑀲𑀼𑀔𑀳𑁂𑀢𑀼𑀪𑀽𑀢𑀸𑀬 𑀧𑀯𑀢𑁆𑀢𑀺𑀬𑀸 𑀧𑀜𑁆𑀜𑀯𑀦𑁆𑀢𑀸𑀦𑀁 𑀧𑀝𑀺𑀧𑀢𑁆𑀢𑀺𑀪𑀸𑀯𑀢𑁄. 𑀦 𑀳𑀺 𑀅𑀦𑁆𑀢𑀭𑁂𑀦 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀓𑀼𑀲𑀮𑀼𑀧𑁆𑀧𑀢𑁆𑀢𑀺 𑀅𑀢𑁆𑀣𑀻𑀢𑀺. ‘‘𑀬𑀤𑀺 𑀓𑀼𑀲𑀮𑀲𑁆𑀲 𑀉𑀪𑀬𑀪𑀸𑀕𑀕𑀢𑀁 𑀲𑀁𑀓𑀺𑀮𑁂𑀲𑀮𑀯𑀦𑀁 𑀧𑀸𑀓𑀝𑀁 𑀲𑀺𑀬𑀸, 𑀓𑀼𑀲𑀸 𑀯𑀺𑀬 𑀮𑀼𑀦𑀦𑁆𑀢𑀻𑀢𑀺 𑀓𑀼𑀲𑀮𑀸𑀢𑀺 𑀅𑀬𑀫𑀢𑁆𑀣𑁄 𑀬𑀼𑀢𑁆𑀢𑁄 𑀲𑀺𑀬𑀸’’𑀢𑀺 𑀓𑁄𑀘𑀺 𑀯𑀤𑁂𑀬𑁆𑀬𑀸𑀢𑀺 𑀆𑀲𑀗𑁆𑀓𑀸𑀬 𑀆𑀳 ‘‘𑀲𑀫𑁆𑀫𑀧𑁆𑀧𑀥𑀸𑀦𑀤𑁆𑀯𑀬𑀁 𑀯𑀺𑀬𑀸’’𑀢𑀺.

𑀦 𑀘𑀸𑀢𑀺𑀆𑀤𑀺𑀦𑀸 ‘‘𑀲𑀪𑀸𑀯𑀁 𑀥𑀸𑀭𑁂𑀦𑁆𑀢𑀻’’𑀢𑀺 𑀏𑀢𑁆𑀣 𑀧𑀭𑀫𑀢𑁆𑀣𑀢𑁄 𑀓𑀢𑁆𑀢𑀼𑀓𑀫𑁆𑀫𑀲𑁆𑀲 𑀘 𑀪𑁂𑀤𑁄 𑀦𑀢𑁆𑀣𑀺, 𑀓𑀧𑁆𑀧𑀦𑀸𑀲𑀺𑀤𑁆𑀥𑁄 𑀏𑀯 𑀧𑀦 𑀪𑁂𑀤𑁄𑀢𑀺 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀦𑀸𑀫𑀯𑀲𑁂𑀦 𑀯𑀺𑀜𑁆𑀜𑀸𑀢𑀸𑀯𑀺𑀜𑁆𑀜𑀸𑀢𑁂𑀢𑀺 𑀬𑁂𑀲𑀁 ‘‘𑀥𑀫𑁆𑀫𑀸’’𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀅𑀯𑀺𑀜𑁆𑀜𑀸𑀢𑀸 𑀲𑀪𑀸𑀯𑀸, ‘‘𑀲𑀪𑀸𑀯𑀁 𑀥𑀸𑀭𑁂𑀦𑁆𑀢𑀻’’𑀢𑀺 𑀇𑀫𑀺𑀦𑀸 𑀘 𑀧𑀭𑀺𑀬𑀸𑀬𑁂𑀦 𑀯𑀺𑀜𑁆𑀜𑀸𑀢𑀸, 𑀢𑁂𑀲𑀁 𑀯𑀲𑁂𑀦 𑀏𑀯𑀁 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀧𑀞𑀫𑁄 𑀅𑀢𑁆𑀣𑁄 𑀲𑀗𑁆𑀔𑀢𑀸𑀲𑀗𑁆𑀔𑀢𑀥𑀫𑁆𑀫𑀯𑀲𑁂𑀦 𑀯𑀼𑀢𑁆𑀢𑁄, 𑀤𑀼𑀢𑀺𑀬𑁄 𑀲𑀗𑁆𑀔𑀢𑀯𑀲𑁂𑀦, 𑀢𑀢𑀺𑀬𑁄 𑀲𑀗𑁆𑀔𑀢𑀸𑀲𑀗𑁆𑀔𑀢𑀧𑀜𑁆𑀜𑀢𑁆𑀢𑀺𑀥𑀫𑁆𑀫𑀯𑀲𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀓𑀼𑀲𑀮𑀧𑀝𑀺𑀲𑁂𑀥𑀦𑀁 𑀓𑀼𑀲𑀮𑀸𑀪𑀸𑀯𑁄 𑀏𑀯. 𑀅𑀪𑀸𑀯𑁄 𑀳𑀺 𑀲𑀢𑁆𑀢𑀸𑀧𑀝𑀺𑀲𑁂𑀥𑁄𑀢𑀺. 𑀥𑀫𑁆𑀫𑁄𑀢𑀺 𑀲𑀪𑀸𑀯𑀥𑀫𑁆𑀫𑁄. 𑀅𑀓𑀼𑀲𑀮𑀯𑀘𑀦𑁂𑀦 𑀦 𑀓𑁄𑀘𑀺 𑀅𑀢𑁆𑀣𑁄 𑀲𑀪𑀸𑀯𑀥𑀫𑁆𑀫𑀲𑁆𑀲 𑀅𑀩𑁄𑀥𑀓𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀣 𑀲𑀺𑀬𑀸 𑀅𑀓𑀼𑀲𑀮𑀯𑀘𑀦𑁂𑀦 𑀓𑁄𑀘𑀺 𑀅𑀢𑁆𑀣𑁄 𑀅𑀲𑀪𑀸𑀯𑀥𑀫𑁆𑀫𑀩𑁄𑀥𑀓𑀢𑁆𑀢𑁂𑀧𑀺 ‘‘𑀧𑀜𑁆𑀜𑀢𑁆𑀢𑀺𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 𑀯𑀺𑀬, 𑀏𑀯𑀁 𑀲𑀢𑀺 ‘‘𑀅𑀦𑀩𑁆𑀬𑀸𑀓𑀢𑀸’’𑀢𑀺 𑀘 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀢𑁄 𑀘𑀸𑀬𑀁 𑀘𑀢𑀼𑀓𑁆𑀓𑁄 𑀆𑀧𑀚𑁆𑀚𑀢𑀺, 𑀦 𑀢𑀺𑀓𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀤𑀼𑀓𑀘𑀢𑀼𑀓𑁆𑀓𑀪𑀸𑀯𑁄 𑀅𑀦𑀩𑁆𑀬𑀸𑀓𑀢𑀯𑁄𑀳𑀸𑀭𑁄 𑀘 𑀦𑀢𑁆𑀣𑀺, 𑀲𑁄 𑀘 𑀯𑀼𑀢𑁆𑀢𑀦𑀬𑁂𑀦 𑀅𑀪𑀸𑀯𑀫𑀢𑁆𑀢𑀯𑀘𑀦𑁂 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸. 𑀲𑀪𑀸𑀯𑀥𑀸𑀭𑀡𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀥𑀸𑀭𑀻𑀬𑀦𑁆𑀢𑀺 𑀧𑀘𑁆𑀘𑀬𑁂𑀳𑀻’’𑀢𑀺 𑀅𑀬𑀫𑀢𑁆𑀣𑁄 𑀲𑀗𑁆𑀕𑀳𑀺𑀢𑁄. 𑀜𑁂𑀬𑁆𑀬𑀧𑀭𑀺𑀬𑀸𑀬𑁂𑀦 𑀧𑀦 𑀥𑀫𑁆𑀫-𑀲𑀤𑁆𑀤𑁂𑀦𑀸𑀬𑀁 𑀤𑁄𑀲𑁄𑀢𑀺 𑀦𑀦𑀼 𑀅𑀜𑁂𑀬𑁆𑀬𑀧𑀭𑀺𑀬𑀸𑀬𑁂𑀧𑀺 𑀥𑀫𑁆𑀫-𑀲𑀤𑁆𑀤𑁂 𑀦 𑀓𑁄𑀘𑀺 𑀤𑁄𑀲𑁄𑀢𑀺? 𑀦, 𑀯𑀼𑀢𑁆𑀢𑀤𑁄𑀲𑀸𑀦𑀢𑀺𑀯𑀢𑁆𑀢𑀦𑀢𑁄.

𑀧𑀸𑀭𑀺𑀲𑁂𑀲𑁂𑀦𑀸𑀢𑀺 𑀏𑀢𑁆𑀣 𑀦𑀦𑀼 𑀅𑀬𑀫𑀓𑀸𑀭𑁄 𑀦-𑀅𑀢𑁆𑀣𑀢𑁆𑀢𑀬𑀲𑁆𑀲𑁂𑀯 𑀚𑁄𑀢𑀓𑁄, 𑀅𑀣 𑀔𑁄 ‘‘𑀅𑀳𑁂𑀢𑀼𑀓𑀸 𑀥𑀫𑁆𑀫𑀸, 𑀅𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄’’𑀢𑀺 𑀢𑀁𑀬𑁄𑀕𑀦𑀺𑀯𑀢𑁆𑀢𑀺𑀬𑀸, ‘‘𑀅𑀧𑁆𑀧𑀘𑁆𑀘𑀬𑀸 𑀥𑀫𑁆𑀫𑀸’’𑀢𑀺 𑀢𑀁𑀲𑀫𑁆𑀩𑀦𑁆𑀥𑀺𑀪𑀸𑀯𑀦𑀺𑀯𑀢𑁆𑀢𑀺𑀬𑀸. 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀜𑁆𑀳𑀺 𑀧𑀘𑁆𑀘𑀬𑀲𑀫𑁆𑀩𑀦𑁆𑀥𑀻𑀢𑀺 𑀅𑀧𑁆𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀢𑁆𑀢𑀸 𑀅𑀲𑀫𑁆𑀩𑀦𑁆𑀥𑀺𑀢𑀸 𑀏𑀢𑁆𑀣 𑀚𑁄𑀢𑀻𑀬𑀢𑀺. ‘‘𑀅𑀦𑀺𑀤𑀲𑁆𑀲𑀦𑀸 𑀥𑀫𑁆𑀫𑀸’’𑀢𑀺 𑀢𑀁𑀲𑀪𑀸𑀯𑀦𑀺𑀯𑀢𑁆𑀢𑀺𑀬𑀸. 𑀦𑀺𑀤𑀲𑁆𑀲𑀦𑀜𑁆𑀳𑀺 𑀤𑀝𑁆𑀞𑀩𑁆𑀩𑀢𑀸. 𑀅𑀣 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀦𑀺𑀤𑀲𑁆𑀲𑀦𑀁, 𑀢𑀕𑁆𑀕𑀬𑁆𑀳𑀪𑀸𑀯𑀦𑀺𑀯𑀢𑁆𑀢𑀺𑀬𑀸, 𑀢𑀣𑀸 ‘‘𑀅𑀦𑀸𑀲𑀯𑀸 𑀥𑀫𑁆𑀫𑀸’’𑀢𑀺. ‘‘𑀅𑀧𑁆𑀧𑀝𑀺𑀖𑀸 𑀥𑀫𑁆𑀫𑀸 𑀅𑀦𑀸𑀭𑀫𑁆𑀫𑀡𑀸 𑀥𑀫𑁆𑀫𑀸’’𑀢𑀺 𑀢𑀁𑀓𑀺𑀘𑁆𑀘𑀦𑀺𑀯𑀢𑁆𑀢𑀺𑀬𑀸. ‘‘𑀅𑀭𑀽𑀧𑀺𑀦𑁄 𑀥𑀫𑁆𑀫𑀸 𑀅𑀘𑁂𑀢𑀲𑀺𑀓𑀸 𑀥𑀫𑁆𑀫𑀸’’𑀢𑀺 𑀢𑀩𑁆𑀪𑀸𑀯𑀦𑀺𑀯𑀢𑁆𑀢𑀺𑀬𑀸. 𑀢𑀤𑀜𑁆𑀜𑀢𑀸 𑀳𑀺 𑀏𑀢𑁆𑀣 𑀧𑀓𑀸𑀲𑀻𑀬𑀢𑀺. ‘‘𑀅𑀫𑀦𑀼𑀲𑁆𑀲𑁄’’𑀢𑀺 𑀢𑀩𑁆𑀪𑀸𑀯𑀫𑀢𑁆𑀢𑀦𑀺𑀯𑀢𑁆𑀢𑀺𑀬𑀸. 𑀫𑀦𑀼𑀲𑁆𑀲𑀢𑁆𑀢𑀫𑀢𑁆𑀢𑀁 𑀦𑀢𑁆𑀣𑀺 𑀅𑀜𑁆𑀜𑀁 𑀲𑀫𑀸𑀦𑀦𑁆𑀢𑀺 𑀲𑀤𑀺𑀲𑀢𑀸 𑀳𑁂𑀢𑁆𑀣 𑀲𑀽𑀘𑀺𑀬𑀢𑀺. ‘‘𑀅𑀲𑀫𑀡𑁄 𑀲𑀫𑀡𑀧𑀝𑀺𑀜𑁆𑀜𑁄 𑀅𑀧𑀼𑀢𑁆𑀢𑁄’’𑀢𑀺 𑀢𑀁𑀲𑀫𑁆𑀪𑀸𑀯𑀦𑀕𑀼𑀡𑀦𑀺𑀯𑀢𑁆𑀢𑀺𑀬𑀸. 𑀕𑀭𑀳𑀸 𑀳𑀺 𑀏𑀢𑁆𑀣 𑀜𑀸𑀬𑀢𑀺. ‘‘𑀓𑀘𑁆𑀘𑀺 𑀦𑀼 𑀪𑁄𑀢𑁄 𑀅𑀦𑀸𑀫𑀬𑀸, 𑀅𑀦𑀼𑀤𑀭𑀸 𑀓𑀜𑁆𑀜𑀸’’𑀢𑀺 𑀢𑀤𑀧𑁆𑀧𑀪𑀸𑀯𑀦𑀺𑀯𑀢𑁆𑀢𑀺𑀬𑀸. ‘‘𑀅𑀦𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸’’𑀢𑀺 𑀢𑀁𑀲𑀤𑀺𑀲𑀪𑀸𑀯𑀦𑀺𑀯𑀢𑁆𑀢𑀺𑀬𑀸. 𑀅𑀢𑀻𑀢𑀸𑀦𑀜𑁆𑀳𑀺 𑀉𑀧𑁆𑀧𑀦𑁆𑀦𑀧𑀼𑀩𑁆𑀩𑀢𑁆𑀢𑀸 𑀉𑀧𑀸𑀤𑀺𑀥𑀫𑁆𑀫𑀸𑀦𑀜𑁆𑀘 𑀧𑀘𑁆𑀘𑀬𑁂𑀓𑀤𑁂𑀲𑀦𑀺𑀧𑁆𑀨𑀢𑁆𑀢𑀺𑀬𑀸 𑀆𑀭𑀤𑁆𑀥𑀼𑀧𑁆𑀧𑀸𑀤𑀪𑀸𑀯𑀢𑁄 𑀓𑀸𑀮𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀘 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀉𑀧𑁆𑀧𑀦𑁆𑀦𑀸𑀦𑀼𑀓𑀽𑀮𑀢𑀸, 𑀧𑀕𑁂𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀢𑀩𑁆𑀩𑀺𑀥𑀼𑀭𑀪𑀸𑀯𑁄 𑀏𑀢𑁆𑀣 𑀯𑀺𑀜𑁆𑀜𑀸𑀬𑀢𑀺. ‘‘𑀅𑀲𑁂𑀓𑁆𑀔𑀸 𑀥𑀫𑁆𑀫𑀸’’𑀢𑀺 𑀢𑀤𑀧𑀭𑀺𑀬𑁄𑀲𑀸𑀦𑀦𑀺𑀯𑀢𑁆𑀢𑀺𑀬𑀸. 𑀢𑀁𑀦𑀺𑀝𑁆𑀞𑀸𑀦𑀜𑁆𑀳𑁂𑀢𑁆𑀣 𑀧𑀓𑀸𑀲𑀻𑀬𑀢𑀻𑀢𑀺 𑀏𑀯𑀫𑀦𑁂𑀓𑁂𑀲𑀁 𑀅𑀢𑁆𑀣𑀸𑀦𑀁 𑀚𑁄𑀢𑀓𑁄, 𑀢𑀢𑁆𑀣 𑀓𑀺𑀁 𑀯𑀼𑀘𑁆𑀘𑀢𑁂 𑀅𑀢𑁆𑀣𑀤𑁆𑀯𑀬𑀫𑁂𑀯 𑀯𑀢𑁆𑀯𑀸 𑀧𑀸𑀭𑀺𑀲𑁂𑀲𑁂𑀦𑀸𑀢𑀺? 𑀇𑀢𑀭𑁂𑀲𑀁 𑀏𑀢𑁆𑀣 𑀲𑀼𑀯𑀺𑀤𑀽𑀭𑀪𑀸𑀯𑀢𑁄. 𑀦 𑀳𑀺 𑀓𑀼𑀲𑀮𑀯𑀺𑀧𑁆𑀧𑀬𑀼𑀢𑁆𑀢𑀸𑀤𑀻𑀦𑀁 𑀥𑀫𑁆𑀫𑀸𑀦𑀁 𑀅𑀓𑀼𑀲𑀮𑀪𑀸𑀯𑁄 𑀬𑀼𑀚𑁆𑀚𑀢𑀺.

𑀅𑀓𑀼𑀲𑀮𑀲𑀤𑁆𑀤𑀲𑁆𑀲 𑀉𑀘𑁆𑀘𑀸𑀭𑀡𑀸𑀦𑀦𑁆𑀢𑀭𑀁 𑀯𑀺𑀦𑁂𑀬𑁆𑀬𑀸𑀦𑀁 𑀓𑀼𑀲𑀮𑀧𑀝𑀺𑀧𑀓𑁆𑀔𑀪𑀽𑀢𑁂 𑀅𑀢𑁆𑀣𑁂 𑀧𑀝𑀺𑀧𑀢𑁆𑀢𑀺𑀪𑀸𑀯𑀢𑁄 𑀢𑀢𑁆𑀣 𑀦𑀺𑀭𑀼𑀴𑁆𑀳𑀢𑀸 𑀤𑀝𑁆𑀞𑀩𑁆𑀩𑀸. ‘‘𑀯𑀺𑀭𑀼𑀤𑁆𑀥𑀲𑀪𑀸𑀯𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁 𑀓𑀺𑀘𑁆𑀘𑀯𑀺𑀭𑁄𑀥𑀸𑀤𑀻𑀦𑀫𑁆𑀧𑀺 𑀢𑀤𑀦𑁆𑀢𑁄𑀕𑀥𑀢𑁆𑀢𑀸, 𑀯𑀺𑀭𑀼𑀤𑁆𑀥𑀲𑀪𑀸𑀯𑀢𑁆𑀢𑁂𑀧𑀺 𑀯𑀺𑀦𑀸𑀲𑀓𑀯𑀺𑀦𑀸𑀲𑀺𑀢𑀩𑁆𑀩𑀪𑀸𑀯𑁄 𑀓𑀼𑀲𑀮𑀸𑀓𑀼𑀲𑀮𑁂𑀲𑀼 𑀦𑀺𑀬𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀧𑁆𑀧𑀳𑁂𑀬𑁆𑀬𑀪𑀸𑀯𑀢𑁄’’𑀢𑀺 𑀆𑀳. 𑀇𑀢𑀭𑀣𑀸 𑀓𑀼𑀲𑀮𑀸𑀦𑀫𑁆𑀧𑀺 𑀅𑀓𑀼𑀲𑀮𑁂𑀳𑀺 𑀧𑀳𑀸𑀢𑀩𑁆𑀩𑀪𑀸𑀯𑁂 𑀅𑀘𑁆𑀘𑀦𑁆𑀢𑀁 𑀲𑀫𑀼𑀘𑁆𑀙𑀺𑀦𑁆𑀦𑀓𑀼𑀲𑀮𑀫𑀽𑀮𑀢𑁆𑀢𑀸 𑀅𑀧𑀸𑀬𑀧𑀽𑀭𑀓𑀸 𑀏𑀯 𑀲𑀢𑁆𑀢𑀸 𑀲𑀺𑀬𑀼𑀁. 𑀬𑀁 𑀧𑀦 ‘‘𑀥𑀫𑁆𑀫𑀸𑀧𑀺 𑀯𑁄, 𑀪𑀺𑀓𑁆𑀔𑀯𑁂, 𑀧𑀳𑀸𑀢𑀩𑁆𑀩𑀸’’𑀢𑀺 (𑀫. 𑀦𑀺. 𑁧.𑁨𑁪𑁦) 𑀯𑀼𑀢𑁆𑀢𑀁, 𑀢𑀁 ‘‘𑀭𑀽𑀧𑀁, 𑀪𑀺𑀓𑁆𑀔𑀯𑁂, 𑀦 𑀢𑀼𑀫𑁆𑀳𑀸𑀓𑀁, 𑀢𑀁 𑀧𑀚𑀳𑀣𑀸’’𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁩.𑁩𑁩) 𑀯𑀺𑀬 𑀢𑀤𑀸𑀭𑀫𑁆𑀫𑀡𑀲𑀁𑀓𑀺𑀮𑁂𑀲𑀧𑁆𑀧𑀳𑀸𑀦𑀯𑀲𑁂𑀦 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀁. 𑀬𑀣𑀸𑀳 ‘‘𑀦 𑀳𑀺 𑀓𑀼𑀲𑀮𑀸 𑀅𑀓𑀼𑀲𑀮𑁂𑀳𑀺 𑀧𑀳𑀸𑀢𑀩𑁆𑀩𑀸’’𑀢𑀺 (𑀥. 𑀲. 𑀫𑀽𑀮𑀝𑀻 𑁧).

𑀨𑀲𑁆𑀲𑀸𑀤𑀺𑀯𑀘𑀦𑁂𑀳𑀺 𑀢𑀁𑀦𑀺𑀤𑁆𑀤𑁂𑀲𑀪𑀽𑀢𑁂𑀳𑀺. 𑀢𑀩𑁆𑀩𑀘𑀦𑀻𑀬𑀪𑀸𑀯𑁂𑀦𑀸𑀢𑀺 𑀢𑁂𑀳𑀺 ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸’’𑀢𑀺𑀆𑀤𑀺𑀯𑀘𑀦𑁂𑀳𑀺 𑀅𑀪𑀺𑀥𑁂𑀬𑁆𑀬𑀪𑀸𑀯𑁂𑀦. 𑀬𑀣𑀸 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀸𑀤𑀺𑀅𑀢𑁆𑀣𑀸 𑀓𑀼𑀲𑀮𑀸𑀤𑀺𑀯𑀘𑀦𑁂𑀳𑀺, 𑀏𑀯𑀁 𑀅𑀯𑀺𑀧𑀸𑀓𑀢𑁆𑀣𑀸 𑀅𑀩𑁆𑀬𑀸𑀓𑀢𑀯𑀘𑀦𑁂𑀦 𑀩𑁄𑀥𑀺𑀢𑀸 𑀏𑀯𑀸𑀢𑀺 𑀆𑀳 ‘‘𑀅𑀩𑁆𑀬𑀸𑀓𑀢𑀯𑀘𑀦𑁂𑀦𑁂𑀯 𑀘𑀸’’𑀢𑀺. 𑀓𑀸𑀭𑀡𑀁 𑀅𑀯𑀢𑁆𑀯𑀸𑀢𑀺 𑀇𑀥 𑀯𑀼𑀢𑁆𑀢𑀪𑀸𑀯𑁂𑀦 𑀅𑀦𑀼𑀯𑀢𑁆𑀢𑀫𑀸𑀦𑀢𑁆𑀢𑀸𑀢𑀺 𑀓𑀸𑀭𑀡𑀁 𑀅𑀯𑀢𑁆𑀯𑀸. 𑀅𑀜𑁆𑀜𑀸…𑀧𑁂… 𑀦𑀺𑀯𑀸𑀭𑁂𑀢𑀩𑁆𑀩𑁄𑀢𑀺 𑀏𑀢𑁂𑀦 𑀓𑀼𑀲𑀮𑀸𑀓𑀼𑀲𑀮𑀲𑀤𑁆𑀤𑀸 𑀯𑀺𑀬 𑀓𑀼𑀲𑀮𑀸𑀓𑀼𑀲𑀮𑀲𑀪𑀸𑀯𑀸𑀦𑀁 𑀢𑀤𑀼𑀪𑀬𑀯𑀺𑀧𑀭𑀻𑀢𑀲𑀪𑀸𑀯𑀸𑀦𑀁 𑀥𑀫𑁆𑀫𑀸𑀦𑀁 𑀅𑀩𑁆𑀬𑀸𑀓𑀢𑀲𑀤𑁆𑀤𑁄 𑀩𑁄𑀥𑀓𑁄𑀢𑀺 𑀤𑀲𑁆𑀲𑁂𑀢𑀺. 𑀦 𑀳𑀺 𑀅𑀯𑀺𑀧𑀸𑀓𑀯𑀘𑀦𑀁 𑀯𑀼𑀢𑁆𑀢𑀁, 𑀅𑀓𑀼𑀲𑀮𑀯𑀘𑀦𑀜𑁆𑀘 𑀅𑀯𑀼𑀢𑁆𑀢𑀁. 𑀬𑀢𑁄 𑀅𑀯𑀺𑀧𑀸𑀓𑀯𑀘𑀦𑀲𑁆𑀲 𑀅𑀥𑀺𑀓𑀢𑀪𑀸𑀯𑁄 𑀅𑀓𑀼𑀲𑀮𑀲𑁆𑀲 𑀘 𑀢𑀩𑁆𑀩𑀘𑀦𑀻𑀬𑀪𑀸𑀯𑁂𑀦 𑀅𑀓𑀣𑀺𑀢𑀪𑀸𑀯𑁄 𑀲𑀺𑀬𑀸, 𑀢𑀲𑁆𑀫𑀸 𑀦 𑀅𑀓𑀼𑀲𑀮𑀸𑀦𑀁 𑀅𑀩𑁆𑀬𑀸𑀓𑀢𑀢𑀸𑀢𑀺 𑀅𑀬𑀁 𑀅𑀓𑀼𑀲𑀮𑀸𑀦𑀁 𑀅𑀦𑀩𑁆𑀬𑀸𑀓𑀢𑀪𑀸𑀯𑁂 𑀬𑁄𑀚𑀦𑀸.

𑀢𑀁 𑀧𑀭𑀺𑀳𑀭𑀺𑀢𑀼𑀦𑁆𑀢𑀺 𑀅𑀩𑁆𑀬𑀸𑀓𑀢𑀦𑀺𑀯𑀢𑁆𑀢𑀦𑀫𑀸𑀳. 𑀬𑀤𑀺 𑀏𑀯𑀁 ‘‘𑀲𑀼𑀔𑀯𑀺𑀧𑀸𑀓𑀸𑀦𑀯𑀚𑁆𑀚𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀅𑀦𑀯𑀚𑁆𑀚𑀸 𑀳𑀺 𑀩𑁆𑀬𑀪𑀺𑀘𑀸𑀭𑀺𑀢𑀸𑀬 𑀯𑀺𑀲𑁂𑀲𑀺𑀢𑀩𑁆𑀩𑀸𑀢𑀺? 𑀦, 𑀲𑀼𑀔𑀯𑀺𑀧𑀸𑀓𑀯𑀘𑀦𑀲𑁆𑀲 𑀯𑀺𑀲𑁂𑀲𑀦𑀪𑀸𑀯𑁂𑀦 𑀅𑀕𑁆𑀕𑀳𑀺𑀢𑀢𑁆𑀢𑀸. 𑀲𑀼𑀔𑀯𑀺𑀧𑀸𑀓𑀯𑀘𑀦𑁂𑀦 𑀳𑀺 𑀓𑀼𑀲𑀮𑀪𑀸𑀯𑁂 𑀲𑀫𑀢𑁆𑀢𑁄 𑀯𑀺𑀜𑁆𑀜𑀸𑀬𑀢𑀺, 𑀅𑀦𑀯𑀚𑁆𑀚𑀯𑀘𑀦𑀁 𑀧𑀦𑁂𑀢𑁆𑀣 𑀓𑀼𑀲𑀮𑀸𑀦𑀁 𑀅𑀕𑀭𑀳𑀺𑀢𑀩𑁆𑀩𑀢𑀸𑀲𑀗𑁆𑀔𑀸𑀢𑀁 𑀓𑀜𑁆𑀘𑀺 𑀯𑀺𑀲𑁂𑀲𑀫𑀸𑀳. 𑀢𑁂𑀦𑁂𑀯 𑀘 𑀢𑀲𑁆𑀲 𑀯𑀺𑀲𑁂𑀲𑀦𑀪𑀸𑀯𑁂𑀦 𑀯𑀼𑀢𑁆𑀢𑀲𑁆𑀲 𑀧𑀯𑀢𑁆𑀢𑀺𑀲𑀼𑀔𑀢𑀸𑀤𑀺𑀤𑀲𑁆𑀲𑀦𑀪𑀸𑀯𑀁 𑀲𑀬𑀫𑁂𑀯 𑀯𑀓𑁆𑀔𑀢𑀻𑀢𑀺. 𑀫𑀦𑁄𑀲𑀫𑀸𑀘𑀸𑀭𑀯𑀺𑀲𑁂𑀲𑀪𑀽𑀢𑀸 𑀨𑀮𑀥𑀫𑁆𑀫𑀸 𑀯𑀺𑀲𑁂𑀲𑁂𑀦 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀸𑀯𑀚𑁆𑀚𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺 𑀲𑀫𑀸𑀘𑀸𑀭𑀢𑁆𑀢𑀬𑀯𑀲𑁂𑀦 𑀢𑀲𑁆𑀫𑀺𑀁 𑀲𑀼𑀢𑁆𑀢𑁂 𑀅𑀦𑀯𑀚𑁆𑀚𑀥𑀫𑁆𑀫𑀸𑀦𑀁 𑀯𑀼𑀢𑁆𑀢𑀢𑁆𑀢𑀸 𑀘 𑀢𑁂 𑀅𑀦𑀯𑀲𑁂𑀲𑀢𑁄 𑀲𑀗𑁆𑀕𑀳𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀯𑀺𑀭𑀳𑀺𑀢𑀸𑀯𑀚𑁆𑀚𑀫𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀅𑀯𑀚𑁆𑀚𑀯𑀺𑀦𑀸𑀲𑀦𑀪𑀸𑀯𑁄 𑀤𑀲𑁆𑀲𑀺𑀢𑁄 𑀓𑀡𑁆𑀳𑀲𑀼𑀓𑁆𑀓𑀥𑀫𑁆𑀫𑀸𑀦𑀁 𑀯𑀚𑁆𑀛𑀖𑀸𑀢𑀓𑀪𑀸𑀯𑀲𑁆𑀲 𑀦𑀺𑀬𑀢𑀢𑁆𑀢𑀸. 𑀲𑀯𑀺𑀧𑀸𑀓𑀢𑀸 𑀯𑀺𑀧𑀸𑀓𑀥𑀫𑁆𑀫𑀢𑀸. 𑀲𑀼𑀔𑁄 𑀯𑀺𑀧𑀸𑀓𑁄 𑀏𑀢𑁂𑀲𑀦𑁆𑀢𑀺 𑀲𑀼𑀔𑀯𑀺𑀧𑀸𑀓𑀸𑀢𑀺 𑀇𑀫𑀺𑀦𑀸 𑀲𑀫𑀸𑀲𑁂𑀦 𑀓𑀼𑀲𑀮𑀸𑀦𑀁 𑀲𑀼𑀔𑀯𑀺𑀧𑀸𑀓𑀯𑀦𑁆𑀢𑀢𑀸 𑀯𑀼𑀢𑁆𑀢𑀸. 𑀲𑀸 𑀘 𑀦𑁂𑀲𑀁 𑀦 𑀢𑀁𑀲𑀫𑀗𑁆𑀕𑀺𑀢𑀸𑀬 𑀅𑀲𑀳𑀯𑀢𑁆𑀢𑀦𑀢𑁄𑀢𑀺 𑀢𑀤𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀲𑀼𑀔𑀯𑀺𑀧𑀸𑀓𑀯𑀺𑀧𑀘𑁆𑀘𑀦𑀲𑀪𑀸𑀯𑀁 𑀤𑀲𑁆𑀲𑁂𑀢𑀻’’𑀢𑀺. 𑀬𑀼𑀢𑁆𑀢𑀫𑁂𑀢𑀦𑁆𑀢𑀺 𑀧𑀭𑀫𑀢𑁆𑀣𑀢𑁄 𑀪𑁂𑀤𑀸𑀪𑀸𑀯𑁂𑀧𑀺 𑀬𑀣𑀸𑀯𑀼𑀢𑁆𑀢𑀯𑀘𑀦𑀯𑀘𑀦𑀻𑀬𑀪𑀸𑀯𑀲𑀗𑁆𑀔𑀸𑀢𑁄 𑀪𑁂𑀤𑁄 𑀢𑀲𑁆𑀫𑀺𑀁 𑀅𑀪𑀺𑀥𑁂𑀬𑁆𑀬𑀢𑁆𑀣𑀪𑀽𑀢𑁂 𑀯𑀢𑁆𑀣𑀼𑀲𑁆𑀫𑀺𑀁 𑀉𑀧𑀘𑀸𑀭𑁂𑀦 𑀳𑁄𑀢𑀻𑀢𑀺 𑀬𑀼𑀢𑁆𑀢𑀫𑁂𑀢𑁆𑀣 𑀮𑀓𑁆𑀔𑀡𑀮𑀓𑁆𑀔𑀺𑀢𑀩𑁆𑀩𑀪𑀸𑀯𑁂𑀦 𑀪𑁂𑀤𑀯𑀘𑀦𑀁. 𑀪𑀯𑀢𑀺 𑀳𑀺 𑀲𑀤𑁆𑀤𑀢𑁆𑀣𑀯𑀺𑀲𑁂𑀲𑀫𑀢𑁆𑀢𑁂𑀦𑀧𑀺 𑀅𑀪𑀺𑀦𑁆𑀦𑁂 𑀯𑀢𑁆𑀣𑀼𑀲𑁆𑀫𑀺𑀁 𑀪𑁂𑀤𑀯𑀘𑀦𑀁 𑀬𑀣𑀸 ‘‘𑀲𑀺𑀮𑀸𑀧𑀼𑀢𑁆𑀢𑀓𑀲𑁆𑀲 𑀲𑀭𑀻𑀭’’𑀦𑁆𑀢𑀺.

𑀯𑀺𑀦𑀸𑀧𑀺 𑀪𑀸𑀯𑀸𑀪𑀺𑀥𑀸𑀬𑀺𑀦𑀸 𑀲𑀤𑁆𑀤𑁂𑀦 𑀪𑀸𑀯𑀧𑁆𑀧𑀥𑀸𑀦𑁄 𑀦𑀺𑀤𑁆𑀤𑁂𑀲𑁄 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀦𑀯𑀚𑁆𑀚𑀯𑀘𑀦𑁂𑀦 𑀅𑀦𑀯𑀚𑁆𑀚𑀢𑁆𑀢𑀁 𑀆𑀳𑀸’’𑀢𑀺. 𑀏𑀯𑀜𑁆𑀘𑁂𑀢𑁆𑀣 𑀧𑀤𑀯𑀺𑀕𑁆𑀕𑀳𑁄 𑀕𑀳𑁂𑀢𑀩𑁆𑀩𑁄 𑁋 𑀦 𑀅𑀯𑀚𑁆𑀚𑀁 𑀅𑀦𑀯𑀚𑁆𑀚𑀁, 𑀅𑀯𑀚𑁆𑀚𑀧𑀝𑀺𑀧𑀓𑁆𑀔𑀢𑀸𑀬 𑀅𑀕𑀭𑀳𑀺𑀢𑀩𑁆𑀩𑀲𑀪𑀸𑀯𑁄. 𑀲𑀼𑀔𑁄 𑀯𑀺𑀧𑀸𑀓𑁄 𑀅𑀲𑁆𑀲𑀸𑀢𑀺 𑀲𑀼𑀔𑀯𑀺𑀧𑀸𑀓𑀁, 𑀲𑀼𑀔𑀯𑀺𑀧𑀸𑀓𑀯𑀺𑀧𑀘𑁆𑀘𑀦𑀲𑀫𑀢𑁆𑀣𑀢𑀸. 𑀅𑀦𑀯𑀚𑁆𑀚𑀜𑁆𑀘 𑀢𑀁 𑀲𑀼𑀔𑀯𑀺𑀧𑀸𑀓𑀜𑁆𑀘𑀸𑀢𑀺 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀁, 𑀢𑀁 𑀮𑀓𑁆𑀔𑀡𑀁 𑀏𑀢𑁂𑀲𑀦𑁆𑀢𑀺 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀮𑀓𑁆𑀔𑀡𑀸. 𑀅𑀣 𑀯𑀸 𑀧𑀼𑀩𑁆𑀩𑁂 𑀯𑀺𑀬 𑀅𑀦𑀯𑀚𑁆𑀚𑀁, 𑀯𑀺𑀧𑀘𑁆𑀘𑀦𑀁 𑀯𑀺𑀧𑀸𑀓𑁄, 𑀲𑀼𑀔𑀲𑁆𑀲 𑀯𑀺𑀧𑀸𑀓𑁄 𑀲𑀼𑀔𑀯𑀺𑀧𑀸𑀓𑁄, 𑀅𑀦𑀯𑀚𑁆𑀚𑀜𑁆𑀘 𑀲𑀼𑀔𑀯𑀺𑀧𑀸𑀓𑁄 𑀘 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀁 𑀏𑀓𑀢𑁆𑀢𑀯𑀲𑁂𑀦. 𑀢𑀁 𑀮𑀓𑁆𑀔𑀡𑀁 𑀏𑀢𑁂𑀲𑀦𑁆𑀢𑀺 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀮𑀓𑁆𑀔𑀡𑀸. 𑀓𑀺𑀁 𑀧𑀦𑁂𑀢𑁆𑀣 𑀓𑀸𑀭𑀡𑀁 𑀧𑀤𑀤𑁆𑀯𑀬𑀧𑀭𑀺𑀕𑁆𑀕𑀳𑁂, 𑀦𑀦𑀼 𑀏𑀓𑁂𑀦𑁂𑀯 𑀧𑀤𑁂𑀦 𑀇𑀝𑁆𑀞𑀧𑁆𑀧𑀲𑀺𑀤𑁆𑀥𑀺. 𑀬𑀤𑀺𑀧𑀺 ‘‘𑀅𑀯𑀚𑁆𑀚𑀭𑀳𑀺𑀢𑀁 𑀅𑀦𑀯𑀚𑁆𑀚’’𑀦𑁆𑀢𑀺 𑀇𑀫𑀲𑁆𑀫𑀺𑀁 𑀧𑀦 𑀧𑀓𑁆𑀔𑁂 𑀅𑀩𑁆𑀬𑀸𑀓𑀢𑀦𑀺𑀯𑀢𑁆𑀢𑀦𑀢𑁆𑀣𑀁 𑀲𑀼𑀔𑀯𑀺𑀧𑀸𑀓𑀕𑁆𑀕𑀳𑀡𑀁 𑀓𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀲𑀼𑀔𑀯𑀺𑀧𑀸𑀓𑀕𑁆𑀕𑀳𑀡𑁂 𑀧𑀦 𑀓𑀢𑁂 𑀅𑀦𑀯𑀚𑁆𑀚𑀕𑁆𑀕𑀳𑀡𑀁 𑀦 𑀓𑀢𑁆𑀢𑀩𑁆𑀩𑀫𑁂𑀯. ‘‘𑀅𑀯𑀚𑁆𑀚𑀧𑀝𑀺𑀧𑀓𑁆𑀔𑀸 𑀅𑀦𑀯𑀚𑁆𑀚𑀸’’𑀢𑀺 𑀏𑀢𑀲𑁆𑀫𑀺𑀁 𑀧𑀦 𑀧𑀓𑁆𑀔𑁂 𑀲𑀼𑀔𑀯𑀺𑀧𑀸𑀓𑀕𑁆𑀕𑀳𑀡𑀜𑁆𑀘𑀸𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀢𑀢𑁆𑀣 𑀅𑀦𑀯𑀚𑁆𑀚𑀯𑀘𑀦𑁂𑀦𑀸’’𑀢𑀺𑀆𑀤𑀺. 𑀢𑁂𑀦 𑀧𑀯𑀢𑁆𑀢𑀺𑀲𑀼𑀔𑀲𑀼𑀔𑀯𑀺𑀧𑀸𑀓𑀢𑀸𑀅𑀢𑁆𑀢𑀲𑀼𑀤𑁆𑀥𑀺𑀯𑀺𑀲𑀼𑀤𑁆𑀥𑀯𑀺𑀧𑀸𑀓𑀢𑀸𑀅𑀓𑀼𑀲𑀮𑀅𑀩𑁆𑀬𑀸𑀓𑀢𑀲𑀪𑀸𑀯𑀦𑀺𑀯𑀢𑁆𑀢𑀺𑀭𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀧𑀤𑀝𑁆𑀞𑀸𑀦𑀯𑀺𑀲𑁂𑀲𑀤𑀻𑀧𑀦𑀢𑁄 𑀏𑀯𑀁 𑀯𑀺𑀧𑀼𑀮𑀧𑁆𑀧𑀬𑁄𑀚𑀦𑀢𑁆𑀣𑁄 𑀧𑀤𑀤𑁆𑀯𑀬𑀧𑀭𑀺𑀕𑁆𑀕𑀳𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀼𑀔-𑀲𑀤𑁆𑀤𑀲𑁆𑀲 𑀇𑀝𑁆𑀞𑀧𑀭𑀺𑀬𑀸𑀬𑀢𑀸 𑀯𑀺𑀬 ‘‘𑀦𑀺𑀩𑁆𑀩𑀸𑀦𑀧𑀭𑀫𑀁 𑀲𑀼𑀔𑀁 (𑀥. 𑀧. 𑁨𑁦𑁩-𑁨𑁦𑁪), 𑀲𑀼𑀔𑀸 𑀯𑀺𑀭𑀸𑀕𑀢𑀸 𑀮𑁄𑀓𑁂 (𑀉𑀤𑀸. 𑁧𑁧), 𑀢𑁂𑀲𑀁 𑀯𑀽𑀧𑀲𑀫𑁄 𑀲𑀼𑀔𑁄’’𑀢𑀺𑀆𑀤𑀻𑀲𑀼 (𑀤𑀻. 𑀦𑀺. 𑁨.𑁨𑁨𑁧, 𑁨𑁭𑁨) 𑀲𑀗𑁆𑀔𑀸𑀭𑀤𑀼𑀓𑁆𑀔𑀽𑀧𑀲𑀫𑀧𑀭𑀺𑀬𑀸𑀬𑀢𑀸𑀧𑀺 𑀯𑀺𑀚𑁆𑀚𑀢𑀺, 𑀢𑀁𑀅𑀯𑀺𑀧𑀸𑀓𑀢𑀸𑀬 𑀧𑀦 𑀇𑀥 𑀲𑀼𑀔𑀯𑀺𑀧𑀸𑀓𑀪𑀸𑀯𑁄 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀲𑀗𑁆𑀔𑀸…𑀧𑁂… 𑀦𑀢𑁆𑀣𑀻’’𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀢𑁂𑀪𑀽𑀫𑀓𑀓𑀼𑀲𑀮𑀸𑀦𑀫𑁆𑀧𑀺 𑀯𑀺𑀯𑀝𑁆𑀝𑀲𑀦𑁆𑀦𑀺𑀲𑁆𑀲𑀬𑀪𑀸𑀯𑁂𑀦 𑀧𑀯𑀢𑁆𑀢𑀺𑀲𑀪𑀸𑀯𑀢𑁆𑀢𑀸 𑀓𑀺𑀜𑁆𑀘𑀸𑀧𑀺 𑀲𑀩𑁆𑀩𑁂 𑀓𑀼𑀲𑀮𑀸 𑀲𑀗𑁆𑀔𑀸𑀭𑀤𑀼𑀓𑁆𑀔𑀽𑀧𑀲𑀫𑀲𑀼𑀔𑀦𑀺𑀧𑁆𑀨𑀸𑀤𑀓𑀸 𑀲𑀫𑁆𑀪𑀯𑀦𑁆𑀢𑀺, 𑀬𑀣𑀸𑀯𑀼𑀢𑁆𑀢𑀲𑀼𑀔𑀲𑁆𑀲 𑀧𑀦 𑀅𑀯𑀺𑀧𑀸𑀓𑀪𑀸𑀯𑀢𑁄 𑀦 𑀏𑀢𑁂𑀦 𑀧𑀤𑁂𑀦 𑀓𑀼𑀲𑀮𑀸𑀦𑀁 𑀲𑀼𑀔𑀯𑀺𑀧𑀸𑀓𑀢𑀸 𑀲𑀫𑁆𑀪𑀯𑀢𑀻𑀢𑀺. 𑀯𑀺𑀧𑀓𑁆𑀓𑀪𑀸𑀯𑀫𑀸𑀧𑀦𑁆𑀦𑁂𑀲𑀼 𑀅𑀭𑀽𑀧𑀥𑀫𑁆𑀫𑁂𑀲𑀼 𑀦𑀺𑀭𑀼𑀴𑁆𑀳𑀢𑁆𑀢𑀸 𑀯𑀺𑀧𑀸𑀓-𑀲𑀤𑁆𑀤𑀲𑁆𑀲 ‘‘𑀬𑀤𑀺 𑀧𑀦𑀸’’𑀢𑀺 𑀲𑀸𑀲𑀗𑁆𑀓𑀁 𑀯𑀤𑀢𑀺.

𑀬𑀣𑀸𑀲𑀫𑁆𑀪𑀯𑀦𑁆𑀢𑀺 𑀲𑀳 𑀅𑀯𑀚𑁆𑀚𑁂𑀦𑀸𑀢𑀺 𑀲𑀸𑀯𑀚𑁆𑀚𑀸, 𑀕𑀭𑀳𑀺𑀢𑀩𑁆𑀩𑀪𑀸𑀯𑀬𑀼𑀢𑁆𑀢𑀸. 𑀢𑁂𑀦 𑀦𑁂𑀲𑀁 𑀕𑀭𑀳𑀺𑀢𑀩𑁆𑀩𑀲𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀅𑀜𑁆𑀜𑁂𑀧𑀺 𑀅𑀢𑁆𑀣𑀺 𑀤𑀼𑀓𑁆𑀔𑀪𑀸𑀯𑁂𑀦 𑀕𑀭𑀳𑀺𑀢𑀩𑁆𑀩𑀲𑀪𑀸𑀯𑀸 𑀅𑀓𑀼𑀲𑀮𑀯𑀺𑀧𑀸𑀓𑀸𑀢𑀺 𑀲𑀸𑀯𑀚𑁆𑀚𑀯𑀘𑀦𑀫𑀢𑁆𑀢𑁂𑀦 𑀢𑁂𑀲𑀫𑁆𑀧𑀺 𑀅𑀓𑀼𑀲𑀮𑀢𑀸𑀧𑀢𑁆𑀢𑀺𑀤𑁄𑀲𑀁 𑀤𑀺𑀲𑁆𑀯𑀸 𑀢𑀁 𑀧𑀭𑀺𑀳𑀭𑀺𑀢𑀼𑀁 𑀤𑀼𑀓𑁆𑀔𑀯𑀺𑀧𑀸𑀓𑀯𑀘𑀦𑀫𑀸𑀳. 𑀅𑀯𑀚𑁆𑀚-𑀲𑀤𑁆𑀤𑁄 𑀯𑀸 𑀭𑀸𑀕𑀸𑀤𑀻𑀲𑀼 𑀏𑀓𑀦𑁆𑀢𑀸𑀓𑀼𑀲𑀮𑁂𑀲𑀼 𑀦𑀺𑀭𑀼𑀴𑁆𑀳𑁄𑀢𑀺 𑀢𑀁𑀲𑀳𑀯𑀢𑁆𑀢𑀺𑀥𑀫𑁆𑀫𑀸𑀦𑀁 𑀏𑀯 𑀲𑀸𑀯𑀚𑁆𑀚𑀪𑀸𑀯𑁂 𑀓𑀼𑀲𑀮𑀸𑀩𑁆𑀬𑀸𑀓𑀢𑁂𑀳𑀺 𑀅𑀓𑀼𑀲𑀮𑀸𑀦𑀁 𑀯𑀺𑀲𑁂𑀲𑁄 𑀲𑀸𑀯𑀚𑁆𑀚𑀯𑀘𑀦𑁂𑀦𑁂𑀯 𑀤𑀲𑁆𑀲𑀺𑀢𑁄. 𑀅𑀩𑁆𑀬𑀸𑀓𑀢𑁂𑀳𑀺 𑀧𑀦 𑀯𑀺𑀲𑀺𑀝𑁆𑀞𑀁 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀲𑀸𑀥𑀸𑀭𑀡𑀁 𑀲𑀯𑀺𑀧𑀸𑀓𑀢𑀸𑀮𑀓𑁆𑀔𑀡𑀦𑁆𑀢𑀺 𑀢𑀲𑁆𑀫𑀺𑀁 𑀮𑀓𑁆𑀔𑀡𑁂 𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 𑀤𑀼𑀓𑁆𑀔𑀯𑀺𑀧𑀸𑀓𑀮𑀓𑁆𑀔𑀡𑀁 𑀯𑀼𑀢𑁆𑀢𑀁. 𑀇𑀢𑁄 𑀧𑀭𑀁 ‘‘𑀤𑀼𑀓𑁆𑀔𑁄 𑀯𑀺𑀧𑀸𑀓𑁄 𑀏𑀢𑁂𑀲𑀦𑁆𑀢𑀺 𑀤𑀼𑀓𑁆𑀔𑀯𑀺𑀧𑀸𑀓𑀸’’𑀢𑀺𑀆𑀤𑀺𑀦𑀸 𑀲𑀼𑀔𑀯𑀺𑀧𑀸𑀓𑀅𑀦𑀯𑀚𑁆𑀚𑀓𑀼𑀲𑀮𑀧𑀤𑀸𑀦𑀁 𑀞𑀸𑀦𑁂 𑀤𑀼𑀓𑁆𑀔𑀯𑀺𑀧𑀸𑀓𑀲𑀸𑀯𑀚𑁆𑀚𑀅𑀓𑀼𑀲𑀮𑀧𑀤𑀸𑀦𑀺 𑀞𑀧𑁂𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑁄𑀚𑀦𑀸 𑀘 𑀲𑀸𑀯𑀚𑁆𑀚𑀯𑀘𑀦𑁂𑀦 𑀅𑀓𑀼𑀲𑀮𑀸𑀦𑀁 𑀧𑀯𑀢𑁆𑀢𑀺𑀤𑀼𑀓𑁆𑀔𑀢𑀁 𑀤𑀲𑁆𑀲𑁂𑀢𑀺, 𑀤𑀼𑀓𑁆𑀔𑀯𑀺𑀧𑀸𑀓𑀯𑀘𑀦𑁂𑀦 𑀯𑀺𑀧𑀸𑀓𑀤𑀼𑀓𑁆𑀔𑀢𑀁. 𑀧𑀼𑀭𑀺𑀫𑀜𑁆𑀳𑀺 𑀅𑀢𑁆𑀢𑀦𑁄 𑀧𑀯𑀢𑁆𑀢𑀺𑀲𑀪𑀸𑀯𑀯𑀲𑁂𑀦 𑀮𑀓𑁆𑀔𑀡𑀯𑀘𑀦𑀁, 𑀧𑀘𑁆𑀙𑀺𑀫𑀁 𑀓𑀸𑀮𑀦𑁆𑀢𑀭𑁂 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸𑀬𑀸𑀢𑀺. 𑀢𑀣𑀸 𑀧𑀼𑀭𑀺𑀫𑁂𑀦 𑀅𑀓𑀼𑀲𑀮𑀸𑀦𑀁 𑀅𑀯𑀺𑀲𑀼𑀤𑁆𑀥𑀲𑀪𑀸𑀯𑀢𑀁 𑀤𑀲𑁆𑀲𑁂𑀢𑀺, 𑀧𑀘𑁆𑀙𑀺𑀫𑁂𑀦 𑀅𑀯𑀺𑀲𑀼𑀤𑁆𑀥𑀯𑀺𑀧𑀸𑀓𑀢𑀁. 𑀧𑀼𑀭𑀺𑀫𑁂𑀦 𑀘 𑀅𑀓𑀼𑀲𑀮𑁂 𑀓𑀼𑀲𑀮𑀲𑀪𑀸𑀯𑀢𑁄 𑀦𑀺𑀯𑀢𑁆𑀢𑁂𑀢𑀺, 𑀧𑀘𑁆𑀙𑀺𑀫𑁂𑀦 𑀅𑀩𑁆𑀬𑀸𑀓𑀢𑀲𑀪𑀸𑀯𑀢𑁄 𑀲𑀯𑀺𑀧𑀸𑀓𑀢𑁆𑀢𑀤𑀻𑀧𑀓𑀢𑁆𑀢𑀸 𑀧𑀘𑁆𑀙𑀺𑀫𑀲𑁆𑀲. 𑀧𑀼𑀭𑀺𑀫𑁂𑀦 𑀯𑀸 𑀅𑀯𑀚𑁆𑀚𑀯𑀦𑁆𑀢𑀢𑀸𑀤𑀲𑁆𑀲𑀦𑀢𑁄 𑀓𑀺𑀘𑁆𑀘𑀝𑁆𑀞𑁂𑀦 𑀭𑀲𑁂𑀦 𑀅𑀦𑀢𑁆𑀣𑀚𑀦𑀦𑀭𑀲𑀢𑀁 𑀤𑀲𑁆𑀲𑁂𑀢𑀺, 𑀧𑀘𑁆𑀙𑀺𑀫𑁂𑀦 𑀲𑀫𑁆𑀧𑀢𑁆𑀢𑀺𑀅𑀢𑁆𑀣𑁂𑀦 𑀅𑀦𑀺𑀝𑁆𑀞𑀯𑀺𑀧𑀸𑀓𑀭𑀲𑀢𑀁. 𑀧𑀼𑀭𑀺𑀫𑁂𑀦 𑀘 𑀉𑀧𑀝𑁆𑀞𑀸𑀦𑀸𑀓𑀸𑀭𑀝𑁆𑀞𑁂𑀦 𑀧𑀘𑁆𑀘𑀼𑀧𑀝𑁆𑀞𑀸𑀦𑁂𑀦 𑀲𑀁𑀓𑀺𑀮𑁂𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑀁, 𑀧𑀘𑁆𑀙𑀺𑀫𑁂𑀦 𑀨𑀮𑀝𑁆𑀞𑁂𑀦 𑀤𑀼𑀓𑁆𑀔𑀯𑀺𑀧𑀸𑀓𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑀁. 𑀧𑀼𑀭𑀺𑀫𑁂𑀦 𑀘 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀁 𑀅𑀓𑀼𑀲𑀮𑀸𑀦𑀁 𑀧𑀤𑀝𑁆𑀞𑀸𑀦𑀁 𑀧𑀓𑀸𑀲𑁂𑀢𑀺. 𑀢𑀢𑁄 𑀳𑀺 𑀢𑁂 𑀲𑀸𑀯𑀚𑁆𑀚𑀸 𑀚𑀸𑀢𑀸𑀢𑀺. 𑀧𑀘𑁆𑀙𑀺𑀫𑁂𑀦 𑀅𑀓𑀼𑀲𑀮𑀸𑀦𑀁 𑀅𑀜𑁆𑀜𑁂𑀲𑀁 𑀧𑀤𑀝𑁆𑀞𑀸𑀦𑀪𑀸𑀯𑀁 𑀯𑀺𑀪𑀸𑀯𑁂𑀢𑀺. 𑀢𑁂 𑀳𑀺 𑀤𑀼𑀓𑁆𑀔𑀯𑀺𑀧𑀸𑀓𑀲𑁆𑀲 𑀓𑀸𑀭𑀡𑀁 𑀳𑁄𑀢𑀻𑀢𑀺. 𑀏𑀢𑁆𑀣 𑀘 𑀤𑀼𑀓𑁆𑀔-𑀲𑀤𑁆𑀤𑁄 𑀅𑀦𑀺𑀝𑁆𑀞𑀧𑀭𑀺𑀬𑀸𑀬𑀯𑀘𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀦𑀺𑀝𑁆𑀞𑀘𑀢𑀼𑀓𑁆𑀔𑀦𑁆𑀥𑀯𑀺𑀧𑀸𑀓𑀸 𑀳𑀺 𑀅𑀓𑀼𑀲𑀮𑀸, 𑀦 𑀤𑀼𑀓𑁆𑀔𑀯𑁂𑀤𑀦𑀸𑀯𑀺𑀧𑀸𑀓𑀸𑀯. 𑀯𑀺𑀧𑀸𑀓-𑀲𑀤𑁆𑀤𑀲𑁆𑀲 𑀨𑀮𑀧𑀭𑀺𑀬𑀸𑀬𑀪𑀸𑀯𑁂 𑀧𑀦 𑀦𑀺𑀲𑁆𑀲𑀦𑁆𑀤𑀯𑀺𑀧𑀸𑀓𑁂𑀦 𑀅𑀦𑀺𑀝𑁆𑀞𑀭𑀽𑀧𑁂𑀦𑀧𑀺 𑀤𑀼𑀓𑁆𑀔𑀯𑀺𑀧𑀸𑀓𑀢𑀸 𑀬𑁄𑀚𑁂𑀢𑀩𑁆𑀩𑀸. 𑀯𑀺𑀧𑀸𑀓𑀥𑀫𑁆𑀫𑀢𑀸𑀧𑀝𑀺𑀲𑁂𑀥𑀯𑀲𑁂𑀦 𑀅𑀩𑁆𑀬𑀸𑀓𑀢𑀸𑀦𑀁 𑀅𑀯𑀺𑀧𑀸𑀓𑀮𑀓𑁆𑀔𑀡𑀸𑀢𑀺 𑀮𑀓𑁆𑀔𑀡𑀁 𑀯𑀼𑀢𑁆𑀢𑀦𑁆𑀢𑀺 𑀢𑀤𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀯𑀺𑀧𑀸𑀓𑀸𑀭𑀳𑀲𑀪𑀸𑀯𑀸’’𑀢𑀺 𑀆𑀳. 𑀏𑀯𑀁𑀧𑀓𑀸𑀭𑀸𑀦𑀦𑁆𑀢𑀺 𑀅𑀪𑀺𑀜𑁆𑀜𑀸𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺.

𑀙𑀳𑀺 𑀧𑀤𑁂𑀳𑀺 𑀢𑀺𑀓𑁂𑀲𑀼, 𑀘𑀢𑀽𑀳𑀺 𑀤𑀼𑀓𑁂𑀲𑀼 𑀬𑀣𑀸𑀓𑁆𑀓𑀫𑀁 𑀙 𑀘𑀢𑁆𑀢𑀸𑀭𑁄 𑀅𑀢𑁆𑀣𑀸 𑀯𑀼𑀢𑁆𑀢𑀸. 𑀙𑀓𑁆𑀓𑀪𑀸𑀯𑁄 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀏𑀢𑁂𑀦 𑀘𑀢𑀼𑀓𑁆𑀓𑀪𑀸𑀯𑀸𑀪𑀸𑀯𑁄 𑀤𑀲𑁆𑀲𑀺𑀢𑀦𑀬𑀢𑁆𑀢𑀸 𑀘𑁄𑀤𑀺𑀢𑁄𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀢𑁆𑀣𑀪𑁂𑀤𑁄 𑀉𑀧𑀧𑀚𑁆𑀚𑀢𑀻𑀢𑀺 𑀓𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀁, 𑀦𑀦𑀼 𑀢𑀻𑀳𑀺 𑀥𑀫𑁆𑀫𑀲𑀤𑁆𑀤𑁂𑀳𑀺 𑀯𑀼𑀘𑁆𑀘𑀫𑀸𑀦𑁄 𑀲𑀪𑀸𑀯𑀥𑀸𑀭𑀡𑀸𑀤𑀺𑀅𑀢𑁆𑀣𑁂𑀦 𑀅𑀪𑀺𑀦𑁆𑀦𑁄 𑀏𑀯 𑀲𑁄 𑀅𑀢𑁆𑀣𑁄𑀢𑀺? 𑀦, 𑀚𑀸𑀢𑀺𑀆𑀤𑀺𑀪𑁂𑀤𑁂𑀦 𑀪𑁂𑀤𑀲𑀩𑁆𑀪𑀸𑀯𑀢𑁄. 𑀪𑁂𑀤𑀓𑀸 𑀳𑀺 𑀚𑀸𑀢𑀺𑀆𑀤𑀬𑁄. 𑀫𑀸𑀲𑀧𑀤𑀢𑁆𑀣𑀢𑀸𑀬𑀸𑀢𑀺 𑀫𑀸𑀲-𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑀪𑀸𑀯𑁂𑀦. 𑀢𑀩𑁆𑀩𑀘𑀦𑀻𑀬𑀪𑀺𑀦𑁆𑀦𑀢𑁆𑀣𑀸𑀦𑀦𑁆𑀢𑀺 𑀢𑁂𑀳𑀺 𑀓𑀸𑀮𑀲𑀤𑁆𑀤𑀸𑀤𑀻𑀳𑀺 𑀯𑀢𑁆𑀢𑀩𑁆𑀩𑀸𑀦𑀁 𑀯𑀺𑀲𑀺𑀝𑁆𑀞𑀢𑁆𑀣𑀸𑀦𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀬𑀣𑀸 𑀓𑀸𑀮𑀲𑀤𑁆𑀤𑀸𑀤𑀺𑀅𑀪𑀺𑀥𑁂𑀬𑁆𑀬𑀸𑀦𑀁 𑀓𑀸𑀮𑀸𑀤𑀺𑀅𑀢𑁆𑀣𑀸𑀦𑀁 𑀪𑀺𑀦𑁆𑀦𑀲𑀪𑀸𑀯𑀸𑀦𑀫𑁆𑀧𑀺 𑀫𑀸𑀲-𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑀪𑀸𑀯𑁂𑀦 𑀅𑀪𑁂𑀤𑁄, 𑀏𑀯𑀁 𑀚𑀸𑀢𑀺𑀆𑀤𑀺𑀪𑁂𑀤𑁂𑀦 𑀪𑀺𑀦𑁆𑀦𑀸𑀦𑀫𑁆𑀧𑀺 𑀢𑁂𑀲𑀁 𑀢𑀺𑀡𑁆𑀡𑀁 𑀤𑁆𑀯𑀺𑀦𑁆𑀦𑀜𑁆𑀘 𑀅𑀢𑁆𑀣𑀸𑀦𑀁 𑀥𑀫𑁆𑀫-𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑀪𑀸𑀯𑁂𑀦 𑀦𑀢𑁆𑀣𑀺 𑀪𑁂𑀤𑁄’’𑀢𑀺. 𑀯𑀺𑀦𑀺…𑀧𑁂… 𑀫𑀸𑀦𑀸𑀢𑀺 𑀥𑀫𑁆𑀫-𑀲𑀤𑁆𑀤𑀲𑁆𑀲 𑀭𑀽𑀧𑀸𑀪𑁂𑀤𑁂𑀧𑀺 𑀪𑁂𑀤𑀓𑀸𑀭𑀡𑀫𑀸𑀳. 𑀪𑀺𑀦𑁆𑀦𑀚𑀸𑀢𑀺𑀬𑀢𑁆𑀣𑀯𑀘𑀦𑀻𑀬𑀢𑀸𑀬 𑀳𑀺 𑀢𑀲𑁆𑀲𑁂𑀯𑀢𑁆𑀣𑀪𑁂𑀤𑁄𑀢𑀺.

𑀲𑀸𑀥𑁂𑀢𑀼𑀦𑁆𑀢𑀺 𑀩𑁄𑀥𑁂𑀢𑀼𑀁. 𑀳𑁄𑀢𑀼 𑀅𑀲𑀫𑁆𑀩𑀦𑁆𑀥𑁄, 𑀓𑀸 𑀦𑁄 𑀳𑀸𑀦𑀻𑀢𑀺 𑀓𑀤𑀸𑀘𑀺 𑀯𑀤𑁂𑀬𑁆𑀬𑀸𑀢𑀺 𑀆𑀲𑀗𑁆𑀓𑀸𑀬 𑀆𑀳 ‘‘𑀧𑀼𑀩𑁆𑀩𑀸…𑀧𑁂… 𑀦𑀸𑀫 𑀳𑁄𑀦𑁆𑀢𑀻’’𑀢𑀺. 𑀲𑁄 𑀘𑀸𑀢𑀺 𑀲𑀪𑀸𑀯𑀥𑀸𑀭𑀡𑀧𑀘𑁆𑀘𑀬𑀥𑀭𑀺𑀬𑀫𑀸𑀦𑀢𑀸𑀲𑀗𑁆𑀔𑀸𑀢𑁄 𑀅𑀢𑁆𑀣𑁄 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀅𑀪𑀸𑀯𑀲𑁆𑀲 𑀅𑀧𑁂𑀓𑁆𑀔𑀸𑀯𑀼𑀢𑁆𑀢𑀺𑀢𑀸𑀬 𑀯𑀼𑀢𑁆𑀢𑀁. 𑀦 𑀳𑀺 𑀅𑀧𑁂𑀓𑁆𑀔𑀸𑀯𑀼𑀢𑁆𑀢𑀺𑀦𑁄 𑀅𑀦𑁆𑀢𑀭𑁂𑀦 𑀅𑀧𑁂𑀓𑁆𑀔𑀺𑀢𑀩𑁆𑀩𑀁 𑀮𑀪𑀦𑁆𑀢𑀺. 𑀲𑀢𑀺𑀧𑀺 𑀲𑀪𑀸𑀯𑀥𑀸𑀭𑀡𑀸𑀤𑀺𑀅𑀢𑁆𑀣𑀲𑀸𑀫𑀜𑁆𑀜𑁂 𑀓𑀼𑀲𑀮𑀚𑀸𑀢𑀺𑀆𑀤𑀺𑀯𑀺𑀲𑀺𑀝𑁆𑀞𑀲𑁆𑀲𑁂𑀯 𑀢𑀲𑁆𑀲 𑀇𑀥 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀏𑀓𑀢𑁆𑀣𑀢𑀸 𑀦 𑀅𑀦𑀼𑀜𑁆𑀜𑀸𑀢𑀸𑀢𑀺 𑀯𑀼𑀢𑁆𑀢𑀁, 𑀯𑀘𑀦𑀲𑀺𑀮𑁂𑀲𑀯𑀲𑁂𑀦 𑀯𑀸. 𑀅𑀣 𑀯𑀸𑀢𑀺𑀆𑀤𑀺𑀦𑀸 𑀢𑀺𑀡𑁆𑀡𑀁 𑀥𑀫𑁆𑀫𑀲𑀤𑁆𑀤𑀸𑀦𑀁 𑀅𑀪𑀸𑀯𑀢𑁆𑀢𑀁 𑀅𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑁄 𑀦𑀸𑀦𑀢𑁆𑀣𑀢𑀸𑀪𑀸𑀯𑀤𑁄𑀲𑀁 𑀧𑀭𑀺𑀳𑀭𑀢𑀺.

𑀜𑀸𑀧𑀓𑀳𑁂𑀢𑀼𑀪𑀸𑀯𑀢𑁄 𑀉𑀧𑀧𑀢𑁆𑀢𑀺 𑀇𑀥 𑀓𑀸𑀭𑀡𑀦𑁆𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀓𑀸𑀭𑀡𑀁 𑀦𑀸𑀫 𑀬𑀼𑀢𑁆𑀢𑀻’’𑀢𑀺. 𑀧𑀼𑀦𑀭𑀼𑀢𑁆𑀢𑀻𑀢𑀺𑀆𑀤𑀺𑀦𑀸 𑀦𑀦𑀼 ‘‘𑀓𑀼𑀲𑀮𑀸𑀤𑀻𑀦𑀫𑁆𑀧𑀺 𑀏𑀓𑀢𑁆𑀢𑀁 𑀆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀏𑀓𑀢𑁆𑀢𑀸𑀧𑀢𑁆𑀢𑀺𑀧𑀺 𑀯𑀢𑁆𑀢𑀩𑁆𑀩𑀸𑀢𑀺? 𑀲𑀘𑁆𑀘𑀁 𑀯𑀢𑁆𑀢𑀩𑁆𑀩𑀸, 𑀲𑀸 𑀧𑀦 𑀅𑀪𑀸𑀯𑀸𑀧𑀢𑁆𑀢𑀺𑀬𑀁 𑀏𑀯 𑀅𑀦𑁆𑀢𑁄𑀕𑀥𑀸 𑀦𑀸𑀦𑀢𑁆𑀢𑀸𑀪𑀸𑀯𑀘𑁄𑀤𑀦𑀸𑀲𑀸𑀫𑀜𑁆𑀜𑁂𑀦. 𑀪𑁂𑀤𑀸𑀪𑁂𑀤𑀦𑀺𑀩𑀦𑁆𑀥𑀦𑀢𑁆𑀢𑀸 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑀲𑁆𑀲 𑀲𑁄 𑀅𑀘𑁆𑀘𑀦𑁆𑀢𑀫𑀪𑀺𑀦𑁆𑀦𑁂𑀲𑀼 𑀦𑀺𑀬𑀫𑁂𑀦 𑀦𑀢𑁆𑀣𑀻𑀢𑀺 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀸𑀪𑀸𑀯𑁂𑀦 𑀅𑀘𑁆𑀘𑀦𑁆𑀢𑀸𑀪𑁂𑀤𑀁 𑀤𑀲𑁆𑀲𑁂𑀢𑀺, 𑀦 𑀧𑀦 𑀅𑀘𑁆𑀘𑀦𑁆𑀢𑀁 𑀅𑀪𑀺𑀦𑁆𑀦𑁂𑀲𑀼𑀬𑁂𑀯 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀸𑀪𑀸𑀯𑀁. 𑀅𑀣 𑀯𑀸 𑀅𑀘𑁆𑀘𑀦𑁆𑀢𑀁 𑀅𑀪𑀺𑀦𑁆𑀦𑁂𑀲𑀼 𑀅𑀯𑀺𑀯𑀝𑀲𑀤𑁆𑀤𑀢𑁆𑀣𑀯𑀺𑀯𑀭𑀡𑀢𑁆𑀣𑀁 𑀧𑀯𑀢𑁆𑀢𑀸. 𑀓𑀲𑁆𑀫𑀸? 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀸𑀪𑀸𑀯𑀢𑁄𑀢𑀺 𑀏𑀯𑀁 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀅𑀫𑀺𑀢𑁆𑀢𑀁 𑀅𑀪𑀺𑀪𑀯𑀺𑀢𑀼𑀁 𑀲𑀓𑁆𑀓𑀼𑀡𑀸𑀢𑀻𑀢𑀺 𑀲𑀓𑁆𑀓𑁄, 𑀇𑀦𑁆𑀤𑀢𑀻𑀢𑀺 𑀇𑀦𑁆𑀤𑁄, 𑀧𑀼𑀭𑀺𑀫𑁂 𑀤𑀤𑀸𑀢𑀻𑀢𑀺 𑀧𑀼𑀭𑀺𑀦𑁆𑀤𑀤𑁄𑀢𑀺 𑀏𑀯𑀁 𑀓𑀺𑀭𑀺𑀬𑀸𑀕𑀼𑀡𑀸𑀤𑀺𑀧𑀭𑀺𑀕𑁆𑀕𑀳𑀯𑀺𑀲𑁂𑀲𑁂𑀦.

𑀪𑁂𑀤𑀸𑀪𑁂𑀤𑀯𑀦𑁆𑀢𑁂𑀲𑀽𑀢𑀺 𑀯𑀺𑀲𑁂𑀲𑀲𑀸𑀫𑀜𑁆𑀜𑀯𑀦𑁆𑀢𑁂𑀲𑀼. 𑀦𑀻𑀮-𑀲𑀤𑁆𑀤𑁄 𑀳𑀺 𑀉𑀧𑁆𑀧𑀮𑀲𑀤𑁆𑀤𑀲𑀫𑀸𑀬𑁄𑀕𑁄 𑀭𑀢𑁆𑀢𑀼𑀧𑁆𑀧𑀮𑀲𑁂𑀢𑀼𑀧𑁆𑀧𑀮𑀸𑀤𑀺𑀉𑀧𑁆𑀧𑀮𑀚𑀸𑀢𑀺𑀲𑀸𑀫𑀜𑁆𑀜𑀢𑁄 𑀯𑀺𑀦𑀺𑀯𑀢𑁆𑀢𑁂𑀢𑁆𑀯𑀸 𑀦𑀻𑀮𑀕𑀼𑀡𑀬𑀼𑀢𑁆𑀢𑀫𑁂𑀯 𑀉𑀧𑁆𑀧𑀮𑀚𑀸𑀢𑀺𑀯𑀺𑀲𑁂𑀲𑀁 𑀚𑁄𑀢𑁂𑀢𑀺. 𑀉𑀧𑁆𑀧𑀮-𑀲𑀤𑁆𑀤𑁄𑀧𑀺 𑀦𑀻𑀮-𑀲𑀤𑁆𑀤𑀲𑀫𑀸𑀬𑀼𑀢𑁆𑀢𑁄 𑀪𑀫𑀭𑀗𑁆𑀕𑀸𑀭𑀓𑁄𑀓𑀺𑀮𑀸𑀤𑀺𑀕𑀢𑀦𑀻𑀮𑀕𑀼𑀡𑀲𑀸𑀫𑀜𑁆𑀜𑀢𑁄 𑀅𑀯𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀉𑀧𑁆𑀧𑀮𑀯𑀢𑁆𑀣𑀼𑀕𑀢𑀫𑁂𑀯 𑀦𑀻𑀮𑀕𑀼𑀡𑀁 𑀧𑀓𑀸𑀲𑁂𑀢𑀻𑀢𑀺 𑀯𑀺𑀲𑁂𑀲𑀢𑁆𑀣𑀲𑀸𑀫𑀜𑁆𑀜𑀢𑁆𑀣𑀬𑀼𑀢𑁆𑀢𑀢𑀸 𑀧𑀤𑀤𑁆𑀯𑀬𑀲𑁆𑀲 𑀤𑀝𑁆𑀞𑀩𑁆𑀩𑀸. 𑀇𑀫𑀺𑀦𑀸 𑀦𑀬𑁂𑀦 𑀇𑀢𑀭𑀢𑁆𑀭𑀸𑀧𑀺 𑀪𑁂𑀤𑀸𑀪𑁂𑀤𑀯𑀦𑁆𑀢𑀢𑀸 𑀬𑁄𑀚𑁂𑀢𑀩𑁆𑀩𑀸. 𑀢𑀸𑀬 𑀢𑀸𑀬 𑀅𑀦𑀼𑀫𑀢𑀺𑀬𑀸𑀢𑀺 𑀢𑁂𑀦 𑀢𑁂𑀦 𑀲𑀗𑁆𑀓𑁂𑀢𑁂𑀦. 𑀢𑁂 𑀢𑁂 𑀯𑁄𑀳𑀸𑀭𑀸𑀢𑀺 𑀅𑀘𑁆𑀘𑀦𑁆𑀢𑀁 𑀅𑀪𑀺𑀦𑁆𑀦𑁂 𑀅𑀢𑁆𑀣𑁂 𑀧𑀭𑀺𑀬𑀸𑀬𑀪𑀸𑀯𑁂𑀦 𑀅𑀘𑁆𑀘𑀦𑁆𑀢𑀁 𑀪𑀺𑀦𑁆𑀦𑁂 𑀬𑀣𑀸𑀲𑀓𑀁 𑀅𑀢𑁆𑀣𑀯𑀺𑀯𑀭𑀡𑀪𑀸𑀯𑁂𑀦 𑀪𑁂𑀤𑀸𑀪𑁂𑀤𑀯𑀦𑁆𑀢𑁂 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁂𑀦 𑀢𑀸 𑀢𑀸 𑀲𑀫𑀜𑁆𑀜𑀸 𑀧𑀜𑁆𑀜𑀢𑁆𑀢𑀺𑀬𑁄 𑀲𑀺𑀤𑁆𑀥𑀸𑀢𑀺 𑀅𑀢𑁆𑀣𑁄. 𑀲𑀫𑀸𑀦𑁂𑀢𑀺 𑀏𑀓𑀲𑁆𑀫𑀺𑀁. 𑀓𑀼𑀲𑀮𑀸𑀤𑀺𑀪𑀸𑀯𑀦𑁆𑀢𑀺 𑀓𑀼𑀘𑁆𑀙𑀺𑀢𑀲𑀮𑀦𑀸𑀤𑀺𑀪𑀸𑀯𑀁. 𑀅𑀪𑀺𑀥𑀸𑀦𑀢𑁆𑀣𑁄𑀧𑀺 𑀳𑀺 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀸𑀤𑀺𑀅𑀪𑀺𑀥𑁂𑀬𑁆𑀬𑀢𑁆𑀣𑁄 𑀯𑀺𑀬 𑀲𑀪𑀸𑀯𑀥𑀸𑀭𑀡𑀸𑀤𑀺𑀲𑀸𑀫𑀜𑁆𑀜𑀢𑁆𑀣𑀁 𑀯𑀺𑀲𑁂𑀲𑁂𑀢𑀻𑀢𑀺.

𑀏𑀢𑁆𑀣𑀸𑀳 ‘‘𑀓𑀺𑀁 𑀧𑀦 𑀓𑀸𑀭𑀡𑀁 𑀢𑀺𑀓𑀸 𑀏𑀯 𑀧𑀞𑀫𑀁 𑀯𑀼𑀢𑁆𑀢𑀸, 𑀦 𑀤𑀼𑀓𑀸, 𑀢𑀺𑀓𑁂𑀲𑀼𑀧𑀺 𑀓𑀼𑀲𑀮𑀢𑁆𑀢𑀺𑀓𑁄𑀯, 𑀦 𑀅𑀜𑁆𑀜𑁄’’𑀢𑀺? 𑀯𑀼𑀘𑁆𑀘𑀢𑁂 𑁋 𑀲𑀼𑀔𑀕𑁆𑀕𑀳𑀡𑀢𑁄 𑀅𑀧𑁆𑀧𑀪𑁂𑀤𑀢𑁄 𑀘 𑀢𑀺𑀓𑀸 𑀏𑀯 𑀧𑀞𑀫𑀁 𑀯𑀼𑀢𑁆𑀢𑀸. 𑀬𑀲𑁆𑀫𑀸 𑀢𑀺𑀓𑁂𑀳𑀺 𑀩𑁄𑀥𑀺𑀢𑁂 𑀓𑀼𑀲𑀮𑀸𑀤𑀺𑀪𑁂𑀤𑁂 𑀢𑀩𑁆𑀩𑀺𑀪𑀸𑀕𑀪𑀺𑀦𑁆𑀦𑀸 𑀳𑁂𑀢𑀼𑀆𑀤𑀬𑁄 𑀯𑀼𑀘𑁆𑀘𑀫𑀸𑀦𑀸 𑀲𑀼𑀯𑀺𑀜𑁆𑀜𑁂𑀬𑁆𑀬𑀸 𑀳𑁄𑀦𑁆𑀢𑀺. 𑀢𑀣𑀸 𑀳𑀺 ‘‘𑀢𑀬𑁄 𑀓𑀼𑀲𑀮𑀳𑁂𑀢𑀽’’𑀢𑀺𑀆𑀤𑀺𑀦𑀸 𑀓𑀼𑀲𑀮𑀸𑀤𑀺𑀫𑀼𑀔𑁂𑀦 𑀳𑁂𑀢𑀼𑀆𑀤𑀬𑁄 𑀯𑀺𑀪𑀢𑁆𑀢𑀸, 𑀓𑀢𑀺𑀧𑀬𑀪𑁂𑀤𑀸 𑀘 𑀢𑀺𑀓𑀸 𑀤𑁆𑀯𑀸𑀯𑀻𑀲𑀢𑀺𑀧𑀭𑀺𑀫𑀸𑀡𑀢𑁆𑀢𑀸.

𑀢𑁂𑀲𑀼 𑀧𑀦 𑀲𑀩𑁆𑀩𑀲𑀗𑁆𑀕𑀳𑀅𑀲𑀗𑁆𑀓𑀭𑀆𑀤𑀺𑀓𑀮𑁆𑀬𑀸𑀡𑀪𑀸𑀯𑁂𑀦 𑀧𑀞𑀫𑀁 𑀓𑀼𑀲𑀮𑀢𑁆𑀢𑀺𑀓𑀁 𑀯𑀼𑀢𑁆𑀢𑀁. 𑀦𑀺𑀭𑀯𑀲𑁂𑀲𑀸 𑀳𑀺 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀓𑀼𑀲𑀮𑀢𑁆𑀢𑀺𑀓𑁂𑀦 𑀲𑀗𑁆𑀕𑀳𑀺𑀢𑀸, 𑀦 𑀢𑀣𑀸 𑀯𑁂𑀤𑀦𑀸𑀢𑁆𑀢𑀺𑀓𑀸𑀤𑀻𑀳𑀺. 𑀦𑀦𑀼 𑀯𑀺𑀧𑀸𑀓𑀢𑁆𑀢𑀺𑀓𑀸𑀤𑀻𑀳𑀺𑀧𑀺 𑀦𑀺𑀭𑀯𑀲𑁂𑀲𑀸 𑀥𑀫𑁆𑀫𑀸 𑀲𑀗𑁆𑀕𑀳𑀺𑀢𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀢𑁂𑀲𑀼 𑀧𑀦 𑀅𑀦𑀯𑀚𑁆𑀚𑀲𑀸𑀯𑀚𑁆𑀚𑀥𑀫𑁆𑀫𑀸 𑀦 𑀅𑀲𑀗𑁆𑀓𑀭𑀢𑁄 𑀯𑀼𑀢𑁆𑀢𑀸 𑀬𑀣𑀸 𑀓𑀼𑀲𑀮𑀢𑁆𑀢𑀺𑀓𑁂. 𑀦𑀦𑀼 𑀘 𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀢𑁆𑀢𑀺𑀓𑀸𑀤𑀻𑀲𑀼𑀧𑀺 𑀢𑁂 𑀅𑀲𑀗𑁆𑀓𑀭𑀢𑁄 𑀯𑀼𑀢𑁆𑀢𑀸𑀢𑀺? 𑀏𑀯𑀫𑁂𑀢𑀁, 𑀢𑁂 𑀧𑀦 𑀅𑀓𑀮𑁆𑀬𑀸𑀡𑀪𑀽𑀢𑁂 𑀧𑀸𑀧𑀥𑀫𑁆𑀫𑁂 𑀆𑀤𑀺𑀁 𑀓𑀢𑁆𑀯𑀸 𑀯𑀼𑀢𑁆𑀢𑀸, 𑀦 𑀏𑀯𑀫𑀬𑀁. 𑀅𑀬𑀁 𑀧𑀦 𑀓𑀮𑁆𑀬𑀸𑀡𑀪𑀽𑀢𑁂 𑀧𑀼𑀚𑁆𑀚𑀪𑀯𑀧𑀭𑀺𑀦𑀺𑀩𑁆𑀩𑀼𑀢𑀺𑀦𑀺𑀧𑁆𑀨𑀸𑀤𑀓𑁂 𑀧𑀼𑀜𑁆𑀜𑀥𑀫𑁆𑀫𑁂 𑀆𑀤𑀺𑀁 𑀓𑀢𑁆𑀯𑀸 𑀯𑀼𑀢𑁆𑀢𑁄. 𑀇𑀢𑀺 𑀪𑀕𑀯𑀸 𑀲𑀡𑁆𑀳𑀲𑀼𑀔𑀼𑀫𑀁 𑀭𑀽𑀧𑀸𑀭𑀽𑀧𑀤𑁂𑀲𑀦𑀁 𑀆𑀭𑀪𑀦𑁆𑀢𑁄 𑀲𑀩𑁆𑀩𑀲𑀗𑁆𑀕𑀳𑀅𑀲𑀗𑁆𑀓𑀭𑀆𑀤𑀺𑀓𑀮𑁆𑀬𑀸𑀡𑀕𑀼𑀡𑀬𑁄𑀕𑀢𑁄 𑀧𑀞𑀫𑀁 𑀓𑀼𑀲𑀮𑀢𑁆𑀢𑀺𑀓𑀁 𑀤𑁂𑀲𑁂𑀢𑀺, 𑀓𑀺𑀜𑁆𑀘 𑀢𑀤𑀜𑁆𑀜𑀢𑁆𑀢𑀺𑀓𑀸𑀦𑀁 𑀲𑀼𑀔𑀕𑁆𑀕𑀳𑀡𑀢𑁄. 𑀢𑀣𑀸 𑀳𑀺 𑀓𑀼𑀲𑀮𑀢𑁆𑀢𑀺𑀓𑀫𑀼𑀔𑁂𑀦 ‘‘𑀓𑀸𑀫𑀸𑀯𑀘𑀭𑀓𑀼𑀲𑀮𑀢𑁄 𑀘𑀢𑁆𑀢𑀸𑀭𑁄 𑀲𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸’’𑀢𑀺𑀆𑀤𑀺𑀦𑀸 𑀯𑁂𑀤𑀦𑀸𑀢𑁆𑀢𑀺𑀓𑀸𑀤𑀬𑁄 𑀯𑀺𑀪𑀢𑁆𑀢𑀸𑀢𑀺.

𑀓𑀼𑀲𑀮𑀢𑁆𑀢𑀺𑀓𑁂𑀧𑀺 𑀘 𑀧𑀥𑀸𑀦𑀧𑀸𑀲𑀁𑀲𑀉𑀪𑀬𑀳𑀺𑀢𑀪𑀸𑀯𑀢𑁄 𑀓𑀼𑀲𑀮𑀸 𑀥𑀫𑁆𑀫𑀸 𑀧𑀞𑀫𑀁 𑀯𑀼𑀢𑁆𑀢𑀸. 𑀓𑀼𑀲𑀮𑀸 𑀳𑀺 𑀥𑀫𑁆𑀫𑀸 𑀲𑀼𑀔𑀯𑀺𑀧𑀸𑀓𑀢𑁆𑀢𑀸 𑀲𑀩𑁆𑀩𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀉𑀢𑁆𑀢𑀫𑀸 𑀅𑀯𑀚𑁆𑀚𑀯𑀺𑀥𑀫𑀦𑀢𑁄 𑀯𑀺𑀜𑁆𑀜𑀼𑀧𑁆𑀧𑀲𑀢𑁆𑀣𑀸 𑀇𑀥𑀮𑁄𑀓𑀧𑀭𑀮𑁄𑀓𑁂𑀲𑀼 𑀅𑀢𑁆𑀣𑀸𑀯𑀳𑀸 𑀦𑀺𑀲𑁆𑀲𑀭𑀡𑀸𑀯𑀳𑀸 𑀘, 𑀢𑀲𑁆𑀫𑀸 𑀧𑀥𑀸𑀦𑀸𑀤𑀺𑀪𑀸𑀯𑁂𑀦 𑀧𑀞𑀫𑀁 𑀯𑀼𑀢𑁆𑀢𑀸, 𑀢𑀧𑁆𑀧𑀝𑀺𑀧𑀓𑁆𑀔𑀢𑁆𑀢𑀸 𑀢𑀤𑀦𑀦𑁆𑀢𑀭𑀁 𑀅𑀓𑀼𑀲𑀮𑀸, 𑀢𑀤𑀼𑀪𑀬𑀯𑀺𑀧𑀭𑀻𑀢𑀲𑀪𑀸𑀯𑀸 𑀢𑀤𑀦𑀦𑁆𑀢𑀭𑀁 𑀅𑀩𑁆𑀬𑀸𑀓𑀢𑀸 𑀯𑀼𑀢𑁆𑀢𑀸. 𑀓𑀼𑀲𑀮𑀯𑀲𑁂𑀦 𑀯𑀸 𑀅𑀲𑁆𑀲𑀸𑀤𑁄, 𑀅𑀓𑀼𑀲𑀮𑀯𑀲𑁂𑀦 𑀆𑀤𑀻𑀦𑀯𑁄, 𑀅𑀩𑁆𑀬𑀸𑀓𑀢𑀥𑀫𑁆𑀫𑁂𑀲𑀼 𑀦𑀺𑀩𑁆𑀩𑀸𑀦𑀯𑀲𑁂𑀦 𑀦𑀺𑀲𑁆𑀲𑀭𑀡𑀦𑁆𑀢𑀺 𑀇𑀫𑀺𑀦𑀸 𑀅𑀲𑁆𑀲𑀸𑀤𑀸𑀤𑀺𑀓𑁆𑀓𑀫𑁂𑀦, 𑀓𑀼𑀲𑀮𑁂𑀲𑀼 𑀧𑀢𑀺𑀝𑁆𑀞𑀸𑀬 𑀧𑀡𑁆𑀟𑀺𑀢𑀸 𑀅𑀓𑀼𑀲𑀮𑁂 𑀧𑀚𑀳𑀦𑁆𑀢𑀸 𑀅𑀩𑁆𑀬𑀸𑀓𑀢𑀥𑀫𑁆𑀫𑀪𑀽𑀢𑀫𑀕𑁆𑀕𑀨𑀮𑀁 𑀦𑀺𑀩𑁆𑀩𑀸𑀦𑀜𑁆𑀘 𑀲𑀘𑁆𑀙𑀺𑀓𑀭𑁄𑀦𑁆𑀢𑀻𑀢𑀺 𑀇𑀫𑀺𑀦𑀸 𑀯𑀸 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁂𑀦 𑀅𑀬𑀫𑀦𑀼𑀧𑀼𑀩𑁆𑀩𑀻 𑀞𑀧𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀓𑀲𑁆𑀫𑀸 𑀧𑀦𑁂𑀢𑁆𑀣 𑀲𑁂𑀓𑁆𑀔𑀢𑁆𑀢𑀺𑀓𑀸𑀤𑀻𑀲𑀼 𑀯𑀺𑀬 𑀲𑀭𑀽𑀧𑀢𑁄 𑀧𑀼𑀭𑀺𑀫𑀧𑀤𑀤𑁆𑀯𑀬𑀧𑀝𑀺𑀓𑁆𑀔𑁂𑀧𑀯𑀲𑁂𑀦 𑀢𑀢𑀺𑀬𑀧𑀤𑀁 𑀦 𑀯𑀼𑀢𑁆𑀢𑀁 ‘‘𑀦𑁂𑀯𑀓𑀼𑀲𑀮𑀸 𑀦𑀸𑀓𑀼𑀲𑀮𑀸’’𑀢𑀺? 𑀯𑀺𑀲𑁂𑀲𑀤𑀻𑀧𑀦𑀢𑁆𑀣𑀁. 𑀬𑀣𑀸 𑀳𑀺 𑀲𑁂𑀓𑁆𑀔𑀸𑀲𑁂𑀓𑁆𑀔𑀲𑀪𑀸𑀯𑁂𑀲𑀼 𑀥𑀫𑁆𑀫𑁂𑀲𑀼 𑀓𑁄𑀘𑀺𑀧𑀺 𑀥𑀫𑁆𑀫𑁄 𑀢𑀤𑀼𑀪𑀬𑀲𑀪𑀸𑀯𑁂𑀦 𑀓𑁂𑀦𑀘𑀺𑀧𑀺 𑀧𑀭𑀺𑀬𑀸𑀬𑁂𑀦 𑀓𑀤𑀸𑀘𑀺 𑀅𑀩𑁆𑀬𑀸𑀓𑀭𑀡𑀻𑀬𑁄 𑀦𑀸𑀫 𑀦𑀢𑁆𑀣𑀻𑀢𑀺 𑀲𑁂𑀓𑁆𑀔𑀢𑁆𑀢𑀺𑀓𑁂 𑀧𑀤𑀤𑁆𑀯𑀬𑀧𑀝𑀺𑀓𑁆𑀔𑁂𑀧𑀯𑀲𑁂𑀦 ‘‘𑀦𑁂𑀯𑀲𑁂𑀓𑁆𑀔𑀸 𑀦𑀸𑀲𑁂𑀓𑁆𑀔𑀸’’𑀢𑁆𑀯𑁂𑀯 𑀯𑀼𑀢𑁆𑀢𑀁, 𑀦 𑀏𑀯𑀁 𑀇𑀥. 𑀇𑀥 𑀧𑀦 𑀓𑀼𑀲𑀮𑀲𑀪𑀸𑀯𑀸 𑀏𑀯 𑀥𑀫𑁆𑀫𑀸 𑀅𑀕𑁆𑀕𑀨𑀮𑀼𑀧𑁆𑀧𑀢𑁆𑀢𑀺𑀬𑀸 𑀢𑀣𑀸 𑀦 𑀩𑁆𑀬𑀸𑀓𑀭𑀡𑀻𑀬𑀸 𑀳𑁄𑀦𑁆𑀢𑀻𑀢𑀺 𑀇𑀫𑀲𑁆𑀲 𑀯𑀺𑀲𑁂𑀲𑀲𑁆𑀲 𑀤𑀻𑀧𑀦𑀢𑁆𑀣𑀁 ‘‘𑀅𑀩𑁆𑀬𑀸𑀓𑀢𑀸’’𑀢𑀺 𑀯𑀼𑀢𑁆𑀢𑀁. 𑀯𑀘𑀦𑀫𑀢𑁆𑀢𑁂 𑀏𑀯 𑀯𑀸 𑀇𑀤𑀁 𑀦𑀸𑀦𑀸𑀓𑀭𑀡𑀁 ‘‘𑀅𑀩𑁆𑀬𑀸𑀓𑀢𑀸 𑀦𑁂𑀯𑀓𑀼𑀲𑀮𑀸 𑀦𑀸𑀓𑀼𑀲𑀮𑀸’’𑀢𑀺 𑀩𑁆𑀬𑀸𑀓𑀢-𑀲𑀤𑁆𑀤𑁂𑀦 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀩𑁄𑀥𑀺𑀢𑀢𑁆𑀢𑀸𑀢𑀺.

𑀏𑀢𑁆𑀣 𑀘 𑀅𑀓𑀼𑀲𑀮𑁂𑀲𑀼 𑀢𑀡𑁆𑀳𑀸𑀬 𑀲𑀩𑁆𑀩𑀸𑀓𑀼𑀲𑀮𑁂𑀳𑀺, 𑀢𑁂𑀪𑀽𑀫𑀓𑀓𑀼𑀲𑀮𑀸𑀓𑀼𑀲𑀮𑁂𑀳𑀺 𑀯𑀸 𑀲𑀫𑀼𑀤𑀬𑀲𑀘𑁆𑀘𑀁, 𑀢𑀁𑀢𑀁𑀅𑀯𑀲𑀺𑀝𑁆𑀞𑀢𑁂𑀪𑀽𑀫𑀓𑀥𑀫𑁆𑀫𑁂𑀳𑀺 𑀤𑀼𑀓𑁆𑀔𑀲𑀘𑁆𑀘𑀁, 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑁂𑀦 𑀫𑀕𑁆𑀕𑀲𑀘𑁆𑀘𑀁, 𑀅𑀯𑀲𑀺𑀝𑁆𑀞𑀅𑀩𑁆𑀬𑀸𑀓𑀢𑀯𑀺𑀲𑁂𑀲𑁂𑀦 𑀦𑀺𑀭𑁄𑀥𑀲𑀘𑁆𑀘𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀢𑀢𑁆𑀣 𑀲𑀫𑀼𑀤𑀬𑁂𑀦 𑀅𑀲𑁆𑀲𑀸𑀤𑁄, 𑀤𑀼𑀓𑁆𑀔𑁂𑀦 𑀆𑀤𑀻𑀦𑀯𑁄, 𑀫𑀕𑁆𑀕𑀦𑀺𑀭𑁄𑀥𑁂𑀳𑀺 𑀦𑀺𑀲𑁆𑀲𑀭𑀡𑀁. 𑀓𑀺𑀜𑁆𑀘𑀸𑀧𑀺 𑀦𑀸𑀫𑀭𑀽𑀧𑀧𑀭𑀺𑀘𑁆𑀙𑁂𑀤𑀪𑀸𑀯𑀢𑁄 𑀲𑀪𑀸𑀯𑀥𑀫𑁆𑀫𑀦𑀺𑀤𑁆𑀥𑀸𑀭𑀡𑀧𑀥𑀸𑀦𑀸 𑀅𑀪𑀺𑀥𑀫𑁆𑀫𑀓𑀣𑀸, 𑀢𑁂𑀲𑀁 𑀧𑀦 𑀓𑀼𑀲𑀮𑀸𑀤𑀺𑀯𑀺𑀲𑁂𑀲𑁂 𑀦𑀺𑀤𑁆𑀥𑀸𑀭𑀺𑀢𑁂 𑀢𑀲𑁆𑀲 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑀢𑀸𑀤𑀺𑀧𑀺 𑀅𑀢𑁆𑀣𑀢𑁄 𑀯𑀼𑀢𑁆𑀢𑀫𑁂𑀯 𑀳𑁄𑀢𑀺. 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀳𑀸𑀦𑀸𑀬 𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀉𑀧𑀲𑀫𑁆𑀧𑀤𑀸𑀬 ‘‘𑀲𑀩𑁆𑀩𑀧𑀸𑀧𑀲𑁆𑀲 𑀅𑀓𑀭𑀡𑀁, 𑀓𑀼𑀲𑀮𑀲𑁆𑀲 𑀉𑀧𑀲𑀫𑁆𑀧𑀤𑀸’’𑀢𑀺 (𑀥. 𑀧. 𑁧𑁮𑁩; 𑀤𑀻. 𑀦𑀺. 𑁨.𑁯𑁦) 𑀏𑀯𑀫𑀸𑀤𑀺𑀯𑀘𑀦𑀢𑁄 𑀳𑀺 𑀓𑀼𑀲𑀮𑀸𑀤𑀻𑀦𑀁 𑀉𑀧𑀲𑀫𑁆𑀧𑀸𑀤𑀦𑀸𑀤𑀺𑀤𑀲𑁆𑀲𑀦𑀧𑀭𑀁 𑀪𑀕𑀯𑀢𑁄 𑀲𑀸𑀲𑀦𑀁, 𑀢𑀲𑁆𑀫𑀸 𑀓𑀼𑀲𑀮𑀸𑀦𑀁 𑀉𑀧𑀲𑀫𑁆𑀧𑀸𑀤𑀦𑀁 𑀅𑀓𑀼𑀲𑀮𑀸𑀦𑀁 𑀧𑀳𑀸𑀦𑀜𑁆𑀘 𑀉𑀧𑀸𑀬𑁄, 𑀅𑀩𑁆𑀬𑀸𑀓𑀢𑀯𑀺𑀲𑁂𑀲𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸 𑀨𑀮𑀁, 𑀓𑀼𑀲𑀮𑀸𑀤𑀻𑀦𑀁 𑀉𑀧𑀲𑀫𑁆𑀧𑀸𑀤𑀦𑀸𑀤𑀺𑀅𑀢𑁆𑀣𑀸 𑀤𑁂𑀲𑀦𑀸 𑀆𑀡𑀢𑁆𑀢𑀻𑀢𑀺 𑀅𑀬𑀁 𑀤𑁂𑀲𑀦𑀸𑀳𑀸𑀭𑁄.

𑀆𑀭𑁄𑀕𑁆𑀬𑀝𑁆𑀞𑁂𑀦 𑀅𑀦𑀯𑀚𑁆𑀚𑀝𑁆𑀞𑁂𑀦 𑀓𑁄𑀲𑀮𑁆𑀬𑀲𑀫𑁆𑀪𑀽𑀢𑀝𑁆𑀞𑁂𑀦 𑀘 𑀓𑀼𑀲𑀮𑀸, 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀅𑀓𑀼𑀲𑀮𑀸, 𑀢𑀤𑀼𑀪𑀬𑀯𑀺𑀧𑀭𑀻𑀢𑀢𑁄 𑀅𑀩𑁆𑀬𑀸𑀓𑀢𑀸, 𑀲𑀪𑀸𑀯𑀥𑀸𑀭𑀡𑀸𑀤𑀺𑀅𑀢𑁆𑀣𑁂𑀦 𑀥𑀫𑁆𑀫𑀸𑀢𑀺 𑀅𑀦𑀼𑀧𑀤𑀯𑀺𑀘𑀺𑀦𑀦𑀁 𑀯𑀺𑀘𑀬𑁄 𑀳𑀸𑀭𑁄.

𑀧𑀼𑀚𑁆𑀚𑀪𑀯𑀨𑀮𑀧𑀭𑀺𑀦𑀺𑀩𑁆𑀩𑀼𑀢𑀺𑀦𑀺𑀧𑁆𑀨𑀢𑁆𑀢𑀺 𑀓𑀼𑀲𑀮𑁂𑀳𑀻𑀢𑀺 𑀬𑀼𑀚𑁆𑀚𑀢𑀺 𑀲𑀼𑀔𑀯𑀺𑀧𑀸𑀓𑀢𑁆𑀢𑀸, 𑀅𑀧𑀸𑀬𑀤𑀼𑀓𑁆𑀔𑀲𑀁𑀲𑀸𑀭𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺 𑀅𑀓𑀼𑀲𑀮𑁂𑀳𑀻𑀢𑀺 𑀬𑀼𑀚𑁆𑀚𑀢𑀺 𑀅𑀦𑀺𑀝𑁆𑀞𑀨𑀮𑀢𑁆𑀢𑀸, 𑀢𑀤𑀼𑀪𑀬𑀨𑀮𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺 𑀅𑀩𑁆𑀬𑀸𑀓𑀢𑁂𑀳𑀻𑀢𑀺 𑀬𑀼𑀚𑁆𑀚𑀢𑀺 𑀅𑀯𑀺𑀧𑀸𑀓𑀥𑀫𑁆𑀫𑀢𑁆𑀢𑀸𑀢𑀺 𑀅𑀬𑀁 𑀬𑀼𑀢𑁆𑀢𑀺 𑀳𑀸𑀭𑁄.

𑀓𑀼𑀲𑀮𑀸 𑀥𑀫𑁆𑀫𑀸 𑀲𑀼𑀔𑀯𑀺𑀧𑀸𑀓𑀲𑁆𑀲 𑀧𑀤𑀝𑁆𑀞𑀸𑀦𑀁, 𑀅𑀓𑀼𑀲𑀮𑀸 𑀤𑀼𑀓𑁆𑀔𑀯𑀺𑀧𑀸𑀓𑀲𑁆𑀲, 𑀅𑀩𑁆𑀬𑀸𑀓𑀢𑀸 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀥𑀫𑁆𑀫𑀸𑀦𑀦𑁆𑀢𑀺 𑀅𑀬𑀁 𑀧𑀤𑀝𑁆𑀞𑀸𑀦𑁄 𑀳𑀸𑀭𑁄.

𑀓𑀼𑀲𑀮𑀕𑁆𑀕𑀳𑀡𑁂𑀦 𑀬𑁂 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀸 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸 𑀅𑀦𑀼𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀸𑀦𑀺𑀬𑀸…𑀧𑁂… 𑀅𑀭𑀡𑀸 𑀥𑀫𑁆𑀫𑀸, 𑀢𑁂 𑀩𑁄𑀥𑀺𑀢𑀸 𑀪𑀯𑀦𑁆𑀢𑀺 𑀓𑀼𑀲𑀮𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸. 𑀢𑀣𑀸 𑀅𑀓𑀼𑀲𑀮𑀕𑁆𑀕𑀳𑀡𑁂𑀦 𑀬𑁂 𑀲𑀸𑀯𑀚𑁆𑀚𑀤𑀼𑀓𑁆𑀔𑀯𑀺𑀧𑀸𑀓𑀸 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸 𑀲𑀁𑀓𑀺𑀮𑀺𑀝𑁆𑀞𑀲𑀁𑀓𑀺𑀮𑁂𑀲𑀺𑀓𑀸…𑀧𑁂… 𑀲𑀭𑀡𑀸 𑀥𑀫𑁆𑀫𑀸, 𑀢𑁂 𑀩𑁄𑀥𑀺𑀢𑀸 𑀪𑀯𑀦𑁆𑀢𑀺 𑀅𑀓𑀼𑀲𑀮𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸. 𑀢𑀣𑀸 𑀅𑀩𑁆𑀬𑀸𑀓𑀢𑀕𑁆𑀕𑀳𑀡𑁂𑀦 𑀬𑁂 𑀅𑀯𑀺𑀧𑀸𑀓𑀸𑀭𑀳𑀸 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸 𑀯𑀺𑀧𑀸𑀓𑀸 𑀥𑀫𑁆𑀫𑀸 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸 𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸 𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸 𑀅𑀦𑀼𑀧𑀸𑀤𑀺𑀦𑁆𑀦𑀅𑀦𑀼𑀧𑀸𑀤𑀸𑀦𑀺𑀬𑀸…𑀧𑁂… 𑀅𑀭𑀡𑀸 𑀥𑀫𑁆𑀫𑀸, 𑀢𑁂 𑀩𑁄𑀥𑀺𑀢𑀸 𑀪𑀯𑀦𑁆𑀢𑀺 𑀅𑀩𑁆𑀬𑀸𑀓𑀢𑀮𑀓𑁆𑀔𑀡𑁂𑀦 𑀏𑀓𑀮𑀓𑁆𑀔𑀡𑀢𑁆𑀢𑀸𑀢𑀺 𑀅𑀬𑀁 𑀮𑀓𑁆𑀔𑀡𑁄 𑀳𑀸𑀭𑁄.

‘‘𑀓𑀼𑀘𑁆𑀙𑀺𑀢𑁂 𑀧𑀸𑀧𑀥𑀫𑁆𑀫𑁂 𑀲𑀮𑀬𑀦𑁆𑀢𑀻’’𑀢𑀺𑀆𑀤𑀺𑀦𑀸 𑀦𑀺𑀭𑀼𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀓𑀼𑀲𑀮𑀸𑀤𑀺𑀫𑀼𑀔𑁂𑀦 𑀭𑀽𑀧𑀸𑀭𑀽𑀧𑀥𑀫𑁆𑀫𑁂 𑀧𑀭𑀺𑀕𑁆𑀕𑀳𑁂𑀢𑁆𑀯𑀸 𑀯𑀺𑀲𑀼𑀤𑁆𑀥𑀺𑀧𑀭𑀫𑁆𑀧𑀭𑀸𑀬 ‘‘𑀓𑀣𑀁 𑀦𑀼 𑀔𑁄 𑀲𑀢𑁆𑀢𑀸 𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀪𑀸𑀕𑀺𑀦𑁄 𑀪𑀯𑁂𑀬𑁆𑀬𑀼’’𑀦𑁆𑀢𑀺 𑀅𑀬𑀫𑁂𑀢𑁆𑀣 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑁄, 𑀦𑀺𑀤𑀸𑀦𑀁 𑀅𑀲𑀸𑀥𑀸𑀭𑀡𑀢𑁄 𑀓𑀼𑀲𑀮𑀸𑀤𑀺𑀪𑁂𑀤𑁂𑀦 𑀩𑀼𑀚𑁆𑀛𑀦𑀓𑀲𑀢𑁆𑀢𑀸. 𑀲𑀸𑀥𑀸𑀭𑀡𑀢𑁄 𑀧𑀦 𑀧𑀸𑀓𑀝𑀫𑁂𑀯. 𑀧𑀞𑀫𑀁 𑀓𑀼𑀲𑀮𑀢𑁆𑀢𑀺𑀓𑀲𑁆𑀲 𑀤𑁂𑀲𑀦𑀸 𑀯𑀺𑀘𑀸𑀭𑀺𑀢𑀸𑀬𑁂𑀯𑀸𑀢𑀺 𑀅𑀬𑀁 𑀘𑀢𑀼𑀩𑁆𑀬𑀽𑀳𑁄 𑀳𑀸𑀭𑁄.

𑀓𑀼𑀲𑀮𑀕𑁆𑀕𑀳𑀡𑁂𑀦 𑀓𑀮𑁆𑀬𑀸𑀡𑀫𑀺𑀢𑁆𑀢𑀧𑀭𑀺𑀕𑁆𑀕𑀳𑁄 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀭𑀺𑀕𑁆𑀕𑀳𑁄 𑀘. 𑀢𑀢𑁆𑀣 𑀧𑀞𑀫𑁂𑀦 𑀲𑀓𑀮𑀁 𑀩𑁆𑀭𑀳𑁆𑀫𑀘𑀭𑀺𑀬𑀫𑀸𑀯𑀢𑁆𑀢𑀢𑀺, 𑀤𑀼𑀢𑀺𑀬𑁂𑀦 𑀘 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀫𑀽𑀮𑀓𑀸 𑀥𑀫𑁆𑀫𑀸. 𑀅𑀓𑀼𑀲𑀮𑀕𑁆𑀕𑀳𑀡𑁂𑀦 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀅𑀩𑁆𑀬𑀸𑀓𑀢𑀕𑁆𑀕𑀳𑀡𑁂𑀦 𑀧𑀦 𑀲𑀓𑀮𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑀧𑀓𑁆𑀔𑁄 𑀬𑀣𑀸𑀭𑀳𑀫𑀸𑀯𑀢𑁆𑀢𑀢𑀻𑀢𑀺 𑀅𑀬𑀁 𑀆𑀯𑀢𑁆𑀢𑁄 𑀳𑀸𑀭𑁄.

𑀢𑀢𑁆𑀣 𑀓𑀼𑀲𑀮𑀸 𑀪𑀽𑀫𑀺𑀢𑁄 𑀘𑀢𑀼𑀥𑀸 𑀯𑀺𑀪𑀢𑁆𑀢𑀸, 𑀲𑀫𑁆𑀧𑀬𑀼𑀢𑁆𑀢𑀧𑀯𑀢𑁆𑀢𑀺𑀆𑀓𑀸𑀭𑀸𑀤𑀺𑀢𑁄 𑀧𑀦 𑀅𑀦𑁂𑀓𑀥𑀸. 𑀅𑀓𑀼𑀲𑀮𑀸 𑀪𑀽𑀫𑀺𑀢𑁄 𑀏𑀓𑀥𑀸 𑀯𑀺𑀪𑀢𑁆𑀢𑀸, 𑀲𑀫𑁆𑀧𑀬𑀼𑀢𑁆𑀢𑀸𑀤𑀺𑀢𑁄 𑀅𑀦𑁂𑀓𑀥𑀸. 𑀅𑀩𑁆𑀬𑀸𑀓𑀢𑀸 𑀧𑀦 𑀯𑀺𑀧𑀸𑀓𑀓𑀺𑀭𑀺𑀬𑀭𑀽𑀧𑀦𑀺𑀩𑁆𑀩𑀸𑀦𑀯𑀲𑁂𑀦 𑀘𑀢𑀼𑀥𑀸 𑀪𑀽𑀫𑀺𑀲𑀫𑁆𑀧𑀬𑀼𑀢𑁆𑀢𑀸𑀤𑀺𑀢𑁄 𑀅𑀦𑁂𑀓𑀥𑀸 𑀘 𑀯𑀺𑀪𑀢𑁆𑀢𑀸𑀢𑀺 𑀅𑀬𑀁 𑀯𑀺𑀪𑀢𑁆𑀢𑀺 𑀳𑀸𑀭𑁄.

𑀓𑀼𑀲𑀮𑀸 𑀥𑀫𑁆𑀫𑀸 𑀅𑀓𑀼𑀲𑀮𑀸𑀦𑀁 𑀢𑀤𑀗𑁆𑀕𑀸𑀤𑀺𑀧𑁆𑀧𑀳𑀸𑀦𑀸𑀬 𑀯𑀻𑀢𑀺𑀓𑁆𑀓𑀫𑀸𑀤𑀺𑀧𑁆𑀧𑀳𑀸𑀦𑀸𑀬 𑀘 𑀲𑀁𑀯𑀢𑁆𑀢𑀦𑁆𑀢𑀺, 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀓𑀼𑀲𑀮𑀸𑀦𑀁 𑀅𑀦𑀼𑀧𑀲𑀫𑁆𑀧𑀚𑁆𑀚𑀦𑀸𑀬, 𑀅𑀩𑁆𑀬𑀸𑀓𑀢𑁂𑀲𑀼 𑀅𑀲𑀗𑁆𑀔𑀢𑀥𑀸𑀢𑀼 𑀲𑀩𑁆𑀩𑀲𑀗𑁆𑀔𑀢𑀦𑀺𑀲𑁆𑀲𑀭𑀡𑀸𑀬𑀸𑀢𑀺 𑀅𑀬𑀁 𑀧𑀭𑀺𑀯𑀢𑁆𑀢𑁄 𑀳𑀸𑀭𑁄.

𑀓𑀼𑀲𑀮𑀸 𑀅𑀦𑀯𑀚𑁆𑀚𑀸 𑀧𑀼𑀜𑁆𑀜𑀸𑀦𑀻𑀢𑀺 𑀧𑀭𑀺𑀬𑀸𑀬𑀯𑀘𑀦𑀁, 𑀅𑀓𑀼𑀲𑀮𑀸 𑀲𑀸𑀯𑀚𑁆𑀚𑀸 𑀅𑀧𑀼𑀜𑁆𑀜𑀸𑀦𑀻𑀢𑀺 𑀧𑀭𑀺𑀬𑀸𑀬 𑀯𑀘𑀦𑀁, 𑀅𑀩𑁆𑀬𑀸𑀓𑀢𑀸 𑀅𑀯𑀺𑀧𑀸𑀓𑀸𑀭𑀳𑀸 𑀦𑁂𑀯𑀆𑀘𑀬𑀕𑀸𑀫𑀻 𑀦𑀅𑀧𑀘𑀬𑀕𑀸𑀫𑀻𑀦𑁄𑀢𑀺 𑀧𑀭𑀺𑀬𑀸𑀬𑀯𑀘𑀦𑀦𑁆𑀢𑀺 𑀅𑀬𑀁 𑀯𑁂𑀯𑀘𑀦𑁄 𑀳𑀸𑀭𑁄.

𑀓𑀼𑀲𑀮𑀸𑀤𑀬𑁄 ‘‘𑀬𑀲𑁆𑀫𑀺𑀁 𑀲𑀫𑀬𑁂’’𑀢𑀺𑀆𑀤𑀺𑀦𑀸 𑀧𑀪𑀯𑀪𑀽𑀫𑀺𑀯𑁂𑀯𑀘𑀦𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀬𑀣𑀸𑀲𑀫𑁆𑀪𑀯𑀁 𑀧𑀭𑀺𑀜𑁆𑀜𑀸𑀤𑀺𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀘 𑀧𑀜𑁆𑀜𑀢𑁆𑀢𑀸𑀢𑀺 𑀅𑀬𑀁 𑀧𑀜𑁆𑀜𑀢𑁆𑀢𑀺 𑀳𑀸𑀭𑁄.

𑀅𑀓𑀼𑀲𑀮𑀸𑀦𑀁 𑀓𑀼𑀘𑁆𑀙𑀺𑀢𑀸𑀦𑀁 𑀧𑀸𑀧𑀥𑀫𑁆𑀫𑀸𑀦𑀁 𑀲𑀮𑀦𑀁 𑀓𑀼𑀲𑀸𑀦𑀁 𑀯𑀺𑀬 𑀓𑀼𑀲𑀸𑀦𑀁 𑀯𑀸 𑀭𑀸𑀕𑀸𑀤𑀻𑀦𑀁 𑀮𑀯𑀦𑀁 𑀏𑀯𑀁𑀥𑀫𑁆𑀫𑀢𑀸𑀢𑀺 𑀅𑀬𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀫𑀼𑀔𑁂𑀦 𑀅𑀯𑀢𑀭𑀡𑀁, 𑀢𑀣𑀸 𑀓𑀼𑀲𑁂𑀦 𑀮𑀸𑀢𑀩𑁆𑀩𑀸 𑀓𑁄𑀲𑀮𑁆𑀮𑀲𑀫𑁆𑀪𑀽𑀢𑀸 𑀘𑀸𑀢𑀺 𑀧𑀘𑁆𑀘𑀬𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸𑀬 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤…𑀧𑁂… 𑀅𑀯𑀢𑀭𑀡𑀁, 𑀧𑀘𑁆𑀘𑀬𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀢𑀸𑀬 𑀯𑀸 𑀆𑀤𑀺𑀅𑀦𑁆𑀢𑀯𑀦𑁆𑀢𑀸 𑀅𑀦𑀺𑀘𑁆𑀘𑀦𑁆𑀢𑀺𑀓𑀸 𑀘𑀸𑀢𑀺 𑀅𑀦𑀺𑀘𑁆𑀘𑀢𑀸𑀫𑀼𑀔𑁂𑀦 𑀅𑀯𑀢𑀭𑀡𑀁, 𑀅𑀦𑀺𑀘𑁆𑀘𑀢𑀸 𑀏𑀯 𑀉𑀤𑀬𑀩𑁆𑀩𑀬𑀧𑀝𑀺𑀧𑀻𑀴𑀺𑀢𑀢𑀸𑀬 𑀤𑀼𑀓𑁆𑀔𑀸𑀢𑀺 𑀤𑀼𑀓𑁆𑀔𑀢𑀸𑀫𑀼𑀔𑁂𑀦 𑀅𑀯𑀢𑀭𑀡𑀁, 𑀦𑀺𑀲𑁆𑀲𑀢𑁆𑀢𑀦𑀺𑀚𑁆𑀚𑀻𑀯𑀝𑁆𑀞𑁂𑀦 𑀥𑀫𑁆𑀫𑀸𑀢𑀺 𑀅𑀩𑁆𑀬𑀸𑀧𑀸𑀭𑀢𑁄 𑀲𑀼𑀜𑁆𑀜𑀢𑀸𑀫𑀼𑀔𑁂𑀦 𑀅𑀯𑀢𑀭𑀡𑀁, 𑀏𑀯𑀁 𑀓𑀼𑀲𑀮𑀸𑀢𑀺 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀤𑁆𑀯𑀸𑀬𑀢𑀦𑀸𑀦𑀺 𑀤𑁆𑀯𑁂 𑀥𑀸𑀢𑀼𑀬𑁄𑀢𑀺𑀆𑀤𑀺𑀦𑀸 𑀔𑀦𑁆𑀥𑀸𑀬𑀢𑀦𑀥𑀸𑀢𑀸𑀤𑀺𑀫𑀼𑀔𑁂𑀦𑀧𑀺 𑀅𑀯𑀢𑀭𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀺𑀦𑀸 𑀦𑀬𑁂𑀦 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑁂𑀲𑀼𑀧𑀺 𑀅𑀯𑀢𑀭𑀡𑀁 𑀤𑀲𑁆𑀲𑁂𑀢𑀩𑁆𑀩𑀦𑁆𑀢𑀺 𑀅𑀬𑀁 𑀅𑀯𑀢𑀭𑀡𑁄 𑀳𑀸𑀭𑁄.

𑀓𑀼𑀲𑀮𑀸𑀢𑀺 𑀆𑀭𑀫𑁆𑀪𑁄, 𑀥𑀫𑁆𑀫𑀸𑀢𑀺 𑀧𑀤𑀲𑀼𑀤𑁆𑀥𑀺, 𑀦𑁄 𑀆𑀭𑀫𑁆𑀪𑀲𑀼𑀤𑁆𑀥𑀺. 𑀢𑀣𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀅𑀩𑁆𑀬𑀸𑀓𑀢𑀸𑀢𑀺, 𑀥𑀫𑁆𑀫𑀸𑀢𑀺 𑀧𑀦 𑀧𑀤𑀲𑀼𑀤𑁆𑀥𑀺 𑀆𑀭𑀫𑁆𑀪𑀲𑀼𑀤𑁆𑀥𑀺 𑀘𑀸𑀢𑀺 𑀅𑀬𑀁 𑀲𑁄𑀥𑀦𑁄 𑀳𑀸𑀭𑁄.

𑀥𑀫𑁆𑀫𑀸𑀢𑀺 𑀲𑀸𑀫𑀜𑁆𑀜𑀢𑁄 𑀅𑀥𑀺𑀝𑁆𑀞𑀸𑀦𑀁, 𑀢𑀁 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀯𑀺𑀲𑁂𑀲𑀯𑀘𑀦𑀁 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀢𑀺. 𑀢𑀣𑀸 𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑀲𑀸𑀫𑀜𑁆𑀜𑀢𑁄 𑀅𑀥𑀺𑀝𑁆𑀞𑀸𑀦𑀁, 𑀢𑀁 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀓𑀸𑀫𑀸𑀯𑀘𑀭𑀁 𑀲𑁄𑀫𑀦𑀲𑁆𑀲𑀲𑀳𑀕𑀢𑀦𑁆𑀢𑀺𑀆𑀤𑀺 𑀯𑀺𑀲𑁂𑀲𑀯𑀘𑀦𑀁. 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺𑀆𑀤𑀻𑀲𑀼𑀧𑀺 𑀏𑀲𑁂𑀯 𑀦𑀬𑁄𑀢𑀺 𑀅𑀬𑀁 𑀅𑀥𑀺𑀝𑁆𑀞𑀸𑀦𑁄 𑀳𑀸𑀭𑁄.

𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀦𑀯𑀫𑁄 𑀔𑀡𑁄 𑀘𑀢𑁆𑀢𑀸𑀭𑀺 𑀘 𑀲𑀫𑁆𑀧𑀢𑁆𑀢𑀺𑀘𑀓𑁆𑀓𑀸𑀦𑀺 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀏𑀯 𑀯𑀸 𑀳𑁂𑀢𑀼, 𑀯𑀼𑀢𑁆𑀢𑀯𑀺𑀧𑀭𑀺𑀬𑀸𑀬𑁂𑀦 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀳𑁂𑀢𑀼, 𑀓𑀼𑀲𑀮𑀸𑀓𑀼𑀲𑀮𑀸 𑀥𑀫𑁆𑀫𑀸 𑀬𑀣𑀸𑀲𑀫𑁆𑀪𑀯𑀁 𑀅𑀩𑁆𑀬𑀸𑀓𑀢𑀸𑀦𑀁 𑀥𑀫𑁆𑀫𑀸𑀦𑀁 𑀳𑁂𑀢𑀽𑀢𑀺 𑀅𑀬𑀁 𑀧𑀭𑀺𑀓𑁆𑀔𑀸𑀭𑁄 𑀳𑀸𑀭𑁄.

𑀓𑀼𑀲𑀮𑀸𑀢𑀺 𑀧𑀭𑀺𑀜𑁆𑀜𑁂𑀬𑁆𑀬𑀕𑁆𑀕𑀳𑀡𑀜𑁆𑀘𑁂𑀯 𑀪𑀸𑀯𑁂𑀢𑀩𑁆𑀩𑀕𑁆𑀕𑀳𑀡𑀜𑁆𑀘. 𑀅𑀓𑀼𑀲𑀮𑀸𑀢𑀺 𑀧𑀭𑀺𑀜𑁆𑀜𑁂𑀬𑁆𑀬𑀕𑁆𑀕𑀳𑀡𑀜𑁆𑀘𑁂𑀯 𑀧𑀳𑀸𑀢𑀩𑁆𑀩𑀕𑁆𑀕𑀳𑀡𑀜𑁆𑀘. 𑀅𑀩𑁆𑀬𑀸𑀓𑀢𑀸𑀢𑀺 𑀧𑀭𑀺𑀜𑁆𑀜𑁂𑀬𑁆𑀬𑀕𑁆𑀕𑀳𑀡𑀜𑁆𑀘𑁂𑀯 𑀲𑀘𑁆𑀙𑀺𑀓𑀸𑀢𑀩𑁆𑀩𑀕𑁆𑀕𑀳𑀡𑀜𑁆𑀘. 𑀥𑀫𑁆𑀫𑀸𑀢𑀺 𑀧𑀭𑀺𑀜𑁆𑀜𑀸𑀤𑀻𑀦𑀁 𑀧𑀯𑀢𑁆𑀢𑀦𑀸𑀓𑀸𑀭𑀕𑁆𑀕𑀳𑀡𑀁. 𑀢𑁂𑀦 𑀧𑀭𑀺𑀜𑁆𑀜𑁂𑀬𑁆𑀬𑀧𑁆𑀧𑀳𑀸𑀦𑀪𑀸𑀯𑀦𑀸𑀲𑀘𑁆𑀙𑀺𑀓𑀭𑀡𑀸𑀦𑀺 𑀤𑀻𑀧𑀺𑀢𑀸𑀦𑀻𑀢𑀺 𑀢𑀤𑀗𑁆𑀕𑀸𑀤𑀺𑀯𑀻𑀢𑀺𑀓𑁆𑀓𑀫𑀸𑀤𑀺𑀧𑁆𑀧𑀳𑀸𑀦𑀸𑀦𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀘 𑀪𑀸𑀯𑀦𑀸 𑀤𑀲𑁆𑀲𑀺𑀢𑀸𑀢𑀺 𑀅𑀬𑀁 𑀲𑀫𑀸𑀭𑁄𑀧𑀦𑁄 𑀳𑀸𑀭𑁄.

𑀓𑀸𑀫𑀜𑁆𑀘𑁂𑀢𑀁 𑀅𑀯𑀺𑀲𑁂𑀲𑀢𑁄 𑀲𑀪𑀸𑀯𑀥𑀫𑁆𑀫𑀓𑀣𑀦𑀁, 𑀯𑀺𑀲𑁂𑀲𑀯𑀦𑁆𑀢𑁄 𑀧𑀦 𑀥𑀫𑁆𑀫𑀸 𑀯𑀺𑀲𑁂𑀲𑀢𑁄 𑀦𑀺𑀤𑁆𑀥𑀸𑀭𑀺𑀢𑀸. 𑀢𑀣𑀸 𑀳𑀺 𑀘𑀺𑀢𑁆𑀢𑁂𑀦𑁂𑀯 𑀲𑀫𑀬𑁄 𑀦𑀺𑀬𑀫𑀺𑀢𑁄, 𑀢𑀲𑁆𑀫𑀸 𑀓𑀼𑀲𑀮𑀕𑁆𑀕𑀳𑀡𑁂𑀦 𑀯𑀺𑀲𑁂𑀲𑀢𑁄 𑀲𑀸𑀥𑀺𑀝𑁆𑀞𑀸𑀦𑁄 𑀲𑀫𑀣𑁄 𑀯𑀺𑀧𑀲𑁆𑀲𑀦𑀸 𑀘 𑀤𑀲𑁆𑀲𑀺𑀢𑀸𑀢𑀺. 𑀢𑀣𑀸 𑀢𑀧𑁆𑀧𑀝𑀺𑀧𑀓𑁆𑀔𑀢𑁄 𑀅𑀓𑀼𑀲𑀮𑀕𑁆𑀕𑀳𑀡𑁂𑀦 𑀲𑀸𑀥𑀺𑀝𑁆𑀞𑀸𑀦𑀸 𑀢𑀡𑁆𑀳𑀸 𑀅𑀯𑀺𑀚𑁆𑀚𑀸 𑀘, 𑀅𑀩𑁆𑀬𑀸𑀓𑀢𑀕𑁆𑀕𑀳𑀡𑁂𑀦 𑀲𑀧𑀭𑀺𑀯𑀸𑀭𑀸 𑀘𑁂𑀢𑁄𑀯𑀺𑀫𑀼𑀢𑁆𑀢𑀺 𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺 𑀘𑀸𑀢𑀺 𑀅𑀬𑀁 𑀦𑀦𑁆𑀤𑀺𑀬𑀸𑀯𑀢𑁆𑀢𑀲𑁆𑀲 𑀦𑀬𑀲𑁆𑀲 𑀪𑀽𑀫𑀺.

𑀢𑀣𑀸 𑀓𑀼𑀲𑀮𑀕𑁆𑀕𑀳𑀡𑁂𑀦 𑀫𑀽𑀮𑀪𑀸𑀯𑀯𑀺𑀲𑁂𑀲𑀢𑁄 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀺, 𑀢𑁂𑀲𑀼 𑀘 𑀅𑀤𑁄𑀲𑁂𑀦 𑀲𑀻𑀮𑀓𑁆𑀔𑀦𑁆𑀥𑁄, 𑀅𑀮𑁄𑀪𑁂𑀦 𑀲𑀫𑀸𑀥𑀺𑀓𑁆𑀔𑀦𑁆𑀥𑁄, 𑀅𑀫𑁄𑀳𑁂𑀦 𑀧𑀜𑁆𑀜𑀸𑀓𑁆𑀔𑀦𑁆𑀥𑁄 𑀦𑀻𑀬𑀢𑀺. 𑀢𑀣𑀸 𑀅𑀓𑀼𑀲𑀮𑀕𑁆𑀕𑀳𑀡𑁂𑀦 𑀢𑀻𑀡𑀺 𑀅𑀓𑀼𑀲𑀮𑀫𑀽𑀮𑀸𑀦𑀺, 𑀢𑁂𑀲𑀼 𑀘 𑀮𑁄𑀪𑁂𑀦 𑀢𑀤𑁂𑀓𑀝𑁆𑀞𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸. 𑀢𑀣𑀸 𑀤𑁄𑀲𑀫𑁄𑀳𑁂𑀳𑀺 𑀢𑀁𑀢𑀤𑁂𑀓𑀝𑁆𑀞𑀸. 𑀅𑀩𑁆𑀬𑀸𑀓𑀢𑀕𑁆𑀕𑀳𑀡𑁂𑀦 𑀅𑀧𑁆𑀧𑀡𑀺𑀳𑀺𑀢𑀸𑀦𑀺𑀫𑀺𑀢𑁆𑀢𑀲𑀼𑀜𑁆𑀜𑀢𑀸 𑀦𑀻𑀬𑀦𑁆𑀢𑀻𑀢𑀺 𑀅𑀬𑀁 𑀢𑀺𑀧𑀼𑀓𑁆𑀔𑀮𑀲𑁆𑀲 𑀦𑀬𑀲𑁆𑀲 𑀪𑀽𑀫𑀺.

𑀢𑀣𑀸 𑀓𑀼𑀲𑀮𑀕𑁆𑀕𑀳𑀡𑁂𑀦 𑀬𑀢𑁄 𑀓𑁄𑀲𑀮𑁆𑀮𑀢𑁄 𑀲𑀫𑁆𑀪𑀽𑀢𑀸 𑀓𑀼𑀲𑀮𑀸, 𑀢𑀁 𑀧𑀜𑁆𑀜𑀺𑀦𑁆𑀤𑁆𑀭𑀺𑀬𑀁. 𑀢𑀁𑀲𑀳𑀚𑀸𑀢𑀸 𑀢𑀤𑀼𑀧𑀦𑀺𑀲𑁆𑀲𑀬𑀸 𑀘 𑀲𑀤𑁆𑀤𑀳𑀦𑀼𑀲𑁆𑀲𑀳𑀦𑀸𑀧𑀺𑀮𑀸𑀧𑀸𑀯𑀺𑀓𑁆𑀔𑁂𑀧𑀸 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀺. 𑀢𑁂𑀳𑀺 𑀘 𑀲𑀩𑁆𑀩𑁂 𑀲𑀤𑁆𑀥𑀫𑁆𑀫𑀸 𑀩𑁄𑀥𑀺𑀢𑀸 𑀪𑀯𑀦𑁆𑀢𑀺. 𑀅𑀓𑀼𑀲𑀮𑀕𑁆𑀕𑀳𑀡𑁂𑀦 𑀅𑀓𑁄𑀲𑀮𑁆𑀮𑀧𑀝𑀺𑀘𑁆𑀙𑀸𑀤𑀺𑀢𑀸𑀤𑀻𑀦𑀯𑁂𑀲𑀼 𑀓𑀸𑀬𑀯𑁂𑀤𑀦𑀸𑀘𑀺𑀢𑁆𑀢𑀥𑀫𑁆𑀫𑁂𑀲𑀼 𑀲𑀼𑀪𑀲𑀼𑀔𑀦𑀺𑀘𑁆𑀘𑀅𑀢𑁆𑀢𑀸𑀪𑀺𑀦𑀺𑀯𑁂𑀲𑀪𑀽𑀢𑀸 𑀘𑀢𑁆𑀢𑀸𑀭𑁄 𑀯𑀺𑀧𑀮𑁆𑀮𑀸𑀲𑀸. 𑀅𑀩𑁆𑀬𑀸𑀓𑀢𑀕𑁆𑀕𑀳𑀡𑁂𑀦 𑀬𑀣𑀸𑀯𑀼𑀢𑁆𑀢𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀸𑀦𑀺 𑀬𑀣𑀸𑀯𑀼𑀢𑁆𑀢𑀯𑀺𑀧𑀮𑁆𑀮𑀸𑀲𑀧𑁆𑀧𑀳𑀸𑀦𑀪𑀽𑀢𑀸𑀦𑀺 𑀘 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀩𑁄𑀥𑀺𑀢𑀸𑀦𑀻𑀢𑀺 𑀅𑀬𑀁 𑀲𑀻𑀳𑀯𑀺𑀓𑁆𑀓𑀻𑀴𑀺𑀢𑀲𑁆𑀲 𑀦𑀬𑀲𑁆𑀲 𑀪𑀽𑀫𑀻𑀢𑀺 𑀇𑀫𑁂 𑀢𑀬𑁄 𑀅𑀢𑁆𑀣𑀦𑀬𑀸.

𑀢𑁂𑀳𑀺 𑀘 𑀲𑀺𑀤𑁆𑀥𑁂𑀳𑀺 𑀤𑁆𑀯𑁂 𑀓𑀫𑁆𑀫𑀦𑀬𑀸𑀧𑀺 𑀲𑀺𑀤𑁆𑀥𑀸 𑀳𑁄𑀦𑁆𑀢𑀻𑀢𑀺. 𑀅𑀬𑀁 𑀢𑀺𑀓𑁄 𑀲𑀩𑁆𑀩𑀥𑀫𑁆𑀫𑀲𑀗𑁆𑀕𑀳𑀺𑀢𑀲𑀩𑁆𑀩𑀪𑀸𑀕𑀺𑀬𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀇𑀤𑀁 𑀲𑀸𑀲𑀦𑀧𑀝𑁆𑀞𑀸𑀦𑀁.

𑀅𑀬𑀁 𑀢𑀸𑀯 𑀦𑁂𑀢𑁆𑀢𑀺𑀦𑀬𑁂𑀦 𑀓𑀼𑀲𑀮𑀢𑁆𑀢𑀺𑀓𑀯𑀡𑁆𑀡𑀦𑀸.

𑀏𑀯𑀁 𑀯𑁂𑀤𑀦𑀸𑀢𑁆𑀢𑀺𑀓𑀸𑀤𑀻𑀲𑀼𑀧𑀺 𑀬𑀣𑀸𑀲𑀫𑁆𑀪𑀯𑀁 𑀘𑀢𑀼𑀲𑀘𑁆𑀘𑀦𑀺𑀤𑁆𑀥𑀸𑀭𑀡𑀸𑀤𑀺𑀯𑀺𑀥𑀺𑀦𑀸 𑀲𑁄𑀴𑀲 𑀳𑀸𑀭𑀸 𑀧𑀜𑁆𑀘 𑀦𑀬𑀸 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸, 𑀅𑀢𑀺𑀯𑀺𑀢𑁆𑀣𑀸𑀭𑀪𑀬𑁂𑀦 𑀧𑀦 𑀦 𑀯𑀺𑀢𑁆𑀣𑀸𑀭𑀬𑀸𑀫. 𑀲𑀓𑁆𑀓𑀸 𑀳𑀺 𑀇𑀫𑀺𑀦𑀸 𑀦𑀬𑁂𑀦 𑀢𑁂𑀲𑀼 𑀢𑁂𑀲𑀼 𑀢𑀺𑀓𑀤𑀼𑀓𑁂𑀲𑀼 𑀢𑀁𑀢𑀁𑀳𑀸𑀭𑀦𑀬𑀬𑁄𑀚𑀦𑀸𑀦𑀼𑀭𑀽𑀧𑀥𑀫𑁆𑀫𑀦𑀺𑀤𑁆𑀥𑀸𑀭𑀡𑀯𑀲𑁂𑀦 𑀢𑁂 𑀢𑁂 𑀳𑀸𑀭𑀦𑀬𑀸 𑀯𑀺𑀜𑁆𑀜𑀼𑀦𑀸 𑀦𑀺𑀤𑁆𑀤𑀺𑀲𑀺𑀢𑀼𑀦𑁆𑀢𑀺.

𑁨. 𑀢𑀜𑁆𑀘 𑀲𑀼𑀔𑀺𑀦𑁆𑀤𑁆𑀭𑀺𑀬𑀁 𑀲𑀼𑀔𑀯𑁂𑀤𑀦𑀸 𑀏𑀯 𑀳𑁄𑀢𑀺 𑀲𑀸𑀫𑀜𑁆𑀜𑀲𑁆𑀲 𑀪𑁂𑀤𑀧𑀭𑀺𑀬𑀸𑀤𑀸𑀦𑀢𑁄, 𑀪𑁂𑀤𑀲𑁆𑀲 𑀘 𑀲𑀸𑀫𑀜𑁆𑀜𑀧𑀭𑀺𑀘𑁆𑀘𑀸𑀕𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀲𑁆𑀫𑀸 𑀧𑀦 𑀯𑀺𑀲𑁂𑀲𑀲𑀸𑀫𑀜𑁆𑀜𑀸𑀦𑀺 𑀅𑀯𑀬𑀯𑀲𑀫𑀼𑀤𑀸𑀬𑀸 𑀯𑀺𑀬 𑀅𑀜𑁆𑀜𑀫𑀜𑁆𑀜𑀢𑁄 𑀪𑀺𑀦𑁆𑀦𑀸𑀦𑀺, 𑀢𑀲𑁆𑀫𑀸 ‘‘𑀦 𑀧𑀦…𑀧𑁂… 𑀲𑀫𑀸𑀦𑀢𑁆𑀣𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀢𑀫𑁂𑀯 𑀦𑁂𑀲𑀁 𑀪𑀺𑀦𑁆𑀦𑀢𑀢𑁆𑀯𑀁 ‘‘𑀅𑀬𑀜𑁆𑀳𑀻’’𑀢𑀺𑀆𑀤𑀺𑀦𑀸 𑀯𑀺𑀯𑀭𑀢𑀺. 𑀢𑀦𑁆𑀢𑀺 𑀲𑀼𑀔𑀳𑁂𑀢𑀽𑀦𑀁 𑀓𑀸𑀭𑀡𑀁. 𑀢𑁂𑀦 𑀲𑀼𑀔𑀲𑁆𑀲 𑀓𑀸𑀭𑀡𑀁 𑀲𑀼𑀔𑀳𑁂𑀢𑀼, 𑀲𑀼𑀔𑀲𑁆𑀲 𑀓𑀸𑀭𑀡𑀓𑀸𑀭𑀡𑀁 𑀲𑀼𑀔𑀫𑀽𑀮𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀲𑀼𑀔𑀳𑁂𑀢𑀽𑀦𑀦𑁆𑀢𑀺 𑀏𑀢𑁆𑀣 𑀳𑁂𑀢𑀼-𑀲𑀤𑁆𑀤𑁂𑀦 𑀓𑀸𑀭𑀡𑀪𑀸𑀯𑀲𑀸𑀫𑀜𑁆𑀜𑀢𑁄 𑀳𑁂𑀢𑀼𑀧𑀘𑁆𑀘𑀬𑀸 𑀲𑀗𑁆𑀕𑀳𑀺𑀢𑀸𑀢𑀺 𑀆𑀳 ‘‘𑀧𑀼𑀜𑁆𑀜𑀧𑀲𑁆𑀲𑀤𑁆𑀥𑀺𑀆𑀤𑀻𑀦’’𑀦𑁆𑀢𑀺. 𑀏𑀢𑁆𑀣 𑀘 𑀲𑀼𑀔𑀫𑀽𑀮𑀲𑀼𑀔𑀳𑁂𑀢𑀽𑀲𑀼 𑀨𑀮𑀽𑀧𑀘𑀸𑀭𑁂𑀦, 𑀲𑀼𑀔𑀸𑀭𑀫𑁆𑀫𑀡𑀲𑀼𑀔𑀧𑀘𑁆𑀘𑀬𑀝𑁆𑀞𑀸𑀦𑁂𑀲𑀼 𑀲𑀼𑀔𑀲𑀳𑀘𑀭𑀺𑀬𑀸𑀬, 𑀅𑀩𑁆𑀬𑀸𑀧𑀚𑁆𑀚𑀦𑀺𑀩𑁆𑀩𑀸𑀦𑁂𑀲𑀼 𑀤𑀼𑀓𑁆𑀔𑀸𑀧𑀕𑀫𑀪𑀸𑀯𑁂𑀦 𑀲𑀼𑀔𑀧𑀭𑀺𑀬𑀸𑀬𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀇𑀝𑁆𑀞𑀸𑀲𑀽𑀢𑀺 𑀲𑀼𑀔𑀼𑀧𑁂𑀓𑁆𑀔𑀸𑀦𑀁 𑀯𑀺𑀧𑀭𑀺𑀡𑀸𑀫𑀸𑀜𑁆𑀜𑀸𑀡𑀲𑀗𑁆𑀔𑀸𑀭𑀤𑀼𑀓𑁆𑀔𑀢𑀸𑀬 𑀅𑀦𑀺𑀝𑁆𑀞𑀪𑀸𑀯𑁄𑀧𑀺 𑀅𑀢𑁆𑀣𑀻𑀢𑀺 𑀯𑀺𑀲𑁂𑀲𑁂𑀢𑀺. 𑀉𑀧𑁂𑀓𑁆𑀔𑀫𑁂𑀯 𑀯𑀸 𑀅𑀧𑁂𑀓𑁆𑀔𑀺𑀢𑁆𑀯𑀸 𑀯𑀺𑀲𑁂𑀲𑀦𑀁 𑀓𑀢𑀁. 𑀲𑀸 𑀳𑀺 𑀅𑀓𑀼𑀲𑀮𑀯𑀺𑀧𑀸𑀓𑀪𑀽𑀢𑀸 𑀅𑀦𑀺𑀝𑁆𑀞𑀸𑀧𑀺 𑀅𑀢𑁆𑀣𑀻𑀢𑀺. 𑀏𑀯𑀫𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀲𑁄𑀯𑀕𑁆𑀕𑀺𑀓𑀁 𑀲𑀼𑀔𑀯𑀺𑀧𑀸𑀓’’𑀦𑁆𑀢𑀺 (𑀤𑀻. 𑀦𑀺. 𑁧.𑁧𑁬𑁩) 𑀏𑀯𑀫𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀇𑀝𑁆𑀞𑀧𑀭𑀺𑀬𑀸𑀬𑁄 𑀳𑀺 𑀏𑀢𑁆𑀣 𑀲𑀼𑀔-𑀲𑀤𑁆𑀤𑁄𑀢𑀺.

𑀲𑀗𑁆𑀔𑀸𑀭𑀤𑀼𑀓𑁆𑀔𑀸𑀤𑀻𑀲𑀽𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 ‘‘𑀞𑀺𑀢𑀺𑀲𑀼𑀔𑀁 𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀁, 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀤𑀼𑀓𑁆𑀔𑀼𑀤𑁆𑀭𑀬𑀁 𑀤𑀼𑀓𑁆𑀔𑀯𑀺𑀧𑀸𑀓’’𑀦𑁆𑀢𑀺𑀆𑀤𑀺𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀬𑀣𑀸𑀓𑁆𑀓𑀫𑀁 𑀲𑀼𑀔𑀯𑁂𑀤𑀦𑀸 𑀤𑀼𑀓𑁆𑀔𑀅𑀦𑀺𑀝𑁆𑀞𑀧𑀭𑀺𑀬𑀸𑀬𑁄 𑀳𑀺 𑀏𑀢𑁆𑀣 𑀤𑀼𑀓𑁆𑀔-𑀲𑀤𑁆𑀤𑁄𑀢𑀺. 𑀤𑀼𑀓𑁆𑀔𑀯𑁂𑀤𑀦𑀸𑀤𑀼𑀓𑁆𑀔𑀯𑀢𑁆𑀣𑀼𑀆𑀤𑀻𑀲𑀼 𑀤𑀼𑀓𑁆𑀔𑀲𑀤𑁆𑀤𑀧𑁆𑀧𑀯𑀢𑁆𑀢𑀺 𑀯𑀼𑀢𑁆𑀢𑀦𑀬𑁂𑀦𑁂𑀯 𑀬𑁄𑀚𑁂𑀢𑀩𑁆𑀩𑀸. 𑀯𑀺𑀧𑀸𑀓𑀸𑀯𑀺𑀧𑀸𑀓𑀪𑁂𑀤𑀸𑀬 𑀲𑀩𑁆𑀩𑀸𑀬𑀧𑀺 𑀲𑀼𑀔𑀯𑁂𑀤𑀦𑀸𑀬 𑀯𑀲𑁂𑀦 𑀮𑀓𑁆𑀔𑀡𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀢𑀤𑀼𑀪𑀬𑀸𑀦𑀼𑀓𑀽𑀮𑀫𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀲𑀪𑀸𑀯𑀢𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀯𑀺𑀧𑀸𑀓𑀸 𑀲𑀪𑀸𑀯𑀢𑁄 𑀇𑀝𑁆𑀞𑀲𑁆𑀲 𑀅𑀦𑀼𑀪𑀯𑀦𑀮𑀓𑁆𑀔𑀡𑀸. 𑀇𑀢𑀭𑀸 𑀲𑀪𑀸𑀯𑀢𑁄 𑀲𑀗𑁆𑀓𑀧𑁆𑀧𑀢𑁄 𑀘 𑀇𑀝𑁆𑀞𑀲𑁆𑀲 𑀇𑀝𑁆𑀞𑀸𑀓𑀸𑀭𑀲𑁆𑀲 𑀯𑀸 𑀅𑀦𑀼𑀪𑀯𑀦𑀮𑀓𑁆𑀔𑀡𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀲𑀫𑀸𑀦𑀧𑀘𑁆𑀘𑀬𑁂𑀳𑀺 𑀏𑀓𑀚𑁆𑀛𑀁 𑀉𑀧𑁆𑀧𑀢𑁆𑀢𑀺𑀢𑁄 𑀲𑀫𑀸𑀦𑀧𑀘𑁆𑀘𑀬𑁂𑀳𑀺 𑀏𑀓𑀚𑁆𑀛𑀁 𑀉𑀧𑁆𑀧𑀢𑁆𑀢𑀺 𑀲𑀸𑀢𑀺𑀲𑀬𑀸𑀢𑀺 𑀉𑀓𑁆𑀓𑀁𑀲𑀕𑀢𑀺𑀯𑀺𑀚𑀸𑀦𑀦𑀯𑀲𑁂𑀦 ‘‘𑀲𑀫𑀸𑀦𑀧𑀘𑁆𑀘𑀬𑁂𑀳𑀺 𑀲𑀳𑀼𑀧𑁆𑀧𑀢𑁆𑀢𑀺𑀓𑀸𑀢𑀺 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀉𑀧𑁆𑀧𑀚𑁆𑀚𑀦𑀁 𑀉𑀧𑁆𑀧𑀸𑀤𑁄, 𑀉𑀧𑁆𑀧𑀚𑁆𑀚𑀢𑀺 𑀏𑀢𑀲𑁆𑀫𑀸𑀢𑀺 𑀉𑀧𑁆𑀧𑀸𑀤𑁄𑀢𑀺 𑀤𑀼𑀯𑀺𑀥𑁄𑀧𑀺 𑀉𑀧𑁆𑀧𑀸𑀤𑁄 𑀏𑀓𑀼𑀧𑁆𑀧𑀸𑀤𑀸𑀢𑀺 𑀏𑀢𑁆𑀣 𑀏𑀓𑀲𑁂𑀲𑀦𑀬𑁂𑀦 𑀲𑀗𑁆𑀕𑀳𑀺𑀢𑁄𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀲𑀫𑀸…𑀧𑁂… 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁 𑀲𑀺𑀬𑀸. 𑀢𑁂𑀦 𑀢𑀸𑀦𑀺 𑀏𑀓𑀯𑀢𑁆𑀣𑀼𑀓𑀸𑀦𑀻𑀢𑀺 𑀏𑀢𑀲𑁆𑀲 𑀘 ‘‘𑀓𑀧𑁆𑀧𑁂𑀦𑁆𑀢𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀢𑀢𑁆𑀣 𑀧𑀼𑀭𑀺𑀫𑀯𑀺𑀓𑀧𑁆𑀧𑁂 𑀏𑀓𑀁 𑀯𑀢𑁆𑀣𑀼 𑀦𑀺𑀲𑁆𑀲𑀬𑁄 𑀏𑀢𑁂𑀲𑀦𑁆𑀢𑀺 𑀬𑁄𑀚𑀦𑀸, 𑀦 𑀏𑀓𑀁𑀬𑁂𑀯 𑀯𑀢𑁆𑀣𑀽𑀢𑀺. 𑀏𑀓𑁂𑀓𑀪𑀽𑀢𑀲𑁆𑀲 𑀪𑀽𑀢𑀢𑁆𑀢𑀬𑀦𑀺𑀲𑁆𑀲𑀺𑀢𑀢𑁆𑀢𑀸 𑀘𑀢𑀼𑀪𑀽𑀢𑀦𑀺𑀲𑁆𑀲𑀺𑀢𑀢𑁆𑀢𑀸 𑀘 𑀉𑀧𑀸𑀤𑀸𑀭𑀽𑀧𑀸𑀦𑀁. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀧𑀦 𑀏𑀓𑀁𑀬𑁂𑀯 𑀯𑀢𑁆𑀣𑀼 𑀏𑀢𑁂𑀲𑀼 𑀦𑀺𑀲𑁆𑀲𑀺𑀢𑀦𑁆𑀢𑀺 𑀬𑁄𑀚𑀦𑀸. 𑀦𑀺𑀲𑁆𑀲𑀬𑀦𑀺𑀲𑁆𑀲𑀺𑀢𑀢𑀸𑀲𑀗𑁆𑀔𑀸𑀢𑀉𑀧𑀓𑀸𑀭𑁄𑀧𑀓𑀢𑁆𑀢𑀩𑁆𑀩𑀪𑀸𑀯𑀤𑀻𑀧𑀦𑀁 𑀏𑀓𑀯𑀢𑁆𑀣𑀼𑀓𑀯𑀘𑀦𑀦𑁆𑀢𑀺 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀫𑀳𑀸𑀪𑀽𑀢𑀯𑀲𑁂𑀦 𑀬𑁄𑀚𑀦𑀸 𑀓𑀢𑀸. 𑀇𑀢𑀭𑀣𑀸 𑀏𑀓𑀁 𑀯𑀢𑁆𑀣𑀼 𑀏𑀢𑁂𑀲𑀽𑀢𑀺 𑀲𑀫𑀸𑀲𑀢𑁆𑀣𑀪𑀸𑀯𑁂𑀦 𑀉𑀧𑀸𑀤𑀸𑀭𑀽𑀧𑀸𑀦𑀫𑁆𑀧𑀺 𑀧𑀭𑀺𑀕𑁆𑀕𑀳𑁄 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸. 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀫𑁆𑀧𑀝𑀺𑀘𑁆𑀙𑀦𑀸𑀦𑀦𑁆𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀺𑀭𑀺𑀬𑀫𑀦𑁄𑀥𑀸𑀢𑀼𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀬𑁄𑀧𑀺 𑀳𑀺 𑀏𑀓𑀸𑀭𑀫𑁆𑀫𑀡𑀸𑀪𑀺𑀦𑁆𑀦𑀯𑀢𑁆𑀣𑀼𑀓𑀸 𑀘𑀸𑀢𑀺 𑀧𑀸𑀓𑀝𑁄𑀬𑀫𑀢𑁆𑀣𑁄𑀢𑀺. 𑀲𑀦𑁆𑀢𑀻𑀭𑀡𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀯𑁄𑀝𑁆𑀞𑀩𑁆𑀩𑀦𑀚𑀯𑀦𑀢𑀤𑀸𑀭𑀫𑁆𑀫𑀡𑀸𑀦𑀺 𑀲𑀗𑁆𑀕𑀬𑁆𑀳𑀦𑁆𑀢𑀺, 𑀏𑀢𑀸𑀦𑀺 𑀘 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀻𑀦𑀺 𑀘𑀼𑀢𑀺𑀆𑀲𑀦𑁆𑀦𑀸𑀦𑀺 𑀇𑀥𑀸𑀥𑀺𑀧𑁆𑀧𑁂𑀢𑀸𑀦𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑀸𑀦𑀺 𑀳𑀺 𑀢𑀤𑀼𑀤𑁆𑀥𑀁 𑀓𑀫𑁆𑀫𑀚𑀭𑀽𑀧𑀲𑁆𑀲 𑀅𑀦𑀼𑀧𑁆𑀧𑀢𑁆𑀢𑀺𑀢𑁄 𑀏𑀓𑀲𑁆𑀫𑀺𑀁𑀬𑁂𑀯 𑀳𑀤𑀬𑀯𑀢𑁆𑀣𑀼𑀲𑁆𑀫𑀺𑀁 𑀯𑀢𑁆𑀢𑀦𑁆𑀢𑀺, 𑀇𑀢𑀭𑀸𑀦𑀺 𑀧𑀦 𑀧𑀼𑀭𑀺𑀫𑀧𑀼𑀭𑀺𑀫𑀘𑀺𑀢𑁆𑀢𑀓𑁆𑀔𑀡𑀼𑀧𑁆𑀧𑀦𑁆𑀦𑁂 𑀳𑀤𑀬𑀯𑀢𑁆𑀣𑀼𑀲𑁆𑀫𑀺𑀁 𑀉𑀢𑁆𑀢𑀭𑀼𑀢𑁆𑀢𑀭𑀸𑀦𑀺 𑀧𑀯𑀢𑁆𑀢𑀦𑁆𑀢𑀻𑀢𑀺. 𑀙𑀲𑀼 𑀯𑀸 𑀯𑀢𑁆𑀣𑀽𑀲𑀼 𑀏𑀓𑀁 𑀳𑀤𑀬𑀯𑀢𑁆𑀣𑀼𑀬𑁂𑀯 𑀯𑀢𑁆𑀣𑀼 𑀏𑀢𑁂𑀲𑀦𑁆𑀢𑀺 𑀏𑀯𑀁 𑀧𑀦 𑀅𑀢𑁆𑀣𑁂 𑀲𑀢𑀺 𑀘𑀼𑀢𑀺𑀆𑀲𑀦𑁆𑀦𑀢𑁄 𑀇𑀢𑀭𑁂𑀲𑀁 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀻𑀦𑀁 𑀕𑀳𑀡𑀁 𑀲𑀺𑀬𑀸𑀢𑀺 𑀜𑀸𑀢𑀩𑁆𑀩𑀁.

𑀏𑀢𑁆𑀣𑀸𑀳 𑁋 ‘‘𑀓𑀲𑁆𑀫𑀸 𑀧𑀦𑁂𑀢𑁆𑀣 𑀓𑀼𑀲𑀮𑀢𑁆𑀢𑀺𑀓𑀸𑀦𑀦𑁆𑀢𑀭𑀁 𑀯𑁂𑀤𑀦𑀸𑀢𑁆𑀢𑀺𑀓𑁄𑀯 𑀯𑀼𑀢𑁆𑀢𑁄’’𑀢𑀺? 𑀓𑀺𑀲𑁆𑀫𑀺𑀁 𑀧𑀦 𑀯𑀼𑀘𑁆𑀘𑀫𑀸𑀦𑁂 𑀅𑀬𑀫𑀦𑀼𑀬𑁄𑀕𑁄 𑀦 𑀲𑀺𑀬𑀸, 𑀅𑀧𑀺𑀘 𑀅𑀯𑀬𑀯𑀸𑀦𑀁 𑀅𑀦𑁂𑀓𑀪𑁂𑀤𑀢𑀸𑀤𑀲𑁆𑀲𑀦𑀢𑁆𑀣𑀸 𑀢𑀺𑀓𑀦𑁆𑀢𑀭𑀤𑁂𑀲𑀦𑀸. 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂𑀦 𑀳𑀺 𑀓𑀼𑀲𑀮𑀢𑁆𑀢𑀺𑀓𑁂𑀦 𑀲𑀩𑁆𑀩𑀥𑀫𑁆𑀫𑀸𑀦𑀁 𑀢𑀺𑀥𑀸 𑀯𑀺𑀪𑀸𑀕𑀁 𑀤𑀲𑁆𑀲𑁂𑀢𑁆𑀯𑀸 𑀧𑀼𑀦 𑀢𑀤𑀯𑀬𑀯𑀸𑀦𑀁 𑀓𑀼𑀲𑀮𑀸𑀤𑀻𑀦𑀫𑁆𑀧𑀺 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑀢𑀁 𑀤𑀲𑁆𑀲𑁂𑀦𑁆𑀢𑁂𑀦 𑀢𑁂𑀲𑀁 𑀯𑁂𑀤𑀦𑀸𑀲𑀫𑁆𑀧𑀬𑁄𑀕𑀯𑀺𑀪𑀸𑀕𑀯𑀺𑀪𑀸𑀯𑀦𑀢𑁆𑀣𑀁 ‘‘𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀓𑀼𑀲𑀮𑀸 𑀳𑀺 𑀥𑀫𑁆𑀫𑀸 𑀲𑀺𑀬𑀸 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸, 𑀲𑀺𑀬𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸. 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀺𑀬𑀸 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸, 𑀲𑀺𑀬𑀸 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸, 𑀲𑀺𑀬𑀸 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀸, 𑀢𑀣𑀸 𑀅𑀩𑁆𑀬𑀸𑀓𑀢𑀸 𑀲𑀫𑁆𑀧𑀬𑁄𑀕𑀸𑀭𑀳𑀸𑀢𑀺. 𑀏𑀯𑀁 𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀁 𑀧𑀘𑁆𑀘𑁂𑀓𑀁 𑀯𑁂𑀤𑀦𑀸𑀪𑁂𑀤𑁂𑀦 𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀁 𑀓𑀼𑀲𑀮𑀢𑁆𑀢𑀺𑀓𑀸𑀦𑀦𑁆𑀢𑀭𑀁 𑀯𑁂𑀤𑀦𑀸𑀢𑁆𑀢𑀺𑀓𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀲𑀼𑀔𑀲𑀫𑁆𑀧𑀬𑀼𑀢𑁆𑀢𑀸𑀤𑀻𑀦𑀁 𑀧𑀘𑁆𑀘𑁂𑀓𑀁 𑀯𑀺𑀧𑀸𑀓𑀸𑀤𑀺𑀪𑁂𑀤𑀪𑀺𑀦𑁆𑀦𑀢𑀁 𑀤𑀲𑁆𑀲𑁂𑀢𑀼𑀁 𑀯𑁂𑀤𑀦𑀸𑀢𑁆𑀢𑀺𑀓𑀸𑀦𑀦𑁆𑀢𑀭𑀁 𑀯𑀺𑀧𑀸𑀓𑀢𑁆𑀢𑀺𑀓𑁄 𑀯𑀼𑀢𑁆𑀢𑁄. 𑀲𑀼𑀔𑀲𑀫𑁆𑀧𑀬𑀼𑀢𑁆𑀢𑀸 𑀳𑀺 𑀥𑀫𑁆𑀫𑀸 𑀲𑀺𑀬𑀸 𑀯𑀺𑀧𑀸𑀓𑀸, 𑀲𑀺𑀬𑀸 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸, 𑀲𑀺𑀬𑀸 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸. 𑀢𑀣𑀸 𑀅𑀤𑀼𑀓𑁆𑀔𑀫𑀲𑀼𑀔𑀲𑀫𑁆𑀧𑀬𑀼𑀢𑁆𑀢𑀸, 𑀤𑀼𑀓𑁆𑀔𑀲𑀫𑁆𑀧𑀬𑀼𑀢𑁆𑀢𑀸 𑀧𑀦 𑀲𑀺𑀬𑀸 𑀯𑀺𑀧𑀸𑀓𑀸, 𑀲𑀺𑀬𑀸 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀅𑀯𑀲𑁂𑀲𑀢𑁆𑀢𑀺𑀓𑀸𑀦𑀁 𑀤𑀼𑀓𑀸𑀦𑀜𑁆𑀘 𑀢𑀲𑁆𑀲 𑀢𑀲𑁆𑀲 𑀅𑀦𑀦𑁆𑀢𑀭𑀯𑀘𑀦𑁂 𑀧𑀬𑁄𑀚𑀦𑀁 𑀯𑀺𑀪𑀸𑀯𑁂𑀢𑀩𑁆𑀩𑀁.

𑁩. 𑀯𑀺𑀧𑀸𑀓𑀦𑀺𑀭𑀼𑀢𑁆𑀢𑀺𑀜𑁆𑀘 𑀮𑀪𑀦𑁆𑀢𑀻𑀢𑀺 𑀢𑁂𑀲𑀼 𑀯𑀺𑀧𑀸𑀓𑀲𑀤𑁆𑀤𑀲𑁆𑀲 𑀦𑀺𑀭𑀼𑀴𑁆𑀳𑀢𑀁 𑀤𑀲𑁆𑀲𑁂𑀢𑀺. 𑀲𑀼𑀓𑁆𑀓𑀓𑀡𑁆𑀳𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀓𑀡𑁆𑀳𑀅𑀲𑀼𑀓𑁆𑀓𑀨𑀲𑁆𑀲𑀸𑀤𑀺𑀪𑀸𑀯𑁄 𑀧𑀭𑀺𑀕𑁆𑀕𑀳𑀺𑀢𑁄. 𑀲𑀢𑀺 𑀧𑀦 𑀧𑀸𑀓-𑀲𑀤𑁆𑀤𑀲𑁆𑀲 𑀨𑀮𑀧𑀭𑀺𑀬𑀸𑀬𑀪𑀸𑀯𑁂 𑀭𑀽𑀧𑀁 𑀯𑀺𑀬 𑀦 𑀦𑀺𑀳𑀻𑀦𑁄 𑀧𑀓𑁆𑀓𑀁 𑀯𑀺𑀬 𑀯𑀺𑀲𑀺𑀝𑁆𑀞𑁄 𑀧𑀸𑀓𑁄𑀢𑀺 𑀯𑀺𑀧𑀸𑀓𑁄𑀢𑀺 𑀏𑀯𑀁 𑀯𑀸 𑀏𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑀩𑁆𑀬𑀸𑀧𑀸𑀭𑀢𑀸𑀢𑀺 𑀲𑀉𑀲𑁆𑀲𑀸𑀳𑀢𑀸. 𑀲𑀦𑁆𑀢𑀸𑀦𑁂 𑀲𑀩𑁆𑀬𑀸𑀧𑀸𑀭𑀢𑀸𑀢𑀺 𑀏𑀢𑁂𑀦 𑀘𑀺𑀢𑁆𑀢𑀧𑁆𑀧𑀬𑁄𑀕𑀲𑀗𑁆𑀔𑀸𑀢𑁂𑀦 𑀓𑀺𑀭𑀺𑀬𑀸𑀪𑀸𑀯𑁂𑀦 𑀯𑀺𑀧𑀸𑀓𑀥𑀫𑁆𑀫𑀸𑀦𑀁 𑀲𑀦𑁆𑀢𑀸𑀦𑀯𑀺𑀲𑁂𑀲𑀫𑀸𑀳 ‘‘𑀬𑀢𑁄 𑀬𑀲𑁆𑀫𑀺𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀓𑀼𑀲𑀮𑀸𑀓𑀼𑀲𑀮𑀸 𑀘𑁂𑀢𑀦𑀸, 𑀢𑀁𑀲𑀦𑁆𑀢𑀸𑀦𑁂 𑀏𑀯 𑀢𑀲𑁆𑀲𑀸 𑀯𑀺𑀧𑀸𑀓𑀼𑀧𑁆𑀧𑀢𑁆𑀢𑀻’’𑀢𑀺. 𑀏𑀢𑁆𑀣 𑀘 ‘‘𑀲𑀩𑁆𑀬𑀸𑀧𑀸𑀭𑀢𑀸’’𑀢𑀺 𑀏𑀢𑁂𑀦 𑀆𑀯𑀚𑁆𑀚𑀦𑀤𑁆𑀯𑀬𑀁 𑀯𑀺𑀧𑀸𑀓𑀜𑁆𑀘 𑀦𑀺𑀯𑀢𑁆𑀢𑁂𑀢𑀺, ‘‘𑀅𑀦𑀼𑀧𑀘𑁆𑀙𑀺𑀦𑁆𑀦𑀸𑀯𑀺𑀚𑁆𑀚𑀸𑀢𑀡𑁆𑀳𑀸𑀫𑀸𑀦𑁂’’𑀢𑀺 𑀇𑀫𑀺𑀦𑀸 𑀅𑀯𑀲𑀺𑀝𑁆𑀞𑀁 𑀓𑀺𑀭𑀺𑀬𑀁 𑀦𑀺𑀯𑀢𑁆𑀢𑁂𑀢𑀺. 𑀉𑀪𑀬𑁂𑀦𑀧𑀺 𑀅𑀦𑀼𑀲𑀬𑀲𑀳𑀸𑀬𑀲𑀉𑀲𑁆𑀲𑀸𑀳𑀢𑀸𑀮𑀓𑁆𑀔𑀡𑀸 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸𑀢𑀺 𑀤𑀲𑁆𑀲𑁂𑀢𑀺. 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀸𑀦𑀫𑁆𑀧𑀺 𑀳𑀺 𑀅𑀦𑀼𑀲𑀬𑀸 𑀉𑀧𑀦𑀺𑀲𑁆𑀲𑀬𑀸 𑀳𑁄𑀦𑁆𑀢𑀺, 𑀬𑀢𑁄 ‘‘𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸? 𑀬𑀲𑁆𑀫𑀺𑀁 𑀲𑀫𑀬𑁂 𑀮𑁄𑀓𑀼𑀢𑁆𑀢𑀭𑀁…𑀧𑁂… 𑀢𑀲𑁆𑀫𑀺𑀁 𑀲𑀫𑀬𑁂 𑀅𑀯𑀺𑀚𑁆𑀚𑀸𑀧𑀘𑁆𑀘𑀬𑀸 𑀲𑀗𑁆𑀔𑀸𑀭𑀸’’𑀢𑀺𑀆𑀤𑀺𑀦𑀸 (𑀯𑀺𑀪. 𑁩𑁪𑁨) 𑀅𑀭𑀺𑀬𑀫𑀕𑁆𑀕𑀘𑁂𑀢𑀦𑀸𑀬 𑀅𑀯𑀺𑀚𑁆𑀚𑀸𑀉𑀧𑀦𑀺𑀲𑁆𑀲𑀬𑀢𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀺𑀪𑀗𑁆𑀕𑁂 𑀧𑀓𑀸𑀲𑀺𑀢𑀸. 𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢𑀪𑀸𑀯𑀮𑀓𑁆𑀔𑀡𑀸 𑀯𑀺𑀧𑀸𑀓𑀸, 𑀉𑀪𑀬𑀯𑀺𑀧𑀭𑀻𑀢𑀮𑀓𑁆𑀔𑀡𑀸 𑀦𑁂𑀯𑀯𑀺𑀧𑀸𑀓𑀦𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸𑀢𑀺.

𑀅𑀪𑀺𑀜𑁆𑀜𑀸𑀤𑀺𑀓𑀼𑀲𑀮𑀸𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀅𑀳𑁄𑀲𑀺 𑀓𑀫𑁆𑀫𑀁 𑀦𑀸𑀳𑁄𑀲𑀺 𑀓𑀫𑁆𑀫𑀯𑀺𑀧𑀸𑀓𑁄’’𑀢𑀺 (𑀧𑀝𑀺. 𑀫. 𑁧.𑁨𑁩𑁪) 𑀇𑀫𑀺𑀦𑀸 𑀢𑀺𑀓𑁂𑀦 𑀲𑀗𑁆𑀕𑀳𑀺𑀢𑀁 𑀕𑀢𑀺𑀉𑀧𑀥𑀺𑀓𑀸𑀮𑀧𑀬𑁄𑀕𑀸𑀪𑀸𑀯𑁂𑀦 𑀅𑀯𑀺𑀧𑀸𑀓𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀅𑀧𑀭𑀸𑀧𑀭𑀺𑀬𑀯𑁂𑀤𑀦𑀻𑀬𑀁 𑀧𑀦 𑀲𑀁𑀲𑀸𑀭𑀧𑁆𑀧𑀯𑀢𑁆𑀢𑀺𑀬𑀁 𑀅𑀳𑁄𑀲𑀺𑀓𑀫𑁆𑀫𑀸𑀤𑀺𑀪𑀸𑀯𑀁 𑀦 𑀪𑀚𑀢𑀺. 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀉𑀪𑀬𑀫𑁆𑀧𑀺 ‘‘𑀯𑀺𑀧𑀸𑀓𑀸𑀦𑀼𑀧𑁆𑀧𑀸𑀤𑀦𑁂’’𑀢𑀺 𑀯𑀘𑀦𑀢𑁄 𑀕𑀢𑀺𑀉𑀧𑀥𑀺𑀓𑀸𑀮𑀧𑀬𑁄𑀕𑀸𑀪𑀸𑀯𑁂𑀦 𑀅𑀦𑀼𑀧𑁆𑀧𑀦𑁆𑀦𑀯𑀺𑀧𑀸𑀓𑀫𑁂𑀯 𑀅𑀥𑀺𑀧𑁆𑀧𑁂𑀢𑀁 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀲𑁆𑀲𑀧𑀺 𑀧𑀯𑀢𑁆𑀢𑀺𑀯𑀺𑀧𑀸𑀓𑀲𑁆𑀲 𑀅𑀦𑀼𑀚𑀸𑀦𑀦𑀢𑁄. 𑀬𑁂𑀲𑀁 𑀧𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸 𑀅𑀯𑀺𑀧𑀸𑀓𑀸, 𑀢𑁂𑀲𑀁 𑀫𑀢𑁂𑀦 𑀆𑀤𑀺-𑀲𑀤𑁆𑀤𑁂𑀦 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀲𑁆𑀲 𑀅𑀳𑁄𑀲𑀺𑀓𑀫𑁆𑀫𑀦𑁆𑀢𑀺 𑀏𑀯𑀁𑀧𑀓𑀸𑀭𑀲𑁆𑀲𑁂𑀯 𑀧𑀭𑀺𑀕𑁆𑀕𑀳𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁪. ‘‘𑀓𑀣𑀫𑀸𑀤𑀺𑀦𑁆𑀦𑀸’’𑀢𑀺 𑀅𑀬𑀫𑁆𑀧𑀺 𑀧𑀜𑁆𑀳𑁄 𑀮𑀩𑁆𑀪𑀢𑀺. ‘‘𑀨𑀮𑀪𑀸𑀯𑁂𑀦𑀸’’𑀢𑀺 𑀳𑀺 𑀆𑀤𑀸𑀦𑀧𑁆𑀧𑀓𑀸𑀭𑀯𑀘𑀦𑀁. 𑀓𑁂𑀲𑀜𑁆𑀘𑀺 𑀕𑁄𑀢𑁆𑀭𑀪𑀼𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀻𑀦𑀁 𑀉𑀧𑁂𑀢𑀓𑀺𑀭𑀺𑀬𑀪𑀽𑀢𑀸𑀦𑀁 𑀢𑀁𑀓𑀢𑁆𑀢𑀼𑀪𑀽𑀢𑀸𑀦𑀜𑁆𑀘 𑀅𑀢𑁆𑀣𑀸𑀦𑀁 𑀉𑀧𑁂𑀢𑀩𑁆𑀩𑀲𑀫𑁆𑀩𑀦𑁆𑀥𑀪𑀸𑀯𑀢𑁄 𑀢𑀤𑀪𑀺𑀥𑀸𑀬𑀺𑀦𑁄𑀧𑀺 𑀲𑀤𑁆𑀤𑀸 𑀲𑀫𑁆𑀩𑀦𑁆𑀥𑀸 𑀏𑀯𑀸𑀢𑀺 ‘‘𑀉𑀧𑁂𑀢𑀲𑀤𑁆𑀤𑀲𑀫𑁆𑀩𑀦𑁆𑀥𑀺𑀦𑀸’’𑀢𑀺 𑀯𑀼𑀢𑁆𑀢𑀁. 𑀉𑀧𑁂𑀢𑀦𑁆𑀢𑀺 𑀳𑀺 𑀉𑀧𑁂𑀢𑀩𑁆𑀩𑀢𑁆𑀣𑁂 𑀯𑀼𑀘𑁆𑀘𑀫𑀸𑀦𑁂 𑀅𑀯𑀲𑁆𑀲𑀁 𑀉𑀧𑁂𑀢𑀓𑀺𑀭𑀺𑀬𑀸 𑀉𑀧𑁂𑀢𑀸 𑀘 𑀜𑀸𑀬𑀢𑀻𑀢𑀺. ‘‘𑀭𑀽𑀧𑀥𑀸𑀢𑀼𑀬𑀸 𑀔𑁄 𑀧𑀦, 𑀕𑀳𑀧𑀢𑀺, 𑀬𑁄 𑀙𑀦𑁆𑀤𑁄 𑀬𑁄 𑀭𑀸𑀕𑁄 𑀬𑀸 𑀦𑀦𑁆𑀤𑀻 𑀬𑀸 𑀢𑀡𑁆𑀳𑀸 𑀬𑁂 𑀉𑀧𑀬𑀼𑀧𑀸𑀤𑀸𑀦𑀸, 𑀘𑁂𑀢𑀲𑁄 𑀅𑀥𑀺𑀝𑁆𑀞𑀸𑀦𑀸 𑀅𑀪𑀺𑀦𑀺𑀯𑁂𑀲𑀸 𑀅𑀦𑀼𑀲𑀬𑀸’’𑀢𑀺𑀆𑀤𑀻𑀲𑀼 ‘‘𑀉𑀧𑀬𑁄’’𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀺𑀬𑁄 𑀅𑀥𑀺𑀧𑁆𑀧𑁂𑀢𑀸𑀢𑀺 𑀆𑀳 ‘‘𑀉𑀧𑀬…𑀧𑁂… 𑀤𑀺𑀝𑁆𑀞𑀻𑀳𑀻’’𑀢𑀺. 𑀬𑀣𑀸𑀲𑀫𑁆𑀪𑀯𑀦𑁆𑀢𑀺 ‘‘𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦𑀸’’𑀢𑀺𑀆𑀤𑀺𑀦𑀸 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀅𑀢𑁆𑀣𑁂𑀲𑀼 𑀬𑁄 𑀬𑁄 𑀲𑀫𑁆𑀪𑀯𑀢𑀺 𑀬𑁄𑀚𑁂𑀢𑀼𑀁, 𑀲𑁄 𑀲𑁄𑀢𑀺 𑀅𑀢𑁆𑀣𑁄. 𑀦 𑀯𑀘𑀦𑀸𑀦𑀼𑀧𑀼𑀩𑁆𑀩𑁂𑀦𑀸𑀢𑀺 ‘‘𑀓𑀺𑀁 𑀧𑀦 𑀢𑀁 𑀉𑀧𑁂𑀢’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀯𑀘𑀦𑀸𑀦𑀼𑀧𑀼𑀩𑁆𑀩𑁂𑀦 𑀦 𑀬𑁄𑀚𑁂𑀢𑀩𑁆𑀩𑁄. 𑀲𑀩𑁆𑀩𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀦𑁆𑀢𑀺 𑀲𑀩𑁆𑀩𑀢𑁂𑀪𑀽𑀫𑀓𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁. 𑀦𑀸𑀧𑀚𑁆𑀚𑀢𑀺 𑀲𑀸𑀫𑀜𑁆𑀜𑀚𑁄𑀢𑀦𑀸𑀬 𑀯𑀺𑀲𑁂𑀲𑁂 𑀅𑀯𑀝𑁆𑀞𑀸𑀦𑀢𑁄 𑀯𑀺𑀲𑁂𑀲𑀢𑁆𑀣𑀺𑀦𑀸 𑀘 𑀯𑀺𑀲𑁂𑀲𑁄 𑀅𑀦𑀼𑀧𑀬𑀼𑀚𑁆𑀚𑀢𑀻𑀢𑀺 𑀢𑀁 𑀧𑀦 𑀯𑀺𑀲𑁂𑀲𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀦𑀺𑀬𑀫𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀩𑁄𑀥𑀦𑁂𑀬𑁆𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀉𑀧𑁂𑀢𑀁 𑀤𑀻𑀧𑁂𑀢𑀻𑀢𑀺 𑀬𑀣𑀸 ‘‘𑀧𑀸𑀘𑀭𑀺𑀬𑁄’’𑀢𑀺 𑀏𑀢𑁆𑀣 𑀧𑀕𑀢𑁄 𑀆𑀘𑀭𑀺𑀬𑁄 𑀧𑀸𑀘𑀭𑀺𑀬𑁄𑀢𑀺 𑀧-𑀲𑀤𑁆𑀤𑁄 𑀧𑀕𑀢𑀁 𑀤𑀻𑀧𑁂𑀢𑀺, 𑀏𑀯𑀁 𑀉𑀧-𑀲𑀤𑁆𑀤𑁄 𑀉𑀧𑁂𑀢𑀁 𑀤𑀻𑀧𑁂𑀢𑀺 𑀏𑀯, 𑀦 𑀘𑁂𑀢𑁆𑀣 𑀕𑀢𑀸𑀤𑀺𑀅𑀢𑁆𑀣𑀸𑀦𑀁 𑀏𑀓𑀦𑁆𑀢𑁂𑀦 𑀧𑀘𑁆𑀘𑀢𑁆𑀢𑀯𑀘𑀦𑀬𑁄𑀕𑁄 𑀇𑀘𑁆𑀙𑀺𑀢𑁄𑀢𑀺. 𑀅𑀢𑀺𑀲𑀤𑁆𑀤𑁄 𑀯𑀺𑀬𑀸𑀢𑀺 𑀘 𑀇𑀤𑀁 𑀲𑀲𑀸𑀥𑀦𑀓𑀺𑀭𑀺𑀬𑀸𑀤𑀻𑀧𑀦𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀘𑁆𑀘𑀬𑀪𑀸𑀯𑁂𑀦𑀸𑀢𑀺 𑀏𑀢𑁂𑀦 𑀧𑀼𑀭𑀺𑀫𑀦𑀺𑀩𑁆𑀩𑀢𑁆𑀢𑀺𑀁 𑀯𑀺𑀲𑁂𑀲𑁂𑀢𑀺. 𑀢𑁂𑀦 𑀲𑀳𑀚𑀸𑀢𑀲𑁆𑀲𑀧𑀺 𑀉𑀧𑀸𑀤𑀸𑀦𑀲𑁆𑀲 𑀲𑀗𑁆𑀕𑀳𑁄 𑀓𑀢𑁄 𑀳𑁄𑀢𑀺. 𑀲𑀳𑀚𑀸𑀢𑁄𑀧𑀺 𑀳𑀺 𑀥𑀫𑁆𑀫𑁄 𑀧𑀘𑁆𑀘𑀬𑀪𑀽𑀢𑁄 𑀧𑀼𑀭𑀺𑀫𑀦𑀺𑀧𑁆𑀨𑀦𑁆𑀦𑁄 𑀯𑀺𑀬 𑀯𑁄𑀳𑀭𑀻𑀬𑀢𑀺 𑀬𑀣𑀸 ‘‘𑀏𑀓𑀁 𑀫𑀳𑀸𑀪𑀽𑀢𑀁 𑀧𑀝𑀺𑀘𑁆𑀘 𑀢𑀬𑁄 𑀫𑀳𑀸𑀪𑀽𑀢𑀸’’𑀢𑀺, ‘‘𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘 𑀢𑀬𑁄 𑀔𑀦𑁆𑀥𑀸’’𑀢𑀺 (𑀧𑀝𑁆𑀞𑀸. 𑁧.𑁧.𑁫𑁩) 𑀘. 𑀥𑀸𑀢𑀼𑀓𑀣𑀸𑀬𑀁 𑀧𑀓𑀸𑀲𑀺𑀢𑀦𑁆𑀢𑀺 ‘‘𑀉𑀧𑀧𑀢𑁆𑀢𑀺𑀪𑀯𑁄 𑀧𑀜𑁆𑀘𑀳𑀺 𑀔𑀦𑁆𑀥𑁂𑀳𑀺 𑀏𑀓𑀸𑀤𑀲𑀳𑀸𑀬𑀢𑀦𑁂𑀳𑀺 𑀲𑀢𑁆𑀢𑀭𑀲𑀳𑀺 𑀥𑀸𑀢𑀽𑀳𑀺 𑀲𑀗𑁆𑀕𑀳𑀺𑀢𑁄. 𑀓𑀢𑀺𑀳𑀺 𑀅𑀲𑀗𑁆𑀕𑀳𑀺𑀢𑁄. 𑀦 𑀓𑁂𑀳𑀺𑀘𑀺 𑀔𑀦𑁆𑀥𑁂𑀳𑀺 𑀏𑀓𑁂𑀦𑀸𑀬𑀢𑀦𑁂𑀦 𑀏𑀓𑀸𑀬 𑀥𑀸𑀢𑀼𑀬𑀸 𑀅𑀲𑀗𑁆𑀕𑀳𑀺𑀢𑁄’’𑀢𑀺 (𑀥𑀸𑀢𑀼. 𑁬𑁭) 𑀏𑀯𑀫𑀸𑀤𑀺𑀁 𑀲𑀦𑁆𑀥𑀸𑀬𑀸𑀳. 𑀢𑀲𑁆𑀫𑀸 𑀏𑀯𑀸𑀢𑀺 𑀉𑀧𑀸𑀤𑀺𑀦𑁆𑀦𑀲𑀤𑁆𑀤𑀸𑀦𑀧𑁂𑀓𑁆𑀔𑀢𑁆𑀢𑀸 𑀏𑀯. 𑀅𑀯𑀺𑀲𑁂𑀲𑁂𑀢𑁆𑀯𑀸𑀢𑀺 𑀉𑀧𑀸𑀤𑀺𑀦𑁆𑀦𑀸𑀦𑀼𑀧𑀸𑀤𑀺𑀦𑁆𑀦𑀯𑀺𑀲𑁂𑀲𑀁 𑀅𑀓𑀢𑁆𑀯𑀸. 𑀉𑀧𑀸𑀤𑀸𑀦𑀸𑀦𑀁 𑀆𑀭𑀫𑁆𑀫𑀡𑀪𑀸𑀯𑀸𑀦𑀢𑀺𑀯𑀢𑁆𑀢𑀦𑀢𑁄 𑀉𑀧𑀸𑀤𑀸𑀦𑁂𑀳𑀺 𑀉𑀧𑀸𑀤𑀸𑀢𑀩𑁆𑀩𑀸𑀢𑀺 𑀯𑀸 𑀉𑀧𑀸𑀤𑀸𑀦𑀺𑀬𑀸, 𑀉𑀧𑀸𑀤𑀸𑀢𑀼𑀁 𑀯𑀸 𑀅𑀭𑀳𑀦𑁆𑀢𑀻𑀢𑀺 𑀉𑀧𑀸𑀤𑀸𑀦𑀺𑀬𑀸, 𑀉𑀧𑀸𑀤𑀸𑀦𑁂 𑀦𑀺𑀬𑀼𑀢𑁆𑀢𑀸𑀢𑀺 𑀯𑀸 𑀉𑀧𑀸𑀤𑀸𑀦𑀺𑀬𑀸 𑀓-𑀓𑀸𑀭𑀲𑁆𑀲 𑀬-𑀓𑀸𑀭𑀁 𑀓𑀢𑁆𑀯𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄𑀢𑀺.

𑁫. 𑀯𑀺𑀩𑀸𑀥𑀦𑀁 𑀧𑀻𑀴𑀦𑀁 𑀓𑀺𑀮𑀫𑀦𑀁 𑀉𑀧𑀢𑀸𑀧𑁄 𑀧𑀭𑀺𑀴𑀸𑀳𑁄 𑀅𑀧𑁆𑀧𑀲𑁆𑀲𑀤𑁆𑀥𑀺𑀪𑀸𑀯𑁄. 𑀯𑀺𑀤𑀽𑀲𑀺𑀢𑀸 𑀫𑀮𑀻𑀦𑀸 𑀘 𑀬𑀢𑁄 𑀓𑁂𑀘𑀺 𑀅𑀓𑀺𑀮𑁂𑀲𑀲𑀪𑀸𑀯𑀸𑀧𑀺 𑀅𑀦𑀺𑀝𑁆𑀞𑀨𑀮𑀸 𑀕𑀸𑀭𑀬𑁆𑀳𑀸 𑀘 𑀚𑀸𑀢𑀸.

𑁬. ‘‘𑀲𑀻𑀮𑀫𑀢𑁆𑀢𑀓𑀁, 𑀧𑀭𑀁 𑀯𑀺𑀬 𑀫𑀢𑁆𑀢𑀸𑀬𑀸’’𑀢𑀺𑀆𑀤𑀻𑀲𑀼 𑀫𑀢𑁆𑀢𑀸-𑀲𑀤𑁆𑀤𑀲𑁆𑀲 𑀧𑀫𑀸𑀡𑀯𑀸𑀘𑀓𑀢𑀸 𑀤𑀝𑁆𑀞𑀩𑁆𑀩𑀸. 𑀫𑀭𑀺𑀬𑀸𑀤𑀯𑀸𑀘𑀓𑁄 𑀯𑀸 𑀫𑀢𑁆𑀢𑀸-𑀲𑀤𑁆𑀤𑁄. 𑀯𑀺𑀘𑀸𑀭𑁄 𑀳𑁂𑀢𑁆𑀣 𑀛𑀸𑀦𑀗𑁆𑀕𑁂𑀲𑀼 𑀳𑁂𑀝𑁆𑀞𑀺𑀫𑀫𑀭𑀺𑀬𑀸𑀤𑁄, 𑀦 𑀧𑀞𑀫𑀚𑁆𑀛𑀸𑀦𑀉𑀧𑀘𑀸𑀭𑀚𑁆𑀛𑀸𑀦𑁂𑀲𑀼 𑀯𑀺𑀬 𑀯𑀺𑀢𑀓𑁆𑀓𑁄. 𑀲𑀸 𑀧𑀦 𑀯𑀺𑀘𑀸𑀭𑀫𑀭𑀺𑀬𑀸𑀤𑀢𑀸 𑀯𑀺𑀢𑀓𑁆𑀓𑀸𑀪𑀸𑀯𑁂𑀦 𑀏𑀢𑁂𑀲𑀁 𑀚𑀸𑀢𑀸𑀢𑀺 𑀅𑀯𑀺𑀢𑀓𑁆𑀓𑀕𑁆𑀕𑀳𑀡𑀁 𑀓𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀅𑀯𑀺𑀢𑀓𑁆𑀓𑀸 𑀳𑀼𑀢𑁆𑀯𑀸 𑀯𑀺𑀘𑀸𑀭𑀫𑀭𑀺𑀬𑀸𑀤𑀛𑀸𑀦𑀗𑁆𑀕𑁂𑀲𑀼 𑀯𑀺𑀘𑀸𑀭𑀳𑁂𑀝𑁆𑀞𑀺𑀫𑀓𑁄𑀝𑀺𑀓𑀸𑀢𑀺. 𑀅𑀣 𑀯𑀸 𑀈𑀲𑀤𑀢𑁆𑀣𑁄 𑀫𑀢𑁆𑀢𑀸-𑀲𑀤𑁆𑀤𑁄 ‘‘𑀫𑀢𑁆𑀢𑀸𑀲𑀼𑀔𑀧𑀭𑀺𑀘𑁆𑀘𑀸𑀕𑀸’’𑀢𑀺𑀆𑀤𑀻𑀲𑀼 (𑀥. 𑀧. 𑁨𑁯𑁦) 𑀯𑀺𑀬. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀯𑀺𑀢𑀓𑁆𑀓𑀭𑀳𑀺𑀢𑀸 𑀪𑀸𑀯𑀦𑀸𑀬 𑀅𑀢𑀺𑀲𑀼𑀔𑀼𑀫𑀪𑀽𑀢𑀯𑀺𑀘𑀸𑀭𑀢𑁆𑀢𑀸 𑀈𑀲𑀁 𑀯𑀺𑀘𑀸𑀭𑀸 𑀘 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀸𑀢𑀺. 𑀦 𑀳𑀺 𑀇𑀢𑁄 𑀧𑀭𑀁 𑀯𑀺𑀘𑀸𑀭𑁄 𑀅𑀢𑁆𑀣𑀻𑀢𑀺. 𑀬𑀤𑀺 𑀯𑀺𑀢𑀓𑁆𑀓𑀯𑀺𑀲𑁂𑀲𑀭𑀳𑀺𑀢𑀸 𑀯𑀺𑀘𑀸𑀭𑀫𑀢𑁆𑀢𑀸, 𑀏𑀯𑀁 𑀲𑀦𑁆𑀢𑁂 𑀅𑀯𑀺𑀢𑀓𑁆𑀓𑀯𑀘𑀦𑀁 𑀓𑀺𑀫𑀢𑁆𑀣𑀺𑀬𑀦𑁆𑀢𑀺 𑀆𑀳 ‘‘𑀯𑀺𑀘𑀸𑀭𑀫𑀢𑁆𑀢𑀯𑀘𑀦𑁂𑀦𑀸’’𑀢𑀺𑀆𑀤𑀺. 𑀬𑀤𑀺 𑀯𑀺𑀘𑀸𑀭𑀫𑀢𑁆𑀢𑀢𑁄 𑀅𑀜𑁆𑀜𑁂𑀲𑀫𑁆𑀧𑀺 𑀅𑀯𑀺𑀢𑀓𑁆𑀓𑀸𑀦𑀁 𑀅𑀢𑁆𑀣𑀺𑀪𑀸𑀯𑀚𑁄𑀢𑀦𑀢𑁆𑀣𑀁 𑀅𑀯𑀺𑀢𑀓𑁆𑀓𑀯𑀘𑀦𑀁, 𑀅𑀯𑀺𑀢𑀓𑁆𑀓𑀸 𑀘 𑀯𑀺𑀘𑀸𑀭𑀫𑀢𑁆𑀢𑀸 𑀅𑀯𑀺𑀘𑀸𑀭𑀸𑀢𑀺 𑀦𑀺𑀯𑀢𑁆𑀢𑁂𑀢𑀩𑁆𑀩𑀸 𑀕𑀳𑁂𑀢𑀩𑁆𑀩𑀸 𑀘, 𑀏𑀯𑀁 𑀲𑀢𑀺 𑀯𑀺𑀘𑀸𑀭𑀫𑀢𑁆𑀢𑀸 𑀯𑀺𑀲𑁂𑀲𑀦𑀁, 𑀅𑀯𑀺𑀢𑀓𑁆𑀓𑀸 𑀯𑀺𑀲𑁂𑀲𑀺𑀢𑀩𑁆𑀩𑀸𑀢𑀺 𑀯𑀺𑀘𑀸𑀭𑀫𑀢𑁆𑀢𑀸𑀯𑀺𑀢𑀓𑁆𑀓𑀸𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁄’’𑀢𑀺𑀆𑀤𑀺. 𑀬𑀣𑀸𑀓𑀸𑀫𑀦𑁆𑀢𑀺 𑀯𑀢𑁆𑀢𑀼𑀇𑀘𑁆𑀙𑀸𑀦𑀼𑀭𑀽𑀧𑀁. 𑀬𑁂𑀦 𑀬𑁂𑀦 𑀳𑀺 𑀧𑀓𑀸𑀭𑁂𑀦 𑀥𑀫𑁆𑀫𑁂𑀲𑀼 𑀦𑀺𑀯𑀢𑁆𑀢𑁂𑀢𑀩𑁆𑀩𑀕𑀳𑁂𑀢𑀩𑁆𑀩𑀪𑀸𑀯𑀸 𑀮𑀩𑁆𑀪𑀦𑁆𑀢𑀺, 𑀢𑁂𑀦 𑀢𑁂𑀦 𑀧𑀓𑀸𑀭𑁂𑀦 𑀯𑀺𑀲𑁂𑀲𑀦𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑁄 𑀲𑀫𑁆𑀪𑀯𑀢𑀻𑀢𑀺. 𑀧𑀤𑀸𑀦𑀁 𑀅𑀦𑀼𑀓𑁆𑀓𑀫𑁄 𑀧𑀤𑀸𑀦𑀼𑀓𑁆𑀓𑀫𑁄.

𑀅𑀯𑀺𑀢𑀓𑁆𑀓𑀸 𑀲𑀯𑀺𑀢𑀓𑁆𑀓𑀸 𑀘 𑀲𑀯𑀺𑀘𑀸𑀭𑀸 𑀅𑀯𑀺𑀘𑀸𑀭𑀸 𑀘𑀸𑀢𑀺 𑀅𑀯𑀺𑀢𑀓𑁆𑀓𑀸𑀲𑀯𑀺𑀘𑀸𑀭𑀸 𑀲𑀯𑀺𑀢𑀓𑁆𑀓𑀸 𑀅𑀯𑀺𑀘𑀸𑀭𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀉𑀪𑀬𑁂𑀓𑀤𑁂𑀲𑀤𑀲𑁆𑀲𑀦𑀫𑁆𑀧𑀺 𑀉𑀪𑀬𑀤𑀲𑁆𑀲𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀬𑀤𑀺 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀇𑀢𑀭𑀫𑁆𑀧𑀺 𑀧𑀓𑀸𑀲𑁂𑀢𑀼𑀦𑁆𑀢𑀺 𑀇𑀤𑀁 𑀬𑀣𑀸 𑀲𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑁂𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀯𑀺𑀢𑀓𑁆𑀓𑁄 𑀅𑀯𑀺𑀢𑀓𑁆𑀓𑀲𑀯𑀺𑀘𑀸𑀭𑀢𑀸𑀬 ‘‘𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑁄’’𑀢𑀺 𑀯𑀼𑀢𑁆𑀢𑁄, 𑀏𑀯𑀁 𑀬𑀣𑀸𑀯𑀼𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀯𑀺𑀘𑀸𑀭𑁄 ‘‘𑀲𑀯𑀺𑀢𑀓𑁆𑀓𑀅𑀯𑀺𑀘𑀸𑀭𑁄’’𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀯𑀺𑀢𑀓𑁆𑀓𑀸𑀪𑀸𑀯𑁂𑀦 𑀏𑀢𑁂 𑀯𑀺𑀘𑀸𑀭𑀫𑀢𑁆𑀢𑀸𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀺𑀲𑁂𑀲𑀦𑀺𑀯𑀢𑁆𑀢𑀺𑀅𑀢𑁆𑀣𑀁𑀬𑁂𑀯 𑀫𑀢𑁆𑀢𑀸-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑁄. 𑀯𑀺𑀘𑀸𑀭𑀫𑀢𑁆𑀢𑀸𑀢𑀺 𑀳𑀺 𑀯𑀺𑀘𑀸𑀭𑀫𑀢𑁆𑀢𑀯𑀦𑁆𑀢𑁄𑀢𑀺 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸 𑀢𑀤𑀜𑁆𑀜𑀯𑀺𑀲𑁂𑀲𑀯𑀺𑀭𑀳𑀲𑀸𑀫𑀜𑁆𑀜𑀢𑁄 𑀦𑀺𑀯𑀢𑁆𑀢𑁂𑀢𑁆𑀯𑀸 𑀯𑀺𑀢𑀓𑁆𑀓𑀯𑀺𑀲𑁂𑀲𑀯𑀺𑀭𑀳𑀲𑀗𑁆𑀔𑀸𑀢𑁂 𑀅𑀯𑀺𑀢𑀓𑁆𑀓-𑀲𑀤𑁆𑀤𑁄 𑀲𑀦𑁆𑀦𑀺𑀥𑀸𑀧𑀺𑀢𑁄 𑀯𑀺𑀲𑁂𑀲𑁂𑀢𑀺 𑀤𑀼𑀢𑀺𑀬𑀚𑁆𑀛𑀸𑀦𑀥𑀫𑁆𑀫𑁂𑀢𑀺. 𑀬𑀣𑀸𑀳 ‘‘𑀦 𑀯𑀺𑀘𑀸𑀭𑀢𑁄’’𑀢𑀺𑀆𑀤𑀺.

𑁭. 𑀯𑁂𑀤𑀬𑀫𑀸𑀦𑀸𑀢𑀺 𑀅𑀦𑀼𑀪𑀯𑀫𑀸𑀦𑀸. 𑀲𑀼𑀔𑀸𑀓𑀸𑀭𑁂𑀢𑀺 𑀇𑀝𑁆𑀞𑀸𑀓𑀸𑀭𑁂, 𑀇𑀝𑁆𑀞𑀸𑀦𑀼𑀪𑀯𑀦𑀸𑀓𑀸𑀭𑁂 𑀯𑀸. 𑀉𑀤𑀸𑀲𑀺𑀦𑀸𑀢𑀺 𑀦𑀢𑀺𑀅𑀧𑀦𑀢𑀺𑀭𑀳𑀺𑀢𑀸. 𑀲𑀼𑀔𑀤𑀼𑀓𑁆𑀔𑀸𑀦𑀁 𑀅𑀯𑀺𑀭𑀼𑀤𑁆𑀥𑀸 𑀢𑁂𑀲𑀁 𑀩𑁆𑀬𑀯𑀥𑀸𑀬𑀺𑀓𑀸𑀪𑀸𑀯𑀢𑁄. 𑀲𑀼𑀔𑀤𑀼𑀓𑁆𑀔𑀸𑀦𑀺 𑀯𑀺𑀬 𑀳𑀺 𑀲𑀼𑀔𑀤𑀼𑀓𑁆𑀔𑀸𑀦𑀁 𑀅𑀦𑀦𑁆𑀢𑀭𑀁 𑀧𑀯𑀢𑁆𑀢𑀦𑀢𑁄 𑀩𑁆𑀬𑀯𑀥𑀸𑀬𑀺𑀓𑀸𑀪𑀽𑀢𑀸 𑀦 𑀢𑁂𑀳𑀺 𑀯𑀺𑀭𑀼𑀚𑁆𑀛𑀢𑀺, 𑀦 𑀧𑀦 𑀲𑀼𑀔𑀤𑀼𑀓𑁆𑀔𑀸𑀦𑀺 𑀅𑀦𑀦𑁆𑀢𑀭𑀸𑀧𑀯𑀢𑁆𑀢𑀺𑀢𑁄. ‘‘𑀉𑀧𑀧𑀢𑁆𑀢𑀺𑀢𑁄 𑀇𑀓𑁆𑀔𑀢𑀻𑀢𑀺 𑀉𑀧𑁂𑀓𑁆𑀔𑀸’’𑀢𑀺 𑀅𑀬𑀁 𑀧𑀦𑀢𑁆𑀣𑁄 𑀇𑀥 𑀉𑀧𑁂𑀓𑁆𑀔𑀸-𑀲𑀤𑁆𑀤𑀲𑁆𑀲 𑀲𑀩𑁆𑀩𑀼𑀧𑁂𑀓𑁆𑀔𑀸𑀧𑀭𑀺𑀬𑀸𑀤𑀸𑀦𑀢𑁄 𑀦 𑀯𑀼𑀢𑁆𑀢𑁄. 𑀦 𑀳𑀺 𑀮𑁄𑀪𑀲𑀫𑁆𑀧𑀬𑀼𑀢𑁆𑀢𑀸𑀤𑀺𑀉𑀧𑁂𑀓𑁆𑀔𑀸 𑀉𑀧𑀧𑀢𑁆𑀢𑀺𑀢𑁄 𑀇𑀓𑁆𑀔𑀢𑀻𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀧𑀻𑀢𑀺𑀲𑀳𑀕𑀢𑀸𑀬𑁂𑀯 𑀦 𑀲𑀼𑀔𑀲𑀳𑀕𑀢𑀸, 𑀲𑀼𑀔𑀲𑀳𑀕𑀢𑀸𑀧𑀺 𑀦 𑀧𑀻𑀢𑀺𑀲𑀳𑀕𑀢𑀸 𑀏𑀯𑀸𑀢𑀺 𑀧𑀻𑀢𑀺𑀲𑀳𑀕𑀢𑀸 𑀲𑀼𑀔𑀲𑀳𑀕𑀢𑀸 𑀘 𑀅𑀜𑁆𑀜𑀫𑀜𑁆𑀜𑀁 𑀪𑀺𑀦𑁆𑀦𑀸, 𑀢𑀲𑁆𑀫𑀸. 𑀲𑀢𑀺𑀧𑀺 𑀲𑀼𑀔𑀲𑀳𑀕𑀢𑀸𑀦𑀁 𑀬𑁂𑀪𑀼𑀬𑁆𑀬𑁂𑀦 𑀧𑀻𑀢𑀺𑀲𑀳𑀕𑀢𑀪𑀸𑀯𑁂 𑀬𑁂𑀦 𑀲𑀼𑀔𑁂𑀦 𑀲𑀫𑀦𑁆𑀦𑀸𑀕𑀢𑀸 𑀲𑀼𑀔𑀲𑀳𑀕𑀢𑀸 𑀏𑀯 𑀳𑁄𑀦𑁆𑀢𑀺, 𑀦 𑀧𑀻𑀢𑀺𑀲𑀳𑀕𑀢𑀸, 𑀢𑀁 𑀲𑀼𑀔𑀁 𑀦𑀺𑀧𑁆𑀧𑀻𑀢𑀺𑀓𑀲𑀼𑀔𑀦𑁆𑀢𑀺 𑀅𑀬𑀁 𑀯𑀺𑀲𑁂𑀲𑁄 𑀇𑀫𑀺𑀦𑀸 𑀢𑀺𑀓𑁂𑀦 𑀤𑀲𑁆𑀲𑀺𑀢𑁄𑀢𑀺 𑀇𑀫𑀫𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀧𑀻𑀢𑀺𑀲𑀳𑀕𑀢𑀸𑀢𑀺 𑀯𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳.

𑀲𑀺𑀤𑁆𑀥𑁄𑀢𑀺 𑀲𑀸𑀯𑀲𑁂𑀲𑀁 𑀦𑀺𑀭𑀯𑀲𑁂𑀲𑀜𑁆𑀘 𑀲𑀼𑀔𑀧𑀻𑀢𑀺𑀬𑁄 𑀲𑀗𑁆𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑁂𑀳𑀺 𑀧𑀞𑀫𑀤𑀼𑀢𑀺𑀬𑀧𑀤𑁂𑀳𑀺 𑀬𑁄 𑀧𑀻𑀢𑀺𑀲𑀳𑀕𑀢𑁄 𑀥𑀫𑁆𑀫𑀯𑀺𑀲𑁂𑀲𑁄, 𑀢𑀁 𑀲𑀼𑀔𑀁, 𑀬𑁄 𑀘 𑀲𑀼𑀔𑀲𑀳𑀕𑀢𑁄 𑀥𑀫𑁆𑀫𑀯𑀺𑀲𑁂𑀲𑁄, 𑀲𑀸 𑀧𑀻𑀢𑀻𑀢𑀺 𑀲𑀢𑀺𑀧𑀺 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀝𑁆𑀞𑀪𑀸𑀯𑁂 𑀧𑀤𑀦𑁆𑀢𑀭𑀲𑀗𑁆𑀕𑀳𑀺𑀢𑀪𑀸𑀯𑀤𑀻𑀧𑀦𑀢𑁄𑀲𑀺𑀤𑁆𑀥𑁄 𑀜𑀸𑀢𑁄 𑀯𑀺𑀤𑀺𑀢𑁄𑀢𑀺 𑀅𑀢𑁆𑀣𑁄. ‘‘𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀼𑀔𑀁 𑀅𑀢𑀺𑀧𑀡𑀻𑀢𑀲𑀼𑀔𑀦𑁆𑀢𑀺 𑀑𑀴𑀸𑀭𑀺𑀓𑀗𑁆𑀕𑀢𑁄 𑀦𑀻𑀳𑀭𑀺𑀢𑁆𑀯𑀸 𑀢𑀲𑁆𑀲 𑀧𑀡𑀻𑀢𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 𑀅𑀬𑀁 𑀢𑀺𑀓𑁄 𑀯𑀼𑀢𑁆𑀢𑁄’’𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀢𑀤𑁂𑀢𑀁 𑀲𑀩𑁆𑀩𑁂𑀲𑀁 𑀲𑀼𑀔𑀯𑁂𑀤𑀦𑀸𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀇𑀥 ‘‘𑀲𑀼𑀔𑀲𑀳𑀕𑀢𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀢𑀣𑀸 𑀳𑀺 ‘‘𑀲𑀼𑀔𑀪𑀽𑀫𑀺𑀬𑀁 𑀓𑀸𑀫𑀸𑀯𑀘𑀭𑁂’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁨𑁮𑁩) ‘‘𑀓𑀸𑀫𑀸𑀯𑀘𑀭𑀓𑀼𑀲𑀮𑀢𑁄 𑀘𑀢𑁆𑀢𑀸𑀭𑁄 𑀲𑁄𑀫𑀦𑀲𑁆𑀲𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁫𑁯𑁮) 𑀘 𑀦𑀺𑀤𑁆𑀤𑁂𑀲𑁄 𑀧𑀯𑀢𑁆𑀢𑁄𑀢𑀺.

𑁮. 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑀁 𑀲𑀦𑁆𑀥𑀸𑀬𑀸𑀳, 𑀦 𑀦𑀺𑀩𑁆𑀩𑀸𑀦𑀧𑀝𑀺𑀯𑀺𑀚𑁆𑀛𑀦𑀁, 𑀇𑀢𑀭𑀣𑀸 𑀕𑁄𑀢𑁆𑀭𑀪𑀼𑀲𑁆𑀲 𑀤𑀲𑁆𑀲𑀦𑀪𑀸𑀯𑀸𑀧𑀢𑁆𑀢𑀺 𑀅𑀘𑁄𑀤𑀦𑀻𑀬𑀸 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀦𑀼 𑀘 𑀤𑀺𑀲𑁆𑀯𑀸 𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀓𑀭𑀡𑁂𑀦 𑀲𑁄𑀢𑀸𑀧𑀢𑁆𑀢𑀺𑀫𑀕𑁆𑀕𑁄𑀯 𑀤𑀲𑁆𑀲𑀦𑀦𑁆𑀢𑀺 𑀉𑀓𑁆𑀓𑀁𑀲𑀕𑀢𑀺𑀯𑀺𑀚𑀸𑀦𑀦𑁂𑀦 𑀦𑀺𑀩𑁆𑀩𑀸𑀦𑀲𑁆𑀲 𑀧𑀝𑀺𑀯𑀺𑀚𑁆𑀛𑀦𑀫𑁂𑀯 𑀤𑀲𑁆𑀲𑀦𑀦𑁆𑀢𑀺 𑀕𑁄𑀢𑁆𑀭𑀪𑀼𑀲𑁆𑀲 𑀤𑀲𑁆𑀲𑀦𑀪𑀸𑀯𑀸𑀧𑀢𑁆𑀢𑀺 𑀦 𑀘𑁄𑀤𑁂𑀢𑀩𑁆𑀩𑀸𑀯𑀸𑀢𑀺? 𑀦, 𑀤𑀲𑁆𑀲𑀦𑀲𑀸𑀫𑀜𑁆𑀜𑀲𑁆𑀲𑁂𑀯 𑀲𑀼𑀬𑁆𑀬𑀫𑀸𑀦𑀢𑁆𑀢𑀸 𑀤𑀲𑁆𑀲𑀦𑀓𑀢𑁆𑀢𑀩𑁆𑀩𑀓𑀺𑀘𑁆𑀘𑀓𑀭𑀡𑀸𑀦𑀜𑁆𑀘 𑀪𑁂𑀤𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀢𑀢𑁆𑀣 𑀬𑀤𑀺𑀧𑀺 ‘‘𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀻’’𑀢𑀺𑀆𑀤𑀻𑀲𑀼 (𑀫. 𑀦𑀺. 𑁨.𑁧𑁮𑁨) 𑀯𑀺𑀬 𑀅𑀪𑀺𑀦𑁆𑀦𑀓𑀸𑀮𑀲𑁆𑀲𑀧𑀺 𑀪𑀺𑀦𑁆𑀦𑀓𑀸𑀮𑀲𑁆𑀲 𑀯𑀺𑀬 𑀪𑁂𑀤𑁄𑀧𑀘𑀸𑀭𑀤𑀲𑁆𑀲𑀦𑀢𑁄 𑀪𑁂𑀤𑀯𑀘𑀦𑀁 𑀬𑀼𑀢𑁆𑀢𑀁, 𑀤𑀲𑁆𑀲𑀦𑀯𑀺𑀲𑁂𑀲𑁂 𑀧𑀦 𑀅𑀥𑀺𑀧𑁆𑀧𑁂𑀢𑁂 𑀤𑀲𑁆𑀲𑀦𑀲𑀸𑀫𑀜𑁆𑀜𑀯𑀘𑀦𑀁 𑀦 𑀓𑀢𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑀦𑀲𑀸𑀫𑀜𑁆𑀜𑀫𑀢𑁆𑀢𑀁 𑀕𑀳𑁂𑀢𑁆𑀯𑀸 𑀘𑁄𑀤𑀦𑀸 𑀓𑀢𑀸𑀢𑀺 ‘‘𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑀁 𑀲𑀦𑁆𑀥𑀸𑀬𑀸𑀳𑀸’’𑀢𑀺 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀢𑀢𑀺𑀬𑀫𑀕𑁆𑀕𑀸𑀦𑀫𑁆𑀧𑀺 𑀥𑀫𑁆𑀫𑀘𑀓𑁆𑀔𑀼𑀧𑀭𑀺𑀬𑀸𑀬𑀲𑀩𑁆𑀪𑀸𑀯𑀢𑁄 ‘‘𑀪𑀸𑀯𑀦𑀸𑀪𑀸𑀯𑀁 𑀅𑀧𑁆𑀧𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀪𑀸𑀯𑀦𑀸 𑀯𑀟𑁆𑀠𑀦𑀸. 𑀲𑀸 𑀘 𑀩𑀳𑀼𑀮𑀁 𑀉𑀧𑁆𑀧𑀢𑁆𑀢𑀺𑀬𑀸 𑀳𑁄𑀢𑀻𑀢𑀺 𑀆𑀳 ‘‘𑀧𑀼𑀦𑀧𑁆𑀧𑀼𑀦𑀁 𑀦𑀺𑀩𑁆𑀩𑀢𑁆𑀢𑀦𑁂𑀦𑀸’’𑀢𑀺. 𑀢𑀣𑀸 𑀳𑀺 𑀲𑀢𑀻𑀢𑀺 ‘‘𑀉𑀪𑀬𑀧𑀝𑀺𑀓𑁆𑀔𑁂𑀧𑀯𑀲𑁂𑀦𑀸’’𑀢𑀺 𑀧𑀤𑀲𑁆𑀲 𑀤𑀲𑁆𑀲𑀦𑀪𑀸𑀯𑀦𑀸𑀧𑀝𑀺𑀓𑁆𑀔𑁂𑀧𑀯𑀲𑁂𑀦𑀸𑀢𑀺 𑀅𑀢𑁆𑀣𑁂 𑀲𑀢𑀺. 𑀦𑀦𑀼 𑀮𑁄𑀓𑀺𑀬𑀲𑀫𑀣𑀯𑀺𑀧𑀲𑁆𑀲𑀦𑀸𑀧𑀺 𑀬𑀣𑀸𑀩𑀮𑀁 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀦𑀁 𑀧𑀳𑀸𑀬𑀓𑀸, 𑀢𑀢𑁆𑀭 𑀓𑀣𑀫𑀺𑀤𑀁 𑀯𑀼𑀢𑁆𑀢𑀁, 𑀦 𑀘 𑀅𑀜𑁆𑀜𑁄 𑀧𑀳𑀸𑀬𑀓𑁄 𑀅𑀢𑁆𑀣𑀻𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀅𑀜𑁆𑀜𑁂𑀳𑀻’’𑀢𑀺𑀆𑀤𑀺.

𑁯. 𑀅𑀧𑁆𑀧𑀳𑀸𑀢𑀩𑁆𑀩𑀳𑁂𑀢𑀼𑀫𑀢𑁆𑀢𑁂𑀲𑀽𑀢𑀺 𑀅𑀧𑁆𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀫𑀢𑁆𑀢𑁂𑀲𑀼. 𑀲𑀩𑁆𑀩𑁄 𑀓𑀼𑀲𑀮𑀸𑀩𑁆𑀬𑀸𑀓𑀢𑀥𑀫𑁆𑀫𑁄 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑁄. 𑀲𑀫𑀸𑀲𑁄 𑀦 𑀉𑀧𑀧𑀚𑁆𑀚𑀢𑀺 𑀅𑀲𑀫𑀢𑁆𑀣𑀪𑀸𑀯𑀢𑁄. 𑀬𑁂𑀲𑀦𑁆𑀢𑀺 𑀬𑁂 𑀢𑀢𑀺𑀬𑀭𑀸𑀲𑀺𑀪𑀸𑀯𑁂𑀦 𑀯𑀼𑀢𑁆𑀢𑀸 𑀥𑀫𑁆𑀫𑀸, 𑀅𑀢𑁆𑀣𑁄 𑀢𑁂𑀲𑀁. 𑀉𑀪𑀺𑀦𑁆𑀦𑀦𑁆𑀢𑀺 𑀯𑀺𑀲𑀼𑀁 𑀯𑀺𑀲𑀼𑀁 𑀬𑁄𑀚𑁂𑀢𑀩𑁆𑀩𑀢𑀸𑀬 𑀤𑁆𑀯𑁂 𑀧𑀳𑀸𑀢𑀩𑁆𑀩𑀳𑁂𑀢𑀼𑀲𑀤𑁆𑀤𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀏𑀢𑀦𑁆𑀢𑀺 ‘‘𑀦𑁂𑀯𑀤𑀲𑁆𑀲𑀦𑁂𑀦 𑀦𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑁄 𑀳𑁂𑀢𑀼 𑀏𑀢𑁂𑀲𑀁 𑀅𑀢𑁆𑀣𑀻’’𑀢𑀺 𑀏𑀢𑀁 𑀯𑀘𑀦𑀁. 𑀢𑁂𑀳𑀺 𑀤𑀲𑁆𑀲𑀦𑀪𑀸𑀯𑀦𑀸𑀧𑀤𑁂𑀳𑀺 𑀬𑀼𑀢𑁆𑀢𑁂𑀦 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀧𑀤𑁂𑀦. 𑀏𑀯𑀜𑁆𑀘 𑀓𑀢𑁆𑀯𑀸𑀢𑀺 𑀏𑀯𑀁 𑀤𑀲𑁆𑀲𑀦𑀪𑀸𑀯𑀦𑀸𑀧𑀤𑁂𑀳𑀺 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀧𑀤𑀲𑁆𑀲 𑀯𑀺𑀲𑀼𑀁 𑀯𑀺𑀲𑀼𑀁 𑀬𑁄𑀚𑀦𑀢𑁄. 𑀏𑀯𑀜𑁆𑀳𑀺 𑀧𑀼𑀭𑀺𑀫𑀧𑀤𑀤𑁆𑀯𑀬…𑀧𑁂… 𑀤𑀲𑁆𑀲𑀦𑀫𑁂𑀢𑀁 𑀳𑁄𑀢𑀻𑀢𑀺. 𑀏𑀯𑀦𑁆𑀢𑀺 𑀤𑀲𑁆𑀲𑀦𑀪𑀸𑀯𑀦𑀸𑀳𑀺 𑀦𑀧𑀳𑀸𑀢𑀩𑁆𑀩𑁄 𑀳𑁂𑀢𑀼 𑀏𑀢𑁂𑀲𑀦𑁆𑀢𑀺 𑀏𑀯𑀁 𑀅𑀢𑁆𑀣𑁂 𑀲𑀢𑀺. ‘‘𑀳𑁂𑀢𑀼…𑀧𑁂… 𑀲𑀺𑀬𑀸’’𑀢𑀺 𑀏𑀢𑀲𑁆𑀲 ‘‘𑀧𑀼𑀭𑀺𑀫𑀲𑁆𑀫𑀺𑀜𑁆𑀳𑀺 𑀅𑀢𑁆𑀣𑁂’’𑀢𑀺𑀆𑀤𑀺𑀦𑀸 𑀅𑀳𑁂𑀢𑀼𑀓𑀸𑀦𑀁 𑀅𑀕𑁆𑀕𑀳𑀺𑀢𑀪𑀸𑀯𑀤𑀲𑁆𑀲𑀦𑀯𑀲𑁂𑀦 𑀅𑀢𑁆𑀣𑀁 𑀯𑀢𑁆𑀯𑀸 𑀇𑀤𑀸𑀦𑀺 ‘‘𑀅𑀣 𑀯𑀸’’𑀢𑀺𑀆𑀤𑀺𑀦𑀸 𑀤𑀼𑀢𑀺𑀬𑀲𑁆𑀲𑁂𑀯 𑀅𑀢𑁆𑀣𑀲𑁆𑀲 𑀬𑀼𑀢𑁆𑀢𑀪𑀸𑀯𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀕𑀳𑁂𑀢𑀩𑁆𑀩𑀢𑁆𑀣𑀲𑁆𑀲𑁂𑀯𑀸’’𑀢𑀺𑀆𑀤𑀺𑀫𑀸𑀳. 𑀲𑁄 𑀳𑀺 ‘‘𑀏𑀯𑀫𑀢𑁆𑀣𑁄 𑀕𑀳𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀕𑀳𑁂𑀢𑀩𑁆𑀩𑀢𑁆𑀣𑁄.

𑁧𑁦. 𑀅𑀜𑁆𑀜𑀣𑀸𑀢𑀺 𑀆𑀭𑀫𑁆𑀫𑀡𑀓𑀭𑀡𑀫𑀢𑁆𑀢𑁂 𑀅𑀥𑀺𑀧𑁆𑀧𑁂𑀢𑁂. 𑀓𑀣𑀁 𑀧𑀦𑁂𑀢𑀁 𑀚𑀸𑀦𑀺𑀢𑀩𑁆𑀩𑀁 ‘‘𑀆𑀭𑀫𑁆𑀫𑀡𑀁 𑀓𑀢𑁆𑀯𑀸𑀢𑀺 𑀏𑀢𑁂𑀦 𑀘𑀢𑀼𑀓𑀺𑀘𑁆𑀘𑀲𑀸𑀥𑀓𑀁 𑀆𑀭𑀫𑁆𑀫𑀡𑀓𑀭𑀡𑀁 𑀯𑀼𑀘𑁆𑀘𑀢𑀻’’𑀢𑀺? 𑀲𑀸𑀫𑀜𑁆𑀜𑀚𑁄𑀢𑀦𑀸𑀬 𑀯𑀺𑀲𑁂𑀲𑁂 𑀅𑀯𑀝𑁆𑀞𑀸𑀦𑀢𑁄 𑀅𑀭𑀺𑀬𑀫𑀕𑁆𑀕𑀥𑀫𑁆𑀫𑀸𑀦𑀁𑀬𑁂𑀯 𑀘 𑀅𑀧𑀘𑀬𑀕𑀸𑀫𑀺𑀪𑀸𑀯𑀢𑁄. ‘‘𑀘𑀢𑁆𑀢𑀸𑀭𑁄 𑀫𑀕𑁆𑀕𑀸 𑀅𑀧𑀭𑀺𑀬𑀸𑀧𑀦𑁆𑀦𑀸 𑀅𑀧𑀘𑀬𑀕𑀸𑀫𑀺𑀦𑁄’’𑀢𑀺 (𑀥. 𑀲. 𑁧𑁦𑁨𑁧) 𑀳𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀅𑀭𑀺𑀬𑀫𑀕𑁆𑀕𑀸𑀦𑀁 𑀏𑀢𑀁 𑀅𑀥𑀺𑀯𑀘𑀦’’𑀦𑁆𑀢𑀺. 𑀏𑀢𑁂𑀦𑁂𑀯 𑀯𑀸 𑀯𑀺𑀲𑁂𑀲𑀼𑀧𑀮𑀓𑁆𑀔𑀡𑀳𑁂𑀢𑀼𑀪𑀽𑀢𑁂𑀦 𑀯𑀘𑀦𑁂𑀦 𑀬𑀣𑀸𑀯𑀼𑀢𑁆𑀢𑁄 𑀆𑀭𑀫𑁆𑀫𑀡𑀓𑀭𑀡𑀯𑀺𑀲𑁂𑀲𑁄 𑀯𑀺𑀜𑁆𑀜𑀸𑀬𑀢𑀺. 𑀉𑀓𑁆𑀓𑀁𑀲𑀕𑀢𑀺𑀯𑀺𑀚𑀸𑀦𑀦𑁂𑀦 𑀯𑀸 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀻𑀦𑀦𑁆𑀢𑀺 𑀯𑁄𑀤𑀸𑀦𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀳𑁂𑀢𑀼𑀪𑀸𑀯𑁂𑀦𑀸𑀢𑀺 𑀲𑀫𑁆𑀧𑀸𑀧𑀓𑀳𑁂𑀢𑀼𑀪𑀸𑀯𑁂𑀦. 𑀜𑀸𑀧𑀓𑁄 𑀓𑀸𑀭𑀓𑁄 𑀲𑀫𑁆𑀧𑀸𑀧𑀓𑁄𑀢𑀺 𑀢𑀺𑀯𑀺𑀥𑁄 𑀳𑀺 𑀳𑁂𑀢𑀼, 𑀢𑀣𑀸 𑀜𑀸𑀧𑁂𑀢𑀩𑁆𑀩𑀸𑀤𑀺𑀪𑀸𑀯𑁂𑀦 𑀨𑀮𑀁. 𑀬𑀣𑀸 𑀦𑀺𑀭𑀬𑀸𑀤𑀺𑀫𑀦𑀼𑀲𑁆𑀲𑀪𑀸𑀯𑀸𑀤𑀺𑀕𑀸𑀫𑀺𑀧𑀝𑀺𑀧𑀤𑀸𑀪𑀸𑀯𑀢𑁄 𑀅𑀓𑀼𑀲𑀮𑀮𑁄𑀓𑀺𑀬𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸 ‘‘𑀆𑀘𑀬𑀕𑀸𑀫𑀺𑀦𑁄 𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑀸, 𑀦 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀆𑀤𑀺𑀮𑁄𑀓𑀺𑀬𑀲𑀫𑁆𑀫𑀸𑀤𑀺𑀝𑁆𑀞𑀺𑀆𑀤𑀺𑀥𑀫𑁆𑀫𑀸 𑀏𑀯, 𑀏𑀯𑀁 𑀦𑀺𑀩𑁆𑀩𑀸𑀦𑀕𑀸𑀫𑀺𑀧𑀝𑀺𑀧𑀤𑀸𑀪𑀸𑀯𑀢𑁄 𑀮𑁄𑀓𑀼𑀢𑁆𑀢𑀭𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀸 ‘‘𑀅𑀧𑀘𑀬𑀕𑀸𑀫𑀺𑀦𑁄’’𑀢𑀺 𑀤𑀝𑁆𑀞𑀩𑁆𑀩𑀸, 𑀦 𑀅𑀭𑀺𑀬𑀫𑀕𑁆𑀕𑀥𑀫𑁆𑀫𑀸 𑀏𑀯𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀼𑀭𑀺𑀫𑀧𑀘𑁆𑀙𑀺𑀫𑀸𑀦’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀅𑀭𑀺𑀬𑀫𑀕𑁆𑀕𑀲𑁆𑀲𑁂𑀯 𑀦𑀺𑀩𑁆𑀩𑀸𑀦𑀕𑀸𑀫𑀺𑀧𑀝𑀺𑀧𑀤𑀸𑀪𑀸𑀯𑁄 𑀧𑀭𑀺𑀩𑁆𑀬𑀢𑁆𑀢𑁄𑀢𑀺 𑀢𑀲𑁆𑀲𑁂𑀯 𑀅𑀧𑀘𑀬𑀕𑀸𑀫𑀺𑀪𑀸𑀯𑁄 𑀬𑀼𑀢𑁆𑀢𑁄, 𑀢𑀤𑀦𑀼𑀯𑀢𑁆𑀢𑀓𑀢𑁆𑀢𑀸 𑀧𑀦 𑀲𑁂𑀲𑀥𑀫𑁆𑀫𑁂 𑀲𑀗𑁆𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀧𑀘𑀬𑁂 𑀤𑀼𑀓𑁆𑀔𑀧𑀭𑀺𑀚𑀸𑀦𑀦𑀸𑀤𑀺𑀦𑀸 𑀲𑀸𑀢𑀺𑀲𑀬𑀁 𑀕𑀫𑀦𑀁 𑀬𑁂𑀲𑀦𑁆𑀢𑁂 𑀅𑀧𑀘𑀬𑀕𑀸𑀫𑀺𑀦𑁄𑀢𑀺 ‘‘𑀫𑀕𑁆𑀕𑀸 𑀏𑀯 𑀅𑀧𑀘𑀬𑀕𑀸𑀫𑀺𑀦𑁄’’𑀢𑀺 𑀯𑀼𑀢𑁆𑀢𑀁. 𑀧𑀼𑀭𑀺𑀫𑀧𑀘𑁆𑀙𑀺𑀫𑀸𑀦𑀦𑁆𑀢𑀺 𑀘 𑀇𑀫𑀲𑁆𑀫𑀺𑀁 𑀢𑀺𑀓𑁂 𑀧𑀞𑀫𑀧𑀤𑀤𑀼𑀢𑀺𑀬𑀧𑀤𑀲𑀗𑁆𑀕𑀳𑀺𑀢𑀸𑀦𑀁 𑀅𑀢𑁆𑀣𑀸𑀦𑀦𑁆𑀢𑀺 𑀅𑀢𑁆𑀣𑁄. ‘‘𑀚𑀬𑀁 𑀯𑁂𑀭𑀁 𑀧𑀲𑀯𑀢𑀺 (𑀥. 𑀧. 𑁨𑁦𑁧), 𑀘𑀭𑀁 𑀯𑀸 𑀬𑀤𑀺 𑀯𑀸 𑀢𑀺𑀝𑁆𑀞’’𑀦𑁆𑀢𑀺𑀆𑀤𑀻𑀲𑀼 (𑀇𑀢𑀺𑀯𑀼. 𑁮𑁬, 𑁧𑁧𑁦; 𑀲𑀼. 𑀦𑀺. 𑁧𑁯𑁫) 𑀯𑀺𑀬 𑀲𑀸𑀦𑀼𑀦𑀸𑀲𑀺𑀓𑁄 𑀆𑀘𑀬-𑀲𑀤𑁆𑀤𑁄𑀢𑀺 ‘‘𑀅𑀦𑀼𑀦𑀸𑀲𑀺𑀓𑀮𑁄𑀧𑁄 𑀓𑀢𑁄’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 ‘‘𑀆𑀘𑀺𑀦’’𑀦𑁆𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀆𑀘𑀬’’𑀦𑁆𑀢𑀺 𑀩𑁆𑀬𑀢𑁆𑀢𑀬𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀆𑀘𑀬𑀸 𑀳𑀼𑀢𑁆𑀯𑀸 𑀕𑀘𑁆𑀙𑀦𑁆𑀢𑀻𑀢𑀺 𑀏𑀢𑁂𑀦 𑀅𑀧𑀘𑀺𑀦𑀦𑁆𑀢𑀻𑀢𑀺 𑀅𑀧𑀘𑀬𑀸, 𑀅𑀧𑀘𑀬𑀸 𑀳𑀼𑀢𑁆𑀯𑀸 𑀕𑀘𑁆𑀙𑀦𑁆𑀢𑀺 𑀧𑀯𑀢𑁆𑀢𑀦𑁆𑀢𑀻𑀢𑀺 𑀅𑀬𑀫𑀢𑁆𑀣𑁄 𑀦𑀬𑀢𑁄 𑀤𑀲𑁆𑀲𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑁧𑁧. 𑀮𑁄𑀓𑀺𑀬𑁂𑀲𑀼 𑀅𑀲𑁂𑀓𑁆𑀔𑀪𑀸𑀯𑀸𑀦𑀸𑀧𑀢𑁆𑀢𑀺 𑀤𑀝𑁆𑀞𑀩𑁆𑀩𑀸𑀢𑀺 𑀓𑀲𑁆𑀫𑀸 𑀏𑀯𑀁 𑀯𑀼𑀢𑁆𑀢𑀁, 𑀦𑀦𑀼 𑁋

‘‘𑀲𑀺𑀓𑁆𑀔𑀢𑀻𑀢𑀺 𑀔𑁄 𑀪𑀺𑀓𑁆𑀔𑀼 𑀢𑀲𑁆𑀫𑀸 𑀲𑁂𑀓𑁆𑀔𑁄𑀢𑀺 𑀯𑀼𑀘𑁆𑀘𑀢𑀺. 𑀓𑀺𑀜𑁆𑀘 𑀲𑀺𑀓𑁆𑀔𑀢𑀺, 𑀅𑀥𑀺𑀲𑀻𑀮𑀫𑁆𑀧𑀺 𑀲𑀺𑀓𑁆𑀔𑀢𑀺 𑀅𑀥𑀺𑀘𑀺𑀢𑁆𑀢𑀫𑁆𑀧𑀺 𑀲𑀺𑀓𑁆𑀔𑀢𑀺 𑀅𑀥𑀺𑀧𑀜𑁆𑀜𑀫𑁆𑀧𑀺 𑀲𑀺𑀓𑁆𑀔𑀢𑀺. 𑀲𑀺𑀓𑁆𑀔𑀢𑀻𑀢𑀺 𑀔𑁄 𑀪𑀺𑀓𑁆𑀔𑀼 𑀢𑀲𑁆𑀫𑀸 𑀲𑁂𑀓𑁆𑀔𑁄𑀢𑀺 𑀯𑀼𑀘𑁆𑀘𑀢𑀺 (𑀅. 𑀦𑀺. 𑁩.𑁮𑁬). 𑀬𑁄𑀧𑀺 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑁄 𑀅𑀦𑀼𑀮𑁄𑀫𑀧𑀝𑀺𑀧𑀤𑀸𑀬 𑀧𑀭𑀺𑀧𑀽𑀭𑀓𑀸𑀭𑀻 𑀲𑀻𑀮𑀲𑀫𑁆𑀧𑀦𑁆𑀦𑁄 𑀇𑀦𑁆𑀤𑁆𑀭𑀺𑀬𑁂𑀲𑀼 𑀕𑀼𑀢𑁆𑀢𑀤𑁆𑀯𑀸𑀭𑁄 𑀪𑁄𑀚𑀦𑁂 𑀫𑀢𑁆𑀢𑀜𑁆𑀜𑀽 𑀚𑀸𑀕𑀭𑀺𑀬𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀧𑀼𑀩𑁆𑀩𑀭𑀢𑁆𑀢𑀸𑀧𑀭𑀭𑀢𑁆𑀢𑀁 𑀩𑁄𑀥𑀺𑀧𑀓𑁆𑀔𑀺𑀬𑀸𑀦𑀁 𑀥𑀫𑁆𑀫𑀸𑀦𑀁 𑀪𑀸𑀯𑀦𑀸𑀦𑀼𑀬𑁄𑀕𑀫𑀦𑀼𑀬𑀼𑀢𑁆𑀢𑁄 𑀯𑀺𑀳𑀭𑀢𑀺 ‘𑀅𑀚𑁆𑀚 𑀯𑀸 𑀲𑁆𑀯𑁂 𑀯𑀸 𑀅𑀜𑁆𑀜𑀢𑀭𑀁 𑀲𑀸𑀫𑀜𑁆𑀜𑀨𑀮𑀁 𑀅𑀥𑀺𑀕𑀫𑀺𑀲𑁆𑀲𑀸𑀫𑀻’𑀢𑀺, 𑀲𑁄𑀧𑀺 𑀲𑀺𑀓𑁆𑀔𑀢𑀻𑀢𑀺 𑀲𑁂𑀓𑁆𑀔𑁄’’𑀢𑀺 𑁋

𑀯𑀘𑀦𑀢𑁄 𑀬𑀣𑀸𑀯𑀼𑀢𑁆𑀢𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀲𑁆𑀲𑀧𑀺 𑀲𑀻𑀮𑀸𑀤𑀺𑀥𑀫𑁆𑀫𑀸 𑀲𑁂𑀓𑁆𑀔𑀸𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺? 𑀦, 𑀧𑀭𑀺𑀬𑀸𑀬𑀪𑀸𑀯𑀢𑁄. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀳𑀺 𑀲𑁂𑀓𑁆𑀔𑀸𑀲𑁂𑀓𑁆𑀔𑀪𑀸𑀯𑁄 𑀬𑀣𑀸𑀲𑀫𑁆𑀪𑀯𑀁 𑀫𑀕𑁆𑀕𑀨𑀮𑀥𑀫𑁆𑀫𑁂𑀲𑀼 𑀏𑀯𑀸𑀢𑀺 𑀮𑁄𑀓𑀺𑀬𑁂𑀲𑀼 𑀲𑁂𑀓𑁆𑀔𑀪𑀸𑀯𑀸𑀲𑀗𑁆𑀓𑀸𑀪𑀸𑀯𑀢𑁄 𑀅𑀲𑁂𑀓𑁆𑀔𑀪𑀸𑀯𑀸𑀦𑀸𑀧𑀢𑁆𑀢𑀺 𑀯𑀼𑀢𑁆𑀢𑀸. 𑀢𑁂𑀦𑁂𑀯𑀸𑀳 ‘‘𑀲𑀻𑀮𑀲𑀫𑀸𑀥𑀻’’𑀢𑀺𑀆𑀤𑀺. 𑀅𑀭𑀳𑀢𑁆𑀢𑀨𑀮𑀥𑀫𑁆𑀫𑀸𑀧𑀺 𑀲𑀺𑀓𑁆𑀔𑀸𑀨𑀮𑀪𑀸𑀯𑁂𑀦 𑀧𑀯𑀢𑁆𑀢𑀦𑀢𑁄 𑀳𑁂𑀝𑁆𑀞𑀺𑀫𑀨𑀮𑀥𑀫𑁆𑀫𑀸 𑀯𑀺𑀬 𑀲𑀺𑀓𑁆𑀔𑀸𑀲𑀼 𑀚𑀸𑀢𑀸𑀢𑀺𑀆𑀤𑀺𑀅𑀢𑁆𑀣𑁂𑀳𑀺 𑀲𑁂𑀓𑁆𑀔𑀸 𑀲𑀺𑀬𑀼𑀁, 𑀳𑁂𑀝𑁆𑀞𑀺𑀫𑀨𑀮𑀥𑀫𑁆𑀫𑀸𑀧𑀺 𑀯𑀸 𑀲𑀺𑀓𑁆𑀔𑀸𑀨𑀮𑀪𑀸𑀯𑁂𑀦 𑀧𑀯𑀢𑁆𑀢𑀦𑀢𑁄 𑀅𑀭𑀳𑀢𑁆𑀢𑀨𑀮𑀥𑀫𑁆𑀫𑀸 𑀯𑀺𑀬 𑀅𑀲𑁂𑀓𑁆𑀔𑀸𑀢𑀺 𑀘𑁄𑀤𑀦𑀁 𑀫𑀦𑀲𑀺𑀓𑀢𑁆𑀯𑀸 ‘‘𑀧𑀭𑀺𑀦𑀺𑀝𑁆𑀞𑀺𑀢𑀲𑀺𑀓𑁆𑀔𑀸𑀓𑀺𑀘𑁆𑀘𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁, 𑀢𑀣𑀸 ‘‘𑀳𑁂𑀝𑁆𑀞𑀺𑀫𑀨𑀮𑁂𑀲𑀼 𑀧𑀦𑀸’’𑀢𑀺𑀆𑀤𑀺. ‘‘𑀢𑀁 𑀏𑀯 𑀲𑀸𑀮𑀺𑀁 𑀪𑀼𑀜𑁆𑀚𑀸𑀫𑀺, 𑀲𑀸 𑀏𑀯 𑀢𑀺𑀢𑁆𑀢𑀺𑀭𑀻, 𑀢𑀸𑀦𑀺 𑀏𑀯 𑀑𑀲𑀥𑀸𑀦𑀻’’𑀢𑀺𑀆𑀤𑀻𑀲𑀼 𑀢𑀁𑀲𑀤𑀺𑀲𑁂𑀲𑀼 𑀢𑀩𑁆𑀩𑁄𑀳𑀸𑀭𑁄 𑀤𑀝𑁆𑀞𑀩𑁆𑀩𑁄. 𑀏𑀢𑁂𑀦 𑀘 𑀲𑁂𑀓𑁆𑀔𑀲𑀤𑀺𑀲𑀸 𑀅𑀲𑁂𑀓𑁆𑀔𑀸 𑀬𑀣𑀸 ‘‘𑀅𑀫𑀦𑀼𑀲𑁆𑀲𑁄’’𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺 𑀅𑀜𑁆𑀜𑁂. 𑀅𑀜𑁆𑀜𑀢𑁆𑀣 ‘‘𑀅𑀭𑀺𑀝𑁆𑀞’’𑀦𑁆𑀢𑀺𑀆𑀤𑀻𑀲𑀼 𑀯𑀼𑀤𑁆𑀥𑀺𑀅𑀢𑁆𑀣𑁂𑀧𑀺 𑀅-𑀓𑀸𑀭𑁄 𑀤𑀺𑀲𑁆𑀲𑀢𑀻𑀢𑀺 𑀯𑀼𑀤𑁆𑀥𑀺𑀧𑁆𑀧𑀢𑁆𑀢𑀸 𑀲𑁂𑀓𑁆𑀔𑀸 𑀅𑀲𑁂𑀓𑁆𑀔𑀸𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄.

𑁧𑁨. 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀲𑀫𑀢𑁆𑀣𑀢𑀸𑀬𑀸𑀢𑀺 𑀇𑀤𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀯𑀺𑀢𑀓𑁆𑀓𑀸𑀤𑀺𑀯𑀺𑀓𑁆𑀔𑀫𑁆𑀪𑀦𑀲𑀫𑀢𑁆𑀣𑀢𑀸𑀧𑀺 𑀳𑁂𑀢𑁆𑀣 𑀮𑀩𑁆𑀪𑀢𑀻𑀢𑀺. 𑀅𑀓𑀼𑀲𑀮𑀯𑀺𑀤𑁆𑀥𑀁𑀲𑀦𑀭𑀲𑀢𑁆𑀢𑀸 𑀯𑀸 𑀓𑀼𑀲𑀮𑀸𑀦𑀁 𑀢𑀢𑁆𑀣 𑀲𑀸𑀢𑀺𑀲𑀬𑀓𑀺𑀘𑁆𑀘𑀬𑀼𑀢𑁆𑀢𑀢𑀁 𑀧𑀭𑀺𑀢𑁆𑀢𑀥𑀫𑁆𑀫𑁂𑀳𑀺 𑀫𑀳𑀕𑁆𑀕𑀢𑀸𑀦𑀁 𑀧𑀓𑀸𑀲𑁂𑀢𑀼𑀁 ‘‘𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀲𑀫𑀢𑁆𑀣𑀢𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀯𑀺𑀧𑀸𑀓𑀓𑀺𑀭𑀺𑀬𑁂𑀲𑀼 𑀤𑀻𑀖𑀲𑀦𑁆𑀢𑀸𑀦𑀢𑀸𑀯, 𑀦 𑀓𑀺𑀮𑁂𑀲𑀯𑀺𑀓𑁆𑀔𑀫𑁆𑀪𑀦𑀲𑀫𑀢𑁆𑀣𑀢𑀸 𑀯𑀺𑀧𑀼𑀮𑀨𑀮𑀢𑀸 𑀘𑀸𑀢𑀺 𑀅𑀢𑁆𑀣𑁄. ‘‘𑀯𑀺𑀧𑀼𑀮𑀁 𑀨𑀮𑀁 𑀯𑀺𑀧𑀼𑀮𑀨𑀮’’𑀦𑁆𑀢𑀺 𑀏𑀯𑀁 𑀧𑀦 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂 𑀯𑀺𑀧𑀸𑀓𑁂𑀲𑀼𑀧𑀺 𑀯𑀺𑀧𑀼𑀮𑀨𑀮𑀢𑀸 𑀮𑀩𑁆𑀪𑀢𑁂𑀯. 𑀲𑁄𑀧𑀺 𑀏𑀓𑀲𑁂𑀲𑀦𑀬𑁂𑀦 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀫𑀳𑀦𑁆𑀢𑁂𑀳𑀺 𑀕𑀢𑀸 𑀧𑀝𑀺𑀧𑀦𑁆𑀦𑀸𑀢𑀺 𑀅𑀬𑀁 𑀧𑀦𑀢𑁆𑀣𑁄 𑀢𑀺𑀡𑁆𑀡𑀫𑁆𑀧𑀺 𑀲𑀸𑀥𑀸𑀭𑀡𑁄𑀢𑀺. 𑀕𑀼𑀡𑀢𑁄 𑀅𑀬𑀁 𑀏𑀢𑁆𑀢𑀓𑁄𑀢𑀺 𑀲𑀢𑁆𑀢𑀸𑀦𑀁 𑀧𑀫𑀸𑀡𑀁 𑀓𑀭𑁄𑀦𑁆𑀢𑀸 𑀯𑀺𑀬 𑀧𑀯𑀢𑁆𑀢𑀦𑁆𑀢𑀻𑀢𑀺 𑀑𑀴𑀸𑀭𑀺𑀓𑀸 𑀓𑀺𑀮𑁂𑀲𑀸 ‘‘𑀧𑀫𑀸𑀡𑀓𑀭𑀸’’𑀢𑀺 𑀯𑀼𑀢𑁆𑀢𑀸. 𑀢𑁂𑀳𑀺 𑀧𑀭𑀺𑀢𑁄 𑀔𑀡𑁆𑀟𑀺𑀢𑀸 𑀧𑀭𑀺𑀘𑁆𑀙𑀺𑀦𑁆𑀦𑀸𑀢𑀺 𑀧𑀭𑀺𑀢𑁆𑀢𑀸. 𑀲𑀢𑀺𑀧𑀺 𑀓𑁂𑀳𑀺𑀘𑀺 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑁂 𑀫𑀳𑀸𑀧𑀫𑀸𑀡𑀪𑀸𑀯𑁂𑀦 𑀕𑀢𑀸 𑀧𑀯𑀢𑁆𑀢𑀸𑀢𑀺 𑀫𑀳𑀕𑁆𑀕𑀢𑀸. 𑀧𑀭𑀺𑀘𑁆𑀙𑁂𑀤𑀓𑀭𑀸𑀦𑀁 𑀓𑀺𑀮𑁂𑀲𑀸𑀦𑀁 𑀲𑀼𑀔𑀼𑀫𑀸𑀦𑀫𑁆𑀧𑀺 𑀅𑀕𑁄𑀘𑀭𑀪𑀸𑀯𑀢𑁄 𑀢𑁂𑀳𑀺 𑀦 𑀓𑀣𑀜𑁆𑀘𑀺𑀧𑀺 𑀧𑀭𑀺𑀘𑁆𑀙𑀺𑀦𑁆𑀦𑀸 𑀯𑀻𑀢𑀺𑀓𑁆𑀓𑀦𑁆𑀢𑀸𑀢𑀺 𑀅𑀧𑀭𑀺𑀘𑁆𑀙𑀺𑀦𑁆𑀦𑀸 𑀅𑀧𑁆𑀧𑀫𑀸𑀡𑀸, 𑀬𑀢𑁄 𑀢𑁂 ‘‘𑀅𑀧𑀭𑀺𑀬𑀸𑀧𑀦𑁆𑀦𑀸’’𑀢𑀺𑀧𑀺 𑀯𑀼𑀘𑁆𑀘𑀦𑁆𑀢𑀺.

𑁧𑁪. 𑀢𑀺𑀢𑁆𑀢𑀺𑀁 𑀦 𑀚𑀦𑁂𑀦𑁆𑀢𑀺 𑀲𑀦𑁆𑀢𑀢𑀭𑀢𑀸𑀬 𑀅𑀲𑁂𑀘𑀦𑀓𑀪𑀸𑀯𑀢𑁄. 𑀏𑀢𑁆𑀣 𑀘 ‘‘𑀧𑀫𑀸𑀡𑀓𑀭𑁂𑀳𑀻’’𑀢𑀺𑀆𑀤𑀺𑀓𑁄 𑀅𑀢𑁆𑀣𑀯𑀺𑀓𑀧𑁆𑀧𑁄 ‘‘𑀅𑀢𑀧𑁆𑀧𑀓𑀢𑁆𑀣𑁂𑀦𑀸’’𑀢𑀺𑀆𑀤𑀺𑀓𑀸𑀬 𑀳𑀻𑀦𑀢𑁆𑀢𑀺𑀓𑀧𑀤𑀯𑀡𑁆𑀡𑀦𑀸𑀬 𑀧𑀭𑀢𑁄 𑀩𑀳𑀽𑀲𑀼 𑀧𑁄𑀢𑁆𑀣𑀓𑁂𑀲𑀼 𑀮𑀺𑀔𑀻𑀬𑀢𑀺, 𑀬𑀣𑀸𑀞𑀸𑀦𑁂 𑀏𑀯 𑀧𑀦 𑀆𑀦𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑁄.

𑁧𑁫. 𑀮𑁄𑀓𑀺𑀬𑀲𑀸𑀥𑀼𑀚𑀦𑁂𑀳𑀺𑀧𑀺 𑀅𑀢𑀺𑀚𑀺𑀕𑀼𑀘𑁆𑀙𑀦𑀻𑀬𑁂𑀲𑀼 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀦𑀢𑁆𑀣𑀺𑀓𑀯𑀸𑀤𑀸𑀤𑀻𑀲𑀼 𑀧𑀯𑀢𑁆𑀢𑀺 𑀯𑀺𑀦𑀸 𑀯𑀺𑀧𑀮𑁆𑀮𑀸𑀲𑀩𑀮𑀯𑀪𑀸𑀯𑁂𑀦 𑀦 𑀳𑁄𑀢𑀻𑀢𑀺 ‘‘𑀯𑀺𑀧𑀭𑀺𑀬𑀸𑀲𑀤𑀴𑁆𑀳𑀢𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀏𑀢𑁂𑀦𑀸𑀢𑀺 ‘‘𑀯𑀺𑀧𑀸𑀓𑀤𑀸𑀦𑁂 𑀲𑀢𑀻’’𑀢𑀺𑀆𑀤𑀺𑀦𑀸 𑀲𑀢𑀺𑀧𑀺 𑀓𑀸𑀮𑀦𑀺𑀬𑀫𑁂 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑁂 𑀲𑀸𑀲𑀗𑁆𑀓𑀯𑀘𑀦𑁂𑀦. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀦𑀺𑀬𑀢𑀢𑀸𑀬 𑀅𑀢𑀺𑀧𑁆𑀧𑀲𑀗𑁆𑀕𑁄 𑀤𑀼𑀦𑁆𑀦𑀺𑀯𑀸𑀭𑁄, 𑀢𑀲𑁆𑀫𑀸. 𑀩𑀮𑀯𑀢𑀸…𑀧𑁂… 𑀧𑀯𑀢𑁆𑀢𑀻𑀢𑀺 𑀏𑀢𑁂𑀦 𑀅𑀲𑀫𑀸𑀦𑀚𑀸𑀢𑀺𑀓𑁂𑀦 𑀅𑀦𑀺𑀯𑀢𑁆𑀢𑀦𑀻𑀬𑀯𑀺𑀧𑀸𑀓𑀢𑀁, 𑀲𑀫𑀸𑀦𑀚𑀸𑀢𑀺𑀓𑁂𑀦 𑀘 𑀯𑀺𑀧𑀸𑀓𑀸𑀦𑀼𑀧𑁆𑀧𑀸𑀤𑀦𑁂𑀧𑀺 𑀅𑀦𑀦𑁆𑀢𑀭𑀁 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸𑀬 𑀅𑀯𑀺𑀳𑀦𑁆𑀢𑀩𑁆𑀩𑀢𑀁 𑀅𑀦𑀦𑁆𑀢𑀭𑀺𑀓𑀸𑀦𑀁 𑀤𑀲𑁆𑀲𑁂𑀢𑀺. 𑀬𑀢𑁄 𑀢𑁂𑀲𑀁 𑀯𑀺𑀧𑀸𑀓𑀥𑀫𑁆𑀫𑀢𑀸 𑀯𑀺𑀬 𑀲𑀪𑀸𑀯𑀲𑀺𑀤𑁆𑀥𑀸 𑀦𑀺𑀬𑀢𑀸𑀦𑀦𑁆𑀢𑀭𑀺𑀬𑀢𑀸. 𑀅𑀜𑁆𑀜𑀲𑁆𑀲…𑀧𑁂… 𑀤𑀸𑀦𑀢𑁄𑀢𑀺 𑀇𑀫𑀺𑀦𑀸𑀧𑀺 𑀅𑀲𑀫𑀸𑀦𑀚𑀸𑀢𑀺𑀓𑀸𑀤𑀻𑀳𑀺 𑀅𑀦𑀺𑀯𑀢𑁆𑀢𑀦𑀻𑀬𑀨𑀮𑀢𑀁 𑀏𑀯 𑀯𑀺𑀪𑀸𑀯𑁂𑀢𑀺.

𑀘𑁄𑀤𑀓𑁄 𑀅𑀥𑀺𑀧𑁆𑀧𑀸𑀬𑀁 𑀅𑀚𑀸𑀦𑀦𑁆𑀢𑁄 ‘‘𑀦𑀦𑀽’’𑀢𑀺𑀆𑀤𑀺𑀦𑀸 𑀅𑀢𑀺𑀧𑁆𑀧𑀲𑀗𑁆𑀕𑀫𑁂𑀯 𑀘𑁄𑀤𑁂𑀢𑀺. 𑀇𑀢𑀭𑁄 ‘‘𑀦𑀸𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀢𑀺. 𑀏𑀓𑀦𑁆𑀢𑁂𑀢𑀺 𑀅𑀯𑀲𑁆𑀲𑀫𑁆𑀪𑀸𑀯𑀺𑀦𑀺. 𑀲𑀦𑁆𑀦𑀺𑀬𑀢𑀢𑁆𑀢𑀸𑀢𑀺 𑀲𑀫𑁆𑀧𑀸𑀤𑀦𑁂 𑀚𑀦𑀦𑁂 𑀦𑀺𑀬𑀢𑀪𑀸𑀯𑀢𑁄. 𑀉𑀧𑀭𑀢𑀸 𑀅𑀯𑀺𑀧𑀘𑁆𑀘𑀦𑀲𑀪𑀸𑀯𑀸𑀲𑀗𑁆𑀓𑀸 𑀬𑁂𑀲𑀼 𑀢𑀸𑀦𑀺 𑀉𑀧𑀭𑀢𑀸𑀯𑀺𑀧𑀘𑁆𑀘…𑀧𑁂… 𑀲𑀗𑁆𑀓𑀸𑀦𑀺, 𑀢𑀩𑁆𑀪𑀸𑀯𑁄 𑀉𑀧…𑀧𑁂… 𑀲𑀗𑁆𑀓𑀢𑁆𑀢𑀁, 𑀢𑀲𑁆𑀫𑀸. ‘‘𑀦 𑀲𑀫𑀢𑁆𑀣𑀢𑀸𑀯𑀺𑀖𑀸𑀢𑀢𑁆𑀢𑀸𑀢𑀺 𑀩𑀮𑀯𑀢𑀸𑀧𑀺 𑀆𑀦𑀦𑁆𑀢𑀭𑀺𑀬𑁂𑀦 𑀅𑀦𑀼𑀧𑀳𑀦𑁆𑀢𑀩𑁆𑀩𑀢𑀁 𑀆𑀳. 𑀉𑀧𑀢𑁆𑀣𑀫𑁆𑀪𑀓𑀸𑀦𑀺 𑀅𑀦𑀼𑀩𑀮𑀧𑁆𑀧𑀤𑀸𑀬𑀓𑀸𑀦𑀺 𑀳𑁄𑀦𑁆𑀢𑀺 𑀉𑀧𑁆𑀧𑀢𑁆𑀢𑀺𑀬𑀸 𑀲𑀦𑁆𑀢𑀸𑀦𑀲𑁆𑀲 𑀯𑀺𑀲𑁂𑀲𑀺𑀢𑀢𑁆𑀢𑀸. 𑀢𑁂𑀦 𑀦𑁂𑀲𑀁 𑀯𑀺𑀧𑀸𑀓𑀸𑀦𑀼𑀧𑁆𑀧𑀸𑀤𑀦𑁂𑀧𑀺 𑀅𑀫𑁄𑀖𑀯𑀼𑀢𑁆𑀢𑀺𑀢𑀁 𑀆𑀳.

𑁧𑁬. 𑀫𑀕𑁆𑀕𑀓𑀺𑀘𑁆𑀘𑀁 𑀧𑀭𑀺𑀜𑁆𑀜𑀸𑀤𑀺. 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀺𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀸𑀮𑁄𑀪𑀸𑀤𑁄𑀲𑀲𑀗𑁆𑀔𑀸𑀢𑁂𑀳𑀺 𑀫𑀕𑁆𑀕𑀳𑁂𑀢𑀽𑀳𑀺 𑀫𑀕𑁆𑀕𑀲𑀫𑁆𑀧𑀬𑀼𑀢𑁆𑀢𑀔𑀦𑁆𑀥𑀲𑁂𑀲𑀫𑀕𑁆𑀕𑀗𑁆𑀕𑀲𑀫𑁆𑀫𑀸𑀤𑀺𑀝𑁆𑀞𑀻𑀦𑀁 𑀲𑀳𑁂𑀢𑀼𑀓𑀪𑀸𑀯𑀤𑀲𑁆𑀲𑀦𑀢𑁄 𑀢𑀺𑀡𑁆𑀡𑀁 𑀦𑀬𑀸𑀦𑀁 𑀅𑀲𑀗𑁆𑀕𑀳𑀺𑀢𑀲𑀗𑁆𑀕𑀡𑁆𑀳𑀦𑀯𑀲𑁂𑀦𑀸𑀢𑀺 𑀯𑀼𑀢𑁆𑀢𑀁. 𑀳𑁂𑀢𑀼𑀩𑀳𑀼𑀢𑀸𑀯𑀲𑁂𑀦𑀸𑀢𑀺 𑀩𑀳𑀼𑀳𑁂𑀢𑀼𑀓𑀲𑁆𑀲 𑀧𑀞𑀫𑀦𑀬𑀲𑁆𑀲 𑀅𑀦𑀦𑁆𑀢𑀭𑀁 𑀩𑀳𑀼𑀳𑁂𑀢𑀼𑀓𑀢𑀸𑀲𑀸𑀫𑀜𑁆𑀜𑁂𑀦 𑀦𑀺𑀓𑁆𑀔𑁂𑀧𑀓𑀡𑁆𑀟𑀧𑀸𑀴𑀺𑀬𑀁 𑀢𑀢𑀺𑀬𑀁 𑀯𑀼𑀢𑁆𑀢𑀦𑀬𑁄 𑀇𑀥 𑀅𑀝𑁆𑀞𑀓𑀣𑀸𑀬𑀁 𑀤𑀼𑀢𑀺𑀬𑀁 𑀯𑀼𑀢𑁆𑀢𑁄. 𑀬𑀣𑀸𑀲𑀓𑀁 𑀧𑀘𑁆𑀘𑀬𑁂𑀳𑀺 𑀧𑀯𑀢𑁆𑀢𑀫𑀸𑀦𑁂𑀲𑀼 𑀦𑀺𑀭𑀻𑀳𑀓𑁂𑀲𑀼 𑀥𑀫𑁆𑀫𑁂𑀲𑀼 𑀓𑁂𑀲𑀜𑁆𑀘𑀺 𑀅𑀦𑀼𑀯𑀢𑁆𑀢𑀦𑀻𑀬𑀪𑀸𑀯𑁄 𑀦 𑀓𑁂𑀯𑀮𑀁 𑀥𑀫𑁆𑀫𑀲𑀪𑀸𑀯𑀢𑁄𑀬𑁂𑀯, 𑀅𑀣 𑀔𑁄 𑀧𑀼𑀭𑀺𑀫𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀯𑀺𑀲𑁂𑀲𑁂𑀦𑀧𑀺 𑀳𑁄𑀢𑀻𑀢𑀺 𑀆𑀳 ‘‘𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦𑀸’’𑀢𑀺. 𑀧𑀯𑀢𑁆𑀢𑀺𑀯𑀺𑀲𑁂𑀲𑁄 𑀳𑀺 𑀧𑀼𑀭𑀺𑀫𑀧𑀼𑀭𑀺𑀫𑀸𑀦𑀁 𑀘𑀺𑀢𑁆𑀢𑀘𑁂𑀢𑀲𑀺𑀓𑀸𑀦𑀁 𑀉𑀢𑁆𑀢𑀭𑀼𑀢𑁆𑀢𑀭𑁂𑀲𑀼 𑀯𑀺𑀲𑁂𑀲𑀸𑀥𑀸𑀦𑀁 𑀪𑀸𑀯𑀦𑀸𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑁄𑀢𑀺. 𑀅𑀦𑀼𑀯𑀢𑁆𑀢𑀬𑀫𑀸𑀦𑁄𑀢𑀺 𑀕𑀭𑀼𑀓𑀸𑀭𑀬𑀫𑀸𑀦𑁄. 𑀉𑀤𑀸𑀳𑀭𑀡𑀯𑀲𑁂𑀦𑀸𑀢𑀺 𑀦𑀺𑀤𑀲𑁆𑀲𑀦𑀯𑀲𑁂𑀦, 𑀦 𑀦𑀺𑀭𑀯𑀲𑁂𑀲𑀤𑀲𑁆𑀲𑀦𑀯𑀲𑁂𑀦. 𑀬𑀲𑁆𑀫𑀸 𑀧𑀦𑀸𑀢𑀺𑀆𑀤𑀺𑀦𑀸 𑀬𑀣𑀸𑀯𑀼𑀢𑁆𑀢𑀁 𑀅𑀢𑁆𑀣𑀁 𑀧𑀸𑀞𑀦𑁆𑀢𑀭𑁂𑀦 𑀲𑀸𑀥𑁂𑀢𑀺. 𑀢𑀢𑁆𑀣 𑀳𑀺 𑀅𑀥𑀺𑀧𑀢𑀺𑀧𑀘𑁆𑀘𑀬𑀲𑁆𑀲 𑀧𑀘𑁆𑀘𑀦𑀻𑀬𑁂 𑀞𑀺𑀢𑀢𑁆𑀢𑀸 𑀫𑀕𑁆𑀕𑁄 𑀅𑀥𑀺𑀧𑀢𑀺 𑀫𑀕𑁆𑀕𑀸𑀥𑀺𑀧𑀢𑀻𑀢𑀺 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀻𑀢𑀺. 𑀲𑀫𑀸𑀦𑀲𑀤𑁆𑀤𑀢𑁆𑀣𑀯𑀲𑁂𑀦𑀸𑀢𑀺 𑀲𑀢𑀺𑀧𑀺 𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀦𑀸𑀥𑀺𑀓𑀭𑀡𑀲𑀫𑀸𑀲𑀢𑁆𑀣𑀪𑁂𑀤𑁂 𑀫𑀕𑁆𑀕𑀸𑀥𑀺𑀧𑀢𑀺𑀲𑀤𑁆𑀤𑀢𑁆𑀣𑀪𑁂𑀤𑀸𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁧𑁭. 𑀉𑀧𑁆𑀧𑀦𑁆𑀦-𑀲𑀤𑁆𑀤𑁄 𑀉𑀧𑁆𑀧𑀸𑀤𑀸𑀤𑀺𑀁 𑀧𑀝𑀺𑀧𑀚𑁆𑀚𑀫𑀸𑀦𑁄, 𑀧𑀢𑁆𑀯𑀸 𑀯𑀺𑀕𑀢𑁄 𑀘𑀸𑀢𑀺 𑀤𑀼𑀯𑀺𑀥𑁂𑀲𑀼 𑀅𑀢𑁆𑀣𑁂𑀲𑀼 𑀉𑀪𑀬𑁂𑀲𑀫𑁆𑀧𑀺 𑀯𑀸𑀘𑀓𑁄, 𑀦 𑀧𑀼𑀭𑀺𑀫𑀸𑀦𑀁𑀬𑁂𑀯𑀸𑀢𑀺 𑀢𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀼𑀧𑁆𑀧𑀦𑁆𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀉𑀧𑁆𑀧𑀦𑁆𑀦𑀪𑀸𑀯𑁄 𑀉𑀧𑁆𑀧𑀸𑀤𑀸𑀤𑀺𑀧𑁆𑀧𑀢𑁆𑀢𑀢𑀸. 𑀢𑁂𑀦 𑀅𑀢𑀻𑀢𑀸𑀧𑀺 𑀲𑀗𑁆𑀕𑀳𑀺𑀢𑀸 𑀳𑁄𑀦𑁆𑀢𑀺. 𑀢𑁂𑀦𑁂𑀯𑀸𑀳 ‘‘𑀲𑀩𑁆𑀩𑁄 𑀉𑀧𑁆𑀧𑀦𑁆𑀦𑀪𑀸𑀯𑁄’’𑀢𑀺. 𑀉𑀧𑁆𑀧𑀦𑁆𑀦𑀥𑀫𑁆𑀫𑀪𑀸𑀯𑁄 ‘‘𑀉𑀧𑁆𑀧𑀦𑁆𑀦𑀸 𑀥𑀫𑁆𑀫𑀸’’𑀢𑀺 𑀧𑀤𑁂𑀦 𑀕𑀳𑀺𑀢𑀥𑀫𑁆𑀫𑀪𑀸𑀯𑁄, 𑀯𑀢𑁆𑀢𑀫𑀸𑀦𑀥𑀫𑁆𑀫𑀪𑀸𑀯𑁄𑀢𑀺 𑀅𑀢𑁆𑀣𑁄. 𑀬𑁄 𑀯𑀸 𑀉𑀧𑁆𑀧𑀸𑀤𑀸𑀤𑀺𑀧𑁆𑀧𑀢𑁆𑀢𑁄 𑀅𑀢𑁆𑀢𑀦𑁄 𑀘 𑀲𑀪𑀸𑀯𑀁 𑀥𑀸𑀭𑁂𑀢𑀺 𑀧𑀘𑁆𑀘𑀬𑁂𑀳𑀺 𑀘 𑀥𑀸𑀭𑀻𑀬𑀢𑀺, 𑀲𑁄 𑀉𑀧𑁆𑀧𑀦𑁆𑀦𑀥𑀫𑁆𑀫𑁄𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀪𑀸𑀯𑁄 𑀉𑀧𑁆𑀧𑀦𑁆𑀦𑀥𑀫𑁆𑀫𑀪𑀸𑀯𑁄𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀉𑀧𑁆𑀧𑀦𑁆𑀦𑀥𑀫𑁆𑀫𑁂 𑀯𑀢𑁆𑀯𑀸 ‘‘𑀅𑀦𑀼𑀧𑁆𑀧𑀦𑁆𑀦𑀸’’𑀢𑀺 𑀯𑀘𑀦𑀁 𑀦 𑀬𑀣𑀸𑀥𑀺𑀕𑀢𑀧𑀝𑀺𑀲𑁂𑀥𑀦𑀦𑁆𑀢𑀺 𑀓𑀣𑀫𑀺𑀤𑀁 𑀧𑀘𑁆𑀘𑁂𑀢𑀩𑁆𑀩𑀦𑁆𑀢𑀺 𑀆𑀳 ‘‘𑀬𑀤𑀺 𑀳𑀻’’𑀢𑀺𑀆𑀤𑀺. 𑀓𑁂𑀘𑀺 𑀧𑀦𑁂𑀢𑁆𑀣 ‘‘𑀉𑀧𑁆𑀧𑀦𑁆𑀦𑀸𑀢𑀺 𑀧𑀤𑁂𑀦 𑀅𑀢𑀻𑀢𑀸𑀧𑀺 𑀲𑀗𑁆𑀕𑀳𑀺𑀢𑀸. 𑀬𑀤𑀺 𑀦 𑀲𑀗𑁆𑀕𑀳𑀺𑀢𑀸, 𑀦𑀺𑀩𑁆𑀩𑀸𑀦𑀁 𑀯𑀺𑀬 𑀢𑁂𑀧𑀺 𑀦𑀯𑀢𑁆𑀢𑀩𑁆𑀩𑀸𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦 𑀘 𑀢𑀣𑀸 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀧𑀦 𑀢𑁂𑀲𑀁 𑀫𑀢𑀺𑀫𑀢𑁆𑀢𑀫𑁂𑀯. 𑀅𑀬𑀁 𑀧𑀦 𑀢𑀺𑀓𑁄 𑀤𑁆𑀯𑀺𑀦𑁆𑀦𑀁 𑀅𑀤𑁆𑀥𑀸𑀦𑀁 𑀯𑀲𑁂𑀦 𑀧𑀽𑀭𑁂𑀢𑁆𑀯𑀸 𑀤𑀲𑁆𑀲𑀺𑀢𑁄𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀓𑁆𑀔𑀢𑀻𑀢𑀺. 𑀏𑀯𑀁 𑀲𑀦𑁆𑀢𑁂 𑀓𑀲𑁆𑀫𑀸 𑀅𑀢𑀻𑀢𑀸 𑀦𑀯𑀢𑁆𑀢𑀩𑁆𑀩𑀸𑀢𑀺 𑀦 𑀯𑀼𑀢𑁆𑀢𑀸𑀢𑀺? 𑀥𑀫𑁆𑀫𑀯𑀲𑁂𑀦 𑀅𑀲𑀗𑁆𑀕𑀳𑀺𑀢𑀢𑁆𑀢𑀸𑀪𑀸𑀯𑀢𑁄. 𑀥𑀫𑁆𑀫𑀯𑀲𑁂𑀦 𑀳𑀺 𑀅𑀲𑀗𑁆𑀕𑀳𑀺𑀢𑀁 𑀦𑀺𑀩𑁆𑀩𑀸𑀦𑀁 𑀢𑀢𑁆𑀣 𑀦𑀯𑀢𑁆𑀢𑀩𑁆𑀩𑀁 𑀚𑀸𑀢𑀁, 𑀦 𑀘 𑀦𑀺𑀬𑁄𑀕𑀢𑁄 𑀅𑀢𑀻𑀢𑀸 𑀦𑀸𑀫 𑀥𑀫𑁆𑀫𑀸 𑀓𑁂𑀘𑀺 𑀅𑀢𑁆𑀣𑀺, 𑀬𑁂 𑀇𑀥 𑀅𑀲𑀗𑁆𑀕𑀳𑀺𑀢𑀢𑁆𑀢𑀸 𑀦𑀯𑀢𑁆𑀢𑀩𑁆𑀩𑀸 𑀲𑀺𑀬𑀼𑀦𑁆𑀢𑀺. 𑀨𑀮𑀦𑀺𑀩𑁆𑀩𑀢𑁆𑀢𑀺𑀢𑁄 𑀓𑀸𑀭𑀡𑀲𑁆𑀲 𑀧𑀼𑀭𑁂𑀢𑀭𑀁 𑀦𑀺𑀩𑁆𑀩𑀢𑁆𑀢𑀺 𑀇𑀥 𑀧𑀭𑀺𑀦𑀺𑀝𑁆𑀞𑀺𑀢𑀲𑀤𑁆𑀤𑁂𑀦 𑀯𑀼𑀘𑁆𑀘𑀢𑀺, 𑀦 𑀢𑀲𑁆𑀲 𑀳𑀼𑀢𑁆𑀯𑀸 𑀯𑀺𑀕𑀢𑀪𑀸𑀯𑁄𑀢𑀺 𑀆𑀳 ‘‘𑀅𑀦𑀸𑀕𑀢𑁂 𑀯𑀸’’𑀢𑀺. 𑀬𑀢𑁄 𑀫𑁂𑀢𑁆𑀢𑁂𑀬𑁆𑀬𑀲𑁆𑀲 𑀪𑀕𑀯𑀢𑁄 𑀉𑀧𑁆𑀧𑀚𑁆𑀚𑀦𑀓𑀨𑀮𑀫𑁆𑀧𑀺 ‘‘𑀉𑀧𑁆𑀧𑀸𑀤𑀻’’𑀢𑀺 𑀯𑀼𑀘𑁆𑀘𑀢𑀺.

𑁨𑁦. 𑀬𑀲𑁆𑀲 𑀛𑀸𑀦𑀸 𑀯𑀼𑀝𑁆𑀞𑀳𑀺𑀢𑁆𑀯𑀸𑀢𑀺𑀆𑀤𑀺𑀦𑀸 ‘‘𑀢𑁂𑀦𑀸𑀦𑀦𑁆𑀤𑀸’’𑀢𑀺𑀆𑀤𑀺𑀧𑀸𑀴𑀺𑀬𑀸 𑀳𑁂𑀝𑁆𑀞𑀸𑀧𑀸𑀴𑀺𑀁 𑀅𑀢𑁆𑀣𑀯𑀲𑁂𑀦 𑀤𑀲𑁆𑀲𑁂𑀢𑀺. 𑀅𑀬𑀜𑁆𑀳𑀺 𑀢𑀢𑁆𑀣 𑀧𑀸𑀴𑀺 𑁋

‘‘𑀓𑀣𑀜𑁆𑀘𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀲𑀡𑁆𑀞𑀧𑁂𑀢𑀺 𑀲𑀦𑁆𑀦𑀺𑀲𑀸𑀤𑁂𑀢𑀺 𑀏𑀓𑁄𑀤𑀺𑀁 𑀓𑀭𑁄𑀢𑀺 𑀲𑀫𑀸𑀤𑀳𑀢𑀺. 𑀇𑀥𑀸𑀦𑀦𑁆𑀤, 𑀪𑀺𑀓𑁆𑀔𑀼 𑀯𑀺𑀯𑀺𑀘𑁆𑀘𑁂𑀯…𑀧𑁂… 𑀘𑀢𑀼𑀢𑁆𑀣𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺. 𑀏𑀯𑀁 𑀔𑁄…𑀧𑁂… 𑀲𑀫𑀸𑀤𑀳𑀢𑀺. 𑀲𑁄 𑀅𑀚𑁆𑀛𑀢𑁆𑀢𑀁 𑀲𑀼𑀜𑁆𑀜𑀢𑀁 𑀫𑀦𑀲𑀺 𑀓𑀭𑁄𑀢𑀺, 𑀢𑀲𑁆𑀲 𑀅𑀚𑁆𑀛𑀢𑁆𑀢𑀁 𑀲𑀼𑀜𑁆𑀜𑀢𑀁 𑀫𑀦𑀲𑀺𑀓𑀭𑁄𑀢𑁄 𑀲𑀼𑀜𑁆𑀜𑀢𑀸𑀬 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀺…𑀧𑁂… 𑀫𑀼𑀘𑁆𑀘𑀢𑀺. 𑀏𑀯𑀁 𑀲𑀦𑁆𑀢𑀫𑁂𑀢𑀁, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀏𑀯𑀁 𑀲𑀫𑁆𑀧𑀚𑀸𑀦𑀸𑀢𑀺 𑀅𑀚𑁆𑀛𑀢𑁆𑀢𑀁 𑀔𑁄 𑀫𑁂 𑀲𑀼𑀜𑁆𑀜𑀢𑀁 𑀫𑀦𑀲𑀺𑀓𑀭𑁄𑀢𑁄 𑀅𑀚𑁆𑀛𑀢𑁆𑀢𑀁 𑀲𑀼𑀜𑁆𑀜𑀢𑀸𑀬 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀺…𑀧𑁂… 𑀫𑀼𑀘𑁆𑀘𑀢𑀻𑀢𑀺, 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. 𑀲𑁄 𑀩𑀳𑀺𑀤𑁆𑀥𑀸 𑀲𑀼𑀜𑁆𑀜𑀢𑀁…𑀧𑁂… 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀲𑀼𑀜𑁆𑀜𑀢𑀁…𑀧𑁂… 𑀲𑁄 𑀆𑀦𑁂𑀜𑁆𑀚𑀁 𑀫𑀦𑀲𑀺 𑀓𑀭𑁄𑀢𑀺, 𑀢𑀲𑁆𑀲 𑀆𑀦𑁂𑀜𑁆𑀚𑀁 𑀫𑀦𑀲𑀺𑀓𑀭𑁄𑀢𑁄 𑀆𑀦𑁂𑀜𑁆𑀚𑀸𑀬 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀺…𑀧𑁂… 𑀫𑀼𑀘𑁆𑀘𑀢𑀻𑀢𑀺, 𑀇𑀢𑀺𑀳 𑀢𑀢𑁆𑀣 𑀲𑀫𑁆𑀧𑀚𑀸𑀦𑁄 𑀳𑁄𑀢𑀺. 𑀢𑁂𑀦𑀸𑀦𑀦𑁆𑀤, 𑀪𑀺𑀓𑁆𑀔𑀼𑀦𑀸’’𑀢𑀺 (𑀫. 𑀦𑀺. 𑁩.𑁧𑁮𑁮).

𑀢𑀢𑁆𑀣 𑀅𑀚𑁆𑀛𑀢𑁆𑀢𑀲𑀼𑀜𑁆𑀜𑀢𑀸𑀤𑀻𑀲𑀽𑀢𑀺 𑀅𑀚𑁆𑀛𑀢𑁆𑀢𑀁 𑀩𑀳𑀺𑀤𑁆𑀥𑀸 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀘 𑀲𑀼𑀜𑁆𑀜𑀢𑀸𑀬 𑀆𑀦𑁂𑀜𑁆𑀚𑁂 𑀘. 𑀧𑀞𑀫𑀚𑁆𑀛𑀸𑀦𑀸𑀤𑀺𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑁂𑀢𑀺 𑀧𑀸𑀤𑀓𑀪𑀽𑀢𑀧𑀞𑀫𑀚𑁆𑀛𑀸𑀦𑀸𑀤𑀺𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑁂. 𑀅𑀧𑀕𑀼𑀡𑀧𑀸𑀤𑀓𑀚𑁆𑀛𑀸𑀦𑀢𑁄 𑀯𑀼𑀝𑁆𑀞𑀺𑀢𑀲𑁆𑀲 𑀳𑀺 𑀅𑀚𑁆𑀛𑀢𑁆𑀢𑀁 𑀲𑀼𑀜𑁆𑀜𑀢𑀁 𑀫𑀦𑀲𑀺𑀓𑀭𑁄𑀢𑁄 𑀢𑀢𑁆𑀣 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀺. 𑀢𑀢𑁄 ‘‘𑀧𑀭𑀲𑁆𑀲 𑀲𑀦𑁆𑀢𑀸𑀦𑁂 𑀦𑀼 𑀔𑁄 𑀓𑀣’’𑀦𑁆𑀢𑀺 𑀩𑀳𑀺𑀤𑁆𑀥𑀸 𑀫𑀦𑀲𑀺 𑀓𑀭𑁄𑀢𑀺, 𑀢𑀢𑁆𑀣𑀧𑀺 𑀦 𑀧𑀓𑁆𑀔𑀦𑁆𑀤𑀢𑀺. 𑀢𑀢𑁄 ‘‘𑀓𑀸𑀮𑁂𑀦 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂, 𑀓𑀸𑀮𑁂𑀦 𑀧𑀭𑀲𑁆𑀲 𑀲𑀦𑁆𑀢𑀸𑀦𑁂 𑀦𑀼 𑀔𑁄 𑀓𑀣’’𑀦𑁆𑀢𑀺 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸 𑀫𑀦𑀲𑀺 𑀓𑀭𑁄𑀢𑀺, 𑀢𑀢𑁆𑀣𑀧𑀺 𑀦 𑀧𑀓𑁆𑀔𑀦𑁆𑀤𑀢𑀺. 𑀢𑀢𑁄 𑀉𑀪𑀢𑁄𑀪𑀸𑀕𑀯𑀺𑀫𑀼𑀢𑁆𑀢𑁄 𑀳𑁄𑀢𑀼𑀓𑀸𑀫𑁄 ‘‘𑀅𑀭𑀽𑀧𑀲𑀫𑀸𑀧𑀢𑁆𑀢𑀺𑀬𑀁 𑀦𑀼 𑀔𑁄 𑀓𑀣’’𑀦𑁆𑀢𑀺 𑀆𑀦𑁂𑀜𑁆𑀚𑀁 𑀫𑀦𑀲𑀺 𑀓𑀭𑁄𑀢𑀺, 𑀢𑀢𑁆𑀣𑀧𑀺 𑀦 𑀧𑀓𑁆𑀔𑀦𑁆𑀤𑀢𑀺. ‘‘𑀇𑀤𑀸𑀦𑀺 𑀫𑁂 𑀘𑀺𑀢𑁆𑀢𑀁 𑀦 𑀧𑀓𑁆𑀔𑀦𑁆𑀤𑀢𑀻’’𑀢𑀺 𑀯𑀺𑀲𑁆𑀲𑀝𑁆𑀞𑀯𑀻𑀭𑀺𑀬𑁂𑀦 𑀦 𑀪𑀯𑀺𑀢𑀩𑁆𑀩𑀁, 𑀧𑀸𑀤𑀓𑀚𑁆𑀛𑀸𑀦𑀫𑁂𑀯 𑀧𑀦 𑀲𑀸𑀥𑀼𑀓𑀁 𑀧𑀼𑀦𑀧𑁆𑀧𑀼𑀦𑀁 𑀫𑀦𑀲𑀺 𑀓𑀸𑀢𑀩𑁆𑀩𑀁, 𑀏𑀯𑀫𑀲𑁆𑀲 𑀭𑀼𑀓𑁆𑀔𑀁 𑀙𑀺𑀦𑁆𑀤𑀢𑁄 𑀨𑀭𑀲𑀼𑀫𑁆𑀳𑀺 𑀅𑀯𑀳𑀦𑁆𑀢𑁂 𑀧𑀼𑀦𑀧𑁆𑀧𑀼𑀦𑀁 𑀦𑀺𑀲𑀺𑀢𑀦𑀺𑀲𑀺𑀢𑀁 𑀓𑀸𑀭𑁂𑀢𑁆𑀯𑀸 𑀙𑀺𑀦𑁆𑀤𑀦𑁆𑀢𑀲𑁆𑀲 𑀙𑀺𑀚𑁆𑀚𑁂 𑀨𑀭𑀲𑀼 𑀯𑀺𑀬 𑀓𑀫𑁆𑀫𑀝𑁆𑀞𑀸𑀦𑁂 𑀫𑀦𑀲𑀺𑀓𑀸𑀭𑁄 𑀯𑀳𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑀲𑁆𑀫𑀺𑀁𑀬𑁂𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺.

𑀅𑀢𑁆𑀣𑀢𑁄 𑀘 𑀅𑀲𑀫𑀸𑀦𑀢𑁆𑀢𑀸𑀢𑀺 𑀇𑀤𑀁 𑀓𑀲𑁆𑀫𑀸 𑀯𑀼𑀢𑁆𑀢𑀁. 𑀦𑀦𑀼 𑀬𑁂𑀲𑀼 𑀅𑀢𑁆𑀣𑁂𑀲𑀼 𑀅𑀚𑁆𑀛𑀢𑁆𑀢-𑀲𑀤𑁆𑀤𑁄 𑀯𑀢𑁆𑀢𑀢𑀺, 𑀢𑁂 𑀲𑀩𑁆𑀩𑁂 𑀤𑀲𑁆𑀲𑁂𑀢𑁆𑀯𑀸 𑀇𑀥𑀸𑀥𑀺𑀧𑁆𑀧𑁂𑀢𑀢𑁆𑀣𑀦𑀺𑀤𑁆𑀥𑀸𑀭𑀡𑀢𑁆𑀣𑀁 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦𑁂𑀢𑀁 𑀯𑀼𑀢𑁆𑀢𑀁. 𑀘𑀓𑁆𑀔𑀸𑀤𑀻𑀲𑀼 𑀘 𑀅𑀚𑁆𑀛𑀢𑁆𑀢𑀺𑀓-𑀲𑀤𑁆𑀤𑁄 𑀅𑀚𑁆𑀛𑀢𑁆𑀢𑀸𑀦𑀁 𑀅𑀩𑁆𑀪𑀦𑁆𑀢𑀭𑀢𑀸𑀯𑀺𑀲𑁂𑀲𑀫𑀼𑀧𑀸𑀤𑀸𑀬 𑀧𑀯𑀢𑁆𑀢𑀢𑀺, 𑀬𑀢𑁄 𑀢𑁂 𑀅𑀚𑁆𑀛𑀢𑁆𑀢𑀅𑀚𑁆𑀛𑀢𑁆𑀢𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀅𑀧𑀺𑀘 ‘‘𑀙 𑀅𑀚𑁆𑀛𑀢𑁆𑀢𑀺𑀓𑀸𑀦𑀻’’𑀢𑀺 𑀇𑀤𑀁 𑀅𑀚𑁆𑀛𑀢𑁆𑀢𑀺𑀓-𑀲𑀤𑁆𑀤𑀲𑁆𑀲 𑀘𑀓𑁆𑀔𑀸𑀤𑀻𑀦𑀁 𑀅𑀚𑁆𑀛𑀢𑁆𑀢𑀪𑀸𑀯𑀯𑀺𑀪𑀸𑀯𑀦𑀲𑀩𑁆𑀪𑀸𑀯𑀢𑁄 𑀇𑀥 𑀉𑀤𑀸𑀳𑀭𑀡𑀯𑀲𑁂𑀦 𑀯𑀼𑀢𑁆𑀢𑀁. 𑀢𑁂𑀦𑁂𑀯 𑀳𑀺 𑀅𑀝𑁆𑀞𑀓𑀣𑀸𑀬𑀁 𑀅𑀚𑁆𑀛𑀢𑁆𑀢𑀺𑀓𑀤𑀼𑀓𑁂 ‘‘𑀅𑀚𑁆𑀛𑀢𑁆𑀢𑀸𑀯 𑀅𑀚𑁆𑀛𑀢𑁆𑀢𑀺𑀓𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀜𑁆𑀘 𑀲𑀢𑀺 𑀦 𑀏𑀢𑁆𑀣 𑀲𑀤𑁆𑀤𑀢𑁄 𑀅𑀲𑀫𑀸𑀦𑀢𑀸𑀧𑀺 𑀲𑀺𑀬𑀸, 𑀢𑀲𑁆𑀫𑀸𑀬𑁂𑀯 𑀬𑀣𑀸𑀯𑀼𑀢𑁆𑀢𑀘𑁄𑀤𑀦𑀁 𑀯𑀺𑀲𑁄𑀥𑁂𑀦𑁆𑀢𑁄 ‘‘𑀅𑀬𑀁 𑀧𑀦𑁂𑀢𑁆𑀣𑀸’’𑀢𑀺𑀆𑀤𑀺𑀫𑀸𑀳. 𑀢𑁂𑀦𑀸𑀢𑀺 𑀢𑀲𑁆𑀫𑀸. 𑀢𑀁𑀯𑀸𑀘𑀓𑀲𑁆𑀲𑀸𑀢𑀺 𑀅𑀚𑁆𑀛𑀢𑁆𑀢𑀚𑁆𑀛𑀢𑁆𑀢𑀯𑀸𑀘𑀓𑀲𑁆𑀲 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀢𑀤𑀢𑁆𑀣𑀲𑁆𑀲 𑀅𑀚𑁆𑀛𑀢𑁆𑀢𑀪𑀸𑀯𑀲𑀩𑁆𑀪𑀸𑀯𑀢𑁄.

‘‘𑀦 𑀔𑁄, 𑀆𑀦𑀦𑁆𑀤, 𑀪𑀺𑀓𑁆𑀔𑀼 𑀲𑁄𑀪𑀢𑀺 𑀲𑀗𑁆𑀕𑀡𑀺𑀓𑀸𑀭𑀸𑀫𑁄 𑀲𑀗𑁆𑀕𑀡𑀺𑀓𑀸𑀭𑀢𑁄 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀁 𑀅𑀦𑀼𑀬𑀼𑀢𑁆𑀢𑁄’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁧𑁮𑁬) 𑀧𑀩𑁆𑀩𑀚𑀺𑀢𑀸𑀲𑀸𑀭𑀼𑀧𑁆𑀧𑀲𑁆𑀲 𑀦𑁂𑀓𑁆𑀔𑀫𑁆𑀫𑀲𑀼𑀔𑀸𑀤𑀺𑀦𑀺𑀓𑀸𑀫𑀮𑀸𑀪𑀺𑀢𑀸𑀬 𑀅𑀪𑀸𑀯𑀲𑁆𑀲 𑀘 𑀤𑀲𑁆𑀲𑀦𑁂𑀦 𑀲𑀗𑁆𑀕𑀡𑀺𑀓𑀸𑀭𑀸𑀫𑀢𑀸𑀬, ‘‘𑀦𑀸𑀳𑀁, 𑀆𑀦𑀦𑁆𑀤, 𑀏𑀓𑀁 𑀭𑀽𑀧𑀫𑁆𑀧𑀺 𑀲𑀫𑀦𑀼𑀧𑀲𑁆𑀲𑀸𑀫𑀺, 𑀬𑀢𑁆𑀣 𑀭𑀢𑁆𑀢𑀲𑁆𑀲 𑀬𑀣𑀸𑀪𑀺𑀭𑀢𑀲𑁆𑀲 𑀭𑀽𑀧𑀲𑁆𑀲 𑀯𑀺𑀧𑀭𑀺𑀡𑀸𑀫𑀜𑁆𑀜𑀣𑀸𑀪𑀸𑀯𑀸 𑀦 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁 𑀲𑁄𑀓𑀧𑀭𑀺…𑀧𑁂… 𑀉𑀧𑀸𑀬𑀸𑀲𑀸’’𑀢𑀺 (𑀫. 𑀦𑀺. 𑁩.𑁧𑁮𑁬) 𑀏𑀯𑀁 𑀭𑀽𑀧𑀸𑀤𑀺𑀭𑀢𑀺𑀬𑀸 𑀘 𑀆𑀤𑀻𑀦𑀯𑀁 𑀯𑀢𑁆𑀯𑀸 𑀲𑀘𑁂 𑀓𑁄𑀘𑀺 𑀤𑀼𑀧𑁆𑀧𑀜𑁆𑀜𑀚𑀸𑀢𑀺𑀓𑁄 𑀧𑀩𑁆𑀩𑀚𑀺𑀢𑁄 𑀯𑀤𑁂𑀬𑁆𑀬 ‘‘𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄 𑀔𑁂𑀢𑁆𑀢𑁂 𑀧𑀯𑀺𑀝𑁆𑀞𑀸 𑀕𑀸𑀯𑀺𑀬𑁄 𑀯𑀺𑀬 𑀅𑀫𑁆𑀳𑁂𑀬𑁂𑀯 𑀕𑀡𑀢𑁄 𑀦𑀻𑀳𑀭𑀢𑀺, 𑀏𑀓𑀻𑀪𑀸𑀯𑁂 𑀦𑀺𑀬𑁄𑀚𑁂𑀢𑀺, 𑀲𑀬𑀁 𑀧𑀦 𑀭𑀸𑀚𑀭𑀸𑀚𑀫𑀳𑀸𑀫𑀢𑁆𑀢𑀸𑀤𑀻𑀳𑀺 𑀧𑀭𑀺𑀯𑀼𑀢𑁄 𑀯𑀺𑀳𑀭𑀢𑀻’’𑀢𑀺, 𑀢𑀲𑁆𑀲 𑀯𑀘𑀦𑁄𑀓𑀸𑀲𑀼𑀧𑀘𑁆𑀙𑁂𑀤𑀦𑀢𑁆𑀣𑀁 𑀘𑀓𑁆𑀓𑀯𑀸𑀴𑀧𑀭𑀺𑀬𑀦𑁆𑀢𑀸𑀬 𑀧𑀭𑀺𑀲𑀸𑀬 𑀫𑀚𑁆𑀛𑁂 𑀦𑀺𑀲𑀺𑀦𑁆𑀦𑁄𑀧𑀺 𑀢𑀣𑀸𑀕𑀢𑁄 𑀏𑀓𑀓𑁄𑀯𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀅𑀬𑀁 𑀔𑁄 𑀧𑀦𑀸’’𑀢𑀺 𑀤𑁂𑀲𑀦𑀸 𑀆𑀭𑀤𑁆𑀥𑀸𑀢𑀺 𑀆𑀳 ‘‘𑀢𑀧𑁆𑀧𑀝𑀺𑀧𑀓𑁆𑀔𑀯𑀺𑀳𑀸𑀭𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺. 𑀢𑀢𑁆𑀣 𑀲𑀩𑁆𑀩𑀦𑀺𑀫𑀺𑀢𑁆𑀢𑀸𑀦𑀦𑁆𑀢𑀺 𑀭𑀽𑀧𑀸𑀤𑀻𑀦𑀁 𑀲𑀗𑁆𑀔𑀢𑀦𑀺𑀫𑀺𑀢𑁆𑀢𑀸𑀦𑀁. 𑀅𑀚𑁆𑀛𑀢𑁆𑀢𑀦𑁆𑀢𑀺 𑀯𑀺𑀲𑀬𑀚𑁆𑀛𑀢𑁆𑀢𑀁. 𑀲𑀼𑀜𑁆𑀜𑀢𑀦𑁆𑀢𑀺 𑀅𑀦𑀢𑁆𑀢𑀸𑀦𑀼𑀧𑀲𑁆𑀲𑀦𑀸𑀦𑀼𑀪𑀸𑀯𑀦𑀺𑀩𑁆𑀩𑀢𑁆𑀢𑀨𑀮𑀲𑀫𑀸𑀧𑀢𑁆𑀢𑀺𑀁. 𑀢𑁂𑀦𑁂𑀯𑀸𑀳 ‘‘𑀅𑀚𑁆𑀛𑀢𑁆𑀢’’𑀦𑁆𑀢𑀺𑀆𑀤𑀺. 𑀢𑀢𑁆𑀣 𑀤𑀼𑀢𑀺𑀬𑁂 𑀯𑀺𑀓𑀧𑁆𑀧𑁂 𑀞𑀸𑀦-𑀲𑀤𑁆𑀤𑁄 𑀓𑀸𑀭𑀡𑀧𑀭𑀺𑀬𑀸𑀬𑁄 𑀤𑀝𑁆𑀞𑀩𑁆𑀩𑁄. 𑀲𑀘𑁆𑀘𑀓𑀲𑀼𑀢𑁆𑀢𑁂𑀦𑀸𑀢𑀺 𑀫𑀳𑀸𑀲𑀘𑁆𑀘𑀓𑀲𑀼𑀢𑁆𑀢𑁂𑀦. 𑀢𑀢𑁆𑀣 𑀳𑀺 𑁋

‘‘𑀅𑀪𑀺𑀚𑀸𑀦𑀸𑀫𑀺 𑀔𑁄 𑀧𑀦𑀸𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀅𑀦𑁂𑀓𑀲𑀢𑀸𑀬 𑀧𑀭𑀺𑀲𑀸𑀬 𑀥𑀫𑁆𑀫𑀁 𑀤𑁂𑀲𑁂𑀢𑀸, 𑀅𑀧𑀺𑀲𑁆𑀲𑀼 𑀫𑀁 𑀏𑀓𑀫𑁂𑀓𑁄 𑀏𑀯𑀁 𑀫𑀜𑁆𑀜𑀢𑀺 ‘𑀫𑀫𑁂𑀯𑀸𑀭𑀩𑁆𑀪 𑀲𑀫𑀡𑁄 𑀕𑁄𑀢𑀫𑁄 𑀥𑀫𑁆𑀫𑀁 𑀤𑁂𑀲𑁂𑀢𑀻’𑀢𑀺. 𑀦 𑀔𑁄 𑀧𑀦𑁂𑀢𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀬𑀸𑀯𑀤𑁂𑀯 𑀯𑀺𑀜𑁆𑀜𑀸𑀧𑀦𑀢𑁆𑀣𑀸𑀬 𑀢𑀣𑀸𑀕𑀢𑁄 𑀧𑀭𑁂𑀲𑀁 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺. 𑀲𑁄 𑀔𑁄 𑀅𑀳𑀁, 𑀅𑀕𑁆𑀕𑀺𑀯𑁂𑀲𑁆𑀲𑀦, 𑀢𑀲𑁆𑀲𑀸𑀬𑁂𑀯 𑀓𑀣𑀸𑀬 𑀧𑀭𑀺𑀬𑁄𑀲𑀸𑀦𑁂 𑀢𑀲𑁆𑀫𑀺𑀁𑀬𑁂𑀯 𑀧𑀼𑀭𑀺𑀫𑀲𑁆𑀫𑀺𑀁 𑀲𑀫𑀸𑀥𑀺𑀦𑀺𑀫𑀺𑀢𑁆𑀢𑁂 𑀅𑀚𑁆𑀛𑀢𑁆𑀢𑀫𑁂𑀯 𑀘𑀺𑀢𑁆𑀢𑀁 𑀲𑀡𑁆𑀞𑀧𑁂𑀫𑀺 𑀲𑀦𑁆𑀦𑀺𑀲𑀸𑀤𑁂𑀫𑀺, 𑀏𑀓𑁄𑀤𑀺𑀁 𑀓𑀭𑁄𑀫𑀺, 𑀲𑀫𑀸𑀤𑀳𑀸𑀫𑀺 ‘𑀬𑁂𑀦 𑀲𑀼𑀤𑀁 𑀦𑀺𑀘𑁆𑀘𑀓𑀧𑁆𑀧𑀁 𑀯𑀺𑀳𑀭𑀸𑀫𑀻’’𑀢𑀺 (𑀫. 𑀦𑀺. 𑁧.𑁩𑁮𑁭) 𑁋