𑁨. 𑀭𑀽𑀧𑀓𑀡𑁆𑀟𑀁

𑀉𑀤𑁆𑀤𑁂𑀲𑀯𑀡𑁆𑀡𑀦𑀸

𑀓𑁂𑀦𑀘𑀻𑀢𑀺 𑀭𑀽𑀧𑁂𑀦 𑀯𑀸 𑀅𑀭𑀽𑀧𑁂𑀦 𑀯𑀸. 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦 𑀢𑀸𑀯 𑀭𑀽𑀧𑀲𑁆𑀲 𑀲𑀫𑀬𑀯𑀯𑀢𑁆𑀣𑀸𑀦𑀁 𑀦 𑀲𑀓𑁆𑀓𑀸 𑀓𑀸𑀢𑀼𑀁 𑀅𑀩𑁆𑀬𑀸𑀧𑀺𑀢𑀸𑀬 𑀅𑀦𑁂𑀓𑀦𑁆𑀢𑀺𑀓𑀢𑀸𑀬 𑀘𑀸𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑀩𑁆𑀪𑀸𑀯𑀢𑁄’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁 𑀘𑀺𑀢𑁆𑀢𑀲𑁆𑀲 𑀢𑀻𑀲𑀼 𑀔𑀡𑁂𑀲𑀼 𑀉𑀧𑁆𑀧𑀚𑁆𑀚𑀢𑀻𑀢𑀺 𑀇𑀫𑀲𑁆𑀫𑀺𑀁 𑀢𑀸𑀯 𑀯𑀸𑀤𑁂 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀲𑀫𑀬𑁂𑀦 𑀭𑀽𑀧𑀽𑀧𑀧𑀢𑁆𑀢𑀺𑀲𑀫𑀬𑀲𑁆𑀲 𑀯𑀯𑀢𑁆𑀣𑀸𑀦𑀁 𑀫𑀸 𑀳𑁄𑀢𑀼, 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂𑀬𑁂𑀯 𑀲𑀩𑁆𑀩𑀫𑁆𑀧𑀺 𑀭𑀽𑀧𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀇𑀫𑀲𑁆𑀫𑀺𑀁 𑀧𑀦 𑀯𑀸𑀤𑁂 𑀓𑀣𑀦𑁆𑀢𑀺? 𑀏𑀢𑁆𑀣𑀸𑀧𑀺 𑀅𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀭𑀽𑀧𑀁 𑀘𑀺𑀢𑁆𑀢𑁂𑀦 𑀲𑀳𑀼𑀧𑁆𑀧𑀸𑀤𑁂𑀧𑀺 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑀭𑀽𑀧𑀁 𑀯𑀺𑀬 𑀅𑀘𑀺𑀢𑁆𑀢𑀧𑀝𑀺 𑀩𑀦𑁆𑀥𑀼𑀧𑁆𑀧𑀸𑀤𑀢𑀸𑀬 𑀦 𑀘𑀺𑀢𑁆𑀢𑁂𑀦 𑀯𑀯𑀢𑁆𑀣𑀸𑀧𑁂𑀢𑀩𑁆𑀩𑀲𑀫𑀬𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀅𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑀩𑁆𑀪𑀸𑀯𑀢𑁄’’𑀢𑀺. 𑀢𑁂𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦 𑀭𑀽𑀧𑀲𑁆𑀲 𑀲𑀫𑀬𑀯𑀯𑀢𑁆𑀣𑀸𑀦𑀁 𑀦 𑀩𑁆𑀬𑀸𑀧𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀦𑁂𑀓𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀢𑀸𑀬 𑀯𑀯𑀢𑁆𑀣𑀸𑀦𑀸𑀪𑀸𑀯𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀺𑀬𑀢𑁂 𑀳𑀺 𑀲𑀫𑀼𑀝𑁆𑀞𑀸𑀧𑀓𑀘𑀺𑀢𑁆𑀢𑁂 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲 𑀲𑀺𑀬𑀸 𑀯𑀯𑀢𑁆𑀣𑀸𑀦𑀦𑁆𑀢𑀺.

𑀓𑁂𑀲𑀜𑁆𑀘𑀻𑀢𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀤𑀻𑀦𑀁. 𑀓𑀢𑁆𑀣𑀘𑀻𑀢𑀺 𑀆𑀭𑀼𑀧𑁆𑀧𑁂. 𑀓𑁂𑀲𑀜𑁆𑀘𑀻𑀢𑀺 𑀯𑀸 𑀓𑁂𑀲𑀜𑁆𑀘𑀺 𑀧𑀜𑁆𑀘𑀯𑁄𑀓𑀸𑀭𑀯𑀺𑀧𑀸𑀓𑀸𑀦𑀁. 𑀓𑀢𑁆𑀣𑀘𑀻𑀢𑀺 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀘𑀭𑀺𑀫𑀓𑁆𑀔𑀡𑁂 𑀘. ‘‘𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀥. 𑀲. 𑁧) 𑀘𑀺𑀢𑁆𑀢𑀲𑀳𑀪𑀸𑀯𑀺𑀦𑀁 𑀏𑀯 𑀘𑀺𑀢𑁆𑀢𑁂𑀦 𑀲𑀫𑀬𑀯𑀯𑀢𑁆𑀣𑀸𑀦𑀁 𑀓𑀢𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀅𑀘𑀺𑀢𑁆𑀢𑀲𑀳𑀪𑀼𑀪𑀸𑀯𑀢𑁄’’𑀢𑀺. 𑀢𑁂𑀲𑀦𑁆𑀢𑀺 𑀉𑀧𑀸𑀤𑀸𑀭𑀽𑀧𑀸𑀦𑀁. 𑀬𑁄 𑀬𑀲𑁆𑀲 𑀲𑀳𑀪𑀸𑀯𑁂𑀦 𑀉𑀧𑀓𑀸𑀭𑀓𑁄, 𑀲𑁄 𑀏𑀯 𑀢𑀲𑁆𑀲 𑀲𑀫𑀬𑀯𑀯𑀢𑁆𑀣𑀸𑀧𑀓𑀪𑀸𑀯𑁂𑀦 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀲𑀳𑀚𑀸𑀢…𑀧𑁂… 𑀢𑁆𑀢𑀦𑀢𑁄’’𑀢𑀺. 𑀦𑀸𑀧𑀺 𑀫𑀳𑀸𑀪𑀽𑀢𑁂𑀳𑀻𑀢𑀺𑀆𑀤𑀺𑀦𑀸 𑀯𑀯𑀢𑁆𑀣𑀸𑀦𑀸𑀪𑀸𑀯𑀫𑁂𑀯 𑀤𑀲𑁆𑀲𑁂𑀢𑀺. 𑀓𑁂𑀲𑀜𑁆𑀘𑀻𑀢𑀺 𑀅𑀓𑀫𑁆𑀫𑀚𑀸𑀤𑀻𑀦𑀁. 𑀓𑁂𑀳𑀺𑀘𑀻𑀢𑀺 𑀓𑀫𑁆𑀫𑀚𑀸𑀤𑀻𑀳𑀺. 𑀧𑀯𑀢𑁆𑀢𑀺𑀢𑁄𑀢𑀺 𑀧𑀯𑀢𑁆𑀢𑀦𑀢𑁄. 𑀲𑀳𑀸𑀢𑀺 𑀏𑀓𑀲𑁆𑀫𑀺𑀁 𑀓𑀸𑀮𑁂. 𑀅𑀪𑀸𑀯𑀸𑀢𑀺 𑀦𑀺𑀬𑁄𑀕𑀢𑁄 𑀅𑀪𑀸𑀯𑀸.

𑀯𑀺𑀜𑁆𑀜𑀢𑁆𑀢𑀺 …𑀧𑁂… 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀫𑀳𑀸𑀪𑀽𑀢𑁂𑀳𑀺 𑀲𑀫𑀬𑀯𑀯𑀢𑁆𑀣𑀸𑀦𑁂 𑀓𑀭𑀺𑀬𑀫𑀸𑀦𑁂 𑀢𑁂𑀳𑀺 𑀅𑀬𑀸𑀯𑀪𑀸𑀯𑀺𑀢𑀢𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀓𑀲𑁆𑀫𑀺𑀁 𑀓𑀸𑀮𑁂𑀢𑀺𑀆𑀤𑀺𑀦𑀸𑀧𑀺 𑀫𑀳𑀸𑀪𑀽𑀢𑁂𑀳𑀺 𑀲𑀫𑀬𑀦𑀺𑀬𑀫𑀦𑁂 𑀯𑀯𑀢𑁆𑀣𑀸𑀦𑀸𑀪𑀸𑀯𑀫𑁂𑀯 𑀯𑀺𑀪𑀸𑀯𑁂𑀢𑀺. ‘‘𑀢𑀣𑀸 𑀯𑀺𑀪𑀚𑀦𑀢𑁆𑀣’’𑀦𑁆𑀢𑀺, ‘‘𑀅𑀯𑀺𑀪𑀢𑁆𑀢𑀁 𑀅𑀩𑁆𑀬𑀸𑀓𑀢𑀁 𑀅𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼’’𑀦𑁆𑀢𑀺 𑀘 𑀇𑀫𑁂𑀲𑀁 𑀧𑀤𑀸𑀦𑀁 ‘‘𑀯𑀺𑀪𑀢𑁆𑀢𑀁 𑀅𑀯𑀺𑀪𑀢𑁆𑀢𑀜𑁆𑀘 𑀲𑀩𑁆𑀩𑀁 𑀲𑀗𑁆𑀕𑀡𑁆𑀳𑀦𑁆𑀢𑁄 𑀆𑀳𑀸’’𑀢𑀺 𑀇𑀫𑀺𑀦𑀸 𑀲𑀫𑁆𑀩𑀦𑁆𑀥𑁄. 𑀲𑀫𑀬𑀯𑀯𑀢𑁆𑀣𑀸𑀦𑀁 𑀓𑀢𑁆𑀯𑀸 𑀦𑀺𑀤𑁆𑀤𑀺𑀲𑀺𑀬𑀫𑀸𑀦𑀲𑁆𑀲 𑀦𑀺𑀧𑁆𑀧𑀤𑁂𑀲𑀢𑀸𑀬 𑀅𑀲𑀫𑁆𑀪𑀯𑀢𑁄 𑀏𑀓𑀤𑁂𑀲𑀁 𑀦𑀺𑀤𑁆𑀤𑀺𑀲𑀺𑀢𑁆𑀯𑀸 𑀲𑀸𑀫𑀜𑁆𑀜𑁂𑀦 𑀦𑀺𑀕𑀫𑀦𑀁 𑀬𑀼𑀢𑁆𑀢𑀁, 𑀅𑀓𑀢𑁆𑀯𑀸 𑀧𑀦 𑀲𑀫𑀬𑀯𑀯𑀢𑁆𑀣𑀸𑀦𑀁 𑀲𑀭𑀽𑀧𑀢𑁄 𑀦𑀺𑀤𑁆𑀤𑀺𑀲𑀦𑁂𑀦 𑀢𑀣𑀸𑀢𑀺 𑀇𑀫𑀫𑀢𑁆𑀣𑀁 𑀆𑀳 ‘‘𑀲𑀫𑀬𑀯𑀯𑀢𑁆𑀣𑀸𑀦𑁂𑀦𑀸’’𑀢𑀺𑀆𑀤𑀺𑀦𑀸. 𑀅𑀯𑀺𑀪𑀢𑁆𑀢𑁂𑀢𑀺 𑀯𑀺𑀧𑀸𑀓𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀁 𑀯𑀺𑀬 𑀦 𑀧𑀼𑀩𑁆𑀩𑁂 𑀯𑀺𑀪𑀢𑁆𑀢𑁂. 𑀯𑀺𑀪𑀚𑀺𑀢𑀩𑁆𑀩𑁂𑀢𑀺 𑀪𑁂𑀤𑀯𑀦𑁆𑀢𑀢𑀸𑀬 𑀯𑀺𑀪𑀚𑀦𑀸𑀭𑀳𑁂. 𑀤𑀲𑁆𑀲𑀺𑀢𑁂𑀢𑀺 𑀉𑀤𑁆𑀤𑀺𑀲𑀦𑀯𑀲𑁂𑀦 𑀤𑀲𑁆𑀲𑀺𑀢𑁂. 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑀭𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀏𑀢𑁆𑀣 𑀧𑀦𑀸’’𑀢𑀺𑀆𑀤𑀺𑀫𑀸𑀳.

𑀯𑀺𑀧𑀸𑀓𑀸𑀤𑀺𑀥𑀫𑁆𑀫𑀸𑀦𑀁 𑀦𑀬𑀦𑀁 𑀦𑀬𑁄, 𑀲𑁄𑀯 𑀤𑀲𑁆𑀲𑀦𑀦𑁆𑀢𑀺 𑀦𑀬𑀤𑀲𑁆𑀲𑀦𑀁. ‘‘𑀤𑁂𑀲𑀦𑀸’’𑀢𑀺 𑀯𑀼𑀢𑁆𑀢𑀁 𑀳𑁂𑀝𑁆𑀞𑀸 𑀕𑀳𑀡𑀫𑁂𑀯 𑀦𑀬𑀤𑀲𑁆𑀲𑀦𑀦𑁆𑀢𑀺. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀧𑀦 𑀓𑀸𑀫𑀸𑀯𑀘𑀭𑀸𑀤𑀺𑀪𑀸𑀯𑁂𑀦 𑀦𑀻𑀬𑀢𑀻𑀢𑀺 𑀦𑀬𑁄, 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀁. 𑀢𑀲𑁆𑀲 𑀤𑀲𑁆𑀲𑀦𑀁 𑀦𑀬𑀤𑀲𑁆𑀲𑀦𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀤𑀼𑀓𑀸𑀤𑀻𑀲𑀼 𑀦𑀺𑀤𑁆𑀤𑁂𑀲𑀯𑀸𑀭𑁂 𑀘 𑀳𑀤𑀬𑀯𑀢𑁆𑀣𑀼𑀦𑁄 𑀅𑀦𑀸𑀕𑀢𑀢𑁆𑀢𑀸 𑀢𑀁 𑀅𑀕𑁆𑀕𑀳𑁂𑀢𑁆𑀯𑀸 𑀧𑀞𑀫𑀯𑀺𑀓𑀧𑁆𑀧𑁄 𑀯𑀼𑀢𑁆𑀢𑁄, 𑀏𑀓𑀓𑁂 𑀧𑀦 𑀯𑀢𑁆𑀣𑀼𑀧𑀺 𑀕𑀳𑀺𑀢𑀦𑁆𑀢𑀺 ‘‘𑀳𑀤𑀬𑀯𑀢𑁆𑀣𑀼𑀜𑁆𑀘𑀸’’𑀢𑀺 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀯𑀼𑀢𑁆𑀢𑀁. 𑀓𑀺𑀁 𑀧𑀦 𑀓𑀸𑀭𑀡𑀁 𑀤𑀼𑀓𑀸𑀤𑀻𑀲𑀼 𑀦𑀺𑀤𑁆𑀤𑁂𑀲𑀯𑀸𑀭𑁂 𑀘 𑀳𑀤𑀬𑀯𑀢𑁆𑀣𑀼 𑀦 𑀕𑀳𑀺𑀢𑀦𑁆𑀢𑀺? 𑀇𑀢𑀭𑀯𑀢𑁆𑀣𑀽𑀳𑀺 𑀅𑀲𑀫𑀸𑀦𑀕𑀢𑀺𑀓𑀢𑁆𑀢𑀸 𑀤𑁂𑀲𑀦𑀸𑀪𑁂𑀤𑀢𑁄 𑀘. 𑀬𑀣𑀸 𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀺 𑀏𑀓𑀦𑁆𑀢𑀢𑁄 𑀘𑀓𑁆𑀔𑀸𑀤𑀺𑀦𑀺𑀲𑁆𑀲𑀬𑀸𑀦𑀺, 𑀦 𑀏𑀯𑀁 𑀫𑀦𑁄𑀯𑀺𑀜𑁆𑀜𑀸𑀡𑀁 𑀏𑀓𑀦𑁆𑀢𑀢𑁄 𑀳𑀤𑀬𑀯𑀢𑁆𑀣𑀼𑀦𑀺𑀲𑁆𑀲𑀬𑀁, 𑀦𑀺𑀲𑁆𑀲𑀺𑀢𑀫𑀼𑀔𑁂𑀦 𑀘 𑀯𑀢𑁆𑀣𑀼𑀤𑀼𑀓𑀸𑀤𑀺𑀤𑁂𑀲𑀦𑀸 𑀧𑀯𑀢𑁆𑀢𑀸. 𑀬𑀫𑁆𑀧𑀺 𑀏𑀓𑀦𑁆𑀢𑀢𑁄 𑀳𑀤𑀬𑀯𑀢𑁆𑀣𑀼𑀦𑀺𑀲𑁆𑀲𑀬𑀁, 𑀢𑀲𑁆𑀲 𑀯𑀲𑁂𑀦 ‘‘𑀅𑀢𑁆𑀣𑀺 𑀭𑀽𑀧𑀁 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀯𑀢𑁆𑀣𑀽’’𑀢𑀺𑀆𑀤𑀺𑀦𑀸 𑀤𑀼𑀓𑀸𑀤𑀻𑀲𑀼 𑀯𑀼𑀘𑁆𑀘𑀫𑀸𑀦𑁂𑀲𑀼𑀧𑀺 𑀢𑀤𑀦𑀼𑀓𑀽𑀮𑀆𑀭𑀫𑁆𑀫𑀡𑀤𑀼𑀓𑀸𑀤𑀬𑁄 𑀦 𑀲𑀫𑁆𑀪𑀯𑀦𑁆𑀢𑀺. 𑀦 𑀳𑀺 ‘‘𑀅𑀢𑁆𑀣𑀺 𑀭𑀽𑀧𑀁 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀁, 𑀅𑀢𑁆𑀣𑀺 𑀭𑀽𑀧𑀁 𑀦 𑀫𑀦𑁄𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡’’𑀦𑁆𑀢𑀺𑀆𑀤𑀺𑀦𑀸 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺 𑀯𑀢𑁆𑀣𑀸𑀭𑀫𑁆𑀫𑀡𑀤𑀼𑀓𑀤𑁂𑀲𑀦𑀸 𑀪𑀺𑀦𑁆𑀦𑀕𑀢𑀺𑀓𑀸 𑀲𑀺𑀬𑀼𑀁, 𑀲𑀫𑀸𑀦𑀕𑀢𑀺𑀓𑀸 𑀘 𑀢𑀸 𑀤𑁂𑀲𑁂𑀢𑀼𑀁 𑀪𑀕𑀯𑀢𑁄 𑀅𑀚𑁆𑀛𑀸𑀲𑀬𑁄. 𑀏𑀲𑀸 𑀳𑀺 𑀪𑀕𑀯𑀢𑁄 𑀤𑁂𑀲𑀦𑀸 𑀧𑀓𑀢𑀺. 𑀢𑁂𑀦𑁂𑀯 𑀳𑀺 𑀦𑀺𑀓𑁆𑀔𑁂𑀧𑀓𑀡𑁆𑀟𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀺𑀪𑀸𑀕𑁂𑀦 𑀅𑀯𑀼𑀘𑁆𑀘𑀫𑀸𑀦𑀢𑁆𑀢𑀸 𑀅𑀯𑀺𑀢𑀓𑁆𑀓𑀸𑀯𑀺𑀘𑀸𑀭𑀧𑀤𑀯𑀺𑀲𑁆𑀲𑀚𑁆𑀚𑀦𑁂 𑀯𑀺𑀘𑀸𑀭𑁄𑀢𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀅𑀯𑀺𑀢𑀓𑁆𑀓𑀯𑀺𑀘𑀸𑀭𑀫𑀢𑁆𑀢𑀧𑀤𑀯𑀺𑀲𑁆𑀲𑀚𑁆𑀚𑀦𑁂 𑀮𑀩𑁆𑀪𑀫𑀸𑀦𑁄𑀧𑀺 𑀯𑀺𑀢𑀓𑁆𑀓𑁄 𑀦 𑀉𑀤𑁆𑀥𑀝𑁄, 𑀅𑀜𑁆𑀜𑀣𑀸 𑀯𑀺𑀢𑀓𑁆𑀓𑁄 𑀘𑀸𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺. 𑀏𑀯𑀁 𑀇𑀢𑀭𑀯𑀢𑁆𑀣𑀽𑀳𑀺 𑀅𑀲𑀫𑀸𑀦𑀕𑀢𑀺𑀓𑀢𑁆𑀢𑀸 𑀤𑁂𑀲𑀦𑀸𑀪𑁂𑀤𑀢𑁄 𑀘 𑀤𑀼𑀓𑀸𑀤𑀻𑀲𑀼 𑀉𑀤𑁆𑀤𑁂𑀲𑁂 𑀦 𑀕𑀳𑀺𑀢𑀁. 𑀉𑀤𑁆𑀤𑀺𑀝𑁆𑀞𑀲𑁆𑀲𑁂𑀯 𑀳𑀺 𑀦𑀺𑀤𑁆𑀤𑀺𑀲𑀦𑀢𑁄 𑀦𑀺𑀤𑁆𑀤𑁂𑀲𑁂𑀧𑀺 𑀦 𑀕𑀳𑀺𑀢𑀁 𑀳𑀤𑀬𑀯𑀢𑁆𑀣𑀽𑀢𑀺 𑀯𑀤𑀦𑁆𑀢𑀺.

𑀘𑀓𑁆𑀔𑀸𑀤𑀺𑀤𑀲𑀓𑀸 𑀲𑀢𑁆𑀢𑀸𑀢𑀺 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀇𑀢𑁆𑀣𑀺𑀪𑀸𑀯𑀧𑀼𑀭𑀺𑀲𑀪𑀸𑀯𑀤𑀲𑀓𑀸 𑀲𑀢𑁆𑀢, 𑀏𑀓𑀲𑀦𑁆𑀢𑀸𑀦𑀯𑀲𑁂𑀦 𑀯𑀸 𑀘𑀓𑁆𑀔𑀼𑀲𑁄𑀢𑀖𑀸𑀦𑀚𑀺𑀯𑁆𑀳𑀸𑀓𑀸𑀬𑀪𑀸𑀯𑀯𑀢𑁆𑀣𑀼𑀤𑀲𑀓𑀸 𑀲𑀢𑁆𑀢. 𑀦𑀺𑀩𑁆𑀩𑀸𑀦𑀲𑁆𑀲 𑀅𑀲𑀢𑀺𑀧𑀺 𑀧𑀭𑀫𑀢𑁆𑀣𑀢𑁄 𑀪𑁂𑀤𑁂 𑀧𑀭𑀺𑀓𑀧𑁆𑀧𑀺𑀢𑀪𑁂𑀤𑁄𑀧𑀺 𑀪𑁂𑀤𑁄𑀬𑁂𑀯 𑀯𑁄𑀳𑀸𑀭𑀯𑀺𑀲𑀬𑁂𑀢𑀺 𑀓𑀢𑁆𑀯𑀸 𑀲𑁄𑀧𑀸𑀤𑀺𑀲𑁂𑀲𑀸𑀤𑀺𑀪𑁂𑀤𑁄 𑀯𑀼𑀢𑁆𑀢𑁄.

𑁫𑁮𑁪. 𑀓𑀺𑀜𑁆𑀘𑀸𑀧𑀺 𑀅𑀜𑁆𑀜𑀢𑁆𑀣 𑀓𑀼𑀓𑁆𑀓𑀼𑀝𑀡𑁆𑀟𑀲𑀡𑁆𑀞𑀸𑀦𑁂 𑀧𑀭𑀺𑀫𑀡𑁆𑀟𑀮-𑀲𑀤𑁆𑀤𑁄 𑀤𑀺𑀲𑁆𑀲𑀢𑀺, 𑀘𑀓𑁆𑀓𑀲𑀡𑁆𑀞𑀸𑀦𑀢𑀸 𑀧𑀦 𑀯𑀝𑁆𑀝𑀲𑀡𑁆𑀞𑀸𑀦𑁂 𑀘𑀓𑁆𑀓𑀯𑀸𑀴𑁂 𑀯𑀼𑀘𑁆𑀘𑀫𑀸𑀦𑁄 𑀧𑀭𑀺𑀫𑀡𑁆𑀟𑀮-𑀲𑀤𑁆𑀤𑁄 𑀯𑀝𑁆𑀝𑀧𑀭𑀺𑀬𑀸𑀬𑁄 𑀲𑀺𑀬𑀸. 𑀅𑀦𑁂𑀓𑀢𑁆𑀣𑀸 𑀳𑀺 𑀲𑀤𑁆𑀤𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀯𑀝𑁆𑀝𑀁 𑀧𑀭𑀺𑀫𑀡𑁆𑀟𑀮’’𑀦𑁆𑀢𑀺. 𑀏𑀢𑁆𑀣 𑀘 𑀲𑀺𑀦𑁂𑀭𑀼𑀬𑀼𑀕𑀦𑁆𑀥𑀭𑀸𑀤𑀻𑀦𑀁 𑀲𑀫𑀼𑀤𑁆𑀤𑀢𑁄 𑀉𑀧𑀭𑀺𑀅𑀥𑁄𑀪𑀸𑀕𑀸𑀦𑀁 𑀯𑀲𑁂𑀦 𑀉𑀩𑁆𑀩𑁂𑀥𑁄 𑀯𑀼𑀢𑁆𑀢𑁄, 𑀆𑀬𑀸𑀫𑀯𑀺𑀢𑁆𑀣𑀸𑀭𑁂𑀳𑀺𑀧𑀺 𑀲𑀺𑀦𑁂𑀭𑀼 𑀘𑀢𑀼𑀭𑀸𑀲𑀻𑀢𑀺𑀬𑁄𑀚𑀦𑀲𑀳𑀲𑁆𑀲𑀧𑀭𑀺𑀫𑀸𑀡𑁄𑀯. 𑀬𑀣𑀸𑀳 ‘‘𑀲𑀺𑀦𑁂𑀭𑀼, 𑀪𑀺𑀓𑁆𑀔𑀯𑁂, 𑀧𑀩𑁆𑀩𑀢𑀭𑀸𑀚𑀸 𑀘𑀢𑀼𑀭𑀸𑀲𑀻𑀢𑀺 𑀬𑁄𑀚𑀦𑀲𑀳𑀲𑁆𑀲𑀸𑀦𑀺 𑀆𑀬𑀸𑀫𑁂𑀦, 𑀘𑀢𑀼𑀭𑀸𑀲𑀻𑀢𑀺 𑀬𑁄𑀚𑀦𑀲𑀳𑀲𑁆𑀲𑀸𑀦𑀺 𑀯𑀺𑀢𑁆𑀣𑀸𑀭𑁂𑀦𑀸’’𑀢𑀺 (𑀅. 𑀦𑀺. 𑁭.𑁬𑁬). 𑀲𑀺𑀦𑁂𑀭𑀼𑀁 𑀧𑀸𑀓𑀸𑀭𑀧𑀭𑀺𑀓𑁆𑀔𑁂𑀧𑀯𑀲𑁂𑀦 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀞𑀺𑀢𑀸 𑀬𑀼𑀕𑀦𑁆𑀥𑀭𑀸𑀤𑀬𑁄, 𑀲𑀺𑀦𑁂𑀭𑀼𑀬𑀼𑀕𑀦𑁆𑀥𑀭𑀸𑀤𑀻𑀦𑀁 𑀅𑀦𑁆𑀢𑀭𑁂𑀧𑀺 𑀲𑀻𑀢𑀲𑀫𑀼𑀤𑁆𑀤𑀸 𑀦𑀸𑀫. ‘‘𑀢𑁂 𑀯𑀺𑀲𑀸𑀮𑀢𑁄 𑀬𑀣𑀸𑀓𑁆𑀓𑀫𑀁 𑀲𑀺𑀦𑁂𑀭𑀼𑀆𑀤𑀻𑀦𑀁 𑀅𑀘𑁆𑀘𑀼𑀕𑁆𑀕𑀫𑀦𑀲𑀫𑀸𑀦𑀧𑀭𑀺𑀫𑀸𑀡𑀸’’𑀢𑀺 𑀯𑀤𑀦𑁆𑀢𑀺.

𑀓𑁄𑀝𑀺𑀲𑀢𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀲𑁆𑀲𑁂𑀯 𑀆𑀡𑀸𑀔𑁂𑀢𑁆𑀢𑀪𑀸𑀯𑁄 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑀲𑁆𑀲 𑀚𑀸𑀢𑀺𑀔𑁂𑀢𑁆𑀢𑀪𑀸𑀯𑁄 𑀯𑀺𑀬 𑀥𑀫𑁆𑀫𑀢𑀸𑀯𑀲𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄. 𑀯𑀺𑀓𑀧𑁆𑀧𑀲𑀫𑀸𑀦𑀲𑀫𑀼𑀘𑁆𑀘𑀬𑀯𑀺𑀪𑀸𑀯𑀦𑁂𑀲𑀼 𑀯𑀺𑀬 𑀅𑀯𑀥𑀸𑀭𑀡𑁂 𑀅𑀦𑀺𑀬𑀫𑁂 𑀘 𑀯𑀸-𑀲𑀤𑁆𑀤𑁄 𑀯𑀢𑁆𑀢𑀢𑀻𑀢𑀺 𑀢𑀣𑀸 𑀬𑁄𑀚𑀦𑀸 𑀓𑀢𑀸. 𑀅𑀦𑁂𑀓𑀢𑁆𑀣𑀸 𑀳𑀺 𑀦𑀺𑀧𑀸𑀢𑀸𑀢𑀺. 𑀢𑀢𑁆𑀣 𑀅𑀦𑁂𑀓𑀦𑁆𑀢𑀺𑀓𑀢𑁆𑀣𑁄 𑀅𑀦𑀺𑀬𑀫𑀢𑁆𑀣𑁄.

𑀲𑀻𑀮𑀸𑀤𑀺𑀯𑀺𑀲𑀼𑀤𑁆𑀥𑀺𑀲𑀫𑁆𑀧𑀸𑀤𑀦𑁂𑀦, 𑀘𑀢𑀼𑀥𑀸𑀢𑀼𑀯𑀯𑀢𑁆𑀣𑀸𑀦𑀯𑀲𑁂𑀦𑁂𑀯 𑀯𑀸 𑀫𑀳𑀸𑀓𑀺𑀘𑁆𑀘𑀢𑀸𑀬 𑀫𑀳𑀦𑁆𑀢𑁂𑀦 𑀯𑀸𑀬𑀸𑀫𑁂𑀦. 𑀲𑀢𑀺𑀧𑀺 𑀮𑀓𑁆𑀔𑀡𑀸𑀤𑀺𑀪𑁂𑀤𑁂 𑀏𑀓𑀲𑁆𑀫𑀺𑀁 𑀏𑀯 𑀓𑀸𑀮𑁂 𑀏𑀓𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀅𑀦𑁂𑀓𑀲𑀢𑀲𑀳𑀲𑁆𑀲𑀓𑀮𑀸𑀧𑀯𑀼𑀢𑁆𑀢𑀺𑀢𑁄 𑀫𑀳𑀦𑁆𑀢𑀸𑀦𑀺 𑀩𑀳𑀽𑀦𑀺 𑀪𑀽𑀢𑀸𑀦𑀺 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀫𑀸𑀦𑀸𑀦𑀻𑀢𑀺 𑀯𑀸 𑀫𑀳𑀸𑀪𑀽𑀢𑀸𑀦𑀺 𑀬𑀣𑀸 ‘‘𑀫𑀳𑀸𑀚𑀦𑁄’’𑀢𑀺. 𑀏𑀯𑀦𑁆𑀢𑀺 ‘‘𑀉𑀧𑀸𑀤𑀸𑀬 𑀧𑀯𑀢𑁆𑀢’’𑀦𑁆𑀢𑀺 𑀅𑀢𑁆𑀣𑁂 𑀲𑀢𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀢𑀸 𑀯𑀼𑀢𑁆𑀢𑀸 𑀳𑁄𑀢𑀺 𑀧𑀘𑁆𑀘𑀬𑀲𑀫𑁆𑀪𑀽𑀢𑀢𑀸𑀤𑀻𑀧𑀦𑀢𑁄. 𑀉𑀧𑀸𑀤𑀸𑀬𑀢𑀻𑀢𑀺 𑀉𑀧𑀸𑀤𑀸𑀬𑀢𑀺 𑀏𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦𑁂𑀯𑀸𑀳 ‘‘𑀏𑀓𑀦𑁆𑀢𑀦𑀺𑀲𑁆𑀲𑀺𑀢𑀲𑁆𑀲𑀸’’𑀢𑀺. ‘‘𑀪𑀯𑀢𑀺 𑀳𑀺 𑀦𑀺𑀲𑁆𑀲𑀬𑀭𑀽𑀧𑀸𑀦𑀁 𑀲𑀸𑀫𑀺𑀪𑀸𑀯𑁄’’𑀢𑀺 𑀆𑀥𑀸𑀭𑀸𑀥𑁂𑀬𑁆𑀬𑀲𑀫𑁆𑀩𑀦𑁆𑀥𑀯𑀘𑀦𑀺𑀘𑁆𑀙𑀸𑀬 𑀅𑀪𑀸𑀯𑁂 𑀆𑀥𑀸𑀭𑀪𑀽𑀢𑁄𑀧𑀺 𑀅𑀢𑁆𑀣𑁄 𑀲𑀁𑀲𑀸𑀫𑀺𑀲𑀫𑁆𑀩𑀦𑁆𑀥𑀯𑀘𑀦𑀺𑀘𑁆𑀙𑀸𑀬 𑀲𑀸𑀫𑀺𑀪𑀸𑀯𑁂𑀦 𑀯𑀼𑀘𑁆𑀘𑀢𑀺 𑀬𑀣𑀸 ‘‘𑀭𑀼𑀓𑁆𑀔𑀲𑁆𑀲 𑀲𑀸𑀔𑀸’’𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀢𑀺𑀯𑀺𑀥𑀭𑀽𑀧𑀲𑀗𑁆𑀕𑀳𑀯𑀡𑁆𑀡𑀦𑀸

𑁫𑁮𑁫. 𑀯𑀺𑀜𑁆𑀜𑀢𑁆𑀢𑀺𑀤𑀼𑀓𑁄 𑀘𑀸𑀢𑀺 𑀘-𑀲𑀤𑁆𑀤𑁂𑀦 𑀘𑀺𑀢𑁆𑀢𑀲𑀳𑀪𑀼𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀤𑀼𑀓𑀸𑀧𑀺 𑀲𑀗𑁆𑀕𑀳𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀓𑁆𑀓𑀸 𑀳𑀺 𑀏𑀢𑁂𑀦 𑀦𑀬𑁂𑀦…𑀧𑁂… 𑀯𑀺𑀜𑁆𑀜𑀸𑀢𑀼𑀦𑁆𑀢𑀺 𑀏𑀢𑁆𑀣 𑀧𑀜𑁆𑀘𑀯𑀻𑀲𑀸𑀬 𑀢𑀸𑀯 𑀯𑀢𑁆𑀣𑀼𑀤𑀼𑀓𑁂𑀲𑀼 𑀧𑀞𑀫𑀤𑀼𑀓𑀧𑀜𑁆𑀘𑀓𑀸𑀤𑀬𑁄 𑀘𑀼𑀤𑁆𑀤𑀲𑀳𑀺𑀧𑀺 𑀧𑀓𑀺𑀡𑁆𑀡𑀓𑀤𑀼𑀓𑁂𑀳𑀺 𑀅𑀯𑀲𑀺𑀝𑁆𑀞𑁂𑀳𑀺 𑀯𑀢𑁆𑀣𑀼𑀤𑀼𑀓𑁂𑀳𑀺 𑀧𑀜𑁆𑀘𑀯𑀻𑀲𑀸𑀬 𑀆𑀭𑀫𑁆𑀫𑀡𑀤𑀼𑀓𑁂𑀳𑀺 𑀧𑀜𑁆𑀘𑀳𑀺 𑀩𑀸𑀳𑀺𑀭𑀸𑀬𑀢𑀦𑀤𑀼𑀓𑁂𑀳𑀺 𑀭𑀽𑀧𑀥𑀸𑀢𑀼𑀤𑀼𑀓𑀸𑀤𑀻𑀳𑀺 𑀧𑀜𑁆𑀘𑀳𑀺 𑀥𑀸𑀢𑀼𑀤𑀼𑀓𑁂𑀳𑀺 𑀧𑀘𑁆𑀙𑀺𑀫𑀓𑁂𑀳𑀺 𑀢𑀻𑀳𑀺 𑀇𑀦𑁆𑀤𑁆𑀭𑀺𑀬𑀤𑀼𑀓𑁂𑀳𑀺 𑀤𑁆𑀯𑀸𑀤𑀲𑀳𑀺𑀧𑀺 𑀲𑀼𑀔𑀼𑀫𑀭𑀽𑀧𑀤𑀼𑀓𑁂𑀳𑀺 𑀧𑀞𑀫𑀸𑀤𑀺𑀯𑀚𑁆𑀚𑁂𑀳𑀺 𑀅𑀯𑀲𑀺𑀝𑁆𑀞𑁂𑀳𑀺 𑀆𑀬𑀢𑀦𑀥𑀸𑀢𑀼𑀇𑀦𑁆𑀤𑁆𑀭𑀺𑀬𑀤𑀼𑀓𑁂𑀳𑀺 𑀘 𑀬𑁄𑀚𑀦𑀁 𑀕𑀘𑁆𑀙𑀦𑁆𑀢𑀺. 𑀧𑀜𑁆𑀘𑀯𑀻𑀲𑀸𑀬 𑀧𑀦 𑀆𑀭𑀫𑁆𑀫𑀡𑀤𑀼𑀓𑁂𑀲𑀼 𑀧𑀼𑀭𑀺𑀫𑀓𑁄 𑀤𑀼𑀓𑀧𑀜𑁆𑀘𑀓𑁄 𑀉𑀧𑀸𑀤𑀺𑀦𑁆𑀦𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀲𑀦𑀺𑀤𑀲𑁆𑀲𑀦𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀘𑀺𑀢𑁆𑀢𑀲𑀳𑀪𑀼𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀤𑀼𑀓𑀯𑀚𑁆𑀚𑁂𑀳𑀺 𑀧𑀓𑀺𑀡𑁆𑀡𑀓𑀤𑀼𑀓𑁂𑀳𑀺 𑀲𑀩𑁆𑀩𑁂𑀳𑀺𑀧𑀺 𑀯𑀢𑁆𑀣𑀼𑀤𑀼𑀓𑁂𑀳𑀺 𑀭𑀽𑀧𑀸𑀬𑀢𑀦𑀭𑀽𑀧𑀥𑀸𑀢𑀼𑀤𑀼𑀓𑀯𑀚𑁆𑀚𑁂𑀳𑀺 𑀆𑀬𑀢𑀦𑀥𑀸𑀢𑀼𑀤𑀼𑀓𑁂𑀳𑀺 𑀲𑀩𑁆𑀩𑁂𑀳𑀺𑀧𑀺 𑀇𑀦𑁆𑀤𑁆𑀭𑀺𑀬𑀤𑀼𑀓𑀲𑀼𑀔𑀼𑀫𑀭𑀽𑀧𑀤𑀼𑀓𑁂𑀳𑀺 𑀬𑁄𑀚𑀦𑀁 𑀕𑀘𑁆𑀙𑀢𑀺. 𑀤𑀼𑀢𑀺𑀬𑀤𑀼𑀓𑀧𑀜𑁆𑀘𑀓𑀸𑀤𑀻𑀲𑀼 𑀬𑀣𑀸𑀓𑁆𑀓𑀫𑀁 𑀲𑀤𑁆𑀤𑀸𑀬𑀢𑀦𑀲𑀤𑁆𑀤𑀥𑀸𑀢𑀼𑀤𑀼𑀓𑀸𑀤𑀬𑁄 𑀬𑁄𑀚𑀦𑀁 𑀦 𑀕𑀘𑁆𑀙𑀦𑁆𑀢𑀺, 𑀭𑀽𑀧𑀸𑀬𑀢𑀦𑀭𑀽𑀧𑀥𑀸𑀢𑀼𑀤𑀼𑀓𑀸𑀤𑀬𑁄 𑀕𑀘𑁆𑀙𑀦𑁆𑀢𑀺. 𑀧𑀓𑀺𑀡𑁆𑀡𑀓𑀤𑀼𑀓𑁂𑀲𑀼 𑀲𑀦𑀺𑀤𑀲𑁆𑀲𑀦𑀤𑀼𑀓𑀜𑁆𑀘𑀸𑀢𑀺 𑀅𑀬𑀫𑁂𑀯 𑀯𑀺𑀲𑁂𑀲𑁄. 𑀬𑀣𑀸 𑀘 𑀯𑀢𑁆𑀣𑀼𑀤𑀼𑀓𑁂𑀲𑀼, 𑀏𑀯𑀁 𑀘𑀓𑁆𑀔𑀸𑀬𑀢𑀦𑀘𑀓𑁆𑀔𑀼𑀥𑀸𑀢𑀼𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀺𑀤𑀼𑀓𑀧𑀜𑁆𑀘𑀓𑁂𑀲𑀼. 𑀬𑀣𑀸 𑀘 𑀆𑀭𑀫𑁆𑀫𑀡𑀤𑀼𑀓𑁂𑀲𑀼, 𑀏𑀯𑀁 𑀭𑀽𑀧𑀸𑀬𑀢𑀦𑀭𑀽𑀧𑀥𑀸𑀢𑀼𑀆𑀤𑀺𑀤𑀼𑀓𑀧𑀜𑁆𑀘𑀓𑁂𑀲𑀼 𑀢𑀺𑀓𑀬𑁄𑀚𑀦𑀸. 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀤𑀼𑀓𑀸 𑀲𑀼𑀔𑀼𑀫𑀭𑀽𑀧𑀤𑀼𑀓𑀸 𑀘 𑀲𑀩𑁆𑀩𑁂𑀳𑀺𑀧𑀺 𑀤𑀼𑀓𑁂𑀳𑀺 𑀬𑁄𑀚𑀦𑀁 𑀕𑀘𑁆𑀙𑀦𑁆𑀢𑀻𑀢𑀺 𑀏𑀯𑀁 𑀢𑀸𑀯 𑀢𑀺𑀓𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀦𑀦𑀼 𑀘𑀸𑀬𑀫𑁆𑀧𑀺 𑀬𑁄𑀚𑀦𑀸 𑀪𑀕𑀯𑀢𑀸 𑀦 𑀤𑁂𑀲𑀺𑀢𑀸𑀢𑀺 𑀦 𑀓𑀸𑀢𑀩𑁆𑀩𑀸𑀢𑀺? 𑀦𑀬𑀺𑀤𑀁 𑀏𑀓𑀦𑁆𑀢𑀺𑀓𑀁. 𑀓𑀲𑁆𑀫𑀸? 𑀪𑀕𑀯𑀢𑀸 𑀤𑀺𑀦𑁆𑀦𑀦𑀬𑁂𑀦 𑀬𑁄𑀚𑀦𑀸𑀧𑀺 𑀪𑀕𑀯𑀢𑁄𑀬𑁂𑀯 𑀤𑁂𑀲𑀦𑀸. 𑀢𑀣𑀸 𑀳𑀺 𑀯𑀼𑀢𑁆𑀢𑀁 𑀫𑀸𑀢𑀺𑀓𑀸𑀯𑀡𑁆𑀡𑀦𑀸𑀬𑀁 (𑀥. 𑀲. 𑀅𑀝𑁆𑀞. 𑁧-𑁬) ‘‘𑀳𑁂𑀢𑀽 𑀘𑁂𑀯 𑀥𑀫𑁆𑀫𑀸 𑀅𑀳𑁂𑀢𑀼𑀓𑀸 𑀘𑀸𑀢𑀺 𑀇𑀤𑀫𑁆𑀧𑀺 𑀲𑀫𑁆𑀪𑀯𑀢𑀻’’𑀢𑀺𑀆𑀤𑀺. 𑀲𑀫𑁆𑀪𑀯𑁄 𑀳𑀺 𑀕𑀳𑀡𑀲𑁆𑀲 𑀓𑀸𑀭𑀡𑀦𑁆𑀢𑀺 𑀘.

𑀢𑀺𑀯𑀺𑀥𑀭𑀽𑀧𑀲𑀗𑁆𑀕𑀳𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀩𑁆𑀩𑀺𑀥𑀸𑀤𑀺𑀭𑀽𑀧𑀲𑀗𑁆𑀕𑀳𑀯𑀡𑁆𑀡𑀦𑀸

𑁫𑁮𑁬. 𑀘𑀺𑀢𑁆𑀢𑀢𑁄 𑀏𑀯 𑀲𑀫𑀼𑀝𑁆𑀞𑀸𑀢𑀻𑀢𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀇𑀫𑀫𑁂𑀯 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸 ‘‘𑀯𑀺𑀜𑁆𑀜𑀢𑁆𑀢𑀺𑀤𑀼𑀓𑀸𑀤𑀻𑀳𑀺 𑀲𑀫𑀸𑀦𑀕𑀢𑀺𑀓𑁄 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀤𑀼𑀓𑁄’’𑀢𑀺 𑀯𑀼𑀢𑁆𑀢𑀁. 𑀯𑀺𑀦𑀺𑀯𑀢𑁆𑀢𑀺𑀢𑁂 𑀳𑀺 𑀲𑀸𑀫𑀜𑁆𑀜𑁂 𑀬𑀁 𑀭𑀽𑀧𑀁 𑀚𑀦𑀓𑀧𑀘𑁆𑀘𑀬𑁂𑀲𑀼 𑀘𑀺𑀢𑁆𑀢𑀢𑁄 𑀲𑀫𑀼𑀝𑁆𑀞𑀸𑀢𑀺, 𑀢𑀁 𑀘𑀺𑀢𑁆𑀢𑀢𑁄 𑀏𑀯 𑀲𑀫𑀼𑀝𑁆𑀞𑀸𑀢𑀻𑀢𑀺. 𑀯𑀺𑀜𑁆𑀜𑀢𑁆𑀢𑀺𑀤𑀼𑀓𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀘𑀺𑀢𑁆𑀢𑀲𑀳𑀪𑀼𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀤𑀼𑀓𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀮𑀩𑁆𑀪𑀫𑀸𑀦𑁄𑀢𑀺 𑀬𑀁 𑀢𑀁 𑀭𑀽𑀧𑀁 𑀉𑀧𑀸𑀤𑀸, 𑀢𑀁 𑀅𑀢𑁆𑀣𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁, 𑀅𑀢𑁆𑀣𑀺 𑀦 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁. 𑀬𑀁 𑀢𑀁 𑀭𑀽𑀧𑀁 𑀦𑀼𑀧𑀸𑀤𑀸, 𑀢𑀁 𑀅𑀢𑁆𑀣𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁, 𑀅𑀢𑁆𑀣𑀺 𑀦 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀦𑁆𑀢𑀺 𑀏𑀯𑀁 𑀮𑀩𑁆𑀪𑀫𑀸𑀦𑁄. 𑀲𑀦𑀺𑀤𑀲𑁆𑀲𑀦𑀤𑀼𑀓𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀧𑁆𑀧𑀝𑀺𑀖𑀫𑀳𑀸𑀪𑀽𑀢𑀤𑀼𑀓𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀢𑁂𑀦𑀸𑀢𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀤𑀼𑀓𑁂𑀦. 𑀢𑀲𑁆𑀲𑀸𑀢𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀤𑀼𑀓𑀲𑁆𑀲𑁂𑀯. 𑀅𑀜𑁆𑀜𑁂 𑀧𑀦𑀸𑀢𑀺 𑀯𑀺𑀜𑁆𑀜𑀢𑁆𑀢𑀺𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀘𑀺𑀢𑁆𑀢𑀲𑀳𑀪𑀼𑀘𑀺𑀢𑁆𑀢𑀸𑀦𑀼𑀧𑀭𑀺𑀯𑀢𑁆𑀢𑀺𑀤𑀼𑀓𑁂𑀳𑀺 𑀅𑀜𑁆𑀜𑁂𑀧𑀺 𑀧𑀓𑀺𑀡𑁆𑀡𑀓𑀤𑀼𑀓𑀸.

𑀲𑀤𑁆𑀤𑀸𑀬𑀢𑀦𑀲𑁆𑀲 𑀏𑀓𑀦𑁆𑀢𑀢𑁄 𑀅𑀦𑀼𑀧𑀸𑀤𑀺𑀦𑁆𑀦𑀢𑁆𑀢𑀸 ‘‘𑀲𑁄𑀢𑀲𑀫𑁆𑀨𑀲𑁆𑀲𑀸𑀭𑀫𑁆𑀫𑀡𑀤𑀼𑀓𑀸𑀤𑀬𑁄 𑀯𑀚𑁆𑀚𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀘𑀢𑀼𑀓𑁆𑀓𑀸 𑀮𑀩𑁆𑀪𑀦𑁆𑀢𑀻𑀢𑀺 𑀬𑀁 𑀢𑀁 𑀭𑀽𑀧𑀁 𑀉𑀧𑀸𑀤𑀺𑀦𑁆𑀦𑀁, 𑀢𑀁 𑀅𑀢𑁆𑀣𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀲𑁆𑀲 𑀆𑀭𑀫𑁆𑀫𑀡𑀁, 𑀅𑀢𑁆𑀣𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀲𑁆𑀲 𑀦𑀸𑀭𑀫𑁆𑀫𑀡𑀁. 𑀬𑀁 𑀢𑀁 𑀭𑀽𑀧𑀁 𑀅𑀦𑀼𑀧𑀸𑀤𑀺𑀦𑁆𑀦𑀁, 𑀢𑀁 𑀅𑀢𑁆𑀣𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀲𑁆𑀲 𑀆𑀭𑀫𑁆𑀫𑀡𑀁, 𑀅𑀢𑁆𑀣𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀲𑁆𑀲 𑀦𑀸𑀭𑀫𑁆𑀫𑀡𑀦𑁆𑀢𑀺 𑀏𑀯𑀫𑀸𑀤𑀬𑁄 𑀲𑀩𑁆𑀩𑀸𑀭𑀫𑁆𑀫𑀡𑀩𑀸𑀳𑀺𑀭𑀸𑀬𑀢𑀦𑀸𑀤𑀺𑀮𑀩𑁆𑀪𑀫𑀸𑀦𑀤𑀼𑀓𑁂𑀳𑀺 𑀬𑁄𑀚𑀦𑀸𑀬𑀁 𑀘𑀢𑀼𑀓𑁆𑀓𑀸 𑀮𑀩𑁆𑀪𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀯𑀲𑁂𑀲𑁂𑀳𑀻𑀢𑀺 𑀆𑀭𑀫𑁆𑀫𑀡𑀩𑀸𑀳𑀺𑀭𑀸𑀬𑀢𑀦𑀭𑀽𑀧𑀥𑀸𑀢𑀼𑀤𑀼𑀓𑀸𑀤𑀺𑀢𑁄 𑀮𑀩𑁆𑀪𑀫𑀸𑀦𑀤𑀼𑀓𑁂𑀳𑀻𑀢𑀺 𑀯𑀼𑀢𑁆𑀢𑀤𑀼𑀓𑀭𑀸𑀲𑀺𑀢𑁄 𑀅𑀯𑀲𑁂𑀲𑁂𑀳𑀺. 𑀢𑁂𑀲𑀦𑁆𑀢𑀺 𑀉𑀧𑀸𑀤𑀺𑀦𑁆𑀦𑀉𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀤𑀼𑀓𑀸𑀦𑀁. 𑀅𑀜𑁆𑀜𑁂𑀲𑀦𑁆𑀢𑀺 𑀉𑀧𑀸𑀤𑀺𑀦𑁆𑀦𑀤𑀼𑀓𑀸𑀤𑀺𑀢𑁄 𑀅𑀜𑁆𑀜𑁂𑀲𑀁 𑀉𑀧𑀸𑀤𑀸𑀤𑀼𑀓𑀸𑀤𑀻𑀦𑀁. 𑀯𑀢𑁆𑀣𑀼𑀤𑀼𑀓𑀸𑀤𑀻𑀳𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀘𑀓𑁆𑀔𑀸𑀬𑀢𑀦𑀤𑀼𑀓𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀏𑀢𑁆𑀣𑀸𑀧𑀺 𑀅𑀯𑀲𑁂𑀲𑁂𑀳𑀺 𑀢𑁂𑀲𑀁 𑀅𑀜𑁆𑀜𑁂𑀲𑀜𑁆𑀘 𑀬𑁄𑀚𑀦𑀸𑀬 𑀘𑀢𑀼𑀓𑁆𑀓𑀸 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀘𑀢𑀼𑀩𑁆𑀩𑀺𑀥𑀸𑀤𑀺𑀭𑀽𑀧𑀲𑀗𑁆𑀕𑀳𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀭𑀽𑀧𑀯𑀺𑀪𑀢𑁆𑀢𑀺

𑀏𑀓𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁫𑁯𑁪. 𑀧𑀣𑀯𑀻𑀆𑀤𑀻𑀦𑀁 𑀥𑀫𑁆𑀫𑀸𑀦𑀁 𑀭𑀼𑀧𑁆𑀧𑀦𑀲𑀪𑀸𑀯𑁄 𑀯𑀺𑀬 𑀦 𑀳𑁂𑀢𑀼𑀆𑀤𑀺𑀪𑀸𑀯𑁄𑀧𑀺 𑀲𑀸𑀥𑀸𑀭𑀡𑁄𑀢𑀺 𑀦 𑀳𑁂𑀢𑀽𑀲𑀼 𑀯𑀺𑀪𑀚𑀺𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 ‘‘𑀅𑀯𑀺𑀚𑁆𑀚𑀫𑀸𑀦𑀯𑀺𑀪𑀸𑀕𑀲𑁆𑀲𑀸’’𑀢𑀺. 𑀢𑀲𑁆𑀲 𑀧𑀦 𑀯𑀺𑀪𑀸𑀕𑀸𑀪𑀸𑀯𑀤𑀲𑁆𑀲𑀦𑀲𑀭𑀽𑀧𑀤𑀲𑁆𑀲𑀦𑀫𑁂𑀯 𑀦𑀺𑀤𑁆𑀤𑁂𑀲𑁄. 𑀏𑀯𑀜𑁆𑀘 𑀓𑀢𑁆𑀯𑀸 𑀦𑀺𑀩𑁆𑀩𑀸𑀦𑀲𑁆𑀲𑀧𑀺 𑀯𑀺𑀪𑀸𑀕𑀭𑀳𑀺𑀢𑀢𑁆𑀢𑀸 ‘‘𑀅𑀲𑀗𑁆𑀔𑀢𑀸 𑀥𑀸𑀢𑀽’’𑀢𑀺 𑀏𑀢𑁆𑀢𑀓𑀫𑁂𑀯 𑀦𑀺𑀤𑁆𑀤𑁂𑀲𑀯𑀲𑁂𑀦 𑀯𑀼𑀢𑁆𑀢𑀁.

𑀬𑀤𑀺𑀧𑀺 𑀳𑀺𑀦𑁄𑀢𑀺 𑀏𑀢𑁂𑀦 𑀧𑀢𑀺𑀝𑁆𑀞𑀸𑀢𑀺 𑀓𑀼𑀲𑀮𑀸𑀤𑀺𑀓𑁄 𑀥𑀫𑁆𑀫𑁄𑀢𑀺 𑀅𑀮𑁄𑀪𑀸𑀤𑀬𑁄 𑀓𑁂𑀯𑀮𑀁 𑀳𑁂𑀢𑀼𑀧𑀤𑀯𑀘𑀦𑀻𑀬𑀸, 𑀓𑀸𑀭𑀡𑀪𑀸𑀯𑀲𑀸𑀫𑀜𑁆𑀜𑀢𑁄 𑀧𑀦 𑀫𑀳𑀸𑀪𑀽𑀢𑀸𑀤𑀬𑁄𑀧𑀺 𑀳𑁂𑀢𑀼-𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑀸𑀢𑀺 𑀫𑀽𑀮𑀝𑁆𑀞𑀯𑀸𑀘𑀺𑀦𑀸 𑀤𑀼𑀢𑀺𑀬𑁂𑀦 𑀳𑁂𑀢𑀼-𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀆𑀳 ‘‘𑀳𑁂𑀢𑀼𑀳𑁂𑀢𑀽’’𑀢𑀺. 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑀢𑁄 𑀓𑀼𑀲𑀮𑀸𑀤𑀺𑀥𑀫𑁆𑀫𑀸𑀦𑀁 𑀫𑀽𑀮𑀢𑁆𑀣𑁂𑀦 𑀉𑀧𑀓𑀸𑀭𑀓𑀥𑀫𑁆𑀫𑀸 ‘‘𑀢𑀬𑁄 𑀓𑀼𑀲𑀮𑀳𑁂𑀢𑀽’’𑀢𑀺𑀆𑀤𑀺𑀦𑀸 (𑀥. 𑀲. 𑁧𑁦𑁫𑁯-𑁧𑁦𑁬𑁦) 𑀧𑀝𑁆𑀞𑀸𑀦𑁂 𑀘 𑀢𑁂𑀬𑁂𑀯 ‘‘𑀳𑁂𑀢𑀼𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀫𑀽𑀮𑀳𑁂𑀢𑀼 𑀧𑀘𑁆𑀘𑀬𑀳𑁂𑀢𑀽𑀢𑀺 𑀯𑀸 𑀅𑀬𑀫𑀢𑁆𑀣𑁄’’𑀢𑀺. 𑀳𑀺𑀦𑁄𑀢𑀺 𑀏𑀢𑁂𑀦, 𑀏𑀢𑀲𑁆𑀫𑀸 𑀯𑀸 𑀨𑀮𑀁 𑀧𑀯𑀢𑁆𑀢𑀢𑀻𑀢𑀺 𑀳𑁂𑀢𑀼, 𑀧𑀝𑀺𑀘𑁆𑀘 𑀏𑀢𑀲𑁆𑀫𑀸 𑀏𑀢𑀺 𑀧𑀯𑀢𑁆𑀢𑀢𑀻𑀢𑀺 𑀧𑀘𑁆𑀘𑀬𑁄𑀢𑀺 𑀏𑀯𑀁 𑀳𑁂𑀢𑀼𑀧𑀘𑁆𑀘𑀬-𑀲𑀤𑁆𑀤𑀸𑀦𑀁 𑀅𑀦𑀸𑀦𑀢𑁆𑀣𑀢𑀁 𑀲𑀦𑁆𑀥𑀸𑀬 𑀳𑁂𑀢𑀼𑀲𑀤𑁆𑀤𑀧𑀭𑀺𑀬𑀸𑀬𑀪𑀸𑀯𑁂𑀦 𑀧𑀘𑁆𑀘𑀬-𑀲𑀤𑁆𑀤𑁄 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀳𑁂𑀢𑀼𑀧𑀘𑁆𑀘𑀬𑀲𑀤𑁆𑀤𑀸𑀦𑀁 𑀲𑀫𑀸𑀦𑀢𑁆𑀣𑀢𑁆𑀢𑀸’’𑀢𑀺. 𑀪𑀽𑀢𑀢𑁆𑀢𑀬𑀦𑀺𑀲𑁆𑀲𑀺𑀢𑀸𑀦𑀺 𑀘 𑀫𑀳𑀸𑀪𑀽𑀢𑀸𑀦𑀺 𑀘𑀢𑀼𑀫𑀳𑀸𑀪𑀽𑀢𑀦𑀺𑀲𑁆𑀲𑀺𑀢𑀁 𑀉𑀧𑀸𑀤𑀸𑀭𑀽𑀧𑀦𑁆𑀢𑀺 𑀲𑀩𑁆𑀩𑀫𑁆𑀧𑀺 𑀭𑀽𑀧𑀁 𑀲𑀩𑁆𑀩𑀤𑀸 𑀲𑀩𑁆𑀩𑀢𑁆𑀣 𑀲𑀩𑁆𑀩𑀸𑀓𑀸𑀭𑀁 𑀘𑀢𑀼𑀫𑀳𑀸𑀪𑀽𑀢𑀳𑁂𑀢𑀼𑀓𑀁 𑀫𑀳𑀸𑀪𑀽𑀢𑀸𑀦𑀺 𑀘 𑀅𑀦𑀸𑀫𑀝𑁆𑀞𑀪𑁂𑀤𑀸𑀦𑀺 𑀲𑀸𑀫𑀜𑁆𑀜𑀢𑁄 𑀕𑀳𑀺𑀢𑀸𑀦𑀻𑀢𑀺 𑀯𑀼𑀢𑁆𑀢𑀁 ‘‘𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀳𑁂𑀢𑀽’’𑀢𑀺.

𑀓𑀫𑁆𑀫𑀲𑀫𑀸𑀤𑀸𑀦𑀸𑀦𑀦𑁆𑀢𑀺 𑀲𑀫𑀸𑀤𑀸𑀦𑀸𑀦𑀁 𑀓𑀫𑁆𑀫𑀸𑀦𑀁, 𑀲𑀫𑀸𑀤𑀺𑀬𑀺𑀢𑁆𑀯𑀸 𑀓𑀢𑀓𑀫𑁆𑀫𑀸𑀦𑀁 𑀯𑀸. 𑀅𑀜𑁆𑀜𑁂𑀲𑀼 𑀧𑀘𑁆𑀘𑀬𑁂𑀲𑀼 𑀯𑀺𑀧𑀸𑀓𑀲𑁆𑀲 𑀢𑀡𑁆𑀳𑀸𑀯𑀺𑀚𑁆𑀚𑀸𑀤𑀻𑀲𑀼.

‘‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄, 𑀬𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀲𑁆𑀲 𑀇𑀝𑁆𑀞𑁄 𑀓𑀦𑁆𑀢𑁄 𑀫𑀦𑀸𑀧𑁄 𑀯𑀺𑀧𑀸𑀓𑁄 𑀦𑀺𑀩𑁆𑀩𑀢𑁆𑀢𑁂𑀬𑁆𑀬, 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀺. 𑀞𑀸𑀦𑀜𑁆𑀘 𑀔𑁄 𑀏𑀢𑀁, 𑀪𑀺𑀓𑁆𑀔𑀯𑁂, 𑀯𑀺𑀚𑁆𑀚𑀢𑀺, 𑀬𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀲𑁆𑀲 𑀅𑀦𑀺𑀝𑁆𑀞𑁄 𑀅𑀓𑀦𑁆𑀢𑁄 𑀅𑀫𑀦𑀸𑀧𑁄 𑀯𑀺𑀧𑀸𑀓𑁄 𑀦𑀺𑀩𑁆𑀩𑀢𑁆𑀢𑁂𑀬𑁆𑀬. 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺. 𑀯𑀘𑀻…𑀧𑁂… 𑀫𑀦𑁄…𑀧𑁂… 𑀯𑀺𑀚𑁆𑀚𑀢𑀺…𑀧𑁂… 𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄, 𑀬𑀁 𑀓𑀸𑀬𑀲𑀼𑀘𑀭𑀺𑀢𑀲𑁆𑀲 𑀅𑀦𑀺𑀝𑁆𑀞𑁄 𑀅𑀓𑀦𑁆𑀢𑁄 𑀅𑀫𑀦𑀸𑀧𑁄 𑀯𑀺𑀧𑀸𑀓𑁄 𑀦𑀺𑀩𑁆𑀩𑀢𑁆𑀢𑁂𑀬𑁆𑀬𑀸’’𑀢𑀺 (𑀫. 𑀦𑀺. 𑁩.𑁧𑁩𑁧; 𑀯𑀺𑀪. 𑁮𑁦𑁯),

‘‘𑀓𑀫𑁆𑀫𑀁 𑀲𑀢𑁆𑀢𑁂 𑀯𑀺𑀪𑀚𑀢𑀺, 𑀬𑀤𑀺𑀤𑀁 𑀳𑀻𑀦𑀧𑀡𑀻𑀢𑀢𑀸𑀬𑀸’’𑀢𑀺 (𑀫. 𑀦𑀺. 𑁩.𑁨𑁮𑁯) 𑁋 𑀏𑀯𑀫𑀸𑀤𑀺𑀯𑀘𑀦𑀢𑁄 𑀓𑀫𑁆𑀫𑀁 𑀯𑀺𑀧𑀸𑀓𑀲𑁆𑀲 𑀇𑀝𑁆𑀞𑀸𑀦𑀺𑀝𑁆𑀞𑀢𑀁 𑀦𑀺𑀬𑀫𑁂𑀢𑀻𑀢𑀺 𑀆𑀳 ‘‘𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀧𑀸𑀓𑀦𑀺𑀬𑀸𑀫𑀓𑀢𑁆𑀢𑀸’’𑀢𑀺. 𑀕𑀢𑀺𑀉𑀧𑀥𑀺𑀓𑀸𑀮𑀧𑀬𑁄𑀕𑀲𑀫𑁆𑀧𑀢𑁆𑀢𑀺𑀯𑀺𑀧𑀢𑁆𑀢𑀺𑀬𑁄𑀬𑁂𑀯 𑀞𑀸𑀦𑀁 𑀯𑀺𑀧𑀸𑀓𑀲𑁆𑀲 𑀑𑀓𑀸𑀲𑀪𑀸𑀯𑀢𑁄. 𑀦 𑀳𑀺 𑀢𑁂𑀳𑀺 𑀯𑀺𑀦𑀸 𑀓𑁄𑀘𑀺 𑀯𑀺𑀧𑀸𑀓𑁄 𑀦𑀺𑀩𑁆𑀩𑀢𑁆𑀢𑀢𑀻𑀢𑀺. 𑀬𑀣𑀸𑀯𑀼𑀢𑁆𑀢𑀝𑁆𑀞𑀸𑀦𑁂 𑀲𑀢𑀺 𑀅𑀥𑀺𑀕𑀦𑁆𑀢𑀩𑁆𑀩𑀁 𑀇𑀝𑁆𑀞𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑀁 ‘‘𑀕𑀢𑀺…𑀧𑁂… 𑀦𑀺𑀧𑁆𑀨𑀸𑀤𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀺𑀧𑀸𑀓𑀲𑁆𑀲 𑀆𑀭𑀫𑁆𑀫𑀡𑁂𑀦 𑀯𑀺𑀦𑀸 𑀅𑀪𑀸𑀯𑀢𑁄 𑀆𑀭𑀫𑁆𑀫𑀡𑀫𑁆𑀧𑀺 𑀢𑀲𑁆𑀲 𑀧𑀥𑀸𑀦𑀁 𑀓𑀸𑀭𑀡𑀁. 𑀅𑀦𑀜𑁆𑀜𑀲𑀪𑀸𑀯𑀢𑁄𑀢𑀺 𑀳𑁂𑀢𑀼𑀆𑀤𑀺𑀲𑀪𑀸𑀯𑀸𑀪𑀸𑀯𑀢𑁄.

𑀭𑀼𑀧𑁆𑀧𑀦𑀁 𑀭𑀽𑀧𑀁. 𑀢𑀁 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀏𑀢𑁆𑀣 ‘‘𑀅𑀲𑁆𑀲𑀸’’𑀢𑀺 𑀯𑀼𑀘𑁆𑀘𑀫𑀸𑀦𑁄 𑀧𑀣𑀯𑀻𑀆𑀤𑀺𑀅𑀢𑁆𑀣𑁄𑀬𑁂𑀯 𑀭𑀼𑀧𑁆𑀧𑀢𑀻𑀢𑀺𑀧𑀺 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀭𑀼𑀧𑁆𑀧𑀦𑀮𑀓𑁆𑀔𑀡𑀬𑀼𑀢𑁆𑀢𑀲𑁆𑀲𑁂𑀯 𑀭𑀽𑀧𑀻𑀭𑀽𑀧𑀪𑀸𑀯𑀢𑁄’’𑀢𑀺. 𑀏𑀢𑀁 𑀲𑀪𑀸𑀯𑀦𑁆𑀢𑀺 𑀏𑀢𑀁 𑀉𑀧𑁆𑀧𑀦𑁆𑀦𑀪𑀸𑀯𑁂 𑀲𑀢𑀺 𑀙𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀯𑀺𑀜𑁆𑀜𑁂𑀬𑁆𑀬𑀲𑀪𑀸𑀯𑀁 𑀭𑀽𑀧𑁂 𑀦𑀺𑀬𑀫𑁂𑀢𑀺 𑀭𑀽𑀧𑀲𑁆𑀲𑁂𑀯 𑀢𑀁𑀲𑀪𑀸𑀯𑀢𑁆𑀢𑀸. 𑀦 𑀭𑀽𑀧𑀁 𑀏𑀢𑀲𑁆𑀫𑀺𑀦𑁆𑀢𑀺 𑀓𑀸𑀮𑀪𑁂𑀤𑀯𑀲𑁂𑀦 𑀅𑀢𑀁𑀲𑀪𑀸𑀯𑀲𑁆𑀲𑀧𑀺 𑀭𑀽𑀧𑀲𑁆𑀲 𑀅𑀢𑁆𑀣𑀺𑀢𑀸𑀬 𑀦 𑀭𑀽𑀧𑀁 𑀢𑀢𑁆𑀣 𑀦𑀺𑀬𑀦𑁆𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀢𑁆𑀣𑀺 𑀳𑀻𑀢𑀺𑀆𑀤𑀺𑀦𑀸 𑀢𑀢𑁆𑀣 𑀭𑀽𑀧𑀲𑁆𑀲𑁂𑀯 𑀦𑀺𑀬𑀦𑁆𑀢𑀩𑁆𑀩𑀢𑀸𑀪𑀸𑀯𑀁𑀬𑁂𑀯 𑀯𑀺𑀯𑀭𑀢𑀺. 𑀏𑀢𑀫𑁂𑀯𑀸𑀢𑀺𑀆𑀤𑀺𑀦𑀸 𑀉𑀤𑁆𑀤𑁂𑀲𑁂𑀦 𑀦𑀺𑀤𑁆𑀤𑁂𑀲𑀁 𑀲𑀁𑀲𑀦𑁆𑀤𑁂𑀢𑀺. 𑀏𑀢𑁆𑀣 𑀏𑀢𑀫𑁂𑀯 𑀭𑀽𑀧𑁂 𑀬𑀣𑀸𑀯𑀼𑀢𑁆𑀢𑀲𑀪𑀸𑀯𑀁 𑀦𑀺𑀬𑀫𑁂𑀢𑀩𑁆𑀩𑀁 𑀦𑀺𑀤𑁆𑀤𑁂𑀲𑁂 𑀏𑀯-𑀲𑀤𑁆𑀤𑁂𑀦 𑀦𑀺𑀬𑀫𑁂𑀢𑀺 𑀅𑀯𑀥𑀸𑀭𑁂𑀢𑀻𑀢𑀺 𑀅𑀢𑁆𑀣𑁄. 𑀬𑀣𑀸𑀯𑀼𑀢𑁆𑀢𑁄 𑀦𑀺𑀬𑀫𑁄𑀢𑀺 𑀉𑀧𑁆𑀧𑀦𑁆𑀦𑀪𑀸𑀯𑁂 𑀲𑀢𑀺 𑀙𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀯𑀺𑀜𑁆𑀜𑁂𑀬𑁆𑀬𑀪𑀸𑀯𑁄 𑀦𑀺𑀬𑀦𑁆𑀢𑀩𑁆𑀩𑀢𑀸𑀬 ‘‘𑀦𑀺𑀬𑀫𑁄’’𑀢𑀺 𑀯𑀼𑀢𑁆𑀢𑁄, 𑀲𑁄 𑀭𑀽𑀧𑁂 𑀅𑀢𑁆𑀣𑀺 𑀏𑀯 𑀭𑀽𑀧𑀲𑁆𑀲𑁂𑀯 𑀢𑀁𑀲𑀪𑀸𑀯𑀢𑁆𑀢𑀸. 𑀯𑀺𑀲𑀺𑀝𑁆𑀞𑀓𑀸𑀮𑀲𑁆𑀲 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀅𑀯𑀥𑀸𑀭𑀡𑀁𑀬𑁂𑀯 𑀯𑀸 𑀬𑀣𑀸𑀯𑀼𑀢𑁆𑀢𑁄 𑀦𑀺𑀬𑀫𑁄, 𑀲𑁄 𑀭𑀽𑀧𑁂 𑀅𑀢𑁆𑀣𑀺𑀬𑁂𑀯 𑀲𑀫𑁆𑀪𑀯𑀢𑀺𑀬𑁂𑀯, 𑀦 𑀅𑀭𑀽𑀧𑁂 𑀯𑀺𑀬 𑀦 𑀲𑀫𑁆𑀪𑀯𑀢𑀻𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀓𑀸𑀮𑀪𑁂𑀤𑀦𑁆𑀢𑀺 𑀓𑀸𑀮𑀯𑀺𑀲𑁂𑀲𑀁. 𑀅𑀦𑀸𑀫𑀲𑀺𑀢𑁆𑀯𑀸𑀢𑀺 𑀅𑀕𑁆𑀕𑀳𑁂𑀢𑁆𑀯𑀸. 𑀢𑀁 𑀲𑀩𑁆𑀩𑀦𑁆𑀢𑀺 𑀅𑀦𑀸𑀫𑀝𑁆𑀞𑀓𑀸𑀮𑀪𑁂𑀤𑀁 𑀢𑀢𑁄𑀬𑁂𑀯 𑀅𑀭𑀽𑀧𑁂𑀳𑀺 𑀲𑀫𑀸𑀦𑀯𑀺𑀜𑁆𑀜𑁂𑀬𑁆𑀬𑀲𑀪𑀸𑀯𑀁 𑀲𑀩𑁆𑀩𑀁 𑀭𑀽𑀧𑀁. 𑀉𑀧𑁆𑀧𑀦𑁆𑀦𑀦𑁆𑀢𑀺 𑀏𑀢𑁂𑀦 𑀓𑀸𑀮𑀪𑁂𑀤𑀸𑀫𑀲𑀦𑁂𑀦 𑀯𑀺𑀲𑁂𑀲𑁂𑀢𑀺 ‘‘𑀉𑀧𑁆𑀧𑀦𑁆𑀦𑀁…𑀧𑁂… 𑀫𑁂𑀯𑀸’’𑀢𑀺.

𑀯𑀢𑁆𑀢𑀫𑀸𑀦𑀓𑀸𑀮𑀺𑀓𑀁 𑀲𑀩𑁆𑀩𑀁 𑀭𑀽𑀧𑀁 𑀤𑀺𑀝𑁆𑀞𑀲𑀼𑀢𑀫𑀼𑀢𑀯𑀺𑀜𑁆𑀜𑀸𑀢𑀲𑀪𑀸𑀯𑀁, 𑀢𑀁 𑀬𑀣𑀸𑀲𑀓𑀁 𑀙𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀯𑀺𑀜𑁆𑀜𑁂𑀬𑁆𑀬𑀲𑀪𑀸𑀯𑀫𑁂𑀯, 𑀦 𑀢𑁂𑀳𑀺 𑀅𑀯𑀺𑀜𑁆𑀜𑁂𑀬𑁆𑀬𑀁. 𑀦𑀸𑀧𑀺 𑀉𑀧𑁆𑀧𑀦𑁆𑀦𑀫𑁂𑀯 𑀙𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀯𑀺𑀜𑁆𑀜𑁂𑀬𑁆𑀬𑀲𑀪𑀸𑀯𑀁 𑀏𑀓𑀦𑁆𑀢𑀮𑀓𑁆𑀔𑀡𑀦𑀺𑀬𑀫𑀸𑀪𑀸𑀯𑀸𑀧𑀢𑁆𑀢𑀺𑀢𑁄𑀢𑀺 𑀏𑀯𑀁 𑀅𑀯𑀺𑀧𑀭𑀻𑀢𑁂 𑀅𑀢𑁆𑀣𑁂 𑀯𑀺𑀪𑀸𑀯𑀺𑀢𑁂𑀧𑀺 𑀘𑁄𑀤𑀓𑁄 𑀅𑀥𑀺𑀧𑁆𑀧𑀸𑀬𑀁 𑀅𑀚𑀸𑀦𑀦𑁆𑀢𑁄 ‘‘𑀦𑀦𑀼 𑀏𑀯’’𑀦𑁆𑀢𑀺𑀆𑀤𑀺𑀦𑀸 𑀲𑀩𑁆𑀩𑀲𑁆𑀲 𑀲𑀩𑁆𑀩𑀸𑀭𑀫𑁆𑀫𑀡𑀢𑀸𑀧𑀢𑁆𑀢𑀺𑀁 𑀘𑁄𑀤𑁂𑀢𑀺. 𑀇𑀢𑀭𑁄 ‘‘𑀭𑀽𑀧𑀁 𑀲𑀩𑁆𑀩𑀁 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀯𑀺𑀪𑀸𑀯𑁂𑀢𑀺. 𑀏𑀢𑁆𑀣 𑀏𑀓𑀻𑀪𑀸𑀯𑁂𑀦 𑀕𑀳𑁂𑀢𑁆𑀯𑀸𑀢𑀺 𑀇𑀤𑀁 ‘‘𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸’’𑀢𑀺 𑀏𑀢𑀲𑁆𑀲 𑀅𑀢𑁆𑀣𑀯𑀘𑀦𑀁. 𑀏𑀓𑀦𑁆𑀢𑀮𑀓𑁆𑀔𑀡𑀁 𑀙𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀯𑀺𑀜𑁆𑀜𑁂𑀬𑁆𑀬𑀲𑀪𑀸𑀯𑁄𑀬𑁂𑀯. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀓𑀺𑀜𑁆𑀘𑀸𑀧𑀺 𑀧𑀜𑁆𑀘𑀦𑁆𑀦𑀁 𑀯𑀺𑀜𑁆𑀜𑀸𑀡𑀸𑀦𑀁 𑀯𑀺𑀲𑀬𑀦𑁆𑀢𑀭𑁂 𑀅𑀧𑁆𑀧𑀯𑀢𑁆𑀢𑀦𑀢𑁄 𑀦 𑀲𑀩𑁆𑀩𑀲𑁆𑀲 𑀲𑀩𑁆𑀩𑀸𑀭𑀫𑁆𑀫𑀡𑀢𑀸, 𑀲𑀩𑁆𑀩𑀲𑁆𑀲𑀧𑀺 𑀧𑀦 𑀭𑀽𑀧𑀲𑁆𑀲 𑀙𑀯𑀺𑀜𑁆𑀜𑀸𑀡𑀸𑀭𑀫𑁆𑀫𑀡𑀪𑀸𑀯𑀢𑁄 𑀬𑀣𑀸𑀲𑀓𑀁 𑀙𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀯𑀺𑀜𑁆𑀜𑁂𑀬𑁆𑀬𑀢𑀸𑀬 𑀙𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀯𑀺𑀜𑁆𑀜𑁂𑀬𑁆𑀬𑀢𑀸𑀯 𑀅𑀢𑁆𑀣𑀺, 𑀢𑀁 𑀏𑀓𑀢𑁄 𑀲𑀗𑁆𑀕𑀳𑀡𑀯𑀲𑁂𑀦 𑀕𑀳𑁂𑀢𑁆𑀯𑀸 ‘‘𑀉𑀧𑁆𑀧𑀦𑁆𑀦𑀁 𑀲𑀩𑁆𑀩𑀁 𑀭𑀽𑀧𑀁 𑀙𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀯𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺 𑀯𑀼𑀢𑁆𑀢𑀁 𑀬𑀣𑀸 ‘‘𑀅𑀪𑀺𑀜𑁆𑀜𑀸𑀧𑁆𑀧𑀢𑁆𑀢𑀁 𑀧𑀜𑁆𑀘𑀫𑀚𑁆𑀛𑀸𑀦𑀁 𑀙𑀴𑀸𑀭𑀫𑁆𑀫𑀡𑀁 𑀳𑁄𑀢𑀻’’𑀢𑀺. 𑀬𑀣𑀸 𑀳𑀺 𑀤𑀺𑀩𑁆𑀩𑀘𑀓𑁆𑀔𑀼𑀤𑀺𑀩𑁆𑀩𑀲𑁄𑀢𑀸𑀤𑀺𑀅𑀪𑀺𑀜𑁆𑀜𑀸𑀧𑁆𑀧𑀢𑁆𑀢𑀲𑁆𑀲 𑀧𑀜𑁆𑀘𑀫𑀚𑁆𑀛𑀸𑀦𑀲𑁆𑀲 𑀯𑀺𑀲𑀼𑀁 𑀅𑀲𑀩𑁆𑀩𑀸𑀭𑀫𑁆𑀫𑀡𑀢𑁆𑀢𑁂𑀧𑀺 𑀏𑀓𑀦𑁆𑀢𑀮𑀓𑁆𑀔𑀡𑀯𑀲𑁂𑀦 𑀏𑀓𑀻𑀪𑀸𑀯𑁂𑀦 𑀕𑀳𑁂𑀢𑁆𑀯𑀸 𑀆𑀭𑀫𑁆𑀫𑀡𑀯𑀲𑁂𑀦 𑀧𑀞𑀫𑀚𑁆𑀛𑀸𑀦𑀸𑀤𑀺𑀢𑁄 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀪𑀺𑀜𑁆𑀜𑀸𑀧𑁆𑀧𑀢𑁆𑀢𑀁 𑀧𑀜𑁆𑀘𑀫𑀚𑁆𑀛𑀸𑀦𑀁 𑀙𑀴𑀸𑀭𑀫𑁆𑀫𑀡𑀁 𑀳𑁄𑀢𑀻’’𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀅𑀭𑀽𑀧𑀢𑁄 𑀭𑀽𑀧𑀲𑁆𑀲 𑀯𑀺𑀲𑀬𑀯𑀲𑁂𑀦 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀉𑀧𑁆𑀧 …𑀧𑁂… 𑀯𑀺𑀜𑁆𑀜𑁂𑀬𑁆𑀬’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀙𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀯𑀺𑀜𑁆𑀜𑁂𑀬𑁆𑀬𑀪𑀸𑀯𑁄 𑀭𑀽𑀧𑁂 𑀦𑀺𑀬𑀫𑁂𑀢𑀩𑁆𑀩𑁄, 𑀦 𑀧𑀦 𑀭𑀽𑀧𑀁 𑀢𑀲𑁆𑀫𑀺𑀁 𑀦𑀺𑀬𑀫𑁂𑀢𑀩𑁆𑀩𑀁, 𑀅𑀦𑀺𑀬𑀢𑀤𑁂𑀲𑁄 𑀘 𑀏𑀯-𑀲𑀤𑁆𑀤𑁄𑀢𑀺 𑀅𑀝𑁆𑀞𑀓𑀣𑀸𑀬𑀁 (𑀥. 𑀲. 𑀅𑀝𑁆𑀝. 𑁫𑁯𑁪) ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀭𑀽𑀧𑀫𑁂𑀯 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀳𑀺 𑀙𑀳𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀧𑀘𑁆𑀘𑀼𑀧𑁆𑀧𑀦𑁆𑀦𑀭𑀽𑀧𑀫𑁂𑀯𑀸’’𑀢𑀺𑀆𑀤𑀺𑀦𑀸 𑀢𑀢𑁆𑀣 𑀤𑁄𑀲𑀫𑀸𑀳. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀧𑀸𑀴𑀺𑀬𑀁 𑀯𑀺𑀜𑁆𑀜𑁂𑀬𑁆𑀬𑀫𑁂𑀯𑀸𑀢𑀺 𑀏𑀯-𑀲𑀤𑁆𑀤𑁄 𑀯𑀼𑀢𑁆𑀢𑁄, 𑀦 𑀘 𑀢𑀲𑁆𑀲 𑀅𑀝𑁆𑀞𑀸𑀦𑀬𑁄𑀚𑀦𑁂𑀦 𑀓𑀸𑀘𑀺 𑀇𑀝𑁆𑀞𑀲𑀺𑀤𑁆𑀥𑀺, 𑀅𑀣 𑀔𑁄 𑀅𑀦𑀺𑀝𑁆𑀞𑀲𑀺𑀤𑁆𑀥𑀺𑀬𑁂𑀯 𑀲𑀩𑁆𑀩𑀭𑀽𑀧𑀲𑁆𑀲 𑀏𑀓𑀦𑁆𑀢𑀮𑀓𑁆𑀔𑀡𑀦𑀺𑀬𑀫𑀸𑀤𑀲𑁆𑀲𑀦𑀢𑁄, 𑀢𑀲𑁆𑀫𑀸. 𑀬𑀣𑀸𑀭𑀼𑀢𑀯𑀲𑁂𑀦𑁂𑀯 𑀦𑀺𑀬𑀫𑁂 𑀕𑀬𑁆𑀳𑀫𑀸𑀦𑁂 𑀉𑀧𑁆𑀧…𑀧𑁂… 𑀧𑀢𑁆𑀢𑀺 𑀦𑀢𑁆𑀣𑀺, 𑀢𑀢𑁄 𑀘 𑀲𑁄𑀢𑀧𑀢𑀺𑀢𑀢𑀸𑀬𑀧𑀺 𑀧𑀬𑁄𑀚𑀦𑀁 𑀦𑀢𑁆𑀣𑀻𑀢𑀺. 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 ‘‘𑀅𑀭𑀽𑀧𑀢𑁄 𑀯𑀺𑀥𑀼𑀭’’𑀦𑁆𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦.

𑀜𑀸𑀡𑀲𑁆𑀲 𑀯𑀸 𑀉𑀢𑁆𑀢𑀭𑀲𑁆𑀲 𑀧𑀼𑀭𑀺𑀫𑀜𑀸𑀡𑀁 𑀯𑀢𑁆𑀣𑀼𑀓𑀸𑀭𑀡𑀦𑁆𑀢𑀺 𑀜𑀸𑀡𑀯𑀢𑁆𑀣𑀼. ‘‘𑀲𑀚𑀸𑀢𑀻’’𑀢𑀺 𑀏𑀢𑁆𑀣 𑀲-𑀓𑀸𑀭𑁄 𑀲𑀫𑀸𑀦𑀲𑀤𑁆𑀤𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀫𑀸𑀦𑀚𑀸𑀢𑀺𑀓𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀫𑀸𑀦𑀚𑀸𑀢𑀺𑀢𑀸 𑀘 𑀲𑀫𑁆𑀫𑀸𑀯𑀸𑀘𑀸𑀤𑀻𑀦𑀁 𑀲𑀻𑀮𑀦𑀢𑁆𑀣𑁄 𑀏𑀯. 𑀏𑀢𑁂𑀦 𑀲𑀫𑀸𑀦𑀲𑀪𑀸𑀯𑀢𑀸 𑀲𑀚𑀸𑀢𑀺𑀲𑀗𑁆𑀕𑀳𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀆𑀭𑀫𑁆𑀫𑀡𑁂 𑀘𑁂𑀢𑀲𑁄 𑀅𑀯𑀺𑀓𑁆𑀔𑁂𑀧𑀧𑁆𑀧𑀯𑀢𑁆𑀢𑀺𑀬𑀸 𑀉𑀧𑀝𑁆𑀞𑀸𑀦𑀼𑀲𑁆𑀲𑀸𑀳𑀦𑀸𑀦𑀺 𑀯𑀺𑀬 𑀢𑁂𑀲𑀁 𑀅𑀯𑀺𑀓𑁆𑀔𑁂𑀧𑁄𑀧𑀺 𑀅𑀢𑀺𑀲𑀬𑁂𑀦 𑀉𑀧𑀓𑀸𑀭𑀓𑁄𑀢𑀺 ‘‘𑀅𑀜𑁆𑀜𑀫𑀜𑁆𑀜𑁄𑀧𑀓𑀸𑀭𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 𑀅𑀜𑁆𑀜𑁂𑀲𑀼 𑀲𑀳𑀚𑀸𑀢𑀥𑀫𑁆𑀫𑁂𑀲𑀼 𑀏𑀢𑁂𑀲𑀁𑀬𑁂𑀯 𑀲𑀫𑀸𑀥𑀺𑀓𑁆𑀔𑀦𑁆𑀥𑀲𑀗𑁆𑀕𑀳𑁄 𑀤𑀲𑁆𑀲𑀺𑀢𑁄. 𑀬𑀁 𑀧𑀦 𑀲𑀘𑁆𑀘𑀯𑀺𑀪𑀗𑁆𑀕𑀯𑀡𑁆𑀡𑀦𑀸𑀬𑀁 (𑀯𑀺𑀪. 𑀅𑀝𑁆𑀞. 𑁧𑁮𑁯) 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑀸𑀤𑀻𑀲𑀼 (𑀯𑀺𑀲𑀼𑀤𑁆𑀥𑀺. 𑁨.𑁫𑁬𑁮) 𑀘 ‘‘𑀯𑀸𑀬𑀸𑀫𑀲𑀢𑀺𑀬𑁄 𑀓𑀺𑀭𑀺𑀬𑀢𑁄 𑀲𑀗𑁆𑀕𑀳𑀺𑀢𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀅𑀲𑀫𑀸𑀥𑀺𑀲𑀪𑀸𑀯𑀢𑀁 𑀢𑁂𑀲𑀁 𑀲𑀫𑀸𑀥𑀺𑀲𑁆𑀲 𑀉𑀧𑀓𑀸𑀭𑀓𑀢𑁆𑀢𑀜𑁆𑀘 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑁂𑀦𑁂𑀯 𑀘 𑀢𑀢𑁆𑀣 ‘‘𑀲𑀫𑀸𑀥𑀺𑀬𑁂𑀯𑁂𑀢𑁆𑀣 𑀲𑀚𑀸𑀢𑀺𑀢𑁄 𑀲𑀫𑀸𑀥𑀺𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑁄’’𑀢𑀺 (𑀯𑀺𑀲𑀼𑀤𑁆𑀥𑀺. 𑁨.𑁫𑁬𑁮; 𑀯𑀺𑀪. 𑀅𑀝𑁆𑀞. 𑁧𑁮𑁯) 𑀯𑀼𑀢𑁆𑀢𑀁. 𑀇𑀥 𑀧𑀦 𑀲𑀚𑀸𑀢𑀺𑀲𑀗𑁆𑀕𑀳𑁄𑀢𑀺 𑀲𑀫𑀸𑀥𑀺𑀢𑀤𑀼𑀧𑀓𑀸𑀭𑀓𑀥𑀫𑁆𑀫𑀸𑀦𑀁 𑀉𑀧𑁆𑀧𑀢𑁆𑀢𑀺𑀤𑁂𑀲𑀯𑀲𑁂𑀦 𑀲𑀗𑁆𑀕𑀳𑁄 𑀯𑀼𑀢𑁆𑀢𑁄𑀢𑀺. 𑀅𑀯𑀺𑀭𑀸𑀥𑁂𑀢𑁆𑀯𑀸 𑀯𑀺𑀲𑀬𑀲𑀪𑀸𑀯𑀸𑀯𑀕𑁆𑀕𑀳𑀡𑀁 𑀧𑀝𑀺𑀯𑁂𑀥𑁄, 𑀅𑀧𑁆𑀧𑀦𑀸 𑀘 𑀆𑀭𑀫𑁆𑀫𑀡𑁂 𑀤𑀴𑁆𑀳𑀦𑀺𑀧𑀸𑀢𑁄 𑀢𑀤𑀯𑀕𑀸𑀳𑁄𑀬𑁂𑀯𑀸𑀢𑀺 ‘‘𑀧𑀝𑀺𑀯𑁂𑀥𑀲𑀤𑀺𑀲𑀁 𑀓𑀺𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀆𑀭𑀫𑁆𑀫𑀡𑀧𑀝𑀺𑀯𑁂𑀥𑀲𑁆𑀲 𑀢𑀤𑀸𑀳𑀦𑀦𑀧𑀭𑀺𑀬𑀸𑀳𑀦𑀦𑀫𑀦𑀼𑀕𑀼𑀡𑀢𑀸𑀬 𑀲𑀫𑀸𑀦𑀦𑁆𑀢𑀺 𑀧𑀜𑁆𑀜𑀸𑀯𑀺𑀢𑀓𑁆𑀓𑀸𑀦𑀁 𑀓𑀺𑀘𑁆𑀘𑀲𑀭𑀺𑀓𑁆𑀔𑀢𑀸 𑀯𑀼𑀢𑁆𑀢𑀸.

𑀏𑀓𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀓𑀦𑀺𑀤𑁆𑀤𑁂𑀲𑁄

𑀉𑀧𑀸𑀤𑀸𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁫𑁯𑁬. 𑀲𑀫𑀦𑁆𑀢𑀢𑁄 𑀲𑀩𑁆𑀩𑀲𑁄 𑀤𑀲𑁆𑀲𑀦𑀝𑁆𑀞𑁂𑀦 𑀘𑀓𑁆𑀔𑀼 𑀲𑀫𑀦𑁆𑀢𑀘𑀓𑁆𑀔𑀽𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀩𑁆𑀩𑀲𑀗𑁆𑀔𑀢𑀸𑀲𑀗𑁆𑀔𑀢𑀤𑀲𑁆𑀲𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀯𑀫𑀸𑀤𑀺𑀦𑀸𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁄 ‘‘𑀤𑀼𑀓𑁆𑀔𑀁 𑀧𑀭𑀺𑀜𑁆𑀜𑁂𑀬𑁆𑀬𑀁 𑀧𑀭𑀺𑀜𑁆𑀜𑀸𑀢’’𑀦𑁆𑀢𑀺 𑀢𑀻𑀲𑀼𑀧𑀺 𑀧𑀤𑁂𑀲𑀼 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑁄. ‘‘𑀇𑀤𑀁 𑀤𑀼𑀓𑁆𑀔𑀦𑁆𑀢𑀺 𑀫𑁂, 𑀪𑀺𑀓𑁆𑀔𑀯𑁂, 𑀧𑀼𑀩𑁆𑀩𑁂 𑀅𑀦𑀦𑀼𑀲𑁆𑀲𑀼𑀢𑁂𑀲𑀼 𑀥𑀫𑁆𑀫𑁂𑀲𑀼 𑀘𑀓𑁆𑀔𑀼𑀁 𑀉𑀤𑀧𑀸𑀤𑀺, 𑀜𑀸𑀡𑀁 𑀉𑀤𑀧𑀸𑀤𑀻’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁧𑁫; 𑀧𑀝𑀺. 𑀫. 𑁨.𑁩𑁦) 𑀳𑀺 𑀧𑀸𑀴𑀺 𑀧𑀯𑀢𑁆𑀢𑀸𑀢𑀺. 𑀆𑀓𑀸𑀭𑁂𑀦𑀸𑀢𑀺 𑀤𑁆𑀯𑀸𑀤𑀲𑀯𑀺𑀥𑁂𑀦 𑀆𑀓𑀸𑀭𑁂𑀦. 𑀢𑀫𑁆𑀧𑀺 𑀓𑀸𑀫𑀸𑀯𑀘𑀭𑀁 𑀯𑀺𑀧𑀲𑁆𑀲𑀦𑀸𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀪𑀸𑀯𑀢𑁄. ‘‘𑀜𑀸𑀡𑀘𑀓𑁆𑀔𑀼 𑀲𑀳𑀅𑀭𑀺𑀬𑀫𑀕𑁆𑀕𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀦𑁆𑀢𑀺𑀧𑀺 𑀬𑀼𑀚𑁆𑀚𑀢𑀻’’𑀢𑀺 𑀯𑀤𑀦𑁆𑀢𑀺. 𑀅𑀕𑁆𑀕𑀫𑀕𑁆𑀕𑁂𑀦 𑀧𑀦 𑀲𑀳 𑀯𑀺𑀧𑀲𑁆𑀲𑀦𑀸 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀦𑁆𑀢𑀺 𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺.

𑀬𑀣𑀸𑀯𑀼𑀢𑁆𑀢𑁂 𑀫𑀁𑀲𑀧𑀺𑀡𑁆𑀟𑁂 𑀲𑀲𑀫𑁆𑀪𑀸𑀭𑁂 𑀘𑀓𑁆𑀔𑀼𑀯𑁄𑀳𑀸𑀭𑁄 𑀲𑀦𑁆𑀢𑀸𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑁂 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀭𑀽𑀧𑀥𑀫𑁆𑀫𑁂 𑀉𑀧𑀸𑀤𑀸𑀬 𑀧𑀯𑀢𑁆𑀢𑁄𑀢𑀺 ‘‘𑀘𑀢𑀼…𑀧𑁂… 𑀲𑀫𑁆𑀪𑀸𑀭𑀸’’𑀢𑀺 𑀯𑀼𑀢𑁆𑀢𑀁. 𑀲𑀡𑁆𑀞𑀸𑀦𑀦𑁆𑀢𑀺 𑀯𑀡𑁆𑀡𑀸𑀬𑀢𑀦𑀫𑁂𑀯𑀸𑀢𑀺 𑀢𑁂𑀦 𑀢𑁂𑀦 𑀆𑀓𑀸𑀭𑁂𑀦 𑀲𑀦𑁆𑀦𑀺𑀯𑀺𑀝𑁆𑀞𑁂𑀲𑀼 𑀫𑀳𑀸𑀪𑀽𑀢𑁂𑀲𑀼 𑀢𑀁𑀢𑀁𑀲𑀡𑁆𑀞𑀸𑀦𑀯𑀲𑁂𑀦 𑀯𑀡𑁆𑀡𑀸𑀬𑀢𑀦𑀲𑁆𑀲 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸 𑀯𑀼𑀢𑁆𑀢𑀁, 𑀦 𑀯𑀡𑁆𑀡𑀸𑀬𑀢𑀦𑀲𑁆𑀲𑁂𑀯 𑀲𑀡𑁆𑀞𑀸𑀦𑀧𑀜𑁆𑀜𑀢𑁆𑀢𑀺𑀬𑀸 𑀉𑀧𑀸𑀤𑀸𑀦𑀢𑁆𑀢𑀸. 𑀢𑀣𑀸 𑀳𑀺 𑀅𑀦𑁆𑀥𑀓𑀸𑀭𑁂 𑀨𑀼𑀲𑀺𑀢𑁆𑀯𑀸𑀧𑀺 𑀲𑀡𑁆𑀞𑀸𑀦𑀁 𑀯𑀺𑀜𑁆𑀜𑀸𑀬𑀢𑀻𑀢𑀺. 𑀢𑀣𑀸 𑀘 𑀯𑀓𑁆𑀔𑀢𑀺 ‘‘𑀤𑀻𑀖𑀸𑀤𑀻𑀦𑀺 𑀨𑀼𑀲𑀺𑀢𑁆𑀯𑀸𑀧𑀺 𑀲𑀓𑁆𑀓𑀸 𑀚𑀸𑀦𑀺𑀢𑀼’’𑀦𑁆𑀢𑀺, (𑀥. 𑀲. 𑀅𑀝𑁆𑀝. 𑁬𑁧𑁬) ‘‘𑀤𑀻𑀖𑀸𑀤𑀺𑀲𑀦𑁆𑀦𑀺𑀯𑁂𑀲𑀁 𑀪𑀽𑀢𑀲𑀫𑀼𑀤𑀸𑀬𑀁 𑀦𑀺𑀲𑁆𑀲𑀸𑀬𑀸’’𑀢𑀺 (𑀥. 𑀲. 𑀫𑀽𑀮𑀝𑀻. 𑁬𑁧𑁬) 𑀘. 𑀢𑁂𑀲𑀁 𑀲𑀫𑁆𑀪𑀯𑀲𑀡𑁆𑀞𑀸𑀦𑀸𑀦𑀁 𑀆𑀧𑁄𑀥𑀸𑀢𑀼𑀯𑀡𑁆𑀡𑀸𑀬𑀢𑀦𑁂𑀳𑀺 𑀅𑀦𑀢𑁆𑀣𑀦𑁆𑀢𑀭𑀪𑀸𑀯𑁂𑀧𑀺 𑀢𑁂𑀳𑀺 𑀯𑀺𑀲𑀼𑀁 𑀯𑀘𑀦𑀁 𑀢𑀣𑀸𑀪𑀽𑀢𑀸𑀦𑀁 𑀲𑀫𑁆𑀪𑀯𑀪𑀽𑀢𑀸𑀦𑀁 𑀲𑀡𑁆𑀞𑀸𑀦𑀪𑀽𑀢𑀸𑀦𑀜𑁆𑀘. 𑀏𑀢𑁂𑀦 𑀆𑀧𑁄𑀥𑀸𑀢𑀼𑀯𑀡𑁆𑀡𑀸𑀬𑀢𑀦𑀸𑀦𑀁 𑀯𑀲𑁂𑀦 𑀯𑀢𑁆𑀢𑀫𑀸𑀦𑀅𑀯𑀢𑁆𑀣𑀸𑀯𑀺𑀲𑁂𑀲𑁄 𑀲𑀫𑁆𑀪𑀯𑁄 𑀲𑀡𑁆𑀞𑀸𑀦𑀜𑁆𑀘𑀸𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀢𑀢𑁆𑀣 𑀲𑀫𑁆𑀪𑀯𑁄 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑁄 𑀲𑁄𑀴𑀲𑀯𑀲𑁆𑀲𑀓𑀸𑀮𑁂 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀲 𑀭𑀸𑀕𑀯𑀲𑁂𑀦 𑀞𑀸𑀦𑀸 𑀯𑀘𑀦𑀁 𑀳𑁄𑀢𑀻𑀢𑀺 𑀯𑀤𑀦𑁆𑀢𑀺. 𑀅𑀢𑀣𑀸𑀪𑀽𑀢𑀸𑀦𑀁 𑀢𑀢𑁄 𑀅𑀜𑁆𑀜𑀣𑀸𑀪𑀽𑀢𑀸𑀦𑀁. 𑀬𑀣𑀸𑀯𑀼𑀢𑁆𑀢𑁂 𑀲𑀫𑁆𑀪𑀸𑀭𑀯𑀢𑁆𑀣𑀼𑀲𑀗𑁆𑀔𑀸𑀢𑁂. 𑀯𑀺𑀚𑁆𑀚𑀫𑀸𑀦𑀢𑁆𑀢𑀸𑀢𑀺 𑀪𑀺𑀬𑁆𑀬𑁄𑀯𑀼𑀢𑁆𑀢𑀺𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀔𑀻𑀡𑀸𑀲𑀯𑀸𑀦𑀁 𑀩𑁆𑀭𑀳𑁆𑀫𑀸𑀦𑀜𑁆𑀘 𑀲𑀫𑁆𑀪𑀯𑁄 𑀦𑀢𑁆𑀣𑀻𑀢𑀺. 𑀆𑀧𑁄𑀥𑀸𑀢𑀼𑀯𑀺𑀲𑁂𑀲𑀢𑁆𑀢𑀸 𑀲𑀫𑁆𑀪𑀯𑁄 𑀆𑀧𑁄𑀥𑀸𑀢𑀼𑀲𑀫𑁆𑀩𑀦𑁆𑀥𑀻 𑀆𑀧𑁄𑀥𑀸𑀢𑀼𑀢𑀦𑁆𑀦𑀺𑀲𑁆𑀲𑀬𑀦𑀺𑀲𑁆𑀲𑀺𑀢𑁄𑀧𑀺 𑀳𑁄𑀢𑀻𑀢𑀺 𑀢𑀲𑁆𑀲 𑀘𑀢𑀼𑀥𑀸𑀢𑀼𑀦𑀺𑀲𑁆𑀲𑀺𑀢𑀢𑀸𑀬 𑀅𑀯𑀺𑀭𑁄𑀥𑁄 𑀯𑀼𑀢𑁆𑀢𑁄.

𑀉𑀢𑀼𑀘𑀺𑀢𑁆𑀢𑀸𑀳𑀸𑀭𑁂𑀳𑀺 𑀉𑀧𑀢𑁆𑀣𑀫𑁆𑀪𑀺𑀬𑀫𑀸𑀦𑀦𑁆𑀢𑀺 𑀏𑀢𑁆𑀣 ‘‘𑀓𑀮𑀸𑀧𑀦𑁆𑀢𑀭𑀕𑀢𑀸 𑀉𑀢𑀼𑀆𑀳𑀸𑀭𑀸 𑀅𑀥𑀺𑀧𑁆𑀧𑁂𑀢𑀸’’𑀢𑀺 𑀯𑀤𑀦𑁆𑀢𑀺. 𑀅𑀦𑁂𑀓𑀓𑀮𑀸𑀧𑀕𑀢𑀪𑀸𑀯𑀁 𑀘𑀓𑁆𑀔𑀼𑀲𑁆𑀲 𑀤𑀲𑁆𑀲𑁂𑀢𑀺 𑀬𑀢𑁄 𑀉𑀧𑀤𑁆𑀤𑀼𑀢𑀧𑀝𑀮𑁂 𑀦𑀺𑀭𑀸𑀓𑀭𑀡𑁂𑀧𑀺 𑀘𑀓𑁆𑀔𑀼 𑀯𑀺𑀚𑁆𑀚𑀢𑀻𑀢𑀺. 𑀧𑀝𑀺𑀖𑀝𑁆𑀝𑀦𑀁 𑀯𑀺𑀲𑀬𑀸𑀪𑀺𑀫𑀼𑀔𑀪𑀸𑀯𑁄 𑀦𑀺𑀖𑀁𑀲𑀧𑀘𑁆𑀘𑀬𑀢𑁆𑀢𑀸. 𑀦𑀺𑀖𑀁𑀲𑁄 𑀦𑀺𑀲𑁆𑀲𑀬𑀪𑀸𑀯𑀸𑀧𑀢𑁆𑀢𑀺. 𑀬𑀢𑁄 𑀘𑀓𑁆𑀔𑀸𑀤𑀺𑀦𑀺𑀲𑁆𑀲𑀺𑀢𑀸 𑀲𑀜𑁆𑀜𑀸 ‘‘𑀧𑀝𑀺𑀖𑀲𑀜𑁆𑀜𑀸’’𑀢𑀺 𑀯𑀼𑀘𑁆𑀘𑀢𑀺.

𑀅𑀦𑁂𑀓𑀢𑁆𑀢𑀸𑀢𑀺 𑀇𑀤𑀁 𑀅𑀯𑀘𑀦𑀲𑁆𑀲 𑀓𑀸𑀭𑀡𑀁, 𑀦 𑀳𑁂𑀢𑀼𑀓𑀺𑀭𑀺𑀬𑀸𑀬 𑀯𑀺𑀜𑁆𑀜𑀸𑀬𑀫𑀸𑀦𑀪𑀸𑀯𑀲𑁆𑀲. 𑀲𑁄 𑀧𑀦 𑀅𑀧𑁂𑀓𑁆𑀔𑀸𑀲𑀺𑀤𑁆𑀥𑀺𑀢𑁄 𑀏𑀯 𑀯𑁂𑀤𑀺𑀢𑀩𑁆𑀩𑁄. 𑀳𑁂𑀢𑀼𑀓𑀺𑀭𑀺𑀬𑀸𑀧𑁂𑀓𑁆𑀔𑀸 𑀳𑀺 𑀨𑀮𑀓𑀺𑀭𑀺𑀬𑀸𑀢𑀺. 𑀘𑀓𑁆𑀔𑀼𑀁 𑀲𑀗𑁆𑀕𑀡𑁆𑀳𑀸𑀢𑀻𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀬𑀪𑀸𑀯𑀸𑀦𑀼𑀧𑀕𑀫𑀦𑁂𑀧𑀺 𑀢𑀁𑀲𑀪𑀸𑀯𑀸𑀦𑀢𑀺𑀯𑀢𑁆𑀢𑀦𑀢𑁄 𑀢𑀲𑁆𑀲𑀸 𑀲𑀫𑀜𑁆𑀜𑀸𑀬 𑀢𑀢𑁆𑀣 𑀦𑀺𑀭𑀼𑀴𑁆𑀳𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀤𑀲𑁆𑀲𑀦𑀧𑀭𑀺𑀡𑀸𑀬𑀓𑀝𑁆𑀞𑁄 𑀘𑀓𑁆𑀔𑀼𑀲𑁆𑀲 𑀇𑀦𑁆𑀤𑀝𑁆𑀞𑁄𑀬𑁂𑀯𑀸𑀢𑀺 ‘‘𑀬𑀣𑀸 𑀳𑀺 𑀇𑀲𑁆𑀲𑀭𑁄’’𑀢𑀺𑀆𑀤𑀺𑀦𑀸 𑀇𑀲𑁆𑀲𑀭𑁄𑀧𑀫𑀸 𑀯𑀼𑀢𑁆𑀢𑀸. 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀤𑀲𑁆𑀲𑀦𑀓𑀺𑀘𑁆𑀘𑁂 𑀧𑀭𑀺𑀡𑀸𑀬𑀦𑁆𑀢𑀁 𑀘𑀓𑁆𑀔𑀼 𑀢𑀁𑀲𑀳𑀚𑀸𑀢𑁂 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀬𑁄𑀧𑀺 𑀢𑀢𑁆𑀣 𑀧𑀭𑀺𑀡𑀸𑀬𑀢𑀻𑀢𑀺 𑀯𑀼𑀘𑁆𑀘𑀢𑀻𑀢𑀺 ‘‘𑀢𑁂 𑀥𑀫𑁆𑀫𑁂…𑀧𑁂… 𑀧𑀭𑀺𑀡𑀸𑀬𑀢𑀻’’𑀢𑀺 𑀯𑀼𑀢𑁆𑀢𑀁, 𑀦 𑀧𑀦 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀻𑀦𑀁 𑀤𑀲𑁆𑀲𑀦𑀓𑀺𑀘𑁆𑀘𑀢𑁆𑀢𑀸. 𑀅𑀣 𑀯𑀸 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀧𑀘𑁆𑀘𑀬𑀪𑀸𑀯𑁂𑀦 𑀉𑀧𑀓𑀸𑀭𑀓𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀤𑀲𑁆𑀲𑀦𑀓𑀺𑀘𑁆𑀘𑁂 𑀧𑀭𑀺𑀡𑀸𑀬𑀦𑁆𑀢𑀁 𑀘𑀓𑁆𑀔𑀼 𑀢𑀢𑁆𑀣 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀬𑁄𑀧𑀺 𑀢𑀤𑀦𑀼𑀯𑀢𑁆𑀢𑀓𑁂 𑀧𑀭𑀺𑀡𑀸𑀬𑀢𑀻𑀢𑀺 𑀅𑀢𑁆𑀣𑀸𑀬𑀁 𑀧𑀭𑀺𑀬𑀸𑀬𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀢𑁂 𑀥𑀫𑁆𑀫𑁂…𑀧𑁂… 𑀡𑀸𑀬𑀢𑀻’’𑀢𑀺. 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀽𑀦𑀁 𑀘𑀓𑁆𑀔𑀢𑀻𑀢𑀺 𑀇𑀫𑀲𑁆𑀲 ‘‘𑀧𑀭𑀺𑀡𑀸𑀬𑀢𑀺 𑀧𑀓𑀸𑀲𑁂𑀢𑀻’’𑀢𑀺 𑀘 𑀅𑀢𑁆𑀣𑀸 𑀯𑀼𑀢𑁆𑀢𑀸. 𑀲𑀡𑁆𑀞𑀸𑀦𑀫𑁆𑀧𑀺 𑀭𑀽𑀧𑀸𑀬𑀢𑀦𑀫𑁂𑀯𑀸𑀢𑀺 ‘‘𑀲𑀫𑀯𑀺𑀲𑀫𑀸𑀦𑀺 𑀭𑀽𑀧𑀸𑀦𑀺 𑀘𑀓𑁆𑀔𑀢𑀻𑀢𑀺 𑀘𑀓𑁆𑀔𑀽’’𑀢𑀺 𑀯𑀼𑀢𑁆𑀢𑀁. 𑀢𑀁𑀤𑁆𑀯𑀸𑀭𑀺𑀓𑀸𑀦𑀁 𑀨𑀲𑁆𑀲𑀸𑀤𑀻𑀦𑀁 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑁄 𑀏𑀯 𑀯𑀴𑀜𑁆𑀚𑀦𑀢𑁆𑀣𑁄.

𑁫𑁯𑁯. 𑀢𑀁𑀤𑁆𑀯𑀸𑀭𑀺𑀓𑀸…𑀧𑁂… 𑀉𑀧𑁆𑀧𑀢𑁆𑀢𑀺 𑀯𑀼𑀢𑁆𑀢𑀸𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂 𑀉𑀧𑁆𑀧𑀦𑁆𑀦𑁂 𑀲𑀫𑁆𑀧𑀝𑀺𑀘𑁆𑀙𑀦𑀸𑀤𑀻𑀦𑀺 𑀩𑀮𑀯𑀸𑀭𑀫𑁆𑀫𑀡𑁂 𑀚𑀯𑀦𑀁 𑀏𑀓𑀦𑁆𑀢𑁂𑀦 𑀉𑀧𑁆𑀧𑀚𑁆𑀚𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀣𑀸 𑀘𑁂𑀯 𑀳𑀺 𑀅𑀦𑁆𑀢𑀭𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑁂 𑀯𑀸 𑀲𑀫𑁆𑀧𑀝𑀺𑀘𑁆𑀙𑀦𑁂 𑀯𑀸 𑀲𑀦𑁆𑀢𑀻𑀭𑀡𑁂 𑀯𑀸 𑀞𑀢𑁆𑀯𑀸 𑀦𑀺𑀯𑀢𑁆𑀢𑀺𑀲𑁆𑀲𑀢𑀻𑀢𑀺 𑀦𑁂𑀢𑀁 𑀞𑀸𑀦𑀁 𑀯𑀺𑀚𑁆𑀚𑀢𑀻𑀢𑀺 𑀦𑀺𑀘𑁆𑀙𑀺𑀢𑀁. 𑀢𑁂𑀦 𑀧𑀘𑁆𑀘𑀬𑁂𑀦𑀸𑀢𑀺 𑀢𑀁𑀧𑀓𑀸𑀭𑁂𑀦 𑀧𑀘𑁆𑀘𑀬𑁂𑀦. 𑀢𑀁𑀲𑀤𑀺𑀲𑀸𑀦𑀦𑁆𑀢𑀺 𑀕𑀭𑀼𑀁 𑀓𑀢𑁆𑀯𑀸 𑀅𑀲𑁆𑀲𑀸𑀤𑀦𑀸𑀤𑀺𑀧𑁆𑀧𑀯𑀢𑁆𑀢𑀺𑀯𑀺𑀲𑁂𑀲𑀭𑀳𑀺𑀢𑀢𑀸𑀬 𑀤𑀲𑁆𑀲𑀦𑀲𑀤𑀺𑀲𑀸𑀦𑀁 𑀫𑀦𑁄𑀥𑀸𑀢𑀼𑀲𑀦𑁆𑀢𑀻𑀭𑀡𑀯𑁄𑀝𑁆𑀞𑀩𑁆𑀩𑀦𑀸𑀦𑀁. 𑀧𑀜𑁆𑀘𑀤𑁆𑀯𑀸𑀭𑀺𑀓𑀚𑀯𑀦𑀸𑀦𑀁 𑀅𑀲𑁆𑀲𑀸𑀤𑀦𑀸𑀤𑀺𑀢𑁄 𑀅𑀜𑁆𑀜𑀣𑀸 𑀕𑀭𑀼𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺 𑀦𑀢𑁆𑀣𑀺 𑀭𑀽𑀧𑀥𑀫𑁆𑀫𑀯𑀺𑀲𑀬𑀢𑁆𑀢𑀸𑀢𑀺 ‘‘𑀅𑀲𑁆𑀲𑀸𑀤𑀦𑀸𑀪𑀺𑀦𑀦𑁆𑀤𑀦𑀪𑀽𑀢𑀸𑀦𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁. 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀧𑀺𑀝𑁆𑀞𑀺𑀯𑀝𑁆𑀝𑀓𑀸𑀦𑀫𑁆𑀧𑀺 𑀳𑀺 𑀧𑀜𑁆𑀘𑀤𑁆𑀯𑀸𑀭𑀺𑀓𑀚𑀯𑀦𑀸𑀦𑀁 𑀅𑀲𑁆𑀲𑀸𑀤𑀦𑀸𑀪𑀺𑀦𑀦𑁆𑀤𑀦𑀪𑀸𑀯𑁂𑀦 𑀭𑀽𑀧𑀁 𑀕𑀭𑀼𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺 𑀦𑀢𑁆𑀣𑀻𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀦𑁆𑀢𑀺. 𑀭𑀽𑀧𑀁 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀅𑀓𑀼𑀲𑀮𑀲𑁆𑀲𑁂𑀯 𑀳𑁄𑀢𑀺. 𑀢𑀣𑀸 𑀳𑀺 𑀧𑀝𑁆𑀞𑀸𑀦𑁂 ‘‘𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀅𑀓𑀼𑀲𑀮𑀲𑁆𑀲 𑀥𑀫𑁆𑀫𑀲𑁆𑀲 𑀅𑀥𑀺𑀧𑀢𑀺𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀘𑀓𑁆𑀔𑀼𑀁 𑀕𑀭𑀼𑀁 𑀓𑀢𑁆𑀯𑀸 𑀅𑀲𑁆𑀲𑀸𑀤𑁂𑀢𑀺 𑀅𑀪𑀺𑀦𑀦𑁆𑀤𑀢𑀻’’𑀢𑀺𑀆𑀤𑀺𑀦𑀸 (𑀧𑀝𑁆𑀞𑀸. 𑁧.𑁧.𑁪𑁧𑁬) 𑀭𑀽𑀧𑀥𑀫𑁆𑀫𑁄𑀧𑀺 𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀯𑀺𑀪𑀢𑁆𑀢𑁄. ‘‘𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀅𑀩𑁆𑀬𑀸𑀓𑀢𑀲𑁆𑀲 𑀥𑀫𑁆𑀫𑀲𑁆𑀲 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄 𑀓𑀼𑀲𑀮𑀲𑁆𑀲𑀸’’𑀢𑀺 𑀏𑀢𑁆𑀣 𑀧𑀦 𑀨𑀮𑀦𑀺𑀩𑁆𑀩𑀸𑀦𑀸𑀦𑁂𑀯 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀪𑀸𑀯𑁂𑀦 𑀯𑀺𑀪𑀢𑁆𑀢𑀸𑀦𑀻𑀢𑀺. 𑀕𑀡𑀦𑀸𑀬 𑀘 ‘‘𑀆𑀭𑀫𑁆𑀫𑀡𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀉𑀧𑀦𑀺𑀲𑁆𑀲𑀬𑀧𑀼𑀭𑁂𑀚𑀸𑀢𑀅𑀢𑁆𑀣𑀺𑀅𑀯𑀺𑀕𑀢𑀦𑁆𑀢𑀺 𑀏𑀓’’𑀦𑁆𑀢𑀺 (𑀧𑀝𑁆𑀞𑀸. 𑁧.𑁧.𑁪𑁪𑁫) 𑀯𑀼𑀢𑁆𑀢𑀁. 𑀬𑀤𑀺 𑀓𑀼𑀲𑀮𑀲𑁆𑀲𑀧𑀺 𑀲𑀺𑀬𑀸, 𑀤𑁆𑀯𑁂𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺. 𑀢𑀸𑀦𑀻𑀢𑀺 𑀬𑀣𑀸𑀯𑀼𑀢𑁆𑀢𑀚𑀯𑀦𑀸𑀦𑀺 𑀧𑀝𑀺𑀦𑀺𑀤𑁆𑀤𑀺𑀝𑁆𑀞𑀸𑀦𑀺. 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀘𑀸𑀢𑀺 𑀚𑀯𑀦𑀲𑀫𑁆𑀧𑀬𑀼𑀢𑁆𑀢𑀸𑀦𑀺. 𑀅𑀜𑁆𑀜𑀸𑀦𑀺 𑀘𑀓𑁆𑀔𑀼𑀲𑀫𑁆𑀨𑀲𑁆𑀲𑀸𑀤𑀻𑀦𑀺. 𑀬𑀤𑀺 𑀭𑀽𑀧𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑀪𑀸𑀯𑀫𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁, ‘‘𑀢𑀁 𑀭𑀽𑀧𑀸𑀭𑀫𑁆𑀫𑀡𑁂𑀢𑀺 𑀏𑀢𑁂𑀦𑁂𑀯 𑀲𑀺𑀚𑁆𑀛𑁂𑀬𑁆𑀬𑀸’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀤𑁂𑀬𑁆𑀬. 𑀬𑀲𑁆𑀫𑀸 𑀧𑀦 𑀭𑀽𑀧𑀁 𑀢𑀁𑀤𑁆𑀯𑀸𑀭𑀺𑀓𑀚𑀯𑀦𑀸𑀦𑀁 𑀧𑀘𑁆𑀘𑀬𑀯𑀺𑀲𑁂𑀲𑁄𑀧𑀺 𑀳𑁄𑀢𑀺, 𑀢𑀲𑁆𑀫𑀸 𑀢𑀲𑁆𑀲 𑀯𑀺𑀲𑁂𑀲𑀲𑁆𑀲 𑀤𑀻𑀧𑀦𑀢𑁆𑀣𑀁 ‘‘𑀆𑀭𑀩𑁆𑀪𑀸’’𑀢𑀺 𑀯𑀘𑀦𑀁 𑀯𑀼𑀢𑁆𑀢𑀁 𑀲𑀺𑀬𑀸𑀢𑀺 𑀆𑀳 ‘‘𑀆𑀭𑀫𑁆𑀫𑀡𑀧𑀘𑁆𑀘𑀬𑀢𑁄 𑀅𑀜𑁆𑀜𑀧𑀘𑁆𑀘𑀬𑀪𑀸𑀯𑀲𑁆𑀲𑀧𑀺 𑀤𑀻𑀧𑀓’’𑀦𑁆𑀢𑀺.

𑁬𑁦𑁦. 𑀲𑁄𑀢𑀯𑀺𑀜𑁆𑀜𑀸𑀡𑀧𑁆𑀧𑀯𑀢𑁆𑀢𑀺𑀬𑀁 𑀲𑀯𑀦𑀓𑀺𑀭𑀺𑀬𑀸𑀯𑁄𑀳𑀸𑀭𑁄𑀢𑀺 𑀲𑁄𑀢𑀲𑁆𑀲 𑀲𑀯𑀦𑀓𑀺𑀭𑀺𑀬𑀸𑀬 𑀓𑀢𑁆𑀢𑀼𑀪𑀸𑀯𑁄 𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑀪𑀸𑀯𑁂𑀦𑀸𑀢𑀺 𑀯𑀼𑀢𑁆𑀢𑀁 ‘‘𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀲 𑀦𑀺𑀲𑁆𑀲𑀬𑀪𑀸𑀯𑁂𑀦 𑀲𑀼𑀡𑀸𑀢𑀻’’𑀢𑀺. 𑀚𑀻𑀯𑀺𑀢𑀦𑀺𑀫𑀺𑀢𑁆𑀢𑀫𑀸𑀳𑀸𑀭𑀭𑀲𑁄 𑀚𑀻𑀯𑀺𑀢𑀁, 𑀢𑀲𑁆𑀫𑀺𑀁 𑀦𑀺𑀦𑁆𑀦𑀢𑀸𑀬 𑀢𑀁 𑀅𑀯𑁆𑀳𑀸𑀬𑀢𑀻𑀢𑀺 𑀚𑀺𑀯𑁆𑀳𑀸𑀢𑀺 𑀏𑀯𑀁 𑀲𑀺𑀤𑁆𑀥𑁂𑀦 𑀚𑀺𑀯𑁆𑀳𑀸-𑀲𑀤𑁆𑀤𑁂𑀦 𑀧𑀓𑀸𑀲𑀺𑀬𑀫𑀸𑀦𑀸 𑀭𑀲𑀸𑀯𑁆𑀳𑀸𑀬𑀦𑀲𑀗𑁆𑀔𑀸𑀢𑀸 𑀲𑀸𑀬𑀦𑀓𑀺𑀭𑀺𑀬𑀸 𑀮𑀩𑁆𑀪𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀚𑀺𑀯𑁆𑀳𑀸𑀲𑀤𑁆𑀤𑁂𑀦 𑀯𑀺𑀜𑁆𑀜𑀸𑀬𑀫𑀸𑀦𑀸 𑀓𑀺𑀭𑀺𑀬𑀸𑀲𑀸𑀬𑀦’’𑀦𑁆𑀢𑀺. 𑀢𑀣𑀸 𑀘 𑀯𑀓𑁆𑀔𑀢𑀺 ‘‘𑀚𑀻𑀯𑀺𑀢𑀫𑀯𑁆𑀳𑀸𑀬𑀢𑀻𑀢𑀺 𑀚𑀺𑀯𑁆𑀳𑀸’’𑀢𑀺 (𑀯𑀺𑀪. 𑀅𑀝𑁆𑀞. 𑁧𑁫𑁪). 𑀆𑀬𑁄𑀢𑀺 𑀉𑀧𑁆𑀧𑀢𑁆𑀢𑀺𑀤𑁂𑀲𑁄. 𑀧𑀲𑀸𑀤𑀓𑀸𑀬𑀲𑁆𑀲 𑀓𑀸𑀬𑀺𑀓𑀸𑀦𑀁 𑀤𑀼𑀓𑁆𑀔𑀲𑀼𑀔𑀸𑀦𑀁 𑀦𑀺𑀲𑁆𑀲𑀬𑀪𑀸𑀯𑀢𑁄 𑀇𑀢𑀭𑁂𑀲𑀁 𑀉𑀧𑀦𑀺𑀲𑁆𑀲𑀬𑀪𑀸𑀯𑀢𑁄 ‘‘𑀤𑀼𑀓𑁆𑀔𑀤𑀼𑀓𑁆𑀔𑀯𑀺𑀧𑀭𑀺𑀡𑀸𑀫𑀤𑀼𑀓𑁆𑀔𑀸𑀦𑀁 𑀆𑀬𑁄’’𑀢𑀺 𑀯𑀼𑀢𑁆𑀢𑀁. 𑀩𑁆𑀬𑀸𑀧𑀺𑀢𑀸𑀬𑀸𑀢𑀺 𑀩𑁆𑀬𑀸𑀧𑀺𑀪𑀸𑀯𑁂, 𑀩𑁆𑀬𑀸𑀧𑀺𑀪𑀸𑀯𑁂𑀦 𑀯𑀸. 𑀓𑀸𑀬𑀧𑁆𑀧𑀲𑀸𑀤𑀪𑀸𑀯𑁄𑀢𑀺 𑀓𑀸𑀬𑀧𑁆𑀧𑀲𑀸𑀤𑀲𑀩𑁆𑀪𑀸𑀯𑁄. 𑀅𑀦𑀼𑀯𑀺𑀤𑁆𑀥𑀢𑁆𑀢𑀸𑀢𑀺 𑀅𑀦𑀼𑀬𑀼𑀢𑁆𑀢𑀪𑀸𑀯𑀢𑁄, 𑀲𑀁𑀲𑀝𑁆𑀞𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀬𑀸𑀯𑀢𑀸 𑀇𑀫𑀲𑁆𑀫𑀺𑀁 𑀓𑀸𑀬𑁂 𑀉𑀧𑀸𑀤𑀺𑀦𑁆𑀦𑀓𑀧𑀯𑀢𑁆𑀢𑀁 𑀦𑀸𑀫 𑀅𑀢𑁆𑀣𑀺, 𑀲𑀩𑁆𑀩𑀢𑁆𑀣 𑀓𑀸𑀬𑀸𑀬𑀢𑀦𑀁 𑀓𑀧𑁆𑀧𑀸𑀲𑀧𑀝𑀮𑁂 𑀲𑁆𑀦𑁂𑀳𑁄 𑀯𑀺𑀬𑀸𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸. 𑀧𑀡𑁆𑀟𑀭𑀲𑀪𑀸𑀯𑀸 𑀧𑀲𑀸𑀤𑀸 𑀆𑀧𑀸𑀣𑀕𑀢𑀁 𑀯𑀺𑀲𑀬𑀁 𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑁂𑀦 𑀧𑀓𑀸𑀲𑁂𑀦𑁆𑀢𑀸 𑀯𑀺𑀬 𑀳𑁄𑀦𑁆𑀢𑀻𑀢𑀺 𑀢𑁂𑀲𑀁 𑀯𑀺𑀲𑀬𑀸𑀯𑀪𑀸𑀲𑀦𑀓𑀺𑀘𑁆𑀘𑀢𑀸 𑀯𑀼𑀢𑁆𑀢𑀸. 𑀲𑀫𑀸𑀦𑀦𑀺𑀲𑁆𑀲𑀬𑀸𑀦𑀦𑁆𑀢𑀺 𑀏𑀓𑀦𑀺𑀲𑁆𑀲𑀬𑀸𑀦𑀁. 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑁂𑀲𑀼 𑀳𑀺 𑀭𑀽𑀧𑀭𑀲𑀸𑀤𑀻𑀲𑀼 𑀬𑀁𑀦𑀺𑀲𑁆𑀲𑀬𑀁 𑀭𑀽𑀧𑀁, 𑀢𑀁𑀦𑀺𑀲𑁆𑀲𑀬𑁄 𑀏𑀯 𑀭𑀲𑀸𑀤𑀻𑀢𑀺. 𑀅𑀜𑁆𑀜𑀫𑀜𑁆𑀜𑀲𑀪𑀸𑀯𑀸𑀦𑀼𑀧𑀕𑀫𑁂𑀦𑀸𑀢𑀺 𑀮𑀓𑁆𑀔𑀡𑀲𑀗𑁆𑀓𑀭𑀸𑀪𑀸𑀯𑀫𑀸𑀳.

𑀬𑀲𑁆𑀫𑀸 𑀧𑀘𑁆𑀘𑀬𑀦𑁆𑀢𑀭𑀲𑀳𑀺𑀢𑁄𑀬𑁂𑀯 𑀘𑀓𑁆𑀔𑀼𑀧𑁆𑀧𑀲𑀸𑀤𑁄 𑀭𑀽𑀧𑀸𑀪𑀺𑀳𑀦𑀦𑀯𑀲𑁂𑀦 𑀧𑀯𑀢𑁆𑀢𑀢𑀺, 𑀦 𑀧𑀘𑁆𑀘𑀬𑀦𑁆𑀢𑀭𑀭𑀳𑀺𑀢𑁄, 𑀢𑀲𑁆𑀫𑀸 𑀭𑀽𑀧𑀸𑀪𑀺𑀖𑀸𑀢𑁄 𑀳𑁄𑀢𑀼 𑀯𑀸 𑀫𑀸 𑀯𑀸 𑀳𑁄𑀢𑀼, 𑀏𑀯𑀁𑀲𑀪𑀸𑀯𑁄 𑀲𑁄 𑀭𑀽𑀧𑀥𑀫𑁆𑀫𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀭𑀽𑀧𑀸𑀪𑀺𑀖𑀸𑀢𑀸𑀭𑀳𑁄’’𑀢𑀺 𑀯𑀼𑀢𑁆𑀢𑀁 𑀬𑀣𑀸 ‘‘𑀯𑀺𑀧𑀸𑀓𑀸𑀭𑀳𑀲𑀪𑀸𑀯𑀸 𑀓𑀼𑀲𑀮𑀸𑀓𑀼𑀲𑀮𑀸’’𑀢𑀺. 𑀯𑀺𑀲𑀬𑀯𑀺𑀲𑀬𑀻𑀦𑀁 𑀅𑀜𑁆𑀜𑀫𑀜𑁆𑀜𑀁 𑀅𑀪𑀺𑀫𑀼𑀔𑀪𑀸𑀯𑁄 𑀅𑀪𑀺𑀖𑀸𑀢𑁄 𑀯𑀺𑀬𑀸𑀢𑀺 𑀅𑀪𑀺𑀖𑀸𑀢𑁄, 𑀲𑁄 𑀭𑀽𑀧𑁂 𑀘𑀓𑁆𑀔𑀼𑀲𑁆𑀲, 𑀘𑀓𑁆𑀔𑀼𑀫𑁆𑀳𑀺 𑀯𑀸 𑀭𑀽𑀧𑀲𑁆𑀲 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀭𑀽𑀧𑁂, 𑀭𑀽𑀧𑀲𑁆𑀲 𑀯𑀸 𑀅𑀪𑀺𑀖𑀸𑀢𑁄’’𑀢𑀺. 𑀢𑁂𑀦𑁂𑀯𑀸𑀳 ‘‘𑀬𑀫𑁆𑀳𑀺 𑀘𑀓𑁆𑀔𑀼𑀫𑁆𑀳𑀺 𑀅𑀦𑀺𑀤𑀲𑁆𑀲𑀦𑀫𑁆𑀳𑀺 𑀲𑀧𑁆𑀧𑀝𑀺𑀖𑀫𑁆𑀳𑀺 𑀭𑀽𑀧𑀁 𑀲𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀧𑀝𑀺𑀳𑀜𑁆𑀜𑀺 𑀯𑀸’’𑀢𑀺 (𑀥. 𑀲. 𑁫𑁯𑁭), ‘‘𑀘𑀓𑁆𑀔𑀼 𑀅𑀦𑀺𑀤𑀲𑁆𑀲𑀦𑀁 𑀲𑀧𑁆𑀧𑀝𑀺𑀖𑀁 𑀭𑀽𑀧𑀫𑁆𑀳𑀺 𑀲𑀦𑀺𑀤𑀲𑁆𑀲𑀦𑀫𑁆𑀳𑀺 𑀲𑀧𑁆𑀧𑀝𑀺𑀖𑀫𑁆𑀳𑀺 𑀧𑀝𑀺𑀳𑀜𑁆𑀜𑀺 𑀯𑀸’’𑀢𑀺 (𑀥. 𑀲. 𑁫𑁯𑁮) 𑀘 𑀆𑀤𑀺. 𑀏𑀢𑁆𑀣 𑀘 𑀢𑀁𑀢𑀁𑀪𑀯𑀧𑀢𑁆𑀣𑀦𑀸𑀯𑀲𑁂𑀦 𑀘𑀓𑁆𑀔𑀸𑀤𑀻𑀲𑀼 𑀅𑀯𑀺𑀕𑀢𑀭𑀸𑀕𑀲𑁆𑀲 𑀅𑀢𑁆𑀢𑀪𑀸𑀯𑀦𑀺𑀧𑁆𑀨𑀸𑀤𑀓𑀲𑀸𑀥𑀸𑀭𑀡𑀓𑀫𑁆𑀫𑀯𑀲𑁂𑀦 𑀧𑀼𑀭𑀺𑀫𑀁 𑀘𑀓𑁆𑀔𑀼𑀮𑀓𑁆𑀔𑀡𑀁 𑀯𑀼𑀢𑁆𑀢𑀁, 𑀲𑀼𑀤𑀽𑀭𑀲𑀼𑀔𑀼𑀫𑀸𑀤𑀺𑀪𑁂𑀤𑀲𑁆𑀲𑀧𑀺 𑀭𑀽𑀧𑀲𑁆𑀲 𑀕𑀳𑀡𑀲𑀫𑀢𑁆𑀣𑀫𑁂𑀯 𑀘𑀓𑁆𑀔𑀼 𑀳𑁄𑀢𑀽𑀢𑀺 𑀏𑀯𑀁 𑀦𑀺𑀩𑁆𑀩𑀢𑁆𑀢𑀺𑀢𑀆𑀯𑁂𑀡𑀺𑀓𑀓𑀫𑁆𑀫𑀯𑀲𑁂𑀦 𑀤𑀼𑀢𑀺𑀬𑀁. 𑀏𑀲 𑀦𑀬𑁄 𑀲𑁂𑀲𑁂𑀲𑀼𑀧𑀺. 𑀅𑀣 𑀯𑀸 𑀲𑀢𑀺𑀧𑀺 𑀧𑀜𑁆𑀘𑀦𑁆𑀦𑀁 𑀧𑀲𑀸𑀤𑀪𑀸𑀯𑀲𑀸𑀫𑀜𑁆𑀜𑁂 𑀲𑀯𑀺𑀲𑀬𑀸𑀯𑀪𑀸𑀲𑀦𑀲𑀗𑁆𑀔𑀸𑀢𑀲𑁆𑀲 𑀧𑀲𑀸𑀤𑀩𑁆𑀬𑀸𑀧𑀸𑀭𑀲𑁆𑀲 𑀤𑀲𑁆𑀲𑀦𑀯𑀲𑁂𑀦 𑀧𑀼𑀭𑀺𑀫𑀁 𑀯𑀼𑀢𑁆𑀢𑀁, 𑀧𑀲𑀸𑀤𑀓𑀸𑀭𑀡𑀲𑁆𑀲 𑀲𑀢𑀺𑀧𑀺 𑀓𑀫𑁆𑀫𑀪𑀸𑀯𑀲𑀸𑀫𑀜𑁆𑀜𑁂 𑀅𑀢𑁆𑀢𑀦𑁄 𑀓𑀸𑀭𑀡𑀪𑁂𑀤𑁂𑀦 𑀪𑁂𑀤𑀤𑀲𑁆𑀲𑀦𑀯𑀲𑁂𑀦 𑀤𑀼𑀢𑀺𑀬𑀁.

𑀓𑀸𑀫𑀢𑀡𑁆𑀳𑀸𑀢𑀺 𑀓𑀸𑀫𑀪𑀯𑁂 𑀢𑀡𑁆𑀳𑀸. 𑀢𑀣𑀸 𑀭𑀽𑀧𑀢𑀡𑁆𑀳𑀸 𑀤𑀝𑁆𑀞𑀩𑁆𑀩𑀸. 𑀢𑀲𑁆𑀲 𑀢𑀲𑁆𑀲 𑀪𑀯𑀲𑁆𑀲 𑀫𑀽𑀮𑀓𑀸𑀭𑀡𑀪𑀽𑀢𑀸 𑀢𑀡𑁆𑀳𑀸 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀪𑀯𑁂 𑀉𑀧𑁆𑀧𑀚𑁆𑀚𑀦𑀸𑀭𑀳𑀸𑀬𑀢𑀦𑀯𑀺𑀲𑀬𑀸𑀧𑀺 𑀦𑀸𑀫 𑀳𑁄𑀢𑀻𑀢𑀺 𑀓𑀸𑀫𑀢𑀡𑁆𑀳𑀸𑀤𑀻𑀦𑀁 𑀤𑀝𑁆𑀞𑀼𑀓𑀸𑀫𑀢𑀸𑀤𑀺𑀯𑁄𑀳𑀸𑀭𑀸𑀭𑀳𑀢𑀸 𑀯𑀼𑀢𑁆𑀢𑀸. 𑀤𑀝𑁆𑀞𑀼𑀓𑀸𑀫𑀢𑀸𑀢𑀺 𑀳𑀺 𑀤𑀝𑁆𑀞𑀼𑀫𑀺𑀘𑁆𑀙𑀸 𑀭𑀽𑀧𑀢𑀡𑁆𑀳𑀸𑀢𑀺 𑀅𑀢𑁆𑀣𑁄. 𑀢𑀣𑀸 𑀲𑁂𑀲𑀸𑀲𑀼𑀧𑀻𑀢𑀺. 𑀏𑀢𑁆𑀣 𑀘 𑀤𑀝𑁆𑀞𑀼𑀓𑀸𑀫𑀢𑀸𑀤𑀻𑀦𑀁 𑀢𑀁𑀢𑀁𑀅𑀢𑁆𑀢𑀪𑀸𑀯𑀦𑀺𑀩𑁆𑀩𑀢𑁆𑀢𑀓𑀓𑀫𑁆𑀫𑀸𑀬𑀽𑀳𑀦𑀓𑁆𑀔𑀡𑀢𑁄 𑀲𑀢𑀺 𑀧𑀼𑀭𑀺𑀫𑀦𑀺𑀩𑁆𑀩𑀢𑁆𑀢𑀺𑀬𑀁 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺. 𑀅𑀲𑀢𑀺𑀧𑀺 𑀢𑀲𑁆𑀲 𑀫𑀕𑁆𑀕𑁂𑀦 𑀅𑀲𑀫𑀼𑀕𑁆𑀖𑀸𑀢𑀺𑀢𑀪𑀸𑀯𑁂𑀦𑁂𑀯 𑀓𑀸𑀭𑀡𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑀢𑁄 𑀫𑀕𑁆𑀕𑁂𑀦 𑀅𑀲𑀫𑀼𑀘𑁆𑀙𑀺𑀦𑁆𑀦𑀁 𑀓𑀸𑀭𑀡𑀮𑀸𑀪𑁂 𑀲𑀢𑀺 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀅𑀢𑁆𑀢𑀦𑁄 𑀨𑀮𑀲𑁆𑀲 𑀓𑀸𑀭𑀡𑀪𑀸𑀯𑀽𑀧𑀕𑀫𑀦𑀢𑁄 𑀯𑀺𑀚𑁆𑀚𑀫𑀸𑀦𑀫𑁂𑀯𑀸𑀢𑀺 𑀉𑀧𑁆𑀧𑀦𑁆𑀦𑀅𑀢𑁆𑀣𑀺𑀢𑀸𑀧𑀭𑀺𑀬𑀸𑀬𑁂𑀳𑀺 𑀯𑀼𑀘𑁆𑀘𑀢𑀺 ‘‘𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀪𑀸𑀯𑁂𑀦𑁆𑀢𑁄 𑀅𑀭𑀺𑀬𑀁 𑀅𑀝𑁆𑀞𑀗𑁆𑀕𑀺𑀓𑀁 𑀫𑀕𑁆𑀕𑀁 𑀩𑀳𑀼𑀮𑀻𑀓𑀭𑁄𑀦𑁆𑀢𑁄 𑀉𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑁂 𑀧𑀸𑀧𑀓𑁂 𑀅𑀓𑀼𑀲𑀮𑁂 𑀥𑀫𑁆𑀫𑁂 𑀅𑀦𑁆𑀢𑀭𑀸𑀬𑁂𑀯 𑀅𑀦𑁆𑀢𑀭𑀥𑀸𑀧𑁂𑀢𑀺’’ (𑀲𑀁. 𑀦𑀺. 𑁫.𑁧𑁫𑁭), ‘‘𑀲𑀦𑁆𑀢𑀁 𑀯𑀸 𑀅𑀚𑁆𑀛𑀢𑁆𑀢𑀁 𑀓𑀸𑀫𑀘𑁆𑀙𑀦𑁆𑀤𑀁 𑀅𑀢𑁆𑀣𑀺 𑀫𑁂 𑀅𑀚𑁆𑀛𑀢𑁆𑀢𑀁 𑀓𑀸𑀫𑀘𑁆𑀙𑀦𑁆𑀤𑁄𑀢𑀺 𑀧𑀚𑀸𑀦𑀸𑀢𑀻’’𑀢𑀺 (𑀤𑀻. 𑀦𑀺. 𑁨.𑁩𑁮𑁨; 𑀫. 𑀦𑀺. 𑁧.𑁧𑁧𑁫) 𑀘 𑀏𑀯𑀫𑀸𑀤𑀻𑀲𑀼.

𑀏𑀢𑁆𑀣𑀸𑀳 𑁋 𑀘𑀓𑁆𑀔𑀸𑀤𑀻𑀦𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀓𑀺𑀁 𑀏𑀓𑀓𑀫𑁆𑀫𑀼𑀦𑀸 𑀉𑀧𑁆𑀧𑀢𑁆𑀢𑀺, 𑀉𑀤𑀸𑀳𑀼 𑀦𑀸𑀦𑀸𑀓𑀫𑁆𑀫𑀼𑀦𑀸𑀢𑀺? 𑀉𑀪𑀬𑀣𑀸𑀧𑀻𑀢𑀺 𑀧𑁄𑀭𑀸𑀡𑀸. 𑀢𑀢𑁆𑀣 𑀦𑀸𑀦𑀸𑀓𑀫𑁆𑀫𑀼𑀦𑀸 𑀢𑀸𑀯 𑀉𑀧𑁆𑀧𑀢𑁆𑀢𑀺𑀬𑀁 𑀘𑀓𑁆𑀔𑀸𑀤𑀻𑀦𑀁 𑀯𑀺𑀲𑁂𑀲𑁂 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺 𑀓𑀸𑀭𑀡𑀲𑁆𑀲 𑀪𑀺𑀦𑁆𑀦𑀢𑁆𑀢𑀸. 𑀏𑀓𑀓𑀫𑁆𑀫𑀼𑀦𑀸 𑀧𑀦 𑀉𑀧𑁆𑀧𑀢𑁆𑀢𑀺𑀬𑀁 𑀢𑁂𑀲𑀁 𑀓𑀣𑀁 𑀯𑀺𑀲𑁂𑀲𑁄𑀢𑀺? 𑀓𑀸𑀭𑀡𑀲𑁆𑀲 𑀪𑀺𑀦𑁆𑀦𑀢𑁆𑀢𑀸𑀬𑁂𑀯. 𑀢𑀁𑀢𑀁𑀪𑀯𑀧𑀢𑁆𑀣𑀦𑀸𑀪𑀽𑀢𑀸 𑀳𑀺 𑀢𑀡𑁆𑀳𑀸 𑀢𑀁𑀢𑀁𑀪𑀯𑀧𑀭𑀺𑀬𑀸𑀧𑀦𑁆𑀦𑀸𑀬𑀢𑀦𑀸𑀪𑀺𑀮𑀸𑀲𑀢𑀸𑀬 𑀲𑀬𑀁 𑀯𑀺𑀘𑀺𑀢𑁆𑀢𑀭𑀽𑀧𑀸 𑀉𑀧𑀦𑀺𑀲𑁆𑀲𑀬𑀪𑀸𑀯𑁂𑀦 𑀢𑀁𑀢𑀁𑀪𑀯𑀦𑀺𑀩𑁆𑀩𑀢𑁆𑀢𑀓𑀓𑀫𑁆𑀫𑀲𑁆𑀲 𑀯𑀺𑀘𑀺𑀢𑁆𑀢𑀪𑁂𑀤𑀢𑀁 𑀯𑀺𑀤𑀳𑀢𑀺. 𑀬𑀢𑁄 𑀢𑀤𑀸𑀳𑀺𑀢𑀯𑀺𑀲𑁂𑀲𑀁 𑀢𑀁 𑀢𑀣𑀸𑀭𑀽𑀧𑀲𑀫𑀢𑁆𑀣𑀢𑀸𑀬𑁄𑀕𑁂𑀦 𑀅𑀦𑁂𑀓𑀭𑀽𑀧𑀸𑀧𑀦𑁆𑀦𑀁 𑀯𑀺𑀬 𑀅𑀦𑁂𑀓𑀁 𑀯𑀺𑀲𑀺𑀝𑁆𑀞𑀲𑀪𑀸𑀯𑀁 𑀨𑀮𑀁 𑀦𑀺𑀩𑁆𑀩𑀢𑁆𑀢𑁂𑀢𑀺. 𑀢𑀣𑀸 𑀘 𑀯𑀓𑁆𑀔𑀢𑀺 ‘‘𑀓𑀫𑁆𑀫𑀫𑁂𑀯 𑀦𑁂𑀲𑀁 𑀯𑀺𑀲𑁂𑀲𑀓𑀸𑀭𑀡’’𑀦𑁆𑀢𑀺. 𑀦 𑀘𑁂𑀢𑁆𑀣 𑀲𑀫𑀢𑁆𑀣𑀢𑀸𑀪𑀸𑀯𑀢𑁄 𑀅𑀜𑁆𑀜𑀁 𑀯𑁂𑀤𑀺𑀢𑀩𑁆𑀩𑀁 𑀓𑀸𑀭𑀡𑀯𑀺𑀲𑁂𑀲𑁂𑀦𑀸𑀳𑀺𑀢𑀯𑀺𑀲𑁂𑀲𑀲𑁆𑀲 𑀯𑀺𑀲𑀺𑀝𑁆𑀞𑀨𑀮𑀦𑀺𑀧𑁆𑀨𑀸𑀤𑀦𑀬𑁄𑀕𑁆𑀬𑀢𑀸𑀪𑀸𑀯𑀢𑁄. 𑀢𑀣𑀸 𑀳𑀺 𑀲𑀢𑀺 𑀏𑀓𑀲𑁆𑀲𑀧𑀺 𑀓𑀫𑁆𑀫𑀲𑁆𑀲 𑀅𑀦𑁂𑀓𑀺𑀦𑁆𑀤𑁆𑀭𑀺𑀬𑀳𑁂𑀢𑀼𑀢𑀸𑀯𑀺𑀲𑁂𑀲𑀬𑁄𑀕𑀁 𑀏𑀓𑀫𑁆𑀧𑀺 𑀓𑀫𑁆𑀫𑀦𑁆𑀢𑀺𑀆𑀤𑀺𑀦𑀸 𑀬𑀼𑀢𑁆𑀢𑀺𑀢𑁄 𑀆𑀕𑀫𑀢𑁄𑀧𑀺 𑀧𑀭𑀢𑁄 𑀲𑀬𑀫𑁂𑀯 𑀯𑀓𑁆𑀔𑀢𑀺. 𑀢𑀣𑀸 𑀘 𑀏𑀓𑀲𑁆𑀲𑁂𑀯 𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀲𑁄𑀴𑀲𑀸𑀤𑀺𑀯𑀺𑀧𑀸𑀓𑀘𑀺𑀢𑁆𑀢𑀦𑀺𑀩𑁆𑀩𑀢𑁆𑀢𑀺𑀳𑁂𑀢𑀼𑀪𑀸𑀯𑁄 𑀯𑀼𑀘𑁆𑀘𑀢𑀺. 𑀮𑁄𑀓𑁂𑀧𑀺 𑀏𑀓𑀲𑁆𑀲𑁂𑀯 𑀲𑀸𑀮𑀺𑀩𑀻𑀚𑀲𑁆𑀲 𑀧𑀭𑀺𑀧𑀼𑀡𑁆𑀡𑀸𑀧𑀭𑀺𑀧𑀼𑀡𑁆𑀡𑀢𑀡𑁆𑀟𑀼𑀮𑀨𑀮𑀦𑀺𑀩𑁆𑀩𑀢𑁆𑀢𑀺𑀳𑁂𑀢𑀼𑀢𑀸 𑀤𑀺𑀲𑁆𑀲𑀢𑀺. 𑀓𑀺𑀁 𑀯𑀸 𑀏𑀢𑀸𑀬 𑀬𑀼𑀢𑁆𑀢𑀺𑀘𑀺𑀦𑁆𑀢𑀸𑀬, 𑀦 𑀘𑀺𑀦𑁆𑀢𑀺𑀢𑀩𑁆𑀩𑀫𑁂𑀯𑁂𑀢𑀁. 𑀬𑀢𑁄 𑀓𑀫𑁆𑀫𑀯𑀺𑀧𑀸𑀓𑁄 𑀘𑀓𑁆𑀔𑀸𑀤𑀻𑀦𑀺 𑀓𑀫𑁆𑀫𑀯𑀺𑀧𑀸𑀓𑁄 𑀘 𑀲𑀩𑁆𑀩𑀸𑀓𑀸𑀭𑀢𑁄 𑀩𑀼𑀤𑁆𑀥𑀸𑀦𑀁𑀬𑁂𑀯 𑀓𑀫𑁆𑀫𑀯𑀺𑀧𑀸𑀓𑀜𑀸𑀡𑀨𑀮𑀬𑀼𑀢𑁆𑀢𑀸𑀦𑀁 𑀯𑀺𑀲𑀬𑁄, 𑀦 𑀅𑀜𑁆𑀜𑁂𑀲𑀁 𑀅𑀢𑀓𑁆𑀓𑀸𑀯𑀘𑀭𑀢𑀸𑀬. 𑀢𑁂𑀦𑁂𑀯 𑀘 𑀪𑀕𑀯𑀢𑀸 ‘‘𑀓𑀫𑁆𑀫𑀯𑀺𑀧𑀸𑀓𑁄 𑀅𑀘𑀺𑀦𑁆𑀢𑁂𑀬𑁆𑀬𑁄 𑀦 𑀘𑀺𑀦𑁆𑀢𑁂𑀢𑀩𑁆𑀩𑁄, 𑀬𑁄 𑀘𑀺𑀦𑁆𑀢𑁂𑀬𑁆𑀬 𑀉𑀫𑁆𑀫𑀸𑀤𑀲𑁆𑀲 𑀯𑀺𑀖𑀸𑀢𑀲𑁆𑀲 𑀪𑀸𑀕𑀻 𑀅𑀲𑁆𑀲𑀸’’𑀢𑀺 (𑀅. 𑀦𑀺. 𑁪.𑁭𑁭) 𑀆𑀤𑀻𑀦𑀯𑀁 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀆𑀯𑀺𑀜𑁆𑀙𑀦𑀁 𑀧𑀼𑀕𑁆𑀕𑀮𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀯𑀸 𑀢𑀁𑀦𑀺𑀦𑁆𑀦𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀳𑁂𑀢𑀼𑀪𑀸𑀯𑁄.

𑀲𑀩𑁆𑀩𑁂𑀲𑀦𑁆𑀢𑀺 𑀧𑀤𑀲𑁆𑀲 𑀧𑀓𑀭𑀡𑀢𑁄 𑀧𑀸𑀭𑀺𑀲𑁂𑀲𑀢𑁄 𑀯𑀸 𑀮𑀩𑁆𑀪𑀫𑀸𑀦𑀁 𑀅𑀢𑁆𑀣𑀯𑀺𑀲𑁂𑀲𑀁 𑀅𑀚𑀸𑀦𑀦𑁆𑀢𑁄 𑀬𑀣𑀸𑀭𑀼𑀢𑀯𑀲𑁂𑀦𑁂𑀯 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸 ‘‘𑀓𑁄 𑀏𑀢𑁆𑀣 𑀯𑀺𑀲𑁂𑀲𑁄’’𑀢𑀺𑀆𑀤𑀺𑀦𑀸 𑀘𑁄𑀤𑁂𑀢𑀺. 𑀇𑀢𑀭𑁄 𑀢𑁂𑀚𑀸𑀤𑀻𑀦𑀁 𑀧𑀘𑁆𑀘𑁂𑀓𑀁 𑀅𑀥𑀺𑀓𑀪𑀸𑀯𑁂 𑀯𑀺𑀬 𑀤𑁆𑀯𑀺𑀦𑁆𑀦𑀁 𑀢𑀺𑀡𑁆𑀡𑀁 𑀯𑀸 𑀅𑀥𑀺𑀓𑀪𑀸𑀯𑁂𑀧𑀺 𑀬𑀣𑀸𑀯𑀼𑀢𑁆𑀢𑀸𑀥𑀺𑀓𑀪𑀸𑀯𑁂𑀦𑁂𑀯 𑀏𑀓𑀓𑀸𑀤𑀺𑀯𑀲𑁂𑀦 𑀮𑀩𑁆𑀪𑀫𑀸𑀦𑀸𑀬 𑀑𑀫𑀢𑁆𑀢𑀢𑀸𑀬𑀧𑀺 𑀓𑀸𑀬𑀧𑁆𑀧𑀲𑀸𑀤𑁄 𑀦 𑀳𑁄𑀢𑀻𑀢𑀺 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸 𑀧𑀓𑀭𑀡𑀢𑁄 𑀧𑀸𑀭𑀺𑀲𑁂𑀲𑀢𑁄 𑀯𑀸 𑀘𑀢𑀼𑀦𑁆𑀦𑀫𑁆𑀧𑀺 𑀪𑀽𑀢𑀸𑀦𑀁 𑀲𑀫𑀪𑀸𑀯𑁂𑀦 𑀓𑀸𑀬𑁄 𑀳𑁄𑀢𑀻𑀢𑀺 𑀅𑀬𑀫𑀢𑁆𑀣𑁄 𑀲𑀺𑀤𑁆𑀥𑁄𑀢𑀺 𑀲𑀩𑁆𑀩-𑀲𑀤𑁆𑀤𑁄 𑀇𑀥 𑀲𑀫𑀪𑀸𑀯𑀤𑀻𑀧𑀓𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀇𑀤𑀁 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀻𑀢𑀺 𑀘 𑀬𑀣𑀸𑀯𑀼𑀢𑁆𑀢𑁂𑀦 𑀜𑀸𑀬𑁂𑀦 ‘‘𑀲𑀩𑁆𑀩𑁂𑀲’’𑀦𑁆𑀢𑀺 𑀯𑀘𑀦𑀢𑁄 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀺, 𑀦 𑀢𑀲𑁆𑀲 𑀯𑀸𑀘𑀓𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯𑀸𑀳 ‘‘𑀅𑀦𑀼𑀯𑀢𑁆𑀢…𑀧𑁂… 𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸’’𑀢𑀺. 𑀏𑀓𑀤𑁂𑀲𑀸𑀥𑀺𑀓𑀪𑀸𑀯𑀦𑀺𑀯𑀸𑀭𑀡𑁂𑀦𑁂𑀯 𑀳𑀺 𑀏𑀓𑀤𑁂𑀲𑁄𑀫𑀢𑁆𑀢𑀢𑀸𑀦𑀺𑀯𑀸𑀭𑀡𑀫𑁆𑀧𑀺 𑀯𑀺𑀜𑁆𑀜𑀸𑀬𑀢𑀻𑀢𑀺. 𑀏𑀓𑀤𑁂𑀲𑁄 𑀅𑀯𑀬𑀯𑁄. 𑀘𑀢𑀼𑀥𑀸𑀢𑀼𑀲𑀫𑀼𑀤𑀸𑀬𑀦𑀺𑀲𑁆𑀲𑀬𑀲𑁆𑀲 𑀳𑀺 𑀧𑀲𑀸𑀤𑀲𑁆𑀲 𑀢𑀤𑁂𑀓𑀥𑀸𑀢𑀼𑀅𑀥𑀺𑀓𑀢𑀸 𑀅𑀯𑀬𑀯𑀸𑀥𑀺𑀓𑀢𑀸 𑀳𑁄𑀢𑀻𑀢𑀺.

‘‘𑀧𑀼𑀭𑀺𑀫𑀸 𑀘𑁂𑀢𑁆𑀣 𑀤𑁆𑀯𑁂𑀧𑀺 𑀯𑀸𑀤𑀺𑀦𑁄 𑀦𑀺𑀓𑀸𑀬𑀦𑁆𑀢𑀭𑀺𑀬𑀸’’𑀢𑀺 𑀯𑀤𑀦𑁆𑀢𑀺. 𑀆𑀮𑁄𑀓𑀸𑀤𑀺𑀲𑀳𑀓𑀸𑀭𑀻𑀓𑀸𑀭𑀡𑀲𑀳𑀺𑀢𑀸𑀦𑀁𑀬𑁂𑀯 𑀘𑀓𑁆𑀔𑀸𑀤𑀻𑀦𑀁 𑀭𑀽𑀧𑀸𑀤𑀺𑀅𑀯𑀪𑀸𑀲𑀦𑀲𑀫𑀢𑁆𑀣𑀢𑀸 𑀯𑀺𑀯𑀭𑀲𑁆𑀲 𑀘 𑀲𑁄𑀢𑀯𑀺𑀜𑁆𑀜𑀸𑀡𑀼𑀧𑀦𑀺𑀲𑁆𑀲𑀬𑀪𑀸𑀯𑁄 𑀕𑀼𑀡𑁄𑀢𑀺 𑀢𑁂𑀲𑀁 𑀮𑀤𑁆𑀥𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀢𑀁𑀢𑀁𑀪𑀽𑀢𑀕𑀼𑀡𑁂𑀳𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀚𑀸𑀤𑀻𑀦𑀁 𑀯𑀺𑀬 𑀯𑀺𑀯𑀭𑀲𑁆𑀲 𑀪𑀽𑀢𑀪𑀸𑀯𑀸𑀪𑀸𑀯𑀢𑁄 ‘‘𑀬𑀣𑀸𑀬𑁄𑀕’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀭𑀽𑀧𑀸𑀤𑀬𑁄 𑀯𑀺𑀬 𑀯𑀺𑀯𑀭𑀫𑁆𑀧𑀺 𑀪𑀽𑀢𑀕𑀼𑀡𑁄𑀢𑀺 𑀧𑀭𑀸𑀥𑀺𑀧𑁆𑀧𑀸𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀁𑀢𑀁𑀪𑀽𑀢𑀕𑀼𑀡𑁂𑀳𑀻’’𑀢𑀺 𑀆𑀳. 𑀢𑁂𑀚𑀲𑁆𑀲 𑀧𑀦 𑀆𑀮𑁄𑀓𑀭𑀽𑀧𑁂𑀦, 𑀆𑀓𑀸𑀲𑀲𑀗𑁆𑀔𑀸𑀢𑀲𑁆𑀲 𑀯𑀺𑀯𑀭𑀲𑁆𑀲 𑀲𑀤𑁆𑀤𑁂𑀦, 𑀯𑀸𑀬𑀼𑀲𑁆𑀲 𑀕𑀦𑁆𑀥𑁂𑀦, 𑀉𑀤𑀓𑀲𑁆𑀲 𑀭𑀲𑁂𑀦, 𑀧𑀣𑀯𑀺𑀬𑀸 𑀨𑁄𑀝𑁆𑀞𑀩𑁆𑀩𑁂𑀦𑀸𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 ‘‘𑀬𑀣𑀸𑀬𑁄𑀕𑀁 𑀢𑀁𑀢𑀁𑀪𑀽𑀢𑀕𑀼𑀡𑁂𑀳𑀻’’𑀢𑀺 𑀯𑀼𑀢𑁆𑀢𑀁 𑀲𑀺𑀬𑀸. 𑀭𑀽𑀧𑀸𑀤𑀺𑀕𑁆𑀕𑀳𑀡𑁂𑀢𑀺 𑀭𑀽𑀧𑀸𑀤𑀺𑀯𑀺𑀲𑀬𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀓𑁂 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂𑀢𑀺 𑀅𑀢𑁆𑀣𑁄. 𑀉𑀧𑀓𑀭𑀺𑀢𑀩𑁆𑀩𑀢𑁄𑀢𑀺 𑀲𑀳𑀓𑀸𑀭𑀻𑀓𑀸𑀭𑀡𑀪𑀽𑀢𑁂𑀳𑀺 𑀬𑀣𑀸𑀯𑀼𑀢𑁆𑀢𑀪𑀽𑀢𑀕𑀼𑀡𑁂𑀳𑀺 𑀘𑀓𑁆𑀔𑀸𑀤𑀻𑀦𑀁 𑀲𑀓𑀺𑀘𑁆𑀘𑀓𑀭𑀡𑁂 𑀉𑀧𑀓𑀭𑀺𑀢𑀩𑁆𑀩𑀢𑁄. 𑀲𑀪𑀸𑀯𑁂𑀦 𑀲𑀼𑀬𑁆𑀬𑀫𑀸𑀦𑀲𑁆𑀲𑀸𑀢𑀺 𑀓𑁂𑀦𑀘𑀺 𑀅𑀦𑀼𑀘𑁆𑀘𑀸𑀭𑀺𑀬𑀫𑀸𑀦𑀲𑁆𑀲𑁂𑀯 𑀮𑀩𑁆𑀪𑀫𑀸𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀖𑀝𑁆𑀝𑀦𑀁 𑀧𑀦 𑀯𑀺𑀦𑀸 𑀯𑀸𑀬𑀼𑀲𑀤𑁆𑀤𑁄𑀧𑀺 𑀦𑀢𑁆𑀣𑀻𑀢𑀺. 𑀅𑀣 𑀯𑀸 𑀯𑀸𑀬𑀼𑀫𑁆𑀳𑀺 𑀲𑀤𑁆𑀤𑁄 𑀲𑀪𑀸𑀯𑁂𑀦 𑀲𑀼𑀬𑁆𑀬𑀢𑀻𑀢𑀺 𑀆𑀧𑁂 𑀭𑀲𑁄 𑀫𑀥𑀼𑀭𑁄𑀢𑀺 𑀘 𑀢𑀲𑁆𑀲 𑀮𑀤𑁆𑀥𑀺𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀤𑀼𑀢𑀺𑀬𑀯𑀸𑀤𑀺𑀲𑁆𑀲𑀧𑀺 𑀦𑀺𑀕𑁆𑀕𑀳𑁄 𑀳𑁄𑀢𑀺 𑀢𑀲𑁆𑀲𑀧𑀺 𑀢𑁂𑀚𑀸𑀤𑀺𑀕𑀼𑀡𑀸 𑀭𑀽𑀧𑀸𑀤𑀬𑁄𑀢𑀺 𑀏𑀯𑀁𑀮𑀤𑁆𑀥𑀺𑀓𑀢𑁆𑀢𑀸.

𑀭𑀽𑀧𑀸𑀤𑀺𑀯𑀺𑀲𑁂𑀲𑀕𑀼𑀡𑁂𑀳𑀻𑀢𑀺 𑀭𑀽𑀧𑀸𑀤𑀺𑀯𑀺𑀲𑁂𑀲𑀕𑀼𑀡𑀬𑀼𑀢𑁆𑀢𑁂𑀳𑀺. 𑀢𑁂𑀚…𑀧𑁂… 𑀯𑀸𑀬𑀽𑀳𑀻𑀢𑀺 𑀲𑀳𑀸𑀓𑀸𑀲𑁂𑀳𑀺 𑀢𑁂𑀚𑀸𑀤𑀺𑀧𑀭𑀫𑀸𑀡𑀽𑀳𑀺. 𑀓𑀧𑁆𑀧𑀸𑀲𑀢𑁄 𑀯𑀺𑀲𑀤𑀺𑀲𑀸𑀬𑀸𑀢𑀺 𑀓𑀧𑁆𑀧𑀸𑀲𑀧𑀣𑀯𑀺𑀢𑁄 𑀯𑀺𑀲𑁂𑀲𑀬𑀼𑀢𑁆𑀢𑀸𑀬 𑀢𑀢𑁄 𑀅𑀥𑀺𑀓𑀲𑀸𑀫𑀢𑁆𑀣𑀺𑀬𑀬𑀼𑀢𑁆𑀢𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀲𑁆𑀲𑀸𑀬𑁂𑀯𑀸𑀢𑀺 𑀓𑀧𑁆𑀧𑀸𑀲𑀧𑀣𑀯𑀺𑀬𑀸𑀬𑁂𑀯. 𑀬𑀲𑁆𑀫𑀸 𑀲𑀸 𑀯𑀺𑀚𑁆𑀚𑀫𑀸𑀦𑀸𑀦𑀺𑀧𑀺 𑀅𑀯𑀺𑀲𑁂𑀲𑀪𑀽𑀢𑀸𑀦𑀺 𑀅𑀢𑁆𑀣𑀻𑀢𑀺 𑀕𑀳𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀪𑀸𑀯𑁂𑀦 𑀅𑀪𑀺𑀪𑀯𑀺𑀢𑁆𑀯𑀸 𑀞𑀺𑀢𑀸, 𑀢𑀲𑁆𑀫𑀸 𑀢𑀲𑁆𑀲𑀸𑀬𑁂𑀯 𑀕𑀦𑁆𑀥𑁄 𑀅𑀥𑀺𑀓𑀢𑀭𑁄 𑀪𑀯𑁂𑀬𑁆𑀬𑀸𑀢𑀺 𑀅𑀢𑁆𑀣𑁄. 𑀅𑀬𑀜𑁆𑀘 𑀲𑀩𑁆𑀩𑁄 𑀉𑀢𑁆𑀢𑀭𑁄 ‘‘𑀢𑀲𑁆𑀲 𑀢𑀲𑁆𑀲 𑀪𑀽𑀢𑀲𑁆𑀲 𑀅𑀥𑀺𑀓𑀢𑀸𑀬𑀸’’𑀢𑀺𑀆𑀤𑀺𑀦𑀸 𑀅𑀝𑁆𑀞𑀓𑀣𑀸𑀬𑀁 (𑀥. 𑀲. 𑀅𑀝𑁆𑀞. 𑁬𑁦𑁦) 𑀯𑀼𑀢𑁆𑀢𑀢𑁆𑀢𑀸 𑀢𑀣𑀸𑀕𑀢𑀸𑀦𑀁 𑀯𑀸𑀤𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀯𑀤𑀦𑁆𑀢𑀲𑁆𑀲 𑀓𑀡𑀸𑀤𑀲𑁆𑀲 𑀯𑀲𑁂𑀦 𑀯𑀼𑀢𑁆𑀢𑁄. ‘‘𑀅𑀢𑁆𑀢𑀦𑁄 𑀧𑀦 𑀫𑀢𑁂𑀦 𑀓𑀡𑀸𑀤𑀓𑀧𑀺𑀮𑀸𑀤𑀬𑁄 𑀓𑁂𑀯𑀮𑀁 𑀧𑀣𑀯𑀸𑀤𑀺𑀤𑁆𑀭𑀩𑁆𑀬𑀫𑁂𑀯𑀸𑀢𑀺𑀆𑀤𑀺 𑀮𑀤𑁆𑀥𑀺. 𑀓𑀡𑀸𑀤𑀲𑀸𑀲𑀦𑀸𑀬 𑀅𑀥𑀺𑀫𑀼𑀢𑁆𑀢𑀸𑀦𑀁 𑀲𑀸𑀲𑀦𑁂 𑀅𑀦𑀯𑀕𑀸𑀴𑁆𑀳𑀸𑀦𑀁 𑀓𑁂𑀲𑀜𑁆𑀘𑀺 𑀅𑀬𑀁 𑀯𑀸𑀤𑁄’’𑀢𑀺 𑀘 𑀯𑀤𑀦𑁆𑀢𑀺. 𑀏𑀢𑀲𑁆𑀲𑀼𑀪𑀬𑀲𑁆𑀲𑀸𑀢𑀺 𑀆𑀲𑀯𑀕𑀦𑁆𑀥𑀢𑁄 𑀓𑀧𑁆𑀧𑀸𑀲𑀕𑀦𑁆𑀥𑁄 𑀅𑀥𑀺𑀓𑁄 𑀲𑀻𑀢𑀼𑀤𑀓𑀯𑀡𑁆𑀡𑀢𑁄 𑀉𑀡𑁆𑀳𑁄𑀤𑀓𑀯𑀡𑁆𑀡𑁄 𑀘 𑀅𑀥𑀺𑀓𑁄𑀢𑀺 𑀏𑀢𑀲𑁆𑀲 𑀉𑀪𑀬𑀲𑁆𑀲. 𑀢𑁂𑀚𑀸𑀤𑀺𑀅𑀥𑀺𑀓𑁂𑀲𑀼 𑀘 𑀲𑀫𑁆𑀪𑀸𑀭𑁂𑀲𑀼 𑀭𑀽𑀧𑀸𑀤𑀻𑀦𑀁 𑀯𑀺𑀲𑁂𑀲𑀲𑁆𑀲 𑀅𑀤𑀲𑁆𑀲𑀦𑀢𑁄 𑀦 𑀭𑀽𑀧𑀸𑀤𑀬𑁄 𑀢𑁂𑀚𑀸𑀤𑀻𑀦𑀁 𑀯𑀺𑀲𑁂𑀲𑀕𑀼𑀡𑁄𑀢𑀺 𑀲𑀺𑀤𑁆𑀥𑀦𑁆𑀢𑀺 𑀆𑀳 ‘‘𑀢𑀤𑀪𑀸…𑀧𑁂… 𑀢𑁆𑀢𑀺𑀢𑀸’’𑀢𑀺. 𑀢𑁂𑀦 𑀦 𑀭𑀽𑀧𑀁 𑀢𑁂𑀚𑀲𑁆𑀲 𑀯𑀺𑀲𑁂𑀲𑀕𑀼𑀡𑁄 𑀏𑀓𑀦𑁆𑀢𑀢𑁄 𑀢𑁂𑀚𑀸𑀤𑀺𑀓𑁂 𑀲𑀫𑁆𑀪𑀸𑀭𑁂 𑀯𑀺𑀲𑁂𑀲𑁂𑀦 𑀅𑀤𑀲𑁆𑀲𑀦𑀢𑁄, 𑀬𑁄 𑀬𑀲𑁆𑀲 𑀯𑀺𑀲𑁂𑀲𑀕𑀼𑀡𑁄, 𑀦 𑀲𑁄 𑀢𑀤𑀥𑀺𑀓𑁂 𑀲𑀫𑁆𑀪𑀸𑀭𑁂 𑀏𑀓𑀦𑁆𑀢𑀢𑁄 𑀯𑀺𑀲𑁂𑀲𑁂𑀦 𑀤𑀺𑀲𑁆𑀲𑀢𑀺 𑀬𑀣𑀸 𑀧𑀣𑀯𑀻𑀅𑀥𑀺𑀓𑁂 𑀲𑀫𑁆𑀪𑀸𑀭𑁂 𑀆𑀧𑁄𑀥𑀸𑀢𑀽𑀢𑀺 𑀤𑀲𑁆𑀲𑁂𑀢𑀺. 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀬𑀣𑀸𑀬𑁄𑀕𑀁 𑀬𑁄𑀚𑁂𑀢𑀩𑁆𑀩𑀁. 𑀓𑁄 𑀧𑀦 𑀯𑀸𑀤𑁄 𑀦𑀸𑀦𑀸𑀓𑀮𑀸𑀧𑁂𑀢𑀺 𑀲𑀪𑀸𑀯𑀢𑁄 𑀦𑀸𑀦𑀢𑁆𑀢𑀸𑀪𑀸𑀯𑁂𑀧𑀺 𑀫𑀽𑀮𑀓𑀸𑀭𑀡𑀦𑀸𑀦𑀢𑁆𑀢𑀯𑀲𑁂𑀦 𑀅𑀢𑁆𑀣𑀺 𑀓𑁄𑀘𑀺 𑀯𑀺𑀲𑁂𑀲𑁄 𑀅𑀲𑀗𑁆𑀖𑀸𑀢𑁂𑀢𑀺 𑀤𑀲𑁆𑀲𑁂𑀢𑀺, 𑀬𑀢𑁄 𑀧𑀭𑀫𑀭𑀡𑀸𑀤𑀺𑀓𑀺𑀭𑀺𑀬𑀸𑀲𑀫𑀢𑁆𑀣𑀢𑀸 𑀦𑁂𑀲𑀁 𑀓𑁂𑀲𑀜𑁆𑀘𑀺𑀬𑁂𑀯 𑀤𑀺𑀲𑁆𑀲𑀢𑀻𑀢𑀺.

𑀏𑀓𑀫𑁆𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀅𑀦𑁂𑀓𑀲𑁆𑀫𑀺𑀁 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀺. 𑀧𑀜𑁆𑀘𑀸𑀬𑀢𑀦𑀺𑀓𑀢𑁆𑀢𑀪𑀸𑀯𑁂 𑀧𑀢𑁆𑀣𑀦𑀸 𑀬𑀸 𑀤𑀝𑁆𑀞𑀼𑀓𑀸𑀫𑀢𑀸𑀤𑀺𑀪𑀸𑀯𑁂𑀦 𑀯𑀼𑀢𑁆𑀢𑀸, 𑀢𑀸𑀬 𑀦𑀺𑀧𑁆𑀨𑀦𑁆𑀦𑀁. 𑀏𑀢𑁂𑀦 𑀓𑀸𑀭𑀡𑀯𑀺𑀲𑁂𑀲𑁂𑀦 𑀨𑀮𑀯𑀺𑀲𑁂𑀲𑀫𑀸𑀳. 𑀦 𑀳𑀻𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀫𑀢𑁆𑀣𑀬𑀢𑀺. 𑀢𑀦𑁆𑀢𑀺 𑀓𑀫𑁆𑀫𑀁. 𑀯𑀺𑀲𑁂𑀲𑁂𑀦𑀸𑀢𑀺 𑀅𑀢𑁆𑀢𑀦𑁄 𑀓𑀸𑀭𑀡𑁂𑀦 𑀆𑀳𑀺𑀢𑀸𑀢𑀺𑀲𑀬𑁂𑀦. 𑀢𑁂𑀦𑁂𑀯 𑀲𑁄𑀢𑀲𑁆𑀲 𑀦 𑀳𑁄𑀢𑀺 𑀧𑀘𑁆𑀘𑀬𑁄, 𑀢𑀢𑁄 𑀅𑀜𑁆𑀜𑁂𑀦𑁂𑀯 𑀧𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑁂𑀦 𑀅𑀦𑁂𑀓𑀲𑀪𑀸𑀯𑁂𑀦 𑀓𑀸𑀭𑀡𑁂𑀦 𑀆𑀳𑀺𑀢𑀯𑀺𑀲𑁂𑀲𑀁 𑀏𑀓𑀫𑁆𑀧𑀺 𑀓𑀫𑁆𑀫𑀁 𑀅𑀦𑁂𑀓𑀲𑀪𑀸𑀯𑀁 𑀨𑀮𑀁 𑀦𑀺𑀧𑁆𑀨𑀸𑀤𑁂𑀢𑀼𑀁 𑀲𑀫𑀢𑁆𑀣𑀁 𑀳𑁄𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀇𑀤𑀸𑀦𑀺 𑀓𑀫𑁆𑀫𑀲𑁆𑀲 𑀯𑀼𑀢𑁆𑀢𑀧𑁆𑀧𑀓𑀸𑀭𑀯𑀺𑀲𑁂𑀲𑀸𑀪𑀸𑀯𑁂 𑀤𑁄𑀲𑀫𑀸𑀳 ‘‘𑀇𑀦𑁆𑀤𑁆𑀭𑀺𑀬𑀦𑁆𑀢𑀭𑀸𑀪𑀸𑀯𑀧𑁆𑀧𑀢𑁆𑀢𑀺𑀢𑁄’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀓𑀸𑀭𑀡𑀯𑀺𑀲𑁂𑀲𑀸𑀪𑀸𑀯𑁂 𑀨𑀮𑀯𑀺𑀲𑁂𑀲𑀲𑁆𑀲 𑀅𑀲𑀫𑁆𑀪𑀯𑀢𑁄 𑀬𑀁 𑀯𑀺𑀲𑁂𑀲𑀬𑀼𑀢𑁆𑀢𑀁 𑀓𑀫𑁆𑀫𑀁 𑀘𑀓𑁆𑀔𑀼𑀲𑁆𑀲 𑀓𑀸𑀭𑀡𑀁, 𑀢𑀲𑁆𑀲 𑀢𑀢𑁄 𑀅𑀜𑁆𑀜𑀯𑀺𑀲𑁂𑀲𑀸𑀪𑀸𑀯𑁂 𑀢𑀤𑀜𑁆𑀜𑀺𑀦𑁆𑀤𑁆𑀭𑀺𑀬𑀼𑀧𑁆𑀧𑀸𑀤𑀓𑀢𑀸𑀧𑀺 𑀦 𑀲𑀺𑀬𑀸𑀢𑀺 𑀲𑁄𑀢𑀺𑀦𑁆𑀤𑁆𑀭𑀺𑀬𑀸𑀤𑀻𑀦𑀁 𑀢𑀢𑁄 𑀅𑀦𑀼𑀧𑁆𑀧𑀢𑁆𑀢𑀺 𑀏𑀯 𑀲𑀺𑀬𑀸. 𑀏𑀯𑀫𑀺𑀢𑀭𑀢𑁆𑀣𑀸𑀧𑀺. 𑀯𑀺𑀲𑁂𑀲𑁄𑀢𑀺 𑀘𑁂𑀢𑁆𑀣 𑀓𑀫𑁆𑀫𑀲𑁆𑀲 𑀢𑀁𑀢𑀁𑀇𑀦𑁆𑀤𑁆𑀭𑀺𑀬𑀼𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸 𑀅𑀥𑀺𑀧𑁆𑀧𑁂𑀢𑀸, 𑀲𑀸 𑀘 𑀧𑀼𑀩𑁆𑀩𑁂 𑀤𑀲𑁆𑀲𑀺𑀢𑀲𑀪𑀸𑀯𑁄𑀯.

𑀅𑀦𑁂𑀓𑀸𑀳𑀺 𑀫𑀳𑀕𑁆𑀕𑀢𑀘𑁂𑀢𑀦𑀸𑀳𑀺 𑀏𑀓𑀸𑀬 𑀯𑀸 𑀧𑀭𑀺𑀢𑁆𑀢𑀘𑁂𑀢𑀦𑀸𑀲𑀳𑀺𑀢𑀸𑀬 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀓𑀝𑀢𑁆𑀢𑀸𑀭𑀽𑀧𑀸𑀦𑀁 𑀦𑀺𑀩𑁆𑀩𑀢𑁆𑀢𑀻𑀢𑀺 𑀦 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀦𑁆𑀢𑀺 ‘‘𑀲𑀩𑁆𑀩𑁂𑀲𑀁…𑀧𑁂… 𑀯𑀺𑀜𑁆𑀜𑀸𑀬𑀢𑀻’’𑀢𑀺 𑀯𑀼𑀢𑁆𑀢𑀁. 𑀇𑀤𑀸𑀦𑀺 𑀢𑀫𑁂𑀯 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀦𑀸𑀦𑀸𑀘𑁂𑀢𑀦𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀸𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 ‘‘𑀧𑀝𑀺𑀲…𑀧𑁂… 𑀧𑀘𑁆𑀘𑀬𑁄’’𑀢𑀺 𑀏𑀢𑁆𑀣 𑀬𑀤𑀺 𑀦𑀸𑀦𑀸𑀓𑀫𑁆𑀫𑀯𑀲𑁂𑀦 𑀇𑀦𑁆𑀤𑁆𑀭𑀺𑀬𑀸𑀦𑀁 𑀉𑀧𑁆𑀧𑀢𑁆𑀢𑀺 𑀅𑀥𑀺𑀧𑁆𑀧𑁂𑀢𑀸, 𑀏𑀯𑀁 𑀲𑀢𑀺 𑀫𑀳𑀕𑁆𑀕𑀢𑀓𑀫𑁆𑀫𑁂𑀦 𑀘 𑀓𑀸𑀫𑀸𑀯𑀘𑀭𑀓𑀫𑁆𑀫𑁂𑀦 𑀘 𑀢𑀁𑀢𑀁𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀓𑀝𑀢𑁆𑀢𑀸𑀭𑀽𑀧𑀁 𑀉𑀧𑁆𑀧𑀦𑁆𑀦𑀁 𑀲𑀺𑀬𑀸, 𑀦 𑀘𑁂𑀢𑀁 𑀬𑀼𑀢𑁆𑀢𑀁 ‘‘𑀫𑀳𑀕𑁆𑀕𑀢𑀘𑁂𑀢𑀦𑀸 𑀓𑀫𑁆𑀫𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁧𑁨.𑁭𑁮) 𑀯𑀼𑀢𑁆𑀢𑀢𑁆𑀢𑀸. 𑀦𑀸𑀧𑀺 𑀢𑀁𑀢𑀁𑀪𑀯𑀦𑀺𑀬𑀢𑀭𑀽𑀧𑀺𑀦𑁆𑀤𑁆𑀭𑀺𑀬𑁂𑀳𑀺 𑀯𑀺𑀓𑀮𑀺𑀦𑁆𑀤𑁆𑀭𑀺𑀬𑀢𑀸 𑀕𑀢𑀺𑀲𑀫𑁆𑀧𑀢𑁆𑀢𑀺𑀬𑀸 𑀑𑀧𑀧𑀸𑀢𑀺𑀓𑀬𑁄𑀦𑀺𑀬𑀁 𑀧𑀝𑀺𑀲𑀦𑁆𑀥𑀺𑀓𑁆𑀔𑀡𑁂 𑀬𑀼𑀢𑁆𑀢𑀸. 𑀅𑀣 𑀫𑀳𑀕𑁆𑀕𑀢𑀸𑀳𑀺 𑀏𑀯 𑀦𑀸𑀦𑀸𑀘𑁂𑀢𑀦𑀸𑀳𑀺 𑀦𑀺𑀩𑁆𑀩𑀢𑁆𑀢𑀁, 𑀦 𑀘𑁂𑀓𑀸 𑀧𑀝𑀺𑀲𑀦𑁆𑀥𑀺 𑀅𑀦𑁂𑀓𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀸 𑀳𑁄𑀢𑀺. 𑀦𑀺𑀘𑁆𑀙𑀺𑀢𑀜𑁆𑀳𑁂𑀢𑀁 𑀲𑀸𑀓𑁂𑀢𑀧𑀜𑁆𑀳𑁂𑀦𑀸𑀢𑀺. 𑀏𑀯𑀁 𑀏𑀓𑁂𑀦 𑀫𑀳𑀕𑁆𑀕𑀢𑀓𑀫𑁆𑀫𑀼𑀦𑀸 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑁄𑀢𑀺𑀦𑁆𑀤𑁆𑀭𑀺𑀬𑀳𑀤𑀬𑀯𑀢𑁆𑀣𑀽𑀦𑀁 𑀉𑀧𑁆𑀧𑀢𑁆𑀢𑀺𑀜𑀸𑀧𑀓𑁂𑀦 𑀇𑀫𑀺𑀦𑀸 𑀯𑀘𑀦𑁂𑀦 𑀧𑀭𑀺𑀢𑁆𑀢𑀓𑀫𑁆𑀫𑀼𑀦𑀸𑀧𑀺 𑀏𑀓𑁂𑀦 𑀬𑀣𑀸𑀭𑀳𑀁 𑀅𑀦𑁂𑀓𑁂𑀲𑀁 𑀇𑀦𑁆𑀤𑁆𑀭𑀺𑀬𑀸𑀦𑀁 𑀉𑀧𑁆𑀧𑀢𑁆𑀢𑀺 𑀲𑀺𑀤𑁆𑀥𑀸𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀲𑀺𑀤𑁆𑀥𑀫𑁂𑀓𑁂𑀦 𑀓𑀫𑁆𑀫𑁂𑀦 𑀅𑀦𑁂𑀓𑀺𑀦𑁆𑀤𑁆𑀭𑀺𑀬𑀼𑀧𑁆𑀧𑀢𑁆𑀢𑀺 𑀳𑁄𑀢𑀻’’𑀢𑀺.

𑀲𑀫𑁆𑀧𑀢𑁆𑀢𑁄𑀬𑁂𑀯 𑀦𑀸𑀫 𑀲𑀫𑁆𑀧𑀢𑁆𑀢𑀺𑀓𑀺𑀘𑁆𑀘𑀓𑀭𑀡𑀢𑁄𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀝𑀺…𑀧𑁂… 𑀦𑀓𑀢𑁄’’𑀢𑀺 𑀯𑀼𑀢𑁆𑀢𑀁. 𑀅𑀢𑀺𑀲𑀼𑀔𑀼𑀫𑀪𑀸𑀯𑀢𑁄 𑀫𑀁𑀲𑀘𑀓𑁆𑀔𑀼𑀅𑀕𑁄𑀘𑀭𑁂𑀦 𑀭𑀽𑀧𑀸𑀬𑀢𑀦𑁂𑀦 𑀲𑀫𑀦𑁆𑀦𑀸𑀕𑀢𑀲𑀗𑁆𑀖𑀸𑀢𑀯𑀼𑀢𑁆𑀢𑀺𑀢𑀸𑀬 𑀘 ‘‘𑀯𑀸𑀬𑀼 𑀯𑀺𑀬𑀸’’𑀢𑀺 𑀯𑀼𑀢𑁆𑀢𑀁. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀁 𑀲𑀤𑁆𑀤𑀸𑀬𑀢𑀦𑀁 𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀲 𑀓𑀤𑀸𑀘𑀺𑀧𑀺 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀦 𑀲𑀺𑀬𑀸 𑀥𑀸𑀢𑀼𑀧𑀭𑀫𑁆𑀧𑀭𑀸𑀬 𑀖𑀝𑁆𑀝𑁂𑀦𑁆𑀢𑀲𑁆𑀲 𑀉𑀢𑀼𑀲𑀫𑀼𑀝𑁆𑀞𑀸𑀦𑀢𑁆𑀢𑀸. 𑀢𑁂𑀦𑀸𑀳 ‘‘𑀦 𑀳𑀺…𑀧𑁂… 𑀧𑀚𑁆𑀚𑀢𑀻’’𑀢𑀺. 𑀧𑀝𑁆𑀞𑀸𑀦𑁂 (𑀧𑀝𑁆𑀞𑀸. 𑁧.𑁧.𑁨) 𑀘 ‘‘𑀲𑀤𑁆𑀤𑀸𑀬𑀢𑀦𑀁 𑀲𑁄𑀢𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁.

𑀦𑀦𑀼 𑀘𑀺𑀭𑁂𑀦 𑀲𑀼𑀬𑁆𑀬𑀦𑁆𑀢𑀻𑀢𑀺 𑀤𑀽𑀭𑁂 𑀞𑀺𑀢𑀸𑀦𑀁 𑀮𑀳𑀼𑀓𑀁 𑀲𑀯𑀦𑀁 𑀦𑀢𑁆𑀣𑀺, 𑀢𑁂𑀲𑀫𑁆𑀧𑀺 𑀯𑀸 𑀮𑀳𑀼𑀓𑀁 𑀲𑀯𑀦𑁂𑀦 𑀤𑀽𑀭𑀸𑀲𑀦𑁆𑀦𑀪𑀸𑀯𑀸𑀦𑀁 𑀯𑀺𑀲𑁂𑀲𑁄 𑀦 𑀲𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦, 𑀤𑀽…𑀧𑁂… 𑀢𑁄𑀢𑀺 𑀦 𑀤𑀽𑀭𑁂 𑀞𑀺𑀢𑁂𑀳𑀺 𑀭𑀚𑀓𑀸𑀤𑀺𑀲𑀤𑁆𑀤𑀸 𑀘𑀺𑀭𑁂𑀦 𑀲𑁄𑀢𑀯𑀺𑀜𑁆𑀜𑀸𑀡𑁂𑀦 𑀲𑀼𑀬𑁆𑀬𑀦𑁆𑀢𑀺, 𑀲𑀘𑁂 𑀲𑀯𑀦𑀽𑀧𑀘𑀸𑀭𑁂 𑀲𑁄 𑀲𑀤𑁆𑀤𑁄 𑀤𑀽𑀭𑁂 𑀆𑀲𑀦𑁆𑀦𑁂 𑀘 𑀞𑀺𑀢𑀸𑀦𑀁 𑀬𑀣𑀸𑀪𑀽𑀢𑁂 𑀆𑀧𑀸𑀣𑀕𑀢𑁂 𑀲𑀤𑁆𑀤𑁂 𑀫𑀦𑁄𑀯𑀺𑀜𑁆𑀜𑀸𑀡𑀲𑀗𑁆𑀔𑀸𑀢𑀢𑁄 𑀕𑀳𑀡𑀯𑀺𑀲𑁂𑀲𑀢𑁄 𑀘𑀺𑀭𑁂𑀦 𑀲𑀼𑀢𑁄 𑀲𑀻𑀖𑀁 𑀲𑀼𑀢𑁄𑀢𑀺 𑀅𑀪𑀺𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀏𑀢𑀫𑁂𑀯𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀣𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀦𑀺𑀘𑁆𑀙𑀬…𑀧𑁂… 𑀅𑀪𑀺𑀫𑀸𑀦𑁄 𑀳𑁄𑀢𑀺, 𑀲𑁄𑀢𑀯𑀺𑀜𑁆𑀜𑀸𑀡𑀧𑁆𑀧𑀯𑀢𑁆𑀢𑀺 𑀧𑀦 𑀉𑀪𑀬𑀢𑁆𑀣𑀸𑀧𑀺 𑀲𑀫𑀸𑀦𑀸, 𑀬𑀲𑁆𑀫𑀸 𑀲𑁄 𑀧𑀦 𑀲𑀤𑁆𑀤𑁄…𑀧𑁂… 𑀆𑀕𑀘𑁆𑀙𑀢𑀻𑀢𑀺. 𑀬𑀤𑀺 𑀥𑀸𑀢𑀼𑀧𑀭𑀫𑁆𑀧𑀭𑀸𑀬 𑀲𑀤𑁆𑀤𑁄 𑀦𑀧𑁆𑀧𑀯𑀢𑁆𑀢𑀢𑀺, 𑀓𑀣𑀁 𑀧𑀝𑀺𑀖𑁄𑀲𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀻𑀢𑀺 𑀆𑀳 ‘‘𑀤𑀽𑀭𑁂…𑀧𑁂… 𑀧𑀘𑁆𑀘𑀬𑁄 𑀳𑁄𑀢𑀻’’𑀢𑀺. 𑀉𑀧𑁆𑀧𑀢𑁆𑀢𑀺𑀯𑀲𑁂𑀦 𑀆𑀕𑀢𑀸𑀦𑀻𑀢𑀺 𑀏𑀢𑁂𑀦 𑀭𑀽𑀧𑀥𑀫𑁆𑀫𑀸𑀧𑀺 𑀬𑀢𑁆𑀣 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑀢𑁆𑀣𑁂𑀯 𑀪𑀺𑀚𑁆𑀚𑀦𑁆𑀢𑀺, 𑀦 𑀤𑁂𑀲𑀦𑁆𑀢𑀭𑀁 𑀲𑀗𑁆𑀓𑀫𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀖𑀝𑁆𑀝𑀦𑀲𑀪𑀸𑀯𑀸𑀦𑁂𑀯𑀸𑀢𑀺 𑀢𑁂𑀲𑀁 𑀪𑀽𑀢𑀸𑀦𑀁 𑀲𑀤𑁆𑀤𑀲𑀫𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑀫𑀸𑀳. 𑀲𑁄𑀢𑀧𑀤𑁂𑀲𑀲𑁆𑀲𑀸𑀢𑀺 𑀲𑁄𑀢𑀤𑁂𑀲𑀲𑁆𑀲, 𑀲𑁄𑀢𑀤𑁂𑀲𑁂 𑀞𑀺𑀢𑀲𑁆𑀲𑀸𑀢𑀺 𑀅𑀢𑁆𑀣𑁄.

𑀘𑀓𑁆𑀔𑀼𑀫𑀢𑁄 𑀧𑀼𑀕𑁆𑀕𑀮𑀲𑁆𑀲 𑀅𑀚𑁆𑀛𑀸𑀲𑀬𑀯𑀲𑁂𑀦𑀸𑀢𑀺 𑀘𑀺𑀢𑁆𑀭𑀯𑀺𑀘𑀺𑀢𑁆𑀭𑀭𑀽𑀧𑀸𑀬𑀢𑀦𑁂 𑀬𑁂𑀪𑀼𑀬𑁆𑀬𑁂𑀦 𑀲𑀢𑁆𑀢𑀸𑀦𑀁 𑀘𑀓𑁆𑀔𑀼𑀤𑁆𑀯𑀸𑀭𑀺𑀓𑀚𑀯𑀦𑀲𑁆𑀲 𑀅𑀦𑀼𑀓𑀟𑁆𑀠𑀦𑀯𑀲𑁂𑀦 𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀡𑁆𑀡𑀓𑀽𑀧𑀘𑁆𑀙𑀺𑀤𑁆𑀤𑁂𑀬𑁂𑀯 𑀧𑀯𑀢𑁆𑀢𑀦𑀢𑁄𑀢𑀺 𑀏𑀢𑁂𑀦 𑀅𑀥𑀺𑀝𑁆𑀞𑀸𑀦𑀢𑁄 𑀩𑀳𑀺𑀤𑁆𑀥𑀸 𑀇𑀦𑁆𑀤𑁆𑀭𑀺𑀬𑀁 𑀧𑀯𑀢𑁆𑀢𑀻𑀢𑀺 𑀯𑀸𑀤𑀁 𑀧𑀝𑀺𑀲𑁂𑀥𑁂𑀢𑀺. 𑀅𑀥𑀺𑀝𑁆𑀞𑀸𑀦𑀤𑁂𑀲𑁂 𑀏𑀯 𑀳𑀺 𑀇𑀦𑁆𑀤𑁆𑀭𑀺𑀬𑀁 𑀯𑀢𑁆𑀢𑀢𑀺 𑀢𑀢𑁆𑀣 𑀓𑀺𑀘𑁆𑀘𑀸𑀤𑀺𑀧𑁆𑀧𑀬𑁄𑀕𑀤𑀲𑁆𑀲𑀦𑀢𑁄. 𑀲𑀢𑀺𑀧𑀺 𑀧𑀦𑀲𑁆𑀲 𑀩𑀳𑀺𑀤𑁆𑀥𑀸 𑀯𑀼𑀢𑁆𑀢𑀺𑀬𑀁 𑀦 𑀯𑀺𑀲𑀬𑀕𑁆𑀕𑀳𑀡𑁂 𑀲𑀫𑀢𑁆𑀣𑀢𑀸, 𑀅𑀜𑁆𑀜𑀣𑀸 𑀅𑀥𑀺𑀝𑁆𑀞𑀸𑀦𑀧𑀺𑀤𑀳𑀦𑁂𑀧𑀺 𑀯𑀺𑀲𑀬𑀕𑁆𑀕𑀳𑀡𑀁 𑀪𑀯𑁂𑀬𑁆𑀬𑀸𑀢𑀺. 𑀆𑀭𑀫𑁆𑀫𑀡𑀕𑁆𑀕𑀳𑀡𑀳𑁂𑀢𑀼𑀢𑁄 𑀘𑀸𑀢𑀺 𑀓𑀡𑁆𑀡𑀓𑀽𑀧𑀘𑁆𑀙𑀺𑀤𑁆𑀤𑁂𑀬𑁂𑀯 𑀞𑀢𑁆𑀯𑀸 𑀆𑀭𑀫𑁆𑀫𑀡𑀓𑀭𑀡𑀲𑁆𑀲 𑀯𑀺𑀜𑁆𑀜𑀸𑀡𑀲𑁆𑀲 𑀯𑀸 𑀳𑁂𑀢𑀼𑀪𑀸𑀯𑀢𑁄.

𑀢𑀩𑁆𑀩𑁄𑀳𑀸𑀭𑁂𑀦𑀸𑀢𑀺 𑀕𑀦𑁆𑀥𑀕𑀦𑁆𑀥𑀕𑁆𑀕𑀳𑀡𑀲𑁆𑀲 𑀲𑀳𑀘𑀭𑀺𑀢𑀸𑀬 𑀕𑀦𑁆𑀥𑁄𑀧𑀺 𑀢𑀣𑀸 𑀯𑀼𑀢𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀕𑀦𑁆𑀥𑁄 𑀧𑀘𑁆𑀘𑀬𑁄𑀢𑀺 𑀕𑀦𑁆𑀥𑁄 𑀲𑀳𑀓𑀸𑀭𑀻𑀧𑀘𑁆𑀘𑀬𑁄𑀢𑀺 𑀅𑀢𑁆𑀣𑁄. 𑀔𑁂𑀴𑀸𑀤𑀺𑀓𑁄 𑀧𑀘𑁆𑀘𑀬𑁄𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀢𑀣𑀸 𑀧𑀣𑀯𑀻𑀢𑀺 𑀲𑀳𑀓𑀸𑀭𑀻𑀧𑀘𑁆𑀘𑀬𑀦𑁆𑀢𑀭𑀪𑀽𑀢𑀸 𑀅𑀚𑁆𑀛𑀢𑁆𑀢𑀺𑀓𑀩𑀸𑀳𑀺𑀭𑀸 𑀧𑀣𑀯𑀻 𑀆𑀭𑀫𑁆𑀫𑀡𑀕𑁆𑀕𑀳𑀡𑁂 𑀧𑀘𑁆𑀘𑀬𑁄𑀢𑀺 𑀅𑀢𑁆𑀣𑁄. 𑀆𑀥𑀸𑀭𑀪𑀽𑀢𑀸𑀢𑀺 𑀢𑁂𑀚𑁄𑀯𑀸𑀬𑁄𑀥𑀸𑀢𑀽𑀦𑀁 𑀆𑀥𑀸𑀭𑀪𑀽𑀢𑀸. 𑀦𑀺𑀲𑁆𑀲𑀬𑀪𑀽𑀢𑀸𑀦𑀦𑁆𑀢𑀺 𑀦𑀺𑀲𑁆𑀲𑀬𑀫𑀳𑀸𑀪𑀽𑀢𑀸𑀦𑀁 𑀆𑀧𑁄𑀢𑁂𑀚𑁄𑀯𑀸𑀬𑁄𑀥𑀸𑀢𑀽𑀦𑀁. 𑀲𑀩𑁆𑀩𑀤𑀸𑀢𑀺 𑀉𑀧𑁆𑀧𑀻𑀴𑀦𑀓𑀸𑀮𑁂 𑀘 𑀅𑀦𑀼𑀧𑁆𑀧𑀻𑀴𑀦𑀓𑀸𑀮𑁂 𑀘. 𑀢𑀢𑁆𑀣𑀸𑀢𑀺 𑀘𑀢𑀼𑀭𑀸𑀲𑀻𑀢𑀺𑀧𑀪𑁂𑀤𑁂 𑀉𑀧𑀭𑀺𑀫𑀓𑀸𑀬𑀲𑀗𑁆𑀔𑀸𑀢𑁂 𑀭𑀽𑀧𑀲𑀫𑀽𑀳𑁂. 𑀯𑀺𑀦𑀺𑀩𑁆𑀪𑀼𑀚𑁆𑀚𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀸𑀦𑀦𑁆𑀢𑀺 𑀇𑀤𑀁 𑀘𑀓𑁆𑀔𑀼𑀤𑀲𑀓𑀁 𑀇𑀤𑀁 𑀓𑀸𑀬𑀤𑀲𑀓𑀁 𑀇𑀤𑀁 𑀪𑀸𑀯𑀤𑀲𑀓𑀦𑁆𑀢𑀺 𑀏𑀯𑀁 𑀓𑀮𑀸𑀧𑀢𑁄𑀧𑀺 𑀯𑀺𑀦𑀺𑀩𑁆𑀪𑀼𑀚𑁆𑀚𑀺𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀸𑀦𑀁.

𑁬𑁧𑁬. 𑀤𑀻𑀖𑀸𑀤𑀻𑀦𑀁 𑀨𑀼𑀲𑀺𑀢𑁆𑀯𑀸 𑀚𑀸𑀦𑀺𑀢𑀩𑁆𑀩𑀢𑁄𑀢𑀺 𑀇𑀤𑀁 𑀤𑀻𑀖𑀸𑀤𑀻𑀦𑀁 𑀦 𑀓𑀸𑀬𑀯𑀺𑀜𑁆𑀜𑀸𑀡𑀕𑁄𑀘𑀭𑀢𑁆𑀢𑀸 𑀯𑀼𑀢𑁆𑀢𑀁, 𑀤𑀻𑀖𑀸𑀤𑀺𑀯𑁄𑀳𑀸𑀭𑀭𑀽𑀧𑀸𑀤𑀻𑀦𑀁 𑀧𑀦 𑀨𑁄𑀝𑁆𑀞𑀩𑁆𑀩𑀁 𑀨𑀼𑀲𑀺𑀢𑁆𑀯𑀸 𑀓𑀸𑀬𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀧𑀭𑀢𑁄 𑀧𑀯𑀢𑁆𑀢𑁂𑀦 𑀫𑀦𑁄𑀯𑀺𑀜𑁆𑀜𑀸𑀡𑁂𑀦𑀧𑀺 𑀚𑀸𑀦𑀺𑀢𑀩𑁆𑀩𑀢𑁆𑀢𑀸 𑀯𑀼𑀢𑁆𑀢𑀁. 𑀤𑀻𑀖𑀸𑀤𑀺𑀲𑀦𑁆𑀦𑀺𑀯𑁂𑀲𑀦𑁆𑀢𑀺 𑀤𑀻𑀖𑀸𑀤𑀺𑀲𑀦𑁆𑀦𑀺𑀯𑁂𑀲𑀯𑀦𑁆𑀢𑀁. 𑀏𑀓𑀲𑁆𑀫𑀺𑀁 𑀇𑀢𑀭𑀲𑁆𑀲 𑀅𑀪𑀸𑀯𑀸𑀢𑀺 𑀙𑀸𑀬𑀸𑀢𑀧𑀸𑀦𑀁 𑀆𑀮𑁄𑀓𑀦𑁆𑀥𑀓𑀸𑀭𑀸𑀦𑀜𑁆𑀘 𑀅𑀲𑀳𑀝𑁆𑀞𑀸𑀬𑀺𑀢𑀁 𑀆𑀳. 𑀓𑀣𑀁 𑀧𑀦 𑀆𑀮𑁄𑀓𑁄 𑀅𑀦𑁆𑀥𑀓𑀸𑀭𑀁 𑀯𑀺𑀥𑀫𑀢𑀻𑀢𑀺? ‘‘𑀆𑀮𑁄𑀓𑀧𑁆𑀧𑀯𑀢𑁆𑀢𑀺𑀲𑀫𑀸𑀦𑀓𑀸𑀮𑀁 𑀅𑀦𑁆𑀥𑀓𑀸𑀭𑀲𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀁 𑀯𑀡𑁆𑀡𑀸𑀬𑀢𑀦𑀁 𑀪𑀺𑀚𑁆𑀚𑀢𑀺. 𑀅𑀦𑁆𑀥𑀓𑀸𑀭𑀲𑁆𑀲 𑀦𑀺𑀲𑁆𑀲𑀬𑁄 𑀳𑀼𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀸𑀦𑀺 𑀪𑀽𑀢𑀸𑀦𑀺 𑀓𑀫𑁂𑀦 𑀢𑀣𑀸𑀭𑀽𑀧𑀲𑁆𑀲 𑀯𑀡𑁆𑀡𑀸𑀬𑀢𑀦𑀲𑁆𑀲 𑀦𑀺𑀲𑁆𑀲𑀬𑀪𑀸𑀯𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀓𑁂𑀘𑀺. 𑀲𑀳 𑀅𑀦𑁆𑀥𑀓𑀸𑀭𑁂𑀦 𑀢𑀦𑁆𑀦𑀺𑀲𑁆𑀲𑀬𑀪𑀽𑀢𑀸𑀦𑀁 𑀦𑀺𑀭𑁄𑀥𑀲𑀫𑀦𑀦𑁆𑀢𑀭𑀁 𑀢𑀁𑀲𑀦𑁆𑀢𑀢𑀺𑀬𑀁 𑀢𑀸𑀤𑀺𑀲𑁂 𑀧𑀘𑁆𑀘𑀬𑀲𑀦𑁆𑀦𑀺𑀧𑀸𑀢𑁂 𑀆𑀮𑁄𑀓𑀦𑀺𑀲𑁆𑀲𑀬𑀪𑀽𑀢𑀸𑀦𑀁 𑀉𑀧𑁆𑀧𑀢𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦 𑀳𑀺 𑀦𑀺𑀲𑁆𑀲𑀬𑀫𑀳𑀸𑀪𑀽𑀢𑁂𑀳𑀺 𑀯𑀺𑀦𑀸 𑀆𑀮𑁄𑀓𑀧𑁆𑀧𑀯𑀢𑁆𑀢𑀺 𑀅𑀢𑁆𑀣𑀺, 𑀦𑀸𑀧𑀺 𑀅𑀦𑁆𑀥𑀓𑀸𑀭𑀲𑀗𑁆𑀔𑀸𑀢𑀁 𑀯𑀡𑁆𑀡𑀸𑀬𑀢𑀦𑀫𑁂𑀯 𑀦𑀺𑀭𑀼𑀚𑁆𑀛𑀢𑀺 𑀢𑀁𑀦𑀺𑀲𑁆𑀲𑀬𑁂𑀳𑀺 𑀧𑀬𑀼𑀚𑁆𑀚𑀫𑀸𑀦𑀓𑀏𑀓𑀓𑀮𑀸𑀧𑀪𑀽𑀢𑁄𑀧𑀸𑀤𑀸𑀭𑀽𑀧𑀸𑀦𑀁 𑀲𑀳𑁂𑀯 𑀦𑀺𑀭𑀼𑀚𑁆𑀛𑀦𑀢𑁄. 𑀧𑀤𑀻𑀧𑀲𑀺𑀔𑀸𑀫𑀡𑀺𑀭𑀁𑀲𑀺𑀬𑁄 𑀯𑀺𑀬 𑀧𑀣𑀯𑀻𑀧𑀸𑀓𑀸𑀭𑀭𑀼𑀓𑁆𑀔𑀸𑀤𑀻𑀦𑀺 𑀫𑀼𑀜𑁆𑀘𑀺𑀢𑁆𑀯𑀸𑀧𑀺 𑀅𑀦𑁆𑀥𑀓𑀸𑀭𑁄 𑀧𑀯𑀢𑁆𑀢𑀢𑀻𑀢𑀺 𑀯𑀤𑀦𑁆𑀢𑀺. 𑀫𑀦𑁆𑀤𑀁 𑀧𑀦 𑀧𑀸𑀓𑀸𑀭𑀸𑀤𑀺𑀆𑀥𑀸𑀭𑀭𑀳𑀺𑀢𑀁 𑀦 𑀲𑀼𑀝𑁆𑀞𑀼 𑀧𑀜𑁆𑀜𑀸𑀬𑀢𑀺, 𑀩𑀳𑀮𑀁 𑀆𑀥𑀸𑀭𑀁 𑀦𑀺𑀲𑁆𑀲𑀸𑀬 𑀧𑀯𑀢𑁆𑀢𑀢𑀻𑀢𑀺 𑀬𑀼𑀢𑁆𑀢𑀦𑁆𑀢𑀺 𑀘 𑀯𑀤𑀦𑁆𑀢𑀺.

𑁬𑁨𑁦. ‘‘𑀅𑀫𑀦𑀼𑀲𑁆𑀲𑀲𑀤𑁆𑀤𑁄’’𑀢𑀺 𑀏𑀢𑁆𑀣 𑀅-𑀓𑀸𑀭𑁄 𑀦 𑀫𑀦𑀼𑀲𑁆𑀲𑀢𑀸𑀫𑀢𑁆𑀢𑀦𑀺𑀯𑀢𑁆𑀢𑀺𑀅𑀢𑁆𑀣𑁄 𑀲𑀤𑀺𑀲𑀪𑀸𑀯𑀤𑀻𑀧𑀦𑀢𑀸𑀬 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸, 𑀫𑀦𑀼𑀲𑁆𑀲𑀢𑁄 𑀧𑀦 𑀅𑀦𑀜𑁆𑀜𑀢𑀸𑀦𑀺𑀯𑀢𑁆𑀢𑀺𑀅𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀫𑀦𑀼𑀲𑁆𑀲…𑀧𑁂… 𑀝𑁆𑀞𑀸𑀤𑀬𑁄𑀧𑀻’’𑀢𑀺 𑀆𑀳. 𑀢𑀣𑀸 𑀓𑀺𑀢𑁆𑀢𑁂𑀢𑀩𑁆𑀩𑁄𑀢𑀺 ‘‘𑀯𑀁𑀲𑀨𑀸𑀮𑀦𑀲𑀤𑁆𑀤𑁄’’𑀢𑀺𑀆𑀤𑀺𑀦𑀸 𑀯𑀢𑁆𑀣𑀼𑀯𑀲𑁂𑀦 𑀓𑀺𑀢𑁆𑀢𑁂𑀢𑀩𑁆𑀩𑁄.

𑁬𑁩𑁨. 𑀓𑀫𑁆𑀫𑀘𑀺𑀢𑁆𑀢𑀸𑀤𑀺𑀦𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀉𑀢𑀼𑀆𑀳𑀸𑀭𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀁𑀢𑀤𑀸𑀓𑀸𑀭𑀸𑀦𑀻𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀺𑀆𑀓𑀸𑀭𑀸𑀦𑀺. 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀧𑀝𑀺𑀘𑁆𑀘 𑀲𑀫𑀼𑀝𑁆𑀞𑀳𑀦𑁆𑀢𑀻𑀢𑀺 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀸𑀦𑀺𑀧𑀺 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀻𑀦𑀺 𑀬𑁂𑀪𑀼𑀬𑁆𑀬𑁂𑀦 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀲𑀳𑀺𑀢𑁂 𑀏𑀯 𑀲𑀦𑁆𑀢𑀸𑀦𑁂 𑀲𑀩𑁆𑀪𑀸𑀯𑀸 𑀇𑀢𑀭𑀢𑁆𑀣 𑀘 𑀅𑀪𑀸𑀯𑀸 𑀇𑀦𑁆𑀤𑁆𑀭𑀺𑀬𑀳𑁂𑀢𑀼𑀓𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀅𑀜𑁆𑀜𑀣𑀸𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀺𑀆𑀓𑀸𑀭𑀢𑁄 𑀅𑀜𑁆𑀜𑀣𑀸, 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀸𑀪𑀸𑀯𑁂 𑀯𑀸. 𑀇𑀢𑁆𑀣𑀺𑀕𑁆𑀕𑀳𑀡𑀲𑁆𑀲 𑀘𑀸𑀢𑀺 𑀇𑀢𑁆𑀣𑀻𑀢𑀺 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑀸. 𑀢𑁂𑀲𑀁 𑀭𑀽𑀧𑀸𑀦𑀦𑁆𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀺𑀆𑀓𑀸𑀭𑀭𑀽𑀧𑀸𑀦𑀁. 𑀬𑀤𑀺 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀇𑀢𑁆𑀣𑀺𑀮𑀺𑀗𑁆𑀕𑀸𑀤𑀺𑀆𑀓𑀸𑀭𑀭𑀽𑀧𑀸𑀦𑀁 𑀲𑀳𑀓𑀸𑀭𑀻𑀓𑀸𑀭𑀡𑀁, 𑀅𑀣 𑀓𑀲𑁆𑀫𑀸 𑀢𑀲𑁆𑀲 𑀇𑀦𑁆𑀤𑁆𑀭𑀺𑀬𑀸𑀤𑀺𑀧𑀘𑁆𑀘𑀬𑀪𑀸𑀯𑁄 𑀢𑁂𑀲𑀁 𑀦 𑀯𑀼𑀢𑁆𑀢𑁄𑀢𑀺? 𑀦𑁂𑀯 𑀢𑀁 𑀲𑀳𑀓𑀸𑀭𑀻𑀓𑀸𑀭𑀡𑀁, 𑀅𑀣 𑀔𑁄 𑀢𑁂𑀲𑀁 𑀢𑀩𑁆𑀪𑀸𑀯𑀪𑀸𑀯𑀺𑀢𑀸𑀫𑀢𑁆𑀢𑁂𑀦 𑀢𑀁 𑀓𑀸𑀭𑀡𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 𑀆𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺.

𑁬𑁩𑁩. 𑀮𑀺𑀗𑁆𑀕𑀁 𑀧𑀭𑀺𑀯𑀢𑁆𑀢𑀫𑀸𑀦𑀁 𑀧𑀼𑀭𑀺𑀫𑀮𑀺𑀗𑁆𑀕𑀸𑀥𑀸𑀭𑀚𑀸𑀢𑀺𑀅𑀦𑀼𑀭𑀽𑀧𑀫𑁂𑀯 𑀳𑀼𑀢𑁆𑀯𑀸 𑀧𑀭𑀺𑀯𑀢𑁆𑀢𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀧𑀝𑀺𑀲𑀦𑁆𑀥𑀺𑀬𑀁 𑀯𑀺𑀬 𑀧𑀯𑀢𑁆𑀢𑁂𑀧𑀻’’𑀢𑀺. 𑀬𑀲𑁆𑀲…𑀧𑁂… 𑀦𑁄𑀢𑀺 𑀆𑀤𑀺𑀯𑀘𑀦𑀢𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀬𑀲𑁆𑀲 𑀯𑀸 𑀧𑀦 𑀧𑀼𑀭𑀺𑀲𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀲 𑀇𑀢𑁆𑀣𑀺𑀦𑁆𑀤𑁆𑀭𑀺𑀬𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀦𑁄’’𑀢𑀺 (𑀬𑀫. 𑁩.𑀇𑀦𑁆𑀤𑁆𑀭𑀺𑀬𑀬𑀫𑀓.𑁧𑁮𑁮) 𑀲𑀗𑁆𑀕𑀡𑁆𑀳𑀸𑀢𑀺.

𑁬𑁩𑁫. 𑀤𑁆𑀯𑀸𑀭𑀪𑀸𑀯𑁂𑀦 𑀓𑀼𑀘𑁆𑀙𑀺𑀢𑀸𑀦𑀁 𑀆𑀲𑀯𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀝𑁆𑀞𑀸𑀦𑀢𑀸𑀬 𑀧𑀲𑀸𑀤𑀯𑀺𑀲𑁂𑀲𑁂 𑀯𑀺𑀬 𑀯𑀺𑀜𑁆𑀜𑀢𑁆𑀢𑀺𑀯𑀺𑀲𑁂𑀲𑁂𑀧𑀺 𑀓𑀸𑀬𑀯𑁄𑀳𑀸𑀭𑀧𑁆𑀧𑀯𑀢𑁆𑀢𑀺 𑀤𑀝𑁆𑀞𑀩𑁆𑀩𑀸. 𑀯𑀺𑀢𑁆𑀣𑀫𑁆𑀪𑀦𑀲𑀪𑀸𑀯𑀢𑀸𑀬 𑀯𑀸𑀬𑁄𑀥𑀸𑀢𑀼𑀬𑀸 𑀣𑀫𑁆𑀪𑀦𑀁 ‘‘𑀯𑀸𑀬𑁄𑀥𑀸𑀢𑀼𑀓𑀺𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀺𑀘𑁆𑀘𑀫𑁆𑀧𑀺 𑀳𑀺 𑀥𑀫𑁆𑀫𑀸𑀦𑀁 𑀲𑀪𑀸𑀯𑁄𑀬𑁂𑀯𑀸𑀢𑀺. 𑀧𑀣𑀯𑀻𑀥𑀸𑀢𑀼𑀬𑀸 𑀆𑀓𑀸𑀭𑁄 𑀯𑀘𑀻𑀯𑀺𑀜𑁆𑀜𑀢𑁆𑀢𑀻𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀬𑁄𑀚𑀦𑀸.

𑁬𑁩𑁬. 𑀯𑀺𑀢𑀓𑁆𑀓…𑀧𑁂… 𑀕𑀳𑀺𑀢𑀸𑀢𑀺 𑀬𑀣𑀸𑀥𑀺𑀧𑁆𑀧𑁂𑀢𑀢𑁆𑀣𑀸𑀪𑀺𑀩𑁆𑀬𑀜𑁆𑀚𑀺𑀓𑀸𑀬 𑀯𑀸𑀘𑀸𑀬 𑀲𑀫𑀼𑀝𑁆𑀞𑀸𑀧𑀦𑀸𑀥𑀺𑀧𑁆𑀧𑀸𑀬𑀧𑁆𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀤𑀸 𑀳𑀺 𑀲𑀸 𑀢𑁂𑀳𑀺 𑀧𑀭𑀺𑀕𑁆𑀕𑀳𑀺𑀢𑀸 𑀦𑀸𑀫 𑀳𑁄𑀢𑀻𑀢𑀺. 𑀏𑀓𑀲𑁆𑀲𑀧𑀺 𑀅𑀓𑁆𑀔𑀭𑀲𑁆𑀲 𑀅𑀦𑁂𑀓𑁂𑀳𑀺 𑀚𑀯𑀦𑁂𑀳𑀺 𑀦𑀺𑀩𑁆𑀩𑀢𑁆𑀢𑁂𑀢𑀩𑁆𑀩𑀢𑁆𑀢𑀸 𑀢𑀣𑀸 𑀦𑀺𑀩𑁆𑀩𑀢𑁆𑀢𑀺𑀬𑀫𑀸𑀦𑀢𑀸𑀬 𑀅𑀲𑀫𑀢𑁆𑀣𑀲𑀪𑀸𑀯𑀢𑁆𑀢𑀸 𑀦 𑀯𑀺𑀜𑁆𑀜𑀸𑀢𑀯𑀺𑀲𑁂𑀲𑀸 𑀦 𑀪𑀺𑀦𑁆𑀦𑀸 𑀏𑀯𑀸𑀢𑀺 𑀆𑀳 ‘‘𑀲𑀯…𑀧𑁂… 𑀪𑀺𑀦𑁆𑀦𑀸’’𑀢𑀺. 𑀅𑀩𑁆𑀩𑁄𑀓𑀺𑀡𑁆𑀡𑁂𑀢𑀺 𑀅𑀦𑁆𑀢𑀭𑀦𑁆𑀢𑀭𑀸 𑀉𑀧𑁆𑀧𑀚𑁆𑀚𑀫𑀸𑀦𑁂𑀳𑀺 𑀅𑀲𑀁𑀲𑀝𑁆𑀞𑁂. ‘‘𑀧𑀘𑁆𑀙𑀺𑀫𑀘𑀺𑀢𑁆𑀢’’𑀦𑁆𑀢𑀺 𑀅𑀯𑀺𑀲𑁂𑀲𑁂𑀦 𑀘𑀼𑀢𑀺𑀘𑀺𑀢𑁆𑀢𑀁 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀅𑀜𑁆𑀜𑁂𑀲𑀫𑁆𑀧𑀺 𑀘𑀼𑀢𑀺𑀘𑀺𑀢𑁆𑀢𑀁…𑀧𑁂… 𑀜𑀸𑀬𑀢𑀻’’𑀢𑀺 𑀯𑀼𑀢𑁆𑀢𑀁.

𑀅𑀣 𑀯𑀸 ‘‘𑀬𑁂 𑀘 𑀭𑀽𑀧𑀸𑀯𑀘𑀭𑀁 𑀅𑀭𑀽𑀧𑀸𑀯𑀘𑀭𑀁 𑀉𑀧𑀧𑀚𑁆𑀚𑀺𑀢𑁆𑀯𑀸 𑀧𑀭𑀺𑀦𑀺𑀩𑁆𑀩𑀸𑀬𑀺𑀲𑁆𑀲𑀦𑁆𑀢𑀺, 𑀢𑁂𑀲𑀁 𑀘𑀯𑀦𑁆𑀢𑀸𑀦𑀁 𑀢𑁂𑀲𑀁 𑀯𑀘𑀻𑀲𑀗𑁆𑀔𑀸𑀭𑁄 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺, 𑀦𑁄 𑀘 𑀢𑁂𑀲𑀁 𑀓𑀸𑀬𑀲𑀗𑁆𑀔𑀸𑀭𑁄 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 (𑀬𑀫. 𑁨.𑀲𑀗𑁆𑀔𑀸𑀭𑀬𑀫𑀓.𑁮𑁮) 𑀭𑀽𑀧𑀸𑀭𑀽𑀧𑀪𑀯𑀽𑀧𑀧𑀚𑁆𑀚𑀦𑀓𑀸𑀦𑀁 𑀓𑀸𑀫𑀸𑀯𑀘𑀭𑀘𑀼𑀢𑀺𑀘𑀺𑀢𑁆𑀢𑀲𑁆𑀲𑀧𑀺 𑀓𑀸𑀬𑀲𑀗𑁆𑀔𑀸𑀭𑀸𑀲𑀫𑀼𑀝𑁆𑀞𑀸𑀧𑀦𑀯𑀘𑀦𑁂𑀦 𑀔𑀻𑀡𑀸𑀲𑀯𑁂𑀳𑀺 𑀅𑀜𑁆𑀜𑁂𑀲𑀫𑁆𑀧𑀺…𑀧𑁂… 𑀜𑀸𑀬𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀘 𑁋

‘‘𑀬𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑁄 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀯𑀘𑀻𑀲𑀗𑁆𑀔𑀸𑀭𑁄 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺 𑀆𑀫𑀦𑁆𑀢𑀸’’𑀢𑀺 (𑀬𑀫. 𑁨.𑀲𑀗𑁆𑀔𑀸𑀭𑀬𑀫𑀓.𑁧𑁦𑁮),

‘‘𑀬𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑁄 𑀦𑀺𑀭𑀼𑀚𑁆𑀛𑀢𑀺, 𑀢𑀲𑁆𑀲 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻𑀢𑀺 𑀆𑀫𑀦𑁆𑀢𑀸’’𑀢𑀺 (𑀬𑀫. 𑁨.𑀲𑀗𑁆𑀔𑀸𑀭𑀬𑀫𑀓.𑁧𑁦𑁮) 𑀘,

‘‘𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀢𑁂𑀲𑀁 𑀓𑀸𑀬𑀲𑀗𑁆𑀔𑀸𑀭𑁄 𑀘 𑀦 𑀦𑀺𑀭𑀼𑀚𑁆𑀛𑀢𑀺 𑀘𑀺𑀢𑁆𑀢𑀲𑀗𑁆𑀔𑀸𑀭𑁄 𑀘 𑀦 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 (𑀬𑀫. 𑁨.𑀲𑀗𑁆𑀔𑀸𑀭𑀬𑀫𑀓.𑁧𑁧𑁩) 𑁋

𑀆𑀤𑀺𑀯𑀘𑀦𑀢𑁄 𑀘 𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑁆𑀲 𑀧𑀼𑀭𑀢𑁄 𑀲𑁄𑀴𑀲𑀫𑁂𑀦 𑀘𑀺𑀢𑁆𑀢𑁂𑀦 𑀢𑀢𑁄 𑀑𑀭𑀺𑀫𑁂𑀦 𑀯𑀸 𑀲𑀤𑁆𑀥𑀺𑀁 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀦 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀲𑀺𑀤𑁆𑀥𑀁. 𑀬𑀤𑀺 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁, ‘‘𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑁆𑀲 𑀪𑀗𑁆𑀕𑀓𑁆𑀔𑀡𑁂 𑀢𑁂𑀲𑀁 𑀓𑀸𑀬𑀲𑀗𑁆𑀔𑀸𑀭𑁄 𑀦 𑀦𑀺𑀭𑀼𑀚𑁆𑀛𑀢𑀻’’𑀢𑀺 𑀦 𑀯𑀤𑁂𑀬𑁆𑀬, 𑀯𑀼𑀢𑁆𑀢𑀜𑁆𑀘𑁂𑀢𑀁, 𑀢𑀲𑁆𑀫𑀸 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀘𑀼𑀢𑀺𑀢𑁄 𑀧𑀼𑀭𑀺𑀫𑁂𑀦 𑀲𑀢𑁆𑀢𑀭𑀲𑀫𑁂𑀦 𑀉𑀧𑁆𑀧𑀦𑁆𑀦𑀸 𑀅𑀲𑁆𑀲𑀸𑀲𑀧𑀲𑁆𑀲𑀸𑀲𑀸 𑀘𑀼𑀢𑀺𑀬𑀸 𑀳𑁂𑀝𑁆𑀞𑀸 𑀤𑀼𑀢𑀺𑀬𑁂𑀦 𑀘𑀺𑀢𑁆𑀢𑁂𑀦 𑀲𑀤𑁆𑀥𑀺𑀁 𑀦𑀺𑀭𑀼𑀚𑁆𑀛𑀦𑁆𑀢𑀺. 𑀢𑁂𑀦 ‘‘𑀬𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀸 𑀓𑀸𑀫𑀸𑀯𑀘𑀭𑀸𑀦𑀁 𑀧𑀘𑁆𑀙𑀺𑀫𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀘𑀼𑀢𑀺𑀘𑀺𑀢𑁆𑀢𑀲𑁆𑀲𑀸𑀦𑀦𑁆𑀢𑀭𑀧𑀘𑁆𑀘𑀬𑀪𑀽𑀢𑀲𑁆𑀲𑀧𑀺 𑀘𑀺𑀢𑁆𑀢𑀲𑁆𑀲 𑀓𑀸𑀬𑀲𑀗𑁆𑀔𑀸𑀭𑀸𑀲𑀫𑀼𑀝𑁆𑀞𑀸𑀧𑀦𑀢𑀸 𑀯𑀼𑀢𑁆𑀢𑀸.

𑀅𑀣 𑀯𑀸 𑀬𑀲𑁆𑀲 𑀘𑀺𑀢𑁆𑀢𑀲𑁆𑀲𑀸𑀢𑀺 𑀬𑁂𑀦 𑀘𑀺𑀢𑁆𑀢𑁂𑀦 𑀲𑀩𑁆𑀩𑀧𑀘𑁆𑀙𑀺𑀫𑁄 𑀓𑀸𑀬𑀲𑀗𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀢𑀺. 𑀢𑀁 𑀘𑀺𑀢𑁆𑀢𑀁 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀁, 𑀦 𑀧𑀘𑁆𑀙𑀺𑀫𑀘𑀺𑀢𑁆𑀢𑀲𑁆𑀲 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀽𑀢𑀁. 𑀅𑀦𑀦𑁆𑀢𑀭𑀸𑀢𑀺 𑀳𑀺 𑀓𑀸𑀬𑀲𑀗𑁆𑀔𑀸𑀭𑀼𑀧𑁆𑀧𑀸𑀤𑀦𑀁 𑀅𑀦𑁆𑀢𑀭𑀁 𑀯𑀺𑀦𑀸, 𑀬𑀢𑁄 𑀧𑀘𑁆𑀙𑀸 𑀓𑀸𑀬𑀲𑀗𑁆𑀔𑀸𑀭𑀼𑀧𑁆𑀧𑀸𑀤𑀦𑁂𑀦 𑀅𑀦𑀦𑁆𑀢𑀭𑀺𑀢𑀁 𑀳𑀼𑀢𑁆𑀯𑀸 𑀧𑀘𑁆𑀙𑀺𑀫𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸? ‘‘𑀇𑀢𑀭𑁂𑀲𑀁 𑀯𑀘𑀻𑀲𑀗𑁆𑀔𑀸𑀭𑁄 𑀘 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀺 𑀓𑀸𑀬𑀲𑀗𑁆𑀔𑀸𑀭𑁄 𑀘 𑀦𑀺𑀭𑀼𑀚𑁆𑀛𑀺𑀲𑁆𑀲𑀢𑀻’’𑀢𑀺 (𑀬𑀫. 𑁨.𑀲𑀗𑁆𑀔𑀸𑀭𑀬𑀫𑀓.𑁮𑁮) 𑀯𑀼𑀢𑁆𑀢𑀢𑁆𑀢𑀸. 𑀅𑀜𑁆𑀜𑀣𑀸𑀧𑀘𑁆𑀙𑀺𑀫𑀘𑀺𑀢𑁆𑀢𑀢𑁄 𑀧𑀼𑀭𑀺𑀫𑀢𑀢𑀺𑀬𑀘𑀺𑀢𑁆𑀢𑀲𑀫𑀗𑁆𑀕𑀻𑀦𑀁 𑀓𑀸𑀬𑀲𑀗𑁆𑀔𑀸𑀭𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀆𑀧𑀚𑁆𑀚𑀢𑀻𑀢𑀺. 𑀏𑀯𑀁 𑀲𑀩𑁆𑀩𑁂𑀲𑀫𑁆𑀧𑀺 𑀘𑀼𑀢𑀺𑀘𑀺𑀢𑁆𑀢𑀲𑁆𑀲 𑀭𑀽𑀧𑀚𑀦𑀓𑀢𑀸𑀪𑀸𑀯𑁂 𑀆𑀕𑀫𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀬𑀼𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀦 𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀕𑀩𑁆𑀪𑀕𑀫𑀦𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀉𑀤𑀓𑀦𑀺𑀫𑀼𑀕𑁆𑀕𑀅𑀲𑀜𑁆𑀜𑀻𑀪𑀽𑀢𑀓𑀸𑀮𑀓𑀢𑀘𑀢𑀼𑀢𑁆𑀣𑀚𑁆𑀛𑀸𑀦𑀲𑀫𑀸𑀧𑀦𑁆𑀦𑀭𑀽𑀧𑀸𑀭𑀽𑀧𑀪𑀯𑀲𑀫𑀗𑁆𑀕𑀻𑀦𑀺𑀭𑁄𑀥𑀲𑀫𑀸𑀧𑀦𑁆𑀦𑀪𑀸𑀯𑁂 𑀲𑀗𑁆𑀕𑀡𑁆𑀳𑀸𑀢𑀺.

𑁬𑁩𑁭. 𑀅𑀦𑁂𑀓𑁂𑀲𑀁 𑀓𑀮𑀸𑀧𑀸𑀦𑀁 𑀏𑀓𑀢𑁄 𑀳𑀼𑀢𑁆𑀯𑀸 𑀏𑀓𑀖𑀦𑀧𑀺𑀡𑁆𑀟𑀪𑀸𑀯𑁂𑀦 𑀧𑀯𑀢𑁆𑀢𑀦𑀢𑁄 𑀓𑀮𑀸𑀧𑀦𑁆𑀢𑀭𑀪𑀽𑀢𑀸𑀦𑀁 𑀓𑀮𑀸𑀧𑀦𑁆𑀢𑀭𑀪𑀽𑀢𑁂𑀳𑀺 𑀲𑀫𑁆𑀨𑀼𑀝𑁆𑀞𑀪𑀸𑀯𑁄 𑀯𑀼𑀢𑁆𑀢𑁄. 𑀬𑀢𑁄 𑀢𑁂𑀲𑀁 𑀤𑀼𑀯𑀺𑀜𑁆𑀜𑁂𑀬𑁆𑀬𑀦𑀸𑀦𑀢𑁆𑀢𑀁, 𑀦 𑀧𑀦 𑀅𑀯𑀺𑀦𑀺𑀩𑁆𑀪𑀼𑀢𑁆𑀢𑀪𑀸𑀯𑀢𑁄. 𑀢𑀁𑀢𑀁𑀪𑀽𑀢𑀯𑀺𑀯𑀺𑀢𑁆𑀢𑀢𑀸𑀢𑀺 𑀢𑁂𑀲𑀁 𑀢𑁂𑀲𑀁 𑀪𑀽𑀢𑀸𑀦𑀁 𑀯𑀺𑀪𑀢𑁆𑀢𑀪𑀸𑀯𑁄 𑀓𑀮𑀸𑀧𑀦𑁆𑀢𑀭𑀪𑀽𑀢𑁂𑀳𑀺 𑀯𑀺𑀪𑀢𑁆𑀢𑀲𑀪𑀸𑀯𑀢𑀸 𑀅𑀲𑀁𑀓𑀺𑀡𑁆𑀡𑀢𑀸𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀦 𑀬𑀣𑀸𑀯𑀼𑀢𑁆𑀢𑀸 𑀯𑀺𑀯𑀺𑀢𑁆𑀢𑀢𑀸 𑀭𑀽𑀧𑀸𑀦𑀁 𑀑𑀲𑀸𑀦𑀁 𑀳𑁄𑀢𑀺, 𑀢𑀲𑁆𑀫𑀸 ‘‘𑀭𑀽𑀧𑀧𑀭𑀺𑀬𑀦𑁆𑀢𑁄’’𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀢𑀁𑀢𑀁𑀪𑀽𑀢𑀲𑀼𑀜𑁆𑀜𑀢𑀸. 𑀬𑁂𑀲𑀜𑁆𑀳𑀺 𑀧𑀭𑀺𑀘𑁆𑀙𑁂𑀤𑁄 𑀆𑀓𑀸𑀲𑁄, 𑀢𑁂𑀲𑀁 𑀧𑀭𑀺𑀬𑀦𑁆𑀢𑀢𑀸𑀬 𑀢𑁂𑀳𑀺 𑀲𑀼𑀜𑁆𑀜𑀪𑀸𑀯𑁄𑀢𑀺 𑀮𑀓𑁆𑀔𑀺𑀢𑀩𑁆𑀩𑁄. 𑀢𑀢𑁄𑀬𑁂𑀯 𑀘 𑀲𑁄 𑀪𑀽𑀢𑀦𑁆𑀢𑀭𑁂𑀳𑀺 𑀯𑀺𑀬 𑀢𑁂𑀳𑀺 𑀅𑀲𑀫𑁆𑀨𑀼𑀝𑁆𑀞𑁄𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀅𑀜𑁆𑀜𑀣𑀸𑀢𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁂𑀳𑀺 𑀅𑀲𑀫𑁆𑀨𑀼𑀝𑁆𑀞𑀪𑀸𑀯𑀸𑀪𑀸𑀯𑁂.

𑁬𑁩𑁮. 𑀢𑀁𑀢𑀁𑀯𑀺𑀓𑀸𑀭𑀸𑀥𑀺𑀓𑀭𑀽𑀧𑁂𑀳𑀻𑀢𑀺 𑀏𑀢𑁆𑀣 𑀓𑀣𑀁 𑀘𑀫𑁆𑀫𑀲𑀼𑀯𑀡𑁆𑀡𑁂𑀲𑀼 𑀫𑀼𑀤𑀼𑀢𑀸𑀓𑀫𑁆𑀫𑀜𑁆𑀜𑀢𑀸 𑀮𑀩𑁆𑀪𑀦𑁆𑀢𑀺, 𑀦𑀦𑀼 𑀮𑀳𑀼𑀢𑀸𑀤𑀺𑀯𑀺𑀓𑀸𑀭𑀸 𑀏𑀓𑀦𑁆𑀢𑀢𑁄 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀭𑀽𑀧𑁂 𑀏𑀯 𑀧𑀯𑀢𑁆𑀢𑀦𑀢𑁄 𑀅𑀦𑀺𑀦𑁆𑀤𑁆𑀭𑀺𑀬𑀩𑀤𑁆𑀥𑁂 𑀦 𑀮𑀩𑁆𑀪𑀦𑁆𑀢𑀻𑀢𑀺? 𑀲𑀘𑁆𑀘𑀫𑁂𑀢𑀁, 𑀇𑀥 𑀧𑀦 𑀢𑀁𑀲𑀤𑀺𑀲𑁂𑀲𑀼 𑀢𑀩𑁆𑀩𑁄𑀳𑀸𑀭𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀢𑀽𑀮𑀧𑀺𑀘𑀼𑀆𑀤𑀻𑀲𑀼 𑀕𑀭𑀼𑀪𑀸𑀯𑀸𑀤𑀺𑀳𑁂𑀢𑀽𑀦𑀁 𑀪𑀽𑀢𑀸𑀦𑀁 𑀅𑀥𑀺𑀓𑀪𑀸𑀯𑀸𑀪𑀸𑀯𑀢𑁄 𑀮𑀳𑀼𑀆𑀤𑀺𑀯𑁄𑀳𑀸𑀭𑁄. 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀥𑀫𑁆𑀫𑀦𑀺𑀲𑁆𑀲𑀬𑀭𑀽𑀧𑁂 𑀏𑀯 𑀯𑀸 𑀲𑀦𑁆𑀥𑀸𑀬 ‘‘𑀢𑀁𑀢𑀁𑀯𑀺𑀓𑀸𑀭𑀸𑀥𑀺𑀓𑀭𑀽𑀧𑁂𑀳𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀩𑁆𑀩𑁂 𑀲𑀩𑁆𑀩𑁂𑀲𑀁 𑀧𑀘𑁆𑀘𑀬𑀸 𑀮𑀳𑀼𑀢𑀸𑀤𑀻𑀦𑀁 𑀅𑀜𑁆𑀜𑀫𑀜𑁆𑀜𑀸𑀯𑀺𑀚𑀳𑀦𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁬𑁪𑁧. 𑀆𑀘𑀬𑀲𑀤𑁆𑀤𑁂𑀦𑁂𑀯𑀸𑀢𑀺 𑀦𑀺𑀤𑁆𑀤𑁂𑀲𑁂 𑀯𑀼𑀢𑁆𑀢𑀆𑀘𑀬𑀲𑀤𑁆𑀤𑁂𑀦𑁂𑀯. 𑀬𑁄 𑀆𑀬𑀢𑀦𑀸𑀦𑀁 𑀆𑀤𑀺𑀘𑀬𑀢𑁆𑀢𑀸 𑀆𑀘𑀬𑁄 𑀧𑀼𑀦𑀧𑁆𑀧𑀼𑀦𑀁 𑀦𑀺𑀩𑁆𑀩𑀢𑁆𑀢𑀫𑀸𑀦𑀸𑀦𑀁, 𑀲𑁄𑀯 𑀭𑀽𑀧𑀲𑁆𑀲 𑀉𑀧𑀭𑀺𑀘𑀬𑀢𑁆𑀢𑀸 𑀉𑀧𑀘𑀬𑁄𑀢𑀺 𑀅𑀥𑀺𑀧𑁆𑀧𑁂𑀢𑀁 𑀅𑀢𑁆𑀣𑀁 𑀧𑀸𑀴𑀺𑀬𑀁 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀧𑀸𑀴𑀺𑀬𑀁 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀉𑀧-𑀲𑀤𑁆𑀤𑁄 𑀧𑀞𑀫𑀢𑁆𑀣𑁄 ‘‘𑀤𑀸𑀦𑀁, 𑀪𑀺𑀓𑁆𑀔𑀯𑁂, 𑀧𑀡𑁆𑀟𑀺𑀢𑀼𑀧𑀜𑁆𑀜𑀢𑁆𑀢’’𑀦𑁆𑀢𑀺𑀆𑀤𑀻𑀲𑀼 (𑀅. 𑀦𑀺. 𑁩.𑁪𑁫) 𑀯𑀺𑀬. 𑀉𑀧𑀭𑀺𑀅𑀢𑁆𑀣𑁄𑀘 ‘‘𑀲𑀫𑁆𑀫𑀝𑁆𑀞𑁂 𑀉𑀧𑀲𑀺𑀢𑁆𑀢𑁂 𑀘, 𑀢𑁂 𑀦𑀺𑀲𑀻𑀤𑀺𑀁𑀲𑀼 𑀫𑀡𑁆𑀟𑀧𑁂’’𑀢𑀺𑀆𑀤𑀻𑀲𑀼 𑀯𑀺𑀬. 𑀅𑀜𑁆𑀜𑀣𑀸𑀢𑀺 𑀉𑀧-𑀲𑀤𑁆𑀤𑀲𑁆𑀲 𑀉𑀧𑀭𑀺𑀅𑀢𑁆𑀣𑀲𑁆𑀲𑁂𑀯 𑀕𑀳𑀡𑁂.

𑁬𑁪𑁩. 𑀨𑀮𑀯𑀺𑀧𑀘𑁆𑀘𑀦𑀧𑀓𑀢𑀺𑀬𑀸𑀢𑀺 𑀨𑀮𑀯𑀺𑀧𑀘𑁆𑀘𑀦𑀲𑀪𑀸𑀯𑁂𑀦. 𑀨𑀮𑀫𑁂𑀯 𑀯𑀸 𑀧𑀓𑀢𑀻𑀢𑀺 𑀆𑀬𑀼𑀲𑀁𑀳𑀸𑀦𑀸𑀤𑀺𑀦𑀸 𑀨𑀮𑀲𑀪𑀸𑀯𑁂𑀦 𑀚𑀭𑀸𑀦𑀺𑀤𑁆𑀤𑁂𑀲𑁄𑀢𑀺 𑀅𑀢𑁆𑀣𑁄. 𑀢𑀣𑀸 𑀳𑀺 ‘‘𑀨𑀮𑀽𑀧𑀘𑀸𑀭𑁂𑀦 𑀯𑀼𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀲𑀼𑀧𑀭𑀺𑀡𑀢𑀭𑀽𑀧𑀧𑀭𑀺𑀧𑀸𑀓𑀓𑀸𑀮𑁂 𑀳𑀸𑀦𑀺𑀤𑀲𑀓𑀸𑀤𑀻𑀲𑀼.

𑁬𑁪𑁫. 𑀓𑀢𑁆𑀢𑀩𑁆𑀩𑀲𑀪𑀸𑀯𑀢𑁄𑀢𑀺 𑀫𑀽𑀮𑀨𑀮𑀸𑀤𑀻𑀦𑀁 𑀇𑀥𑀸𑀥𑀺𑀧𑁆𑀧𑁂𑀢𑀆𑀳𑀸𑀭𑀯𑀢𑁆𑀣𑀽𑀦𑀁 𑀫𑀼𑀔𑁂𑀦 𑀅𑀲𑀦𑀸𑀤𑀺𑀓𑀢𑁆𑀢𑀩𑁆𑀩𑀲𑀪𑀸𑀯𑀢𑁄. 𑀯𑀺𑀲𑀪𑀽𑀢𑁂 𑀲𑀗𑁆𑀖𑀸𑀢𑁂 𑀑𑀚𑀸 𑀫𑀦𑁆𑀤𑀸 𑀳𑁄𑀢𑀻𑀢𑀺 𑀲𑀯𑀺𑀲𑀢𑁆𑀢𑀸𑀪𑀸𑀯𑀢𑁄 𑀲𑀼𑀔𑀼𑀫𑀢𑀸 𑀯𑀼𑀢𑁆𑀢𑀸. 𑀅𑀗𑁆𑀕𑀫𑀗𑁆𑀕𑀸𑀦𑀼𑀲𑀸𑀭𑀺𑀦𑁄 𑀭𑀲𑀲𑁆𑀲 𑀲𑀸𑀭𑁄𑀢𑀺 𑀭𑀲𑀳𑀭𑀡𑀻𑀥𑀫𑀦𑀺𑀚𑀸𑀮𑀸𑀦𑀼𑀲𑀸𑀭𑁂𑀦 𑀲𑀭𑀻𑀭𑀸𑀯𑀬𑀯𑁂 𑀅𑀦𑀼𑀧𑁆𑀧𑀯𑀺𑀝𑁆𑀞𑀲𑁆𑀲 𑀆𑀳𑀸𑀭𑀭𑀲𑀲𑁆𑀲 𑀅𑀩𑁆𑀪𑀦𑁆𑀢𑀭𑀸𑀳𑀸𑀭𑀧𑀘𑁆𑀘𑀬𑁄 𑀲𑁆𑀦𑁂𑀳𑁄, 𑀬𑁄 𑀮𑁄𑀓𑁂 𑀭𑀲𑀥𑀸𑀢𑀽𑀢𑀺 𑀯𑀼𑀘𑁆𑀘𑀢𑀺.

𑀉𑀧𑀸𑀤𑀸𑀪𑀸𑀚𑀦𑀻𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑁄𑀉𑀧𑀸𑀤𑀸𑀪𑀸𑀚𑀦𑀻𑀬𑀓𑀣𑀸𑀯𑀡𑁆𑀡𑀦𑀸

𑁬𑁪𑁬. ‘‘𑀏𑀓𑀁 𑀫𑀳𑀸𑀪𑀽𑀢𑀁 𑀧𑀝𑀺𑀘𑁆𑀘 𑀢𑀬𑁄 𑀫𑀳𑀸𑀪𑀽𑀢𑀸 𑀢𑀬𑁄 𑀫𑀳𑀸𑀪𑀽𑀢𑁂 𑀧𑀝𑀺𑀘𑁆𑀘 𑀏𑀓𑀁 𑀫𑀳𑀸𑀪𑀽𑀢’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 (𑀧𑀝𑁆𑀞𑀸. 𑁧.𑁧.𑁫𑁩) 𑀏𑀓𑀁 𑀫𑀳𑀸𑀪𑀽𑀢𑀁 𑀅𑀯𑀲𑁂𑀲𑀫𑀳𑀸𑀪𑀽𑀢𑁂 𑀦𑀺𑀲𑁆𑀲𑀬𑀢𑀺, 𑀢𑁂𑀳𑀺 𑀉𑀧𑀸𑀤𑀸𑀭𑀽𑀧𑁂𑀦 𑀘 𑀦𑀺𑀲𑁆𑀲𑀻𑀬𑀢𑀻𑀢𑀺 𑀆𑀳 ‘‘𑀦𑀺𑀲𑁆𑀲𑀬𑀢𑀺 𑀘 𑀦𑀺𑀲𑁆𑀲𑀻𑀬𑀢𑀺 𑀘𑀸’’𑀢𑀺.

𑁬𑁪𑁭. 𑀫𑀳𑀸𑀪𑀽𑀢𑀸𑀦𑀁 𑀅𑀜𑁆𑀜𑀫𑀜𑁆𑀜𑀸𑀯𑀺𑀚𑀳𑀦𑀢𑁄 𑀏𑀓𑀲𑁆𑀫𑀺𑀫𑁆𑀧𑀺 𑀓𑀮𑀸𑀧𑁂 𑀅𑀦𑁂𑀓𑀁 𑀨𑁄𑀝𑁆𑀞𑀩𑁆𑀩𑀁 𑀅𑀢𑁆𑀣𑀻𑀢𑀺 𑀨𑁄𑀝𑁆𑀞𑀩𑁆𑀩𑀲𑀪𑀸𑀯𑁂𑀲𑀼𑀬𑁂𑀯 𑀅𑀦𑁂𑀓𑁂𑀲𑀼𑀧𑀺 𑀆𑀭𑀫𑁆𑀫𑀡𑁂𑀲𑀼 𑀆𑀧𑀸𑀣𑀕𑀢𑁂𑀲𑀼 𑀆𑀪𑁄𑀕𑀸𑀤𑀺𑀯𑀲𑁂𑀦 𑀏𑀓𑀁𑀬𑁂𑀯 𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀳𑁂𑀢𑀼 𑀳𑁄𑀢𑀻𑀢𑀺 𑀅𑀬𑀁 𑀯𑀺𑀘𑀸𑀭𑁄 𑀤𑀲𑁆𑀲𑀺𑀢𑁄. 𑀇𑀢𑀭𑁂𑀲𑀼𑀧𑀺 𑀧𑀦 𑀬𑀣𑀸𑀬𑁄𑀕𑀁 𑀤𑀲𑁆𑀲𑁂𑀢𑀩𑁆𑀩𑁄. 𑀢𑀢𑁆𑀣 𑀭𑀲𑀸𑀭𑀫𑁆𑀫𑀡𑀁 𑀢𑀸𑀯 𑀇𑀦𑁆𑀤𑁆𑀭𑀺𑀬𑀦𑀺𑀲𑁆𑀲𑀬𑀁 𑀅𑀮𑁆𑀮𑀻𑀬𑀺𑀢𑁆𑀯𑀸 𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑀢𑁄 𑀲𑀢𑀺𑀧𑀺 𑀅𑀦𑁂𑀓𑁂𑀲𑀁 𑀭𑀲𑀸𑀦𑀁 𑀆𑀧𑀸𑀣𑀕𑀫𑀦𑁂 𑀏𑀓𑀲𑁆𑀫𑀺𑀁 𑀔𑀡𑁂 𑀏𑀓𑀧𑁆𑀧𑀓𑀸𑀭𑀁𑀬𑁂𑀯 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀚𑀺𑀯𑁆𑀳𑀸𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀳𑁂𑀢𑀼 𑀳𑁄𑀢𑀺, 𑀢𑀣𑀸 𑀕𑀦𑁆𑀥𑀸𑀭𑀫𑁆𑀫𑀡𑀁. 𑀭𑀽𑀧𑀲𑀤𑁆𑀤𑀸𑀭𑀫𑁆𑀫𑀡𑀸𑀦𑀺 𑀧𑀦 𑀇𑀦𑁆𑀤𑁆𑀭𑀺𑀬𑀦𑀺𑀲𑁆𑀲𑀬𑀁 𑀅𑀲𑀫𑁆𑀧𑀢𑁆𑀯𑀸𑀯 𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑀢𑁄 𑀬𑁄𑀕𑁆𑀬𑀤𑁂𑀲𑁂 𑀅𑀯𑀝𑁆𑀞𑀺𑀢𑀸𑀦𑀺 𑀬𑀢𑁆𑀢𑀓𑀸𑀦𑀺 𑀲𑀳𑀓𑀸𑀭𑀻𑀧𑀘𑁆𑀘𑀬𑀦𑁆𑀢𑀭𑀕𑀢𑀁 𑀉𑀧𑀓𑀸𑀭𑀁 𑀮𑀪𑀦𑁆𑀢𑀺, 𑀢𑀢𑁆𑀢𑀓𑀸𑀦𑀺 𑀏𑀓𑀲𑁆𑀫𑀺𑀁 𑀔𑀡𑁂 𑀏𑀓𑀚𑁆𑀛𑀁 𑀆𑀭𑀫𑁆𑀫𑀡𑀁 𑀦 𑀳𑁄𑀦𑁆𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑀸𑀦𑀺. 𑀢𑀣𑀸 𑀳𑀺 𑀲𑀤𑁆𑀤𑁄 𑀦𑀺𑀕𑁆𑀖𑁄𑀲𑀸𑀤𑀺𑀓𑁄 𑀅𑀦𑁂𑀓𑀓𑀮𑀸𑀧𑀕𑀢𑁄 𑀢𑀣𑀸 𑀯𑀡𑁆𑀡𑁄𑀧𑀺 𑀲𑀺𑀯𑀺𑀓𑀼𑀩𑁆𑀩𑀳𑀦𑀦𑀺𑀬𑀸𑀫𑁂𑀦 𑀏𑀓𑀚𑁆𑀛𑀁 𑀆𑀭𑀫𑁆𑀫𑀡𑀁 𑀳𑁄𑀢𑀻𑀢𑀺. 𑀏𑀢𑁆𑀣𑀸𑀧𑀺 𑀘 𑀆𑀪𑀼𑀚𑀺𑀢𑀯𑀲𑁂𑀦 𑀆𑀭𑀫𑁆𑀫𑀡𑀸𑀥𑀺𑀫𑀢𑁆𑀢𑀢𑀸𑀯𑀲𑁂𑀦 𑀅𑀦𑁂𑀓𑀓𑀮𑀸𑀧𑀲𑀦𑁆𑀦𑀺𑀧𑀸𑀢𑁂𑀧𑀺 𑀓𑀢𑁆𑀣𑀘𑀺 𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺 𑀳𑁄𑀢𑀺𑀬𑁂𑀯. 𑀧𑀲𑀸𑀤𑀸𑀥𑀺𑀫𑀢𑁆𑀢𑀢𑀸 𑀧𑀺𑀢𑁆𑀢𑀸𑀤𑀺𑀯𑀺𑀩𑀦𑁆𑀥𑀸𑀪𑀸𑀯𑁂𑀦 𑀧𑀲𑀸𑀤𑀲𑁆𑀲 𑀢𑀺𑀓𑁆𑀔𑀢𑀸. 𑀓𑀣𑀁 𑀧𑀦 𑀘𑀺𑀢𑁆𑀢𑀲𑁆𑀲𑀸𑀢𑀺 𑀘𑀺𑀢𑁆𑀢𑀲𑀸𑀫𑀜𑁆𑀜𑀢𑁄 𑀏𑀓𑀢𑁆𑀢𑀦𑀬𑀯𑀲𑁂𑀦 𑀧𑀼𑀘𑁆𑀙𑀢𑀺.

𑁬𑁫𑁧. 𑀢𑀸𑀤𑀺𑀲𑀸𑀬𑀸𑀢𑀺 𑀬𑀸 𑀧𑀘𑀼𑀭𑀚𑀦𑀲𑁆𑀲 𑀅𑀢𑁆𑀣𑀻𑀢𑀺𑀧𑀺 𑀦 𑀕𑀳𑀺𑀢𑀸. 𑀲𑀦𑁆𑀢𑀻 𑀲𑀫𑀸𑀦𑀸. 𑀏𑀯𑀦𑁆𑀢𑀺 𑀬𑀣𑀸𑀲𑀲𑀫𑁆𑀪𑀸𑀭𑀼𑀤𑀓𑀁 𑀲𑀲𑀫𑁆𑀪𑀸𑀭𑀧𑀣𑀯𑀺𑀬𑀸 𑀆𑀩𑀦𑁆𑀥𑀓𑀁, 𑀏𑀯𑀁 𑀧𑀭𑀫𑀢𑁆𑀣𑀼𑀤𑀓𑀁 𑀧𑀭𑀫𑀢𑁆𑀣𑀧𑀣𑀯𑀺𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀢𑀤𑀦𑀼𑀭𑀽𑀧𑀧𑀘𑁆𑀘𑀬𑁂𑀳𑀻𑀢𑀺 𑀅𑀢𑁆𑀢𑀦𑁄 𑀆𑀩𑀦𑁆𑀥𑀦𑀸𑀦𑀼𑀕𑀼𑀡𑁂𑀳𑀺 𑀆𑀩𑀦𑁆𑀥𑀺𑀬𑀫𑀸𑀦𑁂𑀳𑀺 𑀲𑀦𑁆𑀥𑀸𑀭𑀡𑀸𑀤𑀺𑀓𑀺𑀘𑁆𑀘𑁂𑀳𑀺 𑀧𑀼𑀭𑀺𑀫𑁂𑀳𑀺 𑀘 𑀧𑀣𑀯𑀻𑀆𑀤𑀻𑀳𑀺. 𑀅𑀨𑀼𑀲𑀺𑀢𑁆𑀯𑀸 𑀧𑀢𑀺𑀝𑁆𑀞𑀸 𑀳𑁄𑀢𑀺, 𑀅𑀨𑀼𑀲𑀺𑀢𑁆𑀯𑀸 𑀆𑀩𑀦𑁆𑀥𑀢𑀻𑀢𑀺 𑀇𑀫𑀺𑀦𑀸 𑀨𑀼𑀲𑀺𑀢𑀩𑁆𑀩𑀨𑀼𑀲𑀦𑀓𑀪𑀸𑀯𑁄 𑀆𑀧𑁄𑀥𑀸𑀢𑀼𑀬𑀁 𑀦𑀢𑁆𑀣𑀻𑀢𑀺 𑀨𑁄𑀝𑁆𑀞𑀩𑁆𑀩𑀯𑀲𑁂𑀦 𑀉𑀪𑀬𑀥𑀫𑁆𑀫𑀢𑀁 𑀆𑀳. 𑀅𑀜𑁆𑀜𑀫𑀜𑁆𑀜𑀁 𑀦𑀺𑀲𑁆𑀲𑀬𑀢𑀸 𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀢𑀸. 𑀅𑀣 𑀯𑀸 𑀅𑀜𑁆𑀜𑀫𑀜𑁆𑀜𑀢𑀸 𑀘 𑀦𑀺𑀲𑁆𑀲𑀬𑀢𑀸 𑀘 𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀢𑀸. 𑀬𑀤𑀺 𑀨𑁄𑀝𑁆𑀞𑀩𑁆𑀩𑀸𑀨𑁄𑀝𑁆𑀞𑀩𑁆𑀩𑀥𑀸𑀢𑀽𑀦𑀁 𑀨𑁄𑀝𑁆𑀞𑀩𑁆𑀩𑀪𑀸𑀯𑁂𑀦 𑀯𑀺𑀦𑀸 𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀢𑀸, 𑀧𑀣𑀯𑀻𑀆𑀤𑀻𑀦𑀁 𑀓𑀓𑁆𑀔𑀴𑀸𑀤𑀺𑀲𑀪𑀸𑀯𑁄 𑀏𑀯 𑀨𑁄𑀝𑁆𑀞𑀩𑁆𑀩𑀪𑀸𑀯𑁄𑀢𑀺 𑀢𑀩𑁆𑀩𑀺𑀭𑀳𑁂𑀦 𑀓𑀣𑀁 𑀢𑁂𑀲𑀁 𑀆𑀧𑁄𑀥𑀸𑀢𑀼𑀬𑀸 𑀦𑀺𑀲𑁆𑀲𑀬𑀸𑀤𑀺𑀪𑀸𑀯𑁄𑀢𑀺 𑀆𑀳 ‘‘𑀅𑀯𑀺𑀦𑀺𑀩𑁆𑀪𑁄𑀕𑀯𑀼𑀢𑁆𑀢𑀻𑀲𑀽’’𑀢𑀺𑀆𑀤𑀺. 𑀅𑀜𑁆𑀜𑀫𑀜𑁆𑀜𑀧𑀘𑁆𑀘𑀬𑀪𑀽𑀢𑁂𑀲𑀽𑀢𑀺 𑀏𑀢𑁂𑀦 𑀉𑀧𑀸𑀤𑀸𑀭𑀽𑀧𑀁 𑀦𑀺𑀯𑀢𑁆𑀢𑁂𑀢𑀺. 𑀅𑀣 𑀯𑀸 𑀧𑀼𑀩𑁆𑀩𑁂 𑀅𑀝𑁆𑀞𑀓𑀣𑀸𑀥𑀺𑀧𑁆𑀧𑀸𑀬𑁂 𑀞𑀢𑁆𑀯𑀸 𑀨𑁄𑀝𑁆𑀞𑀩𑁆𑀩𑀸𑀨𑁄𑀝𑁆𑀞𑀩𑁆𑀩𑀥𑀸𑀢𑀽𑀦𑀁 𑀯𑀺𑀲𑀺𑀝𑁆𑀞𑀁 𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀢𑀁 𑀯𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑁂 𑀞𑀢𑁆𑀯𑀸 𑀅𑀯𑀺𑀲𑁂𑀲𑁂𑀦 𑀢𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀯𑀺𑀦𑀺𑀩𑁆𑀪𑁄𑀕𑀯𑀼𑀢𑁆𑀢𑀻𑀲𑀽’’𑀢𑀺𑀆𑀤𑀺. 𑀢𑀁𑀬𑁂𑀯 𑀅𑀯𑀺𑀲𑀺𑀝𑁆𑀞𑀁 𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀢𑀁 𑀤𑀴𑁆𑀳𑀁 𑀓𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀸𑀧𑀺 𑀲𑀳𑀚𑀸𑀢𑁂𑀲𑀽’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀅𑀨𑀼𑀲𑀦𑀁 𑀢𑀸𑀯 𑀏𑀓𑀓𑀮𑀸𑀧𑀕𑀢𑀢𑁆𑀢𑀸 𑀦 𑀯𑀺𑀘𑀸𑀭𑁂𑀢𑀩𑁆𑀩𑀁, 𑀨𑀼𑀲𑀦𑀁 𑀧𑀦 𑀓𑀣𑀦𑁆𑀢𑀺? 𑀏𑀓𑀓𑀮𑀸𑀧𑀕𑀢𑀢𑁆𑀢𑀸 𑀏𑀯. 𑀯𑀺𑀲𑀼𑀁 𑀲𑀺𑀤𑁆𑀥𑀸𑀦𑀁𑀬𑁂𑀯 𑀳𑀺 𑀯𑀺𑀲𑀬𑀫𑀳𑀸𑀪𑀽𑀢𑀸𑀦𑀁 𑀓𑀸𑀬𑀧𑁆𑀧𑀲𑀸𑀤𑀦𑀺𑀲𑁆𑀲𑀬𑀪𑀽𑀢𑁂𑀲𑀼 𑀨𑀼𑀲𑀦𑀁 𑀤𑀺𑀲𑁆𑀲𑀢𑀺.

𑀛𑀸𑀬𑀢𑀻𑀢𑀺 𑀧𑀭𑀺𑀧𑀘𑁆𑀘𑀢𑀺. 𑀦 𑀉𑀡𑁆𑀳𑀸 𑀳𑀼𑀢𑁆𑀯𑀸𑀢𑀺 𑀏𑀢𑀲𑁆𑀲 𑀉𑀡𑁆𑀳𑀲𑀪𑀸𑀯𑀸 𑀳𑀼𑀢𑁆𑀯𑀸𑀢𑀺 𑀅𑀬𑀫𑀢𑁆𑀣𑁄𑀢𑀺 𑀓𑀢𑁆𑀯𑀸 ‘‘𑀢𑁂𑀚𑁄𑀲𑀪𑀸𑀯𑀢𑀁𑀬𑁂𑀯 𑀧𑀝𑀺𑀓𑁆𑀔𑀺𑀧𑀢𑀻’’𑀢𑀺 𑀯𑀼𑀢𑁆𑀢𑀁. 𑀉𑀡𑁆𑀳𑀧𑀝𑀺𑀧𑀓𑁆𑀔𑀢𑁆𑀢𑀸 𑀲𑀻𑀢𑀲𑁆𑀲 𑀉𑀡𑁆𑀳𑀢𑀸𑀬 𑀧𑀝𑀺𑀓𑁆𑀔𑁂𑀧𑁂 𑀲𑀻𑀢𑀢𑀸𑀲𑀗𑁆𑀓𑀸 𑀲𑀺𑀬𑀸𑀢𑀺 𑀆𑀳 ‘‘𑀦 𑀲𑀻𑀢𑀢𑁆𑀢𑀁 𑀅𑀦𑀼𑀚𑀸𑀦𑀸𑀢𑀻’’𑀢𑀺. 𑀢𑁂𑀚𑁄𑀲𑀪𑀸𑀕𑀢𑀁𑀬𑁂𑀯 𑀯𑀸 𑀲𑀻𑀢𑀢𑀸𑀬𑀧𑀺 𑀤𑀲𑁆𑀲𑁂𑀢𑀼𑀁 ‘‘𑀦 𑀲𑀻𑀢𑀢𑁆𑀢𑀁 𑀅𑀦𑀼𑀚𑀸𑀦𑀸𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀢𑁂𑀚𑁄 𑀏𑀯 𑀳𑀺 𑀲𑀻𑀢’’𑀦𑁆𑀢𑀺. 𑀫𑀦𑁆𑀤𑁂 𑀳𑀺 𑀉𑀡𑁆𑀳𑀪𑀸𑀯𑁂 𑀲𑀻𑀢𑀩𑀼𑀤𑁆𑀥𑀻𑀢𑀺 𑀢𑁂𑀚𑁄 𑀏𑀯 𑀳𑀺 𑀲𑀻𑀢𑀁. 𑀓𑀣𑀁 𑀧𑀦𑁂𑀢𑀁 𑀯𑀺𑀜𑁆𑀜𑀸𑀬𑀢𑀻𑀢𑀺? 𑀲𑀻𑀢𑀩𑀼𑀤𑁆𑀥𑀺𑀬𑀸 𑀅𑀯𑀯𑀢𑁆𑀣𑀺𑀢𑀪𑀸𑀯𑀢𑁄 𑀧𑀸𑀭𑀸𑀧𑀸𑀭𑀁 𑀯𑀺𑀬. 𑀢𑀣𑀸 𑀳𑀺 𑀆𑀢𑀧𑁂 𑀞𑀢𑁆𑀯𑀸 𑀙𑀸𑀬𑀁 𑀧𑀯𑀺𑀝𑁆𑀞𑀸𑀦𑀁 𑀲𑀻𑀢𑀩𑀼𑀤𑁆𑀥𑀺 𑀳𑁄𑀢𑀺, 𑀢𑀢𑁆𑀣𑁂𑀯 𑀧𑀣𑀯𑀻𑀕𑀩𑁆𑀪𑀢𑁄 𑀦𑀺𑀕𑁆𑀕𑀢𑀸𑀦𑀁 𑀉𑀡𑁆𑀳𑀩𑀼𑀤𑁆𑀥𑀻𑀢𑀺. 𑀬𑀤𑀺 𑀢𑁂𑀚𑁄𑀬𑁂𑀯 𑀲𑀻𑀢𑀁, 𑀉𑀡𑁆𑀳𑀪𑀸𑀯𑁂𑀦 𑀲𑀤𑁆𑀥𑀺𑀁 𑀲𑀻𑀢𑀪𑀸𑀯𑁄𑀧𑀺 𑀏𑀓𑀲𑁆𑀫𑀺𑀁 𑀓𑀮𑀸𑀧𑁂 𑀉𑀧𑀮𑀩𑁆𑀪𑁂𑀬𑁆𑀬𑀸𑀢𑀺 𑀆𑀳 ‘‘𑀲𑀻𑀢𑀼𑀡𑁆𑀳𑀸𑀦𑀜𑁆𑀘𑀸’’𑀢𑀺𑀆𑀤𑀺. 𑀉𑀡𑁆𑀳𑀲𑀻𑀢𑀓𑀮𑀸𑀧𑁂𑀲𑀼 𑀲𑀻𑀢𑀼𑀡𑁆𑀳𑀸𑀦𑀁 𑀅𑀧𑁆𑀧𑀯𑀢𑁆𑀢𑀺. 𑀤𑁆𑀯𑀺𑀦𑁆𑀦𑀁…𑀧𑁂… 𑀬𑀼𑀚𑁆𑀚𑀢𑀺, 𑀦 𑀆𑀧𑁄𑀥𑀸𑀢𑀼𑀯𑀸𑀬𑁄𑀥𑀸𑀢𑀽𑀦𑀁 𑀲𑀻𑀢𑀪𑀸𑀯𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀧𑁄𑀥𑀸𑀢𑀼𑀬𑀸 𑀳𑀺 𑀯𑀸𑀬𑁄𑀥𑀸𑀢𑀼𑀬𑀸 𑀲𑀻𑀢𑀪𑀸𑀯𑁂 𑀉𑀡𑁆𑀳𑀪𑀸𑀯𑁂𑀦 𑀲𑀤𑁆𑀥𑀺𑀁 𑀏𑀓𑀲𑁆𑀫𑀺𑀁 𑀓𑀮𑀸𑀧𑁂 𑀲𑀻𑀢𑀪𑀸𑀯𑁄 𑀮𑀩𑁆𑀪𑁂𑀬𑁆𑀬, 𑀦 𑀧𑀦 𑀮𑀩𑁆𑀪𑀢𑀺. 𑀦 𑀘𑁂𑀢𑁆𑀣 𑀆𑀧𑁄𑀥𑀸𑀢𑀼𑀅𑀥𑀺𑀓𑁂 𑀯𑀸𑀬𑁄𑀥𑀸𑀢𑀼𑀅𑀥𑀺𑀓𑁂 𑀯𑀸 𑀓𑀮𑀸𑀧𑁂 𑀲𑀻𑀢𑀪𑀸𑀯𑁄𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁 𑀢𑀸𑀤𑀺𑀲𑁂𑀧𑀺 𑀓𑀢𑁆𑀣𑀘𑀺 𑀓𑀮𑀸𑀧𑁂 𑀅𑀮𑀩𑁆𑀪𑀫𑀸𑀦𑀢𑁆𑀢𑀸 𑀲𑀻𑀢𑀪𑀸𑀯𑀲𑁆𑀲𑀸𑀢𑀺. 𑀔𑀭𑀢𑀸𑀤𑀺𑀲𑀪𑀸𑀯𑀸𑀥𑀺𑀓𑀲𑁆𑀲 𑀪𑀽𑀢𑀲𑀗𑁆𑀖𑀸𑀢𑀲𑁆𑀲 𑀤𑀯𑀢𑀸𑀤𑀺𑀲𑀪𑀸𑀯𑀸𑀥𑀺𑀓𑀢𑀸𑀧𑀢𑁆𑀢𑀺 𑀪𑀸𑀯𑀜𑁆𑀜𑀣𑀢𑁆𑀢𑀁. 𑀢𑀁 𑀧𑀦 𑀬𑀣𑀸 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀘𑁆𑀘…𑀧𑁂… 𑀧𑁆𑀧𑀢𑁆𑀢𑀻’’𑀢𑀺 𑀆𑀳.

𑁬𑁫𑁨. 𑀏𑀓𑀦𑁆𑀢𑀦𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀏𑀓𑀦𑁆𑀢𑀅𑀦𑀼𑀧𑀸𑀤𑀺𑀦𑁆𑀦𑀼𑀧𑀸𑀤𑀸𑀦𑀺𑀬𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀧𑀼𑀭𑀺𑀫𑀸𑀦𑀫𑁆𑀧𑀻𑀢𑀺 ‘‘𑀬𑀁 𑀯𑀸 𑀧𑀦𑀜𑁆𑀜𑀫𑁆𑀧𑀻’’𑀢𑀺 𑀏𑀢𑀲𑁆𑀫𑀸 𑀯𑀘𑀦𑀢𑁄 𑀧𑀼𑀭𑀺𑀫𑀸𑀦𑀁 𑀅𑀦𑀼𑀧𑀸𑀤𑀺𑀦𑁆𑀦𑀸𑀦𑀁 𑀲𑀤𑁆𑀤𑀸𑀬𑀢𑀦𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀆𑀤𑀻𑀦𑀁 𑀦𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀜𑁆𑀘 𑀘𑀓𑁆𑀔𑀸𑀬𑀢𑀦𑀲𑁄𑀢𑀸𑀬𑀢𑀦𑀸𑀤𑀻𑀦𑀁. 𑀦𑀓𑀫𑁆𑀫𑀲𑁆𑀲𑀓𑀢𑀢𑁆𑀢𑀸𑀪𑀸𑀯𑀸𑀤𑀺𑀓𑀦𑁆𑀢𑀺 𑀦𑀓𑀫𑁆𑀫𑀲𑁆𑀲𑀓𑀢𑀢𑁆𑀢𑀸𑀪𑀸𑀯𑀁 𑀦𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀪𑀸𑀯𑀦𑁆𑀢𑀺 𑀏𑀯𑀫𑀸𑀤𑀺𑀓𑀁. 𑀏𑀓𑀦𑁆𑀢𑀸𑀓𑀫𑁆𑀫𑀚𑀸𑀤𑀻𑀲𑀽𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀏𑀓𑀦𑁆𑀢𑀸𑀘𑀺𑀢𑁆𑀢𑀚𑀁 𑀕𑀬𑁆𑀳𑀢𑀺. 𑀢𑀸 𑀚𑀭𑀢𑀸𑀅𑀦𑀺𑀘𑁆𑀘𑀢𑀸. 𑀅𑀦𑁂𑀓𑀦𑁆𑀢𑁂𑀲𑀼 𑀦 𑀕𑀳𑀺𑀢𑀸𑀢𑀺 𑀏𑀓𑀦𑁆𑀢𑀢𑁄 𑀅𑀓𑀫𑁆𑀫𑀚𑁂𑀲𑀼 𑀲𑀤𑁆𑀤𑀸𑀬𑀢𑀦𑀸𑀤𑀻𑀲𑀼 𑀅𑀘𑀺𑀢𑁆𑀢𑀚𑁂𑀲𑀼 𑀘 𑀘𑀓𑁆𑀔𑀸𑀬𑀢𑀦𑀸𑀤𑀻𑀲𑀼 𑀕𑀳𑁂𑀢𑁆𑀯𑀸 𑀘𑀢𑀼𑀲𑀫𑀼𑀝𑁆𑀞𑀸𑀦𑀺𑀓𑀢𑁆𑀢𑀸 𑀅𑀦𑁂𑀓𑀦𑁆𑀢𑁂𑀲𑀼 𑀭𑀽𑀧𑀸𑀬𑀢𑀦𑀸𑀤𑀻𑀲𑀼 𑀦 𑀕𑀳𑀺𑀢𑀸𑀢𑀺 𑀅𑀢𑁆𑀣𑁄.

𑁬𑁬𑁬. 𑀅𑀦𑀺𑀧𑁆𑀨𑀦𑁆𑀦𑀢𑁆𑀢𑀸𑀢𑀺 𑀅𑀜𑁆𑀜𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀲𑀪𑀸𑀯𑀢𑁄 𑀅𑀲𑀺𑀤𑁆𑀥𑀢𑁆𑀢𑀁. 𑀢𑀲𑁆𑀲𑀸𑀢𑀺 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀲𑁆𑀲.

𑀦𑁄𑀉𑀧𑀸𑀤𑀸𑀪𑀸𑀚𑀦𑀻𑀬𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀢𑀼𑀓𑁆𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁬𑁬. ‘‘𑀲𑀩𑁆𑀩𑀁 𑀭𑀽𑀧𑀁 𑀫𑀦𑀲𑀸 𑀯𑀺𑀜𑁆𑀜𑀸𑀢’’𑀦𑁆𑀢𑀺 𑀯𑀘𑀦𑀢𑁄 𑀬𑀤𑀺 𑀯𑀺𑀜𑁆𑀜𑀸𑀢𑀢𑁄 𑀅𑀜𑁆𑀜𑀁 𑀤𑀺𑀝𑁆𑀞𑀸𑀤𑀺 𑀦 𑀳𑁄𑀢𑀻𑀢𑀺 ‘‘𑀓𑀢𑀫𑀁 𑀢𑀁 𑀭𑀽𑀧𑀁 𑀤𑀺𑀝𑁆𑀞’’𑀦𑁆𑀢𑀺𑀆𑀤𑀺𑀦𑀸 𑀧𑀼𑀘𑁆𑀙𑀸 𑀦 𑀓𑀢𑀸, 𑀏𑀯𑀁 𑀲𑀦𑁆𑀢𑁂 𑀘𑀢𑀼𑀓𑁆𑀓𑀪𑀸𑀯𑁄 𑀓𑀣𑀦𑁆𑀢𑀺 𑀅𑀦𑀼𑀬𑁄𑀕𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀤𑀲𑁆𑀲𑀦𑀸𑀤𑀺𑀕𑁆𑀕𑀳𑀡𑀯𑀺𑀲𑁂𑀲𑀢𑁄’’𑀢𑀺. 𑀤𑀲𑁆𑀲𑀦𑀁 𑀲𑀯𑀦𑀁 𑀫𑀺𑀦𑀺𑀢𑁆𑀯𑀸 𑀚𑀸𑀦𑀦𑀁 𑀯𑀺𑀚𑀸𑀦𑀦𑀜𑁆𑀘𑀸𑀢𑀺 𑀏𑀢𑀲𑁆𑀫𑀸 𑀤𑀲𑁆𑀲𑀦𑀸𑀤𑀺𑀕𑁆𑀕𑀳𑀡𑀯𑀺𑀲𑁂𑀲𑀢𑁄. 𑀏𑀢𑁂𑀦 𑀕𑀸𑀳𑀓𑀪𑁂𑀤𑁂𑀦 𑀕𑀳𑁂𑀢𑀩𑁆𑀩𑀪𑁂𑀤𑁄𑀢𑀺 𑀤𑀲𑁆𑀲𑁂𑀢𑀺. 𑀇𑀤𑀸𑀦𑀺 𑀲𑀫𑀼𑀔𑁂𑀦𑀧𑀺 𑀕𑀳𑁂𑀢𑀩𑁆𑀩𑀪𑁂𑀤𑁄 𑀮𑀩𑁆𑀪𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀤𑀺𑀝𑁆𑀞𑀸…𑀧𑁂… 𑀪𑀸𑀯𑀢𑁄’’𑀢𑀺 𑀯𑀼𑀢𑁆𑀢𑀁.

𑀧𑀜𑁆𑀘𑀓𑀦𑀺𑀤𑁆𑀤𑁂𑀲𑀯𑀡𑁆𑀡𑀦𑀸

𑁯𑁬𑁯. 𑀢𑀤𑀺𑀤𑀁 𑀦𑀬𑀓𑀭𑀡𑀁 𑀙𑀩𑁆𑀩𑀺𑀥𑀸𑀤𑀻𑀲𑀼 𑀢𑀻𑀲𑀼 𑀲𑀗𑁆𑀕𑀳𑁂𑀲𑀼 𑀬𑁄𑀚𑀺𑀢𑀁.

𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸

𑁯𑁭𑁫. 𑀏𑀓𑀦𑁆𑀢𑀢𑁄 𑀦𑀻𑀯𑀭𑀡𑀢𑁆𑀢𑀸 𑀫𑀺𑀤𑁆𑀥𑀲𑁆𑀲 ‘‘𑀦𑀢𑁆𑀣𑀺 𑀦𑀻𑀯𑀭𑀡𑀸’’𑀢𑀺 𑀯𑀘𑀦𑁂𑀦 𑀕𑀳𑀡𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀫𑀺𑀤𑁆𑀥𑀲𑁆𑀲𑀧𑀺 𑀦𑀻𑀯𑀭𑀡𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀦 𑀘 𑀭𑀽𑀧𑀁 𑀧𑀳𑀸𑀢𑀩𑁆𑀩𑀁 𑀦𑀺𑀧𑁆𑀧𑀭𑀺𑀬𑀸𑀬𑀧𑁆𑀧𑀳𑀸𑀦𑀲𑁆𑀲 𑀇𑀥 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀏𑀢𑁆𑀣 𑀓𑁂𑀘𑀺 ‘‘𑀦𑀸𑀫𑀓𑀸𑀬𑀭𑀽𑀧𑀓𑀸𑀬𑀕𑁂𑀮𑀜𑁆𑀜𑀲𑀪𑀸𑀯𑀢𑁄 𑀤𑀼𑀯𑀺𑀥𑀁 𑀫𑀺𑀤𑁆𑀥𑀁. 𑀢𑀢𑁆𑀣 𑀧𑀼𑀭𑀺𑀫𑀁 ‘𑀦𑀻𑀯𑀭𑀡𑀸’𑀢𑀺 𑀯𑀘𑀦𑁂𑀦 𑀯𑀼𑀢𑁆𑀢𑀁, 𑀇𑀢𑀭𑀁 𑀭𑀽𑀧𑀲𑀪𑀸𑀯’’𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀢𑁆𑀣 𑀬𑀁 𑀢𑀁 𑀅𑀭𑀽𑀧𑀢𑁄 𑀅𑀜𑁆𑀜𑀁 𑀫𑀺𑀤𑁆𑀥𑀁 𑀧𑀭𑀺𑀓𑀧𑁆𑀧𑀺𑀢𑀁, 𑀢𑀫𑁆𑀧𑀺 𑀦𑀻𑀯𑀭𑀡𑀁 𑀫𑀺𑀤𑁆𑀥𑀲𑀪𑀸𑀯𑀢𑁄 𑀇𑀢𑀭𑀁 𑀫𑀺𑀤𑁆𑀥𑀁 𑀯𑀺𑀬𑀸𑀢𑀺 𑀧𑀭𑀺𑀓𑀧𑁆𑀧𑀺𑀢𑀫𑀺𑀤𑁆𑀥𑀲𑁆𑀲𑀧𑀺 𑀦 𑀲𑀓𑁆𑀓𑀸 𑀦𑀻𑀯𑀭𑀡𑀪𑀸𑀯𑀁 𑀦𑀺𑀯𑀢𑁆𑀢𑁂𑀢𑀼𑀦𑁆𑀢𑀺 𑀢𑁂𑀲𑀁 𑀯𑀘𑀦𑀲𑁆𑀲 𑀦𑀻𑀯𑀭𑀡𑀧𑁆𑀧𑀳𑀸𑀦𑀯𑀘𑀦𑁂𑀦 𑀯𑀺𑀭𑁄𑀥𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀘 𑀭𑀽𑀧𑀓𑀸𑀬’’𑀦𑁆𑀢𑀺𑀆𑀤𑀺𑀫𑀸𑀳. 𑀅𑀣 𑀯𑀸 𑀔𑀻𑀡𑀸𑀲𑀯𑀸𑀦𑀁 𑀲𑁄𑀧𑁆𑀧𑀦𑀲𑀪𑀸𑀯𑀢𑁄 𑀲𑁄𑀧𑁆𑀧𑀲𑁆𑀲 𑀘 𑀫𑀺𑀤𑁆𑀥𑀳𑁂𑀢𑀼𑀓𑀢𑁆𑀢𑀸 𑀅𑀢𑁆𑀣𑀺 𑀫𑀺𑀤𑁆𑀥𑀭𑀽𑀧𑀦𑁆𑀢𑀺 𑀯𑀸𑀤𑀁 𑀲𑀦𑁆𑀥𑀸𑀬 𑀉𑀢𑁆𑀢𑀭𑀫𑀸𑀳 ‘‘𑀦 𑀘 𑀭𑀽𑀧𑀓𑀸𑀬𑀕𑁂𑀮𑀜𑁆𑀜’’𑀦𑁆𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀫𑀺𑀤𑁆𑀥𑀫𑁂𑀯 𑀲𑁄𑀧𑁆𑀧𑀳𑁂𑀢𑀽𑀢𑀺 𑀦𑀸𑀬𑀁 𑀅𑀯𑀥𑀸𑀭𑀡𑀸 𑀇𑀘𑁆𑀙𑀺𑀢𑀸, 𑀲𑁄𑀧𑁆𑀧𑀳𑁂𑀢𑀼 𑀏𑀯 𑀫𑀺𑀤𑁆𑀥𑀦𑁆𑀢𑀺 𑀧𑀦 𑀇𑀘𑁆𑀙𑀺𑀢𑀸𑀢𑀺 𑀫𑀺𑀤𑁆𑀥𑀢𑁄 𑀅𑀜𑁆𑀜𑁄𑀧𑀺 𑀲𑁄𑀧𑁆𑀧𑀳𑁂𑀢𑀼 𑀅𑀢𑁆𑀣𑀺, 𑀓𑁄 𑀧𑀦 𑀲𑁄? 𑀭𑀽𑀧𑀓𑀸𑀬𑀕𑁂𑀮𑀜𑁆𑀜𑀁. 𑀦 𑀘 𑀭𑀽𑀧…𑀧𑁂… 𑀯𑀘𑀦𑀢𑁄𑀢𑀺 𑀬𑁄𑀚𑀦𑀸 𑀤𑀝𑁆𑀞𑀩𑁆𑀩𑀸.

𑀯𑀘𑀻𑀖𑁄𑀲𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀳𑀼𑀁𑀓𑀸𑀭𑀸𑀤𑀺𑀲𑀤𑁆𑀤𑁄 𑀲𑀗𑁆𑀕𑀬𑁆𑀳𑀢𑀺. 𑀅𑀗𑁆𑀕𑀼𑀮𑀺𑀨𑁄𑀝𑀸𑀤𑀺𑀲𑀤𑁆𑀤𑁄 𑀉𑀢𑀼𑀲𑀫𑀼𑀝𑁆𑀞𑀸𑀦𑁄𑀬𑁂𑀯, 𑀘𑀺𑀢𑁆𑀢𑀧𑀘𑁆𑀘𑀬𑁄 𑀧𑀦 𑀳𑁄𑀢𑀺. 𑀭𑀽𑀧𑀪𑀸𑀯𑀫𑀢𑁆𑀢𑀸𑀦𑀻𑀢𑀺 𑀚𑀭𑀸𑀫𑀭𑀡𑀲𑀪𑀸𑀯𑀸𑀦𑀁 𑀭𑀽𑀧𑀸𑀦𑀁 𑀢𑀁𑀥𑀫𑁆𑀫𑀫𑀢𑁆𑀢𑀸𑀦𑀺, 𑀢𑀢𑁄 𑀏𑀯 𑀦 𑀚𑀸𑀢𑀺𑀆𑀤𑀺𑀥𑀫𑁆𑀫𑀯𑀦𑁆𑀢𑀸𑀦𑀻𑀢𑀺 𑀆𑀳 ‘‘𑀦 𑀲𑀬𑀁 𑀲𑀪𑀸𑀯𑀯𑀦𑁆𑀢𑀸𑀦𑀻’’𑀢𑀺. 𑀬𑀣𑀸 𑀚𑀭𑀸 𑀅𑀦𑀺𑀘𑁆𑀘𑀢𑀸 𑀘 𑀭𑀽𑀧𑀪𑀸𑀯𑀫𑀢𑁆𑀢𑀁, 𑀏𑀯𑀁 𑀚𑀸𑀢𑀺𑀧𑀻𑀢𑀺 𑀚𑀸𑀢𑀺𑀬𑀸 𑀭𑀽𑀧𑀪𑀸𑀯𑀫𑀢𑁆𑀢𑀢𑀸𑀬 𑀉𑀧𑀲𑀁𑀳𑀭𑀡𑀢𑁆𑀣𑁄 𑀢𑀣𑀸-𑀲𑀤𑁆𑀤𑁄.

𑀢𑁂𑀲𑀁 𑀭𑀽𑀧𑀥𑀫𑁆𑀫𑀸𑀦𑀁. 𑀲𑀗𑁆𑀔𑀸𑀢𑀸𑀤𑀺-𑀲𑀤𑁆𑀤𑁄 𑀯𑀺𑀬 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀢-𑀲𑀤𑁆𑀤𑁄𑀧𑀺 𑀯𑀢𑁆𑀢𑀫𑀸𑀦𑀓𑀸𑀮𑀺𑀓𑁄𑀧𑀺 𑀳𑁄𑀢𑀻𑀢𑀺 ‘‘𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀬𑀫𑀸𑀦𑀥𑀫𑁆𑀫𑀓𑁆𑀔𑀡𑀲𑁆𑀫𑀺’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀯𑀫𑀧𑀻𑀢𑀺 𑀬𑀤𑀺𑀧𑀺 𑀚𑀺𑀭𑀡𑀪𑀺𑀚𑁆𑀚𑀦𑀪𑀸𑀯𑀸 𑀚𑀺𑀭𑀡𑀸𑀤𑀺𑀲𑀪𑀸𑀯𑀸𑀦𑀁 𑀥𑀫𑁆𑀫𑀸𑀦𑀁 𑀚𑀦𑀓𑀧𑀘𑁆𑀘𑀬𑀓𑀺𑀘𑁆𑀘𑀸𑀦𑀼𑀪𑀸𑀯𑀓𑁆𑀔𑀡𑁂 𑀅𑀪𑀸𑀯𑀢𑁄 𑀢𑀧𑁆𑀧𑀘𑁆𑀘𑀬𑀪𑀸𑀯𑀯𑁄𑀳𑀸𑀭𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀺𑀯𑁄𑀳𑀸𑀭𑀜𑁆𑀘 𑀦 𑀮𑀪𑀦𑁆𑀢𑀺, 𑀏𑀯𑀫𑀧𑀺 𑀢𑁂𑀲𑀁 𑀉𑀧𑀸𑀤𑀺𑀦𑁆𑀦𑀢𑀸 𑀯𑀢𑁆𑀢𑀩𑁆𑀩𑀸𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀚𑀭𑀸𑀫𑀭𑀡𑀁 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦’’𑀦𑁆𑀢𑀺 𑀯𑀘𑀦𑀢𑁄 𑀢𑀲𑁆𑀲 𑀧𑀭𑀺𑀬𑀸𑀬𑀢𑀁 𑀯𑀺𑀯𑀭𑀢𑀺 ‘‘𑀢𑁂𑀲𑀁 𑀉𑀧𑁆𑀧𑀸𑀤𑁂 𑀲𑀢𑀻’’𑀢𑀺𑀆𑀤𑀺𑀦𑀸.

𑀬𑀤𑀺 𑀏𑀯𑀦𑁆𑀢𑀺 𑀬𑀤𑀺 𑀦𑀺𑀲𑁆𑀲𑀬𑀧𑀝𑀺𑀩𑀤𑁆𑀥𑀯𑀼𑀢𑁆𑀢𑀺𑀓𑀸 𑀚𑀸𑀢𑀺𑀆𑀤𑀬𑁄, 𑀏𑀯𑀁 𑀲𑀢𑀺. ‘‘𑀫𑀳𑀸𑀪𑀽𑀢𑀸𑀦𑀁 𑀉𑀧𑀸𑀤𑀸𑀬𑀭𑀽𑀧’’𑀦𑁆𑀢𑀺 𑀯𑀘𑀦𑀢𑁄 𑀪𑀽𑀢𑀦𑀺𑀲𑁆𑀲𑀺𑀢𑁂𑀲𑀼 𑀓𑁂𑀯𑀮𑁄 𑀉𑀧𑀸𑀤𑀸𑀬𑀯𑁄𑀳𑀸𑀭𑁄𑀢𑀺 𑀉𑀧𑀸𑀤𑀸𑀬𑁂 𑀦𑀺𑀲𑁆𑀲𑀺𑀢𑀸𑀧𑀺 𑀅𑀧𑀭𑁂𑀦 𑀉𑀧𑀸𑀤𑀸𑀬-𑀲𑀤𑁆𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀉𑀧𑀸𑀤𑀸𑀬𑀼𑀧𑀸𑀤𑀸𑀬𑀪𑀸𑀯𑁄 𑀆𑀧𑀚𑁆𑀚𑀢𑀻’’𑀢𑀺 𑀆𑀳. 𑀓𑀸𑀭𑀡𑀓𑀸𑀭𑀡𑁂𑀧𑀺 𑀓𑀸𑀭𑀡𑁂 𑀯𑀺𑀬 𑀯𑁄𑀳𑀸𑀭𑁄 𑀳𑁄𑀢𑀺 ‘‘𑀘𑁄𑀭𑁂𑀳𑀺 𑀕𑀸𑀫𑁄 𑀤𑀟𑁆𑀠𑁄’’𑀢𑀺 𑀬𑀣𑀸𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀪𑀽𑀢…𑀧𑁂… 𑀢𑁆𑀢𑀦𑀢𑁄’’𑀢𑀺 𑀆𑀳. 𑀇𑀤𑀸𑀦𑀺 𑀧𑀭𑀫𑁆𑀧𑀭𑀸 𑀯𑀺𑀦𑀸 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀉𑀧𑁆𑀧𑀸𑀤𑀸𑀤𑀻𑀦𑀁 𑀪𑀽𑀢𑀧𑀝𑀺𑀩𑀤𑁆𑀥𑀪𑀸𑀯𑀁 𑀲𑀳 𑀦𑀺𑀤𑀲𑁆𑀲𑀦𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀅𑀧𑀺 𑀘𑀸’’𑀢𑀺𑀆𑀤𑀺𑀫𑀯𑁄𑀘. 𑀯𑀺𑀓𑀸𑀭𑀧𑀭𑀺𑀘𑁆𑀙𑁂𑀤𑀸𑀧𑀺 𑀉𑀧𑀸𑀤𑀸𑀬𑀭𑀽𑀧𑀯𑀺𑀓𑀸𑀭𑀸𑀤𑀺𑀪𑀸𑀯𑁂 𑀪𑀽𑀢𑀧𑀝𑀺𑀩𑀤𑁆𑀥𑀪𑀸𑀯𑀸𑀯𑀺𑀦𑀺𑀯𑀢𑁆𑀢𑀺𑀢𑁄 𑀏𑀓𑀲𑁆𑀫𑀺𑀁 𑀓𑀮𑀸𑀧𑁂 𑀏𑀓𑁂𑀓𑀸𑀯 𑀯𑀺𑀓𑀸𑀭𑀸𑀤𑀬𑁄𑀢𑀺 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀯𑀺𑀬 𑀓𑀮𑀸𑀧𑀸𑀦𑀼𑀧𑀸𑀮𑀓𑀁 𑀓𑀮𑀸𑀧𑀯𑀺𑀓𑀸𑀭𑀸𑀤𑀺𑀪𑀸𑀯𑀢𑁄 𑀘 ‘‘𑀉𑀧𑀸𑀤𑀸𑀬𑀭𑀽𑀧𑀸𑀦𑀺’’𑀇𑀘𑁆𑀘𑁂𑀯 𑀯𑀼𑀘𑁆𑀘𑀦𑁆𑀢𑀻𑀢𑀺 𑀆𑀳 ‘‘𑀏𑀯𑀁 𑀯𑀺𑀓𑀸…𑀧𑁂… 𑀬𑁄𑀚𑁂𑀢𑀩𑁆𑀩𑀸𑀦𑀻’’𑀢𑀺.

𑀅𑀲𑀗𑁆𑀔𑀢𑀪𑀸𑀯𑀦𑀺𑀯𑀸𑀭𑀡𑀢𑁆𑀣𑀁 𑀧𑀭𑀺𑀦𑀺𑀧𑁆𑀨𑀦𑁆𑀦𑀢𑀸 𑀯𑀼𑀢𑁆𑀢𑀸𑀢𑀺 𑀇𑀤𑀁 𑀅𑀧𑀭𑀺𑀦𑀺𑀧𑁆𑀨𑀦𑁆𑀦𑀲𑀪𑀸𑀯𑀯𑀢𑁄 𑀅𑀦𑀼𑀧𑀮𑀩𑁆𑀪𑀫𑀸𑀦𑀢𑀸𑀬 𑀲𑀲𑀯𑀺𑀲𑀸𑀡𑀁 𑀯𑀺𑀬 𑀓𑁂𑀦𑀘𑀺 𑀦 𑀲𑀗𑁆𑀔𑀢𑀦𑁆𑀢𑀺 𑀅𑀲𑀗𑁆𑀔𑀢𑀁 𑀦𑀸𑀫 𑀲𑀺𑀬𑀸𑀢𑀺 𑀇𑀫𑀺𑀲𑁆𑀲𑀸 𑀆𑀲𑀗𑁆𑀓𑀸𑀬 𑀦𑀺𑀯𑀢𑁆𑀢𑀦𑀯𑀲𑁂𑀦 𑀯𑀼𑀢𑁆𑀢𑀁. 𑀅𑀣 𑀯𑀸 𑀭𑀽𑀧𑀯𑀺𑀓𑀸𑀭𑀸𑀤𑀺𑀪𑀸𑀯𑀢𑁄 𑀭𑀽𑀧𑀪𑀸𑀯𑁄 𑀯𑀺𑀬 𑀭𑀽𑀧𑁂 𑀲𑀢𑀺 𑀲𑀦𑁆𑀢𑀺, 𑀅𑀲𑀢𑀺 𑀦 𑀲𑀦𑁆𑀢𑀻𑀢𑀺 𑀲𑀺𑀤𑁆𑀥𑀸𑀬 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀦𑁆𑀦𑀢𑀸𑀬 𑀲𑀸𑀥𑀺𑀢𑀸 𑀧𑀭𑀺𑀦𑀺𑀧𑁆𑀨𑀦𑁆𑀦𑀢𑀸 𑀢𑁂𑀲𑀁 𑀲𑀗𑁆𑀔𑀢𑀪𑀸𑀯𑀁 𑀲𑀸𑀥𑁂𑀦𑁆𑀢𑀻 𑀅𑀲𑀗𑁆𑀔𑀢𑀪𑀸𑀯𑀁 𑀦𑀺𑀯𑀸𑀭𑀡𑀢𑁆𑀣𑀁 𑀚𑀸𑀬𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀅𑀲𑀗𑁆𑀔𑀢𑀪𑀸𑀯𑀦𑀺𑀯𑀸𑀭𑀡𑀢𑁆𑀣𑀁 𑀧𑀭𑀺𑀦𑀺𑀧𑁆𑀨𑀦𑁆𑀦𑀢𑀸 𑀯𑀼𑀢𑁆𑀢𑀸’’𑀢𑀺.

𑀧𑀓𑀺𑀡𑁆𑀡𑀓𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀭𑀽𑀧𑀓𑀡𑁆𑀟𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.