𑁩. 𑀦𑀺𑀓𑁆𑀔𑁂𑀧𑀓𑀡𑁆𑀟𑀁

𑀢𑀺𑀓𑀦𑀺𑀓𑁆𑀔𑁂𑀧𑀓𑀣𑀸𑀯𑀡𑁆𑀡𑀦𑀸

𑁯𑁮𑁫. 𑀬𑀣𑀸𑀯𑀼𑀢𑁆𑀢𑀨𑀲𑁆𑀲𑀧𑀜𑁆𑀘𑀫𑀓𑀸𑀤𑀺𑀭𑀸𑀲𑀺𑀓𑀺𑀘𑁆𑀘𑀭𑀳𑀺𑀢𑀢𑁆𑀢𑀸 𑀓𑁂𑀘𑀺 𑀥𑀫𑁆𑀫𑁂 𑀯𑀺𑀲𑀼𑀁 𑀞𑀧𑁂𑀢𑁆𑀯𑀸 𑀲𑁄𑀯𑀘𑀲𑁆𑀲𑀢𑀸𑀤𑀺𑀅𑀯𑀼𑀢𑁆𑀢𑀯𑀺𑀲𑁂𑀲𑀲𑀗𑁆𑀕𑀡𑁆𑀳𑀦𑀢𑁆𑀣𑀜𑁆𑀘, 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦 𑀯𑀸 𑀙𑀦𑁆𑀤𑀸𑀤𑀬𑁄 ‘‘𑀬𑁂𑀯𑀸𑀧𑀦𑀸’’𑀢𑀺 𑀯𑀼𑀢𑁆𑀢𑀸𑀢𑀺 𑀬𑁂𑀯𑀸𑀧𑀦𑀓𑀸𑀦𑀁 𑀧𑀤𑀼𑀤𑁆𑀥𑀸𑀭𑁂𑀦 𑀦𑀺𑀤𑁆𑀤𑁂𑀲𑀸𑀦𑀭𑀳𑀢𑀸𑀬 𑀓𑀸𑀭𑀡𑀁 𑀯𑀼𑀢𑁆𑀢𑀦𑁆𑀢𑀺 𑀳𑀤𑀬𑀯𑀢𑁆𑀣𑀼𑀲𑁆𑀲 𑀢𑀣𑀸 𑀦𑀺𑀤𑁆𑀤𑁂𑀲𑀸𑀦𑀭𑀳𑀢𑀸𑀬 𑀓𑀸𑀭𑀡𑀁 𑀯𑀤𑀦𑁆𑀢𑁄 ‘‘𑀲𑀼𑀔𑀼𑀫𑀼𑀧𑀸…𑀧𑁂… 𑀳𑀺𑀢𑀲𑁆𑀲𑀸’’𑀢𑀺 𑀆𑀳. 𑀲𑀼𑀔𑀼𑀫𑀪𑀸𑀯𑁂𑀧𑀺 𑀇𑀦𑁆𑀤𑁆𑀭𑀺𑀬𑀸𑀤𑀺𑀲𑀪𑀸𑀯𑀸𑀦𑀺 𑀉𑀧𑀸𑀤𑀸𑀬𑀭𑀽𑀧𑀸𑀦𑀺 𑀆𑀥𑀺𑀧𑀘𑁆𑀘𑀸𑀤𑀺𑀯𑀲𑁂𑀦 𑀧𑀸𑀓𑀝𑀸𑀦𑀺 𑀳𑁄𑀦𑁆𑀢𑀺, 𑀦 𑀅𑀢𑀁𑀲𑀪𑀸𑀯𑀁 𑀲𑀼𑀔𑀼𑀫𑀼𑀧𑀸𑀤𑀸𑀬𑀭𑀽𑀧𑀦𑁆𑀢𑀺 𑀳𑀤𑀬𑀯𑀢𑁆𑀣𑀼𑀲𑁆𑀲 𑀧𑀤𑀼𑀤𑁆𑀥𑀸𑀭𑁂𑀦 𑀓𑀼𑀲𑀮𑀢𑁆𑀢𑀺𑀓𑀧𑀤𑀪𑀸𑀚𑀦𑁂 𑀦𑀺𑀤𑁆𑀤𑁂𑀲𑀸𑀦𑀭𑀳𑀢𑀸 𑀯𑀼𑀢𑁆𑀢𑀸. 𑀲𑀼𑀔𑀼𑀫𑀪𑀸𑀯𑀢𑁄𑀬𑁂𑀯 𑀳𑀺 𑀢𑀁 𑀫𑀳𑀸𑀧𑀓𑀭𑀡𑁂𑀧𑀺 ‘‘𑀬𑀁 𑀭𑀽𑀧𑀁 𑀦𑀺𑀲𑁆𑀲𑀸𑀬 𑀫𑀦𑁄𑀥𑀸𑀢𑀼 𑀘 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼 𑀘 𑀯𑀢𑁆𑀢𑀦𑁆𑀢𑀻’’𑀢𑀺 (𑀧𑀝𑁆𑀞𑀸. 𑁧.𑁧.𑁮) 𑀦𑀺𑀲𑁆𑀲𑀺𑀢𑀥𑀫𑁆𑀫𑀫𑀼𑀔𑁂𑀦 𑀤𑀲𑁆𑀲𑀺𑀢𑀦𑁆𑀢𑀺. 𑀯𑁂𑀦𑁂𑀬𑁆𑀬𑀚𑁆𑀛𑀸𑀲𑀬𑀯𑀲𑁂𑀦 𑀯𑀸 𑀳𑀤𑀬𑀯𑀢𑁆𑀣𑀼 𑀧𑀤𑀼𑀤𑁆𑀥𑀸𑀭𑁂𑀦 𑀦 𑀤𑀲𑁆𑀲𑀺𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀬𑁂𑀦 𑀧𑀦 𑀅𑀥𑀺𑀧𑁆𑀧𑀸𑀬𑁂𑀦 𑀭𑀽𑀧𑀓𑀡𑁆𑀟𑁂 𑀳𑀤𑀬𑀯𑀢𑁆𑀣𑀼 𑀤𑀼𑀯𑀺𑀥𑁂𑀦 𑀭𑀽𑀧𑀲𑀗𑁆𑀕𑀳𑀸𑀤𑀻𑀲𑀼 𑀦 𑀯𑀼𑀢𑁆𑀢𑀁, 𑀲𑁄 𑀭𑀽𑀧𑀓𑀡𑁆𑀟𑀯𑀡𑁆𑀡𑀦𑀸𑀬 𑀯𑀺𑀪𑀸𑀯𑀺𑀢𑁄 𑀏𑀯𑀸𑀢𑀺. 𑀦𑀺𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀧𑀤𑀲𑁆𑀲 𑀧𑀓𑁆𑀔𑀺𑀧𑀺𑀢𑁆𑀯𑀸𑀢𑀺 𑀅𑀢𑁆𑀣𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀯𑀺𑀢𑁆𑀣𑀸𑀭𑀤𑁂𑀲𑀦𑀁 𑀅𑀦𑁆𑀢𑁄𑀕𑀥𑀁 𑀓𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀫𑀽𑀮𑀸𑀤𑀺𑀯𑀲𑁂𑀦 𑀳𑀺 𑀤𑁂𑀲𑀺𑀢𑀸 𑀓𑀼𑀲𑀮𑀸𑀤𑀺𑀥𑀫𑁆𑀫𑀸 𑀢𑀁𑀢𑀁𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀤𑀺𑀯𑀲𑁂𑀦𑀧𑀺 𑀤𑁂𑀲𑀺𑀢𑀸 𑀏𑀯 𑀦𑀸𑀫 𑀳𑁄𑀦𑁆𑀢𑀺 𑀢𑀁𑀲𑀪𑀸𑀯𑀸𑀦𑀢𑀺𑀯𑀢𑁆𑀢𑀦𑀢𑁄𑀢𑀺.

𑀫𑀽𑀮𑀯𑀲𑁂𑀦𑀸𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑀯𑀲𑁂𑀦. 𑀏𑀢𑀸𑀦𑀺 𑀳𑁂𑀢𑀼𑀧𑀤𑀸𑀤𑀻𑀦𑀺 𑀳𑀺𑀦𑁄𑀢𑀺 𑀨𑀮𑀁 𑀏𑀢𑀲𑁆𑀫𑀸 𑀧𑀯𑀢𑁆𑀢𑀢𑀻𑀢𑀺 𑀳𑁂𑀢𑀼, 𑀧𑀝𑀺𑀘𑁆𑀘 𑀏𑀢𑀲𑁆𑀫𑀸 𑀏𑀢𑀻𑀢𑀺 𑀧𑀘𑁆𑀘𑀬𑁄, 𑀚𑀦𑁂𑀢𑀻𑀢𑀺 𑀚𑀦𑀓𑁄, 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀦𑀺𑀩𑁆𑀩𑀢𑁆𑀢𑀓𑁄𑀢𑀺 𑀲𑁂𑀲𑀸𑀦𑀁 𑀯𑀘𑀦𑀢𑁆𑀣𑁄. ‘‘𑀫𑀽𑀮𑀝𑁆𑀞𑀲𑁆𑀲…𑀧𑁂… 𑀯𑀼𑀢𑁆𑀢’’𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 ‘‘𑀧𑀻𑀴𑀦𑀝𑁆𑀞𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀫𑀽𑀮𑀪𑀸𑀯𑁄 𑀫𑀽𑀮𑀝𑁆𑀞𑁄, 𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀻𑀢𑀺 𑀅𑀬𑀜𑁆𑀘 𑀫𑀽𑀮𑀢𑁄 𑀦𑀺𑀓𑁆𑀔𑁂𑀧𑁄𑀢𑀺? 𑀦, 𑀫𑀽𑀮𑀲𑁆𑀲 𑀅𑀢𑁆𑀣𑁄 𑀫𑀽𑀮𑀝𑁆𑀞𑁄, 𑀲𑁄 𑀏𑀯 𑀫𑀽𑀮𑀝𑁆𑀞𑁄𑀢𑀺 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑀝𑁆𑀞𑁂𑀦 𑀫𑀽𑀮𑀲𑀪𑀸𑀯𑀸𑀦𑀁 𑀅𑀮𑁄𑀪𑀸𑀤𑀺𑀥𑀫𑁆𑀫𑀸𑀦𑀁 𑀓𑀼𑀲𑀮𑀥𑀫𑁆𑀫𑁂𑀲𑀼 𑀓𑀺𑀘𑁆𑀘𑀯𑀺𑀲𑁂𑀲𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀢𑁂𑀦𑁂𑀯𑀸𑀳 ‘‘𑀅𑀢𑁆𑀣𑁄𑀢𑀺 𑀥𑀫𑁆𑀫𑀓𑀺𑀘𑁆𑀘’’𑀦𑁆𑀢𑀺. 𑀅𑀣 𑀯𑀸 𑀅𑀢𑁆𑀣𑀯𑀲𑁂𑀦𑀸𑀢𑀺 ‘‘𑀢𑀻𑀡𑀺 𑀓𑀼𑀲𑀮𑀫𑀽𑀮𑀸𑀦𑀻’’𑀢𑀺 𑀯𑀼𑀢𑁆𑀢𑀸𑀦𑀁 𑀢𑁂𑀲𑀁 𑀫𑀽𑀮𑀸𑀦𑀁 𑀲𑀪𑀸𑀯𑀲𑀗𑁆𑀔𑀸𑀢𑀅𑀢𑁆𑀣𑀯𑀲𑁂𑀦, 𑀦 𑀕𑀸𑀣𑀸𑀬 𑀯𑀼𑀢𑁆𑀢𑀅𑀢𑁆𑀣𑀯𑀲𑁂𑀦. 𑀬𑀲𑁆𑀫𑀸 𑀧𑀦 𑀲𑁄 𑀫𑀽𑀮𑀝𑁆𑀞𑁄𑀬𑁂𑀯 𑀘 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀅𑀮𑁄𑀪𑀸𑀤𑀻𑀦’’𑀦𑁆𑀢𑀺𑀆𑀤𑀺. 𑀅𑀮𑁄𑀪𑀸𑀤𑀬𑁄 𑀯𑀺𑀬 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄𑀧𑀺 𑀅𑀥𑀺𑀓𑀢𑀢𑁆𑀢𑀸 𑀢𑀁-𑀲𑀤𑁆𑀤𑁂𑀦 𑀧𑀝𑀺𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀁 ‘‘𑀢𑁂 𑀓𑀼𑀲𑀮𑀫𑀽𑀮𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺. 𑀢𑁂𑀳𑀺 𑀅𑀮𑁄𑀪𑀸𑀤𑀻𑀳𑀻𑀢𑀺 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀯𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀬𑁄𑀧𑀺 𑀲𑀗𑁆𑀕𑀳𑀺𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀢𑁂 𑀓𑀼𑀲𑀮𑀫𑀽𑀮𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁.

‘‘𑀓𑀢𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸’’𑀢𑀺 𑀧𑀼𑀘𑁆𑀙𑀺𑀢𑁆𑀯𑀸 𑀨𑀲𑁆𑀲𑀸𑀤𑀺𑀪𑁂𑀤𑀢𑁄 𑀘𑀢𑁆𑀢𑀸𑀭𑁄 𑀔𑀦𑁆𑀥𑁂 𑀤𑀲𑁆𑀲𑁂𑀢𑁆𑀯𑀸 ‘‘𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸’’𑀢𑀺 (𑀥. 𑀲. 𑁧) 𑀯𑀼𑀢𑁆𑀢𑀢𑀸 𑀔𑀦𑁆𑀥𑀸 𑀘 𑀓𑀼𑀲𑀮𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀔𑀦𑁆𑀥𑁂𑀳𑀺 𑀲𑀪𑀸𑀯𑀢𑁄 𑀓𑀼𑀲𑀮𑁂 𑀧𑀭𑀺𑀬𑀸𑀤𑀺𑀬𑀢𑀻’’𑀢𑀺. 𑀯𑁂𑀤𑀦𑀸𑀓𑁆𑀔𑀦𑁆𑀥𑁄 𑀯𑀸𑀢𑀺 𑀓𑀼𑀲𑀮𑀁…𑀧𑁂… 𑀯𑀺𑀜𑁆𑀜𑀸𑀡𑀓𑁆𑀔𑀦𑁆𑀥𑁄 𑀯𑀸𑀢𑀺. 𑀅𑀜𑁆𑀜𑀲𑁆𑀲 𑀅𑀢𑁆𑀢𑀦𑁄 𑀨𑀮𑀲𑁆𑀲. 𑀫𑀽𑀮𑁂𑀳𑀺 𑀓𑀼𑀲𑀮𑀸𑀦𑀁 𑀅𑀦𑀯𑀚𑁆𑀚𑀢𑀸𑀬 𑀳𑁂𑀢𑀼𑀁 𑀤𑀲𑁆𑀲𑁂𑀢𑀻𑀢𑀺 𑀇𑀤𑀁 𑀦 𑀫𑀽𑀮𑀸𑀦𑀁 𑀓𑀼𑀲𑀮𑀲𑁆𑀲 𑀅𑀦𑀯𑀚𑁆𑀚𑀪𑀸𑀯𑀲𑀸𑀥𑀓𑀢𑁆𑀢𑀸 𑀯𑀼𑀢𑁆𑀢𑀁, 𑀅𑀣 𑀔𑁄 𑀢𑀲𑁆𑀲 𑀅𑀦𑀯𑀚𑁆𑀚𑀢𑀸𑀬 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀓𑀢𑁆𑀢𑀸. 𑀬𑀤𑀺 𑀳𑀺 𑀫𑀽𑀮𑁂𑀳𑀺 𑀓𑀢𑁄 𑀓𑀼𑀲𑀮𑀸𑀦𑀁 𑀅𑀦𑀯𑀚𑁆𑀚𑀪𑀸𑀯𑁄 𑀪𑀯𑁂𑀬𑁆𑀬, 𑀢𑀁𑀲𑀫𑀼𑀝𑁆𑀞𑀸𑀦𑀭𑀽𑀧𑀲𑁆𑀲𑀧𑀺 𑀲𑁄 𑀪𑀯𑁂𑀬𑁆𑀬, 𑀫𑀽𑀮𑀸𑀦𑀁 𑀯𑀸 𑀢𑁂𑀲𑀁 𑀧𑀘𑁆𑀘𑀬𑀪𑀸𑀯𑁄 𑀦 𑀲𑀺𑀬𑀸, 𑀳𑁄𑀢𑀺 𑀘 𑀲𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀳𑁂𑀢𑀽 𑀳𑁂𑀢𑀼…𑀧𑁂… 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁧.). 𑀓𑀺𑀜𑁆𑀘 𑀪𑀺𑀬𑁆𑀬𑁄 𑀓𑀼𑀲𑀮𑀸𑀦𑀁 𑀯𑀺𑀬 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀫𑁆𑀧𑀺 𑀢𑀩𑁆𑀪𑀸𑀯𑁄 𑀫𑀽𑀮𑀧𑀝𑀺𑀩𑀤𑁆𑀥𑁄 𑀪𑀯𑁂𑀬𑁆𑀬, 𑀢𑀣𑀸 𑀲𑀢𑀺 𑀅𑀳𑁂𑀢𑀼𑀓𑀸𑀦𑀁 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀦𑀁 𑀢𑀩𑁆𑀪𑀸𑀯𑁄 𑀦 𑀲𑀺𑀬𑀸, 𑀢𑀲𑁆𑀫𑀸 𑀓𑀼𑀲𑀮𑀸𑀤𑀻𑀦𑀁 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀸𑀤𑀺𑀧𑀝𑀺𑀩𑀤𑁆𑀥𑁄 𑀓𑀼𑀲𑀮𑀸𑀤𑀺𑀪𑀸𑀯𑁄, 𑀦 𑀫𑀽𑀮𑀧𑀝𑀺𑀩𑀤𑁆𑀥𑁄, 𑀫𑀽𑀮𑀸𑀦𑀺 𑀧𑀦 𑀓𑀼𑀲𑀮𑀸𑀤𑀻𑀦𑀁 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀪𑀸𑀯𑀲𑀸𑀥𑀦𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀳𑁂𑀢𑀼𑀓𑀸 𑀳𑀺 𑀥𑀫𑁆𑀫𑀸 𑀯𑀺𑀭𑀼𑀴𑁆𑀳𑀫𑀽𑀮𑀸 𑀯𑀺𑀬 𑀧𑀸𑀤𑀧𑀸 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑀸 𑀣𑀺𑀭𑀸 𑀳𑁄𑀦𑁆𑀢𑀺, 𑀦 𑀢𑀣𑀸 𑀅𑀳𑁂𑀢𑀼𑀓𑀸𑀢𑀺. 𑀢𑀁𑀲𑀫𑁆𑀧𑀬𑁄𑀕𑀓𑀢𑀁 𑀅𑀦𑀯𑀚𑁆𑀚𑀲𑀪𑀸𑀯𑀦𑁆𑀢𑀺 𑀇𑀤𑀫𑁆𑀧𑀺 𑀦 𑀅𑀦𑀯𑀚𑁆𑀚𑀲𑀪𑀸𑀯𑀲𑁆𑀲 𑀢𑀁𑀲𑀫𑁆𑀧𑀬𑁄𑀕𑁂𑀦 𑀦𑀺𑀧𑁆𑀨𑀸𑀤𑀺𑀢𑀢𑁆𑀢𑀸 𑀯𑀼𑀢𑁆𑀢𑀁, 𑀅𑀦𑀯𑀚𑁆𑀚𑀲𑀪𑀸𑀯𑀁 𑀧𑀦 𑀯𑀺𑀲𑁂𑀲𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀅𑀮𑁄𑀪𑀸𑀤𑀺𑀲𑀫𑁆𑀧𑀬𑁄𑀕𑀢𑁄 𑀳𑀺 𑀓𑀼𑀲𑀮𑀸𑀤𑀻𑀦𑀁 𑀔𑀦𑁆𑀥𑀸𑀦𑀁 𑀅𑀦𑀯𑀚𑁆𑀚𑀪𑀸𑀯𑁄 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄 𑀚𑀸𑀬𑀢𑀺, 𑀦 𑀅𑀳𑁂𑀢𑀼𑀓𑀸𑀩𑁆𑀬𑀸𑀓𑀢𑀸𑀦𑀁 𑀯𑀺𑀬 𑀦 𑀲𑀼𑀧𑁆𑀧𑀢𑀺𑀝𑁆𑀞𑀺𑀢𑁄𑀢𑀺. 𑀬𑀤𑀺 𑀏𑀯𑀁 𑀦 𑀢𑁂𑀲𑀁 𑀔𑀦𑁆𑀥𑀸𑀦𑀁 𑀓𑀼𑀲𑀮𑀸𑀤𑀺𑀪𑀸𑀯𑁄 𑀤𑀲𑁆𑀲𑀺𑀢𑁄 𑀲𑀺𑀬𑀸? 𑀦, 𑀅𑀥𑀺𑀓𑀸𑀭𑀢𑁄 𑀓𑀼𑀲𑀮𑀪𑀸𑀯𑀲𑁆𑀲 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸. 𑀓𑀫𑁆𑀫-𑀲𑀤𑁆𑀤𑁄 𑀯𑀺𑀬 𑀯𑀺𑀧𑀸𑀓𑀥𑀫𑁆𑀫𑀢𑀸𑀯𑀸𑀘𑀺𑀦𑁄 𑀦 𑀫𑀽𑀮𑀓𑁆𑀔𑀦𑁆𑀥𑀲𑀤𑁆𑀤𑀸, 𑀲𑁄 𑀘 𑀇𑀥 𑀅𑀯𑀺𑀲𑁂𑀲𑀢𑁄 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀓𑀫𑁆𑀫𑁂𑀳𑀺 𑀲𑀼𑀔𑀯𑀺𑀧𑀸𑀓𑀢𑀁 𑀤𑀲𑁆𑀲𑁂𑀢𑀻’’𑀢𑀺. 𑀆𑀤𑀺𑀓𑀮𑁆𑀬𑀸𑀡𑀢𑀁 𑀓𑀼𑀲𑀮𑀸𑀦𑀁 𑀤𑀲𑁆𑀲𑁂𑀢𑀻𑀢𑀺 𑀬𑁄𑀚𑀦𑀸. 𑀅𑀦𑀯𑀚𑁆𑀚𑀳𑁂𑀢𑀼𑀲𑀪𑀸𑀯𑀲𑀼𑀔𑀯𑀺𑀧𑀸𑀓𑀪𑀸𑀯𑀦𑀺𑀤𑀸𑀦𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑁄 𑀤𑀝𑁆𑀞𑀩𑁆𑀩𑀸, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀅𑀯𑀚𑁆𑀚𑀧𑀝𑀺𑀧𑀓𑁆𑀔𑀢𑀸𑀇𑀝𑁆𑀞𑀯𑀺𑀧𑀸𑀓𑀢𑀸𑀯𑀲𑁂𑀦𑀧𑀺 𑀦𑀺𑀤𑀸𑀦𑀸𑀤𑀺𑀲𑀫𑁆𑀧𑀢𑁆𑀢𑀺𑀬𑁄 𑀬𑁄𑀚𑁂𑀢𑀩𑁆𑀩𑀸. 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀢𑁄 𑀳𑀺 𑀓𑀼𑀲𑀮𑀸 𑀅𑀮𑁄𑀪𑀸𑀤𑀺𑀫𑀽𑀮𑀓𑀸, 𑀅𑀮𑁄𑀪𑀸𑀤𑀺𑀲𑀫𑁆𑀧𑀬𑁄𑀕𑀢𑁄 𑀘 𑀮𑁄𑀪𑀸𑀤𑀺𑀧𑀝𑀺𑀧𑀓𑁆𑀔𑀲𑀼𑀔𑀯𑀺𑀧𑀸𑀓𑀸𑀯 𑀚𑀸𑀢𑀸𑀢𑀺.

𑁯𑁮𑁬. ‘‘𑀓𑀲𑁆𑀫𑀸 𑀯𑀼𑀢𑁆𑀢’’𑀦𑁆𑀢𑀺 𑀅𑀦𑀼𑀬𑀼𑀜𑁆𑀚𑀺𑀢𑁆𑀯𑀸 𑀘𑁄𑀤𑀓𑁄 ‘‘𑀦𑀦𑀽’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀢𑀺. 𑀇𑀢𑀭𑁄 𑀬𑀣𑀸𑀯𑀼𑀢𑁆𑀢𑀫𑁄𑀳𑀲𑁆𑀲 𑀇𑀥 𑀲𑀫𑁆𑀧𑀬𑀼𑀢𑁆𑀢-𑀲𑀤𑁆𑀤𑁂𑀦 𑀅𑀯𑀼𑀘𑁆𑀘𑀫𑀸𑀦𑀢𑀁 ‘‘𑀲𑀘𑁆𑀘𑀫𑁂𑀢’’𑀦𑁆𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 ‘‘𑀢𑁂𑀦𑀸’’𑀢𑀺𑀆𑀤𑀺𑀦𑀸 𑀧𑀭𑀺𑀳𑀸𑀭𑀫𑀸𑀳. 𑀢𑀲𑁆𑀲𑀢𑁆𑀣𑁄 𑁋 ‘‘𑀢𑀁𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺𑀧𑀤𑁂𑀦 𑀓𑀺𑀜𑁆𑀘𑀸𑀧𑀺 𑀬𑀣𑀸𑀯𑀼𑀢𑁆𑀢𑀫𑁄𑀳𑁄 𑀧𑀥𑀸𑀦𑀪𑀸𑀯𑁂𑀦 𑀦 𑀕𑀳𑀺𑀢𑁄, 𑀦𑀸𑀦𑀦𑁆𑀢𑀭𑀺𑀬𑀓𑀢𑀸𑀬 𑀧𑀦 𑀕𑀼𑀡𑀪𑀸𑀯𑁂𑀦 𑀕𑀳𑀺𑀢𑁄𑀢𑀺. 𑀅𑀜𑁆𑀜𑀢𑁆𑀣 𑀅𑀪𑀸𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀢𑁄 𑀅𑀜𑁆𑀜𑀢𑁆𑀣 𑀅𑀪𑀸𑀯𑀸. 𑀦 𑀳𑀺 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀳𑀕𑀢𑁄 𑀫𑁄𑀳𑁄 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀸𑀤𑀺𑀥𑀫𑁆𑀫𑁂𑀳𑀺 𑀯𑀺𑀦𑀸 𑀳𑁄𑀢𑀻𑀢𑀺.

𑁯𑁮𑁭. 𑀉𑀧𑁆𑀧𑀸𑀤𑀸𑀤𑀺𑀲𑀗𑁆𑀔𑀢𑀮𑀓𑁆𑀔𑀡𑀯𑀺𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀅𑀦𑀺𑀘𑁆𑀘𑀤𑀼𑀓𑁆𑀔𑀅𑀦𑀢𑁆𑀢𑀢𑀸’’𑀢𑀺 𑀯𑀼𑀢𑁆𑀢𑀁. 𑀉𑀧𑁆𑀧𑀸𑀤𑀸𑀤𑀬𑁄 𑀧𑀦 𑀢𑀤𑀯𑀢𑁆𑀣𑀥𑀫𑁆𑀫𑀯𑀺𑀓𑀸𑀭𑀪𑀸𑀯𑀢𑁄 𑀢𑀁𑀢𑀁𑀥𑀫𑁆𑀫𑀕𑁆𑀕𑀳𑀡𑁂𑀦 𑀕𑀳𑀺𑀢𑀸𑀬𑁂𑀯. 𑀢𑀣𑀸 𑀳𑀺 𑀯𑀼𑀢𑁆𑀢𑀁 ‘‘𑀚𑀭𑀸𑀫𑀭𑀡𑀁 𑀤𑁆𑀯𑀻𑀳𑀺 𑀔𑀦𑁆𑀥𑁂𑀳𑀺 𑀲𑀗𑁆𑀕𑀳𑀺𑀢’’𑀦𑁆𑀢𑀺 (𑀥𑀸𑀢𑀼. 𑁭𑁧), ‘‘𑀭𑀽𑀧𑀲𑁆𑀲 𑀉𑀧𑀘𑀬𑁄’’𑀢𑀺 𑀘 𑀆𑀤𑀺. 𑀓𑁂𑀲𑀓𑀼𑀫𑁆𑀪𑀸𑀤𑀺 𑀲𑀩𑁆𑀩𑀁 𑀦𑀸𑀫𑀁 𑀦𑀸𑀫𑀧𑀜𑁆𑀜𑀢𑁆𑀢𑀺, 𑀭𑀽𑀧𑀯𑁂𑀤𑀦𑀸𑀤𑀺𑀉𑀧𑀸𑀤𑀸𑀦𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑀸𑀤𑀺𑀕𑁄𑀘𑀭𑀸 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺 𑀲𑀢𑁆𑀢𑀧𑀜𑁆𑀜𑀢𑁆𑀢𑀺, 𑀢𑀁𑀢𑀁𑀪𑀽𑀢𑀦𑀺𑀫𑀺𑀢𑁆𑀢𑀁 𑀪𑀸𑀯𑀦𑀸𑀯𑀺𑀲𑁂𑀲𑀜𑁆𑀘 𑀉𑀧𑀸𑀤𑀸𑀬 𑀕𑀳𑁂𑀢𑀩𑁆𑀩𑁄 𑀛𑀸𑀦𑀕𑁄𑀘𑀭𑀯𑀺𑀲𑁂𑀲𑁄 𑀓𑀲𑀺𑀡𑀧𑀜𑁆𑀜𑀢𑁆𑀢𑀺. 𑀧𑀭𑀫𑀢𑁆𑀣𑁂 𑀅𑀫𑀼𑀜𑁆𑀘𑀺𑀢𑁆𑀯𑀸 𑀯𑁄𑀳𑀭𑀺𑀬𑀫𑀸𑀦𑀸𑀢𑀺 𑀇𑀫𑀺𑀦𑀸 𑀯𑀺𑀳𑀸𑀭𑀫𑀜𑁆𑀘𑀸𑀤𑀺𑀧𑀜𑁆𑀜𑀢𑁆𑀢𑀻𑀦𑀁 𑀲𑀢𑁆𑀢𑀧𑀜𑁆𑀜𑀢𑁆𑀢𑀺𑀲𑀤𑀺𑀲𑀢𑀁 𑀤𑀲𑁆𑀲𑁂𑀢𑀺, 𑀬𑀢𑁄 𑀢𑀸 𑀲𑀢𑁆𑀢𑀧𑀜𑁆𑀜𑀢𑁆𑀢𑀺𑀕𑁆𑀕𑀳𑀡𑁂𑀦 𑀕𑀬𑁆𑀳𑀦𑁆𑀢𑀺. 𑀳𑀼𑀢𑁆𑀯𑀸 𑀅𑀪𑀸𑀯𑀧𑀝𑀺𑀧𑀻𑀴𑀦𑀅𑀯𑀲𑀯𑀢𑁆𑀢𑀦𑀸𑀓𑀸𑀭𑀪𑀸𑀯𑀢𑁄 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀆𑀓𑀸𑀭𑀪𑀸𑀯𑀢𑁄 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀆𑀓𑀸𑀭𑀯𑀺𑀲𑁂𑀲𑀪𑀽𑀢𑀸𑀦𑀺 𑀮𑀓𑁆𑀔𑀡𑀸𑀦𑀺 𑀯𑀺𑀜𑁆𑀜𑀢𑁆𑀢𑀺𑀆𑀤𑀬𑁄 𑀯𑀺𑀬 𑀯𑀢𑁆𑀢𑀩𑁆𑀩𑀸𑀦𑀺 𑀲𑀺𑀬𑀼𑀁, 𑀢𑀸𑀦𑀺 𑀧𑀦 𑀦𑀺𑀲𑁆𑀲𑀬𑀸𑀦𑀧𑁂𑀓𑁆𑀔𑀁 𑀦 𑀮𑀩𑁆𑀪𑀦𑁆𑀢𑀻𑀢𑀺 𑀧𑀜𑁆𑀜𑀢𑁆𑀢𑀺𑀲𑀪𑀸𑀯𑀸𑀦𑁂𑀯 𑀢𑀚𑁆𑀚𑀸𑀧𑀜𑁆𑀜𑀢𑁆𑀢𑀺𑀪𑀸𑀯𑀢𑁄𑀢𑀺 𑀦 𑀯𑀼𑀢𑁆𑀢𑀸𑀦𑀺, 𑀲𑀢𑁆𑀢𑀖𑀝𑀸𑀤𑀺𑀢𑁄 𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 𑀧𑀦 𑀅𑀝𑁆𑀞𑀓𑀣𑀸𑀬𑀁 𑀯𑀺𑀲𑀼𑀁 𑀯𑀼𑀢𑁆𑀢𑀸𑀦𑀻𑀢𑀺. 𑀦 𑀳𑀺 𑀓𑁄…𑀧𑁂… 𑀯𑀢𑁆𑀢𑀼𑀁 𑀬𑀼𑀢𑁆𑀢𑀁 𑀓𑀼𑀲𑀮𑀢𑁆𑀢𑀺𑀓𑀲𑁆𑀲 𑀦𑀺𑀧𑁆𑀧𑀤𑁂𑀲𑀢𑁆𑀢𑀸.

𑁯𑁮𑁮. 𑀪𑀯𑀢𑀺 𑀏𑀢𑁆𑀣𑀸𑀢𑀺 𑀪𑀽𑀫𑀺, 𑀦𑀺𑀲𑁆𑀲𑀬𑀧𑀘𑁆𑀘𑀬𑀪𑀸𑀯𑀢𑁄 𑀲𑀼𑀔𑀲𑁆𑀲 𑀪𑀽𑀫𑀺 𑀲𑀼𑀔𑀪𑀽𑀫𑀺. 𑀲𑀼𑀔𑀯𑁂𑀤𑀦𑀸𑀲𑀳𑀺𑀢𑀁 𑀘𑀺𑀢𑁆𑀢𑀁. 𑀢𑀲𑁆𑀲 𑀪𑀽𑀫𑀺𑀪𑁂𑀤𑁂𑀦 𑀦𑀺𑀤𑁆𑀥𑀸𑀭𑀡𑀢𑁆𑀣𑀁 𑀢𑀁𑀦𑀺𑀲𑁆𑀲𑀬𑀪𑀽𑀢𑀸 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 ‘‘𑀓𑀸𑀫𑀸𑀯𑀘𑀭𑁂’’𑀢𑀺 𑀯𑀼𑀢𑁆𑀢𑀸. 𑀢𑀲𑁆𑀲 𑀯𑀸 𑀏𑀓𑀤𑁂𑀲𑀪𑀽𑀢𑀲𑁆𑀲 𑀲𑀫𑀼𑀤𑀸𑀬𑀪𑀸𑀯𑀢𑁄 𑀆𑀥𑀸𑀭𑀡𑀪𑀸𑀯𑁂𑀦 𑀅𑀧𑁂𑀓𑁆𑀔𑀺𑀢𑁆𑀯𑀸 𑀢𑀁𑀲𑀫𑀸𑀦𑀪𑀽𑀫𑀺 ‘‘𑀓𑀸𑀫𑀸𑀯𑀘𑀭𑁂’’𑀢𑀺 𑀯𑀼𑀢𑁆𑀢𑀸. 𑀢𑀢𑁆𑀣 ‘‘𑀲𑀼𑀔𑀪𑀽𑀫𑀺𑀬𑀁 𑀓𑀸𑀫𑀸𑀯𑀘𑀭𑁂’’𑀢𑀺 𑀤𑁆𑀯𑁂𑀧𑀺 𑀪𑀼𑀫𑁆𑀫𑀯𑀘𑀦𑀸𑀦𑀺 𑀪𑀺𑀦𑁆𑀦𑀸𑀥𑀺𑀓𑀭𑀡𑀪𑀸𑀯𑁂𑀦 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀸𑀦𑀻𑀢𑀺 𑀉𑀪𑀬𑁂𑀲𑀫𑁆𑀧𑀺 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁂𑀦 𑀅𑀢𑁆𑀣𑀬𑁄𑀕𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀔𑀪𑀽𑀫𑀻𑀢𑀺 𑀓𑀸𑀫𑀸𑀯𑀘𑀭𑀸𑀤𑀬𑁄𑀧𑀺 𑀬𑀼𑀚𑁆𑀚𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀬𑀣𑁂𑀯 𑀳𑀺 𑀘𑀺𑀢𑁆𑀢𑀁, 𑀏𑀯𑀁 𑀲𑀩𑁆𑀩𑁂𑀧𑀺 𑀧𑀭𑀺𑀢𑁆𑀢𑀲𑀼𑀔𑁂𑀦 𑀲𑀫𑁆𑀧𑀬𑀼𑀢𑁆𑀢𑀸 𑀥𑀫𑁆𑀫𑀸 𑀢𑀲𑁆𑀲 𑀦𑀺𑀲𑁆𑀲𑀬𑀪𑀸𑀯𑀢𑁄 𑀪𑀽𑀫𑀺 𑀓𑀸𑀫𑀸𑀯𑀘𑀭𑀸𑀢𑀺. 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 𑀯𑀸 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀘𑀺𑀢𑁆𑀢’’𑀦𑁆𑀢𑀺 𑀳𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑁄𑀧𑀺 𑀯𑀼𑀘𑁆𑀘𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀦𑁆𑀢𑀺 𑀏𑀢𑁆𑀣 𑀘𑀺𑀢𑁆𑀢𑀫𑁂𑀯 𑀅𑀕𑁆𑀕𑀳𑁂𑀢𑁆𑀯𑀸 𑀧𑀭𑁄𑀧𑀡𑁆𑀡𑀸𑀲𑀓𑀼𑀲𑀮𑀥𑀫𑁆𑀫𑁂𑀳𑀺 𑀲𑀤𑁆𑀥𑀺𑀁𑀬𑁂𑀯 𑀘𑀺𑀢𑁆𑀢𑀁 𑀕𑀳𑀺𑀢’’𑀦𑁆𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸𑀢𑀺 𑀲𑀼𑀔𑀪𑀽𑀫𑀺𑀬𑀦𑁆𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸. 𑀯𑀺𑀪𑀸𑀕𑀤𑀲𑁆𑀲𑀦𑀁 𑀯𑀺𑀲𑁂𑀲𑀤𑀲𑁆𑀲𑀦𑀁. 𑀪𑀸𑀲𑀺𑀢𑀩𑁆𑀩𑀁 𑀪𑀸𑀲𑀺𑀢𑀁, 𑀢𑀤𑁂𑀯 𑀅𑀢𑁆𑀣𑁄𑀢𑀺 𑀪𑀸𑀲𑀺𑀢𑀢𑁆𑀣𑁄. 𑀅𑀪𑀺𑀥𑁂𑀬𑁆𑀬𑀢𑁆𑀣𑁄. 𑀢𑀤𑀢𑁆𑀣𑀯𑀺𑀜𑁆𑀜𑀸𑀧𑀦𑁂𑀦𑀸𑀢𑀺 𑀢𑀺𑀓𑀤𑀼𑀓𑀸𑀦𑀁 𑀓𑀼𑀘𑁆𑀙𑀺𑀢𑀸𑀦𑀁 𑀲𑀮𑀦𑀸𑀤𑀺𑀅𑀢𑁆𑀣𑀤𑀻𑀧𑀓𑁂𑀦.

𑁯𑁯𑁪. 𑀓𑁄 𑀧𑀦 𑀯𑀸𑀤𑁄 𑀔𑀦𑁆𑀥𑀸𑀭𑀫𑁆𑀫𑀡𑀲𑁆𑀲𑀸𑀢𑀺 𑀧𑀼𑀩𑁆𑀩𑀸𑀧𑀭𑀪𑀸𑀯𑁂𑀦 𑀯𑀢𑁆𑀢𑀫𑀸𑀦𑁂 𑀅𑀭𑀳𑀢𑁄 𑀔𑀦𑁆𑀥𑁂 𑀏𑀓𑀢𑁆𑀢𑀦𑀬𑀯𑀲𑁂𑀦 𑀲𑀦𑁆𑀢𑀸𑀦𑀢𑁄 ‘‘𑀅𑀫𑁆𑀳𑀸𑀓𑀁 𑀫𑀸𑀢𑀼𑀮𑀢𑁆𑀣𑁂𑀭𑁄’’𑀢𑀺𑀆𑀤𑀺𑀦𑀸 𑀆𑀮𑀫𑁆𑀩𑀺𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀁 𑀉𑀧𑀸𑀤𑀸𑀦𑀁 𑀢𑀲𑁆𑀲 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀬𑁂𑀯 𑀕𑀡𑁆𑀳𑀸𑀢𑀺. 𑀲𑀢𑀺𑀧𑀺 𑀢𑀁𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑁂 𑀮𑁄𑀓𑀼𑀢𑁆𑀢𑀭𑀓𑁆𑀔𑀦𑁆𑀥𑁂 𑀢𑀢𑁆𑀣 𑀧𑀯𑀢𑁆𑀢𑀺𑀢𑀼𑀁 𑀅𑀲𑀫𑀢𑁆𑀣𑀪𑀸𑀯𑀢𑁄 𑀓𑀸 𑀧𑀦 𑀓𑀣𑀸 𑀔𑀦𑁆𑀥𑁂 𑀆𑀭𑀩𑁆𑀪 𑀧𑀯𑀢𑁆𑀢𑀫𑀸𑀦𑁂. 𑀏𑀢𑁂𑀦 𑀦𑀢𑁆𑀣𑀺 𑀫𑀕𑁆𑀕𑁄 𑀯𑀺𑀲𑀼𑀤𑁆𑀥𑀺𑀬𑀸, 𑀦𑀢𑁆𑀣𑀺 𑀦𑀺𑀩𑁆𑀩𑀸𑀦𑀦𑁆𑀢𑀺 𑀏𑀯𑀫𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀸 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀆𑀤𑀬𑁄 𑀦 𑀫𑀕𑁆𑀕𑀸𑀤𑀺𑀯𑀺𑀲𑀬𑀸 𑀢𑀁𑀢𑀁𑀧𑀜𑁆𑀜𑀢𑁆𑀢𑀺𑀯𑀺𑀲𑀬𑀸𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺.

𑁯𑁯𑁮. 𑀏𑀯𑀁 𑀲𑀁…𑀧𑁂… 𑀮𑁂𑀲𑀺𑀓𑀸𑀢𑀺 𑀅𑀦𑀼𑀧𑀸𑀤𑀸𑀦𑀺𑀬𑁂𑀳𑀺 𑀅𑀲𑀁𑀓𑀺𑀮𑁂𑀲𑀺𑀓𑀸𑀦𑀁 𑀪𑁂𑀤𑀸𑀪𑀸𑀯𑀫𑀸𑀳.

𑁧𑁦𑁦𑁬. 𑀅𑀯𑀺𑀚𑁆𑀚𑀫𑀸𑀦𑁄 𑀘 𑀲𑁄 𑀦𑀺𑀘𑁆𑀘𑀸𑀤𑀺𑀯𑀺𑀧𑀭𑀺𑀬𑀸𑀲𑀸𑀓𑀸𑀭𑁄 𑀘𑀸𑀢𑀺 𑀅𑀯𑀺…𑀧𑁂… 𑀲𑀸𑀓𑀸𑀭𑁄𑀢𑀺 𑀧𑀤𑀘𑁆𑀙𑁂𑀤𑁄. 𑀤𑀺𑀝𑁆𑀞𑀺𑀬𑀸 𑀦𑀺𑀘𑁆𑀘𑀸𑀤𑀺𑀅𑀯𑀺𑀚𑁆𑀚𑀫𑀸𑀦𑀸𑀓𑀸𑀭𑁂𑀦 𑀕𑀬𑁆𑀳𑀫𑀸𑀦𑀢𑁆𑀢𑁂𑀧𑀺 𑀦 𑀢𑀤𑀸𑀓𑀸𑀭𑁄 𑀯𑀺𑀬 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑁄, 𑀅𑀣 𑀔𑁄 𑀯𑀺𑀚𑁆𑀚𑀫𑀸𑀦𑁄 𑀓𑀸𑀬𑁄 𑀲𑀓𑁆𑀓𑀸𑀬𑁄𑀢𑀺 𑀅𑀯𑀺𑀚𑁆𑀚𑀫𑀸𑀦𑀦𑀺𑀘𑁆𑀘𑀸𑀤𑀺𑀯𑀺𑀧𑀭𑀺𑀬𑀸𑀲𑀸𑀓𑀸𑀭𑀢𑁄 𑀯𑀺𑀲𑁂𑀲𑀦𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀸 𑀦 𑀇𑀤𑀁 𑀯𑀺𑀲𑁂𑀲𑀦𑀁 𑀅𑀭𑀳𑀦𑁆𑀢𑀺 ‘‘𑀲𑀦𑁆𑀢𑁄 𑀯𑀺𑀚𑁆𑀚𑀫𑀸𑀦𑁄 𑀓𑀸𑀬𑁄 𑀲𑀓𑁆𑀓𑀸𑀬𑁄’’𑀢𑀺. 𑀯𑀢𑁆𑀣𑀼 𑀅𑀯𑀺𑀲𑁂𑀲𑀺𑀢𑀁 𑀳𑁄𑀢𑀻𑀢𑀺 𑀇𑀤𑀁 ‘‘𑀲𑀢𑀻 𑀓𑀸𑀬𑁂’’𑀢𑀺 𑀏𑀢𑁆𑀣 𑀓𑀸𑀬-𑀲𑀤𑁆𑀤𑁄 𑀲𑀫𑀽𑀳𑀢𑁆𑀣𑀢𑀸𑀬 𑀅𑀦𑀸𑀫𑀲𑀺𑀢𑀯𑀺𑀲𑁂𑀲𑀁 𑀔𑀦𑁆𑀥𑀧𑀜𑁆𑀘𑀓𑀁 𑀯𑀤𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁. 𑀧𑀲𑀸𑀤𑀓𑀸𑀬𑁄 𑀯𑀺𑀬 𑀓𑀼𑀘𑁆𑀙𑀺𑀢𑀸𑀦𑀁 𑀭𑀸𑀕𑀸𑀤𑀻𑀦𑀁 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀢𑀸𑀬 𑀓𑀸𑀬𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀏𑀯𑀁 𑀧𑀦 𑀅𑀢𑁆𑀣𑁂 𑀲𑀢𑀺 𑀤𑀺𑀝𑁆𑀞𑀺𑀬𑀸 𑀯𑀢𑁆𑀣𑀼 𑀯𑀺𑀲𑁂𑀲𑀺𑀢𑀫𑁂𑀯 𑀳𑁄𑀢𑀻𑀢𑀺 𑀮𑁄𑀓𑀼𑀢𑁆𑀢𑀭𑀸𑀧𑀺 𑀅𑀧𑀦𑀻𑀢𑀸. 𑀦 𑀳𑀺 𑀮𑁄𑀓𑀼𑀢𑁆𑀢𑀭𑀸 𑀔𑀦𑁆𑀥𑀸 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀢𑀸𑀬 ‘‘𑀓𑀸𑀬𑁄’’𑀢𑀺 𑀯𑀼𑀘𑁆𑀘𑀦𑁆𑀢𑀻𑀢𑀺. 𑀲𑀼𑀤𑁆𑀥𑀺𑀬𑀸 𑀅𑀳𑁂𑀢𑀼𑀪𑀽𑀢𑁂𑀦𑀸𑀢𑀺 𑀕𑁄𑀲𑀻𑀮𑀸𑀤𑀺𑀦𑀸, 𑀮𑁄𑀓𑀺𑀬𑀲𑀻𑀮𑁂𑀦 𑀯𑀸 𑀮𑁄𑀓𑀼𑀢𑁆𑀢𑀭𑀲𑀻𑀮𑀲𑁆𑀲 𑀅𑀧𑀤𑀝𑁆𑀞𑀸𑀦𑁂𑀦. ‘‘𑀅𑀯𑀻𑀢𑀺𑀓𑁆𑀓𑀫𑀦𑀻𑀬𑀢𑀸𑀲𑀢𑀢𑀁𑀘𑀭𑀺𑀢𑀩𑁆𑀩𑀢𑀸𑀳𑀺 𑀯𑀸 𑀲𑀻𑀮𑀁, 𑀢𑀧𑁄𑀘𑀭𑀡𑀪𑀸𑀯𑁂𑀦 𑀲𑀫𑀸𑀤𑀺𑀦𑁆𑀦𑀢𑀸𑀬 𑀯𑀢𑀁. 𑀅𑀢𑁆𑀢𑀦𑁄 𑀕𑀯𑀸𑀤𑀺𑀪𑀸𑀯𑀸𑀥𑀺𑀝𑁆𑀞𑀸𑀦𑀁 𑀲𑀻𑀮𑀁, 𑀕𑀘𑁆𑀙𑀦𑁆𑀢𑁄𑀬𑁂𑀯 𑀪𑀓𑁆𑀔𑀦𑀸𑀤𑀺𑀕𑀯𑀸𑀤𑀺𑀓𑀺𑀭𑀺𑀬𑀸𑀓𑀭𑀡𑀁 𑀯𑀢𑀁. 𑀅𑀓𑀢𑁆𑀢𑀩𑁆𑀩𑀸𑀪𑀺𑀫𑀢𑀢𑁄 𑀦𑀺𑀯𑀢𑁆𑀢𑀦𑀁 𑀯𑀸 𑀲𑀻𑀮𑀁, 𑀢𑀁𑀲𑀫𑀸𑀤𑀸𑀦𑀯𑀢𑁄 𑀯𑁂𑀲𑀪𑁄𑀚𑀦𑀓𑀺𑀘𑁆𑀘𑀘𑀭𑀡𑀸𑀤𑀺𑀯𑀺𑀲𑁂𑀲𑀧𑀝𑀺𑀧𑀢𑁆𑀢𑀺 𑀯𑀢’’𑀦𑁆𑀢𑀺 𑀘 𑀲𑀻𑀮𑀩𑁆𑀩𑀢𑀸𑀦𑀁 𑀯𑀺𑀲𑁂𑀲𑀁 𑀯𑀤𑀦𑁆𑀢𑀺.

𑁧𑁦𑁦𑁭. 𑀇𑀫𑀲𑁆𑀲𑀼𑀧𑁆𑀧𑀸𑀤𑀸 𑀇𑀤𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀉𑀧𑁆𑀧𑀸𑀤𑁄𑀢𑀺 𑀦 𑀚𑀦𑀦𑀫𑀢𑁆𑀢𑀁 𑀅𑀥𑀺𑀧𑁆𑀧𑁂𑀢𑀁, 𑀅𑀣 𑀔𑁄 𑀅𑀦𑀺𑀭𑁄𑀥𑁄𑀧𑀻𑀢𑀺 ‘‘𑀅𑀯𑀺𑀖𑀸𑀢𑀁 𑀚𑀦𑀲𑀤𑁆𑀤𑁄 𑀯𑀤𑀢𑀻’’𑀢𑀺 𑀆𑀳. 𑀢𑀢𑁆𑀣𑀸𑀬𑀁 𑀚𑀦-𑀲𑀤𑁆𑀤𑁂 𑀦𑀬𑁄, 𑀚𑀦𑀺𑀢𑀸𑀢𑀺 𑀚𑀦𑀸, 𑀅𑀯𑀺𑀳𑀢𑀸𑀢𑀺 𑀅𑀢𑁆𑀣𑁄. 𑀧𑀼𑀣𑀽 𑀚𑀦𑀸 𑀏𑀢𑁂𑀲𑀦𑁆𑀢𑀺 𑀧𑀼𑀣𑀼𑀚𑁆𑀚𑀦𑀸𑀢𑀺 𑀧𑀼𑀣𑀼𑀲𑀢𑁆𑀣𑀼𑀫𑀸𑀦𑀺𑀦𑁄 𑀲𑀢𑁆𑀢𑀸. 𑀅𑀪𑀺𑀲𑀗𑁆𑀔𑀭𑀡𑀸𑀤𑀺𑀅𑀢𑁆𑀣𑁄 𑀯𑀸 𑀚𑀦-𑀲𑀤𑁆𑀤𑁄 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀽𑀦𑀁. 𑀔𑀦𑁆𑀥𑀸𑀬𑀢𑀦𑀸𑀤𑀻𑀦𑀁 𑀲𑀯𑀦𑀸𑀥𑀻𑀦𑀢𑁆𑀢𑀸 𑀧𑀜𑁆𑀜𑀸𑀘𑀓𑁆𑀔𑀼𑀧𑀝𑀺𑀮𑀸𑀪𑀲𑁆𑀲 𑀢𑁂𑀲𑀁 𑀲𑀯𑀦𑀸𑀪𑀸𑀯𑀤𑀻𑀧𑀓𑀁 ‘‘𑀅𑀲𑁆𑀲𑀼𑀢𑀯𑀸’’𑀢𑀺 𑀇𑀤𑀁 𑀧𑀤𑀁 𑀅𑀦𑁆𑀥𑀢𑀁 𑀯𑀤𑀢𑀺.

𑀓𑀢𑀁 𑀚𑀸𑀦𑀦𑁆𑀢𑀻𑀢𑀺 𑀅𑀢𑁆𑀢𑀦𑀸 𑀧𑀭𑁂𑀳𑀺 𑀘 𑀓𑀢𑀁 𑀓𑀼𑀲𑀮𑀸𑀓𑀼𑀲𑀮𑀁 𑀢𑁂𑀳𑀺 𑀦𑀺𑀧𑁆𑀨𑀸𑀤𑀺𑀢𑀁 𑀲𑀼𑀔𑀤𑀼𑀓𑁆𑀔𑀁 𑀬𑀸𑀣𑀸𑀯𑀢𑁄 𑀚𑀸𑀦𑀦𑁆𑀢𑀺. 𑀧𑀭𑁂𑀲𑀁 𑀅𑀢𑁆𑀢𑀦𑀸, 𑀅𑀢𑁆𑀢𑀦𑁄 𑀘 𑀧𑀭𑁂𑀳𑀺 𑀓𑀢𑀁 𑀉𑀧𑀓𑀸𑀭𑀁 𑀬𑀣𑀸𑀯𑀼𑀢𑁆𑀢𑀸𑀓𑀸𑀭𑁂𑀦 𑀧𑀸𑀓𑀝𑀁 𑀓𑀭𑁄𑀦𑁆𑀢𑀺. 𑀩𑁆𑀬𑀸𑀥𑀺𑀆𑀤𑀻𑀳𑀺 𑀤𑀼𑀓𑁆𑀔𑀺𑀢𑀲𑁆𑀲 𑀉𑀧𑀝𑁆𑀞𑀸𑀦𑀸𑀤𑀺𑀓𑀸𑀢𑀩𑁆𑀩𑀁, 𑀲𑀁𑀲𑀸𑀭𑀤𑀼𑀓𑁆𑀔𑀤𑀼𑀓𑁆𑀔𑀺𑀢𑀲𑁆𑀲𑁂𑀯 𑀯𑀸 𑀬𑀣𑀸𑀯𑀼𑀢𑁆𑀢𑀸𑀓𑀸𑀭𑁂𑀦 𑀓𑀸𑀢𑀩𑁆𑀩𑀁 𑀓𑀭𑁄𑀦𑁆𑀢𑀺. 𑀅𑀭𑀺𑀬𑀓𑀭𑀥𑀫𑁆𑀫𑀸 𑀅𑀭𑀺𑀬𑀲𑀘𑁆𑀘𑀸𑀦𑀻𑀢𑀺 𑀧𑀼𑀭𑀺𑀫𑀲𑀘𑁆𑀘𑀤𑁆𑀯𑀬𑀯𑀲𑁂𑀦 𑀯𑀼𑀢𑁆𑀢𑀁 ‘‘𑀯𑀺𑀧𑀲𑁆𑀲𑀺𑀬𑀫𑀸𑀦𑀸 𑀅𑀦𑀺𑀘𑁆𑀘𑀸𑀤𑀬𑁄’’𑀢𑀺. 𑀧𑀭𑀺𑀜𑁆𑀜𑀸𑀤𑀺𑀯𑀺𑀲𑁂𑀲𑁂𑀦 𑀯𑀸 𑀧𑀲𑁆𑀲𑀺𑀬𑀫𑀸𑀦𑀸𑀢𑀺 𑀅𑀢𑁆𑀣𑁂 𑀲𑀢𑀺 𑀅𑀦𑀺𑀘𑁆𑀘𑀸𑀤𑀬𑁄𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀦𑀺𑀘𑁆𑀘𑀫𑁆𑀧𑀺 𑀦𑀺𑀩𑁆𑀩𑀸𑀦𑀁 𑀕𑀳𑀺𑀢𑀦𑁆𑀢𑀺 𑀘𑀢𑀼𑀲𑀘𑁆𑀘𑀯𑀲𑁂𑀦𑀧𑀺 𑀬𑁄𑀚𑁂𑀢𑀩𑁆𑀩𑀁, 𑀅𑀦𑀺𑀘𑁆𑀘𑀢𑁆𑀢𑀸𑀤𑀬𑁄 𑀯𑀸 ‘‘𑀅𑀦𑀺𑀘𑁆𑀘𑀸𑀤𑀬𑁄’’𑀢𑀺 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀯𑀲𑁂𑀲𑀓𑀺𑀮𑁂𑀲𑀸 𑀓𑀺𑀮𑁂𑀲𑀲𑁄𑀢𑀁. 𑀜𑀸𑀡𑀦𑁆𑀢𑀺 𑀬𑀸𑀣𑀸𑀯𑀢𑁄 𑀚𑀸𑀦𑀦𑀁. 𑀬𑀣𑀸𑀪𑀽𑀢𑀸𑀯𑀩𑁄𑀥𑁂𑀦 𑀳𑀺 𑀢𑀲𑁆𑀲 𑀢𑀸𑀦𑀺 𑀅𑀦𑀼𑀧𑁆𑀧𑀢𑁆𑀢𑀺𑀥𑀫𑁆𑀫𑀢𑀁 𑀆𑀧𑀸𑀤𑀺𑀢𑀢𑀸𑀬 𑀲𑀦𑁆𑀢𑀸𑀦𑁂 𑀅𑀧𑁆𑀧𑀯𑁂𑀲𑀸𑀭𑀳𑀸𑀦𑀺 ‘‘𑀲𑀁𑀯𑀼𑀢𑀸𑀦𑀺 𑀧𑀺𑀳𑀺𑀢𑀸𑀦𑀻’’𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺. 𑀢𑀣𑀸𑀢𑀺 𑀲𑀩𑁆𑀩𑀲𑀗𑁆𑀔𑀸𑀭𑀸𑀦𑀁 𑀯𑀺𑀧𑁆𑀧𑀓𑀸𑀭𑀲𑁆𑀲 𑀔𑀫𑀦𑀸𑀓𑀸𑀭𑁂𑀦. 𑀅𑀯𑀺𑀧𑀭𑀻𑀢𑀥𑀫𑁆𑀫𑀸 𑀏𑀢𑀸𑀬 𑀦𑀺𑀚𑁆𑀛𑀸𑀬𑀁 𑀔𑀫𑀦𑁆𑀢𑀻𑀢𑀺 𑀧𑀜𑁆𑀜𑀸 𑀔𑀦𑁆𑀢𑀻𑀢𑀺. 𑀅𑀤𑀼𑀝𑁆𑀞𑀲𑁆𑀲𑁂𑀯 𑀢𑀺𑀢𑀺𑀓𑁆𑀔𑀸𑀪𑀸𑀯𑀢𑁄 𑀢𑀣𑀸𑀧𑀯𑀢𑁆𑀢𑀸 𑀔𑀦𑁆𑀥𑀸𑀢𑀺 𑀅𑀤𑁄𑀲𑀧𑁆𑀧𑀥𑀸𑀦𑀸 𑀔𑀦𑁆𑀥𑀸 𑀯𑀼𑀢𑁆𑀢𑀸𑀢𑀺 ‘‘𑀅𑀤𑁄𑀲𑁄 𑀏𑀯 𑀯𑀸’’𑀢𑀺 𑀢𑀢𑀺𑀬𑁄 𑀯𑀺𑀓𑀧𑁆𑀧𑁄 𑀯𑀼𑀢𑁆𑀢𑁄. 𑀲𑀢𑀺𑀧𑀝𑀺𑀧𑀓𑁆𑀔𑀢𑁆𑀢𑀸 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀸𑀦𑀁 ‘‘𑀫𑀼𑀝𑁆𑀞𑀲𑁆𑀲𑀘𑁆𑀘’’𑀦𑁆𑀢𑀺 𑀯𑀼𑀢𑁆𑀢𑀸. 𑀅𑀓𑁆𑀔𑀦𑁆𑀢𑀺 𑀤𑁄𑀲𑁄. 𑀲𑀲𑁆𑀲𑀢𑀸𑀤𑀺𑀅𑀦𑁆𑀢𑀯𑀺𑀦𑀺𑀫𑀼𑀢𑁆𑀢𑀸 𑀥𑀫𑁆𑀫𑀝𑁆𑀞𑀺𑀢𑀻𑀢𑀺 𑀲𑀲𑁆𑀲𑀢𑀼𑀘𑁆𑀙𑁂𑀤𑀸𑀤𑀺𑀕𑀸𑀳𑁄 𑀢𑀧𑁆𑀧𑀝𑀺𑀮𑁄𑀫𑀪𑀸𑀯𑁄 𑀯𑀼𑀢𑁆𑀢𑁄. 𑀤𑀺𑀝𑁆𑀞𑀥𑀫𑁆𑀫𑀦𑀺𑀩𑁆𑀩𑀸𑀦𑀯𑀸𑀤𑁄 𑀦𑀺𑀩𑁆𑀩𑀸𑀦𑁂 𑀧𑀝𑀺𑀮𑁄𑀫𑀪𑀸𑀯𑁄. 𑀘𑀭𑀺𑀫𑀸𑀦𑀼𑀮𑁄𑀫𑀜𑀸𑀡𑀯𑀚𑁆𑀛𑀢𑀡𑁆𑀳𑀸𑀤𑀺𑀓𑁄 𑀓𑀺𑀮𑁂𑀲𑁄𑀢𑀺 𑀯𑀼𑀢𑁆𑀢𑁄, 𑀧𑀝𑀺𑀧𑀤𑀸𑀜𑀸𑀡𑀤𑀲𑁆𑀲𑀦𑀜𑀸𑀡𑀤𑀲𑁆𑀲𑀦𑀸𑀦𑀺 𑀯𑀺𑀬 𑀕𑁄𑀢𑁆𑀭𑀪𑀼𑀜𑀸𑀡𑀁 𑀓𑀺𑀮𑁂𑀲𑀸𑀦𑀁 𑀅𑀧𑁆𑀧𑀯𑀢𑁆𑀢𑀺𑀓𑀭𑀡𑀪𑀸𑀯𑁂𑀦 𑀯𑀢𑁆𑀢𑀢𑀺, 𑀓𑀺𑀮𑁂𑀲𑀯𑀺𑀲𑀬𑀸𑀢𑀺𑀮𑀗𑁆𑀖𑀦𑀪𑀸𑀯𑁂𑀦 𑀧𑀦 𑀧𑀯𑀢𑁆𑀢𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀲𑀗𑁆𑀔𑀸𑀭…𑀧𑁂… 𑀧𑀳𑀸𑀦’’𑀦𑁆𑀢𑀺.

𑀤𑀺𑀝𑁆𑀞𑀺𑀬𑀸𑀤𑀻𑀦𑀁 𑀲𑀫𑀼𑀤𑀬𑀲𑀪𑀸𑀕𑀢𑀸 𑀓𑀫𑁆𑀫𑀲𑁆𑀲 𑀯𑀺𑀓𑀼𑀧𑁆𑀧𑀸𑀤𑀦𑁂 𑀲𑀳𑀓𑀸𑀭𑀻𑀓𑀸𑀭𑀡𑀪𑀸𑀯𑁄, 𑀤𑀲𑁆𑀲𑀦𑀸𑀤𑀺𑀩𑁆𑀬𑀸𑀧𑀸𑀭𑀁 𑀯𑀸 𑀅𑀢𑁆𑀢𑀸𑀦𑀜𑁆𑀘 𑀤𑀲𑁆𑀲𑀦𑀸𑀤𑀺𑀓𑀺𑀘𑁆𑀘𑀁 𑀘𑀓𑁆𑀔𑀸𑀤𑀻𑀦𑀦𑁆𑀢𑀺 𑀏𑀯𑀜𑁆𑀳𑀺 𑀬𑀣𑀸𑀢𑀓𑁆𑀓𑀺𑀢𑀁 𑀅𑀢𑁆𑀢𑀸𑀦𑀁 𑀭𑀽𑀧𑀦𑁆𑀢𑀺 𑀕𑀡𑁆𑀳𑀸𑀢𑀺. 𑀬𑀣𑀸𑀤𑀺𑀝𑁆𑀞𑀦𑁆𑀢𑀺 𑀢𑀓𑁆𑀓𑀤𑀲𑁆𑀲𑀦𑁂𑀦 𑀬𑀣𑁄𑀧𑀮𑀤𑁆𑀥𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀤𑀺𑀝𑁆𑀞𑀺𑀕𑀢𑀺𑀓𑁄 𑀭𑀽𑀧𑀸𑀬𑀢𑀦𑀫𑁂𑀯 𑀅𑀢𑁆𑀢𑀸𑀢𑀺 𑀕𑀡𑁆𑀳𑀸𑀢𑀻𑀢𑀺. 𑀇𑀫𑀺𑀲𑁆𑀲𑀸𑀧𑀯𑀢𑁆𑀢𑀺𑀬𑀸𑀢𑀺 𑀲𑀸𑀫𑀜𑁆𑀜𑁂𑀦 𑀭𑀽𑀧𑀁 𑀅𑀢𑁆𑀢𑀸𑀢𑀺 𑀲𑀩𑁆𑀩𑀲𑀗𑁆𑀕𑀸𑀳𑀓𑀪𑀽𑀢𑀸𑀬 𑀧𑀯𑀢𑁆𑀢𑀺𑀬𑀸. 𑀭𑀽𑀧𑁂…𑀧𑁂… 𑀫𑀸𑀦𑀦𑁆𑀢𑀺 𑀘𑀓𑁆𑀔𑀸𑀤𑀻𑀲𑀼 𑀢𑀁𑀲𑀪𑀸𑀯𑁄 𑀅𑀢𑁆𑀢𑀸𑀢𑀺 𑀧𑀯𑀢𑁆𑀢𑀫𑀸𑀦𑀁 𑀅𑀢𑁆𑀢𑀕𑁆𑀕𑀳𑀡𑀁. 𑀅𑀦𑀜𑁆𑀜𑀢𑁆𑀢𑀸𑀤𑀺𑀕𑁆𑀕𑀳𑀡𑀦𑁆𑀢𑀺 𑀅𑀦𑀜𑁆𑀜𑀢𑁆𑀢𑀁 𑀅𑀢𑁆𑀢𑀦𑀺𑀬𑀅𑀢𑁆𑀢𑀦𑀺𑀲𑁆𑀲𑀺𑀢𑀅𑀢𑁆𑀢𑀸𑀥𑀸𑀭𑀢𑀸𑀕𑀳𑀡𑀁. 𑀯𑀡𑁆𑀡𑀸𑀤𑀻𑀦𑀦𑁆𑀢𑀺 𑀯𑀡𑁆𑀡𑀭𑀼𑀓𑁆𑀔𑀧𑀼𑀧𑁆𑀨𑀫𑀡𑀻𑀦𑀁. 𑀦𑀦𑀼 𑀘 𑀭𑀼𑀓𑁆𑀔𑀧𑀼𑀧𑁆𑀨𑀫𑀡𑀺𑀬𑁄 𑀧𑀭𑀫𑀢𑁆𑀣𑀢𑁄 𑀦 𑀯𑀺𑀚𑁆𑀚𑀦𑁆𑀢𑀺? 𑀲𑀘𑁆𑀘𑀁 𑀦 𑀯𑀺𑀚𑁆𑀚𑀦𑁆𑀢𑀺, 𑀢𑀤𑀼𑀧𑀸𑀤𑀸𑀦𑀁 𑀧𑀦 𑀯𑀺𑀚𑁆𑀚𑀢𑀻𑀢𑀺 𑀢𑀁 𑀲𑀫𑀼𑀤𑀺𑀢𑀸𑀤𑀺𑀧𑁆𑀧𑀓𑀸𑀭𑀁 𑀇𑀥 𑀭𑀼𑀓𑁆𑀔𑀸𑀤𑀺𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀦𑁆𑀢𑀺 𑀭𑀼𑀓𑁆𑀔𑀸𑀤𑀺𑀦𑀺𑀤𑀲𑁆𑀲𑀦𑁂𑀧𑀺 𑀦 𑀤𑁄𑀲𑁄 𑀙𑀸𑀬𑀸𑀭𑀼𑀓𑁆𑀔𑀸𑀤𑀻𑀦𑀁 𑀯𑀺𑀬 𑀭𑀽𑀧𑀲𑁆𑀲 𑀅𑀢𑁆𑀢𑀦𑁄 𑀘 𑀲𑀁𑀲𑀸𑀫𑀺𑀪𑀸𑀯𑀸𑀤𑀺𑀫𑀢𑁆𑀢𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸.

𑁧𑁦𑁦𑁮. 𑀚𑀸𑀢𑀺𑀆𑀤𑀺𑀲𑀪𑀸𑀯𑀦𑁆𑀢𑀺 𑀚𑀸𑀢𑀺𑀪𑀯𑀸𑀤𑀻𑀦𑀁 𑀦𑀺𑀩𑁆𑀩𑀢𑁆𑀢𑀺𑀦𑀺𑀩𑁆𑀩𑀢𑁆𑀢𑀦𑀸𑀤𑀺𑀲𑀪𑀸𑀯𑀁, 𑀉𑀧𑁆𑀧𑀸𑀤𑀦𑀲𑀫𑀢𑁆𑀣𑀢𑀸 𑀧𑀘𑁆𑀘𑀬𑀪𑀸𑀯𑁄.

𑁧𑁦𑁦𑁯. 𑀲𑀸𑀫𑀜𑁆𑀜𑁂𑀦 ‘‘𑀢𑀤𑁂𑀓𑀝𑁆𑀞𑀸 𑀓𑀺𑀮𑁂𑀲𑀸’’𑀢𑀺 (𑀥. 𑀲. 𑁧𑁦𑁧𑁦), 𑀧𑀭𑀢𑁄 ‘‘𑀅𑀯𑀲𑁂𑀲𑁄 𑀮𑁄𑀪𑁄’’𑀢𑀺𑀆𑀤𑀺𑀯𑀘𑀦𑀢𑁄 (𑀥. 𑀲. 𑁧𑁦𑁧𑁧) 𑀧𑀸𑀭𑀺𑀲𑁂𑀲𑀢𑁄 𑀲𑀸𑀫𑀢𑁆𑀣𑀺𑀬𑀢𑁄 𑀯𑀸 𑀮𑀩𑁆𑀪𑀫𑀸𑀦𑀢𑀸𑀬 𑀲𑀢𑀺𑀧𑀺 𑀆𑀕𑀢𑀢𑁆𑀢𑁂 𑀲𑀭𑀽𑀧𑁂𑀦 𑀧𑀪𑁂𑀤𑁂𑀦 𑀯𑀸 𑀤𑀺𑀝𑁆𑀞𑀺𑀆𑀤𑀬𑁄 𑀯𑀺𑀬 𑀅𑀦𑀸𑀕𑀢𑀢𑁆𑀢𑀸 𑀮𑁄𑀪𑀸𑀤𑀬𑁄 ‘‘𑀅𑀦𑀸𑀕𑀢𑀸’’𑀢𑀺 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀇𑀥 …𑀧𑁂… 𑀲𑁆𑀲𑁂𑀢𑀼’’𑀦𑁆𑀢𑀺. 𑀅𑀢𑁆𑀣𑀢𑁄 𑀯𑀺𑀜𑁆𑀜𑀸𑀬𑀢𑀺 𑀮𑁄𑀪𑀸𑀤𑀻𑀳𑀺 𑀲𑀳𑀚𑀸𑀢𑀸 𑀳𑀼𑀢𑁆𑀯𑀸 𑀤𑀺𑀝𑁆𑀞𑀺𑀬𑀸 𑀏𑀯 𑀧𑀸𑀴𑀺𑀬𑀁 𑀯𑀼𑀢𑁆𑀢𑀓𑀺𑀮𑁂𑀲𑀪𑀸𑀯𑀢𑁄. 𑀇𑀢𑀺𑀧𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺 𑀲𑀁𑀬𑁄𑀚𑀦𑀓𑀺𑀮𑁂𑀲𑀸𑀦𑀫𑁆𑀧𑀺 𑀧𑀝𑀺𑀦𑀺𑀤𑁆𑀤𑁂𑀲𑀸𑀭𑀳𑀢𑁆𑀢𑀸 𑀲𑀫𑁆𑀧𑀬𑀼𑀢𑁆𑀢𑀲𑀫𑀼𑀝𑁆𑀞𑀸𑀦𑀪𑀸𑀯𑀢𑁄 𑀘. 𑀲𑀁𑀬𑁄𑀚𑀦𑀭𑀳𑀺𑀢𑁂𑀳𑀻𑀢𑀺 𑀲𑀁𑀬𑁄𑀚𑀦𑀪𑀸𑀯𑀭𑀳𑀺𑀢𑁂𑀳𑀺 𑀣𑀺𑀦𑀉𑀤𑁆𑀥𑀘𑁆𑀘𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀣𑀺𑀦𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑁂𑀳𑀺 𑀯𑀸.

𑁧𑁦𑁧𑁩. 𑀏𑀓𑀤𑁂…𑀧𑁂… 𑀯𑀤𑀢𑀺 𑀅𑀯𑀬𑀯𑁂𑀦𑀧𑀺 𑀲𑀫𑀼𑀤𑀸𑀬𑁄 𑀯𑀼𑀘𑁆𑀘𑀢𑀻𑀢𑀺. 𑀳𑁂𑀢𑀼 𑀏𑀢𑁂𑀲𑀁 𑀅𑀢𑁆𑀣𑀻𑀢𑀺 𑀯𑀸 𑀳𑁂𑀢𑀼𑀓𑀸. 𑀅𑀦𑀺𑀬𑀢𑁄𑀢𑀺 𑀦 𑀅𑀯𑀥𑀸𑀭𑀺𑀢𑁄. 𑀧𑀼𑀭𑀺𑀫𑀧𑀤𑀸𑀯𑀥𑀸𑀭𑀡𑀯𑀲𑁂𑀦 𑀕𑀳𑁂𑀢𑀩𑁆𑀩𑀢𑁆𑀣𑀢𑁆𑀢𑀸 𑀯𑀺𑀯𑀭𑀡𑀻𑀬𑀢𑁆𑀣𑀯𑀸. 𑀅𑀢𑁆𑀣𑀢𑁄 𑀦𑀺𑀓𑁆𑀔𑀺𑀧𑀺𑀢𑀼𑀦𑁆𑀢𑀺 ‘‘𑀢𑀬𑁄 𑀓𑀼𑀲𑀮𑀳𑁂𑀢𑀽 𑀅𑀮𑁄𑀪𑁄 𑀅𑀤𑁄𑀲𑁄 𑀅𑀫𑁄𑀳𑁄’’𑀢𑀺𑀆𑀤𑀻𑀲𑀼 (𑀥. 𑀲. 𑁧𑁦𑁬𑁦) 𑀯𑀺𑀬 𑀧𑀼𑀭𑀺𑀫𑀦𑀬𑁂𑀦 𑀤𑀲𑁆𑀲𑀺𑀢𑀥𑀫𑁆𑀫𑁂𑀬𑁂𑀯 𑀳𑁂𑀢𑀼𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀪𑁂𑀤𑀢𑁄 𑀅𑀢𑁆𑀣𑀤𑀲𑁆𑀲𑀦𑀯𑀲𑁂𑀦 𑀦𑀺𑀤𑁆𑀤𑀺𑀲𑀺𑀢𑀼𑀦𑁆𑀢𑀺 𑀅𑀢𑁆𑀣𑁄.

𑁧𑁦𑁨𑁯. 𑀅𑀪𑀺𑀜𑁆𑀜𑀸𑀬𑀼𑀢𑁆𑀢𑀯𑀚𑁆𑀚𑀸𑀦𑀁 𑀫𑀳𑀕𑁆𑀕𑀢𑀸𑀦𑀁 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸𑀪𑀸𑀯𑀸 ‘‘𑀫𑀳𑀕𑁆𑀕𑀢𑀸 𑀯𑀸 𑀇𑀤𑁆𑀥𑀺𑀯𑀺𑀥𑀸𑀤𑀬𑁄’’𑀢𑀺 𑀯𑀼𑀢𑁆𑀢𑀁. 𑀅𑀢𑀻𑀢𑀁𑀲𑀜𑀸𑀡𑀲𑁆𑀲 𑀓𑀸𑀫𑀸𑀯𑀘𑀭𑀢𑁆𑀢𑀸 ‘‘𑀘𑁂𑀢𑁄…𑀧𑁂… 𑀜𑀸𑀡𑀲𑀫𑁆𑀧𑀬𑀼𑀢𑁆𑀢𑀸’’𑀢𑀺 𑀆𑀳.

𑁧𑁦𑁩𑁫. 𑀅𑀦𑀦𑁆𑀢𑀭𑁂 𑀦𑀺𑀬𑀼𑀢𑁆𑀢𑀸𑀦𑀻𑀢𑀺 𑀘𑀼𑀢𑀺𑀅𑀦𑀦𑁆𑀢𑀭𑀁 𑀨𑀮𑀁 𑀅𑀦𑀦𑁆𑀢𑀭𑀁, 𑀢𑀲𑁆𑀫𑀺𑀁 𑀦𑀺𑀬𑀼𑀢𑁆𑀢𑀸𑀦𑀺 𑀢𑀁 𑀏𑀓𑀦𑁆𑀢𑁂𑀦 𑀦𑀺𑀧𑁆𑀨𑀸𑀤𑀦𑀢𑁄 𑀅𑀦𑀢𑀺𑀓𑁆𑀓𑀫𑀦𑀓𑀸𑀦𑀻𑀢𑀺 𑀅𑀢𑁆𑀣𑁄. 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀲 𑀅𑀦𑀦𑁆𑀢𑀭𑀲𑁆𑀲 𑀓𑀭𑀡𑀁 𑀅𑀦𑀦𑁆𑀢𑀭𑀁, 𑀢𑀁 𑀲𑀻𑀮𑀸𑀦𑀻𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀅𑀦𑁂𑀓𑁂𑀲𑀼 𑀆𑀦𑀦𑁆𑀢𑀭𑀺𑀬𑁂𑀲𑀼 𑀓𑀢𑁂𑀲𑀼 𑀓𑀺𑀜𑁆𑀘𑀸𑀧𑀺 𑀩𑀮𑀯𑀢𑁄𑀬𑁂𑀯 𑀧𑀝𑀺𑀲𑀦𑁆𑀥𑀺𑀤𑀸𑀦𑀁, 𑀦 𑀇𑀢𑀭𑁂𑀲𑀁, 𑀅𑀢𑁆𑀢𑀦𑀸 𑀧𑀦 𑀓𑀸𑀢𑀩𑁆𑀩𑀓𑀺𑀘𑁆𑀘𑀲𑁆𑀲 𑀢𑁂𑀦𑁂𑀯 𑀓𑀢𑀢𑁆𑀢𑀸 𑀢𑀲𑁆𑀲 𑀯𑀺𑀧𑀸𑀓𑀲𑁆𑀲 𑀉𑀧𑀢𑁆𑀣𑀫𑁆𑀪𑀦𑀯𑀲𑁂𑀦 𑀧𑀯𑀢𑁆𑀢𑀦𑀢𑁄 𑀦 𑀇𑀢𑀭𑀸𑀦𑀺 𑀢𑁂𑀦 𑀦𑀺𑀯𑀸𑀭𑀺𑀢𑀨𑀮𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺, 𑀓𑁄 𑀧𑀦 𑀯𑀸𑀤𑁄 𑀧𑀝𑀺𑀧𑀓𑁆𑀔𑁂𑀲𑀼 𑀓𑀼𑀲𑀮𑁂𑀲𑀽𑀢𑀺 𑀯𑀼𑀢𑁆𑀢𑀁 ‘‘𑀧𑀝𑀺𑀧𑀓𑁆𑀔𑁂𑀦 𑀅𑀦𑀺𑀯𑀸𑀭𑀡𑀻𑀬𑀨𑀮𑀢𑁆𑀢𑀸’’𑀢𑀺. ‘‘𑀅𑀦𑁂𑀓𑀲𑁆𑀫𑀺𑀫𑁆𑀧𑀺…𑀧𑁂… 𑀦𑀢𑁆𑀣𑀻’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀅𑀦𑁂𑀓𑁂𑀲𑀼 𑀆𑀦𑀦𑁆𑀢𑀭𑀺𑀬𑁂𑀲𑀼 𑀓𑀢𑁂𑀲𑀼 𑀩𑀮𑀯𑀁𑀬𑁂𑀯 𑀧𑀝𑀺𑀲𑀦𑁆𑀥𑀺𑀤𑀸𑀬𑀓𑀦𑁆𑀢𑀺 𑀢𑁂𑀦 𑀇𑀢𑀭𑁂𑀲𑀁 𑀯𑀺𑀧𑀸𑀓𑁄 𑀧𑀝𑀺𑀩𑀸𑀳𑀺𑀢𑁄 𑀳𑁄𑀢𑀻𑀢𑀺 𑀆𑀳 ‘‘𑀦 𑀘 𑀢𑁂𑀲’’𑀦𑁆𑀢𑀺𑀆𑀤𑀺. 𑀢𑀜𑁆𑀘 𑀢𑁂𑀲𑀁 𑀅𑀜𑁆𑀜𑀫𑀜𑁆𑀜𑀁 𑀅𑀧𑁆𑀧𑀝𑀺𑀩𑀸𑀳𑀓𑀢𑁆𑀢𑀁 𑀫𑀸𑀢𑀺𑀓𑀸𑀯𑀡𑁆𑀡𑀦𑀸𑀬𑀁 𑀯𑀺𑀢𑁆𑀣𑀸𑀭𑁂𑀦 𑀯𑀺𑀘𑀸𑀭𑀺𑀢𑀫𑁂𑀯.

𑀅𑀢𑁆𑀣𑀢𑁄 𑀆𑀧𑀦𑁆𑀦𑀁 𑀅𑀕𑁆𑀕𑀳𑁂𑀢𑁆𑀯𑀸 𑀬𑀣𑀸𑀭𑀼𑀢𑀯𑀲𑁂𑀦𑁂𑀯 𑀧𑀸𑀴𑀺𑀬𑀸 𑀅𑀢𑁆𑀣𑀁 𑀕𑀳𑁂𑀢𑁆𑀯𑀸 𑀢𑁂𑀲𑀁 𑀯𑀸𑀤𑀸𑀦𑀁 𑀢𑀧𑁆𑀧𑀭𑀪𑀸𑀯𑁂𑀦 𑀧𑀯𑀢𑁆𑀢𑀺𑀁 𑀲𑀦𑁆𑀥𑀸𑀬 𑀅𑀳𑁂𑀢𑀼𑀓𑀯𑀸𑀤𑀸𑀤𑀻𑀦𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀼𑀭𑀺𑀫𑀯𑀸𑀤𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀦𑀺𑀬𑁆𑀬𑀸𑀦𑀺𑀓𑀦𑀺𑀬𑁆𑀬𑀸𑀦𑀺𑀓𑀪𑁂𑀤𑀁 𑀧𑀦 𑀲𑀫𑁆𑀪𑀸𑀭𑀓𑀫𑁆𑀫𑀁 𑀩𑀦𑁆𑀥𑀫𑁄𑀓𑁆𑀔𑀳𑁂𑀢𑀽𑀢𑀺 𑀩𑀦𑁆𑀥𑀫𑁄𑀓𑁆𑀔𑀳𑁂𑀢𑀼𑀁 𑀧𑀝𑀺𑀲𑁂𑀥𑁂𑀦𑁆𑀢𑁄𑀧𑀺 𑀓𑀫𑁆𑀫𑀁 𑀧𑀝𑀺𑀲𑁂𑀥𑁂𑀢𑀺. 𑀲𑀼𑀫𑀗𑁆𑀕𑀮𑀯𑀺𑀮𑀸𑀲𑀺𑀦𑀺𑀬𑀁 𑀧𑀦 𑀯𑀺𑀧𑀸𑀓𑀲𑁆𑀲 𑀓𑀫𑁆𑀫𑀓𑀺𑀮𑁂𑀲𑀲𑀫𑀸𑀥𑀺𑀧𑀜𑁆𑀜𑀸𑀦𑀁 𑀳𑁂𑀢𑀼𑀪𑀸𑀯𑀢𑁄 𑀯𑀺𑀧𑀸𑀓𑁄𑀧𑀺 𑀩𑀦𑁆𑀥𑀫𑁄𑀓𑁆𑀔𑀳𑁂𑀢𑀽𑀢𑀺 ‘‘𑀦𑀢𑁆𑀣𑀺 𑀳𑁂𑀢𑀽𑀢𑀺 𑀯𑀤𑀦𑁆𑀢𑁄 𑀉𑀪𑀬𑀁 𑀧𑀝𑀺𑀩𑀸𑀳𑀢𑀻’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁧.𑁧𑁭𑁦-𑁧𑁭𑁨) 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀫𑁆𑀫𑀁 𑀧𑀝𑀺𑀲𑁂𑀥𑁂𑀦𑁆𑀢𑁂𑀦𑀧𑀺 𑀯𑀺𑀧𑀸𑀓𑁄 𑀧𑀝𑀺𑀲𑁂𑀥𑀺𑀢𑁄 𑀳𑁄𑀢𑀺, 𑀯𑀺𑀧𑀸𑀓𑀁 𑀧𑀝𑀺𑀲𑁂𑀥𑁂𑀦𑁆𑀢𑁂𑀦𑀧𑀺 𑀓𑀫𑁆𑀫𑀦𑁆𑀢𑀺 𑀢𑀬𑁄𑀧𑀺 𑀏𑀢𑁂 𑀯𑀸𑀤𑀸 𑀅𑀢𑁆𑀣𑀢𑁄 𑀉𑀪𑀬𑀧𑀝𑀺𑀲𑁂𑀥𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀦𑁆𑀢𑀺 𑀅𑀳𑁂𑀢𑀼𑀓𑀯𑀸𑀤𑀸𑀤𑀺𑀧𑀝𑀺𑀲𑀁𑀬𑀼𑀢𑁆𑀢𑁂 𑀅𑀲𑀤𑁆𑀥𑀫𑁆𑀫𑁂 𑀉𑀕𑁆𑀕𑀳𑀧𑀭𑀺𑀧𑀼𑀘𑁆𑀙𑀸𑀯𑀺𑀦𑀺𑀘𑁆𑀙𑀬𑀧𑀲𑀼𑀢𑀲𑁆𑀲 ‘‘𑀦𑀢𑁆𑀣𑀺 𑀳𑁂𑀢𑀽’’𑀢𑀺𑀆𑀤𑀺𑀦𑀸 𑀭𑀳𑁄 𑀦𑀺𑀲𑀻𑀤𑀺𑀢𑁆𑀯𑀸 𑀘𑀺𑀦𑁆𑀢𑁂𑀦𑁆𑀢𑀲𑁆𑀲 𑀢𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀫𑀺𑀘𑁆𑀙𑀸𑀲𑀢𑀺 𑀲𑀦𑁆𑀢𑀺𑀝𑁆𑀞𑀢𑀺, 𑀘𑀺𑀢𑁆𑀢𑀁 𑀏𑀓𑀕𑁆𑀕𑀁 𑀳𑁄𑀢𑀺, 𑀚𑀯𑀦𑀸𑀦𑀺 𑀚𑀯𑀦𑁆𑀢𑀺. 𑀧𑀞𑀫𑀚𑀯𑀦𑁂 𑀲𑀢𑁂𑀓𑀺𑀘𑁆𑀙𑁄 𑀳𑁄𑀢𑀺, 𑀢𑀣𑀸 𑀤𑀼𑀢𑀺𑀬𑀸𑀤𑀻𑀲𑀼. 𑀲𑀢𑁆𑀢𑀫𑁂 𑀅𑀢𑁂𑀓𑀺𑀘𑁆𑀙𑀪𑀸𑀯𑀁 𑀧𑀢𑁆𑀢𑁄 𑀦𑀸𑀫 𑀳𑁄𑀢𑀺. 𑀬𑀸 𑀏𑀯𑀁 𑀧𑀯𑀢𑁆𑀢𑀸 𑀤𑀺𑀝𑁆𑀞𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺’’𑀦𑁆𑀢𑀺. 𑀢𑀢𑁄 𑀧𑀼𑀭𑀺𑀫𑀪𑀸𑀯𑀸 𑀅𑀦𑀺𑀬𑀢𑀸.

𑁧𑁦𑁩𑁯. 𑀲𑀳𑀚𑀸𑀢 𑀅𑀜𑁆𑀜𑀫𑀜𑁆𑀜 𑀦𑀺𑀲𑁆𑀲𑀬 𑀅𑀢𑁆𑀣𑀺 𑀅𑀯𑀺𑀕𑀢𑀸𑀤𑀺𑀯𑀺𑀲𑀺𑀝𑁆𑀞𑀪𑀸𑀯𑁂𑀧𑀺 𑀫𑀕𑁆𑀕𑀧𑀘𑁆𑀘𑀬𑀲𑁆𑀲 𑀲𑀫𑁆𑀧𑀬𑁄𑀕𑀯𑀺𑀲𑀺𑀝𑁆𑀞𑀢𑀸𑀤𑀻𑀧𑀦𑁂𑀦𑁂𑀯 𑀲𑀳𑀚𑀸𑀢𑀸𑀤𑀺𑀯𑀺𑀲𑀺𑀝𑁆𑀞𑀢𑀸𑀧𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 𑀧𑀸𑀴𑀺𑀬𑀁 ‘‘𑀲𑀫𑁆𑀧𑀬𑀼𑀢𑁆𑀢𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 ‘‘𑀲𑀫𑁆𑀧𑀬𑁄𑀕𑀯𑀺𑀲𑀺𑀝𑁆𑀞𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀫𑀕𑁆𑀕…𑀧𑁂… 𑀤𑀲𑁆𑀲𑁂𑀢𑀼𑀁, 𑀦 𑀧𑀦 𑀫𑀕𑁆𑀕𑀗𑁆𑀕𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀫𑀕𑁆𑀕𑀧𑀘𑁆𑀘𑀬𑀪𑀸𑀯𑀸𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀁 𑀲𑀢𑀻𑀢𑀺 𑀬𑀤𑀺 𑀫𑀕𑁆𑀕𑀗𑁆𑀕𑀸𑀦𑀁 𑀫𑀕𑁆𑀕𑀧𑀘𑁆𑀘𑀬𑀮𑀸𑀪𑀺𑀢𑀸𑀬 𑀧𑀓𑀸𑀲𑀦𑁄 𑀧𑀞𑀫𑀦𑀬𑁄, 𑀏𑀯𑀁 𑀲𑀦𑁆𑀢𑁂. 𑀫𑀕𑁆𑀕𑀗𑁆𑀕𑀸𑀦𑀺𑀧𑀺 𑀯𑁂𑀤𑀦𑀸𑀤𑀬𑁄 𑀯𑀺𑀬 𑀫𑀕𑁆𑀕𑀳𑁂𑀢𑀼𑀓𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑀢𑁆𑀢𑀸 𑀅𑀫𑀕𑁆𑀕𑀲𑀪𑀸𑀯𑀸𑀦𑀁 𑀅𑀮𑁄𑀪𑀸𑀤𑀻𑀦𑀁 𑀢𑀤𑀜𑁆𑀜𑁂𑀲𑀁 𑀢𑀤𑀼𑀪𑀬𑀲𑀪𑀸𑀯𑀸𑀦𑀁 𑀥𑀫𑁆𑀫𑀸𑀦𑀁 𑀧𑀘𑁆𑀘𑀬𑀪𑀸𑀯𑀤𑀻𑀧𑀦𑁂 𑀢𑀢𑀺𑀬𑀦𑀬𑁂 𑀯𑀺𑀬 𑀦 𑀞𑀧𑁂𑀢𑀩𑁆𑀩𑀸𑀦𑀻𑀢𑀺 𑀆𑀳 ‘‘𑀞𑀧𑁂𑀢𑁆𑀯𑀸𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸’’𑀢𑀺. 𑀧𑀼𑀩𑁆𑀩𑁂𑀢𑀺 𑀧𑀼𑀭𑀺𑀫𑀦𑀬𑁂.

𑀤𑀼𑀢𑀺𑀬𑀦𑀬𑁂𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀧𑀞𑀫𑀦𑀬𑀁 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀢𑁂𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀧𑀼𑀭𑀺𑀫𑀲𑁆𑀫𑀺𑀁 𑀦𑀬𑀤𑁆𑀯𑀬𑁂 𑀞𑀧𑀺𑀢𑀢𑁆𑀢𑀸 𑀢𑀲𑁆𑀲 𑀲𑀳𑁂𑀢𑀼𑀓𑀪𑀸𑀯𑀤𑀲𑁆𑀲𑀦𑁄 𑀢𑀢𑀺𑀬𑀦𑀬𑁄 𑀆𑀭𑀤𑁆𑀥𑁄𑀢𑀺 𑀤𑀲𑁆𑀲𑁂𑀢𑀺. 𑀢𑀢𑀺𑀬𑀦𑀬𑁂 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀳𑁂𑀢𑀼𑀓𑀪𑀸𑀯𑀤𑀲𑁆𑀲𑀦𑀁 𑀅𑀦𑀺𑀘𑁆𑀙𑀦𑁆𑀢𑁄 𑀘𑁄𑀤𑀓𑁄 ‘‘𑀓𑀣𑀁 𑀤𑀲𑁆𑀲𑀺𑀢𑁄’’𑀢𑀺 𑀘𑁄𑀤𑁂𑀢𑁆𑀯𑀸 ‘‘𑀦𑀦𑀽’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀢𑀺. 𑀇𑀢𑀭𑁄 ‘‘𑀬𑀣𑀸 𑀳𑀻’’𑀢𑀺𑀆𑀤𑀺𑀦𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀳𑁂𑀢𑀼𑀪𑀸𑀯𑁂𑀦 𑀯𑀼𑀢𑁆𑀢𑀸𑀦𑀫𑁆𑀧𑀺 𑀮𑁄𑀪𑀸𑀤𑀻𑀦𑀁 𑀅𑀜𑁆𑀜𑀫𑀜𑁆𑀜𑀁 𑀲𑀳𑀚𑁂𑀓𑀝𑁆𑀞𑀲𑀫𑁆𑀧𑀬𑀼𑀢𑁆𑀢𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀢𑁄 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀳𑁂𑀢𑀼𑀓𑀲𑀗𑁆𑀕𑀳𑁄 𑀯𑀺𑀬 𑀫𑀕𑁆𑀕𑀳𑁂𑀢𑀼𑀪𑀸𑀯𑁂𑀦 𑀯𑀼𑀢𑁆𑀢𑀸𑀬𑀧𑀺 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀫𑀕𑁆𑀕𑀳𑁂𑀢𑀼𑀓𑀪𑀸𑀯𑁄𑀧𑀺 𑀬𑀼𑀚𑁆𑀚𑀢𑀺 𑀫𑀕𑁆𑀕𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑀢𑁄𑀢𑀺 𑀤𑀲𑁆𑀲𑁂𑀢𑀺.

𑀢𑀢𑁄 𑀅𑀜𑁆𑀜𑀲𑁆𑀲𑁂𑀯𑀸𑀢𑀺 𑀢𑀢𑁄 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀗𑁆𑀔𑀸𑀢𑀳𑁂𑀢𑀼𑀢𑁄 𑀅𑀜𑁆𑀜𑀲𑁆𑀲 𑀅𑀮𑁄𑀪𑀸𑀤𑁄𑀲𑀲𑁆𑀲𑁂𑀯. 𑀅𑀜𑁆𑀜𑁂𑀦𑀸𑀢𑀺 ‘‘𑀫𑀕𑁆𑀕𑁄 𑀳𑁂𑀢𑀽’’𑀢𑀺 𑀇𑀢𑁄 𑀅𑀜𑁆𑀜𑁂𑀦. 𑀅𑀮𑁄𑀪𑀸𑀤𑁄𑀲𑀸𑀦𑀁𑀬𑁂𑀯 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀢𑁂𑀲𑀁𑀬𑁂𑀯 𑀆𑀯𑁂𑀡𑀺𑀓𑁂𑀦 𑀫𑀕𑁆𑀕𑀳𑁂𑀢𑀽𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦. 𑀲𑀸𑀥𑀸𑀭𑀡𑁂𑀦 𑀧𑀭𑀺𑀬𑀸𑀬𑁂𑀦𑀸𑀢𑀺 𑀢𑀺𑀡𑁆𑀡𑀫𑁆𑀧𑀺 𑀳𑁂𑀢𑀽𑀦𑀁 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀫𑀕𑁆𑀕𑀸𑀫𑀕𑁆𑀕𑀲𑀪𑀸𑀯𑀸𑀦𑀁 𑀲𑀸𑀥𑀸𑀭𑀡𑁂𑀦 𑀫𑀕𑁆𑀕𑀳𑁂𑀢𑀼𑀫𑀕𑁆𑀕𑀳𑁂𑀢𑀽𑀢𑀺 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦. 𑀢𑁂𑀲𑀦𑁆𑀢𑀺 𑀳𑁂𑀢𑀽𑀦𑀁. 𑀅𑀜𑁆𑀜𑁂𑀲𑀦𑁆𑀢𑀺 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀸𑀦𑀁. 𑀅𑀢𑁆𑀣𑀯𑀺𑀲𑁂𑀲𑀯𑀲𑁂𑀦𑀸𑀢𑀺 ‘‘𑀫𑀕𑁆𑀕𑀳𑁂𑀢𑀼𑀓𑀸’’𑀢𑀺 𑀧𑀸𑀴𑀺𑀬𑀸 𑀅𑀢𑁆𑀣𑀯𑀺𑀲𑁂𑀲𑀯𑀲𑁂𑀦. 𑀅𑀫𑁄𑀳𑁂𑀦 𑀅𑀮𑁄𑀪𑀸𑀤𑁄𑀲𑀸𑀫𑁄𑀳𑁂𑀳𑀺 𑀘 𑀲𑁂𑀲𑀥𑀫𑁆𑀫𑀸𑀦𑀁 𑀲𑀳𑁂𑀢𑀼𑀓𑀪𑀸𑀯𑀤𑀲𑁆𑀲𑀦𑀯𑀲𑁂𑀦 𑀧𑀯𑀢𑁆𑀢𑀸 𑀤𑀼𑀢𑀺𑀬𑀢𑀢𑀺𑀬𑀦𑀬𑀸 ‘‘𑀲𑀭𑀽𑀧𑀢𑁄 𑀳𑁂𑀢𑀼𑀳𑁂𑀢𑀼𑀫𑀦𑁆𑀢𑀤𑀲𑁆𑀲𑀦’’𑀦𑁆𑀢𑀺 𑀯𑀼𑀢𑁆𑀢𑀸. 𑀢𑀣𑀸𑀅𑀤𑀲𑁆𑀲𑀦𑀢𑁄𑀢𑀺 𑀲𑀭𑀽𑀧𑁂𑀦 𑀅𑀤𑀲𑁆𑀲𑀦𑀢𑁄. 𑀅𑀢𑁆𑀣𑁂𑀦…𑀧𑁂… 𑀕𑀫𑀦𑀢𑁄𑀢𑀺 ‘‘𑀫𑀕𑁆𑀕𑀗𑁆𑀕𑀸𑀦𑀺 𑀞𑀧𑁂𑀢𑁆𑀯𑀸 𑀢𑀁𑀲𑀫𑁆𑀧𑀬𑀼𑀢𑁆𑀢𑁄’’𑀢𑀺 (𑀥. 𑀲. 𑁧𑁦𑁩𑁯) 𑀯𑀘𑀦𑀢𑁄 𑀫𑀕𑁆𑀕𑀲𑀪𑀸𑀯𑀸𑀦𑀁 𑀥𑀫𑁆𑀫𑀸𑀦𑀁 𑀫𑀕𑁆𑀕𑀧𑀘𑁆𑀘𑀬𑀢𑀸𑀲𑀗𑁆𑀔𑀸𑀢𑁄 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀳𑁂𑀢𑀼𑀪𑀸𑀯𑁄 𑀲𑀭𑀽𑀧𑀢𑁄 𑀤𑀲𑁆𑀲𑀺𑀢𑁄. 𑀫𑀕𑁆𑀕𑀳𑁂𑀢𑀼𑀪𑀽𑀢𑀸𑀬 𑀧𑀦 𑀲𑀫𑁆𑀫𑀸𑀤𑀺𑀝𑁆𑀞𑀺𑀬𑀸 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀳𑁂𑀢𑀼𑀳𑁂𑀢𑀼𑀪𑀸𑀯𑁄 𑀅𑀢𑁆𑀣𑀢𑁄 𑀜𑀸𑀧𑀺𑀢𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄.

𑁧𑁦𑁪𑁦. 𑀅𑀲𑀪𑀸𑀯𑀥𑀫𑁆𑀫𑁄 𑀕𑀭𑀼𑀓𑀸𑀢𑀩𑁆𑀩𑁄 𑀦 𑀳𑁄𑀢𑀻𑀢𑀺 ‘‘𑀲𑀪𑀸𑀯𑀥𑀫𑁆𑀫𑁄’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯 𑀧𑀝𑁆𑀞𑀸𑀦𑀯𑀡𑁆𑀡𑀦𑀸𑀬𑀁 (𑀧𑀝𑁆𑀞𑀸. 𑀅𑀝𑁆𑀞. 𑁧.𑁩) ‘‘𑀆𑀭𑀫𑁆𑀫𑀡𑀸𑀥𑀺𑀧𑀢𑀺 𑀚𑀸𑀢𑀺𑀪𑁂𑀤𑀢𑁄 𑀓𑀼𑀲𑀮𑀸𑀓𑀼𑀲𑀮𑀯𑀺𑀧𑀸𑀓𑀓𑀺𑀭𑀺𑀬𑀭𑀽𑀧𑀦𑀺𑀩𑁆𑀩𑀸𑀦𑀯𑀲𑁂𑀦 𑀙𑀩𑁆𑀩𑀺𑀥𑁄’’𑀢𑀺 𑀯𑀓𑁆𑀔𑀢𑀺. 𑀫𑀕𑁆𑀕𑀸𑀤𑀻𑀦𑀺 𑀞𑀧𑁂𑀢𑁆𑀯𑀸𑀢𑀺 𑀫𑀕𑁆𑀕𑀸𑀤𑀻𑀦𑀺 𑀧𑀳𑀸𑀬. 𑀅𑀜𑁆𑀜𑁂𑀲𑀦𑁆𑀢𑀺 𑀫𑀕𑁆𑀕𑀸𑀤𑀺𑀢𑁄 𑀅𑀜𑁆𑀜𑁂𑀲𑀁. 𑀅𑀥𑀺…𑀧𑁂… 𑀯𑀲𑁆𑀲𑀸𑀢𑀺 𑀆𑀭𑀫𑁆𑀫𑀡𑀸𑀥𑀺𑀧𑀢𑀺𑀧𑀘𑁆𑀘𑀬𑀪𑀸𑀯𑀲𑁆𑀲. 𑀧𑀜𑁆𑀜𑀼𑀢𑁆𑀢𑀭𑀢𑁆𑀢𑀸 𑀓𑀼𑀲𑀮𑀸𑀦𑀁 𑀮𑁄𑀓𑀼𑀢𑁆𑀢𑀭𑀓𑀣𑀸𑀬 𑀘 𑀧𑀜𑁆𑀜𑀸𑀥𑀼𑀭𑀢𑁆𑀢𑀸 𑀯𑀻𑀫𑀁𑀲𑀸𑀥𑀺𑀧𑀢𑀺𑀲𑁆𑀲 𑀲𑁂𑀲𑀸𑀥𑀺𑀧𑀢𑀻𑀦𑀁 𑀧𑀥𑀸𑀦𑀢𑀸 𑀯𑁂𑀤𑀺𑀢𑀩𑁆𑀩𑀸.

𑁧𑁦𑁪𑁧. 𑀧𑀤𑁂𑀲𑀲𑀢𑁆𑀢𑀯𑀺𑀲𑀬𑀢𑁆𑀢𑀸 𑀧𑀞𑀫𑀯𑀺𑀓𑀧𑁆𑀧𑀲𑁆𑀲 𑀲𑀓𑀮𑀲𑀢𑁆𑀢𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 ‘‘𑀓𑀧𑁆𑀧𑀲𑀳𑀲𑁆𑀲𑀸𑀢𑀺𑀓𑁆𑀓𑀫𑁂𑀧𑀺 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀮𑀤𑁆𑀥𑁄𑀓𑀸𑀲𑀁 𑀬𑀁 𑀪𑀯𑀺𑀲𑁆𑀲𑀢𑀻𑀢𑀺 𑀮𑀤𑁆𑀥𑁄𑀓𑀸𑀲𑀁 𑀬𑀁 𑀓𑀫𑁆𑀫𑀁 𑀧𑀸𑀧𑀼𑀡𑀺𑀲𑁆𑀲𑀢𑀺. 𑀓𑀧𑁆𑀧𑀲𑀳𑀲𑁆𑀲𑀸𑀢𑀺𑀓𑁆𑀓𑀫𑁂 𑀅𑀯𑀲𑁆𑀲𑀁 𑀉𑀧𑁆𑀧𑀚𑁆𑀚𑀦𑀯𑀺𑀧𑀸𑀓𑀢𑁆𑀢𑀸 𑀢𑀤𑀧𑀺…𑀧𑁂… 𑀯𑀼𑀘𑁆𑀘𑀢𑀻𑀢𑀺. 𑀅𑀮𑀤𑁆𑀥𑀢𑁆𑀢𑀮𑀸𑀪𑀢𑀸𑀬 𑀉𑀧𑁆𑀧𑀸𑀤𑀸𑀤𑀺𑀓𑁆𑀔𑀡𑀁 𑀅𑀧𑁆𑀧𑀢𑁆𑀢𑀲𑁆𑀲 𑀯𑀺𑀧𑀸𑀓𑀲𑁆𑀲 𑀅𑀦𑀼𑀧𑁆𑀧𑀦𑁆𑀦𑀪𑀸𑀯𑁄 𑀦𑀢𑁆𑀣𑀺𑀪𑀸𑀯𑁄 𑀧𑀸𑀓𑀝𑀪𑀸𑀯𑀸𑀪𑀸𑀯𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀦𑀢𑁆𑀣𑀺 𑀦𑀸𑀫 𑀦 𑀳𑁄𑀢𑀻𑀢𑀺 𑀅𑀦𑀼𑀧𑁆𑀧𑀦𑁆𑀦𑁄 𑀦𑀸𑀫 𑀦 𑀳𑁄𑀢𑀻’’𑀢𑀺. 𑀢𑀢𑁆𑀣𑀸𑀢𑀺 𑀅𑀭𑀽𑀧𑀪𑀯𑀗𑁆𑀕𑁂.

𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀁 𑀓𑀫𑁆𑀫𑀁 𑀲𑀳𑀓𑀸𑀭𑀻𑀓𑀸𑀭𑀡𑀲𑀫𑀯𑀸𑀬𑀸𑀮𑀸𑀪𑁂𑀦 𑀅𑀓𑀢𑁄𑀓𑀸𑀲𑀁 𑀯𑀺𑀧𑀸𑀓𑀸𑀪𑀺𑀫𑀼𑀔𑀪𑀸𑀯𑀸𑀪𑀸𑀯𑀢𑁄 𑀯𑀺𑀧𑀓𑁆𑀓𑀯𑀺𑀧𑀸𑀓𑀓𑀫𑁆𑀫𑀲𑀭𑀺𑀓𑁆𑀔𑀓𑀦𑁆𑀢𑀺 𑀯𑀼𑀢𑁆𑀢𑀁 ‘‘𑀅𑀮𑀤𑁆𑀥𑁄…𑀧𑁂… 𑀤𑁂𑀬𑁆𑀬𑀸’’𑀢𑀺. 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀬𑀸 𑀅𑀲𑀢𑀺 𑀉𑀧𑁆𑀧𑀦𑁆𑀦𑀫𑁆𑀧𑀺 𑀓𑀫𑁆𑀫𑀁 𑀅𑀦𑀼𑀧𑁆𑀧𑀦𑁆𑀦𑀲𑀫𑀸𑀦𑀦𑁆𑀢𑀺 ‘‘𑀑𑀓𑀸𑀲𑁄 𑀦 𑀪𑀯𑁂𑀬𑁆𑀬𑀸’’𑀢𑀺 𑀏𑀢𑀲𑁆𑀲 𑀲𑀫𑀢𑁆𑀣𑀢𑀸 𑀦 𑀲𑀺𑀬𑀸𑀢𑀺 𑀅𑀢𑁆𑀣𑀫𑀸𑀳. 𑀢𑁂𑀦 𑀅𑀧𑀘𑀬𑀕𑀸𑀫𑀺𑀓𑀫𑁆𑀫𑀓𑀺𑀘𑁆𑀘𑀲𑁆𑀲 𑀑𑀓𑀸𑀲𑀸𑀪𑀸𑀯𑁄 𑀤𑀲𑁆𑀲𑀺𑀢𑁄. 𑀧𑀼𑀩𑁆𑀩𑁂 𑀦𑀺𑀭𑀢𑁆𑀣𑀓𑀢𑁆𑀢𑀸 𑀉𑀧𑁆𑀧𑀢𑁆𑀢𑀺𑀬𑀸 𑀑𑀓𑀸𑀲𑁄 𑀦 𑀪𑀯𑁂𑀬𑁆𑀬𑀸𑀢𑀺 𑀧𑀬𑁄𑀚𑀦𑀸𑀪𑀸𑀯𑀢𑁄 𑀓𑀫𑁆𑀫𑀼𑀧𑁆𑀧𑀢𑁆𑀢𑀺𑀬𑀸 𑀑𑀓𑀸𑀲𑀸𑀪𑀸𑀯𑁄 𑀯𑀼𑀢𑁆𑀢𑁄. ‘‘𑀯𑀺𑀧𑀸𑀓𑀢𑁄 𑀅𑀜𑁆𑀜𑀲𑁆𑀲 𑀧𑀯𑀢𑁆𑀢𑀺𑀑𑀓𑀸𑀲𑁄 𑀦 𑀪𑀯𑁂𑀬𑁆𑀬𑀸’’𑀢𑀺 𑀇𑀫𑀺𑀦𑀸 𑀅𑀲𑀫𑁆𑀪𑀯𑀢𑁄𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄. 𑀥𑀼𑀯𑀯𑀺𑀧𑀸𑀓𑀲𑁆𑀲 𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁂𑀦 𑀦𑀺𑀤𑀲𑁆𑀲𑀦𑀫𑀢𑁆𑀢𑀪𑀽𑀢𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀭𑀺𑀬𑀫𑀕𑁆𑀕𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀸𑀦𑀁 𑀯𑀺𑀬 𑀫𑀳𑀕𑁆𑀕𑀢𑀓𑀫𑁆𑀫𑀸𑀦𑀁 𑀦𑀺𑀬𑀢𑀲𑀪𑀸𑀯𑀢𑀸𑀪𑀸𑀯𑀸 𑀅𑀝𑁆𑀞𑀲𑀫𑀸𑀧𑀢𑁆𑀢𑀻𑀦𑀁 ‘‘𑀩𑀮𑀯𑀯𑀺𑀭𑀳𑁂’’𑀢𑀺𑀆𑀤𑀺𑀦𑀸 𑀲𑀯𑀺𑀲𑁂𑀲𑀦𑀥𑀼𑀯𑀯𑀺𑀧𑀸𑀓𑀢𑀸 𑀯𑀼𑀢𑁆𑀢𑀸. 𑀏𑀢𑁆𑀣 𑀘 ‘‘𑀧𑀜𑁆𑀘 𑀆𑀦𑀦𑁆𑀢𑀭𑀺𑀬𑀓𑀫𑁆𑀫𑀸𑀦𑀻’’𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁 𑀦𑀺𑀬𑀢𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀬𑀸𑀧𑀺 𑀥𑀼𑀯𑀯𑀺𑀧𑀸𑀓𑀢𑁆𑀢𑀸. 𑀬𑀲𑁆𑀲 𑀓𑀫𑁆𑀫𑀲𑁆𑀲 𑀓𑀢𑀢𑁆𑀢𑀸 𑀬𑁄 𑀯𑀺𑀧𑀸𑀓𑁄 𑀦𑀺𑀬𑁄𑀕𑀢𑁄 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀺, 𑀲𑁄 𑀢𑀲𑁆𑀲 𑀅𑀦𑀸𑀕𑀢𑀓𑀸𑀮𑁂𑀧𑀺 𑀉𑀧𑁆𑀧𑀸𑀤𑀺𑀯𑁄𑀳𑀸𑀭𑀁 𑀮𑀪𑀢𑀺. 𑀲𑁄 𑀘 𑀉𑀧𑁆𑀧𑀸𑀤𑀺𑀯𑁄𑀳𑀸𑀭𑁄 𑀆𑀬𑀽𑀳𑀺𑀢𑀓𑀫𑁆𑀫𑀯𑀲𑁂𑀦 𑀯𑀼𑀘𑁆𑀘𑀫𑀸𑀦𑁄 𑀪𑀸𑀯𑀺𑀦𑀸 𑀆𑀬𑀽𑀳𑀺𑀢𑀪𑀸𑀯𑁂𑀦 𑀫𑀕𑁆𑀕𑁄 𑀅𑀦𑀼𑀧𑁆𑀧𑀦𑁆𑀦𑁄𑀢𑀺 𑀏𑀢𑁆𑀣 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀁 𑀆𑀬𑀽𑀳𑀺𑀢𑀁 𑀪𑀯𑀺𑀲𑁆𑀲𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁧𑁦𑁫𑁦. 𑀉𑀧𑀸𑀤𑀸𑀦𑁂𑀳𑀺 𑀆𑀤𑀺𑀦𑁆𑀦𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑁂𑀢𑀺 𑀉𑀧𑀸𑀤𑀸𑀦𑀸𑀭𑀫𑁆𑀫𑀡𑁂𑀳𑀺 𑀅𑀜𑁆𑀜𑁂 𑀅𑀦𑀼𑀧𑀸𑀤𑀸𑀦𑀺𑀬𑀸𑀢𑀺 𑀅𑀢𑁆𑀣𑁄. 𑀆𑀤𑀺𑀓𑁂𑀦 𑀕𑀳𑀡𑁂𑀦𑀸𑀢𑀺 ‘‘𑀅𑀳𑀁 𑀨𑀮𑀁 𑀲𑀘𑁆𑀙𑀸𑀓𑀸𑀲𑀺’’𑀦𑁆𑀢𑀺 𑀏𑀯𑀁 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀲𑀗𑁆𑀔𑀸𑀢𑁂𑀦 𑀕𑀳𑀡𑁂𑀦. 𑀇𑀤𑀸𑀦𑀺 𑀉𑀧𑁂𑀢𑀢𑁆𑀣𑀤𑀻𑀧𑀓𑀲𑁆𑀲 𑀉𑀧-𑀲𑀤𑁆𑀤𑀲𑁆𑀲 𑀯𑀲𑁂𑀦 𑀉𑀧𑀸𑀤𑀺𑀦𑁆𑀦-𑀲𑀤𑁆𑀤𑀲𑁆𑀲 𑀅𑀢𑁆𑀣𑀁 𑀯𑀢𑁆𑀢𑀼𑀁 ‘‘𑀉𑀧𑀸𑀤𑀺𑀦𑁆𑀦𑀲𑀤𑁆𑀤𑁂𑀦 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀺𑀩𑁆𑀩𑀸𑀦𑀲𑁆𑀲 𑀅𑀦𑀚𑁆𑀛𑀢𑁆𑀢𑀪𑀸𑀯𑀢𑁄 ‘‘𑀅𑀫𑀕𑁆𑀕𑀨𑀮𑀥𑀫𑁆𑀫𑀸𑀬𑁂𑀯 𑀯𑀼𑀢𑁆𑀢𑀸’’𑀢𑀺 𑀆𑀳. 𑀇𑀢𑀭𑁂𑀳𑀻𑀢𑀺 𑀅𑀚𑁆𑀛𑀢𑁆𑀢𑀧𑀤𑀸𑀤𑀻𑀳𑀺.

𑀢𑀺𑀓𑀦𑀺𑀓𑁆𑀔𑁂𑀧𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀓𑀦𑀺𑀓𑁆𑀔𑁂𑀧𑀓𑀣𑀸𑀯𑀡𑁆𑀡𑀦𑀸

𑁧𑁦𑁬𑁨. 𑀫𑁂𑀢𑁆𑀢𑀸𑀬 𑀅𑀬𑀦𑀁 𑀉𑀧𑀕𑀫𑀦𑀁 𑀫𑁂𑀢𑁆𑀢𑀸𑀬𑀦𑀁, 𑀢𑀜𑁆𑀘 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀫𑁂𑀢𑁆𑀢𑀸𑀬 𑀮𑀸𑀪𑁄 𑀉𑀧𑁆𑀧𑀸𑀤𑀦𑀁 𑀲𑀢𑁆𑀢𑀸𑀦𑀁 𑀅𑀦𑀼𑀧𑀕𑀫𑁄 𑀅𑀢𑁆𑀣𑀢𑁄 𑀫𑀚𑁆𑀚𑀦𑀫𑁂𑀯𑀸𑀢𑀺 ‘‘𑀫𑁂𑀢𑁆𑀢𑀸, 𑀫𑁂𑀤𑀦’’𑀦𑁆𑀢𑀺 𑀯𑀢𑁆𑀯𑀸 ‘‘𑀲𑀺𑀦𑁂𑀳𑀦’’𑀦𑁆𑀢𑀺 𑀆𑀳.

𑁧𑁦𑁬𑁫. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀯𑀺𑀲𑀬𑁂 𑀘𑀺𑀢𑁆𑀢𑀁 𑀲𑀁𑀭𑀜𑁆𑀚𑀢𑀻𑀢𑀺 𑀘𑀺𑀢𑁆𑀢𑀲𑁆𑀲 𑀲𑀁𑀭𑀜𑁆𑀚𑀦𑀁. 𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀏𑀲𑀦𑀸𑀤𑀬𑁄 𑀲𑀗𑁆𑀕𑀳𑀺𑀢𑀸. 𑀢𑀡𑁆𑀳𑀸𑀬 𑀯𑀺𑀧𑀼𑀮𑀢𑀸 𑀯𑀺𑀲𑀬𑀯𑀲𑁂𑀦 𑀧𑀯𑀢𑁆𑀢𑀺𑀯𑀲𑁂𑀦 𑀯𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀦𑀺𑀘𑁆𑀘𑀸𑀤𑀺𑀲𑀪𑀸𑀯𑀲𑁆𑀲 𑀭𑀽𑀧𑀸𑀤𑀺𑀓𑀲𑁆𑀲 𑀦𑀺𑀘𑁆𑀘𑀸𑀤𑀺𑀢𑁄 𑀕𑀳𑀡𑀁 𑀅𑀪𑀺𑀦𑀺𑀯𑁂𑀲𑁄 𑀯𑀺𑀲𑁂𑀲𑀢𑁄 𑀢𑀡𑁆𑀳𑀸𑀯𑀲𑁂𑀦 𑀳𑁄𑀢𑀺 𑀢𑀡𑁆𑀳𑀸𑀭𑀳𑀺𑀢𑀸𑀬 𑀤𑀺𑀝𑁆𑀞𑀺𑀬𑀸 𑀅𑀪𑀸𑀯𑀸𑀢𑀺 𑀉𑀧𑀘𑀸𑀭𑀯𑀲𑁂𑀦 𑀦𑀺𑀫𑀺𑀢𑁆𑀢𑀲𑁆𑀲 𑀓𑀢𑁆𑀢𑀼𑀪𑀸𑀯𑀫𑀸𑀳 ‘‘𑀦𑀺𑀘𑁆𑀘𑀸𑀤𑀺𑀢𑁄 𑀕𑀡𑁆𑀳𑀦𑁆𑀢𑀻 𑀯𑀺𑀲𑀁𑀯𑀸𑀤𑀺𑀓𑀸 𑀳𑁄𑀢𑀻’’𑀢𑀺. 𑀧𑀸𑀓𑀝𑁂𑀦 𑀲𑀤𑁆𑀤𑁂𑀦 𑀮𑀩𑁆𑀪𑀫𑀸𑀦𑀢𑁆𑀢𑀸 𑀬𑀣𑀸𑀭𑀼𑀢𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸 𑀘 𑀯𑀺𑀲𑀢𑁆𑀢𑀺𑀓𑀸𑀲𑀤𑁆𑀤𑀲𑁆𑀲 𑀯𑀺𑀲𑀢𑀲𑀪𑀸𑀯𑁄 ‘‘𑀧𑀥𑀸𑀦𑁄 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑁄. ‘‘𑀅𑀦𑁆𑀢𑀮𑀺𑀓𑁆𑀔𑀘𑀭𑁄 𑀧𑀸𑀲𑁄, 𑀬𑁆𑀯𑀸𑀬𑀁 𑀘𑀭𑀢𑀺 𑀫𑀸𑀦𑀲𑁄. 𑀢𑁂𑀦 𑀢𑀁 𑀩𑀸𑀥𑀬𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀯𑀲𑁂𑀦 (𑀲𑀁. 𑀦𑀺. 𑁧.𑁧𑁫𑁧; 𑀫𑀳𑀸𑀯. 𑁩𑁩) 𑀫𑀸𑀭𑁂𑀦 𑀕𑀳𑀺𑀢𑀢𑀸𑀬.

𑁧𑁦𑁬𑁬. 𑀅𑀦𑀢𑁆𑀣𑀘𑀭𑀡𑀸𑀤𑀺𑀅𑀦𑀪𑀺𑀲𑀦𑁆𑀥𑀸𑀦𑀓𑀢𑀸𑀬 𑀅𑀝𑁆𑀞𑀸𑀦𑀪𑀽𑀢𑁂𑀲𑀼 𑀘 𑀯𑀲𑁆𑀲𑀯𑀸𑀢𑀸𑀤𑀺𑀲𑀗𑁆𑀔𑀸𑀭𑁂𑀲𑀼 𑀉𑀧𑁆𑀧𑀦𑁆𑀦𑀓𑁄𑀧𑁄 𑀯𑀺𑀬 𑀲𑀢𑁆𑀢𑁂𑀲𑀼 𑀅𑀢𑁆𑀣𑀸𑀘𑀭𑀡𑀸𑀤𑀺𑀦𑀸 𑀆𑀭𑁄𑀧𑀦𑀸𑀥𑀺𑀧𑁆𑀧𑀸𑀬𑁂𑀲𑀼𑀬𑁂𑀯 𑀢𑀤𑀚𑁆𑀛𑀸𑀭𑁄𑀧𑀦𑀯𑀲𑁂𑀦 𑀧𑀯𑀢𑁆𑀢𑁄 𑀬𑀤𑀺𑀧𑀺 𑀅𑀦𑀸𑀬𑀢𑀦𑀼𑀧𑁆𑀧𑀢𑁆𑀢𑀺𑀬𑀸 𑀅𑀝𑁆𑀞𑀸𑀦𑀸𑀖𑀸𑀢𑁄𑀬𑁂𑀯 𑀳𑁄𑀢𑀺, 𑀲𑀢𑁆𑀢𑀯𑀺𑀲𑀬𑀢𑁆𑀢𑀸 𑀧𑀦 𑀲𑀢𑀺 𑀘𑀺𑀢𑁆𑀢𑀲𑁆𑀲 𑀏𑀓𑀦𑁆𑀢𑀩𑁆𑀬𑀸𑀧𑀢𑁆𑀢𑀺𑀬𑀁 𑀓𑀫𑁆𑀫𑀧𑀣𑀪𑁂𑀤𑁄 𑀳𑁄𑀢𑀺𑀬𑁂𑀯𑀸𑀢𑀺 𑀲𑀓𑁆𑀓𑀸 𑀯𑀺𑀜𑁆𑀜𑀸𑀢𑀼𑀁, 𑀅𑀝𑁆𑀞𑀸𑀦𑀼𑀧𑁆𑀧𑀢𑁆𑀢𑀺𑀬𑀁 𑀧𑀦𑀲𑁆𑀲 𑀦 𑀲𑀺𑀬𑀸 𑀓𑀫𑁆𑀫𑀧𑀣𑀪𑁂𑀤𑁄𑀢𑀺 𑀆𑀳 ‘‘𑀲𑀢𑁆𑀢𑁂𑀲𑀼 𑀉𑀧𑁆𑀧𑀦𑁆𑀦𑁄 𑀅𑀝𑁆𑀞𑀸𑀦𑀓𑁄𑀧𑁄 𑀓𑀭𑁄𑀢𑀻’’𑀢𑀺. 𑀧𑀝𑀺𑀖𑀸𑀤𑀺𑀧𑀤𑀸𑀦𑀁 𑀖𑀝𑁆𑀝𑀦𑀸𑀧𑀼𑀭𑀺𑀫𑀬𑀸𑀫𑀯𑀺𑀓𑀸𑀭𑀼𑀧𑁆𑀧𑀢𑁆𑀢𑀺𑀲𑀫𑀜𑁆𑀜𑀸𑀤𑀻𑀲𑀼𑀧𑀺 𑀤𑀲𑁆𑀲𑀦𑀢𑁄 ‘‘𑀧𑀝𑀺𑀯𑀺𑀭𑁄𑀥𑀸𑀤𑀺𑀧𑀤𑀸𑀦𑀺 𑀢𑁂𑀲𑀁 𑀯𑀺𑀲𑁂𑀲𑀦𑀢𑁆𑀣𑀸𑀦𑀻’’𑀢𑀺 𑀯𑀼𑀢𑁆𑀢𑀁.

𑁧𑁦𑁯𑁧. 𑀤𑁆𑀯𑁂 𑀥𑀫𑁆𑀫𑀸 𑀢𑀬𑁄 𑀥𑀫𑁆𑀫𑀸𑀢𑀺 𑀲𑀤𑁆𑀤𑀦𑁆𑀢𑀭𑀲𑀦𑁆𑀦𑀺𑀥𑀸𑀦𑁂𑀦 𑀧𑀭𑀺𑀘𑁆𑀙𑁂𑀤𑀯𑀢𑁄 𑀩𑀳𑀼𑀯𑀘𑀦𑀲𑁆𑀲 𑀤𑀲𑁆𑀲𑀦𑀢𑁄 ‘‘𑀅𑀧𑀭𑀺𑀘𑁆𑀙𑁂𑀤𑁂𑀦 𑀩𑀳𑀼𑀯𑀘𑀦𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀉𑀤𑁆𑀤𑁂𑀲𑁄 𑀓𑀢𑁄𑀢𑀺 𑀇𑀢𑀺-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄. 𑀢𑁂𑀦 𑀩𑀳𑀼𑀯𑀘𑀦𑁂𑀦 𑀉𑀤𑁆𑀤𑁂𑀲𑀓𑀭𑀡𑀁 𑀩𑀳𑀼𑀯𑀘𑀦𑁂𑀦 𑀧𑀼𑀘𑁆𑀙𑀸𑀬 𑀓𑀸𑀭𑀡𑀦𑁆𑀢𑀺 𑀤𑀻𑀧𑁂𑀢𑀺. 𑀉𑀤𑁆𑀤𑁂𑀲𑀸𑀦𑀼𑀯𑀺𑀥𑀸𑀬𑀺𑀦𑀻 𑀳𑀺 𑀧𑀼𑀘𑁆𑀙𑀸𑀢𑀺. 𑀢𑀣𑀸 𑀳𑀺 𑀲𑀗𑁆𑀔𑀸𑀧𑀭𑀺𑀘𑁆𑀙𑀺𑀦𑁆𑀦𑁂 𑀉𑀤𑁆𑀤𑁂𑀲𑁂 ‘‘𑀓𑀢𑀫𑁂 𑀯𑀸 𑀢𑀬𑁄’’𑀢𑀺 𑀲𑀗𑁆𑀔𑀸𑀧𑀭𑀺𑀘𑁆𑀙𑀺𑀦𑁆𑀦𑀸𑀯 𑀧𑀼𑀘𑁆𑀙𑀸 𑀓𑀭𑀻𑀬𑀢𑀻𑀢𑀺. 𑀉𑀤𑁆𑀤𑁂𑀲𑁂𑀦 𑀥𑀫𑁆𑀫𑀸𑀦𑀁 𑀅𑀢𑁆𑀣𑀺𑀢𑀸𑀫𑀢𑁆𑀢𑀯𑀘𑀦𑀺𑀘𑁆𑀙𑀸𑀬𑀁 𑀲𑀪𑀸𑀯𑀪𑀽𑀫𑀺𑀓𑀸𑀭𑀡𑀨𑀮𑀸𑀤𑀺𑀧𑀭𑀺𑀘𑁆𑀙𑁂𑀤𑁄 𑀯𑀺𑀬 𑀲𑀗𑁆𑀔𑀸𑀧𑀭𑀺𑀘𑁆𑀙𑁂𑀤𑁄𑀧𑀺 𑀦 𑀓𑀸𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀅𑀦𑀺𑀤𑁆𑀥𑀸𑀭𑀺𑀢𑀧𑀭𑀺𑀘𑁆𑀙𑁂𑀤𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀅𑀧𑀘𑁆𑀘𑀬𑀸 𑀥𑀫𑁆𑀫𑀸’’𑀢𑀺 𑀧𑀤𑀢𑁄 𑀧𑀦 𑀳𑁂𑀝𑁆𑀞𑀸 𑀅𑀦𑁂𑀓𑀪𑁂𑀤𑀪𑀺𑀦𑁆𑀦𑀸 𑀥𑀫𑁆𑀫𑀸 𑀅𑀧𑀭𑀺𑀘𑁆𑀙𑁂𑀤𑁂𑀦 𑀩𑀳𑀼𑀯𑀘𑀦𑁂𑀦𑁂𑀯 𑀉𑀤𑁆𑀤𑀺𑀝𑁆𑀞𑀸, 𑀉𑀤𑁆𑀥𑀜𑁆𑀘 𑀢𑀣𑀸 𑀉𑀤𑁆𑀤𑀺𑀲𑀻𑀬𑀦𑁆𑀢𑀻𑀢𑀺 𑀢𑀁 𑀲𑁄𑀢𑀧𑀢𑀺𑀢𑀢𑀸𑀬 𑀪𑁂𑀤𑀸𑀪𑀸𑀯𑁂𑀧𑀺 𑀧𑀭𑀫𑀢𑁆𑀣𑀢𑁄 𑀅𑀧𑁆𑀧𑀘𑁆𑀘𑀬𑀥𑀫𑁆𑀫𑀲𑁆𑀲 𑀅𑀲𑀗𑁆𑀔𑀢𑀥𑀫𑁆𑀫𑀲𑁆𑀲 𑀘 𑀲𑁄𑀧𑀸𑀤𑀺𑀲𑁂𑀲𑀦𑀺𑀭𑀼𑀧𑀸𑀤𑀺𑀲𑁂𑀲𑀭𑀸𑀕𑀓𑁆𑀔𑀬𑀸𑀤𑀺𑀅𑀲𑀗𑁆𑀔𑀢𑀸𑀤𑀺𑀯𑀘𑀦𑀯𑀘𑀦𑀻𑀬𑀪𑀸𑀯𑁂𑀦 𑀉𑀧𑀘𑀭𑀺𑀢𑀪𑁂𑀤𑁂𑀕𑀳𑀺𑀢𑁂 𑀧𑀤𑀤𑁆𑀯𑀬𑁂𑀦 𑀅𑀢𑁆𑀣𑀺 𑀓𑀸𑀘𑀺 𑀪𑁂𑀤𑀫𑀢𑁆𑀢𑀸𑀢𑀺 𑀅𑀧𑀭𑀺𑀘𑁆𑀙𑁂𑀤𑁂𑀦 𑀩𑀳𑀼𑀯𑀘𑀦𑁂𑀦 𑀉𑀤𑁆𑀤𑁂𑀲𑁄 𑀓𑀢𑁄𑀢𑀺 𑀬𑀼𑀢𑁆𑀢𑀁 𑀲𑀺𑀬𑀸. 𑀉𑀤𑁆𑀤𑁂𑀲𑀸𑀦𑀼𑀲𑀸𑀭𑀻𑀦𑀺 𑀧𑀼𑀘𑁆𑀙𑀸𑀦𑀺𑀕𑀫𑀦𑀸𑀦𑀻𑀢𑀺 𑀢𑀸𑀦𑀺𑀧𑀺 𑀢𑀣𑀸 𑀧𑀯𑀢𑁆𑀢𑀸𑀦𑀺. 𑀦𑀺𑀤𑁆𑀤𑁂𑀲𑁄 𑀧𑀦 𑀬𑀣𑀸𑀥𑀺𑀧𑁆𑀧𑁂𑀢𑀲𑀪𑀸𑀯𑀸𑀤𑀺𑀧𑀭𑀺𑀘𑁆𑀙𑁂𑀤𑀯𑀺𑀪𑀸𑀯𑀦𑀯𑀲𑁂𑀦𑁂𑀯 𑀓𑀸𑀢𑀩𑁆𑀩𑁄𑀢𑀺 𑀅𑀲𑀗𑁆𑀔𑀢𑀸 𑀥𑀸𑀢𑀼 𑀇𑀘𑁆𑀘𑁂𑀯 𑀓𑀢𑁄 𑀧𑀭𑀫𑀢𑁆𑀣𑀢𑁄 𑀪𑁂𑀤𑀸𑀪𑀸𑀯𑀤𑀻𑀧𑀦𑀢𑁆𑀣𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀣𑁂𑀢𑀼𑀓𑀸𑀫𑀢𑀸𑀯𑀲𑁂𑀦 𑀧𑀼𑀘𑁆𑀙𑀦𑁆𑀢𑁄 𑀬𑀲𑁆𑀲 𑀓𑀣𑁂𑀢𑀺, 𑀢𑁂𑀦 𑀓𑀸𑀢𑀩𑁆𑀩𑀧𑀼𑀘𑁆𑀙𑀸𑀬 𑀓𑀭𑀡𑀢𑁄 𑀢𑀕𑁆𑀕𑀢𑀁 𑀅𑀚𑀸𑀦𑀦𑀁 𑀲𑀁𑀲𑀬𑀁 𑀯𑀸 𑀅𑀦𑀼𑀯𑀺𑀥𑀸𑀬𑀬𑁂𑀯 𑀧𑀼𑀘𑁆𑀙𑀢𑀻𑀢𑀺 ‘‘𑀲𑀪𑀸𑀯…𑀧𑁂… 𑀅𑀚𑀸𑀦𑀦𑁆𑀢𑀲𑁆𑀲 𑀯𑀲𑁂𑀦 𑀧𑀼𑀘𑁆𑀙𑀸 𑀓𑀭𑀻𑀬𑀢𑀻’’𑀢𑀺 𑀯𑀼𑀢𑁆𑀢𑀁. 𑀦𑀺𑀤𑁆𑀤𑁂𑀲𑀢𑁄 𑀧𑀼𑀩𑁆𑀩𑁂𑀢𑀺𑀆𑀤𑀺𑀦𑀸 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 𑀧𑀼𑀘𑁆𑀙𑀸𑀦𑀼𑀲𑀦𑁆𑀥𑀺𑀁𑀬𑁂𑀯 𑀯𑀺𑀪𑀸𑀯𑁂𑀢𑀺.

𑁧𑁧𑁦𑁧. 𑀪𑀺𑀦𑁆𑀤𑀺𑀢𑁆𑀯𑀸𑀢𑀺 𑀯𑀺𑀪𑀚𑀺𑀢𑁆𑀯𑀸. 𑀭𑀽𑀧𑀸𑀯…𑀧𑁂… 𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀫𑀳𑀸𑀓𑀺𑀭𑀺𑀬𑀯𑀺𑀜𑁆𑀜𑀸𑀡𑁂𑀦 𑀫𑀳𑀕𑁆𑀕𑀢𑀥𑀫𑁆𑀫𑀸𑀦𑀁 𑀲𑀫𑁆𑀫𑀲𑀦𑀯𑀲𑁂𑀦 𑀬𑀣𑀸𑀬𑁄𑀕𑀁 𑀫𑀳𑀕𑁆𑀕𑀢𑀧𑁆𑀧𑀫𑀸𑀡𑀥𑀫𑁆𑀫𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀺𑀯𑀲𑁂𑀦 𑀭𑀽𑀧𑀭𑀸𑀕𑀸𑀭𑀽𑀧𑀭𑀸𑀕𑀲𑀫𑁆𑀧𑀬𑀼𑀢𑁆𑀢𑁂𑀦 𑀅𑀓𑀼𑀲𑀮𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀫𑀳𑀕𑁆𑀕𑀢𑀥𑀫𑁆𑀫𑀸𑀦𑀁 𑀅𑀪𑀺𑀦𑀺𑀯𑁂𑀲𑀦𑀅𑀲𑁆𑀲𑀸𑀤𑀦𑀯𑀲𑁂𑀦 𑀢𑀁𑀢𑀁𑀧𑀜𑁆𑀜𑀢𑁆𑀢𑀺𑀬𑀜𑁆𑀘 𑀢𑀁𑀢𑀁𑀯𑁄𑀳𑀸𑀭𑀯𑀲𑁂𑀦 𑀧𑀯𑀢𑁆𑀢𑁂𑀦 𑀆𑀯𑀚𑁆𑀚𑀦𑁂𑀦 𑀘 𑀬𑀣𑀸𑀯𑀼𑀢𑁆𑀢𑀯𑀺𑀜𑁆𑀜𑀸𑀡𑀸𑀦𑀁 𑀧𑀼𑀭𑁂𑀘𑀸𑀭𑀺𑀓𑁂𑀦 𑀓𑀸𑀫𑀸𑀯𑀘𑀭𑀥𑀫𑁆𑀫𑀸 𑀦 𑀯𑀺𑀜𑁆𑀜𑁂𑀬𑁆𑀬𑀸. 𑀇𑀢𑀭𑁂𑀦𑀸𑀢𑀺 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑁂𑀦. 𑀓𑀸𑀫𑀸𑀯𑀘𑀭𑀸𑀦𑀫𑁂𑀯 𑀆𑀭𑀫𑁆𑀫𑀡𑀸𑀦𑀦𑁆𑀢𑀺 𑀦𑀺𑀤𑁆𑀥𑀸𑀭𑀡𑁂 𑀲𑀸𑀫𑀺𑀯𑀘𑀦𑀁. 𑀭𑀽𑀧𑀸𑀭𑀫𑁆𑀫𑀡𑀸𑀤𑀻𑀳𑀺 𑀯𑀺𑀜𑁆𑀜𑀸𑀡𑁂𑀳𑀺 𑀢𑀢𑁆𑀣 𑀭𑀽𑀧𑀸𑀭𑀫𑁆𑀫𑀡𑁂𑀦 𑀯𑀺𑀜𑁆𑀜𑀸𑀡𑁂𑀦𑀧𑀺 𑀲𑀤𑁆𑀤𑀸𑀤𑀻𑀦𑀁 𑀅𑀯𑀺𑀜𑁆𑀜𑁂𑀬𑁆𑀬𑀢𑀸 𑀭𑀽𑀧𑀲𑁆𑀲 𑀘 𑀯𑀺𑀜𑁆𑀜𑁂𑀬𑁆𑀬𑀢𑀸. 𑀏𑀯𑀁 𑀲𑁂𑀲𑁂𑀲𑀼𑀧𑀺 𑀬𑁄𑀚𑀦𑀸 𑀤𑀝𑁆𑀞𑀩𑁆𑀩𑀸. 𑀘𑀓𑁆𑀔𑀼𑀤𑁆𑀯𑀸𑀭𑀺𑀓𑁂𑀦 𑀲𑀤𑁆𑀤𑀸𑀤𑀻𑀦𑀁 𑀅𑀯𑀺𑀜𑁆𑀜𑁂𑀬𑁆𑀬𑀢𑀸 𑀭𑀽𑀧𑀲𑁆𑀲 𑀯𑀺𑀜𑁆𑀜𑁂𑀬𑁆𑀬𑀢𑀸𑀢𑀺𑀆𑀤𑀺𑀦𑀸 𑀤𑁆𑀯𑀸𑀭𑀪𑁂𑀤𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀁. 𑀇𑀢𑀭𑀦𑁆𑀢𑀺 𑀇𑀝𑁆𑀞𑀫𑀚𑁆𑀛𑀢𑁆𑀢𑀁 𑀅𑀦𑀺𑀝𑁆𑀞𑀫𑀦𑀺𑀝𑁆𑀞𑀫𑀚𑁆𑀛𑀢𑁆𑀢𑀜𑁆𑀘. 𑀭𑀽𑀧𑀸𑀯𑀘𑀭𑀸𑀤𑀬𑁄 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑀸𑀤𑀻𑀳𑀻𑀢𑀺 𑀭𑀽𑀧𑀸𑀯𑀘𑀭𑀸𑀭𑀽𑀧𑀸𑀯𑀘𑀭𑀮𑁄𑀓𑀼𑀢𑁆𑀢𑀭𑀧𑀜𑁆𑀜𑀢𑁆𑀢𑀺𑀬𑁄 𑀓𑀸𑀫𑀸𑀯𑀘𑀭𑀯𑀺𑀧𑀸𑀓𑁂𑀳𑀺 𑀮𑁄𑀓𑀼𑀢𑁆𑀢𑀭𑀸 𑀓𑀸𑀫𑀸𑀯𑀘𑀭𑀢𑁄 𑀜𑀸𑀡𑀯𑀺𑀧𑁆𑀧𑀬𑀼𑀢𑁆𑀢𑀓𑀼𑀲𑀮𑀓𑀺𑀭𑀺𑀬𑁂𑀳𑀺 𑀅𑀓𑀼𑀲𑀮𑁂𑀳𑀺 𑀘 𑀅𑀯𑀺𑀜𑁆𑀜𑁂𑀬𑁆𑀬𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀦𑀺𑀩𑁆𑀩𑀸𑀦𑀲𑁆𑀲 𑀅𑀯𑀺𑀚𑀸𑀦𑀦𑀲𑀪𑀸𑀯𑁄 𑀏𑀯 𑀅𑀢𑁆𑀢𑀲𑀫𑁆𑀪𑀯𑁄.

𑁧𑁧𑁦𑁨. 𑀭𑀽𑀧𑀸𑀭𑀽𑀧𑀸𑀯𑀘𑀭𑀓𑀫𑁆𑀫𑀽𑀧𑀧𑀢𑁆𑀢𑀺𑀪𑀯𑁂 𑀤𑀺𑀝𑁆𑀞𑀺𑀭𑀳𑀺𑀢𑁄 𑀮𑁄𑀪𑁄 𑀪𑀯𑀸𑀲𑀯𑁄𑀢𑀺 𑀬𑀣𑀸𑀯𑀼𑀢𑁆𑀢𑀯𑀺𑀲𑀬𑁄 𑀤𑀺𑀝𑁆𑀞𑀺𑀲𑀳𑀺𑀢𑁄 𑀲𑀩𑁆𑀩𑀓𑀸𑀫𑀸𑀯𑀘𑀭𑀥𑀫𑁆𑀫𑀯𑀺𑀲𑀬𑁄 𑀘 𑀮𑁄𑀪𑁄 𑀓𑀸𑀫𑀸𑀲𑀯𑁄 𑀪𑀯𑀺𑀢𑀼𑀁 𑀬𑀼𑀢𑁆𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀪𑀯𑀸𑀲𑀯𑀁…𑀧𑁂… 𑀲𑀺𑀬𑀸’’𑀢𑀺. 𑀓𑀸𑀫𑀸𑀲𑀯𑀪𑀯𑀸𑀲𑀯𑀯𑀺𑀦𑀺𑀫𑀼𑀢𑁆𑀢𑀲𑁆𑀲 𑀳𑀺 𑀮𑁄𑀪𑀲𑁆𑀲 𑀅𑀪𑀸𑀯𑀁 𑀲𑀬𑀫𑁂𑀯 𑀯𑀓𑁆𑀔𑀢𑀻𑀢𑀺. 𑀧𑀸𑀴𑀺𑀬𑀦𑁆𑀢𑀺 𑀅𑀝𑁆𑀞𑀓𑀣𑀸𑀓𑀡𑁆𑀟𑀧𑀸𑀴𑀺𑀬𑀁. 𑀢𑀢𑁆𑀣 𑀬𑀣𑀸 ‘‘𑀓𑀸𑀫𑀸𑀲𑀯𑁄 𑀅𑀝𑁆𑀞𑀲𑀼 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁, 𑀏𑀯𑀁 ‘‘𑀪𑀯𑀸𑀲𑀯𑁄 𑀅𑀝𑁆𑀞𑀲𑀼 𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀅𑀯𑀢𑁆𑀯𑀸 ‘‘𑀘𑀢𑀽𑀲𑀼𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑀮𑁄𑀪𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀥. 𑀲. 𑁧𑁪𑁬𑁫) 𑀯𑀼𑀢𑁆𑀢𑀢𑁆𑀢𑀸 ‘‘𑀪𑀯𑀸𑀲𑀯𑁄…𑀧𑁂… 𑀬𑀼𑀢𑁆𑀢𑁂𑀲𑀼 𑀏𑀯 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀧𑀸𑀴𑀺𑀬𑀁 𑀯𑀼𑀢𑁆𑀢𑁄𑀢𑀺 𑀲𑀸𑀯𑀥𑀸𑀭𑀡𑀁 𑀯𑀼𑀢𑁆𑀢𑀁. 𑀢𑀣𑀸 𑀘 𑀯𑀓𑁆𑀔𑀢𑀺 ‘‘𑀪𑀯𑀸𑀲𑀯𑁄 𑀘𑀢𑀽𑀲𑀼 𑀤𑀺𑀝𑁆𑀞𑀺𑀕𑀢𑀯𑀺𑀧𑁆𑀧𑀬𑀼𑀢𑁆𑀢𑁂𑀲𑀼 𑀅𑀯𑀺𑀚𑁆𑀚𑀸𑀲𑀯𑁂𑀦 𑀲𑀤𑁆𑀥𑀺𑀁 𑀏𑀓𑀥𑀸𑀯 𑀏𑀓𑀢𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀥. 𑀲. 𑀅𑀝𑁆𑀞. 𑁧𑁪𑁭𑁩). 𑀲𑁄𑀧𑀺 𑀭𑀸𑀕𑁄𑀢𑀺 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀳𑀕𑀢𑁄 𑀭𑀸𑀕𑁄. 𑀓𑀸𑀫𑀪𑀯𑀧𑀢𑁆𑀣𑀦𑀸 𑀯𑀺𑀬 𑀓𑀸𑀫𑀸𑀲𑀯𑁄𑀢𑀺 𑀬𑀼𑀢𑁆𑀢𑀁 𑀯𑀢𑁆𑀢𑀼𑀁. 𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀳𑀕𑀢𑀭𑀸𑀕𑀓𑀸𑀫𑀪𑀯𑀧𑀢𑁆𑀣𑀦𑀸𑀦𑀫𑁆𑀧𑀺 𑀳𑀺 𑀪𑀯𑀸𑀲𑀯𑁄𑀢𑀺 𑀯𑀢𑁆𑀢𑀩𑁆𑀩𑀧𑀭𑀺𑀬𑀸𑀬𑁄 𑀅𑀢𑁆𑀣𑀻𑀢𑀺 ‘‘𑀲𑀲𑁆𑀲𑀢𑀤𑀺𑀝𑁆𑀞𑀺𑀲𑀳𑀕𑀢𑁄 𑀭𑀸𑀕𑁄 𑀪𑀯𑀭𑀸𑀕𑀯𑀲𑁂𑀦 𑀧𑀢𑁆𑀣𑀦𑀸 𑀪𑀯𑀸𑀲𑀯𑁄 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁, 𑀦 𑀢𑁂𑀲𑀁 𑀇𑀥 𑀅𑀥𑀺𑀧𑁆𑀧𑁂𑀢𑀪𑀯𑀸𑀲𑀯𑀪𑀸𑀯𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀳𑀺 ‘‘𑀭𑀽𑀧𑀸𑀭𑀽𑀧𑀲𑀗𑁆𑀔𑀸𑀢𑁂 𑀓𑀫𑁆𑀫𑀢𑁄 𑀘 𑀉𑀧𑀧𑀢𑁆𑀢𑀺𑀢𑁄 𑀘 𑀤𑀼𑀯𑀺𑀥𑁂𑀧𑀺 𑀪𑀯𑁂 𑀆𑀲𑀯𑁄 𑀪𑀯𑀸𑀲𑀯𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺. 𑀢𑀢𑁆𑀣 𑀓𑀸𑀫𑀪𑀯𑀧𑀢𑁆𑀣𑀦𑀸𑀬 𑀢𑀸𑀯 𑀓𑀸𑀫𑀸𑀲𑀯𑀪𑀸𑀯𑁄 𑀳𑁄𑀢𑀼, 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀲𑀲𑁆𑀲𑀢𑀸𑀪𑀺𑀦𑀺𑀯𑁂𑀲𑀲𑀳𑀕𑀢𑀭𑀸𑀕𑀲𑁆𑀲 𑀓𑀣𑀦𑁆𑀢𑀺? 𑀲𑁄𑀧𑀺 𑀬𑀣𑀸𑀯𑀼𑀢𑁆𑀢𑀯𑀺𑀲𑀬𑁂 𑀓𑀸𑀫𑀦𑀯𑀲𑁂𑀦 𑀧𑀯𑀢𑁆𑀢𑀺𑀢𑁄 𑀓𑀸𑀫𑀸𑀲𑀯𑁄𑀬𑁂𑀯 𑀦𑀸𑀫. 𑀲𑀩𑁆𑀩𑁂𑀧𑀺 𑀳𑀺 𑀢𑁂𑀪𑀽𑀫𑀓𑀸 𑀥𑀫𑁆𑀫𑀸 𑀓𑀫𑀦𑀻𑀬𑀝𑁆𑀞𑁂𑀦 𑀓𑀸𑀫𑀸𑀢𑀺. 𑀦 𑀘𑁂𑀢𑁆𑀣 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑁄 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀮𑁄𑀪𑀲𑁆𑀲 𑀪𑀯𑀸𑀲𑀯𑀪𑀸𑀯𑁂𑀦 𑀯𑀺𑀲𑀼𑀁 𑀉𑀤𑁆𑀥𑀝𑀢𑁆𑀢𑀸. 𑀅𑀯𑀲𑁆𑀲𑀜𑁆𑀘𑁂𑀢𑀫𑁂𑀯𑀁 𑀯𑀺𑀜𑁆𑀜𑀸𑀢𑀩𑁆𑀩𑀁, 𑀇𑀢𑀭𑀣𑀸 𑀭𑀽𑀧𑀸𑀭𑀽𑀧𑀪𑀯𑁂𑀲𑀼 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀲𑀳𑀕𑀢𑀲𑁆𑀲𑀧𑀺 𑀮𑁄𑀪𑀲𑁆𑀲 𑀪𑀯𑀸𑀲𑀯𑀪𑀸𑀯𑁄 𑀆𑀧𑀚𑁆𑀚𑁂𑀬𑁆𑀬𑀸𑀢𑀺. 𑀓𑀸𑀫𑀸𑀲𑀯𑀸𑀤𑀬𑁄 𑀏𑀯 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀸𑀲𑀯𑀪𑀸𑀯𑁂𑀦 𑀤𑁆𑀯𑀺𑀥𑀸 𑀯𑀼𑀢𑁆𑀢𑀸.

𑁧𑁧𑁦𑁩. 𑀇𑀥 𑀧𑀸𑀴𑀺𑀬𑀸𑀧𑀺 𑀪𑀯𑀸𑀲𑀯𑀯𑀺𑀦𑀺𑀫𑀼𑀢𑁆𑀢𑀮𑁄𑀪𑀲𑁆𑀲 𑀓𑀸𑀫𑀸𑀲𑀯𑀪𑀸𑀯𑁄 𑀦 𑀦 𑀲𑀓𑁆𑀓𑀸 𑀬𑁄𑀚𑁂𑀢𑀼𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀫𑀸𑀲𑀯𑀦𑀺𑀤𑁆𑀤𑁂𑀲𑁂 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀥𑀫𑁆𑀫𑀘𑁆𑀙𑀦𑁆𑀤𑁄 𑀲𑀤𑁆𑀥𑀸’’𑀢𑀺 𑀓𑁂𑀘𑀺.

𑁧𑁧𑁦𑁫. 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑁂𑀲𑁆𑀯𑁂𑀯 𑀧𑀯𑀢𑁆𑀢𑀢𑀺 𑀢𑀩𑁆𑀩𑀺𑀦𑀺𑀫𑀼𑀢𑁆𑀢𑀲𑁆𑀲 𑀥𑀫𑁆𑀫𑀲𑁆𑀲 𑀚𑀻𑀯𑀕𑁆𑀕𑀳𑀡𑀯𑀺𑀲𑀬𑀲𑁆𑀲 𑀧𑀭𑀫𑀢𑁆𑀣𑀢𑁄 𑀅𑀪𑀸𑀯𑀸. 𑀭𑀽𑀧𑁂…𑀧𑁂… 𑀯𑀺𑀜𑁆𑀜𑀸𑀡𑁂 𑀯𑀸 𑀧𑀦 𑀦 𑀧𑀢𑀺𑀝𑁆𑀞𑀸𑀢𑀺 𑀭𑀽𑀧𑀸𑀤𑀻𑀦𑀁 𑀅𑀯𑀺𑀧𑀭𑀻𑀢𑀲𑀪𑀸𑀯𑀫𑀢𑁆𑀢𑁂 𑀅𑀝𑁆𑀞𑀢𑁆𑀯𑀸 𑀲𑀬𑀁 𑀲𑀫𑀸𑀭𑁄𑀧𑀺𑀢𑀲𑁆𑀲 𑀢𑁂𑀲𑀼 𑀧𑀭𑀺𑀓𑀧𑁆𑀧𑀦𑀸𑀫𑀢𑁆𑀢𑀲𑀺𑀤𑁆𑀥𑀲𑁆𑀲 𑀓𑀲𑁆𑀲𑀘𑀺 𑀆𑀓𑀸𑀭𑀲𑁆𑀲 𑀅𑀪𑀺𑀦𑀺𑀯𑁂𑀲𑀦𑀢𑁄. 𑀢𑁂𑀦𑁂𑀯𑀸𑀳 ‘‘𑀢𑀢𑁄 𑀅𑀜𑁆𑀜𑀁 𑀓𑀢𑁆𑀯𑀸’’𑀢𑀺. 𑀢𑀢𑁄 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀢𑁄. 𑀯𑁂𑀤𑀦𑀸𑀤𑀬𑁄𑀧𑀺 𑀳𑀺 𑀓𑁂𑀘𑀺 𑀤𑀺𑀝𑁆𑀞𑀺𑀕𑀢𑀺𑀓𑀸 𑀅𑀦𑀺𑀘𑁆𑀘𑀸𑀢𑀺 𑀧𑀲𑁆𑀲𑀦𑁆𑀢𑀻𑀢𑀺. 𑀢𑀢𑁄𑀢𑀺 𑀯𑀸 𑀲𑀭𑀻𑀭𑀲𑀗𑁆𑀔𑀸𑀢𑀭𑀽𑀧𑀓𑁆𑀔𑀦𑁆𑀥𑀢𑁄. ‘‘𑀅𑀜𑁆𑀜𑀁 𑀚𑀻𑀯𑀁 𑀅𑀜𑁆𑀜𑀁 𑀲𑀭𑀻𑀭’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀳𑁄𑀢𑀻𑀢𑀺 𑀪𑀯𑀢𑀺 𑀲𑀲𑁆𑀲𑀢𑀁 𑀅𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀦𑁆𑀢𑀺 𑀩𑁆𑀭𑀳𑁆𑀫𑀇𑀲𑁆𑀲𑀭𑀸𑀤𑀺𑀢𑁄 𑀅𑀜𑁆𑀜𑀁.

𑀅𑀭𑀽𑀧𑀪𑀯𑁄 𑀯𑀺𑀬 𑀭𑀽𑀧𑀭𑀸𑀕𑀧𑁆𑀧𑀳𑀸𑀦𑁂𑀦 𑀭𑀽𑀧𑀪𑀯𑁄 𑀓𑀸𑀫𑀭𑀸𑀕𑀧𑁆𑀧𑀳𑀸𑀦𑁂𑀦 𑀧𑀢𑁆𑀢𑀩𑁆𑀩𑁄. 𑀭𑀽𑀧𑀻𑀩𑁆𑀭𑀳𑁆𑀫𑀸𑀦𑀜𑁆𑀘 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁄 𑀭𑀸𑀕𑁄 𑀧𑀳𑀻𑀬𑀢𑀺, 𑀦 𑀯𑀺𑀫𑀸𑀦𑀸𑀤𑀻𑀲𑀼 𑀭𑀸𑀕𑁄𑀢𑀺 𑀲𑁄 𑀅𑀓𑀸𑀫𑀭𑀸𑀕𑁄𑀢𑀺 𑀓𑀢𑁆𑀯𑀸 𑀓𑀸𑀫𑀸𑀲𑀯𑁄 𑀦 𑀳𑁄𑀢𑀻𑀢𑀺 𑀅𑀝𑁆𑀞𑀓𑀣𑀸𑀬𑀁 𑀧𑀝𑀺𑀓𑁆𑀔𑀺𑀢𑁆𑀢𑀁. 𑀝𑀻𑀓𑀸𑀓𑀸𑀭𑁂𑀳𑀺 𑀧𑀦 𑀓𑀸𑀫𑀸𑀲𑀯𑀪𑀯𑀸𑀲𑀯𑀯𑀺𑀦𑀺𑀫𑀼𑀢𑁆𑀢𑀮𑁄𑀪𑀸𑀪𑀸𑀯𑀤𑀲𑁆𑀲𑀦𑁂𑀦 𑀭𑀽𑀧𑀻𑀩𑁆𑀭𑀳𑁆𑀫𑀸𑀦𑀁 𑀯𑀺𑀫𑀸𑀦𑀸𑀤𑀺𑀭𑀸𑀕𑀲𑁆𑀲𑀧𑀺 𑀓𑀸𑀫𑀘𑁆𑀙𑀦𑁆𑀤𑀸𑀤𑀺𑀪𑀸𑀯𑀢𑁄 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀭𑀽𑀧𑀸𑀭𑀽𑀧𑀪𑀯𑀭𑀸𑀕𑀯𑀺𑀦𑀺𑀫𑀼𑀢𑁆𑀢𑁄 𑀲𑀩𑁆𑀩𑁄 𑀮𑁄𑀪𑁄 𑀓𑀸𑀫𑀸𑀲𑀯𑁄𑀢𑀺 𑀤𑀲𑁆𑀲𑀺𑀢𑁄. 𑀢𑀢𑁆𑀣 𑀬𑀼𑀢𑁆𑀢𑀁 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀲𑀺𑀬𑀸 𑀆𑀲𑀯𑀲𑀫𑁆𑀧𑀬𑀼𑀢𑁆𑀢𑁄 𑀓𑀸𑀫𑀭𑀸𑀕𑁂𑀦 𑀪𑀯𑀭𑀸𑀕𑁂𑀦 𑀯𑀸 𑀲𑀳𑀼𑀧𑁆𑀧𑀢𑁆𑀢𑀺𑀬𑀁, 𑀲𑀺𑀬𑀸 𑀆𑀲𑀯𑀯𑀺𑀧𑁆𑀧𑀬𑀼𑀢𑁆𑀢𑁄 𑀢𑀤𑀜𑁆𑀜𑀭𑀸𑀕𑁂𑀦 𑀲𑀳𑀼𑀧𑁆𑀧𑀢𑁆𑀢𑀺𑀬𑀁, ‘‘𑀘𑀢𑀽𑀲𑀼 𑀤𑀺𑀝𑁆𑀞𑀺𑀕𑀢𑀸’’𑀢𑀺𑀆𑀤𑀺𑀧𑀸𑀴𑀺𑀬𑀸 𑀅𑀪𑀸𑀯𑀤𑀲𑁆𑀲𑀦𑁂𑀦 𑀓𑀸𑀫𑀸𑀲𑀯𑀪𑀯𑀸𑀲𑀯𑀯𑀺𑀦𑀺𑀫𑀼𑀢𑁆𑀢𑀮𑁄𑀪𑀸𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀓𑀸𑀫𑀸𑀲𑀯𑁄’’𑀢𑀺𑀆𑀤𑀺𑀧𑀸𑀴𑀺𑀤𑀲𑁆𑀲𑀦𑁂𑀦 𑀤𑀺𑀝𑁆𑀞𑀺𑀭𑀸𑀕𑀲𑁆𑀲 𑀓𑀸𑀫𑀸𑀲𑀯𑀪𑀸𑀯𑀁 𑀲𑀸𑀥𑁂𑀢𑀺. 𑀧𑀳𑀸𑀢𑀩𑁆𑀩𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀧𑀳𑀸𑀢𑀩𑁆𑀩𑀢𑀸𑀤𑀲𑁆𑀲𑀦𑀢𑁆𑀣𑀁. 𑀧𑀳𑀸𑀦𑁂𑀢𑀺 𑀧𑀳𑀸𑀦𑀦𑀺𑀫𑀺𑀢𑁆𑀢𑀁.

𑁧𑁧𑁨𑁧. 𑀚𑀸𑀢𑀺𑀬𑀸𑀢𑀺 𑀔𑀢𑁆𑀢𑀺𑀬𑀲𑀪𑀸𑀯𑀸𑀤𑀺𑀚𑀸𑀢𑀺𑀲𑀫𑁆𑀧𑀢𑁆𑀢𑀺𑀬𑀸. 𑀕𑁄𑀢𑁆𑀢𑁂𑀦𑀸𑀢𑀺 𑀕𑁄𑀢𑀫𑀕𑁄𑀢𑁆𑀢𑀸𑀤𑀺𑀉𑀓𑁆𑀓𑀝𑁆𑀞𑀕𑁄𑀢𑁆𑀢𑁂𑀦. 𑀓𑁄𑀮𑀧𑀼𑀢𑁆𑀢𑀺𑀬𑁂𑀦𑀸𑀢𑀺 𑀫𑀳𑀸𑀓𑀼𑀮𑀪𑀸𑀯𑁂𑀦. 𑀯𑀡𑁆𑀡𑀧𑁄𑀓𑁆𑀔𑀭𑀢𑀸𑀬𑀸𑀢𑀺 𑀯𑀡𑁆𑀡𑀲𑀫𑁆𑀧𑀦𑁆𑀦𑀲𑀭𑀻𑀭𑀢𑀸𑀬. ‘‘𑀧𑁄𑀓𑁆𑀔𑀭’’𑀦𑁆𑀢𑀺 𑀳𑀺 𑀲𑀭𑀻𑀭𑀁 𑀯𑀼𑀘𑁆𑀘𑀢𑀻𑀢𑀺. 𑀫𑀸𑀦𑀁 𑀚𑀧𑁆𑀧𑁂𑀢𑀻𑀢𑀺 𑀫𑀸𑀦𑀁 𑀧𑀯𑀢𑁆𑀢𑁂𑀢𑀺 𑀓𑀭𑁄𑀢𑀺. 𑀧𑀯𑀢𑁆𑀢𑁄 𑀫𑀸𑀦𑁄 𑀧𑀯𑀢𑁆𑀢𑀫𑀸𑀦𑁄. 𑀧𑀼𑀕𑁆𑀕𑀮𑀯𑀺𑀲𑁂𑀲𑀦𑁆𑀢𑀺 𑀲𑁂𑀬𑁆𑀬𑀲𑁆𑀲 𑀲𑁂𑀬𑁆𑀬𑁄𑀢𑀺𑀆𑀤𑀺𑀪𑁂𑀤𑀁 𑀧𑀼𑀕𑁆𑀕𑀮𑀯𑀺𑀲𑁂𑀲𑀁. 𑀲𑁂𑀬𑁆𑀬𑀁 𑀪𑀺𑀦𑁆𑀤𑀺𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑁄 𑀲𑁂𑀬𑁆𑀬𑀫𑀸𑀦𑁄. 𑀢𑀺𑀡𑁆𑀡𑀦𑁆𑀢𑀺 𑀲𑁂𑀬𑁆𑀬𑀲𑁆𑀲 𑀲𑁂𑀬𑁆𑀬𑀸𑀤𑀻𑀦𑀁 𑀢𑀺𑀡𑁆𑀡𑀁 ‘‘𑀲𑁂𑀬𑁆𑀬𑁄𑀳𑀫𑀲𑁆𑀫𑀻’’𑀢𑀺𑀆𑀤𑀺𑀦𑀸 𑀅𑀜𑁆𑀜𑀁 𑀧𑀼𑀕𑁆𑀕𑀮𑀁 𑀅𑀦𑀺𑀲𑁆𑀲𑀸𑀬 𑀯𑀼𑀢𑁆𑀢𑀸𑀦𑀁. 𑀲𑁂𑀬𑁆𑀬𑀸𑀤𑀺𑀯𑀲𑁂𑀦 𑀅𑀢𑁆𑀢𑀦𑁄 𑀫𑀦𑀦𑀁 𑀧𑀕𑁆𑀕𑀳𑁄 𑀫𑀸𑀦𑁄, 𑀢𑀲𑁆𑀲 𑀓𑀭𑀡𑀁 𑀲𑁂𑀬𑁆𑀬𑁄𑀳𑀫𑀲𑁆𑀫𑀻𑀢𑀺𑀆𑀤𑀺𑀧𑀯𑀢𑁆𑀢𑀺𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀲𑁂𑀬𑁆𑀬𑁄𑀢𑀺 𑀆𑀤𑀺𑀓𑀺𑀘𑁆𑀘𑀓𑀭𑀡’’𑀦𑁆𑀢𑀺.

𑁧𑁧𑁪𑁦. 𑀲𑀩𑁆𑀩𑁄𑀧𑀺 𑀮𑁄𑀪𑁄 𑀅𑀪𑀺𑀚𑁆𑀛𑀸𑀲𑀪𑀸𑀯𑁄𑀢𑀺 𑀅𑀪𑀺𑀚𑁆𑀛𑀸 𑀆𑀲𑀯𑀤𑁆𑀯𑀬𑀲𑀪𑀸𑀯𑀸, 𑀓𑀸𑀫𑀭𑀸𑀕𑁄 𑀓𑀸𑀫𑀸𑀲𑀯𑀲𑀪𑀸𑀯𑁄 𑀏𑀯𑀸𑀢𑀺 𑀆𑀲𑀯𑀤𑁆𑀯𑀬𑀏𑀓𑀸𑀲𑀯𑀪𑀸𑀯𑁄 𑀅𑀪𑀺𑀚𑁆𑀛𑀸𑀓𑀸𑀫𑀭𑀸𑀕𑀸𑀦𑀁 𑀯𑀺𑀲𑁂𑀲𑁄 𑀯𑀼𑀢𑁆𑀢𑁄. 𑀦 𑀅𑀪𑀺𑀚𑁆𑀛𑀸 𑀘 𑀥𑀫𑁆𑀫𑀸 𑀞𑀧𑁂𑀢𑁆𑀯𑀸 𑀤𑀺𑀝𑁆𑀞𑀺𑀁 𑀅𑀯𑀺𑀚𑁆𑀚𑀜𑁆𑀘 𑀦𑁄𑀆𑀲𑀯𑀲𑀪𑀸𑀯𑀸. 𑀅𑀪𑀺𑀚𑁆𑀛𑀸 𑀘 𑀆𑀲𑀯𑀤𑁆𑀯𑀬𑀲𑀪𑀸𑀯𑀸 𑀏𑀯, 𑀦𑀅𑀪𑀺𑀚𑁆𑀛𑀸𑀲𑀪𑀸𑀯𑁄 𑀘 𑀮𑁄𑀪𑁄 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀦𑁄𑀆𑀲𑀯𑀮𑁄𑀪𑀲𑁆𑀲 𑀲𑀩𑁆𑀪𑀸𑀯𑁄 𑀯𑀺𑀘𑀸𑀭𑁂𑀢𑀩𑁆𑀩𑁄’’𑀢𑀺 𑀆𑀳. 𑀕𑀡𑀦𑀸𑀬 𑀳𑁂𑀢𑀼𑀬𑀸 𑀲𑀢𑁆𑀢𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀧𑀜𑁆𑀳𑀸𑀯𑀸𑀭𑀧𑀸𑀞𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑁆𑀣 𑀳𑀺 ‘‘𑀆𑀲𑀯𑁄 𑀥𑀫𑁆𑀫𑁄 𑀆𑀲𑀯𑀲𑁆𑀲 𑀥𑀫𑁆𑀫𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄. 𑀆𑀲𑀯𑁄 𑀥𑀫𑁆𑀫𑁄 𑀦𑁄𑀆𑀲𑀯𑀲𑁆𑀲 𑀥𑀫𑁆𑀫𑀲𑁆𑀲. 𑀆𑀲𑀯𑁄 𑀥𑀫𑁆𑀫𑁄 𑀆𑀲𑀯𑀲𑁆𑀲 𑀘 𑀦𑁄𑀆𑀲𑀯𑀲𑁆𑀲 𑀘. 𑀦𑁄𑀆𑀲𑀯𑁄 𑀥𑀫𑁆𑀫𑁄 𑀦𑁄𑀆𑀲𑀯𑀲𑁆𑀲. 𑀦𑁄𑀆𑀲𑀯𑁄 𑀥𑀫𑁆𑀫𑁄 𑀆𑀲𑀯𑀲𑁆𑀲. 𑀦𑁄𑀆𑀲𑀯𑁄 𑀥𑀫𑁆𑀫𑁄 𑀆𑀲𑀯𑀲𑁆𑀲 𑀘 𑀦𑁄𑀆𑀲𑀯𑀲𑁆𑀲 𑀘. 𑀆𑀲𑀯𑁄 𑀘 𑀦𑁄𑀆𑀲𑀯𑁄 𑀘 𑀥𑀫𑁆𑀫𑀸 𑀦𑁄𑀆𑀲𑀯𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁩.𑁩.𑁧𑁬) 𑀇𑀫𑁂𑀲𑀁 𑀯𑀸𑀭𑀸𑀦𑀁 𑀯𑀲𑁂𑀦 ‘‘𑀕𑀡𑀦𑀸𑀬 𑀲𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀤𑀺 𑀦𑁄𑀆𑀲𑀯𑀲𑀪𑀸𑀯𑁄𑀧𑀺 𑀮𑁄𑀪𑁄 𑀲𑀺𑀬𑀸, 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀘𑀺𑀢𑁆𑀢𑀲𑁆𑀲 𑀯𑀲𑁂𑀦 ‘‘𑀆𑀲𑀯𑁄 𑀘 𑀦𑁄𑀆𑀲𑀯𑁄 𑀘 𑀥𑀫𑁆𑀫𑀸 𑀫𑁄𑀳𑀬𑀣𑀸𑀯𑀼𑀢𑁆𑀢𑀮𑁄𑀪𑀸 𑀆𑀲𑀯𑀲𑁆𑀲 𑀥𑀫𑁆𑀫𑀲𑁆𑀲 𑀤𑀺𑀝𑁆𑀞𑀺𑀬𑀸 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀲𑀢𑁆𑀢𑀫𑁄, 𑀧𑀸𑀴𑀺𑀬𑀁 𑀆𑀕𑀢𑀁 𑀲𑀢𑁆𑀢𑀫𑀁 𑀅𑀝𑁆𑀞𑀫𑀁 𑀓𑀢𑁆𑀯𑀸 ‘‘𑀆𑀲𑀯𑁄 𑀘 𑀦𑁄𑀆𑀲𑀯𑁄 𑀘 𑀥𑀫𑁆𑀫𑀸 𑀆𑀲𑀯𑀲𑁆𑀲 𑀘 𑀦𑁄𑀆𑀲𑀯𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀦𑀯𑀫𑁄 𑀧𑀜𑁆𑀳𑁄 𑀯𑀼𑀘𑁆𑀘𑁂𑀬𑁆𑀬, 𑀦 𑀧𑀦 𑀯𑀼𑀢𑁆𑀢𑁄𑀢𑀺. 𑀏𑀯𑀁 𑀤𑀺𑀝𑁆𑀞𑀺𑀲𑀫𑁆𑀧𑀬𑀼𑀢𑁆𑀢𑀮𑁄𑀪𑀲𑁆𑀲 𑀦𑁄𑀆𑀲𑀯𑀪𑀸𑀯𑀸𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀢𑀭𑀲𑁆𑀲𑀧𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑁂 𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁧𑁧𑁬𑁨. 𑀬𑀣𑀸𑀭𑀽𑀧𑁂 𑀭𑀽𑀧𑀧𑁆𑀧𑀩𑀦𑁆𑀥𑁂 𑀯𑀢𑁆𑀢𑀫𑀸𑀦𑁂 𑀧𑀼𑀕𑁆𑀕𑀮𑁄 𑀕𑀘𑁆𑀙𑀢𑀺 𑀢𑀺𑀝𑁆𑀞𑀢𑀺 𑀦𑀺𑀲𑀻𑀤𑀢𑀻𑀢𑀺 𑀯𑀼𑀘𑁆𑀘𑀢𑀺, 𑀢𑀣𑀸 𑀯𑀺𑀲𑀤𑀭𑀽𑀧𑀲𑁆𑀲 𑀉𑀧𑁆𑀧𑀸𑀤𑀓𑀁 𑀘𑀺𑀢𑁆𑀢𑀁 𑀇𑀭𑀺𑀬𑀸𑀧𑀣𑀽𑀧𑀢𑁆𑀣𑀫𑁆𑀪𑀓𑀁. 𑀢𑀁 𑀧𑀦 𑀓𑀼𑀲𑀮𑀢𑁄 𑀓𑀺𑀭𑀺𑀬𑀢𑁄 𑀘 𑀧𑀜𑁆𑀘𑀫𑀚𑁆𑀛𑀸𑀦𑀘𑀺𑀢𑁆𑀢𑀁 𑀅𑀪𑀺𑀜𑁆𑀜𑀸𑀧𑁆𑀧𑀢𑁆𑀢𑀁 𑀅𑀧𑁆𑀧𑀢𑁆𑀢𑀜𑁆𑀘 𑀪𑀺𑀦𑁆𑀤𑀺𑀢𑁆𑀯𑀸 𑀲𑀢𑁆𑀢𑀧𑀜𑁆𑀜𑀸𑀲 𑀚𑀯𑀦𑀸𑀦𑀺 𑀯𑁄𑀝𑁆𑀞𑀩𑁆𑀩𑀦𑀜𑁆𑀘𑀸𑀢𑀺 𑀅𑀝𑁆𑀞𑀧𑀜𑁆𑀜𑀸𑀲𑀯𑀺𑀥𑀁. 𑀲𑀳𑀚𑀸𑀢𑀥𑀫𑁆𑀫𑀸𑀦𑀁 𑀅𑀓𑀫𑁆𑀫𑀜𑁆𑀜𑀪𑀸𑀯𑀓𑀭𑀢𑁆𑀢𑀸 𑀣𑀺𑀦𑀫𑀺𑀤𑁆𑀥𑀲𑀳𑀕𑀢𑀘𑀺𑀢𑁆𑀢𑀁 𑀯𑀺𑀲𑀤𑀸𑀦𑀺 𑀭𑀽𑀧𑀸𑀦𑀺 𑀦 𑀲𑀫𑀼𑀝𑁆𑀞𑀧𑁂𑀢𑀺 𑀦 𑀉𑀧𑀢𑁆𑀣𑀫𑁆𑀪𑁂𑀢𑀺 𑀘𑀸𑀢𑀺 𑀯𑀼𑀢𑁆𑀢𑀁 ‘‘𑀇𑀭𑀺𑀬𑀸𑀧𑀣𑀁 𑀲𑀦𑁆𑀥𑀸𑀭𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢’’𑀦𑁆𑀢𑀺.

𑁧𑁧𑁬𑁩. 𑀯𑀺𑀧𑀓𑁆𑀔𑁂𑀧𑀺 𑀪𑀸𑀯𑀢𑁄 𑀅𑀦𑁂𑀓𑀦𑁆𑀢𑀺𑀓𑀢𑁆𑀢𑀸 𑀭𑀽𑀧𑀢𑁆𑀢𑀸𑀲𑀸𑀥𑀓𑀢𑁆𑀢𑀁. 𑀕𑀭𑀼𑀪𑀸𑀯𑀧𑁆𑀧𑀢𑁆𑀢𑀺 𑀮𑀳𑀼𑀢𑀸𑀯𑀺𑀭𑀳𑁄 𑀤𑀝𑁆𑀞𑀩𑁆𑀩𑁄. 𑀲𑀢𑀺𑀧𑀺 𑀅𑀜𑁆𑀜𑁂𑀲𑀫𑁆𑀧𑀺 𑀅𑀓𑀼𑀲𑀮𑀸𑀤𑀻𑀦𑀁 𑀮𑀳𑀼𑀢𑀸𑀯𑀺𑀭𑀳𑁂 𑀣𑀺𑀦𑀫𑀺𑀤𑁆𑀥𑀸𑀦𑀁 𑀏𑀓𑀦𑁆𑀢𑀢𑁄 𑀮𑀳𑀼𑀢𑀸𑀧𑀝𑀺𑀧𑀓𑁆𑀔𑀢𑁆𑀢𑀸 𑀓𑀸𑀭𑀡𑀸𑀦𑀼𑀭𑀽𑀧𑀢𑁆𑀢𑀸 𑀘 𑀨𑀮𑀲𑁆𑀲 ‘‘𑀣𑀺𑀦𑀫𑀺𑀤𑁆𑀥𑀲𑀫𑀼𑀝𑁆𑀞𑀺𑀢𑀭𑀽𑀧𑁂𑀳𑀻’’𑀢𑀺 𑀯𑀼𑀢𑁆𑀢𑀁. 𑀦 𑀚𑀸𑀕𑀭…𑀧𑁂… 𑀲𑀦𑁆𑀢𑀢𑀺𑀦𑁆𑀢𑀺 𑀏𑀢𑁂𑀦 𑀦𑀸𑀫𑀓𑀸𑀬𑁂 𑀲𑀼𑀧𑀦𑀲𑁆𑀲 𑀅𑀲𑀺𑀤𑁆𑀥𑀢𑀁 𑀤𑀲𑁆𑀲𑁂𑀢𑀺. 𑀫𑀺𑀤𑁆𑀥𑀲𑁆𑀲 𑀨𑀮𑀢𑁆𑀢𑀸𑀢𑀺 𑀏𑀢𑁆𑀣 𑀫𑀺𑀤𑁆𑀥𑀁𑀬𑁂𑀯 𑀦𑀺𑀤𑁆𑀤𑀸𑀓𑀸𑀭𑀡𑀦𑁆𑀢𑀺 𑀦𑀸𑀬𑀁 𑀦𑀺𑀬𑀫𑁄 𑀇𑀘𑁆𑀙𑀺𑀢𑁄, 𑀦𑀺𑀤𑁆𑀤𑀸𑀓𑀸𑀭𑀡𑀫𑁂𑀯 𑀧𑀦 𑀫𑀺𑀤𑁆𑀥𑀦𑁆𑀢𑀺 𑀦𑀺𑀬𑀫𑁄 𑀇𑀘𑁆𑀙𑀺𑀢𑁄𑀢𑀺 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀳𑀺 𑀔𑀻𑀡𑀸𑀲𑀯𑀸𑀦𑀁 𑀦𑀺𑀤𑁆𑀤𑀸𑀬 𑀫𑀺𑀤𑁆𑀥𑀢𑁄 𑀅𑀜𑁆𑀜𑀁 𑀓𑀸𑀭𑀡𑀁 𑀓𑀭𑀚𑀓𑀸𑀬𑀲𑁆𑀲 𑀤𑀼𑀩𑁆𑀩𑀮𑀪𑀸𑀯𑁄 𑀅𑀝𑁆𑀞𑀓𑀣𑀸𑀬𑀁 𑀤𑀲𑁆𑀲𑀺𑀢𑁄𑀢𑀺.

𑀙𑀸𑀤𑀦𑀁, 𑀅𑀯𑀢𑁆𑀣𑀭𑀡𑀁 𑀯𑀸 𑀑𑀦𑀸𑀳𑁄, 𑀲𑁄 𑀭𑀽𑀧𑀲𑁆𑀲𑁂𑀯 𑀲𑀪𑀸𑀯𑁄𑀢𑀺 𑀧𑀭𑀲𑁆𑀲 𑀆𑀲𑀗𑁆𑀓𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀢𑁂𑀦 𑀲𑀳 𑀯𑀼𑀢𑁆𑀢𑀸 𑀑𑀦𑀸𑀳𑀧𑀭𑀺𑀬𑁄𑀦𑀸𑀳𑀸 𑀘𑀸’’𑀢𑀺. 𑀅𑀲𑀗𑁆𑀓𑁄𑀘𑀯𑀲𑁂𑀦 𑀯𑀺𑀲𑀤𑀸 𑀧𑀯𑀢𑁆𑀢𑀺 𑀯𑀺𑀧𑁆𑀨𑀸𑀭𑀺𑀓𑀪𑀸𑀯𑁄. 𑀆𑀯𑀭𑀡𑀪𑀸𑀯𑁄 𑀯𑀺𑀬𑀸𑀢𑀺 𑀏𑀢𑁂𑀦 𑀆𑀯𑀭𑀡𑀲𑀪𑀸𑀯𑀢𑁆𑀢𑁂𑀧𑀺 𑀫𑀺𑀤𑁆𑀥𑀲𑁆𑀲 𑀢𑀩𑁆𑀩𑀺𑀥𑀼𑀭𑁄 𑀅𑀦𑀜𑁆𑀜𑀲𑀸𑀥𑀸𑀭𑀡𑀢𑁆𑀢𑀸 𑀑𑀦𑀳𑀦𑀸𑀤𑀺𑀪𑀸𑀯𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀸𑀫𑀜𑁆𑀜𑀜𑁆𑀳𑀺 𑀧𑀜𑁆𑀘𑀦𑁆𑀦𑀫𑁆𑀧𑀺 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀦𑀁 𑀆𑀯𑀭𑀡𑀲𑀪𑀸𑀯𑁄𑀢𑀺 𑀆𑀯𑀭𑀡𑀪𑀸𑀯𑀲𑀤𑀺𑀲𑀲𑁆𑀲 𑀑𑀦𑀳𑀦𑀸𑀤𑀺𑀪𑀸𑀯𑀲𑁆𑀲 𑀦𑀸𑀫𑀓𑀸𑀬𑁂 𑀮𑀩𑁆𑀪𑀫𑀸𑀦𑀲𑁆𑀲 𑀕𑀳𑀺𑀢𑀢𑀸𑀢𑀺 𑀏𑀢𑁆𑀣𑀸𑀥𑀺𑀧𑁆𑀧𑀸𑀬𑁄.

𑀧𑀸𑀦𑀦𑁆𑀢𑀺 𑀅𑀦𑀼𑀬𑁄𑀕𑁄𑀢𑀺 𑀘 𑀢𑀁𑀓𑀺𑀭𑀺𑀬𑀸𑀲𑀸𑀥𑀺𑀓𑀸 𑀘𑁂𑀢𑀦𑀸 𑀅𑀥𑀺𑀧𑁆𑀧𑁂𑀢𑀸𑀢𑀺 𑀲𑀼𑀭𑀸𑀧𑀸𑀦𑀲𑁆𑀲 𑀲𑀼𑀭𑀸…𑀧𑁂… 𑀬𑁄𑀕𑀲𑁆𑀲 𑀘 𑀅𑀓𑀼𑀲𑀮𑀪𑀸𑀯𑁂𑀦 𑀉𑀧𑀓𑁆𑀓𑀺𑀮𑁂𑀲𑀤𑀼𑀩𑁆𑀩𑀮𑀻𑀓𑀭𑀡𑀪𑀸𑀯𑁄 𑀬𑀼𑀢𑁆𑀢𑁄𑀢𑀺 𑀯𑀼𑀢𑁆𑀢𑁄. ‘‘𑀲𑀼𑀭𑀸𑀫𑁂𑀭𑀬𑀲𑁆𑀲 𑀅𑀚𑁆𑀛𑁄𑀳𑀭𑀡𑀁 𑀧𑀸𑀦𑀁 𑀧𑀫𑀸𑀤𑀝𑁆𑀞𑀸𑀦𑀸𑀦𑀼𑀬𑁄𑀕𑁄 𑀘𑀸’’𑀢𑀺 𑀧𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. 𑀦𑀻𑀯𑀭𑀡𑀁 𑀳𑀼𑀢𑁆𑀯𑀸 𑀯𑀸𑀢𑀺𑀆𑀤𑀺𑀦𑀸 𑀇𑀤𑀁 𑀤𑀲𑁆𑀲𑁂𑀢𑀺 ‘‘𑀦𑀻𑀯𑀭𑀡𑀲𑀪𑀸𑀯𑀸𑀦𑀁 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀪𑀸𑀯𑀤𑀲𑁆𑀲𑀦𑀧𑀭𑀸𑀬 𑀘𑁄𑀤𑀦𑀸𑀬 𑀦𑀻𑀯𑀭𑀡𑀦𑁆𑀢𑀺 𑀓𑀢𑁆𑀣𑀘𑀺 𑀅𑀤𑀺𑀝𑁆𑀞𑀧𑀬𑁄𑀕𑀲𑁆𑀲 𑀅𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀭𑀽𑀧𑀲𑁆𑀲 𑀬𑀣𑀸𑀮𑀸𑀪𑀢𑁄 𑀕𑀳𑀡𑀁 𑀜𑀸𑀬𑁄𑀬𑁂𑀯 𑀦 𑀳𑁄𑀢𑀺, 𑀲𑀺𑀤𑁆𑀥𑀦𑀻𑀯𑀭𑀡𑀪𑀸𑀯𑀲𑀫𑁆𑀧𑀬𑀼𑀢𑁆𑀢𑀲𑀪𑀸𑀯𑀸𑀦𑀁𑀬𑁂𑀯 𑀧𑀦 𑀕𑀳𑀡𑀦𑁆𑀢𑀺 𑀢𑀁𑀲𑀪𑀸𑀯𑀸 𑀅𑀭𑀽𑀧𑀥𑀫𑁆𑀫𑀸𑀬𑁂𑀯 𑀤𑀲𑁆𑀲𑀺𑀢𑀸, 𑀦 𑀭𑀽𑀧𑀦𑁆𑀢𑀺 𑀣𑀺𑀦𑀁 𑀯𑀺𑀬 𑀫𑀺𑀤𑁆𑀥𑀫𑁆𑀧𑀺 𑀅𑀭𑀽𑀧𑀫𑁂𑀯𑀸𑀢𑀺 𑀯𑀺𑀜𑁆𑀜𑀸𑀬𑀢𑀻’’𑀢𑀺. 𑀬𑀦𑁆𑀢𑀺 𑀬𑁂𑀦 𑀯𑀘𑀦𑁂𑀦. 𑀅𑀲𑀫𑁆𑀪𑀯𑀯𑀘𑀦𑀢𑁄𑀢𑀺 𑀅𑀲𑀫𑁆𑀪𑀯𑀯𑀘𑀦𑀪𑀸𑀯𑀢𑁄.

𑀢𑁂𑀦𑀸𑀢𑀺 𑀢𑁂𑀦 𑀭𑀽𑀧𑀸𑀭𑀫𑁆𑀫𑀡𑀲𑁆𑀲 𑀙𑀦𑁆𑀤𑀭𑀸𑀕𑀲𑁆𑀲 𑀧𑀳𑀸𑀦𑀯𑀘𑀦𑁂𑀦. 𑀭𑀽𑀧𑀧𑁆𑀧𑀳𑀸𑀦𑀢𑁄 𑀅𑀜𑁆𑀜𑁄𑀢𑀺 𑀓𑀢𑁆𑀯𑀸 𑀭𑀽𑀧𑁂 𑀙𑀦𑁆𑀤𑀭𑀸𑀕𑀧𑁆𑀧𑀳𑀸𑀦𑀁 ‘‘𑀅𑀜𑁆𑀜𑁄 𑀓𑀸𑀭𑁄’’𑀢𑀺 𑀯𑀼𑀢𑁆𑀢𑀁. 𑀬𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀜𑁆𑀜𑀣𑀸’’𑀢𑀺 𑀯𑀼𑀢𑁆𑀢𑀁. 𑀇𑀤𑀦𑁆𑀢𑀺𑀆𑀤𑀺𑀦𑀸 ‘‘𑀢𑀁 𑀧𑀚𑀳𑀣𑀸’’𑀢𑀺 𑀧𑀸𑀴𑀺𑀬𑀸 𑀦 𑀦𑀺𑀧𑁆𑀧𑀭𑀺𑀬𑀸𑀬𑀧𑁆𑀧𑀳𑀸𑀦𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀭𑀽𑀧𑀲𑁆𑀲𑁂𑀯 𑀬𑀼𑀚𑁆𑀚𑀢𑀻𑀢𑀺 𑀲𑀼𑀤𑀼𑀤𑁆𑀤𑀲𑀁 𑀤𑀽𑀭𑀗𑁆𑀕𑀫𑀸𑀤𑀺𑀧𑁆𑀧𑀯𑀢𑁆𑀢𑀓𑀁 𑀘𑀺𑀢𑁆𑀢𑀁 𑀢𑀁𑀲𑀫𑁆𑀧𑀬𑀼𑀢𑁆𑀢𑁄 𑀅𑀭𑀽𑀧𑀥𑀫𑁆𑀫𑁄𑀬𑁂𑀯 𑀯𑀺𑀩𑀦𑁆𑀥𑀺𑀢𑀼𑀁 𑀲𑀫𑀢𑁆𑀣𑁄𑀢𑀺 𑀤𑀲𑁆𑀲𑁂𑀢𑀺. 𑀘𑁂𑀢𑀲𑁄 𑀧𑀭𑀺𑀬𑀼𑀝𑁆𑀞𑀸𑀦𑀦𑁆𑀢𑀺 𑀓𑀼𑀲𑀮𑀘𑀺𑀢𑁆𑀢𑀲𑁆𑀲 𑀕𑀳𑀡𑀁. 𑀦𑀻𑀯𑀭𑀡𑀸𑀦𑀺 𑀳𑀺 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀺 𑀉𑀧𑁆𑀧𑀚𑁆𑀚𑀺𑀢𑀼𑀁 𑀅𑀧𑁆𑀧𑀤𑀸𑀦𑁂𑀦 𑀓𑀼𑀲𑀮𑀯𑀸𑀭𑀁 𑀕𑀡𑁆𑀳𑀦𑁆𑀢𑀻𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀕𑀳𑀡𑀜𑁆𑀘𑁂𑀢𑁆𑀣 𑀧𑀭𑀺𑀬𑀼𑀝𑁆𑀞𑀸𑀦𑀁 ‘‘𑀘𑁄𑀭𑀸 𑀫𑀕𑁆𑀕𑁂 𑀧𑀭𑀺𑀬𑀼𑀝𑁆𑀞𑀺𑀁𑀲𑀽’’𑀢𑀺𑀆𑀤𑀻𑀲𑀼 𑀯𑀺𑀬.

𑁧𑁧𑁭𑁬. 𑀉𑀤𑁆𑀥𑀘𑁆𑀘𑀁 𑀓𑀼𑀓𑁆𑀓𑀼𑀘𑁆𑀘𑀜𑁆𑀘 𑀲𑀳 𑀯𑀼𑀢𑁆𑀢𑀦𑁆𑀢𑀺 𑀉𑀤𑁆𑀤𑁂𑀲𑀧𑀼𑀘𑁆𑀙𑀸𑀦𑀺𑀕𑀫𑀦𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀁 𑀧𑀦 𑀅𑀝𑁆𑀞𑀓𑀣𑀸𑀬𑀁 𑀉𑀤𑁆𑀥𑀘𑁆𑀘𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑁂𑀦 𑀯𑀺𑀦𑀸𑀪𑀸𑀯𑀓𑀸𑀭𑀡𑀁 𑀯𑀢𑁆𑀯𑀸 ‘‘𑀪𑀺𑀦𑁆𑀤𑀺𑀢𑁆𑀯𑀸 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 ‘‘𑀦𑀻𑀯𑀭𑀡𑀸 𑀘𑁂𑀯 𑀦𑀻𑀯𑀭𑀡𑀲𑀫𑁆𑀧𑀬𑀼𑀢𑁆𑀢𑀸 𑀘𑀸’’𑀢𑀺 𑀧𑀤𑀲𑁆𑀲 𑀦𑀺𑀤𑁆𑀤𑁂𑀲𑁂 𑀉𑀤𑁆𑀥𑀘𑁆𑀘𑀓𑀼𑀓𑁆𑀓𑀼𑀘𑁆𑀘𑀸𑀦𑀁 𑀯𑀺𑀲𑀼𑀁 𑀦𑀺𑀤𑁆𑀤𑀺𑀝𑁆𑀞𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀸𑀫𑀘𑁆𑀙𑀦𑁆𑀤𑀲𑁆𑀲 𑀉𑀓𑁆𑀓𑀝𑁆𑀞𑀦𑀻𑀯𑀭𑀡𑀢𑀸 𑀑𑀭𑀫𑁆𑀪𑀸𑀕𑀺𑀬𑀪𑀸𑀯𑁄. 𑀲𑁄 𑀳𑀺 𑀭𑀽𑀧𑀭𑀸𑀕𑀸𑀭𑀽𑀧𑀭𑀸𑀕𑀧𑁆𑀧𑀓𑀸𑀭𑀓𑀸𑀫𑀘𑁆𑀙𑀦𑁆𑀤𑀁 𑀉𑀧𑀸𑀤𑀸𑀬 𑀢𑀢𑁄 𑀢𑀺𑀩𑁆𑀩𑀓𑀺𑀘𑁆𑀘𑀢𑀸𑀬 ‘‘𑀉𑀓𑁆𑀓𑀝𑁆𑀞𑀦𑀻𑀯𑀭𑀡’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀦𑁆𑀢𑁆𑀯𑁂𑀯 𑀮𑁄𑀪𑁄 𑀯𑀼𑀢𑁆𑀢𑁄, 𑀦 𑀪𑀺𑀦𑁆𑀤𑀺𑀢𑁆𑀯𑀸. 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀲𑁆𑀲 𑀘 𑀅𑀦𑀯𑀲𑁂𑀲𑀢𑁄 𑀅𑀦𑀸𑀕𑀸𑀫𑀺𑀫𑀕𑁆𑀕𑁂𑀦 𑀧𑀳𑀸𑀦𑁂 𑀯𑀼𑀘𑁆𑀘𑀫𑀸𑀦𑁂 𑀘𑀢𑀼𑀢𑁆𑀣𑀫𑀕𑁆𑀕𑀯𑀚𑁆𑀛𑁄 𑀮𑁄𑀪𑁄 𑀅𑀦𑀻𑀯𑀭𑀡𑀲𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺 𑀆𑀳 ‘‘𑀬𑀤𑀺…𑀧𑁂… 𑀲𑀺𑀬𑀸’’𑀢𑀺. 𑀦𑁄𑀦𑀻𑀯𑀭𑀡𑁄 𑀭𑀽𑀧𑀭𑀸𑀕𑀸𑀭𑀽𑀧𑀭𑀸𑀕𑀧𑁆𑀧𑀓𑀸𑀭𑁄 𑀮𑁄𑀪𑀥𑀫𑁆𑀫𑁄 𑀦𑀻𑀯𑀭𑀡𑀲𑁆𑀲 𑀅𑀯𑀺𑀚𑁆𑀚𑀸𑀤𑀺𑀓𑀲𑁆𑀲. 𑀆𑀤𑀺-𑀲𑀤𑁆𑀤𑁂𑀦 ‘‘𑀦𑁄𑀦𑀻𑀯𑀭𑀡𑁄 𑀥𑀫𑁆𑀫𑁄 𑀦𑀻𑀯𑀭𑀡𑀲𑁆𑀲 𑀘 𑀦𑁄𑀦𑀻𑀯𑀭𑀡𑀲𑁆𑀲 𑀘 𑀥𑀫𑁆𑀫𑀲𑁆𑀲. 𑀦𑀻𑀯𑀭𑀡𑁄 𑀘 𑀦𑁄𑀦𑀻𑀯𑀭𑀡𑁄 𑀘 𑀥𑀫𑁆𑀫𑀸 𑀦𑀻𑀯𑀭𑀡𑀲𑁆𑀲 𑀥𑀫𑁆𑀫𑀲𑁆𑀲. 𑀦𑀻𑀯𑀭𑀡𑁄 𑀘 𑀦𑁄𑀦𑀻𑀯𑀭𑀡𑁄 𑀘 𑀥𑀫𑁆𑀫𑀸 𑀦𑁄𑀦𑀻𑀯𑀭𑀡𑀲𑁆𑀲 𑀥𑀫𑁆𑀫𑀲𑁆𑀲. 𑀦𑀻𑀯𑀭𑀡𑁄 𑀘 𑀦𑁄𑀦𑀻𑀯𑀭𑀡𑁄 𑀘 𑀥𑀫𑁆𑀫𑀸 𑀦𑀻𑀯𑀭𑀡𑀲𑁆𑀲 𑀘 𑀦𑁄𑀦𑀻𑀯𑀭𑀡𑀲𑁆𑀲 𑀘 𑀥𑀫𑁆𑀫𑀲𑁆𑀲 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁩.𑁮.𑁨𑁫) 𑀇𑀫𑁂 𑀧𑀜𑁆𑀳𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀘𑀢𑁆𑀢𑀸𑀭𑀻𑀢𑀺 𑀯𑀼𑀢𑁆𑀢𑀁 𑀦𑀻𑀯𑀭𑀡𑀧𑀤𑀫𑀽𑀮𑀓𑀸𑀦𑀁 𑀢𑀺𑀡𑁆𑀡𑀁 𑀦𑁄𑀦𑀻𑀯𑀭𑀡𑀫𑀽𑀮𑀓𑀲𑁆𑀲 𑀏𑀓𑀲𑁆𑀲 𑀯𑀲𑁂𑀦. 𑀦𑀻𑀯𑀭𑀡𑀦𑁄𑀦𑀻𑀯𑀭𑀡𑀢𑀤𑀼𑀪𑀬𑀫𑀽𑀮𑀓𑀸𑀦𑀁 𑀧𑀦 𑀢𑀺𑀡𑁆𑀡𑀁 𑀢𑀺𑀡𑁆𑀡𑀁 𑀯𑀲𑁂𑀦 𑀦𑀯𑀸𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀸𑀢𑀺 𑀬𑀣𑀸𑀤𑀲𑁆𑀲𑀺𑀢𑀦𑀬𑀸𑀬 𑀧𑀸𑀴𑀺𑀬𑀸 𑀅𑀪𑀸𑀯𑀸 𑀦𑁄𑀦𑀻𑀯𑀭𑀡𑀮𑁄𑀪𑀸𑀪𑀸𑀯𑀸.

𑁧𑁨𑁧𑁯. 𑀢𑁂𑀦𑁂𑀯𑀸𑀢𑀺 𑀧𑀼𑀭𑀺𑀫𑀤𑀺𑀝𑁆𑀞𑀺𑀆𑀓𑀸𑀭𑁂𑀦𑁂𑀯 𑀉𑀧𑁆𑀧𑀚𑁆𑀚𑀫𑀸𑀦𑁂𑀦. 𑀤𑀺𑀝𑁆𑀞𑀺𑀕𑀢𑀺𑀓𑁂𑀳𑀺 𑀯𑀼𑀘𑁆𑀘𑀫𑀸𑀦𑀸𑀦𑀁 ‘‘𑀦𑀺𑀘𑁆𑀘𑀁 𑀲𑀼𑀪’’𑀦𑁆𑀢𑀺 𑀏𑀯𑀫𑀸𑀤𑀺𑀯𑀘𑀦𑀸𑀦𑀁, 𑀤𑀺𑀝𑁆𑀞𑀺𑀭𑀳𑀺𑀢𑁂𑀳𑀺 𑀯𑀼𑀘𑁆𑀘𑀫𑀸𑀦𑀸𑀦𑀁 𑀕𑀕𑀦𑀓𑀼𑀲𑀼𑀫𑀸𑀤𑀺𑀮𑁄𑀓𑀯𑁄𑀳𑀸𑀭𑀯𑀘𑀦𑀸𑀦𑀜𑁆𑀘 𑀯𑀢𑁆𑀣𑀽𑀦𑀺 𑀯𑀸𑀘𑀸𑀯𑀢𑁆𑀣𑀼𑀫𑀢𑁆𑀢𑀸𑀦𑀻𑀢𑀺 𑀆𑀳 ‘‘𑀯𑀸𑀘𑀸…𑀧𑁂… 𑀯𑀸’’𑀢𑀺.

𑁧𑁨𑁨𑁧. 𑀘𑀺𑀢𑁆𑀢𑁂𑀦 𑀧𑀭𑀮𑁄𑀓𑁂 𑀞𑀺𑀢𑁄𑀢𑀺 𑀬𑀲𑁆𑀫𑀺𑀁 𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀺𑀯𑀲𑁂𑀦 𑀲𑀬𑀁 𑀞𑀺𑀢𑁄, 𑀢𑀢𑁄 𑀅𑀜𑁆𑀜𑀁 𑀮𑁄𑀓𑀁 𑀧𑀭𑀮𑁄𑀓𑁄𑀢𑀺 𑀘𑀺𑀢𑁆𑀢𑁂𑀦 𑀕𑀳𑁂𑀢𑁆𑀯𑀸 𑀞𑀺𑀢𑁄.

𑁧𑁨𑁩𑁬. 𑀦 𑀳𑀺 𑀧𑀼𑀭𑀺𑀫𑁂𑀳𑀻𑀢𑀺𑀆𑀤𑀺𑀦𑀸 𑀧𑀞𑀫𑀫𑀕𑁆𑀕𑀸𑀤𑀻𑀳𑀺 𑀲𑀫𑀼𑀕𑁆𑀖𑀸𑀝𑀺𑀢𑀅𑀧𑀸𑀬𑀕𑀫𑀦𑀻𑀬𑀪𑀸𑀯𑀸𑀤𑀺𑀓𑀸 𑀏𑀯 𑀭𑀸𑀕𑀸𑀤𑀬𑁄 𑀤𑀼𑀢𑀺𑀬𑀫𑀕𑁆𑀕𑀸𑀤𑀻𑀳𑀺 𑀧𑀳𑀻𑀬𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺.

𑁧𑁨𑁮𑁭. 𑀉𑀧𑀝𑁆𑀞𑀺𑀢𑁂𑀧𑀺 𑀤𑀼𑀕𑁆𑀕𑀢𑀺𑀦𑀺𑀫𑀺𑀢𑁆𑀢𑀸𑀤𑀺𑀓𑁂 𑀦 𑀢𑀣𑀸 𑀢𑀺𑀩𑁆𑀩𑁄 𑀮𑁄𑀪𑁄 𑀉𑀧𑁆𑀧𑀚𑁆𑀚𑀢𑀺, 𑀬𑀣𑀸 𑀲𑀼𑀕𑀢𑀺𑀦𑀺𑀫𑀺𑀢𑁆𑀢𑀸𑀤𑀺𑀓𑁂𑀢𑀺 𑀆𑀳 ‘‘𑀩𑀮𑀯𑀦𑀺𑀓𑀦𑁆𑀢𑀺𑀯𑀺𑀭𑀳𑁂𑀦𑀸’’𑀢𑀺.

𑁧𑁩𑁦𑁧. 𑀏𑀓𑀲𑁆𑀫𑀺𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀉𑀧𑁆𑀧𑀦𑁆𑀦𑀸𑀦𑀁 𑀯𑀺𑀬 𑀏𑀓𑀲𑁆𑀫𑀺𑀁 𑀲𑀦𑁆𑀢𑀸𑀦𑁂 𑀉𑀧𑁆𑀧𑀦𑁆𑀦𑀸𑀦𑀫𑁆𑀧𑀺 𑀲𑀳𑀧𑀯𑀢𑁆𑀢𑀺𑀧𑀭𑀺𑀬𑀸𑀬𑁄 𑀅𑀢𑁆𑀣𑀻𑀢𑀺 𑀧𑀳𑀸𑀦𑁂𑀓𑀝𑁆𑀞𑁂𑀦 𑀭𑀸𑀕𑀭𑀡𑁂𑀦 𑀯𑀺𑀘𑀺𑀓𑀺𑀘𑁆𑀙𑀼𑀤𑁆𑀥𑀘𑁆𑀘𑀲𑀳𑀕𑀢𑀫𑁄𑀳𑀲𑁆𑀲 𑀲𑀭𑀡𑀢𑀸 𑀯𑀼𑀢𑁆𑀢𑀸. 𑀉𑀤𑁆𑀥𑀘𑁆𑀘𑀯𑀺𑀘𑀺𑀓𑀺𑀘𑁆𑀙𑀸𑀳𑀺 𑀬𑁄 𑀫𑁄𑀳𑁄 𑀲𑀳𑀚𑀸𑀢𑁄 𑀪𑀯𑁂, 𑀲𑁄𑀧𑀺 𑀭𑀸𑀕𑁂𑀦 𑀲𑀭𑀡𑁄 𑀧𑀳𑀸𑀦𑁂𑀓𑀝𑁆𑀞𑀪𑀸𑀯𑀢𑁄𑀢𑀺. 𑀮𑁄𑀪𑀤𑁄𑀲𑀫𑁄𑀳𑀢𑀤𑁂𑀓𑀝𑁆𑀞𑀓𑀺𑀮𑁂𑀲𑀢𑀁𑀲𑀫𑁆𑀧𑀬𑀼𑀢𑁆𑀢𑀓𑁆𑀔𑀦𑁆𑀥𑀢𑀁𑀲𑀫𑀼𑀝𑁆𑀞𑀸𑀦𑀓𑀫𑁆𑀫𑀪𑁂𑀤𑀢𑁄 𑀲𑀩𑁆𑀩𑀲𑁆𑀲𑀧𑀺 𑀅𑀓𑀼𑀲𑀮𑀲𑁆𑀲 𑀲𑀗𑁆𑀕𑀳𑀡𑀯𑀲𑁂𑀦 𑀧𑀯𑀢𑁆𑀢𑁄 𑀲𑀭𑀡𑀧𑀤𑀦𑀺𑀤𑁆𑀤𑁂𑀲𑁄 𑀅𑀭𑀡𑀯𑀺𑀪𑀗𑁆𑀕𑀲𑀼𑀢𑁆𑀢𑁂𑀦𑀧𑀺 𑀅𑀜𑁆𑀜𑀤𑀢𑁆𑀣𑀼 𑀲𑀁𑀲𑀦𑁆𑀤𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀭𑀡𑀯𑀺𑀪𑀗𑁆𑀕𑀲𑀼𑀢𑁆𑀢𑁂’’𑀢𑀺𑀆𑀤𑀺𑀫𑀸𑀳. 𑀬𑀁 𑀧𑀦 𑀅𑀝𑁆𑀞𑀓𑀣𑀸𑀬𑀁 𑀲𑀫𑁆𑀧𑀬𑁄𑀕𑀧𑁆𑀧𑀳𑀸𑀦𑁂𑀓𑀝𑁆𑀞𑀪𑀸𑀯𑀤𑀻𑀧𑀦𑁂𑀦 𑀭𑀸𑀕𑀸𑀤𑀻𑀦𑀁 𑀲𑀩𑁆𑀩𑁂𑀲𑀁 𑀯𑀸 𑀅𑀓𑀼𑀲𑀮𑀥𑀫𑁆𑀫𑀸𑀦𑀁 𑀲𑀭𑀡𑀪𑀸𑀯𑀤𑀲𑁆𑀲𑀦𑀁, 𑀢𑀁 𑀧𑀸𑀴𑀺𑀬𑀸 𑀬𑀣𑀸𑀤𑀲𑁆𑀲𑀺𑀢𑀥𑀫𑁆𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀲𑀭𑀡𑀪𑀸𑀯𑀤𑀲𑁆𑀲𑀦𑀧𑀭𑀁, 𑀢𑀤𑀜𑁆𑀜𑀥𑀫𑁆𑀫𑀸𑀦𑀁 𑀲𑀭𑀡𑀪𑀸𑀯𑀧𑀝𑀺𑀲𑁂𑀥𑀦𑀧𑀭𑀦𑁆𑀢𑀺 𑀅𑀭𑀡𑀯𑀺𑀪𑀗𑁆𑀕𑀲𑀼𑀢𑁆𑀢𑀯𑀺𑀭𑁄𑀥𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀼𑀢𑁆𑀢𑀦𑁆𑀢𑀤𑁂𑀲𑀦𑀸𑀬 𑀯𑀸 𑀧𑀭𑀺𑀬𑀸𑀬𑀓𑀣𑀸𑀪𑀸𑀯𑀢𑁄 𑀦𑀺𑀧𑁆𑀧𑀭𑀺𑀬𑀸𑀬𑀢𑁄 𑀲𑀭𑀡𑀪𑀸𑀯𑁄 𑀯𑀺𑀬 𑀅𑀭𑀡𑀪𑀸𑀯𑁄𑀧𑀺 𑀅𑀓𑀼𑀲𑀮𑀥𑀫𑁆𑀫𑀸𑀦𑀁𑀬𑁂𑀯𑀸𑀢𑀺 𑀢𑀣𑀸𑀧𑀯𑀢𑁆𑀢𑀸𑀬 𑀅𑀝𑁆𑀞𑀓𑀣𑀸𑀬 𑀦 𑀓𑁄𑀘𑀺 𑀲𑀼𑀢𑁆𑀢𑀯𑀺𑀭𑁄𑀥𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀼𑀢𑁆𑀢𑀦𑁆𑀢𑀺𑀓𑀤𑀼𑀓𑀦𑀺𑀓𑁆𑀔𑁂𑀧𑀓𑀣𑀸𑀯𑀡𑁆𑀡𑀦𑀸

𑁧𑁩𑁧𑁩. 𑀅𑀳𑀁-𑀲𑀤𑁆𑀤𑁂𑀦 𑀳𑁂𑀢𑀼𑀪𑀽𑀢𑁂𑀦 𑀬𑁄 𑀅𑀢𑁆𑀣𑁄𑀢𑀺 𑀏𑀢𑁆𑀣 𑀅𑀳𑀁-𑀲𑀤𑁆𑀤𑁄 𑀅𑀢𑁆𑀣𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀅𑀢𑁆𑀣𑀸𑀯𑀩𑁄𑀥𑀦𑀢𑁆𑀣𑁄 𑀳𑀺 𑀲𑀤𑁆𑀤𑀧𑁆𑀧𑀬𑁄𑀕𑁄. 𑀅𑀢𑁆𑀣𑀧𑀭𑀸𑀥𑀻𑀦𑁄 𑀓𑁂𑀯𑀮𑁄 𑀅𑀢𑁆𑀣𑀧𑀤𑀢𑁆𑀣𑀓𑁄, 𑀲𑁄 𑀧𑀤𑀢𑁆𑀣𑀯𑀺𑀧𑀭𑀺𑀬𑁂𑀲𑀓𑀸𑀭𑀺𑀦𑀸 𑀧𑀦 𑀇𑀢𑀺-𑀲𑀤𑁆𑀤𑁂𑀦 𑀧𑀭𑀢𑁄 𑀧𑀬𑀼𑀢𑁆𑀢𑁂𑀦 𑀲𑀤𑁆𑀤𑀧𑀤𑀢𑁆𑀣𑀓𑁄 𑀚𑀸𑀬𑀢𑀺 𑀬𑀣𑀸 𑀕𑀸𑀯𑀻𑀢𑀺 𑀅𑀬𑀫𑀸𑀳𑀸𑀢𑀺 𑀕𑁄-𑀲𑀤𑁆𑀤𑀁 𑀆𑀳𑀸𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀢𑁂𑀦 𑀯𑀺𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑀲𑀳𑀺𑀢𑁄 𑀲𑀤𑁆𑀤𑁄 𑀧𑀜𑁆𑀜𑀢𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑀣𑀸 𑀳𑀺 ‘‘𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑁄 𑀮𑁄𑀓𑀺𑀬𑀲𑁄𑀢𑁂 𑀧𑀝𑀺𑀳𑀜𑁆𑀜𑀢𑀻’’𑀢𑀺𑀆𑀤𑀺𑀦𑀸 (𑀓𑀣𑀸. 𑁩𑁪𑁭) 𑀧𑀜𑁆𑀜𑀢𑁆𑀢𑀺𑀬𑀸 𑀯𑀘𑀦𑀪𑀸𑀯𑀁 𑀲𑀸𑀥𑀬𑀢𑀺. 𑀅𑀜𑁆𑀜𑀣𑀸𑀢𑀺𑀆𑀤𑀺𑀦𑀸 𑀧𑀜𑁆𑀜𑀢𑁆𑀢𑀺𑀬𑀸 𑀅𑀲𑀤𑁆𑀤𑀲𑀪𑀸𑀯𑀢𑁆𑀢𑁂 𑀤𑁄𑀲𑀫𑀸𑀳. 𑀅𑀥𑀺𑀯𑀘𑀦𑀸𑀤𑀺𑀢𑀸 𑀲𑀺𑀬𑀸, 𑀢𑀣𑀸 𑀘 𑀅𑀥𑀺𑀯𑀘𑀦𑀸𑀤𑀻𑀦𑀁 𑀅𑀥𑀺𑀯𑀘𑀦𑀧𑀣𑀸𑀤𑀺𑀢𑁄 𑀯𑀺𑀲𑁂𑀲𑁄 𑀦 𑀲𑀺𑀬𑀸𑀢𑀺 𑀤𑀼𑀓𑁄𑀬𑁂𑀯 𑀦 𑀲𑀫𑁆𑀪𑀯𑁂𑀬𑁆𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀲𑀓𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑁂 𑀭𑀽𑀧𑀸𑀤𑀬𑁄 𑀥𑀫𑁆𑀫𑁂 𑀲𑀫𑀽𑀳𑀢𑁄 𑀲𑀦𑁆𑀢𑀸𑀦𑀢𑁄 𑀘 𑀏𑀓𑀢𑁆𑀢𑀯𑀲𑁂𑀦 𑀕𑀳𑁂𑀢𑁆𑀯𑀸 𑀅𑀳𑀦𑁆𑀢𑀺 𑀯𑁄𑀳𑀭𑀺𑀬𑀫𑀸𑀦𑀸 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺 𑀲𑀗𑁆𑀔𑀸𑀬𑀢𑀺 𑀯𑁄𑀳𑀭𑀻𑀬𑀢𑀻𑀢𑀺 𑀲𑀗𑁆𑀔𑀸𑀢𑀺 𑀅𑀥𑀺𑀧𑁆𑀧𑁂𑀢𑀸. 𑀢𑀣𑀸 𑀲𑁂𑀲𑁂𑀲𑀼 𑀬𑀣𑀸𑀲𑀫𑁆𑀪𑀯𑀁 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯𑀸𑀳 ‘‘𑀤𑀢𑁆𑀢𑁄𑀢𑀺 𑀏𑀢𑁆𑀢𑀸𑀯𑀢𑀸 𑀲𑀢𑁆𑀢𑀧𑀜𑁆𑀜𑀢𑁆𑀢𑀺𑀁 𑀤𑀲𑁆𑀲𑁂𑀢𑁆𑀯𑀸 𑀅𑀜𑁆𑀜𑀫𑁆𑀧𑀺 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺𑀁 𑀤𑀲𑁆𑀲𑁂𑀢𑀼’’𑀦𑁆𑀢𑀺𑀆𑀤𑀺. 𑀧𑀤𑀢𑁆𑀣𑀲𑁆𑀲𑀸𑀢𑀺 𑀅𑀳𑀁-𑀲𑀤𑁆𑀤𑀸𑀤𑀺𑀧𑀤𑀸𑀪𑀺𑀥𑁂𑀬𑁆𑀬𑀲𑁆𑀲, 𑀧𑀭𑀫𑀢𑁆𑀣𑀲𑁆𑀲 𑀯𑀸. 𑀅𑀥𑀺𑀯𑀘𑀦𑀁 𑀲𑀤𑁆𑀤𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀯𑀤𑀦𑁆𑀢𑁂𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑁄 𑀳𑀺 𑀅𑀢𑁆𑀢𑀦𑀸 𑀜𑀸𑀧𑁂𑀢𑀩𑁆𑀩𑀫𑀢𑁆𑀣𑀁 𑀲𑀬𑀁 𑀜𑀸𑀢𑁄 𑀏𑀯 𑀜𑀸𑀧𑁂𑀢𑀻𑀢𑀺 𑀅𑀕𑁆𑀕𑀳𑀺𑀢𑀲𑀫𑁆𑀩𑀦𑁆𑀥𑀲𑁆𑀲 𑀦 𑀲𑀤𑁆𑀤𑁄 𑀅𑀢𑁆𑀣𑀧𑁆𑀧𑀓𑀸𑀲𑀦𑀲𑀫𑀢𑁆𑀣𑁄𑀢𑀺 𑀯𑀼𑀢𑁆𑀢𑀁 ‘‘𑀧𑀼𑀩𑁆𑀩𑁂 𑀕𑀳𑀺𑀢𑀲𑀜𑁆𑀜𑁂𑀦𑀸’’𑀢𑀺. 𑀯𑀺𑀲𑁂𑀲𑁂𑀦 𑀜𑀸𑀬𑀢𑀻𑀢𑀺 𑀲𑀫𑀜𑁆𑀜𑀸𑀢𑀺 𑀲𑀁-𑀲𑀤𑁆𑀤𑀲𑁆𑀲 𑀯𑀺𑀲𑁂𑀲𑀢𑁆𑀣𑀢𑀁 𑀆𑀳.

𑀓𑀭𑀻𑀬𑀢𑀻𑀢𑀺 𑀇𑀤𑀁 𑀇𑀫𑀲𑁆𑀲𑀢𑁆𑀣𑀲𑁆𑀲 𑀅𑀥𑀺𑀯𑀘𑀦𑀦𑁆𑀢𑀺 𑀏𑀯𑀁 𑀦𑀺𑀓𑁆𑀔𑀺𑀧𑀻𑀬𑀢𑀺. 𑀦𑀸𑀫𑀪𑀽𑀢𑀁 𑀯𑀘𑀦𑀫𑁂𑀯 𑀢𑀁 𑀢𑀁 𑀅𑀢𑁆𑀣𑀁 𑀦𑀺𑀤𑁆𑀥𑀸𑀭𑁂𑀢𑁆𑀯𑀸 𑀲𑀳𑁂𑀢𑀼𑀓𑀁 𑀓𑀢𑁆𑀯𑀸 𑀯𑀤𑀢𑀺 𑀩𑁆𑀬𑀜𑁆𑀚𑀬𑀢𑀺 𑀘𑀸𑀢𑀺 𑀆𑀳 ‘‘𑀦𑀸𑀫𑀫𑀺𑀘𑁆𑀘𑁂𑀯 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺. 𑀢𑁂𑀦𑁂𑀯𑀸𑀳 ‘‘𑀦 𑀳𑀺 𑀧𑀣𑀯𑀻’’𑀢𑀺𑀆𑀤𑀺. 𑀧𑀣𑀯𑀻𑀲𑀗𑁆𑀔𑀸𑀢𑀦𑁆𑀢𑀺 𑀧𑀣𑀯𑀻-𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑀁.

𑀆𑀘𑀭𑀺𑀬𑀸𑀢𑀺 𑀅𑀝𑁆𑀞𑀓𑀣𑀸𑀬 𑀲𑀁𑀯𑀡𑁆𑀡𑀦𑀓𑀸 𑀆𑀘𑀭𑀺𑀬𑀸, 𑀦 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀤𑀢𑀺. 𑀫𑀸𑀢𑀺𑀓𑀸𑀬𑀦𑁆𑀢𑀺 𑀫𑀸𑀢𑀺𑀓𑀸𑀯𑀡𑁆𑀡𑀦𑀸𑀬𑀁. 𑀢𑁂𑀦𑀸𑀢𑀺 𑀫𑀸𑀢𑀺𑀓𑀸𑀯𑀡𑁆𑀡𑀦𑀸𑀯𑀘𑀦𑁂𑀦. 𑀇𑀫𑀺𑀲𑁆𑀲𑀸 𑀧𑀸𑀴𑀺𑀬𑀸 𑀅𑀝𑁆𑀞𑀓𑀣𑀸𑀬 𑀘 𑀅𑀢𑁆𑀣𑀤𑀲𑁆𑀲𑀦𑀲𑁆𑀲 𑀏𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀲𑁆𑀲 𑀆𑀘𑀭𑀺𑀬𑀯𑀸𑀤𑀲𑁆𑀲 𑀯𑀺𑀭𑁄𑀥𑁄 𑀲𑀺𑀬𑀸, 𑀢𑀫𑁂𑀯 𑀯𑀺𑀭𑁄𑀥𑀁 ‘‘𑀦 𑀳𑀻’’𑀢𑀺𑀆𑀤𑀺𑀦𑀸 𑀯𑀺𑀯𑀭𑀢𑀺. 𑀢𑀢𑁆𑀣 𑀅𑀥𑀺𑀯𑀘𑀦𑀧𑀣𑀸𑀤𑀺𑀪𑀸𑀯𑁂𑀦 𑀯𑀼𑀢𑁆𑀢𑀸𑀦𑀁 𑀥𑀫𑁆𑀫𑀸𑀦𑀁 𑀧𑀓𑀸𑀲𑀓𑀲𑁆𑀲 𑀲𑀪𑀸𑀯𑀲𑁆𑀲 𑀯𑀺𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑀲𑀳𑀺𑀢𑀲𑀤𑁆𑀤𑀲𑁆𑀲𑁂𑀯 𑀯𑀘𑀦𑀫𑀢𑁆𑀢𑀁 𑀅𑀥𑀺𑀓𑀸𑀭𑀁 𑀓𑀢𑁆𑀯𑀸 𑀧𑀯𑀢𑁆𑀢𑀺𑀆𑀤𑀺 𑀬𑀼𑀚𑁆𑀚𑀢𑀺, 𑀦 𑀅𑀲𑀪𑀸𑀯𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀉𑀧𑁆𑀧𑀸𑀤𑀯𑀬𑀓𑀺𑀘𑁆𑀘𑀭𑀳𑀺𑀢𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀦𑀺𑀤𑁆𑀥𑀸𑀭𑀺𑀢𑀲𑀪𑀸𑀯𑀲𑁆𑀲𑀸𑀢𑀺 𑀧𑀭𑀫𑀢𑁆𑀣𑀢𑁄 𑀅𑀦𑀼𑀧𑀮𑀤𑁆𑀥𑀲𑀪𑀸𑀯𑀲𑁆𑀲.

𑀤𑀼𑀯𑀺𑀥𑀸𑀢𑀺 𑀧𑀜𑁆𑀜𑀸𑀧𑀦𑀧𑀜𑁆𑀜𑀸𑀧𑀺𑀢𑀩𑁆𑀩𑀪𑁂𑀤𑀢𑁄 𑀤𑀼𑀯𑀺𑀥𑀸. 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀢𑀺 𑀉𑀧𑁆𑀧𑀸𑀤𑀯𑀬𑀓𑀺𑀘𑁆𑀘𑀭𑀳𑀺𑀢𑀸𑀢𑀺𑀆𑀤𑀺𑀧𑁆𑀧𑀓𑀸𑀭𑀸. 𑀅𑀝𑁆𑀞𑀓𑀣𑀸𑀬𑀁 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀯𑀡𑁆𑀡𑀦𑀸𑀬𑀁. 𑀦𑀦𑀼 𑀘 𑀢𑀢𑁆𑀣 𑀉𑀧𑀦𑀺𑀥𑀸𑀧𑀜𑁆𑀜𑀢𑁆𑀢𑀺𑀆𑀤𑀬𑁄 𑀅𑀧𑀭𑀸𑀧𑀺 𑀧𑀜𑁆𑀜𑀢𑁆𑀢𑀺𑀬𑁄 𑀯𑀼𑀢𑁆𑀢𑀸, 𑀅𑀣 𑀓𑀲𑁆𑀫𑀸 ‘‘𑀙 𑀧𑀜𑁆𑀜𑀢𑁆𑀢𑀺𑀬𑁄𑀯 𑀯𑀼𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁? 𑀲𑀘𑁆𑀘𑀁 𑀯𑀼𑀢𑁆𑀢𑀸, 𑀢𑀸 𑀧𑀦 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀆𑀤𑀻𑀲𑀼 𑀙𑀲𑀼 𑀏𑀯 𑀅𑀦𑁆𑀢𑁄𑀕𑀥𑀸𑀢𑀺 ‘‘𑀅𑀝𑁆𑀞𑀓𑀣𑀸𑀬𑀁 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀆𑀤𑀬𑁄 𑀙 𑀧𑀜𑁆𑀜𑀢𑁆𑀢𑀺𑀬𑁄𑀯 𑀯𑀼𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀭𑀽𑀧𑀸𑀤𑀺 𑀯𑀺𑀬 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀧𑀜𑁆𑀜𑀸𑀧𑀺𑀢𑀩𑁆𑀩𑀢𑁆𑀢𑀸 𑀘 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, 𑀅𑀯𑀺𑀚𑁆𑀚𑀫𑀸𑀦𑀲𑁆𑀲 𑀘 𑀲𑀢𑁆𑀢𑀭𑀣𑀸𑀤𑀺𑀅𑀢𑁆𑀣𑀲𑁆𑀲 𑀧𑀜𑁆𑀜𑀸𑀧𑀦𑀢𑁄 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻𑀢𑀺 𑀏𑀯𑀁 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀯𑀘𑀦𑁂𑀦 𑀬𑀣𑀸𑀯𑀼𑀢𑁆𑀢𑀸 𑀤𑀼𑀯𑀺𑀥𑀸𑀧𑀺 𑀧𑀜𑁆𑀜𑀢𑁆𑀢𑀺 𑀲𑀗𑁆𑀕𑀳𑀺𑀢𑀸𑀢𑀺 𑀆𑀳 ‘‘𑀅𑀯𑀺𑀚𑁆𑀚𑀫𑀸𑀦…𑀧𑁂… 𑀯𑀼𑀢𑁆𑀢𑀸’’𑀢𑀺. 𑀇𑀢𑀭𑁂𑀳𑀻𑀢𑀺 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀆𑀤𑀻𑀳𑀺 𑀅𑀯𑀲𑁂𑀲𑁂𑀳𑀺 𑀧𑀜𑁆𑀘𑀳𑀺, 𑀭𑀽𑀧𑀯𑁂𑀤𑀦𑀸𑀤𑀻𑀦𑀁 𑀲𑀢𑁆𑀢𑀭𑀣𑀸𑀤𑀻𑀦𑀜𑁆𑀘 𑀅𑀢𑁆𑀣𑀸𑀦𑀁 𑀧𑀓𑀸𑀭𑁂𑀳𑀺 𑀜𑀸𑀧𑀦𑀢𑁄 𑀢𑀁𑀢𑀁𑀯𑀸𑀘𑀓𑁄 𑀲𑀤𑁆𑀤𑁄𑀬𑁂𑀯 𑀯𑀺𑀲𑀬𑀪𑁂𑀤𑀢𑁄 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀆𑀤𑀺𑀪𑁂𑀤𑀸 𑀧𑀜𑁆𑀜𑀢𑁆𑀢𑀺 𑀲𑀗𑁆𑀔𑀸𑀤𑀻𑀳𑀺 𑀤𑀲𑀳𑀺 𑀧𑀤𑁂𑀳𑀺 𑀯𑀼𑀢𑁆𑀢𑀸𑀢𑀺 𑀅𑀬𑀁 𑀧𑀼𑀭𑀺𑀫𑁄 𑀅𑀢𑁆𑀣𑁄, 𑀲𑁄 𑀘 𑀬𑀣𑀸𑀭𑀼𑀢𑀯𑀲𑁂𑀦𑁂𑀯 𑀧𑀸𑀴𑀺𑀬𑀸 𑀯𑀺𑀜𑁆𑀜𑀸𑀬𑀫𑀸𑀦𑀢𑁆𑀢𑀸 ‘‘𑀧𑀸𑀴𑀺𑀅𑀦𑀼𑀕𑀢𑁄 𑀉𑀚𑀼𑀓𑁄’’𑀢𑀺 𑀘 𑀯𑀼𑀢𑁆𑀢𑁄. 𑀬𑀤𑀺 𑀘𑀸𑀢𑀺𑀆𑀤𑀻𑀲𑀼 𑀲𑀢𑁆𑀢𑀸𑀤𑀺𑀓𑀸 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺 𑀬𑀤𑀺 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺, 𑀲𑀸 𑀅𑀢𑁆𑀣𑀻𑀢𑀺 𑀦 𑀯𑀢𑁆𑀢𑀩𑁆𑀩𑀸. 𑀅𑀯𑀺𑀚𑁆𑀚𑀫𑀸𑀦𑀸 𑀘 𑀲𑀸 𑀧𑀜𑁆𑀜𑀸𑀧𑀺𑀢𑀩𑁆𑀩𑀢𑁄 𑀧𑀜𑁆𑀜𑀢𑁆𑀢𑀺 𑀘𑀸𑀢𑀺 𑀢𑁂𑀲𑀁 𑀆𑀘𑀭𑀺𑀬𑀸𑀦𑀁 𑀮𑀤𑁆𑀥𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀸𑀦𑀺 𑀢𑀲𑁆𑀲𑀸 𑀮𑀤𑁆𑀥𑀺𑀬𑀸 𑀯𑀲𑁂𑀦 𑀧𑀜𑁆𑀜𑀢𑁆𑀢𑀺𑀧𑀣𑀸𑀢𑀺 𑀯𑀼𑀢𑁆𑀢𑀥𑀫𑁆𑀫𑀸𑀦𑀫𑁆𑀧𑀺 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀪𑀸𑀯𑀸𑀧𑀢𑁆𑀢𑀺𑀘𑁄𑀤𑀦𑁂𑀦 𑀢𑀢𑁆𑀣 𑀤𑁄𑀲𑀁 𑀤𑀲𑁆𑀲𑁂𑀢𑀺 ‘‘𑀬𑀣𑀸 𑀘𑀸’’𑀢𑀺𑀆𑀤𑀺𑀦𑀸. 𑀢𑀢𑁄𑀢𑀺 𑀬𑀲𑁆𑀫𑀸 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀧𑀜𑁆𑀜𑀸𑀧𑀺𑀢𑀩𑁆𑀩𑀢𑁆𑀢𑀸 𑀘 𑀲𑀢𑁆𑀢𑀭𑀣𑀸𑀤𑀻𑀦𑀁 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀪𑀸𑀯𑁄 𑀯𑀺𑀬 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀧𑀜𑁆𑀜𑀸𑀧𑀺𑀢𑀩𑁆𑀩𑀢𑁆𑀢𑀸 𑀘 𑀲𑀩𑁆𑀩𑁂𑀲𑀁 𑀲𑀪𑀸𑀯𑀥𑀫𑁆𑀫𑀸𑀦𑀁 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀪𑀸𑀯𑁄 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄.

‘‘𑀅𑀣𑀸’’𑀢𑀺𑀆𑀤𑀺𑀦𑀸 𑀧𑀜𑁆𑀜𑀢𑁆𑀢𑀺𑀧𑀣𑀦𑀺𑀤𑁆𑀤𑁂𑀲𑀢𑁄 𑀯𑀺𑀲𑀺𑀝𑁆𑀞𑀲𑁆𑀲 𑀧𑀜𑁆𑀜𑀢𑁆𑀢𑀺𑀥𑀫𑁆𑀫𑀦𑀺𑀤𑁆𑀤𑁂𑀲𑀲𑁆𑀲 𑀲𑀬𑀫𑁂𑀯 𑀓𑀸𑀭𑀡𑀫𑀸𑀲𑀗𑁆𑀓𑀢𑀺. ‘‘𑀦𑀸𑀧𑀻’’𑀢𑀺𑀆𑀤𑀺𑀦𑀸 𑀢𑀲𑁆𑀲 𑀓𑀸𑀭𑀡𑀲𑁆𑀲 𑀅𑀲𑀺𑀤𑁆𑀥𑀢𑀁 𑀤𑀲𑁆𑀲𑁂𑀢𑀺. ‘‘𑀧𑀼𑀭𑀺𑀲𑁄𑀢𑀺 𑀲𑀗𑁆𑀔𑀸’’𑀢𑀺𑀆𑀤𑀻𑀲𑀼 𑀲𑀗𑁆𑀔𑀸𑀤𑀬𑁄𑀧𑀺 𑀦𑀸𑀫𑀸𑀤𑀻𑀳𑀺 𑀅𑀢𑁆𑀣𑀢𑁄 𑀅𑀯𑀺𑀲𑀺𑀝𑁆𑀞𑀸 𑀯𑀼𑀢𑁆𑀢𑀸𑀢𑀺 𑀆𑀳 ‘‘𑀲𑀗𑁆𑀔𑀸𑀤𑀺𑀲𑀤𑁆𑀤𑀸𑀦𑀁 𑀲𑀫𑀸𑀦𑀢𑁆𑀣𑀢𑁆𑀢𑀸’’𑀢𑀺. 𑀯𑀘𑀦𑀕𑁆𑀕𑀳𑀡𑀁 𑀯𑀘𑀦𑀼𑀘𑁆𑀘𑀸𑀭𑀡𑀁. 𑀅𑀜𑁆𑀜𑀲𑁆𑀲𑀸𑀢𑀺 𑀦𑀸𑀫𑀧𑀜𑁆𑀜𑀢𑁆𑀢𑀺𑀁 𑀲𑀦𑁆𑀥𑀸𑀬𑀸𑀳. 𑀢𑁂𑀲𑀦𑁆𑀢𑀺 𑀲𑀗𑁆𑀓𑁂𑀢𑀕𑁆𑀕𑀳𑀡𑀯𑀘𑀦𑀕𑁆𑀕𑀳𑀡𑀸𑀦𑀁. 𑀅𑀲𑀫𑀢𑁆𑀣𑀢𑀸 𑀦 𑀲𑀫𑁆𑀪𑀯𑀢𑀻𑀢𑀺 𑀬𑁄𑀚𑀦𑀸. 𑀢𑀫𑁂𑀯 𑀅𑀲𑀫𑁆𑀪𑀯𑀁 ‘‘𑀬𑀤𑀺 𑀳𑀻’’𑀢𑀺𑀆𑀤𑀺𑀦𑀸 𑀯𑀺𑀯𑀭𑀢𑀺. 𑀧𑀜𑁆𑀜𑀢𑁆𑀢𑀺𑀬𑀸𑀢𑀺 𑀦𑀸𑀫𑀧𑀜𑁆𑀜𑀢𑁆𑀢𑀺𑀬𑀸. 𑀧𑀜𑁆𑀜𑀢𑁆𑀢𑀺𑀧𑀜𑁆𑀜𑀸𑀧𑀦𑁂𑀢𑀺 𑀬𑀸𑀬 𑀦𑀸𑀫𑀧𑀜𑁆𑀜𑀢𑁆𑀢𑀺𑀬𑀸 𑀉𑀧𑀸𑀤𑀸𑀬𑀧𑀜𑁆𑀜𑀢𑁆𑀢𑀺 𑀭𑀽𑀧𑀸𑀤𑀬𑁄 𑀘 𑀧𑀜𑁆𑀜𑀸𑀧𑀻𑀬𑀦𑁆𑀢𑀺, 𑀬𑀸 𑀘 𑀲𑁄𑀢𑀤𑁆𑀯𑀸𑀭𑀯𑀺𑀜𑁆𑀜𑀸𑀡𑀲𑀦𑁆𑀢𑀸𑀦𑀸𑀦𑀦𑁆𑀢𑀭𑀫𑀼𑀧𑁆𑀧𑀦𑁆𑀦𑁂𑀦 𑀕𑀳𑀺𑀢𑀧𑀼𑀩𑁆𑀩𑀲𑀗𑁆𑀓𑁂𑀢𑁂𑀦 𑀫𑀦𑁄𑀤𑁆𑀯𑀸𑀭𑀯𑀺𑀜𑁆𑀜𑀸𑀡𑀲𑀦𑁆𑀢𑀸𑀦𑁂𑀦 𑀕𑀬𑁆𑀳𑀢𑀺, 𑀲𑀸 𑀅𑀬𑀁 𑀦𑀸𑀫𑀸𑀢𑀺 𑀢𑀲𑁆𑀲𑀸 𑀧𑀜𑁆𑀜𑀸𑀧𑀦𑁂 𑀅𑀲𑀗𑁆𑀓𑀭𑀢𑁄 𑀞𑀧𑀦𑁂. 𑀅𑀣 𑀯𑀸 𑀲𑁄𑀢𑀤𑁆𑀯𑀸𑀭𑀯𑀺𑀜𑁆𑀜𑀸𑀡𑀲𑀦𑁆𑀢𑀸𑀦𑀸𑀦𑀦𑁆𑀢𑀭𑀫𑀼𑀧𑁆𑀧𑀦𑁆𑀦𑁂𑀦 𑀫𑀦𑁄𑀤𑁆𑀯𑀸𑀭𑀯𑀺𑀜𑁆𑀜𑀸𑀡𑀲𑀦𑁆𑀢𑀸𑀦𑁂𑀦 𑀧𑀜𑁆𑀜𑀢𑁆𑀢𑀺𑀬𑀸 𑀕𑀸𑀳𑀸𑀧𑀦𑁂 𑀧𑀭𑀺𑀘𑁆𑀙𑀺𑀦𑁆𑀤𑀦𑁂. 𑀢𑀲𑁆𑀲𑀸 𑀅𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸𑀢𑀺 𑀢𑀲𑁆𑀲𑀸 𑀦𑀸𑀫𑀧𑀜𑁆𑀜𑀢𑁆𑀢𑀺𑀬𑀸 𑀜𑀸𑀧𑀦𑁂 𑀲𑀗𑁆𑀓𑁂𑀢𑀕𑁆𑀕𑀳𑀡𑀯𑀘𑀦𑀕𑁆𑀕𑀳𑀡𑀸𑀦𑀁 𑀲𑀳𑀓𑀸𑀭𑀻𑀓𑀸𑀭𑀡𑀪𑀽𑀢𑀸 𑀅𑀜𑁆𑀜𑀸 𑀦𑀸𑀫𑀧𑀜𑁆𑀜𑀢𑁆𑀢𑀺 𑀅𑀢𑁆𑀣𑀻𑀢𑀺 𑀯𑀢𑁆𑀢𑀩𑁆𑀩𑀸 𑀅𑀦𑀼𑀜𑁆𑀜𑀸𑀢𑀩𑁆𑀩𑀸 𑀲𑀺𑀬𑀸. 𑀢𑀢𑁄 𑀅𑀢𑁆𑀣𑀯𑀺𑀚𑀸𑀦𑀦𑀫𑁂𑀯 𑀦 𑀲𑀺𑀬𑀸𑀢𑀺 𑀓𑁂𑀯𑀮𑀸𑀦𑀺 𑀲𑀗𑁆𑀓𑁂𑀢𑀕𑁆𑀕𑀳𑀡𑀯𑀘𑀦𑀕𑁆𑀕𑀳𑀡𑀸𑀦𑀺 𑀅𑀢𑁆𑀣𑀧𑀜𑁆𑀜𑀸𑀧𑀦𑁂 𑀯𑀺𑀬 𑀧𑀜𑁆𑀜𑀢𑁆𑀢𑀺𑀜𑀸𑀧𑀦𑁂𑀧𑀺 𑀅𑀲𑀫𑀢𑁆𑀣𑀸𑀦𑀺, 𑀧𑀜𑁆𑀜𑀢𑁆𑀢𑀺 𑀘 𑀜𑀸𑀢𑀸𑀬𑁂𑀯 𑀢𑁂𑀲𑀁 𑀲𑀳𑀓𑀸𑀭𑀻𑀓𑀸𑀭𑀡𑀁 𑀢𑀁𑀚𑀸𑀦𑀦𑀢𑁆𑀣𑀁 𑀧𑀜𑁆𑀜𑀢𑁆𑀢𑀺𑀅𑀦𑀦𑁆𑀢𑀭𑀧𑀭𑀺𑀓𑀧𑁆𑀧𑀦𑁂 𑀘 𑀅𑀦𑀯𑀢𑁆𑀣𑀸𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑀸𑀥𑀺𑀕𑀫𑀲𑁆𑀲 𑀲𑀫𑁆𑀪𑀯𑁄 𑀏𑀯 𑀦 𑀪𑀯𑁂𑀬𑁆𑀬.

𑀲𑀗𑁆𑀓𑁂𑀢𑁄 𑀭𑀽𑀧𑀸𑀤𑀻𑀲𑀼 𑀦 𑀓𑀺𑀜𑁆𑀘𑀺 𑀳𑁄𑀢𑀺, 𑀪𑀽𑀢𑀸𑀤𑀺𑀦𑀺𑀫𑀺𑀢𑁆𑀢𑀁 𑀪𑀸𑀯𑀦𑀸𑀯𑀺𑀲𑁂𑀲𑀜𑁆𑀘 𑀉𑀧𑀸𑀤𑀸𑀬 𑀯𑁄𑀳𑀭𑀺𑀬𑀫𑀸𑀦𑀸 𑀓𑀲𑀺𑀡𑀸𑀤𑀺𑀧𑀜𑁆𑀜𑀢𑁆𑀢𑀺 𑀯𑀺𑀬 𑀢𑀁 𑀢𑀁 𑀲𑀗𑁆𑀓𑁂𑀢𑀺𑀢𑀩𑁆𑀩𑀁 𑀲𑀗𑁆𑀓𑁂𑀢𑀓𑀭𑀡𑀜𑁆𑀘 𑀉𑀧𑀸𑀤𑀸𑀬 𑀯𑁄𑀳𑀸𑀭𑀫𑀢𑁆𑀢𑁄, 𑀢𑀲𑁆𑀲 𑀘 𑀧𑀜𑁆𑀜𑀸𑀧𑀺𑀓𑀸 𑀦𑀸𑀫𑀧𑀜𑁆𑀜𑀢𑁆𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑀤𑁄𑀲𑀸𑀧𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀸𑀧𑀺 𑀲𑀗𑁆𑀓𑁂𑀢𑀕𑁆𑀕𑀳𑀡’’𑀦𑁆𑀢𑀺 𑀅𑀯𑁄𑀘. 𑀦𑀦𑀼 𑀘 𑀅𑀢𑁆𑀣𑀯𑀺𑀚𑀸𑀦𑀦𑀸𑀲𑀫𑁆𑀪𑀯𑀘𑁄𑀤𑀦𑁂𑀦𑁂𑀯 𑀲𑀗𑁆𑀓𑁂𑀢𑀕𑁆𑀕𑀳𑀡𑀸𑀪𑀯𑁄𑀧𑀺 𑀤𑀲𑁆𑀲𑀺𑀢𑁄𑀢𑀺? 𑀲𑀘𑁆𑀘𑀫𑁂𑀢𑀁, 𑀲𑀗𑁆𑀓𑁂𑀢𑁂 𑀧𑀦 𑀆𑀘𑀭𑀺𑀬𑀸𑀦𑀁 𑀫𑀢𑀺𑀪𑁂𑀤𑁄 𑀯𑀺𑀚𑁆𑀚𑀢𑀺. 𑀢𑀢𑁆𑀣 𑀏𑀓𑀧𑀓𑁆𑀔𑀺𑀓𑁄 𑀅𑀬𑀁 𑀤𑁄𑀲𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 𑀢𑀲𑁆𑀲 𑀯𑀺𑀲𑀼𑀁 𑀯𑀘𑀦𑀁 𑀯𑀼𑀘𑁆𑀘𑀫𑀸𑀦𑀸 𑀭𑀽𑀧𑀸𑀤𑀬𑁄 𑀥𑀫𑁆𑀫𑀸𑀯𑀘𑀦𑀢𑁆𑀣𑀸 𑀧𑀜𑁆𑀜𑀸𑀧𑀺𑀢𑀩𑁆𑀩𑀸 𑀘, 𑀢𑀤𑀪𑀺𑀥𑀸𑀬𑀓𑁄 𑀲𑀤𑁆𑀤𑁄 𑀧𑀜𑁆𑀜𑀢𑁆𑀢𑀻𑀢𑀺. 𑀏𑀢𑁆𑀢𑀸𑀯𑀢𑀸 𑀲𑀩𑁆𑀩𑀯𑁄𑀳𑀸𑀭𑁄 𑀲𑀺𑀚𑁆𑀛𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀯𑀘𑀦…𑀧𑁂… 𑀚𑀦𑀁 𑀦𑀢𑁆𑀣𑀻’’𑀢𑀺 𑀆𑀳. 𑀧𑀜𑁆𑀜𑀢𑁆𑀢𑀺𑀬𑀸 𑀯𑀘𑀦𑀪𑀸𑀯𑁄 𑀲𑀺𑀤𑁆𑀥𑁄 𑀧𑀝𑀺𑀳𑀦𑀦𑀲𑁄𑀢𑀩𑁆𑀩𑀢𑀸𑀤𑀻𑀧𑀓𑀢𑁆𑀢𑀸 𑀢𑁂𑀲𑀁 𑀧𑀸𑀞𑀸𑀦𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀆𑀤𑀺-𑀲𑀤𑁆𑀤𑁂𑀦 ‘‘𑀅𑀢𑁆𑀣𑀺 𑀓𑁂𑀘𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀯𑁄𑀳𑀸𑀭𑀁 𑀲𑀼𑀡𑀦𑁆𑀢𑀺, 𑀦𑀺𑀭𑀼𑀢𑁆𑀢𑀺𑀧𑀝𑀺𑀲𑀫𑁆𑀪𑀺𑀤𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸’’𑀢𑀺 𑀏𑀯𑀫𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 ‘‘𑀧𑀜𑁆𑀜𑀢𑁆𑀢𑀺𑀥𑀫𑁆𑀫𑀸’’𑀢𑀺 𑀧𑀤𑀲𑁆𑀲 𑀬𑀣𑀸𑀯𑀼𑀢𑁆𑀢𑀧𑀜𑁆𑀜𑀢𑁆𑀢𑀺𑀬𑁄 𑀅𑀢𑁆𑀣𑁄𑀢𑀺 𑀏𑀢𑀲𑁆𑀫𑀺𑀁 𑀧𑀓𑁆𑀔𑁂 𑀫𑀸𑀢𑀺𑀓𑀸𑀯𑀡𑁆𑀡𑀦𑀸𑀬 𑀯𑀺𑀭𑁄𑀥𑁄, 𑀅𑀝𑁆𑀞𑀓𑀣𑀸𑀬𑀁 𑀅𑀯𑀼𑀢𑁆𑀢𑀢𑀸, 𑀇𑀫𑀺𑀲𑁆𑀲𑀸 𑀧𑀸𑀴𑀺𑀬𑀸 𑀅𑀦𑀦𑀼𑀕𑀫𑁄, 𑀲𑀩𑁆𑀩𑁂 𑀥𑀫𑁆𑀫𑀸 𑀧𑀜𑁆𑀜𑀢𑁆𑀢𑀻𑀢𑀺 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑀢𑀸, 𑀧𑀜𑁆𑀜𑀢𑁆𑀢𑀺𑀧𑀣𑀧𑀤𑀲𑁆𑀲 𑀦𑀯𑀢𑁆𑀢𑀩𑁆𑀩𑀢𑀸, 𑀅𑀦𑀯𑀢𑁆𑀣𑀸𑀦𑀸𑀧𑀢𑁆𑀢𑀺𑀢𑁄 𑀅𑀢𑁆𑀣𑀯𑀺𑀚𑀸𑀦𑀦𑀸𑀲𑀫𑁆𑀪𑀯𑁄𑀢𑀺 𑀅𑀦𑁂𑀓𑁂 𑀤𑁄𑀲𑀸, 𑀯𑀺𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑀲𑀳𑀺𑀢𑀲𑁆𑀲 𑀧𑀦 𑀲𑀤𑁆𑀤𑀲𑁆𑀲 𑀧𑀜𑁆𑀜𑀢𑁆𑀢𑀺𑀪𑀸𑀯𑁂 𑀬𑀣𑀸𑀯𑀼𑀢𑁆𑀢𑀤𑁄𑀲𑀸𑀪𑀸𑀯𑁄 𑀅𑀦𑁂𑀓𑁂𑀲𑀁 𑀧𑀸𑀞𑀧𑁆𑀧𑀤𑁂𑀲𑀸𑀦𑀜𑁆𑀘 𑀅𑀦𑀼𑀮𑁄𑀫𑀦𑀁, 𑀢𑀲𑁆𑀫𑀸. 𑀢𑀢𑁆𑀣 𑀬𑀼𑀢𑁆𑀢𑀁 𑀕𑀳𑁂𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸𑀳 ‘‘𑀧𑀸𑀴𑀺…𑀧𑁂… 𑀢𑀩𑁆𑀩𑁄’’𑀢𑀺.

𑀬𑀤𑀺 𑀲𑀢𑁆𑀢𑀸𑀢𑀺𑀆𑀤𑀺𑀦𑀸 𑀲𑀤𑁆𑀤𑀲𑁆𑀲 𑀧𑀜𑁆𑀜𑀢𑁆𑀢𑀺𑀪𑀸𑀯𑁂 𑀅𑀝𑁆𑀞𑀓𑀣𑀸𑀬 𑀯𑀺𑀭𑁄𑀥𑀫𑀸𑀳. 𑀏𑀯𑀁 𑀧𑀜𑁆𑀜𑀢𑁆𑀢𑀺𑀪𑀸𑀯𑁂 𑀬𑀤𑀺 𑀲𑀤𑁆𑀤𑀲𑁆𑀲 𑀧𑀜𑁆𑀜𑀢𑁆𑀢𑀺𑀪𑀸𑀯𑁄, 𑀢𑀲𑁆𑀲 𑀧𑀭𑀫𑀢𑁆𑀣𑀢𑁄 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀭𑀽𑀧𑀸𑀤𑀺𑀅𑀢𑁆𑀣𑀲𑁆𑀲 𑀘 𑀧𑀜𑁆𑀜𑀸𑀧𑀦𑀢𑁄 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀪𑀸𑀯𑁄 𑀏𑀯 𑀲𑀺𑀬𑀸, 𑀦 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀪𑀸𑀯𑁄. 𑀦 𑀳𑀺 𑀢𑁂 𑀲𑀢𑁆𑀢𑀸𑀤𑀬𑁄 𑀧𑀜𑁆𑀜𑀢𑁆𑀢𑀻𑀢𑀺. 𑀏𑀯𑀜𑁆𑀘 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀬𑀸 𑀅𑀪𑀸𑀯𑁄 𑀏𑀯 𑀲𑀺𑀬𑀸. 𑀯𑀼𑀢𑁆𑀢𑀸 𑀘 𑀅𑀝𑁆𑀞𑀓𑀣𑀸𑀬𑀁 (𑀧. 𑀧. 𑀅𑀝𑁆𑀞. 𑁧 𑀫𑀸𑀢𑀺𑀓𑀸𑀯𑀡𑁆𑀡𑀦𑀸) ‘‘𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻’’𑀢𑀺. 𑀇𑀢𑀭𑁄 𑀯𑀺𑀲𑀬𑀲𑁆𑀲 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀢𑀲𑁆𑀲 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀪𑀸𑀯𑁄𑀢𑀺 𑀬𑀣𑀸𑀯𑀼𑀢𑁆𑀢𑀯𑀺𑀭𑁄𑀥𑀸𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀯𑀺𑀚𑁆𑀚𑀫𑀸𑀦𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀇𑀤𑀸𑀦𑀺 𑀲𑀢𑁆𑀢𑀸𑀤𑀺𑀯𑀺𑀲𑀬𑀲𑁆𑀲 𑀓𑁂𑀦𑀘𑀺𑀧𑀺 𑀧𑀭𑀺𑀬𑀸𑀬𑁂𑀦 𑀅𑀢𑁆𑀣𑀺𑀢𑀸𑀬 𑀅𑀪𑀸𑀯𑀤𑀲𑁆𑀲𑀦𑁂𑀦 𑀢𑀩𑁆𑀩𑀺𑀲𑀬𑀸𑀬 𑀧𑀜𑁆𑀜𑀢𑁆𑀢𑀺𑀬𑀸 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀪𑀸𑀯𑀁𑀬𑁂𑀯 𑀯𑀯𑀢𑁆𑀣𑀧𑁂𑀢𑀺 ‘‘𑀅𑀬𑀜𑁆𑀘 𑀯𑀸𑀤𑁄’’𑀢𑀺. 𑀯𑀺𑀚𑁆𑀚𑀫𑀸𑀦𑀸 𑀏𑀯 𑀲𑀢𑁆𑀢𑀸𑀤𑀬𑁄 𑀭𑀽𑀧𑀸𑀤𑀺𑀲𑀪𑀸𑀯𑀸𑀪𑀸𑀯𑀯𑀲𑁂𑀦 ‘‘𑀅𑀯𑀺𑀚𑁆𑀚𑀫𑀸𑀦𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀦 𑀲𑀩𑁆𑀩𑀣𑀸 𑀅𑀪𑀸𑀯𑀢𑁄. 𑀢𑀣𑀸 𑀳𑀺 𑀢𑀣𑀸 𑀢𑀣𑀸 𑀧𑀜𑁆𑀜𑀸𑀧𑀺𑀬𑀫𑀸𑀦𑀪𑀸𑀯𑁂𑀦 𑀯𑀺𑀜𑁆𑀜𑀸𑀬𑀦𑁆𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑀭𑀽𑀧𑁄 𑀯𑀸𑀤𑁄 ‘‘𑀭𑀽𑀧𑀁 𑀅𑀢𑁆𑀣𑀻𑀢𑀺? 𑀳𑁂𑀯𑀢𑁆𑀣𑀺 𑀳𑁂𑀯 𑀦𑀢𑁆𑀣𑀻𑀢𑀺. 𑀲𑁂𑀯𑀢𑁆𑀣𑀺 𑀲𑁂𑀯 𑀦𑀢𑁆𑀣𑀻𑀢𑀺. 𑀦 𑀳𑁂𑀯𑀁 𑀯𑀢𑁆𑀢𑀩𑁆𑀩𑁂. 𑀲𑁂𑀯𑀢𑁆𑀣𑀺 𑀲𑁂𑀯 𑀦𑀢𑁆𑀣𑀻𑀢𑀺. 𑀆𑀫𑀦𑁆𑀢𑀸. 𑀅𑀢𑁆𑀣𑀝𑁆𑀞𑁄 𑀦𑀢𑁆𑀣𑀝𑁆𑀞𑁄’’𑀢𑀺 (𑀓𑀣𑀸. 𑁩𑁦𑁬) 𑀏𑀯𑀁 𑀧𑀯𑀢𑁆𑀢𑀸𑀬 𑀳𑁂𑀯𑀢𑁆𑀣𑀺𑀓𑀣𑀸𑀬. 𑀢𑀢𑁆𑀣 𑀳𑀺 𑀭𑀽𑀧𑀸𑀤𑀬𑁄 𑀥𑀫𑁆𑀫𑀸 𑀭𑀽𑀧𑀸𑀤𑀺𑀲𑀪𑀸𑀯𑁂𑀦 𑀅𑀢𑁆𑀣𑀺, 𑀯𑁂𑀤𑀦𑀸𑀤𑀺𑀲𑀪𑀸𑀯𑁂𑀦 𑀦𑀢𑁆𑀣𑀺, 𑀢𑀲𑁆𑀫𑀸 𑀲𑀩𑁆𑀩𑀫𑁂𑀯𑀺𑀤𑀁 𑀏𑀯𑀁 𑀅𑀢𑁆𑀣𑀺 𑀏𑀯𑀁 𑀦𑀢𑁆𑀣𑀻𑀢𑀺 𑀏𑀯𑀁𑀮𑀤𑁆𑀥𑀺𑀓𑁂 𑀲𑀦𑁆𑀥𑀸𑀬 ‘‘𑀭𑀽𑀧𑀁 𑀅𑀢𑁆𑀣𑀻’’𑀢𑀺 𑀧𑀼𑀘𑁆𑀙𑀸 𑀲𑀓𑀯𑀸𑀤𑀺𑀲𑁆𑀲. ‘‘𑀳𑁂𑀯𑀢𑁆𑀣𑀺 𑀳𑁂𑀯 𑀦𑀢𑁆𑀣𑀻’’𑀢𑀺 𑀯𑀺𑀲𑁆𑀲𑀚𑁆𑀚𑀦𑀁 𑀧𑀭𑀯𑀸𑀤𑀺𑀲𑁆𑀲. 𑀅𑀣 𑀦𑀁 𑀲𑀓𑀯𑀸𑀤𑀻 𑀬𑀤𑀺 𑀭𑀽𑀧𑀫𑁂𑀯 𑀏𑀯𑀁 𑀅𑀢𑁆𑀣𑀺 𑀏𑀯𑀁 𑀦𑀢𑁆𑀣𑀻𑀢𑀺 𑀮𑀤𑁆𑀥𑀺, 𑀏𑀯𑀁 𑀲𑀦𑁆𑀢𑁂 𑀲𑁄 𑀏𑀯 𑀅𑀢𑁆𑀣𑀺 𑀲𑁄 𑀏𑀯 𑀦𑀢𑁆𑀣𑀺 𑀦𑀸𑀫𑀸𑀢𑀺 𑀧𑀼𑀘𑁆𑀙𑀦𑁆𑀢𑁄 ‘‘𑀲𑁂𑀯𑀢𑁆𑀣𑀻’’𑀢𑀺 𑀆𑀳. 𑀇𑀢𑀭𑁄 𑀢𑁂𑀦𑁂𑀯 𑀲𑀪𑀸𑀯𑁂𑀦 𑀅𑀢𑁆𑀣𑀺𑀢𑀁, 𑀢𑁂𑀦𑁂𑀯 𑀦𑀢𑁆𑀣𑀺𑀢𑀁 𑀲𑀦𑁆𑀥𑀸𑀬 𑀧𑀝𑀺𑀓𑁆𑀔𑀺𑀧𑀢𑀺. 𑀤𑀼𑀢𑀺𑀬𑀁 𑀧𑀼𑀝𑁆𑀞𑁄 𑀲𑀓𑀪𑀸𑀯𑁂𑀦 𑀅𑀢𑁆𑀣𑀺𑀢𑀁, 𑀧𑀭𑀪𑀸𑀯𑁂𑀦 𑀦𑀢𑁆𑀣𑀺𑀢𑀁 𑀲𑀦𑁆𑀥𑀸𑀬 𑀧𑀝𑀺𑀚𑀸𑀦𑀸𑀢𑀺. 𑀢𑀢𑁄 𑀲𑀓𑀯𑀸𑀤𑀻 ‘‘𑀅𑀢𑁆𑀣𑀝𑁆𑀞𑁄 𑀦𑀢𑁆𑀣𑀝𑁆𑀞𑁄’’𑀢𑀺𑀆𑀤𑀺𑀦𑀸 𑀅𑀢𑁆𑀣𑀺𑀢𑀸 𑀯𑀸 𑀦𑀢𑁆𑀣𑀺𑀢𑀸 𑀯𑀸 𑀅𑀜𑁆𑀜𑀫𑀜𑁆𑀜𑀯𑀺𑀭𑀼𑀤𑁆𑀥𑀸 𑀏𑀓𑀲𑁆𑀫𑀺𑀁 𑀥𑀫𑁆𑀫𑁂 𑀯𑀺𑀦𑀸 𑀓𑀸𑀮𑀪𑁂𑀤𑁂𑀦 𑀅𑀲𑀫𑁆𑀪𑀯𑀢𑁆𑀢𑀸𑀢𑀺 𑀓𑀺𑀁 𑀏𑀓𑀢𑁆𑀢𑀁 𑀆𑀧𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀧𑀭𑀯𑀸𑀤𑀺𑀁 𑀦𑀺𑀕𑁆𑀕𑀡𑁆𑀳𑀸𑀢𑀻𑀢𑀺. 𑀧𑀝𑀺𑀲𑀺𑀤𑁆𑀥𑁄𑀢𑀺 𑀘 ‘‘𑀭𑀽𑀧𑀁 ‘𑀭𑀽𑀧’𑀦𑁆𑀢𑀺 𑀳𑁂𑀯𑀢𑁆𑀣𑀺, 𑀭𑀽𑀧𑀁 ‘𑀯𑁂𑀤𑀦𑀸’𑀢𑀺 𑀳𑁂𑀯 𑀦𑀢𑁆𑀣𑀻’’𑀢𑀺𑀆𑀤𑀺𑀦𑀸 (𑀓𑀣𑀸. 𑁩𑁦𑁬) 𑀯𑀼𑀢𑁆𑀢𑀸𑀬 𑀭𑀽𑀧𑀯𑁂𑀤𑀦𑀸𑀲𑀜𑁆𑀜𑀸𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀸𑀦𑀁 𑀲𑀓𑀪𑀸𑀯𑁂𑀦 𑀅𑀢𑁆𑀣𑀺𑀢𑀸𑀬 𑀧𑀭𑀪𑀸𑀯𑁂𑀦 𑀦𑀢𑁆𑀣𑀺𑀢𑀸𑀬 𑀘 𑀧𑀝𑀺𑀲𑁂𑀥𑀦𑁂𑀦 𑀲𑀢𑁆𑀢𑀸𑀤𑀻𑀦𑀫𑁆𑀧𑀺 𑀢𑀣𑀸𑀪𑀸𑀯𑁄 𑀧𑀝𑀺𑀲𑁂𑀥𑀺𑀢𑁄 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑀭𑀽𑀧𑀸𑀤𑀬𑁄 𑀦 𑀳𑁄𑀦𑁆𑀢𑀻𑀢𑀺 𑀭𑀽𑀧𑀸𑀤𑀺𑀲𑀪𑀸𑀯𑀸 𑀦 𑀳𑁄𑀦𑁆𑀢𑀺. 𑀢𑀣𑀸 𑀢𑀣𑀸𑀢𑀺 𑀲𑀫𑀽𑀳𑀲𑀦𑁆𑀢𑀸𑀦𑀸𑀤𑀺𑀯𑀲𑁂𑀦. 𑀯𑀺𑀘𑀺𑀢𑁆𑀢𑀲𑀜𑁆𑀜𑀸 𑀧𑀭𑀺𑀓𑀧𑁆𑀧𑀯𑀲𑁂𑀦 𑀉𑀧𑁆𑀧𑀚𑁆𑀚𑀢𑀺. 𑀬𑀤𑀺 𑀲𑀢𑁆𑀢𑀭𑀣𑀸𑀤𑀺𑀲𑀜𑁆𑀜𑀸𑀯𑀮𑀫𑁆𑀩𑀺𑀢𑁄 𑀯𑀘𑀦𑀢𑁆𑀣𑁄 𑀯𑀺𑀚𑁆𑀚𑀫𑀸𑀦𑁄 𑀦 𑀳𑁄𑀢𑀺, 𑀦𑀦𑀼 𑀲𑀢𑁆𑀢𑀭𑀣𑀸𑀤𑀺𑀅𑀪𑀺𑀮𑀸𑀧𑀸 𑀅𑀦𑀭𑀺𑀬𑀯𑁄𑀳𑀸𑀭𑀸 𑀚𑀸𑀬𑀦𑁆𑀢𑀻𑀢𑀺 𑀆𑀳 ‘‘𑀦 𑀘 𑀢𑁂 𑀅𑀪𑀺𑀮𑀸𑀧𑀸’’𑀢𑀺𑀆𑀤𑀺. 𑀅𑀢𑁆𑀢𑀦𑁄 𑀯𑀲𑁂𑀦 𑀓𑀺𑀜𑁆𑀘𑀺 𑀅𑀳𑁄𑀦𑁆𑀢𑀁 𑀧𑀜𑁆𑀜𑀸𑀧𑀓𑀲𑁆𑀲 𑀯𑀘𑀦𑀲𑁆𑀲𑁂𑀯 𑀯𑀲𑁂𑀦 𑀧𑀜𑁆𑀜𑀸𑀧𑀺𑀢𑀩𑁆𑀩𑀢𑁆𑀢𑀸 𑀧𑀜𑁆𑀜𑀢𑁆𑀢𑀺𑀯𑁄𑀳𑀸𑀭𑀁 𑀮𑀪𑀢𑀺. 𑀇𑀫𑀺𑀦𑀸𑀯 𑀅𑀥𑀺𑀧𑁆𑀧𑀸𑀬𑁂𑀦𑀸𑀢𑀺𑀆𑀤𑀺 ‘‘𑀲𑀬𑀁 𑀅𑀯𑀺𑀚𑁆𑀚𑀫𑀸𑀦𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀲𑀦𑁆𑀥𑀸𑀬𑀸𑀳. 𑀢𑀦𑁆𑀢𑀺 𑀲𑀢𑁆𑀢𑀸𑀤𑀺𑀕𑁆𑀕𑀳𑀡𑀁. ‘‘𑀩𑁆𑀭𑀳𑁆𑀫𑀯𑀺𑀳𑀸𑀭𑀘𑀢𑀼𑀓𑁆𑀓𑀁 𑀲𑀢𑁆𑀢𑀧𑀜𑁆𑀜𑀢𑁆𑀢𑀺𑀁 𑀆𑀭𑀩𑁆𑀪 𑀧𑀯𑀢𑁆𑀢𑀢𑁆𑀢𑀸 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀁 𑀦𑀸𑀫 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀅𑀝𑁆𑀞𑀓𑀣𑀸𑀬𑀁 (𑀥. 𑀲. 𑀅𑀝𑁆𑀞. 𑁧𑁪𑁨𑁧) 𑀢𑀢𑁆𑀣 𑀢𑀢𑁆𑀣 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀧𑀭𑀺𑀢𑁆𑀢𑀸𑀤𑀺𑀪𑀸𑀯𑁂𑀦 𑀦 𑀯𑀢𑁆𑀢𑀩𑁆𑀩𑀁, 𑀓𑀣𑀁 𑀅𑀯𑀺𑀚𑁆𑀚𑀫𑀸𑀦𑀲𑁆𑀲 𑀲𑀢𑁆𑀢𑀸𑀤𑀺𑀓𑀲𑁆𑀲 𑀧𑀘𑁆𑀘𑀬𑀪𑀸𑀯𑁄𑀢𑀺 𑀆𑀳 ‘‘𑀔𑀦𑁆𑀥𑀲𑀫𑀽𑀳𑀲𑀦𑁆𑀢𑀸𑀦’’𑀦𑁆𑀢𑀺𑀆𑀤𑀺. 𑀢𑀦𑁆𑀢𑀺 𑀔𑀦𑁆𑀥𑀲𑀫𑀽𑀳𑀲𑀦𑁆𑀢𑀸𑀦𑀁. 𑀢𑀤𑀼𑀧𑀸𑀤𑀸𑀦𑀪𑀽𑀢𑀦𑁆𑀢𑀺 𑀧𑀼𑀕𑁆𑀕𑀮𑁄𑀢𑀺 𑀕𑀳𑀡𑀧𑀜𑁆𑀜𑀢𑁆𑀢𑀻𑀦𑀁 𑀓𑀸𑀭𑀡𑀪𑀽𑀢𑀁. 𑀬𑀤𑀺 𑀧𑀼𑀕𑁆𑀕𑀮𑀲𑀜𑁆𑀜𑀸𑀬 𑀲𑁂𑀯𑀫𑀸𑀦𑀲𑁆𑀲 𑀓𑀼𑀲𑀮𑀸𑀤𑀺𑀉𑀧𑁆𑀧𑀢𑁆𑀢𑀺 𑀳𑁄𑀢𑀺, 𑀓𑀣𑀁 𑀧𑀼𑀕𑁆𑀕𑀮𑀤𑀲𑁆𑀲𑀦𑀁 𑀫𑀺𑀘𑁆𑀙𑀸𑀤𑀲𑁆𑀲𑀦𑀦𑁆𑀢𑀺 𑀧𑀝𑀺𑀲𑀺𑀤𑁆𑀥𑀦𑁆𑀢𑀺 𑀆𑀳 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺. 𑀧𑀣𑀯𑀻𑀥𑀸𑀢𑀼 𑀉𑀧𑀮𑀩𑁆𑀪𑀢𑀻𑀢𑀺 𑀧𑀼𑀕𑁆𑀕𑀮𑀸𑀪𑀸𑀯𑁂 𑀯𑀺𑀧𑀓𑁆𑀔𑀯𑀲𑁂𑀦 𑀦𑀺𑀤𑀲𑁆𑀲𑀦𑀫𑀸𑀳. 𑀇𑀤𑀜𑁆𑀳𑁂𑀢𑁆𑀣 𑀅𑀦𑀼𑀫𑀸𑀦𑀁. 𑀦 𑀭𑀽𑀧𑀸𑀤𑀬𑁄 𑀯𑀺𑀯𑁂𑀘𑁂𑀢𑁆𑀯𑀸 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀢𑁂𑀲𑀁 𑀅𑀕𑁆𑀕𑀳𑀡𑁂 𑀢𑀣𑀸𑀭𑀽𑀧𑀸𑀬 𑀩𑀼𑀤𑁆𑀥𑀺𑀬𑀸 𑀅𑀪𑀸𑀯𑀢𑁄 𑀲𑁂𑀯𑀦𑀸𑀤𑀬𑁄 𑀯𑀺𑀬𑀸𑀢𑀺. 𑀧𑀼𑀕𑁆𑀕𑀮𑁄 𑀉𑀧𑀮𑀩𑁆𑀪𑀢𑀺 𑀲𑀘𑁆𑀙𑀺𑀓𑀝𑁆𑀞𑀧𑀭𑀫𑀢𑁆𑀣𑁂𑀦 𑀬𑁄 𑀙𑀯𑀺𑀜𑁆𑀜𑀸𑀡𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀲𑀁𑀲𑀭𑀢𑀺 𑀫𑀼𑀘𑁆𑀘𑀢𑀺 𑀘𑀸𑀢𑀺 𑀏𑀯𑀁 𑀤𑀺𑀝𑁆𑀞𑀺𑀬𑀸 𑀧𑀭𑀺𑀓𑀧𑁆𑀧𑀺𑀢𑀧𑀼𑀕𑁆𑀕𑀮𑁄𑀯 𑀧𑀝𑀺𑀲𑁂𑀥𑀺𑀢𑁄, 𑀦 𑀯𑁄𑀳𑀸𑀭𑀧𑀼𑀕𑁆𑀕𑀮𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀝𑀺𑀲𑁂…𑀧𑁂… 𑀤𑀺𑀝𑁆𑀞𑀻’’𑀢𑀺 𑀆𑀳.

𑀕𑀸𑀣𑀸𑀬 𑀧𑀜𑁆𑀘𑀲𑀼 𑀔𑀦𑁆𑀥𑁂𑀲𑀼 𑀭𑀽𑀧𑀁 𑀯𑁂𑀤𑀦𑀸 𑀲𑀜𑁆𑀜𑀸 𑀘𑁂𑀢𑀦𑀸 𑀯𑀺𑀜𑁆𑀜𑀸𑀡𑀦𑁆𑀢𑀺 𑀏𑀢𑁂𑀲𑀼 𑀓𑀁 𑀦𑀸𑀫 𑀥𑀫𑁆𑀫𑀁 𑀲𑀢𑁆𑀢𑁄𑀢𑀺 𑀚𑀸𑀦𑀸𑀲𑀺 𑀦𑀼, 𑀏𑀢𑁂𑀲𑀼 𑀏𑀓𑀫𑁆𑀧𑀺 𑀲𑀢𑁆𑀢𑁄𑀢𑀺 𑀕𑀡𑁆𑀳𑀺𑀢𑀼𑀁 𑀦𑀸𑀭𑀳𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀅𑀣 𑀏𑀢𑁂𑀳𑀺 𑀅𑀜𑁆𑀜𑁄 𑀏𑀓𑁄 𑀲𑀢𑁆𑀢𑁄 𑀅𑀢𑁆𑀣𑀻𑀢𑀺 𑀧𑀘𑁆𑀘𑁂𑀲𑀺. 𑀏𑀯𑀫𑁆𑀧𑀺 𑀫𑀸𑀭 𑀤𑀺𑀝𑁆𑀞𑀺𑀕𑀢𑀁 𑀦𑀼 𑀢𑁂. 𑀦𑀼-𑀲𑀤𑁆𑀤𑁄 𑀤𑀺𑀝𑁆𑀞𑀺𑀕𑀢𑀫𑁂𑀯𑁂𑀢𑀺 𑀅𑀯𑀥𑀸𑀭𑀡𑀢𑁆𑀣𑁄. 𑀓𑀲𑁆𑀫𑀸? 𑀬𑀲𑁆𑀫𑀸 𑀲𑀼𑀤𑁆𑀥𑀲𑀗𑁆𑀔𑀸𑀭𑀧𑀼𑀜𑁆𑀚𑁄𑀬𑀁. 𑀢𑀫𑁂𑀯𑀢𑁆𑀣𑀁 𑀯𑀺𑀯𑀭𑀢𑀺 ‘‘𑀦𑀬𑀺𑀥 𑀲𑀢𑁆𑀢𑀽𑀧𑀮𑀩𑁆𑀪𑀢𑀻’’𑀢𑀺. 𑀬𑀲𑁆𑀫𑀸 𑀧𑀘𑁆𑀘𑀓𑁆𑀔𑀢𑁄 𑀯𑀸 𑀅𑀦𑀼𑀫𑀸𑀦𑀢𑁄 𑀯𑀸 𑀅𑀦𑀼𑀧𑀮𑀤𑁆𑀥𑀺𑀢𑁄 𑀦𑀢𑁆𑀣𑀺 𑀏𑀢𑁆𑀣 𑀓𑁄𑀘𑀺 𑀲𑀢𑁆𑀢𑁄 𑀦𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀤𑀺 𑀲𑀢𑁆𑀢𑁄 𑀦𑀢𑁆𑀣𑀺, 𑀓𑀣𑀁 𑀲𑀢𑁆𑀢𑁄 𑀲𑀁𑀲𑀸𑀭𑀫𑀸𑀧𑀸𑀤𑀻𑀢𑀺𑀆𑀤𑀺 𑀦𑀻𑀬𑀢𑀻𑀢𑀺. 𑀓𑀺𑀫𑁂𑀢𑁆𑀣 𑀦𑁂𑀢𑀩𑁆𑀩𑀁, 𑀲𑀢𑁆𑀢𑁄𑀢𑀺 𑀯𑁄𑀳𑀸𑀭𑀲𑀢𑁆𑀢𑁄 𑀅𑀥𑀺𑀧𑁆𑀧𑁂𑀢𑁄, 𑀬𑀲𑁆𑀫𑀸 𑀲𑀢𑁆𑀢-𑀲𑀤𑁆𑀤𑁄 𑀯𑁄𑀳𑀸𑀭𑁂 𑀧𑀯𑀢𑁆𑀢𑀢𑀻𑀢𑀺. 𑀤𑀼𑀢𑀺𑀬𑀕𑀸𑀣𑀸𑀬 𑀲𑀫𑁆𑀩𑀦𑁆𑀥𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀢𑁆𑀢𑁄 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀅𑀗𑁆𑀕𑀲𑀫𑁆𑀪𑀸𑀭𑀸𑀢𑀺 𑀅𑀗𑁆𑀕𑀲𑀫𑁆𑀪𑀸𑀭𑀢𑁄 𑀅𑀓𑁆𑀔𑀘𑀓𑁆𑀓𑀈𑀲𑀸𑀤𑀺𑀅𑀗𑁆𑀕𑀲𑀫𑁆𑀪𑀸𑀭𑀫𑀼𑀧𑀸𑀤𑀸𑀬𑀸𑀢𑀺 𑀅𑀢𑁆𑀣𑁄. 𑀲𑀢𑁆𑀢𑁄𑀢𑀺 𑀯𑁄𑀳𑀸𑀭𑁄.

𑀅𑀯𑀺𑀚𑁆𑀚𑀫𑀸𑀦𑀲𑁆𑀲𑀸𑀢𑀺 𑀅𑀘𑁆𑀘𑀦𑁆𑀢𑀁 𑀅𑀯𑀺𑀚𑁆𑀚𑀫𑀸𑀦𑀲𑁆𑀲 𑀲𑀲𑀯𑀺𑀲𑀸𑀡𑀸𑀤𑀺𑀓𑀲𑁆𑀲. 𑀬𑀤𑀺 𑀅𑀘𑁆𑀘𑀦𑁆𑀢𑀁 𑀅𑀯𑀺𑀚𑁆𑀚𑀫𑀸𑀦𑀁, 𑀓𑀣𑀁 𑀢𑀁 𑀕𑀬𑁆𑀳𑀢𑀻𑀢𑀺 𑀆𑀳 ‘‘𑀧𑀭𑀺𑀓𑀧𑁆𑀧𑀺𑀢’’𑀦𑁆𑀢𑀺. 𑀮𑁄𑀓𑀲𑀜𑁆𑀜𑀸𑀢𑀁 𑀖𑀝𑀸𑀤𑀺. 𑀏𑀢𑁆𑀣 𑀧𑀦 𑀬𑀣𑀸 𑀅𑀢𑁆𑀢𑀸𑀦𑀁 𑀆𑀭𑀩𑁆𑀪 𑀉𑀧𑁆𑀧𑀚𑁆𑀚𑀫𑀸𑀦𑀓𑀥𑀫𑁆𑀫𑀸𑀦𑀁 𑀢𑀁𑀲𑀦𑁆𑀢𑀢𑀺𑀧𑀢𑀺𑀢𑀸𑀦𑀜𑁆𑀘 𑀓𑀺𑀮𑁂𑀲𑀼𑀧𑀢𑀸𑀧𑀸𑀪𑀸𑀯𑁂𑀦 𑀅𑀲𑁆𑀲𑀢𑁆𑀣𑀪𑀸𑀯𑀧𑀘𑁆𑀘𑀬𑀢𑀸𑀬 𑀉𑀧𑁆𑀧𑀸𑀤𑀸𑀤𑀺𑀭𑀳𑀺𑀢𑀫𑁆𑀧𑀺 𑀦𑀺𑀩𑁆𑀩𑀸𑀦𑀁 ‘‘𑀅𑀲𑁆𑀲𑀸𑀲𑀦𑀓𑀭𑀲’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀅𑀢𑁆𑀢𑀸𑀦𑀁 𑀆𑀭𑀩𑁆𑀪 𑀧𑀯𑀢𑁆𑀢𑀦𑀓𑀥𑀫𑁆𑀫𑀯𑀲𑁂𑀦 𑀉𑀧𑁆𑀧𑀸𑀤𑀸𑀤𑀺𑀭𑀳𑀺𑀢𑀸𑀧𑀺 𑀧𑀜𑁆𑀜𑀢𑁆𑀢𑀺 𑀧𑀯𑀢𑁆𑀢𑀸𑀢𑀺 𑀯𑀼𑀢𑁆𑀢𑀸. 𑀳𑁂𑀢𑀼𑀅𑀢𑁆𑀣𑁄 𑀯𑀸 𑀅𑀦𑁆𑀢𑁄𑀦𑀻𑀢𑁄𑀢𑀺 𑀧𑀯𑀢𑁆𑀢𑀺𑀢𑀸 𑀯𑁄𑀳𑀸𑀭𑀺𑀢𑀸𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀢𑀣𑀸 𑀦𑀸𑀫𑀧𑀜𑁆𑀜𑀢𑁆𑀢𑀺 𑀧𑀜𑁆𑀜𑀧𑁂𑀢𑀩𑁆𑀩𑀫𑀢𑁆𑀣𑀁 𑀕𑀳𑀺𑀢𑀸𑀬𑁂𑀯 𑀧𑀜𑁆𑀜𑀸𑀧𑁂𑀢𑀺, 𑀯𑀺𑀜𑁆𑀜𑀢𑁆𑀢𑀺 𑀯𑀺𑀬 𑀅𑀥𑀺𑀧𑁆𑀧𑀸𑀬𑀁 𑀯𑀺𑀜𑁆𑀜𑀸𑀧𑁂𑀢𑀻𑀢𑀺 𑀲𑀸 𑀕𑀳𑁂𑀢𑀩𑁆𑀩𑀸𑀪𑀸𑀯𑀢𑁄 𑀯𑀼𑀘𑁆𑀘𑀫𑀸𑀦𑀢𑁆𑀣𑀤𑁆𑀯𑀸𑀭𑁂𑀦 𑀯𑀼𑀘𑁆𑀘𑀫𑀸𑀦𑀸𑀢𑀺 𑀯𑀼𑀢𑁆𑀢𑀸. 𑀧𑀜𑁆𑀜𑀸𑀧𑀺𑀢𑀩𑁆𑀩𑀧𑀜𑁆𑀜𑀢𑁆𑀢𑀺𑀬𑀸 𑀧𑀦 𑀯𑀼𑀘𑁆𑀘𑀫𑀸𑀦𑀪𑀸𑀯𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀢𑀣𑀸 𑀧𑀓𑀸𑀭𑀢𑁄 𑀜𑀸𑀧𑀦𑀪𑀸𑀯𑁂𑀦 𑀜𑀸𑀧𑁂𑀢𑀩𑁆𑀩𑀜𑀸𑀧𑀦𑀦𑁆𑀢𑀺 𑀓𑀢𑁆𑀯𑀸 𑀕𑀳𑁂𑀢𑀩𑁆𑀩𑀢𑁆𑀢𑀸𑀬𑁂𑀯 𑀘 𑀢𑀲𑁆𑀲𑀸 𑀅𑀦𑀺𑀤𑁆𑀥𑀸𑀭𑀺𑀢𑀲𑀪𑀸𑀯𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀸 𑀤𑀝𑁆𑀞𑀩𑁆𑀩𑀸. 𑀦 𑀳𑀺 𑀲𑀪𑀸𑀯𑀥𑀫𑁆𑀫𑀸𑀦𑀁 𑀓𑀓𑁆𑀔𑀴𑀨𑀼𑀲𑀦𑀸𑀤𑀺 𑀲𑀭𑀽𑀧𑀢𑁄 𑀲𑀤𑁆𑀤𑁂𑀦 𑀯𑀘𑀦𑀻𑀬𑀪𑀸𑀯𑀁 𑀪𑀚𑀢𑀺, 𑀅𑀧𑀺𑀘 𑀔𑁄 𑀦𑁂𑀲𑀁 𑀓𑀸𑀮𑀤𑁂𑀲𑀸𑀤𑀺𑀪𑁂𑀤𑀪𑀺𑀦𑁆𑀦𑀸𑀦𑀁 𑀯𑀺𑀦𑀺𑀯𑀢𑁆𑀢𑀅𑀜𑁆𑀜𑀚𑀸𑀢𑀺𑀬𑀓𑁄 𑀲𑀚𑀸𑀢𑀺𑀬𑀲𑀸𑀥𑀸𑀭𑀡𑁄 𑀧𑀼𑀩𑁆𑀩𑀲𑀗𑁆𑀓𑁂𑀢𑀸𑀦𑀼𑀭𑀽𑀧𑀁 𑀅𑀚𑁆𑀛𑀸𑀭𑁄𑀧𑀲𑀺𑀤𑁆𑀥𑁄 𑀲𑀸𑀫𑀜𑁆𑀜𑀸𑀓𑀸𑀭𑁄 𑀯𑀘𑀦𑀻𑀬𑁄. 𑀢𑀢𑁆𑀣𑀸𑀧𑀺 𑀦 𑀯𑀺𑀦𑀸 𑀓𑁂𑀦𑀘𑀺 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑁂𑀦 𑀲𑀤𑁆𑀤𑁄 𑀧𑀯𑀢𑁆𑀢𑀢𑀻𑀢𑀺 𑀢𑀲𑁆𑀲 𑀧𑀯𑀢𑁆𑀢𑀺𑀦𑀺𑀫𑀺𑀢𑁆𑀢𑀪𑀽𑀢𑁄 𑀮𑁄𑀓𑀲𑀗𑁆𑀓𑁂𑀢𑀲𑀺𑀤𑁆𑀥𑁄 𑀢𑀁𑀢𑀁𑀯𑀘𑀦𑀢𑁆𑀣𑀦𑀺𑀬𑀢𑁄 𑀲𑀸𑀫𑀜𑁆𑀜𑀸𑀓𑀸𑀭𑀯𑀺𑀲𑁂𑀲𑁄 𑀦𑀸𑀫 𑀧𑀜𑁆𑀜𑀢𑁆𑀢𑀻𑀢𑀺 𑀧𑀼𑀩𑁆𑀩𑀸𑀘𑀭𑀺𑀬𑀸. 𑀲𑁄 𑀳𑀺 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀅𑀢𑁆𑀣𑁂 𑀲𑀤𑁆𑀤𑀁 𑀦𑀸𑀫𑁂𑀢𑀺, 𑀢𑀲𑁆𑀲 𑀢𑀲𑁆𑀲 𑀯𑀸 𑀅𑀢𑁆𑀣𑀲𑁆𑀲 𑀦𑀸𑀫𑀲𑀜𑁆𑀜𑀁 𑀓𑀭𑁄𑀢𑀻𑀢𑀺 𑀦𑀸𑀫𑀁, 𑀧𑀓𑀸𑀭𑁂𑀳𑀺 𑀜𑀸𑀧𑀦𑀢𑁄 𑀧𑀜𑁆𑀜𑀢𑁆𑀢𑀺 𑀘𑀸𑀢𑀺.

𑀓𑀲𑁆𑀲 𑀧𑀦 𑀲𑁄 𑀆𑀓𑀸𑀭𑀯𑀺𑀲𑁂𑀲𑁄𑀢𑀺? 𑀧𑀜𑁆𑀜𑀸𑀧𑁂𑀢𑀩𑁆𑀩𑀢𑁆𑀣𑀲𑁆𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀦𑁂𑀓𑀸𑀓𑀸𑀭𑀸 𑀳𑀺 𑀅𑀢𑁆𑀣𑀸𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 𑀢𑀲𑁆𑀲𑀸 𑀧𑀜𑁆𑀜𑀢𑁆𑀢𑀺𑀬𑀸 𑀕𑀳𑁂𑀢𑀩𑁆𑀩𑀢𑀸𑀯𑀘𑀦𑀜𑁆𑀘 𑀲𑀫𑀢𑁆𑀣𑀺𑀢𑀁 𑀪𑀯𑀢𑀺, 𑀅𑀯𑀲𑁆𑀲𑀜𑁆𑀘 𑀏𑀢𑀫𑁂𑀯𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀁. 𑀅𑀜𑁆𑀜𑀣𑀸 𑀯𑀘𑀦𑀯𑀘𑀦𑀻𑀬𑀪𑁂𑀤𑀸𑀦𑀁 𑀲𑀗𑁆𑀓𑀭𑁄 𑀲𑀺𑀬𑀸, 𑀲𑀩𑁆𑀩𑁄𑀧𑀺 𑀅𑀢𑁆𑀣𑁄 𑀲𑀩𑁆𑀩𑀲𑁆𑀲 𑀲𑀤𑁆𑀤𑀲𑁆𑀲 𑀯𑀘𑀦𑀻𑀬𑁄, 𑀲𑀩𑁆𑀩𑁄 𑀘 𑀲𑀤𑁆𑀤𑁄 𑀲𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲 𑀯𑀸𑀘𑀓𑁄𑀢𑀺 𑀦 𑀘𑁂𑀢𑁆𑀣 𑀲𑀗𑁆𑀓𑁂𑀢𑀕𑁆𑀕𑀳𑀡𑁂𑀦𑁂𑀯 𑀢𑁂𑀲𑀁 𑀧𑀯𑀢𑁆𑀢𑀸𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀯𑀯𑀢𑁆𑀣𑀺𑀢𑁂𑀲𑀼 𑀏𑀯 𑀢𑁂𑀲𑀼 𑀲𑀗𑁆𑀓𑁂𑀢𑀕𑁆𑀕𑀳𑀡𑀲𑁆𑀲 𑀧𑀯𑀢𑁆𑀢𑀺𑀢𑁄.

𑀅𑀧𑀭𑁂 𑀧𑀦 ‘‘𑀬𑀣𑀸 𑀥𑀽𑀫𑀢𑁄 𑀅𑀕𑁆𑀕𑀺𑀅𑀦𑀼𑀫𑀸𑀦𑁂 𑀦 𑀓𑁂𑀯𑀮𑁂𑀦 𑀥𑀽𑀫𑁂𑀦𑁂𑀯 𑀅𑀕𑁆𑀕𑀺 𑀯𑀺𑀜𑁆𑀜𑀸𑀬𑀢𑀺, 𑀥𑀽𑀫𑀲𑁆𑀲 𑀧𑀦 𑀅𑀕𑁆𑀕𑀺𑀦𑀸 𑀅𑀯𑀺𑀦𑀸𑀪𑀸𑀯𑀲𑀗𑁆𑀔𑀸𑀢𑁄 𑀲𑀫𑁆𑀩𑀦𑁆𑀥𑁄 𑀯𑀺𑀜𑁆𑀜𑀸𑀬𑀫𑀸𑀦𑁄 𑀥𑀽𑀫𑁂𑀦 𑀅𑀕𑁆𑀕𑀺 𑀯𑀺𑀜𑁆𑀜𑀸𑀬𑀢𑀺, 𑀏𑀯𑀁 𑀲𑀤𑁆𑀤𑁂𑀦 𑀅𑀢𑁆𑀣𑀯𑀺𑀚𑀸𑀦𑀦𑁂 𑀦 𑀓𑁂𑀯𑀮𑁂𑀦 𑀲𑀤𑁆𑀤𑁂𑀦 𑀢𑀤𑀢𑁆𑀣𑁄 𑀯𑀺𑀜𑁆𑀜𑀸𑀬𑀢𑀺. 𑀢𑀁𑀢𑀁𑀲𑀤𑁆𑀤𑀲𑁆𑀲 𑀧𑀦 𑀢𑁂𑀦 𑀢𑁂𑀦 𑀅𑀢𑁆𑀣𑁂𑀦 𑀅𑀯𑀺𑀦𑀸𑀪𑀸𑀯𑀲𑀗𑁆𑀔𑀸𑀢𑁄 𑀲𑀫𑁆𑀩𑀦𑁆𑀥𑁄 𑀯𑀺𑀜𑁆𑀜𑀸𑀬𑀫𑀸𑀦𑁄 𑀢𑁂𑀦 𑀢𑁂𑀦 𑀲𑀤𑁆𑀤𑁂𑀦 𑀅𑀢𑁆𑀣𑀁 𑀜𑀸𑀧𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀜𑁆𑀜𑀣𑀸 𑀅𑀕𑁆𑀕𑀳𑀺𑀢𑀲𑀫𑁆𑀩𑀦𑁆𑀥𑁂𑀦𑀧𑀺 𑀲𑀤𑁆𑀤𑀲𑀯𑀦𑀫𑀢𑁆𑀢𑁂𑀦 𑀢𑀤𑀢𑁆𑀣𑁄 𑀯𑀺𑀜𑁆𑀜𑀸𑀬𑁂𑀬𑁆𑀬𑀸𑀢𑀺. 𑀬𑁄 𑀬𑀫𑁂𑀢𑁆𑀣 𑀬𑀣𑀸𑀯𑀼𑀢𑁆𑀢𑀭𑀽𑀧𑁄 𑀲𑀫𑁆𑀩𑀦𑁆𑀥𑁄, 𑀲𑁄 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀲𑀜𑁆𑀜𑀸𑀧𑀦𑀪𑀸𑀯𑁂𑀦 𑀦𑀸𑀫𑀦𑁆𑀢𑀺 𑀧𑀭𑀫𑀢𑁆𑀣𑀢𑁄 𑀅𑀪𑀸𑀯𑀸 𑀮𑁄𑀓𑀲𑀗𑁆𑀓𑁂𑀢𑀯𑀲𑁂𑀦 𑀮𑁄𑀓𑀲𑀗𑁆𑀓𑁂𑀢𑁄𑀢𑀺 𑀯𑀸 𑀲𑀺𑀤𑁆𑀥𑁄 𑀜𑀸𑀢𑁄𑀢𑀺 𑀮𑁄𑀓𑀲𑀗𑁆𑀓𑁂𑀢𑀲𑀺𑀤𑁆𑀥𑁄𑀢𑀺, 𑀲𑀤𑁆𑀤𑁂𑀦 𑀧𑀓𑀸𑀲𑀺𑀬𑀫𑀸𑀦𑀸𑀦𑀁 𑀅𑀢𑁆𑀣𑀧𑁆𑀧𑀓𑀸𑀭𑀸𑀦𑀁 𑀅𑀥𑀺𑀕𑀫𑀳𑁂𑀢𑀼𑀢𑀸𑀬 𑀧𑀓𑀸𑀭𑀢𑁄 𑀜𑀸𑀧𑀦𑀢𑁄 𑀧𑀜𑁆𑀜𑀢𑁆𑀢𑀻𑀢𑀺 𑀘 𑀯𑀼𑀢𑁆𑀢𑁄’’𑀢𑀺 𑀯𑀡𑁆𑀡𑀬𑀦𑁆𑀢𑀺.

𑀲𑀗𑁆𑀔𑀢𑀸𑀲𑀗𑁆𑀔𑀢𑀯𑀺𑀦𑀺𑀫𑀼𑀢𑁆𑀢𑀲𑁆𑀲𑀧𑀺 𑀜𑁂𑀬𑁆𑀬𑀯𑀺𑀲𑁂𑀲𑀲𑁆𑀲 𑀅𑀪𑀸𑀯𑁂 𑀖𑀝𑀸𑀤𑀺𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑀸 𑀯𑀺𑀬 𑀧𑀣𑀯𑀻𑀨𑀲𑁆𑀲𑀸𑀤𑀺𑀲𑀤𑁆𑀤𑀯𑀘𑀦𑀻𑀬𑁄𑀧𑀺 𑀦 𑀮𑀩𑁆𑀪𑀢𑀺𑀬𑁂𑀯𑀸𑀢𑀺 𑀲𑀩𑁆𑀩𑀯𑁄𑀳𑀸𑀭𑀮𑁄𑀧𑁄 𑀲𑀺𑀬𑀸. 𑀬𑀲𑁆𑀫𑀸 𑀘 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀧𑀩𑀦𑁆𑀥𑀲𑀗𑁆𑀔𑀸𑀢𑀢𑀁𑀢𑀁𑀯𑀺𑀲𑁂𑀲𑀸𑀓𑀸𑀭𑀯𑀲𑁂𑀦𑁂𑀯 𑀧𑀯𑀢𑁆𑀢𑀦𑁆𑀢𑀺, 𑀦 𑀓𑁂𑀯𑀮𑀸, 𑀢𑀲𑁆𑀫𑀸 𑀢𑁂𑀲𑀁 𑀢𑁂 𑀲𑀡𑁆𑀞𑀸𑀦𑀲𑀫𑀽𑀳𑀅𑀯𑀢𑁆𑀣𑀸𑀯𑀺𑀲𑁂𑀲𑀸𑀓𑀸𑀭𑀸 𑀬𑀤𑀺𑀧𑀺 𑀧𑀭𑀫𑀢𑁆𑀣𑀢𑁄 𑀓𑀺𑀜𑁆𑀘𑀺 𑀦 𑀳𑁄𑀦𑁆𑀢𑀺, 𑀧𑀭𑀫𑀢𑁆𑀣𑀢𑁄 𑀧𑀦 𑀯𑀺𑀚𑁆𑀚𑀫𑀸𑀦𑀸𑀦𑀁 𑀭𑀽𑀧𑀸𑀤𑀻𑀦𑀁 𑀉𑀧𑀸𑀤𑀸𑀦𑀸𑀦𑀁 𑀯𑀲𑁂𑀦 𑀯𑀺𑀚𑁆𑀚𑀫𑀸𑀦𑀪𑀸𑀯𑀁 𑀮𑀪𑀺𑀢𑁆𑀯𑀸 𑀢𑀁𑀢𑀁𑀕𑀳𑀡𑀸𑀦𑀼𑀭𑀽𑀧𑀁 𑀢𑀁𑀢𑀁𑀅𑀪𑀺𑀮𑀸𑀧𑀸𑀥𑀺𑀓𑀭𑀡𑀁 𑀪𑀯𑀢𑀺. 𑀉𑀧𑀸𑀤𑀸𑀬𑀧𑀜𑁆𑀜𑀢𑁆𑀢𑀺 𑀳𑀺 𑀉𑀧𑀸𑀤𑀸𑀦𑀢𑁄 𑀬𑀣𑀸 𑀅𑀜𑁆𑀜𑀸 𑀅𑀦𑀜𑁆𑀜𑀸𑀢𑀺 𑀘 𑀦 𑀯𑀢𑁆𑀢𑀩𑁆𑀩𑀸, 𑀏𑀯𑀁 𑀲𑀩𑁆𑀩𑀣𑀸 𑀅𑀢𑁆𑀣𑀺 𑀦𑀢𑁆𑀣𑀻𑀢𑀺 𑀘 𑀦 𑀯𑀢𑁆𑀢𑀩𑁆𑀩𑀸. 𑀢𑀬𑁄𑀧𑀺 𑀳𑀺 𑀏𑀢𑁂 𑀲𑀦𑁆𑀢𑀸𑀬𑁂𑀯𑀸𑀢𑀺 𑀏𑀯𑀁 𑀢𑀸𑀯 𑀫𑀸𑀢𑀺𑀓𑀸𑀯𑀡𑁆𑀡𑀦𑀸𑀬 𑀦 𑀓𑁄𑀘𑀺 𑀯𑀺𑀭𑁄𑀥𑁄. 𑀲𑀗𑁆𑀔𑀸𑀬𑀢𑀺 𑀲𑀁𑀓𑀣𑀻𑀬𑀢𑀻𑀢𑀺 𑀲𑀗𑁆𑀔𑀸𑀢𑀺 𑀅𑀬𑀫𑀢𑁆𑀣𑁄 𑀓𑀣𑁂𑀢𑀩𑁆𑀩𑀪𑀸𑀯𑁂𑀦 𑀯𑀘𑀦𑀢𑁆𑀣𑁂𑀬𑁂𑀯 𑀦𑀺𑀭𑀼𑀴𑁆𑀳𑁄, 𑀦 𑀯𑀘𑀦𑀲𑁆𑀫𑀺𑀦𑁆𑀢𑀺 𑀯𑀘𑀦𑀧𑀓𑁆𑀔𑀲𑁆𑀲 𑀉𑀚𑀼𑀓𑀢𑀸 𑀲𑀫𑁆𑀪𑀯𑀢𑀺. 𑀯𑀘𑀦𑀧𑀓𑁆𑀔𑁄𑀬𑁂𑀯 𑀧𑀸𑀴𑀺𑀅𑀦𑀼𑀕𑀢𑁄, 𑀦 𑀧𑀭𑀫𑁆𑀧𑀭𑀸𑀕𑀢𑁄 𑀬𑀣𑀸𑀯𑀼𑀢𑁆𑀢𑁄 𑀅𑀢𑁆𑀣𑁄𑀢𑀺 𑀓𑀼𑀢𑁄 𑀧𑀦𑁂𑀢𑀁 𑀮𑀩𑁆𑀪𑀸. 𑀦 𑀳𑀺 𑀅𑀦𑀻𑀢𑁄 𑀅𑀢𑁆𑀣𑁄 𑀧𑀸𑀴𑀺𑀅𑀦𑀦𑀼𑀕𑀢𑁄, 𑀦𑀸𑀧𑀺 𑀲𑀩𑁆𑀩𑀸 𑀧𑀸𑀴𑀺𑀦𑀻𑀢𑀢𑁆𑀣𑀸 𑀏𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑀸 𑀤𑀼𑀯𑀺𑀥𑀸 𑀧𑀜𑁆𑀜𑀢𑁆𑀢𑀺𑀬𑁄 𑀅𑀝𑁆𑀞𑀓𑀣𑀸𑀬𑀁 𑀙𑀳𑀺 𑀧𑀜𑁆𑀜𑀢𑁆𑀢𑀻𑀳𑀺 𑀬𑀣𑀸𑀲𑀫𑁆𑀪𑀯𑀁 𑀯𑀼𑀢𑁆𑀢𑀸𑀬𑁂𑀯𑀸𑀢𑀺 𑀲𑀺𑀤𑁆𑀥𑀫𑁂𑀢𑀁 𑀅𑀢𑁆𑀣𑀻𑀢𑀺 𑀦 𑀯𑀢𑁆𑀢𑀩𑁆𑀩𑀸𑀢𑀺.

𑀬𑀤𑀺 𑀧𑀭𑀫𑀢𑁆𑀣𑀢𑁄 𑀅𑀢𑁆𑀣𑀺𑀢𑀸𑀧𑀝𑀺𑀲𑁂𑀥𑁄, 𑀇𑀝𑁆𑀞𑀫𑁂𑀢𑀁. 𑀅𑀣 𑀯𑁄𑀳𑀸𑀭𑀢𑁄, 𑀲𑀢𑁆𑀢𑀭𑀣𑀖𑀝𑀸𑀤𑀻𑀳𑀺 𑀲𑀢𑁆𑀢𑀭𑀣𑀸𑀤𑀺𑀯𑀘𑀦𑀧𑁆𑀧𑀬𑁄𑀕𑁄𑀬𑁂𑀯 𑀦 𑀲𑀫𑁆𑀪𑀯𑁂𑀬𑁆𑀬𑀸𑀢𑀺. 𑀦 𑀳𑀺 𑀯𑀘𑀦𑀻𑀬𑀭𑀳𑀺𑀢𑁄 𑀯𑀘𑀦𑀧𑁆𑀧𑀬𑁄𑀕𑁄 𑀅𑀢𑁆𑀣𑀻𑀢𑀺. 𑀧𑀭𑀫𑀢𑁆𑀣𑀥𑀫𑁆𑀫𑀸𑀦𑀁 𑀅𑀲𑀪𑀸𑀯𑀥𑀫𑁆𑀫𑀪𑀽𑀢𑀸𑀬 𑀧𑀜𑁆𑀜𑀢𑁆𑀢𑀺𑀬𑀸 𑀯𑀺𑀪𑀸𑀕𑀤𑀲𑁆𑀲𑀦𑀢𑁆𑀣𑀸 𑀅𑀥𑀺𑀯𑀘𑀦𑀸𑀤𑀺𑀤𑀼𑀓𑀢𑁆𑀢𑀬𑀤𑁂𑀲𑀦𑀸𑀢𑀺 𑀦 𑀧𑀭𑀫𑀢𑁆𑀣𑀥𑀫𑁆𑀫𑀸𑀦𑀁 𑀭𑀽𑀧𑀸𑀤𑀻𑀦𑀁 𑀧𑀜𑁆𑀜𑀢𑁆𑀢𑀺𑀪𑀸𑀯𑀸𑀧𑀢𑁆𑀢𑀻𑀢𑀺. 𑀦 𑀘 𑀧𑀜𑁆𑀜𑀢𑁆𑀢𑀺𑀧𑀣𑀧𑀜𑁆𑀜𑀢𑁆𑀢𑀺𑀥𑀫𑁆𑀫𑀦𑀺𑀤𑁆𑀤𑁂𑀲𑀸𑀦𑀁 𑀅𑀯𑀺𑀲𑁂𑀲𑀯𑀘𑀦𑀁 𑀬𑀼𑀢𑁆𑀢𑀁, 𑀲𑀤𑁆𑀤𑀲𑁆𑀲𑁂𑀯 𑀧𑀦 𑀧𑀜𑁆𑀜𑀢𑁆𑀢𑀺𑀪𑀸𑀯𑁂 𑀲𑀺𑀬𑀸 𑀓𑀸𑀘𑀺 𑀢𑁂𑀲𑀁 𑀯𑀺𑀲𑁂𑀲𑀫𑀢𑁆𑀢𑀸. 𑀧𑀜𑁆𑀜𑀸𑀧𑀺𑀢𑀩𑁆𑀩𑀲𑁆𑀲 𑀅𑀧𑀭𑀫𑀢𑁆𑀣𑀲𑀪𑀸𑀯𑀲𑁆𑀲𑁂𑀯 𑀧𑀜𑁆𑀜𑀢𑁆𑀢𑀺𑀪𑀸𑀯𑁄 𑀅𑀥𑀺𑀧𑁆𑀧𑁂𑀢𑁄𑀢𑀺 𑀦 𑀲𑀩𑁆𑀩𑁄 𑀧𑀜𑁆𑀜𑀢𑁆𑀢𑀺𑀧𑀣𑁄 𑀧𑀜𑁆𑀜𑀢𑁆𑀢𑀺𑀲𑀤𑁆𑀤𑁂𑀦 𑀯𑀼𑀢𑁆𑀢𑁄, 𑀧𑀜𑁆𑀜𑀢𑁆𑀢𑀺 𑀘 𑀧𑀜𑁆𑀜𑀸𑀧𑁂𑀢𑀩𑁆𑀩𑀪𑀸𑀯𑁂𑀦 𑀯𑀼𑀢𑁆𑀢𑀸𑀢𑀺 𑀧𑀜𑁆𑀜𑀢𑁆𑀢𑀺𑀧𑀣𑀧𑀤𑀁 𑀯𑀢𑁆𑀢𑀩𑁆𑀩𑀫𑁂𑀯. 𑀏𑀯𑀜𑁆𑀘𑁂𑀢𑀁 𑀇𑀘𑁆𑀙𑀺𑀢𑀩𑁆𑀩𑀁. 𑀇𑀢𑀭𑀣𑀸 𑀲𑀤𑁆𑀤𑀲𑁆𑀲 𑀘 𑀧𑀜𑁆𑀜𑀸𑀧𑀺𑀢𑀩𑁆𑀩𑀢𑀸𑀬 𑀧𑀜𑁆𑀜𑀢𑁆𑀢𑀺𑀧𑀣𑀪𑀸𑀯𑁄𑀢𑀺 𑀧𑀜𑁆𑀜𑀢𑁆𑀢𑀺𑀧𑀤𑀁 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺 𑀘 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀦𑀺𑀓𑁆𑀔𑁂𑀧𑀓𑀡𑁆𑀟𑁂 𑀯𑀺𑀪𑀢𑁆𑀢𑀸𑀬𑁂𑀯 𑀧𑀜𑁆𑀜𑀢𑁆𑀢𑀺 ‘‘𑀧𑀼𑀭𑀺𑀲𑁄 𑀫𑀸𑀕𑀡𑁆𑀟𑀺𑀬𑁄’’𑀢𑀺 𑀏𑀢𑁆𑀣𑀸𑀧𑀺 𑀤𑀲𑁆𑀲𑀺𑀢𑀸𑀢𑀺 𑀦 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀢𑀣𑀸𑀧𑀺 𑀳𑀺 𑀬𑀣𑀸𑀯𑀼𑀢𑁆𑀢𑀉𑀧𑀸𑀤𑀸𑀬𑀧𑀜𑁆𑀜𑀢𑁆𑀢𑀺𑀦𑀸𑀫𑀧𑀜𑁆𑀜𑀢𑁆𑀢𑀻𑀦𑀁 𑀲𑀪𑀸𑀯𑀲𑀫𑁆𑀪𑀯𑀢𑁄𑀢𑀺 𑀲𑀗𑁆𑀔𑀸𑀤𑀺𑀲𑀤𑁆𑀤𑀸𑀦𑀁 𑀲𑀫𑀸𑀦𑀢𑁆𑀣𑀢𑀸𑀧𑀺 𑀢𑁂𑀲𑀁 𑀫𑀢𑀺𑀫𑀢𑁆𑀢𑀫𑁂𑀯, 𑀯𑀺𑀜𑁆𑀜𑀢𑁆𑀢𑀺 𑀯𑀺𑀬 𑀅𑀥𑀺𑀧𑁆𑀧𑀸𑀬𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑀸 𑀲𑀬𑀁 𑀜𑀸𑀢𑀸𑀬𑁂𑀯 𑀦𑀸𑀫𑀧𑀜𑁆𑀜𑀢𑁆𑀢𑀺 𑀧𑀜𑁆𑀜𑀸𑀧𑁂𑀢𑀩𑁆𑀩𑀫𑀢𑁆𑀣𑀁 𑀧𑀜𑁆𑀜𑀸𑀧𑁂𑀢𑀺 𑀕𑀳𑀺𑀢𑀲𑀭𑀽𑀧𑀢𑀸𑀬 𑀧𑀤𑀻𑀧𑁄 𑀯𑀺𑀬 𑀭𑀽𑀧𑀕𑀢𑀯𑀺𑀥𑀁𑀲𑀦𑁂𑀢𑀺 𑀦 𑀧𑀜𑁆𑀜𑀢𑁆𑀢𑀺𑀅𑀦𑁆𑀢𑀭𑀧𑀭𑀺𑀓𑀧𑁆𑀧𑀦𑁂𑀦 𑀧𑀬𑁄𑀚𑀦𑀁 𑀅𑀢𑁆𑀣𑀺 𑀧𑀜𑁆𑀜𑀸𑀧𑁂𑀢𑀩𑁆𑀩𑀢𑁆𑀣𑀧𑀜𑁆𑀜𑀸𑀧𑀦𑁂, 𑀦𑀸𑀫𑀧𑀜𑁆𑀜𑀢𑁆𑀢𑀺𑀧𑀜𑁆𑀜𑀸𑀧𑀦𑁂 𑀧𑀦 𑀉𑀧𑀸𑀤𑀸𑀦𑀪𑁂𑀤𑀪𑀺𑀦𑁆𑀦𑀸 𑀉𑀧𑀸𑀤𑀸𑀬𑀧𑀜𑁆𑀜𑀢𑁆𑀢𑀺 𑀯𑀺𑀬 𑀢𑀁𑀢𑀁𑀯𑀘𑀦𑀯𑀘𑀦𑀢𑁆𑀣𑀪𑁂𑀤𑀪𑀺𑀦𑁆𑀦𑀸 𑀦𑀸𑀫𑀧𑀜𑁆𑀜𑀢𑁆𑀢𑀻𑀢𑀺 𑀅𑀜𑁆𑀜𑀸 𑀧𑀜𑁆𑀜𑀢𑁆𑀢𑀺 𑀇𑀘𑁆𑀙𑀺𑀢𑀸 𑀏𑀯. 𑀦 𑀘 𑀅𑀦𑀯𑀢𑁆𑀣𑀸𑀦𑀤𑁄𑀲𑁄 𑀢𑀁𑀢𑀁𑀯𑀘𑀦𑀲𑁆𑀲 𑀢𑀤𑀢𑁆𑀣𑀯𑀺𑀪𑀸𑀯𑀦𑁂 𑀲𑀳𑀓𑀸𑀭𑀻𑀓𑀸𑀭𑀡𑀪𑀸𑀯𑁂𑀦 𑀧𑀝𑀺𑀦𑀺𑀬𑀢𑀲𑀭𑀽𑀧𑀢𑁆𑀢𑀸. 𑀏𑀢𑁂𑀦 𑀲𑀗𑁆𑀓𑁂𑀢𑀕𑁆𑀕𑀳𑀡𑀸𑀪𑀸𑀯𑁄𑀧𑀺 𑀧𑀝𑀺𑀲𑀺𑀤𑁆𑀥𑁄 𑀤𑀝𑁆𑀞𑀩𑁆𑀩𑁄, 𑀢𑀣𑀸 𑀦𑀸𑀫𑀧𑀜𑁆𑀜𑀢𑁆𑀢𑀺𑀬𑀸 𑀧𑀬𑁄𑀚𑀦𑀸𑀪𑀸𑀯𑁄. 𑀤𑀲𑁆𑀲𑀺𑀢𑀧𑁆𑀧𑀬𑁄𑀚𑀦𑀸 𑀳𑀺 𑀲𑀸 𑀧𑀼𑀩𑁆𑀩𑁂𑀢𑀺.

‘‘𑀯𑁄𑀳𑀸𑀭𑁄 𑀮𑁄𑀓𑀺𑀬𑀲𑁄𑀢𑁂 𑀧𑀝𑀺𑀳𑀜𑁆𑀜𑀢𑀻’’𑀢𑀺𑀆𑀤𑀻𑀲𑀼 𑀲𑁄𑀢𑀩𑁆𑀩𑀲𑁆𑀲 𑀲𑀤𑁆𑀤𑀲𑁆𑀲 𑀯𑀲𑁂𑀦 𑀢𑀩𑁆𑀩𑀺𑀲𑀬𑀪𑀽𑀢𑀸 𑀯𑁄𑀳𑀸𑀭𑀸𑀤𑀬𑁄 𑀧𑀝𑀺𑀳𑀦𑀦𑀲𑁄𑀢𑀩𑁆𑀩𑀢𑀸𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀲𑀤𑁆𑀤𑁄𑀬𑁂𑀯 𑀯𑀸 𑀢𑀢𑁆𑀣 𑀯𑁄𑀳𑀸𑀭𑀸𑀤𑀺𑀲𑀳𑀘𑀸𑀭𑀺𑀢𑀸𑀬 𑀢𑀣𑀸 𑀯𑀼𑀢𑁆𑀢𑁄. 𑀦 𑀳𑀺 𑀲𑀓𑁆𑀓𑀸 𑀲𑀩𑁆𑀩𑀢𑁆𑀣 𑀏𑀓𑀭𑀲𑀸 𑀤𑁂𑀲𑀦𑀸 𑀧𑀯𑀢𑁆𑀢𑀻𑀢𑀺 𑀯𑀢𑁆𑀢𑀼𑀁. 𑀢𑀣𑀸 𑀳𑀺 𑀓𑀢𑁆𑀣𑀘𑀺 𑀲𑀼𑀔𑀸 𑀤𑀼𑀓𑁆𑀔𑀸, 𑀲𑀼𑀔𑀸𑀧𑀺 𑀯𑁂𑀤𑀦𑀸 𑀤𑀼𑀓𑁆𑀔𑀸𑀢𑀺 𑀯𑀼𑀘𑁆𑀘𑀦𑁆𑀢𑀺, 𑀤𑀼𑀓𑁆𑀔𑀸 𑀲𑀼𑀔𑀸, 𑀤𑀼𑀓𑁆𑀔𑀸𑀧𑀺 𑀲𑀼𑀔𑀸𑀢𑀺, 𑀏𑀯𑀁 𑀬𑀣𑀸𑀯𑀼𑀢𑁆𑀢𑀸 𑀤𑀼𑀯𑀺𑀥𑀸𑀧𑀺 𑀧𑀜𑁆𑀜𑀢𑁆𑀢𑀺 𑀅𑀥𑀺𑀯𑀘𑀦𑀸𑀤𑀺𑀧𑀸𑀞𑀲𑁆𑀲 𑀅𑀢𑁆𑀣𑀪𑀸𑀯𑁂𑀦 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀸𑀬𑁂𑀯𑀸𑀢𑀺. 𑀅𑀬𑀁 𑀲𑀗𑁆𑀔𑀢𑀸𑀲𑀗𑁆𑀔𑀢𑀯𑀺𑀦𑀺𑀫𑀼𑀢𑁆𑀢𑀁 𑀜𑁂𑀬𑁆𑀬𑀯𑀺𑀲𑁂𑀲𑀁 𑀇𑀘𑁆𑀙𑀦𑁆𑀢𑀸𑀦𑀁 𑀯𑀲𑁂𑀦 𑀯𑀺𑀦𑀺𑀘𑁆𑀙𑀬𑁄.

𑁧𑁩𑁧𑁬. 𑀲𑀢𑀺𑀧𑀺 𑀧𑀭𑁂𑀲𑀁 𑀲𑀸𑀫𑀜𑁆𑀜𑀸𑀤𑀺𑀦𑀸𑀫𑀓𑀸𑀭𑀓𑀸𑀦𑀁 𑀦𑀸𑀫𑀓𑀭𑀡𑀪𑀸𑀯𑁂 𑀧𑀭𑀸𑀦𑀧𑁂𑀓𑁆𑀔𑀢𑀸𑀬 𑀢𑀢𑁄 𑀅𑀢𑀺𑀯𑀺𑀬 𑀬𑀼𑀢𑁆𑀢𑁄 𑀇𑀥 𑀦𑀸𑀫𑀓𑀭𑀡𑀲𑀪𑀸𑀯𑁄 𑀉𑀓𑁆𑀓𑀁𑀲𑀧𑀭𑀺𑀘𑁆𑀙𑁂𑀤𑁂𑀦 𑀦𑀸𑀫𑀓𑀭𑀡𑀢𑁆𑀣𑁄𑀢𑀺 𑀅𑀥𑀺𑀧𑁆𑀧𑁂𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀜𑁆𑀜𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳. 𑀦𑀸𑀫𑀓𑀭𑀡𑀲𑀪𑀸𑀯𑀢𑀸 𑀦 𑀳𑁄𑀢𑀺 𑀅𑀲𑀪𑀸𑀯𑀺𑀓𑀢𑀸𑀬 𑀓𑀤𑀸𑀘𑀺𑀤𑁂𑀯 𑀧𑀯𑀢𑁆𑀢𑀺𑀢𑁄 𑀘𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀪𑀸𑀯𑀲𑀺𑀤𑁆𑀥𑀢𑁆𑀢𑀸𑀢𑀺 𑀯𑁂𑀤𑀦𑀸𑀤𑀻𑀦𑀁 𑀯𑁂𑀤𑀦𑀸𑀤𑀺𑀦𑀸𑀫𑀓𑀭𑀡𑀥𑀫𑁆𑀫𑀢𑀁 𑀆𑀳. 𑀬𑀤𑀺 𑀯𑁂𑀤𑀦𑀸𑀤𑀻𑀦𑀁 𑀓𑁂𑀦𑀘𑀺 𑀅𑀓𑀢𑀁 𑀲𑀓𑀦𑀸𑀫𑀁 𑀆𑀤𑀸𑀬𑀬𑁂𑀯 𑀧𑀯𑀢𑁆𑀢𑀦𑀢𑁄 𑀑𑀧𑀧𑀸𑀢𑀺𑀓𑀦𑀸𑀫𑀸𑀦𑀁 𑀦𑀸𑀫𑀓𑀭𑀡𑀝𑁆𑀞𑁂𑀦 𑀦𑀸𑀫𑀪𑀸𑀯𑁄, 𑀏𑀯𑀁 𑀲𑀢𑀺 𑀧𑀣𑀯𑀻𑀆𑀤𑀻𑀦𑀫𑁆𑀧𑀺 𑀦𑀸𑀫𑀪𑀸𑀯𑁄 𑀆𑀧𑀚𑁆𑀚𑀢𑀺, 𑀅𑀜𑁆𑀜𑀣𑀸 𑀧𑀣𑀯𑀻𑀆𑀤𑀺𑀦𑀺𑀤𑀲𑁆𑀲𑀦𑀫𑁂𑀯 𑀦 𑀲𑀺𑀬𑀸𑀢𑀺 𑀅𑀦𑀼𑀬𑁄𑀕𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀧𑀣𑀯𑀻𑀆𑀤𑀺𑀦𑀺𑀤𑀲𑁆𑀲𑀦𑁂𑀦𑀸’’𑀢𑀺𑀆𑀤𑀺. 𑀏𑀓𑀤𑁂𑀲𑀲𑀸𑀫𑀜𑁆𑀜𑁂𑀦 𑀳𑀺 𑀬𑀣𑀸𑀥𑀺𑀧𑁆𑀧𑁂𑀢𑁂𑀦 𑀉𑀧𑀫𑀸 𑀳𑁄𑀢𑀺, 𑀦 𑀲𑀩𑁆𑀩𑀲𑀸𑀫𑀜𑁆𑀜𑁂𑀦𑀸𑀢𑀺. 𑀏𑀯𑀫𑁆𑀧𑀺 𑀬𑀤𑀺 𑀲𑀪𑀸𑀯𑀲𑀺𑀤𑁆𑀥𑀦𑀸𑀫𑀢𑁆𑀢𑀸 𑀯𑁂𑀤𑀦𑀸𑀤𑀬𑁄 𑀦𑀸𑀫𑀁, 𑀧𑀣𑀯𑀻𑀆𑀤𑀻𑀦𑀫𑁆𑀧𑀺 𑀅𑀦𑀺𑀯𑀢𑁆𑀢𑀦𑀻𑀬𑁄 𑀦𑀸𑀫𑀪𑀸𑀯𑁄𑀢𑀺 𑀆𑀳 ‘‘𑀦𑀺𑀭𑀼𑀴𑁆𑀳𑀢𑁆𑀢𑀸’’𑀢𑀺𑀆𑀤𑀺. 𑀢𑁂𑀦 𑀬𑀁𑀦𑀺𑀫𑀺𑀢𑁆𑀢𑀁 𑀯𑁂𑀤𑀦𑀸𑀤𑀻𑀲𑀼 𑀦𑀸𑀫𑀲𑀤𑁆𑀤𑀧𑁆𑀧𑀯𑀢𑁆𑀢𑀺, 𑀲𑀢𑀺𑀧𑀺 𑀢𑀤𑀜𑁆𑀜𑁂𑀲𑀁 𑀢𑀁𑀦𑀺𑀫𑀺𑀢𑁆𑀢𑀬𑁄𑀕𑁂 𑀕𑁄-𑀲𑀤𑁆𑀤𑁄 𑀯𑀺𑀬 𑀓𑀼𑀓𑁆𑀓𑀼𑀝𑀸𑀤𑀺𑀲𑀢𑁆𑀢𑀧𑀺𑀡𑁆𑀟𑁂 𑀦𑀺𑀭𑀼𑀴𑁆𑀳𑀢𑁄 𑀯𑁂𑀤𑀦𑀸𑀤𑀻𑀲𑀼 𑀦𑀸𑀫-𑀲𑀤𑁆𑀤𑁄 𑀧𑀯𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀢𑀣𑀸 𑀳𑀺 𑀅𑀦𑁂𑀓𑁂𑀲𑀼 𑀲𑀼𑀢𑁆𑀢𑀧𑀤𑁂𑀲𑁂𑀲𑀼 𑀢𑁂𑀲𑀁𑀬𑁂𑀯 𑀦𑀸𑀫𑀯𑁄𑀳𑀸𑀭𑁄 𑀤𑀺𑀲𑁆𑀲𑀢𑀺. 𑀦𑀸𑀫𑀢𑀸𑀦𑀸𑀧𑀢𑁆𑀢𑀺 𑀯𑀼𑀢𑁆𑀢𑀸 𑀓𑁂𑀲𑀓𑀼𑀫𑁆𑀪𑀸𑀤𑀺𑀦𑀸𑀫𑀦𑁆𑀢𑀭𑀸𑀧𑀚𑁆𑀚𑀦𑀢𑁄. 𑀏𑀢𑀫𑁂𑀯𑀢𑁆𑀣𑀁 𑀦𑀺𑀤𑀲𑁆𑀲𑀦𑀪𑀸𑀯𑁂𑀦 ‘‘𑀦 𑀳𑀻’’𑀢𑀺𑀆𑀤𑀺𑀦𑀸 𑀯𑀺𑀯𑀭𑀢𑀺. 𑀬𑀤𑀺𑀧𑀺 𑀲𑀫𑀽𑀳𑀸𑀤𑀺𑀖𑀦𑀯𑀺𑀦𑀺𑀩𑁆𑀪𑁄𑀕𑀸𑀪𑀸𑀯𑀢𑁄 𑀯𑁂𑀤𑀦𑀸𑀤𑀺𑀅𑀭𑀽𑀧𑀥𑀫𑁆𑀫𑁂𑀲𑀼𑀧𑀺 𑀧𑀺𑀡𑁆𑀟𑀸𑀓𑀸𑀭𑁂𑀦 𑀕𑀳𑀡𑀁 𑀧𑀯𑀢𑁆𑀢𑀢𑀺, 𑀢𑀁 𑀧𑀦 𑀬𑁂𑀪𑀼𑀬𑁆𑀬𑁂𑀦 𑀅𑀢𑁆𑀣𑀸𑀢𑀺𑀧𑀭𑀺𑀓𑀧𑁆𑀧𑀫𑀼𑀔𑁂𑀦 𑀏𑀓𑀥𑀫𑁆𑀫𑀯𑀲𑁂𑀦𑁂𑀯, 𑀦 𑀲𑀫𑀽𑀳𑀯𑀲𑁂𑀦𑀸𑀢𑀺 𑀯𑀼𑀢𑁆𑀢𑀁 ‘‘𑀅𑀜𑁆𑀜𑁂𑀦…𑀧𑁂… 𑀦𑀢𑁆𑀣𑀻’’𑀢𑀺.

𑀧𑀓𑀸𑀲𑀓𑀧𑀓𑀸𑀲𑀺𑀢𑀩𑁆𑀩𑀪𑀸𑀯𑁄 𑀯𑀺𑀲𑀬𑀺𑀯𑀺𑀲𑀬𑀪𑀸𑀯𑁄 𑀏𑀯. 𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑁄 𑀫𑀦𑁄𑀲𑀫𑁆𑀨𑀲𑁆𑀲𑁄. 𑀲𑁄 𑀦𑀸𑀫𑀫𑀦𑁆𑀢𑀭𑁂𑀦 𑀕𑀳𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀧𑀸𑀓𑀝𑁄𑀢𑀺 𑀦𑀺𑀤𑀲𑁆𑀲𑀦𑀪𑀸𑀯𑁂𑀦 𑀯𑀼𑀢𑁆𑀢𑁄. ‘‘𑀅𑀥𑀺𑀯𑀘𑀦𑀲𑀫𑁆𑀨𑀲𑁆𑀲𑁄 𑀯𑀺𑀬𑀸’’𑀢𑀺 𑀯𑀘𑀦𑁂𑀦 𑀫𑀦𑁄𑀲𑀫𑁆𑀨𑀲𑁆𑀲𑀢𑀧𑁆𑀧𑀓𑀸𑀭𑀸𑀦𑀫𑁂𑀯 𑀦𑀸𑀫𑀪𑀸𑀯𑁄 𑀲𑀺𑀬𑀸, 𑀦 𑀧𑀝𑀺𑀖𑀲𑀫𑁆𑀨𑀲𑁆𑀲𑀢𑀧𑁆𑀧𑀓𑀸𑀭𑀸𑀦𑀦𑁆𑀢𑀺 𑀆𑀲𑀗𑁆𑀓𑀸𑀬 𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀧𑀝𑀺𑀖𑀲𑀫𑁆𑀨𑀲𑁆𑀲𑁄𑀧𑀻’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀧𑀜𑁆𑀘𑀯𑀺𑀜𑁆𑀜𑀸𑀡𑀲𑀳𑀕𑀢𑁄 𑀨𑀲𑁆𑀲𑁄 𑀧𑀝𑀺𑀖𑀲𑀫𑁆𑀨𑀲𑁆𑀲𑁄. 𑀧𑀺-𑀲𑀤𑁆𑀤𑁄 𑀲𑀫𑁆𑀪𑀸𑀯𑀦𑁂. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀯𑀺𑀲𑀬𑀻𑀯𑀺𑀲𑀬𑀲𑀗𑁆𑀖𑀝𑁆𑀝𑀦𑀲𑀫𑀼𑀧𑁆𑀧𑀢𑁆𑀢𑀺𑀬𑀸 𑀅𑀜𑁆𑀜𑀨𑀲𑁆𑀲𑀢𑁄 𑀑𑀴𑀸𑀭𑀺𑀓𑁄𑀧𑀺 𑀧𑀝𑀺𑀖𑀲𑀫𑁆𑀨𑀲𑁆𑀲𑁄 𑀦 𑀭𑀽𑀧𑀥𑀫𑁆𑀫𑀸 𑀯𑀺𑀬 𑀯𑀺𑀪𑀽𑀢𑀸𑀓𑀸𑀭𑁄, 𑀢𑀢𑁄 𑀦𑀸𑀫𑀸𑀬𑀢𑁆𑀢𑀕𑀳𑀡𑀺𑀬𑀪𑀸𑀯𑁄 𑀦𑀸𑀫𑀲𑁆𑀲𑁂𑀯𑀸𑀢𑀺. 𑀅𑀭𑀽𑀧𑀢𑀸𑀬 𑀯𑀸𑀢𑀺𑀆𑀤𑀺𑀦𑀸 𑀲𑀸𑀫𑀜𑁆𑀜𑀢𑁄 𑀯𑀺𑀲𑁂𑀲𑀢𑁄 𑀘 𑀧𑀝𑀺𑀖𑀲𑀫𑁆𑀨𑀲𑁆𑀲𑀲𑁆𑀲 𑀉𑀧𑀘𑀸𑀭𑀯𑀲𑁂𑀦 𑀦𑀸𑀫𑀪𑀸𑀯𑀫𑀸𑀳. 𑀧𑀘𑁆𑀙𑀺𑀫𑀧𑀼𑀭𑀺𑀫𑀸𑀦𑀦𑁆𑀢𑀺 ‘‘𑀦𑀸𑀫𑀜𑁆𑀘 𑀭𑀽𑀧𑀜𑁆𑀘𑀸’’𑀢𑀺 𑀇𑀫𑀁 𑀅𑀦𑀼𑀧𑀼𑀩𑁆𑀩𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀢𑀺𑀧𑀺 𑀭𑀽𑀧𑀲𑁆𑀲𑀸𑀢𑀺𑀆𑀤𑀺𑀦𑀸 𑀦𑀸𑀫𑀯𑁄𑀳𑀸𑀭𑀳𑁂𑀢𑀼𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀦𑀺𑀩𑁆𑀩𑀸𑀦𑀲𑁆𑀲 𑀅𑀥𑀺𑀧𑀢𑀺𑀧𑀘𑁆𑀘𑀬𑀪𑀸𑀯𑀁 𑀏𑀯 𑀯𑀺𑀪𑀸𑀯𑁂𑀢𑀺, 𑀬𑀢𑁄 𑀅𑀭𑀺𑀬𑀸𑀦𑀁 𑀅𑀜𑁆𑀜𑀯𑀺𑀲𑀬𑀯𑀺𑀦𑀺𑀲𑁆𑀲𑀝𑀁 𑀦𑀺𑀦𑁆𑀦𑀧𑁄𑀡𑀧𑀩𑁆𑀪𑀸𑀭𑀪𑀸𑀯𑁂𑀦 𑀅𑀲𑀗𑁆𑀔𑀢𑀥𑀸𑀢𑀼𑀬𑀁 𑀏𑀯 𑀘𑀺𑀢𑁆𑀢𑀁 𑀧𑀯𑀢𑁆𑀢𑀢𑀻𑀢𑀺.

𑁧𑁩𑁧𑁮. 𑀯𑀝𑁆𑀝𑀲𑁆𑀫𑀺𑀁 𑀆𑀤𑀻𑀦𑀯𑀧𑀝𑀺𑀘𑁆𑀙𑀸𑀤𑀦𑀢𑁄 𑀢𑀤𑀲𑁆𑀲𑀸𑀤𑀦𑀸𑀪𑀺𑀦𑀦𑁆𑀤𑀦𑀢𑁄 𑀘 𑀯𑀝𑁆𑀝𑀲𑁆𑀲 𑀫𑀽𑀮𑀁 𑀧𑀥𑀸𑀦𑀓𑀸𑀭𑀡𑀦𑁆𑀢𑀺 𑀯𑀝𑁆𑀝𑀫𑀽𑀮𑀁.

𑁧𑁩𑁨𑁦. 𑀏𑀓𑁂𑀓𑀲𑁆𑀫𑀺𑀁 𑀭𑀽𑀧𑀸𑀤𑀺𑀓𑁂 𑀬𑀣𑀸𑀪𑀺𑀦𑀺𑀯𑀺𑀝𑁆𑀞𑁂 𑀯𑀢𑁆𑀣𑀼𑀲𑁆𑀫𑀺𑀁 𑀅𑀳𑀁𑀫𑀸𑀦𑀸𑀥𑀸𑀭𑀦𑀺𑀫𑀺𑀢𑁆𑀢𑀢𑀁 𑀓𑀼𑀲𑀮𑀸𑀓𑀼𑀲𑀮𑀢𑀩𑁆𑀩𑀺𑀧𑀸𑀓𑀮𑁄𑀓𑀸𑀥𑀸𑀭𑀢𑀜𑁆𑀘 𑀲𑀫𑀸𑀭𑁄𑀧𑁂𑀢𑁆𑀯𑀸 𑀧𑀯𑀢𑁆𑀢𑀕𑁆𑀕𑀳𑀡𑀯𑀺𑀲𑁂𑀲𑁄. 𑀬𑀸 𑀓𑀸𑀘𑀺 𑀤𑀺𑀝𑁆𑀞𑀺 𑀦𑀺𑀯𑀺𑀲𑀫𑀸𑀦𑀸 𑀥𑀫𑁆𑀫𑀲𑀪𑀸𑀯𑀁 𑀅𑀢𑀺𑀘𑁆𑀘𑀧𑀭𑀸𑀫𑀲𑀦𑀸𑀓𑀸𑀭𑁂𑀦𑁂𑀯 𑀦𑀺𑀯𑀺𑀲𑀢𑀻𑀢𑀺 𑀯𑀼𑀢𑁆𑀢𑀁 ‘‘𑀧𑀭𑀸𑀫𑀲𑀦𑁆𑀢𑀻𑀢𑀺 𑀅𑀢𑁆𑀣𑁄’’𑀢𑀺.

𑁧𑁩𑁩𑁨. 𑀘𑁂𑀢𑀦𑀸𑀧𑁆𑀧𑀥𑀸𑀦𑁄 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁄𑀢𑀺 𑀓𑀢𑁆𑀯𑀸 ‘‘𑀬𑀸𑀬 𑀘𑁂𑀢𑀦𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑁧𑁩𑁩𑁩. 𑀤𑀼𑀦𑁆𑀦𑀸𑀫𑀁 𑀕𑀸𑀭𑀬𑁆𑀳𑀦𑀸𑀫𑀁. 𑀅𑀦𑀼𑀧𑀲𑀗𑁆𑀓𑀫𑀦𑁆𑀢𑀲𑁆𑀲𑀸𑀢𑀺𑀆𑀤𑀺𑀦𑀸 𑀲𑁂𑀯𑀦𑀪𑀚𑀦𑀸𑀦𑀁 𑀯𑀺𑀲𑁂𑀲𑀫𑀸𑀳.

𑁧𑁩𑁩𑁬. 𑀆𑀧𑀢𑁆𑀢𑀺𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀧𑀭𑀺𑀘𑁆𑀙𑁂𑀤𑀚𑀸𑀦𑀦𑀽𑀧𑀸𑀬𑀤𑀲𑁆𑀲𑀦𑀁 𑀲𑀳 𑀯𑀢𑁆𑀣𑀼𑀦𑀸 𑀲𑀳 𑀓𑀫𑁆𑀫𑀯𑀸𑀘𑀸𑀬𑀸𑀤𑀺𑀯𑀘𑀦𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀢𑁆𑀣𑀼𑀯𑀻𑀢𑀺𑀓𑁆𑀓𑀫𑀢𑁄’’𑀢𑀺𑀆𑀤𑀺𑀫𑀸𑀳. ‘‘𑀆𑀧𑀢𑁆𑀢𑀺𑀓𑀼𑀲𑀮𑀢𑀸 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀓𑀼𑀲𑀮𑀢𑀸’’𑀢𑀺 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁧𑁧𑁯) 𑀳𑀺 𑀯𑀼𑀢𑁆𑀢𑀦𑁆𑀢𑀺. 𑀓𑀸𑀭𑀡𑀚𑀸𑀦𑀦𑁂𑀦 𑀨𑀮𑀁 𑀲𑀼𑀝𑁆𑀞𑀼 𑀜𑀸𑀢𑀁 𑀳𑁄𑀢𑀻𑀢𑀺 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀆𑀧𑀢𑁆𑀢𑀺𑀬𑀸 𑀯𑀸’’𑀢𑀺𑀆𑀤𑀺𑀫𑀸𑀳.

𑁧𑁩𑁪𑁨. 𑀢𑀲𑁆𑀲𑀸𑀢𑀺 𑀫𑀦𑀲𑀺𑀓𑀸𑀭𑀓𑀼𑀲𑀮𑀢𑀸𑀬.

𑁧𑁩𑁪𑁪. 𑀅𑀦𑀼𑀧𑁆𑀧𑀚𑁆𑀚𑀫𑀸𑀦𑀸𑀦𑁂𑀯 𑀅𑀦𑀼𑀧𑁆𑀧𑀚𑁆𑀚𑀦𑁆𑀢𑀸𑀦𑁂𑀯.

𑁧𑁩𑁪𑁮. 𑀅𑀓𑀭𑀡𑁂𑀦 𑀅𑀦𑀸𑀤𑀭𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁩𑁫𑁦. 𑀨𑁂𑀕𑁆𑀕𑀼𑀭𑀼𑀓𑁆𑀔𑀲𑁆𑀲 𑀲𑀺𑀕𑁆𑀕𑀼𑀆𑀤𑀺𑀓𑀲𑁆𑀲.

𑁧𑁩𑁫𑁨. 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀲𑀁𑀯𑀭𑀲𑁆𑀲𑀸𑀢𑀺 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀲𑀁𑀯𑀭𑀡𑀲𑁆𑀲. 𑀅𑀲𑀁𑀯𑀼𑀢𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑁆𑀲𑁂𑀯 𑀳𑁂𑀢𑀽𑀢𑀺 𑀘𑀓𑁆𑀔𑀼𑀤𑁆𑀯𑀸𑀭𑀺𑀓𑀲𑁆𑀲 𑀅𑀪𑀺𑀚𑁆𑀛𑀸𑀤𑀺𑀅𑀦𑁆𑀯𑀸𑀲𑁆𑀲𑀯𑀦𑀲𑁆𑀲 𑀢𑀁𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀬 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀧𑀥𑀸𑀦𑀓𑀸𑀭𑀡𑀁. 𑀲𑀢𑀺 𑀳𑀺 𑀅𑀲𑀁𑀯𑀼𑀢𑀢𑁆𑀢𑁂 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀲𑁆𑀲 𑀢𑁂 𑀢𑁂 𑀅𑀦𑁆𑀯𑀸𑀲𑁆𑀲𑀯𑀦𑁆𑀢𑀻𑀢𑀺 𑀅𑀲𑀁𑀯𑀭𑀺𑀬𑀫𑀸𑀦𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀳𑁂𑀢𑀼𑀓𑁄 𑀲𑁄 𑀅𑀲𑀁𑀯𑀭𑁄 𑀢𑀣𑀸𑀯𑀼𑀢𑁆𑀢𑁄𑀢𑀺 𑀅𑀝𑁆𑀞𑀓𑀣𑀸𑀬 𑀅𑀥𑀺𑀧𑁆𑀧𑀸𑀬𑀁 𑀤𑀲𑁆𑀲𑁂𑀢𑀺. 𑀇𑀤𑀸𑀦𑀺 𑀬𑀣𑀸𑀯𑀼𑀢𑁆𑀢𑁂 𑀅𑀥𑀺𑀧𑁆𑀧𑀸𑀬𑁂 𑀞𑀢𑁆𑀯𑀸 ‘‘𑀬𑀢𑁆𑀯𑀸𑀥𑀺𑀓𑀭𑀡𑀦𑁆𑀢𑀺 𑀳𑀻’’𑀢𑀺𑀆𑀤𑀺𑀦𑀸 𑀧𑀸𑀴𑀺𑀬𑀸 𑀬𑁄𑀚𑀦𑀁 𑀤𑀲𑁆𑀲𑁂𑀢𑀺. 𑀓𑀲𑁆𑀲 𑀘𑀸𑀢𑀺 𑀧𑀓𑀸𑀭𑀁 𑀧𑀼𑀘𑁆𑀙𑀢𑀺, 𑀓𑀣𑀁𑀯𑀺𑀥𑀲𑁆𑀲 𑀓𑀣𑀁𑀲𑀡𑁆𑀞𑀺𑀢𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀦 𑀳𑀺 𑀲𑀭𑀽𑀧𑁂 𑀯𑀼𑀢𑁆𑀢𑁂 𑀧𑀼𑀦 𑀲𑀭𑀽𑀧𑀧𑀼𑀘𑁆𑀙𑀸𑀬 𑀧𑀬𑁄𑀚𑀦𑀁 𑀅𑀢𑁆𑀣𑀺. 𑀅𑀦𑁆𑀯𑀸𑀲𑁆𑀲𑀯𑀦𑁆𑀢𑀺 𑀅𑀪𑀺𑀚𑁆𑀛𑀸𑀤𑀬𑁄. 𑀢𑀤𑀼𑀧𑀮𑀓𑁆𑀔𑀺𑀢𑀦𑁆𑀢𑀺 𑀅𑀦𑁆𑀯𑀸𑀲𑁆𑀲𑀯𑀽𑀧𑀮𑀓𑁆𑀔𑀺𑀢𑀁 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀁 𑀅𑀲𑀁𑀯𑀼𑀢𑀦𑁆𑀢𑀺 𑀬𑁄𑀚𑀦𑀸.

𑀬𑀣𑀸𑀲𑀫𑁆𑀪𑀯𑀦𑁆𑀢𑀺 𑀤𑀼𑀲𑁆𑀲𑀻𑀮𑁆𑀬𑀸𑀲𑀁𑀯𑀭𑁄 𑀫𑀦𑁄𑀤𑁆𑀯𑀸𑀭𑀯𑀲𑁂𑀦, 𑀲𑁂𑀲𑀸𑀲𑀁𑀯𑀭𑁄 𑀙𑀤𑁆𑀯𑀸𑀭𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑁄. 𑀫𑀼𑀝𑁆𑀞𑀲𑁆𑀲𑀘𑁆𑀘𑀸𑀤𑀻𑀦𑀁 𑀲𑀢𑀺𑀧𑀝𑀺𑀧𑀓𑁆𑀔𑀸𑀓𑀼𑀲𑀮𑀥𑀫𑁆𑀫𑀸𑀤𑀺𑀪𑀸𑀯𑀢𑁄 𑀲𑀺𑀬𑀸 𑀧𑀜𑁆𑀘𑀤𑁆𑀯𑀸𑀭𑁂 𑀉𑀧𑁆𑀧𑀢𑁆𑀢𑀺, 𑀦 𑀢𑁆𑀯𑁂𑀯 𑀓𑀸𑀬𑀺𑀓𑀯𑀸𑀘𑀲𑀺𑀓𑀯𑀻𑀢𑀺𑀓𑁆𑀓𑀫𑀪𑀽𑀢𑀲𑁆𑀲 𑀤𑀼𑀲𑁆𑀲𑀻𑀮𑁆𑀬𑀲𑁆𑀲 𑀢𑀢𑁆𑀣 𑀉𑀧𑁆𑀧𑀢𑁆𑀢𑀺 𑀧𑀜𑁆𑀘𑀤𑁆𑀯𑀸𑀭𑀺𑀓𑀚𑀯𑀦𑀸𑀦𑀁 𑀅𑀯𑀺𑀜𑁆𑀜𑀢𑁆𑀢𑀺𑀚𑀦𑀓𑀢𑁆𑀢𑀸𑀢𑀺 𑀢𑀫𑁂𑀯 𑀬𑀣𑀸𑀲𑀫𑁆𑀪𑀯𑀁 ‘‘𑀦 𑀳𑀺 𑀧𑀜𑁆𑀘𑀤𑁆𑀯𑀸𑀭𑁂’’𑀢𑀺𑀆𑀤𑀺𑀦𑀸 𑀯𑀺𑀯𑀭𑀢𑀺.

𑀬𑀣𑀸 𑀓𑀺𑀦𑁆𑀢𑀺 𑀬𑁂𑀦 𑀧𑀓𑀸𑀭𑁂𑀦 𑀚𑀯𑀦𑁂 𑀉𑀧𑁆𑀧𑀚𑁆𑀚𑀫𑀸𑀦𑁄 𑀅𑀲𑀁𑀯𑀭𑁄 ‘‘𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑁂 𑀅𑀲𑀁𑀯𑀭𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀁 𑀦𑀺𑀤𑀲𑁆𑀲𑀦𑀁 𑀓𑀺𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁆𑀣𑀸𑀬𑀁 𑀧𑀯𑀢𑁆𑀢𑀺𑀓𑁆𑀓𑀫𑁄 𑁋 𑀧𑀜𑁆𑀘𑀤𑁆𑀯𑀸𑀭𑁂 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑁂 𑀆𑀧𑀸𑀣𑀕𑀢𑁂 𑀦𑀺𑀬𑀫𑀺𑀢𑀸𑀤𑀺𑀯𑀲𑁂𑀦 𑀓𑀼𑀲𑀮𑀸𑀓𑀼𑀲𑀮𑀚𑀯𑀦𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀪𑀯𑀗𑁆𑀕𑀁 𑀑𑀢𑀺𑀡𑁆𑀡𑁂 𑀫𑀦𑁄𑀤𑁆𑀯𑀸𑀭𑀺𑀓𑀚𑀯𑀦𑀁 𑀢𑀁𑀬𑁂𑀯𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀪𑀯𑀗𑁆𑀕𑀁 𑀑𑀢𑀭𑀢𑀺, 𑀧𑀼𑀦 𑀢𑀲𑁆𑀫𑀺𑀁𑀬𑁂𑀯 𑀤𑁆𑀯𑀸𑀭𑁂 ‘‘𑀇𑀢𑁆𑀣𑀺𑀧𑀼𑀭𑀺𑀲𑁄’’𑀢𑀺𑀆𑀤𑀺𑀦𑀸 𑀯𑀯𑀢𑁆𑀣𑀧𑁂𑀢𑁆𑀯𑀸 𑀚𑀯𑀦𑀁 𑀪𑀯𑀗𑁆𑀕𑀁 𑀑𑀢𑀭𑀢𑀺. 𑀧𑀼𑀦 𑀯𑀸𑀭𑁂 𑀧𑀲𑀸𑀤𑀭𑀚𑁆𑀚𑀦𑀸𑀤𑀺𑀯𑀲𑁂𑀦 𑀚𑀯𑀦𑀁 𑀚𑀯𑀢𑀺. 𑀧𑀼𑀦 𑀬𑀤𑀺 𑀢𑀁 𑀆𑀭𑀫𑁆𑀫𑀡𑀁 𑀆𑀧𑀸𑀣𑀁 𑀆𑀕𑀘𑁆𑀙𑀢𑀺, 𑀢𑀁𑀲𑀤𑀺𑀲𑀫𑁂𑀯 𑀧𑀜𑁆𑀘𑀤𑁆𑀯𑀸𑀭𑀸𑀤𑀻𑀲𑀼 𑀚𑀯𑀦𑀁 𑀢𑀤𑀸 𑀉𑀧𑁆𑀧𑀚𑁆𑀚𑀫𑀸𑀦𑀓𑀁 𑀲𑀦𑁆𑀥𑀸𑀬 ‘‘𑀏𑀯𑀫𑁂𑀯 𑀚𑀯𑀦𑁂 𑀤𑀼𑀲𑁆𑀲𑀻𑀮𑁆𑀬𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼 𑀢𑀲𑁆𑀫𑀺𑀁 𑀅𑀲𑀁𑀯𑀭𑁂 𑀲𑀢𑀺 𑀤𑁆𑀯𑀸𑀭𑀫𑁆𑀧𑀺 𑀅𑀕𑀼𑀢𑁆𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀬𑀁 𑀧𑀦 𑀉𑀓𑁆𑀓𑀝𑁆𑀞𑀦𑀬𑁄 𑀧𑀭𑀺𑀘𑀺𑀢𑀸𑀭𑀫𑁆𑀫𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄, 𑀅𑀧𑀭𑀺𑀘𑀺𑀢𑁂 𑀅𑀦𑁆𑀢𑀭𑀦𑁆𑀢𑀭𑀸 𑀧𑀜𑁆𑀘𑀤𑁆𑀯𑀸𑀭𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀢𑀤𑀦𑀼𑀭𑀽𑀧𑀁 𑀫𑀦𑁄𑀤𑁆𑀯𑀸𑀭𑁂𑀧𑀺 𑀉𑀧𑁆𑀧𑀚𑁆𑀚𑀢𑀻𑀢𑀺. 𑀤𑁆𑀯𑀸𑀭𑀪𑀯𑀗𑁆𑀕𑀸𑀤𑀻𑀦𑀁 𑀚𑀯𑀦𑁂𑀦 𑀲𑀫𑁆𑀩𑀦𑁆𑀥𑁄 𑀏𑀓𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀢𑁄 𑀤𑀝𑁆𑀞𑀩𑁆𑀩𑁄.

𑀲𑀢𑀺 𑀤𑁆𑀯𑀸𑀭𑀪𑀯𑀗𑁆𑀕𑀸𑀤𑀺𑀓𑁂𑀢𑀺 𑀧𑀘𑁆𑀘𑀬𑀪𑀸𑀯𑁂𑀦 𑀧𑀼𑀭𑀺𑀫𑀦𑀺𑀧𑁆𑀨𑀦𑁆𑀦𑀁 𑀚𑀯𑀦𑀓𑀸𑀮𑁂 𑀅𑀲𑀦𑁆𑀢𑀫𑁆𑀧𑀺 𑀪𑀯𑀗𑁆𑀕𑀸𑀤𑀺 𑀘𑀓𑁆𑀔𑀸𑀤𑀺 𑀯𑀺𑀬 𑀨𑀮𑀦𑀺𑀧𑁆𑀨𑀢𑁆𑀢𑀺𑀬𑀸 𑀲𑀦𑁆𑀢𑀜𑁆𑀜𑁂𑀯 𑀦𑀸𑀫𑀸𑀢𑀺 𑀯𑀼𑀢𑁆𑀢𑀁. 𑀦 𑀳𑀺 𑀥𑀭𑀫𑀸𑀦𑀁𑀬𑁂𑀯 𑀲𑀦𑁆𑀢𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀩𑀸𑀳𑀺𑀭𑀁 𑀯𑀺𑀬 𑀓𑀢𑁆𑀯𑀸𑀢𑀺 𑀧𑀭𑀫𑀢𑁆𑀣𑀢𑁄 𑀚𑀯𑀦𑀲𑁆𑀲 𑀩𑀸𑀳𑀺𑀭𑀪𑀸𑀯𑁂 𑀇𑀢𑀭𑀲𑁆𑀲 𑀘 𑀅𑀩𑁆𑀪𑀦𑁆𑀢𑀭𑀪𑀸𑀯𑁂 𑀅𑀲𑀢𑀺𑀧𑀺 ‘‘𑀧𑀪𑀲𑁆𑀲𑀭𑀫𑀺𑀤𑀁, 𑀪𑀺𑀓𑁆𑀔𑀯𑁂, 𑀘𑀺𑀢𑁆𑀢𑀁, 𑀢𑀜𑁆𑀘 𑀔𑁄 𑀆𑀕𑀦𑁆𑀢𑀼𑀓𑁂𑀳𑀺 𑀉𑀧𑀓𑁆𑀓𑀺𑀮𑁂𑀲𑁂𑀳𑀺 𑀉𑀧𑀓𑁆𑀓𑀺𑀮𑀺𑀝𑁆𑀞’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 (𑀅. 𑀦𑀺. 𑁧.𑁪𑁯) 𑀆𑀕𑀦𑁆𑀢𑀼𑀓𑀪𑀽𑀢𑀲𑁆𑀲 𑀓𑀤𑀸𑀘𑀺 𑀓𑀤𑀸𑀘𑀺 𑀉𑀧𑁆𑀧𑀚𑁆𑀚𑀫𑀸𑀦𑀲𑁆𑀲 𑀚𑀯𑀦𑀲𑁆𑀲 𑀩𑀸𑀳𑀺𑀭𑀪𑀸𑀯𑁄 𑀢𑀩𑁆𑀩𑀺𑀥𑀼𑀭𑀲𑀪𑀸𑀯𑀲𑁆𑀲 𑀇𑀢𑀭𑀲𑁆𑀲 𑀅𑀩𑁆𑀪𑀦𑁆𑀢𑀭𑀪𑀸𑀯𑁄 𑀧𑀭𑀺𑀬𑀸𑀬𑀢𑁄 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀅𑀲𑀁𑀯𑀭𑀳𑁂𑀢𑀼𑀪𑀸𑀯𑀸𑀧𑀢𑁆𑀢𑀺𑀢𑁄𑀢𑀺 𑀤𑁆𑀯𑀸𑀭𑀸𑀤𑀻𑀦𑀁 𑀅𑀲𑀁𑀯𑀭𑀳𑁂𑀢𑀼𑀪𑀸𑀯𑀸𑀧𑀚𑁆𑀚𑀦𑀲𑁆𑀲 𑀧𑀸𑀓𑀝𑀪𑀸𑀯𑀁 𑀲𑀦𑁆𑀥𑀸𑀬𑀸𑀳. 𑀉𑀧𑁆𑀧𑀦𑁆𑀦𑁂 𑀳𑀺 𑀅𑀲𑀁𑀯𑀭𑁂 𑀤𑁆𑀯𑀸𑀭𑀸𑀤𑀻𑀦𑀁 𑀢𑀲𑁆𑀲 𑀳𑁂𑀢𑀼𑀪𑀸𑀯𑁄 𑀧𑀜𑁆𑀜𑀸𑀬𑀢𑀻𑀢𑀺. 𑀤𑁆𑀯𑀸𑀭𑀪𑀯𑀗𑁆𑀕𑀸𑀤𑀺𑀫𑀽𑀲𑀦𑀦𑁆𑀢𑀺 𑀤𑁆𑀯𑀸𑀭𑀪𑀯𑀗𑁆𑀕𑀸𑀤𑀻𑀲𑀼 𑀫𑀽𑀲𑀦𑀁. 𑀬𑀲𑁆𑀫𑀺𑀜𑁆𑀳𑀺 𑀤𑁆𑀯𑀸𑀭𑁂 𑀅𑀲𑀁𑀯𑀭𑁄 𑀉𑀧𑁆𑀧𑀚𑁆𑀚𑀢𑀺, 𑀲𑁄 𑀢𑀢𑁆𑀣 𑀤𑁆𑀯𑀸𑀭𑀸𑀤𑀻𑀦𑀁 𑀲𑀁𑀯𑀭𑀽𑀧𑀦𑀺𑀲𑁆𑀲𑀬𑀪𑀸𑀯𑀁 𑀉𑀧𑀘𑁆𑀙𑀺𑀦𑁆𑀤𑀦𑁆𑀢𑁄𑀬𑁂𑀯 𑀧𑀯𑀢𑁆𑀢𑀢𑀻𑀢𑀺. 𑀢𑁂𑀦𑁂𑀯𑀸𑀳 ‘‘𑀓𑀼𑀲𑀮𑀪𑀡𑁆𑀟𑀯𑀺𑀦𑀸𑀲𑀦’’𑀦𑁆𑀢𑀺.

𑀏𑀢𑁆𑀣 𑀘 ‘‘𑀘𑀓𑁆𑀔𑀼𑀦𑀸 𑀭𑀽𑀧𑀁 𑀤𑀺𑀲𑁆𑀯𑀸’’𑀢𑀺𑀆𑀤𑀺𑀧𑀸𑀴𑀺𑀬𑀁 𑀲𑀁𑀯𑀭𑁄, 𑀲𑀁𑀯𑀭𑀺𑀢𑀩𑁆𑀩𑀁, 𑀲𑀁𑀯𑀭𑀡𑀼𑀧𑀸𑀬𑁄, 𑀬𑀢𑁄 𑀘 𑀲𑁄 𑀲𑀁𑀯𑀭𑁄, 𑀬𑀢𑁆𑀣 𑀘 𑀲𑁄 𑀲𑀁𑀯𑀭𑁄𑀢𑀺 𑀇𑀫𑀁 𑀧𑀪𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀬𑁄𑀚𑁂𑀢𑀩𑁆𑀩𑀸. 𑀓𑀣𑀁? ‘‘𑀭𑀓𑁆𑀔𑀢𑀺…𑀧𑁂… 𑀲𑀁𑀯𑀭𑀁 𑀆𑀧𑀚𑁆𑀚𑀢𑀻’’𑀢𑀺 𑀏𑀢𑁂𑀦 𑀲𑀁𑀯𑀭𑁄 𑀯𑀼𑀢𑁆𑀢𑁄. 𑀲𑀢𑀺𑀁 𑀧𑀘𑁆𑀘𑀼𑀝𑁆𑀞𑀧𑁂𑀢𑀻𑀢𑀺 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄𑀢𑀺. 𑀘𑀓𑁆𑀔𑀸𑀤𑀺 𑀲𑀁𑀯𑀭𑀺𑀢𑀩𑁆𑀩𑀁. 𑀦 𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀻 𑀳𑁄𑀢𑀺 𑀦𑀸𑀦𑀼𑀩𑁆𑀬𑀜𑁆𑀚𑀦𑀕𑁆𑀕𑀸𑀳𑀻𑀢𑀺 𑀲𑀁𑀯𑀭𑀡𑀼𑀧𑀸𑀬𑁄. ‘‘𑀬𑀢𑁆𑀯𑀸𑀥𑀺𑀓𑀭𑀡’’𑀦𑁆𑀢𑀺𑀆𑀤𑀺𑀦𑀸 𑀲𑀁𑀯𑀭𑀡𑀸𑀯𑀥𑀺. 𑀭𑀽𑀧𑀸𑀤𑀬𑁄 𑀲𑀁𑀯𑀭𑀯𑀺𑀲𑀬𑁄𑀢𑀺. 𑀓𑀺𑀜𑁆𑀘 𑀧𑀝𑀺𑀲𑀗𑁆𑀔𑀸𑀪𑀸𑀯𑀦𑀸𑀩𑀮𑀲𑀗𑁆𑀕𑀳𑀺𑀢𑀪𑀸𑀯𑁂𑀦 𑀤𑀼𑀯𑀺𑀥𑁄𑀧𑀺 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑁄? 𑀢𑀢𑁆𑀣 𑀧𑀼𑀭𑀺𑀫𑁂𑀦 𑀯𑀺𑀲𑀬𑁂𑀲𑀼 𑀆𑀤𑀻𑀦𑀯𑀤𑀲𑁆𑀲𑀦𑀁, 𑀇𑀢𑀭𑁂𑀦 𑀆𑀤𑀻𑀦𑀯𑀧𑁆𑀧𑀳𑀸𑀦𑀁. 𑀢𑀣𑀸 𑀧𑀼𑀭𑀺𑀫𑁂𑀦 𑀧𑀭𑀺𑀬𑀼𑀝𑁆𑀞𑀸𑀦𑀧𑁆𑀧𑀳𑀸𑀦𑀁, 𑀇𑀢𑀭𑁂𑀦 𑀅𑀦𑀼𑀲𑀬𑀧𑁆𑀧𑀳𑀸𑀦𑀁. 𑀢𑀣𑀸 𑀧𑀼𑀭𑀺𑀫𑁄 𑀮𑁄𑀓𑀺𑀬𑀫𑀕𑁆𑀕𑀲𑀗𑁆𑀕𑀳𑀺𑀢𑁄, 𑀤𑀼𑀢𑀺𑀬𑁄 𑀮𑁄𑀓𑀼𑀢𑁆𑀢𑀭𑀫𑀕𑁆𑀕𑀲𑀗𑁆𑀕𑀳𑀺𑀢𑁄𑀢𑀺 𑀅𑀬𑀫𑁆𑀧𑀺 𑀯𑀺𑀲𑁂𑀲𑁄 𑀯𑁂𑀤𑀺𑀢𑀩𑁆𑀩𑁄.

𑁧𑁩𑁫𑁩. 𑀤𑀯𑀢𑁆𑀣𑀸𑀤𑀺𑀅𑀪𑀺𑀮𑀸𑀲𑁄𑀢𑀺 𑀤𑀯𑁄 𑀏𑀯 𑀅𑀢𑁆𑀣𑁄 𑀧𑀬𑁄𑀚𑀦𑀦𑁆𑀢𑀺 𑀤𑀯𑀢𑁆𑀣𑁄, 𑀲𑁄 𑀆𑀤𑀺 𑀬𑁂𑀲𑀁 𑀢𑁂 𑀤𑀯𑀢𑁆𑀣𑀸𑀤𑀬𑁄. 𑀢𑁂𑀲𑀼, 𑀢𑁂𑀲𑀁 𑀯𑀸 𑀅𑀪𑀺𑀮𑀸𑀲𑁄, 𑀤𑀯𑁄 𑀯𑀸 𑀅𑀢𑁆𑀣𑁄 𑀏𑀢𑀲𑁆𑀲𑀸𑀢𑀺 𑀤𑀯𑀢𑁆𑀣𑁄, 𑀢𑀤𑀸𑀤𑀺𑀓𑁄 𑀤𑀯𑀢𑁆𑀣𑀸𑀤𑀺, 𑀓𑁄 𑀧𑀦 𑀲𑁄𑀢𑀺 𑀆𑀳 ‘‘𑀅𑀪𑀺𑀮𑀸𑀲𑁄’’𑀢𑀺. 𑀆𑀳𑀸𑀭𑀧𑀭𑀺𑀪𑁄𑀕𑁂 𑀅𑀲𑀦𑁆𑀢𑀼𑀲𑁆𑀲𑀦𑀸𑀢𑀺 𑀆𑀳𑀸𑀭𑀧𑀭𑀺𑀪𑁄𑀕𑁂 𑀅𑀢𑀺𑀢𑁆𑀢𑀺. 𑀩𑀳𑀼𑀦𑁄 𑀉𑀴𑀸𑀭𑀲𑁆𑀲 𑀘 𑀧𑀢𑁆𑀣𑀦𑀸𑀯𑀲𑁂𑀦 𑀧𑀯𑀢𑁆𑀢𑀸 𑀪𑀺𑀬𑁆𑀬𑁄𑀓𑀫𑁆𑀬𑀢𑀸 𑀅𑀲𑀦𑁆𑀢𑀼𑀲𑁆𑀲𑀦𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺.

𑁧𑁩𑁫𑁫. 𑀫𑀚𑁆𑀚𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀺 𑀫𑀸𑀦𑀲𑁆𑀲𑁂𑀯𑀸𑀢𑀺 𑀓𑀢𑁆𑀯𑀸 ‘‘𑀫𑀸𑀦𑁄𑀯 𑀫𑀸𑀦𑀫𑀤𑁄’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀚𑀸𑀢𑀺𑀫𑀤𑀸𑀤𑀬𑁄 ‘‘𑀫𑀸𑀦𑁄 𑀫𑀜𑁆𑀜𑀦𑀸’’𑀢𑀺𑀆𑀤𑀺𑀦𑀸 𑀫𑀸𑀦𑀪𑀸𑀯𑁂𑀦𑁂𑀯 𑀯𑀺𑀪𑀢𑁆𑀢𑀸𑀢𑀺. 𑀔𑀼𑀤𑀸 𑀦𑀸𑀫 𑀓𑀫𑁆𑀫𑀚𑀢𑁂𑀚𑁄. 𑀢𑀁 𑀧𑀦 𑀅𑀪𑀼𑀢𑁆𑀢𑁂 𑀪𑀼𑀢𑁆𑀢𑁂 𑀘 𑀉𑀧𑁆𑀧𑀚𑁆𑀚𑀢𑀻𑀢𑀺 𑀬𑀁 𑀢𑀢𑁆𑀣 𑀆𑀫𑀸𑀲𑀬𑀲𑀗𑁆𑀔𑀸𑀢𑀲𑁆𑀲 𑀲𑀭𑀻𑀭𑀤𑁂𑀲𑀲𑁆𑀲 𑀧𑀻𑀴𑀦𑀢𑁄 𑀯𑀺𑀳𑀺𑀁𑀲𑀸𑀲𑀤𑁆𑀤𑀯𑀘𑀦𑀻𑀬𑀁, 𑀢𑀤𑁂𑀯 𑀤𑀲𑁆𑀲𑁂𑀢𑀩𑁆𑀩𑀁, 𑀇𑀢𑀭𑀜𑁆𑀘 𑀦𑀺𑀯𑀢𑁆𑀢𑁂𑀢𑀩𑁆𑀩𑀦𑁆𑀢𑀺 𑀅𑀪𑀼𑀢𑁆𑀢𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑀓𑀢𑁆𑀢𑁂𑀦 𑀔𑀼𑀤𑀸 𑀯𑀺𑀲𑁂𑀲𑀺𑀢𑀸𑀢𑀺 𑀆𑀳 ‘‘𑀔𑀼𑀤𑀸𑀬 𑀯𑀺𑀲𑁂𑀲𑀦’’𑀦𑁆𑀢𑀺. 𑀬𑁂 𑀧𑀦 ‘‘𑀓𑀫𑁆𑀫𑀚𑀢𑁂𑀚𑀧𑀘𑁆𑀘𑀬𑀸 𑀤𑀼𑀓𑁆𑀔𑀸 𑀯𑁂𑀤𑀦𑀸 𑀔𑀼𑀤𑀸’’𑀢𑀺 𑀯𑀤𑀦𑁆𑀢𑀺, 𑀢𑁂𑀲𑀁 𑀅𑀪𑀼𑀢𑁆𑀢𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑀓𑀸𑀢𑀺 𑀯𑀺𑀲𑁂𑀲𑀦𑀫𑁂𑀯 𑀦 𑀬𑀼𑀚𑁆𑀚𑀢𑀺. 𑀲𑀢𑀺𑀧𑀺 𑀢𑀲𑁆𑀫𑀺𑀁 𑀪𑀽𑀢𑀢𑁆𑀣𑀓𑀣𑀦𑁂 𑀯𑀺𑀳𑀺𑀁𑀲𑀽𑀧𑀭𑀢𑀺𑀧𑀼𑀭𑀸𑀡𑀯𑁂𑀤𑀦𑀸𑀧𑀝𑀺𑀳𑀦𑀦𑀸𑀦𑀁 𑀯𑀺𑀲𑁂𑀲𑀸𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺 𑀧𑀼𑀭𑀺𑀫𑁄𑀬𑁂𑀯𑁂𑀢𑁆𑀣 𑀅𑀢𑁆𑀣𑁄. 𑀏𑀢𑀸𑀲𑀁 𑀓𑁄 𑀯𑀺𑀲𑁂𑀲𑁄𑀢𑀺 𑀅𑀪𑀼𑀢𑁆𑀢𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑀓𑀯𑁂𑀤𑀦𑀸, 𑀪𑀼𑀢𑁆𑀢𑀧𑀘𑁆𑀘𑀬𑀸 𑀦 𑀉𑀧𑁆𑀧𑀚𑁆𑀚𑀦𑀓𑀯𑁂𑀤𑀦𑀸𑀢𑀺 𑀤𑁆𑀯𑁂𑀧𑀺 𑀘𑁂𑀢𑀸 𑀯𑁂𑀤𑀦𑀸 𑀬𑀸𑀯𑀢𑀸 𑀅𑀦𑀸𑀕𑀢𑀸𑀬𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀢𑀺𑀧𑀺 𑀅𑀦𑀸𑀕𑀢𑀢𑁆𑀢𑁂 𑀧𑀼𑀭𑀺𑀫𑀸 𑀉𑀧𑁆𑀧𑀦𑁆𑀦𑀲𑀤𑀺𑀲𑀻, 𑀇𑀢𑀭𑀸 𑀧𑀦 𑀅𑀢𑀁𑀲𑀤𑀺𑀲𑀻 𑀅𑀘𑁆𑀘𑀦𑁆𑀢𑀁 𑀅𑀦𑀼𑀧𑁆𑀧𑀦𑁆𑀦𑀸𑀯𑀸𑀢𑀺 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄. 𑀢𑁂𑀦𑁂𑀯 ‘‘𑀬𑀣𑀸𑀧𑀯𑀢𑁆𑀢𑀸’’𑀢𑀺 𑀧𑀼𑀭𑀺𑀫𑀸𑀬𑀁 𑀯𑀼𑀢𑁆𑀢𑀁, 𑀇𑀢𑀭𑀢𑁆𑀣 𑀘 ‘‘𑀅𑀧𑁆𑀧𑀯𑀢𑁆𑀢𑀸’’𑀢𑀺. 𑀅𑀣 𑀯𑀸 𑀅𑀪𑀼𑀢𑁆𑀢𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑀓𑀯𑁂𑀤𑀦𑀸 𑀧𑀼𑀩𑁆𑀩𑁂 𑀓𑀢𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑀢𑁆𑀢𑀸 𑀧𑀼𑀭𑀸𑀡𑀯𑁂𑀤𑀦𑀸 𑀦𑀸𑀫. 𑀅𑀧𑁆𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀺𑀅𑀬𑀼𑀢𑁆𑀢𑀧𑀭𑀺𑀪𑁄𑀕𑀧𑀘𑁆𑀘𑀬𑀸 𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀺𑀬𑀼𑀢𑁆𑀢𑀧𑀭𑀺𑀪𑁄𑀕𑀢𑁄 𑀆𑀬𑀢𑀺𑀁 𑀦 𑀉𑀧𑁆𑀧𑀚𑁆𑀚𑀺𑀲𑁆𑀲𑀢𑀻𑀢𑀺 𑀪𑀼𑀢𑁆𑀢𑀧𑀘𑁆𑀘𑀬𑀸 𑀦 𑀉𑀧𑁆𑀧𑀚𑁆𑀚𑀦𑀓𑀯𑁂𑀤𑀦𑀸 𑀦𑀯𑀯𑁂𑀤𑀦𑀸 𑀦𑀸𑀫. 𑀯𑀺𑀳𑀺𑀁𑀲𑀸𑀦𑀺𑀫𑀺𑀢𑁆𑀢𑀢𑀸 𑀯𑀺𑀳𑀺𑀁𑀲𑀸𑀦𑀺𑀩𑁆𑀩𑀢𑁆𑀢𑀢𑀸.

𑀬𑀸𑀧𑁂𑀦𑁆𑀢𑀺 𑀏𑀢𑁂𑀦𑀸𑀢𑀺 𑀬𑀸𑀧𑀦𑀸𑀢𑀺 𑀯𑀼𑀢𑁆𑀢𑀲𑁆𑀲 𑀲𑀭𑀻𑀭𑀬𑀸𑀧𑀦𑀓𑀸𑀭𑀡𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲𑀧𑀺𑀬𑀸𑀧𑀦𑀓𑀸𑀭𑀡𑀦𑁆𑀢𑀺 𑀇𑀫𑀲𑁆𑀲 𑀯𑀺𑀲𑁂𑀲𑀲𑁆𑀲𑀤𑀲𑁆𑀲𑀦𑀢𑁆𑀣𑀁 ‘‘𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀬𑀸𑀧𑀦𑀢𑁆𑀣𑀸𑀬𑀸’’𑀢𑀺 𑀯𑀢𑁆𑀯𑀸 𑀦 𑀓𑁂𑀯𑀮𑀁 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲𑁂𑀯 𑀬𑀸𑀧𑀦𑀓𑀸𑀭𑀡𑀫𑀸𑀳𑀸𑀭𑁄, 𑀅𑀣 𑀔𑁄 𑀞𑀸𑀦𑀸𑀤𑀺𑀧𑀯𑀢𑁆𑀢𑀺𑀆𑀓𑀸𑀭𑀯𑀺𑀲𑁂𑀲𑀬𑀼𑀢𑁆𑀢𑀲𑁆𑀲 𑀲𑀓𑀮𑀲𑀭𑀻𑀭𑀲𑁆𑀲𑀧𑀺 𑀬𑀸𑀧𑀦𑀓𑀸𑀭𑀡𑀦𑁆𑀢𑀺 𑀢𑀁𑀤𑀻𑀧𑀦𑀢𑁆𑀣𑀁 𑀬𑀸𑀢𑁆𑀭𑀸𑀢𑀺 𑀯𑀘𑀦𑀦𑁆𑀢𑀺 𑀬𑀸𑀧𑀦𑀸 𑀫𑁂 𑀪𑀯𑀺𑀲𑁆𑀲𑀢𑀻𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀘𑀢𑀼𑀦𑁆𑀦𑀁 𑀇𑀭𑀺𑀬𑀸𑀧𑀣𑀸𑀦𑀁 𑀅𑀯𑀺𑀘𑁆𑀙𑁂𑀤𑀲𑀗𑁆𑀔𑀸𑀢𑀸 𑀬𑀸𑀧𑀦𑀸 𑀬𑀸𑀢𑁆𑀭𑀸’’𑀢𑀺 𑀆𑀳. 𑀅𑀝𑁆𑀞𑀸𑀦𑀬𑁄𑀚𑀦𑀅𑀧𑀭𑀺𑀪𑁄𑀕𑀤𑀼𑀧𑁆𑀧𑀭𑀺𑀪𑁄𑀕𑀸𑀤𑀺𑀯𑀲𑁂𑀦 𑀲𑀤𑁆𑀥𑀸𑀤𑁂𑀬𑁆𑀬𑀲𑁆𑀲 𑀯𑀺𑀦𑀸𑀲𑀦𑀁 𑀲𑀤𑁆𑀥𑀸𑀤𑁂𑀬𑁆𑀬𑀯𑀺𑀦𑀺𑀧𑀸𑀢𑀦𑀁. 𑀬𑁂𑀦𑀸𑀢𑀺 𑀕𑀡𑀪𑁄𑀚𑀦𑀮𑀓𑁆𑀔𑀡𑀧𑁆𑀧𑀢𑁆𑀢𑀲𑁆𑀲 𑀣𑀽𑀧𑀻𑀓𑀢𑀸𑀤𑀺𑀓𑀲𑁆𑀲 𑀯𑀸 𑀧𑀝𑀺𑀕𑁆𑀕𑀳𑀡𑁂𑀦. 𑀲𑀸𑀯𑀚𑁆𑀚𑀁 𑀲𑀦𑀺𑀦𑁆𑀤𑀁 𑀧𑀭𑀺𑀪𑁄𑀕𑀁 𑀓𑀭𑁄𑀢𑀻𑀢𑀺 𑀯𑀸 𑀅𑀢𑁆𑀣𑁄.

𑀇𑀭𑀺𑀬𑀸…𑀧𑁂… 𑀯𑀼𑀢𑁆𑀢𑀦𑁆𑀢𑀺 𑀲𑀼𑀔𑀁 𑀧𑀯𑀢𑁆𑀢𑀫𑀸𑀦𑁂𑀳𑀺 𑀇𑀭𑀺𑀬𑀸𑀧𑀣𑁂𑀳𑀺 𑀢𑁂𑀲𑀁 𑀢𑀣𑀸𑀧𑀯𑀢𑁆𑀢𑀺𑀬𑀸 𑀓𑀸𑀭𑀡𑀦𑁆𑀢𑀺 𑀕𑀳𑀺𑀢𑀢𑁆𑀢𑀸 𑀯𑀺𑀤𑀺𑀢𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑀪𑀼𑀜𑁆𑀚𑀦𑀧𑀺𑀯𑀦𑀸𑀦𑀺 𑀧𑀼𑀩𑁆𑀩𑀓𑀸𑀮𑀓𑀺𑀭𑀺𑀬𑀸𑀪𑀸𑀯𑁂𑀦 𑀯𑀼𑀘𑁆𑀘𑀫𑀸𑀦𑀸𑀦𑀺 𑀇𑀭𑀺𑀬𑀸𑀧𑀣𑀓𑀢𑁆𑀢𑀼𑀓𑀸𑀦𑀺 𑀯𑀺𑀬 𑀯𑀼𑀢𑁆𑀢𑀸𑀦𑀻𑀢𑀺 𑀅𑀢𑁆𑀣𑁄. 𑀬𑀣𑀸 𑀳𑀺 ‘‘𑀧𑀜𑁆𑀜𑀸𑀬 𑀘𑀲𑁆𑀲 𑀤𑀺𑀲𑁆𑀯𑀸 𑀆𑀲𑀯𑀸 𑀧𑀭𑀺𑀓𑁆𑀔𑀻𑀡𑀸 𑀳𑁄𑀦𑁆𑀢𑀻’’𑀢𑀺 (𑀫. 𑀦𑀺. 𑁧.𑁨𑁭𑁧; 𑁨.𑁧𑁮𑁨) 𑀤𑀲𑁆𑀲𑀦𑀲𑁆𑀲 𑀔𑀬𑀳𑁂𑀢𑀼𑀢𑀸, ‘‘𑀖𑀢𑀁 𑀧𑀺𑀯𑀺𑀢𑁆𑀯𑀸 𑀩𑀮𑀁 𑀪𑀯𑀢𑀺, 𑀲𑀻𑀳𑀁 𑀤𑀺𑀲𑁆𑀯𑀸 𑀪𑀬𑀁 𑀪𑀯𑀢𑀻’’𑀢𑀺 𑀘 𑀧𑀸𑀦𑀤𑀲𑁆𑀲𑀦𑀸𑀦𑀁 𑀩𑀮𑀪𑀬𑀳𑁂𑀢𑀼𑀢𑀸 𑀯𑀼𑀘𑁆𑀘𑀢𑀺, 𑀏𑀯𑀁 𑀪𑀼𑀜𑁆𑀚𑀦𑀧𑀺𑀯𑀦𑀸𑀦𑀁 𑀇𑀭𑀺𑀬𑀸𑀧𑀣𑀲𑀼𑀔𑀧𑁆𑀧𑀯𑀢𑁆𑀢𑀺𑀳𑁂𑀢𑀼𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀲𑀼𑀮𑀪𑀸𑀦𑀯𑀚𑁆𑀚𑀪𑀸𑀯𑁄 𑀯𑀺𑀬 𑀅𑀧𑁆𑀧𑀪𑀸𑀯𑁄𑀧𑀺 𑀧𑀘𑁆𑀘𑀬𑀸𑀦𑀁 𑀧𑀭𑀫𑀲𑀮𑁆𑀮𑁂𑀔𑀯𑀼𑀢𑁆𑀢𑀻𑀦𑀁 𑀲𑀼𑀔𑀯𑀺𑀳𑀸𑀭𑀸𑀬 𑀧𑀭𑀺𑀬𑀢𑁆𑀢𑁄𑀢𑀺 𑀘𑀻𑀯𑀭𑀲𑁂𑀦𑀸𑀲𑀦𑀸𑀦𑀁 𑀅𑀧𑁆𑀧𑀪𑀸𑀯𑀼𑀓𑁆𑀓𑀁𑀲𑀸𑀦𑀼𑀚𑀸𑀦𑀦𑀯𑀲𑁂𑀦 𑀧𑀯𑀢𑁆𑀢𑀸𑀳𑀺 𑀅𑀦𑀦𑁆𑀢𑀭𑀕𑀸𑀣𑀸𑀳𑀺 𑀇𑀥𑀸𑀧𑀺 𑀥𑀫𑁆𑀫𑀲𑁂𑀦𑀸𑀧𑀢𑀺𑀦𑀸 𑀲𑀼𑀔𑀯𑀺𑀳𑀸𑀭𑀸𑀬 𑀧𑀭𑀺𑀬𑀢𑁆𑀢𑁄 𑀅𑀧𑁆𑀧𑀪𑀸𑀯𑀼𑀓𑁆𑀓𑀁𑀲𑁄 𑀅𑀦𑀼𑀜𑁆𑀜𑀸𑀢𑁄𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺 ‘‘𑀧𑀼𑀦𑀧𑀻’’𑀢𑀺𑀆𑀤𑀺𑀦𑀸 ‘‘𑀪𑀼𑀢𑁆𑀯𑀸𑀦𑀸’’𑀢𑀺 𑀧𑀸𑀞𑀁 𑀲𑀫𑀢𑁆𑀣𑀬𑀢𑀺.

𑁧𑁩𑁬𑁮. 𑀲𑀢𑀺𑀆𑀤𑀺𑀥𑀫𑁆𑀫𑀸𑀢𑀺 𑀲𑀢𑀺𑀧𑀜𑁆𑀜𑀸𑀲𑀫𑀸𑀥𑀺𑀯𑀻𑀭𑀺𑀬𑀲𑀫𑁆𑀫𑀸𑀯𑀸𑀘𑀸𑀤𑀺𑀥𑀫𑁆𑀫𑀸, 𑀬𑁂 𑀙𑀳𑀺 𑀤𑀼𑀓𑁂𑀳𑀺 𑀧𑀭𑀺𑀕𑁆𑀕𑀳𑀺𑀢𑀸.

𑁧𑁩𑁭𑁩. 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑁂𑀳𑀺 𑀧𑀝𑀺𑀯𑁂𑀥𑁄 𑀯𑀼𑀢𑁆𑀢𑁄. 𑀯𑀺𑀲𑀬𑁂𑀦𑀧𑀺 𑀳𑀺 𑀯𑀺𑀲𑀬𑀻 𑀯𑀼𑀘𑁆𑀘𑀢𑀺 𑀲𑀳𑀘𑀭𑀪𑀸𑀯𑀢𑁄. 𑀬𑀣𑀸 𑁋

‘‘𑀉𑀧𑁆𑀧𑀸𑀤𑁂𑀢𑁆𑀯𑀸𑀦 𑀲𑀁𑀯𑁂𑀕𑀁, 𑀤𑀼𑀓𑁆𑀔𑁂𑀦𑀲𑁆𑀲 𑀘 𑀳𑁂𑀢𑀼𑀦𑀸;

𑀯𑀟𑁆𑀠𑀬𑀺𑀢𑁆𑀯𑀸 𑀲𑀫𑁆𑀫𑀲𑀺𑀢𑁆𑀯𑀸, 𑀫𑀼𑀢𑁆𑀢𑀺𑀬𑀸 𑀫𑀕𑁆𑀕𑀫𑀩𑁆𑀭𑀯𑀻’’𑀢𑀺

‘‘𑀲𑀘𑁆𑀘𑀧𑀭𑀺𑀬𑁄𑀲𑀸𑀦𑁂’’𑀢𑀺 𑀘.

𑀬𑀣𑀸 𑀤𑀼𑀓𑁆𑀔𑀸𑀤𑀻𑀦𑀁 𑀧𑀭𑀺𑀜𑁆𑀜𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀁 𑀧𑀝𑀺𑀯𑁂𑀥𑀜𑀸𑀡𑀁 𑀅𑀲𑀫𑁆𑀫𑁄𑀳𑀢𑁄 𑀢𑁂 𑀅𑀯𑀺𑀮𑁄𑀫𑁂𑀢𑁆𑀯𑀸 𑀅𑀯𑀺𑀭𑁄𑀥𑁂𑀢𑁆𑀯𑀸 𑀧𑀯𑀢𑁆𑀢𑀢𑀺 𑀦𑀸𑀫, 𑀏𑀯𑀁 𑀢𑀤𑀼𑀧𑀦𑀺𑀲𑁆𑀲𑀬𑀪𑀸𑀯𑀁 𑀯𑀺𑀧𑀲𑁆𑀲𑀦𑀸𑀜𑀸𑀡𑀫𑁆𑀧𑀺 𑀬𑀣𑀸𑀩𑀮𑀁 𑀢𑁂 𑀅𑀯𑀺𑀮𑁄𑀫𑁂𑀢𑁆𑀯𑀸 𑀧𑀯𑀢𑁆𑀢𑀢𑀻𑀢𑀺 𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀅𑀦𑀼𑀮𑁄𑀫𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀼𑀢𑀺𑀬𑁄 𑀅𑀢𑁆𑀣𑀯𑀺𑀓𑀧𑁆𑀧𑁄 𑀯𑀼𑀢𑁆𑀢𑁄. 𑀏𑀢𑁆𑀣 𑀘 ‘‘𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦’’𑀦𑁆𑀢𑀺 𑀧𑀤𑀁 𑀯𑀺𑀦𑀸 𑀉𑀧𑀘𑀸𑀭𑁂𑀦 𑀯𑀼𑀢𑁆𑀢𑀁, 𑀧𑀼𑀭𑀺𑀫𑀲𑁆𑀫𑀺𑀁 𑀉𑀧𑀘𑀸𑀭𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀫𑁆𑀫𑀸𑀤𑀺𑀝𑁆𑀞𑀺𑀧𑁆𑀧𑀥𑀸𑀦𑀢𑁆𑀢𑀸 𑀯𑀸 𑀲𑁂𑀲𑀫𑀕𑁆𑀕𑀗𑁆𑀕𑀸𑀦𑀁 𑀫𑀕𑁆𑀕𑀲𑀘𑁆𑀘𑁂𑀓𑀤𑁂𑀲𑀲𑁆𑀲 𑀧𑀝𑀺𑀯𑁂𑀥𑀲𑁆𑀲 𑀅𑀦𑀼𑀮𑁄𑀫𑀁 𑀲𑀫𑀼𑀤𑀸𑀬𑀸𑀦𑀼𑀮𑁄𑀫𑀁 𑀯𑀼𑀢𑁆𑀢𑀁, 𑀘𑀢𑀼𑀲𑀘𑁆𑀘𑁂𑀓𑀤𑁂𑀲𑀲𑁆𑀲 𑀫𑀕𑁆𑀕𑀲𑁆𑀲 𑀯𑀸.

𑁧𑁩𑁮𑁦. 𑀔𑀬𑀲𑀫𑀬𑁂𑀢𑀺 𑀔𑀬𑀲𑀫𑀽𑀳𑁂. ‘‘𑀓𑀺𑀮𑁂𑀲𑀸𑀦𑀁 𑀔𑀬𑀯𑀲𑁂𑀦 𑀧𑀯𑀢𑁆𑀢𑀥𑀫𑁆𑀫𑀧𑀼𑀜𑁆𑀚𑁂’’𑀢𑀺 𑀘 𑀯𑀤𑀦𑁆𑀢𑀺.

𑁧𑁩𑁮𑁧. 𑀅𑀧𑀭𑀺𑀩𑀦𑁆𑀥𑀪𑀸𑀯𑁂𑀦 𑀦𑀺𑀭𑀸𑀲𑀗𑁆𑀓𑀸, 𑀆𑀭𑀫𑁆𑀫𑀡𑁂 𑀅𑀪𑀺𑀭𑀢𑀺𑀪𑀸𑀯𑁂𑀦 𑀘 𑀧𑀯𑀢𑁆𑀢𑀺 𑀅𑀥𑀺𑀫𑀼𑀘𑁆𑀘𑀦𑀝𑁆𑀞𑁄𑀢𑀺 𑀆𑀳 ‘‘𑀅𑀦𑀺…𑀧𑁂… 𑀢𑁆𑀢𑀦𑀝𑁆𑀞𑁂𑀦𑀸’’𑀢𑀺.

𑁧𑁩𑁮𑁨. 𑀅𑀭𑀺𑀬𑀫𑀕𑁆𑀕𑀧𑁆𑀧𑀯𑀢𑁆𑀢𑀺𑀬𑀸 𑀉𑀢𑁆𑀢𑀭𑀓𑀸𑀮𑀁 𑀧𑀯𑀢𑁆𑀢𑀫𑀸𑀦𑀁 𑀨𑀮𑀜𑀸𑀡𑀁 𑀢𑀁𑀢𑀁𑀫𑀕𑁆𑀕𑀯𑀚𑁆𑀛𑀓𑀺𑀮𑁂𑀲𑀸𑀦𑀁 𑀔𑀬𑀧𑀭𑀺𑀬𑁄𑀲𑀸𑀦𑁂 𑀧𑀯𑀢𑁆𑀢𑀢𑁆𑀢𑀸 ‘‘𑀔𑀻𑀡𑀦𑁆𑀢𑁂 𑀜𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀢𑀁 𑀫𑀕𑁆𑀕𑀸𑀦𑀦𑁆𑀢𑀭𑀁 𑀉𑀧𑁆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀫𑀕𑁆𑀕𑁂𑀦 𑀞𑀸𑀦𑀲𑁄 𑀔𑀻𑀡𑁂𑀲𑀼 𑀓𑀺𑀮𑁂𑀲𑁂𑀲𑀼 𑀢𑁂𑀲𑀁 𑀔𑀻𑀡𑀪𑀸𑀯𑀸𑀦𑀦𑁆𑀢𑀭𑀁 𑀧𑀯𑀢𑁆𑀢𑀫𑀸𑀦𑀁 𑀔𑀻𑀡𑀪𑀸𑀯𑀸𑀦𑀁 𑀧𑀞𑀫𑀓𑀸𑀮𑁂 𑀧𑀯𑀢𑁆𑀢𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀻𑀢𑀺 𑀤𑀼𑀢𑀺𑀬𑁄 𑀯𑀺𑀓𑀧𑁆𑀧𑁄 𑀯𑀼𑀢𑁆𑀢𑁄.

𑀤𑀼𑀓𑀦𑀺𑀓𑁆𑀔𑁂𑀧𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀓𑁆𑀔𑁂𑀧𑀓𑀡𑁆𑀟𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.