𑁪. 𑀅𑀝𑁆𑀞𑀓𑀣𑀸𑀓𑀡𑁆𑀟𑀁

𑀢𑀺𑀓𑀅𑀢𑁆𑀣𑀼𑀤𑁆𑀥𑀸𑀭𑀯𑀡𑁆𑀡𑀦𑀸

𑁧𑁩𑁮𑁪. 𑀦𑀬𑀕𑀫𑀦𑀦𑁆𑀢𑀺 𑀦𑀻𑀬𑀢𑀺, 𑀦𑁂𑀢𑀺, 𑀦𑀻𑀬𑀦𑁆𑀢𑀺 𑀯𑀸 𑀏𑀢𑁂𑀦𑀸𑀢𑀺 𑀦𑀬𑁄, 𑀕𑀫𑁆𑀫𑀢𑀺 𑀏𑀢𑁂𑀦𑀸𑀢𑀺 𑀕𑀫𑀦𑀁, 𑀦𑀬𑁄𑀯, 𑀦𑀬𑀲𑁆𑀲 𑀯𑀸 𑀕𑀫𑀦𑀁 𑀦𑀬𑀕𑀫𑀦𑀁. 𑀕𑀢𑀺 𑀏𑀯 𑀯𑀸 𑀕𑀫𑀦𑀁. 𑀧𑀞𑀫𑁂𑀦 𑀆𑀤𑀺-𑀲𑀤𑁆𑀤𑁂𑀦 𑀅𑀪𑀺𑀥𑀫𑁆𑀫𑀪𑀸𑀚𑀦𑀻𑀬𑀸𑀤𑀺𑀲𑀗𑁆𑀕𑀳𑀸𑀲𑀗𑁆𑀕𑀳𑀸𑀤𑀺𑀏𑀓𑀓𑀸𑀤𑀺𑀲𑀼𑀤𑁆𑀥𑀺𑀓𑀲𑀘𑁆𑀙𑀺 𑀓𑀝𑁆𑀞𑀸𑀤𑀺𑀫𑀽𑀮𑀫𑀽𑀮𑀸𑀤𑀺𑀓𑀸 𑀧𑀜𑁆𑀘𑀧𑀓𑀭𑀡𑀺𑀓𑀸 𑀦𑀬𑀕𑀢𑀺 𑀲𑀗𑁆𑀕𑀬𑁆𑀳𑀢𑀺. 𑀅𑀦𑀼𑀮𑁄𑀫𑀸𑀤𑀻𑀢𑀺 𑀧𑀦 𑀧𑀘𑁆𑀘𑀦𑀻𑀬𑀅𑀦𑀼𑀮𑁄𑀫𑀧𑀘𑁆𑀘𑀦𑀻𑀬𑀧𑀘𑁆𑀘𑀦𑀻𑀬𑀸𑀦𑀼𑀮𑁄𑀫𑀧𑀓𑀸𑀭𑀸 𑀏𑀓𑀫𑀽𑀮𑀸𑀤𑀺𑀧𑁆𑀧𑀓𑀸𑀭𑀸 𑀘. 𑀏𑀢𑁆𑀣 𑀅𑀢𑁆𑀣𑁂𑀲𑀼 𑀦𑀺𑀘𑁆𑀙𑀺𑀢𑁂𑀲𑀽𑀢𑀺 𑀏𑀢𑀲𑁆𑀫𑀺𑀁 𑀅𑀝𑁆𑀞𑀓𑀣𑀸𑀓𑀡𑁆𑀟𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑀯𑀲𑁂𑀦 𑀪𑀽𑀫𑀦𑁆𑀢𑀭𑀯𑀺𑀲𑁂𑀲𑀬𑁄𑀕𑀢𑁄 𑀲𑀩𑁆𑀩𑁂𑀲𑀁 𑀫𑀸𑀢𑀺𑀓𑀸𑀧𑀤𑀸𑀦𑀁 𑀅𑀢𑁆𑀣𑁂𑀲𑀼 𑀲𑀗𑁆𑀔𑁂𑀧𑀢𑁄 𑀯𑀯𑀢𑁆𑀣𑀸𑀧𑀺𑀢𑁂𑀲𑀼.

𑀧𑀜𑁆𑀳𑀼𑀤𑁆𑀥𑀸𑀭𑀦𑁆𑀢𑀺𑀆𑀤𑀻𑀲𑀼 ‘‘𑀲𑀺𑀬𑀸 𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺𑀆𑀤𑀺𑀦𑀸 (𑀧𑀝𑁆𑀞𑀸. 𑁧.𑁧.𑁨𑁫) 𑀓𑀼𑀲𑀮𑀧𑀤𑀁 𑀆𑀤𑀺𑀁 𑀓𑀢𑁆𑀯𑀸 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀦𑁆𑀢𑀸 𑀢𑀺𑀲𑁆𑀲𑁄 𑀓𑀼𑀲𑀮𑀸𑀤𑀺𑀓𑀸, 𑀓𑀼𑀲𑀮𑀸𑀩𑁆𑀬𑀸𑀓𑀢𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀓𑀼𑀲𑀮𑀸𑀓𑀼𑀲𑀮𑀦𑁆𑀢𑀸 𑀢𑀺𑀲𑁆𑀲𑁄, 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀦𑁆𑀢𑀸 𑀏𑀓𑀸𑀢𑀺 𑀓𑀼𑀲𑀮𑀸𑀤𑀺𑀓𑀸 𑀲𑀢𑁆𑀢 𑀧𑀼𑀘𑁆𑀙𑀸, 𑀢𑀣𑀸 𑀅𑀓𑀼𑀲𑀮𑀸𑀤𑀺𑀓𑀸, 𑀅𑀩𑁆𑀬𑀸𑀓𑀢𑀸𑀤𑀺𑀓𑀸, 𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀤𑀺𑀓𑀸, 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀤𑀺𑀓𑀸, 𑀓𑀼𑀲𑀮𑀸𑀓𑀼𑀲𑀮𑀸𑀤𑀺𑀓𑀸, 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀸𑀤𑀺𑀓𑀸𑀢𑀺 𑀲𑀢𑁆𑀢𑀦𑁆𑀦𑀁 𑀲𑀢𑁆𑀢𑀓𑀸𑀦𑀁 𑀯𑀲𑁂𑀦 𑀥𑀫𑁆𑀫𑀸𑀦𑀼𑀮𑁄𑀫𑁂 𑀓𑀼𑀲𑀮𑀢𑁆𑀢𑀺𑀓𑀁 𑀦𑀺𑀲𑁆𑀲𑀸𑀬 𑀳𑁂𑀢𑀼𑀧𑀘𑁆𑀘𑀬𑁂 𑀏𑀓𑀽𑀦𑀧𑀜𑁆𑀜𑀸𑀲 𑀧𑀼𑀘𑁆𑀙𑀸, 𑀢𑀣𑀸 𑀲𑁂𑀲𑀧𑀘𑁆𑀘𑀬𑁂𑀲𑀼 𑀲𑁂𑀲𑀢𑀺𑀓𑁂𑀲𑀼 𑀥𑀫𑁆𑀫𑀧𑀘𑁆𑀘𑀦𑀻𑀬𑀸𑀤𑀻𑀲𑀼 𑀘. 𑀢𑀁 𑀲𑀦𑁆𑀥𑀸𑀬 ‘‘𑀏𑀓𑀽𑀦𑀧𑀜𑁆𑀜𑀸𑀲𑀸𑀬 𑀏𑀓𑀽𑀦𑀧𑀜𑁆𑀜𑀸𑀲𑀸𑀬𑀸’’𑀢𑀺 𑀯𑀼𑀢𑁆𑀢𑀁. ‘‘𑀲𑀺𑀬𑀸 𑀳𑁂𑀢𑀼𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀳𑁂𑀢𑀼𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑁂𑀬𑁆𑀬 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺𑀆𑀤𑀺𑀦𑀸 (𑀧𑀝𑁆𑀞𑀸. 𑁩.𑁧.𑁧) ‘‘𑀳𑁂𑀢𑀼𑀁 𑀧𑀝𑀺𑀘𑁆𑀘 𑀳𑁂𑀢𑀼, 𑀳𑁂𑀢𑀼𑀁 𑀧𑀝𑀺𑀘𑁆𑀘 𑀦𑀳𑁂𑀢𑀼, 𑀳𑁂𑀢𑀼𑀁 𑀧𑀝𑀺𑀘𑁆𑀘 𑀳𑁂𑀢𑀼 𑀘 𑀦𑀳𑁂𑀢𑀼 𑀘. 𑀦𑀳𑁂𑀢𑀼𑀁 𑀧𑀝𑀺𑀘𑁆𑀘 𑀦𑀳𑁂𑀢𑀼, 𑀦𑀳𑁂𑀢𑀼𑀁 𑀧𑀝𑀺𑀘𑁆𑀘 𑀳𑁂𑀢𑀼, 𑀦𑀳𑁂𑀢𑀼𑀁 𑀧𑀝𑀺𑀘𑁆𑀘 𑀳𑁂𑀢𑀼 𑀘 𑀦𑀳𑁂𑀢𑀼 𑀘. 𑀳𑁂𑀢𑀼𑀜𑁆𑀘 𑀦𑀳𑁂𑀢𑀼𑀜𑁆𑀘 𑀧𑀝𑀺𑀘𑁆𑀘 𑀳𑁂𑀢𑀼, 𑀳𑁂𑀢𑀼𑀜𑁆𑀘 𑀦𑀳𑁂𑀢𑀼𑀜𑁆𑀘 𑀧𑀝𑀺𑀘𑁆𑀘 𑀦𑀳𑁂𑀢𑀼, 𑀳𑁂𑀢𑀼𑀜𑁆𑀘 𑀦𑀳𑁂𑀢𑀼𑀜𑁆𑀘 𑀧𑀝𑀺𑀘𑁆𑀘 𑀳𑁂𑀢𑀼 𑀘 𑀦𑀳𑁂𑀢𑀼 𑀘𑀸’’𑀢𑀺 𑀏𑀓𑁂𑀓𑀲𑁆𑀫𑀺𑀁 𑀤𑀼𑀓𑁂 𑀳𑁂𑀢𑀼𑀧𑀘𑁆𑀘𑀬𑀸𑀤𑀻𑀲𑀼 𑀏𑀓𑀫𑁂𑀓𑀲𑁆𑀫𑀺𑀁 𑀧𑀘𑁆𑀘𑀬𑁂 𑀦𑀯 𑀦𑀯 𑀧𑀼𑀘𑁆𑀙𑀸 𑀳𑁄𑀦𑁆𑀢𑀺. 𑀢𑀸 𑀲𑀦𑁆𑀥𑀸𑀬 ‘‘𑀦𑀯𑀲𑀼 𑀦𑀯𑀲𑀼 𑀧𑀜𑁆𑀳𑁂𑀲𑀽’’𑀢𑀺 𑀯𑀼𑀢𑁆𑀢𑀁.

𑀮𑀩𑁆𑀪𑀫𑀸𑀦𑀲𑁆𑀲𑀸𑀢𑀺 𑀓𑀼𑀲𑀮𑀢𑁆𑀢𑀺𑀓𑁂 𑀢𑀸𑀯 𑀧𑀝𑀺𑀘𑁆𑀘𑀯𑀸𑀭𑁂 𑀳𑁂𑀢𑀼𑀧𑀘𑁆𑀘𑀬𑁂 ‘‘𑀓𑀼𑀲𑀮𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀼𑀲𑀮𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸, 𑀓𑀼𑀲𑀮𑀁 𑀏𑀓𑀁 𑀔𑀦𑁆𑀥𑀁 𑀧𑀝𑀺𑀘𑁆𑀘 𑀢𑀬𑁄 𑀔𑀦𑁆𑀥𑀸’’𑀢𑀺𑀆𑀤𑀺𑀦𑀸 (𑀧𑀝𑁆𑀞𑀸. 𑁧.𑁧.𑁫𑁩) 𑀓𑀼𑀲𑀮𑁂𑀦 𑀓𑀼𑀲𑀮𑀁, 𑀓𑀼𑀲𑀮𑁂𑀦 𑀅𑀩𑁆𑀬𑀸𑀓𑀢𑀁, 𑀓𑀼𑀲𑀮𑁂𑀦 𑀓𑀼𑀲𑀮𑀸𑀩𑁆𑀬𑀸𑀓𑀢𑀁, 𑀅𑀓𑀼𑀲𑀮𑁂𑀦 𑀅𑀓𑀼𑀲𑀮𑀁, 𑀅𑀓𑀼𑀲𑀮𑁂𑀦 𑀅𑀩𑁆𑀬𑀸𑀓𑀢𑀁, 𑀅𑀓𑀼𑀲𑀮𑁂𑀦 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑀁, 𑀅𑀩𑁆𑀬𑀸𑀓𑀢𑁂𑀦 𑀅𑀩𑁆𑀬𑀸𑀓𑀢𑀁, 𑀓𑀼𑀲𑀮𑀸𑀩𑁆𑀬𑀸𑀓𑀢𑁂𑀦 𑀅𑀩𑁆𑀬𑀸𑀓𑀢𑀁, 𑀅𑀓𑀼𑀲𑀮𑀸𑀩𑁆𑀬𑀸𑀓𑀢𑁂𑀦 𑀅𑀩𑁆𑀬𑀸𑀓𑀢𑀦𑁆𑀢𑀺 𑀦𑀯𑀦𑁆𑀦𑀁 𑀦𑀯𑀦𑁆𑀦𑀁 𑀧𑀜𑁆𑀳𑀸𑀦𑀁 𑀅𑀢𑁆𑀣𑀢𑁄 𑀲𑀫𑁆𑀪𑀯𑀦𑁆𑀢𑀲𑁆𑀲 𑀧𑀜𑁆𑀳𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀯𑀲𑁂𑀦 𑀉𑀤𑁆𑀥𑀭𑀡𑀁, 𑀢𑀣𑀸 𑀲𑁂𑀲𑀧𑀘𑁆𑀘𑀬𑀯𑀸𑀭𑀢𑁆𑀢𑀺𑀓𑀸𑀤𑀻𑀲𑀼. 𑀢𑁂𑀲𑀼𑀬𑁂𑀯𑀸𑀢𑀺 𑀬𑀣𑀸𑀯𑀼𑀢𑁆𑀢𑁂𑀲𑀼 𑀏𑀯 𑀧𑀜𑁆𑀳𑁂𑀲𑀼 𑀅𑀢𑁆𑀣𑀲𑀫𑁆𑀪𑀯𑀢𑁄 𑀬𑀣𑀸𑀯𑀺𑀪𑀢𑁆𑀢𑀸𑀦𑀁 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀸𑀦𑀁 ‘‘𑀳𑁂𑀢𑀼𑀬𑀸 𑀦𑀯𑀸’’𑀢𑀺𑀆𑀤𑀺𑀦𑀸 𑀕𑀡𑀦𑀸𑀞𑀧𑀦𑀁. 𑀧𑀲𑀝𑁂 𑀥𑀫𑁆𑀫𑁂𑀢𑀺 𑀬𑀣𑀸 𑀳𑁂𑀝𑁆𑀞𑀸 𑀓𑀡𑁆𑀟𑀤𑁆𑀯𑀬𑁂 ‘‘𑀬𑀲𑁆𑀫𑀺𑀁 𑀲𑀫𑀬𑁂 𑀓𑀸𑀫𑀸𑀯𑀘𑀭𑀁 𑀓𑀼𑀲𑀮𑀁 𑀘𑀺𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 (𑀥. 𑀲. 𑁧) 𑀯𑀺𑀧𑁆𑀧𑀓𑀺𑀡𑁆𑀡𑁂 𑀫𑀼𑀢𑁆𑀢𑀧𑀼𑀧𑁆𑀨𑁂 𑀯𑀺𑀬 𑀨𑀲𑁆𑀲𑀸𑀤𑀬𑁄 𑀥𑀫𑁆𑀫𑁂. 𑀅𑀯𑀺𑀲𑀺𑀝𑁆𑀞𑀦𑀺𑀤𑁆𑀤𑁂𑀲𑁄 𑀲𑀸𑀫𑀜𑁆𑀜𑀦𑀺𑀤𑁆𑀤𑁂𑀲𑁄. 𑀯𑀺𑀜𑁆𑀜𑀸𑀢𑀥𑀫𑁆𑀫𑀲𑁆𑀲 𑀧𑀼𑀕𑁆𑀕𑀮𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀬𑀤𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀭𑀽𑀧𑀓𑀡𑁆𑀟𑁂𑀲𑀼 𑀘𑀢𑀼𑀪𑀽𑀫𑀺𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀤𑀺𑀯𑀲𑁂𑀦 𑀯𑀺𑀜𑁆𑀜𑀸𑀢𑀥𑀫𑁆𑀫𑀲𑁆𑀲 𑀅𑀢𑁆𑀣𑀼𑀤𑁆𑀥𑀸𑀭𑀤𑁂𑀲𑀦𑀸 𑀆𑀭𑀤𑁆𑀥𑀸, 𑀏𑀯𑀁 𑀲𑀦𑁆𑀢𑁂 𑀇𑀥 𑀓𑀲𑁆𑀫𑀸 𑀓𑀼𑀲𑀮𑀢𑁆𑀢𑀺𑀓𑀦𑀺𑀤𑁆𑀤𑁂𑀲𑁄 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀬𑀤𑀺𑀧𑀺 𑀓𑀼𑀲𑀮𑀢𑁆𑀢𑀺𑀓𑀯𑀺𑀢𑁆𑀣𑀸𑀭𑁄’’𑀢𑀺𑀆𑀤𑀺. 𑀥𑀫𑁆𑀫𑀯𑀺𑀲𑁂𑀲𑀦𑀪𑀸𑀯𑀢𑁄𑀢𑀺 ‘‘𑀥𑀫𑁆𑀫𑀸’’𑀢𑀺 𑀧𑀤𑀲𑁆𑀲 𑀧𑀥𑀸𑀦𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀅𑀢𑁄 𑀳𑀺 𑀢𑀤𑀪𑀺𑀥𑁂𑀬𑁆𑀬𑀸 𑀧𑀼𑀘𑁆𑀙𑀺𑀢𑀩𑁆𑀩𑀸 𑀚𑀸𑀢𑀸. 𑀯𑀺𑀜𑁆𑀜𑀸𑀢𑀸𑀳𑀻𑀢𑀺 𑀪𑀽𑀫𑀻𑀦𑀁 𑀯𑀺𑀲𑁂𑀲𑀦𑀮𑀓𑁆𑀔𑀡𑀬𑁄𑀕𑀫𑀸𑀳. 𑀏𑀢𑁆𑀣 𑀧𑀥𑀸𑀦𑀦𑁆𑀢𑀺 𑀓𑀺𑀜𑁆𑀘𑀸𑀧𑀺 𑀉𑀤𑁆𑀤𑁂𑀲𑁂 𑀓𑀼𑀲𑀮𑀧𑀤𑁂𑀦 𑀥𑀫𑁆𑀫𑀸 𑀯𑀺𑀲𑁂𑀲𑀺𑀢𑀩𑁆𑀩𑀸, ‘‘𑀘𑀢𑀽𑀲𑀼 𑀪𑀽𑀫𑀻𑀲𑀼 𑀓𑀼𑀲𑀮’’𑀦𑁆𑀢𑀺 𑀇𑀫𑀲𑁆𑀫𑀺𑀁 𑀧𑀦 𑀦𑀺𑀤𑁆𑀤𑁂𑀲𑁂 𑀪𑀽𑀫𑀻𑀳𑀺 𑀯𑀺𑀲𑁂𑀲𑀺𑀢𑀩𑁆𑀩𑀢𑁆𑀢𑀸 𑀓𑀼𑀲𑀮𑀧𑀤𑀁 𑀧𑀥𑀸𑀦𑀦𑁆𑀢𑀺 𑀯𑀺𑀲𑁂𑀲𑀦𑀪𑀸𑀯𑁂𑀦 𑀯𑀘𑀦𑀺𑀘𑁆𑀙𑀸𑀬 𑀅𑀪𑀸𑀯𑀢𑁄 𑀲𑀢𑀺𑀧𑀺 𑀯𑀺𑀲𑁂𑀲𑀺𑀢𑀩𑁆𑀩𑀥𑀫𑁆𑀫𑀸𑀦𑀁 𑀓𑀸𑀫𑀸𑀯𑀘𑀭𑀸𑀤𑀺𑀨𑀲𑁆𑀲𑀸𑀤𑀺𑀪𑁂𑀤𑁂 𑀢𑀤𑀦𑀧𑁂𑀓𑁆𑀔𑀁 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀢𑀸𑀲𑀗𑁆𑀔𑀸𑀢𑀁 𑀅𑀢𑁆𑀢𑀦𑁄 𑀓𑀼𑀲𑀮𑀸𑀓𑀸𑀭𑀫𑁂𑀯 𑀕𑀳𑁂𑀢𑁆𑀯𑀸 𑀧𑀯𑀢𑁆𑀢𑀫𑀸𑀦𑀢𑁆𑀢𑀸 ‘‘𑀏𑀓𑀢𑁆𑀢𑀫𑁂𑀯 𑀉𑀧𑀸𑀤𑀸𑀬 𑀧𑀯𑀢𑁆𑀢𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑀩𑁆𑀩𑁂𑀧𑀺 𑀳𑀺 𑀓𑀼𑀲𑀮𑀸 𑀥𑀫𑁆𑀫𑀸 𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀢𑀸𑀬 𑀏𑀓𑀲𑀪𑀸𑀯𑀸𑀬𑁂𑀯𑀸𑀢𑀺.

𑁧𑁩𑁮𑁫. 𑀬𑀣𑀸𑀬𑁄𑀕𑀁 𑀬𑁄𑀚𑁂𑀢𑀩𑁆𑀩𑀦𑁆𑀢𑀺 𑀘𑀢𑀽𑀳𑀺 𑀪𑀽𑀫𑀻𑀳𑀺 𑀆𑀥𑀸𑀭𑀪𑀽𑀢𑀸𑀳𑀺 𑀯𑀺𑀲𑁂𑀲𑁂𑀢𑁆𑀯𑀸 𑀲𑀫𑀬𑀨𑀲𑁆𑀲𑀸𑀤𑀺𑀪𑁂𑀤𑀁 𑀅𑀦𑀸𑀫𑀲𑀺𑀢𑁆𑀯𑀸 𑀯𑀺𑀧𑀸𑀓𑀪𑀸𑀯𑁂𑀦 𑀏𑀓𑀢𑁆𑀢𑀁 𑀦𑁂𑀢𑁆𑀯𑀸 ‘‘𑀘𑀢𑀽𑀲𑀼 𑀪𑀽𑀫𑀻𑀲𑀼 𑀯𑀺𑀧𑀸𑀓𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀏𑀲 𑀦𑀬𑁄 ‘‘𑀢𑀻𑀲𑀼 𑀪𑀽𑀫𑀻𑀲𑀼 𑀓𑀺𑀭𑀺𑀬𑀸𑀩𑁆𑀬𑀸𑀓𑀢’’𑀦𑁆𑀢𑀺𑀆𑀤𑀻𑀲𑀼𑀧𑀺.

𑀉𑀧𑁆𑀧𑀚𑁆𑀚𑀢𑀺 𑀏𑀢𑁆𑀣𑀸𑀢𑀺 𑀉𑀧𑁆𑀧𑀸𑀤𑁄, 𑀘𑁂𑀢𑀲𑀺𑀓𑀸. 𑀢𑁂 𑀳𑀺 𑀘𑀺𑀢𑁆𑀢𑀲𑁆𑀲 𑀲𑀩𑁆𑀩𑀣𑀸𑀧𑀺 𑀦𑀺𑀲𑁆𑀲𑀬𑀸𑀤𑀺𑀧𑀘𑁆𑀘𑀬𑀪𑀸𑀯𑀢𑁄 𑀏𑀢𑁆𑀣 𑀘 𑀉𑀧𑁆𑀧𑀢𑁆𑀢𑀺𑀬𑀸 𑀆𑀥𑀸𑀭𑀪𑀸𑀯𑁂𑀦 𑀅𑀧𑁂𑀓𑁆𑀔𑀺𑀢𑀸. 𑀬𑀣𑀸 𑀘 𑀘𑁂𑀢𑀲𑀺𑀓𑀸 𑀘𑀺𑀢𑁆𑀢𑀲𑁆𑀲, 𑀏𑀯𑀁 𑀘𑀺𑀢𑁆𑀢𑀫𑁆𑀧𑀺 𑀘𑁂𑀢𑀲𑀺𑀓𑀸𑀦𑀁 𑀦𑀺𑀲𑁆𑀲𑀬𑀸𑀤𑀺𑀧𑀘𑁆𑀘𑀬𑀪𑀸𑀯𑀢𑁄 𑀆𑀥𑀸𑀭𑀪𑀸𑀯𑁂𑀦 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑀁 𑀉𑀧𑁆𑀧𑀸𑀤𑀲𑀤𑁆𑀤𑀸𑀪𑀺𑀥𑁂𑀬𑁆𑀬𑀢𑀁 𑀦 𑀯𑀺𑀦𑀺𑀯𑀢𑁆𑀢𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 ‘‘𑀘𑀺𑀢𑁆𑀢𑀼𑀧𑁆𑀧𑀸𑀤𑁄’’𑀢𑀺 𑀏𑀢𑁆𑀣 𑀉𑀧𑁆𑀧𑀸𑀤𑀲𑁆𑀲 𑀯𑀺𑀲𑁂𑀲𑀦𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀫𑁆𑀧𑀺 𑀘𑀺𑀢𑁆𑀢𑀁 𑀅𑀢𑁆𑀢𑀦𑀺 𑀬𑀣𑀸𑀯𑀼𑀢𑁆𑀢𑀉𑀧𑁆𑀧𑀸𑀤𑀅𑀢𑁆𑀣𑀲𑀫𑁆𑀪𑀯𑀢𑁄 𑀅𑀧𑀭𑀺𑀘𑁆𑀘𑀢𑁆𑀢𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑀫𑁂𑀯 𑀳𑀼𑀢𑁆𑀯𑀸 𑀢𑀲𑁆𑀲 𑀯𑀺𑀲𑁂𑀲𑀦𑀪𑀸𑀯𑀁 𑀧𑀝𑀺𑀧𑀚𑁆𑀚𑀢𑀻𑀢𑀺. 𑀬𑀤𑀸𑀳 ‘‘𑀅𑀯𑀬𑀯𑁂𑀦 𑀲𑀫𑀼𑀤𑀸𑀬𑁄𑀧𑀮𑀓𑁆𑀔𑀡𑀯𑀲𑁂𑀦 𑀅𑀢𑁆𑀣𑁄 𑀲𑀫𑁆𑀪𑀯𑀢𑀻’’𑀢𑀺. 𑀘𑀺𑀢𑁆𑀢𑀲𑀫𑀸𑀦𑀕𑀢𑀺𑀓𑀲𑁆𑀲 𑀇𑀥 𑀘𑀺𑀢𑁆𑀢𑀕𑁆𑀕𑀳𑀡𑁂𑀦 𑀕𑀳𑁂𑀢𑀩𑁆𑀩𑀢𑀸𑀬 ‘‘𑀤𑁆𑀯𑁂𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀦𑀻’’𑀢𑀺 𑀦𑀺𑀤𑀲𑁆𑀲𑀦𑁂𑀦 𑀯𑀓𑁆𑀔𑀫𑀸𑀦𑀢𑁆𑀢𑀸 ‘‘𑀘𑀺𑀢𑁆𑀢…𑀧𑁂… 𑀕𑀳𑀡𑀁 𑀓𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀅𑀜𑁆𑀜𑀲𑁆𑀲𑀸𑀢𑀺 𑀭𑀽𑀧𑀲𑁆𑀲.

𑁧𑁪𑁨𑁦. 𑀧𑀜𑁆𑀘𑀤𑁆𑀯𑀸𑀭𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺 𑀏𑀓𑀦𑁆𑀢𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀢𑁆𑀢𑀸 𑀧𑀜𑁆𑀘𑀤𑁆𑀯𑀸𑀭𑀺𑀓𑀘𑀺𑀢𑁆𑀢𑀸𑀦𑀁. 𑀇𑀝𑁆𑀞𑀸𑀦𑀺𑀝𑁆𑀞𑀸𑀭𑀫𑁆𑀫𑀡𑀸𑀦𑀼𑀪𑀯𑀦𑀦𑁆𑀢𑀺 𑀯𑀺𑀧𑀸𑀓𑀲𑁆𑀲 𑀧𑀓𑀧𑁆𑀧𑁂𑀢𑁆𑀯𑀸 𑀆𑀭𑀫𑁆𑀫𑀡𑀕𑁆𑀕𑀳𑀡𑀸𑀪𑀸𑀯𑀫𑀸𑀳. 𑀢𑀢𑁄 𑀓𑀫𑁆𑀫𑀸𑀦𑀼𑀭𑀽𑀧𑀁 𑀧𑀯𑀢𑁆𑀢𑀫𑀸𑀦𑁄 𑀯𑀺𑀧𑀸𑀓𑁄 𑀧𑀭𑀺𑀢𑁆𑀢𑀓𑀫𑁆𑀫𑀯𑀺𑀧𑀸𑀓𑀢𑀸𑀬 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑁂𑀬𑁂𑀯 𑀧𑀯𑀢𑁆𑀢𑀺𑀢𑀼𑀫𑀭𑀳𑀢𑀺, 𑀦 𑀫𑀳𑀕𑁆𑀕𑀢𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑁂𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀫𑀸𑀥𑀺𑀧𑁆𑀧𑀥𑀸𑀦𑀲𑁆𑀲𑀧𑀺 𑀓𑀲𑁆𑀲𑀘𑀺 𑀓𑀫𑁆𑀫𑀲𑁆𑀲 𑀅𑀧𑁆𑀧𑀦𑀸𑀅𑀧𑁆𑀧𑀢𑁆𑀢𑀲𑁆𑀲 𑀏𑀓𑀦𑁆𑀢𑁂𑀦 𑀲𑀤𑀺𑀲𑀯𑀺𑀧𑀸𑀓𑀢𑀸𑀅𑀪𑀸𑀯𑀢𑁄 ‘‘𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀲𑁆𑀲𑀸’’𑀢𑀺 𑀓𑀫𑁆𑀫𑀁 𑀯𑀺𑀲𑁂𑀲𑀺𑀢𑀁. 𑀯𑀡𑁆𑀡𑀮𑀓𑁆𑀔𑀡𑀸𑀤𑀺𑀁 𑀅𑀕𑁆𑀕𑀳𑁂𑀢𑁆𑀯𑀸 𑀮𑁄𑀓𑀲𑀜𑁆𑀜𑀸𑀦𑀼𑀭𑁄𑀥𑁂𑀦𑁂𑀯 𑀕𑀳𑀺𑀢𑁂 𑀧𑀣𑀯𑀸𑀤𑀺𑀓𑁂 𑀧𑀭𑀺𑀓𑀫𑁆𑀫𑀲𑀜𑁆𑀜𑀸𑀬 𑀲𑀫𑀼𑀧𑁆𑀧𑀸𑀤𑀺𑀢𑀢𑁆𑀢𑀸 𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑀲𑀗𑁆𑀔𑀸𑀢𑀁 𑀲𑀜𑁆𑀜𑀸𑀯𑀲𑀁 𑀆𑀭𑀫𑁆𑀫𑀡𑀁 𑀅𑀲𑁆𑀲𑀸𑀢𑀺 𑀲𑀜𑁆𑀜𑀸𑀯𑀲𑀸𑀭𑀫𑁆𑀫𑀡𑀁. 𑀢𑀸𑀤𑀺𑀲𑁂𑀦𑁂𑀯𑀸𑀢𑀺 𑀲𑀫𑀸𑀥𑀺𑀧𑁆𑀧𑀥𑀸𑀦𑀢𑀸𑀬 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀻𑀳𑀺 𑀯𑀺𑀬 𑀲𑀜𑁆𑀜𑀸𑀯𑀲𑀸𑀭𑀫𑁆𑀫𑀡𑀢𑀸𑀬 𑀘 𑀦𑀺𑀩𑁆𑀩𑀺𑀲𑁂𑀲𑁂𑀦𑁂𑀯. 𑀲𑁄𑀧𑀻𑀢𑀺 𑀧𑀺-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄. 𑀢𑁂𑀦𑁂𑀢𑀁 𑀤𑀲𑁆𑀲𑁂𑀢𑀺 ‘‘𑀅𑀢𑁆𑀢𑀦𑁄 𑀓𑀫𑁆𑀫𑀲𑁆𑀲 𑀲𑀫𑀸𑀦𑀪𑀽𑀫𑀺𑀓𑀥𑀫𑁆𑀫𑀸𑀭𑀫𑁆𑀫𑀡𑀢𑀸𑀬 𑀯𑀺𑀬 𑀢𑀲𑁆𑀲 𑀆𑀭𑀫𑁆𑀫𑀡𑀸𑀭𑀫𑁆𑀫𑀡𑀢𑀸𑀬𑀧𑀺 𑀯𑀺𑀧𑀸𑀓𑁄 𑀓𑀫𑁆𑀫𑀸𑀦𑀼𑀭𑀽𑀧𑁄𑀬𑁂𑀯 𑀦𑀸𑀫 𑀳𑁄𑀢𑀻’’𑀢𑀺.

𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀫𑀳𑀕𑁆𑀕𑀢𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀲𑁆𑀲 𑀧𑀭𑀺𑀢𑁆𑀢𑀓𑀫𑁆𑀫𑀲𑁆𑀲 𑀯𑀺𑀧𑀸𑀓𑁄 𑀢𑀤𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑁄 𑀦 𑀳𑁄𑀢𑀻𑀢𑀺? 𑀅𑀧𑁆𑀧𑀦𑀸𑀧𑁆𑀧𑀢𑁆𑀢𑀓𑀫𑁆𑀫𑀯𑀺𑀧𑀸𑀓𑀲𑁆𑀲 𑀯𑀺𑀬 𑀢𑀲𑁆𑀲 𑀓𑀫𑁆𑀫𑀸𑀭𑀫𑁆𑀫𑀡𑀸𑀭𑀫𑁆𑀫𑀡𑀢𑀸𑀬 𑀦𑀺𑀬𑀫𑀸𑀪𑀸𑀯𑀢𑁄 𑀓𑀫𑁆𑀫𑀸𑀦𑀼𑀭𑀽𑀧𑀢𑀸𑀬 𑀘 𑀅𑀦𑁂𑀓𑀭𑀽𑀧𑀢𑁆𑀢𑀸. 𑀬𑀣𑀸 𑀅𑀢𑁆𑀢𑀦𑁄 𑀓𑀫𑁆𑀫𑀲𑀤𑀺𑀲𑀲𑁆𑀲 𑀫𑀳𑀕𑁆𑀕𑀢𑀚𑀯𑀦𑀲𑁆𑀲 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀲𑁆𑀲𑀧𑀺 𑀢𑀤𑀸𑀭𑀫𑁆𑀫𑀡𑀁 𑀦𑀸𑀦𑀼𑀩𑀦𑁆𑀥𑀓𑀁 𑀧𑀭𑀺𑀘𑀬𑀸𑀪𑀸𑀯𑀢𑁄, 𑀏𑀯𑀁 𑀅𑀢𑁆𑀢𑀦𑁄 𑀓𑀫𑁆𑀫𑀲𑁆𑀲 𑀦𑀺𑀫𑀺𑀢𑁆𑀢𑀪𑀽𑀢𑁂𑀧𑀺 𑀢𑀲𑁆𑀲 𑀲𑀳𑀓𑀸𑀭𑀻𑀓𑀸𑀭𑀡𑀸𑀳𑀺 𑀅𑀧𑀭𑀺𑀬𑀸𑀤𑀺𑀦𑁆𑀦𑁂 𑀫𑀳𑀕𑁆𑀕𑀢𑀧𑁆𑀧𑀫𑀸𑀡𑁂 𑀆𑀭𑀫𑁆𑀫𑀡𑁂 𑀧𑀭𑀺𑀘𑀬𑀸𑀪𑀸𑀯𑀢𑁄 𑀧𑀭𑀺𑀢𑁆𑀢𑀯𑀺𑀧𑀸𑀓𑁄 𑀦 𑀧𑀯𑀢𑁆𑀢𑀢𑀺, 𑀓𑀫𑁆𑀫𑀦𑀺𑀫𑀺𑀢𑁆𑀢𑀸𑀭𑀫𑁆𑀫𑀡𑁄 𑀧𑀦 𑀚𑀸𑀬𑀫𑀸𑀦𑁄 𑀧𑀭𑀺𑀢𑁆𑀢𑁂𑀦𑁂𑀯 𑀢𑁂𑀦 𑀳𑁄𑀢𑀻𑀢𑀺 𑀆𑀳 ‘‘𑀧𑀝𑀺𑀲𑀦𑁆𑀥𑀺𑀆𑀤𑀺𑀪𑀽𑀢𑁄’’𑀢𑀺𑀆𑀤𑀺. 𑀬𑀲𑁆𑀫𑀸 𑀧𑀦𑀸𑀢𑀺𑀆𑀤𑀺𑀦𑀸 𑀧𑀸𑀴𑀺𑀬𑀸𑀯 𑀬𑀣𑀸𑀯𑀼𑀢𑁆𑀢𑀫𑀢𑁆𑀣𑀁 𑀦𑀺𑀘𑁆𑀙𑀺𑀦𑁄𑀢𑀺. 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁄 𑀳𑀺 𑀏𑀢𑁆𑀣 𑀅𑀥𑀺𑀧𑁆𑀧𑁂𑀢𑁄 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀸𑀦𑀁 𑀪𑀺𑀦𑁆𑀦𑀸𑀭𑀫𑁆𑀫𑀡𑀢𑀸𑀬 𑀯𑀼𑀢𑁆𑀢𑀢𑁆𑀢𑀸. 𑀦 𑀘𑀸𑀢𑀺𑀆𑀤𑀺𑀦𑀸 𑀧𑀭𑀺𑀢𑁆𑀢𑀯𑀺𑀧𑀸𑀓𑀸 𑀏𑀯 𑀇𑀥 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀯𑀼𑀢𑁆𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀅𑀢𑁆𑀣𑀼𑀤𑁆𑀥𑀸𑀭𑀓𑀡𑁆𑀟𑁂.

𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀸𑀦𑀁 𑀲𑀢𑀺𑀯𑀺𑀭𑀳𑀺𑀢𑀲𑁆𑀲 𑀓𑀸𑀬𑀓𑀫𑁆𑀫𑀲𑁆𑀲 𑀲𑀫𑁆𑀪𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀸𑀲𑀦𑀸𑀯𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀅𑀯𑀻𑀢𑀭𑀸𑀕𑀸𑀦𑀁 𑀅𑀧𑀭𑀺𑀢𑁆𑀢𑁂𑀧𑀺 𑀓𑀢𑁆𑀣𑀘𑀺 𑀆𑀭𑀫𑁆𑀫𑀡𑁂 𑀲𑀺𑀬𑀸 𑀘𑁂𑀢𑀲𑁄 𑀉𑀧𑁆𑀧𑀺𑀮𑀸𑀯𑀺𑀢𑀢𑁆𑀢𑀦𑁆𑀢𑀺 ‘‘𑀓𑀺𑀮𑁂𑀲𑀯𑀺𑀭𑀳𑁂’’𑀢𑀺 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀁. 𑀆𑀤𑀭𑀸𑀓𑀭𑀡𑀯𑀲𑁂𑀦𑁂𑀯𑀸𑀢𑀺 𑀆𑀤𑀭𑀸𑀓𑀭𑀡𑀫𑀢𑁆𑀢𑀯𑀲𑁂𑀦𑁂𑀯𑀸𑀢𑀺 𑀯𑀺𑀲𑁂𑀲𑀦𑀺𑀯𑀢𑁆𑀢𑀺𑀅𑀢𑁆𑀣𑁄 𑀏𑀯-𑀲𑀤𑁆𑀤𑁄 𑀢𑀫𑁂𑀯 𑀦𑀺𑀯𑀢𑁆𑀢𑁂𑀢𑀩𑁆𑀩𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀺, 𑀦𑀸𑀜𑁆𑀜𑀣𑀸. 𑀓𑁄𑀲𑀚𑁆𑀚𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀤𑁄𑀲𑀸𑀤𑀬𑁄 𑀲𑀗𑁆𑀕𑀡𑁆𑀳𑀸𑀢𑀺. 𑀆𑀤𑀭𑀸𑀓𑀭𑀡𑀁 𑀦𑀺𑀭𑀼𑀲𑁆𑀲𑀼𑀓𑁆𑀓𑀢𑀸 𑀏𑀯𑀸𑀢𑀺 𑀆𑀤𑀭𑀁 𑀓𑀭𑁄𑀦𑁆𑀢𑀸 𑀦𑀺𑀭𑀼𑀲𑁆𑀲𑀼𑀓𑁆𑀓𑀪𑀸𑀯𑁂𑀦𑁂𑀯 𑀦 𑀳𑁄𑀦𑁆𑀢𑀺, 𑀦 𑀧𑀦 𑀆𑀤𑀭𑀁 𑀦 𑀓𑀭𑁄𑀦𑁆𑀢𑀺𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀓𑀘𑁆𑀘𑁂 𑀧𑀦 ‘‘𑀅𑀓𑀫𑁆𑀫𑀜𑁆𑀜𑀲𑀭𑀻𑀭𑀢𑀸𑀬 𑀅𑀜𑁆𑀜𑀯𑀺𑀳𑀺𑀢𑀢𑀸𑀬 𑀘 𑀔𑀻𑀡𑀸𑀲𑀯𑀸𑀦𑀁 𑀅𑀲𑀓𑁆𑀓𑀘𑁆𑀘𑀤𑀸𑀦𑀸𑀤𑀺𑀧𑀯𑀢𑁆𑀢𑀺 𑀦 𑀅𑀦𑀸𑀤𑀭𑀯𑀲𑁂𑀦𑀸’’𑀢𑀺 𑀯𑀤𑀦𑁆𑀢𑀺.

𑁧𑁪𑁨𑁧. 𑀅𑀢𑀺𑀧𑀕𑀼𑀡𑀸𑀦𑀦𑁆𑀢𑀺 𑀲𑀼𑀪𑀸𑀯𑀺𑀢𑀸𑀦𑀁 𑀲𑀼𑀝𑁆𑀞𑀼𑀢𑀭𑀁 𑀯𑀲𑀺𑀧𑁆𑀧𑀢𑁆𑀢𑀸𑀦𑀁. 𑀏𑀯𑀁 𑀧𑀕𑀼𑀡𑀚𑁆𑀛𑀸𑀦𑁂𑀲𑀼𑀧𑀺 𑀧𑀯𑀢𑁆𑀢𑀺 𑀳𑁄𑀢𑀺 𑀢𑀢𑁆𑀣 𑀯𑀺𑀘𑀸𑀭𑀡𑀼𑀲𑁆𑀲𑀸𑀳𑀲𑁆𑀲 𑀫𑀦𑁆𑀤𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀩𑁆𑀩𑁂 𑀤𑀲𑁆𑀲𑀺𑀢𑀦𑁆𑀢𑀺 ‘‘𑀢𑀻𑀡𑀺 𑀮𑀓𑁆𑀔𑀡𑀸𑀦𑀻𑀢𑀺 𑀅𑀳𑀦𑁆𑀢𑀺 𑀯𑀸’’𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑁂 𑀤𑀲𑁆𑀲𑀺𑀢𑀁. ‘‘𑀅𑀯𑀺𑀚𑁆𑀚𑀫𑀸𑀦𑁄 𑀅𑀧𑀭𑀫𑀢𑁆𑀣𑀪𑀸𑀯𑀢𑁄, 𑀯𑀺𑀚𑁆𑀚𑀫𑀸𑀦𑁄 𑀘 𑀮𑁄𑀓𑀲𑀗𑁆𑀓𑁂𑀢𑀲𑀺𑀤𑁆𑀥𑀺𑀬𑀸 𑀲𑀫𑁆𑀫𑀼𑀢𑀺𑀲𑀘𑁆𑀘𑀪𑀸𑀯𑀢𑁄 𑀅𑀢𑁆𑀣𑁄 𑀅𑀭𑀻𑀬𑀢𑀺 𑀘𑀺𑀢𑁆𑀢𑁂𑀦 𑀕𑀫𑁆𑀫𑀢𑀺 𑀜𑀸𑀬𑀢𑀻’’𑀢𑀺 𑀆𑀘𑀭𑀺𑀬𑀸 𑀯𑀤𑀦𑁆𑀢𑀺. 𑀬𑀢𑁄 𑀢𑀩𑁆𑀩𑀺𑀲𑀬𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀸 𑀦𑀯𑀢𑁆𑀢𑀩𑁆𑀩𑀁 𑀆𑀭𑀫𑁆𑀫𑀡𑀁 𑀏𑀢𑁂𑀲𑀦𑁆𑀢𑀺 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀸𑀢𑀺 𑀅𑀜𑁆𑀜𑀧𑀤𑀢𑁆𑀣𑀲𑀫𑀸𑀲𑀯𑀲𑁂𑀦 𑀯𑀼𑀘𑁆𑀘𑀦𑁆𑀢𑀺. 𑀅𑀬𑀁 𑀧𑀦 𑀯𑀸𑀤𑁄 𑀳𑁂𑀯𑀢𑁆𑀣𑀺𑀓𑀯𑀸𑀤𑁄 𑀯𑀺𑀬 𑀳𑁄𑀢𑀻𑀢𑀺 𑀢𑀲𑁆𑀲 𑀅𑀘𑁆𑀘𑀦𑁆𑀢𑀁 𑀅𑀯𑀺𑀚𑁆𑀚𑀫𑀸𑀦𑀢𑀁 𑀫𑀜𑁆𑀜𑀦𑁆𑀢𑁄 𑀇𑀢𑁄 𑀘 𑀅𑀜𑁆𑀜𑀣𑀸 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀫𑁆𑀫𑀼𑀢𑀺𑀲𑀘𑁆𑀘𑁂 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀓𑀣𑀁 𑀧𑀦 𑀢𑀲𑁆𑀲 𑀅𑀘𑁆𑀘𑀦𑁆𑀢𑀫𑀯𑀺𑀚𑁆𑀚𑀫𑀸𑀦𑀢𑁆𑀢𑁂 𑀢𑀩𑁆𑀩𑀺𑀲𑀬𑀸𑀦𑀁 𑀥𑀫𑁆𑀫𑀸𑀦𑀁 𑀧𑀯𑀢𑁆𑀢𑀺 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀪𑀸𑀯𑁄 𑀘𑀸𑀢𑀺 𑀆𑀳 ‘‘𑀅𑀯𑀺𑀚𑁆𑀚𑀫𑀸𑀦𑀫𑁆𑀧𑀻’’𑀢𑀺𑀆𑀤𑀺. 𑀧𑀭𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀸𑀢𑀺 𑀦 𑀯𑀢𑁆𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀸𑀢𑀺 𑀧𑀭𑀺𑀢𑁆𑀢𑀸𑀤𑀬𑁄 𑀯𑀺𑀬 𑀢𑀲𑁆𑀲 𑀯𑀺𑀲𑀼𑀁 𑀯𑀯𑀢𑁆𑀣𑀺𑀢𑀪𑀸𑀯𑀁 𑀦𑀺𑀲𑁂𑀥𑁂𑀢𑀺.

𑀯𑀺𑀓𑁆𑀔𑀺𑀧𑀦𑀁 𑀦𑀸𑀦𑀸𑀭𑀫𑁆𑀫𑀡𑁂𑀲𑀼 𑀘𑀺𑀢𑁆𑀢𑀲𑁆𑀲 𑀧𑀯𑀢𑁆𑀢𑀦𑀁. 𑀅𑀦𑀯𑀝𑁆𑀞𑀸𑀦𑀁 𑀏𑀓𑀲𑁆𑀫𑀺𑀁𑀬𑁂𑀯 𑀧𑀯𑀢𑁆𑀢𑀺𑀢𑀼𑀁 𑀅𑀧𑁆𑀧𑀤𑀸𑀦𑀁. 𑀤𑀼𑀢𑀺𑀬𑀸𑀤𑀺𑀫𑀕𑁆𑀕𑀧𑀼𑀭𑁂𑀘𑀸𑀭𑀺𑀓𑀁 𑀨𑀮𑀲𑀫𑀸𑀧𑀢𑁆𑀢𑀺𑀧𑀼𑀭𑁂𑀘𑀸𑀭𑀺𑀓𑀜𑁆𑀘 𑀓𑀸𑀫𑀸𑀯𑀘𑀭𑀜𑀸𑀡𑀁 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑀸𑀬 𑀮𑁄𑀓𑀼𑀢𑁆𑀢𑀭𑀘𑀺𑀢𑁆𑀢𑀲𑁆𑀲 𑀆𑀯𑀚𑁆𑀚𑀦𑀝𑁆𑀞𑀸𑀦𑀺𑀬𑀢𑀸𑀬 𑀘 𑀧𑀞𑀫𑀫𑀕𑁆𑀕𑀧𑀼𑀭𑁂𑀘𑀸𑀭𑀺𑀓𑀜𑀸𑀡𑁂𑀦 𑀲𑀫𑀸𑀦𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀕𑁄𑀢𑁆𑀭𑀪𑀼𑀯𑁄𑀤𑀸𑀦𑁂 𑀕𑁄𑀢𑁆𑀭𑀪𑀽𑀢𑀺 𑀕𑀳𑁂𑀢𑁆𑀯𑀸’’𑀢𑀺.

𑀲𑀩𑁆𑀩𑀢𑁆𑀣𑀧𑀸𑀤𑀓𑀦𑁆𑀢𑀺 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂, 𑀧𑀬𑁄𑀚𑀦𑁂 𑀯𑀸 𑀪𑀼𑀫𑁆𑀫𑀁 ‘‘𑀘𑁂𑀢𑀲𑁄 𑀅𑀯𑀽𑀧𑀲𑀫𑁂’’𑀢𑀺𑀆𑀤𑀻𑀲𑀼 𑀯𑀺𑀬. 𑀢𑁂𑀦 𑀲𑀩𑁆𑀩𑁂𑀲𑀼 𑀯𑀺𑀧𑀲𑁆𑀲𑀦𑀸𑀤𑀻𑀲𑀼 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂𑀲𑀽𑀢𑀺 𑀅𑀢𑁆𑀣𑁄. 𑀢𑁂𑀦𑁂𑀯𑀸𑀳 ‘‘𑀲𑀩𑁆𑀩𑁂𑀲𑀽’’𑀢𑀺𑀆𑀤𑀺. 𑀅𑀢𑀻𑀢𑀁𑀲𑀜𑀸𑀡𑀲𑁆𑀲 𑀓𑀸𑀫𑀸𑀯𑀘𑀭𑀢𑁆𑀢𑀸 𑀇𑀤𑁆𑀥𑀺𑀯𑀺𑀥𑀸𑀤𑀻𑀲𑀼 𑀢𑀲𑁆𑀲 𑀅𑀕𑁆𑀕𑀳𑀡𑀁 𑀤𑀝𑁆𑀞𑀩𑁆𑀩𑀁. 𑀢𑀲𑁆𑀲 𑀧𑀦 𑀅𑀢𑀻𑀢𑀲𑀢𑁆𑀢𑀤𑀺𑀯𑀲𑀢𑁄 𑀳𑁂𑀝𑁆𑀞𑀸 𑀬𑀸𑀯 𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀝𑀺𑀲𑀦𑁆𑀥𑀺, 𑀢𑀸𑀯 𑀯𑀺𑀲𑀬𑁄𑀢𑀺 𑀯𑀤𑀦𑁆𑀢𑀺. 𑀅𑀢𑀻𑀢𑀲𑀢𑁆𑀢𑀤𑀺𑀯𑀲𑁂𑀲𑀼𑀧𑀺 𑀔𑀦𑁆𑀥𑀧𑀝𑀺𑀩𑀤𑁆𑀥𑀸𑀦𑀁 𑀢𑀲𑁆𑀲 𑀯𑀺𑀲𑀬𑀪𑀸𑀯𑁄 𑀬𑀼𑀢𑁆𑀢𑁄 𑀯𑀺𑀬 𑀤𑀺𑀲𑁆𑀲𑀢𑀺.

𑀧𑀸𑀤𑀓𑀚𑁆𑀛𑀸𑀦𑀘𑀺𑀢𑁆𑀢𑀁 𑀧𑀭𑀺𑀓𑀫𑁆𑀫𑁂𑀳𑀺 𑀕𑀳𑁂𑀢𑁆𑀯𑀸𑀢𑀺 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 ‘‘𑀇𑀤𑀁 𑀘𑀺𑀢𑁆𑀢𑀁 𑀯𑀺𑀬 𑀅𑀬𑀁 𑀓𑀸𑀬𑁄 𑀲𑀻𑀖𑀕𑀫𑀦𑁄 𑀳𑁄𑀢𑀽’’𑀢𑀺 𑀧𑀼𑀩𑁆𑀩𑀪𑀸𑀕𑀧𑀭𑀺𑀓𑀫𑁆𑀫𑁂𑀳𑀺 𑀭𑀽𑀧𑀓𑀸𑀬𑀲𑁆𑀲 𑀯𑀺𑀬 𑀧𑀸𑀤𑀓𑀚𑁆𑀛𑀸𑀦𑀘𑀺𑀢𑁆𑀢𑀲𑁆𑀲𑀧𑀺 𑀕𑀳𑁂𑀢𑀩𑁆𑀩𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀇𑀤𑀁 𑀧𑀦 𑀅𑀥𑀺𑀝𑁆𑀞𑀸𑀦𑀁 𑀏𑀯𑀁 𑀧𑀯𑀢𑁆𑀢𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀥𑀺𑀧𑁆𑀧𑁂𑀢𑀝𑁆𑀞𑀸𑀦𑀧𑀸𑀧𑀼𑀡𑀦𑀢𑁆𑀣𑀁 𑀕𑀦𑁆𑀢𑀼𑀓𑀸𑀫𑀢𑀁 𑀧𑀼𑀭𑀓𑁆𑀔𑀢𑁆𑀯𑀸 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 ‘‘𑀇𑀤𑀁 𑀘𑀺𑀢𑁆𑀢𑀁 𑀯𑀺𑀬 𑀅𑀬𑀁 𑀓𑀸𑀬𑁄 𑀲𑀻𑀖𑀕𑀫𑀦𑁄 𑀳𑁄𑀢𑀽’’𑀢𑀺 𑀓𑀭𑀚𑀓𑀸𑀬𑀸𑀭𑀫𑁆𑀫𑀡𑀁 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀪𑀯𑀗𑁆𑀕𑀁 𑀑𑀢𑀭𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀧𑀼𑀦 𑀪𑀯𑀗𑁆𑀕𑁂 𑀑𑀢𑀺𑀡𑁆𑀡𑁂 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁 𑀭𑀽𑀧𑀓𑀸𑀬𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺 𑀅𑀦𑀼𑀮𑁄𑀫𑀸𑀦𑀺 𑀘. 𑀢𑀢𑁄 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑀫𑁆𑀧𑀺 𑀢𑀫𑁂𑀯𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀬𑀣𑀸𑀥𑀺𑀧𑁆𑀧𑁂𑀢𑀝𑁆𑀞𑀸𑀦𑀁 𑀕𑀢𑁄𑀬𑁂𑀯 𑀳𑁄𑀢𑀺. 𑀏𑀯𑀁 𑀅𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀕𑀘𑁆𑀙𑀦𑁆𑀢𑁄 𑀧𑀦𑀸𑀬𑀁 𑀓𑀺𑀁 𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀸𑀤𑀓𑁆𑀔𑀡𑁂 𑀕𑀘𑁆𑀙𑀢𑀺, 𑀉𑀤𑀸𑀳𑀼 𑀞𑀺𑀢𑀺𑀓𑁆𑀔𑀡𑁂 𑀪𑀗𑁆𑀕𑀓𑁆𑀔𑀡𑁂 𑀯𑀸𑀢𑀺? 𑀢𑀻𑀲𑀼 𑀔𑀡𑁂𑀲𑀼 𑀕𑀘𑁆𑀙𑀢𑀻𑀢𑀺 𑀇𑀘𑁆𑀙𑀦𑁆𑀢𑀺. 𑀘𑀺𑀢𑁆𑀢𑁂𑀢𑀺 𑀧𑀸𑀤𑀓𑀚𑁆𑀛𑀸𑀦𑀘𑀺𑀢𑁆𑀢𑁂. 𑀲𑀫𑁄𑀤𑀳𑀢𑀻𑀢𑀺 𑀘𑀺𑀢𑁆𑀢𑀸𑀦𑀼𑀕𑀢𑀺𑀓𑀁 𑀘𑀺𑀢𑁆𑀢𑀁 𑀯𑀺𑀬 𑀲𑀻𑀖𑀕𑀫𑀦𑀁 𑀓𑀭𑁄𑀢𑀻𑀢𑀺 𑀅𑀢𑁆𑀣𑁄. 𑀬𑀣𑀸 𑀳𑀺 𑀘𑀺𑀢𑁆𑀢𑀁 𑀇𑀘𑁆𑀙𑀺𑀢𑀓𑁆𑀔𑀡𑁂 𑀅𑀢𑀺𑀤𑀽𑀭𑁂𑀧𑀺 𑀯𑀺𑀲𑀬𑀁 𑀆𑀭𑀩𑁆𑀪 𑀧𑀯𑀢𑁆𑀢𑀢𑀺, 𑀏𑀯𑀁 𑀭𑀽𑀧𑀓𑀸𑀬𑀲𑁆𑀲𑀧𑀺 𑀮𑀳𑀼𑀧𑀭𑀺𑀯𑀢𑁆𑀢𑀺𑀪𑀸𑀯𑀸𑀧𑀸𑀤𑀦𑀁 𑀘𑀺𑀢𑁆𑀢𑀯𑀲𑁂𑀦 𑀓𑀸𑀬𑀧𑀭𑀺𑀡𑀸𑀫𑀦𑀁. 𑀦 𑀘𑁂𑀢𑁆𑀣 𑀭𑀽𑀧𑀥𑀫𑁆𑀫𑀸𑀦𑀁 𑀤𑀦𑁆𑀥𑀧𑀭𑀺𑀯𑀢𑁆𑀢𑀺𑀪𑀸𑀯𑀢𑁄 𑀏𑀓𑀘𑀺𑀢𑁆𑀢𑀓𑁆𑀔𑀡𑁂𑀦 𑀤𑁂𑀲𑀦𑁆𑀢𑀭𑀼𑀧𑁆𑀧𑀢𑁆𑀢𑀺 𑀦 𑀬𑀼𑀚𑁆𑀚𑀢𑀻𑀢𑀺 𑀯𑀢𑁆𑀢𑀩𑁆𑀩𑀸 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑁂𑀦 𑀭𑀽𑀧𑀓𑀸𑀬𑀲𑁆𑀲 𑀮𑀳𑀼𑀧𑀭𑀺𑀯𑀢𑁆𑀢𑀺𑀪𑀸𑀯𑀲𑁆𑀲 𑀆𑀧𑀸𑀤𑀺𑀢𑀢𑁆𑀢𑀸. 𑀢𑁂𑀦𑁂𑀯𑀸𑀳 ‘‘𑀘𑀺𑀢𑁆𑀢𑀯𑀲𑁂𑀦 𑀓𑀸𑀬𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀲𑀼𑀔𑀲𑀜𑁆𑀜𑀜𑁆𑀘 𑀮𑀳𑀼𑀲𑀜𑁆𑀜𑀜𑁆𑀘 𑀑𑀓𑁆𑀓𑀫𑀺𑀢𑁆𑀯𑀸 𑀅𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀩𑁆𑀭𑀳𑁆𑀫𑀮𑁄𑀓𑀁 𑀕𑀘𑁆𑀙𑀢𑀻’’𑀢𑀺 (𑀯𑀺𑀲𑀼𑀤𑁆𑀥𑀺. 𑁨.𑁩𑁯𑁭). 𑀅𑀘𑀺𑀦𑁆𑀢𑁂𑀬𑁆𑀬𑁄 𑀳𑀺 𑀇𑀤𑁆𑀥𑀺𑀫𑀦𑁆𑀢𑀸𑀦𑀁 𑀇𑀤𑁆𑀥𑀺𑀯𑀺𑀲𑀬𑁄𑀢𑀺.

𑀘𑀺𑀢𑁆𑀢𑀲𑀦𑁆𑀢𑀸𑀦𑀁 𑀭𑀽𑀧𑀓𑀸𑀬𑁂 𑀲𑀫𑁄𑀤𑀳𑀺𑀢𑀦𑁆𑀢𑀺 𑀬𑀢𑁆𑀢𑀓𑁂𑀳𑀺 𑀘𑀺𑀢𑁆𑀢𑁂𑀳𑀺 𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀬𑀣𑀸𑀥𑀺𑀧𑁆𑀧𑁂𑀢𑀝𑁆𑀞𑀸𑀦𑀧𑁆𑀧𑀢𑁆𑀢𑀺, 𑀢𑀢𑁆𑀢𑀓𑀸𑀦𑀁 𑀘𑀺𑀢𑁆𑀢𑀸𑀦𑀁 𑀧𑀩𑀦𑁆𑀥𑀲𑁆𑀲 𑀤𑀦𑁆𑀥𑀕𑀫𑀦𑀓𑀭𑀡𑀢𑁄 𑀇𑀫𑀲𑁆𑀲 𑀅𑀥𑀺𑀝𑁆𑀞𑀸𑀦𑀲𑁆𑀲 𑀓𑀭𑀚𑀓𑀸𑀬𑁂 𑀆𑀭𑁄𑀧𑀺𑀢𑀁 𑀢𑀤𑀦𑀼𑀕𑀼𑀡𑀦𑁆𑀢𑀺 𑀅𑀢𑁆𑀣𑁄. 𑀇𑀤𑀫𑁆𑀧𑀺 𑀅𑀥𑀺𑀝𑁆𑀞𑀸𑀦𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀸𑀬 ‘‘𑀅𑀬𑀁 𑀓𑀸𑀬𑁄 𑀯𑀺𑀬 𑀇𑀤𑀁 𑀘𑀺𑀢𑁆𑀢𑀁 𑀤𑀦𑁆𑀥𑀕𑀫𑀦𑀁 𑀳𑁄𑀢𑀽’’𑀢𑀺 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑀼𑀝𑁆𑀞𑀺𑀢𑀚𑁆𑀛𑀸𑀦𑀘𑀺𑀢𑁆𑀢𑀸𑀭𑀫𑁆𑀫𑀡𑀁 𑀧𑀭𑀺𑀓𑀫𑁆𑀫𑀁 𑀓𑀢𑁆𑀯𑀸 𑀪𑀯𑀗𑁆𑀕𑀁 𑀑𑀢𑀭𑀺𑀢𑁆𑀯𑀸 𑀪𑀯𑀗𑁆𑀕𑀢𑁄 𑀯𑀼𑀝𑁆𑀞𑀸𑀬 𑀧𑀸𑀤𑀓𑀚𑁆𑀛𑀸𑀦𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀧𑀼𑀦 𑀪𑀯𑀗𑁆𑀕𑁂 𑀑𑀢𑀺𑀡𑁆𑀡𑁂 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀁 𑀧𑀸𑀤𑀓𑀚𑁆𑀛𑀸𑀦𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺 𑀅𑀦𑀼𑀮𑁄𑀫𑀸𑀦𑀺 𑀘. 𑀢𑀢𑁄 𑀅𑀥𑀺𑀝𑁆𑀞𑀸𑀦𑀘𑀺𑀢𑁆𑀢𑀫𑁆𑀧𑀺 𑀢𑀫𑁂𑀯𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀉𑀧𑁆𑀧𑀚𑁆𑀚𑀢𑀺. 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀅𑀦𑁆𑀢𑀭𑀸 𑀧𑀜𑁆𑀘𑀯𑀺𑀜𑁆𑀜𑀸𑀡𑀸𑀤𑀻𑀲𑀼 𑀉𑀧𑁆𑀧𑀦𑁆𑀦𑁂𑀲𑀼𑀧𑀺 𑀅𑀧𑀢𑀦𑁆𑀢𑁄 𑀇𑀘𑁆𑀙𑀺𑀢𑀝𑁆𑀞𑀸𑀦𑀁 𑀕𑀘𑁆𑀙𑀢𑀺. 𑀏𑀯𑀁 𑀕𑀘𑁆𑀙𑀦𑁆𑀢𑁄 𑀘 𑀲𑀘𑁂 𑀇𑀘𑁆𑀙𑀢𑀺, 𑀧𑀣𑀯𑀻𑀓𑀲𑀺𑀡𑀯𑀲𑁂𑀦 𑀆𑀓𑀸𑀲𑁂 𑀫𑀕𑁆𑀕𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀧𑀤𑀲𑀸 𑀕𑀘𑁆𑀙𑀢𑀺. 𑀲𑀘𑁂 𑀇𑀘𑁆𑀙𑀢𑀺, 𑀯𑀸𑀬𑁄𑀓𑀲𑀺𑀡𑀯𑀲𑁂𑀦 𑀯𑀸𑀬𑀼𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀢𑀽𑀮𑀧𑀺𑀘𑀼 𑀯𑀺𑀬 𑀯𑀸𑀬𑀼𑀦𑀸 𑀕𑀘𑁆𑀙𑀢𑀺. 𑀅𑀧𑀺𑀘 𑀕𑀦𑁆𑀢𑀼𑀓𑀸𑀫𑀢𑀸𑀯 𑀏𑀢𑁆𑀣 𑀧𑀫𑀸𑀡𑀁. 𑀲𑀢𑀺 𑀳𑀺 𑀕𑀦𑁆𑀢𑀼𑀓𑀸𑀫𑀢𑀸𑀬 𑀏𑀯𑀁 𑀓𑀢𑀸𑀥𑀺𑀝𑁆𑀞𑀸𑀦𑁄 𑀅𑀥𑀺𑀝𑁆𑀞𑀸𑀦𑀯𑁂𑀕𑀓𑁆𑀔𑀺𑀢𑁆𑀢𑁄𑀯𑁂𑀲𑁄 𑀇𑀲𑁆𑀲𑀸𑀲𑀧𑀓𑁆𑀔𑀺𑀢𑁆𑀢𑁄 𑀲𑀭𑁄 𑀯𑀺𑀬 𑀤𑀺𑀲𑁆𑀲𑀫𑀸𑀦𑁄 𑀕𑀘𑁆𑀙𑀢𑀻𑀢𑀺. 𑀢𑀢𑁆𑀣 𑀆𑀓𑀸𑀲𑁂 𑀫𑀕𑁆𑀕𑀁 𑀦𑀺𑀫𑁆𑀫𑀺𑀦𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀯𑀺𑀦𑀸𑀧𑀺 𑀅𑀪𑀺𑀜𑁆𑀜𑀸𑀜𑀸𑀡𑁂𑀦 𑀧𑀓𑀢𑀺𑀧𑀣𑀯𑀺𑀬𑀁 𑀯𑀺𑀬 𑀕𑀘𑁆𑀙𑀢𑀺. 𑀢𑁂𑀦𑁂𑀯 ‘‘𑀧𑀤𑀲𑀸 𑀕𑀘𑁆𑀙𑀢𑀻’’𑀢𑀺 𑀯𑀼𑀢𑁆𑀢𑀁. 𑀯𑀸𑀬𑀼𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀅𑀪𑀺𑀜𑁆𑀜𑀸𑀜𑀸𑀡𑀲𑀫𑀼𑀝𑁆𑀞𑀺𑀢𑀯𑀸𑀬𑁄𑀥𑀸𑀢𑀼𑀧𑀭𑀫𑁆𑀧𑀭𑀸𑀬 𑀕𑀘𑁆𑀙𑀢𑀺. 𑀉𑀪𑀬𑀢𑁆𑀣𑀸𑀧𑀺 𑀅𑀦𑁆𑀢𑀭𑀸 𑀯𑀦𑀭𑀸𑀫𑀡𑀻𑀬𑀓𑀸𑀤𑀻𑀦𑀺 𑀧𑁂𑀓𑁆𑀔𑀫𑀸𑀦𑁄 𑀆𑀧𑀸𑀣𑀕𑀢𑁂 𑀲𑀤𑁆𑀤𑁂 𑀘 𑀲𑀼𑀡𑀫𑀸𑀦𑁄 𑀕𑀘𑁆𑀙𑀢𑀻𑀢𑀺 𑀯𑀤𑀦𑁆𑀢𑀺. 𑀓𑁂𑀘𑀺 𑀧𑀦 ‘‘𑀅𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀏𑀓𑀘𑀺𑀢𑁆𑀢𑀓𑁆𑀔𑀡𑁂𑀦𑁂𑀯 𑀇𑀘𑁆𑀙𑀺𑀢𑀝𑁆𑀞𑀸𑀦𑀕𑀫𑀦𑁂 𑀤𑀺𑀲𑁆𑀲𑀫𑀸𑀦𑁂𑀦 𑀓𑀸𑀬𑁂𑀦 𑀧𑀤𑀲𑀸 𑀯𑀸𑀬𑀼𑀦𑀸 𑀘 𑀕𑀫𑀦𑁂 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀲𑀫𑀼𑀝𑁆𑀞𑀺𑀢𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀯𑀺𑀧𑁆𑀨𑀸𑀭𑁂𑀦 𑀕𑀫𑀦’’𑀦𑁆𑀢𑀺 𑀯𑀤𑀦𑁆𑀢𑀺. 𑀅𑀧𑀭𑁂 ‘‘𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀲𑁆𑀲 𑀯𑀺𑀜𑁆𑀜𑀢𑁆𑀢𑀺𑀦𑀺𑀩𑁆𑀩𑀢𑁆𑀢𑀦𑀓𑀺𑀘𑁆𑀘𑀁 𑀦𑀢𑁆𑀣𑀻’’𑀢𑀺 𑀯𑀤𑀦𑁆𑀢𑀺.

𑀅𑀥𑀺𑀝𑁆𑀞𑀸𑀦𑀤𑁆𑀯𑀬𑀦𑁆𑀢𑀺 𑀘𑀺𑀢𑁆𑀢𑀓𑀸𑀬𑀯𑀲𑁂𑀦 𑀓𑀸𑀬𑀘𑀺𑀢𑁆𑀢𑀧𑀭𑀺𑀡𑀸𑀫𑀦𑀪𑀽𑀢𑀁 𑀭𑀽𑀧𑀓𑀸𑀬𑀧𑀸𑀤𑀓𑀚𑁆𑀛𑀸𑀦𑀘𑀺𑀢𑁆𑀢𑀸𑀭𑀫𑁆𑀫𑀡𑀁 𑀉𑀪𑀬𑀁 𑀅𑀥𑀺𑀝𑁆𑀞𑀸𑀦𑀁. 𑀢𑀁𑀲𑀫𑁆𑀧𑀬𑀼𑀢𑁆𑀢𑀸𑀬𑀸𑀢𑀺 𑀬𑀣𑀸𑀯𑀼𑀢𑁆𑀢𑀅𑀥𑀺𑀝𑁆𑀞𑀸𑀦𑀤𑁆𑀯𑀬𑀲𑀫𑁆𑀧𑀬𑀼𑀢𑁆𑀢𑀸𑀬. 𑀲𑀼𑀔𑀲𑀜𑁆𑀜𑀸𑀮𑀳𑀼𑀲𑀜𑁆𑀜𑀸𑀪𑀸𑀯𑀢𑁄𑀢𑀺 𑀲𑀼𑀔𑀲𑀜𑁆𑀜𑀸𑀮𑀳𑀼𑀲𑀜𑁆𑀜𑀸𑀲𑀩𑁆𑀪𑀸𑀯𑀢𑁄, 𑀢𑀩𑁆𑀪𑀸𑀯𑀁 𑀆𑀧𑀚𑁆𑀚𑀦𑀢𑁄𑀢𑀺 𑀅𑀢𑁆𑀣𑁄. 𑀲𑀼𑀔𑀲𑀜𑁆𑀜𑀸𑀢𑀺 𑀘𑁂𑀢𑁆𑀣 𑀉𑀧𑁂𑀓𑁆𑀔𑀸𑀲𑀫𑁆𑀧𑀬𑀼𑀢𑁆𑀢𑀸 𑀲𑀜𑁆𑀜𑀸. 𑀉𑀧𑁂𑀓𑁆𑀔𑀸 𑀳𑀺 ‘‘𑀲𑀦𑁆𑀢𑀁 𑀲𑀼𑀔’’𑀦𑁆𑀢𑀺 𑀯𑀼𑀢𑁆𑀢𑀸. 𑀲𑀸𑀬𑁂𑀯 𑀘 𑀲𑀜𑁆𑀜𑀸 𑀦𑀻𑀯𑀭𑀡𑁂𑀳𑀺 𑀘𑁂𑀯 𑀯𑀺𑀢𑀓𑁆𑀓𑀸𑀤𑀻𑀳𑀺 𑀧𑀘𑁆𑀘𑀦𑀻𑀓𑁂𑀳𑀺 𑀘 𑀯𑀺𑀫𑀼𑀢𑁆𑀢𑀢𑁆𑀢𑀸 ‘‘𑀮𑀳𑀼𑀲𑀜𑁆𑀜𑀸’’𑀢𑀺𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀸𑀳𑀺 𑀲𑀫𑁄𑀓𑁆𑀓𑀦𑁆𑀢𑀸𑀳𑀺 𑀭𑀽𑀧𑀓𑀸𑀬𑁄𑀧𑀺 𑀢𑀽𑀮𑀧𑀺𑀘𑀼 𑀯𑀺𑀬 𑀲𑀮𑁆𑀮𑀳𑀼𑀓𑁄 𑀳𑁄𑀢𑀺. 𑀲𑁄 𑀏𑀯𑀁 𑀯𑀸𑀢𑀓𑁆𑀔𑀺𑀢𑁆𑀢𑀢𑀽𑀮𑀧𑀺𑀘𑀼𑀦𑀸 𑀯𑀺𑀬 𑀲𑀮𑁆𑀮𑀳𑀼𑀓𑁂𑀦 𑀏𑀓𑀘𑀺𑀢𑁆𑀢𑀓𑁆𑀔𑀡𑁂𑀦 𑀅𑀤𑀺𑀲𑁆𑀲𑀫𑀸𑀦𑁂𑀦 𑀘 𑀓𑀸𑀬𑁂𑀦 𑀬𑀣𑀸𑀭𑀼𑀘𑀺 𑀕𑀘𑁆𑀙𑀢𑀻𑀢𑀺.

‘‘𑀫𑀼𑀢𑁆𑀢𑁄 𑀯𑀢𑀫𑁆𑀳𑀺 𑀢𑀸𑀬 𑀅𑀦𑀢𑁆𑀣𑀲𑀁𑀳𑀺𑀢𑀸𑀬 𑀤𑀼𑀓𑁆𑀓𑀭𑀓𑀸𑀭𑀺𑀓𑀸𑀬, 𑀲𑀸𑀥𑀼 𑀯𑀢𑀫𑁆𑀳𑀺 𑀲𑀫𑁆𑀫𑀸𑀲𑀫𑁆𑀩𑁄𑀥𑀺𑀁 𑀲𑀫𑁆𑀩𑀼𑀚𑁆𑀛’’𑀦𑁆𑀢𑀺 (𑀲𑀁. 𑀦𑀺. 𑁧.𑁧𑁩𑁭) 𑀧𑀯𑀢𑁆𑀢𑀁 𑀪𑀕𑀯𑀢𑁄 𑀘𑁂𑀢𑁄𑀧𑀭𑀺𑀯𑀺𑀢𑀓𑁆𑀓𑀫𑀜𑁆𑀜𑀸𑀬 𑀫𑀸𑀭𑁄 ‘‘𑀅𑀫𑀼𑀢𑁆𑀢𑀪𑀸𑀯𑀫𑀲𑁆𑀲 𑀓𑀭𑀺𑀲𑁆𑀲𑀸𑀫𑀻’’𑀢𑀺,

‘‘𑀢𑀧𑁄𑀓𑀫𑁆𑀫𑀸 𑀅𑀧𑀓𑁆𑀓𑀫𑁆𑀫, 𑀬𑀁 𑀦 𑀲𑀼𑀚𑁆𑀛𑀦𑁆𑀢𑀺 𑀫𑀸𑀡𑀯𑀸;

𑀅𑀲𑀼𑀤𑁆𑀥𑁄 𑀫𑀜𑁆𑀜𑀲𑀺 𑀲𑀼𑀤𑁆𑀥𑁄, 𑀲𑀼𑀤𑁆𑀥𑀺𑀫𑀕𑁆𑀕𑀸 𑀅𑀧𑀭𑀤𑁆𑀥𑁄’’𑀢𑀺. (𑀲𑀁. 𑀦𑀺. 𑁧.𑁧𑁩𑁭) 𑁋

𑀆𑀳𑀸𑀢𑀺 𑀏𑀯𑀫𑀸𑀤𑀺𑀁 𑀲𑀦𑁆𑀥𑀸𑀬 ‘‘𑀫𑀸𑀭𑀸𑀤𑀻𑀦𑀫𑁆𑀧𑀺 𑀪𑀕𑀯𑀢𑁄 𑀘𑀺𑀢𑁆𑀢𑀚𑀸𑀦𑀦𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀦𑀺𑀩𑁆𑀩𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀜𑁆𑀘 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑁂𑀦 𑀦𑀺𑀩𑁆𑀩𑀸𑀦𑀸…𑀧𑁂… 𑀜𑀸𑀢𑁂𑀲𑀼 𑀧𑀯𑀢𑁆𑀢𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀦𑀺𑀩𑁆𑀩𑀸𑀦𑀸…𑀧𑁂… 𑀜𑀸𑀢𑁂𑀲𑀽𑀢𑀺 𑀇𑀤𑀁 𑀅𑀪𑀺𑀜𑁆𑀜𑀸𑀜𑀸𑀡𑀲𑁆𑀲 𑀧𑀭𑀢𑁄 𑀧𑀯𑀢𑁆𑀢𑀫𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀡𑀁 𑀅𑀪𑀺𑀜𑁆𑀜𑀸𑀜𑀸𑀡𑀲𑁆𑀲 𑀯𑀺𑀲𑀬𑁂 𑀯𑀺𑀬 𑀅𑀪𑀺𑀜𑁆𑀜𑀸𑀜𑀸𑀡𑀯𑀺𑀲𑀬𑀯𑀺𑀲𑀬𑁂𑀧𑀺 𑀓𑀤𑀸𑀘𑀺 𑀧𑀯𑀢𑁆𑀢𑀺𑀢𑀼𑀁 𑀅𑀭𑀳𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀧𑁆𑀧𑀫𑀸𑀡𑀸𑀭𑀫𑁆𑀫𑀡𑀢𑀦𑁆𑀢𑀺 𑀅𑀧𑁆𑀧𑀫𑀸𑀡𑀔𑀦𑁆𑀥𑀸𑀭𑀫𑁆𑀫𑀡𑀢𑀦𑁆𑀢𑀺 𑀅𑀢𑁆𑀣𑁄. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀲𑁆𑀲 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀪𑀸𑀯𑀤𑀻𑀧𑀓𑁄 𑀓𑁄𑀘𑀺 𑀧𑀸𑀞𑁄 𑀦𑀢𑁆𑀣𑀺, 𑀢𑀲𑁆𑀫𑀸. 𑀧𑀘𑁆𑀘𑀯𑁂𑀓𑁆𑀔𑀡𑀓𑀺𑀘𑁆𑀘𑁂 𑀯𑀼𑀘𑁆𑀘𑀫𑀸𑀦𑁂𑀢𑀺 𑀭𑀼𑀴𑁆𑀳𑀺𑀁 𑀅𑀕𑁆𑀕𑀳𑁂𑀢𑁆𑀯𑀸 𑀫𑀕𑁆𑀕𑀸𑀤𑀻𑀦𑀁 𑀅𑀢𑀻𑀢𑀸𑀦𑀁 𑀧𑀢𑀺 𑀧𑀢𑀺 𑀅𑀯𑁂𑀓𑁆𑀔𑀦𑀁 𑀅𑀦𑀼𑀲𑁆𑀲𑀭𑀡𑀁 𑀧𑀘𑁆𑀘𑀯𑁂𑀓𑁆𑀔𑀡𑀦𑁆𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀲𑁆𑀲 𑀓𑀺𑀘𑁆𑀘𑀁𑀬𑁂𑀯 𑀧𑀘𑁆𑀘𑀯𑁂𑀓𑁆𑀔𑀡𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑁂𑀢𑀺 𑀅𑀢𑁆𑀣𑁄. 𑀅𑀦𑀼𑀜𑁆𑀜𑀸𑀢𑀸𑀢𑀺 𑀤𑀺𑀲𑁆𑀲𑀢𑀻𑀢𑀺 ‘‘𑀫𑀕𑁆𑀕𑀨𑀮𑀦𑀺𑀩𑁆𑀩𑀸𑀦𑀧𑀘𑁆𑀘𑀯𑁂𑀓𑁆𑀔𑀡𑀢𑁄’’𑀢𑀺 𑀇𑀤𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀢𑁆𑀣𑁄 𑁋 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑁂𑀦 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁂 𑀔𑀦𑁆𑀥𑁂 𑀤𑀺𑀲𑁆𑀯𑀸 ‘‘𑀇𑀫𑁂 𑀥𑀫𑁆𑀫𑀸 𑀓𑀺𑀁 𑀦𑀼 𑀔𑁄 𑀆𑀭𑀩𑁆𑀪 𑀧𑀯𑀢𑁆𑀢𑀸’’𑀢𑀺 𑀆𑀯𑀚𑁆𑀚𑁂𑀦𑁆𑀢𑀲𑁆𑀲 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀁 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑁂 𑀧𑀯𑀢𑁆𑀢𑀢𑀻𑀢𑀺. 𑀅𑀦𑀸𑀕𑀢𑀁𑀲𑀜𑀸𑀡𑁂𑀧𑀺 𑀏𑀲𑁂𑀯 𑀦𑀬𑁄.

𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀧𑀭𑀺𑀢𑁆𑀢𑀢𑁆𑀢𑀺𑀓𑁂 ‘‘𑀅𑀧𑁆𑀧𑀫𑀸𑀡𑁄 𑀥𑀫𑁆𑀫𑁄 𑀫𑀳𑀕𑁆𑀕𑀢𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁧𑁨.𑁫𑁮) 𑀏𑀢𑁆𑀣 ‘‘𑀅𑀧𑁆𑀧𑀫𑀸𑀡𑀸 𑀔𑀦𑁆𑀥𑀸 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀧𑀼𑀩𑁆𑀩𑁂𑀦𑀺𑀯𑀸𑀲𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀅𑀚𑁆𑀛𑀢𑁆𑀢𑀢𑁆𑀢𑀺𑀓𑁂 𑀘 ‘‘𑀩𑀳𑀺𑀤𑁆𑀥𑀸𑀥𑀫𑁆𑀫𑁄 𑀩𑀳𑀺𑀤𑁆𑀥𑀸𑀥𑀫𑁆𑀫𑀲𑁆𑀲, 𑀩𑀳𑀺𑀤𑁆𑀥𑀸𑀥𑀫𑁆𑀫𑁄 𑀅𑀚𑁆𑀛𑀢𑁆𑀢𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀏𑀢𑁂𑀲𑀁 𑀯𑀺𑀪𑀗𑁆𑀕𑁂𑀲𑀼 ‘‘𑀩𑀳𑀺𑀤𑁆𑀥𑀸 𑀔𑀦𑁆𑀥𑀸 𑀇𑀤𑁆𑀥𑀺𑀯𑀺𑀥𑀜𑀸𑀡𑀲𑁆𑀲 𑀘𑁂𑀢𑁄𑀧𑀭𑀺𑀬𑀧𑀼𑀩𑁆𑀩𑁂𑀦𑀺𑀯𑀸𑀲𑀬𑀣𑀸𑀓𑀫𑁆𑀫𑀽𑀧𑀕𑀅𑀦𑀸𑀕𑀢𑀁𑀲𑀆𑀯𑀚𑁆𑀚𑀦𑀸𑀬 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁨𑁦.𑁨𑁯) 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁, 𑀦 𑀯𑀼𑀢𑁆𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺. 𑀘𑁂𑀢𑁄𑀧𑀭𑀺𑀬𑀇𑀤𑁆𑀥𑀺𑀯𑀺𑀥𑀸𑀤𑀺𑀜𑀸𑀡𑁂𑀳𑀺 𑀲𑀳 𑀯𑀼𑀢𑁆𑀢𑀢𑁆𑀢𑀸𑀢𑀺 𑀘𑁂, 𑀏𑀯𑀫𑁆𑀧𑀺 𑀯𑀺𑀲𑀼𑀁 𑀯𑀺𑀪𑀚𑀺𑀢𑀩𑁆𑀩𑀁 𑀲𑀺𑀬𑀸. 𑀦 𑀳𑀺 𑀯𑀺𑀲𑀼𑀁 𑀯𑀺𑀪𑀚𑀦𑀸𑀭𑀳𑀁 𑀲𑀳 𑀯𑀺𑀪𑀚𑀢𑀻𑀢𑀺? 𑀦, 𑀅𑀯𑀘𑀦𑀲𑁆𑀲 𑀅𑀜𑁆𑀜𑀓𑀸𑀭𑀡𑀢𑁆𑀢𑀸. 𑀬𑀸𑀦𑀺 𑀳𑀺 𑀧𑀼𑀣𑀼𑀚𑁆𑀚𑀦𑀸𑀦𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀅𑀦𑀸𑀕𑀢𑀁𑀲𑀜𑀸𑀡𑀸𑀦𑀺, 𑀢𑁂𑀲𑀁 𑀅𑀯𑀺𑀲𑀬𑁄 𑀏𑀯 𑀦𑀺𑀩𑁆𑀩𑀸𑀦𑀁. 𑀅𑀭𑀺𑀬𑀸𑀦𑀁 𑀧𑀦 𑀫𑀕𑁆𑀕𑀨𑀮𑀧𑀘𑁆𑀘𑀯𑁂𑀓𑁆𑀔𑀡𑁂𑀳𑀺 𑀲𑀘𑁆𑀙𑀺𑀓𑀢𑀦𑀺𑀩𑁆𑀩𑀸𑀦𑀸𑀦𑀁 𑀇𑀫𑁂𑀳𑀺 𑀜𑀸𑀡𑁂𑀳𑀺 𑀧𑀘𑁆𑀘𑀓𑁆𑀔𑀓𑀭𑀡𑁂 𑀧𑀬𑁄𑀚𑀦𑀁 𑀦𑀢𑁆𑀣𑀻𑀢𑀺 𑀲𑀸𑀥𑀸𑀭𑀡𑁂𑀦 𑀇𑀤𑁆𑀥𑀺𑀯𑀺𑀥𑀜𑀸𑀡𑀸𑀤𑀻𑀦𑀁 𑀕𑀳𑀺𑀢𑀢𑁆𑀢𑀸 𑀦𑀺𑀩𑁆𑀩𑀸𑀦𑀁 𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀦𑀺𑀩𑁆𑀩𑀢𑁆𑀢𑀓𑁆𑀔𑀦𑁆𑀥𑀚𑀸𑀦𑀦𑀫𑀸𑀳, 𑀦 𑀦𑀺𑀩𑁆𑀩𑀢𑁆𑀢𑀓𑀓𑁆𑀔𑀦𑁆𑀥𑀚𑀸𑀦𑀦𑀁. 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀓𑀺𑀘𑁆𑀘𑀜𑁆𑀳𑀺 𑀢𑀦𑁆𑀢𑀺. 𑀅𑀢𑁆𑀣𑁄 𑀲𑀫𑁆𑀪𑀯𑀢𑀻𑀢𑀺 𑀇𑀤𑀁 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲𑀧𑀺 𑀅𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁧𑁪𑁨𑁯. 𑀫𑀕𑁆𑀕𑀸𑀭𑀫𑁆𑀫𑀡𑀢𑁆𑀢𑀺𑀓𑁂 𑀬𑀲𑁆𑀫𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀓𑀡𑁆𑀟𑁂 𑀩𑁄𑀥𑀺𑀢𑁂𑀲𑀼 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀲𑀼 𑀏𑀓𑀦𑁆𑀢𑀢𑁄 𑀫𑀕𑁆𑀕𑀸𑀭𑀫𑁆𑀫𑀡𑀸𑀬𑁂𑀯 𑀓𑁂𑀘𑀺 𑀦𑀢𑁆𑀣𑀺, 𑀫𑀕𑁆𑀕𑀸𑀭𑀫𑁆𑀫𑀡𑀸𑀬𑁂𑀯 𑀧𑀦 𑀓𑀤𑀸𑀘𑀺 𑀫𑀕𑁆𑀕𑀸𑀥𑀺𑀧𑀢𑀺𑀦𑁄 𑀳𑁄𑀦𑁆𑀢𑀺, 𑀢𑀲𑁆𑀫𑀸 ‘‘𑀓𑀢𑀫𑁂 𑀥𑀫𑁆𑀫𑀸 𑀫𑀕𑁆𑀕𑀸𑀭𑀫𑁆𑀫𑀡𑀸’’𑀢𑀺 𑀏𑀓𑀫𑁂𑀯 𑀧𑀼𑀘𑁆𑀙𑀁 𑀓𑀢𑁆𑀯𑀸 𑀢𑀬𑁄𑀧𑀺 𑀓𑁄𑀝𑁆𑀞𑀸𑀲𑀸 𑀮𑀩𑁆𑀪𑀫𑀸𑀦𑀯𑀲𑁂𑀦 𑀯𑀺𑀪𑀢𑁆𑀢𑀸. 𑀇𑀫𑀺𑀦𑀸 𑀦𑀬𑁂𑀦 𑀧𑀭𑀢𑁄𑀧𑀺 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀘𑀺𑀢𑁆𑀢𑀼𑀧𑁆𑀧𑀸𑀤𑀸’’𑀢𑀺, ‘‘𑀫𑀕𑁆𑀕𑀸𑀭𑀫𑁆𑀫𑀡𑀸’’𑀢𑀺 𑀘 𑀯𑀼𑀢𑁆𑀢𑀥𑀫𑁆𑀫𑀸𑀦𑀁𑀬𑁂𑀯 𑀫𑀕𑁆𑀕𑀳𑁂𑀢𑀼𑀓𑀢𑁆𑀢𑀸𑀪𑀸𑀯𑀁 𑀲𑀸𑀥𑁂𑀢𑀼𑀁 ‘‘𑀅𑀲𑀳𑀚𑀸𑀢𑀢𑁆𑀢𑀸’’𑀢𑀺 𑀇𑀤𑀁 𑀳𑁂𑀢𑀼𑀯𑀘𑀦𑀦𑁆𑀢𑀺 ‘‘𑀅𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸𑀢𑀺 𑀅𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀦 𑀳𑀺 𑀅𑀭𑀽𑀧𑀥𑀫𑁆𑀫𑀸𑀦’’𑀦𑁆𑀢𑀺𑀆𑀤𑀺. ‘‘𑀅𑀜𑁆𑀜𑀥𑀫𑁆𑀫𑀸𑀭𑀫𑁆𑀫𑀡𑀓𑀸𑀮𑁂 𑀏𑀯𑀸’’𑀢𑀺 𑀅𑀯𑀥𑀸𑀭𑀡𑀲𑁆𑀲 𑀅𑀕𑁆𑀕𑀳𑀺𑀢𑀢𑁆𑀢𑀸 𑀕𑀭𑀼𑀁 𑀅𑀓𑀢𑁆𑀯𑀸 𑀫𑀕𑁆𑀕𑀸𑀭𑀫𑁆𑀫𑀡𑀓𑀸𑀮𑁂𑀧𑀺 𑀫𑀕𑁆𑀕𑀸𑀥𑀺𑀧𑀢𑀺𑀪𑀸𑀯𑁂𑀦 𑀦 𑀯𑀢𑁆𑀢𑀩𑁆𑀩𑀸𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀅𑀝𑁆𑀞𑀓𑀣𑀸𑀬𑀁 𑀧𑀭𑀺𑀕𑁆𑀕𑀳𑀺𑀢𑁄𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀕𑀭𑀼𑀁 𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂’’𑀢𑀺 𑀳𑀺 𑀯𑀼𑀢𑁆𑀢𑀢𑁆𑀢𑀸 𑀕𑀭𑀼𑀁 𑀅𑀓𑀢𑁆𑀯𑀸 𑀧𑀘𑁆𑀘𑀯𑁂𑀓𑁆𑀔𑀡𑀓𑀸𑀮𑁂𑀧𑀺 𑀅𑀢𑁆𑀣𑀺 𑀏𑀯. 𑀢𑀤𑀸 𑀘 𑀫𑀕𑁆𑀕𑀸𑀥𑀺𑀧𑀢𑀺𑀪𑀸𑀯𑁂𑀦 𑀦 𑀯𑀢𑁆𑀢𑀩𑁆𑀩𑀸 𑀢𑁂 𑀥𑀫𑁆𑀫𑀸𑀢𑀺 𑀪𑀺𑀬𑁆𑀬𑁄𑀧𑀺 𑀲𑀺𑀤𑁆𑀥𑁄𑀯𑀸𑀬𑀫𑀢𑁆𑀣𑁄.

𑁧𑁪𑁩𑁪. 𑀅𑀢𑀻𑀢𑀸𑀭𑀫𑁆𑀫𑀡𑀸𑀯𑀸𑀢𑀺 𑀉𑀤𑁆𑀥𑀝𑀁, ‘‘𑀅𑀢𑀻𑀢𑀸𑀭𑀫𑁆𑀫𑀡𑀸’’𑀢𑀺 𑀧𑀦 𑀅𑀝𑁆𑀞𑀓𑀣𑀸𑀧𑀸𑀞𑁄 𑀩𑀳𑀽𑀲𑀼 𑀧𑁄𑀢𑁆𑀣𑀓𑁂𑀲𑀼 𑀤𑀺𑀲𑁆𑀲𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑀯𑀺𑀪𑀗𑁆𑀕𑀯𑀡𑁆𑀡𑀦𑀸𑀬𑀁 (𑀯𑀺𑀪. 𑀅. 𑁨𑁨𑁭) ‘‘𑀫𑀭𑀡𑀲𑀫𑀬𑁂 𑀜𑀸𑀢𑀓𑀸 ‘𑀅𑀬𑀁, 𑀢𑀸𑀢, 𑀢𑀯𑀢𑁆𑀣𑀸𑀬 𑀩𑀼𑀤𑁆𑀥𑀧𑀽𑀚𑀸 𑀓𑀭𑀻𑀬𑀢𑀺, 𑀘𑀺𑀢𑁆𑀢𑀁 𑀧𑀲𑀸𑀤𑁂𑀳𑀻’𑀢𑀺 𑀯𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀧𑀜𑁆𑀘𑀤𑁆𑀯𑀸𑀭𑁂 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀽𑀧𑀲𑀁𑀳𑀭𑀡𑀁 𑀢𑀢𑁆𑀣 𑀢𑀤𑀸𑀭𑀫𑁆𑀫𑀡𑀧𑀭𑀺𑀬𑁄𑀲𑀸𑀦𑀸𑀦𑀁 𑀘𑀼𑀤𑁆𑀤𑀲𑀦𑁆𑀦𑀁 𑀘𑀺𑀢𑁆𑀢𑀸𑀦𑀁 𑀧𑀯𑀢𑁆𑀢𑀺𑀜𑁆𑀘 𑀯𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀏𑀓𑀘𑀺𑀢𑁆𑀢𑀓𑁆𑀔𑀡𑀝𑁆𑀞𑀺𑀢𑀺𑀓𑁂 𑀆𑀭𑀫𑁆𑀫𑀡𑁂 𑀧𑀝𑀺𑀲𑀦𑁆𑀥𑀺𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀻𑀢𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀪𑀸𑀯𑀁 𑀧𑀝𑀺𑀲𑀦𑁆𑀥𑀺𑀬𑀸 𑀯𑀓𑁆𑀔𑀢𑀺, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀤𑁆𑀯𑁂 𑀪𑀯𑀗𑁆𑀕𑀸𑀦𑀺 𑀆𑀯𑀚𑁆𑀚𑀦𑀁 𑀫𑀭𑀡𑀲𑁆𑀲𑀸𑀲𑀦𑁆𑀦𑀪𑀸𑀯𑁂𑀦 𑀫𑀦𑁆𑀤𑀻𑀪𑀽𑀢𑀯𑁂𑀕𑀢𑁆𑀢𑀸 𑀧𑀜𑁆𑀘 𑀚𑀯𑀦𑀸𑀦𑀺 𑀤𑁆𑀯𑁂 𑀢𑀤𑀸𑀭𑀫𑁆𑀫𑀡𑀸𑀦𑀺 𑀘𑀼𑀢𑀺𑀘𑀺𑀢𑁆𑀢𑀦𑁆𑀢𑀺 𑀏𑀓𑀸𑀤𑀲 𑀘𑀺𑀢𑁆𑀢𑀓𑁆𑀔𑀡𑀸 𑀅𑀢𑀻𑀢𑀸𑀢𑀺 𑀆𑀳 ‘‘𑀧𑀜𑁆𑀘𑀘𑀺𑀢𑁆𑀢𑀓𑁆𑀔𑀡𑀸𑀯𑀲𑀺𑀝𑁆𑀞𑀸𑀬𑀼𑀓𑁂’’𑀢𑀺. 𑀇𑀢𑀭𑀢𑁆𑀣𑀸𑀢𑀺 𑀅𑀜𑁆𑀜𑀢𑀤𑀸𑀭𑀫𑁆𑀫𑀡𑀸𑀬 𑀘𑀼𑀢𑀺𑀬𑀸. 𑀇𑀤𑀸𑀦𑀺 𑀢𑀫𑁂𑀯 ‘‘𑀇𑀢𑀭𑀢𑁆𑀣𑀸’’𑀢𑀺 𑀲𑀗𑁆𑀔𑁂𑀧𑀢𑁄 𑀯𑀼𑀢𑁆𑀢𑀫𑀢𑁆𑀣𑀁 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀬𑀤𑀸 𑀳𑀻’’𑀢𑀺𑀆𑀤𑀺𑀫𑀸𑀳. 𑀘𑀼𑀢𑀺𑀬𑀸 𑀢𑀤𑀸𑀭𑀫𑁆𑀫𑀡𑀭𑀳𑀺𑀢𑀢𑁆𑀢𑀸 𑀧𑀝𑀺𑀲𑀦𑁆𑀥𑀺𑀬𑀸 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑁆𑀢𑀸 ‘‘𑀭𑀽𑀧𑀸…𑀧𑁂… 𑀚𑁆𑀚𑀦𑁆𑀢𑀲𑁆𑀲𑀸’’𑀢𑀺 𑀉𑀤𑀸𑀳𑀝𑀁. 𑀙 𑀪𑀯𑀗𑁆𑀕𑀸𑀦𑀺 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀺, 𑀦𑀯 𑀘𑀺𑀢𑁆𑀢𑀓𑁆𑀔𑀡𑀸 𑀅𑀢𑀻𑀢𑀸𑀢𑀺 𑀲𑀢𑁆𑀢𑀘𑀺𑀢𑁆𑀢𑀓𑁆𑀔𑀡𑀸𑀯𑀲𑀺𑀝𑁆𑀞𑀸𑀬𑀼𑀓𑁂 𑀕𑀢𑀺𑀦𑀺𑀫𑀺𑀢𑁆𑀢𑁂 𑀧𑀝𑀺𑀲𑀦𑁆𑀥𑀺𑀬𑀸 𑀧𑀯𑀢𑁆𑀢𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀯𑀺𑀚𑁆𑀚𑀫𑀸𑀦𑀫𑁂𑀯 𑀓𑀸𑀬𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀻𑀢𑀺 𑀏𑀢𑁂𑀦 𑀲𑀼𑀔𑀮𑀳𑀼𑀲𑀜𑁆𑀜𑁄𑀓𑁆𑀓𑀫𑀦𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀲𑁆𑀲𑁂𑀯 𑀪𑀽𑀢𑀼𑀧𑀸𑀤𑀸𑀬𑀭𑀽𑀧𑀲𑀗𑁆𑀖𑀸𑀢𑀲𑁆𑀲 𑀮𑀳𑀼𑀧𑀭𑀺𑀯𑀢𑁆𑀢𑀺𑀪𑀸𑀯𑀸𑀧𑀸𑀤𑀦𑀁, 𑀦 𑀪𑀸𑀯𑀺𑀦𑁄𑀢𑀺 𑀤𑀲𑁆𑀲𑁂𑀢𑀺.

𑀏𑀢𑁆𑀣𑀦𑁆𑀢𑀭𑁂𑀢𑀺 𑀅𑀧𑀸𑀓𑀝𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀸𑀓𑀝𑀓𑀸𑀮𑁄, 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂. 𑀬𑀲𑁆𑀫𑀸 𑀧𑀦 𑀓𑀲𑁆𑀲𑀘𑀺 𑀓𑀺𑀜𑁆𑀘𑀺 𑀲𑀻𑀖𑀁 𑀧𑀸𑀓𑀝𑀁 𑀳𑁄𑀢𑀺, 𑀓𑀲𑁆𑀲𑀘𑀺 𑀤𑀦𑁆𑀥𑀁, 𑀢𑀲𑁆𑀫𑀸 ‘‘𑀏𑀓𑀤𑁆𑀯𑁂𑀲𑀦𑁆𑀢𑀢𑀺𑀯𑀸𑀭𑀸’’𑀢𑀺 𑀅𑀦𑀺𑀬𑀫𑁂𑀢𑁆𑀯𑀸 𑀯𑀼𑀢𑁆𑀢𑀁. ‘‘𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀯𑀲𑁂𑀦 𑀯𑀼𑀢𑁆𑀢’’𑀦𑁆𑀢𑀺 𑀏𑀓𑁂, 𑀓𑁂𑀘𑀺 𑀧𑀦 ‘‘𑀏𑀢𑁆𑀣𑀦𑁆𑀢𑀭𑁂 𑀧𑀯𑀢𑁆𑀢𑀸 𑀭𑀽𑀧𑀥𑀫𑁆𑀫𑀸 𑀅𑀭𑀽𑀧𑀥𑀫𑁆𑀫𑀸 𑀘 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀺 𑀕𑀳𑀺𑀢𑁂 𑀏𑀓𑁄 𑀲𑀦𑁆𑀢𑀢𑀺𑀯𑀸𑀭𑁄 𑀳𑁄𑀢𑀺, 𑀢𑀁 𑀧𑀦 𑀤𑁆𑀯𑀺𑀥𑀸 𑀯𑀺𑀪𑀚𑀺𑀢𑁆𑀯𑀸 𑀅𑀧𑀸𑀓𑀝𑀓𑀸𑀮𑀁 𑀆𑀤𑀺𑀁 𑀓𑀢𑁆𑀯𑀸 𑀬𑁂𑀪𑀼𑀬𑁆𑀬𑁂𑀦 𑀧𑀸𑀓𑀝𑀓𑀸𑀮𑀢𑁄 𑀑𑀭𑀪𑀸𑀯𑁄 𑀏𑀓𑁄 𑀓𑁄𑀝𑁆𑀞𑀸𑀲𑁄 𑀬𑁂𑀪𑀼𑀬𑁆𑀬𑁂𑀦 𑀧𑀸𑀓𑀝𑀓𑀸𑀮𑀁 𑀆𑀤𑀺𑀁 𑀓𑀢𑁆𑀯𑀸 𑀬𑀸𑀯 𑀲𑀼𑀧𑀸𑀓𑀝𑀓𑀸𑀮𑁄 𑀏𑀓𑁄𑀢𑀺 𑀏𑀢𑁂 𑀤𑁆𑀯𑁂 𑀲𑀦𑁆𑀢𑀢𑀺𑀯𑀸𑀭𑀸. 𑀇𑀫𑀺𑀦𑀸 𑀦𑀬𑁂𑀦 𑀲𑁂𑀲𑀲𑀦𑁆𑀢𑀢𑀺𑀯𑀸𑀭𑀪𑁂𑀤𑀸𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀓𑀸𑀮𑀯𑀲𑁂𑀦 𑀲𑀩𑁆𑀩𑁂𑀲𑀁 𑀲𑀫𑀸𑀦𑀪𑀸𑀯𑀁 𑀅𑀕𑁆𑀕𑀳𑁂𑀢𑁆𑀯𑀸 𑀥𑀫𑁆𑀫𑀸𑀦𑀁 𑀲𑀤𑀺𑀲𑀧𑁆𑀧𑀯𑀢𑁆𑀢𑀺𑀯𑀲𑁂𑀦 𑀲𑀦𑁆𑀢𑀢𑀺𑀧𑀭𑀺𑀘𑁆𑀙𑁂𑀤𑁄 𑀤𑀻𑀧𑀺𑀢𑀩𑁆𑀩𑁄’’𑀢𑀺 𑀯𑀤𑀦𑁆𑀢𑀺. 𑀓𑀺𑀜𑁆𑀘𑀺 𑀓𑀺𑀜𑁆𑀘𑀺 𑀓𑀸𑀮𑀁 𑀲𑀤𑀺𑀲𑀁 𑀧𑀯𑀢𑁆𑀢𑀫𑀸𑀦𑀸𑀧𑀺 𑀳𑀺 𑀉𑀢𑀼𑀘𑀺𑀢𑁆𑀢𑀸𑀤𑀺𑀲𑀫𑀼𑀝𑁆𑀞𑀸𑀦𑀸 𑀭𑀽𑀧𑀥𑀫𑁆𑀫𑀸 𑀲𑀦𑁆𑀢𑀢𑀺𑀯𑀸𑀭𑀸𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀬𑀤𑀸𑀳 ‘‘𑀅𑀢𑀺𑀧𑀭𑀺𑀢𑁆𑀢𑀸’’𑀢𑀺𑀆𑀤𑀺𑀦𑀸, 𑀅𑀭𑀽𑀧𑀲𑀦𑁆𑀢𑀢𑀺𑀧𑀺 𑀘𑁂𑀢𑁆𑀣 𑀬𑀣𑀸𑀯𑀼𑀢𑁆𑀢𑀭𑀽𑀧𑀲𑀦𑁆𑀢𑀢𑀺𑀧𑀭𑀺𑀘𑁆𑀙𑀺𑀦𑁆𑀦𑀸 𑀲𑀗𑁆𑀕𑀳𑀺𑀢𑀸𑀬𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀲𑀼 𑀥𑀫𑁆𑀫𑁂𑀲𑀼 𑀲𑀁𑀳𑀻𑀭𑀢𑀻𑀢𑀺 𑀢𑀡𑁆𑀳𑀸𑀤𑀺𑀝𑁆𑀞𑀻𑀳𑀺 𑀆𑀓𑀟𑁆𑀠𑀦𑀻𑀬𑀝𑁆𑀞𑀸𑀦𑀪𑀸𑀯𑁂𑀦 𑀯𑀼𑀢𑁆𑀢𑀁. ‘‘𑀬𑁄 𑀘𑀸𑀯𑀼𑀲𑁄, 𑀫𑀦𑁄 𑀬𑁂 𑀘 𑀥𑀫𑁆𑀫𑀸’’𑀢𑀺 𑀯𑀺𑀲𑀬𑀺𑀯𑀺𑀲𑀬𑀪𑀽𑀢𑀸 𑀏𑀓𑀪𑀯𑀪𑀽𑀢𑀸 𑀘 𑀏𑀓𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑀸 𑀥𑀫𑁆𑀫𑀸 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀕𑀬𑁆𑀳𑀫𑀸𑀦𑀸 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀳𑁄𑀢𑀺, 𑀲𑀢𑀺 𑀧𑀦 𑀯𑀺𑀪𑀸𑀕𑀓𑀭𑀡𑁂 𑀔𑀡𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀢𑀸 𑀮𑀩𑁆𑀪𑀢𑀻𑀢𑀺 𑀆𑀳 ‘‘𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀳𑁄𑀦𑁆𑀢𑀁 𑀏𑀢𑀁 𑀉𑀪𑀬𑀁 𑀳𑁄𑀢𑀻’’𑀢𑀺.

𑀢𑀲𑁆𑀲𑀸𑀢𑀺 𑀫𑀳𑀸𑀚𑀦𑀲𑁆𑀲. 𑀅𑀢𑀻𑀢𑀸𑀤𑀺𑀯𑀺𑀪𑀸𑀕𑀁 𑀅𑀓𑀢𑁆𑀯𑀸𑀢𑀺 𑀆𑀯𑀚𑁆𑀚𑀦𑀸𑀤𑀻𑀦𑀁 𑀲𑀫𑀸𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀬𑀸 𑀉𑀧𑀸𑀬𑀁 𑀤𑀲𑁆𑀲𑁂𑀢𑀺. 𑀲𑀺𑀤𑁆𑀥𑀁 𑀳𑁄𑀢𑀻𑀢𑀺 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑁆𑀢𑁂𑀧𑀺 𑀧𑀭𑀺𑀓𑀫𑁆𑀫𑀘𑁂𑀢𑁄𑀧𑀭𑀺𑀬𑀜𑀸𑀡𑀸𑀦𑀁 𑀅𑀬𑀁 𑀧𑀸𑀴𑀺 𑀲𑀼𑀝𑁆𑀞𑀼 𑀦𑀻𑀢𑀸 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀅𑀢𑀻𑀢𑀢𑁆𑀢𑀺𑀓𑁄 𑀘 𑀏𑀯𑀁 𑀅𑀪𑀺𑀦𑁆𑀦𑁄 𑀳𑁄𑀢𑀻𑀢𑀺 𑀏𑀯𑀁 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑁂𑀬𑁂𑀯 𑀥𑀫𑁆𑀫𑁂 𑀇𑀥 𑀧𑀘𑁆𑀘𑀼𑀧𑁆𑀧𑀦𑁆𑀦𑁄𑀢𑀺 𑀕𑀬𑁆𑀳𑀫𑀸𑀦𑁂 𑀅𑀜𑁆𑀜𑀧𑀤𑀲𑀗𑁆𑀕𑀳𑀺𑀢𑀲𑁆𑀲𑁂𑀯 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀸𑀯𑀁 𑀧𑀓𑀸𑀲𑁂𑀦𑁆𑀢𑁄 𑀅𑀢𑀻𑀢𑀢𑁆𑀢𑀺𑀓𑁄 𑀘 𑀧𑀝𑁆𑀞𑀸𑀦𑁂 𑀅𑀪𑁂𑀤𑀢𑁄 𑀲𑀫𑁆𑀫𑀸 𑀅𑀢𑁆𑀣𑀲𑁆𑀲 𑀉𑀤𑁆𑀥𑀝𑀢𑁆𑀢𑀸 𑀅𑀯𑀺𑀦𑀸𑀲𑀺𑀢𑁄 𑀳𑁄𑀢𑀺. 𑀅𑀣 𑀯𑀸 𑀅𑀢𑀻𑀢𑀢𑁆𑀢𑀺𑀓𑁄𑀢𑀺 𑀧𑀝𑁆𑀞𑀸𑀦𑁂 𑀅𑀢𑀻𑀢𑀢𑁆𑀢𑀺𑀓𑀧𑀸𑀴𑀺, 𑀇𑀫𑀸𑀬 𑀅𑀢𑀻𑀢𑀢𑁆𑀢𑀺𑀓𑀧𑀸𑀴𑀺𑀬𑀸 𑀬𑀣𑀸𑀯𑀼𑀢𑁆𑀢𑀓𑀸𑀭𑀡𑀢𑁄𑀬𑁂𑀯 𑀅𑀪𑀺𑀦𑁆𑀦𑁄 𑀅𑀯𑀺𑀲𑀺𑀝𑁆𑀞𑁄 𑀅𑀜𑁆𑀜𑀤𑀢𑁆𑀣𑀼 𑀲𑀁𑀲𑀦𑁆𑀤𑀢𑀺 𑀲𑀫𑁂𑀢𑀻𑀢𑀺 𑀅𑀢𑁆𑀣𑁄.

𑀬𑀣𑀸𑀲𑀫𑁆𑀪𑀯𑀦𑁆𑀢𑀺 𑀆𑀯𑀚𑁆𑀚𑀦𑀸𑀬 𑀅𑀦𑀸𑀕𑀢𑀸𑀭𑀫𑁆𑀫𑀡𑀢𑀸, 𑀚𑀯𑀦𑀸𑀦𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀻𑀢𑀸𑀭𑀫𑁆𑀫𑀡𑀢𑀸 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀢𑀻𑀢𑀸𑀭𑀫𑁆𑀫𑀡𑀢𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀦𑀸𑀦𑀸𑀭𑀫𑁆𑀫𑀡𑀢𑀸 𑀦 𑀲𑀺𑀬𑀸 𑀅𑀤𑁆𑀥𑀸𑀯𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀬𑀜𑁆𑀘 𑀅𑀢𑁆𑀣𑁄 𑀏𑀓𑀺𑀲𑁆𑀲𑀸 𑀚𑀯𑀦𑀯𑀻𑀣𑀺𑀬𑀸 𑀏𑀓𑀲𑁆𑀫𑀺𑀁𑀬𑁂𑀯 𑀘𑀺𑀢𑁆𑀢𑁂 𑀧𑀯𑀢𑁆𑀢𑀺𑀬𑀁 𑀆𑀯𑀚𑁆𑀚𑀦𑀸𑀤𑀻𑀦𑀁 𑀅𑀦𑀸𑀕𑀢𑀸𑀤𑀺𑀆𑀭𑀫𑁆𑀫𑀡𑀢𑀸 𑀲𑀫𑁆𑀪𑀯𑀢𑀻𑀢𑀺 𑀲𑀫𑁆𑀪𑀯𑀤𑀲𑁆𑀲𑀦𑀯𑀲𑁂𑀦 𑀯𑀼𑀢𑁆𑀢𑁄𑀢𑀺 𑀬𑀣𑀸𑀥𑀺𑀧𑁆𑀧𑁂𑀢𑀲𑁆𑀲 𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀲𑁆𑀲 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀧𑀯𑀢𑁆𑀢𑀺𑀁 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀻𑀡𑀻𑀢𑀺 ‘‘𑀅𑀢𑀻𑀢𑀸𑀭𑀫𑁆𑀫𑀡𑁄 𑀥𑀫𑁆𑀫𑁄 𑀅𑀢𑀻𑀢𑀸𑀭𑀫𑁆𑀫𑀡𑀲𑁆𑀲 𑀥𑀫𑁆𑀫𑀲𑁆𑀲 𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀅𑀦𑀸𑀕𑀢𑀸𑀭𑀫𑁆𑀫𑀡𑁄 𑀥𑀫𑁆𑀫𑁄 𑀅𑀦𑀸𑀕𑀢𑀸𑀭𑀫𑁆𑀫𑀡𑀲𑁆𑀲 𑀥𑀫𑁆𑀫𑀲𑁆𑀲, 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑁄 𑀥𑀫𑁆𑀫𑁄 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀲𑁆𑀲 𑀥𑀫𑁆𑀫𑀲𑁆𑀲 𑀆𑀲𑁂𑀯𑀦𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁧𑁯.𑁩𑁪) 𑀧𑀤𑀦𑁆𑀢𑀭𑀲𑀗𑁆𑀕𑀳𑀺𑀢𑀥𑀫𑁆𑀫𑀸𑀦𑀧𑁂𑀓𑁆𑀔𑀸 𑀥𑀫𑁆𑀫𑀸 𑀢𑀻𑀡𑀺 𑀧𑀜𑁆𑀳𑀯𑀺𑀲𑁆𑀲𑀚𑁆𑀚𑀦𑀸𑀦𑀻𑀢𑀺 𑀅𑀢𑁆𑀣𑁄. 𑀅𑀦𑀸𑀲𑁂𑀯𑀦𑀁 𑀦𑀢𑁆𑀣𑀻𑀢𑀺 𑀆𑀲𑁂𑀯𑀦𑀮𑀸𑀪𑁂 𑀲𑀢𑀺 𑀬𑀣𑀸𑀥𑀫𑁆𑀫𑀲𑀸𑀲𑀦𑁂 𑀅𑀯𑀘𑀦𑀲𑁆𑀲 𑀓𑀸𑀭𑀡𑀁 𑀦𑀢𑁆𑀣𑀻𑀢𑀺 𑀅𑀯𑀘𑀦𑁂𑀦 𑀢𑀢𑁆𑀣 𑀇𑀢𑀭𑁂𑀲𑀁 𑀧𑀜𑁆𑀳𑀸𑀦𑀁 𑀧𑀝𑀺𑀲𑁂𑀥𑁄 𑀯𑀺𑀜𑁆𑀜𑀸𑀬𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀢𑀲𑁆𑀲 𑀯𑀸𑀤𑀲𑁆𑀲𑀸𑀢𑀺 ‘‘𑀆𑀯𑀚𑁆𑀚𑀦𑀚𑀯𑀦𑀸𑀦𑀁 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑁆𑀢𑁂𑀧𑀺 𑀘𑁂𑀢𑁄𑀧𑀭𑀺𑀬𑀜𑀸𑀡𑀁 𑀲𑀺𑀤𑁆𑀥’’𑀦𑁆𑀢𑀺 𑀯𑀸𑀤𑀲𑁆𑀲. 𑀦𑀺𑀲𑁆𑀲𑀬𑀪𑀸𑀯𑁄𑀢𑀺 𑀅𑀢𑁆𑀣𑀲𑀫𑁆𑀪𑀯𑀢𑁄 𑀬𑀣𑀸𑀯𑀼𑀢𑁆𑀢𑀦𑀬𑀲𑁆𑀲 𑀚𑁄𑀢𑀓𑀪𑀸𑀯𑁄. 𑀬𑀦𑁆𑀢𑀺 𑀘𑀺𑀢𑁆𑀢𑀁. 𑀢𑀲𑁆𑀲𑀸𑀢𑀺 𑀆𑀯𑀚𑁆𑀚𑀦𑀚𑀯𑀦𑀸𑀦𑀁 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀦𑀺𑀭𑀼𑀤𑁆𑀥𑀸𑀭𑀫𑁆𑀫𑀡𑀢𑀸𑀯𑀘𑀦𑀲𑁆𑀲. 𑀏𑀢𑁆𑀣 𑀘 𑀓𑀸𑀮𑀯𑀺𑀲𑁂𑀲𑀁 𑀆𑀫𑀲𑀢𑀺, 𑀅𑀦𑀸𑀕𑀢𑀸𑀬𑁂𑀯 𑀘 𑀆𑀯𑀚𑁆𑀚𑀦𑀸 𑀧𑀯𑀢𑁆𑀢𑀢𑀻𑀢𑀺 𑀦𑀬𑀺𑀤𑀁 𑀬𑀼𑀚𑁆𑀚𑀫𑀸𑀦𑀓𑀁. 𑀅𑀣 ‘‘𑀬𑀁 𑀇𑀫𑀲𑁆𑀲 𑀘𑀺𑀢𑁆𑀢𑀁 𑀪𑀯𑀺𑀲𑁆𑀲𑀢𑀺, 𑀢𑀁 𑀚𑀸𑀦𑀸𑀫𑀻’’𑀢𑀺 𑀆𑀪𑁄𑀕𑀁 𑀓𑀭𑁄𑀢𑀺, 𑀏𑀯𑀁 𑀲𑀢𑀺 𑀧𑀭𑀺𑀓𑀫𑁆𑀫𑀸𑀪𑀺𑀜𑁆𑀜𑀸𑀘𑀺𑀢𑁆𑀢𑀸𑀦𑀫𑁆𑀧𑀺 𑀅𑀦𑀸𑀕𑀢𑀸𑀭𑀫𑁆𑀫𑀡𑀢𑁆𑀢𑀫𑁂𑀯𑀸𑀢𑀺 𑀲𑀩𑁆𑀩𑀢𑁆𑀣 𑀆𑀯𑀚𑁆𑀚𑀦𑀚𑀯𑀦𑀸𑀦𑀁 𑀅𑀦𑀸𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑀸 𑀦 𑀲𑀺𑀚𑁆𑀛𑀢𑀻𑀢𑀺 𑀆𑀳 ‘‘𑀧𑀯𑀢𑁆𑀢𑀺…𑀧𑁂… 𑀯𑀼𑀢𑁆𑀢𑀢𑁆𑀢𑀸’’𑀢𑀺. 𑀤𑁄𑀲𑀸𑀧𑀢𑁆𑀢𑀺𑀬𑀸𑀢𑀺 𑀤𑁄𑀲𑀸𑀧𑀚𑁆𑀚𑀦𑁂𑀦, 𑀤𑁄𑀲𑀸𑀧𑀢𑁆𑀢𑀺𑀢𑁄 𑀯𑀸. 𑀭𑀸𑀲𑀺𑀏𑀓𑀤𑁂𑀲𑀸𑀯𑀚𑁆𑀚𑀦𑀧𑀝𑀺𑀯𑁂𑀥𑁂𑀢𑀺 𑀬𑀣𑀸𑀭𑀼𑀢𑀯𑀲𑁂𑀦𑁂𑀯 𑀧𑀼𑀭𑀺𑀫𑀯𑀸𑀤𑀺𑀧𑀓𑁆𑀔𑀫𑀸𑀳, 𑀲𑀫𑁆𑀧𑀢𑁆𑀢𑀲𑀫𑁆𑀧𑀢𑁆𑀢𑀸𑀯𑀚𑁆𑀚𑀦𑀚𑀸𑀦𑀦𑁂𑀢𑀺 𑀅𑀢𑁆𑀢𑀦𑀸 𑀦𑀺𑀤𑁆𑀥𑀸𑀭𑀺𑀢𑀧𑀓𑁆𑀔𑀁. 𑀧𑀼𑀭𑀺𑀫𑀯𑀸𑀤𑀺𑀦𑁄 𑀦𑀸𑀦𑀼𑀚𑀸𑀦𑁂𑀬𑁆𑀬𑀼𑀦𑁆𑀢𑀺 𑀅𑀤𑁆𑀥𑀸𑀲𑀦𑁆𑀢𑀢𑀺𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀤𑀢𑁆𑀣𑀢𑀸 𑀅𑀪𑀺𑀥𑀫𑁆𑀫𑀫𑀸𑀢𑀺𑀓𑀸𑀬𑀁 𑀆𑀕𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀧𑀤𑀲𑁆𑀲 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁂 𑀞𑀢𑁆𑀯𑀸 𑀦𑀸𑀦𑀼𑀚𑀸𑀦𑁂𑀬𑁆𑀬𑀼𑀁. 𑀏𑀢𑁆𑀣 𑀘 𑀲𑀢𑀺𑀧𑀺 𑀲𑀪𑀸𑀯𑀪𑁂𑀤𑁂 𑀆𑀓𑀸𑀭𑀪𑁂𑀤𑀸𑀪𑀸𑀯𑀢𑁄 𑀏𑀓𑀢𑁆𑀢𑀦𑀬𑀯𑀲𑁂𑀦 𑀆𑀯𑀚𑁆𑀚𑀦𑀧𑀭𑀺𑀓𑀫𑁆𑀫𑀸𑀪𑀺𑀜𑁆𑀜𑀸𑀘𑀺𑀢𑁆𑀢𑀸𑀦𑀁 𑀦𑀸𑀦𑀸𑀭𑀫𑁆𑀫𑀡𑀢𑀸𑀤𑁄𑀲𑁄 𑀦𑀢𑁆𑀣𑀻𑀢𑀺 𑀔𑀡𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑀸 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀧𑀼𑀭𑀺𑀫𑀯𑀸𑀤𑀻𑀦𑀁 𑀅𑀥𑀺𑀧𑁆𑀧𑀸𑀬𑀯𑀺𑀪𑀸𑀯𑀦𑀫𑀼𑀔𑁂𑀦 𑀤𑀲𑁆𑀲𑀺𑀢𑀸. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀲𑀪𑀸𑀯𑀪𑁂𑀤𑁂 𑀲𑀢𑀺 𑀦𑀸𑀦𑀸𑀭𑀫𑁆𑀫𑀡𑀢𑀸𑀤𑁄𑀲𑀸𑀪𑀸𑀯𑁄 𑀦𑀢𑁆𑀣𑀺 𑀏𑀯𑀸𑀢𑀺 𑀏𑀓𑀲𑁆𑀫𑀺𑀁 𑀏𑀯 𑀘𑀺𑀢𑁆𑀢𑁂 𑀅𑀤𑁆𑀥𑀸𑀲𑀦𑁆𑀢𑀢𑀺𑀯𑀲𑁂𑀦 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡𑀢𑀸 𑀯𑀺𑀪𑀸𑀯𑀺𑀢𑀸’’𑀢𑀺 𑀤𑁆𑀯𑀻𑀲𑀼𑀧𑀺 𑀯𑀸𑀤𑁂𑀲𑀼 𑀬𑀁 𑀬𑀼𑀢𑁆𑀢𑀁, 𑀢𑀁 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀢𑁂𑀦𑁂𑀯𑀸𑀢𑀺 𑀬𑀲𑁆𑀫𑀸 𑀅𑀢𑀻𑀢𑀢𑁆𑀢𑀺𑀓𑁂 𑀉𑀧𑁆𑀧𑀦𑁆𑀦𑀢𑁆𑀢𑀺𑀓𑁂 𑀘 𑀘𑁂𑀢𑁄𑀧𑀭𑀺𑀬𑀜𑀸𑀡𑀲𑁆𑀲 𑀯𑀢𑁆𑀢𑀫𑀸𑀦𑀥𑀫𑁆𑀫𑀸𑀭𑀫𑁆𑀫𑀡𑀪𑀸𑀯𑀚𑁄𑀢𑀦𑁄 𑀧𑀸𑀞𑁄 𑀦 𑀤𑀺𑀲𑁆𑀲𑀢𑀺, 𑀢𑁂𑀦𑁂𑀯 𑀓𑀸𑀭𑀡𑁂𑀦. 𑀤𑁆𑀯𑀻𑀲𑀼 𑀜𑀸𑀡𑁂𑀲𑀽𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀘𑁂𑀢𑁄𑀧𑀭𑀺𑀬𑀜𑀸𑀡𑁂𑀲𑀼. 𑀓𑀫𑁆𑀫𑀫𑀼𑀔𑁂𑀦 𑀕𑀬𑁆𑀳𑀦𑁆𑀢𑀻𑀢𑀺 𑀲𑀢𑀺𑀧𑀺 𑀆𑀭𑀫𑁆𑀫𑀡𑀪𑀸𑀯𑁂 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑁂𑀦 𑀓𑀫𑁆𑀫𑀤𑁆𑀯𑀸𑀭𑁂𑀦 𑀓𑀼𑀲𑀮𑀸𑀓𑀼𑀲𑀮𑀸 𑀇𑀘𑁆𑀘𑁂𑀯 𑀕𑀬𑁆𑀳𑀦𑁆𑀢𑀺, 𑀦 𑀧𑀦 𑀯𑀺𑀪𑀸𑀕𑀲𑁄𑀢𑀺 𑀤𑀲𑁆𑀲𑁂𑀢𑀺. 𑀮𑁄𑀪𑀸𑀤𑀺𑀲𑀫𑁆𑀧𑀬𑁄𑀕𑀯𑀺𑀲𑁂𑀲𑁂𑀦 𑀤𑀼𑀘𑁆𑀘𑀭𑀺𑀢𑀪𑀸𑀯𑁄, 𑀅𑀮𑁄𑀪𑀸𑀤𑀺𑀲𑀫𑁆𑀧𑀬𑁄𑀕𑀯𑀺𑀲𑁂𑀲𑁂𑀦 𑀘 𑀲𑀼𑀘𑀭𑀺𑀢𑀪𑀸𑀯𑁄 𑀮𑀓𑁆𑀔𑀻𑀬𑀢𑀻𑀢𑀺 𑀤𑀼𑀘𑁆𑀘𑀭𑀺𑀢𑀲𑀼𑀘𑀭𑀺𑀢𑀸𑀦𑀺 𑀯𑀺𑀪𑀸𑀯𑁂𑀦𑁆𑀢𑀁 𑀮𑁄𑀪𑀸𑀤𑀬𑁄𑀧𑀺 𑀯𑀺𑀪𑀸𑀯𑁂𑀢𑀺𑀬𑁂𑀯 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀤𑀼𑀘𑁆𑀘𑀭𑀺𑀢…𑀧𑁂… 𑀪𑀸𑀯𑀦𑀁 𑀳𑁄𑀢𑀻’’𑀢𑀺.

𑁧𑁪𑁩𑁫. 𑀅𑀲𑀪𑀸𑀯𑀥𑀫𑁆𑀫𑀲𑁆𑀲 ‘‘𑀅𑀳’’𑀦𑁆𑀢𑀺𑀆𑀤𑀺𑀧𑀜𑁆𑀜𑀢𑁆𑀢𑀺𑀬𑀸 𑀅𑀚𑁆𑀛𑀢𑁆𑀢𑀥𑀫𑁆𑀫𑀼𑀧𑀸𑀤𑀸𑀦𑀢𑀸𑀬 𑀲𑀺𑀬𑀸 𑀓𑁄𑀘𑀺 𑀅𑀚𑁆𑀛𑀢𑁆𑀢𑀧𑀭𑀺𑀬𑀸𑀬𑁄, 𑀦 𑀧𑀦 𑀲𑀪𑀸𑀯𑀥𑀫𑁆𑀫𑀲𑁆𑀲 𑀅𑀲𑀢𑁆𑀢𑀲𑀦𑁆𑀢𑀸𑀦𑁂𑀯 𑀢𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 ‘‘𑀲𑀪𑀸𑀯…𑀧𑁂… 𑀅𑀳𑁄𑀦𑁆𑀢’’𑀦𑁆𑀢𑀺. 𑀢𑀣𑀸 𑀳𑀺 ‘‘𑀅𑀢𑁆𑀢𑀦𑁄 𑀔𑀦𑁆𑀥𑀸𑀤𑀻𑀦𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑀲𑁆𑀲𑀸’’𑀢𑀺 𑀏𑀢𑁆𑀣 ‘‘𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀯𑀺𑀯𑀭𑀡𑀯𑀲𑁂𑀦 ‘‘𑀅𑀚𑁆𑀛𑀢𑁆𑀢𑀁 𑀕𑀬𑁆𑀳𑀫𑀸𑀦𑀁 𑀅𑀳𑀦𑁆𑀢𑀺 𑀧𑀜𑁆𑀜𑀢𑁆𑀢𑀺𑀁 𑀆𑀤𑀺-𑀲𑀤𑁆𑀤𑁂𑀦 𑀕𑀡𑁆𑀳𑀸𑀢𑀻’’𑀢𑀺 𑀯𑀓𑁆𑀔𑀢𑀺. 𑀬𑀤𑀺 𑀏𑀯𑀁 𑀢𑀲𑁆𑀲 𑀅𑀚𑁆𑀛𑀢𑁆𑀢𑀢𑁆𑀢𑀺𑀓𑁂𑀧𑀺 𑀅𑀚𑁆𑀛𑀢𑁆𑀢𑀪𑀸𑀯𑁄 𑀯𑀢𑁆𑀢𑀩𑁆𑀩𑁄 𑀲𑀺𑀬𑀸? 𑀦, 𑀩𑀳𑀺𑀤𑁆𑀥𑀸𑀪𑀸𑀯𑀲𑁆𑀲 𑀯𑀺𑀬 𑀅𑀚𑁆𑀛𑀢𑁆𑀢𑀪𑀸𑀯𑀲𑁆𑀲𑀧𑀺 𑀅𑀚𑁆𑀛𑀢𑁆𑀢𑀢𑁆𑀢𑀺𑀓𑁂 𑀦𑀺𑀧𑁆𑀧𑀭𑀺𑀬𑀸𑀬𑀯𑀲𑁂𑀦 𑀅𑀥𑀺𑀧𑁆𑀧𑁂𑀢𑀢𑁆𑀢𑀸𑀢𑀺. 𑀬𑀤𑀸𑀳 ‘‘𑀅𑀲𑀪𑀸…𑀧𑁂… 𑀦 𑀯𑀼𑀢𑁆𑀢’’𑀦𑁆𑀢𑀺. 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀸𑀯𑀚𑁆𑀚𑀦𑀸𑀦𑀺 𑀢𑀲𑁆𑀲 𑀧𑀼𑀭𑁂𑀘𑀸𑀭𑀺𑀓𑀉𑀧𑀘𑀸𑀭𑀘𑀺𑀢𑁆𑀢𑀸𑀦𑀺 𑀢𑀲𑁆𑀲 𑀆𑀭𑀫𑁆𑀫𑀡𑁂𑀦 𑀧𑀯𑀢𑁆𑀢𑀦𑀓𑀧𑀘𑁆𑀘𑀯𑁂𑀓𑁆𑀔𑀡𑀅𑀲𑁆𑀲𑀸𑀤𑀦𑀸𑀤𑀺𑀘𑀺𑀢𑁆𑀢𑀸𑀦𑀺 𑀘 𑀲𑀗𑁆𑀕𑀡𑁆𑀳𑀸𑀢𑀺.

𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀁 𑀢𑀁-𑀲𑀤𑁆𑀤𑁂𑀦 𑀆𑀓𑀟𑁆𑀠𑀺𑀢𑁆𑀯𑀸 𑀯𑀤𑀢𑀺, 𑀦 𑀧𑀦 𑀢𑀁 𑀲𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁, 𑀬𑀜𑁆𑀘 𑀢𑀲𑁆𑀲 𑀧𑀼𑀭𑁂𑀘𑀸𑀭𑀺𑀓𑀦𑁆𑀢𑀺 𑀅𑀢𑁆𑀣𑁄. 𑀮𑁂𑀲𑀯𑀘𑀦𑀦𑁆𑀢𑀺 𑀏𑀓𑀤𑁂𑀲𑀲𑀸𑀭𑀼𑀧𑁆𑀧𑁂𑀦 𑀲𑀫𑀸𑀦𑀸𑀭𑀫𑁆𑀫𑀡𑀪𑀸𑀯𑁂𑀦 𑀏𑀓𑀤𑁂𑀲𑀲𑁆𑀲𑁂𑀯 𑀯𑀘𑀦𑀁. 𑀮𑀺𑀲𑁆𑀲𑀢𑀺 𑀲𑀺𑀮𑀺𑀲𑁆𑀲𑀢𑀺 𑀏𑀓𑀤𑁂𑀲𑁂𑀦 𑀅𑀮𑁆𑀮𑀻𑀬𑀢𑀻𑀢𑀺 𑀳𑀺 𑀮𑁂𑀲𑁄. 𑀬𑁂𑀲𑀦𑁆𑀢𑀺 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀓𑀼𑀲𑀮𑀫𑀳𑀸𑀓𑀺𑀭𑀺𑀬𑀸𑀯𑀚𑁆𑀚𑀦𑀘𑀺𑀢𑁆𑀢𑀸𑀦𑀁 𑀓𑀼𑀲𑀮𑀓𑀺𑀭𑀺𑀬𑀸𑀪𑁂𑀤𑀲𑁆𑀲 𑀭𑀽𑀧𑀸𑀯𑀘𑀭𑀘𑀢𑀼𑀢𑁆𑀣𑀲𑁆𑀲 𑀘. 𑀏𑀯𑀁 𑀉𑀧𑁂𑀓𑁆𑀔𑀸𑀲𑀳𑀕𑀢𑀦𑀺𑀤𑁆𑀤𑁂𑀲𑀸𑀤𑀻𑀲𑀽𑀢𑀺 𑀬𑁂𑀲𑀁 𑀅𑀤𑀼𑀓𑁆𑀔𑀫𑀲𑀼𑀔𑀸𑀬 𑀯𑁂𑀤𑀦𑀸𑀬 𑀲𑀫𑁆𑀧𑀬𑀼𑀢𑁆𑀢𑀢𑀸 𑀯𑀼𑀢𑁆𑀢𑀸, 𑀢𑁂𑀲𑀼 𑀏𑀓𑀫𑁂𑀯 𑀉𑀧𑁂𑀓𑁆𑀔𑀸𑀲𑀳𑀕𑀢𑀦𑀺𑀤𑁆𑀤𑁂𑀲𑀁 𑀯𑀢𑁆𑀯𑀸 𑀇𑀢𑀭𑀁 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺 𑀅𑀢𑁆𑀣𑁄. 𑀆𑀤𑀺-𑀲𑀤𑁆𑀤𑁂𑀦 𑀳𑁂𑀢𑀼𑀲𑀫𑁆𑀧𑀬𑀼𑀢𑁆𑀢𑀓𑀸𑀫𑀸𑀯𑀘𑀭𑀸𑀤𑀺𑀦𑀺𑀤𑁆𑀤𑁂𑀲𑁂 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀢𑁆𑀣𑀸𑀧𑀺 𑀳𑀺 𑀧𑀭𑀺𑀢𑁆𑀢𑀲𑀳𑁂𑀢𑀼𑀓𑀸𑀤𑀺𑀪𑀸𑀯𑁂𑀦 𑀯𑀼𑀢𑁆𑀢𑁂𑀲𑀼 𑀥𑀫𑁆𑀫𑁂𑀲𑀼 𑀏𑀓𑀫𑁂𑀯 𑀯𑀢𑁆𑀯𑀸 𑀇𑀢𑀭𑀁 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺. 𑀅𑀪𑀸𑀯𑀦𑀸𑀦𑀺𑀝𑁆𑀞𑀧𑁆𑀧𑀯𑀢𑁆𑀢𑀺𑀬𑀸𑀢𑀺 𑀅𑀪𑀸𑀯𑀦𑀸𑀦𑀺𑀝𑁆𑀞𑀧𑁆𑀧𑀯𑀢𑁆𑀢𑀺𑀬𑀸 𑀅𑀪𑀸𑀯𑀦𑀸𑀓𑀸𑀭𑀲𑁆𑀲 𑀉𑀓𑁆𑀓𑀁𑀲𑀧𑁆𑀧𑀯𑀢𑁆𑀢𑀺𑀬𑀸𑀢𑀺 𑀅𑀢𑁆𑀣𑁄, 𑀅𑀪𑀸𑀯𑀲𑁆𑀲 𑀯𑀸 𑀉𑀓𑁆𑀓𑀁𑀲𑀧𑁆𑀧𑀯𑀢𑁆𑀢𑀺𑀬𑀸. 𑀦𑀯𑀢𑁆𑀢𑀩𑁆𑀩𑀁 𑀚𑀸𑀢𑀁 𑀅𑀚𑁆𑀛𑀢𑁆𑀢𑀸𑀭𑀫𑁆𑀫𑀡𑀸𑀤𑀺𑀪𑀸𑀯𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀸𑀦𑀻𑀢𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑁂𑀦 𑀲𑀫𑀸𑀦𑀸𑀭𑀫𑁆𑀫𑀡𑀸𑀦𑀺 𑀆𑀯𑀚𑁆𑀚𑀦𑀸𑀤𑀻𑀦𑀺. 𑀬𑀤𑀺 𑀏𑀯𑀁 ‘‘𑀅𑀪𑀸𑀯𑀦𑀸𑀲𑀸𑀫𑀜𑁆𑀜𑁂’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁. 𑀦 𑀳𑀺 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀸𑀭𑀫𑁆𑀫𑀡𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀅𑀲𑁆𑀲𑀸𑀤𑀦𑀸𑀤𑀺𑀯𑀲𑁂𑀦 𑀧𑀯𑀢𑁆𑀢𑀘𑀺𑀢𑁆𑀢𑀸𑀦𑀁 𑀅𑀪𑀸𑀯𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀺 𑀅𑀢𑁆𑀣𑀻𑀢𑀺? 𑀦, 𑀅𑀪𑀸𑀯𑁂𑀢𑀩𑁆𑀩𑀢𑀸𑀬 𑀅𑀥𑀺𑀧𑁆𑀧𑁂𑀢𑀢𑁆𑀢𑀸. 𑀦 𑀪𑀸𑀯𑀻𑀬𑀢𑀻𑀢𑀺 𑀳𑀺 𑀅𑀪𑀸𑀯𑀦𑀁, 𑀦 𑀦 𑀪𑀸𑀯𑁂𑀢𑀻𑀢𑀺.

𑀕𑀳𑀡𑀯𑀺𑀲𑁂𑀲𑀦𑀺𑀫𑁆𑀫𑀺𑀢𑀸𑀦𑀻𑀢𑀺𑀆𑀤𑀻𑀲𑀼 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 𑀬𑀤𑀺𑀧𑀺 𑀪𑀸𑀯𑀦𑀸𑀜𑀸𑀡𑀦𑀺𑀫𑁆𑀫𑀺𑀢𑀸𑀓𑀸𑀭𑀫𑀢𑁆𑀢𑁂𑀲𑀼 𑀲𑀪𑀸𑀯𑀢𑁄 𑀅𑀯𑀺𑀚𑁆𑀚𑀫𑀸𑀦𑁂𑀲𑀼 𑀯𑀺𑀲𑀬𑁂𑀲𑀼 𑀬𑁂𑀪𑀼𑀬𑁆𑀬𑁂𑀦 𑀫𑀳𑀕𑁆𑀕𑀢𑀸 𑀥𑀫𑁆𑀫𑀸 𑀧𑀯𑀢𑁆𑀢𑀦𑁆𑀢𑀺, 𑀩𑀳𑀺𑀤𑁆𑀥𑀸𑀓𑀸𑀭𑀕𑁆𑀕𑀳𑀡𑀯𑀲𑁂𑀦 𑀧𑀦 𑀓𑀲𑀺𑀡𑀸𑀤𑀻𑀦𑀁 𑀩𑀳𑀺𑀤𑁆𑀥𑀸𑀪𑀸𑀯𑁄𑀢𑀺 𑀢𑀤𑀸𑀭𑀫𑁆𑀫𑀡𑀥𑀫𑁆𑀫𑀸 𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀸𑀢𑀺 𑀯𑀼𑀢𑁆𑀢𑀁. 𑀓𑀲𑀺𑀡𑀸𑀦𑀜𑁆𑀳𑀺 𑀲𑀦𑁆𑀢𑀸𑀦𑀁 𑀫𑀼𑀜𑁆𑀘𑀺𑀢𑁆𑀯𑀸 𑀉𑀧𑀝𑁆𑀞𑀸𑀦𑀁 𑀯𑀺𑀲𑁂𑀲𑀢𑁄 𑀯𑀟𑁆𑀠𑀺𑀢𑀓𑀲𑀺𑀡𑀯𑀲𑁂𑀦 𑀯𑀺𑀜𑁆𑀜𑀸𑀬𑀢𑀺, 𑀧𑀞𑀫𑀸𑀭𑀼𑀧𑁆𑀧𑀯𑀺𑀜𑁆𑀜𑀸𑀡𑀸𑀪𑀸𑀯𑀲𑁆𑀲 𑀧𑀦 𑀦 𑀩𑀳𑀺𑀤𑁆𑀥𑀸𑀓𑀸𑀭𑁄, 𑀦𑀸𑀧𑀺 𑀅𑀚𑁆𑀛𑀢𑁆𑀢𑀸𑀓𑀸𑀭𑁄𑀢𑀺 𑀉𑀪𑀬𑀸𑀓𑀸𑀭𑀯𑀺𑀥𑀼𑀭𑁂 𑀢𑀲𑁆𑀫𑀺𑀁 𑀅𑀦𑀜𑁆𑀜𑀲𑀸𑀥𑀸𑀭𑀡𑁂𑀦 𑀧𑀯𑀢𑁆𑀢𑀺𑀬𑀸𑀓𑀸𑀭𑁂𑀦 𑀧𑀯𑀢𑁆𑀢𑀫𑀸𑀦𑀁 𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀫𑁂𑀯 𑀦𑀯𑀢𑁆𑀢𑀩𑁆𑀩𑀸𑀭𑀫𑁆𑀫𑀡𑀁 𑀯𑀼𑀢𑁆𑀢𑀁, 𑀦 𑀇𑀢𑀭𑁂 𑀇𑀢𑀭𑀸𑀓𑀸𑀭𑀧𑁆𑀧𑀯𑀢𑁆𑀢𑀺𑀢𑁄𑀢𑀺. 𑀓𑀸𑀫𑀸𑀯𑀘𑀭𑀓𑀼𑀲𑀮𑀸𑀦𑀦𑁆𑀢𑀺 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁.

𑀆𑀓𑀺𑀜𑁆𑀘𑀜𑁆𑀜𑀸𑀬𑀢𑀦𑀯𑀺𑀧𑀸𑀓𑀁 𑀦𑁂𑀯𑀲𑀜𑁆𑀜𑀸𑀦𑀸𑀲𑀜𑁆𑀜𑀸𑀬𑀢𑀦𑀲𑁆𑀲 𑀯𑀺𑀧𑀸𑀓𑀸𑀤𑀺𑀓𑀲𑁆𑀲𑀸𑀢𑀺 𑀅𑀢𑁆𑀣𑀯𑀲𑁂𑀦 𑀯𑀺𑀪𑀢𑁆𑀢𑀺 𑀧𑀭𑀺𑀡𑀸𑀫𑁂𑀢𑀩𑁆𑀩𑀸. 𑀅𑀪𑀺𑀦𑀻𑀳𑀸𑀭𑀸𑀲𑀫𑁆𑀪𑀯𑀢𑁄𑀢𑀺 𑀲𑀫𑀸𑀧𑀢𑁆𑀢𑀺𑀘𑀺𑀢𑁆𑀢𑀲𑁆𑀲 𑀅𑀪𑀺𑀦𑀻𑀳𑀭𑀡𑀸𑀲𑀫𑁆𑀪𑀯𑀢𑁄. 𑀓𑀼𑀲𑀮𑀫𑁂𑀯 𑀯𑀺𑀧𑀸𑀓𑀲𑁆𑀲 𑀆𑀭𑀫𑁆𑀫𑀡𑀦𑁆𑀢𑀺 𑀓𑀢𑁆𑀯𑀸 ‘‘𑀯𑀺𑀧𑀸𑀓𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀅𑀲𑀪𑀸𑀯𑀥𑀫𑁆𑀫𑀢𑁆𑀢𑁂𑀧𑀺 𑀩𑀳𑀺𑀤𑁆𑀥𑀸𑀓𑀸𑀭𑁂𑀦 𑀕𑀳𑀡𑀻𑀬𑀪𑀸𑀯𑀢𑁄 𑀓𑀲𑀺𑀡𑀸𑀦𑀁 𑀩𑀳𑀺𑀤𑁆𑀥𑀸𑀪𑀸𑀯𑁄 𑀯𑀺𑀬 𑀏𑀓𑀦𑁆𑀢𑀢𑁄 𑀇𑀥 𑀅𑀚𑁆𑀛𑀢𑁆𑀢𑀥𑀫𑁆𑀫𑀼𑀧𑀸𑀤𑀸𑀦𑀢𑀸𑀬 𑀅𑀳𑀦𑁆𑀢𑀺 𑀧𑀜𑁆𑀜𑀢𑁆𑀢𑀺𑀬𑀸 𑀲𑀺𑀬𑀸 𑀅𑀚𑁆𑀛𑀢𑁆𑀢𑀪𑀸𑀯𑁄𑀢𑀺 𑀯𑀼𑀢𑁆𑀢𑀁 ‘‘𑀅𑀚𑁆𑀛𑀢𑁆𑀢’’𑀦𑁆𑀢𑀺𑀆𑀤𑀺. ‘‘𑀔𑀦𑁆𑀥𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀥𑀸𑀢𑀼𑀆𑀬𑀢𑀦𑀸𑀤𑀺 𑀲𑀗𑁆𑀕𑀬𑁆𑀳𑀢𑀻’’𑀢𑀺 𑀘 𑀯𑀤𑀦𑁆𑀢𑀺. 𑀏𑀲 𑀦𑀬𑁄𑀢𑀺 ‘‘𑀅𑀭𑀽𑀧𑀓𑁆𑀔𑀦𑁆𑀥𑁂 𑀔𑀦𑁆𑀥𑀸𑀢𑀺 𑀕𑀳𑁂𑀢𑁆𑀯𑀸’’𑀢𑀺𑀆𑀤𑀺𑀓𑀁 𑀯𑀡𑁆𑀡𑀦𑀸𑀦𑀻𑀢𑀺𑀁 𑀆𑀳. 𑀧𑀭𑁂𑀲𑀁 𑀔𑀦𑁆𑀥𑀸𑀤𑀺𑀕𑁆𑀕𑀳𑀡𑁂𑀢𑀺 𑀧𑀭𑁂𑀲𑀁 𑀔𑀦𑁆𑀥𑀸𑀤𑀻𑀢𑀺 𑀇𑀫𑀲𑁆𑀲 𑀧𑀤𑀲𑁆𑀲 𑀓𑀣𑀦𑁂 𑀉𑀘𑁆𑀘𑀸𑀭𑀡𑁂. 𑀲𑀩𑁆𑀩𑀁 𑀉𑀧𑀸𑀤𑀸𑀧𑀜𑁆𑀜𑀢𑁆𑀢𑀺𑀁 𑀆𑀳 𑀆𑀤𑀺𑀲𑀤𑁆𑀤𑁂𑀦𑀸𑀢𑀺 𑀲𑀫𑁆𑀩𑀦𑁆𑀥𑁄.

𑀢𑀺𑀓𑀅𑀢𑁆𑀣𑀼𑀤𑁆𑀥𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀼𑀓𑀅𑀢𑁆𑀣𑀼𑀤𑁆𑀥𑀸𑀭𑀯𑀡𑁆𑀡𑀦𑀸

𑁧𑁪𑁭𑁩. 𑀅𑀜𑁆𑀜𑀣𑀸𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀲 𑀤𑀲𑁆𑀲𑀦𑁂. 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑁆𑀲 𑀤𑀲𑁆𑀲𑀦𑀢𑁄 𑀏𑀯 𑀳𑀺 𑀅𑀝𑁆𑀞𑀓𑀣𑀸𑀬𑀁 𑀲𑀲𑀗𑁆𑀔𑀸𑀭𑀺𑀓𑀸𑀦𑀁 𑀣𑀺𑀦𑀫𑀺𑀤𑁆𑀥𑀯𑀺𑀭𑀳𑁂 𑀅𑀲𑀗𑁆𑀔𑀸𑀭𑀺𑀓𑀲𑀤𑀺𑀲𑀻 𑀬𑁄𑀚𑀦𑀸 𑀦 𑀤𑀲𑁆𑀲𑀺𑀢𑀸. 𑀪𑀯𑀭𑀸𑀕𑀸𑀤𑀻𑀲𑀽𑀢𑀺 𑀪𑀯𑀭𑀸𑀕𑀫𑀽𑀮𑀺𑀓𑀸𑀤𑀻𑀲𑀼 𑀬𑁄𑀚𑀦𑀸𑀲𑀼.

𑁧𑁫𑁧𑁧. 𑀤𑁆𑀯𑁂𑀢𑀺 𑀉𑀤𑁆𑀥𑀘𑁆𑀘𑀸𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀺. 𑀢𑀻𑀡𑀻𑀢𑀺 𑀓𑀸𑀫𑀘𑁆𑀙𑀦𑁆𑀤𑀩𑁆𑀬𑀸𑀧𑀸𑀤𑀯𑀺𑀘𑀺𑀓𑀺𑀘𑁆𑀙𑀸𑀲𑀼 𑀏𑀓𑁂𑀓𑁂𑀦 𑀉𑀤𑁆𑀥𑀘𑁆𑀘𑀸𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀺. 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸𑀢𑀺 𑀧𑀸𑀴𑀺𑀬𑀁 𑀯𑀸-𑀲𑀤𑁆𑀤𑀲𑁆𑀲 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑀢𑀁 𑀆𑀳. 𑀅𑀣 𑀯𑀸 𑀦𑀺𑀧𑀸𑀢𑀲𑀤𑁆𑀤𑀲𑀦𑁆𑀦𑀺𑀥𑀸𑀦𑁂𑀧𑀺 𑀦𑀸𑀫𑀧𑀤𑀸𑀤𑀻𑀳𑀺 𑀏𑀯 𑀲𑀫𑀼𑀘𑁆𑀘𑀬𑀸𑀤𑀺𑀅𑀢𑁆𑀣𑁄 𑀯𑀼𑀘𑁆𑀘𑀢𑀺, 𑀦 𑀦𑀺𑀧𑀸𑀢𑀧𑀤𑁂𑀳𑀺 𑀢𑁂𑀲𑀁 𑀅𑀯𑀸𑀘𑀓𑀢𑁆𑀢𑀸𑀢𑀺 𑀅𑀦𑁆𑀢𑀭𑁂𑀦𑀧𑀺 𑀦𑀺𑀧𑀸𑀢𑀧𑀤𑀁 𑀅𑀬𑀫𑀢𑁆𑀣𑁄 𑀮𑀩𑁆𑀪𑀢𑀺. 𑀢𑀣𑀸 𑀯𑀘𑀦𑀺𑀘𑁆𑀙𑀸𑀬 𑀲𑀫𑁆𑀪𑀯𑁄 𑀏𑀯 𑀳𑁂𑀢𑁆𑀣 𑀧𑀫𑀸𑀡𑀦𑁆𑀢𑀺 𑀧𑀸𑀴𑀺𑀬𑀁 ‘‘𑀤𑁆𑀯𑁂 𑀢𑀻𑀡𑀻’’𑀢𑀺 𑀯𑀼𑀢𑁆𑀢𑀁. 𑀬𑀢𑁆𑀣 𑀲𑀳𑀼𑀧𑁆𑀧𑀢𑁆𑀢𑀻𑀢𑀺𑀆𑀤𑀺𑀦𑀸 ‘‘𑀤𑁆𑀯𑁂 𑀢𑀻𑀡𑀻’’𑀢𑀺 𑀮𑀓𑁆𑀔𑀡𑀯𑀘𑀦𑀦𑁆𑀢𑀺 𑀲𑀩𑁆𑀩𑀲𑀸𑀥𑀸𑀭𑀡𑀫𑀢𑁆𑀣𑀫𑀸𑀳. 𑀢𑀣𑀸 𑀳𑀺 ‘‘𑀏𑀯𑀜𑁆𑀘 𑀓𑀢𑁆𑀯𑀸 𑀓𑀺𑀮𑁂𑀲𑀕𑁄𑀘𑁆𑀙𑀓𑁂 𑀘𑀸’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀸𑀬𑀫𑀥𑀺𑀧𑁆𑀧𑀸𑀬𑁄 𑁋 𑀓𑀺𑀮𑁂𑀲𑀤𑁆𑀯𑀬𑀲𑀳𑀺𑀢𑀲𑁆𑀲𑁂𑀯 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀅𑀪𑀸𑀯𑁂𑀧𑀺 𑀧𑀸𑀴𑀺𑀬𑀁 𑀤𑁆𑀯𑀺𑀕𑁆𑀕𑀳𑀡𑀁 𑀓𑀢𑀁, 𑀓𑀺𑀮𑁂𑀲𑀸𑀦𑀜𑁆𑀘 𑀲𑀫𑁆𑀪𑀯𑀦𑁆𑀢𑀸𑀦𑀁 𑀲𑀩𑁆𑀩𑁂𑀲𑀁 𑀲𑀭𑀽𑀧𑁂𑀦 𑀕𑀳𑀡𑀁 𑀦 𑀓𑀢𑀦𑁆𑀢𑀺 𑀤𑁆𑀯𑁂 𑀢𑀬𑁄𑀢𑀺 𑀮𑀓𑁆𑀔𑀡𑀓𑀭𑀡𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀻𑀢𑀺.

𑀬𑀤𑀺 𑀲𑀩𑁆𑀩𑀸𑀓𑀼𑀲𑀮𑁂 𑀉𑀧𑁆𑀧𑀚𑁆𑀚𑀦𑀓𑀲𑁆𑀲𑀧𑀺 𑀉𑀤𑁆𑀥𑀘𑁆𑀘𑀲𑁆𑀲 𑀏𑀓𑁄 𑀏𑀯 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀯𑀺𑀲𑀬𑀪𑀸𑀯𑁂𑀦 𑀯𑀼𑀘𑁆𑀘𑀢𑀺, 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀲𑁆𑀲𑀧𑀺 𑀢𑀣𑀸 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀓𑀲𑁆𑀫𑀸 𑀯𑀼𑀢𑁆𑀢’’𑀦𑁆𑀢𑀺𑀆𑀤𑀺𑀦𑀸 𑀘𑁄𑀤𑁂𑀢𑀺. 𑀇𑀢𑀭𑁄 𑀉𑀤𑁆𑀥𑀘𑁆𑀘𑀦𑀻𑀯𑀭𑀡𑀲𑁆𑀲𑁂𑀯 𑀢𑀣𑀸 𑀯𑀢𑁆𑀢𑀩𑁆𑀩𑀢𑀁 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀲𑁆𑀲 𑀢𑀣𑀸 𑀯𑀢𑁆𑀢𑀩𑁆𑀩𑀢𑀸𑀪𑀸𑀯𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀢𑁆𑀢𑀦𑁆𑀢𑁂’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀼𑀢𑁆𑀢𑀦𑁆𑀢𑁂 𑀯𑀼𑀢𑁆𑀢𑁂𑀲𑀼 𑀧𑀜𑁆𑀘𑀲𑀼 𑀦𑀻𑀯𑀭𑀡𑁂𑀲𑀽𑀢𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑁂 𑀉𑀤𑁆𑀥𑀘𑁆𑀘𑀲𑁆𑀲 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑁂𑀦 𑀦𑀻𑀯𑀭𑀡𑀲𑀳𑀺𑀢𑀢𑀁 𑀆𑀲𑀗𑁆𑀓𑀺𑀢𑁆𑀯𑀸 𑀯𑀼𑀢𑁆𑀢𑀁. 𑀦𑀦𑀼 𑀘 𑀲𑀼𑀢𑁆𑀢𑀦𑁆𑀢𑁂𑀧𑀺 ‘‘𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦𑀁 𑀲𑀢𑁆𑀢𑀸𑀦’’𑀦𑁆𑀢𑀺𑀆𑀤𑀻𑀲𑀼 (𑀲𑀁. 𑀦𑀺. 𑁨.𑁧𑁨𑁪) 𑀅𑀯𑀺𑀚𑁆𑀚𑀸 ‘‘𑀦𑀻𑀯𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀛𑀸𑀦𑀗𑁆𑀕𑀸𑀦𑀁 𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀧𑀦 𑀲𑀼𑀢𑁆𑀢𑀦𑁆𑀢𑁂 𑀩𑀳𑀼𑀮𑀁 𑀓𑀸𑀫𑀘𑁆𑀙𑀦𑁆𑀤𑀸𑀤𑀬𑁄 𑀧𑀜𑁆𑀘𑁂𑀯 𑀦𑀻𑀯𑀭𑀡𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀬𑁂𑀪𑀼𑀬𑁆𑀬𑀯𑀼𑀢𑁆𑀢𑀺𑀯𑀲𑁂𑀦 𑀏𑀢𑀁 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀓𑁂𑀘𑀺 𑀧𑀦 ‘‘𑀬𑀣𑀸 𑀦𑀺𑀓𑁆𑀔𑁂𑀧𑀓𑀡𑁆𑀟𑁂 𑀓𑀼𑀲𑀮𑀧𑀝𑀺𑀧𑀓𑁆𑀔𑀪𑀽𑀢𑀸𑀦𑀺 𑀤𑀼𑀩𑁆𑀩𑀮𑀸𑀦𑀺𑀧𑀺 𑀦𑀻𑀯𑀭𑀡𑀸𑀦𑀺 𑀧𑀝𑁆𑀞𑀸𑀦𑁂 𑀯𑀺𑀬 𑀤𑀲𑁆𑀲𑀺𑀢𑀸𑀦𑀺. 𑀢𑀣𑀸 𑀳𑀺 𑀧𑀝𑁆𑀞𑀸𑀦𑁂 (𑀧𑀝𑁆𑀞𑀸. 𑁩.𑁮.𑁧) ‘𑀦𑀻𑀯𑀭𑀡𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀦𑀻𑀯𑀭𑀡𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀦 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑀸. 𑀅𑀭𑀽𑀧𑁂 𑀓𑀸𑀫𑀘𑁆𑀙𑀦𑁆𑀤𑀦𑀻𑀯𑀭𑀡𑀁 𑀧𑀝𑀺𑀘𑁆𑀘 𑀣𑀺𑀦𑀫𑀺𑀤𑁆𑀥𑀦𑀻𑀯𑀭𑀡𑀁 𑀉𑀤𑁆𑀥𑀘𑁆𑀘𑀦𑀻𑀯𑀭𑀡’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀦 𑀏𑀯𑀁 𑀅𑀝𑁆𑀞𑀓𑀣𑀸𑀓𑀡𑁆𑀟𑁂. 𑀅𑀝𑁆𑀞𑀓𑀣𑀸𑀓𑀡𑁆𑀟𑁂 𑀧𑀦 𑀛𑀸𑀦𑀧𑀝𑀺𑀧𑀓𑁆𑀔𑀪𑀽𑀢𑀸𑀦𑀺𑀬𑁂𑀯 𑀦𑀻𑀯𑀭𑀡𑀸𑀦𑀺 𑀦𑀺𑀤𑁆𑀤𑀺𑀝𑁆𑀞𑀸𑀦𑀻𑀢𑀺 ‘𑀉𑀤𑁆𑀥𑀘𑁆𑀘𑀦𑀻𑀯𑀭𑀡𑀁 𑀉𑀤𑁆𑀥𑀘𑁆𑀘𑀲𑀳𑀕𑀢𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀉𑀧𑁆𑀧𑀚𑁆𑀚𑀢𑀻’𑀢𑀺 𑀯𑀼𑀢𑁆𑀢𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀉𑀤𑁆𑀥𑀘𑁆𑀘𑀦𑀻𑀯𑀭𑀡𑀲𑁆𑀲 𑀓𑀸𑀫𑀘𑁆𑀙𑀦𑁆𑀤𑀸𑀤𑀻𑀳𑀺 𑀏𑀓𑀢𑁄 𑀉𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀁 𑀦𑀺𑀓𑁆𑀔𑁂𑀧𑀓𑀡𑁆𑀟𑀸𑀦𑀼𑀲𑀸𑀭𑁂𑀦 𑀓𑀢𑀁 𑀏𑀓𑀢𑁄 𑀉𑀧𑁆𑀧𑀢𑁆𑀢𑀺𑀬𑀸 𑀧𑀪𑁂𑀤𑀤𑀲𑁆𑀲𑀦𑀢𑁆𑀣𑀁. 𑀢𑀢𑁆𑀣 𑀳𑀺 𑀧𑀸𑀴𑀺𑀬𑀁𑀬𑁂𑀯 𑀢𑀸𑀦𑀺 𑀯𑀺𑀢𑁆𑀣𑀸𑀭𑀢𑁄 𑀯𑀼𑀢𑁆𑀢𑀸𑀦𑀻’’𑀢𑀺 𑀯𑀤𑀦𑁆𑀢𑀺. 𑀅𑀬𑀜𑁆𑀘 𑀯𑀸𑀤𑁄 ‘‘𑀉𑀤𑁆𑀥𑀘𑁆𑀘𑀦𑀻𑀯𑀭𑀡𑀁 𑀉𑀤𑁆𑀥𑀘𑁆𑀘𑀲𑀳𑀕𑀢𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀇𑀤𑀫𑁂𑀯 𑀯𑀘𑀦𑀁 𑀜𑀸𑀧𑀓𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑁄. 𑀅𑀜𑁆𑀜𑀣𑀸 𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀁 𑀯𑀺𑀬 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀦 𑀢𑀺 𑀇𑀢𑁄 𑀅𑀜𑁆𑀜𑀁 𑀧𑀭𑀺𑀬𑀼𑀝𑁆𑀞𑀸𑀦𑀧𑀝𑁆𑀞𑀸𑀬𑀻𑀦𑀺𑀬𑁂𑀯 𑀦𑀻𑀯𑀭𑀡𑀸𑀦𑀺 𑀅𑀢𑁆𑀣𑀼𑀤𑁆𑀥𑀸𑀭𑀓𑀡𑁆𑀟𑁂 𑀅𑀥𑀺𑀧𑁆𑀧𑁂𑀢𑀸𑀦𑀻𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀲𑀸𑀥𑀓𑀁 𑀯𑀘𑀦𑀁 𑀅𑀢𑁆𑀣𑀺, 𑀇𑀤𑀁 𑀯𑀘𑀦𑀁 𑀤𑁆𑀯𑁂𑀢𑀻𑀡𑀺𑀯𑀘𑀦𑀲𑁆𑀲 𑀲𑀸𑀫𑀜𑁆𑀜𑁂𑀦 𑀲𑀩𑁆𑀩𑀦𑀻𑀯𑀭𑀡𑀲𑀗𑁆𑀕𑀸𑀳𑀓𑀢𑁆𑀢𑀸 𑀬𑀣𑀸𑀯𑀼𑀢𑁆𑀢𑀯𑀘𑀦𑀲𑁆𑀲 𑀯𑀺𑀲𑀬𑀯𑀺𑀲𑁂𑀲𑀧𑁆𑀧𑀓𑀸𑀲𑀦𑀲𑀗𑁆𑀔𑀸𑀢𑁂𑀦 𑀧𑀬𑁄𑀚𑀦𑀦𑁆𑀢𑀭𑁂𑀦 𑀯𑀼𑀢𑁆𑀢𑀪𑀸𑀯𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸 𑀘 𑀜𑀸𑀧𑀓𑀁 𑀦 𑀪𑀯𑀢𑀻𑀢𑀺 𑀤𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀅𑀕𑁆𑀕𑀳𑁂𑀢𑁆𑀯𑀸𑀢𑀺 𑀬𑀣𑀸𑀭𑀼𑀢𑀯𑀲𑁂𑀦𑁂𑀯 𑀅𑀢𑁆𑀣𑀁 𑀅𑀕𑁆𑀕𑀳𑁂𑀢𑁆𑀯𑀸 𑀬𑀣𑀸 𑀦𑀺𑀓𑁆𑀔𑁂𑀧𑀓𑀡𑁆𑀟𑀧𑀝𑁆𑀞𑀸𑀦𑀸𑀤𑀻𑀳𑀺 𑀦 𑀇𑀫𑀺𑀲𑁆𑀲𑀸 𑀧𑀸𑀴𑀺𑀬𑀸 𑀯𑀺𑀭𑁄𑀥𑁄 𑀳𑁄𑀢𑀺, 𑀏𑀯𑀁 𑀅𑀥𑀺𑀧𑁆𑀧𑀸𑀬𑁄 𑀕𑀯𑁂𑀲𑀺𑀢𑀩𑁆𑀩𑁄𑀢𑀺 𑀬𑀣𑀸𑀯𑀼𑀢𑁆𑀢𑀫𑁂𑀯𑀢𑁆𑀣𑀁 𑀦𑀺𑀕𑀫𑁂𑀢𑀺.

𑁧𑁫𑁭𑁭. 𑀢𑁂𑀲𑀦𑁆𑀢𑀺 𑀮𑁄𑀪𑀸𑀤𑀺𑀢𑁄 𑀅𑀜𑁆𑀜𑁂𑀲𑀁. 𑀤𑀲𑁆𑀲𑀺𑀢𑀸𑀢𑀺 𑀓𑀣𑀁 𑀤𑀲𑁆𑀲𑀺𑀢𑀸? 𑀫𑀸𑀦𑁄 𑀢𑀸𑀯 𑀮𑁄𑀪𑀫𑁄𑀳𑀉𑀤𑁆𑀥𑀘𑁆𑀘𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀮𑁄𑀪𑀫𑁄𑀳𑀣𑀺𑀦𑀉𑀤𑁆𑀥𑀘𑁆𑀘𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀢𑀣𑀸 𑀤𑀺𑀝𑁆𑀞𑀺, 𑀯𑀺𑀘𑀺𑀓𑀺𑀘𑁆𑀙𑀸 𑀫𑁄𑀳𑀉𑀤𑁆𑀥𑀘𑁆𑀘𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀣𑀺𑀦𑀁 𑀮𑁄𑀪𑀫𑁄𑀳𑀤𑀺𑀝𑁆𑀞𑀺𑀉𑀤𑁆𑀥𑀘𑁆𑀘𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀮𑁄𑀪𑀫𑁄𑀳𑀫𑀸𑀦𑀉𑀤𑁆𑀥𑀘𑁆𑀘𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀮𑁄𑀪𑀫𑁄𑀳𑀉𑀤𑁆𑀥𑀘𑁆𑀘𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀤𑁄𑀲𑀫𑁄𑀳𑀉𑀤𑁆𑀥𑀘𑁆𑀘𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀉𑀤𑁆𑀥𑀘𑁆𑀘𑀁 𑀮𑁄𑀪𑀫𑁄𑀳𑀤𑀺𑀝𑁆𑀞𑀺𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀮𑁄𑀪𑀫𑁄𑀳𑀤𑀺𑀝𑁆𑀞𑀺𑀣𑀺𑀦𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀮𑁄𑀪𑀫𑁄𑀳𑀫𑀸𑀦𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀮𑁄𑀪𑀫𑁄𑀳𑀫𑀸𑀦𑀣𑀺𑀦𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀮𑁄𑀪𑀫𑁄𑀳𑀣𑀺𑀦𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀮𑁄𑀪𑀫𑁄𑀳𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀤𑁄𑀲𑀫𑁄𑀳𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀤𑁄𑀲𑀫𑁄𑀳𑀣𑀺𑀦𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀫𑁄𑀳𑀯𑀺𑀘𑀺𑀓𑀺𑀘𑁆𑀙𑀸𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀫𑁄𑀳𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑁂𑀳𑀺 𑀏𑀓𑀢𑁄 𑀉𑀧𑁆𑀧𑀚𑁆𑀚𑀢𑀺.

𑀬𑀣𑀸 𑀘 𑀉𑀤𑁆𑀥𑀘𑁆𑀘𑀁, 𑀏𑀯𑀁 𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀸𑀦𑀺 𑀘 𑀬𑁄𑀚𑁂𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀓𑀣𑀁? 𑀅𑀳𑀺𑀭𑀺𑀓𑀁 𑀮𑁄𑀪𑀫𑁄𑀳𑀤𑀺𑀝𑁆𑀞𑀺𑀉𑀤𑁆𑀥𑀘𑁆𑀘𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀮𑁄𑀪𑀫𑁄𑀳𑀤𑀺𑀝𑁆𑀞𑀺𑀣𑀺𑀦𑀉𑀤𑁆𑀥𑀘𑁆𑀘𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀮𑁄𑀪𑀫𑁄𑀳𑀫𑀸𑀦𑀉𑀤𑁆𑀥𑀘𑁆𑀘𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀮𑁄𑀪𑀫𑁄𑀳𑀫𑀸𑀦𑀣𑀺𑀦𑀉𑀤𑁆𑀥𑀘𑁆𑀘𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀮𑁄𑀪𑀫𑁄𑀳𑀣𑀺𑀦𑀉𑀤𑁆𑀥𑀘𑁆𑀘𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀮𑁄𑀪𑀫𑁄𑀳𑀉𑀤𑁆𑀥𑀘𑁆𑀘𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀤𑁄𑀲𑀫𑁄𑀳𑀉𑀤𑁆𑀥𑀘𑁆𑀘𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀤𑁄𑀲𑀫𑁄𑀳𑀣𑀺𑀦𑀉𑀤𑁆𑀥𑀘𑁆𑀘𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀫𑁄𑀳𑀯𑀺𑀘𑀺𑀓𑀺𑀘𑁆𑀙𑀸𑀉𑀤𑁆𑀥𑀘𑁆𑀘𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀫𑁄𑀳𑀉𑀤𑁆𑀥𑀘𑁆𑀘𑀸𑀦𑁄𑀢𑁆𑀢𑀧𑁆𑀧𑁂𑀳𑀺 𑀘 𑀏𑀓𑀢𑁄 𑀉𑀧𑁆𑀧𑀚𑁆𑀚𑀢𑀺. 𑀅𑀦𑁄𑀢𑁆𑀢𑀧𑁆𑀧𑀁 𑀮𑁄𑀪𑀫𑁄𑀳𑀤𑀺𑀝𑁆𑀞𑀺𑀉𑀤𑁆𑀥𑀘𑁆𑀘𑀸𑀳𑀺𑀭𑀺𑀓𑁂𑀳𑀺, 𑀮𑁄𑀪𑀫𑁄𑀳𑀤𑀺𑀝𑁆𑀞𑀺𑀣𑀺𑀦𑀉𑀤𑁆𑀥𑀘𑁆𑀘𑀸𑀳𑀺𑀭𑀺𑀓𑁂𑀳𑀺, 𑀮𑁄𑀪𑀫𑁄𑀳𑀫𑀸𑀦𑀉𑀤𑁆𑀥𑀘𑁆𑀘𑀸𑀳𑀺𑀭𑀺𑀓𑁂𑀳𑀺, 𑀮𑁄𑀪𑀫𑁄𑀳𑀫𑀸𑀦𑀣𑀺𑀦𑀉𑀤𑁆𑀥𑀘𑁆𑀘𑀸𑀳𑀺𑀭𑀺𑀓𑁂𑀳𑀺, 𑀮𑁄𑀪𑀫𑁄𑀳𑀣𑀺𑀦𑀉𑀤𑁆𑀥𑀘𑁆𑀘𑀸𑀳𑀺𑀭𑀺𑀓𑁂𑀳𑀺, 𑀮𑁄𑀪𑀫𑁄𑀳𑀉𑀤𑁆𑀥𑀘𑁆𑀘𑀸𑀳𑀺𑀭𑀺𑀓𑁂𑀳𑀺, 𑀤𑁄𑀲𑀫𑁄𑀳𑀉𑀤𑁆𑀥𑀘𑁆𑀘𑀸𑀳𑀺𑀭𑀺𑀓𑁂𑀳𑀺, 𑀤𑁄𑀲𑀫𑁄𑀳𑀣𑀺𑀦𑀉𑀤𑁆𑀥𑀘𑁆𑀘𑀸𑀳𑀺𑀭𑀺𑀓𑁂𑀳𑀺, 𑀫𑁄𑀳𑀯𑀺𑀘𑀺𑀓𑀺𑀘𑁆𑀙𑀸𑀉𑀤𑁆𑀥𑀘𑁆𑀘𑀸𑀳𑀺𑀭𑀺𑀓𑁂𑀳𑀺, 𑀫𑁄𑀳𑀉𑀤𑁆𑀥𑀘𑁆𑀘𑀸𑀳𑀺𑀭𑀺𑀓𑁂𑀳𑀺 𑀘 𑀏𑀓𑀢𑁄 𑀉𑀧𑁆𑀧𑀚𑁆𑀚𑀢𑀻𑀢𑀺 𑀏𑀯𑀫𑁂𑀢𑁆𑀣 𑀫𑀸𑀦𑀸𑀤𑀻𑀦𑀫𑁆𑀧𑀺 𑀏𑀓𑀢𑁄 𑀉𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀅𑀝𑁆𑀞𑀓𑀣𑀸𑀓𑀡𑁆𑀟𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀇𑀢𑀺 𑀥𑀫𑁆𑀫𑀲𑀗𑁆𑀕𑀡𑀻𑀫𑀽𑀮𑀝𑀻𑀓𑀸𑀬 𑀮𑀻𑀦𑀢𑁆𑀣𑀧𑀤𑀯𑀡𑁆𑀡𑀦𑀸

𑀥𑀫𑁆𑀫𑀲𑀗𑁆𑀕𑀡𑀻-𑀅𑀦𑀼𑀝𑀻𑀓𑀸 𑀲𑀫𑀢𑁆𑀢𑀸.