𑀓𑀸𑀫𑀸𑀯𑀘𑀭𑀓𑀼𑀲𑀮𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁧. 𑀅𑀧𑁆𑀧𑁂𑀢𑀼𑀦𑁆𑀢𑀺 𑀦𑀺𑀕𑀫𑁂𑀢𑀼𑀁. ‘‘𑀧𑀤𑀪𑀸𑀚𑀦𑀻𑀬𑀁 𑀦 𑀯𑀼𑀢𑁆𑀢’’𑀦𑁆𑀢𑀺 𑀧𑀤𑀪𑀸𑀚𑀦𑀻𑀬𑀸𑀯𑀘𑀦𑁂𑀦 𑀅𑀧𑁆𑀧𑀦𑀸𑀯𑀭𑁄𑀥𑀁 𑀲𑀸𑀥𑁂𑀢𑁆𑀯𑀸 𑀧𑀤𑀪𑀸𑀚𑀦𑀻𑀬𑀸𑀯𑀘𑀦𑀲𑁆𑀲 𑀓𑀸𑀭𑀡𑀁 𑀯𑀤𑀦𑁆𑀢𑁄 ‘‘𑀲𑀭𑀽𑀧𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 ‘‘𑀨𑀲𑁆𑀲𑁄 𑀳𑁄𑀢𑀻’’𑀢𑀺𑀆𑀤𑀻𑀲𑀼 𑀳𑁄𑀢𑀺-𑀲𑀤𑁆𑀤𑁄 𑀅𑀢𑁆𑀣𑀺-𑀲𑀤𑁆𑀤𑁂𑀦 𑀅𑀦𑀸𑀦𑀢𑁆𑀣𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁 ‘‘𑀤𑀼𑀢𑀺𑀬𑁂𑀦 𑀳𑁄𑀢𑀺-𑀲𑀤𑁆𑀤𑁂𑀦𑀸’’𑀢𑀺. 𑀧𑀼𑀩𑁆𑀩𑁂 𑀅𑀝𑁆𑀞𑀓𑀣𑀸𑀥𑀺𑀧𑁆𑀧𑀸𑀬𑁂𑀦 𑀯𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑀲𑁆𑀲 𑀧𑀸𑀴𑀺𑀧𑁆𑀧𑀤𑁂𑀲𑀲𑁆𑀲 𑀅𑀧𑁆𑀧𑀦𑀸𑀯𑀭𑁄𑀥𑁄 𑀲𑀫𑀢𑁆𑀣𑀺𑀢𑁄𑀢𑀺 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀗𑁆𑀔𑁂𑀧𑁂𑀦𑀸’’𑀢𑀺𑀆𑀤𑀺𑀫𑀸𑀳.

𑀜𑀸𑀢𑀼𑀁 𑀇𑀘𑁆𑀙𑀺𑀢𑁄𑀢𑀺 𑀮𑀓𑁆𑀔𑀡𑀲𑁆𑀲 𑀧𑀼𑀘𑁆𑀙𑀸𑀯𑀺𑀲𑀬𑀢𑀁 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. 𑀬𑁂𑀦 𑀓𑁂𑀦𑀘𑀻𑀢𑀺 𑀤𑀲𑁆𑀲𑀦𑀸𑀤𑀺𑀯𑀺𑀲𑁂𑀲𑀬𑀼𑀢𑁆𑀢𑁂𑀦, 𑀇𑀢𑀭𑁂𑀦 𑀯𑀸. 𑀅𑀯𑀢𑁆𑀣𑀸𑀯𑀺𑀲𑁂𑀲𑁄 𑀳𑀺 𑀜𑀸𑀡𑀲𑁆𑀲 𑀤𑀲𑁆𑀲𑀦𑀢𑀼𑀮𑀦𑀢𑀻𑀭𑀡𑀸𑀦𑀺. ‘‘𑀅𑀤𑀺𑀝𑁆𑀞𑀢’’𑀦𑁆𑀢𑀺𑀆𑀤𑀻𑀲𑀼 𑀆𑀳𑀸𑀢𑀺 𑀬𑁄𑀚𑁂𑀢𑀩𑁆𑀩𑀁, 𑀲𑀩𑁆𑀩𑀢𑁆𑀣 𑀘 𑀮𑀓𑁆𑀔𑀡𑀲𑁆𑀲𑀸𑀢𑀺. 𑀢𑀜𑁆𑀳𑁂𑀢𑁆𑀣 𑀅𑀥𑀺𑀓𑀢𑀦𑁆𑀢𑀺. 𑀅𑀤𑀺𑀝𑁆𑀞𑀁 𑀚𑁄𑀢𑀻𑀬𑀢𑀺 𑀏𑀢𑀸𑀬𑀸𑀢𑀺 𑀏𑀢𑁂𑀦 𑀤𑀺𑀝𑁆𑀞𑀁 𑀲𑀁𑀲𑀦𑁆𑀤𑀢𑀺 𑀏𑀢𑀸𑀬𑀸𑀢𑀺 𑀤𑀺𑀝𑁆𑀞𑀲𑀁𑀲𑀦𑁆𑀤𑀦𑀸. 𑀯𑀺𑀫𑀢𑀺𑀁 𑀙𑀺𑀦𑁆𑀤𑀢𑀺 𑀏𑀢𑀸𑀬𑀸𑀢𑀺 𑀯𑀺𑀫𑀢𑀺𑀘𑁆𑀙𑁂𑀤𑀦𑀸𑀢𑀺 𑀏𑀢𑀸𑀲𑀫𑁆𑀧𑀺 𑀲𑀤𑁆𑀤𑀢𑁆𑀣𑁄 𑀦𑀬𑀢𑁄 𑀤𑀲𑁆𑀲𑀺𑀢𑁄, 𑀅𑀢𑁆𑀣𑀢𑁄 𑀧𑀦 𑀲𑀩𑁆𑀩𑀸𑀧𑀺 𑀢𑀣𑀸𑀧𑀯𑀢𑁆𑀢𑀁 𑀯𑀘𑀦𑀁, 𑀢𑀤𑀼𑀧𑁆𑀧𑀸𑀤𑀓𑁄 𑀯𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀜𑁆𑀜𑀫𑀜𑁆𑀜𑀢𑁄 𑀧𑀪𑀺𑀚𑁆𑀚𑀢𑀻𑀢𑀺 𑀧𑀪𑁂𑀤𑁄, 𑀯𑀺𑀲𑁂𑀲𑁄, 𑀢𑁂𑀦 𑀧𑀪𑁂𑀤𑁂𑀦. 𑀥𑀫𑁆𑀫𑀸𑀦𑀁 𑀤𑁂𑀲𑀦𑀦𑁆𑀢𑀺 𑀓𑀺𑀜𑁆𑀘𑀸𑀧𑀺 𑀲𑀫𑀬𑀪𑀽𑀫𑀺𑀚𑀸𑀢𑀺𑀆𑀭𑀫𑁆𑀫𑀡𑀲𑀪𑀸𑀯𑀸𑀤𑀺𑀯𑀲𑁂𑀦 𑀅𑀦𑀯𑀲𑁂𑀲𑀧𑁆𑀧𑀪𑁂𑀤𑀧𑀭𑀺𑀕𑁆𑀕𑀳𑀢𑁄 𑀦𑀺𑀤𑁆𑀤𑁂𑀲𑀤𑁂𑀲𑀦𑀸𑀯 𑀯𑀢𑁆𑀢𑀼𑀁 𑀬𑀼𑀢𑁆𑀢𑀸, 𑀢𑀣𑀸𑀧𑀺 𑀓𑀼𑀲𑀮𑀸𑀤𑀺𑀫𑀸𑀢𑀺𑀓𑀸𑀧𑀤𑀲𑀗𑁆𑀕𑀳𑀺𑀢𑀯𑀺𑀲𑁂𑀲𑁄𑀬𑁂𑀯 𑀇𑀥 𑀧𑀪𑁂𑀤𑁄𑀢𑀺 𑀅𑀥𑀺𑀧𑁆𑀧𑁂𑀢𑁄𑀢𑀺 𑀯𑀼𑀢𑁆𑀢𑀁 ‘‘𑀧𑀪𑁂𑀤…𑀧𑁂… 𑀤𑁂𑀲𑀦𑀁 𑀆𑀳𑀸’’𑀢𑀺. 𑀢𑁂𑀦𑁂𑀯𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀓𑀼𑀲𑀮…𑀧𑁂… 𑀤𑀻𑀧𑁂𑀢𑁆𑀯𑀸𑀢𑀺 𑀨𑀲𑁆𑀲𑁄 𑀳𑁄𑀢𑀺…𑀧𑁂… 𑀅𑀯𑀺𑀓𑁆𑀔𑁂𑀧𑁄 𑀳𑁄𑀢𑀻’’𑀢𑀺 (𑀥. 𑀲. 𑀅𑀝𑁆𑀞. 𑀥𑀫𑁆𑀫𑀼𑀤𑁆𑀤𑁂𑀲𑀯𑀸𑀭 𑀨𑀲𑁆𑀲𑀧𑀜𑁆𑀘𑀫𑀓𑀭𑀸𑀲𑀺𑀯𑀡𑁆𑀡𑀦𑀸). ‘‘𑀨𑀲𑁆𑀲𑁄 𑀨𑀼𑀲𑀦𑀸’’𑀢𑀺𑀆𑀤𑀺𑀦𑀸 𑀘 𑀧𑀪𑁂𑀤𑀯𑀦𑁆𑀢𑁄𑀯 𑀲𑀸𑀢𑀺𑀲𑀬𑀁 𑀦𑀺𑀤𑁆𑀤𑀺𑀝𑁆𑀞𑀸, 𑀦 𑀧𑀦 𑀫𑀸𑀢𑀺𑀓𑀸𑀬𑀁 𑀯𑀼𑀢𑁆𑀢𑀧𑁆𑀧𑀪𑁂𑀤𑁄𑀢𑀺 𑀧𑀪𑁂𑀤𑀯𑀦𑁆𑀢𑀤𑀲𑁆𑀲𑀦𑀁 𑀦𑀺𑀤𑁆𑀤𑁂𑀲𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺𑀆𑀤𑀺𑀦𑀸 ‘‘𑀧𑀪𑁂𑀤𑁂…𑀧𑁂… 𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺 𑀇𑀫𑀲𑁆𑀲 𑀯𑀸𑀓𑁆𑀬𑀲𑁆𑀲 𑀧𑀺𑀡𑁆𑀟𑀢𑁆𑀣𑀫𑀸𑀳. 𑀬𑀤𑀺 𑀥𑀫𑁆𑀫𑀸 𑀏𑀯 𑀧𑀼𑀘𑁆𑀙𑀺𑀢𑀩𑁆𑀩𑀸 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀸 𑀘, 𑀓𑀲𑁆𑀫𑀸 𑀓𑀼𑀲𑀮𑀸𑀢𑀺 𑀧𑀪𑁂𑀤𑀯𑀘𑀦𑀦𑁆𑀢𑀺 𑀆𑀳 ‘‘𑀢𑁂 𑀧𑀦𑀸’’𑀢𑀺𑀆𑀤𑀺. 𑀦 𑀳𑀺 𑀧𑀪𑁂𑀤𑁂𑀳𑀺 𑀯𑀺𑀦𑀸 𑀧𑀪𑁂𑀤𑀯𑀦𑁆𑀢𑁄 𑀅𑀢𑁆𑀣𑀻𑀢𑀺. ‘‘𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸’’𑀢𑀺 𑀏𑀢𑁂𑀦 ‘‘𑀨𑀲𑁆𑀲𑁄 𑀳𑁄𑀢𑀻’’𑀢𑀺, ‘‘𑀨𑀲𑁆𑀲𑁄 𑀨𑀼𑀲𑀦𑀸’’𑀢𑀺 𑀘 𑀆𑀤𑀺𑀦𑀸 𑀉𑀤𑁆𑀤𑀺𑀝𑁆𑀞𑀦𑀺𑀤𑁆𑀤𑀺𑀝𑁆𑀞𑀸𑀦𑀁 𑀥𑀫𑁆𑀫𑀸𑀦𑀁 𑀓𑀼𑀲𑀮𑀪𑀸𑀯𑁄 𑀯𑀺𑀲𑁆𑀲𑀚𑁆𑀚𑀺𑀢𑁄 𑀳𑁄𑀢𑀻𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀇𑀫𑁂 𑀥𑀫𑁆𑀫𑀸 𑀓𑀼𑀲𑀮𑀸𑀢𑀺 𑀯𑀺𑀲𑁆𑀲𑀚𑁆𑀚𑀦𑁂𑀧𑀻’’𑀢𑀺 𑀆𑀳. 𑀇𑀫𑀲𑁆𑀫𑀺𑀜𑁆𑀳𑀻𑀢𑀺 𑀳𑀺-𑀲𑀤𑁆𑀤𑁄 𑀓𑀸𑀭𑀡𑀢𑁆𑀣𑁄. 𑀢𑁂𑀦 𑀬𑀲𑁆𑀫𑀸 𑀥𑀫𑁆𑀫𑀸𑀯 𑀤𑁂𑀲𑁂𑀢𑀩𑁆𑀩𑀸, 𑀢𑁂 𑀘 𑀓𑀼𑀲𑀮𑀸…𑀧𑁂… 𑀪𑁂𑀤𑀸 𑀤𑁂𑀲𑁂𑀢𑀩𑁆𑀩𑀸, 𑀢𑀲𑁆𑀫𑀸𑀢𑀺 𑀏𑀯𑀁 𑀯𑀸 𑀬𑁄𑀚𑀦𑀸. 𑀥𑀫𑁆𑀫𑀸𑀦𑀫𑁂𑀯𑀸𑀢𑀺 𑀅𑀯𑀥𑀸𑀭𑀡𑀨𑀮𑀁 𑀤𑀲𑁆𑀲𑁂𑀢𑀺 ‘‘𑀅𑀯𑁄𑀳𑀸𑀭𑀤𑁂𑀲𑀦𑀸𑀢𑁄’’𑀢𑀺. 𑀅𑀢𑁆𑀣𑀸𑀦𑀜𑁆𑀘𑀸𑀢𑀺 𑀘-𑀲𑀤𑁆𑀤𑁂𑀦 ‘‘𑀨𑀲𑁆𑀲𑁄 𑀨𑀼𑀲𑀦𑀸’’𑀢𑀺 𑀏𑀯𑀫𑀸𑀤𑀺𑀲𑀪𑀸𑀯𑀦𑀺𑀭𑀼𑀢𑁆𑀢𑀺𑀁 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀸𑀤𑀺𑀜𑀸𑀡𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. ‘‘𑀇𑀢𑀺 𑀏𑀯𑀁 𑀅𑀬𑀁 𑀧𑀯𑀢𑁆𑀢𑁂𑀢𑀩𑁆𑀩𑁄 𑀦𑀺𑀯𑀢𑁆𑀢𑁂𑀢𑀩𑁆𑀩𑁄 𑀘𑀸’’𑀢𑀺 𑀢𑀣𑀸 𑀢𑀣𑀸 𑀯𑀺𑀥𑁂𑀢𑀩𑁆𑀩𑀪𑀸𑀯𑁄 𑀇𑀢𑀺𑀓𑀢𑁆𑀢𑀩𑁆𑀩𑀢𑀸, 𑀢𑀸𑀬 𑀬𑀼𑀢𑁆𑀢𑁄 𑀇𑀢𑀺…𑀧𑁂… 𑀬𑀼𑀢𑁆𑀢𑁄, 𑀢𑀲𑁆𑀲 𑀯𑀺𑀥𑁂𑀢𑀩𑁆𑀩𑀲𑁆𑀲𑀸𑀢𑀺 𑀅𑀢𑁆𑀣𑁄, 𑀯𑀺𑀲𑁂𑀲𑀦𑀢𑁆𑀢𑀸 𑀧𑀪𑁂𑀤𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀇𑀢𑀺𑀓𑀢𑁆𑀢𑀩𑁆𑀩𑀢𑀸𑀬𑀼𑀢𑁆𑀢𑀲𑁆𑀲 𑀯𑀺𑀲𑁂𑀲𑀺𑀢𑀩𑁆𑀩𑀢𑁆𑀢𑀸 𑀉𑀤𑁆𑀤𑁂𑀲𑁄 𑀥𑀫𑁆𑀫𑀧𑁆𑀧𑀥𑀸𑀦𑁄, 𑀢𑀲𑁆𑀫𑀸 𑀢𑀢𑁆𑀣 𑀥𑀫𑁆𑀫𑀲𑁆𑀲 𑀯𑀺𑀲𑁂𑀲𑀺𑀢𑀩𑁆𑀩𑀢𑁆𑀢𑀸 ‘‘𑀓𑀼𑀲𑀮𑀸 𑀥𑀫𑁆𑀫𑀸’’𑀢𑀺 𑀅𑀬𑀁 𑀧𑀤𑀸𑀦𑀼𑀓𑁆𑀓𑀫𑁄 𑀓𑀢𑁄. 𑀧𑀼𑀘𑁆𑀙𑀸 𑀲𑀁𑀲𑀬𑀺𑀢𑀧𑁆𑀧𑀥𑀸𑀦𑀸 𑀅𑀦𑀺𑀘𑁆𑀙𑀺𑀢𑀦𑀺𑀘𑁆𑀙𑀬𑀦𑀸𑀬 𑀧𑀯𑀢𑁆𑀢𑁂𑀢𑀩𑁆𑀩𑀢𑁆𑀢𑀸. 𑀢𑁂𑀦 𑀲𑀩𑁆𑀩𑀥𑀫𑁆𑀫𑁂𑀲𑀼 𑀲𑀫𑀼𑀕𑁆𑀖𑀸𑀝𑀺𑀢𑀯𑀺𑀘𑀺𑀓𑀺𑀘𑁆𑀙𑀸𑀦𑀼𑀲𑀬𑀸𑀦𑀫𑁆𑀧𑀺 𑀧𑀼𑀘𑁆𑀙𑀸 𑀤𑁂𑀲𑁂𑀢𑀩𑁆𑀩𑀧𑀼𑀕𑁆𑀕𑀮𑀕𑀢𑀲𑀁𑀲𑀬𑀸𑀧𑀢𑁆𑀢𑀺𑀁 𑀅𑀢𑁆𑀢𑀦𑀺 𑀆𑀭𑁄𑀧𑁂𑀢𑁆𑀯𑀸 𑀲𑀁𑀲𑀬𑀸𑀧𑀦𑁆𑀦𑁂𑀳𑀺 𑀯𑀺𑀬 𑀧𑀯𑀢𑁆𑀢𑀻𑀬𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀓𑀸𑀫𑀸𑀯𑀘𑀭𑀸𑀤𑀺𑀪𑁂𑀤𑁄 𑀯𑀺𑀬 𑀓𑀼𑀲𑀮𑀸𑀤𑀺𑀪𑀸𑀯𑁂𑀦 𑀓𑀼𑀲𑀮𑀸𑀤𑀺𑀪𑁂𑀤𑁄 𑀥𑀫𑁆𑀫𑀪𑀸𑀯𑁂𑀦 𑀦𑀺𑀬𑀢𑁄𑀢𑀺 𑀥𑀫𑁆𑀫𑀸𑀢𑀺 𑀯𑀼𑀢𑁆𑀢𑁂 𑀦𑀺𑀘𑁆𑀙𑀬𑀸𑀪𑀸𑀯𑀢𑁄 ‘‘𑀓𑀼𑀲𑀮𑀸 𑀦𑀼 𑀔𑁄 𑀅𑀓𑀼𑀲𑀮𑀸 𑀦𑀼 𑀔𑁄’’𑀢𑀺𑀆𑀤𑀺𑀦𑀸 𑀲𑀁𑀲𑀬𑁄 𑀳𑁄𑀢𑀻𑀢𑀺 𑀆𑀳 ‘‘𑀓𑀼𑀲𑀮𑀸𑀤𑀺𑀪𑁂𑀤𑁄 𑀧𑀦 𑀲𑀁𑀲𑀬𑀺𑀢𑁄’’𑀢𑀺. 𑀥𑀫𑁆𑀫𑀪𑀸𑀯𑁄 𑀧𑀦 𑀓𑀼𑀲𑀮𑀸𑀤𑀻𑀲𑀼 𑀏𑀓𑀦𑁆𑀢𑀺𑀓𑀢𑁆𑀢𑀸 𑀦𑀺𑀘𑁆𑀙𑀺𑀢𑁄𑀬𑁂𑀯𑀸𑀢𑀺 𑀯𑀼𑀢𑁆𑀢𑀁 ‘‘𑀦 𑀘 𑀥𑀫𑁆𑀫𑀪𑀸𑀯𑁄 𑀲𑀁𑀲𑀬𑀺𑀢𑁄’’𑀢𑀺. 𑀢𑁂𑀦 𑀲𑀁𑀲𑀬𑀺𑀢𑁄 𑀦𑀺𑀘𑁆𑀙𑁂𑀢𑀩𑁆𑀩𑀪𑀸𑀯𑁂𑀦 𑀧𑀥𑀸𑀦𑁄 𑀏𑀢𑁆𑀣 𑀓𑀼𑀲𑀮𑀪𑀸𑀯𑁄, 𑀦 𑀢𑀣𑀸 𑀥𑀫𑁆𑀫𑀪𑀸𑀯𑁄𑀢𑀺 𑀥𑀫𑁆𑀫𑀸 𑀓𑀼𑀲𑀮𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀫𑀬𑁂𑀢𑀺 𑀘𑀺𑀢𑁆𑀢𑀲𑁆𑀲 𑀉𑀧𑁆𑀧𑀚𑁆𑀚𑀦𑀲𑀫𑀬𑁂. ‘‘𑀅𑀣 𑀯𑀺𑀚𑁆𑀚𑀫𑀸𑀦𑁂’’𑀢𑀺 𑀏𑀢𑁆𑀣 𑀅𑀣-𑀲𑀤𑁆𑀤𑀲𑁆𑀲 𑀅𑀢𑁆𑀣𑀫𑀸𑀳 ‘‘𑀧𑀘𑁆𑀙𑀸’’𑀢𑀺. 𑀪𑁄𑀚𑀦𑀕𑀫𑀦𑀸𑀤𑀻𑀳𑀺 𑀲𑀫𑀬𑁂𑀓𑀤𑁂𑀲𑀦𑀸𑀦𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀅𑀯𑀲𑁂𑀲𑀦𑀸𑀦𑀢𑁆𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀫𑀯𑀸𑀬𑀸𑀤𑀻’’𑀢𑀺 𑀯𑀼𑀢𑁆𑀢𑀁. 𑀯𑀺𑀲𑁂𑀲𑀺𑀢𑀸𑀢𑀺 𑀏𑀢𑁂𑀦 ‘‘𑀦𑀺𑀬𑀫𑀺𑀢𑀸’’𑀢𑀺 𑀧𑀤𑀲𑁆𑀲 𑀅𑀢𑁆𑀣𑀁 𑀯𑀺𑀯𑀭𑀢𑀺, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀘𑀺𑀢𑁆𑀢𑀯𑀺𑀲𑁂𑀲𑀺𑀢𑀩𑁆𑀩𑀢𑁄 𑀲𑀫𑀬𑀢𑁄𑀢𑀺 𑀅𑀢𑁆𑀣𑁄. 𑀬𑀣𑀸𑀥𑀺𑀧𑁆𑀧𑁂𑀢𑀸𑀦𑀦𑁆𑀢𑀺 𑀓𑀸𑀫𑀸𑀯𑀘𑀭𑀸𑀤𑀺𑀯𑀺𑀲𑁂𑀲𑀬𑀼𑀢𑁆𑀢𑀸𑀦𑀁. ‘‘𑀢𑀲𑁆𑀫𑀺𑀁 𑀲𑀫𑀬𑁂’’𑀢𑀺 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀸 𑀯𑀺𑀲𑁂𑀲𑀺𑀢𑀩𑁆𑀩𑁄𑀧𑀺 𑀲𑀫𑀬𑁄 𑀬𑁂𑀦 𑀘𑀺𑀢𑁆𑀢𑁂𑀦 𑀉𑀧𑁆𑀧𑀚𑁆𑀚𑀫𑀸𑀦𑁂𑀦 𑀯𑀺𑀲𑁂𑀲𑀻𑀬𑀢𑀺, 𑀢𑀲𑁆𑀲𑁂𑀯 𑀘𑀺𑀢𑁆𑀢𑀲𑁆𑀲 ‘‘𑀬𑀲𑁆𑀫𑀺𑀁 𑀲𑀫𑀬𑁂’’𑀢𑀺 𑀏𑀢𑁆𑀣 𑀲𑀬𑀁 𑀯𑀺𑀲𑁂𑀲𑀦𑀪𑀸𑀯𑀁 𑀆𑀧𑀚𑁆𑀚𑀢𑀺. 𑀢𑀣𑀸 ‘‘𑀢𑀲𑁆𑀫𑀺𑀁 𑀲𑀫𑀬𑁂’’𑀢𑀺 𑀏𑀢𑁆𑀣 𑀯𑀺𑀲𑁂𑀲𑀦𑀪𑀽𑀢𑀁 𑀘𑀺𑀢𑁆𑀢𑀁 𑀅𑀢𑁆𑀢𑀦𑀸 𑀯𑀺𑀲𑁂𑀲𑀺𑀢𑀩𑁆𑀩𑀲𑀫𑀬𑀲𑁆𑀲 𑀉𑀧𑀓𑀸𑀭𑀢𑁆𑀣𑀁 ‘‘𑀬𑀲𑁆𑀫𑀺𑀁 𑀲𑀫𑀬𑁂…𑀧𑁂… 𑀘𑀺𑀢𑁆𑀢’’𑀦𑁆𑀢𑀺 𑀯𑀺𑀲𑁂𑀲𑀺𑀢𑀩𑁆𑀩𑀪𑀸𑀯𑀁 𑀆𑀧𑀚𑁆𑀚𑀢𑀺. 𑀉𑀧𑀓𑀸𑀭𑁄𑀢𑀺 𑀘 𑀅𑀜𑁆𑀜𑀫𑀜𑁆𑀜𑀁 𑀅𑀯𑀘𑁆𑀙𑁂𑀤𑀓𑀸𑀯𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑀪𑀸𑀯𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀧𑀼𑀭𑀺𑀫𑀥𑀫𑁆𑀫𑀸𑀦𑀁 𑀪𑀗𑁆𑀕𑀲𑀫𑀓𑀸𑀮𑀁, 𑀪𑀗𑁆𑀕𑀸𑀦𑀦𑁆𑀢𑀭𑀫𑁂𑀯 𑀯𑀸 𑀧𑀘𑁆𑀙𑀺𑀫𑀥𑀫𑁆𑀫𑀸𑀦𑀁 𑀉𑀧𑁆𑀧𑀢𑁆𑀢𑀺 𑀧𑀼𑀭𑀺𑀫𑀧𑀘𑁆𑀙𑀺𑀫𑀸𑀦𑀁 𑀦𑀺𑀭𑀦𑁆𑀢𑀭𑀢𑀸 𑀓𑁂𑀦𑀘𑀺 𑀅𑀦𑀦𑁆𑀢𑀭𑀺𑀢𑀢𑀸. 𑀬𑀸𑀬 𑀪𑀸𑀯𑀧𑀓𑁆𑀔𑀲𑁆𑀲 𑀩𑀮𑀯𑀪𑀸𑀯𑁂𑀦 𑀧𑀝𑀺𑀘𑁆𑀙𑀸𑀤𑀺𑀢𑁄 𑀯𑀺𑀬 𑀳𑀼𑀢𑁆𑀯𑀸 𑀅𑀪𑀸𑀯𑀧𑀓𑁆𑀔𑁄 𑀦 𑀧𑀜𑁆𑀜𑀸𑀬𑀢𑀻𑀢𑀺 𑀢𑀤𑁂𑀯𑁂𑀢𑀦𑁆𑀢𑀺 𑀕𑀳𑀡𑀯𑀲𑁂𑀦 𑀧𑀘𑀼𑀭𑀚𑀦𑁄 𑀯𑀺𑀧𑀭𑀺𑀬𑁂𑀲𑀺𑀢𑁄, 𑀲𑁄𑀬𑀫𑀢𑁆𑀣𑁄 𑀅𑀮𑀸𑀢𑀘𑀓𑁆𑀓𑁂𑀦 𑀲𑀼𑀧𑀸𑀓𑀝𑁄 𑀳𑁄𑀢𑀺. 𑀢𑁂𑀦𑁂𑀯𑀸𑀳 ‘‘𑀏𑀓𑀻𑀪𑀽𑀢𑀸𑀦𑀫𑀺𑀯𑀸’’𑀢𑀺. 𑀏𑀓𑀲𑀫𑀽𑀳𑀯𑀲𑁂𑀦 𑀏𑀓𑀻𑀪𑀽𑀢𑀸𑀦𑀫𑀺𑀯 𑀧𑀯𑀢𑁆𑀢𑀺 𑀲𑀫𑀽𑀳𑀖𑀦𑀢𑀸, 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀓𑀺𑀘𑁆𑀘𑀪𑁂𑀤𑀯𑀲𑁂𑀦 𑀏𑀓𑀻𑀪𑀽𑀢𑀸𑀦𑀫𑀺𑀯 𑀧𑀯𑀢𑁆𑀢𑀺 𑀓𑀺𑀘𑁆𑀘𑀖𑀦𑀢𑀸𑀢𑀺 𑀬𑁄𑀚𑀦𑀸. 𑀏𑀢𑁆𑀣 𑀘 𑀧𑀘𑁆𑀘𑀬𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑀸𑀦𑀁 𑀅𑀦𑁂𑀓𑁂𑀲𑀁 𑀥𑀫𑁆𑀫𑀸𑀦𑀁 𑀓𑀸𑀮𑀲𑀪𑀸𑀯𑀩𑁆𑀬𑀸𑀧𑀸𑀭𑀸𑀭𑀫𑁆𑀫𑀡𑁂𑀳𑀺 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑀪𑁂𑀤𑀢𑀸𑀬 𑀏𑀓𑀻𑀪𑀽𑀢𑀸𑀦𑀫𑀺𑀯 𑀕𑀳𑁂𑀢𑀩𑁆𑀩𑀢𑀸 𑀬𑀣𑀸𑀓𑁆𑀓𑀫𑀁 𑀲𑀦𑁆𑀢𑀢𑀺𑀖𑀦𑀢𑀸𑀤𑀬𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀲𑀳𑀓𑀸𑀭𑀻𑀓𑀸𑀭𑀡𑀲𑀦𑁆𑀦𑀺𑀚𑁆𑀛𑀁 𑀲𑀫𑁂𑀢𑀻𑀢𑀺 𑀲𑀫𑀬𑁄, 𑀲𑀫𑀯𑁂𑀢𑀻𑀢𑀺 𑀅𑀢𑁆𑀣𑁄𑀢𑀺 𑀲𑀫𑀬-𑀲𑀤𑁆𑀤𑀲𑁆𑀲 𑀲𑀫𑀯𑀸𑀬𑀢𑁆𑀣𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀧𑀘𑁆𑀘𑀬𑀲𑀸𑀫𑀕𑁆𑀕𑀺’’𑀦𑁆𑀢𑀺 𑀆𑀳. 𑀲𑀫𑁂𑀢𑀺 𑀲𑀫𑀸𑀕𑀘𑁆𑀙𑀢𑀺 𑀏𑀢𑁆𑀣 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁 𑀢𑀤𑀸𑀥𑀸𑀭𑀧𑀼𑀕𑁆𑀕𑀮𑁂𑀳𑀻𑀢𑀺 𑀲𑀫𑀬𑁄, 𑀔𑀡𑁄. 𑀲𑀫𑁂𑀦𑁆𑀢𑀺 𑀏𑀢𑁆𑀣, 𑀏𑀢𑁂𑀦 𑀯𑀸, 𑀲𑀫𑀸𑀕𑀘𑁆𑀙𑀦𑁆𑀢𑀺 𑀥𑀫𑁆𑀫𑀸 𑀲𑀳𑀚𑀸𑀢𑀥𑀫𑁆𑀫𑁂𑀳𑀺 𑀉𑀧𑁆𑀧𑀸𑀤𑀸𑀤𑀻𑀳𑀺 𑀯𑀸𑀢𑀺 𑀲𑀫𑀬𑁄, 𑀓𑀸𑀮𑁄. 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀫𑀢𑁆𑀢𑀢𑀸𑀬 𑀅𑀢𑁆𑀣𑀢𑁄 𑀅𑀪𑀽𑀢𑁄𑀧𑀺 𑀳𑀺 𑀓𑀸𑀮𑁄 𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀸 𑀅𑀥𑀺𑀓𑀭𑀡𑀁 𑀓𑀭𑀡𑀁 𑀯𑀺𑀬 𑀘 𑀧𑀭𑀺𑀓𑀧𑁆𑀧𑀦𑀸𑀫𑀢𑁆𑀢𑀲𑀺𑀤𑁆𑀥𑁂𑀦 𑀭𑀽𑀧𑁂𑀦 𑀯𑁄𑀳𑀭𑀻𑀬𑀢𑀻𑀢𑀺. 𑀲𑀫𑀁, 𑀲𑀳 𑀯𑀸 𑀅𑀯𑀬𑀯𑀸𑀦𑀁 𑀅𑀬𑀦𑀁 𑀧𑀯𑀢𑁆𑀢𑀺 𑀅𑀯𑀝𑁆𑀞𑀸𑀦𑀦𑁆𑀢𑀺 𑀲𑀫𑀬𑁄, 𑀲𑀫𑀽𑀳𑁄 𑀬𑀣𑀸 ‘‘𑀲𑀫𑀼𑀤𑀸𑀬𑁄’’𑀢𑀺. 𑀅𑀯𑀬𑀯𑀲𑀳𑀸𑀯𑀝𑁆𑀞𑀸𑀦𑀫𑁂𑀯 𑀳𑀺 𑀲𑀫𑀽𑀳𑁄. 𑀧𑀘𑁆𑀘𑀬𑀦𑁆𑀢𑀭𑀲𑀫𑀸𑀕𑀫𑁂 𑀏𑀢𑀺 𑀨𑀮𑀁 𑀏𑀢𑀲𑁆𑀫𑀸 𑀉𑀧𑁆𑀧𑀚𑁆𑀚𑀢𑀺 𑀧𑀯𑀢𑁆𑀢𑀢𑀺 𑀘𑀸𑀢𑀺 𑀲𑀫𑀬𑁄, 𑀳𑁂𑀢𑀼 𑀬𑀣𑀸 ‘‘𑀲𑀫𑀼𑀤𑀬𑁄’’𑀢𑀺. 𑀲𑀫𑁂𑀢𑀺 𑀲𑀫𑁆𑀩𑀦𑁆𑀥𑁄 𑀏𑀢𑀺 𑀲𑀯𑀺𑀲𑀬𑁂 𑀧𑀯𑀢𑁆𑀢𑀢𑀺, 𑀲𑀫𑁆𑀩𑀦𑁆𑀥𑀸 𑀯𑀸 𑀅𑀬𑀦𑁆𑀢𑀺 𑀏𑀢𑁂𑀦𑀸𑀢𑀺 𑀲𑀫𑀬𑁄, 𑀤𑀺𑀝𑁆𑀞𑀺. 𑀤𑀺𑀝𑁆𑀞𑀺𑀲𑀁𑀬𑁄𑀚𑀦𑁂𑀦 𑀳𑀺 𑀲𑀢𑁆𑀢𑀸 𑀅𑀢𑀺𑀯𑀺𑀬 𑀩𑀚𑁆𑀛𑀦𑁆𑀢𑀻𑀢𑀺. 𑀲𑀫𑀬𑀦𑀁 𑀲𑀗𑁆𑀕𑀢𑀺 𑀲𑀫𑁄𑀥𑀸𑀦𑀦𑁆𑀢𑀺 𑀲𑀫𑀬𑁄, 𑀧𑀝𑀺𑀮𑀸𑀪𑁄. 𑀲𑀫𑀲𑁆𑀲 𑀦𑀺𑀭𑁄𑀥𑀲𑁆𑀲 𑀬𑀸𑀦𑀁, 𑀲𑀫𑁆𑀫𑀸 𑀯𑀸 𑀬𑀸𑀦𑀁 𑀅𑀧𑀕𑀫𑁄 𑀅𑀧𑁆𑀧𑀯𑀢𑁆𑀢𑀻𑀢𑀺 𑀲𑀫𑀬𑁄, 𑀧𑀳𑀸𑀦𑀁. 𑀅𑀪𑀺𑀫𑀼𑀔𑀪𑀸𑀯𑁂𑀦 𑀲𑀫𑁆𑀫𑀸 𑀏𑀢𑀩𑁆𑀩𑁄 𑀅𑀪𑀺𑀲𑀫𑁂𑀢𑀩𑁆𑀩𑁄 𑀅𑀥𑀺𑀕𑀦𑁆𑀢𑀩𑁆𑀩𑁄𑀢𑀺 𑀅𑀯𑀺𑀧𑀭𑀻𑀢𑁄 𑀲𑀪𑀸𑀯𑁄 𑀅𑀪𑀺𑀲𑀫𑀬𑁄. 𑀅𑀪𑀺𑀫𑀼𑀔𑀪𑀸𑀯𑁂𑀦 𑀲𑀫𑁆𑀫𑀸 𑀯𑀸 𑀏𑀢𑀺 𑀕𑀘𑁆𑀙𑀢𑀺 𑀩𑀼𑀚𑁆𑀛𑀢𑀻𑀢𑀺 𑀅𑀪𑀺𑀲𑀫𑀬𑁄, 𑀅𑀯𑀺𑀭𑀸𑀥𑁂𑀢𑁆𑀯𑀸 𑀥𑀫𑁆𑀫𑀸𑀦𑀁 𑀅𑀯𑀺𑀧𑀭𑀻𑀢𑀲𑀪𑀸𑀯𑀸𑀯𑀩𑁄𑀥𑁄. 𑀏𑀢𑁆𑀣 𑀘 𑀉𑀧𑀲𑀕𑁆𑀕𑀸𑀦𑀁 𑀚𑁄𑀢𑀓𑀫𑀢𑁆𑀢𑀢𑁆𑀢𑀸 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀸𑀘𑀓𑁄 𑀲𑀫𑀬-𑀲𑀤𑁆𑀤𑁄 𑀏𑀯𑀸𑀢𑀺 𑀲𑀉𑀧𑀲𑀕𑁆𑀕𑁄𑀧𑀺 𑀯𑀼𑀢𑁆𑀢𑁄. 𑀢𑀸𑀦𑁂𑀯𑀸𑀢𑀺 𑀧𑀻𑀴𑀦𑀸𑀤𑀻𑀦𑁂𑀯. 𑀯𑀺𑀧𑁆𑀨𑀸𑀭𑀺𑀓𑀢𑀸 𑀲𑁂𑀭𑀺𑀪𑀸𑀯𑁂𑀦 𑀓𑀺𑀭𑀺𑀬𑀸𑀲𑀼 𑀉𑀲𑁆𑀲𑀸𑀳𑀦𑀧𑀭𑀺𑀦𑀺𑀧𑁆𑀨𑀦𑁆𑀦𑁄.

𑀓𑁂𑀲𑀼𑀘𑀻𑀢𑀺 𑀅𑀓𑀼𑀲𑀮𑀯𑀺𑀧𑀸𑀓𑀸𑀤𑀻𑀲𑀼. 𑀔𑀡𑀲𑁆𑀲 𑀅𑀲𑀫𑁆𑀪𑀯𑁄 𑀢𑁂𑀦 𑀯𑀺𑀦𑀸𑀪𑀸𑀯𑁄𑀢𑀺 𑀆𑀳 ‘‘𑀦𑀦𑀽’’𑀢𑀺𑀆𑀤𑀺. 𑀥𑀫𑁆𑀫𑁂𑀦𑁂𑀯𑀸𑀢𑀺 𑀯𑀺𑀲𑁂𑀲𑀦𑁆𑀢𑀭𑀭𑀳𑀺𑀢𑁂𑀦. 𑀢𑀁𑀬𑁂𑀯 𑀳𑀺 𑀅𑀯𑀥𑀸𑀭𑀡𑁂𑀦 𑀦𑀺𑀯𑀢𑁆𑀢𑀺𑀢𑀁 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀺 ‘‘𑀦 𑀢𑀲𑁆𑀲 𑀧𑀯𑀢𑁆𑀢𑀺𑀢𑁆𑀣𑀸’’𑀢𑀺𑀆𑀤𑀺𑀦𑀸. 𑀬𑀣𑀸 𑀯𑀸 𑀢𑀣𑀸 𑀯𑀸𑀢𑀺 𑀓𑀸𑀮𑁂𑀦 𑀮𑁄𑀓𑁄 𑀧𑀯𑀢𑁆𑀢𑀢𑀺 𑀦𑀺𑀯𑀢𑁆𑀢𑀢𑀻𑀢𑀺 𑀯𑀸 𑀓𑀸𑀮𑁄 𑀦𑀸𑀫 𑀪𑀸𑀯𑁄 𑀯𑀢𑁆𑀢𑀦𑀮𑀓𑁆𑀔𑀡𑁄 𑀪𑀸𑀯𑀸𑀦𑀁 𑀧𑀯𑀢𑁆𑀢𑀺𑀑𑀓𑀸𑀲𑀤𑀸𑀬𑀓𑁄𑀢𑀺 𑀯𑀸 𑀬𑁂𑀦 𑀢𑁂𑀦 𑀧𑀓𑀸𑀭𑁂𑀦. 𑀇𑀥 𑀉𑀢𑁆𑀢𑀫𑀳𑁂𑀢𑀼𑀦𑁄 𑀲𑀫𑁆𑀪𑀯𑁄 𑀏𑀯 𑀦𑀢𑁆𑀣𑀻𑀢𑀺 𑀳𑁂𑀢𑀼𑀳𑁂𑀢𑀼𑀲𑀸𑀥𑀸𑀭𑀡𑀳𑁂𑀢𑀽𑀬𑁂𑀯 𑀧𑀝𑀺𑀲𑁂𑀥𑁂𑀢𑀺. 𑀢𑀧𑁆𑀧𑀘𑁆𑀘𑀬𑀢𑀁 𑀅𑀦𑁂𑀓𑀧𑀘𑁆𑀘𑀬𑀢𑀁.

𑀧𑀓𑀢𑀺𑀲𑁆𑀲𑀭𑀯𑀸𑀤𑀕𑁆𑀕𑀳𑀡𑀁 𑀦𑀺𑀤𑀲𑁆𑀲𑀦𑀫𑀢𑁆𑀢𑀁 𑀤𑀝𑁆𑀞𑀩𑁆𑀩𑀁. 𑀧𑀚𑀸𑀧𑀢𑀺𑀧𑀼𑀭𑀺𑀲𑀓𑀸𑀮𑀯𑀸𑀤𑀸𑀤𑀬𑁄𑀧𑀺 ‘‘𑀏𑀓𑀓𑀸𑀭𑀡𑀯𑀸𑀤𑁄’’𑀢𑀺. 𑀯𑀸-𑀲𑀤𑁆𑀤𑁂𑀦 𑀯𑀸 𑀢𑁂𑀲𑀫𑁆𑀧𑀺 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀅𑀯𑀬𑀯…𑀧𑁂… 𑀤𑀸𑀬𑁄 𑀯𑀼𑀢𑁆𑀢𑁄 𑀅𑀯𑀬𑀯𑀥𑀫𑁆𑀫𑁂𑀦 𑀲𑀫𑀼𑀤𑀸𑀬𑀲𑁆𑀲 𑀅𑀧𑀤𑀺𑀲𑀺𑀢𑀩𑁆𑀩𑀢𑁆𑀢𑀸, 𑀬𑀣𑀸 ‘‘𑀲𑀫𑀁 𑀘𑀼𑀡𑁆𑀡𑀁, 𑀅𑀮𑀗𑁆𑀓𑀢𑁄 𑀤𑁂𑀯𑀤𑀢𑁆𑀢𑁄’’𑀢𑀺 𑀘. 𑀅𑀦𑀺𑀧𑁆𑀨𑀸𑀤𑀦𑀁 𑀦𑀺𑀧𑁆𑀨𑀸𑀤𑀦𑀸𑀪𑀸𑀯𑁄 𑀅𑀳𑁂𑀢𑀼𑀪𑀸𑀯𑁄. 𑀦𑀺𑀧𑁆𑀨𑀸𑀤𑁂𑀢𑀼𑀁 𑀅𑀲𑀫𑀢𑁆𑀣𑀲𑁆𑀲 𑀧𑀦 𑀧𑀘𑁆𑀘𑀬𑀦𑁆𑀢𑀭𑀸𑀦𑀁 𑀲𑀳𑀲𑁆𑀲𑁂𑀧𑀺 𑀲𑀫𑀸𑀕𑀢𑁂 𑀦𑀢𑁆𑀣𑁂𑀯 𑀲𑀫𑀢𑁆𑀣𑀢𑀸𑀢𑀺 𑀆𑀳 ‘‘𑀦𑀺𑀧𑁆𑀨𑀸𑀤𑀦𑀲𑀫𑀢𑁆𑀣𑀲𑁆𑀲𑀸’’𑀢𑀺. 𑀏𑀢𑁆𑀣 𑀘 𑀲𑀳𑀓𑀸𑀭𑀻𑀓𑀸𑀭𑀡𑀸𑀬𑀢𑁆𑀢𑀸 𑀨𑀮𑀼𑀧𑁆𑀧𑀸𑀤𑀦𑀸 𑀧𑀘𑁆𑀘𑀬𑀥𑀫𑁆𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀸𑀧𑁂𑀓𑁆𑀔𑀸𑀢𑀺 𑀯𑀼𑀢𑁆𑀢𑀸𑀢𑀺 𑀅𑀧𑁂𑀓𑁆𑀔𑀸 𑀯𑀺𑀬𑀸𑀢𑀺 𑀅𑀧𑁂𑀓𑁆𑀔𑀸 𑀤𑀝𑁆𑀞𑀩𑁆𑀩𑀸.

𑀦𑀺𑀩𑁆𑀬𑀸𑀧𑀸𑀭𑁂𑀲𑀼 𑀅𑀩𑁆𑀬𑀸𑀯𑀝𑁂𑀲𑀼. 𑀏𑀓𑁂𑀓𑀲𑁆𑀫𑀺𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀆𑀫𑁂𑀟𑀺𑀢𑀯𑀘𑀦𑀲𑁆𑀲 𑀮𑀼𑀢𑁆𑀢𑀦𑀺𑀤𑁆𑀤𑀺𑀝𑁆𑀞𑀢𑀁 𑀤𑀲𑁆𑀲𑁂𑀢𑀺. 𑀲𑀢𑀺 𑀘 𑀆𑀫𑁂𑀟𑀺𑀢𑁂 𑀲𑀺𑀤𑁆𑀥𑁄 𑀩𑀳𑀼𑀪𑀸𑀯𑁄𑀢𑀺. 𑀅𑀦𑁆𑀥𑀲𑀢𑀁 𑀧𑀲𑁆𑀲𑀢𑀻𑀢𑀺 𑀘 𑀧𑀘𑁆𑀘𑀢𑁆𑀢𑀯𑀘𑀦𑀁 𑀦𑀺𑀤𑁆𑀥𑀸𑀭𑀡𑁂 𑀪𑀼𑀫𑁆𑀫𑀯𑀲𑁂𑀦 𑀧𑀭𑀺𑀡𑀸𑀫𑁂𑀢𑁆𑀯𑀸 ‘‘𑀅𑀦𑁆𑀥𑀲𑀢𑁂’’𑀢𑀺 𑀆𑀳. 𑀢𑀣𑀸 𑀏𑀓𑁂𑀓𑀲𑁆𑀫𑀺𑀦𑁆𑀢𑀺 𑀇𑀫𑀺𑀦𑀸 𑀯𑀺𑀲𑀼𑀁 𑀅𑀲𑀫𑀢𑁆𑀣𑀢𑀸 𑀚𑁄𑀢𑀺𑀢𑀸𑀢𑀺 𑀅𑀦𑁆𑀥𑀲𑀢𑀁 𑀧𑀲𑁆𑀲𑀢𑀻𑀢𑀺 𑀲𑀫𑀼𑀤𑀺𑀢𑀁 𑀧𑀲𑁆𑀲𑀢𑀻𑀢𑀺 𑀅𑀢𑁆𑀣𑀢𑁄 𑀅𑀬𑀫𑀢𑁆𑀣𑁄 𑀆𑀧𑀦𑁆𑀦𑁄𑀢𑀺 𑀆𑀳 ‘‘𑀅𑀦𑁆𑀥𑀲𑀢𑀁 𑀲𑀳𑀺𑀢𑀁 𑀧𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺. 𑀅𑀜𑁆𑀜𑀣𑀸𑀢𑀺 𑀬𑀣𑀸𑀭𑀼𑀢𑀯𑀲𑁂𑀦 𑀅𑀢𑁆𑀣𑁂 𑀕𑀬𑁆𑀳𑀫𑀸𑀦𑁂. 𑀬𑀲𑁆𑀫𑀸 𑀅𑀲𑀸…𑀧𑁂… 𑀲𑀺𑀤𑁆𑀥𑁄 𑀲𑀺𑀯𑀺𑀓𑀼𑀩𑁆𑀩𑀳𑀦𑀸𑀤𑀻𑀲𑀼, 𑀢𑀲𑁆𑀫𑀸 𑀦𑀸𑀬𑀫𑀢𑁆𑀣𑁄 𑀲𑀸𑀥𑁂𑀢𑀩𑁆𑀩𑁄. 𑀇𑀤𑀸𑀦𑀺 𑀢𑀲𑁆𑀲𑀢𑁆𑀣𑀲𑁆𑀲 𑀲𑀼𑀧𑀸𑀓𑀝𑀪𑀸𑀯𑁂𑀦 𑀅𑀲𑀸𑀥𑁂𑀢𑀩𑁆𑀩𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀺𑀲𑀼’’𑀦𑁆𑀢𑀺𑀆𑀤𑀺𑀫𑀸𑀳.

𑀏𑀢𑁂𑀦𑀼𑀧𑀸𑀬𑁂𑀦𑀸𑀢𑀺 𑀬𑁄𑀬𑀁 𑀔𑀡𑀲𑀗𑁆𑀔𑀸𑀢𑁄 𑀲𑀫𑀬𑁄 𑀓𑀼𑀲𑀮𑀼𑀧𑁆𑀧𑀢𑁆𑀢𑀺𑀬𑀸 𑀤𑀼𑀮𑁆𑀮𑀪𑀪𑀸𑀯𑀁 𑀤𑀻𑀧𑁂𑀢𑀺. 𑀅𑀢𑁆𑀢𑀦𑁄 𑀤𑀼𑀮𑁆𑀮𑀪𑀢𑀸𑀬𑀸𑀢𑀺 𑀏𑀢𑁆𑀣 𑀔𑀡𑀢𑁆𑀣𑁄 𑀯𑀸 𑀲𑀫𑀬-𑀲𑀤𑁆𑀤𑁄 𑀔𑀡𑀲𑀗𑁆𑀔𑀸𑀢𑁄 𑀲𑀫𑀬𑁄𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄. 𑀏𑀢𑁂𑀦 𑀉𑀧𑀸𑀬𑀪𑀽𑀢𑁂𑀦 𑀦𑀬𑀪𑀽𑀢𑁂𑀦. 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸𑀢𑀺 𑀏𑀢𑁆𑀣𑀸𑀬𑀁 𑀬𑁄𑀚𑀦𑀸 𑁋 𑀲𑀫𑀯𑀸𑀬…𑀧𑁂… 𑀯𑀼𑀢𑁆𑀢𑀺𑀁 𑀤𑀻𑀧𑁂𑀢𑀺 𑀲𑀬𑀁 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀪𑀸𑀯𑀢𑁄, 𑀲𑀫𑀯𑀸𑀬𑀢𑁆𑀣𑁄 𑀯𑀸 𑀲𑀫𑀬-𑀲𑀤𑁆𑀤𑁄 𑀲𑀫𑀯𑀸𑀬𑀲𑀗𑁆𑀔𑀸𑀢𑁄 𑀲𑀫𑀬𑁄. 𑀲𑁄 𑀬𑀸𑀬 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀬𑀸 𑀲𑀢𑀻𑀢𑀺 𑀇𑀫𑀲𑁆𑀲 𑀅𑀢𑁆𑀣𑀲𑁆𑀲 𑀧𑀓𑀸𑀲𑀦𑀯𑀲𑁂𑀦 𑀥𑀫𑁆𑀫𑀸𑀦𑀁 𑀅𑀦𑁂𑀓𑀳𑁂𑀢𑀼𑀢𑁄 𑀯𑀼𑀢𑁆𑀢𑀺𑀁 𑀤𑀻𑀧𑁂𑀢𑀺. 𑀓𑀸𑀮…𑀧𑁂… 𑀧𑀭𑀺𑀢𑁆𑀢𑀢𑀁 𑀤𑀻𑀧𑁂𑀢𑀺 𑀅𑀢𑁆𑀢𑀦𑁄 𑀅𑀢𑀺𑀧𑀭𑀺𑀢𑁆𑀢𑀢𑀸𑀬. 𑀲𑀫𑀽𑀳…𑀧𑁂… 𑀲𑀳𑀼𑀧𑁆𑀧𑀢𑁆𑀢𑀺𑀁 𑀤𑀻𑀧𑁂𑀢𑀺 𑀲𑀬𑀁 𑀥𑀫𑁆𑀫𑀸𑀦𑀁 𑀲𑀫𑀼𑀤𑀸𑀬𑀪𑀸𑀯𑀢𑁄. 𑀳𑁂𑀢𑀼…𑀧𑁂… 𑀯𑀼𑀢𑁆𑀢𑀺𑀢𑀁 𑀤𑀻𑀧𑁂𑀢𑀺 𑀲𑀢𑀺 𑀏𑀯 𑀅𑀢𑁆𑀢𑀦𑀺 𑀅𑀢𑁆𑀢𑀦𑁄 𑀨𑀮𑀸𑀦𑀁 𑀲𑀫𑁆𑀪𑀯𑀢𑁄𑀢𑀺. 𑀅𑀢𑁆𑀣𑀧𑀓𑁆𑀔𑁂 𑀘 𑀲𑀤𑁆𑀤𑀧𑀓𑁆𑀔𑁂 𑀘 𑀬𑀲𑁆𑀫𑀺𑀁 𑀅𑀢𑀺𑀧𑀭𑀺𑀢𑁆𑀢𑁂 𑀓𑀸𑀮𑁂 𑀬𑀲𑁆𑀫𑀺𑀁 𑀥𑀫𑁆𑀫𑀲𑀫𑀼𑀤𑀸𑀬𑁂 𑀬𑀫𑁆𑀳𑀺 𑀳𑁂𑀢𑀼𑀫𑁆𑀳𑀺 𑀲𑀢𑀻𑀢𑀺 𑀏𑀢𑀲𑁆𑀲 𑀅𑀢𑁆𑀣𑀲𑁆𑀲 𑀜𑀸𑀧𑀦𑀯𑀲𑁂𑀦 𑀢𑀤𑀸𑀥𑀸𑀭𑀸𑀬 𑀢𑀤𑀥𑀻𑀦𑀸𑀬 𑀘 𑀓𑀼𑀲𑀮𑀥𑀫𑁆𑀫𑀧𑁆𑀧𑀯𑀢𑁆𑀢𑀺𑀬𑀸 𑀤𑀼𑀧𑁆𑀧𑀝𑀺𑀯𑀺𑀚𑁆𑀛𑀢𑀁 𑀅𑀦𑁂𑀓𑁂𑀲𑀁 𑀲𑀳𑀼𑀧𑁆𑀧𑀢𑁆𑀢𑀺𑀁 𑀧𑀭𑀸𑀥𑀻𑀦𑀧𑁆𑀧𑀢𑁆𑀢𑀺𑀜𑁆𑀘 𑀤𑀻𑀧𑁂𑀢𑀻𑀢𑀺.

𑀤𑀴𑁆𑀳𑀥𑀫𑁆𑀫𑀸 𑀥𑀦𑀼𑀕𑁆𑀕𑀳𑀸𑀢𑀺 𑀤𑀴𑁆𑀳𑀥𑀦𑀼𑀦𑁄 𑀇𑀲𑁆𑀲𑀸𑀲𑀸. 𑀤𑀴𑁆𑀳𑀥𑀦𑀼 𑀦𑀸𑀫 𑀤𑁆𑀯𑀺𑀲𑀳𑀲𑁆𑀲𑀣𑀸𑀫𑀁 𑀯𑀼𑀘𑁆𑀘𑀢𑀺. 𑀤𑁆𑀯𑀺𑀲𑀳𑀲𑁆𑀲𑀣𑀸𑀫𑀦𑁆𑀢𑀺 𑀘 𑀬𑀲𑁆𑀲 𑀆𑀭𑁄𑀧𑀺𑀢𑀲𑁆𑀲 𑀚𑀺𑀬𑀸𑀩𑀤𑁆𑀥𑁄 𑀮𑁄𑀳𑀲𑀻𑀲𑀸𑀤𑀻𑀦𑀁 𑀪𑀸𑀭𑁄 𑀤𑀡𑁆𑀟𑁂 𑀕𑀳𑁂𑀢𑁆𑀯𑀸 𑀬𑀸𑀯 𑀓𑀡𑁆𑀟𑀧𑁆𑀧𑀫𑀸𑀡𑀸 𑀉𑀓𑁆𑀔𑀺𑀢𑁆𑀢𑀲𑁆𑀲 𑀧𑀣𑀯𑀺𑀢𑁄 𑀫𑀼𑀘𑁆𑀘𑀢𑀺. 𑀲𑀺𑀓𑁆𑀔𑀺𑀢𑀸𑀢𑀺 𑀤𑀲𑀤𑁆𑀯𑀸𑀤𑀲𑀯𑀲𑁆𑀲𑀸𑀦𑀺 𑀆𑀘𑀭𑀺𑀬𑀓𑀼𑀮𑁂 𑀉𑀕𑁆𑀕𑀳𑀺𑀢𑀲𑀺𑀧𑁆𑀧𑀸. 𑀓𑀢𑀳𑀢𑁆𑀣𑀸𑀢𑀺 𑀥𑀦𑀼𑀲𑁆𑀫𑀺𑀁 𑀘𑀺𑀡𑁆𑀡𑀯𑀲𑀻𑀪𑀸𑀯𑀸. 𑀓𑁄𑀘𑀺 𑀲𑀺𑀧𑁆𑀧𑀫𑁂𑀯 𑀉𑀕𑁆𑀕𑀡𑁆𑀳𑀸𑀢𑀺, 𑀓𑀢𑀳𑀢𑁆𑀣𑁄 𑀦 𑀳𑁄𑀢𑀺, 𑀇𑀫𑁂 𑀧𑀦 𑀦 𑀢𑀣𑀸𑀢𑀺 𑀤𑀲𑁆𑀲𑁂𑀢𑀺. 𑀓𑀢𑀼𑀧𑀸𑀲𑀦𑀸𑀢𑀺 𑀭𑀸𑀚𑀓𑀼𑀮𑀸𑀤𑀻𑀲𑀼 𑀤𑀲𑁆𑀲𑀺𑀢𑀲𑀺𑀧𑁆𑀧𑀸. 𑀘𑀢𑀼𑀤𑁆𑀤𑀺𑀲𑀸 𑀞𑀺𑀢𑀸 𑀅𑀲𑁆𑀲𑀽𑀢𑀺 𑀏𑀓𑀲𑁆𑀫𑀺𑀁𑀬𑁂𑀯 𑀧𑀤𑁂𑀲𑁂 𑀣𑀫𑁆𑀪𑀁 𑀯𑀸 𑀭𑀼𑀓𑁆𑀔𑀁 𑀯𑀸 𑀬𑀁 𑀓𑀺𑀜𑁆𑀘𑀺 𑀏𑀓𑀁𑀬𑁂𑀯 𑀦𑀺𑀲𑁆𑀲𑀸𑀬 𑀘𑀢𑀼𑀤𑁆𑀤𑀺𑀲𑀸𑀪𑀺𑀫𑀼𑀔𑀸 𑀞𑀺𑀢𑀸 𑀲𑀺𑀬𑀼𑀦𑁆𑀢𑀺 𑀅𑀢𑁆𑀣𑁄. 𑀏𑀯𑀁 𑀯𑀼𑀢𑁆𑀢𑀚𑀯𑀦𑀧𑀼𑀭𑀺𑀲𑀲𑁆𑀲𑀸𑀢𑀺 𑀦 𑀏𑀯𑀭𑀽𑀧𑁄 𑀧𑀼𑀭𑀺𑀲𑁄 𑀓𑁄𑀘𑀺 𑀪𑀽𑀢𑀧𑀼𑀩𑁆𑀩𑁄 𑀅𑀜𑁆𑀜𑀢𑁆𑀭 𑀩𑁄𑀥𑀺𑀲𑀢𑁆𑀢𑁂𑀦. 𑀲𑁄 𑀳𑀺 𑀚𑀯𑀦𑀳𑀁𑀲𑀓𑀸𑀮𑁂 𑀏𑀯𑀭𑀽𑀧𑀫𑀓𑀸𑀲𑀺. 𑀲𑀼𑀢𑁆𑀢𑁂 𑀧𑀦 𑀅𑀪𑀽𑀢𑀧𑀭𑀺𑀓𑀧𑁆𑀧𑀦𑀯𑀲𑁂𑀦 𑀉𑀧𑀫𑀸𑀫𑀢𑁆𑀢𑀁 𑀆𑀳𑀝𑀁. 𑀢𑀧𑁆𑀧𑀭𑀪𑀸𑀯𑀸𑀢𑀺 𑀢𑀧𑁆𑀧𑀭𑀪𑀸𑀯𑀢𑁄 𑀳𑁂𑀢𑀼𑀲𑀗𑁆𑀔𑀸𑀢𑀲𑁆𑀲 𑀲𑀫𑀬𑀲𑁆𑀲 𑀧𑀭𑀸𑀬𑀢𑁆𑀢𑀯𑀼𑀢𑁆𑀢𑀺𑀤𑀻𑀧𑀦𑁂 𑀏𑀓𑀦𑁆𑀢𑀩𑁆𑀬𑀸𑀯𑀝𑀲𑀪𑀸𑀯𑀢𑁄𑀢𑀺 𑀅𑀢𑁆𑀣𑁄. 𑀬𑁂 𑀧𑀦 ‘‘𑀢𑀧𑁆𑀧𑀭𑀪𑀸𑀯𑁄’’𑀢𑀺 𑀧𑀞𑀦𑁆𑀢𑀺, 𑀢𑁂𑀲𑀁 𑀧𑀘𑁆𑀘𑀬𑀸𑀬𑀢𑁆𑀢𑀯𑀼𑀢𑁆𑀢𑀺𑀤𑀻𑀧𑀦𑀢𑁄 𑀢𑀧𑁆𑀧𑀭𑀪𑀸𑀯𑁄 𑀳𑁂𑀢𑀼𑀲𑀗𑁆𑀔𑀸𑀢𑀲𑁆𑀲 𑀲𑀫𑀬𑀲𑁆𑀲, 𑀢𑀲𑁆𑀫𑀸 𑀢𑀲𑁆𑀲 𑀧𑀭𑀸𑀬𑀢𑁆𑀢𑀯𑀼𑀢𑁆𑀢𑀺𑀤𑀻𑀧𑀦𑀢𑀸 𑀯𑀼𑀢𑁆𑀢𑀸𑀢𑀺 𑀬𑁄𑀚𑀦𑀸. 𑀲𑀫𑀼𑀤𑀸𑀬𑀸𑀬𑀢𑁆𑀢𑀢𑀸𑀤𑀻𑀧𑀦𑁂 𑀢𑀧𑁆𑀧𑀭𑁄, 𑀢𑀤𑁂𑀓𑀤𑁂𑀲𑀸𑀬𑀢𑁆𑀢𑀢𑀸𑀤𑀻𑀧𑀦𑁂 𑀢𑀧𑁆𑀧𑀭𑁄 𑀦 𑀳𑁄𑀢𑀻𑀢𑀺 𑀆𑀳 ‘‘𑀅𑀢𑀧𑁆𑀧𑀭𑀪𑀸𑀯𑀢𑁄’’𑀢𑀺.

𑀦𑀦𑀼 𑀘 𑀢𑀁 𑀢𑀁 𑀉𑀧𑀸𑀤𑀸𑀬 𑀧𑀜𑁆𑀜𑀢𑁆𑀢𑁄 𑀓𑀸𑀮𑁄 𑀯𑁄𑀳𑀸𑀭𑀫𑀢𑁆𑀢𑀓𑁄, 𑀲𑁄 𑀓𑀣𑀁 𑀆𑀥𑀸𑀭𑁄 𑀢𑀢𑁆𑀣 𑀯𑀼𑀢𑁆𑀢𑀥𑀫𑁆𑀫𑀸𑀦𑀦𑁆𑀢𑀺 𑀆𑀳 ‘‘𑀓𑀸𑀮𑁄𑀧𑀺 𑀳𑀻’’𑀢𑀺𑀆𑀤𑀺. 𑀬𑀤𑀺 𑀓𑀺𑀭𑀺𑀬𑀸𑀬 𑀓𑀺𑀭𑀺𑀬𑀦𑁆𑀢𑀭𑀮𑀓𑁆𑀔𑀡𑀁 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀁, 𑀓𑀸 𑀧𑀦𑁂𑀢𑁆𑀣 𑀮𑀓𑁆𑀔𑀡𑀓𑀺𑀭𑀺𑀬𑀸𑀢𑀺 𑀆𑀳 ‘‘𑀇𑀳𑀸𑀧𑀻’’𑀢𑀺𑀆𑀤𑀺. 𑀮𑀓𑁆𑀔𑀡𑀪𑀽𑀢𑀪𑀸𑀯𑀬𑀼𑀢𑁆𑀢𑁄𑀢𑀺 𑀇𑀢𑀺-𑀲𑀤𑁆𑀤𑁄 𑀳𑁂𑀢𑀼𑀅𑀢𑁆𑀣𑁄. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀲𑁆𑀫𑀸 𑀲𑀢𑁆𑀢𑀸𑀲𑀗𑁆𑀔𑀸𑀢𑀸𑀬 𑀮𑀓𑁆𑀔𑀡𑀓𑀺𑀭𑀺𑀬𑀸𑀬 𑀬𑀼𑀢𑁆𑀢𑁄 𑀲𑀫𑀬𑁄, 𑀢𑀲𑁆𑀫𑀸 𑀢𑀢𑁆𑀣 𑀪𑀽𑀫𑀺𑀦𑀺𑀤𑁆𑀤𑁂𑀲𑁄𑀢𑀺.

𑀉𑀤𑁆𑀤𑀸𑀦𑀢𑁄𑀢𑀺 𑀬𑀤𑀺 𑀲𑀗𑁆𑀔𑁂𑀧𑀢𑁄𑀢𑀺 𑀅𑀢𑁆𑀣𑁄. 𑀦𑀦𑀼 𑀘 𑀅𑀯𑀲𑀺𑀝𑁆𑀞𑀓𑀺𑀮𑁂𑀲𑀸𑀤𑀬𑁄 𑀯𑀺𑀬 𑀓𑀺𑀮𑁂𑀲𑀓𑀸𑀫𑁄𑀧𑀺 𑀅𑀲𑁆𑀲𑀸𑀤𑁂𑀢𑀩𑁆𑀩𑀢𑀸𑀬 𑀯𑀢𑁆𑀣𑀼𑀓𑀸𑀫𑁂 𑀲𑀫𑀯𑀭𑀼𑀤𑁆𑀥𑁄 𑀜𑀸𑀡𑀁 𑀯𑀺𑀬 𑀜𑁂𑀬𑁆𑀬𑁂𑀢𑀺 𑀲𑀗𑁆𑀔𑁂𑀧𑀢𑁄 𑀏𑀓𑁄𑀬𑁂𑀯 𑀓𑀸𑀫𑁄 𑀲𑀺𑀬𑀸𑀢𑀺 𑀅𑀦𑀼𑀬𑁄𑀕𑀁 𑀲𑀦𑁆𑀥𑀸𑀬𑀸𑀳 ‘‘𑀓𑀺𑀮𑁂𑀲𑀓𑀸𑀫𑁄’’𑀢𑀺𑀆𑀤𑀺. 𑀲𑀳𑀺𑀢𑀲𑁆𑀲𑀸𑀢𑀺 𑀯𑀺𑀲𑀬𑀯𑀺𑀲𑀬𑀺𑀪𑀸𑀯𑁂𑀦 𑀅𑀯𑀝𑁆𑀞𑀺𑀢𑀲𑁆𑀲. ‘‘𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸’’𑀢𑀺 𑀓𑀺𑀜𑁆𑀘𑀸𑀧𑀺 𑀲𑀩𑁆𑀩𑁂 𑀓𑀸𑀫𑀸 𑀉𑀤𑁆𑀤𑀺𑀝𑁆𑀞𑀸, ‘‘𑀘𑀢𑀼𑀦𑁆𑀦𑀁 𑀅𑀧𑀸𑀬𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀧𑀦 𑀯𑀺𑀲𑀬𑀲𑁆𑀲 𑀯𑀺𑀲𑁂𑀲𑀺𑀢𑀢𑁆𑀢𑀸 𑀑𑀭𑀫𑁆𑀪𑀸𑀕𑀺𑀬𑀓𑀺𑀮𑁂𑀲𑀪𑀽𑀢𑁄 𑀓𑀸𑀫𑀭𑀸𑀕𑁄 𑀇𑀥 𑀓𑀺𑀮𑁂𑀲𑀓𑀸𑀫𑁄𑀢𑀺 𑀕𑀳𑀺𑀢𑁄𑀢𑀺 ‘‘𑀢𑁂𑀦𑀸’’𑀢𑀺𑀆𑀤𑀺𑀫𑀸𑀳. 𑀘𑁄𑀤𑀓𑁄 𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀅𑀚𑀸𑀦𑀦𑁆𑀢𑁄 ‘‘𑀦𑀦𑀼 𑀘𑀸’’𑀢𑀺𑀆𑀤𑀺𑀦𑀸 𑀅𑀦𑀼𑀬𑀼𑀜𑁆𑀚𑀢𑀺. 𑀇𑀢𑀭𑁄 𑀧𑀦 ‘‘𑀩𑀳𑀮𑀓𑀺𑀮𑁂𑀲𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑀁 𑀯𑀺𑀯𑀭𑀢𑀺.

𑀓𑀸𑀫𑀸𑀯𑀘𑀭𑀥𑀫𑁆𑀫𑁂𑀲𑀼 𑀯𑀺𑀫𑀸𑀦𑀓𑀧𑁆𑀧𑀭𑀼𑀓𑁆𑀔𑀸𑀤𑀺𑀧𑁆𑀧𑀓𑀸𑀭𑁂𑀲𑀼 𑀧𑀭𑀺𑀢𑁆𑀢𑀓𑀼𑀲𑀮𑀸𑀤𑀻𑀲𑀼 𑀯𑀸. 𑀦𑀦𑀼 𑀘 ‘‘𑀘𑀢𑀼𑀦𑁆𑀦𑀁 𑀅𑀧𑀸𑀬𑀸𑀦’’𑀦𑁆𑀢𑀺 𑀯𑀺𑀲𑀬𑀲𑁆𑀲 𑀯𑀺𑀲𑁂𑀲𑀺𑀢𑀢𑁆𑀢𑀸 𑀭𑀽𑀧𑀸𑀭𑀽𑀧𑀥𑀸𑀢𑀼𑀕𑁆𑀕𑀳𑀡𑀲𑁆𑀲 𑀅𑀲𑀫𑁆𑀪𑀯𑁄𑀬𑁂𑀯𑀸𑀢𑀺? 𑀦, ‘‘𑀉𑀤𑁆𑀤𑀸𑀦𑀢𑁄 𑀤𑁆𑀯𑁂 𑀓𑀸𑀫𑀸’’𑀢𑀺 𑀦𑀺𑀭𑀯𑀲𑁂𑀲𑀢𑁄 𑀓𑀸𑀫𑀸𑀦𑀁 𑀉𑀤𑁆𑀤𑀺𑀝𑁆𑀞𑀢𑁆𑀢𑀸. 𑀉𑀤𑁆𑀤𑀺𑀝𑁆𑀞𑁂𑀧𑀺 𑀳𑀺 𑀓𑀸𑀫𑀲𑀫𑀼𑀤𑀸𑀬𑁂 𑀬𑀣𑀸 𑀢𑀤𑁂𑀓𑀤𑁂𑀲𑁄𑀯 𑀕𑀬𑁆𑀳𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀤𑀼𑀯𑀺𑀥𑁄’’𑀢𑀺𑀆𑀤𑀺𑀫𑀸𑀳. 𑀓𑀸𑀫𑀭𑀸𑀕𑁄 𑀧𑀜𑁆𑀘𑀓𑀸𑀫𑀕𑀼𑀡𑀺𑀓𑁄 𑀭𑀸𑀕𑁄. 𑀓𑀸𑀫𑀢𑀡𑁆𑀳𑀸 𑀓𑀸𑀫𑀸𑀯𑀘𑀭𑀥𑀫𑁆𑀫𑀯𑀺𑀲𑀬𑀸 𑀢𑀡𑁆𑀳𑀸. 𑀦𑀺𑀭𑁄𑀥𑀢𑀡𑁆𑀳𑀸 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀲𑀳𑀕𑀢𑁄 𑀭𑀸𑀕𑁄. 𑀇𑀥𑀸𑀢𑀺 𑀏𑀓𑀸𑀤𑀲𑀯𑀺𑀥𑁂 𑀧𑀤𑁂𑀲𑁂. 𑀬𑀤𑀺 𑀅𑀦𑀯𑀲𑁂𑀲𑀧𑁆𑀧𑀯𑀢𑁆𑀢𑀺 𑀅𑀥𑀺𑀧𑁆𑀧𑁂𑀢𑀸, ‘‘𑀤𑀼𑀯𑀺𑀥𑁄𑀧𑁂𑀲𑁄’’𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀯𑀢𑁆𑀣𑀼𑀓𑀸𑀫𑁂𑀓𑀤𑁂𑀲𑀲𑁆𑀲 𑀇𑀥 𑀅𑀧𑁆𑀧𑀯𑀢𑁆𑀢𑀦𑀢𑁄𑀢𑀺 𑀅𑀦𑀼𑀬𑁄𑀕𑁂𑀦 𑀬𑁂𑀪𑀼𑀬𑁆𑀬𑀪𑀸𑀯𑀢𑁄 𑀅𑀦𑀯𑀲𑁂𑀲𑁄 𑀯𑀺𑀬 𑀅𑀦𑀯𑀲𑁂𑀲𑁄𑀢𑀺 𑀯𑀸 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀢𑁆𑀣𑀼𑀓𑀸𑀫𑁄𑀧𑀻’’𑀢𑀺𑀆𑀤𑀺𑀫𑀸𑀳. 𑀅𑀦𑀯𑀲𑁂𑀲𑀲𑀤𑀺𑀲𑀢𑀸 𑀘𑁂𑀢𑁆𑀣 𑀲𑀪𑀸𑀯𑀪𑀺𑀦𑁆𑀦𑀲𑁆𑀲 𑀓𑀲𑁆𑀲𑀘𑀺 𑀅𑀦𑀯𑀲𑁂𑀲𑀢𑁄. 𑀏𑀯𑀜𑁆𑀘 𑀓𑀢𑁆𑀯𑀸𑀢𑀺 𑀓𑀺𑀮𑁂𑀲𑀓𑀸𑀫𑀯𑀢𑁆𑀣𑀼𑀓𑀸𑀫𑀸𑀦𑀁 𑀅𑀦𑀯𑀲𑁂𑀲𑀧𑀭𑀺𑀧𑀼𑀡𑁆𑀡𑀪𑀸𑀯𑁂𑀦 𑀅𑀪𑀺𑀮𑀓𑁆𑀔𑀺𑀢𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀘𑀸𑀲𑀤𑁆𑀤𑀲𑁆𑀲 𑀭𑀲𑁆𑀲𑀢𑁆𑀢𑀁 𑀓𑀢𑀦𑁆𑀢𑀺 𑀓𑀸𑀫𑀸𑀯𑀘𑀭𑀲𑀤𑁆𑀤𑁂 𑀳𑁂𑀢𑀼𑀓𑀢𑁆𑀢𑀼𑀅𑀢𑁆𑀣𑁄 𑀅𑀦𑁆𑀢𑁄𑀦𑀻𑀢𑁄𑀢𑀺 𑀤𑀲𑁆𑀲𑁂𑀢𑀺.

𑀯𑀺𑀲𑀬𑁂𑀢𑀺 𑀯𑀢𑁆𑀣𑀼𑀲𑁆𑀫𑀺𑀁 𑀅𑀪𑀺𑀥𑁂𑀬𑁆𑀬𑀢𑁆𑀣𑁂𑀢𑀺 𑀅𑀢𑁆𑀣𑁄. 𑀦𑀺𑀫𑀺𑀢𑁆𑀢𑀯𑀺𑀭𑀳𑁂𑀢𑀺 𑀏𑀢𑁂𑀦 𑀭𑀼𑀴𑁆𑀳𑀻𑀲𑀼 𑀓𑀺𑀭𑀺𑀬𑀸 𑀯𑀺𑀪𑀸𑀕𑀓𑀭𑀡𑀸𑀬, 𑀦 𑀅𑀢𑁆𑀢𑀓𑀺𑀭𑀺𑀬𑀸𑀬𑀸𑀢𑀺 𑀤𑀲𑁆𑀲𑁂𑀢𑀺. 𑀓𑀼𑀲𑀮𑀪𑀸𑀯𑀦𑁆𑀢𑀺 𑀚𑀸𑀢𑀓𑀩𑀸𑀳𑀺𑀢𑀺𑀓𑀲𑀼𑀢𑁆𑀢𑀅𑀪𑀺𑀥𑀫𑁆𑀫𑀧𑀭𑀺𑀬𑀸𑀬𑁂𑀦 𑀓𑀣𑀺𑀢𑀁 𑀓𑀼𑀲𑀮𑀢𑁆𑀢𑀁. 𑀢𑀲𑁆𑀲𑀸𑀢𑀺 𑀲𑀼𑀔𑀯𑀺𑀧𑀸𑀓𑀪𑀸𑀯𑀲𑁆𑀲. 𑀢𑀲𑁆𑀲 𑀧𑀘𑁆𑀘𑀼𑀧𑀝𑁆𑀞𑀸𑀦𑀢𑀁 𑀯𑀢𑁆𑀢𑀼𑀓𑀸𑀫𑀢𑀸𑀬𑀸𑀢𑀺 𑀏𑀢𑁂𑀦 ‘‘𑀅𑀦𑀯𑀚𑁆𑀚𑀲𑀼𑀔𑀯𑀺𑀧𑀸𑀓𑀮𑀓𑁆𑀔𑀡’’𑀦𑁆𑀢𑀺 𑀏𑀢𑁆𑀣 𑀲𑀼𑀔𑀲𑀤𑁆𑀤𑁄 𑀇𑀝𑁆𑀞𑀧𑀭𑀺𑀬𑀸𑀬𑁄 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀜𑁆𑀜𑀸𑀧𑀜𑁆𑀜𑀸𑀓𑀺𑀘𑁆𑀘𑀁 𑀲𑀜𑁆𑀜𑀸𑀡𑀓𑀭𑀡𑀧𑀝𑀺𑀯𑀺𑀚𑁆𑀛𑀦𑀸𑀦𑀺, 𑀢𑀤𑀼𑀪𑀬𑀯𑀺𑀥𑀼𑀭𑀸 𑀆𑀭𑀫𑁆𑀫𑀡𑀽𑀧𑀮𑀤𑁆𑀥𑀺 ‘‘𑀯𑀺𑀚𑀸𑀦𑀸𑀢𑀻’’𑀢𑀺 𑀇𑀫𑀺𑀦𑀸 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀲𑀜𑁆𑀜𑀸…𑀧𑁂… 𑀕𑀳𑀡’’𑀦𑁆𑀢𑀺. 𑀦𑀦𑀼 𑀘 𑀨𑀲𑁆𑀲𑀸𑀤𑀺𑀓𑀺𑀘𑁆𑀘𑀢𑁄𑀧𑀺 𑀯𑀺𑀲𑀺𑀝𑁆𑀞𑀓𑀺𑀘𑁆𑀘𑀁 𑀘𑀺𑀢𑁆𑀢𑀦𑁆𑀢𑀺? 𑀲𑀘𑁆𑀘𑀫𑁂𑀢𑀁, 𑀲𑁄 𑀧𑀦 𑀯𑀺𑀲𑁂𑀲𑁄 𑀦 𑀢𑀣𑀸 𑀤𑀼𑀭𑀯𑀩𑁄𑀥𑁄, 𑀬𑀣𑀸 𑀲𑀜𑁆𑀜𑀸𑀧𑀜𑁆𑀜𑀸𑀯𑀺𑀜𑁆𑀜𑀸𑀡𑀸𑀦𑀦𑁆𑀢𑀺 𑀲𑀜𑁆𑀜𑀸𑀧𑀜𑁆𑀜𑀸𑀓𑀺𑀘𑁆𑀘𑀯𑀺𑀲𑀺𑀝𑁆𑀞𑀮𑀓𑁆𑀔𑀡𑀢𑀸𑀬 𑀯𑀺𑀜𑁆𑀜𑀸𑀡𑀮𑀓𑁆𑀔𑀡𑀫𑀸𑀳. 𑀅𑀦𑀦𑁆𑀢𑀭𑀥𑀫𑁆𑀫𑀸𑀦𑀁 𑀧𑀕𑀼𑀡𑀩𑀮𑀯𑀪𑀸𑀯𑀲𑁆𑀲 𑀓𑀸𑀭𑀡𑀪𑀸𑀯𑁂𑀦 𑀧𑀯𑀢𑁆𑀢𑀫𑀸𑀦𑁄 𑀲𑀦𑁆𑀢𑀸𑀦𑀁 𑀘𑀺𑀦𑁄𑀢𑀺 𑀦𑀸𑀫. 𑀢𑀣𑀸𑀧𑀯𑀢𑁆𑀢𑀺 𑀘 𑀆𑀲𑁂𑀯𑀦𑀧𑀘𑁆𑀘𑀬𑀪𑀸𑀯𑁄𑀢𑀺 𑀆𑀳 ‘‘𑀆𑀲𑁂𑀯𑀦𑀧𑀘𑁆𑀘𑀬𑀪𑀸𑀯𑁂𑀦 𑀘𑀺𑀦𑁄𑀢𑀻’’𑀢𑀺.

𑀘𑀺𑀢𑁆𑀢𑀓𑀢𑀫𑁂𑀯𑀸𑀢𑀺 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀓𑀢𑀫𑁂𑀯. 𑀦𑀸𑀦𑀢𑁆𑀢𑀸𑀤𑀻𑀦𑀁 𑀯𑀯𑀢𑁆𑀣𑀸𑀦𑀦𑁆𑀢𑀺 𑀏𑀢𑁆𑀣 𑀯𑀯𑀢𑁆𑀣𑀸𑀦𑀁 𑀧𑀘𑁆𑀘𑁂𑀓𑀁 𑀬𑁄𑀚𑁂𑀢𑀩𑁆𑀩𑀁. 𑀯𑀯𑀢𑁆𑀣𑀸𑀦𑀁 𑀧𑀭𑀺𑀘𑁆𑀙𑁂𑀤𑁄 𑀅𑀲𑀗𑁆𑀓𑀭𑀪𑀸𑀯𑁄. 𑀢𑁂𑀦 𑀘 𑀥𑀫𑁆𑀫𑁄 𑀦𑀺𑀘𑁆𑀙𑀺𑀢𑁄 𑀦𑀸𑀫 𑀳𑁄𑀢𑀻𑀢𑀺 𑀆𑀳 ‘‘𑀦𑀺𑀘𑁆𑀙𑀺𑀢𑀢𑀸’’𑀢𑀺. 𑀮𑀺𑀗𑁆𑀕𑀦𑀸𑀦𑀢𑁆𑀢𑀸𑀤𑀻𑀦𑀻𑀢𑀺 𑀏𑀢𑁆𑀣 𑀇𑀢𑁆𑀣𑀺𑀧𑀼𑀭𑀺𑀲𑀲𑀡𑁆𑀞𑀸𑀦𑀯𑀲𑁂𑀦 𑀮𑀺𑀗𑁆𑀕𑀦𑀸𑀦𑀢𑁆𑀢𑀁. 𑀤𑁂𑀯𑀫𑀦𑀼𑀲𑁆𑀲𑀢𑀺𑀭𑀘𑁆𑀙𑀸𑀦𑀸𑀤𑀺𑀯𑀲𑁂𑀦 𑀇𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀧𑀼𑀣𑀼𑀢𑁆𑀢𑀁, 𑀢𑀣𑀸 𑀧𑀼𑀭𑀺𑀲𑀮𑀺𑀗𑁆𑀕𑀲𑁆𑀲. 𑀤𑁂𑀯𑀸𑀤𑀺𑀪𑁂𑀤𑁂 𑀇𑀢𑁆𑀣𑀺𑀮𑀺𑀗𑁆𑀕𑁂 𑀧𑀘𑁆𑀘𑁂𑀓𑀁 𑀦𑀸𑀦𑀢𑁆𑀢𑀓𑀸𑀬𑀢𑀸𑀲𑀗𑁆𑀔𑀸𑀢𑀲𑁆𑀲 𑀅𑀜𑁆𑀜𑀫𑀜𑁆𑀜𑀯𑀺𑀲𑀤𑀺𑀲𑀲𑀪𑀸𑀯𑀲𑁆𑀲 𑀤𑁂𑀲𑀸𑀤𑀺𑀪𑁂𑀤𑀪𑀺𑀦𑁆𑀦𑀲𑁆𑀲 𑀘 𑀯𑀺𑀲𑁂𑀲𑀲𑁆𑀲 𑀯𑀲𑁂𑀦 𑀧𑀪𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀣𑀸 𑀧𑀼𑀭𑀺𑀲𑀮𑀺𑀗𑁆𑀕𑁂. 𑀮𑀺𑀗𑁆𑀕𑀦𑀺𑀩𑁆𑀩𑀢𑁆𑀢𑀓𑀲𑁆𑀲 𑀯𑀸 𑀓𑀫𑁆𑀫𑀲𑁆𑀲 𑀬𑀣𑀸𑀯𑀼𑀢𑁆𑀢𑀦𑀸𑀦𑀢𑁆𑀢𑀸𑀤𑀺𑀯𑀲𑁂𑀦 𑀮𑀺𑀗𑁆𑀕𑀲𑁆𑀲 𑀦𑀸𑀦𑀢𑁆𑀢𑀸𑀤𑀻𑀦𑀺 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀮𑀺𑀗𑁆𑀕𑀦𑀸𑀦𑀢𑁆𑀢𑀸𑀤𑀻𑀲𑀼 𑀧𑀯𑀢𑁆𑀢𑀢𑁆𑀢𑀸 𑀲𑀜𑁆𑀜𑀸𑀤𑀻𑀦𑀁 𑀦𑀸𑀦𑀢𑁆𑀢𑀸𑀤𑀻𑀦𑀺. 𑀢𑁂𑀦𑁂𑀯𑀸𑀳 ‘‘𑀓𑀫𑁆𑀫𑀦𑀸𑀦𑀢𑁆𑀢𑀸𑀤𑀻𑀳𑀺 𑀦𑀺𑀩𑁆𑀩𑀢𑁆𑀢𑀸𑀦𑀺 𑀳𑀺 𑀢𑀸𑀦𑀻’’𑀢𑀺. 𑀅𑀧𑀤𑀸𑀤𑀺𑀦𑀸𑀦𑀸𑀓𑀭𑀡𑀤𑀲𑁆𑀲𑀦𑁂𑀦 𑀮𑀺𑀗𑁆𑀕𑀦𑀸𑀦𑀢𑁆𑀢𑀁 𑀤𑀲𑁆𑀲𑀺𑀢𑀁. 𑀢𑀲𑁆𑀫𑀺𑀜𑁆𑀘 𑀤𑀲𑁆𑀲𑀺𑀢𑁂 𑀲𑀜𑁆𑀜𑀸𑀦𑀸𑀦𑀢𑁆𑀢𑀸𑀤𑀬𑁄 𑀤𑀲𑁆𑀲𑀺𑀢𑀸 𑀏𑀯𑀸𑀢𑀺 𑀆𑀯𑀢𑁆𑀢𑀢𑀺 𑀪𑀯𑀘𑀓𑁆𑀓𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀦𑀸𑀕…𑀧𑁂… 𑀖𑀝𑁂𑀦𑁆𑀢𑁄’’𑀢𑀺. 𑀇𑀢𑁆𑀣𑀺𑀮𑀺𑀗𑁆𑀕𑀧𑀼𑀭𑀺𑀲𑀮𑀺𑀗𑁆𑀕𑀸𑀤𑀺 𑀯𑀺𑀜𑁆𑀜𑀸𑀡𑀸𑀥𑀺𑀝𑁆𑀞𑀺𑀢𑀲𑁆𑀲 𑀭𑀽𑀧𑀓𑁆𑀔𑀦𑁆𑀥𑀲𑁆𑀲 𑀲𑀦𑁆𑀦𑀺𑀯𑁂𑀲𑀯𑀺𑀲𑁂𑀲𑁄. 𑀲𑀜𑁆𑀜𑀸𑀲𑀻𑀲𑁂𑀦 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸 𑀯𑀼𑀢𑁆𑀢𑀸. 𑀯𑁄𑀳𑀸𑀭𑀯𑀘𑀦𑁂𑀦 𑀘 𑀧𑀜𑁆𑀘𑀦𑁆𑀦𑀁 𑀔𑀦𑁆𑀥𑀸𑀦𑀁 𑀯𑁄𑀳𑀭𑀺𑀢𑀩𑁆𑀩𑀪𑀸𑀯𑁂𑀦 𑀧𑀯𑀢𑁆𑀢𑀺 𑀤𑀻𑀧𑀺𑀢𑀸, 𑀬𑀸 𑀲𑀸 𑀢𑀡𑁆𑀳𑀸𑀤𑀺𑀝𑁆𑀞𑀺𑀅𑀪𑀺𑀦𑀺𑀯𑁂𑀲𑀳𑁂𑀢𑀽𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀮𑀺𑀗𑁆𑀕𑀸𑀤𑀺…𑀧𑁂… 𑀬𑁄𑀲𑀸𑀦𑀸𑀦𑀻’’𑀢𑀺 𑀆𑀳.

‘‘𑀬𑁂 𑀓𑁂𑀘𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑀸 𑀅𑀓𑀼𑀲𑀮𑀸 𑀅𑀓𑀼𑀲𑀮𑀪𑀸𑀕𑀺𑀬𑀸, 𑀲𑀩𑁆𑀩𑁂𑀢𑁂 𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸’’𑀢𑀺 (𑀅. 𑀦𑀺. 𑁧.𑁫𑁬-𑁫𑁭), ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸’’𑀢𑀺 (𑀥. 𑀧. 𑁧, 𑁨) 𑀘 𑀏𑀯𑀫𑀸𑀤𑀺𑀯𑀘𑀦𑀢𑁄 𑀘𑀺𑀢𑁆𑀢𑀳𑁂𑀢𑀼𑀓𑀁 𑀓𑀫𑁆𑀫𑀦𑁆𑀢𑀺 𑀆𑀳 ‘‘𑀓𑀫𑁆𑀫𑀜𑁆𑀳𑀺 𑀘𑀺𑀢𑁆𑀢𑀢𑁄 𑀦𑀺𑀩𑁆𑀩𑀢𑁆𑀢’’𑀦𑁆𑀢𑀺. 𑀬𑀣𑀸𑀲𑀗𑁆𑀔𑁆𑀬𑀦𑁆𑀢𑀺 𑀓𑀫𑁆𑀫𑀢𑁄 𑀮𑀺𑀗𑁆𑀕𑀁 𑀮𑀺𑀗𑁆𑀕𑀢𑁄 𑀲𑀜𑁆𑀜𑀸𑀢𑀺 𑀅𑀢𑁆𑀣𑁄. 𑀦 𑀧𑀼𑀭𑀺𑀫𑀯𑀺𑀓𑀧𑁆𑀧𑁂 𑀯𑀺𑀬 𑀓𑀫𑁆𑀫𑀢𑁄 𑀮𑀺𑀗𑁆𑀕𑀲𑀜𑁆𑀜𑀸 𑀮𑀺𑀗𑁆𑀕𑀢𑁄 𑀮𑀺𑀗𑁆𑀕𑀲𑀜𑁆𑀜𑀸𑀢𑀺 𑀉𑀪𑀬𑀢𑁄 𑀉𑀪𑀬𑀧𑁆𑀧𑀯𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦. ‘‘𑀪𑁂𑀤𑀁 𑀕𑀘𑁆𑀙𑀦𑁆𑀢𑀺 𑀇𑀢𑁆𑀣𑀸𑀬𑀁 𑀧𑀼𑀭𑀺𑀲𑁄𑀢𑀺 𑀯𑀸’’𑀢𑀺 𑀪𑁂𑀤𑀲𑁆𑀲 𑀯𑀺𑀲𑁂𑀲𑀺𑀢𑀢𑁆𑀢𑀸 𑀇𑀢𑁆𑀣𑀸𑀤𑀺𑀪𑀸𑀯𑁂𑀦 𑀯𑁄𑀳𑀭𑀺𑀢𑀩𑁆𑀩𑀪𑀸𑀯𑁄 𑀇𑀥 𑀪𑁂𑀤𑁄𑀢𑀺 ‘‘𑀇𑀢𑁆𑀣𑀺𑀧𑀼𑀭𑀺𑀲𑀸𑀤𑀺𑀯𑁄𑀳𑀸𑀭𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀤𑁆𑀥𑀤𑁆𑀯𑀬𑀯𑀲𑁂𑀦𑀸𑀢𑀺 𑀅𑀢𑀻𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀤𑁆𑀥𑀤𑁆𑀯𑀬𑀯𑀲𑁂𑀦. 𑀕𑀼𑀡𑀸𑀪𑀺𑀩𑁆𑀬𑀸𑀧𑀦𑀁 𑀓𑀺𑀢𑁆𑀢𑀻𑀢𑀺 𑀆𑀳 ‘‘𑀧𑀢𑁆𑀣𑀝𑀬𑀲𑀢’’𑀦𑁆𑀢𑀺. 𑀓𑀫𑁆𑀫𑀦𑀸𑀦𑀸𑀓𑀭𑀡𑁂𑀦 𑀯𑀺𑀦𑀸 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀦𑀸𑀦𑀸𑀓𑀸𑀭𑀡𑀸𑀪𑀸𑀯𑀢𑁄 ‘‘𑀓𑀫𑁆𑀫𑀚𑁂𑀳𑀺…𑀧𑁂… 𑀦𑀸𑀦𑀸𑀓𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀯𑀺𑀧𑀘𑁆𑀘𑀦𑁄𑀓𑀸𑀲𑁄 𑀅𑀝𑁆𑀞𑀸𑀦𑀪𑀽𑀢𑀸, 𑀕𑀢𑀺𑀓𑀸𑀮𑁄𑀧𑀺 𑀯𑀸. 𑀓𑀸𑀫𑀸𑀯𑀘𑀭𑀁 𑀅𑀪𑀺𑀲𑀗𑁆𑀔𑀸𑀭𑀯𑀺𑀜𑁆𑀜𑀸𑀡𑀁 𑀭𑀽𑀧𑀥𑀸𑀢𑀼𑀬𑀸 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀺𑀁 𑀚𑀦𑁂𑀢𑁆𑀯𑀸 𑀅𑀦𑁄𑀓𑀸𑀲𑀢𑀸𑀬 𑀢𑀤𑀸𑀭𑀫𑁆𑀫𑀡𑀁 𑀅𑀚𑀦𑁂𑀦𑁆𑀢𑀁 𑀏𑀢𑁆𑀣 𑀦𑀺𑀤𑀲𑁆𑀲𑁂𑀢𑀩𑁆𑀩𑀁. 𑀏𑀓𑀘𑁆𑀘𑀘𑀺𑀢𑁆𑀢𑀓𑀭𑀡𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸 𑀘𑀓𑁆𑀔𑀸𑀤𑀺𑀯𑁂𑀓𑀮𑁆𑀮𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀦𑀁 𑀅𑀚𑀦𑀓𑀁 𑀓𑀫𑁆𑀫𑀯𑀺𑀜𑁆𑀜𑀸𑀡𑀁 𑀅𑀯𑀲𑁂𑀲𑀧𑀘𑁆𑀘𑀬𑀯𑀺𑀓𑀮𑁂 𑀅𑀦𑁄𑀕𑀥𑀁 𑀤𑀝𑁆𑀞𑀩𑁆𑀩𑀁. 𑀢𑀤𑀧𑀺 𑀓𑀸𑀮𑀕𑀢𑀺𑀧𑀬𑁄𑀕𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀗𑁆𑀕𑀳𑀺𑀢𑀦𑁆𑀢𑀺. 𑀏𑀢𑁆𑀣 𑀘 ‘‘𑀲𑀳𑀓𑀸𑀭𑀻𑀓𑀸𑀭𑀡𑀯𑀺𑀓𑀮𑀁 𑀯𑀺𑀧𑀸𑀓𑀲𑁆𑀲 𑀅𑀘𑁆𑀘𑀦𑁆𑀢𑀁 𑀑𑀓𑀸𑀲𑀫𑁂𑀯 𑀦 𑀮𑀪𑀢𑀺, 𑀇𑀢𑀭𑀁 𑀯𑀺𑀧𑀸𑀓𑁂𑀓𑀤𑁂𑀲𑀲𑁆𑀲 𑀮𑀤𑁆𑀥𑁄𑀓𑀸𑀲𑀦𑁆𑀢𑀺, 𑀇𑀤𑀫𑁂𑀢𑁂𑀲𑀁 𑀦𑀸𑀦𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀯𑀺𑀧𑀸𑀓𑀲𑁆𑀲 𑀑𑀓𑀸𑀲𑀮𑀸𑀪𑁂 𑀲𑀢𑀺 𑀲𑀳𑀸𑀬𑀓𑀸𑀭𑀡𑀯𑀺𑀓𑀮𑀢𑀸𑀯 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁.

𑀪𑀯𑀢𑀼 𑀢𑀸𑀯 𑀪𑀯𑀺𑀢𑁆𑀯𑀸 𑀅𑀧𑀕𑀢𑀁 𑀪𑀽𑀢𑀸𑀧𑀕𑀢𑀁, 𑀅𑀦𑀼𑀪𑀯𑀺𑀢𑁆𑀯𑀸 𑀅𑀧𑀕𑀢𑀁 𑀧𑀦 𑀓𑀣𑀦𑁆𑀢𑀺 𑀆𑀳 ‘‘𑀅𑀦𑀼𑀪𑀽𑀢𑀪𑀽𑀢𑀸’’𑀢𑀺𑀆𑀤𑀺. 𑀢𑁂𑀦 𑀅𑀦𑀼𑀪𑀽𑀢-𑀲𑀤𑁆𑀤𑁂𑀦 𑀬𑁄 𑀅𑀢𑁆𑀣𑁄 𑀯𑀼𑀘𑁆𑀘𑀢𑀺, 𑀢𑀲𑁆𑀲 𑀪𑀽𑀢-𑀲𑀤𑁆𑀤𑁄𑀬𑁂𑀯 𑀯𑀸𑀘𑀓𑁄, 𑀦 𑀅𑀦𑀼-𑀲𑀤𑁆𑀤𑁄, 𑀅𑀦𑀼-𑀲𑀤𑁆𑀤𑁄 𑀧𑀦 𑀚𑁄𑀢𑀓𑁄𑀢𑀺 𑀤𑀲𑁆𑀲𑁂𑀢𑀺. 𑀲𑀸𑀔𑀸𑀪𑀗𑁆𑀕𑀲𑀤𑀺𑀲𑀸 𑀳𑀺 𑀦𑀺𑀧𑀸𑀢𑁄𑀧𑀲𑀕𑁆𑀕𑀸𑀢𑀺. 𑀓𑀺𑀭𑀺𑀬𑀸𑀯𑀺𑀲𑁂𑀲𑀓𑀢𑁆𑀢𑀜𑁆𑀘 𑀉𑀧𑀲𑀕𑁆𑀕𑀸𑀦𑀁 𑀅𑀦𑁂𑀓𑀢𑁆𑀣𑀢𑁆𑀢𑀸 𑀥𑀸𑀢𑀼𑀲𑀤𑁆𑀤𑀸𑀦𑀁 𑀢𑁂𑀳𑀺 𑀯𑀢𑁆𑀢𑀩𑁆𑀩𑀯𑀺𑀲𑁂𑀲𑀲𑁆𑀲 𑀚𑁄𑀢𑀦𑀪𑀸𑀯𑁂𑀦𑁂𑀯 𑀅𑀯𑀘𑁆𑀙𑀺𑀦𑁆𑀤𑀦𑀦𑁆𑀢𑀺 𑀬𑀢𑁆𑀢𑀓𑀸 𑀥𑀸𑀢𑀼𑀲𑀤𑁆𑀤𑁂𑀦 𑀅𑀪𑀺𑀥𑀸𑀢𑀩𑁆𑀩𑀸 𑀅𑀢𑁆𑀣𑀯𑀺𑀲𑁂𑀲𑀸, 𑀢𑁂𑀲𑀁 𑀬𑀁 𑀲𑀸𑀫𑀜𑁆𑀜𑀁 𑀅𑀯𑀺𑀲𑁂𑀲𑁄, 𑀢𑀲𑁆𑀲 𑀯𑀺𑀲𑁂𑀲𑁂 𑀅𑀯𑀝𑁆𑀞𑀸𑀧𑀦𑀁 𑀢𑀲𑁆𑀲 𑀢𑀲𑁆𑀲 𑀯𑀺𑀲𑁂𑀲𑀲𑁆𑀲 𑀚𑁄𑀢𑀦𑀫𑁂𑀯𑀸𑀢𑀺 𑀆𑀳 ‘‘𑀲𑀸𑀫𑀜𑁆𑀜…𑀧𑁂… 𑀯𑀺𑀲𑁂𑀲𑀻𑀬𑀢𑀻’’𑀢𑀺. 𑀅𑀦𑀼𑀪𑀽𑀢-𑀲𑀤𑁆𑀤𑁄 𑀩𑀳𑀼𑀮𑀁 𑀓𑀫𑁆𑀫𑀢𑁆𑀣𑁂 𑀏𑀯 𑀤𑀺𑀲𑁆𑀲𑀢𑀻𑀢𑀺 𑀢𑀲𑁆𑀲 𑀇𑀥 𑀓𑀢𑁆𑀢𑀼𑀅𑀢𑁆𑀣𑀯𑀸𑀘𑀺𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀼𑀪𑀽𑀢𑀲𑀤𑁆𑀤𑁄 𑀘𑀸’’𑀢𑀺𑀆𑀤𑀺𑀫𑀸𑀳. 𑀲𑀢𑀺𑀧𑀺 𑀲𑀩𑁆𑀩𑁂𑀲𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀸𑀦𑀁 𑀲𑀯𑁂𑀤𑀬𑀺𑀢𑀪𑀸𑀯𑀢𑁄 𑀆𑀭𑀫𑁆𑀫𑀡𑀸𑀦𑀼𑀪𑀯𑀦𑁂, 𑀲𑀯𑀺𑀧𑀮𑁆𑀮𑀸𑀲𑁂 𑀧𑀦 𑀲𑀦𑁆𑀢𑀸𑀦𑁂 𑀘𑀺𑀢𑁆𑀢𑀸𑀪𑀺𑀲𑀗𑁆𑀔𑀸𑀭𑀯𑀲𑁂𑀦 𑀧𑀯𑀢𑁆𑀢𑀺𑀢𑁄 𑀅𑀩𑁆𑀬𑀸𑀓𑀢𑁂𑀳𑀺 𑀯𑀺𑀲𑀺𑀝𑁆𑀞𑁄 𑀓𑀼𑀲𑀮𑀸𑀓𑀼𑀲𑀮𑀸𑀦𑀁 𑀲𑀸𑀢𑀺𑀲𑀬𑁄 𑀯𑀺𑀲𑀬𑀸𑀦𑀼𑀪𑀯𑀦𑀸𑀓𑀸𑀭𑁄𑀢𑀺 𑀅𑀬𑀫𑀢𑁆𑀣𑁄 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀯𑀢𑁆𑀢𑀼𑀁 𑀅𑀥𑀺𑀧𑁆𑀧𑀸𑀬𑀯𑀲𑁂𑀦𑀸’’𑀢𑀺 𑀆𑀳. 𑀪𑀽𑀢𑀸𑀧𑀕𑀢𑀪𑀸𑀯𑀸𑀪𑀺𑀥𑀸𑀦𑀸𑀥𑀺𑀧𑁆𑀧𑀸𑀬𑁂𑀦𑀸𑀢𑀺 𑀓𑀼𑀲𑀮𑀸𑀓𑀼𑀲𑀮𑀲𑁆𑀲 𑀆𑀓𑀟𑁆𑀠𑀦𑀼𑀧𑀸𑀬𑀫𑀸𑀳.

𑀉𑀧𑁆𑀧𑀢𑀺𑀢𑀓𑀺𑀘𑁆𑀘𑀦𑀺𑀧𑁆𑀨𑀸𑀤𑀦𑀢𑁄 𑀉𑀧𑁆𑀧𑀢𑀺𑀢𑀲𑀤𑀺𑀲𑀢𑁆𑀢𑀸 ‘‘𑀉𑀧𑁆𑀧𑀢𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀧𑁆𑀧𑀚𑁆𑀚𑀺𑀢𑀼𑀁 𑀆𑀭𑀤𑁆𑀥𑁄𑀢𑀺 𑀅𑀦𑀸𑀕𑀢𑀲𑁆𑀲𑀧𑀺 𑀢𑀲𑁆𑀲𑁂𑀯 𑀉𑀧𑁆𑀧𑀦𑁆𑀦-𑀲𑀤𑁆𑀤𑁂𑀦 𑀯𑀼𑀢𑁆𑀢𑀢𑀸𑀬 𑀓𑀸𑀭𑀡𑀫𑀸𑀳. 𑀏𑀢𑁆𑀣 𑀘 𑀭𑀚𑁆𑀚𑀦𑀸𑀤𑀺𑀯𑀲𑁂𑀦 𑀆𑀭𑀫𑁆𑀫𑀡𑀭𑀲𑀸𑀦𑀼𑀪𑀯𑀦𑀁 𑀲𑀸𑀢𑀺𑀲𑀬𑀦𑁆𑀢𑀺 𑀅𑀓𑀼𑀲𑀮𑀜𑁆𑀘 𑀓𑀼𑀲𑀮𑀜𑁆𑀘 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀦𑀺𑀭𑀼𑀤𑁆𑀥𑀢𑀸𑀲𑀸𑀫𑀜𑁆𑀜𑁂𑀦 ‘‘𑀲𑀩𑁆𑀩𑀲𑀗𑁆𑀔𑀢𑀁 𑀪𑀽𑀢𑀸𑀧𑀕𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀫𑁆𑀫𑁄𑀳𑀯𑀺𑀦𑁄𑀤𑀦𑀺𑀬𑀁 𑀧𑀦 ‘‘𑀯𑀺𑀧𑀸𑀓𑀸𑀦𑀼𑀪𑀯𑀦𑀯𑀲𑁂𑀦 𑀢𑀤𑀸𑀭𑀫𑁆𑀫𑀡𑀁. 𑀅𑀯𑀺𑀧𑀓𑁆𑀓𑀯𑀺𑀧𑀸𑀓𑀲𑁆𑀲 𑀲𑀩𑁆𑀩𑀣𑀸 𑀅𑀯𑀺𑀕𑀢𑀢𑁆𑀢𑀸 𑀪𑀯𑀺𑀢𑁆𑀯𑀸 𑀯𑀺𑀕𑀢𑀢𑀸𑀫𑀢𑁆𑀢𑀯𑀲𑁂𑀦𑀓𑀫𑁆𑀫𑀜𑁆𑀘 𑀪𑀽𑀢𑀸𑀧𑀕𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯 𑀢𑀢𑁆𑀣 𑀑𑀓𑀸𑀲𑀓𑀢𑀼𑀧𑁆𑀧𑀦𑁆𑀦𑀦𑁆𑀢𑀺 𑀯𑀺𑀧𑀸𑀓𑀫𑁂𑀯𑀸𑀳. 𑀇𑀥 𑀧𑀦 𑀓𑀫𑁆𑀫𑀫𑁆𑀧𑀻𑀢𑀺. 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀪𑀯𑀢𑀺 𑀏𑀢𑁆𑀣 𑀓𑀺𑀮𑁂𑀲𑀚𑀸𑀢𑀦𑁆𑀢𑀺 𑀪𑀽𑀫𑀻𑀢𑀺 𑀯𑀼𑀢𑁆𑀢𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀸. 𑀅𑀕𑁆𑀕𑀺𑀆𑀳𑀺𑀢𑁄 𑀯𑀺𑀬𑀸𑀢𑀺 𑀪𑀽𑀫𑀺𑀮𑀤𑁆𑀥𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀸𑀬 𑀉𑀧𑀸𑀬𑀁 𑀤𑀲𑁆𑀲𑁂𑀢𑀺. 𑀏𑀢𑁂𑀦𑀸𑀢𑀺 𑀓𑀫𑁆𑀫𑀁. 𑀏𑀢𑀲𑁆𑀲𑀸𑀢𑀺 𑀯𑀺𑀧𑀸𑀓𑁄 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁.

𑀅𑀯𑀺𑀓𑁆𑀔𑀫𑁆𑀪𑀺𑀢𑀢𑁆𑀢𑀸𑀢𑀺 𑀅𑀯𑀺𑀦𑁄𑀤𑀺𑀢𑀢𑁆𑀢𑀸. 𑀲𑀪𑀽𑀫𑀺𑀬𑀦𑁆𑀢𑀺 𑀲𑀓𑀪𑀽𑀫𑀺𑀬𑀁. 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀧𑀼𑀦 𑀉𑀧𑁆𑀧𑀚𑁆𑀚𑀺𑀢𑀼𑀁 𑀅𑀤𑀢𑁆𑀯𑀸. 𑀔𑀡𑀢𑁆𑀢𑀬𑁂𑀓𑀤𑁂𑀲𑀕𑀢𑀁 𑀔𑀡𑀢𑁆𑀢𑀬𑀕𑀢𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀲𑁆𑀲 𑀉𑀤𑀸𑀳𑀭𑀡𑀲𑁆𑀲 𑀉𑀧𑀘𑀸𑀭𑀪𑀸𑀯𑀫𑀸𑀳. 𑀢𑁂𑀦 𑀉𑀧𑁆𑀧𑀦𑁆𑀦𑀸 𑀥𑀫𑁆𑀫𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸 𑀥𑀫𑁆𑀫𑀸𑀢𑀺 𑀇𑀤𑀫𑁂𑀢𑁆𑀣 𑀉𑀤𑀸𑀳𑀭𑀡𑀁 𑀬𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀧𑀥𑀸𑀦𑁂𑀦𑀸𑀢𑀺 𑀧𑀥𑀸𑀦𑀪𑀸𑀯𑁂𑀦. 𑀤𑁂𑀲𑀦𑀸𑀬 𑀘𑀺𑀢𑁆𑀢𑀁 𑀧𑀼𑀩𑁆𑀩𑀗𑁆𑀕𑀫𑀦𑁆𑀢𑀺 𑀮𑁄𑀓𑀺𑀬𑀥𑀫𑁆𑀫𑁂 𑀤𑁂𑀲𑁂𑀢𑀩𑁆𑀩𑁂 𑀘𑀺𑀢𑁆𑀢𑀁 𑀧𑀼𑀩𑁆𑀩𑀗𑁆𑀕𑀫𑀁 𑀓𑀢𑁆𑀯𑀸 𑀤𑁂𑀲𑀦𑀸 𑀪𑀕𑀯𑀢𑀸 𑀉𑀘𑀺𑀢𑀸𑀢𑀺 𑀤𑀲𑁆𑀲𑁂𑀢𑀺. 𑀥𑀫𑁆𑀫𑀲𑀪𑀸𑀯𑀁 𑀯𑀸 𑀲𑀦𑁆𑀥𑀸𑀬𑀸𑀢𑀺 𑀮𑁄𑀓𑀺𑀬𑀥𑀫𑁆𑀫𑀸𑀦𑀁 𑀅𑀬𑀁 𑀲𑀪𑀸𑀯𑁄 𑀬𑀤𑀺𑀤𑀁 𑀢𑁂 𑀘𑀺𑀢𑁆𑀢𑀚𑁂𑀝𑁆𑀞𑀓𑀸 𑀘𑀺𑀢𑁆𑀢𑀧𑀼𑀩𑁆𑀩𑀗𑁆𑀕𑀫𑀸 𑀧𑀯𑀢𑁆𑀢𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦 𑀢𑁂𑀲𑀁 𑀢𑀣𑀸𑀤𑁂𑀲𑀦𑀸𑀬 𑀓𑀸𑀭𑀡𑀫𑀸𑀳, 𑀲𑀩𑁆𑀩𑁂 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀘𑀺𑀢𑁆𑀢𑀯𑀚𑁆𑀚𑀸𑀢𑀺 𑀅𑀢𑁆𑀣𑁄. 𑀓𑁂𑀘𑀻𑀢𑀺 𑀧𑀤𑀓𑀸𑀭𑀸. 𑀨𑀲𑁆𑀲𑀸𑀤𑀬𑁄𑀧𑀻𑀢𑀺 𑀧𑀺-𑀲𑀤𑁆𑀤𑁂𑀦 𑀭𑀸𑀕𑀸𑀤𑀬𑁄 𑀲𑀫𑁆𑀧𑀺𑀡𑁆𑀟𑁂𑀢𑀺. 𑀓𑀸𑀮𑀪𑁂𑀤𑀸𑀪𑀸𑀯𑁂𑀧𑀺 𑀧𑀘𑁆𑀘𑀬𑀪𑀸𑀯𑁂𑀦 𑀅𑀧𑁂𑀓𑁆𑀔𑀺𑀢𑁄 𑀥𑀫𑁆𑀫𑁄 𑀧𑀼𑀭𑀺𑀫𑀦𑀺𑀧𑁆𑀨𑀦𑁆𑀦𑁄 𑀯𑀺𑀬 𑀯𑁄𑀳𑀭𑀻𑀬𑀢𑀻𑀢𑀺 𑀆𑀳 ‘‘𑀧𑀞𑀫𑀁 𑀉𑀧𑁆𑀧𑀦𑁆𑀦𑁄 𑀯𑀺𑀬𑀸’’𑀢𑀺. 𑀅𑀦𑀼𑀧𑀘𑀭𑀺𑀢𑀫𑁂𑀯𑀲𑁆𑀲 𑀧𑀼𑀩𑁆𑀩𑀗𑁆𑀕𑀫𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀦𑀦𑁆𑀢𑀭𑀧𑀘𑁆𑀘𑀬𑀫𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀔𑀻𑀡𑀸 𑀪𑀯𑀦𑁂𑀢𑁆𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 (𑀤𑀻. 𑀦𑀺. 𑁨.𑁧𑁫𑁫; 𑀦𑁂𑀢𑁆𑀢𑀺. 𑁧𑁧𑁪) 𑀦𑁂𑀢𑁆𑀢𑀺𑀪𑀽𑀢𑀸𑀬 𑀢𑀡𑁆𑀳𑀸𑀬 𑀬𑀼𑀢𑁆𑀢𑀁 𑀘𑀺𑀢𑁆𑀢𑀁 𑀦𑀸𑀬𑀓𑀦𑁆𑀢𑀺 𑀆𑀳 ‘‘𑀢𑀡𑁆𑀳𑀸𑀲𑀫𑁆𑀧𑀬𑀼𑀢𑁆𑀢𑀁 𑀯𑀸’’𑀢𑀺.

‘‘𑀬𑀁 𑀢𑀲𑁆𑀫𑀺𑀁 𑀲𑀫𑀬𑁂 𑀘𑁂𑀢𑀲𑀺𑀓𑀁 𑀲𑀸𑀢’’𑀦𑁆𑀢𑀺 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀲𑁄𑀫𑀦𑀲𑁆𑀲𑀯𑁂𑀤𑀦𑀸 𑀲𑀸𑀢𑀲𑀪𑀸𑀯𑀸𑀢𑀺 𑀆𑀳 ‘‘𑀲𑀪𑀸𑀯𑀯𑀲𑁂𑀦 𑀯𑀼𑀢𑁆𑀢’’𑀦𑁆𑀢𑀺. 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀫𑀥𑀼𑀭-𑀲𑀤𑁆𑀤𑁄 𑀭𑀲𑀯𑀺𑀲𑁂𑀲𑀧𑀭𑀺𑀬𑀸𑀬𑁄, 𑀇𑀝𑁆𑀞𑀪𑀸𑀯𑀲𑀸𑀫𑀜𑁆𑀜𑁂𑀦 𑀇𑀥 𑀉𑀧𑀘𑀸𑀭𑁂𑀦 𑀯𑀼𑀢𑁆𑀢𑁄𑀢𑀺𑀆𑀳 ‘‘𑀫𑀥𑀼𑀭𑀁 𑀯𑀺𑀬𑀸’’𑀢𑀺. 𑀧𑀭𑀫𑀢𑁆𑀣𑀢𑁄 𑀢𑀡𑁆𑀳𑀸𑀯𑀺𑀦𑀺𑀫𑀼𑀢𑁆𑀢𑁄 𑀦𑀦𑁆𑀤𑀺𑀭𑀸𑀕𑁄 𑀦𑀦𑁆𑀤𑀺𑀭𑀸𑀕𑀪𑀸𑀯𑁄 𑀯𑀸 𑀦𑀢𑁆𑀣𑀻𑀢𑀺 ‘‘𑀦 𑀏𑀢𑁆𑀣 𑀲𑀫𑁆𑀧𑀬𑁄𑀕𑀯𑀲𑁂𑀦 𑀲𑀳𑀕𑀢𑀪𑀸𑀯𑁄 𑀅𑀢𑁆𑀣𑀻’’𑀢𑀺, ‘‘𑀦𑀦𑁆𑀤𑀺𑀭𑀸𑀕𑀲𑀳𑀕𑀢𑀸’’𑀢𑀺 𑀘 𑀯𑀼𑀘𑁆𑀘𑀢𑀺. 𑀢𑁂𑀦 𑀯𑀺𑀜𑁆𑀜𑀸𑀬𑀢𑀺 ‘‘𑀲𑀳𑀕𑀢𑀲𑀤𑁆𑀤𑁄 𑀢𑀡𑁆𑀳𑀸𑀬 𑀦𑀦𑁆𑀤𑀺𑀭𑀸𑀕𑀪𑀸𑀯𑀁 𑀚𑁄𑀢𑁂𑀢𑀻’’𑀢𑀺. 𑀅𑀯𑀢𑁆𑀣𑀸𑀯𑀺𑀲𑁂𑀲𑀯𑀸𑀘𑀓𑁄 𑀯𑀸 𑀲𑀳-𑀲𑀤𑁆𑀤𑁄 ‘‘𑀲𑀦𑀺𑀤𑀲𑁆𑀲𑀦𑀸’’𑀢𑀺𑀆𑀤𑀻𑀲𑀼 𑀯𑀺𑀬, 𑀲𑀩𑁆𑀩𑀸𑀲𑀼𑀧𑀺 𑀅𑀯𑀢𑁆𑀣𑀸𑀲𑀼 𑀦𑀦𑁆𑀤𑀺𑀭𑀸𑀕𑀲𑀪𑀸𑀯𑀸𑀯𑀺𑀚𑀳𑀦𑀤𑀻𑀧𑀦𑀯𑀲𑁂𑀦 𑀦𑀦𑁆𑀤𑀺𑀭𑀸𑀕𑀪𑀸𑀯𑀁 𑀕𑀢𑀸 𑀦𑀦𑁆𑀤𑀺𑀭𑀸𑀕𑀲𑀳𑀕𑀢𑀸𑀢𑀺 𑀢𑀡𑁆𑀳𑀸 𑀯𑀼𑀢𑁆𑀢𑀸. 𑀕𑀢-𑀲𑀤𑁆𑀤𑀲𑁆𑀲 𑀯𑀸 ‘‘𑀤𑀺𑀝𑁆𑀞𑀺𑀕𑀢’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀅𑀢𑁆𑀣𑀦𑁆𑀢𑀭𑀸𑀪𑀸𑀯𑀢𑁄 𑀦𑀦𑁆𑀤𑀺𑀭𑀸𑀕𑀲𑀪𑀸𑀯𑀸 𑀢𑀡𑁆𑀳𑀸 ‘‘𑀦𑀦𑁆𑀤𑀺𑀭𑀸𑀕𑀲𑀳𑀕𑀢𑀸’’𑀢𑀺 𑀯𑀼𑀢𑁆𑀢𑀸, 𑀦𑀦𑁆𑀤𑀺𑀭𑀸𑀕𑀲𑀪𑀸𑀯𑀸𑀢𑀺 𑀅𑀢𑁆𑀣𑁄. 𑀇𑀥𑀸𑀧𑀻𑀢𑀺 𑀇𑀫𑀺𑀲𑁆𑀲𑀁 𑀅𑀝𑁆𑀞𑀓𑀣𑀸𑀬𑀁. 𑀇𑀫𑀲𑁆𑀫𑀺𑀫𑁆𑀧𑀺 𑀧𑀤𑁂𑀢𑀺 ‘‘𑀲𑁄𑀫𑀦𑀲𑁆𑀲𑀲𑀳𑀕𑀢’’𑀦𑁆𑀢𑀺 𑀏𑀢𑀲𑁆𑀫𑀺𑀫𑁆𑀧𑀺 𑀧𑀤𑁂. 𑀅𑀬𑀫𑁂𑀯𑀢𑁆𑀣𑁄𑀢𑀺 𑀲𑀁𑀲𑀝𑁆𑀞𑁄 𑀏𑀯. 𑀬𑀣𑀸𑀤𑀲𑁆𑀲𑀺𑀢𑀲𑀁𑀲𑀝𑁆𑀞𑀲𑀤𑁆𑀤𑁄𑀢𑀺 𑀅𑀢𑁆𑀣𑀼𑀤𑁆𑀥𑀸𑀭𑀧𑁆𑀧𑀲𑀗𑁆𑀕𑁂𑀦 𑀧𑀸𑀴𑀺𑀢𑁄 𑀅𑀝𑁆𑀞𑀓𑀣𑀸𑀬 𑀆𑀕𑀢𑀲𑀁𑀲𑀝𑁆𑀞𑀲𑀤𑁆𑀤𑁄. 𑀲𑀳𑀚𑀸𑀢𑁂𑀢𑀺 𑀲𑀳𑀚𑀸𑀢𑀢𑁆𑀣𑁂.

𑀓𑀸𑀮𑀯𑀺𑀲𑁂𑀲𑀸𑀦𑀧𑁂𑀓𑁆𑀔𑁄 𑀓𑀫𑁆𑀫𑀲𑀸𑀥𑀦𑁄 𑀆𑀪𑀝𑁆𑀞-𑀲𑀤𑁆𑀤𑁄 𑀪𑀸𑀲𑀺𑀢𑀧𑀭𑀺𑀬𑀸𑀬𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀪𑀸𑀲𑀺𑀢𑀩𑁆𑀩𑀢𑀸 𑀅𑀦𑀸𑀪𑀝𑁆𑀞𑀢𑀸’’𑀢𑀺. 𑀧𑀸𑀴𑀺𑀬𑀦𑁆𑀢𑀺 𑀇𑀫𑀺𑀲𑁆𑀲𑀸 𑀧𑀞𑀫𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀸𑀴𑀺𑀬𑀁. 𑀅𑀪𑀸𑀲𑀺𑀢𑀢𑁆𑀢𑀸 𑀏𑀯𑀸𑀢𑀺 𑀅𑀲𑀗𑁆𑀔𑀸𑀭𑀺𑀓𑀪𑀸𑀯𑀲𑁆𑀲 𑀅𑀯𑀼𑀢𑁆𑀢𑀢𑁆𑀢𑀸 𑀏𑀯. 𑀓𑀸𑀭𑀡𑀧𑀭𑀺𑀬𑀸𑀬𑀢𑁆𑀢𑀸 𑀯𑀢𑁆𑀣𑀼𑀲𑀤𑁆𑀤𑀲𑁆𑀲 𑀧𑀘𑁆𑀘𑀬𑀪𑀸𑀯𑀲𑀸𑀫𑀜𑁆𑀜𑀢𑁄 𑀤𑁆𑀯𑀸𑀭𑀪𑀽𑀢𑀥𑀫𑁆𑀫𑀸𑀦𑀫𑁆𑀧𑀺 𑀲𑀺𑀬𑀸 𑀯𑀢𑁆𑀣𑀼𑀧𑀭𑀺𑀬𑀸𑀬𑁄𑀢𑀺 𑀆𑀳 ‘‘𑀤𑁆𑀯𑀸𑀭𑀁 𑀯𑀢𑁆𑀣𑀽𑀢𑀺 𑀯𑀼𑀢𑁆𑀢’’𑀦𑁆𑀢𑀺. 𑀢𑁂𑀦 𑀯𑀢𑁆𑀣𑀼 𑀯𑀺𑀬 𑀯𑀢𑁆𑀣𑀽𑀢𑀺 𑀤𑀲𑁆𑀲𑁂𑀢𑀺. 𑀫𑀦𑁄𑀤𑁆𑀯𑀸𑀭𑀪𑀽𑀢𑀸 𑀥𑀫𑁆𑀫𑀸 𑀬𑁂𑀪𑀼𑀬𑁆𑀬𑁂𑀦 𑀳𑀤𑀬𑀯𑀢𑁆𑀣𑀼𑀦𑀸 𑀲𑀳 𑀘𑀭𑀦𑁆𑀢𑀻𑀢𑀺 𑀤𑁆𑀯𑀸𑀭𑁂𑀦…𑀧𑁂… 𑀳𑀤𑀬𑀯𑀢𑁆𑀣𑀼 𑀯𑀼𑀢𑁆𑀢𑀦𑁆𑀢𑀺 𑀆𑀳 𑀬𑀣𑀸 ‘‘𑀓𑀼𑀦𑁆𑀢𑀸 𑀧𑀘𑀭𑀦𑁆𑀢𑀻’’𑀢𑀺. 𑀲𑀓𑀺𑀘𑁆𑀘𑀪𑀸𑀯𑁂𑀦𑀸𑀢𑀺 𑀅𑀢𑁆𑀢𑀦𑁄 𑀓𑀺𑀘𑁆𑀘𑀪𑀸𑀯𑁂𑀦, 𑀓𑀺𑀘𑁆𑀘𑀲𑀳𑀺𑀢𑀢𑀸𑀬 𑀯𑀸. 𑀅𑀜𑁆𑀜𑀸𑀲𑀸𑀥𑀸𑀭𑀡𑁄𑀢𑀺 𑀲-𑀲𑀤𑁆𑀤𑀲𑁆𑀲 𑀅𑀢𑁆𑀣𑀫𑀸𑀳. 𑀲𑀓𑁄 𑀳𑀺 𑀭𑀲𑁄 𑀲𑀭𑀲𑁄𑀢𑀺.

𑀅𑀦𑀦𑁆𑀢𑀭𑀘𑀺𑀢𑁆𑀢𑀳𑁂𑀢𑀼𑀓𑀢𑁆𑀢𑀸 𑀘𑀺𑀢𑁆𑀢𑀲𑁆𑀲 𑀏𑀓𑀲𑀫𑀼𑀝𑁆𑀞𑀸𑀦𑀢𑀸 𑀯𑀼𑀢𑁆𑀢𑀸, 𑀲𑀳𑀚𑀸𑀢𑀘𑀺𑀢𑁆𑀢𑀨𑀲𑁆𑀲𑀳𑁂𑀢𑀼𑀓𑀢𑁆𑀢𑀸 𑀘𑁂𑀢𑀲𑀺𑀓𑀸𑀦𑀁 𑀤𑁆𑀯𑀺𑀲𑀫𑀼𑀝𑁆𑀞𑀸𑀦𑀢𑀸. ‘‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸 𑀥𑀫𑁆𑀫𑀸, 𑀨𑀼𑀝𑁆𑀞𑁄 𑀪𑀺𑀓𑁆𑀔𑀯𑁂 𑀯𑁂𑀤𑁂𑀢𑀺, 𑀨𑀼𑀝𑁆𑀞𑁄 𑀲𑀜𑁆𑀚𑀸𑀦𑀸𑀢𑀺, 𑀨𑀼𑀝𑁆𑀞𑁄 𑀘𑁂𑀢𑁂𑀢𑀻’’𑀢𑀺 (𑀲𑀁. 𑀦𑀺. 𑁪.𑁯𑁩) 𑀳𑀺 𑀯𑀼𑀢𑁆𑀢𑀁.

𑀲𑀼𑀔𑀼𑀫𑀭𑀚𑀸𑀤𑀺𑀭𑀽𑀧𑀦𑁆𑀢𑀺 𑀅𑀡𑀼𑀢𑀚𑁆𑀚𑀸𑀭𑀺𑀭𑀽𑀧𑀫𑀸𑀳. 𑀧𑀭𑀫𑀸𑀡𑀼𑀭𑀽𑀧𑁂 𑀧𑀦 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀯𑀢𑁆𑀣𑀼𑀧𑀭𑀺𑀢𑁆𑀢𑀢𑀸𑀬𑀸𑀢𑀺 𑀏𑀢𑁂𑀦 𑀅𑀦𑁂𑀓𑀓𑀮𑀸𑀧𑀕𑀢𑀸𑀦𑀺 𑀩𑀳𑀽𑀦𑀺𑀬𑁂𑀯 𑀭𑀽𑀧𑀸𑀬𑀢𑀦𑀸𑀦𑀺 𑀲𑀫𑀼𑀤𑀺𑀢𑀸𑀦𑀺 𑀲𑀁𑀳𑀘𑁆𑀘𑀓𑀸𑀭𑀺𑀢𑀸𑀬 𑀲𑀺𑀯𑀺𑀓𑀼𑀩𑁆𑀩𑀳𑀦𑀜𑀸𑀬𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁄, 𑀦 𑀏𑀓𑀁 𑀓𑀢𑀺𑀧𑀬𑀸𑀦𑀺 𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀦𑀦𑀼 𑀘 𑀏𑀯𑀁 𑀲𑀦𑁆𑀢𑁂 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀁 𑀲𑀫𑀼𑀤𑀸𑀬𑀸𑀭𑀫𑁆𑀫𑀡𑀁 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺 𑀲𑀫𑀼𑀤𑀸𑀬𑀲𑁆𑀲𑁂𑀯 𑀅𑀪𑀸𑀯𑀢𑁄. 𑀦 𑀳𑀺 𑀧𑀭𑀫𑀢𑁆𑀣𑀢𑁄 𑀲𑀫𑀼𑀤𑀸𑀬𑁄 𑀦𑀸𑀫 𑀓𑁄𑀘𑀺 𑀅𑀢𑁆𑀣𑀺. 𑀯𑀡𑁆𑀡𑀸𑀬𑀢𑀦𑀫𑁂𑀯 𑀳𑀺 𑀬𑀢𑁆𑀢𑀓𑀁 𑀬𑁄𑀕𑁆𑀬𑀤𑁂𑀲𑁂 𑀅𑀯𑀝𑁆𑀞𑀺𑀢𑀁, 𑀲𑀢𑀺 𑀧𑀘𑁆𑀘𑀬𑀦𑁆𑀢𑀭𑀲𑀫𑀸𑀬𑁄𑀕𑁂 𑀢𑀢𑁆𑀢𑀓𑀁 𑀬𑀣𑀸𑀯𑀼𑀢𑁆𑀢𑁂𑀦 𑀜𑀸𑀬𑁂𑀦 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁄 𑀳𑁄𑀢𑀺 𑀅𑀯𑀺𑀓𑀧𑁆𑀧𑀓𑀢𑁆𑀢𑀸 𑀢𑀲𑁆𑀲. 𑀢𑀤𑀪𑀺𑀦𑀺𑀳𑀝𑀁 𑀧𑀦 𑀫𑀦𑁄𑀯𑀺𑀜𑁆𑀜𑀸𑀡𑀁 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀉𑀧𑁆𑀧𑀚𑁆𑀚𑀫𑀸𑀦𑀁 𑀧𑀼𑀭𑀺𑀫𑀲𑀺𑀤𑁆𑀥𑀓𑀧𑁆𑀧𑀦𑀸𑀯𑀲𑁂𑀦 𑀲𑀫𑀽𑀳𑀸𑀓𑀸𑀭𑁂𑀦 𑀲𑀡𑁆𑀞𑀸𑀦𑀸𑀤𑀺𑀆𑀓𑀸𑀭𑁂𑀦 𑀘 𑀧𑀯𑀢𑁆𑀢𑀢𑀻𑀢𑀺 𑀓𑀺𑀁 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀏𑀓𑀁 𑀯𑀡𑁆𑀡𑀸𑀬𑀢𑀦𑀁 𑀆𑀭𑀫𑁆𑀫𑀡𑀁, 𑀉𑀤𑀸𑀳𑀼 𑀅𑀦𑁂𑀓𑀸𑀦𑀻𑀢𑀺 𑀦 𑀘𑁄𑀤𑁂𑀢𑀩𑁆𑀩𑀫𑁂𑀢𑀁. 𑀦 𑀳𑀺 𑀧𑀘𑁆𑀘𑀓𑁆𑀔𑀯𑀺𑀲𑀬𑁂 𑀬𑀼𑀢𑁆𑀢𑀺𑀫𑀕𑁆𑀕𑀦𑀸 𑀬𑀼𑀢𑁆𑀢𑀸. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑀅𑀘𑁆𑀙𑀭𑀸𑀲𑀗𑁆𑀖𑀸𑀢𑀓𑁆𑀔𑀡𑁂𑀦 𑀅𑀦𑁂𑀓𑀓𑁄𑀝𑀺𑀲𑀗𑁆𑀔𑀸𑀬 𑀘𑀺𑀢𑁆𑀢𑀼𑀧𑁆𑀧𑀢𑁆𑀢𑀺𑀬𑀸 𑀧𑀯𑀢𑁆𑀢𑀦𑀢𑁄 𑀘𑀺𑀢𑁆𑀢𑀲𑁆𑀲 𑀮𑀳𑀼𑀧𑀭𑀺𑀯𑀢𑁆𑀢𑀺𑀢𑀸𑀬 𑀲𑀫𑀸𑀦𑁂𑀧𑀺 𑀖𑀝𑀲𑀭𑀸𑀯𑀸𑀤𑀺𑀯𑀡𑁆𑀡𑀸𑀦𑀁 𑀬𑁄𑀕𑁆𑀬𑀤𑁂𑀲𑀸𑀯𑀝𑁆𑀞𑀸𑀦𑁂 𑀧𑀼𑀭𑀺𑀫𑀫𑀦𑀲𑀺𑀓𑀸𑀭𑀸𑀦𑀼𑀭𑀽𑀧𑀁 ‘‘𑀖𑀝𑁄’’𑀢𑀺 𑀯𑀸 ‘‘𑀲𑀭𑀸𑀯𑁄’’𑀢𑀺 𑀯𑀸 𑀧𑀞𑀫𑀁 𑀢𑀸𑀯 𑀏𑀓𑁄 𑀫𑀦𑁄𑀯𑀺𑀜𑁆𑀜𑀸𑀡𑀲𑀦𑁆𑀢𑀸𑀦𑁂𑀦 𑀧𑀭𑀺𑀘𑁆𑀙𑀺𑀚𑁆𑀚𑀢𑀺, 𑀧𑀘𑁆𑀙𑀸 𑀇𑀢𑀭𑁄 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀯𑀻𑀣𑀺𑀬𑀸 𑀩𑁆𑀬𑀯𑀳𑀺𑀢𑁂𑀦𑀸𑀢𑀺 𑀅𑀯𑀺𑀲𑁂𑀲𑀯𑀺𑀤𑀼𑀢𑀸𑀬 𑀧𑀦 𑀖𑀝𑀲𑀭𑀸𑀯𑀸𑀤𑀺𑀩𑀼𑀤𑁆𑀥𑀺𑀬𑀸 𑀅𑀪𑁂𑀤𑀸𑀧𑀢𑁆𑀢𑀺𑀧𑀭𑀺𑀓𑀧𑁆𑀧𑀦𑀸𑀢𑀺. 𑀈𑀤𑀺𑀲𑀻𑀧𑁂𑀢𑁆𑀣 𑀘𑁄𑀤𑀦𑀸 𑀅𑀘𑁄𑀤𑀦𑀸𑀢𑀺 𑀤𑀝𑁆𑀞𑀩𑁆𑀩𑀸. 𑀔𑀡𑀧𑀭𑀺𑀢𑁆𑀢𑀢𑀸𑀬𑀸𑀢𑀺 𑀧𑀩𑀦𑁆𑀥𑀓𑁆𑀔𑀡𑀲𑁆𑀲 𑀇𑀢𑁆𑀢𑀭𑀢𑀸𑀬. 𑀧𑀩𑀦𑁆𑀥𑀯𑀲𑁂𑀦 𑀳𑀺 𑀧𑀘𑁆𑀘𑁂𑀓𑀁 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀯𑀺𑀭𑁄𑀥𑀺𑀅𑀯𑀺𑀭𑁄𑀥𑀺𑀧𑀘𑁆𑀘𑀬𑀲𑀫𑀸𑀬𑁄𑀕𑁂 𑀮𑀳𑀼𑀁 𑀤𑀦𑁆𑀥𑀜𑁆𑀘 𑀦𑀺𑀭𑀼𑀚𑁆𑀛𑀦𑀢𑁄 𑀧𑀭𑀺𑀢𑁆𑀢𑀓𑀸𑀮𑀸 𑀤𑀻𑀖𑀓𑀸𑀮𑀸 𑀘 𑀳𑁄𑀦𑁆𑀢𑀺, 𑀲𑀪𑀸𑀯𑀮𑀓𑁆𑀔𑀡𑀯𑀲𑁂𑀦 𑀧𑀦 𑀏𑀓𑀧𑀭𑀺𑀘𑁆𑀙𑁂𑀤𑀸 𑀏𑀯𑀸𑀢𑀺. 𑀬𑀣𑀸 𑀘 𑀭𑀽𑀧𑀸𑀬𑀢𑀦𑀁, 𑀏𑀯𑀁 𑀇𑀢𑀭𑀸𑀦𑀺𑀧𑀺. 𑀲𑀤𑁆𑀤𑀸𑀤𑀬𑁄𑀧𑀺 𑀳𑀺 𑀯𑀢𑁆𑀣𑀼𑀧𑀭𑀺𑀢𑁆𑀢𑀢𑀸𑀤𑀺𑀪𑀸𑀯𑁂𑀦 𑀮𑀩𑁆𑀪𑀦𑁆𑀢𑀻𑀢𑀺. 𑀅𑀘𑁆𑀘𑀸𑀲𑀦𑁆𑀦𑀸𑀤𑀺𑀢𑀸𑀬𑀸𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀦𑀸𑀯𑀚𑁆𑀚𑀦𑀁 𑀓𑁂𑀦𑀘𑀺 𑀧𑀝𑀺𑀘𑁆𑀙𑀦𑁆𑀦𑀢𑀸𑀢𑀺 𑀏𑀯𑀫𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀺𑀲𑀬𑀺𑀥𑀫𑁆𑀫𑀁 𑀯𑀺𑀲𑁂𑀲𑀢𑁄 𑀲𑀺𑀦𑁄𑀢𑀺 𑀩𑀦𑁆𑀥𑀢𑀻𑀢𑀺 𑀯𑀺𑀲𑀬𑁄𑀢𑀺 𑀅𑀦𑀜𑁆𑀜𑀢𑁆𑀣𑀪𑀸𑀯𑀸𑀧𑁂𑀓𑁆𑀔𑁄 𑀯𑀺𑀲𑀬𑁄𑀢𑀺 𑀆𑀳 ‘‘𑀯𑀺𑀲𑀬𑁄 𑀅𑀦𑀜𑁆𑀜𑀢𑁆𑀣𑀪𑀸𑀯𑁂𑀦𑀸’’𑀢𑀺. 𑀦 𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀬𑁄 𑀭𑀽𑀧𑀸𑀬𑀢𑀦𑀸𑀤𑀺𑀢𑁄 𑀅𑀜𑁆𑀜𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀧𑀯𑀢𑁆𑀢𑀦𑁆𑀢𑀻𑀢𑀺. 𑀕𑀸𑀯𑁄 𑀘𑀭𑀦𑁆𑀢𑀺 𑀏𑀢𑁆𑀣𑀸𑀢𑀺 𑀕𑁄𑀘𑀭𑁄, 𑀕𑁄𑀘𑀭𑁄 𑀯𑀺𑀬𑀸𑀢𑀺 𑀕𑁄𑀘𑀭𑁄𑀢𑀺 𑀲𑀫𑁆𑀩𑀳𑀼𑀮𑀘𑀸𑀭𑀺𑀢𑀸𑀧𑁂𑀓𑁆𑀔𑁄 𑀕𑁄𑀘𑀭𑁄𑀢𑀺 𑀆𑀳 ‘‘𑀕𑁄𑀘𑀭𑁄 𑀢𑀢𑁆𑀣 𑀘𑀭𑀡𑁂𑀦𑀸’’𑀢𑀺. 𑀩𑀳𑀼𑀮𑀜𑁆𑀳𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀸𑀤𑀻𑀳𑀺 𑀭𑀽𑀧𑀸𑀤𑀬𑁄 𑀕𑀬𑁆𑀳𑀦𑁆𑀢𑀺, 𑀦 𑀢𑀣𑀸 𑀫𑀦𑁄𑀯𑀺𑀜𑁆𑀜𑀸𑀡𑁂𑀦𑀸𑀢𑀺. 𑀢𑁂𑀲𑀦𑁆𑀢𑀺 𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀕𑀬𑁆𑀳𑀫𑀸𑀦𑀸𑀦𑀁 𑀭𑀽𑀧𑀸𑀬𑀢𑀦𑀸𑀤𑀻𑀦𑀁. ‘‘𑀯𑀘𑀦𑀲𑁆𑀲 𑀅𑀦𑀼𑀧𑀧𑀢𑁆𑀢𑀺𑀢𑁄’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀧𑀜𑁆𑀘𑀤𑁆𑀯𑀸𑀭𑁂 𑀧𑀯𑀢𑁆𑀢𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀁 𑀲𑀦𑁆𑀥𑀸𑀬 𑀢𑁂𑀲𑀁 𑀕𑁄𑀘𑀭𑀯𑀺𑀲𑀬𑀁 𑀧𑀘𑁆𑀘𑀦𑀼𑀪𑁄𑀢𑀻𑀢𑀺 𑀯𑀘𑀦𑀁 𑀉𑀧𑀧𑀚𑁆𑀚𑀢𑀺𑀬𑁂𑀯𑀸𑀢𑀺? 𑀦, 𑀦𑀺𑀬𑀫𑀸𑀪𑀸𑀯𑀢𑁄. 𑀦 𑀳𑀺 𑀧𑀜𑁆𑀘𑀤𑁆𑀯𑀸𑀭𑀸𑀪𑀺𑀦𑀺𑀳𑀝𑀁𑀬𑁂𑀯 𑀫𑀦𑁄 𑀇𑀥 ‘‘𑀫𑀦𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀦𑀺𑀬𑀫𑀳𑁂𑀢𑀼 𑀅𑀢𑁆𑀣𑀻𑀢𑀺, 𑀏𑀢𑀁𑀬𑁂𑀯 𑀯𑀸 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀸𑀤𑀺𑀕𑁆𑀕𑀳𑀡𑀁 𑀓𑀢𑀁. 𑀏𑀯𑀁𑀯𑀡𑁆𑀡𑁄𑀢𑀺𑀆𑀤𑀺𑀯𑀘𑀦𑀢𑁄 𑀧𑀼𑀩𑁆𑀩𑁂𑀦𑀺𑀯𑀸𑀲𑀅𑀢𑀻𑀢𑀸𑀦𑀸𑀕𑀢𑀁𑀲𑀜𑀸𑀡𑀸𑀤𑀬𑁄𑀧𑀺 𑀇𑀥 𑀲𑀫𑁆𑀪𑀯𑀦𑁆𑀢𑀺. 𑀇𑀢𑀭𑀣𑀸𑀢𑀺 𑀭𑀽𑀧𑀁 𑀲𑀤𑁆𑀤𑀦𑁆𑀢𑀺𑀆𑀤𑀺𑀦𑀸.

𑀪𑁄𑀚𑀦 …𑀧𑁂… 𑀉𑀲𑁆𑀲𑀸𑀳𑀸𑀤𑀻𑀳𑀻𑀢𑀺 𑀇𑀤𑀁 𑀬𑀸𑀬 𑀓𑀫𑁆𑀫𑀜𑁆𑀜𑀢𑀸𑀬 𑀭𑀽𑀧𑀓𑀸𑀬𑀲𑁆𑀲 𑀓𑀮𑁆𑀮𑀢𑀸 𑀳𑁄𑀢𑀺, 𑀢𑀲𑁆𑀲𑀸 𑀧𑀘𑁆𑀘𑀬𑀦𑀺𑀤𑀲𑁆𑀲𑀦𑀁. 𑀪𑁄𑀚𑀦𑁂 𑀳𑀺 𑀲𑀫𑁆𑀫𑀸𑀧𑀭𑀺𑀡𑀢𑁂 𑀲𑀧𑁆𑀧𑀸𑀬𑁂 𑀘 𑀉𑀢𑀼𑀪𑁄𑀚𑀦𑁂 𑀲𑀫𑁆𑀫𑀼𑀧𑀬𑀼𑀢𑁆𑀢𑁂 𑀲𑀫𑁆𑀫𑀸𑀧𑀬𑁄𑀕𑀲𑀗𑁆𑀔𑀸𑀢𑁂 𑀓𑀸𑀬𑀺𑀓𑀘𑁂𑀢𑀲𑀺𑀓𑀯𑀻𑀭𑀺𑀬𑁂 𑀘 𑀲𑀫𑀸𑀭𑀤𑁆𑀥𑁂 𑀮𑀳𑀼𑀢𑀸𑀤𑀺𑀲𑀩𑁆𑀪𑀸𑀯𑁂𑀦 𑀓𑀸𑀬𑁄 𑀓𑀫𑁆𑀫𑀓𑁆𑀔𑀫𑁄 𑀳𑁄𑀢𑀺 𑀲𑀩𑁆𑀩𑀓𑀺𑀭𑀺𑀬𑀸𑀦𑀼𑀓𑀽𑀮𑁄𑀢𑀺. 𑀅𑀣 𑀯𑀸 𑀪𑁄𑀚𑀦…𑀧𑁂… 𑀉𑀲𑁆𑀲𑀸𑀳𑀸𑀤𑀻𑀳𑀻𑀢𑀺 𑀇𑀤𑀁 𑀓𑀸𑀬𑀲𑁆𑀲 𑀓𑀮𑁆𑀬𑀢𑀸𑀬 𑀯𑀺𑀬 𑀉𑀧𑀤𑁆𑀤𑀼𑀢𑀢𑀸𑀬𑀧𑀺 𑀓𑀸𑀭𑀡𑀯𑀘𑀦𑀁. 𑀯𑀺𑀲𑀫𑀪𑁄𑀚𑀦𑀸𑀧𑀭𑀺𑀡𑀸𑀫𑀸𑀤𑀺𑀢𑁄 𑀳𑀺 𑀓𑀸𑀬𑀲𑁆𑀲 𑀉𑀧𑀤𑁆𑀤𑀯𑀓𑀭𑀸 𑀯𑀸𑀢𑀸𑀤𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺. 𑀅𑀦𑀼𑀯𑀢𑁆𑀢𑀦𑁆𑀢𑀲𑁆𑀲𑀸𑀢𑀺 𑀧𑀤𑀁 ‘‘𑀚𑀬𑀁 𑀯𑁂𑀭𑀁 𑀧𑀲𑀯𑀢𑀻’’𑀢𑀺𑀆𑀤𑀻𑀲𑀼 (𑀥. 𑀧. 𑁨𑁦𑁧) 𑀯𑀺𑀬 𑀳𑁂𑀢𑀼𑀅𑀢𑁆𑀣𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀚𑀸𑀕𑀭𑀡𑀦𑀺𑀫𑀺𑀢𑁆𑀢𑀜𑁆𑀳𑀺 𑀇𑀥 𑀅𑀦𑀼𑀯𑀢𑁆𑀢𑀦𑀁 𑀅𑀥𑀺𑀧𑁆𑀧𑁂𑀢𑀦𑁆𑀢𑀺. 𑀅𑀣 𑀯𑀸 𑀅𑀦𑀼𑀯𑀢𑁆𑀢𑀦𑁆𑀢𑀲𑁆𑀲𑀸𑀢𑀺 𑀇𑀤𑀁 𑀧𑀓𑀢𑀺𑀬𑀸 𑀤𑀺𑀝𑁆𑀞𑀸𑀤𑀺𑀯𑀲𑁂𑀦 𑀆𑀧𑀸𑀣𑀕𑀫𑀦𑀼𑀧𑀦𑀺𑀲𑁆𑀲𑀬𑀸𑀦𑀁 𑀓𑀮𑁆𑀬𑀢𑀸𑀤𑀺𑀦𑀺𑀩𑁆𑀩𑀢𑁆𑀢𑀸𑀦𑀁 𑀓𑀸𑀬𑀺𑀓𑀲𑀼𑀔𑀸𑀤𑀻𑀦𑀁 𑀲𑀫𑁆𑀪𑀯𑀤𑀲𑁆𑀲𑀦𑀁. 𑀓𑀸𑀬𑀓𑀮𑁆𑀬𑀢𑀸𑀤𑀺𑀁 𑀅𑀦𑀦𑀼𑀯𑀢𑁆𑀢𑀦𑁆𑀢𑀲𑁆𑀲 𑀳𑀺 𑀬𑀣𑀸𑀯𑀼𑀢𑁆𑀢𑀉𑀧𑀦𑀺𑀲𑁆𑀲𑀬𑀸𑀪𑁄𑀕𑀸𑀪𑀸𑀯𑁂𑀦 𑀯𑀼𑀢𑁆𑀢𑀧𑁆𑀧𑀓𑀸𑀭𑀁 𑀆𑀧𑀸𑀣𑀕𑀫𑀦𑀁 𑀦 𑀲𑀺𑀬𑀸𑀢𑀺. 𑀬𑀣𑀸𑀦𑀼𑀪𑀽𑀢𑁂 𑀭𑀽𑀧𑀸𑀤𑀺𑀯𑀺𑀲𑀬𑁂 𑀘𑀺𑀢𑁆𑀢𑀲𑁆𑀲 𑀞𑀧𑀦𑀁 𑀆𑀯𑀚𑁆𑀚𑀦𑀁 𑀘𑀺𑀢𑁆𑀢𑀧𑀡𑀺𑀤𑀳𑀦𑀁. 𑀬𑀣𑀸𑀦𑀼𑀪𑀽𑀢𑁂𑀦 𑀭𑀽𑀧𑀸𑀤𑀺𑀦𑀸 𑀲𑀤𑀺𑀲𑀁 𑀅𑀲𑀤𑀺𑀲𑀁 𑀲𑀫𑁆𑀩𑀦𑁆𑀥𑀜𑁆𑀘 𑀲𑀤𑀺𑀲𑀸𑀲𑀤𑀺𑀲𑀲𑀫𑁆𑀩𑀦𑁆𑀥𑀁, 𑀢𑀲𑁆𑀲 𑀤𑀲𑁆𑀲𑀦𑀸𑀤𑀺 𑀲𑀤𑀺𑀲𑀸𑀲𑀤𑀺𑀲𑀲𑀫𑁆𑀩𑀦𑁆𑀥𑀤𑀲𑁆𑀲𑀦𑀸𑀤𑀺, 𑀘𑀺𑀢𑁆𑀢𑀧𑀡𑀺𑀤𑀳𑀦𑀜𑁆𑀘 𑀲𑀤𑀺𑀲𑀸𑀲𑀤𑀺𑀲…𑀧𑁂… 𑀤𑀲𑁆𑀲𑀦𑀸𑀤𑀺 𑀘 𑀘𑀺𑀢𑁆𑀢…𑀧𑁂… 𑀤𑀲𑁆𑀲𑀦𑀸𑀤𑀬𑁄 𑀢𑁂 𑀧𑀘𑁆𑀘𑀬𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀥𑀸𑀢𑀼𑀓𑁆𑀔𑁄𑀪𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀤𑁂𑀯𑀢𑀽𑀧𑀲𑀁𑀳𑀸𑀭𑀸𑀤𑀺𑀁 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀁𑀲𑀤𑀺𑀲𑀢𑀸 𑀤𑀺𑀝𑁆𑀞𑀲𑀼𑀢𑀲𑀤𑀺𑀲𑀢𑀸. 𑀢𑀁𑀲𑀫𑁆𑀧𑀬𑀼𑀢𑁆𑀢𑀢𑀸 𑀤𑀺𑀝𑁆𑀞𑀲𑀼𑀢𑀧𑀝𑀺𑀩𑀤𑁆𑀥𑀢𑀸. 𑀓𑁂𑀦𑀘𑀺 𑀯𑀼𑀢𑁆𑀢𑁂𑀢𑀺 𑀇𑀫𑀺𑀦𑀸 𑀲𑀤𑁆𑀥𑀸𑀬 𑀅𑀦𑀼𑀲𑁆𑀲𑀯𑀦𑀺𑀩𑁆𑀩𑀢𑁆𑀢𑀢𑀁 𑀆𑀳. 𑀆𑀓𑀸𑀭𑀯𑀺𑀘𑀸𑀭𑀡𑀦𑁆𑀢𑀺 𑀢𑁂𑀲𑀁 𑀢𑁂𑀲𑀁 𑀅𑀢𑁆𑀣𑀸𑀦𑀁 𑀉𑀧𑀝𑁆𑀞𑀸𑀦𑀸𑀓𑀸𑀭𑀯𑀺𑀘𑀸𑀭𑀡𑀁. 𑀓𑀢𑁆𑀣𑀘𑀺 𑀅𑀢𑁆𑀣𑁂.

𑀦𑀺𑀬𑀫𑀺𑀢𑀲𑁆𑀲𑀸𑀢𑀺 𑀓𑀼𑀲𑀮𑀫𑁂𑀯 𑀫𑀬𑀸 𑀉𑀧𑁆𑀧𑀸𑀤𑁂𑀢𑀩𑁆𑀩𑀦𑁆𑀢𑀺 𑀏𑀯𑀁 𑀦𑀺𑀬𑀫𑀺𑀢𑀲𑁆𑀲. 𑀧𑀲𑀸𑀤𑀲𑀺𑀦𑁂𑀳𑀸𑀪𑀸𑀯𑁄 𑀤𑁄𑀲𑀩𑀳𑀼𑀮𑀢𑀸𑀬 𑀳𑁄𑀢𑀻𑀢𑀺 𑀮𑀽𑀔𑀧𑀼𑀕𑁆𑀕𑀮𑀸 𑀤𑁄𑀲𑀩𑀳𑀼𑀮𑀸𑀢𑀺 𑀆𑀳.

𑀆𑀬𑀢𑀦𑀪𑀸𑀯𑀢𑁄𑀢𑀺 𑀓𑀸𑀭𑀡𑀪𑀸𑀯𑀢𑁄.

𑀯𑀺𑀚𑁆𑀚𑀫𑀸𑀦𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀏𑀢𑁂𑀦 ‘‘𑀯𑀺𑀦𑀸𑀧𑀺 𑀤𑁂𑀬𑁆𑀬𑀥𑀫𑁆𑀫𑀧𑀭𑀺𑀘𑁆𑀘𑀸𑀕𑁂𑀦 𑀘𑀺𑀢𑁆𑀢𑀼𑀧𑁆𑀧𑀸𑀤𑀫𑀢𑁆𑀢𑁂𑀦𑁂𑀯 𑀤𑀸𑀦𑀫𑀬𑀁 𑀓𑀼𑀲𑀮𑀁 𑀉𑀧𑀘𑀺𑀢𑀁 𑀳𑁄𑀢𑀻’’𑀢𑀺 𑀓𑁂𑀲𑀜𑁆𑀘𑀺 𑀅𑀢𑀺𑀥𑀸𑀯𑀦𑀁 𑀦𑀺𑀯𑀢𑁆𑀢𑀺𑀢𑀁 𑀳𑁄𑀢𑀻𑀢𑀺.

𑀥𑀫𑁆𑀫𑀲𑀯𑀦𑀲𑁆𑀲 𑀖𑁄𑀲𑀦𑀁 𑀥𑀫𑁆𑀫𑀲𑀯𑀦𑀖𑁄𑀲𑀦𑀁. 𑀢𑀲𑁆𑀲𑀸𑀢𑀺 ‘‘𑀲𑀤𑁆𑀤𑀤𑀸𑀦𑀁 𑀤𑀲𑁆𑀲𑀸𑀫𑀻’’𑀢𑀺 𑀲𑀤𑁆𑀤𑀯𑀢𑁆𑀣𑀽𑀦𑀁 𑀞𑀸𑀦𑀓𑀭𑀡𑀪𑁂𑀭𑀺𑀆𑀤𑀻𑀦𑀁 𑀲𑀲𑀤𑁆𑀤𑀧𑁆𑀧𑀯𑀢𑁆𑀢𑀺𑀓𑀭𑀡𑀲𑁆𑀲. 𑀘𑀺𑀦𑁆𑀢𑀦𑀁 𑀢𑀣𑀸 𑀢𑀣𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑀦𑀁. 𑀅𑀜𑁆𑀜𑀢𑁆𑀣𑀸𑀢𑀺 𑀲𑀼𑀢𑁆𑀢𑁂𑀲𑀼. 𑀅𑀧𑀭𑀢𑁆𑀣𑀸𑀢𑀺 𑀅𑀪𑀺𑀥𑀫𑁆𑀫𑀧𑀤𑁂𑀲𑀼. 𑀅𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀧𑀤𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀸 ‘‘𑀧𑀭𑀺𑀪𑁄𑀕𑀭𑀲𑁄’’𑀢𑀺𑀆𑀤𑀺𑀓𑀸𑀬 𑀅𑀢𑁆𑀣𑀯𑀡𑁆𑀡𑀦𑀸𑀬 𑀧𑀭𑀢𑁄 𑀩𑀳𑀽𑀲𑀼 𑀧𑁄𑀢𑁆𑀣𑀓𑁂𑀲𑀼 𑀮𑀺𑀔𑀻𑀬𑀢𑀺, 𑀬𑀣𑀸𑀞𑀸𑀦𑁂𑀬𑁂𑀯 𑀧𑀦 𑀆𑀦𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀸. 𑀢𑀢𑁆𑀣 𑀧𑀭𑀫𑀢𑁆𑀣𑀢𑁄 𑀅𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀮𑀓𑁆𑀔𑀡𑀧𑀜𑁆𑀜𑀢𑁆𑀢𑀺𑀬𑁄 𑀅𑀜𑁆𑀜𑀸𑀬𑀢𑀦𑀢𑁆𑀢𑀸 𑀙 𑀅𑀚𑁆𑀛𑀢𑁆𑀢𑀺𑀓𑀸𑀬𑀢𑀦𑀸𑀦𑀺 𑀅𑀲𑀗𑁆𑀕𑀳𑀺𑀢𑀸 𑀥𑀫𑁆𑀫𑀸𑀬𑀢𑀦𑁂𑀦𑀸𑀢𑀺 𑀬𑁄𑀚𑁂𑀢𑀩𑁆𑀩𑀁.

‘‘𑀏𑀓𑀤𑁆𑀯𑀸𑀭𑀺𑀓𑀓𑀫𑁆𑀫𑀁 𑀅𑀜𑁆𑀜𑀲𑁆𑀫𑀺𑀁 𑀤𑁆𑀯𑀸𑀭𑁂 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀭𑀽𑀧𑀸𑀤𑀻𑀲𑀼 𑀏𑀓𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑀁 𑀬𑀣𑀸 𑀦 𑀅𑀜𑁆𑀜𑀸𑀭𑀫𑁆𑀫𑀡𑀁 𑀳𑁄𑀢𑀺 𑀘𑀺𑀢𑁆𑀢𑀯𑀺𑀲𑁂𑀲𑀲𑁆𑀲 𑀅𑀥𑀺𑀧𑁆𑀧𑁂𑀢𑀢𑁆𑀢𑀸, 𑀏𑀯𑀁 𑀓𑀫𑁆𑀫𑀯𑀺𑀲𑁂𑀲𑁂 𑀅𑀥𑀺𑀧𑁆𑀧𑁂𑀢𑁂 𑀓𑀸𑀬𑀤𑁆𑀯𑀸𑀭𑀸𑀤𑀻𑀲𑀼 𑀏𑀓𑀤𑁆𑀯𑀸𑀭𑀺𑀓𑀓𑀫𑁆𑀫𑀁 𑀅𑀜𑁆𑀜𑀲𑁆𑀫𑀺𑀁 𑀤𑁆𑀯𑀸𑀭𑁂 𑀦 𑀉𑀧𑁆𑀧𑀚𑁆𑀚𑀢𑀺 𑀢𑀢𑁆𑀣𑁂𑀯 𑀧𑀭𑀺𑀬𑁄𑀲𑀺𑀢𑀢𑁆𑀢𑀸, 𑀅𑀣 𑀓𑀫𑁆𑀫𑀲𑀸𑀫𑀜𑁆𑀜𑀁 𑀅𑀥𑀺𑀧𑁆𑀧𑁂𑀢𑀁, 𑀭𑀽𑀧𑀸𑀤𑀻𑀲𑀼 𑀏𑀓𑀸𑀭𑀫𑁆𑀫𑀡𑀦𑁆𑀢𑀺 𑀇𑀤𑀁 𑀉𑀤𑀸𑀳𑀭𑀡𑀁 𑀦 𑀲𑀺𑀬𑀸𑀢𑀺? 𑀦, 𑀅𑀲𑀤𑀺𑀲𑀪𑀸𑀯𑀯𑀺𑀪𑀸𑀯𑀦𑀯𑀲𑁂𑀦 𑀉𑀤𑀸𑀳𑀝𑀢𑁆𑀢𑀸, 𑀇𑀢𑀭𑀣𑀸 𑀫𑀦𑁄𑀯𑀺𑀜𑁆𑀜𑀸𑀡𑀪𑀽𑀢𑀁 𑀇𑀤𑀁 𑀘𑀺𑀢𑁆𑀢𑀁 𑀙𑀲𑀼𑀧𑀺 𑀯𑀺𑀲𑀬𑁂𑀲𑀼 𑀧𑀯𑀢𑁆𑀢𑀦𑀢𑁄 𑀅𑀦𑀺𑀩𑀤𑁆𑀥𑀸𑀭𑀫𑁆𑀫𑀡𑀦𑁆𑀢𑀺 𑀆𑀭𑀫𑁆𑀫𑀡𑀁 𑀲𑀤𑀺𑀲𑀽𑀤𑀸𑀳𑀭𑀡𑀪𑀸𑀯𑁂𑀦 𑀯𑀼𑀘𑁆𑀘𑁂𑀬𑁆𑀬 𑀆𑀭𑀫𑁆𑀫𑀡𑀁 𑀯𑀺𑀬 𑀤𑁆𑀯𑀸𑀭𑀫𑁆𑀧𑀺 𑀅𑀦𑀺𑀩𑀤𑁆𑀥𑀦𑁆𑀢𑀺. 𑀬𑀲𑁆𑀫𑀸 𑀧𑀦 𑀲𑀢𑀺𑀧𑀺 𑀓𑀫𑁆𑀫𑀸𑀦𑀁 𑀤𑁆𑀯𑀸𑀭𑀦𑁆𑀢𑀭𑀘𑀭𑀡𑁂 𑀬𑁂𑀪𑀼𑀬𑁆𑀬𑁂𑀦 𑀯𑀼𑀢𑁆𑀢𑀺𑀬𑀸 𑀢𑀩𑁆𑀩𑀳𑀼𑀮𑀯𑀼𑀢𑁆𑀢𑀺𑀬𑀸 𑀘 𑀤𑁆𑀯𑀸𑀭𑀓𑀫𑁆𑀫𑀸𑀦𑀁 𑀅𑀜𑁆𑀜𑀫𑀜𑁆𑀜𑀁 𑀯𑀯𑀢𑁆𑀣𑀸𑀦𑀁 𑀯𑀓𑁆𑀔𑀢𑀺, 𑀢𑀲𑁆𑀫𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀪𑀸𑀯𑀲𑀸𑀫𑀜𑁆𑀜𑁂𑀦 𑀓𑀫𑁆𑀫𑀁 𑀏𑀓𑀢𑁆𑀢𑀦𑀬𑀯𑀲𑁂𑀦 𑀕𑀳𑁂𑀢𑁆𑀯𑀸 𑀢𑀲𑁆𑀲 𑀯𑀘𑀻𑀤𑁆𑀯𑀸𑀭𑀸𑀤𑀻𑀲𑀼 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀢𑁄 𑀓𑀫𑁆𑀫𑀲𑁆𑀲 𑀅𑀦𑀺𑀩𑀤𑁆𑀥𑀢𑁆𑀢𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀓𑀸𑀬𑀤𑁆𑀯𑀸𑀭𑀸𑀤𑀻𑀲𑀼 𑀏𑀓𑀤𑁆𑀯𑀸𑀭𑀺𑀓𑀓𑀫𑁆𑀫𑀁 𑀅𑀜𑁆𑀜𑀲𑁆𑀫𑀺𑀁 𑀤𑁆𑀯𑀸𑀭𑁂 𑀦 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺. 𑀭𑀽𑀧𑀸𑀤𑀻𑀲𑀼 𑀧𑀦 𑀏𑀓𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑀁 𑀢𑁂𑀦𑁂𑀯𑀸𑀭𑀫𑁆𑀫𑀡𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑀦𑁆𑀢𑀺 𑀯𑀺𑀲𑀺𑀝𑁆𑀞𑀫𑁂𑀯 𑀕𑀳𑀺𑀢𑀦𑁆𑀢𑀺 𑀆𑀭𑀫𑁆𑀫𑀡𑀫𑁂𑀯 𑀦𑀺𑀩𑀤𑁆𑀥𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀘𑀺𑀢𑁆𑀢𑀯𑀺𑀲𑁂𑀲𑁄 𑀏𑀯 𑀕𑀳𑀺𑀢𑁄, 𑀦 𑀘𑀺𑀢𑁆𑀢𑀲𑀸𑀫𑀜𑁆𑀜𑀁. ‘‘𑀦𑀦𑀼 𑀘 𑀭𑀽𑀧𑀸𑀭𑀫𑁆𑀫𑀡𑀁 𑀯𑀸…𑀧𑁂… 𑀥𑀫𑁆𑀫𑀸𑀭𑀫𑁆𑀫𑀡𑀁 𑀯𑀸 𑀬𑀁 𑀬𑀁 𑀯𑀸 𑀧𑀦𑀸’’𑀢𑀺 𑀆𑀭𑀫𑁆𑀫𑀡𑀫𑁆𑀧𑀺 𑀅𑀦𑀺𑀬𑀫𑁂𑀦𑁂𑀯 𑀯𑀼𑀢𑁆𑀢𑀦𑁆𑀢𑀺? 𑀲𑀘𑁆𑀘𑀫𑁂𑀢𑀁, 𑀢𑀢𑁆𑀣 𑀧𑀦 𑀬𑀁 𑀭𑀽𑀧𑀸𑀤𑀻𑀲𑀼 𑀏𑀓𑀸𑀭𑀫𑁆𑀫𑀡𑀁 𑀘𑀺𑀢𑁆𑀢𑀁, 𑀢𑀁 𑀢𑁂𑀦 𑀯𑀺𑀦𑀸 𑀦𑀧𑁆𑀧𑀯𑀢𑁆𑀢𑀢𑀺, 𑀓𑀫𑁆𑀫𑀁 𑀧𑀦 𑀓𑀸𑀬𑀤𑁆𑀯𑀸𑀭𑀺𑀓𑀸𑀤𑀺𑀪𑁂𑀤𑀁 𑀯𑀘𑀻𑀤𑁆𑀯𑀸𑀭𑀸𑀤𑀻𑀲𑀼 𑀦 𑀦𑀧𑁆𑀧𑀯𑀢𑁆𑀢𑀢𑀻𑀢𑀺 𑀇𑀫𑀲𑁆𑀲 𑀯𑀺𑀲𑁂𑀲𑀲𑁆𑀲 𑀚𑁄𑀢𑀦𑀢𑁆𑀣𑀁 𑀧𑀸𑀴𑀺𑀬𑀁 𑀆𑀭𑀫𑁆𑀫𑀡𑀫𑁂𑀯 𑀕𑀳𑀺𑀢𑀁, 𑀤𑁆𑀯𑀸𑀭𑀁 𑀦 𑀕𑀳𑀺𑀢𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀺 ‘‘𑀆𑀭𑀫𑁆𑀫𑀡𑀫𑁂𑀯 𑀦𑀺𑀩𑀤𑁆𑀥’’𑀦𑁆𑀢𑀺𑀆𑀤𑀺𑀦𑀸. 𑀯𑀘𑀻𑀤𑁆𑀯𑀸𑀭𑁂 𑀉𑀧𑁆𑀧𑀚𑁆𑀚𑀫𑀸𑀦𑀫𑁆𑀧𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀢𑀺 𑀅𑀢𑁆𑀣𑁄.

𑀓𑀸𑀫𑀸𑀯𑀘𑀭𑀓𑀼𑀲𑀮𑀁

𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑀓𑀫𑁆𑀫𑀤𑁆𑀯𑀸𑀭𑀸𑀦𑀦𑁆𑀢𑀺𑀆𑀤𑀺𑀦𑀸 𑀧𑀓𑀸𑀲𑁂𑀢𑀩𑁆𑀩𑀲𑁆𑀲 𑀲𑀭𑀽𑀧𑀁 𑀧𑀓𑀸𑀲𑀦𑀼𑀧𑀸𑀬𑀜𑁆𑀘 𑀤𑀲𑁆𑀲𑁂𑀢𑀺. 𑀦𑀺𑀬𑀢𑀭𑀽𑀧𑀭𑀽𑀧𑀯𑀲𑁂𑀦𑀸𑀢𑀺 𑀥𑀫𑁆𑀫𑀲𑀗𑁆𑀕𑀳𑁂 𑀦𑀺𑀤𑁆𑀤𑀺𑀝𑁆𑀞𑀦𑀺𑀬𑀢𑀭𑀽𑀧𑀭𑀽𑀧𑀯𑀲𑁂𑀦. 𑀅𑀜𑁆𑀜𑀣𑀸 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀺𑀓𑀓𑀸𑀬𑁂 𑀳𑀤𑀬𑀯𑀢𑁆𑀣𑀼𑀧𑀺 𑀕𑀳𑁂𑀢𑀩𑁆𑀩𑀁 𑀲𑀺𑀬𑀸. 𑀏𑀓𑀲𑀦𑁆𑀢𑀢𑀺𑀧𑀭𑀺𑀬𑀸𑀧𑀦𑁆𑀦𑁄 𑀉𑀧𑀸𑀤𑀺𑀦𑁆𑀦𑀓𑀓𑀸𑀬𑁄 𑀇𑀥 𑀕𑀳𑀺𑀢𑁄𑀢𑀺 𑀘𑀓𑁆𑀔𑀸𑀬𑀢𑀦𑀸𑀤𑀻𑀢𑀺 𑀯𑀼𑀢𑁆𑀢𑁂𑀲𑀼 𑀏𑀓𑁄 𑀪𑀸𑀯𑁄 𑀳𑀤𑀬𑀯𑀢𑁆𑀣𑀼 𑀘 𑀕𑀳𑀺𑀢𑀦𑁆𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 ‘‘𑀘𑀓𑁆𑀔𑀸𑀬𑀢𑀦𑀸𑀤𑀻𑀦𑀺 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀸𑀦𑀻’’𑀢𑀺 𑀲𑀦𑁆𑀦𑀺𑀯𑁂𑀲𑀲𑁆𑀲 𑀯𑀺𑀪𑀸𑀯𑀺𑀢𑀢𑁆𑀢𑀸.

𑀯𑀺𑀧𑁆𑀨𑀦𑁆𑀤𑀫𑀸𑀦𑀯𑀡𑁆𑀡𑀕𑁆𑀕𑀳𑀡𑀸𑀦𑀦𑁆𑀢𑀭𑀁 𑀯𑀺𑀜𑁆𑀜𑀢𑁆𑀢𑀺𑀕𑁆𑀕𑀳𑀡𑀲𑁆𑀲 𑀇𑀘𑁆𑀙𑀺𑀢𑀢𑁆𑀢𑀸 𑀘𑀮𑀦𑀸𑀓𑀸𑀭𑀸𑀯 𑀯𑀸𑀬𑁄𑀥𑀸𑀢𑀼 𑀯𑀺𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑀲𑀳𑀺𑀢𑀸𑀢𑀺 𑀓𑀤𑀸𑀘𑀺 𑀆𑀲𑀗𑁆𑀓𑁂𑀬𑁆𑀬𑀸𑀢𑀺 𑀢𑀦𑁆𑀦𑀺𑀯𑀢𑁆𑀢𑀦𑀢𑁆𑀣𑀁 ‘‘𑀧𑀞𑀫𑀚𑀯𑀦𑀲𑀫𑀼𑀝𑁆𑀞𑀺𑀢𑀸’’𑀢𑀺 𑀆𑀳. 𑀤𑁂𑀲𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀳𑁂𑀢𑀼𑀪𑀸𑀯𑁂𑀦 𑀘𑀸𑀮𑁂𑀢𑀼𑀦𑁆𑀢𑀺 𑀏𑀢𑁂𑀦 𑀤𑁂𑀲𑀦𑁆𑀢𑀭𑀼𑀧𑁆𑀧𑀢𑁆𑀢𑀺 𑀘𑀮𑀦𑀁, 𑀢𑀁𑀦𑀺𑀫𑀺𑀢𑁆𑀢𑁂 𑀘 𑀓𑀢𑁆𑀢𑀼𑀪𑀸𑀯𑁄 𑀉𑀧𑀘𑀭𑀺𑀢𑁄𑀢𑀺 𑀤𑀲𑁆𑀲𑁂𑀢𑀺, 𑀅𑀜𑁆𑀜𑀣𑀸 𑀔𑀡𑀺𑀓𑀢𑀸 𑀅𑀩𑁆𑀬𑀸𑀧𑀸𑀭𑀢𑀸 𑀘 𑀥𑀫𑁆𑀫𑀸𑀦𑀁 𑀦 𑀲𑀫𑁆𑀪𑀯𑁂𑀬𑁆𑀬𑀸𑀢𑀺. 𑀢𑀤𑀪𑀺𑀫𑀼𑀔𑀪𑀸𑀯𑀯𑀺𑀓𑀸𑀭𑀯𑀢𑀻𑀢𑀺 𑀢𑀁𑀤𑀺𑀲𑀫𑀪𑀺𑀫𑀼𑀔𑁄 𑀢𑀤𑀪𑀺𑀫𑀼𑀔𑁄, 𑀢𑀲𑁆𑀲 𑀪𑀸𑀯𑁄 𑀢𑀤𑀪𑀺𑀫𑀼𑀔𑀪𑀸𑀯𑁄, 𑀲𑁄 𑀏𑀯 𑀯𑀺𑀓𑀸𑀭𑁄, 𑀢𑀁𑀲𑀫𑀗𑁆𑀕𑀺𑀦𑀻 𑀯𑀸𑀬𑁄𑀥𑀸𑀢𑀼 𑀢𑀤𑀪𑀺𑀫𑀼𑀔𑀪𑀸𑀯𑀯𑀺𑀓𑀸𑀭𑀯𑀢𑀻. 𑀇𑀤𑀸𑀦𑀺 𑀢𑀤𑀪𑀺𑀫𑀼𑀔𑀪𑀸𑀯𑀯𑀺𑀓𑀸 𑀭𑀲𑁆𑀲 𑀯𑀺𑀜𑁆𑀜𑀢𑁆𑀢𑀺𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀥𑀺𑀧𑁆𑀧𑀸𑀬𑀲𑀳𑀪𑀸𑀯𑀻’’𑀢𑀺𑀆𑀤𑀺. 𑀏𑀯𑀜𑁆𑀘 𑀓𑀢𑁆𑀯𑀸𑀢𑀺𑀆𑀤𑀺𑀦𑀸 𑀇𑀫𑀺𑀲𑁆𑀲𑀸 𑀅𑀢𑁆𑀣𑀯𑀡𑁆𑀡𑀦𑀸𑀬 𑀮𑀤𑁆𑀥𑀕𑀼𑀡𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀆𑀯𑀚𑁆𑀚𑀦𑀲𑁆𑀲𑀸𑀢𑀺 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑁆𑀲. 𑀬𑀢𑁄 𑀩𑀸𑀢𑁆𑀢𑀺𑀁𑀲𑀸𑀢𑀺𑀆𑀤𑀺𑀦𑀸 𑀢𑀲𑁆𑀲 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀢𑀸 𑀦 𑀲𑀓𑁆𑀓𑀸 𑀧𑀝𑀺𑀲𑁂𑀥𑁂𑀢𑀼𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀲𑀫𑀢𑁆𑀣𑁄𑀢𑀺 𑀏𑀢𑁂𑀦 𑀬𑀣𑀸𑀯𑀼𑀢𑁆𑀢𑀯𑀸𑀬𑁄𑀥𑀸𑀢𑀼𑀬𑀸 𑀣𑀫𑁆𑀪𑀦𑀘𑀮𑀦𑀲𑀗𑁆𑀔𑀸𑀢𑀓𑀺𑀘𑁆𑀘𑀦𑀺𑀧𑁆𑀨𑀸𑀤𑀦𑁂 𑀢𑀲𑁆𑀲 𑀆𑀓𑀸𑀭𑀯𑀺𑀲𑁂𑀲𑀲𑁆𑀲 𑀲𑀳𑀓𑀸𑀭𑀻𑀓𑀸𑀭𑀡𑀪𑀸𑀯𑀫𑀸𑀳. 𑀅𑀦𑀺𑀤𑀲𑁆𑀲𑀦𑀲𑀧𑁆𑀧𑀝𑀺𑀖𑀢𑀸𑀤𑀬𑁄 𑀯𑀺𑀬 𑀫𑀳𑀸𑀪𑀽𑀢𑀸𑀦𑀁 𑀅𑀯𑀢𑁆𑀣𑀸𑀯𑀺𑀲𑁂𑀲𑀫𑀢𑁆𑀢𑀁 𑀲𑁄 𑀆𑀓𑀸𑀭𑀯𑀺𑀲𑁂𑀲𑁄𑀢𑀺 𑀧𑀭𑀫𑀢𑁆𑀣𑀢𑁄 𑀦 𑀓𑀺𑀜𑁆𑀘𑀺 𑀳𑁄𑀢𑀻𑀢𑀺 ‘‘𑀧𑀭𑀫𑀢𑁆𑀣𑀢𑁄 𑀅𑀪𑀸𑀯𑀁 𑀤𑀲𑁆𑀲𑁂𑀢𑀻’’𑀢𑀺 𑀆𑀳. 𑀧𑀭𑀫𑀢𑁆𑀣𑀢𑁄 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀪𑀸𑀯𑁄 𑀧𑀝𑀺𑀲𑁂𑀥𑀺𑀢𑁄. 𑀓𑀫𑁆𑀫𑀲𑀫𑀼𑀝𑁆𑀞𑀸𑀦𑀸𑀤𑀺𑀪𑀸𑀯𑀲𑁆𑀲 𑀧𑀦 𑀲𑀫𑁆𑀪𑀯𑁄𑀬𑁂𑀯 𑀦𑀢𑁆𑀣𑀻𑀢𑀺 𑀬𑀣𑀸𑀯𑀼𑀢𑁆𑀢𑀯𑀺𑀓𑀸𑀭𑀲𑁆𑀲 𑀧𑀭𑀫𑀢𑁆𑀣𑀢𑁄 𑀲𑀩𑁆𑀪𑀸𑀯𑁂 𑀦𑀓𑀼𑀢𑁄𑀘𑀺𑀲𑀫𑀼𑀝𑁆𑀞𑀺𑀢𑀢𑁆𑀢𑀸 𑀅𑀧𑁆𑀧𑀘𑁆𑀘𑀬𑀢𑁆𑀢𑀁 𑀆𑀧𑀦𑁆𑀦𑀁. 𑀦 𑀳𑀺 𑀭𑀽𑀧𑀁 𑀅𑀧𑁆𑀧𑀘𑁆𑀘𑀬𑀁 𑀅𑀢𑁆𑀣𑀺, 𑀅𑀧𑁆𑀧𑀘𑁆𑀘𑀬𑀢𑁆𑀢𑁂 𑀘 𑀲𑀢𑀺 𑀦𑀺𑀘𑁆𑀘𑀪𑀸𑀯𑁄 𑀆𑀧𑀚𑁆𑀚𑀢𑀺, 𑀦 𑀘 𑀦𑀺𑀩𑁆𑀩𑀸𑀦𑀯𑀚𑁆𑀚𑁄 𑀅𑀢𑁆𑀣𑁄 𑀲𑀪𑀸𑀯𑀥𑀫𑁆𑀫𑁄 𑀦𑀺𑀘𑁆𑀘𑁄 𑀅𑀢𑁆𑀣𑀺. 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀪𑀸𑀯𑁄 𑀯𑀺𑀬𑀸𑀢𑀺 𑀯𑀺𑀜𑁆𑀜𑀢𑁆𑀢𑀺𑀬𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀉𑀧𑀸𑀤𑀸𑀭𑀽𑀧𑀪𑀸𑀯𑁄 𑀉𑀧𑀘𑀸𑀭𑀲𑀺𑀤𑁆𑀥𑁄𑀢𑀺 𑀤𑀲𑁆𑀲𑁂𑀢𑀺.

𑀯𑀺𑀜𑁆𑀜𑀢𑁆𑀢𑀺𑀬𑀸 𑀓𑀭𑀡𑀪𑀽𑀢𑀸𑀬. 𑀬𑀁 𑀓𑀭𑀡𑀦𑁆𑀢𑀺 𑀬𑀁 𑀘𑀺𑀢𑁆𑀢𑀓𑀺𑀭𑀺𑀬𑀁 𑀘𑀺𑀢𑁆𑀢𑀩𑁆𑀬𑀸𑀧𑀸𑀭𑀁. 𑀯𑀺𑀜𑁆𑀜𑀢𑁆𑀢𑀺𑀬𑀸 𑀯𑀺𑀜𑁆𑀜𑀸𑀢𑀢𑁆𑀢𑀦𑁆𑀢𑀺 𑀇𑀤𑀫𑁂𑀲 𑀓𑀸𑀭𑁂𑀢𑀻𑀢𑀺 𑀬𑀤𑁂𑀢𑀁 𑀅𑀥𑀺𑀧𑁆𑀧𑀸𑀬𑀯𑀺𑀪𑀸𑀯𑀦𑀁, 𑀏𑀢𑀁 𑀯𑀺𑀜𑁆𑀜𑀢𑁆𑀢𑀺𑀯𑀺𑀓𑀸𑀭𑀭𑀳𑀺𑀢𑁂𑀲𑀼 𑀭𑀼𑀓𑁆𑀔𑀘𑀮𑀦𑀸𑀤𑀻𑀲𑀼 𑀦 𑀤𑀺𑀝𑁆𑀞𑀁, 𑀳𑀢𑁆𑀣𑀘𑀮𑀦𑀸𑀤𑀻𑀲𑀼 𑀧𑀦 𑀤𑀺𑀝𑁆𑀞𑀁, 𑀢𑀲𑁆𑀫𑀸 𑀯𑀺𑀧𑁆𑀨𑀦𑁆𑀤𑀫𑀸𑀦𑀯𑀡𑁆𑀡𑀯𑀺𑀦𑀺𑀫𑀼𑀢𑁆𑀢𑁄 𑀓𑁄𑀘𑀺 𑀯𑀺𑀓𑀸𑀭𑁄 𑀅𑀢𑁆𑀣𑀺 𑀓𑀸𑀬𑀺𑀓𑀓𑀭𑀡𑀲𑀗𑁆𑀔𑀸𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑀲𑁆𑀲 𑀜𑀸𑀧𑀓𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀜𑀸𑀧𑀓𑁄 𑀘 𑀳𑁂𑀢𑀼 𑀜𑀸𑀧𑁂𑀢𑀩𑁆𑀩𑀫𑀢𑁆𑀣𑀁 𑀲𑀬𑀁 𑀜𑀸𑀢𑁄𑀬𑁂𑀯 𑀜𑀸𑀧𑁂𑀢𑀺, 𑀦 𑀲𑀩𑁆𑀪𑀸𑀯𑀫𑀢𑁆𑀢𑁂𑀦𑀸𑀢𑀺 𑀯𑀡𑁆𑀡𑀕𑁆𑀕𑀳𑀡𑀸𑀦𑀦𑁆𑀢𑀭𑀁 𑀯𑀺𑀓𑀸𑀭𑀕𑁆𑀕𑀳𑀡𑀫𑁆𑀧𑀺 𑀯𑀺𑀜𑁆𑀜𑀸𑀬𑀢𑀺. 𑀢𑀣𑀸 𑀳𑀺 𑀯𑀺𑀲𑀬𑀪𑀸𑀯𑀫𑀸𑀧𑀦𑁆𑀦𑁄 𑀏𑀯 𑀲𑀤𑁆𑀤𑁄 𑀅𑀢𑁆𑀣𑀁 𑀧𑀓𑀸𑀲𑁂𑀢𑀺, 𑀦𑁂𑀢𑀭𑁄. 𑀢𑁂𑀦𑁂𑀯𑀸𑀳 ‘‘𑀦 𑀳𑀺 𑀯𑀺𑀜𑁆𑀜𑀢𑁆𑀢𑀻’’𑀢𑀺𑀆𑀤𑀺. 𑀬𑀤𑀺 𑀧𑀦 𑀘𑀺𑀢𑁆𑀢𑀚𑀭𑀽𑀧𑀸𑀦𑀁 𑀘𑀮𑀦𑀸𑀓𑀸𑀭𑁄 𑀯𑀺𑀜𑁆𑀜𑀢𑁆𑀢𑀺, 𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀧𑁆𑀨𑀦𑁆𑀤𑀫𑀸𑀦𑀯𑀡𑁆𑀡𑀸𑀭𑀫𑁆𑀫𑀡𑀢𑁆𑀢𑀸 𑀢𑁂𑀦𑀧𑀺 𑀲𑀸 𑀕𑀳𑀺𑀢𑀸 𑀲𑀺𑀬𑀸𑀢𑀺 𑀆𑀲𑀗𑁆𑀓𑀸𑀬 𑀦𑀺𑀯𑀢𑁆𑀢𑀦𑀢𑁆𑀣𑀁 𑀆𑀳 ‘‘𑀘𑀓𑁆𑀔𑀼𑀯𑀺𑀜𑁆𑀜𑀸𑀡𑀲𑁆𑀲𑀸’’𑀢𑀺𑀆𑀤𑀺.

𑀢𑀸𑀮𑀧𑀡𑁆𑀡𑀸𑀤𑀺𑀭𑀽𑀧𑀸𑀦𑀻𑀢𑀺𑀆𑀤𑀺𑀦𑀸𑀧𑀺 𑀯𑀺𑀜𑁆𑀜𑀢𑁆𑀢𑀺𑀬𑀸 𑀯𑀺𑀜𑁆𑀜𑀸𑀢𑀩𑁆𑀩𑀢𑀁 𑀫𑀦𑁄𑀯𑀺𑀜𑁆𑀜𑀸𑀡𑁂𑀦𑁂𑀯 𑀘 𑀯𑀺𑀜𑁆𑀜𑀸𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑀺. 𑀲𑀜𑁆𑀚𑀸𑀦𑀸𑀢𑀺 𑀏𑀢𑁂𑀦𑀸𑀢𑀺 𑀲𑀜𑁆𑀜𑀸𑀡𑀁, 𑀢𑀲𑁆𑀲 𑀉𑀤𑀓𑀸𑀤𑀺𑀦𑁄 𑀲𑀜𑁆𑀜𑀸𑀡𑀁 𑀢𑀁𑀲𑀜𑁆𑀜𑀸𑀡𑀁, 𑀢𑀲𑁆𑀲 𑀆𑀓𑀸𑀭𑁄 𑀢𑀁𑀲𑀜𑁆𑀜𑀸𑀡𑀸𑀓𑀸𑀭𑁄, 𑀉𑀤𑀓𑀸𑀤𑀺𑀲𑀳𑀘𑀸𑀭𑀺𑀧𑁆𑀧𑀓𑀸𑀭𑁄 𑀘 𑀲𑁄 𑀢𑀁𑀲𑀜𑁆𑀜𑀸𑀡𑀸𑀓𑀸𑀭𑁄 𑀘𑀸𑀢𑀺 𑀉𑀤𑀓𑀸…𑀧𑁂… 𑀓𑀸𑀭𑁄, 𑀢𑀁 𑀕𑀳𑁂𑀢𑁆𑀯𑀸 𑀚𑀸𑀦𑀺𑀢𑁆𑀯𑀸. 𑀢𑀤𑀸𑀓𑀸𑀭𑀲𑁆𑀲𑀸𑀢𑀺 𑀉𑀤𑀓𑀸𑀤𑀺𑀜𑀸𑀧𑀦𑀸𑀓𑀸𑀭𑀲𑁆𑀲. 𑀬𑀤𑀺 𑀬𑀣𑀸𑀯𑀼𑀢𑁆𑀢𑀯𑀺𑀓𑀸𑀭𑀕𑁆𑀕𑀳𑀡𑀁𑀬𑁂𑀯 𑀓𑀸𑀭𑀡𑀁 𑀅𑀥𑀺𑀧𑁆𑀧𑀸𑀬𑀕𑁆𑀕𑀳𑀡𑀲𑁆𑀲, 𑀅𑀣 𑀓𑀲𑁆𑀫𑀸 𑀅𑀕𑁆𑀕𑀳𑀺𑀢𑀲𑀗𑁆𑀓𑁂𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑀕𑁆𑀕𑀳𑀡𑀁 𑀦 𑀳𑁄𑀢𑀻𑀢𑀺? 𑀦 𑀓𑁂𑀯𑀮𑀁 𑀯𑀺𑀓𑀸𑀭𑀕𑁆𑀕𑀳𑀡𑀫𑁂𑀯 𑀅𑀥𑀺𑀧𑁆𑀧𑀸𑀬𑀕𑁆𑀕𑀳𑀡𑀲𑁆𑀲 𑀓𑀸𑀭𑀡𑀁, 𑀓𑀺𑀜𑁆𑀘𑀭𑀳𑀻𑀢𑀺 𑀆𑀳 ‘‘𑀏𑀢𑀲𑁆𑀲 𑀧𑀦𑀸’’𑀢𑀺𑀆𑀤𑀺.

𑀅𑀣 𑀧𑀦𑀸𑀢𑀺𑀆𑀤𑀺𑀦𑀸 𑀯𑀺𑀜𑁆𑀜𑀢𑁆𑀢𑀺𑀬𑀸 𑀅𑀦𑀼𑀫𑀸𑀦𑁂𑀦 𑀕𑀳𑁂𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑀺. 𑀲𑀸𑀥𑀺𑀧𑁆𑀧𑀸𑀬…𑀧𑁂… 𑀦𑀦𑁆𑀢𑀭𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑀲𑀳𑀺𑀢𑀯𑀺𑀓𑀸𑀭𑁂𑀦 𑀲𑀳𑀚𑀸𑀢𑀯𑀡𑁆𑀡𑀸𑀬𑀢𑀦𑀕𑁆𑀕𑀳𑀡𑀲𑀗𑁆𑀔𑀸𑀢𑀲𑁆𑀲 𑀘𑀓𑁆𑀔𑀼𑀤𑁆𑀯𑀸𑀭𑀺𑀓𑀯𑀺𑀜𑁆𑀜𑀸𑀡𑀲𑀦𑁆𑀢𑀸𑀦𑀲𑁆𑀲 𑀅𑀦𑀦𑁆𑀢𑀭𑀁. 𑀅𑀥𑀺𑀧𑁆𑀧𑀸𑀬𑀕𑁆𑀕𑀳𑀡𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑀯𑀯𑀢𑁆𑀣𑀸𑀧𑀓𑀲𑁆𑀲 𑀢𑀢𑀺𑀬𑀯𑀸𑀭𑁂 𑀚𑀯𑀦𑀲𑁆𑀲. 𑀅𑀥𑀺𑀧𑁆𑀧𑀸𑀬𑀲𑀳𑀪𑀽 𑀯𑀺𑀓𑀸𑀭𑀸𑀪𑀸𑀯𑁂 𑀅𑀪𑀸𑀯𑀢𑁄𑀢𑀺 𑀏𑀢𑁂𑀦 𑀬𑀣𑀸𑀯𑀼𑀢𑁆𑀢𑀯𑀺𑀓𑀸𑀭𑀁 𑀅𑀥𑀺𑀧𑁆𑀧𑀸𑀬𑀕𑁆𑀕𑀳𑀡𑁂𑀦 𑀅𑀦𑀼𑀫𑀺𑀦𑁄𑀢𑀺. 𑀏𑀯𑀁 𑀲𑀢𑀻𑀢𑀺𑀆𑀤𑀺𑀦𑀸 𑀬𑀣𑀸𑀦𑀼𑀫𑀺𑀢𑀫𑀢𑁆𑀣𑀁 𑀦𑀺𑀕𑀫𑀦𑀯𑀲𑁂𑀦 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀉𑀤𑀓𑀸𑀤𑀺𑀕𑁆𑀕𑀳𑀡𑁂𑀦𑁂𑀯𑀸𑀢𑀺 𑀢𑀸𑀮𑀧𑀡𑁆𑀡𑀸𑀤𑀻𑀦𑀁 𑀯𑀡𑁆𑀡𑀕𑁆𑀕𑀳𑀡𑀸𑀦𑀦𑁆𑀢𑀭𑁂𑀦 𑀧𑀼𑀭𑀺𑀫𑀲𑀺𑀤𑁆𑀥𑀲𑀫𑁆𑀩𑀦𑁆𑀥𑀸𑀦𑀼𑀕𑁆𑀕𑀳𑀺𑀢𑁂𑀦 𑀉𑀤𑀓𑀸𑀤𑀻𑀦𑀁 𑀢𑀢𑁆𑀣 𑀅𑀢𑁆𑀣𑀺𑀪𑀸𑀯𑀯𑀺𑀚𑀸𑀦𑀦𑁂𑀦𑁂𑀯. 𑀬𑀣𑀸 𑀢𑀸𑀮𑀧𑀡𑁆𑀡𑀸𑀤𑀻𑀦𑀁 𑀉𑀤𑀓𑀸𑀤𑀺𑀲𑀳𑀘𑀸𑀭𑀺𑀧𑁆𑀧𑀓𑀸𑀭𑀢𑀁 𑀲𑀜𑁆𑀜𑀸𑀡𑀸𑀓𑀸𑀭𑁄 𑀯𑀺𑀜𑁆𑀜𑀸𑀢𑁄𑀬𑁂𑀯 𑀳𑁄𑀢𑀺 𑀦𑀸𑀦𑀦𑁆𑀢𑀭𑀺𑀬𑀓𑀢𑁆𑀢𑀸, 𑀏𑀯𑀁 𑀯𑀺𑀧𑁆𑀨𑀦𑁆𑀤𑀫𑀸𑀦𑀯𑀡𑁆𑀡𑀕𑁆𑀕𑀳𑀡𑀸𑀦𑀦𑁆𑀢𑀭𑁂𑀦 𑀧𑀼𑀭𑀺𑀫𑀲𑀺𑀤𑁆𑀥𑀲𑀫𑁆𑀩𑀦𑁆𑀥𑀸𑀦𑀼𑀕𑁆𑀕𑀳𑀺𑀢𑁂𑀦 𑀕𑀦𑁆𑀢𑀼𑀓𑀸𑀫𑀢𑀸𑀤𑀺𑀅𑀥𑀺𑀧𑁆𑀧𑀸𑀬𑀯𑀺𑀚𑀸𑀦𑀦𑁂𑀦𑁂𑀯 𑀯𑀺𑀜𑁆𑀜𑀢𑁆𑀢𑀺 𑀯𑀺𑀜𑁆𑀜𑀸𑀢𑀸 𑀳𑁄𑀢𑀺 𑀢𑀤𑀪𑀸𑀯𑁂 𑀅𑀪𑀸𑀯𑀢𑁄𑀢𑀺 𑀉𑀧𑀫𑀸𑀬𑁄𑀚𑀦𑀸.

𑀲𑀪𑀸𑀯𑀪𑀽𑀢𑀦𑁆𑀢𑀺 𑀅𑀦𑁆𑀯𑀢𑁆𑀣𑀪𑀽𑀢𑀁. 𑀤𑁆𑀯𑀺𑀥𑀸𑀢𑀺 𑀯𑀺𑀜𑁆𑀜𑀸𑀧𑀦𑀢𑁄 𑀯𑀺𑀜𑁆𑀜𑁂𑀬𑁆𑀬𑀢𑁄 𑀘. 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀬𑀸 𑀢𑀣𑀸𑀧𑀯𑀢𑁆𑀢𑀫𑀸𑀦𑀸𑀬 𑀘𑁂𑀢𑀦𑀸𑀲𑀗𑁆𑀔𑀸𑀢𑀲𑁆𑀲 𑀓𑀫𑁆𑀫𑀲𑁆𑀲 𑀓𑀸𑀬𑀓𑀫𑁆𑀫𑀪𑀸𑀯𑁄 𑀦𑀺𑀧𑁆𑀨𑀚𑁆𑀚𑀢𑀺 𑀢𑀸𑀬 𑀉𑀧𑀮𑀓𑁆𑀔𑀺𑀢𑀩𑁆𑀩𑀢𑁆𑀢𑀸, 𑀦 𑀧𑀦 𑀘𑀢𑀼𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀲𑀼 𑀓𑁂𑀦𑀘𑀺 𑀧𑀘𑁆𑀘𑀬𑀪𑀸𑀯𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀲𑁆𑀫𑀺𑀁 𑀤𑁆𑀯𑀸𑀭𑁂 𑀲𑀺𑀤𑁆𑀥𑀸’’𑀢𑀺𑀆𑀤𑀺𑀫𑀸𑀳. 𑀢𑁂𑀦 𑀯𑀘𑀻𑀤𑁆𑀯𑀸𑀭𑀼𑀧𑁆𑀧𑀦𑁆𑀦𑀸𑀧𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀬𑁄 𑀲𑀗𑁆𑀕𑀳𑀺𑀢𑀸𑀢𑀺 𑀢𑁂𑀲𑀁 𑀲𑀗𑁆𑀕𑀳𑀺𑀢𑀪𑀸𑀯𑀁 𑀤𑀲𑁆𑀲𑁂𑀢𑀺. 𑀅𑀣 𑀯𑀸 𑀓𑀸𑀬𑀤𑁆𑀯𑀸𑀭𑀼𑀧𑁆𑀧𑀦𑁆𑀦𑀸𑀬 𑀓𑀸𑀬𑀓𑀫𑁆𑀫𑀪𑀽𑀢𑀸𑀬 𑀘𑁂𑀢𑀦𑀸𑀬 𑀯𑀲𑁂𑀦 ‘‘𑀢𑁂𑀦 𑀤𑁆𑀯𑀸𑀭𑁂𑀦 𑀯𑀺𑀜𑁆𑀜𑀸𑀢𑀩𑁆𑀩𑀪𑀸𑀯𑀢𑁄’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀲𑀸𑀬𑁂𑀯 𑀤𑁆𑀯𑀸𑀭𑀦𑁆𑀢𑀭𑀼𑀧𑁆𑀧𑀦𑁆𑀦𑀸𑀬 𑀯𑀲𑁂𑀦 ‘‘𑀢𑁂𑀦 𑀤𑁆𑀯𑀸𑀭𑁂𑀦 𑀦𑀸𑀫𑀮𑀸𑀪𑀢𑁄’’𑀢𑀺. 𑀫𑀦𑁄𑀤𑁆𑀯𑀸𑀭𑀸𑀯𑀚𑁆𑀚𑀦𑀲𑁆𑀲𑀧𑀺 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀪𑀸𑀯𑁄 𑀦𑀺𑀘𑁆𑀙𑀺𑀢𑁄𑀢𑀺 ‘‘𑀏𑀓𑀸𑀤𑀲𑀦𑁆𑀦𑀁 𑀓𑀺𑀭𑀺𑀬𑀘𑀺𑀢𑁆𑀢𑀸𑀦’’𑀦𑁆𑀢𑀺 𑀆𑀳.

𑀤𑁆𑀯𑀸𑀭𑀦𑁆𑀢𑀭𑀘𑀸𑀭𑀺𑀦𑁄𑀢𑀺 𑀤𑁆𑀯𑀸𑀭𑀦𑁆𑀢𑀭𑀪𑀸𑀯𑁂𑀦 𑀧𑀯𑀢𑁆𑀢𑀦𑀓𑀸. 𑀤𑁆𑀯𑀸𑀭𑀲𑀫𑁆𑀪𑁂𑀤𑀸𑀢𑀺 𑀤𑁆𑀯𑀸𑀭𑀸𑀦𑀁 𑀲𑀗𑁆𑀓𑀭𑀡𑀢𑁄. 𑀤𑁆𑀯𑀸𑀭𑀸𑀦𑀜𑁆𑀳𑀺 𑀤𑁆𑀯𑀸𑀭𑀦𑁆𑀢𑀭𑀪𑀸𑀯𑀧𑁆𑀧𑀢𑁆𑀢𑀺𑀬𑀸 𑀲𑀢𑀺 𑀓𑀸𑀬𑀤𑁆𑀯𑀸𑀭𑀲𑁆𑀲 𑀯𑀘𑀻𑀤𑁆𑀯𑀸𑀭𑀸𑀤𑀺𑀪𑀸𑀯𑁄, 𑀯𑀘𑀻𑀤𑁆𑀯𑀸𑀭𑀲𑁆𑀲 𑀘 𑀓𑀸𑀬𑀤𑁆𑀯𑀸𑀭𑀸𑀤𑀺𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺 𑀢𑀁𑀢𑀁𑀤𑁆𑀯𑀸𑀭𑀼𑀧𑁆𑀧𑀦𑁆𑀦𑀓𑀫𑁆𑀫𑀸𑀦𑀫𑁆𑀧𑀺 𑀲𑀗𑁆𑀓𑀭𑁄 𑀲𑀺𑀬𑀸. 𑀢𑁂𑀦𑀸𑀳 ‘‘𑀓𑀫𑁆𑀫𑀲𑀫𑁆𑀪𑁂𑀤𑁄𑀧𑀻’’𑀢𑀺. 𑀏𑀯𑀁 𑀲𑀢𑀺 𑀓𑀸𑀬𑀓𑀫𑁆𑀫𑀁…𑀧𑁂… 𑀯𑀯𑀢𑁆𑀣𑀸𑀦𑀁 𑀦 𑀲𑀺𑀬𑀸. 𑀬𑀤𑀺 𑀓𑀫𑁆𑀫𑀸𑀦𑀺 𑀓𑀫𑁆𑀫𑀦𑁆𑀢𑀭𑀘𑀸𑀭𑀻𑀦𑀺 𑀳𑁄𑀦𑁆𑀢𑀺, 𑀓𑀸𑀬𑀓𑀫𑁆𑀫𑀸𑀤𑀺𑀓𑀲𑁆𑀲 𑀯𑀘𑀻𑀓𑀫𑁆𑀫𑀸𑀤𑀺𑀓𑀪𑀸𑀯𑀸𑀧𑀢𑁆𑀢𑀺𑀢𑁄 ‘‘𑀓𑀫𑁆𑀫𑀲𑀫𑁆𑀪𑁂𑀤𑀸 𑀤𑁆𑀯𑀸𑀭𑀲𑀫𑁆𑀪𑁂𑀤𑁄𑀧𑀻’’𑀢𑀺 𑀓𑀸𑀬𑀓𑀫𑁆𑀫𑀁 𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀦𑁆𑀢𑀺 𑀅𑀜𑁆𑀜𑀫𑀜𑁆𑀜𑀯𑀯𑀢𑁆𑀣𑀸𑀦𑀁 𑀦 𑀲𑀺𑀬𑀸𑀢𑀺 𑀇𑀫𑀫𑀢𑁆𑀣𑀫𑀸𑀳 ‘‘𑀓𑀫𑁆𑀫𑀸𑀦𑀫𑁆𑀧𑀺 𑀓𑀫𑁆𑀫𑀦𑁆𑀢𑀭𑀘𑀭𑀡𑁂 𑀏𑀲𑁂𑀯 𑀦𑀬𑁄’’𑀢𑀺. 𑀓𑀫𑁆𑀫𑀦𑁆𑀢𑀭𑀘𑀭𑀡𑀁 𑀓𑀫𑁆𑀫𑀦𑁆𑀢𑀭𑀽𑀧𑀮𑀓𑁆𑀔𑀡𑀢𑀸. 𑀢𑁂𑀦𑁂𑀯𑀸𑀳 ‘‘𑀤𑁆𑀯𑀸𑀭𑀪𑀸𑀯𑁂𑀦𑀸’’𑀢𑀺. 𑀤𑁆𑀯𑀸𑀭𑀦𑁆𑀢𑀭𑀘𑀭𑀡𑀁 𑀤𑁆𑀯𑀸𑀭𑀦𑁆𑀢𑀭𑀼𑀧𑁆𑀧𑀢𑁆𑀢𑀺. 𑀤𑁆𑀯𑀸𑀭𑁂𑀢𑀺 𑀅𑀢𑁆𑀢𑀦𑁄 𑀤𑁆𑀯𑀸𑀭𑁂. 𑀅𑀜𑁆𑀜𑀲𑁆𑀫𑀺𑀦𑁆𑀢𑀺 𑀤𑁆𑀯𑀸𑀭𑀦𑁆𑀢𑀭𑁂. 𑀓𑀫𑁆𑀫𑀸𑀦𑀻𑀢𑀺 𑀢𑀁𑀢𑀁𑀤𑁆𑀯𑀸𑀭𑀺𑀓𑀓𑀫𑁆𑀫𑀸𑀦𑀺. 𑀅𑀜𑁆𑀜𑀸𑀦𑀻𑀢𑀺 𑀅𑀜𑁆𑀜𑀤𑁆𑀯𑀸𑀭𑀺𑀓𑀓𑀫𑁆𑀫𑀸𑀦𑀺. 𑀤𑁆𑀯𑀸𑀭𑁂 𑀤𑁆𑀯𑀸𑀭𑀸𑀦𑀺 𑀦 𑀘𑀭𑀦𑁆𑀢𑀻𑀢𑀺 𑀤𑁆𑀯𑀸𑀭𑀦𑁆𑀢𑀭𑀪𑀸𑀯𑁂𑀦 𑀦𑀧𑁆𑀧𑀯𑀢𑁆𑀢𑀦𑁆𑀢𑀺, 𑀤𑁆𑀯𑀸𑀭𑀦𑁆𑀢𑀭𑀁 𑀯𑀸 𑀦 𑀲𑀗𑁆𑀓𑀫𑀦𑁆𑀢𑀺. 𑀓𑀺𑀜𑁆𑀘𑀸𑀧𑀺 𑀯𑀺𑀜𑁆𑀜𑀢𑁆𑀢𑀺𑀬𑀸 𑀘𑀢𑀼𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑁂𑀲𑀼 𑀬𑁂𑀦 𑀓𑁂𑀦𑀘𑀺 𑀧𑀘𑁆𑀘𑀬𑁂𑀦 𑀘𑁂𑀢𑀦𑀸𑀬 𑀧𑀘𑁆𑀘𑀬𑀪𑀸𑀯𑁄 𑀦𑀢𑁆𑀣𑀺, 𑀢𑀣𑀸 𑀧𑀦 𑀯𑀺𑀜𑁆𑀜𑀢𑁆𑀢𑀺𑀬𑀸 𑀧𑀯𑀢𑁆𑀢𑀫𑀸𑀦𑀸𑀬 𑀏𑀯 𑀧𑀸𑀡𑀸𑀢𑀺𑀧𑀸𑀢𑀸𑀤𑀺 𑀳𑁄𑀢𑀺, 𑀦𑀸𑀜𑁆𑀜𑀣𑀸𑀢𑀺 𑀲𑀺𑀬𑀸 𑀯𑀺𑀜𑁆𑀜𑀢𑁆𑀢𑀺𑀬𑀸 𑀳𑁂𑀢𑀼𑀪𑀸𑀯𑁄 𑀘𑁂𑀢𑀦𑀸𑀬𑀸𑀢𑀺 𑀯𑀼𑀢𑁆𑀢𑀁 ‘‘𑀤𑁆𑀯𑀸𑀭𑁂𑀳𑀺 𑀓𑀸𑀭𑀡𑀪𑀽𑀢𑁂𑀳𑀻’’𑀢𑀺. 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀦𑁆𑀢𑀺 𑀓𑀫𑁆𑀫𑀯𑀯𑀢𑁆𑀣𑀸𑀦𑀲𑁆𑀲𑁂𑀯 𑀯𑀸 𑀓𑀸𑀭𑀡𑀪𑀸𑀯𑀁 𑀲𑀦𑁆𑀥𑀸𑀬 ‘‘𑀤𑁆𑀯𑀸𑀭𑁂𑀳𑀺 𑀓𑀸𑀭𑀡𑀪𑀽𑀢𑁂𑀳𑀻’’𑀢𑀺 𑀯𑀼𑀢𑁆𑀢𑀁. 𑀬𑀤𑀺𑀧𑀺 ‘‘𑀤𑁆𑀯𑀸𑀭𑁂𑀳𑀺 𑀓𑀫𑁆𑀫𑀸𑀦𑀻’’𑀢𑀺 𑀯𑀼𑀢𑁆𑀢𑀁, ‘‘𑀅𑀜𑁆𑀜𑀫𑀜𑁆𑀜𑀁 𑀯𑀯𑀢𑁆𑀣𑀺𑀢𑀸’’𑀢𑀺 𑀧𑀦 𑀯𑀼𑀢𑁆𑀢𑀢𑁆𑀢𑀸 𑀓𑀫𑁆𑀫𑁂𑀳𑀺𑀧𑀺 𑀤𑁆𑀯𑀸𑀭𑀸𑀦𑀺 𑀯𑀯𑀢𑁆𑀣𑀺𑀢𑀸𑀦𑀻𑀢𑀺 𑀅𑀬𑀫𑀢𑁆𑀣𑁄𑀧𑀺 𑀲𑀺𑀤𑁆𑀥𑁄𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀦 𑀓𑁂𑀯𑀮’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀤𑁆𑀯𑀸𑀭𑀘𑀸𑀭𑀻𑀳𑀻𑀢𑀺 𑀤𑁆𑀯𑀸𑀭𑀸𑀦𑀁 𑀲𑀬𑀁 𑀯𑀯𑀢𑁆𑀣𑀺𑀢𑀪𑀸𑀯𑀫𑀸𑀳, 𑀦 𑀧𑀦 𑀅𑀯𑀯𑀢𑁆𑀣𑀸𑀦𑀁, 𑀯𑀯𑀢𑁆𑀣𑀸𑀦𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀸𑀦𑀺 𑀢𑀁 𑀯𑀯𑀢𑁆𑀣𑀸𑀦𑀁 𑀯𑀺𑀪𑀸𑀯𑁂𑀢𑀺 𑀓𑀫𑁆𑀫𑀸𑀦𑀧𑁂𑀓𑁆𑀔𑀸𑀢𑀺𑀆𑀤𑀺𑀦𑀸. 𑀢𑀢𑁆𑀣 𑀲𑀫𑀬𑀦𑀺𑀬𑀫𑀺𑀢𑁂𑀦 𑀘𑀺𑀢𑁆𑀢𑁂𑀦 𑀲𑀫𑀬𑁄 𑀯𑀺𑀬 𑀤𑁆𑀯𑀸𑀭𑀦𑀺𑀬𑀫𑀺𑀢𑁂𑀳𑀺 𑀓𑀫𑁆𑀫𑁂𑀳𑀺 𑀤𑁆𑀯𑀸𑀭𑀸𑀦𑀺 𑀦𑀺𑀬𑀫𑀺𑀢𑀸𑀦𑀻𑀢𑀺 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄.

𑀏𑀯𑀁𑀲𑀪𑀸𑀯𑀢𑁆𑀢𑀸𑀢𑀺 𑀤𑁆𑀯𑀸𑀭𑀪𑀽𑀢𑁂𑀳𑀺 𑀓𑀸𑀬𑀸𑀤𑀻𑀳𑀺 𑀉𑀧𑀮𑀓𑁆𑀔𑀡𑀻𑀬𑀲𑀪𑀸𑀯𑀢𑁆𑀢𑀸. 𑀆𑀡𑀢𑁆𑀢𑀺…𑀧𑁂… 𑀫𑀸𑀦𑀲𑁆𑀲𑀸𑀢𑀺 𑀓𑀸𑀬𑀯𑀘𑀻𑀓𑀫𑁆𑀫𑀸𑀦𑀁 𑀯𑀘𑀻𑀓𑀸𑀬𑀯𑀺𑀜𑁆𑀜𑀢𑁆𑀢𑀻𑀳𑀺 𑀧𑀓𑀸𑀲𑁂𑀢𑀩𑁆𑀩𑀢𑀁 𑀆𑀳. 𑀓𑀸𑀬𑀸𑀤𑀻𑀳𑀻𑀢𑀺 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀻𑀳𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀤𑁆𑀯𑀸𑀭𑀦𑁆𑀢𑀭𑁂 𑀘𑀭𑀦𑁆𑀢𑀸𑀦𑀺𑀧𑀺 𑀓𑀫𑁆𑀫𑀸𑀦𑀺 𑀲𑀓𑁂𑀦 𑀤𑁆𑀯𑀸𑀭𑁂𑀦 𑀉𑀧𑀮𑀓𑁆𑀔𑀺𑀢𑀸𑀦𑁂𑀯 𑀘𑀭𑀦𑁆𑀢𑀺, 𑀢𑀲𑁆𑀫𑀸. 𑀦𑀸𑀧𑀺 𑀓𑀫𑁆𑀫𑀁 𑀤𑁆𑀯𑀸𑀭𑀲𑁆𑀲𑀸𑀢𑀺 𑀬𑀲𑁆𑀫𑀺𑀁 𑀤𑁆𑀯𑀸𑀭𑀦𑁆𑀢𑀭𑁂 𑀓𑀫𑁆𑀫𑀁 𑀘𑀭𑀢𑀺, 𑀢𑀲𑁆𑀲 𑀤𑁆𑀯𑀸𑀭𑀲𑁆𑀲 𑀅𑀦𑀢𑁆𑀢𑀦𑀺𑀬𑀲𑁆𑀲. 𑀢𑀁𑀢𑀁𑀤𑁆𑀯𑀸𑀭𑀫𑁂𑀯𑀸𑀢𑀺 𑀲𑀓𑀤𑁆𑀯𑀸𑀭𑀫𑁂𑀯. 𑀓𑀫𑁆𑀫𑀲𑁆𑀲𑀸𑀢𑀺 𑀲𑀓𑀲𑀓𑀓𑀫𑁆𑀫𑀲𑁆𑀲. 𑀬𑀤𑀺 𑀓𑀫𑁆𑀫𑁂𑀳𑀺 𑀤𑁆𑀯𑀸𑀭𑀸𑀦𑀺 𑀯𑀯𑀢𑁆𑀣𑀺𑀢𑀸𑀦𑀺, ‘‘𑀓𑀫𑁆𑀫𑀲𑁆𑀲 𑀅𑀦𑀺𑀩𑀤𑁆𑀥𑀢𑁆𑀢𑀸’’𑀢𑀺 𑀇𑀤𑀁 𑀓𑀣𑀁 𑀦𑀻𑀬𑀢𑀻𑀢𑀺 𑀆𑀳 ‘‘𑀧𑀼𑀩𑁆𑀩𑁂 𑀧𑀦𑀸’’𑀢𑀺𑀆𑀤𑀺.

𑀲𑀸𑀢𑀺 𑀯𑀺𑀜𑁆𑀜𑀢𑁆𑀢𑀺. 𑀢𑀲𑁆𑀲𑀸𑀢𑀺 𑀓𑀫𑁆𑀫𑀲𑁆𑀲. 𑀓𑁂𑀦𑀘𑀺 𑀧𑀓𑀸𑀭𑁂𑀦𑀸𑀢𑀺 𑀘𑀢𑀼𑀯𑀻𑀲𑀢𑀺𑀬𑀸 𑀧𑀘𑁆𑀘𑀬𑀧𑁆𑀧𑀓𑀸𑀭𑁂𑀲𑀼 𑀓𑁂𑀦𑀘𑀺 𑀧𑀓𑀸𑀭𑁂𑀦. 𑀢𑀁𑀲𑀳𑀚𑀸𑀢𑀸𑀢𑀺 𑀏𑀢𑁂𑀦 𑀓𑀸𑀬𑀯𑀺𑀜𑁆𑀜𑀢𑁆𑀢𑀺𑀬𑀸 𑀲𑀩𑁆𑀪𑀸𑀯𑁂𑀬𑁂𑀯 𑀓𑀸𑀬𑀓𑀫𑁆𑀫𑀲𑁆𑀲 𑀲𑀩𑁆𑀪𑀸𑀯𑁄, 𑀦𑀸𑀜𑁆𑀜𑀣𑀸𑀢𑀺 𑀧𑀭𑀺𑀬𑀸𑀬𑁂𑀦 𑀯𑀺𑀜𑁆𑀜𑀢𑁆𑀢𑀺𑀬𑀸 𑀓𑀫𑁆𑀫𑀲𑁆𑀲 𑀓𑀸𑀭𑀡𑀪𑀸𑀯𑀁 𑀯𑀺𑀪𑀸𑀯𑁂𑀢𑀺. 𑀢𑁂𑀦𑁂𑀯𑀸𑀳 ‘‘𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑁂𑀦 𑀯𑀼𑀢𑁆𑀢𑀸’’𑀢𑀺. 𑀬𑀣𑀸𑀯𑀼𑀢𑁆𑀢𑀦𑀺𑀬𑀫𑁂𑀦𑀸𑀢𑀺𑀆𑀤𑀺𑀦𑀸 𑀓𑀫𑁆𑀫𑀲𑁆𑀲 𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀪𑀸𑀯𑁂 𑀩𑁆𑀬𑀪𑀺𑀘𑀸𑀭𑀸𑀪𑀸𑀯𑀫𑀸𑀳. 𑀢𑀢𑁆𑀣 𑀬𑀣𑀸𑀯𑀼𑀢𑁆𑀢𑀦𑀺𑀬𑀫𑁂𑀦𑀸𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀯𑀯𑀢𑁆𑀣𑀸𑀦𑀬𑀼𑀢𑁆𑀢𑀺𑀲𑀗𑁆𑀔𑀸𑀢𑁂𑀦 𑀦𑀺𑀬𑀫𑁂𑀦. 𑀤𑁆𑀯𑀸𑀭𑀘𑀭𑀡𑁂𑀢𑀺 𑀅𑀜𑁆𑀜𑀤𑁆𑀯𑀸𑀭𑀘𑀭𑀡𑁂.

𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀘𑀻𑀓𑀫𑁆𑀫𑀤𑁆𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑀘𑀢𑀽𑀳𑀺 𑀅𑀗𑁆𑀕𑁂𑀳𑀻𑀢𑀺 𑀏𑀢𑁆𑀣 ‘‘𑀲𑀼𑀪𑀸𑀲𑀺𑀢𑀁𑀬𑁂𑀯 𑀪𑀸𑀲𑀢𑀺, 𑀦𑁄 𑀤𑀼𑀩𑁆𑀪𑀸𑀲𑀺𑀢𑀁. 𑀥𑀫𑁆𑀫𑀁𑀬𑁂𑀯, 𑀧𑀺𑀬𑀁𑀬𑁂𑀯, 𑀲𑀘𑁆𑀘𑀁𑀬𑁂𑀯 𑀪𑀸𑀲𑀢𑀺, 𑀦𑁄 𑀅𑀮𑀺𑀓’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁧𑁩; 𑀲𑀼. 𑀦𑀺. 𑀲𑀼𑀪𑀸𑀲𑀺𑀢𑀲𑀼𑀢𑁆𑀢) 𑀬𑀸𑀦𑀺 𑀅𑀗𑁆𑀕𑀸𑀦𑀺 𑀲𑀼𑀢𑁆𑀢𑁂 𑀯𑀼𑀢𑁆𑀢𑀸𑀦𑀺, 𑀢𑁂𑀲𑀁 𑀘𑁂𑀢𑀦𑀸𑀲𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀪𑀸𑀲𑀺𑀢𑀪𑀸𑀲𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀣𑀸𑀧𑀯𑀢𑁆𑀢𑀸𑀢𑀺 𑀲𑀼𑀪𑀸𑀲𑀺𑀢𑀪𑀸𑀲𑀦𑀸𑀤𑀺𑀪𑀸𑀯𑁂𑀦 𑀧𑀯𑀢𑁆𑀢𑀸. 𑀲𑀳 𑀲𑀫𑁆𑀪𑀽𑀢𑀢𑁆𑀢𑀸𑀢𑀺 𑀲𑀳𑁂𑀯 𑀉𑀧𑁆𑀧𑀦𑁆𑀦𑀢𑁆𑀢𑀸. 𑀦 𑀳𑀺 𑀯𑀘𑀻𑀯𑀺𑀜𑁆𑀜𑀢𑁆𑀢𑀺 𑀲𑀤𑁆𑀤𑀭𑀳𑀺𑀢𑀸 𑀅𑀢𑁆𑀣𑀺. 𑀢𑀣𑀸 𑀳𑀺 ‘‘𑀬𑀸 𑀢𑀸𑀬 𑀯𑀸𑀘𑀸𑀬 𑀯𑀺𑀜𑁆𑀜𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀯𑀸𑀘𑀸𑀕𑀺𑀭𑀸 𑀩𑁆𑀬𑀧𑀣𑁄’’𑀢𑀺𑀆𑀤𑀺𑀦𑀸 (𑀥. 𑀲. 𑁬𑁩𑁬) 𑀦𑀸𑀢𑀺𑀲𑀼𑀔𑀼𑀫𑀁𑀬𑁂𑀯 𑀲𑀤𑁆𑀤𑀯𑀸𑀘𑀁 𑀯𑀢𑁆𑀯𑀸 ‘‘𑀬𑀸 𑀢𑀸𑀬 𑀯𑀸𑀘𑀸𑀬 𑀯𑀺𑀜𑁆𑀜𑀢𑁆𑀢𑀻’’𑀢𑀺, 𑀢𑀸𑀬 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀬𑀸 𑀯𑀼𑀢𑁆𑀢𑀢𑁆𑀢𑀸 𑀭𑀽𑀧𑀸𑀬𑀢𑀦𑀁 𑀯𑀺𑀬 𑀯𑀢𑁆𑀣𑀼𑀧𑀭𑀺𑀢𑁆𑀢𑀢𑀸𑀤𑀺𑀦𑀸 𑀲𑀤𑁆𑀤𑀸𑀬𑀢𑀦𑀫𑁆𑀧𑀺 𑀅𑀦𑀺𑀦𑁆𑀤𑁆𑀭𑀺𑀬𑀕𑁄𑀘𑀭𑁄 𑀅𑀢𑁆𑀣𑀻𑀢𑀺 𑀘 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀬𑀸 𑀢𑀸𑀬…𑀧𑁂… 𑀯𑀺𑀜𑁆𑀜𑀸𑀬𑀢𑀻’’𑀢𑀺 𑀆𑀳.

𑀇𑀤𑀸𑀦𑀺 𑀅𑀯𑀺𑀲𑁂𑀲𑁂𑀦 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀲𑀤𑁆𑀤𑀲𑁆𑀲 𑀲𑁄𑀢𑀯𑀺𑀜𑁆𑀜𑀸𑀡𑀸𑀭𑀫𑁆𑀫𑀡𑀢𑀸 𑀧𑀸𑀴𑀺𑀬𑀁 𑀯𑀼𑀢𑁆𑀢𑀸𑀢𑀺 𑀯𑀺𑀢𑀓𑁆𑀓𑀯𑀺𑀧𑁆𑀨𑀸𑀭𑀲𑀤𑁆𑀤𑁄 𑀦 𑀲𑁄𑀢𑀯𑀺𑀜𑁆𑀜𑁂𑀬𑁆𑀬𑁄𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀯𑀸𑀤𑀲𑁆𑀲 𑀧𑀸𑀴𑀺𑀬𑀸 𑀯𑀺𑀭𑁄𑀥𑀁 𑀤𑀲𑁆𑀲𑁂𑀢𑀼𑀁 ‘‘𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑀗𑁆𑀕𑀳𑀓𑀸𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑁂 𑀞𑀢𑁆𑀯𑀸 𑀫𑀳𑀸𑀅𑀝𑁆𑀞𑀓𑀣𑀸𑀯𑀸𑀤𑀲𑁆𑀲 𑀧𑀝𑀺𑀲𑁂𑀥𑁂𑀢𑀩𑁆𑀩𑀢𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀅𑀥𑀺𑀧𑁆𑀧𑀸𑀬𑁂 𑀞𑀢𑁆𑀯𑀸 𑀢𑀁 𑀧𑀭𑀺𑀳𑀭𑀺𑀢𑀼𑀁 ‘‘𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀲𑀗𑁆𑀖𑀝𑁆𑀝𑀦𑀸𑀓𑀸𑀭𑁂𑀦 𑀧𑀯𑀢𑁆𑀢𑀸𑀦𑀁 𑀪𑀽𑀢𑀸𑀦𑀁 𑀲𑀤𑁆𑀤𑀲𑁆𑀲 𑀦𑀺𑀲𑁆𑀲𑀬𑀪𑀸𑀯𑀢𑁄 𑀲𑀗𑁆𑀖𑀝𑁆𑀝𑀦𑁂𑀦 𑀲𑀳𑁂𑀯 𑀲𑀤𑁆𑀤𑁄 𑀉𑀧𑁆𑀧𑀚𑁆𑀚𑀢𑀺. 𑀢𑀧𑁆𑀧𑀘𑁆𑀘𑀬𑀪𑀸𑀯𑁄𑀢𑀺 𑀉𑀧𑀸𑀤𑀺𑀦𑁆𑀦𑀓𑀖𑀝𑁆𑀝𑀦𑀲𑁆𑀲 𑀧𑀘𑁆𑀘𑀬𑀪𑀸𑀯𑁄. 𑀘𑀺𑀢𑁆𑀢𑀚𑀧𑀣𑀯𑀻𑀥𑀸𑀢𑀼𑀬𑀸 𑀉𑀧𑀸𑀤𑀺𑀦𑁆𑀦𑀓𑀖𑀝𑁆𑀝𑀦𑁂 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀲𑀫𑀢𑁆𑀣𑁄 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀫𑀳𑀸𑀪𑀽𑀢𑀸𑀦𑀁 𑀏𑀓𑁄 𑀆𑀓𑀸𑀭𑀯𑀺𑀲𑁂𑀲𑁄 𑀅𑀢𑁆𑀣𑀺. 𑀢𑀤𑀸𑀓𑀸𑀭𑀢𑁆𑀢𑀸 𑀳𑀺 𑀢𑁂𑀲𑀁 𑀧𑀣𑀯𑀻𑀥𑀸𑀢𑀼 𑀉𑀧𑀸𑀤𑀺𑀦𑁆𑀦𑀓𑀁 𑀖𑀝𑁆𑀝𑁂𑀢𑀻𑀢𑀺 𑀇𑀫𑀫𑀢𑁆𑀣𑀁 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀯𑁂𑀤𑀺𑀢𑀩𑁆𑀩𑀢𑁆𑀢𑀸 ‘‘𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀯𑀢𑁆𑀯𑀸 𑀢𑀫𑁂𑀯 𑀯𑀼𑀢𑁆𑀢𑀦𑀬𑀁 ‘‘𑀢𑀩𑁆𑀩𑀺𑀓𑀸𑀭𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀯𑀺𑀪𑀸𑀯𑁂𑀢𑀺. 𑀢𑀢𑁆𑀣 𑀅𑀜𑁆𑀜𑀫𑀜𑁆𑀜𑀲𑁆𑀲 𑀧𑀘𑁆𑀘𑀬𑀪𑀸𑀯𑁄 𑀢𑀧𑁆𑀧𑀘𑁆𑀘𑀬𑀪𑀸𑀯𑁄 𑀯𑀼𑀢𑁆𑀢𑁄𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀫𑁆𑀧𑀺 𑀲𑀩𑁆𑀩𑀁 𑀯𑀺𑀥𑀸𑀦𑀦𑁆𑀢𑀺 ‘‘𑀦 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀢𑀺 𑀏𑀢𑁂𑀦 𑀧𑀭𑀫𑀢𑁆𑀣𑀢𑁄 𑀅𑀪𑀸𑀯𑀁 𑀤𑀲𑁆𑀲𑁂𑀢𑀻’’𑀢𑀺𑀆𑀤𑀺𑀦𑀸 𑀅𑀢𑁆𑀢𑀦𑀸 𑀯𑀼𑀢𑁆𑀢𑀯𑀺𑀥𑀸𑀦𑀁. 𑀅𑀝𑁆𑀞𑀓𑀣𑀸𑀬𑀁 𑀧𑀦 𑀯𑀼𑀢𑁆𑀢𑀯𑀺𑀥𑀸𑀦𑀁 ‘‘𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀫𑁂𑀯𑀸𑀢𑀺.

𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀧𑀘𑁆𑀘𑀬𑀼𑀧𑁆𑀧𑀦𑁆𑀦𑀲𑁆𑀲 𑀤𑁂𑀲𑀦𑁆𑀢𑀭𑁂 𑀧𑀸𑀭𑀫𑁆𑀧𑀭𑀺𑀬𑁂𑀦 𑀉𑀧𑁆𑀧𑀸𑀤𑀦𑀁 𑀤𑁂𑀲𑀦𑁆𑀢𑀭𑀼𑀧𑁆𑀧𑀸𑀤𑀦𑀧𑀭𑀫𑁆𑀧𑀭𑀢𑀸. 𑀮𑀤𑁆𑀥𑀸𑀲𑁂𑀯𑀦𑁂𑀦𑀸𑀢𑀺 𑀮𑀤𑁆𑀥𑀧𑀼𑀩𑁆𑀩𑀸𑀪𑀺𑀲𑀗𑁆𑀔𑀸𑀭𑁂𑀦. 𑀘𑀺𑀢𑁆𑀢𑁂𑀦𑁂𑀯𑀸𑀢𑀺 𑀧𑀞𑀫𑀘𑀺𑀢𑁆𑀢𑁂𑀦𑁂𑀯. ‘‘𑀲𑀢𑁆𑀢 𑀚𑀯𑀦𑀸𑀦𑀺 𑀲𑀢𑁆𑀢 𑀅𑀓𑁆𑀔𑀭𑀸𑀦𑀺 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀻𑀢𑀺 𑀯𑀸𑀤𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀏𑀓𑀚𑀯𑀦𑀯𑀸𑀭𑀧𑀭𑀺𑀬𑀸𑀧𑀦𑁆𑀦𑀸𑀦𑀺 𑀘𑀺𑀢𑁆𑀢𑀸𑀦𑀺 𑀏𑀓𑀫𑀓𑁆𑀔𑀭𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀓𑀺𑀜𑁆𑀘𑀸𑀧𑀺 𑀧𑀞𑀫𑀘𑀺𑀢𑁆𑀢𑁂𑀦𑀧𑀺 𑀖𑀝𑁆𑀝𑀦𑀸 𑀦𑀺𑀧𑁆𑀨𑀚𑁆𑀚𑀢𑀺, 𑀏𑀓𑀲𑁆𑀲𑁂𑀯 𑀧𑀦 𑀩𑀳𑀼𑀲𑁄 𑀧𑀯𑀢𑁆𑀢𑀦𑁂𑀦 𑀅𑀢𑁆𑀣𑀺 𑀓𑁄𑀘𑀺 𑀯𑀺𑀲𑁂𑀲𑁄𑀢𑀺 𑀧𑀼𑀭𑀺𑀫𑀚𑀯𑀦𑀲𑀫𑀼𑀝𑁆𑀞𑀺𑀢𑀸𑀳𑀺 𑀖𑀝𑁆𑀝𑀦𑀸𑀳𑀺 𑀧𑀝𑀺𑀮𑀤𑁆𑀥𑀸𑀲𑁂𑀯𑀦𑁂𑀦 𑀲𑀢𑁆𑀢𑀫𑀚𑀯𑀦𑁂𑀦 𑀲𑀫𑀼𑀝𑁆𑀞𑀺𑀢𑀸 𑀖𑀝𑁆𑀝𑀦𑀸 𑀧𑀭𑀺𑀩𑁆𑀬𑀢𑁆𑀢𑀫𑀓𑁆𑀔𑀭𑀁 𑀦𑀺𑀩𑁆𑀩𑀢𑁆𑀢𑁂𑀢𑀻𑀢𑀺 𑀉𑀧𑀢𑁆𑀣𑀫𑁆𑀪𑀦𑀁 𑀦𑀢𑁆𑀣𑀻𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀮𑀤𑁆𑀥𑀸𑀪𑀺𑀲𑀗𑁆𑀔𑀸𑀭𑁂𑀦 𑀧𑀦 𑀧𑀞𑀫𑀘𑀺𑀢𑁆𑀢𑁂𑀦𑀧𑀺 𑀖𑀝𑁆𑀝𑀦𑀸 𑀩𑀮𑀯𑀢𑀻 𑀳𑁄𑀢𑀻𑀢𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀉𑀧𑀢𑁆𑀣𑀫𑁆𑀪𑀦𑀓𑀺𑀘𑁆𑀘𑀁 𑀦𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀁 𑀲𑀺𑀬𑀸, 𑀲𑀩𑁆𑀩𑀫𑁂𑀢𑀁 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀯𑀘𑀻𑀓𑀫𑁆𑀫𑀤𑁆𑀯𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀦𑁄𑀓𑀫𑁆𑀫𑀤𑁆𑀯𑀸𑀭𑀓𑀣𑀸𑀯𑀡𑁆𑀡𑀦𑀸

‘‘𑀲𑀩𑁆𑀩𑀸𑀬𑀧𑀺 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀬𑀸 𑀓𑀸𑀬𑀯𑀘𑀻𑀤𑁆𑀯𑀸𑀭𑀪𑀸𑀯𑁄 𑀯𑀺𑀬 𑀲𑀩𑁆𑀩𑀲𑁆𑀲𑀧𑀺 𑀘𑀺𑀢𑁆𑀢𑀲𑁆𑀲 𑀫𑀦𑁄𑀤𑁆𑀯𑀸𑀭𑀪𑀸𑀯𑁄 𑀲𑀫𑁆𑀪𑀯𑀢𑀻’’𑀢𑀺 𑀤𑀲𑁆𑀲𑀦𑀢𑁆𑀣𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀬𑀁 𑀦𑀸𑀫 𑀫𑀦𑁄 𑀫𑀦𑁄𑀤𑁆𑀯𑀸𑀭𑀁 𑀦 𑀳𑁄𑀢𑀻𑀢𑀺 𑀦 𑀯𑀢𑁆𑀢𑀩𑁆𑀩𑁄’’𑀢𑀺 𑀯𑀢𑁆𑀯𑀸 𑀢𑀁𑀤𑁆𑀯𑀸𑀭𑀯𑀦𑁆𑀢𑀥𑀫𑁆𑀫𑀤𑀲𑁆𑀲𑀦𑀢𑁆𑀣𑀁 ‘‘𑀅𑀬𑀁 𑀦𑀸𑀫 𑀘𑁂𑀢𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀆𑀳 ‘‘𑀬𑀲𑁆𑀲 𑀤𑁆𑀯𑀸𑀭𑀁 𑀫𑀦𑁄, 𑀢𑀁 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢’’𑀦𑁆𑀢𑀺. 𑀬𑀣𑀸 𑀧𑀦 𑀢𑀺𑀯𑀺𑀥𑀘𑀢𑀼𑀩𑁆𑀩𑀺𑀥𑀓𑀸𑀬𑀯𑀘𑀻𑀓𑀫𑁆𑀫𑀸𑀦𑀁 𑀤𑁆𑀯𑀸𑀭𑀪𑀸𑀯𑀢𑁄 𑀓𑀸𑀬𑀓𑀫𑁆𑀫𑀤𑁆𑀯𑀸𑀭𑀯𑀘𑀻𑀓𑀫𑁆𑀫𑀤𑁆𑀯𑀸𑀭𑀸𑀦𑀺 𑀯𑀼𑀢𑁆𑀢𑀸𑀦𑀺, 𑀏𑀯𑀁 𑀫𑀦𑁄𑀓𑀫𑁆𑀫𑀦𑁆𑀢𑀺 𑀯𑀼𑀢𑁆𑀢𑀅𑀪𑀺𑀚𑁆𑀛𑀸𑀤𑀻𑀦𑀁 𑀤𑁆𑀯𑀸𑀭𑀪𑀸𑀯𑀢𑁄 𑀯𑀝𑁆𑀝𑀳𑁂𑀢𑀼𑀪𑀽𑀢𑀮𑁄𑀓𑀺𑀬𑀓𑀼𑀲𑀮𑀸𑀓𑀼𑀲𑀮𑀲𑀫𑁆𑀧𑀬𑀼𑀢𑁆𑀢𑀫𑀦𑁄 𑀏𑀯 𑀫𑀦𑁄𑀓𑀫𑁆𑀫𑀤𑁆𑀯𑀸𑀭𑀦𑁆𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀘𑁂𑀢𑀦𑀸𑀬 𑀅𑀢𑁆𑀢𑀦𑁄 𑀓𑀺𑀘𑁆𑀘𑀁 𑀆𑀭𑀤𑁆𑀥𑀸𑀬 𑀲𑀫𑁆𑀧𑀬𑀼𑀢𑁆𑀢𑀸𑀧𑀺 𑀢𑀁 𑀢𑀁 𑀲𑀓𑀺𑀘𑁆𑀘𑀁 𑀆𑀭𑀪𑀦𑁆𑀢𑀻𑀢𑀺 𑀲𑀸 𑀦𑁂 𑀲𑀓𑀺𑀘𑁆𑀘𑁂 𑀧𑀯𑀢𑁆𑀢𑁂𑀢𑀺 𑀦𑀸𑀫, 𑀢𑀣𑀸 𑀧𑀯𑀢𑁆𑀢𑁂𑀦𑁆𑀢𑀻 𑀘 𑀲𑀫𑁆𑀧𑀬𑀼𑀢𑁆𑀢𑁂 𑀏𑀓𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀅𑀯𑀺𑀧𑁆𑀧𑀓𑀺𑀡𑁆𑀡𑁂 𑀓𑀭𑁄𑀢𑀺 𑀩𑁆𑀬𑀸𑀧𑀸𑀭𑁂𑀢𑀺 𑀘𑀸𑀢𑀺 𑀯𑀼𑀘𑁆𑀘𑀢𑀺, 𑀢𑀣𑀸 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀬𑀣𑀸𑀯𑀼𑀢𑁆𑀢𑀁 𑀅𑀯𑀺𑀧𑁆𑀧𑀓𑀺𑀡𑁆𑀡𑀓𑀭𑀡𑀁 𑀲𑀫𑁆𑀧𑀺𑀡𑁆𑀟𑀦𑀁 𑀆𑀬𑀽𑀳𑀦𑀁 𑀩𑁆𑀬𑀸𑀧𑀸𑀭𑀸𑀧𑀸𑀤𑀦𑀁 𑀩𑁆𑀬𑀸𑀧𑀸𑀭𑀡𑀁 𑀘𑁂𑀢𑀬𑀦𑀦𑁆𑀢𑀺 𑀆𑀬𑀽𑀳𑀦𑀘𑁂𑀢𑀬𑀦𑀸𑀦𑀁 𑀦𑀸𑀦𑀢𑁆𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀨𑀲𑁆𑀲𑀸𑀤𑀺𑀥𑀫𑁆𑀫𑁂𑀳𑀻’’𑀢𑀺𑀆𑀤𑀺𑀫𑀸𑀳. 𑀢𑀣𑀸𑀓𑀭𑀡𑀦𑁆𑀢𑀺 𑀬𑀣𑀸 𑀨𑀲𑁆𑀲𑀸𑀤𑀬𑁄 𑀲𑀓𑀲𑀓𑀓𑀺𑀘𑁆𑀘𑁂 𑀧𑀲𑀼𑀢𑀸 𑀪𑀯𑀦𑁆𑀢𑀺, 𑀢𑀣𑀸 𑀓𑀭𑀡𑀁. 𑀢𑁂𑀦𑁂𑀯 𑀬𑀣𑀸𑀯𑀼𑀢𑁆𑀢𑁂𑀦 𑀅𑀯𑀺𑀧𑁆𑀧𑀓𑀺𑀡𑁆𑀡𑀩𑁆𑀬𑀸𑀧𑀸𑀭𑀡𑀸𑀓𑀸𑀭𑁂𑀦 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀓𑀭𑀡𑀁 𑀧𑀯𑀢𑁆𑀢𑀦𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀓𑀫𑁆𑀫𑀓𑁆𑀔𑀬𑀓𑀭𑀢𑁆𑀢𑀸𑀢𑀺 𑀓𑀫𑁆𑀫𑀓𑁆𑀔𑀬𑀓𑀭𑀫𑀦𑀲𑁆𑀲 𑀓𑀫𑁆𑀫𑀤𑁆𑀯𑀸𑀭𑀪𑀸𑀯𑁄 𑀦 𑀬𑀼𑀚𑁆𑀚𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀢𑁄 ‘‘𑀓𑀫𑁆𑀫𑀧𑀣𑀓𑀣𑀸 𑀮𑁄𑀓𑀺𑀬𑀸 𑀏𑀯𑀸’’𑀢𑀺 𑀯𑀤𑀦𑁆𑀢𑀺.

𑀫𑀦𑁄𑀓𑀫𑁆𑀫𑀤𑁆𑀯𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀫𑁆𑀫𑀓𑀣𑀸𑀯𑀡𑁆𑀡𑀦𑀸

𑀲𑀫𑀸𑀦𑀓𑀸𑀮𑀸𑀧𑀺 𑀓𑀸𑀭𑀡𑀨𑀮𑀓𑀺𑀭𑀺𑀬𑀸 𑀧𑀼𑀩𑁆𑀩𑀸𑀧𑀭𑀓𑀸𑀮𑀸 𑀯𑀺𑀬 𑀯𑀢𑁆𑀢𑀼𑀁 𑀬𑀼𑀢𑁆𑀢𑀸𑀬𑁂𑀯. 𑀲𑁂𑀬𑁆𑀬𑀣𑀸𑀧𑀺 𑀧𑀝𑀺𑀘𑁆𑀘𑀲𑀫𑀼𑀧𑁆𑀧𑀸𑀤𑁂 ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀺 𑀘𑀓𑁆𑀔𑀼𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀯𑀸’’𑀢𑀺𑀆𑀤𑀺𑀫𑀸𑀳. 𑀘𑁄𑀧𑀦𑀓𑀺𑀭𑀺𑀬𑀦𑁆𑀢𑀺 𑀯𑀺𑀜𑁆𑀜𑀢𑁆𑀢𑀺𑀤𑁆𑀯𑀬𑀁 𑀆𑀳. 𑀢𑀲𑁆𑀲𑀸 𑀳𑀺 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀓𑀸𑀬𑀲𑀤𑁆𑀤𑀯𑀸𑀘𑀸𑀳𑀺 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀻𑀳𑀺 𑀏𑀯 𑀯𑀸 𑀧𑀼𑀭𑀺𑀫𑀧𑀼𑀭𑀺𑀫𑀸𑀳𑀺 𑀧𑀯𑀢𑁆𑀢𑁂𑀢𑀩𑁆𑀩𑀢𑁆𑀢𑀸 ‘‘𑀓𑀸𑀬𑀯𑀸𑀘𑀸𑀳𑀺 𑀘𑁄𑀧𑀦𑀓𑀺𑀭𑀺𑀬𑀁 𑀓𑀭𑁄𑀢𑀻’’𑀢𑀺 𑀯𑀼𑀢𑁆𑀢𑀁 𑀢𑀩𑁆𑀩𑀺𑀓𑀸𑀭𑀸𑀦𑀁 𑀪𑀽𑀢𑀸𑀦𑀁 𑀢𑀣𑀸𑀧𑀯𑀢𑁆𑀢𑀦𑀢𑁄. 𑀅𑀣 𑀯𑀸 𑀓𑀸𑀬𑀯𑀸𑀘𑀸𑀳𑀻𑀢𑀺 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀻𑀳𑀺. 𑀘𑁄𑀧𑀦𑀓𑀺𑀭𑀺𑀬𑀦𑁆𑀢𑀺 𑀭𑀽𑀧𑀓𑀸𑀬𑀲𑁆𑀲 𑀣𑀫𑁆𑀪𑀦𑀘𑀮𑀦𑀓𑀺𑀭𑀺𑀬𑀁 𑀉𑀧𑀸𑀤𑀺𑀦𑁆𑀦𑀓𑀖𑀝𑁆𑀝𑀦𑀓𑀺𑀭𑀺𑀬𑀜𑁆𑀘. 𑀏𑀲𑀸 𑀳𑀺 𑀓𑀺𑀭𑀺𑀬𑀸 ‘‘𑀭𑀽𑀧𑀓𑀸𑀬𑀁 𑀣𑀫𑁆𑀪𑁂𑀢𑀼𑀁 𑀘𑀸𑀮𑁂𑀢𑀼𑀁 𑀧𑀘𑁆𑀘𑀬𑁄 𑀪𑀯𑀺𑀢𑀼𑀁 𑀲𑀫𑀢𑁆𑀣𑁄’’𑀢𑀺, ‘‘𑀉𑀧𑀸𑀤𑀺𑀦𑁆𑀦𑀓𑀖𑀝𑁆𑀝𑀦𑀲𑁆𑀲 𑀧𑀘𑁆𑀘𑀬𑀪𑀽𑀢𑁄’’𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀻𑀳𑀺 𑀦𑀺𑀧𑁆𑀨𑀚𑁆𑀚𑀢𑀻𑀢𑀺. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀘𑁄𑀧𑀦𑀓𑀺𑀭𑀺𑀬𑀸𑀦𑀺𑀲𑁆𑀲𑀬𑀪𑀽𑀢𑀸 𑀓𑀸𑀬𑀯𑀸𑀘𑀸’’𑀢𑀺, ‘‘𑀓𑀸𑀬𑀸𑀤𑀻𑀳𑀺 𑀓𑀭𑀡𑀪𑀽𑀢𑁂𑀳𑀺 𑀘𑁄𑀧𑀦𑀸𑀪𑀺𑀚𑁆𑀛𑀸𑀤𑀺𑀓𑀺𑀭𑀺𑀬𑀁 𑀓𑀭𑁄𑀦𑁆𑀢𑀺 𑀯𑀸𑀲𑀺𑀆𑀤𑀻𑀳𑀺 𑀯𑀺𑀬 𑀙𑁂𑀤𑀦𑀸𑀤𑀺’’𑀦𑁆𑀢𑀺 𑀘 𑀇𑀤𑀫𑁆𑀧𑀺 𑀯𑀘𑀦𑀁 𑀲𑀫𑀢𑁆𑀣𑀺𑀢𑀁 𑀪𑀯𑀢𑀺. 𑀦 𑀓𑁂𑀯𑀮𑀁 𑀥𑀭𑀫𑀸𑀦𑀢𑀸𑀯 𑀲𑀩𑁆𑀪𑀸𑀯𑁄, 𑀅𑀣 𑀔𑁄 𑀫𑀕𑁆𑀕𑁂𑀦 𑀅𑀲𑀫𑀼𑀘𑁆𑀙𑀺𑀦𑁆𑀦𑀢𑀸𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀦𑀺𑀭𑁄𑀥𑀺𑀢𑁂𑀯𑀸’’𑀢𑀺 𑀆𑀳. 𑀅𑀲𑀫𑀼𑀘𑁆𑀙𑀺𑀦𑁆𑀦𑀢𑀸 𑀘 𑀓𑀸𑀬𑀸𑀤𑀻𑀦𑀁 𑀢𑀤𑀼𑀧𑀦𑀺𑀲𑁆𑀲𑀬𑀓𑀺𑀮𑁂𑀲𑀸𑀲𑀫𑀼𑀘𑁆𑀙𑁂𑀤𑁂𑀦𑁂𑀯𑀸𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀓𑀸𑀬𑀸𑀤𑀻𑀳𑀺 𑀓𑀭𑀡𑀪𑀽𑀢𑁂𑀳𑀺 𑀘𑁄𑀧𑀦𑀸𑀪𑀺𑀚𑁆𑀛𑀸𑀤𑀺𑀓𑀺𑀭𑀺𑀬𑀁 𑀓𑀭𑁄𑀦𑁆𑀢𑀻’’𑀢𑀺 𑀏𑀢𑁂𑀦 𑀘𑁄𑀧𑀦𑀸𑀪𑀺𑀚𑁆𑀛𑀸𑀤𑀺𑀓𑀺𑀭𑀺𑀬𑀸𑀦𑀺𑀩𑁆𑀩𑀢𑁆𑀢𑀺𑀤𑁆𑀯𑀸𑀭𑁂𑀦 𑀘𑁂𑀢𑀦𑀸𑀦𑀺𑀩𑁆𑀩𑀢𑁆𑀢𑀺𑀬𑁂𑀯 𑀯𑀼𑀢𑁆𑀢𑀸𑀢𑀺 𑀇𑀫𑀺𑀦𑀸 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀏𑀯𑀜𑁆𑀘…𑀧𑁂… 𑀬𑀼𑀚𑁆𑀚𑀦𑁆𑀢𑀻’’𑀢𑀺 𑀆𑀳. 𑀏𑀯𑀜𑁆𑀘 𑀓𑀢𑁆𑀯𑀸 𑀓𑀸𑀬𑁂 𑀲𑀢𑀺 𑀯𑀸𑀘𑀸𑀬 𑀲𑀢𑀻𑀢𑀺𑀆𑀤𑀺𑀯𑀘𑀦𑀁 𑀅𑀦𑀼𑀮𑁄𑀫𑀺𑀢𑀁 𑀳𑁄𑀢𑀺. 𑀬𑀸𑀬 𑀘𑁂𑀢𑀦𑀸𑀬𑀸𑀢𑀺 𑀓𑀭𑀡𑀦𑀺𑀤𑁆𑀤𑁂𑀲𑁄 𑀧𑀦 𑀓𑀸𑀬𑀸𑀤𑀻𑀦𑀁 𑀘𑁄𑀧𑀦𑀸𑀪𑀺𑀚𑁆𑀛𑀸𑀤𑀺𑀓𑀺𑀭𑀺𑀬𑀸𑀬 𑀘 𑀘𑁂𑀢𑀦𑀸𑀳𑁂𑀢𑀼𑀓𑀢𑁆𑀢𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑁄𑀢𑀺.

𑀲𑀪𑀸𑀯𑀢𑁄 𑀉𑀧𑀓𑀸𑀭𑀓𑀢𑁄 𑀫𑀕𑁆𑀕𑁂 𑀲𑀢𑀺 𑀲𑀩𑁆𑀪𑀸𑀯𑀢𑁄 𑀘 𑀩𑁄𑀚𑁆𑀛𑀗𑁆𑀕𑀸 𑀫𑀕𑁆𑀕𑁂 𑀅𑀦𑁆𑀢𑁄𑀕𑀥𑀸𑀢𑀺 𑀆𑀳 ‘‘𑀦 𑀘 𑀦 𑀲𑀓𑁆𑀓𑀸’’𑀢𑀺𑀆𑀤𑀺.

𑀓𑀫𑁆𑀫𑀧𑀣𑀁 𑀅𑀧𑁆𑀧𑀢𑁆𑀢𑀸𑀦𑀫𑁆𑀧𑀺 𑀢𑀁𑀢𑀁𑀤𑁆𑀯𑀸𑀭𑁂 𑀲𑀁𑀲𑀦𑁆𑀤𑀦𑀦𑁆𑀢𑀺 𑀬𑀣𑀸 𑀓𑀫𑁆𑀫𑀧𑀣𑀁 𑀧𑀢𑁆𑀢𑀸𑀦𑀁, 𑀏𑀯𑀁 𑀓𑀫𑁆𑀫𑀧𑀣𑀁 𑀅𑀧𑁆𑀧𑀢𑁆𑀢𑀸𑀦𑀫𑁆𑀧𑀺 𑀲𑀢𑀺𑀧𑀺 𑀤𑁆𑀯𑀸𑀭𑀦𑁆𑀢𑀭𑀼𑀧𑁆𑀧𑀢𑁆𑀢𑀺𑀬𑀁 𑀬𑀣𑀸𑀲𑀓𑀁 𑀤𑁆𑀯𑀸𑀭𑁂𑀳𑁂𑀯 𑀦𑀸𑀫𑀕𑁆𑀕𑀳𑀡𑀦𑁆𑀢𑀺 𑀯𑀤𑀦𑁆𑀢𑀺, 𑀏𑀯𑀁 𑀲𑀢𑀺 𑀅𑀝𑁆𑀞𑀓𑀣𑀸𑀬 𑀯𑀺𑀭𑁄𑀥𑁄. 𑀤𑀼𑀢𑀺𑀬𑀢𑁆𑀣𑀲𑁆𑀲 𑀘 𑀅𑀪𑀸𑀯𑁄 𑀲𑀺𑀬𑀸, 𑀢𑀲𑁆𑀫𑀸 𑀢𑀁𑀢𑀁𑀤𑁆𑀯𑀸𑀭𑁂 𑀲𑀁𑀲𑀦𑁆𑀤𑀦𑀦𑁆𑀢𑀺 𑀬𑀲𑁆𑀫𑀺𑀁 𑀬𑀲𑁆𑀫𑀺𑀁 𑀤𑁆𑀯𑀸𑀭𑁂 𑀓𑀫𑁆𑀫𑀧𑀣𑀁 𑀅𑀧𑁆𑀧𑀢𑁆𑀢𑀸 𑀅𑀓𑀼𑀲𑀮𑀘𑁂𑀢𑀦𑀸𑀤𑀬𑁄 𑀧𑀯𑀢𑁆𑀢𑀸, 𑀢𑀸𑀲𑀁 𑀢𑁂𑀦 𑀢𑁂𑀦𑁂𑀯 𑀤𑁆𑀯𑀸𑀭𑁂𑀦 𑀦𑀸𑀫𑀕𑁆𑀕𑀳𑀡𑀁. 𑀢𑀁 𑀧𑀦 𑀢𑀁𑀢𑀁𑀤𑁆𑀯𑀸𑀭𑀧𑀓𑁆𑀔𑀺𑀓𑀪𑀸𑀯𑀓𑀭𑀡𑀢𑁄 𑀢𑀢𑁆𑀣 𑀅𑀯𑀭𑁄𑀥𑀦𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀳𑀺 𑀓𑀫𑁆𑀫𑀧𑀣𑀁 𑀧𑀢𑁆𑀢𑀸 𑀓𑀸𑀬𑀓𑀫𑁆𑀫𑀸𑀤𑀺𑀲𑀗𑁆𑀔𑀸𑀢𑀸 𑀘𑁂𑀢𑀦𑀸 𑀤𑁆𑀯𑀸𑀭𑀦𑁆𑀢𑀭𑁂 𑀉𑀧𑁆𑀧𑀦𑁆𑀦𑀸𑀧𑀺 𑀓𑀸𑀬𑀓𑀫𑁆𑀫𑀸𑀤𑀺𑀦𑀸𑀫𑀫𑁂𑀯 𑀮𑀪𑀦𑁆𑀢𑀺, 𑀦 𑀏𑀯𑀁 𑀓𑀫𑁆𑀫𑀧𑀣𑀁 𑀅𑀧𑁆𑀧𑀢𑁆𑀢𑀸. 𑀢𑀸 𑀧𑀦 𑀬𑀢𑁆𑀣 𑀬𑀢𑁆𑀣 𑀤𑁆𑀯𑀸𑀭𑁂 𑀉𑀧𑁆𑀧𑀚𑁆𑀚𑀦𑁆𑀢𑀺, 𑀢𑁂𑀦 𑀢𑁂𑀦𑁂𑀯 𑀤𑁆𑀯𑀸𑀭𑁂𑀦 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀦𑁆𑀢𑀺𑀆𑀤𑀺𑀦𑀸𑀫𑀁 𑀮𑀪𑀦𑁆𑀢𑀺. 𑀏𑀯𑀁 𑀦𑀸𑀫𑀕𑁆𑀕𑀳𑀡𑀫𑁂𑀯 𑀳𑀺 𑀢𑁂𑀲𑀁 𑀢𑀁𑀢𑀁𑀤𑁆𑀯𑀸𑀭𑀧𑀓𑁆𑀔𑀺𑀓𑀓𑀭𑀡𑀁 𑀯𑀼𑀢𑁆𑀢𑀁. 𑀢𑁂𑀦𑁂𑀯 𑀳𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀓𑀺𑀜𑁆𑀘𑀸𑀧𑀺 𑀯𑀘𑀻𑀤𑁆𑀯𑀸𑀭𑁂 𑀘𑁄𑀧𑀦𑀧𑁆𑀧𑀢𑁆𑀢𑀁 𑀓𑀫𑁆𑀫𑀧𑀣𑀁, 𑀅𑀧𑁆𑀧𑀢𑁆𑀢𑀢𑀸𑀬 𑀧𑀦 𑀓𑀸𑀬𑀓𑀫𑁆𑀫𑀁 𑀦 𑀳𑁄𑀢𑀺, 𑀓𑁂𑀯𑀮𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀦𑀸𑀫 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁.

𑀲𑀢𑀺𑀧𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀘𑁂𑀢𑀦𑀸𑀬 𑀯𑀘𑀻𑀤𑁆𑀯𑀸𑀭𑀸𑀤𑀻𑀲𑀼 𑀧𑀯𑀢𑁆𑀢𑀺𑀬𑀁 𑀬𑀣𑀸𑀯𑀼𑀢𑁆𑀢𑀬𑁂𑀪𑀼𑀬𑁆𑀬𑀢𑀩𑁆𑀩𑀳𑀼𑀮𑀯𑀼𑀢𑁆𑀢𑀺𑀬𑀸 𑀓𑀸𑀬𑀓𑀫𑁆𑀫𑀸𑀤𑀺𑀪𑀸𑀯𑀯𑀯𑀢𑁆𑀣𑀸𑀧𑀦𑀁 𑀓𑀸𑀬𑀸𑀤𑀺𑀓𑀲𑁆𑀲 𑀢𑀁𑀢𑀁𑀤𑁆𑀯𑀸𑀭𑀪𑀸𑀯𑀯𑀯𑀢𑁆𑀣𑀸𑀧𑀦𑀜𑁆𑀘 𑀓𑀫𑁆𑀫𑀤𑁆𑀯𑀸𑀭𑀸𑀪𑁂𑀤𑀦𑀁. 𑀢𑀜𑁆𑀳𑀺 𑀓𑀫𑁆𑀫𑀤𑁆𑀯𑀸𑀭𑀸𑀦𑀁 𑀅𑀲𑀁𑀓𑀺𑀡𑁆𑀡𑀪𑀸𑀯𑁂𑀦 𑀧𑀢𑀺𑀝𑁆𑀞𑀸𑀧𑀦𑀁. 𑀬𑀁 𑀲𑀦𑁆𑀥𑀸𑀬 ‘‘𑀆𑀡𑀢𑁆𑀢𑀺𑀲𑀫𑀼𑀝𑁆𑀞𑀺𑀢𑁂𑀲𑀽’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀓𑁆𑀔𑀢𑀺. 𑀓𑁂𑀘𑀺 𑀧𑀦 ‘‘𑀏𑀓𑁂𑀓𑀲𑁆𑀫𑀺𑀁 𑀤𑁆𑀯𑀸𑀭𑁂 𑀅𑀦𑁂𑀓𑁂𑀲𑀁 𑀓𑀫𑁆𑀫𑀸𑀦𑀁 𑀧𑀯𑀢𑁆𑀢𑀺𑀤𑀲𑁆𑀲𑀦𑀫𑁆𑀧𑀺 𑀤𑁆𑀯𑀸𑀭𑀲𑀁𑀲𑀦𑁆𑀤𑀦’’𑀦𑁆𑀢𑀺 𑀯𑀤𑀦𑁆𑀢𑀺. 𑀬𑀣𑀸 𑀧𑀯𑀢𑁆𑀢𑁄 𑀩𑁆𑀬𑀸𑀧𑀸𑀤𑁄 𑀓𑀫𑁆𑀫𑀧𑀣𑁄 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀇𑀫𑁂 𑀲𑀢𑁆𑀢𑀸 𑀳𑀜𑁆𑀜𑀦𑁆𑀢𑀽’’𑀢𑀺 𑀧𑀯𑀢𑁆𑀢𑀺 𑀩𑁆𑀬𑀸𑀧𑀸𑀤𑀲𑁆𑀲 𑀤𑀲𑁆𑀲𑀺𑀢𑀸. 𑀓𑀸𑀬𑀤𑁆𑀯𑀸𑀭𑀺𑀓𑀘𑁂𑀢𑀦𑀸𑀬 𑀲𑀳𑀓𑀸𑀭𑀻𑀓𑀸𑀭𑀡𑀪𑀸𑀯𑀢𑁄 𑀓𑀸𑀬𑀓𑀫𑁆𑀫𑀯𑁄𑀳𑀸𑀭𑀮𑀸𑀪𑀸, 𑀅𑀪𑀺𑀚𑁆𑀛𑀸𑀤𑀻𑀦𑀁 𑀧𑀭𑀲𑀦𑁆𑀢𑀓𑀲𑁆𑀲 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑀦𑀯𑀲𑁂𑀦 ‘‘𑀇𑀫𑁂 𑀲𑀢𑁆𑀢𑀸 𑀳𑀜𑁆𑀜𑀦𑁆𑀢𑀽’’𑀢𑀺𑀆𑀤𑀺𑀦𑀸 𑀘 𑀅𑀧𑁆𑀧𑀯𑀢𑁆𑀢𑀢𑁆𑀢𑀸 𑀫𑀦𑁄𑀓𑀫𑁆𑀫𑀯𑁄𑀳𑀸𑀭𑀯𑀺𑀭𑀳𑀸, 𑀅𑀘𑁂𑀢𑀦𑀸𑀲𑀪𑀸𑀯𑀢𑁄 𑀯𑀸 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀯𑀲𑁂𑀦 𑀅𑀩𑁆𑀩𑁄𑀳𑀸𑀭𑀺𑀓𑀸, 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀪𑀸𑀯𑁂𑀦 𑀦 𑀯𑀢𑁆𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀏𑀢𑁆𑀣𑀸𑀢𑀺 𑀅𑀩𑁆𑀩𑁄𑀳𑀸𑀭𑀺𑀓𑀪𑀸𑀯𑁂.

𑀤𑀲𑀯𑀺𑀥𑀸 𑀇𑀤𑁆𑀥𑀺…𑀧𑁂… 𑀢𑀩𑁆𑀩𑀸 𑀯𑀺𑀢𑁆𑀣𑀸𑀭𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀢𑁂𑀦𑀸𑀥𑀺𑀧𑁆𑀧𑁂𑀢𑀦𑁆𑀢𑀺 ‘‘𑀅𑀓𑀼𑀲𑀮𑀁 𑀯𑀘𑀻𑀓𑀫𑁆𑀫𑀁 𑀫𑀦𑁄𑀤𑁆𑀯𑀸𑀭𑁂 𑀲𑀫𑀼𑀝𑁆𑀞𑀸𑀢𑀻’’𑀢𑀺 𑀯𑀤𑀦𑁆𑀢𑁂𑀦 𑀅𑀥𑀺𑀧𑁆𑀧𑁂𑀢𑀁. ‘‘𑀦 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢’’𑀦𑁆𑀢𑀺 𑀓𑀲𑁆𑀫𑀸 𑀯𑀼𑀢𑁆𑀢𑀁, 𑀦𑀦𑀼 𑀢𑁂𑀦 𑀉𑀧𑁄𑀲𑀣𑀓𑁆𑀔𑀦𑁆𑀥𑀓𑀢𑁄 𑀲𑀼𑀢𑁆𑀢𑀁 𑀆𑀳𑀝𑀦𑁆𑀢𑀺? 𑀓𑀺𑀜𑁆𑀘𑀸𑀧𑀺 𑀆𑀳𑀝𑀁, 𑀢𑀢𑁆𑀣 𑀅𑀯𑀼𑀢𑁆𑀢𑁄𑀬𑁂𑀯 𑀧𑀦 𑀲𑁄 𑀢𑁂𑀦 𑀯𑀼𑀢𑁆𑀢𑁄𑀢𑀺 𑀕𑀳𑀺𑀢𑁄𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣 𑀅𑀯𑀼𑀢𑁆𑀢𑀫𑁂𑀯𑀸’’𑀢𑀺𑀆𑀤𑀺𑀫𑀸𑀳.

‘‘𑀲𑀼𑀕𑀢𑀺𑀤𑀼𑀕𑁆𑀕𑀢𑀻𑀲𑀼 𑀉𑀧𑀧𑀚𑁆𑀚𑀦𑀁 𑀲𑀼𑀓𑀢𑀤𑀼𑀓𑁆𑀓𑀝𑀓𑀫𑁆𑀫𑀢𑁄 𑀦 𑀳𑁄𑀢𑀺, 𑀔𑀦𑁆𑀥𑀲𑀺𑀯𑀸𑀤𑀻𑀳𑀺 𑀧𑀦 𑀳𑁄𑀢𑀻𑀢𑀺 𑀕𑀳𑁂𑀢𑁆𑀯𑀸 ‘𑀦𑀢𑁆𑀣𑀺 𑀤𑀺𑀦𑁆𑀦’𑀦𑁆𑀢𑀺𑀆𑀤𑀺𑀦𑀸 𑀧𑀭𑀸𑀫𑀲𑀦𑁆𑀢𑀲𑁆𑀲 𑀯𑀲𑁂𑀦 ‘𑀫𑀺𑀘𑁆𑀙𑀸𑀤𑀺𑀝𑁆𑀞𑀺…𑀧𑁂… 𑀧𑀭𑀺𑀪𑀡𑁆𑀟𑀸𑀤𑀻𑀦𑀺 𑀓𑀭𑁄𑀢𑀻’𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀅𑀪𑀺𑀚𑁆𑀛𑀸𑀤𑀺𑀧𑀥𑀸𑀦𑀢𑁆𑀢𑀸𑀢𑀺 𑀏𑀢𑁂𑀦 𑀯𑀺𑀚𑁆𑀚𑀫𑀸𑀦𑁂𑀲𑀼𑀧𑀺 𑀩𑁆𑀬𑀸𑀧𑀸𑀤𑀸𑀤𑀻𑀲𑀼 𑀬𑀤𑀸 𑀓𑀸𑀬𑀯𑀘𑀻𑀤𑁆𑀯𑀸𑀭𑁂𑀲𑀼 𑀘𑁂𑀢𑀦𑀸 𑀩𑀮𑀯𑀢𑀻 𑀳𑁄𑀢𑀺, 𑀦 𑀢𑀣𑀸 𑀇𑀢𑀭𑁂, 𑀢𑀤𑀸 𑀧𑀥𑀸𑀦𑀪𑀸𑀯𑀢𑁄 𑀘𑁂𑀢𑀦𑀸 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀦𑁆𑀢𑀺 𑀘 𑀯𑁄𑀳𑀸𑀭𑀁 𑀮𑀪𑀢𑀺. 𑀲𑁄 𑀔𑁄 𑀧𑀦𑀲𑁆𑀲𑀸 𑀧𑀥𑀸𑀦𑀪𑀸𑀯𑁄 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀲𑀺𑀤𑁆𑀥𑀺𑀬𑀸 𑀯𑀺𑀜𑁆𑀜𑀸𑀬𑀢𑀺. 𑀬𑀤𑀸 𑀧𑀦 𑀢𑁂𑀲𑀼𑀬𑁂𑀯 𑀤𑁆𑀯𑀸𑀭𑁂𑀲𑀼 𑀅𑀪𑀺𑀚𑁆𑀛𑀸𑀤𑀬𑁄 𑀩𑀮𑀯𑀦𑁆𑀢𑁄 𑀳𑁄𑀦𑁆𑀢𑀺, 𑀦 𑀢𑀣𑀸 𑀘𑁂𑀢𑀦𑀸, 𑀢𑀤𑀸 𑀢𑀢𑁆𑀣 𑀯𑀺𑀚𑁆𑀚𑀫𑀸𑀦𑀸𑀧𑀺 𑀘𑁂𑀢𑀦𑀸 𑀅𑀧𑀥𑀸𑀦𑀪𑀸𑀯𑀢𑁄 𑀓𑀸𑀬𑀓𑀫𑁆𑀫𑀁 𑀯𑀘𑀻𑀓𑀫𑁆𑀫𑀦𑁆𑀢𑀺 𑀘 𑀯𑁄𑀳𑀸𑀭𑀁 𑀦 𑀮𑀪𑀢𑀺. 𑀅𑀪𑀺𑀚𑁆𑀛𑀸𑀤𑀬𑁄 𑀧𑀦 𑀧𑀥𑀸𑀦𑀪𑀸𑀯𑀢𑁄 𑀲𑀢𑀺𑀧𑀺 𑀓𑀸𑀬𑀗𑁆𑀕𑀯𑀸𑀘𑀗𑁆𑀕𑀘𑁄𑀧𑀦𑁂 𑀲𑀓𑁂𑀦 𑀯𑀯𑀢𑁆𑀣𑀸𑀦𑁂𑀦 𑀫𑀦𑁄𑀓𑀫𑁆𑀫𑀦𑁆𑀢𑁆𑀯𑁂𑀯 𑀯𑀼𑀘𑁆𑀘𑀦𑁆𑀢𑀻𑀢𑀺 𑀤𑀲𑁆𑀲𑁂𑀢𑀺. 𑀬𑁂 𑀧𑀦 ‘‘𑀢𑀻𑀲𑀼𑀧𑀺 𑀤𑁆𑀯𑀸𑀭𑁂𑀲𑀼 𑀓𑀫𑁆𑀫𑀧𑀣𑀪𑀸𑀯𑁂𑀦 𑀅𑀧𑁆𑀧𑀢𑁆𑀢𑀺𑀬𑀸 𑀤𑁆𑀯𑀸𑀭𑀢𑁆𑀢𑀬𑁂𑀧𑀺 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀫𑀦𑁄𑀓𑀫𑁆𑀫𑁂𑀦 𑀲𑀳 𑀧𑀯𑀢𑁆𑀢𑀺𑀬𑀸 𑀘 𑀘𑁂𑀢𑀦𑀸 𑀏𑀢𑁆𑀣 𑀓𑀫𑁆𑀫𑀦𑁆𑀢𑀺 𑀦 𑀯𑀼𑀘𑁆𑀘𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑁂𑀳𑀺 𑀅𑀪𑀺𑀚𑁆𑀛𑀸𑀤𑀻𑀦𑀁 𑀧𑀥𑀸𑀦𑀲𑀪𑀸𑀯𑀁𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀲𑀺𑀬𑀸. 𑀅𑀣 𑀯𑀸 𑀘𑁂𑀢𑀦𑀸𑀬 𑀦𑀺𑀧𑁆𑀧𑀭𑀺𑀬𑀸𑀬𑀓𑀫𑁆𑀫𑀪𑀸𑀯𑀢𑁄 𑀧𑀭𑀺𑀬𑀸𑀬𑀓𑀫𑁆𑀫𑁂 𑀅𑀦𑀯𑀭𑁄𑀥𑁂𑀢𑀩𑁆𑀩𑀢𑁆𑀢𑀸 ‘‘𑀅𑀩𑁆𑀩𑁄𑀳𑀸𑀭𑀺𑀓𑀸’’𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦𑁂𑀯 𑀧𑀦 𑀲𑀸 𑀏𑀢𑁆𑀣𑀸𑀧𑀺 𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸𑀳 ‘‘𑀘𑁂𑀢𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀯𑀤𑀸𑀫𑀻’’𑀢𑀺𑀆𑀤𑀺 (𑀓𑀣𑀸. 𑁫𑁩𑁯). 𑀅𑀝𑁆𑀞𑀓𑀣𑀸𑀬𑀜𑁆𑀘 ‘‘𑀢𑀲𑁆𑀫𑀺𑀁 𑀤𑁆𑀯𑀸𑀭𑁂 𑀲𑀺𑀤𑁆𑀥𑀸 𑀘𑁂𑀢𑀦𑀸’’𑀢𑀺𑀆𑀤𑀺𑀦𑀸 𑀘𑁂𑀢𑀦𑀸𑀬𑁂𑀯 𑀧𑀥𑀸𑀦𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀲𑀪𑀸𑀯𑁂𑀦𑁂𑀯 𑀲𑀸 𑀫𑀦𑁄𑀓𑀫𑁆𑀫’’𑀦𑁆𑀢𑀺𑀆𑀤𑀺. 𑀅𑀣 𑀯𑀸 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀅𑀪𑀺𑀚𑁆𑀛𑀸𑀤𑀻𑀳𑀺 𑀓𑀸𑀬𑀯𑀘𑀻𑀤𑁆𑀯𑀸𑀭𑁂 𑀲𑀳𑀚𑀸𑀢𑀸 𑀘𑁂𑀢𑀦𑀸 𑀓𑀸𑀬𑀯𑀘𑀻𑀓𑀫𑁆𑀫𑀯𑀲𑁂𑀦 𑀅𑀩𑁆𑀩𑁄𑀳𑀸𑀭𑀺𑀓𑀸 𑀘𑁂𑀢𑀦𑀸𑀲𑀗𑁆𑀔𑀸𑀢𑀫𑀦𑁄𑀓𑀫𑁆𑀫𑀢𑁆𑀢𑀸𑀢𑀺. 𑀬𑀤𑀺 𑀅𑀪𑀺𑀚𑁆𑀛𑀸𑀤𑀬𑁄 𑀧𑀥𑀸𑀦𑀸, 𑀦 𑀘𑁂𑀢𑀦𑀸, 𑀏𑀯𑀁 𑀲𑀢𑀺 𑀅𑀪𑀺𑀚𑁆𑀛𑀸𑀤𑀬𑁄 𑀘𑁂𑀢𑁆𑀣 𑀓𑀫𑁆𑀫𑀁, 𑀦 𑀘𑁂𑀢𑀦𑀸, 𑀅𑀪𑀺𑀚𑁆𑀛𑀸𑀤𑀺𑀧𑀓𑁆𑀔𑀺𑀓𑀸 𑀯𑀸 𑀲𑀸 𑀲𑀺𑀬𑀸𑀢𑀺 𑀅𑀦𑀼𑀬𑁄𑀕𑀁 𑀫𑀦𑀲𑀺 𑀓𑀢𑁆𑀯𑀸 𑀆𑀳 ‘‘𑀢𑀺𑀯𑀺𑀥𑀸, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺. ‘‘𑀘𑁂𑀢𑀦𑀸𑀧𑀺…𑀧𑁂… 𑀫𑀦𑁄𑀤𑁆𑀯𑀸𑀭𑁂 𑀏𑀯 𑀲𑀫𑀼𑀝𑁆𑀞𑀳𑀦𑁆𑀢𑀻’’𑀢𑀺 𑀇𑀤𑀁 𑀫𑀦𑁄𑀤𑁆𑀯𑀸𑀭𑁂 𑀘𑁂𑀢𑀦𑀸𑀬 𑀅𑀪𑀺𑀚𑁆𑀛𑀸𑀤𑀻𑀳𑀺 𑀫𑀦𑁄𑀓𑀫𑁆𑀫𑀪𑀸𑀯𑁂 𑀦𑀺𑀩𑁆𑀩𑀺𑀲𑁂𑀲𑀪𑀸𑀯𑀤𑀲𑁆𑀲𑀦𑀦𑁆𑀢𑀺 𑀓𑀢𑁆𑀯𑀸 ‘‘𑀘𑁂𑀢𑀦𑀸…𑀧𑁂… 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀆𑀳. 𑀘𑁂𑀢𑀦𑀸 𑀘𑁂𑀢𑀦𑀸𑀓𑀫𑁆𑀫𑀁, 𑀅𑀪𑀺𑀚𑁆𑀛𑀸𑀤𑀬𑁄 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀓𑀫𑁆𑀫𑀦𑁆𑀢𑀺 𑀏𑀢𑁆𑀢𑀓𑀫𑁂𑀯 𑀳𑀺 𑀏𑀢𑁆𑀣 𑀯𑀺𑀲𑁂𑀲𑁄𑀢𑀺. 𑀏𑀢𑁆𑀣 𑀘 𑀘𑁂𑀢𑀦𑀸𑀬 𑀓𑀸𑀬𑀯𑀘𑀻𑀓𑀫𑁆𑀫𑀪𑀸𑀯𑁄 𑀲𑀺𑀬𑀸𑀢𑀺 𑀆𑀲𑀗𑁆𑀓𑀸𑀬 𑀅𑀪𑀸𑀯𑀢𑁄 𑀫𑀦𑁄𑀤𑁆𑀯𑀸𑀭𑁂 𑀅𑀓𑀼𑀲𑀮𑀓𑀸𑀬𑀯𑀘𑀻𑀓𑀫𑁆𑀫𑀸𑀦𑀁 𑀅𑀦𑀼𑀧𑁆𑀧𑀢𑁆𑀢𑀺𑀢𑁄 𑀘 𑀅𑀩𑁆𑀩𑁄𑀳𑀸𑀭𑀺𑀓𑀸𑀢𑀺 𑀦 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀯𑀺𑀭𑀢𑀺𑀯𑀺𑀲𑀺𑀝𑁆𑀞𑀸𑀢𑀺 𑀯𑀺𑀭𑀢𑀺𑀢𑁄 𑀘𑁂𑀢𑀦𑀸𑀬 𑀧𑀥𑀸𑀦𑀪𑀸𑀯𑀫𑀸𑀳. 𑀢𑀢𑁆𑀣 ‘‘𑀢𑀺𑀯𑀺𑀥𑀸, 𑀪𑀺𑀓𑁆𑀔𑀯𑁂, 𑀓𑀸𑀬𑀲𑀜𑁆𑀘𑁂𑀢𑀦𑀸’’𑀢𑀺𑀆𑀤𑀺𑀦𑀸 (𑀓𑀣𑀸. 𑁫𑁩𑁯) 𑀆𑀕𑀫𑀫𑁆𑀳𑀺 ‘‘𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀧𑀝𑀺𑀧𑀓𑁆𑀔𑀪𑀽𑀢𑀸’’𑀢𑀺 𑀬𑀼𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀬𑀲𑁆𑀫𑀸 𑀘 𑀧𑀝𑁆𑀞𑀸𑀦𑁂 𑀘𑁂𑀢𑀦𑀸𑀯 ‘‘𑀓𑀫𑁆𑀫𑀧𑀘𑁆𑀘𑀬𑁄’’𑀢𑀺 𑀯𑀼𑀢𑁆𑀢𑀸, 𑀦 𑀯𑀺𑀭𑀢𑀺, 𑀅𑀪𑀺𑀚𑁆𑀛𑀸𑀤𑀬𑁄 𑀯𑀸, 𑀢𑀲𑁆𑀫𑀸 𑀦𑀺𑀧𑁆𑀧𑀭𑀺𑀬𑀸𑀬𑁂𑀦 𑀓𑀫𑁆𑀫𑀁 ‘‘𑀘𑁂𑀢𑀦𑀸’’𑀢𑀺 𑀅𑀦𑀪𑀺𑀚𑁆𑀛𑀸𑀤𑀬𑁄 ‘‘𑀘𑁂𑀢𑀦𑀸𑀧𑀓𑁆𑀔𑀺𑀓𑀸 𑀯𑀸’’𑀢𑀺 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀲𑀗𑁆𑀓𑀭𑀢𑁄 𑀓𑀫𑁆𑀫𑀤𑁆𑀯𑀸𑀭𑀸𑀦𑀺 𑀯𑀯𑀢𑁆𑀣𑀧𑁂𑀦𑁆𑀢𑁄 ‘‘𑀭𑀓𑁆𑀔𑀢𑀻’’𑀢𑀺, 𑀯𑀺𑀧𑀭𑀺𑀬𑀸𑀬𑁂𑀦 ‘‘𑀪𑀺𑀦𑁆𑀤𑀢𑀻’’𑀢𑀺 𑀯𑀼𑀢𑁆𑀢𑁄𑀢𑀺 𑀭𑀓𑁆𑀔𑀡𑀪𑀺𑀦𑁆𑀤𑀦𑀸𑀦𑀺 𑀅𑀦𑀸𑀲𑁂𑀢𑁆𑀯𑀸 𑀦𑀸𑀲𑁂𑀢𑁆𑀯𑀸 𑀘 𑀓𑀣𑀦𑀦𑁆𑀢𑀺 𑀯𑀼𑀢𑁆𑀢𑀸𑀦𑀻𑀢𑀺.

𑀓𑀫𑁆𑀫𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀢𑀢𑀺𑀬𑁄 𑀯𑀺𑀓𑀧𑁆𑀧𑁄 𑀧𑀞𑀫𑀘𑀢𑀼𑀢𑁆𑀣𑀯𑀺𑀜𑁆𑀜𑀸𑀡𑀤𑁆𑀯𑀸𑀭𑁂𑀲𑀼𑀬𑁂𑀯 𑀮𑀩𑁆𑀪𑀢𑀺, 𑀦 𑀇𑀢𑀭𑀢𑁆𑀣 ‘‘𑀲𑁄𑀢𑀁 𑀖𑀸𑀦’’𑀦𑁆𑀢𑀺𑀆𑀤𑀺𑀦𑀸 𑀅𑀯𑀼𑀢𑁆𑀢𑀢𑁆𑀢𑀸, 𑀇𑀢𑀭𑀣𑀸𑀧𑀺 𑀯𑀸 𑀅𑀯𑀺𑀪𑀢𑁆𑀢𑀺𑀓𑁂 𑀦𑀺𑀤𑁆𑀤𑁂𑀲𑁂 𑀮𑀩𑁆𑀪𑀢𑀺. 𑀬𑀢𑁄 𑀲𑀁𑀯𑀭𑀯𑀲𑁂𑀦 𑀧𑀸𑀢𑀺𑀫𑁄𑀓𑁆𑀔𑀲𑀻𑀮𑀁 𑀧𑀯𑀢𑁆𑀢𑀢𑀺, 𑀢𑀁 𑀤𑀼𑀲𑁆𑀲𑀻𑀮𑁆𑀬𑀦𑁆𑀢𑀺 𑀆𑀳 ‘‘𑀤𑀼𑀲𑁆𑀲𑀻𑀮𑁆𑀬𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀘𑁂𑀢𑀦𑀸’’𑀢𑀺. 𑀇𑀢𑀭𑀸 𑀲𑀁𑀯𑀭𑀯𑀺𑀦𑀺𑀫𑀼𑀢𑁆𑀢𑀸 𑀅𑀪𑀺𑀚𑁆𑀛𑀸𑀤𑁄𑀫𑀦𑀲𑁆𑀲𑀬𑀼𑀢𑁆𑀢𑀸 𑀢𑀧𑁆𑀧𑀥𑀸𑀦𑀸 𑀯𑀸 𑀅𑀓𑀼𑀲𑀮𑀥𑀫𑁆𑀫𑀸 𑀲𑀢𑀺𑀧𑀝𑀺𑀧𑀓𑁆𑀔𑀸 𑀅𑀓𑀼𑀲𑀮𑀸 𑀥𑀫𑁆𑀫𑀸. 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀯𑁄𑀲𑁆𑀲𑀕𑁆𑀕𑀯𑀲𑁂𑀦 𑀧𑀯𑀢𑁆𑀢𑁄 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀧𑀫𑀸𑀤𑁄. 𑀯𑀻𑀭𑀺𑀬𑀧𑀦𑁄𑀤𑀦𑀪𑀸𑀯𑀢𑁄 𑀣𑀺𑀦𑀫𑀺𑀤𑁆𑀥𑀁 ‘‘𑀓𑁄𑀲𑀚𑁆𑀚’’𑀦𑁆𑀢𑀺 𑀯𑀼𑀢𑁆𑀢𑀁, 𑀣𑀺𑀦𑀫𑀺𑀤𑁆𑀥𑀧𑁆𑀧𑀥𑀸𑀦𑁄 𑀯𑀸 𑀘𑀺𑀢𑁆𑀢𑀼𑀧𑁆𑀧𑀸𑀤𑁄.

𑀅𑀲𑀼𑀤𑁆𑀥𑀢𑀸𑀢𑀺 𑀅𑀓𑁂𑀯𑀮𑀢𑀸 𑀅𑀜𑁆𑀜𑁂𑀦 𑀲𑀫𑁆𑀫𑀺𑀲𑁆𑀲𑀢𑀸. 𑀤𑁆𑀯𑀸𑀭𑀜𑁆𑀳𑀺 𑀤𑁆𑀯𑀸𑀭𑀦𑁆𑀢𑀭𑀺𑀓𑀓𑀫𑁆𑀫𑀲𑁆𑀲 𑀤𑁆𑀯𑀸𑀭𑀁 𑀳𑁄𑀦𑁆𑀢𑀁 𑀢𑁂𑀦 𑀫𑀺𑀲𑁆𑀲𑀺𑀢𑀁 𑀯𑀺𑀬 𑀳𑁄𑀢𑀺. 𑀢𑁂𑀦𑁂𑀯𑀸𑀳 ‘‘𑀫𑀼𑀲𑀸𑀯𑀸𑀤𑀸𑀤𑀺𑀦𑁄𑀧𑀺 𑀓𑀸𑀬𑀤𑁆𑀯𑀸𑀭𑁂 𑀧𑀯𑀢𑁆𑀢𑀺𑀲𑀩𑁆𑀪𑀸𑀯𑀸’’𑀢𑀺. 𑀓𑁂𑀘𑀺 𑀧𑀦 ‘‘𑀅𑀯𑀺𑀜𑁆𑀜𑁂𑀬𑁆𑀬𑀫𑀸𑀦𑀦𑁆𑀢𑀭𑀸𑀦𑀁 𑀤𑁆𑀯𑀸𑀭𑀦𑁆𑀢𑀭𑀘𑀺𑀢𑁆𑀢𑀸𑀦𑀁 𑀅𑀦𑁆𑀢𑀭𑀦𑁆𑀢𑀭𑀸 𑀅𑀧𑁆𑀧𑀯𑀢𑁆𑀢𑀺𑀢𑁄 𑀲𑀼𑀤𑁆𑀥𑀦𑁆𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀅𑀦𑁂𑀓𑀲𑁆𑀲𑀧𑀺 𑀚𑀯𑀦𑀯𑀸𑀭𑀲𑁆𑀲 𑀓𑀸𑀬𑀓𑀫𑁆𑀫𑀸𑀤𑀺𑀪𑀸𑀯𑁂𑀦 𑀧𑀩𑀦𑁆𑀥𑀦𑀯𑀲𑁂𑀦 𑀧𑀯𑀢𑁆𑀢𑀺 𑀅𑀢𑁆𑀣𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀅𑀯𑀺𑀭𑀼𑀤𑁆𑀥𑀁 𑀳𑁄𑀢𑀻𑀢𑀺 𑀅𑀓𑀼𑀲𑀮𑀓𑀸𑀬𑀓𑀫𑁆𑀫𑀸𑀤𑀺𑀪𑀸𑀯𑁂𑀦 𑀅𑀯𑀥𑀸𑀭𑁂𑀢𑁆𑀯𑀸 𑀅𑀲𑀁𑀯𑀭𑀁 𑀯𑀢𑁆𑀯𑀸 𑀧𑀼𑀦 𑀢𑀲𑁆𑀲𑁂𑀯 𑀯𑀸𑀘𑀸𑀅𑀲𑀁𑀯𑀭𑀤𑁆𑀯𑀸𑀭𑀸𑀤𑀻𑀲𑀼 𑀉𑀧𑁆𑀧𑀢𑁆𑀢𑀺𑀯𑀘𑀦𑀁 𑀓𑀸𑀬𑀤𑁆𑀯𑀸𑀭𑀽𑀧𑀮𑀓𑁆𑀔𑀺𑀢𑁄 𑀅𑀲𑀁𑀯𑀭𑁄 𑀤𑁆𑀯𑀸𑀭𑀦𑁆𑀢𑀭𑁂 𑀧𑀯𑀢𑁆𑀢𑁄𑀧𑀺 𑀓𑀸𑀬𑀤𑁆𑀯𑀸𑀭𑀺𑀓𑁄 𑀏𑀯𑀸𑀢𑀺 𑀏𑀯𑀁 𑀲𑀁𑀯𑀡𑁆𑀡𑀦𑀸𑀬 𑀲𑀢𑀺 𑀦 𑀯𑀺𑀭𑀼𑀚𑁆𑀛𑀢𑀻𑀢𑀺 𑀅𑀢𑁆𑀣𑁄. 𑀇𑀤𑀸𑀦𑀺 𑀢𑀁 𑀅𑀯𑀺𑀭𑀼𑀚𑁆𑀛𑀦𑀸𑀓𑀸𑀭𑀁 ‘‘𑀅𑀲𑀁𑀯𑀭𑁄 𑀳𑀻’’𑀢𑀺𑀆𑀤𑀺𑀦𑀸 𑀯𑀺𑀪𑀸𑀯𑁂𑀢𑀺. 𑀲𑀤𑁆𑀯𑀸𑀭𑁂𑀢𑀺 𑀅𑀢𑁆𑀢𑀦𑁄 𑀤𑁆𑀯𑀸𑀭𑁂. 𑀅𑀲𑀁𑀯𑀭𑁄 𑀤𑁆𑀯𑀸𑀭𑀦𑁆𑀢𑀭𑁂 𑀉𑀧𑁆𑀧𑀚𑁆𑀚𑀫𑀸𑀦𑁄𑀧𑀺 𑀲𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀦𑁆𑀦𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀏𑀢𑁂𑀦 𑀯𑀸𑀘𑀸𑀅𑀲𑀁𑀯𑀭𑀤𑁆𑀯𑀸𑀭𑁂 𑀉𑀧𑁆𑀧𑀦𑁆𑀦𑁄𑀧𑀺 𑀓𑀸𑀬𑀺𑀓𑁄 𑀅𑀲𑀁𑀯𑀭𑁄 𑀘𑁄𑀧𑀦𑀓𑀸𑀬𑀅𑀲𑀁𑀯𑀭𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀦𑁆𑀦𑁄𑀢𑁆𑀯𑁂𑀯 𑀯𑀼𑀢𑁆𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀏𑀲 𑀦𑀬𑁄 𑀇𑀢𑀭𑀢𑁆𑀣𑀸𑀧𑀺. 𑀓𑀫𑁆𑀫𑀁 𑀅𑀜𑁆𑀜𑀤𑁆𑀯𑀸𑀭𑁂𑀢𑀺 𑀓𑀫𑁆𑀫𑀲𑁆𑀲 𑀤𑁆𑀯𑀸𑀭𑀦𑁆𑀢𑀭𑀘𑀭𑀡𑀁 𑀧𑀸𑀓𑀝𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁.

𑀏𑀯𑀁 𑀲𑀢𑀻𑀢𑀺 𑀘𑁄𑀧𑀦𑀲𑀗𑁆𑀔𑀸𑀢𑁂 𑀓𑀸𑀬𑀅𑀲𑀁𑀯𑀭𑀤𑁆𑀯𑀸𑀭𑁂 𑀅𑀲𑀁𑀯𑀭𑁄𑀢𑀺 𑀏𑀢𑁆𑀢𑀓𑁂 𑀏𑀯 𑀕𑀳𑀺𑀢𑁂. 𑀓𑀫𑁆𑀫𑀧𑀣𑀪𑀸𑀯𑀧𑁆𑀧𑀢𑁆𑀢𑀲𑁆𑀲𑁂𑀯 𑀓𑀫𑁆𑀫𑀪𑀸𑀯𑁄 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀓𑀫𑁆𑀫𑀧𑀣𑀪𑀸𑀯𑀧𑁆𑀧𑀢𑁆𑀢𑀢𑀸𑀬 𑀯𑀘𑀻𑀫𑀦𑁄𑀓𑀫𑁆𑀫’’𑀦𑁆𑀢𑀺. 𑀲𑁂𑀲𑀦𑁆𑀢𑀺 𑀤𑁆𑀯𑀸𑀭𑀦𑁆𑀢𑀭𑀸𑀦𑀼𑀧𑀮𑀓𑁆𑀔𑀺𑀢𑀁. 𑀢𑀣𑀸 𑀦 𑀯𑀼𑀘𑁆𑀘𑀢𑀻𑀢𑀺 𑀓𑀸𑀬𑀓𑀫𑁆𑀫𑀦𑁆𑀢𑀺 𑀦 𑀯𑀼𑀘𑁆𑀘𑀢𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀣𑁂𑀯 𑀯𑀓𑁆𑀔𑀸𑀫𑀸𑀢𑀺 𑀓𑀫𑁆𑀫𑀧𑀣𑀲𑀁𑀲𑀦𑁆𑀤𑀦𑁂 𑀯𑀓𑁆𑀔𑀸𑀫. ‘‘𑀲𑁄 𑀳𑀺 𑀓𑀸𑀬𑀤𑁆𑀯𑀸𑀭𑁂 𑀘𑁄𑀧𑀦𑀧𑁆𑀧𑀢𑁆𑀢𑁄 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀳𑁄𑀢𑀻’’𑀢𑀺𑀆𑀤𑀺𑀦𑀸 (𑀥. 𑀲. 𑀅𑀝𑁆𑀞. 𑀓𑀫𑁆𑀫𑀧𑀣𑀲𑀁𑀲𑀦𑁆𑀤𑀦𑀓𑀣𑀸) ‘‘𑀘𑁄𑀧𑀦𑀓𑀸𑀬𑀅𑀲𑀁𑀯𑀭𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀫𑁂𑀯 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀘 𑀯𑀘𑀻𑀓𑀫𑁆𑀫𑀸𑀤𑀻𑀦𑀜𑁆𑀘 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀸𑀦𑀁 𑀅𑀲𑀁𑀯𑀭𑀪𑀽𑀢𑀸𑀦𑀁 𑀓𑀸𑀬𑀓𑀫𑁆𑀫𑀸𑀤𑀺𑀪𑀸𑀯𑁂 𑀆𑀧𑀦𑁆𑀦𑁂 ‘‘𑀘𑀢𑀼𑀩𑁆𑀩𑀺𑀥𑀁 𑀯𑀘𑀻𑀤𑀼𑀘𑁆𑀘𑀭𑀺𑀢𑀁 𑀅𑀓𑀼𑀲𑀮𑀁 𑀯𑀘𑀻𑀓𑀫𑁆𑀫𑀫𑁂𑀯 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀅𑀧𑀯𑀸𑀤𑁂𑀦 𑀦𑀺𑀯𑀢𑁆𑀢𑀺 𑀤𑀝𑁆𑀞𑀩𑁆𑀩𑀸𑀢𑀺 𑀏𑀯𑀁 𑀯𑀓𑁆𑀔𑀫𑀸𑀦𑀢𑀁 𑀲𑀦𑁆𑀥𑀸𑀬𑀸𑀳. 𑀅𑀦𑁆𑀢𑁄𑀕𑀥𑀢𑀸 𑀤𑀝𑁆𑀞𑀩𑁆𑀩𑀸 𑀧𑀘𑁆𑀘𑀬𑀲𑀦𑁆𑀦𑀺𑀲𑁆𑀲𑀺𑀢𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀸𑀦𑀁 𑀜𑀸𑀡𑀯𑀻𑀭𑀺𑀬𑁂𑀳𑀺 𑀲𑀸𑀥𑁂𑀢𑀩𑁆𑀩𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀅𑀓𑀼𑀲𑀮𑀓𑀫𑁆𑀫𑀧𑀣𑀓𑀣𑀸𑀯𑀡𑁆𑀡𑀦𑀸

𑀲𑀭𑀲𑁂𑀦 𑀅𑀢𑁆𑀢𑀦𑁄 𑀲𑀪𑀸𑀯𑁂𑀦. 𑀬𑀸𑀬 𑀘𑁂𑀢𑀦𑀸𑀬 𑀧𑀯𑀢𑁆𑀢𑀫𑀸𑀦𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀧𑀘𑁆𑀘𑀬𑀪𑀽𑀢𑁂𑀲𑀼 𑀫𑀳𑀸𑀪𑀽𑀢𑁂𑀲𑀼 𑀉𑀧𑀓𑁆𑀓𑀫𑀓𑀭𑀡𑀳𑁂𑀢𑀼 𑀢𑀁𑀫𑀳𑀸𑀪𑀽𑀢𑀧𑀘𑁆𑀘𑀬𑀸 𑀉𑀧𑁆𑀧𑀚𑁆𑀚𑀦𑀓𑀫𑀳𑀸𑀪𑀽𑀢𑀸 𑀦𑀼𑀧𑁆𑀧𑀚𑁆𑀚𑀺𑀲𑁆𑀲𑀦𑁆𑀢𑀺, 𑀲𑀸 𑀢𑀸𑀤𑀺𑀲𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀧𑀸𑀡𑀸𑀢𑀺𑀧𑀸𑀢𑁄 𑀦𑀸𑀫. 𑀮𑀤𑁆𑀥𑀼𑀧𑀓𑁆𑀓𑀫𑀸𑀦𑀺 𑀳𑀺 𑀪𑀽𑀢𑀸𑀦𑀺 𑀦 𑀧𑀼𑀭𑀺𑀫𑀪𑀽𑀢𑀸𑀦𑀺 𑀯𑀺𑀬 𑀯𑀺𑀲𑀤𑀸𑀦𑀻𑀢𑀺 𑀲𑀫𑀸𑀦𑀚𑀸𑀢𑀺𑀬𑀸𑀦𑀁 𑀪𑀽𑀢𑀸𑀦𑀁 𑀓𑀸𑀭𑀡𑀁 𑀦 𑀳𑁄𑀦𑁆𑀢𑀻𑀢𑀺. 𑀏𑀓𑀲𑁆𑀲𑀧𑀺 𑀧𑀬𑁄𑀕𑀲𑁆𑀲 𑀲𑀳𑀲𑀸 𑀦𑀺𑀧𑁆𑀨𑀸𑀤𑀦𑀯𑀲𑁂𑀦 𑀓𑀺𑀘𑁆𑀘𑀲𑀸𑀥𑀺𑀓𑀸𑀬 𑀩𑀳𑀼𑀓𑁆𑀔𑀢𑁆𑀢𑀼𑀁 𑀧𑀯𑀢𑁆𑀢𑀚𑀯𑀦𑁂𑀳𑀺 𑀮𑀤𑁆𑀥𑀸𑀲𑁂𑀯𑀦𑀸𑀬 𑀘 𑀲𑀦𑁆𑀦𑀺𑀝𑁆𑀞𑀸𑀧𑀓𑀘𑁂𑀢𑀦𑀸𑀬 𑀯𑀲𑁂𑀦 𑀧𑀬𑁄𑀕𑀲𑁆𑀲 𑀫𑀳𑀦𑁆𑀢𑀪𑀸𑀯𑁄. 𑀲𑀢𑀺𑀧𑀺 𑀓𑀤𑀸𑀘𑀺 𑀔𑀼𑀤𑁆𑀤𑀓𑁂 𑀘𑁂𑀯 𑀫𑀳𑀦𑁆𑀢𑁂 𑀘 𑀧𑀸𑀡𑁂 𑀧𑀬𑁄𑀕𑀲𑁆𑀲 𑀲𑀫𑀪𑀸𑀯𑁂 𑀫𑀳𑀦𑁆𑀢𑀁 𑀳𑀦𑀦𑁆𑀢𑀲𑁆𑀲 𑀘𑁂𑀢𑀦𑀸 𑀢𑀺𑀩𑁆𑀩𑀢𑀭𑀸 𑀉𑀧𑁆𑀧𑀚𑁆𑀚𑀢𑀻𑀢𑀺 𑀯𑀢𑁆𑀣𑀼𑀲𑁆𑀲 𑀫𑀳𑀦𑁆𑀢𑀪𑀸𑀯𑁄𑀢𑀺 𑀢𑀤𑀼𑀪𑀬𑀁 𑀘𑁂𑀢𑀦𑀸𑀬 𑀩𑀮𑀯𑀪𑀸𑀯𑁂𑀦𑁂𑀯 𑀳𑁄𑀢𑀻𑀢𑀺 𑀆𑀳 ‘‘𑀧𑀬𑁄𑀕…𑀧𑁂… 𑀪𑀸𑀯𑀢𑁄’’𑀢𑀺. 𑀬𑀣𑀸𑀯𑀼𑀢𑁆𑀢𑀧𑀘𑁆𑀘𑀬𑀯𑀺𑀧𑀭𑀺𑀬𑀸𑀬𑁂𑀧𑀻𑀢𑀺 𑀧𑀬𑁄𑀕𑀯𑀢𑁆𑀣𑀼𑀆𑀤𑀺𑀧𑀘𑁆𑀘𑀬𑀸𑀦𑀁 𑀅𑀫𑀳𑀢𑁆𑀢𑁂𑀧𑀺. 𑀢𑀁𑀢𑀁𑀧𑀘𑁆𑀘𑀬𑁂𑀳𑀻𑀢𑀺 𑀕𑀼𑀡𑀯𑀦𑁆𑀢𑀢𑀸𑀤𑀺𑀧𑀘𑁆𑀘𑀬𑁂𑀳𑀺. 𑀏𑀢𑁆𑀣 𑀘 𑀳𑀦𑁆𑀢𑀩𑁆𑀩𑀲𑁆𑀲 𑀕𑀼𑀡𑀯𑀦𑁆𑀢𑀢𑀸𑀬 𑀫𑀳𑀸𑀲𑀸𑀯𑀚𑁆𑀚𑀢𑀸 𑀯𑀢𑁆𑀣𑀼𑀫𑀳𑀦𑁆𑀢𑀢𑀸𑀬 𑀯𑀺𑀬 𑀤𑀝𑁆𑀞𑀩𑁆𑀩𑀸. 𑀓𑀺𑀮𑁂𑀲𑀸𑀦𑀁 𑀉𑀧𑀓𑁆𑀓𑀫𑀸𑀦𑀁 𑀤𑁆𑀯𑀺𑀦𑁆𑀦𑀜𑁆𑀘 𑀫𑀼𑀤𑀼𑀢𑀸𑀬 𑀢𑀺𑀩𑁆𑀩𑀢𑀸𑀬 𑀘 𑀅𑀧𑁆𑀧𑀲𑀸𑀯𑀚𑁆𑀚𑀢𑀸 𑀫𑀳𑀸𑀲𑀸𑀯𑀚𑁆𑀚𑀢𑀸 𑀘 𑀬𑁄𑀚𑁂𑀢𑀩𑁆𑀩𑀸. 𑀧𑀸𑀡𑁄 𑀧𑀸𑀡𑀲𑀜𑁆𑀜𑀺𑀢𑀸 𑀯𑀥𑀓𑀘𑀺𑀢𑁆𑀢𑀜𑁆𑀘 𑀧𑀼𑀩𑁆𑀩𑀪𑀸𑀕𑀲𑀫𑁆𑀪𑀸𑀭𑀸, 𑀉𑀧𑀓𑁆𑀓𑀫𑁄 𑀯𑀥𑀓𑀘𑁂𑀢𑀦𑀸𑀲𑀫𑀼𑀝𑁆𑀞𑀸𑀧𑀺𑀢𑁄, 𑀧𑀜𑁆𑀘𑀲𑀫𑁆𑀪𑀸𑀭𑀯𑀢𑀻 𑀧𑀸𑀡𑀸𑀢𑀺𑀧𑀸𑀢𑀘𑁂𑀢𑀦𑀸𑀢𑀺 𑀲𑀸 𑀧𑀜𑁆𑀘𑀲𑀫𑁆𑀪𑀸𑀭𑀯𑀺𑀦𑀺𑀫𑀼𑀢𑁆𑀢𑀸 𑀤𑀝𑁆𑀞𑀩𑁆𑀩𑀸. 𑀏𑀲 𑀦𑀬𑁄 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀲𑀼𑀧𑀺.

𑀫𑀦𑁆𑀢𑀧𑀭𑀺𑀚𑀧𑁆𑀧𑀦𑁂𑀦 𑀧𑀭𑀲𑁆𑀲 𑀲𑀦𑁆𑀢𑀓𑀳𑀭𑀡𑀁 𑀯𑀺𑀚𑁆𑀚𑀸𑀫𑀬𑁄, 𑀯𑀺𑀦𑀸 𑀫𑀦𑁆𑀢𑁂𑀦 𑀧𑀭𑀲𑀦𑁆𑀢𑀓𑀲𑁆𑀲 𑀓𑀸𑀬𑀯𑀘𑀻𑀧𑀬𑁄𑀕𑁂𑀳𑀺 𑀆𑀓𑀟𑁆𑀠𑀦𑀁 𑀢𑀸𑀤𑀺𑀲𑀇𑀤𑁆𑀥𑀺𑀬𑁄𑀕𑁂𑀦 𑀇𑀤𑁆𑀥𑀺𑀫𑀬𑁄 𑀧𑀬𑁄𑀕𑁄𑀢𑀺 𑀅𑀤𑀺𑀦𑁆𑀦𑀸𑀤𑀸𑀦𑀲𑁆𑀲𑀧𑀺 𑀙 𑀧𑀬𑁄𑀕𑀸 𑀲𑀸𑀳𑀢𑁆𑀣𑀺𑀓𑀸𑀤𑀬𑁄 𑀯𑁂𑀤𑀺𑀢𑀩𑁆𑀩𑀸.

𑀅𑀪𑀺𑀪𑀯𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑀦𑁂 𑀫𑀺𑀘𑁆𑀙𑀸𑀘𑀸𑀭𑁄 𑀫𑀳𑀸𑀲𑀸𑀯𑀚𑁆𑀚𑁄, 𑀦 𑀢𑀣𑀸 𑀉𑀪𑀺𑀦𑁆𑀦𑀁 𑀲𑀫𑀸𑀦𑀘𑁆𑀙𑀦𑁆𑀤𑀪𑀸𑀯𑁂. ‘‘𑀘𑀢𑁆𑀢𑀸𑀭𑁄 𑀲𑀫𑁆𑀪𑀸𑀭𑀸𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀪𑀺𑀪𑀯𑀺𑀢𑁆𑀯𑀸 𑀯𑀻𑀢𑀺𑀓𑁆𑀓𑀫𑀦𑁂 𑀲𑀢𑀺𑀧𑀺 𑀫𑀕𑁆𑀕𑁂𑀦𑀫𑀕𑁆𑀕𑀧𑀝𑀺𑀧𑀢𑁆𑀢𑀺𑀅𑀥𑀺𑀯𑀸𑀲𑀦𑁂 𑀧𑀼𑀭𑀺𑀫𑀼𑀧𑁆𑀧𑀦𑁆𑀦𑀲𑁂𑀯𑀦𑀸𑀪𑀺𑀲𑀦𑁆𑀥𑀺𑀧𑀬𑁄𑀕𑀸𑀪𑀸𑀯𑀢𑁄 𑀫𑀺𑀘𑁆𑀙𑀸𑀘𑀸𑀭𑁄 𑀦 𑀳𑁄𑀢𑀺 𑀅𑀪𑀺𑀪𑀼𑀬𑁆𑀬𑀫𑀸𑀦𑀲𑁆𑀲𑀸’’𑀢𑀺 𑀯𑀤𑀦𑁆𑀢𑀺. 𑀲𑁂𑀯𑀦𑀘𑀺𑀢𑁆𑀢𑁂 𑀲𑀢𑀺 𑀧𑀬𑁄𑀕𑀸𑀪𑀸𑀯𑁄 𑀦 𑀧𑀫𑀸𑀡𑀁 𑀇𑀢𑁆𑀣𑀺𑀬𑀸 𑀲𑁂𑀯𑀦𑀧𑁆𑀧𑀬𑁄𑀕𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀅𑀪𑀸𑀯𑀢𑁄. 𑀧𑀼𑀭𑀺𑀲𑀲𑁆𑀲𑁂𑀯 𑀳𑀺 𑀬𑁂𑀪𑀼𑀬𑁆𑀬𑁂𑀦 𑀲𑁂𑀯𑀦𑀧𑁆𑀧𑀬𑁄𑀕𑁄 𑀳𑁄𑀢𑀻𑀢𑀺 𑀇𑀢𑁆𑀣𑀺𑀬𑀸 𑀧𑀼𑀭𑁂𑀢𑀭𑀁 𑀲𑁂𑀯𑀦𑀘𑀺𑀢𑁆𑀢𑀁 𑀉𑀧𑀝𑁆𑀞𑀸𑀧𑁂𑀢𑁆𑀯𑀸 𑀦𑀺𑀧𑀦𑁆𑀦𑀸𑀬𑀧𑀺 𑀫𑀺𑀘𑁆𑀙𑀸𑀘𑀸𑀭𑁄 𑀦 𑀲𑀺𑀬𑀸𑀢𑀺 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀧𑀼𑀭𑀺𑀲𑀲𑁆𑀲 𑀯𑀲𑁂𑀦 𑀉𑀓𑁆𑀓𑀁𑀲𑀢𑁄 𑀘𑀢𑁆𑀢𑀸𑀭𑁄 𑀲𑀫𑁆𑀪𑀸𑀭𑀸 𑀯𑀼𑀢𑁆𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀜𑁆𑀜𑀣𑀸 𑀇𑀢𑁆𑀣𑀺𑀬𑀸 𑀧𑀼𑀭𑀺𑀲𑀓𑀺𑀘𑁆𑀘𑀓𑀭𑀡𑀓𑀸𑀮𑁂 𑀧𑀼𑀭𑀺𑀲𑀲𑁆𑀲𑀧𑀺 𑀲𑁂𑀯𑀦𑀧𑁆𑀧𑀬𑁄𑀕𑀸𑀪𑀸𑀯𑀢𑁄 𑀫𑀺𑀘𑁆𑀙𑀸𑀘𑀸𑀭𑁄 𑀦 𑀲𑀺𑀬𑀸𑀢𑀺. 𑀓𑁂𑀘𑀺 𑀧𑀦 ‘‘𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀧𑀯𑀢𑁆𑀢𑀺𑀢𑀲𑁆𑀲 𑀢𑀻𑀡𑀺 𑀅𑀗𑁆𑀕𑀸𑀦𑀺, 𑀩𑀮𑀓𑁆𑀓𑀸𑀭𑁂𑀦 𑀧𑀯𑀢𑁆𑀢𑀺𑀢𑀲𑁆𑀲 𑀢𑀻𑀡𑀻𑀢𑀺 𑀲𑀩𑁆𑀩𑀸𑀦𑀺 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀘𑀢𑁆𑀢𑀸𑀭𑀻’’𑀢𑀺 𑀯𑀤𑀦𑁆𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀤𑀼𑀝𑁆𑀞𑀘𑀺𑀢𑁆𑀢𑀲𑁆𑀲 𑀅𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲 𑀨𑀭𑀼𑀲𑀓𑀸𑀬𑀯𑀘𑀻𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀨𑀭𑀼𑀲𑀘𑁂𑀢𑀦𑀸 𑀨𑀭𑀼𑀲𑀯𑀸𑀘𑀸. 𑀫𑀭𑀡𑀸𑀥𑀺𑀧𑁆𑀧𑀸𑀬𑁂 𑀧𑀦 𑀲𑀢𑀺 𑀅𑀢𑁆𑀣𑀲𑀺𑀤𑁆𑀥𑀺𑀢𑀤𑀪𑀸𑀯𑁂𑀲𑀼 𑀧𑀸𑀡𑀸𑀢𑀺𑀧𑀸𑀢𑀸 𑀩𑁆𑀬𑀸𑀧𑀸𑀤𑀸 𑀘 𑀳𑁄𑀦𑁆𑀢𑀻𑀢𑀺. 𑀬𑀁 𑀧𑀢𑀺 𑀨𑀭𑀼𑀲𑀯𑀸𑀘𑀸 𑀧𑀬𑀼𑀚𑁆𑀚𑀢𑀺, 𑀢𑀲𑁆𑀲 𑀲𑀫𑁆𑀫𑀼𑀔𑀸𑀯 𑀲𑀻𑀲𑀁 𑀏𑀢𑀺. ‘‘𑀧𑀭𑀫𑁆𑀫𑀼𑀔𑁂𑀧𑀺 𑀨𑀭𑀼𑀲𑀯𑀸𑀘𑀸 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺.

𑀬𑀤𑀺 𑀘𑁂𑀢𑀦𑀸𑀬 𑀲𑀩𑁆𑀩𑀤𑀸 𑀓𑀫𑁆𑀫𑀧𑀣𑀪𑀸𑀯𑀸𑀪𑀸𑀯𑀢𑁄 𑀅𑀦𑀺𑀬𑀢𑁄 𑀓𑀫𑁆𑀫𑀧𑀣𑀪𑀸𑀯𑁄𑀢𑀺 𑀓𑀫𑁆𑀫𑀧𑀣𑀭𑀸𑀲𑀺𑀫𑁆𑀳𑀺 𑀅𑀯𑀘𑀦𑀁, 𑀦𑀦𑀼 𑀅𑀪𑀺𑀚𑁆𑀛𑀸𑀤𑀻𑀦𑀫𑁆𑀧𑀺 𑀓𑀫𑁆𑀫𑀧𑀣𑀁 𑀅𑀧𑁆𑀧𑀢𑁆𑀢𑀸𑀦𑀁 𑀅𑀢𑁆𑀣𑀺𑀢𑀸𑀬 𑀅𑀦𑀺𑀬𑀢𑁄 𑀓𑀫𑁆𑀫𑀧𑀣𑀪𑀸𑀯𑁄𑀢𑀺 𑀢𑁂𑀲𑀫𑁆𑀧𑀺 𑀓𑀫𑁆𑀫𑀧𑀣𑀭𑀸𑀲𑀺𑀬𑀁 𑀅𑀯𑀘𑀦𑀁 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺, 𑀓𑀫𑁆𑀫𑀧𑀣𑀢𑀸𑀢𑀁𑀲𑀪𑀸𑀕𑀢𑀸𑀳𑀺 𑀢𑁂𑀲𑀁 𑀢𑀢𑁆𑀣 𑀯𑀼𑀢𑁆𑀢𑀢𑁆𑀢𑀸. 𑀬𑀤𑀺 𑀏𑀯𑀁 𑀘𑁂𑀢𑀦𑀸𑀧𑀺 𑀢𑀢𑁆𑀣 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸𑀢𑀺? 𑀲𑀘𑁆𑀘𑀫𑁂𑀢𑀁, 𑀲𑀸 𑀧𑀦 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀓𑀸𑀢𑀺 𑀧𑀸𑀓𑀝𑁄 𑀢𑀲𑁆𑀲𑀸 𑀓𑀫𑁆𑀫𑀧𑀣𑀪𑀸𑀯𑁄𑀢𑀺 𑀦 𑀯𑀼𑀢𑁆𑀢𑀁 𑀲𑀺𑀬𑀸. 𑀘𑁂𑀢𑀦𑀸𑀬 𑀳𑀺 ‘‘𑀘𑁂𑀢𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀁 𑀯𑀤𑀸𑀫𑀺,’’‘‘𑀢𑀺𑀯𑀺𑀥𑀸, 𑀪𑀺𑀓𑁆𑀔𑀯𑁂, 𑀓𑀸𑀬𑀲𑀜𑁆𑀘𑁂𑀢𑀦𑀸 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫’’𑀦𑁆𑀢𑀺𑀆𑀤𑀺𑀯𑀘𑀦𑁂𑀳𑀺 𑀓𑀫𑁆𑀫𑀪𑀸𑀯𑁄 𑀤𑀻𑀧𑀺𑀢𑁄. 𑀓𑀫𑁆𑀫𑀁𑀬𑁂𑀯 𑀘 𑀲𑀼𑀕𑀢𑀺𑀤𑀼𑀕𑁆𑀕𑀢𑀻𑀦𑀁 𑀢𑀤𑀼𑀧𑁆𑀧𑀚𑁆𑀚𑀦𑀲𑀼𑀔𑀤𑀼𑀓𑁆𑀔𑀸𑀦𑀜𑁆𑀘 𑀧𑀣𑀪𑀸𑀯𑁂𑀦 𑀧𑀯𑀢𑁆𑀢𑀁 𑀓𑀫𑁆𑀫𑀧𑀣𑁄𑀢𑀺 𑀯𑀼𑀘𑁆𑀘𑀢𑀻𑀢𑀺 𑀧𑀸𑀓𑀝𑁄 𑀢𑀲𑁆𑀲𑀸 𑀓𑀫𑁆𑀫𑀧𑀣𑀪𑀸𑀯𑁄. 𑀅𑀪𑀺𑀚𑁆𑀛𑀸𑀤𑀻𑀦𑀁 𑀧𑀦 𑀘𑁂𑀢𑀦𑀸𑀲𑀫𑀻𑀳𑀦𑀪𑀸𑀯𑁂𑀦 𑀲𑀼𑀘𑀭𑀺𑀢𑀤𑀼𑀘𑁆𑀘𑀭𑀺𑀢𑀪𑀸𑀯𑁄, 𑀘𑁂𑀢𑀦𑀸𑀚𑀦𑀺𑀢𑀢𑀁𑀩𑀦𑁆𑀥𑀢𑀺𑀪𑀸𑀯𑁂𑀦 𑀲𑀼𑀕𑀢𑀺𑀤𑀼𑀕𑁆𑀕𑀢𑀺𑀢𑀤𑀼𑀧𑁆𑀧𑀚𑁆𑀚𑀦𑀲𑀼𑀔𑀤𑀼𑀓𑁆𑀔𑀸𑀦𑀁 𑀧𑀣𑀪𑀸𑀯𑁄 𑀘𑀸𑀢𑀺 𑀦 𑀢𑀣𑀸 𑀧𑀸𑀓𑀝𑁄 𑀓𑀫𑁆𑀫𑀧𑀣𑀪𑀸𑀯𑁄𑀢𑀺 𑀢𑁂 𑀏𑀯 𑀓𑀫𑁆𑀫𑀧𑀣𑀭𑀸𑀲𑀺𑀪𑀸𑀯𑁂𑀦 𑀯𑀼𑀢𑁆𑀢𑀸. 𑀅𑀢𑀣𑀸𑀚𑀸𑀢𑀺𑀬𑀢𑁆𑀢𑀸 𑀯𑀸 𑀘𑁂𑀢𑀦𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀦 𑀯𑀼𑀢𑁆𑀢𑀸 𑀲𑀺𑀬𑀸. 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀆𑀭𑀫𑁆𑀫𑀡𑀸𑀦𑁂𑀯 𑀢𑀩𑁆𑀩𑀺𑀭𑀢𑀺𑀆𑀭𑀫𑁆𑀫𑀡𑀸𑀦𑀻𑀢𑀺 𑀧𑀜𑁆𑀘 𑀲𑀺𑀓𑁆𑀔𑀸𑀧𑀤𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸 𑀏𑀯𑀸𑀢𑀺 𑀯𑀘𑀦𑁂𑀦 𑀅𑀤𑀺𑀦𑁆𑀦𑀸𑀤𑀸𑀦𑀸𑀤𑀻𑀦𑀁 𑀲𑀢𑁆𑀢𑀸𑀭𑀫𑁆𑀫𑀡𑀢𑀸𑀯𑀘𑀦𑀲𑁆𑀲 𑀯𑀺𑀭𑁄𑀥𑀁 𑀘𑁄𑀤𑁂𑀢𑀺. 𑀢𑀣𑀸 𑀳𑀺 𑀯𑀓𑁆𑀔𑀢𑀺 ‘‘𑀯𑀻𑀢𑀺𑀓𑁆𑀓𑀫𑀺𑀢𑀩𑁆𑀩𑀢𑁄𑀬𑁂𑀯 𑀳𑀺 𑀯𑁂𑀭𑀫𑀡𑀻 𑀦𑀸𑀫 𑀳𑁄𑀢𑀻’’𑀢𑀺. 𑀲𑀬𑀫𑁂𑀯 𑀧𑀭𑀺𑀳𑀭𑀺𑀲𑁆𑀲𑀢𑀻𑀢𑀺 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂 𑀧𑀜𑁆𑀳𑀧𑀼𑀘𑁆𑀙𑀓𑀯𑀡𑁆𑀡𑀦𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀢𑀢𑁆𑀣 𑀳𑀺 ‘‘𑀬𑀲𑁆𑀫𑀸 𑀲𑀢𑁆𑀢𑁄𑀢𑀺 𑀲𑀗𑁆𑀔𑁆𑀬𑀁 𑀕𑀢𑁂 𑀲𑀗𑁆𑀔𑀸𑀭𑁂𑀬𑁂𑀯 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀢𑀲𑁆𑀫𑀸 𑀧𑀭𑀺𑀢𑁆𑀢𑀸𑀭𑀫𑁆𑀫𑀡𑀸𑀢𑀺 𑀯𑀼𑀘𑁆𑀘𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁.

𑀤𑀼𑀕𑁆𑀕𑀢𑀢𑀸𑀤𑀻𑀦𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀅𑀮𑀤𑁆𑀥𑀸𑀮𑀸𑀪𑁄 𑀮𑀤𑁆𑀥𑀯𑀺𑀦𑀸𑀲𑁄 𑀇𑀘𑁆𑀙𑀺𑀢𑀸𑀦𑀁 𑀪𑁄𑀕𑀸𑀦𑀁 𑀓𑀺𑀘𑁆𑀙𑀧𑀝𑀺𑀮𑀸𑀪𑁄 𑀭𑀸𑀚𑀸𑀤𑀻𑀳𑀺 𑀲𑀸𑀥𑀸𑀭𑀡𑀪𑁄𑀕𑀢𑀸 𑀤𑀼𑀓𑁆𑀔𑀯𑀺𑀳𑀸𑀭𑁄 𑀲𑀸𑀲𑀗𑁆𑀓𑀯𑀺𑀳𑀸𑀭𑁄’’𑀢𑀺 𑀏𑀯𑀫𑀸𑀤𑀬𑁄 𑀲𑀗𑁆𑀕𑀳𑀺𑀢𑀸. 𑀓𑁂𑀘𑀺 𑀧𑀦 ‘‘𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀪𑁄𑀕𑀚𑀸𑀦𑀺𑀆𑀤𑀬𑁄 𑀦𑀺𑀲𑁆𑀲𑀦𑁆𑀤𑀨𑀮’’𑀦𑁆𑀢𑀺 𑀯𑀤𑀦𑁆𑀢𑀺.

𑀓𑀼𑀲𑀮𑀓𑀫𑁆𑀫𑀧𑀣𑀓𑀣𑀸𑀯𑀡𑁆𑀡𑀦𑀸

𑀢𑀸𑀲𑀜𑁆𑀘 𑀯𑀺𑀭𑀢𑀻𑀦𑀁 𑀘𑁂𑀢𑀦𑀸𑀲𑀫𑁆𑀧𑀬𑀼𑀢𑁆𑀢𑀢𑁆𑀢𑀸 𑀘𑁂𑀢𑀦𑀸𑀤𑁆𑀯𑀸𑀭𑁂𑀦 𑀲𑀼𑀕𑀢𑀺𑀤𑀼𑀕𑁆𑀕𑀢𑀺𑀢𑀤𑀼𑀧𑁆𑀧𑀚𑁆𑀚𑀦𑀲𑀼𑀔𑀤𑀼𑀓𑁆𑀔𑀸𑀦𑀁 𑀧𑀣𑀪𑀸𑀯𑁄 𑀬𑀼𑀢𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀓𑀫𑁆𑀫𑀧𑀣𑀲𑀁𑀲𑀦𑁆𑀤𑀦𑀓𑀣𑀸𑀯𑀡𑁆𑀡𑀦𑀸

𑀢𑀣𑀸𑀢𑀺 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀸𑀦𑀁. 𑀓𑁂𑀘𑀻𑀢𑀺 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑀁 𑀲𑀦𑁆𑀥𑀸𑀬𑀸𑀳. 𑀲𑁄 𑀳𑀺 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀸𑀦𑀫𑁂𑀯 𑀤𑀼𑀲𑁆𑀲𑀻𑀮𑁆𑀬𑀸𑀤𑀻𑀦𑀁 𑀲𑀼𑀲𑀻𑀮𑁆𑀬𑀸𑀤𑀻𑀦𑀜𑁆𑀘 𑀓𑀫𑁆𑀫𑀧𑀣𑁂𑀳𑀺 𑀅𑀢𑁆𑀣𑀢𑁄 𑀦𑀸𑀦𑀢𑁆𑀢𑀸𑀪𑀸𑀯𑀤𑀲𑁆𑀲𑀦𑀁, 𑀢𑁂𑀲𑀁 𑀯𑀸 𑀨𑀲𑁆𑀲𑀤𑁆𑀯𑀸𑀭𑀸𑀤𑀻𑀳𑀺 𑀅𑀯𑀺𑀭𑁄𑀥𑀪𑀸𑀯𑁂𑀦 𑀤𑀻𑀧𑀦𑀁 𑀓𑀫𑁆𑀫𑀧𑀣𑀲𑀁𑀲𑀦𑁆𑀤𑀦𑀦𑁆𑀢𑀺 𑀯𑀤𑀢𑀺. 𑀓𑀫𑁆𑀫𑀧𑀣𑀢𑀸 𑀦𑀢𑁆𑀣𑀻𑀢𑀺 𑀏𑀢𑁂𑀦 𑀬𑀣𑀸𑀯𑀼𑀢𑁆𑀢𑀸𑀦𑀁 𑀅𑀲𑀁𑀯𑀭𑀲𑀁𑀯𑀭𑀸𑀦𑀁 𑀢𑁂𑀲𑀁 𑀯𑀸𑀤𑁂 𑀓𑀫𑁆𑀫𑀧𑀣𑀲𑀁𑀲𑀦𑁆𑀤𑀦𑁂 𑀅𑀲𑀗𑁆𑀕𑀳𑀺𑀢𑀢𑀁 𑀤𑀲𑁆𑀲𑁂𑀢𑀺. 𑀬𑁂 𑀧𑀦 𑀲𑀗𑁆𑀕𑀳𑀁 𑀮𑀪𑀦𑁆𑀢𑀺, 𑀢𑁂𑀲𑀁 𑀕𑀳𑀡𑁂 𑀧𑀬𑁄𑀚𑀦𑀸𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀢𑀺𑀯𑀺𑀥…𑀧𑁂… 𑀤𑀲𑁆𑀲𑀦𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀧𑀼𑀭𑀺𑀫𑀧𑀓𑁆𑀔𑁂 𑀲𑀗𑁆𑀔𑁂𑀧𑀢𑁄 𑀤𑁄𑀲𑀁 𑀯𑀢𑁆𑀯𑀸 𑀤𑀼𑀢𑀺𑀬𑀧𑀓𑁆𑀔𑁂𑀧𑀺 𑀯𑀢𑁆𑀢𑀼𑀁 ‘‘𑀦 𑀘 𑀤𑀼𑀘𑁆𑀘𑀭𑀺𑀢𑀸𑀦’’𑀦𑁆𑀢𑀺𑀆𑀤𑀺𑀫𑀸𑀳. 𑀢𑁂𑀦 𑀬𑁂 𑀤𑀼𑀘𑁆𑀘𑀭𑀺𑀢𑀲𑀼𑀘𑀭𑀺𑀢𑀅𑀲𑀁𑀯𑀭𑀲𑀁𑀯𑀭𑀸 𑀅𑀦𑀼𑀘𑀭𑀻𑀬𑀦𑁆𑀢𑀺, 𑀢𑁂𑀲𑀁 𑀓𑀸𑀬𑀓𑀫𑁆𑀫𑀸𑀤𑀺𑀢𑀸 𑀯𑀺𑀥𑀻𑀬𑀢𑀻𑀢𑀺 𑀤𑀲𑁆𑀲𑁂𑀢𑀺. ‘‘𑀧𑀜𑁆𑀘𑀨𑀲𑁆𑀲𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀦𑁆𑀦𑁄 𑀅𑀲𑀁𑀯𑀭𑁄 𑀅𑀓𑀼𑀲𑀮𑀁 𑀫𑀦𑁄𑀓𑀫𑁆𑀫𑀫𑁂𑀯 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀳𑀺 𑀯𑀼𑀢𑁆𑀢𑀦𑁆𑀢𑀺. 𑀬𑀤𑀺 𑀘𑀸𑀢𑀺𑀆𑀤𑀺𑀦𑀸 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀸𑀪𑀸𑀯𑀫𑀸𑀳. 𑀉𑀧𑁆𑀧𑀢𑁆𑀢𑀺 𑀦 𑀯𑀢𑁆𑀢𑀩𑁆𑀩𑀸𑀢𑀺 𑀓𑀫𑁆𑀫𑀧𑀣…𑀧𑁂… 𑀯𑀤𑀦𑁆𑀢𑁂𑀳𑀺 ‘‘𑀫𑀦𑁄𑀓𑀫𑁆𑀫𑀁 𑀙𑀨𑀲𑁆𑀲𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀬𑀤𑀺 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀸𑀦𑁂𑀯 𑀤𑀼𑀲𑁆𑀲𑀻𑀮𑁆𑀬𑀸𑀤𑀻𑀦𑀺 𑀓𑀸𑀬𑀓𑀫𑁆𑀫𑀸𑀤𑀺𑀦𑀸𑀫𑁂𑀳𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀸𑀦𑀻𑀢𑀺 𑀏𑀯𑀁 𑀯𑀤𑀦𑁆𑀢𑁂𑀳𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀫𑀦𑁄𑀓𑀫𑁆𑀫𑀲𑁆𑀲 𑀙𑀨𑀲𑁆𑀲𑀤𑁆𑀯𑀸𑀭𑀯𑀲𑁂𑀦 𑀉𑀧𑁆𑀧𑀢𑁆𑀢𑀺 𑀦 𑀯𑀢𑁆𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. 𑀢𑀁𑀢𑀁𑀓𑀫𑁆𑀫𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸𑀢𑀺 ‘‘𑀢𑀺𑀯𑀺𑀥𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁 𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀫𑁂𑀯 𑀳𑁄𑀢𑀻’’𑀢𑀺𑀆𑀤𑀺𑀁 (𑀯𑀺𑀪. 𑁯𑁧𑁩) 𑀲𑀦𑁆𑀥𑀸𑀬𑀸𑀳.

𑀓𑀫𑁆𑀫𑀦𑁆𑀢𑀭𑀫𑁆𑀧𑀺 𑀢𑀁𑀤𑁆𑀯𑀸𑀭𑀺𑀓𑀓𑀫𑁆𑀫𑀫𑁂𑀯 𑀲𑀺𑀬𑀸𑀢𑀺 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀓𑀲𑁆𑀲 𑀯𑀘𑀻𑀓𑀫𑁆𑀫𑀸𑀤𑀺𑀪𑀸𑀯𑀫𑀸𑀲𑀗𑁆𑀓𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀓𑁂𑀲𑀜𑁆𑀘𑀺 𑀅𑀲𑀁𑀯𑀭𑀸𑀦𑀁 𑀲𑀁𑀯𑀭𑀸𑀦𑀜𑁆𑀘 𑀓𑀫𑁆𑀫𑀧𑀣𑀢𑀸 𑀦𑀢𑁆𑀣𑀺, 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀜𑁆𑀘 𑀓𑀫𑁆𑀫𑀧𑀣𑁂𑀳𑀺 𑀦𑀸𑀦𑀢𑁆𑀢𑀸𑀪𑀸𑀯𑀤𑀲𑁆𑀲𑀦𑁂𑀦 𑀧𑀬𑁄𑀚𑀦𑀁 𑀦𑀢𑁆𑀣𑀺, 𑀦 𑀘 𑀤𑀼𑀘𑁆𑀘𑀭𑀺𑀢𑀸𑀤𑀻𑀦𑀁 𑀨𑀲𑁆𑀲𑀤𑁆𑀯𑀸𑀭𑀸𑀦𑀁 𑀯𑀲𑁂𑀦 𑀉𑀧𑁆𑀧𑀢𑁆𑀢𑀺 𑀤𑀻𑀧𑀺𑀢𑀸, 𑀦 𑀘𑀸𑀬𑀁 𑀯𑀺𑀥𑀺 𑀦𑀺𑀭𑀯𑀲𑁂𑀲𑀲𑀗𑁆𑀕𑀸𑀳𑀺𑀓𑀸, 𑀓𑀫𑁆𑀫𑀸𑀦𑀜𑁆𑀘 𑀲𑀗𑁆𑀓𑀭𑁄 𑀆𑀧𑀚𑁆𑀚𑀢𑀺, 𑀅𑀝𑁆𑀞𑀓𑀣𑀸𑀬𑀜𑁆𑀘 𑀧𑀼𑀩𑁆𑀩𑀸𑀧𑀭𑀯𑀺𑀭𑁄𑀥𑁄, 𑀢𑀲𑁆𑀫𑀸𑀢𑀺 𑀅𑀢𑁆𑀣𑁄. 𑀲𑀫𑀸𑀦𑀦𑀸𑀫𑀢𑀸 𑀓𑀸𑀬𑀓𑀫𑁆𑀫𑀸𑀤𑀺𑀢𑀸. 𑀲𑀸𑀫𑀜𑁆𑀜𑀦𑀸𑀫𑀸𑀯𑀺𑀚𑀳𑀦𑀁 𑀓𑀸𑀬𑀓𑀫𑁆𑀫𑀸𑀤𑀺𑀪𑀸𑀯𑀸𑀯𑀺𑀚𑀳𑀦𑀁. 𑀉𑀪𑀬𑁂𑀲𑀦𑁆𑀢𑀺 𑀓𑀫𑁆𑀫𑀧𑀣𑀸𑀓𑀫𑁆𑀫𑀧𑀣𑀸𑀦𑀁. 𑀉𑀧𑁆𑀧𑀢𑁆𑀢𑀺𑀧𑀭𑀺𑀬𑀸𑀬𑀯𑀘𑀦𑀸𑀪𑀸𑀯𑀢𑁄𑀢𑀺 𑀏𑀢𑁂𑀦 𑀨𑀲𑁆𑀲𑀤𑁆𑀯𑀸𑀭𑀅𑀲𑀁𑀯𑀭𑀤𑁆𑀯𑀸𑀭𑀸𑀤𑀻𑀦𑀁 𑀢𑀁𑀤𑁆𑀯𑀸𑀭𑀺𑀓𑀓𑀫𑁆𑀫𑀸𑀦𑀜𑁆𑀘 𑀅𑀢𑁆𑀣𑀢𑁄 𑀦𑀸𑀦𑀢𑁆𑀢𑀸𑀪𑀸𑀯𑁂𑀧𑀺 𑀢𑀣𑀸 𑀢𑀣𑀸 𑀧𑀯𑀢𑁆𑀢𑀤𑁂𑀲𑀦𑀸𑀯𑀲𑁂𑀦 𑀢𑁂 𑀯𑀺𑀘𑀸𑀭𑀺𑀢𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀅𑀓𑀼𑀲𑀮𑀁 𑀓𑀸𑀬𑀓𑀫𑁆𑀫𑀁 𑀧𑀜𑁆𑀘𑀨𑀲𑁆𑀲𑀤𑁆𑀯𑀸𑀭𑀯𑀲𑁂𑀦 𑀦 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀓𑁄 𑀤𑀼𑀢𑀺𑀬𑀯𑀺𑀦𑀺𑀘𑁆𑀙𑀬𑁄.

𑀓𑀸𑀬𑁂 𑀯𑀸𑀘𑀸𑀬 𑀘…𑀧𑁂… 𑀲𑀺𑀤𑁆𑀥𑀺𑀢𑁄𑀢𑀺 𑀏𑀢𑁂𑀦 𑀘𑁄𑀧𑀦𑀧𑁆𑀧𑀢𑁆𑀢𑀁 𑀅𑀓𑀼𑀲𑀮𑀁 𑀫𑀦𑁄𑀓𑀫𑁆𑀫𑀁 𑀘𑁄𑀧𑀦𑀁 𑀅𑀧𑁆𑀧𑀢𑁆𑀢𑀢𑁄 𑀯𑀺𑀲𑁂𑀲𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀬𑀯𑀘𑀻𑀓𑀫𑁆𑀫’’𑀦𑁆𑀢𑀺 𑀯𑀼𑀢𑁆𑀢𑀁, 𑀦 𑀧𑀦 𑀓𑀸𑀬𑀯𑀘𑀻𑀓𑀫𑁆𑀫𑀪𑀸𑀯𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦 𑀓𑀸𑀬𑀯𑀘𑀻𑀕𑀳𑀡𑀁 𑀬𑀣𑀸𑀯𑀼𑀢𑁆𑀢𑀘𑁄𑀧𑀦𑀧𑁆𑀧𑀢𑁆𑀢𑀁 𑀏𑀯 𑀯𑀺𑀪𑀸𑀯𑁂𑀢𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯𑀸𑀳 𑁋 ‘‘𑀘𑁄𑀧𑀦𑀧𑁆𑀧𑀢𑁆𑀢𑀁 𑀅𑀓𑀼𑀲𑀮𑀁 𑀓𑀸𑀬𑀤𑁆𑀯𑀸𑀭𑁂 𑀯𑀘𑀻𑀤𑁆𑀯𑀸𑀭𑁂 𑀘 𑀫𑀦𑁄𑀓𑀫𑁆𑀫𑀁 𑀳𑁄𑀢𑀻’’𑀢𑀺. 𑀢𑀁-𑀲𑀤𑁆𑀤𑁂 𑀯𑀼𑀢𑁆𑀢𑁂 𑀬𑀁-𑀲𑀤𑁆𑀤𑁄 𑀅𑀩𑁆𑀬𑀪𑀺𑀘𑀸𑀭𑀺𑀢𑀲𑀫𑁆𑀩𑀦𑁆𑀥𑀢𑀸𑀬 𑀯𑀼𑀢𑁆𑀢𑁄𑀬𑁂𑀯 𑀳𑁄𑀢𑀻𑀢𑀺 𑀓𑀢𑁆𑀯𑀸 ‘‘𑀬𑀁 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀉𑀧𑁆𑀧𑀸𑀤𑀫𑀢𑁆𑀢𑀧𑀭𑀺𑀘𑁆𑀙𑀺𑀦𑁆𑀦𑁂𑀦𑀸𑀢𑀺 𑀙𑀨𑀲𑁆𑀲𑀤𑁆𑀯𑀸𑀭𑀺𑀓𑀓𑀫𑁆𑀫𑁂𑀦𑀸𑀢𑀺 𑀅𑀢𑁆𑀣𑁄. 𑀫𑀢𑁆𑀢-𑀲𑀤𑁆𑀤𑁂𑀦 𑀯𑀺𑀲𑁂𑀲𑀦𑀺𑀯𑀢𑁆𑀢𑀺𑀅𑀢𑁆𑀣𑁂𑀦 𑀫𑀦𑁄𑀓𑀫𑁆𑀫𑀢𑀸𑀯𑀺𑀲𑁂𑀲𑀁 𑀦𑀺𑀯𑀢𑁆𑀢𑁂𑀢𑀺. 𑀦𑀺𑀬𑀫𑀲𑁆𑀲 𑀏𑀯-𑀲𑀤𑁆𑀤𑀲𑁆𑀲 𑀅𑀓𑀢𑀢𑁆𑀢𑀸 ‘‘𑀓𑀸𑀬𑀯𑀘𑀻𑀓𑀫𑁆𑀫𑀫𑁂𑀯 𑀳𑁄𑀢𑀻’’𑀢𑀺 𑀅𑀯𑀼𑀢𑁆𑀢𑀢𑁆𑀢𑀸. 𑀇𑀤𑀸𑀦𑀺 𑀦𑀺𑀬𑀫𑀸𑀓𑀭𑀡𑁂𑀦 𑀮𑀤𑁆𑀥𑀕𑀼𑀡𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀧𑀦 𑀲𑀩𑁆𑀩𑀫𑁆𑀧𑀻’’𑀢𑀺𑀆𑀤𑀺𑀫𑀸𑀳.

‘‘𑀦𑀺𑀬𑀫𑀲𑁆𑀲 𑀅𑀓𑀢𑀢𑁆𑀢𑀸’’𑀢𑀺𑀆𑀤𑀺 𑀧𑀼𑀭𑀺𑀫𑀦𑀬𑁄𑀢𑀺 𑀅𑀥𑀺𑀧𑁆𑀧𑁂𑀢𑁄. 𑀯𑀢𑁆𑀢𑀼𑀅𑀥𑀺𑀧𑁆𑀧𑀸𑀬𑀸𑀦𑀼𑀭𑁄𑀥𑀺𑀦𑀻 𑀲𑀤𑁆𑀤𑀧𑁆𑀧𑀯𑀢𑁆𑀢𑀻𑀢𑀺 𑀲𑀫𑀸𑀲𑀧𑀤𑁂 𑀏𑀓𑀤𑁂𑀲𑁄𑀧𑀺 𑀆𑀓𑀟𑁆𑀠𑀻𑀬𑀢𑀺 𑀅𑀥𑀺𑀓𑀸𑀭𑀯𑀲𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀓𑀫𑁆𑀫-𑀲𑀤𑁆𑀤𑀫𑀢𑁆𑀢𑁂𑀦 𑀲𑀫𑁆𑀩𑀦𑁆𑀥𑀁 𑀓𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀬𑀁 𑀧𑀦 𑀯𑀤𑀦𑁆𑀢𑀻𑀢𑀺𑀆𑀤𑀺𑀦𑀸 𑀏𑀢𑁆𑀣 𑀧𑀤𑀓𑀸𑀭𑀫𑀢𑀲𑁆𑀲 𑀅𑀬𑀼𑀢𑁆𑀢𑀢𑀁 𑀤𑀲𑁆𑀲𑁂𑀢𑀺. 𑀢𑀢𑁆𑀣 𑀘𑁂𑀢𑀦𑀸𑀧𑀓𑁆𑀔𑀺𑀓𑀸𑀦𑀦𑁆𑀢𑀺 𑀓𑀸𑀬𑀯𑀘𑀻𑀓𑀫𑁆𑀫𑀪𑀽𑀢𑀘𑁂𑀢𑀦𑀸𑀧𑀓𑁆𑀔𑀺𑀓𑀸𑀦𑀁. 𑀲𑀢𑀦𑁆𑀢𑀺 𑀲𑀫𑀸𑀦𑀸𑀦𑀁. 𑀢𑀁𑀢𑀁𑀤𑁆𑀯𑀸𑀭𑀓𑀫𑁆𑀫𑀧𑀣𑀸𑀦𑀜𑁆𑀘𑀸𑀢𑀺 𑀇𑀤𑀁 𑀇𑀫𑀲𑁆𑀲 𑀘𑀺𑀢𑁆𑀢𑀲𑁆𑀲 𑀓𑀫𑁆𑀫𑀧𑀣𑀪𑀸𑀯𑁂𑀦 𑀧𑀯𑀢𑁆𑀢𑀁 𑀓𑀸𑀮𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀲𑀩𑁆𑀩𑀤𑀸, 𑀓𑀫𑁆𑀫𑀧𑀣𑀪𑀸𑀯𑁂𑀦𑁂𑀯 𑀧𑀯𑀢𑁆𑀢𑀦𑀢𑁄. 𑀘-𑀲𑀤𑁆𑀤𑁂𑀦 𑀯𑀸 𑀅𑀓𑀫𑁆𑀫𑀧𑀣𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀅𑀣 𑀯𑀸 𑀢𑀁𑀢𑀁𑀤𑁆𑀯𑀸𑀭𑀸 𑀘 𑀢𑀁𑀢𑀁𑀤𑁆𑀯𑀸𑀭𑀓𑀫𑁆𑀫𑀧𑀣𑀸 𑀘 𑀢𑀁𑀢𑀁𑀤𑁆𑀯𑀸𑀭𑀓𑀫𑁆𑀫𑀧𑀣𑀸𑀢𑀺 ‘‘𑀢𑀁𑀢𑀁𑀤𑁆𑀯𑀸𑀭𑀸’’𑀢𑀺 𑀧𑀤𑁂𑀦 𑀅𑀓𑀫𑁆𑀫𑀧𑀣𑀸𑀦𑀁 𑀲𑀁𑀯𑀭𑀸𑀦𑀁 𑀲𑀗𑁆𑀕𑀳𑁄 𑀤𑀝𑁆𑀞𑀩𑁆𑀩𑁄. 𑀢𑁂𑀦 𑀲𑀪𑀸𑀯𑁂𑀦𑀸𑀢𑀺 𑀫𑀦𑁄𑀓𑀫𑁆𑀫𑀲𑁆𑀲 𑀤𑁆𑀯𑀸𑀭𑀪𑀸𑀯𑁂𑀦, 𑀦 𑀅𑀢𑁆𑀢𑀦𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀏𑀯𑀫𑀺𑀥𑀸𑀧𑀻𑀢𑀺 𑀘𑀺𑀢𑁆𑀢𑀚𑀦𑀺𑀢𑁄 𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀲𑁆𑀲 𑀓𑀫𑁆𑀫𑀲𑁆𑀲 𑀤𑁆𑀯𑀸𑀭𑀪𑀸𑀯𑁄 𑀘𑀺𑀢𑁆𑀢𑁂𑀧𑀺 𑀉𑀧𑀘𑀭𑀺𑀢𑁄𑀢𑀺 𑀅𑀢𑁆𑀣𑁄. 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺 𑀅𑀦𑀦𑁆𑀢𑀭𑀧𑀘𑁆𑀘𑀬𑀪𑀽𑀢𑀫𑀦𑁄𑀭𑀳𑀺𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀪𑀸𑀯𑀢𑁄𑀢𑀺.

𑀤𑁆𑀯𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀫𑀸𑀪𑀸𑀯𑀦𑀺𑀬𑀫𑀸𑀪𑀸𑀯𑁂 𑀲𑀩𑁆𑀩𑀸𑀭𑀫𑁆𑀫𑀡𑀢𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀗𑁆𑀕𑀡𑁆𑀳𑀸𑀢𑀺. 𑀦 𑀳𑀺…𑀧𑁂… 𑀅𑀢𑁆𑀣𑀻𑀢𑀺 𑀧𑀥𑀸𑀦𑁂 𑀅𑀲𑀫𑁆𑀪𑀯𑀢𑁄 𑀅𑀧𑁆𑀧𑀥𑀸𑀦𑀁 𑀅𑀥𑀺𑀓𑀭𑀻𑀬𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀥𑀫𑁆𑀫𑀼𑀤𑁆𑀤𑁂𑀲𑀯𑀸𑀭𑀓𑀣𑀸

𑀨𑀲𑁆𑀲𑀧𑀜𑁆𑀘𑀫𑀓𑀭𑀸𑀲𑀺𑀯𑀡𑁆𑀡𑀦𑀸

‘‘𑀢𑀲𑁆𑀫𑀺𑀁 𑀲𑀫𑀬𑁂 𑀨𑀲𑁆𑀲𑁄 𑀳𑁄𑀢𑀻’’𑀢𑀺𑀆𑀤𑀺𑀓𑀸𑀬 𑀧𑀸𑀴𑀺𑀬𑀸 𑀨𑀲𑁆𑀲𑀸𑀤𑀻𑀦𑀁 𑀓𑀸𑀫𑀸𑀯𑀘𑀭𑀢𑀸𑀤𑀺𑀤𑀲𑁆𑀲𑀦𑁂 𑀦 𑀢𑀧𑁆𑀧𑀭𑀪𑀸𑀯𑁄, 𑀲𑀪𑀸𑀯𑀤𑀲𑁆𑀲𑀦𑁂 𑀏𑀯 𑀧𑀦 𑀢𑀧𑁆𑀧𑀭𑀪𑀸𑀯𑁄𑀢𑀺 𑀤𑀲𑁆𑀲𑁂𑀢𑀺 ‘‘𑀦 𑀳𑀺 𑀨𑀲𑁆𑀲𑀸𑀤𑀻𑀦’’𑀦𑁆𑀢𑀺𑀆𑀤𑀺𑀦𑀸.

𑀘𑀺𑀢𑁆𑀢𑀓𑀺𑀭𑀺𑀬𑀸𑀪𑀸𑀯𑁂𑀦𑀸𑀢𑀺 𑀘𑀺𑀢𑁆𑀢𑀩𑁆𑀬𑀸𑀧𑀸𑀭𑀪𑀸𑀯𑁂𑀦. 𑀨𑀲𑁆𑀲𑀲𑁆𑀲 𑀲𑀫𑁆𑀧𑀚𑁆𑀚𑀦𑀫𑀼𑀧𑁆𑀧𑀚𑁆𑀚𑀦𑀫𑁂𑀯. 𑀲𑀦𑁆𑀦𑀺𑀧𑀢𑀺𑀢𑀧𑁆𑀧𑀯𑀢𑁆𑀢𑀺𑀬𑀸 𑀧𑀘𑁆𑀘𑀬𑁄 𑀳𑁄𑀢𑀻𑀢𑀺 𑀏𑀢𑁂𑀦 𑀘𑀺𑀢𑁆𑀢𑀸𑀭𑀫𑁆𑀫𑀡𑀲𑀦𑁆𑀦𑀺𑀧𑀸𑀢𑀓𑀸𑀭𑀡𑀁 𑀨𑀲𑁆𑀲𑁄 𑀘𑀺𑀢𑁆𑀢𑀸𑀭𑀫𑁆𑀫𑀡𑀲𑀦𑁆𑀦𑀺𑀧𑀸𑀢𑁄𑀢𑀺 𑀯𑀼𑀢𑁆𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀨𑀲𑁆𑀲𑁄 𑀳𑀺 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑁂 𑀨𑀼𑀲𑀦𑀸𑀓𑀸𑀭𑁂𑀦𑁂𑀯 𑀧𑀯𑀢𑁆𑀢𑀺𑀢𑁄 𑀢𑀲𑁆𑀲 𑀆𑀭𑀫𑁆𑀫𑀡𑁂 𑀲𑀦𑁆𑀦𑀺𑀧𑀢𑀺𑀢𑀧𑁆𑀧𑀯𑀢𑁆𑀢𑀺𑀬𑀸 𑀧𑀘𑁆𑀘𑀬𑁄𑀢𑀺 𑀘 𑀯𑀼𑀘𑁆𑀘𑀢𑀺. 𑀲𑀸 𑀘𑀲𑁆𑀲 𑀨𑀼𑀲𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀺 𑀲𑀸𑀔𑀕𑁆𑀕𑁂 𑀞𑀺𑀢𑀁 𑀤𑀺𑀲𑁆𑀯𑀸 𑀪𑀽𑀫𑀺𑀲𑀡𑁆𑀞𑀺𑀢𑀲𑁆𑀲 𑀅𑀯𑀻𑀭𑀓𑀧𑀼𑀭𑀺𑀲𑀲𑁆𑀲 𑀚𑀗𑁆𑀖𑀘𑀮𑀦𑀁, 𑀅𑀫𑁆𑀩𑀺𑀮𑀅𑀫𑁆𑀩𑀧𑀓𑁆𑀓𑀸𑀤𑀺𑀁 𑀔𑀸𑀤𑀦𑁆𑀢𑀁 𑀤𑀺𑀲𑁆𑀯𑀸 𑀫𑀼𑀔𑁂 𑀔𑁂𑀴𑀼𑀧𑁆𑀧𑀢𑁆𑀢𑀺, 𑀤𑀬𑀸𑀮𑀼𑀓𑀲𑁆𑀲 𑀧𑀭𑀁 𑀳𑀜𑁆𑀜𑀫𑀸𑀦𑀁 𑀤𑀺𑀲𑁆𑀯𑀸 𑀲𑀭𑀻𑀭𑀓𑀫𑁆𑀧𑀦𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 𑀧𑀭𑀺𑀩𑁆𑀬𑀢𑁆𑀢𑀸 𑀳𑁄𑀢𑀺. 𑀢𑀩𑁆𑀩𑀺𑀲𑁂𑀲𑀪𑀽𑀢𑀸 𑀭𑀽𑀧𑀥𑀫𑁆𑀫𑀸𑀢𑀺 𑀬𑀣𑀸 𑀧𑀝𑀺𑀳𑀦𑀦𑀯𑀲𑁂𑀦 𑀅𑀜𑁆𑀜𑀫𑀜𑁆𑀜𑀁 𑀆𑀲𑀦𑁆𑀦𑀢𑀭𑀁 𑀉𑀧𑁆𑀧𑀚𑁆𑀚𑀫𑀸𑀦𑁂𑀲𑀼 𑀭𑀽𑀧𑀥𑀫𑁆𑀫𑀯𑀺𑀲𑁂𑀲𑁂𑀲𑀼 𑀲𑀗𑁆𑀖𑀝𑁆𑀝𑀦𑀧𑀭𑀺𑀬𑀸𑀬𑁄, 𑀏𑀯𑀁 𑀘𑀺𑀢𑁆𑀢𑀸𑀭𑀫𑁆𑀫𑀡𑀸𑀦𑀁 𑀯𑀺𑀲𑀬𑀓𑀭𑀡𑀯𑀺𑀲𑀬𑀪𑀸𑀯𑀧𑁆𑀧𑀢𑁆𑀢𑀺 𑀧𑀝𑀺𑀳𑀦𑀦𑀸𑀓𑀸𑀭𑁂𑀦 𑀳𑁄𑀢𑀺. 𑀲𑁄 𑀘 𑀘𑀺𑀢𑁆𑀢𑀦𑀺𑀲𑁆𑀲𑀺𑀢𑁄 𑀥𑀫𑁆𑀫𑀯𑀺𑀲𑁂𑀲𑁄 𑀲𑀗𑁆𑀖𑀝𑁆𑀝𑀦𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑁄, 𑀬𑀤𑀸𑀳 ‘‘𑀏𑀯’’𑀦𑁆𑀢𑀺𑀆𑀤𑀺. 𑀓𑁂𑀘𑀺 𑀧𑀦 ‘‘𑀲𑀗𑁆𑀖𑀝𑁆𑀝𑀦𑀭𑀲𑁄 𑀨𑀲𑁆𑀲𑁄 𑀧𑀜𑁆𑀘𑀤𑁆𑀯𑀸𑀭𑀺𑀓𑁄𑀯, 𑀦 𑀇𑀢𑀭𑁄 𑀯𑀢𑁆𑀣𑀸𑀭𑀫𑁆𑀫𑀡𑀲𑀗𑁆𑀖𑀝𑁆𑀝𑀦𑀸𑀪𑀸𑀯𑀢𑁄’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀚𑁆𑀚𑀢𑀺 𑀉𑀧𑀘𑀸𑀭𑀲𑀺𑀤𑁆𑀥𑀢𑁆𑀢𑀸 𑀲𑀗𑁆𑀖𑀝𑁆𑀝𑀦𑀲𑁆𑀲. 𑀇𑀢𑀭𑀣𑀸 𑀧𑀜𑁆𑀘𑀤𑁆𑀯𑀸𑀭𑀺𑀓𑀲𑁆𑀲𑀧𑀺 𑀢𑀁 𑀦 𑀲𑀫𑁆𑀪𑀯𑁂𑀬𑁆𑀬𑀸𑀢𑀺. 𑀇𑀦𑁆𑀤𑁆𑀭𑀺𑀬𑀫𑀦𑀲𑀺𑀓𑀸𑀭𑁂𑀲𑀼 𑀬𑀣𑀸𑀧𑀯𑀢𑁆𑀢𑀫𑀸𑀦𑁂𑀲𑀼 𑀢𑀁𑀢𑀁𑀆𑀭𑀫𑁆𑀫𑀡𑁂 𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑁂𑀲𑀁 𑀢𑀣𑀸𑀧𑀯𑀢𑁆𑀢𑀺𑀬𑁂𑀯 𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀲𑀬𑀪𑀸𑀯𑀓𑀭𑀡𑀁.

‘‘𑀬𑀁 𑀔𑁄, 𑀪𑀺𑀓𑁆𑀔𑀯𑁂, 𑀇𑀫𑁂 𑀧𑀜𑁆𑀘 𑀓𑀸𑀫𑀕𑀼𑀡𑁂 𑀧𑀝𑀺𑀘𑁆𑀘 𑀉𑀧𑁆𑀧𑀚𑁆𑀚𑀢𑀺 𑀲𑀼𑀔𑀁 𑀲𑁄𑀫𑀦𑀲𑁆𑀲𑀁, 𑀅𑀬𑀁 𑀯𑀼𑀘𑁆𑀘𑀢𑀺 𑀓𑀸𑀫𑀸𑀦𑀁 𑀅𑀲𑁆𑀲𑀸𑀤𑁄’’𑀢𑀺𑀆𑀤𑀺𑀯𑀘𑀦𑀢𑁄 (𑀅. 𑀦𑀺. 𑁯.𑁩𑁪) 𑀲𑀼𑀔𑀯𑁂𑀤𑀦𑀸𑀯 𑀅𑀲𑁆𑀲𑀸𑀤𑁄𑀢𑀺 𑀆𑀳 ‘‘𑀅𑀲𑁆𑀲𑀸𑀤𑀪𑀸𑀯𑀢𑁄’’𑀢𑀺. 𑀨𑀼𑀲𑀦𑀸𑀤𑀺𑀪𑀸𑀯𑁂𑀦 𑀆𑀭𑀫𑁆𑀫𑀡𑀕𑁆𑀕𑀳𑀡𑀁 𑀏𑀓𑀤𑁂𑀲𑀸𑀦𑀼𑀪𑀯𑀦𑀦𑁆𑀢𑀺 𑀅𑀦𑀼𑀧𑀘𑀭𑀺𑀢𑀫𑁂𑀯 𑀨𑀲𑁆𑀲𑀸𑀤𑀻𑀦𑀁 𑀅𑀦𑀼𑀪𑀯𑀦𑀓𑀺𑀘𑁆𑀘𑀫𑀸𑀳.

𑀦𑀺𑀫𑀺𑀢𑁆𑀢𑁂𑀦𑀸𑀢𑀺 𑀦𑀻𑀮𑀸𑀤𑀺𑀦𑀸 𑀤𑀻𑀖𑀸𑀤𑀺𑀦𑀸 𑀘 𑀦𑀺𑀫𑀺𑀢𑁆𑀢𑁂𑀦. 𑀏𑀢𑁂𑀦𑀼𑀧𑀸𑀬𑁂𑀦𑀸𑀢𑀺 𑀬𑀣𑀸 𑀜𑀸𑀡𑀧𑁆𑀧𑀥𑀸𑀦𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀲𑀜𑁆𑀜𑀸 𑀜𑀸𑀡𑀫𑀦𑀼𑀯𑀢𑁆𑀢𑀢𑀺, 𑀏𑀯𑀁 𑀲𑀫𑀸𑀥𑀺𑀧𑁆𑀧𑀥𑀸𑀦𑁂 𑀲𑀫𑀸𑀥𑀺𑀦𑁆𑀢𑀺 𑀤𑀲𑁆𑀲𑁂𑀢𑀺.

𑀧𑀩𑀦𑁆𑀥𑀢𑀻𑀢𑀺 𑀧𑀝𑁆𑀞𑀧𑁂𑀢𑀺 𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑁂 𑀲𑀓𑀲𑀓𑀓𑀺𑀘𑁆𑀘𑁂 𑀧𑀝𑁆𑀞𑀧𑁂𑀢𑀺. 𑀢𑁂𑀦𑁂𑀯 𑀳𑀺 𑀢𑀤𑀢𑁆𑀣𑀁 𑀯𑀺𑀯𑀭𑀦𑁆𑀢𑁄 ‘‘𑀧𑀯𑀢𑁆𑀢𑁂𑀢𑀻’’𑀢𑀺 𑀆𑀳.

𑀯𑀺𑀚𑁆𑀚𑀫𑀸𑀦𑀢𑀸𑀯𑀸𑀘𑀻 𑀳𑁄𑀢𑀺-𑀲𑀤𑁆𑀤𑁄, 𑀯𑀺𑀚𑁆𑀚𑀫𑀸𑀦𑀢𑀸 𑀘 𑀲𑀗𑁆𑀔𑀢𑀥𑀫𑁆𑀫𑀸𑀦𑀁 𑀉𑀧𑁆𑀧𑀚𑁆𑀚𑀦𑁂𑀦 𑀯𑀺𑀦𑀸 𑀦𑀢𑁆𑀣𑀻𑀢𑀺 ‘‘𑀘𑀺𑀢𑁆𑀢𑀁 𑀦 𑀢𑀣𑀸 𑀅𑀢𑁆𑀣𑀢𑁄 𑀦𑀼𑀧𑁆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀬𑀲𑁆𑀫𑀸 𑀘𑀺𑀢𑁆𑀢𑀁 𑀦 𑀦𑀼𑀧𑁆𑀧𑀚𑁆𑀚𑀢𑀺 𑀉𑀧𑁆𑀧𑀚𑁆𑀚𑀢𑀺 𑀏𑀯, 𑀢𑀲𑁆𑀫𑀸 𑀘𑀺𑀢𑁆𑀢𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀝𑁆𑀞𑀓𑀣𑀸𑀬 𑀅𑀢𑁆𑀣𑁄. 𑀏𑀯𑀫𑀯𑀝𑁆𑀞𑀺𑀢𑁂 𑀳𑁄𑀢𑀺-𑀉𑀧𑁆𑀧𑀚𑁆𑀚𑀢𑀺-𑀲𑀤𑁆𑀤𑀸𑀦𑀁 𑀲𑀫𑀸𑀦𑀢𑁆𑀣𑀢𑁆𑀢𑁂𑀦 𑀦 𑀓𑀺𑀜𑁆𑀘𑀺 𑀧𑀬𑁄𑀚𑀦𑀁 𑀤𑀺𑀲𑁆𑀲𑀢𑀺. 𑀅𑀣 𑀯𑀸 𑀪𑀯𑀦𑀁 𑀦𑀸𑀫 𑀲𑀢𑁆𑀢𑀸, 𑀲𑀢𑁆𑀢𑀸 𑀘 𑀉𑀧𑁆𑀧𑀸𑀤𑀸𑀤𑀺𑀦𑀸 𑀲𑀫𑀗𑁆𑀕𑀺𑀢𑀸𑀢𑀺 𑀨𑀲𑁆𑀲𑀸𑀤𑀻𑀦𑀁 𑀔𑀡𑀢𑁆𑀢𑀬𑀧𑀭𑀺𑀬𑀸𑀧𑀦𑁆𑀦𑀢𑀸 ‘‘𑀨𑀲𑁆𑀲𑁄 𑀳𑁄𑀢𑀻’’𑀢𑀺𑀆𑀤𑀻𑀲𑀼 𑀳𑁄𑀢𑀺-𑀲𑀤𑁆𑀤𑁂𑀦 𑀯𑀼𑀢𑁆𑀢𑀸. 𑀢𑀢𑁆𑀣 𑀬𑁄 𑀪𑀸𑀯𑁄 𑀉𑀧𑁆𑀧𑀸𑀤𑀲𑀫𑀗𑁆𑀕𑀻, 𑀦 𑀲𑁄 𑀦 𑀳𑁄𑀢𑀺 𑀦𑀸𑀫, 𑀢𑀲𑁆𑀫𑀸 𑀉𑀧𑁆𑀧𑀚𑁆𑀚𑀢𑀺-𑀲𑀤𑁆𑀤𑁂𑀦 𑀯𑀼𑀘𑁆𑀘𑀫𑀸𑀦𑀲𑁆𑀲 𑀅𑀢𑁆𑀣𑀲𑁆𑀲 𑀳𑁄𑀢𑀺-𑀲𑀤𑁆𑀤𑀯𑀘𑀦𑀻𑀬𑀢𑀸 𑀦 𑀦 𑀲𑀫𑁆𑀪𑀯𑀢𑀺. 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻𑀢𑀺 𑀏𑀢𑁆𑀣 𑀧𑀦 𑀓𑀺𑀜𑁆𑀘𑀸𑀧𑀺 𑀉𑀧𑁆𑀧𑀦𑁆𑀦-𑀲𑀤𑁆𑀤𑁂𑀦𑁂𑀯 𑀉𑀧𑁆𑀧𑀸𑀤𑀸𑀤𑀺𑀲𑀫𑀗𑁆𑀕𑀺𑀢𑀸 𑀯𑀼𑀘𑁆𑀘𑀢𑀺, 𑀢𑀩𑁆𑀪𑀸𑀯𑀸𑀦𑀢𑀺𑀯𑀢𑁆𑀢𑀺 𑀧𑀦 𑀳𑁄𑀢𑀺-𑀲𑀤𑁆𑀤𑁂𑀦 𑀯𑀼𑀢𑁆𑀢𑀸 𑀔𑀡𑀢𑁆𑀢𑀬𑀯𑀻𑀢𑀺𑀯𑀢𑁆𑀢𑁂𑀧𑀺 𑀉𑀧𑁆𑀧𑀦𑁆𑀦-𑀲𑀤𑁆𑀤𑀲𑁆𑀲 𑀯𑀢𑁆𑀢𑀦𑀢𑁄, 𑀢𑀲𑁆𑀫𑀸 𑀦 𑀏𑀢𑁆𑀣 𑀉𑀧𑁆𑀧𑀚𑁆𑀚𑀢𑀺-𑀲𑀤𑁆𑀤𑁂𑀦 𑀲𑀫𑀸𑀦𑀢𑁆𑀣𑀢𑀸𑀲𑀩𑁆𑀪𑀸𑀯𑀤𑀲𑁆𑀲𑀦𑀁 𑀯𑀺𑀬 𑀉𑀧𑁆𑀧𑀚𑁆𑀚𑀢𑀺𑀤𑀲𑁆𑀲𑀦𑀫𑁆𑀧𑀺 𑀯𑀺𑀭𑀼𑀚𑁆𑀛𑀢𑀺 𑀧𑀸𑀓𑀝𑀓𑀭𑀡𑀪𑀸𑀯𑀢𑁄. 𑀇𑀢𑀭𑀣𑀸 ‘‘𑀘𑀺𑀢𑁆𑀢𑀁 𑀉𑀧𑁆𑀧𑀦𑁆𑀦𑀁 𑀳𑁄𑀢𑀻’’𑀢𑀺 𑀇𑀫𑀺𑀦𑀸𑀯 𑀘𑀺𑀢𑁆𑀢𑀲𑁆𑀲 𑀯𑀺𑀚𑁆𑀚𑀫𑀸𑀦𑀪𑀸𑀯𑁄 𑀤𑀲𑁆𑀲𑀺𑀢𑁄𑀢𑀺 𑀓𑀺𑀁 𑀧𑀼𑀦 𑀯𑀺𑀚𑁆𑀚𑀫𑀸𑀦𑀪𑀸𑀯𑀤𑀲𑁆𑀲𑀦𑁂𑀦𑀸𑀢𑀺 𑀦 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀲𑀫𑀬𑀯𑀯𑀢𑁆𑀣𑀸𑀦𑀯𑀲𑁂𑀦 𑀲𑀯𑀺𑀲𑁂𑀲𑀁 𑀯𑀼𑀢𑁆𑀢𑀫𑁆𑀧𑀺 𑀘𑀺𑀢𑁆𑀢𑀁 𑀨𑀲𑁆𑀲𑀸𑀤𑀻𑀳𑀺 𑀲𑀳𑀼𑀧𑁆𑀧𑀢𑁆𑀢𑀺𑀬𑀸 𑀲𑀼𑀝𑁆𑀞𑀼𑀢𑀭𑀁 𑀦𑀺𑀩𑁆𑀩𑀺𑀲𑁂𑀲𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 𑀘𑀺𑀢𑁆𑀢𑀲𑁆𑀲 𑀧𑀼𑀦 𑀯𑀘𑀦𑀁. 𑀉𑀤𑁆𑀤𑀺𑀝𑁆𑀞𑀥𑀫𑁆𑀫𑀸𑀦𑀁𑀬𑁂𑀯 𑀘𑁂𑀢𑁆𑀣 𑀦𑀺𑀤𑁆𑀤𑁂𑀲𑀯𑀸𑀭𑁂 𑀯𑀺𑀪𑀚𑀦𑀁, 𑀦 𑀯𑀺𑀪𑀗𑁆𑀕𑁂 𑀯𑀺𑀬 𑀧𑀸𑀴𑀺𑀬𑀸 𑀆𑀭𑀼𑀴𑁆𑀳𑀲𑀩𑁆𑀩𑀧𑀤𑀸𑀦𑀦𑁆𑀢𑀺 ‘‘𑀉𑀤𑁆𑀤𑁂𑀲𑀯𑀸𑀭𑁂 𑀲𑀗𑁆𑀕𑀡𑁆𑀳𑀦𑀢𑁆𑀣𑀁 𑀦𑀺𑀤𑁆𑀤𑁂𑀲𑀯𑀸𑀭𑁂 𑀯𑀺𑀪𑀚𑀦𑀢𑁆𑀣’’𑀦𑁆𑀢𑀺 𑀅𑀬𑀫𑁆𑀧𑀺 𑀅𑀢𑁆𑀣𑁄 𑀦𑀺𑀘𑁆𑀘𑀮𑁄. 𑀢𑀣𑀸 𑀳𑀺 ‘‘𑀬𑀲𑁆𑀫𑀺𑀁 𑀲𑀫𑀬𑁂 𑀭𑀽𑀧𑀽𑀧𑀧𑀢𑁆𑀢𑀺𑀬𑀸 𑀫𑀕𑁆𑀕𑀁 𑀪𑀸𑀯𑁂𑀢𑀻’’𑀢𑀺𑀆𑀤𑀻𑀲𑀼 𑀫𑀕𑁆𑀕𑀸𑀤𑀬𑁄 𑀦 𑀯𑀺𑀪𑀢𑁆𑀢𑀸. 𑀅𑀧𑀺𑀘 𑀅𑀥𑀺𑀧𑀢𑀺𑀪𑀸𑀯𑁂𑀦 𑀇𑀦𑁆𑀤𑁆𑀭𑀺𑀬𑁂𑀲𑀼 𑀯𑀺𑀬 𑀨𑀲𑁆𑀲𑀯𑁂𑀤𑀦𑀸𑀲𑀜𑁆𑀜𑀸𑀘𑁂𑀢𑀦𑀸𑀳𑀺 𑀲𑀳 𑀲𑀩𑁆𑀩𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀸𑀥𑀸𑀭𑀡𑀭𑀸𑀲𑀺𑀬𑀁 𑀕𑀳𑁂𑀢𑀩𑁆𑀩𑀢𑁆𑀢𑀸 𑀲𑀫𑀬𑀯𑀯𑀢𑁆𑀣𑀸𑀦𑁂 𑀯𑀼𑀢𑁆𑀢𑀫𑁆𑀧𑀺 𑀘𑀺𑀢𑁆𑀢𑀁 𑀨𑀲𑁆𑀲𑀧𑀜𑁆𑀘𑀫𑀓𑁂 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁.

𑀛𑀸𑀦𑀗𑁆𑀕𑀭𑀸𑀲𑀺𑀯𑀡𑁆𑀡𑀦𑀸

𑀯𑀺𑀢𑀓𑁆𑀓𑀦𑀦𑁆𑀢𑀺 𑀯𑀺𑀢𑀓𑁆𑀓𑀦𑀓𑀺𑀭𑀺𑀬𑀸, 𑀲𑀸 𑀘 𑀯𑀺𑀢𑀓𑁆𑀓𑀲𑁆𑀲 𑀅𑀢𑁆𑀢𑀦𑁄 𑀧𑀘𑁆𑀘𑀬𑁂𑀳𑀺 𑀧𑀯𑀢𑁆𑀢𑀺𑀫𑀢𑁆𑀢𑀫𑁂𑀯𑀸𑀢𑀺 𑀪𑀸𑀯𑀦𑀺𑀤𑁆𑀤𑁂𑀲𑁄 𑀯𑀲𑀯𑀢𑁆𑀢𑀺𑀪𑀸𑀯𑀦𑀺𑀯𑀸𑀭𑀡𑀸𑀬 𑀳𑁄𑀢𑀺. 𑀬𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀘𑀺𑀢𑁆𑀢𑀁 𑀅𑀪𑀺𑀦𑀺𑀭𑁄𑀧𑁂𑀢𑀺, 𑀢𑀁 𑀢𑀲𑁆𑀲 𑀕𑀳𑀡𑀬𑁄𑀕𑁆𑀬𑀁 𑀓𑀭𑁄𑀦𑁆𑀢𑁄 𑀯𑀺𑀢𑀓𑁆𑀓𑁄 𑀆𑀓𑁄𑀝𑁂𑀦𑁆𑀢𑁄 𑀯𑀺𑀬 𑀧𑀭𑀺𑀯𑀢𑁆𑀢𑁂𑀦𑁆𑀢𑁄 𑀯𑀺𑀬 𑀘 𑀳𑁄𑀢𑀻𑀢𑀺 𑀢𑀲𑁆𑀲 𑀆𑀓𑁄𑀝𑀦𑀮𑀓𑁆𑀔𑀡𑀢𑀸 𑀧𑀭𑀺𑀬𑀸𑀳𑀦𑀦𑀭𑀲𑀢𑀸 𑀘 𑀯𑀼𑀢𑁆𑀢𑀸. 𑀇𑀤𑀜𑁆𑀘 𑀮𑀓𑁆𑀔𑀡𑀁 𑀓𑀺𑀘𑁆𑀘𑀲𑀦𑁆𑀦𑀺𑀲𑁆𑀲𑀺𑀢𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀥𑀫𑁆𑀫𑀸𑀦𑀜𑁆𑀳𑀺 𑀲𑀪𑀸𑀯𑀯𑀺𑀦𑀺𑀫𑀼𑀢𑁆𑀢𑀸 𑀓𑀸𑀘𑀺 𑀓𑀺𑀭𑀺𑀬𑀸 𑀦𑀸𑀫 𑀦𑀢𑁆𑀣𑀺, 𑀢𑀣𑀸 𑀕𑀳𑁂𑀢𑀩𑁆𑀩𑀸𑀓𑀸𑀭𑁄. 𑀩𑁄𑀥𑀦𑁂𑀬𑁆𑀬𑀚𑀦𑀸𑀦𑀼𑀭𑁄𑀥𑁂𑀦 𑀧𑀦 𑀧𑀭𑀫𑀢𑁆𑀣𑀢𑁄 𑀏𑀓𑀲𑀪𑀸𑀯𑁄𑀧𑀺 𑀲𑀪𑀸𑀯𑀥𑀫𑁆𑀫𑁄 𑀧𑀭𑀺𑀬𑀸𑀬𑀯𑀘𑀦𑁂𑀳𑀺 𑀯𑀺𑀬 𑀲𑀫𑀸𑀭𑁄𑀧𑀺𑀢𑀭𑀽𑀧𑁂𑀳𑀺 𑀩𑀳𑀽𑀳𑀺 𑀧𑀓𑀸𑀭𑁂𑀳𑀺 𑀧𑀓𑀸𑀲𑀻𑀬𑀢𑀺. 𑀏𑀯𑀜𑁆𑀳𑀺 𑀲𑁄 𑀲𑀼𑀝𑁆𑀞𑀼 𑀧𑀓𑀸𑀲𑀺𑀢𑁄 𑀳𑁄𑀢𑀻𑀢𑀺.

𑀯𑀺𑀧𑁆𑀨𑀸𑀭𑁄 𑀦𑀸𑀫 𑀯𑀺𑀢𑀓𑁆𑀓𑀲𑁆𑀲 𑀣𑀺𑀦𑀫𑀺𑀤𑁆𑀥𑀧𑀝𑀺𑀧𑀓𑁆𑀔𑁄 𑀆𑀭𑀫𑁆𑀫𑀡𑁂 𑀅𑀦𑁄𑀮𑀻𑀦𑀢𑀸 𑀅𑀲𑀗𑁆𑀓𑁄𑀘𑁄, 𑀲𑁄 𑀧𑀦 𑀅𑀪𑀺𑀦𑀺𑀭𑁄𑀧𑀦𑀪𑀸𑀯𑀢𑁄 𑀘𑀮𑀦𑀁 𑀯𑀺𑀬 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀯𑀺𑀧𑁆𑀨𑀸𑀭𑀯𑀸𑀢𑀺 𑀯𑀺𑀘𑀮𑀦𑀬𑀼𑀢𑁆𑀢𑁄’’𑀢𑀺 𑀯𑀼𑀢𑁆𑀢𑀁. 𑀉𑀧𑀘𑀸𑀭𑀧𑁆𑀧𑀦𑀸𑀲𑀼 𑀲𑀦𑁆𑀢𑀸𑀦𑁂𑀦 𑀧𑀯𑀢𑁆𑀢𑀺𑀬𑀦𑁆𑀢𑀺 𑀏𑀢𑁂𑀦 𑀬𑀣𑀸 𑀅𑀧𑀼𑀩𑁆𑀩𑀸𑀭𑀫𑁆𑀫𑀡𑁂 𑀧𑀞𑀫𑀸𑀪𑀺𑀦𑀺𑀧𑀸𑀢𑀪𑀽𑀢𑁄 𑀯𑀺𑀢𑀓𑁆𑀓𑁄 𑀯𑀺𑀧𑁆𑀨𑀸𑀭𑀯𑀸 𑀳𑁄𑀢𑀺, 𑀦 𑀢𑀣𑀸 𑀏𑀓𑀲𑁆𑀫𑀺𑀁𑀬𑁂𑀯 𑀆𑀭𑀫𑁆𑀫𑀡𑁂 𑀦𑀺𑀭𑀦𑁆𑀢𑀭𑀁 𑀅𑀦𑀼𑀧𑁆𑀧𑀩𑀦𑁆𑀥𑀯𑀲𑁂𑀦 𑀧𑀯𑀢𑁆𑀢𑀺𑀬𑀁, 𑀦𑀸𑀢𑀺𑀯𑀺𑀧𑁆𑀨𑀸𑀭𑀯𑀸 𑀧𑀦 𑀢𑀢𑁆𑀣 𑀳𑁄𑀢𑀺 𑀲𑀦𑁆𑀦𑀺𑀲𑀺𑀦𑁆𑀦𑀪𑀸𑀯𑀢𑁄𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦𑁂𑀯𑀸𑀳 ‘‘𑀦𑀺𑀘𑁆𑀘𑀮𑁄 𑀳𑀼𑀢𑁆𑀯𑀸’’𑀢𑀺𑀆𑀤𑀺.

‘‘𑀧𑀻𑀢𑀺𑀲𑀼𑀔𑁂𑀦 𑀅𑀪𑀺𑀲𑀦𑁆𑀤𑁂𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 (𑀤𑀻. 𑀦𑀺. 𑁧.𑁨𑁨𑁬; 𑀫. 𑀦𑀺. 𑁧.𑁪𑁨𑁭) 𑀧𑀻𑀢𑀺𑀬𑀸 𑀨𑀭𑀡𑀁 𑀓𑀸𑀬𑀯𑀺𑀲𑀬𑀦𑁆𑀢𑀺 𑀬𑀣𑀸 𑀢𑀁 𑀳𑁄𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀧𑀡𑀻𑀢𑀭𑀽𑀧𑁂𑀳𑀻’’𑀢𑀺 𑀯𑀼𑀢𑁆𑀢𑀁.

𑀯𑀺𑀲𑀸𑀭𑀲𑁆𑀲 𑀩𑁆𑀬𑀕𑁆𑀕𑀪𑀸𑀯𑀲𑁆𑀲 𑀧𑀝𑀺𑀧𑀓𑁆𑀔𑁄 𑀲𑀪𑀸𑀯𑁄 𑀅𑀯𑀺𑀲𑀸𑀭𑁄, 𑀦 𑀯𑀺𑀲𑀸𑀭𑀸𑀪𑀸𑀯𑀫𑀢𑁆𑀢𑀁. 𑀅𑀯𑀺𑀲𑀸𑀭𑀸𑀯𑀺𑀓𑁆𑀔𑁂𑀧𑀸𑀦𑀁 𑀲𑀫𑀸𑀥𑀸𑀦𑀪𑀸𑀯𑀢𑁄 𑀅𑀢𑁆𑀣𑀢𑁄 𑀯𑀺𑀲𑁂𑀲𑀸𑀪𑀸𑀯𑁂𑀧𑀺 𑀲𑀫𑀼𑀔𑁂𑀦 𑀲𑀫𑁆𑀧𑀬𑀼𑀢𑁆𑀢𑀫𑀼𑀔𑁂𑀦 𑀘 𑀉𑀪𑀬𑀁 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀅𑀯𑀺𑀲𑀸…𑀧𑁂… 𑀯𑀺𑀓𑁆𑀔𑁂𑀧𑁄’’𑀢𑀺 𑀯𑀼𑀢𑁆𑀢𑀁. 𑀯𑀺𑀲𑁂𑀲𑀢𑁄𑀢𑀺 𑀅𑀢𑀺𑀲𑀬𑁂𑀦𑀸𑀢𑀺 𑀯𑀸 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀲𑀼𑀔𑀜𑁆𑀳𑀺 𑀲𑀫𑀸𑀥𑀺𑀲𑁆𑀲 𑀯𑀺𑀲𑁂𑀲𑀓𑀸𑀭𑀡𑀁 ‘‘𑀲𑀼𑀔𑀺𑀦𑁄 𑀘𑀺𑀢𑁆𑀢𑀁 𑀲𑀫𑀸𑀥𑀺𑀬𑀢𑀻’’𑀢𑀺 (𑀤𑀻. 𑀦𑀺. 𑁩.𑁩𑁫𑁯; 𑀅. 𑀦𑀺. 𑁩.𑁯𑁬; 𑁬.𑁧𑁦; 𑁧𑁧.𑁧𑁨) 𑀯𑀘𑀦𑀢𑁄.

𑀇𑀦𑁆𑀤𑁆𑀭𑀺𑀬𑀭𑀸𑀲𑀺𑀯𑀡𑁆𑀡𑀦𑀸

𑀢𑀢𑁆𑀣𑀸𑀢𑀺 𑀲𑀤𑁆𑀤𑀳𑀦𑀲𑀗𑁆𑀔𑀸𑀢𑁂 𑀅𑀥𑀺𑀫𑁄𑀓𑁆𑀔𑀮𑀓𑁆𑀔𑀡𑁂. 𑀧𑀼𑀕𑁆𑀕𑀮𑁄 𑀲𑀤𑁆𑀤𑀳𑀢𑀻𑀢𑀺 𑀇𑀫𑀺𑀦𑀸𑀧𑀺 𑀲𑀤𑁆𑀥𑀸𑀬 𑀆𑀳𑀺𑀢𑀯𑀺𑀲𑁂𑀲𑀸𑀦𑀁 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸𑀦𑀁 𑀲𑀤𑁆𑀤𑀳𑀦𑀓𑀺𑀭𑀺𑀬𑀸𑀬 𑀓𑀢𑁆𑀢𑀼𑀪𑀸𑀯𑀫𑁂𑀯 𑀯𑀺𑀪𑀸𑀯𑁂𑀢𑀺. 𑀅𑀯𑀬𑀯𑀩𑁆𑀬𑀸𑀧𑀸𑀭𑁄 𑀳𑀺 𑀲𑀫𑀼𑀤𑀸𑀬𑁂 𑀯𑁄𑀳𑀭𑀻𑀬𑀢𑀻𑀢𑀺. 𑀦 𑀓𑁂𑀯𑀮𑀁 𑀧𑀲𑀸𑀤𑀦𑀻𑀬𑀯𑀢𑁆𑀣𑀼𑀲𑁆𑀫𑀺𑀁 𑀅𑀧𑁆𑀧𑀲𑀸𑀤𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀫𑁂𑀯 𑀅𑀓𑀼𑀲𑀮𑀁 𑀅𑀲𑁆𑀲𑀤𑁆𑀥𑀺𑀬𑀁, 𑀅𑀣 𑀔𑁄 𑀅𑀧𑁆𑀧𑀲𑀸𑀤𑀦𑀻𑀬𑀯𑀢𑁆𑀣𑀼𑀲𑁆𑀫𑀺𑀁 𑀧𑀲𑀸𑀤𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀫𑁆𑀧𑀻𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀫𑀺𑀘𑁆𑀙𑀸𑀥𑀺𑀫𑁄𑀓𑁆𑀔𑁄’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀧𑀽𑀭𑀡𑀸𑀤𑀻𑀲𑀼 𑀧𑀲𑀸𑀤𑀲𑁆𑀲 𑀅𑀲𑁆𑀲𑀤𑁆𑀥𑀺𑀬𑀢𑀫𑀸𑀳. 𑀧𑀲𑀸𑀤𑀪𑀽𑀢𑁄𑀢𑀺 𑀏𑀢𑁂𑀦 𑀅𑀧𑁆𑀧𑀲𑀸𑀤𑀪𑀽𑀢𑀁 𑀅𑀲𑁆𑀲𑀤𑁆𑀥𑀺𑀬𑀁 𑀦𑀺𑀯𑀢𑁆𑀢𑁂𑀢𑀺. 𑀯𑀢𑁆𑀣𑀼𑀕𑀢𑁄𑀢𑀺 𑀇𑀫𑀺𑀦𑀸 𑀫𑀺𑀘𑁆𑀙𑀸𑀥𑀺𑀫𑁄𑀓𑁆𑀔𑀁. ‘‘𑀧𑀲𑀸𑀤𑀪𑀽𑀢𑁄 𑀦𑀺𑀘𑁆𑀙𑀬𑁄’’𑀢𑀺 𑀇𑀫𑀺𑀦𑀸 𑀧𑀦 𑀯𑀺𑀪𑀸𑀯𑀺𑀢𑀫𑁂𑀯𑀢𑁆𑀣𑀁 𑀧𑀸𑀓𑀝𑀁 𑀓𑀭𑁄𑀦𑁆𑀢𑁄 ‘‘𑀦 𑀬𑁂𑀯𑀸𑀧𑀦𑀓𑀸𑀥𑀺𑀫𑁄𑀓𑁆𑀔𑁄’’𑀢𑀺 𑀆𑀳. 𑀅𑀓𑀸𑀮𑀼𑀲𑁆𑀲𑀺𑀬𑀁 𑀧𑀲𑀸𑀤𑁄, 𑀢𑀁 𑀧𑀦 𑀅𑀲𑀗𑁆𑀔𑁄𑀪𑀪𑀸𑀯𑀢𑁄 ‘‘𑀅𑀦𑀸𑀯𑀺𑀮𑀪𑀸𑀯𑁄’’𑀢𑀺 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀲𑀫𑁆𑀧𑀬𑀼𑀢𑁆𑀢𑁂𑀲𑀼 𑀯𑀺𑀤𑀳𑀦𑁆𑀢𑀻 𑀲𑀤𑁆𑀥𑀸 𑀅𑀓𑀸𑀮𑀼𑀲𑁆𑀲𑀺𑀬𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀏𑀯𑀫𑁂𑀢𑀦𑁆𑀢𑀺 𑀅𑀥𑀺𑀫𑀼𑀘𑁆𑀘𑀦𑀸𑀓𑀸𑀭𑁂𑀦 𑀧𑀦 𑀕𑀳𑁂𑀢𑀩𑁆𑀩𑀢𑁆𑀢𑀸 𑀅𑀥𑀺𑀫𑀼𑀢𑁆𑀢𑀺𑀧𑀘𑁆𑀘𑀼𑀧𑀝𑁆𑀞𑀸𑀦𑀸. 𑀩𑀼𑀤𑁆𑀥𑀸𑀤𑀺𑀯𑀢𑁆𑀣𑀽𑀦𑀻𑀢𑀺 𑀏𑀢𑁆𑀣 𑀇𑀥𑀮𑁄𑀓𑀧𑀭𑀮𑁄𑀓𑀓𑀫𑁆𑀫𑀨𑀮𑀲𑀫𑁆𑀩𑀦𑁆𑀥𑀸𑀧𑀺 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀲𑀤𑁆𑀥𑀸𑀳𑀢𑁆𑀣𑁄, 𑀫𑀳𑀸𑀦𑀸𑀫, 𑀅𑀭𑀺𑀬𑀲𑀸𑀯𑀓𑁄’’𑀢𑀺, ‘‘𑀲𑀤𑁆𑀥𑀻𑀥 𑀯𑀺𑀢𑁆𑀢𑀁 𑀧𑀼𑀭𑀺𑀲𑀲𑁆𑀲 𑀲𑁂𑀝𑁆𑀞’’𑀦𑁆𑀢𑀺 (𑀲𑀁. 𑀦𑀺. 𑁧.𑁨𑁪𑁬; 𑀲𑀼. 𑀦𑀺. 𑁧𑁮𑁪), ‘‘𑀲𑀤𑁆𑀥𑀸 𑀩𑀻𑀚𑀁 𑀢𑀧𑁄 𑀯𑀼𑀝𑁆𑀞𑀻’’𑀢𑀺 (𑀲𑀁. 𑀦𑀺. 𑁧.𑁧𑁯𑁭; 𑀲𑀼. 𑀦𑀺. 𑁭𑁭) 𑀏𑀯𑀫𑀸𑀤𑀺𑀯𑀘𑀦𑀢𑁄 𑀓𑀼𑀲𑀮𑀥𑀫𑁆𑀫𑀸𑀦𑀁 𑀆𑀤𑀸𑀦𑀸𑀤𑀻𑀲𑀼 𑀳𑀢𑁆𑀣𑀸𑀤𑀬𑁄 𑀯𑀺𑀬 𑀲𑀤𑁆𑀥𑀸 𑀤𑀝𑁆𑀞𑀩𑁆𑀩𑀸.

‘‘𑀇𑀥 𑀪𑀺𑀓𑁆𑀔𑀼𑀦𑀸 𑀓𑀫𑁆𑀫𑀁 𑀓𑀢𑁆𑀢𑀩𑁆𑀩𑀁 𑀳𑁄𑀢𑀺. 𑀢𑀲𑁆𑀲 𑀏𑀯𑀁 𑀳𑁄𑀢𑀺 ‘𑀓𑀫𑁆𑀫𑀁 𑀔𑁄 𑀫𑁂 𑀓𑀢𑁆𑀢𑀩𑁆𑀩𑀁 𑀪𑀯𑀺𑀲𑁆𑀲𑀢𑀺, 𑀓𑀫𑁆𑀫𑀁 𑀔𑁄 𑀧𑀦 𑀫𑁂 𑀓𑀭𑁄𑀦𑁆𑀢𑀲𑁆𑀲 𑀦 𑀲𑀼𑀓𑀭𑀁 𑀩𑀼𑀤𑁆𑀥𑀸𑀦𑀁 𑀲𑀸𑀲𑀦𑀁 𑀫𑀦𑀲𑀺 𑀓𑀸𑀢𑀼𑀁, 𑀳𑀦𑁆𑀤𑀸𑀳𑀁 𑀯𑀻𑀭𑀺𑀬𑀁 𑀆𑀭𑀪𑀸𑀫𑀺 𑀅𑀧𑁆𑀧𑀢𑁆𑀢𑀲𑁆𑀲 𑀧𑀢𑁆𑀢𑀺𑀬𑀸 𑀅𑀦𑀥𑀺𑀕𑀢𑀲𑁆𑀲 𑀅𑀥𑀺𑀕𑀫𑀸𑀬 𑀅𑀲𑀘𑁆𑀙𑀺𑀓𑀢𑀲𑁆𑀲 𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀸’’’𑀢𑀺 (𑀤𑀻. 𑀦𑀺. 𑁩.𑁩𑁩𑁫) 𑁋

𑀆𑀤𑀺𑀓𑀸 𑀅𑀦𑀼𑀭𑀽𑀧𑀧𑀘𑁆𑀘𑀯𑁂𑀓𑁆𑀔𑀡𑀸.

𑀢𑀁𑀫𑀽𑀮𑀓𑀸𑀦𑀻𑀢𑀺 𑀕𑀦𑁆𑀢𑀩𑁆𑀩𑀫𑀕𑁆𑀕𑀸𑀤𑀺𑀫𑀽𑀮𑀓𑀸𑀦𑀺. 𑀏𑀢𑁆𑀣 𑀘 𑀫𑀕𑁆𑀕𑁄 𑀕𑀦𑁆𑀢𑀩𑁆𑀩𑁄 𑀳𑁄𑀢𑀻𑀢𑀺𑀆𑀤𑀬𑁄 𑀅𑀝𑁆𑀞𑀓𑀣𑀸𑀬𑀁 𑀤𑀲𑁆𑀲𑀦𑀯𑀲𑁂𑀦𑁂𑀯 𑀯𑀼𑀢𑁆𑀢𑀸, 𑀦 𑀧𑀸𑀴𑀺𑀬𑀁 𑀆𑀕𑀢𑀸𑀦𑀼𑀓𑁆𑀓𑀫𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁.

𑀓𑀭𑀡𑀸𑀤𑀺𑀓𑀸𑀮𑁂 𑀯𑀺𑀬 𑀘𑀺𑀭𑀓𑀢𑀸𑀤𑀺𑀆𑀭𑀫𑁆𑀫𑀡𑀁 𑀯𑀺𑀪𑀽𑀢𑀁 𑀓𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀻 𑀲𑀢𑀺 𑀢𑀁 𑀉𑀧𑀕𑀦𑁆𑀢𑁆𑀯𑀸 𑀢𑀺𑀝𑁆𑀞𑀦𑁆𑀢𑀻 𑀅𑀦𑀺𑀲𑁆𑀲𑀚𑁆𑀚𑀦𑁆𑀢𑀻 𑀘 𑀳𑁄𑀢𑀺. 𑀬𑀁 𑀆𑀭𑀫𑁆𑀫𑀡𑀁 𑀲𑀫𑁆𑀫𑀼𑀝𑁆𑀞𑀁, 𑀢𑀁 𑀧𑀺𑀮𑀯𑀺𑀢𑁆𑀯𑀸 𑀕𑀢𑀁 𑀯𑀺𑀬 𑀘𑀮𑀺𑀢𑀁 𑀯𑀺𑀬 𑀘 𑀳𑁄𑀢𑀺, 𑀢𑀧𑁆𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀧𑀦 𑀅𑀲𑀫𑁆𑀫𑀼𑀝𑁆𑀞𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀉𑀤𑀓𑁂 𑀅𑀮𑀸𑀩𑀼 𑀯𑀺𑀬𑀸’’𑀢𑀺𑀆𑀤𑀺𑀫𑀸𑀳. 𑀢𑀢𑁆𑀣 𑀲𑀸𑀭𑀡𑀦𑁆𑀢𑀺 𑀏𑀢𑁂𑀦 ‘‘𑀲𑀭𑀦𑁆𑀢𑀺 𑀢𑀸𑀬𑀸’’𑀢𑀺 𑀇𑀫𑀫𑁂𑀯𑀢𑁆𑀣𑀁 𑀯𑀺𑀪𑀸𑀯𑁂𑀢𑀺. 𑀲𑀭𑀡𑀓𑀺𑀭𑀺𑀬𑀸𑀬 𑀳𑀺 𑀧𑀯𑀢𑁆𑀢𑀫𑀸𑀦𑀸𑀦𑀁 𑀥𑀫𑁆𑀫𑀸𑀦𑀁 𑀢𑀢𑁆𑀣 𑀆𑀥𑀺𑀧𑀘𑁆𑀘𑀪𑀸𑀯𑁂𑀦 𑀲𑀢𑀺 𑀧𑀘𑁆𑀘𑀬𑁄. 𑀢𑀲𑁆𑀲𑀸 𑀳𑀺 𑀢𑀣𑀸 𑀧𑀘𑁆𑀘𑀬𑀪𑀸𑀯𑁂 𑀲𑀢𑀺 𑀢𑁂 𑀥𑀫𑁆𑀫𑀸 𑀲𑀸𑀭𑀺𑀢𑀸 𑀅𑀲𑀫𑁆𑀫𑀼𑀝𑁆𑀞𑀓𑀢𑀸 𑀅𑀧𑀺𑀮𑀸𑀯𑀺𑀢𑀸𑀳𑁄𑀦𑁆𑀢𑀻𑀢𑀺. ‘‘𑀇𑀫𑁂𑀳𑀺 𑀦𑀸𑀫 𑀳𑁂𑀢𑀽𑀳𑀺 𑀧𑀘𑁆𑀘𑀬𑁂𑀳𑀺 𑀘 𑀏𑀢𑁂 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀻’’𑀢𑀺 𑀲𑀫𑁆𑀪𑀯𑀢𑁄. ‘‘𑀇𑀫𑀁 𑀦𑀸𑀫 𑀨𑀮𑀁 𑀦𑀺𑀩𑁆𑀩𑀢𑁆𑀢𑁂𑀦𑁆𑀢𑀻’’𑀢𑀺 𑀨𑀮𑀢𑁄 𑀥𑀫𑁆𑀫𑀸 𑀉𑀧𑁆𑀧𑀚𑁆𑀚𑀦𑁂𑀦 𑀯𑀺𑀧𑀘𑁆𑀘𑀦𑁂𑀦 𑀘 𑀦𑀺𑀧𑁆𑀨𑀦𑁆𑀦𑀸 𑀦𑀸𑀫 𑀳𑁄𑀦𑁆𑀢𑀻𑀢𑀺. 𑀯𑀢𑁆𑀣𑀼𑀪𑀽𑀢𑀸𑀢𑀺 𑀆𑀭𑀫𑁆𑀫𑀡𑀪𑀽𑀢𑀸.

𑀲𑀢𑀺𑀧𑀺 𑀲𑀩𑁆𑀩𑁂𑀲𑀁 𑀲𑀸𑀭𑀫𑁆𑀫𑀡𑀥𑀫𑁆𑀫𑀸𑀦𑀁 𑀆𑀭𑀫𑁆𑀫𑀡𑀕𑁆𑀕𑀳𑀡𑁂 𑀦 𑀘𑀺𑀢𑁆𑀢𑀁 𑀯𑀺𑀬 𑀧𑀭𑁂 𑀧𑀭𑀺𑀘𑁆𑀙𑀺𑀚𑁆𑀚𑀕𑀸𑀳𑀺𑀦𑁄𑀢𑀺 ‘‘𑀧𑀭𑀺𑀘𑁆𑀙𑀺𑀦𑁆𑀦𑁄𑀧𑀮𑀤𑁆𑀥𑀺𑀯𑀲𑁂𑀦 𑀚𑀸𑀦𑀸𑀢𑀻’’𑀢𑀺 𑀘𑀺𑀢𑁆𑀢𑀁 𑀯𑀼𑀢𑁆𑀢𑀁. 𑀘𑁂𑀢𑀲𑀺𑀓𑁂𑀲𑀼 𑀳𑀺 𑀓𑁂𑀘𑀺 𑀯𑀺𑀲𑀬𑀁 𑀧𑀭𑀺𑀘𑁆𑀙𑀺𑀚𑁆𑀚 𑀕𑀳𑁂𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀺, 𑀓𑁂𑀘𑀺 𑀧𑀦 𑀧𑀭𑀺𑀘𑁆𑀙𑁂𑀤𑀫𑀢𑁆𑀢𑁂𑀬𑁂𑀯 𑀢𑀺𑀝𑁆𑀞𑀦𑁆𑀢𑀺, 𑀦 𑀯𑀺𑀜𑁆𑀜𑀸𑀡𑀁 𑀯𑀺𑀬 𑀯𑀺𑀲𑀬𑀁 𑀕𑀡𑁆𑀳𑀦𑁆𑀢𑀻𑀢𑀺 𑀬𑁂 𑀆𑀲𑀗𑁆𑀓𑀺𑀢𑀩𑁆𑀩𑀸, 𑀢𑁂𑀲𑀼 𑀢𑀤𑀪𑀸𑀯𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀦 𑀲𑀜𑁆𑀜𑀸…𑀧𑁂… 𑀯𑀺𑀚𑁆𑀛𑀦𑀯𑀲𑁂𑀦𑀸’’𑀢𑀺 𑀆𑀳.

𑀧𑀻𑀢𑀺𑀬𑀸 𑀘 𑀲𑁄𑀫𑀦𑀲𑁆𑀲𑀪𑀸𑀯𑁄 𑀆𑀧𑀚𑁆𑀚𑀢𑀻𑀢𑀺 𑀇𑀤𑀁 𑀧𑀻𑀢𑀺 𑀘 𑀲𑁄𑀫𑀦𑀲𑁆𑀲𑀜𑁆𑀘 𑀧𑀻𑀢𑀺𑀲𑁄𑀫𑀦𑀲𑁆𑀲𑀦𑁆𑀢𑀺 𑀧𑀻𑀢𑀺𑀲𑁄𑀫𑀦𑀲𑁆𑀲𑀸𑀦𑀁 𑀢𑀼𑀮𑁆𑀬𑀬𑁄𑀕𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑁄𑀫𑀦𑀲𑁆𑀲𑀲𑁆𑀲𑁂𑀯 𑀧𑀦 ‘‘𑀆𑀚𑀜𑁆𑀜𑀭𑀣𑁄’’𑀢𑀺 𑀯𑀺𑀬 𑀧𑀻𑀢𑀺𑀬𑀼𑀢𑁆𑀢𑀁 𑀲𑁄𑀫𑀦𑀲𑁆𑀲𑀁 𑀧𑀻𑀢𑀺𑀲𑁄𑀫𑀦𑀲𑁆𑀲𑀦𑁆𑀢𑀺 𑀧𑀥𑀸𑀦𑀪𑀸𑀯𑁄 𑀇𑀘𑁆𑀙𑀺𑀢𑁄𑀢𑀺 𑀦 𑀧𑀻𑀢𑀺𑀬𑀸 𑀲𑁄𑀫𑀦𑀲𑁆𑀲𑀪𑀸𑀯𑀧𑁆𑀧𑀢𑁆𑀢𑀺. 𑀦 𑀳𑀺 𑀧𑀥𑀸𑀦𑁂 𑀯𑀺𑀚𑁆𑀚𑀫𑀸𑀦𑁂 𑀅𑀧𑁆𑀧𑀥𑀸𑀦𑀁 𑀉𑀧𑀬𑀼𑀚𑁆𑀚𑀢𑀺, 𑀧𑀻𑀢𑀺𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀧𑀻𑀢𑀺𑀬𑀼𑀢𑁆𑀢𑀲𑁆𑀲 𑀲𑁄𑀫𑀦𑀲𑁆𑀲𑀲𑁆𑀲 𑀬𑁂𑀪𑀼𑀬𑁆𑀬𑁂𑀦 𑀪𑀸𑀯𑀢𑁄 𑀧𑀭𑀺𑀩𑁆𑀬𑀢𑁆𑀢𑀓𑀺𑀘𑁆𑀘𑀢𑁄 𑀘 𑀓𑀢𑀁, 𑀦 𑀘 𑀦𑀺𑀧𑁆𑀧𑀻𑀢𑀺𑀓𑀲𑁄𑀫𑀦𑀲𑁆𑀲𑀲𑁆𑀲 𑀅𑀲𑀗𑁆𑀕𑀳𑁄. 𑀭𑀼𑀴𑁆𑀳𑀻𑀲𑀤𑁆𑀤𑁂𑀲𑀼 𑀓𑀺𑀭𑀺𑀬𑀸𑀬 𑀅𑀦𑀘𑁆𑀘𑀦𑁆𑀢𑀺𑀓𑀪𑀸𑀯𑀢𑁄. 𑀧𑀻𑀢𑀺𑀬𑀸 𑀧𑀦 𑀉𑀧𑀮𑀓𑁆𑀔𑀡𑀪𑀸𑀯𑁂𑀦 𑀅𑀬𑀫𑀢𑁆𑀣𑁄 𑀲𑀼𑀝𑁆𑀞𑀼 𑀬𑀼𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀧𑀻𑀢𑀺𑀉𑀧𑀮𑀓𑁆𑀔𑀺𑀢𑀁 𑀯𑀸’’𑀢𑀺𑀆𑀤𑀺.

𑀧𑀯𑀢𑁆𑀢𑀁 𑀉𑀧𑀸𑀤𑀺𑀦𑁆𑀦𑀓𑁆𑀔𑀦𑁆𑀥𑀁. 𑀘𑀺𑀭𑀝𑁆𑀞𑀺𑀢𑀺𑀓𑀁 𑀳𑁄𑀢𑀻𑀢𑀺 𑀏𑀢𑁂𑀦 𑀦 𑀓𑁂𑀯𑀮𑀁 𑀅𑀦𑀼𑀧𑀸𑀮𑁂𑀢𑀩𑁆𑀩𑀥𑀫𑁆𑀫𑀸𑀦𑀁 𑀔𑀡𑀝𑁆𑀞𑀺𑀢𑀺𑀬𑀸𑀬𑁂𑀯, 𑀅𑀣 𑀔𑁄 𑀧𑀩𑀦𑁆𑀥𑀸𑀦𑀼𑀧𑀘𑁆𑀙𑁂𑀤𑀲𑁆𑀲𑀧𑀺 𑀚𑀻𑀯𑀺𑀢𑀁 𑀓𑀸𑀭𑀡𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀅𑀜𑁆𑀜𑀣𑀸 𑀳𑀺 𑀆𑀬𑀼𑀓𑁆𑀔𑀬𑀫𑀭𑀡𑀁 𑀦 𑀬𑀼𑀚𑁆𑀚𑁂𑀬𑁆𑀬𑀸𑀢𑀺. 𑀅𑀯𑀺𑀲𑁂𑀲𑁂𑀦𑀸𑀢𑀺 𑀓𑀸𑀭𑀡𑀯𑀺𑀲𑁂𑀲𑀸𑀦𑀧𑁂𑀓𑁆𑀔𑁂𑀦 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀢𑀸𑀲𑀸𑀫𑀜𑁆𑀜𑁂𑀦. 𑀬𑀤𑀺𑀧𑀺 𑀅𑀭𑀽𑀧𑀸𑀲𑀜𑁆𑀜𑀪𑀯𑁂𑀲𑀼 𑀭𑀽𑀧𑀸𑀭𑀽𑀧𑀥𑀫𑁆𑀫𑀸 𑀦𑀧𑁆𑀧𑀯𑀢𑁆𑀢𑀦𑁆𑀢𑀺, 𑀢𑁂𑀳𑀺 𑀧𑀦 𑀧𑀼𑀭𑀺𑀫𑀧𑀘𑁆𑀙𑀺𑀫𑀪𑀯𑁂𑀲𑀼 𑀘𑀭𑀺𑀫𑀧𑀞𑀫𑀥𑀫𑁆𑀫𑀸 𑀲𑀫𑀸𑀦𑀚𑀸𑀢𑀺𑀬𑁂𑀦 𑀅𑀩𑁆𑀬𑀯𑀳𑀺𑀢𑀢𑀸𑀬 𑀦𑀺𑀭𑀦𑁆𑀢𑀭𑀸𑀬𑁂𑀯 𑀦𑀸𑀫 𑀳𑁄𑀦𑁆𑀢𑀻𑀢𑀺 ‘‘𑀬𑀸𑀯 𑀧𑀭𑀺𑀦𑀺𑀩𑁆𑀩𑀸𑀦𑀁 𑀅𑀯𑀺𑀘𑁆𑀙𑀺𑀦𑁆𑀦𑀁 𑀧𑀯𑀢𑁆𑀢𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀦𑀼𑀧𑀸𑀮𑀦𑀸𑀤𑀺𑀓𑀲𑁆𑀲𑀸𑀢𑀺 𑀅𑀦𑀼𑀧𑀸𑀮𑀦𑀧𑀯𑀢𑁆𑀢𑀦𑀝𑁆𑀞𑀧𑀦𑀸𑀦𑀺𑀬𑁂𑀯 𑀯𑀤𑀢𑀺. 𑀚𑀻𑀯𑀫𑀸𑀦𑀯𑀺𑀲𑁂𑀲𑀧𑁆𑀧𑀘𑁆𑀘𑀬𑀪𑀸𑀯𑀢𑁄𑀢𑀺 𑀲𑀳𑀚𑀸𑀢𑀸𑀦𑀁 𑀚𑀻𑀯𑀫𑀸𑀦𑀢𑀸𑀯𑀺𑀲𑁂𑀲𑀲𑁆𑀲 𑀧𑀘𑁆𑀘𑀬𑀪𑀸𑀯𑀢𑁄. 𑀇𑀦𑁆𑀤𑁆𑀭𑀺𑀬𑀩𑀤𑁆𑀥𑀲𑁆𑀲 𑀳𑀺 𑀫𑀢𑀭𑀽𑀧𑀢𑁄 𑀓𑀫𑁆𑀫𑀚𑀲𑁆𑀲 𑀘 𑀉𑀢𑀼𑀚𑀸𑀤𑀺𑀢𑁄 𑀯𑀺𑀲𑁂𑀲𑁄 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀓𑀢𑁄𑀢𑀺.

𑀫𑀕𑁆𑀕𑀗𑁆𑀕𑀭𑀸𑀲𑀺𑀯𑀡𑁆𑀡𑀦𑀸

𑀅𑀯𑀺𑀧𑀭𑀻𑀢𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑁂𑀦𑀸𑀢𑀺 𑀇𑀤𑀁 𑀲𑀫𑁆𑀫𑀸-𑀲𑀤𑁆𑀤𑀲𑁆𑀲 𑀤𑀺𑀝𑁆𑀞𑀺-𑀆𑀤𑀺𑀲𑀤𑁆𑀤𑀸𑀦𑀜𑁆𑀘 𑀲𑀫𑀸𑀦𑀸𑀥𑀺𑀓𑀭𑀡𑀢𑀸𑀯𑀲𑁂𑀦 𑀤𑀺𑀝𑁆𑀞𑀺𑀆𑀤𑀻𑀦𑀁 𑀅𑀯𑀺𑀲𑁂𑀲𑀪𑀽𑀢𑀲𑁆𑀲 𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑀲𑁆𑀲 𑀲𑀫𑁆𑀫𑀸-𑀲𑀤𑁆𑀤𑁂𑀦 𑀯𑀺𑀲𑁂𑀲𑀺𑀢𑀩𑁆𑀩𑀢𑁆𑀢𑀸 𑀯𑀼𑀢𑁆𑀢𑀁. 𑀅𑀯𑀺𑀧𑀭𑀻𑀢𑀢𑁆𑀣𑁄 𑀳𑀺 𑀲𑀫𑁆𑀫𑀸-𑀲𑀤𑁆𑀤𑁄, 𑀦 𑀦𑀺𑀬𑁆𑀬𑀸𑀦𑀺𑀓𑀢𑁆𑀣𑁄𑀢𑀺. 𑀅𑀯𑀺𑀧𑀭𑀻𑀢𑀦𑀺𑀬𑁆𑀬𑀸𑀦𑀺𑀓𑀢𑁆𑀣𑁄 𑀏𑀯 𑀯𑀸 𑀲𑀫𑁆𑀫𑀸-𑀲𑀤𑁆𑀤𑁄. 𑀅𑀦𑁂𑀓𑀢𑁆𑀣𑀸 𑀳𑀺 𑀦𑀺𑀧𑀸𑀢𑀸𑀢𑀺. 𑀏𑀯𑀫𑁂𑀯𑀸𑀢𑀺 𑀅𑀯𑀺𑀧𑀭𑀻𑀢𑀦𑀺𑀬𑁆𑀬𑀸𑀦𑀺𑀓𑀪𑀸𑀯𑁂𑀦.

𑀩𑀮𑀭𑀸𑀲𑀺𑀯𑀡𑁆𑀡𑀦𑀸

𑀧𑀢𑀺𑀲𑁆𑀲𑀯𑁄 𑀯𑀘𑀦𑀲𑀫𑁆𑀧𑀝𑀺𑀕𑁆𑀕𑀳𑁄𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀲𑀧𑁆𑀧𑀢𑀺𑀲𑁆𑀲𑀯𑀁 𑀧𑀢𑀺𑀲𑁆𑀲𑀯𑀪𑀽𑀢𑀁 𑀢𑀁𑀲𑀪𑀸𑀕𑀜𑁆𑀘 𑀬𑀁 𑀓𑀺𑀜𑁆𑀘𑀺 𑀕𑀸𑀭𑀯’’𑀦𑁆𑀢𑀺 𑀆𑀳. 𑀢𑀢𑁆𑀣 𑀢𑀢𑁆𑀣 𑀧𑀸𑀓𑀝𑀪𑀸𑀯𑁂𑀦𑀸𑀢𑀺 𑀅𑀚𑁆𑀛𑀢𑁆𑀢𑀪𑀽𑀢𑁂𑀲𑀼 𑀚𑀸𑀢𑀺𑀬𑀸𑀤𑀻𑀲𑀼 𑀩𑀳𑀺𑀤𑁆𑀥𑀸𑀪𑀽𑀢𑁂𑀲𑀼 𑀪𑀺𑀓𑁆𑀔𑀼𑀆𑀤𑀻𑀲𑀼 𑀳𑀺𑀭𑁄𑀢𑁆𑀢𑀧𑁆𑀧𑀸𑀦𑀁 𑀅𑀦𑀼𑀭𑀽𑀧𑀧𑀘𑁆𑀘𑀯𑁂𑀓𑁆𑀔𑀡𑀯𑀲𑁂𑀦 𑀲𑀲𑀫𑁆𑀪𑀸𑀭𑀧𑀣𑀯𑀻𑀆𑀤𑀻𑀲𑀼 𑀧𑀣𑀯𑀻𑀥𑀸𑀢𑀼𑀆𑀤𑀻𑀦𑀁 𑀯𑀺𑀬 𑀯𑀺𑀪𑀽𑀢𑀓𑀺𑀘𑁆𑀘𑀪𑀸𑀯𑁂𑀦𑀸𑀢𑀺 𑀅𑀢𑁆𑀣𑁄.

𑀫𑀽𑀮𑀭𑀸𑀲𑀺𑀯𑀡𑁆𑀡𑀦𑀸

𑀏𑀯𑀜𑁆𑀳𑀺 𑀉𑀧𑀫𑀸𑀬 𑀲𑀫𑁂𑀢𑀻𑀢𑀺 𑀬𑀣𑀸 𑀅𑀲𑀼𑀘𑀺𑀫𑁆𑀳𑀺 𑀧𑀢𑀺𑀢𑀧𑀼𑀭𑀺𑀲𑀲𑁆𑀲 𑀲𑀢𑀺𑀧𑀺 𑀓𑀸𑀬𑁂𑀦 𑀅𑀮𑁆𑀮𑀻𑀬𑀦𑁂 𑀪𑀸𑀯𑁄 𑀅𑀦𑀮𑁆𑀮𑀻𑀦𑁄, 𑀏𑀯𑀁 𑀅𑀮𑁄𑀪𑁄𑀧𑀺 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀕𑀳𑀺𑀢𑁂𑀧𑀺 𑀆𑀭𑀫𑁆𑀫𑀡𑁂 𑀅𑀮𑀕𑁆𑀕𑀪𑀸𑀯𑁂𑀦 𑀅𑀦𑀮𑁆𑀮𑀻𑀦𑀪𑀸𑀯𑁄 𑀅𑀦𑀮𑁆𑀮𑀻𑀦𑀸𑀓𑀸𑀭𑁄 𑀏𑀯 𑀧𑀯𑀢𑁆𑀢𑀢𑀺. 𑀏𑀯𑀁𑀲𑀪𑀸𑀯𑁄 𑀳𑀺 𑀲𑁄 𑀥𑀫𑁆𑀫𑁄𑀢𑀺. 𑀓𑀺𑀜𑁆𑀘𑀺 𑀤𑀼𑀲𑁆𑀲𑀻𑀮𑁆𑀬𑀁 𑀤𑁄𑀲𑀲𑀫𑀼𑀝𑁆𑀞𑀸𑀦𑀁 𑀲𑀩𑁆𑀩𑀫𑁆𑀧𑀺 𑀤𑀼𑀲𑁆𑀲𑀻𑀮𑁆𑀬𑀁 𑀤𑁄𑀲𑀽𑀧𑀦𑀺𑀲𑁆𑀲𑀬𑀦𑁆𑀢𑀺 ‘‘𑀤𑁄𑀲𑀲𑀫𑀼𑀝𑁆𑀞𑀸𑀦𑀢𑀁 𑀤𑁄𑀲𑀽𑀧𑀦𑀺𑀲𑁆𑀲𑀬𑀢𑀜𑁆𑀘𑀸’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀅𑀤𑁄𑀲𑁄 𑀤𑁄𑀲𑀲𑁆𑀲𑁂𑀯 𑀉𑀚𑀼𑀯𑀺𑀧𑀘𑁆𑀘𑀦𑀻𑀓𑁄, 𑀢𑀁𑀫𑀼𑀔𑁂𑀦 𑀤𑀼𑀲𑁆𑀲𑀻𑀮𑁆𑀬𑀲𑁆𑀲𑀸𑀢𑀺 𑀤𑀲𑁆𑀲𑁂𑀢𑀺.

𑀢𑀢𑁆𑀣 𑀚𑀸𑀢𑀸𑀦𑀁 𑀥𑀫𑁆𑀫𑀸𑀦𑀁 𑀅𑀦𑀢𑀺𑀯𑀢𑁆𑀢𑀦𑀝𑁆𑀞𑁂𑀦…𑀧𑁂… 𑀆𑀲𑁂𑀯𑀦𑀝𑁆𑀞𑁂𑀦 𑀪𑀸𑀯𑀦𑀸𑀢𑀺 𑀬𑁄 𑀲𑁄 𑀏𑀓𑀢𑁆𑀢𑀼𑀧𑀕𑀢𑁄 𑀧𑀞𑀫𑀚𑁆𑀛𑀸𑀦𑀸𑀤𑀺𑀅𑀧𑁆𑀧𑀦𑀸𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀆𑀲𑀦𑁆𑀦𑀽𑀧𑀘𑀸𑀭𑀸𑀳𑀺𑀢𑀯𑀺𑀲𑁂𑀲𑁄 𑀦𑀻𑀯𑀭𑀡𑀸𑀤𑀺𑀧𑀭𑀺𑀧𑀦𑁆𑀣𑀯𑀺𑀲𑀼𑀤𑁆𑀥𑀺𑀬𑀸 𑀯𑀺𑀲𑀼𑀤𑁆𑀥𑁄, 𑀢𑀤𑀸𑀯𑀭𑀡𑀯𑀺𑀲𑀬𑀯𑀺𑀭𑀳𑁂𑀦 𑀘 𑀲𑀫𑀧𑁆𑀧𑀯𑀢𑁆𑀢𑀅𑀧𑁆𑀧𑀦𑀸𑀲𑀫𑀸𑀥𑀺𑀲𑀗𑁆𑀔𑀸𑀢𑀁 𑀫𑀚𑁆𑀛𑀺𑀫𑀁 𑀲𑀫𑀣𑀦𑀺𑀫𑀺𑀢𑁆𑀢𑀁 𑀧𑀝𑀺𑀧𑀦𑁆𑀦𑁄, 𑀏𑀯𑀁 𑀧𑀝𑀺𑀧𑀦𑁆𑀦𑀢𑁆𑀢𑀸 𑀏𑀯 𑀢𑀢𑁆𑀣𑀼𑀧𑀕𑀫𑀦𑁂𑀦 𑀢𑀢𑁆𑀣 𑀘 𑀧𑀓𑁆𑀔𑀦𑁆𑀤𑁄, 𑀯𑀺𑀲𑁄𑀥𑁂𑀢𑀩𑁆𑀩𑀲𑁆𑀲 𑀯𑀺𑀓𑁆𑀔𑁂𑀧𑀲𑁆𑀲 𑀓𑀺𑀮𑁂𑀲𑀲𑀁𑀲𑀕𑁆𑀕𑀲𑁆𑀲 𑀘 𑀅𑀪𑀸𑀯𑀢𑁄 𑀯𑀺𑀲𑁄𑀥𑀦𑀲𑀫𑀸𑀥𑀸𑀦𑀏𑀓𑀢𑁆𑀢𑀼𑀧𑀝𑁆𑀞𑀸𑀦𑀩𑁆𑀬𑀸𑀧𑀸𑀭𑀯𑀺𑀭𑀳𑁂𑀦 𑀯𑀺𑀲𑀼𑀤𑁆𑀥𑀺𑀲𑀫𑀣𑀧𑀝𑀺𑀧𑀢𑁆𑀢𑀺𑀏𑀓𑀢𑁆𑀢𑀼𑀧𑀝𑁆𑀞𑀸𑀦𑀸𑀓𑀸𑀭𑁂 𑀅𑀚𑁆𑀛𑀼𑀧𑁂𑀓𑁆𑀔𑀦𑁆𑀢𑁄 𑀅𑀪𑀺𑀩𑁆𑀬𑀢𑁆𑀢𑀭𑀽𑀧𑀸𑀬 𑀲𑀳𑀚𑀸𑀢𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀬 𑀓𑀺𑀘𑁆𑀘𑀯𑀲𑁂𑀦 𑀉𑀧𑁂𑀓𑁆𑀔𑀸𑀦𑀼𑀩𑁆𑀭𑀽𑀳𑀺𑀢𑁄, 𑀢𑀲𑁆𑀫𑀺𑀁𑀬𑁂𑀯 𑀚𑀸𑀢𑀸 𑀲𑀫𑀸𑀥𑀺𑀧𑀜𑁆𑀜𑀸𑀲𑀗𑁆𑀔𑀸𑀢𑀸 𑀬𑀼𑀕𑀦𑀤𑁆𑀥𑀥𑀫𑁆𑀫𑀸. 𑀢𑁂 𑀬𑀣𑀸 𑀅𑀜𑁆𑀜𑀁 𑀅𑀦𑀢𑀺𑀯𑀢𑁆𑀢𑀫𑀸𑀦𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀦𑁆𑀢𑀺, 𑀏𑀯𑀁 𑀪𑀸𑀯𑀦𑀸 𑀩𑁆𑀭𑀽𑀳𑀦𑀸. 𑀢𑀣𑀸 𑀬𑀸𑀦𑀺 𑀢𑀢𑁆𑀣 𑀲𑀤𑁆𑀥𑀸𑀤𑀻𑀦𑀺 𑀇𑀦𑁆𑀤𑁆𑀭𑀺𑀬𑀸𑀦𑀺 𑀦𑀸𑀦𑀸𑀓𑀺𑀮𑁂𑀲𑁂𑀳𑀺 𑀯𑀺𑀫𑀼𑀢𑁆𑀢𑀢𑁆𑀢𑀸 𑀯𑀺𑀫𑀼𑀢𑁆𑀢𑀺𑀭𑀲𑁂𑀦 𑀏𑀓𑀭𑀲𑀸𑀦𑀺 𑀳𑀼𑀢𑁆𑀯𑀸 𑀧𑀯𑀢𑁆𑀢𑀸𑀦𑀺. 𑀬𑀜𑁆𑀘 𑀢𑀢𑁆𑀣 𑀢𑀤𑀼𑀧𑀕𑀁, 𑀢𑁂𑀲𑀁 𑀅𑀦𑀢𑀺𑀯𑀢𑁆𑀢𑀦𑀏𑀓𑀭𑀲𑀪𑀸𑀯𑀸𑀦𑀁 𑀅𑀦𑀼𑀘𑁆𑀙𑀯𑀺𑀓𑀁 𑀯𑀻𑀭𑀺𑀬𑀁 𑀯𑀸𑀳𑀻𑀬𑀢𑀺 𑀧𑀯𑀢𑁆𑀢𑀻𑀬𑀢𑀺, 𑀬𑀸 𑀘𑀲𑁆𑀲 𑀢𑀲𑁆𑀫𑀺𑀁 𑀔𑀡𑁂 𑀧𑀯𑀢𑁆𑀢𑀸 𑀧𑀕𑀼𑀡𑀩𑀮𑀯𑀪𑀸𑀯𑀸𑀧𑀢𑁆𑀢𑀺𑀲𑀗𑁆𑀔𑀸𑀢𑀸 𑀆𑀲𑁂𑀯𑀦𑀸. 𑀲𑀩𑁆𑀩𑁂𑀲𑀁 𑀏𑀢𑁂𑀲𑀁 𑀆𑀓𑀸𑀭𑀸𑀦𑀁 𑀪𑀸𑀯𑀦𑀸 𑀉𑀧𑁆𑀧𑀸𑀤𑀦𑀸 𑀯𑀟𑁆𑀠𑀦𑀸, 𑀅𑀬𑀁 𑀢𑀢𑁆𑀣 𑀚𑀸𑀢𑀸𑀦𑀁…𑀧𑁂… 𑀆𑀲𑁂𑀯𑀦𑀝𑁆𑀞𑁂𑀦 𑀪𑀸𑀯𑀦𑀸 𑀦𑀸𑀫.

𑀬𑀲𑁆𑀫𑀸 𑀧𑀦𑀸𑀬𑀁 𑀪𑀸𑀯𑀦𑀸𑀓𑀸𑀭𑁄 ‘‘𑀧𑀞𑀫𑀲𑁆𑀲 𑀛𑀸𑀦𑀲𑁆𑀲 𑀧𑀝𑀺𑀧𑀤𑀸𑀯𑀺𑀲𑀼𑀤𑁆𑀥𑀺 𑀆𑀤𑀻’’𑀢𑀺𑀆𑀤𑀺𑀦𑀸𑀧𑀺 (𑀧𑀝𑀺. 𑀫. 𑁧.𑁧𑁫𑁮) 𑀧𑀸𑀴𑀺𑀬𑀁 𑀆𑀕𑀢𑁄 𑀏𑀯, 𑀜𑀸𑀡𑁂𑀦 𑀘 𑀲𑀁𑀓𑀺𑀮𑁂𑀲𑀯𑁄𑀤𑀸𑀦𑁂𑀲𑀼 𑀢𑀁 𑀢𑀁 𑀆𑀤𑀻𑀦𑀯𑀁 𑀆𑀦𑀺𑀲𑀁𑀲𑀜𑁆𑀘 𑀤𑀺𑀲𑁆𑀯𑀸 𑀢𑀣𑀸 𑀢𑀣𑀸 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁄, 𑀢𑀲𑁆𑀫𑀸 ‘‘𑀏𑀯𑀁 𑀯𑀼𑀢𑁆𑀢𑀸𑀬 𑀧𑀜𑁆𑀜𑀸𑀲𑀸𑀥𑀦𑀸𑀬 𑀪𑀸𑀯𑀦𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀅𑀧𑁆𑀧𑀯𑀢𑁆𑀢𑀻𑀢𑀺 𑀬𑀲𑁆𑀫𑀺𑀁 𑀥𑀫𑁆𑀫𑁂 𑀲𑀢𑀺 𑀬𑀣𑀸𑀯𑀼𑀢𑁆𑀢𑀸 𑀪𑀸𑀯𑀦𑀸 𑀦𑀧𑁆𑀧𑀯𑀢𑁆𑀢𑀢𑀺, 𑀲𑁄 𑀥𑀫𑁆𑀫𑁄 𑀧𑀝𑀺𑀧𑀓𑁆𑀔𑀪𑀸𑀯𑀦𑀸𑀧𑀭𑀸𑀫𑀲𑀦𑁂𑀦 𑀅𑀪𑀸𑀯𑀦𑀸𑀢𑀺 𑀯𑀼𑀢𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀅𑀪𑀸𑀯𑀫𑀢𑁆𑀢𑀲𑁆𑀲 𑀅𑀫𑁄𑀳𑁄 𑀧𑀝𑀺𑀧𑀓𑁆𑀔𑁄𑀢𑀺 𑀬𑀼𑀚𑁆𑀚𑀢𑀻𑀢𑀺. 𑀢𑀧𑁆𑀧𑀝𑀺𑀧𑀓𑁆𑀔𑀪𑀽𑀢𑀸 𑀅𑀓𑀼𑀲𑀮𑀸 𑀓𑀸𑀫𑀘𑁆𑀙𑀦𑁆𑀤𑀸𑀤𑀬𑁄 𑀤𑀝𑁆𑀞𑀩𑁆𑀩𑀸. 𑀧𑀫𑀸𑀤𑀯𑀺𑀲𑁂𑀲𑁄 𑀯𑀸 𑀅𑀪𑀸𑀯𑀦𑀸. 𑀲𑁄 𑀳𑀺 ‘‘𑀓𑀼𑀲𑀮𑀸𑀦𑀁 𑀯𑀸 𑀥𑀫𑁆𑀫𑀸𑀦𑀁 𑀅𑀦𑀸𑀲𑁂𑀯𑀦𑀸 𑀅𑀪𑀸𑀯𑀦𑀸 𑀅𑀩𑀳𑀼𑀮𑀻𑀓𑀫𑁆𑀫’’𑀦𑁆𑀢𑀺𑀆𑀤𑀺𑀦𑀸 𑀦𑀺𑀤𑁆𑀤𑀺𑀝𑁆𑀞𑁄𑀢𑀺.

𑀏𑀓𑀦𑁆𑀢𑁂𑀦 𑀅𑀮𑀩𑁆𑀪𑀦𑁂𑀬𑁆𑀬𑀤𑀲𑁆𑀲𑀦𑀢𑁆𑀣𑀁 ‘‘𑀚𑀭𑀸𑀥𑀫𑁆𑀫𑁄’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀧𑀸𑀴𑀺𑀬𑀁 ‘‘𑀚𑀸𑀢𑀺𑀥𑀫𑁆𑀫𑀸𑀦𑀁, 𑀪𑀺𑀓𑁆𑀔𑀯𑁂, 𑀲𑀢𑁆𑀢𑀸𑀦𑀁 𑀏𑀯𑀁 𑀇𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁩.𑁩𑁭𑁩) 𑀇𑀘𑁆𑀙𑀺𑀢𑀸𑀮𑀸𑀪𑁄 𑀯𑀺𑀪𑀢𑁆𑀢𑁄. 𑀅𑀮𑁄𑀪𑀸𑀦𑀼𑀪𑀸𑀯𑁂𑀦 𑀓𑀸𑀬𑀸𑀦𑀼𑀧𑀲𑁆𑀲𑀦𑀸𑀬, 𑀅𑀫𑁄𑀳𑀸𑀦𑀼𑀪𑀸𑀯𑁂𑀦 𑀘𑀺𑀢𑁆𑀢𑀥𑀫𑁆𑀫𑀸𑀦𑀼𑀧𑀲𑁆𑀲𑀦𑀸𑀬 𑀲𑀺𑀤𑁆𑀥𑀺 𑀧𑀸𑀓𑀝𑀸𑀬𑁂𑀯𑀸𑀢𑀺 𑀅𑀧𑀸𑀓𑀝𑀁 𑀅𑀤𑁄𑀲𑀸𑀦𑀼𑀪𑀸𑀯𑁂𑀦 𑀯𑁂𑀤𑀦𑀸𑀦𑀼𑀧𑀲𑁆𑀲𑀦𑀸𑀲𑀺𑀤𑁆𑀥𑀺𑀁 𑀯𑀺𑀪𑀸𑀯𑁂𑀦𑁆𑀢𑁄 ‘‘𑀲𑀼𑀔𑀯𑀺𑀧𑀭𑀺𑀡𑀸𑀫𑁂’’𑀢𑀺𑀆𑀤𑀺𑀫𑀸𑀳. 𑀅𑀬𑀜𑁆𑀘 𑀬𑁄𑀚𑀦𑀸 𑀅𑀮𑁄𑀪𑀸𑀤𑀻𑀦𑀁 𑀯𑀺𑀲𑁂𑀲𑀧𑀘𑁆𑀘𑀬𑀢𑀁 𑀲𑀦𑁆𑀥𑀸𑀬 𑀓𑀢𑀸, 𑀅𑀯𑀺𑀲𑁂𑀲𑁂𑀦 𑀧𑀦 𑀲𑀩𑁆𑀩𑁂 𑀲𑀩𑁆𑀩𑁂𑀲𑀁 𑀧𑀘𑁆𑀘𑀬𑀸. 𑀲𑀪𑀸𑀯𑀢𑁄 𑀲𑀗𑁆𑀓𑀧𑁆𑀧𑀢𑁄 𑀘 𑀉𑀧𑁆𑀧𑀦𑁆𑀦𑀲𑁆𑀲 𑀤𑀼𑀓𑁆𑀔𑀲𑁆𑀲 𑀅𑀲𑀳𑀦𑀯𑀲𑁂𑀦𑁂𑀯 𑀉𑀧𑁆𑀧𑀚𑁆𑀚𑀢𑀻𑀢𑀺 𑀤𑁄𑀲𑁄 𑀢𑀁𑀤𑀲𑁆𑀲𑀦𑀲𑁆𑀲 𑀆𑀲𑀦𑁆𑀦𑀧𑀝𑀺𑀧𑀓𑁆𑀔𑁄, 𑀦 𑀭𑀸𑀕𑁄 𑀯𑀺𑀬 𑀤𑀽𑀭𑀧𑀝𑀺𑀧𑀓𑁆𑀔𑁄.

𑀓𑀫𑁆𑀫𑀧𑀣𑀭𑀸𑀲𑀺𑀯𑀡𑁆𑀡𑀦𑀸

𑀅𑀪𑀺𑀚𑁆𑀛𑀸𑀤𑀬𑁄 𑀯𑀺𑀬 𑀅𑀦𑀪𑀺𑀚𑁆𑀛𑀸𑀤𑀬𑁄𑀧𑀺 𑀦 𑀏𑀓𑀦𑁆𑀢𑀁 𑀓𑀫𑁆𑀫𑀧𑀣𑀪𑀽𑀢𑀸𑀬𑁂𑀯𑀸𑀢𑀺 𑀆𑀳 ‘‘𑀓𑀫𑁆𑀫𑀧𑀣𑀢𑀸𑀢𑀁𑀲𑀪𑀸𑀕𑀢𑀸𑀳𑀻’’𑀢𑀺. 𑀫𑀦𑁄𑀓𑀫𑁆𑀫𑀧𑀣𑀪𑀸𑀯𑁂𑀦 𑀧𑀯𑀢𑁆𑀢𑀦𑀓𑀫𑁆𑀫𑀪𑀸𑀯𑀢𑁄 𑀳𑀺 𑀏𑀢𑁂𑀲𑀁 𑀓𑀫𑁆𑀫𑀧𑀣𑀭𑀸𑀲𑀺𑀪𑀸𑀯𑁂𑀦 𑀲𑀗𑁆𑀕𑀳𑁄, 𑀦 𑀲𑀩𑁆𑀩𑀤𑀸 𑀓𑀫𑁆𑀫𑀧𑀣𑀸𑀬𑁂𑀯𑀸𑀢𑀺. 𑀢𑁂𑀦 𑀬𑁄 𑀅𑀜𑁆𑀜𑁄𑀧𑀺 𑀥𑀫𑁆𑀫𑁄 𑀅𑀦𑀺𑀬𑀢𑁄 𑀓𑀫𑁆𑀫𑀧𑀣𑀪𑀸𑀯𑁂𑀦 𑀧𑀸𑀓𑀝𑁄 𑀘, 𑀢𑀲𑁆𑀲𑀧𑀺 𑀓𑀫𑁆𑀫𑀧𑀣𑀢𑀸𑀯𑀘𑀦𑀁 𑀦 𑀯𑀺𑀭𑀼𑀚𑁆𑀛𑀢𑀻𑀢𑀺 𑀤𑀲𑁆𑀲𑁂𑀢𑀺.

𑀧𑀲𑁆𑀲𑀤𑁆𑀥𑀸𑀤𑀺𑀬𑀼𑀕𑀮𑀯𑀡𑁆𑀡𑀦𑀸

𑀲𑀫𑀦𑁆𑀢𑀺 𑀲𑀫𑁆𑀫𑀸. 𑀘𑁂𑀢𑀺𑀬𑀯𑀦𑁆𑀤𑀦𑀸𑀤𑀺𑀅𑀢𑁆𑀣𑀦𑁆𑀢𑀺 𑀘𑁂𑀢𑀺𑀬𑀯𑀦𑁆𑀤𑀦𑀸𑀤𑀺𑀳𑁂𑀢𑀼. 𑀲𑀫𑀣𑀘𑀢𑀼𑀲𑀘𑁆𑀘𑀓𑀫𑁆𑀫𑀝𑁆𑀞𑀸𑀦𑀯𑀲𑁂𑀦 𑀢𑀩𑁆𑀪𑁂𑀤𑀯𑀲𑁂𑀦 𑀘 𑀲𑀩𑁆𑀩𑀓𑀫𑁆𑀫𑀝𑁆𑀞𑀸𑀦𑀪𑀸𑀯𑀦𑀸𑀪𑀺𑀬𑀼𑀢𑁆𑀢𑀸𑀦𑀁 𑀫𑀼𑀤𑀼𑀫𑀚𑁆𑀛𑀺𑀫𑀢𑀺𑀓𑁆𑀔𑀺𑀦𑁆𑀤𑁆𑀭𑀺𑀬𑀢𑀸𑀤𑀺𑀪𑁂𑀤𑀯𑀲𑁂𑀦 𑀲𑀩𑁆𑀩𑀬𑁄𑀕𑀻𑀦𑀁 𑀘𑀺𑀢𑁆𑀢𑀲𑁆𑀲 𑀮𑀻𑀦𑀼𑀤𑁆𑀥𑀘𑁆𑀘𑀸𑀤𑀺𑀓𑀸𑀮𑀯𑀲𑁂𑀦 𑀲𑀩𑁆𑀩𑀤𑀸 𑀳𑀺𑀢𑀸𑀳𑀺𑀢𑀥𑀫𑁆𑀫𑀽𑀧𑀮𑀓𑁆𑀔𑀡𑀪𑀸𑀯𑀢𑁄 𑀬𑀣𑀸𑀲𑀪𑀸𑀯𑀁 𑀧𑀝𑀺𑀯𑁂𑀥𑀪𑀸𑀯𑀢𑁄 𑀘 𑀲𑀢𑀺𑀲𑀫𑁆𑀧𑀚𑀜𑁆𑀜𑀸𑀦𑀁 𑀧𑀸𑀭𑀺𑀩𑀦𑁆𑀥𑀓𑀳𑀭𑀡𑀪𑀸𑀯𑀦𑀸𑀯𑀟𑁆𑀠𑀦𑀸𑀦𑀺 𑀅𑀯𑀺𑀲𑁂𑀲𑀢𑁄 𑀤𑀝𑁆𑀞𑀩𑁆𑀩𑀸𑀦𑀺. 𑀬𑀣𑀸 𑀅𑀧𑁆𑀧𑀦𑀸𑀓𑁄𑀲𑀮𑁆𑀮𑁂𑀦 𑀯𑀺𑀦𑀸 𑀲𑀫𑀣𑁄 𑀲𑀫𑀣𑀫𑀦𑁆𑀢𑀭𑁂𑀦 𑀬𑀣𑀸𑀪𑀽𑀢𑀸𑀯𑀩𑁄𑀥𑁄 𑀘 𑀦𑀢𑁆𑀣𑀻𑀢𑀺 𑀦𑀸𑀦𑀸𑀓𑁆𑀔𑀡𑀺𑀓𑀸 𑀲𑀫𑀸𑀥𑀺𑀧𑀜𑁆𑀜𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀯𑀺𑀲𑁂𑀲𑀓𑀸𑀭𑀡𑀁, 𑀏𑀯𑀁 𑀧𑀝𑀺𑀯𑁂𑀥𑁂 𑀏𑀓𑀓𑁆𑀔𑀡𑀺𑀓𑀸𑀧𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 𑀆𑀳 ‘‘𑀅𑀜𑁆𑀜𑀫𑀜𑁆𑀜𑀁 𑀦𑀺𑀫𑀺𑀢𑁆𑀢𑀪𑀸𑀯𑁂𑀦𑀸’’𑀢𑀺. 𑀧𑀜𑁆𑀜𑀸𑀬 𑀳𑀺 𑀲𑀸𑀢𑀺𑀲𑀬𑀁 𑀅𑀯𑀪𑀸𑀲𑀺𑀬𑀫𑀸𑀦𑁂 𑀯𑀺𑀲𑀬𑁂 𑀲𑀫𑀸𑀥𑀺 𑀏𑀓𑀢𑁆𑀢𑀯𑀲𑁂𑀦 𑀅𑀧𑁆𑀧𑁂𑀢𑀼𑀁 𑀲𑀓𑁆𑀓𑁄𑀢𑀺, 𑀲𑀫𑀸𑀥𑀺𑀫𑁆𑀳𑀺 𑀘 𑀫𑀚𑁆𑀛𑀺𑀫𑀁 𑀲𑀫𑀣𑀦𑀺𑀫𑀺𑀢𑁆𑀢𑀁 𑀧𑀝𑀺𑀧𑀦𑁆𑀦𑁂 𑀧𑀜𑁆𑀜𑀸 𑀆𑀭𑀫𑁆𑀫𑀡𑁂𑀲𑀼 𑀯𑀺𑀲𑀤𑀸 𑀯𑀳𑀢𑀻𑀢𑀺. 𑀲𑀫𑀁 𑀧𑀯𑀢𑁆𑀢𑀸𑀢𑀺 𑀅𑀜𑁆𑀜𑀫𑀜𑁆𑀜𑀸𑀦𑀢𑀺𑀯𑀢𑁆𑀢𑀦𑁂𑀦 𑀲𑀫𑀁 𑀅𑀯𑀺𑀲𑀫𑀁 𑀏𑀓𑀭𑀲𑀪𑀸𑀯𑁂𑀦 𑀧𑀯𑀢𑁆𑀢𑀸. 𑀅𑀜𑁆𑀜𑀫𑀜𑁆𑀜𑀲𑀳𑀸𑀬𑀪𑀸𑀯𑀽𑀧𑀕𑀫𑀦𑁂𑀦 𑀬𑁄𑀕𑀺𑀦𑁄 𑀫𑀦𑁄𑀭𑀣𑀥𑀼𑀭𑀸𑀓𑀟𑁆𑀠𑀦𑁂 𑀭𑀣𑀥𑀼𑀭𑀸𑀓𑀟𑁆𑀠𑀦𑁂 𑀯𑀺𑀬 𑀆𑀚𑀸𑀦𑁂𑀬𑁆𑀬𑀬𑀼𑀕𑁄 𑀬𑀼𑀕𑀮𑀓𑁄 𑀳𑀼𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀸𑀦𑀢𑀺𑀯𑀢𑁆𑀢𑀫𑀸𑀦𑁂𑀦 𑀦𑀤𑁆𑀥𑀸 𑀩𑀤𑁆𑀥𑀸 𑀯𑀺𑀬𑀸𑀢𑀺 𑀯𑀸 𑀬𑀼𑀕𑀦𑀤𑁆𑀥𑀸. 𑀅𑀥𑀺𑀘𑀺𑀢𑁆𑀢𑀫𑀦𑀼𑀬𑀼𑀢𑁆𑀢𑁂𑀳𑀺 𑀯𑀻𑀭𑀺𑀬𑀲𑀫𑀸𑀥𑀬𑁄 𑀲𑀫𑀁 𑀬𑁄𑀚𑁂𑀢𑀩𑁆𑀩𑀸𑀢𑀺 𑀇𑀫𑀲𑁆𑀲 𑀯𑀺𑀲𑁂𑀲𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀧𑀼𑀩𑁆𑀩𑁂 𑀕𑀳𑀺𑀢𑀸𑀧𑀺 𑀢𑁂 𑀧𑀼𑀦 𑀕𑀳𑀺𑀢𑀸𑀢𑀺 𑀤𑀲𑁆𑀲𑁂𑀢𑀼𑀁 𑀯𑀻𑀭𑀺𑀬𑀲𑀫𑀸𑀥𑀺𑀬𑁄𑀚𑀦𑀢𑁆𑀣𑀸𑀬𑀸𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀢𑀁 𑀧𑀦 𑀲𑀫𑀸𑀥𑀺𑀯𑀻𑀭𑀺𑀬𑀬𑁄𑀕𑀲𑁆𑀲 𑀯𑀺𑀪𑀸𑀯𑀦𑀁 𑀳𑁄𑀢𑀻𑀢𑀺 ‘‘𑀬𑁄𑀕𑀯𑀘𑀦𑀢𑁆𑀣𑀸𑀬𑀸𑀢𑀺 𑀅𑀢𑁆𑀣𑁄’’𑀢𑀺 𑀆𑀳.

𑀬𑁂𑀯𑀸𑀧𑀦𑀓𑀯𑀡𑁆𑀡𑀦𑀸

𑀬𑀣𑀸 𑀢𑀣𑀸 𑀯𑀸𑀢𑀺 𑀲𑀫𑁆𑀫𑀸 𑀫𑀺𑀘𑁆𑀙𑀸 𑀯𑀸. 𑀅𑀦𑀥𑀺𑀫𑀼𑀘𑁆𑀘𑀦𑁆𑀢𑁄𑀢𑀺 ‘‘𑀇𑀤𑀁 𑀓𑀭𑀺𑀲𑁆𑀲𑀸𑀫𑀺, 𑀏𑀢𑀁 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀏𑀯𑀁 𑀧𑀯𑀢𑁆𑀢𑀧𑀼𑀩𑁆𑀩𑀪𑀸𑀕𑀲𑀦𑁆𑀦𑀺𑀝𑁆𑀞𑀸𑀦𑀳𑁂𑀢𑀼𑀓𑁂𑀦 𑀧𑀬𑁄𑀕𑀓𑀸𑀮𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀅𑀦𑀺𑀘𑁆𑀙𑀺𑀦𑀦𑁆𑀢𑁄. 𑀬𑀢𑁆𑀣 𑀳𑀺 𑀅𑀦𑀺𑀘𑁆𑀙𑀬𑁄, 𑀢𑀢𑁆𑀣 𑀅𑀧𑁆𑀧𑀝𑀺𑀧𑀢𑁆𑀢𑀺 𑀏𑀯𑀸𑀢𑀺. 𑀲𑀁𑀲𑀧𑁆𑀧𑀦𑀁 𑀲𑀁𑀲𑀬𑁄. 𑀲𑁄 𑀳𑀺 ‘‘𑀆𑀲𑀧𑁆𑀧𑀦𑀸 𑀧𑀭𑀺𑀲𑀧𑁆𑀧𑀦𑀸’’𑀢𑀺 𑀯𑀼𑀢𑁆𑀢𑁄. 𑀅𑀲𑀢𑀺𑀧𑀺 𑀩𑁆𑀬𑀸𑀧𑀸𑀭𑁂 𑀢𑀢𑁆𑀭𑀫𑀚𑁆𑀛𑀢𑁆𑀢𑀢𑀸𑀬 𑀲𑀢𑀺 𑀢𑀁𑀲𑀫𑁆𑀧𑀬𑀼𑀢𑁆𑀢𑀥𑀫𑁆𑀫𑀸 𑀲𑀓𑀲𑀓𑀓𑀺𑀘𑁆𑀘𑀯𑀲𑁂𑀦 𑀅𑀦𑀽𑀦𑀸𑀦𑀥𑀺𑀓𑀢𑀸𑀬 𑀅𑀮𑀻𑀦𑀅𑀦𑀼𑀤𑁆𑀥𑀢𑀢𑀸𑀬 𑀘 𑀲𑀁𑀯𑀢𑁆𑀢𑀦𑁆𑀢𑀻𑀢𑀺 𑀲𑀸 𑀢𑁂𑀲𑀁 𑀢𑀣𑀸𑀧𑀯𑀢𑁆𑀢𑀺𑀬𑀸 𑀧𑀘𑁆𑀘𑀬𑀪𑀽𑀢𑀸 𑀊𑀦𑀸𑀥𑀺𑀓𑀪𑀸𑀯𑀁 𑀦𑀺𑀯𑀸𑀭𑁂𑀢𑀺 𑀯𑀺𑀬𑀸𑀢𑀺 𑀊𑀦𑀸𑀥𑀺𑀓𑀦𑀺𑀯𑀸𑀭𑀡𑀭𑀲𑀸 𑀯𑀼𑀢𑁆𑀢𑀸. 𑀢𑀣𑀸 𑀧𑀯𑀢𑁆𑀢𑀺𑀧𑀘𑁆𑀘𑀬𑀢𑁆𑀢𑀸𑀬𑁂𑀯 𑀢𑁂𑀲𑀼 𑀥𑀫𑁆𑀫𑁂𑀲𑀼 𑀫𑀚𑁆𑀛𑀢𑁆𑀢𑀢𑀸𑀢𑀺 𑀘 𑀯𑀼𑀢𑁆𑀢𑀸.

𑀛𑀸𑀦𑀧𑀤𑀲𑁆𑀲𑀸𑀢𑀺 𑀛𑀸𑀦𑀲𑀤𑁆𑀤𑀲𑁆𑀲. 𑀢𑁂𑀲𑀽𑀢𑀺 𑀧𑀜𑁆𑀘𑀲𑀼. 𑀧𑀜𑁆𑀘 𑀳𑀺 𑀅𑀗𑁆𑀕𑀸𑀦𑀺 𑀛𑀸𑀦𑀧𑀤𑀲𑁆𑀲 𑀅𑀢𑁆𑀣𑁄𑀢𑀺 𑀇𑀤𑀁 𑀲𑀁𑀯𑀡𑁆𑀡𑀺𑀬𑀫𑀸𑀦𑀢𑁆𑀢𑀸𑀬𑁂𑀯 𑀇𑀫𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦 𑀳𑀺 𑀲𑀩𑁆𑀩𑀲𑁆𑀫𑀺𑀁 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀧𑀜𑁆𑀘𑁂𑀯 𑀛𑀸𑀦𑀗𑁆𑀕𑀸𑀦𑀺. 𑀧𑀤𑀲𑀫𑀽𑀳𑁄 𑀯𑀸𑀓𑁆𑀬𑀁, 𑀧𑀤𑀓𑁄𑀝𑁆𑀞𑀸𑀲𑁄 𑀯𑀸 𑀨𑀲𑁆𑀲𑀧𑀜𑁆𑀘𑀫𑀓𑀸𑀤𑀺 𑀥𑀫𑁆𑀫𑀭𑀸𑀲𑀺. 𑀯𑀼𑀢𑁆𑀢𑀁 𑀧𑀽𑀭𑀺𑀢𑀦𑁆𑀢𑀺 𑀙𑀧𑀡𑁆𑀡𑀸𑀲𑀸𑀤𑀺𑀢𑀸𑀬 𑀧𑀽𑀭𑀡𑀯𑀲𑁂𑀦. 𑀨𑀲𑁆𑀲𑀧𑀘𑁆𑀘𑀬𑀸 𑀯𑁂𑀤𑀦𑀸 ‘‘𑀨𑀼𑀝𑁆𑀞𑁄 𑀯𑁂𑀤𑁂𑀢𑀺, 𑀨𑀼𑀝𑁆𑀞𑁄 𑀲𑀜𑁆𑀚𑀸𑀦𑀸𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 (𑀲𑀁. 𑀦𑀺. 𑁪.𑁯𑁩) 𑀨𑀲𑁆𑀲𑁄 𑀯𑁂𑀤𑀦𑀸𑀤𑀻𑀦𑀁 𑀧𑀘𑁆𑀘𑀬𑁄. 𑀬𑀤𑀺𑀧𑀺 𑀙𑀦𑁆𑀤𑀸𑀤𑀬𑁄 𑀬𑀣𑀸𑀯𑀼𑀢𑁆𑀢𑀭𑀸𑀲𑀺𑀓𑀺𑀘𑁆𑀘𑀸𑀪𑀸𑀯𑀢𑁄 𑀢𑁂𑀲𑀼 𑀦 𑀯𑀢𑁆𑀢𑀩𑁆𑀩𑀸, 𑀯𑀺𑀲𑀼𑀁 𑀭𑀸𑀲𑀺𑀅𑀦𑁆𑀢𑀭𑀪𑀸𑀯𑁂𑀦 𑀧𑀦 𑀲𑀭𑀽𑀧𑀢𑁄 𑀯𑀢𑁆𑀢𑀩𑁆𑀩𑀸𑀢𑀺 𑀘𑁄𑀤𑀦𑀁 𑀫𑀦𑀲𑀺 𑀓𑀢𑁆𑀯𑀸 ‘‘𑀯𑀼𑀢𑁆𑀢𑀸𑀦𑀫𑁆𑀧𑀻’’𑀢𑀺𑀆𑀤𑀺𑀫𑀸𑀳.

𑀥𑀫𑁆𑀫𑀼𑀤𑁆𑀤𑁂𑀲𑀯𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑀸𑀫𑀸𑀯𑀘𑀭𑀓𑀼𑀲𑀮𑀁

𑀦𑀺𑀤𑁆𑀤𑁂𑀲𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑁨. 𑀲𑀦𑁆𑀢𑁂𑀢𑀺 𑀲𑀪𑀸𑀯𑀢𑁄 𑀯𑀺𑀚𑁆𑀚𑀫𑀸𑀦𑁂. 𑀨𑀲𑁆𑀲𑀲𑁆𑀲 𑀯𑀺𑀲𑀬𑀯𑀺𑀲𑀬𑀻𑀦𑀁 𑀲𑀦𑁆𑀦𑀺𑀧𑀢𑀦𑀸𑀓𑀸𑀭𑁂𑀦 𑀕𑀳𑁂𑀢𑀩𑁆𑀩𑀢𑁆𑀢𑀸 𑀨𑀼𑀲𑀦𑀁 𑀯𑀺𑀲𑀬𑁂 𑀘𑀺𑀢𑁆𑀢𑀲𑁆𑀲 𑀲𑀦𑁆𑀦𑀺𑀧𑀢𑀦𑀁 𑀯𑀼𑀢𑁆𑀢𑀁. ‘‘𑀘𑀺𑀦𑁆𑀢𑀦𑀝𑁆𑀞𑁂𑀦 𑀘𑀺𑀢𑁆𑀢𑀁, 𑀫𑀦𑀦𑀝𑁆𑀞𑁂𑀦 𑀫𑀦𑁄’’𑀢𑀺𑀆𑀤𑀺𑀦𑀸 𑀘𑀺𑀢𑁆𑀢𑀸𑀤𑀺𑀲𑀤𑁆𑀤𑀸 𑀘𑀺𑀦𑁆𑀢𑀦𑀸𑀤𑀺𑀩𑁆𑀬𑀸𑀧𑀸𑀭𑀫𑀼𑀔𑁂𑀦 𑀅𑀢𑁆𑀢𑀦𑁄 𑀅𑀢𑁆𑀣𑀁 𑀯𑀺𑀪𑀸𑀯𑁂𑀦𑁆𑀢𑀻𑀢𑀺 𑀆𑀳 ‘‘𑀘𑀺𑀢𑁆𑀢𑀁 𑀫𑀦𑁄𑀢𑀺𑀆𑀤𑀻𑀲𑀼 𑀯𑀺𑀬 𑀓𑀺𑀘𑁆𑀘𑀯𑀺𑀲𑁂𑀲𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸’’𑀢𑀺. 𑀬𑀣𑀸 𑀮𑁄𑀓𑁂 𑀯𑀺𑀓𑀢𑀫𑁂𑀯 𑀯𑁂𑀓𑀢𑀁, 𑀯𑀺𑀲𑀬𑁄 𑀏𑀯 𑀯𑁂𑀲𑀬𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁 𑀫𑀦𑁄 𑀏𑀯 𑀫𑀸𑀦𑀲𑀦𑁆𑀢𑀺 𑀲𑀤𑁆𑀤𑀫𑀢𑁆𑀢𑀯𑀺𑀲𑁂𑀲𑁄. 𑀦𑀻𑀮𑀸𑀤𑀺-𑀲𑀤𑁆𑀤𑀸 𑀯𑀺𑀬 𑀯𑀢𑁆𑀣𑀸𑀤𑀻𑀲𑀼 𑀘𑀺𑀢𑁆𑀢𑁂𑀲𑀼 𑀧𑀭𑀺𑀲𑀼𑀤𑁆𑀥𑀪𑀸𑀯𑀦𑀺𑀩𑀦𑁆𑀥𑀦𑀸 𑀧𑀡𑁆𑀟𑀭𑀲𑀤𑁆𑀤𑀲𑁆𑀲 𑀧𑀯𑀢𑁆𑀢𑀻𑀢𑀺 𑀢𑀲𑁆𑀲 𑀕𑀼𑀡𑀯𑀺𑀲𑁂𑀲𑀸𑀧𑁂𑀓𑁆𑀔𑀢𑀸 𑀯𑀼𑀢𑁆𑀢𑀸. 𑀬𑀣𑀸 𑀓𑀸𑀬𑀺𑀓𑀁 𑀲𑀸𑀢𑀦𑁆𑀢𑀺 𑀏𑀢𑁆𑀣 𑀓𑀸𑀬𑀧𑁆𑀧𑀲𑀸𑀤𑀦𑀺𑀲𑁆𑀲𑀺𑀢𑀦𑁆𑀢𑀺 𑀅𑀢𑁆𑀣𑁄, 𑀏𑀯𑀁 𑀘𑁂𑀢𑀲𑀺𑀓𑀁 𑀲𑀸𑀢𑀦𑁆𑀢𑀺 𑀏𑀢𑁆𑀣 𑀘𑁂𑀢𑁄𑀦𑀺𑀲𑁆𑀲𑀺𑀢𑀁 𑀲𑀸𑀢𑀦𑁆𑀢𑀺 𑀦𑀺𑀲𑁆𑀲𑀬𑀯𑀺𑀲𑁂𑀲𑀸𑀧𑁂𑀓𑁆𑀔𑀢𑀸 𑀯𑀼𑀢𑁆𑀢𑀸. 𑀏𑀓𑀓𑁆𑀔𑀡𑀺𑀓𑀸 𑀦𑀸𑀦𑀸𑀓𑁆𑀔𑀡𑀺𑀓𑀸 𑀘 𑀘𑀺𑀢𑁆𑀢𑀲𑁆𑀲 𑀞𑀺𑀢𑀺 𑀦𑀸𑀫, 𑀢𑀲𑁆𑀲 𑀅𑀯𑀢𑁆𑀣𑀸𑀯𑀺𑀲𑁂𑀲𑁄𑀢𑀺 𑀅𑀯𑀢𑁆𑀣𑀸𑀯𑀺𑀲𑁂𑀲𑀸𑀧𑁂𑀓𑁆𑀔𑁄 𑀘𑀺𑀢𑁆𑀢𑀲𑁆𑀲 𑀞𑀺𑀢𑀻𑀢𑀺 𑀏𑀯𑀁𑀧𑀓𑀸𑀭𑁄 𑀦𑀺𑀤𑁆𑀤𑁂𑀲𑁄. ‘‘𑀦 𑀮𑀼𑀩𑁆𑀪𑀢𑀻’’𑀢𑀺 𑀯𑀼𑀢𑁆𑀢𑀲𑁆𑀲 𑀘𑀺𑀢𑁆𑀢𑀲𑁆𑀲, 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀧𑀯𑀢𑁆𑀢𑀺𑀆𑀓𑀸𑀭𑀪𑀸𑀯𑁂𑀦 𑀅𑀮𑀼𑀩𑁆𑀪𑀦𑀸𑀢𑀺 𑀅𑀮𑁄𑀪𑁄 𑀯𑀼𑀢𑁆𑀢𑁄𑀢𑀺 𑀅𑀜𑁆𑀜𑀲𑁆𑀲 𑀓𑀺𑀭𑀺𑀬𑀸𑀪𑀸𑀯𑀯𑀺𑀲𑁂𑀲𑀸𑀧𑁂𑀓𑁆𑀔𑁄 𑀅𑀮𑀼𑀩𑁆𑀪𑀦𑀸𑀢𑀺 𑀦𑀺𑀤𑁆𑀤𑁂𑀲𑁄. 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀮𑀼𑀩𑁆𑀪𑀺𑀢𑀲𑁆𑀲 𑀪𑀸𑀯𑁄 𑀅𑀮𑀼𑀩𑁆𑀪𑀺𑀢𑀢𑁆𑀢𑀦𑁆𑀢𑀺 𑀅𑀬𑀁 𑀦𑀺𑀤𑁆𑀤𑁂𑀲𑁄 𑀅𑀜𑁆𑀜𑀲𑁆𑀲 𑀪𑀸𑀯𑀪𑀽𑀢𑀢𑀸𑀯𑀺𑀲𑁂𑀲𑀸𑀧𑁂𑀓𑁆𑀔𑁄 𑀯𑀼𑀢𑁆𑀢𑁄. 𑀓𑀢𑁆𑀢𑀼𑀓𑀭𑀡𑀪𑀸𑀯𑀸𑀤𑀬𑁄 𑀲𑀪𑀸𑀯𑀥𑀫𑁆𑀫𑀸𑀦𑀁 𑀅𑀚𑁆𑀛𑀸𑀭𑁄𑀧𑀦𑀯𑀲𑁂𑀦𑁂𑀯 𑀲𑀺𑀚𑁆𑀛𑀦𑁆𑀢𑀺, 𑀪𑀸𑀯𑀦𑀺𑀤𑁆𑀤𑁂𑀲𑁄 𑀧𑀦 𑀅𑀚𑁆𑀛𑀸𑀭𑁄𑀧𑀦𑀸𑀦𑀧𑁂𑀓𑁆𑀔𑁄, 𑀢𑀢𑁄𑀬𑁂𑀯 𑀘 𑀯𑀺𑀲𑁂𑀲𑀦𑁆𑀢𑀭𑀯𑀺𑀦𑀺𑀫𑀼𑀢𑁆𑀢𑁄 𑀯𑀺𑀦𑀺𑀯𑀢𑁆𑀢𑁄 𑀯𑀺𑀲𑁂𑀲𑀢𑁄 𑀦𑀺𑀚𑁆𑀚𑀻𑀯𑀪𑀸𑀯𑀕𑀺𑀪𑀸𑀯𑀢𑁄 𑀲𑀪𑀸𑀯𑀦𑀺𑀤𑁆𑀤𑁂𑀲𑁄 𑀦𑀸𑀫 𑀳𑁄𑀢𑀻𑀢𑀺 𑀨𑀲𑁆𑀲𑁄𑀢𑀺 𑀇𑀤𑀁 𑀨𑀼𑀲𑀦𑀝𑁆𑀞𑁂𑀦 ‘‘𑀥𑀫𑁆𑀫𑀫𑀢𑁆𑀢𑀤𑀻𑀧𑀦𑀁 𑀲𑀪𑀸𑀯𑀧𑀤’’𑀦𑁆𑀢𑀺 𑀯𑀼𑀢𑁆𑀢𑀁. 𑀆𑀭𑀫𑁆𑀫𑀡𑀁 𑀨𑀼𑀲𑀦𑁆𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀧𑀯𑀢𑁆𑀢𑀺𑀆𑀓𑀸𑀭𑁄 𑀨𑀼𑀲𑀦𑀩𑁆𑀬𑀸𑀧𑀸𑀭𑁄 𑀳𑁄𑀢𑀻𑀢𑀺 ‘‘𑀨𑀼𑀲𑀦𑀓𑀺𑀭𑀺𑀬𑀸 𑀨𑀼𑀲𑀦𑀸𑀓𑀸𑀭𑁄’’𑀢𑀺 𑀯𑀼𑀢𑁆𑀢𑀁. 𑀲𑀫𑁆𑀨𑀼𑀲𑀦𑀸𑀢𑀺 𑀲𑀁-𑀲𑀤𑁆𑀤𑁄 ‘‘𑀲𑀫𑀼𑀤𑀬𑁄’’𑀢𑀺𑀆𑀤𑀻𑀲𑀼 𑀯𑀺𑀬 𑀲𑀫𑀸𑀕𑀫𑀢𑁆𑀣𑀤𑀻𑀧𑀓𑁄𑀢𑀺 𑀆𑀳 ‘‘𑀲𑀫𑀸𑀕𑀫𑀨𑀼𑀲𑀦𑀸’’𑀢𑀺. ‘‘𑀨𑀼𑀲𑀸𑀫𑀺 𑀦𑁂𑀓𑁆𑀔𑀫𑁆𑀫𑀲𑀼𑀔’’𑀦𑁆𑀢𑀺𑀆𑀤𑀻𑀲𑀼 (𑀥. 𑀧. 𑁨𑁭𑁨) 𑀧𑀝𑀺𑀮𑀸𑀪𑁄𑀧𑀺 𑀨𑀼𑀲𑀦𑀸 𑀲𑀫𑁆𑀨𑀼𑀲𑀦𑀸𑀢𑀺 𑀘 𑀯𑀼𑀘𑁆𑀘𑀢𑀻𑀢𑀺 𑀆𑀳 ‘‘𑀦 𑀧𑀝𑀺𑀮𑀸𑀪𑀲𑀫𑁆𑀨𑀼𑀲𑀦𑀸’’𑀢𑀺.

𑀅𑀧𑀭𑁂𑀦 𑀯𑁂𑀯𑀘𑀦𑁂𑀦. 𑀩𑀳𑀼𑀲𑁆𑀲𑀼𑀢𑀪𑀸𑀯𑀲𑀫𑁆𑀧𑀸𑀤𑀺𑀓𑀸𑀬 𑀧𑀜𑁆𑀜𑀸𑀬 𑀧𑀡𑁆𑀟𑀺𑀘𑁆𑀘𑀧𑀭𑀺𑀬𑀸𑀬𑁄. 𑀲𑀺𑀧𑁆𑀧𑀸𑀬𑀢𑀦𑀸𑀤𑀻𑀲𑀼 𑀤𑀓𑁆𑀔𑀢𑀸𑀪𑀽𑀢𑀸𑀬 𑀓𑁄𑀲𑀮𑁆𑀮𑀧𑀭𑀺𑀬𑀸𑀬𑁄, 𑀬𑀢𑁆𑀣 𑀓𑀢𑁆𑀣𑀘𑀺 𑀢𑀺𑀓𑁆𑀔𑀲𑀼𑀔𑀼𑀫𑀸𑀬 𑀦𑁂𑀧𑀼𑀜𑁆𑀜𑀧𑀭𑀺𑀬𑀸𑀬𑁄, 𑀲𑀫𑁆𑀫𑀸 𑀥𑀫𑁆𑀫𑁂 𑀧𑀜𑁆𑀜𑀧𑁂𑀦𑁆𑀢𑀺𑀬𑀸 𑀯𑁂𑀪𑀩𑁆𑀬𑀸𑀧𑀭𑀺𑀬𑀸𑀬𑁄𑀢𑀺 𑀏𑀯𑀫𑀸𑀤𑀺𑀦𑀸 𑀢𑁂𑀲𑀼 𑀢𑁂𑀲𑀼 𑀧𑀜𑁆𑀜𑀸𑀯𑀺𑀲𑁂𑀲𑁂𑀲𑀼 𑀢𑁂 𑀢𑁂 𑀧𑀭𑀺𑀬𑀸𑀬𑀯𑀺𑀲𑁂𑀲𑀸 𑀯𑀺𑀲𑁂𑀲𑁂𑀦 𑀧𑀯𑀢𑁆𑀢𑀸𑀢𑀺 𑀢𑁂𑀲𑀁 𑀧𑀜𑁆𑀜𑀸𑀯𑀺𑀲𑁂𑀲𑀸𑀦𑀁 𑀦𑀸𑀦𑀸𑀓𑀸𑀮𑁂 𑀮𑀩𑁆𑀪𑀫𑀸𑀦𑀢𑀸 𑀯𑀼𑀢𑁆𑀢𑀸, 𑀇𑀢𑀭𑁂𑀧𑀺 𑀅𑀦𑀼𑀕𑀢𑀸 𑀳𑁄𑀦𑁆𑀢𑀺 𑀬𑁂𑀪𑀼𑀬𑁆𑀬𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀢𑁆𑀣𑀦𑀸𑀦𑀢𑁆𑀢𑁂𑀦 𑀧𑀜𑁆𑀜𑀸𑀤𑀺𑀅𑀢𑁆𑀣𑀯𑀺𑀲𑁂𑀲𑁂𑀦. 𑀓𑁄𑀥𑁄 𑀓𑀼𑀚𑁆𑀛𑀦𑀸 𑀓𑀼𑀚𑁆𑀛𑀺𑀢𑀢𑁆𑀢𑀦𑁆𑀢𑀺 𑀏𑀯𑀁𑀧𑀓𑀸𑀭𑀸 𑀦𑀺𑀤𑁆𑀤𑁂𑀲𑀸 𑀲𑀪𑀸𑀯𑀸𑀓𑀸𑀭𑀪𑀸𑀯𑀤𑀻𑀧𑀦𑀯𑀲𑁂𑀦 𑀩𑁆𑀬𑀜𑁆𑀚𑀦𑀯𑀲𑁂𑀦𑁂𑀯 𑀯𑀺𑀪𑀸𑀕𑀯𑀘𑀦𑀁. 𑀧𑀡𑁆𑀟𑀺𑀘𑁆𑀘𑀦𑁆𑀢𑀺𑀆𑀤𑀬𑁄 𑀧𑀜𑁆𑀜𑀸𑀯𑀺𑀲𑁂𑀲𑀦𑀺𑀩𑀦𑁆𑀥𑀦𑀢𑁆𑀢𑀸 𑀅𑀢𑁆𑀣𑀯𑀲𑁂𑀦 𑀯𑀺𑀪𑀸𑀕𑀯𑀘𑀦𑀦𑁆𑀢𑀺 𑀇𑀫𑀫𑀢𑁆𑀣𑀫𑀸𑀳 ‘‘𑀅𑀣 𑀯𑀸’’𑀢𑀺𑀆𑀤𑀺𑀦𑀸. 𑀏𑀯𑀫𑀸𑀓𑀸𑀭𑁄 𑀧𑀦𑀸𑀢𑀺 𑀧𑀼𑀭𑀺𑀫𑀸𑀓𑀸𑀭𑀢𑁄 𑀯𑀺𑀲𑁂𑀲𑁄 𑀅𑀢𑁆𑀣𑀢𑁄 𑀯𑀺𑀪𑀢𑁆𑀢𑀺𑀕𑀫𑀦𑀲𑁆𑀲 𑀓𑀸𑀭𑀡𑀁 𑀯𑀼𑀢𑁆𑀢𑀁.

𑀧𑀝𑀺𑀓𑁆𑀔𑀺𑀧𑀦𑀁 𑀧𑀝𑀺𑀲𑁂𑀥𑀦𑀁 𑀧𑀝𑀺𑀓𑁆𑀔𑁂𑀧𑁄, 𑀢𑀲𑁆𑀲 𑀦𑀸𑀦𑀢𑁆𑀢𑀁 𑀯𑀺𑀲𑁂𑀲𑁄 𑀧𑀝𑀺𑀓𑁆𑀔𑁂𑀧𑀦𑀸𑀦𑀢𑁆𑀢𑀁, 𑀲𑀤𑁆𑀥𑀫𑁆𑀫𑀕𑀭𑀼𑀢𑀸𑀬 𑀧𑀝𑀺𑀓𑁆𑀔𑁂𑀧𑁄 𑀲𑀤𑁆𑀥𑀫𑁆𑀫𑀕𑀭𑀼𑀢𑀸𑀧𑀝𑀺𑀓𑁆𑀔𑁂𑀧𑁄, 𑀢𑁂𑀦 𑀲𑀤𑁆𑀥𑀫𑁆𑀫𑀕𑀭𑀼𑀢𑀸𑀧𑀝𑀺𑀓𑁆𑀔𑁂𑀧𑁂𑀦 𑀦𑀸𑀦𑀢𑁆𑀢𑀁 𑀲𑀤𑁆𑀥𑀫𑁆𑀫𑀕𑀭𑀼𑀢𑀸𑀧𑀝𑀺𑀓𑁆𑀔𑁂𑀧𑀦𑀸𑀦𑀢𑁆𑀢𑀁. 𑀢𑀁 𑀲𑀤𑁆𑀥𑀫𑁆𑀫𑀕𑀭𑀼𑀢𑀸𑀧𑀝𑀺𑀓𑁆𑀔𑁂𑀧𑀦𑀸𑀦𑀢𑁆𑀢𑀁 𑀧𑀦 𑀓𑁄𑀥𑀕𑀭𑀼𑀢𑀸𑀤𑀺𑀪𑁂𑀤𑀪𑀺𑀦𑁆𑀦𑀦𑁆𑀢𑀺 ‘‘𑀓𑁄𑀥𑀕𑀭𑀼𑀢𑀸𑀤𑀺𑀯𑀺𑀲𑀺𑀝𑁆𑀞𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀓𑁄𑀥𑀸𑀤𑀻𑀳𑀺 𑀯𑀺𑀲𑀺𑀝𑁆𑀞𑁄 𑀪𑀺𑀦𑁆𑀦𑁄 𑀲𑀤𑁆𑀥𑀫𑁆𑀫𑀕𑀭𑀼𑀢𑀸𑀬 𑀧𑀝𑀺𑀓𑁆𑀔𑁂𑀧𑁄 𑀧𑀝𑀺𑀲𑁂𑀥𑀦𑀁 𑀓𑁄𑀥𑀸𑀤𑀺𑀯𑀺𑀲𑀺𑀝𑁆𑀞𑀧𑀝𑀺𑀓𑁆𑀔𑁂𑀧𑁄. 𑀓𑁄𑀥𑀕𑀭𑀼𑀢𑀸𑀤𑀺𑀬𑁂𑀯, 𑀢𑀲𑁆𑀲 𑀦𑀸𑀦𑀢𑁆𑀢𑁂𑀦 𑀲𑀤𑁆𑀥𑀫𑁆𑀫𑀕𑀭𑀼𑀢𑀸𑀧𑀝𑀺𑀧𑀓𑁆𑀔𑀦𑀸𑀦𑀢𑁆𑀢𑁂𑀦𑀸𑀢𑀺 𑀓𑁄𑀥𑀕𑀭𑀼𑀢𑀸 𑀲𑀤𑁆𑀥𑀫𑁆𑀫𑀕𑀭𑀼𑀢𑀸𑀬 𑀧𑀝𑀺𑀧𑀓𑁆𑀔𑁄. 𑀫𑀓𑁆𑀔𑀮𑀸𑀪𑀲𑀓𑁆𑀓𑀸𑀭𑀕𑀭𑀼𑀢𑀸 𑀲𑀤𑁆𑀥𑀫𑁆𑀫𑀕𑀭𑀼𑀢𑀸𑀬 𑀧𑀝𑀺𑀧𑀓𑁆𑀔𑁄𑀢𑀺 𑀲𑀤𑁆𑀥𑀫𑁆𑀫𑀕𑀭𑀼𑀢𑀸𑀬 𑀧𑀝𑀺𑀧𑀓𑁆𑀔𑀪𑀸𑀯𑀯𑀺𑀲𑁂𑀲𑁂𑀦 𑀅𑀲𑀤𑁆𑀥𑀫𑁆𑀫𑀕𑀭𑀼𑀢𑀸 𑀢𑀩𑁆𑀪𑀸𑀯𑁂𑀦 𑀏𑀓𑀻𑀪𑀽𑀢𑀸𑀧𑀺 𑀦𑀸𑀦𑀢𑁆𑀢𑀁 𑀕𑀢𑀸. 𑀬𑀲𑁆𑀫𑀸 𑀧𑀦 𑀓𑁄𑀥𑁄 𑀅𑀢𑁆𑀣𑀢𑁄 𑀤𑁄𑀲𑁄𑀬𑁂𑀯. 𑀫𑀓𑁆𑀔𑁄 𑀤𑁄𑀲𑀧𑁆𑀧𑀥𑀸𑀦𑀸 𑀧𑀭𑀕𑀼𑀡𑀯𑀺𑀤𑁆𑀥𑀁𑀲𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑀸 𑀅𑀓𑀼𑀲𑀮𑀸 𑀔𑀦𑁆𑀥𑀸. 𑀢𑀕𑁆𑀕𑀭𑀼𑀢𑀸 𑀘 𑀢𑁂𑀲𑀁 𑀲𑀸𑀤𑀭𑀅𑀪𑀺𑀲𑀗𑁆𑀔𑀭𑀡𑀯𑀲𑁂𑀦 𑀧𑀯𑀢𑁆𑀢𑀦𑀫𑁂𑀯. 𑀮𑀸𑀪𑀕𑀭𑀼𑀢𑀸 𑀘𑀢𑀼𑀦𑁆𑀦𑀁 𑀧𑀘𑁆𑀘𑀬𑀸𑀦𑀁 𑀲𑀓𑁆𑀓𑀸𑀭𑀕𑀭𑀼𑀢𑀸, 𑀢𑁂𑀲𑀁𑀬𑁂𑀯 𑀲𑀼𑀲𑀗𑁆𑀔𑀢𑀸𑀦𑀁 𑀮𑀤𑁆𑀥𑀓𑀸𑀫𑀢𑀸. 𑀢𑀤𑀼𑀪𑀬𑁂𑀲𑀼 𑀘 𑀆𑀤𑀭𑀓𑀺𑀭𑀺𑀬𑀸 𑀢𑀣𑀸𑀧𑀯𑀢𑁆𑀢𑀸 𑀇𑀘𑁆𑀙𑀸𑀬𑁂𑀯, 𑀢𑀲𑁆𑀫𑀸 ‘‘𑀲𑀤𑁆𑀥𑀫𑁆𑀫𑀕𑀭𑀼𑀢𑀸𑀧𑀝𑀺𑀧𑀓𑁆𑀔𑀦𑀸𑀦𑀢𑁆𑀢𑁂𑀦 𑀅𑀲𑀤𑁆𑀥𑀫𑁆𑀫𑀸 𑀦𑀸𑀦𑀢𑁆𑀢𑀁 𑀕𑀢𑀸’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀘𑀢𑁆𑀢𑀸𑀭𑁄 𑀅𑀲𑀤𑁆𑀥𑀫𑁆𑀫𑀸 𑀇𑀘𑁆𑀘𑁂𑀯 𑀉𑀤𑁆𑀤𑀺𑀝𑁆𑀞𑀸. 𑀅𑀲𑀤𑁆𑀥𑀫𑁆𑀫𑀕𑀭𑀼𑀢𑀸𑀢𑀺 𑀏𑀢𑁆𑀣 𑀘 𑀧𑀼𑀭𑀺𑀫𑀲𑁆𑀫𑀺𑀁 𑀯𑀺𑀓𑀧𑁆𑀧𑁂 ‘‘𑀦 𑀲𑀤𑁆𑀥𑀫𑁆𑀫𑀕𑀭𑀼𑀢𑀸’’𑀢𑀺 𑀲𑀤𑁆𑀥𑀫𑁆𑀫𑀕𑀭𑀼𑀢𑀸 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀤𑀼𑀢𑀺𑀬𑀲𑁆𑀫𑀺𑀁 𑀲𑀤𑁆𑀥𑀫𑁆𑀫𑀕𑀭𑀼𑀢𑀸𑀬 𑀧𑀝𑀺𑀧𑀓𑁆𑀔𑁄𑀢𑀺 𑀲𑀤𑁆𑀥𑀫𑁆𑀫𑀕𑀭𑀼𑀢𑀸 𑀏𑀯 𑀯𑀸 𑀧𑀝𑀺𑀧𑀓𑁆𑀔𑁄, 𑀢𑀲𑁆𑀲 𑀦𑀸𑀦𑀢𑁆𑀢𑁂𑀦 𑀲𑀤𑁆𑀥𑀫𑁆𑀫𑀕𑀭𑀼𑀢𑀸𑀧𑀝𑀺𑀧𑀓𑁆𑀔𑀦𑀸𑀦𑀢𑁆𑀢𑁂𑀦𑀸𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀓𑁄𑀥𑀫𑀓𑁆𑀔𑀕𑀭𑀼𑀢𑀸𑀦𑀜𑁆𑀳𑀺 𑀲𑀤𑁆𑀥𑀫𑁆𑀫𑀯𑀺𑀲𑁂𑀲𑀸 𑀧𑀯𑀢𑁆𑀢𑀺𑀪𑁂𑀤𑀪𑀺𑀦𑁆𑀦𑀸 𑀫𑁂𑀢𑁆𑀢𑀸 𑀧𑀝𑀺𑀧𑀓𑁆𑀔𑁄. 𑀮𑀸𑀪𑀲𑀓𑁆𑀓𑀸𑀭𑀕𑀭𑀼𑀢𑀸𑀦𑀁 𑀅𑀧𑁆𑀧𑀺𑀘𑁆𑀙𑀢𑀸 𑀲𑀦𑁆𑀢𑁄𑀲𑀸. 𑀢𑁂𑀦 𑀓𑁄𑀥𑀕𑀭𑀼𑀢𑀸 𑀦 𑀲𑀤𑁆𑀥𑀫𑁆𑀫𑀕𑀭𑀼𑀢𑀸𑀢𑀺 𑀓𑁄𑀥𑀕𑀭𑀼𑀢𑀸 𑀓𑀸𑀬𑀘𑀺 𑀲𑀤𑁆𑀥𑀫𑁆𑀫𑀕𑀭𑀼𑀢𑀸𑀬 𑀧𑀝𑀺𑀧𑀓𑁆𑀔𑁄𑀢𑀺 𑀅𑀬𑀫𑀢𑁆𑀣𑁄 𑀯𑀼𑀢𑁆𑀢𑁄 𑀳𑁄𑀢𑀺. 𑀢𑀣𑀸 𑀫𑀓𑁆𑀔𑀕𑀭𑀼𑀢𑀸𑀤𑀻𑀲𑀼𑀧𑀺. 𑀏𑀯𑀜𑁆𑀘 𑀓𑀢𑁆𑀯𑀸 ‘‘𑀘𑀢𑁆𑀢𑀸𑀭𑁄 𑀲𑀤𑁆𑀥𑀫𑁆𑀫𑀸 𑀲𑀤𑁆𑀥𑀫𑁆𑀫𑀕𑀭𑀼𑀢𑀸 𑀦 𑀓𑁄𑀥𑀕𑀭𑀼𑀢𑀸…𑀧𑁂… 𑀲𑀤𑁆𑀥𑀫𑁆𑀫𑀕𑀭𑀼𑀢𑀸 𑀦 𑀲𑀓𑁆𑀓𑀸𑀭𑀕𑀭𑀼𑀢𑀸’’𑀢𑀺 (𑀅. 𑀦𑀺. 𑁪.𑁪𑁪) 𑀆𑀕𑀢𑀢𑀦𑁆𑀢𑀺𑀧𑀺 𑀲𑀫𑀢𑁆𑀣𑀺𑀢𑀸 𑀪𑀯𑀢𑀺. 𑀮𑁄𑀪𑁄 𑀦 𑀳𑁄𑀢𑀻𑀢𑀺 𑀅𑀮𑁄𑀪𑁄 𑀮𑀼𑀩𑁆𑀪𑀦𑀸 𑀦 𑀳𑁄𑀢𑀻𑀢𑀺 𑀅𑀮𑀼𑀩𑁆𑀪𑀦𑀸𑀢𑀺 𑀏𑀯𑀫𑀸𑀤𑀺𑀓𑁄 𑀅𑀮𑁄𑀪𑁄𑀢𑀺𑀆𑀤𑀻𑀦𑀁 𑀮𑁄𑀪𑀸𑀤𑀺𑀯𑀺𑀲𑀺𑀝𑁆𑀞𑁄 𑀧𑀝𑀺𑀓𑁆𑀔𑁂𑀧𑁄 ‘‘𑀨𑀲𑁆𑀲𑁄 𑀨𑀼𑀲𑀦𑀸’’𑀢𑀺𑀆𑀤𑀺𑀓𑁂𑀳𑀺 𑀯𑀺𑀲𑀤𑀺𑀲𑀪𑀸𑀯𑀢𑁄 ‘‘𑀨𑀲𑁆𑀲𑀸𑀤𑀻𑀳𑀺 𑀦𑀸𑀦𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑁄. 𑀨𑀲𑁆𑀲𑀸𑀤𑀻𑀳𑀻𑀢𑀺 𑀘𑁂𑀢𑁆𑀣 𑀅𑀮𑀼𑀩𑁆𑀪𑀦𑀸𑀤𑀬𑁄𑀧𑀺 𑀆𑀤𑀺-𑀲𑀤𑁆𑀤𑁂𑀦 𑀲𑀗𑁆𑀕𑀳𑀺𑀢𑀸𑀢𑀺 𑀤𑀝𑁆𑀞𑀩𑁆𑀩𑀁. 𑀮𑁄𑀪𑀸𑀤𑀺𑀧𑀝𑀺𑀧𑀓𑁆𑀔𑁂𑀦𑀸𑀢𑀺 ‘‘𑀮𑁄𑀪𑀧𑀝𑀺𑀧𑀓𑁆𑀔𑁄 𑀅𑀮𑁄𑀪𑁄’’𑀢𑀺𑀆𑀤𑀺𑀦𑀸 𑀬𑁄𑀚𑁂𑀢𑀩𑁆𑀩𑀁. 𑀲𑁂𑀲𑀁 𑀧𑀼𑀭𑀺𑀫𑀲𑀤𑀺𑀲𑀫𑁂𑀯. 𑀅𑀮𑁄𑀪𑀸𑀤𑁄𑀲𑀸𑀫𑁄𑀳𑀸𑀦𑀁 𑀯𑀺𑀥𑀼𑀭𑀢𑀸𑀬 𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀘 𑀮𑀩𑁆𑀪𑀫𑀸𑀦𑁄 𑀅𑀜𑁆𑀜𑀫𑀜𑁆𑀜𑀯𑀺𑀲𑀤𑀺𑀲𑁄 𑀮𑁄𑀪𑀸𑀤𑀺𑀯𑀺𑀲𑀺𑀝𑁆𑀞𑀧𑀝𑀺𑀓𑁆𑀔𑁂𑀧𑀪𑀸𑀯𑁂𑀦 𑀮𑁄𑀪𑀸𑀤𑀺𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀘 𑀯𑀺𑀜𑁆𑀜𑀸𑀬𑀢𑀻𑀢𑀺 𑀆𑀳 ‘‘𑀅𑀮𑁄𑀪𑀸…𑀧𑁂… 𑀬𑁄𑀚𑁂𑀢𑀩𑁆𑀩’’𑀦𑁆𑀢𑀺. 𑀩𑀳𑀽𑀳𑀺 𑀧𑀓𑀸𑀭𑁂𑀳𑀺 𑀤𑀻𑀧𑁂𑀢𑀩𑁆𑀩𑀢𑁆𑀣𑀢𑀸 𑀫𑀳𑀢𑁆𑀣𑀢𑀸. 𑀆𑀤𑀭𑀯𑀲𑁂𑀦 𑀲𑁄𑀢𑀽𑀦𑀁.

𑁩. 𑀬𑀤𑀺𑀧𑀺 𑀏𑀓𑀲𑁆𑀫𑀺𑀁 𑀔𑀡𑁂 𑀏𑀓𑀁𑀬𑁂𑀯 𑀆𑀭𑀫𑁆𑀫𑀡𑀁 𑀳𑁄𑀢𑀺, 𑀙𑀲𑀼𑀧𑀺 𑀧𑀦 𑀆𑀭𑀫𑁆𑀫𑀡𑁂𑀲𑀼 𑀉𑀧𑁆𑀧𑀢𑁆𑀢𑀺𑀭𑀳𑀢𑁆𑀢𑀸 ‘‘𑀢𑁂𑀳𑀺 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀸𑀢𑀺 𑀲𑀸𑀢𑀲𑁆𑀲 𑀲𑀼𑀔𑀲𑁆𑀲. 𑀚𑀸𑀢𑀸𑀢𑀺 𑀏𑀢𑀲𑁆𑀲 𑀅𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀭𑀡𑀪𑀸𑀯𑁂𑀦 𑀨𑀲𑁆𑀲𑀢𑁆𑀣𑀁 𑀧𑀯𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 𑁋 𑀬𑀣𑀸 𑀘𑁂𑀢𑀲𑀺𑀓𑀲𑀸𑀢𑀲𑀗𑁆𑀔𑀸𑀢𑀸 𑀲𑁄𑀫𑀦𑀲𑁆𑀲𑀯𑁂𑀤𑀦𑀸 𑀲𑀳𑁂𑀯 𑀉𑀧𑁆𑀧𑀚𑁆𑀚𑀢𑀺, 𑀏𑀯𑀁 𑀢𑀤𑀦𑀼𑀭𑀽𑀧𑀨𑀲𑁆𑀲𑀲𑀳𑀺𑀢𑀸 𑀳𑀼𑀢𑁆𑀯𑀸 𑀧𑀯𑀢𑁆𑀢𑀸 𑀢𑀚𑁆𑀚𑀸𑀢𑀺 𑀯𑀼𑀢𑁆𑀢𑀸. 𑀲𑀸𑀤𑀬𑀢𑀻𑀢𑀺 𑀅𑀥𑀺𑀕𑀫𑀸𑀲𑀻𑀲𑀸𑀬 𑀅𑀦𑀜𑁆𑀜𑀦𑀺𑀦𑁆𑀦𑀁 𑀓𑀭𑁄𑀢𑀺.

𑁫. 𑀦 𑀢𑀲𑁆𑀲𑀸 𑀢𑀚𑁆𑀚𑀢𑀸𑀢𑀺 𑀢𑀲𑁆𑀲𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀬𑀸 𑀢𑀲𑁆𑀲𑀸𑀭𑀼𑀧𑁆𑀧𑀸 ‘‘𑀢𑀲𑁆𑀲 𑀚𑀸𑀢𑀸’’𑀢𑀺 𑀯𑀸 𑀉𑀪𑀬𑀣𑀸𑀧𑀺 𑀢𑀚𑁆𑀚𑀢𑀸 𑀦 𑀬𑀼𑀚𑁆𑀚𑀢𑀺. 𑀬𑀤𑀺𑀧𑀺 𑀨𑀲𑁆𑀲𑁄 𑀯𑀺𑀜𑁆𑀜𑀸𑀡𑀲𑁆𑀲 𑀯𑀺𑀲𑁂𑀲𑀧𑀘𑁆𑀘𑀬𑁄 𑀦 𑀳𑁄𑀢𑀺, 𑀢𑀣𑀸𑀧𑀺 𑀲𑁄 𑀢𑀲𑁆𑀲 𑀧𑀘𑁆𑀘𑀬𑁄 𑀳𑁄𑀢𑀺𑀬𑁂𑀯𑀸𑀢𑀺 𑀢𑀲𑁆𑀲 𑀢𑀚𑁆𑀚𑀸𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀢𑀸 𑀯𑀢𑁆𑀢𑀩𑁆𑀩𑀸𑀢𑀺 𑀘𑁄𑀤𑀦𑀁 𑀲𑀦𑁆𑀥𑀸𑀬𑀸𑀳 ‘‘𑀦 𑀘 𑀢𑀤𑁂𑀯𑀸’’𑀢𑀺𑀆𑀤𑀺. 𑀢𑁂𑀳𑀺 𑀆𑀭𑀫𑁆𑀫𑀡𑁂𑀳𑀺 𑀚𑀸𑀢𑀸 𑀢𑀚𑁆𑀚𑀸𑀢𑀺 𑀇𑀫𑀺𑀦𑀸𑀧𑀺 𑀅𑀢𑁆𑀣𑁂𑀦 𑀢𑀚𑁆𑀚𑀸 𑀫𑀦𑁄𑀯𑀺𑀜𑁆𑀜𑀸𑀡𑀥𑀸𑀢𑀼𑀲𑀫𑁆𑀨𑀲𑁆𑀲𑀚𑀸𑀢𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸. 𑀯𑀺𑀜𑁆𑀜𑀸𑀡𑀲𑁆𑀲 𑀧𑀦 𑀢𑀚𑁆𑀚𑀢𑀸𑀧𑀜𑁆𑀜𑀢𑁆𑀢𑀺 𑀮𑀩𑁆𑀪𑀢𑁂𑀯. 𑀢𑀣𑀸 𑀳𑀺 ‘‘𑀓𑀺𑀁 𑀯𑀸 𑀏𑀢𑁂𑀦𑀸’’𑀢𑀺𑀆𑀤𑀺𑀦𑀸 𑀨𑀲𑁆𑀲𑀸𑀤𑀻𑀦𑀁 𑀢𑀣𑀸 𑀤𑁂𑀲𑁂𑀢𑀩𑁆𑀩𑀢𑀁 𑀆𑀳.

𑁭. 𑀘𑀺𑀢𑁆𑀢𑀲𑁆𑀲 𑀆𑀭𑀫𑁆𑀫𑀡𑁂 𑀆𑀦𑀬𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑁄 𑀯𑀺𑀢𑀓𑁆𑀓𑁄 𑀅𑀢𑁆𑀣𑀢𑁄 𑀆𑀭𑀫𑁆𑀫𑀡𑀁 𑀢𑀢𑁆𑀣 𑀆𑀓𑀟𑁆𑀠𑀦𑁆𑀢𑁄 𑀯𑀺𑀬 𑀳𑁄𑀢𑀻𑀢𑀺 ‘‘𑀆𑀭𑀫𑁆𑀫𑀡𑀲𑁆𑀲 𑀆𑀓𑀟𑁆𑀠𑀦𑀁 𑀯𑀺𑀢𑀓𑁆𑀓𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑁮. 𑀆𑀭𑀫𑁆𑀫𑀡𑀲𑁆𑀲 𑀅𑀦𑀼𑀫𑀚𑁆𑀚𑀦𑀸𑀓𑀸𑀭𑀧𑁆𑀧𑀯𑀢𑁆𑀢𑁄 𑀯𑀺𑀘𑀸𑀭𑁄 𑀢𑀢𑁆𑀣 𑀧𑀭𑀺𑀩𑁆𑀪𑀫𑀦𑁆𑀢𑁄 𑀯𑀺𑀬 𑀲𑀫𑀦𑁆𑀢𑀢𑁄 𑀘𑀭𑀦𑁆𑀢𑁄 𑀯𑀺𑀬 𑀘 𑀳𑁄𑀢𑀻𑀢𑀺 ‘‘𑀲𑀫𑀦𑁆𑀢𑀢𑁄 𑀘𑀭𑀡𑀁 𑀯𑀺𑀘𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀁.

𑁧𑁧. 𑀢𑀣𑀸 𑀅𑀯𑀝𑁆𑀞𑀸𑀦𑀫𑀢𑁆𑀢𑀪𑀸𑀯𑀢𑁄𑀢𑀺 𑀧𑀸𑀡𑀯𑀥𑀸𑀤𑀺𑀲𑀸𑀥𑀦𑀅𑀯𑀝𑁆𑀞𑀸𑀦𑀫𑀢𑁆𑀢𑀪𑀸𑀯𑀢𑁄, 𑀦 𑀩𑀮𑀯𑀪𑀸𑀯𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁪. 𑀬𑁂𑀦 𑀥𑀫𑁆𑀫𑁂𑀦 𑀘𑀺𑀢𑁆𑀢𑁂 𑀆𑀭𑀫𑁆𑀫𑀡𑀁 𑀉𑀧𑀢𑀺𑀝𑁆𑀞𑀢𑀺 𑀚𑁄𑀢𑀢𑀺 𑀘, 𑀲𑁄 𑀥𑀫𑁆𑀫𑁄 𑀉𑀧𑀝𑁆𑀞𑀸𑀦𑀁 𑀚𑁄𑀢𑀦𑀦𑁆𑀢𑀺 𑀘 𑀯𑀼𑀢𑁆𑀢𑁄𑀢𑀺 𑀆𑀳 ‘‘𑀉𑀧𑀝𑁆𑀞𑀸𑀦𑀁 𑀚𑁄𑀢𑀦𑀜𑁆𑀘 𑀲𑀢𑀺𑀬𑁂𑀯𑀸’’𑀢𑀺.

𑁧𑁬. 𑀲𑀡𑁆𑀳𑀝𑁆𑀞𑁂𑀦𑀸𑀢𑀺 𑀲𑀼𑀔𑀼𑀫𑀝𑁆𑀞𑁂𑀦.

𑁩𑁦. 𑀪𑀸𑀯𑁄𑀢𑀺 𑀳𑀺𑀭𑀺𑀬𑀦𑀁 𑀯𑀤𑀢𑀺.

𑁩𑁩. 𑀦 𑀩𑁆𑀬𑀸𑀧𑀸𑀤𑁂𑀢𑀩𑁆𑀩𑁄𑀢𑀺 𑀅𑀩𑁆𑀬𑀸𑀧𑀚𑁆𑀚-𑀲𑀤𑁆𑀤𑀲𑁆𑀲 𑀓𑀫𑁆𑀫𑀢𑁆𑀣𑀢𑀁 𑀆𑀳.

𑁪𑁨-𑁪𑁩. 𑀬𑀤𑀺 𑀅𑀦𑀯𑀚𑁆𑀚𑀥𑀫𑁆𑀫𑀸𑀦𑀁 𑀲𑀻𑀖𑀲𑀻𑀖𑀧𑀭𑀺𑀯𑀢𑁆𑀢𑀦𑀲𑀫𑀢𑁆𑀣𑀢𑀸 𑀮𑀳𑀼𑀢𑀸, 𑀲𑀸𑀯𑀚𑁆𑀚𑀥𑀫𑁆𑀫𑀸𑀦𑀁 𑀓𑀣𑀦𑁆𑀢𑀺 𑀆𑀳 ‘‘𑀅𑀯𑀺𑀚𑁆𑀚𑀸𑀦𑀻𑀯𑀭𑀡𑀸𑀦’’𑀦𑁆𑀢𑀺𑀆𑀤𑀺. 𑀢𑁂𑀲𑀁 𑀪𑀸𑀯𑁄 𑀕𑀭𑀼𑀢𑀸𑀢𑀺 𑀏𑀢𑁂𑀦 𑀲𑀢𑀺𑀧𑀺 𑀲𑀩𑁆𑀩𑁂𑀲𑀁 𑀅𑀭𑀽𑀧𑀥𑀫𑁆𑀫𑀸𑀦𑀁 𑀲𑀫𑀸𑀦𑀔𑀡𑀢𑁆𑀢𑁂 𑀫𑁄𑀳𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀲𑀸𑀢𑀺𑀲𑀬𑁄 𑀤𑀦𑁆𑀥𑁄 𑀧𑀯𑀢𑁆𑀢𑀺𑀆𑀓𑀸𑀭𑁄𑀢𑀺 𑀤𑀲𑁆𑀲𑁂𑀢𑀺. 𑀲𑁄 𑀧𑀦 𑀢𑁂𑀲𑀁 𑀤𑀦𑁆𑀥𑀸𑀓𑀸𑀭𑁄 𑀲𑀦𑁆𑀢𑀸𑀦𑁂 𑀧𑀸𑀓𑀝𑁄 𑀳𑁄𑀢𑀺.

𑁪𑁪-𑁪𑁫. 𑀅𑀧𑁆𑀧𑀝𑀺𑀖𑀸𑀢𑁄 𑀅𑀯𑀺𑀮𑁄𑀫𑀦𑀁.

𑁪𑁬-𑁪𑁭. 𑀓𑀺𑀮𑀺𑀦𑁆𑀦𑀦𑁆𑀢𑀺 𑀅𑀯𑀲𑁆𑀲𑀼𑀢𑀁.

𑁫𑁦-𑁫𑁧. 𑀧𑀘𑁆𑀘𑁄𑀲𑀓𑁆𑀓𑀦𑀁 𑀫𑀸𑀬𑀸 𑀬𑀸 𑀅𑀘𑁆𑀘𑀲𑀭𑀸𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀅𑀭𑀼𑀫𑀓𑁆𑀔𑀦𑀁 𑀯𑀡𑀸𑀮𑁂𑀧𑀦𑀁. 𑀯𑁂𑀴𑀼 𑀏𑀯 𑀤𑀸𑀢𑀩𑁆𑀩𑀪𑀸𑀯𑁂𑀦 𑀧𑀭𑀺𑀕𑁆𑀕𑀳𑀺𑀢𑁄 𑀯𑁂𑀴𑀼𑀤𑀸𑀦𑀁 𑀦𑀸𑀫.

𑀦𑀺𑀤𑁆𑀤𑁂𑀲𑀯𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀓𑁄𑀝𑁆𑀞𑀸𑀲𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑁫𑁮-𑁧𑁨𑁦. 𑀢𑁂𑀢𑀺 𑀨𑀲𑁆𑀲𑀧𑀜𑁆𑀘𑀫𑀓𑀸𑀤𑀬𑁄. 𑀲𑀗𑁆𑀕𑀳𑀕𑀫𑀦𑁂𑀦𑁂𑀯𑀸𑀢𑀺 𑀲𑀸𑀥𑀸𑀭𑀡𑀢𑀸𑀤𑀺𑀦𑀸 𑀓𑁂𑀦𑀘𑀺 𑀲𑀤𑀺𑀲𑀢𑀸𑀮𑁂𑀲𑁂𑀦, 𑀦 𑀨𑀲𑁆𑀲𑀸𑀤𑀬𑁄 𑀯𑀺𑀬 𑀯𑀺𑀲𑀼𑀁 𑀥𑀫𑁆𑀫𑀪𑀸𑀯𑁂𑀦𑁂𑀯𑀸𑀢𑀺 𑀅𑀢𑁆𑀣𑁄. 𑀢𑀣𑀸 𑀅𑀯𑀺𑀧𑁆𑀧𑀓𑀺𑀡𑁆𑀡𑀢𑁆𑀢𑀸𑀢𑀺 𑀨𑀲𑁆𑀲𑀸𑀤𑀬𑁄 𑀯𑀺𑀬 𑀲𑀭𑀽𑀧𑁂𑀦 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀯𑀼𑀢𑁆𑀢𑀢𑁆𑀢𑀸. 𑀬𑀤𑀺𑀧𑀺 𑀙𑀦𑁆𑀤𑀸𑀤𑀬𑁄 𑀲𑀗𑁆𑀕𑀳𑀲𑀼𑀜𑁆𑀜𑀢𑀯𑀸𑀭𑁂𑀲𑀼𑀧𑀺 𑀲𑀭𑀽𑀧𑁂𑀦 𑀦 𑀯𑀼𑀢𑁆𑀢𑀸, 𑀔𑀦𑁆𑀥𑀸𑀬𑀢𑀦𑀥𑀸𑀢𑀼𑀭𑀸𑀲𑀻𑀲𑀼 𑀧𑀦 𑀲𑀗𑁆𑀕𑀳𑀺𑀢𑀸𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀢𑀁𑀦𑀺𑀤𑁆𑀤𑁂𑀲𑁂𑀢𑀺 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑀦𑀺𑀤𑁆𑀤𑁂𑀲𑁂. 𑀔𑀦𑁆𑀥𑀸𑀦𑀁 𑀥𑀸𑀢𑀸𑀬𑀢𑀦𑀪𑀸𑀯𑁂 𑀩𑁆𑀬𑀪𑀺𑀘𑀸𑀭𑀸𑀪𑀸𑀯𑀢𑁄 𑀅𑀔𑀦𑁆𑀥𑀪𑀸𑀯𑀦𑀺𑀯𑀸𑀭𑀡𑁂𑀦 𑀅𑀦𑀸𑀬𑀢𑀦𑀸𑀥𑀸𑀢𑀼𑀪𑀸𑀯𑀦𑀺𑀯𑀸𑀭𑀡𑀫𑁆𑀧𑀺 𑀤𑀝𑁆𑀞𑀩𑁆𑀩𑀁. 𑀦 𑀬𑁂𑀯𑀸𑀧𑀦𑀓𑀸 𑀞𑀧𑁂𑀢𑀩𑁆𑀩𑀸𑀢𑀺 𑀔𑀦𑁆𑀥𑀸𑀤𑀺𑀭𑀸𑀲𑀺𑀅𑀦𑁆𑀢𑁄𑀕𑀥𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀉𑀤𑁆𑀤𑁂𑀲𑀸𑀤𑀻𑀲𑀼 𑀧𑀦 ‘‘𑀬𑁂𑀯𑀸𑀧𑀦𑀸𑀢𑁆𑀯𑁂𑀯 𑀯𑀼𑀢𑁆𑀢𑀸𑀦𑀁 𑀢𑁂𑀲𑀁 𑀢𑀣𑀸𑀬𑁂𑀯 𑀲𑀗𑁆𑀕𑀳𑁄 𑀬𑀼𑀢𑁆𑀢𑁄’’𑀢𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀞𑀧𑁂𑀢𑁆𑀯𑀸 𑀬𑁂𑀯𑀸𑀧𑀦𑀓𑁂’’𑀢𑀺 𑀯𑀼𑀢𑁆𑀢𑀁. 𑀲𑀭𑀽𑀧𑁂𑀦 𑀅𑀯𑀼𑀢𑁆𑀢𑀸𑀦𑀫𑁆𑀧𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀔𑀦𑁆𑀥𑀸𑀤𑀺𑀪𑀸𑀯𑁄 𑀦 𑀯𑀸𑀭𑁂𑀢𑀩𑁆𑀩𑁄𑀢𑀺 𑀦 𑀬𑁂𑀯𑀸𑀧𑀦𑀓𑀸 𑀞𑀧𑁂𑀢𑀩𑁆𑀩𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀉𑀪𑀬𑁂𑀲𑀫𑁆𑀧𑀺 𑀅𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄.

𑀆𑀳𑀸𑀭𑀧𑀘𑁆𑀘𑀬𑀲𑀗𑁆𑀔𑀸𑀢𑁂𑀦𑀸𑀢𑀺 𑀉𑀧𑀢𑁆𑀣𑀫𑁆𑀪𑀓𑀧𑀘𑁆𑀘𑀬𑀲𑀗𑁆𑀔𑀸𑀢𑁂𑀦. 𑀲𑁄 𑀘 𑀆𑀳𑀸𑀭𑀸𑀦𑀁 𑀉𑀧𑀢𑁆𑀣𑀫𑁆𑀪𑀓𑀪𑀸𑀯𑁄 𑀧𑀸𑀓𑀝𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑁄, 𑀦 𑀚𑀦𑀓𑀢𑁆𑀢𑀸𑀪𑀸𑀯𑀢𑁄. 𑀑𑀚𑀝𑁆𑀞𑀫𑀓𑀭𑀽𑀧𑀲𑁆𑀲 𑀳𑀺 𑀯𑁂𑀤𑀦𑀸𑀤𑀻𑀦𑀜𑁆𑀘 𑀆𑀳𑀸𑀭𑀡𑀢𑁄 𑀢𑁂𑀲𑀁 𑀚𑀦𑀓𑀢𑁆𑀢𑀁 𑀮𑀩𑁆𑀪𑀢𑀻𑀢𑀺. 𑀬𑀤𑀺 𑀉𑀧𑀢𑁆𑀣𑀫𑁆𑀪𑀓𑁄 𑀇𑀥 𑀧𑀘𑁆𑀘𑀬𑁄𑀢𑀺 𑀅𑀥𑀺𑀧𑁆𑀧𑁂𑀢𑁄, 𑀓𑀩𑀴𑀻𑀓𑀸𑀭𑀸𑀳𑀸𑀭𑀲𑁆𑀲 𑀢𑀸𑀯 𑀳𑁄𑀢𑀼, 𑀇𑀢𑀭𑁂𑀲𑀁 𑀓𑀣𑀦𑁆𑀢𑀺 𑀆𑀳 ‘‘𑀬𑀣𑀸 𑀳𑀻’’𑀢𑀺𑀆𑀤𑀺. 𑀲𑀳𑀚𑀸𑀢𑀸𑀤𑀺𑀧𑀘𑁆𑀘𑀬𑁂𑀢𑀺 𑀲𑀳𑀚𑀸𑀢𑀅𑀜𑁆𑀜𑀫𑀜𑁆𑀜𑀦𑀺𑀲𑁆𑀲𑀬𑀲𑀫𑁆𑀧𑀬𑀼𑀢𑁆𑀢𑀅𑀢𑁆𑀣𑀺𑀅𑀯𑀺𑀕𑀢𑀧𑀘𑁆𑀘𑀬𑁂 𑀯𑀤𑀢𑀺, 𑀫𑀳𑀸𑀘𑀢𑀼𑀓𑁆𑀓𑀁 𑀯𑀸, 𑀏𑀓𑁂𑀦𑀸𑀓𑀸𑀭𑁂𑀦𑀸𑀢𑀺 𑀭𑀽𑀧𑀸𑀭𑀽𑀧𑀸𑀦𑀁 𑀉𑀧𑀢𑁆𑀣𑀫𑁆𑀪𑀓𑀢𑁆𑀢𑁂𑀦 𑀉𑀧𑀓𑀸𑀭𑀓𑀪𑀸𑀯𑀫𑀸𑀳. 𑀲𑁄 𑀏𑀯 𑀘 𑀦𑁂𑀲𑀁 𑀆𑀳𑀭𑀡𑀓𑀺𑀘𑁆𑀘𑀁. ‘‘𑀲𑀗𑁆𑀔𑀸𑀭𑀧𑀘𑁆𑀘𑀬𑀸 𑀯𑀺𑀜𑁆𑀜𑀸𑀡’’𑀦𑁆𑀢𑀺 𑀯𑀘𑀦𑀢𑁄 𑀘𑁂𑀢𑀦𑀸𑀬 𑀯𑀺𑀜𑁆𑀜𑀸𑀡𑀲𑁆𑀲 𑀧𑀘𑁆𑀘𑀬𑀪𑀸𑀯𑁄 𑀲𑀸𑀢𑀺𑀲𑀬𑁄𑀢𑀺 𑀆𑀳 ‘‘𑀯𑀺𑀜𑁆𑀜𑀸𑀡𑀁 𑀯𑀺𑀲𑁂𑀲𑁂𑀦𑀸’’𑀢𑀺.

𑀬𑀣𑀸𑀕𑀢𑀫𑀕𑁆𑀕𑁄𑀢𑀺 𑀯𑀼𑀢𑁆𑀢𑁄 𑀓𑀸𑀭𑀡𑀨𑀮𑀸𑀦𑀁 𑀅𑀪𑁂𑀤𑀽𑀧𑀘𑀸𑀭𑁂𑀦𑀸𑀢𑀺 𑀤𑀝𑁆𑀞𑀩𑁆𑀩𑀁, 𑀦𑀸𑀦𑀸𑀓𑁆𑀔𑀡𑀺𑀓𑁄 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑁄 𑀉𑀧𑀦𑀺𑀲𑁆𑀲𑀬𑁄 𑀏𑀢𑀲𑁆𑀲𑀸𑀢𑀺 𑀅𑀝𑁆𑀞𑀗𑁆𑀕𑀺𑀓𑀫𑀕𑁆𑀕𑀽𑀧𑀦𑀺𑀲𑁆𑀲𑀬𑁄. 𑀅𑀭𑀺𑀬𑀫𑀕𑁆𑀕𑀲𑁆𑀲 𑀬𑀣𑀸𑀕𑀢𑀫𑀕𑁆𑀕𑀧𑀭𑀺𑀬𑀸𑀬𑁄 𑀯𑀼𑀘𑁆𑀘𑀫𑀸𑀦𑁄 𑀢𑀲𑁆𑀲 𑀬𑀸 𑀧𑀼𑀭𑀺𑀫𑀓𑀸𑀮𑀪𑀽𑀢𑀸 𑀅𑀪𑁂𑀤𑁄𑀧𑀘𑀸𑀭𑀲𑀺𑀤𑁆𑀥𑀸 𑀆𑀕𑀫𑀦𑀸𑀯𑀢𑁆𑀣𑀸 𑀢𑀢𑁄 𑀦𑀸𑀢𑀺𑀯𑀺𑀮𑀓𑁆𑀔𑀡𑀸𑀢𑀺 𑀇𑀫𑀫𑀢𑁆𑀣𑀁 𑀯𑀺𑀪𑀸𑀯𑁂𑀢𑀻𑀢𑀺 𑀆𑀳 ‘‘𑀧𑀼𑀩𑁆𑀩𑀪𑀸𑀕…𑀧𑁂… 𑀤𑀻𑀧𑀺𑀢𑀸’’𑀢𑀺. 𑀯𑀺𑀜𑁆𑀜𑀸𑀡𑀲𑁆𑀲 𑀘𑀺𑀢𑁆𑀢𑀯𑀺𑀘𑀺𑀢𑁆𑀢𑀢𑀸 𑀯𑀺𑀚𑀸𑀦𑀦𑀪𑀸𑀯𑀯𑀺𑀲𑁂𑀲𑀸 𑀏𑀯𑀸𑀢𑀺 𑀆𑀳 ‘‘𑀯𑀺𑀚𑀸𑀦𑀦𑀫𑁂𑀯 𑀘𑀺𑀢𑁆𑀢𑀯𑀺𑀘𑀺𑀢𑁆𑀢𑀢𑀸’’𑀢𑀺. 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀻𑀦𑀦𑁆𑀢𑀺 𑀆𑀤𑀺-𑀲𑀤𑁆𑀤𑁂𑀦 ‘‘𑀤𑁆𑀯𑀸𑀬𑀢𑀦𑀸𑀦𑀺 𑀳𑁄𑀦𑁆𑀢𑀻’’𑀢𑀺𑀆𑀤𑀻𑀲𑀼 𑀯𑀼𑀢𑁆𑀢𑀫𑀦𑀸𑀬𑀢𑀦𑀸𑀤𑀬𑁄𑀧𑀺 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀧𑁆𑀧𑀝𑀺𑀓𑁆𑀔𑁂𑀧𑁄𑀢𑀺 𑀢𑀲𑁆𑀲 𑀚𑀸𑀢𑀺𑀦𑀺𑀤𑁆𑀤𑁂𑀲𑀪𑀸𑀯𑀲𑁆𑀲 𑀧𑀝𑀺𑀓𑁆𑀔𑁂𑀧𑁄. 𑀓𑀢𑁄 𑀳𑁄𑀢𑀻𑀢𑀺 𑀏𑀢𑁂𑀦 𑀆𑀳𑀸𑀭𑀺𑀦𑁆𑀤𑁆𑀭𑀺𑀬𑀛𑀸𑀦𑀫𑀕𑁆𑀕𑀨𑀮𑀳𑁂𑀢𑀼𑀬𑁄 𑀬𑀢𑁆𑀢𑀓𑀸 𑀇𑀫𑀲𑁆𑀫𑀺𑀁 𑀘𑀺𑀢𑁆𑀢𑁂 𑀮𑀩𑁆𑀪𑀦𑁆𑀢𑀺, 𑀢𑁂 𑀲𑀩𑁆𑀩𑁂𑀧𑀺 ‘‘𑀏𑀓𑁄 𑀯𑀺𑀜𑁆𑀜𑀸𑀡𑀸𑀳𑀸𑀭𑁄 𑀳𑁄𑀢𑀻’’𑀢𑀺𑀆𑀤𑀺𑀦𑀸 𑀅𑀯𑀼𑀢𑁆𑀢𑀸𑀧𑀺 𑀅𑀢𑁆𑀣𑀢𑁄 𑀯𑀼𑀢𑁆𑀢𑀸𑀬𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. 𑀏𑀲 𑀦𑀬𑁄 𑀅𑀜𑁆𑀜𑀢𑁆𑀣𑀸𑀧𑀺.

𑀓𑁄𑀝𑁆𑀞𑀸𑀲𑀯𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀼𑀜𑁆𑀜𑀢𑀯𑀸𑀭𑀸𑀤𑀺𑀯𑀡𑁆𑀡𑀦𑀸

𑁧𑁨𑁧-𑁧𑁪𑁫. 𑀬𑀣𑀸𑀯𑀼𑀢𑁆𑀢𑁂 𑀲𑀫𑀬𑁂𑀢𑀺 𑀯𑀼𑀢𑁆𑀢𑀧𑁆𑀧𑀓𑀸𑀭𑀲𑀫𑀽𑀳𑁂.

𑁧𑁪𑁬. 𑀉𑀲𑁆𑀲𑀸𑀳𑀦𑀁 𑀧𑁂𑀲𑀦𑀁 𑀦𑀺𑀬𑁄𑀚𑀦𑀁.

𑁧𑁫𑁬-𑁧𑁫𑁯. 𑀦𑀸𑀢𑀺𑀲𑀫𑀸𑀳𑀺𑀢𑀸𑀬𑀸𑀢𑀺 𑀦𑀸𑀦𑀸𑀯𑀚𑁆𑀚𑀦𑀽𑀧𑀘𑀸𑀭𑀁 𑀲𑀦𑁆𑀥𑀸𑀬 𑀯𑀤𑀢𑀺. 𑀬𑁂𑀯𑀸𑀧𑀦𑀓𑁂𑀳𑀺𑀧𑀺 𑀦𑀺𑀩𑁆𑀩𑀺𑀲𑁂𑀲𑀢𑀁 𑀤𑀲𑁆𑀲𑁂𑀢𑀺 𑀓𑀭𑀼𑀡𑀸𑀫𑀼𑀤𑀺𑀢𑀸𑀦𑀫𑁆𑀧𑀺 𑀉𑀧𑁆𑀧𑀚𑁆𑀚𑀦𑀢𑁄.

𑀓𑀸𑀬𑀯𑀘𑀻𑀓𑀺𑀭𑀺𑀬𑀸 𑀓𑀸𑀬𑀯𑀘𑀻𑀧𑀯𑀢𑁆𑀢𑀺, 𑀯𑀺𑀜𑁆𑀜𑀢𑁆𑀢𑀺 𑀏𑀯 𑀯𑀸. 𑀅𑀲𑀫𑀢𑁆𑀢𑀪𑀸𑀯𑀦𑀦𑁆𑀢𑀺 𑀧𑀼𑀩𑁆𑀩𑀪𑀸𑀕𑀪𑀸𑀯𑀦𑀫𑀸𑀳.