𑀥𑀫𑁆𑀫𑀼𑀤𑁆𑀤𑁂𑀲𑀯𑀸𑀭𑁄

𑀧𑀞𑀫𑀘𑀺𑀢𑁆𑀢𑀯𑀡𑁆𑀡𑀦𑀸

𑁩𑁬𑁫. 𑀔𑀡𑀢𑁆𑀢𑀬𑀲𑁆𑀲 𑀅𑀓𑀼𑀲𑀮𑁂𑀲𑀼 𑀅𑀲𑀫𑁆𑀪𑀯𑀢𑁄 𑀲𑀫𑀯𑀸𑀬𑀓𑀸𑀮𑀳𑁂𑀢𑀼𑀲𑀫𑀽𑀳𑀢𑁆𑀣𑁄 𑀲𑀫𑀬-𑀲𑀤𑁆𑀤𑁄. 𑀮𑁄𑀪𑀸𑀪𑀺𑀪𑀽𑀢𑀸𑀬 𑀏𑀯 𑀇𑀝𑁆𑀞𑀸𑀭𑀫𑁆𑀫𑀡𑀲𑁆𑀫𑀺𑀁 𑀇𑀢𑀭𑀢𑁆𑀭 𑀘 𑀇𑀝𑁆𑀞𑀸𑀓𑀸𑀭𑀕𑁆𑀕𑀳𑀡𑀯𑀲𑁂𑀦 𑀲𑁄𑀫𑀦𑀲𑁆𑀲𑀲𑀳𑀕𑀢𑀪𑀸𑀯𑁄𑀢𑀺 𑀏𑀯𑀫𑀸𑀤𑀺𑀁 𑀲𑀦𑁆𑀥𑀸𑀬 ‘‘𑀬𑀣𑀸𑀦𑀼𑀭𑀽𑀧’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀓𑀺𑀮𑁂𑀲𑀸𑀢𑀼𑀭𑀢𑀸𑀬 𑀅𑀦𑀸𑀭𑁄𑀕𑁆𑀬𑀝𑁆𑀞𑁂𑀦 𑀓𑀺𑀮𑁂𑀲𑀯𑀚𑁆𑀚𑀲𑀩𑁆𑀪𑀸𑀯𑀢𑁄 𑀲𑀸𑀯𑀚𑁆𑀚𑀝𑁆𑀞𑁂𑀦 𑀅𑀯𑀺𑀚𑁆𑀚𑀸𑀲𑀫𑁆𑀪𑀽𑀢𑀢𑀸𑀬 𑀅𑀓𑁄𑀲𑀮𑁆𑀬𑀲𑀫𑁆𑀪𑀽𑀢𑀝𑁆𑀞𑁂𑀦 𑀅𑀓𑀼𑀲𑀮’’𑀦𑁆𑀢𑀺 𑀘 ‘‘𑀲𑀸𑀯𑀚𑁆𑀚𑀤𑀼𑀓𑁆𑀔𑀯𑀺𑀧𑀸𑀓𑀮𑀓𑁆𑀔𑀡𑀁, 𑀅𑀦𑀢𑁆𑀣𑀚𑀦𑀦𑀭𑀲𑀁, 𑀲𑀁𑀓𑀺𑀮𑁂𑀲𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑀧𑀤𑀝𑁆𑀞𑀸𑀦𑀁, 𑀕𑀸𑀭𑀬𑁆𑀳𑀪𑀸𑀯𑀢𑁄 𑀯𑀸 𑀲𑀸𑀯𑀚𑁆𑀚𑀮𑀓𑁆𑀔𑀡𑀁, 𑀲𑀁𑀓𑀺𑀮𑁂𑀲𑀪𑀸𑀯𑀭𑀲𑀁, 𑀅𑀦𑀺𑀝𑁆𑀞𑀯𑀺𑀧𑀸𑀓𑀧𑀘𑁆𑀘𑀼𑀧𑀝𑁆𑀞𑀸𑀦𑀁, 𑀬𑀣𑀸𑀯𑀼𑀢𑁆𑀢𑀧𑀤𑀝𑁆𑀞𑀸𑀦𑀫𑁂𑀯𑀸’’𑀢𑀺 𑀘 𑀏𑀯𑀫𑀸𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦 𑀅𑀦𑀼𑀕𑀦𑁆𑀢𑀩𑁆𑀩𑀢𑀸𑀬 𑀯𑀼𑀢𑁆𑀢𑀁 ‘‘𑀯𑀼𑀢𑁆𑀢𑀦𑀬𑀁 𑀅𑀦𑀼𑀕𑀦𑁆𑀢𑁆𑀯𑀸’’𑀢𑀺.

𑀕𑀢𑀁 𑀕𑀫𑀦𑀁 𑀧𑀯𑀢𑁆𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁 ‘‘𑀕𑀢𑀫𑀢𑁆𑀢𑀁 𑀕𑀢𑀺𑀫𑀢𑁆𑀢𑀁 𑀕𑀳𑀡𑀫𑀢𑁆𑀢’’𑀦𑁆𑀢𑀺. 𑀤𑀺𑀝𑁆𑀞𑀺𑀬𑀸 𑀳𑀺 𑀕𑀢𑀺 𑀧𑀯𑀢𑁆𑀢𑀺 𑀏𑀯𑀸𑀢𑀺. 𑀆𑀲𑀦𑁆𑀦𑀓𑀸𑀭𑀡𑀢𑁆𑀢𑀸𑀢𑀺 𑀧𑀤𑀝𑁆𑀞𑀸𑀦𑀢𑀸𑀬, 𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀯𑀺𑀬 𑀳𑀺 𑀓𑀼𑀲𑀮𑀲𑁆𑀲 𑀅𑀬𑁄𑀦𑀺𑀲𑁄𑀫𑀦𑀲𑀺𑀓𑀸𑀭𑁄 𑀅𑀓𑀼𑀲𑀮𑀲𑁆𑀲 𑀅𑀘𑁆𑀘𑀸𑀲𑀦𑁆𑀦𑀳𑁂𑀢𑀼. 𑀢𑀣𑀸 𑀳𑀺 𑀲𑀢𑀺𑀧𑀺 𑀅𑀲𑀤𑁆𑀥𑀫𑁆𑀫𑀲𑀯𑀦𑀸𑀤𑀺𑀓𑀸𑀭𑀡𑁂 𑀅𑀬𑁄𑀦𑀺𑀲𑁄 𑀅𑀦𑀸𑀯𑀚𑁆𑀚𑀺𑀢𑁂 𑀅𑀯𑀯𑀢𑁆𑀣𑀸𑀧𑀺𑀢𑁂 𑀘 𑀦𑀢𑁆𑀣𑀺 𑀅𑀓𑀼𑀲𑀮𑀧𑁆𑀧𑀯𑀢𑁆𑀢𑀺. 𑀢𑀣𑀸 𑀘 𑀯𑀓𑁆𑀔𑀢𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀬𑁄𑀦𑀺𑀲𑁄 𑀅𑀓𑀼𑀲𑀮’’𑀦𑁆𑀢𑀺. 𑀏𑀢𑁂𑀦 𑀏𑀓𑀦𑁆𑀢𑀓𑀸𑀭𑀡𑀢𑀸 𑀘 𑀯𑀼𑀢𑁆𑀢𑀢𑁆𑀣𑀸 𑀳𑁄𑀢𑀺. 𑀧𑀝𑀺𑀲𑀗𑁆𑀔𑀸 𑀲𑀻𑀢𑀸𑀤𑀺𑀔𑀫𑀦𑀁 𑀅𑀧𑁆𑀧𑀫𑀸𑀤𑀯𑀺𑀳𑀸𑀭𑁄𑀢𑀺 𑀯𑀼𑀢𑁆𑀢𑀁 ‘‘𑀅𑀧𑁆𑀧𑀫𑀚𑁆𑀚𑀦𑀁 𑀔𑀫𑀦’’𑀦𑁆𑀢𑀺. 𑀢𑁂𑀦 𑀲𑀢𑀺𑀲𑀁𑀯𑀭𑁄𑀢𑀺 𑀇𑀥 𑀔𑀦𑁆𑀢𑀺𑀲𑀁𑀯𑀭𑁄 𑀯𑀼𑀢𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀧𑀳𑀸𑀦𑀲𑀁𑀯𑀭𑁄𑀢𑀺 𑀯𑀻𑀭𑀺𑀬𑀲𑀁𑀯𑀭𑁄. 𑀲𑁄 𑀳𑀺 ‘‘𑀉𑀧𑁆𑀧𑀦𑁆𑀦𑀁 𑀓𑀸𑀫𑀯𑀺𑀢𑀓𑁆𑀓𑀁 𑀦𑀸𑀥𑀺𑀯𑀸𑀲𑁂𑀢𑀺 𑀧𑀚𑀳𑀢𑀻’’𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁨𑁬; 𑀅. 𑀦𑀺. 𑁪.𑁧𑁪; 𑁬.𑁫𑁮) 𑀯𑀼𑀢𑁆𑀢𑁄𑀢𑀺.

𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀬𑀸 𑀧𑀝𑀺𑀧𑀓𑁆𑀔𑀪𑀸𑀯𑁂𑀦 𑀕𑀳𑁂𑀢𑀩𑁆𑀩𑀢𑀸𑀓𑀸𑀭𑁄 𑀫𑁄𑀳𑁄 𑀲𑀫𑁆𑀫𑀸𑀧𑀝𑀺𑀧𑀢𑁆𑀢𑀺𑀧𑀝𑀺𑀧𑀓𑁆𑀔𑀪𑀸𑀯𑀕𑁆𑀕𑀳𑀡𑀸𑀓𑀸𑀭𑁄. 𑀢𑁂𑀦 𑀳𑀺 𑀦𑀺𑀯𑀼𑀢𑀸 𑀦 𑀲𑀫𑁆𑀫𑀸 𑀧𑀝𑀺𑀧𑀚𑁆𑀚𑀦𑁆𑀢𑀺. 𑀅𑀪𑀺𑀚𑁆𑀛𑀸𑀬 𑀯𑀺𑀲𑁂𑀲𑀬𑁄𑀕𑁄 𑀓𑀫𑁆𑀫𑀧𑀣𑀧𑁆𑀧𑀢𑁆𑀢𑀺.

𑀅𑀦𑀼𑀧𑀧𑀭𑀺𑀓𑁆𑀔𑀸 𑀫𑁄𑀳𑁄. 𑀲𑁄 𑀘𑁂𑀢𑁆𑀣 𑀤𑀺𑀝𑁆𑀞𑀺𑀭𑀳𑀺𑀢𑁄 𑀯𑁂𑀤𑀺𑀢𑀩𑁆𑀩𑁄. 𑀤𑀺𑀝𑁆𑀞𑀺𑀲𑀳𑀺𑀢𑀲𑁆𑀲 𑀧𑀦 𑀤𑀺𑀝𑁆𑀞𑀺𑀬𑀸 𑀅𑀦𑀼𑀯𑀺𑀥𑀸𑀬𑀓𑀢𑁆𑀢𑀸 𑀢𑀕𑁆𑀕𑀳𑀡𑁂𑀦𑁂𑀯 𑀕𑀳𑀡𑀦𑁆𑀢𑀺. 𑀅𑀯𑀢𑁆𑀣𑀼𑀲𑁆𑀫𑀺𑀦𑁆𑀢𑀺 𑀅𑀲𑀤𑁆𑀤𑀳𑀦𑀻𑀬𑁂 𑀯𑀢𑁆𑀣𑀼𑀲𑁆𑀫𑀺𑀁. 𑀲𑀸𑀦𑀼𑀦𑀬𑁄 𑀅𑀥𑀺𑀫𑁄𑀓𑁆𑀔𑁄𑀢𑀺 𑀫𑁄𑀳𑀤𑀺𑀝𑁆𑀞𑀻𑀦𑀁 𑀲𑀤𑁆𑀥𑀸𑀧𑀢𑀺𑀭𑀽𑀧𑀢𑀫𑀸𑀳. 𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑀫𑁄𑀳𑀸𑀤𑀻𑀳𑀺 𑀧𑀫𑀚𑁆𑀚𑀦𑀢𑁄 𑀅𑀳𑀺𑀭𑀺𑀓𑀸𑀤𑀻𑀳𑀺 𑀓𑀸𑀭𑀡𑁂𑀳𑀺. 𑀆𑀭𑀓𑁆𑀔𑀭𑀳𑀺𑀢𑀘𑀺𑀢𑁆𑀢𑁂𑀢𑀺 𑀘𑀺𑀢𑁆𑀢𑀲𑁆𑀲 𑀲𑀢𑀺𑀯𑀺𑀭𑀳𑀢𑀁𑀬𑁂𑀯 𑀤𑀲𑁆𑀲𑁂𑀢𑀺. 𑀆𑀭𑀓𑁆𑀔𑀧𑀘𑁆𑀘𑀼𑀧𑀝𑁆𑀞𑀸𑀦𑀸 𑀳𑀺 𑀲𑀢𑀻𑀢𑀺. 𑀏𑀢𑁂𑀦 ‘‘𑀅𑀲𑁆𑀲𑀤𑁆𑀥𑀺𑀬𑀘𑀺𑀢𑁆𑀢𑁂 𑀅𑀦𑁆𑀥𑀩𑀸𑀮𑀘𑀺𑀢𑁆𑀢𑁂’’𑀢𑀺 𑀧𑀤𑀤𑁆𑀯𑀬𑀁 𑀯𑀼𑀢𑁆𑀢𑀢𑁆𑀣𑀁 𑀳𑁄𑀢𑀺. 𑀉𑀧𑀦𑀸𑀳𑀸𑀤𑀻𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀭𑀸𑀕𑀸𑀤𑀬𑁄 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀭𑀸𑀕𑀸𑀤𑀻𑀦𑀁 𑀧𑀭𑀺𑀬𑀼𑀝𑁆𑀞𑀸𑀦𑀸𑀤𑀺𑀲𑀪𑀸𑀯𑀢𑀸𑀬 ‘‘𑀅𑀯𑀺𑀲𑁂𑀲𑁂𑀦𑀸’’𑀢𑀺 𑀯𑀼𑀢𑁆𑀢𑀁 𑀯𑀺𑀲𑁂𑀲𑀲𑁆𑀲 𑀏𑀓𑀘𑁆𑀘𑀲𑁆𑀲 𑀅𑀲𑀫𑁆𑀪𑀯𑀢𑁄. 𑀇𑀥𑀸𑀢𑀺, 𑀇𑀫𑀲𑁆𑀫𑀺𑀁 𑀘𑀺𑀢𑁆𑀢𑁂. 𑀦𑀺𑀧𑁆𑀨𑀸𑀤𑁂𑀢𑀩𑁆𑀩𑁂 𑀧𑀬𑁄𑀚𑀦𑁂 𑀪𑀼𑀫𑁆𑀫𑀁 ‘‘𑀘𑀫𑁆𑀫𑀲𑁆𑀫𑀺𑀁 𑀤𑀻𑀧𑀺𑀦𑀁 𑀳𑀦𑁆𑀢𑀻’’𑀢𑀺 (𑀯𑀚𑀺𑀭. 𑀝𑀻. 𑁧𑁭-𑁧𑁮 𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸) 𑀯𑀺𑀬 𑀆𑀭𑀫𑁆𑀫𑀡𑀁 𑀯𑀸 𑀅𑀯𑀽𑀧𑀲𑀫𑁄 𑀨𑀮𑀽𑀧𑀘𑀸𑀭𑁂𑀦 ‘‘𑀲𑁂𑀫𑁆𑀳𑁄 𑀕𑀼𑀴𑁄’’𑀢𑀺 𑀯𑀺𑀬.

𑀥𑀫𑁆𑀫𑀼𑀤𑁆𑀤𑁂𑀲𑀯𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀤𑁆𑀤𑁂𑀲𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑁩𑁯𑁦. 𑀲𑀪𑀸𑀯𑀧𑀝𑀺𑀘𑁆𑀙𑀸𑀤𑀯𑀲𑁂𑀦 𑀧𑀓𑀢𑀺𑀅𑀢𑁆𑀢𑀸𑀤𑀺𑀅𑀲𑀦𑁆𑀢𑀕𑁆𑀕𑀳𑀡𑀲𑁆𑀲 𑀦𑀺𑀲𑁆𑀲𑀬𑀢𑁆𑀢𑀸 𑀦𑀺𑀫𑀺𑀢𑁆𑀢𑀢𑁆𑀢𑀸 𑀅𑀲𑀦𑁆𑀢𑀁 𑀩𑀼𑀚𑁆𑀛𑀢𑀺, 𑀦𑀺𑀘𑁆𑀘𑀸𑀤𑀺𑀯𑀺𑀲𑀫𑀕𑁆𑀕𑀳𑀡𑀲𑁆𑀲 𑀲𑀜𑁆𑀜𑀸𑀤𑀺𑀯𑀺𑀧𑀭𑀺𑀬𑁂𑀲𑀲𑁆𑀲 𑀦𑀺𑀲𑁆𑀲𑀬𑀢𑁆𑀢𑀸 𑀅𑀲𑀫𑀁 𑀩𑀼𑀚𑁆𑀛𑀢𑀻𑀢𑀺 𑀫𑁄𑀳𑁄 𑀯𑀼𑀢𑁆𑀢𑁄 𑀦𑀺𑀫𑀺𑀢𑁆𑀢𑀲𑁆𑀲 𑀓𑀢𑁆𑀢𑀼𑀪𑀸𑀯𑁂𑀦 𑀉𑀧𑀘𑀸𑀭𑀺𑀢𑀢𑁆𑀢𑀸, 𑀅𑀬𑀜𑁆𑀘 𑀅𑀢𑁆𑀣𑁄 𑀤𑀺𑀝𑁆𑀞𑀺𑀲𑀳𑀺𑀢𑀫𑁄𑀳𑀯𑀲𑁂𑀦 𑀤𑀝𑁆𑀞𑀩𑁆𑀩𑁄. 𑀏𑀢𑁆𑀣 𑀘 𑀧𑀓𑀢𑀻𑀢𑀺 𑀓𑀸𑀧𑀺𑀮𑀸𑀦𑀁 𑀧𑀥𑀸𑀦𑀁.

𑀢𑀢𑀺𑀬𑀘𑀺𑀢𑁆𑀢𑀯𑀡𑁆𑀡𑀦𑀸

𑁪𑁦𑁦. 𑀅𑀧𑀡𑁆𑀡𑀓𑀧𑀤𑀁 𑀯𑀺𑀬 𑀅𑀯𑀺𑀭𑀚𑁆𑀛𑀦𑀓𑀧𑀤𑀫𑁆𑀧𑀺 𑀓𑀤𑀸𑀘𑀺 𑀦𑀺𑀬𑀢𑀪𑀸𑀯𑀁 𑀤𑀻𑀧𑁂𑀬𑁆𑀬𑀸𑀢𑀺 𑀅𑀦𑀺𑀬𑀢𑀢𑀁 𑀤𑀻𑀧𑁂𑀢𑀼𑀁 ‘‘𑀉𑀧𑁆𑀧𑀢𑁆𑀢𑀺𑀅𑀭𑀳𑀗𑁆𑀕𑀸𑀦𑀻’’𑀢𑀺 𑀯𑀼𑀢𑁆𑀢𑀁 𑀫𑀸𑀦𑀲𑁆𑀲 𑀅𑀦𑀺𑀬𑀢𑀢𑁆𑀢𑀸. 𑀬𑀤𑀺 𑀳𑀺 𑀫𑀸𑀦𑁄 𑀦𑀺𑀬𑀢𑁄 𑀲𑀺𑀬𑀸, 𑀓𑀸𑀫𑀭𑀸𑀕𑀲𑁆𑀲 𑀫𑀸𑀦𑀭𑀳𑀺𑀢𑀸 𑀧𑀯𑀢𑁆𑀢𑀺 𑀦 𑀲𑀺𑀬𑀸, 𑀢𑀣𑀸 𑀪𑀯𑀭𑀸𑀕𑀲𑁆𑀲. 𑀏𑀯𑀁 𑀲𑀢𑀺 𑀧𑀝𑁆𑀞𑀸𑀦𑁂 𑀘𑀢𑀼𑀓𑁆𑀔𑀢𑁆𑀢𑀼𑀁 𑀓𑀸𑀫𑀭𑀸𑀕𑁂𑀦 𑀬𑁄𑀚𑀦𑀸 𑀦 𑀲𑀺𑀬𑀸, 𑀢𑀺𑀓𑁆𑀔𑀢𑁆𑀢𑀼𑀁𑀬𑁂𑀯 𑀲𑀺𑀬𑀸, 𑀪𑀯𑀭𑀸𑀕𑀫𑀽𑀮𑀺𑀓𑀸 𑀘 𑀦 𑀲𑀺𑀬𑀸, 𑀏𑀯𑀜𑁆𑀘 𑀲𑀁𑀬𑁄𑀚𑀦𑀸𑀦𑀁 𑀲𑀁𑀬𑁄𑀚𑀦𑁂𑀳𑀺 𑀅𑀝𑁆𑀞𑀯𑀺𑀥𑁂𑀦 𑀬𑁄𑀚𑀦𑀸 𑀲𑀺𑀬𑀸, 𑀦 𑀤𑀲𑀯𑀺𑀥𑀸 𑀤𑀲𑁆𑀲𑀺𑀢𑀸𑀢𑀺 𑀬𑀣𑀸𑀯𑀼𑀢𑁆𑀢𑀸𑀳𑀺 𑀬𑁄𑀚𑀦𑀸𑀳𑀺 𑀫𑀸𑀦𑀲𑁆𑀲 𑀅𑀦𑀺𑀬𑀢𑀪𑀸𑀯𑁄 𑀧𑀓𑀸𑀲𑀺𑀢𑁄. 𑀅𑀣 𑀯𑀸 𑀫𑀸𑀦𑁂𑀦 𑀲𑀤𑁆𑀥𑀺𑀁 𑀧𑀜𑁆𑀘 𑀳𑁄𑀦𑁆𑀢𑀺 𑀬𑀣𑀸𑀯𑀼𑀢𑁆𑀢𑀸𑀦𑀺 𑀅𑀧𑀡𑁆𑀡𑀓𑀗𑁆𑀕𑀸𑀦𑀺, 𑀓𑀺𑀁 𑀧𑀦 𑀳𑁄𑀦𑁆𑀢𑀻𑀢𑀺 𑀅𑀧𑁂𑀓𑁆𑀔𑀸𑀬𑀁 𑀬𑁂𑀯𑀸𑀧𑀦𑀓𑀸𑀢𑀺 𑀯𑀺𑀤𑀺𑀢𑁄𑀯𑀸𑀬𑀫𑀢𑁆𑀣𑁄. 𑀬𑁂𑀯𑀸𑀧𑀦𑀓𑀸𑀦𑀜𑁆𑀳𑀺 𑀧𑀜𑁆𑀘𑀪𑀸𑀯𑁄 𑀇𑀥 𑀯𑀺𑀥𑀻𑀬𑀢𑀺, 𑀦 𑀅𑀧𑀡𑁆𑀡𑀓𑀗𑁆𑀕𑀸𑀦𑀦𑁆𑀢𑀺 𑀲𑁄 𑀬𑀣𑀸 𑀳𑁄𑀢𑀺, 𑀢𑀣𑀸 𑀬𑁄𑀚𑁂𑀢𑀩𑁆𑀩𑀁. 𑀓𑀺𑀮𑁂𑀲𑀤𑀼𑀓𑁂 𑀧𑀝𑀺𑀘𑁆𑀘𑀯𑀸𑀭𑀸𑀤𑀻𑀲𑀼 ‘‘𑀓𑀺𑀮𑁂𑀲𑀁 𑀥𑀫𑁆𑀫𑀁 𑀧𑀝𑀺𑀘𑁆𑀘 𑀓𑀺𑀮𑁂𑀲𑁄 𑀥𑀫𑁆𑀫𑁄 𑀉𑀧𑁆𑀧𑀚𑁆𑀚𑀢𑀺 𑀳𑁂𑀢𑀼𑀧𑀘𑁆𑀘𑀬𑀸’’𑀢𑀺𑀆𑀤𑀻𑀲𑀼 ‘‘𑀮𑁄𑀪𑀁 𑀧𑀝𑀺𑀘𑁆𑀘 𑀫𑁄𑀳𑁄 𑀫𑀸𑀦𑁄 𑀣𑀺𑀦𑀁 𑀉𑀤𑁆𑀥𑀘𑁆𑀘𑀁 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀁. 𑀮𑁄𑀪𑀁 𑀧𑀝𑀺𑀘𑁆𑀘 𑀫𑁄𑀳𑁄 𑀫𑀸𑀦𑁄 𑀉𑀤𑁆𑀥𑀘𑁆𑀘𑀁 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀁. 𑀮𑁄𑀪𑀁 𑀧𑀝𑀺𑀘𑁆𑀘 𑀫𑁄𑀳𑁄 𑀣𑀺𑀦𑀁 𑀉𑀤𑁆𑀥𑀘𑁆𑀘𑀁 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧𑀁. 𑀮𑁄𑀪𑀁 𑀧𑀝𑀺𑀘𑁆𑀘 𑀫𑁄𑀳𑁄 𑀉𑀤𑁆𑀥𑀘𑁆𑀘𑀁 𑀅𑀳𑀺𑀭𑀺𑀓𑀁 𑀅𑀦𑁄𑀢𑁆𑀢𑀧𑁆𑀧’’𑀦𑁆𑀢𑀺 𑀯𑀺𑀪𑀢𑁆𑀢𑀢𑁆𑀢𑀸 ‘‘𑀢𑀣𑀸 𑀓𑀺𑀮𑁂𑀲𑀤𑀼𑀓𑁂𑀧𑀻’’𑀢𑀺 𑀯𑀼𑀢𑁆𑀢𑀁. 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑀲𑀲𑀗𑁆𑀔𑀸𑀭𑀺𑀓𑀸𑀲𑀗𑁆𑀔𑀸𑀭𑀺𑀓𑀘𑀺𑀢𑁆𑀢𑀯𑀲𑁂𑀦 𑀳𑀺 𑀅𑀬𑀁 𑀧𑀸𑀞𑀪𑁂𑀤𑁄𑀢𑀺.

‘‘𑀓𑀸𑀫𑀭𑀸𑀕𑁄 𑀘𑀢𑀼𑀥𑀸 𑀏𑀓𑀢𑁄 𑀉𑀧𑁆𑀧𑀚𑁆𑀚𑀢𑀺, 𑀧𑀝𑀺𑀖𑁄 𑀢𑀺𑀥𑀸, 𑀫𑀸𑀦𑁄 𑀏𑀓𑀥𑀸, 𑀢𑀣𑀸 𑀯𑀺𑀘𑀺𑀓𑀺𑀘𑁆𑀙𑀸 𑀪𑀯𑀭𑀸𑀕𑁄𑀢𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 𑀓𑀸𑀫𑀭𑀸𑀕𑁄 𑀫𑀸𑀦𑀲𑀁𑀬𑁄𑀚𑀦𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑁂𑀳𑀺 𑀘𑁂𑀯 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑀫𑀢𑁆𑀢𑁂𑀦𑁂𑀯 𑀘 𑀲𑀤𑁆𑀥𑀺𑀁 𑀫𑀸𑀦𑁄 𑀪𑀯𑀭𑀸𑀕𑀸𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑁂𑀳𑀺 𑀲𑀤𑁆𑀥𑀺𑀁 𑀪𑀯𑀭𑀸𑀕𑁄 𑀅𑀯𑀺𑀚𑁆𑀚𑀸𑀲𑀁𑀬𑁄𑀚𑀦𑁂𑀦 𑀲𑀤𑁆𑀥𑀺’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀓𑀡𑁆𑀟𑀯𑀡𑁆𑀡𑀦𑀸𑀬𑀁 (𑀥. 𑀲. 𑀅𑀝𑁆𑀞. 𑁧𑁪𑁮𑁫) 𑀯𑀓𑁆𑀔𑀫𑀸𑀦𑀢𑁆𑀢𑀸 ‘‘𑀇𑀥 𑀘 𑀯𑀓𑁆𑀔𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣𑁂𑀯 ‘‘𑀮𑁄𑀪𑁄 𑀙𑀥𑀸 𑀏𑀓𑀢𑁄 𑀉𑀧𑁆𑀧𑀚𑁆𑀚𑀢𑀺, 𑀧𑀝𑀺𑀖𑁄 𑀤𑁆𑀯𑁂𑀥𑀸, 𑀢𑀣𑀸 𑀫𑁄𑀳𑁄’’𑀢𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 ‘‘𑀮𑁄𑀪𑁄 𑀅𑀲𑀗𑁆𑀔𑀸𑀭𑀺𑀓𑁄 𑀤𑀺𑀝𑁆𑀞𑀺𑀯𑀺𑀧𑁆𑀧𑀬𑀼𑀢𑁆𑀢𑁄 𑀫𑁄𑀳𑀉𑀤𑁆𑀥𑀘𑁆𑀘𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀲𑀲𑀗𑁆𑀔𑀸𑀭𑀺𑀓𑁄 𑀫𑁄𑀳𑀣𑀺𑀦𑀉𑀤𑁆𑀥𑀘𑁆𑀘𑀅𑀳𑀺𑀭𑀺𑀓𑀸𑀦𑁄𑀢𑁆𑀢𑀧𑁆𑀧𑁂𑀳𑀺, 𑀅𑀲𑀗𑁆𑀔𑀸𑀭𑀺𑀓𑁄 𑀏𑀯 𑀫𑁄𑀳𑀫𑀸𑀦𑀉𑀤𑁆𑀥𑀘𑁆𑀘𑀅𑀳𑀺𑀭𑀺𑀓𑀅𑀦𑁄𑀢𑁆𑀢𑀧𑁆𑀧𑁂𑀳𑀺, 𑀲𑀲𑀗𑁆𑀔𑀸𑀭𑀺𑀓𑁄 𑀏𑀯 𑀘 𑀫𑁄𑀳𑀫𑀸𑀦𑀣𑀺𑀦𑀉𑀤𑁆𑀥𑀘𑁆𑀘𑀅𑀳𑀺𑀭𑀺𑀓𑀅𑀦𑁄𑀢𑁆𑀢𑀧𑁆𑀧𑁂𑀳𑀻’’𑀢𑀺 𑀯𑀓𑁆𑀔𑀫𑀸𑀦𑀢𑁆𑀢𑀸 ‘‘𑀢𑀣𑀸𑀤𑀲𑀯𑀺𑀥𑀸 𑀓𑀺𑀮𑁂𑀲𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀅𑀳’’𑀦𑁆𑀢𑀺 𑀕𑀳𑀡𑀢𑀸𑀬 𑀅𑀯𑀁𑀓𑀢𑁆𑀯𑀸 𑀕𑀳𑀡𑀫𑁆𑀧𑀺 ‘‘𑀲𑀫𑁆𑀧𑀕𑁆𑀕𑀳𑁄’’𑀢𑀺 𑀯𑀼𑀢𑁆𑀢𑀁.

𑀘𑀢𑀼𑀢𑁆𑀣𑀘𑀺𑀢𑁆𑀢𑀯𑀡𑁆𑀡𑀦𑀸

𑁪𑁦𑁨. 𑀉𑀲𑁆𑀲𑀸𑀳𑀁 𑀚𑀦𑁂𑀦𑁆𑀢𑀸𑀢𑀺 𑀏𑀢𑁆𑀣 𑀘𑀺𑀢𑁆𑀢𑀧𑀬𑁄𑀕𑀲𑀗𑁆𑀔𑀸𑀢𑁄 𑀲𑀗𑁆𑀔𑀸𑀭𑁄 𑀏𑀯 𑀉𑀲𑁆𑀲𑀸𑀳𑁄, 𑀦 𑀯𑀻𑀭𑀺𑀬𑀼𑀲𑁆𑀲𑀸𑀳𑁄𑀢𑀺.

𑀦𑀯𑀫𑀘𑀺𑀢𑁆𑀢𑀯𑀡𑁆𑀡𑀦𑀸

𑁪𑁧𑁩. 𑀯𑀺𑀲𑀧𑁆𑀧𑀦𑀸𑀦𑀺𑀝𑁆𑀞𑀭𑀽𑀧𑀲𑀫𑀼𑀝𑁆𑀞𑀸𑀦𑀁 𑀬𑁂𑀦 𑀓𑀼𑀧𑀺𑀢𑀲𑁆𑀲 𑀲𑀓𑀮𑀲𑀭𑀻𑀭𑀁 𑀓𑀫𑁆𑀧𑀢𑀺, 𑀓𑀼𑀧𑀺𑀢𑀸𑀓𑀸𑀭𑁄 𑀧𑀜𑁆𑀜𑀸𑀬𑀢𑀺. 𑀏𑀢𑁂𑀦 𑀲𑀫𑁆𑀧𑀢𑁆𑀢𑀺𑀅𑀢𑁆𑀣𑁄 𑀭𑀲𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺, 𑀧𑀯𑀢𑁆𑀢𑀺𑀆𑀓𑀸𑀭𑀯𑀲𑁂𑀦 𑀯𑀸 𑀯𑀺𑀲𑀧𑁆𑀧𑀦𑀭𑀲𑁄. 𑀢𑀣𑀸 𑀳𑀺 𑀬𑀲𑁆𑀲 𑀓𑀼𑀧𑁆𑀧𑀢𑀺, 𑀢𑀲𑁆𑀲 𑀅𑀫𑀺𑀢𑁆𑀢𑀲𑁆𑀲 𑀲𑀫𑁆𑀧𑀢𑁆𑀢𑀺 𑀬𑁂𑀪𑀼𑀬𑁆𑀬𑁂𑀦 𑀧𑀝𑀺𑀖𑀼𑀧𑁆𑀧𑀢𑁆𑀢𑀺𑀳𑁂𑀢𑀼 𑀳𑁄𑀢𑀻𑀢𑀺. 𑀏𑀢𑁂𑀦 𑀓𑀺𑀘𑁆𑀘𑀢𑁆𑀣𑁄 𑀭𑀲𑁄 𑀯𑀼𑀢𑁆𑀢𑁄 𑀳𑁄𑀢𑀻𑀢𑀺.

𑁪𑁧𑁮. 𑀯𑀘𑀦𑀢𑁆𑀣𑀫𑁂𑀯 𑀯𑀘𑀦𑀧𑀭𑀺𑀬𑀸𑀬𑀫𑁂𑀯.

𑀏𑀓𑀸𑀤𑀲𑀫𑀘𑀺𑀢𑁆𑀢𑀯𑀡𑁆𑀡𑀦𑀸

𑁪𑁨𑁪. 𑀦𑀺𑀘𑁆𑀙𑀬𑀸𑀪𑀸𑀯𑀸𑀢𑀺 𑀅𑀥𑀺𑀫𑁄𑀓𑁆𑀔𑀸𑀪𑀸𑀯𑀸. 𑀅𑀲𑀡𑁆𑀞𑀳𑀦𑀢𑁄𑀢𑀺 𑀲𑀦𑁆𑀢𑀸𑀦𑀯𑀲𑁂𑀦 𑀏𑀓𑀲𑁆𑀫𑀺𑀁 𑀆𑀭𑀫𑁆𑀫𑀡𑁂 𑀅𑀦𑀯𑀝𑁆𑀞𑀸𑀦𑀢𑁄.

𑀤𑁆𑀯𑀸𑀤𑀲𑀫𑀘𑀺𑀢𑁆𑀢𑀯𑀡𑁆𑀡𑀦𑀸

𑁪𑁨𑁯. 𑀲𑀳𑀚𑀸𑀢𑀸𑀥𑀺𑀧𑀢𑀺 𑀦𑀢𑁆𑀣𑀺 ‘‘𑀙𑀦𑁆𑀤𑀯𑀢𑁄 𑀘𑁂 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺, 𑀲𑀸 𑀫𑀬𑁆𑀳𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺𑀆𑀤𑀺𑀧𑁆𑀧𑀯𑀢𑁆𑀢𑀺𑀬𑀸 𑀅𑀪𑀸𑀯𑀸. 𑀅𑀦𑀼𑀤𑁆𑀥𑀝𑀢𑁆𑀢𑀸 𑀧𑀝𑀺𑀲𑀺𑀤𑁆𑀥𑀢𑀸, 𑀬𑀣𑀸𑀥𑀫𑁆𑀫𑀲𑀸𑀲𑀦𑁂 𑀅𑀯𑀘𑀦𑀫𑁆𑀧𑀺 𑀅𑀪𑀸𑀯𑀁 𑀤𑀻𑀧𑁂𑀢𑀺.

𑀅𑀯𑀘𑀦𑀢𑁄𑀢𑀺 𑀅-𑀓𑀸𑀭𑀲𑁆𑀲 𑀢𑀤𑀜𑁆𑀜𑀯𑀘𑀦𑀢𑀁 𑀤𑀲𑁆𑀲𑁂𑀢𑀺. 𑀏𑀢𑁂𑀦 𑀘 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑁂𑀲𑀼 𑀅𑀪𑀸𑀯𑀯𑀘𑀦𑁂𑀦 𑀓𑀸𑀭𑀡𑀲𑀺𑀤𑁆𑀥𑀺𑀬𑀸 𑀨𑀮𑀲𑀺𑀤𑁆𑀥𑀻𑀢𑀺 𑀢𑀢𑁆𑀣 𑀅𑀪𑀸𑀯𑀲𑁆𑀲 𑀓𑀸𑀭𑀡𑀫𑁂𑀯 𑀢𑀸𑀯 𑀤𑀲𑁆𑀲𑁂𑀢𑀼𑀁 ‘‘𑀧𑀝𑀺𑀲𑀦𑁆𑀥𑀺𑀅𑀦𑀸𑀓𑀟𑁆𑀠𑀦𑀢𑁄’’𑀢𑀺 𑀯𑀼𑀢𑁆𑀢𑀁. 𑀢𑁂𑀦 𑀢𑀁𑀲𑀪𑀸𑀯𑀢𑀸 𑀢𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀯𑀼𑀢𑁆𑀢𑀸 𑀳𑁄𑀢𑀺. 𑀢𑀢𑁄 𑀘 ‘‘𑀩𑀮𑀯𑀁 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀢𑀺, 𑀤𑀼𑀩𑁆𑀩𑀮𑀁 𑀦𑀸𑀓𑀟𑁆𑀠𑀢𑀻’’𑀢𑀺 𑀇𑀤𑀁 𑀧𑀝𑀺𑀲𑀦𑁆𑀥𑀺𑀤𑀸𑀦𑀲𑀪𑀸𑀯𑁂𑀲𑀼. 𑀬𑀲𑁆𑀲 𑀧𑀦 𑀧𑀝𑀺𑀲𑀦𑁆𑀥𑀺𑀤𑀸𑀦𑀲𑀪𑀸𑀯𑁄 𑀏𑀯 𑀦𑀢𑁆𑀣𑀺, 𑀦 𑀢𑀲𑁆𑀲 𑀩𑀮𑀯𑀪𑀸𑀯𑁄 𑀧𑀝𑀺𑀲𑀦𑁆𑀥𑀺𑀆𑀓𑀟𑁆𑀠𑀦𑁂 𑀓𑀸𑀭𑀡𑀦𑁆𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺. 𑀅𑀦𑀸𑀓𑀟𑁆𑀠𑀦𑀁 𑀲𑀸𑀥𑁂𑀢𑀺 ‘‘𑀬𑀤𑀺 𑀳𑀺 𑀆𑀓𑀟𑁆𑀠𑁂𑀬𑁆𑀬𑀸’’𑀢𑀺𑀆𑀤𑀺𑀦𑀸. 𑀬𑀲𑁆𑀫𑀸 𑀘 𑀦𑀸𑀕𑀢𑀁, 𑀢𑀲𑁆𑀫𑀸 𑀦𑀸𑀓𑀟𑁆𑀠𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀬𑀲𑁆𑀫𑀸 𑀧𑀦 𑀢𑀁 𑀧𑀝𑀺𑀲𑀦𑁆𑀥𑀺𑀤𑀸𑀦𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀦𑀸𑀕𑀢’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀅𑀦𑀸𑀓𑀟𑁆𑀠𑀦𑀢𑁄 𑀅𑀦𑀸𑀕𑀫𑀦𑀁 𑀲𑀸𑀥𑁂𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀁.

𑀅𑀧𑀸𑀬𑀕𑀫𑀦𑀻𑀬𑀲𑁆𑀲𑀸𑀢𑀺 𑀅𑀧𑀸𑀬𑀁 𑀕𑀫𑁂𑀢𑀻𑀢𑀺 𑀅𑀧𑀸𑀬𑀕𑀫𑀦𑀻𑀬𑀁, 𑀢𑀁𑀲𑀪𑀸𑀯𑀦𑁆𑀢𑀺 𑀅𑀢𑁆𑀣𑁄. 𑀧𑀝𑀺𑀲𑀦𑁆𑀥𑀺𑀆𑀓𑀟𑁆𑀠𑀦𑁂 𑀲𑀢𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑀁 𑀏𑀓𑀦𑁆𑀢𑁂𑀦 𑀅𑀧𑀸𑀬𑀕𑀫𑀦𑀻𑀬𑀁 𑀲𑀺𑀬𑀸. 𑀢𑁂𑀦 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 (𑀥. 𑀲. 𑀅𑀝𑁆𑀞. 𑁪𑁨𑁯) ‘‘𑀇𑀢𑀭𑀲𑁆𑀲𑀸𑀧𑀺 𑀏𑀢𑁆𑀣𑁂𑀯 𑀧𑀝𑀺𑀲𑀦𑁆𑀥𑀺𑀤𑀸𑀦𑀁 𑀪𑀯𑁂𑀬𑁆𑀬𑀸’’𑀢𑀺. 𑀦 𑀳𑀺 𑀅𑀓𑀼𑀲𑀮𑀧𑀝𑀺𑀲𑀦𑁆𑀥𑀺 𑀲𑀼𑀕𑀢𑀺𑀬𑀁 𑀲𑀫𑁆𑀪𑀯𑀢𑀻𑀢𑀺. ‘‘𑀘𑀢𑀽𑀳𑀺 𑀅𑀧𑀸𑀬𑁂𑀳𑀺 𑀘 𑀯𑀺𑀧𑁆𑀧𑀫𑀼𑀢𑁆𑀢𑁄 (𑀔𑀼. 𑀧𑀸. 𑁬.𑁧𑁧; 𑀲𑀼. 𑀦𑀺. 𑁨𑁩𑁪) 𑀅𑀯𑀺𑀦𑀺𑀧𑀸𑀢𑀥𑀫𑁆𑀫𑁄’’𑀢𑀺 (𑀲. 𑀦𑀺. 𑁨.𑁪𑁧; 𑁫.𑁯𑁯𑁮, 𑁧𑁦𑁦𑁪) 𑀯𑀘𑀦𑀢𑁄 𑀅𑀧𑀸𑀬𑀕𑀫𑀦𑀻𑀬𑀜𑁆𑀘 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀁. 𑀢𑁂𑀦𑀸𑀳 ‘‘𑀅𑀧𑀸𑀬𑀕𑀫𑀦𑀻𑀬𑀲𑁆𑀲 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀢𑁆𑀢𑀸’’𑀢𑀺. 𑀦 𑀘𑁂𑀢𑀁 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀁, 𑀦 𑀲𑁄 𑀢𑀲𑁆𑀲 𑀅𑀧𑀸𑀬𑀕𑀫𑀦𑀻𑀬𑁄 𑀭𑀸𑀕𑁄 𑀤𑁄𑀲𑁄 𑀫𑁄𑀳𑁄 𑀢𑀤𑁂𑀓𑀝𑁆𑀞𑀸 𑀘 𑀓𑀺𑀮𑁂𑀲𑀸𑀢𑀺 𑀏𑀢𑁂𑀦 𑀲𑀗𑁆𑀕𑀳𑁄𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁 𑀦𑀺𑀬𑁄𑀕𑀢𑁄 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀪𑀸𑀯𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀓𑀢𑀫𑁂 𑀥𑀫𑁆𑀫𑀸 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸, 𑀉𑀤𑁆𑀥𑀘𑁆𑀘𑀲𑀳𑀕𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄’’𑀢𑀺 (𑀥. 𑀲. 𑁧𑁪𑁦𑁬).

‘‘𑀓𑀼𑀲𑀮𑀸𑀓𑀼𑀲𑀮𑀁 𑀓𑀫𑁆𑀫𑀁 𑀯𑀺𑀧𑀸𑀓𑀸𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁨𑁭) 𑀯𑀼𑀢𑁆𑀢𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑁄 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑁄. 𑀲𑁄 𑀘 𑀬𑀤𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑀁 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑁂𑀬𑁆𑀬, 𑀢𑀲𑁆𑀲𑀸𑀧𑀺 𑀲𑀺𑀬𑀸. 𑀢𑀣𑀸 𑀘 𑀲𑀢𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑀁 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀁 𑀲𑀺𑀬𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸𑀦𑀁𑀬𑁂𑀯 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀦 𑀘𑁂𑀢𑀁 𑀤𑀲𑁆𑀲𑁂𑀦𑁂𑀦 𑀧𑀳𑀸𑀢𑀩𑁆𑀩𑀦𑁆𑀢𑀺 𑀲𑀩𑁆𑀩𑀁 𑀧𑀼𑀩𑁆𑀩𑁂 𑀯𑀺𑀬 𑀆𑀯𑀢𑁆𑀢𑀢𑀺.

𑀲𑀳𑀚𑀸𑀢𑀫𑁂𑀯 𑀯𑀺𑀪𑀢𑁆𑀢𑀦𑁆𑀢𑀺 𑀬𑀣𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀯𑀺𑀪𑀗𑁆𑀕𑁂 ‘‘𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑁄 𑀥𑀫𑁆𑀫𑁄 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀲𑁆𑀲 𑀥𑀫𑁆𑀫𑀲𑁆𑀲 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁮.𑁮𑁬) 𑀲𑀳𑀚𑀸𑀢𑀁 𑀦𑀸𑀦𑀸𑀓𑁆𑀔𑀡𑀺𑀓𑀦𑁆𑀢𑀺 𑀉𑀤𑁆𑀤𑀺𑀲𑀺𑀢𑁆𑀯𑀸 ‘‘𑀲𑀳𑀚𑀸𑀢𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸 𑀘𑁂𑀢𑀦𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀦𑀸𑀦𑀸𑀓𑁆𑀔𑀡𑀺𑀓𑀸 𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑀸 𑀘𑁂𑀢𑀦𑀸 𑀯𑀺𑀧𑀸𑀓𑀸𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 𑀯𑀺𑀪𑀢𑁆𑀢𑀁, 𑀏𑀯𑀁 𑀅𑀯𑀺𑀪𑀚𑀺𑀢𑁆𑀯𑀸 ‘‘𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀸 𑀘𑁂𑀢𑀦𑀸 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁮.𑁮𑁯) 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁, 𑀦 𑀯𑀼𑀢𑁆𑀢𑀁 ‘‘𑀦𑀸𑀦𑀸𑀓𑁆𑀔𑀡𑀺𑀓𑀸 𑀘𑁂𑀢𑀦𑀸 𑀯𑀺𑀧𑀸𑀓𑀸𑀦𑀁 𑀔𑀦𑁆𑀥𑀸𑀦𑀁 𑀓𑀝𑀢𑁆𑀢𑀸 𑀘 𑀭𑀽𑀧𑀸𑀦𑀁 𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺. 𑀢𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀲𑁆𑀲 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀪𑀸𑀯𑁄𑀢𑀺 𑀯𑀺𑀜𑁆𑀜𑀸𑀬𑀢𑀺. 𑀧𑀘𑁆𑀘𑀦𑀻𑀬𑁂𑀧𑀺 𑀬𑀣𑀸𑀲𑀫𑁆𑀪𑀯𑀁 𑀲𑀗𑁆𑀕𑀸𑀳𑀓𑀧𑀘𑁆𑀘𑀬𑀸𑀦𑀁 𑀯𑀲𑁂𑀦 𑀧𑀘𑁆𑀘𑀬𑀼𑀤𑁆𑀥𑀸𑀭𑁂 𑀓𑀭𑀺𑀬𑀫𑀸𑀦𑁂. 𑀇𑀢𑀭𑀢𑁆𑀣 𑀘𑀸𑀢𑀺 𑀤𑀲𑁆𑀲𑀦𑁂𑀦𑀧𑀳𑀸𑀢𑀩𑁆𑀩𑀧𑀤𑁂. 𑀢𑀢𑁆𑀣 𑀳𑀺 ‘‘𑀤𑀲𑁆𑀲𑀦𑁂𑀦 𑀧𑀳𑀸𑀢𑀩𑁆𑀩𑁄 𑀥𑀫𑁆𑀫𑁄 𑀦𑁂𑀯 𑀤𑀲𑁆𑀲𑀦𑁂𑀦 𑀦 𑀪𑀸𑀯𑀦𑀸𑀬 𑀧𑀳𑀸𑀢𑀩𑁆𑀩𑀲𑁆𑀲 𑀥𑀫𑁆𑀫𑀲𑁆𑀲 𑀆𑀭𑀫𑁆𑀫𑀡𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄, 𑀲𑀳𑀚𑀸𑀢𑀉𑀧𑀦𑀺𑀲𑁆𑀲𑀬𑀧𑀘𑁆𑀙𑀸𑀚𑀸𑀢𑀓𑀫𑁆𑀫𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄’’𑀢𑀺 (𑀧𑀝𑁆𑀞𑀸. 𑁨.𑁮.𑁭𑁧) 𑀓𑀫𑁆𑀫𑀧𑀘𑁆𑀘𑀬𑁄𑀧𑀺 𑀯𑀼𑀢𑁆𑀢𑁄𑀢𑀺.

𑀢𑀤𑀪𑀸𑀯𑀸𑀢𑀺 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀢𑁆𑀢𑀸𑀪𑀸𑀯𑀸. 𑀦 𑀘 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀁 𑀯𑀺𑀦𑀸 𑀧𑀝𑀺𑀲𑀦𑁆𑀥𑀺𑀆𑀓𑀟𑁆𑀠𑀦𑀁 𑀅𑀢𑁆𑀣𑀻𑀢𑀺 ‘‘𑀧𑀝𑀺𑀲𑀦𑁆𑀥𑀺𑀅𑀦𑀸𑀓𑀟𑁆𑀠𑀦𑀢𑁄 𑀢𑀢𑁆𑀣 𑀅𑀦𑀸𑀕𑀢𑀸’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣𑀸𑀢𑀺 ‘‘𑀞𑀧𑁂𑀢𑁆𑀯𑀸 𑀉𑀤𑁆𑀥𑀘𑁆𑀘𑀲𑀳𑀕𑀢𑀁 𑀲𑁂𑀲𑀸𑀦𑀺 𑀏𑀓𑀸𑀤𑀲𑁂𑀯 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀦𑁆𑀢𑀻’’𑀢𑀺 𑀏𑀢𑁆𑀣. 𑀧𑀯𑀢𑁆𑀢𑀺𑀯𑀺𑀧𑀸𑀓𑀲𑁆𑀲𑀸𑀢𑀺 𑀧𑀯𑀢𑁆𑀢𑀺𑀬𑀁 𑀯𑀺𑀧𑀸𑀓𑁄 𑀧𑀯𑀢𑁆𑀢𑀺𑀏𑀓𑀤𑁂𑀲𑀢𑀸𑀬 𑀧𑀯𑀢𑁆𑀢𑀺𑀪𑀽𑀢𑁄 𑀯𑀸 𑀯𑀺𑀧𑀸𑀓𑁄 𑀏𑀢𑀲𑁆𑀲𑀸𑀢𑀺 𑀧𑀯𑀢𑁆𑀢𑀺𑀯𑀺𑀧𑀸𑀓𑀁, 𑀓𑀫𑁆𑀫𑀁, 𑀢𑀲𑁆𑀲. 𑀅𑀣 𑀯𑀸 𑀧𑀯𑀢𑁆𑀢𑀺𑀬𑀁 𑀯𑀺𑀧𑀸𑀓𑁄 𑀧𑀯𑀢𑁆𑀢𑀺𑀯𑀺𑀧𑀸𑀓𑁄. 𑀇𑀫𑀲𑁆𑀫𑀺𑀁 𑀧𑀦 𑀅𑀢𑁆𑀣𑁂 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑁄 𑀏𑀢𑀲𑁆𑀲𑀸𑀢𑀺 𑀦𑀸𑀦𑀸…𑀧𑁂… 𑀬𑁄, 𑀢𑀩𑁆𑀪𑀸𑀯𑁄…𑀧𑁂… 𑀢𑀸𑀢𑀺 𑀏𑀯𑀁 𑀧𑀤𑀘𑁆𑀙𑁂𑀤𑁄 𑀤𑀝𑁆𑀞𑀩𑁆𑀩𑁄. 𑀦 𑀲𑀓𑁆𑀓𑀸 𑀦𑀺𑀯𑀸𑀭𑁂𑀢𑀼𑀁 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀁 𑀯𑀺𑀦𑀸 𑀯𑀺𑀧𑀸𑀓𑀲𑁆𑀲 𑀅𑀦𑀼𑀧𑁆𑀧𑀚𑁆𑀚𑀦𑀢𑁄.

𑀇𑀤𑀸𑀦𑀺 𑀧𑀯𑀢𑁆𑀢𑀺𑀯𑀺𑀧𑀸𑀓𑀸𑀦𑀁 𑀦𑀸𑀦𑀸𑀓𑁆𑀔𑀡𑀺𑀓𑀓𑀫𑁆𑀫𑀧𑀘𑁆𑀘𑀬𑀮𑀸𑀪𑀺𑀢𑀸𑀬 𑀆𑀳𑀘𑁆𑀘𑀪𑀸𑀲𑀺𑀢𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀯𑀼𑀢𑁆𑀢𑀜𑁆𑀘𑀸’’𑀢𑀺𑀆𑀤𑀺𑀫𑀸𑀳. 𑀯𑀺𑀧𑀸𑀓𑀤𑀸𑀦𑀁 𑀧𑀝𑀺𑀲𑀦𑁆𑀥𑀺𑀯𑀺𑀧𑀸𑀓𑀥𑀫𑁆𑀫𑀢𑀸𑀢𑀺 𑀫𑀜𑁆𑀜𑀫𑀸𑀦𑁄 ‘‘𑀬𑀤𑀺 𑀪𑀸𑀯𑀦𑀸’’𑀢𑀺𑀆𑀤𑀺𑀫𑀸𑀳. 𑀇𑀢𑀭𑁄 𑀯𑀺𑀧𑀸𑀓𑀤𑀸𑀦𑀸𑀪𑀸𑀯𑁂𑀧𑀺 𑀲𑀺𑀤𑁆𑀥𑁄 𑀯𑀺𑀧𑀸𑀓𑀥𑀫𑁆𑀫𑀪𑀸𑀯𑁄 𑀢𑀸𑀤𑀺𑀲𑀸𑀦𑀁 𑀅𑀜𑁆𑀜𑁂𑀲𑀫𑁆𑀧𑀺 𑀮𑀩𑁆𑀪𑀫𑀸𑀦𑀢𑁆𑀢𑀸𑀢𑀺 𑀆𑀳 ‘‘𑀅𑀪𑀺𑀜𑁆𑀜𑀸𑀘𑀺𑀢𑁆𑀢𑀸𑀤𑀻𑀦’’𑀦𑁆𑀢𑀺. 𑀆𑀤𑀺-𑀲𑀤𑁆𑀤𑁂𑀦 𑀅𑀢𑁆𑀢𑀦𑁄 𑀓𑀸𑀮𑀫𑀢𑀺𑀓𑁆𑀓𑀦𑁆𑀢𑀁 𑀤𑀺𑀝𑁆𑀞𑀥𑀫𑁆𑀫𑀯𑁂𑀤𑀦𑀻𑀬𑀁 𑀉𑀧𑀧𑀚𑁆𑀚𑀯𑁂𑀤𑀦𑀻𑀬𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀯𑀼𑀢𑁆𑀢𑀁 𑀲𑀺𑀬𑀸𑀢𑀺 𑀇𑀤𑀁 𑀲𑀳𑀸𑀬𑀧𑀘𑁆𑀘𑀬𑀮𑀸𑀪𑀢𑁄 𑀧𑀼𑀣𑀼𑀚𑁆𑀚𑀦𑀲𑀦𑁆𑀢𑀸𑀦𑀯𑀼𑀢𑁆𑀢𑀺𑀦𑁄 𑀉𑀤𑁆𑀥𑀘𑁆𑀘𑀲𑀳𑀕𑀢𑀲𑁆𑀲 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀁, 𑀢𑀤𑀪𑀸𑀯𑀸 𑀲𑁂𑀓𑁆𑀔𑀲𑀦𑁆𑀢𑀢𑀺𑀬𑀁 𑀢𑀲𑁆𑀲 𑀯𑀺𑀧𑀸𑀓𑀸𑀦𑀼𑀧𑁆𑀧𑀸𑀤𑀦𑀜𑁆𑀘 𑀬𑀼𑀢𑁆𑀢𑀁 𑀲𑀺𑀬𑀸𑀢𑀺 𑀯𑀼𑀢𑁆𑀢𑀁. 𑀢𑁂𑀦𑁂𑀯𑀸𑀳 ‘‘𑀇𑀤𑀁 𑀧𑀦 𑀞𑀸𑀦𑀁 𑀲𑀼𑀝𑁆𑀞𑀼 𑀯𑀺𑀘𑀸𑀭𑁂𑀢𑀩𑁆𑀩’’𑀦𑁆𑀢𑀺𑀆𑀤𑀺. 𑀢𑀣𑀸 𑀘 𑀯𑀓𑁆𑀔𑀢𑀺 ‘‘𑀧𑀼𑀣𑀼𑀚𑁆𑀚𑀦𑁂𑀲𑀼 𑀉𑀧𑁆𑀧𑀚𑁆𑀚𑀫𑀸𑀦𑀸𑀦𑀁 𑀲𑀓𑀪𑀡𑁆𑀟𑁂 𑀙𑀦𑁆𑀤𑀭𑀸𑀕𑀸𑀤𑀻𑀦𑀁 𑀉𑀤𑁆𑀥𑀘𑁆𑀘𑀲𑀳𑀕𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀘 𑀲𑀁𑀬𑁄𑀚𑀦𑀢𑁆𑀢𑀬𑀢𑀤𑁂𑀓𑀝𑁆𑀞𑀓𑀺𑀮𑁂𑀲𑀸𑀦𑀁 𑀅𑀦𑀼𑀧𑀘𑁆𑀙𑀺𑀦𑁆𑀦𑀢𑀸𑀬 𑀅𑀧𑀭𑀺𑀓𑁆𑀔𑀻𑀡𑀲𑀳𑀸𑀬𑀸𑀦𑀁 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀁 𑀦 𑀲𑀓𑁆𑀓𑀸 𑀧𑀝𑀺𑀓𑁆𑀔𑀺𑀧𑀺𑀢𑀼𑀦𑁆𑀢𑀺 𑀉𑀤𑁆𑀥𑀘𑁆𑀘𑀲𑀳𑀕𑀢𑀥𑀫𑁆𑀫𑀸𑀦𑀁 𑀯𑀺𑀧𑀸𑀓𑁄 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑁄’’𑀢𑀺. 𑀢𑀲𑁆𑀲 𑀢𑀸𑀤𑀺𑀲𑀲𑁆𑀲𑁂𑀯 𑀲𑀢𑀺 𑀲𑀳𑀸𑀬𑁂 𑀯𑀺𑀧𑀸𑀓𑀼𑀧𑁆𑀧𑀸𑀤𑀦𑀯𑀘𑀦𑀁, 𑀅𑀲𑀢𑀺 𑀯𑀺𑀧𑀸𑀓𑀸𑀦𑀼𑀧𑁆𑀧𑀸𑀤𑀦𑀯𑀘𑀦𑀁 𑀯𑀺𑀭𑀼𑀚𑁆𑀛𑀢𑀻𑀢𑀺 𑀘 𑀧𑀯𑀢𑁆𑀢𑀺𑀯𑀺𑀧𑀸𑀓𑀤𑀸𑀬𑀺𑀓𑀁 𑀯𑀸 𑀉𑀤𑁆𑀥𑀘𑁆𑀘𑀲𑀳𑀕𑀢𑀲𑁆𑀲 𑀫𑀦𑀲𑀺 𑀓𑀢𑁆𑀯𑀸 ‘‘𑀯𑀼𑀢𑁆𑀢𑀁 𑀲𑀺𑀬𑀸’’𑀢𑀺 𑀯𑀼𑀢𑁆𑀢𑀁. ‘‘𑀧𑀯𑀢𑁆𑀢𑀺𑀯𑀺𑀧𑀸𑀓𑀜𑁆𑀳𑀺 𑀲𑀦𑁆𑀥𑀸𑀬 ‘𑀢𑁂𑀲𑀁 𑀯𑀺𑀧𑀸𑀓𑁂 𑀜𑀸𑀡’𑀦𑁆𑀢𑀺 𑀧𑀝𑀺𑀲𑀫𑁆𑀪𑀺𑀤𑀸𑀯𑀺𑀪𑀗𑁆𑀕𑁂 (𑀯𑀺𑀪. 𑁭𑁨𑁫-𑁭𑁨𑁬) 𑀯𑀼𑀢𑁆𑀢’’𑀦𑁆𑀢𑀺 𑀏𑀓𑁂 𑀯𑀡𑁆𑀡𑀬𑀦𑁆𑀢𑀺. 𑀏𑀯𑀁 𑀉𑀤𑁆𑀥𑀘𑁆𑀘𑀘𑁂𑀢𑀦𑀸𑀧𑀺 𑀦 𑀳𑁄𑀢𑀺, 𑀲𑀸𑀧𑀺 𑀯𑀺𑀜𑁆𑀜𑀸𑀡𑀧𑀘𑁆𑀘𑀬𑀪𑀸𑀯𑁂 𑀅𑀧𑀦𑁂𑀢𑀩𑁆𑀩𑀸𑀢𑀺 𑀇𑀤𑀫𑁆𑀧𑀺 𑀧𑀝𑀺𑀲𑀦𑁆𑀥𑀺𑀯𑀺𑀜𑁆𑀜𑀸𑀡𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺.

𑀅𑀓𑀼𑀲𑀮𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.