𑀲𑁂𑀤𑀫𑁄𑀘𑀦𑀕𑀸𑀣𑀸𑀯𑀡𑁆𑀡𑀦𑀸

𑀅𑀯𑀺𑀧𑁆𑀧𑀯𑀸𑀲𑀧𑀜𑁆𑀳𑀸𑀯𑀡𑁆𑀡𑀦𑀸

𑁪𑁭𑁯. 𑀢𑀳𑀺𑀦𑁆𑀢𑀺 𑀢𑀲𑁆𑀫𑀺𑀁 𑀧𑀼𑀕𑁆𑀕𑀮𑁂. 𑀅𑀓𑀧𑁆𑀧𑀺𑀬𑀲𑀫𑁆𑀪𑁄𑀕𑁄 𑀦𑀸𑀫 𑀫𑁂𑀣𑀼𑀦𑀥𑀫𑁆𑀫𑀸𑀤𑀺. ‘‘𑀯𑀭𑀲𑁂𑀦𑀸𑀲𑀦𑀭𑀓𑁆𑀔𑀡𑀢𑁆𑀣𑀸𑀬 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀕𑀭𑀼𑀪𑀡𑁆𑀟𑀯𑀺𑀦𑀺𑀘𑁆𑀙𑀬𑁂 𑀯𑀼𑀢𑁆𑀢𑁄. 𑀏𑀓𑀸𑀤𑀲𑀸𑀯𑀦𑁆𑀤𑀺𑀬𑁂 𑀧𑀡𑁆𑀟𑀓𑀸𑀤𑀬𑁄 𑀏𑀓𑀸𑀤𑀲. 𑀉𑀧𑁂𑀢𑀺 𑀲𑀧𑀭𑀺𑀲𑀁. 𑀦 𑀚𑀻𑀯𑀢𑀺 𑀦𑀺𑀫𑁆𑀫𑀺𑀢𑀭𑀽𑀧𑀢𑁆𑀢𑀸. ‘‘𑀉𑀩𑁆𑀪𑀓𑁆𑀔𑀓𑁂𑀦 𑀯𑀤𑀸𑀫𑀻’’𑀢𑀺 𑀇𑀫𑀺𑀦𑀸 𑀫𑀼𑀔𑁂 𑀫𑁂𑀣𑀼𑀦𑀥𑀫𑁆𑀫𑀸𑀪𑀸𑀯𑀁 𑀤𑀻𑀧𑁂𑀢𑀺. 𑀅𑀥𑁄𑀦𑀸𑀪𑀺𑀯𑀺𑀯𑀚𑁆𑀚𑀦𑁂𑀦 𑀯𑀘𑁆𑀘𑀫𑀕𑁆𑀕𑀧𑁆𑀧𑀲𑁆𑀲𑀸𑀯𑀫𑀕𑁆𑀕𑁂𑀲𑀼. 𑀕𑀸𑀫𑀦𑁆𑀢𑀭𑀧𑀭𑀺𑀬𑀸𑀧𑀦𑁆𑀦𑀁 𑀦𑀤𑀺𑀧𑀸𑀭𑀁 𑀑𑀓𑁆𑀓𑀦𑁆𑀢𑀪𑀺𑀓𑁆𑀔𑀼𑀦𑀺𑀁 𑀲𑀦𑁆𑀥𑀸𑀬𑀸𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀕𑀸𑀫𑀸𑀧𑀭𑀺𑀬𑀸𑀧𑀦𑁆𑀦𑀧𑀭𑀢𑀻𑀭𑁂 𑀦𑀤𑀺𑀲𑀫𑀻𑀧𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀸. 𑀢𑀢𑁆𑀣 𑀧𑀭𑀢𑀻𑀭𑁂 𑀕𑀸𑀫𑀽𑀧𑀘𑀸𑀭𑁄 𑀏𑀓𑀮𑁂𑀟𑁆𑀟𑀼𑀧𑀸𑀢𑁄 𑀦𑀤𑀺𑀧𑀭𑀺𑀬𑀦𑁆𑀢𑁂𑀦 𑀧𑀭𑀺𑀘𑁆𑀙𑀺𑀦𑁆𑀦𑁄, 𑀢𑀲𑁆𑀫𑀸 𑀧𑀭𑀢𑀻𑀭𑁂 𑀭𑀢𑀦𑀫𑀢𑁆𑀢𑀫𑁆𑀧𑀺 𑀅𑀭𑀜𑁆𑀜𑀁 𑀦 𑀅𑀢𑁆𑀣𑀺, 𑀢𑀜𑁆𑀘 𑀢𑀺𑀡𑀸𑀤𑀻𑀳𑀺 𑀧𑀝𑀺𑀘𑁆𑀙𑀦𑁆𑀦𑀢𑁆𑀢𑀸 𑀤𑀲𑁆𑀲𑀦𑀽𑀧𑀘𑀸𑀭𑀯𑀺𑀭𑀳𑀺𑀢𑀁 𑀓𑀭𑁄𑀢𑀺. 𑀢𑀢𑁆𑀣 𑀅𑀢𑁆𑀢𑀦𑁄 𑀕𑀸𑀫𑁂 𑀆𑀧𑀢𑁆𑀢𑀺 𑀦𑀢𑁆𑀣𑀺. 𑀧𑀭𑀢𑀻𑀭𑁂 𑀧𑀦 𑀏𑀓𑀮𑁂𑀟𑁆𑀟𑀼𑀧𑀸𑀢𑀲𑀗𑁆𑀔𑀸𑀢𑁂 𑀕𑀸𑀫𑀽𑀧𑀘𑀸𑀭𑁂𑀬𑁂𑀯 𑀧𑀤𑀁 𑀞𑀧𑁂𑀢𑀺. 𑀅𑀦𑁆𑀢𑀭𑁂 𑀅𑀪𑀺𑀥𑀫𑁆𑀫𑀯𑀲𑁂𑀦 𑀅𑀭𑀜𑁆𑀜𑀪𑀽𑀢𑀁 𑀲𑀓𑀕𑀸𑀫𑀁 𑀅𑀢𑀺𑀓𑁆𑀓𑀫𑀢𑀺 𑀦𑀸𑀫, 𑀢𑀲𑁆𑀫𑀸 𑀕𑀡𑀫𑁆𑀳𑀸 𑀑𑀳𑀻𑀬𑀦𑀸 𑀘 𑀳𑁄𑀢𑀻𑀢𑀺 𑀜𑀸𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸𑀧𑀺 𑀲𑀦𑁆𑀢𑁄𑀲𑀫𑀓𑀢𑁆𑀯𑀸 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀦𑁆𑀦𑀸 𑀧𑀜𑁆𑀘𑀲𑀢𑀸 𑀫𑀳𑀸𑀧𑀚𑀸𑀧𑀢𑀺𑀧𑁆𑀧𑀫𑀼𑀔𑀸. 𑀫𑀳𑀸𑀧𑀚𑀸𑀧𑀢𑀺𑀧𑀺 𑀳𑀺 𑀆𑀦𑀦𑁆𑀤𑀢𑁆𑀣𑁂𑀭𑁂𑀦 𑀤𑀺𑀦𑁆𑀦𑀑𑀯𑀸𑀤𑀲𑁆𑀲 𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀦𑁆𑀦𑀸 𑀦𑀸𑀫.

𑀧𑀸𑀭𑀸𑀚𑀺𑀓𑀸𑀤𑀺𑀧𑀜𑁆𑀳𑀸𑀯𑀡𑁆𑀡𑀦𑀸

𑁪𑁮𑁦. ‘‘𑀤𑀼𑀲𑁆𑀲𑀓𑀼𑀝𑀺𑀁 𑀲𑀦𑁆𑀥𑀸𑀬𑀸’’𑀢𑀺 𑀲𑀳 𑀤𑀼𑀲𑁆𑀲𑁂𑀦 𑀯𑀻𑀢𑀺𑀓𑁆𑀓𑀫𑀦𑀲𑁆𑀲 𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 𑀯𑀼𑀢𑁆𑀢𑀁. 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑁂 𑀧𑀝𑀺𑀕𑁆𑀕𑀳𑀡𑀲𑁆𑀲 𑀯𑀺𑀚𑀳𑀦𑀢𑁄 𑀲𑀸𑀫𑀁 𑀕𑀳𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀺. 𑀓𑀸𑀓𑀊𑀳𑀤𑀦𑀁 𑀯𑀸𑀢𑀺 𑀓𑀸𑀓𑁂𑀦 𑀊𑀳𑀤𑀦𑀁 𑀯𑀸. ‘‘𑀢𑀬𑁄 𑀧𑀼𑀭𑀺𑀲𑁂𑀧𑀺 𑀉𑀧𑀕𑀦𑁆𑀢𑁆𑀯𑀸’’𑀢𑀺 𑀧𑀸𑀞𑀲𑁂𑀲𑁄.

𑀧𑀸𑀘𑀺𑀢𑁆𑀢𑀺𑀬𑀸𑀤𑀺𑀧𑀜𑁆𑀳𑀸𑀯𑀡𑁆𑀡𑀦𑀸

𑁪𑁮𑁧. 𑀫𑁂𑀣𑀼𑀦𑀥𑀫𑁆𑀫𑀧𑀘𑁆𑀘𑀬𑀸 𑀦𑀸𑀫 𑀓𑀸𑀬𑀲𑀁𑀲𑀕𑁆𑀕𑁄. 𑀢𑀁𑀳𑁂𑀢𑀼 𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀧𑀼𑀩𑁆𑀩𑀪𑀸𑀕𑀪𑀽𑀢𑀁 𑀓𑀸𑀬𑀲𑀁𑀲𑀕𑁆𑀕𑀁 𑀯𑀸𑀬𑀸𑀫𑀦𑁆𑀢𑀺𑀬𑀸𑀢𑀺 𑀅𑀝𑁆𑀞𑀯𑀢𑁆𑀣𑀼𑀧𑀽𑀭𑀡𑀁 𑀲𑀦𑁆𑀥𑀸𑀬. 𑀧𑀭𑀺𑀪𑁄𑀕𑀧𑁆𑀧𑀘𑁆𑀘𑀬𑀸𑀢𑀺 𑀧𑀭𑀺𑀪𑁄𑀕𑀓𑀸𑀭𑀡𑀸. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 𑀧𑀭𑀺𑀪𑁄𑀕𑀧𑁆𑀧𑀘𑁆𑀘𑀬𑀸 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀪𑁄𑀚𑀦𑀧𑀭𑀺𑀬𑁄𑀲𑀸𑀦𑁂 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀧𑁄𑀭𑀸𑀡𑀧𑁄𑀢𑁆𑀣𑀓𑁂𑀲𑀼 ‘‘𑀢𑀲𑁆𑀲𑀸’’𑀢𑀺 𑀧𑀸𑀞𑁄. ‘‘𑀓𑀸𑀭𑀡𑀯𑀘𑀦𑀁 𑀲𑀼𑀦𑁆𑀤𑀭𑀁 𑀪𑁄𑀚𑀦𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁄’’𑀢𑀺 𑀯𑀤𑀦𑁆𑀢𑀺.

𑀲𑁂𑀤𑀫𑁄𑀘𑀦𑀕𑀸𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.