𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀯𑀺𑀦𑀬𑀧𑀺𑀝𑀓𑁂

𑀯𑀚𑀺𑀭𑀩𑀼𑀤𑁆𑀥𑀺-𑀝𑀻𑀓𑀸

𑀕𑀦𑁆𑀣𑀸𑀭𑀫𑁆𑀪𑀓𑀣𑀸

𑀧𑀜𑁆𑀜𑀸𑀯𑀺𑀲𑀼𑀤𑁆𑀥𑀸𑀬 𑀤𑀬𑀸𑀬 𑀲𑀩𑁆𑀩𑁂;

𑀯𑀺𑀫𑁄𑀘𑀺𑀢𑀸 𑀬𑁂𑀦 𑀯𑀺𑀦𑁂𑀬𑁆𑀬𑀲𑀢𑁆𑀢𑀸;

𑀢𑀁 𑀘𑀓𑁆𑀔𑀼𑀪𑀽𑀢𑀁 𑀲𑀺𑀭𑀲𑀸 𑀦𑀫𑀺𑀢𑁆𑀯𑀸;

𑀮𑁄𑀓𑀲𑁆𑀲 𑀮𑁄𑀓𑀦𑁆𑀢𑀕𑀢𑀲𑁆𑀲 𑀥𑀫𑁆𑀫𑀁.

𑀲𑀗𑁆𑀖𑀜𑁆𑀘 𑀲𑀻𑀮𑀸𑀤𑀺𑀕𑀼𑀡𑁂𑀳𑀺 𑀬𑀼𑀢𑁆𑀢-

𑀫𑀸𑀤𑀸𑀬 𑀲𑀩𑁆𑀩𑁂𑀲𑀼 𑀧𑀤𑁂𑀲𑀼 𑀲𑀸𑀭𑀁;

𑀲𑀗𑁆𑀔𑁂𑀧𑀓𑀸𑀫𑁂𑀦 𑀫𑀫𑀸𑀲𑀬𑁂𑀦;

𑀲𑀜𑁆𑀘𑁄𑀤𑀺𑀢𑁄 𑀪𑀺𑀓𑁆𑀔𑀼𑀳𑀺𑀢𑀜𑁆𑀘 𑀤𑀺𑀲𑁆𑀯𑀸.

𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀲𑀜𑁆𑀜𑀺𑀢𑀸𑀬;

𑀲𑀫𑁆𑀩𑀼𑀤𑁆𑀥𑀖𑁄𑀲𑀸𑀘𑀭𑀺𑀬𑁄𑀤𑀺𑀢𑀸𑀬;

𑀲𑀫𑀸𑀲𑀢𑁄 𑀮𑀻𑀦𑀧𑀤𑁂 𑀮𑀺𑀔𑀺𑀲𑁆𑀲𑀁;

𑀲𑀫𑀸𑀲𑀢𑁄 𑀮𑀻𑀦𑀧𑀤𑁂 𑀮𑀺𑀔𑀻𑀢𑀁.

𑀲𑀜𑁆𑀜𑀸 𑀦𑀺𑀫𑀺𑀢𑁆𑀢𑀁 𑀓𑀢𑁆𑀢𑀸 𑀘, 𑀧𑀭𑀺𑀫𑀸𑀡𑀁 𑀧𑀬𑁄𑀚𑀦𑀁;

𑀲𑀩𑁆𑀩𑀸𑀕𑀫𑀲𑁆𑀲 𑀧𑀼𑀩𑁆𑀩𑁂𑀯, 𑀯𑀢𑁆𑀢𑀩𑁆𑀩𑀁 𑀯𑀢𑁆𑀢𑀼𑀫𑀺𑀘𑁆𑀙𑀢𑀸𑀢𑀺. 𑁋

𑀯𑀘𑀦𑀢𑁄 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑁂𑀢𑀺 𑀲𑀜𑁆𑀜𑀸. 𑀤𑀻𑀧𑀦𑁆𑀢𑀭𑁂 𑀪𑀺𑀓𑁆𑀔𑀼𑀚𑀦𑀲𑁆𑀲 𑀅𑀢𑁆𑀣𑀁 𑀦𑀸𑀪𑀺𑀲𑀫𑁆𑀪𑀼𑀡𑀸𑀢𑀻𑀢𑀺 𑀦𑀺𑀫𑀺𑀢𑁆𑀢𑀁. 𑀩𑀼𑀤𑁆𑀥𑀖𑁄𑀲𑁄𑀢𑀺 𑀕𑀭𑀽𑀳𑀺 𑀕𑀳𑀺𑀢𑀦𑀸𑀫𑀥𑁂𑀬𑁆𑀬𑁂𑀦𑀸𑀢𑀺 𑀓𑀢𑁆𑀢𑀸. 𑀲𑀫𑀥𑀺𑀓𑀲𑀢𑁆𑀢𑀯𑀻𑀲𑀢𑀺𑀲𑀳𑀲𑁆𑀲𑀫𑀢𑁆𑀢𑁂𑀦 𑀢𑀲𑁆𑀲 𑀕𑀦𑁆𑀣𑁂𑀦𑀸𑀢𑀺 𑀧𑀭𑀺𑀫𑀸𑀡𑀁. 𑀘𑀺𑀭𑀝𑁆𑀞𑀺𑀢𑀢𑁆𑀣𑀁 𑀥𑀫𑁆𑀫𑀲𑁆𑀲𑀸𑀢𑀺 𑀧𑀬𑁄𑀚𑀦𑀁.

𑀢𑀢𑁆𑀭𑀸𑀳 𑁋 ‘‘𑀯𑀢𑁆𑀢𑀩𑁆𑀩𑀁 𑀯𑀢𑁆𑀢𑀼𑀫𑀺𑀘𑁆𑀙𑀢𑀸𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀢𑁆𑀣 𑀓𑀣𑀁𑀯𑀺𑀥𑁄 𑀯𑀢𑁆𑀢𑀸’’𑀢𑀺? 𑀉𑀘𑁆𑀘𑀢𑁂 𑁋

𑀧𑀸𑀞𑀢𑁆𑀣𑀯𑀺𑀤𑀽𑀲𑀁𑀳𑀻𑀭𑁄, 𑀯𑀢𑁆𑀢𑀸 𑀲𑀼𑀘𑀺 𑀅𑀫𑀘𑁆𑀙𑀭𑁄;

𑀘𑀢𑀼𑀓𑁆𑀓𑀫𑀧𑀭𑀺𑀘𑁆𑀘𑀸𑀕𑀻, 𑀤𑁂𑀲𑀓𑀲𑁆𑀲 𑀳𑀺𑀢𑀼𑀲𑁆𑀲𑀼𑀓𑁄𑀢𑀺. (𑀫𑀳𑀸𑀦𑀺. 𑀅𑀝𑁆𑀞. 𑀕𑀦𑁆𑀣𑀸𑀭𑀫𑁆𑀪𑀓𑀣𑀸);

𑀢𑀢𑁆𑀭 𑀧𑀞𑀻𑀬𑀢𑁂𑀢𑀺 𑀧𑀸𑀞𑁄. 𑀲𑁄 𑀳𑀺 𑀅𑀦𑁂𑀓𑀧𑁆𑀧𑀓𑀸𑀭𑁄 𑀅𑀢𑁆𑀣𑀸𑀦𑀼𑀭𑀽𑀧𑁄 𑀅𑀢𑁆𑀣𑀸𑀦𑀦𑀼𑀭𑀽𑀧𑁄 𑀘𑁂𑀢𑀺. 𑀓𑀣𑀁? 𑀲𑀦𑁆𑀥𑀸𑀬𑀪𑀸𑀲𑀺𑀢𑁄 𑀩𑁆𑀬𑀜𑁆𑀚𑀦𑀪𑀸𑀲𑀺𑀢𑁄 𑀲𑀸𑀯𑀲𑁂𑀲𑀧𑀸𑀞𑁄 𑀦𑀺𑀭𑀯𑀲𑁂𑀲𑀧𑀸𑀞𑁄 𑀦𑀻𑀢𑁄 𑀦𑁂𑀬𑁆𑀬𑁄𑀢𑀺. 𑀢𑀢𑁆𑀭 𑀅𑀦𑁂𑀓𑀢𑁆𑀣𑀯𑀢𑁆𑀢𑀸 𑀲𑀦𑁆𑀥𑀸𑀬𑀪𑀸𑀲𑀺𑀢𑁄 𑀦𑀸𑀫 ‘‘𑀫𑀸𑀢𑀭𑀁 𑀧𑀺𑀢𑀭𑀁 𑀳𑀦𑁆𑀢𑁆𑀯𑀸’’𑀢𑀺𑀆𑀤𑀺 (𑀥. 𑀧. 𑁨𑁯𑁪). 𑀏𑀓𑀢𑁆𑀣𑀯𑀢𑁆𑀢𑀸 𑀩𑁆𑀬𑀜𑁆𑀚𑀦𑀪𑀸𑀲𑀺𑀢𑁄 𑀦𑀸𑀫 ‘‘𑀫𑀦𑁄𑀧𑀼𑀩𑁆𑀩𑀗𑁆𑀕𑀫𑀸 𑀥𑀫𑁆𑀫𑀸’’𑀢𑁆𑀬𑀸𑀤𑀺 (𑀥. 𑀧. 𑁧, 𑁨; 𑀦𑁂𑀢𑁆𑀢𑀺. 𑁯𑁦, 𑁯𑁨; 𑀧𑁂𑀝𑀓𑁄. 𑁧𑁪). 𑀲𑀸𑀯𑀲𑁂𑀲𑁄 𑀦𑀸𑀫 ‘‘𑀲𑀩𑁆𑀩𑀁, 𑀪𑀺𑀓𑁆𑀔𑀯𑁂, 𑀆𑀤𑀺𑀢𑁆𑀢’’𑀫𑀺𑀢𑁆𑀬𑀸𑀤𑀺 (𑀫𑀳𑀸𑀯. 𑁫𑁪; 𑀲𑀁. 𑀦𑀺. 𑁪.𑁨𑁮). 𑀯𑀺𑀧𑀭𑀻𑀢𑁄 𑀦𑀺𑀭𑀯𑀲𑁂𑀲𑁄 𑀦𑀸𑀫 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀲𑀩𑁆𑀩𑀸𑀓𑀸𑀭𑁂𑀦 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀜𑀸𑀡𑀫𑀼𑀔𑁂 𑀆𑀧𑀸𑀣𑀁 𑀆𑀕𑀘𑁆𑀙𑀦𑁆𑀢𑀻’’𑀢𑁆𑀬𑀸𑀤𑀺 (𑀫𑀳𑀸𑀦𑀺. 𑁧𑁫𑁬; 𑀧𑀝𑀺. 𑀫. 𑁩.𑁫). 𑀬𑀣𑀸 𑀯𑀘𑀦𑀁, 𑀢𑀣𑀸 𑀅𑀯𑀕𑀦𑁆𑀢𑀩𑁆𑀩𑁄 𑀦𑀻𑀢𑁄 𑀦𑀸𑀫 ‘‘𑀅𑀦𑀺𑀘𑁆𑀘𑀁 𑀤𑀼𑀓𑁆𑀔𑀫𑀦𑀢𑁆𑀢𑀸’’𑀢𑁆𑀬𑀸𑀤𑀺. 𑀬𑀼𑀢𑁆𑀢𑀺𑀬𑀸 𑀅𑀦𑀼𑀲𑁆𑀲𑀭𑀺𑀢𑀩𑁆𑀩𑁄 𑀦𑁂𑀬𑁆𑀬𑁄 𑀦𑀸𑀫 ‘‘𑀏𑀓𑀧𑀼𑀕𑁆𑀕𑀮𑁄, 𑀪𑀺𑀓𑁆𑀔𑀯𑁂’’𑀢𑁆𑀬𑀸𑀤𑀺 (𑀅. 𑀦𑀺. 𑁧.𑁧𑁭𑁦).

𑀅𑀢𑁆𑀣𑁄𑀧𑀺 𑀅𑀦𑁂𑀓𑀧𑁆𑀧𑀓𑀸𑀭𑁄 𑀧𑀸𑀞𑀢𑁆𑀣𑁄 𑀲𑀪𑀸𑀯𑀢𑁆𑀣𑁄 𑀜𑁂𑀬𑁆𑀬𑀢𑁆𑀣𑁄 𑀧𑀸𑀞𑀸𑀦𑀼𑀭𑀽𑀧𑁄 𑀧𑀸𑀞𑀸𑀦𑀦𑀼𑀭𑀽𑀧𑁄 𑀲𑀸𑀯𑀲𑁂𑀲𑀢𑁆𑀣𑁄 𑀦𑀺𑀭𑀯𑀲𑁂𑀲𑀢𑁆𑀣𑁄 𑀦𑀻𑀢𑀢𑁆𑀣𑁄 𑀦𑁂𑀬𑁆𑀬𑀢𑁆𑀣𑁄𑀢𑁆𑀬𑀸𑀤𑀺. 𑀢𑀢𑁆𑀣 𑀬𑁄 𑀢𑀁𑀢𑀁𑀲𑀜𑁆𑀜𑀸𑀧𑀦𑀢𑁆𑀣𑀫𑀼𑀘𑁆𑀘𑀸𑀭𑀻𑀬𑀢𑁂 𑀧𑀸𑀞𑁄, 𑀲 𑀧𑀸𑀞𑀢𑁆𑀣𑁄 ‘‘𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦’’𑀫𑀺𑀢𑁆𑀬𑀸𑀤𑀻𑀲𑀼 (𑀧𑀸𑀭𑀸. 𑁧; 𑀤𑀻. 𑀦𑀺. 𑁧.𑁧𑁯𑁦) 𑀯𑀺𑀬. 𑀭𑀽𑀧𑀸𑀭𑀽𑀧𑀥𑀫𑁆𑀫𑀸𑀦𑀁 𑀮𑀓𑁆𑀔𑀡𑀭𑀲𑀸𑀤𑀺 𑀲𑀪𑀸𑀯𑀢𑁆𑀣𑁄 ‘‘𑀲𑀫𑁆𑀫𑀸𑀤𑀺𑀝𑁆𑀞𑀺𑀁 𑀪𑀸𑀯𑁂𑀢𑀻’’𑀢𑁆𑀬𑀸𑀤𑀻𑀲𑀼 (𑀯𑀺𑀪. 𑁪𑁮𑁯; 𑀲𑀁. 𑀦𑀺. 𑁫.𑁩) 𑀯𑀺𑀬. 𑀬𑁄 𑀜𑀸𑀬𑀫𑀸𑀦𑁄 𑀳𑀺𑀢𑀸𑀬 𑀪𑀯𑀢𑀺, 𑀲 𑀜𑀸𑀢𑀼𑀫𑀭𑀳𑀢𑁆𑀢𑀸 𑀜𑁂𑀬𑁆𑀬𑀢𑁆𑀣𑁄 ‘‘𑀅𑀢𑁆𑀣𑀯𑀸𑀤𑀻 𑀥𑀫𑁆𑀫𑀯𑀸𑀤𑀻’’𑀢𑁆𑀬𑁂𑀯𑀫𑀸𑀤𑀻𑀲𑀼 (𑀤𑀻. 𑀦𑀺. 𑁧.𑁯, 𑁧𑁯𑁪; 𑁩.𑁨𑁩𑁮; 𑀫. 𑀦𑀺. 𑁧.𑁪𑁧𑁧) 𑀯𑀺𑀬. 𑀬𑀣𑀸𑀧𑀸𑀞𑀁 𑀪𑀸𑀲𑀺𑀢𑁄 𑀧𑀸𑀞𑀸𑀦𑀼𑀭𑀽𑀧𑁄 ‘‘𑀘𑀓𑁆𑀔𑀼, 𑀪𑀺𑀓𑁆𑀔𑀯𑁂, 𑀧𑀼𑀭𑀸𑀡𑀓𑀫𑁆𑀫’’𑀦𑁆𑀢𑀺 (𑀲𑀁. 𑀦𑀺. 𑁪.𑁧𑁪𑁬) 𑀪𑀕𑀯𑀢𑀸 𑀯𑀼𑀢𑁆𑀢𑀫𑀢𑁄 𑀘𑀓𑁆𑀔𑀼𑀫𑀧𑀺 𑀓𑀫𑁆𑀫𑀦𑁆𑀢𑀺. 𑀩𑁆𑀬𑀜𑁆𑀚𑀦𑀘𑁆𑀙𑀸𑀬𑀸𑀬 𑀅𑀢𑁆𑀣𑀁 𑀧𑀝𑀺𑀩𑀸𑀳𑀬𑀫𑀸𑀦𑁂𑀦 𑀯𑀼𑀢𑁆𑀢𑁄 𑀧𑀸𑀞𑀸𑀦𑀦𑀼𑀭𑀽𑀧𑁄. 𑀯𑀚𑁆𑀚𑁂𑀢𑀩𑁆𑀩𑀁 𑀓𑀺𑀜𑁆𑀘𑀺 𑀅𑀧𑀭𑀺𑀘𑁆𑀘𑀚𑀺𑀢𑁆𑀯𑀸 𑀧𑀭𑀺𑀲𑁂𑀲𑀁 𑀓𑀢𑁆𑀯𑀸 𑀯𑀼𑀢𑁆𑀢𑁄 𑀲𑀸𑀯𑀲𑁂𑀲𑀢𑁆𑀣𑁄 ‘‘𑀘𑀓𑁆𑀔𑀼𑀜𑁆𑀘 𑀧𑀝𑀺𑀘𑁆𑀘 𑀭𑀽𑀧𑁂 𑀘 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀲𑀁. 𑀦𑀺. 𑁪.𑁬𑁦; 𑀫𑀳𑀸𑀦𑀺. 𑁧𑁦𑁭) 𑀘, ‘‘𑀲𑀩𑁆𑀩𑁂 𑀢𑀲𑀦𑁆𑀢𑀺 𑀤𑀡𑁆𑀟𑀲𑁆𑀲, 𑀲𑀩𑁆𑀩𑁂 𑀪𑀸𑀬𑀦𑁆𑀢𑀺 𑀫𑀘𑁆𑀘𑀼𑀦𑁄’’𑀢𑁆𑀬𑀸𑀤𑀻𑀲𑀼 (𑀥. 𑀧. 𑁧𑁨𑁯) 𑀯𑀺𑀬. 𑀯𑀺𑀧𑀭𑀻𑀢𑁄 𑀦𑀺𑀭𑀯𑀲𑁂𑀲𑀢𑁆𑀣𑁄 ‘‘𑀲𑀦𑁆𑀥𑀸𑀯𑀺𑀢𑀁 𑀲𑀁𑀲𑀭𑀺𑀢𑀁 𑀫𑀫𑀜𑁆𑀘𑁂𑀯 𑀢𑀼𑀫𑁆𑀳𑀸𑀓𑀜𑁆𑀘 (𑀤𑀻. 𑀦𑀺. 𑁨.𑁧𑁫𑁫; 𑀫𑀳𑀸. 𑁨𑁮𑁭; 𑀦𑁂𑀢𑁆𑀢𑀺. 𑁧𑁧𑁪). 𑀢𑀢𑁆𑀭, 𑀪𑀺𑀓𑁆𑀔𑀯𑁂, 𑀓𑁄 𑀫𑀦𑁆𑀢𑀸 𑀓𑁄 𑀲𑀤𑁆𑀥𑀸𑀢𑀸…𑀧𑁂… 𑀅𑀜𑁆𑀜𑀢𑁆𑀭 𑀤𑀺𑀝𑁆𑀞𑀧𑀤𑁂𑀳𑀻’’𑀢𑁆𑀬𑀸𑀤𑀺 (𑀅. 𑀦𑀺. 𑁭.𑁬𑁬). 𑀲𑀤𑁆𑀤𑀯𑀲𑁂𑀦𑁂𑀯 𑀯𑁂𑀤𑀦𑀻𑀬𑁄 𑀦𑀻𑀢𑀢𑁆𑀣𑁄 ‘‘𑀭𑀽𑀧𑀸 𑀲𑀤𑁆𑀤𑀸 𑀭𑀲𑀸 𑀕𑀦𑁆𑀥𑀸, 𑀨𑁄𑀝𑁆𑀞𑀩𑁆𑀩𑀸 𑀘 𑀫𑀦𑁄𑀭𑀫𑀸’’𑀢𑁆𑀬𑀸𑀤𑀻𑀲𑀼 (𑀲𑀁. 𑀦𑀺. 𑁧.𑁧𑁫𑁧, 𑁧𑁬𑁫; 𑀫𑀳𑀸𑀯. 𑁩𑁩) 𑀯𑀺𑀬. 𑀲𑀫𑁆𑀫𑀼𑀢𑀺𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄 𑀦𑁂𑀬𑁆𑀬𑀢𑁆𑀣𑁄 ‘‘𑀘𑀢𑁆𑀢𑀸𑀭𑁄𑀫𑁂, 𑀪𑀺𑀓𑁆𑀔𑀯𑁂, 𑀯𑀮𑀸𑀳𑀓𑀽𑀧𑀫𑀸𑀧𑀼𑀕𑁆𑀕𑀮𑀸’’𑀢𑁆𑀬𑀸𑀤𑀻𑀲𑀼 𑀯𑀺𑀬 (𑀅. 𑀦𑀺. 𑁪.𑁧𑁦𑁧; 𑀧𑀼. 𑀧. 𑁧𑁫𑁭). 𑀆𑀳 𑀘 𑁋

‘‘𑀬𑁄 𑀅𑀢𑁆𑀣𑁄 𑀲𑀤𑁆𑀤𑀢𑁄 𑀜𑁂𑀬𑁆𑀬𑁄, 𑀦𑀻𑀢𑀢𑁆𑀣𑀁 𑀇𑀢𑀺 𑀢𑀁 𑀯𑀺𑀤𑀽;

𑀅𑀢𑁆𑀣𑀲𑁆𑀲𑁂𑀯𑀸𑀪𑀺𑀲𑀸𑀫𑀕𑁆𑀕𑀻, 𑀦𑁂𑀬𑁆𑀬𑀢𑁆𑀣𑁄 𑀇𑀢𑀺 𑀓𑀣𑁆𑀬𑀢𑁂’’𑀢𑀺.

𑀏𑀯𑀁 𑀧𑀪𑁂𑀤𑀕𑀢𑁂 𑀧𑀸𑀞𑀢𑁆𑀣𑁂 𑀯𑀺𑀚𑀸𑀦𑀸𑀢𑀻𑀢𑀺 𑀧𑀸𑀞𑀢𑁆𑀣𑀯𑀺𑀤𑀽. 𑀦 𑀲𑀁𑀳𑀻𑀭𑀢𑁂 𑀧𑀭𑀧𑀯𑀸𑀤𑀻𑀳𑀺 𑀤𑀻𑀖𑀭𑀢𑁆𑀢𑀁 𑀢𑀺𑀢𑁆𑀣𑀯𑀸𑀲𑁂𑀦𑁂𑀢𑁆𑀬𑀲𑀁𑀳𑀻𑀭𑁄. 𑀪𑀸𑀯𑀦𑀸𑀬𑀸𑀕𑀫𑀸𑀥𑀺𑀕𑀫𑀲𑀫𑁆𑀧𑀦𑁆𑀦𑀢𑁆𑀢𑀸 𑀯𑀢𑁆𑀢𑀼𑀁 𑀲𑀓𑁆𑀓𑁄𑀢𑀻𑀢𑀺 𑀯𑀢𑁆𑀢𑀸, 𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑀦𑀬𑁂𑀦 𑀳𑁂𑀢𑀼𑀤𑀸𑀳𑀭𑀡𑀸𑀤𑀻𑀳𑀺 𑀅𑀯𑀩𑁄𑀥𑀬𑀺𑀢𑀼𑀁 𑀲𑀫𑀢𑁆𑀣𑁄𑀢𑁆𑀬𑀢𑁆𑀣𑁄. 𑀲𑁄𑀘𑀬𑀢𑁆𑀬𑀢𑁆𑀢𑀸𑀦𑀁 𑀧𑀭𑁂 𑀘𑁂𑀢𑀺 𑀲𑀼𑀘𑀺, 𑀤𑀼𑀲𑁆𑀲𑀻𑀮𑁆𑀬𑀤𑀼𑀤𑁆𑀤𑀺𑀝𑁆𑀞𑀺𑀫𑀮𑀯𑀺𑀭𑀳𑀺𑀢𑁄𑀢𑁆𑀬𑀢𑁆𑀣𑁄. 𑀤𑀼𑀲𑁆𑀲𑀻𑀮𑁄 𑀳𑀺 𑀅𑀢𑁆𑀢𑀸𑀦𑀫𑀼𑀧𑀳𑀦𑁆𑀢𑀼𑀦𑀸𑀤𑁂𑀬𑁆𑀬𑀯𑀸𑀘𑁄 𑀘 𑀪𑀯𑀢𑁆𑀬𑀧𑀢𑁆𑀢𑀸𑀳𑀸𑀭𑀸𑀘𑀸𑀭𑁄 𑀇𑀯 𑀦𑀺𑀘𑁆𑀘𑀸𑀢𑀼𑀭𑁄 𑀯𑁂𑀚𑁆𑀚𑁄. 𑀤𑀼𑀤𑁆𑀤𑀺𑀝𑁆𑀞𑀺 𑀧𑀭𑀁 𑀉𑀧𑀳𑀦𑁆𑀢𑀺, 𑀦𑀸𑀯𑀲𑁆𑀲𑀁 𑀦𑀺𑀲𑁆𑀲𑀬𑁄 𑀘 𑀪𑀯𑀢𑁆𑀬𑀳𑀺𑀯𑀸𑀴𑀕𑀳𑀸𑀓𑀼𑀮𑁄 𑀇𑀯 𑀓𑀫𑀮𑀲𑀡𑁆𑀟𑁄. 𑀉𑀪𑀬𑀯𑀺𑀧𑀦𑁆𑀦𑁄 𑀲𑀩𑁆𑀩𑀣𑀸𑀧𑁆𑀬𑀦𑀼𑀧𑀸𑀲𑀦𑀻𑀬𑁄 𑀪𑀯𑀢𑀺 𑀕𑀽𑀣𑀕𑀢𑀫𑀺𑀯 𑀙𑀯𑀸𑀮𑀸𑀢𑀁 𑀕𑀽𑀣𑀕𑀢𑁄 𑀯𑀺𑀬 𑀘 𑀓𑀡𑁆𑀳𑀲𑀧𑁆𑀧𑁄. 𑀉𑀪𑀬𑀲𑀫𑁆𑀧𑀦𑁆𑀦𑁄 𑀧𑀦 𑀲𑀼𑀘𑀺 𑀲𑀩𑁆𑀩𑀣𑀸𑀧𑁆𑀬𑀼𑀧𑀸𑀲𑀦𑀻𑀬𑁄 𑀲𑁂𑀯𑀺𑀢𑀩𑁆𑀩𑁄 𑀘 𑀯𑀺𑀜𑁆𑀜𑀽𑀳𑀺, 𑀦𑀺𑀭𑀼𑀧𑀤𑁆𑀤𑀯𑁄 𑀇𑀯 𑀭𑀢𑀦𑀸𑀓𑀭𑁄. 𑀦𑀸𑀲𑁆𑀲 𑀫𑀘𑁆𑀙𑀭𑁄𑀢𑁆𑀬𑀫𑀘𑁆𑀙𑀭𑁄, 𑀅𑀳𑀻𑀦𑀸𑀘𑀭𑀺𑀬𑀫𑀼𑀝𑁆𑀞𑀻𑀢𑁆𑀬𑀢𑁆𑀣𑁄. 𑀲𑀼𑀢𑁆𑀢𑀲𑀼𑀢𑁆𑀢𑀸𑀦𑀼𑀮𑁄𑀫𑀸𑀘𑀭𑀺𑀬𑀯𑀸𑀤𑀅𑀢𑁆𑀢𑀦𑁄𑀫𑀢𑀺𑀲𑀗𑁆𑀔𑀸𑀢𑀲𑁆𑀲 𑀘𑀢𑀼𑀓𑁆𑀓𑀲𑁆𑀲𑀸𑀧𑀭𑀺𑀘𑁆𑀘𑀸𑀕𑀻, 𑀢𑀤𑀢𑁆𑀣𑀲𑁆𑀲𑁂𑀯 𑀩𑁆𑀬𑀸𑀔𑁆𑀬𑀸𑀢𑁂𑀢𑁆𑀬𑀢𑁆𑀣𑁄. 𑀅𑀣 𑀯𑀸 𑀧𑀘𑁆𑀘𑀓𑁆𑀔𑀸𑀦𑀼𑀫𑀸𑀦𑀲𑀤𑁆𑀤𑀢𑁆𑀣𑀸𑀧𑀢𑁆𑀢𑀺𑀧𑁆𑀧𑀪𑁂𑀤𑀲𑁆𑀲 𑀧𑀫𑀸𑀡𑀘𑀢𑀼𑀓𑁆𑀓𑀲𑁆𑀲𑀸𑀧𑀭𑀺𑀘𑁆𑀘𑀸𑀕𑀻.

‘‘𑀏𑀓𑀁𑀲𑀯𑀘𑀦𑀁 𑀏𑀓𑀁, 𑀯𑀺𑀪𑀚𑁆𑀚𑀯𑀘𑀦𑀸𑀧𑀭𑀁;

𑀢𑀢𑀺𑀬𑀁 𑀧𑀝𑀺𑀧𑀼𑀘𑁆𑀙𑁂𑀬𑁆𑀬, 𑀘𑀢𑀼𑀢𑁆𑀣𑀁 𑀧𑀦 𑀞𑀸𑀧𑀬𑁂’’𑀢𑀺. 𑁋

𑀏𑀯𑀁 𑀯𑀼𑀢𑁆𑀢𑀘𑀢𑀼𑀓𑁆𑀓𑀲𑁆𑀲 𑀯𑀸 𑀅𑀧𑀭𑀺𑀘𑁆𑀘𑀸𑀕𑀻; 𑀳𑀺𑀢𑀼𑀲𑁆𑀲𑀼𑀓𑁄 𑀇𑀢𑀺 𑀲𑁄𑀢𑀽𑀦𑀁 𑀳𑀺𑀢𑀸𑀬𑁄𑀲𑁆𑀲𑀼𑀓𑁄, 𑀢𑁂𑀲𑀫𑀯𑀩𑁄𑀥𑀦𑀁 𑀧𑀢𑀺 𑀧𑀢𑁆𑀣𑁂𑀢𑀻 𑀢𑁆𑀬𑀢𑁆𑀣𑁄; 𑀲𑁄 𑀏𑀲𑁄 𑀲𑀼𑀘𑀺𑀢𑁆𑀢𑀸 𑀧𑀺𑀬𑁄; 𑀘𑀢𑀼𑀓𑁆𑀓𑀲𑁆𑀲 𑀅𑀧𑀭𑀺𑀘𑁆𑀘𑀸𑀕𑀺𑀢𑁆𑀢𑀸 𑀕𑀭𑀼; 𑀅𑀲𑀁𑀳𑀻𑀭𑀢𑁆𑀢𑀸 𑀪𑀸𑀯𑀦𑀻𑀬𑁄; 𑀤𑁂𑀲𑀓𑀢𑁆𑀢𑀸 𑀯𑀢𑁆𑀢𑀸; 𑀳𑀺𑀢𑀼𑀲𑁆𑀲𑀼𑀓𑀢𑁆𑀢𑀸 𑀯𑀘𑀦𑀓𑁆𑀔𑀫𑁄; 𑀧𑀸𑀞𑀢𑁆𑀣𑀯𑀺𑀤𑀼𑀢𑁆𑀢𑀸 𑀕𑀫𑁆𑀪𑀻𑀭𑀓𑀣𑀁 𑀓𑀢𑁆𑀢𑀸; 𑀅𑀫𑀘𑁆𑀙𑀭𑀢𑁆𑀢𑀸 𑀦𑁄 𑀘𑀝𑁆𑀞𑀸𑀦𑁂 𑀦𑀺𑀬𑁄𑀚𑀓𑁄𑀢𑀺;

‘‘𑀧𑀺𑀬𑁄 𑀕𑀭𑀼 𑀪𑀸𑀯𑀦𑀻𑀬𑁄, 𑀯𑀢𑁆𑀢𑀸 𑀘 𑀯𑀘𑀦𑀓𑁆𑀔𑀫𑁄;

𑀕𑀫𑁆𑀪𑀻𑀭𑀜𑁆𑀘 𑀓𑀣𑀁 𑀓𑀢𑁆𑀢𑀸, 𑀦𑁄 𑀘𑀝𑁆𑀞𑀸𑀦𑁂 𑀦𑀺𑀬𑁄𑀚𑀓𑁄’’. (𑀅. 𑀦𑀺. 𑁭.𑁩𑁭; 𑀦𑁂𑀢𑁆𑀢𑀺. 𑁧𑁧𑁩) 𑁋

𑀇𑀢𑀺𑀅𑀪𑀺𑀳𑀺𑀢𑁄 𑀤𑁂𑀲𑀓𑁄;

𑀲𑁄𑀢𑀸 𑀇𑀤𑀸𑀦𑀺 𑀅𑀪𑀺𑀥𑀻𑀬𑀢𑁂 𑁋

𑀥𑀫𑁆𑀫𑀸𑀘𑀭𑀺𑀬𑀕𑀭𑀼 𑀲𑀤𑁆𑀥𑀸-𑀧𑀜𑁆𑀜𑀸𑀤𑀺𑀕𑀼𑀡𑀫𑀡𑁆𑀟𑀺𑀢𑁄;

𑀅𑀲𑀞𑀸𑀫𑀸𑀬𑁄 𑀲𑁄𑀢𑀸𑀲𑁆𑀲, 𑀲𑀼𑀫𑁂𑀥𑁄 𑀅𑀫𑀢𑀸𑀫𑀼𑀔𑁄.

𑀢𑀢𑁆𑀣 𑀥𑀫𑁆𑀫𑀕𑀭𑀼𑀢𑁆𑀢𑀸 𑀓𑀣𑀁 𑀦 𑀧𑀭𑀺𑀪𑀯𑀢𑀺, 𑀆𑀘𑀭𑀺𑀬𑀕𑀭𑀼𑀢𑁆𑀢𑀸 𑀓𑀣𑀺𑀓𑀁 𑀦 𑀧𑀭𑀺𑀪𑀯𑀢𑀺, 𑀲𑀤𑁆𑀥𑀸𑀧𑀜𑁆𑀜𑀸𑀤𑀺𑀕𑀼𑀡𑀧𑀝𑀺𑀫𑀡𑁆𑀟𑀺𑀢𑀢𑁆𑀢𑀸 𑀅𑀢𑁆𑀢𑀸𑀦𑀁 𑀦 𑀧𑀭𑀺𑀪𑀯𑀢𑀺, 𑀅𑀲𑀞𑀸𑀫𑀸𑀬𑀢𑁆𑀢𑀸 𑀅𑀫𑀢𑀸𑀪𑀺𑀫𑀼𑀔𑀢𑁆𑀢𑀸 𑀘 𑀅𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀪𑀯𑀢𑀺, 𑀲𑀼𑀫𑁂𑀥𑀢𑁆𑀢𑀸 𑀬𑁄𑀦𑀺𑀲𑁄𑀫𑀦𑀲𑀺𑀓𑀭𑁄𑀢𑀻𑀢𑁆𑀬𑀢𑁆𑀣𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀥𑀫𑁆𑀫𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀼𑀡𑀦𑁆𑀢𑁄 𑀲𑀤𑁆𑀥𑀫𑁆𑀫𑀁 𑀪𑀩𑁆𑀩𑁄 𑀦𑀺𑀬𑀸𑀫𑀁 𑀑𑀓𑁆𑀓𑀫𑀺𑀢𑀼𑀁 𑀓𑀼𑀲𑀮𑁂𑀲𑀼 𑀥𑀫𑁆𑀫𑁂𑀲𑀼 𑀲𑀫𑁆𑀫𑀢𑁆𑀢𑀁. 𑀓𑀢𑀫𑁂𑀳𑀺 𑀧𑀜𑁆𑀘𑀳𑀺? 𑀦 𑀓𑀣𑀁 𑀧𑀭𑀺𑀪𑁄𑀢𑀺, 𑀦 𑀓𑀣𑀺𑀓𑀁 𑀧𑀭𑀺𑀪𑁄𑀢𑀺, 𑀦 𑀅𑀢𑁆𑀢𑀸𑀦𑀁 𑀧𑀭𑀺𑀪𑁄𑀢𑀺, 𑀅𑀯𑀺𑀓𑁆𑀔𑀺𑀢𑁆𑀢𑀘𑀺𑀢𑁆𑀢𑁄 𑀥𑀫𑁆𑀫𑀁 𑀲𑀼𑀡𑀸𑀢𑀺 𑀏𑀓𑀕𑁆𑀕𑀘𑀺𑀢𑁆𑀢𑁄, 𑀬𑁄𑀦𑀺𑀲𑁄 𑀘 𑀫𑀦𑀲𑀺 𑀓𑀭𑁄𑀢𑀻’’𑀢𑀺 (𑀅. 𑀦𑀺. 𑁫.𑁧𑁫𑁧).

𑀢𑀁𑀮𑀓𑁆𑀔𑀡𑀧𑁆𑀧𑀢𑁆𑀢𑀢𑁆𑀢𑀸 𑀪𑀸𑀯𑀦𑀸 𑀪𑀯𑀢𑀺 𑀲𑀯𑀦𑀲𑁆𑀲𑁂𑀢𑁆𑀬𑀼𑀢𑁆𑀢𑁄 𑀲𑁄𑀢𑀸.

𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸

𑀇𑀤𑀸𑀦𑀺 𑀅𑀲𑁆𑀲𑀸𑀭𑀫𑁆𑀪𑁄 𑁋 𑀢𑀢𑁆𑀣 𑀬𑁄𑀢𑀺 𑀅𑀦𑀺𑀬𑀫𑀦𑀺𑀤𑁆𑀤𑁂𑀲𑁄, 𑀢𑁂𑀦 𑀯𑀺𑀲𑀼𑀤𑁆𑀥𑀚𑀸𑀢𑀺𑀓𑀼𑀮𑀕𑁄𑀢𑁆𑀢𑀸𑀤𑀻𑀦𑀁 𑀓𑀺𑀮𑁂𑀲𑀫𑀮𑀯𑀺𑀲𑀼𑀤𑁆𑀥𑀺𑀬𑀸, 𑀧𑀽𑀚𑀸𑀭𑀳𑀢𑀸𑀬 𑀯𑀸 𑀅𑀓𑀸𑀭𑀡𑀢𑀁 𑀤𑀲𑁆𑀲𑁂𑀢𑁆𑀯𑀸 𑀬𑁄 𑀓𑁄𑀘𑀺 𑀇𑀫𑀺𑀲𑁆𑀲𑀸 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀆𑀤𑀺𑀕𑀸𑀣𑀸𑀬 𑀦𑀺𑀤𑁆𑀤𑀺𑀝𑁆𑀞𑀮𑁄𑀓𑀦𑀸𑀣𑀢𑁆𑀢𑀳𑁂𑀢𑀼𑀁 𑀬𑀣𑀸𑀯𑀼𑀢𑁆𑀢𑀳𑁂𑀢𑀼𑀫𑀽𑀮𑁂𑀦 𑀣𑀺𑀭𑀢𑀭𑀁 𑀅𑀘𑀮𑀁 𑀓𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑀳𑁂𑀢𑀼𑀓𑀸𑀮𑀁 𑀅𑀘𑁆𑀘𑀦𑁆𑀢𑀫𑁂𑀯 𑀧𑀽𑀭𑁂𑀦𑁆𑀢𑁄 𑀅𑀯𑀲𑀸𑀦𑁂 𑀬𑀣𑀸𑀯𑀼𑀢𑁆𑀢𑀳𑁂𑀢𑀼𑀨𑀮𑀁 𑀲𑀫𑁆𑀧𑀸𑀤𑁂𑀢𑁆𑀯𑀸 𑀬𑀣𑀸𑀯𑀼𑀢𑁆𑀢𑀳𑁂𑀢𑀼𑀨𑀮𑀧𑁆𑀧𑀬𑁄𑀚𑀦𑀁 𑀲𑀸𑀥𑁂𑀢𑀺, 𑀲𑁄𑀯 𑀧𑀭𑀫𑀧𑀽𑀚𑀸𑀭𑀳𑁄𑀢𑀺 𑀦𑀺𑀬𑀫𑁂𑀢𑀺.

𑀏𑀢𑁆𑀢𑀸𑀯𑀢𑀸 𑁋

𑀪𑀬𑀲𑀫𑁆𑀫𑁄𑀳𑀤𑀼𑀤𑁆𑀤𑀺𑀝𑁆𑀞𑀺-𑀧𑀡𑀸𑀫𑁄 𑀦𑁂𑀲 𑀲𑀩𑁆𑀩𑀣𑀸;

𑀧𑀜𑁆𑀜𑀸𑀧𑀼𑀩𑁆𑀩𑀗𑁆𑀕𑀫𑁄 𑀏𑀲𑁄, 𑀧𑀡𑀸𑀫𑁄𑀢𑀺 𑀦𑀺𑀤𑀲𑁆𑀲𑀺𑀢𑁄.

𑀢𑀢𑁆𑀭 𑀳𑁂𑀢𑀽𑀢𑀺 𑀅𑀢𑀺𑀤𑀼𑀓𑁆𑀓𑀭𑀸𑀦𑀺 𑀢𑀺𑀁𑀲𑀧𑀸𑀭𑀫𑀺𑀢𑀸𑀲𑀗𑁆𑀔𑀸𑀢𑀸𑀦𑀺 𑀧𑀼𑀜𑁆𑀜𑀓𑀫𑁆𑀫𑀸𑀦𑀺. 𑀢𑀸𑀦𑀺 𑀳𑀺 𑀅𑀘𑁆𑀘𑀦𑁆𑀢𑀤𑀼𑀓𑁆𑀔𑁂𑀦 𑀓𑀲𑀺𑀭𑁂𑀦 𑀯𑀘𑀦𑀧𑀣𑀸𑀢𑀻𑀢𑀸𑀦𑀼𑀪𑀸𑀯𑁂𑀦 𑀫𑀳𑀢𑀸 𑀉𑀲𑁆𑀲𑀸𑀳𑁂𑀦 𑀓𑀭𑀻𑀬𑀦𑁆𑀢𑀻𑀢𑀺 𑀅𑀢𑀺𑀤𑀼𑀓𑁆𑀓𑀭𑀸𑀦𑀺 𑀦𑀸𑀫. 𑀅𑀢𑀺𑀤𑀼𑀓𑁆𑀓𑀭𑀢𑁆𑀢𑀸 𑀏𑀯 𑀳𑀺 𑀢𑁂𑀲𑀁 𑀅𑀢𑀺𑀤𑀼𑀮𑁆𑀮𑀪𑀁 𑀮𑁄𑀓𑁂 𑀅𑀦𑀜𑁆𑀜𑀲𑀸𑀥𑀸𑀭𑀡𑀁 𑀦𑀸𑀣𑀢𑁆𑀢𑀲𑀗𑁆𑀔𑀸𑀢𑀁 𑀨𑀮𑀁 𑀨𑀮𑀦𑁆𑀢𑀺, 𑀢𑀁 𑀢𑀢𑁆𑀣 𑀳𑁂𑀢𑀼𑀨𑀮𑀁; 𑀳𑁂𑀢𑀼𑀫𑀽𑀮𑀁 𑀦𑀸𑀫 𑀬𑀣𑀸𑀯𑀼𑀢𑁆𑀢𑀲𑁆𑀲 𑀳𑁂𑀢𑀼𑀦𑁄 𑀦𑀺𑀧𑁆𑀨𑀸𑀤𑀦𑀲𑀫𑀢𑁆𑀣𑀸 𑀫𑀳𑀸𑀓𑀭𑀼𑀡𑀸, 𑀲𑀸 𑀆𑀤𑀺𑀧𑀡𑀺𑀥𑀸𑀦𑀢𑁄 𑀧𑀝𑁆𑀞𑀸𑀬 ‘‘𑀫𑀼𑀢𑁆𑀢𑁄 𑀫𑁄𑀘𑁂𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀬𑀸𑀯 𑀳𑁂𑀢𑀼𑀨𑀮𑀧𑁆𑀧𑀬𑁄𑀚𑀦𑀸, 𑀢𑀸𑀯 𑀅𑀩𑁆𑀩𑁄𑀘𑁆𑀙𑀺𑀦𑁆𑀦𑀁 𑀧𑀯𑀢𑁆𑀢𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋

‘‘𑀲𑀓𑀸𑀦𑀦𑀸 𑀲𑀕𑁆𑀭𑀺𑀯𑀭𑀸 𑀲𑀲𑀸𑀕𑀭𑀸,

𑀕𑀢𑀸 𑀯𑀺𑀦𑀸𑀲𑀁 𑀩𑀳𑀼𑀲𑁄 𑀯𑀲𑀼𑀦𑁆𑀥𑀭𑀸;

𑀬𑀼𑀕𑀦𑁆𑀢𑀓𑀸𑀮𑁂 𑀲𑀮𑀺𑀮𑀸𑀦𑀮𑀸𑀦𑀺𑀮𑁂,

𑀦 𑀩𑁄𑀥𑀺𑀲𑀢𑁆𑀢𑀲𑁆𑀲 𑀫𑀳𑀸𑀢𑀧𑀸 𑀓𑀼𑀢𑁄’’𑀢𑀺.

𑀬𑀸𑀬 𑀲𑀫𑀦𑁆𑀦𑀸𑀕𑀢𑀢𑁆𑀢𑀸 ‘‘𑀦𑀫𑁄 𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲 𑀢𑀲𑁆𑀲𑀸’’𑀢𑀺 𑀆𑀳. 𑀳𑁂𑀢𑀼𑀓𑀸𑀮𑀁 𑀦𑀸𑀫 𑀘𑀢𑀼𑀅𑀝𑁆𑀞𑀲𑁄𑀴𑀲𑀅𑀲𑀗𑁆𑀔𑁆𑀬𑁂𑀬𑁆𑀬𑀸𑀤𑀺𑀧𑁆𑀧𑀪𑁂𑀤𑁄 𑀓𑀸𑀮𑁄, 𑀬𑀁 𑀲𑀦𑁆𑀥𑀸𑀬𑀸𑀳 ‘‘𑀓𑀧𑁆𑀧𑀓𑁄𑀝𑀻𑀳𑀺𑀧𑀺 𑀅𑀧𑁆𑀧𑀫𑁂𑀬𑁆𑀬𑀁 𑀓𑀸𑀮’’𑀦𑁆𑀢𑀺. 𑀢𑀢𑁆𑀣 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁 𑀯𑁂𑀤𑀺𑀢𑀩𑁆𑀩𑀁 ‘‘𑀫𑀸𑀲𑀁 𑀅𑀥𑀻𑀢𑁂, 𑀤𑀺𑀯𑀲𑀁 𑀘𑀭𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬. 𑀓𑀸𑀫𑀜𑁆𑀘 𑀲𑁄 𑀓𑀸𑀮𑁄 𑀅𑀲𑀗𑁆𑀔𑁆𑀬𑁂𑀬𑁆𑀬𑀯𑀲𑁂𑀦 𑀧𑀫𑁂𑀬𑁆𑀬𑁄 𑀯𑀺𑀜𑁆𑀜𑁂𑀬𑁆𑀬𑁄, 𑀢𑀣𑀸𑀧𑀺 𑀓𑀧𑁆𑀧𑀓𑁄𑀝𑀺𑀯𑀲𑁂𑀦 𑀅𑀯𑀺𑀜𑁆𑀜𑁂𑀬𑁆𑀬𑀢𑀁 𑀲𑀦𑁆𑀥𑀸𑀬 ‘‘𑀓𑀧𑁆𑀧𑀓𑁄𑀝𑀻𑀳𑀺𑀧𑀺 𑀅𑀧𑁆𑀧𑀫𑁂𑀬𑁆𑀬𑀁 𑀓𑀸𑀮’’𑀦𑁆𑀢𑀺 𑀆𑀳. 𑀢𑀢𑁆𑀣 𑀓𑀸𑀮𑀬𑀢𑀻𑀢𑀺 𑀓𑀸𑀮𑁄, 𑀔𑀺𑀧𑀢𑀺 𑀯𑀺𑀤𑁆𑀥𑀁𑀲𑀬𑀢𑀺 𑀲𑀢𑁆𑀢𑀸𑀦𑀁 𑀚𑀻𑀯𑀺𑀢𑀫𑀺𑀢𑀺 𑀅𑀢𑁆𑀣𑁄. 𑀓𑀮 𑀯𑀺𑀓𑁆𑀔𑁂𑀧𑁂. 𑀢𑀢𑁆𑀣 𑀓𑀧𑁆𑀧𑀻𑀬𑀢𑀺 𑀲𑀁𑀓𑀧𑁆𑀧𑀻𑀬𑀢𑀺 𑀲𑀸𑀲𑀧𑀧𑀩𑁆𑀩𑀢𑀸𑀤𑀻𑀳𑀺 𑀉𑀧𑀫𑀸𑀳𑀺 𑀓𑁂𑀯𑀮𑀁 𑀲𑀁𑀓𑀧𑁆𑀧𑀻𑀬𑀢𑀺, 𑀦 𑀫𑀦𑀼𑀲𑁆𑀲𑀤𑀺𑀯𑀲𑀫𑀸𑀲𑀲𑀁𑀯𑀘𑁆𑀙𑀭𑀸𑀤𑀺𑀕𑀡𑀦𑀸𑀬 𑀕𑀡𑀻𑀬𑀢𑀻𑀢𑀺 𑀓𑀧𑁆𑀧𑁄. 𑀏𑀓𑀦𑁆𑀢𑀺𑀆𑀤𑀺𑀕𑀡𑀦𑀧𑀣𑀲𑁆𑀲 𑀓𑁄𑀝𑀺𑀪𑀽𑀢𑀢𑁆𑀢𑀸 𑀓𑁄𑀝𑀺, 𑀓𑀧𑁆𑀧𑀸𑀦𑀁 𑀓𑁄𑀝𑀺𑀬𑁄 𑀓𑀧𑁆𑀧𑀓𑁄𑀝𑀺𑀬𑁄. 𑀢𑀸𑀳𑀺𑀧𑀺 𑀦 𑀧𑀫𑀻𑀬𑀢𑀻𑀢𑀺 𑀅𑀧𑁆𑀧𑀫𑁂𑀬𑁆𑀬𑁄, 𑀢𑀁 𑀅𑀧𑁆𑀧𑀫𑁂𑀬𑁆𑀬𑀁. 𑀓𑀭𑁄𑀦𑁆𑀢𑁄𑀢𑀺 𑀦𑀸𑀦𑀢𑁆𑀣𑀢𑁆𑀢𑀸 𑀥𑀸𑀢𑀽𑀦𑀁 𑀤𑀸𑀦𑀁 𑀤𑁂𑀦𑁆𑀢𑁄, 𑀲𑀻𑀮𑀁 𑀭𑀓𑁆𑀔𑀦𑁆𑀢𑁄, 𑀮𑁄𑀪𑀓𑁆𑀔𑀦𑁆𑀥𑀢𑁄 𑀦𑀺𑀓𑁆𑀔𑀫𑀦𑁆𑀢𑁄, 𑀅𑀢𑁆𑀢𑀳𑀺𑀢𑀧𑀭𑀳𑀺𑀢𑀸𑀤𑀺𑀪𑁂𑀤𑀁 𑀢𑀁 𑀢𑀁 𑀥𑀫𑁆𑀫𑀁 𑀧𑀚𑀸𑀦𑀦𑁆𑀢𑁄, 𑀯𑀺𑀯𑀺𑀥𑁂𑀦 𑀯𑀸𑀬𑀸𑀫𑁂𑀦 𑀖𑀝𑁂𑀦𑁆𑀢𑁄 𑀯𑀸𑀬𑀫𑀦𑁆𑀢𑁄, 𑀢𑀁 𑀢𑀁 𑀲𑀢𑁆𑀢𑀸𑀧𑀭𑀸𑀥𑀁 𑀔𑀫𑀦𑁆𑀢𑁄, 𑀧𑀝𑀺𑀜𑁆𑀜𑀸𑀲𑀫𑁆𑀫𑀼𑀢𑀺𑀧𑀭𑀫𑀢𑁆𑀣𑀲𑀘𑁆𑀘𑀸𑀦𑀺 𑀲𑀘𑁆𑀘𑀸𑀬𑀦𑁆𑀢𑁄, 𑀢𑀁 𑀢𑀁 𑀲𑀢𑁆𑀢𑀳𑀺𑀢𑀁 𑀅𑀥𑀺𑀝𑁆𑀞𑀳𑀦𑁆𑀢𑁄, 𑀲𑀓𑀮𑀮𑁄𑀓𑀁 𑀫𑁂𑀢𑁆𑀢𑀸𑀬𑀦𑁆𑀢𑁄, 𑀫𑀺𑀢𑁆𑀢𑀸𑀫𑀺𑀢𑁆𑀢𑀸𑀤𑀺𑀪𑁂𑀤𑀁 𑀧𑀓𑁆𑀔𑀧𑀸𑀢𑀁 𑀧𑀳𑀸𑀬 𑀢𑀁 𑀢𑀁 𑀲𑀢𑁆𑀢𑀁 𑀅𑀚𑁆𑀛𑀼𑀧𑁂𑀓𑁆𑀔𑀦𑁆𑀢𑁄 𑀘𑀸𑀢𑀺 𑀅𑀢𑁆𑀣𑁄. 𑀔𑁂𑀤𑀁 𑀕𑀢𑁄𑀢𑀺 𑀅𑀦𑀦𑁆𑀢𑀧𑁆𑀧𑀪𑁂𑀤𑀁 𑀫𑀳𑀦𑁆𑀢𑀁 𑀲𑀁𑀲𑀸𑀭𑀤𑀼𑀓𑁆𑀔𑀁 𑀅𑀦𑀼𑀪𑀯𑀦𑀝𑁆𑀞𑁂𑀦 𑀕𑀢𑁄, 𑀲𑀫𑁆𑀧𑀢𑁆𑀢𑁄𑀢𑁆𑀬𑀢𑁆𑀣𑁄. 𑀲𑀁𑀲𑀸𑀭𑀤𑀼𑀓𑁆𑀔𑀜𑁆𑀳𑀺 𑀲𑀸𑀭𑀻𑀭𑀺𑀓𑀁 𑀫𑀸𑀦𑀲𑀺𑀓𑀜𑁆𑀘 𑀲𑀼𑀔𑀁 𑀔𑁂𑀤𑀬𑀢𑀺 𑀧𑀸𑀢𑀬𑀢𑀻𑀢𑀺 ‘‘𑀔𑁂𑀤𑁄’’𑀢𑀺 𑀯𑀼𑀘𑁆𑀘𑀢𑀺. 𑀮𑁄𑀓𑀳𑀺𑀢𑀸𑀬𑀸𑀢𑀺 𑀇𑀤𑀁 𑀬𑀣𑀸𑀯𑀼𑀢𑁆𑀢𑀳𑁂𑀢𑀼𑀨𑀮𑀧𑁆𑀧𑀬𑁄𑀚𑀦𑀦𑀺𑀤𑀲𑁆𑀲𑀦𑀁, ‘‘𑀲𑀁𑀲𑀸𑀭𑀤𑀼𑀓𑁆𑀔𑀸𑀦𑀼𑀪𑀯𑀦𑀓𑀸𑀭𑀡𑀦𑀺𑀤𑀲𑁆𑀲𑀦’’𑀦𑁆𑀢𑀺𑀧𑀺 𑀏𑀓𑁂 𑁋

‘‘‘𑀚𑀸𑀢𑀺𑀲𑀁𑀲𑀸𑀭𑀤𑀼𑀓𑁆𑀔𑀸𑀦𑀁, 𑀕𑀦𑁆𑀢𑀼𑀁 𑀲𑀓𑁆𑀓𑁄𑀧𑀺 𑀦𑀺𑀩𑁆𑀩𑀼𑀢𑀺𑀁;

𑀘𑀺𑀭𑀮𑁆𑀮𑀺𑀝𑁆𑀞𑁄𑀧𑀺 𑀲𑀁𑀲𑀸𑀭𑁂, 𑀓𑀭𑀼𑀡𑀸𑀬𑁂𑀯 𑀓𑁂𑀯𑀮’𑀦𑁆𑀢𑀺. 𑁋

𑀘 𑀯𑀼𑀢𑁆𑀢’’𑀦𑁆𑀢𑀺, 𑀢𑀫𑀬𑀼𑀢𑁆𑀢𑀁. 𑀦 𑀳𑀺 𑀪𑀕𑀯𑀸 𑀮𑁄𑀓𑀳𑀺𑀢𑀸𑀬 𑀲𑀁𑀲𑀸𑀭𑀤𑀼𑀓𑁆𑀔𑀫𑀦𑀼𑀪𑀯𑀢𑀺. 𑀦 𑀳𑀺 𑀓𑀲𑁆𑀲𑀘𑀺 𑀤𑀼𑀓𑁆𑀔𑀸𑀦𑀼𑀪𑀯𑀦𑀁 𑀮𑁄𑀓𑀲𑁆𑀲 𑀉𑀧𑀓𑀸𑀭𑀁 𑀆𑀯𑀳𑀢𑀺. 𑀏𑀯𑀁 𑀧𑀦𑁂𑀢𑀁 𑀤𑀲𑁆𑀲𑁂𑀢𑀺 𑀢𑀺𑀁𑀲𑀧𑀸𑀭𑀫𑀺𑀢𑀸𑀧𑀪𑁂𑀤𑀁 𑀳𑁂𑀢𑀼𑀁, 𑀧𑀸𑀭𑀫𑀺𑀢𑀸𑀨𑀮𑀪𑀽𑀢𑀁 𑀦𑀸𑀣𑀢𑁆𑀢𑀲𑀗𑁆𑀔𑀸𑀢𑀁 𑀨𑀮𑀜𑁆𑀘. 𑀬𑀣𑀸 𑀘𑀸𑀳 ‘‘𑀫𑀫𑀜𑁆𑀳𑀺, 𑀆𑀦𑀦𑁆𑀤, 𑀓𑀮𑁆𑀬𑀸𑀡𑀫𑀺𑀢𑁆𑀢𑀁 𑀆𑀕𑀫𑁆𑀫 𑀚𑀸𑀢𑀺𑀥𑀫𑁆𑀫𑀸 𑀲𑀢𑁆𑀢𑀸 𑀚𑀸𑀢𑀺𑀬𑀸 𑀧𑀭𑀺𑀫𑀼𑀘𑁆𑀘𑀦𑁆𑀢𑀻’’𑀢𑀺𑀆𑀤𑀺 (𑀲𑀁. 𑀦𑀺. 𑁧.𑁧𑁨𑁯; 𑁫.𑁨). 𑀢𑀢𑁆𑀣 𑀪𑀕𑀯𑀸 𑀬𑀣𑀸𑀯𑀼𑀢𑁆𑀢𑀳𑁂𑀢𑀽𑀳𑀺 𑀲𑀢𑁆𑀢𑀸𑀦𑀁 𑀯𑀺𑀦𑁂𑀬𑁆𑀬𑀪𑀸𑀯𑀦𑀺𑀧𑁆𑀨𑀸𑀤𑀦𑀧𑀜𑁆𑀜𑀸𑀩𑀻𑀚𑀸𑀦𑀺 𑀯𑀧𑀺, 𑀳𑁂𑀢𑀼𑀨𑀮𑁂𑀦 𑀧𑀭𑀺𑀧𑀓𑁆𑀓𑀺𑀦𑁆𑀤𑁆𑀭𑀺𑀬𑀪𑀸𑀯𑁂𑀦 𑀧𑀭𑀺𑀦𑀺𑀧𑁆𑀨𑀦𑁆𑀦𑀯𑀺𑀦𑁂𑀬𑁆𑀬𑀪𑀸𑀯𑁂 𑀲𑀢𑁆𑀢𑁂 𑀯𑀺𑀦𑀬𑀺, 𑀲𑀁𑀲𑀸𑀭𑀤𑀼𑀓𑁆𑀔𑀢𑁄 𑀫𑁄𑀘𑀬𑀻𑀢𑀺 𑀅𑀢𑁆𑀣𑁄. 𑀦 𑀏𑀯𑀁 𑀲𑀁𑀲𑀸𑀭𑀤𑀼𑀓𑁆𑀔𑁂𑀦 𑀮𑁄𑀓𑀲𑁆𑀲 𑀉𑀧𑀓𑀸𑀭𑀁 𑀓𑀺𑀜𑁆𑀘𑀺 𑀅𑀓𑀸𑀲𑀺, 𑀢𑀲𑁆𑀫𑀸 𑀓𑀭𑁄𑀦𑁆𑀢𑁄 𑀅𑀢𑀺𑀤𑀼𑀓𑁆𑀓𑀭𑀸𑀦𑀺 𑀮𑁄𑀓𑀳𑀺𑀢𑀸𑀬𑀸𑀢𑀺 𑀲𑀫𑁆𑀩𑀦𑁆𑀥𑁄. 𑀇𑀫𑀺𑀲𑁆𑀲𑀸 𑀬𑁄𑀚𑀦𑀸𑀬 𑀲𑀩𑁆𑀩𑀧𑀞𑀫𑀲𑁆𑀲 𑀩𑁄𑀥𑀺𑀲𑀢𑁆𑀢𑀲𑁆𑀲 𑀉𑀧𑁆𑀧𑀢𑁆𑀢𑀺𑀓𑀸𑀮𑀢𑁄 𑀧𑀝𑁆𑀞𑀸𑀬 𑀩𑁄𑀥𑀺𑀲𑀢𑁆𑀢𑀲𑁆𑀲 𑀦𑀸𑀣𑀢𑁆𑀢𑀲𑀗𑁆𑀔𑀸𑀢𑀧𑀸𑀭𑀫𑀺𑀢𑀸𑀳𑁂𑀢𑀼𑀨𑀮𑀸𑀥𑀺𑀕𑀫𑁄 𑀯𑁂𑀤𑀺𑀢𑀩𑁆𑀩𑁄. 𑀬𑁄 𑀦𑀸𑀣𑁄𑀢𑀺 𑀳𑀺 𑀲𑀫𑁆𑀩𑀦𑁆𑀥𑁄 𑀅𑀥𑀺𑀧𑁆𑀧𑁂𑀢𑁄. 𑀇𑀫𑀲𑁆𑀲 𑀧𑀦𑀢𑁆𑀣𑀲𑁆𑀲 𑁋

‘‘𑀬𑀤𑁂𑀯 𑀧𑀞𑀫𑀁 𑀘𑀺𑀢𑁆𑀢-𑀫𑀼𑀧𑁆𑀧𑀦𑁆𑀦𑀁 𑀢𑀯 𑀩𑁄𑀥𑀬𑁂;

𑀢𑁆𑀯𑀁 𑀢𑀤𑁂𑀯𑀲𑁆𑀲 𑀮𑁄𑀓𑀲𑁆𑀲, 𑀧𑀽𑀚𑀺𑀓𑁂 𑀧𑀭𑀺𑀯𑀲𑀺𑀢𑁆𑀣’’. 𑁋

𑀇𑀢𑀺 𑀯𑀘𑀦𑀁 𑀲𑀸𑀥𑀓𑀁. 𑀧𑀞𑀫𑀘𑀺𑀢𑁆𑀢𑀲𑁆𑀲 𑀧𑀸𑀭𑀫𑀺𑀢𑀸𑀪𑀸𑀯𑁄 𑀭𑀼𑀓𑁆𑀔𑀲𑁆𑀲 𑀅𑀗𑁆𑀓𑀼𑀭𑀢𑁄 𑀧𑀝𑁆𑀞𑀸𑀬 𑀉𑀧𑁆𑀧𑀢𑁆𑀢𑀺𑀉𑀧𑀫𑀸𑀬 𑀲𑀸𑀥𑁂𑀢𑀩𑁆𑀩𑁄. 𑀏𑀢𑁆𑀣𑀸𑀳 𑁋 ‘‘𑀔𑁂𑀤𑀁 𑀕𑀢𑁄𑀢𑀺 𑀯𑀘𑀦𑀁 𑀦𑀺𑀭𑀢𑁆𑀣𑀓𑀁, 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀕𑀼𑀡𑀲𑀸𑀥𑀦𑀸𑀲𑀫𑁆𑀪𑀯𑀢𑁄’’𑀢𑀺? 𑀦, 𑀅𑀦𑁆𑀢𑀭𑀸 𑀅𑀦𑀺𑀯𑀢𑁆𑀢𑀦𑀓𑀪𑀸𑀯𑀤𑀻𑀧𑀦𑀢𑁄. 𑀤𑀼𑀓𑁆𑀓𑀭𑀸𑀦𑀺 𑀓𑀭𑁄𑀦𑁆𑀢𑁄 𑀔𑁂𑀤𑀁 𑀕𑀢𑁄 𑀏𑀯, 𑀦 𑀅𑀦𑁆𑀢𑀭𑀸 𑀔𑁂𑀤𑀁 𑀅𑀲𑀳𑀦𑁆𑀢𑁄 𑀦𑀺𑀯𑀢𑁆𑀢𑀢𑀻𑀢𑀺 𑀤𑀻𑀧𑁂𑀢𑀺. 𑀮𑁄𑀓𑀤𑀼𑀓𑁆𑀔𑀸𑀧𑀦𑀬𑀦𑀓𑀸𑀫𑀲𑁆𑀲 𑀯𑀸 𑀪𑀕𑀯𑀢𑁄 𑀅𑀢𑁆𑀢𑀦𑁄 𑀤𑀼𑀓𑁆𑀔𑀸𑀦𑀼𑀪𑀯𑀦𑀲𑀫𑀢𑁆𑀣𑀢𑀁 𑀤𑀲𑁆𑀲𑁂𑀢𑀺.

‘‘𑀬𑀲𑁆𑀲 𑀓𑀲𑁆𑀲𑀘𑀺 𑀯𑀭𑀤𑁄𑀲𑁆𑀲𑀁, 𑀬𑀸𑀯𑀸𑀳𑀁 𑀲𑀩𑁆𑀩𑀲𑀢𑁆𑀢𑀤𑀼𑀓𑁆𑀔𑀸𑀦𑀺;

𑀲𑀩𑁆𑀩𑀸𑀦𑀺 𑀲𑀩𑁆𑀩𑀓𑀸𑀮𑀁 𑀬𑀼𑀕𑀁, 𑀧𑀤𑁆𑀫𑀲𑁆𑀲𑁂𑀯 𑀩𑀼𑀚𑁆𑀛𑀦𑁆𑀢𑁄𑀫𑁆𑀳𑀻’’𑀢𑀺. 𑁋

𑀏𑀯𑀁𑀅𑀥𑀺𑀧𑁆𑀧𑀸𑀬𑀲𑁆𑀲 𑀅𑀢𑁆𑀢𑀫𑀢𑁆𑀢𑀤𑀼𑀓𑁆𑀔𑀸𑀦𑀼𑀪𑀯𑀦𑀲𑀫𑀢𑁆𑀣𑀢𑀸𑀬 𑀓𑀸𑀬𑁂𑀯 𑀓𑀣𑀸𑀢𑀺 𑀅𑀢𑀺𑀲𑀬𑀁 𑀅𑀢𑁆𑀣𑀁 𑀤𑀲𑁆𑀲𑁂𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀔𑁂𑀤𑀁 𑀕𑀢𑁄𑀢𑀺 𑀩𑁆𑀬𑀸𑀧𑀸𑀭𑀁 𑀧𑀭𑀺𑀘𑀬𑀁 𑀕𑀢𑁄𑀢𑀺𑀧𑀺 𑀅𑀢𑁆𑀣𑁄 𑀲𑀫𑁆𑀪𑀯𑀢𑀺. 𑀓𑀫𑁆𑀫𑀸𑀤𑀻𑀲𑀼 𑀲𑀩𑁆𑀬𑀸𑀧𑀸𑀭𑀁 𑀧𑀼𑀭𑀺𑀲𑀁 𑀤𑀺𑀲𑁆𑀯𑀸 𑀲𑀦𑁆𑀢𑀺 𑀳𑀺 𑀮𑁄𑀓𑁂 𑀯𑀢𑁆𑀢𑀸𑀭𑁄 ‘‘𑀔𑀺𑀦𑁆𑀦𑁄𑀬𑀁 𑀓𑀫𑁆𑀫𑁂, 𑀔𑀺𑀦𑁆𑀦𑁄𑀬𑀁 𑀲𑀢𑁆𑀢𑁂’’𑀢𑀺𑀆𑀤𑀺. 𑀇𑀫𑀺𑀲𑁆𑀲𑀸 𑀬𑁄𑀚𑀦𑀸𑀬 𑀦𑀸𑀣𑁄𑀢𑀺 𑀇𑀫𑀺𑀦𑀸 𑀩𑀼𑀤𑁆𑀥𑀢𑁆𑀢𑀸𑀥𑀺𑀕𑀫𑀲𑀺𑀤𑁆𑀥𑀁 𑀓𑁄𑀝𑀺𑀧𑁆𑀧𑀢𑁆𑀢𑀁 𑀦𑀸𑀣𑀪𑀸𑀯𑀁 𑀧𑀢𑁆𑀯𑀸 𑀞𑀺𑀢𑀓𑀸𑀮𑁄 𑀤𑀲𑁆𑀲𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀓𑁂𑀘𑀺 ‘‘𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲𑀸𑀢𑀺 𑀯𑀤𑀦𑁆𑀢𑁄 𑀩𑀼𑀤𑁆𑀥𑀪𑀽𑀢𑀲𑁆𑀲𑀸𑀢𑀺 𑀤𑀲𑁆𑀲𑁂𑀢𑀻’’𑀢𑀺 𑀮𑀺𑀔𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁 𑀯𑀺𑀬, 𑀩𑁄𑀥𑀺𑀲𑀢𑁆𑀢𑀓𑀸𑀮𑁂𑀧𑀺 𑀢𑀩𑁆𑀩𑁄𑀳𑀸𑀭𑀲𑀩𑁆𑀪𑀸𑀯𑀢𑁄. 𑀢𑀲𑁆𑀫𑀸 𑀲𑁄 𑀏𑀢𑁆𑀢𑀓𑀁 𑀓𑀸𑀮𑀁 𑀤𑀼𑀓𑁆𑀓𑀭𑀸𑀦𑀺 𑀓𑀭𑁄𑀦𑁆𑀢𑁄 𑀅𑀯𑀲𑀸𑀦𑁂 𑀤𑀼𑀓𑁆𑀓𑀭𑀧𑀸𑀭𑀫𑀺𑀢𑀸𑀧𑀸𑀭𑀺𑀧𑀽𑀭𑀺𑀬𑀸 𑀢𑀸𑀲𑀁 𑀨𑀮𑀪𑀽𑀢𑀁 𑀦𑀸𑀣𑀪𑀸𑀯𑀁 𑀧𑀢𑁆𑀯𑀸 𑀮𑁄𑀓𑀳𑀺𑀢𑀸𑀬 𑀩𑁆𑀬𑀸𑀧𑀸𑀭𑀁 𑀕𑀢𑁄𑀢𑀺 𑀅𑀬𑀫𑀢𑁆𑀣𑁄 𑀦𑀺𑀤𑀲𑁆𑀲𑀺𑀢𑁄 𑀳𑁄𑀢𑀺. ‘‘𑀩𑁄𑀥𑀺𑀁 𑀕𑀢𑁄’’𑀢𑀺 𑀯𑀼𑀢𑁆𑀢𑁂𑀧𑀺 𑀲𑀼𑀩𑁆𑀬𑀢𑁆𑀢𑀁 𑀳𑁂𑀢𑀼𑀨𑀮𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀩𑀼𑀤𑁆𑀥𑀪𑀸𑀯𑀧𑁆𑀧𑀢𑁆𑀢𑀲𑁆𑀲𑁂𑀯 𑀘 𑀦𑀸𑀣𑀲𑁆𑀲 𑀦𑀫𑁄 𑀓𑀢𑁄 𑀳𑁄𑀢𑀺 𑀯𑀺𑀲𑁂𑀲𑀯𑀘𑀦𑀲𑀩𑁆𑀪𑀸𑀯𑀢𑁄, 𑀦 𑀩𑁄𑀥𑀺𑀲𑀢𑁆𑀢𑀲𑁆𑀲. 𑀏𑀯𑀁 𑀲𑀦𑁆𑀢𑁂𑀧𑀺 𑀯𑀺𑀦𑀬𑀸𑀥𑀺𑀓𑀸𑀭𑁄 𑀇𑀥𑀸𑀥𑀺𑀧𑁆𑀧𑁂𑀢𑁄. 𑀲𑁄 𑀘 𑀧𑀩𑁆𑀩𑀚𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀬𑀸𑀯𑀫𑀭𑀡𑀓𑀸𑀮𑀸 𑀳𑁄𑀢𑀺. 𑀢𑀁 𑀅𑀢𑀺𑀯𑀺𑀬 𑀧𑀭𑀺𑀢𑁆𑀢𑀁 𑀓𑀸𑀮𑀁 𑀮𑀚𑁆𑀚𑀺𑀦𑁄 𑀅𑀢𑀺𑀲𑀼𑀓𑀭𑀁 𑀲𑀻𑀮𑀫𑀢𑁆𑀢𑀁 𑀏𑀓𑀓𑀲𑁆𑀲 𑀅𑀢𑁆𑀢𑀦𑁄 𑀳𑀺𑀢𑀸𑀬 𑀅𑀢𑁆𑀢𑀫𑀢𑁆𑀢𑀤𑀼𑀓𑁆𑀔𑀸𑀧𑀦𑀬𑀦𑀸𑀥𑀺𑀧𑁆𑀧𑀸𑀬𑁂𑀦 𑀧𑀭𑀺𑀧𑀽𑀭𑁂𑀦𑁆𑀢𑁄 𑀓𑁄 𑀦𑀸𑀫 𑀇𑀥𑀮𑁄𑀓𑀧𑀭𑀮𑁄𑀓𑀸𑀢𑀺𑀓𑁆𑀓𑀫𑀲𑀼𑀔𑀁 𑀦 𑀕𑀘𑁆𑀙𑁂𑀬𑁆𑀬, 𑀦𑀦𑀼 𑀪𑀕𑀯𑀸 𑀲𑀓𑀮𑀮𑁄𑀓𑀤𑀼𑀓𑁆𑀔𑀸𑀧𑀦𑀬𑀦𑀸𑀥𑀺𑀧𑁆𑀧𑀸𑀬𑁂𑀦 𑀓𑀧𑁆𑀧𑀓𑁄𑀝𑀻𑀳𑀺𑀧𑀺 𑀅𑀧𑁆𑀧𑀫𑁂𑀬𑁆𑀬𑀁 𑀓𑀸𑀮𑀁 𑀓𑀭𑁄𑀦𑁆𑀢𑁄 𑀅𑀢𑀺𑀤𑀼𑀓𑁆𑀓𑀭𑀦𑀺𑀭𑀲𑁆𑀲𑀸𑀤𑀁 𑀔𑁂𑀤𑀁 𑀕𑀢𑁄𑀢𑀺 𑀅𑀜𑁆𑀜𑀸𑀧𑀤𑁂𑀲𑁂𑀦 𑀕𑀼𑀡𑀁 𑀯𑀡𑁆𑀡𑁂𑀢𑀺 𑀆𑀘𑀭𑀺𑀬𑁄.

𑀮𑁄𑀓𑀳𑀺𑀢𑀸𑀬𑀸𑀢𑀺 𑀏𑀢𑁆𑀣 𑀮𑁄𑀓𑀺𑀬𑀢𑀺 𑀏𑀢𑁆𑀣 𑀤𑀼𑀓𑁆𑀔𑀦𑁆𑀢𑀺 𑀮𑁄𑀓𑁄, 𑀮𑀼𑀬𑀢𑁂 𑀯𑀸 𑀚𑀸𑀢𑀺𑀚𑀭𑀸𑀫𑀭𑀡𑀤𑀼𑀓𑁆𑀔𑁂𑀳𑀻𑀢𑀺 𑀮𑁄𑀓𑁄, 𑀇𑀫𑀺𑀦𑀸 𑀲𑀢𑁆𑀢𑀮𑁄𑀓𑀁 𑀚𑀸𑀢𑀺𑀮𑁄𑀓𑀜𑁆𑀘 𑀲𑀗𑁆𑀕𑀡𑁆𑀳𑀸𑀢𑀺. 𑀢𑀲𑁆𑀫𑀸 𑀢𑀲𑁆𑀲 𑀲𑀢𑁆𑀢𑀮𑁄𑀓𑀲𑁆𑀲 𑀇𑀥𑀮𑁄𑀓𑀧𑀭𑀮𑁄𑀓𑀳𑀺𑀢𑀁 𑀅𑀢𑀺𑀓𑁆𑀓𑀦𑁆𑀢𑀧𑀭𑀮𑁄𑀓𑀸𑀦𑀁 𑀯𑀸 𑀉𑀘𑁆𑀙𑀺𑀦𑁆𑀦𑀮𑁄𑀓𑀲𑀫𑀼𑀤𑀬𑀸𑀦𑀁 𑀮𑁄𑀓𑀸𑀦𑀁, 𑀇𑀥 𑀚𑀸𑀢𑀺𑀮𑁄𑀓𑁂 𑀑𑀓𑀸𑀲𑀮𑁄𑀓𑁂 𑀯𑀸 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀲𑀗𑁆𑀔𑀸𑀢𑀜𑁆𑀘 𑀳𑀺𑀢𑀁 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 𑀮𑁄𑀓𑀲𑁆𑀲, 𑀮𑁄𑀓𑀸𑀦𑀁, 𑀮𑁄𑀓𑁂 𑀯𑀸 𑀳𑀺𑀢𑀦𑁆𑀢𑀺 𑀲𑀭𑀽𑀧𑁂𑀓𑀤𑁂𑀲𑁂𑀓𑀲𑁂𑀲𑀁 𑀓𑀢𑁆𑀯𑀸 ‘‘𑀮𑁄𑀓𑀳𑀺𑀢’’𑀫𑀺𑀘𑁆𑀘𑁂𑀯𑀸𑀳. 𑀦𑀸𑀣𑁄𑀢𑀺 𑀲𑀩𑁆𑀩𑀲𑀢𑁆𑀢𑀸𑀦𑀁 𑀆𑀲𑀬𑀸𑀦𑀼𑀲𑀬𑀘𑀭𑀺𑀬𑀸𑀥𑀺𑀫𑀼𑀢𑁆𑀢𑀺𑀪𑁂𑀤𑀸𑀦𑀼𑀭𑀽𑀧𑀥𑀫𑁆𑀫𑀤𑁂𑀲𑀦𑀲𑀫𑀢𑁆𑀣𑀢𑀸𑀬 ‘‘𑀥𑀫𑁆𑀫𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁂𑀲𑁂𑀲𑁆𑀲𑀸𑀫𑀺…𑀧𑁂… 𑀢𑀁 𑀲𑀼𑀡𑀸𑀣𑀸’’𑀢𑀺 (𑀫. 𑀦𑀺. 𑁩.𑁪𑁨𑁦) 𑀏𑀯𑀁 𑀬𑀸𑀘𑀦𑀝𑁆𑀞𑁂𑀦𑀸𑀧𑀺 𑀦𑀸𑀣𑀢𑁂𑀢𑀺 𑀦𑀸𑀣𑁄. 𑀪𑀺𑀓𑁆𑀔𑀽𑀦𑀁 𑀯𑀻𑀢𑀺𑀓𑁆𑀓𑀫𑀸𑀦𑀼𑀭𑀽𑀧𑀁 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑁂𑀦 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀸𑀬 𑀘 𑀓𑀭𑀼𑀡𑀸𑀬 𑀉𑀧𑀕𑀦𑁆𑀢𑁆𑀯𑀸 𑀢𑀧𑀢𑀺, 𑀲𑀼𑀢𑁆𑀢𑀦𑁆𑀢𑀯𑀲𑁂𑀦 𑀯𑀸 𑀢𑁂𑀲𑀁 𑀲𑀩𑁆𑀩𑀲𑀢𑁆𑀢𑀸𑀦𑀁 𑀅𑀦𑀼𑀲𑀬𑀺𑀢𑁂 𑀓𑀺𑀮𑁂𑀲𑁂 𑀓𑀭𑀼𑀡𑀸𑀬 𑀘 𑀧𑀜𑁆𑀜𑀸𑀬 𑀘 𑀉𑀧𑀕𑀦𑁆𑀢𑁆𑀯𑀸 𑀢𑀧𑀢𑀺, 𑀅𑀪𑀺𑀥𑀫𑁆𑀫𑀯𑀲𑁂𑀦 𑀯𑀸 𑀢𑁂 𑀢𑁂 𑀲𑀗𑁆𑀔𑀸𑀭𑁂 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀯𑀲𑁂𑀦 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀅𑀢𑁆𑀢𑀦𑁄 𑀓𑀺𑀮𑁂𑀲𑁂 𑀧𑀜𑁆𑀜𑀸𑀬 𑀉𑀧𑁂𑀘𑁆𑀘 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀢𑀧𑀢𑀻𑀢𑀺 𑀢𑀧𑀦𑀝𑁆𑀞𑁂𑀦𑀸𑀧𑀺 𑀦𑀸𑀣𑀢𑁂𑀢𑀺 𑀦𑀸𑀣𑁄. 𑀲𑀤𑁂𑀯𑀓𑁂 𑀮𑁄𑀓𑁂 𑀅𑀧𑁆𑀧𑀝𑀺𑀧𑀼𑀕𑁆𑀕𑀮𑀢𑁆𑀢𑀸 𑀓𑁂𑀦𑀘𑀺 𑀅𑀧𑁆𑀧𑀝𑀺𑀳𑀢𑀥𑀫𑁆𑀫𑀤𑁂𑀲𑀦𑀢𑁆𑀢𑀸 𑀧𑀭𑀫𑀘𑀺𑀢𑁆𑀢𑀺𑀲𑁆𑀲𑀭𑀺𑀬𑀧𑁆𑀧𑀯𑀢𑁆𑀢𑀺𑀢𑁄 𑀘 𑀇𑀲𑁆𑀲𑀭𑀺𑀬𑀝𑁆𑀞𑁂𑀦𑀸𑀧𑀺 𑀦𑀸𑀣𑀢𑁂𑀢𑀺 𑀦𑀸𑀣𑁄. ‘‘𑀥𑀫𑁆𑀫𑀺𑀬𑀸 𑀓𑀣𑀸𑀬 𑀲𑀦𑁆𑀤𑀲𑁆𑀲𑁂𑀲𑀺 𑀲𑀫𑀸𑀤𑀧𑁂𑀲𑀺 𑀲𑀫𑀼𑀢𑁆𑀢𑁂𑀚𑁂𑀲𑀺 𑀲𑀫𑁆𑀧𑀳𑀁𑀲𑁂𑀲𑀻’’𑀢𑀺 (𑀫𑀳𑀸𑀯. 𑁯𑁦) 𑀯𑀘𑀦𑀢𑁄 𑀲𑀫𑁆𑀧𑀳𑀁𑀲𑀦𑀲𑀗𑁆𑀔𑀸𑀢𑁂𑀦 𑀆𑀲𑀻𑀲𑀝𑁆𑀞𑁂𑀦, 𑀧𑀡𑀺𑀥𑀸𑀦𑀢𑁄 𑀧𑀝𑁆𑀞𑀸𑀬 ‘‘𑀓𑀣𑀁 𑀦𑀸𑀫𑀸𑀳𑀁 𑀫𑀼𑀢𑁆𑀢𑁄 𑀫𑁄𑀘𑀬𑀺𑀲𑁆𑀲𑀸𑀫𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀆𑀲𑀻𑀲𑀝𑁆𑀞𑁂𑀦 𑀯𑀸 𑀦𑀸𑀣𑀢𑁂𑀢𑀺 𑀦𑀸𑀣𑁄𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁄. 𑀘𑀢𑀽𑀳𑀺𑀧𑀺 𑀦𑀸𑀣𑀗𑁆𑀕𑁂𑀳𑀺 𑀘𑀢𑀼𑀯𑁂𑀲𑀸𑀭𑀚𑁆𑀚𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀤𑀬𑁄 𑀲𑀩𑁆𑀩𑁂𑀧𑀺 𑀩𑀼𑀤𑁆𑀥𑀕𑀼𑀡𑀸 𑀬𑁄𑀚𑁂𑀢𑀩𑁆𑀩𑀸, 𑀅𑀢𑀺𑀯𑀺𑀢𑁆𑀣𑀸𑀭𑀺𑀓𑀪𑀬𑀸 𑀧𑀦 𑀦 𑀬𑁄𑀚𑀺𑀢𑀸.

𑀦𑀫𑁄𑀢𑀺 𑀧𑀭𑀫𑀢𑁆𑀣𑀢𑁄 𑀩𑀼𑀤𑁆𑀥𑀕𑀼𑀡𑀩𑀳𑀼𑀫𑀸𑀦𑀧𑀩𑁆𑀪𑀸𑀭𑀸 𑀘𑀺𑀢𑁆𑀢𑀦𑀢𑀺, 𑀘𑀺𑀢𑁆𑀢𑀦𑀢𑀺𑀧𑁆𑀧𑀪𑀯𑀸 𑀘 𑀯𑀘𑀻𑀓𑀸𑀬𑀦𑀢𑀺. 𑀅𑀢𑁆𑀣𑀼 𑀫𑁂𑀢𑀺 𑀧𑀸𑀞𑀲𑁂𑀲𑁂𑀦 𑀲𑀫𑁆𑀩𑀦𑁆𑀥𑁄. 𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲𑀸𑀢𑀺 𑀏𑀢𑁆𑀣 𑀲𑀩𑁆𑀩𑀲𑀢𑁆𑀢𑀯𑀺𑀲𑀬𑀢𑁆𑀢𑀸 𑀫𑀳𑀼𑀲𑁆𑀲𑀸𑀳𑀧𑁆𑀧𑀪𑀯𑀢𑁆𑀢𑀸 𑀘 𑀫𑀳𑀢𑀻 𑀓𑀭𑀼𑀡𑀸 𑀫𑀳𑀸𑀓𑀭𑀼𑀡𑀸. 𑀢𑀢𑁆𑀣 𑀧𑀡𑀺𑀥𑀸𑀦𑀢𑁄 𑀧𑀝𑁆𑀞𑀸𑀬 𑀬𑀸𑀯𑀅𑀦𑀼𑀧𑀸𑀤𑀺𑀲𑁂𑀲𑀦𑀺𑀩𑁆𑀩𑀸𑀦𑀧𑀼𑀭𑀧𑁆𑀧𑀯𑁂𑀲𑀸 𑀦𑀺𑀬𑀼𑀢𑁆𑀢𑁄𑀢𑀺 𑀫𑀳𑀸𑀓𑀸𑀭𑀼𑀡𑀺𑀓𑁄, 𑀪𑀕𑀯𑀸. 𑀏𑀢𑁆𑀣 𑀘 𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲𑀸𑀢𑀺 𑀇𑀫𑀺𑀦𑀸 𑀬𑀣𑀸𑀯𑀼𑀢𑁆𑀢𑀳𑁂𑀢𑀼𑀫𑀽𑀮𑀁 𑀤𑀲𑁆𑀲𑁂𑀢𑀺. 𑀦𑀺𑀓𑁆𑀓𑀭𑀼𑀡𑁄 𑀳𑀺 𑀧𑀭𑀤𑀼𑀓𑁆𑀔𑁂𑀲𑀼 𑀉𑀤𑀸𑀲𑀺𑀦𑁄 𑀩𑀼𑀤𑁆𑀥𑀢𑁆𑀣𑀸𑀬 𑀧𑀡𑀺𑀥𑀸𑀦𑀫𑀢𑁆𑀢𑀫𑁆𑀧𑀺 𑀅𑀢𑀺𑀪𑀸𑀭𑀺𑀬𑀦𑁆𑀢𑀺 𑀫𑀜𑁆𑀜𑀦𑁆𑀢𑁄 𑀅𑀧𑁆𑀧𑀫𑁂𑀬𑁆𑀬𑀁 𑀓𑀸𑀮𑀁 𑀅𑀢𑀺𑀤𑀼𑀓𑁆𑀓𑀭𑀁 𑀳𑁂𑀢𑀼𑀁 𑀧𑀽𑀭𑁂𑀢𑁆𑀯𑀸 𑀦𑀸𑀣𑀢𑁆𑀢𑀲𑀗𑁆𑀔𑀸𑀢𑀁 𑀳𑁂𑀢𑀼𑀨𑀮𑀧𑁆𑀧𑀬𑁄𑀚𑀦𑀪𑀽𑀢𑀁 𑀮𑁄𑀓𑀳𑀺𑀢𑀁 𑀓𑀣𑀁 𑀓𑀭𑀺𑀲𑁆𑀲𑀢𑀺. 𑀢𑀲𑁆𑀫𑀸 𑀲𑀩𑁆𑀩𑀕𑀼𑀡𑀫𑀽𑀮𑀪𑀽𑀢𑀢𑁆𑀢𑀸 𑀫𑀳𑀸𑀓𑀭𑀼𑀡𑀸𑀕𑀼𑀡𑀫𑁂𑀯 𑀯𑀡𑁆𑀡𑁂𑀦𑁆𑀢𑁄 ‘‘𑀦𑀫𑁄 𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲𑀸’’𑀢𑀺 𑀆𑀳. 𑀏𑀢𑁆𑀢𑀸𑀯𑀢𑀸 𑀳𑁂𑀢𑀼𑀅𑀦𑀼𑀭𑀽𑀧𑀁 𑀨𑀮𑀁, 𑀨𑀮𑀸𑀦𑀼𑀭𑀽𑀧𑁄 𑀳𑁂𑀢𑀼, 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀦𑀼𑀭𑀽𑀧𑀁 𑀫𑀽𑀮𑀁, 𑀢𑀺𑀡𑁆𑀡𑀫𑁆𑀧𑀺 𑀅𑀦𑀼𑀭𑀽𑀧𑀁 𑀧𑀬𑁄𑀚𑀦𑀦𑁆𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺.

𑀏𑀯𑀁 𑀅𑀘𑁆𑀙𑀭𑀺𑀬𑀧𑀼𑀭𑀺𑀲𑁄, 𑀦𑀸𑀣𑁄 𑀦𑀸𑀣𑀕𑀼𑀡𑁂 𑀞𑀺𑀢𑁄;

𑀦𑀫𑁄𑀭𑀳𑁄 𑀅𑀦𑀸𑀣𑀲𑁆𑀲, 𑀦𑀸𑀣𑀫𑀸𑀦𑀲𑁆𑀲 𑀲𑀫𑁆𑀧𑀤𑀁.

𑀏𑀢𑁆𑀣 𑀲𑀺𑀬𑀸 ‘‘𑀅𑀦𑁂𑀓𑁂𑀲𑀼 𑀪𑀕𑀯𑀢𑁄 𑀕𑀼𑀡𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀓𑀲𑁆𑀫𑀸 ‘𑀫𑀳𑀸𑀓𑀸𑀭𑀼𑀡𑀺𑀓𑀲𑁆𑀲𑀸’𑀢𑀺 𑀏𑀓𑀫𑁂𑀯 𑀕𑀳𑀺𑀢’’𑀦𑁆𑀢𑀺? 𑀉𑀘𑁆𑀘𑀢𑁂 𑁋

𑀤𑁄𑀲𑀳𑀻𑀦𑀲𑁆𑀲 𑀲𑀢𑁆𑀣𑀲𑁆𑀲, 𑀘𑁄𑀤𑀦𑀸 𑀢𑀼 𑀦 𑀯𑀺𑀚𑁆𑀚𑀢𑁂;

𑀤𑁄𑀲𑀬𑀼𑀢𑁆𑀢𑀫𑀲𑀢𑁆𑀣𑀜𑁆𑀘, 𑀢𑀲𑁆𑀫𑀸 𑀘𑁄𑀤𑀦𑀸 𑀅𑀧𑀢𑁆𑀢𑀓𑀸𑀢𑀺.

𑀦 𑀫𑀬𑀸 𑀘𑁄𑀤𑀦𑀸 𑀓𑀢𑀸, 𑀓𑀺𑀦𑁆𑀢𑀼 𑀧𑀼𑀘𑁆𑀙𑀸 𑀏𑀯 𑀓𑀢𑀸. 𑀅𑀧𑀺𑀘 𑁋

‘‘𑀨𑀮𑀁 𑀲𑀢𑀺𑀧𑀺 𑀭𑀼𑀓𑁆𑀔𑁂𑀟𑁆𑀠𑁂, 𑀦 𑀧𑀢𑀢𑁆𑀬𑀯𑀺𑀓𑀫𑁆𑀧𑀺𑀢𑁂;

𑀘𑁄𑀤𑀦𑀸 𑀬𑀸’𑀢𑁆𑀣𑀼 𑀲𑀢𑁆𑀣𑀸𑀦𑀁, 𑀧𑀼𑀘𑁆𑀙𑀦𑀸𑀢𑁆𑀬𑀢𑁆𑀣𑀨𑀮𑀁 𑀫𑀳𑀢𑀸.

‘‘𑀦𑀪𑁄𑀢𑁆𑀢𑀼𑀁 𑀓𑀼𑀭𑀼𑀢𑁂 𑀲𑀫𑁆𑀫𑀸, 𑀕𑀳𑀺𑀢𑀼𑀁 𑀦𑀸𑀟𑁆𑀠𑀢𑁂 𑀖𑀝𑀁;

𑀅𑀓𑁆𑀔𑁂𑀧𑁂 𑀳𑀺 𑀓𑀢𑁂 𑀢𑀤𑀺-𑀘𑁆𑀙𑀺𑀲𑁆𑀲𑀸𑀡𑀸𑀩𑀼𑀤𑁆𑀥𑀺𑀩𑀦𑁆𑀥𑀦𑀁.

‘‘𑀬𑀣𑀸 𑀳𑀺𑀫𑀧𑀤𑁄 𑀧𑀤𑁆𑀥𑁄, 𑀧𑀩𑀼𑀤𑁆𑀥𑁄 𑀕𑀦𑁆𑀥𑀮𑀺𑀫𑁆𑀧𑀺𑀬𑀸;

𑀪𑀺𑀦𑁆𑀦𑀢𑁆𑀣𑀯𑀺𑀭𑀫𑀲𑁆𑀲𑁂𑀯𑀁, 𑀲𑀢𑁆𑀣𑀓𑀢𑀸𑀢𑁆𑀣𑀮𑀺𑀫𑁆𑀧𑀺𑀬𑀸’’𑀢𑀺. 𑁋

𑀏𑀯𑀁 𑀘𑁂𑀓𑀁 𑁋

𑀲𑀫𑁆𑀫𑀸𑀧𑀺 𑀘𑁄𑀤𑀦𑀸 𑀢𑀁 𑀔𑀮𑀼, 𑀕𑀼𑀭𑀯𑁄 𑀯𑀺𑀯𑀸𑀓𑁆𑀬𑀸 𑀯𑀺𑀯𑀤𑁆𑀥;

𑀬𑀢𑀺𑀲𑀺𑀲𑁆𑀲𑀸 𑀆𑀖𑀝𑁆𑀝𑀺𑀢𑀸𑀢𑀺-𑀯𑀸𑀓𑁆𑀬𑁂𑀦𑀸𑀪𑁆𑀬𑀥𑀺𑀓𑀁 𑀕𑁄𑀧𑀬.

𑀲𑀭𑀯𑀢𑀻 𑀆𑀘𑁂𑀭𑀁 𑀓𑀺𑀮𑀺𑀝𑁆𑀞𑀸, 𑀢𑀤𑀺𑀘𑁆𑀙𑀺𑀲𑁆𑀲𑀚𑀺𑀢𑀸𑀢𑁆𑀢𑀸𑀦𑀁;

𑀚𑀬𑀢𑁆𑀬𑀢𑁆𑀢𑀸𑀦𑀫𑀸𑀘𑁂𑀭𑁄, 𑀲𑀤𑀲𑁆𑀲𑀲𑁆𑀲𑁂𑀯 𑀲𑀸𑀭𑀣𑀻𑀢𑀺. 𑁋

𑀅𑀢𑁆𑀭𑁄𑀘𑁆𑀘𑀢𑁂 𑁋

𑀬𑀲𑁆𑀲 𑀳𑀺 𑀯𑀸𑀓𑁆𑀬𑀲𑀳𑀲𑁆𑀲𑀁, 𑀯𑀸𑀓𑁆𑀬𑁂 𑀯𑀸𑀓𑁆𑀬𑁂 𑀲𑀢𑀜𑁆𑀘 𑀚𑀺𑀯𑁆𑀳𑀸;

𑀦𑀸𑀫𑀁 𑀤𑀲𑀩𑀮𑀕𑀼𑀡𑀧𑀤𑁂𑀲𑀁, 𑀯𑀢𑁆𑀢𑀼𑀁 𑀓𑀧𑁆𑀧𑁂𑀦𑀧𑀺 𑀦 𑀲𑀓𑁆𑀓𑀸.

𑀬𑀣𑀸 𑁋

𑀩𑀼𑀤𑁆𑀥𑁄𑀧𑀺 𑀩𑀼𑀤𑁆𑀥𑀲𑁆𑀲 𑀪𑀡𑁂𑀬𑁆𑀬 𑀯𑀡𑁆𑀡𑀁,

𑀓𑀧𑁆𑀧𑀫𑁆𑀧𑀺 𑀘𑁂 𑀅𑀜𑁆𑀜𑀫𑀪𑀸𑀲𑀫𑀸𑀦𑁄;

𑀔𑀻𑀬𑁂𑀣 𑀓𑀧𑁆𑀧𑁄 𑀘𑀺𑀭𑀤𑀻𑀖𑀫𑀦𑁆𑀢𑀭𑁂,

𑀯𑀡𑁆𑀡𑁄 𑀦 𑀔𑀻𑀬𑁂𑀣 𑀢𑀣𑀸𑀕𑀢𑀲𑁆𑀲𑀸𑀢𑀺. (𑀤𑀻. 𑀦𑀺. 𑀅𑀝𑁆𑀞. 𑁧.𑁩𑁦𑁪; 𑁩.𑁧𑁪𑁧; 𑀫. 𑀦𑀺. 𑀅𑀝𑁆𑀞. 𑁨.𑁪𑁨𑁫; 𑀉𑀤𑀸. 𑀅𑀝𑁆𑀞. 𑁫𑁩; 𑀘𑀭𑀺𑀬𑀸. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸) 𑁋

𑀘𑁄𑀢𑁆𑀢𑀢𑁆𑀢𑀸 𑀦 𑀲𑀓𑁆𑀓𑀸 𑀪𑀕𑀯𑀢𑀁 𑀕𑀼𑀡𑀸𑀦𑀫𑀯𑀲𑁂𑀲𑀸𑀪𑀺𑀥𑀸𑀢𑀼𑀁.

𑀅𑀧𑀺𑀘 𑁋

𑀬𑀣𑀸 𑀢𑁆𑀯𑀁 𑀲𑀢𑁆𑀢𑀸𑀦𑀁, 𑀤𑀲𑀩𑀮 𑀢𑀣𑀸 𑀜𑀸𑀡𑀓𑀭𑀼𑀡𑀸;

𑀕𑀼𑀡𑀤𑁆𑀯𑀦𑁆𑀤𑀁 𑀲𑁂𑀝𑁆𑀞𑀁, 𑀢𑀯 𑀕𑀼𑀡𑀕𑀡𑀸 𑀦𑀸𑀫 𑀢𑀺𑀕𑀼𑀡𑀸𑀢𑀺. 𑁋

𑀲𑀩𑁆𑀩𑀕𑀼𑀡𑀲𑁂𑀝𑁆𑀞𑀢𑁆𑀢𑀸 𑀫𑀽𑀮𑀢𑁆𑀢𑀸 𑀘 𑀏𑀓𑀫𑁂𑀯 𑀯𑀼𑀢𑁆𑀢𑀁. 𑀅𑀣 𑀯𑀸 ‘‘𑀙𑀲𑀼 𑀅𑀲𑀸𑀥𑀸𑀭𑀡𑀜𑀸𑀡𑁂𑀲𑀼 𑀅𑀜𑁆𑀜𑀢𑀭𑀢𑁆𑀢𑀸 𑀢𑀕𑁆𑀕𑀳𑀡𑁂𑀦 𑀲𑁂𑀲𑀸𑀧𑀺 𑀕𑀳𑀺𑀢𑀸𑀯 𑀲𑀳𑀘𑀭𑀡𑀮𑀓𑁆𑀔𑀡𑁂𑀦𑀸’’𑀢𑀺 𑀘 𑀯𑀤𑀦𑁆𑀢𑀺. 𑀯𑀺𑀲𑁂𑀲𑀢𑁄 𑀧𑀦𑁂𑀢𑁆𑀣 𑀅𑀪𑀺𑀥𑀫𑁆𑀫𑀲𑁆𑀲 𑀓𑁂𑀯𑀮𑀁 𑀧𑀜𑁆𑀜𑀸𑀯𑀺𑀲𑀬𑀢𑁆𑀢𑀸 𑀅𑀪𑀺𑀥𑀫𑁆𑀫𑀝𑁆𑀞𑀓𑀣𑀸𑀭𑀫𑁆𑀪𑁂 𑀆𑀘𑀭𑀺𑀬𑁂𑀦 ‘‘𑀓𑀭𑀼𑀡𑀸 𑀯𑀺𑀬 𑀲𑀢𑁆𑀢𑁂𑀲𑀼, 𑀧𑀜𑁆𑀜𑀸 𑀬𑀲𑁆𑀲 𑀫𑀳𑁂𑀲𑀺𑀦𑁄’’𑀢𑀺 𑀧𑀜𑁆𑀜𑀸𑀕𑀼𑀡𑁄 𑀯𑀡𑁆𑀡𑀺𑀢𑁄 𑀢𑁂𑀲𑀁 𑀢𑁂𑀲𑀁 𑀲𑀢𑁆𑀢𑀸𑀦𑀁 𑀆𑀲𑀬𑀸𑀦𑀼𑀲𑀬𑀘𑀅𑀬𑀸𑀥𑀺𑀫𑀼𑀢𑁆𑀢𑀺𑀪𑁂𑀤𑀸𑀦𑀼𑀭𑀽𑀧𑀧𑀭𑀺𑀘𑁆𑀙𑀺𑀦𑁆𑀤𑀦𑀧𑀜𑁆𑀜𑀸𑀬, 𑀲𑀢𑁆𑀢𑁂𑀲𑀼 𑀫𑀳𑀸𑀓𑀭𑀼𑀡𑀸𑀬 𑀘 𑀅𑀥𑀺𑀓𑀸𑀭𑀢𑁆𑀢𑀸. 𑀲𑀼𑀢𑁆𑀢𑀦𑁆𑀢𑀝𑁆𑀞𑀓𑀣𑀸𑀭𑀫𑁆𑀪𑁂 ‘‘𑀓𑀭𑀼𑀡𑀸𑀲𑀻𑀢𑀮𑀳𑀤𑀬𑀁, 𑀧𑀜𑁆𑀜𑀸𑀧𑀚𑁆𑀚𑁄𑀢𑀯𑀺𑀳𑀢𑀫𑁄𑀳𑀢𑀫’’𑀦𑁆𑀢𑀺 𑀪𑀕𑀯𑀢𑁄 𑀉𑀪𑁄𑀧𑀺 𑀧𑀜𑁆𑀜𑀸𑀓𑀭𑀼𑀡𑀸𑀕𑀼𑀡𑀸 𑀯𑀡𑁆𑀡𑀺𑀢𑀸. 𑀇𑀥 𑀧𑀦 𑀯𑀺𑀦𑀬𑁂 𑀆𑀲𑀬𑀸𑀤𑀺𑀦𑀺𑀭𑀧𑁂𑀓𑁆𑀔𑀁 𑀓𑁂𑀯𑀮𑀁 𑀓𑀭𑀼𑀡𑀸𑀬 𑀧𑀸𑀓𑀢𑀺𑀓𑀲𑀢𑁆𑀢𑁂𑀦𑀸𑀧𑀺 𑀅𑀲𑁄𑀢𑀩𑁆𑀩𑀸𑀭𑀳𑀁 𑀲𑀼𑀡𑀦𑁆𑀢𑁄, 𑀅𑀧𑀼𑀘𑁆𑀙𑀺𑀢𑀩𑁆𑀩𑀸𑀭𑀳𑀁 𑀧𑀼𑀘𑁆𑀙𑀦𑁆𑀢𑁄, 𑀅𑀯𑀢𑁆𑀢𑀩𑁆𑀩𑀸𑀭𑀳𑀜𑁆𑀘 𑀯𑀤𑀦𑁆𑀢𑁄 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑀻𑀢𑀺 𑀓𑀭𑀼𑀡𑀸𑀕𑀼𑀡𑁄𑀬𑁂𑀯𑁂𑀓𑁄 𑀯𑀡𑁆𑀡𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀧𑀜𑁆𑀜𑀸𑀤𑀬𑀸 𑀅𑀢𑁆𑀢𑀧𑀭𑀢𑁆𑀣𑀳𑁂𑀢𑀽,

𑀢𑀤𑀦𑁆𑀯𑀬𑀸 𑀲𑀩𑁆𑀩𑀕𑀼𑀡𑀸 𑀚𑀺𑀦𑀲𑁆𑀲;

𑀉𑀪𑁄 𑀕𑀼𑀡𑀸 𑀢𑁂 𑀕𑀼𑀡𑀲𑀸𑀕𑀭𑀲𑁆𑀲,

𑀯𑀼𑀢𑁆𑀢𑀸 𑀇𑀥𑀸𑀘𑀭𑀺𑀬𑀯𑀭𑁂𑀦 𑀢𑀲𑁆𑀫𑀸.

𑀏𑀢𑁆𑀢𑀸𑀯𑀢𑀸 𑀅𑀝𑁆𑀞𑀓𑀣𑀸𑀤𑀺𑀕𑀸𑀣𑀸,

𑀲𑀫𑀸𑀲𑀢𑁄 𑀯𑀼𑀢𑁆𑀢𑀧𑀤𑀢𑁆𑀣𑀲𑁄𑀪𑀸;

𑀅𑀬𑀫𑁆𑀧𑀺 𑀯𑀺𑀢𑁆𑀣𑀸𑀭𑀦𑀬𑁄𑀢𑀺 𑀘𑀸𑀳𑀁,

𑀉𑀤𑁆𑀥𑀁 𑀇𑀢𑁄 𑀢𑁂 𑀧𑀝𑀺𑀲𑀁𑀔𑀺𑀧𑀸𑀫𑀺.

𑀤𑀼𑀢𑀺𑀬𑀕𑀸𑀣𑀸𑀬 𑀅𑀲𑀫𑁆𑀩𑀼𑀥𑀦𑁆𑀢𑀺 𑀥𑀫𑁆𑀫𑀸𑀦𑀁 𑀬𑀣𑀸𑀲𑀪𑀸𑀯𑀁 𑀅𑀩𑀼𑀚𑁆𑀛𑀦𑁆𑀢𑁄. 𑀩𑀼𑀤𑁆𑀥𑀦𑀺𑀲𑁂𑀯𑀺𑀢𑀦𑁆𑀢𑀺 𑀩𑀼𑀤𑁆𑀥𑀸𑀦𑀼𑀩𑀼𑀤𑁆𑀥𑀧𑀘𑁆𑀘𑁂𑀓𑀩𑀼𑀤𑁆𑀥𑁂𑀳𑀺 𑀕𑁄𑀘𑀭𑀪𑀸𑀯𑀦𑀸𑀲𑁂𑀯𑀦𑀸𑀳𑀺 𑀬𑀣𑀸𑀭𑀳𑀁 𑀦𑀺𑀲𑁂𑀯𑀺𑀢𑀁. 𑀪𑀯𑀸 𑀪𑀯𑀦𑁆𑀢𑀺 𑀯𑀢𑁆𑀢𑀫𑀸𑀦𑀪𑀯𑀢𑁄 𑀅𑀜𑁆𑀜𑀁 𑀪𑀯𑀁 𑀕𑀘𑁆𑀙𑀢𑀺 𑀉𑀧𑀕𑀘𑁆𑀙𑀢𑀺, 𑀧𑀝𑀺𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀪𑀯𑁄𑀢𑀺 𑀲𑀲𑁆𑀲𑀢𑀤𑀺𑀝𑁆𑀞𑀺. 𑀢𑀲𑁆𑀲 𑀧𑀝𑀺𑀧𑀓𑁆𑀔𑀢𑁆𑀢𑀸 𑀅𑀪𑀯𑁄𑀢𑀺 𑀉𑀘𑁆𑀙𑁂𑀤𑀤𑀺𑀝𑁆𑀞𑀺. 𑀪𑀯𑁄𑀢𑀺 𑀯𑀸 𑀯𑀼𑀤𑁆𑀥𑀺. 𑀅𑀪𑀯𑁄𑀢𑀺 𑀳𑀸𑀦𑀺. 𑀪𑀯𑁄𑀢𑀺 𑀯𑀸 𑀤𑀼𑀕𑁆𑀕𑀢𑀺. 𑀅𑀪𑀯𑁄𑀢𑀺 𑀲𑀼𑀕𑀢𑀺. ‘‘𑀅𑀧𑁆𑀧𑀫𑀸𑀡𑀸 𑀥𑀫𑁆𑀫𑀸, 𑀅𑀲𑁂𑀓𑁆𑀔𑀸 𑀥𑀫𑁆𑀫𑀸’’𑀢𑀺𑀆𑀤𑀻𑀲𑀼 (𑀥. 𑀲. 𑀢𑀺𑀓𑀫𑀸𑀢𑀺𑀓𑀸 𑁧𑁩, 𑁧𑁧) 𑀯𑀺𑀬 𑀳𑀺 𑀯𑀼𑀤𑁆𑀥𑀺𑀅𑀢𑁆𑀣𑀢𑁆𑀢𑀸 𑀅𑀓𑀸𑀭𑀲𑁆𑀲. 𑀪𑀸𑀯𑀬𑀢𑀻𑀢𑀺 𑀪𑀯𑁄, 𑀚𑀸𑀢𑀺. 𑀪𑀯𑀢𑀻𑀢𑀺 𑀯𑀸 𑀪𑀯𑁄. 𑀲𑀯𑀺𑀓𑀸𑀭𑀸 𑀩𑀳𑀼𑀯𑀺𑀥𑀔𑀦𑁆𑀥𑀼𑀧𑁆𑀧𑀢𑁆𑀢𑀺 𑀤𑀻𑀧𑀺𑀢𑀸. 𑀅𑀪𑀯𑁄𑀢𑀺 𑀯𑀺𑀦𑀸𑀲𑁄, 𑀚𑀸𑀢𑀺𑀪𑀸𑀯𑀁 𑀫𑀭𑀡𑀪𑀸𑀯𑀜𑁆𑀘 𑀕𑀘𑁆𑀙𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀢𑁆𑀣 𑀅𑀭𑀳𑀦𑁆𑀢𑀸𑀦𑀁 𑀫𑀭𑀡𑀫𑁆𑀧𑀺 𑀔𑀡𑀺𑀓𑀯𑀲𑁂𑀦 𑀕𑀳𑁂𑀢𑀩𑁆𑀩𑀁. 𑀪𑀯𑁂𑀲𑀼 𑀅𑀪𑀯𑁄 𑀪𑀯𑀸𑀪𑀯𑁄, 𑀢𑀁 𑀪𑀯𑀸𑀪𑀯𑀁, 𑀪𑀯𑁂𑀲𑀼 𑀅𑀪𑀸𑀯𑀧𑀜𑁆𑀜𑀢𑁆𑀢𑀺𑀁 𑀕𑀘𑁆𑀙𑀢𑀻𑀢𑀺 𑀅𑀢𑁆𑀣𑁄. 𑀚𑀻𑀯𑀮𑁄𑀓𑁄𑀢𑀺 𑀲𑀢𑁆𑀢𑀮𑁄𑀓𑁄, 𑀲𑀗𑁆𑀔𑀸𑀭𑀮𑁄𑀓𑀑𑀓𑀸𑀲𑀮𑁄𑀓𑀸𑀦𑀁 𑀪𑀯𑀸𑀪𑀯𑀕𑀫𑀦𑀸𑀲𑀫𑁆𑀪𑀯𑀢𑁄 𑀲𑀢𑁆𑀢𑀮𑁄𑀓𑀁 𑀚𑀻𑀯𑀮𑁄𑀓𑁄𑀢𑀺 𑀯𑀺𑀲𑁂𑀲𑁂𑀢𑀺. 𑀅𑀯𑀺𑀚𑁆𑀚𑀸𑀤𑀺𑀓𑀺𑀮𑁂𑀲𑀚𑀸𑀮𑀯𑀺𑀤𑁆𑀥𑀁𑀲𑀺𑀦𑁄𑀢𑀺 𑀏𑀢𑁆𑀣 𑀦𑀯𑀧𑀺 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀲𑀗𑁆𑀕𑀳𑀁 𑀕𑀘𑁆𑀙𑀦𑁆𑀢𑀺. 𑀅𑀧𑀘𑀬𑀕𑀸𑀫𑀺𑀢𑀸 𑀳𑀺 𑀘𑀢𑀼𑀫𑀕𑁆𑀕𑀥𑀫𑁆𑀫𑀲𑁆𑀲 𑀑𑀥𑀺𑀲𑁄 𑀅𑀯𑀺𑀚𑁆𑀚𑀸𑀤𑀺𑀓𑀺𑀮𑁂𑀲𑀚𑀸𑀮𑀯𑀺𑀤𑁆𑀥𑀁𑀲𑁄, 𑀲𑁄 𑀅𑀲𑁆𑀲 𑀅𑀢𑁆𑀣𑀺, 𑀢𑀤𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸 𑀢𑀢𑁆𑀣 𑀲𑀳𑀸𑀬𑀪𑀸𑀯𑀽𑀧𑀕𑀫𑀦𑁂𑀦 𑀦𑀺𑀩𑁆𑀩𑀸𑀦𑀲𑁆𑀲𑀸𑀧𑀺. 𑀬𑀣𑀸𑀳 ‘‘𑀬𑁄 𑀔𑁄, 𑀆𑀯𑀼𑀲𑁄, 𑀭𑀸𑀕𑀓𑁆𑀔𑀬𑁄…𑀧𑁂… 𑀇𑀤𑀁 𑀯𑀼𑀘𑁆𑀘𑀢𑀺 𑀦𑀺𑀩𑁆𑀩𑀸𑀦’’𑀦𑁆𑀢𑀺. 𑀅𑀭𑀳𑀢𑁆𑀢𑀲𑁆𑀲𑀸𑀧𑀺 𑀢𑀣𑀸 𑀭𑀸𑀕𑀸𑀤𑀺𑀓𑁆𑀔𑀬𑀯𑀘𑀦𑀲𑀩𑁆𑀪𑀸𑀯𑀢𑁄. 𑀨𑀮𑀲𑀸𑀫𑀜𑁆𑀜𑁂𑀦 𑀢𑀺𑀡𑁆𑀡𑀫𑁆𑀧𑀺 𑀨𑀮𑀸𑀦𑀁 𑀅𑀢𑁆𑀣𑀻𑀢𑀺 𑀦𑀯𑀯𑀺𑀥𑁄𑀧𑁂𑀲 ‘‘𑀅𑀯𑀺𑀚𑁆𑀚𑀸𑀤𑀺𑀓𑀺𑀮𑁂𑀲𑀚𑀸𑀮𑀯𑀺𑀤𑁆𑀥𑀁𑀲𑀻’’𑀢𑀺 𑀯𑀼𑀘𑁆𑀘𑀢𑀺. 𑀅𑀣 𑀯𑀸 𑀲𑀳𑀘𑀭𑀡𑀮𑀓𑁆𑀔𑀡𑀓𑀆𑀭𑀡𑀢𑀸𑀬 𑀧𑀝𑀺𑀧𑀓𑁆𑀔𑀕𑁄𑀘𑀭𑀕𑁆𑀕𑀳𑀡𑀢𑀸. 𑀅𑀦𑀪𑀺𑀳𑀺𑀢𑁄𑀧𑀺 𑀳𑀺 𑀥𑀫𑁆𑀫𑀲𑁆𑀲 𑀢𑀢𑁆𑀭𑀸𑀪𑀺𑀳𑀺𑀢𑁄𑀯 𑀩𑀼𑀚𑁆𑀛𑀺𑀢𑀩𑁆𑀩𑁄 𑀇𑀢𑀺 𑀯𑀘𑀦𑀢𑁄 𑀓𑀸𑀭𑀡𑀕𑁄𑀘𑀭𑀕𑁆𑀕𑀳𑀡𑁂𑀦 𑀘𑀢𑁆𑀢𑀸𑀭𑀺𑀧𑀺 𑀨𑀮𑀸𑀦𑀺 𑀕𑀳𑀺𑀢𑀸𑀦𑀺. 𑀦𑀭𑀓𑀸𑀤𑀻𑀲𑀼 𑀅𑀧𑀢𑀫𑀸𑀦𑀁 𑀥𑀸𑀭𑁂𑀢𑀺 𑀲𑀼𑀕𑀢𑀺𑀬𑀁 𑀉𑀧𑁆𑀧𑀸𑀤𑀦𑁂𑀦𑀸𑀢𑀺 𑀥𑀫𑁆𑀫𑁄. 𑀧𑀼𑀦 𑀲𑀼𑀕𑀢𑀺𑀫𑁆𑀳𑀺 𑀅𑀚𑀦𑀦𑀓𑀸𑀭𑀻 𑀅𑀓𑀼𑀲𑀮𑀥𑀫𑁆𑀫𑁂 𑀦𑀺𑀯𑀸𑀭𑁂𑀢𑁆𑀯𑀸 𑀧𑁄𑀲𑁂𑀢𑀺 𑀧𑀯𑀢𑁆𑀢𑁂𑀢𑀺 𑀯𑀟𑁆𑀠𑁂𑀢𑀻𑀢𑀺 𑀥𑀫𑁆𑀫𑁄. 𑀲𑁄 𑀧𑀦 𑀓𑀸𑀫𑀭𑀽𑀧𑀸𑀭𑀽𑀧𑀪𑁂𑀤𑀢𑁄 𑀢𑀺𑀯𑀺𑀥𑁄 𑀅𑀘𑁆𑀘𑀦𑁆𑀢𑀲𑀼𑀔𑀸𑀯𑀳𑀦𑀢𑁄, 𑀢𑀢𑁄𑀧𑀺 𑀉𑀢𑁆𑀢𑀫𑀢𑁆𑀢𑀸 𑀥𑀫𑁆𑀫𑀯𑀭𑁄.

𑀏𑀢𑁆𑀣𑀸𑀳 𑁋 ‘‘𑀘𑀢𑀼𑀦𑁆𑀦𑀁, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑀘𑁆𑀘𑀸𑀦𑀁 𑀅𑀦𑀦𑀼𑀩𑁄𑀥𑀸 𑀅𑀧𑁆𑀧𑀝𑀺𑀯𑁂𑀥𑀸 𑀏𑀯𑀫𑀺𑀤𑀁 𑀤𑀻𑀖𑀫𑀤𑁆𑀥𑀸𑀦𑀁 𑀲𑀦𑁆𑀥𑀸𑀯𑀺𑀢𑀁 𑀲𑀁𑀲𑀭𑀺𑀢’𑀦𑁆𑀢𑀺 (𑀤𑀻. 𑀦𑀺. 𑁨.𑁧𑁫𑁫; 𑀫𑀳𑀸𑀯. 𑁨𑁮𑁭) 𑀯𑀘𑀦𑀢𑁄 𑀘𑀢𑀼𑀲𑀘𑁆𑀘𑀥𑀫𑁆𑀫𑀁 𑀅𑀲𑀫𑁆𑀩𑀼𑀥𑀁 𑀪𑀯𑀸 𑀪𑀯𑀁 𑀕𑀘𑁆𑀙𑀢𑀺 𑀚𑀻𑀯𑀮𑁄𑀓𑁄𑀢𑀺 𑀲𑀺𑀤𑁆𑀥𑀁. 𑀢𑀲𑁆𑀫𑀸 𑀬𑀁 𑀅𑀲𑀫𑁆𑀩𑀼𑀥𑀁 𑀕𑀘𑁆𑀙𑀢𑀺, 𑀢𑀲𑁆𑀲𑁂𑀯 ‘‘𑀢𑀲𑁆𑀲𑀸’’𑀢𑀺 𑀅𑀦𑁆𑀢𑁂 𑀢𑀁𑀦𑀺𑀤𑁆𑀤𑁂𑀲𑁂𑀦 𑀦𑀺𑀬𑀫𑀦𑀢𑁄 𑀘𑀢𑀼𑀲𑀘𑁆𑀘𑀥𑀫𑁆𑀫𑁄𑀧𑀺 𑀅𑀯𑀺𑀚𑁆𑀚𑀸𑀤𑀺𑀓𑀺𑀮𑁂𑀲𑀚𑀸𑀮𑀯𑀺𑀤𑁆𑀥𑀁𑀲𑀻 𑀥𑀫𑁆𑀫𑀯𑀭𑁄𑀢𑀺 𑀘𑀸𑀧𑀚𑁆𑀚𑀢𑀺. 𑀅𑀜𑁆𑀜𑀣𑀸 ‘‘𑀦𑀫𑁄 𑀅𑀯𑀺𑀚𑁆𑀚𑀸𑀤𑀺𑀓𑀺𑀮𑁂𑀲𑀚𑀸𑀮𑀯𑀺𑀤𑁆𑀥𑀁𑀲𑀺𑀦𑁄 𑀥𑀫𑁆𑀫𑀯𑀭𑀲𑁆𑀲 𑀢𑀲𑁆𑀲𑀸’’𑀢𑀺 𑀢𑀁𑀦𑀺𑀤𑁆𑀤𑁂𑀲𑁂𑀦 𑀲𑀫𑀸𑀦𑀯𑀺𑀪𑀢𑁆𑀢𑀺𑀓𑀭𑀡𑀁 𑀦 𑀬𑀼𑀚𑁆𑀚𑀢𑀺 𑀅𑀢𑀺𑀧𑁆𑀧𑀲𑀗𑁆𑀕𑀦𑀺𑀬𑀫𑀦𑀢𑁄, ‘‘𑀅𑀯𑀺𑀚𑁆𑀚𑀸𑀤𑀺𑀓𑀺𑀮𑁂𑀲𑀚𑀸𑀮𑀯𑀺𑀤𑁆𑀥𑀁𑀲𑀺𑀦𑁄 𑀥𑀫𑁆𑀫𑀯𑀭𑀲𑁆𑀲𑀸’’𑀢𑀺 𑀯𑀘𑀦𑀁 𑀯𑀺𑀲𑁂𑀲𑀦𑀯𑀘𑀦𑀁. 𑀢𑀲𑁆𑀫𑀸 𑀤𑀼𑀓𑁆𑀔𑀲𑀫𑀼𑀤𑀬𑀲𑀘𑁆𑀘𑀸𑀦𑀁 𑀢𑀩𑁆𑀪𑀸𑀯𑀧𑁆𑀧𑀲𑀗𑁆𑀕𑁄 𑀦𑀢𑁆𑀣𑀻𑀢𑀺 𑀘𑁂? 𑀦, 𑀢𑀁𑀦𑀺𑀤𑁆𑀤𑁂𑀲𑁂𑀦 𑀲𑀫𑀸𑀦𑀯𑀺𑀪𑀢𑁆𑀢𑀺𑀝𑁆𑀞𑀸𑀦𑁂 𑀅𑀯𑀺𑀲𑁂𑀲𑀺𑀢𑀢𑁆𑀢𑀸. 𑀅𑀧𑀺 𑀘 𑀫𑀕𑁆𑀕𑀲𑀘𑁆𑀘𑀦𑀺𑀭𑁄𑀥𑀲𑀘𑁆𑀘𑁂𑀲𑀼 𑀨𑀮𑀸𑀦𑀁 𑀅𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀦𑀯 𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑀸 𑀲𑀗𑁆𑀕𑀳𑀺𑀢𑀸𑀢𑀺 𑀯𑀘𑀦𑀯𑀺𑀭𑁄𑀥𑁄, 𑀨𑀮𑀸𑀦𑀁 𑀅𑀲𑀗𑁆𑀕𑀳𑁂 𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸𑀬𑀁 𑀦 𑀓𑁂𑀯𑀮𑀁 𑀅𑀭𑀺𑀬𑀫𑀕𑁆𑀕𑁄 𑀘𑁂𑀯 𑀦𑀺𑀩𑁆𑀩𑀸𑀦𑀜𑁆𑀘, 𑀅𑀧𑀺 𑀘 𑀅𑀭𑀺𑀬𑀨𑀮𑀥𑀫𑁆𑀫𑁂𑀳𑀺 𑀲𑀤𑁆𑀥𑀺𑀁 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄𑀧𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀭𑀸𑀕𑀯𑀺𑀭𑀸𑀕𑀫𑀦𑁂𑀚𑀫𑀲𑁄𑀓𑀁…𑀧𑁂… 𑀥𑀫𑁆𑀫𑀫𑀺𑀫𑀁 𑀲𑀭𑀡𑀢𑁆𑀣𑀫𑀼𑀧𑁂𑀳𑀻’’𑀢𑀺 (𑀯𑀺. 𑀯. 𑁮𑁮𑁭) 𑀯𑀘𑀦𑀯𑀺𑀭𑁄𑀥𑁄 𑀘𑀸𑀢𑀺 𑀧𑀼𑀩𑁆𑀩𑀸𑀧𑀭𑀯𑀺𑀭𑀼𑀤𑁆𑀥𑀸 𑀏𑀲𑀸 𑀕𑀸𑀣𑀸 𑀲𑀸𑀲𑀦𑀯𑀺𑀭𑀼𑀤𑁆𑀥𑀸 𑀘𑀸’’𑀢𑀺? 𑀯𑀼𑀘𑁆𑀘𑀢𑁂 𑁋 𑀲𑀩𑁆𑀩𑀫𑁂𑀢𑀫𑀬𑀼𑀢𑁆𑀢𑀁 𑀯𑀼𑀢𑁆𑀢𑀕𑀸𑀣𑀢𑁆𑀣𑀸𑀚𑀸𑀦𑀦𑀢𑁄. 𑀏𑀢𑁆𑀣 𑀳𑀺 𑀆𑀘𑀭𑀺𑀬𑁂𑀦 𑀧𑀯𑀢𑁆𑀢𑀺𑀧𑀯𑀢𑁆𑀢𑀺𑀳𑁂𑀢𑀼𑀯𑀺𑀲𑀬𑀯𑀺𑀪𑀸𑀕𑁄 𑀘 𑀤𑀲𑁆𑀲𑀺𑀢𑁄. 𑀓𑀣𑀁? 𑀢𑀢𑁆𑀣 𑀅𑀲𑀫𑁆𑀩𑀼𑀥𑀦𑁆𑀢𑀺 𑀅𑀲𑀫𑁆𑀩𑁄𑀥𑁄, 𑀲𑁄 𑀅𑀢𑁆𑀣𑀢𑁄 𑀅𑀯𑀺𑀚𑁆𑀚𑀸, 𑀢𑀸𑀬 𑀘 𑀢𑀡𑁆𑀳𑀼𑀧𑀸𑀤𑀸𑀦𑀸𑀦𑀺 𑀕𑀳𑀺𑀢𑀸𑀦𑀺, 𑀢𑀬𑁄𑀧𑀺 𑀢𑁂 𑀥𑀫𑁆𑀫𑀸 𑀲𑀫𑀼𑀤𑀬𑀲𑀘𑁆𑀘𑀁, 𑀪𑀯𑀸𑀪𑀯𑀦𑁆𑀢𑀺 𑀏𑀢𑁆𑀣 𑀤𑀼𑀓𑁆𑀔𑀲𑀘𑁆𑀘𑀁 𑀯𑀼𑀢𑁆𑀢𑀁. 𑀲𑀼𑀕𑀢𑀺𑀤𑀼𑀕𑁆𑀕𑀢𑀺𑀧𑁆𑀧𑀪𑁂𑀤𑁄 𑀳𑀺 𑀪𑀯𑁄 𑀅𑀢𑁆𑀣𑀢𑁄 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀳𑁄𑀦𑁆𑀢𑀺. ‘‘𑀏𑀯𑀫𑁂𑀢𑀲𑁆𑀲 𑀓𑁂𑀯𑀮𑀲𑁆𑀲 𑀤𑀼𑀓𑁆𑀔𑀓𑁆𑀔𑀦𑁆𑀥𑀲𑁆𑀲 𑀲𑀫𑀼𑀤𑀬𑁄 𑀳𑁄𑀢𑀻’’𑀢𑀺 (𑀫𑀳𑀸𑀯. 𑁧) 𑀯𑀘𑀦𑀢𑁄 𑀤𑀼𑀓𑁆𑀔𑀧𑁆𑀧𑀯𑀢𑁆𑀢𑀺 𑀧𑀯𑀢𑁆𑀢𑀺 𑀦𑀸𑀫, 𑀤𑀼𑀓𑁆𑀔𑀲𑀫𑀼𑀤𑀬𑁄 𑀧𑀯𑀢𑁆𑀢𑀺𑀳𑁂𑀢𑀼 𑀦𑀸𑀫, 𑀅𑀯𑀺𑀚𑁆𑀚𑀸𑀲𑀗𑁆𑀔𑀸𑀢𑀲𑁆𑀲 𑀘 𑀧𑀯𑀢𑁆𑀢𑀺𑀳𑁂𑀢𑀼𑀲𑁆𑀲 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀦𑀺𑀭𑁄𑀥𑀫𑀕𑁆𑀕𑀲𑀘𑁆𑀘𑀤𑁆𑀯𑀬𑀁 𑀯𑀺𑀲𑀬𑁄 𑀦𑀸𑀫. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀢𑀢𑁆𑀣 𑀓𑀢𑀫𑀸 𑀅𑀯𑀺𑀚𑁆𑀚𑀸? 𑀤𑀼𑀓𑁆𑀔𑁂 𑀅𑀜𑁆𑀜𑀸𑀡𑀁…𑀧𑁂… 𑀤𑀼𑀓𑁆𑀔𑀦𑀺𑀭𑁄𑀥𑀕𑀸𑀫𑀺𑀦𑀺𑀬𑀸 𑀧𑀝𑀺𑀧𑀤𑀸𑀬 𑀅𑀜𑁆𑀜𑀸𑀡’’𑀦𑁆𑀢𑀺 (𑀯𑀺𑀪. 𑁨𑁨𑁬).

𑀏𑀢𑁆𑀣 𑀘 𑀦𑀺𑀭𑁄𑀥𑀲𑀘𑁆𑀘𑀁 𑀩𑀼𑀤𑁆𑀥𑁂𑀦 𑀕𑁄𑀘𑀭𑀸𑀲𑁂𑀯𑀦𑀸𑀬 𑀆𑀲𑁂𑀯𑀺𑀢𑀁, 𑀫𑀕𑁆𑀕𑀲𑀘𑁆𑀘𑀁 𑀪𑀸𑀯𑀦𑀸𑀲𑁂𑀯𑀦𑀸𑀬. 𑀏𑀢𑁆𑀢𑀸𑀯𑀢𑀸 𑀅𑀲𑀫𑁆𑀩𑀼𑀥𑀁 𑀩𑀼𑀤𑁆𑀥𑀦𑀺𑀲𑁂𑀯𑀺𑀢𑀁 𑀬𑀦𑁆𑀢𑀺 𑀉𑀧𑀬𑁄𑀕𑀧𑁆𑀧𑀢𑁆𑀢𑁄 𑀬𑁄 𑀯𑀺𑀲𑀬𑁄 𑀦𑀺𑀭𑁄𑀥𑁄 𑀘 𑀫𑀕𑁆𑀕𑁄 𑀘, 𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀸𑀯𑀺𑀚𑁆𑀚𑀸𑀤𑀺𑀓𑀺𑀮𑁂𑀲𑀚𑀸𑀮𑀢𑁆𑀢𑀬𑀯𑀺𑀤𑁆𑀥𑀁𑀲𑀺𑀦𑁄 𑀦𑀫𑁄 𑀥𑀫𑁆𑀫𑀯𑀭𑀲𑁆𑀲𑀸𑀢𑀺 𑀅𑀬𑀁 𑀕𑀸𑀣𑀸𑀬 𑀅𑀢𑁆𑀣𑁄. 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄𑀧𑀺 𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀲𑁆𑀲 𑀲𑀼𑀢𑁆𑀢𑀦𑁆𑀢𑀦𑀬𑁂𑀦 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑁆𑀢𑀸 𑀓𑀺𑀮𑁂𑀲𑀯𑀺𑀤𑁆𑀥𑀁𑀲𑀦𑀲𑀻𑀮𑀢𑀸𑀬 ‘‘𑀅𑀯𑀺𑀚𑁆𑀚𑀸𑀤𑀺𑀓𑀺𑀮𑁂𑀲𑀚𑀸𑀮𑀯𑀺𑀤𑁆𑀥𑀁𑀲𑀻’’𑀢𑀺 𑀯𑀢𑁆𑀢𑀼𑀁 𑀲𑀫𑁆𑀪𑀯𑀢𑀺. 𑀏𑀯𑀜𑁆𑀳𑀺 𑀲𑀢𑀺 𑀭𑀸𑀕𑀯𑀺𑀭𑀸𑀕𑀸𑀢𑀺 𑀕𑀸𑀣𑀢𑁆𑀣𑁄, 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺…𑀧𑁂… 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀻𑀢𑀺 𑀲𑀼𑀢𑁆𑀢𑀢𑁆𑀣𑁄 𑀘 𑀅𑀲𑁂𑀲𑀢𑁄 𑀕𑀳𑀺𑀢𑁄 𑀳𑁄𑀢𑀺. 𑀅𑀣 𑀯𑀸 𑀇𑀫𑀸𑀬 𑀕𑀸𑀣𑀸𑀬 𑀓𑁂𑀯𑀮𑀁 𑀧𑀭𑀺𑀬𑀢𑁆𑀢𑀺𑀥𑀫𑁆𑀫𑁄𑀯 𑀕𑀳𑀺𑀢𑁄 𑀳𑁄𑀢𑀺, 𑀬𑀁 𑀲𑀦𑁆𑀥𑀸𑀬𑀸𑀳 ‘‘𑀲𑁄 𑀥𑀫𑁆𑀫𑀁 𑀤𑁂𑀲𑁂𑀢𑀺 𑀆𑀤𑀺𑀓𑀮𑁆𑀬𑀸𑀡𑀁…𑀧𑁂… 𑀩𑁆𑀭𑀳𑁆𑀫𑀘𑀭𑀺𑀬𑀁 𑀧𑀓𑀸𑀲𑁂𑀢𑀻’’𑀢𑀺 (𑀤𑀻. 𑀦𑀺. 𑁧.𑁧𑁯𑁦; 𑀧𑀸𑀭𑀸. 𑁧), 𑀢𑀫𑁆𑀧𑀺 𑀅𑀲𑀫𑁆𑀩𑀼𑀥𑀁 𑀩𑀼𑀤𑁆𑀥𑁂𑀳𑁂𑀯 𑀦𑀺𑀲𑁂𑀯𑀺𑀢𑀁 𑀕𑁄𑀘𑀭𑀸𑀲𑁂𑀯𑀦𑀸𑀬 𑀅𑀦𑀜𑁆𑀜𑀦𑀺𑀲𑁂𑀯𑀺𑀢𑀁. 𑀬𑀣𑀸𑀳 ‘‘𑀪𑀕𑀯𑀁𑀫𑀽𑀮𑀓𑀸 𑀦𑁄, 𑀪𑀦𑁆𑀢𑁂, 𑀥𑀫𑁆𑀫𑀸 𑀪𑀕𑀯𑀁𑀦𑁂𑀢𑁆𑀢𑀺𑀓𑀸 𑀪𑀕𑀯𑀁𑀧𑀝𑀺𑀲𑀭𑀡𑀸…𑀧𑁂… 𑀪𑀕𑀯𑀢𑁄 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀥𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺 (𑀲𑀁. 𑀦𑀺. 𑁨.𑁧𑁪𑁬).

𑀢𑀢𑀺𑀬𑀕𑀸𑀣𑀸𑀬 𑀲𑀻𑀮𑀸𑀤𑀬𑁄 𑀓𑀺𑀜𑁆𑀘𑀸𑀧𑀺 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀸 𑀬𑀣𑀸𑀲𑀫𑁆𑀪𑀯𑀁 𑀮𑀩𑁆𑀪𑀦𑁆𑀢𑀺, 𑀢𑀣𑀸𑀧𑀺 𑀅𑀦𑁆𑀢𑁂 ‘‘𑀅𑀭𑀺𑀬𑀲𑀗𑁆𑀖’’𑀦𑁆𑀢𑀺 𑀯𑀘𑀦𑀢𑁄 𑀲𑀻𑀮𑀸𑀤𑀬𑁄 𑀘𑀢𑁆𑀢𑀸𑀭𑁄 𑀥𑀫𑁆𑀫𑀓𑁆𑀔𑀦𑁆𑀥𑀸 𑀮𑁄𑀓𑀼𑀢𑁆𑀢𑀭𑀸𑀯. 𑀏𑀢𑁆𑀣 𑀘 ‘‘𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀯𑀺𑀫𑀼𑀢𑁆𑀢𑀺𑀜𑀸𑀡𑀧𑁆𑀧𑀪𑀼𑀢𑀻𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁂 𑀲𑀭𑀽𑀧𑁂𑀓𑀲𑁂𑀲𑀁 𑀓𑀢𑁆𑀯𑀸 ‘‘𑀯𑀺𑀫𑀼𑀢𑁆𑀢𑀺𑀜𑀸𑀡𑀧𑁆𑀧𑀪𑀼𑀢𑀻𑀳𑀻’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀘 𑀓𑀺𑀜𑁆𑀘𑀸𑀧𑀺 𑀯𑀺𑀫𑀼𑀢𑁆𑀢𑀻𑀢𑀺 𑀨𑀮𑀥𑀫𑁆𑀫𑀸𑀯 𑀲𑀼𑀢𑁆𑀢𑁂 𑀅𑀥𑀺𑀧𑁆𑀧𑁂𑀢𑀸, 𑀢𑀣𑀸𑀧𑀺 ‘‘𑀫𑀕𑁆𑀕𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀫𑀕𑁆𑀕𑀁 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀧𑀳𑀻𑀦𑁂 𑀓𑀺𑀮𑁂𑀲𑁂 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀨𑀮𑀁 𑀧𑀘𑁆𑀘𑀯𑁂𑀓𑁆𑀔𑀢𑀺. 𑀦𑀺𑀩𑁆𑀩𑀸𑀦𑀁 𑀧𑀘𑁆𑀘𑀯𑁂𑀓𑁆𑀔𑀢𑀻’’𑀢𑀺 (𑀧𑀝𑁆𑀞𑀸. 𑁧.𑁧.𑁪𑁧𑁦) 𑀯𑀘𑀦𑀢𑁄 𑀫𑀕𑁆𑀕𑀸𑀤𑀺𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀯𑀺𑀫𑀼𑀢𑁆𑀢𑀺𑀜𑀸𑀡𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀯𑀺𑀫𑀼𑀢𑁆𑀢𑀺 𑀯𑀺𑀫𑁄𑀓𑁆𑀔𑁄 𑀔𑀬𑁄𑀢𑀺 𑀳𑀺 𑀅𑀢𑁆𑀣𑀢𑁄 𑀏𑀓𑀁. ‘‘𑀔𑀬𑁂 𑀜𑀸𑀡𑀁 𑀅𑀦𑀼𑀧𑁆𑀧𑀸𑀤𑁂 𑀜𑀸𑀡𑀦𑁆𑀢𑀺 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁧𑁪𑁨; 𑀤𑀻. 𑀦𑀺. 𑁩.𑁩𑁦𑁪) 𑀏𑀢𑁆𑀣 𑀔𑀬𑁄 𑀦𑀸𑀫 𑀫𑀕𑁆𑀕𑁄, 𑀭𑀸𑀕𑀓𑁆𑀔𑀬𑁄 𑀤𑁄𑀲𑀓𑁆𑀔𑀬𑁄𑀢𑀺 𑀨𑀮𑀦𑀺𑀩𑁆𑀩𑀸𑀦𑀸𑀦𑀁 𑀅𑀥𑀺𑀯𑀘𑀦’’𑀦𑁆𑀢𑀺 𑀲𑀼𑀢𑁆𑀢𑁂 𑀆𑀕𑀢𑀫𑁂𑀯. 𑀧𑀳𑀻𑀦𑀓𑀺𑀮𑁂𑀲𑀸𑀦𑀁 𑀔𑀬𑁄 𑀧𑀸𑀓𑀢𑀺𑀓𑁄 𑀔𑀬𑁄 𑀏𑀯. 𑀧𑀪𑀼𑀢𑀺-𑀲𑀤𑁆𑀤𑁂𑀦 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀙 𑀅𑀪𑀺𑀜𑁆𑀜𑀸 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸𑀢𑀺 𑀏𑀯𑀫𑀸𑀤𑀬𑁄 𑀕𑀼𑀡𑀸 𑀲𑀗𑁆𑀕𑀳𑀺𑀢𑀸. 𑀲𑀫𑀦𑁆𑀦𑀸𑀕𑀫𑀝𑁆𑀞𑁂𑀦 𑀅𑀧𑀭𑀺𑀳𑀻𑀦𑀝𑁆𑀞𑁂𑀦 𑀘 𑀬𑀼𑀢𑁆𑀢𑁄. 𑀔𑁂𑀢𑁆𑀢𑀁 𑀚𑀦𑀸𑀦𑀁 𑀓𑀼𑀲𑀮𑀢𑁆𑀣𑀺𑀓𑀸𑀦𑀦𑁆𑀢𑀺 ‘‘𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺 𑀲𑀼𑀢𑁆𑀢𑀢𑁄 𑀓𑀼𑀲𑀮𑀲𑁆𑀲 𑀯𑀺𑀭𑀼𑀳𑀦𑀝𑁆𑀞𑀸𑀦𑀢𑁆𑀢𑀸, 𑀲𑀼𑀢𑁆𑀢𑀦𑁆𑀢𑀦𑀬𑁂𑀦 𑀉𑀧𑀦𑀺𑀲𑁆𑀲𑀬𑀧𑀘𑁆𑀘𑀬𑀢𑁆𑀢𑀸 𑀘 𑀓𑀸𑀫𑀁 𑀓𑀼𑀲𑀮𑀲𑁆𑀲 𑀔𑁂𑀢𑁆𑀢𑀁 𑀳𑁄𑀢𑀺 𑀲𑀗𑁆𑀖𑁄, 𑀦 𑀓𑀼𑀲𑀮𑀢𑁆𑀣𑀺𑀓𑀸𑀦𑀁 𑀚𑀦𑀸𑀦𑀁. 𑀢𑀲𑁆𑀫𑀸 𑀦 𑀬𑀼𑀚𑁆𑀚𑀢𑀻𑀢𑀺 𑀘𑁂? 𑀦, 𑀲𑀼𑀢𑁆𑀢𑀢𑁆𑀣𑀲𑀫𑁆𑀪𑀯𑀢𑁄. 𑀲𑀼𑀢𑁆𑀢𑁂 ‘‘𑀅𑀦𑀼𑀢𑁆𑀢𑀭𑀁 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀮𑁄𑀓𑀲𑁆𑀲𑀸’’𑀢𑀺 (𑀲𑀁. 𑀦𑀺. 𑁪.𑁩𑁪𑁧) 𑀳𑀺 𑀯𑀼𑀢𑁆𑀢𑀁. 𑀓𑀲𑁆𑀲 𑀮𑁄𑀓𑀲𑁆𑀲? 𑀧𑀼𑀜𑁆𑀜𑀢𑁆𑀣𑀺𑀓𑀲𑁆𑀲 𑀔𑁂𑀢𑁆𑀢𑀁 𑀲𑀗𑁆𑀖𑁄, 𑀧𑀼𑀜𑁆𑀜𑀼𑀧𑀦𑀺𑀲𑁆𑀲𑀬𑀢𑁆𑀢𑀸 𑀧𑀼𑀜𑁆𑀜𑀓𑁆𑀔𑁂𑀢𑁆𑀢𑀁 𑀳𑁄𑀢𑀺 𑀲𑀗𑁆𑀖𑁄, 𑀓𑀼𑀲𑀮𑀢𑁆𑀣𑀺𑀓𑀸𑀦𑀦𑁆𑀢𑀺 𑀘 𑀯𑀼𑀘𑁆𑀘𑀦𑁆𑀢𑀺. 𑀮𑁄𑀓𑁂𑀧𑀺 𑀳𑀺 𑀤𑁂𑀯𑀤𑀢𑁆𑀢𑀲𑁆𑀲 𑀔𑁂𑀢𑁆𑀢𑀁 𑀬𑀜𑁆𑀜𑀤𑀢𑁆𑀢𑀲𑁆𑀲 𑀔𑁂𑀢𑁆𑀢𑀁 𑀲𑀸𑀮𑀺𑀬𑀯𑀼𑀧𑀦𑀺𑀲𑁆𑀲𑀬𑀢𑁆𑀢𑀸 𑀲𑀸𑀮𑀺𑀔𑁂𑀢𑁆𑀢𑀁 𑀬𑀯𑀔𑁂𑀢𑁆𑀢𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺. 𑀅𑀭𑀺𑀬𑀲𑀗𑁆𑀖𑀦𑁆𑀢𑀺 𑀯𑀺𑀕𑀢𑀓𑀺𑀮𑁂𑀲𑀢𑁆𑀢𑀸 𑀅𑀭𑀺𑀬𑀁 𑀧𑀭𑀺𑀲𑀼𑀤𑁆𑀥𑀁 𑀅𑀭𑀺𑀬𑀸𑀦𑀁, 𑀅𑀭𑀺𑀬𑀪𑀸𑀯𑀁 𑀯𑀸 𑀧𑀢𑁆𑀢𑀁 𑀲𑀻𑀮𑀤𑀺𑀝𑁆𑀞𑀺𑀲𑀸𑀫𑀜𑁆𑀜𑁂𑀦 𑀲𑀗𑁆𑀖𑀢𑀢𑁆𑀢𑀸 𑀲𑀗𑁆𑀖𑀁. ‘‘𑀅𑀭𑀺𑀬-𑀲𑀤𑁆𑀤𑁂𑀦 𑀲𑀫𑁆𑀫𑀼𑀢𑀺𑀲𑀗𑁆𑀖𑀁 𑀦𑀺𑀯𑀸𑀭𑁂𑀢𑀻’’𑀢𑀺 𑀓𑁂𑀘𑀺 𑀮𑀺𑀔𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁 𑀯𑀺𑀫𑀼𑀢𑁆𑀢𑀺𑀜𑀸𑀡𑀕𑀼𑀡𑀕𑁆𑀕𑀳𑀡𑁂𑀦 𑀯𑀺𑀲𑁂𑀲𑀺𑀢𑀢𑁆𑀢𑀸. 𑀲𑀺𑀭𑀲𑀸𑀢𑀺 𑀇𑀫𑀺𑀦𑀸 𑀓𑀸𑀫𑀁 𑀓𑀸𑀬𑀦𑀢𑀺𑀁 𑀤𑀲𑁆𑀲𑁂𑀢𑀺, 𑀢𑀣𑀸𑀧𑀺 𑀉𑀢𑁆𑀢𑀫𑀲𑀗𑁆𑀖𑁂 𑀕𑀼𑀡𑀕𑀸𑀭𑀯𑁂𑀦 𑀉𑀢𑁆𑀢𑀫𑀗𑁆𑀕𑀫𑁂𑀯 𑀦𑀺𑀤𑁆𑀤𑀺𑀲𑀦𑁆𑀢𑁄 ‘‘𑀲𑀺𑀭𑀲𑀸 𑀦𑀫𑀸𑀫𑀻’’𑀢𑁆𑀬𑀸𑀳. 𑀲𑀺𑀭𑀲𑁆𑀲 𑀧𑀦 𑀉𑀢𑁆𑀢𑀫𑀢𑀸 𑀉𑀢𑁆𑀢𑀫𑀸𑀦𑀁 𑀘𑀓𑁆𑀔𑀼𑀲𑁄𑀢𑀺𑀦𑁆𑀤𑁆𑀭𑀺𑀬𑀸𑀦𑀁 𑀦𑀺𑀲𑁆𑀲𑀬𑀢𑁆𑀢𑀸, 𑀢𑁂𑀲𑀁 𑀉𑀢𑁆𑀢𑀫𑀢𑀸 𑀘 𑀤𑀲𑁆𑀲𑀦𑀸𑀦𑀼𑀢𑁆𑀢𑀭𑀺𑀬𑀲𑀯𑀦𑀸𑀦𑀼𑀢𑁆𑀢𑀭𑀺𑀬𑀳𑁂𑀢𑀼𑀢𑀸𑀬 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣𑀸𑀳 𑁋 𑀅𑀦𑀼𑀲𑀦𑁆𑀥𑀺𑀓𑀼𑀲𑀮𑁄

‘‘𑀉𑀧𑁄𑀕𑁆𑀖𑀸𑀢𑁄 𑀧𑀤𑀜𑁆𑀘𑁂𑀯, 𑀧𑀤𑀢𑁆𑀣𑁄 𑀧𑀤𑀯𑀺𑀕𑁆𑀕𑀳𑁄;

𑀘𑁄𑀤𑀦𑀸𑀧𑁆𑀭𑀢𑁆𑀬𑀯𑀚𑁆𑀚𑀸𑀦𑀁, 𑀩𑁆𑀬𑀸𑀔𑁆𑀬𑀸 𑀢𑀦𑁆𑀢𑀲𑁆𑀲 𑀙𑀩𑁆𑀩𑀺𑀥𑀸’’𑀢𑀺. 𑁋

𑀏𑀯𑀫𑀯𑀢𑁆𑀯𑀸 𑀓𑀲𑁆𑀫𑀸 𑀭𑀢𑀦𑀢𑁆𑀢𑀬𑀧𑀡𑀸𑀫𑀁 𑀧𑀞𑀫𑀁 𑀯𑀼𑀢𑁆𑀢𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀲𑀢𑀸𑀘𑀸𑀭𑀢𑁆𑀢𑀸. 𑀆𑀘𑀸𑀭𑁄 𑀓𑀺𑀭𑁂𑀲 𑀲𑀧𑁆𑀧𑀼𑀭𑀺𑀲𑀸𑀦𑀁, 𑀬𑀤𑀺𑀤𑀁 𑀲𑀁𑀯𑀡𑁆𑀡𑀦𑀸𑀭𑀫𑁆𑀪𑁂 𑀭𑀢𑀦𑀢𑁆𑀢𑀬𑀧𑀽𑀚𑀸𑀯𑀺𑀥𑀸𑀦𑀁. 𑀢𑀲𑁆𑀫𑀸 ‘‘𑀲𑀢𑀸𑀘𑀸𑀭𑀢𑁄 𑀪𑀝𑁆𑀞𑀸 𑀫𑀸 𑀫𑀬𑀁 𑀳𑁄𑀫𑀸’’𑀢𑀺 𑀓𑀭𑀻𑀬𑀢𑀺, 𑀘𑀢𑀼𑀕𑀫𑁆𑀪𑀻𑀭𑀪𑀸𑀯𑀬𑀼𑀢𑁆𑀢𑀜𑁆𑀘 𑀯𑀺𑀦𑀬𑀧𑀺𑀝𑀓𑀁 𑀲𑀁𑀯𑀡𑁆𑀡𑁂𑀢𑀼𑀓𑀸𑀫𑀲𑁆𑀲 𑀫𑀳𑀸𑀲𑀫𑀼𑀤𑁆𑀤𑀁 𑀑𑀕𑀸𑀳𑀦𑁆𑀢𑀲𑁆𑀲 𑀯𑀺𑀬 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑀲𑀫𑀦𑁆𑀦𑀸𑀕𑀢𑀲𑁆𑀲𑀸𑀧𑀺 𑀫𑀳𑀦𑁆𑀢𑀁 𑀪𑀬𑀁 𑀳𑁄𑀢𑀺, 𑀪𑀬𑀓𑁆𑀔𑀬𑀸𑀯𑀳𑀜𑁆𑀘𑁂𑀢𑀁 𑀭𑀢𑀦𑀢𑁆𑀢𑀬𑀕𑀼𑀡𑀸𑀦𑀼𑀲𑁆𑀲𑀭𑀡𑀚𑀦𑀺𑀢𑀁 𑀧𑀡𑀸𑀫𑀧𑀽𑀚𑀸𑀯𑀺𑀥𑀸𑀦𑀁. 𑀬𑀣𑀸𑀳 ‘‘𑀏𑀯𑀁 𑀩𑀼𑀤𑁆𑀥𑀁 𑀲𑀭𑀦𑁆𑀢𑀸𑀦’’𑀦𑁆𑀢𑀺𑀆𑀤𑀺 (𑀲𑀁. 𑀦𑀺. 𑁧.𑁨𑁪𑁯). 𑀅𑀧𑀺𑀘𑀸𑀘𑀭𑀺𑀬𑁄 𑀲𑀢𑁆𑀣𑀼𑀧𑀽𑀚𑀸𑀯𑀺𑀥𑀸𑀦𑁂𑀦 𑀅𑀲𑀢𑁆𑀣𑀭𑀺 𑀲𑀢𑁆𑀣𑀸𑀪𑀺𑀦𑀺𑀯𑁂𑀲𑀲𑁆𑀲 𑀮𑁄𑀓𑀲𑁆𑀲 𑀬𑀣𑀸𑀪𑀽𑀢𑀁 𑀲𑀢𑁆𑀣𑀭𑀺 𑀏𑀯 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑁂 𑀲𑀢𑁆𑀣𑀼𑀲𑀫𑁆𑀪𑀸𑀯𑀦𑀁 𑀉𑀧𑁆𑀧𑀸𑀤𑁂𑀢𑀺, 𑀅𑀲𑀢𑁆𑀣𑀭𑀺 𑀲𑀢𑁆𑀣𑀼𑀲𑀫𑁆𑀪𑀸𑀯𑀦𑀁 𑀧𑀭𑀺𑀘𑁆𑀘𑀚𑀸𑀧𑁂𑀢𑀺, ‘‘𑀢𑀣𑀸𑀕𑀢𑀧𑁆𑀧𑀯𑁂𑀤𑀺𑀢𑀁 𑀥𑀫𑁆𑀫𑀯𑀺𑀦𑀬𑀁 𑀅𑀢𑁆𑀢𑀦𑁄 𑀤𑀳𑀢𑀻’’𑀢𑀺 𑀯𑀼𑀢𑁆𑀢𑀤𑁄𑀲𑀁 𑀧𑀭𑀺𑀳𑀭𑀢𑀺. 𑀅𑀦𑁆𑀢𑀭𑀸𑀬𑀩𑀳𑀼𑀮𑀢𑁆𑀢𑀸 𑀔𑀦𑁆𑀥𑀲𑀦𑁆𑀢𑀢𑀺𑀬𑀸 𑀯𑀺𑀧𑁆𑀧𑀓𑀢𑀸𑀬 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀬 𑀅𑀢𑁆𑀢𑀦𑁄 𑀆𑀬𑀼𑀯𑀡𑁆𑀡𑀲𑀼𑀔𑀩𑀮𑀸𑀦𑀁 𑀧𑀭𑀺𑀓𑁆𑀔𑀬𑀲𑀫𑁆𑀪𑀯𑀸𑀲𑀗𑁆𑀓𑀸𑀬 ‘‘𑀅𑀪𑀺𑀯𑀸𑀤𑀦𑀲𑀻𑀮𑀺𑀲𑁆𑀲…𑀧𑁂… 𑀆𑀬𑀼 𑀯𑀡𑁆𑀡𑁄 𑀲𑀼𑀔𑀁 𑀩𑀮’’𑀦𑁆𑀢𑀺 (𑀥. 𑀧. 𑁧𑁦𑁯) 𑀯𑀼𑀢𑁆𑀢𑀸𑀦𑀺𑀲𑀁𑀲𑁂 𑀬𑀸𑀯 𑀲𑀁𑀯𑀡𑁆𑀡𑀦𑀸𑀧𑀭𑀺𑀬𑁄𑀲𑀸𑀦𑀸 𑀧𑀢𑁆𑀣𑁂𑀢𑀺. 𑀅𑀧𑀺 𑀘𑁂𑀢𑁆𑀣 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀡𑀸𑀫𑀧𑀽𑀚𑀸𑀯𑀺𑀥𑀸𑀦𑀁 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀪𑀸𑀯𑀸𑀥𑀺𑀕𑀫𑀢𑁆𑀣𑀁 𑀩𑀼𑀤𑁆𑀥𑀬𑀸𑀦𑀁 𑀧𑀝𑀺𑀧𑀚𑁆𑀚𑀦𑁆𑀢𑀸𑀦𑀁 𑀉𑀲𑁆𑀲𑀸𑀳𑀁 𑀚𑀦𑁂𑀢𑀺. 𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀪𑁂𑀤𑀲𑁆𑀲, 𑀮𑁄𑀓𑀼𑀢𑁆𑀢𑀭𑀲𑁆𑀲𑁂𑀯 𑀯𑀸 𑀲𑀤𑁆𑀥𑀫𑁆𑀫𑀲𑁆𑀲 𑀧𑀽𑀚𑀸𑀯𑀺𑀥𑀸𑀦𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀪𑀸𑀯𑀸𑀥𑀺𑀕𑀫𑀢𑁆𑀣𑀁 𑀧𑀘𑁆𑀘𑁂𑀓𑀩𑀼𑀤𑁆𑀥𑀬𑀸𑀦𑀁 𑀧𑀝𑀺𑀧𑀚𑁆𑀚𑀦𑁆𑀢𑀸𑀦𑀁 𑀉𑀲𑁆𑀲𑀸𑀳𑀁 𑀚𑀦𑁂𑀢𑀺. 𑀲𑀤𑁆𑀥𑀫𑁆𑀫𑀧𑀝𑀺𑀯𑁂𑀥𑀫𑀢𑁆𑀢𑀸𑀪𑀺𑀮𑀸𑀲𑀺𑀦𑁄 𑀳𑀺 𑀢𑁂. 𑀧𑀭𑀫𑀢𑁆𑀣𑀲𑀗𑁆𑀖𑀧𑀽𑀚𑀸𑀯𑀺𑀥𑀸𑀦𑀁 𑀧𑀭𑀫𑀢𑁆𑀣𑀲𑀗𑁆𑀖𑀪𑀸𑀯𑀸𑀥𑀺𑀕𑀫𑀢𑁆𑀣𑀁 𑀲𑀸𑀯𑀓𑀬𑀸𑀦𑀁 𑀧𑀝𑀺𑀧𑀚𑁆𑀚𑀦𑁆𑀢𑀸𑀦𑀁 𑀉𑀲𑁆𑀲𑀸𑀳𑀁 𑀚𑀦𑁂𑀢𑀺, 𑀫𑀗𑁆𑀕𑀮𑀸𑀤𑀻𑀦𑀺 𑀯𑀸 𑀲𑀸𑀢𑁆𑀣𑀸𑀦𑀺 𑀅𑀦𑀦𑁆𑀢𑀭𑀸𑀬𑀸𑀦𑀺 𑀘𑀺𑀭𑀝𑁆𑀞𑀺𑀢𑀺𑀓𑀸𑀦𑀺 𑀩𑀳𑀼𑀫𑀢𑀸𑀦𑀺 𑀘 𑀪𑀯𑀦𑁆𑀢𑀻𑀢𑀺 𑀏𑀯𑀁𑀮𑀤𑁆𑀥𑀺𑀓𑀸𑀦𑀁 𑀘𑀺𑀢𑁆𑀢𑀧𑀭𑀺𑀢𑁄𑀲𑀦𑀢𑁆𑀣𑀁 ‘‘𑀧𑀽𑀚𑀸 𑀘 𑀧𑀽𑀚𑀦𑁂𑀬𑁆𑀬𑀸𑀦’’𑀦𑁆𑀢𑀺 𑀪𑀕𑀯𑀢𑀸 𑀧𑀲𑀢𑁆𑀣𑀫𑀗𑁆𑀕𑀮𑀁 𑀓𑀭𑁄𑀢𑀺. 𑀯𑀼𑀘𑁆𑀘𑀢𑁂 𑀘 𑁋

‘‘𑀫𑀗𑁆𑀕𑀮𑀁 𑀪𑀕𑀯𑀸 𑀩𑀼𑀤𑁆𑀥𑁄, 𑀥𑀫𑁆𑀫𑁄 𑀲𑀗𑁆𑀖𑁄 𑀘 𑀫𑀗𑁆𑀕𑀮𑀁;

𑀫𑀗𑁆𑀕𑀮𑀸𑀤𑀻𑀦𑀺 𑀲𑀸𑀢𑁆𑀣𑀸𑀦𑀺, 𑀲𑀻𑀖𑀁 𑀲𑀺𑀚𑁆𑀛𑀦𑁆𑀢𑀺 𑀲𑀩𑁆𑀩𑀲𑁄.

‘‘𑀲𑀢𑁆𑀣𑀼 𑀧𑀽𑀚𑀸𑀯𑀺𑀥𑀸𑀦𑁂𑀦, 𑀏𑀯𑀫𑀸𑀤𑀻 𑀩𑀳𑀽 𑀕𑀼𑀡𑁂;

𑀮𑀪𑀢𑀻𑀢𑀺 𑀯𑀺𑀚𑀸𑀦𑀦𑁆𑀢𑁄, 𑀲𑀢𑁆𑀣𑀼𑀧𑀽𑀚𑀸𑀧𑀭𑁄 𑀲𑀺𑀬𑀸’’𑀢𑀺.

𑀏𑀢𑁆𑀣 𑀘 𑀲𑀢𑁆𑀣𑀼𑀧𑀥𑀸𑀦𑀢𑁆𑀢𑀸 𑀥𑀫𑁆𑀫𑀲𑀗𑁆𑀖𑀸𑀦𑀁 𑀧𑀽𑀚𑀸𑀯𑀺𑀥𑀸𑀦𑀁 𑀲𑀢𑁆𑀣𑀼𑀧𑀽𑀚𑀸𑀯𑀺𑀥𑀸𑀦𑀫𑀺𑀘𑁆𑀘𑁂𑀯 𑀤𑀝𑁆𑀞𑀩𑁆𑀩𑀁 𑀲𑀸𑀲𑀦𑀢𑁄 𑀮𑁄𑀓𑀢𑁄 𑀘. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 𑁋

‘‘𑀲𑀢𑁆𑀣𑀸’’𑀢𑀺 𑀥𑀫𑁆𑀫𑁄 𑀲𑀼𑀕𑀢𑁂𑀦 𑀯𑀼𑀢𑁆𑀢𑁄;

𑀦𑀺𑀩𑁆𑀩𑀸𑀦𑀓𑀸𑀮𑁂 𑀬𑀫𑀢𑁄 𑀲 𑀲𑀢𑁆𑀣𑀸;

𑀲𑀼𑀯𑀢𑁆𑀣𑀺𑀕𑀸𑀣𑀸𑀲𑀼 ‘‘𑀢𑀣𑀸𑀕𑀢𑁄’’𑀢𑀺;

𑀲𑀗𑁆𑀖𑁄 𑀘 𑀯𑀼𑀢𑁆𑀢𑁄 𑀬𑀫𑀢𑁄 𑀲 𑀲𑀢𑁆𑀣𑀸.

𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋

𑀥𑀫𑁆𑀫𑀓𑀸𑀬𑁄 𑀬𑀢𑁄 𑀲𑀢𑁆𑀣𑀸, 𑀥𑀫𑁆𑀫𑁄 𑀲𑀢𑁆𑀣𑀸 𑀢𑀢𑁄 𑀫𑀢𑁄;

𑀥𑀫𑁆𑀫𑀝𑁆𑀞𑀺𑀢𑁄 𑀲𑁄 𑀲𑀗𑁆𑀖𑁄 𑀘, 𑀲𑀢𑁆𑀣𑀼𑀲𑀗𑁆𑀔𑁆𑀬𑀁 𑀦𑀺𑀕𑀘𑁆𑀙𑀢𑀺.

𑀲𑀦𑁆𑀢𑀺 𑀳𑀺 𑀮𑁄𑀓𑁂 𑀯𑀢𑁆𑀢𑀸𑀭𑁄 𑀓𑁄𑀲𑀕𑀢𑀁 𑀅𑀲𑀺𑀁 𑀕𑀳𑁂𑀢𑁆𑀯𑀸 𑀞𑀺𑀢𑀁 𑀧𑀼𑀭𑀺𑀲𑀁 𑀯𑀺𑀲𑀼𑀁 𑀅𑀧𑀭𑀸𑀫𑀲𑀺𑀢𑁆𑀯𑀸 ‘‘𑀅𑀲𑀺𑀁 𑀕𑀳𑁂𑀢𑁆𑀯𑀸 𑀞𑀺𑀢𑁄 𑀏𑀲𑁄’’𑀢𑀺. 𑀢𑁂𑀦𑁂𑀯𑀸𑀳 𑀘𑀸𑀭𑀺𑀬𑀫𑀸𑀢𑁆𑀭𑀘𑁆𑀘𑁂𑀯𑀸 𑁋

‘‘𑀦𑀫𑀢𑁆𑀣𑀼 𑀩𑀼𑀤𑁆𑀥𑀭𑀢𑁆𑀦𑀸𑀬, 𑀥𑀫𑁆𑀫𑀭𑀢𑁆𑀦𑀸𑀬 𑀢𑁂 𑀦𑀫𑁄;

𑀦𑀫𑀢𑁆𑀣𑀼 𑀲𑀗𑁆𑀖𑀭𑀢𑁆𑀦𑀸𑀬, 𑀢𑀺𑀭𑀢𑁆𑀦𑀲𑀫𑀯𑀸𑀦𑀬𑀻’’𑀢𑀺.

𑀅𑀧𑀺𑀘 𑀲𑀩𑁆𑀩𑀥𑀫𑁆𑀫𑁂𑀲𑀼 𑀅𑀧𑁆𑀧𑀝𑀺𑀳𑀢𑀜𑀸𑀡𑀦𑀺𑀫𑀺𑀢𑁆𑀢𑀸𑀦𑀼𑀢𑁆𑀢𑀭𑀯𑀺𑀫𑁄𑀓𑁆𑀔𑀧𑀸𑀢𑀼𑀪𑀸𑀯𑀸𑀪𑀺𑀲𑀗𑁆𑀔𑀸𑀢𑀁 𑀔𑀦𑁆𑀥𑀲𑀦𑁆𑀢𑀸𑀦𑀫𑀼𑀧𑀸𑀤𑀸𑀬 ‘‘𑀩𑀼𑀤𑁆𑀥𑁄’’𑀢𑀺 𑀬𑀤𑀺 𑀧𑀜𑁆𑀜𑀸𑀧𑀺𑀬𑀢𑀺, 𑀥𑀫𑁆𑀫𑁄 𑀧𑀡𑀸𑀫𑀸𑀭𑀳𑁄𑀢𑀺 𑀓𑀸 𑀏𑀯 𑀓𑀣𑀸, 𑀲𑀗𑁆𑀖𑁄 𑀘 ‘‘𑀲𑀗𑁆𑀖𑁂 𑀕𑁄𑀢𑀫𑀺 𑀤𑁂𑀳𑀺, 𑀲𑀗𑁆𑀖𑁂 𑀢𑁂 𑀤𑀺𑀦𑁆𑀦𑁂 𑀅𑀳𑀜𑁆𑀘𑁂𑀯 𑀧𑀽𑀚𑀺𑀢𑁄 𑀪𑀯𑀺𑀲𑁆𑀲𑀸𑀫𑀺 𑀲𑀗𑁆𑀖𑁄 𑀘𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀪𑀸𑀚𑀦𑀦𑁆𑀢𑀺 𑀤𑀻𑀧𑁂𑀢𑀺. 𑀅𑀣 𑀯𑀸 ‘‘𑀩𑀼𑀤𑁆𑀥𑀲𑀼𑀩𑁄𑀥𑀺𑀢𑁄 𑀥𑀫𑁆𑀫𑁄 𑀆𑀘𑀭𑀺𑀬𑀧𑀭𑀫𑁆𑀧𑀭𑀸𑀬 𑀲𑀼𑀯𑀡𑁆𑀡𑀪𑀸𑀚𑀦𑁂 𑀧𑀓𑁆𑀔𑀺𑀢𑁆𑀢𑀢𑁂𑀮𑀫𑀺𑀯 𑀅𑀧𑀭𑀺𑀳𑀸𑀧𑁂𑀢𑁆𑀯𑀸 𑀬𑀸𑀯𑀚𑁆𑀚𑀢𑀦𑀸 𑀆𑀪𑀢𑀢𑁆𑀢𑀸 𑀏𑀯 𑀫𑀸𑀤𑀺𑀲𑀸𑀦𑀫𑁆𑀧𑀺 𑀲𑁄𑀢𑀤𑁆𑀯𑀸𑀭𑀫𑀦𑀼𑀧𑁆𑀧𑀢𑁆𑀢𑁄’’𑀢𑀺 𑀲𑀗𑁆𑀖𑀲𑁆𑀲 𑀆𑀘𑀭𑀺𑀬𑁄 𑀅𑀢𑀻𑀯 𑀆𑀤𑀭𑁂𑀦 𑀧𑀡𑀸𑀫𑀁 𑀓𑀭𑁄𑀢𑀺 ‘‘𑀲𑀺𑀭𑀲𑀸 𑀦𑀫𑀸𑀫𑀻’’𑀢𑀺.

𑀏𑀯𑀁 𑀅𑀦𑁂𑀓𑀯𑀺𑀥𑀁 𑀧𑀡𑀸𑀫𑀧𑁆𑀧𑀬𑁄𑀚𑀦𑀁 𑀯𑀤𑀦𑁆𑀢𑀺, 𑀆𑀘𑀭𑀺𑀬𑁂𑀦 𑀧𑀦 𑀅𑀥𑀺𑀧𑁆𑀧𑁂𑀢𑀧𑁆𑀧𑀬𑁄𑀚𑀦𑀁 𑀅𑀢𑁆𑀢𑀦𑀸 𑀏𑀯 𑀯𑀼𑀢𑁆𑀢𑀁 ‘‘𑀇𑀘𑁆𑀘𑁂𑀯𑀫𑀘𑁆𑀘𑀦𑁆𑀢𑀦𑀫𑀲𑁆𑀲𑀦𑁂𑀬𑁆𑀬’’𑀦𑁆𑀢𑀺𑀆𑀤𑀺𑀦𑀸 𑀘𑀢𑀼𑀢𑁆𑀣𑀕𑀸𑀣𑀸𑀬. 𑀇𑀘𑁆𑀘𑁂𑀯𑀦𑁆𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑁄 𑀭𑀢𑀦𑀢𑁆𑀢𑀬𑀧𑀽𑀚𑀸𑀯𑀺𑀥𑀸𑀦𑀧𑀭𑀺𑀲𑀫𑀢𑁆𑀢𑀢𑁆𑀣𑁄. 𑀬𑀤𑀺 𑀏𑀯𑀁 𑀬𑀣𑀸𑀯𑀺𑀳𑀺𑀢𑀫𑀢𑁆𑀢𑀫𑁂𑀯 𑀧𑀽𑀚𑀸𑀯𑀺𑀥𑀸𑀦𑀁 𑀅𑀭𑀳𑀢𑀺 𑀭𑀢𑀦𑀢𑁆𑀢𑀬𑀁, 𑀦 𑀢𑀢𑁄 𑀉𑀤𑁆𑀥𑀦𑁆𑀢𑀺 𑀆𑀧𑀚𑁆𑀚𑀢𑀻𑀢𑀺 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀦𑀺𑀯𑀸𑀭𑀡𑀢𑁆𑀣𑀁 ‘‘𑀏𑀯𑀫𑀘𑁆𑀘𑀦𑁆𑀢𑀦𑀫𑀲𑁆𑀲𑀦𑁂𑀬𑁆𑀬’’𑀦𑁆𑀢𑀺 𑀆𑀳. 𑀢𑀢𑁆𑀣 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀬𑀣𑀸𑀯𑀼𑀢𑁆𑀢𑀯𑀺𑀥𑀺𑀁 𑀤𑀲𑁆𑀲𑁂𑀢𑀺. 𑀬𑀣𑀸𑀯𑀼𑀢𑁆𑀢𑁂𑀦 𑀯𑀺𑀥𑀺𑀦𑀸, 𑀅𑀜𑁆𑀜𑁂𑀦 𑀯𑀸 𑀢𑀸𑀤𑀺𑀲𑁂𑀦 𑀅𑀘𑁆𑀘𑀦𑁆𑀢𑀫𑁂𑀯 𑀫𑀼𑀳𑀼𑀢𑁆𑀢𑀫𑀧𑀺 𑀅𑀝𑁆𑀞𑀢𑁆𑀯𑀸 𑀅𑀪𑀺𑀓𑁆𑀔𑀡𑀁 𑀦𑀺𑀭𑀦𑁆𑀢𑀭𑀁 𑀦𑀺𑀬𑀫𑁂𑀦 𑀦𑀫𑀲𑁆𑀲𑀦𑀸𑀭𑀳𑀁 𑀦𑀫𑀲𑁆𑀲𑀫𑀸𑀦𑀲𑁆𑀲 𑀳𑀺𑀢𑀫𑀳𑀧𑁆𑀨𑀮𑀓𑀭𑀡𑀢𑁄𑀢𑀺 𑀅𑀢𑁆𑀣𑁄. 𑀏𑀯𑀁𑀯𑀺𑀥𑀁 𑀤𑀼𑀮𑁆𑀮𑀪𑀝𑁆𑀞𑁂𑀦 𑀫𑀳𑀧𑁆𑀨𑀮𑀝𑁆𑀞𑁂𑀦 𑀘 𑀲𑀺𑀤𑁆𑀥𑀁 𑀭𑀢𑀦𑀪𑀸𑀯𑀁 𑀭𑀢𑀦𑀢𑁆𑀢𑀬𑀁 𑀦𑀫𑀲𑁆𑀲𑀫𑀸𑀦𑁄 𑀬𑀁 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀁 𑀅𑀮𑀢𑁆𑀣𑀁 𑀅𑀮𑀪𑀺𑀁. 𑀅𑀓𑀼𑀲𑀮𑀫𑀮𑀁 𑀢𑀤𑀗𑁆𑀕𑀸𑀤𑀺𑀧𑁆𑀧𑀳𑀸𑀦𑁂𑀦 𑀧𑀼𑀦𑀸𑀢𑀻𑀢𑀺 𑀧𑀼𑀜𑁆𑀜𑀁. 𑀓𑀺𑀮𑁂𑀲𑀤𑀭𑀣𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀬𑀸 𑀲𑀻𑀢𑀮𑀢𑁆𑀢𑀸 𑀘𑀺𑀢𑁆𑀢𑀁 𑀅𑀪𑀺𑀲𑀦𑁆𑀤𑁂𑀢𑀻𑀢𑀺 𑀅𑀪𑀺𑀲𑀦𑁆𑀤𑁄. 𑀧𑀼𑀜𑁆𑀜𑀜𑁆𑀘 𑀢𑀁 𑀅𑀪𑀺𑀲𑀦𑁆𑀤𑁄 𑀘𑀸𑀢𑀺 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄, 𑀢𑀁 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀁. 𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀧𑀼𑀜𑁆𑀜𑀫𑀳𑀢𑁆𑀢𑀁’’𑀦𑁆𑀢𑀺 𑀪𑀡𑀦𑁆𑀢𑀺, ‘‘𑀯𑀺𑀧𑀼𑀮’’𑀦𑁆𑀢𑀺 𑀯𑀘𑀦𑀢𑁄 𑀲𑁄 𑀅𑀢𑁆𑀣𑁄 𑀦 𑀬𑀼𑀚𑁆𑀚𑀢𑀻𑀢𑀺 𑀆𑀘𑀭𑀺𑀬𑁄. 𑀅𑀣 𑀯𑀸 𑀧𑀼𑀜𑁆𑀜𑀸𑀦𑀁 𑀅𑀪𑀺𑀲𑀦𑁆𑀤𑁄 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑁄, 𑀢𑀁 𑀧𑀼𑀜𑁆𑀜𑀸𑀪𑀺𑀲𑀦𑁆𑀤𑀁. 𑀲𑀦𑁆𑀤 𑀲𑀯𑀦𑁂𑀢𑀺 𑀥𑀸𑀢𑀼. 𑀢𑀲𑁆𑀫𑀸 𑀧𑀼𑀜𑁆𑀜𑀲𑁄𑀢𑀁 𑀧𑀼𑀜𑁆𑀜𑀼𑀲𑁆𑀲𑀬𑀦𑁆𑀢𑀺 𑀅𑀢𑁆𑀣𑁄 𑀬𑀼𑀚𑁆𑀚𑀢𑀺, 𑀢𑀁 𑀧𑀦 𑀯𑀺𑀧𑀼𑀮𑀁, 𑀦 𑀧𑀭𑀺𑀢𑁆𑀢𑀦𑁆𑀢𑀺 𑀤𑀲𑁆𑀲𑀺𑀢𑀁 𑀯𑀺𑀧𑀼𑀮-𑀲𑀤𑁆𑀤𑁂𑀦.

𑀧𑀜𑁆𑀘𑀫𑀕𑀸𑀣𑀸 𑀬𑀲𑁆𑀫𑀺𑀁 𑀯𑀺𑀦𑀬𑀧𑀺𑀝𑀓𑁂 𑀧𑀸𑀴𑀺𑀢𑁄 𑀘 𑀅𑀢𑁆𑀣𑀢𑁄 𑀘 𑀅𑀦𑀽𑀦𑀁 𑀮𑀚𑁆𑀚𑀻𑀧𑀼𑀕𑁆𑀕𑀮𑁂𑀲𑀼 𑀧𑀯𑀢𑁆𑀢𑀦𑀝𑁆𑀞𑁂𑀦 𑀞𑀺𑀢𑁂 𑀲𑀓𑀮𑀁 𑀢𑀺𑀯𑀺𑀥𑀫𑁆𑀧𑀺 𑀲𑀸𑀲𑀦𑀁 𑀢𑁂𑀲𑁆𑀯𑁂𑀯 𑀧𑀼𑀕𑁆𑀕𑀮𑁂𑀲𑀼 𑀧𑀢𑀺𑀝𑁆𑀞𑀺𑀢𑀁 𑀳𑁄𑀢𑀺. 𑀓𑀲𑁆𑀲 𑀲𑀸𑀲𑀦𑀦𑁆𑀢𑀺 𑀘𑁂? 𑀅𑀝𑁆𑀞𑀺𑀢𑀲𑁆𑀲 𑀪𑀕𑀯𑀢𑁄. 𑀪𑀕𑀯𑀸 𑀳𑀺 𑀞𑀺𑀢𑀺𑀳𑁂𑀢𑀼𑀪𑀽𑀢𑀸𑀬 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀬𑀸 𑀅𑀪𑀸𑀯𑁂𑀦 𑀅𑀝𑁆𑀞𑀺𑀢𑁄𑀢𑀺 𑀯𑀼𑀘𑁆𑀘𑀢𑀺. 𑀉𑀘𑁆𑀙𑁂𑀤𑀤𑀺𑀝𑁆𑀞𑀺𑀓𑁄 𑀳𑀺 𑀧𑀭𑀮𑁄𑀓𑁂 𑀦𑀺𑀭𑀧𑁂𑀓𑁆𑀔𑁄 𑀓𑁂𑀯𑀮𑀁 𑀓𑀸𑀫𑀲𑀼𑀔𑀮𑁆𑀮𑀺𑀓𑀸𑀦𑀼𑀬𑁄𑀕𑀫𑀦𑀼𑀬𑀼𑀜𑁆𑀚𑀦𑁆𑀢𑁄 𑀢𑀺𑀝𑁆𑀞𑀢𑀺, 𑀦 𑀧𑀭𑀮𑁄𑀓𑀳𑀺𑀢𑀸𑀦𑀺 𑀧𑀼𑀜𑁆𑀜𑀸𑀦𑀺 𑀓𑀢𑁆𑀢𑀼𑀁 𑀩𑁆𑀬𑀸𑀯𑀝𑁄 𑀳𑁄𑀢𑀺, 𑀲𑀲𑁆𑀲𑀢𑀤𑀺𑀝𑁆𑀞𑀺𑀓𑁄 𑀢𑀸𑀦𑀺 𑀓𑀢𑁆𑀢𑀼𑀁 𑀆𑀬𑀽𑀳𑀢𑀺. 𑀪𑀕𑀯𑀸 𑀧𑀦 𑀢𑀣𑀸 𑀅𑀢𑀺𑀝𑁆𑀞𑀦𑁆𑀢𑁄 𑀅𑀦𑀸𑀬𑀽𑀳𑀦𑁆𑀢𑁄 𑀫𑀚𑁆𑀛𑀺𑀫𑀁 𑀧𑀝𑀺𑀧𑀤𑀁 𑀧𑀝𑀺𑀧𑀚𑁆𑀚𑀦𑁆𑀢𑁄 𑀲𑀬𑀜𑁆𑀘 𑀑𑀖𑀁 𑀢𑀭𑀺, 𑀧𑀭𑁂 𑀘 𑀢𑀸𑀭𑁂𑀲𑀺. 𑀬𑀣𑀸𑀳 ‘‘𑀅𑀧𑁆𑀧𑀢𑀺𑀝𑁆𑀞𑀁 𑀔𑁆𑀯𑀸𑀳𑀁, 𑀆𑀯𑀼𑀲𑁄, 𑀅𑀦𑀸𑀬𑀽𑀳𑀁 𑀑𑀖𑀫𑀢𑀭𑀺’’𑀦𑁆𑀢𑀺 (𑀲𑀁. 𑀦𑀺. 𑁧.𑁧). 𑀘𑀢𑀼𑀩𑁆𑀭𑀳𑁆𑀫𑀯𑀺𑀳𑀸𑀭𑀯𑀲𑁂𑀦 𑀲𑀢𑁆𑀢𑁂𑀲𑀼 𑀲𑀼𑀝𑁆𑀞𑀼 𑀲𑀫𑁆𑀫𑀸 𑀘 𑀞𑀺𑀢𑀲𑁆𑀲𑀸𑀢𑀺 𑀅𑀢𑁆𑀣𑀯𑀲𑁂𑀦 𑀯𑀸 𑀲𑀼𑀲𑀡𑁆𑀞𑀺𑀢𑀲𑁆𑀲. 𑀲𑀼𑀲𑀡𑁆𑀞𑀺𑀢𑀢𑁆𑀢𑀸 𑀳𑁂𑀲 𑀓𑁂𑀯𑀮𑀁 𑀲𑀢𑁆𑀢𑀸𑀦𑀁 𑀤𑀼𑀓𑁆𑀔𑀁 𑀅𑀧𑀦𑁂𑀢𑀼𑀓𑀸𑀫𑁄 𑀳𑀺𑀢𑀁 𑀉𑀧𑀲𑀁𑀳𑀭𑀺𑀢𑀼𑀓𑀸𑀫𑁄 𑀲𑀫𑁆𑀧𑀢𑁆𑀢𑀺𑀬𑀸 𑀘 𑀧𑀫𑁄𑀤𑀺𑀢𑁄 𑀅𑀧𑀓𑁆𑀔𑀧𑀢𑀺𑀢𑁄 𑀘 𑀳𑀼𑀢𑁆𑀯𑀸 𑀯𑀺𑀦𑀬𑀁 𑀤𑁂𑀲𑁂𑀢𑀺, 𑀢𑀲𑁆𑀫𑀸 𑀇𑀫𑀲𑁆𑀫𑀺𑀁 𑀯𑀺𑀦𑀬𑀲𑀁𑀯𑀡𑁆𑀡𑀦𑀸𑀥𑀺𑀓𑀸𑀭𑁂 𑀲𑀸𑀭𑀼𑀧𑁆𑀧𑀸𑀬 𑀣𑀼𑀢𑀺𑀬𑀸 𑀣𑁄𑀫𑁂𑀦𑁆𑀢𑁄 𑀆𑀳 ‘‘𑀲𑀼𑀲𑀡𑁆𑀞𑀺𑀢𑀲𑁆𑀲𑀸’’𑀢𑀺. 𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀫𑀦𑀸𑀧𑀺𑀬𑁂 𑀘 𑀔𑁄, 𑀪𑀺𑀓𑁆𑀔𑀯𑁂, 𑀓𑀫𑁆𑀫𑀯𑀺𑀧𑀸𑀓𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑁂’’𑀢𑀺 (𑀤𑀻. 𑀦𑀺. 𑀅𑀝𑁆𑀞. 𑁨.𑁩𑁫; 𑀫. 𑀦𑀺. 𑀅𑀝𑁆𑀞. 𑁨.𑁩𑁮𑁬) 𑀲𑀼𑀢𑁆𑀢𑀲𑁆𑀲, ‘‘𑀲𑀼𑀲𑀡𑁆𑀞𑀸𑀦𑀸 𑀲𑀼𑀭𑀽𑀧𑀢𑀸’’𑀢𑀺 (𑀔𑀼. 𑀧𑀸. 𑁮.𑁧𑁧) 𑀲𑀼𑀢𑁆𑀢𑀲𑁆𑀲 𑀘 𑀯𑀲𑁂𑀦 𑀲𑀼𑀲𑀡𑁆𑀞𑀺𑀢𑀲𑁆𑀲𑀸𑀢𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄, 𑀲𑁄 𑀅𑀥𑀺𑀧𑁆𑀧𑁂𑀢𑀸𑀥𑀺𑀓𑀸𑀭𑀸𑀦𑀼𑀭𑀽𑀧𑁄 𑀦 𑀳𑁄𑀢𑀺. 𑀅𑀫𑀺𑀲𑁆𑀲𑀦𑁆𑀢𑀺 𑀓𑀺𑀁 𑀯𑀺𑀦𑀬𑀁 𑀅𑀫𑀺𑀲𑁆𑀲𑀁, 𑀉𑀤𑀸𑀳𑀼 𑀧𑀼𑀩𑁆𑀩𑀸𑀘𑀭𑀺𑀬𑀸𑀦𑀼𑀪𑀸𑀯𑀦𑁆𑀢𑀺? 𑀦𑁄𑀪𑀬𑀫𑁆𑀧𑀺. 𑀅𑀫𑀺𑀲𑁆𑀲𑀸 𑀏𑀯 𑀳𑀺 𑀯𑀺𑀦𑀬𑀝𑁆𑀞𑀓𑀣𑀸. 𑀢𑀲𑁆𑀫𑀸 𑀪𑀸𑀯𑀦𑀧𑀼𑀁𑀲𑀓𑀯𑀲𑁂𑀦 𑀅𑀫𑀺𑀲𑁆𑀲𑀁 𑀢𑀁 𑀯𑀡𑁆𑀡𑀬𑀺𑀲𑁆𑀲𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀼𑀩𑁆𑀩𑀸𑀘𑀭𑀺𑀬𑀸𑀦𑀼𑀪𑀸𑀯𑀦𑁆𑀢𑀺 𑀅𑀝𑁆𑀞𑀓𑀣𑀸 ‘‘𑀬𑀲𑁆𑀫𑀸 𑀧𑀼𑀭𑁂 𑀅𑀝𑁆𑀞𑀓𑀣𑀸 𑀅𑀓𑀁𑀲𑀽’’𑀢𑀺 𑀯𑀘𑀦𑀢𑁄 𑀢𑁂𑀲𑀁 𑀆𑀦𑀼𑀪𑀸𑀯𑁄 𑀦𑀸𑀫 𑀳𑁄𑀢𑀺. 𑀓𑀺𑀜𑁆𑀘𑀺 𑀅𑀧𑀼𑀩𑁆𑀩𑀁 𑀤𑀺𑀲𑁆𑀯𑀸 𑀲𑀦𑁆𑀢𑀺 𑀳𑀺 𑀮𑁄𑀓𑁂 𑀯𑀢𑁆𑀢𑀸𑀭𑁄 ‘‘𑀓𑀲𑁆𑀲𑁂𑀲 𑀆𑀦𑀼𑀪𑀸𑀯𑁄’’𑀢𑀺. 𑀅𑀣 𑀯𑀸 𑀪𑀕𑀯𑀢𑁄 𑀅𑀥𑀺𑀧𑁆𑀧𑀸𑀬𑀁 𑀅𑀦𑀼𑀕𑀦𑁆𑀢𑁆𑀯𑀸 𑀢𑀁𑀢𑀁𑀧𑀸𑀞𑁂 𑀅𑀢𑁆𑀣𑀁 𑀪𑀸𑀯𑀬𑀢𑀺 𑀯𑀺𑀪𑀸𑀯𑀬𑀢𑀺, 𑀢𑀲𑁆𑀲 𑀢𑀲𑁆𑀲 𑀯𑀸 𑀅𑀢𑁆𑀣𑀲𑁆𑀲 𑀪𑀸𑀯𑀦𑀸 𑀯𑀺𑀪𑀸𑀯𑀦𑀸𑀢𑀺 𑀆𑀦𑀼𑀪𑀸𑀯𑁄 𑀯𑀼𑀘𑁆𑀘𑀢𑀺 𑀅𑀝𑁆𑀞𑀓𑀣𑀸.

𑀧𑀼𑀩𑁆𑀩𑀸𑀘𑀭𑀺𑀬𑀸𑀦𑀼𑀪𑀸𑀯𑁂 𑀲𑀢𑀺 𑀓𑀺𑀁 𑀧𑀼𑀦 𑀢𑀁 𑀯𑀡𑁆𑀡𑀬𑀺𑀲𑁆𑀲𑀦𑁆𑀢𑀺 𑀇𑀫𑀺𑀦𑀸 𑀆𑀭𑀫𑁆𑀪𑁂𑀦𑀸𑀢𑀺 𑀢𑀢𑁄 𑀯𑀼𑀘𑁆𑀘𑀦𑁆𑀢𑀺 𑀙𑀝𑁆𑀞𑀲𑀢𑁆𑀢𑀫𑀝𑁆𑀞𑀫𑀦𑀯𑀫𑀕𑀸𑀣𑀸𑀬𑁄. 𑀢𑀢𑁆𑀣 𑀅𑀭𑀺𑀬𑀫𑀕𑁆𑀕𑀜𑀸𑀡𑀫𑁆𑀩𑀼𑀦𑀸 𑀦𑀺𑀤𑁆𑀥𑁄𑀢𑀫𑀮𑀢𑁆𑀢𑀸 𑀯𑀺𑀲𑀼𑀤𑁆𑀥𑀯𑀺𑀚𑁆𑀚𑁂𑀳𑀺, 𑀢𑁂𑀦𑁂𑀯 𑀦𑀺𑀤𑁆𑀥𑁄𑀢𑀸𑀲𑀯𑀢𑁆𑀢𑀸 𑀯𑀺𑀲𑀼𑀤𑁆𑀥𑀧𑀝𑀺𑀲𑀫𑁆𑀪𑀺𑀤𑁂𑀳𑀺, 𑀯𑀺𑀲𑀼𑀤𑁆𑀥𑀧𑀝𑀺𑀲𑀫𑁆𑀪𑀺𑀤𑀢𑁆𑀢𑀸 𑀘 𑀲𑀤𑁆𑀥𑀫𑁆𑀫𑀲𑀁𑀯𑀡𑁆𑀡𑀦𑀓𑁄𑀯𑀺𑀤𑁂𑀳𑀻𑀢𑀺 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀓𑁂𑀘𑀺 ‘‘𑀧𑀼𑀩𑁆𑀩𑀸𑀘𑀭𑀺𑀬𑀸𑀢𑀺 𑀯𑀼𑀢𑁆𑀢𑁂 𑀮𑁄𑀓𑀸𑀘𑀭𑀺𑀬𑀸𑀧𑀺, 𑀲𑀸𑀲𑀦𑁂 𑀭𑀸𑀳𑀼𑀮𑀸𑀘𑀭𑀺𑀬𑀸𑀤𑀬𑁄𑀧𑀺 𑀲𑀗𑁆𑀕𑀬𑁆𑀳𑀦𑁆𑀢𑀺, 𑀢𑁂 𑀅𑀧𑀦𑁂𑀢𑀼𑀁 𑀓𑀸𑀫𑀜𑁆𑀘𑀸𑀢𑀺𑀆𑀤𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. ‘‘𑀢𑀁 𑀯𑀡𑁆𑀡𑀬𑀺𑀲𑁆𑀲’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀼𑀩𑁆𑀩𑀝𑁆𑀞𑀓𑀣𑀸𑀬 𑀊𑀦𑀪𑀸𑀯𑁄 𑀤𑀲𑁆𑀲𑀺𑀢𑁄𑀢𑀺 𑀘𑁂? 𑀦, 𑀘𑀺𑀢𑁆𑀢𑁂𑀳𑀺 𑀦𑀬𑁂𑀳𑀺 𑀲𑀁𑀯𑀡𑁆𑀡𑀺𑀢𑁄𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀓𑀸𑀫𑀜𑁆𑀘𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀲𑀤𑁆𑀥𑀫𑁆𑀫𑀁 𑀲𑀁𑀯𑀡𑁆𑀡𑁂𑀢𑀼𑀁 𑀓𑁄𑀯𑀺𑀤𑁂𑀳𑀺, 𑀢𑀸𑀬 𑀲𑀁𑀯𑀡𑁆𑀡𑀦𑀸𑀬 𑀯𑀸 𑀓𑁄𑀯𑀺𑀤𑁂𑀳𑀺 𑀲𑀤𑁆𑀥𑀫𑁆𑀫𑀲𑀁𑀯𑀡𑁆𑀡𑀦𑀓𑁄𑀯𑀺𑀤𑁂𑀳𑀺.

𑀲𑀮𑁆𑀮𑁂𑀔𑀺𑀬𑁂𑀢𑀺 𑀓𑀺𑀮𑁂𑀲𑀚𑀸𑀢𑀁 𑀩𑀸𑀳𑀼𑀮𑁆𑀮𑀁 𑀯𑀸 𑀲𑀮𑁆𑀮𑀺𑀔𑀢𑀺 𑀢𑀦𑀼𑀁 𑀓𑀭𑁄𑀢𑀻𑀢𑀺 𑀲𑀮𑁆𑀮𑁂𑀔𑁄, 𑀲𑀮𑁆𑀮𑁂𑀔𑀲𑁆𑀲 𑀪𑀸𑀯𑁄 𑀲𑀮𑁆𑀮𑁂𑀔𑀺𑀬𑀁, 𑀢𑀲𑁆𑀫𑀺𑀁 𑀲𑀮𑁆𑀮𑁂𑀔𑀺𑀬𑁂. 𑀦𑁄𑀲𑀼𑀮𑀪𑀽𑀧𑀫𑁂𑀳𑀻𑀢𑀺 𑀅𑀲𑀼𑀮𑀪𑀽𑀧𑀫𑁂𑀳𑀺. 𑀫𑀳𑀸𑀯𑀺𑀳𑀸𑀭𑀲𑁆𑀲𑀸𑀢𑀺 𑀫𑀳𑀸𑀯𑀺𑀳𑀸𑀭𑀯𑀁𑀲𑀲𑁆𑀲. 𑀧𑀜𑁆𑀜𑀸𑀬 𑀅𑀘𑁆𑀘𑀼𑀕𑁆𑀕𑀢𑀝𑁆𑀞𑁂𑀦 𑀥𑀚𑁄 𑀉𑀧𑀫𑀸 𑀏𑀢𑁂𑀲𑀦𑁆𑀢𑀺 𑀥𑀚𑀽𑀧𑀫𑀸, 𑀢𑁂𑀳𑀺 𑀥𑀚𑀽𑀧𑀫𑁂𑀳𑀺. 𑀲𑀫𑁆𑀩𑀼𑀤𑁆𑀥𑀯𑀭𑀁 𑀅𑀦𑀼𑀅𑀬𑁂𑀳𑀺 𑀅𑀦𑀼𑀕𑀢𑁂𑀳𑀺 𑀲𑀫𑁆𑀩𑀼𑀤𑁆𑀥𑀯𑀭𑀦𑁆𑀯𑀬𑁂𑀳𑀺, 𑀩𑀼𑀤𑁆𑀥𑀸𑀥𑀺𑀧𑁆𑀧𑀸𑀬𑀸𑀦𑀼𑀕𑁂𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀥 𑀯𑀭-𑀲𑀤𑁆𑀤𑁄 ‘‘𑀲𑀸𑀫𑀁 𑀲𑀘𑁆𑀘𑀸𑀦𑀺 𑀩𑀼𑀤𑁆𑀥𑀢𑁆𑀢𑀸 𑀲𑀫𑁆𑀩𑀼𑀤𑁆𑀥𑁄’’𑀢𑀺 𑀯𑀘𑀦𑀢𑁄 𑀧𑀘𑁆𑀘𑁂𑀓𑀩𑀼𑀤𑁆𑀥𑀸𑀧𑀺 𑀲𑀗𑁆𑀕𑀬𑁆𑀳𑀦𑁆𑀢𑀺. 𑀢𑀲𑁆𑀫𑀸 𑀢𑁂 𑀅𑀧𑀦𑁂𑀢𑀼𑀁 𑀯𑀼𑀢𑁆𑀢𑁄.

𑀅𑀝𑁆𑀞𑀓𑀣𑀸𑀬 𑀊𑀦𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀇𑀤𑀸𑀦𑀺 𑀅𑀢𑁆𑀢𑀦𑁄 𑀓𑀭𑀡𑀯𑀺𑀲𑁂𑀲𑀁 𑀢𑀲𑁆𑀲 𑀧𑀬𑁄𑀚𑀦𑀜𑁆𑀘 𑀤𑀲𑁆𑀲𑁂𑀢𑀼𑀁 ‘‘𑀲𑀁𑀯𑀡𑁆𑀡𑀦𑀸’’𑀢𑀺𑀆𑀤𑀺𑀫𑀸𑀳. 𑀦 𑀓𑀺𑀜𑁆𑀘𑀺 𑀅𑀢𑁆𑀣𑀁 𑀅𑀪𑀺𑀲𑀫𑁆𑀪𑀼𑀡𑀸𑀢𑀻𑀢𑀺 𑀓𑀺𑀜𑁆𑀘𑀺 𑀧𑀬𑁄𑀚𑀦𑀁 𑀨𑀮𑀁 𑀳𑀺𑀢𑀁 𑀦 𑀲𑀸𑀥𑁂𑀢𑀻𑀢𑀺 𑀅𑀢𑁆𑀣𑁄 ‘‘𑀦 𑀢𑀁 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀺𑀜𑁆𑀘𑀺 𑀅𑀢𑁆𑀣𑀁 𑀅𑀦𑀼𑀪𑁄𑀢𑀻’’𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁫𑁩𑁮) 𑀯𑀺𑀬. 𑀅𑀚𑁆𑀛𑁂𑀲𑀦𑀁 𑀩𑀼𑀤𑁆𑀥𑀲𑀺𑀭𑀺𑀯𑁆𑀳𑀬𑀲𑁆𑀲𑀸𑀢𑀺 𑀇𑀫𑀺𑀦𑀸 𑀬𑀲𑁆𑀫𑀸 𑀲𑀳𑀫𑁆𑀧𑀢𑀺𑀩𑁆𑀭𑀳𑁆𑀫𑀼𑀦𑀸 𑀅𑀚𑁆𑀛𑀺𑀝𑁆𑀞𑁂𑀦 𑀥𑀫𑁆𑀫𑁄 𑀤𑁂𑀲𑀺𑀢𑁄 𑀪𑀕𑀯𑀢𑀸, 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀅𑀚𑁆𑀛𑁂𑀲𑀦𑀁 𑀦𑀺𑀲𑁆𑀲𑀸𑀬 𑀯𑀺𑀦𑀬𑁄 𑀧𑀜𑁆𑀜𑀢𑁆𑀢𑁄, 𑀢𑀲𑁆𑀫𑀸 𑀅𑀬𑀫𑁆𑀧𑀺 𑀆𑀘𑀭𑀺𑀬𑁄 𑀢𑀁 𑀆𑀘𑀭𑀺𑀬𑀯𑀢𑁆𑀢𑀁 𑀧𑀽𑀚𑁂𑀦𑁆𑀢𑁄 𑀇𑀫𑀁 𑀲𑀁𑀯𑀡𑁆𑀡𑀦𑀁 𑀩𑀼𑀤𑁆𑀥𑀲𑀺𑀭𑀺𑀢𑁆𑀣𑁂𑀭𑀲𑁆𑀲 𑀬𑀸𑀘𑀦𑀁 𑀦𑀺𑀲𑁆𑀲𑀸𑀬 𑀅𑀓𑀸𑀲𑀻𑀢𑀺 𑀤𑀲𑁆𑀲𑁂𑀢𑀺. 𑀲𑀫𑀦𑀼𑀲𑁆𑀲𑀭𑀦𑁆𑀢𑁄𑀢𑀺 𑀢𑀲𑁆𑀲𑀸𑀪𑀸𑀯𑀁 𑀤𑀻𑀧𑁂𑀢𑀺 𑀆𑀤𑀭𑀜𑁆𑀘.

𑀢𑀢𑁄 𑀧𑀭𑀁 𑀤𑁆𑀯𑁂 𑀕𑀸𑀣𑀸𑀬𑁄 𑀓𑀢𑁆𑀢𑀩𑁆𑀩𑀯𑀺𑀥𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸. 𑀢𑁂𑀦 𑀢𑀸𑀲𑀼 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀯𑀺𑀦𑀺𑀘𑁆𑀙𑀬𑀧𑀘𑁆𑀘𑀬𑀯𑀺𑀫𑀢𑀺𑀁 𑀯𑀺𑀦𑁄𑀤𑁂𑀢𑀺, 𑀏𑀓𑀝𑁆𑀞𑀓𑀣𑀸𑀬 𑀓𑀼𑀲𑀮𑀲𑁆𑀲 𑀯𑀸 ‘‘𑀅𑀬𑀁 𑀦𑀬𑁄 𑀅𑀝𑁆𑀞𑀓𑀣𑀸𑀬𑀁 𑀦𑀢𑁆𑀣𑀻’’𑀢𑀺 𑀧𑀝𑀺𑀓𑁆𑀔𑁂𑀧𑀁 𑀦𑀺𑀯𑀸𑀭𑁂𑀢𑀺, 𑀅𑀬𑀼𑀢𑁆𑀢𑀢𑁆𑀣𑀧𑀭𑀺𑀘𑁆𑀘𑀸𑀕𑁂𑀦 𑀢𑀢𑁆𑀣 𑀅𑀪𑀺𑀦𑀺𑀯𑀺𑀝𑁆𑀞𑀸𑀦𑀁 𑀅𑀪𑀺𑀦𑀺𑀯𑁂𑀲𑀁 𑀧𑀭𑀺𑀘𑁆𑀘𑀚𑀸𑀧𑁂𑀢𑀺, 𑀣𑁂𑀭𑀯𑀸𑀤𑀤𑀲𑁆𑀲𑀦𑁂𑀦 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑀁 𑀧𑀢𑀺 𑀯𑀺𑀦𑀬𑀥𑀭𑀸𑀦𑀁 𑀓𑀸𑀭𑀡𑁄𑀧𑀧𑀢𑁆𑀢𑀺𑀢𑁄 𑀉𑀳𑀸𑀧𑁄𑀳𑀓𑁆𑀓𑀫𑀁 𑀤𑀲𑁆𑀲𑁂𑀢𑀺, 𑀅𑀬𑀼𑀢𑁆𑀢𑀢𑁆𑀣𑁂𑀭𑀯𑀸𑀤𑀧𑀝𑀺𑀓𑁆𑀔𑁂𑀧𑁂𑀦 𑀧𑀼𑀕𑁆𑀕𑀮𑀧𑁆𑀧𑀫𑀸𑀡𑀢𑀁 𑀧𑀝𑀺𑀓𑁆𑀔𑀺𑀧𑀢𑀻𑀢𑀺 𑀇𑀫𑁂 𑀘𑀸𑀦𑀺𑀲𑀁𑀲𑀸 𑀓𑀢𑁆𑀢𑀩𑁆𑀩𑀯𑀺𑀥𑀺𑀤𑀲𑁆𑀲𑀦𑁂𑀦 𑀤𑀲𑁆𑀲𑀺𑀢𑀸 𑀳𑁄𑀦𑁆𑀢𑀺. 𑀲𑀁𑀯𑀡𑁆𑀡𑀦𑀁 𑀢𑀜𑁆𑀘 𑀲𑀫𑀸𑀭𑀪𑀦𑁆𑀢𑁄 𑀢𑀲𑁆𑀲𑀸 𑀲𑀁𑀯𑀡𑁆𑀡𑀦𑀸𑀬 𑀫𑀳𑀸𑀅𑀝𑁆𑀞𑀓𑀣𑀁 𑀲𑀭𑀻𑀭𑀁 𑀓𑀢𑁆𑀯𑀸 𑀲𑀫𑀸𑀭𑀪𑀺𑀲𑁆𑀲𑀁, 𑀫𑀳𑀸𑀧𑀘𑁆𑀘𑀭𑀺𑀬𑀫𑁆𑀧𑀺 𑀬𑁄 𑀯𑀼𑀢𑁆𑀢𑁄 𑀯𑀺𑀦𑀺𑀘𑁆𑀙𑀬𑁄, 𑀢𑀣𑁂𑀯 𑀓𑀼𑀭𑀼𑀦𑁆𑀤𑀻𑀦𑀸𑀫𑀸𑀤𑀻𑀲𑀼 𑀮𑁄𑀓𑁂 𑀯𑀺𑀲𑁆𑀲𑀼𑀢𑀸𑀲𑀼 𑀅𑀝𑁆𑀞𑀓𑀣𑀸𑀲𑀼 𑀘 𑀬𑁄 𑀯𑀼𑀢𑁆𑀢𑁄 𑀯𑀺𑀦𑀺𑀘𑁆𑀙𑀬𑁄, 𑀢𑀢𑁄𑀧𑀺 𑀯𑀺𑀦𑀺𑀘𑁆𑀙𑀬𑀢𑁄 𑀫𑀳𑀸𑀅𑀝𑁆𑀞𑀓𑀣𑀸𑀦𑀬𑁂𑀦, 𑀯𑀺𑀦𑀬𑀬𑀼𑀢𑁆𑀢𑀺𑀬𑀸 𑀯𑀸 𑀬𑀼𑀢𑁆𑀢𑀫𑀢𑁆𑀣𑀁 𑀢𑀲𑁆𑀲 𑀲𑀭𑀻𑀭𑀲𑁆𑀲 𑀅𑀮𑀗𑁆𑀓𑀸𑀭𑀁 𑀯𑀺𑀬 𑀕𑀡𑁆𑀳𑀦𑁆𑀢𑁄 𑀲𑀫𑀸𑀭𑀪𑀺𑀲𑁆𑀲𑀁. 𑀓𑀺𑀁 𑀲𑀁𑀯𑀡𑁆𑀡𑀦𑀫𑁂𑀯, 𑀦 𑀅𑀜𑁆𑀜𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 𑀧𑀼𑀦 𑀲𑀁𑀯𑀡𑁆𑀡𑀦𑀸𑀕𑁆𑀕𑀳𑀡𑀁. 𑀅𑀣 𑀯𑀸 𑀅𑀦𑁆𑀢𑁄𑀕𑀥𑀢𑁆𑀣𑁂𑀭𑀯𑀸𑀤𑀁 𑀲𑀁𑀯𑀡𑁆𑀡𑀦𑀁 𑀓𑀢𑁆𑀯𑀸 𑀲𑀫𑀸𑀭𑀪𑀺𑀲𑁆𑀲𑀦𑁆𑀢𑀺 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀣𑁂𑀭𑀯𑀸𑀤𑀸 𑀳𑀺 𑀩𑀳𑀺𑀅𑀝𑁆𑀞𑀓𑀣𑀸𑀬 𑀯𑀺𑀘𑀭𑀦𑁆𑀢𑀺. 𑀏𑀢𑁆𑀣 𑀆𑀤𑀺-𑀲𑀤𑁆𑀤𑁂𑀦 𑀘𑀽𑀴𑀧𑀘𑁆𑀘𑀭𑀺𑀅𑀦𑁆𑀥𑀓𑀅𑀭𑀺𑀬𑀝𑁆𑀞𑀓𑀣𑀸𑀧𑀦𑁆𑀦𑀯𑀸𑀭𑀸𑀤𑀬𑁄𑀧𑀺 𑀲𑀗𑁆𑀕𑀳𑀺𑀢𑀸. 𑀢𑀢𑁆𑀣 𑀧𑀘𑁆𑀘𑀭𑀻 𑀦𑀸𑀫 𑀲𑀻𑀳𑀴𑀪𑀸𑀲𑀸𑀬 𑀉𑀴𑀼𑀫𑁆𑀧𑀁 𑀓𑀺𑀭, 𑀢𑀲𑁆𑀫𑀺𑀁 𑀦𑀺𑀲𑀻𑀤𑀺𑀢𑁆𑀯𑀸 𑀓𑀢𑀢𑁆𑀢𑀸 𑀢𑀫𑁂𑀯 𑀦𑀸𑀫𑀁 𑀚𑀸𑀢𑀁. 𑀓𑀼𑀭𑀼𑀦𑁆𑀤𑀻𑀯𑀮𑁆𑀮𑀺𑀯𑀺𑀳𑀸𑀭𑁄 𑀦𑀸𑀫 𑀅𑀢𑁆𑀣𑀺, 𑀢𑀢𑁆𑀣 𑀓𑀢𑀢𑁆𑀢𑀸 𑀓𑀼𑀭𑀼𑀦𑁆𑀤𑀻 𑀦𑀸𑀫 𑀚𑀸𑀢𑀸.

𑀲𑀫𑁆𑀫 𑀲𑀫𑀸𑀭𑀪𑀺𑀲𑁆𑀲𑀦𑁆𑀢𑀺 𑀓𑀢𑁆𑀢𑀩𑁆𑀩𑀯𑀺𑀥𑀸𑀦𑀁 𑀲𑀚𑁆𑀚𑁂𑀢𑁆𑀯𑀸 𑀅𑀳𑀁 𑀞𑀺𑀢𑁄, 𑀢𑀲𑁆𑀫𑀸 𑀢𑀁 𑀫𑁂 𑀦𑀺𑀲𑀸𑀫𑁂𑀦𑁆𑀢𑀽𑀢𑀺 𑀕𑀸𑀣𑀸𑀬 𑀢𑀁 𑀲𑀁𑀯𑀡𑁆𑀡𑀦𑀁 𑀫𑁂 𑀫𑀫, 𑀫𑀬𑀸 𑀯𑀸 𑀯𑀼𑀘𑁆𑀘𑀫𑀸𑀦𑀦𑁆𑀢𑀺 𑀧𑀸𑀞𑀲𑁂𑀲𑁄. 𑀦𑀺𑀲𑀸𑀫𑁂𑀦𑁆𑀢𑀼 𑀧𑀲𑁆𑀲𑀦𑁆𑀢𑀼 𑀧𑀜𑁆𑀜𑀸𑀘𑀓𑁆𑀔𑀼𑀦𑀸 𑀲𑀼𑀡𑀦𑁆𑀢𑀼 𑀯𑀸 𑀲𑀤𑁆𑀥𑀸𑀯𑀻𑀭𑀺𑀬𑀧𑀻𑀢𑀺𑀧𑀸𑀫𑁄𑀚𑁆𑀚𑀸𑀪𑀺𑀲𑀗𑁆𑀔𑀸𑀭𑁂𑀦 𑀲𑀗𑁆𑀔𑀭𑀺𑀢𑁆𑀯𑀸 𑀧𑀽𑀚𑀬𑀦𑁆𑀢𑀸 𑀲𑀓𑁆𑀓𑀘𑁆𑀘𑀁 𑀥𑀫𑁆𑀫𑀁. 𑀓𑀲𑁆𑀲 𑀥𑀫𑁆𑀫𑀁? 𑀥𑀫𑁆𑀫𑀧𑁆𑀧𑀤𑀻𑀧𑀲𑁆𑀲 𑀢𑀣𑀸𑀕𑀢𑀲𑁆𑀲. 𑀓𑀺𑀁 𑀤𑀲𑁆𑀲𑁂𑀢𑀺? 𑀧𑀤𑀻𑀧𑀝𑁆𑀞𑀸𑀦𑀺𑀬𑁄 𑀳𑀺 𑀥𑀫𑁆𑀫𑁄 𑀳𑀺𑀢𑀸𑀳𑀺𑀢𑀧𑁆𑀧𑀓𑀸𑀲𑀦𑀢𑁄, 𑀧𑀤𑀻𑀧𑀥𑀭𑀝𑁆𑀞𑀸𑀦𑀺𑀬𑁄 𑀥𑀫𑁆𑀫𑀥𑀭𑁄 𑀢𑀣𑀸𑀕𑀢𑁄, 𑀢𑀲𑁆𑀫𑀸 𑀧𑀭𑀺𑀦𑀺𑀩𑁆𑀩𑀼𑀢𑁂𑀧𑀺 𑀢𑀲𑁆𑀫𑀺𑀁 𑀢𑀣𑀸𑀕𑀢𑁂 𑀢𑀢𑁆𑀣 𑀲𑁄𑀓𑀁 𑀅𑀓𑀢𑁆𑀯𑀸 𑀲𑀓𑁆𑀓𑀘𑁆𑀘 𑀥𑀫𑁆𑀫𑀁 𑀧𑀝𑀺𑀫𑀸𑀦𑀬𑀦𑁆𑀢𑀸 𑀦𑀺𑀲𑀸𑀫𑁂𑀦𑁆𑀢𑀽𑀢𑀺 𑀤𑀲𑁆𑀲𑁂𑀢𑀺. 𑀅𑀣 𑀯𑀸 ‘‘𑀥𑀫𑁆𑀫𑀓𑀸𑀬𑀸 𑀢𑀣𑀸𑀕𑀢𑀸’’𑀢𑀺 (𑀤𑀻. 𑀦𑀺. 𑁩.𑁧𑁧𑁮) 𑀯𑀘𑀦𑀢𑁄 𑀥𑀫𑁆𑀫𑁄 𑀘 𑀲𑁄 𑀧𑀤𑀻𑀧𑁄 𑀘𑀸𑀢𑀺 𑀥𑀫𑁆𑀫𑀧𑁆𑀧𑀤𑀻𑀧𑁄, 𑀪𑀕𑀯𑀸.

𑀬𑁄 𑀥𑀫𑁆𑀫𑀯𑀺𑀦𑀬𑁄 𑀬𑀣𑀸 𑀩𑀼𑀤𑁆𑀥𑁂𑀦 𑀯𑀼𑀢𑁆𑀢𑁄, 𑀲𑁄 𑀢𑀣𑁂𑀯 𑀩𑀼𑀤𑁆𑀥𑀧𑀼𑀢𑁆𑀢𑁂𑀳𑀺 𑀲𑀸𑀯𑀓𑁂𑀳𑀺 𑀜𑀸𑀢𑁄 𑀅𑀯𑀩𑀼𑀤𑁆𑀥𑁄, 𑀬𑁂𑀳𑀺 𑀢𑁂𑀲𑀁 𑀩𑀼𑀤𑁆𑀥𑀧𑀼𑀢𑁆𑀢𑀸𑀦𑀁 𑀫𑀢𑀺𑀁 𑀅𑀥𑀺𑀧𑁆𑀧𑀸𑀬𑀁 𑀅𑀘𑁆𑀘𑀚𑀦𑁆𑀢𑀸 𑀦𑀺𑀭𑀯𑀲𑁂𑀲𑀁 𑀕𑀡𑁆𑀳𑀦𑁆𑀢𑀸. 𑀧𑀼𑀭𑁂𑀢𑀺 𑀧𑀼𑀭𑀸, 𑀧𑁄𑀭𑀸𑀡𑀢𑁆𑀣𑁂𑀭𑀸 𑀯𑀸. 𑀅𑀝𑁆𑀞𑀓𑀣𑀸𑀢𑀺 𑀅𑀝𑁆𑀞𑀓𑀣𑀸𑀬𑁄, 𑀉𑀧𑀬𑁄𑀕𑀩𑀳𑀼𑀯𑀘𑀦𑀁.

𑀬𑀁 𑀅𑀢𑁆𑀣𑀚𑀸𑀢𑀁 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀁, 𑀢𑀁 𑀲𑀩𑁆𑀩𑀫𑁆𑀧𑀺 𑀧𑀫𑀸𑀤𑀮𑁂𑀔𑀓𑀸𑀦𑀁 𑀧𑀫𑀸𑀤𑀮𑁂𑀔𑀫𑀢𑁆𑀢𑀁 𑀯𑀚𑁆𑀚𑀬𑀺𑀢𑁆𑀯𑀸. 𑀓𑀺𑀁 𑀲𑀩𑁆𑀩𑁂𑀲𑀫𑁆𑀧𑀺 𑀧𑀫𑀸𑀡𑀁? 𑀦, 𑀓𑀺𑀦𑁆𑀢𑀼 𑀲𑀺𑀓𑁆𑀔𑀸𑀲𑀼 𑀲𑀕𑀸𑀭𑀯𑀸𑀦𑀁 𑀇𑀥 𑀯𑀺𑀦𑀬𑀫𑁆𑀳𑀺 𑀧𑀡𑁆𑀟𑀺𑀢𑀸𑀦𑀁, 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀧𑀦 𑀲𑀘𑁆𑀘𑁂𑀧𑀺 𑀅𑀮𑀺𑀓𑁂𑀧𑀺 𑀤𑀼𑀓𑁆𑀓𑀝𑀫𑁂𑀯 𑀯𑀼𑀢𑁆𑀢𑀁, 𑀢𑀁 𑀧𑀫𑀸𑀤𑀮𑁂𑀔𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀫𑀸𑀤𑀮𑁂𑀔𑀁 𑀯𑀚𑁆𑀚𑀬𑀺𑀢𑁆𑀯𑀸 𑀧𑀫𑀸𑀡𑀁 𑀳𑁂𑀲𑁆𑀲𑀢𑀻𑀢𑀺 𑀲𑀫𑁆𑀩𑀦𑁆𑀥𑁄.

𑀢𑀢𑁄 𑀘𑀸𑀢𑀺 𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀅𑀢𑁆𑀣𑀚𑀸𑀢𑀢𑁄 𑀢𑀦𑁆𑀢𑀺𑀓𑁆𑀓𑀫𑀁 𑀧𑀸𑀴𑀺𑀓𑁆𑀓𑀫𑀁. 𑀲𑀼𑀢𑁆𑀢𑀦𑁆𑀢𑀸 𑀲𑀼𑀢𑁆𑀢𑀸𑀯𑀬𑀯𑀸. 𑀅𑀦𑁆𑀢𑁄𑀢𑀺 𑀳𑀺𑀤𑀁 𑀅𑀩𑁆𑀪𑀦𑁆𑀢𑀭𑀸𑀯𑀬𑀯𑀲𑀫𑁆𑀪𑀸𑀯𑀦𑀸𑀤𑀻𑀲𑀼 𑀤𑀺𑀲𑁆𑀲𑀢𑀺. 𑀲𑀼𑀢𑁆𑀢𑀦𑁆𑀢𑁂𑀲𑀼 𑀪𑀯𑀸 𑀲𑀼𑀢𑁆𑀢𑀦𑁆𑀢𑀺𑀓𑀸, 𑀢𑁂𑀲𑀁 𑀲𑀼𑀢𑁆𑀢𑀦𑁆𑀢𑀺𑀓𑀸𑀦𑀁, 𑀲𑀼𑀢𑁆𑀢𑀦𑁆𑀢𑀕𑀦𑁆𑀣𑁂𑀲𑀼 𑀆𑀕𑀢𑀯𑀘𑀦𑀸𑀦𑀦𑁆𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀅𑀫𑀻𑀬𑀢𑀻𑀢𑀺 𑀅𑀦𑁆𑀢𑁄, 𑀲𑀸𑀥𑀻𑀬𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑁂𑀦 𑀲𑀸𑀥𑀻𑀬𑀢𑀺? 𑀲𑀼𑀢𑁆𑀢𑁂𑀦, 𑀲𑀼𑀢𑁆𑀢𑀲𑁆𑀲 𑀅𑀦𑁆𑀢𑁄 𑀲𑀼𑀢𑁆𑀢𑀦𑁆𑀢𑁄, 𑀓𑁄 𑀲𑁄? 𑀲𑁄 𑀲𑁄 𑀅𑀢𑁆𑀣𑀯𑀺𑀓𑀧𑁆𑀧𑁄, 𑀢𑀲𑁆𑀫𑀺𑀁 𑀲𑀼𑀢𑁆𑀢𑀦𑁆𑀢𑁂 𑀦𑀺𑀬𑀼𑀢𑁆𑀢𑀸𑀦𑀺 𑀯𑀘𑀦𑀸𑀦𑀺 𑀲𑀼𑀢𑁆𑀢𑀦𑁆𑀢𑀺𑀓𑀸𑀦𑀺. 𑀢𑁂𑀲𑀁 𑀲𑀼𑀢𑁆𑀢𑀦𑁆𑀢𑀺𑀓𑀸𑀦𑀁 𑀯𑀘𑀦𑀸𑀦𑀫𑀢𑁆𑀣𑀁. 𑀢𑀲𑁆𑀲 𑀢𑀲𑁆𑀲 𑀆𑀕𑀫𑀲𑀼𑀢𑁆𑀢𑀲𑁆𑀲 𑀅𑀪𑀺𑀥𑀫𑁆𑀫𑀯𑀺𑀦𑀬𑀲𑀼𑀢𑁆𑀢𑀲𑁆𑀲 𑀘𑀸𑀦𑀼𑀭𑀽𑀧𑀁 𑀧𑀭𑀺𑀤𑀻𑀧𑀬𑀦𑁆𑀢𑀻, 𑀅𑀬𑀁 𑀢𑀸𑀯𑁂𑀢𑁆𑀣 𑀲𑀫𑀸𑀲𑀢𑁄 𑀅𑀢𑁆𑀣𑀯𑀺𑀪𑀸𑀯𑀦𑀸 𑁋 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀻𑀦𑀁 (𑀲𑀁. 𑀦𑀺. 𑁨.𑁪𑁧; 𑁫.𑁪𑁭𑁯; 𑀅. 𑀦𑀺. 𑁬.𑁧𑁦; 𑀧𑀸𑀭𑀸. 𑁧) 𑀲𑀼𑀢𑁆𑀢𑀦𑁆𑀢𑀺𑀓𑀸𑀦𑀁 𑀯𑀘𑀦𑀸𑀦𑀫𑀢𑁆𑀣𑀁 𑀆𑀕𑀫𑀲𑀼𑀢𑁆𑀢𑀦𑁆𑀢𑀸𑀦𑀼𑀭𑀽𑀧𑀁. ‘‘𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀲𑀺𑀬𑀸 𑀓𑀼𑀲𑀮𑀁 𑀲𑀺𑀬𑀸 𑀅𑀓𑀼𑀲𑀮𑀁 𑀲𑀺𑀬𑀸 𑀅𑀩𑁆𑀬𑀸𑀓𑀢’’𑀦𑁆𑀢𑀺 (𑀘𑀽𑀴𑀯. 𑁨𑁨𑁦) 𑀏𑀯𑀫𑀸𑀤𑀻𑀦𑀁 𑀅𑀪𑀺𑀥𑀫𑁆𑀫𑀲𑀼𑀢𑁆𑀢𑀦𑁆𑀢𑀺𑀓𑀸𑀦𑀁 𑀯𑀘𑀦𑀸𑀦𑀫𑀢𑁆𑀣𑀁 𑀅𑀪𑀺𑀥𑀫𑁆𑀫𑀲𑀼𑀢𑁆𑀢𑀦𑁆𑀢𑀸𑀦𑀼𑀭𑀽𑀧𑀦𑁆𑀢𑀺 𑀏𑀯𑀫𑀸𑀤𑀺. 𑀳𑁂𑀲𑁆𑀲𑀢𑀻𑀢𑀺 𑀪𑀯𑀺𑀲𑁆𑀲𑀢𑀺, 𑀓𑀭𑀻𑀬𑀺𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀡𑁆𑀡𑀦𑀸𑀧𑀻𑀢𑀺 𑀏𑀢𑁆𑀣 𑀅𑀧𑀺-𑀲𑀤𑁆𑀤𑁄 𑀲𑀫𑁆𑀧𑀺𑀡𑁆𑀟𑀦𑀢𑁆𑀣𑁄, 𑀲𑁄 𑀢𑀲𑁆𑀫𑀸𑀢𑀺 𑀧𑀤𑁂𑀦 𑀬𑁄𑀚𑁂𑀢𑀩𑁆𑀩𑁄. 𑀓𑀣𑀁? 𑀧𑀡𑁆𑀟𑀺𑀢𑀸𑀦𑀁 𑀧𑀫𑀸𑀡𑀢𑁆𑀢𑀸𑀧𑀺 𑀯𑀺𑀢𑁆𑀣𑀸𑀭𑀫𑀕𑁆𑀕𑀲𑁆𑀲 𑀲𑀫𑀸𑀲𑀺𑀢𑀢𑁆𑀢𑀸𑀧𑀺 𑀯𑀺𑀦𑀺𑀘𑁆𑀙𑀬𑀲𑁆𑀲 𑀅𑀲𑁂𑀲𑀺𑀢𑀢𑁆𑀢𑀸𑀧𑀺 𑀢𑀦𑁆𑀢𑀺𑀓𑁆𑀓𑀫𑀲𑁆𑀲 𑀅𑀯𑁄𑀓𑁆𑀓𑀫𑀺𑀢𑀢𑁆𑀢𑀸𑀧𑀺 𑀲𑀼𑀢𑁆𑀢𑀦𑁆𑀢𑀺𑀓𑀯𑀘𑀦𑀸𑀦𑀁 𑀲𑀼𑀢𑁆𑀢𑀦𑁆𑀢𑀝𑁆𑀞𑀓𑀣𑀸𑀦𑀼𑀭𑀽𑀧𑀁 𑀤𑀻𑀧𑀦𑀢𑁄𑀧𑀺 𑀢𑀲𑁆𑀫𑀸𑀧𑀺 𑀲𑀓𑁆𑀓𑀘𑁆𑀘𑀁 𑀅𑀦𑀼𑀲𑀺𑀓𑁆𑀔𑀺𑀢𑀩𑁆𑀩𑀸𑀢𑀺. 𑀏𑀢𑁆𑀣 ‘‘𑀢𑀦𑁆𑀢𑀺𑀓𑁆𑀓𑀫𑀁 𑀅𑀯𑁄𑀓𑁆𑀓𑀫𑀺𑀢𑁆𑀯𑀸’’𑀢𑀺 𑀯𑀘𑀦𑁂𑀦 𑀲𑀺𑀤𑁆𑀥𑁂𑀧𑀺 ‘‘𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀯𑁂𑀭𑀜𑁆𑀚𑀓𑀡𑁆𑀟𑀸𑀤𑀻𑀲𑀼 ‘𑀲𑀼𑀢𑁆𑀢𑀦𑁆𑀢𑀺𑀓𑀸𑀦𑀁 𑀪𑀸𑀭𑁄’𑀢𑀺 𑀕𑀢𑀸, 𑀫𑀬𑀁 𑀧𑀦 𑀯𑀢𑁆𑀯𑀸𑀯 𑀕𑀫𑀺𑀲𑁆𑀲𑀸𑀫𑀸’’𑀢𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀼𑀢𑁆𑀢𑀦𑁆𑀢𑀺𑀓𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁 𑀓𑀺𑀭.

𑀕𑀦𑁆𑀣𑀸𑀭𑀫𑁆𑀪𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀩𑀸𑀳𑀺𑀭𑀦𑀺𑀤𑀸𑀦𑀓𑀣𑀸𑀯𑀡𑁆𑀡𑀦𑀸

𑀢𑀤𑀗𑁆𑀕𑀯𑀺𑀦𑀬𑀸𑀤𑀺𑀪𑁂𑀤𑁂𑀦 𑀯𑀺𑀦𑀬𑀲𑁆𑀲𑀩𑀳𑀼𑀢𑁆𑀢𑀸 𑀯𑀺𑀦𑀬𑁄 𑀢𑀸𑀯 𑀯𑀯𑀢𑁆𑀣𑀧𑁂𑀢𑀩𑁆𑀩𑁄. ‘‘𑀩𑀼𑀤𑁆𑀥𑁂𑀦 𑀥𑀫𑁆𑀫𑁄 𑀯𑀺𑀦𑀬𑁄 𑀘 𑀯𑀼𑀢𑁆𑀢𑁄’’𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀢𑁆𑀢𑀸 𑀇𑀤𑀸𑀦𑀺 ‘‘𑀯𑀼𑀢𑁆𑀢𑀁 𑀬𑁂𑀦𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀘𑁂? 𑀢𑀲𑁆𑀲 𑀏𑀯𑀫𑀸𑀤𑀺𑀯𑀘𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀲𑀫𑁆𑀩𑀦𑁆𑀥𑁄. 𑀥𑀸𑀭𑀺𑀢𑀁 𑀬𑁂𑀦 𑀘𑀸𑀪𑀢𑀁. 𑀬𑀢𑁆𑀣𑀧𑁆𑀧𑀢𑀺𑀝𑁆𑀞𑀺𑀢𑀜𑁆𑀘𑁂𑀢𑀦𑁆𑀢𑀺 𑀯𑀘𑀦𑀁 𑀲𑀓𑀮𑀫𑁆𑀧𑀺 𑀯𑀺𑀦𑀬𑀧𑀺𑀝𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀢𑁆𑀢𑀧𑀘𑁆𑀘𑀓𑁆𑀔𑀯𑀘𑀦𑀁 𑀦 𑀳𑁄𑀢𑀻𑀢𑀺 𑀆𑀳𑀘𑁆𑀘 𑀪𑀸𑀲𑀺𑀢𑀁 𑀦 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀪𑀕𑀯𑀢𑁄 𑀅𑀢𑀻𑀢𑀸𑀤𑀻𑀲𑀼 𑀅𑀧𑁆𑀧𑀘𑁆𑀘𑀓𑁆𑀔𑀁 𑀓𑀺𑀜𑁆𑀘𑀺 𑀅𑀢𑁆𑀣𑀺. 𑀬𑀤𑀺 𑀅𑀢𑁆𑀢𑀧𑀘𑁆𑀘𑀓𑁆𑀔𑀯𑀘𑀦𑀁 𑀦 𑀳𑁄𑀢𑀺, 𑀧𑀤𑀲𑁄𑀥𑀫𑁆𑀫𑀸𑀧𑀢𑁆𑀢𑀺𑀁 𑀦 𑀚𑀦𑁂𑀬𑁆𑀬𑀸𑀢𑀺 𑀘𑁂? 𑀦, 𑀲𑀸𑀯𑀓𑀪𑀸𑀲𑀺𑀢𑀲𑁆𑀲𑀧𑀺 𑀧𑀤𑀲𑁄𑀥𑀫𑁆𑀫𑀸𑀧𑀢𑁆𑀢𑀺𑀚𑀦𑀦𑀢𑁄. 𑀦𑀺𑀬𑀫𑀸𑀪𑀸𑀯𑀸 𑀅𑀢𑀺𑀧𑁆𑀧𑀲𑀗𑁆𑀕𑁄𑀢𑀺 𑀘𑁂? 𑀦, 𑀧𑀤𑀲𑁄𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀝𑁆𑀞𑀓𑀣𑀸𑀬𑀁 ‘‘𑀲𑀗𑁆𑀕𑀻𑀢𑀺𑀢𑁆𑀢𑀬𑀁 𑀆𑀭𑀼𑀴𑁆𑀳𑁄’’𑀢𑀺 𑀯𑀺𑀲𑁂𑀲𑀺𑀢𑀢𑁆𑀢𑀸. 𑀢𑀣𑀸 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 𑀲𑀗𑁆𑀕𑀻𑀢𑀺𑀁 𑀆𑀭𑀼𑀴𑁆𑀳𑀢𑁆𑀢𑀸 ‘‘𑀔𑀦𑁆𑀥𑀸𑀦𑀜𑁆𑀘 𑀧𑀝𑀺𑀧𑀸𑀝𑀺…𑀧𑁂… 𑀲𑀁𑀲𑀸𑀭𑁄𑀢𑀺 𑀧𑀯𑀼𑀘𑁆𑀘𑀢𑀻’’𑀢𑀺 (𑀥. 𑀲. 𑀅𑀝𑁆𑀞. 𑀦𑀺𑀤𑀸𑀦𑀓𑀣𑀸; 𑀯𑀺𑀪. 𑀅𑀝𑁆𑀞. 𑁨𑁨𑁬 𑀲𑀗𑁆𑀔𑀸𑀭𑀧𑀤𑀦𑀺𑀤𑁆𑀤𑁂𑀲) 𑀏𑀯𑀫𑀸𑀤𑀺𑀯𑀘𑀦𑀁, 𑀬𑀜𑁆𑀘 𑀲𑀗𑁆𑀕𑀻𑀢𑀺𑀆𑀭𑀼𑀴𑁆𑀳𑀓𑁆𑀓𑀫𑀸𑀦𑀼𑀕𑀢𑀁, 𑀢𑀁 𑀧𑀤𑀲𑁄𑀥𑀫𑁆𑀫𑀸𑀧𑀢𑁆𑀢𑀺𑀁 𑀚𑀦𑁂𑀢𑀻𑀢𑀺 𑀆𑀬𑀲𑁆𑀫𑀸 𑀉𑀧𑀢𑀺𑀲𑁆𑀲𑁄.

𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸

𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺 𑀦𑀸𑀫 𑀘𑀸𑀢𑀺 𑀏𑀢𑁆𑀣 𑀘-𑀲𑀤𑁆𑀤𑁄 𑀅𑀢𑀺𑀭𑁂𑀓𑀢𑁆𑀣𑁄, 𑀢𑁂𑀦 𑀅𑀜𑁆𑀜𑀸𑀧𑀺 𑀅𑀢𑁆𑀣𑀻𑀢𑀺 𑀤𑀻𑀧𑁂𑀢𑀺. 𑀢𑀫𑁆𑀧𑀺 𑀲𑀸𑀮𑀯𑀦𑀁 𑀉𑀧𑀕𑀦𑁆𑀢𑁆𑀯𑀸 𑀫𑀺𑀢𑁆𑀢𑀲𑀼𑀳𑀚𑁆𑀚𑁂 𑀅𑀧𑀮𑁄𑀓𑁂𑀢𑁆𑀯𑀸 𑀦𑀺𑀯𑀢𑁆𑀢𑀦𑀢𑁄 𑀉𑀧𑀯𑀢𑁆𑀢𑀦𑀦𑁆𑀢𑀺 𑀧𑀸𑀓𑀝𑀁 𑀚𑀸𑀢𑀁 𑀓𑀺𑀭. 𑀬𑀫𑀓𑀲𑀸𑀮𑀸𑀦𑀦𑁆𑀢𑀺 𑀏𑀓𑀸 𑀓𑀺𑀭 𑀲𑀸𑀮𑀧𑀦𑁆𑀢𑀺 𑀲𑀻𑀲𑀪𑀸𑀕𑁂, 𑀏𑀓𑀸 𑀧𑀸𑀤𑀪𑀸𑀕𑁂. 𑀢𑀢𑁆𑀭𑀸𑀧𑀺 𑀏𑀓𑁄 𑀢𑀭𑀼𑀡𑀲𑀸𑀮𑁄 𑀲𑀻𑀲𑀪𑀸𑀕𑀲𑁆𑀲 𑀆𑀲𑀦𑁆𑀦𑁂 𑀳𑁄𑀢𑀺, 𑀏𑀓𑁄 𑀧𑀸𑀤𑀪𑀸𑀕𑀲𑁆𑀲, 𑀫𑀽𑀮𑀔𑀦𑁆𑀥𑀯𑀺𑀝𑀧𑀧𑀢𑁆𑀢𑁂𑀳𑀺 𑀅𑀜𑁆𑀜𑀫𑀜𑁆𑀜𑀁 𑀲𑀁𑀲𑀺𑀩𑁆𑀩𑀺𑀢𑁆𑀯𑀸 𑀞𑀺𑀢𑀲𑀸𑀮𑀸𑀦𑀦𑁆𑀢𑀺𑀧𑀺 𑀯𑀼𑀢𑁆𑀢𑀁. 𑀅𑀦𑀼𑀧𑀸𑀤𑀺𑀲𑁂𑀲𑀸𑀬 𑀦𑀺𑀩𑁆𑀩𑀸𑀦𑀥𑀸𑀢𑀼𑀬𑀸𑀢𑀺 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂 𑀓𑀭𑀡𑀯𑀘𑀦𑀁 ‘‘𑀓𑀢𑀓𑀺𑀘𑁆𑀘𑁄 𑀧𑀻𑀢𑀺𑀚 𑀳𑀸𑀲 𑀘𑁂𑀢𑁄 𑀅𑀯𑁂𑀭𑀫𑀼𑀔𑁂𑀦𑀸𑀪𑀢𑀓𑀼𑀡𑁆𑀟𑀮𑁂𑀦𑀸’’𑀢𑀺𑀆𑀤𑀻𑀲𑀼 𑀯𑀺𑀬. 𑀧𑀭𑀺𑀦𑀺𑀩𑁆𑀩𑀸𑀦𑁂 𑀧𑀭𑀺𑀦𑀺𑀩𑁆𑀩𑀸𑀦𑀳𑁂𑀢𑀼, 𑀢𑀲𑁆𑀫𑀺𑀁 𑀞𑀸𑀦𑁂 𑀯𑀸 𑀫𑀸 𑀲𑁄𑀘𑀺𑀢𑁆𑀣 𑀘𑀺𑀢𑁆𑀢𑁂𑀦, 𑀫𑀸 𑀧𑀭𑀺𑀤𑁂𑀯𑀺𑀢𑁆𑀣 𑀯𑀸𑀘𑀸𑀬 ‘‘𑀧𑀭𑀺𑀤𑁂𑀯𑀦𑀁 𑀯𑀺𑀮𑀸𑀧’’𑀦𑁆𑀢𑀺 𑀯𑀘𑀦𑀢𑁄. 𑀫𑀳𑀸𑀲𑀫𑀡𑁂𑀦𑀸𑀢𑀺 𑀦𑀺𑀲𑁆𑀲𑀓𑁆𑀓𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀲𑀽𑀭𑀺𑀬𑀁’𑀲𑀽𑀪𑀺 𑀧𑀝𑀼𑀓𑀭𑀸’𑀪𑀸’𑀭𑀺𑀡𑀲𑁆𑀲 𑀢𑀸𑀡𑀸 𑀇𑀢𑁆𑀬𑀢𑁆𑀭𑁂𑀯. 𑀬𑀜𑁆𑀘 𑀪𑀕𑀯𑀢𑁄 𑀅𑀦𑀼𑀕𑁆𑀕𑀳𑀁, 𑀢𑀲𑁆𑀲 𑀅𑀦𑀼𑀕𑁆𑀕𑀳𑀲𑁆𑀲𑀸𑀢𑀺 𑀆𑀘𑀭𑀺𑀬𑀸. 𑀏𑀓𑀘𑁆𑀘𑁂 𑀧𑀦 ‘‘𑀬𑀁 𑀬𑀲𑁆𑀫𑀸 𑀅𑀳𑀁 𑀅𑀦𑀼𑀕𑁆𑀕𑀳𑀺𑀢𑁄’’𑀢𑀺 𑀯𑀤𑀦𑁆𑀢𑀺. 𑀦𑀺𑀩𑁆𑀩𑀲𑀦𑀸𑀦𑀻𑀢𑀺 𑀦𑀺𑀝𑁆𑀞𑀺𑀢𑀯𑀲𑀦𑀓𑀺𑀘𑁆𑀘𑀸𑀦𑀺, 𑀫𑀬𑀸 𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀅𑀧𑀦𑀻𑀢𑀸𑀦𑀺. 𑀬𑀤𑀺 𑀲𑀼𑀬𑀼𑀢𑁆𑀢𑀸𑀦𑀺 𑀥𑀸𑀭𑁂𑀲𑁆𑀲𑀲𑀻𑀢𑀺 𑀧𑀼𑀘𑁆𑀙𑀢𑀺, 𑀓𑀯𑀘𑀲𑀤𑀺𑀲𑀸𑀦𑀺 𑀲𑀸𑀡𑀸𑀦𑀺. 𑀇𑀲𑁆𑀲𑀭𑀺𑀬𑀲𑀤𑀺𑀲𑀸 𑀦𑀯 𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀸𑀤𑀬𑁄. 𑀅𑀝𑁆𑀞 𑀲𑀫𑀸𑀧𑀢𑁆𑀢𑀺𑀬𑁄 𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺 𑀘 𑀧𑀝𑀺𑀮𑀸𑀪𑀓𑁆𑀓𑀫𑁂𑀦 ‘‘𑀅𑀦𑀼𑀧𑀼𑀩𑁆𑀩𑀯𑀺𑀳𑀸𑀭𑀸’’𑀢𑀺 𑀯𑀼𑀢𑁆𑀢𑀸.

𑀅𑀦𑀸𑀕𑀢𑁂 𑀲𑀦𑁆𑀦𑀺𑀓𑀝𑁆𑀞𑁂, 𑀢𑀣𑀸𑀢𑀻𑀢𑁂 𑀘𑀺𑀭𑀦𑁆𑀢𑀦𑁂;

𑀓𑀸𑀮𑀤𑁆𑀯𑀬𑁂𑀧𑀺 𑀓𑀯𑀻𑀳𑀺, 𑀧𑀼𑀭𑀸𑀲𑀤𑁆𑀤𑁄 𑀧𑀬𑀼𑀚𑁆𑀚𑀢𑁂.

𑀲𑀢𑁆𑀣𑀼𑀲𑀸𑀲𑀦𑀫𑁂𑀯 𑀧𑀭𑀺𑀬𑀢𑁆𑀢𑀺 𑀲𑀢𑁆𑀣𑀼𑀲𑀸𑀲𑀦𑀧𑀭𑀺𑀬𑀢𑁆𑀢𑀺, 𑀲𑀸 𑀲𑀼𑀢𑁆𑀢𑀕𑁂𑀬𑁆𑀬𑀸𑀤𑀺𑀯𑀲𑁂𑀦 𑀦𑀯𑀗𑁆𑀕𑀸. 𑀢𑀺𑀧𑀺𑀝𑀓𑀫𑁂𑀯 𑀲𑀩𑁆𑀩𑀧𑀭𑀺𑀬𑀢𑁆𑀢𑀺𑀧𑁆𑀧𑀪𑁂𑀤𑀁 𑀥𑀸𑀭𑁂𑀦𑁆𑀢𑀻𑀢𑀺 𑀢𑀺𑀧𑀺𑀝𑀓𑀲𑀩𑁆𑀩𑀧𑀭𑀺𑀬𑀢𑁆𑀢𑀺𑀧𑁆𑀧𑀪𑁂𑀤𑀥𑀭𑀸. ‘‘𑀯𑀺𑀦𑀸 𑀦 𑀲𑀓𑁆𑀓𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀁 ‘‘𑀢𑀺𑀧𑀺𑀝𑀓𑀲𑀩𑁆𑀩𑀧𑀭𑀺𑀬𑀢𑁆𑀢𑀺𑀧𑁆𑀧𑀪𑁂𑀤𑀥𑀭𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀏𑀯𑀁 𑀲𑀦𑁆𑀢𑁂𑀧𑀺 𑀅𑀢𑁆𑀣𑀺 𑀯𑀺𑀲𑁂𑀲𑁄 𑀢𑁂𑀳𑀺 𑀲𑀫𑁆𑀫𑀼𑀔𑀸𑀧𑀺 𑀅𑀲𑀫𑁆𑀫𑀼𑀔𑀸𑀧𑀺 𑀲𑀼𑀢𑀁, 𑀣𑁂𑀭𑁂𑀦 𑀧𑀦 𑀅𑀲𑀫𑁆𑀫𑀼𑀔𑀸𑀧𑀝𑀺𑀕𑁆𑀕𑀳𑀺𑀢𑀁 𑀦𑀸𑀫 𑀦𑀢𑁆𑀣𑀻𑀢𑀺. 𑀦 𑀯𑀸𑀬𑀦𑁆𑀢𑀺 𑀏𑀢𑁆𑀣 𑀯𑀸𑀢𑀺 𑀯𑀺𑀪𑀸𑀲𑀸, 𑀅𑀜𑁆𑀜𑀸𑀲𑀺𑀧𑀺 𑀦 𑀅𑀜𑁆𑀜𑀸𑀲𑀺𑀧𑀻𑀢𑀺 𑀅𑀢𑁆𑀣𑁄. 𑀢𑀢𑁆𑀭 𑀉𑀘𑁆𑀘𑀺𑀦𑀦𑁂. 𑀩𑀳𑀼𑀲𑀤𑁆𑀤𑁄 𑀯𑀺𑀧𑀼𑀮𑁆𑀮𑀢𑁆𑀣𑁄 ‘‘𑀅𑀦𑀦𑁆𑀢𑀧𑀸𑀭𑀁 𑀩𑀳𑀼 𑀯𑁂𑀤𑀺𑀢𑀩𑁆𑀩𑀫𑀺𑀢𑁆𑀬’’𑀢𑁆𑀭𑁂𑀯. 𑀧𑀼𑀩𑁆𑀩𑁂 ‘‘𑀢𑀺𑀧𑀺𑀝𑀓𑀲𑀩𑁆𑀩𑀧𑀅𑀬𑀢𑁆𑀢𑀺𑀧𑁆𑀧𑀪𑁂𑀤𑀥𑀭𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀩𑀳𑀼 𑀘𑀸𑀦𑁂𑀦…𑀧𑁂… 𑀧𑀭𑀺𑀬𑀢𑁆𑀢𑁄’’𑀢𑀺 𑀦 𑀬𑀼𑀚𑁆𑀚𑀢𑀻𑀢𑀺 𑀘𑁂? 𑀦, 𑀢𑀺𑀧𑀺𑀝𑀓𑀲𑁆𑀲 𑀅𑀦𑀦𑁆𑀢𑀢𑁆𑀢𑀸, 𑀢𑀲𑁆𑀫𑀸 𑀅𑀫𑁆𑀳𑁂 𑀉𑀧𑀸𑀤𑀸𑀬 𑀢𑁂𑀦 𑀩𑀳𑀼 𑀧𑀭𑀺𑀬𑀢𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀢𑀭𑀣𑀸 𑀆𑀦𑀦𑁆𑀤𑀢𑁆𑀣𑁂𑀭𑁄 𑀢𑁂𑀳𑀺 𑀅𑀧𑁆𑀧𑀲𑁆𑀲𑀼𑀢𑁄𑀢𑀺 𑀆𑀧𑀚𑁆𑀚𑀢𑀺, ‘‘𑀅𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁 𑀦𑀸𑀫 𑀦𑀢𑁆𑀣𑀻’’𑀢𑀺 𑀯𑀘𑀦𑀯𑀺𑀭𑁄𑀥𑁄 𑀘. 𑀅𑀟𑁆𑀠𑀫𑀸𑀲𑁄 𑀅𑀢𑀺𑀓𑁆𑀓𑀦𑁆𑀢𑁄𑀢𑀺 𑀏𑀢𑁆𑀣 𑀏𑀓𑁄 𑀤𑀺𑀯𑀲𑁄 𑀦𑀝𑁆𑀞𑁄, 𑀲𑁄 𑀧𑀸𑀝𑀺𑀧𑀤𑀤𑀺𑀯𑀲𑁄, 𑀓𑁄𑀮𑀸𑀳𑀮𑀤𑀺𑀯𑀲𑁄 𑀦𑀸𑀫 𑀲𑁄, 𑀢𑀲𑁆𑀫𑀸 𑀇𑀥 𑀦 𑀕𑀳𑀺𑀢𑁄. 𑀲𑀁𑀯𑁂𑀕𑀯𑀢𑁆𑀣𑀼𑀁 𑀓𑀺𑀢𑁆𑀢𑁂𑀢𑁆𑀯𑀸 𑀓𑀻𑀴𑀦𑀢𑁄 𑀲𑀸𑀥𑀼𑀓𑀻𑀴𑀦𑀁 𑀦𑀸𑀫. 𑀲𑁆𑀯𑁂𑀧𑀻𑀢𑀺 𑀅𑀧𑀺-𑀲𑀤𑁆𑀤𑁄 𑀅𑀧𑁂𑀓𑁆𑀔𑀸𑀫𑀦𑁆𑀢𑀸𑀦𑀼𑀜𑁆𑀜𑀸𑀬. 𑀲𑀼𑀪𑀲𑀼𑀢𑁆𑀢𑀁 ‘‘𑀅𑀘𑀺𑀭𑀧𑀭𑀺𑀦𑀺𑀩𑁆𑀩𑀼𑀢𑁂 𑀪𑀕𑀯𑀢𑀻’’𑀢𑀺 (𑀤𑀻. 𑀦𑀺. 𑁧.𑁪𑁪𑁪) 𑀯𑀼𑀢𑁆𑀢𑀢𑁆𑀢𑀸 𑀘𑀢𑀼𑀭𑀸𑀲𑀻𑀢𑀺𑀥𑀫𑁆𑀫𑀓𑁆𑀔𑀦𑁆𑀥𑀲𑀳𑀲𑁆𑀲𑁂𑀲𑀼 𑀅𑀦𑁆𑀢𑁄𑀕𑀥𑀁 𑀦 𑀳𑁄𑀢𑀻𑀢𑀺 𑀘𑁂? 𑀦, 𑀪𑀕𑀯𑀢𑁄 𑀓𑀸𑀮𑁂 𑀮𑀤𑁆𑀥𑀦𑀬𑀢𑁆𑀢𑀸 𑀓𑀣𑀸𑀯𑀢𑁆𑀣𑀼 𑀯𑀺𑀬. 𑀙𑀟𑁆𑀟𑀺𑀢𑀸 𑀧𑀢𑀺𑀢𑀸 𑀉𑀓𑁆𑀮𑀸𑀧𑀸 𑀙𑀟𑁆𑀟𑀺𑀢𑀧𑀢𑀺𑀢𑀉𑀓𑁆𑀮𑀸𑀧𑀸. 𑀆𑀡𑀸 𑀏𑀯 𑀅𑀧𑁆𑀧𑀝𑀺𑀳𑀢𑀝𑁆𑀞𑁂𑀦 𑀘𑀓𑁆𑀓𑀦𑁆𑀢𑀺 𑀆𑀡𑀸𑀘𑀓𑁆𑀓𑀁. 𑀏𑀓𑀢𑁄 𑀏𑀢𑁆𑀣 𑀦𑀺𑀧𑀢𑀦𑁆𑀢𑀻𑀢𑀺 𑀏𑀓𑀦𑀺𑀧𑀸𑀢𑀦𑀁. 𑀆𑀓𑀸𑀲𑁂𑀦 𑀆𑀕𑀦𑁆𑀢𑁆𑀯𑀸 𑀦𑀺𑀲𑀻𑀤𑀻𑀢𑀺 𑀏𑀓𑁂𑀢𑀺 𑀏𑀢𑀁 𑀤𑀼𑀢𑀺𑀬𑀯𑀸𑀭𑁂 𑀕𑀫𑀦𑀁 𑀲𑀦𑁆𑀥𑀸𑀬𑀸𑀢𑀺 𑀆𑀬𑀲𑁆𑀫𑀸 𑀉𑀧𑀢𑀺𑀲𑁆𑀲𑁄. 𑀧𑀞𑀫𑀁 𑀯𑀸 𑀆𑀓𑀸𑀲𑁂𑀦 𑀕𑀦𑁆𑀢𑁆𑀯𑀸 𑀧𑀭𑀺𑀲𑀁 𑀧𑀢𑁆𑀯𑀸 𑀪𑀺𑀓𑁆𑀔𑀼𑀧𑀦𑁆𑀢𑀺𑀁 𑀅𑀧𑀻𑀴𑁂𑀦𑁆𑀢𑁄 𑀧𑀣𑀯𑀺𑀬𑀁 𑀦𑀺𑀫𑀼𑀚𑁆𑀚𑀺𑀢𑁆𑀯𑀸 𑀆𑀲𑀦𑁂 𑀏𑀯 𑀅𑀢𑁆𑀢𑀸𑀦𑀁 𑀤𑀲𑁆𑀲𑁂𑀲𑀺. 𑀉𑀪𑀬𑀣𑀸 𑀘 𑀆𑀧𑀸𑀣𑀁 𑀕𑀢𑁄, 𑀢𑁂𑀦 𑀉𑀪𑀬𑀫𑁆𑀧𑀺 𑀬𑀼𑀚𑁆𑀚𑀢𑀺, 𑀅𑀜𑁆𑀜𑀣𑀸 𑀤𑁆𑀯𑀻𑀲𑀼 𑀏𑀓𑀁 𑀅𑀪𑀽𑀢𑀁 𑀆𑀧𑀚𑁆𑀚𑀢𑀺.

𑀅𑀣 𑀔𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀆𑀬𑀲𑁆𑀫𑀦𑁆𑀢𑀁 𑀉𑀧𑀸𑀮𑀺𑀁 𑀧𑀼𑀘𑁆𑀙𑀺…𑀧𑁂… 𑀆𑀬𑀲𑁆𑀫𑀸 𑀉𑀧𑀸𑀮𑀺𑀢𑁆𑀣𑁂𑀭𑁄 𑀯𑀺𑀲𑁆𑀲𑀚𑁆𑀚𑁂𑀲𑀻𑀢𑀺 𑀇𑀤𑀁 𑀧𑀼𑀩𑁆𑀩𑁂 ‘‘𑀧𑀞𑀫𑀁 𑀆𑀯𑀼𑀲𑁄 𑀉𑀧𑀸𑀮𑀻’’𑀢𑀺𑀆𑀤𑀺𑀦𑀸 (𑀘𑀽𑀴𑀯. 𑁪𑁩𑁯) 𑀯𑀼𑀢𑁆𑀢𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀲𑀗𑁆𑀕𑀻𑀢𑀺𑀓𑀸𑀭𑀓𑁂𑀳𑀺 𑀤𑀲𑁆𑀲𑀺𑀢𑀯𑀘𑀦𑀦𑁆𑀢𑀺 𑀕𑀡𑁆𑀞𑀺𑀧𑀤𑁂 𑀮𑀺𑀔𑀺𑀢𑀁. 𑀢𑀣𑀸 𑀳𑁄𑀢𑀼, 𑀓𑀺𑀫𑀢𑁆𑀣𑀁 𑀧𑀦𑁂𑀢𑁆𑀣 ‘‘𑀦𑀺𑀤𑀸𑀦𑀫𑁆𑀧𑀺 𑀧𑀼𑀘𑁆𑀙𑀺, 𑀧𑀼𑀕𑁆𑀕𑀮𑀫𑁆𑀧𑀺 𑀧𑀼𑀘𑁆𑀙𑀺, 𑀯𑀢𑁆𑀣𑀼𑀫𑁆𑀧𑀺 𑀧𑀼𑀘𑁆𑀙𑀻’’𑀢𑀺 𑀏𑀯𑀁 𑀧𑀼𑀩𑁆𑀩𑁂 𑀤𑀲𑁆𑀲𑀺𑀢𑀸𑀦𑀼𑀓𑁆𑀓𑀫𑁂𑀦 𑀅𑀯𑀢𑁆𑀯𑀸 ‘‘𑀯𑀢𑁆𑀣𑀼𑀫𑁆𑀧𑀺 𑀧𑀼𑀘𑁆𑀙𑀺, 𑀦𑀺𑀤𑀸𑀦𑀫𑁆𑀧𑀺 𑀧𑀼𑀘𑁆𑀙𑀺, 𑀧𑀼𑀕𑁆𑀕𑀮𑀫𑁆𑀧𑀺 𑀧𑀼𑀘𑁆𑀙𑀻’’𑀢𑀺 𑀏𑀯𑀁 𑀅𑀦𑀼𑀓𑁆𑀓𑀫𑁄 𑀓𑀢𑁄𑀢𑀺? ‘‘𑀯𑀢𑁆𑀣𑀼𑀫𑀽𑀮𑀓𑀢𑁆𑀢𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺 𑀏𑀓𑁂. 𑀏𑀢𑁆𑀣 𑀧𑀦 𑀯𑀺𑀘𑀸𑀭𑀡𑀸 𑀯𑁂𑀭𑀜𑁆𑀚𑀓𑀡𑁆𑀟𑁂 𑀲𑀫𑁆𑀧𑀢𑁆𑀢𑁂 𑀓𑀭𑀻𑀬𑀢𑀺. 𑀭𑀸𑀚𑀸𑀕𑀸𑀭𑀓𑁂𑀢𑀺 𑀏𑀯𑀁𑀦𑀸𑀫𑀓𑁂 𑀉𑀬𑁆𑀬𑀸𑀦𑁂. 𑀅𑀪𑀺𑀭𑀫𑀦𑀸𑀭𑀳𑀁 𑀓𑀺𑀭 𑀭𑀸𑀚𑀸𑀕𑀸𑀭𑀫𑁆𑀧𑀺. 𑀢𑀢𑁆𑀣, 𑀬𑀲𑁆𑀲 𑀯𑀲𑁂𑀦𑁂𑀢𑀁 𑀏𑀯𑀁 𑀦𑀸𑀫𑀁 𑀮𑀪𑀢𑀺. 𑀅𑀣 𑀔𑁄 ‘‘𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄’’𑀢𑀺𑀆𑀤𑀺𑀦𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀫𑁂𑀯 𑀲𑀗𑁆𑀔𑀺𑀧𑀺𑀢𑁆𑀯𑀸 𑀤𑀲𑁆𑀲𑁂𑀢𑀺 𑀲𑀗𑁆𑀕𑀻𑀢𑀺𑀓𑀸𑀭𑀓𑁄 𑀯𑀲𑀻𑀕𑀡𑁄. 𑀬𑀤𑀺 𑀏𑀯𑀁 𑀬𑀣𑀸 𑀦𑀺𑀤𑀸𑀦𑀫𑁆𑀧𑀺 𑀧𑀼𑀘𑁆𑀙𑀺, 𑀧𑀼𑀕𑁆𑀕𑀮𑀫𑁆𑀧𑀺 𑀧𑀼𑀘𑁆𑀙𑀻𑀢𑀺 𑀏𑀢𑁆𑀣 𑀧𑀼𑀘𑁆𑀙𑀸𑀓𑁆𑀓𑀫𑁄 𑀤𑀲𑁆𑀲𑀺𑀢𑁄, 𑀢𑀣𑀸 𑀆𑀦𑀦𑁆𑀤𑀢𑁆𑀣𑁂𑀭𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑀓𑁆𑀓𑀫𑁄𑀧𑀺 𑀓𑀺𑀫𑀢𑁆𑀣𑀁 𑀦 𑀤𑀲𑁆𑀲𑀺𑀢𑁄𑀢𑀺 𑀘𑁂? 𑀇𑀫𑀺𑀦𑀸𑀦𑀼𑀓𑁆𑀓𑀫𑁂𑀦 𑀲𑀗𑁆𑀕𑀳𑀁 𑀧𑀜𑁆𑀘𑀧𑀺 𑀦𑀺𑀓𑀸𑀬𑀸 𑀅𑀦𑀸𑀭𑀼𑀴𑁆𑀳𑀸𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀓𑀣𑀁 𑀧𑀦 𑀆𑀭𑀼𑀴𑁆𑀳𑀸𑀢𑀺? 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀧𑀜𑁆𑀘𑀧𑀺 𑀦𑀺𑀓𑀸𑀬𑁂 𑀅𑀦𑀼𑀓𑁆𑀓𑀫𑁂𑀦𑁂𑀯 𑀧𑀼𑀘𑁆𑀙𑀺, 𑀆𑀦𑀦𑁆𑀤𑀢𑁆𑀣𑁂𑀭𑁄 𑀧𑀦 𑀅𑀦𑀼𑀓𑁆𑀓𑀫𑁂𑀦𑁂𑀯 𑀧𑀼𑀘𑁆𑀙𑀺𑀢𑀫𑁆𑀧𑀺 𑀅𑀧𑀼𑀘𑁆𑀙𑀺𑀢𑀫𑁆𑀧𑀺 𑀢𑀲𑁆𑀲 𑀢𑀲𑁆𑀲 𑀲𑀼𑀢𑁆𑀢𑀲𑁆𑀲 𑀲𑀪𑀸𑀯𑀁 𑀅𑀦𑁆𑀢𑀭𑀸 𑀉𑀧𑁆𑀧𑀦𑁆𑀦𑀁 𑀯𑀢𑁆𑀣𑀼𑀁 𑀉𑀤𑁆𑀤𑁂𑀲𑀦𑀺𑀤𑁆𑀤𑁂𑀲𑀓𑁆𑀓𑀫𑀁 𑀫𑀸𑀢𑀺𑀓𑀸𑀯𑀺𑀪𑀗𑁆𑀕𑀓𑁆𑀓𑀫𑀦𑁆𑀢𑀺 𑀏𑀯𑀫𑀸𑀤𑀺𑀲𑀩𑁆𑀩𑀁 𑀅𑀦𑀼𑀭𑀽𑀧𑀯𑀘𑀦𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑁂𑀲𑀺, 𑀢𑁂𑀦𑁂𑀯𑀸𑀳 ‘‘𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀧𑀜𑁆𑀘𑀧𑀺 𑀦𑀺𑀓𑀸𑀬𑁂 𑀧𑀼𑀘𑁆𑀙𑀻’’𑀢𑀺. 𑀅𑀣 𑀯𑀸 ‘‘𑀅𑀫𑁆𑀩𑀮𑀝𑁆𑀞𑀺𑀓𑀸𑀬𑀁 𑀭𑀸𑀚𑀸𑀕𑀸𑀭𑀓𑁂’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀭𑀸𑀚𑀸𑀕𑀸𑀭𑀓𑁂 𑀅𑀫𑁆𑀩𑀮𑀝𑁆𑀞𑀺𑀓𑀸𑀬’’𑀦𑁆𑀢𑀺 𑀉𑀧𑁆𑀧𑀝𑀺𑀧𑀸𑀝𑀺𑀯𑀘𑀦𑁂𑀦𑀧𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺. ‘‘𑀅𑀫𑁆𑀩𑀮𑀝𑁆𑀞𑀺𑀓𑀸𑀬𑀁 𑀯𑀺𑀳𑀭𑀢𑀺 𑀭𑀸𑀚𑀸𑀕𑀸𑀭𑀓𑁂’’𑀢𑀺 𑀳𑀺 𑀯𑀼𑀢𑁆𑀢𑀁.

𑀕𑀳𑀓𑀸𑀭𑀦𑁆𑀢𑀺 𑀇𑀫𑀲𑁆𑀲 𑀅𑀢𑁆𑀢𑀪𑀸𑀯𑀕𑁂𑀳𑀲𑁆𑀲 𑀓𑀸𑀭𑀓𑀁 𑀢𑀡𑁆𑀳𑀸𑀯𑀟𑁆𑀠𑀓𑀺𑀁 𑀕𑀯𑁂𑀲𑀦𑁆𑀢𑁄 𑀬𑁂𑀦 𑀜𑀸𑀡𑁂𑀦 𑀲𑀓𑁆𑀓𑀸 𑀲𑁄 𑀤𑀝𑁆𑀞𑀼𑀁, 𑀢𑀲𑁆𑀲𑀢𑁆𑀣𑀸𑀬 𑀤𑀻𑀧𑀗𑁆𑀓𑀭𑀧𑀸𑀤𑀫𑀽𑀮𑁂 𑀓𑀢𑀸𑀪𑀺𑀦𑀻𑀳𑀸𑀭𑁄 𑀏𑀢𑁆𑀢𑀓𑀁 𑀓𑀸𑀮𑀁 𑀅𑀦𑁂𑀓𑀚𑀸𑀢𑀺𑀲𑀁𑀲𑀸𑀭𑀁 𑀢𑀁 𑀜𑀸𑀡𑀁 𑀅𑀯𑀺𑀦𑁆𑀤𑀦𑁆𑀢𑁄 𑀯𑀺𑀘𑀭𑀺𑀦𑁆𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀸 𑀚𑀸𑀢𑀺 𑀧𑀼𑀦𑀧𑁆𑀧𑀼𑀦𑀦𑁆𑀢𑀺 𑀇𑀤𑀁 𑀕𑀳𑀓𑀸𑀭𑀓𑀕𑀯𑁂𑀲𑀦𑀲𑁆𑀲 𑀓𑀸𑀭𑀡𑀯𑀘𑀦𑀁. 𑀲𑀩𑁆𑀩𑀸 𑀢𑁂 𑀨𑀸𑀲𑀼𑀓𑀸𑀢𑀺 𑀢𑀯 𑀲𑀩𑁆𑀩𑀸 𑀅𑀦𑀯𑀲𑁂𑀲𑀓𑀺𑀮𑁂𑀲𑀨𑀸𑀲𑀼𑀓𑀸 𑀫𑀬𑀸 𑀪𑀕𑁆𑀕𑀸. 𑀕𑀳𑀓𑀽𑀝𑀁 𑀦𑀸𑀫 𑀅𑀯𑀺𑀚𑁆𑀚𑀸. 𑀲𑁄𑀫𑀦𑀲𑁆𑀲𑀲𑀳𑀕𑀢𑀁 𑀜𑀸𑀡𑀁 𑀲𑁄𑀫𑀦𑀲𑁆𑀲𑀫𑀬𑀁. 𑀦 𑀳𑀺 𑀲𑁄𑀫𑀦𑀲𑁆𑀲𑀫𑀬𑀁 𑀜𑀸𑀡𑀁 𑀔𑀦𑁆𑀥𑀲𑀪𑀸𑀯𑀪𑁂𑀤𑀢𑁄. 𑀤𑀴𑁆𑀳𑀻𑀓𑀫𑁆𑀫𑀲𑀺𑀣𑀺𑀮𑀓𑀭𑀡𑀧𑁆𑀧𑀬𑁄𑀚𑀦𑀸𑀢𑀺 𑀬𑁂𑀪𑀼𑀬𑁆𑀬𑀢𑀸𑀬 𑀯𑀼𑀢𑁆𑀢𑀁, 𑀢𑀁 𑀧𑀦 𑀢𑀢𑁆𑀣 𑀢𑀢𑁆𑀣 𑀧𑀓𑀸𑀲𑀬𑀺𑀲𑁆𑀲𑀸𑀫. 𑀅𑀜𑁆𑀜𑀫𑀜𑁆𑀜𑀲𑀗𑁆𑀓𑀭𑀯𑀺𑀭𑀳𑀺𑀢𑁂 𑀥𑀫𑁆𑀫𑁂 𑀘 𑀯𑀺𑀦𑀬𑁂 𑀘𑀸𑀢𑀺 𑀏𑀢𑁆𑀣 𑀧𑀸𑀡𑀸𑀢𑀺𑀧𑀸𑀢𑁄 𑀅𑀓𑀼𑀲𑀮𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 𑀫𑀭𑀡𑀸𑀥𑀺𑀧𑁆𑀧𑀸𑀬𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀼𑀧𑀘𑁆𑀙𑁂𑀤𑀓𑀧𑁆𑀧𑀬𑁄𑀕𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸 𑀅𑀓𑀼𑀲𑀮𑀁, 𑀦 𑀧𑀸𑀡𑀲𑀗𑁆𑀔𑀸𑀢𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀉𑀧𑀘𑁆𑀙𑁂𑀤𑀓𑀲𑀗𑁆𑀔𑀸𑀢𑁄 𑀅𑀢𑀺𑀧𑀸𑀢𑁄. 𑀢𑀣𑀸 𑀅𑀤𑀺𑀦𑁆𑀦𑀲𑁆𑀲 𑀧𑀭𑀲𑀦𑁆𑀢𑀓𑀲𑁆𑀲 𑀆𑀤𑀸𑀦𑀲𑀗𑁆𑀔𑀸𑀢𑀸 𑀯𑀺𑀜𑁆𑀜𑀢𑁆𑀢𑀺 𑀅𑀩𑁆𑀬𑀸𑀓𑀢𑁄 𑀥𑀫𑁆𑀫𑁄, 𑀢𑀩𑁆𑀩𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀺𑀓𑀸 𑀣𑁂𑀬𑁆𑀬𑀘𑁂𑀢𑀦𑀸 𑀅𑀓𑀼𑀲𑀮𑁄 𑀥𑀫𑁆𑀫𑁄𑀢𑀺 (𑀧𑀝𑁆𑀞𑀸. 𑁧.𑁧.𑁨𑁭) 𑀏𑀯𑀫𑀸𑀤𑀺𑀦𑀸 𑀅𑀜𑁆𑀜𑀫𑀜𑁆𑀜𑀲𑀗𑁆𑀓𑀭𑀯𑀺𑀭𑀳𑀺𑀢𑁂 𑀥𑀫𑁆𑀫𑁂 𑀧𑀝𑀺𑀩𑀮𑁄 𑀯𑀺𑀦𑁂𑀢𑀼𑀁. 𑀚𑀸𑀢𑀭𑀽𑀧𑀭𑀚𑀢𑀁 𑀧𑀭𑀲𑀦𑁆𑀢𑀓𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀡𑁆𑀳𑀦𑁆𑀢𑀲𑁆𑀲 𑀬𑀣𑀸𑀯𑀢𑁆𑀣𑀼𑀁 𑀧𑀸𑀭𑀸𑀚𑀺𑀓𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑁂𑀲𑀼 𑀅𑀜𑁆𑀜𑀢𑀭𑀁, 𑀪𑀡𑁆𑀟𑀸𑀕𑀸𑀭𑀺𑀓𑀲𑀻𑀲𑁂𑀦 𑀤𑀺𑀬𑁆𑀬𑀫𑀸𑀦𑀁 𑀕𑀡𑁆𑀳𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁, 𑀅𑀢𑁆𑀢𑀢𑁆𑀣𑀸𑀬 𑀕𑀡𑁆𑀳𑀦𑁆𑀢𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀓𑁂𑀯𑀮𑀁 𑀮𑁄𑀮𑀢𑀸𑀬 𑀕𑀡𑁆𑀳𑀦𑁆𑀢𑀲𑁆𑀲 𑀅𑀦𑀸𑀫𑀸𑀲𑀤𑀼𑀓𑁆𑀓𑀝𑀁, 𑀭𑀽𑀧𑀺𑀬𑀙𑀟𑁆𑀟𑀓𑀲𑀫𑁆𑀫𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀏𑀯𑀁 𑀅𑀜𑁆𑀜𑀫𑀜𑁆𑀜𑀲𑀗𑁆𑀓𑀭𑀯𑀺𑀭𑀳𑀺𑀢𑁂 𑀯𑀺𑀦𑀬𑁂𑀧𑀺 𑀧𑀝𑀺𑀩𑀮𑁄 𑀯𑀺𑀦𑁂𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀪𑀸𑀯𑁂𑀢𑀻𑀢𑀺 𑀯𑀟𑁆𑀠𑁂𑀢𑀺, 𑀏𑀢𑁂𑀦 𑀨𑀮𑀯𑀲𑁂𑀦 𑀚𑀯𑀦𑀯𑀲𑁂𑀦 𑀘 𑀘𑀺𑀢𑁆𑀢𑀲𑁆𑀲 𑀯𑀼𑀤𑁆𑀥𑀺𑀁 𑀤𑀲𑁆𑀲𑁂𑀢𑀺. ‘‘𑀅𑀯𑀺𑀲𑀺𑀝𑁆𑀞’’𑀦𑁆𑀢𑀺 𑀧𑀸𑀞𑁄, 𑀲𑀸𑀥𑀸𑀭𑀡𑀦𑁆𑀢𑀺 𑀅𑀢𑁆𑀣𑁄.

𑀤𑁂𑀲𑁂𑀦𑁆𑀢𑀲𑁆𑀲 𑀯𑀲𑁂𑀦𑁂𑀢𑁆𑀣, 𑀤𑁂𑀲𑀦𑀸 𑀧𑀺𑀝𑀓𑀢𑁆𑀢𑀬𑀁;

𑀲𑀸𑀲𑀺𑀢𑀩𑁆𑀩𑀯𑀲𑁂𑀦𑁂𑀢𑀁, 𑀲𑀸𑀲𑀦𑀦𑁆𑀢𑀺𑀧𑀺 𑀯𑀼𑀘𑁆𑀘𑀢𑀺.

𑀓𑀣𑁂𑀢𑀩𑁆𑀩𑀲𑁆𑀲 𑀅𑀢𑁆𑀣𑀲𑁆𑀲, 𑀯𑀲𑁂𑀦𑀸𑀧𑀺 𑀓𑀣𑀸𑀢𑀺 𑀘;

𑀤𑁂𑀲𑀦𑀸 𑀲𑀸𑀲𑀦𑀸 𑀓𑀣𑀸, 𑀪𑁂𑀤𑀫𑁆𑀧𑁂𑀯𑀁 𑀧𑀓𑀸𑀲𑀬𑁂.

𑀲𑀸𑀲𑀦𑀲𑁆𑀲 𑀦𑀧𑀼𑀁𑀲𑀓𑀢𑁆𑀢𑀸 ‘‘𑀬𑀣𑀸…𑀧𑁂… 𑀥𑀫𑁆𑀫𑀲𑀸𑀲𑀦𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑀁 𑀦𑀸𑀫 𑀅𑀢𑁆𑀣𑀢𑁄 𑀘𑁂𑀢𑀦𑀸, 𑀢𑀣𑀸𑀓𑀸𑀭𑀧𑁆𑀧𑀯𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀯𑀸. 𑀅𑀦𑀺𑀘𑁆𑀘𑀸𑀤𑀺𑀮𑀓𑁆𑀔𑀡𑀁 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 𑀧𑀯𑀢𑁆𑀢𑀢𑁆𑀢𑀸 𑀯𑀺𑀧𑀲𑁆𑀲𑀦𑀸𑀘𑀺𑀢𑁆𑀢𑀸𑀦𑀺 𑀯𑀺𑀲𑀬𑀢𑁄 𑀮𑁄𑀓𑀺𑀬𑀸’𑀪𑀺𑀲𑀫𑀬𑁄 𑀅𑀲𑀫𑁆𑀫𑁄𑀳𑀢𑁄 𑀮𑁄𑀓𑀼𑀢𑁆𑀢𑀭𑁄, 𑀮𑁄𑀓𑀼𑀢𑁆𑀢𑀭𑁄 𑀏𑀯 𑀯𑀸 𑀅𑀪𑀺𑀲𑀫𑀬𑁄 𑀯𑀺𑀲𑀬𑀢𑁄 𑀦𑀺𑀩𑁆𑀩𑀸𑀦𑀲𑀗𑁆𑀔𑀸𑀢𑀲𑁆𑀲 𑀅𑀢𑁆𑀣𑀲𑁆𑀲, 𑀇𑀢𑀭𑀲𑁆𑀲 𑀫𑀕𑁆𑀕𑀸𑀤𑀺𑀓𑀲𑁆𑀲 𑀅𑀲𑀫𑁆𑀫𑁄𑀳𑀢𑁄𑀢𑀺𑀧𑀺 𑀏𑀓𑁂. 𑀏𑀢𑁆𑀣 ‘‘𑀧𑀝𑀺𑀯𑁂𑀥𑁄’’𑀢𑀺 𑀯𑀼𑀢𑁆𑀢𑀁 𑀜𑀸𑀡𑀁, 𑀢𑀁 𑀓𑀣𑀁 𑀕𑀫𑁆𑀪𑀻𑀭𑀦𑁆𑀢𑀺 𑀘𑁂? 𑀕𑀫𑁆𑀪𑀻𑀭𑀲𑁆𑀲 𑀉𑀤𑀓𑀲𑁆𑀲 𑀧𑀫𑀸𑀡𑀕𑁆𑀕𑀳𑀡𑀓𑀸𑀮𑁂 𑀤𑀻𑀖𑁂𑀦 𑀧𑀫𑀸𑀡𑁂𑀦 𑀪𑀯𑀺𑀢𑀩𑁆𑀩𑀁, 𑀏𑀯𑀁 𑀅𑀮𑀩𑁆𑀪𑀦𑁂𑀬𑁆𑀬𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀇𑀤𑀸𑀦𑀻𑀢𑀺 𑀯𑀼𑀢𑁆𑀢𑀦𑁆𑀢𑀺 𑀏𑀓𑁂. 𑀬𑀲𑁆𑀲 𑀘𑀢𑁆𑀣𑀸𑀬 𑀫𑀕𑁆𑀕𑀨𑀮𑀢𑁆𑀣𑀸𑀬. 𑀢𑀜𑁆𑀘 𑀅𑀢𑁆𑀣𑀁 𑀦𑀸𑀦𑀼𑀪𑁄𑀦𑁆𑀢𑀺 𑀦𑀸𑀥𑀺𑀕𑀘𑁆𑀙𑀦𑁆𑀢𑀺 𑀓𑀜𑁆𑀘𑀺 𑀅𑀢𑁆𑀢𑀦𑀸 𑀅𑀥𑀺𑀧𑁆𑀧𑁂𑀢𑀁, 𑀇𑀢𑀺𑀯𑀸𑀤𑀧𑀫𑁄𑀓𑁆𑀔𑀜𑁆𑀘. 𑀓𑀲𑁆𑀫𑀸? 𑀅𑀢𑁆𑀣𑀲𑁆𑀲 𑀅𑀦𑀼𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀕𑀳𑀺𑀢𑀢𑁆𑀢𑀸. 𑀅𑀥𑀺𑀕𑀢𑀨𑀮𑀢𑁆𑀢𑀸 𑀧𑀝𑀺𑀯𑀺𑀤𑁆𑀥𑀸𑀓𑀼𑀧𑁆𑀧𑁄. 𑀧𑀼𑀦 𑀔𑀻𑀡𑀸𑀲𑀯𑀕𑁆𑀕𑀳𑀡𑁂𑀦 𑀅𑀭𑀳𑀦𑁆𑀢𑀫𑁂𑀯 𑀤𑀲𑁆𑀲𑁂𑀢𑀺, 𑀦 𑀲𑁂𑀓𑁆𑀔𑀁. 𑀲𑁄 𑀳𑀺 𑀬𑀣𑀸 𑀪𑀡𑁆𑀟𑀸𑀕𑀸𑀭𑀺𑀓𑁄 𑀭𑀜𑁆𑀜𑁄 𑀓𑀝𑀓𑀫𑀓𑀼𑀝𑀸𑀤𑀺𑀁 𑀕𑁄𑀧𑁂𑀢𑁆𑀯𑀸 𑀇𑀘𑁆𑀙𑀺𑀢𑀺𑀘𑁆𑀙𑀺𑀢𑀓𑁆𑀔𑀡𑁂 𑀉𑀧𑀦𑁂𑀢𑀺, 𑀏𑀯𑀁 𑀲𑀳𑁂𑀢𑀼𑀓𑀸𑀦𑀁 𑀲𑀢𑁆𑀢𑀸𑀦𑀁 𑀫𑀕𑁆𑀕𑀨𑀮𑀢𑁆𑀣𑀸𑀬 𑀥𑀫𑁆𑀫𑀁 𑀤𑁂𑀲𑁂𑀲𑀺. 𑀢𑀸𑀲𑀁𑀬𑁂𑀯 𑀢𑀢𑁆𑀣 𑀯𑀺𑀦𑀬𑀧𑀺𑀝𑀓𑁂 𑀧𑀪𑁂𑀤𑀢𑁄 𑀯𑀼𑀢𑁆𑀢𑀢𑁆𑀢𑀸, 𑀯𑀸𑀬𑀫𑀺𑀢𑁆𑀯𑀸 𑀢𑀸 𑀏𑀯 𑀧𑀸𑀧𑀼𑀡𑀸𑀢𑀻𑀢𑀺 𑀆𑀘𑀭𑀺𑀬𑀸. 𑀓𑀺𑀫𑀢𑁆𑀣𑀁 𑀢𑀺𑀲𑁆𑀲𑁄𑀯 𑀯𑀺𑀚𑁆𑀚𑀸 𑀢𑀢𑁆𑀣 𑀯𑀺𑀪𑀢𑁆𑀢𑀸𑀢𑀺? 𑀲𑀻𑀮𑀲𑀫𑁆𑀧𑀢𑁆𑀢𑀺𑀬𑀸 𑀏𑀢𑀧𑀭𑀫𑀼𑀧𑀦𑀺𑀲𑁆𑀲𑀬𑀪𑀸𑀯𑀢𑁄. ‘‘𑀅𑀧𑀭𑁂𑀳𑀺𑀧𑀺 𑀲𑀢𑁆𑀢𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀪𑀺𑀓𑁆𑀔𑀼 𑀯𑀺𑀦𑀬𑀥𑀭𑁄 𑀳𑁄𑀢𑀺. 𑀆𑀧𑀢𑁆𑀢𑀺𑀁 𑀚𑀸𑀦𑀸𑀢𑀺, 𑀅𑀦𑀸𑀧𑀢𑁆𑀢𑀺𑀁, 𑀮𑀳𑀼𑀓𑀁 𑀆𑀧𑀢𑁆𑀢𑀺𑀁, 𑀕𑀭𑀼𑀓𑀁 𑀆𑀧𑀢𑁆𑀢𑀺𑀁, 𑀅𑀦𑁂𑀓𑀯𑀺𑀳𑀺𑀢𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀅𑀦𑀼𑀲𑁆𑀲𑀭𑀢𑀺…𑀧𑁂… 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀯𑀺𑀲𑀼𑀤𑁆𑀥𑁂𑀦 𑀅𑀢𑀺𑀓𑁆𑀓𑀦𑁆𑀢𑀫𑀸𑀦𑀼𑀲𑀓𑁂𑀦 𑀲𑀢𑁆𑀢𑁂 𑀧𑀲𑁆𑀲𑀢𑀺…𑀧𑁂… 𑀆𑀲𑀯𑀸𑀦𑀜𑁆𑀘 𑀔𑀬𑀸…𑀧𑁂… 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀻’’𑀢𑀺 (𑀧𑀭𑀺. 𑁩𑁨𑁭) 𑀲𑀼𑀢𑁆𑀢𑀫𑁂𑀢𑁆𑀣 𑀲𑀸𑀥𑀓𑀁. 𑀯𑀺𑀦𑀬𑀁 𑀧𑀭𑀺𑀬𑀸𑀧𑀼𑀡𑀺𑀢𑁆𑀯𑀸 𑀲𑀻𑀮𑀲𑀫𑁆𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀆𑀲𑀯𑀓𑁆𑀔𑀬𑀜𑀸𑀡𑁂𑀦 𑀲𑀳𑁂𑀯 𑀯𑀺𑀬 𑀤𑀺𑀩𑁆𑀩𑀘𑀓𑁆𑀔𑀼𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀸𑀦𑀺 𑀧𑀝𑀺𑀮𑀪𑀢𑀺. 𑀯𑀺𑀲𑀼𑀁 𑀏𑀢𑁂𑀲𑀁 𑀧𑀭𑀺𑀓𑀫𑁆𑀫𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀢𑀸𑀲𑀁𑀬𑁂𑀯𑀸𑀢𑀺 𑀯𑀼𑀢𑁆𑀢𑀦𑁆𑀢𑀺 𑀘 𑀯𑀤𑀦𑁆𑀢𑀺 𑀏𑀓𑁂. 𑀅𑀪𑀺𑀥𑀫𑁆𑀫𑁂 𑀧𑀦 𑀢𑀺𑀲𑁆𑀲𑁄𑀯𑀺𑀚𑁆𑀚𑀸 𑀙 𑀅𑀪𑀺𑀜𑁆𑀜𑀸 𑀘𑀢𑀲𑁆𑀲𑁄 𑀘 𑀧𑀝𑀺𑀲𑀫𑁆𑀪𑀺𑀤𑀸 𑀅𑀜𑁆𑀜𑁂 𑀘 𑀲𑀫𑁆𑀫𑀧𑁆𑀧𑀥𑀸𑀦𑀸𑀤𑀬𑁄 𑀕𑀼𑀡𑀯𑀺𑀲𑁂𑀲𑀸 𑀯𑀺𑀪𑀢𑁆𑀢𑀸. 𑀓𑀺𑀜𑁆𑀘𑀸𑀧𑀺 𑀯𑀺𑀪𑀢𑁆𑀢𑀸, 𑀢𑀣𑀸𑀧𑀺 𑀯𑀺𑀲𑁂𑀲𑀢𑁄 𑀧𑀜𑁆𑀜𑀸𑀚𑀸𑀢𑀺𑀓𑀢𑁆𑀢𑀸 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸 𑀧𑀸𑀧𑀼𑀡𑀸𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀢𑀸𑀲𑀁 𑀢𑀢𑁆𑀣𑁂𑀯𑀸𑀢𑀺 𑀅𑀯𑀥𑀸𑀭𑀡𑀯𑀺𑀧𑀮𑁆𑀮𑀸𑀲𑁄 𑀓𑀢𑁄. 𑀅𑀢𑁆𑀢𑀦𑀸 𑀤𑀼𑀕𑁆𑀕𑀳𑀺𑀢𑁂𑀦 𑀥𑀫𑁆𑀫𑁂𑀦𑀸𑀢𑀺 𑀧𑀸𑀞𑀲𑁂𑀲𑁄. 𑀓𑀢𑁆𑀢𑀭𑀺 𑀘𑁂𑀢𑀁 𑀓𑀭𑀡𑀯𑀘𑀦𑀁, 𑀳𑁂𑀢𑀼𑀢𑁆𑀣𑁂 𑀘, 𑀅𑀢𑁆𑀢𑀦𑀸 𑀤𑀼𑀕𑁆𑀕𑀳𑀺𑀢𑀳𑁂𑀢𑀽𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀲𑁆𑀫𑀸 𑀧𑀦𑀸𑀢𑀺 ‘‘𑀅𑀦𑀼𑀮𑁄𑀫𑀺𑀓𑁄’’𑀢𑀺 𑀯𑀼𑀢𑁆𑀢𑀢𑁆𑀣𑀁 𑀤𑀻𑀧𑁂𑀢𑀺.

𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸𑀦𑀬𑁄.

𑀤𑀼𑀢𑀺𑀬𑀲𑀗𑁆𑀕𑀻𑀢𑀺𑀓𑀣𑀸𑀯𑀡𑁆𑀡𑀦𑀸

𑀧𑀦𑁆𑀦𑀪𑀸𑀭𑀸𑀢𑀺 𑀧𑀢𑀺𑀢𑀓𑁆𑀔𑀦𑁆𑀥𑀪𑀸𑀭𑀸. ‘‘𑀪𑀸𑀭𑀸 𑀳𑀯𑁂 𑀧𑀜𑁆𑀘𑀓𑁆𑀔𑀦𑁆𑀥𑀸’’𑀢𑀺 (𑀲𑀁. 𑀦𑀺. 𑁩.𑁨𑁨) 𑀳𑀺 𑀯𑀼𑀢𑁆𑀢𑀁. ‘‘𑀲𑀫𑁆𑀫𑀼𑀔𑀸 𑀪𑀯𑀺𑀲𑁆𑀲𑀸𑀫 𑀦 𑀪𑀯𑀺𑀲𑁆𑀲𑀸𑀫𑀸’’𑀢𑀺 𑀯𑀢𑁆𑀢𑀸𑀭𑁄. 𑀢𑁂𑀲𑀼 𑀤𑀳𑀭𑀸 𑀓𑀺𑀭. 𑀚𑀫𑁆𑀫𑀺𑀦𑁆𑀢𑀺 𑀮𑀸𑀫𑀓𑀁.