𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑀯𑀡𑁆𑀡𑀦𑀸

𑁧. 𑀧𑀸𑀭𑀸𑀚𑀺𑀓𑀓𑀡𑁆𑀟𑀯𑀡𑁆𑀡𑀦𑀸

𑀕𑀦𑁆𑀣𑀸𑀭𑀫𑁆𑀪𑀯𑀡𑁆𑀡𑀦𑀸

𑀯𑀺𑀪𑀗𑁆𑀕𑁂 𑀯𑀺𑀬 𑀪𑀺𑀓𑁆𑀔𑀽𑀦𑀁, 𑀯𑀺𑀢𑁆𑀣𑀸𑀭𑀫𑀪𑀺𑀲𑀗𑁆𑀔𑀢𑀁;

𑀅𑀓𑀢𑁆𑀯𑀸 𑀪𑀺𑀓𑁆𑀔𑀼𑀦𑀻𑀦𑀫𑁆𑀧𑀺, 𑀯𑀓𑁆𑀔𑁂 𑀕𑀡𑁆𑀞𑀺𑀧𑀤𑀓𑁆𑀓𑀫𑀁.

𑀬𑁄 𑀪𑀺𑀓𑁆𑀔𑀼𑀦𑀻𑀦𑀁 𑀯𑀺𑀪𑀗𑁆𑀕𑁄 𑀅𑀲𑁆𑀲, 𑀢𑀲𑁆𑀲 𑀲𑀁𑀯𑀡𑁆𑀡𑀦𑀸𑀓𑁆𑀓𑀫𑁄 𑀧𑀢𑁆𑀢𑁄𑀢𑀺 𑀅𑀢𑁆𑀣𑁄.

𑀕𑀦𑁆𑀣𑀸𑀭𑀫𑁆𑀪𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀧𑀞𑀫𑀧𑀸𑀭𑀸𑀚𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁫𑁬-𑁭. 𑀢𑀢𑁆𑀣 𑀢𑀢𑁆𑀣 𑀞𑀸𑀦𑀼𑀧𑁆𑀧𑀢𑁆𑀢𑀺𑀓𑀧𑀜𑁆𑀜𑀸 𑀯𑀻𑀫𑀁𑀲𑀸. 𑀧𑀤𑀧𑀝𑀺𑀧𑀸𑀝𑀺𑀬𑀸 𑀏𑀯𑀸𑀢𑀺 𑀫𑀸𑀢𑀺𑀓𑀸𑀧𑀤𑀧𑀝𑀺𑀧𑀸𑀝𑀺𑀬𑀸 𑀏𑀯. ‘‘𑀯𑀼𑀢𑁆𑀢𑀦𑁆𑀢𑀺 𑀲𑀗𑁆𑀕𑀻𑀢𑀺𑀓𑀸𑀦𑀁 𑀉𑀧𑀲𑀗𑁆𑀓𑀧𑁆𑀧𑀦𑀸𑀦𑀁 𑀯𑀺𑀪𑀸𑀚𑀦𑀁 𑀯𑀼𑀢𑁆𑀢’’𑀦𑁆𑀢𑀺 𑀮𑀺𑀔𑀺𑀢𑀁.

𑁬𑁫𑁮. ‘‘𑀏𑀳𑀺𑀪𑀺𑀓𑁆𑀔𑀼𑀦𑀻𑀢𑀺 𑀪𑀺𑀓𑁆𑀔𑀼𑀦𑀻, 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀉𑀧𑀲𑀫𑁆𑀧𑀦𑁆𑀦𑀸𑀢𑀺 𑀪𑀺𑀓𑁆𑀔𑀼𑀦𑀻’’𑀢𑀺 𑀇𑀤𑀁 𑀧𑀦 𑀤𑁂𑀲𑀦𑀸𑀯𑀺𑀮𑀸𑀲𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀏𑀓𑁂. 𑀅𑀜𑁆𑀜𑀩𑀼𑀤𑁆𑀥𑀓𑀸𑀮𑁂 𑀅𑀢𑁆𑀣𑀻𑀢𑀺 𑀏𑀓𑁂, 𑀢𑀁 𑀦 𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺 𑀅𑀫𑁆𑀳𑀸𑀓𑀫𑁆𑀧𑀺 𑀩𑀼𑀤𑁆𑀥𑀓𑀸𑀮𑁂 𑀲𑀫𑁆𑀪𑀯𑀧𑁆𑀧𑀲𑀗𑁆𑀕𑀢𑁄, 𑀏𑀳𑀺𑀪𑀺𑀓𑁆𑀔𑀼𑀦𑀺𑀬𑀸 𑀧𑀝𑀺𑀲𑁂𑀥𑀙𑀸𑀬𑀸𑀤𑀺𑀲𑁆𑀲𑀦𑀢𑁄 𑀘. 𑀬𑀣𑀸𑀳 𑀥𑀫𑁆𑀫𑀧𑀤𑁂 𑀯𑀺𑀲𑀸𑀔𑀸𑀯𑀢𑁆𑀣𑀼𑀲𑁆𑀫𑀺𑀁 (𑀥. 𑀧. 𑀅𑀝𑁆𑀞. 𑁧. 𑀯𑀺𑀲𑀸𑀔𑀸𑀯𑀢𑁆𑀣𑀼) ‘‘𑀢𑀲𑁆𑀲 𑀘𑀻𑀯𑀭𑀤𑀸𑀦𑀲𑁆𑀲 𑀦𑀺𑀲𑁆𑀲𑀦𑁆𑀤𑁂𑀦 𑀇𑀫𑀁 𑀫𑀳𑀸𑀮𑀢𑀸𑀧𑀲𑀸𑀥𑀦𑀁 𑀮𑀪𑀺. 𑀇𑀢𑁆𑀣𑀻𑀦𑀜𑁆𑀳𑀺 𑀘𑀻𑀯𑀭𑀤𑀸𑀦𑀁 𑀫𑀳𑀸𑀮𑀢𑀸𑀧𑀲𑀸𑀥𑀦𑀪𑀡𑁆𑀟𑁂𑀦 𑀫𑀢𑁆𑀣𑀓𑀁 𑀧𑀧𑁆𑀧𑁄𑀢𑀺, 𑀧𑀼𑀭𑀺𑀲𑀸𑀦𑀁 𑀇𑀤𑁆𑀥𑀺𑀫𑀬𑀧𑀢𑁆𑀢𑀘𑀻𑀯𑀭𑁂𑀦𑀸’’𑀢𑀺. 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀉𑀧𑀲𑀫𑁆𑀧𑀦𑁆𑀦𑀸𑀬 𑀧𑀦 𑀪𑀺𑀓𑁆𑀔𑀼𑀦𑀺𑀬𑀸 𑀲𑀫𑁆𑀪𑀯𑁄 𑀅𑀜𑁆𑀜𑀩𑀼𑀤𑁆𑀥𑀓𑀸𑀮𑁂 𑀓𑀤𑀸𑀘𑀺 𑀲𑀺𑀬𑀸, 𑀦𑀢𑁆𑀣𑁂𑀯 𑀅𑀫𑁆𑀳𑀸𑀓𑀁 𑀩𑀼𑀤𑁆𑀥𑀓𑀸𑀮𑁂. 𑀤𑁂𑀲𑀦𑀸𑀯𑀺𑀮𑀸𑀲𑁂𑀦 𑀧𑀦 𑀪𑀺𑀓𑁆𑀔𑀼𑀤𑁂𑀲𑀦𑀸𑀓𑁆𑀓𑀫𑁂𑀦𑁂𑀯 𑀪𑀺𑀓𑁆𑀔𑀼𑀦𑀺𑀦𑀺𑀤𑁆𑀤𑁂𑀲𑁄 𑀯𑀼𑀢𑁆𑀢𑁄, 𑀢𑁂𑀦𑁂𑀯 𑀪𑀺𑀓𑁆𑀔𑀼𑀲𑀗𑁆𑀖𑀯𑀲𑁂𑀦 𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸 𑀪𑀺𑀓𑁆𑀔𑀼𑀦𑀺𑀬𑁄 𑀯𑀺𑀚𑁆𑀚𑀫𑀸𑀦𑀸𑀧𑀺 𑀢𑀢𑁆𑀣 𑀦 𑀯𑀼𑀢𑁆𑀢𑀸. 𑀢𑀸𑀲𑀁 𑀅𑀢𑁆𑀣𑀺𑀢𑀸 𑀇𑀫𑀸𑀬 𑀧𑀭𑀺𑀯𑀸𑀭𑀓𑀣𑀸𑀬 𑀯𑁂𑀤𑀺𑀢𑀩𑁆𑀩𑀸 𑁋

‘‘𑀉𑀪𑁄 𑀏𑀓𑀢𑁄 𑀉𑀧𑀲𑀫𑁆𑀧𑀦𑁆𑀦𑀸,

𑀉𑀪𑀺𑀦𑁆𑀦𑀁 𑀳𑀢𑁆𑀣𑀢𑁄 𑀘𑀻𑀯𑀭𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬;

𑀲𑀺𑀬𑀸 𑀆𑀧𑀢𑁆𑀢𑀺𑀬𑁄 𑀦𑀸𑀦𑀸,

𑀧𑀜𑁆𑀳𑀸 𑀫𑁂𑀲𑀸 𑀓𑀼𑀲𑀮𑁂𑀳𑀺 𑀘𑀺𑀦𑁆𑀢𑀺𑀢𑀸’’𑀢𑀺. (𑀧𑀭𑀺. 𑁪𑁭𑁯);

𑀅𑀣 𑀯𑀸 𑀧𑀼𑀣𑀼𑀚𑁆𑀚𑀦𑀓𑀸𑀮𑁂 𑀏𑀳𑀺𑀪𑀺𑀓𑁆𑀔𑀼𑀲𑀭𑀡𑀕𑀫𑀦𑁂𑀦 𑀉𑀧𑀲𑀫𑁆𑀧𑀦𑁆𑀦𑁄𑀯 𑀇𑀢𑁆𑀣𑀺𑀮𑀺𑀗𑁆𑀕𑀧𑀸𑀢𑀼𑀪𑀸𑀯𑁂𑀦 𑀪𑀺𑀓𑁆𑀔𑀼𑀦𑀺𑀪𑀸𑀯𑁂 𑀞𑀺𑀢𑀸 𑀧𑀼𑀭𑀺𑀲𑀽𑀧𑀲𑀫𑁆𑀧𑀦𑁆𑀦𑀁 𑀉𑀧𑀸𑀤𑀸𑀬 ‘‘𑀏𑀳𑀺𑀪𑀺𑀓𑁆𑀔𑀼𑀦𑀻’’𑀢𑀺, ‘‘𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀉𑀧𑀲𑀫𑁆𑀧𑀦𑁆𑀦𑀸 𑀪𑀺𑀓𑁆𑀔𑀼𑀦𑀻’’𑀢𑀺 𑀘 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀦𑁄 𑀘𑁂, 𑀢𑀁 𑀯𑀘𑀦𑀁 𑀯𑀺𑀭𑀼𑀚𑁆𑀛𑁂𑀬𑁆𑀬𑀸𑀢𑀺 𑀏𑀓𑁂, 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. ‘‘𑀯𑀺𑀜𑁆𑀜𑀽 𑀧𑀝𑀺𑀩𑀮𑁄’’𑀢𑀺 𑀤𑁆𑀯𑀺𑀦𑁆𑀦𑀁 𑀅𑀯𑀲𑁆𑀲𑀯𑀪𑀸𑀯𑀲𑁆𑀲 𑀇𑀚𑁆𑀛𑀦𑀢𑁄 𑀯𑀼𑀢𑁆𑀢𑀁. 𑀏𑀢𑁆𑀣 𑀬𑀲𑁆𑀫𑀸 𑀬𑀁 𑀓𑀺𑀜𑁆𑀘𑀺 𑀆𑀫𑀺𑀲𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀻𑀦𑀁 𑀅𑀕𑁆𑀕𑀳𑀢𑁆𑀣𑀸 𑀧𑀼𑀭𑀺𑀲𑀸𑀦𑀁 𑀳𑀢𑁆𑀣𑁂𑀳𑀺 𑀓𑀤𑀸𑀘𑀺 𑀫𑀺𑀲𑁆𑀲𑀻𑀪𑀸𑀯𑀁 𑀕𑀘𑁆𑀙𑀦𑁆𑀢𑀺, 𑀯𑀦𑁆𑀤𑀦𑁆𑀢𑀸𑀦𑀁 𑀯𑀸 𑀧𑀼𑀭𑀺𑀲𑀸𑀦𑀁 𑀲𑀺𑀭𑀸𑀦𑀺 𑀅𑀕𑁆𑀕𑀧𑀸𑀤𑁂𑀳𑀺 𑀫𑀺𑀲𑁆𑀲𑀺𑀢𑀸𑀦𑀺 𑀓𑀤𑀸𑀘𑀺 𑀳𑁄𑀦𑁆𑀢𑀺, 𑀓𑁂𑀲𑀘𑁆𑀙𑁂𑀤𑀦𑀓𑀸𑀮𑁂 𑀯𑀸 𑀲𑀺𑀭𑀁 𑀧𑀼𑀭𑀺𑀲𑀸𑀦𑀁 𑀳𑀢𑁆𑀣𑁂𑀳𑀺 𑀫𑀺𑀲𑁆𑀲𑀺𑀢𑀁 𑀳𑁄𑀢𑀺, 𑀘𑀺𑀢𑁆𑀢𑀁 𑀦𑀸𑀫𑁂𑀢𑀁 𑀅𑀢𑀺𑀭𑀤𑁆𑀥𑀕𑀯𑁂𑀲𑀺, 𑀤𑀼𑀭𑀓𑁆𑀔𑀺𑀬𑀁 𑀯𑀸, 𑀢𑀲𑁆𑀫𑀸 ‘‘𑀫𑀸 𑀅𑀢𑀺𑀮𑀳𑀼𑀁 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀪𑀺𑀓𑁆𑀔𑀼𑀦𑀻𑀦𑀁 𑀳𑁄𑀢𑀽’’𑀢𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀓𑀸𑀭𑀼𑀜𑁆𑀜𑁂𑀦 𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑀧𑀭𑀺𑀘𑁆𑀙𑁂𑀤𑀁, 𑀣𑀼𑀮𑁆𑀮𑀘𑁆𑀘𑀬𑀓𑁆𑀔𑁂𑀢𑁆𑀢𑀧𑀭𑀺𑀘𑁆𑀙𑁂𑀤𑀜𑁆𑀘 𑀯𑀺𑀲𑀼𑀁 𑀯𑀺𑀲𑀼𑀁 𑀤𑁂𑀲𑁂𑀲𑀼𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁬𑁫𑁯. 𑀢𑀩𑁆𑀩𑀳𑀼𑀮𑀦𑀬𑁂𑀦 𑀲𑀸 𑀯𑀼𑀢𑁆𑀢𑀸𑀢𑀺 𑀏𑀢𑁆𑀣 𑀅𑀬𑀫𑀦𑀼𑀕𑀡𑁆𑀞𑀺𑀧𑀤𑀓𑁆𑀓𑀫𑁄 𑁋 𑀬𑁂𑀪𑀼𑀬𑁆𑀬𑁂𑀦 𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀢𑁆𑀢𑀸 ‘‘𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀅𑀯𑀢𑁆𑀯𑀸 𑀧𑀦 ‘‘𑀲𑀸𑀤𑀺𑀬𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀓𑀺𑀭𑀺𑀬𑀢𑁄𑀧𑀺 𑀲𑀫𑀼𑀝𑁆𑀞𑀸𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀳𑁂𑀝𑁆𑀞𑀸 ‘‘𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀢𑀬𑁄 𑀫𑀕𑁆𑀕𑁂 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀢𑀁 𑀯𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 ‘‘𑀪𑀺𑀓𑁆𑀔𑀼𑀧𑀘𑁆𑀘𑀢𑁆𑀣𑀺𑀓𑀸…𑀧𑁂… 𑀲𑁄 𑀘𑁂 𑀧𑀯𑁂𑀲𑀦𑀁 𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁫𑁬) 𑀦𑀬𑁂𑀦 𑀅𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀢𑀸𑀬𑀧𑀺 𑀯𑀼𑀢𑁆𑀢𑀢𑁆𑀢𑀸 𑀧𑀞𑀫𑀧𑀸𑀭𑀸𑀚𑀺𑀓𑀲𑁆𑀲𑀸𑀧𑀺 𑀢𑀩𑁆𑀩𑀳𑀼𑀮𑀦𑀬𑁂𑀦𑁂𑀯 𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀦 𑀳𑀺 𑀧𑀯𑁂𑀲𑀦𑀲𑀸𑀤𑀺𑀬𑀦𑀸𑀤𑀺𑀫𑁆𑀳𑀺 𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀢𑀸 𑀤𑀺𑀲𑁆𑀲𑀢𑀺. 𑀅𑀗𑁆𑀕𑀚𑀸𑀢𑀘𑀮𑀦𑀜𑁆𑀘𑁂𑀢𑁆𑀣 𑀦 𑀲𑀸𑀭𑀢𑁄 𑀤𑀝𑁆𑀞𑀩𑁆𑀩𑀁 ‘‘𑀲𑁄 𑀘𑁂 𑀧𑀯𑁂𑀲𑀦𑀁 𑀦 𑀲𑀸𑀤𑀺𑀬𑀢𑀺, 𑀧𑀯𑀺𑀝𑁆𑀞𑀁 𑀦 𑀲𑀸𑀤𑀺𑀬𑀢𑀺, 𑀞𑀺𑀢𑀁 𑀦 𑀲𑀸𑀤𑀺𑀬𑀢𑀺, 𑀉𑀤𑁆𑀥𑀭𑀡𑀁 𑀲𑀸𑀤𑀺𑀬𑀢𑀺, 𑀆𑀧𑀢𑁆𑀢𑀺 𑀧𑀸𑀭𑀸𑀚𑀺𑀓𑀲𑁆𑀲𑀸’’𑀢𑀺 (𑀧𑀸𑀭𑀸. 𑁫𑁮) 𑀏𑀢𑁆𑀣 𑀞𑀺𑀢 𑀦 𑀲𑀸𑀤𑀺𑀬𑀦𑁂 𑀧𑀓𑀢𑀺𑀬𑀸𑀧𑀺 𑀧𑀭𑀺𑀧𑀼𑀡𑁆𑀡𑀘𑀮𑀦𑀢𑁆𑀢𑀸. 𑀲𑀸𑀤𑀺𑀬𑀦𑀧𑀘𑁆𑀘𑀬𑀸 𑀳𑀺 𑀲𑁂𑀯𑀦𑀘𑀮𑀦𑀜𑁆𑀘𑁂𑀢𑁆𑀣 𑀦 𑀤𑀺𑀲𑁆𑀲𑀢𑁂𑀯𑀸𑀢𑀺 𑀢𑀩𑁆𑀩𑀳𑀼𑀮𑀦𑀬𑁂𑀦𑁂𑀯 𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀢𑀸 𑀕𑀳𑁂𑀢𑀩𑁆𑀩𑀸. 𑀢𑀢𑁆𑀣 𑀢𑀢𑁆𑀣 𑀅𑀝𑁆𑀞𑀓𑀣𑀸𑀲𑀼 𑀓𑀲𑁆𑀫𑀸 𑀢𑀩𑁆𑀩𑀳𑀼𑀮𑀦𑀬𑁄 𑀅𑀯𑀼𑀢𑁆𑀢𑁄𑀢𑀺 𑀘𑁂? ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑁂𑀬𑁆𑀬𑀸’’𑀢𑀺 (𑀧𑀸𑀭𑀸. 𑁩𑁯, 𑁪𑁨) 𑀫𑀸𑀢𑀺𑀓𑀸𑀬𑀁 𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀲𑁆𑀲 𑀲𑀭𑀽𑀧𑁂𑀦 𑀯𑀼𑀢𑁆𑀢𑀢𑁆𑀢𑀸 𑀢𑀤𑀦𑀼𑀭𑀽𑀧𑀯𑀲𑁂𑀦 𑀯𑀺𑀪𑀗𑁆𑀕𑀦𑀬𑀫𑀦𑁄𑀮𑁄𑀓𑁂𑀢𑁆𑀯𑀸 ‘‘𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦’’𑀫𑀺𑀘𑁆𑀘𑁂𑀯 𑀯𑀼𑀢𑁆𑀢𑀁. 𑀬𑀣𑀸 𑀘𑁂𑀢𑁂𑀲𑀼 𑀢𑀩𑁆𑀩𑀳𑀼𑀮𑀦𑀬𑁂𑀦 𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀢𑀸 𑀯𑀼𑀢𑁆𑀢𑀸, 𑀢𑀣𑀸 𑀲𑀼𑀭𑀸𑀤𑀻𑀦𑀁 𑀅𑀓𑀼𑀲𑀮𑁂𑀦𑁂𑀯 𑀧𑀸𑀢𑀩𑁆𑀩𑀢𑀸, 𑀦 𑀇𑀢𑀭𑀣𑀸 ‘‘𑀬𑀁 𑀅𑀓𑀼𑀲𑀮𑁂𑀦𑁂𑀯 𑀆𑀧𑀚𑁆𑀚𑀢𑀺, 𑀅𑀬𑀁 𑀮𑁄𑀓𑀯𑀚𑁆𑀚𑀸, 𑀲𑁂𑀲𑀸 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀸’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸) 𑀯𑀼𑀢𑁆𑀢𑁂 𑀮𑁄𑀓𑀯𑀚𑁆𑀚𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀸𑀦𑀁 𑀦𑀺𑀬𑀫𑀦𑀮𑀓𑁆𑀔𑀡𑀲𑀺𑀤𑁆𑀥𑀺 𑀳𑁄𑀢𑀺, 𑀢𑀣𑀸 𑀢𑀁 𑀅𑀯𑀢𑁆𑀯𑀸 ‘‘𑀬𑀲𑁆𑀲𑀸 𑀲𑀘𑀺𑀢𑁆𑀢𑀓𑀧𑀓𑁆𑀔𑁂 𑀘𑀺𑀢𑁆𑀢𑀁 𑀅𑀓𑀼𑀲𑀮𑀫𑁂𑀯 𑀳𑁄𑀢𑀺, 𑀅𑀬𑀁 𑀮𑁄𑀓𑀯𑀚𑁆𑀚𑀸. 𑀲𑁂𑀲𑀸 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀸’’𑀢𑀺 𑀯𑀼𑀢𑁆𑀢𑁂 𑀮𑁄𑀓𑀯𑀚𑁆𑀚𑀯𑀘𑀦𑀁 𑀦𑀺𑀭𑀢𑁆𑀣𑀓𑀁 𑀲𑀺𑀬𑀸 𑀯𑀢𑁆𑀣𑀼𑀅𑀚𑀸𑀦𑀦𑀧𑀓𑁆𑀔𑁂𑀧𑀺 𑀅𑀓𑀼𑀲𑀮𑁂𑀦𑁂𑀯 𑀧𑀸𑀢𑀩𑁆𑀩𑀢𑁆𑀢𑀸. 𑀬𑀲𑁆𑀫𑀸 𑀢𑀢𑁆𑀣 𑀲𑀼𑀭𑀸𑀧𑀸𑀦𑀯𑀻𑀢𑀺𑀓𑁆𑀓𑀫𑀲𑁆𑀲 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀦𑀢𑁆𑀣𑀺, 𑀢𑀲𑁆𑀫𑀸 𑀔𑀦𑁆𑀥𑀓𑀝𑁆𑀞𑀓𑀣𑀸𑀬𑀁 (𑀫𑀳𑀸𑀯. 𑀅𑀝𑁆𑀞. 𑁧𑁦𑁮) ‘‘𑀫𑀚𑁆𑀚𑀧𑀸𑀦𑁂 𑀧𑀦 𑀪𑀺𑀓𑁆𑀔𑀼𑀦𑁄 𑀅𑀚𑀸𑀦𑀺𑀢𑁆𑀯𑀸𑀧𑀺 𑀩𑀻𑀚𑀢𑁄 𑀧𑀝𑁆𑀞𑀸𑀬 𑀫𑀚𑁆𑀚𑀁 𑀧𑀺𑀯𑀦𑁆𑀢𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀁, 𑀲𑀸𑀫𑀡𑁂𑀭𑁄 𑀚𑀸𑀦𑀺𑀢𑁆𑀯𑀸 𑀧𑀺𑀯𑀦𑁆𑀢𑁄 𑀲𑀻𑀮𑀪𑁂𑀤𑀁 𑀆𑀧𑀚𑁆𑀚𑀢𑀺, 𑀦 𑀅𑀚𑀸𑀦𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁, 𑀦 𑀯𑀼𑀢𑁆𑀢𑀁 ‘‘𑀯𑀢𑁆𑀣𑀼𑀅𑀚𑀸𑀦𑀦𑀧𑀓𑁆𑀔𑁂 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀦𑀁 𑀲𑀺𑀤𑁆𑀥𑀺𑀓𑀭𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀤𑀺𑀲𑁂 𑀘𑀺𑀢𑁆𑀢𑀼𑀧𑁆𑀧𑀸𑀤𑁂 𑀲𑀢𑀺𑀧𑀺 𑀲𑀸𑀫𑀡𑁂𑀭𑁄 𑀲𑀻𑀮𑀪𑁂𑀤𑀁 𑀦𑀸𑀧𑀚𑁆𑀚𑀢𑀻’’𑀢𑀺. 𑀅𑀪𑀺𑀦𑀺𑀯𑁂𑀲𑀯𑀘𑀦𑀁 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀳𑀺 𑀲𑀫𑀸𑀦𑀚𑀸𑀢𑀺𑀓𑀢𑁆𑀢𑀸 𑀲𑀸𑀫𑀡𑁂𑀭𑀸𑀦𑀁 𑀲𑀼𑀭𑀸𑀧𑀸𑀦𑀲𑁆𑀲. ‘‘𑀲𑀼𑀭𑀸𑀤𑀬𑁄 𑀧𑀦𑀺𑀫𑁂’’𑀢𑀺 𑀯𑀢𑁆𑀣𑀼𑀁 𑀚𑀸𑀦𑀺𑀢𑁆𑀯𑀸 𑀧𑀸𑀢𑀩𑁆𑀩𑀢𑀸𑀤𑀺𑀯𑀲𑁂𑀦 𑀯𑀻𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀅𑀓𑀼𑀲𑀮𑀲𑁆𑀲 𑀅𑀲𑀫𑁆𑀪𑀯𑁄 𑀦𑀢𑁆𑀣𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀬𑀲𑁆𑀲 𑀲𑀘𑀺𑀢𑁆𑀢𑀓𑀧𑀓𑁆𑀔𑁂’’𑀢𑀺𑀆𑀤𑀺.

𑀓𑀺𑀜𑁆𑀘𑁂𑀢𑁆𑀣 𑀬𑀼𑀢𑁆𑀢𑀺𑀯𑀘𑀦𑁂𑀦 𑀅𑀭𑀳𑀦𑁆𑀢𑀸𑀦𑀁 𑀅𑀧𑁆𑀧𑀯𑀺𑀲𑀦𑀢𑁄 𑀲𑀘𑀺𑀢𑁆𑀢𑀓𑀸𑀘𑀺𑀢𑁆𑀢𑀓𑀧𑀓𑁆𑀔𑁂𑀲𑀼 𑀅𑀓𑀼𑀲𑀮𑀦𑀺𑀬𑀫𑁄𑀢𑀺 𑀘𑁂? 𑀦, 𑀥𑀫𑁆𑀫𑀢𑀸𑀯𑀲𑁂𑀦 𑀲𑁂𑀓𑁆𑀔𑀸𑀦𑀫𑁆𑀧𑀺 𑀅𑀧𑁆𑀧𑀯𑀺𑀲𑀦𑀢𑁄. 𑀅𑀘𑀺𑀢𑁆𑀢𑀓𑀧𑀓𑁆𑀔𑁂 𑀅𑀓𑀼𑀲𑀮𑀦𑀺𑀬𑀫𑀸𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀲𑀼𑀧𑀦𑁆𑀢𑀲𑁆𑀲 𑀫𑀼𑀔𑁂 𑀧𑀓𑁆𑀔𑀺𑀢𑁆𑀢𑀚𑀮𑀩𑀺𑀦𑁆𑀤𑀼𑀫𑀺𑀯 𑀲𑀼𑀭𑀸𑀩𑀺𑀦𑁆𑀤𑀼𑀆𑀤𑀬𑁄 𑀉𑀤𑀸𑀳𑀭𑀺𑀢𑀩𑁆𑀩𑀸𑀢𑀺. 𑀢𑀩𑁆𑀩𑀳𑀼𑀮𑀦𑀬𑁂𑀦 𑀳𑀺 𑀅𑀢𑁆𑀣𑁂 𑀕𑀳𑀺𑀢𑁂 𑀧𑀼𑀩𑁆𑀩𑁂𑀦𑀸𑀧𑀭𑀁 𑀅𑀝𑁆𑀞𑀓𑀣𑀸𑀬 𑀲𑀫𑁂𑀢𑀺. ‘‘𑀲𑀤𑁆𑀥𑀺𑀁 𑀧𑀸𑀴𑀺𑀬𑀸 𑀅𑀯𑀺𑀲𑁂𑀲𑀢𑁆𑀣𑁄 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀻𑀢𑀺 𑀅𑀧𑀭𑁂’’𑀢𑀺 𑀯𑀼𑀢𑁆𑀢𑀁. 𑀇𑀤𑀫𑁂𑀢𑁆𑀣 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀬𑀤𑀺 𑀯𑀢𑁆𑀣𑀼𑀚𑀸𑀦𑀦𑀧𑀓𑁆𑀔𑁂 𑀯𑀺𑀦𑀸 𑀅𑀓𑀼𑀲𑀮𑁂𑀦 𑀫𑀚𑁆𑀚𑀧𑀸𑀦𑀁 𑀲𑀺𑀬𑀸, 𑀓𑀲𑁆𑀫𑀸 𑀦𑀸𑀴𑀺𑀫𑀚𑁆𑀛𑀁 𑀦𑀸𑀢𑀺𑀓𑁆𑀓𑀫𑀢𑀺 𑀅𑀭𑀺𑀬𑀸𑀦𑀁 𑀧𑀸𑀦𑀓𑀸𑀤𑀺𑀲𑀜𑁆𑀜𑀻𑀦𑀦𑁆𑀢𑀺? 𑀲𑀻𑀮𑀪𑁂𑀤𑀯𑀢𑁆𑀣𑀼𑀯𑀻𑀢𑀺𑀓𑁆𑀓𑀫𑁄 𑀯𑀺𑀦𑀸𑀧𑀺 𑀘𑀺𑀢𑁆𑀢𑁂𑀦 𑀅𑀭𑀺𑀬𑀸𑀦𑀁 𑀥𑀫𑁆𑀫𑀢𑀸𑀯𑀲𑁂𑀦𑁂𑀯 𑀦 𑀲𑀫𑁆𑀪𑀯𑀢𑀻𑀢𑀺 𑀘𑁂, 𑀦, 𑀘𑀓𑁆𑀔𑀼𑀧𑀸𑀮𑀢𑁆𑀣𑁂𑀭𑀯𑀢𑁆𑀣𑀼 (𑀥. 𑀧. 𑀅𑀝𑁆𑀞. 𑁧.𑁧) 𑀆𑀤𑀺𑀯𑀺𑀭𑁄𑀥𑀢𑁄𑀢𑀺. 𑀅𑀧𑀺𑀘 𑀪𑀺𑀓𑁆𑀔𑀼𑀦𑁄𑀧𑀺 𑀲𑀸𑀫𑀡𑁂𑀭𑀲𑁆𑀲 𑀯𑀺𑀬 𑀲𑀼𑀭𑀸𑀧𑀸𑀦𑀁 𑀲𑀘𑀺𑀢𑁆𑀢𑀓𑀫𑁂𑀯 𑀓𑀲𑁆𑀫𑀸 𑀦 𑀚𑀸𑀢𑀦𑁆𑀢𑀺? 𑀅𑀧𑁆𑀧𑀢𑀺𑀭𑀽𑀧𑀢𑁆𑀢𑀸𑀢𑀺 𑀘𑁂, 𑀲𑀸𑀫𑀡𑁂𑀭𑀸𑀦𑀫𑁆𑀧𑀺 𑀅𑀧𑁆𑀧𑀢𑀺𑀭𑀽𑀧𑀫𑁂𑀯. 𑀲𑀳𑀥𑀫𑁆𑀫𑀺𑀓𑀸 𑀏𑀯 𑀳𑀺 𑀢𑁂. 𑀫𑀳𑀸𑀲𑀸𑀯𑀚𑁆𑀚𑀢𑁆𑀢𑀸𑀢𑀺 𑀘𑁂? 𑀲𑀸𑀫𑀡𑁂𑀭𑀸𑀦𑀫𑁆𑀧𑀺 𑀢𑀸𑀤𑀺𑀲𑀫𑁂𑀯. 𑀲𑀸𑀫𑀡𑁂𑀭𑀸𑀦𑀁 𑀲𑀘𑀺𑀢𑁆𑀢𑀓𑀫𑁂𑀯 𑀧𑀸𑀭𑀸𑀚𑀺𑀓𑀁, 𑀇𑀢𑀭𑀁 𑀤𑀡𑁆𑀟𑀓𑀫𑁆𑀫𑀯𑀢𑁆𑀣𑀽𑀢𑀺 𑀘𑁂? 𑀪𑀺𑀓𑁆𑀔𑀽𑀦𑀫𑁆𑀧𑀺 𑀫𑀚𑁆𑀚𑀧𑀸𑀦𑁂 𑀦𑀢𑁆𑀣𑀺. 𑀏𑀢𑁆𑀣 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑁂𑀦 𑀦 𑀪𑀯𑀺𑀢𑀩𑁆𑀩𑀁. 𑀫𑀚𑁆𑀚𑁂 𑀅𑀫𑀚𑁆𑀚𑀲𑀜𑁆𑀜𑀺𑀲𑁆𑀲 𑀤𑀼𑀓𑁆𑀓𑀝𑀸𑀧𑀢𑁆𑀢𑀺 𑀧𑀜𑁆𑀜𑀸𑀧𑁂𑀢𑀩𑁆𑀩𑀸 𑀲𑀺𑀬𑀸. 𑀪𑀺𑀓𑁆𑀔𑀼𑀲𑁆𑀲 𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀼 𑀲𑀸𑀫𑀡𑁂𑀭𑀸𑀦𑀁 𑀧𑀸𑀭𑀸𑀚𑀺𑀓𑀁 𑀳𑁄𑀢𑀺 𑀢𑀺𑀭𑀘𑁆𑀙𑀸𑀦𑀕𑀢𑀲𑀸𑀫𑀡𑁂𑀭𑀸𑀦𑀁 𑀯𑀺𑀬𑀸𑀢𑀺 𑀘𑁂? 𑀅𑀘𑀺𑀢𑁆𑀢𑀓𑀫𑁆𑀧𑀺 𑀫𑀚𑁆𑀚𑀧𑀸𑀦𑀸𑀤𑀻𑀦𑀁 𑀲𑀸𑀫𑀡𑁂𑀭𑀸𑀦𑀁 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀸𑀧𑁂𑀢𑀩𑁆𑀩𑀁 𑀲𑀺𑀬𑀸. 𑀦𑀸𑀘𑀺𑀢𑁆𑀢𑀓𑀁 𑀧𑀸𑀭𑀸𑀚𑀺𑀓𑀁 𑀲𑀫𑁆𑀪𑀯𑀢𑀻𑀢𑀺 𑀘𑁂? 𑀦, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀫𑁆𑀧𑀺 𑀧𑀸𑀭𑀸𑀚𑀺𑀓𑀁 𑀲𑀫𑁆𑀪𑀯𑀢𑀻𑀢𑀺. 𑀦𑀺𑀓𑀸𑀬𑀦𑁆𑀢𑀭𑀧𑀓𑁆𑀔𑁂 𑀅𑀬𑀫𑁂𑀯 𑀤𑁄𑀲𑁄. 𑀅𑀫𑁆𑀳𑀸𑀓𑀜𑁆𑀳𑀺 𑀮𑁄𑀓𑀯𑀚𑁆𑀚𑀫𑁂𑀯 𑀫𑀚𑁆𑀚𑀧𑀸𑀦𑀦𑁆𑀢𑀺. 𑀓𑀲𑁆𑀫𑀸 𑀧𑀦𑁂𑀢𑁆𑀣 𑀲𑀼𑀭𑀸𑀧𑀸𑀦𑀫𑁂𑀯 𑀥𑀫𑁆𑀫𑀢𑀸𑀯𑀲𑁂𑀦 𑀅𑀭𑀺𑀬𑀸 𑀦 𑀓𑀭𑁄𑀦𑁆𑀢𑀻𑀢𑀺? 𑀦 𑀓𑁂𑀯𑀮𑀁 𑀲𑀼𑀭𑀸𑀧𑀸𑀦𑀫𑁂𑀯 𑀥𑀫𑁆𑀫𑀢𑀸𑀯𑀲𑁂𑀦 𑀅𑀭𑀺𑀬𑀸 𑀦 𑀓𑀭𑁄𑀦𑁆𑀢𑀺, 𑀧𑀸𑀡𑁂𑀲𑀼𑀧𑀺 𑀓𑁄𑀥𑀯𑀲𑁂𑀦 𑀧𑀸𑀡𑀲𑀜𑁆𑀜𑀺𑀢𑀸𑀬 𑀲𑀻𑀲𑀘𑁆𑀙𑁂𑀤𑀦𑀸𑀤𑀻𑀦𑀺 𑀦 𑀓𑀭𑁄𑀦𑁆𑀢𑀺, 𑀲𑀤𑀸𑀭𑀲𑀜𑁆𑀜𑀸𑀬 𑀧𑀭𑀤𑀸𑀭𑀁 𑀦 𑀯𑀻𑀢𑀺𑀓𑁆𑀓𑀫𑀦𑁆𑀢𑀺, 𑀅𑀦𑀢𑁆𑀣𑀪𑀜𑁆𑀚𑀓𑀲𑀜𑁆𑀜𑀸𑀬 𑀅𑀢𑁆𑀣𑀪𑀜𑁆𑀚𑀓𑀫𑀼𑀲𑀸 𑀦 𑀯𑀤𑀦𑁆𑀢𑀺, 𑀲𑀫𑁆𑀫𑀸𑀤𑀺𑀝𑁆𑀞𑀺𑀲𑀜𑁆𑀜𑀸𑀬 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀁 𑀦 𑀧𑀝𑀺𑀧𑀚𑁆𑀚𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀆𑀘𑀭𑀺𑀬𑀸𑀧𑀺 𑀲𑀼𑀭𑀸𑀧𑀸𑀦𑁂 𑀅𑀓𑀼𑀲𑀮𑀦𑀺𑀬𑀫𑀸𑀪𑀸𑀯𑀫𑁂𑀯 𑀯𑀤𑀦𑁆𑀢𑀺, 𑀢𑀲𑁆𑀫𑀸 𑀏𑀯 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬 𑀕𑀡𑁆𑀞𑀺𑀧𑀤𑁂 𑀮𑁄𑀓𑀯𑀚𑁆𑀚𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀸𑀥𑀺𑀓𑀸𑀭𑁂 ‘‘𑀲𑀘𑀺𑀢𑁆𑀢𑀓𑀧𑀓𑁆𑀔𑁂𑀅𑀓𑀼𑀲𑀮𑀦𑁆𑀢𑀺 𑀲𑀼𑀭𑀸𑀧𑀸𑀦𑀸𑀤𑀺𑀲𑀗𑁆𑀕𑀳𑀢𑁆𑀣𑀁, 𑀇𑀢𑀭𑀣𑀸 𑀬𑀲𑁆𑀲 𑀅𑀓𑀼𑀲𑀮𑀫𑁂𑀯𑀸𑀢𑀺 𑀯𑀤𑁂𑀬𑁆𑀬𑀸’’𑀢𑀺 𑀮𑀺𑀔𑀺𑀢𑀁. 𑀓𑀺𑀭𑀺𑀬𑀲𑀫𑀼𑀝𑁆𑀞𑀸𑀦𑀢𑀸 𑀧𑀦𑀲𑁆𑀲 𑀢𑀩𑁆𑀩𑀳𑀼𑀮𑀦𑀬𑀫𑁂𑀯, 𑀦 𑀧𑀞𑀫𑀧𑀸𑀭𑀸𑀚𑀺𑀓𑁂. 𑀓𑀣𑀁? 𑀓𑀸𑀬𑀲𑀁𑀲𑀕𑁆𑀕𑀲𑀺𑀓𑁆𑀔𑀸𑀧𑀤𑀁 𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀁. 𑀏𑀢𑁆𑀣 𑀪𑀺𑀓𑁆𑀔𑀼𑀲𑁆𑀲 𑀘 𑀪𑀺𑀓𑁆𑀔𑀼𑀦𑀺𑀬𑀸 𑀘 𑀓𑀸𑀬𑀲𑀁𑀲𑀕𑁆𑀕𑀪𑀸𑀯𑁂 𑀲𑀢𑀺 𑀪𑀺𑀓𑁆𑀔𑀼𑀦𑀻 𑀓𑀸𑀬𑀗𑁆𑀕𑀫𑀘𑁄𑀧𑀬𑀫𑀸𑀦𑀸𑀧𑀺 𑀘𑀺𑀢𑁆𑀢𑁂𑀦𑁂𑀯 𑀅𑀥𑀺𑀯𑀸𑀲𑁂𑀦𑁆𑀢𑀻 𑀆𑀧𑀚𑁆𑀚𑀢𑀺, 𑀦 𑀏𑀯𑀁 𑀪𑀺𑀓𑁆𑀔𑀼. 𑀪𑀺𑀓𑁆𑀔𑀼 𑀧𑀦 𑀘𑁄𑀧𑀬𑀫𑀸𑀦𑁄𑀯 𑀆𑀧𑀚𑁆𑀚𑀢𑀺, 𑀏𑀯𑀫𑁂𑀯 𑀧𑀞𑀫𑀧𑀸𑀭𑀸𑀚𑀺𑀓𑁂𑀧𑀺 𑀘𑁄𑀧𑀦𑁂 𑀲𑀢𑀺 𑀏𑀯 𑀆𑀧𑀚𑁆𑀚𑀢𑀺, 𑀦𑀸𑀲𑀢𑀺. 𑀧𑀯𑁂𑀲𑀦𑀁 𑀲𑀸𑀤𑀺𑀬𑀢𑀻𑀢𑀺 𑀏𑀢𑁆𑀣 𑀧𑀯𑁂𑀲𑀦𑀲𑀸𑀤𑀺𑀬𑀦𑀁 𑀦𑀸𑀫 𑀲𑁂𑀯𑀦𑀘𑀺𑀢𑁆𑀢𑀲𑁆𑀲𑀼𑀧𑁆𑀧𑀸𑀤𑀦𑀦𑁆𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 ‘‘𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁.

𑀧𑀞𑀫𑀧𑀸𑀭𑀸𑀚𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

‘‘𑀓𑀺𑀲𑁆𑀲 𑀧𑀦 𑀢𑁆𑀯𑀁 𑀅𑀬𑁆𑀬𑁂 𑀚𑀸𑀦𑀁 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦’’𑀦𑁆𑀢𑀺 𑀯𑀘𑀦𑀢𑁄, ‘‘𑀅𑀝𑁆𑀞𑀦𑁆𑀦𑀁 𑀧𑀸𑀭𑀸𑀚𑀺𑀓𑀸𑀦𑀁 𑀅𑀜𑁆𑀜𑀢𑀭𑀁 𑀧𑀸𑀭𑀸𑀚𑀺𑀓𑀁 𑀅𑀚𑁆𑀛𑀸𑀧𑀦𑁆𑀦’’𑀦𑁆𑀢𑀺 (𑀧𑀸𑀘𑀺. 𑁬𑁬𑁬) 𑀯𑀘𑀦𑀢𑁄, 𑀅𑀦𑁆𑀢𑁂 ‘‘𑀉𑀤𑁆𑀤𑀺𑀝𑁆𑀞𑀸 𑀔𑁄 𑀅𑀬𑁆𑀬𑀸𑀬𑁄 𑀅𑀝𑁆𑀞 𑀧𑀸𑀭𑀸𑀚𑀺𑀓𑀸 𑀥𑀫𑁆𑀫𑀸’’𑀢𑀺𑀆𑀤𑀺𑀯𑀘𑀦𑀢𑁄 (𑀧𑀸𑀘𑀺. 𑁬𑁭𑁭), 𑀧𑀭𑀺𑀯𑀸𑀭𑁂 ‘‘𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺 𑀉𑀪𑀢𑁄𑀧𑀜𑁆𑀜𑀢𑁆𑀢𑀻’’𑀢𑀺 (𑀧𑀭𑀺. 𑁨𑁦𑁧) 𑀯𑀘𑀦𑀢𑁄 𑀘 𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑀁 𑀧𑀢𑁆𑀯𑀸 𑀪𑀕𑀯𑀸 𑀲𑀸𑀥𑀸𑀭𑀡𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀪𑀺𑀓𑁆𑀔𑀽𑀦𑀁 𑀉𑀧𑁆𑀧𑀦𑁆𑀦𑀯𑀢𑁆𑀣𑀼𑀲𑁆𑀫𑀺𑀁𑀬𑁂𑀯 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀙𑀦𑁆𑀤𑀲𑁄 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑁂𑀬𑁆𑀬 𑀅𑀦𑁆𑀢𑀫𑀲𑁄 𑀢𑀺𑀭𑀘𑁆𑀙𑀸𑀦𑀕𑀢𑁂𑀦𑀧𑀺 𑀧𑀸𑀭𑀸𑀚𑀺𑀓𑀸 𑀳𑁄𑀢𑀺 𑀅𑀲𑀁𑀯𑀸𑀲𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀲𑀯𑀺𑀲𑁂𑀲𑀫𑁆𑀧𑀺 𑀅𑀯𑀺𑀲𑁂𑀲𑀫𑁆𑀧𑀺 𑀫𑀸𑀢𑀺𑀓𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑀼𑀓𑁆𑀓𑀫𑁂𑀦 𑀧𑀤𑀪𑀸𑀚𑀦𑀁, 𑀆𑀧𑀢𑁆𑀢𑀺𑀪𑁂𑀤𑀁, 𑀢𑀺𑀓𑀘𑁆𑀙𑁂𑀤𑀁, 𑀅𑀦𑀸𑀧𑀢𑁆𑀢𑀺𑀯𑀸𑀭𑀜𑁆𑀘 𑀅𑀦𑀯𑀲𑁂𑀲𑀁 𑀯𑀢𑁆𑀯𑀸 𑀯𑀺𑀢𑁆𑀣𑀸𑀭𑁂𑀲𑀺. 𑀲𑀗𑁆𑀕𑀻𑀢𑀺𑀓𑀸𑀭𑀓𑁂𑀳𑀺 𑀧𑀦 𑀅𑀲𑀸𑀥𑀸𑀭𑀡𑀧𑀜𑁆𑀜𑀢𑁆𑀢𑀺𑀬𑁄𑀬𑁂𑀯 𑀇𑀥 𑀯𑀺𑀢𑁆𑀣𑀸𑀭𑀺𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁬𑁬𑁬. 𑀢𑀢𑁆𑀣 ‘‘𑀅𑀝𑁆𑀞𑀦𑁆𑀦𑀁 𑀧𑀸𑀭𑀸𑀚𑀺𑀓𑀸𑀦’’𑀦𑁆𑀢𑀺 𑀇𑀤𑀁 𑀓𑁂𑀯𑀮𑀁 𑀲𑀗𑁆𑀕𑀻𑀢𑀺𑀓𑀸𑀭𑀓𑀸𑀦𑀁𑀬𑁂𑀯 𑀦𑀬𑀢𑁄 𑀦𑀺𑀓𑁆𑀔𑀺𑀢𑁆𑀢𑀯𑀘𑀦𑀁 𑀇𑀢𑁄 𑀧𑀼𑀩𑁆𑀩𑁂 𑀙𑀝𑁆𑀞𑀲𑀢𑁆𑀢𑀫𑀝𑁆𑀞𑀫𑀸𑀦𑀁 𑀧𑀸𑀭𑀸𑀚𑀺𑀓𑀸𑀦𑀁 𑀅𑀧𑀜𑁆𑀜𑀢𑁆𑀢𑀢𑁆𑀢𑀸. 𑀪𑀕𑀯𑀢𑀸 𑀧𑀦 𑀇𑀤𑀁 𑀧𑀜𑁆𑀜𑀸𑀧𑀺𑀢𑀫𑀸𑀤𑀺𑀲𑀺𑀓𑁆𑀔𑀸𑀧𑀤𑀫𑁆𑀧𑀺 𑀉𑀧𑀸𑀤𑀸𑀬 ‘‘𑀙𑀦𑁆𑀦𑀁 𑀧𑀸𑀭𑀸𑀚𑀺𑀓𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁 𑀲𑀺𑀬𑀸. 𑀇𑀢𑁄 𑀉𑀤𑁆𑀥𑀁 𑀧𑀜𑁆𑀜𑀢𑁆𑀢𑀸𑀦𑀺𑀧𑀺 𑀉𑀧𑀸𑀤𑀸𑀬 ‘‘𑀅𑀝𑁆𑀞𑀦𑁆𑀦𑀁 𑀧𑀸𑀭𑀸𑀚𑀺𑀓𑀸𑀦’’𑀦𑁆𑀢𑀺 𑀯𑀘𑀦𑀁 𑀅𑀧𑀭𑀪𑀸𑀕𑁂 𑀉𑀧𑁆𑀧𑀦𑁆𑀦𑀦𑁆𑀢𑀺 𑀏𑀓𑀘𑁆𑀘𑁂 𑀆𑀘𑀭𑀺𑀬𑀸. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀇𑀤𑀜𑁆𑀘 𑀧𑀸𑀭𑀸𑀚𑀺𑀓𑀁 𑀧𑀘𑁆𑀙𑀸 𑀧𑀜𑁆𑀜𑀢𑁆𑀢𑀁, 𑀢𑀲𑁆𑀫𑀸 ‘𑀅𑀝𑁆𑀞𑀦𑁆𑀦’𑀦𑁆𑀢𑀺 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀁 𑀫𑀢𑁂𑀦 𑀲𑀺𑀤𑁆𑀥𑀫𑁂𑀢𑀁 𑀬𑀣𑀸𑀧𑀜𑁆𑀜𑀢𑁆𑀢𑀸𑀦𑀼𑀓𑁆𑀓𑀫𑀯𑀲𑁂𑀦𑁂𑀯 𑀲𑀗𑁆𑀕𑀻𑀢𑀸𑀦𑀻𑀢𑀺. ‘‘𑀅𑀜𑁆𑀜𑀸𑀲𑀺’’𑀦𑁆𑀢𑀺 𑀧𑀸𑀞𑁄. 𑀅𑀜𑁆𑀜𑀸𑀲𑀻𑀢𑀺 𑀦 𑀕𑀳𑁂𑀢𑀩𑁆𑀩𑁄. ‘‘𑀤𑀼𑀝𑁆𑀞𑀼𑀮𑁆𑀮𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑁂𑀯𑀸’’𑀢𑀺 𑀯𑀘𑀦𑀢𑁄 𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀺𑀓𑀁 𑀬𑀸 𑀧𑀝𑀺𑀘𑁆𑀙𑀸𑀤𑁂𑀢𑀺, 𑀲𑀸𑀧𑀺 𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀺𑀓𑀆𑀬𑁂𑀯𑀸𑀢𑀺 𑀲𑀺𑀤𑁆𑀥𑀁. 𑀓𑀺𑀜𑁆𑀘𑀸𑀧𑀺 𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀦𑀁 𑀧𑁂𑀫𑀯𑀲𑁂𑀦 𑀳𑁄𑀢𑀺, 𑀢𑀣𑀸𑀧𑀺 𑀲𑀺𑀓𑁆𑀔𑀸𑀧𑀤𑀯𑀻𑀢𑀺𑀓𑁆𑀓𑀫𑀘𑀺𑀢𑁆𑀢𑀁 𑀤𑁄𑀫𑀦𑀲𑁆𑀲𑀺𑀓𑀫𑁂𑀯 𑀳𑁄𑀢𑀻𑀢𑀺 𑀓𑀢𑁆𑀯𑀸 ‘‘𑀤𑀼𑀓𑁆𑀔𑀯𑁂𑀤𑀦’’𑀦𑁆𑀢𑀺 𑀯𑀼𑀢𑁆𑀢𑀁.

𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀢𑀺𑀬𑀧𑀸𑀭𑀸𑀚𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁬𑁯. 𑀇𑀫𑀁 𑀅𑀥𑀺𑀧𑁆𑀧𑀸𑀬𑀫𑀢𑁆𑀢𑀦𑁆𑀢𑀺 ‘‘𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑁆𑀯𑀸’’𑀢𑀺 𑀏𑀢𑀁. 𑀏𑀢𑁆𑀣𑀸𑀬𑀁 𑀯𑀺𑀘𑀸𑀭𑀡𑀸 𑁋 𑀬𑁄 𑀪𑀺𑀓𑁆𑀔𑀼 𑀉𑀓𑁆𑀔𑀺𑀢𑁆𑀢𑀓𑀪𑀺𑀓𑁆𑀔𑀼𑀦𑀸 𑀲𑀫𑀸𑀦𑀤𑀺𑀝𑁆𑀞𑀺𑀓𑁄 𑀮𑀤𑁆𑀥𑀺𑀦𑀸𑀦𑀸𑀲𑀁𑀯𑀸𑀲𑀓𑁄 𑀳𑁄𑀢𑀺, 𑀲𑁄 𑀅𑀯𑀦𑁆𑀤𑀦𑀻𑀬𑁄, 𑀓𑀫𑁆𑀫𑀸𑀓𑀫𑁆𑀫𑁂 𑀉𑀓𑁆𑀔𑀺𑀢𑁆𑀢𑀓𑁄 𑀯𑀺𑀬 𑀦 𑀕𑀡𑀧𑀽𑀭𑀡𑁄, 𑀲𑀳𑀲𑁂𑀬𑁆𑀬𑀫𑁆𑀧𑀺 𑀦 𑀮𑀪𑀢𑀺, 𑀦 𑀢𑀣𑀸 𑀪𑀺𑀓𑁆𑀔𑀼𑀦𑀻. 𑀲𑀸 𑀳𑀺 𑀬𑀸𑀯 𑀦 𑀲𑀫𑀦𑀼𑀪𑀝𑁆𑀞𑀸, 𑀢𑀸𑀯 𑀕𑀡𑀧𑀽𑀭𑀓𑀸 𑀘 𑀳𑁄𑀢𑀺, 𑀲𑀁𑀯𑀸𑀲𑀜𑁆𑀘 𑀮𑀪𑀢𑀺. 𑀮𑀤𑁆𑀥𑀺𑀦𑀸𑀦𑀸𑀲𑀁𑀯𑀸𑀲𑀺𑀓𑀸𑀦𑀼𑀯𑀢𑁆𑀢𑀺𑀓𑀸𑀧𑀺 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀺𑀓𑀸𑀯 𑀳𑁄𑀢𑀺. 𑀉𑀓𑁆𑀔𑀺𑀢𑁆𑀢𑁄 𑀘𑁂 𑀓𑀸𑀮𑀗𑁆𑀓𑀢𑁄, 𑀢𑀤𑀦𑀼𑀯𑀢𑁆𑀢𑀓𑁄 𑀪𑀺𑀓𑁆𑀔𑀼 𑀮𑀤𑁆𑀥𑀺𑀦𑀸𑀦𑀸𑀲𑀁𑀯𑀸𑀲𑀓𑁄 𑀳𑁄𑀢𑀺𑀬𑁂𑀯. 𑀢𑀣𑀸 𑀯𑀺𑀩𑁆𑀪𑀦𑁆𑀢𑁂𑀧𑀺 𑀢𑀲𑁆𑀫𑀺𑀁 𑀢𑀺𑀢𑁆𑀣𑀺𑀬𑀧𑀓𑁆𑀓𑀦𑁆𑀢𑀓𑁂𑀧𑀺 𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀲𑀸𑀫𑀡𑁂𑀭𑀪𑀽𑀫𑀺𑀬𑀁 𑀞𑀺𑀢𑁂𑀧𑀻𑀢𑀺 𑀏𑀓𑁂. 𑀢𑁂𑀲𑀁 𑀫𑀢𑁂𑀦 𑀉𑀓𑁆𑀔𑀺𑀢𑁆𑀢𑀓𑁂 𑀢𑀣𑀸𑀪𑀽𑀢𑁂𑀧𑀺 𑀪𑀺𑀓𑁆𑀔𑀼𑀦𑀻 𑀢𑀤𑀦𑀼𑀯𑀢𑁆𑀢𑀺𑀓𑀸 𑀲𑀫𑀦𑀼𑀪𑀸𑀲𑀺𑀢𑀩𑁆𑀩𑀸𑀯𑀸𑀢𑀺 𑀆𑀧𑀚𑁆𑀚𑀢𑀺. 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑀁 𑀲𑀗𑁆𑀖𑀸𑀬𑀢𑁆𑀢𑀁, 𑀲𑀗𑁆𑀖𑁂𑀦 𑀲𑀜𑁆𑀘𑀺𑀘𑁆𑀘 𑀧𑀼𑀭𑀺𑀫𑀓𑀸𑀧𑀢𑁆𑀢𑀺𑀁 𑀅𑀧𑀦𑁂𑀢𑀼𑀁 𑀦 𑀬𑀼𑀢𑁆𑀢𑀁 𑀯𑀺𑀬 𑀔𑀸𑀬𑀢𑀺. 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀜𑁆𑀘 𑀆𑀧𑀢𑁆𑀢𑀺𑀅𑀤𑀲𑁆𑀲𑀦𑀫𑀢𑁆𑀢𑁂, 𑀅𑀧𑁆𑀧𑀝𑀺𑀓𑀫𑁆𑀫𑀫𑀢𑁆𑀢𑁂, 𑀓𑀼𑀤𑀺𑀝𑁆𑀞𑀺𑀅𑀧𑁆𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑀫𑀢𑁆𑀢𑁂 𑀘 𑀓𑀭𑀺𑀬𑀢𑀺, 𑀢𑀲𑁆𑀲 𑀅𑀦𑀼𑀯𑀢𑁆𑀢𑀦𑀫𑀢𑁆𑀢𑁂𑀦 𑀲𑀫𑀦𑀼𑀪𑀸𑀲𑀺𑀢𑁆𑀯𑀸 𑀲𑀸𑀲𑀦𑀢𑁄 𑀘𑀸𑀯𑁂𑀢𑀩𑁆𑀩𑀸𑀦𑀻𑀢𑀺 𑀦 𑀬𑀼𑀢𑁆𑀢𑀦𑁆𑀢𑀺 𑀘𑁂? 𑀦 𑀯𑀢𑁆𑀢𑀩𑁆𑀩𑀫𑁂𑀯, 𑀇𑀤𑀁 𑀅𑀧𑀸𑀭𑀸𑀚𑀺𑀓𑀯𑀢𑁆𑀣𑀽𑀲𑀼𑀧𑀺 𑀢𑀧𑁆𑀧𑀲𑀗𑁆𑀕𑀢𑁄, 𑀅𑀦𑀜𑁆𑀜𑀯𑀺𑀲𑀬𑀢𑁆𑀢𑀸 𑀘 𑀯𑀺𑀦𑀬𑀲𑁆𑀲.

𑀢𑀢𑀺𑀬𑀧𑀸𑀭𑀸𑀚𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁭𑁫. ‘‘𑀮𑁄𑀓𑀲𑁆𑀲𑀸𑀤𑀲𑀗𑁆𑀔𑀸𑀢𑀲𑁆𑀲 𑀫𑀺𑀢𑁆𑀢𑀲𑀦𑁆𑀣𑀯𑀲𑁆𑀲 𑀯𑀲𑁂𑀦 𑀢𑀁 𑀤𑀲𑁆𑀲𑁂𑀢𑀼𑀁 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦𑀸𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀮𑀺𑀔𑀺𑀢𑀁. 𑀢𑀺𑀲𑁆𑀲𑀺𑀢𑁆𑀣𑀺𑀬𑁄𑀢𑀺 𑀢𑀻𑀲𑀼 𑀇𑀢𑁆𑀣𑀻𑀲𑀼, 𑀢𑀺𑀲𑁆𑀲𑁄 𑀯𑀸 𑀇𑀢𑁆𑀣𑀺𑀬𑁄. 𑀢𑀁 𑀦 𑀲𑁂𑀯𑁂𑀢𑀺 𑀢𑀸𑀲𑀼 𑀦 𑀲𑁂𑀯𑀢𑀺. 𑀅𑀦𑀭𑀺𑀬𑀸𑀢𑀺 𑀉𑀪𑀢𑁄𑀩𑁆𑀬𑀜𑁆𑀚𑀦𑀸. 𑀩𑁆𑀬𑀜𑁆𑀚𑀦𑀲𑁆𑀫𑀺𑀦𑁆𑀢𑀺 𑀅𑀢𑁆𑀢𑀦𑁄 𑀩𑁆𑀬𑀜𑁆𑀚𑀦𑁂. 𑀦 𑀲𑁂𑀯𑁂𑀢𑀺 𑀦 𑀲𑁂𑀯𑀢𑀺. 𑀦 𑀘𑀸𑀘𑀭𑁂𑀢𑀺 𑀦𑀸𑀘𑀭𑀢𑀺. 𑀯𑀡𑁆𑀡𑀸𑀯𑀡𑁆𑀡𑁄𑀢𑀺 𑀤𑁆𑀯𑀻𑀳𑀺𑀧𑀺 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺. 𑀕𑀫𑀦𑀼𑀧𑁆𑀧𑀸𑀤𑀦𑀦𑁆𑀢𑀺 𑀲𑀜𑁆𑀘𑀭𑀺𑀢𑁆𑀢𑀁.

𑁬𑁭𑁬. ‘‘𑀦𑀺𑀯𑀢𑁆𑀣𑀁 𑀯𑀸 𑀧𑀸𑀭𑀼𑀢𑀁 𑀯𑀸’’𑀢𑀺 𑀏𑀢𑁆𑀣 𑀦𑀺𑀯𑀢𑁆𑀣𑀲𑁆𑀲 𑀯𑀸 𑀧𑀸𑀭𑀼𑀢𑀲𑁆𑀲 𑀯𑀸 𑀯𑀢𑁆𑀣𑀲𑁆𑀲 𑀕𑀳𑀡𑀁 𑀲𑀸𑀤𑀺𑀬𑀢𑀻𑀢𑀺 𑀅𑀢𑁆𑀣𑁄.

𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀸𑀭𑀸𑀚𑀺𑀓𑀓𑀡𑁆𑀟𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀗𑁆𑀖𑀸𑀤𑀺𑀲𑁂𑀲𑀓𑀡𑁆𑀟𑀯𑀡𑁆𑀡𑀦𑀸

𑁧. 𑀧𑀞𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁮𑁧. 𑀆𑀳𑀢𑀓𑁄𑀢𑀺 𑀆𑀦𑀻𑀢𑁄, 𑀦𑀺𑀬𑀢𑀓𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀓𑀧𑁆𑀧𑀺𑀬𑀅𑀟𑁆𑀟𑁄 𑀦𑀸𑀫 𑀲𑀗𑁆𑀖𑀲𑁆𑀲 𑀯𑀸 𑀆𑀭𑀸𑀫𑀺𑀓𑀧𑀼𑀕𑁆𑀕𑀮𑀲𑁆𑀲 𑀯𑀸 𑀯𑀢𑁆𑀣𑀼𑀲𑁆𑀲 𑀓𑀸𑀭𑀡𑀸 𑀲𑀗𑁆𑀖𑀲𑁆𑀲 𑀯𑀸𑀭𑀺𑀓𑀪𑀸𑀯𑁂𑀦 𑀲𑀬𑀫𑁂𑀯 𑀯𑀸 𑀅𑀥𑀺𑀓𑀭𑀡𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 ‘‘𑀅𑀫𑁆𑀳𑀸𑀓𑀁 𑀏𑀲𑁄 𑀤𑀸𑀲𑁄, 𑀤𑀸𑀲𑀻, 𑀯𑀸𑀧𑀻, 𑀔𑁂𑀢𑁆𑀢𑀁, 𑀆𑀭𑀸𑀫𑁄, 𑀆𑀭𑀸𑀫𑀯𑀢𑁆𑀣𑀼, 𑀕𑀸𑀯𑁄, 𑀕𑀸𑀯𑀻, 𑀫𑀳𑀺𑀁𑀲𑀻, 𑀅𑀚𑀸, 𑀓𑀼𑀓𑁆𑀓𑀼𑀝𑀸’’𑀢𑀺𑀆𑀤𑀺𑀦𑀸 𑀯𑁄𑀳𑀭𑀢𑀺, 𑀅𑀓𑀧𑁆𑀧𑀺𑀬𑀁. ‘‘𑀅𑀬𑀁 𑀅𑀫𑁆𑀳𑀸𑀓𑀁 𑀆𑀭𑀸𑀫𑀺𑀓𑁄 𑀆𑀭𑀸𑀫𑀺𑀓𑀸, 𑀅𑀬𑀁 𑀯𑀸𑀧𑀻 𑀇𑀢𑁆𑀣𑀦𑁆𑀦𑀸𑀫𑁂𑀦 𑀲𑀗𑁆𑀖𑀲𑁆𑀲 𑀳𑀢𑁆𑀣𑁂 𑀤𑁄𑀳𑀦𑀢𑁆𑀣𑀸𑀬 𑀤𑀺𑀦𑁆𑀦𑀸. 𑀇𑀢𑁄 𑀔𑁂𑀢𑁆𑀢𑀢𑁄 𑀆𑀭𑀸𑀫𑀢𑁄 𑀉𑀧𑁆𑀧𑀚𑁆𑀚𑀦𑀓𑀘𑀢𑀼𑀧𑀘𑁆𑀘𑀬𑀸 𑀇𑀢𑁄 𑀕𑀸𑀯𑀺𑀢𑁄 𑀫𑀳𑀺𑀁𑀲𑀺𑀢𑁄 𑀅𑀚𑀸𑀢𑁄 𑀉𑀧𑁆𑀧𑀚𑁆𑀚𑀦𑀓𑀕𑁄𑀭𑀲𑀸 𑀇𑀢𑁆𑀣𑀦𑁆𑀦𑀸𑀫𑁂𑀦 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑀸’’𑀢𑀺 𑀧𑀼𑀘𑁆𑀙𑀺𑀢𑁂 𑀯𑀸 𑀅𑀧𑀼𑀘𑁆𑀙𑀺𑀢𑁂 𑀯𑀸 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. ‘‘𑀓𑀢’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀓𑀭𑁄𑀦𑁆𑀢𑀻’’𑀢𑀺 𑀯𑀘𑀦𑁂𑀦 𑀓𑀺𑀭 𑀅𑀦𑁂𑀦𑀓𑀢𑀁 𑀆𑀭𑀩𑁆𑀪 𑀆𑀘𑀺𑀓𑁆𑀔𑀺𑀢𑀸 𑀦𑀸𑀫 𑀳𑁄𑀢𑀺. 𑀕𑀻𑀯𑀸𑀢𑀺 𑀓𑁂𑀯𑀮𑀁 𑀕𑀻𑀯𑀸 𑀏𑀯 𑀳𑁄𑀢𑀺, 𑀦 𑀧𑀸𑀭𑀸𑀚𑀺𑀓𑀁. 𑀓𑀸𑀭𑀸𑀧𑁂𑀢𑁆𑀯𑀸 𑀤𑀸𑀢𑀩𑁆𑀩𑀸𑀢𑀺 𑀏𑀢𑁆𑀣 𑀲𑀘𑁂 𑀆𑀯𑀼𑀥𑀪𑀡𑁆𑀟𑀁 𑀳𑁄𑀢𑀺, 𑀢𑀲𑁆𑀲 𑀥𑀸𑀭𑀸 𑀦 𑀓𑀸𑀭𑁂𑀢𑀩𑁆𑀩𑀸, 𑀅𑀜𑁆𑀜𑁂𑀦 𑀧𑀦 𑀆𑀓𑀸𑀭𑁂𑀦 𑀲𑀜𑁆𑀜𑀸𑀧𑁂𑀢𑀩𑁆𑀩𑀁. ‘‘𑀢𑀺𑀘𑀺𑀢𑁆𑀢𑀁 𑀢𑀺𑀯𑁂𑀤𑀦’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀫𑀸𑀦𑀼𑀲𑁆𑀲𑀬𑀯𑀲𑁂𑀦 𑀓𑁄𑀥𑀼𑀲𑁆𑀲𑀬𑀯𑀲𑁂𑀦𑀸’’𑀢𑀺 𑀢𑀩𑁆𑀩𑀳𑀼𑀮𑀦𑀬𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀞𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁮𑁩. 𑀪𑀝𑀺𑀧𑀼𑀢𑁆𑀢𑀓𑀸𑀦𑀁 𑀓𑀼𑀫𑀸𑀭𑀪𑀝𑀺𑀓𑀸𑀦𑀁 𑀕𑀡𑀸 𑀪𑀝𑀺𑀧𑀼𑀢𑁆𑀢𑀕𑀡𑀸. 𑀓𑀧𑁆𑀧𑀦𑁆𑀢𑀺 𑀓𑀧𑁆𑀧𑀺𑀬𑀁. 𑀓𑀧𑁆𑀧𑀕𑀢𑀺𑀓𑀦𑁆𑀢𑀺 𑀓𑀧𑁆𑀧𑀺𑀬𑀲𑀪𑀸𑀯𑀁. 𑀧𑀓𑁆𑀓𑀦𑁆𑀢𑀸𑀲𑀼𑀧𑀻𑀢𑀺 𑀅𑀢𑁆𑀢𑀦𑁄 𑀧𑀭𑀺𑀲𑀁 𑀞𑀧𑁂𑀢𑁆𑀯𑀸 𑀇𑀢𑀭𑀸𑀲𑀼 𑀧𑀓𑁆𑀓𑀦𑁆𑀢𑀸𑀲𑀼. 𑀧𑀡𑁆𑀡𑀢𑁆𑀢𑀺𑀁 𑀅𑀚𑀸𑀦𑀦𑁆𑀢𑀸 𑀅𑀭𑀺𑀬𑀸𑀧𑀺 𑀯𑀼𑀝𑁆𑀞𑀸𑀧𑁂𑀦𑁆𑀢𑀻𑀢𑀺 𑀓𑀢𑁆𑀯𑀸 𑀯𑀸 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀆𑀧𑀢𑁆𑀢𑀺𑀓𑁆𑀔𑀡𑁂 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀲𑀫𑀗𑁆𑀕𑀺𑀢𑀸𑀯𑀲𑁂𑀦 𑀯𑀸 ‘‘𑀢𑀺𑀘𑀺𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀧𑀩𑁆𑀩𑀸𑀚𑀦𑁂 𑀦 𑀤𑀼𑀓𑁆𑀓𑀝’’𑀦𑁆𑀢𑀺 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁.

𑀤𑀼𑀢𑀺𑀬𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀢𑀺𑀬𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁮𑁭. 𑀪𑀤𑁆𑀤𑀸𑀓𑀸𑀧𑀺𑀮𑀸𑀦𑀻 𑀫𑀳𑀸𑀓𑀲𑁆𑀲𑀧𑀲𑁆𑀲 𑀧𑀼𑀭𑀸𑀡𑀤𑀼𑀢𑀺𑀬𑀸 𑀓𑀺𑀭. 𑀜𑀸𑀢𑀻𑀦𑀁 𑀓𑀼𑀮𑀁 𑀬𑀲𑁆𑀫𑀺𑀁 𑀕𑀸𑀫𑀓𑁂, 𑀢𑀤𑁂𑀢𑀁 𑀕𑀸𑀫𑀓𑀁 𑀜𑀸𑀢𑀺𑀓𑀼𑀮𑀁, 𑀓𑀼𑀮𑀲𑀦𑁆𑀦𑀺𑀳𑀺𑀢𑀁 𑀕𑀸𑀫𑀓𑀁 𑀅𑀕𑀫𑀸𑀲𑀻𑀢𑀺 𑀅𑀢𑁆𑀣𑁄. ‘‘𑀅𑀚𑀁 𑀕𑀸𑀫𑀁 𑀦𑁂𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀯𑀸 𑀤𑁆𑀯𑀺𑀓𑀫𑁆𑀫𑀺𑀓𑀁 𑀓𑀢𑁆𑀯𑀸 𑀕𑀸𑀫𑀓𑀁 𑀅𑀕𑀫𑀸𑀲𑀺 𑀜𑀸𑀢𑀺𑀓𑀼𑀮𑀁 𑀅𑀕𑀫𑀸𑀲𑀻𑀢𑀺𑀧𑀺 𑀬𑀼𑀚𑁆𑀚𑀢𑀺.

𑁬𑁯𑁨. ‘‘𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀉𑀧𑀘𑀸𑀭𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺𑀬𑀸’’𑀢𑀺 𑀯𑀘𑀦𑁂𑀦𑀧𑀺 𑀏𑀯𑀁 𑀯𑁂𑀤𑀺𑀢𑀩𑁆𑀩𑀁 𑁋 𑀯𑀺𑀓𑀸𑀮𑀕𑀸𑀫𑀧𑁆𑀧𑀯𑁂𑀲𑀦𑁂 𑀤𑁆𑀯𑀺𑀦𑁆𑀦𑀁 𑀮𑁂𑀟𑁆𑀟𑀼𑀧𑀸𑀢𑀸𑀦𑀁𑀬𑁂𑀯 𑀯𑀲𑁂𑀦 𑀉𑀧𑀘𑀸𑀭𑁄 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑀩𑁆𑀩𑁄, 𑀇𑀢𑀭𑀣𑀸 𑀬𑀣𑀸 𑀏𑀢𑁆𑀣 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀁 𑀧𑀭𑀺𑀓𑁆𑀔𑁂𑀧𑀁 𑀯𑀺𑀬 𑀓𑀢𑁆𑀯𑀸 ‘‘𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺𑀬𑀸’’𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀢𑀢𑁆𑀣𑀸𑀧𑀺 ‘‘𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀉𑀧𑀘𑀸𑀭𑀁 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲𑀸’’𑀢𑀺 𑀯𑀤𑁂𑀬𑁆𑀬. 𑀬𑀲𑁆𑀫𑀸 𑀧𑀦 𑀢𑀢𑁆𑀣 𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀢𑁄 𑀉𑀢𑁆𑀢𑀭𑀺 𑀏𑀓𑁄 𑀮𑁂𑀟𑁆𑀟𑀼𑀧𑀸𑀢𑁄 𑀉𑀧𑀘𑀸𑀭𑁄𑀢𑀺 𑀅𑀥𑀺𑀧𑁆𑀧𑁂𑀢𑁄, 𑀢𑀲𑁆𑀫𑀸 𑀢𑀤𑀢𑁆𑀣𑀤𑀻𑀧𑀦𑀢𑁆𑀣𑀁 ‘‘𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀉𑀧𑀘𑀸𑀭𑀁 𑀑𑀓𑁆𑀓𑀫𑀦𑁆𑀢𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀬𑀁 𑀧𑀦 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 ‘‘𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀁𑀬𑁂𑀯 ‘𑀉𑀧𑀘𑀸𑀭’𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑀭𑀺𑀓𑁆𑀔𑁂𑀧𑀧𑀭𑀺𑀓𑁆𑀔𑁂𑀧𑀸𑀭𑀳𑀝𑁆𑀞𑀸𑀦𑀸𑀦𑀁 𑀦𑀺𑀦𑁆𑀦𑀸𑀦𑀸𑀓𑀸𑀭𑀡𑀤𑀻𑀧𑀦𑀢𑁆𑀣𑀁 ‘𑀉𑀧𑀘𑀸𑀭𑀁 𑀑𑀓𑁆𑀓𑀫𑀦𑁆𑀢𑀲𑁆𑀲𑀸’𑀢𑀺 𑀯𑀼𑀢𑁆𑀢𑀁 𑀧𑀸𑀴𑀺𑀯𑀺𑀲𑁂𑀲𑀫𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀯 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀉𑀧𑀘𑀸𑀭𑀁 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀇𑀥 𑀉𑀧𑀘𑀸𑀭𑁄 𑀧𑀭𑀺𑀓𑁆𑀔𑁂𑀧𑁄 𑀬𑀣𑀸 𑀪𑀯𑁂𑀬𑁆𑀬, 𑀢𑀁 𑀉𑀧𑀘𑀸𑀭𑀁 𑀧𑀞𑀫𑀁 𑀧𑀸𑀤𑀁 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀤𑀼𑀢𑀺𑀬𑀁 𑀧𑀸𑀤𑀁 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀦 𑀕𑀳𑁂𑀢𑀩𑁆𑀩𑀫𑁂𑀯 𑀧𑀸𑀴𑀺𑀬𑀸 𑀯𑀺𑀲𑁂𑀲𑀲𑀩𑁆𑀪𑀸𑀯𑀢𑁄𑀢𑀺. ‘‘𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀕𑀸𑀫𑀲𑁆𑀲 𑀉𑀧𑀘𑀸𑀭𑀁 𑀑𑀓𑁆𑀓𑀫𑀦𑁆𑀢𑀺𑀬𑀸𑀢𑀺𑀧𑀺 𑀏𑀓𑀘𑁆𑀘𑁂𑀲𑀼 𑀤𑀺𑀲𑁆𑀲𑀢𑀺, 𑀢𑀁 𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀅𑀧𑀭𑁂’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀧𑀸𑀴𑀺𑀯𑀺𑀲𑁂𑀲𑀫𑀲𑀮𑁆𑀮𑀓𑁆𑀔𑁂𑀢𑁆𑀯𑀸’’𑀢𑀺 𑀤𑀼𑀯𑀼𑀢𑁆𑀢𑀁, 𑀓𑀲𑁆𑀫𑀸? 𑀯𑀺𑀓𑀸𑀮𑀕𑀸𑀫𑀧𑁆𑀧𑀯𑁂𑀲𑀦𑀲𑀺𑀓𑁆𑀔𑀸𑀧𑀤𑁂𑀧𑀺 𑀓𑀢𑁆𑀣𑀘𑀺 ‘‘𑀉𑀧𑀘𑀸𑀭𑀁 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲𑀸’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀻𑀢𑀺, 𑀲𑁄 𑀅𑀦𑁆𑀥𑀓𑀝𑁆𑀞𑀓𑀣𑀸𑀧𑀸𑀞𑀢𑁄 𑀕𑀳𑀺𑀢𑁄𑀢𑀺 𑀆𑀘𑀭𑀺𑀬𑁄. 𑀅𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀉𑀧𑀘𑀸𑀭𑁄𑀓𑁆𑀓𑀫𑀦𑀫𑁂𑀯 𑀧𑀸𑀞𑁄 𑀬𑀼𑀚𑁆𑀚𑀢𑀺, 𑀦 𑀅𑀢𑀺𑀓𑁆𑀓𑀫𑀦𑀁. 𑀓𑀲𑁆𑀫𑀸? 𑀩𑀳𑀽𑀲𑀼 𑀞𑀸𑀦𑁂𑀲𑀼 𑀧𑀸𑀴𑀺𑀬𑀸 𑀅𑀝𑁆𑀞𑀓𑀣𑀸𑀳𑀺 𑀯𑀺𑀭𑀼𑀚𑁆𑀛𑀦𑀢𑁄, 𑀇𑀫𑀲𑁆𑀫𑀺𑀁 𑀯𑀸𑀧𑀺 𑀲𑀺𑀓𑁆𑀔𑀸𑀧𑀤𑁂 𑀯𑀺𑀭𑀼𑀚𑁆𑀛𑀢𑀺. 𑀓𑀣𑀁? 𑀕𑀡𑀫𑁆𑀳𑀸 𑀑𑀳𑀻𑀬𑀫𑀸𑀦𑀸𑀬 𑀅𑀭𑀜𑁆𑀜𑁂 𑀆𑀧𑀢𑁆𑀢𑀺 𑀳𑁄𑀢𑀺, 𑀦 𑀕𑀸𑀫𑁂. 𑀅𑀣 𑀘 𑀧𑀦 𑀦𑀺𑀤𑀲𑁆𑀲𑀦𑀫𑁆𑀧𑀺 ‘‘𑀲𑀺𑀓𑁆𑀔𑀸𑀧𑀤𑀸 𑀩𑀼𑀤𑁆𑀥𑀯𑀭𑁂𑀦𑀸’’𑀢𑀺 (𑀧𑀭𑀺. 𑁪𑁭𑁯) 𑀕𑀸𑀣𑀸 𑀤𑀲𑁆𑀲𑀺𑀢𑀸, 𑀢𑀲𑁆𑀫𑀸 𑀉𑀧𑀘𑀸𑀭𑁄𑀓𑁆𑀓𑀫𑀦𑀧𑀭𑀺𑀬𑀸𑀧𑀦𑁆𑀦𑀦𑀤𑀺𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺𑀬𑀸 𑀳𑁄𑀢𑀺. 𑀓𑀺𑀜𑁆𑀘 𑀪𑀺𑀬𑁆𑀬𑁄 ‘‘𑀕𑀘𑁆𑀙𑀦𑁆𑀢𑀲𑁆𑀲 𑀘𑀢𑀲𑁆𑀲𑁄 𑀆𑀧𑀢𑁆𑀢𑀺𑀬𑁄, 𑀞𑀺𑀢𑀲𑁆𑀲 𑀘𑀸𑀧𑀺 𑀢𑀢𑁆𑀢𑀓𑀸𑀢𑀺𑀆𑀤𑀻𑀦𑀁 (𑀧𑀭𑀺. 𑁪𑁭𑁫) 𑀧𑀭𑀺𑀯𑀸𑀭𑀕𑀸𑀣𑀸𑀦𑀁 𑀅𑀝𑁆𑀞𑀓𑀣𑀸𑀳𑀺 𑀉𑀧𑀘𑀸𑀭𑁄𑀓𑁆𑀓𑀫𑀦𑀫𑁂𑀯 𑀧𑀸𑀞𑁄𑀢𑀺 𑀦𑀺𑀝𑁆𑀞𑀁 𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀘 𑀯𑀼𑀢𑁆𑀢𑀁, 𑀲𑀼𑀝𑁆𑀞𑀼 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀁.

‘‘𑀧𑀤𑀲𑀸 𑀕𑀫𑀦𑀫𑁂𑀯 𑀳𑀺 𑀇𑀥𑀸𑀥𑀺𑀧𑁆𑀧𑁂𑀢𑀁, 𑀢𑁂𑀦𑁂𑀯 𑀧𑀞𑀫𑀁 𑀧𑀸𑀤𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀺𑀬𑀸𑀢𑀺𑀆𑀤𑀺𑀫𑀸𑀳𑀸’’𑀢𑀺 𑀏𑀢𑁆𑀣 𑀯𑀺𑀓𑀸𑀮𑀕𑀸𑀫𑀧𑁆𑀧𑀯𑁂𑀲𑀦𑀲𑀺𑀓𑁆𑀔𑀸𑀧𑀤𑀸𑀤𑀻𑀲𑀼 𑀢𑀤𑀪𑀸𑀯𑀸 𑀬𑀸𑀦𑁂𑀦 𑀯𑀸 𑀇𑀤𑁆𑀥𑀺𑀬𑀸 𑀯𑀸 𑀧𑀯𑀺𑀲𑀢𑁄, 𑀅𑀤𑁆𑀥𑀸𑀦𑀁 𑀕𑀘𑁆𑀙𑀢𑁄 𑀘 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺. 𑀢𑀢𑁆𑀣 𑀅𑀲𑀸𑀭𑀼𑀧𑁆𑀧𑀢𑁆𑀢𑀸 𑀆𑀧𑀢𑁆𑀢𑀺𑀫𑁄𑀓𑁆𑀔𑁄 𑀦𑀢𑁆𑀣𑀻𑀢𑀺 𑀏𑀓𑁂, 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀪𑀺𑀓𑁆𑀔𑀼𑀦𑀻𑀯𑀺𑀳𑀸𑀭𑀪𑀽𑀫𑀺 ‘‘𑀕𑀸𑀫𑀦𑁆𑀢𑀭’’𑀦𑁆𑀢𑀺 𑀦 𑀯𑀼𑀘𑁆𑀘𑀢𑀺 𑀕𑀸𑀫𑀦𑁆𑀢𑀭𑀧𑀭𑀺𑀬𑀸𑀧𑀦𑁆𑀦𑀸𑀬𑀧𑀺 𑀓𑀧𑁆𑀧𑀺𑀬𑀪𑀽𑀫𑀺𑀢𑁆𑀢𑀸. ‘‘𑀧𑀭𑀢𑁄 ‘𑀲𑀘𑁂 𑀪𑀺𑀓𑁆𑀔𑀼𑀦𑀻𑀲𑀼 𑀫𑀳𑀸𑀩𑁄𑀥𑀺𑀬𑀗𑁆𑀕𑀡𑀁 𑀧𑀯𑀺𑀲𑀦𑁆𑀢𑀻𑀲𑀼 𑀏𑀓𑀸 𑀩𑀳𑀺 𑀢𑀺𑀝𑁆𑀞𑀢𑀺, 𑀢𑀲𑁆𑀲𑀸 𑀆𑀧𑀢𑁆𑀢𑀻’𑀢𑀺𑀆𑀤𑀺𑀯𑀘𑀦𑀢𑁄 𑀪𑀺𑀓𑁆𑀔𑀼𑀯𑀺𑀳𑀸𑀭𑁄 𑀦 𑀓𑀧𑁆𑀧𑀺𑀬𑀪𑀽𑀫𑀻𑀢𑀺 𑀲𑀺𑀤𑁆𑀥𑀁, 𑀢𑀲𑁆𑀫𑀸 𑀓𑀜𑁆𑀘𑀺𑀦𑀕𑀭𑁂 𑀔𑀦𑁆𑀥𑀥𑀫𑁆𑀫𑀯𑀺𑀳𑀸𑀭𑁄 𑀯𑀺𑀬, 𑀓𑀸𑀯𑀻𑀭𑀧𑀝𑁆𑀝𑀦𑁂 𑀲𑀸𑀭𑀻𑀥𑀫𑁆𑀫𑀯𑀺𑀳𑀸𑀭𑁄 𑀯𑀺𑀬 𑀘 𑀅𑀜𑁆𑀜𑁄𑀧𑀺 𑀲𑁄 𑀯𑀺𑀳𑀸𑀭𑁄, 𑀢𑀲𑁆𑀫𑀸 𑀲𑀻𑀫𑀩𑀤𑁆𑀥𑀲𑀼𑀔𑀢𑁆𑀣𑀁 𑀕𑀸𑀫𑀦𑁆𑀢𑀭𑀪𑀸𑀯𑁂 𑀦𑀺𑀭𑀦𑁆𑀢𑀭𑀸 𑀅𑀥𑀺𑀝𑁆𑀞𑀸𑀦𑀢𑁆𑀣𑀁 𑀧𑀯𑀺𑀲𑀦𑁆𑀢𑀺𑀬𑀸, 𑀦𑀺𑀓𑁆𑀔𑀫𑀦𑁆𑀢𑀺𑀬𑀸𑀧𑀺 𑀕𑀸𑀫𑀦𑁆𑀢𑀭𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 𑀅𑀧𑀭𑁂’’𑀢𑀺 𑀯𑀼𑀢𑁆𑀢𑀁. 𑀘𑀢𑀼𑀕𑀸𑀫𑀲𑀸𑀥𑀸𑀭𑀡𑀢𑁆𑀢𑀸𑀢𑀺 𑀏𑀢𑁆𑀣 𑀏𑀯𑀁𑀯𑀺𑀥𑁂 𑀯𑀺𑀳𑀸𑀭𑁂 𑀲𑀻𑀫𑀁 𑀩𑀦𑁆𑀥𑀦𑁆𑀢𑁂𑀳𑀺 𑀘𑀢𑁆𑀢𑀸𑀭𑁄𑀧𑀺 𑀢𑁂 𑀕𑀸𑀫𑀸 𑀲𑁄𑀥𑁂𑀢𑀩𑁆𑀩𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀁𑀯𑀺𑀤𑀳𑀺𑀢𑁆𑀯𑀸 𑀪𑀺𑀓𑁆𑀔𑀼𑀦𑀺𑀬𑀸 𑀯𑀸 𑀫𑀸𑀢𑀼𑀕𑀸𑀫𑁂𑀦 𑀯𑀸 𑀣𑁂𑀬𑁆𑀬𑀲𑀢𑁆𑀣𑁂𑀦 𑀯𑀸 𑀲𑀤𑁆𑀥𑀺𑀁 𑀢𑀁 𑀯𑀺𑀳𑀸𑀭𑀁 𑀑𑀓𑁆𑀓𑀫𑀦𑁆𑀢𑀺𑀬𑀸 𑀘𑀢𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀏𑀓𑀢𑁄𑀯 𑀳𑁄𑀦𑁆𑀢𑀺. ‘‘𑀕𑀸𑀫𑀦𑁆𑀢𑀭𑁂 𑀕𑀸𑀫𑀦𑁆𑀢𑀭𑁂 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀸𑀢𑀺 𑀏𑀓𑁂.

𑀤𑀼𑀢𑀺𑀬𑀧𑀸𑀤𑀼𑀤𑁆𑀥𑀸𑀭𑁂 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀏𑀢𑁆𑀣 𑀲𑀘𑁂 𑀤𑀼𑀢𑀺𑀬𑁄 𑀧𑀸𑀤𑀼𑀤𑁆𑀥𑀸𑀭𑁄 𑀓𑀧𑁆𑀧𑀺𑀬𑀪𑀽𑀫𑀺𑀬𑀁 𑀳𑁄𑀢𑀺, 𑀦 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀅𑀓𑀧𑁆𑀧𑀺𑀬𑀪𑀽𑀫𑀺𑀬𑀁 𑀏𑀯 𑀲𑀗𑁆𑀖𑀸𑀤𑀺𑀲𑁂𑀲𑁄. ‘‘𑀉𑀪𑀬𑀢𑀻𑀭𑁂𑀲𑀼 𑀯𑀺𑀘𑀭𑀦𑁆𑀢𑀺, 𑀯𑀝𑁆𑀝𑀢𑀻𑀢𑀺 𑀤𑀲𑁆𑀲𑀦𑀽𑀧𑀘𑀸𑀭𑀲𑁆𑀲𑁂𑀢𑁆𑀣 𑀲𑀫𑁆𑀪𑀯𑀸’’𑀢𑀺 𑀮𑀺𑀔𑀺𑀢𑀁, 𑀢𑀁 𑀬𑀼𑀢𑁆𑀢𑀁. 𑀲𑀯𑀦𑀽𑀧𑀘𑀸𑀭𑁄 𑀳𑁂𑀢𑁆𑀣 𑀦𑀤𑀻𑀧𑀸𑀭𑁂, 𑀕𑀸𑀫𑀦𑁆𑀢𑀭𑁂 𑀯𑀸 𑀅𑀧𑁆𑀧𑀫𑀸𑀡𑀦𑁆𑀢𑀺. 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀧𑀭𑀢𑀻𑀭𑀢𑁄 𑀦𑀤𑀺𑀁 𑀑𑀢𑀭𑀺𑀢𑁆𑀯𑀸 𑀤𑀲𑁆𑀲𑀦𑀽𑀧𑀘𑀸𑀭𑀢𑁄 𑀤𑀸𑀭𑀽𑀦𑀺, 𑀧𑀡𑁆𑀡𑀸𑀦𑀺𑀯𑀸 𑀫𑀕𑁆𑀕𑀺𑀢𑁆𑀯𑀸 𑀆𑀦𑁂𑀢𑀺, 𑀅𑀦𑀸𑀧𑀢𑁆𑀢𑀺. 𑀢𑀺𑀘𑀻𑀯𑀭𑀸𑀦𑀺 𑀧𑀭𑀢𑀻𑀭𑁂 𑀑𑀢𑀸𑀧𑁂𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀑𑀭𑀺𑀫𑀢𑀻𑀭𑀫𑁂𑀯 𑀆𑀕𑀘𑁆𑀙𑀢𑀺, 𑀆𑀧𑀢𑁆𑀢𑀻’’𑀢𑀺 𑀅𑀢𑀺𑀓𑁆𑀓𑀫𑀺𑀢𑀼𑀓𑀸𑀫𑀢𑀸𑀬 𑀧𑀯𑀺𑀝𑁆𑀞𑀢𑁆𑀢𑀸 𑀯𑀼𑀢𑁆𑀢𑀁. ‘‘𑀦𑁆𑀳𑀸𑀬𑀦𑀸𑀤𑀺𑀓𑀺𑀘𑁆𑀘𑁂𑀦 𑀧𑀯𑀺𑀝𑁆𑀞𑀸𑀦𑀁 𑀓𑀢𑁆𑀣𑁂𑀯𑀸𑀮𑀬𑀲𑀫𑁆𑀪𑀯𑀸 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀕𑀸𑀫𑀦𑁆𑀢𑀭𑁂 𑀧𑀫𑀸𑀡𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀧𑀭𑀢𑀻𑀭𑀢𑁄 𑀦𑀤𑀺𑀁 𑀑𑀢𑀭𑀺𑀢𑁆𑀯𑀸 𑀤𑀲𑁆𑀲𑀦𑀽𑀧𑀘𑀸𑀭𑀢𑁄 𑀤𑀸𑀭𑀽𑀦𑀺 𑀧𑀡𑁆𑀡𑀸𑀦𑀺 𑀲𑀓𑀕𑀸𑀫𑀢𑁄 𑀣𑁄𑀓𑀫𑁆𑀧𑀺 𑀢𑀭𑀡𑀯𑀸𑀭𑁂𑀦 𑀦 𑀯𑀝𑁆𑀝𑀢𑀺 𑀓𑀺𑀭 𑀦𑀺𑀓𑁆𑀔𑀫𑀺𑀢𑁆𑀯𑀸 𑀧𑀯𑀺𑀲𑀺𑀢𑀼𑀁.

𑀅𑀕𑀸𑀫𑀓𑁂 𑀅𑀭𑀜𑁆𑀜𑁂𑀢𑀺 𑀅𑀕𑀸𑀫𑀮𑀓𑁆𑀔𑀡𑁂 𑀅𑀭𑀜𑁆𑀜𑁂𑀢𑀺 𑀅𑀢𑁆𑀣𑁄. 𑀇𑀫𑀺𑀦𑀸 𑀆𑀧𑀢𑁆𑀢𑀺𑀔𑁂𑀢𑁆𑀢𑀁 𑀤𑀲𑁆𑀲𑀺𑀢𑀁. 𑀬𑀲𑁆𑀫𑀸 𑀇𑀤𑀁 𑀆𑀧𑀢𑁆𑀢𑀺𑀔𑁂𑀢𑁆𑀢𑀁, 𑀢𑀲𑁆𑀫𑀸 𑀬𑀸 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀢𑁄 𑀕𑀸𑀫𑀲𑁆𑀲 𑀇𑀦𑁆𑀤𑀔𑀻𑀮𑀁 𑀅𑀢𑀺𑀓𑁆𑀓𑀫𑀢𑀺, 𑀲𑀸 𑀅𑀲𑀦𑁆𑀢𑁂 𑀕𑀸𑀫𑁂 𑀕𑀡𑀫𑁆𑀳𑀸 𑀑𑀳𑀻𑀬𑀦𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀤𑀲𑁆𑀲𑀦𑀲𑀯𑀦𑀽𑀧𑀘𑀸𑀭𑀸𑀪𑀸𑀯𑁂𑀧𑀺 𑀧𑀕𑁂𑀯 𑀕𑀸𑀫𑁂 𑀇𑀦𑁆𑀤𑀔𑀻𑀮𑀸𑀢𑀺𑀓𑁆𑀓𑀫𑀦𑀓𑁆𑀔𑀡𑁂𑀬𑁂𑀯 𑀆𑀧𑀚𑁆𑀚𑀢𑀺. 𑀲𑀘𑁂 𑀢𑀢𑁆𑀣 𑀏𑀓𑀸 𑀪𑀺𑀓𑁆𑀔𑀼𑀦𑀻 𑀅𑀢𑁆𑀣𑀺, 𑀢𑀲𑁆𑀲𑀸 𑀤𑀲𑁆𑀲𑀦𑀲𑀯𑀦𑀽𑀧𑀘𑀸𑀭𑀸𑀢𑀺𑀓𑁆𑀓𑀫𑀦𑀓𑁆𑀔𑀡𑁂 𑀆𑀧𑀚𑁆𑀚𑀢𑀺, 𑀅𑀭𑀜𑁆𑀜𑀫𑀕𑁆𑀕𑀕𑀫𑀦𑀓𑀸𑀮𑁂 𑀏𑀯𑀸𑀬𑀁 𑀯𑀺𑀥𑀻𑀢𑀺 𑀦 𑀕𑀳𑁂𑀢𑀩𑁆𑀩𑀁. 𑀕𑀸𑀫𑀢𑁄 𑀧𑀦 𑀦𑀺𑀓𑁆𑀔𑀫𑀦𑁆𑀢𑀻 𑀇𑀢𑁄 𑀧𑀝𑁆𑀞𑀸𑀬 𑀆𑀧𑀚𑁆𑀚𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀅𑀕𑀸𑀫𑀓𑀁 𑀅𑀭𑀜𑁆𑀜’’𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀆𑀭𑀸𑀥𑀺𑀓𑀸 𑀘 𑀳𑁄𑀦𑁆𑀢𑀺 𑀲𑀗𑁆𑀕𑀸𑀳𑀺𑀓𑀸 𑀮𑀚𑁆𑀚𑀺𑀦𑀺𑀬𑁄, 𑀢𑀸 𑀓𑁄𑀧𑁂𑀢𑁆𑀯𑀸 𑀅𑀜𑁆𑀜𑀢𑁆𑀣 𑀦 𑀕𑀦𑁆𑀢𑀩𑁆𑀩𑀁. 𑀕𑀘𑁆𑀙𑀢𑀺 𑀘𑁂, 𑀕𑀸𑀫𑀦𑁆𑀢𑀭𑀦𑀤𑀻𑀧𑀸𑀭𑀭𑀢𑁆𑀢𑀺𑀯𑀺𑀧𑁆𑀧𑀯𑀸𑀲𑀕𑀡𑀫𑁆𑀳𑀸 𑀑𑀳𑀻𑀬𑀦𑀸𑀧𑀢𑁆𑀢𑀻𑀳𑀺 𑀦 𑀫𑀼𑀘𑁆𑀘𑀢𑀻’’𑀢𑀺𑀆𑀤𑀺. 𑀢𑀢𑁆𑀣 ‘‘𑀕𑀡𑀫𑁆𑀳𑀸 𑀑𑀳𑀻𑀬𑀦𑀸𑀧𑀢𑁆𑀢𑀺 𑀲𑀓𑀺𑀁𑀬𑁂𑀯𑀸𑀧𑀚𑁆𑀚𑀢𑀺. 𑀇𑀢𑀭𑀸 𑀕𑀸𑀫𑁂 𑀕𑀸𑀫𑁂 𑀧𑀸𑀭𑁂 𑀧𑀸𑀭𑁂 𑀅𑀭𑀼𑀡𑁂 𑀅𑀭𑀼𑀡𑁂 𑀘𑀸𑀢𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀯𑀼𑀢𑁆𑀢𑀜𑁆𑀳𑁂𑀢’’𑀦𑁆𑀢𑀺𑀆𑀤𑀻𑀦𑀺 𑀅𑀲𑀸𑀥𑀓𑀸𑀦𑀺 𑀬𑀣𑀸𑀲𑀫𑁆𑀪𑀯𑀁 𑀕𑀳𑁂𑀢𑀩𑁆𑀩𑀢𑁆𑀢𑀸. ‘‘𑀫𑀳𑀸𑀩𑁄𑀥𑀺𑀬𑀗𑁆𑀕𑀡𑀦𑁆𑀢𑀺𑀆𑀤𑀺 𑀏𑀯𑀁 𑀕𑀸𑀫𑀲𑁆𑀲 𑀆𑀲𑀦𑁆𑀦𑀝𑁆𑀞𑀸𑀦𑁂𑀧𑀺 𑀇𑀫𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢’’𑀦𑁆𑀢𑀺 𑀮𑀺𑀔𑀺𑀢𑀁.

𑀢𑀢𑀺𑀬𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀘𑀢𑀼𑀢𑁆𑀣𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁯𑁪. 𑀧𑀝𑀺𑀯𑀢𑁆𑀢𑀸𑀢𑀺 𑀧𑀝𑀺𑀯𑀘𑀦𑀁 𑀤𑁂𑀦𑁆𑀢𑀺. 𑀓𑀫𑁆𑀫𑀤𑁄𑀲𑀦𑁆𑀢𑀺 ‘‘𑀅𑀦𑀜𑁆𑀜𑀸𑀬 𑀕𑀡𑀲𑁆𑀲 𑀙𑀦𑁆𑀤𑀦𑁆𑀢𑀺 𑀏𑀯𑀫𑀸𑀤𑀻’’𑀢𑀺 𑀮𑀺𑀔𑀺𑀢𑀁. 𑀓𑀢𑁆𑀢𑀩𑁆𑀩𑀝𑁆𑀞𑀸𑀦𑀤𑁄𑀲𑀦𑁆𑀢𑀺 𑀧𑁄𑀭𑀸𑀡𑀸. 𑀓𑀸𑀭𑀓𑀕𑀡𑀲𑁆𑀲𑀸𑀢𑀺 𑀓𑀸𑀭𑀓𑀲𑀗𑁆𑀖𑀲𑁆𑀲. ‘‘𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀁 𑀲𑀦𑁆𑀦𑀺𑀧𑀸𑀢𑁂𑀢𑁆𑀯𑀸’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀓𑀸𑀭𑀓𑀲𑀗𑁆𑀖𑁄𑀧𑀺 𑀅𑀬𑀫𑁂𑀯𑀸𑀢𑀺 𑀘𑁂? 𑀧𑀞𑀫𑀫𑁂𑀯 𑀓𑀸𑀭𑀓𑀲𑀗𑁆𑀖𑀁 𑀦 𑀆𑀫𑀦𑁆𑀢𑁂𑀢𑁆𑀯𑀸 𑀩𑀮𑀓𑁆𑀓𑀸𑀭𑁂𑀦𑀸𑀬𑀁 𑀣𑀼𑀮𑁆𑀮𑀦𑀦𑁆𑀤𑀸 𑀢𑀁 𑀪𑀺𑀓𑁆𑀔𑀼𑀦𑀺𑀁 𑀑𑀲𑀸𑀭𑁂𑀲𑀻’’𑀢𑀺 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀓𑀸𑀭𑀓𑀪𑀺𑀓𑁆𑀔𑀽𑀦𑀁 𑀲𑀫𑁆𑀫𑀼𑀔𑀸𑀧𑀺 𑀢𑁂𑀲𑀁 𑀅𑀦𑀼𑀫𑀢𑀺𑀁 𑀧𑀞𑀫𑀁 𑀅𑀕𑁆𑀕𑀳𑁂𑀢𑁆𑀯𑀸 𑀢𑀁 𑀓𑀫𑁆𑀫𑀁 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀩𑁆𑀩𑀦𑁆𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺, 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀁 𑀩𑀮𑀓𑁆𑀓𑀸𑀭𑁂𑀦 𑀦 𑀓𑀸𑀢𑀩𑁆𑀩𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀪𑀺𑀓𑁆𑀔𑀼𑀦𑀻𑀧𑀺 𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑀁 𑀓𑀸𑀢𑀼𑀁 𑀮𑀪𑀢𑀻’’𑀢𑀺 𑀘 𑀢𑀢𑁆𑀣 𑀯𑀼𑀢𑁆𑀢𑀁.

𑁬𑁯𑁮. 𑀅𑀲𑀦𑁆𑀢𑁂 𑀓𑀫𑁆𑀫𑀓𑀸𑀭𑀓𑀲𑀗𑁆𑀖𑁂 𑀑𑀲𑀸𑀭𑁂𑀢𑀺, 𑀅𑀦𑀸𑀧𑀢𑁆𑀢𑀻𑀢𑀺 𑀏𑀢𑁆𑀣 𑀓𑀺𑀢𑁆𑀢𑀸𑀯𑀢𑀸 𑀅𑀲𑀦𑁆𑀢𑁄 𑀦𑀸𑀫 𑀳𑁄𑀢𑀻𑀢𑀺? 𑀇𑀤𑀁 𑀲𑀩𑁆𑀩𑀢𑁆𑀣 𑀦 𑀯𑀺𑀘𑀸𑀭𑀺𑀢𑀁. 𑀓𑀸𑀭𑀓𑀸𑀦𑀁 𑀓𑀸𑀮𑀓𑀺𑀭𑀺𑀬𑀸𑀬𑀸𑀢𑀺 𑀏𑀓𑁂. 𑀏𑀓𑀲𑁆𑀲𑀧𑀺 𑀅𑀪𑀸𑀯𑁂𑀦𑀸𑀢𑀺 𑀏𑀓𑁂. 𑀏𑀓𑀲𑁆𑀫𑀺𑀁 𑀭𑀚𑁆𑀚𑁂𑀢𑀺 𑀏𑀓𑁂. 𑀏𑀓𑀭𑀝𑁆𑀞𑁂𑀢𑀺 𑀏𑀓𑁂. 𑀏𑀓𑀕𑀸𑀫𑁂𑀢𑀺 𑀏𑀓𑁂. 𑀏𑀓𑀲𑁆𑀫𑀺𑀁 𑀆𑀯𑀸𑀲𑁂𑀢𑀺 𑀏𑀓𑁂. 𑀬𑀢𑁆𑀣 𑀲𑀓𑁆𑀓𑀸 𑀅𑀧𑀮𑁄𑀓𑁂𑀢𑀼𑀦𑁆𑀢𑀺 𑀏𑀓𑁂. 𑀅𑀦𑁆𑀢𑁄𑀅𑀤𑁆𑀥𑀬𑁄𑀚𑀦𑁂𑀢𑀺 𑀏𑀓𑁂. 𑀢𑀢𑁆𑀣 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀅𑀲𑀦𑁆𑀢𑁂 𑀓𑀸𑀭𑀓𑀲𑀗𑁆𑀖𑁂 𑀑𑀲𑀸𑀭𑁂𑀢𑀺, 𑀅𑀦𑀸𑀧𑀢𑁆𑀢𑀻𑀢𑀺 𑀇𑀤𑀁 𑀧𑀲𑀁𑀲𑀦𑁆𑀢𑀺 𑀆𑀘𑀭𑀺𑀬𑀸. 𑀬𑀢𑁆𑀣 𑀲𑀓𑁆𑀓𑀸 𑀅𑀧𑀮𑁄𑀓𑁂𑀢𑀼𑀦𑁆𑀢𑀺 𑀲𑀸𑀫𑀻𑀘𑀺.

𑀘𑀢𑀼𑀢𑁆𑀣𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀜𑁆𑀘𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁦𑁧. 𑀏𑀢𑀁 𑀦 𑀯𑀼𑀢𑁆𑀢𑀦𑁆𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀅𑀯𑀲𑁆𑀲𑀼𑀢𑀪𑀸𑀯𑁄 𑀤𑀝𑁆𑀞𑀩𑁆𑀩𑁄𑀢𑀺 𑀏𑀢𑀁 𑀦𑀺𑀬𑀫𑀦𑀁 𑀦 𑀯𑀼𑀢𑁆𑀢𑀁. 𑀢𑀁 𑀅𑀯𑀘𑀦𑀁 𑀧𑀸𑀴𑀺𑀬𑀸 𑀲𑀫𑁂𑀢𑀺. 𑀓𑀢𑀭𑀧𑀸𑀴𑀺𑀬𑀸𑀢𑀺? ‘‘𑀅𑀦𑀯𑀲𑁆𑀲𑀼𑀢𑁄𑀢𑀺 𑀚𑀸𑀦𑀦𑁆𑀢𑀻 𑀧𑀝𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺 𑀇𑀫𑀸𑀬. 𑀬𑀤𑀺 𑀳𑀺 𑀧𑀼𑀕𑁆𑀕𑀮𑀲𑁆𑀲 𑀅𑀯𑀲𑁆𑀲𑀼𑀢𑀪𑀸𑀯𑁄 𑀦 𑀧𑀫𑀸𑀡𑀁, 𑀓𑀺𑀁 𑀇𑀫𑀸𑀬 𑀧𑀸𑀴𑀺𑀬𑀸 𑀧𑀬𑁄𑀚𑀦𑀁, ‘‘𑀅𑀦𑀸𑀧𑀢𑁆𑀢𑀺 𑀉𑀪𑁄 𑀅𑀦𑀯𑀲𑁆𑀲𑀼𑀢𑀸 𑀳𑁄𑀦𑁆𑀢𑀺, 𑀅𑀦𑀯𑀲𑁆𑀲𑀼𑀢𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀅𑀢𑁆𑀢𑀦𑁄 𑀳𑀺 𑀅𑀦𑀯𑀲𑁆𑀲𑀼𑀢𑀪𑀸𑀯𑁄𑀬𑁂𑀯 𑀧𑀫𑀸𑀡𑀦𑁆𑀢𑀺. 𑀇𑀫𑀲𑁆𑀲 𑀧𑀦 𑀅𑀦𑀸𑀧𑀢𑁆𑀢𑀺𑀯𑀸𑀭𑀲𑁆𑀲 𑀅𑀬𑀫𑀢𑁆𑀣𑁄 𑁋 𑀉𑀪𑁄 𑀘𑁂 𑀅𑀦𑀯𑀲𑁆𑀲𑀼𑀢𑀸, 𑀲𑀩𑁆𑀩𑀣𑀸𑀧𑀺 𑀅𑀦𑀸𑀧𑀢𑁆𑀢𑀺. 𑀅𑀣 𑀪𑀺𑀓𑁆𑀔𑀼𑀦𑀻 𑀅𑀦𑀯𑀲𑁆𑀲𑀼𑀢𑀸 𑀲𑀫𑀸𑀦𑀸 𑀅𑀯𑀲𑁆𑀲𑀼𑀢𑀫𑁆𑀧𑀺 ‘‘𑀅𑀦𑀯𑀲𑁆𑀲𑀼𑀢𑁄’’𑀢𑀺 𑀲𑀜𑁆𑀜𑀸𑀬 𑀢𑀲𑁆𑀲 𑀳𑀢𑁆𑀣𑀢𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀏𑀯𑀫𑁆𑀧𑀺 𑀅𑀦𑀸𑀧𑀢𑁆𑀢𑀻𑀢𑀺. 𑀅𑀣 𑀲𑀸 𑀅𑀦𑀯𑀲𑁆𑀲𑀼𑀢𑀸𑀧𑀺 𑀅𑀜𑁆𑀜𑀁 𑀅𑀦𑀯𑀲𑁆𑀲𑀼𑀢𑀁 𑀯𑀸 𑀅𑀯𑀲𑁆𑀲𑀼𑀢𑀁 𑀯𑀸 ‘‘𑀅𑀯𑀲𑁆𑀲𑀼𑀢𑁄’’𑀢𑀺 𑀚𑀸𑀦𑀸𑀢𑀺, 𑀤𑀼𑀓𑁆𑀓𑀝𑀫𑁂𑀯. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀦𑀦𑁆𑀢𑀭𑀲𑀺𑀓𑁆𑀔𑀸𑀧𑀤𑁂 ‘‘𑀓𑀺𑀲𑁆𑀲 𑀢𑁆𑀯𑀁 𑀅𑀬𑁆𑀬𑁂 𑀦 𑀧𑀝𑀺𑀕𑁆𑀕𑀡𑁆𑀳𑀸𑀲𑀻𑀢𑀺. 𑀅𑀯𑀲𑁆𑀲𑀼𑀢𑁄 𑀅𑀬𑁆𑀬𑁂𑀢𑀺…𑀧𑁂… 𑀦𑀸𑀳𑀁 𑀅𑀯𑀲𑁆𑀲𑀼𑀢𑀸’’𑀢𑀺.

𑀧𑀜𑁆𑀘𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀙𑀝𑁆𑀞𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁦𑁫. 𑀢𑁂𑀦𑀸𑀢𑀺 𑀢𑀲𑁆𑀫𑀸. 𑀬𑀲𑁆𑀫𑀸 𑀉𑀬𑁆𑀬𑁄𑀚𑀺𑀓𑀸 𑀦 𑀤𑁂𑀢𑀺 𑀦 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀢𑀲𑁆𑀫𑀸 𑀧𑀝𑀺𑀕𑁆𑀕𑀳𑁄 𑀦 𑀯𑀺𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀇𑀢𑀭𑀺𑀲𑁆𑀲𑀸 𑀧𑀭𑀺𑀪𑁄𑀕𑀧𑀘𑁆𑀘𑀬𑀸. ‘‘𑀅𑀓𑀼𑀲𑀮𑀘𑀺𑀢𑁆𑀢’’𑀦𑁆𑀢𑀺 𑀩𑀸𑀳𑀼𑀮𑁆𑀮𑁂𑀦 𑀯𑀼𑀢𑁆𑀢𑀁. ‘‘𑀯𑀝𑁆𑀝𑀢𑀻𑀢𑀺 𑀲𑀜𑁆𑀜𑀸𑀬 𑀯𑀤𑀦𑁆𑀢𑀺𑀬𑀸𑀧𑀺 𑀆𑀧𑀢𑁆𑀢𑀻’’𑀢𑀺 𑀯𑀤𑀦𑁆𑀢𑀺.

𑀙𑀝𑁆𑀞𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀢𑁆𑀢𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁧𑁨-𑁪. 𑀓𑀫𑁆𑀫𑀯𑀸𑀘𑀢𑁄 𑀧𑀼𑀩𑁆𑀩𑁂 𑀆𑀧𑀦𑁆𑀦𑀸𑀧𑀢𑁆𑀢𑀺𑀬𑁄 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺. 𑀜𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀣𑀼𑀮𑁆𑀮𑀘𑁆𑀘𑀬𑀸 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁂 𑀧𑀢𑁆𑀢𑁂𑀢𑀺 𑀧𑁄𑀭𑀸𑀡𑀸. 𑀢𑀁 ‘‘𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑀺𑀬𑀸’’𑀢𑀺 𑀧𑀸𑀴𑀺𑀬𑀸 𑀲𑀫𑁂𑀢𑀺. ‘‘𑀲𑀼𑀢𑁆𑀯𑀸 𑀦 𑀯𑀤𑀦𑁆𑀢𑀻’’𑀢𑀺 𑀏𑀢𑁆𑀣 𑀲𑀘𑁂 𑀚𑀻𑀯𑀺𑀢𑀩𑁆𑀭𑀳𑁆𑀫𑀘𑀭𑀺𑀬𑀦𑁆𑀢𑀭𑀸𑀬𑀪𑀬𑀸 𑀦 𑀯𑀤𑀦𑁆𑀢𑀺, 𑀅𑀦𑀸𑀧𑀢𑁆𑀢𑀺. ‘‘𑀅𑀥𑀫𑁆𑀫𑀓𑀫𑁆𑀫𑁂 𑀅𑀥𑀫𑁆𑀫𑀓𑀫𑁆𑀫𑀲𑀜𑁆𑀜𑀸 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀅𑀦𑀸𑀧𑀢𑁆𑀢𑀺 𑀅𑀲𑀫𑀦𑀼𑀪𑀸𑀲𑀦𑁆𑀢𑀺𑀬𑀸’’𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑀲𑀢𑁆𑀢𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀝𑁆𑀞𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁧𑁫. 𑀧𑀘𑁆𑀘𑀸𑀓𑀢𑀸𑀢𑀺 𑀧𑀭𑀸𑀚𑀺𑀢𑀸. 𑀓𑀼𑀮𑀤𑀽𑀲𑀓𑀲𑀺𑀓𑁆𑀔𑀸𑀧𑀤𑀲𑁆𑀲, 𑀇𑀫𑀲𑁆𑀲 𑀘 𑀦𑀺𑀤𑀸𑀦𑀫𑀢𑁆𑀢𑀫𑁂𑀯 𑀦𑀸𑀦𑀸𑀓𑀭𑀡𑀁. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 ‘‘𑀢𑀲𑁆𑀲 𑀯𑀘𑀦𑀲𑁆𑀲 𑀧𑀝𑀺𑀦𑀺𑀲𑁆𑀲𑀕𑁆𑀕𑀸𑀬 𑀏𑀯 𑀯𑀘𑀦𑀻𑀬𑁄, 𑀦 𑀓𑀼𑀮𑀤𑀽𑀲𑀦𑀦𑀺𑀯𑀸𑀭𑀡𑀢𑁆𑀣𑀸𑀬𑀸’’𑀢𑀺. 𑀏𑀯𑀁 𑀲𑀦𑁆𑀢𑁂 𑀉𑀪𑁄𑀧𑁂𑀢𑀸 𑀆𑀧𑀢𑁆𑀢𑀺𑀬𑁄 𑀅𑀜𑁆𑀜𑀫𑀜𑁆𑀜𑀁 𑀲𑀪𑀸𑀕𑀢𑁆𑀣𑀸, 𑀢𑀲𑁆𑀫𑀸 𑀇𑀤𑀁 𑀢𑀲𑁆𑀲 𑀅𑀦𑀼𑀧𑀜𑁆𑀜𑀢𑁆𑀢𑀺𑀲𑀤𑀺𑀲𑀁 𑀆𑀧𑀚𑁆𑀚𑀢𑀺, 𑀢𑀢𑁄 𑀇𑀤𑀁 𑀦𑀺𑀭𑀢𑁆𑀣𑀓𑀫𑁂𑀯 𑀆𑀧𑀚𑁆𑀚𑀢𑀻𑀢𑀺? 𑀦 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀯𑀢𑁆𑀣𑀼𑀯𑀺𑀲𑁂𑀲𑀢𑁄, 𑀓𑀫𑁆𑀫𑀯𑀸𑀘𑀸𑀯𑀺𑀲𑁂𑀲𑀢𑁄 𑀘 𑀉𑀪𑀺𑀦𑁆𑀦𑀁 𑀦𑀸𑀦𑀸𑀓𑀭𑀡𑀁.

𑀅𑀝𑁆𑀞𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀦𑀯𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁨𑁩. ‘‘𑀓𑀸𑀬𑀺𑀓𑀯𑀸𑀘𑀲𑀺𑀓𑁂𑀦 𑀲𑀁𑀲𑀕𑁆𑀕𑁂𑀦𑀸’’𑀢𑀺 𑀧𑀸𑀞𑀲𑁂𑀲𑁄.

𑀦𑀯𑀫𑀲𑀗𑁆𑀖𑀸𑀤𑀺𑀲𑁂𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀗𑁆𑀖𑀸𑀤𑀺𑀲𑁂𑀲𑀓𑀡𑁆𑀟𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀦𑀺𑀲𑁆𑀲𑀕𑁆𑀕𑀺𑀬𑀓𑀡𑁆𑀟𑀯𑀡𑁆𑀡𑀦𑀸

𑁧. 𑀧𑀞𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁩𑁩. 𑀧𑀞𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀁 𑀉𑀢𑁆𑀢𑀸𑀦𑀫𑁂𑀯.

𑁨. 𑀤𑀼𑀢𑀺𑀬𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁪𑁦. 𑀯𑀢𑁆𑀣𑀼𑀲𑀫𑁆𑀧𑀢𑁆𑀢𑀢𑁆𑀢𑀸 𑀯𑀸 𑀦 𑀢𑀲𑁆𑀲𑀸 𑀅𑀦𑀸𑀧𑀦𑁆𑀦𑀓𑀸𑀫𑀢𑀸𑀬 𑀯𑀸 𑀅𑀦𑀸𑀡𑀢𑁆𑀢𑀺𑀓𑀢𑀸𑀬 𑀯𑀸 𑀅𑀓𑀸𑀮𑀘𑀻𑀯𑀭𑀫𑀤𑀁𑀲𑀼. 𑀬𑀣𑀸𑀤𑀸𑀦𑁂 𑀏𑀯 𑀉𑀧𑀦𑁂𑀢𑀩𑁆𑀩𑀁, 𑀦 𑀪𑀸𑀚𑁂𑀢𑀩𑁆𑀩𑀁 𑀧𑀼𑀕𑁆𑀕𑀮𑀺𑀓𑀢𑁆𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀢𑁆𑀣𑀢𑁄 𑀳𑀺 𑀇𑀢𑀭𑀫𑁆𑀧𑀺 𑀬𑀣𑀸𑀤𑀸𑀦𑁂 𑀏𑀯 𑀉𑀧𑀦𑁂𑀢𑀩𑁆𑀩𑀫𑁂𑀯. 𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀅𑀬𑁆𑀬𑀸𑀬 𑀤𑀫𑁆𑀫𑀻𑀢𑀺 𑀏𑀯𑀁 𑀧𑀝𑀺𑀮𑀤𑁆𑀥𑀦𑁆𑀢𑀺 𑀦𑀺𑀲𑁆𑀲𑀝𑁆𑀞𑀧𑀝𑀺𑀮𑀤𑁆𑀥𑀁. 𑀬𑀣𑀸𑀤𑀸𑀦𑁂𑀢𑀺 𑀤𑀸𑀬𑀓𑁂𑀳𑀺 𑀧𑀭𑀺𑀘𑁆𑀘𑀢𑁆𑀢𑀯𑀺𑀥𑀸𑀦𑁂𑀦. 𑀉𑀧𑀦𑁂𑀢𑀩𑁆𑀩𑀦𑁆𑀢𑀺 𑀅𑀓𑀸𑀮𑀘𑀻𑀯𑀭𑀪𑀸𑀯𑁂𑀦 𑀪𑀸𑀚𑁂𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀥 𑀪𑀸𑀚𑀸𑀧𑀺𑀢𑀸𑀬 𑀮𑀤𑁆𑀥𑀘𑀻𑀯𑀭𑀫𑁂𑀯 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺, 𑀢𑀁 𑀯𑀺𑀦𑀬𑀓𑀫𑁆𑀫𑀁 𑀓𑀢𑁆𑀯𑀸𑀧𑀺 𑀅𑀢𑁆𑀢𑀦𑀸 𑀦 𑀮𑀪𑀢𑀻’’𑀢𑀺 𑀮𑀺𑀔𑀺𑀢𑀁. 𑀬𑀤𑀺 𑀦𑀺𑀲𑁆𑀲𑀝𑁆𑀞𑀧𑀝𑀺𑀮𑀤𑁆𑀥𑀁 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁 𑀲𑀺𑀬𑀸, ‘‘𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁 𑀲𑀗𑁆𑀖𑀲𑁆𑀲 𑀯𑀸 𑀕𑀡𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀤𑀤𑁂𑀬𑁆𑀬, 𑀤𑀤𑁂𑀬𑁆𑀬𑀼𑀁, 𑀅𑀬𑁆𑀬𑀸𑀬 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀻𑀡𑀺𑀧𑁂𑀢𑀸𑀦𑀺 𑀧𑀤𑀸𑀦𑀺 𑀯𑀢𑁆𑀢𑀩𑁆𑀩𑀸𑀦𑀺 𑀲𑀺𑀬𑀼𑀁, 𑀢𑀲𑁆𑀫𑀸 𑀦 𑀓𑁂𑀯𑀮𑀁 𑀦𑀺𑀲𑁆𑀲𑀝𑁆𑀞𑀧𑀝𑀺𑀮𑀤𑁆𑀥𑀫𑁂𑀯 𑀬𑀣𑀸𑀤𑀸𑀦𑁂 𑀉𑀧𑀦𑁂𑀢𑀩𑁆𑀩𑀁, 𑀅𑀜𑁆𑀜𑀸𑀳𑀺 𑀪𑀺𑀓𑁆𑀔𑀼𑀦𑀻𑀳𑀺 𑀮𑀤𑁆𑀥𑀓𑁄𑀝𑁆𑀞𑀸𑀲𑀫𑁆𑀧𑀺 𑀬𑀣𑀸𑀤𑀸𑀦𑁂𑀬𑁂𑀯 𑀉𑀧𑀦𑁂𑀢𑀩𑁆𑀩𑀁.

𑁭𑁪𑁧. ‘‘𑀅𑀓𑀸𑀮𑀘𑀻𑀯𑀭𑁂 𑀓𑀸𑀮𑀘𑀻𑀯𑀭𑀲𑀜𑁆𑀜𑀸𑀬 𑀅𑀦𑀸𑀧𑀢𑁆𑀢𑀻’’𑀢𑀺 𑀧𑀦 𑀪𑀸𑀚𑀦𑀧𑀘𑁆𑀘𑀬𑀸 𑀆𑀧𑀚𑁆𑀚𑀺𑀢𑀩𑁆𑀩𑀸𑀧𑀢𑁆𑀢𑀺𑀁 𑀦𑀸𑀧𑀚𑁆𑀚𑀢𑀻𑀢𑀺 𑀏𑀢𑁆𑀢𑀓𑀫𑁂𑀯 𑀤𑀻𑀧𑁂𑀢𑀺, 𑀦 𑀧𑀝𑀺𑀮𑀤𑁆𑀥𑀁, 𑀦 𑀬𑀣𑀸𑀤𑀸𑀦𑁂 𑀤𑀸𑀢𑀩𑁆𑀩𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀺. 𑀮𑁂𑀲𑁂𑀦 𑀧𑀦 𑀕𑀡𑁆𑀳𑀸𑀢𑀺 𑀘𑁂, 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑀸.

𑀤𑀼𑀢𑀺𑀬𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀢𑀺𑀬𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁪𑁪. 𑀲𑀓𑀲𑀜𑁆𑀜𑀸𑀬 𑀕𑀳𑀺𑀢𑀢𑁆𑀢𑀸 𑀧𑀸𑀘𑀺𑀢𑁆𑀢𑀺𑀬𑀁, 𑀤𑀼𑀓𑁆𑀓𑀝𑀜𑁆𑀘 𑀯𑀼𑀢𑁆𑀢𑀁. 𑀇𑀢𑀭𑀣𑀸 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑀁.

𑀢𑀢𑀺𑀬𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀘𑀢𑀼𑀢𑁆𑀣𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁫𑁨. 𑀮𑁂𑀲𑁂𑀦 𑀕𑀳𑁂𑀢𑀼𑀓𑀸𑀫𑀢𑀸, 𑀅𑀜𑁆𑀜𑀲𑁆𑀲 𑀯𑀺𑀜𑁆𑀜𑀼𑀲𑁆𑀲 𑀯𑀺𑀜𑁆𑀜𑀸𑀧𑀦𑀁, 𑀧𑀝𑀺𑀮𑀸𑀪𑁄𑀢𑀺 𑀢𑀻𑀡𑀺 𑀅𑀗𑁆𑀕𑀸𑀦𑀺, 𑀢𑀲𑁆𑀫𑀸 𑀧𑀞𑀫𑀁 𑀯𑀺𑀜𑁆𑀜𑀢𑁆𑀢𑀁 𑀅𑀮𑀪𑀺𑀢𑁆𑀯𑀸 𑀅𑀜𑁆𑀜𑀁 𑀢𑀢𑁄 𑀊𑀦𑀢𑀭𑀫𑁆𑀧𑀺 𑀮𑀪𑁂𑀬𑁆𑀬, 𑀦𑀺𑀲𑁆𑀲𑀕𑁆𑀕𑀺𑀬𑀫𑁂𑀯 𑀅𑀗𑁆𑀕𑀲𑀫𑁆𑀧𑀢𑁆𑀢𑀺𑀢𑁄. 𑀏𑀲 𑀦𑀬𑁄 𑀅𑀜𑁆𑀜𑀢𑁆𑀣𑀸𑀧𑀺.

𑀘𑀢𑀼𑀢𑁆𑀣𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀜𑁆𑀘𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁫𑁩. ‘‘𑀢𑁂𑀮𑀁 𑀕𑁄𑀧𑁂𑀢𑁆𑀯𑀸 𑀲𑀧𑁆𑀧𑀺𑀫𑁆𑀧𑀺 𑀫𑁂 𑀅𑀢𑁆𑀢𑀦𑁄 𑀓𑀼𑀮𑀖𑀭𑀸’’𑀢𑀺 𑀓𑀺𑀭 𑀧𑀸𑀞𑁄.

𑀧𑀜𑁆𑀘𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀙𑀝𑁆𑀞𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁫𑁮-𑁭𑁬𑁨. 𑀧𑀸𑀯𑀸𑀭𑀺𑀓𑀲𑁆𑀲𑀸𑀢𑀺 𑀤𑀼𑀲𑁆𑀲𑀯𑀸𑀡𑀺𑀚𑀓𑀲𑁆𑀲. 𑀬𑀸𑀬 𑀘𑁂𑀢𑀸𑀧𑀺𑀢𑀁, 𑀢𑀲𑁆𑀲𑀸 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀦𑀺𑀲𑁆𑀲𑀝𑁆𑀞𑀧𑀝𑀺𑀮𑀸𑀪𑁄 𑀘. ‘‘𑀇𑀢𑀭𑀸𑀲𑀁 𑀧𑀦 𑀚𑀸𑀦𑀺𑀢𑁆𑀯𑀸 𑀯𑀲𑁆𑀲𑀕𑁆𑀕𑁂𑀦 𑀧𑀢𑁆𑀢𑀓𑁄𑀝𑁆𑀞𑀸𑀲𑀁 𑀲𑀸𑀤𑀺𑀬𑀦𑁆𑀢𑀻𑀦𑀫𑁆𑀧𑀺 𑀦 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀓𑁂𑀯𑀮𑀁 𑀬𑀣𑀸𑀤𑀸𑀦𑁂 𑀏𑀯 𑀢𑀸𑀳𑀺𑀧𑀺 𑀉𑀧𑀦𑁂𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑀺. ‘‘𑀦𑀺𑀲𑁆𑀲𑀝𑁆𑀞𑀁 𑀧𑀝𑀺𑀮𑀪𑀺𑀢𑁆𑀯𑀸𑀧𑀺 𑀬𑀣𑀸𑀤𑀸𑀦𑁂 𑀉𑀧𑀦𑁂𑀢𑀩𑁆𑀩’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑁂𑀲𑀸𑀳𑀺 𑀕𑀳𑀺𑀢𑀁 𑀲𑀼𑀕𑁆𑀕𑀳𑀺𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀏𑀢𑁆𑀣 𑀕𑀺𑀮𑀸𑀦𑀸𑀬𑀧𑀺 𑀦 𑀫𑁄𑀓𑁆𑀔𑁄.

𑀙𑀝𑁆𑀞𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀢𑁆𑀢𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁬𑁪. 𑀲𑀢𑁆𑀢𑀫𑁂 ‘‘𑀲𑀬𑀁 𑀬𑀸𑀘𑀺𑀢𑀓𑁂𑀦𑀸’’𑀢𑀺 𑀓𑀺𑀜𑁆𑀘𑀸𑀧𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁. 𑀢𑀣𑀸𑀧𑀺 𑀅𑀜𑁆𑀜𑀤𑀢𑁆𑀣𑀺𑀓𑁂𑀦 𑀅𑀢𑁆𑀢𑀼𑀤𑁆𑀤𑁂𑀲𑀺𑀓𑁂𑀦 𑀲𑀜𑁆𑀜𑀸𑀘𑀺𑀓𑁂𑀦𑀸𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀬𑀫𑀢𑁆𑀣𑁄 ‘‘𑀪𑀺𑀓𑁆𑀔𑀼𑀦𑀺𑀬𑁄 𑀢𑁂𑀦 𑀘 𑀧𑀭𑀺𑀓𑁆𑀔𑀸𑀭𑁂𑀦 𑀲𑀬𑀫𑁆𑀧𑀺 𑀬𑀸𑀘𑀺𑀢𑁆𑀯𑀸 𑀪𑁂𑀲𑀚𑁆𑀚𑀁 𑀘𑁂𑀢𑀸𑀧𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀁𑀲𑀽’’𑀢𑀺 𑀇𑀫𑀺𑀲𑁆𑀲𑀸 𑀧𑀸𑀴𑀺𑀬𑀸 𑀅𑀢𑁆𑀣𑁂𑀦 𑀲𑀁𑀲𑀦𑁆𑀤𑀺𑀢𑁆𑀯𑀸 𑀯𑁂𑀤𑀺𑀢𑀩𑁆𑀩𑁄. 𑀢𑀲𑁆𑀲𑀸𑀬𑀫𑀢𑁆𑀣𑁄 𑁋 𑀢𑁂𑀦 𑀧𑀭𑀺𑀓𑁆𑀔𑀸𑀭𑁂𑀦 𑀪𑁂𑀲𑀚𑁆𑀚𑀁 𑀘𑁂𑀢𑀸𑀧𑁂𑀢𑁆𑀯𑀸 𑀘-𑀲𑀤𑁆𑀤𑁂𑀦 𑀲𑀜𑁆𑀜𑀸𑀘𑀺𑀓𑁂𑀦 𑀘 𑀪𑁂𑀲𑀚𑁆𑀚𑀁 𑀘𑁂𑀢𑀸𑀧𑁂𑀢𑁆𑀯𑀸𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀦𑁆𑀢𑁄 ‘‘𑀲𑀬𑀫𑁆𑀧𑀺 𑀬𑀸𑀘𑀺𑀢𑁆𑀯𑀸 𑀪𑁂𑀲𑀚𑁆𑀚𑀁 𑀘𑁂𑀢𑀸𑀧𑁂𑀢𑁆𑀯𑀸’’𑀢𑀺 𑀆𑀳. 𑀅𑀜𑁆𑀜𑀣𑀸 ‘‘𑀢𑁂𑀦 𑀧𑀭𑀺𑀓𑁆𑀔𑀸𑀭𑁂𑀦 𑀪𑁂𑀲𑀚𑁆𑀚𑀁 𑀘𑁂𑀢𑀸𑀧𑁂𑀢𑁆𑀯𑀸 𑀲𑀬𑀫𑁆𑀧𑀺 𑀬𑀸𑀘𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀁𑀲𑀽’’𑀢𑀺 𑀇𑀫𑀺𑀦𑀸 𑀅𑀦𑀼𑀓𑁆𑀓𑀫𑁂𑀦 𑀧𑀸𑀴𑀺 𑀯𑀢𑁆𑀢𑀩𑁆𑀩𑀸 𑀲𑀺𑀬𑀸.

𑀧𑀤𑀪𑀸𑀚𑀦𑁂 𑀧𑀦 ‘‘𑀲𑀁𑀬𑀸𑀘𑀺𑀓𑁂𑀦𑀸𑀢𑀺 𑀲𑀬𑀁 𑀬𑀸𑀘𑀺𑀢𑁆𑀯𑀸’’𑀢𑀺 𑀢𑀲𑁆𑀲𑁂𑀯 𑀧𑀤𑀲𑁆𑀲 𑀅𑀥𑀺𑀧𑁆𑀧𑀸𑀬𑀫𑀢𑁆𑀢𑀁 𑀯𑀼𑀢𑁆𑀢𑀁. 𑀲𑀸 𑀳𑀺 𑀧𑀤𑀪𑀸𑀚𑀦𑀥𑀫𑁆𑀫𑀢𑀸. ‘‘𑀲𑀗𑁆𑀖𑀺𑀓𑀁 𑀮𑀸𑀪𑀁 𑀧𑀭𑀺𑀡𑀢’’𑀦𑁆𑀢𑀺𑀆𑀤𑀺𑀧𑀤𑀸𑀦𑀁 𑀪𑀸𑀚𑀦𑁂 𑀧𑀦 𑀲𑀸 𑀧𑀸𑀓𑀝𑀸. 𑀅𑀜𑁆𑀜𑀣𑀸 𑀲𑀁𑀬𑀸𑀘𑀺𑀓𑀧𑀤𑁂𑀦 𑀓𑁄 𑀅𑀜𑁆𑀜𑁄 𑀅𑀢𑀺𑀭𑁂𑀓𑀢𑁆𑀣𑁄 𑀲𑀗𑁆𑀕𑀳𑀺𑀢𑁄 𑀲𑀺𑀬𑀸, 𑀲𑁄 𑀦 𑀤𑀺𑀲𑁆𑀲𑀢𑀻𑀢𑀺 𑀢𑀤𑁂𑀯 𑀧𑀤𑀁 𑀦𑀺𑀧𑁆𑀧𑀬𑁄𑀚𑀦𑀁, 𑀇𑀤𑀜𑁆𑀘 𑀲𑀺𑀓𑁆𑀔𑀸𑀧𑀤𑀁 𑀧𑀼𑀭𑀺𑀫𑁂𑀦 𑀦𑀺𑀦𑁆𑀦𑀸𑀦𑀸𑀓𑀭𑀡𑀁 𑀲𑀺𑀬𑀸. 𑀅𑀢𑁆𑀢𑀦𑁄 𑀳𑀺 𑀲𑀦𑁆𑀢𑀓𑀁 𑀬𑀣𑀸𑀓𑀸𑀫𑀁 𑀓𑀭𑀡𑀻𑀬𑀦𑁆𑀢𑀺. 𑀏𑀢𑁆𑀣 𑀘 𑀲𑀗𑁆𑀖𑀲𑁆𑀲 𑀬𑀸𑀘𑀦𑀸𑀬 𑀯𑀲𑁂𑀦 𑀏𑀓𑀢𑁄 𑀳𑀼𑀢𑁆𑀯𑀸 𑀬𑀸𑀘𑀦𑀸𑀬 𑀮𑀤𑁆𑀥𑀁 𑀲𑀁𑀬𑀸𑀘𑀺𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀜𑁆𑀜𑀣𑀸 𑀇𑀢𑁄 𑀧𑀭𑁂𑀦 𑀲𑀁𑀬𑀸𑀘𑀺𑀓-𑀲𑀤𑁆𑀤𑁂𑀦 𑀇𑀤𑀁 𑀦𑀺𑀩𑁆𑀩𑀺𑀲𑁂𑀲𑀁 𑀆𑀧𑀚𑁆𑀚𑀢𑀻𑀢𑀺 ‘‘𑀧𑀼𑀕𑁆𑀕𑀮𑀺𑀓𑁂𑀦 𑀲𑀁𑀬𑀸𑀘𑀺𑀓𑁂𑀦𑀸’’𑀢𑀺 𑀇𑀤𑀜𑁆𑀘 𑀲𑀺𑀓𑁆𑀔𑀸𑀧𑀤𑀁 𑀯𑀺𑀲𑀼𑀁 𑀦 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸 𑀇𑀥𑁂𑀯 𑀢𑁂𑀦 𑀆𑀧𑀚𑁆𑀚𑀺𑀢𑀩𑁆𑀩𑀸𑀧𑀢𑁆𑀢𑀺𑀬𑀸 𑀲𑀗𑁆𑀕𑀳𑀺𑀢𑀢𑁆𑀢𑀸, 𑀦 𑀘 𑀲𑀗𑁆𑀕𑀳𑀺𑀢𑀸 𑀆𑀧𑀢𑁆𑀢𑀺𑀤𑁆𑀯𑀬𑀪𑀸𑀯𑀢𑁄. 𑀫𑀺𑀲𑁆𑀲𑁂𑀢𑁆𑀯𑀸 𑀘𑁂𑀢𑀸𑀧𑀺𑀢𑀢𑁆𑀢𑀸 𑀳𑀺 𑀏𑀓𑀫𑁂𑀯 𑀆𑀧𑀢𑁆𑀢𑀻𑀢𑀺 𑀘𑁂? 𑀦, 𑀲𑀁𑀬𑀸𑀘𑀺𑀓𑀧𑀤𑀲𑁆𑀲 𑀦𑀺𑀧𑁆𑀧𑀬𑁄𑀚𑀦𑀪𑀸𑀯𑀧𑁆𑀧𑀲𑀗𑁆𑀕𑀢𑁄, 𑀏𑀯𑀁 𑀲𑀗𑁆𑀖𑀺𑀓𑀫𑀳𑀸𑀚𑀦𑀺𑀓𑀧𑀼𑀕𑁆𑀕𑀮𑀺𑀓𑀸𑀦𑀺 𑀫𑀺𑀲𑁆𑀲𑀺𑀢𑁆𑀯𑀸 𑀘𑁂𑀢𑀸𑀧𑀦𑁂 𑀏𑀓𑀸𑀧𑀢𑁆𑀢𑀺𑀪𑀸𑀯𑀧𑁆𑀧𑀲𑀗𑁆𑀕𑀢𑁄 𑀘.

𑀲𑀢𑁆𑀢𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀝𑁆𑀞𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁬𑁯. 𑀕𑀡𑀲𑁆𑀲𑀸𑀢𑀺 𑀆𑀪𑀺𑀥𑀫𑁆𑀫𑀺𑀓𑀸𑀤𑀺𑀕𑀡𑀲𑁆𑀲, 𑀊𑀦𑀘𑀢𑀼𑀯𑀕𑁆𑀕𑀲𑁆𑀲 𑀘.

𑀅𑀝𑁆𑀞𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀦𑀯𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁭𑁪. 𑀲𑀜𑁆𑀜𑀸𑀘𑀺𑀓𑁂𑀦𑀸𑀢𑀺 𑀕𑀡𑀬𑀸𑀘𑀦𑀸𑀬 𑀮𑀤𑁆𑀥𑁂𑀦𑁂𑀯, 𑀦 𑀅𑀜𑁆𑀜𑁂𑀦.

𑀦𑀯𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀤𑀲𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁭𑁯. 𑀤𑀲𑀫𑁂 𑀧𑀦 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀅𑀜𑁆𑀜𑀤𑀢𑁆𑀣𑀺𑀓𑁂𑀦 𑀧𑀭𑀺𑀓𑁆𑀔𑀸𑀭𑁂𑀦 𑀅𑀜𑁆𑀜𑀼𑀤𑁆𑀤𑀺𑀲𑀺𑀓𑁂𑀦 𑀧𑀼𑀕𑁆𑀕𑀮𑀺𑀓𑁂𑀦 𑀅𑀜𑁆𑀜𑀁 𑀘𑁂𑀢𑀸𑀧𑁂𑀬𑁆𑀬, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀏𑀯𑀁𑀯𑀺𑀥𑁂𑀦 𑀪𑀯𑀺𑀢𑀩𑁆𑀩𑀁, ‘‘𑀧𑀼𑀕𑁆𑀕𑀮𑀺𑀓𑁂𑀦 𑀲𑀁𑀬𑀸𑀘𑀺𑀓𑁂𑀦𑀸’’𑀢𑀺 𑀇𑀫𑀺𑀦𑀸 𑀏𑀓𑀸𑀤𑀲𑀫𑁂𑀦 𑀪𑀯𑀺𑀢𑀩𑁆𑀩𑀁 𑀲𑀺𑀬𑀸 𑀬𑀣𑀸𑀓𑁆𑀓𑀫𑁂𑀦 𑀲𑀫𑁆𑀪𑀯𑀢𑁄. 𑀓𑀸𑀫𑀫𑁂𑀯 𑀘𑁂𑀢𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀸 𑀅𑀪𑀸𑀯𑀢𑁄 𑀦 𑀯𑀼𑀢𑁆𑀢𑀁, 𑀅𑀢𑁆𑀣𑀢𑁄 𑀧𑀦 𑀕𑀳𑁂𑀢𑀩𑁆𑀩𑀫𑁂𑀯. 𑀏𑀢𑁆𑀣 𑀧𑀦 𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑀸𑀦𑀁 𑀧𑀯𑀸𑀭𑀺𑀢𑀝𑁆𑀞𑀸𑀦𑁂, 𑀧𑀼𑀕𑁆𑀕𑀮𑀲𑁆𑀲𑁂𑀯 𑀜𑀸𑀢𑀓𑀝𑁆𑀞𑀸𑀦𑁂 𑀘 𑀅𑀦𑀸𑀧𑀢𑁆𑀢𑀺𑀙𑀸𑀬𑀸 𑀤𑀺𑀲𑁆𑀲𑀢𑀺, 𑀇𑀤𑀁 𑀲𑀩𑁆𑀩𑀁 𑀅𑀫𑁆𑀳𑀸𑀓𑀁 𑀢𑀓𑁆𑀓𑀸𑀦𑀼𑀲𑀸𑀭𑀯𑀲𑁂𑀦𑁂𑀯 𑀯𑀼𑀢𑁆𑀢𑀦𑁆𑀢𑀺 𑀓𑀢𑁆𑀯𑀸 𑀦 𑀲𑀸𑀭𑀢𑁄 𑀤𑀝𑁆𑀞𑀩𑁆𑀩𑀁. 𑀯𑀺𑀘𑀸𑀭𑁂𑀢𑁆𑀯𑀸 𑀬𑀣𑀸 𑀦𑀺𑀘𑁆𑀘𑀮𑀓𑀸𑀭𑀡𑀁 𑀤𑀺𑀲𑁆𑀯𑀸 𑀬𑀁 𑀯𑀸 𑀯𑀺𑀦𑀬𑀓𑁆𑀓𑀫𑀓𑁄𑀯𑀺𑀤𑀸 𑀅𑀦𑀼𑀚𑀸𑀦𑀦𑁆𑀢𑀺, 𑀢𑀁 𑀢𑀤𑁂𑀯 𑀕𑀳𑁂𑀢𑀩𑁆𑀩𑀁. 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀆𑀧𑀤𑀸𑀲𑀼𑀧𑀺 𑀅𑀜𑁆𑀜𑀁 𑀕𑀭𑀼𑀪𑀡𑁆𑀟𑀫𑁂𑀯 𑀘𑁂𑀢𑀸𑀧𑁂𑀢𑀩𑁆𑀩𑀁, 𑀇𑀢𑀭𑀁 𑀦 𑀯𑀝𑁆𑀝𑀢𑀺, 𑀪𑀺𑀓𑁆𑀔𑀼𑀲𑁆𑀲 𑀧𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁.

𑀤𑀲𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀏𑀓𑀸𑀤𑀲𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁮𑁪. ‘‘𑀤𑀼𑀢𑀺𑀬𑀯𑀕𑁆𑀕𑀲𑁆𑀲 𑀧𑀞𑀫𑁂’’𑀢𑀺 𑀅𑀯𑀢𑁆𑀯𑀸 ‘‘𑀏𑀓𑀸𑀤𑀲𑀫𑁂’’𑀢𑀺 𑀇𑀥 𑀯𑀼𑀢𑁆𑀢𑀁. 𑀓𑀲𑁆𑀫𑀸? 𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑁂 𑀢𑀺𑀁𑀲𑀓𑀓𑀡𑁆𑀟𑀁 𑀧𑀢𑁆𑀯𑀸 𑀯𑀕𑁆𑀕𑀓𑁆𑀓𑀫𑀲𑁆𑀲 𑀅𑀯𑀼𑀢𑁆𑀢𑀢𑁆𑀢𑀸. 𑀬𑀲𑁆𑀫𑀸 𑀧𑀯𑀸𑀭𑀺𑀢𑀝𑁆𑀞𑀸𑀦𑁂 𑀯𑀺𑀜𑁆𑀜𑀢𑁆𑀢𑀺 𑀦𑀸𑀫 𑀦 𑀧𑀝𑀺𑀲𑁂𑀥𑁂𑀢𑀩𑁆𑀩𑀸, 𑀢𑀲𑁆𑀫𑀸 𑀪𑀕𑀯𑀸 𑀅𑀜𑁆𑀜𑀸𑀢𑀺𑀓𑀅𑀧𑁆𑀧𑀯𑀸𑀭𑀺𑀢𑀝𑁆𑀞𑀸𑀦𑁂 𑀥𑀫𑁆𑀫𑀦𑀺𑀫𑀦𑁆𑀢𑀦𑀯𑀲𑁂𑀦 𑀯𑀤𑁂𑀬𑁆𑀬 ‘‘𑀬𑁂𑀦𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀸𑀬 ‘‘𑀘𑀢𑀼𑀓𑁆𑀓𑀁𑀲𑀧𑀭𑀫𑀁 𑀯𑀺𑀜𑁆𑀜𑀸𑀧𑁂𑀢𑀩𑁆𑀩’’𑀦𑁆𑀢𑀺 𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀜𑁆𑀜𑀣𑀸 ‘‘𑀦𑀺𑀤𑀸𑀦𑁂𑀦 𑀲𑀺𑀓𑁆𑀔𑀸𑀧𑀤𑀁 𑀦 𑀲𑀫𑁂𑀢𑀺, 𑀲𑀺𑀓𑁆𑀔𑀸𑀧𑀤𑁂𑀦 𑀘 𑀅𑀦𑀸𑀧𑀢𑁆𑀢𑀺𑀯𑀸𑀭𑁄’’𑀢𑀺 𑀘 ‘‘𑀅𑀓𑀢𑀯𑀺𑀜𑁆𑀜𑀢𑁆𑀢𑀺𑀬𑀸 𑀘𑀢𑀼𑀓𑁆𑀓𑀁𑀲𑀧𑀭𑀫𑀁 𑀯𑀺𑀜𑁆𑀜𑀸𑀧𑁂𑀢𑀩𑁆𑀩’’𑀦𑁆𑀢𑀺 𑀘 𑀅𑀦𑀺𑀝𑁆𑀞𑀁 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 𑀘𑁂𑀢𑀸𑀧𑁂𑀢𑀩𑁆𑀩𑀦𑁆𑀢𑀺 𑀞𑀧𑁂𑀢𑁆𑀯𑀸 𑀲𑀳𑀥𑀫𑁆𑀫𑀺𑀓𑁂 𑀘 𑀜𑀸𑀢𑀓𑀧𑀯𑀸𑀭𑀺𑀢𑁂 𑀘 𑀅𑀜𑁆𑀜𑁂𑀦 𑀓𑀺𑀲𑁆𑀫𑀺𑀜𑁆𑀘𑀺𑀤𑁂𑀯 𑀕𑀼𑀡𑁂𑀦, 𑀧𑀭𑀺𑀢𑀼𑀝𑁆𑀞𑁂𑀦 𑀘 𑀯𑀤𑁂𑀬𑁆𑀬 ‘‘𑀬𑁂𑀦𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀲𑁆𑀲 ‘‘𑀯𑀺𑀜𑁆𑀜𑀸𑀧𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀦𑀬𑁂𑀦 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀇𑀤𑀁 𑀧𑀭𑀺𑀘𑁆𑀙𑀺𑀦𑁆𑀦𑀧𑀯𑀸𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀦𑀸𑀧𑀢𑁆𑀢𑀺 𑀜𑀸𑀢𑀓𑀸𑀦𑀁 𑀧𑀯𑀸𑀭𑀺𑀢𑀸𑀦𑀦𑁆𑀢𑀺 𑀧𑀦 𑀲𑀩𑁆𑀩𑀧𑁆𑀧𑀓𑀸𑀭𑁂𑀦 𑀧𑀯𑀢𑁆𑀢𑀁 𑀦𑀺𑀘𑁆𑀘𑀧𑀯𑀸𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀦𑀺𑀘𑁆𑀘𑀧𑀯𑀸𑀭𑀡𑀸 𑀦𑀸𑀫 𑀬𑀤𑀸 𑀬𑁂𑀦𑀢𑁆𑀣𑁄, 𑀢𑀤𑀸 𑀢𑀁 𑀯𑀤𑁂𑀬𑁆𑀬𑀸𑀣𑀸𑀢𑀺 𑀏𑀯𑀁 𑀧𑀯𑀢𑁆𑀢𑀸. ‘𑀳𑀦𑁆𑀤 𑀲𑀻𑀢𑀧𑀸𑀯𑀼𑀭𑀡’𑀦𑁆𑀢𑀺 𑀤𑁂𑀦𑁆𑀢𑀸𑀦𑀁 𑀧𑀦 𑀅𑀢𑀺𑀭𑁂𑀓𑀘𑀢𑀼𑀓𑁆𑀓𑀁𑀲𑀫𑁆𑀧𑀺 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀬𑀫𑁂𑀯 𑀦𑀬𑁄 𑀤𑀲𑀫𑁂𑀧𑀻𑀢𑀺.

𑀏𑀓𑀸𑀤𑀲𑀫𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑁂 𑀢𑀺𑀁𑀲𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀲𑁆𑀲𑀕𑁆𑀕𑀺𑀬𑀓𑀡𑁆𑀟𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀸𑀘𑀺𑀢𑁆𑀢𑀺𑀬𑀓𑀡𑁆𑀟𑀯𑀡𑁆𑀡𑀦𑀸

𑁧. 𑀮𑀲𑀼𑀡𑀯𑀕𑁆𑀕𑁄

𑁧. 𑀧𑀞𑀫𑀮𑀲𑀼𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁯𑁩-𑁭. 𑀅𑀳𑀁 𑀮𑀲𑀼𑀡𑁂𑀦𑀸𑀢𑀺 𑀏𑀢𑁆𑀣 ‘‘𑀧𑀯𑀸𑀭𑁂𑀫𑀻’’𑀢𑀺 𑀧𑀸𑀞𑀲𑁂𑀲𑁄. 𑀩𑀤𑀭𑀲𑀸𑀴𑀯𑀁 𑀓𑀺𑀭 𑀩𑀤𑀭𑀨𑀮𑀸𑀦𑀺 𑀲𑀼𑀓𑁆𑀔𑀸𑀧𑁂𑀢𑁆𑀯𑀸 𑀘𑀼𑀡𑁆𑀡𑁂𑀢𑁆𑀯𑀸 𑀓𑀢𑁆𑀢𑀩𑁆𑀩𑀸 𑀔𑀸𑀤𑀦𑀻𑀬𑀯𑀺𑀓𑀢𑀺.

𑀧𑀞𑀫𑀮𑀲𑀼𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁦𑁦. 𑀲𑀁𑀳𑀭𑀸𑀧𑁂𑀬𑁆𑀬𑀸𑀢𑀺 ‘‘𑀲𑀁𑀳𑀭𑀢𑀺 𑀯𑀸 𑀲𑀁𑀳𑀭𑀸𑀧𑁂𑀢𑀺 𑀯𑀸’’𑀢𑀺 𑀧𑀤𑀪𑀸𑀚𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀓𑀺𑀜𑁆𑀘𑀸𑀧𑀺 𑀏𑀢𑁆𑀣 𑀆𑀧𑀢𑁆𑀢𑀺𑀪𑁂𑀤𑁄 𑀦 𑀤𑀲𑁆𑀲𑀺𑀢𑁄, 𑀢𑀣𑀸𑀧𑀺 𑀔𑀼𑀭𑀲𑀡𑁆𑀟𑀸𑀲𑀓𑀢𑁆𑀢𑀭𑀺𑀆𑀤𑀺𑀧𑀭𑀺𑀬𑁂𑀲𑀦𑀖𑀁𑀲𑀦𑀸𑀤𑀻𑀲𑀼 𑀧𑀼𑀩𑁆𑀩𑀧𑀬𑁄𑀕𑁂𑀲𑀼 𑀤𑀼𑀓𑁆𑀓𑀝𑀁 𑀬𑀼𑀚𑁆𑀚𑀢𑀺, 𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀢𑀮𑀖𑀸𑀢𑀓𑀸𑀤𑀺𑀫𑁆𑀳𑀺 𑀘 𑀆𑀧𑀢𑁆𑀢𑀺𑀪𑁂𑀤𑁄 𑀧𑀸𑀴𑀺𑀬𑀁 𑀦 𑀯𑀼𑀢𑁆𑀢𑁄. 𑀬𑀣𑀸𑀲𑀫𑁆𑀪𑀯𑀁 𑀧𑀦 𑀧𑀼𑀩𑁆𑀩𑀧𑀬𑁄𑀕𑁂𑀲𑀼 𑀤𑀼𑀓𑁆𑀓𑀝𑀁 𑀲𑀫𑁆𑀪𑀯𑀢𑀺. 𑀏𑀯𑀁 𑀪𑀺𑀓𑁆𑀔𑀼𑀲𑁆𑀲 𑀏𑀢𑁆𑀣 𑀘 𑀮𑀲𑀼𑀡𑁂 𑀘 𑀤𑀼𑀓𑁆𑀓𑀝𑀁. 𑀇𑀤𑀁 𑀓𑀺𑀭𑀺𑀬𑀸𑀓𑀺𑀭𑀺𑀬𑀦𑁆𑀢𑀺 𑀧𑁄𑀭𑀸𑀡𑀸. 𑀢𑀢𑁆𑀣 ‘‘𑀓𑀺𑀭𑀺𑀬𑀸𑀓𑀺𑀭𑀺𑀬’’𑀦𑁆𑀢𑀺 𑀦 𑀯𑀼𑀢𑁆𑀢𑀁.

𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮𑁦𑁨-𑁬. 𑀢𑀢𑀺𑀬𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁫. 𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁧𑁨. 𑀧𑀜𑁆𑀘𑀫𑁂 𑀉𑀤𑀓𑀲𑀼𑀤𑁆𑀥𑀺𑀧𑀘𑁆𑀘𑀬𑁂 𑀲𑀢𑀺𑀧𑀺 𑀨𑀲𑁆𑀲𑀲𑀸𑀤𑀺𑀬𑀦𑁂 𑀬𑀣𑀸𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑁂 𑀅𑀦𑀸𑀧𑀢𑁆𑀢𑀺. 𑀢𑀢𑁆𑀣 𑀤𑁆𑀯𑀺𑀦𑁆𑀦𑀁 𑀧𑀩𑁆𑀩𑀸𑀦𑀦𑁆𑀢𑀺 ‘‘𑀤𑁆𑀯𑀺𑀦𑁆𑀦𑀁 𑀅𑀗𑁆𑀕𑀼𑀮𑀸𑀦𑀁 𑀲𑀳𑀧𑀯𑁂𑀲𑀦𑁂 𑀏𑀓𑁂𑀓𑀅𑀗𑁆𑀕𑀼𑀮𑀲𑁆𑀲 𑀏𑀓𑁂𑀓𑀁 𑀧𑀩𑁆𑀩𑀁 𑀓𑀢𑁆𑀯𑀸 𑀤𑁆𑀯𑁂 𑀧𑀩𑁆𑀩𑀸, 𑀏𑀓𑀗𑁆𑀕𑀼𑀮𑀧𑁆𑀧𑀯𑁂𑀲𑀦𑁂 𑀤𑁆𑀯𑀺𑀦𑁆𑀦𑀁 𑀧𑀩𑁆𑀩𑀸𑀦𑀁 𑀉𑀧𑀭𑀺 𑀦 𑀯𑀝𑁆𑀝𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀳𑀸𑀧𑀘𑁆𑀘𑀭𑀺𑀬𑀫𑁆𑀧𑀺 𑀅𑀬𑀫𑁂𑀯 𑀦𑀬𑁄 𑀤𑀲𑁆𑀲𑀺𑀢𑁄’’𑀢𑀺 𑀮𑀺𑀔𑀺𑀢𑀁.

𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮𑁧𑁫. 𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑁭. 𑀲𑀢𑁆𑀢𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁨𑁦-𑁮𑁨𑁨. ‘‘𑀦𑀕𑀭𑀁 𑀅𑀢𑀺𑀳𑀭𑀦𑁆𑀢𑀻’’𑀢𑀺 𑀧𑀸𑀞𑁄. ‘‘𑀦𑀕𑀭𑀤𑁆𑀯𑀸𑀭𑁂 𑀅𑀢𑀺𑀳𑀭𑀦𑁆𑀢𑀻’’𑀢𑀺 𑀓𑀢𑁆𑀣𑀘𑀺, 𑀢𑀢𑁆𑀣 𑀤𑁆𑀯𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀅𑀬𑀫𑁂𑀯 𑀯𑀸 𑀧𑀸𑀞𑁄. 𑀢𑀁 𑀧𑀼𑀩𑁆𑀩𑀸𑀧𑀭𑀯𑀺𑀭𑀼𑀤𑁆𑀥𑀦𑁆𑀢𑀺 ‘‘𑀧𑀼𑀦𑀧𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁 𑀯𑀸𑀤𑀁 𑀲𑀦𑁆𑀥𑀸𑀬, 𑀦 𑀢𑀢𑁄 𑀧𑀼𑀩𑁆𑀩𑁂 𑀢𑀢𑁆𑀣 𑀯𑀼𑀢𑁆𑀢𑀁 𑀯𑀸𑀤𑀁. 𑀏𑀢𑁆𑀣 ‘‘𑀫𑀸𑀢𑀭𑀫𑁆𑀧𑀺 𑀯𑀺𑀜𑁆𑀜𑀸𑀧𑁂𑀢𑁆𑀯𑀸𑀢𑀺 𑀯𑀘𑀦𑁂𑀦 𑀯𑀺𑀭𑀼𑀚𑁆𑀛𑀢𑀻’’𑀢𑀺 𑀮𑀺𑀔𑀺𑀢𑀁, 𑀢𑀁 𑀤𑀼𑀮𑁆𑀮𑀺𑀔𑀺𑀢𑀁, 𑀦 𑀳𑀺 𑀢𑁂𑀦 𑀯𑀺𑀭𑁄𑀥𑀁 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀦𑁆𑀢𑀺. 𑀓𑀭𑀡𑁂 𑀘𑁂 𑀧𑀸𑀘𑀺𑀢𑁆𑀢𑀺𑀬𑀁, 𑀓𑀸𑀭𑀸𑀧𑀦𑁂𑀧𑀺 𑀧𑀸𑀘𑀺𑀢𑁆𑀢𑀺𑀬𑁂𑀦𑁂𑀯 𑀪𑀯𑀺𑀢𑀩𑁆𑀩𑀁. 𑀅𑀣 𑀓𑀸𑀭𑀸𑀧𑀦𑁂 𑀤𑀼𑀓𑁆𑀓𑀝𑀁, 𑀓𑀭𑀡𑁂𑀧𑀺 𑀤𑀼𑀓𑁆𑀓𑀝𑁂𑀦𑁂𑀯 𑀪𑀯𑀺𑀢𑀩𑁆𑀩𑀁. 𑀦 𑀳𑀺 𑀓𑀭𑀡𑁂 𑀯𑀸 𑀓𑀸𑀭𑀸𑀧𑀦𑁂 𑀯𑀸 𑀯𑀺𑀲𑁂𑀲𑁄 𑀅𑀢𑁆𑀣𑀺 𑀆𑀧𑀚𑁆𑀚𑀦𑁂 𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁮𑁨𑁩. 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀲𑀸𑀥𑀽’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦 𑀳𑀺 𑀧𑀝𑀺𑀕𑁆𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀅𑀦𑀸𑀫𑀸𑀲𑀢𑁆𑀢𑀸 ‘‘𑀆𑀫𑀓𑀥𑀜𑁆𑀜𑀁 𑀧𑀦 𑀜𑀸𑀢𑀓𑀧𑀯𑀸𑀭𑀺𑀢𑀝𑁆𑀞𑀸𑀦𑁂𑀧𑀺 𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀦𑀼𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀓𑀧𑁆𑀧𑀺𑀬𑁂𑀦 𑀮𑀤𑁆𑀥𑀁 𑀥𑀜𑁆𑀜𑀁 𑀪𑀚𑁆𑀚𑀺𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺𑀬𑀸 𑀤𑀼𑀓𑁆𑀓𑀝𑀁. 𑀅𑀧𑀭𑀡𑁆𑀡𑁂𑀧𑀺 𑀏𑀲𑁂𑀯 𑀦𑀬𑁄’’𑀢𑀺 𑀘 ‘‘𑀅𑀦𑀸𑀧𑀢𑁆𑀢𑀺 𑀆𑀩𑀸𑀥𑀧𑀘𑁆𑀘𑀬𑀸𑀢𑀺 𑀯𑀘𑀦𑀢𑁄 𑀲𑀢𑁆𑀢 𑀥𑀜𑁆𑀜𑀸𑀦𑀺𑀧𑀺 𑀅𑀦𑀸𑀫𑀸𑀲𑀸𑀦𑀻𑀢𑀺 𑀲𑀺𑀤𑁆𑀥𑀁, 𑀢𑁂𑀦𑁂𑀯 𑀳𑁂𑀝𑁆𑀞𑀸 𑀅𑀝𑁆𑀞𑀓𑀣𑀸𑀬𑀁 𑀤𑀼𑀓𑁆𑀓𑀝𑀯𑀢𑁆𑀣𑀼𑀫𑁆𑀳𑀺 𑀲𑀢𑁆𑀢 𑀥𑀜𑁆𑀜𑀸𑀦𑀺𑀧𑀺 𑀕𑀳𑀺𑀢𑀸𑀦𑀺 𑀅𑀦𑀸𑀫𑀸𑀲𑀸𑀦𑀻’’𑀢𑀺 𑀘 𑀯𑀼𑀢𑁆𑀢𑀸𑀦𑀺. 𑀆𑀫𑀸𑀲𑀸𑀦𑀺 𑀓𑀧𑁆𑀧𑀺𑀬𑀯𑀢𑁆𑀣𑀽𑀦𑀺 𑀘 𑀬𑀤𑀺 𑀪𑀯𑁂𑀬𑁆𑀬𑀼𑀁, 𑀬𑀣𑀸 𑀜𑀸𑀢𑀓𑀧𑀯𑀸𑀭𑀺𑀢𑁂 𑀲𑀦𑁆𑀥𑀸𑀬 ‘‘𑀅𑀧𑀭𑀡𑁆𑀡𑀁 𑀯𑀺𑀜𑁆𑀜𑀸𑀧𑁂𑀢𑀻’’𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁, 𑀏𑀯𑀁 ‘‘𑀅𑀦𑀸𑀧𑀢𑁆𑀢𑀺 𑀜𑀸𑀢𑀓𑀸𑀦𑀁 𑀧𑀯𑀸𑀭𑀺𑀢𑀸𑀦𑀁 𑀅𑀜𑁆𑀜𑀲𑁆𑀲 𑀅𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑁂𑀢𑀺, 𑀉𑀫𑁆𑀫𑀢𑁆𑀢𑀺𑀓𑀸𑀬 𑀆𑀤𑀺𑀓𑀫𑁆𑀫𑀺𑀓𑀸𑀬𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀬𑀲𑁆𑀫𑀸 𑀤𑀼𑀓𑁆𑀓𑀝𑀯𑀢𑁆𑀣𑀼𑀢𑁆𑀢𑀸 𑀘 𑀅𑀦𑀸𑀫𑀸𑀲𑀢𑁆𑀢𑀸 𑀘 𑀫𑀸𑀢𑀭𑀫𑁆𑀧𑀺 𑀲𑀢𑁆𑀢𑀯𑀺𑀥𑀁 𑀥𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀢𑀤𑀢𑁆𑀣𑀤𑀻𑀧𑀦𑀢𑁆𑀣𑀁 𑀲𑀢𑁆𑀢𑀯𑀺𑀥𑀁 𑀥𑀜𑁆𑀜𑀁 𑀲𑀦𑁆𑀥𑀸𑀬 ‘‘𑀅𑀦𑀸𑀧𑀢𑁆𑀢𑀺 𑀆𑀩𑀸𑀥𑀧𑀘𑁆𑀘𑀬𑀸’’𑀢𑀺 𑀯𑀼𑀢𑁆𑀢𑀁, 𑀬𑀣𑀸 𑀪𑀺𑀓𑁆𑀔𑀼𑀦𑀺𑀬𑀸 𑀆𑀩𑀸𑀥𑀧𑀘𑁆𑀘𑀬𑀸 𑀯𑀝𑁆𑀝𑀢𑀺, 𑀢𑀣𑀸 𑀪𑀺𑀓𑁆𑀔𑀼𑀲𑁆𑀲𑀸𑀧𑀻𑀢𑀺 𑀘. 𑀬𑀣𑀸 𑀯𑀸 𑀧𑀦 𑀪𑀺𑀓𑁆𑀔𑀼𑀦𑀺𑀬𑀸 𑀪𑀚𑁆𑀚𑀦𑀸𑀤𑀻𑀦𑀺 𑀓𑀸𑀭𑀸𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺, 𑀏𑀯𑀁 𑀪𑀺𑀓𑁆𑀔𑀼𑀲𑁆𑀲𑀸𑀧𑀺. 𑀯𑀼𑀢𑁆𑀢𑀫𑁆𑀧𑀺 𑀘𑁂𑀢𑀁 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 ‘‘𑀅𑀜𑁆𑀜𑀢𑀭𑁄 𑀩𑀸𑀮𑀪𑀺𑀓𑁆𑀔𑀼 𑀓𑀧𑁆𑀧𑀺𑀬𑀁 𑀅𑀚𑀸𑀦𑀦𑁆𑀢𑁄 𑀏𑀢𑀤𑀯𑁄𑀘 ‘𑀆𑀫𑀓𑀥𑀜𑁆𑀜𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀪𑀺𑀓𑁆𑀔𑀽𑀦𑀁 𑀦 𑀯𑀝𑁆𑀝𑀢𑀺. 𑀏𑀢𑀁 𑀥𑀜𑁆𑀜𑀁 𑀪𑀚𑁆𑀚𑀺𑀢𑁆𑀯𑀸 𑀓𑁄𑀝𑁆𑀝𑁂𑀢𑁆𑀯𑀸 𑀧𑀘𑀺𑀢𑁆𑀯𑀸 𑀬𑀸𑀕𑀼𑀔𑀚𑁆𑀚𑀓𑀁 𑀪𑀢𑁆𑀢𑀜𑁆𑀘 𑀤𑁂𑀣𑀸’𑀢𑀺, 𑀆𑀡𑀸𑀧𑀓𑀲𑁆𑀲𑁂𑀯 𑀪𑀺𑀓𑁆𑀔𑀼𑀲𑁆𑀲 𑀆𑀧𑀢𑁆𑀢𑀺, 𑀲𑀩𑁆𑀩𑁂𑀲𑀁 𑀅𑀦𑀸𑀧𑀢𑁆𑀢𑀻’’𑀢𑀺. 𑀢𑀲𑁆𑀫𑀸 ‘‘𑀲𑀗𑁆𑀖𑀯𑀸𑀭𑀺𑀓𑀸𑀦𑀁 𑀥𑀜𑁆𑀜𑀁 𑀓𑁄𑀝𑁆𑀝𑁂𑀣𑀸’’𑀢𑀺 𑀆𑀭𑀸𑀫𑀺𑀓𑀸𑀦𑀁 𑀯𑀢𑁆𑀢𑀼𑀜𑁆𑀘 𑀦 𑀯𑀝𑁆𑀝𑀢𑀺. ‘‘𑀤𑀺𑀯𑀲𑀁 𑀧𑀭𑀺𑀩𑁆𑀩𑀬𑀁 𑀕𑀡𑁆𑀳𑀣, 𑀢𑀡𑁆𑀟𑀼𑀮𑁂 𑀲𑀫𑁆𑀧𑀸𑀤𑁂𑀣, 𑀢𑁆𑀯𑀁 𑀏𑀢𑁆𑀢𑀓𑁂 𑀕𑀡𑁆𑀳, 𑀢𑁆𑀯𑀁 𑀏𑀢𑁆𑀢𑀓𑁂’’𑀢𑀺 𑀏𑀯𑀫𑀸𑀤𑀻𑀦𑀺 𑀧𑀦 𑀯𑀢𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀘. 𑀬𑀁 𑀧𑀦 ‘‘𑀅𑀯𑀺𑀜𑁆𑀜𑀢𑁆𑀢𑀺𑀬𑀸 𑀮𑀩𑁆𑀪𑀫𑀸𑀦𑀁 𑀧𑀦 𑀦𑀯𑀓𑀫𑁆𑀫𑀢𑁆𑀣𑀸𑀬 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀳𑁂𑀝𑁆𑀞𑀸 ‘‘𑀇𑀫𑀁 𑀢𑀴𑀸𑀓𑀁 𑀔𑁂𑀢𑁆𑀢𑀁 𑀯𑀢𑁆𑀣𑀼𑀁 𑀯𑀺𑀳𑀸𑀭𑀲𑁆𑀲 𑀤𑁂𑀫𑀸’𑀢𑀺 𑀯𑀼𑀢𑁆𑀢𑁂 ‘𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁 𑀦𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀢𑁆𑀢𑀸 𑀲𑀼𑀯𑀼𑀢𑁆𑀢𑀫𑁂𑀯. ‘‘𑀦𑀯𑀓𑀫𑁆𑀫𑀢𑁆𑀣𑀸𑀬 𑀥𑀜𑁆𑀜𑀁 𑀤𑁂𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀲𑀸𑀥𑀽’’𑀢𑀺 𑀯𑀢𑁆𑀢𑀩𑁆𑀩𑀁. 𑀬𑀁 𑀧𑀦 𑀳𑁂𑀝𑁆𑀞𑀸 ‘‘𑀢𑀢𑁆𑀣 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀁 𑀅𑀢𑁆𑀢𑀦𑁄 𑀯𑀸 𑀲𑀗𑁆𑀖𑀕𑀡𑀧𑀼𑀕𑁆𑀕𑀮𑀘𑁂𑀢𑀺𑀬𑀸𑀦𑀁 𑀯𑀸 𑀅𑀢𑁆𑀣𑀸𑀬 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀦 𑀯𑀝𑁆𑀝𑀢𑀺…𑀧𑁂… 𑀤𑀼𑀓𑁆𑀓𑀝𑀯𑀢𑁆𑀣𑀼𑀁 𑀲𑀩𑁆𑀩𑁂𑀲𑀫𑁆𑀧𑀺 𑀅𑀢𑁆𑀣𑀸𑀬 𑀲𑀫𑁆𑀧𑀝𑀺𑀘𑁆𑀙𑀢𑁄 𑀤𑀼𑀓𑁆𑀓𑀝𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀲𑀼𑀯𑀼𑀢𑁆𑀢𑀫𑁂𑀯. 𑀓𑀲𑁆𑀫𑀸? ‘‘𑀘𑁂𑀢𑀺𑀬𑀲𑁆𑀲 𑀅𑀢𑁆𑀣𑀸𑀬 𑀥𑀜𑁆𑀜𑀁 𑀤𑀸𑀢𑀼𑀓𑀸𑀫𑁄𑀫𑁆𑀳𑀺, 𑀢𑀼𑀫𑁆𑀳𑁂 𑀪𑀦𑁆𑀢𑁂 𑀢𑀤𑀢𑁆𑀣𑀸𑀬 𑀲𑀫𑁆𑀧𑀝𑀺𑀘𑁆𑀙𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀝𑀺𑀕𑁆𑀕𑀳𑁂𑀢𑀼𑀁 𑀅𑀓𑀧𑁆𑀧𑀺𑀬𑀢𑁆𑀢𑀸. ‘‘𑀇𑀤𑀁 𑀧𑀦 𑀢𑀸𑀤𑀺𑀲𑀁 𑀦 𑀳𑁄𑀢𑀻’’𑀢𑀺 𑀘 𑀯𑀼𑀢𑁆𑀢𑀁. 𑀲𑀩𑁆𑀩𑁄𑀧𑀸𑀬𑀁 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑀯𑀸𑀤𑁄 𑀓𑀺𑀭. 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁄 𑀧𑀦𑁂𑀯𑀫𑀸𑀳 ‘‘𑀧𑀼𑀩𑁆𑀩𑁂𑀧𑀺 𑀦𑀯𑀓𑀫𑁆𑀫𑀢𑁆𑀣𑀸𑀬 𑀧𑀝𑀺𑀕𑁆𑀕𑀳𑁄 𑀦 𑀯𑀸𑀭𑀺𑀢𑁄, 𑀲𑀗𑁆𑀖𑀲𑁆𑀲𑀢𑁆𑀣𑀸𑀬 𑀧𑀝𑀺𑀕𑁆𑀕𑀳𑀺𑀢𑀫𑁆𑀧𑀺 𑀧𑀝𑀺𑀕𑁆𑀕𑀸𑀳𑀓𑀲𑁆𑀲𑁂𑀯 𑀅𑀓𑀧𑁆𑀧𑀺𑀬’’𑀦𑁆𑀢𑀺.

𑀲𑀢𑁆𑀢𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁨𑁪. 𑀧𑁄𑀭𑀸𑀡𑀸 ‘‘𑀦𑀺𑀩𑁆𑀩𑀺𑀝𑁆𑀞𑀭𑀸𑀚𑀪𑀝𑁄’’𑀢𑀺 𑀧𑀞𑀦𑁆𑀢𑀺. 𑀢𑀲𑁆𑀲𑀢𑁆𑀣𑁄 𑀯𑀸𑀭𑀺𑀢𑀪𑀢𑁆𑀢𑀯𑁂𑀢𑀦𑁄 𑀭𑀸𑀚𑀪𑀝𑁄𑀢𑀺. ‘‘𑀢𑀜𑁆𑀜𑁂𑀯 𑀪𑀝𑀧𑀣𑀦𑁆𑀢𑀺 𑀢𑀁𑀬𑁂𑀯 𑀪𑀢𑁆𑀢𑀯𑁂𑀢𑀦’’𑀦𑁆𑀢𑀺 𑀅𑀢𑁆𑀣𑀁 𑀯𑀤𑀦𑁆𑀢𑀺. 𑀉𑀫𑁆𑀫𑀼𑀓𑀦𑁆𑀢𑀺 𑀅𑀮𑀸𑀢𑀁.

𑁮𑁨𑁬. 𑀏𑀢𑁆𑀣 𑀙𑀟𑁆𑀟𑀺𑀢𑀁 𑀓𑀺𑀭𑀺𑀬𑀸. 𑀅𑀦𑁄𑀮𑁄𑀓𑀦𑀁 𑀅𑀓𑀺𑀭𑀺𑀬𑀸.

𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀦𑀯𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁩𑁨. ‘‘𑀲𑀸𑀫𑀺𑀓𑁂 𑀅𑀧𑀮𑁄𑀓𑁂𑀢𑁆𑀯𑀸 𑀙𑀟𑁆𑀟𑁂𑀢𑀻’’𑀢𑀺 𑀓𑀢𑁆𑀣𑀘𑀺 𑀧𑁄𑀢𑁆𑀣𑀓𑁂 𑀦𑀢𑁆𑀣𑀺, 𑀓𑀢𑁆𑀣𑀘𑀺 𑀅𑀢𑁆𑀣𑀺, 𑀅𑀢𑁆𑀣𑀺𑀪𑀸𑀯𑁄𑀯 𑀲𑁂𑀬𑁆𑀬𑁄 𑀓𑀺𑀭𑀺𑀬𑀸𑀓𑀺𑀭𑀺𑀬𑀢𑁆𑀢𑀸 𑀲𑀺𑀓𑁆𑀔𑀸𑀧𑀤𑀲𑁆𑀲. 𑀇𑀥 𑀔𑁂𑀢𑁆𑀢𑀧𑀸𑀮𑀓𑀸, 𑀆𑀭𑀸𑀫𑀸𑀤𑀺𑀕𑁄𑀧𑀓𑀸 𑀘 𑀲𑀸𑀫𑀺𑀓𑀸 𑀏𑀯. ‘‘𑀲𑀗𑁆𑀖𑀲𑁆𑀲 𑀔𑁂𑀢𑁆𑀢𑁂, 𑀆𑀭𑀸𑀫𑁂 𑀘 𑀢𑀢𑁆𑀣 𑀓𑀘𑀯𑀭𑀁 𑀦 𑀙𑀟𑁆𑀟𑁂𑀢𑀩𑁆𑀩𑀦𑁆𑀢𑀺 𑀓𑀢𑀺𑀓𑀸 𑀘𑁂 𑀦𑀢𑁆𑀣𑀺, 𑀪𑀺𑀓𑁆𑀔𑀼𑀲𑁆𑀲 𑀙𑀟𑁆𑀟𑁂𑀢𑀼𑀁 𑀯𑀝𑁆𑀝𑀢𑀺 𑀲𑀗𑁆𑀖𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸, 𑀦 𑀪𑀺𑀓𑁆𑀔𑀼𑀦𑀻𑀦𑀁. 𑀢𑀸𑀲𑀫𑁆𑀧𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑀦𑁆𑀢𑀓𑁂 𑀯𑀼𑀢𑁆𑀢𑀦𑀬𑁂𑀦 𑀯𑀝𑁆𑀝𑀢𑀺, 𑀦 𑀢𑀢𑁆𑀣 𑀪𑀺𑀓𑁆𑀔𑀼𑀲𑁆𑀲, 𑀏𑀯𑀁 𑀲𑀦𑁆𑀢𑁂𑀧𑀺 𑀲𑀸𑀭𑀼𑀧𑁆𑀧𑀯𑀲𑁂𑀦𑁂𑀯 𑀓𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁.

𑀦𑀯𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀤𑀲𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁩𑁩. 𑀲𑀸𑀥𑀼𑀓𑀻𑀴𑀺𑀢𑀕𑀻𑀢𑀁 𑀯𑀸𑀢𑀺 𑀏𑀢𑁆𑀣 𑀧𑀸𑀘𑀺𑀡𑁆𑀡𑀕𑀻𑀢𑀫𑁆𑀧𑀺 𑀲𑁄𑀢𑀼𑀁 𑀦 𑀯𑀝𑁆𑀝𑀢𑀺. ‘‘𑀕𑀻𑀢𑀼𑀧𑀲𑀜𑁆𑀳𑀺𑀢𑀁 𑀧𑀦 𑀥𑀫𑁆𑀫𑀁 𑀲𑁄𑀢𑀼𑀁 𑀯𑀝𑁆𑀝𑀢𑀻𑀢𑀺 𑀤𑀻𑀖𑀦𑀺𑀓𑀸𑀬𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀥𑀫𑁆𑀫𑀕𑀻𑀢𑀫𑁆𑀧𑀺 𑀦 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀯𑀸 ‘‘𑀩𑀼𑀤𑁆𑀥𑀲𑁆𑀲 𑀕𑀸𑀬𑀸𑀫 𑀯𑀸𑀤𑁂𑀫𑀸𑀢𑀺 𑀯𑀼𑀢𑁆𑀢𑁂 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀤𑀼𑀓𑁆𑀓𑀝𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁, ‘‘𑀧𑀽𑀚𑀁 𑀓𑀭𑁄𑀫, 𑀚𑀸𑀢𑀓𑀁 𑀯𑀸 𑀯𑀢𑁆𑀣𑀼𑀁 𑀯𑀸 𑀤𑁂𑀲𑁂𑀫𑀸𑀢𑀺 𑀯𑀼𑀢𑁆𑀢𑁂 ‘𑀲𑀸𑀥𑀽’𑀢𑀺 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘 𑀯𑀼𑀢𑁆𑀢𑀁.

𑁮𑁩𑁬. 𑀏𑀓𑀧𑀬𑁄𑀕𑁄 𑀦𑀸𑀫 𑀏𑀓𑀤𑀺𑀯𑀲𑀸𑀯𑀮𑁄𑀓𑀦𑀁. 𑀢𑁂𑀲𑀁𑀬𑁂𑀯𑀸𑀢𑀺 𑀬𑁂𑀲𑀁 𑀦𑀘𑁆𑀘𑀁 𑀧𑀲𑁆𑀲𑀢𑀺. ‘‘𑀪𑀺𑀓𑁆𑀔𑀼𑀦𑀻 𑀲𑀬𑀫𑁆𑀧𑀺 𑀦𑀘𑁆𑀘𑀺𑀢𑀼𑀁 𑀯𑀸 𑀕𑀸𑀬𑀺𑀢𑀼𑀁 𑀯𑀸 𑀯𑀸𑀤𑀺𑀢𑀼𑀁 𑀯𑀸 𑀦 𑀮𑀪𑀢𑀻’’𑀢𑀺𑀆𑀤𑀺 𑀇𑀥 𑀲𑀺𑀓𑁆𑀔𑀸𑀧𑀤𑁂 𑀦𑀢𑁆𑀣𑀺. 𑀓𑀲𑁆𑀫𑀸? 𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀢𑁆𑀢𑀸. 𑀬𑀤𑀺 𑀏𑀯𑀁 𑀓𑀲𑁆𑀫𑀸 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀲𑀼𑀢𑁆𑀢𑀸𑀦𑀼𑀮𑁄𑀫𑀫𑀳𑀸𑀧𑀤𑁂𑀲𑀢𑁄. 𑀬𑀤𑀺 𑀦𑀘𑁆𑀘𑀸𑀤𑀻𑀦𑀺 𑀧𑀲𑁆𑀲𑀺𑀢𑀼𑀁 𑀯𑀸 𑀲𑁄𑀢𑀼𑀁 𑀯𑀸 𑀦 𑀮𑀪𑀢𑀺, 𑀧𑀕𑁂𑀯 𑀅𑀢𑁆𑀢𑀦𑀸 𑀓𑀸𑀢𑀼𑀦𑁆𑀢𑀺 𑀦𑀬𑀢𑁄 𑀮𑀩𑁆𑀪𑀫𑀸𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀇𑀢𑀭𑀣𑀸 𑀫𑀳𑀸𑀧𑀤𑁂𑀲𑀸 𑀦𑀺𑀭𑀢𑁆𑀣𑀓𑀸 𑀲𑀺𑀬𑀼𑀁. 𑀏𑀯𑀫𑀜𑁆𑀜𑀢𑁆𑀣𑀸𑀧𑀺 𑀦𑀬𑁄 𑀦𑁂𑀢𑀩𑁆𑀩𑁄. ‘‘𑀲𑀫𑀼𑀝𑁆𑀞𑀸𑀦𑀫𑁆𑀧𑀺 𑀇𑀥 𑀯𑀼𑀢𑁆𑀢𑀫𑁂𑀯 𑀅𑀕𑁆𑀕𑀳𑁂𑀢𑁆𑀯𑀸 𑀙𑀲𑀫𑀼𑀝𑁆𑀞𑀸𑀦𑀯𑀲𑁂𑀦 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀮𑀺𑀔𑀺𑀢𑀁. 𑀢𑀁 ‘‘𑀅𑀜𑁆𑀜𑁂 𑀦𑀘𑁆𑀘, 𑀕𑀸𑀬, 𑀯𑀸𑀤𑁂𑀳𑀻’’𑀢𑀺 𑀯𑀢𑁆𑀢𑀼𑀁 𑀦 𑀮𑀩𑁆𑀪𑀢𑀻𑀢𑀺𑀆𑀤𑀺𑀯𑀘𑀻𑀓𑀫𑁆𑀫𑀁 𑀲𑀦𑁆𑀥𑀸𑀬 𑀮𑀺𑀔𑀺𑀢𑀜𑁆𑀘𑁂, 𑀢𑀁 𑀲𑀼𑀮𑀺𑀔𑀺𑀢𑀁 𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑁂 𑀯𑀸𑀘𑀸𑀬 𑀅𑀪𑀸𑀯𑀢𑁄. ‘‘𑀲𑀬𑀫𑁆𑀧𑀺 𑀦𑀘𑁆𑀘𑀺𑀢𑀼’’𑀦𑁆𑀢𑀺𑀆𑀤𑀺𑀓𑀸𑀬𑀓𑀫𑁆𑀫𑀜𑁆𑀘𑁂 𑀲𑀦𑁆𑀥𑀸𑀬 𑀮𑀺𑀔𑀺𑀢𑀁, 𑀤𑀼𑀮𑁆𑀮𑀺𑀔𑀺𑀢𑀁. 𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀜𑁆𑀳𑀺 𑀏𑀓𑀦𑁆𑀢𑀢𑁄 𑀓𑀸𑀬𑀓𑀫𑁆𑀫𑀁 𑀳𑁄𑀢𑀺, 𑀢𑀲𑁆𑀫𑀸 𑀉𑀤𑁆𑀥𑀝𑀁 𑀅𑀕𑁆𑀕𑀳𑁂𑀢𑁆𑀯𑀸 𑀆𑀤𑀺𑀲𑀤𑁆𑀤𑁂𑀦 𑀲𑀗𑁆𑀕𑀳𑀺𑀢𑀫𑁂𑀯 𑀇𑀥 𑀕𑀳𑁂𑀢𑀩𑁆𑀩𑀦𑁆𑀢𑀺. 𑀏𑀢𑀁 𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀢𑁆𑀢𑀸𑀢𑀺 𑀏𑀢𑁆𑀣 𑀓𑀸𑀭𑀡𑀯𑀘𑀦𑁂 𑀲𑀼𑀢𑁆𑀢𑀸𑀦𑀼𑀮𑁄𑀫𑀫𑀳𑀸𑀧𑀤𑁂𑀲𑀢𑁄𑀢𑀺 𑀏𑀢𑁆𑀣 𑀧𑀦 𑀉𑀤𑁆𑀥𑀝𑀁 𑀕𑀳𑁂𑀢𑀩𑁆𑀩𑀁, 𑀏𑀯𑀁 𑀬𑀣𑀸𑀮𑀸𑀪𑀯𑀲𑁂𑀦 𑀢𑀁 𑀮𑀺𑀔𑀺𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀆𑀳𑀘𑁆𑀘𑀪𑀸𑀲𑀺𑀢𑀲𑀺𑀓𑁆𑀔𑀸𑀧𑀤𑀯𑀲𑁂𑀦 𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄. ‘‘𑀏𑀴𑀓𑀮𑁄𑀫𑀲𑀫𑀼𑀝𑁆𑀞𑀸𑀦𑀜𑁆𑀘𑁂 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁, 𑀆𑀡𑀸𑀧𑀓𑁄 𑀫𑀼𑀘𑁆𑀘𑁂𑀬𑁆𑀬, 𑀦 𑀘 𑀫𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀁 ‘‘𑀓𑀲𑁆𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑁄 𑀆𑀳𑀸𑀢𑀺 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁄.

𑁮𑁩𑁭. 𑀆𑀭𑀸𑀫𑁂 𑀞𑀢𑁆𑀯𑀸𑀢𑀺 𑀦 𑀓𑁂𑀯𑀮𑀁 𑀞𑀢𑁆𑀯𑀸, 𑀢𑀢𑁄 𑀕𑀦𑁆𑀢𑁆𑀯𑀸 𑀧𑀦 𑀲𑀩𑁆𑀩𑀺𑀭𑀺𑀬𑀸𑀧𑀣𑁂𑀳𑀺𑀧𑀺 𑀮𑀪𑀢𑀺. ‘‘𑀆𑀭𑀸𑀫𑁂 𑀞𑀺𑀢𑀸𑀢𑀺 𑀧𑀦 𑀆𑀭𑀸𑀫𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀅𑀢𑁆𑀣𑁄, 𑀇𑀢𑀭𑀣𑀸 𑀦𑀺𑀲𑀺𑀦𑁆𑀦𑀸𑀧𑀺 𑀦 𑀮𑀪𑁂𑀬𑁆𑀬𑀸’’𑀢𑀺 𑀮𑀺𑀔𑀺𑀢𑀁, 𑀢𑀁 𑀲𑀼𑀮𑀺𑀔𑀺𑀢𑀫𑁂𑀯.

𑀤𑀲𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀮𑀲𑀼𑀡𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀦𑁆𑀥𑀓𑀸𑀭𑀯𑀕𑁆𑀕𑀯𑀡𑁆𑀡𑀦𑀸

𑁧. 𑀧𑀞𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁩𑁯. ‘‘𑀤𑀺𑀯𑀸𑀧𑀺 𑀅𑀦𑁆𑀥𑀓𑀸𑀭𑀁 𑀅𑀢𑁆𑀣𑀺, 𑀢𑀧𑁆𑀧𑀝𑀺𑀲𑁂𑀥𑀦𑀢𑁆𑀣𑀁 ‘𑀭𑀢𑁆𑀢𑀦𑁆𑀥𑀓𑀸𑀭𑁂’𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺 𑀧𑁄𑀭𑀸𑀡𑀸. 𑀲𑀦𑁆𑀢𑀺𑀝𑁆𑀞𑁂𑀬𑁆𑀬𑀸𑀢𑀺 𑀏𑀢𑁆𑀣 𑀞𑀸𑀦𑀸𑀧𑀤𑁂𑀲𑁂𑀦 𑀘𑀢𑀼𑀩𑁆𑀩𑀺𑀥𑁄𑀧𑀺 𑀇𑀭𑀺𑀬𑀸𑀧𑀣𑁄 𑀲𑀗𑁆𑀕𑀳𑀺𑀢𑁄, 𑀢𑀲𑁆𑀫𑀸 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀧𑀸𑀲𑁂 𑀢𑁂𑀦 𑀲𑀤𑁆𑀥𑀺𑀁 𑀘𑀗𑁆𑀓𑀫𑀦𑀸𑀤𑀺𑀁 𑀓𑀭𑁄𑀦𑁆𑀢𑀺𑀬𑀸 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. ‘‘𑀲𑀮𑁆𑀮𑀧𑁂𑀬𑁆𑀬 𑀯𑀸’’𑀢𑀺 𑀓𑁂𑀯𑀮𑀁 𑀦𑀺𑀤𑀸𑀦𑀯𑀲𑁂𑀦 𑀯𑀼𑀢𑁆𑀢𑀁 𑀯𑀺𑀲𑁂𑀲𑀸𑀪𑀸𑀯𑀢𑁄. ‘‘𑀲𑀮𑁆𑀮𑀧𑁂𑀬𑁆𑀬𑀯𑀸𑀢𑀺 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀧𑀸𑀲𑁂 𑀞𑀺𑀢𑀸 𑀲𑀮𑁆𑀮𑀧𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 𑀳𑀺 𑀯𑀼𑀢𑁆𑀢𑀁, 𑀢𑀁 𑀦 𑀬𑀼𑀢𑁆𑀢𑀦𑁆𑀢𑀺 𑀏𑀓𑁂. 𑀓𑀲𑁆𑀫𑀸? 𑀬𑀲𑁆𑀫𑀸 𑀢𑀲𑁆𑀲 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀧𑀸𑀲𑁂 𑀞𑀺𑀢𑁂𑀦𑁂𑀯 𑀏𑀓𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀲𑀮𑁆𑀮𑀧𑀦𑁂𑀦𑀧𑀺 𑀅𑀧𑀭𑀫𑁆𑀧𑀺 𑀏𑀓𑀁 𑀆𑀧𑀚𑁆𑀚𑀢𑀻𑀢𑀺 𑀦𑀸𑀧𑀚𑁆𑀚𑀢𑀺, 𑀓𑀣𑀁 𑀧𑀜𑁆𑀜𑀸𑀬𑀢𑀻𑀢𑀺? 𑀅𑀗𑁆𑀕𑀯𑀲𑁂𑀦. 𑀇𑀫𑀲𑁆𑀲 𑀳𑀺 𑀭𑀢𑁆𑀢𑀦𑁆𑀥𑀓𑀸𑀭𑀢𑀸, 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀧𑀸𑀲𑁂 𑀞𑀸𑀦𑀁 𑀯𑀸 𑀲𑀮𑁆𑀮𑀧𑀦𑀁 𑀯𑀸, 𑀲𑀳𑀸𑀬𑀸𑀪𑀸𑀯𑁄, 𑀭𑀳𑁄𑀧𑁂𑀓𑁆𑀔𑀢𑀸𑀢𑀺 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀢𑀢𑁆𑀣 𑀬𑀤𑀺 𑀞𑀸𑀦𑀧𑀘𑁆𑀘𑀬𑀸 𑀏𑀓𑀸 𑀆𑀧𑀢𑁆𑀢𑀺 𑀯𑀺𑀲𑀼𑀁 𑀲𑀺𑀬𑀸, 𑀢𑀲𑁆𑀲𑀸 𑀘𑀢𑁆𑀢𑀸𑀭𑀺 𑀅𑀗𑁆𑀕𑀸𑀦𑀺 𑀲𑀺𑀬𑀼𑀁. 𑀬𑀤𑀺 𑀲𑀮𑁆𑀮𑀧𑀦𑀧𑀘𑁆𑀘𑀬𑀸 𑀏𑀓𑀸, 𑀢𑀲𑁆𑀲𑀸𑀧𑀺 𑀧𑀜𑁆𑀘 𑀅𑀗𑁆𑀕𑀸𑀦𑀺 𑀲𑀺𑀬𑀼𑀁. 𑀢𑀲𑁆𑀫𑀸 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 ‘‘𑀘𑀢𑁆𑀢𑀸𑀭𑀺 𑀯𑀸 𑀧𑀜𑁆𑀘 𑀯𑀸 𑀅𑀗𑁆𑀕𑀸𑀦𑀻’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀦 𑀘 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀲𑀮𑁆𑀮𑀧𑀦𑀧𑀘𑁆𑀘𑀬𑀸 𑀯𑀺𑀲𑀼𑀁 𑀦𑀢𑁆𑀣𑀻𑀢𑀺. 𑀅𑀢𑁆𑀣𑀺𑀬𑁂𑀯, 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀯𑀘𑀦𑀜𑁆𑀘 𑀢𑀤𑀢𑁆𑀣𑀫𑁂𑀯𑀸𑀢𑀺 𑀏𑀓𑁂. 𑀓𑀣𑀁? 𑀲𑀳𑀼𑀧𑁆𑀧𑀢𑁆𑀢𑀺𑀢𑁄 𑀤𑁆𑀯𑀺𑀦𑁆𑀦𑀁 𑀆𑀧𑀢𑁆𑀢𑀻𑀦𑀁. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀲𑀮𑁆𑀮𑀧𑀦𑁂 𑀲𑀢𑀺 𑀞𑀸𑀦𑀧𑀘𑁆𑀘𑀬𑀸 𑀆𑀧𑀚𑁆𑀚𑀺𑀢𑀩𑁆𑀩𑀁 𑀘𑀢𑀼𑀭𑀗𑁆𑀕𑀺𑀓𑀁, 𑀲𑀮𑁆𑀮𑀧𑀦𑀧𑀘𑁆𑀘𑀬𑀸 𑀆𑀧𑀚𑁆𑀚𑀺𑀢𑀩𑁆𑀩𑀁 𑀘𑀢𑀼𑀭𑀗𑁆𑀕𑀺𑀓𑀦𑁆𑀢𑀺 𑀤𑁆𑀯𑁂 𑀧𑀸𑀘𑀺𑀢𑁆𑀢𑀺𑀬𑀸𑀦𑀺 𑀲𑀳𑀼𑀧𑁆𑀧𑀦𑁆𑀦𑀸𑀦𑀺 𑀏𑀓𑀢𑁄 𑀆𑀧𑀚𑁆𑀚𑀦𑁆𑀢𑀻𑀢𑀺. 𑀇𑀤𑀁 𑀅𑀬𑀼𑀢𑁆𑀢𑀁 𑀧𑀸𑀴𑀺𑀯𑀺𑀭𑁄𑀥𑀢𑁄. 𑀧𑀸𑀴𑀺𑀬𑀜𑁆𑀳𑀺 ‘‘𑀲𑀮𑁆𑀮𑀧𑁂𑀬𑁆𑀬 𑀯𑀸𑀢𑀺 𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀧𑀸𑀲𑁂 𑀞𑀺𑀢𑀸 𑀲𑀮𑁆𑀮𑀧𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀤𑁆𑀯𑁂 𑀲𑀺𑀬𑀼𑀁, ‘‘𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀧𑀸𑀘𑀺𑀢𑁆𑀢𑀺𑀬𑀸𑀦’’𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀢𑀸 𑀲𑀺𑀬𑀸𑀢𑀺. 𑀅𑀬𑀁 𑀦𑀬𑁄 𑀤𑀼𑀢𑀺𑀬𑀸𑀤𑀻𑀲𑀼𑀧𑀺 𑀬𑀣𑀸𑀬𑁄𑀕𑀁 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀤𑀼𑀢𑀺𑀬𑁂𑀦𑀸𑀧𑀺 𑀲𑀤𑁆𑀥𑀺𑀁 𑀬𑀤𑀺 𑀪𑀺𑀓𑁆𑀔𑀼𑀦𑀺𑀬𑀸 𑀭𑀳𑁄𑀧𑁂𑀓𑁆𑀔𑀢𑀸 𑀅𑀢𑁆𑀣𑀺, 𑀲𑁄 𑀘𑁂 𑀧𑀼𑀭𑀺𑀲𑁄, 𑀦 𑀤𑀼𑀢𑀺𑀬𑁄, 𑀧𑀼𑀭𑀺𑀲𑀕𑀡𑀦𑀸𑀬 𑀆𑀧𑀢𑁆𑀢𑀺𑀬𑁄. 𑀅𑀣 𑀤𑀼𑀢𑀺𑀬𑀸 𑀪𑀺𑀓𑁆𑀔𑀼𑀦𑀻 𑀳𑁄𑀢𑀺, 𑀢𑀲𑁆𑀲𑀸 𑀘 𑀢𑁂𑀦 𑀧𑀼𑀭𑀺𑀲𑁂𑀦 𑀲𑀤𑁆𑀥𑀺𑀁 𑀭𑀳𑁄𑀧𑁂𑀓𑁆𑀔𑀢𑀸 𑀅𑀢𑁆𑀣𑀺, 𑀲𑀸 𑀘 𑀪𑀺𑀓𑁆𑀔𑀼𑀦𑀻 𑀦 𑀤𑀼𑀢𑀺𑀬𑀸 𑀳𑁄𑀢𑀺. 𑀉𑀪𑀺𑀦𑁆𑀦𑀫𑁆𑀧𑀺 𑀆𑀧𑀚𑁆𑀚𑀢𑀻𑀢𑀺 𑀏𑀓𑁂, 𑀯𑀺𑀘𑀸𑀭𑁂𑀢𑁆𑀯𑀸 𑀧𑀦 𑀕𑀳𑁂𑀢𑀩𑁆𑀩𑀁. 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀧𑀦 𑀯𑀼𑀢𑁆𑀢𑀁 ‘‘𑀳𑀢𑁆𑀣𑀧𑀸𑀲𑁂 𑀞𑀸𑀦𑁂𑀦 𑀤𑀼𑀓𑁆𑀓𑀝’’𑀦𑁆𑀢𑀺, 𑀢𑀁 𑀧𑀸𑀴𑀺𑀬𑀸 𑀯𑀺𑀭𑀼𑀚𑁆𑀛𑀢𑀺. ‘‘𑀧𑀼𑀭𑀺𑀲𑀲𑁆𑀲 𑀳𑀢𑁆𑀣𑀧𑀸𑀲𑁂 𑀢𑀺𑀝𑁆𑀞𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 𑀳𑀺 𑀧𑀸𑀴𑀺, 𑀓𑀺𑀁𑀩𑀳𑀼𑀦𑀸. 𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑁂 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀤𑀼𑀢𑀺𑀬𑀺𑀓𑀉𑀬𑁆𑀬𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀲𑀦𑁆𑀢𑀺𑀝𑁆𑀞𑀦𑀸𑀤𑀻𑀲𑀼 𑀢𑀻𑀡𑀺 𑀧𑀸𑀘𑀺𑀢𑁆𑀢𑀺𑀬𑀸𑀦𑀻’’𑀢𑀺𑀆𑀤𑀺𑀯𑀘𑀦𑀢𑁄 𑀯𑀢𑁆𑀣𑀼𑀕𑀡𑀦𑀸𑀬 𑀆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. ‘‘𑀅𑀗𑁆𑀕𑀸𑀦𑀺 𑀘𑁂𑀢𑁆𑀣 𑀘𑀢𑁆𑀢𑀸𑀭𑀺 𑀧𑀜𑁆𑀘 𑀯𑀸’’𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁.

𑀧𑀞𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨-𑁩-𑁪. 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁪𑁨-𑁬. 𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀸𑀦𑀺 𑀉𑀢𑁆𑀢𑀸𑀦𑀸𑀦𑀺. 𑀲𑀩𑁆𑀩𑀢𑁆𑀣 ‘‘𑀲𑀮𑁆𑀮𑀧𑀢𑀻𑀢𑀺 𑀬𑀁 𑀓𑀺𑀜𑁆𑀘𑀺 𑀢𑀺𑀭𑀘𑁆𑀙𑀸𑀦𑀓𑀣𑀁 𑀓𑀣𑁂𑀢𑀻’’𑀢𑀺 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁.

𑁮𑁫𑁨. 𑀘𑀢𑀼𑀢𑁆𑀣𑁂 𑀧𑀦𑀸𑀬𑀁 𑀯𑀺𑀲𑁂𑀲𑁄 𑁋 ‘‘𑀏𑀓𑁂𑀦𑁂𑀓𑀸’’𑀢𑀺 𑀧𑀞𑀫𑀁 𑀯𑀼𑀢𑁆𑀢𑀢𑁆𑀢𑀸 𑀤𑀼𑀢𑀺𑀬𑀺𑀓𑀁 𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀉𑀬𑁆𑀬𑁄𑀚𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬𑀁 𑀦 𑀲𑀫𑁆𑀪𑀯𑀢𑀻𑀢𑀺 𑀘𑁂? 𑀲𑀫𑁆𑀪𑀯𑀢𑀺. 𑀓𑀲𑁆𑀫𑀸? 𑀲𑀦𑁆𑀢𑀺𑀝𑁆𑀞𑀦𑀸𑀤𑀺𑀢𑁆𑀢𑀬𑀫𑀢𑁆𑀢𑀸𑀧𑁂𑀓𑁆𑀔𑀢𑁆𑀢𑀸, 𑀢𑀲𑁆𑀲 𑀯𑀘𑀦𑀲𑁆𑀲𑀸𑀧𑀺 𑀯𑀸 𑀅𑀜𑁆𑀜𑀸𑀬𑀧𑀺 𑀭𑀳𑁄𑀧𑁂𑀓𑁆𑀔𑀦𑀲𑁆𑀲𑀸𑀤𑀲𑀫𑁆𑀪𑀯𑁂 𑀲𑀢𑀺 𑀉𑀪𑀺𑀦𑁆𑀦𑀁 𑀏𑀓𑀢𑁆𑀣𑀲𑀫𑁆𑀪𑀯𑀢𑁄 𑀘 𑀲𑀸𑀥𑀺𑀢𑀫𑁂𑀢𑀁. ‘‘𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀺𑀢𑁆𑀯𑀸 𑀲𑀦𑁆𑀢𑀺𑀝𑁆𑀞𑀢𑀺 𑀯𑀸 𑀲𑀮𑁆𑀮𑀧𑀢𑀺 𑀯𑀸’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁. 𑀓𑀲𑁆𑀫𑀸 ‘‘𑀦𑀺𑀓𑀡𑁆𑀡𑀺𑀓𑀁 𑀯𑀸 𑀚𑀧𑁆𑀧𑁂𑀢𑀻’’𑀢𑀺 𑀦 𑀯𑀼𑀢𑁆𑀢𑀁? 𑀳𑀢𑁆𑀣𑀧𑀸𑀲𑀸𑀢𑀺𑀓𑁆𑀓𑀫𑁂 𑀅𑀲𑀫𑁆𑀪𑀯𑀢𑁄. 𑀢𑀲𑁆𑀲 𑀢𑀢𑀺𑀬𑀲𑁆𑀲 𑀧𑀤𑀲𑁆𑀲 𑀧𑀘𑁆𑀙𑀺𑀦𑁆𑀦𑀢𑁆𑀢𑀸 𑀲𑀫𑁆𑀪𑀯𑀦𑁆𑀢𑀫𑁆𑀧𑀺 ‘‘𑀤𑀼𑀢𑀺𑀬𑀺𑀓𑀁 𑀯𑀸 𑀉𑀬𑁆𑀬𑁄𑀚𑁂𑀢𑀻’’𑀢𑀺 𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀅𑀢𑁆𑀣𑀢𑁄 𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀺𑀢𑁆𑀯𑀸 𑀲𑀦𑁆𑀢𑀺𑀝𑁆𑀞𑀢𑀺 𑀯𑀸 𑀲𑀮𑁆𑀮𑀧𑀢𑀺 𑀯𑀸 𑀤𑀼𑀢𑀺𑀬𑀺𑀓𑀁 𑀯𑀸 𑀉𑀬𑁆𑀬𑁄𑀚𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀏𑀲 𑀦𑀬𑁄 𑀬𑀓𑁆𑀔𑁂𑀦 𑀯𑀸𑀢𑀺𑀆𑀤𑀻𑀲𑀼𑀧𑀺. 𑀢𑀢𑁆𑀣 ‘‘𑀳𑀢𑁆𑀣𑀧𑀸𑀲𑁂’’𑀢𑀺 𑀯𑀸 ‘‘𑀳𑀢𑁆𑀣𑀧𑀸𑀲𑀁 𑀯𑀺𑀚𑀳𑀺𑀢𑁆𑀯𑀸’’𑀢𑀺 𑀯𑀸 𑀦 𑀯𑀼𑀢𑁆𑀢𑀁 𑀉𑀪𑀬𑀢𑁆𑀣 𑀤𑀼𑀓𑁆𑀓𑀝𑀢𑁆𑀢𑀸. 𑀅𑀦𑀸𑀧𑀢𑁆𑀢𑀺𑀯𑀸𑀭𑁂𑀧𑀺 𑀅𑀲𑀫𑁆𑀪𑀯𑀢𑁄 ‘‘𑀦𑀺𑀓𑀡𑁆𑀡𑀺𑀓𑀁 𑀯𑀸 𑀚𑀧𑁆𑀧𑁂𑀢𑀻’’𑀢𑀺 𑀦 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀲𑀫𑁆𑀪𑀯𑀢𑀺 𑀲𑀢𑀺 𑀓𑀭𑀡𑀻𑀬𑁂 𑀦𑀺𑀓𑀡𑁆𑀡𑀺𑀓𑀁 𑀯𑀸 𑀚𑀧𑁆𑀧𑁂𑀢𑀻𑀢𑀺 𑀲𑀫𑁆𑀪𑀯𑀢𑁄. 𑀅𑀣 𑀓𑀲𑁆𑀫𑀸 𑀏𑀯𑀁 𑀦 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀅𑀦𑀯𑀚𑁆𑀚𑀓𑀣𑀸𑀬𑀁 𑀦𑀺𑀓𑀡𑁆𑀡𑀺𑀓𑀚𑀧𑁆𑀧𑀦𑁂 𑀧𑀬𑁄𑀚𑀦𑀸𑀪𑀸𑀯𑀸, 𑀥𑀫𑁆𑀫𑀓𑀣𑀸𑀬𑀫𑁆𑀧𑀺 𑀉𑀤𑀸𑀬𑀺𑀁 𑀆𑀭𑀩𑁆𑀪 𑀧𑀝𑀺𑀲𑀺𑀤𑁆𑀥𑀢𑁆𑀢𑀸 𑀘.

𑀤𑀼𑀢𑀺𑀬𑀢𑀢𑀺𑀬𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁫𑁬. ‘‘𑀓𑀼𑀮𑀁 𑀦𑀸𑀫 𑀘𑀢𑁆𑀢𑀸𑀭𑀺 𑀓𑀼𑀮𑀸𑀦𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀺𑀢𑁆𑀣𑀺𑀬𑀸𑀭𑀸𑀫𑁂 𑀓𑀧𑁆𑀧𑀢𑀺 𑀢𑀲𑁆𑀲 𑀓𑀼𑀮𑀯𑁄𑀳𑀸𑀭𑀸𑀪𑀸𑀯𑀢𑁄𑀢𑀺 𑀏𑀓𑁂. 𑀢𑀺𑀢𑁆𑀣𑀺𑀬𑀸𑀦𑀁 𑀔𑀢𑁆𑀢𑀺𑀬𑀸𑀤𑀺𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀦 𑀓𑀧𑁆𑀧𑀢𑀻𑀢𑀺 𑀏𑀓𑁂. 𑀢𑀲𑁆𑀲 𑀓𑀧𑁆𑀧𑀺𑀬𑀪𑀽𑀫𑀺𑀢𑁆𑀢𑀸 𑀦 𑀬𑀼𑀢𑁆𑀢𑀦𑁆𑀢𑀺 𑀘𑁂? 𑀦, 𑀬𑀣𑀸𑀯𑀼𑀢𑁆𑀢𑀔𑀢𑁆𑀢𑀺𑀬𑀸𑀤𑀻𑀦𑀁 𑀲𑀫𑁆𑀪𑀯𑀢𑁄. 𑀢𑀣𑀸𑀧𑀺 𑀕𑁄𑀘𑀭𑀓𑀼𑀮𑀁 𑀇𑀥𑀸𑀥𑀺𑀧𑁆𑀧𑁂𑀢𑀁. ‘‘𑀉𑀧𑀘𑀸𑀭𑁄 𑀤𑁆𑀯𑀸𑀤𑀲𑀳𑀢𑁆𑀣𑁄’’𑀢𑀺 𑀮𑀺𑀔𑀺𑀢𑀁.

𑀧𑀜𑁆𑀘𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁬𑁦. ‘‘𑀦𑀺𑀲𑀻𑀤𑀦𑁆𑀢𑀺𑀬𑀸 𑀏𑀓𑀸, 𑀦𑀺𑀧𑀚𑁆𑀚𑀦𑁆𑀢𑀺𑀬𑀸 𑀏𑀓𑀸’’𑀢𑀺 𑀅𑀯𑀢𑁆𑀯𑀸 ‘‘𑀦𑀺𑀲𑀻𑀤𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀺𑀬𑀸’’𑀢𑀺𑀆𑀤𑀺 𑀦 𑀯𑀢𑁆𑀢𑀩𑁆𑀩𑀁. 𑀦 𑀳𑀺 𑀕𑀫𑀦𑀧𑀘𑁆𑀘𑀬𑀸 𑀏𑀲𑀸 𑀆𑀧𑀢𑁆𑀢𑀻𑀢𑀺? 𑀦, 𑀧𑀭𑀺𑀬𑁄𑀲𑀸𑀦𑀸𑀥𑀺𑀧𑁆𑀧𑀸𑀬𑀯𑀲𑁂𑀦 𑀯𑀼𑀢𑁆𑀢𑀢𑁆𑀢𑀸. ‘‘𑀦𑀺𑀲𑀻𑀤𑀺𑀢𑁆𑀯𑀸 𑀦𑀺𑀧𑀚𑁆𑀚𑀦𑁆𑀢𑀺𑀬𑀸 𑀤𑁆𑀯𑁂’’𑀢𑀺 𑀯𑀘𑀦𑁂𑀦𑀧𑀺 𑀕𑀫𑀦𑀁 𑀇𑀥 𑀦𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺, 𑀢𑀣𑀸 ‘‘𑀦𑀺𑀧𑀚𑁆𑀚𑀺𑀢𑁆𑀯𑀸 𑀦𑀺𑀲𑀻𑀤𑀦𑁆𑀢𑀺𑀬𑀸 𑀤𑁆𑀯𑁂’’𑀢𑀺𑀧𑀺 𑀯𑀢𑁆𑀢𑀩𑁆𑀩𑀁. 𑀬𑀤𑀺 𑀏𑀯𑀁 ‘‘𑀢𑀲𑁆𑀫𑀺𑀁 𑀅𑀪𑀺𑀦𑀺𑀧𑀚𑁆𑀚𑀢𑀺, 𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀧𑀸𑀘𑀺𑀢𑁆𑀢𑀺𑀬𑀸𑀦’’𑀦𑁆𑀢𑀺 𑀓𑀲𑁆𑀫𑀸 𑀦 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀅𑀦𑀺𑀲𑀻𑀤𑀺𑀢𑁆𑀯𑀸𑀧𑀺 𑀦𑀺𑀧𑀚𑁆𑀚𑀦𑀲𑀫𑁆𑀪𑀯𑀢𑁄. 𑀦𑀺𑀧𑀚𑁆𑀚𑀦𑀢𑁆𑀣𑀸𑀬 𑀦𑀺𑀲𑀻𑀤𑀺𑀢𑁆𑀯𑀸 𑀦𑀺𑀧𑀚𑁆𑀚𑀦𑁆𑀢𑀺𑀬𑀸 𑀦𑀺𑀧𑀚𑁆𑀚𑀦𑀓𑀧𑀬𑁄𑀕𑀢𑁆𑀢𑀸 𑀏𑀓𑀸 𑀆𑀧𑀢𑁆𑀢𑀻𑀢𑀺 𑀓𑁂𑀘𑀺.

𑀙𑀝𑁆𑀞𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀢𑁆𑀢𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁬𑁭. 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 ‘‘𑀥𑀼𑀯𑀧𑀜𑁆𑀜𑀢𑁆𑀢𑁂’’𑀢𑀺 𑀦 𑀯𑀼𑀢𑁆𑀢𑀁 ‘‘𑀲𑀦𑁆𑀣𑀭𑀺𑀢𑁆𑀯𑀸 𑀯𑀸 𑀲𑀦𑁆𑀣𑀭𑀸𑀧𑁂𑀢𑁆𑀯𑀸 𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀇𑀥 𑀙𑀝𑁆𑀞𑁂 𑀯𑀼𑀢𑁆𑀢𑀦𑀬𑁂𑀦 𑀧𑀓𑀢𑀺𑀬𑀸 𑀧𑀜𑁆𑀜𑀢𑁆𑀢𑁂 𑀅𑀪𑀺𑀦𑀺𑀲𑀻𑀤𑀢𑀺 𑀯𑀸 𑀅𑀪𑀺𑀦𑀺𑀧𑀚𑁆𑀚𑀢𑀺 𑀯𑀸, 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀅𑀜𑁆𑀜𑀢𑁆𑀣 𑀥𑀼𑀯𑀧𑀜𑁆𑀜𑀢𑁆𑀢𑀁. 𑀇𑀥 𑀯𑀼𑀢𑁆𑀢𑀦𑀬𑁂𑀦 𑀲𑀦𑁆𑀣𑀭𑀺𑀢𑁆𑀯𑀸 𑀯𑀸 𑀲𑀦𑁆𑀣𑀭𑀸𑀧𑁂𑀢𑁆𑀯𑀸 𑀯𑀸 𑀅𑀪𑀺𑀦𑀺𑀲𑀻𑀤𑀢𑀺 𑀯𑀸 𑀅𑀪𑀺𑀦𑀺𑀧𑀚𑁆𑀚𑀢𑀺 𑀯𑀸, 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀉𑀪𑀬𑀢𑁆𑀣𑀸𑀧𑀺 𑀧𑀜𑁆𑀘𑀫𑁂 𑀯𑀼𑀢𑁆𑀢𑀦𑀬𑁂𑀦 𑀅𑀦𑀸𑀧𑀼𑀘𑁆𑀙𑀸 𑀧𑀓𑁆𑀓𑀫𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬𑀫𑁂𑀯, 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 𑀫𑀸𑀢𑀺𑀓𑀸𑀬𑀁 𑀯𑀼𑀢𑁆𑀢𑀓𑀸𑀮𑀢𑁄 𑀅𑀜𑁆𑀜𑀓𑀸𑀮𑀲𑁆𑀲 𑀅𑀧𑀭𑀸𑀫𑀝𑁆𑀞𑀢𑁆𑀢𑀸𑀢𑀺 𑀦𑁄 𑀢𑀓𑁆𑀓𑁄𑀢𑀺 𑀆𑀘𑀭𑀺𑀬𑁄. 𑀅𑀧𑀺𑀘 𑀅𑀢𑁆𑀣𑀸𑀧𑀢𑁆𑀢𑀺𑀓𑀸𑀮𑁂 𑀆𑀧𑀚𑁆𑀚𑀢𑀺, 𑀦𑁄 𑀯𑀺𑀓𑀸𑀮𑁂𑀢𑀺𑀆𑀤𑀺𑀢𑁆𑀢𑀺𑀓𑁂, 𑀅𑀢𑁆𑀣𑀸𑀧𑀢𑁆𑀢𑀺 𑀭𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀦𑁄 𑀤𑀺𑀯𑀸𑀢𑀺𑀆𑀤𑀺𑀢𑁆𑀢𑀺𑀓𑁂 𑀘 𑀅𑀝𑁆𑀞𑀓𑀣𑀸𑀬𑀁 𑀇𑀥 𑀧𑀜𑁆𑀘𑀫𑀙𑀝𑁆𑀞𑀲𑀢𑁆𑀢𑀫𑀲𑀺𑀓𑁆𑀔𑀸𑀧𑀤𑁂𑀳𑀺 𑀲𑀗𑁆𑀕𑀳𑀺𑀢𑀸𑀧𑀢𑁆𑀢𑀻𑀦𑀁 𑀅𑀧𑀭𑀸𑀫𑀝𑁆𑀞𑀢𑁆𑀢𑀸 𑀬𑀣𑀸𑀲𑀫𑁆𑀪𑀯𑀁 𑀢𑀺𑀯𑀺𑀥𑀓𑀸𑀮𑁂 𑀢𑀺𑀯𑀺𑀥𑀫𑁂𑀢𑀁 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 𑀯𑀝𑁆𑀝𑀢𑀺 𑀏𑀯 𑀫𑀳𑀸𑀧𑀤𑁂𑀲𑀦𑀬𑀸𑀦𑀼𑀮𑁄𑀫𑀢𑁄.

𑀲𑀢𑁆𑀢𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀝𑁆𑀞𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁬𑁯. 𑀅𑀝𑁆𑀞𑀫𑁂 𑀪𑀺𑀓𑁆𑀔𑀼𑀲𑁆𑀲 𑀤𑀼𑀓𑁆𑀓𑀝𑀁 𑀲𑀫𑁆𑀪𑀯𑀢𑀺.