𑀧𑀭𑀺𑀯𑀸𑀭𑀯𑀡𑁆𑀡𑀦𑀸
𑀲𑁄𑀴𑀲𑀫𑀳𑀸𑀯𑀸𑀭𑀯𑀡𑁆𑀡𑀦𑀸
𑀧𑀜𑁆𑀜𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸
𑁧-𑁨. 𑀲𑀻𑀮𑀲𑀫𑀸𑀥𑀺𑀧𑀜𑁆𑀜𑀸𑀯𑀺𑀫𑀼𑀢𑁆𑀢𑀺𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀲𑀗𑁆𑀔𑀸𑀢𑀲𑁆𑀲 𑀥𑀫𑁆𑀫𑀓𑁆𑀔𑀦𑁆𑀥𑀲𑀭𑀻𑀭𑀲𑁆𑀲 𑀲𑀸𑀲𑀦𑁂𑀢𑀺 𑀅𑀢𑁆𑀣𑁄. 𑀧𑀭𑀺𑀯𑀸𑀭𑁄𑀢𑀺 𑀲𑀗𑁆𑀕𑀳𑀁 𑀬𑁄 𑀲𑀫𑀸𑀭𑀼𑀴𑁆𑀳𑁄, 𑀢𑀲𑁆𑀲 𑀧𑀭𑀺𑀯𑀸𑀭𑀲𑁆𑀲. 𑀯𑀺𑀦𑀬𑀪𑀽𑀢𑀸 𑀧𑀜𑁆𑀜𑀢𑁆𑀢𑀺 𑀯𑀺𑀦𑀬𑀧𑀜𑁆𑀜𑀢𑁆𑀢𑀺. ‘‘𑀧𑀜𑁆𑀜𑀢𑁆𑀢𑀺𑀓𑀸𑀮𑀁 𑀚𑀸𑀦𑀢𑀸’’𑀢𑀺 𑀤𑀼𑀓𑀦𑀬𑀯𑀲𑁂𑀦 𑀯𑀢𑁆𑀯𑀸 𑀧𑀼𑀦 𑀲𑀼𑀢𑁆𑀢𑀦𑁆𑀢𑀦𑀬𑁂𑀦 𑀯𑀢𑁆𑀢𑀼𑀁 ‘‘𑀅𑀧𑀺𑀘 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀤𑀻𑀳𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀧𑀲𑁆𑀲𑀦𑀁 𑀦𑀸𑀫 𑀤𑀲𑁆𑀲𑀦𑀢𑁆𑀢𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀬𑁄𑀚𑀺𑀢𑀁 𑀧𑀝𑀺𑀯𑁂𑀥𑀜𑀸𑀡𑀤𑀲𑁆𑀲𑀦𑀁. 𑀤𑁂𑀲𑀦𑀸𑀧𑀜𑁆𑀜𑀸𑀬 𑀧𑀲𑁆𑀲𑀢𑀸𑀢𑀺 𑀆𑀲𑀬𑀸𑀦𑀼𑀲𑀬𑀸𑀤𑀺𑀓𑁂. 𑀧𑀼𑀘𑁆𑀙𑀸𑀬𑀸𑀢𑀺 𑀲𑀢𑁆𑀢𑀫𑀻. 𑀧𑀼𑀦𑀧𑀺 𑀏𑀢𑁆𑀣𑀸𑀢𑀺 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑁂. 𑀫𑀺𑀘𑁆𑀙𑀸𑀤𑀺𑀝𑁆𑀞𑀻𑀢𑀺 𑀦𑀢𑁆𑀣𑀺𑀓𑀤𑀺𑀝𑁆𑀞𑀺 𑀅𑀦𑁆𑀢𑀕𑁆𑀕𑀸𑀳𑀺𑀓𑀤𑀺𑀝𑁆𑀞𑀺. ‘‘𑀆𑀚𑀻𑀯𑀳𑁂𑀢𑀼 𑀧𑀜𑁆𑀜𑀢𑁆𑀢𑀸𑀦𑀻’’𑀢𑀺 𑀯𑀘𑀦𑀢𑁄 𑀇𑀫𑀸𑀦𑀺 𑀙 𑀲𑀺𑀓𑁆𑀔𑀸𑀧𑀤𑀸𑀦𑀺 𑀞𑀧𑁂𑀢𑁆𑀯𑀸 𑀲𑁂𑀲𑀸 𑀆𑀘𑀸𑀭𑀯𑀺𑀧𑀢𑁆𑀢𑀺 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀸𑀬𑁂𑀦 𑀧𑀦 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻𑀢𑀺 𑀏𑀢𑁆𑀣 ‘‘𑀧𑀼𑀩𑁆𑀩𑀪𑀸𑀕𑁂 𑀲𑁂𑀯𑀦𑀘𑀺𑀢𑁆𑀢𑀫𑀗𑁆𑀕𑀁 𑀓𑀢𑁆𑀯𑀸 𑀓𑀸𑀬𑀤𑁆𑀯𑀸𑀭𑀲𑀗𑁆𑀔𑀸𑀢𑀁 𑀯𑀺𑀜𑁆𑀜𑀢𑁆𑀢𑀺𑀁 𑀚𑀦𑀬𑀺𑀢𑁆𑀯𑀸 𑀧𑀯𑀢𑁆𑀢𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑀗𑁆𑀔𑀸𑀢𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀓𑀺𑀜𑁆𑀘𑀸𑀧𑀺 𑀘𑀺𑀢𑁆𑀢𑁂𑀦 𑀲𑀫𑀼𑀝𑁆𑀞𑀸𑀧𑀺𑀢𑀸 𑀯𑀺𑀜𑁆𑀜𑀢𑁆𑀢𑀺, 𑀢𑀣𑀸𑀧𑀺 𑀘𑀺𑀢𑁆𑀢𑁂𑀦 𑀅𑀥𑀺𑀧𑁆𑀧𑁂𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀺𑀜𑁆𑀜𑀢𑁆𑀢𑀺𑀬𑀸 𑀲𑀸𑀥𑀺𑀢𑀢𑁆𑀢𑀸 ‘𑀓𑀸𑀬𑀤𑁆𑀯𑀸𑀭𑁂𑀦 𑀆𑀧𑀚𑁆𑀚𑀢𑀻’𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀇𑀫𑀫𑀢𑁆𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀪𑀡𑁆𑀟𑀦𑀸𑀤𑀺𑀢𑁆𑀢𑀬𑀯𑀽𑀧𑀲𑀫𑀁. 𑀆𑀧𑀸𑀡𑀓𑁄𑀝𑀺𑀓𑀦𑁆𑀢𑀺 𑀚𑀻𑀯𑀺𑀢𑀧𑀭𑀺𑀬𑀦𑁆𑀢𑀁 𑀓𑀢𑁆𑀯𑀸. 𑀧𑁄𑀭𑀸𑀡𑀓𑁂𑀳𑀺 𑀫𑀳𑀸𑀣𑁂𑀭𑁂𑀳𑀻𑀢𑀺 𑀲𑀻𑀳𑀴𑀤𑀻𑀧𑁂 𑀫𑀳𑀸𑀣𑁂𑀭𑁂𑀳𑀺 𑀧𑁄𑀢𑁆𑀣𑀓𑀁 𑀆𑀭𑁄𑀧𑀺𑀢𑀓𑀸𑀮𑁂 𑀞𑀧𑀺𑀢𑀸𑀢𑀺 𑀅𑀢𑁆𑀣𑁄. ‘‘𑀘𑀢𑀼𑀢𑁆𑀣𑀲𑀗𑁆𑀕𑀻𑀢𑀺𑀲𑀤𑀺𑀲𑀸 𑀧𑁄𑀢𑁆𑀣𑀓𑀸𑀭𑀼𑀴𑁆𑀳𑀲𑀗𑁆𑀕𑀻𑀢𑀺 𑀅𑀳𑁄𑀲𑀻’’𑀢𑀺 𑀯𑀼𑀢𑁆𑀢𑀁.
𑀫𑀳𑀸𑀯𑀺𑀪𑀗𑁆𑀕𑁂 𑀧𑀜𑁆𑀜𑀢𑁆𑀢𑀺𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑀓𑀢𑀸𑀧𑀢𑁆𑀢𑀺𑀯𑀸𑀭𑀸𑀤𑀺𑀯𑀡𑁆𑀡𑀦𑀸
𑁧𑁬𑁬. 𑀓𑀢𑀸𑀧𑀢𑁆𑀢𑀺𑀯𑀸𑀭𑁂 ‘‘𑀲𑀗𑁆𑀖𑀺𑀓𑀁 𑀫𑀜𑁆𑀘𑀁 𑀯𑀸’’𑀢𑀺𑀆𑀤𑀺 𑀅𑀚𑁆𑀛𑁄𑀓𑀸𑀲𑀢𑁆𑀢𑀸 𑀯𑀺𑀳𑀸𑀭𑀩𑁆𑀪𑀦𑁆𑀢𑀭𑁂𑀧𑀺 𑀆𑀧𑀚𑁆𑀚𑀦𑀢𑁄 𑀮𑁂𑀟𑁆𑀟𑀼𑀧𑀸𑀢𑀸𑀢𑀺𑀓𑁆𑀓𑀫𑀯𑀲𑁂𑀦 𑀯𑀼𑀢𑁆𑀢𑀁. 𑀤𑀼𑀢𑀺𑀬𑁂 𑀲𑁂𑀬𑁆𑀬𑀁 𑀲𑀦𑁆𑀣𑀭𑀺𑀢𑁆𑀯𑀸𑀢𑀺 𑀅𑀩𑁆𑀪𑀦𑁆𑀢𑀭𑁂 𑀲𑀦𑁆𑀣𑀭𑀺𑀢𑀪𑀸𑀯𑀢𑁄 𑀯𑀺𑀳𑀸𑀭𑀢𑁄 𑀩𑀳𑀺𑀕𑀫𑀦𑁂𑀧𑀺 𑀢𑀁𑀤𑀺𑀯𑀲𑀸𑀦𑀸𑀕𑀫𑁂 𑀆𑀧𑀚𑁆𑀚𑀦𑀢𑁄 ‘‘𑀧𑀭𑀺𑀓𑁆𑀔𑁂𑀧𑀁 𑀅𑀢𑀺𑀓𑁆𑀓𑀸𑀫𑁂𑀢𑀻’’𑀢𑀺 𑀯𑀼𑀢𑁆𑀢𑀁.
𑁧𑁭𑁧. 𑀲𑀜𑁆𑀘𑀺𑀘𑁆𑀘 𑀧𑀸𑀡𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀦𑁆𑀢𑁄 𑀘𑀢𑀲𑁆𑀲𑁄 𑀆𑀧𑀢𑁆𑀢𑀺𑀬𑁄𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀢𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀢𑀺𑀭𑀘𑁆𑀙𑀸𑀦𑀕𑀢𑀧𑀸𑀡𑁄𑀯 𑀅𑀥𑀺𑀧𑁆𑀧𑁂𑀢𑁄, 𑀅𑀣 𑀔𑁄 𑀧𑀸𑀡𑁄𑀢𑀺 𑀯𑁄𑀳𑀸𑀭𑀲𑀸𑀫𑀜𑁆𑀜𑀢𑁄 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 ‘‘𑀘𑀢𑀲𑁆𑀲𑁄’’𑀢𑀺 𑀯𑀼𑀢𑁆𑀢𑀁. 𑀏𑀲 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼.
𑁧𑁭𑁩. 𑀯𑀺𑀓𑀸𑀮𑁂 𑀕𑀸𑀫𑀧𑁆𑀧𑀯𑁂𑀲𑀦𑁂 ‘‘𑀧𑀞𑀫𑀁 𑀧𑀸𑀤𑀁 𑀧𑀭𑀺𑀓𑁆𑀔𑁂𑀧𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀉𑀧𑀘𑀸𑀭𑁂 𑀦𑀸𑀧𑀚𑁆𑀚𑀢𑀺, 𑀧𑀭𑀺𑀓𑁆𑀔𑁂𑀧𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀯 𑀆𑀧𑀚𑁆𑀚𑀢𑀻𑀢𑀺 𑀲𑀺𑀤𑁆𑀥𑀫𑁂𑀯𑀸’’𑀢𑀺 𑀯𑀤𑀦𑁆𑀢𑀺.
𑁧𑁯𑁩. 𑀧𑀘𑁆𑀘𑀬𑀯𑀸𑀭𑁂 𑀧𑀼𑀭𑀺𑀫𑀯𑀸𑀭𑀢𑁄 𑀯𑀺𑀲𑁂𑀲𑁄 𑀅𑀢𑁆𑀣𑀺𑀬𑁂𑀯, ‘‘𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑁄 𑀓𑀢𑀺 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑁂 𑀚𑀢𑀼𑀫𑀝𑁆𑀞𑀓𑀲𑁆𑀲𑁄𑀓𑀸𑀲𑁄 𑀦 𑀚𑀸𑀢𑁄, 𑀇𑀥 𑀧𑀦 ‘‘𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑀧𑀘𑁆𑀘𑀬𑀸’’𑀢𑀺 𑀯𑀼𑀢𑁆𑀢𑁂 𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑀸𑀪𑀸𑀯𑀸 𑀚𑀢𑀼𑀫𑀝𑁆𑀞𑀓𑀜𑁆𑀘 𑀧𑀯𑀺𑀝𑁆𑀞𑀁, 𑀏𑀯𑀁 𑀯𑀺𑀲𑁂𑀲𑁄 𑀅𑀢𑁆𑀣𑀺. 𑀢𑀣𑀸 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼.
𑀫𑀳𑀸𑀯𑀺𑀪𑀗𑁆𑀕𑁂 𑀘 𑀪𑀺𑀓𑁆𑀔𑀼𑀦𑀺𑀯𑀺𑀪𑀗𑁆𑀕𑁂 𑀲𑁄𑀴𑀲𑀫𑀳𑀸𑀯𑀸𑀭𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑀲𑀫𑀼𑀝𑁆𑀞𑀸𑀦𑀲𑀻𑀲𑀯𑀡𑁆𑀡𑀦𑀸
𑁨𑁫𑁭. 𑀅𑀦𑀢𑁆𑀢𑀸𑀢𑀺 𑀅𑀢𑁆𑀢𑀯𑀺𑀭𑀳𑀺𑀢𑀸 ‘‘𑀅𑀮𑀯𑀡𑀪𑁄𑀚𑀦’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀓𑀭𑀼𑀡𑀸𑀲𑀻𑀢𑀮𑀪𑀸𑀯𑁂𑀦 𑀘𑀦𑁆𑀤𑀲𑀤𑀺𑀲𑁄. 𑀓𑀺𑀮𑁂𑀲𑀢𑀺𑀫𑀺𑀭𑀧𑁆𑀧𑀳𑀸𑀦𑀢𑁄 𑀆𑀤𑀺𑀘𑁆𑀘𑁄. 𑀬𑀲𑁆𑀫𑀸 𑀢𑁂 𑀤𑁂𑀲𑀬𑀦𑁆𑀢𑀺, 𑀢𑀲𑁆𑀫𑀸 𑀅𑀗𑁆𑀕𑀻𑀭𑀲𑁄𑀧𑀺. 𑀧𑀺𑀝𑀓𑁂 𑀢𑀻𑀡𑀺 𑀤𑁂𑀲𑀬𑀺 𑀢𑁂𑀲𑀁 𑀅𑀜𑁆𑀜𑀢𑀭𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀯𑀺𑀦𑀬𑁄 𑀬𑀤𑀺 𑀢𑀺𑀝𑁆𑀞𑀢𑀺, 𑀏𑀯𑀁 𑀧𑀝𑀺𑀧𑀢𑁆𑀢𑀺𑀲𑀤𑁆𑀥𑀫𑁆𑀫𑀸𑀤𑀺 𑀦𑀻𑀬𑀢𑀺 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀅𑀬𑀁 𑀧𑀦 𑀓𑀣𑀁 𑀢𑀺𑀝𑁆𑀞𑀢𑀻𑀢𑀺? 𑀆𑀳 ‘‘𑀉𑀪𑀢𑁄 𑀘𑀸’’𑀢𑀺𑀆𑀤𑀺. 𑀧𑀭𑀺𑀯𑀸𑀭𑁂𑀦 𑀕𑀦𑁆𑀣𑀺𑀢𑀸 𑀢𑀺𑀝𑁆𑀞𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀢𑀲𑁆𑀲𑁂𑀯 𑀧𑀭𑀺𑀯𑀸𑀭𑀲𑁆𑀲 𑀲𑀼𑀢𑁆𑀢𑁂. 𑀦𑀺𑀬𑀢𑀲𑀫𑀼𑀝𑁆𑀞𑀸𑀦𑀁 𑀓𑀢𑀁, 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀲𑀫𑁆𑀪𑀺𑀦𑁆𑀦𑀲𑀫𑀼𑀝𑁆𑀞𑀸𑀦𑀸𑀦𑀺 𑀅𑀲𑀗𑁆𑀓𑀭𑀲𑀫𑀼𑀝𑁆𑀞𑀸𑀦𑀸𑀦𑀺, 𑀅𑀜𑁆𑀜𑁂𑀳𑀺 𑀅𑀲𑀤𑀺𑀲𑀲𑀫𑀼𑀝𑁆𑀞𑀸𑀦𑀸𑀦𑀻𑀢𑀺 𑀅𑀢𑁆𑀣𑁄. 𑀬𑀲𑁆𑀫𑀸 𑀧𑀭𑀺𑀯𑀸𑀭𑁂 𑀲𑀢𑀺 𑀯𑀺𑀦𑀬𑁄 𑀢𑀺𑀝𑁆𑀞𑀢𑀺, 𑀯𑀺𑀦𑀬𑁂 𑀲𑀢𑀺 𑀲𑀤𑁆𑀥𑀫𑁆𑀫𑁄 𑀢𑀺𑀝𑁆𑀞𑀢𑀺, 𑀬𑀲𑁆𑀫𑀸 𑀲𑀫𑀼𑀝𑁆𑀞𑀸𑀦𑀸𑀦𑀺 𑀘 𑀲𑀼𑀢𑁆𑀢𑁂 𑀤𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 𑀲𑀺𑀓𑁆𑀔𑁂𑀢𑀺 𑀅𑀢𑁆𑀣𑁄. ‘‘𑀥𑀫𑁆𑀫𑀓𑀸𑀫𑁄 𑀲𑀼𑀧𑁂𑀲𑀮𑁄’’𑀢𑀺 𑀧𑀭𑀺𑀯𑀸𑀭𑁂 𑀕𑀸𑀭𑀯𑀚𑀦𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀢𑁆𑀣𑀸𑀢𑀺 ‘‘𑀤𑀺𑀲𑁆𑀲𑀦𑁆𑀢𑀻’’𑀢𑀺 𑀢𑀢𑁆𑀣. ‘‘𑀏𑀓𑁂𑀦 𑀲𑀫𑀼𑀝𑁆𑀞𑀸𑀦𑁂𑀦 𑀲𑀫𑀼𑀝𑁆𑀞𑀸𑀢𑀻𑀢𑀺 𑀧𑀞𑀫𑀧𑀸𑀭𑀸𑀚𑀺𑀓𑀁 𑀏𑀓𑁂𑀦 𑀲𑀫𑀼𑀝𑁆𑀞𑀸𑀦𑁂𑀦 𑀲𑀫𑀼𑀝𑁆𑀞𑀸𑀢𑀻’’𑀢𑀺 𑀯𑀼𑀢𑁆𑀢𑀁. 𑀧𑀸𑀴𑀺𑀬𑀜𑁆𑀳𑀺 𑀦𑀺𑀤𑁆𑀤𑀺𑀝𑁆𑀞𑀲𑀫𑀼𑀝𑁆𑀞𑀸𑀦𑀜𑁆𑀘 𑀤𑀺𑀲𑁆𑀲𑀢𑀺. ‘‘𑀢𑀲𑁆𑀲𑁂𑀯 𑀧𑀭𑀺𑀯𑀸𑀭𑀲𑁆𑀲, 𑀲𑀫𑀼𑀝𑁆𑀞𑀸𑀦𑀁 𑀦𑀺𑀬𑀢𑁄 𑀓𑀢’’𑀦𑁆𑀢𑀺 𑀯𑀼𑀢𑁆𑀢𑀁 𑀧𑀼𑀭𑀺𑀫𑀦𑀬𑁂𑀢𑀺 𑀅𑀢𑁆𑀣𑁄. 𑀬𑀣𑀸𑀜𑀸𑀬𑀦𑁆𑀢𑀺 𑀬𑀣𑀸𑀪𑀽𑀢𑀁. ‘‘𑀲𑀜𑁆𑀘𑀭𑀺𑀢𑁆𑀢𑀸𑀪𑀸𑀲𑀦𑀜𑁆𑀘𑀸’’𑀢𑀺 𑀧𑀸𑀞𑁄. ‘‘𑀲𑀜𑁆𑀘𑀭𑀺𑀢𑁆𑀢𑀸𑀦𑀼𑀪𑀸𑀲𑀦𑀜𑁆𑀘𑀸’’𑀢𑀺𑀧𑀺 𑀅𑀢𑁆𑀣𑀺. 𑀦𑀬𑀯𑀚𑁆𑀚𑁂𑀳𑀺 𑀯𑀺𑀦𑀬𑀯𑀚𑁆𑀚𑁂𑀳𑀻𑀢𑀺 𑀅𑀢𑁆𑀣𑁄.
𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀯𑀡𑁆𑀡𑀦𑀸
𑁨𑁫𑁮. 𑀦𑀸𑀦𑀼𑀩𑀦𑁆𑀥𑁂 𑀧𑀯𑀢𑁆𑀢𑀺𑀦𑀺𑀦𑁆𑀢𑀺 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀯𑀼𑀢𑁆𑀣𑀸𑀧𑀺𑀢𑀁 𑀧𑀯𑀢𑁆𑀢𑀺𑀦𑀺𑀁 𑀤𑁆𑀯𑁂 𑀯𑀲𑁆𑀲𑀸𑀦𑀺 𑀦𑀸𑀦𑀼𑀩𑀦𑁆𑀥𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑀜𑁆𑀘. 𑀅𑀬𑀁 𑀧𑀸𑀞𑁄 𑀏𑀓𑀘𑁆𑀘𑁂𑀲𑀼 𑀧𑁄𑀢𑁆𑀣𑀓𑁂𑀲𑀼 𑀦 𑀤𑀺𑀲𑁆𑀲𑀢𑀺. 𑀙𑀲𑀢𑁆𑀢𑀢𑀺 𑀧𑀞𑀫𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀸.
𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀲𑀫𑀼𑀝𑁆𑀞𑀸𑀦𑀯𑀡𑁆𑀡𑀦𑀸
𑁨𑁫𑁯. ‘‘𑀓𑀼𑀓𑁆𑀓𑀼𑀘𑁆𑀘𑀁 𑀘𑀻𑀯𑀭𑀁 𑀤𑀢𑁆𑀯𑀸𑀢𑀺 𑀓𑀼𑀓𑁆𑀓𑀼𑀘𑁆𑀘𑀼𑀧𑁆𑀧𑀸𑀤𑀦𑀜𑁆𑀘 𑀥𑀫𑁆𑀫𑀺𑀓𑀸𑀦𑀁 𑀓𑀫𑁆𑀫𑀸𑀦𑀁 𑀙𑀦𑁆𑀤𑀁 𑀤𑀢𑁆𑀯𑀸 𑀔𑀻𑀬𑀦𑀜𑁆𑀘 𑀘𑀻𑀯𑀭𑀁 𑀤𑀢𑁆𑀯𑀸 𑀔𑀻𑀬𑀦𑀜𑁆𑀘𑀸’’𑀢𑀺 𑀧𑀸𑀞𑁄. ‘‘𑀤𑀢𑁆𑀯𑀸’’𑀢𑀺 𑀉𑀧𑁆𑀧𑀝𑀺𑀧𑀸𑀝𑀺𑀬𑀸 𑀯𑀼𑀢𑁆𑀢𑀁, 𑀢𑀲𑁆𑀫𑀸 ‘‘𑀓𑀼𑀓𑁆𑀓𑀼𑀘𑁆𑀘𑀁 𑀥𑀫𑁆𑀫𑀺𑀓𑀁 𑀤𑀢𑁆𑀯𑀸𑀢𑀺 𑀧𑀸𑀞𑁄 𑀲𑀼𑀦𑁆𑀤𑀭𑁄’’𑀢𑀺 𑀯𑀤𑀦𑁆𑀢𑀺, 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.
𑁨𑁬𑁯. 𑀅𑀓𑀢𑀦𑁆𑀢𑀺 𑀅𑀪𑀺𑀦𑀯𑀁.
𑀅𑀦𑁆𑀢𑀭𑀧𑁂𑀬𑁆𑀬𑀸𑀮𑀁
𑀓𑀢𑀺𑀧𑀼𑀘𑁆𑀙𑀸𑀯𑀸𑀭𑀯𑀡𑁆𑀡𑀦𑀸
𑁨𑁭𑁧. 𑀧𑀝𑀺𑀦𑀺𑀤𑁆𑀤𑁂𑀲𑀦𑁆𑀢𑀺 𑀧𑀼𑀦𑀧𑁆𑀧𑀼𑀦𑀁 𑀦𑀺𑀤𑁆𑀤𑀺𑀲𑀦𑀁. 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀯𑀺𑀦𑀻𑀢𑀸𑀦𑀺 𑀲𑀁𑀯𑀭𑀸𑀦𑀻𑀢𑀺 𑀅𑀢𑁆𑀣𑁄. 𑀏𑀢𑁂𑀳𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺. ‘‘𑀆𑀭𑀓𑀸’’𑀢𑀺 𑀦𑀺𑀯𑀢𑁆𑀢𑀺𑀅𑀢𑁆𑀣𑁂𑀦 𑀯𑀼𑀢𑁆𑀢𑀢𑁆𑀢𑀸 𑀢𑀁 𑀧𑀼𑀦 𑀲𑀭𑀽𑀧𑁂𑀦 𑀯𑀢𑁆𑀢𑀼𑀓𑀸𑀫𑁄 ‘‘𑀪𑀼𑀲𑀸 𑀯𑀸’’𑀢𑀺 𑀆𑀳. ‘‘𑀕𑁂𑀳𑀁 𑀥𑀽𑀫𑁂𑀦 𑀧𑀼𑀡𑁆𑀡𑀁 𑀆𑀥𑀽𑀫𑀺𑀢’’𑀦𑁆𑀢𑀺𑀆𑀤𑀻𑀲𑀼 𑀯𑀺𑀬 𑀭𑀸𑀕𑀸𑀤𑀺𑀯𑁂𑀭𑀁 𑀫𑀡𑀢𑀺 𑀯𑀺𑀦𑀸𑀲𑁂𑀢𑀺. 𑀏𑀢𑀸𑀬𑀸𑀢𑀺 𑀯𑀺𑀭𑀢𑀺𑀬𑀸. 𑀯𑁂𑀮 𑀘𑀮𑀦𑁂. 𑀦𑀺𑀬𑁆𑀬𑀸𑀦𑀁 𑀫𑀕𑁆𑀕𑀁 𑀲𑀺𑀦𑁄𑀢𑀺 𑀩𑀦𑁆𑀥𑀢𑀻𑀢𑀺 𑀲𑁂𑀢𑀼. ‘‘𑀲𑁂𑀢𑀼𑀖𑀸𑀢𑁄𑀢𑀺 𑀯𑀻𑀢𑀺𑀓𑁆𑀓𑀫𑀧𑀝𑀺𑀧𑀓𑁆𑀔𑀪𑀽𑀢𑀸 𑀯𑀺𑀭𑀢𑀺, 𑀢𑀤𑀢𑁆𑀣𑀦𑀺𑀩𑁆𑀩𑀢𑁆𑀢𑀺𑀓𑀭𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀯𑀸’’𑀢𑀺 𑀯𑀼𑀢𑁆𑀢𑀁. ‘‘𑀥𑀫𑁆𑀫𑀲𑁆𑀲𑀯𑀦𑀕𑁆𑀕𑀦𑁆𑀢𑀺 𑀥𑀫𑁆𑀫𑀁 𑀲𑀼𑀡𑀦𑁆𑀢𑀸𑀦𑀁 𑀲𑀫𑀽𑀳’’𑀦𑁆𑀢𑀺 𑀮𑀺𑀔𑀺𑀢𑀁. 𑀲𑀘𑁂 𑀦 𑀕𑀘𑁆𑀙𑀢𑀺, 𑀯𑀺𑀓𑁆𑀔𑀺𑀢𑁆𑀢𑁄 𑀯𑀸 𑀦𑀺𑀲𑀻𑀤𑀢𑀺. 𑀓𑀸𑀬𑀧𑁆𑀧𑀸𑀕𑀩𑁆𑀪𑀺𑀬𑀁 𑀓𑀸𑀬𑀤𑀼𑀘𑁆𑀘𑀭𑀺𑀢𑀁. ‘‘𑀧𑀫𑀸𑀤𑁂’’𑀢𑀺 𑀯𑀢𑁆𑀯𑀸 𑀢𑀤𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 ‘‘𑀲𑀢𑀺𑀯𑀺𑀧𑁆𑀧𑀯𑀸𑀲𑁂’’𑀢𑀺 𑀯𑀼𑀢𑁆𑀢𑀁.
𑁨𑁭𑁨-𑁩. 𑀲𑀧𑀭𑀲𑀦𑁆𑀢𑀸𑀦𑁂 𑀯𑀸𑀢𑀺 𑀲𑀲𑀦𑁆𑀢𑀸𑀦𑁂 𑀯𑀸 𑀧𑀭𑀲𑀦𑁆𑀢𑀸𑀦𑁂 𑀯𑀸. 𑀢𑀣𑀸 𑀯𑀺𑀯𑀤𑀦𑁆𑀢𑀸 𑀧𑀦𑀸𑀢𑀺 𑀪𑁂𑀤𑀓𑀭𑀯𑀢𑁆𑀣𑀽𑀦𑀺 𑀦𑀺𑀲𑁆𑀲𑀸𑀬 𑀯𑀺𑀯𑀤𑀦𑁆𑀢𑀸. 𑀉𑀪𑀬𑁂𑀳𑀺𑀧𑀻𑀢𑀺 𑀣𑁂𑀭𑀦𑀯𑁂𑀳𑀺. 𑀦𑀦𑁆𑀢𑀺 𑀫𑁂𑀢𑁆𑀢𑀁 𑀓𑀸𑀬𑀓𑀫𑁆𑀫𑀁. 𑀬𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀧𑀺𑀬𑀁 𑀓𑀭𑁄𑀢𑀺, 𑀢𑁂𑀲𑀁 𑀫𑁂𑀢𑁆𑀢𑀸𑀓𑀸𑀬𑀓𑀫𑁆𑀫𑀲𑀗𑁆𑀔𑀸𑀢𑁄 𑀥𑀫𑁆𑀫𑁄. 𑀏𑀢𑁆𑀢𑀓𑀦𑁆𑀢𑀺 𑀆𑀫𑀺𑀲𑀯𑀺𑀪𑀢𑁆𑀢𑀺𑀤𑀲𑁆𑀲𑀦𑀁. 𑀅𑀲𑀼𑀓𑀲𑁆𑀲 𑀘𑀸𑀢𑀺 𑀧𑀼𑀕𑁆𑀕𑀮𑀯𑀺𑀪𑀢𑁆𑀢𑀺𑀤𑀲𑁆𑀲𑀦𑀁. ‘‘𑀤𑀼𑀲𑁆𑀲𑀻𑀮𑀲𑁆𑀲 𑀅𑀤𑀸𑀢𑀼𑀫𑁆𑀧𑀺 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀏𑀯 𑀅𑀮𑀚𑁆𑀚𑀺𑀧𑀭𑀺𑀪𑁄𑀕𑁄 𑀯𑀸𑀭𑀺𑀢𑁄. 𑀲𑀩𑁆𑀩𑁂𑀲𑀁 𑀤𑀸𑀢𑀩𑁆𑀩𑀫𑁂𑀯𑀸𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑁂𑀦 𑀅𑀚𑀸𑀦𑀦𑁆𑀢𑁂𑀦 𑀯𑀺𑀪𑀸𑀕𑀁 𑀅𑀓𑀢𑁆𑀯𑀸 𑀤𑀸𑀢𑀩𑁆𑀩𑀪𑀸𑀯𑀁 𑀤𑀻𑀧𑁂𑀢𑀻𑀢𑀺 𑀏𑀓𑁂. ‘‘𑀲𑀩𑁆𑀩𑁂𑀲𑀁 𑀤𑀸𑀢𑀩𑁆𑀩𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀲𑀼. 𑀢𑀢𑁆𑀣 ‘‘𑀅𑀮𑀚𑁆𑀚𑀺𑀉𑀓𑁆𑀔𑀺𑀢𑁆𑀢𑀓𑀸𑀦𑀁 𑀧𑀭𑀺𑀪𑁄𑀕𑀲𑀻𑀲𑁂𑀦 𑀲𑀳𑀢𑁆𑀣𑀸 𑀦 𑀤𑀸𑀢𑀩𑁆𑀩𑀁, 𑀤𑀸𑀧𑁂𑀢𑀩𑁆𑀩𑀦𑁆𑀢𑀺 𑀅𑀧𑀭𑁂’’𑀢𑀺 𑀯𑀼𑀢𑁆𑀢𑀁. 𑀯𑀺𑀘𑀺𑀦𑀺𑀢𑁆𑀯𑀸 𑀤𑀸𑀦𑀁 𑀯𑀺𑀘𑁂𑀬𑁆𑀬 𑀤𑀸𑀦𑀁. 𑀬𑀲𑁆𑀫𑀸 𑀅𑀬𑀁 𑀯𑀺𑀲𑁂𑀲𑁄 𑀓𑀸𑀢𑀩𑁆𑀩𑁄𑀬𑁂𑀯𑀸𑀢𑀺 𑀅𑀬𑀁 𑀓𑀭𑁄𑀢𑀺, 𑀢𑀲𑁆𑀫𑀸 𑀧𑀼𑀕𑁆𑀕𑀮𑀯𑀺𑀪𑀸𑀕𑁄 𑀦 𑀓𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀧𑀓𑀢𑀺𑀯𑀡𑁆𑀡𑁂𑀦 𑀯𑀺𑀲𑀪𑀸𑀕𑀯𑀡𑁆𑀡𑁂𑀦. ‘‘𑀇𑀤𑀁 𑀦𑀸𑀫 𑀆𑀧𑀦𑁆𑀦𑁄’’𑀢𑀺 𑀧𑀭𑁂𑀳𑀺 𑀅𑀧𑀭𑀸𑀫𑀲𑀺𑀢𑀩𑁆𑀩𑀢𑁄 𑀅𑀧𑀭𑀸𑀫𑀝𑁆𑀞𑀸𑀦𑀺. 𑀅𑀦𑀼𑀮𑁄𑀫𑁂𑀳𑀺 𑀕𑀳𑀺𑀢𑀲𑀗𑁆𑀔𑀸𑀭𑀸𑀭𑀫𑁆𑀫𑀡𑁂𑀳𑀺 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀓𑀢𑁆𑀯𑀸 𑀦𑀺𑀬𑁆𑀬𑀸𑀢𑀺.
𑀙𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀯𑀸𑀭𑀸𑀤𑀺𑀯𑀡𑁆𑀡𑀦𑀸
𑁨𑁭𑁬. ‘‘𑀧𑀞𑀫𑁂𑀦 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑁂𑀦 𑀤𑀼𑀩𑁆𑀪𑀸𑀲𑀺𑀢𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺 𑀦 𑀳𑀻𑀢𑀺 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁 𑀯𑀸𑀘𑀸𑀘𑀺𑀢𑁆𑀢𑀯𑀲𑁂𑀦𑁂𑀯𑀸𑀧𑀚𑁆𑀚𑀺𑀢𑀩𑁆𑀩𑀢𑁄.
𑁨𑁭𑁭. 𑀓𑀼𑀝𑀺𑀁 𑀓𑀭𑁄𑀢𑀻𑀢𑀺 𑀏𑀢𑁆𑀣 𑀲𑀜𑁆𑀘𑀭𑀺𑀢𑁆𑀢𑀫𑀯𑀢𑁆𑀯𑀸 𑀤𑀼𑀓𑁆𑀓𑀝𑀣𑀼𑀮𑁆𑀮𑀘𑁆𑀘𑀬𑀲𑀗𑁆𑀖𑀸𑀤𑀺𑀲𑁂𑀲𑀸𑀦𑀁 𑀏𑀓𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀝𑀺𑀧𑀸𑀝𑀺𑀬𑀸 𑀉𑀧𑁆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀫𑀺𑀤𑀁 𑀯𑀼𑀢𑁆𑀢𑀁. 𑀦 𑀳𑀺 𑀲𑀜𑁆𑀘𑀭𑀺𑀢𑁆𑀢𑁂 𑀏𑀯 𑀆𑀧𑀚𑁆𑀚𑀢𑀺. ‘‘𑀇𑀫𑀺𑀦𑀸 𑀧𑀦 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀧𑀝𑀺𑀧𑀸𑀝𑀺𑀬𑀸 𑀅𑀕𑁆𑀕𑀳𑀡𑁂 𑀓𑀸𑀭𑀡𑀁 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁.
𑁨𑁮𑁩. 𑀯𑀺𑀯𑁂𑀓𑀤𑀲𑁆𑀲𑀺𑀦𑀸𑀢𑀺 𑀢𑀤𑀗𑁆𑀕𑀯𑀺𑀯𑁂𑀓𑀸𑀤𑀺𑀧𑀜𑁆𑀘𑀯𑀺𑀥𑀯𑀺𑀯𑁂𑀓𑀤𑀲𑁆𑀲𑀺𑀦𑀸.
𑁨𑁮𑁪. 𑀅𑀢𑁆𑀢𑀦𑁄 𑀤𑀼𑀝𑁆𑀞𑀼𑀮𑁆𑀮𑀦𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀁.
𑁨𑁮𑁮. 𑀯𑀺𑀯𑀸𑀤𑀸𑀥𑀺𑀓𑀭𑀡𑀧𑀘𑁆𑀘𑀬𑀸𑀢𑀺 𑀅𑀜𑁆𑀜𑁂𑀳𑀺, 𑀅𑀢𑁆𑀢𑀦𑀸 𑀯𑀸 𑀧𑀼𑀩𑁆𑀩𑀪𑀸𑀕𑁂 𑀆𑀧𑀦𑁆𑀦𑀧𑀘𑁆𑀘𑀬𑀸𑀢𑀺 𑀅𑀢𑁆𑀣𑁄. 𑀑𑀫𑀲𑀢𑀻𑀢𑀺 ‘‘𑀅𑀬𑀁 𑀥𑀫𑁆𑀫𑁄, 𑀅𑀬𑀁 𑀯𑀺𑀦𑀬𑁄’’𑀢𑀺 𑀯𑀺𑀯𑀤𑀦𑁆𑀢𑁄 ‘‘𑀢𑁆𑀯𑀁 𑀓𑀺𑀁 𑀚𑀸𑀦𑀸𑀲𑀻’’𑀢𑀺𑀆𑀤𑀺𑀦𑀸 𑀑𑀫𑀲𑀢𑀺. 𑀢𑀻𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑀧𑀝𑀺𑀜𑁆𑀜𑀸𑀢𑀓𑀭𑀡𑀢𑀺𑀡𑀯𑀢𑁆𑀣𑀸𑀭𑀓𑁂𑀳𑀺. ‘‘𑀲𑀫𑁆𑀫𑀼𑀔𑀸𑀯𑀺𑀦𑀬𑀜𑁆𑀘𑁂𑀢𑁆𑀣 𑀲𑀩𑁆𑀩𑀢𑁆𑀣 𑀇𑀘𑁆𑀙𑀺𑀢𑀩𑁆𑀩𑀢𑁄 ‘𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘𑁂𑀯 𑀧𑀝𑀺𑀜𑁆𑀜𑀸𑀢𑀓𑀭𑀡𑁂𑀦 𑀘𑀸’𑀢𑀺𑀆𑀤𑀺𑀦𑀸 𑀤𑁆𑀯𑀻𑀳𑀺𑀧𑀺 𑀬𑁄𑀚𑀺𑀢𑀁. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣𑀸’’𑀢𑀺 𑀯𑀼𑀢𑁆𑀢𑀁.
𑁨𑁯𑁧. 𑀞𑀧𑁂𑀢𑁆𑀯𑀸 𑀲𑀢𑁆𑀢 𑀆𑀧𑀢𑁆𑀢𑀺𑀬𑁄𑀢𑀺 𑀏𑀢𑁆𑀣 ‘‘𑀓𑀺𑀜𑁆𑀘𑀸𑀧𑀺 𑀅𑀯𑀲𑁂𑀲𑀸 𑀦𑀢𑁆𑀣𑀺, 𑀢𑀣𑀸𑀧𑀺 𑀧𑀝𑀺𑀧𑀸𑀝𑀺𑀬𑀸 𑀧𑀸𑀝𑀯𑀚𑀦𑀦𑀢𑁆𑀣𑀁 𑀧𑀼𑀘𑁆𑀙𑀸 𑀓𑀢𑀸’’𑀢𑀺 𑀯𑀼𑀢𑁆𑀢𑀁.
𑀅𑀦𑁆𑀢𑀭𑀧𑁂𑀬𑁆𑀬𑀸𑀮𑀁 𑀦𑀺𑀝𑁆𑀞𑀺𑀢𑀁.
𑀲𑀫𑀣𑀪𑁂𑀤𑀯𑀡𑁆𑀡𑀦𑀸
𑀅𑀥𑀺𑀓𑀭𑀡𑀧𑀭𑀺𑀬𑀸𑀬𑀯𑀸𑀭𑀸𑀤𑀺𑀯𑀡𑁆𑀡𑀦𑀸
𑁨𑁯𑁩-𑁪. 𑀮𑁄𑀪𑀓𑀸𑀭𑀡𑀸 𑀯𑀺𑀯𑀸𑀤𑀦𑀢𑁄 ‘‘𑀮𑁄𑀪𑁄 𑀧𑀼𑀩𑁆𑀩𑀗𑁆𑀕𑀫𑁄’’𑀢𑀺 𑀯𑀼𑀢𑁆𑀢𑀁. 𑀏𑀯𑀁 𑀲𑁂𑀲𑁂𑀲𑀼. 𑀞𑀸𑀦𑀸𑀦𑀻𑀢𑀺𑀆𑀤𑀻𑀦𑀺 𑀓𑀸𑀭𑀡𑀯𑁂𑀯𑀘𑀦𑀸𑀦𑀺. 𑀓𑀸𑀭𑀡𑀜𑁆𑀳𑀺 𑀢𑀺𑀝𑁆𑀞𑀦𑁆𑀢𑀺 𑀏𑀢𑁆𑀣𑀸𑀢𑀺 𑀞𑀸𑀦𑀁, 𑀯𑀲𑀦𑁆𑀢𑀺 𑀏𑀢𑁆𑀣𑀸𑀢𑀺 𑀯𑀢𑁆𑀣𑀼, 𑀪𑀯𑀦𑁆𑀢𑀺 𑀏𑀢𑁆𑀣𑀸𑀢𑀺 𑀪𑀽𑀫𑀻𑀢𑀺 𑀯𑀼𑀘𑁆𑀘𑀢𑀺. 𑀓𑁂 𑀢𑀺𑀝𑁆𑀞𑀦𑁆𑀢𑀺 𑀯𑀲𑀦𑁆𑀢𑀺 𑀪𑀯𑀦𑁆𑀢𑀺 𑀘𑀸𑀢𑀺? 𑀯𑀺𑀯𑀸𑀤𑀸𑀥𑀺𑀓𑀭𑀡𑀸𑀤𑀬𑁄. 𑀓𑀼𑀲𑀮𑀸𑀓𑀼𑀲𑀮𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀯𑀺𑀯𑀤𑀦𑀢𑁄 ‘‘𑀦𑀯 𑀳𑁂𑀢𑀽’’𑀢𑀺 𑀯𑀼𑀢𑁆𑀢𑀁. 𑀓𑁄𑀥𑀦𑁄 𑀳𑁄𑀢𑀺 𑀉𑀧𑀦𑀸𑀳𑀻𑀢𑀺𑀆𑀤𑀻𑀦𑀺 𑀤𑁆𑀯𑀸𑀤𑀲 𑀫𑀽𑀮𑀸𑀦𑀺. 𑀅𑀓𑁆𑀓𑁄𑀲𑀦𑁆𑀢𑁂𑀦 𑀳𑀺 𑀘𑀢𑀽𑀲𑀼 𑀯𑀺𑀧𑀢𑁆𑀢𑀻𑀲𑀼 𑀏𑀓𑁂𑀦 𑀅𑀦𑀼𑀯𑀤𑀦𑀢𑁄 ‘‘𑀘𑀢𑀲𑁆𑀲𑁄 𑀯𑀺𑀧𑀢𑁆𑀢𑀺𑀬𑁄 𑀞𑀸𑀦𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀘𑀼𑀤𑁆𑀤𑀲 𑀫𑀽𑀮𑀸𑀦𑀻𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑁂 𑀯𑀼𑀢𑁆𑀢𑀸 𑀤𑁆𑀯𑀸𑀤𑀲, 𑀓𑀸𑀬𑁄, 𑀯𑀸𑀘𑀸 𑀘.
𑁨𑁯𑁫-𑁬. 𑀲𑀢𑁆𑀢 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀞𑀸𑀦𑀸𑀦𑀻𑀢𑀺 𑀏𑀢𑁆𑀣 ‘‘𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀲𑁆𑀲 𑀬𑀸 𑀆𑀧𑀢𑁆𑀢𑀺 𑀳𑁄𑀢𑀺, 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀧𑀼𑀩𑁆𑀩𑁂 𑀆𑀧𑀦𑁆𑀦𑀸 𑀆𑀧𑀢𑁆𑀢𑀺 𑀞𑀸𑀦𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀦𑀢𑁆𑀣𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀼𑀲𑀮𑀦𑁆𑀢𑀺 𑀯𑀘𑀦𑀢𑁄 𑀦𑀢𑁆𑀣𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀓𑀼𑀲𑀮𑀳𑁂𑀢𑀼, 𑀓𑀼𑀲𑀮𑀘𑀺𑀢𑁆𑀢𑀁 𑀧𑀦 𑀅𑀗𑁆𑀕𑀁 𑀳𑁄𑀢𑀻’’𑀢𑀺 𑀮𑀺𑀔𑀺𑀢𑀁. 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 𑀞𑀸𑀦𑀸𑀦𑀻𑀢𑀺 𑀏𑀢𑁆𑀣 ‘‘𑀏𑀯𑀁 𑀓𑀢𑁆𑀢𑀩𑁆𑀩𑀦𑁆𑀢𑀺 𑀞𑀺𑀢𑀧𑀸𑀴𑀺 𑀓𑀫𑁆𑀫𑀁 𑀦𑀸𑀫. ‘𑀬𑀣𑀸𑀞𑀺𑀢𑀧𑀸𑀴𑀺𑀯𑀲𑁂𑀦 𑀓𑀭𑁄𑀦𑁆𑀢𑀸𑀦𑀁 𑀓𑀺𑀭𑀺𑀬𑀸 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀦𑀸𑀫𑀸’’’𑀢𑀺 𑀯𑀼𑀢𑁆𑀢𑀁, ‘‘𑀧𑀸𑀴𑀺𑀅𑀦𑀼𑀲𑀸𑀭𑁂𑀦 𑀧𑀝𑀺𑀓𑀸𑀢𑀩𑁆𑀩𑀮𑀓𑁆𑀔𑀡𑀁 𑀯𑀸 𑀓𑀫𑁆𑀫𑀁. 𑀢𑀣𑁂𑀯 𑀓𑀭𑀡𑀁 𑀓𑀺𑀘𑁆𑀘𑀸𑀥𑀺𑀓𑀭𑀡’’𑀦𑁆𑀢𑀺 𑀘. 𑀜𑀢𑁆𑀢𑀺𑀜𑀢𑁆𑀢𑀺𑀤𑀼𑀢𑀺𑀬𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀸𑀦𑀺 𑀜𑀢𑁆𑀢𑀺𑀢𑁄 𑀚𑀸𑀬𑀦𑁆𑀢𑀺, 𑀅𑀧𑀮𑁄𑀓𑀦𑀓𑀫𑁆𑀫𑀁 𑀅𑀧𑀮𑁄𑀓𑀦𑀢𑁄, ‘‘𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀏𑀓𑁂𑀦 𑀲𑀫𑀣𑁂𑀦 𑀲𑀫𑁆𑀫𑀢𑀺 𑀲𑀫𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄’’𑀢𑀺 𑀮𑀺𑀔𑀺𑀢𑀁. 𑀲𑀺𑀬𑀼𑀦𑁆𑀢𑀺 𑀳𑁄𑀦𑁆𑀢𑀺. 𑀓𑀣𑀜𑁆𑀘 𑀲𑀺𑀬𑀸𑀢𑀺 𑀓𑀣𑀁 𑀳𑁄𑀢𑀺. 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲 𑀤𑁆𑀯𑁂𑀢𑀺 𑀢𑁂 𑀤𑁆𑀯𑁂 𑀞𑀧𑁂𑀢𑁆𑀯𑀸 𑀅𑀜𑁆𑀜𑁂𑀳𑀺 𑀦 𑀲𑀫𑁆𑀫𑀢𑀺.
𑁨𑁯𑁭. 𑀲𑀸𑀥𑀸𑀭𑀡𑀸𑀢𑀺 𑀢𑀁 𑀲𑀫𑁂𑀢𑀩𑁆𑀩𑀸.
𑁨𑁯𑁮. 𑀢𑀩𑁆𑀪𑀸𑀕𑀺𑀬𑀸𑀢𑀺 𑀢𑀁𑀓𑁄𑀝𑁆𑀞𑀸𑀲𑀸.
𑁨𑁯𑁯. 𑀏𑀓𑀸𑀥𑀺𑀓𑀭𑀡𑀁 𑀲𑀩𑁆𑀩𑁂 𑀲𑀫𑀣𑀸 𑀲𑀫𑀕𑁆𑀕𑀸 𑀳𑀼𑀢𑁆𑀯𑀸 𑀲𑀫𑁂𑀢𑀼𑀁 𑀪𑀩𑁆𑀩𑀸𑀢𑀺 𑀧𑀼𑀘𑁆𑀙𑀦𑁆𑀢𑁄 ‘‘𑀲𑀫𑀣𑀸 𑀲𑀫𑀣𑀲𑁆𑀲 𑀲𑀸𑀥𑀸𑀭𑀡𑀸’’𑀢𑀺 𑀆𑀳. 𑀲𑀫𑀣𑀸 𑀲𑀫𑀣𑀲𑁆𑀲𑀸 𑀲𑀺𑀬𑀸 𑀲𑀸𑀥𑀸𑀭𑀡𑀸 𑀲𑀺𑀬𑀸 𑀅𑀲𑀸𑀥𑀸𑀭𑀡𑀸.
𑁩𑁦𑁦. 𑀲𑀫𑀣𑀸 𑀲𑀫𑀣𑀲𑁆𑀲 𑀢𑀩𑁆𑀪𑀸𑀕𑀺𑀬𑀯𑀸𑀭𑁂𑀧𑀺 𑀏𑀲𑁂𑀯 𑀦𑀬𑁄.
𑁩𑁦𑁧. 𑀇𑀫𑁂 𑀲𑀫𑀣𑀸 𑀲𑀫𑀣𑀸, 𑀦 𑀲𑀫𑁆𑀫𑀼𑀔𑀸𑀯𑀺𑀦𑀬𑁄𑀢𑀺 𑀅𑀢𑁆𑀣𑁄.
𑁩𑁦𑁨. ‘‘𑀲𑀫𑀣𑀸 𑀯𑀺𑀦𑀬𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺, 𑀢𑀲𑁆𑀫𑀸 𑀯𑀺𑀦𑀬𑁄 𑀲𑀫𑁆𑀫𑀼𑀔𑀸𑀯𑀺𑀦𑀬𑁄𑀢𑀺 𑀯𑀺𑀦𑀬𑀯𑀸𑀭𑁄 𑀉𑀤𑁆𑀥𑀝𑁄 𑀲𑀺𑀬𑀸. 𑀦 𑀲𑀫𑁆𑀫𑀼𑀔𑀸𑀯𑀺𑀦𑀬𑁄𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑀁 𑀞𑀧𑁂𑀢𑁆𑀯𑀸 𑀲𑀢𑀺𑀯𑀺𑀦𑀬𑀸𑀤𑀬𑁄 𑀲𑁂𑀲𑀲𑀫𑀣𑀸.
𑁩𑁦𑁩. 𑀲𑀗𑁆𑀖𑀲𑁆𑀲 𑀲𑀫𑁆𑀫𑀼𑀔𑀸 𑀧𑀝𑀺𑀜𑁆𑀜𑀸𑀢𑁂 𑀢𑀁 𑀧𑀝𑀺𑀚𑀸𑀦𑀦𑀁 𑀲𑀗𑁆𑀖𑀲𑁆𑀲 𑀲𑀫𑁆𑀫𑀼𑀔𑀢𑀸 𑀦𑀸𑀫 𑀳𑁄𑀢𑀻𑀢𑀺 ‘‘𑀢𑀲𑁆𑀲 𑀧𑀝𑀺𑀚𑀸𑀦𑀦𑀘𑀺𑀢𑁆𑀢𑀁 𑀲𑀦𑁆𑀥𑀸𑀬 ‘𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀓𑀼𑀲𑀮𑁄’𑀢𑀺𑀆𑀤𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀦𑀢𑁆𑀣𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀅𑀓𑀼𑀲𑀮𑁄𑀢𑀺 ‘‘𑀥𑀫𑁆𑀫𑀯𑀺𑀦𑀬𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸𑀳𑀺 𑀢𑀺𑀯𑀗𑁆𑀕𑀺𑀓𑁄 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀏𑀢𑁂𑀳𑀺 𑀯𑀺𑀦𑀸 𑀦𑀢𑁆𑀣𑀺. 𑀢𑀢𑁆𑀣 𑀓𑀼𑀲𑀮𑀘𑀺𑀢𑁆𑀢𑁂𑀳𑀺 𑀓𑀭𑀡𑀓𑀸𑀮𑁂 𑀓𑀼𑀲𑀮𑁄, 𑀅𑀭𑀳𑀦𑁆𑀢𑀸𑀦𑀁 𑀓𑀭𑀡𑀓𑀸𑀮𑁂 𑀅𑀩𑁆𑀬𑀸𑀓𑀢𑁄, 𑀏𑀢𑁂𑀲𑀁 𑀅𑀓𑀼𑀲𑀮𑀧𑀝𑀺𑀧𑀓𑁆𑀔𑀢𑁆𑀢𑀸 𑀅𑀓𑀼𑀲𑀮𑀲𑁆𑀲 𑀲𑀫𑁆𑀪𑀯𑁄 𑀦𑀢𑁆𑀣𑀺, 𑀢𑀲𑁆𑀫𑀸 ‘𑀦𑀢𑁆𑀣𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀅𑀓𑀼𑀲𑀮𑁄’𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀮𑀺𑀔𑀺𑀢𑀁. ‘‘𑀬𑁂𑀪𑀼𑀬𑁆𑀬𑀲𑀺𑀓𑀸 𑀅𑀥𑀫𑁆𑀫𑀯𑀸𑀤𑀻𑀳𑀺 𑀯𑀽𑀧𑀲𑀫𑀦𑀓𑀸𑀮𑁂 𑀲𑀮𑀸𑀓𑀕𑁆𑀕𑀸𑀳𑀸𑀧𑀓𑁂 𑀥𑀫𑁆𑀫𑀯𑀸𑀤𑀺𑀫𑁆𑀳𑀺 𑀓𑀼𑀲𑀮𑀸, 𑀥𑀫𑁆𑀫𑀯𑀸𑀤𑀻𑀦𑀫𑁆𑀧𑀺 𑀅𑀥𑀫𑁆𑀫𑀯𑀸𑀤𑀺𑀫𑁆𑀳𑀺 𑀲𑀮𑀸𑀓𑀕𑁆𑀕𑀸𑀳𑀸𑀧𑀓𑁂 𑀚𑀸𑀢𑁂 𑀅𑀓𑀼𑀲𑀮𑀸, 𑀲𑀩𑁆𑀩𑀢𑁆𑀣 𑀅𑀭𑀳𑀢𑁄 𑀯𑀲𑁂𑀦𑁂𑀯 𑀅𑀩𑁆𑀬𑀸𑀓𑀢𑀢𑀸, 𑀅𑀦𑀭𑀳𑀢𑁄 𑀲𑀜𑁆𑀘𑀺𑀘𑁆𑀘 𑀲𑀢𑀺𑀯𑀺𑀦𑀬𑀤𑀸𑀦𑁂 𑀲𑀢𑀺𑀯𑀺𑀦𑀬𑁄 𑀅𑀓𑀼𑀲𑀮𑁄, 𑀅𑀫𑀽𑀴𑁆𑀳𑀯𑀺𑀦𑀬𑁄 𑀅𑀦𑀼𑀫𑁆𑀫𑀢𑁆𑀢𑀓𑀲𑁆𑀲 𑀤𑀸𑀦𑁂, 𑀧𑀝𑀺𑀜𑁆𑀜𑀸𑀢𑀓𑀭𑀡𑀁 𑀫𑀽𑀴𑁆𑀳𑀲𑁆𑀲 𑀅𑀚𑀸𑀦𑀦𑀢𑁄 𑀧𑀝𑀺𑀜𑁆𑀜𑀸𑀬𑀓𑀭𑀡𑁂, 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸 𑀲𑀼𑀤𑁆𑀥𑀲𑁆𑀲 𑀓𑀭𑀡𑁂, 𑀢𑀺𑀡𑀯𑀢𑁆𑀣𑀸𑀭𑀓𑀁 𑀫𑀳𑀸𑀓𑀮𑀳𑁂, 𑀲𑀜𑁆𑀘𑀺𑀘𑁆𑀘 𑀓𑀭𑀡𑁂 𑀘 𑀅𑀓𑀼𑀲𑀮’’𑀦𑁆𑀢𑀺 𑀮𑀺𑀔𑀺𑀢𑀁.
𑀬𑀢𑁆𑀣𑀯𑀸𑀭𑀧𑀼𑀘𑁆𑀙𑀸𑀯𑀸𑀭𑀯𑀡𑁆𑀡𑀦𑀸
𑁩𑁦𑁪. 𑀮𑀩𑁆𑀪𑀢𑀻𑀢𑀺 𑀧𑀼𑀘𑁆𑀙𑀸.
𑀲𑀫𑀣𑀯𑀸𑀭𑀯𑀺𑀲𑁆𑀲𑀚𑁆𑀚𑀦𑀸𑀯𑀸𑀭𑀯𑀡𑁆𑀡𑀦𑀸
𑁩𑁦𑁫. 𑀬𑀲𑁆𑀫𑀺𑀁 𑀲𑀫𑀬𑁂 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘𑀸𑀢𑀺𑀆𑀤𑀺 𑀢𑀲𑁆𑀲𑀸 𑀯𑀺𑀲𑁆𑀲𑀚𑁆𑀚𑀦𑀁. 𑀬𑀲𑁆𑀫𑀺𑀁 𑀲𑀫𑀬𑁂 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀬𑁂𑀪𑀼𑀬𑁆𑀬𑀲𑀺𑀓𑀸𑀬 𑀘 𑀅𑀥𑀺𑀓𑀭𑀡𑀁 𑀯𑀽𑀧𑀲𑀫𑁆𑀫𑀢𑀺, 𑀢𑀲𑁆𑀫𑀺𑀁 𑀲𑀫𑀬𑁂 𑀬𑀢𑁆𑀣 𑀬𑁂𑀪𑀼𑀬𑁆𑀬𑀲𑀺𑀓𑀸 𑀮𑀩𑁆𑀪𑀢𑀺, 𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀮𑀩𑁆𑀪𑀢𑀻𑀢𑀺 𑀏𑀯𑀁 𑀲𑀩𑁆𑀩𑀢𑁆𑀣 𑀲𑀫𑁆𑀩𑀦𑁆𑀥𑁄. 𑀬𑀢𑁆𑀣 𑀧𑀝𑀺𑀜𑁆𑀜𑀸𑀢𑀓𑀭𑀡𑀁 𑀮𑀩𑁆𑀪𑀢𑀺, 𑀢𑀢𑁆𑀣 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀮𑀩𑁆𑀪𑀢𑀻𑀢𑀺 𑀏𑀢𑁆𑀣 𑀏𑀓𑀁 𑀯𑀸 𑀤𑁆𑀯𑁂 𑀯𑀸 𑀩𑀳𑀽 𑀯𑀸 𑀆𑀧𑀢𑁆𑀢𑀺𑀬𑁄 𑀆𑀧𑀦𑁆𑀦𑁄 𑀪𑀺𑀓𑁆𑀔𑀼 ‘‘𑀇𑀫𑀁 𑀦𑀸𑀫 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑁄𑀲𑀻’’𑀢𑀺 𑀧𑀼𑀘𑁆𑀙𑀺𑀢𑁄 ‘‘𑀆𑀫𑀸’’𑀢𑀺 𑀆𑀧𑀢𑁆𑀢𑀺𑀁 𑀧𑀝𑀺𑀚𑀸𑀦𑀸𑀢𑀺, 𑀤𑁆𑀯𑁂𑀧𑀺 𑀮𑀩𑁆𑀪𑀦𑁆𑀢𑀺. 𑀢𑀢𑁆𑀣 𑀲𑀗𑁆𑀖𑀲𑀫𑁆𑀫𑀼𑀔𑀢𑀸 𑀥𑀫𑁆𑀫𑀯𑀺𑀦𑀬𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸𑀢𑀺 𑀏𑀯𑀁 𑀯𑀼𑀢𑁆𑀢𑀲𑀫𑁆𑀫𑀼𑀔𑀸𑀯𑀺𑀦𑀬𑁂 𑀲𑀗𑁆𑀖𑀲𑁆𑀲 𑀧𑀼𑀭𑀢𑁄 𑀧𑀝𑀺𑀜𑁆𑀜𑀸𑀢𑀁 𑀓𑀢𑀁 𑀘𑁂, 𑀲𑀗𑁆𑀖𑀲𑀫𑁆𑀫𑀼𑀔𑀢𑀸. 𑀢𑀢𑁆𑀣𑁂𑀯 𑀤𑁂𑀲𑀺𑀢𑀁 𑀘𑁂, 𑀥𑀫𑁆𑀫𑀯𑀺𑀦𑀬𑀲𑀫𑁆𑀫𑀼𑀔𑀢𑀸𑀬𑁄𑀧𑀺 𑀮𑀤𑁆𑀥𑀸 𑀳𑁄𑀦𑁆𑀢𑀺. 𑀅𑀯𑀺𑀯𑀤𑀦𑁆𑀢𑀸 𑀅𑀜𑁆𑀜𑀫𑀜𑁆𑀜𑀁 𑀧𑀝𑀺𑀚𑀸𑀦𑀦𑁆𑀢𑀺 𑀘𑁂, 𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸. 𑀢𑀲𑁆𑀲𑁂𑀯 𑀲𑀦𑁆𑀢𑀺𑀓𑁂 𑀤𑁂𑀲𑀺𑀢𑀁 𑀘𑁂, 𑀥𑀫𑁆𑀫𑀯𑀺𑀦𑀬𑀲𑀫𑁆𑀫𑀼𑀔𑀢𑀸𑀬𑁄𑀧𑀺 𑀮𑀤𑁆𑀥𑀸 𑀳𑁄𑀦𑁆𑀢𑀺. 𑀏𑀓𑀲𑁆𑀲𑁂𑀯 𑀯𑀸 𑀏𑀓𑀲𑁆𑀲 𑀲𑀦𑁆𑀢𑀺𑀓𑁂 𑀆𑀧𑀢𑁆𑀢𑀺𑀤𑁂𑀲𑀦𑀓𑀸𑀮𑁂 ‘‘𑀧𑀲𑁆𑀲𑀲𑀺, 𑀧𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑁂 𑀢𑀢𑁆𑀣 𑀥𑀫𑁆𑀫𑀯𑀺𑀦𑀬𑀧𑀼𑀕𑁆𑀕𑀮𑀲𑀫𑁆𑀫𑀼𑀔𑀢𑀸𑀲𑀜𑁆𑀜𑀺𑀢𑁄 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀘 𑀧𑀝𑀺𑀜𑁆𑀜𑀸𑀢𑀓𑀭𑀡𑀜𑁆𑀘 𑀮𑀤𑁆𑀥𑀁 𑀳𑁄𑀢𑀺.
𑀲𑀁𑀲𑀝𑁆𑀞𑀯𑀸𑀭𑀸𑀤𑀺𑀯𑀡𑁆𑀡𑀦𑀸
𑁩𑁦𑁬. 𑀅𑀥𑀺𑀓𑀭𑀡𑀸𑀦𑀁 𑀯𑀽𑀧𑀲𑀫𑁄𑀯 𑀲𑀫𑀣𑁄 𑀦𑀸𑀫, 𑀲𑁄 𑀅𑀥𑀺𑀓𑀭𑀡𑀁 𑀯𑀺𑀦𑀸 𑀦𑀢𑁆𑀣𑀺, 𑀢𑀲𑁆𑀫𑀸 𑀦 𑀘 𑀮𑀩𑁆𑀪𑀸 𑀯𑀺𑀦𑀺𑀪𑀼𑀚𑁆𑀚𑀺𑀢𑁆𑀯𑀸 𑀦𑀸𑀦𑀸𑀓𑀭𑀡𑀁 𑀓𑀸𑀢𑀼𑀁.
𑁩𑁦𑁯-𑁩𑁧𑁦. 𑀲𑀫𑀣𑀸 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀻𑀢𑀺 𑀏𑀢𑁆𑀣 𑀲𑀫𑁆𑀫𑀦𑁆𑀢𑀻𑀢𑀺 𑀲𑀫𑁆𑀧𑀚𑁆𑀚𑀦𑁆𑀢𑀺. 𑀅𑀥𑀺𑀓𑀭𑀡𑀸 𑀯𑀸 𑀧𑀦 𑀲𑀫𑁆𑀫𑀦𑁆𑀢𑀺 𑀯𑀽𑀧𑀲𑀫𑁆𑀫𑀦𑁆𑀢𑀻𑀢𑀺 𑀅𑀢𑁆𑀣𑁄, 𑀢𑀲𑁆𑀫𑀸 ‘‘𑀬𑁂𑀪𑀼𑀬𑁆𑀬𑀲𑀺𑀓𑀸 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀲𑀫𑁆𑀫𑀢𑀻’’𑀢𑀺 𑀇𑀫𑀸𑀬 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀲𑀤𑁆𑀥𑀺𑀁 𑀲𑀫𑁆𑀧𑀚𑁆𑀚𑀢𑀺, 𑀦 𑀲𑀢𑀺𑀯𑀺𑀦𑀬𑀸𑀤𑀻𑀳𑀺 𑀢𑁂𑀲𑀁 𑀢𑀲𑁆𑀲𑀸 𑀅𑀦𑀼𑀧𑀓𑀸𑀭𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀲𑀫𑀣𑀸 𑀅𑀥𑀺𑀓𑀭𑀡𑁂𑀳𑀺 𑀲𑀫𑁆𑀫𑀦𑁆𑀢𑀻𑀢𑀺 𑀏𑀢𑁆𑀣 𑀲𑀫𑀣𑀸 𑀅𑀪𑀸𑀯𑀁 𑀕𑀘𑁆𑀙𑀦𑁆𑀢𑀻𑀢𑀺 𑀅𑀢𑁆𑀣𑁄.
𑁩𑁧𑁧. ‘‘𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀯𑀺𑀯𑀸𑀤𑀸𑀥𑀺𑀓𑀭𑀡𑁂𑀦 𑀦 𑀲𑀫𑁆𑀫𑀢𑀻’’𑀢𑀺 𑀧𑀸𑀞𑁄. 𑀬𑁂𑀪𑀼𑀬𑁆𑀬𑀲𑀺𑀓𑀸𑀬 𑀲𑀫𑀸𑀦𑀪𑀸𑀯𑀢𑁄 𑀘 𑀅𑀯𑀲𑀸𑀦𑁂 ‘‘𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀦 𑀓𑁂𑀦𑀘𑀺 𑀲𑀫𑁆𑀫𑀢𑀻’’𑀢𑀺 (𑀧𑀭𑀺. 𑁩𑁧𑁩) 𑀯𑀼𑀢𑁆𑀢𑀢𑁆𑀢𑀸 𑀘 𑀲𑀫𑁆𑀫𑀼𑀔𑀸𑀯𑀺𑀦𑀬𑁄 𑀲𑀬𑀁 𑀲𑀫𑀣𑁂𑀦 𑀯𑀸 𑀅𑀥𑀺𑀓𑀭𑀡𑁂𑀦 𑀯𑀸 𑀲𑀫𑁂𑀢𑀩𑁆𑀩𑁄 𑀦 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑁄. 𑀲𑀢𑀺𑀯𑀺𑀦𑀬𑁄 𑀓𑀺𑀘𑁆𑀘𑀸𑀥𑀺𑀓𑀭𑀡𑁂𑀦 𑀲𑀫𑁆𑀫𑀢𑀺. 𑀅𑀫𑀽𑀴𑁆𑀳𑀯𑀺𑀦𑀬𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀢𑀺𑀡𑀯𑀢𑁆𑀣𑀸𑀭𑀓𑀸𑀧𑀺 𑀓𑀺𑀘𑁆𑀘𑀸𑀥𑀺𑀓𑀭𑀡𑁂𑀦 𑀲𑀫𑁆𑀫𑀦𑁆𑀢𑀺.
𑁩𑁧𑁩. 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑁂𑀦 𑀲𑀫𑁆𑀫𑀢𑀻𑀢𑀺 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂…𑀧𑁂… 𑀧𑀞𑀫𑀁 𑀲𑀮𑀸𑀓𑀁 𑀦𑀺𑀓𑁆𑀔𑀺𑀧𑀸𑀫𑀻’’𑀢𑀺 𑀏𑀯𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑁂𑀦 𑀲𑀫𑁆𑀫𑀢𑀺. 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀆𑀧𑀢𑁆𑀢𑀸𑀥𑀺𑀓𑀭𑀡𑀸𑀧𑀺 𑀓𑀺𑀘𑁆𑀘𑀸𑀥𑀺𑀓𑀭𑀡𑁂𑀦 𑀲𑀫𑁆𑀫𑀦𑁆𑀢𑀺. ‘‘‘𑀅𑀓𑀢𑀁 𑀓𑀫𑁆𑀫𑀁 𑀤𑀼𑀓𑁆𑀓𑀝𑀁 𑀓𑀫𑁆𑀫’𑀦𑁆𑀢𑀺 𑀏𑀯𑀁 𑀓𑀺𑀘𑁆𑀘𑀸𑀥𑀺𑀓𑀭𑀡𑀫𑁆𑀧𑀺 𑀓𑀺𑀘𑁆𑀘𑀸𑀥𑀺𑀓𑀭𑀡𑁂𑀦 𑀲𑀫𑁆𑀫𑀢𑀻𑀢𑀺 𑀏𑀯𑀁 𑀧𑀸𑀞𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀮𑀺𑀔𑀺𑀢𑀁. 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀦 𑀕𑀡𑁆𑀞𑀺𑀧𑀤𑁂 ‘‘‘𑀲𑀫𑀣𑀸 𑀅𑀥𑀺𑀓𑀭𑀡𑁂𑀳𑀺 𑀲𑀫𑁆𑀫𑀦𑁆𑀢𑀻’𑀢𑀺 𑀏𑀢𑁆𑀣 𑀬𑀲𑁆𑀫𑀸 𑀲𑀩𑁆𑀩𑁂 𑀲𑀫𑀣𑀸 𑀓𑀺𑀘𑁆𑀘𑀸𑀥𑀺𑀓𑀭𑀡𑁂𑀦 𑀲𑀫𑁆𑀫𑀦𑁆𑀢𑀺, 𑀢𑀲𑁆𑀫𑀸 ‘𑀲𑀫𑀣𑀸 𑀓𑀺𑀘𑁆𑀘𑀸𑀥𑀺𑀓𑀭𑀡𑁂𑀦 𑀲𑀫𑁆𑀫𑀦𑁆𑀢𑀻’𑀢𑀺 𑀧𑀸𑀞𑁄 𑀕𑀳𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁.
𑁩𑁧𑁪. 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀓𑀢𑀫𑀁 𑀅𑀥𑀺𑀓𑀭𑀡𑀁 𑀲𑀫𑀼𑀝𑁆𑀞𑀸𑀧𑁂𑀢𑀻𑀢𑀺 ‘‘𑀦𑀸𑀬𑀁 𑀥𑀫𑁆𑀫𑁄’’𑀢𑀺 𑀯𑀼𑀢𑁆𑀢𑀫𑀢𑁆𑀢𑁂𑀦 𑀓𑀺𑀜𑁆𑀘𑀺 𑀅𑀥𑀺𑀓𑀭𑀡𑀁 𑀦 𑀲𑀫𑀼𑀝𑁆𑀞𑀸𑀧𑁂𑀢𑀺.
𑁩𑁧𑁮-𑁯. ‘‘𑀓𑀢𑀫𑀸𑀥𑀺𑀓𑀭𑀡𑀧𑀭𑀺𑀬𑀸𑀧𑀦𑁆𑀦’’𑀦𑁆𑀢𑀺 𑀧𑀸𑀞𑁄. 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀪𑀚𑀢𑀻𑀢𑀺 𑀧𑀞𑀫𑀼𑀧𑁆𑀧𑀦𑁆𑀦𑀯𑀺𑀯𑀸𑀤𑀁 𑀧𑀘𑁆𑀙𑀸 𑀉𑀧𑁆𑀧𑀦𑁆𑀦𑁄 𑀪𑀚𑀢𑀺. 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀤𑁆𑀯𑁂 𑀲𑀫𑀣𑁂 𑀪𑀚𑀢𑀻𑀢𑀺 ‘‘𑀇𑀫𑀁 𑀯𑀽𑀧𑀲𑀫𑁂𑀢𑀼𑀁 𑀲𑀫𑀢𑁆𑀣𑀸 𑀢𑀼𑀫𑁆𑀳𑁂’’𑀢𑀺 𑀯𑀤𑀦𑁆𑀢𑀁 𑀯𑀺𑀬 𑀪𑀚𑀢𑀺 ‘‘𑀫𑀬𑀁 𑀢𑀁 𑀯𑀽𑀧𑀲𑀫𑁂𑀲𑁆𑀲𑀸𑀫𑀸’’𑀢𑀺 𑀯𑀤𑀦𑁆𑀢𑁂𑀳𑀺 𑀯𑀺𑀬 𑀤𑁆𑀯𑀻𑀳𑀺 𑀲𑀫𑀣𑁂𑀳𑀺 𑀲𑀗𑁆𑀕𑀳𑀺𑀢𑀁.
𑀲𑀫𑀣𑀪𑁂𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑀔𑀦𑁆𑀥𑀓𑀧𑀼𑀘𑁆𑀙𑀸𑀯𑀸𑀭𑀯𑀡𑁆𑀡𑀦𑀸
𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀯𑀡𑁆𑀡𑀦𑀸
𑁩𑁨𑁦. 𑀦𑀺𑀤𑀸𑀦𑀁 𑀦𑀸𑀫 𑀓𑀸𑀮𑀜𑁆𑀘 𑀦𑀕𑀭𑀜𑁆𑀘 𑀤𑁂𑀲𑁄 𑀘 𑀪𑀕𑀯𑀸 𑀘. 𑀯𑀢𑁆𑀣𑀼𑀧𑀼𑀕𑁆𑀕𑀮𑀸𑀤𑀺 𑀦𑀺𑀤𑁆𑀤𑁂𑀲𑁄. 𑀬𑀸𑀦𑀺 𑀢𑀢𑁆𑀣 𑀉𑀧𑀲𑀫𑁆𑀧𑀤𑀓𑁆𑀔𑀦𑁆𑀥𑀓𑁂 ‘‘𑀦, 𑀪𑀺𑀓𑁆𑀔𑀯𑁂, 𑀊𑀦𑀯𑀻𑀲𑀢𑀺𑀯𑀲𑁆𑀲𑁄 𑀧𑀼𑀕𑁆𑀕𑀮𑁄 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀉𑀢𑁆𑀢𑀫𑀸𑀦𑀺 𑀧𑀤𑀸𑀦𑀺 𑀯𑀼𑀢𑁆𑀢𑀸𑀦𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀸 𑀲𑀸 𑀢𑀲𑁆𑀲 𑀢𑀲𑁆𑀲 𑀧𑀤𑀲𑁆𑀲 𑀆𑀧𑀢𑁆𑀢𑀻𑀢𑀺 𑀯𑀼𑀘𑁆𑀘𑀢𑀻𑀢𑀺 𑀬𑀸 ‘‘𑀦, 𑀪𑀺𑀓𑁆𑀔𑀯𑁂, 𑀊𑀦𑀯𑀻𑀲𑀢𑀺𑀯𑀲𑁆𑀲𑁄 𑀧𑀼𑀕𑁆𑀕𑀮𑁄 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄’’𑀢𑀺 𑀧𑀤𑁂𑀦 𑀧𑀜𑁆𑀜𑀢𑁆𑀢𑀸 𑀆𑀧𑀢𑁆𑀢𑀺, 𑀲𑀸 𑀢𑀲𑁆𑀲 𑀧𑀤𑀲𑁆𑀲𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀘𑀫𑁆𑀫𑀲𑀁𑀬𑀼𑀢𑁆𑀢𑁂𑀢𑀺 𑀘𑀫𑁆𑀫𑀓𑁆𑀔𑀦𑁆𑀥𑀓𑁂.
𑀏𑀓𑀼𑀢𑁆𑀢𑀭𑀺𑀓𑀦𑀬𑀯𑀡𑁆𑀡𑀦𑀸
𑀏𑀓𑀓𑀯𑀸𑀭𑀯𑀡𑁆𑀡𑀦𑀸
𑁩𑁨𑁧. 𑀏𑀓𑀼𑀢𑁆𑀢𑀭𑀺𑀓𑀦𑀬𑁂 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸𑀢𑀺 𑀏𑀢𑁆𑀣 𑀆𑀧𑀢𑁆𑀢𑀺 𑀦𑀸𑀫 𑀓𑀺𑀁 𑀧𑀭𑀫𑀢𑁆𑀣𑀲𑀪𑀸𑀯𑀸, 𑀉𑀤𑀸𑀳𑀼 𑀦 𑀯𑀢𑁆𑀢𑀩𑁆𑀩𑀲𑀪𑀸𑀯𑀸𑀢𑀺? 𑀦 𑀯𑀢𑁆𑀢𑀩𑁆𑀩𑀲𑀪𑀸𑀯𑀸. 𑀯𑀼𑀢𑁆𑀢𑀜𑁆𑀳𑀺 𑀧𑀭𑀺𑀯𑀸𑀭𑁂 ‘‘𑀯𑀢𑁆𑀣𑀼 𑀚𑀸𑀦𑀺𑀢𑀩𑁆𑀩𑀁, 𑀕𑁄𑀢𑁆𑀢𑀁 𑀚𑀸𑀦𑀺𑀢𑀩𑁆𑀩𑀁, 𑀦𑀸𑀫𑀁 𑀚𑀸𑀦𑀺𑀢𑀩𑁆𑀩𑀁, 𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸’’𑀢𑀺 𑀏𑀢𑁂𑀲𑀁 𑀧𑀤𑀸𑀦𑀁 𑀯𑀺𑀪𑀗𑁆𑀕𑁂 ‘‘𑀫𑁂𑀣𑀼𑀦𑀥𑀫𑁆𑀫𑁄𑀢𑀺 𑀯𑀢𑁆𑀣𑀼 𑀘 𑀕𑁄𑀢𑁆𑀢𑀜𑁆𑀘. 𑀧𑀸𑀭𑀸𑀚𑀺𑀓𑀦𑁆𑀢𑀺 𑀦𑀸𑀫𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘𑀸’’𑀢𑀺. 𑀦𑀸𑀫𑀜𑁆𑀘 𑀕𑁄𑀢𑁆𑀢𑀜𑁆𑀘 ‘‘𑀦𑀸𑀫𑀕𑁄𑀢𑁆𑀢𑀁 𑀦 𑀚𑀻𑀭𑀢𑀻’’𑀢𑀺 (𑀲𑀁. 𑀦𑀺. 𑁧.𑁭𑁬) 𑀯𑀘𑀦𑀢𑁄 𑀲𑀫𑁆𑀫𑀼𑀢𑀺𑀫𑀢𑁆𑀢𑀁, 𑀢𑀲𑁆𑀫𑀸 ‘‘𑀓𑀼𑀲𑀮𑀢𑁆𑀢𑀺𑀓𑀯𑀺𑀦𑀺𑀫𑀼𑀢𑁆𑀢𑀸 𑀦 𑀯𑀢𑁆𑀢𑀩𑁆𑀩𑀥𑀫𑁆𑀫𑀪𑀽𑀢𑀸 𑀏𑀓𑀘𑁆𑀘𑀸 𑀲𑀫𑁆𑀫𑀼𑀢𑀺 𑀏𑀯𑀸’’𑀢𑀺 𑀯𑀼𑀢𑁆𑀢𑀁. 𑀬𑀁 𑀧𑀦 𑀯𑀼𑀢𑁆𑀢𑀁 𑀲𑀫𑀣𑀓𑁆𑀔𑀦𑁆𑀥𑀓𑁂 ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀺𑀬𑀸 𑀅𑀓𑀼𑀲𑀮𑀁, 𑀲𑀺𑀬𑀸 𑀅𑀩𑁆𑀬𑀸𑀓𑀢’’𑀦𑁆𑀢𑀺 (𑀘𑀽𑀴𑀯. 𑁨𑁨𑁨), 𑀢𑀁 ‘‘𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀲𑀺𑀬𑀸 𑀓𑀼𑀲𑀮𑀁, 𑀲𑀺𑀬𑀸 𑀅𑀓𑀼𑀲𑀮𑀁, 𑀲𑀺𑀬𑀸 𑀅𑀩𑁆𑀬𑀸𑀓𑀢’’𑀦𑁆𑀢𑀺 (𑀘𑀽𑀴𑀯. 𑁨𑁨𑁦) 𑀏𑀢𑁆𑀣 𑀯𑀺𑀬 𑀧𑀭𑀺𑀬𑀸𑀬𑀢𑁄 𑀯𑀼𑀢𑁆𑀢𑀁. 𑀅𑀢𑁆𑀣𑀢𑁄 𑀳𑀺 𑀯𑀺𑀯𑀸𑀤𑁄 𑀦𑀸𑀫 𑀏𑀓𑀘𑁆𑀘𑁄 𑀲𑀫𑁆𑀫𑀼𑀢𑀺𑀯𑀺𑀲𑁂𑀲𑁄. 𑀬𑁄 𑀘𑀺𑀢𑁆𑀢𑀲𑀫𑀗𑁆𑀕𑀺𑀦𑁄, 𑀲𑁄 ‘‘𑀢𑀁 𑀘𑀺𑀢𑁆𑀢𑀧𑀭𑀺𑀬𑀸𑀬𑁂𑀦 𑀧𑀦 𑀲𑀺𑀬𑀸 𑀓𑀼𑀲𑀮’’𑀦𑁆𑀢𑀺𑀆𑀤𑀺 𑀯𑁄𑀳𑀸𑀭𑀮𑀤𑁆𑀥𑁄, 𑀢𑀣𑀸 𑀆𑀧𑀢𑁆𑀢𑀸𑀥𑀺𑀓𑀭𑀡𑀫𑁆𑀧𑀻𑀢𑀺 𑀤𑀝𑁆𑀞𑀩𑁆𑀩𑀁. 𑀢𑁂𑀦𑁂𑀯 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀫𑀸𑀦𑁄 𑀳𑀺 𑀅𑀓𑀼𑀲𑀮𑀘𑀺𑀢𑁆𑀢𑁄 𑀯𑀸 𑀆𑀧𑀚𑁆𑀚𑀢𑀺 𑀓𑀼𑀲𑀮𑀸𑀩𑁆𑀬𑀸𑀓𑀢𑀘𑀺𑀢𑁆𑀢𑁄 𑀯𑀸’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸). 𑀅𑀜𑁆𑀜𑀣𑀸 𑀲𑀫𑀣𑁂𑀳𑀺 𑀅𑀥𑀺𑀓𑀭𑀡𑀻𑀬𑀢𑀸 𑀦 𑀲𑀫𑁆𑀪𑀯𑀢𑀺. 𑀦 𑀳𑀺 𑀲𑀫𑀣𑀸 𑀓𑀼𑀲𑀮𑀸𑀤𑀺𑀁 𑀅𑀓𑀼𑀲𑀮𑀸𑀤𑀺𑀁 𑀯𑀸 𑀅𑀥𑀺𑀓𑀺𑀘𑁆𑀘𑀧𑀯𑀢𑁆𑀢𑀦𑁆𑀢𑀺, 𑀲𑀫𑀣𑀯𑀲𑁂𑀦 𑀯𑀸 𑀓𑀼𑀲𑀮𑀸𑀤𑀺 𑀲𑀫𑁆𑀫𑀢𑀺. 𑀦 𑀘 𑀓𑀼𑀲𑀮𑀲𑁆𑀲 𑀯𑀺𑀯𑀸𑀤𑀲𑁆𑀲, 𑀅𑀦𑀼𑀯𑀸𑀤𑀲𑁆𑀲 𑀯𑀸 𑀓𑀼𑀲𑀮𑀸𑀤𑀺𑀲𑀫𑀣𑁂𑀳𑀺 𑀯𑀽𑀧𑀲𑀫𑁂𑀢𑀩𑁆𑀩𑀢𑀸 𑀆𑀧𑀚𑁆𑀚𑀢𑀻𑀢𑀺 𑀢𑁂𑀲𑀁 𑀅𑀥𑀺𑀓𑀭𑀡𑀫𑀢𑁆𑀢𑀫𑁂𑀯 𑀦 𑀲𑀫𑁆𑀪𑀯𑁂𑀬𑁆𑀬, 𑀢𑀲𑁆𑀫𑀸 𑀅𑀥𑀺𑀓𑀭𑀡𑀸𑀦𑀁, 𑀲𑀫𑀣𑀸𑀦𑀜𑁆𑀘 𑀓𑀼𑀲𑀮𑀸𑀤𑀺𑀪𑀸𑀯𑁄 𑀧𑀭𑀺𑀬𑀸𑀬𑀤𑁂𑀲𑀦𑀸𑀬 𑀮𑀩𑁆𑀪𑀢𑀺, 𑀦𑁄 𑀅𑀜𑁆𑀜𑀣𑀸, 𑀢𑁂𑀦𑁂𑀯 𑀲𑀫𑁆𑀫𑀼𑀔𑀸𑀯𑀺𑀦𑀬𑁂 𑀯𑀺𑀬 𑀆𑀧𑀢𑁆𑀢𑀸𑀥𑀺𑀓𑀭𑀡𑁂 𑀢𑀺𑀓𑀁 𑀦 𑀧𑀽𑀭𑀺𑀢𑀁. 𑀲𑀜𑁆𑀘𑀺𑀘𑁆𑀘 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀫𑀸𑀦𑀲𑁆𑀲 𑀬𑀲𑁆𑀫𑀸 𑀲𑀜𑁆𑀘𑁂𑀢𑀦𑀸 𑀏𑀓𑀦𑁆𑀢𑀢𑁄 𑀅𑀓𑀼𑀲𑀮𑀸𑀯 𑀳𑁄𑀢𑀺. 𑀇𑀢𑀭𑀲𑁆𑀲 𑀲𑀘𑀺𑀢𑁆𑀢𑀓𑀲𑁆𑀲 𑀯𑀸 𑀅𑀘𑀺𑀢𑁆𑀢𑀓𑀲𑁆𑀲 𑀯𑀸 𑀢𑀤𑀸𑀪𑀸𑀯𑀫𑀢𑁆𑀢𑀁 𑀉𑀧𑀸𑀤𑀸𑀬 ‘‘𑀅𑀩𑁆𑀬𑀸𑀓𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀳𑀺 ‘‘𑀢𑀺𑀓𑁆𑀔𑀢𑁆𑀢𑀼𑀁 𑀘𑁄𑀤𑀬𑀫𑀸𑀦𑁄 𑀢𑀁 𑀘𑀻𑀯𑀭𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀬𑁆𑀬, 𑀇𑀘𑁆𑀘𑁂𑀢𑀁 𑀓𑀼𑀲𑀮’’𑀦𑁆𑀢𑀺𑀆𑀤𑀻𑀲𑀼 (𑀧𑀸𑀭𑀸. 𑁫𑁩𑁮) 𑀦 𑀓𑀼𑀲𑀮𑀲𑀤𑁆𑀤𑁄 𑀲𑀼𑀔𑀯𑀺𑀧𑀸𑀓𑁄, ‘‘𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀅𑀓𑀼𑀲𑀮𑀸𑀦𑀁 𑀥𑀫𑁆𑀫𑀸𑀦𑀁 𑀧𑀝𑀺𑀖𑀸𑀢𑀸𑀬𑀸’’𑀢𑀺𑀆𑀤𑀻𑀲𑀼 (𑀧𑀭𑀺. 𑁪𑁯𑁮) 𑀦 𑀅𑀓𑀼𑀲𑀮𑀸 𑀯𑀸 𑀳𑁄𑀢𑀺. 𑀇𑀢𑀭𑀲𑁆𑀲 𑀲𑀘𑀺𑀢𑁆𑀢𑀓𑀲𑁆𑀲 𑀯𑀸 𑀅𑀘𑀺𑀢𑁆𑀢𑀓𑀲𑁆𑀲 𑀯𑀸 𑀢𑀤𑀸𑀪𑀸𑀯𑀫𑀢𑁆𑀢𑀁 𑀉𑀧𑀸𑀤𑀸𑀬 ‘‘𑀅𑀩𑁆𑀬𑀸𑀓𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀳𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀘𑁄𑀤𑀬𑀫𑀸𑀦𑁄 𑀢𑀁 𑀘𑀻𑀯𑀭𑀁 𑀅𑀪𑀺𑀦𑀺𑀧𑁆𑀨𑀸𑀤𑁂𑀬𑁆𑀬, 𑀬𑀁 𑀧𑀦𑁂𑀢𑁆𑀣 ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀅𑀓𑀼𑀲𑀮’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀲 𑀯𑀲𑁂𑀦 𑀢𑀤𑀓𑀼𑀲𑀮𑀢𑁄 𑀲𑀢𑁆𑀢 𑀯𑀺𑀦𑀻𑀢𑀯𑀢𑁆𑀣𑀽𑀦𑀺 𑀯𑁂𑀤𑀺𑀢𑀩𑁆𑀩𑀸𑀦𑀺, 𑀢𑀢𑁄 𑀘𑀻𑀯𑀭𑀦𑁆𑀢𑀺 𑀲𑀫𑁆𑀪𑀯𑀢𑁄 𑀅𑀘𑀻𑀯𑀭𑀓𑀸, 𑀅𑀦𑁆𑀢𑀭𑀸𑀧𑀢𑁆𑀢𑀺𑀓𑀸 𑀘. 𑀅𑀦𑀦𑁆𑀢𑀭𑀺𑀓𑀮𑀓𑁆𑀔𑀡𑀧𑁆𑀧𑀢𑁆𑀢𑀲𑁆𑀲 𑀯𑀲𑁂𑀦 𑀦𑀺𑀬𑀢𑀸 𑀘 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀫𑁆𑀫𑀼𑀢𑀺𑀦𑀺𑀤𑁆𑀤𑁂𑀲𑁂 𑀕𑀭𑀼𑀓𑀮𑀳𑀼𑀓𑀦𑀺𑀤𑁆𑀤𑁂𑀲𑁄𑀧𑀺 𑀲𑀫𑁆𑀪𑀯𑀢𑀺. 𑀅𑀜𑁆𑀜𑀣𑀸 ‘‘𑀅𑀦𑀦𑁆𑀢𑀭𑀸𑀬𑀺𑀓𑀸 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀸, 𑀅𑀦𑀯𑀚𑁆𑀚𑀸𑀧𑀡𑁆𑀡𑀢𑁆𑀢𑀻’’𑀢𑀺 𑀘 𑀯𑀼𑀢𑁆𑀢𑀸. 𑀓𑀼𑀝𑀺𑀓𑀸𑀭𑀫𑀳𑀮𑁆𑀮𑀓𑀸𑀧𑀢𑁆𑀢𑀺 𑀅𑀦𑁆𑀢𑀭𑀸𑀬𑀺𑀓𑀸 𑀮𑁄𑀓𑀯𑀚𑁆𑀚𑀲𑀸𑀯𑀚𑁆𑀚𑀧𑀡𑁆𑀡𑀢𑁆𑀢𑀺𑀢𑁄. 𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁄 𑀑𑀫𑀲𑀯𑀸𑀤𑀸𑀤𑀺𑀢𑁄 𑀕𑀭𑀼𑀓𑀸𑀤𑀺 𑀦 𑀲𑀫𑁆𑀪𑀯𑁂𑀬𑁆𑀬, 𑀢𑀢𑁄 𑀯𑀸 𑀅𑀬𑀁 𑀮𑀳𑀼𑀓𑀸𑀤𑀻𑀢𑀺 𑀇𑀤𑀁 𑀲𑀩𑁆𑀩𑀁 𑀏𑀓𑀘𑁆𑀘𑀸𑀦𑀁 𑀆𑀘𑀭𑀺𑀬𑀸𑀦𑀁 𑀫𑀢𑀁, ‘‘𑀲𑀩𑁆𑀩𑀁 𑀅𑀬𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 ‘‘𑀧𑀸𑀭𑀸𑀚𑀺𑀓𑀦𑁆𑀢𑀺 𑀦𑀸𑀫𑀜𑁆𑀘𑁂𑀯 𑀆𑀧𑀢𑁆𑀢𑀺𑀘𑀸’’𑀢𑀺 𑀯𑀘𑀦𑁂𑀦 𑀘𑁂 𑀆𑀧𑀢𑁆𑀢𑀺 𑀦 𑀯𑀢𑁆𑀢𑀩𑁆𑀩𑀥𑀫𑁆𑀫𑁄 𑀲𑀺𑀬𑀸, 𑀯𑀢𑁆𑀣𑀼 𑀘 𑀦 𑀯𑀢𑁆𑀢𑀩𑁆𑀩𑀥𑀫𑁆𑀫𑁄 𑀲𑀺𑀬𑀸 𑀕𑁄𑀢𑁆𑀢𑁂𑀦 𑀲𑀫𑀸𑀦𑀸𑀥𑀺𑀓𑀭𑀡𑀪𑀸𑀯𑁂𑀦 𑀯𑀼𑀢𑁆𑀢𑀢𑁆𑀢𑀸, 𑀢𑀲𑁆𑀫𑀸 ‘‘𑀫𑁂𑀣𑀼𑀦𑀥𑀫𑁆𑀫𑁄’’𑀢𑀺 𑀧𑀤𑀁 𑀅𑀚𑁆𑀛𑀸𑀘𑀸𑀭𑀲𑀗𑁆𑀔𑀸𑀢𑀁 𑀯𑀢𑁆𑀣𑀼𑀜𑁆𑀘 𑀤𑀻𑀧𑁂𑀢𑀺. 𑀅𑀚𑁆𑀛𑀸𑀘𑀸𑀭𑀯𑀲𑁂𑀦𑁂𑀯 𑀆𑀧𑀢𑁆𑀢𑀺𑀬𑀸 𑀮𑀤𑁆𑀥𑀦𑀸𑀫𑀁 𑀅𑀲𑀸𑀥𑀸𑀭𑀡𑀦𑀸𑀫𑀢𑁆𑀢𑀸 ‘‘𑀕𑁄𑀢𑁆𑀢’’𑀦𑁆𑀢𑀺 𑀘 𑀯𑀼𑀘𑁆𑀘𑀢𑀻𑀢𑀺 𑀅𑀬𑀁 𑀢𑀢𑁆𑀣 𑀅𑀢𑁆𑀣𑁄.
‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀓𑀺𑀁 𑀧𑀼𑀩𑁆𑀩𑀗𑁆𑀕𑀫𑀦𑁆𑀢𑀺? 𑀮𑁄𑀪𑁄 𑀧𑀼𑀩𑁆𑀩𑀗𑁆𑀕𑀫𑁄, 𑀤𑁄𑀲𑁄, 𑀫𑁄𑀳𑁄, 𑀅𑀮𑁄𑀪𑁄, 𑀅𑀤𑁄𑀲𑁄, 𑀅𑀫𑁄𑀳𑁄 𑀧𑀼𑀩𑁆𑀩𑀗𑁆𑀕𑀫𑁄’’𑀢𑀺 ‘‘𑀓𑀢𑀺 𑀳𑁂𑀢𑀽𑀢𑀺? 𑀙 𑀳𑁂𑀢𑀽 𑀢𑀬𑁄 𑀅𑀓𑀼𑀲𑀮𑀳𑁂𑀢𑀽, 𑀢𑀬𑁄 𑀅𑀩𑁆𑀬𑀸𑀓𑀢𑀳𑁂𑀢𑀽’’𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸 𑀦𑀺𑀧𑁆𑀧𑀭𑀺𑀬𑀸𑀬𑁂𑀦𑁂𑀯 ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀺𑀬𑀸 𑀅𑀓𑀼𑀲𑀮𑀁, 𑀲𑀺𑀬𑀸 𑀅𑀩𑁆𑀬𑀸𑀓𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀫𑀣𑀓𑁆𑀔𑀦𑁆𑀥𑀓𑁂 𑀧𑀦 𑀲𑀦𑁆𑀥𑀸𑀬𑀪𑀸𑀲𑀺𑀢𑀯𑀲𑁂𑀦 𑀢𑀣𑀸 𑀏𑀯 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀪𑀸𑀯𑀢𑁄 𑀦𑀺𑀧𑁆𑀧𑀭𑀺𑀬𑀸𑀬𑁂𑀦𑁂𑀯 𑀅𑀓𑀼𑀲𑀮𑀸 𑀘𑀢𑁆𑀢𑀸𑀭𑁄 𑀔𑀦𑁆𑀥𑀸, 𑀭𑀽𑀧𑀅𑀩𑁆𑀬𑀸𑀓𑀢𑀸 𑀘 𑀳𑁄𑀦𑁆𑀢𑀺. ‘‘𑀦𑀢𑁆𑀣𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀼𑀲𑀮’’𑀦𑁆𑀢𑀺 (𑀘𑀽𑀴𑀯. 𑁨𑁨𑁨) 𑀯𑀼𑀢𑁆𑀢𑀢𑁆𑀢𑀸 𑀓𑀼𑀲𑀮𑀫𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀔𑀻𑀡𑀸𑀲𑀯𑀸𑀦𑀁 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀓𑀼𑀲𑀮𑁂 𑀧𑀝𑀺𑀓𑁆𑀔𑀺𑀢𑁆𑀢𑁂 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀫𑁆𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑀫𑁂𑀯 𑀳𑁄𑀢𑀺. 𑀢𑀲𑁆𑀫𑀺𑀁 𑀧𑀝𑀺𑀓𑁆𑀔𑀺𑀢𑁆𑀢𑁂 𑀲𑀩𑁆𑀩𑀣𑀸 𑀅𑀯𑀸𑀯𑀝𑀁 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀁 𑀧𑀝𑀺𑀓𑁆𑀔𑀺𑀢𑁆𑀢𑀫𑁂𑀯 𑀳𑁄𑀢𑀺. 𑀦𑀺𑀩𑁆𑀩𑀸𑀦𑀸𑀩𑁆𑀬𑀸𑀓𑀢𑁂 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀻𑀢𑀺 𑀏𑀓𑁂, 𑀢𑀁 𑀅𑀬𑀼𑀢𑁆𑀢𑀁 ‘‘𑀙 𑀳𑁂𑀢𑀼𑀬𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀓𑀺𑀜𑁆𑀘𑀸𑀧𑀺 𑀯𑀼𑀢𑁆𑀢𑀁 𑀲𑀸𑀫𑀜𑁆𑀜𑁂𑀦, 𑀢𑀣𑀸𑀧𑀺 𑀯𑀺𑀧𑀸𑀓𑀳𑁂𑀢𑀼𑀬𑁂𑀯 𑀢𑀢𑁆𑀣 𑀅𑀥𑀺𑀧𑁆𑀧𑁂𑀢𑁄, 𑀦 𑀓𑀺𑀭𑀺𑀬𑀸𑀳𑁂𑀢𑀼, 𑀢𑁂 𑀳𑀺 𑀓𑀼𑀲𑀮𑀲𑀪𑀸𑀯𑀸 𑀘, 𑀢𑀲𑁆𑀫𑀸 𑀭𑀽𑀧𑀁, 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀜𑁆𑀘𑀸𑀧𑀢𑁆𑀢𑀺. 𑀢𑀢𑁆𑀣 𑀅𑀓𑀼𑀲𑀮𑀸𑀧𑀢𑁆𑀢𑀺𑀢𑁄 𑀯𑀺𑀦𑀻𑀢𑀯𑀢𑁆𑀣𑀽𑀦𑀺. 𑀇𑀢𑀭𑀲𑁆𑀲𑀸𑀧𑀺 𑀆𑀤𑀺𑀢𑁄 𑀙𑀸𑀤𑀦𑀸 𑀓𑀼𑀲𑀮𑀘𑀺𑀢𑁆𑀢𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑁆𑀢𑀭𑀸𑀬𑀺𑀓𑀦𑀺𑀬𑀢𑀲𑀸𑀯𑀚𑁆𑀚𑀧𑀜𑁆𑀜𑀢𑁆𑀢𑀺𑀪𑀸𑀯𑁄𑀧𑀺 𑀘𑀲𑁆𑀲𑀸 𑀯𑁂𑀯𑀘𑀦𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑁄 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀸𑀬, 𑀲𑀜𑁆𑀘𑀺𑀘𑁆𑀘 𑀆𑀧𑀦𑁆𑀦𑀸𑀬 𑀘, 𑀢𑀲𑁆𑀫𑀸 ‘‘𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀁 𑀲𑀺𑀬𑀸 𑀲𑀸𑀭𑀫𑁆𑀫𑀡𑀁 𑀲𑀺𑀬𑀸 𑀅𑀦𑀸𑀭𑀫𑁆𑀫𑀡’’𑀦𑁆𑀢𑀺 𑀯𑀘𑀦𑀁 𑀯𑀺𑀬 𑀏𑀓𑀦𑁆𑀢𑀸𑀓𑀼𑀲𑀮𑀁 𑀅𑀦𑁂𑀓𑀦𑁆𑀢𑀸𑀓𑀼𑀲𑀮𑀜𑁆𑀘 𑀮𑁄𑀓𑀯𑀚𑁆𑀚𑀁, 𑀏𑀓𑀦𑁆𑀢𑀸𑀩𑁆𑀬𑀸𑀓𑀢𑀁 𑀪𑀽𑀢𑀸𑀭𑁄𑀘𑀦𑀁 𑀅𑀦𑁂𑀓𑀦𑁆𑀢𑀸𑀩𑁆𑀬𑀸𑀓𑀢𑀜𑁆𑀘 𑀲𑁂𑀲𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁 𑀏𑀓𑀢𑁄 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀺𑀬𑀸 𑀅𑀓𑀼𑀲𑀮𑀁 𑀲𑀺𑀬𑀸𑀩𑁆𑀬𑀸𑀓𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀫𑀣𑀓𑁆𑀔𑀦𑁆𑀥𑀓𑁂 𑀧𑀦 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀫𑁂𑀯 𑀲𑀦𑁆𑀥𑀸𑀬 𑀢𑀣𑀸 𑀯𑀼𑀢𑁆𑀢𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀬𑀁, 𑀕𑀡𑁆𑀞𑀺𑀧𑀤𑁂 𑀘 ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀺𑀬𑀸 𑀅𑀓𑀼𑀲𑀮𑀁, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀁, 𑀦𑀢𑁆𑀣𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀼𑀲𑀮’𑀦𑁆𑀢𑀺 𑀏𑀢𑁆𑀣 𑀲𑀦𑁆𑀥𑀸𑀬𑀪𑀸𑀲𑀺𑀢𑀯𑀲𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀬𑀲𑁆𑀫𑀺𑀜𑁆𑀳𑀺 𑀧𑀣𑀯𑀺𑀔𑀡𑀦𑀸𑀤𑀺𑀓𑁂 𑀆𑀧𑀢𑁆𑀢𑀸𑀥𑀺𑀓𑀭𑀡𑁂 𑀅𑀧𑀓𑀢𑀜𑁆𑀜𑀼𑀦𑁄 𑀲𑀦𑁆𑀥𑀸𑀬 𑀅𑀧𑁆𑀧𑀳𑀭𑀺𑀢𑀓𑀭𑀡𑀸𑀤𑀺𑀓𑀸𑀮𑁂 𑀓𑀼𑀲𑀮𑀘𑀺𑀢𑁆𑀢𑀁 𑀅𑀗𑁆𑀕𑀁 𑀳𑁄𑀢𑀺, 𑀔𑀡𑀦𑀸𑀤𑀺𑀧𑀬𑁄𑀕𑀲𑀗𑁆𑀔𑀸𑀢𑀁 𑀭𑀽𑀧𑀸𑀩𑁆𑀬𑀸𑀓𑀢𑀁 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑁂𑀦𑁆𑀢𑀁 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀅𑀢𑁆𑀣𑀸𑀧𑀢𑁆𑀢𑀺 𑀓𑀼𑀲𑀮𑀘𑀺𑀢𑁆𑀢𑁄 𑀆𑀧𑀚𑁆𑀚𑀢𑀺, 𑀓𑀼𑀲𑀮𑀘𑀺𑀢𑁆𑀢𑁄 𑀯𑀼𑀝𑁆𑀞𑀸𑀢𑀻’’𑀢𑀺𑀆𑀤𑀺. 𑀢𑀲𑁆𑀫𑀺𑀜𑁆𑀳𑀺 𑀲𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁 ‘‘𑀦𑀢𑁆𑀣𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀼𑀲𑀮’’𑀦𑁆𑀢𑀺. 𑀬𑀲𑁆𑀫𑀸 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀁 𑀘𑀺𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀦 𑀬𑀺𑀤𑀁 𑀅𑀗𑁆𑀕𑀧𑁆𑀧𑀳𑁄𑀦𑀓𑀘𑀺𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀬𑀤𑀺 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, ‘‘𑀲𑀺𑀬𑀸 𑀓𑀼𑀲𑀮’’𑀦𑁆𑀢𑀺 𑀘 𑀯𑀢𑁆𑀢𑀩𑁆𑀩𑀁 𑀪𑀯𑁂𑀬𑁆𑀬, 𑀦 𑀘 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀇𑀤𑀁 𑀧𑀦 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑁋 𑀬𑀁 𑀢𑀸𑀯 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀮𑁄𑀓𑀯𑀚𑁆𑀚𑀁, 𑀢𑀁 𑀏𑀓𑀦𑁆𑀢𑀢𑁄 𑀅𑀓𑀼𑀲𑀮𑀫𑁂𑀯, 𑀢𑀢𑁆𑀣 ‘‘𑀲𑀺𑀬𑀸 𑀅𑀓𑀼𑀲𑀮’’𑀦𑁆𑀢𑀺 𑀯𑀺𑀓𑀧𑁆𑀧𑁄 𑀦𑀢𑁆𑀣𑀺. 𑀬𑀁 𑀧𑀦 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀢𑀁 𑀬𑀲𑁆𑀫𑀸 𑀲𑀜𑁆𑀘𑀺𑀘𑁆𑀘 ‘‘𑀇𑀫𑀁 𑀆𑀧𑀢𑁆𑀢𑀺𑀁 𑀯𑀻𑀢𑀺𑀓𑁆𑀓𑀫𑀸𑀫𑀻’’𑀢𑀺 𑀯𑀻𑀢𑀺𑀓𑁆𑀓𑀫𑀦𑁆𑀢𑀲𑁆𑀲𑁂𑀯 𑀅𑀓𑀼𑀲𑀮𑀁 𑀳𑁄𑀢𑀺, 𑀅𑀲𑀜𑁆𑀘𑀺𑀘𑁆𑀘 𑀧𑀦 𑀓𑀺𑀜𑁆𑀘𑀺 𑀅𑀚𑀸𑀦𑀦𑁆𑀢𑀲𑁆𑀲 𑀲𑀳𑀲𑁂𑀬𑁆𑀬𑀸𑀤𑀺𑀯𑀲𑁂𑀦 𑀆𑀧𑀚𑁆𑀚𑀢𑁄 𑀭𑀽𑀧𑀯𑀺𑀧𑀸𑀓𑀁 𑀅𑀩𑁆𑀬𑀸𑀓𑀢𑀁 𑀳𑁄𑀢𑀺 𑀅𑀦𑀼𑀝𑁆𑀞𑀸𑀦𑀢𑁄. 𑀢𑀲𑁆𑀫𑀸 𑀢𑀲𑁆𑀲 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀲𑁆𑀲 𑀲𑀜𑁆𑀘𑀺𑀘𑁆𑀘𑀸𑀲𑀜𑁆𑀘𑀺𑀘𑁆𑀘𑀯𑀲𑁂𑀦 𑀇𑀫𑀁 𑀯𑀺𑀓𑀧𑁆𑀧𑀪𑀸𑀯𑀁 𑀲𑀦𑁆𑀥𑀸𑀬 𑀇𑀤𑀁 𑀯𑀼𑀢𑁆𑀢𑀁 ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀺𑀬𑀸 𑀅𑀓𑀼𑀲𑀮𑀁, 𑀲𑀺𑀬𑀸 𑀅𑀩𑁆𑀬𑀸𑀓𑀢𑀁, 𑀦𑀢𑁆𑀣𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀼𑀲𑀮’’𑀦𑁆𑀢𑀺.
𑀲𑀘𑁂 𑀧𑀦 𑀓𑁄𑀘𑀺 𑀯𑀺𑀦𑀬𑁂 𑀅𑀧𑀓𑀢𑀜𑁆𑀜𑀽 ‘‘𑀬𑀁 𑀓𑀼𑀲𑀮𑀘𑀺𑀢𑁆𑀢𑁄 𑀆𑀧𑀚𑁆𑀚𑀢𑀺, 𑀇𑀤𑀁 𑀯𑀼𑀘𑁆𑀘𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀼𑀲𑀮’’𑀦𑁆𑀢𑀺 𑀯𑀤𑁂𑀬𑁆𑀬, 𑀢𑀲𑁆𑀲𑁂𑀯𑀁𑀯𑀸𑀤𑀺𑀦𑁄 𑀅𑀘𑀺𑀢𑁆𑀢𑀓𑀸𑀦𑀁 𑀏𑀴𑀓𑀮𑁄𑀫𑀸𑀤𑀺𑀲𑀫𑀼𑀝𑁆𑀞𑀸𑀦𑀸𑀦𑀫𑁆𑀧𑀺 𑀓𑀼𑀲𑀮𑀘𑀺𑀢𑁆𑀢𑀲𑀫𑀗𑁆𑀕𑀺𑀓𑀸𑀮𑁂 𑀢𑀸𑀲𑀁 𑀆𑀧𑀢𑁆𑀢𑀻𑀦𑀁 𑀓𑀼𑀲𑀮𑀘𑀺𑀢𑁆𑀢𑁄 𑀆𑀧𑀚𑁆𑀚𑁂𑀬𑁆𑀬, 𑀦 𑀯𑀸 𑀆𑀧𑀚𑁆𑀚𑀢𑀺. 𑀓𑀺𑀁𑀓𑀸𑀭𑀡𑀁? 𑀦 𑀘 𑀢𑀢𑁆𑀣 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀓𑀼𑀲𑀮𑀘𑀺𑀢𑁆𑀢𑀁 𑀆𑀧𑀢𑁆𑀢𑀺𑀬𑀸 𑀅𑀗𑁆𑀕𑀁. 𑀅𑀢𑁆𑀢𑀪𑀸𑀯𑁄 𑀲𑀪𑀸𑀯𑁄 𑀧𑀓𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀢𑀭𑀁 𑀧𑀦 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀢𑀤𑀸 𑀅𑀗𑁆𑀕𑀲𑀪𑀸𑀯𑁄𑀢𑀺? 𑀯𑀼𑀘𑁆𑀘𑀢𑁂 𑁋 𑀓𑀸𑀬𑀯𑀘𑀻𑀯𑀺𑀜𑁆𑀜𑀢𑁆𑀢𑀺𑀯𑀲𑁂𑀦 𑀧𑀦 𑀘𑀮𑀺𑀢𑀲𑁆𑀲 𑀓𑀸𑀬𑀲𑁆𑀲, 𑀧𑀯𑀢𑁆𑀢𑀸𑀬 𑀯𑀸𑀘𑀸𑀬 𑀘𑀸𑀢𑀺 𑀏𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀘𑀮𑀺𑀢𑀧𑁆𑀧𑀯𑀢𑁆𑀢𑀸𑀦𑀁 𑀓𑀸𑀬𑀯𑀸𑀘𑀸𑀦𑀁 𑀅𑀜𑁆𑀜𑀢𑀭𑀫𑁂𑀯 𑀅𑀗𑁆𑀕𑀲𑀪𑀸𑀯𑁄, 𑀢𑀜𑁆𑀘 𑀭𑀽𑀧𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀅𑀩𑁆𑀬𑀸𑀓𑀢𑀦𑁆𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀓𑀸𑀬𑁄, 𑀯𑀸𑀘𑀸 𑀘 𑀢𑀤𑀸 𑀆𑀧𑀢𑁆𑀢𑀸𑀥𑀺𑀓𑀭𑀡𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀸 𑀧𑀦𑁂𑀢𑁆𑀣 𑀅𑀓𑀼𑀲𑀮𑀸𑀧𑀢𑁆𑀢𑀺𑀓𑁆𑀔𑀡𑁂 𑀓𑀸𑀬𑀯𑀸𑀘𑀸𑀬𑁄 𑀅𑀩𑁆𑀬𑀸𑀓𑀢𑀪𑀸𑀯𑁄, 𑀢𑀸 𑀅𑀩𑁆𑀩𑁄𑀳𑀸𑀭𑀺𑀓𑀸 𑀳𑁄𑀦𑁆𑀢𑀺 𑀓𑀸𑀬𑀯𑀘𑀻𑀓𑀫𑁆𑀫𑀓𑀸𑀮𑁂 𑀫𑀦𑁄𑀓𑀫𑁆𑀫𑀁 𑀯𑀺𑀬. 𑀢𑀤𑀸 𑀳𑀺 𑀓𑀸𑀬𑀯𑀸𑀘𑀸𑀬𑁄 𑀆𑀧𑀢𑁆𑀢𑀺𑀓𑀭𑀸𑀤𑀺𑀝𑁆𑀞𑀸𑀦𑁂 𑀢𑀺𑀝𑁆𑀞𑀦𑁆𑀢𑀺. 𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀆𑀧𑀢𑁆𑀢𑀺𑀓𑀭𑀸 𑀥𑀫𑁆𑀫𑀸 𑀚𑀸𑀦𑀺𑀢𑀩𑁆𑀩𑀸. 𑀓𑀢𑀺 𑀫𑀽𑀮𑀸𑀦𑀻𑀢𑀺 𑀙 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀺 𑀫𑀽𑀮𑀸𑀦𑀻’’𑀢𑀺𑀆𑀤𑀺. 𑀬𑀤𑀸 𑀧𑀦 𑀓𑀸𑀬𑀯𑀸𑀘𑀸𑀬𑁄 𑀆𑀧𑀢𑁆𑀢𑀺𑀬𑀸 𑀅𑀗𑁆𑀕𑀫𑁂𑀯 𑀳𑁄𑀦𑁆𑀢𑀺, 𑀢𑀤𑀸 ‘‘𑀘𑀺𑀢𑁆𑀢𑀁 𑀘𑀺𑀢𑁆𑀢𑀸𑀥𑀺𑀧𑀢𑁂𑀬𑁆𑀬’’𑀦𑁆𑀢𑀺 (𑀥. 𑀲. 𑀅𑀝𑁆𑀞. 𑁧 𑀓𑀸𑀫𑀸𑀯𑀘𑀭𑀓𑀼𑀲𑀮𑀯𑀡𑁆𑀡𑀦𑀸) 𑀯𑀘𑀦𑀁 𑀯𑀺𑀬 𑀧𑀼𑀩𑁆𑀩𑀧𑀬𑁄𑀕𑀸𑀦𑀁 𑀅𑀧𑀭𑀧𑀬𑁄𑀕𑀲𑁆𑀲 𑀧𑀘𑁆𑀘𑀬𑀪𑀸𑀯𑀢𑁄 𑀆𑀧𑀢𑁆𑀢𑀺𑀓𑀭𑀸𑀤𑀺𑀧𑀜𑁆𑀜𑀢𑁆𑀢𑀺𑀁 𑀦 𑀯𑀺𑀚𑀳𑀦𑁆𑀢𑀺. 𑀬𑀣𑀸 𑀢𑀩𑁆𑀪𑀸𑀯𑁂𑀧𑀺 ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀓𑀢𑀺 𑀯𑀢𑁆𑀣𑀽𑀦𑀻𑀢𑀺? 𑀲𑀢𑁆𑀢 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀯𑀢𑁆𑀣𑀽𑀦𑀺. 𑀓𑀢𑀺 𑀪𑀽𑀫𑀺𑀬𑁄𑀢𑀺? 𑀲𑀢𑁆𑀢 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀪𑀽𑀫𑀺𑀬𑁄’’𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀢𑀩𑁆𑀪𑀸𑀯𑁂𑀧𑀺 𑀆𑀧𑀢𑁆𑀢𑀺𑀓𑀭𑀸 ‘‘𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸’’𑀇𑀘𑁆𑀘𑁂𑀯 𑀯𑀼𑀘𑁆𑀘𑀦𑁆𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀢𑀸𑀯𑀢𑀸 𑀆𑀧𑀢𑁆𑀢𑀺 𑀦𑀸𑀫 𑀘𑀢𑁆𑀢𑀸𑀭𑁄 𑀅𑀓𑀼𑀲𑀮𑀓𑁆𑀔𑀦𑁆𑀥𑀸 𑀲𑀜𑁆𑀘𑀺𑀘𑁆𑀘 𑀯𑀻𑀢𑀺𑀓𑁆𑀓𑀫𑀓𑀸𑀮𑁂 𑀪𑀽𑀢𑀸𑀭𑁄𑀘𑀦𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑀸𑀧𑀺 𑀅𑀯𑀺𑀲𑁂𑀲𑀢𑁄, 𑀯𑀺𑀲𑁂𑀲𑀢𑁄 𑀧𑀦 𑀲𑀩𑁆𑀩𑀸𑀧𑀺 𑀏𑀓𑀦𑁆𑀢𑀸𑀓𑀼𑀲𑀮𑀸 𑀅𑀓𑀼𑀲𑀮𑀸, 𑀅𑀦𑁂𑀓𑀦𑁆𑀢𑀸𑀓𑀼𑀲𑀮𑀸 𑀧𑀦 𑀕𑀺𑀭𑀕𑁆𑀕𑀲𑀫𑀚𑁆𑀚𑀘𑀺𑀢𑁆𑀢𑀸𑀕𑀸𑀭𑀲𑀗𑁆𑀖𑀸𑀦𑀺𑀇𑀢𑁆𑀣𑀸𑀮𑀗𑁆𑀓𑀸𑀭𑀕𑀦𑁆𑀥𑀯𑀡𑁆𑀡𑀓𑀯𑀸𑀲𑀺𑀢𑀧𑀺𑀜𑁆𑀜𑀸𑀓𑀧𑁆𑀧𑀪𑁂𑀤𑀸, 𑀪𑀺𑀓𑁆𑀔𑀼𑀦𑀺𑀆𑀤𑀻𑀦𑀁 𑀉𑀫𑁆𑀫𑀤𑁆𑀤𑀦𑀧𑀭𑀺𑀫𑀤𑁆𑀤𑀦𑀧𑁆𑀧𑀪𑁂𑀤𑀸 𑀘𑀸𑀢𑀺 𑀤𑀲𑀧𑁆𑀧𑀪𑁂𑀤𑀸 𑀲𑀓𑀦𑀸𑀫𑁂𑀳𑀺 𑀧𑀭𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀯𑀢𑁆𑀣𑀼𑀚𑀸𑀦𑀦𑀲𑀘𑀺𑀢𑁆𑀢𑀓𑀓𑀸𑀮𑁂 𑀏𑀯 𑀅𑀓𑀼𑀲𑀮𑀸, 𑀢𑀤𑀪𑀸𑀯𑀢𑁄 𑀅𑀘𑀺𑀢𑁆𑀢𑀓𑀓𑀸𑀮𑁂 𑀯𑀺𑀦𑀸 𑀅𑀦𑀸𑀧𑀢𑁆𑀢𑀸𑀥𑀺𑀓𑀭𑀡𑁂𑀦 𑀓𑀫𑁆𑀫𑀝𑁆𑀞𑀸𑀦𑀸𑀤𑀺𑀲𑀻𑀲𑁂𑀦 𑀓𑀼𑀲𑀮𑀘𑀺𑀢𑁆𑀢𑁂𑀦 𑀢𑀁 𑀢𑀁 𑀯𑀢𑁆𑀣𑀼𑀁 𑀯𑀻𑀢𑀺𑀓𑁆𑀓𑀫𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀓𑁂𑀯𑀮𑀁 𑀭𑀽𑀧𑀅𑀩𑁆𑀬𑀸𑀓𑀢𑀫𑁂𑀯.
𑀓𑁂𑀘𑀺 𑀧𑀦𑁂𑀢𑁆𑀣 ‘‘𑀅𑀧𑁆𑀧𑀓𑀸𑀲𑁂 𑀞𑀸𑀦𑁂 𑀓𑀝𑀺𑀲𑀼𑀢𑁆𑀢𑀓𑀲𑀜𑁆𑀜𑀸𑀬 𑀲𑀗𑁆𑀖𑀸𑀡𑀺𑀁, 𑀫𑀢𑁆𑀢𑀺𑀓𑀸𑀲𑀜𑁆𑀜𑀸𑀬 𑀕𑀦𑁆𑀥𑀯𑀡𑁆𑀡𑀓𑀸𑀤𑀺𑀁 𑀯𑀸 𑀥𑀸𑀭𑁂𑀦𑁆𑀢𑀺𑀬𑀸𑀧𑀺 𑀆𑀧𑀢𑁆𑀢𑀺, 𑀢𑀲𑁆𑀫𑀸 𑀅𑀘𑀺𑀢𑁆𑀢𑀓𑀸𑀬𑁂𑀯𑀸’’𑀢𑀺 𑀯𑀡𑁆𑀡𑀬𑀦𑁆𑀢𑀺. 𑀢𑁂 ‘‘𑀲𑀗𑁆𑀖𑀸𑀡𑀺𑀬𑀸 𑀅𑀲𑀗𑁆𑀖𑀸𑀡𑀺𑀲𑀜𑁆𑀜𑀸𑀬 𑀥𑀸𑀭𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 𑀧𑀸𑀞𑀸𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸. 𑀲𑀼𑀭𑀸𑀧𑀸𑀦𑀸𑀧𑀢𑁆𑀢𑀺 𑀧𑀦 𑀅𑀘𑀺𑀢𑁆𑀢𑀓𑀸𑀧𑀺 𑀏𑀓𑀦𑁆𑀢𑀸𑀓𑀼𑀲𑀮𑀸𑀯. 𑀢𑁂𑀦𑁂𑀯 ‘‘𑀫𑀚𑁆𑀚𑁂 𑀅𑀫𑀚𑁆𑀚𑀲𑀜𑁆𑀜𑀻 𑀧𑀺𑀯𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 (𑀧𑀸𑀘𑀺. 𑁩𑁨𑁮) 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀆𑀩𑀸𑀥𑀧𑀘𑁆𑀘𑀬𑀸𑀧𑀺 𑀦 𑀲𑀓𑁆𑀓𑀸 𑀯𑀺𑀦𑀸 𑀅𑀓𑀼𑀲𑀮𑁂𑀦 𑀲𑀼𑀭𑀸𑀧𑀸𑀦𑀁 𑀧𑀸𑀢𑀼𑀁, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑁂𑀲𑀼 𑀅𑀦𑁂𑀓𑀦𑁆𑀢𑀸𑀓𑀼𑀲𑀮𑁂𑀲𑀼 𑀯𑀺𑀬 𑀮𑁄𑀓𑀯𑀚𑁆𑀚𑁂𑀲𑀼 𑀇𑀥 ‘‘𑀲𑀼𑀭𑀸𑀧𑀸𑀦𑁂𑀲𑀼 𑀅𑀦𑀸𑀧𑀢𑁆𑀢𑀺 𑀆𑀩𑀸𑀥𑀧𑀘𑁆𑀘𑀬𑀸’’𑀢𑀺 𑀦 𑀯𑀼𑀢𑁆𑀢𑀁. 𑀲𑀽𑀧𑀲𑀁𑀧𑀸𑀓𑀸𑀤𑀺 𑀧𑀦 𑀅𑀫𑀚𑁆𑀚𑀫𑁂𑀯. 𑀢𑀢𑁆𑀣 𑀓𑀼𑀓𑁆𑀓𑀼𑀘𑁆𑀘𑀯𑀺𑀦𑁄𑀤𑀦𑀢𑁆𑀣𑀁 ‘‘𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁 𑀉𑀤𑀓𑀤𑀦𑁆𑀢𑀧𑁄𑀡𑁂 𑀯𑀺𑀬. 𑀪𑀽𑀢𑀸𑀭𑁄𑀘𑀦𑀸𑀧𑀢𑁆𑀢𑀺 𑀭𑀽𑀧𑀸𑀩𑁆𑀬𑀸𑀓𑀢𑀫𑁂𑀯, 𑀅𑀘𑀺𑀢𑁆𑀢𑀓𑀓𑀸𑀮𑁂 𑀲𑀳𑀲𑁂𑀬𑁆𑀬𑀸𑀤𑀺 𑀭𑀽𑀧𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀫𑁂𑀯, 𑀢𑀢𑁆𑀣 𑀲𑀼𑀧𑀺𑀦𑀦𑁆𑀢𑁄 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀅𑀓𑀼𑀲𑀮𑀁 𑀅𑀦𑀗𑁆𑀕𑀢𑁆𑀢𑀸 𑀅𑀩𑁆𑀩𑁄𑀳𑀸𑀭𑀺𑀓𑀁 𑀳𑁄𑀢𑀺. 𑀓𑀼𑀲𑀮𑁂 𑀓𑀣𑀸𑀯 𑀦𑀢𑁆𑀣𑀺 𑀅𑀦𑀸𑀧𑀢𑁆𑀢𑀺 𑀲𑀪𑀸𑀯𑀢𑁆𑀢𑀸 𑀓𑀼𑀲𑀮𑀲𑁆𑀲. 𑀢𑀣𑀸 𑀓𑀺𑀭𑀺𑀬𑀸𑀢𑀺 𑀇𑀫𑀺𑀦𑀸 𑀦𑀬𑁂𑀦 𑀲𑀩𑁆𑀩𑀢𑁆𑀣 𑀬𑀣𑀸𑀲𑀫𑁆𑀪𑀯𑀁 𑀅𑀓𑀼𑀲𑀮𑀁 𑀯𑀸 𑀲𑀼𑀤𑁆𑀥𑀭𑀽𑀧𑀁 𑀯𑀸 𑀲𑀯𑀺𑀧𑀸𑀓𑀁 𑀯𑀸𑀢𑀺 𑀢𑀺𑀥𑀸 𑀪𑀺𑀚𑁆𑀚𑀢𑀻𑀢𑀺 𑀅𑀬𑀫𑀢𑁆𑀣𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺.
𑀢𑀢𑁆𑀣 𑀞𑀧𑁂𑀢𑁆𑀯𑀸 𑀲𑀼𑀭𑀸𑀧𑀸𑀦𑀁 𑀏𑀓𑀘𑁆𑀘𑀜𑁆𑀘 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁, 𑀏𑀓𑀦𑁆𑀢𑀸𑀓𑀼𑀲𑀮𑀜𑁆𑀘 𑀲𑀘𑀺𑀢𑁆𑀢𑀓𑀫𑁂𑀯, 𑀪𑀽𑀢𑀸𑀭𑁄𑀘𑀦𑀁 𑀅𑀘𑀺𑀢𑁆𑀢𑀓𑀫𑁂𑀯, 𑀲𑁂𑀲𑀁 𑀲𑀳 𑀲𑀼𑀭𑀸𑀧𑀸𑀦𑁂𑀦 𑀅𑀦𑁂𑀓𑀦𑁆𑀢𑀸𑀓𑀼𑀲𑀮𑀁 𑀮𑁄𑀓𑀯𑀚𑁆𑀚𑀜𑁆𑀘 𑀅𑀦𑁂𑀓𑀦𑁆𑀢𑀸𑀩𑁆𑀬𑀸𑀓𑀢𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀜𑁆𑀘 𑀬𑁂𑀪𑀼𑀬𑁆𑀬𑁂𑀦 𑀲𑀘𑀺𑀢𑁆𑀢𑀓𑀸𑀘𑀺𑀢𑁆𑀢𑀓𑀦𑁆𑀢𑀺 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀁 𑀢𑀺𑀧𑁆𑀧𑀪𑁂𑀤𑀁 𑀳𑁄𑀢𑀺. 𑀬𑀁 𑀧𑀦𑁂𑀢𑁆𑀣 𑀲𑀘𑀺𑀢𑁆𑀢𑀓𑀫𑁂𑀯, 𑀢𑀁 𑀫𑁂𑀣𑀼𑀦𑀸𑀤𑀺𑀯𑀢𑁆𑀣𑀼𑀚𑀸𑀦𑀦𑀘𑀺𑀢𑁆𑀢𑁂𑀦𑁂𑀯 𑀲𑀘𑀺𑀢𑁆𑀢𑀓𑀁, 𑀲𑀩𑁆𑀩𑀁 𑀲𑁂𑀔𑀺𑀬𑀁 𑀧𑀡𑁆𑀡𑀢𑁆𑀢𑀺𑀚𑀸𑀦𑀦𑀘𑀺𑀢𑁆𑀢𑁂𑀦𑁂𑀯 𑀲𑀘𑀺𑀢𑁆𑀢𑀓𑀁 ‘‘𑀅𑀦𑀸𑀤𑀭𑀺𑀬𑀁 𑀧𑀝𑀺𑀘𑁆𑀘𑀸’’𑀢𑀺 𑀯𑀘𑀦𑀢𑁄𑀢𑀺 𑀲𑀘𑀺𑀢𑁆𑀢𑀓𑀁 𑀤𑀼𑀯𑀺𑀥𑀁 𑀳𑁄𑀢𑀺. 𑀏𑀓𑀦𑁆𑀢𑀸𑀘𑀺𑀢𑁆𑀢𑀓𑀁 𑀧𑀡𑁆𑀡𑀢𑁆𑀢𑀺𑀚𑀸𑀦𑀦𑀘𑀺𑀢𑁆𑀢𑀸𑀪𑀸𑀯𑁂𑀦, 𑀦 𑀯𑀢𑁆𑀣𑀼𑀚𑀸𑀦𑀦𑀘𑀺𑀢𑁆𑀢𑀸𑀪𑀸𑀯𑁂𑀦. 𑀢𑀤𑀪𑀸𑀯𑀢𑁄 𑀏𑀓𑀦𑁆𑀢𑀸𑀓𑀼𑀲𑀮𑀁 𑀲𑀼𑀭𑀸𑀧𑀸𑀦𑀁, 𑀏𑀓𑀦𑁆𑀢𑀸𑀩𑁆𑀬𑀸𑀓𑀢𑀁 𑀲𑀜𑁆𑀘𑀭𑀺𑀢𑁆𑀢𑀁, 𑀯𑀢𑁆𑀣𑀼𑀚𑀸𑀦𑀦𑀘𑀺𑀢𑁆𑀢𑀲𑁆𑀲 𑀯𑀸 𑀧𑀡𑁆𑀡𑀢𑁆𑀢𑀺𑀚𑀸𑀦𑀦𑀘𑀺𑀢𑁆𑀢𑀲𑁆𑀲 𑀯𑀸 𑀉𑀪𑀺𑀦𑁆𑀦𑀁 𑀅𑀪𑀸𑀯𑁂𑀦 𑀅𑀘𑀺𑀢𑁆𑀢𑀓𑀪𑀸𑀯𑁂𑀦 𑀅𑀘𑀺𑀢𑁆𑀢𑀓𑀁 𑀳𑁄𑀢𑀺. 𑀲𑀼𑀭𑀸𑀧𑀸𑀦𑀁 𑀧𑀦 𑀲𑀘𑀺𑀢𑁆𑀢𑀓𑀁 𑀳𑁄𑀢𑀺 𑀯𑀢𑁆𑀣𑀼𑀚𑀸𑀦𑀦𑀘𑀺𑀢𑁆𑀢𑁂𑀦𑁂𑀯. 𑀅𑀭𑀺𑀬𑀧𑀼𑀕𑁆𑀕𑀮𑀸𑀦𑀁 𑀇𑀢𑀭𑁂𑀲𑀁 𑀉𑀪𑀺𑀦𑁆𑀦𑀁 𑀯𑀸 𑀅𑀜𑁆𑀜𑀢𑀭𑀲𑁆𑀲 𑀪𑀸𑀯𑁂𑀦 𑀲𑁂𑀲𑀁 𑀘𑀺𑀢𑁆𑀢𑀓𑀸𑀘𑀺𑀢𑁆𑀢𑀓𑀁. 𑀯𑀺𑀲𑁂𑀲𑀢𑁄 𑀘 𑀯𑀢𑁆𑀣𑀼𑀚𑀸𑀦𑀦𑀘𑀺𑀢𑁆𑀢𑀸𑀪𑀸𑀯𑁂𑀦, 𑀅𑀧𑀓𑀢𑀜𑁆𑀜𑀼𑀦𑁄 𑀧𑀡𑁆𑀡𑀢𑁆𑀢𑀺𑀚𑀸𑀦𑀦𑀘𑀺𑀢𑁆𑀢𑀸𑀪𑀸𑀯𑁂𑀦 𑀯𑀸 𑀅𑀘𑀺𑀢𑁆𑀢𑀓𑀪𑀸𑀯𑁂𑀦 𑀅𑀘𑀺𑀢𑁆𑀢𑀓𑀁 𑀳𑁄𑀢𑀺. 𑀢𑀢𑁆𑀣 𑀏𑀓𑀦𑁆𑀢𑀸𑀘𑀺𑀢𑁆𑀢𑀓𑀜𑁆𑀘 𑀲𑀘𑀺𑀢𑁆𑀢𑀓𑀜𑁆𑀘 ‘‘𑀅𑀘𑀺𑀢𑁆𑀢𑀓’’𑀫𑀺𑀘𑁆𑀘𑁂𑀯 𑀯𑀼𑀘𑁆𑀘𑀢𑀺. 𑀅𑀬𑀁 𑀢𑀸𑀯 ‘‘𑀆𑀧𑀢𑁆𑀢𑀺 𑀚𑀸𑀦𑀺𑀢𑀩𑁆𑀩𑀸’’𑀢𑀺 𑀏𑀢𑁆𑀣 𑀯𑀺𑀦𑀺𑀘𑁆𑀙𑀬𑁄.
𑀫𑀽𑀮𑀯𑀺𑀲𑀼𑀤𑁆𑀥𑀺𑀬𑀸 𑀅𑀦𑁆𑀢𑀭𑀸𑀧𑀢𑁆𑀢𑀻𑀢𑀺 𑀅𑀦𑁆𑀢𑀭𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸 𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀁 𑀓𑀢𑁆𑀯𑀸 𑀞𑀺𑀢𑁂𑀦 𑀆𑀧𑀦𑁆𑀦𑀸𑀧𑀢𑁆𑀢𑀺. 𑀅𑀬𑀁 𑀅𑀕𑁆𑀖𑀯𑀺𑀲𑀼𑀤𑁆𑀥𑀺𑀬𑀸 𑀅𑀦𑁆𑀢𑀭𑀸𑀧𑀢𑁆𑀢𑀻𑀢𑀺 𑀲𑀫𑁆𑀩𑀳𑀼𑀮𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺𑀢𑁆𑀯𑀸 𑀢𑀸𑀲𑀼 𑀲𑀩𑁆𑀩𑀘𑀺𑀭𑀧𑀝𑀺𑀘𑁆𑀙𑀦𑁆𑀦𑀯𑀲𑁂𑀦 𑀅𑀕𑁆𑀖𑀲𑀫𑁄𑀥𑀸𑀦𑀁 𑀕𑀳𑁂𑀢𑁆𑀯𑀸 𑀯𑀲𑀦𑁆𑀢𑁂𑀦 𑀆𑀧𑀦𑁆𑀦𑀸𑀧𑀢𑁆𑀢𑀺. ‘‘𑀧𑀼𑀦𑀧𑀺 𑀆𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀲𑀉𑀲𑁆𑀲𑀸𑀳𑁂𑀦𑁂𑀯 𑀘𑀺𑀢𑁆𑀢𑁂𑀦. ‘‘𑀅𑀬𑀁 𑀪𑀺𑀓𑁆𑀔𑀼𑀦𑀺𑀬𑀸 𑀏𑀯𑀸’’𑀢𑀺 𑀮𑀺𑀔𑀺𑀢𑀁. ‘‘𑀧𑀸𑀭𑀸𑀚𑀺𑀓𑀫𑁂𑀯𑀸’’𑀢𑀺 𑀇𑀤𑀜𑁆𑀘 𑀪𑀽𑀢𑀯𑀲𑁂𑀦 𑀤𑀲𑁆𑀲𑁂𑀢𑀼𑀁 𑀯𑀼𑀢𑁆𑀢𑀁. ‘‘𑀏𑀯𑀁 𑀤𑁂𑀲𑀺𑀢𑁂 𑀧𑀦 𑀬𑀸 𑀓𑀸𑀘𑀺 𑀆𑀧𑀢𑁆𑀢𑀺 𑀦 𑀯𑀼𑀝𑁆𑀞𑀸𑀢𑀻𑀢𑀺 𑀅𑀧𑀭𑁂, 𑀢𑀁 𑀦 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀥𑀫𑁆𑀫𑀺𑀓𑀲𑁆𑀲 𑀧𑀝𑀺𑀲𑁆𑀲𑀯𑀲𑁆𑀲 𑀅𑀲𑀘𑁆𑀘𑀸𑀧𑀦𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀥𑀫𑁆𑀫𑀺𑀓𑀧𑀝𑀺𑀲𑁆𑀲𑀯𑁂 𑀤𑀼𑀓𑁆𑀓𑀝𑀁 𑀦 𑀳𑁄𑀢𑀺. ‘‘𑀧𑀼𑀩𑁆𑀩𑁂 𑀲𑀼𑀤𑁆𑀥𑀘𑀺𑀢𑁆𑀢𑀲𑁆𑀲 ‘𑀢𑀼𑀫𑁆𑀳𑁂 𑀯𑀺𑀩𑁆𑀪𑀫𑀣𑀸’𑀢𑀺 𑀯𑀼𑀢𑁆𑀢𑁂 ‘𑀲𑀸𑀥𑀽’𑀢𑀺 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀲𑀘𑁂 𑀦 𑀯𑀺𑀩𑁆𑀪𑀫𑀢𑀺 𑀅𑀦𑀸𑀧𑀢𑁆𑀢𑀺, 𑀏𑀯𑀁 𑀲𑀩𑁆𑀩𑀢𑁆𑀣𑀸’’𑀢𑀺 𑀘 𑀯𑀼𑀢𑁆𑀢𑀁. ‘‘𑀆𑀯𑀺𑀓𑀭𑁄 𑀚𑀸𑀦𑀺𑀢𑀩𑁆𑀩𑁄’’𑀢𑀺𑀧𑀺 𑀧𑀸𑀴𑀺. 𑀓𑀸𑀮𑁂𑀦 𑀯𑀓𑁆𑀔𑀸𑀫𑀺, 𑀦𑁄 𑀅𑀓𑀸𑀮𑁂𑀦𑀸’’𑀢𑀺𑀆𑀤𑀻𑀲𑀼 𑀧𑀜𑁆𑀘𑀤𑀲𑀲𑀼 𑀥𑀫𑁆𑀫𑁂𑀲𑀼. 𑀪𑀩𑁆𑀩𑀸𑀧𑀢𑁆𑀢𑀺𑀓𑀸 𑀦𑀸𑀫 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑀼𑀁 𑀪𑀩𑁆𑀩𑀸.
𑀤𑀼𑀓𑀯𑀸𑀭𑀯𑀡𑁆𑀡𑀦𑀸
𑁩𑁨𑁨. 𑀦𑀺𑀤𑀳𑀦𑁂 𑀆𑀢𑀧𑁂. ‘‘𑀏𑀓𑀭𑀢𑁆𑀢𑀫𑁆𑀧𑀺 𑀘𑁂 𑀪𑀺𑀓𑁆𑀔𑀼 𑀢𑀺𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀲𑁂𑀬𑁆𑀬 (𑀧𑀸𑀭𑀸. 𑁪𑁭𑁨). 𑀙𑀸𑀭𑀢𑁆𑀢𑀧𑀭𑀫𑀁 𑀢𑁂𑀦𑀸’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁬𑁫𑁩) 𑀯𑀼𑀢𑁆𑀢𑀸𑀧𑀢𑁆𑀢𑀺𑀓𑁄 𑀕𑀡𑀧𑀽𑀭𑀓𑁄 𑀳𑀼𑀢𑁆𑀯𑀸𑀧𑀺 𑀓𑀫𑁆𑀫𑀁 𑀓𑁄𑀧𑁂𑀢𑀺 𑀦𑀸𑀦𑀸𑀲𑀁𑀯𑀸𑀲𑀓𑀢𑁆𑀢𑀸. 𑀓𑀫𑁆𑀫𑁂𑀦 𑀯𑀸 𑀲𑀮𑀸𑀓𑀕𑁆𑀕𑀸𑀳𑁂𑀦 𑀯𑀸𑀢𑀺 𑀏𑀢𑁆𑀣 𑀉𑀤𑁆𑀤𑁂𑀲𑁄 𑀘𑁂𑀯 𑀓𑀫𑁆𑀫𑀜𑁆𑀘 𑀏𑀓𑀦𑁆𑀢𑀺 𑀏𑀢𑁆𑀣 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄𑀢𑀺 𑀯𑀸 𑀓𑀫𑁆𑀫𑀦𑁆𑀢𑀺 𑀯𑀸 𑀅𑀢𑁆𑀣𑀢𑁄 𑀏𑀓𑀫𑁂𑀯, 𑀢𑁂𑀲𑀼 𑀬𑀁 𑀓𑀺𑀜𑁆𑀘𑀺 𑀓𑀢𑁂 𑀲𑀗𑁆𑀖𑀪𑁂𑀤𑁄 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀧𑀼𑀩𑁆𑀩𑀪𑀸𑀕𑀸𑀢𑀺 𑀲𑀗𑁆𑀖𑀪𑁂𑀤𑀢𑁄 𑀧𑀼𑀩𑁆𑀩𑀪𑀸𑀕𑀸. ‘‘𑀧𑀫𑀸𑀡’’𑀦𑁆𑀢𑀺 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀅𑀜𑁆𑀜𑀢𑀭𑁂𑀦 𑀪𑁂𑀤𑁄 𑀳𑁄𑀢𑀺, 𑀦 𑀇𑀢𑀭𑁂𑀳𑀻𑀢𑀺 𑀯𑀼𑀢𑁆𑀢𑀁. 𑀯𑀺𑀦𑀬𑁂 𑀲𑀺𑀤𑁆𑀥𑀸 𑀯𑀺𑀦𑀬𑀲𑀺𑀤𑁆𑀥𑀸, 𑀭𑁄𑀫𑀚𑀦𑀧𑀤𑁂 𑀚𑀸𑀢𑀁 𑀭𑁄𑀫𑀓𑀁, 𑀅𑀦𑀼𑀜𑁆𑀜𑀸𑀢𑀮𑁄𑀡𑀢𑁆𑀢𑀸 𑀤𑀼𑀓𑁂𑀲𑀼 𑀯𑀼𑀢𑁆𑀢𑀸𑀢𑀺.
𑀢𑀺𑀓𑀯𑀸𑀭𑀯𑀡𑁆𑀡𑀦𑀸
𑁩𑁨𑁩. 𑀯𑁄 𑀢𑀼𑀫𑁆𑀳𑁂𑀳𑀺 𑀦 𑀲𑀫𑀼𑀤𑀸𑀘𑀭𑀺𑀢𑀩𑁆𑀩𑀁. 𑀯𑀘𑀻𑀲𑀫𑁆𑀧𑀬𑀼𑀢𑁆𑀢𑀁 𑀓𑀸𑀬𑀓𑀺𑀭𑀺𑀬𑀁 𑀓𑀢𑁆𑀯𑀸𑀢𑀺 𑀓𑀸𑀬𑁂𑀦 𑀦𑀺𑀧𑀘𑁆𑀘𑀓𑀸𑀭𑀁 𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀉𑀧𑀖𑀸𑀢𑁂𑀢𑀺 𑀯𑀺𑀦𑀸𑀲𑁂𑀢𑀺. 𑀑𑀫𑀤𑁆𑀤𑀺𑀢𑁆𑀯𑀸𑀢𑀺 𑀅𑀪𑀺𑀪𑀯𑀺𑀢𑁆𑀯𑀸. 𑀯𑀤𑀢𑁄𑀢𑀺 𑀯𑀤𑀦𑁆𑀢𑀲𑁆𑀲. ‘‘𑀩𑀸𑀮𑀲𑁆𑀲 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄’’𑀢𑀺 𑀤𑀼𑀓𑁂 𑀆𑀕𑀢𑀁, 𑀇𑀥 𑀧𑀦 ‘‘𑀦 𑀤𑀸𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁, 𑀆𑀧𑀢𑁆𑀢𑀺𑀩𑀸𑀳𑀼𑀮𑁆𑀮𑀁 𑀲𑀦𑁆𑀥𑀸𑀬 𑀦𑀸𑀤𑀸𑀢𑀩𑁆𑀩𑀁, ‘‘𑀇𑀫𑀲𑁆𑀫𑀸 𑀯𑀺𑀳𑀸𑀭𑀸 𑀧𑀭𑀁 𑀫𑀸 𑀦𑀺𑀓𑁆𑀔𑀫𑀸𑀳𑀺, 𑀯𑀺𑀦𑀬𑀥𑀭𑀸𑀦𑀁 𑀯𑀸 𑀲𑀦𑁆𑀢𑀺𑀓𑀁 𑀆𑀕𑀘𑁆𑀙 𑀯𑀺𑀦𑀺𑀘𑁆𑀙𑀬𑀁 𑀤𑀸𑀢𑀼’’𑀦𑁆𑀢𑀺 𑀯𑀼𑀢𑁆𑀢𑁂 𑀢𑀲𑁆𑀲 𑀯𑀘𑀦𑀁 𑀦 𑀕𑀳𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄. 𑀢𑀺𑀓𑀪𑁄𑀚𑀦𑀁 𑀦𑀸𑀫 𑀲𑀘𑁂 𑀢𑀬𑁄 𑀳𑀼𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺, 𑀕𑀡𑀪𑁄𑀚𑀦𑁂𑀦 𑀅𑀦𑀸𑀧𑀢𑁆𑀢𑀺, 𑀇𑀤𑀁 𑀲𑀦𑁆𑀥𑀸𑀬 𑀢𑀺𑀓𑀁. ‘‘𑀧𑀲𑀼𑀢𑁆𑀢𑁄’’𑀢𑀺 𑀩𑀸𑀳𑀼𑀮𑁆𑀮𑀢𑁄 𑀯𑀼𑀢𑁆𑀢𑀁. 𑀅𑀣 𑀯𑀸 𑀦𑀺𑀧𑀚𑁆𑀚𑀺𑀢𑁆𑀯𑀸𑀢𑀺 𑀅𑀢𑁆𑀣𑁄. ‘‘𑀇𑀤𑀁 𑀞𑀧𑁂𑀢𑁆𑀯𑀸 𑀕𑀘𑁆𑀙𑀸𑀫𑀺, 𑀢𑀸𑀯𑀓𑀸𑀮𑀺𑀓𑀁 𑀪𑀦𑁆𑀢𑁂 𑀤𑁂𑀣𑀸𑀢𑀺 𑀯𑀼𑀢𑁆𑀢𑁂 ‘𑀦𑀯𑀓𑀫𑁆𑀫𑀸𑀤𑀺𑀅𑀢𑁆𑀣𑀁 𑀯𑀺𑀦𑀸 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀮𑀺𑀔𑀺𑀢𑀁. 𑀯𑀺𑀓𑀧𑁆𑀧𑁂𑀢𑁆𑀯𑀸 𑀞𑀧𑀺𑀢𑀁 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀧𑀘𑁆𑀙𑀺𑀫𑁂 𑀧𑀸𑀝𑀺𑀧𑀤𑀤𑀺𑀯𑀲𑁂 𑀦𑀺𑀯𑀸𑀲𑁂𑀦𑁆𑀢𑁄 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄. 𑀅𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸𑀢𑀺 𑀧𑀘𑁆𑀘𑀼𑀤𑁆𑀥𑀭𑀡𑀁 𑀅𑀓𑀢𑁆𑀯𑀸𑀢𑀺 𑀅𑀢𑁆𑀣𑁄. ‘‘𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 𑀯𑀘𑀦𑀢𑁄 𑀅𑀯𑀺𑀓𑀧𑁆𑀧𑀦𑀧𑀘𑁆𑀘𑀬𑀸 𑀆𑀧𑀢𑁆𑀢𑀺 𑀳𑁂𑀫𑀦𑁆𑀢𑁂 𑀆𑀧𑀚𑁆𑀚𑀢𑀺, 𑀯𑀺𑀓𑀧𑁆𑀧𑀦𑀸 𑀧𑀦 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀤𑀺𑀯𑀲𑁂 𑀓𑀸𑀢𑀩𑁆𑀩𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀜𑀸𑀢𑀩𑁆𑀩𑀁. 𑀅𑀬𑀁 𑀦𑀬𑁄 𑀅𑀯𑀺𑀓𑀧𑁆𑀧𑀦𑀁 𑀲𑀦𑁆𑀥𑀸𑀬, 𑀧𑀼𑀭𑀺𑀫𑁄 𑀯𑀺𑀓𑀧𑁆𑀧𑀺𑀢𑀧𑀭𑀺𑀪𑁄𑀕𑀧𑀘𑁆𑀘𑀬𑀸𑀧𑀢𑁆𑀢𑀺𑀁 𑀲𑀦𑁆𑀥𑀸𑀬. 𑀯𑀢𑁆𑀣𑀧𑀝𑀺𑀘𑁆𑀙𑀸𑀤𑀺 𑀲𑀩𑁆𑀩𑀓𑀧𑁆𑀧𑀺𑀬𑀢𑀸𑀬𑀸𑀢𑀺 𑀯𑀢𑁆𑀣𑀧𑀝𑀺𑀘𑁆𑀙𑀸𑀤𑀺 𑀲𑀩𑁆𑀩𑀢𑁆𑀣 𑀓𑀧𑁆𑀧𑀺𑀬𑀢𑁆𑀢𑀸𑀢𑀺 𑀅𑀢𑁆𑀣𑁄. 𑀓𑁂𑀘𑀺 𑀇𑀫𑀫𑀢𑁆𑀣𑀁 𑀅𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀯𑀢𑁆𑀣𑀧𑀝𑀺𑀘𑁆𑀙𑀸𑀤𑀺 𑀲𑀩𑁆𑀩𑀓𑀧𑁆𑀧𑀺𑀬𑀢𑀸 𑀢𑀸𑀬 𑀧𑀝𑀺𑀘𑁆𑀙𑀦𑁆𑀦𑁂𑀦𑀸’’𑀢𑀺 𑀮𑀺𑀔𑀦𑁆𑀢𑀺. ‘‘𑀯𑀢𑁆𑀣𑀫𑁂𑀯 𑀧𑀝𑀺𑀘𑁆𑀙𑀸𑀤𑀺 𑀯𑀢𑁆𑀣𑀧𑀝𑀺𑀘𑁆𑀙𑀸𑀤𑀻’’𑀢𑀺 𑀯𑀺𑀕𑁆𑀕𑀳𑀢𑁆𑀢𑀸 ‘‘𑀢𑀸𑀬𑀸’’𑀢𑀺 𑀦 𑀬𑀼𑀚𑁆𑀚𑀢𑀺. ‘‘𑀢𑁂𑀦𑀸’’𑀢𑀺 𑀪𑀯𑀺𑀢𑀩𑁆𑀩𑀢𑁆𑀢𑀸𑀢𑀺 𑀇𑀤𑀁 𑀲𑀩𑁆𑀩𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀡𑁆𑀞𑀺𑀧𑀤𑁂 𑀮𑀺𑀔𑀺𑀢𑀁, 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.
𑀘𑀢𑀼𑀓𑁆𑀓𑀯𑀸𑀭𑀯𑀡𑁆𑀡𑀦𑀸
𑁩𑁨𑁪. 𑀘𑀢𑀽𑀳𑀸𑀓𑀸𑀭𑁂𑀳𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺…𑀧𑁂… 𑀓𑀫𑁆𑀫𑀯𑀸𑀘𑀸𑀬 𑀆𑀧𑀚𑁆𑀚𑀢𑀻𑀢𑀺 𑀏𑀢𑁆𑀣 𑀬𑀜𑁆𑀳𑀺 𑀆𑀧𑀢𑁆𑀢𑀺𑀁 𑀓𑀫𑁆𑀫𑀯𑀸𑀘𑀸𑀬 𑀆𑀧𑀚𑁆𑀚𑀢𑀺, 𑀦 𑀢𑀢𑁆𑀣 𑀓𑀸𑀬𑀸𑀤𑀬𑁄𑀢𑀺 𑀆𑀧𑀦𑁆𑀦𑀁, 𑀢𑀢𑁄 𑀓𑀫𑁆𑀫𑀯𑀸𑀘𑀸𑀬 𑀲𑀤𑁆𑀥𑀺𑀁 𑀆𑀧𑀢𑁆𑀢𑀺𑀓𑀭𑀸 𑀥𑀫𑁆𑀫𑀸 𑀲𑀢𑁆𑀢𑀸𑀢𑀺 𑀆𑀧𑀚𑁆𑀚𑀢𑀺, 𑀏𑀯𑀁 𑀲𑀢𑀺 ‘‘𑀙 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀦𑀻’’𑀢𑀺 𑀯𑀘𑀦𑀯𑀺𑀭𑁄𑀥𑁄, 𑀢𑀸𑀦𑀺 𑀏𑀯 𑀆𑀧𑀢𑁆𑀢𑀺𑀓𑀭𑀸 𑀥𑀫𑁆𑀫𑀸 𑀦𑀸𑀫. 𑀅𑀣 𑀢𑀢𑁆𑀣𑀸𑀧𑀺 𑀓𑀸𑀬𑀸𑀤𑀬𑁄 𑀏𑀓𑀢𑁄 𑀯𑀸 𑀦𑀸𑀦𑀸𑀢𑁄 𑀯𑀸 𑀮𑀩𑁆𑀪𑀦𑁆𑀢𑀺, 𑀘𑀢𑀽𑀳𑀸𑀓𑀸𑀭𑁂𑀳𑀻𑀢𑀺 𑀦 𑀬𑀼𑀚𑁆𑀚𑀢𑀻𑀢𑀺 ‘‘𑀙𑀳𑀸𑀓𑀸𑀭𑁂𑀳𑀺 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺 𑀏𑀯𑀁 𑀏𑀢𑀸𑀦𑀺 𑀲𑀼𑀢𑁆𑀢𑀧𑀤𑀸𑀦𑀺 𑀯𑀺𑀭𑁄𑀥𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀓𑀣𑀁 𑀅𑀯𑀺𑀭𑁄𑀥𑀺𑀢𑀸𑀦𑀺? 𑀲𑀯𑀺𑀜𑁆𑀜𑀢𑁆𑀢𑀺𑀓𑀸𑀯𑀺𑀜𑁆𑀜𑀢𑁆𑀢𑀺𑀓𑀪𑁂𑀤𑀪𑀺𑀦𑁆𑀦𑀢𑁆𑀢𑀸. 𑀓𑀸𑀬𑀸𑀤𑀻𑀦𑀁 𑀬𑀸 𑀓𑀺𑀭𑀺𑀬𑀸 𑀆𑀧𑀢𑁆𑀢𑀺, 𑀦𑀁 𑀏𑀓𑀘𑁆𑀘𑀁 𑀓𑀸𑀬𑁂𑀦 𑀲𑀯𑀺𑀜𑁆𑀜𑀢𑁆𑀢𑀺𑀓𑁂𑀦 𑀆𑀧𑀚𑁆𑀚𑀢𑀺, 𑀏𑀓𑀘𑁆𑀘𑀁 𑀲𑀯𑀺𑀜𑁆𑀜𑀢𑁆𑀢𑀺𑀓𑀸𑀬 𑀯𑀸𑀘𑀸𑀬, 𑀏𑀓𑀘𑁆𑀘𑀁 𑀲𑀯𑀺𑀜𑁆𑀜𑀢𑁆𑀢𑀺𑀓𑀸𑀳𑀺 𑀓𑀸𑀬𑀯𑀸𑀘𑀸𑀳𑀺 𑀆𑀧𑀚𑁆𑀚𑀢𑀺, 𑀬𑀸 𑀧𑀦 𑀅𑀓𑀺𑀭𑀺𑀬𑀸 𑀆𑀧𑀢𑁆𑀢𑀺, 𑀢𑀁 𑀏𑀓𑀘𑁆𑀘𑀁 𑀓𑀫𑁆𑀫𑀯𑀸𑀘𑀸𑀬 𑀆𑀧𑀚𑁆𑀚𑀢𑀺, 𑀢𑀜𑁆𑀘 𑀔𑁄 𑀅𑀯𑀲𑀺𑀝𑁆𑀞𑀸𑀳𑀺 𑀅𑀯𑀺𑀜𑁆𑀜𑀢𑁆𑀢𑀺𑀓𑀸𑀳𑀺 𑀓𑀸𑀬𑀯𑀸𑀘𑀸𑀳𑀺𑀬𑁂𑀯, 𑀦 𑀯𑀺𑀦𑀸 ‘‘𑀦𑁄 𑀘𑁂 𑀓𑀸𑀬𑁂𑀦 𑀯𑀸𑀘𑀸𑀬 𑀧𑀝𑀺𑀦𑀺𑀲𑁆𑀲𑀚𑁆𑀚𑀢𑀺, 𑀓𑀫𑁆𑀫𑀯𑀸𑀘𑀸𑀧𑀭𑀺𑀬𑁄𑀲𑀸𑀦𑁂 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸’’𑀢𑀺 (𑀧𑀸𑀭𑀸. 𑁪𑁧𑁪) 𑀯𑀘𑀦𑀢𑁄, 𑀅𑀯𑀺𑀲𑁂𑀲𑁂𑀦 𑀯𑀸 𑀏𑀓𑀘𑁆𑀘𑀁 𑀆𑀧𑀢𑁆𑀢𑀺𑀁 𑀓𑀸𑀬𑁂𑀦 𑀆𑀧𑀚𑁆𑀚𑀢𑀺, 𑀏𑀓𑀘𑁆𑀘𑀁 𑀯𑀸𑀘𑀸𑀬, 𑀏𑀓𑀘𑁆𑀘𑀁 𑀓𑀸𑀬𑀯𑀸𑀘𑀸𑀳𑀺. 𑀬𑀁 𑀧𑀦𑁂𑀢𑁆𑀣 𑀓𑀸𑀬𑀯𑀸𑀘𑀸𑀳𑀺, 𑀢𑀁 𑀏𑀓𑀘𑁆𑀘𑀁 𑀓𑁂𑀯𑀮𑀸𑀳𑀺 𑀓𑀸𑀬𑀯𑀸𑀘𑀸𑀳𑀺 𑀆𑀧𑀚𑁆𑀚𑀢𑀺, 𑀏𑀓𑀘𑁆𑀘𑀁 𑀓𑀫𑁆𑀫𑀯𑀸𑀘𑀸𑀬 𑀆𑀧𑀚𑁆𑀚𑀢𑀻𑀢𑀺 𑀅𑀬𑀫𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 𑀏𑀯𑀁 𑀅𑀯𑀺𑀭𑁄𑀥𑀺𑀢𑀸𑀦𑀺 𑀳𑁄𑀦𑁆𑀢𑀺.
𑀢𑀢𑁆𑀭𑀸𑀬𑀁 𑀲𑀫𑀸𑀲𑀢𑁄 𑀅𑀢𑁆𑀣𑀯𑀺𑀪𑀸𑀯𑀦𑀸 𑁋 𑀓𑀸𑀬𑁂𑀦 𑀆𑀧𑀚𑁆𑀚𑀢𑀻𑀢𑀺 𑀓𑀸𑀬𑁂𑀦 𑀲𑀯𑀺𑀜𑁆𑀜𑀢𑁆𑀢𑀺𑀓𑁂𑀦 𑀅𑀓𑀢𑁆𑀢𑀩𑁆𑀩𑀁 𑀓𑀢𑁆𑀯𑀸 𑀏𑀓𑀘𑁆𑀘𑀁 𑀆𑀧𑀚𑁆𑀚𑀢𑀺, 𑀅𑀯𑀺𑀜𑁆𑀜𑀢𑁆𑀢𑀺𑀓𑁂𑀦 𑀓𑀢𑁆𑀢𑀩𑁆𑀩𑀁 𑀅𑀓𑀢𑁆𑀯𑀸 𑀆𑀧𑀚𑁆𑀚𑀢𑀺, 𑀢𑀤𑀼𑀪𑀬𑀫𑁆𑀧𑀺 𑀓𑀸𑀬𑀓𑀫𑁆𑀫𑀁 𑀦𑀸𑀫. 𑀅𑀓𑀢𑀫𑁆𑀧𑀺 𑀳𑀺 𑀮𑁄𑀓𑁂 ‘‘𑀓𑀢’’𑀦𑁆𑀢𑀺 𑀯𑀼𑀘𑁆𑀘𑀢𑀺 ‘‘𑀤𑀼𑀓𑁆𑀓𑀝𑀁 𑀫𑀬𑀸, 𑀬𑀁 𑀫𑀬𑀸 𑀧𑀼𑀜𑁆𑀜𑀁 𑀦 𑀓𑀢’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼, 𑀲𑀸𑀲𑀦𑁂 𑀘 ‘‘𑀇𑀤𑀁 𑀢𑁂, 𑀆𑀯𑀼𑀲𑁄 𑀆𑀦𑀦𑁆𑀤, 𑀤𑀼𑀓𑁆𑀓𑀝𑀁, 𑀬𑀁 𑀢𑁆𑀯𑀁 𑀪𑀕𑀯𑀦𑁆𑀢𑀁 𑀦 𑀧𑀼𑀘𑁆𑀙𑀻’’𑀢𑀺 (𑀘𑀽𑀴𑀯. 𑁪𑁪𑁩) 𑀏𑀯𑀫𑀸𑀤𑀻𑀲𑀼, 𑀏𑀯𑀫𑀺𑀥 𑀯𑀺𑀦𑀬𑀧𑀭𑀺𑀬𑀸𑀬𑁂𑀦 𑀓𑀸𑀬𑁂𑀦 𑀅𑀓𑀭𑀡𑀫𑁆𑀧𑀺 ‘‘𑀓𑀸𑀬𑀓𑀫𑁆𑀫’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀅𑀬𑀫𑁂𑀯 𑀦𑀬𑁄 ‘‘𑀯𑀸𑀘𑀸𑀬 𑀆𑀧𑀚𑁆𑀚𑀢𑀻’’𑀢𑀺𑀆𑀤𑀻𑀲𑀼. 𑀧𑀼𑀭𑀢𑀻𑀢𑀺 𑀧𑀼𑀭𑀺𑀲𑁄, 𑀧𑀼𑀭 𑀅𑀕𑁆𑀕𑀕𑀫𑀦𑁂. 𑀧𑀼𑀭𑀢𑀻𑀢𑀺 𑀧𑀼𑀭𑀢𑁄 𑀕𑀘𑁆𑀙𑀢𑀺 𑀲𑀩𑁆𑀩𑀓𑀫𑁆𑀫𑁂𑀲𑀼 𑀧𑀼𑀩𑁆𑀩𑀗𑁆𑀕𑀫𑁄 𑀳𑁄𑀢𑀺. 𑀧𑀞𑀫𑀼𑀧𑁆𑀧𑀦𑁆𑀦𑀯𑀲𑁂𑀦𑀸𑀢𑀺 𑀧𑀞𑀫𑀓𑀧𑁆𑀧𑀺𑀬𑁂𑀲𑀼 𑀳𑀺 𑀧𑀞𑀫𑀁 𑀧𑀼𑀭𑀺𑀲𑀮𑀺𑀗𑁆𑀕𑀁 𑀉𑀧𑁆𑀧𑀚𑁆𑀚𑀢𑀺, ‘‘𑀧𑀼𑀭𑀺𑀫’’𑀦𑁆𑀢𑀺 𑀲𑀗𑁆𑀔𑀁 𑀕𑀢𑀁 𑀧𑀼𑀭𑀺𑀲𑀮𑀺𑀗𑁆𑀕𑀁 𑀚𑀸𑀬𑀢𑀻𑀢𑀺 𑀅𑀢𑁆𑀣𑁄. 𑀲𑀢𑀁 𑀢𑀺𑀁𑀲 𑀘𑀸𑀢𑀺 𑀏𑀢𑁆𑀣 𑀅𑀲𑀸𑀥𑀸𑀭𑀡𑀸𑀧𑀺 𑀧𑀸𑀭𑀸𑀚𑀺𑀓𑀸 𑀦𑁄 𑀅𑀦𑁆𑀢𑁄𑀕𑀥𑀸𑀬𑁂𑀯 𑀚𑀸𑀢𑀸 𑀧𑀸𑀭𑀸𑀚𑀺𑀓𑀸𑀧𑀦𑁆𑀦𑀸𑀦𑀁 𑀪𑀺𑀓𑁆𑀔𑀼𑀪𑀸𑀯𑀸𑀬 𑀅𑀪𑀩𑁆𑀩𑀢𑁆𑀢𑀸. ‘‘𑀅𑀲𑀸𑀥𑀸𑀭𑀡𑀯𑀘𑀦𑁂𑀦 𑀧𑀦 𑀲𑀸𑀫𑀜𑁆𑀜𑁂𑀦 𑀉𑀤𑁆𑀥𑀝𑀸𑀦𑀻’’𑀢𑀺 𑀯𑀤𑀦𑁆𑀢𑀺. ‘‘𑀲𑀢𑀜𑁆𑀘𑁂𑀯 𑀢𑀺𑀁𑀲𑀜𑁆𑀘 𑀲𑀺𑀓𑁆𑀔𑀸𑀧𑀤𑀸𑀦𑀻𑀢𑀺 𑀧𑀸𑀞𑁄’’𑀢𑀺 𑀘 𑀯𑀤𑀦𑁆𑀢𑀺. 𑀪𑀺𑀓𑁆𑀔𑀼𑀲𑁆𑀲 𑀘 𑀪𑀺𑀓𑁆𑀔𑀼𑀦𑀺𑀬𑀸 𑀘 𑀘𑀢𑀽𑀲𑀼 𑀧𑀸𑀭𑀸𑀚𑀺𑀓𑁂𑀲𑀽𑀢𑀺 𑀲𑀸𑀥𑀸𑀭𑀡𑁂𑀲𑀼 𑀏𑀯. 𑀅𑀢𑁆𑀣𑀺 𑀯𑀢𑁆𑀣𑀼𑀦𑀸𑀦𑀢𑁆𑀢𑀢𑀸 𑀦𑁄 𑀆𑀧𑀢𑁆𑀢𑀺𑀦𑀸𑀦𑀢𑁆𑀢𑀢𑀸𑀢𑀺 𑀧𑀞𑀫𑀧𑀜𑁆𑀳𑁄 𑀇𑀥 𑀤𑀼𑀢𑀺𑀬𑁄 𑀦𑀸𑀫. 𑀅𑀢𑁆𑀣𑀺 𑀆𑀧𑀢𑁆𑀢𑀺𑀲𑀪𑀸𑀕𑀢𑀸 𑀦𑁄 𑀯𑀢𑁆𑀣𑀼𑀲𑀪𑀸𑀕𑀢𑀸𑀢𑀺 𑀏𑀢𑁂𑀦 𑀯𑀺𑀲𑁂𑀲𑁄 𑀦𑀢𑁆𑀣𑀺. 𑀫𑀦𑁆𑀢𑀸𑀪𑀸𑀲𑀸𑀢𑀺 𑀫𑀢𑀺𑀬𑀸 𑀪𑀸𑀲𑀸. ‘‘𑀅𑀪𑀺𑀯𑀸𑀤𑀦𑀸𑀭𑀳𑀸𑀢𑀺 𑀬𑀣𑀸𑀦𑀺𑀲𑀺𑀦𑁆𑀦𑀸𑀯 𑀲𑀻𑀲𑀁 𑀉𑀓𑁆𑀔𑀺𑀧𑀺𑀢𑁆𑀯𑀸 𑀯𑀦𑁆𑀤𑀦𑁆𑀢𑀺. 𑀦𑀯𑀫𑀪𑀺𑀓𑁆𑀔𑀼𑀦𑀺𑀢𑁄 𑀧𑀝𑁆𑀞𑀸𑀬 𑀅𑀦𑀼𑀝𑁆𑀞𑀺𑀢𑀩𑁆𑀩𑀢𑁄 𑀆𑀲𑀦𑀸 𑀦 𑀧𑀘𑁆𑀘𑀼𑀝𑁆𑀞𑁂𑀦𑁆𑀢𑀺. 𑀅𑀯𑀺𑀲𑁂𑀲𑁂𑀦𑀸𑀢𑀺 𑀉𑀧𑀚𑁆𑀛𑀸𑀬𑀲𑁆𑀲, 𑀇𑀢𑀭𑀲𑁆𑀲 𑀯𑀸 𑀯𑀺𑀧𑁆𑀧𑀓𑀢𑀪𑁄𑀚𑀦𑀲𑁆𑀲, 𑀲𑀫𑀻𑀧𑀕𑀢𑁄 𑀬𑁄 𑀓𑁄𑀘𑀺 𑀯𑀼𑀟𑁆𑀠𑀢𑀭𑁄𑀢𑀺 𑀅𑀢𑁆𑀣𑁄. 𑀯𑀺𑀧𑁆𑀧𑀓𑀢𑀪𑁄𑀚𑀦𑁂𑀦𑀸𑀧𑀺 𑀳𑀺 𑀉𑀝𑁆𑀞𑀳𑀺𑀢𑁆𑀯𑀸 𑀆𑀲𑀦𑀁 𑀤𑀸𑀢𑀩𑁆𑀩𑀁. 𑀇𑀥 𑀦 𑀓𑀧𑁆𑀧𑀦𑁆𑀢𑀻𑀢𑀺 𑀯𑀤𑀦𑁆𑀢𑁄𑀧𑀻𑀢𑀺 𑀧𑀘𑁆𑀘𑀦𑁆𑀢𑀺𑀫𑀚𑀦𑀧𑀤𑁂𑀲𑀼 𑀞𑀢𑁆𑀯𑀸 ‘‘𑀇𑀥 𑀦 𑀓𑀧𑁆𑀧𑀦𑁆𑀢𑀻’’𑀢𑀺 𑀯𑀤𑀦𑁆𑀢𑁄 𑀯𑀺𑀦𑀬𑀸𑀢𑀺𑀲𑀸𑀭𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀓𑀧𑁆𑀧𑀺𑀬𑀜𑁆𑀳𑀺 ‘‘𑀦 𑀓𑀧𑁆𑀧𑀢𑀻’’𑀢𑀺 𑀯𑀤𑀦𑁆𑀢𑁄 𑀧𑀜𑁆𑀜𑀢𑁆𑀢𑀁 𑀲𑀫𑀼𑀘𑁆𑀙𑀺𑀦𑁆𑀤𑀢𑀺 𑀦𑀸𑀫. 𑀢𑀣𑀸 𑀇𑀥 𑀓𑀧𑁆𑀧𑀦𑁆𑀢𑀻𑀢𑀺𑀆𑀤𑀻𑀲𑀼𑀧𑀺 𑀞𑀢𑁆𑀯𑀸 ‘‘𑀇𑀥 𑀓𑀧𑁆𑀧𑀦𑁆𑀢𑀻’’𑀢𑀺 𑀯𑀤𑀦𑁆𑀢𑁄 𑀯𑀺𑀦𑀬𑀸𑀕𑀢𑀪𑀺𑀓𑁆𑀔𑀼 𑀯𑀺𑀦𑀬𑁄 𑀧𑀼𑀘𑁆𑀙𑀺𑀢𑀩𑁆𑀩𑁄𑀢𑀺 𑀅𑀢𑁆𑀣𑁄.
𑀧𑀜𑁆𑀘𑀓𑀯𑀸𑀭𑀯𑀡𑁆𑀡𑀦𑀸
𑁩𑁨𑁫. 𑀦 𑀉𑀧𑁂𑀢𑀺 𑀧𑀼𑀕𑁆𑀕𑀮𑁄. ‘‘𑀦𑀺𑀫𑀦𑁆𑀢𑀺𑀢𑁄 𑀲𑀪𑀢𑁆𑀢𑁄 𑀲𑀫𑀸𑀦𑁄 𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀼𑀘𑁆𑀙𑀸’’𑀢𑀺 (𑀧𑀸𑀘𑀺. 𑁨𑁯𑁯) 𑀯𑀘𑀦𑀢𑁄 𑀦𑀺𑀫𑀦𑁆𑀢𑀦𑀸𑀪𑀸𑀯𑀸 𑀧𑀺𑀡𑁆𑀟𑀧𑀸𑀢𑀺𑀓𑀲𑁆𑀲 𑀅𑀦𑀸𑀫𑀦𑁆𑀢𑀘𑀸𑀭𑁄 𑀯𑀝𑁆𑀝𑀢𑀺. ‘‘𑀕𑀺𑀮𑀸𑀦𑀲𑀫𑀬𑁄’’𑀢𑀺𑀆𑀤𑀺𑀦𑀸 𑀆𑀪𑁄𑀕𑀁 𑀓𑀢𑁆𑀯𑀸 𑀪𑁄𑀚𑀦𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀪𑁄𑀚𑀦𑀁 𑀦𑀸𑀫. ‘‘𑀫𑀬𑁆𑀳𑀁 𑀪𑀢𑁆𑀢𑀧𑀘𑁆𑀘𑀸𑀲𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑀫𑁆𑀫𑀻’’𑀢𑀺 𑀏𑀯𑀁 𑀅𑀯𑀺𑀓𑀧𑁆𑀧𑀦𑀸. 𑀧𑀭𑀫𑁆𑀫𑀼𑀔𑁂 𑀅𑀕𑀼𑀡𑀯𑀘𑀦𑀁 𑀅𑀬𑀲𑁄. 𑀲𑀫𑁆𑀫𑀼𑀔𑀸 𑀕𑀭𑀳𑀸. 𑀲𑀻𑀮𑀤𑀺𑀝𑁆𑀞𑀺𑀩𑁆𑀬𑀲𑀦𑀸𑀦𑀁 𑀯𑀺𑀦𑀬𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀢𑁂𑀳𑀺 𑀲𑀤𑁆𑀥𑀺𑀁 𑀇𑀢𑀭𑁂 𑀧𑀜𑁆𑀘𑀓𑀁 𑀧𑀽𑀭𑁂𑀢𑀼𑀁 𑀯𑀼𑀢𑁆𑀢𑀸. ‘‘𑀯𑀺𑀦𑀬𑀥𑀭𑀧𑀜𑁆𑀘𑀫𑁂𑀦 𑀕𑀡𑁂𑀦𑀸’’𑀢𑀺 (𑀫𑀳𑀸𑀯. 𑁨𑁫𑁯) 𑀯𑀼𑀢𑁆𑀢𑀢𑁆𑀢𑀸 𑀧𑀜𑁆𑀘𑀓𑀁 𑀚𑀸𑀢𑀁. 𑀅𑀜𑁆𑀜𑀢𑀭𑀲𑁆𑀫𑀺𑀁 𑀯𑀺𑀳𑀸𑀭𑁂 𑀏𑀓𑁄 𑀣𑁂𑀭𑁄𑀢𑀺 𑀅𑀢𑁆𑀣𑁄. ‘‘𑀬𑁄𑀦𑀓𑀯𑀺𑀲𑀬𑀢𑁄𑀢𑀺 𑀘𑀻𑀦𑀝𑁆𑀞𑀸𑀦𑀸’’𑀢𑀺 𑀮𑀺𑀔𑀺𑀢𑀁. 𑀅𑀝𑁆𑀞 𑀓𑀧𑁆𑀧𑁂 𑀅𑀦𑀼𑀲𑁆𑀲𑀭𑀻𑀢𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀜𑀸𑀡𑀁 𑀦𑀺𑀩𑁆𑀩𑀢𑁆𑀢𑁂𑀲𑀻𑀢𑀺 𑀅𑀢𑁆𑀣𑁄. 𑀅𑀦𑀦𑁆𑀢𑀭𑁂 𑀞𑀸𑀦𑁂 𑀞𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀜𑀢𑁆𑀢𑀺𑀬𑀸 𑀓𑀫𑁆𑀫𑀧𑁆𑀧𑀢𑁆𑀢𑁄 𑀳𑀼𑀢𑁆𑀯𑀸𑀢𑀺 𑀜𑀢𑁆𑀢𑀺𑀝𑁆𑀞𑀧𑀺𑀢𑀓𑀸𑀮𑁂 𑀓𑀫𑁆𑀫𑀧𑁆𑀧𑀢𑁆𑀢𑁄 𑀳𑁄𑀢𑀺. 𑀧𑀼𑀦 𑀓𑀫𑁆𑀫𑀯𑀸𑀘𑀸𑀬 𑀓𑀫𑁆𑀫𑀲𑀺𑀤𑁆𑀥𑀺. 𑀜𑀢𑁆𑀢𑀺𑀔𑁂𑀢𑁆𑀢𑀦𑁆𑀢𑀺 𑀜𑀢𑁆𑀢𑀺𑀬𑀸𑀯 𑀓𑀸𑀢𑀩𑁆𑀩𑀝𑁆𑀞𑀸𑀦𑀁 𑀢𑀲𑁆𑀲𑀸 𑀔𑁂𑀢𑁆𑀢𑀁, 𑀜𑀢𑁆𑀢𑀺𑀤𑀼𑀢𑀺𑀬𑀸𑀤𑀺𑀓𑀫𑁆𑀫𑁂 𑀧𑀞𑀫𑀝𑁆𑀞𑀧𑀦𑀁 𑀢𑀲𑁆𑀲𑀸 𑀑𑀓𑀸𑀲𑁄 𑀦𑀸𑀫. 𑀆𑀭𑀜𑁆𑀜𑀓𑁂 𑀇𑀤𑀜𑁆𑀘𑀺𑀤𑀜𑁆𑀘𑀸𑀦𑀺𑀲𑀁𑀲𑀦𑁆𑀢𑀺 𑀏𑀯𑀁 𑀇𑀤𑀫𑀢𑁆𑀣𑀺𑀢𑀦𑁆𑀢𑀺 𑀅𑀢𑁆𑀣𑁄.
𑀙𑀓𑁆𑀓𑀯𑀸𑀭𑀯𑀡𑁆𑀡𑀦𑀸
𑁩𑁨𑁬. ‘‘𑀙𑀩𑁆𑀩𑀲𑁆𑀲𑀧𑀭𑀫𑀢𑀸 𑀥𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀯𑀺𑀪𑀗𑁆𑀕𑁂 𑀧𑀸𑀞𑀢𑁆𑀢𑀸 𑀏𑀯𑀁 𑀯𑀼𑀢𑁆𑀢𑀁. 𑀘𑀼𑀤𑁆𑀤𑀲𑀧𑀭𑀫𑀸𑀦𑀺 𑀦𑀯 𑀙𑀓𑁆𑀓𑀸𑀦𑀺 𑀳𑁄𑀦𑁆𑀢𑀺. 𑀓𑀣𑀁? 𑀧𑀞𑀫𑀁 𑀏𑀓𑀁 𑀙𑀓𑁆𑀓𑀁, 𑀲𑁂𑀲𑁂𑀲𑀼 𑀅𑀝𑁆𑀞𑀲𑀼 𑀏𑀓𑁂𑀓𑁂𑀦 𑀲𑀤𑁆𑀥𑀺𑀁 𑀏𑀓𑁂𑀓𑀦𑁆𑀢𑀺 𑀏𑀯𑀁 𑀢𑀻𑀡𑀺 𑀙𑀓𑁆𑀓𑀸𑀦𑀺 𑀅𑀦𑁆𑀢𑀭𑀧𑁂𑀬𑁆𑀬𑀸𑀮𑁂 𑀯𑀼𑀢𑁆𑀢𑀸𑀦𑀺. 𑀓𑀣𑀁? ‘‘𑀘𑀢𑀼𑀢𑁆𑀣𑁂𑀦 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑁂𑀦 𑀙 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀧𑀜𑁆𑀘𑀫𑁂𑀦, 𑀙𑀝𑁆𑀞𑁂𑀦 𑀘 𑀢𑀻𑀡𑀺 𑀙𑀓𑁆𑀓𑀸𑀦𑀺. 𑀮𑁄𑀪𑀸𑀤𑀬𑁄 𑀙 𑀯𑀺𑀯𑀸𑀤𑀫𑀽𑀮𑀸𑀦𑀺, 𑀢𑀣𑀸 𑀅𑀦𑀼𑀯𑀸𑀤𑀲𑁆𑀲. 𑀤𑀻𑀖𑀲𑁄 𑀙 𑀯𑀺𑀤𑀢𑁆𑀣𑀺𑀬𑁄 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀬. 𑀢𑀺𑀭𑀺𑀬𑀁 𑀙 𑀯𑀺𑀤𑀢𑁆𑀣𑀺𑀬𑁄 𑀲𑀼𑀕𑀢𑀘𑀻𑀯𑀭𑀲𑁆𑀲. 𑀯𑀺𑀧𑁆𑀧𑀓𑀢𑀘𑀻𑀯𑀭𑀁 𑀆𑀤𑀸𑀬 𑀧𑀓𑁆𑀓𑀫𑀦𑁂 𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄, 𑀲𑀦𑁆𑀦𑀺𑀝𑁆𑀞𑀸𑀦𑀦𑀸𑀲𑀦 𑀲𑀯𑀦 𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀺𑀓𑀲𑀳𑀼𑀩𑁆𑀪𑀸𑀭𑀸𑀢𑀺 𑀙, 𑀲𑀫𑀸𑀤𑀸𑀬 𑀯𑀸𑀭𑁂𑀧𑀺 𑀙𑀸𑀢𑀺 𑀙𑀓𑁆𑀓𑀤𑁆𑀯𑀬𑀁. 𑀲𑀢𑁆𑀢𑀓𑁂 𑀧𑀓𑁆𑀓𑀫𑀦𑀦𑁆𑀢𑀺𑀓𑁂𑀦 𑀲𑀳 𑀲𑀢𑁆𑀢.
𑀲𑀢𑁆𑀢𑀓𑀯𑀸𑀭𑀯𑀡𑁆𑀡𑀦𑀸
𑁩𑁨𑁭. 𑀙𑀓𑁆𑀓𑁂 𑀯𑀼𑀢𑁆𑀢𑀸𑀦𑀺𑀬𑁂𑀯 𑀲𑀢𑁆𑀢𑀓𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀸𑀦𑀻𑀢𑀺 𑀙𑀓𑁆𑀓𑁂 𑀯𑀼𑀢𑁆𑀢𑀘𑀼𑀤𑁆𑀤𑀲𑀧𑀭𑀫𑀸𑀦𑀺 𑀲𑀢𑁆𑀢𑀓𑀯𑀲𑁂𑀦 𑀬𑁄𑀚𑁂𑀢𑀩𑁆𑀩𑀸𑀦𑀺. 𑀲𑀢𑁆𑀢𑀫𑁂 𑀅𑀭𑀼𑀡𑀼𑀕𑁆𑀕𑀫𑀦𑁂 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 ‘‘𑀙𑀸𑀭𑀢𑁆𑀢𑀧𑀭𑀫𑀁 𑀢𑁂𑀦 𑀪𑀺𑀓𑁆𑀔𑀼𑀦𑀸 𑀢𑁂𑀦 𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀲𑀺𑀢𑀩𑁆𑀩𑀁, 𑀢𑀢𑁄 𑀘𑁂 𑀉𑀢𑁆𑀢𑀭𑀺 𑀯𑀺𑀧𑁆𑀧𑀯𑀲𑁂𑀬𑁆𑀬𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺. 𑀘𑀫𑁆𑀧𑁂𑀬𑁆𑀬𑀓𑁆𑀔𑀦𑁆𑀥𑀓𑁂 𑀲𑀼𑀕𑀢𑀘𑀻𑀯𑀭𑀪𑀸𑀡𑀯𑀸𑀭𑀲𑁆𑀲 𑀧𑀭𑀢𑁄 ‘‘𑀇𑀥 𑀧𑀦, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀲𑁆𑀲 𑀦 𑀳𑁄𑀢𑀺 𑀆𑀧𑀢𑁆𑀢𑀺 𑀤𑀝𑁆𑀞𑀩𑁆𑀩𑀸, 𑀢𑀫𑁂𑀦𑀁 𑀘𑁄𑀤𑁂𑀢𑀺 𑀲𑀗𑁆𑀖𑁄 𑀯𑀸 𑀲𑀫𑁆𑀩𑀳𑀼𑀮𑀸 𑀯𑀸 𑀏𑀓𑀧𑀼𑀕𑁆𑀕𑀮𑁄 𑀯𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀲𑀢𑁆𑀢𑀓𑀸𑀢𑀺.
𑀅𑀝𑁆𑀞𑀓𑀯𑀸𑀭𑀯𑀡𑁆𑀡𑀦𑀸
𑁩𑁨𑁮. 𑀢𑁂𑀦 𑀲𑀤𑁆𑀥𑀺𑀁 𑀉𑀧𑁄𑀲𑀣𑀸𑀤𑀺𑀓𑀭𑀡𑀁 𑀆𑀦𑀺𑀲𑀁𑀲𑁄, 𑀅𑀓𑀭𑀡𑀁 𑀆𑀤𑀻𑀦𑀯𑁄, 𑀢𑀲𑁆𑀫𑀸 𑀏𑀢𑁂 𑀅𑀝𑁆𑀞𑀸𑀦𑀺𑀲𑀁𑀲𑁂 𑀲𑀫𑁆𑀧𑀲𑁆𑀲𑀫𑀸𑀦𑁂𑀦𑀸𑀢𑀺 𑀅𑀢𑁆𑀣𑁄. ‘‘𑀅𑀬𑀲𑁄 𑀅𑀓𑁆𑀓𑁄𑀲𑁄’’𑀢𑀺 𑀯𑀼𑀢𑁆𑀢𑀁. 𑀧𑀼𑀩𑁆𑀩𑁂𑀯𑀲𑁆𑀲 𑀳𑁄𑀢𑀺 ‘‘𑀫𑀼𑀲𑀸 𑀪𑀡𑀺𑀲𑁆𑀲’’𑀦𑁆𑀢𑀺, 𑀪𑀡𑀦𑁆𑀢𑀲𑁆𑀲 𑀳𑁄𑀢𑀺 ‘‘𑀫𑀼𑀲𑀸 𑀪𑀡𑀸𑀫𑀻’’𑀢𑀺, 𑀪𑀡𑀺𑀢𑀲𑁆𑀲 𑀳𑁄𑀢𑀺 ‘‘𑀫𑀼𑀲𑀸 𑀫𑀬𑀸 𑀪𑀡𑀺𑀢’’𑀦𑁆𑀢𑀺, 𑀯𑀺𑀦𑀺𑀥𑀸𑀬 𑀤𑀺𑀝𑁆𑀞𑀺𑀁 𑀔𑀦𑁆𑀢𑀺𑀁 𑀭𑀼𑀘𑀺𑀁 𑀪𑀸𑀯𑀁 𑀲𑀜𑁆𑀜𑀦𑁆𑀢𑀺 𑀏𑀯𑀁 𑀅𑀓𑀧𑁆𑀧𑀺𑀬𑀓𑀢𑀁 𑀳𑁄𑀢𑀺 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑀢𑀦𑁆𑀢𑀺𑀆𑀤𑀬𑁄 𑀅𑀝𑁆𑀞 𑀅𑀦𑀢𑀺𑀭𑀺𑀢𑁆𑀢𑀸. 𑀲𑀧𑁆𑀧𑀺𑀆𑀤𑀺 𑀅𑀝𑁆𑀞𑀫𑁂 𑀅𑀭𑀼𑀡𑀼𑀕𑁆𑀕𑀫𑀦𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺. 𑀅𑀝𑁆𑀞𑀯𑀸𑀘𑀺𑀓𑀸 𑀪𑀺𑀓𑁆𑀔𑀼𑀦𑀻𑀦𑀁 𑀉𑀧𑀲𑀫𑁆𑀧𑀤𑀸 𑀉𑀪𑀢𑁄𑀜𑀢𑁆𑀢𑀺𑀘𑀢𑀼𑀢𑁆𑀣𑀢𑁆𑀢𑀸. 𑀯𑀲𑁆𑀲𑀺𑀓𑀲𑀸𑀝𑀺𑀓𑀤𑀸𑀦𑀸𑀤𑀻𑀦𑀺 𑀅𑀝𑁆𑀞 𑀯𑀭𑀸𑀦𑀺.
𑀦𑀯𑀓𑀯𑀸𑀭𑀯𑀡𑁆𑀡𑀦𑀸
𑁩𑁨𑁯. 𑀦𑀯𑀳𑀺 𑀪𑀺𑀓𑁆𑀔𑀽𑀳𑀺 𑀪𑀺𑀚𑁆𑀚𑀢𑀺. 𑀫𑀦𑀼𑀲𑁆𑀲𑀫𑀁𑀲𑀯𑀚𑁆𑀚𑁂𑀳𑀺 𑀦𑀯 𑀫𑀁𑀲𑁂𑀳𑀺 𑀯𑀺𑀦𑀺𑀘𑁆𑀙𑀬𑁄. 𑀲𑀼𑀦𑁆𑀤𑀭𑀁 𑀦 𑀲𑀼𑀦𑁆𑀤𑀭𑀦𑁆𑀢𑀺 𑀲𑀗𑁆𑀖𑀸𑀝𑀺𑀆𑀤𑀻𑀦𑀺 𑀦𑀯 𑀘𑀻𑀯𑀭𑀸𑀦𑀺. 𑀢𑀸𑀦𑁂𑀯 𑀅𑀥𑀺𑀝𑁆𑀞𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦 𑀯𑀺𑀓𑀧𑁆𑀧𑁂𑀢𑀩𑁆𑀩𑀸𑀦𑀺, 𑀅𑀥𑀺𑀝𑁆𑀞𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀦 𑀯𑀺𑀓𑀧𑁆𑀧𑁂𑀢𑀩𑁆𑀩𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀦𑀯 𑀯𑀺𑀤𑀢𑁆𑀣𑀺𑀬𑁄 𑀲𑀼𑀕𑀢𑀘𑀻𑀯𑀭𑀲𑁆𑀲. ‘‘𑀯𑀕𑁆𑀕𑀁 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀁 𑀯𑀕𑁆𑀕𑀲𑀜𑁆𑀜𑀻 𑀑𑀯𑀤𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀥𑀫𑁆𑀫𑀓𑀫𑁆𑀫𑁂 𑀤𑁆𑀯𑁂 𑀦𑀯𑀓𑀸𑀦𑀺 𑀧𑀸𑀘𑀺𑀢𑁆𑀢𑀺𑀬𑀯𑀲𑁂𑀦 𑀯𑀼𑀢𑁆𑀢𑀸𑀦𑀺.
𑀤𑀲𑀓𑀯𑀸𑀭𑀯𑀡𑁆𑀡𑀦𑀸
𑁩𑁩𑁦. ‘‘𑀑𑀭𑀫𑀢𑁆𑀢𑀓𑀜𑁆𑀘 𑀅𑀥𑀺𑀓𑀭𑀡𑀁 𑀳𑁄𑀢𑀺, 𑀦 𑀘 𑀕𑀢𑀺𑀕𑀢’’𑀦𑁆𑀢𑀺𑀆𑀤𑀺𑀦𑀸 (𑀘𑀽𑀴𑀯. 𑁨𑁦𑁪) 𑀤𑀲 𑀅𑀥𑀫𑁆𑀫𑀺𑀓𑀸 𑀲𑀮𑀸𑀓𑀕𑁆𑀕𑀸𑀳𑀸. 𑀯𑀺𑀧𑀭𑀻𑀢𑀸 𑀥𑀫𑁆𑀫𑀺𑀓𑀸. 𑀲𑀫𑀣𑀓𑁆𑀔𑀦𑁆𑀥𑀓𑁂 𑀯𑀼𑀢𑁆𑀢𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀳𑁄𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. ‘‘𑀲𑀁𑀓𑀘𑁆𑀘𑀺𑀓𑀁 𑀯𑀸 𑀧𑀓𑁆𑀔𑀺𑀧𑀺𑀢𑁆𑀯𑀸 𑀤𑀲𑀸’’𑀢𑀺 𑀯𑀼𑀢𑁆𑀢𑀁 𑀓𑀧𑁆𑀧𑀺𑀬𑀢𑁆𑀢𑀸 𑀏𑀢𑁂𑀲𑀁. 𑀫𑀸𑀢𑀼𑀭𑀓𑁆𑀔𑀺𑀢𑀸𑀤𑀬𑁄 𑀤𑀲 𑀇𑀢𑁆𑀣𑀺𑀬𑁄. 𑀥𑀦𑀓𑁆𑀓𑀻𑀢𑀸𑀤𑀬𑁄 𑀤𑀲 𑀪𑀭𑀺𑀬𑀸. ‘‘𑀲𑀺𑀓𑁆𑀔𑀸𑀲𑀫𑁆𑀫𑀼𑀢𑀺𑀁 𑀤𑀢𑁆𑀯𑀸 𑀤𑀲𑀯𑀲𑁆𑀲𑀸𑀬 𑀢𑀲𑁆𑀲𑀸 𑀤𑁆𑀯𑀸𑀤𑀲𑀯𑀲𑁆𑀲𑀓𑀸𑀮𑁂 𑀲𑀬𑀫𑁆𑀧𑀺 𑀤𑁆𑀯𑀸𑀤𑀲𑀯𑀲𑁆𑀲𑀸 𑀪𑀯𑀺𑀲𑁆𑀲𑀢𑀻’’𑀢𑀺 𑀯𑀼𑀝𑁆𑀞𑀸𑀧𑀦𑀲𑀫𑁆𑀫𑀼𑀢𑀺 𑀲𑀸𑀤𑀺𑀢𑀩𑁆𑀩𑀸. ‘‘𑀯𑀺𑀦𑀬𑀥𑀭𑀲𑁆𑀲𑁂𑀯 ‘𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀻’𑀢𑀺 𑀆𑀭𑀩𑁆𑀪 𑀬𑀸𑀯 ‘𑀉𑀪𑀬𑀸𑀦𑀺 𑀔𑁄 𑀧𑀦𑀲𑁆𑀲…𑀧𑁂… 𑀅𑀦𑀼𑀩𑁆𑀬𑀜𑁆𑀚𑀦𑀲𑁄’𑀢𑀺 𑀧𑀜𑁆𑀘𑀗𑁆𑀕𑀸𑀦𑀺 𑀯𑀢𑁆𑀯𑀸 𑀧𑀼𑀦𑀧𑀺 ‘𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀁 𑀦 𑀚𑀸𑀦𑀸𑀢𑀺’𑀘𑁆𑀘𑁂𑀯 𑀆𑀭𑀩𑁆𑀪 𑀬𑀸𑀯 ‘𑀅𑀥𑀺𑀓𑀭𑀡𑁂 𑀘 𑀦 𑀯𑀺𑀦𑀺𑀘𑁆𑀙𑀬𑀓𑀼𑀲𑀮𑁄 𑀳𑁄𑀢𑀻’𑀢𑀺 𑀧𑀜𑁆𑀘 𑀯𑀼𑀢𑁆𑀢𑀸, 𑀢𑁂 𑀢𑀣𑀸 𑀢𑀣𑀸 𑀧𑀜𑁆𑀘 𑀧𑀜𑁆𑀘 𑀓𑀢𑁆𑀯𑀸 𑀤𑀲 𑀳𑁄𑀦𑁆𑀢𑀻’’𑀢𑀺 𑀮𑀺𑀔𑀺𑀢𑀁. ‘‘𑀤𑀲𑀯𑀲𑁆𑀲𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀦𑀺𑀲𑁆𑀲𑀬𑁄 𑀤𑀸𑀢𑀩𑁆𑀩𑁄’’𑀢𑀺 𑀏𑀓𑀘𑁆𑀘𑁂𑀲𑀼 𑀧𑁄𑀢𑁆𑀣𑀓𑁂𑀲𑀼 𑀦𑀢𑁆𑀣𑀺, 𑀓𑀺𑀜𑁆𑀘𑀸𑀧𑀺 𑀦𑀢𑁆𑀣𑀺, 𑀧𑀸𑀞𑁄 𑀏𑀯 𑀧𑀦 𑀳𑁄𑀢𑀺.
𑀏𑀓𑀸𑀤𑀲𑀓𑀯𑀸𑀭𑀯𑀡𑁆𑀡𑀦𑀸
𑁩𑁩𑁧. 𑀦 𑀯𑁄𑀤𑀸𑀬𑀦𑁆𑀢𑀺 𑀦 𑀧𑀓𑀸𑀲𑁂𑀦𑁆𑀢𑀺. 𑀭𑁄𑀕𑀫𑁂𑀯 𑀭𑁄𑀕𑀸𑀢𑀗𑁆𑀓𑀁. 𑀭𑁄𑀕𑀦𑁆𑀢𑀭𑀸𑀬𑀁 𑀯𑀸.
𑀏𑀓𑀼𑀢𑁆𑀢𑀭𑀺𑀓𑀦𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑀉𑀧𑁄𑀲𑀣𑀸𑀤𑀺𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀯𑀡𑁆𑀡𑀦𑀸
𑁩𑁩𑁨. ‘‘𑀲𑀗𑁆𑀖𑀁, 𑀪𑀦𑁆𑀢𑁂, 𑀧𑀯𑀸𑀭𑁂𑀫𑀻’’𑀢𑀺𑀆𑀤𑀺 𑀧𑀯𑀸𑀭𑀡𑀓𑀣𑀸 𑀦𑀸𑀫 𑀯𑀺𑀦𑀻𑀢𑀕𑀸𑀣𑀸𑀲𑀼 𑀯𑀺𑀬.
𑀅𑀢𑁆𑀣𑀯𑀲𑀧𑀓𑀭𑀡𑀯𑀡𑁆𑀡𑀦𑀸
𑁩𑁩𑁪. 𑀤𑀲 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘𑀸𑀢𑀺 𑀏𑀢𑁆𑀣 𑀢𑀲𑁆𑀲 𑀢𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀧𑀜𑁆𑀜𑀸𑀧𑀦𑁂 𑀕𑀼𑀡𑀯𑀺𑀲𑁂𑀲𑀤𑀻𑀧𑀦𑀢𑁄, 𑀅𑀧𑀜𑁆𑀜𑀸𑀧𑀦𑁂 𑀆𑀤𑀻𑀦𑀯𑀤𑀲𑁆𑀲𑀦𑀢𑁄 𑀘 𑀲𑀗𑁆𑀖𑀲𑀼𑀝𑁆𑀞𑀼𑀢𑀸 𑀳𑁄𑀢𑀺. 𑀢𑀢𑁆𑀣 𑀬𑀣𑀸𑀲𑀫𑁆𑀪𑀯𑀁 𑀮𑁄𑀓𑀯𑀚𑁆𑀚𑀲𑁆𑀲 𑀅𑀧𑀡𑁆𑀡𑀢𑁆𑀢𑀺𑀲𑀫𑁆𑀪𑀯𑀲𑁆𑀲 𑀧𑀜𑁆𑀜𑀸𑀧𑀦𑁂 𑀧𑀬𑁄𑀕𑀯𑀺𑀲𑀼𑀤𑁆𑀥𑀺 𑀕𑀼𑀡𑁄. 𑀧𑀡𑁆𑀡𑀢𑁆𑀢𑀺𑀲𑀫𑁆𑀪𑀯𑀲𑁆𑀲 𑀧𑀦 𑀲𑁂𑀔𑀺𑀬𑀲𑁆𑀲 𑀮𑁄𑀓𑀯𑀚𑁆𑀚𑀲𑁆𑀲 𑀧𑀜𑁆𑀜𑀸𑀧𑀦𑁂 𑀧𑀝𑀺𑀧𑀢𑁆𑀢𑀺𑀯𑀺𑀲𑀼𑀤𑁆𑀥𑀺 𑀕𑀼𑀡𑁄, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀲𑁆𑀲 𑀆𑀲𑀬𑀯𑀺𑀲𑀼𑀤𑁆𑀥𑀺 𑀕𑀼𑀡𑁄 𑀅𑀧𑁆𑀧𑀺𑀘𑁆𑀙𑀸𑀤𑀺𑀕𑀼𑀡𑀸𑀯𑀳𑀦𑀢𑁄, 𑀢𑁂𑀦𑁂𑀯𑀸𑀳 ‘‘𑀲𑀼𑀪𑀭𑀢𑀸𑀬 𑀲𑀼𑀧𑁄𑀲𑀢𑀸𑀬 𑀅𑀧𑁆𑀧𑀺𑀘𑁆𑀙𑀢𑀸𑀬 𑀅𑀧𑁆𑀧𑀺𑀘𑁆𑀙𑀲𑁆𑀲 𑀯𑀡𑁆𑀡𑀁 𑀪𑀸𑀲𑀺𑀢𑁆𑀯𑀸’’𑀢𑀺. 𑀲𑀫𑀡𑀸𑀘𑀸𑀭𑀯𑀺𑀲𑀼𑀤𑁆𑀥𑀺 𑀘𑀲𑁆𑀲 𑀕𑀼𑀡𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀮𑁄𑀓𑀯𑀚𑁆𑀚𑀲𑁆𑀲 𑀧𑀜𑁆𑀜𑀸𑀧𑀦𑁂 𑀲𑀗𑁆𑀖𑀲𑀼𑀝𑁆𑀞𑀼𑀢𑀸 𑀳𑁄𑀢𑀺 𑀧𑀸𑀓𑀝𑀸𑀤𑀻𑀦𑀯𑀢𑁄, 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀲𑁆𑀲 𑀧𑀜𑁆𑀜𑀸𑀧𑀦𑁂 𑀲𑀗𑁆𑀖𑀨𑀸𑀲𑀼𑀢𑀸 𑀳𑁄𑀢𑀺 𑀧𑀸𑀓𑀝𑀸𑀦𑀺𑀲𑀁𑀲𑀢𑁆𑀢𑀸. 𑀢𑀣𑀸 𑀧𑀞𑀫𑁂𑀦 𑀤𑀼𑀫𑁆𑀫𑀗𑁆𑀓𑀽𑀦𑀁 𑀦𑀺𑀕𑁆𑀕𑀳𑁄, 𑀤𑀼𑀢𑀺𑀬𑁂𑀦 𑀧𑁂𑀲𑀮𑀸𑀦𑀁 𑀨𑀸𑀲𑀼𑀯𑀺𑀳𑀸𑀭𑁄, 𑀧𑀞𑀫𑁂𑀦 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀆𑀲𑀯𑀸𑀦𑀁 𑀧𑀝𑀺𑀖𑀸𑀢𑁄, 𑀤𑀼𑀢𑀺𑀬𑁂𑀦 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁, 𑀢𑀣𑀸 𑀧𑀞𑀫𑁂𑀦 𑀅𑀧𑁆𑀧𑀲𑀦𑁆𑀦𑀸𑀦𑀁 𑀧𑀲𑀸𑀤𑁄, 𑀤𑀼𑀢𑀺𑀬𑁂𑀦 𑀧𑀲𑀦𑁆𑀦𑀸𑀦𑀁 𑀪𑀺𑀬𑁆𑀬𑁄𑀪𑀸𑀯𑁄, 𑀢𑀣𑀸 𑀧𑀞𑀫𑁂𑀦 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺, 𑀤𑀼𑀢𑀺𑀬𑁂𑀦 𑀯𑀺𑀦𑀬𑀸𑀦𑀼𑀕𑁆𑀕𑀳𑁄 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀧𑀭𑀺𑀯𑀸𑀭𑀦𑀬𑁂𑀦 𑀯𑀸 𑀧𑀞𑀫𑁂𑀦 𑀧𑀸𑀧𑀺𑀘𑁆𑀙𑀸𑀦𑀁 𑀪𑀺𑀓𑁆𑀔𑀽𑀦𑀁 𑀧𑀓𑁆𑀔𑀼𑀧𑀘𑁆𑀙𑁂𑀤𑁄, 𑀤𑀼𑀢𑀺𑀬𑁂𑀦 𑀕𑀺𑀳𑀻𑀦𑀁 𑀅𑀦𑀼𑀓𑀫𑁆𑀧𑀸 𑀳𑁄𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀤𑁆𑀯𑁂 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀢𑀣𑀸𑀕𑀢𑁂𑀦 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀕𑀺𑀳𑀻𑀦𑀁 𑀅𑀦𑀼𑀓𑀫𑁆𑀧𑀸𑀬 𑀧𑀸𑀧𑀺𑀘𑁆𑀙𑀸𑀦𑀁 𑀧𑀓𑁆𑀔𑀼𑀧𑀘𑁆𑀙𑁂𑀤𑀸𑀬𑀸’’𑀢𑀺 (𑀧𑀭𑀺. 𑁪𑁯𑁮). 𑀢𑀣𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀯𑁂𑀭𑀸𑀦𑀁 𑀯𑀚𑁆𑀚𑀸𑀦𑀁 𑀅𑀓𑀼𑀲𑀮𑀸𑀦𑀁 𑀯𑀲𑁂𑀦𑀧𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀤𑁆𑀯𑁂 𑀅𑀢𑁆𑀣𑀯𑀲𑁂…𑀧𑁂… 𑀧𑀜𑁆𑀜𑀢𑁆𑀢𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀁 𑀯𑁂𑀭𑀸𑀦𑀁 𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀯𑁂𑀭𑀸𑀦𑀁 𑀧𑀝𑀺𑀖𑀸𑀢𑀸𑀬𑀸’’𑀢𑀺𑀆𑀤𑀺 (𑀧𑀭𑀺. 𑁪𑁯𑁮). 𑀅𑀧𑀺𑀘𑁂𑀢𑁆𑀣 𑀲𑀩𑁆𑀩𑀫𑁆𑀧𑀺 𑀅𑀓𑀢𑀯𑀺𑀜𑁆𑀜𑀢𑁆𑀢𑀺𑀧𑀝𑀺𑀲𑀁𑀬𑀼𑀢𑁆𑀢𑀁, 𑀕𑀺𑀳𑀻𑀦𑀁 𑀧𑀻𑀴𑀸𑀧𑀝𑀺𑀲𑀁𑀬𑀼𑀢𑁆𑀢𑀁, 𑀢𑁂𑀲𑀁 𑀧𑀲𑀸𑀤𑀪𑁄𑀕𑀓𑁆𑀔𑀬𑀭𑀓𑁆𑀔𑀸𑀧𑀝𑀺𑀲𑀁𑀬𑀼𑀢𑁆𑀢𑀜𑁆𑀘 𑀕𑀺𑀳𑀻𑀦𑀁 𑀅𑀦𑀼𑀓𑀫𑁆𑀧𑀸𑀬 𑀧𑀜𑁆𑀜𑀢𑁆𑀢𑀁 𑀦𑀸𑀫, 𑀓𑀼𑀮𑀤𑀽𑀲𑀓𑀕𑀡𑀪𑁄𑀚𑀦𑀸𑀦𑀺 𑀧𑀸𑀧𑀺𑀘𑁆𑀙𑀸𑀦𑀁 𑀧𑀓𑁆𑀔𑀼𑀧𑀘𑁆𑀙𑁂𑀤𑀸𑀬 𑀧𑀜𑁆𑀜𑀢𑁆𑀢𑀁. 𑀲𑀩𑁆𑀩𑀁 𑀮𑁄𑀓𑀯𑀚𑁆𑀚𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀯𑁂𑀭𑀸𑀤𑀺𑀧𑀝𑀺𑀖𑀸𑀢𑀸𑀬, 𑀫𑀸𑀢𑀼𑀕𑀸𑀫𑁂𑀦 𑀲𑀁𑀯𑀺𑀥𑀸𑀦𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀯𑁂𑀭𑀸𑀤𑀺𑀲𑀁𑀯𑀭𑀸𑀬 𑀧𑀜𑁆𑀜𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀧𑀺𑀘𑁂𑀢𑁆𑀣 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀤𑀲𑀅𑀢𑁆𑀣𑀯𑀲𑀧𑀓𑀭𑀡𑀫𑁂𑀯 𑀦𑀺𑀲𑁆𑀲𑀸𑀬 𑀯𑀺𑀦𑀺𑀘𑁆𑀙𑀬𑁄 𑀯𑁂𑀤𑀺𑀢𑀩𑁆𑀩𑁄.
𑀯𑀢𑁆𑀣𑀼𑀯𑀻𑀢𑀺𑀓𑁆𑀓𑀫𑁂𑀦 𑀬𑀁, 𑀏𑀓𑀦𑁆𑀢𑀸𑀓𑀼𑀲𑀮𑀁 𑀪𑀯𑁂;
𑀢𑀁 𑀲𑀗𑁆𑀖𑀲𑀼𑀝𑁆𑀞𑀼𑀪𑀸𑀯𑀸𑀬, 𑀧𑀜𑁆𑀜𑀢𑁆𑀢𑀁 𑀮𑁄𑀓𑀯𑀚𑁆𑀚𑀢𑁄.
𑀧𑀸𑀭𑀸𑀚𑀺𑀓𑀸𑀤𑀺𑀁,
𑀧𑀜𑁆𑀜𑀢𑁆𑀢𑀺𑀚𑀸𑀦𑀦𑁂𑀦𑁂𑀯, 𑀬𑀢𑁆𑀣𑀸𑀧𑀢𑁆𑀢𑀺 𑀦 𑀅𑀜𑁆𑀜𑀣𑀸;
𑀢𑀁 𑀥𑀫𑁆𑀫𑀝𑁆𑀞𑀺𑀢𑀺𑀬𑀸 𑀯𑀸𑀧𑀺, 𑀧𑀲𑀸𑀤𑀼𑀧𑁆𑀧𑀸𑀤𑀩𑀼𑀤𑁆𑀥𑀺𑀬𑀸.
𑀥𑀫𑁆𑀫𑀤𑁂𑀲𑀦𑀸𑀧𑀝𑀺𑀲𑀁𑀬𑀼𑀢𑁆𑀢𑀁 𑀇𑀢𑀭𑀜𑁆𑀘 𑀲𑁂𑀔𑀺𑀬𑀁, 𑀇𑀤𑀁 𑀧𑀡𑁆𑀡𑀢𑁆𑀢𑀺𑀲𑀫𑁆𑀪𑀯𑀁 𑀮𑁄𑀓𑀯𑀚𑁆𑀚𑀁 𑀦𑀸𑀫. 𑀯𑀢𑁆𑀣𑀼𑀦𑁄, 𑀧𑀜𑁆𑀜𑀢𑁆𑀢𑀺𑀬𑀸 𑀯𑀸 𑀯𑀻𑀢𑀺𑀓𑁆𑀓𑀫𑀘𑁂𑀢𑀦𑀸𑀬𑀸𑀪𑀸𑀯𑁂𑀧𑀺 𑀧𑀝𑀺𑀓𑁆𑀔𑀺𑀢𑁆𑀢𑀲𑁆𑀲 𑀓𑀭𑀡𑁂, 𑀓𑀢𑁆𑀢𑀩𑁆𑀩𑀲𑁆𑀲 𑀅𑀓𑀭𑀡𑁂 𑀯𑀸 𑀲𑀢𑀺 𑀬𑀢𑁆𑀣 𑀆𑀧𑀢𑁆𑀢𑀺 𑀧𑀳𑁄𑀢𑀺, 𑀢𑀁 𑀲𑀩𑁆𑀩𑀁 𑀞𑀧𑁂𑀢𑁆𑀯𑀸 𑀲𑀼𑀭𑀸𑀧𑀸𑀦𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀉𑀓𑁆𑀓𑁄𑀝𑀦𑀓𑁂 𑀧𑀸𑀘𑀺𑀢𑁆𑀢𑀺𑀬𑀁, ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀥𑀫𑁆𑀫𑀺𑀓𑀸𑀦𑀁 𑀓𑀫𑁆𑀫𑀸𑀦𑀁 𑀙𑀦𑁆𑀤𑀁 𑀤𑀢𑁆𑀯𑀸 𑀧𑀘𑁆𑀙𑀸 𑀔𑀻𑀬𑀦𑀥𑀫𑁆𑀫𑀁 𑀆𑀧𑀚𑁆𑀚𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬𑀁 (𑀧𑀸𑀘𑀺. 𑁪𑁭𑁫), 𑀬𑁄 𑀧𑀦 𑀪𑀺𑀓𑁆𑀔𑀼 𑀲𑀗𑁆𑀖𑁂 𑀯𑀺𑀦𑀺𑀘𑁆𑀙𑀬𑀓𑀣𑀸𑀬 𑀯𑀢𑁆𑀢𑀫𑀸𑀦𑀸𑀬 𑀙𑀦𑁆𑀤𑀁 𑀅𑀤𑀢𑁆𑀯𑀸 𑀉𑀝𑁆𑀞𑀸𑀬𑀸𑀲𑀦𑀸 𑀧𑀓𑁆𑀓𑀫𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬𑀁 (𑀧𑀸𑀘𑀺. 𑁪𑁮𑁦), 𑀬𑁄 𑀧𑀦 𑀪𑀺𑀓𑁆𑀔𑀼 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦 𑀘𑀻𑀯𑀭𑀁 𑀤𑀢𑁆𑀯𑀸 𑀧𑀘𑁆𑀙𑀸 𑀔𑀻𑀬𑀦𑀥𑀫𑁆𑀫𑀁 𑀆𑀧𑀚𑁆𑀚𑁂𑀬𑁆𑀬…𑀧𑁂… 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁪𑁮𑁫) 𑀏𑀯𑀫𑀸𑀤𑀺 𑀲𑀗𑁆𑀖𑀨𑀸𑀲𑀼𑀢𑀸𑀬 𑀧𑀜𑁆𑀜𑀢𑁆𑀢𑀁. ‘‘𑀅𑀜𑁆𑀜𑀯𑀸𑀤𑀓𑁂 𑀯𑀺𑀳𑁂𑀲𑀓𑁂 𑀧𑀸𑀘𑀺𑀢𑁆𑀢𑀺𑀬𑀁 (𑀧𑀸𑀘𑀺. 𑁧𑁦𑁧), 𑀧𑀸𑀭𑀸𑀚𑀺𑀓𑀸𑀤𑀻𑀳𑀺 𑀅𑀦𑀼𑀤𑁆𑀥𑀁𑀲𑀦𑁂 𑀲𑀗𑁆𑀖𑀸𑀤𑀺𑀲𑁂𑀲𑀸𑀤𑀺 𑀘 𑀤𑀼𑀫𑁆𑀫𑀗𑁆𑀓𑀽𑀦𑀁 𑀦𑀺𑀕𑁆𑀕𑀳𑀸𑀬, 𑀅𑀦𑀼𑀧𑀔𑀚𑁆𑀚𑀦𑀺𑀓𑁆𑀓𑀟𑁆𑀠𑀦𑀉𑀧𑀲𑁆𑀲𑀽𑀢𑀺𑀲𑀺𑀓𑁆𑀔𑀸𑀧𑀤𑀸𑀤𑀺 𑀧𑁂𑀲𑀮𑀸𑀦𑀁 𑀨𑀸𑀲𑀼𑀯𑀺𑀳𑀸𑀭𑀸𑀬, 𑀲𑀩𑁆𑀩𑀁 𑀮𑁄𑀓𑀯𑀚𑁆𑀚𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀸𑀦𑀁 𑀆𑀲𑀯𑀸𑀦𑀁 𑀧𑀝𑀺𑀖𑀸𑀢𑀸𑀬, 𑀲𑀩𑁆𑀩𑀁 𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁 𑀤𑀺𑀝𑁆𑀞𑀥𑀫𑁆𑀫𑀺𑀓𑀸𑀦𑀫𑁂𑀯 𑀲𑀁𑀯𑀭𑀸𑀬. 𑀲𑀩𑁆𑀩𑀁 𑀕𑀺𑀳𑀺𑀧𑀝𑀺𑀲𑀁𑀬𑀼𑀢𑁆𑀢𑀁 𑀅𑀧𑁆𑀧𑀲𑀦𑁆𑀦𑀸𑀦𑀁 𑀯𑀸 𑀧𑀲𑀸𑀤𑀸𑀬 𑀧𑀲𑀦𑁆𑀦𑀸𑀦𑀁 𑀯𑀸 𑀪𑀺𑀬𑁆𑀬𑁄𑀪𑀸𑀯𑀸𑀬 𑀘. 𑀯𑀺𑀲𑁂𑀲𑁂𑀦 𑀅𑀭𑀺𑀝𑁆𑀞𑀲𑀫𑀡𑀼𑀤𑁆𑀤𑁂𑀲𑀲𑀺𑀓𑁆𑀔𑀸𑀧𑀤𑀁, 𑀲𑀸𑀫𑀜𑁆𑀜𑁂𑀦 𑀧𑀘𑁆𑀘𑀬𑁂𑀲𑀼 𑀫𑀭𑀺𑀬𑀸𑀤𑀧𑀝𑀺𑀲𑀁𑀬𑀼𑀢𑁆𑀢𑀜𑁆𑀘 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸, ‘‘𑀅𑀧𑁆𑀧𑀺𑀘𑁆𑀙𑀲𑁆𑀲𑀸𑀬𑀁 𑀥𑀫𑁆𑀫𑁄, 𑀦𑀸𑀬𑀁 𑀥𑀫𑁆𑀫𑁄 𑀫𑀳𑀺𑀘𑁆𑀙𑀲𑁆𑀲𑀸’’𑀢𑀺 (𑀤𑀻. 𑀦𑀺. 𑁩.𑁩𑁫𑁮; 𑀅. 𑀦𑀺. 𑁮.𑁩𑁦) 𑀆𑀤𑀺𑀲𑀼𑀢𑁆𑀢𑀫𑁂𑀢𑁆𑀣 𑀲𑀸𑀥𑀓𑀁. ‘‘𑀲𑀺𑀓𑁆𑀔𑀸𑀧𑀤𑀯𑀺𑀯𑀡𑁆𑀡𑀓𑁂 (𑀧𑀸𑀘𑀺. 𑁪𑁩𑁯) 𑀫𑁄𑀳𑀦𑀓𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺𑀆𑀤𑀺 (𑀧𑀸𑀘𑀺. 𑁪𑁪𑁪) 𑀯𑀺𑀦𑀬𑀸𑀦𑀼𑀕𑁆𑀕𑀳𑀸𑀬 𑀧𑀜𑁆𑀜𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀬 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁯𑁦) 𑀇𑀤𑀁 𑀓𑀺𑀫𑀢𑁆𑀣𑀦𑁆𑀢𑀺 𑀘𑁂? 𑀅𑀧𑁆𑀧𑀲𑀦𑁆𑀦𑀸𑀦𑀁 𑀧𑀲𑀸𑀤𑀸𑀬, 𑀧𑀲𑀦𑁆𑀦𑀸𑀦𑀁 𑀪𑀺𑀬𑁆𑀬𑁄𑀪𑀸𑀯𑀸𑀬 𑀘. 𑀓𑀣𑀁?
‘‘𑀪𑀽𑀢𑀕𑀸𑀫𑁄 𑀲𑀚𑀻𑀯𑁄𑀢𑀺, 𑀅𑀯𑀺𑀧𑀮𑁆𑀮𑀢𑁆𑀢𑀤𑀺𑀝𑁆𑀞𑀺𑀦𑁄;
𑀢𑀲𑁆𑀲 𑀓𑁄𑀧𑀦𑀲𑀜𑁆𑀜𑀸𑀬, 𑀧𑀲𑀸𑀤𑁄 𑀩𑀼𑀤𑁆𑀥𑀲𑀸𑀯𑀓𑁂.
‘‘𑀦𑀺𑀚𑁆𑀚𑀻𑀯𑀲𑀜𑁆𑀜𑀺𑀢𑀁𑀧𑁂𑀢𑀁, 𑀅𑀓𑁄𑀧𑁂𑀦𑁆𑀢𑁄 𑀓𑀣𑀁 𑀫𑀼𑀦𑀺;
𑀚𑀻𑀯𑀁 𑀓𑁄𑀧𑁂𑀬𑁆𑀬 𑀦𑀺𑀤𑁆𑀤𑁄𑀲𑁄, 𑀫𑀘𑁆𑀙𑀫𑀁𑀲𑀸𑀦𑀼𑀚𑀸𑀦𑀦𑁂.
𑀏𑀯𑀫𑁆𑀧𑀺 𑁋
‘‘𑀢𑀲𑁆𑀲 𑀓𑁄𑀧𑀦𑀲𑀜𑁆𑀜𑀸𑀬, 𑀧𑀲𑀸𑀤𑁄 𑀩𑀼𑀤𑁆𑀥𑀲𑀸𑀯𑀓𑁂;
𑀬𑀢𑁄 𑀢𑀺𑀢𑁆𑀣𑀓𑀭𑀸𑀯𑀺𑀫𑁂, 𑀯𑀺𑀭𑀢𑀸 𑀪𑀽𑀢𑀕𑀸𑀫𑀢𑁄;
𑀮𑁄𑀓𑀲𑁆𑀲 𑀘𑀺𑀢𑁆𑀢𑀭𑀓𑁆𑀔𑀢𑁆𑀣𑀁, 𑀢𑀢𑁄𑀧𑀺 𑀯𑀺𑀭𑀢𑁄 𑀫𑀼𑀦𑀻’’𑀢𑀺. 𑁋
𑀧𑀲𑀦𑁆𑀦𑀸𑀦𑀁 𑀪𑀺𑀬𑁆𑀬𑁄𑀪𑀸𑀯𑁄 𑀳𑁄𑀢𑀺.
𑀯𑀺𑀯𑀺𑀢𑁆𑀢𑀲𑁂𑀦𑀸𑀲𑀦𑀪𑁄𑀕𑀢𑀡𑁆𑀳𑀸𑀯𑀲𑁂𑀦𑀦𑀺𑀚𑁆𑀚𑀻𑀯𑀫𑀺𑀢𑀸𑀭𑀓𑁆𑀔𑀁;
𑀩𑀼𑀤𑁆𑀥𑁄𑀪𑀺𑀦𑀺𑀦𑁆𑀦𑀜𑁆𑀘 𑀯𑀺𑀯𑀚𑁆𑀚𑀬𑀦𑁆𑀢𑁄;
𑀲𑀺𑀓𑁆𑀔𑀸𑀧𑀤𑀁 𑀢𑀢𑁆𑀣 𑀘 𑀧𑀜𑁆𑀜𑀧𑁂𑀲𑀺.
𑀦𑀺𑀚𑁆𑀚𑀻𑀯𑀲𑁆𑀲𑀸𑀧𑀺 𑀫𑀁𑀲𑀲𑁆𑀲, 𑀔𑀸𑀤𑀦𑀓𑀁 𑀬𑀢𑀺𑀁 𑀧𑀢𑀺;
𑀦𑀺𑀦𑁆𑀤𑀫𑀸𑀦𑀁 𑀚𑀦𑀁 𑀤𑀺𑀲𑁆𑀯𑀸, 𑀪𑀽𑀢𑀕𑀸𑀫𑀁 𑀧𑀭𑀺𑀘𑁆𑀘𑀚𑀺.
𑀢𑀺𑀓𑁄𑀝𑀺𑀧𑀭𑀺𑀲𑀼𑀤𑁆𑀥𑀢𑁆𑀢𑀸, 𑀫𑀘𑁆𑀙𑀫𑀁𑀲𑀸𑀦𑀼𑀚𑀸𑀦𑀦𑁂;
𑀧𑀝𑀺𑀘𑁆𑀘 𑀫𑀁𑀲𑀸𑀦𑀼𑀚𑀸𑀦𑀦𑀁, 𑀓𑀫𑁆𑀫𑁂 𑀤𑀺𑀝𑁆𑀞𑀺𑀧𑁆𑀧𑀲𑀗𑁆𑀕𑀪𑀬𑀸.
𑀅𑀧𑀭𑀺𑀓𑁆𑀔𑀓𑀲𑁆𑀲 𑀮𑁄𑀓𑀲𑁆𑀲, 𑀧𑀭𑀸𑀦𑀼𑀤𑁆𑀤𑀬𑀢𑀸𑀬 𑀘;
𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀬, 𑀧𑀸𑀡𑀸𑀢𑀺𑀧𑀸𑀢𑀧𑁆𑀧𑀲𑀗𑁆𑀕𑀪𑀬𑀸.
𑀢𑀢𑁆𑀣 𑀧𑀭𑀺𑀬𑀸𑀬𑀯𑀘𑀦𑀁 𑀅𑀦𑀼𑀚𑀸𑀦𑀺 𑀪𑀕𑀯𑀸, 𑀉𑀤𑁆𑀤𑀺𑀲𑁆𑀲 𑀓𑀢𑀁 𑀧𑀝𑀺𑀓𑁆𑀔𑀺𑀧𑀺 𑀧𑀭𑀲𑁆𑀲 𑀯𑀸 𑀧𑀸𑀧𑀧𑁆𑀧𑀲𑀗𑁆𑀕𑀪𑀬𑁂𑀦. 𑀇𑀥 𑀧𑀦 𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀬 𑀧𑀸𑀧𑀸𑀪𑀸𑀯𑀜𑀸𑀧𑀦𑀢𑁆𑀣𑀁 𑀅𑀢𑁆𑀢𑀼𑀤𑁆𑀤𑁂𑀲𑀺𑀓𑀁 𑀯𑀺𑀳𑀸𑀭𑀁, 𑀓𑀼𑀝𑀺𑀜𑁆𑀘 𑀅𑀦𑀼𑀚𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀓𑀺𑀭𑀺𑀬𑀦𑁆𑀢𑀺 𑀏𑀢𑁆𑀣 𑀢𑁂 𑀢𑁂 𑀧𑀬𑁄𑀚𑀦𑀯𑀺𑀲𑁂𑀲𑀲𑀗𑁆𑀔𑀸𑀢𑀸 𑀅𑀢𑁆𑀣𑀯𑀲𑀸𑀢𑀺 𑀅𑀢𑁆𑀣𑀯𑀲𑀧𑀓𑀭𑀡𑀦𑁆𑀢𑀺.
𑀫𑀳𑀸𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑀧𑀞𑀫𑀕𑀸𑀣𑀸𑀲𑀗𑁆𑀕𑀡𑀺𑀓𑀯𑀡𑁆𑀡𑀦𑀸
𑀲𑀢𑁆𑀢𑀦𑀕𑀭𑁂𑀲𑀼 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸
𑁩𑁩𑁫. 𑀯𑀘𑀦𑀲𑀫𑁆𑀧𑀝𑀺𑀘𑁆𑀙𑀦𑀢𑁆𑀣𑁂 𑀯𑀸 𑀦𑀺𑀧𑀸𑀢𑁄𑀢𑀺 𑀅𑀢𑁆𑀣𑁄. 𑀅𑀟𑁆𑀠𑀼𑀟𑁆𑀠𑀲𑀢𑀸𑀦𑀻𑀢𑀺 𑀢𑀻𑀡𑀺 𑀲𑀢𑀸𑀦𑀺, 𑀧𑀜𑁆𑀜𑀸𑀲𑀸𑀦𑀺 𑀘. 𑀯𑀺𑀕𑁆𑀕𑀳𑀦𑁆𑀢𑀺 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀁. 𑀅𑀢𑀺𑀭𑁂𑀓𑀁 𑀯𑀸𑀢𑀺 𑀤𑀲𑀸𑀳𑀧𑀭𑀫𑀁 𑀅𑀢𑀺𑀭𑁂𑀓𑀘𑀻𑀯𑀭𑀁. 𑀓𑀸𑀴𑀓𑀦𑁆𑀢𑀺 ‘‘𑀲𑀼𑀤𑁆𑀥𑀓𑀸𑀴𑀓𑀸𑀦’’𑀦𑁆𑀢𑀺 (𑀧𑀸𑀭𑀸. 𑁫𑁫𑁨-𑁫𑁫𑁪) 𑀯𑀼𑀢𑁆𑀢𑀓𑀸𑀴𑀓𑀁. 𑀪𑀽𑀢𑀦𑁆𑀢𑀺 𑀪𑀽𑀢𑀸𑀭𑁄𑀘𑀦𑀁. 𑀧𑀭𑀫𑁆𑀧𑀭𑀪𑀢𑁆𑀢𑀦𑁆𑀢𑀺 𑀧𑀭𑀫𑁆𑀧𑀭𑀪𑁄𑀚𑀦𑀁. 𑀪𑀺𑀓𑁆𑀔𑀼𑀦𑀻𑀲𑀼 𑀘 𑀅𑀓𑁆𑀓𑁄𑀲𑁄𑀢𑀺 𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀪𑀺𑀓𑁆𑀔𑀼𑀁 𑀅𑀓𑁆𑀓𑁄𑀲𑁂𑀬𑁆𑀬 𑀯𑀸 𑀧𑀭𑀺𑀪𑀸𑀲𑁂𑀬𑁆𑀬 𑀯𑀸 (𑀧𑀸𑀘𑀺. 𑁧𑁦𑁨𑁯). 𑀅𑀦𑁆𑀢𑀭𑀯𑀸𑀲𑀓𑀦𑁆𑀢𑀺 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀁. 𑀭𑀽𑀧𑀺𑀬𑀦𑁆𑀢𑀺 𑀭𑀽𑀧𑀺𑀬𑀲𑀩𑁆𑀩𑁄𑀳𑀸𑀭𑀁. 𑀲𑀼𑀢𑁆𑀢𑀦𑁆𑀢𑀺 𑀲𑀸𑀫𑀁 𑀲𑀼𑀢𑁆𑀢𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀢𑀦𑁆𑀢𑀯𑀸𑀬𑁂𑀳𑀺. 𑀉𑀚𑁆𑀛𑀸𑀧𑀦𑀓𑁂𑀢𑀺 𑀉𑀚𑁆𑀛𑀸𑀧𑀦𑀓𑁂 𑀔𑀻𑀬𑀦𑀓𑁂. 𑀧𑀸𑀘𑀺𑀢𑀧𑀺𑀡𑁆𑀟𑀦𑁆𑀢𑀺 𑀪𑀺𑀓𑁆𑀔𑀼𑀦𑀻𑀧𑀅𑀧𑀸𑀘𑀺𑀢𑀧𑀺𑀡𑁆𑀟𑀧𑀸𑀢𑀁. 𑀘𑀸𑀭𑀺𑀢𑁆𑀢𑀦𑁆𑀢𑀺 𑀦𑀺𑀫𑀦𑁆𑀢𑀺𑀢𑁄 𑀲𑀪𑀢𑁆𑀢𑁄 𑀲𑀫𑀸𑀦𑁄 𑀲𑀦𑁆𑀢𑀁. 𑀘𑀻𑀯𑀭𑀁 𑀤𑀢𑁆𑀯𑀸𑀢𑀺 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦 𑀘𑀻𑀯𑀭𑀁 𑀤𑀢𑁆𑀯𑀸. 𑀯𑁄𑀲𑀸𑀲𑀦𑁆𑀢𑀻𑀢𑀺 𑀪𑀺𑀓𑁆𑀔𑀽 𑀧𑀦𑁂𑀯 𑀓𑀼𑀮𑁂𑀲𑀼 𑀦𑀺𑀫𑀦𑁆𑀢𑀺𑀢𑀸 𑀪𑀼𑀜𑁆𑀚𑀦𑁆𑀢𑀺 (𑀧𑀸𑀘𑀺. 𑁫𑁫𑁮), 𑀢𑀢𑁆𑀣 𑀘𑁂𑀲𑀸. 𑀕𑀺𑀭𑀕𑁆𑀕𑀘𑀭𑀺𑀬𑀸𑀢𑀺 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀦𑀘𑁆𑀘𑀁 𑀯𑀸 𑀕𑀻𑀢𑀁 𑀯𑀸’’𑀢𑀺 (𑀧𑀸𑀘𑀺. 𑁮𑁩𑁪) 𑀘, ‘‘𑀅𑀦𑁆𑀢𑁄𑀯𑀲𑁆𑀲𑀁 𑀘𑀸𑀭𑀺𑀓𑀁 𑀘𑀭𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁯𑁭𑁦) 𑀘 𑀯𑀼𑀢𑁆𑀢𑀤𑁆𑀯𑀬𑀁. 𑀙𑀦𑁆𑀤𑀤𑀸𑀦𑁂𑀦𑀸𑀢𑀺 𑀧𑀸𑀭𑀺𑀯𑀸𑀲𑀺𑀓𑀙𑀦𑁆𑀤𑀤𑀸𑀦𑁂𑀦 𑀲𑀺𑀓𑁆𑀔𑀫𑀸𑀦𑀁 𑀯𑀼𑀝𑁆𑀞𑀸𑀧𑁂𑀬𑁆𑀬 (𑀧𑀸𑀘𑀺. 𑁧𑁧𑁬𑁭). 𑀧𑀸𑀭𑀸𑀚𑀺𑀓𑀸𑀦𑀺 𑀘𑀢𑁆𑀢𑀸𑀭𑀺, 𑀪𑀺𑀓𑁆𑀔𑀼𑀦𑀻𑀦𑀁 𑀲𑀜𑁆𑀜𑀸𑀘𑀺𑀓𑀓𑀼𑀝𑀺𑀜𑁆𑀘 𑀓𑁄𑀲𑀺𑀬𑀫𑀺𑀲𑁆𑀲𑀲𑀦𑁆𑀣𑀢𑀜𑁆𑀘 𑀲𑁂𑀬𑁆𑀬𑀸 𑀘 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦 𑀲𑀳 𑀧𑀣𑀯𑀻𑀔𑀡𑀦𑀁. 𑀕𑀘𑁆𑀙 𑀤𑁂𑀯𑀢𑁂𑀢𑀺 𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸 𑀲𑀧𑁆𑀧𑀸𑀡𑀓𑀉𑀤𑀓𑀲𑀺𑀜𑁆𑀘𑀦𑀦𑁆𑀢𑀺 𑀅𑀢𑁆𑀣𑁄. 𑀫𑀳𑀸𑀯𑀺𑀳𑀸𑀭𑁄𑀢𑀺 𑀫𑀳𑀮𑁆𑀮𑀓𑀯𑀺𑀳𑀸𑀭𑁄. 𑀅𑀜𑁆𑀜𑀦𑁆𑀢𑀺 𑀅𑀜𑁆𑀜𑀯𑀸𑀤𑀓𑀁. 𑀤𑁆𑀯𑀸𑀭𑀦𑁆𑀢𑀺 𑀬𑀸𑀯𑀤𑁆𑀯𑀸𑀭𑀓𑁄𑀲𑀸. ‘‘𑀅𑀦𑀸𑀤𑀭𑀺𑀬𑀧𑀸𑀘𑀺𑀢𑁆𑀢𑀻𑀢𑀺 𑀘 𑀲𑀳𑀥𑀫𑁆𑀫𑀺𑀓𑀁 𑀯𑀼𑀘𑁆𑀘𑀫𑀸𑀦𑁄’’𑀢𑀺 𑀧𑀸𑀞𑁄. 𑀧𑀬𑁄𑀧𑀸𑀦𑀦𑁆𑀢𑀺 𑀲𑀼𑀭𑀼𑀲𑀼𑀭𑀼𑀓𑀸𑀭𑀓𑀁. 𑀏𑀴𑀓𑀮𑁄𑀫𑀸𑀦𑀺 𑀧𑀢𑁆𑀢𑁄 𑀘𑀸𑀢𑀺 𑀏𑀴𑀓𑀮𑁄𑀫𑀥𑁄𑀯𑀸𑀧𑀦𑀜𑁆𑀘 𑀊𑀦𑀧𑀜𑁆𑀘𑀩𑀦𑁆𑀥𑀦𑀧𑀢𑁆𑀢𑁄 𑀘. 𑀑𑀯𑀸𑀤𑁄 𑀘𑁂𑀯 𑀪𑁂𑀲𑀚𑁆𑀚𑀦𑁆𑀢𑀺 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀑𑀯𑀸𑀤𑁄 𑀢𑀤𑀼𑀢𑁆𑀢𑀭𑀺𑀪𑁂𑀲𑀚𑁆𑀚𑀯𑀺𑀜𑁆𑀜𑀸𑀧𑀦𑀜𑁆𑀘. 𑀲𑀽𑀘𑀺 𑀅𑀭𑀜𑁆𑀜𑀓𑁄𑀢𑀺 ‘‘𑀅𑀝𑁆𑀞𑀺𑀫𑀬𑀁 𑀯𑀸 𑀤𑀦𑁆𑀢𑀫𑀬𑀁 𑀯𑀸 𑀯𑀺𑀲𑀸𑀡𑀫𑀬𑀁 𑀯𑀸 𑀲𑀽𑀘𑀺𑀖𑀭’’𑀦𑁆𑀢𑀺 (𑀧𑀸𑀘𑀺. 𑁫𑁧𑁭) 𑀘 ‘‘𑀬𑀸𑀦𑀺 𑀔𑁄 𑀧𑀦 𑀢𑀸𑀦𑀺 𑀆𑀭𑀜𑁆𑀜𑀓𑀸𑀦𑀺 𑀲𑁂𑀦𑀸𑀲𑀦𑀸𑀦𑀺 𑀲𑀸𑀲𑀗𑁆𑀓…𑀧𑁂… 𑀧𑀝𑀺𑀤𑁂𑀲𑁂𑀢𑀩𑁆𑀩’’𑀦𑁆𑀢𑀺 (𑀧𑀸𑀘𑀺. 𑁫𑁭𑁦) 𑀘. 𑀑𑀯𑀸𑀤𑁄𑀢𑀺 𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀑𑀯𑀸𑀤𑀸𑀬 𑀯𑀸 𑀲𑀁𑀯𑀸𑀲𑀸𑀬 𑀯𑀸 𑀦 𑀕𑀘𑁆𑀙𑁂𑀬𑁆𑀬 (𑀧𑀸𑀘𑀺. 𑁧𑁦𑁫𑁫). 𑀧𑀸𑀭𑀸𑀚𑀺𑀓𑀸𑀦𑀺 𑀘𑀢𑁆𑀢𑀸𑀭𑀻𑀢𑀺𑀆𑀤𑀺 𑀤𑁆𑀯𑀻𑀲𑀼 𑀦𑀕𑀭𑁂𑀲𑀼 𑀧𑀜𑁆𑀜𑀢𑁆𑀢𑀲𑀫𑁆𑀧𑀺𑀡𑁆𑀟𑀦𑀁.
𑀘𑀢𑀼𑀯𑀺𑀧𑀢𑁆𑀢𑀺𑀯𑀡𑁆𑀡𑀦𑀸
𑁩𑁩𑁬. 𑀏𑀓𑀢𑀺𑀁𑀲𑀸 𑀬𑁂 𑀕𑀭𑀼𑀓𑀸𑀢𑀺 𑀉𑀪𑀢𑁄 𑀅𑀝𑁆𑀞 𑀧𑀸𑀭𑀸𑀚𑀺𑀓𑀸, 𑀪𑀺𑀓𑁆𑀔𑀽𑀦𑀁 𑀢𑁂𑀭𑀲, 𑀪𑀺𑀓𑁆𑀔𑀼𑀦𑀻𑀦𑀁 𑀤𑀲 𑀘 𑀲𑀗𑁆𑀖𑀸𑀤𑀺𑀲𑁂𑀲𑀸. 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀯𑀲𑁂𑀦 𑀅𑀝𑁆𑀞 𑀅𑀦𑀯𑀲𑁂𑀲𑀸 𑀦𑀸𑀫 𑀧𑀸𑀭𑀸𑀚𑀺𑀓𑀸𑀦𑀺. 𑀢𑀤𑁂𑀯𑀸𑀢𑀺 𑀲𑀻𑀮𑀯𑀺𑀧𑀢𑁆𑀢𑀺𑀁𑀬𑁂𑀯. 𑀯𑀺𑀢𑁆𑀣𑀸𑀭𑀢𑁄 𑀤𑀲𑁆𑀲𑁂𑀢𑀼𑀁 ‘‘𑀧𑀸𑀭𑀸𑀚𑀺𑀓’’𑀦𑁆𑀢𑀺𑀆𑀤𑀺𑀦𑀸 𑀅𑀧𑀼𑀘𑁆𑀙𑀺𑀢𑀫𑁂𑀯 𑀯𑀺𑀲𑁆𑀲𑀚𑁆𑀚𑀺𑀢𑀁. ‘‘𑀢𑀢𑁆𑀣 𑀬𑁄 𑀘𑀸𑀬𑀁, 𑀅𑀓𑁆𑀓𑁄𑀲𑀢𑀺 𑀳𑀲𑀸𑀥𑀺𑀧𑁆𑀧𑀸𑀬𑁄’’𑀢𑀺 𑀧𑀸𑀞𑁄. 𑀤𑀼𑀝𑁆𑀞𑀼𑀮𑁆𑀮𑀯𑀺𑀪𑀸𑀯𑀦𑀯𑀲𑁂𑀦𑀸𑀕𑀢𑀯𑀺𑀧𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀧𑀼𑀘𑁆𑀙𑀸𑀧𑀝𑀺𑀧𑀸𑀝𑀺𑀬𑀸 𑀬𑀸𑀯𑀢𑀢𑀺𑀬𑀓𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑀺𑀢𑀼𑀫𑀸𑀭𑀪𑀺. 𑀉𑀓𑁆𑀔𑀺𑀢𑁆𑀢𑀸𑀦𑀼𑀯𑀢𑁆𑀢𑀺𑀓𑀸 𑀪𑀺𑀓𑁆𑀔𑀼𑀦𑀻 𑀅𑀝𑁆𑀞 𑀬𑀸𑀯𑀢𑀢𑀺𑀬𑀓𑀲𑀗𑁆𑀖𑀸𑀤𑀺𑀲𑁂𑀲𑀸 𑀇𑀥 𑀧𑀼𑀘𑁆𑀙𑀺𑀢𑀢𑁆𑀢𑀸 𑀅𑀦𑀦𑁆𑀢𑀭𑀧𑀜𑁆𑀳𑀸 𑀦𑀸𑀫 𑀚𑀸𑀢𑀸.
𑀙𑁂𑀤𑀦𑀓𑀸𑀤𑀺𑀯𑀡𑁆𑀡𑀦𑀸
𑁩𑁩𑁭. 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀫𑀜𑁆𑀘𑀦𑀺𑀲𑀻𑀤𑀦𑀓𑀡𑁆𑀟𑀼𑀧𑀝𑀺𑀘𑁆𑀙𑀸𑀤𑀺𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀲𑀼𑀕𑀢𑀘𑀻𑀯𑀭𑀧𑁆𑀧𑀫𑀸𑀡𑀁 𑀪𑀺𑀓𑁆𑀔𑀼𑀦𑀻𑀦𑀁 𑀉𑀤𑀓𑀲𑀸𑀝𑀺𑀓𑀸𑀢𑀺 𑀙 𑀙𑁂𑀤𑀦𑀓𑀸𑀦𑀺. 𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺𑀆𑀤𑀬𑁄 𑀘𑀢𑀲𑁆𑀲𑁄 𑀲𑀫𑁆𑀫𑀼𑀢𑀺𑀬𑁄. ‘‘𑀅𑀬𑀁 𑀢𑀢𑁆𑀣 𑀲𑀸𑀫𑀻𑀘𑀻’’𑀢𑀺 𑀏𑀯𑀁 𑀆𑀕𑀢𑀸 𑀲𑀢𑁆𑀢 𑀲𑀸𑀫𑀻𑀘𑀺𑀬𑁄.
𑀅𑀲𑀸𑀥𑀸𑀭𑀡𑀸𑀤𑀺𑀯𑀡𑁆𑀡𑀦𑀸
𑁩𑁩𑁮. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀘𑀼𑀤𑁆𑀤𑀲𑀧𑀭𑀫𑀸𑀦𑁂𑀯 𑀅𑀦𑁆𑀢𑀭𑀧𑀜𑁆𑀳𑁂 𑀦𑀺𑀝𑁆𑀞𑀧𑁂𑀢𑁆𑀯𑀸 𑀧𑀼𑀭𑀺𑀫𑀧𑀜𑁆𑀳𑀁 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄. 𑀥𑁄𑀯𑀦𑀜𑁆𑀘 𑀧𑀝𑀺𑀕𑁆𑀕𑀳𑁄𑀢𑀺 𑀕𑀸𑀣𑀸 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀁. 𑀤𑁆𑀯𑁂 𑀮𑁄𑀫𑀸𑀦𑀺 𑀏𑀴𑀓𑀮𑁄𑀫𑀢𑀺𑀬𑁄𑀚𑀦𑀧𑀭𑀫𑀸𑀦𑀺.
𑀤𑁆𑀯𑁂𑀯𑀻𑀲𑀢𑀺 𑀔𑀼𑀤𑁆𑀤𑀓𑀸𑀢𑀺 𑁋
‘‘𑀲𑀓𑀮𑁄 𑀪𑀺𑀓𑁆𑀔𑀼𑀦𑀺𑀯𑀕𑁆𑀕𑁄, 𑀧𑀭𑀫𑁆𑀧𑀭𑀜𑁆𑀘 𑀪𑁄𑀚𑀦𑀁;
𑀅𑀦𑀢𑀺𑀭𑀺𑀢𑁆𑀢𑀁 𑀅𑀪𑀺𑀳𑀝𑀁, 𑀧𑀡𑀻𑀢𑀜𑁆𑀘 𑀅𑀘𑁂𑀮𑀓𑀁;
𑀚𑀸𑀦𑀁 𑀤𑀼𑀝𑁆𑀞𑀼𑀮𑁆𑀮𑀙𑀸𑀤𑀦𑀁.
‘‘𑀊𑀦𑀁 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺𑀁, 𑀬𑀸 𑀘 𑀅𑀦𑀺𑀓𑁆𑀔𑀦𑁆𑀢𑀭𑀸𑀚𑀓𑁂;
𑀲𑀦𑁆𑀢𑀁 𑀪𑀺𑀓𑁆𑀔𑀼𑀁 𑀅𑀦𑀸𑀧𑀼𑀘𑁆𑀙𑀸, 𑀯𑀺𑀓𑀸𑀮𑁂 𑀕𑀸𑀫𑀧𑁆𑀧𑀯𑁂𑀲𑀦𑀁.
‘‘𑀦𑀺𑀲𑀻𑀤𑀦𑁂 𑀘 𑀬𑀸 𑀲𑀺𑀓𑁆𑀔𑀸, 𑀯𑀲𑁆𑀲𑀺𑀓𑀸𑀬 𑀘 𑀲𑀸𑀝𑀺𑀓𑀸;
𑀤𑁆𑀯𑀸𑀯𑀻𑀲𑀢𑀺 𑀇𑀫𑀸 𑀲𑀺𑀓𑁆𑀔𑀸, 𑀔𑀼𑀤𑁆𑀤𑀓𑁂𑀲𑀼 𑀧𑀓𑀸𑀲𑀺𑀢𑀸’’𑀢𑀺. 𑁋
𑀧𑀸𑀞𑁄. ‘‘𑀓𑀼𑀮𑁂𑀲𑀼 𑀘𑀸𑀭𑀺𑀢𑁆𑀢𑀸𑀧𑀢𑁆𑀢𑀻’’𑀢𑀺 𑀧𑀸𑀞𑁄 𑀦 𑀕𑀳𑁂𑀢𑀩𑁆𑀩𑁄 𑀲𑀸𑀥𑀸𑀭𑀡𑀢𑁆𑀢𑀸 𑀢𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲. 𑀙𑀘𑀢𑁆𑀢𑀸𑀭𑀻𑀲𑀸 𑀘𑀺𑀫𑁂𑀢𑀺 𑀙𑀘𑀢𑁆𑀢𑀸𑀭𑀻𑀲 𑀇𑀫𑁂. ‘‘𑀧𑀸𑀭𑀸𑀚𑀺𑀓𑀸𑀦𑀺 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 𑀏𑀯𑀁 𑀯𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑁂 𑀏𑀯 𑀯𑀺𑀪𑀚𑀺𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀯𑀺𑀪𑀢𑁆𑀢𑀺𑀬𑁄 𑀦𑀸𑀫. 𑀲𑀸𑀥𑀸𑀭𑀡𑀦𑁆𑀢𑀺 𑀅𑀝𑁆𑀞𑀦𑁆𑀦𑀫𑁆𑀧𑀺 𑀲𑀸𑀥𑀸𑀭𑀡𑀁. 𑀧𑀸𑀭𑀸𑀚𑀺𑀓𑀪𑀽𑀢𑀸 𑀯𑀺𑀪𑀢𑁆𑀢𑀺𑀬𑁄 𑀧𑀸𑀭𑀸𑀚𑀺𑀓𑀯𑀺𑀪𑀢𑁆𑀢𑀺𑀬𑁄. 𑀲𑀸𑀥𑀸𑀭𑀡𑁂 𑀲𑀢𑁆𑀢𑀯𑀚𑁆𑀚𑁄 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀡𑁆𑀞𑀺𑀧𑀤𑁂 ‘‘𑀅𑀣 𑀯𑀸 ‘𑀤𑁆𑀯𑁂 𑀉𑀧𑁄𑀲𑀣𑀸 𑀤𑁆𑀯𑁂 𑀧𑀯𑀸𑀭𑀡𑀸 𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀺 𑀧𑀜𑁆𑀘𑁂𑀯 𑀉𑀤𑁆𑀤𑁂𑀲𑀸 𑀘𑀢𑀼𑀭𑁄 𑀪𑀯𑀦𑁆𑀢𑀺, 𑀦𑀜𑁆𑀜𑀣𑀸’𑀢𑀺 𑀧𑀸𑀴𑀺𑀁 𑀉𑀤𑁆𑀥𑀭𑀦𑁆𑀢𑀺. 𑀢𑀢𑁆𑀣 ‘𑀘𑀢𑁆𑀢𑀸𑀭𑀺 𑀓𑀫𑁆𑀫𑀸𑀦𑀻’𑀢𑀺 𑀯𑀺𑀲𑁂𑀲𑀸𑀪𑀸𑀯𑀸 𑀉𑀤𑁆𑀥𑀭𑀺𑀢𑀧𑁄𑀢𑁆𑀣𑀓𑀫𑁂𑀯 𑀲𑀼𑀦𑁆𑀤𑀭𑀁, 𑀧𑀼𑀩𑁆𑀩𑁂𑀧𑀺 𑀯𑀺𑀪𑀢𑁆𑀢𑀺𑀫𑀢𑁆𑀢𑀤𑀲𑁆𑀲𑀦𑀯𑀲𑁂𑀦𑁂𑀯 𑀘𑁂𑀢𑀁 𑀯𑀼𑀢𑁆𑀢𑀁. ‘𑀦 𑀲𑀫𑀣𑁂𑀳𑀺 𑀯𑀽𑀧𑀲𑀫𑀦𑀯𑀲𑁂𑀦𑀸’𑀢𑀺 𑀯𑀢𑁆𑀯𑀸 𑀘𑀢𑁆𑀢𑀸𑀭𑀺 𑀓𑀫𑁆𑀫𑀯𑀺𑀪𑀚𑀦𑁂 ‘𑀲𑀫𑀣𑁂𑀳𑀺 𑀯𑀽𑀧𑀲𑀫𑁆𑀫𑀢𑀻’𑀢𑀺 𑀦 𑀯𑀺𑀲𑁂𑀲𑀺𑀢𑀁 𑀉𑀧𑁄𑀲𑀣𑀧𑁆𑀧𑀯𑀸𑀭𑀡𑀸𑀦𑀁𑀬𑁂𑀯 𑀯𑀺𑀪𑀸𑀕𑀢𑁆𑀢𑀸. 𑀓𑀲𑁆𑀫𑀸? 𑀏𑀢𑁆𑀣𑀸𑀧𑀺 ‘𑀉𑀧𑁄𑀲𑀣𑀧𑁆𑀧𑀯𑀸𑀭𑀡𑀸𑀦𑀁𑀬𑁂𑀯 𑀯𑀺𑀲𑁂𑀲𑁂𑀢𑁆𑀯𑀸 𑀦𑀬𑀁 𑀤𑁂𑀣𑀸’𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀅𑀥𑀫𑁆𑀫𑁂𑀦 𑀯𑀕𑁆𑀕𑀸𑀤𑀺𑀓𑀫𑁆𑀫𑁂𑀦 𑀆𑀧𑀢𑁆𑀢𑀺𑀬𑁄𑀧𑀺 𑀯𑀽𑀧𑀲𑀫𑁆𑀫𑀦𑁆𑀢𑀻𑀢𑀺 𑀆𑀧𑀚𑁆𑀚𑀦𑀢𑁄𑀢𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁, 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀤𑁆𑀯𑀻𑀳𑀺 𑀘𑀢𑀽𑀳𑀺 𑀢𑀻𑀳𑀺 𑀓𑀺𑀘𑁆𑀘𑀁 𑀏𑀓𑁂𑀦𑀸𑀢𑀺 𑀤𑁆𑀯𑀻𑀳𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀁, 𑀘𑀢𑀽𑀳𑀺 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁, 𑀢𑀻𑀳𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁, 𑀏𑀓𑁂𑀦 𑀓𑀺𑀘𑁆𑀘𑀸𑀥𑀺𑀓𑀭𑀡𑀁 𑀲𑀫𑁆𑀫𑀢𑀻𑀢𑀺 𑀅𑀢𑁆𑀣𑁄.
𑀧𑀸𑀭𑀸𑀚𑀺𑀓𑀸𑀤𑀺𑀆𑀧𑀢𑁆𑀢𑀺𑀯𑀡𑁆𑀡𑀦𑀸
𑁩𑁩𑁯. 𑀦𑀺𑀩𑁆𑀩𑀘𑀦𑀫𑀢𑁆𑀢𑀦𑁆𑀢𑀺 𑀯𑁂𑀯𑀘𑀦𑀫𑀢𑁆𑀢𑀁. 𑀲𑁂𑀲𑁂𑀢𑀺 𑀆𑀤𑀺𑀢𑁄 𑀲𑁂𑀲𑀸 𑀫𑀚𑁆𑀛𑀦𑁆𑀢𑀸. 𑀧𑀤𑀦𑁆𑀢𑀺 𑀲𑀺𑀓𑁆𑀔𑀸𑀧𑀤𑀁. 𑀲𑀤𑁆𑀥𑀸𑀘𑀺𑀢𑁆𑀢𑀁 𑀧𑀲𑀦𑁆𑀦𑀘𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄, ‘‘𑀲𑀦𑁆𑀢𑀸𑀘𑀺𑀢𑁆𑀢’’𑀦𑁆𑀢𑀺 𑀯𑀸 𑀧𑀸𑀞𑁄. 𑀅𑀦𑀸𑀴𑀺𑀬𑀦𑁆𑀢𑀺 𑀤𑀮𑀺𑀤𑁆𑀤𑀁. 𑀓𑀺𑀜𑁆𑀘𑀸𑀧𑀺 𑀇𑀤𑀁 𑀦𑀺𑀩𑁆𑀩𑀘𑀦𑀁 ‘‘𑀕𑀭𑀼𑀓𑀁 𑀮𑀳𑀼𑀓𑀜𑁆𑀘𑀸’’𑀢𑀺𑀆𑀤𑀺𑀧𑀜𑁆𑀳𑁂 𑀦𑀢𑁆𑀣𑀺, ‘‘𑀳𑀦𑁆𑀤 𑀯𑀸𑀓𑁆𑀬𑀁 𑀲𑀼𑀡𑁄𑀫 𑀢𑁂’’𑀢𑀺 𑀇𑀫𑀺𑀦𑀸 𑀧𑀦 𑀯𑀘𑀦𑁂𑀦 𑀲𑀗𑁆𑀕𑀳𑀺𑀢𑀲𑁆𑀲𑀢𑁆𑀣𑀲𑁆𑀲 𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀆𑀓𑀸𑀲𑁄 𑀧𑀓𑁆𑀔𑀺𑀦𑀁 𑀕𑀢𑀻’’𑀢𑀺 𑀘 𑀧𑀸𑀞𑁄 𑀅𑀢𑁆𑀣𑀺, 𑀲𑁄 𑀚𑀸𑀢𑀺𑀯𑀲𑁂𑀦 𑀬𑀼𑀚𑁆𑀚𑀢𑀺. 𑀧𑀓𑁆𑀔𑀻𑀦𑀦𑁆𑀢𑀺 𑀉𑀚𑀼𑀓𑀫𑁂𑀯.
𑀧𑀞𑀫𑀕𑀸𑀣𑀸𑀲𑀗𑁆𑀕𑀡𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑀅𑀥𑀺𑀓𑀭𑀡𑀪𑁂𑀤𑀯𑀡𑁆𑀡𑀦𑀸
𑀉𑀓𑁆𑀓𑁄𑀝𑀦𑀪𑁂𑀤𑀸𑀤𑀺𑀯𑀡𑁆𑀡𑀦𑀸
𑁩𑁪𑁦. 𑀅𑀥𑀺𑀓𑀭𑀡𑀉𑀓𑁆𑀓𑁄𑀝𑁂𑀦 𑀲𑀫𑀣𑀸𑀦𑀁 𑀉𑀓𑁆𑀓𑁄𑀝𑀁 𑀤𑀲𑁆𑀲𑁂𑀢𑀼𑀦𑁆𑀢𑀺 𑀅𑀥𑀺𑀓𑀭𑀡𑀸𑀦𑀺 𑀲𑀢𑁆𑀢𑀳𑀺 𑀲𑀫𑀣𑁂𑀳𑀺 𑀲𑀫𑁆𑀫𑀦𑁆𑀢𑀺, 𑀢𑀸𑀦𑀺 𑀉𑀓𑁆𑀓𑁄𑀝𑁂𑀦𑁆𑀢𑁄 𑀲𑀢𑁆𑀢 𑀲𑀫𑀣𑁂 𑀉𑀓𑁆𑀓𑁄𑀝𑁂𑀢𑀺 𑀦𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀲𑀯𑀢𑀻𑀢𑀺 𑀲𑀫𑁆𑀪𑀯𑀢𑀺. ‘‘𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑁂 𑀮𑀩𑁆𑀪𑀦𑁆𑀢𑀻’𑀢𑀺𑀆𑀤𑀻𑀦𑀺 ‘𑀥𑀫𑁆𑀫𑁄 𑀅𑀥𑀫𑁆𑀫𑁄’𑀢𑀺𑀆𑀤𑀻𑀦𑀁 𑀲𑀫𑀸𑀦𑀢𑁆𑀢𑀸 𑀢𑁂𑀲𑀼 𑀯𑀺𑀲𑁂𑀲𑀢𑁄 𑀮𑀩𑁆𑀪𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀦𑀺𑀳𑀢𑀦𑁆𑀢𑀺 𑀲𑀼𑀢𑁆𑀢𑀸𑀤𑀺𑀦𑀸. 𑀅𑀯𑀺𑀦𑀺𑀘𑁆𑀙𑀺𑀢𑀦𑁆𑀢𑀺 ‘‘𑀆𑀧𑀢𑁆𑀢𑀺𑀅𑀦𑀸𑀧𑀢𑁆𑀢𑀻’’𑀢𑀺𑀆𑀤𑀺𑀦𑀸. ‘‘𑀢𑀢𑁆𑀣 𑀚𑀸𑀢𑀓𑀁 𑀅𑀥𑀺𑀓𑀭𑀡𑀁 𑀉𑀓𑁆𑀓𑁄𑀝𑁂𑀢𑀺…𑀧𑁂… 𑀢𑀺𑀡𑀯𑀢𑁆𑀣𑀸𑀭𑀓𑀁 𑀉𑀓𑁆𑀓𑁄𑀝𑁂𑀢𑀻’’𑀢𑀺 𑀤𑀲𑁂𑀯 𑀯𑀼𑀢𑁆𑀢𑀸. ‘‘𑀲𑀫𑁆𑀫𑀼𑀔𑀸𑀯𑀺𑀦𑀬𑀧𑀝𑀺𑀜𑁆𑀜𑀸𑀢𑀓𑀭𑀡𑀬𑁂𑀪𑀼𑀬𑁆𑀬𑀲𑀺𑀓𑀸 𑀅𑀯𑀼𑀢𑁆𑀢𑀢𑁆𑀢𑀸 𑀉𑀓𑁆𑀓𑁄𑀝𑁂𑀢𑀼𑀁 𑀦 𑀲𑀓𑁆𑀓𑀸, 𑀓𑀫𑁆𑀫𑀯𑀸𑀘𑀸𑀧𑀺 𑀢𑁂𑀲𑀁 𑀦𑀢𑁆𑀣𑀺. 𑀢𑀲𑁆𑀫𑀸 𑀢𑁂 𑀉𑀓𑁆𑀓𑁄𑀝𑁂𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀯𑀤𑀦𑁆𑀢𑀻’’𑀢𑀺 𑀮𑀺𑀔𑀺𑀢𑀁. 𑀧𑀸𑀴𑀺𑀫𑀼𑀢𑁆𑀢𑀓𑀯𑀺𑀦𑀺𑀘𑁆𑀙𑀬𑁂𑀦𑁂𑀯𑀸𑀢𑀺 𑀯𑀺𑀦𑀬𑀮𑀓𑁆𑀔𑀡𑀁 𑀯𑀺𑀦𑀸 𑀓𑁂𑀯𑀮𑀁 𑀥𑀫𑁆𑀫𑀤𑁂𑀲𑀦𑀸𑀫𑀢𑁆𑀢𑀯𑀲𑁂𑀦𑁂𑀯𑀸𑀢𑀺 𑀅𑀢𑁆𑀣𑁄. 𑀔𑀦𑁆𑀥𑀓𑀢𑁄 𑀯𑀸 𑀧𑀭𑀺𑀯𑀸𑀭𑀢𑁄 𑀯𑀸 𑀆𑀦𑀻𑀢𑀲𑀼𑀢𑁆𑀢𑁂𑀦. 𑀦𑀺𑀚𑁆𑀛𑀸𑀧𑁂𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑀺. 𑀧𑀼𑀩𑁆𑀩𑁂 𑀥𑀫𑁆𑀫𑀯𑀺𑀦𑀬𑁂𑀦 𑀯𑀺𑀦𑀺𑀘𑁆𑀙𑀺𑀢𑀁 𑀅𑀥𑀺𑀓𑀭𑀡𑀁 𑀉𑀧𑀚𑁆𑀛𑀸𑀬𑀸𑀤𑀻𑀦𑀁 𑀅𑀢𑁆𑀣𑀸𑀬 ‘‘𑀅𑀥𑀫𑁆𑀫𑀁 𑀥𑀫𑁆𑀫𑁄’’𑀢𑀺𑀆𑀤𑀻𑀦𑀺 𑀤𑀻𑀧𑁂𑀢𑁆𑀯𑀸𑀢𑀺 𑀅𑀢𑁆𑀣𑁄. 𑀯𑀺𑀲𑀫𑀸𑀦𑀺 𑀓𑀸𑀬𑀓𑀫𑁆𑀫𑀸𑀤𑀻𑀦𑀺 𑀦𑀺𑀲𑁆𑀲𑀺𑀢𑀢𑁆𑀢𑀸 𑀯𑀺𑀲𑀫𑀦𑀺𑀲𑁆𑀲𑀺𑀢𑁄. 𑀏𑀯𑀁 𑀲𑁂𑀲𑁂𑀲𑀼.
𑀅𑀥𑀺𑀓𑀭𑀡𑀦𑀺𑀤𑀸𑀦𑀸𑀤𑀺𑀯𑀡𑁆𑀡𑀦𑀸
𑁩𑁪𑁨-𑁩. 𑀓𑀺𑀁𑀲𑀫𑁆𑀪𑀸𑀭𑀦𑁆𑀢𑀺 𑀓𑀺𑀁𑀧𑀭𑀺𑀓𑁆𑀔𑀸𑀭𑀁, 𑀏𑀢𑁆𑀣 𑀓𑀺𑀦𑁆𑀢𑀺 𑀮𑀺𑀗𑁆𑀕𑀲𑀸𑀫𑀜𑁆𑀜𑀫𑀩𑁆𑀬𑀬𑀁. 𑀧𑀼𑀩𑁆𑀩𑁂 𑀉𑀧𑁆𑀧𑀦𑁆𑀦𑀯𑀺𑀯𑀸𑀤𑀁 𑀦𑀺𑀲𑁆𑀲𑀸𑀬 𑀧𑀘𑁆𑀙𑀸 𑀉𑀧𑁆𑀧𑀚𑁆𑀚𑀦𑀓𑀯𑀺𑀯𑀸𑀤𑁄 𑀯𑀺𑀯𑀸𑀤𑀦𑀺𑀤𑀸𑀦𑀁 𑀦𑀸𑀫. 𑀆𑀧𑀢𑁆𑀢𑀸𑀥𑀺𑀓𑀭𑀡𑀧𑀘𑁆𑀘𑀬𑀸 𑀘𑀢𑀲𑁆𑀲𑁄 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀻𑀢𑀺 𑀪𑀺𑀓𑁆𑀔𑀼𑀦𑀻 𑀚𑀸𑀦𑀁 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀧𑀝𑀺𑀘𑁆𑀙𑀸𑀤𑁂𑀢𑀺 𑀧𑀸𑀭𑀸𑀚𑀺𑀓𑀁, 𑀯𑁂𑀫𑀢𑀺𑀓𑀸 𑀧𑀝𑀺𑀘𑁆𑀙𑀸𑀤𑁂𑀢𑀺 𑀣𑀼𑀮𑁆𑀮𑀘𑁆𑀘𑀬𑀁, 𑀪𑀺𑀓𑁆𑀔𑀼 𑀲𑀗𑁆𑀖𑀸𑀤𑀺𑀲𑁂𑀲𑀁 𑀧𑀝𑀺𑀘𑁆𑀙𑀸𑀤𑁂𑀢𑀺 𑀧𑀸𑀘𑀺𑀢𑁆𑀢𑀺𑀬𑀁, 𑀆𑀘𑀸𑀭𑀯𑀺𑀧𑀢𑁆𑀢𑀺𑀁 𑀧𑀝𑀺𑀘𑁆𑀙𑀸𑀤𑁂𑀢𑀺 𑀤𑀼𑀓𑁆𑀓𑀝𑀁. 𑀧𑀼𑀩𑁆𑀩𑁂 𑀓𑀢𑀉𑀓𑁆𑀔𑁂𑀧𑀦𑀺𑀬𑀸𑀤𑀺𑀓𑀺𑀘𑁆𑀘𑀁 𑀦𑀺𑀲𑁆𑀲𑀸𑀬 𑀉𑀧𑁆𑀧𑀚𑁆𑀚𑀦𑀓𑀓𑀺𑀘𑁆𑀘𑀸𑀦𑀁. 𑀓𑀻𑀤𑀺𑀲𑀸𑀦𑀁? 𑀲𑀫𑀦𑀼𑀪𑀸𑀲𑀦𑀸𑀤𑀻𑀦𑀁 𑀯𑀲𑁂𑀦. 𑀢𑀁 𑀳𑀻𑀢𑀺 𑀅𑀥𑀺𑀓𑀭𑀡𑀁.
𑁩𑁪𑁪. 𑀅𑀥𑀺𑀓𑀭𑀡𑁂𑀲𑀼 𑀬𑁂𑀦 𑀅𑀥𑀺𑀓𑀭𑀡𑁂𑀦 𑀲𑀫𑁆𑀫𑀦𑁆𑀢𑀺, 𑀢𑀁 𑀤𑀲𑁆𑀲𑁂𑀢𑀼𑀦𑁆𑀢𑀺 𑀬𑀤𑀸 𑀅𑀥𑀺𑀓𑀭𑀡𑁂𑀳𑀺 𑀲𑀫𑁆𑀫𑀦𑁆𑀢𑀺, 𑀢𑀤𑀸 𑀓𑀺𑀘𑁆𑀘𑀸𑀥𑀺𑀓𑀭𑀡𑁂𑀦𑁂𑀯 𑀲𑀫𑁆𑀫𑀦𑁆𑀢𑀺, 𑀦 𑀅𑀜𑁆𑀜𑁂𑀳𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀦 𑀏𑀓𑀦𑁆𑀢𑀢𑁄 𑀅𑀥𑀺𑀓𑀭𑀡𑁂𑀦𑁂𑀯 𑀲𑀫𑁆𑀫𑀦𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁.
𑁩𑁪𑁮. 𑀆𑀧𑀢𑁆𑀢𑀸𑀥𑀺𑀓𑀭𑀡𑁂 𑀲𑀗𑁆𑀖𑁄 𑀯𑀺𑀯𑀤𑀢𑀻𑀢𑀺 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀻𑀢𑀺 𑀏𑀯𑀁.
𑁩𑁫𑁩. 𑀲𑀫𑀼𑀝𑁆𑀞𑀸𑀦𑀸𑀪𑀸𑀯𑀢𑁄 𑀲𑀫𑁆𑀫𑀼𑀔𑀸𑀯𑀺𑀦𑀬𑁂 𑀓𑀫𑁆𑀫𑀲𑁆𑀲 𑀓𑀺𑀭𑀺𑀬𑀸𑀓𑀭𑀡𑀫𑀺𑀘𑁆𑀘𑀸𑀤𑀺𑀦𑀸 𑀅𑀯𑀺𑀪𑀚𑀺𑀢𑁆𑀯𑀸𑀯 𑀲𑀢𑀺𑀯𑀺𑀦𑀬𑀸𑀤𑀻𑀦𑀁 𑀙𑀦𑁆𑀦𑀁𑀬𑁂𑀯 𑀙 𑀲𑀫𑀼𑀝𑁆𑀞𑀸𑀦𑀸𑀦𑀺 𑀯𑀺𑀪𑀢𑁆𑀢𑀸𑀦𑀺. 𑀢𑀁 𑀓𑀲𑁆𑀫𑀸? 𑀓𑀫𑁆𑀫𑀲𑀗𑁆𑀕𑀳𑀸𑀪𑀸𑀯𑁂𑀦, 𑀲𑀢𑀺𑀯𑀺𑀦𑀬𑀸𑀤𑀻𑀦𑀁 𑀯𑀺𑀬 𑀲𑀗𑁆𑀖𑀲𑀫𑁆𑀫𑀼𑀔𑀢𑀸𑀤𑀻𑀦𑀁 𑀓𑀺𑀘𑁆𑀘𑀬𑀢𑀸 𑀦𑀸𑀫 𑀦𑀢𑁆𑀣𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.
𑀅𑀥𑀺𑀓𑀭𑀡𑀪𑁂𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.
𑀤𑀼𑀢𑀺𑀬𑀕𑀸𑀣𑀸𑀲𑀗𑁆𑀕𑀡𑀺𑀓𑀯𑀡𑁆𑀡𑀦𑀸
𑀘𑁄𑀤𑀦𑀸𑀤𑀺𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀸𑀯𑀡𑁆𑀡𑀦𑀸
𑁩𑁫𑁯. 𑀯𑀺𑀕𑁆𑀕𑀸𑀳𑀺𑀓𑀓𑀣𑀦𑁆𑀢𑀺 𑀅𑀢𑁆𑀣𑁄. 𑀦𑀺𑀲𑀸𑀫𑀬𑀸𑀢𑀺 𑀲𑀮𑁆𑀮𑀓𑁆𑀔𑁂𑀳𑀺. ‘‘𑀓𑀸𑀭𑀬’’ 𑀇𑀢𑀺 𑀧𑀸𑀞𑁄. 𑀧𑀼𑀩𑁆𑀩𑀸𑀧𑀭𑀁 𑀦 𑀚𑀸𑀦𑀸𑀢𑀺, 𑀢𑀲𑁆𑀫𑀸 𑀅𑀓𑁄𑀯𑀺𑀤𑁄 𑀳𑁄𑀢𑀻𑀢𑀺 𑀏𑀓𑁂. 𑀅𑀬𑀁 𑀧𑀦 𑀤𑀼𑀯𑀺𑀥𑁂𑀧𑀺 𑀓𑀺𑀘𑁆𑀘𑁂 𑀓𑁂𑀦𑀘𑀺 𑀇𑀭𑀺𑀬𑀸𑀧𑀣𑁂𑀦.