𑀧𑀜𑁆𑀘𑀯𑀕𑁆𑀕𑁄

𑀓𑀫𑁆𑀫𑀯𑀕𑁆𑀕𑀯𑀡𑁆𑀡𑀦𑀸

𑁪𑁮𑁩. ‘‘𑀉𑀫𑁆𑀫𑀢𑁆𑀢𑀓𑀲𑀫𑁆𑀫𑀼𑀢𑀺𑀁 𑀉𑀫𑁆𑀫𑀢𑁆𑀢𑀓𑁂 𑀬𑀸𑀘𑀺𑀢𑁆𑀯𑀸 𑀕𑀢𑁂 𑀅𑀲𑀫𑁆𑀫𑀼𑀔𑀸𑀧𑀺 𑀤𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀺𑀲𑀺𑀦𑁆𑀦𑁂𑀧𑀺 𑀦 𑀓𑀼𑀧𑁆𑀧𑀢𑀺 𑀦𑀺𑀬𑀫𑀸𑀪𑀸𑀯𑀸. 𑀅𑀲𑀫𑁆𑀫𑀼𑀔𑀸 𑀓𑀢𑁂 𑀤𑁄𑀲𑀸𑀪𑀸𑀯𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀲𑀫𑁆𑀫𑀼𑀔𑀸𑀓𑀢𑀁 𑀲𑀼𑀓𑀢𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀤𑀽𑀢𑁂𑀦 𑀉𑀧𑀲𑀫𑁆𑀧𑀤𑀸 𑀧𑀦𑁂𑀢𑁆𑀣 𑀲𑀫𑁆𑀫𑀼𑀔𑀸 𑀓𑀸𑀢𑀼𑀁 𑀦 𑀲𑀓𑁆𑀓𑀸. 𑀓𑀫𑁆𑀫𑀯𑀸𑀘𑀸𑀦𑀸𑀦𑀢𑁆𑀢𑀲𑀪𑀸𑀯𑀸 𑀧𑀢𑁆𑀢𑀦𑀺𑀓𑁆𑀓𑀼𑀚𑁆𑀚𑀦𑀸𑀤𑀬𑁄 𑀳𑀢𑁆𑀣𑀧𑀸𑀲𑀢𑁄 𑀅𑀧𑀦𑁂𑀢𑁆𑀯𑀸 𑀓𑀸𑀢𑀩𑁆𑀩𑀸, 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀲𑀫𑁆𑀫𑀼𑀔𑀸 𑀓𑀢𑀁 𑀲𑀼𑀓𑀢𑀁 𑀳𑁄𑀢𑀻’’𑀢𑀺. ‘‘𑀧𑀼𑀘𑁆𑀙𑀺𑀢𑁆𑀯𑀸 𑀘𑁄𑀤𑁂𑀢𑁆𑀯𑀸 𑀲𑀸𑀭𑁂𑀢𑁆𑀯𑀸 𑀓𑀸𑀢𑀩𑁆𑀩𑀁 𑀅𑀧𑀼𑀘𑁆𑀙𑀺𑀢𑁆𑀯𑀸 𑀅𑀘𑁄𑀤𑁂𑀢𑁆𑀯𑀸 𑀅𑀲𑀸𑀭𑁂𑀢𑁆𑀯𑀸 𑀓𑀭𑁄𑀢𑀻’’𑀢𑀺 𑀅𑀬𑀁 𑀯𑀘𑀦𑀢𑁆𑀣𑁄. 𑀞𑀧𑁂𑀢𑁆𑀯𑀸 𑀓𑀢𑁆𑀢𑀺𑀓𑀫𑀸𑀲𑀦𑁆𑀢𑀺 𑀲𑁄 𑀧𑀯𑀸𑀭𑀡𑀸𑀫𑀸𑀲𑁄, 𑀤𑁆𑀯𑁂 𑀘 𑀧𑀼𑀡𑁆𑀡𑀫𑀸𑀲𑀺𑀬𑁄𑀢𑀺 𑀧𑀞𑀫𑀤𑀼𑀢𑀺𑀬𑀯𑀲𑁆𑀲𑀽𑀧𑀕𑀢𑀸𑀦𑀁 𑀧𑀯𑀸𑀭𑀡𑀸 𑀧𑀼𑀡𑁆𑀡𑀫𑀸𑀲𑀸 𑀤𑁆𑀯𑁂.

𑁪𑁮𑁫. 𑀧𑀤𑀁 𑀯𑀸 𑀙𑀟𑁆𑀟𑁂𑀢𑀻𑀢𑀺 𑀅𑀢𑁆𑀣𑁄. 𑀓-𑀯𑀕𑁆𑀕𑀸𑀤𑀻𑀲𑀼 𑀧𑀜𑁆𑀘𑀲𑀼. 𑀕𑀭𑀼𑀓𑀦𑁆𑀢𑀺 𑀤𑀻𑀖𑀁, 𑀲𑀁𑀬𑁄𑀕𑀧𑀭𑀜𑁆𑀘. ‘‘𑀩𑀼𑀤𑁆𑀥𑀭𑀓𑁆𑀔𑀺𑀢𑀢𑁆𑀣𑁂𑀭𑀲𑁆𑀲 𑀬𑀲𑁆𑀲 𑀦𑀓𑁆𑀔𑀫𑀢𑀻’’𑀢𑀺 𑀏𑀢𑁆𑀣 𑀢-𑀓𑀸𑀭𑀓-𑀓𑀸𑀭𑀸 𑀲𑀁𑀬𑁄𑀕𑀧𑀭𑀸. 𑀤𑀻𑀖𑁂 𑀯𑀢𑁆𑀢𑀩𑁆𑀩𑁂 𑀭𑀲𑁆𑀲𑀦𑁆𑀢𑀺 ‘‘𑀲𑁄 𑀢𑀼𑀡𑁆𑀳𑀻 𑀅𑀲𑁆𑀲𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀲𑁄 𑀢𑀼𑀡𑁆𑀳𑀺 𑀅𑀲𑁆𑀲𑀸𑀢𑀺 𑀯𑀘𑀦𑀁.

𑁪𑁮𑁬. 𑀲𑁂𑀲𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀯𑀘𑀦𑀁 𑀓𑀼𑀭𑀼𑀦𑁆𑀤𑀺𑀬𑀁 𑀧𑀸𑀓𑀝𑀁 𑀓𑀢𑁆𑀯𑀸 ‘‘𑀦𑀺𑀲𑀻𑀤𑀺𑀢𑀼𑀁 𑀦 𑀲𑀓𑁆𑀓𑁄𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁.

𑁪𑁮𑁭-𑁮. 𑀧𑀭𑀺𑀲𑀼𑀤𑁆𑀥𑀲𑀻𑀮𑀸 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽𑀢𑀺 𑀧𑀸𑀭𑀸𑀚𑀺𑀓𑀁 𑀅𑀦𑀸𑀧𑀦𑁆𑀦𑀸. 𑀦 𑀢𑁂𑀲𑀁 𑀙𑀦𑁆𑀤𑁄 𑀯𑀸 𑀧𑀸𑀭𑀺𑀲𑀼𑀤𑁆𑀥𑀺 𑀯𑀸 𑀏𑀢𑀻𑀢𑀺 𑀢𑀻𑀲𑀼, 𑀤𑁆𑀯𑀻𑀲𑀼 𑀯𑀸 𑀦𑀺𑀲𑀺𑀦𑁆𑀦𑁂𑀲𑀼 𑀏𑀓𑀲𑁆𑀲, 𑀤𑁆𑀯𑀺𑀦𑁆𑀦𑀁 𑀯𑀸 𑀙𑀦𑁆𑀤𑀧𑀸𑀭𑀺𑀲𑀼𑀤𑁆𑀥𑀺 𑀆𑀳𑀝𑀸𑀧𑀺 𑀅𑀦𑀸𑀳𑀝𑀸𑀯.

𑀅𑀧𑀮𑁄𑀓𑀦𑀓𑀫𑁆𑀫𑀓𑀣𑀸𑀯𑀡𑁆𑀡𑀦𑀸

𑁪𑁯𑁫-𑁬. 𑀓𑀸𑀬𑀲𑀫𑁆𑀪𑁄𑀕𑀲𑀸𑀫𑀕𑁆𑀕𑀺𑀤𑀸𑀦𑀲𑀳𑀲𑁂𑀬𑁆𑀬𑀧𑀝𑀺𑀕𑁆𑀕𑀳𑀡𑀸𑀤𑀺 𑀇𑀫𑀲𑁆𑀲 𑀅𑀧𑀮𑁄𑀓𑀦𑀓𑀫𑁆𑀫𑀲𑁆𑀲 𑀞𑀸𑀦𑀁 𑀳𑁄𑀢𑀻𑀢𑀺 𑀏𑀯𑀫𑁆𑀧𑀺 𑀅𑀧𑀮𑁄𑀓𑀦𑀓𑀫𑁆𑀫𑀁 𑀧𑀯𑀢𑁆𑀢𑀢𑀻𑀢𑀺 𑀅𑀢𑁆𑀣𑁄. 𑀓𑀫𑁆𑀫𑀜𑁆𑀜𑁂𑀯 𑀮𑀓𑁆𑀔𑀡𑀦𑁆𑀢𑀺 𑀓𑀫𑁆𑀫𑀮𑀓𑁆𑀔𑀡𑀁. 𑀑𑀲𑀸𑀭𑀡𑀦𑀺𑀲𑁆𑀲𑀸𑀭𑀡𑀪𑀡𑁆𑀟𑀼𑀓𑀫𑁆𑀫𑀸𑀤𑀬𑁄 𑀯𑀺𑀬 𑀓𑀫𑁆𑀫𑀜𑁆𑀘 𑀳𑀼𑀢𑁆𑀯𑀸 𑀅𑀜𑁆𑀜𑀜𑁆𑀘 𑀦𑀸𑀫𑀁 𑀦 𑀮𑀪𑀢𑀺, 𑀓𑀫𑁆𑀫𑀫𑁂𑀯 𑀳𑀼𑀢𑁆𑀯𑀸 𑀉𑀧𑀮𑀓𑁆𑀔𑀻𑀬𑀢𑀻𑀢𑀺 𑀓𑀫𑁆𑀫𑀮𑀓𑁆𑀔𑀡𑀁 𑀉𑀧𑀦𑀺𑀲𑁆𑀲𑀬𑁄 𑀯𑀺𑀬. 𑀳𑁂𑀢𑀼𑀧𑀘𑁆𑀘𑀬𑀸𑀤𑀺𑀮𑀓𑁆𑀔𑀡𑀯𑀺𑀫𑀼𑀢𑁆𑀢𑁄 𑀳𑀺 𑀲𑀩𑁆𑀩𑁄 𑀧𑀘𑁆𑀘𑀬𑀯𑀺𑀲𑁂𑀲𑁄 𑀢𑀢𑁆𑀣 𑀲𑀗𑁆𑀕𑀬𑁆𑀳𑀢𑀺, 𑀏𑀯𑀫𑁆𑀧𑀺 ‘‘𑀓𑀫𑁆𑀫𑀮𑀓𑁆𑀔𑀡𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀓𑀫𑁆𑀫𑀮𑀓𑁆𑀔𑀡𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀚𑀺𑀡𑁆𑀡𑀘𑀻𑀯𑀭𑀦𑀝𑁆𑀞𑀘𑀻𑀯𑀭𑀸𑀦’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀢𑀢𑁄 𑀅𑀢𑀺𑀭𑁂𑀓𑀁 𑀤𑁂𑀦𑁆𑀢𑁂𑀦 𑀅𑀧𑀮𑁄𑀓𑁂𑀢𑁆𑀯𑀸 𑀤𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁 𑀅𑀧𑀮𑁄𑀓𑀦𑀁 𑀓𑀫𑁆𑀫𑀮𑀓𑁆𑀔𑀡𑀫𑁂𑀯. 𑀏𑀯𑀁 𑀲𑀩𑁆𑀩𑀢𑁆𑀣 𑀮𑀓𑁆𑀔𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀇𑀡𑀧𑀮𑀺𑀩𑁄𑀥𑀫𑁆𑀧𑀻𑀢𑀺 𑀲𑀘𑁂 𑀢𑀸𑀤𑀺𑀲𑀁 𑀪𑀺𑀓𑁆𑀔𑀼𑀁 𑀇𑀡𑀸𑀬𑀺𑀓𑀸 𑀧𑀮𑀺𑀩𑀼𑀚𑁆𑀛𑀦𑁆𑀢𑀺. 𑀢𑀢𑁆𑀭𑀼𑀧𑁆𑀧𑀸𑀤𑀢𑁄 𑀤𑀸𑀢𑀼𑀁 𑀯𑀝𑁆𑀝𑀢𑀺. 𑀅𑀦𑁆𑀢𑀭𑀲𑀦𑁆𑀦𑀺𑀧𑀸𑀢𑁄𑀢𑀺 𑀉𑀧𑁄𑀲𑀣𑀧𑁆𑀧𑀯𑀸𑀭𑀡𑀸𑀤𑀺𑀫𑀳𑀸𑀲𑀦𑁆𑀦𑀺𑀧𑀸𑀢𑁂 𑀞𑀧𑁂𑀢𑁆𑀯𑀸 𑀅𑀦𑁆𑀢𑀭𑀸 𑀫𑀗𑁆𑀕𑀮𑀼𑀘𑁆𑀘𑀸𑀭𑀡𑀸𑀤𑀺. 𑀉𑀧𑀦𑀺𑀓𑁆𑀔𑁂𑀧𑀢𑁄𑀢𑀺 𑀘𑁂𑀢𑀺𑀬𑀲𑁆𑀲 𑀆𑀧𑀤𑀢𑁆𑀣𑀸𑀬 𑀦𑀺𑀓𑁆𑀔𑀺𑀢𑁆𑀢𑀢𑁄. ‘‘𑀅𑀜𑁆𑀜𑀸 𑀓𑀢𑀺𑀓𑀸 𑀓𑀸𑀢𑀩𑁆𑀩𑀸’’𑀢𑀺 𑀬𑁂 𑀭𑀼𑀓𑁆𑀔𑁂 𑀉𑀤𑁆𑀤𑀺𑀲𑁆𑀲 𑀧𑀼𑀩𑁆𑀩𑁂 𑀓𑀢𑀺𑀓𑀸 𑀓𑀢𑀸, 𑀢𑁂𑀳𑀺 𑀇𑀫𑁂𑀲𑀁 𑀅𑀜𑁆𑀜𑀢𑁆𑀢𑀸𑀢𑀺 𑀯𑀼𑀢𑁆𑀢𑀁. ‘‘𑀲𑀘𑁂 𑀢𑀢𑁆𑀣 𑀫𑀽𑀮𑁂’’𑀢𑀺 𑀧𑀼𑀩𑁆𑀩𑁂 ‘‘𑀇𑀢𑁄 𑀧𑀝𑁆𑀞𑀸𑀬 𑀪𑀸𑀚𑁂𑀢𑁆𑀯𑀸 𑀔𑀸𑀤𑀦𑁆𑀢𑀽’’𑀢𑀺 𑀯𑀘𑀦𑁂𑀦 𑀧𑀼𑀕𑁆𑀕𑀮𑀺𑀓𑀧𑀭𑀺𑀪𑁄𑀕𑁄 𑀧𑀝𑀺𑀓𑁆𑀔𑀺𑀢𑁆𑀢𑁄 𑀳𑁄𑀢𑀺. 𑀅𑀦𑀼𑀯𑀺𑀘𑀭𑀺𑀢𑁆𑀯𑀸𑀢𑀺 𑀧𑀘𑁆𑀙𑀢𑁄 𑀧𑀘𑁆𑀙𑀢𑁄 𑀕𑀦𑁆𑀢𑁆𑀯𑀸. 𑀢𑁂𑀲𑀁 𑀲𑀦𑁆𑀢𑀺𑀓𑀸 𑀧𑀘𑁆𑀘𑀬𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀫𑀽𑀮𑀪𑀸𑀕𑀦𑁆𑀢𑀺 𑀤𑀲𑀫𑀪𑀸𑀕𑀁 𑀓𑀢𑁆𑀯𑀸. 𑀧𑀼𑀩𑁆𑀩𑀓𑀸𑀮𑁂 𑀤𑀲𑀫𑀪𑀸𑀕𑀁 𑀓𑀢𑁆𑀯𑀸 𑀅𑀤𑀁𑀲𑀼, 𑀢𑀲𑁆𑀫𑀸 ‘‘𑀫𑀽𑀮𑀪𑀸𑀕𑁄’’𑀢𑀺 𑀯𑀼𑀢𑁆𑀢𑀁. 𑀅𑀓𑀢𑀸𑀯𑀸𑀲𑀁 𑀯𑀸 𑀓𑀢𑁆𑀯𑀸𑀢𑀺 𑀉𑀧𑁆𑀧𑀦𑁆𑀦𑀆𑀬𑁂𑀦. 𑀚𑀕𑁆𑀕𑀺𑀢𑀓𑀸𑀮𑁂𑀬𑁂𑀯 𑀦 𑀯𑀸𑀭𑁂𑀢𑀩𑁆𑀩𑀸𑀢𑀺 𑀚𑀕𑁆𑀕𑀺𑀢𑀸 𑀳𑀼𑀢𑁆𑀯𑀸 𑀧𑀼𑀧𑁆𑀨𑀨𑀮𑀪𑀭𑀺𑀢𑀓𑀸𑀮𑁂𑀢𑀺 𑀅𑀢𑁆𑀣𑁄. 𑀚𑀕𑁆𑀕𑀦𑀓𑀸𑀮𑁂𑀢𑀺 𑀚𑀕𑁆𑀕𑀺𑀢𑀼𑀁 𑀆𑀭𑀤𑁆𑀥𑀓𑀸𑀮𑁂. 𑀜𑀢𑁆𑀢𑀺𑀓𑀫𑁆𑀫𑀝𑁆𑀞𑀸𑀦𑀪𑁂𑀤𑁂 𑀧𑀦𑀸𑀢𑀺 𑀜𑀢𑁆𑀢𑀺𑀓𑀫𑁆𑀫𑀲𑁆𑀲 𑀞𑀸𑀦𑀪𑁂𑀤𑁂.

𑀇𑀤𑀁 𑀧𑀦𑁂𑀢𑁆𑀣 𑀧𑀓𑀺𑀡𑁆𑀡𑀓𑀁 𑁋 𑀅𑀢𑁆𑀣𑀺 𑀲𑀗𑁆𑀖𑀓𑀫𑁆𑀫𑀁 𑀲𑀗𑁆𑀖𑁄 𑀏𑀯 𑀓𑀭𑁄𑀢𑀺, 𑀦 𑀕𑀡𑁄, 𑀦 𑀧𑀼𑀕𑁆𑀕𑀮𑁄, 𑀢𑀁 𑀅𑀧𑀮𑁄𑀓𑀦𑀓𑀫𑁆𑀫𑀲𑁆𑀲 𑀓𑀫𑁆𑀫𑀮𑀓𑁆𑀔𑀡𑁂𑀓𑀤𑁂𑀲𑀁 𑀞𑀧𑁂𑀢𑁆𑀯𑀸 𑀇𑀢𑀭𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀓𑀫𑁆𑀫𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀢𑁆𑀣𑀺 𑀲𑀗𑁆𑀖𑀓𑀫𑁆𑀫𑀁 𑀲𑀗𑁆𑀖𑁄 𑀘 𑀓𑀭𑁄𑀢𑀺, 𑀕𑀡𑁄 𑀘 𑀓𑀭𑁄𑀢𑀺, 𑀧𑀼𑀕𑁆𑀕𑀮𑁄 𑀘 𑀓𑀭𑁄𑀢𑀺, 𑀢𑀁 𑀧𑀼𑀩𑁆𑀩𑁂 𑀞𑀧𑀺𑀢𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀬𑀲𑁆𑀫𑀺𑀁 𑀯𑀺𑀳𑀸𑀭𑁂 𑀤𑁆𑀯𑁂 𑀢𑀬𑁄 𑀚𑀦𑀸 𑀯𑀲𑀦𑁆𑀢𑀺, 𑀢𑁂𑀳𑀺 𑀦𑀺𑀲𑀻𑀤𑀺𑀢𑁆𑀯𑀸 𑀓𑀢𑀫𑁆𑀧𑀺 𑀲𑀗𑁆𑀖𑁂𑀦 𑀓𑀢𑀲𑀤𑀺𑀲𑀫𑁂𑀯. 𑀬𑀲𑁆𑀫𑀺𑀁 𑀧𑀦 𑀯𑀺𑀳𑀸𑀭𑁂 𑀏𑀓𑁄 𑀪𑀺𑀓𑁆𑀔𑀼 𑀳𑁄𑀢𑀺, 𑀢𑁂𑀦 𑀪𑀺𑀓𑁆𑀔𑀼𑀦𑀸’’𑀢𑀺𑀆𑀤𑀺 (𑀧𑀭𑀺. 𑀅𑀝𑁆𑀞. 𑁪𑁯𑁫-𑁪𑁯𑁬). 𑀅𑀢𑁆𑀣𑀺 𑀕𑀡𑀓𑀫𑁆𑀫𑀁 𑀲𑀗𑁆𑀖𑁄 𑀘 𑀓𑀭𑁄𑀢𑀺, 𑀕𑀡𑁄 𑀘 𑀓𑀭𑁄𑀢𑀺, 𑀧𑀼𑀕𑁆𑀕𑀮𑁄 𑀘 𑀓𑀭𑁄𑀢𑀺, 𑀢𑀁 𑀬𑁄 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁄 𑀅𑀜𑁆𑀜𑁂𑀲𑀁 𑀲𑀦𑁆𑀢𑀺𑀓𑁂 𑀓𑀭𑀻𑀬𑀢𑀺, 𑀢𑀲𑁆𑀲 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀅𑀢𑁆𑀣𑀺 𑀕𑀡𑀓𑀫𑁆𑀫𑀁 𑀕𑀡𑁄𑀯 𑀓𑀭𑁄𑀢𑀺, 𑀦 𑀲𑀗𑁆𑀖𑁄, 𑀦 𑀧𑀼𑀕𑁆𑀕𑀮𑁄, 𑀢𑀁 𑀬𑁄 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁄 𑀅𑀜𑁆𑀜𑀫𑀜𑁆𑀜𑀁 𑀆𑀭𑁄𑀘𑀦𑀯𑀲𑁂𑀦 𑀓𑀭𑀻𑀬𑀢𑀺, 𑀢𑀲𑁆𑀲 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀅𑀢𑁆𑀣𑀺 𑀧𑀼𑀕𑁆𑀕𑀮𑀓𑀫𑁆𑀫𑀁 𑀧𑀼𑀕𑁆𑀕𑀮𑁄𑀯 𑀓𑀭𑁄𑀢𑀺, 𑀦 𑀲𑀗𑁆𑀖𑁄, 𑀦 𑀕𑀡𑁄, 𑀢𑀁 𑀅𑀥𑀺𑀝𑁆𑀞𑀸𑀦𑀼𑀧𑁄𑀲𑀣𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁. 𑀅𑀢𑁆𑀣𑀺 𑀕𑀡𑀓𑀫𑁆𑀫𑀁 𑀏𑀓𑀘𑁆𑀘𑁄𑀯 𑀕𑀡𑁄 𑀓𑀭𑁄𑀢𑀺, 𑀏𑀓𑀘𑁆𑀘𑁄 𑀦 𑀓𑀭𑁄𑀢𑀺, 𑀢𑀢𑁆𑀣 𑀅𑀜𑀢𑁆𑀢𑀺𑀓𑀁 𑀤𑁆𑀯𑁂𑀬𑁂𑀯 𑀓𑀭𑁄𑀦𑁆𑀢𑀺, 𑀦 𑀢𑀬𑁄. 𑀲𑀜𑀢𑁆𑀢𑀺𑀓𑀁 𑀢𑀬𑁄𑀯 𑀓𑀭𑁄𑀦𑁆𑀢𑀺, 𑀦 𑀢𑀢𑁄 𑀊𑀦𑀸 𑀯𑀸 𑀅𑀥𑀺𑀓𑀸 𑀯𑀸𑀢𑀺.

𑀅𑀧𑀜𑁆𑀜𑀢𑁆𑀢𑁂𑀧𑀜𑁆𑀜𑀢𑁆𑀢𑀯𑀕𑁆𑀕𑀯𑀡𑁆𑀡𑀦𑀸

𑁫𑁦𑁦. 𑀓𑀓𑀼𑀲𑀦𑁆𑀥𑀓𑁄𑀡𑀸𑀕𑀫𑀦𑀓𑀲𑁆𑀲𑀧𑀸 𑀏𑀯 𑀳𑀺 𑀲𑀢𑁆𑀢 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂 𑀧𑀜𑁆𑀜𑀧𑁂𑀲𑀼𑀁. 𑀯𑀺𑀧𑀲𑁆𑀲𑀻𑀆𑀤𑀬𑁄 𑀧𑀦 𑀑𑀯𑀸𑀤𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀁𑀲𑀼, 𑀦 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑀼𑀁.

𑀦𑀺𑀕𑀫𑀦𑀓𑀣𑀸𑀯𑀡𑁆𑀡𑀦𑀸

𑀉𑀪𑀢𑁄𑀯𑀺𑀪𑀗𑁆𑀕𑀔𑀦𑁆𑀥𑀓𑀧𑀭𑀺𑀯𑀸𑀭𑁂𑀳𑀺 𑀯𑀺𑀪𑀢𑁆𑀢𑀁 𑀤𑁂𑀲𑀦𑀁 𑀅𑀢𑁆𑀣𑀺 𑀢𑀲𑁆𑀲 𑀯𑀺𑀦𑀬𑀧𑀺𑀝𑀓𑀲𑁆𑀲, 𑀦𑀸𑀫𑁂𑀦 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸 𑀦𑀸𑀫 𑀲𑀁𑀯𑀡𑁆𑀡𑀦𑀸 ‘‘𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀯𑀘𑀦𑀲𑀁𑀯𑀡𑁆𑀡𑀦𑀸 𑀲𑀫𑀢𑁆𑀢𑀸𑀢𑀺 𑀆𑀳. 𑀢𑀢𑁆𑀣 𑀧𑀥𑀸𑀦𑀖𑀭𑁂. 𑀇𑀤𑁆𑀥𑀸 𑀅𑀢𑁆𑀣𑀯𑀺𑀦𑀺𑀘𑁆𑀙𑀬𑀸𑀤𑀻𑀳𑀺.

𑀲𑀫𑁆𑀫𑀸 𑀉𑀤𑀺𑀢𑁄 𑀲𑀫𑀼𑀤𑀺𑀢𑁄, 𑀢𑁂 𑀕𑀼𑀡𑁂 𑀅𑀓𑀺𑀘𑁆𑀙𑁂𑀦 𑀅𑀥𑀺𑀕𑀢𑁄 𑀅𑀥𑀺𑀓𑀧𑁆𑀧𑀫𑀸𑀡𑀕𑀼𑀡𑁂𑀳𑀺 𑀯𑀸 𑀲𑀫𑀼𑀤𑀺𑀢𑁄, 𑀢𑁂𑀦 𑀲𑀫𑀼𑀤𑀺𑀢𑁂𑀦 ‘‘𑀕𑀢𑀸𑀦𑀁 𑀥𑀫𑁆𑀫𑀸𑀦𑀁 𑀕𑀢𑀺𑀬𑁄 𑀲𑀫𑀦𑁆𑀦𑁂𑀲𑀢𑀻’’𑀢𑀺 𑀯𑀼𑀢𑁆𑀢𑀸𑀬 𑀲𑀢𑀺𑀬𑀸 𑀉𑀧𑁆𑀧𑀸𑀤𑀺𑀢𑀸 𑀲𑀤𑁆𑀥𑀸𑀤𑀬𑁄 𑀧𑀭𑀫𑀯𑀺𑀲𑀼𑀤𑁆𑀥𑀸 𑀦𑀸𑀫 𑀲𑀫𑀦𑁆𑀦𑀸𑀭𑀓𑁆𑀔𑀢𑁆𑀢𑀸. 𑀇𑀢𑀺 𑀲𑀢𑀺𑀧𑀺 𑀲𑀤𑁆𑀥𑀸𑀤𑀻𑀳𑀺 𑀯𑀼𑀢𑁆𑀢𑀸 𑀳𑁄𑀢𑀺. 𑀏𑀯𑀁 𑀲𑀦𑁆𑀢𑁂 𑀏𑀢𑁆𑀣 𑀯𑀼𑀢𑁆𑀢𑁂 𑀘𑀢𑀼𑀩𑁆𑀩𑀺𑀥𑁂 𑀲𑀻𑀮𑁂 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀻𑀮𑀁 𑀲𑀤𑁆𑀥𑀸 𑀫𑀡𑁆𑀟𑁂𑀢𑀺. 𑀲𑀤𑁆𑀥𑀸𑀲𑀸𑀥𑀦𑀜𑁆𑀳𑀺 𑀢𑀁. 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀧𑀘𑁆𑀘𑀬𑀧𑀭𑀺𑀪𑁄𑀕𑀲𑀻𑀮𑀸𑀦𑀺 𑀧𑀝𑀺𑀫𑀡𑁆𑀟𑁂𑀦𑁆𑀢𑀺 𑀲𑀢𑀺𑀯𑀻𑀭𑀺𑀬𑀧𑀜𑁆𑀜𑀸𑀬𑁄𑀢𑀺 𑀬𑀣𑀸𑀬𑁄𑀕𑀁 𑀯𑁂𑀤𑀺𑀢𑀩𑁆𑀩𑀁. 𑀅𑀧𑀺𑀘 𑀲𑀤𑁆𑀥𑀸 𑀘 𑀩𑀼𑀤𑁆𑀥𑀺𑀭𑀳𑀺𑀢𑀸 𑀅𑀯𑀺𑀲𑀼𑀤𑁆𑀥𑀸 𑀳𑁄𑀢𑀺 𑀩𑀼𑀤𑁆𑀥𑀺𑀬𑀸 𑀧𑀲𑀸𑀤𑀳𑁂𑀢𑀼𑀢𑁆𑀢𑀸. 𑀩𑀼𑀤𑁆𑀥𑀺𑀬𑁄 𑀧𑀦 𑀢𑀲𑁆𑀲𑀸𑀦𑀼𑀪𑀸𑀯𑁂𑀦 𑀧𑀭𑀫𑀯𑀺𑀲𑀼𑀤𑁆𑀥𑀸 𑀦𑀸𑀫 𑀳𑁄𑀦𑁆𑀢𑀺. 𑀧𑀜𑁆𑀜𑀸 𑀲𑀤𑁆𑀥𑀸𑀭𑀳𑀺𑀢𑀸 𑀓𑁂𑀭𑀸𑀝𑀺𑀓𑀧𑀓𑁆𑀔𑀁 𑀪𑀚𑀢𑀺, 𑀲𑀤𑁆𑀥𑀸𑀬𑀼𑀢𑁆𑀢𑀸 𑀏𑀯 𑀯𑀺𑀲𑀼𑀤𑁆𑀥𑀸 𑀳𑁄𑀢𑀺. 𑀯𑀻𑀭𑀺𑀬𑀜𑁆𑀘 𑀲𑀫𑀸𑀥𑀺𑀭𑀳𑀺𑀢𑀁 𑀉𑀤𑁆𑀥𑀘𑁆𑀘𑀸𑀬 𑀲𑀁𑀯𑀢𑁆𑀢𑀢𑀺, 𑀦 𑀲𑀫𑀸𑀥𑀺𑀬𑀼𑀢𑁆𑀢𑀦𑁆𑀢𑀺 𑀯𑀻𑀭𑀺𑀬𑀲𑁆𑀲 𑀲𑀼𑀤𑁆𑀥𑀯𑀘𑀦𑀢𑁄 𑀲𑀫𑀸𑀥𑀺𑀧𑀺 𑀯𑀼𑀢𑁆𑀢𑁄 𑀳𑁄𑀢𑀺, 𑀏𑀯𑀁 𑀧𑀭𑀫𑀯𑀺𑀲𑀼𑀤𑁆𑀥𑀸 𑀲𑀤𑁆𑀥𑀸𑀤𑀬𑁄𑀧𑀺 𑀧𑀸𑀢𑀺𑀫𑁄𑀓𑁆𑀔𑀁 𑀧𑀝𑀺𑀫𑀡𑁆𑀟𑁂𑀦𑁆𑀢𑀻𑀢𑀺 𑀜𑀸𑀢𑀩𑁆𑀩𑀁. 𑀓𑀣𑀁? 𑀧𑀝𑀺𑀧𑀢𑁆𑀢𑀺𑀤𑁂𑀲𑀓𑁂 𑀲𑀢𑁆𑀣𑀭𑀺 𑀘 𑀧𑀝𑀺𑀧𑀢𑁆𑀢𑀺𑀬𑀜𑁆𑀘 𑀧𑀝𑀺𑀧𑀢𑁆𑀢𑀺𑀨𑀮𑁂 𑀘 𑀲𑀤𑁆𑀥𑀸𑀬 𑀯𑀺𑀦𑀸 𑀲𑀻𑀮𑀲𑀫𑀸𑀤𑀸𑀦𑀁, 𑀲𑀫𑀸𑀤𑀺𑀦𑁆𑀦𑀯𑀺𑀲𑁄𑀥𑀦𑀜𑁆𑀘 𑀓𑀸𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀲𑀤𑁆𑀥𑀸 𑀧𑀸𑀢𑀺𑀫𑁄𑀓𑁆𑀔𑀁 𑀧𑀝𑀺𑀫𑀡𑁆𑀟𑁂𑀢𑀺. 𑀢𑀢𑁆𑀣 ‘‘𑀇𑀢𑀺𑀧𑀺 𑀲𑁄 𑀪𑀕𑀯𑀸’’𑀢𑀺𑀆𑀤𑀺𑀦𑀸 (𑀤𑀻. 𑀦𑀺. 𑁧.𑁨𑁫𑁫; 𑀫. 𑀦𑀺. 𑁧.𑁭𑁪; 𑀲𑀁. 𑀦𑀺. 𑁧.𑁨𑁪𑁯) 𑀲𑀢𑁆𑀣𑀭𑀺 𑀘 𑀧𑀽𑀚𑁂𑀢𑀼𑀁 𑀲𑀓𑁆𑀓𑁄𑀢𑀺. 𑀧𑀝𑀺𑀧𑀢𑁆𑀢𑀺𑀬𑀁 𑀲𑀻𑀮𑀯𑀺𑀧𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀫𑀽𑀮𑀓𑁂 𑀲𑀦𑁆𑀤𑀺𑀝𑁆𑀞𑀺𑀓𑀲𑀫𑁆𑀧𑀭𑀸𑀬𑀺𑀓𑀨𑀮𑁂 𑀘 𑀲𑀤𑁆𑀥𑀸𑀧𑀯𑀢𑁆𑀢𑀺 𑀯𑀺𑀢𑁆𑀣𑀸𑀭𑀢𑁄 𑀜𑀸𑀢𑀩𑁆𑀩𑀸, 𑀲𑀻𑀮𑀯𑀺𑀧𑀢𑁆𑀢𑀺𑀲𑀫𑁆𑀧𑀢𑁆𑀢𑀺𑀦𑀺𑀫𑀺𑀢𑁆𑀢𑀁 𑀆𑀤𑀻𑀦𑀯𑀫𑀸𑀦𑀺𑀲𑀁𑀲𑀜𑁆𑀘 𑀆𑀤𑀻𑀦𑀯𑀧𑀭𑀺𑀘𑁆𑀘𑀸𑀕𑁂, 𑀆𑀦𑀺𑀲𑀁𑀲𑀲𑀫𑁆𑀧𑀸𑀤𑀦𑁂 𑀘 𑀉𑀧𑀸𑀬𑀁 𑀤𑀺𑀲𑁆𑀯𑀸 𑀢𑀣𑀸 𑀧𑀯𑀢𑁆𑀢𑀫𑀸𑀦𑀸 𑀧𑀜𑁆𑀜𑀸 𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀁 𑀧𑀝𑀺𑀫𑀡𑁆𑀟𑁂𑀢𑀺. ‘‘𑀅𑀢𑀺𑀲𑀻𑀢’’𑀦𑁆𑀢𑀺𑀆𑀤𑀺𑀦𑀸 𑀅𑀧𑁆𑀧𑀯𑀢𑁆𑀢𑀦𑀸𑀭𑀳𑀁 𑀓𑁄𑀲𑀚𑁆𑀚𑀁 ‘‘𑀬𑁄 𑀘 𑀲𑀻𑀢𑀜𑁆𑀘 𑀉𑀡𑁆𑀳𑀜𑁆𑀘𑀸’’𑀢𑀺 𑀯𑀼𑀢𑁆𑀢𑀸𑀦𑀼𑀲𑀸𑀭𑁂𑀦 𑀧𑀚𑀳𑀺𑀢𑁆𑀯𑀸 𑀅𑀦𑀼𑀧𑁆𑀧𑀦𑁆𑀦𑀼𑀧𑁆𑀧𑀦𑁆𑀦𑀸𑀦𑀁 𑀅𑀲𑀁𑀯𑀭𑀲𑀁𑀯𑀭𑀸𑀦𑀁 𑀅𑀦𑀼𑀧𑁆𑀧𑀸𑀤𑀦𑀧𑀚𑀳𑀦𑀉𑀧𑁆𑀧𑀸𑀤𑀦𑀯𑀟𑁆𑀠𑀦𑀯𑀲𑁂𑀦 𑀧𑀯𑀢𑁆𑀢𑀫𑀸𑀦𑀯𑀻𑀭𑀺𑀬𑀁 𑀧𑀸𑀢𑀺𑀫𑁄𑀓𑁆𑀔𑀁 𑀧𑀝𑀺𑀫𑀡𑁆𑀟𑁂𑀢𑀺, 𑀇𑀫𑀺𑀦𑀸 𑀦𑀬𑁂𑀦 𑀇𑀦𑁆𑀤𑁆𑀭𑀺𑀬𑀲𑀁𑀯𑀭𑀸𑀤𑀻𑀲𑀼𑀧𑀺 𑀬𑁄𑀚𑁂𑀢𑀩𑁆𑀩𑀁. 𑀘𑀢𑀼𑀦𑁆𑀦𑀫𑁆𑀧𑀺 𑀲𑀗𑁆𑀕𑀳𑀯𑀢𑁆𑀣𑀽𑀦𑀁 𑀅𑀦𑀼𑀓𑀽𑀮𑀲𑀫𑀼𑀤𑀸𑀘𑀸𑀭𑁄 𑀇𑀥 𑀆𑀘𑀸𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀚𑁆𑀚𑀯-𑀯𑀘𑀦𑁂𑀦 𑀮𑀸𑀪𑀲𑀓𑁆𑀓𑀸𑀭𑀳𑁂𑀢𑀼 𑀓𑀸𑀬𑀤𑀼𑀘𑁆𑀘𑀭𑀺𑀢𑀸𑀤𑀺𑀓𑀼𑀝𑀺𑀮𑀓𑀭𑀫𑀸𑀬𑀸𑀲𑀸𑀞𑁂𑀬𑁆𑀬𑀧𑀝𑀺𑀧𑀓𑁆𑀔𑀅𑀚𑁆𑀚𑀯𑀥𑀫𑁆𑀫𑀲𑀫𑀸𑀬𑁄𑀕𑀤𑀻𑀧𑀦𑁂𑀦 𑀅𑀮𑁄𑀪𑀚𑁆𑀛𑀸𑀲𑀬𑀢𑀸 𑀤𑀻𑀧𑀺𑀢𑀸. 𑀫𑀤𑁆𑀤𑀯-𑀯𑀘𑀦𑁂𑀦 𑀓𑀓𑁆𑀔𑀴𑀪𑀸𑀯𑀓𑀭𑀧𑀝𑀺𑀖𑀸𑀤𑀺𑀧𑀝𑀺𑀧𑀓𑁆𑀔𑀪𑀽𑀢𑀫𑁂𑀢𑁆𑀢𑀸𑀤𑀺𑀫𑀤𑁆𑀤𑀯𑀥𑀫𑁆𑀫𑀲𑀫𑀸𑀬𑁄𑀕𑀤𑀻𑀧𑀦𑁂𑀦 𑀳𑀺𑀢𑀚𑁆𑀛𑀸𑀲𑀬𑀸𑀤𑀻𑀦𑀺 𑀤𑀻𑀧𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀆𑀤𑀺-𑀲𑀤𑁆𑀤𑁂𑀦 ‘‘𑀔𑀦𑁆𑀢𑀺 𑀘 𑀲𑁄𑀭𑀘𑁆𑀘𑀜𑁆𑀘 𑀲𑀸𑀔𑀮𑁆𑀬𑀜𑁆𑀘 𑀧𑀝𑀺𑀲𑀦𑁆𑀣𑀸𑀭𑁄 𑀘𑀸’’𑀢𑀺𑀆𑀤𑀺𑀦𑀸 (𑀥. 𑀲. 𑀤𑀼𑀓𑀫𑀸𑀢𑀺𑀓𑀸 𑁧𑁨𑁫-𑁧𑁨𑁬) 𑀯𑀼𑀢𑁆𑀢𑀥𑀫𑁆𑀫𑁂𑀳𑀺 𑀲𑀫𑀸𑀬𑁄𑀕𑁄 𑀤𑀻𑀧𑀺𑀢𑁄 𑀳𑁄𑀢𑀺. 𑀇𑀥 𑀯𑀼𑀢𑁆𑀢𑀸 𑀅𑀚𑁆𑀚𑀯𑀫𑀤𑁆𑀤𑀯𑀸𑀤𑀬𑁄 𑀕𑀼𑀡𑀸 𑀲𑀻𑀮𑀲𑀫𑁆𑀧𑀢𑁆𑀢𑀺𑀬𑀸 𑀳𑁂𑀢𑀽 𑀘 𑀳𑁄𑀦𑁆𑀢𑀺 𑀲𑀻𑀮𑀲𑀫𑁆𑀧𑀢𑁆𑀢𑀺𑀨𑀮𑀜𑁆𑀘 𑀢𑀁𑀲𑀫𑁆𑀧𑀸𑀤𑀦𑀢𑁄. 𑀲𑀓𑀲𑀫𑀬𑁄𑀢𑀺 𑀘𑀢𑀼𑀧𑀭𑀺𑀲𑀸. 𑀏𑀢𑁂𑀦 𑀲𑀪𑀸𑀕𑀤𑀼𑀓𑁆𑀔𑀪𑀸𑀯𑀸𑀪𑀸𑀯𑁄 𑀲𑀽𑀘𑀺𑀢𑁄. 𑀅𑀣 𑀯𑀸 𑀲𑀓𑀲𑀫𑀬𑁄𑀢𑀺 𑀲𑁄𑀕𑀢𑀁 𑀧𑀺𑀝𑀓𑀢𑁆𑀢𑀬𑀁 𑀲𑀓𑀲𑀫𑀬𑁄 𑀏𑀯 𑀕𑀳𑀦𑀁 𑀤𑀼𑀤𑁆𑀤𑀻𑀧𑀦𑀢𑁆𑀢𑀸, 𑀲𑀓𑀲𑀫𑀬𑀲𑁆𑀲 𑀲𑀦𑁆𑀦𑀺𑀝𑁆𑀞𑀸𑀦𑀁 𑀲𑀓𑀲𑀫𑀬𑀕𑀳𑀦𑀁 𑁋

‘‘𑀲𑀘𑁆𑀘𑀁 𑀲𑀢𑁆𑀢𑁄 𑀧𑀝𑀺𑀲𑀦𑁆𑀥𑀺, 𑀧𑀘𑁆𑀘𑀬𑀸𑀓𑀸𑀭𑀫𑁂𑀯 𑀘;

𑀤𑀼𑀤𑁆𑀤𑀲𑀸 𑀘𑀢𑀼𑀭𑁄 𑀥𑀫𑁆𑀫𑀸, 𑀤𑁂𑀲𑁂𑀢𑀼𑀜𑁆𑀘 𑀲𑀼𑀤𑀼𑀓𑁆𑀓𑀭𑀸’’𑀢𑀺. (𑀯𑀺𑀪. 𑀅𑀝𑁆𑀞. 𑁨𑁨𑁫) 𑁋

𑀯𑀼𑀢𑁆𑀢𑀢𑁆𑀢𑀸 𑀬𑀣𑀸 𑀲𑀓𑀲𑀫𑀬𑀲𑁆𑀲 𑀕𑀳𑀦𑀧𑀤𑁂𑀦 𑀬𑁄𑀚𑀦𑀸 𑀯𑀼𑀢𑁆𑀢𑀸, 𑀢𑀣𑀸 𑀧𑀭𑀲𑀫𑀬𑀲𑁆𑀲𑀧𑀺. 𑀧𑀜𑁆𑀜𑀸𑀯𑁂𑀬𑁆𑀬𑀢𑁆𑀢𑀺𑀬𑁂𑀦𑀸𑀢𑀺 𑀅𑀦𑁂𑀦 𑀢𑀺𑀔𑀺𑀡𑁂𑀦 𑀜𑀸𑀡𑁂𑀦 𑀓𑀢𑀲𑀺𑀮𑀸𑀦𑀺𑀲𑀺𑀢𑀲𑀢𑁆𑀣𑀲𑀤𑀺𑀲𑀲𑀪𑀸𑀯𑀧𑀜𑁆𑀜𑀸 𑀯𑀼𑀢𑁆𑀢𑀸. 𑀢𑀺𑀧𑀺𑀝𑀓𑀲𑀗𑁆𑀔𑀸𑀢𑀸𑀬 𑀧𑀭𑀺𑀬𑀢𑁆𑀢𑀺𑀬𑀸 𑀧𑀪𑁂𑀤𑁄 𑀢𑀺𑀧𑀺𑀝𑀓𑀧𑀭𑀺𑀬𑀢𑁆𑀢𑀺𑀧𑁆𑀧𑀪𑁂𑀤𑁄. 𑀢𑀲𑁆𑀫𑀺𑀁 𑀧𑀪𑁂𑀤𑁂. 𑀢𑀦𑁆𑀢𑀺 𑀘 𑀢𑀦𑁆𑀢𑀺𑀅𑀢𑁆𑀣𑁄 𑀘 𑀲𑀸𑀲𑀦𑀁 𑀦𑀸𑀫. 𑀇𑀥 ‘‘𑀢𑀦𑁆𑀢𑀺 𑀏𑀯𑀸’’𑀢𑀺 𑀯𑀤𑀦𑁆𑀢𑀺. 𑀬𑀲𑁆𑀫𑀺𑀁 𑀅𑀬𑀁 𑀲𑀁𑀯𑀡𑁆𑀡𑀦𑀸 𑀦𑀺𑀝𑁆𑀞𑀸𑀧𑀺𑀢𑀸, 𑀢𑀲𑁆𑀫𑀺𑀁 𑀓𑀸𑀮𑁂 𑀧𑀝𑀺𑀯𑁂𑀥𑀜𑀸𑀡𑀸𑀪𑀸𑀯𑀢𑁄 𑀲𑀼𑀢𑀫𑀬𑀁 𑀲𑀦𑁆𑀥𑀸𑀬 ‘‘𑀅𑀧𑁆𑀧𑀝𑀺𑀳𑀢𑀜𑀸𑀡𑀧𑁆𑀧𑀪𑀸𑀯𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀓𑀭𑀡𑀲𑀫𑁆𑀧𑀢𑁆𑀢𑀺𑀬𑀸 𑀚𑀦𑀺𑀢𑀢𑁆𑀢𑀸 𑀲𑀼𑀔𑀯𑀺𑀦𑀺𑀕𑁆𑀕𑀢𑀁. 𑀲𑀼𑀔𑀯𑀺𑀦𑀺𑀕𑁆𑀕𑀢𑀢𑁆𑀢𑀸 𑀫𑀥𑀼𑀭𑁄𑀤𑀸𑀢𑀯𑀘𑀦𑀮𑀸𑀯𑀡𑁆𑀡𑀬𑀼𑀢𑁆𑀢𑁂𑀦𑀸𑀧𑀺 𑀬𑁄𑀚𑁂𑀢𑀩𑁆𑀩𑀁, 𑀈𑀤𑀺𑀲𑀁 𑀯𑀘𑀦𑀁 𑀲𑁄𑀢𑀲𑀼𑀔𑀜𑁆𑀘 𑀲𑀦𑁆𑀦𑀺𑀯𑁂𑀲𑀲𑀫𑁆𑀧𑀢𑁆𑀢𑀺𑀲𑀼𑀔𑀜𑁆𑀘 𑀳𑁄𑀢𑀺. ‘‘𑀯𑁂𑀬𑁆𑀬𑀸𑀓𑀭𑀡𑁂𑀦𑀸’’𑀢𑀺 𑀅𑀯𑀢𑁆𑀯𑀸 ‘‘𑀫𑀳𑀸𑀯𑁂𑀬𑁆𑀬𑀸𑀓𑀭𑀡𑁂𑀦𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀺𑀓𑁆𑀔𑀸𑀦𑀺𑀭𑀼𑀢𑁆𑀢𑀺𑀙𑀦𑁆𑀤𑁄𑀯𑀺𑀘𑀺𑀢𑁆𑀬𑀸𑀤𑀺𑀧𑀝𑀺𑀫𑀡𑁆𑀟𑀺𑀢𑀧𑀸𑀡𑀺𑀦𑀺𑀬𑀦𑁆𑀬𑀸𑀲𑀸𑀥𑀸𑀭𑀡𑀥𑀸𑀭𑀡𑀲𑀪𑀸𑀯𑁄 𑀲𑀽𑀘𑀺𑀢𑁄 𑀪𑀯𑀢𑀺. 𑀬𑀼𑀢𑁆𑀢𑀯𑀸𑀤𑀺𑀦𑀸𑀢𑀺𑀆𑀤𑀻𑀲𑀼 𑀬𑀼𑀢𑁆𑀢𑀫𑀼𑀢𑁆𑀢𑀯𑀸𑀤𑀺𑀦𑀸 𑀞𑀸𑀦𑀼𑀧𑁆𑀧𑀢𑁆𑀢𑀺𑀬𑀧𑀜𑁆𑀜𑀸𑀬 𑀲𑀫𑀦𑁆𑀦𑀸𑀕𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀑𑀚𑀸𑀪𑁂𑀤𑁂𑀧𑀺 𑀆𑀬𑀼𑀲𑀢𑁆𑀢𑀺𑀓𑀭𑀡𑀢𑀸𑀤𑀺𑀲𑀸𑀫𑀢𑁆𑀣𑀬𑁄𑀕𑀸𑀦𑀁 𑀫𑀳𑀸𑀓𑀯𑀺𑀦𑀸 𑀭𑀘𑀺𑀢𑀕𑀦𑁆𑀣𑀲𑁆𑀲 𑀫𑀳𑀦𑁆𑀢𑀢𑁆𑀢𑀸 𑀯𑀸 ‘‘𑀢𑀺𑀧𑀺𑀝𑀓𑀧𑀭𑀺𑀬𑀢𑁆𑀢𑀺𑀧𑁆𑀧𑀪𑁂𑀤𑁂’’𑀢𑀺𑀆𑀤𑀻𑀳𑀺 𑀲𑀸𑀲𑀦𑁂, 𑀳𑁂𑀢𑀼𑀯𑀺𑀲𑀬𑁂, 𑀲𑀤𑁆𑀤𑁂 𑀘𑀸𑀢𑀺 𑀇𑀫𑁂𑀲𑀼 𑀢𑀻𑀲𑀼 𑀞𑀸𑀦𑁂𑀲𑀼 𑀧𑀸𑀝𑀯𑀪𑀸𑀯𑀁 𑀤𑀻𑀧𑁂𑀦𑁆𑀢𑁄 𑀯𑁂𑀦𑀬𑀺𑀓𑀩𑀼𑀤𑁆𑀥𑀺𑀲𑀫𑁆𑀧𑀢𑁆𑀢𑀺𑀲𑀩𑁆𑀪𑀸𑀯𑀫𑀲𑁆𑀲 𑀲𑀽𑀘𑁂𑀢𑀺. 𑀬𑁂𑀲𑀁 𑀧𑀼𑀕𑁆𑀕𑀮𑀸𑀦𑀁 𑀧𑀪𑀺𑀦𑁆𑀦𑀸 𑀧𑀝𑀺𑀲𑀫𑁆𑀪𑀺𑀤𑀸𑀤𑀺, 𑀢𑁂 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑀸𑀤𑀬𑁄 𑀥𑀫𑁆𑀫𑀸. 𑀢𑁂𑀳𑀺 𑀧𑀭𑀺𑀯𑀸𑀭𑀺𑀢𑁄 𑀉𑀓𑁆𑀔𑀺𑀢𑁆𑀢𑀲𑀦𑁆𑀢𑀢𑀺𑀉𑀧𑀘𑁆𑀙𑁂𑀤𑀫𑀓𑀢𑁆𑀯𑀸 𑀅𑀢𑁆𑀢𑀦𑁄 𑀲𑀦𑁆𑀢𑀸𑀦𑁂 𑀉𑀧𑁆𑀧𑀸𑀤𑀦𑀯𑀟𑁆𑀠𑀦𑀯𑀲𑁂𑀦 𑀯𑀸𑀭𑀺𑀢𑁄 𑀲𑁄 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑀸𑀧𑀭𑀺𑀯𑀸𑀭𑁄. 𑀢𑀲𑁆𑀫𑀺𑀁 𑀧𑀪𑀺𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑀸𑀧𑀭𑀺𑀯𑀸𑀭𑁂 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂𑀢𑀺 𑀅𑀢𑁆𑀣𑁄. 𑀙𑀴𑀪𑀺𑀜𑁆𑀜𑀘𑀢𑀼𑀧𑀝𑀺𑀲𑀫𑁆𑀪𑀺𑀤𑀸𑀤𑀺𑀧𑁆𑀧𑀪𑁂𑀤𑀕𑀼𑀡𑀧𑀝𑀺𑀫𑀡𑁆𑀟𑀺𑀢𑁂 𑀧𑀦 𑀙𑀴𑀪𑀺𑀜𑁆𑀜𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸 𑀏𑀯. 𑀘𑀢𑀽𑀲𑀼 𑀧𑀝𑀺𑀲𑀫𑁆𑀪𑀺𑀤𑀸𑀲𑀼 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀸𑀬 𑀏𑀓𑀤𑁂𑀲𑁄𑀯. 𑀢𑀤𑀼𑀪𑀬𑀁 𑀲𑀬𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀧𑀭𑀺𑀬𑀸𑀧𑀦𑁆𑀦𑀁 𑀓𑀣𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀧𑀝𑀺𑀫𑀡𑁆𑀟𑁂𑀢𑀻𑀢𑀺 𑀘𑁂? 𑀭𑀼𑀓𑁆𑀔𑀁 𑀭𑀼𑀓𑁆𑀔𑀲𑁆𑀲 𑀅𑀯𑀬𑀯𑀪𑀽𑀢𑀧𑀼𑀧𑁆𑀨𑀸𑀤𑀬𑁄 𑀯𑀺𑀬 𑀲𑀬𑀜𑁆𑀘 𑀬𑁂𑀲𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀦𑀁 𑀅𑀯𑀬𑀯𑀢𑁆𑀢𑀸𑀢𑀺. 𑀓𑀸𑀫𑀸𑀯𑀘𑀭𑀥𑀫𑁆𑀫𑀧𑀭𑀺𑀬𑀸𑀧𑀦𑁆𑀦𑀧𑀝𑀺𑀲𑀫𑁆𑀪𑀺𑀤𑀸𑀜𑀸𑀡𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀸𑀦𑀁 𑀅𑀦𑀯𑀬𑀯𑀪𑀽𑀢𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀧𑀝𑀺𑀫𑀡𑁆𑀟𑁂𑀢𑀺, 𑀧𑀼𑀭𑀺𑀲𑀲𑁆𑀲 𑀅𑀦𑀯𑀬𑀯𑀪𑀽𑀢𑁄 𑀅𑀮𑀗𑁆𑀓𑀸𑀭𑁄 𑀯𑀺𑀬 𑀧𑀼𑀭𑀺𑀲𑀁. 𑀅𑀣 𑀯𑀸 𑀓𑀸𑀫𑀸𑀯𑀘𑀭𑀧𑀅𑀲𑀫𑁆𑀪𑀺𑀤𑀸𑀧𑀭𑀺𑀯𑀸𑀭𑁄 𑀙𑀴𑀪𑀺𑀜𑁆𑀜𑀸𑀧𑀝𑀺𑀲𑀫𑁆𑀪𑀺𑀤𑀸𑀤𑀺𑀧𑁆𑀧𑀪𑁂𑀤𑀕𑀼𑀡𑁂 𑀧𑀝𑀺𑀫𑀡𑁆𑀟𑁂𑀢𑀺. 𑀮𑁄𑀓𑀼𑀢𑁆𑀢𑀭𑀧𑀝𑀺𑀲𑀫𑁆𑀪𑀺𑀤𑀁 𑀲𑀦𑁆𑀥𑀸𑀬 𑀧𑀼𑀦 𑀧𑀝𑀺𑀲𑀫𑁆𑀪𑀺𑀤𑀸𑀯𑀘𑀦𑀜𑁆𑀘. 𑀲𑀸𑀲𑀦𑁂 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀲𑀸𑀲𑀦𑀲𑁆𑀲 𑀅𑀮𑀗𑁆𑀓𑀸𑀭𑀪𑀽𑀢𑁂𑀦, 𑀬𑀲𑁆𑀫𑀺𑀁 𑀯𑀁𑀲𑁂 𑀉𑀧𑁆𑀧𑀦𑁆𑀦𑁄, 𑀢𑀲𑁆𑀲𑁂𑀯 𑀯𑀸 𑀅𑀮𑀗𑁆𑀓𑀸𑀭𑀪𑀽𑀢𑁂𑀦. 𑀲𑀗𑁆𑀔𑁂𑀧𑀯𑀺𑀢𑁆𑀣𑀸𑀭𑁂𑀲𑀼 𑀇𑀢𑀭𑀻𑀢𑀭𑀓𑀭𑀡𑀁, 𑀅𑀧𑁆𑀧𑀲𑀦𑁆𑀦𑀧𑀲𑀦𑁆𑀦𑀸𑀦𑀁 𑀧𑀲𑀸𑀤𑀼𑀧𑁆𑀧𑀸𑀤𑀦𑀸𑀪𑀺𑀯𑀼𑀟𑁆𑀠𑀺𑀓𑀭𑀡𑀁, 𑀯𑀼𑀢𑁆𑀢𑀸𑀦𑀁 𑀕𑀫𑁆𑀪𑀻𑀭𑀸𑀦𑀁 𑀕𑀫𑁆𑀪𑀻𑀭𑀼𑀢𑁆𑀢𑀸𑀦𑀪𑀸𑀯𑀓𑀭𑀡𑀦𑁆𑀢𑀺 𑀏𑀯𑀁 𑀙𑀩𑁆𑀩𑀺𑀥𑀸𑀘𑀭𑀺𑀬𑀕𑀼𑀡𑀬𑁄𑀕𑀢𑁄 𑀯𑀺𑀧𑀼𑀮𑀩𑀼𑀤𑁆𑀥𑀺 𑀦𑀸𑀫. 𑀬𑁂 𑀥𑀫𑁆𑀫𑀘𑀺𑀦𑁆𑀢𑀦𑀁 𑀅𑀢𑀺𑀥𑀸𑀯𑀦𑁆𑀢𑀸 𑀓𑁂𑀘𑀺 𑀉𑀘𑁆𑀙𑁂𑀤𑀸𑀤𑀺𑀦𑀸𑀦𑀧𑁆𑀧𑀓𑀸𑀭𑀁 𑀅𑀦𑁆𑀢𑀁 𑀯𑀸 𑀕𑀡𑁆𑀳𑀦𑁆𑀢𑀺, ‘‘𑀲𑀩𑁆𑀩𑀁 𑀜𑁂𑀬𑁆𑀬𑀁 𑀧𑀜𑁆𑀜𑀢𑁆𑀢𑀺 𑀏𑀯𑀸’’𑀢𑀺 𑀯𑀸 ‘‘𑀧𑀭𑀫𑀢𑁆𑀣𑁄 𑀏𑀯𑀸’’𑀢𑀺 𑀯𑀸 𑀕𑀡𑁆𑀳𑀦𑁆𑀢𑀺, 𑀢𑁂𑀲𑀁 𑀩𑀼𑀤𑁆𑀥𑀺 𑀫𑀺𑀘𑁆𑀙𑀸𑀤𑀺𑀝𑁆𑀞𑀺𑀧𑀘𑁆𑀘𑀬𑀢𑁆𑀢𑀸 𑀲𑀫𑀮𑀸 𑀦𑀸𑀫 𑀳𑁄𑀢𑀺, 𑀇𑀫𑀲𑁆𑀲 𑀧𑀦 𑀩𑀼𑀤𑁆𑀥𑀺 𑀥𑀫𑁆𑀫𑀘𑀺𑀦𑁆𑀢𑀸𑀢𑀺𑀥𑀸𑀯𑀦𑀭𑀳𑀺𑀢𑀢𑁆𑀢𑀸 𑀯𑀺𑀲𑀼𑀤𑁆𑀥𑀸 𑀦𑀸𑀫 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀯𑀺𑀧𑀼𑀮𑀯𑀺𑀲𑀼𑀤𑁆𑀥𑀩𑀼𑀤𑁆𑀥𑀺𑀦𑀸’’𑀢𑀺. 𑀕𑀭𑀽𑀳𑀺 ‘‘𑀧𑀺𑀬𑁄 𑀕𑀭𑀼 𑀪𑀸𑀯𑀦𑀻𑀬𑁄’’𑀢𑀺𑀆𑀤𑀺𑀦𑀸 (𑀅. 𑀦𑀺. 𑁭.𑁩𑁭; 𑀦𑁂𑀢𑁆𑀢𑀺. 𑁧𑁧𑁩) 𑀯𑀼𑀢𑁆𑀢𑀕𑀼𑀡𑁂𑀳𑀺 𑀬𑀼𑀢𑁆𑀢𑀕𑀭𑀽𑀳𑀺. 𑀕𑀼𑀡𑁂𑀳𑀺 𑀣𑀺𑀭𑀪𑀸𑀯𑀁 𑀕𑀢𑀢𑁆𑀢𑀸 𑀣𑁂𑀭𑁂𑀦.

𑀲𑀻𑀮𑁂𑀦 𑀲𑀻𑀮𑀲𑁆𑀲 𑀯𑀸 𑀯𑀺𑀲𑀼𑀤𑁆𑀥𑀺𑀬𑀸 𑀲𑀻𑀮𑀯𑀺𑀲𑀼𑀤𑁆𑀥𑀺𑀬𑀸. 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀁 𑀧𑀤𑀸𑀮𑁂𑀢𑁆𑀯𑀸 𑀧𑀞𑀫𑀁 𑀅𑀪𑀺𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀮𑁄𑀓𑀚𑁂𑀝𑁆𑀞𑀲𑁆𑀲. 𑀮𑁄𑀓𑀲𑁆𑀲 𑀯𑀸 𑀕𑀫𑁆𑀪𑀻𑀭𑁂 𑀫𑀳𑀦𑁆𑀢𑁂 𑀲𑀻𑀮𑀸𑀤𑀺𑀓𑁆𑀔𑀦𑁆𑀥𑁂 𑀏𑀲𑀺 𑀕𑀯𑁂𑀲𑀻𑀢𑀺 𑀫𑀳𑁂𑀲𑀻𑀢𑀺.

𑀏𑀢𑁆𑀢𑀸𑀯𑀢𑀸 𑀲𑀫𑀥𑀺𑀓𑀲𑀢𑁆𑀢𑀯𑀻𑀲𑀢𑀺𑀲𑀳𑀲𑁆𑀲𑀧𑀭𑀺𑀫𑀸𑀡𑀸𑀬 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀲𑀜𑁆𑀜𑀺𑀢𑀸𑀬 𑀯𑀺𑀦𑀬𑀝𑁆𑀞𑀓𑀣𑀸𑀬 𑀲𑀩𑁆𑀩𑀧𑀤𑁂𑀲𑀼 𑀯𑀺𑀦𑀺𑀘𑁆𑀙𑀬𑀚𑀸𑀢𑀁 𑀲𑀗𑁆𑀔𑀺𑀧𑀺𑀢𑁆𑀯𑀸 𑀕𑀡𑁆𑀞𑀺𑀝𑁆𑀞𑀸𑀦𑀯𑀺𑀓𑀸𑀲𑀦𑀸 𑀓𑀢𑀸 𑀳𑁄𑀢𑀺, 𑀢𑀣𑀸𑀧𑀺 𑀬𑀁 𑀏𑀢𑁆𑀣 𑀮𑀺𑀔𑀺𑀢𑀁, 𑀢𑀁 𑀲𑀼𑀝𑁆𑀞𑀼 𑀯𑀺𑀘𑀸𑀭𑁂𑀢𑁆𑀯𑀸 𑀧𑀸𑀴𑀺𑀜𑁆𑀘 𑀅𑀝𑁆𑀞𑀓𑀣𑀜𑁆𑀘 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀬𑁂 𑀆𑀘𑀭𑀺𑀬𑀸 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀫𑀳𑀸𑀦𑀼𑀪𑀸𑀯𑀁, 𑀯𑀺𑀦𑀬𑀧𑀺𑀝𑀓𑀲𑁆𑀲 𑀘 𑀯𑀺𑀘𑀺𑀢𑁆𑀭𑀦𑀬𑀕𑀫𑁆𑀪𑀻𑀭𑀢𑁆𑀣𑀢𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀧𑁄𑀭𑀸𑀡𑀸𑀦𑀁 𑀓𑀣𑀸𑀫𑀕𑁆𑀕𑀁 𑀅𑀯𑀺𑀦𑀸𑀲𑁂𑀢𑁆𑀯𑀸 𑀅𑀢𑁆𑀢𑀦𑁄 𑀫𑀢𑀺𑀁 𑀧𑀳𑀸𑀬 𑀓𑁂𑀯𑀮𑀁 𑀲𑀤𑁆𑀥𑀫𑁆𑀫𑀝𑁆𑀞𑀺𑀢𑀺𑀬𑀸, 𑀧𑀭𑀸𑀦𑀼𑀕𑁆𑀕𑀳𑀓𑀸𑀫𑀢𑀸𑀬 𑀘 𑀯𑀺𑀦𑀬𑀧𑀺𑀝𑀓𑀁 𑀧𑀓𑀸𑀲𑁂𑀦𑁆𑀢𑀸 𑀞𑀺𑀢𑀸, 𑀢𑁂𑀲𑀁 𑀧𑀸𑀤𑀫𑀽𑀮𑁂 𑀯𑀦𑁆𑀤𑀺𑀢𑁆𑀯𑀸 𑀔𑀦𑁆𑀢𑀺𑀲𑁄𑀭𑀘𑁆𑀘𑀸𑀤𑀺𑀕𑀼𑀡𑀲𑀫𑀦𑁆𑀦𑀸𑀕𑀢𑁂𑀦 𑀳𑀼𑀢𑁆𑀯𑀸 𑀯𑀢𑁆𑀢𑀲𑀫𑁆𑀧𑀢𑁆𑀢𑀺𑀬𑀸 𑀢𑁂𑀲𑀁 𑀘𑀺𑀢𑁆𑀢𑀁 𑀆𑀭𑀸𑀥𑁂𑀢𑁆𑀯𑀸 𑀧𑀯𑁂𑀡𑀺𑀬𑀸 𑀆𑀕𑀢𑀁 𑀯𑀺𑀦𑀺𑀘𑁆𑀙𑀬𑀁 𑀓𑀣𑀸𑀧𑁂𑀢𑁆𑀯𑀸 𑀉𑀧𑀥𑀸𑀭𑁂𑀢𑁆𑀯𑀸 𑀬𑀁 𑀢𑁂𑀦 𑀲𑀁𑀲𑀦𑁆𑀤𑀢𑀺, 𑀢𑀁 𑀕𑀳𑁂𑀢𑀩𑁆𑀩𑀁, 𑀇𑀢𑀭𑀁 𑀙𑀟𑁆𑀟𑁂𑀢𑀩𑁆𑀩𑀁. 𑀇𑀢𑀭𑀣𑀸 𑀢𑀼𑀡𑁆𑀳𑀻𑀪𑀽𑀢𑁂𑀦 𑀪𑀯𑀺𑀢𑀩𑁆𑀩𑀁. 𑀯𑀺𑀦𑀺𑀘𑁆𑀙𑀬𑀲𑀗𑁆𑀓𑀭𑀓𑀭𑁂𑀦 𑀧𑀦 𑀦 𑀪𑀯𑀺𑀢𑀩𑁆𑀩𑀫𑁂𑀯. 𑀓𑀲𑁆𑀫𑀸? 𑀲𑀸𑀲𑀦𑀲𑁆𑀲 𑀦𑀸𑀲𑀳𑁂𑀢𑀼𑀢𑁆𑀢𑀸. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀅𑀲𑀫𑁆𑀩𑀼𑀥𑀁 𑀩𑀼𑀤𑁆𑀥𑀫𑀳𑀸𑀦𑀼𑀪𑀸𑀯𑀁,

𑀥𑀫𑁆𑀫𑀲𑁆𑀲 𑀕𑀫𑁆𑀪𑀻𑀭𑀦𑀬𑀢𑁆𑀣𑀢𑀜𑁆𑀘;

𑀬𑁄 𑀯𑀡𑁆𑀡𑀬𑁂 𑀢𑀁 𑀯𑀺𑀦𑀬𑀁 𑀅𑀯𑀺𑀜𑁆𑀜𑀽,

𑀲𑁄 𑀤𑀼𑀤𑁆𑀤𑀲𑁄 𑀲𑀸𑀲𑀦𑀦𑀸𑀲𑀳𑁂𑀢𑀼.

𑀧𑀸𑀴𑀺𑀁 𑀢𑀤𑀢𑁆𑀣𑀜𑁆𑀘 𑀅𑀲𑀫𑁆𑀩𑀼𑀥𑀜𑁆𑀳𑀺,

𑀦𑀸𑀲𑁂𑀢𑀺 𑀬𑁄 𑀅𑀝𑁆𑀞𑀓𑀣𑀸𑀦𑀬𑀜𑁆𑀘;

𑀅𑀦𑀺𑀘𑁆𑀙𑀬𑀁 𑀦𑀺𑀘𑁆𑀙𑀬𑀢𑁄 𑀧𑀭𑁂𑀳𑀺,

𑀕𑀸𑀳𑁂𑀢𑀺 𑀢𑁂𑀳𑁂𑀯 𑀧𑀼𑀭𑀓𑁆𑀔𑀢𑁄 𑀲𑁄.

𑀅𑀦𑀼𑀓𑁆𑀓𑀫𑁂𑀦𑁂𑀯 𑀫𑀳𑀸𑀚𑀦𑁂𑀦,

𑀧𑀼𑀭𑀓𑁆𑀔𑀢𑁄 𑀧𑀡𑁆𑀟𑀺𑀢𑀫𑀸𑀦𑀺𑀪𑀺𑀓𑁆𑀔𑀼;

𑀅𑀧𑀡𑁆𑀟𑀺𑀢𑀸𑀦𑀁 𑀯𑀺𑀫𑀢𑀺𑀁 𑀅𑀓𑀢𑁆𑀯𑀸,

𑀆𑀘𑀭𑀺𑀬𑀮𑀻𑀴𑀁 𑀧𑀼𑀭𑀢𑁄 𑀓𑀭𑁄𑀢𑀻’’𑀢𑀺.

𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀕𑀡𑁆𑀞𑀺𑀧𑀤𑀸𑀥𑀺𑀧𑁆𑀧𑀸𑀬𑀧𑁆𑀧𑀓𑀸𑀲𑀦𑀸 𑀲𑀫𑀢𑁆𑀢𑀸.

𑀯𑀚𑀺𑀭𑀩𑀼𑀤𑁆𑀥𑀺𑀝𑀻𑀓𑀸 𑀦𑀺𑀝𑁆𑀞𑀺𑀢𑀸.