𑀓𑀣𑀺𑀦𑀪𑁂𑀤𑀯𑀡𑁆𑀡𑀦𑀸

𑀓𑀣𑀺𑀦𑀅𑀢𑁆𑀣𑀢𑀸𑀤𑀺𑀯𑀡𑁆𑀡𑀦𑀸

𑁪𑁦𑁩-𑁪. 𑀓𑀺𑀦𑁆𑀢𑀺 𑀓𑀣𑀁. 𑀅𑀦𑀸𑀤𑀺𑀬𑀤𑀸𑀦𑀁 𑀢𑀸𑀯𑀓𑀸𑀮𑀺𑀓𑀯𑀢𑁆𑀣𑀼. ‘‘𑀅𑀦𑀸𑀕𑀢𑀯𑀲𑁂𑀦 𑀅𑀦𑀦𑁆𑀢𑀭𑀸 𑀳𑀼𑀢𑁆𑀯𑀸’’𑀢𑀺 𑀉𑀤𑀓𑀸𑀳𑀭𑀡𑀸𑀤𑀺𑀧𑀬𑁄𑀕𑀲𑁆𑀲 𑀥𑁄𑀯𑀦𑀸𑀤𑀺𑀧𑀼𑀩𑁆𑀩𑀓𑀭𑀡𑀲𑁆𑀲 𑀧𑀘𑁆𑀙𑀸 𑀉𑀧𑁆𑀧𑀚𑁆𑀚𑀦𑀢𑁄, 𑀥𑁄𑀯𑀦𑀸𑀤𑀺𑀓𑀺𑀭𑀺𑀬𑀜𑁆𑀘 𑀲𑀦𑁆𑀥𑀸𑀬 𑀧𑀬𑁄𑀕𑀓𑀭𑀡𑀢𑁄 𑀯𑀼𑀢𑁆𑀢𑀁. 𑀧𑀼𑀭𑁂𑀚𑀸𑀢𑀧𑀘𑁆𑀘𑀬𑁂 𑀧𑀦𑁂𑀲 𑀧𑀬𑁄𑀕𑁄𑀢𑀺 𑀅𑀢𑁆𑀣𑁄. 𑀏𑀓𑀁 𑀥𑀫𑁆𑀫𑀫𑁆𑀧𑀺 𑀦 𑀮𑀪𑀢𑀺 𑀅𑀢𑁆𑀢𑀦𑁄 𑀧𑀼𑀭𑁂𑀚𑀸𑀢𑀲𑁆𑀲 𑀦𑀢𑁆𑀣𑀺𑀢𑀸𑀬.

𑀓𑀣𑀺𑀦𑀸𑀤𑀺𑀚𑀸𑀦𑀺𑀢𑀩𑁆𑀩𑀯𑀺𑀪𑀸𑀕𑀯𑀡𑁆𑀡𑀦𑀸

𑁪𑁧𑁨. 𑀭𑀽𑀧𑀸𑀤𑀺𑀥𑀫𑁆𑀫𑁂𑀲𑀽𑀢𑀺 𑀯𑀡𑁆𑀡𑀕𑀦𑁆𑀥𑀸𑀤𑀺𑀅𑀝𑁆𑀞𑀓𑁂𑀲𑀼. ‘‘𑀯𑀲𑁆𑀲𑀸𑀦𑀲𑁆𑀲 𑀧𑀘𑁆𑀙𑀺𑀫𑁄 𑀫𑀸𑀲𑁄’’𑀢𑀺 (𑀧𑀸𑀭𑀸. 𑁨𑁧𑁮) 𑀯𑀼𑀢𑁆𑀢𑀢𑁆𑀢𑀸 𑀧𑀘𑁆𑀙𑀺𑀫𑁂 𑀫𑀸𑀲𑁂 𑀬𑀲𑁆𑀫𑀺𑀁 𑀯𑀸 𑀢𑀲𑁆𑀫𑀺𑀁 𑀯𑀸 𑀤𑀺𑀯𑀲𑁂 𑀅𑀢𑁆𑀣𑀭𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁.

𑁪𑁧𑁫. ‘‘𑀆𑀤𑀺𑀘𑁆𑀘𑀩𑀦𑁆𑀥𑀼𑀦𑀸𑀢𑀺 𑀯𑀼𑀢𑁆𑀢𑀢𑁆𑀢𑀸 𑀣𑁂𑀭𑀯𑀘𑀦’’𑀦𑁆𑀢𑀺 𑀯𑀤𑀦𑁆𑀢𑀺.

𑀧𑀮𑀺𑀩𑁄𑀥𑀧𑀜𑁆𑀳𑀸𑀩𑁆𑀬𑀸𑀓𑀭𑀡𑀓𑀣𑀸𑀯𑀡𑁆𑀡𑀦𑀸

𑁪𑁧𑁫-𑁬. 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑁄 𑀓𑀣𑀁 𑀩𑀳𑀺𑀲𑀻𑀫𑀸𑀬 𑀉𑀤𑁆𑀥𑀭𑀻𑀬𑀢𑀺? 𑀪𑀺𑀓𑁆𑀔𑀼 𑀅𑀓𑀢𑀘𑀻𑀯𑀭𑀁 𑀲𑀫𑀸𑀤𑀸𑀬 𑀧𑀓𑁆𑀓𑀫𑀢𑀺 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺, 𑀢𑀲𑁆𑀲 𑀩𑀳𑀺𑀲𑀻𑀫𑀸𑀕𑀢𑀲𑁆𑀲 𑀏𑀯𑀁 𑀳𑁄𑀢𑀺 ‘‘𑀦𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲’’𑀦𑁆𑀢𑀺, 𑀏𑀯𑀫𑁂𑀢𑀲𑁆𑀲 𑀩𑀳𑀺𑀲𑀻𑀫𑀸𑀕𑀢𑀲𑁆𑀲 𑀉𑀤𑁆𑀥𑀭𑀻𑀬𑀢𑀺. 𑀓𑀣𑀁 𑀅𑀦𑁆𑀢𑁄𑀲𑀻𑀫𑀸𑀬? 𑀅𑀓𑀢𑀘𑀻𑀯𑀭𑀁 𑀲𑀫𑀸𑀤𑀸𑀬 𑀧𑀓𑁆𑀓𑀫𑀢𑀺 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺, 𑀢𑀢𑁄 𑀢𑀢𑁆𑀣 𑀨𑀸𑀲𑀼𑀯𑀺𑀳𑀸𑀭𑀁 𑀅𑀮𑀪𑀦𑁆𑀢𑁄 𑀢𑀫𑁂𑀯 𑀯𑀺𑀳𑀸𑀭𑀁 𑀆𑀕𑀘𑁆𑀙𑀢𑀺, 𑀢𑀲𑁆𑀲 𑀘𑀻𑀯𑀭𑀧𑀮𑀺𑀩𑁄𑀥𑁄𑀬𑁂𑀯 𑀞𑀺𑀢𑁄, 𑀲𑁄 𑀘 ‘‘𑀦𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲’’𑀦𑁆𑀢𑀺 𑀘𑀺𑀢𑁆𑀢𑁂 𑀉𑀧𑁆𑀧𑀦𑁆𑀦𑁂 𑀙𑀺𑀚𑁆𑀚𑀢𑀺, 𑀢𑀲𑁆𑀫𑀸 ‘‘𑀅𑀦𑁆𑀢𑁄𑀲𑀻𑀫𑀸𑀬 𑀉𑀤𑁆𑀥𑀭𑀻𑀬𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑀁 𑀤𑀼𑀯𑀺𑀥𑀁 ‘‘𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺 𑀆𑀯𑀸𑀲𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀢𑀢𑁄 𑀧𑀼𑀦𑀧𑀺 𑀢𑀫𑁂𑀯 𑀯𑀺𑀳𑀸𑀭𑀁 𑀆𑀕𑀦𑁆𑀢𑁆𑀯𑀸 ‘‘𑀦𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲’’𑀦𑁆𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁 𑀓𑀭𑁄𑀢𑀺, 𑀩𑀳𑀺𑀲𑀻𑀫𑀸𑀬 𑀞𑀢𑁆𑀯𑀸 ‘‘𑀦𑁂𑀯𑀺𑀫𑀁 𑀘𑀻𑀯𑀭𑀁 𑀓𑀸𑀭𑁂𑀲𑁆𑀲𑀁 𑀦 𑀧𑀘𑁆𑀘𑁂𑀲𑁆𑀲’’𑀦𑁆𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑁂𑀦 𑀲𑀦𑁆𑀦𑀺𑀝𑁆𑀞𑀸𑀦𑀦𑁆𑀢𑀺𑀓𑀁 𑀳𑁄𑀢𑀺. 𑀕𑀸𑀣𑀸𑀬𑀫𑁆𑀧𑀺 ‘‘𑀤𑁆𑀯𑁂 𑀧𑀮𑀺𑀩𑁄𑀥𑀸 𑀅𑀧𑀼𑀩𑁆𑀩𑀁 𑀅𑀘𑀭𑀺𑀫’’𑀦𑁆𑀢𑀺 𑀇𑀤𑀁 𑀇𑀫𑀫𑁂𑀯 𑀲𑀦𑁆𑀥𑀸𑀬. ‘‘𑀆𑀲𑀸𑀯𑀘𑁆𑀙𑁂𑀤𑀺𑀓𑁄 𑀓𑀣𑀁 𑀅𑀦𑁆𑀢𑁄𑀲𑀻𑀫𑀸𑀬? 𑀆𑀲𑀻𑀲𑀺𑀢𑁂𑀦 ‘𑀢𑀼𑀫𑁆𑀳𑁂 𑀯𑀺𑀳𑀸𑀭𑀫𑁂𑀯 𑀧𑀢𑁆𑀣𑁂𑀣, 𑀅𑀳𑀁 𑀧𑀳𑀺𑀡𑀺𑀲𑁆𑀲𑀸𑀫𑀻’𑀢𑀺 𑀯𑀼𑀢𑁆𑀢𑁄 𑀧𑀼𑀩𑁆𑀩𑁂 ‘𑀦 𑀧𑀘𑁆𑀘𑁂𑀲𑁆𑀲’𑀦𑁆𑀢𑀺 𑀆𑀯𑀸𑀲𑀧𑀮𑀺𑀩𑁄𑀥𑀁 𑀙𑀺𑀦𑁆𑀤𑀺𑀢𑁆𑀯𑀸 𑀕𑀢𑁄 𑀧𑀼𑀦 𑀢𑀁 𑀯𑀺𑀳𑀸𑀭𑀁 𑀕𑀦𑁆𑀢𑁆𑀯𑀸 𑀢𑁂𑀦 ‘𑀦𑀸𑀳𑀁 𑀲𑀓𑁆𑀓𑁄𑀫𑀺 𑀤𑀸𑀢𑀼’𑀦𑁆𑀢𑀺 𑀧𑀳𑀺𑀢𑁄 𑀳𑁄𑀢𑀻’’𑀢𑀺 𑀮𑀺𑀔𑀺𑀢𑀁. ‘‘𑀅𑀢𑁆𑀣𑀸𑀭𑁂 𑀳𑀺 𑀲𑀢𑀺 𑀉𑀤𑁆𑀥𑀸𑀭𑁄 𑀦𑀸𑀫𑀸’’𑀢𑀺 𑀅𑀢𑁆𑀣𑀸𑀭𑀁 𑀯𑀺𑀦𑀸 𑀉𑀤𑁆𑀥𑀸𑀭𑀁 𑀦 𑀮𑀪𑀦𑁆𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁. 𑀧𑀼𑀭𑀺𑀫𑀸 𑀤𑁆𑀯𑁂𑀢𑀺 ‘‘𑀤𑁆𑀯𑁂 𑀓𑀣𑀺𑀦𑀼𑀤𑁆𑀥𑀸𑀭𑀸 𑀏𑀓𑀼𑀧𑁆𑀧𑀸𑀤𑀸 𑀏𑀓𑀦𑀺𑀭𑁄𑀥𑀸’’𑀢𑀺 𑀯𑀼𑀢𑁆𑀢𑀸𑀥𑀺𑀓𑀸𑀭𑁂 𑀧𑀞𑀫𑀁 𑀯𑀼𑀢𑁆𑀢𑀸 𑀅𑀦𑁆𑀢𑀭𑀩𑁆𑀪𑀸𑀭𑀲𑀳𑀼𑀩𑁆𑀪𑀸𑀭𑀸. 𑀦 𑀧𑀓𑁆𑀓𑀫𑀦𑀦𑁆𑀢𑀺𑀓𑀸𑀤𑀬𑁄 𑀤𑁆𑀯𑁂. 𑀏𑀓𑀢𑁄 𑀦𑀺𑀭𑀼𑀚𑁆𑀛𑀦𑁆𑀢𑀻𑀢𑀺 𑀉𑀤𑁆𑀥𑀸𑀭𑀪𑀸𑀯𑀁 𑀧𑀸𑀧𑀼𑀡𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀓𑀣𑀺𑀦𑀪𑁂𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀜𑁆𑀜𑀢𑁆𑀢𑀺𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.