𑀉𑀧𑀸𑀮𑀺𑀧𑀜𑁆𑀘𑀓𑀯𑀡𑁆𑀡𑀦𑀸

𑀅𑀦𑀺𑀲𑁆𑀲𑀺𑀢𑀯𑀕𑁆𑀕𑀯𑀡𑁆𑀡𑀦𑀸

𑁪𑁧𑁯. 𑀓𑀸𑀬𑀺𑀓𑀉𑀧𑀖𑀸𑀢𑀺𑀓𑀸 𑀦𑀸𑀫 𑀓𑀸𑀬𑁂𑀦 𑀯𑀻𑀢𑀺𑀓𑁆𑀓𑀫𑁄.

𑀦𑀧𑁆𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀦𑀯𑀕𑁆𑀕𑀯𑀡𑁆𑀡𑀦𑀸

𑁪𑁨𑁦. 𑀑𑀫𑀤𑁆𑀤𑀓𑀸𑀭𑀓𑁄𑀢𑀺 𑀑𑀫𑀤𑁆𑀤𑀺𑀢𑁆𑀯𑀸 𑀅𑀪𑀺𑀪𑀯𑀺𑀢𑁆𑀯𑀸 𑀓𑀸𑀭𑀓𑁄.

𑀯𑁄𑀳𑀸𑀭𑀯𑀕𑁆𑀕𑀯𑀡𑁆𑀡𑀦𑀸

𑁪𑁨𑁪. 𑀪𑁂𑀤𑀓𑀭𑀯𑀢𑁆𑀣𑀽𑀦𑀺 𑀦𑀺𑀲𑁆𑀲𑀸𑀬 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀲𑀫𑀼𑀝𑁆𑀞𑀸𑀢𑀺, 𑀏𑀯𑀁 𑀬𑀣𑀸𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀓𑁄𑀥𑁄𑀧𑀦𑀸𑀳𑀸𑀤𑀺𑀤𑁆𑀯𑀸𑀤𑀲𑀫𑀽𑀮𑀧𑀬𑁄𑀕𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀁, 𑀢𑀣𑀸 𑀲𑁂𑀲𑁂𑀲𑀼. 𑀑𑀲𑀸𑀭𑀡𑀸𑀤𑀻𑀲𑀼 𑀦𑀯𑀲𑀼 𑀞𑀸𑀦𑁂𑀲𑀼 𑀓𑀫𑁆𑀫𑀜𑀢𑁆𑀢𑀺𑀬𑀸 𑀓𑀭𑀡𑀁. 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀜𑀢𑁆𑀢𑀺𑀤𑀼𑀢𑀺𑀬𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑁂𑀲𑀼. 𑀬𑀲𑁆𑀫𑀸 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀉𑀪𑀢𑁄𑀯𑀺𑀪𑀗𑁆𑀕𑀸 𑀅𑀲𑀗𑁆𑀕𑀳𑀺𑀢𑀸, 𑀢𑀲𑁆𑀫𑀸 𑀬𑀁 𑀓𑀼𑀭𑀼𑀦𑁆𑀤𑀺𑀬𑀁 𑀯𑀼𑀢𑁆𑀢𑀁, 𑀢𑀁 𑀕𑀳𑁂𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑀯𑀕𑁆𑀕𑀯𑀡𑁆𑀡𑀦𑀸

𑁪𑁨𑁫. 𑀢𑀺𑀡𑁆𑀡𑀦𑁆𑀦𑀁 𑀉𑀧𑀭𑀺 𑀲𑀳 𑀆𑀧𑀢𑁆𑀢𑀺𑀁 𑀤𑁂𑀲𑁂𑀢𑀼𑀁 𑀦 𑀮𑀩𑁆𑀪𑀦𑁆𑀢𑀺. 𑀓𑀫𑁆𑀫𑀦𑀸𑀦𑀸𑀲𑀁𑀯𑀸𑀲𑀓𑀸𑀦𑀁 𑀮𑀤𑁆𑀥𑀺𑀕𑁆𑀕𑀳𑀺𑀢𑀓𑁄𑀯 𑀮𑀤𑁆𑀥𑀺𑀦𑀸𑀦𑀸𑀲𑀁𑀯𑀸𑀲𑀓𑁄. ‘‘𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑀸𑀬 𑀞𑀺𑀢𑀲𑁆𑀲𑀸’’𑀢𑀺 𑀫𑀳𑀸𑀲𑀻𑀫𑀁 𑀓𑀺𑀭 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁪𑁩𑁩. ‘‘𑀉𑀫𑁆𑀫𑀸𑀤𑀸 𑀘𑀺𑀢𑁆𑀢𑀓𑁆𑀔𑁂𑀧𑀸’’𑀢𑀺 𑀧𑀸𑀞𑁄.

𑀫𑀼𑀲𑀸𑀯𑀸𑀤𑀯𑀕𑁆𑀕𑀯𑀡𑁆𑀡𑀦𑀸

𑁪𑁪𑁪. 𑀧𑀭𑀺𑀬𑀸𑀬𑁂𑀦 𑀚𑀸𑀦𑀦𑁆𑀢𑀲𑁆𑀲𑀸𑀢𑀺 𑀬𑀲𑁆𑀲 𑀓𑀲𑁆𑀲𑀘𑀺 𑀚𑀸𑀦𑀦𑁆𑀢𑀲𑁆𑀲 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀫𑀼𑀲𑀸𑀯𑀸𑀤𑁄𑀢𑀺 𑀅𑀢𑁆𑀣𑁄.

𑁪𑁪𑁬. 𑀅𑀦𑀼𑀬𑁄𑀕𑁄 𑀦 𑀤𑀸𑀢𑀩𑁆𑀩𑁄𑀢𑀺 𑀢𑁂𑀦 𑀯𑀼𑀢𑁆𑀢𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀢𑀼𑀡𑁆𑀳𑀻 𑀪𑀯𑀺𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄.

𑀪𑀺𑀓𑁆𑀔𑀼𑀦𑁄𑀯𑀸𑀤𑀯𑀕𑁆𑀕𑀯𑀡𑁆𑀡𑀦𑀸

𑁪𑁫𑁪. 𑀯𑁄𑀳𑀸𑀭𑀦𑀺𑀭𑀼𑀢𑁆𑀢𑀺𑀬𑀁 𑀲𑀤𑁆𑀤𑀦𑀺𑀭𑀼𑀢𑁆𑀢𑀺𑀬𑀁. 𑀫𑀕𑁆𑀕𑀧𑀘𑁆𑀘𑀯𑁂𑀓𑁆𑀔𑀡𑀸𑀤𑀬𑁄 𑀏𑀓𑀽𑀦𑀯𑀻𑀲𑀢𑀺.

𑀉𑀩𑁆𑀩𑀸𑀳𑀺𑀓𑀯𑀕𑁆𑀕𑀯𑀡𑁆𑀡𑀦𑀸

𑁪𑁫𑁫. 𑀧𑀲𑀸𑀭𑁂𑀢𑀸 𑀫𑁄𑀳𑁂𑀢𑀸.

𑀅𑀥𑀺𑀓𑀭𑀡𑀯𑀽𑀧𑀲𑀫𑀯𑀕𑁆𑀕𑀯𑀡𑁆𑀡𑀦𑀸

𑁪𑁫𑁮. ‘‘𑀬𑀣𑀸𑀭𑀢𑁆𑀢𑀦𑁆𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀅𑀧𑁂𑀓𑁆𑀔𑀢𑀻’’𑀢𑀺𑀧𑀺 𑀯𑀤𑀦𑁆𑀢𑀺. ‘‘𑀬𑀣𑀸𑀯𑀼𑀟𑁆𑀠𑀦𑁆𑀢𑀺 𑀉𑀧𑀲𑀫𑁆𑀧𑀦𑁆𑀦𑁂 𑀅𑀧𑁂𑀓𑁆𑀔𑀢𑀻’’𑀢𑀺 𑀮𑀺𑀔𑀺𑀢𑀁.

𑀓𑀣𑀺𑀦𑀢𑁆𑀣𑀸𑀭𑀯𑀕𑁆𑀕𑀯𑀡𑁆𑀡𑀦𑀸

𑁪𑁬𑁭. ‘‘𑀏𑀓𑀸𑀯𑀢𑁆𑀢𑁄’’𑀢𑀺𑀧𑀺 𑀧𑀞𑀦𑁆𑀢𑀺, 𑀢𑀲𑁆𑀲 𑀓𑀼𑀤𑁆𑀥𑁄 𑀓𑁄𑀥𑀸𑀪𑀺𑀪𑀽𑀢𑁄𑀢𑀺 𑀓𑀺𑀭𑀢𑁆𑀣𑁄. 𑀏𑀓𑀯𑀢𑁆𑀣𑁄𑀢𑀺𑀧𑀺 𑀓𑁂𑀘𑀺, 𑀉𑀢𑁆𑀢𑀭𑀸𑀲𑀗𑁆𑀕𑀁 𑀅𑀧𑀦𑁂𑀢𑁆𑀯𑀸 𑀞𑀺𑀢𑁄𑀢𑀺 𑀓𑀺𑀭𑀢𑁆𑀣𑁄, 𑀢𑀁 𑀲𑀩𑁆𑀩𑀁 𑀅𑀝𑁆𑀞𑀓𑀣𑀸𑀬𑀁 𑀉𑀤𑁆𑀥𑀝𑀧𑀸𑀴𑀺𑀬𑀸 𑀯𑀺𑀭𑀼𑀚𑁆𑀛𑀢𑀻𑀢𑀺. 𑀏𑀓𑀸𑀯𑀝𑁆𑀝𑁄𑀢𑀺 𑀳𑀺 𑀉𑀤𑁆𑀥𑀝𑀁, 𑀢𑀲𑁆𑀫𑀸 𑀦 𑀕𑀳𑁂𑀢𑀩𑁆𑀩𑀁. 𑀅𑀦𑁆𑀢𑀭𑀸 𑀯𑀼𑀢𑁆𑀢𑀓𑀸𑀭𑀡𑁂𑀦𑀸𑀢𑀺 ‘‘𑀓𑀺𑀘𑁆𑀘𑀬𑀧𑀲𑀼𑀢𑀢𑁆𑀢𑀸 𑀯𑀦𑁆𑀤𑀦𑀁 𑀅𑀲𑀫𑀦𑁆𑀦𑀸𑀳𑀭𑀦𑁆𑀢𑁄 𑀦𑀮𑀸𑀝𑀁 𑀧𑀝𑀺𑀳𑀜𑁆𑀜𑁂𑀬𑁆𑀬𑀸’’𑀢𑀺𑀆𑀤𑀺𑀯𑀼𑀢𑁆𑀢𑀓𑀸𑀭𑀡𑁂𑀦.

𑀉𑀧𑀸𑀮𑀺𑀧𑀜𑁆𑀘𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀯𑀡𑁆𑀡𑀦𑀸

𑁪𑁭𑁦. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀫𑁂𑀯𑀸𑀢𑀺 𑀲𑀳𑀲𑁂𑀬𑁆𑀬𑀸𑀤𑀺𑀧𑀡𑁆𑀡𑀢𑁆𑀢𑀺𑀯𑀚𑁆𑀚𑀁. 𑀇𑀢𑀭𑀦𑁆𑀢𑀺 𑀲𑀘𑀺𑀢𑁆𑀢𑀓𑀁. 𑀤𑁂𑀲𑁂𑀦𑁆𑀢𑁄, 𑀤𑁄𑀫𑀦𑀲𑁆𑀲𑀺𑀓𑁄 𑀅𑀜𑁆𑀜𑁂𑀳𑀺 𑀪𑀺𑀁𑀲𑀸𑀧𑀦𑀸𑀤𑀻𑀦𑀺 𑀓𑀢𑁆𑀯𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.