𑁧𑁨. 𑀲𑀢𑁆𑀢𑀲𑀢𑀺𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸

𑀤𑀲𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁪𑁪𑁬. 𑀦𑀺𑀓𑁆𑀔𑀺𑀢𑁆𑀢𑀫𑀡𑀺𑀲𑀼𑀯𑀡𑁆𑀡𑀸𑀢𑀺 𑀲𑀺𑀓𑁆𑀔𑀸𑀧𑀤𑁂𑀦𑁂𑀯 𑀧𑀝𑀺𑀓𑁆𑀔𑀺𑀢𑁆𑀢𑀫𑀡𑀺𑀲𑀼𑀯𑀡𑁆𑀡𑀸. 𑀢𑀢𑁆𑀣 𑀫𑀡𑀺𑀕𑁆𑀕𑀳𑀡𑁂𑀦 𑀲𑀩𑁆𑀩𑀁 𑀤𑀼𑀓𑁆𑀓𑀝𑀯𑀢𑁆𑀣𑀼, 𑀲𑀼𑀯𑀡𑁆𑀡𑀕𑁆𑀕𑀳𑀡𑁂𑀦 𑀲𑀩𑁆𑀩𑀁 𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀼 𑀕𑀳𑀺𑀢𑀁 𑀳𑁄𑀢𑀺. 𑀪𑀺𑀓𑁆𑀔𑀕𑁆𑀕𑁂𑀦 𑀪𑀺𑀓𑁆𑀔𑀼𑀕𑀡𑀦𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁪𑁪𑁭. 𑀫𑀳𑀺𑀓𑀸𑀢𑀺 𑀳𑀺𑀫𑀁. 𑀧𑁄𑀲𑀸𑀢𑀺 𑀲𑀢𑁆𑀢𑀸. 𑀲𑀭𑀚𑀸𑀢𑀺 𑀲𑀓𑀺𑀮𑁂𑀲𑀭𑀚𑀸. 𑀫𑀕𑀸𑀢𑀺 𑀫𑀕𑀲𑀤𑀺𑀲𑀸. 𑀢𑀲𑁆𑀫𑀺𑀁 𑀢𑀲𑁆𑀫𑀺𑀁 𑀯𑀺𑀲𑀬𑁂, 𑀪𑀯𑁂 𑀯𑀸 𑀦𑁂𑀢𑀻𑀢𑀺 𑀦𑁂𑀢𑁆𑀢𑀺, 𑀢𑀡𑁆𑀳𑀸𑀬𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀸𑀬 𑀲𑀳 𑀯𑀢𑁆𑀢𑀦𑁆𑀢𑀻𑀢𑀺 𑀲𑀦𑁂𑀢𑁆𑀢𑀺𑀓𑀸.

𑁪𑁫𑁦-𑁨. 𑀅𑀳𑁄𑀕𑀗𑁆𑀕𑁄𑀢𑀺 𑀧𑀩𑁆𑀩𑀢𑀲𑁆𑀲 𑀦𑀸𑀫𑀁. 𑀅𑀦𑀼𑀫𑀸𑀦𑁂𑀲𑁆𑀲𑀸𑀫𑀸𑀢𑀺 𑀧𑀜𑁆𑀜𑀸𑀧𑁂𑀲𑁆𑀲𑀸𑀫. 𑀆𑀲𑀼𑀢𑀸𑀢𑀺 𑀲𑀚𑁆𑀚𑀺𑀢𑀸, ‘‘𑀅𑀲𑀼𑀢𑁆𑀢𑀸’’𑀢𑀺 𑀯𑀸 𑀧𑀸𑀞𑁄, 𑀅𑀦𑀸𑀯𑀺𑀮𑀸 𑀅𑀧𑀓𑁆𑀓𑀸 𑀢𑀭𑀼𑀡𑀸.

𑁪𑁫𑁩. 𑀉𑀚𑁆𑀚𑀯𑀺𑀁𑀲𑀼 𑀧𑀝𑀺𑀲𑁄𑀢𑁂𑀦 𑀕𑀘𑁆𑀙𑀺𑀁𑀲𑀼.

𑁪𑁫𑁫. 𑀅𑀧𑁆𑀧𑁂𑀯 𑀦𑀸𑀫𑀸𑀢𑀺 𑀲𑀸𑀥𑀼 𑀦𑀸𑀫. 𑀫𑀽𑀮𑀸 𑀤𑀸𑀬𑀓𑀸 𑀧𑁂𑀲𑀮𑀓𑀸. ‘‘𑀓𑀼𑀮𑁆𑀮𑀓𑀯𑀺𑀳𑀸𑀭𑁂𑀦𑀸𑀢𑀺 𑀔𑀼𑀤𑁆𑀤𑀓𑀯𑀺𑀳𑀸𑀭𑁂𑀦𑀸’’𑀢𑀺 𑀮𑀺𑀔𑀺𑀢𑀁. 𑀭𑀽𑀧𑀸𑀯𑀢𑀸𑀭𑀢𑁆𑀢𑀸 𑀓𑀼𑀮𑁆𑀮𑀓𑀯𑀺𑀳𑀸𑀭𑁄 𑀦𑀸𑀫. 𑀓𑀣𑀁 𑀧𑀦𑁂𑀢𑀁 𑀧𑀜𑁆𑀜𑀸𑀬𑀢𑀺, 𑀬𑁂𑀦 𑀲𑀦𑁆𑀦𑀺𑀥𑀺𑀓𑀢𑀁 𑀬𑀸𑀯𑀚𑀻𑀯𑀺𑀓𑀁 𑀬𑀸𑀯𑀓𑀸𑀮𑀺𑀓𑁂𑀦 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑁂𑀦 𑀲𑀫𑁆𑀪𑀺𑀦𑁆𑀦𑀭𑀲𑀁 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑀲𑀗𑁆𑀔𑀬𑀁 𑀆𑀕𑀦𑁆𑀢𑁆𑀯𑀸 𑀲𑀦𑁆𑀦𑀺𑀥𑀺𑀓𑀢𑀸𑀫𑀺𑀲𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 ‘‘𑀬𑀸𑀯𑀓𑀸𑀮𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀬𑀸𑀯𑀚𑀻𑀯𑀺𑀓𑀁 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢’’𑀦𑁆𑀢𑀺 𑀯𑀘𑀦𑀢𑁄 𑀧𑀼𑀭𑁂𑀧𑀝𑀺𑀕𑁆𑀕𑀳𑀺𑀢𑀁 𑀬𑀸𑀯𑀚𑀻𑀯𑀺𑀓𑀁 𑀢𑀤𑀳𑀼𑀧𑀝𑀺𑀕𑁆𑀕𑀳𑀺𑀢𑁂𑀦𑀸𑀫𑀺𑀲𑁂𑀦 𑀘𑁂 𑀲𑀫𑁆𑀪𑀺𑀦𑁆𑀦𑀁, 𑀧𑀼𑀭𑁂𑀧𑀝𑀺𑀕𑁆𑀕𑀳𑀺𑀢𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀻𑀢𑀺 𑀲𑀺𑀤𑁆𑀥𑀁. 𑀅𑀜𑁆𑀜𑀣𑀸 ‘‘𑀲𑀢𑁆𑀢𑀸𑀳𑀓𑀸𑀮𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀬𑀸𑀯𑀚𑀻𑀯𑀺𑀓𑀁 𑀧𑀝𑀺𑀕𑁆𑀕𑀳𑀺𑀢𑀁 𑀲𑀢𑁆𑀢𑀸𑀳𑀁 𑀓𑀧𑁆𑀧𑀢𑀻’’𑀢𑀺 (𑀫𑀳𑀸𑀯. 𑁩𑁦𑁫) 𑀯𑀼𑀢𑁆𑀢𑀝𑁆𑀞𑀸𑀦𑁂 𑀯𑀺𑀬 𑀇𑀥𑀸𑀧𑀺 ‘‘𑀬𑀸𑀯𑀓𑀸𑀮𑀺𑀓𑁂𑀦, 𑀪𑀺𑀓𑁆𑀔𑀯𑁂, 𑀬𑀸𑀯𑀚𑀻𑀯𑀺𑀓𑀁 𑀧𑀝𑀺𑀕𑁆𑀕𑀳𑀺𑀢𑀁 𑀓𑀸𑀮𑁂 𑀓𑀧𑁆𑀧𑀢𑀻’’𑀢𑀺 𑀯𑀤𑁂𑀬𑁆𑀬, 𑀢𑀜𑁆𑀘𑀸𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀧𑀼𑀭𑁂𑀧𑀝𑀺𑀕𑁆𑀕𑀳𑀺𑀢𑀁 𑀢𑀁 𑀆𑀫𑀺𑀲𑀲𑀫𑁆𑀪𑀺𑀦𑁆𑀦𑀁 𑀆𑀫𑀺𑀲𑀕𑀢𑀺𑀓𑀫𑁂𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀲𑀦𑁆𑀦𑀺𑀥𑀺𑀓𑀸𑀭𑀓𑀁 𑀔𑀸𑀤𑀦𑀻𑀬𑀁 𑀯𑀸 𑀪𑁄𑀚𑀦𑀻𑀬𑀁 𑀯𑀸’’𑀢𑀺 (𑀧𑀸𑀘𑀺. 𑁨𑁫𑁩) 𑀯𑀼𑀢𑁆𑀢𑀁. 𑀩𑁆𑀬𑀜𑁆𑀚𑀦𑀫𑀢𑁆𑀢𑀁 𑀦 𑀕𑀳𑁂𑀢𑀩𑁆𑀩𑀁.

𑁪𑁫𑁭. 𑀇𑀥𑀸𑀢𑀺 𑀇𑀫𑀲𑁆𑀫𑀺𑀁 𑀧𑀸𑀞𑁂. ‘‘‘𑀓𑀸𑀮𑁂 𑀓𑀧𑁆𑀧𑀢𑀺, 𑀯𑀺𑀓𑀸𑀮𑁂 𑀦 𑀓𑀧𑁆𑀧𑀢𑀻’𑀢𑀺 (𑀫𑀳𑀸𑀯. 𑁩𑁦𑁫) 𑀯𑀼𑀢𑁆𑀢𑀯𑀘𑀦𑀫𑀢𑁆𑀢𑁂𑀦 ‘𑀯𑀺𑀓𑀸𑀮𑁂 𑀓𑀧𑁆𑀧𑀢𑀻’𑀢𑀺 𑀯𑀺𑀓𑀸𑀮𑀪𑁄𑀚𑀦𑀧𑀸𑀘𑀺𑀢𑁆𑀢𑀺𑀬𑀁 𑀆𑀯𑀳𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄, ‘𑀦 𑀓𑀧𑁆𑀧𑀢𑀻’𑀢𑀺 𑀲𑀦𑁆𑀦𑀺𑀥𑀺𑀪𑁄𑀚𑀦𑀧𑀸𑀘𑀺𑀢𑁆𑀢𑀺𑀬𑀁 𑀆𑀯𑀳𑀁 𑀳𑁄𑀢𑀻𑀢𑀺 𑀅𑀢𑁆𑀣𑁄, 𑀬𑀤𑀺 𑀲𑀫𑁆𑀪𑀺𑀦𑁆𑀦𑀭𑀲𑀁 𑀅𑀚𑁆𑀚𑀧𑀝𑀺𑀕𑁆𑀕𑀳𑀺𑀢𑀫𑁆𑀧𑀺 𑀬𑀸𑀯𑀚𑀻𑀯𑀺𑀓𑀦𑁆𑀢𑀺 𑀅𑀢𑁆𑀣𑁄’’𑀢𑀺 𑀮𑀺𑀔𑀺𑀢𑀁. 𑀲𑀼𑀢𑁆𑀢𑀯𑀺𑀪𑀗𑁆𑀕𑁂𑀢𑀺 𑀫𑀸𑀢𑀺𑀓𑀸𑀲𑀗𑁆𑀔𑀸𑀢𑁂 𑀲𑀼𑀢𑁆𑀢𑁂 𑀘 𑀢𑀲𑁆𑀲 𑀧𑀤𑀪𑀸𑀚𑀦𑀻𑀬𑀲𑀗𑁆𑀔𑀸𑀢𑁂 𑀯𑀺𑀪𑀗𑁆𑀕𑁂 𑀘𑀸𑀢𑀺 𑀅𑀢𑁆𑀣𑁄. 𑀇𑀤𑀁 𑀆𑀕𑀢𑀫𑁂𑀯. 𑀓𑀢𑀭𑀦𑁆𑀢𑀺? ‘‘𑀅𑀢𑀺𑀓𑁆𑀓𑀸𑀫𑀬𑀢𑁄 𑀙𑁂𑀤𑀦𑀓’’𑀦𑁆𑀢𑀺 𑀇𑀤𑀁.

𑀢𑀺𑀯𑀺𑀤𑀢𑁆𑀣𑀺𑀧𑀫𑀸𑀡𑀜𑁆𑀘𑁂, 𑀅𑀤𑀲𑀁 𑀢𑀁 𑀦𑀺𑀲𑀻𑀤𑀦𑀁;

𑀦𑀺𑀲𑀻𑀤𑀦𑀁 𑀓𑀣𑀁 𑀳𑁄𑀢𑀺, 𑀲𑀤𑀲𑀁 𑀢𑀜𑁆𑀳𑀺 𑀮𑀓𑁆𑀔𑀡𑀁.

𑀢𑀺𑀯𑀺𑀤𑀢𑁆𑀣𑀺𑀧𑀫𑀸𑀡𑀁 𑀢𑀁, 𑀤𑀲𑀸 𑀢𑀢𑁆𑀣 𑀯𑀺𑀤𑀢𑁆𑀣𑀺 𑀘𑁂;

𑀢𑀁𑀦𑀺𑀲𑀻𑀤𑀦𑀦𑀸𑀫𑀢𑁆𑀢𑀸, 𑀢𑀲𑁆𑀫𑀺𑀁 𑀙𑁂𑀤𑀦𑀓𑀁 𑀲𑀺𑀬𑀸.

𑀅𑀦𑀺𑀲𑀻𑀤𑀦𑀦𑀸𑀫𑀫𑁆𑀳𑀺, 𑀓𑀣𑀁 𑀙𑁂𑀤𑀦𑀓𑀁 𑀪𑀯𑁂;

𑀇𑀢𑀺 𑀘𑁂 𑀦𑁂𑀯 𑀯𑀢𑁆𑀢𑀩𑁆𑀩𑀁, 𑀦𑀺𑀲𑀻𑀤𑀦𑀯𑀺𑀤𑀢𑁆𑀣𑀺𑀢𑁄.

𑀓𑀧𑁆𑀧𑀢𑁂 𑀲𑀤𑀲𑀸𑀫𑀢𑁆𑀢𑀁, 𑀦𑀺𑀲𑀻𑀤𑀦𑀫𑀺𑀢𑀺 𑀓𑀸𑀭𑀡𑀁;

𑀓𑀣𑀁 𑀬𑀼𑀚𑁆𑀚𑀢𑀺 𑀦𑁄 𑀘𑁂𑀢𑀁, 𑀦𑀺𑀲𑀻𑀤𑀦𑀲𑁆𑀲 𑀦𑀸𑀫𑀓𑀁.

𑀦𑀺𑀲𑀻𑀤𑀦𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀧𑀫𑀸𑀡𑀲𑀫𑀢𑀺𑀓𑁆𑀓𑀫𑀸;

𑀢𑀲𑁆𑀲𑀸𑀦𑀼𑀫𑀢𑀺𑀳𑁂𑀢𑀼𑀢𑁆𑀢𑀸, 𑀢𑀢𑁆𑀣 𑀙𑁂𑀤𑀦𑀓𑀁 𑀪𑀯𑁂.

𑀚𑀸𑀢𑀭𑀽𑀧𑀓𑀧𑁆𑀧𑁂 𑁋

𑀚𑀸𑀢𑀭𑀽𑀧𑀁 𑀧𑀝𑀺𑀓𑁆𑀔𑀺𑀢𑁆𑀢𑀁, 𑀧𑀼𑀕𑁆𑀕𑀮𑀲𑁆𑀲𑁂𑀯 𑀧𑀸𑀴𑀺𑀬𑀁;

𑀦 𑀲𑀗𑁆𑀖𑀲𑁆𑀲𑀸𑀢𑀺 𑀲𑀗𑁆𑀖𑀲𑁆𑀲, 𑀢𑀜𑁆𑀘𑁂 𑀓𑀧𑁆𑀧𑀢𑀺 𑀲𑀩𑁆𑀩𑀲𑁄.

𑀯𑀺𑀓𑀸𑀮𑀪𑁄𑀚𑀦𑀜𑁆𑀘𑀸𑀧𑀺, 𑀧𑀼𑀕𑁆𑀕𑀮𑀲𑁆𑀲𑁂𑀯 𑀯𑀸𑀭𑀺𑀢𑀁;

𑀦 𑀲𑀗𑁆𑀖𑀲𑁆𑀲𑀸𑀢𑀺 𑀲𑀗𑁆𑀖𑀲𑁆𑀲, 𑀓𑀧𑁆𑀧𑀢𑀻𑀢𑀺 𑀓𑀣𑀁 𑀲𑀫𑀁.

𑀲𑀢𑁆𑀢𑀲𑀢𑀺𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀘𑀽𑀴𑀯𑀕𑁆𑀕𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲