𑀘𑀽𑀴𑀯𑀕𑁆𑀕𑀯𑀡𑁆𑀡𑀦𑀸

𑁧. 𑀓𑀫𑁆𑀫𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸

𑀅𑀥𑀫𑁆𑀫𑀓𑀫𑁆𑀫𑀤𑁆𑀯𑀸𑀤𑀲𑀓𑀓𑀣𑀸𑀯𑀡𑁆𑀡𑀦𑀸

𑁪. 𑀅𑀲𑀫𑁆𑀫𑀼𑀔𑀸 𑀓𑀢𑀁 𑀳𑁄𑀢𑀻𑀢𑀺𑀆𑀤𑀬𑁄 𑀢𑀺𑀓𑀸 𑀓𑁂𑀯𑀮𑀁 𑀤𑁂𑀲𑀦𑀸𑀫𑀢𑁆𑀢𑀫𑁂𑀯. 𑀦 𑀳𑀺 𑀢𑀻𑀳𑀺 𑀏𑀯 𑀅𑀗𑁆𑀕𑁂𑀳𑀺 𑀲𑀫𑁄𑀥𑀸𑀦𑁂𑀳𑀺 𑀅𑀥𑀫𑁆𑀫𑀓𑀫𑁆𑀫𑀁 𑀳𑁄𑀢𑀺, 𑀏𑀓𑁂𑀦𑀧𑀺 𑀳𑁄𑀢𑀺 𑀏𑀯, 𑀅𑀬𑀫𑀢𑁆𑀣𑁄 ‘‘𑀢𑀺𑀡𑁆𑀡𑀁, 𑀪𑀺𑀓𑁆𑀔𑀯𑁂’’𑀢𑀺𑀆𑀤𑀺𑀧𑀸𑀴𑀺𑀬𑀸 (𑀘𑀽𑀴𑀯. 𑁬) 𑀲𑀸𑀥𑁂𑀢𑀩𑁆𑀩𑁄. ‘‘𑀅𑀧𑁆𑀧𑀝𑀺𑀜𑁆𑀜𑀸𑀬 𑀓𑀢𑀁 𑀳𑁄𑀢𑀻’’𑀢𑀺 𑀮𑀚𑁆𑀚𑀺𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀡𑁆𑀳𑀧𑀓𑁆𑀔𑁂 ‘‘𑀅𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀻’’𑀢𑀺 𑀲𑀼𑀓𑁆𑀓𑀧𑀓𑁆𑀔𑁂 ‘‘𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀻’’𑀢𑀺 𑀇𑀤𑀁 𑀤𑁆𑀯𑀬𑀁 𑀧𑀭𑀢𑁄 ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀆𑀓𑀗𑁆𑀔𑀫𑀸𑀦𑁄 𑀲𑀗𑁆𑀖𑁄 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁂𑀬𑁆𑀬. 𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀯𑀺𑀭𑀼𑀚𑁆𑀛𑀢𑀺, 𑀅𑀤𑁂𑀲𑀦𑀸𑀕𑀸𑀫𑀺𑀦𑀺𑀁 𑀆𑀧𑀦𑁆𑀦𑁄 𑀳𑀺 ‘‘𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄’’𑀢𑀺 𑀯𑀼𑀘𑁆𑀘𑀢𑀻𑀢𑀺. 𑀬𑀼𑀢𑁆𑀢𑀫𑁂𑀢𑀁, 𑀓𑀢𑁆𑀢𑀼 𑀅𑀥𑀺𑀧𑁆𑀧𑀸𑀬𑁄 𑀏𑀢𑁆𑀣 𑀘𑀺𑀦𑁆𑀢𑁂𑀢𑀩𑁆𑀩𑁄. 𑀏𑀢𑁆𑀣𑀸𑀳 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄 ‘‘𑀢𑀚𑁆𑀚𑀦𑀻𑀬𑀓𑀫𑁆𑀫𑀲𑁆𑀲 𑀳𑀺 𑀯𑀺𑀲𑁂𑀲𑁂𑀦 𑀪𑀡𑁆𑀟𑀦𑀓𑀸𑀭𑀓𑀢𑁆𑀢𑀁 𑀅𑀗𑁆𑀕’𑀦𑁆𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁, 𑀢𑀁 𑀧𑀸𑀴𑀺𑀬𑀸 𑀆𑀕𑀢𑀦𑀺𑀤𑀸𑀦𑁂𑀦 𑀬𑀼𑀚𑁆𑀚𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀢𑁆𑀢𑀺𑀓𑁂𑀲𑀼𑀧𑀺 𑀪𑀡𑁆𑀟𑀦𑀁 𑀆𑀭𑁄𑀧𑁂𑀢𑁆𑀯𑀸 𑀪𑀡𑁆𑀟𑀦𑀧𑀘𑁆𑀘𑀬𑀸 𑀆𑀧𑀦𑁆𑀦𑀸𑀧𑀢𑁆𑀢𑀺𑀯𑀲𑁂𑀦 𑀇𑀤𑀁 𑀓𑀫𑁆𑀫𑀁 𑀓𑀸𑀢𑀩𑁆𑀩𑀁, 𑀢𑀲𑁆𑀫𑀸 ‘𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄’𑀢𑀺 𑀏𑀢𑁆𑀣𑀸𑀧𑀺 𑀧𑀼𑀩𑁆𑀩𑀪𑀸𑀕𑁂 𑀯𑀸 𑀅𑀧𑀭𑀪𑀸𑀕𑁂 𑀯𑀸 𑀘𑁄𑀤𑀦𑀸𑀲𑀸𑀭𑀡𑀸𑀤𑀺𑀓𑀸𑀮𑁂 𑀪𑀡𑁆𑀟𑀦𑀧𑀘𑁆𑀘𑀬𑀸 𑀆𑀧𑀦𑁆𑀦𑀸𑀧𑀢𑁆𑀢𑀺𑀯𑀲𑁂𑀦𑁂𑀯 𑀓𑀸𑀭𑁂𑀢𑀩𑁆𑀩𑀁, 𑀦 𑀓𑁂𑀯𑀮𑀁 𑀲𑀗𑁆𑀖𑀸𑀤𑀺𑀲𑁂𑀲𑀧𑀘𑁆𑀘𑀬𑀸 𑀓𑀸𑀢𑀩𑁆𑀩’’𑀦𑁆𑀢𑀺. ‘‘𑀅𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸𑀢𑀺 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸’𑀢𑀺 𑀏𑀢𑁆𑀢𑀓𑀫𑀢𑁆𑀢𑀁 𑀯𑀢𑁆𑀯𑀸 𑀧𑀭𑀢𑁄 ‘𑀅𑀥𑀺𑀲𑀻𑀮𑁂 𑀧𑀸𑀭𑀸𑀚𑀺𑀓𑀲𑀗𑁆𑀖𑀸𑀤𑀺𑀲𑁂𑀲𑁂 𑀅𑀚𑁆𑀛𑀸𑀘𑀸𑀭𑀸’𑀢𑀺 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢’’𑀦𑁆𑀢𑀺 𑀮𑀺𑀔𑀺𑀢𑀁. ‘‘𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄’𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀁 𑀲𑀦𑁆𑀥𑀸𑀬𑀸’’𑀢𑀺 𑀕𑀡𑁆𑀞𑀺𑀧𑀤𑁂 𑀮𑀺𑀔𑀺𑀢𑀁. 𑀇𑀤𑀁 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀧𑀼𑀭𑀺𑀫𑀯𑀘𑀦𑁂𑀦 𑀲𑀫𑁂𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀧𑀘𑁆𑀙𑀺𑀫𑀁 𑀧𑀸𑀭𑀸𑀚𑀺𑀓𑀧𑀤𑀁 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀯𑀼𑀢𑁆𑀢𑀁 𑀲𑀺𑀬𑀸, 𑀅𑀝𑁆𑀞𑀓𑀣𑀸𑀬𑀜𑁆𑀘 ‘‘𑀅𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸𑀢𑀺 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀯𑀸 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺𑀬𑀸 𑀯𑀸’’𑀢𑀺 𑀯𑀼𑀢𑁆𑀢𑀁, 𑀢𑀢𑁆𑀣 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀯𑀼𑀢𑁆𑀢𑀸 𑀲𑀺𑀬𑀸. 𑀬𑀢𑁄 𑀕𑀡𑁆𑀞𑀺𑀧𑀤𑁂 ‘‘𑀅𑀥𑀺𑀲𑀻𑀮𑁂 𑀲𑀻𑀮𑀯𑀺𑀧𑀦𑁆𑀦𑁄’𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀁 𑀲𑀦𑁆𑀥𑀸𑀬𑀸’’𑀢𑀺 𑀏𑀢𑁆𑀢𑀓𑀫𑁂𑀯 𑀮𑀺𑀔𑀺𑀢𑀁, 𑀢𑀲𑁆𑀫𑀸 𑀲𑀩𑁆𑀩𑀢𑁆𑀣 𑀕𑀡𑁆𑀞𑀺𑀧𑀤𑁂 𑀲𑀓𑀮𑁂𑀦 𑀦𑀬𑁂𑀦 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀧𑀘𑁆𑀘𑀬𑀸 𑀉𑀧𑁆𑀧𑀦𑁆𑀦𑀪𑀡𑁆𑀟𑀦𑀳𑁂𑀢𑀼 𑀦 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀸𑀢𑀩𑁆𑀩𑀁 𑀧𑀬𑁄𑀚𑀦𑀸𑀪𑀸𑀯𑀸, 𑀲𑀗𑁆𑀖𑀸𑀤𑀺𑀲𑁂𑀲𑀧𑀘𑁆𑀘𑀬𑀸 𑀓𑀸𑀢𑀩𑁆𑀩𑀦𑁆𑀢𑀺 𑀅𑀬𑀫𑀢𑁆𑀣𑁄 𑀲𑀺𑀤𑁆𑀥𑁄 𑀳𑁄𑀢𑀺. 𑀦, 𑀲𑀼𑀓𑁆𑀓𑀧𑀓𑁆𑀔𑁂 ‘‘𑀤𑁂𑀲𑀦𑀸𑀕𑀸𑀫𑀺𑀦𑀺𑀬𑀸 𑀆𑀧𑀢𑁆𑀢𑀺𑀬𑀸 𑀓𑀢𑀁 𑀳𑁄𑀢𑀻’’𑀢𑀺 (𑀘𑀽𑀴𑀯. 𑁫) 𑀯𑀘𑀦𑀢𑁄𑀢𑀺 𑀘𑁂? 𑀦, 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀧𑀺 𑀤𑁂𑀲𑀦𑀸𑀕𑀸𑀫𑀺𑀦𑀺𑀯𑁄𑀳𑀸𑀭𑀲𑀫𑁆𑀪𑀯𑀢𑁄,

𑀬𑁂𑀦 𑀓𑀫𑁆𑀫𑁂𑀦 𑀲𑀦𑁆𑀢𑀚𑁆𑀚𑀦𑀁 𑀓𑀭𑀻𑀬𑀢𑀺, 𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀦𑀸𑀫. 𑀬𑁂𑀦 𑀓𑀫𑁆𑀫𑁂𑀦 𑀦𑀺𑀲𑁆𑀲𑀸𑀬 𑀢𑁂 𑀯𑀢𑁆𑀣𑀩𑁆𑀩𑀦𑁆𑀢𑀺 𑀦𑀺𑀲𑁆𑀲𑀺𑀬𑀢𑀺 𑀪𑀚𑀸𑀧𑀺𑀬𑀢𑀺 𑀦𑀺𑀬𑀲𑁆𑀲𑁄, 𑀢𑀁 𑀦𑀺𑀬𑀲𑀓𑀫𑁆𑀫𑀁 𑀦𑀸𑀫. 𑀬𑁂𑀦 𑀢𑀢𑁄 𑀆𑀯𑀸𑀲𑀢𑁄, 𑀕𑀸𑀫𑀢𑁄 𑀘 𑀧𑀩𑁆𑀩𑀸𑀚𑁂𑀦𑁆𑀢𑀺 𑀓𑀼𑀮𑀤𑀽𑀲𑀓𑀁, 𑀢𑀁 𑀧𑀩𑁆𑀩𑀸𑀚𑀦𑀻𑀬𑀓𑀫𑁆𑀫𑀁 𑀦𑀸𑀫. 𑀬𑁂𑀦 𑀓𑀫𑁆𑀫𑁂𑀦 𑀅𑀓𑁆𑀓𑀼𑀝𑁆𑀞𑀕𑀳𑀝𑁆𑀞𑀲𑀫𑀈𑀧𑀫𑁂𑀯 𑀧𑀝𑀺𑀲𑀸𑀭𑀺𑀬𑀢𑀺 𑀲𑁄 𑀅𑀓𑁆𑀓𑁄𑀲𑀓𑁄 𑀧𑀘𑁆𑀙𑀸 𑀧𑁂𑀲𑀺𑀬𑀢𑀺, 𑀢𑀁 𑀧𑀝𑀺𑀲𑀸𑀭𑀡𑀻𑀬𑀓𑀫𑁆𑀫𑀁 𑀦𑀸𑀫. 𑀬𑁂𑀦 𑀲𑀫𑀸𑀦𑀲𑀁𑀯𑀸𑀲𑀓𑀪𑀽𑀫𑀺𑀢𑁄 𑀉𑀓𑁆𑀔𑀺𑀧𑀺𑀬𑀢𑀺. 𑀙𑀟𑁆𑀟𑀻𑀬𑀢𑀺 𑀲𑀸𑀢𑀺𑀲𑀸𑀭𑁄 𑀪𑀺𑀓𑁆𑀔𑀼𑀲𑀗𑁆𑀖𑁂𑀦, 𑀢𑀁 𑀓𑀫𑁆𑀫𑀁 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀁 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁧𑁧. ‘‘𑀦𑀺𑀲𑁆𑀲𑀸𑀬 𑀢𑁂 𑀯𑀢𑁆𑀣𑀩𑁆𑀩’’𑀦𑁆𑀢𑀺 𑀕𑀭𑀼𑀦𑀺𑀲𑁆𑀲𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀇𑀢𑀭𑀦𑁆𑀢𑀺.

𑁨𑁧. 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀯𑀢𑁆𑀣𑀼𑀲𑁆𑀫𑀺𑀁 ‘‘𑀢𑁂𑀲𑀼 𑀯𑀺𑀩𑁆𑀪𑀦𑁆𑀢𑁂𑀲𑀼𑀧𑀺 𑀓𑀫𑁆𑀫𑀁 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑁂𑀢𑀼𑀁 𑀅𑀦𑀼𑀜𑁆𑀜𑀸𑀢𑀫𑁆𑀧𑀺 𑀲𑀫𑁆𑀫𑀸𑀯𑀢𑁆𑀢𑀦𑁆𑀢𑀸𑀦𑀁𑀬𑁂𑀯𑀸’’𑀢𑀺 𑀮𑀺𑀔𑀺𑀢𑀁. 𑀲𑀫𑁆𑀫𑀼𑀔𑀸 𑀯𑀼𑀢𑁆𑀢𑀫𑁂𑀯 𑀕𑀺𑀳𑀺𑀧𑀝𑀺𑀲𑀁𑀬𑀼𑀢𑁆𑀢𑀁 𑀦𑀸𑀫. 𑀧𑀭𑀫𑁆𑀫𑀼𑀔𑀸 𑀯𑀼𑀢𑁆𑀢𑀁 𑀤𑁂𑀲𑀦𑀁 𑀕𑀘𑁆𑀙𑀢𑀺.

𑁪𑁧. 𑀔𑀫𑀸𑀧𑁂𑀦𑁆𑀢𑁂𑀦 ‘‘𑀔𑀫𑀸𑀳𑀻’’𑀢𑀺 𑀯𑀢𑁆𑀢𑀩𑁆𑀩𑀫𑀢𑁆𑀢𑀫𑁂𑀯, 𑀦 𑀉𑀓𑁆𑀓𑀼𑀝𑀺𑀓𑀸𑀤𑀺𑀲𑀸𑀫𑀻𑀘𑀺𑀦𑀸 𑀧𑀬𑁄𑀚𑀦𑀦𑁆𑀢𑀺. 𑀅𑀦𑀼𑀤𑀽𑀢𑀦𑁆𑀢𑀺 𑀲𑀳𑀸𑀬𑀦𑁆𑀢𑀺 𑀅𑀢𑁆𑀣𑁄.

𑁫𑁦. 𑀅𑀤𑀲𑁆𑀲𑀦𑁂𑀬𑁂𑀯 𑀉𑀓𑁆𑀔𑁂𑀧𑀦𑀻𑀬𑀁 𑀓𑀸𑀢𑀩𑁆𑀩𑀁, 𑀦 𑀅𑀜𑁆𑀜𑀣𑀸. ‘‘𑀢𑀚𑁆𑀚𑀦𑀻𑀬𑀸𑀤𑀺𑀓𑀭𑀡𑀓𑀸𑀮𑁂 𑀆𑀧𑀢𑁆𑀢𑀺𑀁 𑀭𑁄𑀧𑁂𑀢𑁆𑀯𑀸 𑀢𑀲𑁆𑀲𑀸 𑀅𑀤𑀲𑁆𑀲𑀦𑁂, 𑀅𑀧𑁆𑀧𑀝𑀺𑀓𑀫𑁆𑀫𑁂 𑀯𑀸 𑀪𑀡𑁆𑀟𑀦𑀓𑀸𑀭𑀓𑀸𑀤𑀺𑀅𑀗𑁆𑀕𑁂𑀳𑀺 𑀓𑀸𑀢𑀩𑁆𑀩’’𑀦𑁆𑀢𑀺 𑀮𑀺𑀔𑀺𑀢𑀁.

𑀢𑀚𑁆𑀚𑀦𑀻𑀬𑀓𑀫𑁆𑀫𑀸𑀤𑀻𑀲𑀼 𑀅𑀬𑀁 𑀧𑀓𑀺𑀡𑁆𑀡𑀓𑀯𑀺𑀦𑀺𑀘𑁆𑀙𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀓𑀺𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁, 𑀢𑀚𑁆𑀚𑀦𑀻𑀬𑀓𑀫𑁆𑀫𑀲𑁆𑀲 𑀓𑀺𑀁 𑀫𑀽𑀮𑀁, 𑀓𑀺𑀁 𑀯𑀢𑁆𑀣𑀼, 𑀓𑀺𑀁 𑀧𑀭𑀺𑀬𑁄𑀲𑀸𑀦𑀁, 𑀓𑀲𑁆𑀫𑀸 ‘‘𑀢𑀚𑁆𑀚𑀦𑀻𑀬𑀓𑀫𑁆𑀫’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺? 𑀓𑀺𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀦𑁆𑀢𑀺 𑀯𑀢𑁆𑀣𑀼𑀲𑁆𑀫𑀺𑀁 𑀲𑀢𑀺 𑀓𑀭𑀡𑀲𑀫𑁆𑀧𑀢𑁆𑀢𑀺. 𑀢𑀚𑁆𑀚𑀦𑀻𑀬𑀓𑀫𑁆𑀫𑀲𑁆𑀲 𑀓𑀺𑀁 𑀫𑀽𑀮𑀦𑁆𑀢𑀺 𑀲𑀗𑁆𑀖𑁄 𑀫𑀽𑀮𑀁. 𑀢𑀚𑁆𑀚𑀦𑀻𑀬𑀓𑀫𑁆𑀫𑀲𑁆𑀲 𑀓𑀺𑀁 𑀯𑀢𑁆𑀣𑀽𑀢𑀺 𑀓𑀮𑀳𑀚𑀸𑀢𑀸𑀧𑀢𑁆𑀢𑀺𑀯𑀢𑁆𑀣𑀼. 𑀓𑀺𑀁 𑀧𑀭𑀺𑀬𑁄𑀲𑀸𑀦𑀦𑁆𑀢𑀺 𑀪𑀸𑀯𑀦𑀸𑀧𑀭𑀺𑀬𑁄𑀲𑀸𑀦𑀁. 𑀓𑀲𑁆𑀫𑀸 𑀢𑀚𑁆𑀚𑀦𑀻𑀬𑀓𑀫𑁆𑀫𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀲𑀗𑁆𑀖𑁄 𑀓𑀮𑀳𑀓𑀸𑀭𑀓𑀧𑀼𑀕𑁆𑀕𑀮𑀁 𑀓𑀮𑀳𑁂 𑀘 𑀪𑁂𑀤𑁂 𑀘 𑀪𑀬𑀁 𑀤𑀲𑁆𑀲𑁂𑀢𑁆𑀯𑀸 𑀔𑀦𑁆𑀢𑀺𑀬𑀸 𑀚𑀦𑁂𑀢𑀺, 𑀉𑀧𑀲𑀫𑁂 𑀚𑀦𑁂𑀢𑀺, 𑀢𑀲𑁆𑀫𑀸 ‘‘𑀢𑀚𑁆𑀚𑀦𑀻𑀬𑀓𑀫𑁆𑀫’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀓𑀣𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺, 𑀓𑀣𑀁 𑀅𑀓𑀢𑀁. 𑀓𑀺𑀦𑁆𑀢𑀺 𑀘 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺, 𑀓𑀺𑀦𑁆𑀢𑀺 𑀘 𑀅𑀓𑀢𑀁. 𑀓𑁂𑀦 𑀘 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺, 𑀓𑁂𑀦 𑀘 𑀅𑀓𑀢𑀁. 𑀓𑀢𑁆𑀣 𑀘 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺, 𑀓𑀢𑁆𑀣 𑀘 𑀅𑀓𑀢𑀁. 𑀓𑀸𑀬 𑀯𑁂𑀮𑀸𑀬 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀢𑀁 𑀳𑁄𑀢𑀺, 𑀓𑀸𑀬 𑀯𑁂𑀮𑀸𑀬 𑀅𑀓𑀢𑀁 𑀳𑁄𑀢𑀺? 𑀓𑀣𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀢𑀁 𑀳𑁄𑀢𑀻𑀢𑀺 𑀲𑀫𑀕𑁆𑀕𑁂𑀦 𑀲𑀗𑁆𑀖𑁂𑀦 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦. 𑀓𑀣𑀁 𑀅𑀓𑀢𑀁 𑀳𑁄𑀢𑀻𑀢𑀺 𑀯𑀕𑁆𑀕𑁂𑀦 𑀲𑀗𑁆𑀖𑁂𑀦 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦 𑀓𑀫𑁆𑀫𑁂𑀦. 𑀓𑀺𑀦𑁆𑀢𑀺 𑀘 𑀓𑀢𑀁 𑀳𑁄𑀢𑀻𑀢𑀺 𑀓𑀭𑀡𑀲𑀫𑁆𑀧𑀢𑁆𑀢𑀺𑀬𑀸. 𑀓𑀺𑀦𑁆𑀢𑀺 𑀘 𑀅𑀓𑀢𑀁 𑀳𑁄𑀢𑀻𑀢𑀺 𑀓𑀭𑀡𑀯𑀺𑀧𑀢𑁆𑀢𑀺𑀬𑀸. 𑀓𑁂𑀦 𑀘 𑀓𑀢𑀁 𑀳𑁄𑀢𑀻𑀢𑀺 𑀲𑀗𑁆𑀖𑁂𑀦. 𑀓𑁂𑀦 𑀘 𑀅𑀓𑀢𑀁 𑀳𑁄𑀢𑀻𑀢𑀺 𑀕𑀡𑁂𑀦 𑀧𑀼𑀕𑁆𑀕𑀮𑁂𑀦. 𑀓𑀢𑁆𑀣 𑀘 𑀓𑀢𑀁 𑀳𑁄𑀢𑀻𑀢𑀺 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀗𑁆𑀖𑁄 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀫𑁆𑀫𑀼𑀔𑀻𑀪𑀽𑀢𑁂. 𑀓𑀢𑁆𑀣 𑀘 𑀅𑀓𑀢𑀁 𑀳𑁄𑀢𑀻𑀢𑀺 𑀬𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀲𑀗𑁆𑀖𑁄 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀓𑀭𑁄𑀢𑀺, 𑀢𑀲𑁆𑀲 𑀧𑀼𑀕𑁆𑀕𑀮𑀲𑁆𑀲 𑀅𑀲𑀫𑁆𑀫𑀼𑀔𑀻𑀪𑀽𑀢𑁂. 𑀓𑀸𑀬 𑀯𑁂𑀮𑀸𑀬 𑀓𑀢𑀁 𑀳𑁄𑀢𑀻𑀢𑀺 𑀬𑀤𑀸 𑀓𑀮𑀳𑀚𑀸𑀢𑀸𑀧𑀢𑁆𑀢𑀺 𑀲𑀁𑀯𑀺𑀚𑁆𑀚𑀢𑀺. 𑀓𑀸𑀬 𑀯𑁂𑀮𑀸𑀬 𑀅𑀓𑀢𑀁 𑀳𑁄𑀢𑀻𑀢𑀺 𑀬𑀤𑀸 𑀓𑀮𑀳𑀚𑀸𑀢𑀸𑀧𑀢𑁆𑀢𑀺 𑀦 𑀲𑀁𑀯𑀺𑀚𑁆𑀚𑀢𑀺. 𑀓𑀢𑀺𑀳𑀸𑀓𑀸𑀭𑁂𑀳𑀺 𑀢𑀚𑁆𑀚𑀦𑀻𑀬𑀓𑀫𑁆𑀫𑀲𑁆𑀲 𑀧𑀢𑁆𑀢𑀓𑀮𑁆𑀮𑀁 𑀳𑁄𑀢𑀺, 𑀓𑀢𑀺𑀳𑀸𑀓𑀸𑀭𑁂𑀳𑀺 𑀅𑀧𑀢𑁆𑀢𑀓𑀮𑁆𑀮𑀁? 𑀲𑀢𑁆𑀢𑀳𑀸𑀓𑀸𑀭𑁂𑀳𑀺 𑀢𑀚𑁆𑀚𑀦𑀻𑀬𑀓𑀫𑁆𑀫𑀲𑁆𑀲 𑀧𑀢𑁆𑀢𑀓𑀮𑁆𑀮𑀁 𑀳𑁄𑀢𑀺, 𑀲𑀢𑁆𑀢𑀳𑀸𑀓𑀸𑀭𑁂𑀳𑀺 𑀅𑀧𑀢𑁆𑀢𑀓𑀮𑁆𑀮𑀁. 𑀓𑀢𑀫𑁂𑀳𑀺 𑀲𑀢𑁆𑀢𑀳𑀸𑀓𑀸𑀭𑁂𑀳𑀺 𑀧𑀢𑁆𑀢𑀓𑀮𑁆𑀮𑀁, 𑀓𑀢𑀫𑁂𑀳𑀺 𑀲𑀢𑁆𑀢𑀳𑀸𑀓𑀸𑀭𑁂𑀳𑀺 𑀅𑀧𑀢𑁆𑀢𑀓𑀮𑁆𑀮𑀁 𑀳𑁄𑀢𑀺? 𑀓𑀮𑀳𑀚𑀸𑀢𑀸𑀧𑀢𑁆𑀢𑀺 𑀦 𑀲𑀁𑀯𑀺𑀚𑁆𑀚𑀢𑀺, 𑀲𑁄 𑀯𑀸 𑀧𑀼𑀕𑁆𑀕𑀮𑁄 𑀅𑀲𑀫𑁆𑀫𑀼𑀔𑀻𑀪𑀽𑀢𑁄 𑀳𑁄𑀢𑀺, 𑀲𑀗𑁆𑀖𑁄 𑀯𑀸 𑀯𑀕𑁆𑀕𑁄 𑀳𑁄𑀢𑀺, 𑀅𑀲𑀁𑀯𑀸𑀲𑀺𑀓𑁄 𑀯𑀸 𑀧𑀼𑀕𑁆𑀕𑀮𑁄 𑀢𑀲𑁆𑀲𑀁 𑀧𑀭𑀺𑀲𑀸𑀬𑀁 𑀲𑀁𑀯𑀺𑀚𑁆𑀚𑀢𑀺, 𑀅𑀘𑁄𑀤𑀺𑀢𑁄 𑀯𑀸 𑀳𑁄𑀢𑀺 𑀅𑀲𑀸𑀭𑀺𑀢𑁄 𑀯𑀸, 𑀆𑀧𑀢𑁆𑀢𑀺𑀁 𑀯𑀸 𑀅𑀦𑀸𑀭𑁄𑀧𑀺𑀢𑁄. 𑀇𑀫𑁂𑀳𑀺 𑀲𑀢𑁆𑀢𑀳𑀸𑀓𑀸𑀭𑁂𑀳𑀺 𑀢𑀚𑁆𑀚𑀦𑀻𑀬𑀓𑀫𑁆𑀫𑀲𑁆𑀲 𑀅𑀧𑀢𑁆𑀢𑀓𑀮𑁆𑀮𑀁 𑀳𑁄𑀢𑀺, 𑀇𑀢𑀭𑁂𑀳𑀺 𑀲𑀢𑁆𑀢𑀳𑀸𑀓𑀸𑀭𑁂𑀳𑀺 𑀧𑀢𑁆𑀢𑀓𑀮𑁆𑀮𑀁 𑀳𑁄𑀢𑀺. 𑀏𑀯𑀁 𑀲𑁂𑀲𑀓𑀫𑁆𑀫𑁂𑀲𑀽𑀢𑀺.

𑀓𑀫𑁆𑀫𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸

𑀧𑀸𑀭𑀺𑀯𑀸𑀲𑀺𑀓𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁭𑁫. 𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑁂 ‘‘𑀫𑀸 𑀫𑀁 𑀕𑀸𑀫𑀧𑁆𑀧𑀯𑁂𑀲𑀦𑀁 𑀆𑀧𑀼𑀘𑁆𑀙𑀣𑀸𑀢𑀺 𑀯𑀼𑀢𑁆𑀢𑁂 𑀅𑀦𑀸𑀧𑀼𑀘𑁆𑀙𑀸𑀧𑀺 𑀕𑀸𑀫𑀁 𑀧𑀯𑀺𑀲𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀲𑀗𑁆𑀖𑁄 𑀅𑀢𑁆𑀢𑀦𑁄 𑀧𑀢𑁆𑀢𑀝𑁆𑀞𑀸𑀦𑁂 𑀕𑀳𑁂𑀢𑀼𑀁 𑀯𑀝𑁆𑀝𑀢𑀺. 𑀑𑀡𑁄𑀚𑀦𑀁 𑀦𑀸𑀫 𑀯𑀺𑀲𑁆𑀲𑀚𑁆𑀚𑀦𑀁. ‘‘𑀢𑀁 𑀧𑀦 𑀧𑀸𑀭𑀺𑀯𑀸𑀲𑀺𑀓𑁂𑀦 𑀧𑀸𑀧𑀺𑀢𑀲𑁆𑀲 𑀅𑀢𑁆𑀢𑀦𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀲𑁆𑀲𑁂𑀯 𑀧𑀼𑀦𑀤𑀺𑀯𑀲𑀸𑀤𑀺𑀅𑀢𑁆𑀣𑀸𑀬 𑀯𑀺𑀲𑁆𑀲𑀚𑁆𑀚𑀦𑀁 𑀓𑀸𑀢𑀩𑁆𑀩𑀁, 𑀅𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸𑀬𑁂𑀯 𑀘𑁂 𑀯𑀺𑀲𑁆𑀲𑀚𑁆𑀚𑁂𑀢𑀺, 𑀦 𑀮𑀪𑀢𑀻’’𑀢𑀺 𑀯𑀼𑀢𑁆𑀢𑀁.

𑁭𑁬. 𑀧𑀓𑀢𑀺𑀬𑀸𑀯 𑀦𑀺𑀲𑁆𑀲𑀬𑁄𑀢𑀺 𑀏𑀢𑁆𑀣 ‘‘𑀅𑀦𑁆𑀢𑁂𑀯𑀸𑀲𑀺𑀓𑀸𑀦𑀁 𑀆𑀮𑀬𑀲𑀩𑁆𑀪𑀸𑀯𑁂 𑀬𑀸𑀯 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁄, 𑀢𑀸𑀯 𑀓𑀧𑁆𑀧𑀢𑀺, 𑀢𑀲𑁆𑀲 𑀆𑀮𑀬𑀲𑁆𑀲 𑀲𑀩𑁆𑀪𑀸𑀯𑁂 𑀦𑀺𑀲𑁆𑀲𑀬𑁄 𑀦 𑀧𑀝𑀺𑀧𑁆𑀧𑀲𑁆𑀲𑀫𑁆𑀪𑀢𑀻𑀢𑀺 𑀘𑁂? 𑀦 𑀯𑀝𑁆𑀝𑀢𑀺. 𑀢𑀢𑁆𑀣 𑀇𑀤𑀸𑀦𑀺 𑀔𑀫𑀸𑀧𑁂𑀬𑁆𑀬𑀸𑀫𑀻𑀢𑀺𑀆𑀤𑀺𑀦𑀸 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀏𑀓𑀦𑁆𑀢𑁂𑀦 𑀯𑀺𑀲𑁆𑀲𑀝𑁆𑀞𑀢𑁆𑀢𑀸, 𑀇𑀥 𑀧𑀦 𑀏𑀓𑀦𑁆𑀢𑁂𑀦𑁂𑀯 𑀤𑁆𑀯𑀺𑀦𑁆𑀦𑀫𑁆𑀧𑀺 𑀲𑀫𑀪𑀸𑀯𑁄 𑀇𑀘𑁆𑀙𑀺𑀢𑀩𑁆𑀩𑁄 𑀏𑀯𑀸𑀢𑀺 𑀏𑀓𑁂. 𑀧𑀝𑀺𑀩𑀮𑀲𑁆𑀲 𑀯𑀸 𑀪𑀺𑀓𑁆𑀔𑀼𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀮𑀤𑁆𑀥𑀲𑀫𑁆𑀫𑀼𑀢𑀺𑀓𑁂𑀦 𑀆𑀡𑀢𑁆𑀢𑁄𑀧𑀺 𑀕𑀭𑀼𑀥𑀫𑁆𑀫𑁂𑀳𑀺, 𑀅𑀜𑁆𑀜𑁂𑀳𑀺 𑀯𑀸 𑀑𑀯𑀤𑀺𑀢𑀼𑀁 𑀦 𑀮𑀪𑀢𑀻’’𑀢𑀺 𑀮𑀺𑀔𑀺𑀢𑀁. 𑀢𑀢𑁄 𑀯𑀸 𑀧𑀸𑀧𑀺𑀝𑁆𑀞𑀢𑀭𑀸𑀢𑀺 𑀏𑀢𑁆𑀣 ‘‘𑀅𑀲𑀜𑁆𑀘𑀺𑀘𑁆𑀘 𑀆𑀧𑀦𑁆𑀦𑀲𑀜𑁆𑀘𑀭𑀺𑀢𑁆𑀢𑀢𑁄 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺 𑀧𑀸𑀧𑀺𑀝𑁆𑀞𑀢𑀭𑀸𑀢𑀺 𑀅𑀬𑀫𑁆𑀧𑀺 𑀦𑀬𑁄 𑀬𑁄𑀚𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀧𑀘𑁆𑀘𑀬𑀦𑁆𑀢𑀺 𑀯𑀲𑁆𑀲𑀸𑀯𑀸𑀲𑀺𑀓𑀁. 𑀲𑁂𑀦𑀸𑀲𑀦𑀁 𑀦 𑀮𑀪𑀢𑀺 𑀲𑁂𑀬𑁆𑀬𑀧𑀭𑀺𑀬𑀦𑁆𑀢𑀪𑀸𑀕𑀺𑀢𑀸𑀬. ‘‘𑀉𑀤𑁆𑀤𑁂𑀲𑀸𑀤𑀻𑀦𑀺 𑀤𑀸𑀢𑀼𑀫𑁆𑀧𑀺 𑀦 𑀮𑀪𑀢𑀻’’𑀢𑀺 𑀯𑀤𑀦𑁆𑀢𑀺. ‘‘𑀲𑀘𑁂 𑀤𑁆𑀯𑁂 𑀧𑀸𑀭𑀺𑀯𑀸𑀲𑀺𑀓𑀸 𑀕𑀢𑀝𑁆𑀞𑀸𑀦𑁂 𑀅𑀜𑁆𑀜𑀫𑀜𑁆𑀜𑀁 𑀧𑀲𑁆𑀲𑀦𑁆𑀢𑀺, 𑀉𑀪𑁄𑀳𑀺𑀧𑀺 𑀅𑀜𑁆𑀜𑀫𑀜𑁆𑀜𑀲𑁆𑀲 𑀆𑀭𑁄𑀘𑁂𑀢𑀩𑁆𑀩𑀁 𑀅𑀯𑀺𑀲𑁂𑀲𑁂𑀦 ‘𑀆𑀕𑀦𑁆𑀢𑀼𑀓𑁂𑀦 𑀆𑀭𑁄𑀘𑁂𑀢𑀩𑁆𑀩𑀁, 𑀆𑀕𑀦𑁆𑀢𑀼𑀓𑀲𑁆𑀲 𑀆𑀭𑁄𑀘𑁂𑀢𑀩𑁆𑀩’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀯𑀺𑀳𑀸𑀭𑀕𑀢𑁂𑀦𑀸𑀧𑀺 𑀢𑀢𑁆𑀣 𑀧𑀼𑀩𑁆𑀩𑁂 𑀆𑀭𑁄𑀘𑀺𑀢𑀲𑁆𑀲 𑀧𑀼𑀦𑀸𑀭𑁄𑀘𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. ‘‘𑀅𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑀲𑁆𑀲 𑀩𑀳𑀺 𑀆𑀭𑁄𑀘𑀺𑀢𑀲𑁆𑀲 𑀬𑀣𑀸 𑀧𑀼𑀦 𑀯𑀺𑀳𑀸𑀭𑁂 𑀆𑀭𑁄𑀘𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀏𑀯𑀁 ‘𑀆𑀕𑀦𑁆𑀢𑀼𑀓𑀲𑁄𑀥𑀦𑀢𑁆𑀣𑀁 𑀉𑀧𑁄𑀲𑀣𑀤𑀺𑀯𑀲𑁂 𑀆𑀭𑁄𑀘𑁂𑀢𑀩𑁆𑀩’𑀦𑁆𑀢𑀺 𑀯𑀘𑀦𑀜𑁆𑀳𑁂𑀢𑁆𑀣 𑀲𑀸𑀥𑀓’’𑀦𑁆𑀢𑀺 𑀯𑀤𑀦𑁆𑀢𑀺.

𑁮𑁧. 𑀏𑀓𑀘𑁆𑀙𑀦𑁆𑀦𑁂 𑀦𑀺𑀲𑀺𑀦𑁆𑀦𑀲𑁆𑀲𑀸𑀧𑀺 𑀭𑀢𑁆𑀢𑀺𑀘𑁆𑀙𑁂𑀤𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀬𑁄 𑀳𑁄𑀦𑁆𑀢𑀻𑀢𑀺 𑀏𑀓𑁂. 𑀅𑀯𑀺𑀲𑁂𑀲𑁂𑀦𑀸𑀢𑀺 𑀧𑀸𑀭𑀺𑀯𑀸𑀲𑀺𑀓𑀲𑁆𑀲 𑀉𑀓𑁆𑀔𑀺𑀢𑁆𑀢𑀓𑀲𑁆𑀲𑀸𑀢𑀺 𑀇𑀫𑀁 𑀪𑁂𑀤𑀁 𑀅𑀓𑀢𑁆𑀯𑀸. ‘‘𑀢𑀤𑀳𑀼𑀧𑀲𑀫𑁆𑀧𑀦𑁆𑀦𑁂𑀧𑀺 𑀧𑀓𑀢𑀢𑁆𑀢𑁂’’𑀢𑀺 𑀯𑀘𑀦𑀢𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀳𑀺 𑀯𑀲𑀺𑀢𑀼𑀁 𑀯𑀝𑁆𑀝𑀢𑀺. ‘‘𑀲𑀫𑀯𑀲𑁆𑀲𑀸𑀢𑀺 𑀏𑀢𑁂𑀦 𑀅𑀧𑀘𑁆𑀙𑀸 𑀅𑀧𑀼𑀭𑀺𑀫𑀁 𑀦𑀺𑀧𑀚𑁆𑀚𑀦𑁂 𑀤𑁆𑀯𑀺𑀦𑁆𑀦𑀫𑁆𑀧𑀺 𑀯𑀢𑁆𑀢𑀪𑁂𑀤𑀸𑀧𑀢𑁆𑀢𑀺𑀪𑀸𑀯𑀁 𑀤𑀻𑀧𑁂𑀢𑀻’’𑀢𑀺 𑀮𑀺𑀔𑀺𑀢𑀁.

𑀧𑀸𑀭𑀺𑀯𑀸𑀲𑀺𑀓𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀫𑀽𑀮𑀸𑀬𑀧𑀝𑀺𑀓𑀲𑁆𑀲𑀦𑀸𑀭𑀳𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁮𑁬. 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀦𑀯𑀓𑀢𑀭𑀦𑁆𑀢𑀺 𑀧𑀸𑀭𑀺𑀯𑀸𑀲𑀺𑀓𑀸𑀤𑀺𑀦𑀯𑀓𑀢𑀭𑀁. 𑀧𑀞𑀫𑀁 𑀲𑀗𑁆𑀖𑀫𑀚𑁆𑀛𑁂 𑀧𑀭𑀺𑀯𑀸𑀲𑀁 𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑁂𑀦 𑀧𑀼𑀦 𑀏𑀓𑀲𑁆𑀲𑀧𑀺 𑀲𑀦𑁆𑀢𑀺𑀓𑁂 𑀲𑀫𑀸𑀤𑀺𑀬𑀺𑀢𑀼𑀁, 𑀦𑀺𑀓𑁆𑀔𑀺𑀧𑀺𑀢𑀼𑀜𑁆𑀘 𑀯𑀝𑁆𑀝𑀢𑀺. 𑀫𑀸𑀦𑀢𑁆𑀢𑁂 𑀧𑀦 𑀦𑀺𑀓𑁆𑀔𑀺𑀧𑀺𑀢𑀼𑀁 𑀯𑀝𑁆𑀝𑀢𑀺. 𑀊𑀦𑁂 𑀕𑀡𑁂 𑀘𑀭𑀡𑀤𑁄𑀲𑀢𑁆𑀢𑀸 𑀦 𑀕𑀳𑁂𑀢𑀼𑀦𑁆𑀢𑀺 𑀏𑀓𑁂. 𑀧𑀞𑀫𑀁 𑀆𑀤𑀺𑀦𑁆𑀦𑀯𑀢𑁆𑀢𑀁 𑀏𑀓𑀲𑁆𑀲 𑀲𑀦𑁆𑀢𑀺𑀓𑁂 𑀬𑀣𑀸 𑀦𑀺𑀓𑁆𑀔𑀺𑀧𑀺𑀢𑀼𑀁 𑀯𑀝𑁆𑀝𑀢𑀺, 𑀢𑀣𑀸 𑀲𑀫𑀸𑀤𑀺𑀬𑀺𑀢𑀼𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂.

𑀧𑀸𑀭𑀺𑀯𑀸𑀲𑀺𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀲𑀫𑀼𑀘𑁆𑀘𑀬𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸

𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀓𑀣𑀸𑀯𑀡𑁆𑀡𑀦𑀸

𑁯𑁭. ‘‘𑀯𑁂𑀤𑀬𑀸𑀫𑀻𑀢𑀺 𑀚𑀸𑀦𑀸𑀫𑀺, 𑀘𑀺𑀢𑁆𑀢𑁂𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀲𑀼𑀔𑀁 𑀅𑀦𑀼𑀪𑀯𑀸𑀫𑀺, 𑀦 𑀢𑀧𑁆𑀧𑀘𑁆𑀘𑀬𑀸 𑀅𑀳𑀁 𑀤𑀼𑀓𑁆𑀔𑀺𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀮𑀺𑀔𑀺𑀢𑀁. 𑀬𑀲𑁆𑀲 𑀫𑀸𑀴𑀓𑁂 𑀦𑀸𑀭𑁄𑀘𑀺𑀢𑀁, 𑀢𑀲𑁆𑀲 𑀆𑀭𑁄𑀘𑁂𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀬𑀲𑁆𑀲 𑀆𑀭𑁄𑀘𑀺𑀢𑀁, 𑀢𑀲𑁆𑀲 𑀧𑀼𑀦 𑀆𑀭𑁄𑀘𑀦𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀓𑁂𑀯𑀮𑀁 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀫𑁂𑀯. 𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀲𑀦𑁆𑀢𑀲𑁆𑀲 𑀉𑀧𑀘𑀸𑀭𑀲𑀻𑀫𑀸𑀕𑀢𑀸𑀦𑀁 𑀲𑀩𑁆𑀩𑁂𑀲𑀁 𑀆𑀭𑁄𑀘𑀦𑀓𑀺𑀘𑁆𑀘𑀁 𑀦𑀢𑁆𑀣𑀺. 𑀤𑀺𑀝𑁆𑀞𑀭𑀽𑀧𑀸𑀦𑀁 𑀲𑀼𑀢𑀲𑀤𑁆𑀤𑀸𑀦𑀁 𑀆𑀭𑁄𑀘𑁂𑀢𑀩𑁆𑀩𑀁, 𑀅𑀤𑀺𑀝𑁆𑀞𑀅𑀲𑁆𑀲𑀼𑀢𑀸𑀦𑀫𑁆𑀧𑀺 𑀅𑀦𑁆𑀢𑁄𑀤𑁆𑀯𑀸𑀤𑀲𑀳𑀢𑁆𑀣𑀕𑀢𑀸𑀦𑀁 𑀆𑀭𑁄𑀘𑁂𑀢𑀩𑁆𑀩𑀁. ‘‘𑀇𑀤𑀁 𑀯𑀢𑁆𑀢𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀯𑀲𑀦𑁆𑀢𑀲𑁆𑀲 𑀮𑀓𑁆𑀔𑀡’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀧𑀭𑀺𑀓𑁆𑀔𑀺𑀢𑁆𑀢𑀲𑁆𑀲 𑀯𑀺𑀳𑀸𑀭𑀲𑁆𑀲 𑀧𑀭𑀺𑀓𑁆𑀔𑁂𑀧𑀢𑁄’𑀢𑀺𑀆𑀤𑀺 𑀓𑀺𑀜𑁆𑀘𑀸𑀧𑀺 𑀧𑀸𑀴𑀺𑀬𑀁 𑀦𑀢𑁆𑀣𑀺, 𑀅𑀣 𑀔𑁄 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀁 𑀯𑀘𑀦𑁂𑀦 𑀢𑀣𑀸 𑀏𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀘 𑀯𑀼𑀢𑁆𑀢𑀁. ‘‘𑀅𑀢𑁆𑀣𑀺𑀪𑀸𑀯𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸𑀢𑀺 𑀤𑁆𑀯𑀸𑀤𑀲𑀳𑀢𑁆𑀣𑁂 𑀉𑀧𑀘𑀸𑀭𑁂 𑀲𑀮𑁆𑀮𑀓𑁆𑀔𑁂𑀢𑁆𑀯𑀸, 𑀅𑀦𑀺𑀓𑁆𑀔𑀺𑀢𑁆𑀢𑀯𑀢𑁆𑀢𑀸𑀦𑀁 𑀉𑀧𑀘𑀸𑀭𑀲𑀻𑀫𑀸𑀬 𑀆𑀕𑀢𑀪𑀸𑀯𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀳𑀯𑀸𑀲𑀸𑀤𑀺𑀓𑀁 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀘 𑀯𑀼𑀢𑁆𑀢𑀁. ‘‘𑀦𑀺𑀓𑁆𑀔𑀺𑀧𑀦𑁆𑀢𑁂𑀦 𑀆𑀭𑁄𑀘𑁂𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀁, 𑀧𑀬𑁄𑀚𑀦𑀁 𑀅𑀢𑁆𑀣𑀻’’𑀢𑀺 𑀘 𑀯𑀼𑀢𑁆𑀢𑀁, 𑀦 𑀧𑀦 𑀢𑀁 𑀧𑀬𑁄𑀚𑀦𑀁 𑀤𑀲𑁆𑀲𑀺𑀢𑀁. 𑀘𑀺𑀡𑁆𑀡𑀫𑀸𑀦𑀢𑁆𑀢𑁄 𑀪𑀺𑀓𑁆𑀔𑀼 𑀅𑀩𑁆𑀪𑁂𑀢𑀩𑁆𑀩𑁄𑀢𑀺 𑀘𑀺𑀡𑁆𑀡𑀫𑀸𑀦𑀢𑁆𑀢𑀲𑁆𑀲 𑀘 𑀅𑀩𑁆𑀪𑀸𑀦𑀸𑀭𑀳𑀲𑁆𑀲 𑀘 𑀦𑀺𑀦𑁆𑀦𑀸𑀦𑀸𑀓𑀸𑀭𑀡𑀢𑁆𑀢𑀸 𑀅𑀜𑁆𑀜𑀣𑀸 ‘‘𑀅𑀩𑁆𑀪𑀸𑀦𑀸𑀭𑀳𑁄 𑀅𑀩𑁆𑀪𑁂𑀢𑀩𑁆𑀩𑁄’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀉𑀓𑁆𑀔𑁂𑀧𑀦𑀻𑀬𑀓𑀫𑁆𑀫𑀓𑀢𑁄𑀧𑀺 𑀅𑀢𑁆𑀢𑀦𑁄 𑀮𑀤𑁆𑀥𑀺𑀕𑁆𑀕𑀳𑀡𑀯𑀲𑁂𑀦 𑀲𑀪𑀸𑀕𑀪𑀺𑀓𑁆𑀔𑀼𑀫𑁆𑀳𑀺 𑀲𑀢𑀺 𑀢𑀲𑁆𑀲 𑀅𑀦𑀸𑀭𑁄𑀘𑀸𑀧𑁂𑀢𑀼𑀁 𑀦 𑀮𑀪𑀢𑀺.

𑀧𑀭𑀺𑀯𑀸𑀲𑀓𑀣𑀸𑀯𑀡𑁆𑀡𑀦𑀸

𑁧𑁦𑁨. ‘‘𑀅𑀦𑀦𑁆𑀢𑀭𑀸𑀬𑀺𑀓𑀲𑁆𑀲 𑀧𑀦 𑀅𑀦𑁆𑀢𑀭𑀸𑀬𑀺𑀓𑀲𑀜𑁆𑀜𑀸𑀬 𑀙𑀸𑀤𑀬𑀢𑁄 𑀅𑀘𑁆𑀙𑀦𑁆𑀦𑀸𑀯𑀸’’𑀢𑀺 𑀧𑀸𑀞𑁄. 𑀅𑀯𑁂𑀭𑀺𑀪𑀸𑀯𑁂𑀦 𑀲𑀪𑀸𑀕𑁄 𑀅𑀯𑁂𑀭𑀺𑀲𑀪𑀸𑀕𑁄. ‘‘𑀲𑀪𑀸𑀕𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀦𑁆𑀦𑀲𑁆𑀲 𑀧𑀦 𑀲𑀦𑁆𑀢𑀺𑀓𑁂 𑀆𑀯𑀺 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀧𑀲𑀗𑁆𑀕𑀢𑁄 𑀇𑀥𑁂𑀯 𑀧𑀓𑀸𑀲𑀺𑀢𑀁. 𑀮𑀳𑀼𑀓𑁂𑀲𑀼 𑀧𑀝𑀺𑀓𑁆𑀔𑁂𑀧𑁄 𑀦𑀢𑁆𑀣𑀺. 𑀢𑀢𑁆𑀣 𑀜𑀢𑁆𑀢𑀺𑀬𑀸 𑀆𑀯𑀺 𑀓𑀢𑁆𑀯𑀸 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀮𑀳𑀼𑀓𑀲𑀪𑀸𑀕𑀁 𑀆𑀯𑀺 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺. 𑀲𑀪𑀸𑀕𑀲𑀗𑁆𑀖𑀸𑀤𑀺𑀲𑁂𑀲𑀁 𑀧𑀦 𑀜𑀢𑁆𑀢𑀺𑀬𑀸 𑀆𑀭𑁄𑀘𑀦𑀁 𑀦 𑀯𑀝𑁆𑀝𑀢𑀻𑀢𑀺 𑀓𑀺𑀭. ‘‘𑀢𑀲𑁆𑀲 𑀲𑀦𑁆𑀢𑀺𑀓𑁂 𑀢𑀁 𑀆𑀧𑀢𑁆𑀢𑀺𑀁 𑀧𑀝𑀺𑀓𑀭𑀺𑀲𑁆𑀲𑀢𑀻’𑀢𑀺 (𑀫𑀳𑀸𑀯. 𑁧𑁭𑁧) 𑀯𑀼𑀢𑁆𑀢𑀢𑁆𑀢𑀸 𑀮𑀳𑀼𑀓𑀲𑁆𑀲𑁂𑀯𑀸𑀬𑀫𑀦𑀼𑀜𑁆𑀜𑀸𑀢𑀸. 𑀦 𑀳𑀺 𑀲𑀓𑁆𑀓𑀸 𑀲𑀼𑀤𑁆𑀥𑀲𑁆𑀲 𑀏𑀓𑀲𑁆𑀲 𑀲𑀦𑁆𑀢𑀺𑀓𑁂 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲 𑀧𑀝𑀺𑀓𑀭𑀡𑀁 𑀓𑀸𑀢𑀼’’𑀦𑁆𑀢𑀺 𑀮𑀺𑀔𑀺𑀢𑀁. 𑀮𑀳𑀼𑀓𑁂𑀲𑀼𑀧𑀺 𑀲𑀪𑀸𑀕𑀁 𑀆𑀯𑀺 𑀓𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺, 𑀢𑀲𑁆𑀫𑀸 𑀏𑀯 𑀳𑀺 𑀜𑀢𑁆𑀢𑀺𑀬𑀸 𑀆𑀯𑀺𑀓𑀭𑀡𑀁 𑀅𑀦𑀼𑀜𑁆𑀜𑀸𑀢𑀁, 𑀇𑀢𑀭𑀣𑀸 𑀢𑀁 𑀦𑀺𑀭𑀢𑁆𑀣𑀓𑀁 𑀲𑀺𑀬𑀸. 𑀅𑀜𑁆𑀜𑀫𑀜𑁆𑀜𑀸𑀭𑁄𑀘𑀦𑀲𑁆𑀲 𑀯𑀝𑁆𑀝𑀢𑀺, 𑀢𑀢𑁄 𑀦 𑀯𑀝𑁆𑀝𑀢𑀻𑀢𑀺 𑀤𑀻𑀧𑀦𑀢𑁆𑀣𑀫𑁂𑀯 𑀜𑀢𑁆𑀢𑀺𑀬𑀸 𑀆𑀯𑀺𑀓𑀭𑀡𑀫𑀦𑀼𑀜𑁆𑀜𑀸𑀢𑀁, 𑀢𑁂𑀦𑁂𑀯 𑀇𑀥 ‘‘𑀲𑀪𑀸𑀕𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀦𑁆𑀦𑀲𑁆𑀲𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀅𑀬𑀫𑀢𑁆𑀣𑁄 ‘‘𑀏𑀢𑁆𑀢𑀸𑀯𑀢𑀸 𑀢𑁂 𑀤𑁆𑀯𑁂 𑀦𑀺𑀭𑀸𑀧𑀢𑁆𑀢𑀺𑀓𑀸 𑀳𑁄𑀦𑁆𑀢𑀺, 𑀢𑁂𑀲𑀁 𑀲𑀦𑁆𑀢𑀺𑀓𑁂 𑀲𑁂𑀲𑁂𑀳𑀺 𑀲𑀪𑀸𑀕𑀸𑀧𑀢𑁆𑀢𑀺𑀬𑁄 𑀤𑁂𑀲𑁂𑀢𑀩𑁆𑀩𑀸’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) 𑀯𑀘𑀦𑁂𑀦 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀁 𑀧𑀓𑀸𑀲𑀺𑀢𑁄𑀯. 𑀲𑀗𑁆𑀖𑀸𑀤𑀺𑀲𑁂𑀲𑀁 𑀧𑀦 𑀜𑀢𑁆𑀢𑀺𑀬𑀸 𑀆𑀭𑁄𑀘𑁂𑀢𑁆𑀯𑀸 𑀉𑀧𑁄𑀲𑀣𑀁 𑀓𑀸𑀢𑀼𑀁 𑀯𑀝𑁆𑀝𑀢𑀺. 𑀢𑀲𑁆𑀲𑀸 𑀜𑀢𑁆𑀢𑀺𑀬𑀸 𑀅𑀬𑀫𑀢𑁆𑀣𑁄 𑀬𑀤𑀸 𑀲𑀼𑀤𑁆𑀥𑀁 𑀪𑀺𑀓𑁆𑀔𑀼𑀁 𑀧𑀲𑁆𑀲𑀺𑀲𑁆𑀲𑀢𑀺, 𑀢𑀲𑁆𑀲 𑀲𑀦𑁆𑀢𑀺𑀓𑁂 𑀆𑀭𑁄𑀘𑀦𑀯𑀲𑁂𑀦 𑀧𑀝𑀺𑀓𑀭𑀺𑀲𑁆𑀲𑀢𑀺. 𑀏𑀯𑀁 𑀧𑀝𑀺𑀓𑀢𑁂 ‘‘𑀦 𑀘, 𑀪𑀺𑀓𑁆𑀔𑀯𑁂, 𑀲𑀸𑀧𑀢𑁆𑀢𑀺𑀓𑁂𑀦 𑀧𑀸𑀢𑀺𑀫𑁄𑀓𑁆𑀔𑀁 𑀲𑁄𑀢𑀩𑁆𑀩𑀁, 𑀬𑁄 𑀲𑀼𑀡𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀘𑀽𑀴𑀯. 𑁩𑁮𑁬) 𑀯𑀼𑀢𑁆𑀢𑀸𑀧𑀢𑁆𑀢𑀺𑀢𑁄 𑀫𑁄𑀓𑁆𑀔𑁄 𑀳𑁄𑀢𑀻𑀢𑀺, 𑀢𑀲𑁆𑀫𑀸 ‘‘𑀕𑀭𑀼𑀓𑀁 𑀯𑀸 𑀳𑁄𑀢𑀼 𑀮𑀳𑀼𑀓𑀁 𑀯𑀸, 𑀜𑀢𑁆𑀢𑀺𑀬𑀸 𑀆𑀯𑀺 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁, 𑀉𑀪𑁄𑀲𑀼 𑀦𑀬𑁂𑀲𑀼 𑀬𑀼𑀢𑁆𑀢𑀢𑀭𑀁 𑀕𑀳𑁂𑀢𑀩𑁆𑀩𑀁.

𑀦𑀸𑀫𑀜𑁆𑀘𑁂𑀯 𑀆𑀧𑀢𑁆𑀢𑀺 𑀘𑀸𑀢𑀺 ‘‘𑀢𑁂𑀦 𑀢𑁂𑀦 𑀯𑀻𑀢𑀺𑀓𑁆𑀓𑀫𑁂𑀦𑀸𑀧𑀦𑁆𑀦𑀸𑀧𑀢𑁆𑀢𑀺 𑀆𑀧𑀢𑁆𑀢𑀺. 𑀦𑀸𑀫𑀦𑁆𑀢𑀺 𑀢𑀲𑁆𑀲𑀸 𑀆𑀧𑀢𑁆𑀢𑀺𑀬𑀸 𑀦𑀸𑀫’’𑀦𑁆𑀢𑀺 𑀮𑀺𑀔𑀺𑀢𑀁. 𑀆𑀭𑁄𑀘𑁂𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀏𑀢𑁆𑀣 𑀆𑀭𑁄𑀘𑀦𑀁 𑀯𑀢𑁆𑀢𑀪𑁂𑀤𑀤𑀼𑀓𑁆𑀓𑀝𑀧𑀅𑀳𑀭𑀡𑀧𑁆𑀧𑀬𑁄𑀚𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀓𑀸𑀭𑀡𑀫𑁂𑀢𑀦𑁆𑀢𑀺 ‘‘𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀺’’𑀦𑁆𑀢𑀺 𑀯𑀼𑀢𑁆𑀢𑁂 𑀯𑀼𑀝𑁆𑀞𑀸𑀦𑀢𑁄.

𑀤𑀲𑀲𑀢𑀁 𑀭𑀢𑁆𑀢𑀺𑀲𑀢𑀦𑁆𑀢𑀺 𑀤𑀲𑀲𑀢𑀁 𑀆𑀧𑀢𑁆𑀢𑀺𑀬𑁄 𑀭𑀢𑁆𑀢𑀺𑀲𑀢𑀁 𑀙𑀸𑀤𑁂𑀢𑁆𑀯𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀅𑀕𑁆𑀖𑀲𑀫𑁄𑀥𑀸𑀦𑁄 𑀦𑀸𑀫 𑀲𑀪𑀸𑀕𑀯𑀢𑁆𑀣𑀼𑀓𑀸𑀬𑁄 𑀲𑀫𑁆𑀩𑀳𑀼𑀮𑀸 𑀆𑀧𑀢𑁆𑀢𑀺𑀬𑁄 𑀆𑀧𑀦𑁆𑀦𑀲𑁆𑀲 𑀩𑀳𑀼𑀭𑀢𑁆𑀢𑀺𑀁 𑀧𑀝𑀺𑀘𑁆𑀙𑀸𑀤𑀺𑀢𑀸𑀧𑀢𑁆𑀢𑀺𑀬𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀤𑀸𑀢𑀩𑁆𑀩𑁄, 𑀇𑀢𑀭𑁄 𑀦𑀸𑀦𑀸𑀯𑀢𑁆𑀣𑀼𑀓𑀸𑀦𑀁 𑀯𑀲𑁂𑀦𑀸𑀢𑀺 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄𑀢𑀺.

𑀧𑀭𑀺𑀯𑀸𑀲𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

‘‘𑀕𑀸𑀫𑀲𑁆𑀲𑀸𑀢𑀺 𑀦 𑀯𑀼𑀢𑁆𑀢’’𑀦𑁆𑀢𑀺 𑀯𑀘𑀦𑀢𑁄 𑀓𑀺𑀭 𑀕𑀸𑀫𑀽𑀧𑀘𑀸𑀭𑁂𑀧𑀺 𑀯𑀝𑁆𑀝𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄𑀢𑀺 𑀮𑀺𑀔𑀺𑀢𑀁. 𑀯𑀼𑀢𑁆𑀢𑀜𑁆𑀘 ‘‘𑀅𑀬𑀁 𑀧𑀦 𑀯𑀺𑀲𑁂𑀲𑁄’’𑀢𑀺. ‘‘𑀏𑀢𑁆𑀣 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀯 𑀧𑀫𑀸𑀡𑀁. 𑀬𑀼𑀢𑁆𑀢𑀁 𑀦 𑀤𑀺𑀲𑁆𑀲𑀢𑀻’’𑀢𑀺 𑀮𑀺𑀔𑀺𑀢𑀁. 𑀅𑀦𑀼𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀅𑀬𑀁 𑀧𑀦 𑀯𑀺𑀲𑁂𑀲𑁄, 𑀆𑀕𑀦𑁆𑀢𑀼𑀓𑀲𑁆𑀲…𑀧𑁂… 𑀑𑀓𑁆𑀓𑀫𑀺𑀢𑁆𑀯𑀸 𑀕𑀘𑁆𑀙𑀢𑀺, 𑀭𑀢𑁆𑀢𑀺𑀘𑁆𑀙𑁂𑀤𑁄 𑀳𑁄𑀢𑀺𑀬𑁂𑀯𑀸’’𑀢𑀺 𑀯𑀘𑀦𑁂 𑀳𑁂𑀝𑁆𑀞𑀸 ‘‘𑀅𑀦𑁆𑀢𑁄𑀅𑀭𑀼𑀡𑁂 𑀏𑀯 𑀦𑀺𑀓𑁆𑀔𑀫𑀺𑀢𑁆𑀯𑀸 𑀕𑀸𑀫𑀽𑀧𑀘𑀸𑀭𑀢𑁄 𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑁂 𑀅𑀢𑀺𑀓𑁆𑀓𑀫𑀺𑀢𑁆𑀯𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀕𑀭𑀼𑀁 𑀓𑀢𑁆𑀯𑀸 𑀯𑀘𑀦𑀢𑁄, 𑀪𑀺𑀓𑁆𑀔𑀼𑀦𑀻𑀦𑀁 𑀕𑀭𑀼𑀓𑀯𑀲𑁂𑀦𑁂𑀯 𑀢𑀢𑁆𑀣 𑀢𑀢𑁆𑀣 𑀲𑀺𑀓𑁆𑀔𑀸𑀧𑀤𑀸𑀦𑀁 𑀧𑀜𑁆𑀜𑀢𑁆𑀢𑀢𑁆𑀢𑀸 𑀘 𑀢𑀤𑀦𑀼𑀭𑀽𑀧𑀯𑀲𑁂𑀦𑁂𑀯 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀦 𑀪𑀺𑀓𑁆𑀔𑀼𑀦𑀻𑀦𑀁 𑀕𑀭𑀼𑀁 𑀓𑀢𑁆𑀯𑀸 𑀫𑀸𑀦𑀢𑁆𑀢𑀘𑀭𑀡𑀯𑀺𑀥𑀺𑀤𑀲𑁆𑀲𑀦𑀢𑁆𑀣𑀁 ‘‘𑀬𑀢𑁆𑀢𑀓𑀸 𑀧𑀼𑀭𑁂𑀪𑀢𑁆𑀢𑀁 𑀯𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀼𑀭𑀼𑀦𑁆𑀤𑀺𑀆𑀤𑀻𑀲𑀼 𑀯𑀼𑀢𑁆𑀢𑀯𑀘𑀦𑁂𑀦 𑀓𑀭𑁄𑀦𑁆𑀢𑀲𑁆𑀲𑀧𑀺 𑀤𑁄𑀲𑁄 𑀦𑀢𑁆𑀣𑀻𑀢𑀺 𑀤𑀲𑁆𑀲𑁂𑀢𑀼𑀁 𑀓𑁂𑀯𑀮𑀁 𑀮𑀓𑁆𑀔𑀡𑀫𑀢𑁆𑀢𑀫𑁂𑀯 𑀯𑀼𑀢𑁆𑀢𑀁, 𑀢𑀤𑀼𑀪𑀬𑀫𑁆𑀧𑀺 𑀢𑁂𑀦 𑀢𑁂𑀦 𑀧𑀭𑀺𑀬𑀸𑀬𑁂𑀦 𑀬𑀼𑀚𑁆𑀚𑀢𑀺, 𑀯𑀺𑀦𑀺𑀘𑁆𑀙𑀬𑁂 𑀧𑀢𑁆𑀢𑁂 𑀮𑀓𑁆𑀔𑀡𑁂 𑀏𑀯 𑀞𑀸𑀢𑀩𑁆𑀩𑀢𑁄 𑀓𑀼𑀭𑀼𑀦𑁆𑀤𑀺𑀆𑀤𑀻𑀲𑀼 𑀯𑀼𑀢𑁆𑀢𑀯𑀘𑀦𑀁 𑀧𑀘𑁆𑀙𑀸 𑀯𑀼𑀢𑁆𑀢𑀁. 𑀧𑀬𑁄𑀕𑁄 𑀧𑀦 𑀧𑀼𑀭𑀺𑀫𑁄𑀯. 𑀬𑀣𑀸 𑀘𑁂𑀢𑁆𑀣, 𑀢𑀣𑀸 𑀲𑀘𑁂 𑀓𑀸𑀘𑀺 𑀪𑀺𑀓𑁆𑀔𑀼𑀦𑀻 𑀤𑁆𑀯𑁂 𑀮𑁂𑀟𑁆𑀟𑀼𑀧𑀸𑀢𑁂 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀭𑀼𑀡𑀁 𑀉𑀝𑁆𑀞𑀧𑁂𑀢𑀺, 𑀤𑁄𑀲𑁄 𑀦𑀢𑁆𑀣𑀺, 𑀢𑀣𑀸𑀧𑀺 𑀲𑀩𑁆𑀩𑀝𑁆𑀞𑀓𑀣𑀸𑀲𑀼 𑀯𑀼𑀢𑁆𑀢𑀢𑁆𑀢𑀸 ‘‘𑀧𑀼𑀭𑀺𑀫𑀫𑁂𑀯 𑀆𑀘𑀺𑀡𑁆𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀭𑀺𑀯𑀸𑀲𑀯𑀢𑁆𑀢𑀸𑀤𑀻𑀦𑀦𑁆𑀢𑀺 ‘‘𑀧𑀭𑀺𑀯𑀸𑀲𑀦𑀺𑀲𑁆𑀲𑀬𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀺𑀆𑀤𑀻𑀦𑀁 𑀉𑀧𑀘𑀸𑀭𑀲𑀻𑀫𑀸𑀬 𑀧𑀭𑀺𑀘𑁆𑀙𑀺𑀦𑁆𑀦𑀢𑁆𑀢𑀸 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀲𑁆𑀲 𑀉𑀧𑀘𑀸𑀭𑀲𑀻𑀫𑀸𑀯 𑀕𑀳𑁂𑀢𑀩𑁆𑀩𑀸, 𑀦 𑀕𑀸𑀫𑁄’’𑀢𑀺 𑀮𑀺𑀔𑀺𑀢𑀁. ‘‘𑀢𑀲𑁆𑀫𑀺𑀁 𑀕𑀸𑀫𑁂 𑀪𑀺𑀓𑁆𑀔𑀸𑀘𑀸𑀭𑁄 𑀲𑀫𑁆𑀧𑀚𑁆𑀚𑀢𑀻’𑀢𑀺𑀆𑀤𑀺 𑀧𑀯𑀸𑀭𑀺𑀢𑀯𑀲𑁂𑀦 𑀯𑀼𑀢𑁆𑀢𑀁. 𑀦 𑀳𑀺 𑀢𑀢𑁆𑀣 𑀅𑀦𑁆𑀢𑁄𑀕𑀸𑀫𑁂 𑀯𑀺𑀳𑀸𑀭𑁄 𑀅𑀢𑁆𑀣𑀻’’𑀢𑀺 𑀘 𑀮𑀺𑀔𑀺𑀢𑀁, ‘‘𑀢𑀫𑁆𑀧𑀺 𑀢𑁂𑀦 𑀧𑀭𑀺𑀬𑀸𑀬𑁂𑀦 𑀬𑀼𑀚𑁆𑀚𑀢𑀺, 𑀦 𑀅𑀢𑁆𑀣𑀢𑁄’’𑀢𑀺 𑀘.

𑀧𑀝𑀺𑀘𑁆𑀙𑀦𑁆𑀦𑀧𑀭𑀺𑀯𑀸𑀲𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁧𑁦𑁮. ‘‘𑀯𑀺𑀲𑀼𑀁 𑀫𑀸𑀦𑀢𑁆𑀣𑀁 𑀘𑀭𑀺𑀢𑀩𑁆𑀩𑀦𑁆𑀢𑀺 𑀫𑀽𑀮𑀸𑀬 𑀧𑀝𑀺𑀓𑀲𑁆𑀲𑀦𑀁 𑀅𑀓𑀢𑁆𑀯𑀸 𑀯𑀺𑀲𑀼𑀁 𑀓𑀫𑁆𑀫𑀯𑀸𑀘𑀸𑀬𑀸’’𑀢𑀺 𑀘 𑀮𑀺𑀔𑀺𑀢𑀁. ‘‘𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀏𑀓𑁄𑀯, 𑀏𑀓𑀯𑀢𑁆𑀣𑀼𑀫𑁆𑀳𑀺 𑀆𑀧𑀦𑁆𑀦𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑀫𑀺𑀲𑁆𑀲𑀓𑀸 𑀦𑀸𑀫. 𑀫𑀓𑁆𑀔𑀥𑀫𑁆𑀫𑁄 𑀦𑀸𑀫 𑀙𑀸𑀤𑁂𑀢𑀼𑀓𑀸𑀫𑀢𑀸.

𑁧𑁪𑁩. 𑀥𑀫𑁆𑀫𑀢𑀸𑀢𑀺 𑀥𑀫𑁆𑀫𑀢𑀸𑀬, 𑀢𑀣𑀸𑀢𑀸𑀬𑀸𑀢𑀺 𑀅𑀢𑁆𑀣𑁄 ‘‘𑀅𑀮𑀚𑁆𑀚𑀺𑀢𑀸’’𑀢𑀺 𑀏𑀢𑁆𑀣 𑀯𑀺𑀬.

𑁧𑁪𑁮. 𑀧𑀼𑀭𑀺𑀫𑀁 𑀉𑀧𑀸𑀤𑀸𑀬 𑀤𑁆𑀯𑁂 𑀫𑀸𑀲𑀸 𑀧𑀭𑀺𑀯𑀲𑀺𑀢𑀩𑁆𑀩𑀸𑀢𑀺 𑀏𑀢𑁆𑀣 ‘‘𑀧𑀭𑀺𑀯𑀲𑀺𑀢𑀤𑀺𑀯𑀲𑀸𑀧𑀺 𑀕𑀡𑀦𑀽𑀧𑀕𑀸 𑀳𑁄𑀦𑁆𑀢𑀻’’𑀢𑀺 𑀮𑀺𑀔𑀺𑀢𑀁.

𑁧𑁮𑁪. 𑀢𑀲𑁆𑀫𑀺𑀁 𑀪𑀽𑀫𑀺𑀬𑀦𑁆𑀢𑀺 𑀢𑀲𑁆𑀲𑀁 𑀪𑀽𑀫𑀺𑀬𑀁. 𑀲𑀫𑁆𑀩𑀳𑀼𑀮𑀸 𑀲𑀗𑁆𑀖𑀸𑀤𑀺𑀲𑁂𑀲𑀸 𑀆𑀧𑀢𑁆𑀢𑀺𑀬𑁄 𑀆𑀧𑀚𑁆𑀚𑀢𑀺 𑀧𑀭𑀺𑀫𑀸𑀡𑀫𑁆𑀧𑀻𑀢𑀺𑀆𑀤𑀺 𑀚𑀸𑀢𑀺𑀯𑀲𑁂𑀦𑁂𑀓𑀯𑀘𑀦𑀁.

𑀲𑀫𑀼𑀘𑁆𑀘𑀬𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀲𑀫𑀣𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸

𑀲𑀫𑁆𑀫𑀼𑀔𑀸𑀯𑀺𑀦𑀬𑀓𑀣𑀸𑀯𑀡𑁆𑀡𑀦𑀸

𑁧𑁮𑁬-𑁧𑁮𑁭. 𑀬𑀢𑁆𑀣 𑀬𑀢𑁆𑀣 𑀓𑀫𑁆𑀫𑀯𑀸𑀘𑀸𑀬 ‘‘𑀅𑀬’’𑀦𑁆𑀢𑀺 𑀯𑀸 ‘‘𑀇𑀫𑁂’’𑀢𑀺 𑀯𑀸 𑀲𑀫𑁆𑀫𑀼𑀔𑀸𑀦𑀺𑀤𑁆𑀤𑁂𑀲𑀦𑀺𑀬𑀫𑁄 𑀅𑀢𑁆𑀣𑀺, 𑀲𑀩𑁆𑀩𑀁 𑀢𑀁 𑀓𑀫𑁆𑀫𑀁 𑀲𑀫𑁆𑀫𑀼𑀔𑀸𑀓𑀭𑀡𑀻𑀬𑀫𑁂𑀯, 𑀦 𑀓𑁂𑀯𑀮𑀁 𑀢𑀚𑁆𑀚𑀦𑀻𑀬𑀸𑀤𑀺𑀧𑀜𑁆𑀘𑀯𑀺𑀥𑀫𑁂𑀯. 𑀧𑀜𑁆𑀘𑀯𑀺𑀥𑀲𑁆𑀲𑁂𑀯 𑀧𑀦 𑀉𑀤𑁆𑀥𑀭𑀺𑀢𑁆𑀯𑀸 𑀤𑀲𑁆𑀲𑀦𑀁 𑀓𑀫𑁆𑀫𑀓𑁆𑀔𑀦𑁆𑀥𑀓𑁂 𑀢𑀸𑀯 𑀢𑀲𑁆𑀲𑁂𑀯 𑀧𑀸𑀴𑀺𑀆𑀭𑀼𑀴𑁆𑀳𑀢𑁆𑀢𑀸, 𑀘𑀢𑀼𑀯𑀻𑀲𑀢𑀺𑀬𑀸 𑀧𑀸𑀭𑀸𑀚𑀺𑀓𑁂𑀲𑀼 𑀯𑀺𑀚𑁆𑀚𑀫𑀸𑀦𑁂𑀲𑀼 𑀧𑀸𑀭𑀸𑀚𑀺𑀓𑀓𑀡𑁆𑀟𑁂 𑀆𑀕𑀢𑀸𑀦𑀁𑀬𑁂𑀯 𑀘𑀢𑀼𑀦𑁆𑀦𑀁 𑀉𑀤𑁆𑀥𑀭𑀺𑀢𑁆𑀯𑀸 𑀤𑀲𑁆𑀲𑀦𑀁 𑀯𑀺𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 ‘‘𑀧𑀼𑀕𑁆𑀕𑀮𑀲𑁆𑀲 𑀲𑀫𑁆𑀫𑀼𑀔𑀢𑀸 𑀳𑀢𑁆𑀣𑀧𑀸𑀲𑀽𑀧𑀕𑀫𑀦𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀓𑀸𑀭𑀡𑀁 𑀲𑀫𑁆𑀫𑀼𑀔𑀸𑀓𑀭𑀡𑀻𑀬𑀲𑁆𑀲𑀧𑀺 𑀲𑀫𑁆𑀫𑀼𑀔𑀸𑀦𑀺𑀤𑁆𑀤𑁂𑀲𑀦𑀺𑀬𑀫𑀸𑀪𑀸𑀯𑀢𑁄. 𑀓𑀸𑀫𑀁 𑀅𑀬𑀫𑀢𑁆𑀣𑁄 𑀓𑀫𑁆𑀫𑀓𑁆𑀔𑀦𑁆𑀥𑀓𑁂𑀬𑁂𑀯 ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀚𑁆𑀚𑀦𑀻𑀬𑀓𑀫𑁆𑀫𑀁 𑀅𑀥𑀫𑁆𑀫𑀓𑀫𑁆𑀫𑀜𑁆𑀘 𑀳𑁄𑀢𑀺…𑀧𑁂… 𑀅𑀲𑀫𑁆𑀫𑀼𑀔𑀸𑀓𑀢𑀁 𑀳𑁄𑀢𑀻’’𑀢𑀺 (𑀘𑀽𑀴𑀯. 𑁪) 𑀯𑀘𑀦𑁂𑀦𑁂𑀯 𑀲𑀺𑀤𑁆𑀥𑁄, 𑀢𑀢𑁆𑀣 𑀧𑀦 𑀆𑀧𑀢𑁆𑀢𑀺 𑀦 𑀤𑀲𑁆𑀲𑀺𑀢𑀸. 𑀇𑀥 ‘‘𑀬𑁄 𑀓𑀭𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀢𑀢𑁆𑀣 𑀪𑀯𑀺𑀢𑀩𑁆𑀩𑀸𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀇𑀤𑀁 𑀆𑀭𑀤𑁆𑀥𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀲𑀫𑁆𑀫𑀼𑀔𑀸𑀯𑀺𑀦𑀬𑀧𑀢𑀺𑀭𑀽𑀧𑀓𑁂𑀦 𑀯𑀽𑀧𑀲𑀦𑁆𑀢𑀫𑁆𑀧𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦𑁂𑀯 𑀯𑀽𑀧𑀲𑀦𑁆𑀢𑀕𑀡𑀦𑀁 𑀕𑀘𑁆𑀙𑀢𑀻𑀢𑀺 𑀤𑀲𑁆𑀲𑁂𑀢𑀼𑀁 ‘𑀅𑀥𑀫𑁆𑀫𑀯𑀸𑀤𑀻 𑀧𑀼𑀕𑁆𑀕𑀮𑁄’𑀢𑀺𑀆𑀤𑀺 𑀆𑀭𑀤𑁆𑀥’’𑀦𑁆𑀢𑀺 𑀯𑀼𑀢𑁆𑀢𑀁, 𑀮𑀺𑀔𑀺𑀢𑀜𑁆𑀘. 𑀏𑀯𑀁 𑀯𑀽𑀧𑀲𑀦𑁆𑀢𑀁 𑀲𑀫𑁆𑀫𑀼𑀔𑀸𑀯𑀺𑀦𑀬𑀧𑀢𑀺𑀭𑀽𑀧𑀓𑁂𑀦 𑀯𑀽𑀧𑀲𑀦𑁆𑀢𑀁 𑀦𑀸𑀫 𑀳𑁄𑀢𑀺, 𑀦 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀘 𑀅𑀜𑁆𑀜𑁂𑀦 𑀓𑁂𑀦𑀘𑀻𑀢𑀺 𑀤𑀲𑁆𑀲𑁂𑀢𑀼𑀁 𑀇𑀤𑀫𑀸𑀭𑀤𑁆𑀥𑀦𑁆𑀢𑀺 𑀆𑀘𑀭𑀺𑀬𑁄.

𑀲𑀢𑀺𑀯𑀺𑀦𑀬𑀓𑀣𑀸𑀯𑀡𑁆𑀡𑀦𑀸

𑁧𑁯𑁫. 𑀤𑀩𑁆𑀩𑀲𑁆𑀲 𑀓𑀫𑁆𑀫𑀯𑀸𑀘𑀸𑀬 ‘‘𑀲𑀗𑁆𑀖𑁄 𑀇𑀫𑀁 𑀆𑀬𑀲𑁆𑀫𑀦𑁆𑀢𑀁 𑀤𑀩𑁆𑀩’’𑀦𑁆𑀢𑀺 𑀲𑀫𑁆𑀫𑀼𑀔𑀸𑀦𑀺𑀤𑁆𑀤𑁂𑀲𑁄 𑀦𑀢𑁆𑀣𑀺, 𑀢𑀣𑀸𑀧𑀺 ‘‘𑀧𑀞𑀫𑀁 𑀤𑀩𑁆𑀩𑁄 𑀬𑀸𑀘𑀺𑀢𑀩𑁆𑀩𑁄’’𑀢𑀺 𑀯𑀘𑀦𑁂𑀦 𑀲𑀫𑁆𑀫𑀼𑀔𑀸𑀓𑀭𑀡𑀻𑀬𑀢𑀸 𑀢𑀲𑁆𑀲 𑀲𑀺𑀤𑁆𑀥𑀸. 𑀢𑀣𑀸 𑀅𑀜𑁆𑀜𑀢𑁆𑀣𑀸𑀧𑀺 𑀬𑀣𑀸𑀲𑀫𑁆𑀪𑀯𑀁 𑀮𑁂𑀲𑁄 𑀯𑁂𑀤𑀺𑀢𑀩𑁆𑀩𑁄. 𑀲𑀢𑀺𑀯𑁂𑀧𑀼𑀮𑁆𑀮𑀧𑁆𑀧𑀢𑁆𑀢𑀲𑁆𑀲 𑀤𑀸𑀢𑀩𑁆𑀩𑁄 𑀯𑀺𑀦𑀬𑁄 𑀲𑀢𑀺𑀯𑀺𑀦𑀬𑁄.

𑀅𑀫𑀽𑀴𑁆𑀳𑀯𑀺𑀦𑀬𑀓𑀣𑀸𑀯𑀡𑁆𑀡𑀦𑀸

𑁧𑁯𑁬-𑁭. ‘‘𑀬𑀲𑁆𑀲 𑀉𑀫𑁆𑀫𑀢𑁆𑀢𑀓𑀲𑁆𑀲 𑀢𑀁𑀢𑀁𑀯𑀻𑀢𑀺𑀓𑁆𑀓𑀫𑀢𑁄 𑀅𑀦𑀸𑀧𑀢𑁆𑀢𑀺, 𑀢𑀸𑀤𑀺𑀲𑀲𑁆𑀲𑁂𑀯 𑀅𑀫𑀽𑀴𑁆𑀳𑀯𑀺𑀦𑀬𑀁 𑀤𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀫𑀽𑀴𑁆𑀳𑀲𑁆𑀲 𑀓𑀢𑁆𑀢𑀩𑁆𑀩𑀯𑀺𑀦𑀬𑁄 𑀅𑀫𑀽𑀴𑁆𑀳𑀯𑀺𑀦𑀬𑁄’’𑀢𑀺 𑀮𑀺𑀔𑀺𑀢𑀁, 𑀢𑀁 𑀬𑀼𑀢𑁆𑀢𑀁 ‘‘𑀲𑀗𑁆𑀖𑁄 𑀕𑀕𑁆𑀕𑀲𑁆𑀲 𑀪𑀺𑀓𑁆𑀔𑀼𑀦𑁄 𑀅𑀫𑀽𑀴𑁆𑀳𑀲𑁆𑀲 𑀅𑀫𑀽𑀴𑁆𑀳𑀯𑀺𑀦𑀬𑀁 𑀤𑁂𑀢𑀻’’𑀢𑀺 𑀯𑀘𑀦𑀢𑁄. ‘‘𑀢𑀻𑀡𑀺𑀫𑀸𑀦𑀺, 𑀪𑀺𑀓𑁆𑀔𑀯𑁂, 𑀅𑀥𑀫𑁆𑀫𑀺𑀓𑀸𑀦𑀺 𑀅𑀫𑀽𑀴𑁆𑀳𑀯𑀺𑀦𑀬𑀲𑁆𑀲 𑀤𑀸𑀦𑀸𑀦𑀻’’𑀢𑀺 𑀇𑀫𑀲𑁆𑀲 𑀯𑀺𑀪𑀗𑁆𑀕𑁂 ‘‘𑀦 𑀲𑀭𑀸𑀫𑀻’’𑀢𑀺 𑀯𑀘𑀦𑀁 𑀯𑀻𑀢𑀺𑀓𑁆𑀓𑀫𑀓𑀸𑀮𑀁 𑀲𑀦𑁆𑀥𑀸𑀬 𑀢𑀲𑁆𑀲 𑀯𑀺𑀪𑀗𑁆𑀕𑀲𑁆𑀲 𑀧𑀯𑀢𑁆𑀢𑀢𑁆𑀢𑀸. 𑀅𑀫𑀽𑀴𑁆𑀳𑀯𑀺𑀦𑀬𑀤𑀸𑀦𑀓𑀸𑀮𑁂 𑀧𑀦𑀲𑁆𑀲 𑀅𑀫𑀽𑀴𑁆𑀳𑀢𑀸 𑀯𑀺𑀦𑀺𑀘𑁆𑀙𑀺𑀢𑀩𑁆𑀩𑀸.

𑀧𑀝𑀺𑀜𑁆𑀜𑀸𑀢𑀓𑀭𑀡𑀓𑀣𑀸𑀯𑀡𑁆𑀡𑀦𑀸

𑁨𑁦𑁦. ‘‘𑀅𑀧𑁆𑀧𑀝𑀺𑀜𑁆𑀜𑀸𑀬 𑀪𑀺𑀓𑁆𑀔𑀽𑀦𑀁 𑀓𑀫𑁆𑀫𑀸𑀦𑀺 𑀓𑀭𑁄𑀦𑁆𑀢𑀻’’𑀢𑀺 𑀆𑀭𑀪𑀦𑁆𑀢𑀲𑁆𑀲 𑀓𑀸𑀭𑀡𑀁 𑀯𑀼𑀢𑁆𑀢𑀫𑁂𑀯. 𑀧𑀝𑀺𑀜𑁆𑀜𑀸𑀢𑁂𑀦 𑀓𑀭𑀡𑀁 𑀧𑀝𑀺𑀜𑁆𑀜𑀸𑀢𑀓𑀭𑀡𑀁.

𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀣𑀸𑀯𑀡𑁆𑀡𑀦𑀸

𑁨𑁦𑁭. ‘‘𑀢𑀻𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑀁 𑀢𑀲𑁆𑀲𑀧𑀸𑀧𑀺𑀬𑀲𑀺𑀓𑀸𑀓𑀫𑁆𑀫’’𑀦𑁆𑀢𑀺 𑀆𑀭𑀪𑀺𑀢𑁆𑀯𑀸 𑀧𑀜𑁆𑀘 𑀅𑀗𑁆𑀕𑀸𑀦𑀺 𑀤𑀲𑁆𑀲𑁂𑀢𑁆𑀯𑀸 𑀧𑀸𑀴𑀺 𑀕𑀢𑀸, ‘‘𑀲𑀸 𑀧𑁂𑀬𑁆𑀬𑀸𑀮𑁂𑀦 𑀲𑀗𑁆𑀔𑀺𑀧𑀺𑀢𑁆𑀯𑀸 𑀕𑀢𑀸𑀢𑀺 𑀜𑀸𑀢𑀩𑁆𑀩’’𑀦𑁆𑀢𑀺 𑀮𑀺𑀔𑀺𑀢𑀁. 𑀢𑀣𑀸 𑀲𑀼𑀓𑁆𑀓𑀧𑀓𑁆𑀔𑁂𑀧𑀺.

𑀢𑀺𑀡𑀯𑀢𑁆𑀣𑀸𑀭𑀓𑀸𑀤𑀺𑀓𑀣𑀸𑀯𑀡𑁆𑀡𑀦𑀸

𑁨𑁧𑁪. ‘‘𑀲𑀩𑁆𑀩𑁂𑀳𑁂𑀯 𑀏𑀓𑀚𑁆𑀛𑀁 𑀲𑀦𑁆𑀦𑀺𑀧𑀢𑀺𑀢𑀩𑁆𑀩’’𑀦𑁆𑀢𑀺 𑀙𑀦𑁆𑀤𑀤𑀸𑀦𑀲𑁆𑀲 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀧𑀯𑀸𑀭𑀡𑀓𑁆𑀔𑀦𑁆𑀥𑀓𑀝𑁆𑀞𑀓𑀣𑀸𑀬𑀜𑁆𑀘 ‘‘𑀪𑀺𑀦𑁆𑀦𑀲𑁆𑀲 𑀳𑀺 𑀲𑀗𑁆𑀖𑀲𑁆𑀲 𑀲𑀫𑀕𑁆𑀕𑀓𑀭𑀡𑀓𑀸𑀮𑁂, 𑀢𑀺𑀡𑀯𑀢𑁆𑀣𑀸𑀭𑀓𑀲𑀫𑀣𑁂, 𑀇𑀫𑀲𑁆𑀫𑀺𑀜𑁆𑀘 𑀧𑀯𑀸𑀭𑀡𑀲𑀗𑁆𑀕𑀳𑁂𑀢𑀺 𑀇𑀫𑁂𑀲𑀼 𑀢𑀻𑀲𑀼 𑀞𑀸𑀦𑁂𑀲𑀼 𑀙𑀦𑁆𑀤𑀁 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁨𑁪𑁧) 𑀯𑀼𑀢𑁆𑀢𑀢𑁆𑀢𑀸 𑀇𑀥 𑀆𑀕𑀦𑁆𑀢𑁆𑀯𑀸 𑀯𑀸 𑀙𑀦𑁆𑀤𑀁 𑀤𑀢𑁆𑀯𑀸 𑀧𑀭𑀺𑀯𑁂𑀡𑀸𑀤𑀻𑀲𑀼 𑀦𑀺𑀲𑀺𑀦𑁆𑀦𑀸𑀢𑀺 𑀇𑀤𑀁 𑀯𑀺𑀭𑀼𑀚𑁆𑀛𑀢𑀺 𑀯𑀺𑀬 𑀔𑀸𑀬𑀢𑀻𑀢𑀺 𑀘𑁂? 𑀦 𑀔𑀸𑀬𑀢𑀺 𑀅𑀥𑀺𑀧𑁆𑀧𑀸𑀬𑀜𑁆𑀜𑀽𑀦𑀁. 𑀅𑀬𑀜𑁆𑀳𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 𑁋 𑀯𑀺𑀲𑀼𑀚𑁆𑀛𑀺𑀢𑀼𑀓𑀸𑀫𑁂𑀳𑀺 𑀲𑀩𑁆𑀩𑁂𑀳𑁂𑀯 𑀲𑀦𑁆𑀦𑀺𑀧𑀢𑀺𑀢𑀩𑁆𑀩𑀁, 𑀅𑀲𑀦𑁆𑀦𑀺𑀧𑀢𑀺𑀢𑀲𑁆𑀲 𑀦𑀢𑁆𑀣𑀺 𑀲𑀼𑀤𑁆𑀥𑀺 𑀙𑀦𑁆𑀤𑀤𑀸𑀬𑀓𑀲𑁆𑀲. 𑀓𑁂𑀯𑀮𑀁 𑀢𑀁 𑀓𑀫𑁆𑀫𑀁 𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀲𑀫𑁆𑀧𑀚𑁆𑀚𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀯𑀺𑀲𑀼𑀚𑁆𑀛𑀺𑀢𑀼𑀓𑀸𑀫𑀸𑀦𑀁 𑀙𑀦𑁆𑀤𑀁 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀢𑀭𑀣𑀸 𑀧𑀸𑀴𑀺𑀬𑀸 𑀘 𑀯𑀺𑀭𑀼𑀚𑁆𑀛𑀢𑀺. ‘‘𑀞𑀧𑁂𑀢𑁆𑀯𑀸 𑀬𑁂 𑀦 𑀢𑀢𑁆𑀣 𑀳𑁄𑀢𑀻’’𑀢𑀺 𑀳𑀺 𑀅𑀬𑀁 𑀧𑀸𑀴𑀺 𑀲𑀦𑁆𑀦𑀺𑀧𑀸𑀢𑀁 𑀆𑀕𑀦𑁆𑀢𑁆𑀯𑀸 𑀙𑀦𑁆𑀤𑀁 𑀤𑀢𑁆𑀯𑀸 𑀞𑀺𑀢𑀸𑀦𑀁 𑀅𑀢𑁆𑀣𑀺𑀢𑀁 𑀤𑀻𑀧𑁂𑀢𑀺. 𑀦𑀺𑀲𑁆𑀲𑀻𑀫𑀕𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀲𑀺𑀬𑀸𑀢𑀺 𑀘𑁂? 𑀦𑀺𑀲𑁆𑀲𑀻𑀫𑀕𑀢𑁂 𑀞𑀧𑁂𑀢𑁆𑀯𑀸 𑀇𑀥 𑀓𑀺𑀁, 𑀢𑀲𑁆𑀫𑀸 𑀬𑁄 𑀲𑀸𑀫𑀕𑁆𑀕𑀻𑀉𑀧𑁄𑀲𑀣𑁂 𑀙𑀦𑁆𑀤𑀁 𑀤𑀢𑁆𑀯𑀸 𑀢𑀺𑀝𑁆𑀞𑀢𑀺 𑀘𑁂, 𑀦𑀸𑀦𑀸𑀲𑀁𑀯𑀸𑀲𑀓𑀪𑀽𑀫𑀺𑀬𑀁𑀬𑁂𑀯 𑀢𑀺𑀝𑁆𑀞𑀢𑀺, 𑀢𑀲𑁆𑀲 𑀙𑀦𑁆𑀤𑀤𑀸𑀬𑀓𑀲𑁆𑀲 𑀧𑀯𑀸𑀭𑀡𑀲𑀗𑁆𑀕𑀳𑁄𑀧𑀺 𑀦𑀢𑁆𑀣𑀺. 𑀬𑁄 𑀘 𑀢𑀺𑀡𑀯𑀢𑁆𑀣𑀸𑀭𑀓𑀓𑀫𑁆𑀫𑁂 𑀦𑀸𑀕𑀘𑁆𑀙𑀢𑀺, 𑀲𑁄 𑀢𑀸𑀳𑀺 𑀆𑀧𑀢𑁆𑀢𑀻𑀳𑀺 𑀦 𑀲𑀼𑀚𑁆𑀛𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀲𑁆𑀲 𑀏𑀢𑀁 𑀦 𑀭𑀼𑀘𑁆𑀘𑀢𑀺, 𑀢𑀲𑁆𑀲 𑀧𑀭𑀺𑀯𑀸𑀭𑁂 𑀯𑀼𑀢𑁆𑀢𑀧𑀭𑀺𑀲𑀢𑁄 𑀓𑀫𑁆𑀫𑀯𑀺𑀧𑀢𑁆𑀢𑀺𑀮𑀓𑁆𑀔𑀡𑀁 𑀯𑀺𑀭𑀼𑀚𑁆𑀛𑀢𑀺, 𑀢𑀢𑁆𑀣 𑀳𑀺 𑀓𑁂𑀯𑀮𑀁 𑀙𑀦𑁆𑀤𑀸𑀭𑀳𑀸𑀦𑀁 𑀙𑀦𑁆𑀤𑁄 𑀅𑀦𑀸𑀳𑀝𑁄 𑀳𑁄𑀢𑀺 𑀲𑀘𑁂, 𑀅𑀓𑀢𑀁 𑀢𑀩𑁆𑀩𑀺𑀧𑀭𑀻𑀢𑁂𑀦 𑀲𑀫𑁆𑀧𑀢𑁆𑀢𑀺𑀤𑀻𑀧𑀦𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸 𑀧𑀢𑁆𑀢𑀓𑀮𑁆𑀮𑀮𑀓𑁆𑀔𑀡𑀫𑁆𑀧𑀺 𑀯𑀺𑀭𑀼𑀚𑁆𑀛𑀢𑀺. 𑀢𑁂𑀲𑀼 𑀢𑀻𑀲𑀼 𑀞𑀸𑀦𑁂𑀲𑀼 𑀓𑀫𑁆𑀫𑀧𑁆𑀧𑀢𑁆𑀢𑀸𑀬𑁂𑀯 𑀲𑀩𑁆𑀩𑁂, 𑀦 𑀢𑀢𑁆𑀣 𑀙𑀦𑁆𑀤𑀸𑀭𑀳𑁄 𑀅𑀢𑁆𑀣𑀻𑀢𑀺 𑀘𑁂? 𑀦, 𑀘𑀢𑀼𑀯𑀕𑁆𑀕𑀸𑀤𑀺𑀓𑀭𑀡𑀯𑀺𑀪𑀸𑀚𑀦𑁂 𑀅𑀯𑀺𑀲𑁂𑀲𑁂𑀢𑁆𑀯𑀸 𑀙𑀦𑁆𑀤𑀸𑀭𑀳𑀲𑁆𑀲 𑀆𑀕𑀢𑀢𑁆𑀢𑀸, 𑀢𑀁 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀁. 𑀇𑀤𑀜𑁆𑀘 𑀆𑀯𑁂𑀡𑀺𑀓𑀮𑀓𑁆𑀔𑀡𑀁, 𑀢𑁂𑀦𑁂𑀯 𑀲𑀢𑀺𑀧𑀺 𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑁂 𑀇𑀤𑀁 𑀧𑀝𑀺𑀓𑀼𑀝𑁆𑀞𑀓𑀢𑀁 𑀦 𑀳𑁄𑀢𑀻𑀢𑀺 𑀘𑁂? 𑀦, 𑀦𑀸𑀦𑀢𑁆𑀢𑀲𑀪𑀸𑀯𑀢𑁄. 𑀇𑀥 𑀳𑀺 𑀬𑁂 𑀧𑀦 ‘‘𑀦 𑀫𑁂𑀢𑀁 𑀔𑀫𑀢𑀻’𑀢𑀺 𑀅𑀜𑁆𑀜𑀫𑀜𑁆𑀜𑀁 𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑀁 𑀓𑀭𑁄𑀦𑁆𑀢𑀻’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁨𑁧𑁪) 𑀯𑀘𑀦𑀢𑁄 𑀦 𑀲𑀗𑁆𑀖𑀲𑁆𑀲 𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑀁 𑀓𑀢𑀁. 𑀢𑀲𑁆𑀫𑀺𑀁 𑀲𑀢𑀺 𑀧𑀝𑀺𑀓𑀼𑀝𑁆𑀞𑀓𑀢𑀫𑁂𑀯 𑀳𑁄𑀢𑀺. 𑀅𑀜𑁆𑀜𑀣𑀸 𑀧𑀼𑀩𑁆𑀩𑀪𑀸𑀕𑀸 𑀢𑀸 𑀜𑀢𑁆𑀢𑀺𑀬𑁄 𑀦𑀺𑀭𑀢𑁆𑀣𑀺𑀓𑀸 𑀲𑀺𑀬𑀼𑀁, 𑀦 𑀘 𑀧𑀭𑀺𑀯𑀸𑀭𑀝𑁆𑀞𑀓𑀣𑀸𑀬𑀁 𑀙𑀦𑁆𑀤𑀸𑀭𑀳𑀸𑀥𑀺𑀓𑀸𑀭𑁂 𑀦𑀬𑁄 𑀤𑀺𑀦𑁆𑀦𑁄. 𑀧𑀯𑀸𑀭𑀡𑀓𑁆𑀔𑀦𑁆𑀥𑀓𑀝𑁆𑀞𑀓𑀣𑀸𑀬𑀁 ‘‘𑀢𑀻𑀲𑀼 𑀞𑀸𑀦𑁂𑀲𑀼 𑀙𑀦𑁆𑀤𑀁 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁨𑁪𑁧) 𑀯𑀼𑀢𑁆𑀢𑀢𑁆𑀢𑀸 𑀯𑀺𑀭𑀼𑀚𑁆𑀛𑀢𑀻𑀢𑀺 𑀘𑁂? 𑀦, 𑀅𑀝𑁆𑀞𑀓𑀣𑀸𑀬 𑀧𑀫𑀸𑀡𑀪𑀸𑀯𑁂 𑀲𑀢𑀺 ‘‘𑀇𑀥 𑀙𑀦𑁆𑀤𑀁 𑀤𑀢𑁆𑀯𑀸 𑀧𑀭𑀺𑀯𑁂𑀡𑀸𑀤𑀻𑀲𑀼 𑀦𑀺𑀲𑀺𑀦𑁆𑀦𑀸’’𑀢𑀺𑀆𑀤𑀺 𑀯𑀘𑀦𑁂 𑀲𑀼𑀤𑁆𑀥𑀺𑀓𑀸𑀫𑀢𑁄 𑀏𑀯 𑀕𑀳𑀺𑀢𑁂 𑀲𑀩𑁆𑀩𑀁 𑀦 𑀯𑀺𑀭𑀼𑀚𑁆𑀛𑀢𑀻𑀢𑀺 𑀏𑀓𑁂. ‘‘𑀆𑀕𑀦𑁆𑀢𑁆𑀯𑀸 𑀯𑀸 𑀙𑀦𑁆𑀤𑀁 𑀤𑀢𑁆𑀯𑀸 𑀧𑀭𑀺𑀯𑁂𑀡𑀸𑀤𑀻𑀲𑀼 𑀦𑀺𑀲𑀺𑀦𑁆𑀦𑀸, 𑀢𑁂 𑀆𑀧𑀢𑁆𑀢𑀻𑀳𑀺 𑀦 𑀯𑀼𑀝𑁆𑀞𑀳𑀦𑁆𑀢𑀻’’𑀢𑀺 𑀇𑀤𑀁 𑀦 𑀯𑀢𑁆𑀢𑀩𑁆𑀩𑀁. 𑀓𑀲𑁆𑀫𑀸? 𑀳𑁂𑀝𑁆𑀞𑀸 ‘‘𑀲𑀩𑁆𑀩𑁂𑀳𑁂𑀯 𑀏𑀓𑀚𑁆𑀛𑀁 𑀲𑀦𑁆𑀦𑀺𑀧𑀢𑀺𑀢𑀩𑁆𑀩’’𑀦𑁆𑀢𑀺 𑀙𑀦𑁆𑀤𑀤𑀸𑀦𑀲𑁆𑀲 𑀧𑀝𑀺𑀓𑁆𑀔𑁂𑀧𑀯𑀘𑀦𑀢𑁄 𑀅𑀝𑁆𑀞𑀓𑀣𑀸𑀬𑀁 ‘‘𑀢𑀻𑀲𑀼 𑀞𑀸𑀦𑁂𑀲𑀼 𑀙𑀦𑁆𑀤𑀁 𑀤𑀸𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀫𑁆𑀧𑀺 𑀢𑀣𑁂𑀯 𑀯𑀼𑀢𑁆𑀢𑀢𑁆𑀢𑀸 𑀘𑀸𑀢𑀺? 𑀦, 𑀏𑀓𑀚𑁆𑀛𑀫𑁂𑀯 𑀓𑀫𑁆𑀫𑁂 𑀓𑀭𑀻𑀬𑀫𑀸𑀦𑁂 𑀬𑁄 𑀇𑀥 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂, 𑀲𑀗𑁆𑀖𑁄, 𑀅𑀫𑁆𑀳𑀸𑀓𑀁…𑀧𑁂… 𑀕𑀺𑀳𑀺𑀧𑀝𑀺𑀲𑀁𑀬𑀼𑀢𑁆𑀢’’𑀦𑁆𑀢𑀺 𑀲𑀸𑀥𑀸𑀭𑀡𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸 𑀧𑀼𑀦 ‘‘𑀲𑀼𑀡𑀦𑁆𑀢𑀼 𑀫𑁂, 𑀆𑀬𑀲𑁆𑀫𑀦𑁆𑀢𑀸’’𑀢𑀺𑀆𑀤𑀺𑀦𑀸 𑀅𑀲𑀸𑀥𑀸𑀭𑀡𑀜𑀢𑁆𑀢𑀺𑀬𑁄 𑀞𑀧𑁂𑀢𑁆𑀯𑀸 ‘‘𑀲𑀼𑀡𑀸𑀢𑀼 𑀫𑁂, 𑀪𑀦𑁆𑀢𑁂 𑀲𑀗𑁆𑀖𑁄, 𑀅𑀫𑁆𑀳𑀸𑀓𑀁…𑀧𑁂… 𑀏𑀯𑀫𑁂𑀢𑀁 𑀥𑀸𑀭𑀬𑀸𑀫𑀻’’𑀢𑀺 𑀏𑀓𑀢𑁄𑀧𑀓𑁆𑀔𑀺𑀓𑀸𑀦𑀁 𑀲𑀦𑁆𑀥𑀺𑀬𑀸 𑀓𑀢𑀸𑀬 𑀢𑀤𑀦𑀦𑁆𑀢𑀭𑁂 𑀓𑁂𑀦𑀘𑀺 𑀓𑀭𑀡𑀻𑀬𑁂𑀦 𑀙𑀦𑁆𑀤𑀁 𑀤𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀲𑁆𑀲 𑀆𑀧𑀢𑁆𑀢𑀻𑀳𑀺 𑀯𑀼𑀝𑁆𑀞𑀸𑀦𑀁 𑀦𑀢𑁆𑀣𑀺. 𑀅𑀧𑀭𑁂𑀲𑀫𑁆𑀧𑀺 𑀏𑀓𑀢𑁄𑀧𑀓𑁆𑀔𑀺𑀓𑀸𑀦𑀁 𑀅𑀩𑁆𑀪𑀦𑁆𑀢𑀭𑁂 𑀞𑀺𑀢𑀢𑁆𑀢𑀸 𑀯𑀺𑀪𑀽𑀢𑀢𑁆𑀢𑀸 𑀓𑀭𑀡𑀲𑁆𑀲 𑀅𑀬𑀫𑀢𑁆𑀣𑁄𑀯 𑀯𑀼𑀢𑁆𑀢𑁄. 𑀲𑀸𑀥𑀸𑀭𑀡𑀯𑀲𑁂𑀦 𑀤𑀼𑀢𑀺𑀬𑀸𑀬 𑀜𑀢𑁆𑀢𑀺𑀬𑀸 𑀞𑀧𑀺𑀢𑀸𑀬 𑀬𑁂 𑀢𑀲𑁆𑀫𑀺𑀁 𑀔𑀡𑁂 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸𑀲𑀼 𑀅𑀦𑀸𑀭𑀤𑁆𑀥𑀸𑀲𑀼, 𑀅𑀧𑀭𑀺𑀬𑁄𑀲𑀺𑀢𑀸𑀲𑀼 𑀯𑀸 𑀙𑀦𑁆𑀤𑀁 𑀤𑀢𑁆𑀯𑀸 𑀕𑀘𑁆𑀙𑀦𑁆𑀢𑀺, 𑀢𑁂𑀲𑀫𑁆𑀧𑀺 𑀦 𑀯𑀼𑀝𑁆𑀞𑀸𑀢𑀺 𑀏𑀯. 𑀬𑁂 𑀦 𑀢𑀢𑁆𑀣 𑀳𑁄𑀦𑁆𑀢𑀻𑀢𑀺 𑀧𑀤𑀲𑁆𑀲 𑀘 𑀬𑁂 𑀯𑀼𑀢𑁆𑀢𑀧𑁆𑀧𑀓𑀸𑀭𑁂𑀦 𑀦𑀬𑁂𑀦 𑀢𑀢𑁆𑀣 𑀦 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀯𑀼𑀢𑁆𑀢𑀧𑁆𑀧𑀓𑀸𑀭𑀢𑁆𑀣𑀤𑀻𑀧𑀦𑀢𑁆𑀣𑀜𑁆𑀘 𑀅𑀝𑁆𑀞𑀓𑀣𑀸𑀬𑀁 ‘‘𑀙𑀦𑁆𑀤𑀁 𑀤𑀢𑁆𑀯𑀸 𑀧𑀭𑀺𑀯𑁂𑀡𑀸𑀤𑀻𑀲𑀼 𑀦𑀺𑀲𑀺𑀦𑁆𑀦𑀸’’𑀢𑀺 𑀇𑀤𑀫𑁂𑀯 𑀅𑀯𑀢𑁆𑀯𑀸 ‘‘𑀬𑁂 𑀧𑀦 𑀢𑁂𑀳𑀺 𑀯𑀸 𑀲𑀤𑁆𑀥𑀺𑀁 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀺𑀢𑁆𑀯𑀸𑀧𑀺 𑀢𑀢𑁆𑀣 𑀅𑀦𑀸𑀕𑀢𑀸, 𑀆𑀕𑀦𑁆𑀢𑁆𑀯𑀸 𑀯𑀸 𑀙𑀦𑁆𑀤𑀁 𑀤𑀢𑁆𑀯𑀸 𑀧𑀭𑀺𑀯𑁂𑀡𑀸𑀤𑀻𑀲𑀼 𑀦𑀺𑀲𑀺𑀦𑁆𑀦𑀸’’𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀧𑀼𑀩𑁆𑀩𑁂𑀦𑀸𑀧𑀭𑀁 𑀲𑀦𑁆𑀥𑀻𑀬𑀢𑀺. ‘‘𑀧𑀸𑀴𑀺𑀬𑀸 𑀘 𑀢𑀢𑁆𑀣 𑀤𑀺𑀝𑁆𑀞𑀸𑀯𑀺𑀓𑀫𑁆𑀫𑁂𑀦 𑀓𑀫𑁆𑀫𑀲𑁆𑀲 𑀅𑀓𑀼𑀧𑁆𑀧𑀢𑀸 𑀯𑁂𑀤𑀺𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁.

𑀅𑀥𑀺𑀓𑀭𑀡𑀓𑀣𑀸𑀯𑀡𑁆𑀡𑀦𑀸

𑁨𑁨𑁦. 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀯𑀺𑀯𑀸𑀤𑁄. 𑀯𑀺𑀯𑀸𑀤𑀲𑀤𑁆𑀤𑁄𑀧𑀺 𑀓𑀸𑀭𑀡𑀽𑀧𑀘𑀸𑀭𑁂𑀦 𑀓𑀼𑀲𑀮𑀸𑀤𑀺𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀢𑀁 𑀲𑀦𑁆𑀥𑀸𑀬 ‘‘𑀲𑀫𑀣𑁂𑀳𑀺 𑀘 𑀅𑀥𑀺𑀓𑀭𑀡𑀻𑀬𑀢𑀸𑀬 𑀅𑀥𑀺𑀓𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀯𑀺𑀯𑀸𑀤𑀳𑁂𑀢𑀼𑀪𑀽𑀢𑀲𑁆𑀲 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲 𑀯𑀽𑀧𑀲𑀫𑁂𑀦 𑀲𑀫𑁆𑀪𑀯𑀲𑁆𑀲 𑀲𑀤𑁆𑀤𑀲𑁆𑀲𑀧𑀺 𑀯𑀽𑀧𑀲𑀫𑁄 𑀳𑁄𑀢𑀻𑀢𑀺 𑀘𑀺𑀢𑁆𑀢𑀼𑀧𑁆𑀧𑀸𑀤𑀲𑁆𑀲𑀧𑀺 𑀲𑀫𑀣𑁂𑀳𑀺 𑀅𑀥𑀺𑀓𑀭𑀡𑀻𑀬𑀢𑀸 𑀧𑀭𑀺𑀬𑀸𑀬𑁄 𑀲𑀫𑁆𑀪𑀯𑀢𑀺. ‘‘𑀓𑀼𑀲𑀮𑀘𑀺𑀢𑁆𑀢𑀸 𑀯𑀺𑀯𑀤𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀯𑀺𑀯𑀸𑀤𑁂𑀧𑀺 ‘‘𑀯𑀺𑀧𑀘𑁆𑀘𑀢𑀸𑀬 𑀯𑁄𑀳𑀸𑀭𑁄’’𑀢𑀺 𑀯𑀼𑀢𑁆𑀢𑀁, 𑀦 𑀯𑀼𑀢𑁆𑀢𑀯𑀘𑀦𑀳𑁂𑀢𑀼𑀯𑀲𑁂𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁨𑁨𑁨. ‘‘𑀆𑀧𑀢𑁆𑀢𑀺𑀜𑁆𑀳𑀺 𑀆𑀧𑀚𑁆𑀚𑀦𑁆𑀢𑁄 𑀓𑀼𑀲𑀮𑀘𑀺𑀢𑁆𑀢𑁄 𑀯𑀸’’𑀢𑀺 𑀯𑀘𑀦𑀢𑁄 𑀓𑀼𑀲𑀮𑀫𑁆𑀧𑀺 𑀲𑀺𑀬𑀸𑀢𑀺 𑀘𑁂? 𑀦 𑀢𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀬𑁄 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀲𑁄 𑀢𑀻𑀲𑀼 𑀘𑀺𑀢𑁆𑀢𑁂𑀲𑀼 𑀅𑀜𑁆𑀜𑀢𑀭𑀘𑀺𑀢𑁆𑀢𑀲𑀫𑀗𑁆𑀕𑀻 𑀳𑀼𑀢𑁆𑀯𑀸 𑀆𑀧𑀚𑁆𑀚𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀬𑀁 𑀓𑀼𑀲𑀮𑀘𑀺𑀢𑁆𑀢𑁄 𑀆𑀧𑀚𑁆𑀚𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑁄 ‘‘𑀧𑀜𑁆𑀜𑀢𑁆𑀢𑀺𑀫𑀢𑁆𑀢𑀁 𑀆𑀧𑀢𑁆𑀢𑀸𑀥𑀺𑀓𑀭𑀡’’𑀦𑁆𑀢𑀺 𑀯𑀤𑁂𑀬𑁆𑀬, 𑀢𑀲𑁆𑀲 𑀅𑀓𑀼𑀲𑀮𑀸𑀤𑀺𑀪𑀸𑀯𑁄𑀧𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀦 𑀬𑀼𑀚𑁆𑀚𑀢𑁂𑀯 𑀯𑀺𑀯𑀸𑀤𑀸𑀥𑀺𑀓𑀭𑀡𑀸𑀤𑀻𑀦𑀁 𑀯𑀺𑀬𑀸𑀢𑀺 𑀘𑁂? 𑀦, ‘‘𑀦𑀢𑁆𑀣𑀸𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀼𑀲𑀮’’𑀦𑁆𑀢𑀺 𑀇𑀫𑀺𑀦𑀸 𑀯𑀺𑀭𑁄𑀥𑀲𑀫𑁆𑀪𑀯𑀢𑁄. 𑀅𑀦𑀼𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀦𑀸𑀫 𑀢𑀣𑀸𑀧𑀯𑀢𑁆𑀢𑀫𑀸𑀦𑀅𑀓𑀉𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑀭𑀽𑀧𑀓𑁆𑀔𑀦𑁆𑀥𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀅𑀯𑀲𑀺𑀝𑁆𑀞𑁂𑀲𑀼 𑀓𑀼𑀲𑀮𑀸𑀩𑁆𑀬𑀸𑀓𑀢𑀧𑀜𑁆𑀜𑀢𑁆𑀢𑀻𑀲𑀼 ‘𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀲𑀺𑀬𑀸 𑀅𑀓𑀼𑀲𑀮𑀁 𑀲𑀺𑀬𑀸 𑀅𑀩𑁆𑀬𑀸𑀓𑀢’𑀦𑁆𑀢𑀺 𑀯𑀘𑀦𑀢𑁄 𑀧𑀜𑁆𑀜𑀢𑁆𑀢𑀺𑀢𑀸𑀯 𑀧𑀝𑀺𑀲𑀺𑀤𑁆𑀥𑀸 𑀓𑀼𑀲𑀮𑀢𑁆𑀢𑀺𑀓𑁂 𑀅𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸. 𑀓𑀼𑀲𑀮𑀧𑀝𑀺𑀲𑁂𑀥𑁂𑀦𑁂𑀯 𑀢𑁂𑀦 𑀲𑀫𑀸𑀦𑀕𑀢𑀺𑀓𑀢𑁆𑀢𑀸 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸𑀦𑀫𑁆𑀧𑀺 𑀧𑀝𑀺𑀲𑁂𑀥𑁄 𑀯𑁂𑀤𑀺𑀢𑀩𑁆𑀩𑁄, 𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸𑀦𑀁 𑀯𑀺𑀬 𑀅𑀦𑀼𑀕𑀫𑀦𑀢𑁄 𑀯𑀺𑀧𑀸𑀓𑀸𑀩𑁆𑀬𑀸𑀓𑀢𑀸𑀦𑀫𑁆𑀧𑀺 𑀧𑀝𑀺𑀲𑁂𑀥𑁄 𑀓𑀢𑁄𑀯 𑀳𑁄𑀢𑀺, 𑀢𑀣𑀸𑀧𑀺 𑀅𑀩𑁆𑀬𑀸𑀓𑀢𑀲𑀸𑀫𑀜𑁆𑀜𑀢𑁄 𑀭𑀽𑀧𑀓𑁆𑀔𑀦𑁆𑀥𑁂𑀦 𑀲𑀤𑁆𑀥𑀺𑀁 𑀯𑀺𑀧𑀸𑀓𑀓𑀺𑀭𑀺𑀬𑀸𑀩𑁆𑀬𑀸𑀓𑀢𑀸𑀦𑀫𑁆𑀧𑀺 𑀅𑀥𑀺𑀯𑀘𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀓𑀼𑀲𑀮𑀘𑀺𑀢𑁆𑀢𑀁 𑀅𑀗𑁆𑀕𑀁 𑀳𑁄𑀢𑀻’’𑀢𑀺 𑀯𑀺𑀦𑀬𑁂 𑀅𑀧𑀓𑀢𑀜𑁆𑀜𑀼𑀦𑁄 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀅𑀧𑁆𑀧𑀳𑀭𑀺𑀢𑀓𑀭𑀡𑀸𑀤𑀺𑀓𑁂 𑀲𑀢𑀺. 𑀢𑀲𑁆𑀫𑀸𑀢𑀺 𑀬𑀲𑁆𑀫𑀸 ‘‘𑀦𑀢𑁆𑀣𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀼𑀲𑀮’’𑀦𑁆𑀢𑀺 𑀯𑀢𑁆𑀢𑀼𑀁 𑀦 𑀲𑀓𑁆𑀓𑀸, 𑀢𑀲𑁆𑀫𑀸 𑀓𑀼𑀲𑀮𑀘𑀺𑀢𑁆𑀢𑀁 𑀅𑀗𑁆𑀕𑀁 𑀦 𑀳𑁄𑀢𑀻𑀢𑀺 𑀅𑀢𑁆𑀣𑁄. 𑀬𑀤𑀺 𑀏𑀯𑀁 𑀓𑀲𑁆𑀫𑀸 ‘‘𑀢𑀺𑀘𑀺𑀢𑁆𑀢𑀁 𑀢𑀺𑀯𑁂𑀤𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀘𑁂? 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀦𑀬𑀺𑀤’’𑀦𑁆𑀢𑀺𑀆𑀤𑀺 𑀆𑀭𑀤𑁆𑀥𑀦𑁆𑀢𑀺 𑀏𑀓𑁂. 𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀘𑀺𑀢𑁆𑀢𑀁 𑀅𑀗𑁆𑀕𑀧𑁆𑀧𑀳𑁄𑀦𑀓𑀘𑀺𑀢𑁆𑀢𑀁 𑀦𑀸𑀫. ‘‘𑀏𑀓𑀦𑁆𑀢𑀢𑁄𑀢𑀺 𑀬𑁂𑀪𑀼𑀬𑁆𑀬𑁂𑀦𑀸𑀢𑀺 𑀅𑀢𑁆𑀣𑁄, 𑀇𑀢𑀭𑀣𑀸 𑀯𑀺𑀭𑀼𑀚𑁆𑀛𑀢𑀺. 𑀓𑀲𑁆𑀫𑀸? ‘𑀬𑀲𑁆𑀲𑀸 𑀲𑀘𑀺𑀢𑁆𑀢𑀓𑀧𑀓𑁆𑀔𑁂 𑀘𑀺𑀢𑁆𑀢𑀁 𑀅𑀓𑀼𑀲𑀮𑀫𑁂𑀯 𑀳𑁄𑀢𑀻’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀧𑀞𑀫𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸) 𑀯𑀼𑀢𑁆𑀢𑀢𑁆𑀢𑀸’’𑀢𑀺 𑀯𑀤𑀦𑁆𑀢𑀺. 𑀢𑁂𑀦 𑀓𑀺𑀁? 𑀯𑀺𑀧𑀸𑀓𑁄 𑀦𑀢𑁆𑀣𑀺, 𑀓𑀲𑁆𑀫𑀸? 𑀏𑀓𑀦𑁆𑀢𑀸𑀓𑀼𑀲𑀮𑀢𑁆𑀢𑀸, 𑀢𑀲𑁆𑀫𑀸 𑀓𑀣𑀸𑀯 𑀢𑀢𑁆𑀣 𑀦𑀢𑁆𑀣𑀺. 𑀬𑀢𑁆𑀣 𑀧𑀦 𑀅𑀢𑁆𑀣𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀁 𑀧𑀦 𑀧𑀡𑁆𑀡𑀢𑁆𑀢𑀺𑀯𑀚𑁆𑀚’’𑀦𑁆𑀢𑀺𑀆𑀤𑀺𑀫𑀸𑀳. 𑀅𑀲𑀜𑁆𑀘𑀺𑀘𑁆𑀘 𑀧𑀦 𑀓𑀺𑀜𑁆𑀘𑀺 𑀅𑀚𑀸𑀦𑀦𑁆𑀢𑀲𑁆𑀲…𑀧𑁂… 𑀅𑀩𑁆𑀬𑀸𑀓𑀢𑀁 𑀳𑁄𑀢𑀻𑀢𑀺 𑀪𑀺𑀓𑁆𑀔𑀼𑀫𑁆𑀳𑀺 𑀓𑀫𑁆𑀫𑀝𑁆𑀞𑀸𑀦𑀕𑀢𑀘𑀺𑀢𑁆𑀢𑁂𑀦 𑀦𑀺𑀧𑀦𑁆𑀦𑁂, 𑀦𑀺𑀤𑁆𑀤𑀸𑀬𑀦𑁆𑀢𑁂 𑀯𑀸 𑀫𑀸𑀢𑀼𑀕𑀸𑀫𑁄 𑀘𑁂 𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀺, 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀯𑀺𑀚𑁆𑀚𑀫𑀸𑀦𑀫𑁆𑀧𑀺 𑀓𑀼𑀲𑀮𑀘𑀺𑀢𑁆𑀢𑀁 𑀆𑀧𑀢𑁆𑀢𑀺𑀬𑀸 𑀅𑀗𑁆𑀕𑀁 𑀦 𑀳𑁄𑀢𑀺, 𑀢𑀲𑁆𑀫𑀸 𑀢𑀲𑁆𑀫𑀺𑀁 𑀔𑀡𑁂 𑀲𑁂𑀬𑁆𑀬𑀸𑀓𑀸𑀭𑁂𑀦 𑀯𑀢𑁆𑀢𑀫𑀸𑀦𑀭𑀽𑀧𑀫𑁂𑀯 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀦𑀸𑀫. 𑀪𑀯𑀗𑁆𑀕𑀘𑀺𑀢𑁆𑀢𑁂 𑀯𑀺𑀚𑁆𑀚𑀫𑀸𑀦𑁂𑀧𑀺 𑀏𑀲𑁂𑀯 𑀦𑀬𑁄. 𑀢𑀲𑁆𑀫𑀺𑀜𑁆𑀳𑀺 𑀔𑀡𑁂 𑀉𑀝𑁆𑀞𑀸𑀢𑀩𑁆𑀩𑁂 𑀚𑀸𑀢𑁂 𑀅𑀦𑀼𑀝𑁆𑀞𑀸𑀦𑀢𑁄 𑀭𑀽𑀧𑀓𑁆𑀔𑀦𑁆𑀥𑁄𑀯 𑀆𑀧𑀢𑁆𑀢𑀺 𑀦𑀸𑀫, 𑀦 𑀯𑀺𑀧𑀸𑀓𑁂𑀦 𑀲𑀤𑁆𑀥𑀺𑀁. 𑀲𑀘𑁂 𑀧𑀦 𑀯𑀤𑁂𑀬𑁆𑀬, 𑀢𑀲𑁆𑀲 𑀏𑀯𑀁𑀯𑀸𑀤𑀺𑀦𑁄 𑀅𑀘𑀺𑀢𑁆𑀢𑀓𑀸𑀦𑀁 𑀓𑀼𑀲𑀮𑀘𑀺𑀢𑁆𑀢𑀁 𑀆𑀧𑀚𑁆𑀚𑁂𑀬𑁆𑀬. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀏𑀴𑀓𑀮𑁄𑀫𑀁 𑀕𑀳𑁂𑀢𑁆𑀯𑀸 𑀓𑀫𑁆𑀫𑀝𑁆𑀞𑀸𑀦𑀫𑀦𑀲𑀺𑀓𑀸𑀭𑁂𑀦 𑀢𑀺𑀬𑁄𑀚𑀦𑀁 𑀅𑀢𑀺𑀓𑁆𑀓𑀫𑀦𑁆𑀢𑀲𑁆𑀲, 𑀧𑀡𑁆𑀡𑀢𑁆𑀢𑀺𑀁 𑀅𑀚𑀸𑀦𑀺𑀢𑁆𑀯𑀸 𑀧𑀤𑀲𑁄 𑀥𑀫𑁆𑀫𑀁 𑀯𑀸𑀘𑁂𑀦𑁆𑀢𑀲𑁆𑀲 𑀘 𑀆𑀧𑀚𑁆𑀚𑀺𑀢𑀩𑁆𑀩𑀸𑀧𑀢𑁆𑀢𑀺𑀬𑀸 𑀓𑀼𑀲𑀮𑀘𑀺𑀢𑁆𑀢𑀁 𑀆𑀧𑀚𑁆𑀚𑁂𑀬𑁆𑀬𑀸𑀢𑀺. 𑀆𑀧𑀚𑁆𑀚𑀢𑀺𑀬𑁂𑀯𑀸𑀢𑀺 𑀘𑁂? 𑀦𑀸𑀧𑀚𑁆𑀚𑀢𑀺. 𑀓𑀲𑁆𑀫𑀸? ‘‘𑀦𑀢𑁆𑀣𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀼𑀲𑀮’’𑀦𑁆𑀢𑀺 𑀯𑀘𑀦𑀢𑁄.

𑀘𑀮𑀺𑀢𑁄 𑀓𑀸𑀬𑁄, 𑀧𑀯𑀢𑁆𑀢𑀸 𑀯𑀸𑀘𑀸, 𑀅𑀜𑁆𑀜𑀢𑀭𑀫𑁂𑀯 𑀅𑀗𑁆𑀕𑀦𑁆𑀢𑀺 𑀅𑀜𑁆𑀜𑀢𑀭𑀫𑁂𑀯 𑀆𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀓𑁂𑀯𑀮𑀁 𑀧𑀜𑁆𑀜𑀢𑁆𑀢𑀺𑀬𑀸 𑀅𑀓𑀼𑀲𑀮𑀸𑀤𑀺𑀪𑀸𑀯𑀸𑀲𑀫𑁆𑀪𑀯𑀢𑁄 𑀆𑀧𑀢𑁆𑀢𑀺𑀢𑀸 𑀦 𑀬𑀼𑀚𑁆𑀚𑀢𑀺. 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑁄 𑀢𑀻𑀲𑀼 𑀅𑀜𑁆𑀜𑀢𑀭𑀲𑀫𑀗𑁆𑀕𑀻 𑀳𑀼𑀢𑁆𑀯𑀸 𑀆𑀧𑀚𑁆𑀚𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀬𑀁 𑀓𑀼𑀲𑀮𑀘𑀺𑀢𑁆𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀲𑁆𑀲𑀢𑁆𑀣𑁄 𑁋 𑀧𑀣𑀯𑀻𑀔𑀡𑀦𑀸𑀤𑀻𑀲𑀼 𑀓𑀼𑀲𑀮𑀘𑀺𑀢𑁆𑀢𑀓𑁆𑀔𑀡𑁂 𑀯𑀻𑀢𑀺𑀓𑁆𑀓𑀫𑀯𑀲𑁂𑀦 𑀧𑀯𑀢𑁆𑀢𑀭𑀽𑀧𑀲𑀫𑁆𑀪𑀯𑀢𑁄 𑀓𑀼𑀲𑀮𑀘𑀺𑀢𑁆𑀢𑁄 𑀯𑀸 𑀅𑀩𑁆𑀬𑀸𑀓𑀢𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀢𑀣𑀸 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑁄 𑀯𑀸 𑀅𑀩𑁆𑀬𑀸𑀓𑀢𑀭𑀽𑀧𑀲𑀗𑁆𑀔𑀸𑀢𑀁 𑀅𑀩𑁆𑀬𑀸𑀓𑀢𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀧𑀸𑀡𑀸𑀢𑀺𑀧𑀸𑀢𑀸𑀤𑀻𑀲𑀼 𑀅𑀓𑀼𑀲𑀮𑀘𑀺𑀢𑁆𑀢𑁄 𑀯𑀸 𑀅𑀓𑀼𑀲𑀮𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺, 𑀭𑀽𑀧𑀁 𑀧𑀦𑁂𑀢𑁆𑀣 𑀅𑀩𑁆𑀩𑁄𑀳𑀸𑀭𑀺𑀓𑀁. 𑀲𑀼𑀧𑀺𑀦𑀧𑀲𑁆𑀲𑀦𑀓𑀸𑀮𑀸𑀤𑀻𑀲𑀼 𑀧𑀸𑀡𑀸𑀢𑀺𑀧𑀸𑀢𑀸𑀤𑀺𑀁 𑀓𑀭𑁄𑀦𑁆𑀢𑁄 𑀲𑀳𑀲𑁂𑀬𑁆𑀬𑀸𑀤𑀺𑀯𑀲𑁂𑀦 𑀆𑀧𑀚𑁆𑀚𑀺𑀢𑀩𑁆𑀩𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀦𑁆𑀢𑁄 𑀅𑀓𑀼𑀲𑀮𑀘𑀺𑀢𑁆𑀢𑁄 𑀅𑀩𑁆𑀬𑀸𑀓𑀢𑀸𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀇𑀤𑀁 𑀯𑀼𑀘𑁆𑀘𑀢𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀅𑀓𑀼𑀲𑀮𑀦𑁆𑀢𑀺 𑀅𑀓𑀼𑀲𑀮𑀘𑀺𑀢𑁆𑀢𑀼𑀧𑁆𑀧𑀸𑀤𑁄. 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂𑀲𑀼 𑀧𑀦 ‘‘𑀧𑀼𑀣𑀼𑀚𑁆𑀚𑀦𑁄 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑁄 𑀲𑁂𑀓𑁆𑀔𑁄 𑀅𑀭𑀳𑀸𑀢𑀺 𑀘𑀢𑁆𑀢𑀸𑀭𑁄 𑀧𑀼𑀕𑁆𑀕𑀮𑁂 𑀤𑀲𑁆𑀲𑁂𑀢𑁆𑀯𑀸 𑀢𑁂𑀲𑀼 𑀅𑀭𑀳𑀢𑁄 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀅𑀩𑁆𑀬𑀸𑀓𑀢𑀫𑁂𑀯, 𑀢𑀣𑀸 𑀲𑁂𑀓𑁆𑀔𑀸𑀦𑀁, 𑀢𑀣𑀸 𑀓𑀮𑁆𑀬𑀸𑀡𑀧𑀼𑀣𑀼𑀚𑁆𑀚𑀦𑀲𑁆𑀲 𑀅𑀲𑀜𑁆𑀘𑀺𑀘𑁆𑀘 𑀯𑀻𑀢𑀺𑀓𑁆𑀓𑀫𑀓𑀸𑀮𑁂 𑀅𑀩𑁆𑀬𑀸𑀓𑀢𑀫𑁂𑀯. 𑀇𑀢𑀭𑀲𑁆𑀲 𑀅𑀓𑀼𑀲𑀮𑀫𑁆𑀧𑀺 𑀳𑁄𑀢𑀺 𑀅𑀩𑁆𑀬𑀸𑀓𑀢𑀫𑁆𑀧𑀺. 𑀬𑀲𑁆𑀫𑀸 𑀘𑀲𑁆𑀲 𑀲𑀜𑁆𑀘𑀺𑀘𑁆𑀘 𑀯𑀻𑀢𑀺𑀓𑁆𑀓𑀫𑀓𑀸𑀮𑁂 𑀅𑀓𑀼𑀲𑀮𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘𑀦𑀢𑁆𑀣𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀁 𑀓𑀼𑀲𑀮’𑀦𑁆𑀢𑀺. 𑀲𑀩𑁆𑀩𑀢𑁆𑀣 𑀅𑀩𑁆𑀬𑀸𑀓𑀢𑀁 𑀦𑀸𑀫 𑀢𑀲𑁆𑀲 𑀯𑀺𑀧𑀸𑀓𑀸𑀪𑀸𑀯𑀫𑀢𑁆𑀢𑀁 𑀲𑀦𑁆𑀥𑀸𑀬 𑀏𑀯𑀁𑀦𑀸𑀫𑀓𑀁 𑀚𑀸𑀢’’𑀦𑁆𑀢𑀺 𑀮𑀺𑀔𑀺𑀢𑀁, 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑁨𑁨𑁪. 𑀯𑀺𑀯𑀸𑀤𑁄 𑀯𑀺𑀯𑀸𑀤𑀸𑀥𑀺𑀓𑀭𑀡𑀦𑁆𑀢𑀺 𑀬𑁄 𑀓𑁄𑀘𑀺 𑀯𑀺𑀯𑀸𑀤𑁄, 𑀲𑁄 𑀲𑀩𑁆𑀩𑁄 𑀓𑀺𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀦𑀸𑀫 𑀳𑁄𑀢𑀻𑀢𑀺 𑀏𑀓𑀧𑀼𑀘𑁆𑀙𑀸. ‘‘𑀯𑀺𑀯𑀸𑀤𑁄 𑀅𑀥𑀺𑀓𑀭𑀡𑀦𑁆𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀫𑁂𑀯 𑀯𑀺𑀯𑀸𑀤𑁄 𑀘 𑀅𑀥𑀺𑀓𑀭𑀡𑀜𑁆𑀘𑀸𑀢𑀺 𑀧𑀼𑀘𑁆𑀙𑀢𑀺. 𑀢𑀤𑀼𑀪𑀬𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀫𑁂𑀯𑀸𑀢𑀺 𑀧𑀼𑀘𑁆𑀙𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 𑀅𑀬𑀁 𑀧𑀼𑀘𑁆𑀙𑀸 𑀦𑀢𑁆𑀣𑀺. 𑀬𑀤𑀺 𑀏𑀯𑀁 𑀇𑀫𑀸𑀬 𑀦 𑀪𑀯𑀺𑀢𑀩𑁆𑀩𑀁 𑀯𑀺𑀯𑀸𑀤𑁄 𑀯𑀺𑀯𑀸𑀤𑀸𑀥𑀺𑀓𑀭𑀡𑀁, 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀯𑀺𑀯𑀸𑀤𑁄, 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀯𑀺𑀯𑀸𑀤𑁄 𑀘𑁂𑀯 𑀅𑀥𑀺𑀓𑀭𑀡𑀜𑁆𑀘𑀸𑀢𑀺 𑀧𑀜𑁆𑀘𑀧𑀜𑁆𑀳𑀸𑀳𑀺 𑀪𑀯𑀺𑀢𑀩𑁆𑀩𑀁 𑀲𑀺𑀬𑀸. 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 𑀢𑀺𑀲𑁆𑀲𑁄, 𑀓𑁂𑀲𑀼𑀘𑀺 𑀘𑀢𑀲𑁆𑀲𑁄, 𑀧𑀜𑁆𑀘 𑀦𑀢𑁆𑀣𑀺. 𑀢𑀢𑁆𑀣 𑀤𑁆𑀯𑁂 𑀯𑀺𑀪𑀢𑁆𑀢𑀸. 𑀇𑀢𑀭𑀸𑀲𑀼 𑀅𑀥𑀺𑀓𑀭𑀡𑀁 𑀯𑀺𑀯𑀸𑀤𑁄𑀢𑀺 𑀬𑀁 𑀓𑀺𑀜𑁆𑀘𑀺 𑀅𑀥𑀺𑀓𑀭𑀡𑀁, 𑀯𑀺𑀯𑀸𑀤𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀺, 𑀯𑀺𑀯𑀸𑀤𑁄 𑀅𑀥𑀺𑀓𑀭𑀡𑀦𑁆𑀢𑀺 𑀬𑁄 𑀓𑁄𑀘𑀺 𑀯𑀺𑀯𑀸𑀤𑁄, 𑀲𑁄 𑀲𑀩𑁆𑀩𑁄 𑀅𑀥𑀺𑀓𑀭𑀡𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀻𑀢𑀺 𑀧𑀼𑀘𑁆𑀙𑀢𑀺. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣.

𑁨𑁨𑁮. 𑀲𑀫𑁆𑀫𑀼𑀔𑀸𑀯𑀺𑀦𑀬𑀲𑁆𑀫𑀺𑀦𑁆𑀢𑀺 𑀲𑀫𑁆𑀫𑀼𑀔𑀸𑀯𑀺𑀦𑀬𑀪𑀸𑀯𑁂.

𑁨𑁩𑁦. ‘‘𑀅𑀦𑁆𑀢𑀭𑁂𑀦𑀸𑀢𑀺 𑀓𑀸𑀭𑀡𑁂𑀦𑀸’’𑀢𑀺 𑀮𑀺𑀔𑀺𑀢𑀁.

𑁨𑁩𑁩. 𑀉𑀩𑁆𑀩𑀸𑀳𑀺𑀓𑀸𑀬 𑀔𑀺𑀬𑁆𑀬𑀦𑀓𑁂 𑀧𑀸𑀘𑀺𑀢𑁆𑀢𑀺 𑀦 𑀯𑀼𑀢𑁆𑀢𑀸 𑀢𑀢𑁆𑀣 𑀙𑀦𑁆𑀤𑀤𑀸𑀦𑀲𑁆𑀲 𑀦𑀢𑁆𑀣𑀺𑀢𑀸𑀬.

𑁨𑁩𑁬. 𑀢𑀲𑁆𑀲 𑀔𑁄 𑀏𑀢𑀦𑁆𑀢𑀺 𑀏𑀲𑁄𑀢𑀺 𑀅𑀢𑁆𑀣𑁄 ‘‘𑀏𑀢𑀤𑀕𑁆𑀕’’𑀦𑁆𑀢𑀺 𑀏𑀢𑁆𑀣 𑀯𑀺𑀬.

𑁨𑁩𑁮. ‘‘𑀓𑀸 𑀘 𑀢𑀲𑁆𑀲 𑀧𑀸𑀧𑀺𑀬𑀲𑀺𑀓𑀸’’𑀢𑀺 𑀓𑀺𑀭 𑀧𑀸𑀞𑁄.

𑁨𑁪𑁨. ‘‘𑀓𑀺𑀘𑁆𑀘𑀫𑁂𑀯 𑀓𑀺𑀘𑁆𑀘𑀸𑀥𑀺𑀓𑀭𑀡’’𑀦𑁆𑀢𑀺 𑀯𑀘𑀦𑀢𑁄 𑀅𑀧𑀮𑁄𑀓𑀦𑀓𑀫𑁆𑀫𑀸𑀤𑀻𑀦𑀫𑁂𑀢𑀁 𑀅𑀥𑀺𑀯𑀘𑀦𑀁, 𑀢𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀸𑀤𑀻𑀦𑀺 𑀯𑀺𑀬 𑀲𑀫𑀣𑁂𑀳𑀺 𑀲𑀫𑁂𑀢𑀩𑁆𑀩𑀁 𑀦 𑀳𑁄𑀢𑀺, 𑀓𑀺𑀦𑁆𑀢𑀼 𑀲𑀫𑁆𑀫𑀼𑀔𑀸𑀯𑀺𑀦𑀬𑁂𑀦 𑀲𑀫𑁆𑀧𑀚𑁆𑀚𑀢𑀻𑀢𑀺 𑀅𑀢𑁆𑀣𑁄.

𑀲𑀫𑀣𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀔𑀼𑀤𑁆𑀤𑀓𑀯𑀢𑁆𑀣𑀼𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸

𑀔𑀼𑀤𑁆𑀤𑀓𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁨𑁪𑁪. 𑀧𑀼𑀣𑀼𑀧𑀸𑀡𑀺𑀦𑀸 𑀓𑀢𑁆𑀢𑀩𑁆𑀩𑀁 𑀓𑀫𑁆𑀫𑀁 𑀧𑀼𑀣𑀼𑀧𑀸𑀡𑀺𑀓𑀁.

𑁨𑁪𑁫. ‘‘𑀓𑀡𑁆𑀡𑀢𑁄 𑀦𑀺𑀓𑁆𑀔𑀦𑁆𑀢𑀫𑀼𑀢𑁆𑀢𑁄𑀮𑀫𑁆𑀩𑀓𑀸𑀤𑀻𑀦𑀁 𑀓𑀼𑀡𑁆𑀟𑀮𑀸𑀤𑀻𑀦’’𑀦𑁆𑀢𑀺 𑀮𑀺𑀔𑀺𑀢𑀁. ‘‘𑀓𑀸𑀬𑀽𑀭’’𑀦𑁆𑀢𑀺 𑀧𑀸𑀴𑀺𑀧𑀸𑀞𑁄. ‘‘𑀓𑁂𑀬𑀽𑀭𑀸𑀤𑀻𑀦𑀻’’𑀢𑀺 𑀆𑀘𑀭𑀺𑀬𑁂𑀦𑀼𑀤𑁆𑀥𑀝𑀁.

𑁨𑁪𑁮. ‘‘𑀲𑀸𑀥𑀼𑀕𑀻𑀢𑀁 𑀦𑀸𑀫 𑀧𑀭𑀺𑀦𑀺𑀩𑁆𑀩𑀼𑀢𑀝𑁆𑀞𑀸𑀦𑁂 𑀕𑀻𑀢’’𑀦𑁆𑀢𑀺 𑀮𑀺𑀔𑀺𑀢𑀁. 𑀤𑀦𑁆𑀢𑀕𑀻𑀢𑀁 𑀕𑀸𑀬𑀺𑀢𑀼𑀓𑀸𑀫𑀸𑀦𑀁 𑀯𑀸𑀓𑁆𑀓𑀓𑀭𑀡𑀻𑀬𑀁. 𑀤𑀦𑁆𑀢𑀕𑀻𑀢𑀲𑁆𑀲 𑀯𑀺𑀪𑀸𑀯𑀦𑀢𑁆𑀣𑀁 ‘‘𑀬𑀁 𑀕𑀸𑀬𑀺𑀲𑁆𑀲𑀸𑀫𑀸’’𑀢𑀺𑀆𑀤𑀺𑀫𑀸𑀳.

𑁨𑁪𑁯. 𑀘𑀢𑀼𑀭𑀲𑁆𑀲𑀯𑀢𑁆𑀢𑀁 𑀦𑀸𑀫 𑀘𑀢𑀼𑀧𑁆𑀧𑀸𑀤𑀕𑀸𑀣𑀸𑀯𑀢𑁆𑀢𑀁. ‘‘𑀢𑀭𑀗𑁆𑀕𑀯𑀢𑁆𑀢𑀸𑀤𑀻𑀦𑀺 𑀉𑀘𑁆𑀘𑀸𑀭𑀡𑀯𑀺𑀥𑀸𑀦𑀸𑀦𑀺 𑀦𑀝𑁆𑀞𑀧𑀬𑁄𑀕𑀸𑀦𑀻’’𑀢𑀺 𑀮𑀺𑀔𑀺𑀢𑀁. 𑀩𑀸𑀳𑀺𑀭𑀮𑁄𑀫𑀺𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀁, 𑀬𑀣𑀸 𑀢𑀲𑁆𑀲 𑀉𑀡𑁆𑀡𑀧𑀸𑀯𑀸𑀭𑀲𑁆𑀲 𑀩𑀳𑀺𑀤𑁆𑀥𑀸 𑀮𑁄𑀫𑀸𑀦𑀺 𑀤𑀺𑀲𑁆𑀲𑀦𑁆𑀢𑀺, 𑀢𑀣𑀸 𑀥𑀸𑀭𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁨𑁫𑁧. 𑀯𑀺𑀭𑀽𑀧𑀓𑁆𑀔𑁂𑀳𑀻𑀢𑀺𑀆𑀤𑀺 𑀲𑀳𑀬𑁄𑀕𑀓𑀭𑀡𑀯𑀘𑀦𑀁. 𑀲𑀭𑀩𑀽𑀢𑀺 𑀕𑁂𑀳𑀕𑁄𑀴𑀺𑀓𑀸. 𑀲𑀸 𑀓𑀺𑀭 𑀲𑁂𑀢𑀸 𑀲𑀯𑀺𑀲𑀸 𑀳𑁄𑀢𑀺. 𑀲𑁄𑀳𑀦𑁆𑀢𑀺 𑀬𑀲𑁆𑀲 𑀫𑁂 𑀏𑀢𑁂𑀳𑀺 𑀫𑁂𑀢𑁆𑀢𑀁, 𑀲𑁄𑀳𑀁 𑀦𑀫𑁄 𑀓𑀭𑁄𑀫𑀺 𑀪𑀕𑀯𑀢𑁄𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀜𑁆𑀜𑀫𑁆𑀳𑀺…𑀧𑁂… 𑀙𑁂𑀢𑀩𑁆𑀩𑀫𑁆𑀳𑀻𑀢𑀺 𑀭𑀸𑀕𑀸𑀦𑀼𑀲𑀬𑁂.

𑁨𑁫𑁨. 𑀉𑀝𑁆𑀝𑀺𑀢𑁆𑀯𑀸𑀢𑀺 𑀧𑀓𑁆𑀔𑀺𑀧𑀺𑀢𑁆𑀯𑀸. 𑀑𑀢𑀭𑀢𑀽𑀢𑀺 𑀇𑀤𑁆𑀥𑀺𑀬𑀸 𑀑𑀢𑀸𑀭𑁂𑀢𑁆𑀯𑀸 𑀕𑀡𑁆𑀳𑀸𑀢𑀼. 𑀅𑀦𑀼𑀧𑀭𑀺𑀬𑀸𑀬𑀻𑀢𑀺 𑀅𑀦𑀼𑀧𑀭𑀺𑀩𑁆𑀪𑀫𑀺.

𑁨𑁫𑁩. 𑀦 𑀅𑀘𑁆𑀙𑀼𑀧𑀺𑀬𑀦𑁆𑀢𑀻𑀢𑀺 𑀦 𑀮𑀕𑁆𑀕𑀦𑁆𑀢𑀺. 𑀭𑀽𑀧𑀓𑀸𑀓𑀺𑀡𑁆𑀡𑀸𑀦𑀻𑀢𑀺 𑀇𑀢𑁆𑀣𑀺𑀭𑀽𑀧𑀸𑀤𑀻𑀳𑀺 𑀯𑁄𑀓𑀺𑀡𑁆𑀡𑀸𑀦𑀺.

𑁨𑁫𑁪. 𑀆𑀮𑀺𑀦𑁆𑀤𑀓𑀫𑀺𑀟𑁆𑀠𑀺𑀓𑀸𑀤𑀻𑀦𑀦𑁆𑀢𑀺 𑀧𑀫𑀼𑀔𑀫𑀺𑀟𑁆𑀠𑀺𑀓𑀸𑀤𑀻𑀦𑀁. 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀢𑀢𑁆𑀣𑁂𑀯𑀸𑀢𑀺 𑀏𑀢𑁆𑀣 ‘‘𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀢𑀢𑀺𑀬𑀯𑀸𑀭𑁂 𑀢𑀢𑁆𑀣𑁂𑀯 𑀫𑀺𑀟𑁆𑀠𑀺𑀬𑀸 𑀧𑀢𑀺𑀝𑁆𑀞𑀸𑀢𑀻’’𑀢𑀺 𑀮𑀺𑀔𑀺𑀢𑀁. 𑀧𑀭𑀺𑀪𑀡𑁆𑀟𑀁 𑀦𑀸𑀫 𑀕𑁂𑀳𑀲𑁆𑀲 𑀩𑀳𑀺 𑀓𑀼𑀝𑁆𑀝𑀧𑀸𑀤𑀲𑁆𑀲 𑀣𑀺𑀭𑀪𑀸𑀯𑀢𑁆𑀣𑀁 𑀓𑀢𑀸 𑀢𑀦𑀼𑀓𑀫𑀺𑀟𑁆𑀠𑀺𑀓𑀸 𑀯𑀼𑀘𑁆𑀘𑀢𑀺. 𑀏𑀢𑁆𑀣 ‘‘𑀧𑀭𑀺𑀯𑀝𑁆𑀝𑀺𑀢𑁆𑀯𑀸 𑀧𑀢𑁆𑀢𑁄 𑀪𑀺𑀚𑁆𑀚𑀢𑀻𑀢𑀺 𑀅𑀥𑀺𑀓𑀭𑀡𑀪𑁂𑀤𑀸𑀲𑀗𑁆𑀓𑀸𑀬 𑀅𑀪𑀸𑀯𑁂 𑀞𑀸𑀦𑁂 𑀞𑀧𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀮𑀺𑀔𑀺𑀢𑀁. 𑀧𑀢𑁆𑀢𑀫𑀸𑀴𑀓𑁄 𑀯𑀝𑁆𑀝𑀺𑀢𑁆𑀯𑀸 𑀧𑀢𑁆𑀢𑀸𑀦𑀁 𑀅𑀧𑀢𑀦𑀢𑁆𑀣𑀁 𑀯𑀝𑁆𑀝𑀁 𑀯𑀸 𑀘𑀢𑀼𑀭𑀲𑁆𑀲𑀁 𑀯𑀸 𑀇𑀝𑁆𑀞𑀓𑀸𑀤𑀻𑀳𑀺 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀫𑀸𑀴𑀓𑀘𑁆𑀙𑀦𑁆𑀦𑁂𑀦 𑀓𑀢𑁄. ‘‘𑀧𑀢𑁆𑀢𑀫𑀡𑁆𑀟𑀮𑀺𑀓𑀸 𑀧𑀢𑁆𑀢𑀧𑀘𑁆𑀙𑀺𑀓𑀸 𑀢𑀸𑀮𑀧𑀢𑁆𑀢𑀸𑀤𑀻𑀳𑀺 𑀓𑀢𑀸’’𑀢𑀺 𑀘 𑀮𑀺𑀔𑀺𑀢𑀁. 𑀫𑀺𑀟𑁆𑀠𑀦𑁆𑀢𑁂 𑀆𑀥𑀸𑀭𑀓𑁂 𑀞𑀧𑁂𑀢𑀼𑀁 𑀯𑀝𑁆𑀝𑀢𑀺 𑀧𑀢𑁆𑀢𑀲𑀦𑁆𑀥𑀸𑀭𑀡𑀢𑁆𑀣𑀁 𑀯𑀼𑀢𑁆𑀢𑀢𑁆𑀢𑀸. 𑀫𑀜𑁆𑀘𑁂 𑀆𑀥𑀸𑀭𑀓𑁂𑀧𑀺 𑀦 𑀯𑀝𑁆𑀝𑀢𑀺 𑀦𑀺𑀲𑀻𑀤𑀦𑀧𑀘𑁆𑀘𑀬𑀸 𑀯𑀸𑀭𑀺𑀢𑀢𑁆𑀢𑀸. 𑀆𑀲𑀦𑁆𑀦𑀪𑀽𑀫𑀺𑀓𑀢𑁆𑀢𑀸 𑀑𑀮𑀫𑁆𑀩𑁂𑀢𑀼𑀁 𑀯𑀝𑁆𑀝𑀢𑀺.

𑁨𑁫𑁫. ‘‘𑀅𑀁𑀲𑀓𑀽𑀝𑁂 𑀮𑀕𑁆𑀕𑁂𑀢𑁆𑀯𑀸𑀢𑀺 𑀯𑀘𑀦𑀢𑁄 𑀅𑀕𑁆𑀕𑀳𑀢𑁆𑀣𑁂 𑀮𑀕𑁆𑀕𑁂𑀢𑁆𑀯𑀸 𑀅𑀗𑁆𑀓𑁂 𑀞𑀧𑁂𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀦 𑀲𑀼𑀦𑁆𑀤𑀭𑀁, ‘‘𑀦 𑀓𑁂𑀯𑀮𑀁 𑀬𑀲𑁆𑀲 𑀧𑀢𑁆𑀢𑁄’’𑀢𑀺𑀆𑀤𑀺 𑀬𑀤𑀺 𑀳𑀢𑁆𑀣𑁂𑀦 𑀕𑀳𑀺𑀢𑀧𑀢𑁆𑀢𑁂 𑀪𑁂𑀤𑀲𑀜𑁆𑀜𑀸, 𑀧𑀕𑁂𑀯 𑀅𑀜𑁆𑀜𑁂𑀦 𑀲𑀭𑀻𑀭𑀸𑀯𑀬𑀯𑁂𑀦𑀸𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀧𑀸𑀴𑀺𑀬𑀁 𑀧𑀦 𑀧𑀘𑀼𑀭𑀯𑁄𑀳𑀸𑀭𑀯𑀲𑁂𑀦 𑀯𑀼𑀢𑁆𑀢𑀁. 𑀖𑀝𑀺𑀓𑀧𑀸𑀮𑀫𑀬𑀁 𑀖𑀝𑀺𑀓𑀝𑀸𑀳𑀁. 𑀙𑀯𑀲𑀻𑀲𑀲𑁆𑀲 𑀧𑀢𑁆𑀢𑀦𑁆𑀢𑀺 ‘‘𑀲𑀺𑀮𑀸𑀧𑀼𑀢𑁆𑀢𑀓𑀲𑁆𑀲 𑀲𑀭𑀻𑀭𑀁, 𑀔𑀻𑀭𑀲𑁆𑀲 𑀥𑀸𑀭𑀸𑀢𑀺𑀆𑀤𑀺𑀯𑁄𑀳𑀸𑀭𑀯𑀲𑁂𑀦 𑀯𑀼𑀢𑁆𑀢𑀁. 𑀫𑀜𑁆𑀘𑁂 𑀦𑀺𑀲𑀻𑀤𑀺𑀢𑀼𑀁 𑀆𑀕𑀢𑁄𑀢𑀺 𑀅𑀢𑁆𑀣𑁄. ‘‘𑀧𑀺𑀲𑀸𑀘𑀺𑀮𑁆𑀮𑀺𑀓𑀸𑀢𑀺 𑀧𑀺𑀲𑀸𑀘𑀤𑀸𑀭𑀓𑀸’’𑀢𑀺𑀧𑀺 𑀯𑀤𑀦𑁆𑀢𑀺. 𑀤𑀺𑀦𑁆𑀦𑀓𑀫𑁂𑀯 𑀧𑀝𑀺𑀕𑁆𑀕𑀳𑀺𑀢𑀫𑁂𑀯. 𑀘𑀩𑁆𑀩𑁂𑀢𑁆𑀯𑀸𑀢𑀺 𑀔𑀸𑀤𑀺𑀢𑁆𑀯𑀸. 𑀅𑀝𑁆𑀞𑀺𑀓𑀸𑀦𑀺 𑀘 𑀓𑀡𑁆𑀝𑀓𑀸𑀦𑀺 𑀘 𑀅𑀝𑁆𑀞𑀺𑀓𑀓𑀡𑁆𑀝𑀓𑀸𑀦𑀺. ‘‘𑀏𑀢𑁂𑀲𑀼 𑀲𑀩𑁆𑀩𑁂𑀲𑀼 𑀧𑀡𑁆𑀡𑀢𑁆𑀢𑀺𑀁 𑀚𑀸𑀦𑀸𑀢𑀼 𑀯𑀸, 𑀫𑀸 𑀯𑀸, 𑀆𑀧𑀢𑁆𑀢𑀺𑀬𑁂𑀯𑀸’’𑀢𑀺 𑀮𑀺𑀔𑀺𑀢𑀁.

𑁨𑁫𑁬. 𑀯𑀺𑀧𑁆𑀨𑀸𑀴𑁂𑀢𑁆𑀯𑀸𑀢𑀺 𑀨𑀸𑀴𑁂𑀢𑁆𑀯𑀸. 𑀓𑀺𑀡𑁆𑀡𑁂𑀦 𑀧𑀽𑀭𑁂𑀢𑀼𑀦𑁆𑀢𑀺 𑀲𑀼𑀭𑀸𑀓𑀺𑀡𑁆𑀡𑁂𑀦 𑀧𑀽𑀭𑁂𑀢𑀼𑀁. 𑀩𑀺𑀤𑀮𑀓𑀁 𑀦𑀸𑀫 𑀤𑀺𑀕𑀼𑀡𑀓𑀭𑀡𑀲𑀗𑁆𑀔𑀸𑀢𑀲𑁆𑀲 𑀓𑀺𑀭𑀺𑀬𑀸𑀯𑀺𑀲𑁂𑀲𑀲𑁆𑀲 𑀅𑀥𑀺𑀯𑀘𑀦𑀁. 𑀓𑀲𑁆𑀲 𑀤𑀺𑀕𑀼𑀡𑀓𑀭𑀡𑀁? 𑀬𑁂𑀦 𑀓𑀺𑀮𑀜𑁆𑀚𑀸𑀤𑀺𑀦𑀸 𑀫𑀳𑀦𑁆𑀢𑀁 𑀓𑀣𑀺𑀦𑀫𑀢𑁆𑀣𑀢𑀁, 𑀢𑀲𑁆𑀲. 𑀢𑀜𑁆𑀳𑀺 𑀤𑀡𑁆𑀟𑀓𑀣𑀺𑀦𑀧𑁆𑀧𑀫𑀸𑀡𑁂𑀦 𑀧𑀭𑀺𑀬𑀦𑁆𑀢𑁂 𑀲𑀁𑀳𑀭𑀺𑀢𑁆𑀯𑀸 𑀤𑀺𑀕𑀼𑀡𑀁 𑀓𑀸𑀢𑀩𑁆𑀩𑀁. 𑀅𑀜𑁆𑀜𑀣𑀸 𑀔𑀼𑀤𑁆𑀤𑀓𑀘𑀻𑀯𑀭𑀲𑁆𑀲 𑀅𑀦𑀼𑀯𑀸𑀢𑀧𑀭𑀺𑀪𑀡𑁆𑀟𑀸𑀤𑀺𑀯𑀺𑀥𑀸𑀦𑀓𑀭𑀡𑁂 𑀳𑀢𑁆𑀣𑀲𑁆𑀲 𑀑𑀓𑀸𑀲𑁄 𑀦 𑀳𑁄𑀢𑀺. 𑀲𑀮𑀸𑀓𑀸𑀬 𑀲𑀢𑀺 𑀤𑁆𑀯𑀺𑀦𑁆𑀦𑀁 𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭𑀁 𑀜𑀢𑁆𑀯𑀸 𑀲𑀺𑀩𑁆𑀩𑀺𑀢𑀸𑀲𑀺𑀩𑁆𑀩𑀺𑀢𑀁 𑀲𑀼𑀔𑀁 𑀧𑀜𑁆𑀜𑀸𑀬𑀢𑀺. 𑀤𑀡𑁆𑀟𑀓𑀣𑀺𑀦𑁂 𑀓𑀢𑁂 𑀦 𑀩𑀳𑀽𑀳𑀺 𑀲𑀳𑀸𑀬𑁂𑀳𑀺 𑀧𑀬𑁄𑀚𑀦𑀁. ‘‘𑀅𑀲𑀁𑀓𑀼𑀝𑀺𑀢𑁆𑀯𑀸 𑀘𑀻𑀯𑀭𑀁 𑀲𑀫𑀁 𑀳𑁄𑀢𑀺. 𑀓𑁄𑀡𑀸𑀧𑀺 𑀲𑀫𑀸 𑀳𑁄𑀦𑁆𑀢𑀻’’𑀢𑀺 𑀮𑀺𑀔𑀺𑀢𑀁, ‘‘𑀳𑀮𑀺𑀤𑁆𑀤𑀺𑀲𑀼𑀢𑁆𑀢𑁂𑀦 𑀲𑀜𑁆𑀜𑀸𑀓𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀳𑀮𑀺𑀤𑁆𑀤𑀺𑀲𑀼𑀢𑁆𑀢𑁂𑀦 𑀘𑀻𑀯𑀭𑀁 𑀲𑀺𑀩𑁆𑀩𑁂𑀢𑀼𑀫𑁆𑀧𑀺 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁. 𑀢𑀢𑁆𑀣 𑀳𑀺 𑀓𑁂𑀘𑀺 𑀅𑀓𑀧𑁆𑀧𑀺𑀬𑀲𑀜𑁆𑀜𑀺𑀦𑁄. 𑀧𑀝𑀺𑀕𑁆𑀕𑀳𑁄 𑀦𑀸𑀫 𑀅𑀗𑁆𑀕𑀼𑀮𑀺𑀓𑁄𑀲𑁄.

𑁨𑁫𑁭-𑁮. 𑀧𑀸𑀢𑀻𑀢𑀺 𑀧𑀝𑀺𑀕𑁆𑀕𑀳𑀲𑀡𑁆𑀞𑀸𑀦𑀁. 𑀧𑀝𑀺𑀕𑁆𑀕𑀳𑀢𑁆𑀣𑀯𑀺𑀓𑀦𑁆𑀢𑀺 𑀅𑀗𑁆𑀕𑀼𑀮𑀺𑀓𑁄𑀲𑀢𑁆𑀣𑀯𑀺𑀓𑀁. 𑀲𑀽𑀘𑀺𑀲𑀢𑁆𑀣𑀓𑀸𑀦𑀁 𑀧𑀼𑀩𑁆𑀩𑁂 𑀆𑀯𑁂𑀲𑀦𑀢𑁆𑀣𑀯𑀺𑀓𑀸𑀬 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀪𑁂𑀲𑀚𑁆𑀚𑀢𑁆𑀣𑀯𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀲𑀽𑀘𑀺𑀲𑀢𑁆𑀣𑀓𑀸𑀤𑀻𑀦𑀺𑀧𑀺 𑀞𑀧𑁂𑀢𑀩𑁆𑀩𑀸𑀦𑀻𑀢𑀺 𑀦𑀺𑀤𑀸𑀦𑀁 𑀲𑀽𑀘𑁂𑀢𑀺. 𑀲𑀘𑁂𑀧𑀺 𑀉𑀧𑀦𑀦𑁆𑀤𑁄 𑀪𑀺𑀓𑁆𑀔𑀼 𑀅𑀮𑀚𑁆𑀚𑀻, 𑀢𑀣𑀸𑀧𑀺 𑀲𑀦𑁆𑀢𑀓𑀫𑁂𑀢𑀁 𑀅𑀫𑀽𑀮𑀘𑁆𑀙𑁂𑀤𑀓𑀢𑀪𑀺𑀓𑁆𑀔𑀼𑀦𑁄 𑀮𑀚𑁆𑀚𑀺𑀦𑁄𑀧𑀺 𑀲𑀫𑀸𑀦𑀲𑁆𑀲 𑀓𑀧𑁆𑀧𑀢𑀻𑀢𑀺 𑀬𑀼𑀚𑁆𑀚𑀢𑀺. 𑀦 𑀲𑀫𑁆𑀫𑀢𑀻𑀢𑀺 𑀦 𑀧𑀳𑁄𑀢𑀺.

𑁨𑁬𑁦-𑁧. 𑀩𑀳𑀺 𑀓𑀼𑀝𑁆𑀝𑀲𑁆𑀲 𑀲𑀫𑀦𑁆𑀢𑀢𑁄 𑀦𑀻𑀘𑀯𑀢𑁆𑀣𑀼𑀓𑀁 𑀓𑀢𑁆𑀯𑀸 𑀞𑀺𑀢𑀁 ‘‘𑀫𑀡𑁆𑀟𑀮𑀺𑀓’’𑀦𑁆𑀢𑀺 𑀯𑀼𑀘𑁆𑀘𑀢𑀺. 𑀚𑀦𑁆𑀢𑀸𑀖𑀭𑀧𑁆𑀧𑀝𑀺𑀘𑁆𑀙𑀸𑀤𑀺𑀦𑀸 𑀙𑀦𑁆𑀦𑀲𑁆𑀲 𑀦𑀕𑁆𑀕𑀺𑀬𑀁 𑀬𑀲𑁆𑀲 𑀦 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀲𑁂𑀯 𑀧𑀭𑀺𑀓𑀫𑁆𑀫𑀁 𑀓𑀸𑀢𑀩𑁆𑀩𑀁. 𑀏𑀲 𑀦𑀬𑁄 𑀉𑀤𑀓𑀯𑀢𑁆𑀣𑀧𑀝𑀺𑀘𑁆𑀙𑀸𑀤𑀻𑀲𑀼𑀧𑀺.

𑁨𑁬𑁨-𑁩. 𑀧𑀡𑀺𑀬𑀸 𑀦𑀸𑀫 𑀧𑀡𑀺𑀬𑀓𑀸𑀭𑀓𑀸. 𑀆𑀓𑀟𑁆𑀠𑀦𑀬𑀦𑁆𑀢𑀁 𑀆𑀓𑀟𑁆𑀠𑀺𑀬𑀫𑀸𑀦𑀁 𑀓𑀽𑀧𑀲𑁆𑀲 𑀉𑀧𑀭𑀺𑀪𑀸𑀕𑁂 𑀧𑀭𑀺𑀩𑁆𑀪𑀫𑀢𑀺. 𑀅𑀭𑀳𑀝𑀖𑀝𑀺𑀬𑀦𑁆𑀢𑀁 𑀲𑀓𑀝𑀘𑀓𑁆𑀓𑀲𑀡𑁆𑀞𑀸𑀦𑀬𑀦𑁆𑀢𑀁. 𑀢𑀲𑁆𑀲 𑀅𑀭𑁂 𑀅𑀭𑁂 𑀖𑀝𑀺𑀓𑀸𑀦𑀺 𑀩𑀦𑁆𑀥𑀺𑀢𑁆𑀯𑀸 𑀏𑀓𑁂𑀦, 𑀤𑁆𑀯𑀻𑀳𑀺 𑀯𑀸 𑀧𑀭𑀺𑀩𑁆𑀪𑀫𑀺𑀬𑀫𑀸𑀦𑀲𑁆𑀲 𑀉𑀤𑀓𑀦𑀺𑀩𑁆𑀩𑀸𑀳𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀆𑀯𑀺𑀤𑁆𑀥𑀧𑀓𑁆𑀔𑀧𑀸𑀲𑀁 𑀦𑀸𑀫 𑀬𑀢𑁆𑀣 𑀫𑀡𑁆𑀟𑀮𑀸𑀓𑀸𑀭𑁂𑀦 𑀧𑀓𑁆𑀔𑀧𑀸𑀲𑀸 𑀩𑀚𑁆𑀛𑀦𑁆𑀢𑀺 𑀆𑀯𑀺𑀤𑁆𑀥𑀯𑀢𑁆𑀣𑀢𑀸 𑀯𑀺𑀬 𑀆𑀯𑀺𑀤𑁆𑀥𑀧𑀓𑁆𑀔𑀧𑀸𑀲𑀓𑀸. 𑀧𑀼𑀩𑁆𑀩𑁂 𑀧𑀢𑁆𑀢𑀲𑀗𑁆𑀕𑁄𑀧𑀦𑀢𑁆𑀣𑀁, 𑀇𑀤𑀸𑀦𑀺 𑀞𑀧𑁂𑀢𑀩𑁆𑀩𑀁 𑀪𑀼𑀜𑁆𑀚𑀺𑀢𑀼𑀁 𑀆𑀥𑀸𑀭𑀓𑁄 𑀅𑀦𑀼𑀜𑁆𑀜𑀸𑀢𑁄.

𑁨𑁭𑁩. 𑀧𑀭𑀕𑀮𑀁 𑀕𑀘𑁆𑀙𑀢𑀻𑀢𑀺 𑀇𑀫𑀲𑁆𑀲 𑀧𑀬𑁄𑀕𑀸𑀪𑀸𑀯𑀸 𑀯𑀝𑁆𑀝𑀢𑀺. 𑀓𑀫𑁆𑀫𑀲𑀢𑁂𑀦𑀸𑀢𑀺 𑀫𑀳𑀢𑀸 𑀉𑀲𑁆𑀲𑀸𑀳𑁂𑀦.

𑁨𑁭𑁭-𑁮. 𑀮𑁄𑀳𑀪𑀡𑁆𑀟𑀁 𑀦𑀸𑀫 𑀓𑀁𑀲𑀢𑁄 𑀲𑁂𑀲𑀮𑁄𑀳𑀪𑀡𑁆𑀟𑀁. 𑀫𑀼𑀤𑁆𑀤𑀺𑀓𑀓𑀸𑀬𑀩𑀦𑁆𑀥𑀦𑀁 𑀦𑀸𑀫 𑀘𑀢𑀼𑀭𑀲𑁆𑀲𑀁 𑀅𑀓𑀢𑁆𑀯𑀸 𑀲𑀚𑁆𑀚𑀺𑀢𑀁. 𑀧𑀸𑀫𑀗𑁆𑀕𑀤𑀲𑀸 𑀘𑀢𑀼𑀭𑀲𑁆𑀲𑀸. 𑀫𑀼𑀤𑀺𑀗𑁆𑀕𑀲𑀡𑁆𑀞𑀸𑀦𑁂𑀦𑀸𑀢𑀺 𑀲𑀗𑁆𑀖𑀸𑀝𑀺𑀬𑀸 𑀫𑀼𑀤𑀺𑀗𑁆𑀕𑀲𑀺𑀩𑁆𑀩𑀦𑀸𑀓𑀸𑀭𑁂𑀦 𑀯𑀭𑀓𑀲𑀻𑀲𑀸𑀓𑀸𑀭𑁂𑀦. 𑀧𑀯𑀦𑀦𑁆𑀢𑁄𑀢𑀺 𑀧𑀸𑀲𑀦𑁆𑀢𑁄. ‘‘𑀤𑀲𑀸𑀫𑀽𑀮’’𑀦𑁆𑀢𑀺 𑀘 𑀮𑀺𑀔𑀺𑀢𑀁. 𑀅𑀓𑀸𑀬𑀩𑀦𑁆𑀥𑀦𑁂𑀦 𑀲𑀜𑁆𑀘𑀺𑀘𑁆𑀘 𑀯𑀸 𑀅𑀲𑀜𑁆𑀘𑀺𑀘𑁆𑀘 𑀯𑀸 𑀕𑀸𑀫𑀧𑁆𑀧𑀯𑁂𑀲𑀦𑁂 𑀆𑀧𑀢𑁆𑀢𑀺. ‘‘𑀲𑀭𑀺𑀢𑀝𑁆𑀞𑀸𑀦𑀢𑁄 𑀩𑀦𑁆𑀥𑀺𑀢𑁆𑀯𑀸 𑀧𑀯𑀺𑀲𑀺𑀢𑀩𑁆𑀩𑀁, 𑀦𑀺𑀯𑀢𑁆𑀢𑀺𑀢𑀩𑁆𑀩𑀁 𑀯𑀸’’𑀢𑀺 𑀮𑀺𑀔𑀺𑀢𑀁.

𑁨𑁭𑁯. 𑀲𑀢𑁆𑀢𑀗𑁆𑀕𑀼𑀮𑀁 𑀯𑀸 𑀅𑀝𑁆𑀞𑀗𑁆𑀕𑀼𑀮𑀁 𑀯𑀸𑀢𑀺 𑀏𑀢𑁆𑀣 ‘‘𑀲𑀼𑀕𑀢𑀗𑁆𑀕𑀼𑀮𑁂𑀦𑀸’’𑀢𑀺 𑀅𑀯𑀼𑀢𑁆𑀢𑀢𑁆𑀢𑀸 𑀧𑀓𑀢𑀺𑀅𑀗𑁆𑀕𑀼𑀮𑁂𑀦 𑀲𑀸𑀭𑀼𑀧𑁆𑀧𑀢𑁆𑀣𑀸𑀬 𑀯𑀟𑁆𑀠𑁂𑀢𑁆𑀯𑀸𑀧𑀺 𑀓𑀭𑁄𑀦𑁆𑀢𑀺 𑀘𑁂, 𑀦 𑀤𑁄𑀲𑁄.

𑁨𑁮𑁦. 𑀢𑀸𑀮𑀯𑀡𑁆𑀝𑀸𑀓𑀸𑀭𑁂𑀦 𑀲𑀻𑀳𑀴𑀺𑀢𑁆𑀣𑀻𑀦𑀁 𑀯𑀺𑀬.

𑀔𑀼𑀤𑁆𑀤𑀓𑀯𑀢𑁆𑀣𑀼𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸

𑀯𑀺𑀳𑀸𑀭𑀸𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸

𑁨𑁯𑁪. 𑀦𑀺𑀮𑀻𑀬𑀦𑁆𑀢𑀺 𑀪𑀺𑀓𑁆𑀔𑀽 𑀏𑀢𑁆𑀣𑀸𑀢𑀺 𑀯𑀺𑀳𑀸𑀭𑀸𑀤𑀬𑁄 𑀮𑁂𑀡𑀸𑀦𑀺 𑀦𑀸𑀫. 𑀆𑀕𑀢-𑀯𑀘𑀦𑁂𑀦 𑀢𑀲𑁆𑀲𑀸𑀕𑀢𑀲𑀗𑁆𑀖𑁄𑀯 𑀲𑀸𑀫𑀻, 𑀦 𑀅𑀦𑀸𑀕𑀢𑁄𑀢𑀺 𑀓𑁂𑀘𑀺, 𑀢𑀁 𑀦 𑀬𑀼𑀚𑁆𑀚𑀢𑀺 𑀲𑀫𑀸𑀦𑀮𑀸𑀪𑀓𑀢𑀺𑀓𑀸𑀬 𑀲𑀺𑀤𑁆𑀥𑀢𑁆𑀢𑀸.

𑁨𑁯𑁬-𑁭. 𑀤𑀻𑀧𑀺𑀦𑀗𑁆𑀕𑀼𑀝𑁆𑀞𑁂𑀦𑀸𑀢𑀺 𑀏𑀢𑁆𑀣 ‘‘𑀤𑀻𑀧𑀺𑀦𑀸 𑀅𑀓𑀧𑁆𑀧𑀺𑀬𑀘𑀫𑁆𑀫𑀁 𑀤𑀲𑁆𑀲𑁂𑀢𑀻’’𑀢𑀺 𑀮𑀺𑀔𑀺𑀢𑀁. 𑀣𑀫𑁆𑀪𑀓𑀯𑀸𑀢𑀧𑀸𑀦𑀁 𑀦𑀸𑀫 𑀢𑀺𑀭𑀺𑀬𑀁 𑀤𑀸𑀭𑀽𑀦𑀺 𑀅𑀤𑀢𑁆𑀯𑀸 𑀉𑀚𑀼𑀓𑀁 𑀞𑀺𑀢𑁂𑀳𑁂𑀯 𑀤𑀸𑀭𑀽𑀳𑀺 𑀓𑀢𑁆𑀢𑀩𑁆𑀩𑀁. 𑀪𑀺𑀲𑀻𑀦𑀁 𑀅𑀦𑀼𑀜𑁆𑀜𑀸𑀢𑀁 𑀯𑀝𑁆𑀝𑀢𑀻𑀢𑀺 𑀩𑀺𑀫𑁆𑀩𑁄𑀳𑀦𑁂 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. 𑀢𑀽𑀮𑀧𑀽𑀭𑀺𑀢𑀁 𑀪𑀺𑀲𑀺𑀁 𑀅𑀧𑀲𑁆𑀲𑀬𑀺𑀢𑀼𑀁 𑀦 𑀯𑀝𑁆𑀝𑀢𑀺 𑀉𑀡𑁆𑀡𑀸𑀤𑀻𑀦𑀁𑀬𑁂𑀯 𑀅𑀦𑀼𑀜𑁆𑀜𑀸𑀢𑀢𑁆𑀢𑀸. 𑀦𑀺𑀲𑀻𑀤𑀦𑀦𑀺𑀧𑀚𑁆𑀚𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀅𑀧𑀲𑁆𑀲𑀬𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀘𑁂? 𑀅𑀓𑀧𑁆𑀧𑀺𑀬𑀦𑁆𑀢𑀺 𑀦 𑀯𑀝𑁆𑀝𑀢𑀻𑀢𑀺 𑀓𑁂𑀘𑀺. 𑀬𑀤𑀺 𑀏𑀯𑀁 𑀅𑀓𑀧𑁆𑀧𑀺𑀬𑀫𑀜𑁆𑀘𑀜𑁆𑀘 𑀅𑀧𑀲𑁆𑀲𑀬𑀺𑀢𑀼𑀁 𑀦 𑀯𑀝𑁆𑀝𑁂𑀬𑁆𑀬. 𑀬𑀲𑁆𑀫𑀸 𑀯𑀝𑁆𑀝𑀢𑀺, 𑀢𑀲𑁆𑀫𑀸 𑀤𑁄𑀲𑁄 𑀦𑀢𑁆𑀣𑀺. 𑀅𑀧𑀺𑀘 𑀕𑀺𑀮𑀸𑀦𑀲𑁆𑀲 𑀩𑀺𑀫𑁆𑀩𑁄𑀳𑀦𑀁 𑀦𑀺𑀧𑀚𑁆𑀚𑀺𑀢𑀼𑀫𑁆𑀧𑀺 𑀅𑀦𑀼𑀜𑁆𑀜𑀸𑀢𑀁, 𑀢𑀲𑁆𑀫𑀸 𑀪𑀺𑀲𑀺𑀧𑀺 𑀯𑀝𑁆𑀝𑀢𑀺 𑀅𑀧𑀲𑁆𑀲𑀬𑀺𑀢𑀼𑀁. 𑀆𑀘𑀭𑀺𑀬𑀸 𑀘 𑀅𑀦𑀼𑀚𑀸𑀦𑀦𑁆𑀢𑀺, 𑀯𑀴𑀜𑁆𑀚𑁂𑀦𑁆𑀢𑀺 𑀘𑀸𑀢𑀺 𑀏𑀓𑁂. 𑀲𑀺𑀫𑁆𑀩𑀮𑀺𑀢𑀽𑀮𑀲𑀼𑀢𑁆𑀢𑁂𑀦 𑀲𑀺𑀩𑁆𑀩𑀺𑀢𑀁 𑀘𑀻𑀯𑀭𑀁 𑀯𑀝𑁆𑀝𑀢𑀺. 𑀓𑀲𑁆𑀫𑀸? 𑀓𑀧𑁆𑀧𑀸𑀲𑀲𑁆𑀲 𑀅𑀦𑀼𑀮𑁄𑀫𑀢𑁄. ‘‘𑀅𑀓𑁆𑀓𑀨𑀮𑀲𑀼𑀢𑁆𑀢𑀫𑀬𑀫𑁆𑀧𑀺 𑀅𑀓𑁆𑀓𑀯𑀸𑀓𑀫𑀬𑀫𑁂𑀯 𑀧𑀝𑀺𑀓𑁆𑀔𑀺𑀢𑁆𑀢’’𑀦𑁆𑀢𑀺 𑀢𑁂 𑀏𑀯 𑀯𑀤𑀦𑁆𑀢𑀺.

𑁨𑁯𑁮. 𑀅𑀦𑀺𑀩𑀦𑁆𑀥𑀦𑀻𑀬𑁄 𑀅𑀮𑀕𑁆𑀕𑁄. 𑀧𑀝𑀺𑀩𑀸𑀳𑁂𑀢𑁆𑀯𑀸𑀢𑀺 𑀫𑀝𑁆𑀞𑀁 𑀓𑀢𑁆𑀯𑀸. ‘‘𑀲𑁂𑀢𑀯𑀡𑁆𑀡𑀸𑀤𑀻𑀦𑀁 𑀬𑀣𑀸𑀲𑀗𑁆𑀔𑁆𑀬𑀁 𑀇𑀓𑁆𑀓𑀸𑀲𑀸𑀤𑀬𑁄 𑀩𑀦𑁆𑀥𑀦𑀢𑁆𑀣𑀁 𑀯𑀼𑀢𑁆𑀢𑀸’’𑀢𑀺 𑀮𑀺𑀔𑀺𑀢𑀁.

𑁩𑁦𑁦. 𑀧𑀓𑀼𑀝𑁆𑀝𑀁 𑀲𑀫𑀦𑁆𑀢𑀢𑁄 𑀆𑀯𑀺𑀤𑁆𑀥𑀧𑀫𑀼𑀔𑀁.

𑁩𑁦𑁩. 𑀲𑀼𑀥𑀸𑀮𑁂𑀧𑁄𑀢𑀺 𑀲𑀼𑀥𑀸𑀫𑀢𑁆𑀢𑀺𑀓𑀸𑀮𑁂𑀧𑁄.

𑁩𑁦𑁫. 𑀆𑀲𑀢𑁆𑀢𑀺 𑀢𑀡𑁆𑀳𑀸. 𑀲𑀦𑁆𑀢𑀺𑀁 𑀅𑀤𑀭𑀁.

𑁩𑁦𑁭. 𑀓𑁂𑀢𑀼𑀦𑁆𑀢𑀺 𑀓𑀬𑁂𑀦 𑀕𑀳𑁂𑀢𑀼𑀁.

𑁩𑁦𑁮. 𑀘𑀺𑀢𑀸𑀢𑀺 𑀇𑀝𑁆𑀞𑀓𑀸𑀬𑁄 𑀓𑀩𑀴𑁂𑀦 𑀦𑀺𑀤𑁆𑀥𑀫𑀦𑀯𑀲𑁂𑀦 𑀙𑀺𑀦𑁆𑀤𑀺𑀢𑁆𑀯𑀸 𑀓𑀢𑀸𑀢𑀺 𑀅𑀢𑁆𑀣𑁄.

𑁩𑁧𑁦. 𑀙𑀩𑁆𑀩𑀕𑁆𑀕𑀺𑀬𑀸𑀦𑀁 𑀪𑀺𑀓𑁆𑀔𑀽𑀦𑀁 𑀅𑀦𑁆𑀢𑁂𑀯𑀸𑀲𑀺𑀓𑀸𑀢𑀺 𑀏𑀢𑁆𑀣 𑀯𑀻𑀲𑀢𑀺𑀯𑀲𑁆𑀲𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀙𑀩𑁆𑀩𑀕𑁆𑀕𑀺𑀬𑀸 𑀉𑀧𑁆𑀧𑀦𑁆𑀦𑀸. ‘‘𑀆𑀭𑀸𑀥𑀬𑀺𑀁𑀲𑀼 𑀫𑁂 𑀪𑀺𑀓𑁆𑀔𑀽 𑀘𑀺𑀢𑁆𑀢’’𑀦𑁆𑀢𑀺 (𑀫. 𑀦𑀺. 𑁧.𑁨𑁨𑁫) 𑀯𑀼𑀢𑁆𑀢𑀢𑁆𑀢𑀸 𑀅𑀜𑁆𑀜𑀲𑁆𑀫𑀺𑀁 𑀓𑀸𑀮𑁂 𑀲𑀸𑀯𑀢𑁆𑀣𑀺𑀕𑀫𑀦𑁂 𑀉𑀧𑁆𑀧𑀦𑁆𑀦𑀁 𑀯𑀢𑁆𑀣𑀼𑀁 𑀇𑀥 𑀆𑀧𑀢𑁆𑀢𑀺𑀤𑀲𑁆𑀲𑀦𑀢𑁆𑀣𑀁 𑀆𑀳𑀭𑀺𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀬𑀼𑀢𑁆𑀢𑀁 𑀯𑀺𑀬, 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀯𑀼𑀤𑁆𑀥𑀦𑁆𑀢𑀺 𑀯𑀼𑀤𑁆𑀥𑀢𑀭𑀁.

𑁩𑁧𑁩. 𑀲𑀦𑁆𑀣𑀭𑁂𑀢𑀺 𑀢𑀺𑀡𑀲𑀦𑁆𑀣𑀭𑀸𑀤𑀬𑁄.

𑀲𑁂𑀦𑀸𑀲𑀦𑀕𑁆𑀕𑀸𑀳𑀓𑀣𑀸𑀯𑀡𑁆𑀡𑀦𑀸

𑁩𑁧𑁮. ‘‘𑀲𑁂𑀬𑁆𑀬𑀕𑁆𑀕𑁂𑀦𑀸𑀢𑀺 𑀫𑀜𑁆𑀘𑀝𑁆𑀞𑀸𑀦𑀧𑀭𑀺𑀘𑁆𑀙𑁂𑀤𑁂𑀦. 𑀯𑀺𑀳𑀸𑀭𑀕𑁆𑀕𑁂𑀦𑀸𑀢𑀺 𑀑𑀯𑀭𑀓𑀕𑁆𑀕𑁂𑀦𑀸’’𑀢𑀺 𑀮𑀺𑀔𑀺𑀢𑀁. 𑀣𑀸𑀯𑀭𑀸𑀢𑀺 𑀦𑀺𑀬𑀢𑀸. 𑀧𑀘𑁆𑀘𑀬𑁂𑀦𑁂𑀯 𑀳𑀺 𑀢𑀦𑁆𑀢𑀺 𑀢𑀲𑁆𑀫𑀺𑀁 𑀲𑁂𑀦𑀸𑀲𑀦𑁂 𑀫𑀳𑀸𑀣𑁂𑀭𑀸 𑀢𑀲𑁆𑀲 𑀧𑀘𑁆𑀘𑀬𑀲𑁆𑀲 𑀓𑀸𑀭𑀡𑀸 𑀅𑀜𑁆𑀜𑀢𑁆𑀣 𑀅𑀕𑀦𑁆𑀢𑁆𑀯𑀸 𑀯𑀲𑀦𑁆𑀢𑀸𑀬𑁂𑀯 𑀦𑀁 𑀧𑀝𑀺𑀚𑀕𑁆𑀕𑀺𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀖𑀝𑁆𑀝𑀦𑀓𑀫𑁆𑀫𑀁 𑀤𑀲𑁆𑀲𑁂𑀢𑀼𑀁 ‘‘𑀦 𑀢𑀢𑁆𑀣 𑀫𑀦𑀼𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. ‘‘𑀯𑀺𑀢𑀓𑁆𑀓𑀁 𑀙𑀺𑀦𑁆𑀤𑀺𑀢𑁆𑀯𑀸 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀕𑀫𑀦𑀯𑀢𑁆𑀢𑁂𑀦𑁂𑀯 𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀧𑀸𑀞𑁄. 𑀫𑀼𑀤𑁆𑀤𑀯𑁂𑀤𑀺𑀓𑀸 𑀦𑀸𑀫 𑀘𑁂𑀢𑀺𑀬𑀲𑁆𑀲 𑀳𑀫𑁆𑀫𑀺𑀬𑀯𑁂𑀤𑀺𑀓𑀸. 𑀧𑀝𑀺𑀓𑁆𑀓𑀫𑁆𑀫𑀸𑀢𑀺 𑀅𑀧𑀲𑀓𑁆𑀓𑀺𑀢𑁆𑀯𑀸. 𑀲𑀫𑀸𑀦𑀮𑀸𑀪𑀓𑀢𑀺𑀓𑀸 𑀫𑀽𑀮𑀸𑀯𑀸𑀲𑁂 𑀲𑀢𑀺 𑀲𑀺𑀬𑀸, 𑀫𑀽𑀮𑀸𑀯𑀸𑀲𑀯𑀺𑀦𑀸𑀲𑁂𑀦 𑀓𑀢𑀺𑀓𑀸𑀧𑀺 𑀯𑀺𑀦𑀲𑁆𑀲𑀢𑀺. 𑀲𑀫𑀸𑀦𑀮𑀸𑀪-𑀯𑀘𑀦𑀁 𑀲𑀢𑀺 𑀤𑁆𑀯𑀻𑀲𑀼, 𑀩𑀳𑀽𑀲𑀼 𑀯𑀸 𑀬𑀼𑀚𑁆𑀚𑀢𑀺, 𑀢𑁂𑀦𑁂𑀯 𑀏𑀓𑀲𑁆𑀫𑀺𑀁 𑀅𑀯𑀲𑀺𑀝𑁆𑀞𑁂𑀢𑀺 𑀦𑁄 𑀫𑀢𑀺. 𑀢𑀸𑀯𑀓𑀸𑀮𑀺𑀓𑀁 𑀓𑀸𑀮𑁂𑀦 𑀫𑀽𑀮𑀘𑁆𑀙𑁂𑀤𑀦𑀯𑀲𑁂𑀦 𑀯𑀸 𑀅𑀜𑁆𑀜𑁂𑀲𑀁 𑀯𑀸 𑀓𑀫𑁆𑀫𑀁 𑀅𑀜𑁆𑀜𑀲𑁆𑀲 𑀲𑀺𑀬𑀸 𑀦𑀸𑀯𑀸𑀬𑀁 𑀲𑀗𑁆𑀕𑀫𑁄𑀢𑀺 𑀆𑀘𑀭𑀺𑀬𑁄. 𑀧𑀼𑀕𑁆𑀕𑀮𑀯𑀲𑁂𑀦𑁂𑀯 𑀓𑀸𑀢𑀩𑁆𑀩𑀦𑁆𑀢𑀺 𑀅𑀧𑀮𑁄𑀓𑀦𑀓𑀸𑀮𑁂 𑀲𑀗𑁆𑀖𑁄 𑀯𑀲𑁆𑀲𑀁𑀯𑀼𑀢𑁆𑀣𑀪𑀺𑀓𑁆𑀔𑀽𑀦𑀁 𑀧𑀸𑀝𑁂𑀓𑁆𑀓𑀁 ‘‘𑀏𑀢𑁆𑀢𑀓𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀯𑀢𑁆𑀣𑀁 𑀤𑁂𑀢𑀺, 𑀭𑀼𑀘𑁆𑀘𑀢𑀺 𑀲𑀗𑁆𑀖𑀲𑁆𑀲𑀸’’𑀢𑀺 𑀧𑀼𑀕𑁆𑀕𑀮𑀫𑁂𑀯 𑀧𑀭𑀸𑀫𑀲𑀺𑀢𑁆𑀯𑀸 𑀤𑀸𑀢𑀩𑁆𑀩𑀁, 𑀦 𑀲𑀗𑁆𑀖𑀯𑀲𑁂𑀦 𑀓𑀸𑀢𑀩𑁆𑀩𑀁. 𑀦 𑀲𑀗𑁆𑀖𑁄 𑀲𑀗𑁆𑀖𑀲𑁆𑀲 𑀏𑀢𑁆𑀢𑀓𑀁 𑀤𑁂𑀢𑀻𑀢𑀺. ‘‘𑀏𑀓𑀲𑁆𑀫𑀺𑀁 𑀆𑀯𑀸𑀲𑁂 𑀲𑀗𑁆𑀖𑀲𑁆𑀲 𑀓𑀫𑁆𑀫𑀁 𑀓𑀭𑁄𑀢𑀻’𑀢𑀺 𑀯𑀘𑀦𑀢𑁄 𑀲𑀗𑁆𑀖𑀯𑀲𑁂𑀦 𑀓𑀸𑀢𑀩𑁆𑀩’’𑀦𑁆𑀢𑀺 𑀮𑀺𑀔𑀺𑀢𑀁. 𑀦 𑀳𑀺 𑀢𑀣𑀸 𑀯𑀼𑀢𑁆𑀢𑁂 𑀲𑀗𑁆𑀖𑀲𑁆𑀲 𑀓𑀺𑀜𑁆𑀘𑀺 𑀓𑀫𑁆𑀫𑀁 𑀓𑀢𑀁 𑀦𑀸𑀫 𑀳𑁄𑀢𑀺. ‘‘𑀲𑀫𑁆𑀫𑀢𑀲𑁂𑀦𑀸𑀲𑀦𑀕𑁆𑀕𑀸𑀳𑀸𑀧𑀓𑀢𑁄 𑀅𑀜𑁆𑀜𑁂𑀦 𑀕𑀸𑀳𑀺𑀢𑁂𑀧𑀺 𑀕𑀸𑀳𑁄 𑀭𑀼𑀳𑀢𑀺 𑀅𑀕𑁆𑀕𑀳𑀺𑀢𑀼𑀧𑀚𑁆𑀛𑀸𑀬𑀲𑁆𑀲 𑀉𑀧𑀲𑀫𑁆𑀧𑀤𑀸 𑀯𑀺𑀬𑀸’’𑀢𑀺 𑀮𑀺𑀔𑀺𑀢𑀁. ‘‘𑀓𑀫𑁆𑀫𑀯𑀸𑀘𑀸𑀬𑀧𑀺 𑀲𑀫𑁆𑀫𑀼𑀢𑀺 𑀯𑀝𑁆𑀝𑀢𑀻’’𑀢𑀺 𑀮𑀺𑀔𑀺𑀢𑀁.

𑀅𑀝𑁆𑀞𑀧𑀺 𑀲𑁄𑀴𑀲𑀧𑀺 𑀚𑀦𑁂𑀢𑀺 𑀏𑀢𑁆𑀣 𑀓𑀺𑀁 𑀯𑀺𑀲𑀼𑀁 𑀯𑀺𑀲𑀼𑀁, 𑀉𑀤𑀸𑀳𑀼 𑀏𑀓𑀢𑁄𑀢𑀺? 𑀏𑀓𑀢𑁄𑀧𑀺 𑀯𑀝𑁆𑀝𑀢𑀺. 𑀦 𑀳𑀺 𑀢𑁂 𑀢𑀣𑀸 𑀲𑀫𑁆𑀫𑀢𑀸 𑀲𑀗𑁆𑀖𑁂𑀦 𑀓𑀫𑁆𑀫𑀓𑀢𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑁂𑀦𑁂𑀯 𑀲𑀢𑁆𑀢𑀲𑀢𑀺𑀓𑀓𑁆𑀔𑀦𑁆𑀥𑀓𑁂 𑀏𑀓𑀢𑁄 𑀅𑀝𑁆𑀞 𑀚𑀦𑀸 𑀲𑀫𑁆𑀫𑀢𑀸𑀢𑀺. 𑀢𑁂𑀲𑀁 𑀲𑀫𑁆𑀫𑀼𑀢𑀺 𑀓𑀫𑁆𑀫𑀯𑀸𑀘𑀸𑀬𑀧𑀻𑀢𑀺 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀯𑀸𑀘𑀸𑀬𑀧𑀺. 𑀅𑀧𑀮𑁄𑀓𑀦𑀓𑀫𑁆𑀫𑀲𑁆𑀲 𑀯𑀢𑁆𑀣𑀽𑀳𑀺 𑀲𑀸 𑀏𑀯 𑀓𑀫𑁆𑀫𑀯𑀸𑀘𑀸 𑀮𑀩𑁆𑀪𑀫𑀸𑀦𑀸 𑀮𑀩𑁆𑀪𑀢𑀺, 𑀢𑀲𑁆𑀲𑀸 𑀘 𑀯𑀢𑁆𑀣𑀽𑀳𑀺 𑀅𑀧𑀮𑁄𑀓𑀦𑀓𑀫𑁆𑀫𑀫𑁂𑀯 𑀮𑀩𑁆𑀪𑀫𑀸𑀦𑀁 𑀮𑀩𑁆𑀪𑀢𑀺, 𑀦 𑀅𑀜𑁆𑀜𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀫𑀁 𑀦𑀬𑀁 𑀫𑀺𑀘𑁆𑀙𑀸 𑀕𑀡𑁆𑀳𑀦𑁆𑀢𑁄 ‘‘𑀅𑀧𑀮𑁄𑀓𑀦𑀓𑀫𑁆𑀫𑀁 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀓𑀸𑀢𑀼𑀁, 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀜𑁆𑀘 𑀅𑀧𑀮𑁄𑀓𑀦𑀓𑀫𑁆𑀫𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀕𑀡𑁆𑀳𑀸𑀢𑀺, 𑀏𑀯𑀜𑁆𑀘 𑀲𑀢𑀺 𑀓𑀫𑁆𑀫𑀲𑀗𑁆𑀓𑀭𑀤𑁄𑀲𑁄 𑀆𑀧𑀚𑁆𑀚𑀢𑀺. 𑀫𑀕𑁆𑀕𑁄 𑀧𑁄𑀓𑁆𑀔𑀭𑀡𑀻𑀢𑀺 𑀏𑀢𑁆𑀣 𑀫𑀕𑁆𑀕𑁄 𑀦𑀸𑀫 𑀫𑀕𑁆𑀕𑁂 𑀓𑀢𑀤𑀻𑀖𑀲𑀸𑀮𑀸, 𑀧𑁄𑀓𑁆𑀔𑀭𑀡𑀻𑀢𑀺 𑀦𑀳𑀸𑀬𑀺𑀢𑀼𑀁 𑀓𑀢𑀧𑁄𑀓𑁆𑀔𑀭𑀡𑀻. 𑀏𑀢𑀸𑀦𑀺 𑀳𑀺 𑀅𑀲𑁂𑀦𑀸𑀲𑀦𑀸𑀦𑀻𑀢𑀺 𑀏𑀢𑁆𑀣 𑀪𑀢𑁆𑀢𑀲𑀸𑀮𑀸 𑀦 𑀆𑀕𑀢𑀸, 𑀢𑀲𑁆𑀫𑀸 𑀢𑀁 𑀲𑁂𑀦𑀸𑀲𑀦𑀦𑁆𑀢𑀺 𑀘𑁂? 𑀲𑀸𑀧𑀺 𑀏𑀢𑁆𑀣𑁂𑀯 𑀧𑀯𑀺𑀝𑁆𑀞𑀸 𑀯𑀸𑀲𑀢𑁆𑀣𑀸𑀬 𑀅𑀓𑀢𑀢𑁆𑀢𑀸. 𑀪𑁄𑀚𑀦𑀲𑀸𑀮𑀸 𑀧𑀦 𑀉𑀪𑀬𑀢𑁆𑀣 𑀦𑀸𑀕𑀢𑀸. 𑀓𑀺𑀜𑁆𑀘𑀸𑀧𑀺 𑀦𑀸𑀕𑀢𑀸, 𑀉𑀧𑀭𑀺 ‘‘𑀪𑁄𑀚𑀦𑀲𑀸𑀮𑀸 𑀧𑀦 𑀲𑁂𑀦𑀸𑀲𑀦𑀫𑁂𑀯𑀸’’𑀢𑀺 (𑀘𑀽𑀴𑀯. 𑀅𑀝𑁆𑀞. 𑁩𑁧𑁮) 𑀯𑀼𑀢𑁆𑀢𑀢𑁆𑀢𑀸 𑀲𑁂𑀦𑀸𑀲𑀦𑀁. ‘‘𑀓𑀧𑁆𑀧𑀺𑀬𑀓𑀼𑀝𑀺 𑀘 𑀏𑀢𑁆𑀣 𑀓𑀸𑀢𑀩𑁆𑀩𑀸’’𑀢𑀺 𑀯𑀤𑀦𑁆𑀢𑀺, 𑀢𑀁 𑀦𑁂𑀢𑀺 𑀏𑀓𑁂. 𑀭𑀼𑀓𑁆𑀔𑀫𑀽𑀮𑀯𑁂𑀴𑀼𑀕𑀼𑀫𑁆𑀩𑀸 𑀙𑀦𑁆𑀦𑀸 𑀓𑀯𑀸𑀝𑀩𑀤𑁆𑀥𑀸𑀯 𑀲𑁂𑀦𑀸𑀲𑀦𑀁. ‘‘𑀅𑀮𑀸𑀪𑀓𑁂𑀲𑀼 𑀆𑀯𑀸𑀲𑁂𑀲𑀽𑀢𑀺 𑀅𑀮𑀸𑀪𑀓𑁂𑀲𑀼 𑀲𑁂𑀦𑀸𑀲𑀦𑁂𑀲𑀽’’𑀢𑀺 𑀮𑀺𑀔𑀺𑀢𑀁, 𑀢𑀁 𑀬𑀼𑀢𑁆𑀢𑀁. 𑀦 𑀳𑀺 𑀧𑀸𑀝𑁂𑀓𑁆𑀓𑀁 𑀲𑁂𑀦𑀸𑀲𑀦𑀁 𑀳𑁄𑀢𑀺. 𑀢𑀁 𑀲𑀜𑁆𑀜𑀸𑀧𑁂𑀢𑁆𑀯𑀸𑀢𑀺 𑀏𑀢𑁆𑀣 𑀧𑀜𑁆𑀜𑀢𑁆𑀢𑀺𑀁 𑀅𑀕𑀘𑁆𑀙𑀦𑁆𑀢𑁂 𑀩𑀮𑀓𑁆𑀓𑀸𑀭𑁂𑀦𑀧𑀺 𑀯𑀝𑁆𑀝𑀢𑀺. 𑀅𑀬𑀫𑁆𑀧𑀻𑀢𑀺 𑀧𑀘𑁆𑀘𑀬𑁄𑀧𑀺.

𑀉𑀧𑀦𑀺𑀩𑀦𑁆𑀥𑀺𑀢𑁆𑀯𑀸𑀢𑀺 𑀢𑀲𑁆𑀲 𑀲𑀫𑀻𑀧𑁂 𑀭𑀼𑀓𑁆𑀔𑀫𑀽𑀮𑀸𑀤𑀻𑀲𑀼 𑀯𑀲𑀺𑀢𑁆𑀯𑀸 𑀢𑀢𑁆𑀣 𑀯𑀢𑁆𑀢𑀁 𑀓𑀢𑁆𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀭𑀺𑀬𑀢𑁆𑀢𑀺𑀧𑀝𑀺𑀧𑀢𑁆𑀢𑀺𑀧𑀝𑀺𑀯𑁂𑀥𑀯𑀲𑁂𑀦 𑀢𑀺𑀯𑀺𑀥𑀫𑁆𑀧𑀺. ‘‘𑀤𑀲𑀓𑀣𑀸𑀯𑀢𑁆𑀣𑀼𑀓𑀁 𑀤𑀲𑀅𑀲𑀼𑀪𑀁 𑀤𑀲𑀅𑀦𑀼𑀲𑁆𑀲𑀢𑀺’’𑀦𑁆𑀢𑀺 𑀧𑀸𑀞𑁄. ‘‘𑀧𑀞𑀫𑀪𑀸𑀕𑀁 𑀫𑀼𑀜𑁆𑀘𑀺𑀢𑁆𑀯𑀸𑀢𑀺 𑀇𑀤𑀁 𑀘𑁂 𑀧𑀞𑀫𑀕𑀸𑀳𑀺𑀢𑀯𑀢𑁆𑀣𑀼𑀢𑁄 𑀫𑀳𑀕𑁆𑀖𑀁 𑀳𑁄𑀢𑀻’’𑀢𑀺 𑀮𑀺𑀔𑀺𑀢𑀁. 𑀙𑀺𑀦𑁆𑀦𑀯𑀲𑁆𑀲𑀸𑀦𑀁 𑀯𑀲𑁆𑀲𑀸𑀯𑀸𑀲𑀺𑀓𑀁 𑀦𑀸𑀫 𑀧𑀼𑀩𑁆𑀩𑁂 𑀕𑀳𑀺𑀢𑀯𑀲𑁆𑀲𑀸𑀯𑀸𑀲𑀺𑀓𑀸𑀦𑀁 𑀧𑀘𑁆𑀙𑀸 𑀙𑀺𑀦𑁆𑀦𑀯𑀲𑁆𑀲𑀸𑀦𑀁. 𑀪𑀢𑀺𑀦𑀺𑀯𑀺𑀝𑁆𑀞𑀦𑁆𑀢𑀺 𑀪𑀢𑀺𑀁 𑀓𑀢𑁆𑀯𑀸 𑀯𑀺𑀬 𑀦𑀺𑀯𑀺𑀝𑁆𑀞𑀁 𑀧𑀭𑀺𑀬𑀺𑀝𑁆𑀞𑀁. ‘‘𑀲𑀗𑁆𑀖𑀺𑀓𑀁 𑀧𑀦…𑀧𑁂… 𑀯𑀺𑀩𑁆𑀪𑀦𑁆𑀢𑁄𑀧𑀺 𑀮𑀪𑀢𑁂𑀯𑀸’’𑀢𑀺 𑀇𑀤𑀁 𑀢𑀢𑁆𑀭𑀼𑀧𑁆𑀧𑀸𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀅𑀧𑀮𑁄𑀓𑀦𑀫𑁂𑀯 𑀧𑀫𑀸𑀡𑀁, 𑀦 𑀕𑀸𑀳𑀸𑀧𑀦𑀦𑁆𑀢𑀺 𑀓𑁂𑀘𑀺. 𑀯𑀺𑀦𑀬𑀥𑀭𑀸 𑀧𑀦 ‘‘𑀅𑀫𑁆𑀳𑀸𑀓𑀁 𑀯𑀺𑀳𑀸𑀭𑁂 𑀯𑀲𑁆𑀲𑀁 𑀉𑀧𑀕𑀢𑀸𑀦𑀁 𑀏𑀓𑁂𑀓𑀲𑁆𑀲 𑀢𑀺𑀘𑀻𑀯𑀭𑀁 𑀲𑀗𑁆𑀖𑁄 𑀤𑀲𑁆𑀲𑀢𑀻’𑀢𑀺𑀆𑀤𑀺𑀦𑀸 𑀅𑀧𑀮𑁄𑀓𑀺𑀢𑁂𑀧𑀺 𑀅𑀪𑀸𑀚𑀺𑀢𑀁 𑀯𑀺𑀩𑁆𑀪𑀦𑁆𑀢𑀓𑁄 𑀦 𑀮𑀪𑀢𑀺. ‘𑀅𑀧𑀮𑁄𑀓𑀦𑀓𑀫𑁆𑀫𑀁 𑀓𑀢𑁆𑀯𑀸 𑀕𑀸𑀳𑀺𑀢’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸, ‘𑀅𑀪𑀸𑀚𑀺𑀢𑁂 𑀯𑀺𑀩𑁆𑀪𑀫𑀢𑀻’𑀢𑀺 𑀏𑀯𑀁 𑀧𑀼𑀩𑁆𑀩𑁂 𑀯𑀼𑀢𑁆𑀢𑀢𑁆𑀢𑀸 𑀘𑀸’’𑀢𑀺 𑀯𑀤𑀦𑁆𑀢𑀺. ‘‘𑀧𑀘𑁆𑀘𑀬𑀯𑀲𑁂𑀦𑀸𑀢𑀺 𑀕𑀳𑀧𑀢𑀺𑀓𑀁 𑀯𑀸 𑀅𑀜𑁆𑀜𑀁 𑀯𑀸 𑀯𑀲𑁆𑀲𑀸𑀯𑀸𑀲𑀺𑀓𑀁 𑀧𑀘𑁆𑀘𑀬𑀯𑀲𑁂𑀦 𑀕𑀸𑀳𑀺𑀢’’𑀦𑁆𑀢𑀺 𑀮𑀺𑀔𑀺𑀢𑀁. ‘‘𑀏𑀓𑀫𑁂𑀯 𑀯𑀢𑁆𑀣𑀁 𑀤𑀸𑀢𑀩𑁆𑀩𑀦𑁆𑀢𑀺 𑀢𑀢𑁆𑀣 𑀦𑀺𑀲𑀺𑀦𑁆𑀦𑀸𑀦𑀁 𑀏𑀓𑀫𑁂𑀓𑀁 𑀯𑀢𑁆𑀣𑀁 𑀧𑀸𑀧𑀼𑀡𑀸𑀢𑀻’’𑀢𑀺 𑀮𑀺𑀔𑀺𑀢𑀁. 𑀤𑀼𑀢𑀺𑀬𑁄 𑀣𑁂𑀭𑀸𑀲𑀦𑁂𑀢𑀺 𑀅𑀦𑀼𑀪𑀸𑀕𑁄. 𑀧𑀞𑀫𑀪𑀸𑀕𑁄 𑀅𑀜𑁆𑀜𑀣𑀸 𑀣𑁂𑀭𑁂𑀦 𑀕𑀳𑀺𑀢𑁄𑀢𑀺 𑀚𑀸𑀦𑀺𑀢𑀩𑁆𑀩𑀁.

𑀉𑀧𑀦𑀦𑁆𑀤𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁩𑁨𑁦. 𑀢𑀺𑀯𑀲𑁆𑀲𑀦𑁆𑀢𑀭𑁂𑀦𑀸𑀢𑀺 𑀢𑀺𑀡𑁆𑀡𑀁 𑀯𑀲𑁆𑀲𑀸𑀦𑀁 𑀅𑀦𑁆𑀢𑁄 𑀞𑀺𑀢𑁂𑀦. 𑀳𑀢𑁆𑀣𑀺𑀫𑁆𑀳𑀺 𑀦𑀔𑁄 𑀅𑀲𑁆𑀲𑀸𑀢𑀺 𑀳𑀢𑁆𑀣𑀺𑀦𑀔𑁄. 𑀧𑀸𑀲𑀸𑀤𑀲𑁆𑀲 𑀦𑀔𑁄 𑀦𑀸𑀫 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁄. 𑀕𑀺𑀳𑀺𑀯𑀺𑀓𑀝𑀦𑀻𑀳𑀸𑀭𑁂𑀦𑀸𑀢𑀺 𑀕𑀺𑀳𑀻𑀳𑀺 𑀓𑀢𑀦𑀻𑀳𑀸𑀭𑁂𑀦𑁂𑀯. ‘‘𑀢𑁂𑀳𑀺 𑀅𑀢𑁆𑀣𑀭𑀺𑀢𑁆𑀯𑀸 𑀤𑀺𑀦𑁆𑀦𑀸𑀦𑁂𑀯 𑀦𑀺𑀲𑀻𑀤𑀺𑀢𑀼𑀁 𑀮𑀩𑁆𑀪𑀦𑁆𑀢𑀺, 𑀦 𑀪𑀺𑀓𑁆𑀔𑀼𑀦𑀸 𑀲𑀬𑀁 𑀅𑀢𑁆𑀣𑀭𑀺𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁 𑀲𑀗𑁆𑀖𑁂𑀦 𑀅𑀢𑁆𑀣𑀭𑀸𑀧𑁂𑀢𑁆𑀯𑀸 𑀯𑀸’’𑀢𑀺 𑀮𑀺𑀔𑀺𑀢𑀁.

𑀅𑀯𑀺𑀲𑁆𑀲𑀚𑁆𑀚𑀺𑀬𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁩𑁨𑁧. ‘‘𑀦 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀁 𑀲𑀗𑁆𑀖𑁂𑀦 𑀯𑀸 𑀕𑀡𑁂𑀦 𑀯𑀸 𑀧𑀼𑀕𑁆𑀕𑀮𑁂𑀦 𑀯𑀸’’𑀢𑀺 𑀯𑀘𑀦𑀁 ‘‘𑀬𑀁 𑀅𑀕𑀭𑀼𑀪𑀡𑁆𑀟𑀁 𑀯𑀺𑀲𑁆𑀲𑀚𑁆𑀚𑀺𑀬𑀁 𑀯𑁂𑀪𑀗𑁆𑀕𑀺𑀬𑀁 𑀲𑀗𑁆𑀖𑀺𑀓𑀁, 𑀢𑀁 𑀕𑀡𑁄 𑀘𑁂 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑀢𑀺 𑀧𑀼𑀕𑁆𑀕𑀮𑁄𑀧𑀺 𑀯𑀸, 𑀕𑀡𑁂𑀦 𑀯𑀸 𑀧𑀼𑀕𑁆𑀕𑀮𑁂𑀦 𑀯𑀸 𑀯𑀺𑀲𑁆𑀲𑀚𑁆𑀚𑀺𑀢𑀁 𑀲𑀗𑁆𑀖𑁂𑀦 𑀯𑀺𑀲𑁆𑀲𑀚𑁆𑀚𑀺𑀢𑀲𑀤𑀺𑀲𑀫𑁂𑀯 𑀳𑁄𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀯𑀘𑀦𑀁 𑀲𑀸𑀥𑁂𑀢𑀺, 𑀅𑀜𑁆𑀜𑀣𑀸 𑀏𑀢𑁆𑀣 𑀕𑀡𑀧𑀼𑀕𑁆𑀕𑀮𑀕𑁆𑀕𑀳𑀡𑀁 𑀦𑀺𑀭𑀢𑁆𑀣𑀓𑀁. 𑀅𑀭𑀜𑁆𑀚𑀭𑁄 𑀉𑀤𑀓𑀘𑀸𑀝𑀺, 𑀅𑀮𑀜𑁆𑀚𑀮𑁄, 𑀩𑀳𑀼𑀉𑀤𑀓𑀕𑀡𑁆𑀳𑀦𑀓𑁄𑀢𑀺 𑀅𑀢𑁆𑀣𑁄. ‘‘𑀯𑀝𑁆𑀝𑀘𑀸𑀝𑀺 𑀯𑀺𑀬 𑀳𑀼𑀢𑁆𑀯𑀸 𑀣𑁄𑀓𑀁 𑀤𑀻𑀖𑀫𑀼𑀔𑁄 𑀫𑀚𑁆𑀛𑁂 𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑁆𑀯𑀸 𑀓𑀢𑁄’’𑀢𑀺 𑀮𑀺𑀔𑀺𑀢𑀁. 𑀫𑀁𑀲𑀤𑀺𑀩𑁆𑀩𑀥𑀫𑁆𑀫𑀩𑀼𑀤𑁆𑀥𑀲𑀫𑀦𑁆𑀢𑀘𑀓𑁆𑀔𑀼𑀯𑀲𑁂𑀦 𑀧𑀜𑁆𑀘.

𑀕𑀭𑀼𑀪𑀡𑁆𑀟𑁂𑀦 𑀘 𑀕𑀭𑀼𑀪𑀡𑁆𑀟𑀦𑁆𑀢𑀺 𑀲𑀁𑀳𑀸𑀭𑀺𑀫𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀧𑀢𑁆𑀢𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑀼𑀦𑁆𑀢𑀺 𑀅𑀝𑁆𑀝𑀓𑀘𑁆𑀙𑀦𑁆𑀦𑁂𑀦 𑀓𑀢𑁂 𑀫𑀜𑁆𑀘𑁂. 𑀯𑀝𑁆𑀝𑀮𑁄𑀳𑀁 𑀦𑀸𑀫 𑀧𑀻𑀢𑀯𑀡𑁆𑀡𑀁. 𑀧𑀸𑀭𑀺𑀳𑀸𑀭𑀺𑀬𑀁 𑀦 𑀯𑀝𑁆𑀝𑀢𑀻𑀢𑀺 𑀆𑀕𑀦𑁆𑀢𑀼𑀓𑀲𑁆𑀲 𑀅𑀤𑀢𑁆𑀯𑀸 𑀧𑀭𑀺𑀘𑀸𑀭𑀺𑀓𑀳𑀢𑁆𑀣𑀢𑁄 𑀅𑀢𑁆𑀢𑀦𑁄 𑀦𑀸𑀫𑀁 𑀮𑀺𑀔𑀸𑀧𑁂𑀢𑁆𑀯𑀸 𑀕𑀳𑁂𑀢𑁆𑀯𑀸 𑀬𑀣𑀸𑀲𑀼𑀔𑀁 𑀧𑀭𑀺𑀳𑀭𑀺𑀢𑀼𑀁 𑀦 𑀯𑀝𑁆𑀝𑀢𑀺. ‘‘𑀕𑀺𑀳𑀺𑀯𑀺𑀓𑀝𑀦𑀻𑀳𑀸𑀭𑁂𑀦𑁂𑀯𑀸𑀢𑀺 𑀬𑀸𑀯 𑀅𑀢𑁆𑀢𑀦𑁄 𑀓𑀫𑁆𑀫𑀦𑀺𑀩𑁆𑀩𑀢𑁆𑀢𑀺, 𑀢𑀸𑀯 𑀕𑀳𑁂𑀢𑁆𑀯𑀸 𑀤𑁂𑀢𑀻’’𑀢𑀺 𑀮𑀺𑀔𑀺𑀢𑀁. 𑀲𑀺𑀔𑀭𑀁 𑀦𑀸𑀫 𑀬𑁂𑀦 𑀧𑀭𑀺𑀩𑁆𑀪𑀫𑀦𑁆𑀢𑀸 𑀙𑀺𑀦𑁆𑀤𑀦𑁆𑀢𑀺. 𑀧𑀢𑁆𑀢𑀩𑀦𑁆𑀥𑀓𑁄 𑀦𑀸𑀫 𑀧𑀢𑁆𑀢𑀲𑁆𑀲 𑀕𑀡𑁆𑀞𑀺𑀆𑀤𑀺𑀓𑀸𑀭𑀓𑁄. ‘‘𑀧𑀝𑀺𑀫𑀸𑀦𑀁 𑀲𑀼𑀯𑀡𑁆𑀡𑀸𑀤𑀺𑀧𑀢𑁆𑀢𑀓𑀸𑀭𑀓𑁄’’𑀢𑀺𑀧𑀺 𑀯𑀤𑀦𑁆𑀢𑀺. ‘‘𑀅𑀟𑁆𑀠𑀩𑀸𑀳𑀽𑀢𑀺 𑀓𑀧𑁆𑀧𑀭𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀅𑀁𑀲𑀓𑀽𑀝’’𑀦𑁆𑀢𑀺 𑀮𑀺𑀔𑀺𑀢𑀁. 𑀇𑀢𑁄 𑀧𑀝𑁆𑀞𑀸𑀬𑀸𑀢𑀺 𑀇𑀫𑀁 𑀧𑀸𑀴𑀺𑀁 𑀆𑀤𑀺𑀁 𑀓𑀢𑁆𑀯𑀸. 𑀤𑀡𑁆𑀟𑀫𑀼𑀕𑁆𑀕𑀭𑁄 𑀦𑀸𑀫 𑀬𑁂𑀦 𑀭𑀚𑀺𑀢𑀘𑀻𑀯𑀭𑀁 𑀧𑁄𑀣𑁂𑀦𑁆𑀢𑀺. ‘𑀧𑀘𑁆𑀘𑀢𑁆𑀣𑀭𑀡𑀕𑀢𑀺𑀓’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸, ‘‘𑀢𑀫𑁆𑀧𑀺 𑀕𑀭𑀼𑀪𑀡𑁆𑀟𑀫𑁂𑀯𑀸𑀢𑀺 𑀯𑀼𑀢𑁆𑀢𑀢𑁆𑀢𑀸 𑀘 𑀅𑀧𑀺-𑀲𑀤𑁆𑀤𑁂𑀦 𑀧𑀸𑀯𑀸𑀭𑀸𑀤𑀺𑀧𑀘𑁆𑀘𑀢𑁆𑀣𑀭𑀡𑀁 𑀲𑀩𑁆𑀩𑀁 𑀕𑀭𑀼𑀪𑀡𑁆𑀟𑀫𑁂𑀯𑀸’’𑀢𑀺 𑀯𑀤𑀦𑁆𑀢𑀺. 𑀏𑀢𑁂𑀦𑁂𑀯 𑀲𑀼𑀢𑁆𑀢𑁂𑀦 𑀅𑀜𑁆𑀜𑀣𑀸 𑀅𑀢𑁆𑀣𑀁 𑀯𑀢𑁆𑀯𑀸 ‘‘𑀧𑀸𑀯𑀸𑀭𑀸𑀤𑀺𑀧𑀘𑁆𑀘𑀢𑁆𑀣𑀭𑀡𑀁 𑀦 𑀕𑀭𑀼𑀪𑀡𑁆𑀟𑀁, 𑀪𑀸𑀚𑀦𑀻𑀬𑀫𑁂𑀯, 𑀲𑁂𑀦𑀸𑀲𑀦𑀢𑁆𑀣𑀸𑀬 𑀤𑀺𑀦𑁆𑀦𑀧𑀘𑁆𑀘𑀢𑁆𑀣𑀭𑀡𑀫𑁂𑀯 𑀕𑀭𑀼𑀪𑀡𑁆𑀟’’𑀦𑁆𑀢𑀺 𑀯𑀤𑀦𑁆𑀢𑀺, 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁. 𑀕𑀡𑁆𑀞𑀺𑀓𑀸𑀢𑀺 𑀘𑀻𑀯𑀭𑀕𑀡𑁆𑀞𑀺𑀓𑀸. 𑀪𑀜𑁆𑀘𑀓𑁄 𑀦𑀸𑀫 𑀲𑀭𑀓𑁄.

𑀦𑀯𑀓𑀫𑁆𑀫𑀤𑀸𑀦𑀓𑀣𑀸𑀯𑀡𑁆𑀡𑀦𑀸

𑁩𑁨𑁩-𑁪. 𑀅𑀕𑁆𑀕𑀴𑀩𑀦𑁆𑀥𑀲𑀽𑀘𑀺𑀤𑁆𑀯𑀸𑀭𑀓𑀭𑀡𑀫𑀢𑁆𑀢𑁂𑀦𑀧𑀺. ‘‘𑀓𑀧𑁄𑀢𑀪𑀡𑁆𑀟𑀺𑀓𑀸 𑀦𑀸𑀫 𑀯𑀴𑀪𑀺𑀬𑀸 𑀉𑀧𑀭𑀺 𑀞𑀧𑁂𑀢𑀩𑁆𑀩𑀯𑀮𑀬𑀁 𑀯𑀸 𑀢𑀺𑀡𑀘𑁆𑀙𑀤𑀦𑀕𑁂𑀳𑀲𑁆𑀲 𑀧𑀺𑀝𑁆𑀞𑀺𑀯𑀁𑀲𑀲𑁆𑀲 𑀳𑁂𑀝𑁆𑀞𑀸 𑀞𑀧𑁂𑀢𑀩𑁆𑀩𑀁 𑀯𑀸 𑀉𑀪𑀬𑀫𑀲𑁆𑀲 𑀕𑀢𑀸 𑀤𑀸𑀭𑀽’’𑀢𑀺 𑀮𑀺𑀔𑀺𑀢𑀁. 𑀓𑀸𑀭𑀦𑁆𑀢𑀭𑀸𑀢𑀺 𑀢𑀤𑀸 𑀧𑀼𑀦 𑀧𑀯𑀺𑀲𑀝𑁆𑀞𑀁 𑀧𑀼𑀩𑁆𑀩𑀧𑀬𑁄𑀚𑀺𑀢𑀸𑀦𑀸𑀦𑀁 𑀯𑀘𑀦𑀧𑀸𑀢𑀲𑁂𑀦𑀸𑀲𑀦𑀯𑀸𑀲𑁄. 𑀦 𑀧𑀦 𑀧𑀢𑀺𑀲𑀝𑁆𑀞𑀢𑁄𑀢𑀺 𑀤𑀝𑁆𑀞𑀩𑁆𑀩𑀁. 𑀲𑀩𑁆𑀩𑀢𑁆𑀣 𑀯𑀺𑀦𑀝𑁆𑀞𑀯𑀸𑀲𑁄 𑀦 𑀘 𑀧𑀝𑀺𑀲𑁂𑀥𑀓𑁄 𑀳𑁄𑀢𑀻𑀢𑀺 𑀤𑀝𑁆𑀞𑀩𑁆𑀩𑁄. 𑀤𑁆𑀯𑀸𑀭𑀯𑀸𑀢𑀧𑀸𑀦𑀸𑀤𑀻𑀦𑀺 𑀅𑀧𑀳𑀭𑀺𑀢𑁆𑀯𑀸 𑀤𑀸𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑁄 ‘‘𑀧𑀝𑀺𑀤𑀸𑀢𑀩𑁆𑀩𑀸𑀦𑀺𑀬𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀕𑁄𑀧𑀸𑀦𑀲𑀺𑀆𑀤𑀬𑁄 𑀤𑁂𑀦𑁆𑀢𑀲𑁆𑀲 𑀯𑀺𑀳𑀸𑀭𑁄 𑀧𑀮𑀼𑀚𑁆𑀚𑀢𑀻𑀢𑀺 ‘‘𑀫𑀽𑀮𑀁 𑀯𑀸 𑀤𑀸𑀢𑀩𑁆𑀩’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀏𑀓𑁂. ‘‘𑀦𑁂𑀯𑀸𑀲𑀺𑀓𑀸 𑀧𑀓𑀢𑀺𑀬𑀸 𑀅𑀦𑀢𑁆𑀣𑀢𑀸𑀬 𑀪𑀽𑀫𑀺𑀬𑀸 𑀞𑀧𑁂𑀦𑁆𑀢𑀺 𑀘𑁂, 𑀢𑁂𑀲𑀫𑁆𑀧𑀺 𑀅𑀦𑀸𑀧𑀢𑁆𑀢𑀺𑀬𑁂𑀯𑀸’’𑀢𑀺 𑀮𑀺𑀔𑀺𑀢𑀁. ‘‘𑀤𑁆𑀯𑀸𑀭𑀯𑀸𑀢𑀧𑀸𑀦𑀸𑀤𑀬𑁄 𑀅𑀧𑀭𑀺𑀓𑀫𑁆𑀫𑀓𑀢𑀸𑀧𑀺 𑀅𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀦 𑀅𑀧𑀲𑁆𑀲𑀬𑀺𑀢𑀩𑁆𑀩𑀸’’𑀢𑀺 𑀮𑀺𑀔𑀺𑀢𑀁.

𑀲𑀗𑁆𑀖𑀪𑀢𑁆𑀢𑀸𑀤𑀺𑀅𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸

𑀉𑀤𑁆𑀤𑁂𑀲𑀪𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁩𑁨𑁫. 𑀬𑀸 𑀪𑀢𑁆𑀢𑀼𑀤𑁆𑀤𑁂𑀲𑀝𑁆𑀞𑀸𑀦𑀪𑀽𑀢𑀸𑀬 𑀪𑁄𑀚𑀦𑀲𑀸𑀮𑀸𑀬 𑀧𑀓𑀢𑀺𑀞𑀺𑀢𑀺𑀓𑀸. 𑀤𑀺𑀦𑁆𑀦𑀁 𑀧𑀦𑀸𑀢𑀺 𑀬𑀣𑀸 𑀲𑁄 𑀤𑀸𑀬𑀓𑁄 𑀤𑁂𑀢𑀺, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀲𑀗𑁆𑀖𑀢𑁄 𑀪𑀦𑁆𑀢𑁂’’𑀢𑀺𑀆𑀤𑀺𑀫𑀸𑀳. 𑀏𑀓𑀯𑀴𑀜𑁆𑀚𑀦𑁆𑀢𑀺 𑀏𑀓𑀤𑁆𑀯𑀸𑀭𑁂𑀦 𑀯𑀴𑀜𑁆𑀚𑀺𑀢𑀩𑁆𑀩𑀁. 𑀢𑀺𑀘𑀻𑀯𑀭𑀧𑀭𑀺𑀯𑀸𑀭𑀦𑁆𑀢𑀺 𑀏𑀢𑁆𑀣 ‘‘𑀉𑀤𑀓𑀫𑀢𑁆𑀢𑀮𑀸𑀪𑀻 𑀯𑀺𑀬 𑀅𑀜𑁆𑀜𑁄𑀧𑀺 𑀉𑀤𑁆𑀤𑁂𑀲𑀪𑀢𑁆𑀢𑀁 𑀅𑀮𑀪𑀺𑀢𑁆𑀯𑀸 𑀯𑀢𑁆𑀣𑀸𑀤𑀺𑀫𑀦𑁂𑀓𑀧𑁆𑀧𑀓𑀸𑀭𑀁 𑀮𑀪𑀢𑀺 𑀘𑁂, 𑀢𑀲𑁆𑀲𑁂𑀯 𑀢’’𑀦𑁆𑀢𑀺 𑀮𑀺𑀔𑀺𑀢𑀁. ‘‘𑀉𑀤𑁆𑀤𑁂𑀲𑀧𑀢𑁆𑀢𑁂 𑀤𑁂𑀣𑀸’𑀢𑀺 𑀯𑀢𑁆𑀯𑀸 𑀕𑀳𑁂𑀢𑁆𑀯𑀸 𑀆𑀕𑀢𑀪𑀸𑀯𑁂𑀦 𑀲𑀗𑁆𑀖𑀲𑁆𑀲 𑀧𑀭𑀺𑀘𑁆𑀘𑀢𑁆𑀢𑀁 𑀦 𑀳𑁄𑀢𑀺𑀬𑁂𑀯 𑀢𑀲𑁆𑀲𑁂𑀯 𑀳𑀢𑁆𑀣𑁂 𑀕𑀢𑀢𑁆𑀢𑀸, 𑀢𑀲𑁆𑀫𑀸 𑀢𑁂𑀳𑀺 𑀯𑀼𑀢𑁆𑀢𑀓𑁆𑀓𑀫𑁂𑀦 𑀲𑀩𑁆𑀩𑁂𑀳𑀺 𑀪𑀸𑀚𑁂𑀢𑁆𑀯𑀸 𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀝𑀺𑀧𑀸𑀝𑀺𑀧𑀢𑁆𑀢𑀁 𑀯𑀸 𑀞𑀺𑀢𑀺𑀓𑀸𑀬 𑀞𑀺𑀢𑀧𑀢𑁆𑀢𑀁 𑀯𑀸. ‘‘𑀓𑀽𑀝𑀝𑁆𑀞𑀺𑀢𑀺𑀓𑀸 𑀦𑀸𑀫 𑀅𑀕𑁆𑀕𑀳𑁂𑀢𑀩𑁆𑀩𑀸𑀦𑀫𑁆𑀧𑀺 𑀕𑀸𑀳𑀺𑀢𑀢𑁆𑀢𑀸’’𑀢𑀺 𑀮𑀺𑀔𑀺𑀢𑀁, ‘‘𑀧𑀡𑀻𑀢𑀪𑀢𑁆𑀢𑀝𑁆𑀞𑀺𑀢𑀺𑀓𑀜𑁆𑀘 𑀅𑀚𑀸𑀦𑀺𑀢𑁆𑀯𑀸 𑀫𑀺𑀲𑁆𑀲𑁂𑀢𑁆𑀯𑀸 𑀕𑀸𑀳𑀺𑀢𑁂𑀧𑀺 𑀏𑀯𑀫𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀘 𑀮𑀺𑀔𑀺𑀢𑀁. 𑀢𑀜𑁆𑀘𑁂 𑀣𑁂𑀬𑁆𑀬𑀸𑀬 𑀳𑀭𑀦𑁆𑀢𑀺 𑀧𑀢𑁆𑀢𑀳𑀸𑀭𑀓𑀸, 𑀆𑀡𑀸𑀧𑀓𑀲𑁆𑀲 𑀕𑀻𑀯𑀸 𑀳𑁄𑀢𑀺. 𑀅𑀢𑀺𑀓𑁆𑀓𑀦𑁆𑀢𑀫𑁆𑀧𑀺 𑀞𑀺𑀢𑀺𑀓𑀁 𑀞𑀧𑁂𑀢𑁆𑀯𑀸𑀢𑀺 𑀏𑀢𑁆𑀣 ‘‘𑀢𑀁𑀤𑀺𑀯𑀲𑀫𑁂𑀯 𑀘𑁂 𑀪𑀺𑀓𑁆𑀔𑀸 𑀮𑀩𑁆𑀪𑀢𑀺, 𑀅𑀧𑀭𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀦 𑀮𑀩𑁆𑀪𑀢𑀺 𑀓𑀺𑀭𑀸’’𑀢𑀺 𑀮𑀺𑀔𑀺𑀢𑀁. 𑀧𑀘𑁆𑀙𑀸 ‘‘𑀲𑀩𑁆𑀩𑁄 𑀲𑀗𑁆𑀖𑁄 𑀧𑀭𑀺𑀪𑀼𑀜𑁆𑀚𑀢𑀽’’𑀢𑀺 𑀅𑀯𑀼𑀢𑁆𑀢𑁂𑀧𑀺 𑀪𑀸𑀚𑁂𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀁. ‘‘𑀏𑀢𑁆𑀢𑀓𑁂 𑀪𑀺𑀓𑁆𑀔𑀽 𑀲𑀗𑁆𑀖𑀢𑁄 𑀉𑀤𑁆𑀤𑀺𑀲𑀺𑀢𑁆𑀯𑀸 𑀤𑁂𑀣𑀸’𑀢𑀺 𑀅𑀯𑀢𑁆𑀯𑀸 ‘𑀏𑀢𑁆𑀢𑀓𑀸𑀦𑀁 𑀪𑀺𑀓𑁆𑀔𑀽𑀦𑀁 𑀪𑀢𑁆𑀢𑀁 𑀕𑀡𑁆𑀳𑀣𑀸’𑀢𑀺 𑀤𑀺𑀦𑁆𑀦𑀁 𑀲𑀗𑁆𑀖𑀺𑀓𑀦𑀺𑀫𑀦𑁆𑀢𑀦𑀁 𑀦𑀸𑀫𑀸’’𑀢𑀺 𑀮𑀺𑀔𑀺𑀢𑀁.

𑀦𑀺𑀫𑀦𑁆𑀢𑀦𑀪𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑀧𑀝𑀺𑀧𑀸𑀝𑀺𑀬𑀸𑀢𑀺 𑀬𑀣𑀸𑀮𑀤𑁆𑀥𑀧𑀝𑀺𑀧𑀸𑀝𑀺𑀬𑀸. 𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸𑀢𑀺 𑀪𑀢𑁆𑀢𑀁 𑀕𑀡𑁆𑀳𑀣𑀸𑀢𑀺 𑀧𑀤𑀁 𑀅𑀯𑀢𑁆𑀯𑀸. 𑀆𑀮𑁄𑀧𑀲𑀗𑁆𑀔𑁂𑀧𑁂𑀦𑀸𑀢𑀺 𑀅𑀬𑀁 𑀦𑀬𑁄 𑀦𑀺𑀫𑀦𑁆𑀢𑀦𑀸𑀬𑀫𑁂𑀯, 𑀉𑀤𑁆𑀤𑁂𑀲𑀪𑀢𑁆𑀢𑁂 𑀧𑀦 𑀏𑀓𑀲𑁆𑀲 𑀧𑀳𑁄𑀦𑀓𑀧𑁆𑀧𑀫𑀸𑀡𑁂 𑀏𑀯 𑀞𑀺𑀢𑀺𑀓𑀸 𑀢𑀺𑀝𑁆𑀞𑀢𑀺. ‘‘𑀏𑀓𑀯𑀸𑀭𑀦𑁆𑀢𑀺 𑀬𑀸𑀯 𑀢𑀲𑁆𑀫𑀺𑀁 𑀆𑀯𑀸𑀲𑁂 𑀯𑀲𑀦𑁆𑀢𑀺 𑀪𑀺𑀓𑁆𑀔𑀽, 𑀲𑀩𑁆𑀩𑁂𑀯 𑀮𑀪𑀦𑁆𑀢𑀻’’𑀢𑀺 𑀮𑀺𑀔𑀺𑀢𑀁.

𑀲𑀮𑀸𑀓𑀪𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑀦 𑀳𑀺 𑀩𑀳𑀺𑀲𑀻𑀫𑀸𑀬 𑀲𑀗𑁆𑀖𑀮𑀸𑀪𑁄𑀢𑀺 𑀏𑀢𑁆𑀣 ‘‘𑀉𑀤𑁆𑀤𑁂𑀲𑀪𑀢𑁆𑀢𑀸𑀤𑀻𑀲𑀼 𑀩𑀳𑀺𑀲𑀻𑀫𑀸𑀬 𑀞𑀺𑀢𑀲𑁆𑀲𑀧𑀺 𑀘𑁂 𑀉𑀧𑀸𑀲𑀓𑀸 𑀤𑁂𑀦𑁆𑀢𑀺, 𑀕𑀳𑁂𑀢𑀼𑀁 𑀮𑀪𑀦𑁆𑀢𑀺, 𑀅𑀢𑁆𑀢𑀦𑁄𑀧𑀺 𑀧𑀸𑀧𑁂𑀢𑁆𑀯𑀸 𑀕𑀳𑀡𑀁 𑀅𑀦𑀼𑀜𑁆𑀜𑀸𑀢𑀁, 𑀢𑀣𑀸 𑀇𑀥 𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀦 𑀧𑀸𑀧𑀼𑀡𑀦𑁆𑀢𑀻𑀢𑀺 𑀉𑀤𑁆𑀤𑀺𑀲𑀺𑀢𑁆𑀯𑀸𑀧𑀺. 𑀯𑀸𑀭𑀕𑀸𑀫𑀦𑁆𑀢𑀺 𑀤𑀽𑀭𑀢𑁆𑀢𑀸 𑀯𑀸𑀭𑁂𑀦 𑀦𑀺𑀕𑁆𑀕𑀳𑁂𑀦 𑀕𑀦𑁆𑀢𑀩𑁆𑀩𑀕𑀸𑀫𑁂. 𑀨𑀸𑀢𑀺𑀓𑀫𑁆𑀫𑀫𑁂𑀯𑀸𑀢𑀺 𑀅𑀢𑀺𑀭𑁂𑀓𑀮𑀸𑀪𑀸 𑀘 𑀪𑀯𑀦𑁆𑀢𑀺. 𑀲𑀫𑁆𑀫𑀼𑀔𑀻𑀪𑀽𑀢𑀲𑁆𑀲𑀸𑀢𑀺 𑀬𑁂𑀪𑀼𑀬𑁆𑀬𑁂𑀦 𑀘𑁂 𑀪𑀺𑀓𑁆𑀔𑀽 𑀩𑀳𑀺𑀲𑀻𑀫𑀁 𑀕𑀢𑀸, 𑀲𑀫𑁆𑀫𑀼𑀔𑀻𑀪𑀽𑀢𑀲𑁆𑀲 𑀧𑀸𑀧𑁂𑀢𑀩𑁆𑀩𑀁. 𑀲𑀪𑀸𑀕𑀢𑁆𑀢𑀸 𑀳𑀺 𑀏𑀓𑁂𑀦 𑀮𑀤𑁆𑀥𑀁 𑀲𑀩𑁆𑀩𑁂𑀲𑀁 𑀧𑀳𑁄𑀢𑀺, 𑀢𑀲𑁆𑀫𑀺𑀫𑁆𑀧𑀺 𑀅𑀲𑀢𑀺 𑀅𑀢𑁆𑀢𑀦𑁄 𑀧𑀸𑀧𑁂𑀢𑁆𑀯𑀸 𑀤𑀸𑀢𑀩𑁆𑀩𑀁. ‘‘𑀮𑀤𑁆𑀥𑀸 𑀯𑀸 𑀅𑀮𑀤𑁆𑀥𑀸 𑀯𑀸’’𑀢𑀺 𑀯𑀘𑀦𑀲𑀺𑀮𑀺𑀝𑁆𑀞𑀯𑀲𑁂𑀦 𑀯𑀼𑀢𑁆𑀢𑀁. 𑀯𑀺𑀳𑀸𑀭𑁂 𑀅𑀧𑀸𑀧𑀺𑀢𑀁 𑀧𑀦…𑀧𑁂… 𑀦 𑀯𑀝𑁆𑀝𑀢𑀻𑀢𑀺 𑀲𑀮𑀸𑀓𑀪𑀢𑁆𑀢𑀁 𑀯𑀺𑀳𑀸𑀭𑁂 𑀉𑀤𑁆𑀤𑀺𑀲𑀺𑀬𑀢𑀺. 𑀢𑁂𑀦 𑀧𑀦 𑀤𑀺𑀦𑁆𑀦𑀲𑀮𑀸𑀓𑁂𑀦. 𑀢𑀲𑁆𑀲𑀸𑀢𑀺 𑀕𑀳𑁂𑀢𑁆𑀯𑀸 𑀕𑀢𑀲𑁆𑀲. 𑀲𑀮𑀸𑀓𑀸 𑀕𑀳𑁂𑀢𑀩𑁆𑀩𑀸𑀢𑀺 𑀬𑀼𑀢𑁆𑀢𑀁 𑀯𑀺𑀬. 𑀲𑀩𑁆𑀩𑀧𑁄𑀢𑁆𑀣𑀓𑁂𑀲𑀼 ‘‘𑀕𑀸𑀳𑁂𑀢𑀩𑁆𑀩𑀸’’𑀢𑀺 𑀧𑀸𑀞𑁄, 𑀢𑀲𑁆𑀫𑀸 𑀢𑁂𑀦𑀸𑀢𑀺 𑀲𑀮𑀸𑀓𑀕𑁆𑀕𑀸𑀳𑀸𑀧𑀓𑁂𑀦𑀸𑀢𑀺 𑀅𑀢𑁆𑀣𑁄. ‘‘𑀘𑁄𑀭𑀺𑀓𑀸𑀬 𑀕𑀳𑀺𑀢𑀢𑁆𑀢𑀸 𑀦 𑀧𑀸𑀧𑀼𑀡𑀸𑀢𑀻’’𑀢𑀺 𑀯𑀘𑀦𑀢𑁄 ‘‘𑀓𑀼𑀝𑀺𑀲𑁄𑀥𑀦𑀁 𑀯𑀝𑁆𑀝𑀢𑀻’’𑀢𑀺 𑀘 𑀤𑀻𑀧𑀯𑀸𑀲𑀺𑀦𑁄 𑀯𑀤𑀦𑁆𑀢𑀺 𑀓𑀺𑀭. 𑀏𑀓𑀁 𑀫𑀳𑀸𑀣𑁂𑀭𑀲𑁆𑀲𑀸𑀢𑀺 𑀫𑀳𑀸𑀣𑁂𑀭𑁄 𑀯𑀺𑀳𑀸𑀭𑀢𑁄 𑀬𑁂𑀪𑀼𑀬𑁆𑀬𑁂𑀦 𑀦 𑀕𑀘𑁆𑀙𑀢𑀺, 𑀇𑀢𑀭𑁂 𑀓𑀤𑀸𑀘𑀺 𑀕𑀘𑁆𑀙𑀢𑀺, 𑀢𑀲𑁆𑀫𑀸 𑀲𑀪𑀸𑀕𑀸 𑀘𑁂, 𑀅𑀢𑁆𑀢𑀦𑁄 𑀧𑀸𑀧𑁂𑀢𑁆𑀯𑀸 𑀧𑀼𑀦 𑀇𑀢𑀭𑁂𑀲𑀁 𑀤𑀺𑀬𑁆𑀬𑀢𑀺. 𑀯𑀺𑀳𑀸𑀭𑁂 𑀣𑁂𑀭𑀲𑁆𑀲 𑀧𑀢𑁆𑀢𑀲𑀮𑀸𑀓𑀪𑀢𑁆𑀢𑀦𑁆𑀢𑀺 𑀫𑀳𑀸𑀣𑁂𑀭𑁄 𑀏𑀓𑀓𑁄𑀯 𑀯𑀺𑀳𑀸𑀭𑁂 𑀑𑀳𑀻𑀦𑁄, ‘‘𑀅𑀯𑀲𑁆𑀲𑀁 𑀲𑀩𑁆𑀩𑀲𑀮𑀸𑀓𑀸 𑀅𑀢𑁆𑀢𑀦𑁄 𑀧𑀸𑀧𑁂𑀢𑁆𑀯𑀸 𑀞𑀺𑀢𑁄’’𑀢𑀺 𑀧𑀝𑀺𑀲𑁆𑀲𑀬𑀁 𑀕𑀦𑁆𑀢𑁆𑀯𑀸 𑀆𑀕𑀦𑁆𑀢𑀼𑀓𑀪𑀺𑀓𑁆𑀔𑀽𑀦𑀫𑁆𑀧𑀺 𑀅𑀤𑀲𑁆𑀲𑀦𑀢𑁄 𑀓𑀼𑀓𑁆𑀓𑀼𑀘𑁆𑀘𑀁 𑀅𑀓𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀺.

𑀧𑀓𑁆𑀔𑀺𑀓𑀪𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑀉𑀧𑁄𑀲𑀣𑀤𑀺𑀯𑀲𑁂 𑀆𑀧𑀢𑁆𑀢𑀺𑀤𑁂𑀲𑀦𑀁 𑀲𑀦𑁆𑀥𑀸𑀬 ‘‘𑀧𑀭𑀺𑀲𑀼𑀤𑁆𑀥𑀲𑀻𑀮𑀸𑀦’’𑀦𑁆𑀢𑀺 𑀆𑀳. 𑀮𑁂𑀔𑀁 𑀓𑀢𑁆𑀯𑀸 𑀦𑀺𑀩𑀤𑁆𑀥𑀸𑀧𑀺𑀢𑀁. ‘‘𑀆𑀕𑀦𑁆𑀢𑀼𑀓𑀪𑀢𑁆𑀢𑀫𑁆𑀧𑀺 𑀕𑀫𑀺𑀓𑀪𑀢𑁆𑀢𑀫𑁆𑀧𑀻’’𑀢𑀺 𑀆𑀕𑀦𑁆𑀢𑀼𑀓𑁄𑀯 𑀳𑀼𑀢𑁆𑀯𑀸 𑀕𑀘𑁆𑀙𑀦𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀦𑀸𑀣𑀕𑀺𑀮𑀸𑀦𑀼𑀧𑀝𑁆𑀞𑀸𑀓𑁄𑀧𑀺 𑀢𑁂𑀦 𑀤𑀺𑀦𑁆𑀦𑀁 𑀪𑀼𑀜𑁆𑀚𑀢𑀺 𑀘𑁂, 𑀢𑀲𑁆𑀲𑀧𑀺 𑀧𑀸𑀧𑁂𑀢𑀩𑁆𑀩𑀫𑁂𑀯. 𑀕𑀼𑀴𑀧𑀺𑀡𑁆𑀟𑀁 𑀢𑀸𑀮𑀧𑀓𑁆𑀓𑀫𑀢𑁆𑀢𑀁.

𑀲𑁂𑀦𑀸𑀲𑀦𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀗𑁆𑀖𑀪𑁂𑀤𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸

𑀙𑀲𑀓𑁆𑀬𑀧𑀩𑁆𑀩𑀚𑁆𑀚𑀸𑀓𑀣𑀸𑀯𑀡𑁆𑀡𑀦𑀸

𑁩𑁩𑁦. ‘‘𑀅𑀦𑀼𑀧𑀺𑀬𑀁 𑀦𑀸𑀫𑀸’’𑀢𑀺 𑀏𑀓𑀯𑀘𑀦𑁂𑀦 𑀤𑀺𑀲𑁆𑀲𑀢𑀺, 𑀲𑀢𑁆𑀢𑀫𑀺𑀬𑀁 𑀧𑀦 ‘‘𑀅𑀦𑀼𑀧𑀺𑀬𑀸𑀬’’𑀦𑁆𑀢𑀺. ‘‘𑀓𑀸𑀴𑀼𑀤𑀸𑀬𑀺𑀧𑁆𑀧𑀪𑀼𑀢𑀬𑁄 𑀤𑀲 𑀤𑀽𑀢𑀸’’𑀢𑀺 𑀧𑀸𑀞𑁄. ‘‘𑀦 𑀳𑁂𑀝𑁆𑀞𑀸𑀧𑀸𑀲𑀸𑀤𑀸 𑀦 𑀳𑁂𑀝𑁆𑀞𑀸𑀧𑀸𑀲𑀸𑀤𑀁 𑀯𑀸’’𑀢𑀺 𑀮𑀺𑀔𑀺𑀢𑀁.

𑁩𑁩𑁨. 𑀧𑀼𑀩𑁆𑀩𑁂 𑀧𑀼𑀩𑁆𑀩𑀓𑀸𑀮𑁂. ‘‘𑀭𑀜𑁆𑀜𑁄 𑀲𑀢𑁄’’𑀢𑀺 𑀘 ‘‘𑀭𑀜𑁆𑀜𑁄𑀯𑀲𑀢𑁄’’𑀢𑀺 𑀘 𑀧𑀸𑀞𑁄.

𑁩𑁩𑁩. 𑀦 𑀮𑀸𑀪𑀢𑀡𑁆𑀳𑀸 𑀇𑀥 𑀓𑀸𑀫𑀢𑀡𑁆𑀳𑀸, 𑀛𑀸𑀦𑀲𑁆𑀲 𑀦𑁂𑀲𑀸 𑀧𑀭𑀺𑀳𑀸𑀦𑀺 𑀳𑁂𑀢𑀼. 𑀩𑀼𑀤𑁆𑀥𑀢𑁆𑀢𑀲𑀻𑀮𑀁 𑀧𑀦 𑀧𑀢𑁆𑀣𑀬𑀦𑁆𑀢𑁄 𑀛𑀸𑀦𑀸𑀧𑀺 𑀦𑀝𑁆𑀞𑁄𑀢𑀺. 𑀦𑀦𑀼 𑀧𑀢𑁆𑀢𑀪𑀸𑀯𑀦𑀸. 𑀫𑀦𑁄𑀫𑀬𑀦𑁆𑀢𑀺 𑀛𑀸𑀦𑀫𑀦𑁄𑀫𑀬𑀁.

𑁩𑁩𑁪. 𑀲𑀢𑁆𑀣𑀸𑀭𑁄𑀢𑀺 𑀕𑀡𑀲𑀢𑁆𑀣𑀸𑀭𑁄.

𑁩𑁩𑁯. 𑀧𑁄𑀢𑁆𑀣𑀦𑀺𑀓𑀦𑁆𑀢𑀺 𑀙𑀼𑀭𑀺𑀓𑀁.

𑁩𑁪𑁦. 𑀫𑀦𑀼𑀲𑁆𑀲𑁂𑀢𑀺 𑀧𑀼𑀭𑀺𑀲𑁂.

𑁩𑁪𑁧. 𑀏𑀓𑀭𑀢𑁆𑀢𑀸𑀥𑀺𑀓𑀸𑀭𑁂𑀦 𑀭𑀓𑁆𑀔𑀁 𑀧𑀘𑁆𑀘𑀸𑀲𑀻𑀲𑀦𑁆𑀢𑀸 𑀈𑀤𑀺𑀲𑀸𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀧𑀜𑁆𑀘𑀺𑀫𑁂’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀧𑀼𑀩𑁆𑀩𑁂 𑀭𑀓𑁆𑀔𑀲𑁆𑀲𑁂𑀢’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀫𑀬𑁆𑀳𑀁 𑀧𑀦 𑀭𑀓𑁆𑀔𑀡𑁂 𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀧𑀭𑀽𑀧𑀓𑁆𑀓𑀫𑁂𑀦 𑀢𑀣𑀸𑀕𑀢𑀁 𑀚𑀻𑀯𑀺𑀢𑀸 𑀯𑁄𑀭𑁄𑀧𑁂𑀬𑁆𑀬𑀸𑀢𑀺 𑀇𑀤𑀁 𑀆𑀡𑀢𑁆𑀢𑀺𑀬𑀸 𑀆𑀕𑀢𑀢𑁆𑀢𑀸 𑀏𑀯𑀁 𑀯𑀼𑀢𑁆𑀢𑀁.

𑁩𑁪𑁨. 𑀫𑀸 𑀆𑀲𑀤𑁄𑀢𑀺 𑀫𑀸 𑀯𑀥𑀓𑀘𑀺𑀢𑁆𑀢𑁂𑀦 𑀉𑀧𑀕𑀘𑁆𑀙. 𑀇𑀢𑁄𑀢𑀺 𑀇𑀫𑀫𑁆𑀳𑀸 𑀚𑀻𑀯𑀺𑀢𑀫𑁆𑀳𑀸. ‘‘𑀬𑀢𑁄𑀢𑀺 𑀬𑀲𑁆𑀫𑀸, 𑀬𑀢𑁄𑀢𑀺 𑀯𑀸 𑀕𑀢𑀲𑁆𑀲𑀸’’𑀢𑀺 𑀮𑀺𑀔𑀺𑀢𑀁. ‘‘𑀧𑀝𑀺𑀓𑀼𑀝𑀺𑀢𑁄𑀢𑀺 𑀅𑀧𑀲𑀓𑁆𑀓𑀺𑀢𑁆𑀯𑀸 𑀲𑀗𑁆𑀓𑀼𑀘𑀺𑀢𑁄 𑀳𑀼𑀢𑁆𑀯𑀸 𑀯𑀸 𑀧𑀝𑀺𑀲𑀓𑁆𑀓𑀢𑀻’’𑀢𑀺 𑀮𑀺𑀔𑀺𑀢𑀁.

𑁩𑁪𑁩. 𑀢𑀺𑀓𑀪𑁄𑀚𑀦𑀦𑁆𑀢𑀺 𑀢𑀻𑀳𑀺 𑀪𑀼𑀜𑁆𑀚𑀺𑀢𑀩𑁆𑀩𑀪𑁄𑀚𑀦𑀁. ‘‘𑀢𑀺𑀓𑀪𑁄𑀚𑀦𑀻𑀬’’𑀦𑁆𑀢𑀺𑀧𑀺 𑀧𑀸𑀞𑁄. 𑀧𑀭𑀺𑀓𑀧𑁆𑀧𑀢𑁄 𑀳𑀺 𑀢𑀺𑀡𑁆𑀡𑀁 𑀪𑀼𑀜𑁆𑀚𑀺𑀢𑀼𑀁 𑀅𑀦𑀼𑀚𑀸𑀦𑀸𑀫𑀺, 𑀢𑀢𑁄 𑀉𑀤𑁆𑀥𑀁 𑀕𑀡𑀪𑁄𑀚𑀦𑀫𑁂𑀯 𑀳𑁄𑀢𑀺, 𑀢𑀲𑁆𑀲𑀸𑀧𑀺 𑀇𑀤𑀫𑁂𑀯 𑀯𑀼𑀢𑁆𑀢𑀁. 𑀇𑀥 𑀅𑀧𑀼𑀩𑁆𑀩𑀁 𑀦𑀢𑁆𑀣𑀺. ‘‘𑀅𑀓𑀢𑀯𑀺𑀜𑁆𑀜𑀢𑁆𑀢𑀺𑀮𑀤𑁆𑀥𑀁 𑀢𑀺𑀡𑁆𑀡𑀁 𑀪𑀼𑀜𑁆𑀚𑀦𑁆𑀢𑀸𑀦𑀁 𑀓𑀺𑀜𑁆𑀘𑀸𑀧𑀺 𑀢𑀁 𑀕𑀡𑀪𑁄𑀚𑀦𑀁 𑀦𑀸𑀫 𑀦 𑀳𑁄𑀢𑀺, 𑀯𑀺𑀜𑁆𑀜𑀢𑁆𑀢𑀺𑀯𑀲𑁂𑀦 𑀧𑀦 𑀦 𑀯𑀝𑁆𑀝𑀢𑀻’’𑀢𑀺 𑀮𑀺𑀔𑀺𑀢𑀁. 𑀢𑀬𑁄 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘𑀸𑀢𑀺 𑀏𑀢𑁆𑀣𑀸𑀧𑀺 ‘‘𑀫𑀸 𑀧𑀸𑀧𑀺𑀘𑁆𑀙𑀸𑀧𑀓𑁆𑀔𑀁 𑀦𑀺𑀲𑁆𑀲𑀸𑀬 𑀲𑀗𑁆𑀖𑀁 𑀪𑀺𑀦𑁆𑀤𑁂𑀬𑁆𑀬𑀼’’𑀦𑁆𑀢𑀺 𑀧𑁂𑀲𑀮𑀸𑀦𑀁 𑀪𑀺𑀓𑁆𑀔𑀽𑀦𑀁 𑀨𑀸𑀲𑀼𑀯𑀺𑀳𑀸𑀭𑀸𑀬𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. 𑀓𑀼𑀮𑀸𑀦𑀼𑀤𑁆𑀤𑀬𑀢𑀸𑀬 𑀘𑀸𑀢𑀺 𑀓𑀼𑀮𑀸𑀦𑀁 𑀧𑀲𑀸𑀤𑀭𑀓𑁆𑀔𑀡𑀢𑁆𑀣𑀁. 𑀯𑀚𑁆𑀚𑀦𑁆𑀢𑀺 𑀯𑀚𑁆𑀚𑀫𑁂𑀯. ‘‘𑀯𑀚𑁆𑀚𑀫𑀺𑀫𑀁 𑀨𑀼𑀲𑁂𑀬𑁆𑀬𑀸’’𑀢𑀺 𑀮𑀺𑀔𑀺𑀢𑀁. ‘‘𑀯𑀚𑁆𑀚𑀦𑀻𑀬𑀁 𑀧𑀼𑀕𑁆𑀕𑀮𑀁 𑀨𑀼𑀲𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀁. ‘‘𑀇𑀫𑀲𑁆𑀲 𑀫𑀦𑁄 𑀦 𑀨𑀼𑀲𑁂𑀬𑁆𑀬𑀸’’𑀢𑀺 𑀯𑀢𑁆𑀢𑀩𑁆𑀩𑀫𑁆𑀧𑀺 𑀲𑀺𑀬𑀸. 𑀘𑀓𑁆𑀓𑀪𑁂𑀤𑀦𑁆𑀢𑀺 𑀲𑀸𑀲𑀦𑀪𑁂𑀤𑀁. 𑀆𑀬𑀼𑀓𑀧𑁆𑀧𑀦𑁆𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀅𑀯𑀻𑀘𑀺𑀫𑁆𑀳𑀺 𑀆𑀬𑀼𑀧𑀭𑀺𑀫𑀸𑀡𑀁 𑀦𑀢𑁆𑀣𑀺, 𑀬𑁂𑀦 𑀧𑀦 𑀓𑀫𑁆𑀫𑁂𑀦 𑀬𑀢𑁆𑀢𑀓𑀁 𑀅𑀦𑀼𑀪𑀯𑀺𑀢𑀩𑁆𑀩𑀁, 𑀢𑀲𑁆𑀲 𑀆𑀬𑀼𑀓𑀧𑁆𑀧𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁩𑁪𑁫. ‘‘𑀅𑀜𑁆𑀜𑀢𑀭𑀁 𑀆𑀲𑀦𑀁 𑀕𑀳𑁂𑀢𑁆𑀯𑀸 𑀦𑀺𑀲𑀻𑀤𑀻’’𑀢𑀺 𑀯𑀘𑀦𑀢𑁄 𑀯𑀺𑀲𑀪𑀸𑀕𑀝𑁆𑀞𑀸𑀦𑀁 𑀕𑀢𑀲𑁆𑀲 𑀧𑁂𑀲𑀮𑀲𑁆𑀲𑀧𑀺 𑀪𑀺𑀓𑁆𑀔𑀼𑀦𑁄 𑀢𑁂𑀲𑀁 𑀆𑀲𑀦𑁂 𑀦𑀺𑀲𑀻𑀤𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁. 𑀆𑀕𑀺𑀮𑀸𑀬𑀢𑀻𑀢𑀺 𑀭𑀼𑀚𑁆𑀚𑀢𑀺. 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀸𑀦𑀼𑀲𑀸𑀲𑀦𑀺𑀬𑀸𑀢𑀺 𑀢𑀲𑁆𑀲 𑀢𑀲𑁆𑀲 𑀘𑀺𑀢𑁆𑀢𑀸𑀘𑀸𑀭𑀁 𑀆𑀤𑀺𑀲𑁆𑀲 𑀆𑀤𑀺𑀲𑁆𑀲 𑀤𑁂𑀲𑀦𑀸, 𑀆𑀤𑁂𑀲𑀦𑀸𑀧𑀸𑀝𑀺𑀳𑀸𑀭𑀺𑀬𑀸𑀦𑀼𑀲𑀸𑀲𑀦𑀻. 𑀇𑀤𑁆𑀥𑀺 𑀏𑀯 𑀧𑀸𑀝𑀺𑀳𑀸𑀭𑀺𑀬𑀁 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀁, 𑀇𑀤𑁆𑀥𑀺𑀧𑀸𑀝𑀺𑀳𑀸𑀭𑀺𑀬𑀲𑀁𑀬𑀼𑀢𑁆𑀢𑀸𑀬 𑀅𑀦𑀼𑀲𑀸𑀲𑀦𑀺𑀬𑀸 𑀑𑀯𑀤𑀢𑀻𑀢𑀺 𑀅𑀢𑁆𑀣𑁄. 𑀦𑀦𑀼 𑀢𑀁 𑀆𑀯𑀼𑀲𑁄𑀢𑀺 𑀏𑀢𑁆𑀣 𑀢𑀁 𑀯𑀘𑀦𑀁 𑀦𑀦𑀼 𑀫𑀬𑀸 𑀯𑀼𑀢𑁆𑀢𑁄𑀲𑀻𑀢𑀺 𑀅𑀢𑁆𑀣𑁄.

𑁩𑁪𑁬-𑁯. 𑀲𑀼𑀯𑀺𑀓𑁆𑀔𑀸𑀮𑀺𑀢𑀦𑁆𑀢𑀺 𑀲𑀼𑀥𑁄𑀢𑀁. 𑀲𑀁𑀔𑀸𑀤𑀺𑀢𑁆𑀯𑀸𑀢𑀺 𑀲𑀼𑀝𑁆𑀞𑀼 𑀔𑀸𑀤𑀺𑀢𑁆𑀯𑀸. ‘‘𑀫𑀳𑀺𑀁 𑀯𑀺𑀓𑀼𑀩𑁆𑀩𑀢𑁄𑀢𑀺 𑀫𑀳𑀸𑀯𑀺𑀲𑀸𑀮𑁄’’𑀢𑀺 𑀮𑀺𑀔𑀺𑀢𑀁. 𑀢𑀲𑁆𑀲 𑀪𑀺𑀲𑀁 𑀖𑀲𑀫𑀸𑀦𑀲𑁆𑀲. 𑀢𑀢𑁆𑀣 𑀦𑀤𑀻𑀲𑀼 𑀚𑀕𑁆𑀕𑀢𑁄𑀢𑀺 𑀧𑀸𑀮𑁂𑀦𑁆𑀢𑀲𑁆𑀲. ‘‘𑀓𑀺𑀁? 𑀳𑀢𑁆𑀣𑀺𑀬𑀽𑀣𑀁 𑀕𑀦𑁆𑀢𑀼’’𑀦𑁆𑀢𑀺 𑀯𑀤𑀦𑁆𑀢𑀺. ‘‘𑀅𑀲𑀁𑀧𑀸𑀢𑁄’𑀢𑀺 𑀧𑀸𑀞𑁄, 𑀅𑀧𑀢𑁆𑀢𑁄 𑀳𑀼𑀢𑁆𑀯𑀸𑀢𑀺 𑀅𑀢𑁆𑀣𑁄’’𑀢𑀺 𑀮𑀺𑀔𑀺𑀢𑀁. ‘‘𑀅𑀧𑀸𑀬𑀩𑀳𑀼𑀢𑁆𑀢𑀸 𑀧𑀼𑀦 𑀤𑀲𑁆𑀲𑀺𑀢𑁄’’𑀢𑀺 𑀯𑀼𑀢𑁆𑀢𑀁. ‘‘𑀏𑀯𑀁𑀲𑀢𑁂𑀢𑀺 𑀏𑀯𑀁 𑀅𑀲𑁆𑀲 𑀢𑁂 𑀆𑀲𑀯𑀸’’𑀢𑀺 𑀮𑀺𑀔𑀺𑀢𑀁.

𑁩𑁫𑁦. ‘‘𑀯𑁄𑀲𑀸𑀦𑀁 𑀧𑀭𑀺𑀦𑀺𑀝𑁆𑀞𑀸𑀦𑀁 𑀯𑀸’’𑀢𑀺 𑀘 𑀮𑀺𑀔𑀺𑀢𑀁. 𑀚𑀸𑀢𑀽𑀢𑀺 𑀤𑀴𑁆𑀳𑀢𑁆𑀣𑁂 𑀦𑀺𑀧𑀸𑀢𑁄. 𑀫𑀸 𑀉𑀤𑀧𑀚𑁆𑀚𑀣𑀸𑀢𑀺 𑀫𑀸 𑀉𑀧𑁆𑀧𑀚𑁆𑀚𑁂𑀬𑁆𑀬. ‘‘𑀲𑁄 𑀧𑀫𑀸𑀤𑀫𑀦𑀼𑀬𑀼𑀜𑁆𑀚𑀦𑁆𑀢𑁄’’𑀢𑀺 𑀧𑀸𑀞𑁄. 𑀅𑀦𑀸𑀤𑀭𑀁 𑀓𑀼𑀲𑀮𑁂𑀲𑀼. 𑀉𑀤𑀥𑀺 𑀫𑀳𑀸𑀢𑀺 𑀓𑀺𑀢𑁆𑀢𑀓𑁄 𑀫𑀳𑀸? 𑀪𑁂𑀲𑁆𑀫𑀸 𑀬𑀸𑀯 𑀪𑀬𑀸𑀦𑀓𑁄, 𑀢𑀸𑀯 𑀫𑀳𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑁩𑁫𑁧. 𑀦 𑀔𑁄, 𑀉𑀧𑀸𑀮𑀺, 𑀪𑀺𑀓𑁆𑀔𑀼𑀦𑀻 𑀲𑀗𑁆𑀖𑀁 𑀪𑀺𑀦𑁆𑀤𑀢𑀻𑀢𑀺 𑀏𑀢𑁆𑀣 𑀪𑀺𑀓𑁆𑀔𑀼 𑀲𑀗𑁆𑀖𑀁 𑀦 𑀪𑀺𑀦𑁆𑀤𑀢𑀺, 𑀪𑀺𑀓𑁆𑀔𑀼𑀦𑀻 𑀲𑀗𑁆𑀖𑀁 𑀪𑀺𑀦𑁆𑀤𑀢𑀻𑀢𑀺 𑀓𑁂𑀘𑀺, 𑀦𑁂𑀢𑀁 𑀕𑀳𑁂𑀢𑀩𑁆𑀩𑀁. 𑀓𑁂𑀯𑀮𑀁 ‘‘𑀲𑀗𑁆𑀖𑁄’’𑀢𑀺 𑀯𑀼𑀢𑁆𑀢𑁂 𑀪𑀺𑀓𑁆𑀔𑀼𑀲𑀗𑁆𑀖𑁄𑀯 𑀅𑀥𑀺𑀧𑁆𑀧𑁂𑀢𑁄. ‘‘𑀲𑀗𑁆𑀖𑀲𑁆𑀲 𑀤𑁂𑀢𑀺, 𑀉𑀪𑀢𑁄𑀲𑀗𑁆𑀖𑀲𑁆𑀲 𑀤𑁂𑀢𑀺 𑀘𑀸’’𑀢𑀺 (𑀫𑀳𑀸𑀯. 𑁩𑁭𑁯) 𑀫𑀸𑀢𑀺𑀓𑀸𑀯𑀘𑀦𑀫𑁆𑀧𑀺 𑀲𑀸𑀥𑁂𑀢𑀺. 𑀢𑀲𑁆𑀫𑀺𑀁 𑀅𑀥𑀫𑁆𑀫𑀤𑀺𑀝𑁆𑀞𑀺𑀪𑁂𑀤𑁂 𑀥𑀫𑁆𑀫𑀤𑀺𑀝𑁆𑀞𑀺 𑀲𑀺𑀬𑀸. ‘‘𑀲𑀻𑀮𑀲𑀢𑀺𑀪𑁂𑀤𑁂𑀲𑀼𑀧𑀺 𑀲𑀫𑀸𑀦𑁄 𑀥𑀫𑁆𑀫𑀁 𑀓𑀸𑀢𑀼𑀦𑁆𑀢𑀺 𑀲𑀗𑁆𑀖𑀪𑁂𑀤𑁂 𑀯𑁂𑀫𑀢𑀺𑀓𑁄𑀧𑀺 𑀢𑀸𑀤𑀺𑀲𑁄 𑀯𑀸’’𑀢𑀺 𑀮𑀺𑀔𑀺𑀢𑀁. 𑀯𑀺𑀦𑀺𑀥𑀸𑀬𑀸𑀢𑀺 𑀅𑀢𑁆𑀢𑀦𑁄 𑀯𑀜𑁆𑀘𑀦𑀸𑀥𑀺𑀧𑁆𑀧𑀸𑀬𑀢𑀁 𑀙𑀸𑀤𑁂𑀢𑁆𑀯𑀸.

𑀲𑀗𑁆𑀖𑀪𑁂𑀤𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀯𑀢𑁆𑀢𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸

𑀆𑀕𑀦𑁆𑀢𑀼𑀓𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁩𑁫𑁭. 𑀏𑀓𑀲𑁆𑀫𑀺𑀁 𑀕𑀸𑀫𑁂 𑀅𑀜𑁆𑀜𑀯𑀺𑀳𑀸𑀭𑀢𑁄 𑀆𑀕𑀢𑁄𑀧𑀺 𑀆𑀕𑀦𑁆𑀢𑀼𑀓𑁄𑀯. 𑀢𑀢𑁆𑀣 𑀓𑁂𑀘𑀺 𑀏𑀯𑀁 𑀯𑀤𑀦𑁆𑀢𑀺 ‘‘𑀆𑀯𑀸𑀲𑀺𑀓𑁄 𑀓𑀢𑁆𑀣𑀘𑀺 𑀕𑀦𑁆𑀢𑁆𑀯𑀸 𑀲𑀘𑁂 𑀆𑀕𑀢𑁄, ‘𑀢𑁂𑀦𑀸𑀧𑀺 𑀆𑀕𑀦𑁆𑀢𑀼𑀓𑀪𑀢𑁆𑀢𑀁 𑀪𑀼𑀜𑁆𑀚𑀺𑀢𑀩𑁆𑀩’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀤𑀽𑀭𑀸𑀕𑀫𑀦𑀁 𑀯𑀼𑀢𑁆𑀢𑀁 𑀳𑁄𑀢𑀺, 𑀦 𑀕𑀸𑀫𑁂, 𑀢𑀲𑁆𑀫𑀸 𑀦 𑀬𑀼𑀢𑁆𑀢’’𑀦𑁆𑀢𑀺. 𑀢𑁂 𑀯𑀢𑁆𑀢𑀩𑁆𑀩𑀸 ‘‘𑀆𑀕𑀦𑁆𑀢𑀼𑀓𑀪𑀢𑁆𑀢𑀁 𑀦𑀸𑀫 𑀕𑀳𑀝𑁆𑀞𑁂𑀳𑀺 𑀞𑀧𑀺𑀢𑀁. 𑀬𑀲𑁆𑀫𑀺𑀁 𑀦𑀺𑀩𑀤𑁆𑀥𑀁, 𑀢𑀢𑁄 𑀅𑀜𑁆𑀜𑀕𑀸𑀫𑀢𑁄𑀢𑀺 𑀆𑀧𑀦𑁆𑀦𑀁. 𑀢𑀣𑀸 𑀯𑀺𑀳𑀸𑀭𑀸𑀥𑀺𑀓𑀸𑀭𑀢𑁆𑀢𑀸 𑀅𑀜𑁆𑀜𑀯𑀺𑀳𑀸𑀭𑀢𑁄 𑀆𑀕𑀢𑁄𑀧𑀺 𑀆𑀕𑀦𑁆𑀢𑀼𑀓𑁄 𑀯𑀸’’𑀢𑀺 𑀆𑀘𑀭𑀺𑀬𑀸𑀦𑀁 𑀲𑀦𑁆𑀦𑀺𑀝𑁆𑀞𑀸𑀦𑀁. 𑀧𑀸𑀦𑀻𑀬𑀁 𑀧𑀼𑀘𑁆𑀙𑀺𑀢𑀩𑁆𑀩𑀁, 𑀧𑀭𑀺𑀪𑁄𑀚𑀦𑀻𑀬𑀁 𑀧𑀼𑀘𑁆𑀙𑀺𑀢𑀩𑁆𑀩𑀦𑁆𑀢𑀺 𑀉𑀤𑁆𑀥𑀭𑀺𑀢𑁆𑀯𑀸 𑀖𑀝𑀲𑀭𑀸𑀯𑀸𑀤𑀺𑀕𑀢𑀁 𑀲𑀦𑁆𑀥𑀸𑀬 𑀧𑀞𑀫𑀁, 𑀤𑀼𑀢𑀺𑀬𑀁 𑀓𑀽𑀧𑀢𑀴𑀸𑀓𑀸𑀤𑀺𑀕𑀢𑀦𑁆𑀢𑀺 𑀆𑀘𑀭𑀺𑀬𑁄. 𑀤𑀼𑀢𑀺𑀬𑀯𑀸𑀭𑁂 𑀅𑀢𑁆𑀢𑀦𑁄 𑀯𑀲𑀦𑀝𑁆𑀞𑀸𑀦𑀢𑁆𑀢𑀸 𑀯𑀺𑀲𑀼𑀁 𑀧𑀼𑀘𑁆𑀙𑀺𑀢𑀩𑁆𑀩𑀫𑁂𑀯, 𑀢𑀲𑁆𑀫𑀸 𑀯𑀼𑀢𑁆𑀢𑀁 𑀏𑀢𑀁 ‘‘𑀧𑀭𑀺𑀘𑁆𑀙𑀺𑀦𑁆𑀦𑀪𑀺𑀓𑁆𑀔𑁄 𑀯𑀸 𑀕𑀸𑀫𑁄’’𑀢𑀺. 𑀩𑀳𑀽𑀲𑀼 𑀧𑁄𑀢𑁆𑀣𑀓𑁂𑀲𑀼 𑀤𑀼𑀯𑀺𑀥𑀸𑀧𑀺 𑀬𑀼𑀚𑁆𑀚𑀢𑀺.

𑀅𑀦𑀼𑀫𑁄𑀤𑀦𑀯𑀢𑁆𑀢𑀓𑀣𑀸𑀯𑀡𑁆𑀡𑀦𑀸

𑁩𑁬𑁨-𑁪. 𑀧𑀜𑁆𑀘𑀫𑁂 𑀅𑀦𑀼𑀫𑁄𑀤𑀦𑀢𑁆𑀣𑀸𑀬 𑀦𑀺𑀲𑀺𑀦𑁆𑀦𑁂. ‘‘𑀫𑀦𑀼𑀲𑁆𑀲𑀸𑀦𑀁 𑀧𑀭𑀺𑀯𑀺𑀲𑀦𑀝𑁆𑀞𑀸𑀦𑀦𑁆𑀢𑀺 𑀬𑀢𑁆𑀣 𑀫𑀦𑀼𑀲𑁆𑀲𑀸 𑀲𑀧𑀼𑀢𑁆𑀢𑀤𑀸𑀭𑀸 𑀆𑀯𑀲𑀺𑀢𑁆𑀯𑀸 𑀤𑁂𑀦𑁆𑀢𑀻’’𑀢𑀺 𑀮𑀺𑀔𑀺𑀢𑀁. 𑀇𑀫𑀲𑁆𑀫𑀺𑀁 𑀔𑀦𑁆𑀥𑀓𑁂 𑀆𑀕𑀦𑁆𑀢𑀼𑀓𑀸𑀯𑀸𑀲𑀺𑀓𑀕𑀫𑀺𑀓𑀸𑀦𑀼𑀫𑁄𑀤𑀦𑀪𑀢𑁆𑀢𑀕𑁆𑀕𑀧𑀺𑀡𑁆𑀟𑀘𑀸𑀭𑀺𑀓𑀸𑀭𑀜𑁆𑀜𑀓𑀲𑁂𑀦𑀸𑀲𑀦𑀚𑀦𑁆𑀢𑀸𑀖𑀭𑀯𑀘𑁆𑀘𑀓𑀼𑀝𑀺𑀉𑀧𑀚𑁆𑀛𑀸𑀘𑀭𑀺𑀬𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀦𑁆𑀢𑁂𑀯𑀸𑀲𑀺𑀓𑀯𑀢𑁆𑀢𑀸𑀦𑀺 𑀘𑀼𑀤𑁆𑀤𑀲 𑀫𑀳𑀸𑀯𑀢𑁆𑀢𑀸𑀦𑀺 𑀦𑀸𑀫. 𑀅𑀕𑁆𑀕𑀳𑀺𑀢𑀕𑁆𑀕𑀳𑀡𑁂𑀦 𑀕𑀡𑀺𑀬𑀫𑀸𑀦𑀸𑀦𑀺 𑀅𑀲𑀻𑀢𑀺 𑀔𑀦𑁆𑀥𑀓𑀯𑀢𑁆𑀢𑀸𑀦𑀺 𑀦𑀸𑀫 𑀳𑁄𑀦𑁆𑀢𑀺.

𑀯𑀢𑁆𑀢𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸

𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀬𑀸𑀘𑀦𑀓𑀣𑀸𑀯𑀡𑁆𑀡𑀦𑀸

𑁩𑁮𑁩-𑁪. ‘‘𑀦𑀦𑁆𑀤𑀺𑀫𑀼𑀔𑀻’’𑀢𑀺 𑀮𑀺𑀔𑀺𑀢𑀁. 𑀆𑀬𑀢𑀓𑁂𑀦𑁂𑀯𑀸𑀢𑀺 𑀆𑀤𑀺𑀫𑁆𑀳𑀺 𑀏𑀯. 𑀬𑀦𑁆𑀢𑀺 𑀬𑀲𑁆𑀫𑀸. 𑀲𑀯𑀦𑁆𑀢𑀺𑀬𑁄 𑀫𑀳𑀸𑀦𑀤𑀺𑀬𑁄. ‘‘𑀫𑀳𑀦𑁆𑀢𑀪𑀽𑀢𑀸𑀦’’𑀦𑁆𑀢𑀺 𑀧𑀸𑀞𑁄. 𑀧𑀢𑁆𑀢𑀸𑀢𑀺 𑀧𑀢𑁆𑀯𑀸. ‘‘𑀲𑀫𑀽𑀮𑀺𑀓𑀸𑀬 𑀞𑀧𑁂𑀢𑀺 𑀅𑀓𑀢𑀸𑀬𑀸’’𑀢𑀺 𑀞𑀧𑀦𑀓𑀲𑁆𑀲 𑀲𑀜𑁆𑀜𑀸𑀫𑀽𑀮𑀯𑀲𑁂𑀦 𑀯𑀼𑀢𑁆𑀢𑀁. 𑀢𑀁 𑀯𑀢𑁆𑀣𑀼𑀁 𑀅𑀯𑀺𑀦𑀺𑀘𑁆𑀙𑀺𑀦𑀺𑀢𑁆𑀯𑀸𑀯 𑀧𑀭𑀺𑀲𑀸 𑀯𑀼𑀝𑁆𑀞𑀸𑀢𑀺.

𑀅𑀢𑁆𑀢𑀸𑀤𑀸𑀦𑀅𑀗𑁆𑀕𑀓𑀣𑀸𑀯𑀡𑁆𑀡𑀦𑀸

𑁩𑁯𑁮-𑁯. ‘‘𑀅𑀢𑁆𑀢𑀸𑀤𑀸𑀦𑀦𑁆𑀢𑀺 𑀲𑀬𑀁 𑀧𑀭𑁂𑀳𑀺 𑀘𑁄𑀤𑀺𑀢𑁄 𑀅𑀢𑁆𑀢𑀸𑀦𑀁 𑀲𑁄𑀥𑁂𑀢𑀼𑀁 𑀅𑀦𑀸𑀤𑀺𑀬𑀺𑀢𑁆𑀯𑀸 𑀧𑀭𑁂𑀲𑀁 𑀯𑀺𑀧𑁆𑀧𑀝𑀺𑀧𑀢𑁆𑀢𑀺𑀁 𑀤𑀺𑀲𑁆𑀯𑀸 𑀲𑀸𑀲𑀦𑀁 𑀲𑁄𑀥𑁂𑀢𑀼𑀁 𑀅𑀢𑁆𑀢𑀦𑀸 𑀆𑀤𑀺𑀢𑀩𑁆𑀩’’𑀦𑁆𑀢𑀺 𑀮𑀺𑀔𑀺𑀢𑀁. 𑀯𑀲𑁆𑀲𑀸𑀭𑀢𑁆𑀢𑁄𑀢𑀺 𑀯𑀲𑁆𑀲𑀓𑀸𑀮𑁄. 𑀲𑀧𑁆𑀧𑀝𑀺𑀫𑀸𑀲𑁄𑀢𑀺 𑀆𑀓𑀟𑁆𑀠𑀦𑀬𑀼𑀢𑁆𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁦𑁧. 𑀉𑀧𑀤𑀳𑀸𑀢𑀩𑁆𑀩𑁄𑀢𑀺 𑀉𑀧𑁆𑀧𑀸𑀤𑁂𑀢𑀩𑁆𑀩𑁄, 𑀯𑀺𑀧𑁆𑀧𑀝𑀺𑀲𑀸𑀭𑀫𑀼𑀔𑁂𑀦 𑀥𑀸𑀭𑁂𑀢𑀩𑁆𑀩𑁄𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀧𑀸𑀢𑀺𑀫𑁄𑀓𑁆𑀔𑀝𑁆𑀞𑀧𑀦𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀪𑀺𑀓𑁆𑀔𑀼𑀦𑀺𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸

𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁪𑁦𑁨-𑁩. 𑀲𑀽𑀦𑁂𑀳𑀻𑀢𑀺 𑀲𑀼𑀢𑁂𑀳𑀺. ‘‘𑀲𑁂𑀢𑀝𑁆𑀝𑀺𑀓𑀸 𑀦𑀸𑀫 𑀭𑁄𑀕𑀚𑀸𑀢𑀻’’𑀢𑀺 𑀧𑀸𑀴𑀺. ‘‘𑀲𑁂𑀢𑀝𑁆𑀞𑀺𑀓𑀸’’𑀢𑀺 𑀅𑀝𑁆𑀞𑀓𑀣𑀸. ‘‘𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑀔𑀻𑀡𑀸𑀲𑀯𑀕𑁆𑀕𑀳𑀡𑁂𑀦 𑀛𑀸𑀦𑀸𑀦𑀺𑀧𑀺 𑀕𑀳𑀺𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀦 𑀳𑀺 𑀦𑀺𑀚𑁆𑀛𑀸𑀦𑀺𑀓𑀸𑀦𑀁 𑀲𑀩𑁆𑀩𑀧𑁆𑀧𑀓𑀸𑀭𑀸 𑀲𑀫𑁆𑀧𑀢𑁆𑀢𑀺 𑀇𑀚𑁆𑀛𑀢𑀻’’𑀢𑀺 𑀮𑀺𑀔𑀺𑀢𑀁.

𑀪𑀺𑀓𑁆𑀔𑀼𑀦𑀻𑀉𑀧𑀲𑀫𑁆𑀧𑀤𑀸𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸

𑁪𑁦𑁪. 𑀬𑀤𑀕𑁆𑀕𑁂𑀦 𑀬𑀁 𑀤𑀺𑀯𑀲𑀁 𑀆𑀤𑀺𑀁 𑀓𑀢𑁆𑀯𑀸. 𑀢𑀤𑁂𑀯𑀸𑀢𑀺 𑀢𑀲𑁆𑀫𑀺𑀁 𑀏𑀯 𑀤𑀺𑀯𑀲𑁂. ‘‘𑀅𑀦𑀼𑀜𑀢𑁆𑀢𑀺𑀬𑀸’’𑀢𑀺 𑀧𑀸𑀞𑁄. ‘‘𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑀸’’𑀢𑀺 𑀦 𑀲𑀼𑀦𑁆𑀤𑀭𑀁.

𑁪𑁦𑁫. ‘‘𑀧𑀝𑀺𑀕𑁆𑀕𑀡𑁆𑀳𑀸𑀫𑀺 𑀬𑀸𑀯𑀚𑀻𑀯𑀁 𑀅𑀦𑀢𑀺𑀓𑁆𑀓𑀫𑀦𑀻𑀬𑁄’’𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 𑀓𑀺𑀁 𑀓𑀸𑀭𑀡𑀸 𑀯𑀭𑀁 𑀬𑀸𑀘𑀢𑀻𑀢𑀺 𑀘𑁂? 𑀧𑀭𑀽𑀧𑀯𑀸𑀤𑀯𑀺𑀯𑀚𑁆𑀚𑀦𑀢𑁆𑀣𑀁. 𑀤𑀼𑀩𑁆𑀩𑀼𑀤𑁆𑀥𑀺𑀦𑁄 𑀳𑀺 𑀓𑁂𑀘𑀺 𑀯𑀤𑁂𑀬𑁆𑀬𑀼𑀁 ‘‘𑀫𑀳𑀸𑀧𑀚𑀸𑀧𑀢𑀺𑀬𑀸 𑀧𑀞𑀫𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀢𑁆𑀢𑀸 𑀉𑀪𑀢𑁄𑀲𑀗𑁆𑀖𑀲𑁆𑀲 𑀬𑀣𑀸𑀯𑀼𑀟𑁆𑀠𑀅𑀪𑀺𑀯𑀸𑀤𑀦𑀁 𑀦 𑀚𑀸𑀢𑀁. 𑀕𑁄𑀢𑀫𑀻 𑀘𑁂 𑀯𑀭𑀁 𑀬𑀸𑀘𑁂𑀬𑁆𑀬, 𑀪𑀕𑀯𑀸 𑀅𑀦𑀼𑀚𑀸𑀦𑁂𑀬𑁆𑀬𑀸’’𑀢𑀺.

𑁪𑁦𑁮. 𑀯𑀺𑀫𑀸𑀦𑁂𑀢𑁆𑀯𑀸𑀢𑀺 𑀅𑀧𑀭𑀚𑁆𑀛𑀺𑀢𑁆𑀯𑀸.

𑁪𑁧𑁦-𑁩. 𑀓𑀫𑁆𑀫𑀧𑁆𑀧𑀢𑁆𑀢𑀸𑀬𑁄𑀧𑀻𑀢𑀺 𑀓𑀫𑁆𑀫𑀸𑀭𑀳𑀸𑀧𑀺. 𑀆𑀧𑀢𑁆𑀢𑀺𑀕𑀸𑀫𑀺𑀦𑀺𑀬𑁄𑀧𑀻𑀢𑀺 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑀸𑀬𑁄𑀧𑀺. 𑀤𑁆𑀯𑁂 𑀢𑀺𑀲𑁆𑀲𑁄 𑀪𑀺𑀓𑁆𑀔𑀼𑀦𑀺𑀬𑁄𑀢𑀺 𑀤𑁆𑀯𑀻𑀳𑀺 𑀢𑀻𑀳𑀺 𑀪𑀺𑀓𑁆𑀔𑀼𑀦𑀻𑀳𑀺. ‘‘𑀫𑀦𑁄𑀲𑀺𑀮𑀺𑀓𑀸𑀬𑀸’’𑀢𑀺 𑀧𑀸𑀞𑁄.