𑁧𑁧. 𑀧𑀜𑁆𑀘𑀲𑀢𑀺𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸

𑀲𑀗𑁆𑀕𑀻𑀢𑀺𑀦𑀺𑀤𑀸𑀦𑀓𑀣𑀸𑀯𑀡𑁆𑀡𑀦𑀸

𑁪𑁩𑁭. 𑀙𑀺𑀦𑁆𑀦𑀧𑀸𑀢𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀁, 𑀢𑁂𑀦𑀸𑀓𑀸𑀭𑁂𑀦 𑀧𑀢𑀦𑁆𑀢𑀻𑀢𑀺 𑀅𑀢𑁆𑀣𑁄. 𑀉𑀧𑀤𑁆𑀤𑀼𑀢𑀸 𑀘 𑀫𑀬𑀁 𑀳𑁄𑀫𑀸𑀢𑀺 𑀅𑀢𑀻𑀢𑀢𑁆𑀣𑁂 𑀯𑀢𑁆𑀢𑀫𑀸𑀦𑀯𑀘𑀦𑀁, 𑀅𑀳𑀼𑀫𑁆𑀳𑀸𑀢𑀺 𑀅𑀢𑁆𑀣𑁄. 𑀅𑀣 𑀯𑀸 𑀢𑀲𑁆𑀫𑀺𑀁 𑀲𑀢𑀺 𑀳𑁄𑀫. ‘‘𑀧𑀜𑁆𑀘 𑀪𑀺𑀓𑁆𑀔𑀼𑀲𑀢𑀸𑀦𑀻’’𑀢𑀺 𑀕𑀡𑀦𑀯𑀲𑁂𑀦 𑀯𑀢𑁆𑀯𑀸 ‘‘𑀯𑀲𑁆𑀲𑀁 𑀯𑀲𑀦𑁆𑀢𑀸’’𑀢𑀺 𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑁄 𑀓𑀢𑁄.

𑀔𑀼𑀤𑁆𑀤𑀸𑀦𑀼𑀔𑀼𑀤𑁆𑀤𑀓𑀓𑀣𑀸𑀯𑀡𑁆𑀡𑀦𑀸

𑁪𑁪𑁩. ‘‘𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀅𑀓𑁆𑀓𑀫𑀺𑀢𑁆𑀯𑀸’’𑀢𑀺 𑀯𑀘𑀦𑀢𑁄 𑀪𑀕𑀯𑀢𑁄 𑀘𑀢𑀼𑀢𑁆𑀣𑀘𑀻𑀯𑀭𑀫𑁆𑀧𑀺 𑀅𑀢𑁆𑀣𑀻𑀢𑀺 𑀲𑀺𑀤𑁆𑀥𑀁. 𑀢𑁂𑀦𑁂𑀯𑀸𑀳 𑀘𑀻𑀯𑀭𑀓𑁆𑀔𑀦𑁆𑀥𑀓𑁂 ‘‘𑀘𑀢𑀼𑀢𑁆𑀣𑀁 𑀘𑀻𑀯𑀭𑀁 𑀧𑀸𑀭𑀼𑀧𑀻’’𑀢𑀺.

𑁪𑁪𑁪. ‘‘𑀅𑀧𑀺𑀘 𑀬𑀣𑁂𑀯 𑀫𑀬𑀸’’𑀢𑀺𑀆𑀤𑀺 𑀲𑀗𑁆𑀕𑀻𑀢𑀺𑀬𑀸 𑀅𑀕𑁆𑀕𑀳𑀡𑀸𑀥𑀺𑀧𑁆𑀧𑀸𑀬𑀯𑀲𑁂𑀦 𑀯𑀼𑀢𑁆𑀢𑀁, 𑀓𑀺𑀦𑁆𑀢𑀼 𑀲𑀼𑀲𑀗𑁆𑀕𑀻𑀢𑀸 𑀆𑀯𑀼𑀲𑁄 𑀣𑁂𑀭𑁂𑀳𑀺 𑀥𑀫𑁆𑀫𑁄 𑀘 𑀯𑀺𑀦𑀬𑁄 𑀘. 𑀅𑀧𑀺𑀘𑀸𑀳𑀁 𑀦𑀸𑀫 𑀢𑀣𑁂𑀯𑀸𑀳𑀁 𑀥𑀸𑀭𑁂𑀲𑁆𑀲𑀸𑀫𑀻𑀢𑀺 𑀬𑀣𑁂𑀯 𑀫𑀬𑀸 𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀲𑀼𑀢𑀁 𑀲𑀫𑁆𑀫𑀼𑀔𑀸 𑀧𑀝𑀺𑀕𑁆𑀕𑀳𑀺𑀢𑀁, 𑀢𑀣𑁂𑀯 𑀣𑁂𑀭𑁂𑀳𑀺 𑀪𑀕𑀯𑀢𑀸 𑀲𑀬𑀫𑁂𑀯 𑀏𑀢𑀤𑀕𑁆𑀕𑀁 𑀆𑀭𑁄𑀧𑀺𑀢𑁂𑀳𑀺, 𑀢𑀲𑁆𑀫𑀸 𑀲𑀼𑀲𑀗𑁆𑀕𑀳𑀺𑀢𑀸 𑀲𑀗𑁆𑀕𑀻𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀩𑁆𑀭𑀳𑁆𑀫𑀤𑀡𑁆𑀟𑀓𑀣𑀸𑀯𑀡𑁆𑀡𑀦𑀸

𑁪𑁪𑁫. ‘‘𑀢𑁆𑀯𑀁𑀬𑁂𑀯 𑀆𑀡𑀸𑀧𑁂𑀳𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁, 𑀣𑁂𑀭𑀸 𑀧𑀦 𑀩𑁆𑀭𑀳𑁆𑀫𑀤𑀡𑁆𑀟𑀁 𑀓𑀢𑁆𑀯𑀸 𑀯𑀼𑀢𑁆𑀢𑀁𑀬𑁂𑀯 ‘‘𑀙𑀦𑁆𑀦𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳𑀁𑀲𑀽𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀣 𑀘 𑀆𑀦𑀦𑁆𑀤𑀢𑁆𑀣𑁂𑀭𑁄 𑀯𑀺𑀬 𑀅𑀜𑁆𑀜𑁄𑀧𑀺 𑀲𑀗𑁆𑀖𑁂𑀦 𑀆𑀡𑀢𑁆𑀢𑁄 𑀪𑀺𑀓𑁆𑀔𑀼 𑀩𑁆𑀭𑀳𑁆𑀫𑀤𑀡𑁆𑀟𑀓𑀢𑁂𑀦 𑀪𑀺𑀓𑁆𑀔𑀼𑀦𑀸 𑀆𑀮𑀧𑀺𑀢𑀼𑀁 𑀮𑀪𑀢𑀺, 𑀦 𑀅𑀜𑁆𑀜𑁄. 𑀉𑀚𑁆𑀚𑀯𑀦𑀺𑀓𑀸𑀬𑀸𑀢𑀺 𑀧𑀝𑀺𑀲𑁄𑀢𑀕𑀸𑀫𑀺𑀦𑀺𑀬𑀸. 𑀆𑀕𑀫𑀸 𑀦𑀼 𑀔𑁄 𑀇𑀥 𑀆𑀕𑀫𑀸 𑀦𑀼 𑀔𑁆𑀯𑀺𑀥. 𑀆𑀕𑀫𑀸 𑀔𑁄 𑀇𑀥, 𑀢𑁂 𑀑𑀭𑁄𑀥𑀸 𑀇𑀥 𑀆𑀕𑀫𑀸 𑀔𑁄. ‘‘𑀪𑀺𑀲𑀺𑀘𑁆𑀙𑀯𑀻𑀢𑀺 𑀪𑀺𑀲𑀺𑀢𑁆𑀣𑀯𑀺𑀓𑀸’’𑀢𑀺 𑀮𑀺𑀔𑀺𑀢𑀁. 𑀲𑀩𑁆𑀩𑁂𑀯𑀺𑀫𑁂𑀢𑀺 𑀲𑀩𑁆𑀩𑀫𑁂𑀯. 𑀓𑀼𑀮𑀯𑀁 𑀕𑀫𑁂𑀦𑁆𑀢𑀻𑀢𑀺 𑀦𑀺𑀭𑀢𑁆𑀣𑀓𑀯𑀺𑀦𑀸𑀲𑀁 𑀕𑀫𑁂𑀦𑁆𑀢𑀺. 𑀓𑀼𑀘𑁆𑀙𑀺𑀢𑁄 𑀮𑀯𑁄 𑀓𑀼𑀮𑀯𑁄, 𑀅𑀦𑀬𑀯𑀺𑀦𑀸𑀲𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀫𑀸𑀬 𑀔𑁄 𑀧𑀦 ‘‘𑀥𑀫𑁆𑀫𑀯𑀺𑀦𑀬𑀲𑀗𑁆𑀕𑀻𑀢𑀺𑀬𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀯𑀺𑀲𑁂𑀲𑁂𑀦 𑀯𑀺𑀦𑀬𑀲𑁆𑀲 𑀲𑀸𑀲𑀦𑀫𑀽𑀮𑀪𑀸𑀯𑀤𑀲𑁆𑀲𑀦𑀢𑁆𑀣𑀁, 𑀢𑀲𑁆𑀫𑀺𑀁 𑀞𑀺𑀢𑁂 𑀲𑀓𑀮𑀲𑀸𑀲𑀦𑀞𑀺𑀢𑀺𑀲𑀺𑀤𑁆𑀥𑀺𑀤𑀻𑀧𑀦𑀢𑁆𑀣𑀜𑁆𑀘 ‘‘𑀇𑀤𑀁 𑀯𑁄 𑀓𑀧𑁆𑀧𑀢𑀺, 𑀇𑀤𑀁 𑀯𑁄 𑀦 𑀓𑀧𑁆𑀧𑀢𑀻’’𑀢𑀺 𑀯𑀢𑁆𑀣𑀼𑀲𑁆𑀫𑀺𑀁 𑀆𑀭𑀤𑁆𑀥𑀢𑁆𑀢𑀸, 𑀇𑀫𑀺𑀲𑁆𑀲𑀸 𑀘 𑀧𑀭𑀺𑀬𑀢𑁆𑀢𑀺𑀬𑀸 𑀯𑀺𑀦𑀬𑀧𑀺𑀝𑀓𑀢𑁆𑀢𑀸 ‘‘𑀯𑀺𑀦𑀬𑀲𑀗𑁆𑀕𑀻𑀢𑀺𑀬𑀸’’𑀢𑀺 𑀇𑀥 𑀯𑀼𑀢𑁆𑀢𑀁.

𑀧𑀜𑁆𑀘𑀲𑀢𑀺𑀓𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.