𑁧𑁦. 𑀪𑀺𑀓𑁆𑀔𑀼𑀦𑀺𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸

𑀫𑀳𑀸𑀧𑀚𑀸𑀧𑀢𑀺𑀕𑁄𑀢𑀫𑀻𑀯𑀢𑁆𑀣𑀼𑀓𑀣𑀸𑀯𑀡𑁆𑀡𑀦𑀸

𑁪𑁦𑁨-𑁩. 𑀲𑀽𑀦𑁂𑀳𑀻𑀢𑀺 𑀲𑀼𑀢𑁂𑀳𑀺. ‘‘𑀲𑁂𑀢𑀝𑁆𑀝𑀺𑀓𑀸 𑀦𑀸𑀫 𑀭𑁄𑀕𑀚𑀸𑀢𑀻’’𑀢𑀺 𑀧𑀸𑀴𑀺. ‘‘𑀲𑁂𑀢𑀝𑁆𑀞𑀺𑀓𑀸’’𑀢𑀺 𑀅𑀝𑁆𑀞𑀓𑀣𑀸. ‘‘𑀧𑀝𑀺𑀲𑀫𑁆𑀪𑀺𑀤𑀸𑀧𑀢𑁆𑀢𑀔𑀻𑀡𑀸𑀲𑀯𑀕𑁆𑀕𑀳𑀡𑁂𑀦 𑀛𑀸𑀦𑀸𑀦𑀺𑀧𑀺 𑀕𑀳𑀺𑀢𑀸𑀦𑁂𑀯 𑀳𑁄𑀦𑁆𑀢𑀺. 𑀦 𑀳𑀺 𑀦𑀺𑀚𑁆𑀛𑀸𑀦𑀺𑀓𑀸𑀦𑀁 𑀲𑀩𑁆𑀩𑀧𑁆𑀧𑀓𑀸𑀭𑀸 𑀲𑀫𑁆𑀧𑀢𑁆𑀢𑀺 𑀇𑀚𑁆𑀛𑀢𑀻’’𑀢𑀺 𑀮𑀺𑀔𑀺𑀢𑀁.

𑀪𑀺𑀓𑁆𑀔𑀼𑀦𑀻𑀉𑀧𑀲𑀫𑁆𑀧𑀤𑀸𑀦𑀼𑀚𑀸𑀦𑀦𑀓𑀣𑀸𑀯𑀡𑁆𑀡𑀦𑀸

𑁪𑁦𑁪. 𑀬𑀤𑀕𑁆𑀕𑁂𑀦 𑀬𑀁 𑀤𑀺𑀯𑀲𑀁 𑀆𑀤𑀺𑀁 𑀓𑀢𑁆𑀯𑀸. 𑀢𑀤𑁂𑀯𑀸𑀢𑀺 𑀢𑀲𑁆𑀫𑀺𑀁 𑀏𑀯 𑀤𑀺𑀯𑀲𑁂. ‘‘𑀅𑀦𑀼𑀜𑀢𑁆𑀢𑀺𑀬𑀸’’𑀢𑀺 𑀧𑀸𑀞𑁄. ‘‘𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑀸’’𑀢𑀺 𑀦 𑀲𑀼𑀦𑁆𑀤𑀭𑀁.

𑁪𑁦𑁫. ‘‘𑀧𑀝𑀺𑀕𑁆𑀕𑀡𑁆𑀳𑀸𑀫𑀺 𑀬𑀸𑀯𑀚𑀻𑀯𑀁 𑀅𑀦𑀢𑀺𑀓𑁆𑀓𑀫𑀦𑀻𑀬𑁄’’𑀢𑀺 𑀯𑀢𑁆𑀯𑀸 𑀇𑀤𑀸𑀦𑀺 𑀓𑀺𑀁 𑀓𑀸𑀭𑀡𑀸 𑀯𑀭𑀁 𑀬𑀸𑀘𑀢𑀻𑀢𑀺 𑀘𑁂? 𑀧𑀭𑀽𑀧𑀯𑀸𑀤𑀯𑀺𑀯𑀚𑁆𑀚𑀦𑀢𑁆𑀣𑀁. 𑀤𑀼𑀩𑁆𑀩𑀼𑀤𑁆𑀥𑀺𑀦𑁄 𑀳𑀺 𑀓𑁂𑀘𑀺 𑀯𑀤𑁂𑀬𑁆𑀬𑀼𑀁 ‘‘𑀫𑀳𑀸𑀧𑀚𑀸𑀧𑀢𑀺𑀬𑀸 𑀧𑀞𑀫𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀢𑁆𑀢𑀸 𑀉𑀪𑀢𑁄𑀲𑀗𑁆𑀖𑀲𑁆𑀲 𑀬𑀣𑀸𑀯𑀼𑀟𑁆𑀠𑀅𑀪𑀺𑀯𑀸𑀤𑀦𑀁 𑀦 𑀚𑀸𑀢𑀁. 𑀕𑁄𑀢𑀫𑀻 𑀘𑁂 𑀯𑀭𑀁 𑀬𑀸𑀘𑁂𑀬𑁆𑀬, 𑀪𑀕𑀯𑀸 𑀅𑀦𑀼𑀚𑀸𑀦𑁂𑀬𑁆𑀬𑀸’’𑀢𑀺.

𑁪𑁦𑁮. 𑀯𑀺𑀫𑀸𑀦𑁂𑀢𑁆𑀯𑀸𑀢𑀺 𑀅𑀧𑀭𑀚𑁆𑀛𑀺𑀢𑁆𑀯𑀸.

𑁪𑁧𑁦-𑁩. 𑀓𑀫𑁆𑀫𑀧𑁆𑀧𑀢𑁆𑀢𑀸𑀬𑁄𑀧𑀻𑀢𑀺 𑀓𑀫𑁆𑀫𑀸𑀭𑀳𑀸𑀧𑀺. 𑀆𑀧𑀢𑁆𑀢𑀺𑀕𑀸𑀫𑀺𑀦𑀺𑀬𑁄𑀧𑀻𑀢𑀺 𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑀸𑀬𑁄𑀧𑀺. 𑀤𑁆𑀯𑁂 𑀢𑀺𑀲𑁆𑀲𑁄 𑀪𑀺𑀓𑁆𑀔𑀼𑀦𑀺𑀬𑁄𑀢𑀺 𑀤𑁆𑀯𑀻𑀳𑀺 𑀢𑀻𑀳𑀺 𑀪𑀺𑀓𑁆𑀔𑀼𑀦𑀻𑀳𑀺. ‘‘𑀫𑀦𑁄𑀲𑀺𑀮𑀺𑀓𑀸𑀬𑀸’’𑀢𑀺 𑀧𑀸𑀞𑁄.

𑁪𑁨𑁦. ‘‘𑀢𑁂𑀦 𑀘 𑀪𑀺𑀓𑁆𑀔𑀼 𑀦𑀺𑀫𑀦𑁆𑀢𑁂𑀢𑀩𑁆𑀩𑁄’’𑀢𑀺 𑀲𑀸𑀫𑀻𑀘𑀺𑀯𑀲𑁂𑀦 𑀯𑀼𑀢𑁆𑀢𑀁.

𑁪𑁨𑁨-𑁩. ‘‘𑀅𑀦𑀼𑀚𑀸𑀦𑀸𑀫𑀺…𑀧𑁂… 𑀢𑀸𑀯𑀓𑀸𑀮𑀺𑀓’’𑀦𑁆𑀢𑀺 𑀧𑀼𑀕𑁆𑀕𑀮𑀺𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀲𑀗𑁆𑀖𑀺𑀓𑀦𑁆𑀢𑀺 𑀆𑀘𑀭𑀺𑀬𑁄. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀢𑀼𑀦𑀺𑀬𑀸 𑀓𑀝𑀺𑀲𑀼𑀢𑁆𑀢𑀓’’𑀦𑁆𑀢𑀺 𑀯𑀘𑀦𑀢𑁄 𑀪𑀺𑀓𑁆𑀔𑀼𑀲𑁆𑀲 𑀯𑀺𑀦𑀺𑀩𑀦𑁆𑀥𑀁 𑀓𑀝𑀺𑀲𑀼𑀢𑁆𑀢𑀓𑀁 𑀦 𑀯𑀝𑁆𑀝𑀢𑀺. 𑀧𑀕𑁆𑀖𑀭𑀦𑁆𑀢𑀻 𑀯𑀺𑀲𑀯𑀺𑀡𑀸. 𑀯𑁂𑀧𑀼𑀭𑀺𑀲𑀺𑀓𑀸 𑀫𑀲𑁆𑀲𑀼𑀤𑀸𑀞𑀻.

𑁪𑁨𑁫. 𑀢𑀬𑁄 𑀦𑀺𑀲𑁆𑀲𑀬𑁂𑀢𑀺 𑀭𑀼𑀓𑁆𑀔𑀫𑀽𑀮𑀜𑁆𑀳𑀺 𑀲𑀸 𑀦 𑀮𑀪𑀢𑀺.

𑁪𑁨𑁬. 𑀪𑀢𑁆𑀢𑀕𑁆𑀕𑁂 𑀲𑀘𑁂 𑀤𑀸𑀬𑀓𑀸 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀪𑀼𑀢𑁆𑀢𑀯𑀢𑁄 𑀘𑀢𑀼𑀧𑀘𑁆𑀘𑀬𑁂 𑀤𑀸𑀢𑀼𑀓𑀸𑀫𑀸 𑀳𑁄𑀦𑁆𑀢𑀺, 𑀬𑀣𑀸𑀯𑀼𑀟𑁆𑀠𑀫𑁂𑀯.

𑁪𑁨𑁭. 𑀯𑀺𑀓𑀸𑀮𑁂𑀢𑀺 𑀬𑀸𑀯 𑀯𑀺𑀓𑀸𑀮𑁂 𑀳𑁄𑀦𑁆𑀢𑀺, 𑀢𑀸𑀯 𑀧𑀯𑀸𑀭𑁂𑀲𑀼𑀦𑁆𑀢𑀺 𑀅𑀢𑁆𑀣𑁄. 𑀅𑀚𑁆𑀚𑀢𑁆𑀢𑀦𑀸𑀢𑀺 𑀅𑀚𑁆𑀚𑀢𑀦𑀸.

𑁪𑁨𑁮. 𑀅𑀦𑀼𑀯𑀸𑀤𑀦𑁆𑀢𑀺 𑀇𑀲𑁆𑀲𑀭𑀺𑀬𑀝𑁆𑀞𑀸𑀦𑀁. 𑀇𑀤𑀁 𑀲𑀩𑁆𑀩𑀁 ‘‘𑀅𑀚𑁆𑀚𑀢𑀕𑁆𑀕𑁂 𑀑𑀯𑀝𑁄 𑀪𑀺𑀓𑁆𑀔𑀼𑀦𑀻𑀦𑀁 𑀪𑀺𑀓𑁆𑀔𑀽𑀲𑀼 𑀯𑀘𑀦𑀧𑀣𑁄’’𑀢𑀺 𑀧𑀜𑁆𑀜𑀢𑁆𑀢𑀲𑁆𑀲 𑀕𑀭𑀼𑀥𑀫𑁆𑀫𑀲𑁆𑀲 𑀯𑀻𑀢𑀺𑀓𑁆𑀓𑀫𑀆𑀧𑀢𑁆𑀢𑀺𑀧𑀜𑁆𑀜𑀸𑀧𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀅𑀜𑁆𑀜𑀣𑀸 𑀬𑁂𑀲𑀁 𑀕𑀭𑀼𑀥𑀫𑁆𑀫𑀸𑀦𑀁 𑀧𑀝𑀺𑀕𑁆𑀕𑀳𑀡𑁂𑀦 𑀪𑀺𑀓𑁆𑀔𑀼𑀦𑀻𑀦𑀁 𑀉𑀧𑀲𑀫𑁆𑀧𑀤𑀸 𑀅𑀦𑀼𑀜𑁆𑀜𑀸𑀢𑀸, 𑀢𑁂𑀲𑀁 𑀯𑀻𑀢𑀺𑀓𑁆𑀓𑀫𑁂 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀯 𑀲𑀺𑀬𑀸𑀢𑀺 𑀆𑀲𑀗𑁆𑀓𑀸 𑀪𑀯𑁂𑀬𑁆𑀬.

𑁪𑁨𑁯. 𑀇𑀢𑁆𑀣𑀺𑀬𑀼𑀢𑁆𑀢𑁂𑀦𑀸𑀢𑀺 𑀇𑀢𑁆𑀣𑀻𑀳𑀺 𑀕𑀸𑀯𑀻𑀆𑀤𑀻𑀳𑀺 𑀥𑀼𑀭𑀝𑁆𑀞𑀸𑀦𑁂 𑀬𑀼𑀢𑁆𑀢𑁂𑀦. 𑀧𑀼𑀭𑀺𑀲𑀦𑁆𑀢𑀭𑁂𑀦𑀸𑀢𑀺 𑀧𑀼𑀭𑀺𑀲𑁂𑀦 𑀅𑀦𑁆𑀢𑀭𑀺𑀓𑁂𑀦. ‘‘𑀧𑀼𑀭𑀺𑀲𑀤𑀼𑀢𑀺𑀬𑁂𑀦𑀸’’𑀢𑀺 𑀮𑀺𑀔𑀺𑀢𑀁, 𑀧𑀼𑀭𑀺𑀲𑀲𑀸𑀭𑀣𑀺𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀩𑀸𑀴𑁆𑀳𑀢𑀭𑀁 𑀅𑀨𑀸𑀲𑀽’’𑀢𑀺 𑀯𑀘𑀦𑀢𑁄 𑀕𑀺𑀮𑀸𑀦𑀸𑀬 𑀯𑀝𑁆𑀝𑀢𑀺𑀘𑁆𑀘𑁂𑀯 𑀲𑀺𑀤𑁆𑀥𑀁, 𑀪𑀕𑀯𑀦𑁆𑀢𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀅𑀦𑀼𑀜𑁆𑀜𑀸𑀢𑀝𑁆𑀞𑀸𑀦𑁂 𑀉𑀧𑀲𑀫𑁆𑀧𑀚𑁆𑀚𑀺𑀲𑁆𑀲𑀸𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁩𑁦. 𑀲𑀸 𑀓𑁂𑀦𑀘𑀺𑀤𑁂𑀯 𑀅𑀦𑁆𑀢𑀭𑀸𑀬𑁂𑀦𑀸𑀢𑀺 𑀲𑀩𑁆𑀩𑀦𑁆𑀢𑀭𑀸𑀬𑀲𑀗𑁆𑀕𑀳𑀦𑀯𑀘𑀦𑀁, 𑀢𑀲𑁆𑀫𑀸 𑀢𑀁 𑀦 𑀅𑀦𑁆𑀢𑀭𑀸𑀬𑀁 𑀓𑀺𑀢𑁆𑀢𑁂𑀢𑁆𑀯𑀸, 𑀯𑀼𑀢𑁆𑀢𑀦𑁆𑀢𑀭𑀸𑀬𑁂𑀦 ‘‘𑀭𑀸𑀚𑀦𑁆𑀢𑀭𑀸𑀬𑁂𑀦𑀸’’𑀢𑀺 𑀲𑀸𑀥𑁂𑀢𑀩𑁆𑀩𑀦𑁆𑀢𑀺 𑀆𑀘𑀭𑀺𑀬𑁄.

𑁪𑁩𑁧-𑁨. ‘‘𑀦𑀯𑀓𑀫𑁆𑀫𑀦𑁆𑀢𑀺 𑀓𑀢𑁆𑀯𑀸 ‘𑀏𑀢𑁆𑀢𑀓𑀸𑀦𑀺 𑀯𑀲𑁆𑀲𑀸𑀦𑀺 𑀯𑀲𑀢𑀽’𑀢𑀺 𑀅𑀧𑀮𑁄𑀓𑁂𑀢𑁆𑀯𑀸 𑀲𑀗𑁆𑀖𑀺𑀓𑀪𑀽𑀫𑀺𑀤𑀸𑀦’’𑀦𑁆𑀢𑀺 𑀮𑀺𑀔𑀺𑀢𑀁. ‘‘𑀲𑀸𑀕𑀸𑀭’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀕𑀸𑀭𑀧𑀝𑀺𑀲𑀁𑀬𑀼𑀢𑁆𑀢𑀭𑀳𑁄𑀦𑀺𑀲𑀚𑁆𑀚𑀲𑀺𑀓𑁆𑀔𑀸𑀤𑀺𑀯𑀚𑁆𑀚𑀺𑀢𑀸𑀢𑀺 𑀓𑁂𑀘𑀺, 𑀬𑀼𑀢𑁆𑀢𑀫𑁂𑀢𑀁. 𑀓𑀲𑁆𑀫𑀸? ‘‘𑀲𑀳𑀸𑀕𑀸𑀭𑀲𑁂𑀬𑁆𑀬𑀫𑀢𑁆𑀢𑀁 𑀞𑀧𑁂𑀢𑁆𑀯𑀸’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑁄𑀲𑁂𑀢𑀼’’𑀦𑁆𑀢𑀺 𑀯𑀘𑀦𑀢𑁄 𑀧𑁄𑀲𑀦𑀬𑀼𑀢𑁆𑀢𑀓𑀫𑁆𑀫𑀁 𑀲𑀩𑁆𑀩𑀁 𑀯𑀝𑁆𑀝𑀢𑀺 𑀫𑀸𑀢𑀼𑀬𑀸, 𑀦 𑀅𑀜𑁆𑀜𑁂𑀲𑀁. 𑀯𑀲𑀺𑀢𑀼𑀁 𑀘𑁂 𑀦 𑀲𑀓𑁆𑀓𑁄𑀢𑀺 𑀤𑀼𑀢𑀺𑀬𑀁 𑀯𑀺𑀦𑀸, 𑀲𑀫𑁆𑀫𑀦𑁆𑀦𑀺𑀢𑁆𑀯𑀸𑀯 𑀤𑀸𑀢𑀩𑁆𑀩𑀸 𑀢𑀸𑀬 𑀇𑀢𑀺 𑀦𑁄 𑀫𑀢𑀺. 𑀓𑀺𑀢𑁆𑀢𑀓𑀁 𑀓𑀸𑀮𑀁? 𑀯𑀲𑀺𑀢𑁆𑀯𑀸 𑀘𑁂 𑀤𑀼𑀢𑀺𑀬𑀸 𑀕𑀦𑁆𑀢𑀼𑀫𑀺𑀘𑁆𑀙𑀢𑀺, 𑀅𑀜𑁆𑀜𑀁 𑀲𑀫𑁆𑀫𑀦𑁆𑀦𑀺𑀢𑀼𑀁 𑀬𑀼𑀢𑁆𑀢𑀸𑀯. 𑀲𑀸 𑀯𑀺𑀚𑀸𑀢𑀸 𑀮𑀪𑁂𑀢𑀺 𑀆𑀘𑀭𑀺𑀬𑁄.

𑁪𑁩𑁪. ‘‘𑀇𑀤𑀁 𑀑𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑀁 𑀯𑀝𑁆𑀝𑀢𑀻𑀢𑀺 𑀏𑀓𑀢𑁄 𑀯𑀸 𑀉𑀪𑀢𑁄 𑀯𑀸 𑀅𑀯𑀲𑁆𑀲𑀯𑁂 𑀲𑀢𑀺𑀧𑀺 𑀯𑀝𑁆𑀝𑀢𑀻’’𑀢𑀺 𑀮𑀺𑀔𑀺𑀢𑀁. ‘‘𑀓𑁂𑀲𑀘𑁆𑀙𑁂𑀤𑀸𑀤𑀺𑀓𑀁 𑀓𑀫𑁆𑀫𑀁 𑀅𑀦𑀼𑀚𑀸𑀦𑀸𑀫𑀺 𑀲𑀸𑀤𑀺𑀢𑀼𑀁 ’’𑀇𑀘𑁆𑀘𑁂𑀯 𑀯𑀼𑀢𑁆𑀢𑀢𑁆𑀢𑀸 𑀯𑀼𑀢𑁆𑀢𑀁 ‘‘𑀢𑀤𑀜𑁆𑀜𑁂 𑀲𑀸𑀤𑀺𑀢𑀼’’𑀦𑁆𑀢𑀺. ‘‘𑀓𑁂𑀲𑀘𑁆𑀙𑁂𑀤𑀸𑀤𑀺𑀓𑀁 𑀓𑀫𑁆𑀫𑀁 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂’’𑀢𑀺 𑀅𑀯𑀢𑁆𑀯𑀸 𑀏𑀢𑁆𑀢𑀓𑀁 𑀬𑀲𑁆𑀫𑀸 ‘‘𑀲𑀸𑀤𑀺𑀢𑀼’’𑀦𑁆𑀢𑀺 𑀪𑀸𑀲𑀺𑀢𑀁, 𑀢𑀲𑁆𑀫𑀸 𑀲𑀸 𑀯𑀺𑀘𑀺𑀓𑀺𑀘𑁆𑀙𑀸𑀬 𑀉𑀪𑀢𑁄𑀧𑀺 𑀅𑀯𑀲𑁆𑀲𑀯𑁂 𑀅𑀧𑀺 𑀧𑀸𑀭𑀸𑀚𑀺𑀓𑀔𑁂𑀢𑁆𑀢𑁂𑀦 𑀲𑀸 𑀧𑀸𑀭𑀸𑀚𑀺𑀓𑀁 𑀨𑀼𑀲𑀢𑀺. 𑀇𑀢𑀺 𑀅𑀝𑁆𑀞𑀓𑀣𑀸𑀲𑁆𑀯𑁂𑀢𑀁 𑀲𑀩𑁆𑀩𑀸𑀲𑀼𑀧𑀺 𑀯𑀺𑀦𑀺𑀘𑁆𑀙𑀺𑀢𑀁. 𑀑𑀤𑀺𑀲𑁆𑀲𑀓𑀸𑀪𑀺𑀮𑀸𑀧𑁄 𑀳𑀺 𑀅𑀜𑁆𑀜𑀣𑀸 𑀦𑀺𑀩𑁆𑀩𑀺𑀲𑁂𑀲𑀢𑁄 𑀢𑀁 𑀧𑀫𑀸𑀡𑀁. 𑀬𑀤𑀺 𑀢𑀣𑀸 𑀪𑀺𑀓𑁆𑀔𑀼𑀲𑁆𑀲 𑀓𑀧𑁆𑀧𑀢𑀺 𑀯𑀺𑀘𑀺𑀓𑀺𑀘𑁆𑀙𑀸.

𑀓𑀸𑀮𑀫𑁄𑀤𑀺𑀲𑁆𑀲 𑀦𑀁 𑀧𑀤𑀁, 𑀦 𑀲𑀢𑁆𑀢𑁄𑀤𑀺𑀲𑁆𑀲𑀓𑀜𑁆𑀳𑀺 𑀢𑀁;

𑀅𑀣 𑀪𑀺𑀓𑁆𑀔𑀼𑀦𑀺𑀬𑀸 𑀏𑀯, 𑀓𑀸𑀮𑀫𑁄𑀤𑀺𑀲𑁆𑀲 𑀪𑀸𑀲𑀺𑀢𑀁.

𑀏𑀯𑀁 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺, 𑀲𑀺𑀣𑀺𑀮𑀸𑀯 𑀓𑀢𑀸 𑀲𑀺𑀬𑀸;

𑀲𑀩𑁆𑀩𑀲𑁄 𑀧𑀺𑀳𑀺𑀢𑀁 𑀤𑁆𑀯𑀸𑀭𑀁, 𑀲𑀩𑁆𑀩𑀧𑀸𑀭𑀸𑀚𑀺𑀓𑀲𑁆𑀫𑀺𑀦𑁆𑀢𑀺.

𑀦𑀺𑀭𑀢𑁆𑀣𑀓𑀪𑀸𑀯𑀢𑁄, 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑁂;

𑀢𑀲𑁆𑀫𑀸 𑀦 𑀲𑀸𑀤𑀺𑀬𑀦𑁆𑀢𑀻𑀢𑀺, 𑀦𑀺𑀤𑀸𑀦𑀯𑀘𑀦𑀓𑁆𑀓𑀫𑀁.

𑀦𑀺𑀲𑁆𑀲𑀸𑀬 𑀲𑀢𑁆𑀣𑀼𑀦𑀸 𑀯𑀼𑀢𑁆𑀢𑀁, 𑀲𑀸𑀤𑀺𑀢𑀼𑀦𑁆𑀢𑀺 𑀦 𑀅𑀜𑁆𑀜𑀣𑀸;

𑀅𑀢𑁆𑀢𑀦𑁄 𑀧𑀡𑁆𑀳𑀺𑀲𑀫𑁆𑀨𑀲𑁆𑀲𑀁, 𑀲𑀸𑀤𑀺𑀢𑀼𑀁 𑀬𑁂𑀦 𑀯𑀸𑀭𑀺𑀢𑀁.

𑀅𑀧𑀺 𑀧𑀸𑀭𑀸𑀚𑀺𑀓𑀓𑁆𑀔𑁂𑀢𑁆𑀢𑁂, 𑀓𑀣𑀁 𑀤𑁆𑀯𑀸𑀭𑀁 𑀤𑀤𑁂𑀬𑁆𑀬 𑀲𑁄;

𑀢𑀣𑀸𑀧𑀺 𑀩𑀼𑀤𑁆𑀥𑀧𑀼𑀢𑁆𑀢𑀸𑀦𑀁, 𑀩𑀼𑀤𑁆𑀥𑀪𑀸𑀲𑀺𑀢𑀪𑀸𑀲𑀺𑀢𑀁.

𑀯𑀘𑀦𑀜𑁆𑀘 𑀲𑀫𑀸𑀦𑁂𑀦𑁆𑀢𑁄, 𑀦𑁄 𑀘𑁂𑀢𑁆𑀣 𑀬𑀼𑀢𑁆𑀢𑀺𑀓𑀣𑀸 𑀥𑀻𑀭𑀸;

𑀓𑁂𑀲𑀘𑁆𑀙𑁂𑀤𑀸𑀤𑀺𑀓𑀫𑁆𑀫𑀲𑁆𑀲, 𑀅𑀯𑀲𑁆𑀲𑀁 𑀓𑀭𑀡𑀻𑀬𑀢𑁄.

𑀘𑀺𑀢𑁆𑀢𑀲𑁆𑀲 𑀘𑀸𑀢𑀺𑀮𑁄𑀮𑀢𑁆𑀢𑀸, 𑀕𑀡𑀲𑁆𑀲 𑀘 𑀅𑀗𑁆𑀕𑀲𑀫𑁆𑀧𑀤𑀸-

𑀪𑀸𑀯𑀸 𑀪𑀺𑀓𑁆𑀔𑀼𑀦𑀻𑀦𑀁 𑀫𑀳𑁂𑀲𑀺𑀦𑀸, 𑀭𑀓𑁆𑀔𑀺𑀢𑀼𑀜𑁆𑀘 𑀅𑀲𑀗𑁆𑀓𑀢𑁆𑀢𑀸;

𑀦𑀦𑀼 𑀫𑁄𑀤𑀺𑀲𑁆𑀲𑀓𑀁 𑀓𑀢𑀦𑁆𑀢𑀺.

𑀪𑀺𑀓𑁆𑀔𑀼𑀦𑀺𑀓𑁆𑀔𑀦𑁆𑀥𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.