𑁧. 𑀧𑀞𑀫𑀅𑀦𑀺𑀬𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁪𑁪-𑁫. 𑀉𑀤𑁆𑀤𑁂𑀲𑀦𑁆𑀢𑀺 𑀉𑀤𑁆𑀤𑀺𑀲𑀦𑀁, 𑀆𑀲𑀸𑀴𑁆𑀳𑀺𑀦𑀓𑁆𑀔𑀢𑁆𑀢𑀁 𑀦𑀸𑀫 𑀯𑀲𑁆𑀲𑀽𑀧𑀕𑀫𑀧𑀽𑀚𑀸. 𑀲𑁄𑀢𑀲𑁆𑀲 𑀭𑀳𑁄𑀢𑀺 𑀏𑀢𑁆𑀣 𑀭𑀳𑁄-𑀯𑀘𑀦𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀁 𑀤𑀼𑀝𑁆𑀞𑀼𑀮𑁆𑀮𑀲𑀸𑀫𑀜𑁆𑀜𑀢𑁄 𑀤𑀼𑀝𑁆𑀞𑀼𑀮𑁆𑀮𑀸𑀭𑁄𑀘𑀦𑀧𑁆𑀧𑀝𑀺𑀘𑁆𑀙𑀸𑀤𑀦𑀲𑀺𑀓𑁆𑀔𑀸𑀧𑀤𑁂𑀲𑀼 𑀧𑀸𑀭𑀸𑀚𑀺𑀓𑀯𑀘𑀦𑀁 𑀯𑀺𑀬. 𑀢𑀲𑁆𑀫𑀸 ‘‘𑀘𑀓𑁆𑀔𑀼𑀲𑁆𑀲 𑀭𑀳𑁂𑀦𑁂𑀯 𑀧𑀦 𑀧𑀭𑀺𑀘𑁆𑀙𑁂𑀤𑁄 𑀓𑀸𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀓𑀣𑀁 𑀧𑀜𑁆𑀜𑀸𑀬𑀢𑀻𑀢𑀺 𑀘𑁂? ‘‘𑀫𑀸𑀢𑀼𑀕𑀸𑀫𑁄 𑀦𑀸𑀫 𑀢𑀤𑀳𑀼𑀚𑀸𑀢𑀸𑀧𑀺 𑀤𑀸𑀭𑀺𑀓𑀸’’𑀢𑀺 𑀯𑀘𑀦𑀢𑁄, ‘‘𑀅𑀮𑀁𑀓𑀫𑁆𑀫𑀦𑀺𑀬𑁂𑀢𑀺 𑀲𑀓𑁆𑀓𑀸 𑀳𑁄𑀢𑀺 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑀼’’𑀦𑁆𑀢𑀺 𑀯𑀘𑀦𑀢𑁄 𑀘 𑀭𑀳𑁄𑀦𑀺𑀲𑀚𑁆𑀚𑀲𑁆𑀲𑀸𑀤𑁄 𑀘𑁂𑀢𑁆𑀣 𑀫𑁂𑀣𑀼𑀦𑀲𑀦𑁆𑀦𑀺𑀲𑁆𑀲𑀺𑀢𑀓𑀺𑀮𑁂𑀲𑁄, 𑀦 𑀤𑀼𑀢𑀺𑀬𑁂 𑀯𑀺𑀬 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀲𑁆𑀲𑀸𑀤𑀓𑀺𑀮𑁂𑀲𑁄, 𑀢𑀲𑁆𑀫𑀸 𑀘 𑀧𑀜𑁆𑀜𑀸𑀬𑀢𑀺 ‘‘𑀲𑁄𑀢𑀲𑁆𑀲 𑀭𑀳𑁄 𑀦𑀸𑀥𑀺𑀧𑁆𑀧𑁂𑀢𑁄’’𑀢𑀺. 𑀓𑁂𑀘𑀺 𑀧𑀦 ‘‘𑀢𑀜𑁆𑀘 𑀮𑀩𑁆𑀪𑀢𑀻𑀢𑀺 𑀯𑀘𑀦𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀢𑁂𑀦 𑀤𑀼𑀢𑀺𑀬𑁂 𑀯𑀼𑀢𑁆𑀢𑀸 𑀯𑀺𑀜𑁆𑀜𑀽 𑀧𑀝𑀺𑀩𑀮𑀸 𑀕𑀳𑀺𑀢𑀸 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺. 𑀬𑁂𑀦 𑀯𑀸 𑀲𑀸𑀢𑀺 𑀏𑀢𑁆𑀣 𑀯𑀸-𑀲𑀤𑁆𑀤𑁄 ‘‘𑀢𑁂𑀦 𑀲𑁄 𑀪𑀺𑀓𑁆𑀔𑀼 𑀓𑀸𑀭𑁂𑀢𑀩𑁆𑀩𑁄 𑀯𑀸’’𑀢𑀺 𑀬𑁄𑀚𑁂𑀢𑀩𑁆𑀩𑁄, 𑀲𑁄 𑀘 𑀯𑀺𑀓𑀧𑁆𑀧𑀢𑁆𑀣𑁄, 𑀢𑀲𑁆𑀫𑀸 𑀓𑀸𑀭𑁂𑀢𑀩𑁆𑀩𑁄 𑀯𑀸 𑀧𑀝𑀺𑀚𑀸𑀦𑀫𑀸𑀦𑁄, 𑀦 𑀯𑀸 𑀓𑀸𑀭𑁂𑀢𑀩𑁆𑀩𑁄 𑀅𑀧𑁆𑀧𑀝𑀺𑀚𑀸𑀦𑀫𑀸𑀦𑁄𑀢𑀺 𑀅𑀢𑁆𑀣𑁄. 𑀢𑁂𑀦 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀧𑀝𑀺𑀚𑀸𑀦𑀫𑀸𑀦𑁄𑀯 𑀢𑁂𑀦 𑀲𑁄 𑀪𑀺𑀓𑁆𑀔𑀼 𑀓𑀸𑀭𑁂𑀢𑀩𑁆𑀩𑁄…𑀧𑁂… 𑀦 𑀓𑀸𑀭𑁂𑀢𑀩𑁆𑀩𑁄’’𑀢𑀺. 𑀢𑀲𑁆𑀫𑀸 𑀏𑀯 𑀧𑀸𑀴𑀺𑀬𑀁 𑀢𑀤𑀢𑁆𑀣𑀤𑁆𑀯𑀬𑀤𑀲𑁆𑀲𑀦𑀢𑁆𑀣𑀁 ‘‘𑀲𑀸 𑀘𑁂 𑀏𑀯𑀁 𑀯𑀤𑁂𑀬𑁆𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀲𑀤𑁆𑀥𑁂𑀬𑁆𑀬𑀯𑀘𑀲𑀸’’𑀢𑀺 𑀇𑀫𑀺𑀦𑀸 𑀲𑁄𑀢𑀸𑀧𑀦𑁆𑀦𑀸 𑀅𑀢𑁆𑀣𑀪𑀜𑁆𑀚𑀦𑀓𑀁 𑀦 𑀪𑀡𑀦𑁆𑀢𑀺, 𑀲𑁂𑀲𑀁 𑀪𑀡𑀦𑁆𑀢𑀻𑀢𑀺 𑀯𑀸𑀤𑀻𑀦𑀁 𑀯𑀸𑀤𑁄 𑀧𑀝𑀺𑀲𑁂𑀥𑀺𑀢𑁄 𑀳𑁄𑀢𑀺. ‘‘𑀤𑀺𑀝𑁆𑀞’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀑𑀮𑁄𑀓𑁂𑀲𑀻’’𑀢𑀺 𑀲𑀼𑀦𑁆𑀤𑀭𑀁. 𑀭𑀓𑁆𑀔𑁂𑀬𑁆𑀬𑀸𑀲𑀻𑀢𑀺 𑀫𑀫 𑀯𑀺𑀲𑁂𑀲𑀁 𑀓𑀲𑁆𑀲𑀘𑀺 𑀦𑀸𑀭𑁄𑀘𑁂𑀬𑁆𑀬𑀸𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁪𑁪𑁬. ‘‘𑀲𑀸 𑀘𑁂 𑀏𑀯𑀁 𑀯𑀤𑁂𑀬𑁆𑀬 ‘𑀅𑀬𑁆𑀬𑀲𑁆𑀲 𑀫𑀬𑀸 𑀲𑀼𑀢𑀁 𑀦𑀺𑀲𑀺𑀦𑁆𑀦𑀲𑁆𑀲 𑀫𑀸𑀢𑀼𑀕𑀸𑀫𑀁 𑀤𑀼𑀝𑁆𑀞𑀼𑀮𑁆𑀮𑀸𑀳𑀺 𑀯𑀸𑀘𑀸𑀳𑀺 𑀑𑀪𑀸𑀲𑁂𑀦𑁆𑀢𑀲𑁆𑀲𑀸’’’𑀢𑀺, 𑀇𑀤𑀁 𑀓𑀺𑀫𑀢𑁆𑀣𑀫𑁂𑀢𑁆𑀣 𑀯𑀼𑀢𑁆𑀢𑀁, 𑀦 𑀅𑀥𑀺𑀧𑁆𑀧𑁂𑀢𑀜𑁆𑀳𑁂𑀢𑀁 𑀇𑀥 𑀲𑁄𑀢𑀲𑁆𑀲 𑀭𑀳𑁄 𑀦𑀸𑀥𑀺𑀧𑁆𑀧𑁂𑀢𑁄𑀢𑀺 𑀓𑀢𑁆𑀯𑀸𑀢𑀺 𑀘𑁂? 𑀅𑀮𑀁𑀓𑀫𑁆𑀫𑀦𑀺𑀬𑀝𑁆𑀞𑀸𑀦𑁂 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀧𑀺 𑀮𑀩𑁆𑀪𑀢𑀺, 𑀦 𑀧𑀦 𑀦𑀸𑀮𑀁𑀓𑀫𑁆𑀫𑀦𑀺𑀬𑀝𑁆𑀞𑀸𑀦𑁂 𑀫𑁂𑀣𑀼𑀦𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺. 𑀬𑀣𑀸 𑀏𑀢𑀁, 𑀢𑀣𑀸 ‘‘𑀲𑀸 𑀘𑁂 𑀏𑀯𑀁 𑀯𑀤𑁂𑀬𑁆𑀬 ‘𑀅𑀬𑁆𑀬𑀲𑁆𑀲 𑀫𑀬𑀸 𑀲𑀼𑀢𑀁 𑀫𑀸𑀢𑀼𑀕𑀸𑀫𑀲𑁆𑀲 𑀲𑀦𑁆𑀢𑀺𑀓𑁂 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀁 𑀪𑀸𑀲𑀦𑁆𑀢𑀲𑁆𑀲𑀸’’’𑀢𑀺 𑀏𑀢𑀫𑁆𑀧𑀺 𑀇𑀥 𑀮𑀩𑁆𑀪𑀢𑀺, 𑀦 𑀤𑀼𑀢𑀺𑀬𑁂 𑀦𑀸𑀮𑀁𑀓𑀫𑁆𑀫𑀦𑀺𑀬𑀝𑁆𑀞𑀸𑀦𑀢𑁆𑀢𑀸𑀢𑀺 𑀏𑀓𑁂. 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀤𑀼𑀢𑀺𑀬𑀸𑀦𑀺𑀬𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀇𑀥𑀸𑀧𑀺 𑀤𑀼𑀢𑀺𑀬𑀸𑀦𑀺𑀬𑀢𑀸𑀥𑀺𑀓𑀸𑀭𑁂 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀜𑁆𑀘 𑀧𑀭𑀺𑀳𑀸𑀧𑁂𑀢𑁆𑀯𑀸 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀧𑀢𑁆𑀢𑀺𑀬𑀸 𑀯𑀼𑀢𑁆𑀢𑀢𑁆𑀢𑀸 𑀧𑀞𑀫𑀸𑀦𑀺𑀬𑀢𑁂 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀧𑀢𑁆𑀢𑀺 𑀦 𑀯𑀼𑀢𑁆𑀢𑀸𑀢𑀺 𑀘𑁂? ‘‘𑀲𑀸 𑀘𑁂’’𑀢𑀺 𑀢𑀲𑁆𑀲𑀸 𑀧𑀸𑀴𑀺𑀬𑀸 𑀧𑁄𑀢𑁆𑀣𑀓𑀸 𑀲𑁄𑀥𑁂𑀢𑀩𑁆𑀩𑀸. 𑀕𑀡𑁆𑀞𑀺𑀧𑀤𑁂 𑀘 ‘‘𑀇𑀥 𑀲𑀺𑀓𑁆𑀔𑀸𑀧𑀤𑁂 𑀫𑁂𑀣𑀼𑀦𑀓𑀸𑀬𑀲𑀁𑀲𑀕𑁆𑀕𑀭𑀳𑁄𑀦𑀺𑀲𑀚𑁆𑀚𑀸𑀦𑀫𑁂𑀯𑀸𑀕𑀢𑀢𑁆𑀢𑀸 𑀘𑀓𑁆𑀔𑀼𑀲𑁆𑀲𑀭𑀳𑁄𑀯 𑀧𑀫𑀸𑀡’’𑀦𑁆𑀢𑀺 𑀮𑀺𑀔𑀺𑀢𑀁, 𑀤𑀼𑀢𑀺𑀬𑀸𑀦𑀺𑀬𑀢𑀸𑀥𑀺𑀓𑀸𑀭𑁂 𑀘 ‘‘𑀅𑀦𑀦𑁆𑀥𑁄 𑀓𑀸𑀬𑀲𑀁𑀲𑀕𑁆𑀕𑀁 𑀧𑀲𑁆𑀲𑀢𑀺, 𑀅𑀩𑀥𑀺𑀭𑁄 𑀤𑀼𑀝𑁆𑀞𑀼𑀮𑁆𑀮𑀁 𑀲𑀼𑀡𑀸𑀢𑀺, 𑀓𑀸𑀬𑀘𑀺𑀢𑁆𑀢𑀢𑁄 𑀓𑀸𑀬𑀲𑀁𑀲𑀕𑁆𑀕𑁄, 𑀯𑀸𑀘𑀸𑀘𑀺𑀢𑁆𑀢𑀢𑁄 𑀤𑀼𑀝𑁆𑀞𑀼𑀮𑁆𑀮𑀁, 𑀉𑀪𑀬𑁂𑀳𑀺 𑀉𑀪𑀬’’𑀦𑁆𑀢𑀺 𑀘 𑀮𑀺𑀔𑀺𑀢𑀁. 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀫𑀼𑀝𑁆𑀞𑀸𑀦𑀸𑀤𑀻𑀦𑀺 𑀧𑀞𑀫𑀧𑀸𑀭𑀸𑀚𑀺𑀓𑀲𑀤𑀺𑀲𑀸𑀦𑁂𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸𑀧𑀺 𑀤𑀼𑀝𑁆𑀞𑀼𑀮𑁆𑀮𑀯𑀸𑀤𑁄 𑀦 𑀲𑀼𑀦𑁆𑀤𑀭𑁄 ‘‘𑀢𑀤𑀳𑀼𑀚𑀸𑀢𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸𑀢𑀺.

𑀧𑀞𑀫𑀅𑀦𑀺𑀬𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.