𑁪. 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀁

𑀯𑀕𑁆𑀕𑀼𑀫𑀼𑀤𑀸𑀢𑀻𑀭𑀺𑀬𑀪𑀺𑀓𑁆𑀔𑀼𑀯𑀢𑁆𑀣𑀼𑀯𑀡𑁆𑀡𑀦𑀸

𑁧𑁯𑁩. 𑀘𑀢𑀼𑀢𑁆𑀣𑁂 𑀯𑀕𑁆𑀕𑀼 𑀘 𑀲𑀸 𑀫𑁄𑀤𑀬𑀢𑀺 𑀘 𑀲𑀢𑁆𑀢𑁂𑀢𑀺 𑀯𑀕𑁆𑀕𑀼𑀫𑀼𑀤𑀸. ‘‘𑀯𑀕𑁆𑀕𑀼𑀫𑀤𑀸’’𑀢𑀺𑀧𑀺 𑀧𑀸𑀞𑁄, 𑀢𑀲𑁆𑀲 𑀯𑀕𑁆𑀕𑀼 𑀘 𑀲𑀸 𑀧𑀲𑀦𑁆𑀦𑀲𑀼𑀤𑁆𑀥𑀢𑀭𑀗𑁆𑀕𑀲𑀫𑀺𑀤𑁆𑀥𑀢𑁆𑀢𑀸 𑀲𑀼𑀔𑀼𑀫𑀸 𑀘𑀸𑀢𑀺 𑀅𑀢𑁆𑀣𑁄 𑀚𑀻𑀯𑀺𑀢𑀯𑀕𑁆𑀕𑀼𑀢𑁆𑀣𑀦𑀺𑀢𑀸 𑀚𑀻𑀯𑀺𑀢𑀢𑁆𑀣𑀦𑁆𑀢𑀺 𑀦𑀻𑀮𑀼𑀧𑁆𑀧𑀮𑀦𑁆𑀢𑀺𑀆𑀤𑀻𑀲𑀼 𑀯𑀺𑀬. 𑀫𑀤𑀲𑁆𑀲𑀸𑀢𑀺 𑀘 𑀩𑀳𑀼𑀔𑀚𑁆𑀚𑀪𑁄𑀚𑁆𑀚𑀧𑀸𑀦𑀸𑀤𑀺𑀲𑀫𑀺𑀤𑁆𑀥𑀸 𑀦𑀤𑀻 𑀙𑀡𑀤𑀺𑀯𑀲𑁂𑀲𑀽𑀢𑀺 𑀦𑀺𑀭𑀼𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀯𑀕𑁆𑀕𑀼 𑀧𑀭𑀺𑀲𑀼𑀤𑁆𑀥𑀸𑀢𑀺 𑀮𑁄𑀓𑁂𑀦 𑀲𑀫𑁆𑀫𑀢𑀸𑀢𑀺 𑀓𑀺𑀭 𑀅𑀢𑁆𑀣𑁄. 𑀪𑀸𑀲𑀺𑀢𑁄 𑀪𑀯𑀺𑀲𑁆𑀲𑀢𑀻𑀢𑀺 𑀧𑀸𑀞𑀲𑁂𑀲𑁄.

𑁧𑁯𑁪-𑁫. 𑀯𑀡𑁆𑀡𑀯𑀸 𑀯𑀡𑁆𑀡𑀯𑀦𑁆𑀢𑁄 𑀯𑀡𑁆𑀡𑀯𑀦𑁆𑀢𑀸𑀦𑀻𑀢𑀺𑀧𑀺 𑀲𑀺𑀚𑁆𑀛𑀢𑀺 𑀓𑀺𑀭 𑀩𑀳𑀼𑀯𑀘𑀦𑁂𑀦. 𑀬𑀲𑁆𑀫𑀸 𑀇𑀦𑁆𑀤𑁆𑀭𑀺𑀬𑀸𑀦𑀁 𑀊𑀦𑀢𑁆𑀢𑀁, 𑀧𑀽𑀭𑀢𑁆𑀢𑀁 𑀯𑀸 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀅𑀪𑀺𑀦𑀺𑀯𑀺𑀝𑁆𑀞𑁄𑀓𑀸𑀲𑀲𑁆𑀲 𑀧𑀭𑀺𑀧𑀼𑀡𑁆𑀡𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀙𑀝𑁆𑀞𑀲𑁆𑀲 𑀅𑀪𑀺𑀦𑀺𑀯𑀺𑀝𑁆𑀞𑁄𑀓𑀸𑀲𑁄 𑀳𑀤𑀬𑀯𑀢𑁆𑀣𑀼. 𑀘𑀢𑀼𑀇𑀭𑀺𑀬𑀸𑀧𑀣𑀘𑀓𑁆𑀓𑁂 𑀧𑀸𑀓𑀢𑀺𑀦𑁆𑀤𑁆𑀭𑀺𑀬𑁂. 𑀅𑀢𑁆𑀢𑀦𑁄 𑀤𑀳𑀢𑀻𑀢𑀺 𑀅𑀢𑁆𑀢𑀦𑀸 𑀤𑀳𑀢𑀺, 𑀅𑀢𑁆𑀢𑀦𑀸 𑀧𑀝𑀺𑀯𑀺𑀤𑁆𑀥𑀁 𑀓𑀢𑁆𑀯𑀸 𑀧𑀯𑁂𑀤𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀦𑁆𑀢𑀦𑁆𑀢𑀺 𑀯𑀢𑁆𑀢𑀫𑀸𑀦𑀁. 𑀕𑁄𑀢𑁆𑀭𑀪𑀼𑀦𑁄𑀢𑀺 𑀕𑁄𑀢𑁆𑀢𑀫𑀢𑁆𑀢𑀁 𑀅𑀦𑀼𑀪𑀯𑀢𑁆𑀢𑀸 𑀦𑀸𑀫𑀫𑀢𑁆𑀢𑀓𑀫𑁂𑀯𑀸𑀢𑀺 𑀅𑀢𑁆𑀣𑁄.

𑀲𑀯𑀺𑀪𑀗𑁆𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁯𑁭. 𑀧𑀤𑀪𑀸𑀚𑀦𑁂 ‘‘𑀢𑀺𑀲𑁆𑀲𑁄 𑀯𑀺𑀚𑁆𑀚𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀭𑀽𑀧𑀸𑀯𑀘𑀭𑀚𑁆𑀛𑀸𑀦𑀸𑀦𑀺 𑀧𑀝𑀺𑀓𑁆𑀔𑀺𑀢𑁆𑀢𑀸𑀦𑀻𑀢𑀺 𑀘𑁂? 𑀦, 𑀢𑀢𑁆𑀣𑁂𑀯 ‘‘𑀬𑀁 𑀜𑀸𑀡𑀁, 𑀢𑀁 𑀤𑀲𑁆𑀲𑀦𑀁, 𑀬𑀁 𑀤𑀲𑁆𑀲𑀦𑀁, 𑀢𑀁 𑀜𑀸𑀡’’𑀦𑁆𑀢𑀺 𑀤𑀲𑁆𑀲𑀦𑀧𑀤𑁂𑀦 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸, 𑀢𑀲𑁆𑀫𑀸 𑀏𑀯 𑀅𑀝𑁆𑀞𑀓𑀣𑀸𑀬𑀁 ‘‘𑀯𑀺𑀚𑁆𑀚𑀸𑀲𑀻𑀲𑁂𑀦 𑀧𑀤𑀪𑀸𑀚𑀦𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀥𑀼𑀭𑀁 𑀓𑀢𑁆𑀯𑀸𑀢𑀺 𑀧𑀼𑀭𑀺𑀫𑀁 𑀓𑀢𑁆𑀯𑀸.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁧𑁯𑁯. 𑀅𑀦𑀸𑀕𑀢𑁂 𑀉𑀧𑁆𑀧𑀚𑁆𑀚𑀦𑀓𑀭𑀸𑀕𑀸𑀤𑀻𑀦𑀁 𑀓𑀸𑀭𑀡𑀢𑁆𑀢𑀸 𑀭𑀸𑀕𑀸𑀤𑀬𑁄𑀯 𑀦𑀺𑀫𑀺𑀢𑁆𑀢𑀁 𑀦𑀸𑀫. 𑀢𑀺𑀲𑁆𑀲𑀦𑁆𑀦𑀜𑁆𑀘 𑀯𑀺𑀚𑁆𑀚𑀸𑀦𑀁 𑀅𑀜𑁆𑀜𑀢𑀭𑀁 𑀲𑀦𑁆𑀥𑀸𑀬 ‘‘𑀯𑀺𑀚𑁆𑀚𑀸𑀦𑀁 𑀮𑀸𑀪𑀻𑀫𑁆𑀳𑀻’’𑀢𑀺 𑀪𑀡𑀢𑀺, 𑀧𑀸𑀭𑀸𑀚𑀺𑀓𑀁, 𑀦 𑀯𑀢𑁆𑀣𑀼𑀯𑀺𑀚𑁆𑀚𑀸𑀤𑀻𑀦𑀁 𑀓𑀺𑀮𑁂𑀲𑀦𑀳𑀸𑀦𑀫𑁂𑀯 𑀯𑀼𑀢𑁆𑀢𑀁, 𑀢𑀁𑀔𑀡𑀢𑁆𑀢𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀧𑁆𑀧𑀯𑀢𑁆𑀢𑀺 𑀦 𑀳𑁄𑀢𑀻𑀢𑀺 𑀘𑁂? 𑀦, 𑀫𑀕𑁆𑀕𑀓𑀺𑀘𑁆𑀘𑀤𑀻𑀧𑀦𑀢𑁄. 𑀢𑁂𑀦𑁂𑀯 ‘‘𑀫𑀕𑁆𑀕𑁂𑀦 𑀯𑀺𑀦𑀸 𑀦𑀢𑁆𑀣𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀘𑀺𑀢𑁆𑀢𑀦𑁆𑀢𑀺 𑀘𑀺𑀢𑁆𑀢𑀲𑁆𑀲 𑀯𑀺𑀕𑀢𑀦𑀻𑀯𑀭𑀡𑀢𑀸𑀢𑀺 𑀅𑀢𑁆𑀣𑁄. ‘‘𑀬𑀸𑀯𑀜𑁆𑀘 𑀯𑀺𑀚𑁆𑀚𑀸 𑀅𑀦𑀸𑀕𑀢𑀸, 𑀢𑀸𑀯 𑀯𑀺𑀧𑀲𑁆𑀲𑀦𑀸𑀜𑀸𑀡𑀲𑁆𑀲 𑀮𑀸𑀪𑀻𑀫𑁆𑀳𑀻’𑀢𑀺 𑀯𑀤𑀦𑁆𑀢𑁄 𑀬𑀤𑀺 𑀮𑁄𑀓𑀼𑀢𑁆𑀢𑀭𑀁 𑀲𑀦𑁆𑀥𑀸𑀬 𑀯𑀤𑀢𑀺, 𑀲𑁄𑀧𑀺 𑀘 𑀢𑀣𑀸 𑀚𑀸𑀦𑀸𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯 𑀮𑁄𑀓𑀼𑀢𑁆𑀢𑀭𑀲𑁆𑀲𑀧𑀺 𑀢𑀁𑀦𑀸𑀫𑀢𑁆𑀢𑀸’’𑀢𑀺 𑀯𑀤𑀦𑁆𑀢𑀺. ‘‘𑀅𑀯𑀺𑀲𑁂𑀲𑁂𑀦𑀸𑀧𑀺 𑀯𑀤𑀢𑁄 𑀧𑀸𑀭𑀸𑀚𑀺𑀓𑀁 𑀯𑀼𑀢𑁆𑀢𑀦𑁆𑀢𑀺 𑀮𑁄𑀓𑀼𑀢𑁆𑀢𑀭𑀁 𑀲𑀦𑁆𑀥𑀸𑀬 𑀯𑀤𑀢𑁄 ‘𑀧𑀸𑀭𑀸𑀚𑀺𑀓’𑀦𑁆𑀢𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺. 𑀬𑀣𑀸 𑀓𑀺𑀁 ‘𑀯𑀺𑀚𑁆𑀚𑀸𑀦𑀁 𑀮𑀸𑀪𑀻𑀫𑁆𑀳𑀻’𑀢𑀺 𑀪𑀡𑀦𑁆𑀢𑁄𑀧𑀺 𑀧𑀸𑀭𑀸𑀚𑀺𑀓𑀫𑁂𑀯𑀸’𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑁂 𑀯𑀢𑁆𑀣𑀼𑀯𑀺𑀚𑁆𑀚𑀸𑀤𑀻𑀦𑀁 𑀲𑀫𑁆𑀪𑀯𑁂𑀧𑀺 𑀢𑀸𑀲𑀁 𑀅𑀦𑀥𑀺𑀧𑁆𑀧𑁂𑀢𑀢𑁆𑀢𑀸 𑀧𑀸𑀭𑀸𑀚𑀺𑀓𑀁 𑀳𑁄𑀢𑀺, 𑀏𑀯𑀫𑀺𑀥𑀸𑀧𑀺. 𑀦 𑀲𑀓𑁆𑀓𑀸 𑀅𑀜𑁆𑀜𑀁 𑀧𑀫𑀸𑀡𑀁 𑀓𑀸𑀢𑀼𑀦𑁆𑀢𑀺 𑀅𑀢𑁆𑀢𑀦𑁄 𑀕𑀼𑀡𑀫𑀸𑀭𑁄𑀘𑁂𑀢𑀼𑀓𑀸𑀫𑁄 𑀮𑁄𑀓𑀺𑀬𑁂𑀦 𑀲𑀫𑁆𑀫𑀺𑀲𑁆𑀲𑀁 𑀅𑀢𑁆𑀣𑀧𑀝𑀺𑀲𑀫𑁆𑀪𑀺𑀤𑀁 𑀯𑀤𑀢𑁄 𑀧𑀸𑀭𑀸𑀚𑀺𑀓𑀦𑁆𑀢𑀺 𑀧𑀫𑀸𑀡𑀁 𑀓𑀸𑀢𑀼𑀁 𑀦 𑀲𑀓𑁆𑀓𑀸, 𑀇𑀢𑀭𑀣𑀸 𑀳𑁄𑀢𑀻’’𑀢𑀺 𑀅𑀧𑀭𑁂𑀳𑀺 𑀯𑀼𑀢𑁆𑀢𑀁, ‘‘𑀢𑀁 𑀧𑀼𑀩𑁆𑀩𑀸𑀧𑀭𑀯𑀺𑀭𑀼𑀤𑁆𑀥𑀁, 𑀢𑀲𑁆𑀫𑀸 𑀯𑀺𑀚𑁆𑀚𑀸𑀦𑀺𑀤𑀲𑁆𑀲𑀦𑀁 𑀇𑀥 𑀅𑀦𑀺𑀤𑀲𑁆𑀲𑀦𑀁 𑀲𑀸𑀲𑀦𑁂 𑀯𑀢𑁆𑀣𑀼𑀯𑀺𑀚𑁆𑀚𑀸𑀤𑀻𑀦𑀁 𑀯𑀺𑀚𑁆𑀚𑀸𑀯𑀺𑀥𑀸𑀦𑀸𑀪𑀸𑀯𑀸. 𑀪𑀕𑀯𑀢𑀸 𑀯𑀺𑀪𑀢𑁆𑀢𑀔𑁂𑀢𑁆𑀢𑀧𑀤𑁂 𑀯𑀸 𑀢𑁂𑀲𑀁 𑀧𑀭𑀺𑀬𑀸𑀬𑀯𑀘𑀦𑀸𑀦𑀁 𑀅𑀦𑀸𑀫𑀝𑁆𑀞𑀢𑁆𑀢𑀸 𑀦 𑀲𑀓𑁆𑀓𑀸 𑀅𑀜𑁆𑀜𑀁 𑀧𑀫𑀸𑀡𑀁 𑀓𑀸𑀢𑀼’’𑀦𑁆𑀢𑀺 𑀮𑀺𑀔𑀺𑀢𑀁. ‘‘𑀧𑀝𑀺𑀲𑀫𑁆𑀪𑀺𑀤𑀸𑀦𑀁 𑀮𑀸𑀪𑀻𑀫𑁆𑀳𑀻’𑀢𑀺 𑀯𑀼𑀢𑁆𑀢𑁂 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀢𑁆𑀢𑀸 𑀣𑀼𑀮𑁆𑀮𑀘𑁆𑀘𑀬𑀁 𑀬𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀯𑀺𑀘𑀸𑀭𑁂𑀢𑀩𑁆𑀩𑀁. 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀦𑁆𑀢𑀺 ‘‘𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀢𑀻’’𑀢𑀺𑀆𑀤𑀻𑀳𑀺 𑀲𑀁𑀲𑀦𑁆𑀤𑀦𑀢𑁄 𑀧𑀭𑀺𑀬𑀸𑀬𑀯𑀘𑀦𑀢𑁆𑀢𑀸 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀁. ‘‘𑀦𑀺𑀭𑁄𑀥𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀸𑀫𑀻’𑀢𑀺 𑀯𑀸 ‘𑀮𑀸𑀪𑀻𑀫𑁆𑀳𑀸𑀳𑀁 𑀢𑀲𑁆𑀲𑀸’𑀢𑀺 𑀯𑀸 𑀯𑀤𑀢𑁄𑀧𑀻’’𑀢𑀺 𑀯𑀼𑀢𑁆𑀢𑀯𑀘𑀦𑀫𑁆𑀧𑀺 ‘‘𑀲𑀘𑁂 𑀧𑀦𑀲𑁆𑀲𑁂𑀯𑀁 𑀳𑁄𑀢𑀻’’𑀢𑀺𑀆𑀤𑀺𑀯𑀘𑀦𑀫𑁆𑀧𑀺 𑀅𑀢𑁆𑀣𑀢𑁄 𑀏𑀓𑀫𑁂𑀯, 𑀲𑁄𑀧𑀺 𑀳𑀺 𑀅𑀢𑁆𑀢𑀦𑁄 𑀯𑀺𑀲𑁂𑀲𑀁 𑀆𑀭𑁄𑀘𑁂𑀢𑀼𑀫𑁂𑀯 𑀯𑀤𑀢𑀺. ‘‘𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀢𑀻’𑀢𑀺𑀆𑀤𑀻𑀲𑀼 𑀅𑀳𑀁-𑀯𑀘𑀦𑀸𑀪𑀸𑀯𑀸 𑀧𑀭𑀺𑀬𑀸𑀬𑁄 𑀬𑀼𑀚𑁆𑀚𑀢𑀺, 𑀇𑀥 𑀧𑀦 ‘𑀮𑀸𑀪𑀻𑀫𑁆𑀳𑀸𑀳𑀁 𑀢𑀲𑁆𑀲𑀸’𑀢𑀺 𑀅𑀢𑁆𑀢𑀸𑀦𑀁 𑀦𑀺𑀤𑁆𑀤𑀺𑀲𑀢𑀺, 𑀢𑀲𑁆𑀫𑀸 𑀧𑀸𑀭𑀸𑀚𑀺𑀓𑀁 𑀆𑀧𑀚𑁆𑀚𑀺𑀢𑀼𑀁 𑀬𑀼𑀢𑁆𑀢𑀁 𑀯𑀺𑀬𑀸’’𑀢𑀺 𑀯𑀤𑀦𑁆𑀢𑀺. ‘‘𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀺𑀯𑀘𑀦𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑁂𑀲𑀼 𑀏𑀓𑁄𑀧𑀺 𑀦 𑀳𑁄𑀢𑀺, 𑀢𑀲𑁆𑀫𑀸 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀢𑁆𑀢𑀸 𑀦 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺, 𑀲𑀼𑀝𑁆𑀞𑀼 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁. 𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸-𑀧𑀤𑀢𑁄 𑀧𑀝𑁆𑀞𑀸𑀬 𑀏𑀯 𑀧𑀸𑀞𑁄 𑀕𑀳𑁂𑀢𑀩𑁆𑀩𑁄, 𑀨𑀮𑀲𑀘𑁆𑀙𑀺𑀓𑀺𑀭𑀺𑀬𑀸𑀬𑀧𑀺 𑀏𑀓𑁂𑀓𑀫𑁆𑀧𑀺 𑀏𑀓𑁂𑀓𑀨𑀮𑀯𑀲𑁂𑀦 𑀧𑀸𑀭𑀸𑀚𑀺𑀓𑀁 𑀯𑁂𑀤𑀺𑀢𑀩𑁆𑀩𑀁.

𑀭𑀸𑀕𑀲𑁆𑀲 𑀧𑀳𑀸𑀦𑀦𑁆𑀢𑀺𑀆𑀤𑀺𑀢𑁆𑀢𑀺𑀓𑁂 𑀓𑀺𑀮𑁂𑀲𑀧𑁆𑀧𑀳𑀸𑀦𑀫𑁂𑀯 𑀯𑀼𑀢𑁆𑀢𑀁, 𑀢𑀁 𑀧𑀦 𑀬𑀲𑁆𑀫𑀸 𑀫𑀕𑁆𑀕𑁂𑀦 𑀯𑀺𑀦𑀸 𑀦𑀢𑁆𑀣𑀺. 𑀢𑀢𑀺𑀬𑀫𑀕𑁆𑀕𑁂𑀦 𑀳𑀺 𑀭𑀸𑀕𑀤𑁄𑀲𑀸𑀦𑀁 𑀧𑀳𑀸𑀦𑀁, 𑀘𑀢𑀼𑀢𑁆𑀣𑁂𑀦 𑀫𑁄𑀳𑀲𑁆𑀲, 𑀢𑀲𑁆𑀫𑀸 ‘‘𑀭𑀸𑀕𑁄 𑀫𑁂 𑀧𑀳𑀻𑀦𑁄’’𑀢𑀺𑀆𑀤𑀻𑀦𑀺 𑀯𑀤𑀢𑁄𑀧𑀺 𑀧𑀸𑀭𑀸𑀚𑀺𑀓𑀁. 𑀭𑀸𑀕𑀸 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡𑀢𑀸𑀢𑀺𑀆𑀤𑀺𑀢𑁆𑀢𑀺𑀓𑁂 𑀮𑁄𑀓𑀼𑀢𑁆𑀢𑀭𑀫𑁂𑀯 𑀯𑀼𑀢𑁆𑀢𑀁, 𑀢𑀲𑁆𑀫𑀸 ‘‘𑀭𑀸𑀕𑀸 𑀫𑁂 𑀘𑀺𑀢𑁆𑀢𑀁 𑀯𑀺𑀦𑀻𑀯𑀭𑀡’’𑀦𑁆𑀢𑀺𑀆𑀤𑀻𑀦𑀺 𑀯𑀤𑀢𑁄 𑀧𑀸𑀭𑀸𑀚𑀺𑀓𑀫𑁂𑀯𑀸𑀢𑀺. 𑀅𑀓𑀼𑀧𑁆𑀧𑀥𑀫𑁆𑀫𑀢𑁆𑀢𑀸𑀢𑀺 𑀓𑁂𑀘𑀺 𑀉𑀢𑁆𑀢𑀭𑀯𑀺𑀳𑀸𑀭𑀯𑀸𑀲𑀺𑀦𑁄. 𑀓𑀲𑁆𑀫𑀸 𑀦 𑀳𑁄𑀢𑀻𑀢𑀺 𑀘𑁂? ‘‘𑀇𑀢𑀺 𑀚𑀸𑀦𑀸𑀫𑀺, 𑀇𑀢𑀺 𑀧𑀲𑁆𑀲𑀸𑀫𑀻’’𑀢𑀺 𑀯𑀢𑁆𑀢𑀫𑀸𑀦𑀯𑀘𑀦𑁂𑀦𑁂𑀯 𑀫𑀸𑀢𑀺𑀓𑀸𑀬𑀁 𑀯𑀼𑀢𑁆𑀢𑀢𑁆𑀢𑀸. 𑀬𑀤𑀺 𑀏𑀯𑀁 𑀧𑀤𑀪𑀸𑀚𑀦𑁂 ‘‘𑀲𑀫𑀸𑀧𑀚𑁆𑀚𑀺𑀁, 𑀲𑀫𑀸𑀧𑀦𑁆𑀦𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀢𑁆𑀢𑀸 ‘‘𑀅𑀢𑀻𑀢𑀢𑁆𑀢𑀪𑀸𑀯𑁂 𑀲𑁄𑀢𑀸𑀧𑀦𑁆𑀦𑁄𑀫𑁆𑀳𑀻’’𑀢𑀺 𑀯𑀤𑀢𑁄𑀧𑀺 𑀳𑁄𑀢𑀽𑀢𑀺 𑀘𑁂? 𑀦, 𑀅𑀜𑁆𑀜𑀣𑀸 𑀅𑀢𑁆𑀣𑀲𑀫𑁆𑀪𑀯𑀢𑁄. 𑀓𑀣𑀁? 𑀅𑀤𑁆𑀥𑀸𑀧𑀘𑁆𑀘𑀼𑀧𑁆𑀧𑀦𑁆𑀦𑀯𑀲𑁂𑀦 𑀯𑀢𑁆𑀢𑀫𑀸𑀦𑀢𑀸 𑀕𑀳𑁂𑀢𑀩𑁆𑀩𑀸𑀢𑀺 𑀜𑀸𑀧𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀦 𑀅𑀢𑀻𑀢𑀢𑁆𑀢𑀪𑀸𑀯𑀁. 𑀅𑀢𑀻𑀢𑀢𑁆𑀢𑀪𑀸𑀯𑁄 𑀳𑀺 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀢𑁆𑀢𑀸 ‘‘𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀆𑀘𑀭𑀺𑀬𑀸.

𑁨𑁦𑁦. ‘‘𑀲𑀘𑁂𑀧𑀺 𑀦 𑀳𑁄𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯𑀸’’𑀢𑀺 𑀅𑀝𑁆𑀞𑀸𑀦𑀧𑀭𑀺𑀓𑀧𑁆𑀧𑀯𑀲𑁂𑀦 𑀯𑀼𑀢𑁆𑀢𑀁 𑀓𑀺𑀭. ‘‘𑀇𑀢𑀺 𑀯𑀸𑀘𑀸 𑀢𑀺𑀯𑀗𑁆𑀕𑀺𑀓𑀸’’𑀢𑀺 𑀯𑀓𑁆𑀔𑀢𑀺. 𑀦𑀢𑁆𑀣𑁂𑀢𑀦𑁆𑀢𑀺 𑀧𑀼𑀭𑀺𑀫𑁂 𑀲𑀢𑀺 𑀧𑀘𑁆𑀙𑀺𑀫𑀲𑁆𑀲𑀸𑀪𑀸𑀯𑀸 𑀲𑀫𑀸𑀧𑀚𑁆𑀚𑀺𑀁, 𑀲𑀫𑀸𑀧𑀦𑁆𑀦𑁄𑀢𑀺 𑀇𑀫𑁂𑀲𑀁 𑀓𑀺𑀜𑁆𑀘𑀸𑀧𑀺 𑀅𑀢𑁆𑀣𑀢𑁄 𑀓𑀸𑀮𑀯𑀺𑀲𑁂𑀲𑁄 𑀦𑀢𑁆𑀣𑀺, 𑀯𑀘𑀦𑀯𑀺𑀲𑁂𑀲𑁄 𑀧𑀦 𑀅𑀢𑁆𑀣𑀺 𑀏𑀯.

𑁨𑁦𑁭. 𑀉𑀓𑁆𑀔𑁂𑀝𑀺𑀢𑁄𑀢𑀺 𑀉𑀢𑁆𑀢𑀸𑀲𑀺𑀢𑁄. 𑀔𑀺𑀝 𑀉𑀢𑁆𑀭𑀸𑀲𑀦𑁂.

𑀲𑀼𑀤𑁆𑀥𑀺𑀓𑀯𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀢𑁆𑀢𑀼𑀓𑀸𑀫𑀯𑀸𑀭𑀓𑀣𑀸𑀯𑀡𑁆𑀡𑀦𑀸

𑀯𑀺𑀜𑁆𑀜𑀢𑁆𑀢𑀺𑀧𑀣𑁂𑀢𑀺 𑀯𑀺𑀚𑀸𑀦𑀦𑀝𑁆𑀞𑀸𑀦𑁂, 𑀢𑁂𑀦 ‘‘𑀯𑀺𑀜𑁆𑀜𑀢𑁆𑀢𑀺𑀧𑀣𑀫𑀢𑀺𑀓𑁆𑀓𑀫𑀺𑀢𑁆𑀯𑀸 𑀞𑀺𑀢𑁄 𑀪𑀺𑀓𑁆𑀔𑀼 𑀤𑀺𑀩𑁆𑀩𑀸𑀬 𑀲𑁄𑀢𑀥𑀸𑀢𑀼𑀬𑀸 𑀲𑀼𑀢𑁆𑀯𑀸 𑀚𑀸𑀦𑀸𑀢𑀺, 𑀦 𑀧𑀸𑀭𑀸𑀚𑀺𑀓𑀦𑁆𑀢𑀺 𑀤𑀻𑀧𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀛𑀸𑀦𑀁 𑀓𑀺𑀭 𑀲𑀫𑀸𑀧𑀚𑁆𑀚𑀺𑀦𑁆𑀢𑀺 𑀏𑀢𑁆𑀣 𑀲𑁄 𑀘𑁂 ‘‘𑀏𑀲 𑀪𑀺𑀓𑁆𑀔𑀼 𑀅𑀢𑁆𑀢𑀦𑁄 𑀕𑀼𑀡𑀤𑀻𑀧𑀦𑀸𑀥𑀺𑀧𑁆𑀧𑀸𑀬𑁂𑀦 𑀏𑀯𑀁 𑀯𑀤𑀢𑀻’’𑀢𑀺 𑀚𑀸𑀦𑀸𑀢𑀺, 𑀧𑀸𑀭𑀸𑀚𑀺𑀓𑀫𑁂𑀯. 𑀅𑀜𑁆𑀜𑀣𑀸 𑀚𑀸𑀦𑀸𑀢𑀻𑀢𑀺 𑀘𑁂? 𑀧𑀸𑀭𑀸𑀚𑀺𑀓𑀘𑁆𑀙𑀸𑀬𑀸 𑀦 𑀤𑀺𑀲𑁆𑀲𑀢𑀻𑀢𑀺 𑀆𑀘𑀭𑀺𑀬𑁄.

𑀯𑀢𑁆𑀢𑀼𑀓𑀸𑀫𑀯𑀸𑀭𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀦𑀸𑀧𑀢𑁆𑀢𑀺𑀪𑁂𑀤𑀓𑀣𑀸𑀯𑀡𑁆𑀡𑀦𑀸

𑀅𑀦𑀼𑀮𑁆𑀮𑀧𑀦𑀸𑀥𑀺𑀧𑁆𑀧𑀸𑀬𑁄𑀢𑀺 𑀬𑀤𑀺 𑀉𑀮𑁆𑀮𑀧𑀦𑀸𑀥𑀺𑀧𑁆𑀧𑀸𑀬𑁄 𑀪𑀯𑁂𑀬𑁆𑀬, 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀅𑀧𑀭𑁂. ‘‘𑀢𑀁 𑀧𑀭𑀢𑁄 ‘𑀦𑀸𑀯𑀼𑀲𑁄, 𑀲𑀓𑁆𑀓𑀸 𑀧𑀼𑀣𑀼𑀚𑁆𑀚𑀦𑁂𑀦 𑀅𑀥𑀺𑀯𑀸𑀲𑁂𑀢𑀼’𑀦𑁆𑀢𑀺 𑀯𑀢𑁆𑀣𑀼𑀦𑀸 𑀲𑀁𑀲𑀦𑁆𑀤𑀺𑀢𑁆𑀯𑀸 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀯𑀺𑀦𑀻𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁨𑁨𑁫-𑁬. 𑀤𑀼𑀓𑁆𑀓𑀭 𑀆𑀕𑀸𑀭 𑀆𑀯𑀝𑀓𑀸𑀫 𑀅𑀪𑀺𑀭𑀢𑀺𑀯𑀢𑁆𑀣𑀽𑀲𑀼 ‘‘𑀬𑀤𑀺 𑀉𑀮𑁆𑀮𑀧𑀦𑀸𑀥𑀺𑀧𑁆𑀧𑀸𑀬𑁄 𑀪𑀯𑁂𑀬𑁆𑀬, 𑀧𑀸𑀭𑀸𑀚𑀺𑀓’’𑀦𑁆𑀢𑀺 𑀯𑀤𑀦𑁆𑀢𑀺, 𑀓𑀸𑀭𑀡𑀁 𑀧𑀦 𑀤𑀼𑀤𑁆𑀤𑀲𑀁, 𑀣𑀼𑀮𑁆𑀮𑀘𑁆𑀘𑀬𑀁 𑀯𑀼𑀢𑁆𑀢𑀁 𑀯𑀺𑀬, 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀬𑀸𑀦𑁂𑀦 𑀯𑀸 𑀇𑀤𑁆𑀥𑀺𑀬𑀸 𑀯𑀸 𑀕𑀘𑁆𑀙𑀦𑁆𑀢𑁄𑀧𑀺 𑀧𑀸𑀭𑀸𑀚𑀺𑀓𑀁 𑀦𑀸𑀧𑀚𑁆𑀚𑀢𑀻𑀢𑀺 𑀧𑀤𑀲𑀸 𑀕𑀫𑀦𑀯𑀲𑁂𑀦𑁂𑀯 𑀓𑀢𑀺𑀓𑀸𑀬 𑀓𑀢𑀸𑀬 𑀬𑀼𑀚𑁆𑀚𑀢𑀺. ‘‘𑀅𑀧𑀼𑀩𑁆𑀩𑀁𑀅𑀘𑀭𑀺𑀫𑀁 𑀕𑀘𑁆𑀙𑀦𑁆𑀢𑁄𑀢𑀺 𑀳𑀢𑁆𑀣𑀧𑀸𑀲𑀁 𑀅𑀯𑀺𑀚𑀳𑀺𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀳𑀢𑁆𑀣𑀁 𑀕𑀡𑁆𑀳𑀦𑁆𑀢𑁄 𑀯𑀺𑀬 𑀕𑀘𑁆𑀙𑀦𑁆𑀢𑁄’’𑀢𑀺 𑀯𑀼𑀢𑁆𑀢𑀁. 𑀉𑀝𑁆𑀞𑁂𑀣 𑀏𑀣 𑀕𑀘𑁆𑀙𑀸𑀫𑀸𑀢𑀺 𑀏𑀯𑀁 𑀲𑀳𑀕𑀫𑀦𑁂 𑀧𑀼𑀩𑁆𑀩𑀸𑀧𑀭𑀸 𑀕𑀘𑁆𑀙𑀦𑁆𑀢𑁄𑀧𑀺 𑀦𑀸𑀧𑀚𑁆𑀚𑀢𑀻𑀢𑀺 𑀆𑀘𑀭𑀺𑀬𑀲𑁆𑀲 𑀢𑀓𑁆𑀓𑁄. 𑀯𑀲𑀦𑁆𑀢𑀲𑁆𑀲𑀸𑀢𑀺 𑀢𑀣𑀸 𑀯𑀲𑀦𑁆𑀢𑁄 𑀘𑁂 𑀉𑀧𑀸𑀲𑀓𑁂𑀦 𑀤𑀺𑀲𑁆𑀲𑀢𑀺, 𑀧𑀸𑀭𑀸𑀚𑀺𑀓𑁄 𑀳𑁄𑀢𑀺. ‘‘𑀭𑀢𑁆𑀢𑀺𑀁 𑀯𑀲𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑁄 𑀦 𑀧𑀸𑀭𑀸𑀚𑀺𑀓𑁄’’𑀢𑀺 𑀯𑀼𑀢𑁆𑀢𑀁. 𑀦𑀸𑀦𑀸𑀯𑁂𑀭𑀚𑁆𑀚𑀓𑀸𑀢𑀺 𑀦𑀸𑀦𑀸𑀚𑀦𑀧𑀤𑀯𑀸𑀲𑀺𑀦𑁄. 𑀲𑀗𑁆𑀖𑀮𑀸𑀪𑁄𑀢𑀺 𑀬𑀣𑀸𑀯𑀼𑀟𑁆𑀠𑀁 𑀅𑀢𑁆𑀢𑀦𑁄 𑀧𑀸𑀧𑀼𑀡𑀦𑀓𑁄𑀝𑁆𑀞𑀸𑀲𑁄.

𑁨𑁨𑁮. 𑀇𑀥𑀸𑀢𑀺 ‘‘𑀓𑁄 𑀦𑀼 𑀔𑁄’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂 𑀧𑀜𑁆𑀳𑀸𑀓𑀫𑁆𑀫𑁂. 𑀥𑀫𑁆𑀫𑀥𑀸𑀢𑀼 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁.

𑁨𑁩𑁨. 𑀦 𑀉𑀧𑁆𑀧𑀝𑀺𑀧𑀸𑀝𑀺𑀬𑀸𑀢𑀺 𑀦 𑀲𑀻𑀳𑁄𑀓𑁆𑀓𑀦𑁆𑀢𑀯𑀲𑁂𑀦 𑀅𑀦𑀼𑀲𑁆𑀲𑀭𑀺. 𑀢𑀲𑁆𑀫𑀸 𑀅𑀦𑁆𑀢𑀭𑀸𑀪𑀯𑀪𑀽𑀢𑀸 𑀏𑀓𑀸 𑀏𑀯 𑀚𑀸𑀢𑀻𑀢𑀺 𑀧𑀝𑀺𑀯𑀺𑀚𑁆𑀛𑀢𑀻𑀢𑀺 𑀅𑀢𑁆𑀣𑁄.

𑀦𑀺𑀕𑀫𑀦𑀯𑀡𑁆𑀡𑀦𑀸

𑁨𑁩𑁩. 𑀘𑀢𑀼𑀯𑀻𑀲𑀢𑀻𑀢𑀺 𑀏𑀢𑁆𑀣 𑀫𑀸𑀢𑀼𑀖𑀸𑀢𑀓𑀧𑀺𑀢𑀼𑀖𑀸𑀢𑀓𑀅𑀭𑀳𑀦𑁆𑀢𑀖𑀸𑀢𑀓𑀸 𑀢𑀢𑀺𑀬𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑀸. 𑀪𑀺𑀓𑁆𑀔𑀼𑀦𑀺𑀤𑀽𑀲𑀓𑁄, 𑀮𑀫𑁆𑀩𑀺𑀆𑀤𑀬𑁄 𑀘 𑀘𑀢𑁆𑀢𑀸𑀭𑁄 𑀧𑀞𑀫𑀧𑀸𑀭𑀸𑀚𑀺𑀓𑀁 𑀆𑀧𑀦𑁆𑀦𑀸 𑀏𑀯𑀸𑀢𑀺 𑀓𑀢𑁆𑀯𑀸 𑀓𑀼𑀢𑁄 𑀘𑀢𑀼𑀯𑀻𑀲𑀢𑀻𑀢𑀺 𑀘𑁂? 𑀦, 𑀅𑀥𑀺𑀧𑁆𑀧𑀸𑀬𑀸𑀚𑀸𑀦𑀦𑀢𑁄. 𑀫𑀸𑀢𑀼𑀖𑀸𑀢𑀓𑀸𑀤𑀬𑁄 𑀳𑀺 𑀘𑀢𑁆𑀢𑀸𑀭𑁄 𑀇𑀥𑀸𑀦𑀼𑀧𑀲𑀫𑁆𑀧𑀦𑁆𑀦𑀸 𑀏𑀯 𑀅𑀥𑀺𑀧𑁆𑀧𑁂𑀢𑀸, 𑀮𑀫𑁆𑀩𑀺𑀆𑀤𑀬𑁄 𑀘𑀢𑁆𑀢𑀸𑀭𑁄 𑀓𑀺𑀜𑁆𑀘𑀸𑀧𑀺 𑀧𑀞𑀫𑀧𑀸𑀭𑀸𑀚𑀺𑀓𑁂𑀦 𑀲𑀗𑁆𑀕𑀳𑀺𑀢𑀸, 𑀬𑀲𑁆𑀫𑀸 𑀏𑀓𑁂𑀦 𑀧𑀭𑀺𑀬𑀸𑀬𑁂𑀦 𑀫𑁂𑀣𑀼𑀦𑀥𑀫𑁆𑀫𑀧𑀝𑀺𑀲𑁂𑀯𑀺𑀦𑁄 𑀦 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀯𑀺𑀲𑀼𑀁 𑀯𑀼𑀢𑁆𑀢𑀸. ‘‘𑀏𑀓𑀓𑀫𑁆𑀫𑀁 𑀏𑀓𑀼𑀤𑁆𑀤𑁂𑀲𑁄 𑀲𑀫𑀲𑀺𑀓𑁆𑀔𑀢𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀲𑀁𑀯𑀸𑀲𑀲𑁆𑀲 𑀅𑀪𑀩𑁆𑀩𑀢𑀸𑀫𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 ‘‘𑀬𑀣𑀸 𑀧𑀼𑀭𑁂 𑀢𑀣𑀸 𑀧𑀘𑁆𑀙𑀸’’𑀢𑀺. 𑀅𑀜𑁆𑀜𑀣𑀸 𑀦𑁂𑀲𑀁 𑀲𑀫𑀜𑁆𑀜𑀸𑀬𑀧𑀝𑀺𑀜𑁆𑀜𑀸𑀬𑀪𑀺𑀓𑁆𑀔𑀼𑀪𑀸𑀯𑁄𑀧𑀺 𑀦𑀢𑁆𑀣𑀻𑀢𑀺 𑀆𑀧𑀚𑁆𑀚𑀢𑀺.

𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀸𑀭𑀸𑀚𑀺𑀓𑀓𑀡𑁆𑀟𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀗𑁆𑀖𑀸𑀤𑀺𑀲𑁂𑀲𑀓𑀡𑁆𑀟𑁄

𑁧. 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁩𑁫. ‘‘𑀑𑀓𑁆𑀓𑀫𑀦𑁆𑀢𑀸𑀦’’𑀦𑁆𑀢𑀺 𑀧𑀸𑀞𑁄. 𑀏𑀢𑁆𑀣𑀸𑀳 𑁋 ‘‘𑀬𑁄 𑀧𑀦 𑀪𑀺𑀓𑁆𑀔𑀽’’𑀢𑀺 𑀓𑀸𑀭𑀓𑁄 𑀇𑀥 𑀓𑀲𑁆𑀫𑀸 𑀦 𑀦𑀺𑀤𑁆𑀤𑀺𑀝𑁆𑀞𑁄𑀢𑀺? 𑀅𑀪𑀺-𑀦𑀺𑀤𑁆𑀤𑁂𑀲𑁂𑀦 𑀇𑀫𑀲𑁆𑀲 𑀲𑀸𑀧𑁂𑀓𑁆𑀔𑀸𑀪𑀸𑀯𑀤𑀲𑁆𑀲𑀦𑀢𑁆𑀣𑀁. 𑀓𑀣𑀁? 𑀓𑀡𑁆𑀟𑀼𑀯𑀦𑀸𑀤𑀺𑀅𑀥𑀺𑀧𑁆𑀧𑀸𑀬𑀘𑁂𑀢𑀦𑀸𑀯𑀲𑁂𑀦 𑀘𑁂𑀢𑁂𑀦𑁆𑀢𑀲𑁆𑀲 𑀓𑀡𑁆𑀟𑀼𑀯𑀦𑀸𑀤𑀺𑀉𑀧𑀓𑁆𑀓𑀫𑁂𑀦 𑀉𑀧𑀓𑁆𑀓𑀫𑀦𑁆𑀢𑀲𑁆𑀲, 𑀫𑁂𑀣𑀼𑀦𑀭𑀸𑀕𑀯𑀲𑁂𑀦 𑀊𑀭𑀼𑀆𑀤𑀻𑀲𑀼 𑀤𑀼𑀓𑁆𑀓𑀝𑀯𑀢𑁆𑀣𑀽𑀲𑀼, 𑀯𑀡𑀸𑀤𑀻𑀲𑀼 𑀣𑀼𑀮𑁆𑀮𑀘𑁆𑀘𑀬𑀯𑀢𑁆𑀣𑀽𑀲𑀼 𑀘 𑀉𑀧𑀓𑁆𑀓𑀫𑀦𑁆𑀢𑀲𑁆𑀲 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀲𑀢𑀺𑀧𑀺 𑀦 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀫𑁄𑀘𑀦𑀲𑁆𑀲𑀸𑀤𑀲𑀗𑁆𑀔𑀸𑀢𑀸𑀥𑀺𑀧𑁆𑀧𑀸𑀬𑀸𑀧𑁂𑀓𑁆𑀔𑀸𑀯 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺 𑀲𑀢𑀺 𑀉𑀧𑀓𑁆𑀓𑀫𑁂, 𑀦 𑀅𑀜𑁆𑀜𑀣𑀸 ‘‘𑀅𑀦𑀸𑀧𑀢𑁆𑀢𑀺 𑀦 𑀫𑁄𑀘𑀦𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺 𑀯𑀘𑀦𑀢𑁄. 𑀢𑀲𑁆𑀫𑀸 𑀢𑀤𑀢𑁆𑀣𑀤𑀲𑁆𑀲𑀦𑀢𑁆𑀣𑀁 𑀇𑀥 𑀓𑀸𑀭𑀓𑁄 𑀦 𑀦𑀺𑀤𑁆𑀤𑀺𑀝𑁆𑀞𑁄, 𑀅𑀜𑁆𑀜𑀣𑀸 ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀲𑀜𑁆𑀘𑁂𑀢𑀦𑀺𑀓𑀁 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀁 𑀆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀓𑀸𑀭𑀓𑁂 𑀦𑀺𑀤𑁆𑀤𑀺𑀝𑁆𑀞𑁂 ‘‘𑀘𑁂𑀢𑁂𑀢𑀺 𑀦 𑀉𑀧𑀓𑁆𑀓𑀫𑀢𑀺 𑀫𑀼𑀘𑁆𑀘𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀯𑀘𑀦𑀯𑀺𑀭𑁄𑀥𑁄. ‘‘𑀲𑀜𑁆𑀘𑁂𑀢𑀦𑀺𑀓𑀸𑀬 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀸 𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑀸’’𑀢𑀺 𑀪𑀼𑀫𑁆𑀫𑁂 𑀦𑀺𑀤𑁆𑀤𑀺𑀝𑁆𑀞𑁂𑀧𑀺 𑀲𑁄𑀯 𑀯𑀺𑀭𑁄𑀥𑁄 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀢𑀤𑀼𑀪𑀬𑀯𑀘𑀦𑀓𑁆𑀓𑀫𑀁 𑀅𑀯𑀢𑁆𑀯𑀸 ‘‘𑀲𑀜𑁆𑀘𑁂𑀢𑀦𑀺𑀓𑀸 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺 𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀺𑀫𑀺𑀢𑁆𑀢𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀸𑀪𑀸𑀯𑀢𑁄 𑀳𑁂𑀢𑀼𑀢𑁆𑀣𑀦𑀺𑀬𑀫𑁄 𑀦 𑀓𑀢𑁄 𑀳𑁄𑀢𑀺. 𑀢𑀲𑁆𑀫𑀺𑀁 𑀅𑀓𑀢𑁂 𑀲𑀜𑁆𑀘𑁂𑀢𑀦𑀺𑀓𑀸 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺 𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑀸 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺, 𑀉𑀧𑀓𑁆𑀓𑀫𑁂 𑀅𑀲𑀢𑀺 𑀅𑀦𑀸𑀧𑀢𑁆𑀢𑀻𑀢𑀺 𑀅𑀬𑀫𑀢𑁆𑀣𑁄 𑀤𑀻𑀧𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁨𑁩𑁬-𑁭. 𑀲𑀜𑁆𑀘𑁂𑀢𑀦𑀺𑀓𑀸𑀢𑀺 𑀏𑀢𑁆𑀣 𑀧𑀞𑀫𑀯𑀺𑀕𑁆𑀕𑀳𑁂𑀦 𑀉𑀧𑀲𑀕𑁆𑀕𑀲𑁆𑀲 𑀲𑀸𑀢𑁆𑀣𑀓𑀢𑀸 𑀤𑀲𑁆𑀲𑀺𑀢𑀸, 𑀤𑀼𑀢𑀺𑀬𑁂𑀦 𑀇𑀓𑀧𑀘𑁆𑀘𑀬𑀲𑁆𑀲. 𑀯𑀸𑀢𑀧𑀺𑀢𑁆𑀢𑀲𑁂𑀫𑁆𑀳𑀭𑀼𑀳𑀺𑀭𑀸𑀤𑀺𑀆𑀲𑀬𑀪𑁂𑀤𑀢𑁄𑀢𑀺 𑀅𑀢𑁆𑀣𑁄. 𑀥𑀸𑀢𑀽𑀢𑀺 𑀏𑀢𑁆𑀣 ‘‘𑀧𑀣𑀯𑀻𑀥𑀸𑀢𑀼𑀆𑀤𑀬𑁄 𑀘𑀢𑀲𑁆𑀲𑁄, 𑀘𑀓𑁆𑀔𑀼𑀥𑀸𑀢𑀼𑀆𑀤𑀬𑁄 𑀯𑀸 𑀅𑀝𑁆𑀞𑀸𑀭𑀲𑀸’’𑀢𑀺 𑀕𑀡𑁆𑀞𑀺𑀧𑀤𑁂 𑀮𑀺𑀔𑀺𑀢𑀁. 𑀯𑀢𑁆𑀣𑀺𑀲𑀻𑀲𑀦𑁆𑀢𑀺 𑀯𑀢𑁆𑀣𑀺𑀧𑀼𑀝𑀲𑁆𑀲 𑀲𑀻𑀲𑀁. ‘‘𑀅𑀗𑁆𑀕𑀚𑀸𑀢𑀲𑁆𑀲 𑀫𑀽𑀮𑀁 𑀅𑀥𑀺𑀧𑁆𑀧𑁂𑀢𑀁, 𑀦 𑀅𑀕𑁆𑀕𑀲𑀻𑀲’’𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀣𑁂𑀯𑀸𑀢𑀺 ‘‘𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀢𑁄’’𑀢𑀺𑀆𑀤𑀺𑀁 𑀕𑀡𑁆𑀳𑀸𑀢𑀺. 𑀢𑀢𑁄 𑀫𑀼𑀘𑁆𑀘𑀺𑀢𑁆𑀯𑀸𑀢𑀺 ‘‘𑀦 𑀲𑀓𑀮𑀓𑀸𑀬𑀢𑁄, 𑀢𑀲𑁆𑀫𑀸 𑀧𑀦 𑀞𑀸𑀦𑀸 𑀘𑀼𑀢𑀫𑀢𑁆𑀢𑁂 𑀳𑁄𑀢𑀽’’𑀢𑀺 𑀕𑀡𑁆𑀞𑀺𑀧𑀤𑁂 𑀮𑀺𑀔𑀺𑀢𑀁. ‘‘𑀤𑀓𑀲𑁄𑀢𑀁 𑀑𑀢𑀺𑀡𑁆𑀡𑀫𑀢𑁆𑀢𑁂’’𑀢𑀺 𑀇𑀫𑀺𑀦𑀸 𑀦 𑀲𑀫𑁂𑀢𑀻𑀢𑀺 𑀘𑁂? 𑀢𑀢𑁄 𑀤𑀓𑀲𑁄𑀢𑁄𑀭𑁄𑀳𑀡𑀜𑁆𑀘𑁂𑀢𑁆𑀣𑀸𑀢𑀺𑀆𑀤𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀁 𑀓𑀢𑁆𑀯𑀸 𑀲𑀼𑀓𑁆𑀓𑀁 𑀞𑀸𑀦𑀸 𑀘𑀸𑀯𑁂𑀢𑁆𑀯𑀸 𑀧𑀼𑀦 𑀯𑀺𑀧𑁆𑀧𑀝𑀺𑀲𑀸𑀭𑀯𑀲𑁂𑀦 𑀤𑀓𑀲𑁄𑀢𑁄𑀭𑁄𑀳𑀡𑀁 𑀦𑀺𑀯𑀸𑀭𑁂𑀢𑀼𑀁 𑀅𑀥𑀺𑀯𑀸𑀲𑁂𑀫𑀻𑀢𑀺. 𑀢𑀢𑁄 𑀩𑀳𑀺 𑀦𑀺𑀓𑁆𑀔𑀫𑀦𑁆𑀢𑁂 𑀅𑀥𑀺𑀯𑀸𑀲𑁂𑀢𑀼𑀁 𑀦 𑀲𑀓𑁆𑀓𑀸, 𑀢𑀣𑀸𑀧𑀺 𑀅𑀥𑀺𑀯𑀸𑀲𑀦𑀸𑀥𑀺𑀧𑁆𑀧𑀸𑀬𑁂𑀦 𑀅𑀥𑀺𑀯𑀸𑀲𑁂𑀢𑁆𑀯𑀸 𑀅𑀦𑁆𑀢𑀭𑀸 𑀤𑀓𑀲𑁄𑀢𑀢𑁄 𑀉𑀤𑁆𑀥𑀁 𑀦𑀺𑀯𑀸𑀭𑁂𑀢𑀼𑀁 𑀅𑀲𑀓𑁆𑀓𑀼𑀡𑁂𑀬𑁆𑀬𑀢𑀸𑀬 ‘‘𑀅𑀦𑀺𑀓𑁆𑀔𑀦𑁆𑀢𑁂 𑀯𑀸’’𑀢𑀺 𑀯𑀼𑀢𑁆𑀢𑀁. 𑀓𑀲𑁆𑀫𑀸? 𑀞𑀸𑀦𑀸 𑀘𑀼𑀢𑀜𑁆𑀳𑀺 𑀅𑀯𑀲𑁆𑀲𑀁 𑀤𑀓𑀲𑁄𑀢𑀁 𑀑𑀢𑀭𑀢𑀻𑀢𑀺 𑀅𑀝𑁆𑀞𑀓𑀣𑀸𑀥𑀺𑀧𑁆𑀧𑀸𑀬𑁄 𑀕𑀡𑁆𑀞𑀺𑀧𑀤𑀸𑀥𑀺𑀧𑁆𑀧𑀸𑀬𑁂𑀦 𑀲𑀫𑁂𑀢𑀺. 𑀢𑀢𑁄 𑀫𑀼𑀘𑁆𑀘𑀺𑀢𑁆𑀯𑀸𑀢𑀺 𑀲𑀓𑀝𑁆𑀞𑀸𑀦𑀢𑁄. 𑀲𑀓𑀲𑀭𑀻𑀭𑀢𑁄 𑀳𑀺 𑀩𑀳𑀺 𑀦𑀺𑀓𑁆𑀔𑀦𑁆𑀢𑀫𑁂𑀯 𑀳𑁄𑀢𑀺, 𑀢𑀢𑁄 ‘‘𑀩𑀳𑀺 𑀦𑀺𑀓𑁆𑀔𑀦𑁆𑀢𑁂 𑀯𑀸 𑀅𑀦𑀺𑀓𑁆𑀔𑀦𑁆𑀢𑁂 𑀯𑀸’’𑀢𑀺 𑀯𑀘𑀦𑀁 𑀯𑀺𑀭𑀼𑀚𑁆𑀛𑁂𑀬𑁆𑀬. 𑀬𑀲𑁆𑀫𑀸 𑀧𑀦 𑀢𑀫𑁆𑀳𑀸 𑀢𑀫𑁆𑀳𑀸 𑀲𑀭𑀻𑀭𑀧𑀤𑁂𑀲𑀸 𑀘𑀼𑀢𑀁 𑀅𑀯𑀲𑁆𑀲𑀁 𑀤𑀓𑀲𑁄𑀢𑀁 𑀑𑀢𑀭𑀢𑀺, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀤𑀓𑀲𑁄𑀢𑀁 𑀑𑀢𑀺𑀡𑁆𑀡𑀫𑀢𑁆𑀢𑁂’’𑀢𑀺, 𑀇𑀫𑀺𑀦𑀸 𑀘 𑀆𑀧𑀢𑁆𑀢𑀺𑀬𑀸 𑀧𑀸𑀓𑀝𑀓𑀸𑀮𑀁 𑀤𑀲𑁆𑀲𑁂𑀢𑀺, 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀫𑁄𑀘𑀦𑀲𑁆𑀲𑀸𑀤𑁂𑀦 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀢𑁄 𑀲𑀼𑀓𑁆𑀓𑀁 𑀩𑀳𑀼𑀢𑀭𑀫𑁆𑀧𑀺 𑀲𑀭𑀻𑀭𑀧𑀤𑁂𑀲𑀸 𑀘𑀼𑀢𑀁 𑀢𑀢𑁆𑀣 𑀢𑀢𑁆𑀣 𑀮𑀕𑁆𑀕𑀸𑀯𑀲𑁂𑀲𑀁 𑀬𑀢𑁆𑀢𑀓𑀁 𑀏𑀓𑀸 𑀔𑀼𑀤𑁆𑀤𑀓𑀫𑀓𑁆𑀔𑀺𑀓𑀸 𑀧𑀺𑀯𑁂𑀬𑁆𑀬, 𑀢𑀢𑁆𑀢𑀓𑁂 𑀤𑀓𑀲𑁄𑀢𑀁 𑀑𑀢𑀺𑀡𑁆𑀡𑀫𑀢𑁆𑀢𑁂 𑀲𑀗𑁆𑀖𑀸𑀤𑀺𑀲𑁂𑀲𑀸𑀧𑀢𑁆𑀢𑀺. 𑀯𑀼𑀢𑁆𑀢𑀜𑁆𑀳𑀺 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀤𑀓𑀲𑁄𑀢𑀁 𑀅𑀦𑁄𑀢𑀺𑀡𑁆𑀡𑁂𑀧𑀺 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺𑀆𑀤𑀺. 𑀢𑀢𑁆𑀢𑀓𑀲𑁆𑀲 𑀩𑀳𑀺 𑀦𑀺𑀓𑁆𑀔𑀫𑀦𑀁 𑀅𑀲𑀮𑁆𑀮𑀓𑁆𑀔𑁂𑀦𑁆𑀢𑁄 ‘‘𑀘𑁂𑀢𑁂𑀢𑀺 𑀉𑀧𑀓𑁆𑀓𑀫𑀢𑀺 𑀦 𑀫𑀼𑀘𑁆𑀘𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 𑀯𑀘𑀦𑀢𑁄 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀲𑀜𑁆𑀜𑀸𑀬 𑀤𑁂𑀲𑁂𑀦𑁆𑀢𑁄𑀧𑀺 𑀦 𑀫𑀼𑀘𑁆𑀘𑀢𑀺, 𑀧𑀲𑁆𑀲𑀸𑀯𑀫𑁆𑀧𑀺 𑀯𑀡𑁆𑀡𑀢𑀁 𑀧𑀲𑁆𑀲𑀺𑀢𑁆𑀯𑀸 𑀯𑀢𑁆𑀣𑀺𑀓𑁄𑀲𑀕𑀢𑀲𑁆𑀲 𑀧𑀺𑀘𑁆𑀙𑀺𑀮𑀢𑀸𑀬 𑀯𑀸 𑀜𑀢𑁆𑀯𑀸 𑀲𑀗𑁆𑀖𑀸𑀤𑀺𑀲𑁂𑀲𑀢𑁄 𑀯𑀼𑀝𑁆𑀞𑀸𑀢𑀩𑁆𑀩𑀁. 𑀅𑀬𑀫𑁂𑀢𑁆𑀣 𑀢𑀢𑀺𑀬𑀢𑁆𑀣𑁂𑀭𑀯𑀸𑀤𑁂 𑀬𑀼𑀢𑁆𑀢𑀺. 𑀲𑀩𑁆𑀩𑀸𑀘𑀭𑀺𑀬𑀸 𑀇𑀫𑁂 𑀏𑀯 𑀢𑀬𑁄 𑀣𑁂𑀭𑀸, 𑀢𑁂𑀲𑀫𑁆𑀧𑀺 𑀤𑀓𑀲𑁄𑀢𑁄𑀭𑁄𑀳𑀡𑀁 𑀦𑀺𑀫𑀺𑀢𑁆𑀢𑁂 𑀉𑀧𑀓𑁆𑀓𑀫𑀦𑀦𑁆𑀢𑀺 𑀅𑀬𑀁 𑀤𑀼𑀢𑀺𑀬𑁄 𑀯𑀺𑀦𑀺𑀘𑁆𑀙𑀬𑁄 𑀲𑀸𑀥𑀸𑀭𑀡𑀢𑁄 𑀏𑀢𑁆𑀣, 𑀏𑀯𑀁 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄 𑀯𑀤𑀢𑀺 𑀓𑀺𑀭.

𑀞𑀸𑀦𑀸 𑀘𑀼𑀢𑀜𑁆𑀳𑀺 𑀅𑀯𑀲𑁆𑀲𑀁 𑀤𑀓𑀲𑁄𑀢𑀁 𑀑𑀢𑀭𑀢𑀻𑀢𑀺 𑀓𑀢𑁆𑀯𑀸 ‘‘𑀞𑀸𑀦𑀸 𑀘𑀸𑀯𑀦𑀫𑀢𑁆𑀢𑁂𑀦𑁂𑀯𑁂𑀢𑁆𑀣 𑀆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁. 𑀤𑀓𑀲𑁄𑀢𑀁 𑀑𑀢𑀺𑀡𑁆𑀡𑁂 𑀏𑀯 𑀆𑀧𑀢𑁆𑀢𑀺. 𑀲𑀼𑀓𑁆𑀓𑀲𑁆𑀲 𑀳𑀺 𑀲𑀓𑀮𑀁 𑀲𑀭𑀻𑀭𑀁 𑀞𑀸𑀦𑀁, 𑀅𑀦𑁄𑀢𑀺𑀡𑁆𑀡𑁂 𑀞𑀸𑀦𑀸 𑀘𑀼𑀢𑀁 𑀦𑀸𑀫 𑀦 𑀳𑁄𑀢𑀻𑀢𑀺 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀆𑀪𑀺𑀥𑀫𑁆𑀫𑀺𑀓𑀢𑁆𑀢𑀸 𑀣𑁂𑀭𑀲𑁆𑀲 ‘‘𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺 𑀦𑀸𑀫 𑀭𑀸𑀕𑀲𑀫𑀼𑀝𑁆𑀞𑀸𑀦𑀸 𑀳𑁄𑀢𑀻’’𑀢𑀺 (𑀓𑀣𑀸. 𑀅𑀝𑁆𑀞. 𑁩𑁦𑁭) 𑀓𑀣𑀸𑀯𑀢𑁆𑀣𑀼𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀲𑀫𑁆𑀪𑀯𑁄 𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑁄, ‘‘𑀢𑀁 𑀅𑀲𑀼𑀘𑀺𑀁 𑀏𑀓𑀤𑁂𑀲𑀁 𑀫𑀼𑀔𑁂𑀦 𑀅𑀕𑁆𑀕𑀳𑁂𑀲𑀺, 𑀏𑀓𑀤𑁂𑀲𑀁 𑀅𑀗𑁆𑀕𑀚𑀸𑀢𑁂 𑀧𑀓𑁆𑀔𑀺𑀧𑀻’’𑀢𑀺 (𑀧𑀸𑀭𑀸. 𑁫𑁦𑁩) 𑀯𑀘𑀦𑀢𑁄 𑀉𑀢𑀼𑀲𑀫𑀼𑀝𑁆𑀞𑀸𑀦𑁄 𑀘 𑀤𑀺𑀲𑁆𑀲𑀢𑀺, 𑀲𑁄 𑀘 𑀔𑁄 𑀅𑀯𑀻𑀢𑀭𑀸𑀕𑀲𑁆𑀲𑁂𑀯 ‘‘𑀅𑀝𑁆𑀞𑀸𑀦𑀫𑁂𑀢𑀁, 𑀪𑀺𑀓𑁆𑀔𑀯𑁂, 𑀅𑀦𑀯𑀓𑀸𑀲𑁄 𑀬𑀁 𑀅𑀭𑀳𑀢𑁄 𑀅𑀲𑀼𑀘𑀺 𑀫𑀼𑀘𑁆𑀘𑁂𑀬𑁆𑀬𑀸’’𑀢𑀺 (𑀫𑀳𑀸𑀯. 𑁩𑁫𑁩; 𑀓𑀣𑀸. 𑁩𑁧𑁩) 𑀯𑀘𑀦𑀢𑁄. 𑀧𑀭𑀽𑀧𑀸𑀳𑀸𑀭𑀝𑁆𑀞𑀓𑀣𑀸𑀬𑀁 ‘‘𑀅𑀢𑁆𑀣𑀺 𑀢𑀲𑁆𑀲 𑀆𑀲𑀬𑁄𑀢𑀺 𑀢𑀲𑁆𑀲 𑀲𑀼𑀓𑁆𑀓𑀲𑁆𑀲 𑀉𑀘𑁆𑀘𑀸𑀭𑀧𑀲𑁆𑀲𑀸𑀯𑀸𑀦𑀁 𑀯𑀺𑀬 𑀧𑀢𑀺𑀝𑁆𑀞𑀸𑀦𑁄𑀓𑀸𑀲𑁄 𑀅𑀢𑁆𑀣𑀻’’𑀢𑀺 (𑀓𑀣𑀸. 𑀅𑀝𑁆𑀞. 𑁩𑁦𑁯) 𑀘𑀦𑀢𑁄 𑀢𑀲𑁆𑀲 𑀆𑀲𑀬𑁄𑀢𑀺 𑀲𑀺𑀤𑁆𑀥𑀁. 𑀧𑀸𑀓𑀢𑀺𑀓𑀘𑀺𑀢𑁆𑀢𑀲𑀫𑀼𑀝𑁆𑀞𑀸𑀦𑀭𑀽𑀧𑀁 𑀯𑀺𑀬 𑀅𑀲𑀁𑀲𑀝𑁆𑀞𑀢𑁆𑀢𑀸, 𑀦𑀺𑀓𑁆𑀔𑀫𑀦𑀢𑁄 𑀘 ‘‘𑀯𑀢𑁆𑀣𑀺𑀲𑀻𑀲𑀁, 𑀓𑀝𑀺, 𑀓𑀸𑀬𑁄’’𑀢𑀺 𑀢𑀺𑀥𑀸 𑀲𑀼𑀓𑁆𑀓𑀲𑁆𑀲 𑀞𑀸𑀦𑀁 𑀧𑀓𑀧𑁆𑀧𑁂𑀦𑁆𑀢𑀺 𑀆𑀘𑀭𑀺𑀬𑀸. 𑀲𑀧𑁆𑀧𑀯𑀺𑀲𑀁 𑀯𑀺𑀬 𑀢𑀁 𑀤𑀝𑁆𑀞𑀩𑁆𑀩𑀁, 𑀦 𑀘 𑀯𑀺𑀲𑀲𑁆𑀲 𑀞𑀸𑀦𑀦𑀺𑀬𑀫𑁄, 𑀓𑁄𑀥𑀯𑀲𑁂𑀦 𑀨𑀼𑀲𑀦𑁆𑀢𑀲𑁆𑀲 𑀳𑁄𑀢𑀺, 𑀏𑀯𑀫𑀲𑁆𑀲 𑀦 𑀘 𑀞𑀸𑀦𑀦𑀺𑀬𑀫𑁄, 𑀭𑀸𑀕𑀯𑀲𑁂𑀦 𑀉𑀧𑀓𑁆𑀓𑀫𑀦𑁆𑀢𑀲𑁆𑀲 𑀳𑁄𑀢𑀻𑀢𑀺 𑀢𑀓𑁆𑀓𑁄.

𑀔𑁄𑀪𑀓𑀭𑀡𑀧𑀘𑁆𑀘𑀬𑁄 𑀦𑀸𑀫 𑀪𑁂𑀲𑀚𑁆𑀚𑀲𑁂𑀦𑀸𑀲𑀦𑀸𑀳𑀸𑀭𑀸𑀤𑀺𑀧𑀘𑁆𑀘𑀬𑁄. 𑀲𑀁𑀲𑀕𑁆𑀕𑀪𑁂𑀤𑀢𑁄𑀧𑀻𑀢𑀺 𑀏𑀢𑁂𑀲𑀼 𑀤𑁆𑀯𑀻𑀳𑀺𑀧𑀺 𑀢𑀻𑀳𑀺𑀧𑀺. 𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀢𑁆𑀢𑀸𑀢𑀺 𑀏𑀢𑁆𑀣 𑀬𑀁 𑀓𑀺𑀜𑁆𑀘𑀺 𑀲𑀼𑀧𑀺𑀦𑀦𑁆𑀢𑁂𑀦 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸 𑀧𑀲𑁆𑀲𑀦𑁆𑀢𑀺, 𑀢𑀁 𑀲𑀩𑁆𑀩𑀁 𑀯𑀺𑀧𑀮𑁆𑀮𑀢𑁆𑀣𑀁 𑀅𑀪𑀽𑀢𑀫𑁂𑀯𑀸𑀢𑀺 𑀆𑀧𑀚𑁆𑀚𑀢𑀺. 𑀢𑀢𑁄 ‘‘𑀬𑀁 𑀧𑀦 𑀧𑀼𑀩𑁆𑀩𑀦𑀺𑀫𑀺𑀢𑁆𑀢𑀢𑁄 𑀧𑀲𑁆𑀲𑀢𑀺. 𑀢𑀁 𑀏𑀓𑀦𑁆𑀢𑀲𑀘𑁆𑀘𑀫𑁂𑀯 𑀳𑁄𑀢𑀻’’𑀢𑀺 𑀇𑀤𑀁 𑀯𑀺𑀭𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀦 𑀯𑀺𑀲𑀬𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑁄 𑀳𑀺 𑀲𑀘𑁆𑀘𑁄 𑀯𑀸 𑀳𑁄𑀢𑀺, 𑀅𑀮𑀺𑀓𑁄 𑀯𑀸𑀢𑀺 𑀓𑀢𑁆𑀯𑀸 𑀢𑀜𑁆𑀘𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁 𑀲𑀺𑀬𑀸, ‘‘𑀅𑀲𑁂𑀓𑁆𑀔𑀸 𑀧𑀳𑀻𑀦𑀯𑀺𑀧𑀮𑁆𑀮𑀸𑀲𑀢𑁆𑀢𑀸 𑀲𑀘𑁆𑀘𑀫𑁂𑀯 𑀧𑀲𑁆𑀲𑀦𑁆𑀢𑀺, 𑀦𑀸𑀲𑀘𑁆𑀘’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀓𑀺𑀦𑁆𑀢𑀼 𑀤𑀲𑁆𑀲𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀅𑀪𑀽𑀢𑀁, 𑀅𑀧𑀲𑁆𑀲𑀦𑁆𑀢𑁄𑀧𑀺 𑀳𑀺 𑀧𑀲𑁆𑀲𑀦𑁆𑀢𑁄 𑀯𑀺𑀬 𑀅𑀲𑀼𑀡𑀦𑁆𑀢𑁄𑀧𑀺 𑀲𑀼𑀡𑀦𑁆𑀢𑁄 𑀯𑀺𑀬 𑀅𑀫𑀼𑀦𑀦𑁆𑀢𑁄𑀧𑀺 𑀫𑀼𑀦𑀦𑁆𑀢𑁄 𑀯𑀺𑀬 𑀳𑁄𑀢𑀺. 𑀲𑀘𑁆𑀘𑀫𑁆𑀧𑀺 𑀯𑀺𑀧𑀲𑁆𑀲𑀢𑀻𑀢𑀺 𑀦𑁄 𑀢𑀓𑁆𑀓𑁄𑀢𑀺 𑀆𑀘𑀭𑀺𑀬𑁄. 𑀢𑀁 𑀭𑀽𑀧𑀦𑀺𑀫𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀁 𑀦 𑀳𑁄𑀢𑀺, 𑀆𑀕𑀦𑁆𑀢𑀼𑀓𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀭𑀽𑀧𑀦𑀺𑀫𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀓𑀫𑁆𑀫𑀦𑀺𑀫𑀺𑀢𑁆𑀢𑀕𑀢𑀺𑀦𑀺𑀫𑀺𑀢𑁆𑀢𑀪𑀽𑀢𑀸𑀦𑀺 𑀳𑀺 𑀭𑀽𑀧𑀦𑀺𑀫𑀺𑀢𑁆𑀢𑀸𑀤𑀻𑀦𑀺 𑀪𑀯𑀗𑁆𑀕𑀲𑁆𑀲 𑀆𑀭𑀫𑁆𑀫𑀡𑀸𑀦𑀺 𑀳𑁄𑀦𑁆𑀢𑀺 𑀏𑀯. 𑀢𑀢𑁆𑀣 𑀓𑀫𑁆𑀫𑀦𑀺𑀫𑀺𑀢𑁆𑀢𑀫𑀢𑀻𑀢𑀫𑁂𑀯, 𑀕𑀢𑀺𑀦𑀺𑀫𑀺𑀢𑁆𑀢𑀁 𑀣𑁄𑀓𑀁 𑀓𑀸𑀮𑀁 𑀧𑀘𑁆𑀘𑀼𑀧𑁆𑀧𑀦𑁆𑀦𑀁 𑀲𑀺𑀬𑀸.

𑀈𑀤𑀺𑀲𑀸𑀦𑀻𑀢𑀺 𑀧𑀘𑁆𑀘𑀓𑁆𑀔𑀢𑁄 𑀅𑀦𑀼𑀪𑀽𑀢𑀧𑀼𑀩𑁆𑀩𑀧𑀭𑀺𑀓𑀧𑁆𑀧𑀺𑀢𑀸𑀕𑀦𑁆𑀢𑀼𑀓𑀧𑀘𑁆𑀘𑀼𑀧𑁆𑀧𑀦𑁆𑀦𑀭𑀽𑀧𑀦𑀺𑀫𑀺𑀢𑁆𑀢𑀸𑀤𑀺𑀆𑀭𑀫𑁆𑀫𑀡𑀸𑀦𑀺, 𑀭𑀸𑀕𑀸𑀤𑀺𑀲𑀫𑁆𑀧𑀬𑀼𑀢𑁆𑀢𑀸𑀦𑀺 𑀘𑀸𑀢𑀺 𑀅𑀢𑁆𑀣𑁄. 𑀫𑀓𑁆𑀓𑀝𑀲𑁆𑀲 𑀦𑀺𑀤𑁆𑀤𑀸 𑀮𑀳𑀼𑀧𑀭𑀺𑀯𑀢𑁆𑀢𑀸 𑀳𑁄𑀢𑀺. 𑀲𑁄 𑀳𑀺 𑀭𑀼𑀓𑁆𑀔𑀲𑀸𑀔𑀢𑁄 𑀧𑀢𑀦𑀪𑀬𑀸 𑀅𑀪𑀺𑀓𑁆𑀔𑀡𑀁 𑀉𑀫𑁆𑀫𑀻𑀮𑀢𑀺 𑀘 𑀲𑀼𑀧𑀢𑀺 𑀘. 𑀫𑀦𑀼𑀲𑁆𑀲𑀸 𑀓𑀺𑀜𑁆𑀘𑀸𑀧𑀺 𑀧𑀼𑀦𑀧𑁆𑀧𑀼𑀦𑀁 𑀉𑀫𑁆𑀫𑀻𑀮𑀦𑁆𑀢𑀺 𑀲𑀼𑀩𑁆𑀬𑀢𑁆𑀢𑀢𑀭𑀁 𑀧𑀝𑀺𑀩𑀼𑀤𑁆𑀥𑀸 𑀯𑀺𑀬 𑀧𑀲𑁆𑀲𑀦𑁆𑀢𑀺, 𑀅𑀣 𑀔𑁄 𑀧𑀝𑀺𑀩𑀼𑀤𑁆𑀥𑀸𑀦𑀁 𑀧𑀼𑀦𑀧𑁆𑀧𑀼𑀦𑀁 𑀪𑀯𑀗𑁆𑀕𑁄𑀢𑀭𑀡𑀁 𑀯𑀺𑀬 𑀲𑀼𑀧𑀺𑀦𑀓𑀸𑀮𑁂𑀧𑀺 𑀢𑁂𑀲𑀁 𑀪𑀯𑀗𑁆𑀕𑁄𑀢𑀭𑀡𑀁 𑀳𑁄𑀢𑀺, 𑀬𑁂𑀦 ‘‘𑀲𑀼𑀧𑀢𑀻’’𑀢𑀺 𑀯𑀼𑀘𑁆𑀘𑀢𑀺. ‘‘𑀪𑀯𑀗𑁆𑀕𑀘𑀺𑀢𑁆𑀢𑁂𑀦 𑀳𑀺 𑀲𑀼𑀧𑀢𑀻’’𑀢𑀺 𑀯𑀘𑀦𑀢𑁄 𑀪𑀯𑀗𑁆𑀕𑁄𑀢𑀭𑀡𑀁 𑀓𑀭𑀚𑀓𑀸𑀬𑀲𑁆𑀲 𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢𑀪𑀸𑀯𑀽𑀧𑀦𑀺𑀲𑁆𑀲𑀬𑀢𑁆𑀢𑀸 ‘‘𑀦𑀺𑀤𑁆𑀤𑀸’’𑀢𑀺 𑀯𑀼𑀘𑁆𑀘𑀢𑀺. 𑀲𑀸 𑀓𑀭𑀚𑀓𑀸𑀬𑀲𑁆𑀲 𑀤𑀼𑀩𑁆𑀩𑀮𑀪𑀸𑀯𑁂𑀦 𑀲𑀼𑀧𑀺𑀦𑀤𑀲𑁆𑀲𑀦𑀓𑀸𑀮𑁂 𑀪𑀯𑀗𑁆𑀕𑀢𑁄 𑀉𑀢𑁆𑀢𑀭𑀡𑁂 𑀲𑀢𑀺𑀧𑀺 𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢𑀪𑀸𑀯𑀧𑁆𑀧𑀢𑁆𑀢𑀺𑀬𑀸 ‘‘𑀧𑀯𑀢𑁆𑀢𑀢𑀻’’𑀢𑀺 𑀘 𑀯𑀼𑀘𑁆𑀘𑀢𑀺, 𑀬𑀢𑁄 𑀲𑀢𑁆𑀢𑀸 ‘‘𑀧𑀝𑀺𑀩𑀼𑀤𑁆𑀥𑀸’’𑀢𑀺 𑀦 𑀯𑀼𑀘𑁆𑀘𑀦𑁆𑀢𑀺, 𑀓𑀭𑀚𑀓𑀸𑀬𑀲𑁆𑀲 𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢𑀲𑀪𑀸𑀯𑀧𑁆𑀧𑀢𑁆𑀢𑀺𑀢𑁄 𑀘 𑀢𑀦𑁆𑀦𑀺𑀲𑁆𑀲𑀺𑀢𑀁 𑀳𑀤𑀬𑀯𑀢𑁆𑀣𑀼 𑀦 𑀲𑀼𑀧𑁆𑀧𑀲𑀦𑁆𑀦𑀁 𑀳𑁄𑀢𑀺, 𑀢𑀢𑁄 𑀢𑀦𑁆𑀦𑀺𑀲𑁆𑀲𑀺𑀢𑀸𑀧𑀺 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀅𑀲𑀼𑀧𑁆𑀧𑀲𑀦𑁆𑀦𑀯𑀝𑁆𑀝𑀺𑀦𑀺𑀲𑁆𑀲𑀺𑀢𑀤𑀻𑀧𑀧𑁆𑀧𑀪𑀸 𑀯𑀺𑀬. 𑀢𑁂𑀦𑁂𑀯 𑀅𑀝𑁆𑀞𑀓𑀣𑀸𑀬𑀁 ‘‘𑀲𑁆𑀯𑀸𑀬𑀁 𑀤𑀼𑀩𑁆𑀩𑀮𑀯𑀢𑁆𑀣𑀼𑀓𑀢𑁆𑀢𑀸 𑀘𑁂𑀢𑀦𑀸𑀬 𑀧𑀝𑀺𑀲𑀦𑁆𑀥𑀺𑀁 𑀆𑀓𑀟𑁆𑀠𑀺𑀢𑀼𑀁 𑀅𑀲𑀫𑀢𑁆𑀣𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁.

𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀤𑀼𑀩𑁆𑀩𑀮𑀯𑀢𑁆𑀣𑀼𑀓𑀢𑁆𑀢𑀸𑀢𑀺 𑀲𑀼𑀧𑀺𑀦𑁂 𑀉𑀧𑀝𑁆𑀞𑀺𑀢𑀁 𑀦𑀺𑀫𑀺𑀢𑁆𑀢𑀫𑁆𑀧𑀺 𑀤𑀼𑀩𑁆𑀩𑀮’’𑀦𑁆𑀢𑀺 𑀮𑀺𑀔𑀺𑀢𑀁. 𑀢𑀁 𑀅𑀦𑁂𑀓𑀢𑁆𑀣𑀁 𑀲𑀩𑁆𑀩𑀫𑁆𑀧𑀺 𑀦𑀺𑀫𑀺𑀢𑁆𑀢𑀁 𑀳𑁄𑀢𑀺, 𑀦 𑀘 𑀤𑀼𑀩𑁆𑀩𑀮𑀸𑀭𑀫𑁆𑀫𑀡𑀯𑀢𑁆𑀣𑀼𑀓𑀢𑁆𑀢𑀸 𑀘𑁂𑀢𑀦𑀸, 𑀢𑀸𑀬 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀤𑀼𑀩𑁆𑀩𑀮𑀸 𑀅𑀢𑀻𑀢𑀸𑀦𑀸𑀕𑀢𑀸𑀭𑀫𑁆𑀫𑀡𑀸𑀬, 𑀧𑀜𑁆𑀜𑀢𑁆𑀢𑀸𑀭𑀫𑁆𑀫𑀡𑀸𑀬 𑀯𑀸 𑀅𑀤𑀼𑀩𑁆𑀩𑀮𑀢𑁆𑀢𑀸, 𑀅𑀯𑀢𑁆𑀣𑀼𑀓𑀸𑀬 𑀤𑀼𑀩𑁆𑀩𑀮𑀪𑀸𑀯𑁄 𑀦 𑀬𑀼𑀚𑁆𑀚𑀢𑀺 𑀘𑁂𑀢𑀦𑀸𑀬 𑀅𑀯𑀢𑁆𑀣𑀼𑀓𑀸𑀬 𑀪𑀸𑀯𑀦𑀸𑀧𑀪𑀸𑀯𑀸𑀬𑀸𑀢𑀺𑀭𑁂𑀓𑀩𑀮𑀲𑀩𑁆𑀪𑀸𑀯𑀢𑁄. 𑀪𑀸𑀯𑀦𑀸𑀩𑀮𑀲𑀫𑀧𑁆𑀧𑀺𑀢𑀜𑁆𑀳𑀺 𑀘𑀺𑀢𑁆𑀢𑀁 𑀅𑀭𑀽𑀧𑀫𑁆𑀧𑀺 𑀲𑀫𑀸𑀦𑀁 𑀅𑀢𑀺𑀪𑀸𑀭𑀺𑀬𑀫𑁆𑀧𑀺 𑀓𑀭𑀚𑀓𑀸𑀬𑀁 𑀕𑀳𑁂𑀢𑁆𑀯𑀸 𑀏𑀓𑀘𑀺𑀢𑁆𑀢𑀓𑁆𑀔𑀡𑁂𑀦𑁂𑀯 𑀩𑁆𑀭𑀳𑁆𑀫𑀮𑁄𑀓𑀁 𑀧𑀸𑀧𑁂𑀢𑁆𑀯𑀸 𑀞𑀧𑁂𑀢𑀺. 𑀢𑀧𑁆𑀧𑀝𑀺𑀪𑀸𑀕𑀁 𑀅𑀦𑀧𑁆𑀧𑀺𑀢𑀫𑁆𑀧𑀺 𑀓𑀸𑀫𑀸𑀯𑀘𑀭𑀘𑀺𑀢𑁆𑀢𑀁 𑀓𑀭𑀚𑀓𑀸𑀬𑀁 𑀆𑀓𑀸𑀲𑁂 𑀮𑀗𑁆𑀖𑀦𑀲𑀫𑀢𑁆𑀣𑀁 𑀓𑀭𑁄𑀢𑀺, 𑀧𑀕𑁂𑀯𑁂𑀢𑀭𑀁. 𑀓𑀺𑀁 𑀧𑀦𑁂𑀢𑁆𑀣 𑀢𑀁 𑀅𑀦𑀼𑀫𑀸𑀦𑀓𑀸𑀭𑀡𑀁, 𑀬𑁂𑀦 𑀘𑀺𑀢𑁆𑀢𑀲𑁆𑀲𑁂𑀯 𑀆𑀦𑀼𑀪𑀸𑀯𑁄𑀢𑀺 𑀧𑀜𑁆𑀜𑀸𑀬𑁂𑀬𑁆𑀬 𑀘𑀺𑀢𑁆𑀢𑀸𑀦𑀼𑀪𑀸𑀯𑁂𑀦 𑀯𑀸 𑀮𑀤𑁆𑀥𑀸𑀲𑁂𑀯𑀦𑀸𑀤𑀺𑀓𑀺𑀭𑀺𑀬𑀸𑀯𑀺𑀲𑁂𑀲𑀦𑀺𑀩𑁆𑀩𑀢𑁆𑀢𑀺𑀤𑀲𑁆𑀲𑀦𑀢𑁄, 𑀢𑀲𑁆𑀫𑀸 𑀤𑀼𑀩𑁆𑀩𑀮𑀯𑀢𑁆𑀣𑀼𑀓𑀢𑁆𑀢𑀸𑀢𑀺 𑀤𑀼𑀩𑁆𑀩𑀮𑀳𑀤𑀬𑀯𑀢𑁆𑀣𑀼𑀓𑀢𑁆𑀢𑀸𑀢𑀺 𑀆𑀘𑀭𑀺𑀬𑀲𑁆𑀲 𑀢𑀓𑁆𑀓𑁄. 𑀅𑀢𑁆𑀢𑀦𑁄 𑀫𑀦𑁆𑀤𑀢𑀺𑀓𑁆𑀔𑀸𑀓𑀸𑀭𑁂𑀦 𑀢𑀦𑁆𑀦𑀺𑀲𑁆𑀲𑀺𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀫𑀦𑁆𑀤𑀢𑀺𑀓𑁆𑀔𑀪𑀸𑀯𑀦𑀺𑀧𑁆𑀨𑀸𑀤𑀦𑀲𑀫𑀢𑁆𑀣𑀜𑁆𑀘𑁂, 𑀳𑀤𑀬𑀯𑀢𑁆𑀣𑀼 𑀘𑀓𑁆𑀔𑀼𑀲𑁄𑀢𑀸𑀤𑀺𑀯𑀢𑁆𑀣𑀼 𑀯𑀺𑀬 𑀇𑀦𑁆𑀤𑁆𑀭𑀺𑀬𑀁 𑀪𑀯𑁂𑀬𑁆𑀬, 𑀦 𑀘𑁂𑀢𑀁 𑀇𑀦𑁆𑀤𑁆𑀭𑀺𑀬𑀁. 𑀬𑀢𑁄 𑀥𑀫𑁆𑀫𑀲𑀗𑁆𑀕𑀳𑁂 𑀉𑀧𑀸𑀤𑀸𑀬𑀭𑀽𑀧𑀧𑀸𑀴𑀺𑀬𑀁 𑀉𑀤𑁆𑀤𑁂𑀲𑀸𑀭𑀳𑀁 𑀦 𑀚𑀸𑀢𑀁. 𑀅𑀦𑀺𑀦𑁆𑀤𑁆𑀭𑀺𑀬𑀢𑁆𑀢𑀸 𑀳𑀺 𑀢𑀁 𑀓𑀸𑀬𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀦𑀦𑁆𑀢𑀭𑀁 𑀦 𑀉𑀤𑁆𑀤𑀺𑀝𑁆𑀞𑀁, 𑀯𑀢𑁆𑀣𑀼𑀭𑀽𑀧𑀢𑁆𑀢𑀸 𑀘 𑀅𑀯𑀢𑁆𑀣𑀼𑀭𑀽𑀧𑀲𑁆𑀲 𑀚𑀻𑀯𑀺𑀢𑀺𑀦𑁆𑀤𑁆𑀭𑀺𑀬𑀲𑁆𑀲 𑀅𑀦𑀦𑁆𑀢𑀭𑀫𑁆𑀧𑀺 𑀦 𑀉𑀤𑁆𑀤𑀺𑀝𑁆𑀞𑀁, 𑀢𑀲𑁆𑀫𑀸 𑀬𑀁 𑀯𑀼𑀢𑁆𑀢𑀁 ‘‘𑀢𑀲𑁆𑀲 𑀅𑀲𑀼𑀧𑁆𑀧𑀲𑀦𑁆𑀦𑀢𑁆𑀢𑀸 𑀢𑀦𑁆𑀦𑀺𑀲𑁆𑀲𑀺𑀢𑀸 𑀘 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺 𑀅𑀲𑀼𑀧𑁆𑀧𑀲𑀦𑁆𑀦𑀸 𑀳𑁄𑀢𑀻’’𑀢𑀺, 𑀢𑀁 𑀦 𑀲𑀺𑀤𑁆𑀥𑀦𑁆𑀢𑀺 𑀘𑁂? 𑀲𑀺𑀤𑁆𑀥𑀫𑁂𑀯 𑀅𑀦𑀺𑀦𑁆𑀤𑁆𑀭𑀺𑀬𑀸𑀦𑀫𑁆𑀧𑀺 𑀲𑀧𑁆𑀧𑀸𑀬𑀸𑀲𑀧𑁆𑀧𑀸𑀬𑀉𑀢𑀼𑀆𑀳𑀸𑀭𑀸𑀤𑀻𑀦𑀁 𑀧𑀘𑁆𑀘𑀬𑀸𑀦𑀁 𑀲𑀫𑀸𑀬𑁄𑀕𑀢𑁄, 𑀘𑀺𑀢𑁆𑀢𑀧𑁆𑀧𑀯𑀢𑁆𑀢𑀺𑀬𑀸 𑀯𑀺𑀓𑀸𑀭𑀤𑀲𑁆𑀲𑀦𑀢𑁄, 𑀧𑀘𑁆𑀘𑀓𑁆𑀔𑀢𑁆𑀢𑀸 𑀘. 𑀬𑀲𑁆𑀫𑀸 𑀅𑀧𑁆𑀧𑀝𑀺𑀩𑀼𑀤𑁆𑀥𑁄𑀧𑀺 𑀧𑀝𑀺𑀩𑀼𑀤𑁆𑀥𑀁 𑀯𑀺𑀬 𑀅𑀢𑁆𑀢𑀸𑀦𑀁 𑀫𑀜𑁆𑀜𑀢𑀻𑀢𑀺. 𑀏𑀢𑁆𑀢𑀸𑀯𑀢𑀸 𑀓𑀭𑀚𑀓𑀸𑀬𑀲𑁆𑀲 𑀦𑀺𑀭𑀼𑀲𑁆𑀲𑀸𑀳𑀲𑀦𑁆𑀢𑀪𑀸𑀯𑀸𑀓𑀸𑀭𑀯𑀺𑀲𑁂𑀲𑁄 𑀦𑀺𑀤𑁆𑀤𑀸 𑀦𑀸𑀫. 𑀲𑀸 𑀘𑀺𑀢𑁆𑀢𑀲𑁆𑀲 𑀪𑀯𑀗𑁆𑀕𑁄𑀢𑀭𑀡𑀸𑀓𑀸𑀭𑀯𑀺𑀲𑁂𑀲𑁂𑀦 𑀳𑁄𑀢𑀺, 𑀢𑀸𑀬 𑀲𑀫𑀦𑁆𑀦𑀸𑀕𑀢𑁄 𑀲𑀢𑁆𑀢𑁄 𑀪𑀯𑀗𑁆𑀕𑀢𑁄 𑀉𑀢𑁆𑀢𑀺𑀡𑁆𑀡𑁄 𑀲𑀼𑀧𑀺𑀦𑀁 𑀧𑀲𑁆𑀲𑀢𑀺, 𑀲𑁄 ‘‘𑀓𑀧𑀺𑀫𑀺𑀤𑁆𑀥𑀧𑀭𑁂𑀢𑁄’’𑀢𑀺 𑀯𑀼𑀘𑁆𑀘𑀢𑀺, 𑀲𑁄 𑀲𑀼𑀢𑁆𑀢𑁄 𑀅𑀧𑁆𑀧𑀝𑀺𑀩𑀼𑀤𑁆𑀥𑁄 𑀳𑁄𑀢𑀻𑀢𑀺 𑀅𑀬𑀫𑀢𑁆𑀣𑁄 𑀲𑀸𑀥𑀺𑀢𑁄 𑀳𑁄𑀢𑀺.

𑀬𑀲𑁆𑀫𑀸 𑀪𑀯𑀗𑁆𑀕𑀯𑀸𑀭𑀦𑀺𑀭𑀦𑁆𑀢𑀭𑀢𑀸𑀬 𑀅𑀘𑁆𑀘𑀦𑁆𑀢𑀲𑀼𑀢𑁆𑀢𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 ‘‘𑀬𑀤𑀺 𑀢𑀸𑀯 𑀲𑀼𑀢𑁆𑀢𑁄 𑀧𑀲𑁆𑀲𑀢𑀺, 𑀅𑀪𑀺𑀥𑀫𑁆𑀫𑀯𑀺𑀭𑁄𑀥𑁄 𑀆𑀧𑀚𑁆𑀚𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦 𑀦𑀺𑀤𑁆𑀤𑀸𑀓𑁆𑀔𑀡𑁂 𑀦 𑀧𑀝𑀺𑀩𑀼𑀤𑁆𑀥𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸 ‘‘𑀅𑀣 𑀧𑀝𑀺𑀩𑀼𑀤𑁆𑀥𑁄 𑀧𑀲𑁆𑀲𑀢𑀺, 𑀯𑀺𑀦𑀬𑀯𑀺𑀭𑁄𑀥𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁, 𑀬𑀲𑁆𑀫𑀸 𑀘 𑀅𑀔𑀻𑀡𑀦𑀺𑀤𑁆𑀤𑁄, 𑀅𑀦𑁄𑀢𑀺𑀡𑁆𑀡𑀪𑀯𑀗𑁆𑀕𑁄 𑀘 𑀅𑀢𑁆𑀣𑀺, 𑀢𑀲𑁆𑀫𑀸 ‘‘𑀓𑀧𑀺𑀫𑀺𑀤𑁆𑀥𑀧𑀭𑁂𑀢𑁄 𑀧𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀣𑀸 𑀅𑀬𑀁 𑀦𑁂𑀯 𑀲𑀼𑀢𑁆𑀢𑁄 𑀦 𑀧𑀝𑀺𑀩𑀼𑀤𑁆𑀥𑁄, 𑀅𑀢𑁆𑀢𑀦𑀸 𑀢𑀁 𑀦𑀺𑀤𑁆𑀤𑀁 𑀅𑀦𑁄𑀓𑁆𑀓𑀦𑁆𑀢𑁄 𑀆𑀧𑀚𑁆𑀚𑁂𑀬𑁆𑀬. 𑀏𑀢𑁆𑀢𑀸𑀯𑀢𑀸 𑀘 𑀅𑀪𑀺𑀥𑀫𑁆𑀫𑁄, 𑀯𑀺𑀦𑀬𑁄, 𑀦𑀸𑀕𑀲𑁂𑀦𑀢𑁆𑀣𑁂𑀭𑀯𑀘𑀦𑀁 𑀬𑀼𑀢𑁆𑀢𑀺 𑀘𑀸𑀢𑀺 𑀲𑀩𑁆𑀩𑀁 𑀅𑀜𑁆𑀜𑀫𑀜𑁆𑀜𑀲𑀁𑀲𑀦𑁆𑀤𑀺𑀢𑀁 𑀳𑁄𑀢𑀺. 𑀢𑀢𑁆𑀣 𑀓𑀧𑀺𑀫𑀺𑀤𑁆𑀥𑀧𑀭𑁂𑀢𑁄𑀢𑀺 𑀪𑀯𑀗𑁆𑀕𑀢𑁄 𑀉𑀢𑁆𑀢𑀺𑀡𑁆𑀡𑀦𑀺𑀤𑁆𑀤𑀸𑀧𑀭𑁂𑀢𑁄. 𑀲𑀸 𑀳𑀺 𑀇𑀥 𑀓𑀧𑀺𑀫𑀺𑀤𑁆𑀥𑀁 𑀦𑀸𑀫. ‘‘𑀢𑀢𑁆𑀣 𑀓𑀢𑀫𑀁 𑀫𑀺𑀤𑁆𑀥𑀁? 𑀬𑀸 𑀓𑀸𑀬𑀲𑁆𑀲 𑀅𑀓𑀮𑁆𑀬𑀢𑀸 𑀅𑀓𑀫𑁆𑀫𑀜𑁆𑀜𑀢𑀸…𑀧𑁂… 𑀲𑀼𑀧𑀦𑀁, 𑀇𑀤𑀁 𑀯𑀼𑀘𑁆𑀘𑀢𑀺 𑀫𑀺𑀤𑁆𑀥’’𑀦𑁆𑀢𑀺 (𑀥. 𑀲. 𑁧𑁧𑁬𑁩) 𑀏𑀯𑀫𑀸𑀕𑀢𑀁. 𑀇𑀤𑀜𑁆𑀳𑀺 𑀅𑀭𑀽𑀧𑀁, 𑀇𑀫𑀲𑁆𑀲 𑀨𑀮𑀪𑀽𑀢𑁄 𑀓𑀭𑀚𑀓𑀸𑀬𑀲𑁆𑀲 𑀅𑀓𑀮𑁆𑀬𑀢𑀸’𑀧𑀘𑀮𑀸𑀬𑀺𑀓𑀸𑀲𑀼𑀧𑀺 𑀦𑀺𑀤𑁆𑀤𑀸𑀯𑀺𑀲𑁂𑀲𑁄 𑀓𑀸𑀭𑀡𑁄𑀧𑀘𑀸𑀭𑁂𑀦 ‘‘𑀓𑀧𑀺𑀫𑀺𑀤𑁆𑀥’’𑀦𑁆𑀢𑀺 𑀧𑀯𑀼𑀘𑁆𑀘𑀢𑀺. 𑀬𑀜𑁆𑀘𑁂𑀯 ‘‘𑀓𑀧𑀺𑀫𑀺𑀤𑁆𑀥𑀧𑀭𑁂𑀢𑁄 𑀔𑁄, 𑀫𑀳𑀸𑀭𑀸𑀚, 𑀲𑀼𑀧𑀺𑀦𑀁 𑀧𑀲𑁆𑀲𑀢𑀻’’𑀢𑀺 (𑀫𑀺. 𑀧. 𑁫.𑁩.𑁫 𑀣𑁄𑀓𑀁 𑀯𑀺𑀲𑀤𑀺𑀲𑀁) 𑀯𑀼𑀢𑁆𑀢𑀦𑁆𑀢𑀺.

𑀬𑀁 𑀢𑀁 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀦𑁆𑀢𑀺 𑀏𑀢𑁆𑀣 𑀬𑁂𑀦 𑀯𑀺𑀦𑀬𑀓𑀫𑁆𑀫𑁂𑀦 𑀢𑀢𑁄 𑀯𑀼𑀝𑁆𑀞𑀸𑀦𑀁 𑀳𑁄𑀢𑀺, 𑀢𑀁 𑀇𑀥 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑀁 𑀦𑀸𑀫. 𑀅𑀯𑀬𑀯𑁂 𑀲𑀫𑀽𑀳𑀯𑁄𑀳𑀸𑀭𑁂𑀦 𑀯𑀸𑀢𑀺 𑀏𑀢𑁆𑀣 𑀲𑀸𑀔𑀘𑁆𑀙𑁂𑀤𑀓𑁄 𑀭𑀼𑀓𑁆𑀔𑀘𑁆𑀙𑁂𑀤𑀓𑁄𑀢𑀺 𑀯𑀼𑀘𑁆𑀘𑀢𑀻𑀢𑀺𑀆𑀤𑀺 𑀦𑀺𑀤𑀲𑁆𑀲𑀦𑀁, 𑀯𑁂𑀤𑀦𑀸𑀓𑁆𑀔𑀦𑁆𑀥𑀸𑀤𑀺 𑀭𑀼𑀴𑁆𑀳𑀻𑀲𑀤𑁆𑀤𑀲𑁆𑀲 𑀦𑀺𑀤𑀲𑁆𑀲𑀦𑀁. 𑀦 𑀘 𑀫𑀬𑀸𑀢𑀺 𑀯𑀻𑀫𑀁𑀲𑀦𑀧𑀤𑀲𑁆𑀲 𑀢𑀲𑁆𑀲 𑀓𑀺𑀭𑀺𑀬𑀁 𑀲𑀦𑁆𑀥𑀸𑀬, 𑀫𑁄𑀘𑀦𑁂 𑀘 𑀲𑀦𑁆𑀦𑀺𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 𑀫𑀼𑀘𑁆𑀘𑀦𑀧𑀓𑀢𑀺𑀬𑀸 𑀘𑀸𑀢𑀺 𑀯𑀼𑀢𑁆𑀢𑀁.

𑁨𑁪𑁦. 𑀕𑁂𑀳𑀦𑁆𑀢𑀺 𑀧𑀜𑁆𑀘𑀓𑀸𑀫𑀕𑀼𑀡𑀸. 𑀯𑀦𑀪𑀗𑁆𑀕𑀺𑀬𑀦𑁆𑀢𑀺 𑀧𑀸𑀪𑀢𑀺𑀓𑀁. 𑀲𑀫𑁆𑀧𑀬𑀼𑀢𑁆𑀢𑀲𑀼𑀔𑀯𑁂𑀤𑀦𑀸𑀫𑀼𑀔𑁂𑀦 𑀭𑀸𑀕𑁄𑀯 ‘‘𑀅𑀲𑁆𑀲𑀸𑀤𑁄’’𑀢𑀺 𑀯𑀼𑀢𑁆𑀢𑁄. 𑀲𑀼𑀧𑀦𑁆𑀢𑀲𑁆𑀲 𑀘𑀸𑀢𑀺 𑀇𑀤𑀁 𑀓𑀧𑀺𑀫𑀺𑀤𑁆𑀥𑀧𑀭𑁂𑀢𑁄 𑀯𑀺𑀬 𑀪𑀯𑀗𑁆𑀕𑀲𑀦𑁆𑀢𑀢𑀺𑀁 𑀅𑀯𑀺𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀲𑀼𑀧𑀦𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺, 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀚𑀕𑁆𑀕𑀦𑀢𑁆𑀣𑀸𑀬𑀸𑀢𑀺 𑀲𑁄𑀥𑀦𑀢𑁆𑀣𑀸𑀬.

𑁨𑁬𑁬. ‘‘𑀤𑀸𑀭𑀼𑀥𑀻𑀢𑀮𑀺𑀓𑀮𑁂𑀧𑀘𑀺𑀢𑁆𑀢𑀸𑀦𑀁 𑀅𑀗𑁆𑀕𑀚𑀸𑀢𑀧𑀝𑀺𑀦𑀺𑀚𑁆𑀛𑀸𑀦𑁂𑀧𑀺 𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀤𑀦𑁆𑀢𑀺. ‘‘𑀉𑀧𑁆𑀧𑀦𑁆𑀦𑁂 𑀧𑀭𑀺𑀴𑀸𑀳𑁂 𑀫𑁄𑀘𑀦𑀭𑀸𑀕𑀚𑁄’’𑀢𑀺 𑀮𑀺𑀔𑀦𑁆𑀢𑀺. 𑀯𑀸𑀮𑀺𑀓𑀸𑀬 𑀯𑀸 ‘‘𑀳𑀢𑁆𑀣𑀺𑀓𑀸𑀫𑀁 𑀦𑀲𑁆𑀲𑀢𑀻’’𑀢𑀺 𑀏𑀢𑁆𑀣 𑀯𑀺𑀬 ‘‘𑀆𑀧𑀢𑁆𑀢𑀺 𑀢𑁆𑀯’’𑀦𑁆𑀢𑀺 𑀲𑀩𑁆𑀩𑀢𑁆𑀣 𑀧𑀸𑀞𑁄. ‘‘𑀏𑀳𑀺 𑀫𑁂 𑀢𑁆𑀯𑀁, 𑀆𑀯𑀼𑀲𑁄 𑀲𑀸𑀫𑀡𑁂𑀭, 𑀅𑀗𑁆𑀕𑀚𑀸𑀢𑀁 𑀕𑀡𑁆𑀳𑀸𑀳𑀻’’𑀢𑀺 𑀆𑀕𑀢𑀢𑁆𑀢𑀸 ‘‘𑀯𑀘𑀻𑀓𑀫𑁆𑀫’’𑀦𑁆𑀢𑀺𑀧𑀺 𑀯𑀢𑁆𑀢𑀼𑀁 𑀬𑀼𑀢𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀏𑀯𑀁 𑀲𑀦𑁆𑀢𑁂 𑀅𑀜𑁆𑀜𑀁 ‘‘𑀏𑀯𑀁 𑀓𑀭𑁄𑀳𑀻’’𑀢𑀺 𑀆𑀡𑀢𑁆𑀢𑀺𑀬𑀸𑀧𑀺 𑀆𑀧𑀢𑁆𑀢𑀺 𑀲𑀺𑀬𑀸𑀢𑀺 𑀲𑀗𑁆𑀓𑀭𑀁 𑀳𑁄𑀢𑀺. 𑀢𑀲𑁆𑀫𑀸 𑀦 𑀯𑀼𑀢𑁆𑀢𑀦𑁆𑀢𑀺 𑀕𑀳𑁂𑀢𑀩𑁆𑀩𑀦𑁆𑀢𑀺 𑀓𑁂𑀘𑀺.

𑁨𑁬𑁭. ‘‘𑀧𑀼𑀧𑁆𑀨𑀸𑀯𑀮𑀺𑀬𑀁 𑀲𑀸𑀲𑀯𑀴𑀺𑀬’’𑀦𑁆𑀢𑀺 𑀤𑀼𑀯𑀺𑀥𑁄 𑀓𑀺𑀭.

𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀓𑀸𑀬𑀲𑀁𑀲𑀕𑁆𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁭𑁦. ‘‘𑀑𑀢𑀺𑀡𑁆𑀡𑁄’’𑀢𑀺 𑀇𑀫𑀺𑀦𑀸𑀲𑁆𑀲 𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑀢𑀸 𑀤𑀲𑁆𑀲𑀺𑀢𑀸. ‘‘𑀯𑀺𑀧𑀭𑀺𑀡𑀢𑁂𑀦 𑀘𑀺𑀢𑁆𑀢𑁂𑀦 𑀫𑀸𑀢𑀼𑀕𑀸𑀫𑁂𑀦 𑀲𑀤𑁆𑀥𑀺’’𑀦𑁆𑀢𑀺 𑀇𑀫𑀺𑀦𑀸𑀲𑁆𑀲 𑀯𑀸𑀬𑀸𑀫𑁄 𑀤𑀲𑁆𑀲𑀺𑀢𑁄. ‘‘𑀲𑀤𑁆𑀥𑀺’’𑀦𑁆𑀢𑀺 𑀳𑀺 𑀧𑀤𑀁 𑀲𑀁𑀬𑁄𑀕𑀁 𑀤𑀻𑀧𑁂𑀢𑀺, 𑀲𑁄 𑀘 𑀧𑀬𑁄𑀕𑁄 𑀲𑀫𑀸𑀕𑀫𑁄 𑀅𑀮𑁆𑀮𑀻𑀬𑀦𑀁. 𑀓𑁂𑀦 𑀘𑀺𑀢𑁆𑀢𑁂𑀦? 𑀯𑀺𑀧𑀭𑀺𑀡𑀢𑁂𑀦 𑀘𑀺𑀢𑁆𑀢𑁂𑀦, 𑀦 𑀧𑀢𑁆𑀢𑀧𑀝𑀺𑀕𑁆𑀕𑀳𑀡𑀸𑀥𑀺𑀧𑁆𑀧𑀸𑀬𑀸𑀤𑀺𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀇𑀫𑀺𑀦𑀸𑀲𑁆𑀲 𑀯𑀸𑀬𑀫𑀢𑁄 𑀨𑀲𑁆𑀲𑀧𑀝𑀺𑀯𑀺𑀚𑀸𑀦𑀦𑀸 𑀤𑀲𑁆𑀲𑀺𑀢𑀸 𑀳𑁄𑀢𑀺. 𑀯𑀸𑀬𑀫𑀺𑀢𑁆𑀯𑀸 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀦𑁆𑀢𑁄 𑀳𑀺 𑀲𑀫𑀸𑀧𑀚𑁆𑀚𑀢𑀺 𑀦𑀸𑀫. 𑀏𑀯𑀫𑀲𑁆𑀲 𑀢𑀺𑀯𑀗𑁆𑀕𑀲𑀫𑁆𑀧𑀢𑁆𑀢𑀺 𑀤𑀲𑁆𑀲𑀺𑀢𑀸 𑀳𑁄𑀢𑀺. 𑀅𑀣 𑀯𑀸 𑀑𑀢𑀺𑀡𑁆𑀡𑁄. 𑀓𑁂𑀦? 𑀯𑀺𑀧𑀭𑀺𑀡𑀢𑁂𑀦 𑀘𑀺𑀢𑁆𑀢𑁂𑀦 𑀬𑀓𑁆𑀔𑀸𑀤𑀺𑀦𑀸 𑀲𑀢𑁆𑀢𑁄 𑀯𑀺𑀬. 𑀉𑀧𑀬𑁄𑀕𑀢𑁆𑀣𑁂 𑀯𑀸 𑀏𑀢𑀁 𑀓𑀭𑀡𑀯𑀘𑀦𑀁. 𑀑𑀢𑀺𑀡𑁆𑀡𑁄 𑀯𑀺𑀧𑀭𑀺𑀡𑀢𑀁 𑀘𑀺𑀢𑁆𑀢𑀁 𑀓𑀽𑀧𑀸𑀤𑀺𑀁 𑀯𑀺𑀬 𑀲𑀢𑁆𑀢𑁄. 𑀅𑀣 𑀯𑀸 ‘‘𑀭𑀸𑀕𑀢𑁄 𑀉𑀢𑁆𑀢𑀺𑀡𑁆𑀡𑁄 𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀪𑀺𑀓𑁆𑀔𑀼𑀪𑀸𑀯𑀁 𑀉𑀧𑀕𑀢𑁄, 𑀢𑀢𑁄 𑀉𑀢𑁆𑀢𑀺𑀡𑁆𑀡𑀸𑀥𑀺𑀧𑁆𑀧𑀸𑀬𑀢𑁄 𑀯𑀺𑀧𑀭𑀺𑀡𑀢𑁂𑀦 𑀘𑀺𑀢𑁆𑀢𑁂𑀦 𑀳𑁂𑀢𑀼𑀪𑀽𑀢𑁂𑀦 𑀢𑀫𑁂𑀯 𑀭𑀸𑀕𑀁 𑀑𑀢𑀺𑀡𑁆𑀡𑁄. 𑀫𑀸𑀢𑀼𑀕𑀸𑀫𑁂𑀦 𑀅𑀢𑁆𑀢𑀦𑁄 𑀲𑀫𑀻𑀧𑀁 𑀆𑀕𑀢𑁂𑀦, 𑀅𑀢𑁆𑀢𑀦𑀸 𑀉𑀧𑀕𑀢𑁂𑀦 𑀯𑀸. 𑀏𑀢𑁂𑀦 𑀫𑀸𑀢𑀼𑀕𑀸𑀫𑀲𑁆𑀲 𑀲𑀸𑀭𑀢𑁆𑀢𑀢𑀸 𑀯𑀸 𑀳𑁄𑀢𑀼 𑀯𑀺𑀭𑀢𑁆𑀢𑀢𑀸 𑀯𑀸, 𑀲𑀸 𑀇𑀥 𑀅𑀧𑁆𑀧𑀫𑀸𑀡𑀸, 𑀦 𑀪𑀺𑀓𑁆𑀔𑀼𑀦𑀻𑀦𑀁 𑀓𑀸𑀬𑀲𑀁𑀲𑀕𑁆𑀕𑁂 𑀯𑀺𑀬 𑀉𑀪𑀺𑀦𑁆𑀦𑀁 𑀲𑀸𑀭𑀢𑁆𑀢𑀢𑀸𑀬 𑀧𑀬𑁄𑀚𑀦𑀁 𑀅𑀢𑁆𑀣𑀺.

𑀓𑀸𑀬𑀲𑀁𑀲𑀕𑁆𑀕𑀦𑁆𑀢𑀺 𑀉𑀪𑀺𑀦𑁆𑀦𑀁 𑀓𑀸𑀬𑀸𑀦𑀁 𑀲𑀫𑁆𑀧𑀬𑁄𑀕𑀁. 𑀧𑀤𑀪𑀸𑀚𑀦𑁂 𑀧𑀦 ‘‘𑀲𑀫𑀸𑀧𑀚𑁆𑀚𑁂𑀬𑁆𑀬𑀸𑀢𑀺 𑀅𑀚𑁆𑀛𑀸𑀘𑀸𑀭𑁄 𑀯𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀲𑀫𑀸𑀧𑀚𑁆𑀚𑀦𑀁 𑀲𑀦𑁆𑀥𑀸𑀬, 𑀦 𑀓𑀸𑀬𑀲𑀁𑀲𑀕𑁆𑀕𑀁. 𑀓𑀸𑀬𑀲𑀁𑀲𑀕𑁆𑀕𑀲𑁆𑀲 𑀲𑀫𑀸𑀧𑀚𑁆𑀚𑀦𑀸 𑀳𑀺 ‘‘𑀅𑀚𑁆𑀛𑀸𑀘𑀸𑀭𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀬𑁄 𑀲𑁄 𑀓𑀸𑀬𑀲𑀁𑀲𑀕𑁆𑀕𑁄 𑀦𑀸𑀫, 𑀲𑁄 𑀅𑀢𑁆𑀣𑀢𑁄 𑀅𑀚𑁆𑀛𑀸𑀘𑀸𑀭𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀭𑀢𑁄 𑀧𑀸𑀴𑀺𑀬𑀁 ‘‘𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑁄, 𑀦 𑀘 𑀓𑀸𑀬𑁂𑀦 𑀯𑀸𑀬𑀫𑀢𑀺, 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 (𑀧𑀸𑀭𑀸. 𑁨𑁭𑁯) 𑀯𑀼𑀢𑁆𑀢𑀮𑀓𑁆𑀔𑀡𑁂𑀦 𑀯𑀺𑀭𑀼𑀚𑁆𑀛𑀢𑀻𑀢𑀺. 𑀨𑀲𑁆𑀲𑀧𑀝𑀺𑀯𑀺𑀚𑀸𑀦𑀦𑀸𑀬 𑀳𑀺 𑀲𑀁𑀲𑀕𑁆𑀕𑁄 𑀤𑀻𑀧𑀺𑀢𑁄. 𑀲𑁄 𑀘𑁂 𑀅𑀚𑁆𑀛𑀸𑀘𑀸𑀭𑁄 𑀳𑁄𑀢𑀺, 𑀓𑀣𑀁 𑀅𑀦𑀸𑀧𑀢𑁆𑀢𑀺 𑀳𑁄𑀢𑀻𑀢𑀺. 𑀲𑀼𑀯𑀼𑀢𑁆𑀢𑀫𑁂𑀢𑀁, 𑀓𑀺𑀦𑁆𑀢𑀼 ‘‘𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀧𑀤𑀁 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀅𑀚𑁆𑀛𑀸𑀘𑀸𑀭𑁄 𑀯𑀼𑀘𑁆𑀘𑀢𑀻’’𑀢𑀺 𑀉𑀪𑀺𑀦𑁆𑀦𑀫𑁆𑀧𑀺 𑀧𑀤𑀸𑀦𑀁 𑀲𑀸𑀫𑀜𑁆𑀜𑀪𑀸𑀚𑀦𑀻𑀬𑀢𑁆𑀢𑀸, 𑀲𑀫𑀸𑀧𑀚𑁆𑀚𑀺𑀢𑀩𑁆𑀩𑀸𑀪𑀸𑀯𑁂 𑀲𑀫𑀸𑀧𑀚𑁆𑀚𑀦𑀸𑀪𑀸𑀯𑁂𑀦 ‘‘𑀲𑁄 𑀅𑀢𑁆𑀣𑀢𑁄 𑀅𑀚𑁆𑀛𑀸𑀘𑀸𑀭𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁 𑀲𑀺𑀬𑀸.

‘‘𑀳𑀢𑁆𑀣𑀕𑁆𑀕𑀸𑀳𑀁 𑀯𑀸’’𑀢𑀺 𑀏𑀢𑁆𑀣 𑀳𑀢𑁆𑀣𑁂𑀦 𑀲𑀩𑁆𑀩𑁄𑀧𑀺 𑀉𑀧𑀸𑀤𑀺𑀦𑁆𑀦𑀓𑁄 𑀓𑀸𑀬𑁄 𑀲𑀗𑁆𑀕𑀳𑀺𑀢𑁄, 𑀦 𑀪𑀺𑀦𑁆𑀦𑀲𑀦𑁆𑀢𑀸𑀦𑁄 𑀢𑀧𑁆𑀧𑀝𑀺𑀩𑀤𑁆𑀥𑁄 𑀳𑀢𑁆𑀣𑀸𑀮𑀗𑁆𑀓𑀸𑀭𑀸𑀤𑀺. 𑀯𑁂𑀡𑀺𑀕𑁆𑀕𑀳𑀡𑁂𑀦 𑀅𑀦𑀼𑀧𑀸𑀤𑀺𑀦𑁆𑀦𑀓𑁄 𑀅𑀪𑀺𑀦𑁆𑀦𑀲𑀦𑁆𑀢𑀸𑀦𑁄 𑀓𑁂𑀲𑀮𑁄𑀫𑀦𑀔𑀤𑀦𑁆𑀢𑀸𑀤𑀺𑀓𑁄 𑀓𑀫𑁆𑀫𑀧𑀘𑁆𑀘𑀬𑀉𑀢𑀼𑀲𑀫𑀼𑀝𑁆𑀞𑀸𑀦𑁄 𑀕𑀳𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑁂𑀯𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀦𑀼𑀧𑀸𑀤𑀺𑀦𑁆𑀦𑀓𑁂𑀦𑀧𑀺 𑀓𑁂𑀦𑀘𑀺 𑀓𑁂𑀲𑀸𑀤𑀺𑀦𑀸 𑀉𑀧𑀸𑀤𑀺𑀦𑁆𑀦𑀓𑀁 𑀯𑀸 𑀅𑀦𑀼𑀧𑀸𑀤𑀺𑀦𑁆𑀦𑀓𑀁 𑀯𑀸 𑀨𑀼𑀲𑀦𑁆𑀢𑁄𑀧𑀺 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑀢𑀺𑀬𑁂𑀯𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁭𑁪). 𑀢𑁂𑀦 𑀅𑀦𑀼𑀧𑀸𑀤𑀺𑀦𑁆𑀦𑀓𑀸𑀦𑀫𑁆𑀧𑀺 𑀓𑁂𑀲𑀮𑁄𑀫𑀸𑀤𑀻𑀦𑀁 𑀅𑀗𑁆𑀕𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀲𑀦𑁆𑀢𑁂𑀧𑀺 ‘‘𑀨𑀲𑁆𑀲𑀁 𑀧𑀝𑀺𑀚𑀸𑀦𑀸𑀢𑀻𑀢𑀺 𑀢𑀺𑀯𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀗𑁆𑀖𑀸𑀤𑀺𑀲𑁂𑀲𑁄. 𑀨𑀲𑁆𑀲𑀲𑁆𑀲 𑀅𑀧𑁆𑀧𑀝𑀺𑀯𑀺𑀚𑀸𑀦𑀦𑀢𑁄 𑀤𑀼𑀯𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀤𑀼𑀓𑁆𑀓𑀝’’𑀦𑁆𑀢𑀺 𑀇𑀫𑀺𑀦𑀸 𑀧𑀸𑀴𑀺𑀅𑀝𑁆𑀞𑀓𑀣𑀸𑀦𑀬𑁂𑀦 𑀯𑀺𑀭𑀼𑀚𑁆𑀛𑀢𑀻𑀢𑀺 𑀘𑁂? 𑀦, 𑀢𑀤𑀢𑁆𑀣𑀚𑀸𑀦𑀦𑀢𑁄. 𑀨𑀼𑀝𑁆𑀞𑀪𑀸𑀯𑀜𑁆𑀳𑀺 𑀧𑀝𑀺𑀯𑀺𑀚𑀸𑀦𑀦𑁆𑀢𑁄𑀧𑀺 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀺 𑀦𑀸𑀫, 𑀅𑀬𑀫𑁂𑀓𑁄 𑀅𑀢𑁆𑀣𑁄, 𑀢𑀲𑁆𑀫𑀸 𑀫𑀸𑀢𑀼𑀕𑀸𑀫𑀲𑁆𑀲, 𑀅𑀢𑁆𑀢𑀦𑁄 𑀘 𑀓𑀸𑀬𑀧𑀭𑀺𑀬𑀸𑀧𑀦𑁆𑀦𑀸𑀦𑀁 𑀓𑁂𑀲𑀸𑀤𑀻𑀦𑀁 𑀅𑀜𑁆𑀜𑀫𑀜𑁆𑀜𑀁 𑀨𑀼𑀝𑁆𑀞𑀪𑀸𑀯𑀁 𑀨𑀼𑀲𑀺𑀢𑁆𑀯𑀸 𑀢𑀁 𑀲𑀸𑀤𑀺𑀬𑀦𑀁 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀺 𑀦𑀸𑀫, 𑀦 𑀓𑀸𑀬𑀯𑀺𑀜𑁆𑀜𑀸𑀡𑀼𑀧𑁆𑀧𑀢𑁆𑀢𑀺𑀬𑀸 𑀏𑀯. 𑀅𑀦𑁂𑀓𑀦𑁆𑀢𑀺𑀓𑀜𑁆𑀳𑁂𑀢𑁆𑀣 𑀓𑀸𑀬𑀯𑀺𑀜𑁆𑀜𑀸𑀡𑀁. 𑀫𑀸𑀢𑀼𑀕𑀸𑀫𑀲𑁆𑀲 𑀉𑀧𑀸𑀤𑀺𑀦𑁆𑀦𑀓𑁂𑀦 𑀓𑀸𑀬𑁂𑀦, 𑀅𑀦𑀼𑀧𑀸𑀤𑀺𑀦𑁆𑀦𑀓𑁂𑀦 𑀯𑀸 𑀓𑀸𑀬𑁂𑀦 𑀪𑀺𑀓𑁆𑀔𑀼𑀦𑁄 𑀉𑀧𑀸𑀤𑀺𑀦𑁆𑀦𑀓𑀓𑀸𑀬𑁂 𑀨𑀼𑀝𑁆𑀞𑁂 𑀧𑀲𑀦𑁆𑀦𑀓𑀸𑀬𑀺𑀦𑁆𑀤𑁆𑀭𑀺𑀬𑁄 𑀘𑁂 𑀳𑁄𑀢𑀺, 𑀢𑀲𑁆𑀲 𑀓𑀸𑀬𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀚𑁆𑀚𑀢𑀺, 𑀢𑁂𑀦𑁂𑀯 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀺 𑀦𑀸𑀫 𑀲𑁄 𑀳𑁄𑀢𑀺. 𑀅𑀦𑀼𑀧𑀸𑀤𑀺𑀦𑁆𑀦𑀓𑀓𑀸𑀬𑁄, 𑀮𑁄𑀮𑀼𑀧𑁆𑀧𑁄 𑀅𑀧𑁆𑀧𑀲𑀦𑁆𑀦𑀓𑀸𑀬𑀺𑀦𑁆𑀤𑁆𑀭𑀺𑀬𑁄 𑀯𑀸 𑀳𑁄𑀢𑀺, 𑀢𑀺𑀫𑀺𑀭𑀯𑀸𑀢𑁂𑀦 𑀉𑀧𑀳𑀢𑀓𑀸𑀬𑁄 𑀯𑀸 𑀢𑀲𑁆𑀲 𑀓𑀸𑀬𑀯𑀺𑀜𑁆𑀜𑀸𑀡𑀁 𑀦𑀼𑀧𑁆𑀧𑀚𑁆𑀚𑀢𑀺. 𑀦 𑀘 𑀢𑁂𑀦 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀺 𑀦𑀸𑀫, 𑀓𑁂𑀯𑀮𑀁 𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑁂𑀦 𑀯𑀸𑀬𑀫𑀺𑀢𑁆𑀯𑀸 𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑀦𑁆𑀢𑁄 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀺 𑀦𑀸𑀫 𑀫𑀦𑁄𑀯𑀺𑀜𑁆𑀜𑀸𑀡𑁂𑀦, 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑁂𑀬𑁆𑀬𑀸𑀢𑀺 𑀇𑀫𑀺𑀦𑀸𑀲𑁆𑀲 𑀯𑀸𑀬𑀫𑀢𑁄 𑀨𑀲𑁆𑀲𑀧𑀝𑀺𑀯𑀺𑀚𑀸𑀦𑀦𑀸 𑀤𑀲𑁆𑀲𑀺𑀢𑀸’’𑀢𑀺. 𑀅𑀧𑀭𑁄𑀧𑀺 𑀪𑀺𑀓𑁆𑀔𑀼 𑀫𑀸𑀢𑀼𑀕𑀸𑀫𑀲𑁆𑀲 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀯𑀸 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀯𑀸 𑀨𑀼𑀝𑁆𑀞𑁄 𑀓𑀸𑀬𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀸𑀤𑁂𑀦𑁆𑀢𑁂𑀦 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀺 𑀦𑀸𑀫, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀅𑀦𑁂𑀓𑀦𑁆𑀢𑀺𑀓𑀜𑁆𑀳𑁂𑀢𑁆𑀣 𑀓𑀸𑀬𑀯𑀺𑀜𑁆𑀜𑀸𑀡’’𑀦𑁆𑀢𑀺. 𑀅𑀧𑀭𑁄 𑀯𑀢𑁆𑀣𑀁 𑀧𑀸𑀭𑀼𑀧𑀺𑀢𑁆𑀯𑀸 𑀦𑀺𑀤𑁆𑀤𑀸𑀬𑀦𑁆𑀢𑀁 𑀫𑀸𑀢𑀼𑀕𑀸𑀫𑀁 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀯𑀢𑁆𑀣𑀲𑁆𑀲 𑀉𑀧𑀭𑀺𑀪𑀸𑀕𑁂 𑀲𑀡𑀺𑀓𑀁 𑀨𑀼𑀲𑀦𑁆𑀢𑁄 𑀯𑀢𑁆𑀣𑀦𑁆𑀢𑀭𑁂𑀦 𑀦𑀺𑀓𑁆𑀔𑀦𑁆𑀢𑀮𑁄𑀫𑀲𑀫𑁆𑀨𑀲𑁆𑀲𑀁 𑀅𑀧𑁆𑀧𑀝𑀺𑀯𑀺𑀚𑀸𑀦𑀦𑁆𑀢𑁄𑀧𑀺 𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑁄 𑀓𑀸𑀬𑁂𑀦 𑀯𑀸𑀬𑀫𑀺𑀢𑁆𑀯𑀸 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀺 𑀦𑀸𑀫, 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑀢𑀺. ‘‘𑀦𑀻𑀮𑀁 𑀖𑀝𑁆𑀝𑁂𑀲𑁆𑀲𑀸𑀫𑀻𑀢𑀺 𑀓𑀸𑀬𑀁 𑀖𑀝𑁆𑀝𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 𑀳𑀺 𑀯𑀼𑀢𑁆𑀢𑀁. 𑀅𑀬𑀁 𑀤𑀼𑀢𑀺𑀬𑁄 𑀅𑀢𑁆𑀣𑁄. 𑀏𑀯𑀁 𑀅𑀦𑁂𑀓𑀢𑁆𑀣𑀢𑁆𑀢𑀸, 𑀏𑀯𑀁 𑀤𑀼𑀯𑀺𑀜𑁆𑀜𑁂𑀬𑁆𑀬𑀸𑀥𑀺𑀧𑁆𑀧𑀸𑀬𑀢𑁄 𑀘 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 𑀨𑀲𑁆𑀲𑀧𑀝𑀺𑀯𑀺𑀚𑀸𑀦𑀦𑀁 𑀅𑀗𑁆𑀕𑀦𑁆𑀢𑁆𑀯𑁂𑀯 𑀦 𑀯𑀼𑀢𑁆𑀢𑀁. 𑀢𑀲𑁆𑀫𑀺𑀜𑁆𑀳𑀺 𑀯𑀼𑀢𑁆𑀢𑁂 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺, 𑀬𑀁 𑀪𑀺𑀓𑁆𑀔𑀼 𑀲𑀗𑁆𑀖𑀸𑀤𑀺𑀲𑁂𑀲𑀁 𑀆𑀧𑀚𑁆𑀚𑀺𑀢𑁆𑀯𑀸𑀧𑀺 𑀦𑀔𑁂𑀦 𑀮𑁄𑀫𑁂𑀦 𑀲𑀁𑀲𑀕𑁆𑀕𑁄 𑀤𑀺𑀝𑁆𑀞𑁄, 𑀦 𑀘 𑀫𑁂 𑀮𑁄𑀫𑀖𑀝𑁆𑀝𑀦𑁂𑀦 𑀓𑀸𑀬𑀯𑀺𑀜𑁆𑀜𑀸𑀡𑀁 𑀉𑀧𑁆𑀧𑀦𑁆𑀦𑀁, 𑀢𑀺𑀫𑀺𑀭𑀯𑀸𑀢𑀣𑀤𑁆𑀥𑀕𑀢𑁆𑀢𑁄 𑀘𑀸𑀳𑀁 𑀦 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀫𑀻𑀢𑀺 𑀅𑀦𑀸𑀧𑀦𑁆𑀦𑀲𑀜𑁆𑀜𑀻 𑀲𑀺𑀬𑀸𑀢𑀺 𑀦 𑀯𑀼𑀢𑁆𑀢𑀁, 𑀅𑀧𑀺𑀘 ‘‘𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀺, 𑀦 𑀘 𑀨𑀲𑁆𑀲𑀁 𑀧𑀝𑀺𑀯𑀺𑀚𑀸𑀦𑀸𑀢𑀻’’𑀢𑀺 𑀘 𑀏𑀢𑁂𑀲𑀁 𑀧𑀤𑀸𑀦𑀁 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑀁 𑀤𑀲𑁆𑀲𑁂𑀢𑁆𑀯𑀸 𑀲𑁄 𑀧𑀜𑁆𑀜𑀸𑀧𑁂𑀢𑀩𑁆𑀩𑁄. 𑀏𑀢𑁆𑀢𑀸𑀯𑀢𑀸 𑀦 𑀢𑀤𑀢𑁆𑀣𑀚𑀸𑀦𑀦𑀢𑁄𑀢𑀺 𑀓𑀸𑀭𑀡𑀁 𑀯𑀺𑀢𑁆𑀣𑀸𑀭𑀺𑀢𑀁 𑀳𑁄𑀢𑀺.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁨𑁭𑁧. ‘‘𑀭𑀢𑁆𑀢𑀁 𑀘𑀺𑀢𑁆𑀢𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀁 𑀯𑀺𑀧𑀭𑀺𑀡𑀢’’𑀦𑁆𑀢𑀺 𑀓𑀺𑀜𑁆𑀘𑀸𑀧𑀺 𑀲𑀸𑀫𑀜𑁆𑀜𑁂𑀦 𑀯𑀼𑀢𑁆𑀢𑀁, 𑀯𑀺𑀦𑀻𑀢𑀯𑀢𑁆𑀣𑀽𑀲𑀼 ‘‘𑀫𑀸𑀢𑀼𑀬𑀸 𑀫𑀸𑀢𑀼𑀧𑁂𑀫𑁂𑀦 𑀆𑀫𑀲𑀢𑀺…𑀧𑁂… 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦𑁂𑀯 𑀭𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 ‘‘𑀫𑀸𑀢𑀼𑀕𑀸𑀫𑁄 𑀦𑀸𑀫 𑀫𑀦𑀼𑀲𑁆𑀲𑀺𑀢𑁆𑀣𑀻’’𑀢𑀺 𑀓𑀺𑀜𑁆𑀘𑀸𑀧𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀁, 𑀅𑀣 𑀔𑁄 𑀅𑀯𑀺𑀦𑀝𑁆𑀞𑀺𑀦𑁆𑀤𑁆𑀭𑀺𑀬𑀸𑀯 𑀫𑀦𑀼𑀲𑁆𑀲𑀺𑀢𑁆𑀣𑀻 𑀇𑀥𑀸𑀥𑀺𑀧𑁆𑀧𑁂𑀢𑀸 ‘‘𑀫𑀢𑀺𑀢𑁆𑀣𑀺𑀬𑀸 𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑀺…𑀧𑁂… 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸. ‘‘𑀫𑀦𑀼𑀲𑁆𑀲𑀺𑀢𑁆𑀣𑀻’’𑀢𑀺 𑀏𑀢𑁆𑀢𑀸𑀯𑀢𑀸 𑀲𑀺𑀤𑁆𑀥𑁂 ‘‘𑀦 𑀬𑀓𑁆𑀔𑀻 𑀦 𑀧𑁂𑀢𑀻 𑀦 𑀢𑀺𑀭𑀘𑁆𑀙𑀸𑀦𑀕𑀢𑀸’’𑀢𑀺 𑀯𑀘𑀦𑀁 𑀅𑀯𑀺𑀦𑀝𑁆𑀞𑀺𑀦𑁆𑀤𑁆𑀭𑀺𑀬𑀸𑀧𑀺 𑀦 𑀲𑀩𑁆𑀩𑀸 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀸 𑀇𑀢𑁆𑀣𑀻 𑀇𑀥 𑀫𑀦𑀼𑀲𑁆𑀲𑀺𑀢𑁆𑀣𑀻 𑀦𑀸𑀫. 𑀬𑀓𑁆𑀔𑀺𑀆𑀤𑀬𑁄 𑀳𑀺 𑀅𑀢𑁆𑀢𑀦𑁄 𑀚𑀸𑀢𑀺𑀲𑀺𑀤𑁆𑀥𑁂𑀦 𑀇𑀤𑁆𑀥𑀺𑀯𑀺𑀲𑁂𑀲𑁂𑀦 𑀇𑀚𑁆𑀛𑀦𑁆𑀢𑀺𑀬𑁄 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀸𑀧𑀺 𑀳𑁄𑀦𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀸𑀲𑀼 𑀬𑀓𑁆𑀔𑀻 𑀣𑀼𑀮𑁆𑀮𑀘𑁆𑀘𑀬𑀯𑀢𑁆𑀣𑀼 𑀳𑁄𑀢𑀺 𑀯𑀺𑀦𑀻𑀢𑀯𑀢𑁆𑀣𑀽𑀲𑀼 𑀬𑀓𑁆𑀔𑀺𑀬𑀸 𑀓𑀸𑀬𑀲𑀁𑀲𑀕𑁆𑀕𑁂𑀦 𑀣𑀼𑀮𑁆𑀮𑀘𑁆𑀘𑀬𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀢𑀤𑀦𑀼𑀮𑁄𑀫𑀢𑁆𑀢𑀸 𑀧𑁂𑀢𑀺𑀢𑁆𑀣𑀻, 𑀤𑁂𑀯𑀺𑀢𑁆𑀣𑀻 𑀘 𑀣𑀼𑀮𑁆𑀮𑀘𑁆𑀘𑀬𑀯𑀢𑁆𑀣𑀼. 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀻 𑀤𑀼𑀓𑁆𑀓𑀝𑀯𑀢𑁆𑀣𑀼. 𑀢𑀺𑀭𑀘𑁆𑀙𑀸𑀦𑀕𑀢𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀺𑀢𑁆𑀣𑀻 𑀘 𑀣𑀼𑀮𑁆𑀮𑀘𑁆𑀘𑀬𑀯𑀢𑁆𑀣𑀼𑀫𑁂𑀯𑀸𑀢𑀺 𑀏𑀓𑁂. 𑀯𑀺𑀪𑀗𑁆𑀕𑁂 𑀧𑀦 ‘‘𑀫𑀦𑀼𑀲𑁆𑀲𑀺𑀢𑁆𑀣𑀻 𑀘 𑀳𑁄𑀢𑀺 𑀫𑀦𑀼𑀲𑁆𑀲𑀺𑀢𑁆𑀣𑀺𑀲𑀜𑁆𑀜𑀻’’𑀢𑀺 𑀧𑀸𑀴𑀺𑀬𑀸 𑀅𑀪𑀸𑀯𑁂𑀦 ‘‘𑀇𑀢𑁆𑀣𑀻 𑀘 𑀳𑁄𑀢𑀺 𑀬𑀓𑁆𑀔𑀺𑀲𑀜𑁆𑀜𑀻’’𑀢𑀺𑀆𑀤𑀺𑀯𑀘𑀦𑁂 𑀲𑀢𑀺 𑀬𑀓𑁆𑀔𑀺𑀆𑀤𑀻𑀦𑀁 𑀅𑀦𑀺𑀢𑁆𑀣𑀺𑀢𑀸𑀧𑀲𑀗𑁆𑀕𑀢𑁄, ‘‘𑀇𑀢𑁆𑀣𑀻 𑀘 𑀳𑁄𑀢𑀺 𑀇𑀢𑁆𑀣𑀺𑀲𑀜𑁆𑀜𑀻’’𑀢𑀺𑀆𑀤𑀺𑀫𑁆𑀳𑀺 𑀬𑀓𑁆𑀔𑀺𑀆𑀤𑀻𑀦𑀁 𑀅𑀦𑁆𑀢𑁄𑀓𑀭𑀡𑁂 𑀲𑀢𑀺 𑀢𑀸𑀲𑀁 𑀲𑀗𑁆𑀖𑀸𑀤𑀺𑀲𑁂𑀲𑀯𑀢𑁆𑀣𑀼𑀪𑀸𑀯𑀧𑁆𑀧𑀲𑀗𑁆𑀕𑀢𑁄 𑀘 𑀬𑀓𑁆𑀔𑀺𑀆𑀤𑀬𑁄 𑀦 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀓𑁂 𑀧𑀦 ‘‘𑀯𑀺𑀦𑀻𑀢𑀯𑀢𑁆𑀣𑀼𑀫𑁆𑀳𑀺 ‘𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀬𑀸 𑀓𑀸𑀬…𑀧𑁂… 𑀤𑀼𑀓𑁆𑀓𑀝𑀲𑁆𑀲𑀸’𑀢𑀺 𑀏𑀢𑁆𑀣 𑀅𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀸 𑀧𑀸𑀓𑀢𑀺𑀓𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀻 𑀅𑀥𑀺𑀧𑁆𑀧𑁂𑀢𑀸, 𑀢𑀲𑁆𑀫𑀸 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁. ‘𑀇𑀢𑁆𑀣𑀻 𑀘 𑀳𑁄𑀢𑀺 𑀢𑀺𑀭𑀘𑁆𑀙𑀸𑀦𑀕𑀢𑀲𑀜𑁆𑀜𑀻𑀢𑀺 𑀢𑀺𑀭𑀘𑁆𑀙𑀸𑀦𑀕𑀢𑀸 𑀘 𑀳𑁄𑀢𑀺 𑀇𑀢𑁆𑀣𑀺𑀲𑀜𑁆𑀜𑀻’𑀢𑀺𑀆𑀤𑀺𑀯𑀸𑀭𑁂𑀲𑀼𑀧𑀺 𑀧𑀸𑀓𑀢𑀺𑀓𑀢𑀺𑀭𑀘𑁆𑀙𑀸𑀦𑀕𑀢𑁄𑀯 𑀅𑀥𑀺𑀧𑁆𑀧𑁂𑀢𑁄, 𑀲𑁄 𑀘 𑀢𑀺𑀭𑀘𑁆𑀙𑀸𑀦𑀕𑀢𑀧𑀼𑀭𑀺𑀲𑁄𑀯. 𑀢𑁂𑀦𑁂𑀯 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀅𑀢𑁆𑀢𑀓𑀆𑀫𑀧𑀸𑀭𑀺𑀘𑀭𑀺𑀬𑀲𑀺𑀓𑁆𑀔𑀸𑀧𑀤𑁂𑀲𑀼 𑀫𑀦𑀼𑀲𑁆𑀲𑀧𑀼𑀭𑀺𑀲𑀧𑀝𑀺𑀲𑀁𑀬𑀼𑀢𑁆𑀢𑀯𑀸𑀭𑀸 𑀯𑀺𑀬 𑀢𑀺𑀭𑀘𑁆𑀙𑀸𑀦𑀧𑀝𑀺𑀲𑀁𑀬𑀼𑀢𑁆𑀢𑀯𑀸𑀭𑀸𑀧𑀺 𑀦𑀸𑀕𑀢𑀸’’𑀢𑀺 𑀯𑀤𑀦𑁆𑀢𑀺. 𑀢𑀣𑀸 𑀧𑀡𑁆𑀟𑀓𑁄𑀢𑀺 𑀇𑀥 𑀫𑀦𑀼𑀲𑁆𑀲𑀧𑀡𑁆𑀟𑀓𑁄𑀯, 𑀧𑀼𑀭𑀺𑀲𑁄𑀢𑀺 𑀘 𑀇𑀥 𑀫𑀦𑀼𑀲𑁆𑀲𑀧𑀼𑀭𑀺𑀲𑁄𑀯 𑀆𑀕𑀢𑁄, 𑀢𑀲𑁆𑀫𑀸 𑀅𑀫𑀦𑀼𑀲𑁆𑀲𑀺𑀢𑁆𑀣𑀻 𑀅𑀫𑀦𑀼𑀲𑁆𑀲𑀧𑀡𑁆𑀟𑀓𑁄 𑀅𑀫𑀦𑀼𑀲𑁆𑀲𑀧𑀼𑀭𑀺𑀲𑁄 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀻 𑀢𑀺𑀭𑀘𑁆𑀙𑀸𑀦𑀕𑀢𑀧𑀡𑁆𑀟𑀓𑁄 𑀫𑀦𑀼𑀲𑁆𑀲𑀸𑀫𑀦𑀼𑀲𑁆𑀲𑀢𑀺𑀭𑀘𑁆𑀙𑀸𑀦𑀕𑀢𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸 𑀘𑀸𑀢𑀺 𑀅𑀝𑁆𑀞 𑀚𑀦𑀸 𑀇𑀥 𑀦𑀸𑀕𑀢𑀸, 𑀢𑁂𑀲𑀁 𑀯𑀲𑁂𑀦 𑀯𑀢𑁆𑀣𑀼𑀲𑀜𑁆𑀜𑀸𑀯𑀺𑀫𑀢𑀺𑀪𑁂𑀤𑀯𑀲𑁂𑀦 𑀆𑀧𑀢𑁆𑀢𑀺𑀪𑁂𑀤𑀸𑀪𑁂𑀤𑀯𑀺𑀦𑀺𑀘𑁆𑀙𑀬𑁄, 𑀅𑀦𑀸𑀕𑀢𑀯𑀸𑀭𑀕𑀡𑀦𑀸 𑀘 𑀅𑀲𑀫𑁆𑀫𑀼𑀬𑁆𑀳𑀦𑁆𑀢𑁂𑀦 𑀯𑁂𑀤𑀺𑀢𑀩𑁆𑀩𑀸, 𑀢𑀣𑀸 𑀢𑁂𑀲𑀁 𑀤𑀼𑀓𑀫𑀺𑀲𑁆𑀲𑀓𑀸𑀤𑀺𑀯𑀸𑀭𑀸, 𑀆𑀧𑀢𑁆𑀢𑀺𑀅𑀦𑀸𑀧𑀢𑁆𑀢𑀺𑀪𑁂𑀤𑀯𑀺𑀦𑀺𑀘𑁆𑀙𑀬𑁄 𑀘. ‘‘𑀢𑀢𑁆𑀣 𑀅𑀫𑀦𑀼𑀲𑁆𑀲𑀧𑀡𑁆𑀟𑀓𑀅𑀫𑀦𑀼𑀲𑁆𑀲𑀧𑀼𑀭𑀺𑀲𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀢𑀺𑀭𑀘𑁆𑀙𑀸𑀦𑀕𑀢𑀧𑀡𑁆𑀟𑀓𑀸𑀢𑀺 𑀘𑀢𑁆𑀢𑀸𑀭𑁄 𑀤𑀼𑀓𑁆𑀓𑀝𑀯𑀢𑁆𑀣𑀼𑀓𑀸, 𑀅𑀫𑀦𑀼𑀲𑁆𑀲𑀺𑀢𑁆𑀣𑀺𑀫𑀦𑀼𑀲𑁆𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸 𑀣𑀼𑀮𑁆𑀮𑀘𑁆𑀘𑀬𑀯𑀢𑁆𑀣𑀼𑀓𑀸, 𑀅𑀫𑀦𑀼𑀲𑁆𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸 𑀢𑀺𑀭𑀘𑁆𑀙𑀸𑀦𑀕𑀢𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸 𑀤𑀼𑀓𑁆𑀓𑀝𑀯𑀢𑁆𑀣𑀼𑀓𑀸, 𑀧𑀸𑀴𑀺𑀬𑀁 𑀧𑀦 𑀅𑀫𑀦𑀼𑀲𑁆𑀲𑀺𑀢𑁆𑀣𑀺𑀬𑀸 𑀅𑀦𑀸𑀕𑀢𑀢𑁆𑀢𑀸 𑀅𑀫𑀦𑀼𑀲𑁆𑀲𑀧𑀡𑁆𑀟𑀓𑀸, 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸 𑀧𑀼𑀭𑀺𑀲𑀸 𑀘 𑀦𑀸𑀕𑀢𑀸. 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀺𑀧𑀡𑁆𑀟𑀓𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀸 𑀢𑀺𑀭𑀘𑁆𑀙𑀸𑀦𑀕𑀢𑀧𑀼𑀭𑀺𑀲𑁂𑀦 𑀲𑀫𑀸𑀦𑀕𑀢𑀺𑀓𑀢𑁆𑀢𑀸 𑀦𑀸𑀕𑀢𑀸, 𑀫𑀦𑀼𑀲𑁆𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀫𑀦𑀼𑀲𑁆𑀲𑀧𑀡𑁆𑀟𑀓𑁂𑀦 𑀲𑀫𑀸𑀦𑀕𑀢𑀺𑀓𑀢𑁆𑀢𑀸 𑀅𑀦𑀸𑀕𑀢𑁄’’𑀢𑀺 𑀯𑀤𑀦𑁆𑀢𑀺. 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁨𑁮𑁧) 𑀧𑀦 ‘‘𑀦𑀸𑀕𑀫𑀸𑀡𑀯𑀺𑀓𑀸𑀬𑀧𑀺 𑀲𑀼𑀧𑀡𑁆𑀡𑀫𑀸𑀡𑀯𑀺𑀓𑀸𑀬𑀧𑀺 𑀓𑀺𑀦𑁆𑀦𑀭𑀺𑀬𑀸𑀧𑀺 𑀕𑀸𑀯𑀺𑀬𑀸𑀧𑀺 𑀤𑀼𑀓𑁆𑀓𑀝𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀢𑀤𑁂𑀯 𑀧𑀫𑀸𑀡𑀢𑁄 𑀕𑀳𑁂𑀢𑀩𑁆𑀩𑀁.

𑀢𑀢𑁆𑀭𑀸𑀬𑀁 𑀯𑀺𑀘𑀸𑀭𑀡𑀸 𑁋 ‘‘𑀦, 𑀪𑀺𑀓𑁆𑀔𑀯𑁂, 𑀢𑀺𑀭𑀘𑁆𑀙𑀸𑀦𑀕𑀢𑀲𑁆𑀲 𑀦𑀺𑀲𑀺𑀦𑁆𑀦𑀧𑀭𑀺𑀲𑀸𑀬 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀺𑀢𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑁧𑁮𑁩) 𑀏𑀢𑁆𑀣 ‘‘𑀢𑀺𑀭𑀘𑁆𑀙𑀸𑀦𑀕𑀢𑁄𑀢𑀺 𑀬𑀲𑁆𑀲 𑀉𑀧𑀲𑀫𑁆𑀧𑀤𑀸 𑀧𑀝𑀺𑀓𑁆𑀔𑀺𑀢𑁆𑀢𑀸’’𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀦𑀺𑀤𑀸𑀦𑀯𑀡𑁆𑀡𑀦𑀸) 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀢𑀺𑀭𑀘𑁆𑀙𑀸𑀦𑀕𑀢𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁄 𑀧𑀸𑀓𑀢𑀺𑀓𑀢𑀺𑀭𑀘𑁆𑀙𑀸𑀦𑀕𑀢𑀢𑁄 𑀯𑀺𑀲𑀺𑀝𑁆𑀞𑁄, 𑀢𑀣𑀸 𑀬𑀓𑁆𑀔𑀧𑁂𑀢𑀢𑀺𑀭𑀘𑁆𑀙𑀸𑀦𑀕𑀢𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀸𑀦𑀁 ‘‘𑀢𑀺𑀭𑀘𑁆𑀙𑀸𑀦𑀕𑀢𑀲𑁆𑀲 𑀘 𑀤𑀼𑀓𑁆𑀔𑀼𑀧𑁆𑀧𑀢𑁆𑀢𑀺𑀬𑀁 𑀅𑀧𑀺𑀘 𑀤𑀼𑀓𑁆𑀓𑀝𑀫𑁂𑀯𑀸’’𑀢𑀺 𑀏𑀢𑁆𑀣 𑀯𑀺𑀲𑁂𑀲𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀘 ‘‘𑀧𑀢𑀦𑀭𑀽𑀧𑀁 𑀧𑀫𑀸𑀡𑀁, 𑀦 𑀫𑀭𑀡𑀭𑀽𑀧’’𑀦𑁆𑀢𑀺 𑀏𑀢𑁆𑀣 𑀆𑀧𑀢𑁆𑀢𑀺𑀯𑀺𑀲𑁂𑀲𑀯𑀘𑀦𑀢𑁄 𑀘 ‘‘𑀉𑀪𑀢𑁄 𑀅𑀯𑀲𑁆𑀲𑀼𑀢𑁂 𑀬𑀓𑁆𑀔𑀲𑁆𑀲 𑀯𑀸 𑀧𑁂𑀢𑀲𑁆𑀲 𑀯𑀸 𑀧𑀡𑁆𑀟𑀓𑀲𑁆𑀲 𑀯𑀸 𑀢𑀺𑀭𑀘𑁆𑀙𑀸𑀦𑀕𑀢𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀲𑁆𑀲 𑀯𑀸 𑀅𑀥𑀓𑁆𑀔𑀓𑀁 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀁 𑀓𑀸𑀬𑁂𑀦 𑀓𑀸𑀬𑀁 𑀆𑀫𑀲𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 (𑀧𑀸𑀘𑀺. 𑁬𑁬𑁧) 𑀲𑀸𑀫𑀜𑁆𑀜𑁂𑀦 𑀯𑀘𑀦𑀢𑁄 𑀘 𑀲𑁄 𑀯𑀺𑀲𑀺𑀝𑁆𑀞𑁄𑀢𑀺 𑀲𑀺𑀤𑁆𑀥𑀁. 𑀯𑀺𑀲𑀺𑀝𑁆𑀞𑀢𑁆𑀢𑀸 𑀘 𑀢𑀺𑀭𑀘𑁆𑀙𑀸𑀦𑀕𑀢𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀺𑀢𑁆𑀣𑀺𑀬𑀸 𑀓𑀸𑀬𑀲𑀁𑀲𑀕𑁆𑀕𑀁 𑀲𑀫𑀸𑀧𑀚𑁆𑀚𑀦𑁆𑀢𑀲𑁆𑀲𑀸𑀢𑀺 𑀯𑀺𑀲𑁂𑀲𑁄 𑀳𑁄𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀆𑀧𑀢𑁆𑀢𑀺𑀯𑀺𑀲𑁂𑀲𑁂𑀦 𑀪𑀯𑀺𑀢𑀩𑁆𑀩𑀁. 𑀬𑀤𑀺 𑀓𑀸𑀬𑀲𑀁𑀲𑀕𑁆𑀕𑀲𑀺𑀓𑁆𑀔𑀸𑀧𑀤𑁂 𑀢𑀺𑀭𑀘𑁆𑀙𑀸𑀦𑀕𑀢𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀺𑀢𑁆𑀣𑀻𑀧𑀺 𑀅𑀥𑀺𑀧𑁆𑀧𑁂𑀢𑀸, 𑀭𑀽𑀧𑀲𑀸𑀫𑀜𑁆𑀜𑁂𑀦 𑀲𑀜𑁆𑀜𑀸𑀯𑀺𑀭𑀸𑀕𑀢𑁆𑀢𑀸𑀲𑀫𑁆𑀪𑀯𑀢𑁄 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀲𑀺𑀓𑁆𑀔𑀸𑀧𑀤𑁂𑀲𑀼𑀧𑀺 𑀲𑀸 𑀯𑀢𑁆𑀢𑀩𑁆𑀩𑀸 𑀪𑀯𑁂𑀬𑁆𑀬, 𑀲𑀸 𑀘𑀸𑀦𑀸𑀕𑀢𑀸. 𑀲𑀭𑀽𑀧𑁂𑀦 𑀲𑀁𑀔𑀺𑀢𑁆𑀢𑀯𑀸𑀭𑀢𑁆𑀢𑀸 𑀦𑀸𑀕𑀢𑀸𑀢𑀺 𑀘𑁂? 𑀇𑀢𑁆𑀣𑀻 𑀘 𑀳𑁄𑀢𑀺 𑀢𑀺𑀭𑀘𑁆𑀙𑀸𑀦𑀕𑀢𑁄 𑀘 𑀉𑀪𑀺𑀦𑁆𑀦𑀁 𑀇𑀢𑁆𑀣𑀺𑀲𑀜𑁆𑀜𑀻𑀢𑀺 𑀇𑀥 𑀆𑀕𑀢𑀢𑁆𑀢𑀸 𑀧𑀼𑀭𑀺𑀲𑀮𑀺𑀗𑁆𑀕𑀦𑀺𑀤𑁆𑀤𑁂𑀲𑁄 𑀦 𑀬𑀼𑀚𑁆𑀚𑀢𑀺, 𑀢𑀲𑁆𑀫𑀸 𑀢𑀺𑀭𑀘𑁆𑀙𑀸𑀦𑀕𑀢𑀧𑀼𑀭𑀺𑀲𑁄 𑀘 𑀇𑀥 𑀆𑀕𑀢𑁄, 𑀢𑀺𑀭𑀘𑁆𑀙𑀸𑀦𑀕𑀢𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀺𑀢𑁆𑀣𑀺𑀬𑀸 𑀧𑀸𑀴𑀺𑀬𑀁 𑀅𑀦𑀸𑀕𑀢𑀸𑀬𑀧𑀺 𑀤𑀼𑀓𑁆𑀓𑀝𑀫𑁂𑀯 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸𑀢𑀺 𑀇𑀫𑀲𑁆𑀲 𑀯𑀘𑀦𑀲𑁆𑀲 𑀓𑀸𑀭𑀡𑀘𑁆𑀙𑀸𑀬𑀸 𑀧𑀭𑀺𑀬𑁂𑀲𑀺𑀢𑀩𑁆𑀩𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀇𑀤𑀁 𑀦 𑀬𑀼𑀚𑁆𑀚𑀢𑀺. 𑀓𑀲𑁆𑀫𑀸? 𑀇𑀢𑁆𑀣𑀻𑀦𑀁, 𑀧𑀼𑀭𑀺𑀲𑀸𑀦𑀜𑁆𑀘 𑀏𑀓𑀢𑁄 𑀯𑀘𑀦𑁂 𑀧𑀼𑀭𑀺𑀲𑀮𑀺𑀗𑁆𑀕𑀲𑀩𑁆𑀪𑀸𑀯𑀢𑁄. 𑀇𑀥 𑀢𑀺𑀭𑀘𑁆𑀙𑀸𑀦𑀕𑀢𑀧𑀼𑀭𑀺𑀲𑀧𑀡𑁆𑀟𑀓𑀺𑀢𑁆𑀣𑀺𑀬𑁄 𑀢𑀺𑀲𑁆𑀲𑁄𑀧𑀺 𑀏𑀓𑀢𑁄 𑀲𑀫𑁆𑀧𑀺𑀡𑁆𑀟𑁂𑀢𑁆𑀯𑀸 ‘‘𑀢𑀺𑀭𑀘𑁆𑀙𑀸𑀦𑀕𑀢𑁄’’𑀢𑀺 𑀯𑀼𑀢𑁆𑀢𑀁.

𑀢𑀢𑁆𑀣 𑀘 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀸𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁂𑀲𑀼 𑀇𑀢𑁆𑀣𑀺𑀧𑀡𑁆𑀟𑀓𑀧𑀼𑀭𑀺𑀲𑀲𑀜𑁆𑀜𑀺𑀢𑀸 𑀬𑀣𑀸𑀲𑀫𑁆𑀪𑀯𑀁 𑀯𑁂𑀤𑀺𑀢𑀩𑁆𑀩𑀸. 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀤𑀺𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑁂 𑀯𑀸𑀭𑀸𑀦𑀁 𑀲𑀁𑀔𑀺𑀢𑁆𑀢𑀢𑁆𑀢𑀸 𑀧𑀼𑀭𑀺𑀲𑀢𑀺𑀭𑀘𑁆𑀙𑀸𑀦𑀕𑀢𑀸𑀤𑀬𑁄 𑀦𑀸𑀕𑀢𑀸. 𑀬𑀣𑀸𑀯𑀼𑀢𑁆𑀢𑁂𑀲𑀼 𑀆𑀧𑀢𑁆𑀢𑀺, 𑀢𑀣𑀸 𑀢𑀢𑁆𑀣𑀸𑀧𑀺. 𑀅𑀜𑁆𑀜𑀣𑀸 𑀧𑀼𑀭𑀺𑀲𑀁 𑀑𑀪𑀸𑀲𑀦𑁆𑀢𑀲𑁆𑀲 𑀘 𑀅𑀦𑀸𑀧𑀢𑁆𑀢𑀻𑀢𑀺 𑀧𑀡𑁆𑀟𑀓𑀁 𑀑𑀪𑀸𑀲𑀦𑁆𑀢𑀲𑁆𑀲 𑀘 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀢𑁂 𑀯𑀸𑀭𑀸 𑀲𑀁𑀔𑀺𑀢𑁆𑀢𑀸𑀢𑀺 𑀧𑀜𑁆𑀜𑀸𑀬𑀦𑁆𑀢𑀻𑀢𑀺. 𑀯𑀺𑀲𑁂𑀲𑁄 𑀘 𑀧𑀡𑁆𑀟𑀓𑁂, 𑀧𑀼𑀭𑀺𑀲𑁂, 𑀢𑀺𑀭𑀘𑁆𑀙𑀸𑀦𑀕𑀢𑁂 𑀘 𑀇𑀢𑁆𑀣𑀺𑀲𑀜𑁆𑀜𑀺𑀲𑁆𑀲 𑀅𑀢𑁆𑀣𑀺, 𑀢𑀣𑀸𑀧𑀺 𑀢𑀢𑁆𑀣 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀫𑁂𑀯 𑀧𑀫𑀸𑀡𑀦𑁆𑀢𑀺 𑀤𑁆𑀯𑀺𑀦𑁆𑀦𑀫𑁂𑀢𑁂𑀲𑀁 𑀯𑀸𑀤𑀸𑀦𑀁 𑀬𑀢𑁆𑀣 𑀬𑀼𑀢𑁆𑀢𑀺 𑀯𑀸 𑀓𑀸𑀭𑀡𑀁 𑀯𑀸 𑀅𑀢𑀺𑀭𑁂𑀓𑀁 𑀤𑀺𑀲𑁆𑀲𑀢𑀺, 𑀢𑀁 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀦𑁆𑀢𑀺 𑀆𑀭𑀺𑀘𑀬𑁄. 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀲𑀼𑀝𑁆𑀞𑀼 𑀯𑀺𑀘𑀸𑀭𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀁.

𑀢𑀢𑁆𑀣 𑀧𑀸𑀴𑀺𑀬𑀁 𑀆𑀕𑀢𑀯𑀸𑀭𑀕𑀡𑀦𑀸 𑀢𑀸𑀯 𑀏𑀯𑀁 𑀲𑀗𑁆𑀔𑁂𑀧𑀢𑁄 𑀯𑁂𑀤𑀺𑀢𑀩𑁆𑀩𑀸 𑁋 𑀇𑀢𑁆𑀣𑀺𑀫𑀽𑀮𑀓𑀸 𑀧𑀜𑁆𑀘 𑀯𑀸𑀭𑀸 𑀧𑀡𑁆𑀟𑀓𑀧𑀼𑀭𑀺𑀲𑀢𑀺𑀭𑀘𑁆𑀙𑀸𑀦𑀕𑀢𑀫𑀽𑀮𑀓𑀸 𑀘 𑀧𑀜𑁆𑀘 𑀧𑀜𑁆𑀘𑀸𑀢𑀺 𑀯𑀻𑀲𑀢𑀺 𑀯𑀸𑀭𑀸 𑀏𑀓𑀫𑀽𑀮𑀓𑀸, 𑀢𑀣𑀸 𑀤𑀼𑀫𑀽𑀮𑀓𑀸 𑀯𑀻𑀲𑀢𑀺, 𑀫𑀺𑀲𑁆𑀲𑀓𑀫𑀽𑀮𑀓𑀸 𑀯𑀻𑀲𑀢𑀻𑀢𑀺 𑀲𑀝𑁆𑀞𑀺 𑀯𑀸𑀭𑀸, 𑀢𑀸𑀦𑀺 𑀢𑀻𑀡𑀺 𑀯𑀻𑀲𑀢𑀺𑀓𑀸𑀦𑀺 𑀳𑁄𑀦𑁆𑀢𑀺. 𑀏𑀓𑁂𑀓𑀲𑁆𑀫𑀺𑀁 𑀯𑀻𑀲𑀢𑀺𑀓𑁂 𑀏𑀓𑁂𑀓𑀫𑀽𑀮𑀯𑀸𑀭𑀁 𑀕𑀳𑁂𑀢𑁆𑀯𑀸 𑀓𑀸𑀬𑁂𑀦 𑀓𑀸𑀬𑀧𑀝𑀺𑀩𑀤𑁆𑀥𑀯𑀸𑀭𑀸 𑀢𑀬𑁄 𑀯𑀼𑀢𑁆𑀢𑀸. 𑀲𑁂𑀲𑀸 𑀲𑀢𑁆𑀢𑀧𑀜𑁆𑀜𑀸𑀲 𑀯𑀸𑀭𑀸 𑀲𑀁𑀔𑀺𑀢𑁆𑀢𑀸, 𑀢𑀣𑀸 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀓𑀸𑀬𑀯𑀸𑀭𑀸 𑀢𑀬𑁄 𑀯𑀼𑀢𑁆𑀢𑀸, 𑀲𑁂𑀲𑀸 𑀲𑀁𑀔𑀺𑀢𑁆𑀢𑀸, 𑀏𑀯𑀁 𑀓𑀸𑀬𑀧𑀝𑀺𑀩𑀤𑁆𑀥𑁂𑀦 𑀓𑀸𑀬𑀧𑀝𑀺𑀩𑀤𑁆𑀥𑀯𑀸𑀭𑁂𑀧𑀺 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀓𑀸𑀬𑀯𑀸𑀭𑁂𑀧𑀺 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀓𑀸𑀬𑀧𑀝𑀺𑀩𑀤𑁆𑀥𑀯𑀸𑀭𑁂𑀧𑀺 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀯𑀸𑀭𑁂𑀧𑀺 𑀢𑀬𑁄 𑀢𑀬𑁄 𑀯𑀸𑀭𑀸 𑀯𑀼𑀢𑁆𑀢𑀸, 𑀲𑁂𑀲𑀸 𑀲𑀁𑀔𑀺𑀢𑁆𑀢𑀸. 𑀏𑀯𑀁 𑀙𑀦𑁆𑀦𑀁 𑀢𑀺𑀓𑀸𑀦𑀁 𑀯𑀲𑁂𑀦 𑀅𑀝𑁆𑀞𑀸𑀭𑀲 𑀯𑀸𑀭𑀸 𑀆𑀕𑀢𑀸𑀢𑀺 𑀲𑀭𑀽𑀧𑀢𑁄 𑀯𑀼𑀢𑁆𑀢𑀸, 𑀲𑁂𑀲𑀸 𑀤𑁆𑀯𑁂𑀘𑀢𑁆𑀢𑀸𑀮𑀻𑀲𑀸𑀥𑀺𑀓𑀸𑀦𑀺 𑀢𑀻𑀡𑀺 𑀯𑀸𑀭𑀲𑀢𑀸𑀦𑀺 𑀲𑀁𑀔𑀺𑀢𑁆𑀢𑀸𑀦𑀺. 𑀢𑀢𑁄 𑀧𑀭𑀁 𑀫𑀸𑀢𑀼𑀕𑀸𑀫𑀲𑁆𑀲 𑀲𑀸𑀭𑀢𑁆𑀢𑀧𑀓𑁆𑀔𑁂 𑀓𑀸𑀬𑁂𑀦 𑀓𑀸𑀬𑀦𑁆𑀢𑀺 𑀏𑀓𑀫𑁂𑀓𑀁 𑀯𑀟𑁆𑀠𑁂𑀢𑁆𑀯𑀸 𑀧𑀼𑀩𑁆𑀩𑁂 𑀯𑀼𑀢𑁆𑀢𑀸 𑀅𑀝𑁆𑀞𑀸𑀭𑀲 𑀯𑀸𑀭𑀸 𑀆𑀕𑀢𑀸𑀢𑀺 𑀏𑀓𑀯𑀻𑀲𑀢𑀺 𑀯𑀸𑀭𑀸 𑀲𑀭𑀽𑀧𑁂𑀦 𑀆𑀕𑀢𑀸, 𑀦𑀯𑀦𑀯𑀼𑀢𑀸𑀥𑀺𑀓𑀸𑀦𑀺 𑀢𑀻𑀡𑀺 𑀯𑀸𑀭𑀲𑀢𑀸𑀦𑀺 𑀲𑀁𑀔𑀺𑀢𑁆𑀢𑀸𑀦𑀺. 𑀢𑀢𑁄 𑀧𑀭𑀁 𑀆𑀧𑀢𑁆𑀢𑀸𑀦𑀸𑀧𑀢𑁆𑀢𑀺𑀤𑀻𑀧𑀓𑀸 𑀘𑀢𑁆𑀢𑀸𑀭𑁄 𑀲𑁂𑀯𑀦𑀸𑀥𑀺𑀧𑁆𑀧𑀸𑀬𑀫𑀽𑀮𑀓𑀸 𑀘𑀢𑁆𑀢𑀸𑀭𑁄 𑀫𑁄𑀓𑁆𑀔𑀸𑀥𑀺𑀧𑁆𑀧𑀸𑀬𑀫𑀽𑀮𑀓𑀸𑀢𑀺 𑀤𑁆𑀯𑁂 𑀘𑀢𑀼𑀓𑁆𑀓𑀸 𑀆𑀕𑀢𑀸.

𑀢𑀢𑁆𑀣𑀸𑀬𑀁 𑀯𑀺𑀲𑁂𑀲𑁄 𑁋 𑀬𑀤𑀺𑀤𑀁 𑀫𑀸𑀢𑀺𑀓𑀸𑀬 𑀧𑀭𑀸𑀫𑀲𑀦𑀧𑀤𑀁, 𑀢𑁂𑀦 𑀬𑀲𑁆𑀫𑀸 𑀆𑀫𑀲𑀦𑀸𑀤𑀻𑀦𑀺 𑀙𑀼𑀧𑀦𑀧𑀭𑀺𑀬𑁄𑀲𑀸𑀦𑀸𑀦𑀺 𑀤𑁆𑀯𑀸𑀤𑀲𑀧𑀺 𑀧𑀤𑀸𑀦𑀺 𑀕𑀳𑀺𑀢𑀸𑀦𑀺, 𑀢𑀲𑁆𑀫𑀸 𑀧𑀤𑀼𑀤𑁆𑀥𑀸𑀭𑀁 𑀅𑀓𑀢𑁆𑀯𑀸 ‘‘𑀆𑀫𑀲𑀦𑀸 𑀧𑀭𑀸𑀫𑀲𑀦𑀁 𑀙𑀼𑀧𑀦’’𑀦𑁆𑀢𑀺 𑀆𑀳. 𑀧𑀭𑀸𑀫𑀲𑀦𑀁 𑀦𑀸𑀫 𑀆𑀫𑀲𑀦𑀸. ‘‘𑀙𑀼𑀧𑀦’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑁂 𑀧𑀭𑀸𑀫𑀲𑀦𑀫𑁆𑀧𑀺 𑀯𑀺𑀲𑀼𑀁 𑀏𑀓𑀢𑁆𑀢𑀁 𑀪𑀯𑁂𑀬𑁆𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀢𑁆𑀣𑀻 𑀘 𑀳𑁄𑀢𑀺 𑀇𑀢𑁆𑀣𑀺𑀲𑀜𑁆𑀜𑀻 𑀘𑀸𑀢𑀺 𑀇𑀫𑀲𑁆𑀫𑀺𑀁 𑀧𑀞𑀫𑀯𑀸𑀭𑁂 𑀏𑀯 𑀤𑁆𑀯𑀸𑀤𑀲𑀧𑀺 𑀆𑀫𑀲𑀦𑀸𑀤𑀻𑀦𑀺 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑀺𑀢𑀸𑀦𑀺. 𑀢𑀢𑁄 𑀧𑀭𑀁 𑀆𑀤𑀺𑀫𑁆𑀳𑀺 𑀤𑁆𑀯𑁂 𑀧𑀤𑀸𑀦𑀻𑀢𑀺 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀆𑀕𑀢𑀸𑀦𑀺, 𑀇𑀢𑀭𑀸𑀦𑀺 𑀲𑀁𑀔𑀺𑀢𑁆𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀓𑀸𑀬𑀯𑀸𑀭𑀸𑀤𑀻𑀲𑀼 𑀧𑀦 𑀲𑀩𑁆𑀩𑀸𑀓𑀸𑀭𑁂𑀦 𑀅𑀮𑀸𑀪𑀢𑁄 𑀆𑀫𑀲𑀦𑀫𑁂𑀯𑁂𑀓𑀁 𑀆𑀕𑀢𑀁, 𑀦𑁂𑀢𑀭𑀸𑀦𑀺. ‘‘𑀲𑀜𑁆𑀘𑁄𑀧𑁂𑀢𑀺 𑀳𑀭𑀢𑀻’’𑀢𑀺 𑀧𑀸𑀞𑁄, 𑀲𑀜𑁆𑀘𑁄𑀧𑁂𑀢𑀺 𑀘. 𑀕𑀡𑁆𑀞𑀺𑀧𑀤𑁂𑀲𑀼 𑀧𑀦 ‘‘𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 𑀭𑀚𑁆𑀚𑀼𑀯𑀢𑁆𑀣𑀸𑀤𑀻𑀳𑀺 𑀧𑀭𑀺𑀓𑁆𑀔𑀺𑀧𑀦𑁂’’𑀢𑀺 𑀘 𑀧𑀘𑁆𑀙𑀸 ‘‘𑀧𑀼𑀭𑀺𑀫𑀦𑀬𑁂𑀦𑁂𑀯𑀸𑀢𑀺 𑀲𑀫𑁆𑀫𑀲𑀦𑀸 𑀳𑁄𑀢𑀻’’𑀢𑀺 𑀘 ‘‘𑀯𑁂𑀡𑀺𑀕𑁆𑀕𑀸𑀳𑁂 𑀆𑀧𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀢𑁆𑀢𑀸 𑀮𑁄𑀫𑀨𑀼𑀲𑀦𑁂𑀧𑀺 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 𑀘 ‘‘𑀢𑀁 𑀧𑀓𑀸𑀲𑁂𑀢𑀼𑀁 𑀉𑀧𑀸𑀤𑀺𑀦𑁆𑀦𑀓𑁂𑀦 𑀳𑀻𑀢𑀺𑀆𑀤𑀺 𑀯𑀼𑀢𑁆𑀢’’𑀦𑁆𑀢𑀺 𑀘 𑀮𑀺𑀔𑀺𑀢𑀁.

𑀬𑀣𑀸𑀦𑀺𑀤𑁆𑀤𑀺𑀝𑁆𑀞𑀦𑀺𑀤𑁆𑀤𑁂𑀲𑁂𑀢𑀺 𑀇𑀫𑀲𑁆𑀫𑀺𑀁𑀬𑁂𑀯 𑀬𑀣𑀸𑀦𑀺𑀤𑁆𑀤𑀺𑀝𑁆𑀞𑁂 𑀦𑀺𑀤𑁆𑀤𑁂𑀲𑁂. ‘‘𑀲𑀤𑀺𑀲𑀁 𑀅𑀕𑁆𑀕𑀳𑁂𑀲𑀻’’𑀢𑀺 𑀯𑀼𑀢𑁆𑀢𑁂 𑀢𑀸𑀤𑀺𑀲𑀁 𑀅𑀕𑁆𑀕𑀳𑁂𑀲𑀻𑀢𑀺 𑀕𑀭𑀼𑀓𑀁 𑀢𑀢𑁆𑀣 𑀓𑀸𑀭𑀬𑁂𑀢𑀺 𑀅𑀢𑁆𑀣𑁄, 𑀓𑀸𑀬𑀲𑀁𑀲𑀕𑁆𑀕𑀯𑀺𑀪𑀗𑁆𑀕𑁂 𑀯𑀸𑀢𑀺 𑀅𑀢𑁆𑀣𑁄. 𑀇𑀢𑀭𑁄𑀧𑀺 𑀓𑀸𑀬𑀧𑀝𑀺𑀩𑀤𑁆𑀥𑀙𑀼𑀧𑀦𑀓𑁄. 𑀕𑀳𑀡𑁂 𑀘𑀸𑀢𑀺 𑀕𑀳𑀡𑀁 𑀯𑀸. 𑀯𑀺𑀭𑀸𑀕𑀺𑀢𑁂𑀢𑀺 𑀯𑀺𑀭𑀤𑁆𑀥𑁂. 𑀲𑀸𑀭𑀢𑁆𑀢𑀦𑁆𑀢𑀺 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑁂𑀦 𑀭𑀢𑁆𑀢𑀁, 𑀅𑀢𑁆𑀢𑀦𑀸 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀅𑀢𑁆𑀣𑁄. ‘‘𑀫𑀸𑀢𑀼𑀪𑀕𑀺𑀦𑀺𑀆𑀤𑀺𑀯𑀺𑀭𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀭𑀢𑁆𑀢𑀁 𑀜𑀸𑀢𑀺𑀧𑁂𑀫𑀯𑀲𑁂𑀦 𑀕𑀡𑁆𑀳𑀺, 𑀏𑀢𑁆𑀣 𑀤𑀼𑀓𑁆𑀓𑀝𑀁 𑀬𑀼𑀢𑁆𑀢𑀁. ‘‘𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑀁 𑀯𑀸 𑀲𑀸𑀭𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀯𑀺𑀭𑀢𑁆𑀢𑀁 𑀫𑀸𑀢𑀭𑀁 𑀕𑀡𑁆𑀳𑀺, 𑀅𑀦𑀥𑀺𑀧𑁆𑀧𑁂𑀢𑀁 𑀕𑀡𑁆𑀳𑀺. 𑀏𑀢𑁆𑀣 𑀫𑀳𑀸𑀲𑀼𑀫𑀢𑁆𑀣𑁂𑀭𑀯𑀸𑀤𑁂𑀦 𑀣𑀼𑀮𑁆𑀮𑀘𑁆𑀘𑀬𑀁 ‘‘𑀓𑀸𑀬𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀁 𑀕𑀡𑁆𑀳𑀸𑀢𑀺, 𑀣𑀼𑀮𑁆𑀮𑀘𑁆𑀘𑀬𑀦𑁆𑀢𑀺 𑀮𑀤𑁆𑀥𑀺𑀓𑀢𑁆𑀢𑀸. ‘‘𑀇𑀢𑁆𑀣𑀻 𑀘 𑀳𑁄𑀢𑀺 𑀇𑀢𑁆𑀣𑀺𑀲𑀜𑁆𑀜𑀻 𑀲𑀸𑀭𑀢𑁆𑀢𑁄 𑀘, 𑀪𑀺𑀓𑁆𑀔𑀼 𑀘 𑀦𑀁 𑀇𑀢𑁆𑀣𑀺𑀬𑀸 𑀓𑀸𑀬𑁂𑀦 𑀓𑀸𑀬𑀁 𑀆𑀫𑀲𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸’’𑀢𑀺 (𑀧𑀸𑀭𑀸. 𑁨𑁭𑁩) 𑀯𑀘𑀦𑀢𑁄 𑀲𑀗𑁆𑀖𑀸𑀤𑀺𑀲𑁂𑀲𑁄𑀧𑀺 𑀔𑀸𑀬𑀢𑀺. ‘‘𑀯𑀺𑀭𑀢𑁆𑀢𑀁 𑀕𑀡𑁆𑀳𑀺𑀲𑁆𑀲𑀸𑀫𑀻’’𑀢𑀺 𑀲𑀸𑀭𑀢𑁆𑀢𑀁 𑀕𑀡𑁆𑀳𑀸𑀢𑀺, 𑀏𑀢𑁆𑀣𑀧𑀺 𑀲𑀗𑁆𑀖𑀸𑀤𑀺𑀲𑁂𑀲𑁄𑀯 𑀔𑀸𑀬𑀢𑀺 ‘‘𑀦𑀻𑀮𑀁 𑀖𑀝𑁆𑀝𑁂𑀲𑁆𑀲𑀸𑀫𑀻’𑀢𑀺 𑀓𑀸𑀬𑀁 𑀖𑀝𑁆𑀝𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 𑀯𑀘𑀦𑀢𑁄. 𑀏𑀢𑁆𑀣 𑀧𑀦 ‘‘𑀦 𑀧𑀼𑀩𑁆𑀩𑀪𑀸𑀕𑁂 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑀢𑁆𑀢𑀸’’𑀢𑀺 𑀅𑀦𑀼𑀕𑀡𑁆𑀞𑀺𑀧𑀤𑁂 𑀓𑀸𑀭𑀡𑀁 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 ‘‘𑀕𑀭𑀼𑀓𑀸𑀧𑀢𑁆𑀢𑀺𑀪𑀬𑁂𑀦 ‘𑀦𑀻𑀮𑀫𑁂𑀯 𑀖𑀝𑁆𑀝𑁂𑀲𑁆𑀲𑀸𑀫𑀻’𑀢𑀺 𑀯𑀸𑀬𑀸𑀫𑀦𑁆𑀢𑁄 𑀓𑀸𑀬𑀁 𑀖𑀝𑁆𑀝𑁂𑀢𑀺, 𑀧𑀼𑀩𑁆𑀩𑀪𑀸𑀕𑁂 𑀢𑀲𑁆𑀲 ‘𑀓𑀸𑀬𑀧𑀝𑀺𑀩𑀤𑁆𑀥𑀁 𑀖𑀝𑁆𑀝𑁂𑀲𑁆𑀲𑀸𑀫𑀻’𑀢𑀺 𑀧𑀯𑀢𑁆𑀢𑀢𑁆𑀢𑀸 𑀤𑀼𑀓𑁆𑀓𑀝𑁂𑀦 𑀪𑀯𑀺𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑀺. 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁄 ‘‘𑀏𑀯𑀭𑀽𑀧𑁂 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 𑀯𑀤𑀢𑀺 𑀓𑀺𑀭. ‘‘𑀇𑀢𑁆𑀣𑀺𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀇𑀢𑁆𑀣𑀺𑀬𑀸 𑀧𑀼𑀭𑀺𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀧𑀼𑀭𑀺𑀲𑁂 𑀯𑀼𑀢𑁆𑀢𑀦𑀬𑁂𑀦 𑀆𑀧𑀢𑁆𑀢𑀺𑀪𑁂𑀤𑁄, 𑀇𑀢𑁆𑀣𑀺𑀮𑀺𑀗𑁆𑀕𑀲𑁆𑀲 𑀧𑀝𑀺𑀘𑁆𑀙𑀦𑁆𑀦𑀓𑀸𑀮𑁂𑀧𑀺 𑀇𑀢𑁆𑀣𑀺𑀯𑀲𑁂𑀦𑁂𑀯 𑀆𑀧𑀢𑁆𑀢𑀻’’𑀢𑀺 𑀯𑀤𑀦𑁆𑀢𑀺.

𑀯𑀺𑀦𑀻𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁨𑁮𑁧. 𑀢𑀺𑀡𑀡𑁆𑀟𑀼𑀧𑀓𑀦𑁆𑀢𑀺 𑀳𑀺𑀭𑀺𑀯𑁂𑀭𑀸𑀤𑀺𑀫𑀽𑀮𑀸𑀦𑀺 𑀕𑀳𑁂𑀢𑁆𑀯𑀸 𑀓𑀢𑁆𑀢𑀩𑁆𑀩𑀁. 𑀢𑀸𑀮𑀧𑀡𑁆𑀡𑀫𑀼𑀤𑁆𑀤𑀺𑀓𑀦𑁆𑀢𑀺 𑀢𑀸𑀮𑀧𑀡𑁆𑀡𑀫𑀬𑀁 𑀅𑀗𑁆𑀕𑀼𑀮𑀺𑀫𑀼𑀤𑁆𑀤𑀺𑀓𑀁, 𑀢𑁂𑀦 𑀢𑀸𑀮𑀧𑀡𑁆𑀡𑀫𑀬𑀁 𑀓𑀝𑀁, 𑀓𑀝𑀺𑀲𑀼𑀢𑁆𑀢𑀓𑀁, 𑀓𑀡𑁆𑀡𑀧𑀺𑀴𑀦𑁆𑀥𑀦𑀸𑀤𑀺 𑀲𑀩𑁆𑀩𑀁 𑀦 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁. 𑀢𑀫𑁆𑀩𑀧𑀡𑁆𑀡𑀺𑀯𑀸𑀲𑀺𑀦𑁄 𑀇𑀢𑁆𑀣𑀺𑀭𑀽𑀧𑀁 𑀮𑀺𑀔𑀺𑀢𑀁, 𑀓𑀝𑀺𑀓𑀧𑀝𑀜𑁆𑀘 𑀦 𑀙𑀼𑀧𑀦𑁆𑀢𑀺 𑀓𑀺𑀭. 𑀆𑀓𑀭𑀢𑁄 𑀫𑀼𑀢𑁆𑀢𑀫𑀢𑁆𑀢𑁄. 𑀭𑀢𑀦𑀫𑀺𑀲𑁆𑀲𑁄𑀢𑀺 𑀅𑀮𑀗𑁆𑀓𑀸𑀭𑀢𑁆𑀣𑀁 𑀓𑀢𑁄 𑀓𑀜𑁆𑀘𑀦𑀮𑀢𑀸𑀤𑀺𑀯𑀺𑀦𑀤𑁆𑀥𑁄. 𑀲𑀼𑀯𑀡𑁆𑀡𑁂𑀦 𑀲𑀤𑁆𑀥𑀺𑀁 𑀬𑁄𑀚𑁂𑀢𑁆𑀯𑀸 𑀧𑀘𑀺𑀢𑁆𑀯𑀸𑀢𑀺 𑀲𑀼𑀯𑀡𑁆𑀡𑀭𑀲𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑀺𑀢𑁆𑀯𑀸. 𑀩𑀻𑀚𑀢𑁄 𑀥𑀸𑀢𑀼𑀧𑀸𑀲𑀸𑀡𑀢𑁄 𑀧𑀝𑁆𑀞𑀸𑀬. 𑀣𑁂𑀭𑁄 𑀦 𑀓𑀧𑁆𑀧𑀢𑀻𑀢𑀺 ‘‘𑀢𑀼𑀫𑁆𑀳𑀸𑀓𑀁 𑀧𑁂𑀲𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸. ‘‘𑀘𑁂𑀢𑀺𑀬𑀲𑁆𑀲 𑀧𑀽𑀚𑀁 𑀓𑀭𑁄𑀣𑀸’’𑀢𑀺 𑀯𑀼𑀢𑁆𑀢𑁂 𑀯𑀝𑁆𑀝𑀢𑀺 𑀓𑀺𑀭. 𑀩𑀼𑀩𑁆𑀩𑀼𑀴𑀓𑀁 𑀢𑀸𑀭𑀓𑀁. 𑀆𑀭𑀓𑀽𑀝𑀮𑁄𑀳𑀫𑁆𑀧𑀺 𑀚𑀸𑀢𑀭𑀽𑀧𑀕𑀢𑀺𑀓𑀫𑁂𑀯.

𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑁋

‘‘𑀆𑀭𑀓𑀽𑀝𑀮𑁄𑀳𑀁 𑀲𑀼𑀯𑀡𑁆𑀡𑀲𑀤𑀺𑀲𑀫𑁂𑀯, 𑀲𑀼𑀯𑀡𑁆𑀡𑀁 𑀅𑀦𑀼𑀮𑁄𑀫𑁂𑀢𑀺, 𑀅𑀦𑀸𑀫𑀸𑀲’’𑀦𑁆𑀢𑀺.

‘‘𑀪𑁂𑀲𑀚𑁆𑀚𑀢𑁆𑀣𑀸𑀬 𑀧𑀦 𑀯𑀝𑁆𑀝𑀢𑀻’’𑀢𑀺 𑀯𑀘𑀦𑀢𑁄 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀓𑀤𑁂𑀲𑁄𑀧𑀺 𑀅𑀦𑀼𑀜𑁆𑀜𑀸𑀢𑁄 𑀳𑁄𑀢𑀻𑀢𑀺 𑀢𑀢𑁆𑀣 𑀢𑀢𑁆𑀣 𑀅𑀥𑀺𑀧𑁆𑀧𑀸𑀬𑀁 𑀜𑀢𑁆𑀯𑀸 𑀯𑀺𑀪𑀸𑀯𑁂𑀢𑀩𑁆𑀩𑀁.

𑀓𑀸𑀬𑀲𑀁𑀲𑀕𑁆𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁮𑁩. 𑀢𑀢𑀺𑀬𑁂 𑀢𑀬𑁄 𑀲𑀗𑁆𑀖𑀸𑀤𑀺𑀲𑁂𑀲𑀯𑀸𑀭𑀸 𑀢𑀬𑁄 𑀣𑀼𑀮𑁆𑀮𑀘𑁆𑀘𑀬𑀯𑀸𑀭𑀸 𑀢𑀬𑁄 𑀤𑀼𑀓𑁆𑀓𑀝𑀯𑀸𑀭𑀸 𑀢𑀬𑁄 𑀓𑀸𑀬𑀧𑀝𑀺𑀩𑀤𑁆𑀥𑀯𑀸𑀭𑀸𑀢𑀺 𑀤𑁆𑀯𑀸𑀤𑀲 𑀯𑀸𑀭𑀸 𑀲𑀭𑀽𑀧𑁂𑀦 𑀆𑀕𑀢𑀸. 𑀢𑀢𑁆𑀣 𑀢𑀬𑁄 𑀲𑀗𑁆𑀖𑀸𑀤𑀺𑀲𑁂𑀲𑀯𑀸𑀭𑀸 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀸𑀢𑀺 𑀢𑀺𑀡𑁆𑀡𑀁 𑀯𑀻𑀲𑀢𑀺𑀓𑀸𑀦𑀁 𑀏𑀓𑁂𑀓𑀫𑀽𑀮𑀸 𑀯𑀸𑀭𑀸𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀢𑀲𑁆𑀫𑀸 𑀇𑀥 𑀯𑀺𑀲𑁂𑀲𑀸𑀢𑀺 𑀧𑀡𑁆𑀡𑀸𑀲 𑀯𑀸𑀭𑀸 𑀲𑀁𑀔𑀺𑀢𑁆𑀢𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀣𑀸 𑀇𑀢𑁆𑀣𑀻 𑀘 𑀳𑁄𑀢𑀺 𑀯𑁂𑀫𑀢𑀺𑀓𑁄 𑀲𑀸𑀭𑀢𑁆𑀢𑁄 𑀘, 𑀪𑀺𑀓𑁆𑀔𑀼 𑀘 𑀦𑀁 𑀇𑀢𑁆𑀣𑀺𑀬𑀸 𑀯𑀘𑁆𑀘𑀫𑀕𑁆𑀕𑀁 𑀧𑀲𑁆𑀲𑀸𑀯𑀫𑀕𑁆𑀕𑀁 𑀆𑀤𑀺𑀲𑁆𑀲 𑀯𑀡𑁆𑀡𑀫𑁆𑀧𑀺 𑀪𑀡𑀢𑀺…𑀧𑁂… 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀇𑀢𑁆𑀣𑀻 𑀘 𑀳𑁄𑀢𑀺 𑀧𑀡𑁆𑀟𑀓𑀧𑀼𑀭𑀺𑀲𑀲𑀜𑁆𑀜𑀻 𑀢𑀺𑀭𑀘𑁆𑀙𑀸𑀦𑀕𑀢𑀲𑀜𑁆𑀜𑀻 𑀲𑀸𑀭𑀢𑁆𑀢𑁄 𑀘, 𑀪𑀺𑀓𑁆𑀔𑀼 𑀘 𑀦𑀁 𑀇𑀢𑁆𑀣𑀺𑀬𑀸 𑀯𑀘𑁆𑀘𑀫𑀕𑁆𑀕𑀁 𑀧𑀲𑁆𑀲𑀸𑀯𑀫𑀕𑁆𑀕𑀁 𑀆𑀤𑀺𑀲𑁆𑀲 𑀯𑀡𑁆𑀡𑀫𑁆𑀧𑀺 𑀪𑀡𑀢𑀺 𑀅𑀓𑁆𑀓𑁄𑀲𑀢𑀺𑀧𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲. 𑀧𑀡𑁆𑀟𑀓𑁄 𑀘 𑀳𑁄𑀢𑀺 𑀧𑀡𑁆𑀟𑀓𑀲𑀜𑁆𑀜𑀻 𑀲𑀸𑀭𑀢𑁆𑀢𑁄 𑀘, 𑀪𑀺𑀓𑁆𑀔𑀼 𑀘 𑀦𑀁 𑀧𑀡𑁆𑀟𑀓𑀲𑁆𑀲 𑀯𑀘𑁆𑀘𑀫𑀕𑁆𑀕𑀁 𑀆𑀤𑀺𑀲𑁆𑀲 𑀯𑀡𑁆𑀡𑀫𑁆𑀧𑀺 𑀪𑀡𑀢𑀺, 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸𑀢𑀺 𑀏𑀯𑀫𑀸𑀤𑀻𑀦𑀁 𑀆𑀧𑀢𑁆𑀢𑀺𑀝𑁆𑀞𑀸𑀦𑀸𑀦𑀁 𑀅𑀦𑀸𑀧𑀢𑁆𑀢𑀺𑀝𑁆𑀞𑀸𑀦𑀢𑀸 𑀆𑀧𑀚𑁆𑀚𑁂𑀬𑁆𑀬, 𑀦 𑀘𑀸𑀧𑀚𑁆𑀚𑀢𑀺, 𑀧𑀡𑁆𑀟𑀓𑁂 𑀇𑀢𑁆𑀣𑀺𑀲𑀜𑁆𑀜𑀺𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀤𑀻𑀧𑁂𑀢𑀼𑀁 ‘‘𑀇𑀢𑁆𑀣𑀻 𑀘 𑀧𑀡𑁆𑀟𑀓𑁄 𑀘 𑀉𑀪𑀺𑀦𑁆𑀦𑀁 𑀇𑀢𑁆𑀣𑀺𑀲𑀜𑁆𑀜𑀻 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀧𑀡𑁆𑀟𑀓𑁂 𑀧𑀡𑁆𑀟𑀓𑀲𑀜𑁆𑀜𑀺𑀲𑁆𑀲 𑀣𑀼𑀮𑁆𑀮𑀘𑁆𑀘𑀬’’𑀦𑁆𑀢𑀺 𑀯𑀼𑀢𑁆𑀢𑀫𑁂𑀯 𑀳𑁄𑀢𑀺, 𑀢𑀲𑁆𑀫𑀸 𑀲𑀩𑁆𑀩𑀢𑁆𑀣 𑀲𑀁𑀔𑀺𑀢𑁆𑀢𑀯𑀸𑀭𑁂𑀲𑀼 𑀣𑀼𑀮𑁆𑀮𑀘𑁆𑀘𑀬𑀝𑁆𑀞𑀸𑀦𑁂 𑀣𑀼𑀮𑁆𑀮𑀘𑁆𑀘𑀬𑀁, 𑀤𑀼𑀓𑁆𑀓𑀝𑀝𑁆𑀞𑀸𑀦𑁂 𑀤𑀼𑀓𑁆𑀓𑀝𑀫𑁆𑀧𑀺 𑀯𑀼𑀢𑁆𑀢𑀫𑁂𑀯 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 ‘‘𑀇𑀢𑁆𑀣𑀻 𑀘 𑀳𑁄𑀢𑀺 𑀯𑁂𑀫𑀢𑀺𑀓𑁄 𑀲𑀸𑀭𑀢𑁆𑀢𑁄 𑀘, 𑀪𑀺𑀓𑁆𑀔𑀼 𑀘 𑀦𑀁 𑀇𑀢𑁆𑀣𑀺𑀬𑀸 𑀯𑀘𑁆𑀘𑀫𑀕𑁆𑀕𑀁 𑀧𑀲𑁆𑀲𑀸𑀯𑀫𑀕𑁆𑀕𑀁 𑀞𑀧𑁂𑀢𑁆𑀯𑀸 𑀅𑀥𑀓𑁆𑀔𑀓𑀁 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀁 𑀆𑀤𑀺𑀲𑁆𑀲 𑀯𑀡𑁆𑀡𑀫𑁆𑀧𑀺 𑀪𑀡𑀢𑀺…𑀧𑁂… 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀣𑀼𑀮𑁆𑀮𑀘𑁆𑀘𑀬𑀔𑁂𑀢𑁆𑀢𑁂𑀧𑀺 𑀬𑀣𑀸𑀲𑀫𑁆𑀪𑀯𑀁 𑀉𑀤𑁆𑀥𑀭𑀺𑀢𑀩𑁆𑀩𑀸. 𑀢𑀣𑀸 ‘‘𑀇𑀢𑁆𑀣𑀻 𑀘 𑀳𑁄𑀢𑀺 𑀯𑁂𑀫𑀢𑀺𑀓𑁄 𑀲𑀸𑀭𑀢𑁆𑀢𑁄 𑀘, 𑀪𑀺𑀓𑁆𑀔𑀼 𑀘 𑀦𑀁 𑀇𑀢𑁆𑀣𑀺𑀬𑀸 𑀓𑀸𑀬𑀧𑀝𑀺𑀩𑀤𑁆𑀥𑀁 𑀆𑀤𑀺𑀲𑁆𑀲 𑀯𑀡𑁆𑀡𑀫𑁆𑀧𑀺 𑀪𑀡𑀢𑀺…𑀧𑁂… 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀓𑀸𑀬𑀧𑀝𑀺𑀩𑀤𑁆𑀥𑀯𑀸𑀭𑀸𑀧𑀺 𑀬𑀣𑀸𑀲𑀫𑁆𑀪𑀯𑀁 𑀉𑀤𑁆𑀥𑀭𑀺𑀢𑀩𑁆𑀩𑀸. 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀯𑀸𑀭𑀢𑁆𑀢𑀺𑀓𑀁 𑀯𑀺𑀬 𑀦𑀺𑀲𑁆𑀲𑀕𑁆𑀕𑀺𑀬𑀯𑀸𑀭𑀢𑁆𑀢𑀺𑀓𑀁 𑀮𑀩𑁆𑀪𑀫𑀸𑀦𑀫𑁆𑀧𑀺 𑀆𑀧𑀢𑁆𑀢𑀺𑀯𑀺𑀲𑁂𑀲𑀸𑀪𑀸𑀯𑀢𑁄 𑀦 𑀉𑀤𑁆𑀥𑀝𑀁. 𑀓𑀸𑀬𑀧𑁆𑀧𑀝𑀺𑀩𑀤𑁆𑀥𑀯𑀸𑀭𑀢𑁆𑀢𑀺𑀓𑁂 𑀧𑀦 𑀤𑀺𑀦𑁆𑀦𑀦𑀬𑀢𑁆𑀢𑀸 𑀢𑀫𑁆𑀧𑀺 𑀢𑀤𑀦𑀼𑀮𑁄𑀫𑀸 𑀯𑀸𑀭𑀸 𑀘 𑀉𑀤𑁆𑀥𑀭𑀺𑀢𑀩𑁆𑀩𑀸. 𑀲𑀩𑁆𑀩𑀢𑁆𑀣 𑀦-𑀯𑀺𑀜𑁆𑀜𑀽 𑀢𑀭𑀼𑀡𑀤𑀸𑀭𑀺𑀓𑀸, 𑀫𑀳𑀮𑁆𑀮𑀺𑀓𑀸 𑀉𑀫𑁆𑀫𑀢𑁆𑀢𑀺𑀓𑀸𑀤𑀺𑀓𑀸 𑀘 𑀅𑀦𑀥𑀺𑀧𑁆𑀧𑁂𑀢𑀸, 𑀧𑀕𑁂𑀯 𑀧𑀸𑀓𑀢𑀺𑀓𑀸 𑀢𑀺𑀭𑀘𑁆𑀙𑀸𑀦𑀕𑀢𑀺𑀢𑁆𑀣𑀻𑀦𑀁, 𑀢𑀣𑀸 𑀧𑀡𑁆𑀟𑀓𑀸𑀤𑀬𑁄𑀧𑀻𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑁂𑀲𑀁 𑀤𑀼𑀢𑀺𑀬𑁂 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑁂𑀤𑀺𑀢𑀩𑁆𑀩𑀁.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁨𑁮𑁫. 𑀯𑀼𑀢𑁆𑀢𑀦𑀬𑀫𑁂𑀯𑀸𑀢𑀺 ‘‘𑀓𑀸𑀬𑀲𑀁𑀲𑀕𑁆𑀕𑁂 𑀇𑀢𑁆𑀣𑀺𑀮𑀓𑁆𑀔𑀡𑁂𑀦𑀸’’𑀢𑀺 𑀮𑀺𑀔𑀺𑀢𑀁. ‘‘𑀇𑀢𑁆𑀣𑀺𑀮𑀓𑁆𑀔𑀡𑁂𑀦𑀸’’𑀢𑀺 𑀓𑀺𑀭 𑀫𑀳𑀸𑀅𑀝𑁆𑀞𑀓𑀣𑀸𑀧𑀸𑀞𑁄. 𑀲𑀻𑀲𑀁 𑀦 𑀏𑀢𑀻𑀢𑀺 𑀅𑀓𑁆𑀓𑁄𑀲𑀦𑀁 𑀦 𑀳𑁄𑀢𑀺, 𑀖𑀝𑀺𑀢𑁂 𑀧𑀦 𑀳𑁄𑀢𑀺. 𑀢𑀢𑁆𑀭𑀸𑀬𑀁 𑀯𑀺𑀲𑁂𑀲𑁄 𑁋 𑀇𑀫𑁂𑀳𑀺 𑀢𑀻𑀳𑀺 𑀖𑀝𑀺𑀢𑁂 𑀏𑀯 𑀲𑀗𑁆𑀖𑀸𑀤𑀺𑀲𑁂𑀲𑁄 𑀯𑀘𑁆𑀘𑀫𑀕𑁆𑀕𑀧𑀲𑁆𑀲𑀸𑀯𑀫𑀕𑁆𑀕𑀸𑀦𑀁 𑀦𑀺𑀬𑀢𑀯𑀘𑀦𑀢𑁆𑀢𑀸, 𑀅𑀘𑁆𑀘𑁄𑀴𑀸𑀭𑀺𑀓𑀢𑁆𑀢𑀸 𑀯𑀸, 𑀦 𑀅𑀜𑁆𑀜𑁂𑀳𑀺 𑀅𑀦𑀺𑀫𑀺𑀢𑁆𑀢𑀸𑀲𑀻𑀢𑀺𑀆𑀤𑀻𑀳𑀺 𑀅𑀝𑁆𑀞𑀳𑀺. 𑀢𑀢𑁆𑀣 𑀅𑀮𑁄𑀳𑀺𑀢𑀸𑀲𑀺, 𑀥𑀼𑀯𑀮𑁄𑀳𑀺𑀢𑀸𑀲𑀺, 𑀥𑀼𑀯𑀘𑁄𑀴𑀸𑀲𑀺, 𑀧𑀕𑁆𑀖𑀭𑀡𑀻𑀲𑀺, 𑀇𑀢𑁆𑀣𑀺𑀧𑀡𑁆𑀟𑀓𑀸𑀲𑀺, 𑀯𑁂𑀧𑀼𑀭𑀺𑀲𑀺𑀓𑀸𑀲𑀻𑀢𑀺 𑀏𑀢𑀸𑀦𑀺 𑀙 𑀫𑀕𑁆𑀕𑀸𑀦𑀁 𑀅𑀦𑀺𑀬𑀢𑀯𑀘𑀦𑀸𑀦𑀺, 𑀅𑀦𑀺𑀫𑀺𑀢𑁆𑀢𑀸𑀲𑀺, 𑀦𑀺𑀫𑀺𑀢𑁆𑀢𑀫𑀢𑁆𑀢𑀸𑀲𑀻𑀢𑀺 𑀤𑁆𑀯𑁂 𑀧𑀤𑀸𑀦𑀺 𑀅𑀦𑀘𑁆𑀘𑁄𑀴𑀸𑀭𑀺𑀓𑀸𑀦𑀺 𑀘, 𑀬𑀢𑁄 𑀅𑀝𑁆𑀞𑀧𑀤𑀸𑀦𑀺 ‘‘𑀲𑀗𑁆𑀖𑀸𑀤𑀺𑀲𑁂𑀲𑀁 𑀦 𑀚𑀦𑁂𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀸𑀦𑀺, 𑀢𑀲𑁆𑀫𑀸 𑀢𑀸𑀦𑀺 𑀣𑀼𑀮𑁆𑀮𑀘𑁆𑀘𑀬𑀯𑀢𑁆𑀣𑀽𑀦𑀺. 𑀧𑀭𑀺𑀩𑁆𑀩𑀸𑀚𑀓𑀯𑀢𑁆𑀣𑀼𑀫𑁆𑀳𑀺 𑀯𑀺𑀬 𑀅𑀓𑁆𑀓𑁄𑀲𑀫𑀢𑁆𑀢𑀢𑁆𑀢𑀸 𑀤𑀼𑀓𑁆𑀓𑀝𑀯𑀢𑁆𑀣𑀽𑀦𑀻𑀢𑀺 𑀏𑀓𑁂. 𑀇𑀢𑁆𑀣𑀺𑀧𑀡𑁆𑀟𑀓𑀸𑀲𑀺, 𑀯𑁂𑀧𑀼𑀭𑀺𑀲𑀺𑀓𑀸𑀲𑀻𑀢𑀺 𑀏𑀢𑀸𑀦𑁂𑀯 𑀧𑀤𑀸𑀦𑀺 𑀲𑀓𑀮𑀲𑀭𑀻𑀭𑀲𑀡𑁆𑀞𑀸𑀦𑀪𑁂𑀤𑀤𑀻𑀧𑀓𑀸𑀦𑀺 𑀲𑀼𑀤𑁆𑀥𑀸𑀦𑀺 𑀲𑀗𑁆𑀖𑀸𑀤𑀺𑀲𑁂𑀲𑀁 𑀦 𑀚𑀦𑁂𑀦𑁆𑀢𑀺 𑀲𑀓𑀮𑀲𑀭𑀻𑀭𑀲𑀸𑀫𑀜𑁆𑀜𑀢𑁆𑀢𑀸, 𑀇𑀢𑀭𑀸𑀦𑀺 𑀚𑀦𑁂𑀦𑁆𑀢𑀺 𑀅𑀲𑀸𑀫𑀜𑁆𑀜𑀢𑁆𑀢𑀸. 𑀢𑀸𑀦𑀺 𑀳𑀺 𑀧𑀲𑁆𑀲𑀸𑀯𑀫𑀕𑁆𑀕𑀫𑁂𑀯 𑀤𑀻𑀧𑁂𑀦𑁆𑀢𑀺 𑀲𑀺𑀔𑀭𑀡𑀻-𑀧𑀤𑀁 𑀯𑀺𑀬. 𑀉𑀪𑀢𑁄𑀩𑁆𑀬𑀜𑁆𑀚𑀦𑀸𑀲𑀻𑀢𑀺 𑀯𑀘𑀦𑀁 𑀧𑀦 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑁂𑀦 𑀅𑀲𑀗𑁆𑀖𑀸𑀤𑀺𑀲𑁂𑀲𑀯𑀢𑁆𑀣𑀼𑀦𑀸 𑀫𑀺𑀲𑁆𑀲𑀯𑀘𑀦𑀁. 𑀧𑀼𑀭𑀺𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀲𑁆𑀲 𑀘 𑀇𑀢𑁆𑀣𑀺𑀦𑀺𑀫𑀺𑀢𑁆𑀢𑀁 𑀧𑀝𑀺𑀘𑁆𑀙𑀦𑁆𑀦𑀁, 𑀧𑀼𑀭𑀺𑀲𑀦𑀺𑀫𑀺𑀢𑁆𑀢𑀁 𑀧𑀸𑀓𑀝𑀁 𑀳𑁄𑀢𑀺. 𑀬𑀤𑀺 𑀢𑀫𑁆𑀧𑀺 𑀚𑀦𑁂𑀢𑀺, 𑀓𑀣𑀁 𑀅𑀦𑀺𑀫𑀺𑀢𑁆𑀢𑀸𑀲𑀻𑀢𑀺𑀆𑀤𑀺𑀧𑀤𑀸𑀦𑀺 𑀦 𑀲𑀗𑁆𑀖𑀸𑀤𑀺𑀲𑁂𑀲𑀁 𑀚𑀦𑁂𑀦𑁆𑀢𑀻𑀢𑀺 𑀏𑀓𑁂, 𑀢𑀁 𑀦 𑀬𑀼𑀢𑁆𑀢𑀁. 𑀧𑀼𑀭𑀺𑀲𑀲𑁆𑀲𑀧𑀺 𑀦𑀺𑀫𑀺𑀢𑁆𑀢𑀸𑀥𑀺𑀯𑀘𑀦𑀢𑁄, ‘‘𑀫𑁂𑀣𑀼𑀦𑀼𑀧𑀲𑀁𑀳𑀺𑀢𑀸𑀳𑀺 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 𑀫𑀸𑀢𑀺𑀓𑀸𑀬 𑀮𑀓𑁆𑀔𑀡𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀘 𑀫𑁂𑀣𑀼𑀦𑀼𑀧𑀲𑀁𑀳𑀺𑀢𑀸𑀳𑀺𑀧𑀺 𑀑𑀪𑀸𑀲𑀦𑁂 𑀧𑀝𑀺𑀯𑀺𑀚𑀸𑀦𑀦𑁆𑀢𑀺𑀬𑀸 𑀲𑀗𑁆𑀖𑀸𑀤𑀺𑀲𑁂𑀲𑁄, 𑀅𑀧𑁆𑀧𑀝𑀺𑀯𑀺𑀚𑀸𑀦𑀦𑁆𑀢𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀁, 𑀇𑀢𑀭𑁂𑀳𑀺 𑀑𑀪𑀸𑀲𑀦𑁂 𑀧𑀝𑀺𑀯𑀺𑀚𑀸𑀦𑀦𑁆𑀢𑀺𑀬𑀸 𑀣𑀼𑀮𑁆𑀮𑀘𑁆𑀘𑀬𑀁, 𑀅𑀧𑁆𑀧𑀝𑀺𑀯𑀺𑀚𑀸𑀦𑀦𑁆𑀢𑀺𑀬𑀸 𑀤𑀼𑀓𑁆𑀓𑀝𑀦𑁆𑀢𑀺 𑀏𑀓𑁂, 𑀲𑀩𑁆𑀩𑀁 𑀲𑀼𑀝𑁆𑀞𑀼 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑁨𑁮𑁭. 𑀳𑀲𑀦𑁆𑀢𑁄𑀢𑀺 𑀬𑀁 𑀉𑀤𑁆𑀤𑀺𑀲𑁆𑀲 𑀪𑀡𑀢𑀺, 𑀲𑀸 𑀘𑁂 𑀧𑀝𑀺𑀯𑀺𑀚𑀸𑀦𑀸𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄.

𑀯𑀺𑀦𑀻𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁨𑁮𑁯. ‘‘𑀧𑀝𑀺𑀯𑀼𑀢𑁆𑀢𑀁 𑀦𑀸𑀫𑀸’’𑀢𑀺 𑀧𑀸𑀞𑁄. 𑀦𑁄-𑀲𑀤𑁆𑀤𑁄 𑀅𑀥𑀺𑀓𑁄. ‘‘𑀅𑀓𑁆𑀔𑀭𑀮𑀺𑀔𑀦𑁂𑀦𑀧𑀺 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀁 𑀆𑀯𑀚𑁆𑀚𑀦𑀲𑀫𑀦𑀦𑁆𑀢𑀭𑀯𑀺𑀥𑀺𑀦𑀸 𑀲𑀫𑁂𑀢𑀺 𑀘𑁂, 𑀕𑀳𑁂𑀢𑀩𑁆𑀩𑀁.

𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁯𑁦. 𑀘𑀢𑀼𑀢𑁆𑀣𑁂 𑀢𑀬𑁄 𑀲𑀗𑁆𑀖𑀸𑀤𑀺𑀲𑁂𑀲𑀯𑀸𑀭𑀸 𑀆𑀕𑀢𑀸, 𑀲𑁂𑀲𑀸 𑀲𑀢𑁆𑀢𑀧𑀜𑁆𑀜𑀸𑀲 𑀯𑀸𑀭𑀸 𑀣𑀼𑀮𑁆𑀮𑀘𑁆𑀘𑀬𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀓𑀸𑀬 𑀲𑀁𑀔𑀺𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀢𑀢𑁄 𑀅𑀜𑁆𑀜𑀢𑀭𑁄 𑀅𑀲𑀫𑁆𑀪𑀯𑀢𑁄 𑀇𑀥 𑀦 𑀉𑀤𑁆𑀥𑀝𑁄. 𑀲𑁂𑀲𑀬𑁄𑀚𑀦𑀓𑁆𑀓𑀫𑁄 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄. 𑀦𑀕𑀭𑀧𑀭𑀺𑀓𑁆𑀔𑀸𑀭𑁂𑀳𑀻𑀢𑀺 𑀧𑀸𑀓𑀸𑀭𑀧𑀭𑀺𑀔𑀸𑀤𑀻𑀳𑀺 𑀦𑀕𑀭𑀧𑀭𑀺𑀯𑀸𑀭𑁂𑀳𑀺. 𑀲𑁂𑀢𑀧𑀭𑀺𑀓𑁆𑀔𑀸𑀭𑁄𑀢𑀺 𑀲𑁂𑀢𑀸𑀮𑀗𑁆𑀓𑀸𑀭𑁄, 𑀲𑀻𑀮𑀸𑀮𑀗𑁆𑀓𑀸𑀭𑁄𑀢𑀺 𑀅𑀢𑁆𑀣𑁄 (𑀲𑀁. 𑀦𑀺. 𑀅𑀝𑁆𑀞. 𑁩.𑁫.𑁪). 𑀘𑀓𑁆𑀓𑀯𑀻𑀭𑀺𑀬𑁄𑀢𑀺 𑀯𑀻𑀭𑀺𑀬𑀘𑀓𑁆𑀓𑁄. 𑀯𑀲𑀮𑀁 𑀤𑀼𑀕𑁆𑀕𑀦𑁆𑀥𑀦𑁆𑀢𑀺 𑀦𑀺𑀫𑀺𑀢𑁆𑀢𑀁 𑀲𑀦𑁆𑀥𑀸𑀬𑀸𑀳, 𑀢𑀤𑁂𑀯 𑀲𑀦𑁆𑀥𑀸𑀬 ‘‘𑀓𑀺𑀁 𑀫𑁂 𑀧𑀸𑀧𑀓𑀁, 𑀓𑀺𑀁 𑀫𑁂 𑀤𑀼𑀕𑁆𑀕𑀦𑁆𑀥’’𑀦𑁆𑀢𑀺 𑀯𑀼𑀢𑁆𑀢𑀁.

𑁨𑁯𑁧. 𑀲𑀦𑁆𑀢𑀺𑀓𑁂𑀢𑀺 𑀬𑀢𑁆𑀣 𑀞𑀺𑀢𑁄 𑀯𑀺𑀜𑁆𑀜𑀸𑀧𑁂𑀢𑀺. ‘‘𑀧𑀞𑀫𑀯𑀺𑀕𑁆𑀕𑀳𑁂 𑀲𑀘𑁂 𑀧𑀸𑀴𑀺𑀯𑀲𑁂𑀦 𑀬𑁄𑀚𑁂𑀢𑀻𑀢𑀺 𑀓𑀸𑀫𑀳𑁂𑀢𑀼𑀧𑀸𑀭𑀺𑀘𑀭𑀺𑀬𑀸𑀅𑀢𑁆𑀣𑁄. 𑀲𑁂𑀲𑀦𑁆𑀢𑀺 ‘𑀅𑀥𑀺𑀧𑁆𑀧𑀸𑀬𑁄’𑀢𑀺 𑀧𑀤𑀁 𑀩𑁆𑀬𑀜𑁆𑀚𑀦𑀁 𑀅𑀢𑁆𑀣𑀸𑀪𑀸𑀯𑀢𑁄. 𑀤𑀼𑀢𑀺𑀬𑁂 𑀧𑀸𑀴𑀺𑀯𑀲𑁂𑀦 𑀓𑀸𑀫𑀳𑁂𑀢𑀼-𑀧𑀤𑀸𑀦𑀺 𑀩𑁆𑀬𑀜𑁆𑀚𑀦𑀸𑀦𑀺 𑀢𑁂𑀲𑀁 𑀢𑀢𑁆𑀣 𑀅𑀢𑁆𑀣𑀸𑀪𑀸𑀯𑀢𑁄. 𑀏𑀯𑀁 𑀘𑀢𑁆𑀢𑀸𑀭𑀺 𑀧𑀤𑀸𑀦𑀺 𑀤𑁆𑀯𑀺𑀦𑁆𑀦𑀁 𑀯𑀺𑀕𑁆𑀕𑀳𑀸𑀦𑀁 𑀯𑀲𑁂𑀦 𑀬𑁄𑀚𑀺𑀢𑀸𑀦𑀻𑀢𑀺 𑀅𑀧𑀭𑁂 𑀯𑀤𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁.

𑁨𑁯𑁫. 𑀏𑀢𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀫𑁂𑀣𑀼𑀦𑀭𑀸𑀕𑁂𑀦 𑀯𑀻𑀢𑀺𑀓𑁆𑀓𑀫𑁂 𑀲𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀅𑀦𑀸𑀧𑀢𑁆𑀢𑀺. 𑀢𑀲𑁆𑀫𑀸 ‘‘𑀓𑀺𑀁 𑀪𑀦𑁆𑀢𑁂 𑀅𑀕𑁆𑀕𑀤𑀸𑀦𑀦𑁆𑀢𑀺. 𑀫𑁂𑀣𑀼𑀦𑀥𑀫𑁆𑀫’’𑀦𑁆𑀢𑀺 𑀇𑀤𑀁 𑀓𑁂𑀯𑀮𑀁 𑀫𑁂𑀣𑀼𑀦𑀥𑀫𑁆𑀫𑀲𑁆𑀲 𑀯𑀡𑁆𑀡𑀪𑀡𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀦 𑀫𑁂𑀣𑀼𑀦𑀥𑀫𑁆𑀫𑀸𑀥𑀺𑀧𑁆𑀧𑀸𑀬𑁂𑀦 𑀢𑀤𑀢𑁆𑀣𑀺𑀬𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀧𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀪𑀡𑀦𑁂 𑀤𑀼𑀓𑁆𑀓𑀝𑀁. ‘‘𑀬𑁄 𑀢𑁂 𑀯𑀺𑀳𑀸𑀭𑁂 𑀯𑀲𑀢𑀺, 𑀢𑀲𑁆𑀲 𑀅𑀕𑁆𑀕𑀤𑀸𑀦𑀁 𑀤𑁂𑀳𑀻’’𑀢𑀺 𑀧𑀭𑀺𑀬𑀸𑀬𑀯𑀘𑀦𑁂𑀦𑀧𑀺 𑀤𑀼𑀓𑁆𑀓𑀝𑀁. ‘‘𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀸𑀬 𑀯𑀡𑁆𑀡𑀁 𑀪𑀸𑀲𑁂𑀬𑁆𑀬. 𑀬𑀸 𑀫𑀸𑀤𑀺𑀲𑀁 𑀲𑀻𑀮𑀯𑀦𑁆𑀢’’𑀦𑁆𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸𑀢𑀺 𑀏𑀓𑁂. 𑀧𑀜𑁆𑀘𑀲𑀼 𑀅𑀗𑁆𑀕𑁂𑀲𑀼 𑀲𑀩𑁆𑀪𑀸𑀯𑀸 𑀲𑀗𑁆𑀖𑀸𑀤𑀺𑀲𑁂𑀲𑁄𑀯𑀸𑀢𑀺 𑀏𑀓𑁂. 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑁂 𑀓𑀸𑀬𑀲𑀁𑀲𑀕𑁆𑀕𑁂 𑀯𑀺𑀬 𑀬𑀓𑁆𑀔𑀺𑀧𑁂𑀢𑀻𑀲𑀼 𑀤𑀼𑀝𑁆𑀞𑀼𑀮𑁆𑀮𑀢𑁆𑀢𑀓𑀸𑀫𑀯𑀘𑀦𑁂 𑀣𑀼𑀮𑁆𑀮𑀘𑁆𑀘𑀬’𑀦𑁆𑀢𑀺 𑀯𑀤𑀦𑁆𑀢𑀺. 𑀅𑀝𑁆𑀞𑀓𑀣𑀸𑀲𑀼 𑀧𑀦 𑀦𑀸𑀕𑀢’’𑀦𑁆𑀢𑀺 𑀮𑀺𑀔𑀺𑀢𑀁. ‘‘𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀧𑀦 𑀧𑀡𑁆𑀟𑀓𑀕𑀢𑀺𑀓𑁄𑀯𑀸’’𑀢𑀺 𑀯𑀤𑀦𑁆𑀢𑀺.

𑀅𑀢𑁆𑀢𑀓𑀸𑀫𑀧𑀸𑀭𑀺𑀘𑀭𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀲𑀜𑁆𑀘𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁯𑁭. 𑀅𑀳𑀫𑁆𑀳𑀺 𑀤𑀼𑀕𑁆𑀕𑀢𑀸𑀢𑀺 𑀅𑀳𑀁 𑀅𑀫𑁆𑀳𑀺 𑀤𑀼𑀕𑁆𑀕𑀢𑀸. 𑀅𑀳𑀁 𑀔𑁆𑀯𑀬𑁆𑀬𑁄𑀢𑀺 𑀏𑀢𑁆𑀣 𑀅𑀬𑁆𑀬𑁄𑀢𑀺 𑀩𑀳𑀼𑀯𑀘𑀦𑀁 𑀳𑁄𑀢𑀺.

𑁨𑁯𑁮. 𑀑𑀬𑀸𑀘𑀦𑁆𑀢𑀻𑀢𑀺 𑀦𑀻𑀘𑀁 𑀓𑀢𑁆𑀯𑀸 𑀤𑁂𑀯𑁂 𑀬𑀸𑀘𑀦𑁆𑀢𑀺. 𑀆𑀬𑀸𑀘𑀦𑁆𑀢𑀻𑀢𑀺 𑀉𑀘𑁆𑀘𑀁 𑀓𑀢𑁆𑀯𑀸 𑀆𑀤𑀭𑁂𑀦 𑀬𑀸𑀘𑀦𑁆𑀢𑀺. 𑀅𑀮𑀗𑁆𑀓𑀸𑀭𑀸𑀤𑀻𑀳𑀺 𑀫𑀡𑁆𑀟𑀺𑀢𑁄 𑀓𑁂𑀲𑀲𑀁𑀯𑀺𑀥𑀸𑀦𑀸𑀤𑀻𑀳𑀺 𑀧𑀲𑀸𑀥𑀺𑀢𑁄. ‘‘𑀫𑀡𑁆𑀟𑀺𑀢𑀓𑀭𑀡𑁂 𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀤𑀦𑁆𑀢𑀺.

𑀧𑀤𑀪𑀸𑀚𑀦𑀻𑀬𑀯𑀡𑁆𑀡𑀦𑀸

𑁩𑁦𑁩. 𑀲𑀳 𑀧𑀭𑀺𑀤𑀡𑁆𑀟𑁂𑀦 𑀯𑀢𑁆𑀢𑀫𑀸𑀦𑀸𑀢𑀺 𑀅𑀢𑁆𑀣𑁄. 𑀙𑀦𑁆𑀤𑀯𑀸𑀲𑀺𑀦𑀻 𑀦𑀸𑀫 ‘‘𑀧𑀺𑀬𑀸 𑀧𑀺𑀬𑀁 𑀯𑀲𑁂𑀢𑀻’’𑀢𑀺 𑀧𑀸𑀴𑀺, 𑀧𑀼𑀭𑀺𑀲𑀁 𑀯𑀸𑀲𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀧𑀺𑀬𑁄 𑀧𑀺𑀬𑀁 𑀯𑀸𑀲𑁂𑀢𑀻’’𑀢𑀺 𑀅𑀝𑁆𑀞𑀓𑀣𑀸.

𑀢𑀁 𑀓𑀺𑀭𑀺𑀬𑀁 𑀲𑀫𑁆𑀧𑀸𑀤𑁂𑀲𑁆𑀲𑀢𑀻𑀢𑀺 𑀅𑀯𑀲𑁆𑀲𑀁 𑀆𑀭𑁄𑀘𑁂𑀦𑁆𑀢𑀺𑀬𑀸 𑀘𑁂 𑀆𑀭𑁄𑀘𑁂𑀢𑀻𑀢𑀺 𑀅𑀢𑁆𑀣𑁄. 𑀤𑁆𑀯𑀺𑀦𑁆𑀦𑀁 𑀫𑀸𑀢𑀸𑀧𑀺𑀢𑀽𑀦𑀁 𑀘𑁂 𑀆𑀭𑁄𑀘𑁂𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 ‘‘𑀯𑀢𑁆𑀣𑀼 𑀑𑀮𑁄𑀓𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀯𑀢𑁆𑀣𑀼𑀫𑁆𑀳𑀺 𑀘 ‘‘𑀉𑀤𑀸𑀬𑀺𑀢𑁆𑀣𑁂𑀭𑁄 𑀕𑀡𑀺𑀓𑀸𑀬 𑀆𑀭𑁄𑀘𑁂𑀲𑀻’’𑀢𑀺 𑀯𑀼𑀢𑁆𑀢𑀁. 𑀢𑀁 ‘‘𑀫𑀸𑀢𑀸𑀤𑀻𑀦𑀫𑁆𑀧𑀺 𑀯𑀤𑀢𑁄 𑀯𑀺𑀲𑀗𑁆𑀓𑁂𑀢𑁄 𑀦𑀢𑁆𑀣𑀻’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀦𑀺𑀧𑁆𑀧𑀬𑁄𑀚𑀦𑀁. 𑀢𑀁 𑀧𑀦𑁂𑀢𑀦𑁆𑀢𑀺 𑀆𑀘𑀭𑀺𑀬𑀲𑁆𑀲 𑀯𑀘𑀦𑀁. 𑀫𑀸𑀢𑀼𑀭𑀓𑁆𑀔𑀺𑀢𑀁 𑀩𑁆𑀭𑀽𑀳𑀻𑀢𑀺 𑀧𑁂𑀲𑀺𑀢𑀲𑁆𑀲 𑀕𑀦𑁆𑀢𑁆𑀯𑀸 𑀫𑀸𑀢𑀸𑀧𑀺𑀢𑀼𑀭𑀓𑁆𑀔𑀺𑀢𑀁 𑀯𑀤𑀢𑁄 𑀢𑀲𑁆𑀲 𑀢𑀲𑁆𑀲𑀸 𑀫𑀸𑀢𑀼𑀭𑀓𑁆𑀔𑀺𑀢𑀪𑀸𑀯𑁂𑀧𑀺 𑀲𑀢𑀺 𑀯𑀺𑀲𑀗𑁆𑀓𑁂𑀢𑀫𑁂𑀯, 𑀓𑀲𑁆𑀫𑀸? ‘‘𑀧𑀺𑀢𑀼𑀭𑀓𑁆𑀔𑀺𑀢𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀯𑀤𑀦𑁆𑀢𑀲𑁆𑀲 𑀯𑀺𑀲𑀗𑁆𑀓𑁂𑀢’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀇𑀢𑀭𑀣𑀸 𑀆𑀤𑀺-𑀲𑀤𑁆𑀤𑁄 𑀦𑀺𑀭𑀢𑁆𑀣𑀓𑁄 𑀲𑀺𑀬𑀸. 𑀏𑀓𑀁 𑀤𑀲𑀓𑀁 𑀇𑀢𑀭𑁂𑀦 𑀤𑀲𑀓𑁂𑀦 𑀬𑁄𑀚𑁂𑀢𑁆𑀯𑀸 𑀧𑀼𑀩𑁆𑀩𑁂 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺𑀬𑀁 𑀯𑀼𑀢𑁆𑀢𑀦𑀬𑀢𑁆𑀢𑀸 𑀫𑀸𑀢𑀼𑀭𑀓𑁆𑀔𑀺𑀢𑀸𑀬 𑀫𑀸𑀢𑀸 𑀅𑀢𑁆𑀢𑀦𑁄 𑀥𑀻𑀢𑀼𑀲𑀦𑁆𑀢𑀺𑀓𑀁 𑀧𑀳𑀺𑀡𑀢𑀻𑀢𑀺 𑀕𑀳𑁂𑀢𑀩𑁆𑀩𑀁.

𑁩𑁩𑁮. 𑀅𑀦𑀪𑀺𑀦𑀦𑁆𑀤𑀺𑀢𑁆𑀯𑀸𑀢𑀺 𑀯𑀘𑀦𑀫𑀢𑁆𑀢𑀫𑁂𑀯, 𑀬𑀤𑀺𑀧𑀺 𑀅𑀪𑀺𑀦𑀦𑁆𑀤𑀢𑀺, 𑀬𑀸𑀯 𑀲𑀸𑀲𑀦𑀁 𑀦𑀸𑀭𑁄𑀘𑁂𑀢𑀺, 𑀢𑀸𑀯 ‘‘𑀯𑀻𑀫𑀁𑀲𑀺𑀢𑁄’’𑀢𑀺 𑀦 𑀯𑀼𑀘𑁆𑀘𑀢𑀺. 𑀲𑀸𑀲𑀦𑀸𑀭𑁄𑀘𑀦𑀓𑀸𑀮𑁂𑀢𑀺 𑀆𑀡𑀸𑀧𑀓𑀲𑁆𑀲 𑀲𑀸𑀲𑀦𑀯𑀘𑀦𑀓𑁆𑀔𑀡𑁂. 𑀢𑀢𑀺𑀬𑀧𑀤𑁂 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀏𑀓𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀤𑀼𑀓𑁆𑀓𑀝𑀦𑁆𑀢𑀺 𑀅𑀢𑁆𑀣𑁄. 𑀯𑀢𑁆𑀣𑀼𑀕𑀡𑀦𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀉𑀪𑀬𑀯𑀢𑁆𑀣𑀼𑀕𑀡𑀦𑀸𑀬 𑀓𑀺𑀭.

𑁩𑁩𑁯. 𑀘𑀢𑀼𑀢𑁆𑀣𑁂 𑀅𑀦𑀸𑀧𑀢𑁆𑀢𑀻𑀢𑀺 𑀏𑀢𑁆𑀣 𑀧𑀦 ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀦 𑀯𑀻𑀫𑀁𑀲𑀢𑀺 𑀦 𑀧𑀘𑁆𑀘𑀸𑀳𑀭𑀢𑀺, 𑀅𑀦𑀸𑀧𑀢𑁆𑀢𑀻𑀢𑀺 𑀏𑀢𑁆𑀣 𑀯𑀺𑀬 ‘𑀕𑀘𑁆𑀙𑀦𑁆𑀢𑁄 𑀦 𑀲𑀫𑁆𑀧𑀸𑀤𑁂𑀢𑀺, 𑀆𑀕𑀘𑁆𑀙𑀦𑁆𑀢𑁄 𑀯𑀺𑀲𑀁𑀯𑀸𑀤𑁂𑀢𑀻’𑀢𑀺 𑀅𑀦𑀸𑀧𑀢𑁆𑀢𑀺𑀧𑀸𑀴𑀺𑀬𑀸𑀧𑀺 𑀪𑀯𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀏𑀓𑀘𑁆𑀘𑁂𑀲𑀼 𑀧𑁄𑀢𑁆𑀣𑀓𑁂𑀲𑀼 ‘‘𑀅𑀢𑁆𑀣𑀻’’𑀢𑀺𑀧𑀺.

𑀯𑀺𑀦𑀻𑀢𑀯𑀢𑁆𑀣𑀼𑀯𑀡𑁆𑀡𑀦𑀸

𑁩𑁪𑁧. 𑀅𑀮𑀁𑀯𑀘𑀦𑀻𑀬𑀸𑀢𑀺 𑀦 𑀯𑀘𑀦𑀻𑀬𑀸, 𑀦𑀺𑀯𑀸𑀭𑀡𑁂 𑀅𑀮𑀁-𑀲𑀤𑁆𑀤𑁄. 𑀣𑁂𑀭𑀧𑀺𑀢𑀸 𑀯𑀤𑀢𑀻𑀢𑀺 𑀚𑀺𑀡𑁆𑀡𑀧𑀺𑀢𑀸 𑀯𑀤𑀢𑀻𑀢𑀺 𑀅𑀢𑁆𑀣𑁄. 𑀓𑀺𑀜𑁆𑀘𑀸𑀧𑀺 𑀏𑀢𑁆𑀣 ‘‘𑀇𑀢𑁆𑀣𑀻 𑀦𑀸𑀫 𑀫𑀦𑀼𑀲𑁆𑀲𑀺𑀢𑁆𑀣𑀻 𑀦 𑀬𑀓𑁆𑀔𑀻 𑀦 𑀧𑁂𑀢𑀻 𑀦 𑀢𑀺𑀭𑀘𑁆𑀙𑀸𑀦𑀕𑀢𑀸, 𑀧𑀼𑀭𑀺𑀲𑁄 𑀦𑀸𑀫 𑀫𑀦𑀼𑀲𑁆𑀲𑀧𑀼𑀭𑀺𑀲𑁄 𑀦 𑀬𑀓𑁆𑀔𑁄’’𑀢𑀺𑀆𑀤𑀺 𑀦𑀢𑁆𑀣𑀺, 𑀢𑀣𑀸𑀧𑀺 𑀓𑀸𑀬𑀲𑀁𑀲𑀕𑁆𑀕𑀸𑀤𑀻𑀲𑀼 ‘‘𑀫𑀦𑀼𑀲𑁆𑀲𑀺𑀢𑁆𑀣𑀻’’𑀢𑀺 𑀇𑀢𑁆𑀣𑀻𑀯𑀯𑀢𑁆𑀣𑀸𑀦𑀲𑁆𑀲 𑀓𑀢𑀢𑁆𑀢𑀸 𑀇𑀥𑀸𑀧𑀺 𑀫𑀦𑀼𑀲𑁆𑀲𑀺𑀢𑁆𑀣𑀻 𑀏𑀯𑀸𑀢𑀺 𑀧𑀜𑁆𑀜𑀸𑀬𑀢𑀺. 𑀫𑁂𑀣𑀼𑀦𑀧𑀼𑀩𑁆𑀩𑀪𑀸𑀕𑀢𑁆𑀢𑀸 𑀫𑀦𑀼𑀲𑁆𑀲𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁄 𑀘 𑀣𑀼𑀮𑁆𑀮𑀘𑁆𑀘𑀬𑀯𑀢𑁆𑀣𑀼𑀓𑁄𑀯 𑀳𑁄𑀢𑀺, 𑀲𑁂𑀲𑀸 𑀫𑀦𑀼𑀲𑁆𑀲𑀧𑀡𑁆𑀟𑀓𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑀢𑀺𑀭𑀘𑁆𑀙𑀸𑀦𑀕𑀢𑀧𑀼𑀭𑀺𑀲𑀸𑀤𑀬𑁄 𑀤𑀼𑀓𑁆𑀓𑀝𑀯𑀢𑁆𑀣𑀼𑀓𑀸𑀯 𑀫𑀺𑀘𑁆𑀙𑀸𑀘𑀸𑀭𑀲𑀸𑀲𑀦𑀗𑁆𑀕𑀲𑀫𑁆𑀪𑀯𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸𑀲𑀫𑁆𑀪𑀯𑀁 𑀧𑀦 𑀯𑀸𑀭𑀸 𑀉𑀤𑁆𑀥𑀭𑀺𑀢𑀩𑁆𑀩𑀸. 𑀧𑀜𑁆𑀜𑀢𑁆𑀢𑀺𑀅𑀚𑀸𑀦𑀦𑁂 𑀯𑀺𑀬 𑀅𑀮𑀁𑀯𑀘𑀦𑀻𑀬𑀪𑀸𑀯𑀸𑀚𑀸𑀦𑀦𑁂𑀧𑀺 𑀅𑀘𑀺𑀢𑁆𑀢𑀓𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀤𑀼𑀝𑁆𑀞𑀼𑀮𑁆𑀮𑀸𑀤𑀻𑀲𑀼𑀧𑀻𑀢𑀺 ‘‘𑀇𑀫𑀲𑁆𑀫𑀺𑀫𑁆𑀧𑀻’’𑀢𑀺 𑀯𑀼𑀢𑁆𑀢𑀫𑁂𑀯 𑀳𑁄𑀢𑀺. ‘‘𑀮𑁂𑀔𑀁 𑀦𑁂𑀢𑁆𑀯𑀸 𑀧𑀝𑀺𑀮𑁂𑀔𑀁 𑀆𑀭𑁄𑀘𑀺𑀢𑀲𑁆𑀲𑀸𑀧𑀺 𑀲𑀜𑁆𑀘𑀭𑀺𑀢𑁆𑀢𑀁 𑀦𑀢𑁆𑀣𑀺 𑀲𑀜𑁆𑀘𑀭𑀺𑀢𑁆𑀢𑀪𑀸𑀯𑀫𑀚𑀸𑀦𑀦𑁆𑀢𑀲𑁆𑀲𑀸’’𑀢𑀺 𑀯𑀤𑀦𑁆𑀢𑀺, 𑀯𑀻𑀫𑀁𑀲𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁.

𑀲𑀜𑁆𑀘𑀭𑀺𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁪𑁨. 𑀬𑀸𑀘𑀦𑀸𑀢𑀺 ‘‘𑀤𑁂𑀣 𑀤𑁂𑀣𑀸’’𑀢𑀺 𑀘𑁄𑀤𑀦𑀸. 𑀯𑀺𑀜𑁆𑀜𑀢𑁆𑀢𑀻𑀢𑀺 𑀇𑀫𑀺𑀦𑀸 𑀦𑁄 𑀅𑀢𑁆𑀣𑁄𑀢𑀺 𑀯𑀺𑀜𑁆𑀜𑀸𑀧𑀦𑀸. ‘‘𑀳𑀢𑁆𑀣𑀓𑀫𑁆𑀫𑀁 𑀬𑀸𑀘𑀺𑀢𑁄 𑀉𑀧𑀓𑀭𑀡𑀁, 𑀫𑀽𑀮𑀁 𑀯𑀸 𑀤𑀲𑁆𑀲𑀢𑀻’’𑀢𑀺 𑀬𑀸𑀘𑀢𑀺, 𑀦 𑀯𑀝𑁆𑀝𑀢𑀻𑀢𑀺. 𑀯𑀝𑁆𑀝𑀢𑀺 𑀲𑁂𑀦𑀸𑀲𑀦𑁂 𑀑𑀪𑀸𑀲𑀧𑀭𑀺𑀓𑀣𑀸𑀤𑀻𑀦𑀁 𑀮𑀤𑁆𑀥𑀢𑁆𑀢𑀸𑀢𑀺 𑀏𑀓𑁂. 𑀅𑀦𑀚𑁆𑀛𑀸𑀯𑀼𑀢𑁆𑀣𑀓𑀦𑁆𑀢𑀺 𑀅𑀲𑁆𑀲𑀸𑀫𑀺𑀓𑀁. 𑀦 𑀆𑀳𑀝𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 ‘‘𑀲𑀽𑀧𑁄𑀤𑀦𑀯𑀺𑀜𑁆𑀜𑀢𑁆𑀢𑀺𑀤𑀼𑀓𑁆𑀓𑀝𑀁 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀓𑀺𑀜𑁆𑀘𑀸𑀧𑀺 𑀕𑀭𑀼𑀪𑀡𑁆𑀟𑀧𑁆𑀧𑀳𑁄𑀦𑀓𑁂𑀲𑀽𑀢𑀺 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀬𑀁 𑀯𑀢𑁆𑀣𑀼𑀯𑀲𑁂𑀦 𑀅𑀧𑁆𑀧𑀁 𑀳𑀼𑀢𑁆𑀯𑀸 𑀅𑀕𑁆𑀖𑀯𑀲𑁂𑀦 𑀫𑀳𑀸 𑀳𑀭𑀺𑀢𑀸𑀮𑀳𑀺𑀗𑁆𑀕𑀼𑀮𑀺𑀓𑀸𑀤𑀺, 𑀢𑀁 𑀬𑀸𑀘𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺.

𑁩𑁪𑁪. 𑀲𑁄 𑀓𑀺𑀭𑀸𑀢𑀺 𑀇𑀲𑀺. 𑀢𑀤𑀸 𑀅𑀚𑁆𑀛𑀕𑀫𑀸 𑀢𑀤𑀚𑁆𑀛𑀕𑀫𑀸.

𑁩𑁪𑁮-𑁯. 𑀦 𑀳𑀺 𑀲𑀓𑁆𑀓𑀸 𑀬𑀸𑀘𑀦𑀸𑀬 𑀓𑀸𑀢𑀼𑀁, 𑀢𑀲𑁆𑀫𑀸 𑀲𑀬𑀁 𑀬𑀸𑀘𑀺𑀢𑀓𑁂𑀳𑀺 𑀉𑀧𑀓𑀭𑀡𑁂𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀩𑁆𑀬𑀜𑁆𑀚𑀦𑀁 𑀲𑀫𑁂𑀢𑀺, 𑀦 𑀅𑀢𑁆𑀣𑁄. 𑀓𑀲𑁆𑀫𑀸? 𑀇𑀥 𑀉𑀪𑀬𑁂𑀲𑀁 𑀅𑀥𑀺𑀧𑁆𑀧𑁂𑀢𑀢𑁆𑀢𑀸, 𑀢𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑀲𑁆𑀫𑀸 𑀧𑀦𑀸’’𑀢𑀺𑀆𑀤𑀺𑀫𑀸𑀳. 𑀇𑀥 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀦𑀬𑁂𑀦. ‘‘𑀲𑀜𑁆𑀜𑀸𑀘𑀺𑀓𑀸𑀬𑀸’’𑀢𑀺 𑀯𑀘𑀦𑀢𑁄 𑀓𑀭𑁄𑀦𑁆𑀢𑁂𑀦𑀸𑀧𑀺, ‘‘𑀧𑀭𑁂𑀳𑀺 𑀧𑀭𑀺𑀬𑁄𑀲𑀸𑀧𑁂𑀢𑀻’’𑀢𑀺 𑀯𑀘𑀦𑀢𑁄 𑀓𑀸𑀭𑀸𑀧𑁂𑀦𑁆𑀢𑁂𑀦𑀸𑀧𑀺 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀉𑀪𑁄𑀧𑁂𑀢𑁂 𑀓𑀸𑀭𑀓𑀓𑀸𑀭𑀸𑀧𑀓𑀸. 𑀩𑁆𑀬𑀜𑁆𑀚𑀦𑀁 𑀯𑀺𑀮𑁄𑀫𑀺𑀢𑀁 𑀪𑀯𑁂𑀬𑁆𑀬, ‘‘𑀓𑀸𑀭𑀬𑀫𑀸𑀦𑁂𑀦𑀸’’𑀢𑀺 𑀳𑀺 𑀩𑁆𑀬𑀜𑁆𑀚𑀦𑀁 ‘‘𑀓𑀭𑁄𑀦𑁆𑀢𑁂𑀦𑀸’’𑀢𑀺 𑀯𑀼𑀢𑁆𑀢𑁂 𑀯𑀺𑀮𑁄𑀫𑀺𑀢𑀁 𑀳𑁄𑀢𑀺 𑀅𑀢𑀤𑀢𑁆𑀣𑀢𑁆𑀢𑀸. 𑀦 𑀳𑀺 𑀓𑀸𑀭𑀸𑀧𑁂𑀦𑁆𑀢𑁄 𑀦𑀸𑀫 𑀳𑁄𑀢𑀺. ‘‘𑀇𑀥 𑀯𑀼𑀢𑁆𑀢𑀦𑀬𑁂𑀦𑀸𑀢𑀺 𑀤𑁂𑀲𑀺𑀢𑀯𑀢𑁆𑀣𑀼𑀓𑀧𑀫𑀸𑀡𑀺𑀓𑀦𑀬𑁂𑀦. 𑀏𑀯𑀁 𑀲𑀦𑁆𑀢𑁂 ‘𑀓𑀭𑁄𑀦𑁆𑀢𑁂𑀦 𑀯𑀸 𑀓𑀸𑀭𑀸𑀧𑁂𑀦𑁆𑀢𑁂𑀦 𑀯𑀸’𑀢𑀺 𑀯𑀘𑀦𑀢𑁄 𑀓𑀭𑁄𑀦𑁆𑀢𑁂𑀦𑀸𑀧𑀺 𑀧𑀭𑁂𑀳𑀺 𑀯𑀺𑀧𑁆𑀧𑀓𑀢𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀘𑁂, 𑀢𑀤𑀢𑁆𑀣𑀯𑀺𑀲𑁆𑀲𑀚𑁆𑀚𑀦𑀢𑁆𑀣𑀁 ‘𑀬𑀤𑀺 𑀧𑀦𑀸𑀢𑀺𑀆𑀤𑀺𑀫𑀸𑀳𑀸’’’𑀢𑀺 𑀅𑀦𑀼𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. ‘‘𑀲𑀜𑁆𑀜𑀸𑀘𑀺𑀓𑀸𑀬 𑀓𑀼𑀝𑀺𑀁 𑀓𑀭𑁄𑀦𑁆𑀢𑁄’’𑀢𑀺 𑀯𑀘𑀦𑀯𑀲𑁂𑀦 𑀯𑀼𑀢𑁆𑀢𑀁. ‘‘𑀆𑀬𑀸𑀫𑀢𑁄 𑀘 𑀯𑀺𑀢𑁆𑀣𑀸𑀭𑀢𑁄 𑀘𑀸’’𑀢𑀺 𑀅𑀯𑀢𑁆𑀯𑀸 𑀯𑀺𑀓𑀧𑁆𑀧𑀢𑁆𑀣𑀲𑁆𑀲 𑀯𑀸-𑀲𑀤𑁆𑀤𑀲𑁆𑀲 𑀕𑀳𑀺𑀢𑀢𑁆𑀢𑀸 𑀏𑀓𑀢𑁄𑀪𑀸𑀕𑁂𑀧𑀺 𑀯𑀟𑁆𑀠𑀺𑀢𑁂 𑀆𑀧𑀢𑁆𑀢𑀺 𑀏𑀯. 𑀧𑀫𑀸𑀡𑀬𑀼𑀢𑁆𑀢𑀫𑀜𑁆𑀘𑁄 𑀓𑀺𑀭 𑀦𑀯𑀯𑀺𑀤𑀢𑁆𑀣𑀺. ‘‘‘𑀘𑀢𑀼𑀳𑀢𑁆𑀣𑀯𑀺𑀢𑁆𑀣𑀸𑀭𑀸’𑀢𑀺 𑀯𑀘𑀦𑁂𑀦 ‘𑀢𑀺𑀭𑀺𑀬𑀁 𑀢𑀺𑀳𑀢𑁆𑀣𑀸 𑀯𑀸’𑀢𑀺 𑀯𑀘𑀦𑀫𑁆𑀧𑀺 𑀲𑀫𑁂𑀢𑀺 ‘𑀬𑀢𑁆𑀣 𑀧𑀫𑀸𑀡𑀬𑀼𑀢𑁆𑀢𑁄’𑀢𑀺𑀆𑀤𑀺𑀲𑀦𑁆𑀦𑀺𑀝𑁆𑀞𑀸𑀦𑀯𑀘𑀦𑀸𑀲𑀫𑁆𑀪𑀯𑀢𑁄’’𑀢𑀺 𑀯𑀼𑀢𑁆𑀢𑀁. 𑀧𑀫𑀸𑀡𑀢𑁄 𑀊𑀦𑀢𑀭𑀫𑁆𑀧𑀻𑀢𑀺 𑀯𑀺𑀢𑁆𑀣𑀸𑀭𑀢𑁄 𑀘𑀢𑀼𑀧𑀜𑁆𑀘𑀳𑀢𑁆𑀣𑀫𑁆𑀧𑀺 𑀤𑀻𑀖𑀢𑁄 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀯𑀼𑀢𑁆𑀢𑀧𑀫𑀸𑀡𑀫𑁂𑀯 𑀤𑁂𑀲𑀺𑀢𑀯𑀢𑁆𑀣𑀼. 𑀅𑀤𑁂𑀲𑀺𑀢𑀯𑀢𑁆𑀣𑀼𑀜𑁆𑀳𑀺 𑀓𑀭𑁄𑀢𑁄 𑀆𑀧𑀢𑁆𑀢𑀺. 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀸 𑀓𑀼𑀝𑀺 𑀏𑀯 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀁 𑀓𑀼𑀝𑀺𑀁 𑀓𑀭𑁂𑀬𑁆𑀬𑀸𑀢𑀺 𑀯𑀼𑀢𑁆𑀢𑀢𑁆𑀢𑀸. ‘‘𑀣𑀫𑁆𑀪𑀢𑀼𑀮𑀸’’𑀢𑀺 𑀧𑀸𑀞𑁄. 𑀅𑀦𑀼𑀲𑁆𑀲𑀸𑀯𑀦𑀸𑀦𑀬𑁂𑀦𑀸𑀢𑀺 𑀏𑀢𑁆𑀣 ‘‘𑀤𑀫𑀺𑀴𑀪𑀸𑀲𑀸𑀬𑀧𑀺 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺.

𑁩𑁫𑁩. 𑀘𑀸𑀭𑀪𑀽𑀫𑀺 𑀕𑁄𑀘𑀭𑀪𑀽𑀫𑀺. 𑀦 𑀕𑀳𑀺𑀢𑀸𑀢𑀺 𑀦 𑀯𑀸𑀭𑀺𑀢𑀸. 𑀅𑀝𑁆𑀞𑀓𑀣𑀸𑀬𑀁 ‘‘𑀓𑀸𑀭𑀡𑀸𑀬 𑀕𑀼𑀢𑁆𑀢𑀺𑀩𑀦𑁆𑀥𑀦𑀸𑀕𑀸𑀭𑀁, 𑀅𑀓𑀭𑀡𑀝𑁆𑀞𑀸𑀦𑀁 𑀯𑀸 𑀥𑀫𑁆𑀫𑀕𑀦𑁆𑀥𑀺𑀓𑀸 𑀳𑀢𑁆𑀣𑀧𑀸𑀤𑀘𑁆𑀙𑀺𑀦𑁆𑀤𑀦𑀓𑀸 𑀕𑀦𑁆𑀥𑀺𑀓𑀸’’𑀢𑀺 𑀮𑀺𑀔𑀺𑀢𑀁. 𑀤𑁆𑀯𑀻𑀳𑀺 𑀩𑀮𑀺𑀩𑀤𑁆𑀤𑁂𑀳𑀻𑀢𑀺 𑀳𑁂𑀝𑁆𑀞𑀺𑀫𑀓𑁄𑀝𑀺𑀬𑀸 𑀓𑀺𑀭 𑀯𑀼𑀢𑁆𑀢𑀢𑁄 𑀆𑀯𑀺𑀚𑁆𑀚𑀺𑀢𑀼𑀁 𑀦 𑀲𑀓𑁆𑀓𑀸 𑀙𑀺𑀦𑁆𑀦𑀸𑀯𑀝𑀢𑁆𑀢𑀸, 𑀦𑀺𑀕𑀫𑀦𑀲𑁆𑀲𑀸𑀧𑀺 𑀅𑀢𑁆𑀣𑀧𑁆𑀧𑀓𑀸𑀲𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀸𑀘𑀺𑀦𑀦𑁆𑀢𑀺 𑀯𑀢𑁆𑀣𑀼 𑀅𑀥𑀺𑀝𑁆𑀞𑀸𑀦𑀁. 𑀢𑀤𑀢𑁆𑀣𑀸𑀬𑀸𑀢𑀺 𑀢𑀘𑁆𑀙𑀦𑀢𑁆𑀣𑀸𑀬. 𑀧𑀡𑁆𑀡𑀲𑀸𑀮𑀫𑁆𑀧𑀻𑀢𑀺 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀓𑀼𑀝𑀺𑀫𑁂𑀯 𑀧𑀡𑁆𑀡𑀘𑁆𑀙𑀤𑀦𑀁. 𑀢𑁂𑀦𑁂𑀯 ‘‘𑀲𑀪𑀺𑀢𑁆𑀢𑀺𑀘𑁆𑀙𑀤𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀅𑀮𑀺𑀢𑁆𑀢𑀁 𑀓𑀺𑀭 𑀲𑀩𑁆𑀩𑀁 𑀯𑀝𑁆𑀝𑀢𑀺. 𑀧𑀼𑀩𑁆𑀩𑁂 𑀣𑁄𑀓𑀁 𑀞𑀧𑀺𑀢𑀁 𑀧𑀼𑀦 𑀯𑀟𑁆𑀠𑁂𑀢𑁆𑀯𑀸. 𑀢𑀲𑁆𑀫𑀺𑀦𑁆𑀢𑀺 𑀤𑁆𑀯𑀸𑀭𑀩𑀦𑁆𑀥𑀦𑁂 𑀯𑀸 𑀯𑀸𑀢𑀧𑀸𑀦𑁂 𑀯𑀸 𑀞𑀧𑀺𑀢𑁂. 𑀧𑀞𑀫𑀫𑁂𑀯𑀸𑀢𑀺 𑀏𑀢𑁆𑀣 𑀧𑀢𑁆𑀢𑀓𑀸𑀮𑁂 𑀏𑀯𑀸𑀢𑀺 𑀓𑀺𑀭 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁄. 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄 𑀞𑀧𑀺𑀢𑀓𑀸𑀮𑁂𑀯𑀸𑀢𑀺 𑀓𑀺𑀭. 𑀧𑀼𑀭𑀺𑀫𑁂𑀦 𑀮𑁂𑀧𑀲𑁆𑀲 𑀅𑀖𑀝𑀺𑀢𑀢𑁆𑀢𑀸 𑀤𑀼𑀢𑀺𑀬𑁂𑀦 𑀯𑀢𑁆𑀢𑀲𑀻𑀲𑁂𑀦 𑀓𑀢𑀢𑁆𑀢𑀸 𑀉𑀪𑀺𑀦𑁆𑀦𑀫𑁆𑀧𑀺 𑀅𑀦𑀸𑀧𑀢𑁆𑀢𑀺. 𑀲𑀘𑁂 𑀆𑀡𑀢𑁆𑀢𑁂𑀦 𑀓𑀢𑀁, ‘‘𑀓𑀭𑁄𑀢𑀺 𑀯𑀸 𑀓𑀸𑀭𑀸𑀧𑁂𑀢𑀺 𑀯𑀸’’𑀢𑀺 𑀯𑀘𑀦𑀢𑁄 𑀆𑀧𑀢𑁆𑀢𑀺 𑀉𑀪𑀺𑀦𑁆𑀦𑀁 𑀲𑀢𑀺 𑀅𑀢𑁆𑀢𑀼𑀤𑁆𑀤𑁂𑀲𑀺𑀓𑀢𑀸𑀬, 𑀅𑀲𑀢𑀺 𑀫𑀽𑀮𑀝𑁆𑀞𑀲𑁆𑀲𑁂𑀯. 𑀳𑁂𑀝𑁆𑀞𑀺𑀫𑀧𑁆𑀧𑀫𑀸𑀡𑀲𑀫𑁆𑀪𑀯𑁂 𑀲𑀢𑀺 𑀲𑀩𑁆𑀩𑀫𑀢𑁆𑀢𑀺𑀓𑀸𑀫𑀬𑀁 𑀓𑀼𑀝𑀺𑀁 𑀓𑀭𑁄𑀢𑁄 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑁄𑀢𑀺 𑀆𑀘𑀭𑀺𑀬𑀲𑁆𑀲 𑀢𑀓𑁆𑀓𑁄.

𑁩𑁫𑁪. 𑀙𑀢𑁆𑀢𑀺𑀁𑀲 𑀘𑀢𑀼𑀓𑁆𑀓𑀸𑀦𑀺 𑀦𑀸𑀫 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀘𑀢𑀼𑀓𑁆𑀓𑀁 𑀤𑁂𑀲𑀺𑀢𑀯𑀢𑁆𑀣𑀼𑀓𑀘𑀢𑀼𑀓𑁆𑀓𑀁 𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀘𑀢𑀼𑀓𑁆𑀓𑀁 𑀧𑀫𑀸𑀡𑀺𑀓𑀘𑀢𑀼𑀓𑁆𑀓𑀁 𑀅𑀤𑁂𑀲𑀺𑀢𑀯𑀢𑁆𑀣𑀼𑀓𑀧𑀫𑀸𑀡𑀸𑀢𑀺𑀓𑁆𑀓𑀦𑁆𑀢𑀘𑀢𑀼𑀓𑁆𑀓𑀁 𑀤𑁂𑀲𑀺𑀢𑀯𑀢𑁆𑀣𑀼𑀓𑀧𑀫𑀸𑀡𑀺𑀓𑀘𑀢𑀼𑀓𑁆𑀓𑀦𑁆𑀢𑀺 𑀙 𑀘𑀢𑀼𑀓𑁆𑀓𑀸𑀦𑀺, 𑀏𑀯𑀁 𑀲𑀫𑀸𑀤𑀺𑀲𑀢𑀺𑀯𑀸𑀭𑀸𑀤𑀻𑀲𑀼𑀧𑀺 𑀧𑀜𑁆𑀘𑀲𑀽𑀢𑀺 𑀙𑀢𑁆𑀢𑀺𑀁𑀲. 𑀆𑀧𑀢𑁆𑀢𑀺𑀪𑁂𑀤𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀏𑀢𑁆𑀣 𑀬𑀲𑁆𑀫𑀸 ‘‘𑀲𑀸𑀭𑀫𑁆𑀪𑁂 𑀘𑁂, 𑀪𑀺𑀓𑁆𑀔𑀼, 𑀯𑀢𑁆𑀣𑀼𑀲𑁆𑀫𑀺𑀁 𑀅𑀧𑀭𑀺𑀓𑁆𑀓𑀫𑀦𑁂…𑀧𑁂… 𑀲𑀗𑁆𑀖𑀸𑀤𑀺𑀲𑁂𑀲𑁄’’𑀢𑀺 𑀫𑀸𑀢𑀺𑀓𑀸𑀬𑀁 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀢𑁆𑀢𑀸 𑀲𑀸𑀭𑀫𑁆𑀪𑀅𑀧𑀭𑀺𑀓𑁆𑀓𑀫𑀦𑁂𑀧𑀺 𑀲𑀗𑁆𑀖𑀸𑀤𑀺𑀲𑁂𑀲𑁄𑀯𑀸𑀢𑀺 𑀫𑀺𑀘𑁆𑀙𑀸𑀕𑀸𑀳𑀯𑀺𑀯𑀚𑁆𑀚𑀦𑀢𑁆𑀣𑀁 𑀆𑀧𑀢𑁆𑀢𑀺𑀪𑁂𑀤𑁄 𑀤𑀲𑁆𑀲𑀺𑀢𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀯𑀺𑀪𑀗𑁆𑀕𑁂 𑀏𑀯𑀁 𑀅𑀯𑀢𑁆𑀯𑀸 𑀓𑀺𑀫𑀢𑁆𑀣𑀁 𑀫𑀸𑀢𑀺𑀓𑀸𑀬𑀁 𑀤𑀼𑀓𑁆𑀓𑀝𑀯𑀢𑁆𑀣𑀼 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀪𑀺𑀓𑁆𑀔𑀽 𑀅𑀪𑀺𑀦𑁂𑀢𑀩𑁆𑀩𑀸 𑀯𑀢𑁆𑀣𑀼𑀤𑁂𑀲𑀦𑀸𑀬, 𑀢𑁂𑀳𑀺 𑀪𑀺𑀓𑁆𑀔𑀽𑀳𑀺 𑀯𑀢𑁆𑀣𑀼 𑀤𑁂𑀲𑁂𑀢𑀩𑁆𑀩𑀁. 𑀓𑀻𑀤𑀺𑀲𑀁? 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀦𑁂𑀢𑀭𑀁, 𑀇𑀢𑀭𑀲𑁆𑀫𑀺𑀁 ‘‘𑀲𑀸𑀭𑀫𑁆𑀪𑁂 𑀘𑁂 𑀪𑀺𑀓𑁆𑀔𑀼 𑀯𑀢𑁆𑀣𑀼𑀲𑁆𑀫𑀺𑀁 𑀅𑀧𑀭𑀺𑀓𑁆𑀓𑀫𑀦𑁂’’𑀢𑀺 𑀏𑀯𑀁 𑀆𑀦𑀺𑀲𑀁𑀲𑀯𑀲𑁂𑀦 𑀆𑀕𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀯𑀢𑁆𑀣𑀼 𑀦𑀸𑀫 𑀅𑀢𑁆𑀣𑀺 𑀲𑀸𑀭𑀫𑁆𑀪𑀁, 𑀅𑀢𑁆𑀣𑀺 𑀅𑀦𑀸𑀭𑀫𑁆𑀪𑀁, 𑀅𑀢𑁆𑀣𑀺 𑀲𑀧𑀭𑀺𑀓𑁆𑀓𑀫𑀦𑀁, 𑀅𑀢𑁆𑀣𑀺 𑀅𑀧𑀭𑀺𑀓𑁆𑀓𑀫𑀦𑀁, 𑀅𑀢𑁆𑀣𑀺 𑀲𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀅𑀢𑁆𑀣𑀺 𑀲𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀁, 𑀅𑀢𑁆𑀣𑀺 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀅𑀢𑁆𑀣𑀺 𑀅𑀦𑀸𑀭𑀫𑁆𑀪𑀁 𑀅𑀧𑀭𑀺𑀓𑁆𑀓𑀫𑀦𑀦𑁆𑀢𑀺 𑀩𑀳𑀼𑀯𑀺𑀥𑀢𑁆𑀢𑀸 𑀯𑀢𑁆𑀣𑀼 𑀤𑁂𑀲𑁂𑀢𑀩𑁆𑀩𑀁 𑀅𑀦𑀸𑀭𑀫𑁆𑀪𑀁 𑀲𑀧𑀭𑀺𑀓𑁆𑀓𑀫𑀦𑀁, 𑀦𑁂𑀢𑀭𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀓𑀺𑀫𑀢𑁆𑀣𑀺𑀓𑀸 𑀧𑀦𑁂𑀲𑀸 𑀤𑁂𑀲𑀦𑀸𑀢𑀺 𑀘𑁂? 𑀕𑀭𑀼𑀓𑀸𑀧𑀢𑁆𑀢𑀺𑀧𑀜𑁆𑀜𑀸𑀧𑀦𑀳𑁂𑀢𑀼𑀧𑀭𑀺𑀯𑀚𑁆𑀚𑀦𑀼𑀧𑀸𑀬𑀢𑁆𑀣𑀸. 𑀯𑀢𑁆𑀣𑀼𑀤𑁂𑀲𑀦𑀸𑀬 𑀳𑀺 𑀕𑀭𑀼𑀓𑀸𑀧𑀢𑁆𑀢𑀺𑀧𑀜𑁆𑀜𑀸𑀧𑀦𑀳𑁂𑀢𑀼𑀢𑁆𑀢𑀸 𑀅𑀓𑀢𑀯𑀺𑀜𑁆𑀜𑀢𑁆𑀢𑀺 𑀕𑀺𑀳𑀻𑀦𑀁 𑀧𑀻𑀴𑀸𑀚𑀦𑀦𑁂𑀦 𑀅𑀢𑁆𑀢𑀤𑀼𑀓𑁆𑀔𑀧𑀭𑀤𑀼𑀓𑁆𑀔𑀳𑁂𑀢𑀼𑀪𑀽𑀢𑁄 𑀘 𑀲𑀸𑀭𑀫𑁆𑀪𑀪𑀸𑀯𑁄𑀢𑀺 𑀏𑀢𑁂 𑀯𑀢𑁆𑀣𑀼𑀤𑁂𑀲𑀦𑀸𑀧𑀤𑁂𑀲𑁂𑀦 𑀉𑀧𑀸𑀬𑁂𑀦 𑀧𑀭𑀺𑀯𑀚𑁆𑀚𑀺𑀢𑀸 𑀳𑁄𑀦𑁆𑀢𑀺. 𑀦 𑀳𑀺 𑀪𑀺𑀓𑁆𑀔𑀼 𑀅𑀓𑀧𑁆𑀧𑀺𑀬𑀓𑀼𑀝𑀺𑀓𑀭𑀡𑀢𑁆𑀣𑀁 𑀕𑀺𑀳𑀻𑀦𑀁 𑀯𑀸 𑀧𑀻𑀴𑀸𑀦𑀺𑀫𑀺𑀢𑁆𑀢𑀁 𑀲𑀸𑀭𑀫𑁆𑀪𑀯𑀢𑁆𑀣𑀼. 𑀓𑀼𑀝𑀺𑀓𑀭𑀡𑀢𑁆𑀣𑀁 𑀯𑀸 𑀯𑀢𑁆𑀣𑀼𑀁 𑀤𑁂𑀲𑁂𑀦𑁆𑀢𑀻𑀢𑀺 𑀧𑀞𑀫𑀫𑁂𑀯 𑀲𑀸𑀥𑀺𑀢𑀫𑁂𑀢𑀁. 𑀯𑁄𑀫𑀺𑀲𑁆𑀲𑀓𑀸𑀧𑀢𑁆𑀢𑀺𑀬𑁄𑀢𑀺 𑀤𑀼𑀓𑁆𑀓𑀝𑀲𑀗𑁆𑀖𑀸𑀤𑀺𑀲𑁂𑀲𑀫𑀺𑀲𑁆𑀲𑀓𑀸𑀧𑀢𑁆𑀢𑀺𑀬𑁄.

𑁩𑁫𑁫. 𑀢𑀢𑁆𑀣 ‘‘𑀤𑁆𑀯𑀻𑀳𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀳𑀻’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀤𑀺𑀲𑁂𑀲𑁂𑀦𑀸’’𑀢𑀺 𑀯𑀺𑀪𑀢𑁆𑀢𑀺𑀩𑁆𑀬𑀢𑁆𑀢𑀬𑁂𑀦, 𑀯𑀘𑀦𑀩𑁆𑀬𑀢𑁆𑀢𑀬𑁂𑀦 𑀘 𑀯𑀼𑀢𑁆𑀢𑀁. ‘‘𑀆𑀧𑀢𑁆𑀢𑀺 𑀤𑁆𑀯𑀺𑀦𑁆𑀦𑀁 𑀲𑀗𑁆𑀖𑀸𑀤𑀺𑀲𑁂𑀲𑀸𑀦’’𑀦𑁆𑀢𑀺𑀧𑀺 𑀧𑀸𑀞𑁄.

𑁩𑁬𑁪. 𑀦 𑀖𑀝𑀬𑀢𑀺 𑀙𑀤𑀦𑀮𑁂𑀧𑀸𑀪𑀸𑀯𑀢𑁄, 𑀅𑀦𑀸𑀧𑀢𑁆𑀢𑀺, 𑀢𑀁 𑀧𑀭𑀢𑁄 𑀲𑀸𑀥𑀺𑀬𑀢𑀺. 𑀙𑀤𑀦𑀫𑁂𑀯 𑀲𑀦𑁆𑀥𑀸𑀬 𑀉𑀮𑁆𑀮𑀺𑀢𑁆𑀢𑀸𑀯𑀮𑀺𑀢𑁆𑀢𑀢𑀸 𑀯𑀼𑀢𑁆𑀢𑀸𑀢𑀺. ‘‘𑀓𑀼𑀓𑁆𑀓𑀼𑀝𑀘𑁆𑀙𑀺𑀓𑀕𑁂𑀳𑀁 𑀯𑀝𑁆𑀝𑀢𑀻𑀢𑀺 𑀯𑀢𑁆𑀯𑀸 𑀧𑀼𑀦 𑀙𑀤𑀦𑀁 𑀤𑀡𑁆𑀟𑀓𑁂𑀳𑀻𑀢𑀺𑀆𑀤𑀺𑀦𑀸 𑀦𑀬𑁂𑀦 𑀢𑀁 𑀤𑀲𑁆𑀲𑁂𑀦𑁆𑀢𑁂𑀳𑀺 𑀢𑀺𑀡𑀧𑀡𑁆𑀡𑀘𑁆𑀙𑀤𑀦𑀸𑀓𑀼𑀝𑀺𑀓𑀸𑀯 𑀯𑀼𑀢𑁆𑀢𑀸. 𑀢𑀢𑁆𑀣 𑀙𑀤𑀦𑀁 𑀤𑀡𑁆𑀟𑀓𑁂𑀳𑀺 𑀤𑀻𑀖𑀢𑁄 𑀢𑀺𑀭𑀺𑀬𑀜𑁆𑀘 𑀚𑀸𑀮𑀁 𑀯𑀺𑀬 𑀩𑀦𑁆𑀥𑀺𑀢𑁆𑀯𑀸 𑀢𑀺𑀡𑁂𑀳𑀺 𑀯𑀸 𑀧𑀡𑁆𑀡𑁂𑀳𑀺 𑀯𑀸 𑀙𑀸𑀤𑁂𑀢𑀼𑀁 𑀉𑀮𑁆𑀮𑀺𑀢𑁆𑀢𑀸𑀤𑀺𑀪𑀸𑀯𑁄 𑀙𑀤𑀦𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄𑀢𑀺 𑀬𑀼𑀢𑁆𑀢𑀫𑀺𑀤𑀁. 𑀢𑀲𑁆𑀫𑀸 𑀫𑀢𑁆𑀢𑀺𑀓𑀸𑀫𑀬𑀁 𑀪𑀺𑀢𑁆𑀢𑀺𑀁 𑀯𑀟𑁆𑀠𑀸𑀧𑁂𑀢𑁆𑀯𑀸 𑀉𑀧𑀭𑀺 𑀉𑀮𑁆𑀮𑀺𑀢𑁆𑀢𑀁 𑀯𑀸 𑀅𑀯𑀮𑀺𑀢𑁆𑀢𑀁 𑀯𑀸 𑀉𑀪𑀬𑀁 𑀯𑀸 𑀪𑀺𑀢𑁆𑀢𑀺𑀬𑀸 𑀖𑀝𑀺𑀢𑀁 𑀓𑀭𑁄𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀏𑀯 𑀯𑀺𑀦𑀸𑀧𑀺 𑀪𑀺𑀢𑁆𑀢𑀺𑀮𑁂𑀧𑁂𑀦𑀸’’𑀢𑀺 𑀮𑀺𑀔𑀺𑀢𑀁. ‘‘‘𑀲𑁄 𑀘 𑀙𑀤𑀦𑀫𑁂𑀯 𑀲𑀦𑁆𑀥𑀸𑀬𑀸’𑀢𑀺 𑀧𑀥𑀸𑀦𑀯𑀲𑁂𑀦 𑀯𑀼𑀢𑁆𑀢𑀁, 𑀦 𑀳𑁂𑀝𑁆𑀞𑀸𑀪𑀸𑀕𑀁 𑀧𑀝𑀺𑀓𑁆𑀔𑀺𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀏𑀢𑁆𑀣𑀸𑀢𑀺 𑀢𑀺𑀡𑀓𑀼𑀝𑀺𑀓𑀸𑀬. 𑀬𑀣𑀸𑀲𑀫𑀸𑀤𑀺𑀝𑁆𑀞𑀸𑀬𑀸𑀢𑀺 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀆𑀧𑀢𑁆𑀢𑀺 𑀓𑀸𑀭𑀼𑀓𑀸𑀦𑀁 𑀢𑀺𑀡𑁆𑀡𑀁 𑀤𑀼𑀓𑁆𑀓𑀝𑀸𑀦’’𑀦𑁆𑀢𑀺𑀆𑀤𑀺𑀫𑁆𑀳𑀺 𑀲𑁄 𑀲𑀼𑀡𑀸𑀢𑀺𑀙𑀓𑁆𑀓𑀫𑁆𑀧𑀺 𑀮𑀩𑁆𑀪𑀢𑀺. 𑀉𑀪𑀬𑀢𑁆𑀣 𑀲𑀫𑀸𑀤𑀺𑀝𑁆𑀞𑀢𑁆𑀢𑀸 𑀆𑀡𑀸𑀧𑀓𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀆𑀡𑀢𑁆𑀢𑀲𑁆𑀲 𑀬𑀣𑀸 𑀲𑀫𑀸𑀤𑀺𑀝𑁆𑀞𑀁 𑀆𑀡𑀸𑀧𑀓𑁂𑀦, 𑀢𑀣𑀸 𑀅𑀓𑀭𑀡𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁. 𑀲𑀘𑁂 ‘‘𑀅𑀳𑀫𑁆𑀧𑁂𑀢𑁆𑀣 𑀯𑀲𑀸𑀫𑀻’’𑀢𑀺 𑀅𑀢𑁆𑀢𑀼𑀤𑁆𑀤𑁂𑀲𑀫𑁆𑀧𑀺 𑀓𑀭𑁄𑀢𑀺, 𑀲𑀗𑁆𑀖𑀸𑀤𑀺𑀲𑁂𑀲𑁄𑀯. ‘‘𑀓𑀼𑀝𑀺𑀁 𑀓𑀭𑁄𑀣𑀸’’𑀢𑀺 𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀝𑁆𑀞𑀸𑀦𑁂 𑀧𑀦 𑀆𑀡𑀸𑀧𑀓𑀲𑁆𑀲𑀸𑀧𑀺 𑀲𑀗𑁆𑀖𑀸𑀤𑀺𑀲𑁂𑀲𑁄 𑀅𑀘𑀺𑀢𑁆𑀢𑀓𑀢𑁆𑀢𑀸 𑀲𑀺𑀓𑁆𑀔𑀸𑀧𑀤𑀲𑁆𑀲.

𑀅𑀳𑀜𑁆𑀘 𑀯𑀲𑀺𑀲𑁆𑀲𑀸𑀫𑀻𑀢𑀺 𑀏𑀢𑁆𑀣 𑀧𑀭𑀲𑁆𑀲 𑀬𑀲𑁆𑀲 𑀓𑀲𑁆𑀲𑀘𑀺 𑀉𑀤𑁆𑀤𑀺𑀝𑁆𑀞𑀲𑁆𑀲 𑀅𑀪𑀸𑀯𑀸 𑀆𑀧𑀢𑁆𑀢𑀺 𑀏𑀯 ‘‘𑀓𑀭𑁄𑀦𑁆𑀢𑀲𑁆𑀲 𑀯𑀸’’𑀢𑀺 𑀦𑀺𑀬𑀫𑀺𑀢𑀢𑁆𑀢𑀸, 𑀅𑀦𑀸𑀧𑀢𑁆𑀢𑀺 𑀅𑀯𑀺𑀪𑀢𑁆𑀢𑀢𑁆𑀢𑀸. ‘‘𑀇𑀥 𑀧𑀜𑁆𑀜𑀢𑁆𑀢𑀺𑀚𑀸𑀦𑀦𑀫𑀢𑁆𑀢𑀫𑁂𑀯 𑀘𑀺𑀢𑁆𑀢’’𑀦𑁆𑀢𑀺 𑀘 𑀮𑀺𑀔𑀺𑀢𑀁. 𑀅𑀦𑀼𑀕𑀡𑁆𑀞𑀺𑀧𑀤𑁂 𑀧𑀦 𑀅𑀳𑀜𑁆𑀘 𑀯𑀲𑀺𑀲𑁆𑀲𑀸𑀫𑀻𑀢𑀺 𑀏𑀢𑁆𑀣 𑀬𑁄 ‘‘𑀫𑀬𑁆𑀳𑀁 𑀯𑀸𑀲𑀸𑀕𑀸𑀭𑀜𑁆𑀘 𑀪𑀯𑀺𑀲𑁆𑀲𑀢𑀻’’𑀢𑀺 𑀇𑀘𑁆𑀙𑀢𑀺, 𑀢𑀲𑁆𑀲𑀸𑀧𑀢𑁆𑀢𑀺. 𑀬𑁄 𑀧𑀦 𑀉𑀧𑁄𑀲𑀣𑀸𑀕𑀸𑀭𑀁 𑀇𑀘𑁆𑀙𑀢𑀺, 𑀢𑀲𑁆𑀲 𑀅𑀦𑀸𑀧𑀢𑁆𑀢𑀺, 𑀢𑀲𑁆𑀫𑀸 ‘‘𑀉𑀪𑀬𑀁 𑀲𑀫𑁂𑀢𑀻’’𑀢𑀺 𑀯𑀢𑁆𑀯𑀸 𑀘 ‘‘𑀯𑀺𑀦𑀬𑀯𑀺𑀦𑀺𑀘𑁆𑀙𑀬𑁂 𑀆𑀕𑀢𑁂 𑀕𑀭𑀼𑀓𑁂 𑀞𑀸𑀢𑀩𑁆𑀩’’𑀦𑁆𑀢𑀺 𑀯𑀘𑀦𑀢𑁄 𑀫𑀳𑀸𑀧𑀘𑁆𑀘𑀭𑀺𑀯𑀸𑀤𑀢𑁄 𑀇𑀢𑀭𑁄 𑀧𑀘𑁆𑀙𑀸 𑀯𑀢𑁆𑀢𑀩𑁆𑀩𑁄𑀢𑀺 𑀘𑁂? 𑀦, 𑀩𑀮𑀯𑀢𑁆𑀢𑀸. ‘‘𑀯𑀸𑀲𑀸𑀕𑀸𑀭𑀁 𑀞𑀧𑁂𑀢𑁆𑀯𑀸 𑀲𑀩𑁆𑀩𑀢𑁆𑀣, 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀘𑀦𑀢𑁄, 𑀪𑁄𑀚𑀦𑀲𑀸𑀮𑀸𑀤𑀻𑀦𑀫𑁆𑀧𑀺 𑀅𑀢𑁆𑀣𑀸𑀬 𑀇𑀫𑀺𑀦𑀸 𑀓𑀢𑀢𑁆𑀢𑀸 𑀲𑀗𑁆𑀓𑀭𑀸 𑀚𑀸𑀢𑀸. 𑀬𑀣𑀸 𑁋 𑀤𑁆𑀯𑁂 𑀢𑀬𑁄 ‘‘𑀏𑀓𑀢𑁄 𑀯𑀲𑀺𑀲𑁆𑀲𑀸𑀫𑀸’’𑀢𑀺 𑀓𑀭𑁄𑀦𑁆𑀢𑀺, 𑀭𑀓𑁆𑀔𑀢𑀺 𑀢𑀸𑀯𑀸𑀢𑀺 𑀏𑀢𑁆𑀣 𑀯𑀺𑀬. ‘‘𑀇𑀤𑀁 𑀞𑀸𑀦𑀁 𑀯𑀸𑀲𑀸𑀕𑀸𑀭𑀁 𑀪𑀯𑀺𑀲𑁆𑀲𑀢𑀺, 𑀇𑀤𑀁 𑀉𑀧𑁄𑀲𑀣𑀸𑀕𑀸𑀭’’𑀦𑁆𑀢𑀺 𑀯𑀺𑀪𑀚𑀺𑀢𑁆𑀯𑀸 𑀓𑀢𑁂𑀧𑀺 𑀆𑀧𑀢𑁆𑀢𑀺 𑀏𑀯. 𑀤𑁆𑀯𑀻𑀲𑀼 𑀫𑀳𑀸𑀧𑀘𑁆𑀘𑀭𑀺𑀯𑀸𑀤𑁄 𑀩𑀮𑀯𑀸, 𑀢𑀲𑁆𑀫𑀸 ‘‘𑀧𑀘𑁆𑀙𑀸 𑀯𑀼𑀢𑁆𑀢𑁄’’𑀢𑀺𑀆𑀤𑀺𑀦𑀸 𑀅𑀢𑀻𑀯 𑀧𑀧𑀜𑁆𑀘𑀺𑀢𑀁. 𑀓𑀺𑀁 𑀢𑁂𑀦. ‘‘𑀅𑀢𑁆𑀢𑀦𑀸 𑀯𑀺𑀧𑁆𑀧𑀓𑀢𑀁 𑀅𑀢𑁆𑀢𑀦𑀸 𑀘 𑀧𑀭𑁂𑀳𑀺 𑀘 𑀧𑀭𑀺𑀬𑁄𑀲𑀸𑀧𑁂𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀧𑀭𑀸𑀦𑀺𑀧𑀺 𑀘𑀢𑀼𑀓𑁆𑀓𑀸𑀦𑀺 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑁆𑀯𑀸 𑀤𑀲𑁆𑀲𑁂𑀢𑀩𑁆𑀩𑀸𑀦𑀺, 𑀮𑁂𑀡𑀸𑀤𑀻𑀲𑀼 𑀓𑀺𑀜𑁆𑀘𑀸𑀧𑀺 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀅𑀦𑀸𑀧𑀢𑁆𑀢𑀺, 𑀅𑀓𑀢𑀯𑀺𑀜𑁆𑀜𑀢𑁆𑀢𑀺𑀬𑀸 𑀲𑀢𑀺 𑀢𑀧𑁆𑀧𑀘𑁆𑀘𑀬𑀸 𑀆𑀧𑀢𑁆𑀢𑀺 𑀏𑀯.

𑀓𑀼𑀝𑀺𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀯𑀺𑀳𑀸𑀭𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁬𑁬. 𑀲𑀢𑁆𑀢𑀫𑁂 𑀯𑀸-𑀲𑀤𑁆𑀤𑁄 𑀅𑀯𑀥𑀸𑀭𑀡𑀢𑁆𑀣𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑀯𑀺𑀳𑀸𑀭𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀧𑀞𑀫𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁮𑁦. 𑀲𑀸𑀯𑀓𑁂𑀦 𑀧𑀢𑁆𑀢𑀩𑁆𑀩𑀦𑁆𑀢𑀺 𑀧𑀓𑀢𑀺𑀲𑀸𑀯𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀅𑀕𑁆𑀕𑀲𑀸𑀯𑀓𑀁. 𑀬𑀣𑀽𑀧𑀦𑀺𑀲𑁆𑀲𑀬𑀬𑀣𑀸𑀧𑀼𑀕𑁆𑀕𑀮𑀯𑀲𑁂𑀦 ‘‘𑀢𑀺𑀲𑁆𑀲𑁄 𑀯𑀺𑀚𑁆𑀚𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑁂𑀦𑀘𑀺 𑀲𑀸𑀯𑀓𑁂𑀦 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸, 𑀓𑁂𑀦𑀘𑀺 𑀘𑀢𑀲𑁆𑀲𑁄 𑀧𑀝𑀺𑀲𑀫𑁆𑀪𑀺𑀤𑀸, 𑀓𑁂𑀦𑀘𑀺 𑀙 𑀅𑀪𑀺𑀜𑁆𑀜𑀸, 𑀓𑁂𑀦𑀘𑀺 𑀓𑁂𑀯𑀮𑁄 𑀦𑀯𑀮𑁄𑀓𑀼𑀢𑁆𑀢𑀭𑀥𑀫𑁆𑀫𑁄𑀢𑀺 𑀏𑀯𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀬𑀣𑀸𑀲𑀫𑁆𑀪𑀯𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁩𑁮𑁨. ‘‘𑀬𑁂 𑀢𑁂 𑀪𑀺𑀓𑁆𑀔𑀽 𑀲𑀼𑀢𑁆𑀢𑀦𑁆𑀢𑀺𑀓𑀸’’𑀢𑀺𑀆𑀤𑀺𑀯𑀘𑀦𑀢𑁄 𑀥𑀭𑀫𑀸𑀦𑁂𑀧𑀺 𑀪𑀕𑀯𑀢𑀺 𑀧𑀺𑀝𑀓𑀢𑁆𑀢𑀬𑀧𑀭𑀺𑀘𑁆𑀙𑁂𑀤𑁄 𑀅𑀢𑁆𑀣𑀻𑀢𑀺 𑀲𑀺𑀤𑁆𑀥𑀁. 𑀥𑀫𑁆𑀫𑀓𑀣𑀺𑀓𑀸𑀢𑀺 𑀆𑀪𑀺𑀥𑀫𑁆𑀫𑀺𑀓𑀸 𑀭𑀢𑀺𑀬𑀸 𑀅𑀘𑁆𑀙𑀺𑀲𑁆𑀲𑀦𑁆𑀢𑀻𑀢𑀺𑀆𑀤𑀺 𑀆𑀬𑀲𑁆𑀫𑀢𑁄 𑀤𑀩𑁆𑀩𑀲𑁆𑀲 𑀦𑁂𑀲𑀁 𑀢𑀺𑀭𑀘𑁆𑀙𑀸𑀦𑀓𑀣𑀸𑀬 𑀭𑀢𑀺𑀦𑀺𑀬𑁄𑀚𑀦𑀁 𑀯𑀺𑀬 𑀤𑀺𑀲𑁆𑀲𑀢𑀺, 𑀦 𑀢𑀣𑀸 𑀤𑀝𑁆𑀞𑀩𑁆𑀩𑀁. 𑀲𑀼𑀢𑁆𑀢𑀦𑁆𑀢𑀺𑀓𑀸𑀤𑀺𑀲𑀁𑀲𑀕𑁆𑀕𑀢𑁄 𑀢𑁂𑀲𑀁 𑀲𑀼𑀢𑁆𑀢𑀦𑁆𑀢𑀺𑀓𑀸𑀤𑀻𑀦𑀁 𑀨𑀸𑀲𑀼𑀯𑀺𑀳𑀸𑀭𑀦𑁆𑀢𑀭𑀸𑀬𑀁, 𑀢𑁂𑀲𑀫𑁆𑀧𑀺 𑀢𑀺𑀭𑀘𑁆𑀙𑀸𑀦𑀓𑀣𑀸𑀭𑀢𑀺𑀬𑀸 𑀅𑀪𑀸𑀯𑁂𑀦 𑀅𑀦𑀪𑀺𑀭𑀢𑀺𑀯𑀸𑀲𑀁, 𑀢𑀢𑁄 𑀦𑁂𑀲𑀁 𑀲𑀸𑀫𑀜𑁆𑀜𑀸 𑀘𑀸𑀯𑀦𑀜𑁆𑀘 𑀧𑀭𑀺𑀯𑀚𑁆𑀚𑀦𑁆𑀢𑁄 𑀏𑀯𑀁 𑀘𑀺𑀦𑁆𑀢𑁂𑀲𑀻𑀢𑀺 𑀤𑀝𑁆𑀞𑀩𑁆𑀩𑀁. ‘‘𑀦𑀺𑀫𑁆𑀫𑀺𑀢𑀸𑀦𑀁 𑀥𑀫𑁆𑀫𑀢𑀸𑀢𑀺 𑀲𑀸𑀯𑀓𑁂𑀳𑀺 𑀦𑀺𑀫𑁆𑀫𑀺𑀢𑀸𑀦𑀁𑀬𑁂𑀯, 𑀦 𑀩𑀼𑀤𑁆𑀥𑁂𑀳𑀻’’𑀢𑀺 𑀯𑀤𑀦𑁆𑀢𑀺. ‘‘𑀲𑀸𑀥𑀓𑀢𑀫𑀁 𑀓𑀭𑀡’’𑀦𑁆𑀢𑀺 𑀏𑀯𑀁 𑀯𑀼𑀢𑁆𑀢𑁂 𑀓𑀭𑀡𑀢𑁆𑀣𑁂𑀬𑁂𑀯 𑀢𑀢𑀺𑀬𑀸𑀯𑀺𑀪𑀢𑁆𑀢𑀻𑀢𑀺 𑀅𑀢𑁆𑀣𑁄.

𑁩𑁮𑁩-𑁪. 𑀬𑀦𑁆𑀢𑀺 𑀬𑁂𑀦. ‘‘𑀓𑀢𑁆𑀢𑀸𑀢𑀺 𑀓𑀢𑁆𑀢𑀸, 𑀦 𑀓𑀢𑁆𑀢𑀸’’𑀢𑀺 𑀮𑀺𑀔𑀺𑀢𑀁. ‘‘𑀪𑀭𑀺𑀬𑀁 𑀯𑀺𑀬 𑀫𑀁 𑀅𑀚𑁆𑀛𑀸𑀘𑀭𑀢𑀻’’𑀢𑀺 𑀯𑀤𑀦𑁆𑀢𑀺𑀬𑀸 𑀩𑀮𑀯𑀢𑀻 𑀘𑁄𑀤𑀦𑀸. 𑀢𑁂𑀦 𑀳𑀻𑀢𑀺 𑀏𑀢𑁆𑀣 𑀬𑀣𑀸 𑀙𑀼𑀧𑀦𑀫𑀢𑁆𑀢𑁂 𑀯𑀺𑀧𑁆𑀧𑀝𑀺𑀲𑀸𑀭𑀻𑀯𑀢𑁆𑀣𑀼𑀲𑁆𑀫𑀺𑀁 𑀓𑀸𑀬𑀲𑀁𑀲𑀕𑁆𑀕𑀭𑀸𑀕𑀲𑀫𑁆𑀪𑀯𑀸 𑀅𑀧𑀼𑀘𑁆𑀙𑀺𑀢𑁆𑀯𑀸 𑀏𑀯 𑀲𑀗𑁆𑀖𑀸𑀤𑀺𑀲𑁂𑀲𑀁 𑀧𑀜𑁆𑀜𑀸𑀧𑁂𑀲𑀺, 𑀢𑀣𑁂𑀯 𑀧𑀼𑀩𑁆𑀩𑁂𑀯𑀲𑁆𑀲𑀸 𑀤𑀼𑀲𑁆𑀲𑀻𑀮𑀪𑀸𑀯𑀁 𑀜𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀤𑀺 𑀢𑀸𑀯 𑀪𑀽𑀢𑀸𑀬 𑀧𑀝𑀺𑀜𑁆𑀜𑀸𑀬 𑀦𑀸𑀲𑀺𑀢𑀸, 𑀣𑁂𑀭𑁄 𑀓𑀸𑀭𑀓𑁄 𑀳𑁄𑀢𑀺. 𑀅𑀣 𑀅𑀪𑀽𑀢𑀸𑀬, 𑀪𑀕𑀯𑀢𑀸 ‘‘𑀦𑀸𑀲𑁂𑀣𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀯𑀼𑀢𑁆𑀢𑀜𑁆𑀘, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀬𑀤𑀺 𑀢𑀸𑀯 𑀧𑀝𑀺𑀜𑁆𑀜𑀸𑀬 𑀦𑀸𑀲𑀺𑀢𑀸, 𑀣𑁂𑀭𑁄 𑀓𑀸𑀭𑀓𑁄 𑀳𑁄𑀢𑀻’’𑀢𑀺.

𑀅𑀣 𑀅𑀧𑁆𑀧𑀝𑀺𑀜𑁆𑀜𑀸𑀬𑀸𑀢𑀺 ‘‘𑀅𑀬𑁆𑀬𑁂𑀦𑀫𑁆𑀳𑀺 𑀤𑀽𑀲𑀺𑀢𑀸’’𑀢𑀺 𑀇𑀫𑀁 𑀧𑀝𑀺𑀜𑁆𑀜𑀁 𑀯𑀺𑀦𑀸 𑀏𑀯 𑀢𑀲𑁆𑀲𑀸 𑀧𑀓𑀢𑀺𑀤𑀼𑀲𑁆𑀲𑀻𑀮𑀪𑀸𑀯𑀁 𑀲𑀦𑁆𑀥𑀸𑀬 𑀦𑀸𑀲𑀺𑀢𑀸, 𑀣𑁂𑀭𑁄 𑀅𑀓𑀸𑀭𑀓𑁄 𑀳𑁄𑀢𑀺. 𑀅𑀪𑀬𑀕𑀺𑀭𑀺𑀯𑀸𑀲𑀺𑀦𑁄𑀧𑀺 𑀅𑀢𑁆𑀢𑀦𑁄 𑀲𑀼𑀢𑁆𑀢𑀁 𑀯𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀯𑀸𑀤𑁂 𑀣𑁂𑀭𑁄 𑀓𑀸𑀭𑀓𑁄’’𑀢𑀺 𑀯𑀤𑀦𑁆𑀢𑀺, 𑀓𑀲𑁆𑀫𑀸? 𑀤𑀼𑀓𑁆𑀓𑀝𑀁 𑀫𑀼𑀲𑀸𑀯𑀸𑀤𑀧𑀘𑁆𑀘𑀬𑀸 𑀮𑀺𑀗𑁆𑀕𑀦𑀸𑀲𑀦𑀸𑀬 𑀅𑀦𑀸𑀲𑁂𑀢𑀩𑁆𑀩𑀢𑁆𑀢𑀸. 𑀧𑀸𑀭𑀸𑀚𑀺𑀓𑀲𑁆𑀲𑁂𑀯 𑀳𑀺 𑀮𑀺𑀗𑁆𑀕𑀦𑀸𑀲𑀦𑀸𑀬 𑀦𑀸𑀲𑁂𑀢𑀩𑁆𑀩𑀸. ‘‘𑀦𑀸𑀲𑁂𑀣𑀸’’𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸 𑀧𑀸𑀭𑀸𑀚𑀺𑀓𑀸𑀯 𑀚𑀸𑀢𑀸, 𑀲𑀸 𑀓𑀺𑀁 𑀲𑀦𑁆𑀥𑀸𑀬, 𑀢𑀢𑁄 𑀣𑁂𑀭𑁄 𑀓𑀸𑀭𑀓𑁄 𑀆𑀧𑀚𑁆𑀚𑀢𑀺. ‘‘𑀲𑀓𑀸𑀬 𑀧𑀝𑀺𑀜𑁆𑀜𑀸𑀬 𑀦𑀸𑀲𑁂𑀣𑀸’’𑀢𑀺 𑀯𑀼𑀢𑁆𑀢𑁂 𑀧𑀦 𑀅𑀧𑀸𑀭𑀸𑀚𑀺𑀓𑀸𑀧𑀺 𑀅𑀢𑁆𑀢𑀦𑁄 𑀯𑀘𑀦𑁂𑀦 𑀦𑀸𑀲𑁂𑀢𑀩𑁆𑀩𑀸 𑀚𑀸𑀢𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀳𑀸𑀯𑀺𑀳𑀸𑀭𑀯𑀸𑀲𑀺𑀦𑁄𑀧𑀺 𑀅𑀢𑁆𑀢𑀦𑁄 𑀲𑀼𑀢𑁆𑀢𑀁 𑀯𑀢𑁆𑀯𑀸 ‘‘𑀢𑀼𑀫𑁆𑀳𑀸𑀓𑀁 𑀯𑀸𑀤𑁂 𑀣𑁂𑀭𑁄 𑀓𑀸𑀭𑀓𑁄’’𑀢𑀺 𑀘 𑀯𑀤𑀦𑁆𑀢𑀺. 𑀓𑀲𑁆𑀫𑀸? ‘‘𑀲𑀓𑀸𑀬 𑀧𑀝𑀺𑀜𑁆𑀜𑀸𑀬 𑀦𑀸𑀲𑁂𑀣𑀸’’𑀢𑀺 𑀳𑀺 𑀯𑀼𑀢𑁆𑀢𑁂 𑀧𑀝𑀺𑀜𑁆𑀜𑀸𑀬 𑀪𑀽𑀢𑀢𑀸 𑀆𑀧𑀚𑁆𑀚𑀢𑀺 ‘‘𑀦𑀸𑀲𑁂𑀣𑀸’’𑀢𑀺 𑀯𑀘𑀦𑀢𑁄. 𑀪𑀽𑀢𑀸𑀬𑁂𑀯 𑀳𑀺 𑀧𑀝𑀺𑀜𑁆𑀜𑀸𑀬 𑀦𑀸𑀲𑁂𑀢𑀩𑁆𑀩𑀸 𑀳𑁄𑀢𑀺, 𑀦𑀸𑀪𑀽𑀢𑀸𑀬𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀼𑀭𑀺𑀫𑀦𑀬𑁂𑀢𑀺 𑀤𑀼𑀓𑁆𑀓𑀝𑀯𑀸𑀤𑁂. 𑀧𑀼𑀭𑀺𑀫𑁄 𑀬𑀼𑀢𑁆𑀢𑀺𑀯𑀲𑁂𑀦 𑀧𑀯𑀢𑁆𑀢𑁄, 𑀧𑀘𑁆𑀙𑀺𑀫𑁄 𑀧𑀸𑀴𑀺𑀯𑀘𑀦𑀯𑀲𑁂𑀦 𑀧𑀯𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄.

𑁩𑁮𑁫-𑁬. 𑀧𑀻𑀢𑀺𑀲𑀼𑀔𑁂𑀳𑀻𑀢𑀺 𑀏𑀢𑁆𑀣 ‘‘𑀲𑀼𑀔𑁂𑀦𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀧𑀻𑀢𑀺𑀕𑁆𑀕𑀳𑀡𑀁 𑀢𑀢𑀺𑀬𑀚𑁆𑀛𑀸𑀦𑀲𑀼𑀔𑀁, 𑀓𑀸𑀬𑀺𑀓𑀜𑁆𑀘 𑀅𑀧𑀦𑁂𑀢𑀼𑀁 𑀲𑀫𑁆𑀧𑀬𑀼𑀢𑁆𑀢𑀧𑀻𑀢𑀺𑀬𑀸 𑀯𑀼𑀢𑁆𑀢𑀁. 𑀲𑀘𑁂 𑀘𑀼𑀤𑀺𑀢𑀓𑀯𑀲𑁂𑀦 𑀓𑀢𑀁 𑀅𑀫𑀽𑀮𑀓𑀁 𑀦𑀸𑀫, ‘‘𑀅𑀦𑀚𑁆𑀛𑀸𑀧𑀦𑁆𑀦𑀁 𑀅𑀓𑀢’’𑀦𑁆𑀢𑀺 𑀯𑀤𑁂𑀬𑁆𑀬, 𑀇𑀫𑁂 𑀓𑀭𑀺𑀲𑁆𑀲𑀦𑁆𑀢𑀺, 𑀢𑀲𑁆𑀫𑀸 ‘‘𑀢𑀸𑀤𑀺𑀲𑀁 𑀤𑀺𑀝𑁆𑀞𑀲𑀜𑁆𑀜𑀻 𑀳𑀼𑀢𑁆𑀯𑀸 𑀘𑁄𑀤𑁂𑀢𑀻’’𑀢𑀺 𑀧𑀸𑀞𑁄. ‘‘𑀏𑀢𑁂𑀦 𑀦𑀬𑁂𑀦 𑀲𑀼𑀢𑀫𑀼𑀢𑀧𑀭𑀺𑀲𑀗𑁆𑀓𑀺𑀢𑀸𑀦𑀺𑀧𑀺 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑀸𑀦𑀻’’𑀢𑀺 𑀧𑀸𑀞𑁄. ‘‘𑀘𑀢𑀼𑀦𑁆𑀦𑀁 𑀅𑀜𑁆𑀜𑀢𑀭𑁂𑀦𑀸’’𑀢𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁂 𑀏𑀯 𑀆𑀕𑀢𑁂 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀁, 𑀇𑀢𑀭𑁂𑀲𑀁 𑀅𑀜𑁆𑀜𑀢𑀭𑁂𑀦𑀸𑀧𑀺 𑀅𑀦𑀼𑀤𑁆𑀥𑀁𑀲𑁂𑀦𑁆𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑁄𑀯𑀸𑀢𑀺 𑀦𑁄 𑀢𑀓𑁆𑀓𑁄𑀢𑀺 𑀆𑀘𑀭𑀺𑀬𑁄. 𑀪𑀺𑀓𑁆𑀔𑀼𑀪𑀸𑀯𑀸 𑀳𑀺 𑀘𑀸𑀯𑀦𑀲𑀫𑀢𑁆𑀣𑀢𑁄. ‘‘𑀲𑀫𑀻𑀧𑁂 𑀞𑀢𑁆𑀯𑀸’’𑀢𑀺 𑀯𑀘𑀦𑀢𑁄 𑀧𑀭𑀫𑁆𑀫𑀼𑀔𑀸 𑀘𑁄𑀤𑁂𑀦𑁆𑀢𑀲𑁆𑀲, 𑀘𑁄𑀤𑀸𑀧𑁂𑀦𑁆𑀢𑀲𑁆𑀲 𑀯𑀸 𑀲𑀻𑀲𑀁 𑀦 𑀏𑀢𑀺. 𑀤𑀺𑀝𑁆𑀞𑀜𑁆𑀘𑁂 𑀲𑀼𑀢𑁂𑀦 𑀧𑀭𑀺𑀲𑀗𑁆𑀓𑀺𑀢𑁂𑀦 𑀘𑁄𑀤𑁂𑀢𑀺 𑀘𑁄𑀤𑀸𑀧𑁂𑀢𑀺, 𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑀁 𑀯𑀸 𑀤𑀺𑀝𑁆𑀞𑀸𑀤𑀻𑀳𑀺 𑀘𑁄𑀤𑀺𑀢𑁂 𑀯𑀸 𑀘𑁄𑀤𑀸𑀧𑀺𑀢𑁂 𑀯𑀸 𑀲𑀻𑀲𑀁 𑀏𑀢𑀺 𑀏𑀯 𑀅𑀫𑀽𑀮𑀓𑁂𑀦 𑀘𑁄𑀤𑀺𑀢𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀤𑀺𑀝𑁆𑀞𑀲𑁆𑀲 𑀳𑁄𑀢𑀺 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄, 𑀢𑀜𑁆𑀘𑁂 𑀘𑁄𑀤𑁂𑀢𑀺 ‘𑀲𑀼𑀢𑁄 𑀫𑀬𑀸…𑀧𑁂… 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸’’𑀢𑀺 (𑀧𑀸𑀭𑀸. 𑁩𑁮𑁭). ‘‘𑀅𑀲𑀼𑀤𑁆𑀥𑁄 𑀳𑁄𑀢𑀺 𑀧𑀼𑀕𑁆𑀕𑀮𑁄 𑀅𑀜𑁆𑀜𑀢𑀭𑀁 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄, 𑀢𑀜𑁆𑀘𑁂 𑀅𑀲𑀼𑀤𑁆𑀥𑀤𑀺𑀝𑁆𑀞𑀺 𑀲𑀫𑀸𑀦𑁄 𑀅𑀦𑁄𑀓𑀸𑀲𑀁 𑀓𑀸𑀭𑀸𑀧𑁂𑀢𑁆𑀯𑀸 𑀘𑀸𑀯𑀦𑀸𑀥𑀺𑀧𑁆𑀧𑀸𑀬𑁄 𑀯𑀤𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀑𑀓𑀸𑀲𑀁 𑀓𑀸𑀭𑀸𑀧𑁂𑀢𑁆𑀯𑀸 𑀘𑀸𑀯𑀦𑀸𑀥𑀺𑀧𑁆𑀧𑀸𑀬𑁄 𑀯𑀤𑁂𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 (𑀧𑀸𑀭𑀸. 𑁩𑁮𑁯) 𑀇𑀫𑀺𑀦𑀸 𑀦-𑀲𑀫𑁂𑀦𑁆𑀢𑀁 𑀯𑀺𑀬 𑀔𑀸𑀬𑀢𑀺, 𑀓𑀣𑀁? 𑀤𑀺𑀝𑁆𑀞𑀲𑁆𑀲 𑀳𑁄𑀢𑀺 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄 𑀦𑀸𑀫 𑀅𑀲𑀼𑀤𑁆𑀥𑁄 𑀧𑀼𑀕𑁆𑀕𑀮𑁄 𑀳𑁄𑀢𑀺, ‘‘𑀅𑀜𑁆𑀜𑀢𑀭𑀲𑁆𑀫𑀺𑀁 𑀅𑀲𑀼𑀤𑁆𑀥𑀤𑀺𑀝𑁆𑀞𑀺 𑀲𑀫𑀸𑀦𑁄 𑀢𑀜𑁆𑀘𑁂 𑀘𑁄𑀤𑁂𑀢𑀺 ‘𑀲𑀼𑀢𑁄 𑀫𑀬𑀸 𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀦𑁆𑀦𑁄𑀲𑀻’𑀢𑀺, 𑀆𑀧𑀢𑁆𑀢𑀺 𑀯𑀸𑀘𑀸𑀬 𑀯𑀸𑀘𑀸𑀬 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲𑀸’’𑀢𑀺 𑀯𑀘𑀦𑀢𑁄 𑀧𑀼𑀭𑀺𑀫𑀦𑀬𑁂𑀦𑀸𑀧𑀢𑁆𑀢𑀺. ‘‘𑀘𑀸𑀯𑀦𑀸𑀥𑀺𑀧𑁆𑀧𑀸𑀬𑁄 𑀯𑀤𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀘𑀦𑀢𑁄 𑀧𑀘𑁆𑀙𑀺𑀫𑀦𑀬𑁂𑀦 𑀲𑀗𑁆𑀖𑀸𑀤𑀺𑀲𑁂𑀲𑁂𑀦 𑀆𑀧𑀢𑁆𑀢𑀻𑀢𑀺 𑀤𑁆𑀯𑁂 𑀧𑀸𑀴𑀺𑀦𑀬𑀸 𑀅𑀜𑁆𑀜𑀫𑀜𑁆𑀜𑀁 𑀯𑀺𑀭𑀼𑀤𑁆𑀥𑀸 𑀯𑀺𑀬 𑀤𑀺𑀲𑁆𑀲𑀦𑁆𑀢𑀺, 𑀦 𑀘 𑀯𑀺𑀭𑀼𑀤𑁆𑀥𑀁 𑀩𑀼𑀤𑁆𑀥𑀸 𑀓𑀣𑀬𑀦𑁆𑀢𑀺, 𑀢𑀲𑁆𑀫𑀸 𑀏𑀢𑁆𑀣 𑀬𑀼𑀢𑁆𑀢𑀺 𑀧𑀭𑀺𑀬𑁂𑀲𑀺𑀢𑀩𑁆𑀩𑀸. 𑀅𑀝𑁆𑀞𑀓𑀣𑀸𑀘𑀭𑀺𑀬𑀸 𑀢𑀸𑀯𑀸𑀳𑀼 ‘‘𑀲𑀫𑀽𑀮𑀓𑁂𑀦 𑀯𑀸 𑀲𑀜𑁆𑀜𑀸𑀲𑀫𑀽𑀮𑀓𑁂𑀦 𑀯𑀸 𑀘𑁄𑀤𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺, 𑀅𑀫𑀽𑀮𑀓𑁂𑀦 𑀯𑀸 𑀧𑀦 𑀲𑀜𑁆𑀜𑀸𑀅𑀫𑀽𑀮𑀓𑁂𑀦 𑀯𑀸 𑀘𑁄𑀤𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀻’’𑀢𑀺. 𑀢𑀲𑁆𑀲𑀢𑁆𑀣𑁄 𑁋 𑀤𑀲𑁆𑀲𑀦𑀲𑀯𑀦𑀧𑀭𑀺𑀲𑀗𑁆𑀓𑀦𑀫𑀽𑀮𑁂𑀦 𑀲𑀫𑀽𑀮𑀓𑁂𑀦 𑀯𑀸 𑀢𑀤𑀪𑀸𑀯𑁂𑀦 𑀅𑀫𑀽𑀮𑀓𑁂𑀦𑀸𑀧𑀺 𑀲𑀜𑁆𑀜𑀸𑀲𑀫𑀽𑀮𑀓𑁂𑀦 𑀯𑀸 𑀘𑁄𑀤𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺, 𑀤𑀲𑁆𑀲𑀦𑀸𑀤𑀺𑀫𑀽𑀮𑀸𑀪𑀸𑀯𑁂𑀦 𑀅𑀫𑀽𑀮𑀓𑁂𑀦 𑀯𑀸 𑀢𑀩𑁆𑀪𑀸𑀯𑁂𑀦 𑀲𑀫𑀽𑀮𑀓𑁂𑀦𑀸𑀧𑀺 𑀲𑀜𑁆𑀜𑀸𑀅𑀫𑀽𑀮𑀓𑁂𑀦 𑀯𑀸 𑀘𑁄𑀤𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺, 𑀢𑀲𑁆𑀫𑀸 𑀤𑀺𑀝𑁆𑀞𑀲𑁆𑀲 𑀳𑁄𑀢𑀺.

𑀧𑀸𑀭𑀸𑀚𑀺𑀓𑀁 𑀥𑀫𑁆𑀫𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄𑀢𑀺𑀆𑀤𑀺𑀫𑁆𑀳𑀺 𑀤𑀲𑁆𑀲𑀦𑀫𑀽𑀮𑁂𑀦 𑀲𑀫𑀽𑀮𑀓𑁂𑀦𑀸𑀧𑀺 ‘‘𑀲𑀼𑀢𑁄 𑀫𑀬𑀸’’𑀢𑀺 𑀯𑀘𑀦𑀢𑁄 𑀲𑀜𑁆𑀜𑀸𑀅𑀫𑀽𑀮𑀓𑁂𑀦 𑀯𑀸 𑀘𑁄𑀤𑁂𑀢𑀺, 𑀆𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀲𑁆𑀲. 𑀢𑀤𑀢𑁆𑀣𑀲𑁆𑀲 𑀆𑀯𑀺𑀪𑀸𑀯𑀢𑁆𑀣𑀁 ‘‘𑀤𑀺𑀝𑁆𑀞𑁂 𑀯𑁂𑀫𑀢𑀺𑀓𑁄’’𑀢𑀺𑀆𑀤𑀺 𑀯𑀸𑀭𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀲𑀼𑀤𑁆𑀥𑁄 𑀳𑁄𑀢𑀺 𑀧𑀼𑀕𑁆𑀕𑀮𑁄𑀪𑀺𑀆𑀤𑀺𑀫𑁆𑀳𑀺 𑀧𑀦 𑀲𑀫𑀽𑀮𑀓𑁂𑀦, 𑀲𑀜𑁆𑀜𑀸𑀲𑀫𑀽𑀮𑀓𑁂𑀦 𑀯𑀸 𑀘𑁄𑀤𑀺𑀢𑀢𑁆𑀢𑀸 𑀅𑀦𑀸𑀧𑀢𑁆𑀢𑀻𑀢𑀺. 𑀏𑀯𑀫𑁂𑀯𑀁 𑀧𑀦 𑀢𑀤𑀢𑁆𑀣𑀤𑀻𑀧𑀦𑀢𑁆𑀣𑀁 𑀢𑁂 𑀯𑀸𑀭𑀸 𑀯𑀼𑀢𑁆𑀢𑀸. 𑀢𑀢𑁆𑀣 𑀳𑀺 ‘‘𑀅𑀤𑀺𑀝𑁆𑀞𑀲𑁆𑀲 𑀳𑁄𑀢𑀻’’𑀢𑀺𑀆𑀤𑀺𑀯𑀸𑀭𑀸 𑀅𑀫𑀽𑀮𑀓𑁂𑀦 𑀘𑁄𑀤𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸. ‘‘𑀤𑀺𑀝𑁆𑀞𑁂 𑀯𑁂𑀫𑀢𑀺𑀓𑁄’’𑀢𑀺𑀆𑀤𑀺𑀦𑀸 𑀲𑀜𑁆𑀜𑀸𑀅𑀫𑀽𑀮𑀓𑁂𑀦 𑀘𑁄𑀤𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸. 𑀅𑀜𑁆𑀜𑀣𑀸 ‘‘𑀤𑀺𑀝𑁆𑀞𑀲𑁆𑀲 𑀳𑁄𑀢𑀺, 𑀤𑀺𑀝𑁆𑀞𑁂 𑀯𑁂𑀫𑀢𑀺𑀓𑁄’’𑀢𑀺𑀆𑀤𑀺𑀯𑀸𑀭𑀸 𑀦𑀺𑀩𑁆𑀩𑀺𑀲𑁂𑀲𑀸 𑀪𑀯𑁂𑀬𑁆𑀬𑀼𑀁. 𑀇𑀤𑀁 𑀧𑀦𑁂𑀢𑁆𑀣 𑀲𑀦𑁆𑀦𑀺𑀝𑁆𑀞𑀸𑀦𑀁-𑀬𑀣𑀸 𑀅𑀲𑀼𑀤𑁆𑀥𑀁 𑀧𑀼𑀕𑁆𑀕𑀮𑀁 𑀅𑀦𑁄𑀓𑀸𑀲𑀁 𑀓𑀸𑀭𑀸𑀧𑁂𑀢𑁆𑀯𑀸 𑀘𑁄𑀤𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁, 𑀅𑀓𑁆𑀓𑁄𑀲𑀸𑀥𑀺𑀧𑁆𑀧𑀸𑀬𑀲𑁆𑀲 𑀘 𑀑𑀫𑀲𑀯𑀸𑀤𑁂𑀦 𑀤𑀼𑀓𑁆𑀓𑀝𑀲𑁆𑀲, 𑀢𑀣𑀸 𑀅𑀲𑀼𑀤𑁆𑀥𑀤𑀺𑀝𑁆𑀞𑀺𑀓𑁄𑀧𑀺 𑀅𑀲𑀼𑀤𑁆𑀥𑀁 𑀅𑀲𑀼𑀤𑁆𑀥𑀤𑀺𑀝𑁆𑀞𑀺 𑀅𑀫𑀽𑀮𑀓𑁂𑀦 𑀘𑁄𑀤𑁂𑀢𑀺, 𑀆𑀧𑀢𑁆𑀢𑀺. 𑀲𑀫𑀽𑀮𑀓𑁂𑀦 𑀯𑀸 𑀘𑁄𑀤𑁂𑀢𑀺, 𑀅𑀦𑀸𑀧𑀢𑁆𑀢𑀻𑀢𑀺 𑀢𑀁 𑀲𑀦𑁆𑀦𑀺𑀝𑁆𑀞𑀸𑀦𑀁 𑀬𑀣𑀸 ‘‘𑀅𑀦𑀸𑀧𑀢𑁆𑀢𑀺 𑀲𑀼𑀤𑁆𑀥𑁂 𑀅𑀲𑀼𑀤𑁆𑀥𑀤𑀺𑀝𑁆𑀞𑀺𑀲𑁆𑀲 𑀅𑀲𑀼𑀤𑁆𑀥𑁂 𑀅𑀲𑀼𑀤𑁆𑀥𑀤𑀺𑀝𑁆𑀞𑀺𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀲𑀁𑀲𑀦𑁆𑀤𑀢𑀺, 𑀢𑀣𑀸 𑀕𑀳𑁂𑀢𑀩𑁆𑀩𑀁. 𑀅𑀜𑁆𑀜𑀣𑀸 𑀬𑀼𑀢𑁆𑀢𑀺 𑀧𑀭𑀺𑀬𑁂𑀲𑀺𑀢𑀩𑁆𑀩𑀸.

𑀲𑀻𑀮𑀲𑀫𑁆𑀧𑀦𑁆𑀦𑁄𑀢𑀺 𑀏𑀢𑁆𑀣 ‘‘𑀤𑀼𑀲𑁆𑀲𑀻𑀮𑀲𑁆𑀲 𑀯𑀘𑀦𑀁 𑀅𑀧𑁆𑀧𑀫𑀸𑀡𑀁. 𑀪𑀺𑀓𑁆𑀔𑀼𑀦𑀻 𑀳𑀺 𑀪𑀺𑀓𑁆𑀔𑀼𑀫𑁆𑀳𑀺 𑀅𑀦𑀺𑀲𑁆𑀲𑀭𑀸, 𑀢𑀲𑁆𑀫𑀸 𑀉𑀓𑁆𑀓𑀝𑁆𑀞𑀦𑀬𑁂 𑀯𑀺𑀥𑀺𑀁 𑀲𑀦𑁆𑀥𑀸𑀬 𑀣𑁂𑀭𑁂𑀦 𑀯𑀼𑀢𑁆𑀢𑀁. 𑀤𑀼𑀢𑀺𑀬𑀢𑁆𑀣𑁂𑀭𑁂𑀦 𑀪𑀺𑀓𑁆𑀔𑀼𑀦𑀻 𑀅𑀚𑀸𑀦𑀺𑀢𑁆𑀯𑀸𑀧𑀺 𑀘𑁄𑀤𑁂𑀢𑀺, 𑀲𑀺𑀓𑁆𑀔𑀫𑀸𑀦𑀸𑀤𑀬𑁄 𑀯𑀸 𑀘𑁄𑀤𑁂𑀦𑁆𑀢𑀺, 𑀢𑁂𑀲𑀁 𑀲𑀼𑀢𑁆𑀯𑀸 𑀪𑀺𑀓𑁆𑀔𑀽 𑀏𑀯 𑀯𑀺𑀘𑀸𑀭𑁂𑀢𑁆𑀯𑀸 𑀢𑀲𑁆𑀲 𑀧𑀝𑀺𑀜𑁆𑀜𑀸𑀬 𑀓𑀸𑀭𑁂𑀦𑁆𑀢𑀺. 𑀓𑁄 𑀏𑀢𑁆𑀣 𑀤𑁄𑀲𑁄𑀢𑀺 𑀇𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀢𑀢𑀺𑀬𑁂𑀦 𑀢𑀺𑀢𑁆𑀣𑀺𑀬𑀸𑀦𑀁 𑀯𑀘𑀦𑀁 𑀲𑀼𑀢𑁆𑀯𑀸𑀧𑀺 𑀪𑀺𑀓𑁆𑀔𑀽 𑀏𑀯 𑀯𑀺𑀘𑀸𑀭𑁂𑀦𑁆𑀢𑀺, 𑀢𑀲𑁆𑀫𑀸 𑀦 𑀓𑁄𑀘𑀺 𑀦 𑀮𑀪𑀢𑀻𑀢𑀺 𑀏𑀯𑀁 𑀲𑀩𑁆𑀩𑀁 𑀲𑀫𑁂𑀢𑀻𑀢𑀺 𑀅𑀧𑀭𑁂’’𑀢𑀺 𑀯𑀼𑀢𑁆𑀢𑀁. 𑀢𑀺𑀁𑀲𑀸𑀦𑀺 𑀢𑀺𑀁𑀲𑀯𑀦𑁆𑀢𑀸𑀦𑀺. 𑀅𑀦𑀼𑀬𑁄𑀕𑁄𑀢𑀺 𑀧𑀝𑀺𑀯𑀘𑀦𑀁. 𑀏𑀳𑀺𑀢𑀻𑀢𑀺 𑀆𑀕𑀫𑀺𑀲𑁆𑀲𑀢𑀺. 𑀤𑀺𑀝𑁆𑀞𑀲𑀦𑁆𑀢𑀸𑀦𑁂𑀦𑀸𑀢𑀺 𑀤𑀺𑀝𑁆𑀞𑀦𑀬𑁂𑀦, 𑀤𑀺𑀝𑁆𑀞𑀯𑀺𑀥𑀸𑀦𑁂𑀦𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀧𑀢𑀺𑀝𑁆𑀞𑀸𑀬𑀸𑀢𑀺 𑀧𑀢𑀺𑀝𑁆𑀞𑀁 𑀮𑀪𑀺𑀢𑁆𑀯𑀸. 𑀞𑀸𑀦𑁂𑀢𑀺 𑀮𑀚𑁆𑀚𑀺𑀝𑁆𑀞𑀸𑀦𑁂.

𑀕𑀸𑀳𑀦𑁆𑀢𑀺 ‘‘𑀅𑀳𑀁 𑀘𑁄𑀤𑁂𑀲𑁆𑀲𑀸𑀫𑀻’’𑀢𑀺 𑀅𑀢𑁆𑀢𑀸𑀤𑀸𑀦𑀕𑁆𑀕𑀳𑀡𑀁. 𑀘𑁂𑀢𑀦𑀸𑀢𑀺 𑀅𑀢𑁆𑀢𑀸𑀤𑀸𑀦𑀕𑁆𑀕𑀳𑀡𑀘𑁂𑀢𑀦𑀸. 𑀯𑁄𑀳𑀸𑀭𑁄𑀢𑀺 𑀇𑀢𑁄, 𑀏𑀢𑁆𑀢𑁄 𑀘 𑀜𑀢𑁆𑀯𑀸 𑀧𑀓𑀸𑀲𑀦𑀁. 𑀧𑀡𑁆𑀡𑀢𑁆𑀢𑀻𑀢𑀺 𑀦𑀸𑀫𑀧𑀜𑁆𑀜𑀢𑁆𑀢𑀺. 𑀬𑀸 𑀯𑀘𑀻𑀖𑁄𑀲𑀸𑀭𑀫𑁆𑀫𑀡𑀲𑁆𑀲 𑀲𑁄𑀢𑀤𑁆𑀯𑀸𑀭𑀧𑁆𑀧𑀯𑀢𑁆𑀢𑀯𑀺𑀜𑁆𑀜𑀸𑀡𑀲𑀦𑁆𑀢𑀸𑀦𑀲𑁆𑀲 𑀅𑀦𑀦𑁆𑀢𑀭𑀁 𑀉𑀧𑁆𑀧𑀦𑁆𑀦𑁂𑀦 𑀉𑀧𑀮𑀤𑁆𑀥𑀧𑀼𑀩𑁆𑀩𑀲𑀗𑁆𑀓𑁂𑀢𑁂𑀦 𑀫𑀦𑁄𑀤𑁆𑀯𑀸𑀭𑀯𑀺𑀜𑁆𑀜𑀸𑀡𑁂𑀦 𑀯𑀺𑀜𑁆𑀜𑀸𑀬𑀢𑀺, 𑀬𑀲𑁆𑀲𑀸 𑀯𑀺𑀜𑁆𑀜𑀸𑀢𑀢𑁆𑀢𑀸 𑀢𑀤𑀢𑁆𑀣𑁄 𑀧𑀭𑀫𑀢𑁆𑀣𑁄 𑀯𑀸 𑀅𑀧𑀭𑀫𑀢𑁆𑀣𑁄 𑀯𑀸 𑀢𑀢𑀺𑀬𑀯𑀸𑀭𑀁 𑀉𑀧𑁆𑀧𑀦𑁆𑀦𑁂𑀦 𑀫𑀦𑁄𑀯𑀺𑀜𑁆𑀜𑀸𑀡𑁂𑀦 𑀯𑀺𑀜𑁆𑀜𑀸𑀬𑀢𑀻𑀢𑀺 𑀦𑀸𑀫𑀸𑀤𑀻𑀳𑀺 𑀙𑀳𑀺 𑀩𑁆𑀬𑀜𑁆𑀚𑀦𑁂𑀳𑀺 𑀧𑀸𑀴𑀺𑀬𑀸 𑀧𑀓𑀸𑀲𑀺𑀢𑀸, 𑀲𑀸 ‘‘𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀻’’𑀢𑀺𑀆𑀤𑀺𑀦𑀸 𑀙𑀥𑀸 𑀆𑀘𑀭𑀺𑀬𑁂𑀳𑀺 𑀤𑀲𑁆𑀲𑀺𑀢𑀸. 𑀢𑀩𑁆𑀪𑀸𑀕𑀺𑀬𑀪𑀸𑀯𑁄 𑀅𑀢𑀩𑁆𑀪𑀸𑀕𑀺𑀬𑀪𑀸𑀯𑁄 𑀘 𑀦𑀺𑀧𑁆𑀨𑀦𑁆𑀦𑀥𑀫𑁆𑀫𑀲𑁆𑀲𑁂𑀯 𑀬𑀼𑀚𑁆𑀚𑀢𑀺, 𑀦 𑀧𑀜𑁆𑀜𑀢𑁆𑀢𑀺𑀬𑀸 𑀅𑀥𑀺𑀓𑀭𑀡𑀻𑀬𑀯𑀢𑁆𑀣𑀼𑀢𑁆𑀢𑀸, 𑀅𑀥𑀺𑀓𑀭𑀡𑁂 𑀧𑀯𑀢𑁆𑀢𑀢𑁆𑀢𑀸 𑀘 𑀅𑀥𑀺𑀓𑀭𑀡𑁄 𑀫𑀜𑁆𑀘𑀝𑁆𑀞𑁂 𑀫𑀜𑁆𑀘𑁄𑀧𑀘𑀸𑀭𑁄 𑀯𑀺𑀬𑀸𑀢𑀺 𑀘. ‘‘𑀧𑀭𑀺𑀬𑀸𑀬𑁂𑀦𑀸𑀢𑀺 𑀅𑀫𑀽𑀮𑀓𑀸 𑀦𑀸𑀫𑀧𑀜𑁆𑀜𑀢𑁆𑀢𑀺 𑀦𑀢𑁆𑀣𑀺. 𑀧𑀭𑀺𑀬𑀸𑀬𑀫𑀢𑁆𑀢𑀁, 𑀲𑀪𑀸𑀯𑀢𑁄 𑀦𑀢𑁆𑀣𑀺. 𑀅𑀪𑀺𑀥𑀸𑀦𑀫𑀢𑁆𑀢𑀫𑁂𑀯, 𑀅𑀪𑀺𑀥𑁂𑀬𑁆𑀬𑀁 𑀦𑀢𑁆𑀣𑀻’’𑀢𑀺 𑀘 𑀮𑀺𑀔𑀺𑀢𑀁. 𑀇𑀥𑁂𑀯𑀸𑀢𑀺 𑀇𑀫𑀲𑁆𑀫𑀺𑀁 𑀏𑀯 𑀲𑀺𑀓𑁆𑀔𑀸𑀧𑀤𑁂. 𑀦 𑀲𑀩𑁆𑀩𑀢𑁆𑀣𑀸𑀢𑀺 𑀯𑀺𑀯𑀸𑀤𑀸𑀥𑀺𑀓𑀭𑀡𑀸𑀤𑀻𑀲𑀼. 𑀓𑀲𑁆𑀫𑀸? 𑀦 𑀳𑀻𑀢𑀺𑀆𑀤𑀺. 𑀯𑀺𑀯𑀸𑀤𑀸𑀥𑀺𑀓𑀭𑀡𑀸𑀤𑀻𑀦𑀫𑀢𑁆𑀣𑀺𑀢𑀸 𑀯𑀺𑀬 𑀅𑀫𑀽𑀮𑀓𑀁 𑀅𑀥𑀺𑀓𑀭𑀡𑀁 𑀦𑀢𑁆𑀣𑀻𑀢𑀺. 𑀧𑀼𑀩𑁆𑀩𑁂 𑀯𑀼𑀢𑁆𑀢𑀲𑀫𑀣𑁂𑀳𑀻𑀢𑀺 ‘‘𑀬𑀁 𑀅𑀥𑀺𑀓𑀺𑀘𑁆𑀘 𑀲𑀫𑀣𑀸 𑀯𑀢𑁆𑀢𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀲𑀫𑀣𑁂𑀳𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀧𑀺𑀘 𑀲𑀪𑀸𑀯𑀢𑁄 𑀦𑀢𑁆𑀣𑀻𑀢𑀺 𑀅𑀧𑁆𑀧𑀝𑀺𑀮𑀤𑁆𑀥𑀲𑀪𑀸𑀯𑀢𑁆𑀢𑀸 𑀯𑀼𑀢𑁆𑀢𑀁. 𑀅𑀦𑀼𑀧𑁆𑀧𑀦𑁆𑀦𑀁 𑀯𑀺𑀬 𑀯𑀺𑀜𑁆𑀜𑀸𑀡𑀸𑀤𑀺. 𑀦 𑀳𑀺 𑀯𑀺𑀯𑀸𑀤𑀸𑀤𑀻𑀦𑀁 𑀧𑀡𑁆𑀡𑀢𑁆𑀢𑀺 𑀅𑀥𑀺𑀓𑀭𑀡𑀝𑁆𑀞𑁄𑀢𑀺 𑀧𑀡𑁆𑀡𑀢𑁆𑀢𑀺𑀁 𑀅𑀥𑀺𑀓𑀺𑀘𑁆𑀘 𑀲𑀫𑀣𑀸 𑀦 𑀧𑀯𑀢𑁆𑀢𑀦𑁆𑀢𑀺, 𑀢𑀲𑁆𑀫𑀸 𑀦 𑀢𑀲𑁆𑀲𑀸 𑀅𑀥𑀺𑀓𑀭𑀡𑀻𑀬𑀢𑀸𑀢𑀺 𑀦 𑀯𑀺𑀯𑀸𑀤𑀸𑀤𑀻𑀦𑀁 𑀧𑀡𑁆𑀡𑀢𑁆𑀢𑀺 𑀅𑀥𑀺𑀓𑀭𑀡𑀝𑁆𑀞𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀅𑀫𑀽𑀮𑀺𑀓𑀸 𑀘𑁂,

𑀧𑀡𑁆𑀡𑀢𑁆𑀢𑀺𑀫𑀢𑁆𑀢𑀸 𑀨𑀮𑀫𑀕𑁆𑀕𑀥𑀫𑁆𑀫𑀸;

𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀽𑀢𑀸,

𑀧𑀡𑁆𑀡𑀢𑁆𑀢𑀺𑀫𑀢𑁆𑀢𑀸𑀯 𑀲𑀺𑀬𑀼𑀁 𑀢𑀣𑁂𑀯.

‘‘𑀢𑀢𑁄 𑀤𑁆𑀯𑀺𑀥𑀸 𑀫𑀕𑁆𑀕𑀨𑀮𑀸𑀤𑀺𑀥𑀫𑁆𑀫𑀸,

𑀲𑀺𑀬𑀼𑀁 𑀢𑀣𑀸𑀢𑀻𑀢𑀫𑀦𑀸𑀕𑀢𑀜𑁆𑀘;

𑀧𑀡𑁆𑀡𑀢𑁆𑀢𑀺𑀙𑀓𑁆𑀓𑀁 𑀦 𑀲𑀺𑀬𑀸 𑀢𑀢𑁄 𑀯𑀸,

𑀧𑀭𑀺𑀬𑀸𑀬𑀢𑁄 𑀲𑀫𑁆𑀫𑀼𑀢𑀺𑀯𑀸𑀤𑀫𑀸𑀳𑀸’’𑀢𑀺.

𑀅𑀦𑀼𑀯𑀤𑀦𑁆𑀢𑀻𑀢𑀺 𑀅𑀓𑁆𑀓𑁄𑀲𑀦𑁆𑀢𑀺. 𑀓𑀺𑀘𑁆𑀘𑀬𑀢𑀸𑀢𑀺 𑀓𑀭𑀡𑀻𑀬𑀢𑀸. 𑀢𑀁 𑀓𑀢𑀫𑀦𑁆𑀢𑀺 𑀘𑁂? 𑀅𑀧𑀮𑁄𑀓𑀦𑀓𑀫𑁆𑀫𑀦𑁆𑀢𑀺𑀆𑀤𑀺. 𑀓𑀺𑀘𑁆𑀘𑀦𑁆𑀢𑀺 𑀯𑀺𑀜𑁆𑀜𑀢𑁆𑀢𑀺𑀲𑀫𑀼𑀝𑁆𑀞𑀸𑀧𑀓𑀘𑀺𑀢𑁆𑀢𑀁 𑀓𑀺𑀭 𑀅𑀥𑀺𑀧𑁆𑀧𑁂𑀢𑀁.

𑁩𑁮𑁭. 𑀲𑀼𑀢𑀸𑀤𑀻𑀦𑀁 𑀅𑀪𑀸𑀯𑁂𑀦 𑀅𑀫𑀽𑀮𑀓𑀢𑁆𑀢𑀦𑁆𑀢𑀺 𑀏𑀢𑁆𑀣 𑀬𑁄 𑀤𑀺𑀲𑁆𑀯𑀸𑀧𑀺 ‘‘𑀤𑀺𑀝𑁆𑀞𑁄𑀲𑀺 𑀫𑀬𑀸’’𑀢𑀺 𑀯𑀢𑁆𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄 𑀅𑀢𑁆𑀢𑀦𑁄 𑀤𑀺𑀝𑁆𑀞𑀦𑀺𑀬𑀸𑀫𑁂𑀦𑁂𑀯 ‘‘𑀲𑀼𑀢𑁄𑀲𑀺 𑀫𑀬𑀸’’𑀢𑀺 𑀯𑀤𑀢𑀺. 𑀢𑀲𑁆𑀲 𑀢𑀲𑁆𑀫𑀺𑀁 𑀅𑀲𑀼𑀤𑁆𑀥𑀤𑀺𑀝𑁆𑀞𑀺𑀢𑁆𑀢𑀸 𑀆𑀧𑀢𑁆𑀢𑀺, 𑀇𑀥 𑀧𑀦 𑀬𑁄 𑀧𑀼𑀩𑁆𑀩𑁂 𑀲𑀼𑀢𑁆𑀯𑀸 𑀅𑀦𑀸𑀧𑀢𑁆𑀢𑀺, 𑀧𑀘𑁆𑀙𑀸 𑀢𑀁 𑀯𑀺𑀲𑁆𑀲𑀭𑀺𑀢𑁆𑀯𑀸 𑀲𑀼𑀤𑁆𑀥𑀤𑀺𑀝𑁆𑀞𑀺 𑀏𑀯 𑀲𑀫𑀸𑀦𑁄 𑀯𑀤𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣𑀸𑀢𑀺 𑀅𑀧𑀭𑁂’’𑀢𑀺 𑀯𑀼𑀢𑁆𑀢𑀁. 𑀚𑁂𑀝𑁆𑀞𑀩𑁆𑀩𑀢𑀺𑀓𑁄 𑀓𑀸𑀓𑁂𑀓𑀧𑁆𑀧𑀝𑀺𑀯𑀢𑁆𑀢𑀸. 𑀬𑀤𑀕𑁆𑀕𑁂𑀦𑀸𑀢𑀺 𑀬𑀸𑀯𑀢𑀸, 𑀬𑀤𑀸 𑀯𑀸. 𑀦𑁄 𑀓𑀧𑁆𑀧𑁂𑀢𑀻𑀢𑀺𑀆𑀤𑀺 𑀯𑁂𑀫𑀢𑀺𑀓𑀸𑀪𑀸𑀯𑀤𑀻𑀧𑀦𑀢𑁆𑀣𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀤𑀲𑁆𑀲𑁂𑀢𑀺. 𑀢𑁂𑀦 𑀯𑁂𑀫𑀢𑀺𑀓𑁄𑀯 𑀦𑀲𑁆𑀲𑀭𑀢𑀺 𑀲𑀫𑁆𑀫𑀼𑀝𑁆𑀞𑁄 𑀦𑀸𑀫𑀸𑀢𑀺 𑀆𑀧𑀚𑁆𑀚𑀢𑀺, 𑀢𑀁 𑀦 𑀬𑀼𑀢𑁆𑀢𑀁 𑀢𑀤𑀦𑀦𑁆𑀢𑀭𑀪𑀸𑀯𑀢𑁄, 𑀢𑀲𑁆𑀫𑀸 𑀤𑀼𑀢𑀺𑀬𑀢𑁆𑀣𑁂𑀭𑀯𑀸𑀤𑁄 𑀧𑀘𑁆𑀙𑀸 𑀯𑀼𑀢𑁆𑀢𑁄.

𑁩𑁮𑁯. 𑀲𑀩𑁆𑀩𑀢𑁆𑀣𑀸𑀢𑀺 𑀲𑀩𑁆𑀩𑀅𑀝𑁆𑀞𑀓𑀣𑀸𑀲𑀼. 𑀑𑀓𑀸𑀲𑀓𑀫𑁆𑀫𑀦𑁆𑀢𑀺 𑀑𑀓𑀸𑀲𑀓𑀭𑀡𑀁. ‘‘𑀑𑀓𑀸𑀲𑁂𑀦 𑀓𑀫𑁆𑀫𑀁 𑀑𑀓𑀸𑀲𑀓𑀫𑁆𑀫’’𑀦𑁆𑀢𑀺 𑀮𑀺𑀔𑀺𑀢𑀁. 𑀅𑀲𑀽𑀭𑀺𑀬𑀁 𑀧𑀲𑁆𑀲𑀢𑀺 𑀓𑀜𑁆𑀜𑀸𑀢𑀺 𑀏𑀢𑁆𑀣 𑀬𑀣𑀸 𑀓𑀜𑁆𑀜𑀸 𑀲𑀽𑀭𑀺𑀬𑀁 𑀦 𑀧𑀲𑁆𑀲𑀢𑀻𑀢𑀺 𑀪𑀯𑀢𑀺, 𑀏𑀯𑀁 ‘‘𑀅𑀦𑁄𑀓𑀸𑀲𑀁 𑀓𑀸𑀭𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑁂 𑀑𑀓𑀸𑀲𑀁 𑀦 𑀓𑀸𑀭𑁂𑀢𑁆𑀯𑀸𑀢𑀺 𑀳𑁄𑀢𑀺.

𑀧𑀞𑀫𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀤𑀼𑀢𑀺𑀬𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁯𑁧. 𑀯𑁂𑀴𑀼𑀯𑀦𑁂𑀬𑁂𑀯𑀸𑀢𑀺 𑀇𑀤𑀁 𑀢𑁂𑀳𑀺 𑀯𑀼𑀢𑁆𑀢𑀯𑁂𑀮𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀧𑀼𑀩𑁆𑀩𑁂 𑀫𑀬𑀁 𑀆𑀯𑀼𑀲𑁄 𑀲𑀼𑀢𑁂𑀦 𑀅𑀯𑁄𑀘𑀼𑀫𑁆𑀳𑀸’’𑀢𑀺 ‘‘𑀅𑀫𑁆𑀳𑁂𑀳𑀺 𑀲𑀸 𑀉𑀲𑁆𑀲𑀸𑀳𑀺𑀢𑀸 𑀓𑀼𑀧𑀺𑀢𑁂𑀳𑀺 𑀅𑀦𑀢𑁆𑀢𑀫𑀦𑁂𑀳𑀻’’𑀢𑀺𑀆𑀤𑀺𑀯𑀘𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀅𑀜𑁆𑀜𑀪𑀸𑀕𑀲𑁆𑀲 𑀇𑀤𑀦𑁆𑀢𑀺 𑀫𑀦𑀼𑀲𑁆𑀲𑀪𑀺𑀓𑁆𑀔𑀼𑀪𑀸𑀯𑀢𑁄 𑀅𑀜𑁆𑀜𑀪𑀸𑀕𑀲𑁆𑀲 𑀢𑀺𑀭𑀘𑁆𑀙𑀸𑀦𑀙𑀕𑀮𑀓𑀪𑀸𑀕𑀲𑁆𑀲 𑀇𑀤𑀁 𑀙𑀕𑀮𑀓𑀚𑀸𑀢𑀁 𑀅𑀥𑀺𑀓𑀭𑀡𑀁. 𑀅𑀜𑁆𑀜𑀪𑀸𑀕𑁄 𑀯𑀸 𑀅𑀲𑁆𑀲 𑀅𑀢𑁆𑀣𑀻𑀢𑀺 𑀲𑁄 𑀢𑀺𑀭𑀘𑁆𑀙𑀸𑀦𑀙𑀕𑀮𑀓𑀪𑀸𑀯𑀲𑀗𑁆𑀔𑀸𑀢𑁄 𑀅𑀜𑁆𑀜𑀪𑀸𑀕𑁄 𑀅𑀲𑁆𑀲 𑀙𑀕𑀮𑀓𑀲𑁆𑀲 𑀅𑀢𑁆𑀣𑀻𑀢𑀺 𑀲𑁆𑀯𑀸𑀬𑀁 𑀙𑀕𑀮𑀓𑁄 𑀅𑀜𑁆𑀜𑀪𑀸𑀕𑀺𑀬𑀁 𑀅𑀥𑀺𑀓𑀭𑀡𑀁 𑀦𑀸𑀫.

𑀢𑀢𑁆𑀣 𑀧𑀝𑀺𑀫𑀸𑀬 𑀲𑀭𑀻𑀭𑀁, 𑀲𑀺𑀮𑀸𑀧𑀼𑀢𑁆𑀢𑀓𑀲𑁆𑀲 𑀲𑀭𑀻𑀭𑀦𑁆𑀢𑀺 𑀦𑀺𑀤𑀲𑁆𑀲𑀦𑀁, 𑀧𑀞𑀫𑀁 𑀧𑀦𑁂𑀢𑁆𑀣 𑀦𑀺𑀩𑁆𑀩𑀘𑀦𑀁 𑀚𑀸𑀢𑀺𑀧𑀤𑀢𑁆𑀣𑁄𑀢𑀺𑀯𑀸𑀤𑀻𑀦𑀁 𑀫𑀢𑁂𑀦 𑀯𑀼𑀢𑁆𑀢𑀁. 𑀲𑀸 𑀳𑀺 𑀲𑀸𑀫𑀺𑀪𑀸𑀯𑁂𑀦, 𑀦𑀺𑀘𑁆𑀘𑀪𑀸𑀯𑁂𑀦 𑀘 𑀧𑀥𑀸𑀦𑀢𑁆𑀢𑀸 𑀲𑀢𑁆𑀢𑀺𑀲𑀪𑀸𑀯𑁂 𑀞𑀺𑀢𑀸. 𑀢𑀩𑁆𑀩𑀺𑀧𑀭𑀻𑀢𑀓𑀢𑁆𑀢𑀸 𑀩𑁆𑀬𑀢𑁆𑀢𑀸𑀓𑀢𑀺 𑀚𑀸𑀢𑀺𑀬𑁄 𑀢𑀼 𑀧𑀤𑀢𑁆𑀣𑁄 𑀇𑀢𑀺 𑀇𑀫𑀲𑁆𑀲 𑀲𑀼𑀢𑁆𑀢𑀲𑁆𑀲 𑀯𑀲𑁂𑀦 𑀤𑀼𑀢𑀺𑀬𑀁 𑀦𑀺𑀩𑁆𑀩𑀘𑀦𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀦𑀸𑀫𑀓𑀭𑀡𑀲𑀜𑁆𑀜𑀸𑀬 𑀆𑀥𑀸𑀭𑁄𑀢𑀺 𑀏𑀢𑁆𑀣 𑀦𑀸𑀫𑀫𑁂𑀯 𑀦𑀸𑀫𑀓𑀭𑀡𑀁. 𑀦𑀸𑀫𑀁 𑀓𑀭𑁄𑀦𑁆𑀢𑀸𑀦𑀁 𑀲𑀜𑁆𑀜𑀸 𑀦𑀸𑀫𑀓𑀭𑀡𑀲𑀜𑁆𑀜𑀸, 𑀢𑀲𑁆𑀲𑀸. 𑀫𑀦𑀼𑀲𑁆𑀲𑀚𑀸𑀢𑀺𑀓𑁄 𑀙𑀕𑀮𑀓𑀚𑀸𑀢𑀺𑀆𑀥𑀸𑀭𑁄 𑀦𑀸𑀫. 𑀦 𑀳𑀺 𑀢𑀁 𑀦𑀸𑀫𑀁 𑀓𑀘𑁆𑀙𑀧𑀮𑁄𑀫𑀁 𑀯𑀺𑀬 𑀅𑀦𑀸𑀥𑀸𑀭𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀢𑀁 𑀧𑀦 𑀙𑀕𑀮𑀓𑀲𑁆𑀲 𑀤𑀩𑁆𑀩𑁄𑀢𑀺 𑀤𑀺𑀦𑁆𑀦𑀦𑀸𑀫𑀁 ‘‘𑀤𑁂𑀲𑁄’’𑀢𑀺 𑀯𑀼𑀘𑁆𑀘𑀢𑀺. 𑀢𑀲𑁆𑀫𑀸 𑀣𑁂𑀭𑀁 𑀅𑀫𑀽𑀮𑀓𑁂𑀦𑀸𑀢𑀺𑀆𑀤𑀺𑀦𑀸 𑀅𑀜𑁆𑀜𑀫𑁆𑀧𑀺 𑀯𑀢𑁆𑀣𑀼𑀁 𑀣𑁂𑀭𑀲𑁆𑀲 𑀮𑀺𑀲𑁆𑀲𑀢𑀺 𑀲𑀺𑀮𑀺𑀲𑁆𑀲𑀢𑀺 𑀯𑁄𑀳𑀸𑀭𑀫𑀢𑁆𑀢𑁂𑀦𑁂𑀯, 𑀦 𑀅𑀢𑁆𑀣𑀢𑁄, 𑀈𑀲𑀓𑀁 𑀅𑀮𑁆𑀮𑀻𑀬𑀢𑀻𑀢𑀺 𑀮𑁂𑀲𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀲𑁆𑀫𑀸 𑀤𑁂𑀲𑀮𑁂𑀲𑀸 𑀅𑀢𑁆𑀣𑀢𑁄 𑀦𑀺𑀦𑁆𑀦𑀸𑀦𑀸𑀓𑀭𑀡𑀸, 𑀢𑀲𑁆𑀫𑀸 ‘‘𑀓𑀜𑁆𑀘𑀺𑀤𑁂𑀲𑀁 𑀮𑁂𑀲𑀫𑀢𑁆𑀢𑀁 𑀉𑀧𑀸𑀤𑀸𑀬𑀸’’𑀢𑀺 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀤𑀲 𑀮𑁂𑀲𑀸 𑀚𑀸𑀢𑀺𑀮𑁂𑀲𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀦𑀺𑀤𑀸𑀦𑁂, 𑀏𑀯𑀁 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀫𑁆𑀧𑀺 𑀫𑀸𑀢𑀺𑀓𑀸𑀬𑀫𑁆𑀧𑀺 𑀅𑀬𑀫𑁂𑀯𑀢𑁆𑀣𑁄. 𑀬𑀲𑁆𑀫𑀸 𑀅𑀜𑁆𑀜𑀪𑀸𑀕𑀺𑀬𑀲𑁆𑀲 𑀅𑀥𑀺𑀓𑀭𑀡𑀲𑁆𑀲𑀸𑀢𑀺 𑀙𑀕𑀮𑀓𑀲𑁆𑀲. 𑀓𑀜𑁆𑀘𑀺𑀤𑁂𑀲𑀁 𑀮𑁂𑀲𑀫𑀢𑁆𑀢𑀁 𑀉𑀧𑀸𑀤𑀸𑀬𑀸𑀢𑀺 𑀤𑀩𑁆𑀩𑁄𑀢𑀺 𑀦𑀸𑀫𑀁 𑀉𑀧𑀸𑀤𑀸𑀬𑀸𑀢𑀺 𑀅𑀬𑀫𑀢𑁆𑀣𑁄 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁂𑀦𑁂𑀯 𑀆𑀯𑀺𑀪𑀽𑀢𑁄, 𑀢𑀲𑁆𑀫𑀸 𑀦 𑀯𑀺𑀪𑀢𑁆𑀢𑁄. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑀅𑀦𑀺𑀬𑀫𑀢𑁆𑀢𑀸. 𑀦 𑀳𑀺 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸𑀦𑀁 𑀯𑀺𑀬 𑀲𑀩𑁆𑀩𑁂𑀲𑀫𑁆𑀧𑀺 𑀙𑀕𑀮𑀓𑀫𑁂𑀯 𑀅𑀜𑁆𑀜𑀪𑀸𑀕𑀺𑀬𑀁 𑀅𑀥𑀺𑀓𑀭𑀡𑀁 𑀳𑁄𑀢𑀺. 𑀅𑀜𑁆𑀜𑀁 𑀕𑁄𑀫𑀳𑀺𑀁 𑀲𑀸𑀤𑀺𑀓𑀫𑁆𑀧𑀺 𑀳𑁄𑀢𑀺, 𑀦 𑀘 𑀫𑁂𑀢𑁆𑀢𑀺𑀬𑀪𑀽𑀫𑀚𑀓𑀸 𑀯𑀺𑀬 𑀲𑀩𑁆𑀩𑁂𑀧𑀺 𑀦𑀸𑀫𑀮𑁂𑀲𑀫𑀢𑁆𑀢𑀫𑁂𑀯 𑀉𑀧𑀸𑀤𑀺𑀬𑀦𑁆𑀢𑀺. 𑀅𑀜𑁆𑀜𑀫𑁆𑀧𑀺 𑀚𑀸𑀢𑀺𑀮𑁂𑀲𑀸𑀤𑀺𑀁 𑀉𑀧𑀸𑀤𑀺𑀬𑀦𑁆𑀢𑀺, 𑀢𑀲𑁆𑀫𑀸 𑀅𑀦𑀺𑀬𑀫𑀢𑁆𑀢𑀸 𑀘 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀦 𑀯𑀺𑀪𑀢𑁆𑀢𑀁. 𑀓𑀺𑀜𑁆𑀘 𑀪𑀺𑀬𑁆𑀬𑁄 𑀢𑀣𑀸 𑀯𑀼𑀢𑁆𑀢𑁂 𑀙𑀕𑀮𑀓𑀲𑁆𑀲𑁂𑀯 𑀅𑀜𑁆𑀜𑀪𑀸𑀕𑀺𑀬𑀢𑀸 𑀲𑀫𑁆𑀪𑀯𑀢𑀺, 𑀦 𑀅𑀜𑁆𑀜𑀲𑁆𑀲, 𑀬𑁂𑀦 𑀲𑁄𑀯 𑀤𑀲𑁆𑀲𑀺𑀢𑁄. 𑀮𑁂𑀲𑁄 𑀘 𑀦𑀸𑀫 𑀮𑁂𑀲𑁄𑀯, 𑀦 𑀚𑀸𑀢𑀺𑀆𑀤𑀺, 𑀬𑁂𑀦 𑀲𑁄𑀯 𑀤𑀲𑁆𑀲𑀺𑀢𑁄𑀢𑀺 𑀏𑀯𑀁 𑀫𑀺𑀘𑁆𑀙𑀸𑀕𑀸𑀳𑀧𑁆𑀧𑀲𑀗𑁆𑀕𑀢𑁄 𑀘 𑀢𑀣𑀸 𑀦 𑀯𑀺𑀪𑀢𑁆𑀢𑁄.

𑁩𑁯𑁩. 𑀅𑀜𑁆𑀜𑀪𑀸𑀕𑀺𑀬𑀲𑁆𑀲𑀸𑀢𑀺 𑀘𑀼𑀤𑀺𑀢𑀓𑀢𑁄 𑀅𑀜𑁆𑀜𑀲𑁆𑀲. 𑀅𑀥𑀺𑀓𑀭𑀡𑀲𑁆𑀲𑀸𑀢𑀺 𑀫𑀦𑀼𑀲𑁆𑀲𑀲𑁆𑀲 𑀯𑀸 𑀅𑀫𑀦𑀼𑀲𑁆𑀲𑀲𑁆𑀲 𑀯𑀸 𑀢𑀺𑀭𑀘𑁆𑀙𑀸𑀦𑀕𑀢𑀲𑁆𑀲 𑀯𑀸𑀢𑀺 𑀏𑀯𑀁 𑀯𑀢𑁆𑀢𑀩𑁆𑀩𑀁. 𑀏𑀯𑀜𑁆𑀳𑀺 𑀯𑀼𑀢𑁆𑀢𑁂 𑀫𑀦𑀼𑀲𑁆𑀲𑀸𑀤𑀻𑀦𑀁𑀬𑁂𑀯 𑀚𑀸𑀢𑀺𑀮𑁂𑀲𑀸𑀤𑀬𑁄 𑀯𑀼𑀢𑁆𑀢𑀸 𑀳𑁄𑀦𑁆𑀢𑀺, 𑀅𑀜𑁆𑀜𑀣𑀸 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑀢𑁂 𑀆𑀧𑀚𑁆𑀚𑀦𑁆𑀢𑀺 ‘‘𑀅𑀥𑀺𑀓𑀭𑀡𑀲𑁆𑀲 𑀓𑀜𑁆𑀘𑀺 𑀤𑁂𑀲𑀁 𑀮𑁂𑀲𑀫𑀢𑁆𑀢’’𑀦𑁆𑀢𑀺 𑀲𑀸𑀫𑀺𑀯𑀘𑀦𑀁 𑀧𑀼𑀩𑁆𑀩𑀗𑁆𑀕𑀫𑀁 𑀉𑀤𑁆𑀤𑀺𑀝𑁆𑀞𑀢𑁆𑀢𑀸𑀢𑀺 𑀘𑁂? 𑀦, 𑀦𑀸𑀫𑀲𑁆𑀲 𑀯𑀺𑀬 𑀚𑀸𑀢𑀺𑀆𑀤𑀻𑀦𑀁 𑀫𑀦𑀼𑀲𑁆𑀲𑀸𑀤𑀻𑀦𑀁 𑀆𑀥𑀸𑀭𑀪𑀸𑀯𑀦𑀺𑀬𑀫𑀲𑀫𑁆𑀪𑀯𑀢𑁄, 𑀅𑀥𑀺𑀓𑀭𑀡𑀪𑀸𑀯𑀸𑀦𑀺𑀬𑀫𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀦𑀺𑀬𑀫𑁂 𑀘 𑀲𑀢𑀺 𑀚𑀸𑀢𑀺𑀬𑀸 𑀆𑀥𑀸𑀭𑁄 𑀚𑀸𑀢𑀺, 𑀮𑀺𑀗𑁆𑀕𑀲𑁆𑀲 𑀘 𑀮𑀺𑀗𑁆𑀕𑀁, 𑀆𑀧𑀢𑁆𑀢𑀺𑀬𑀸 𑀘 𑀆𑀧𑀦𑁆𑀦𑁄 𑀆𑀥𑀸𑀭𑁄, 𑀯𑀺𑀭𑀼𑀤𑁆𑀥𑀸𑀦𑀫𑁆𑀧𑀺 𑀅𑀲𑀫𑀸𑀤𑀺𑀦𑁆𑀦𑀸𑀦𑀫𑁆𑀧𑀺 𑀧𑀢𑁆𑀢𑀘𑀻𑀯𑀭𑀸𑀦𑀁 𑀲𑀸𑀫𑀺𑀓𑁄 𑀆𑀥𑀸𑀭𑁄, 𑀬𑁂𑀦 𑀅𑀥𑀺𑀓𑀭𑀡𑀲𑀗𑁆𑀔𑁆𑀬𑀁 𑀕𑀘𑁆𑀙𑁂𑀬𑁆𑀬𑀸𑀢𑀺 𑀆𑀧𑀚𑁆𑀚𑀢𑀻𑀢𑀺 𑀅𑀥𑀺𑀓𑀭𑀡𑀲𑁆𑀲𑀸𑀢𑀺 𑀧𑀤𑀁 𑀅𑀪𑀸𑀚𑁂𑀢𑀩𑁆𑀩𑀫𑁂𑀯 𑀪𑀯𑁂𑀬𑁆𑀬𑀸𑀢𑀺 𑀦 𑀉𑀤𑁆𑀥𑀭𑀺𑀢𑀩𑁆𑀩𑀁 𑀲𑀺𑀬𑀸, 𑀉𑀤𑁆𑀥𑀭𑀺𑀢𑀩𑁆𑀩𑀁. 𑀢𑀲𑁆𑀫𑀸 ‘‘𑀅𑀥𑀺𑀓𑀭𑀡𑀦𑁆𑀢𑀺 𑀯𑀘𑀦𑀲𑀸𑀫𑀜𑁆𑀜𑀢𑁄’’𑀢𑀺𑀆𑀤𑀺 𑀲𑀩𑁆𑀩𑀁 𑀯𑀢𑁆𑀢𑀩𑁆𑀩𑀁. 𑀅𑀧𑀸𑀓𑀝𑀸 𑀇𑀢𑁄 𑀅𑀜𑁆𑀜𑀢𑁆𑀭 𑀤𑀲𑁆𑀲𑀺𑀢𑀝𑁆𑀞𑀸𑀦𑀸𑀪𑀸𑀯𑀢𑁄. 𑀚𑀸𑀦𑀺𑀢𑀩𑁆𑀩𑀸 𑀘 𑀯𑀺𑀦𑀬𑀥𑀭𑁂𑀳𑀺 𑀬𑀲𑁆𑀫𑀸 𑀅𑀜𑁆𑀜𑀣𑀸 𑀧𑀭𑀺𑀯𑀸𑀭𑁂 ‘‘𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀘𑀢𑀼𑀦𑁆𑀦𑀁 𑀅𑀥𑀺𑀓𑀭𑀡𑀸𑀦𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀪𑀚𑀢𑀻’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀦𑀸𑀕𑀢𑀝𑁆𑀞𑀸𑀦𑁂 ‘‘𑀓𑀲𑁆𑀫𑀸’’𑀢𑀺 𑀯𑀼𑀢𑁆𑀢𑁂 𑀓𑀸𑀭𑀡𑀁 𑀦 𑀧𑀜𑁆𑀜𑀸𑀬𑁂𑀬𑁆𑀬, 𑀢𑀲𑁆𑀫𑀸 𑀢𑁂𑀲𑀁 𑀢𑀩𑁆𑀪𑀸𑀕𑀺𑀬𑀢𑀸 𑀘 𑀅𑀜𑁆𑀜𑀪𑀸𑀕𑀺𑀬𑀢𑀸 𑀘 𑀚𑀸𑀦𑀺𑀢𑀩𑁆𑀩𑀸 𑀯𑀺𑀦𑀬𑀥𑀭𑁂𑀳𑀺. 𑀢𑀸𑀲𑀼 𑀳𑀺 𑀯𑀺𑀜𑁆𑀜𑀸𑀢𑀸𑀲𑀼 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀯𑀺𑀯𑀸𑀤𑀸𑀥𑀺𑀓𑀭𑀡𑀁 𑀪𑀚𑀢𑀺. 𑀓𑀲𑁆𑀫𑀸? 𑀢𑀩𑁆𑀪𑀸𑀕𑀺𑀬𑀢𑁆𑀢𑀸. 𑀇𑀢𑀭𑀁 𑀦 𑀪𑀚𑀢𑀺 𑀅𑀜𑁆𑀜𑀪𑀸𑀕𑀺𑀬𑀢𑁆𑀢𑀸𑀢𑀺 𑀲𑀼𑀔𑀓𑀸𑀭𑀡𑀢𑁄 𑀧𑀜𑁆𑀜𑀸𑀬𑀦𑁆𑀢𑀺, 𑀢𑀲𑁆𑀫𑀸 𑀯𑀘𑀦𑀲𑀸𑀫𑀜𑁆𑀜𑀢𑁄 𑀮𑀤𑁆𑀥𑀁 𑀅𑀥𑀺𑀓𑀭𑀡𑀁 𑀦𑀺𑀲𑁆𑀲𑀸𑀬𑀸𑀢𑀺𑀆𑀤𑀺. 𑀢𑀢𑁆𑀣 𑀬𑀲𑁆𑀫𑀸 𑀆𑀧𑀢𑁆𑀢𑀜𑁆𑀜𑀪𑀸𑀕𑀺𑀬𑀁 𑀫𑀳𑀸𑀯𑀺𑀲𑀬𑀁, 𑀇𑀢𑀭𑁂𑀳𑀺 𑀅𑀲𑀤𑀺𑀲𑀦𑀺𑀤𑁆𑀤𑁂𑀲𑀜𑁆𑀘, 𑀢𑀲𑁆𑀫𑀸 𑀢𑀁 𑀅𑀥𑀺𑀓𑀭𑀡𑀧𑀭𑀺𑀬𑀸𑀧𑀦𑁆𑀦𑀫𑁆𑀧𑀺 𑀲𑀫𑀸𑀦𑀁 𑀯𑀺𑀲𑀼𑀁 𑀯𑀼𑀢𑁆𑀢𑀁 ‘‘𑀆𑀧𑀢𑁆𑀢𑀜𑁆𑀜𑀪𑀸𑀕𑀺𑀬𑀁 𑀯𑀸 𑀳𑁄𑀢𑀻’’𑀢𑀺. 𑀅𑀥𑀺𑀓𑀭𑀡𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀘 ‘‘𑀅𑀥𑀺𑀓𑀭𑀡𑀜𑁆𑀜𑀪𑀸𑀕𑀺𑀬𑀁 𑀯𑀸’’𑀢𑀺 𑀏𑀢𑁆𑀣 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣𑀸𑀧𑀺 𑀫𑀳𑀸𑀯𑀺𑀲𑀬𑀢𑁆𑀢𑀸, 𑀫𑀸𑀢𑀺𑀓𑀸𑀬𑀁 𑀆𑀕𑀢𑀢𑁆𑀢𑀸 𑀘 𑀧𑀞𑀫𑀁 𑀅𑀜𑁆𑀜𑀪𑀸𑀕𑀺𑀬𑀢𑀸 𑀯𑀼𑀢𑁆𑀢𑀸, 𑀧𑀘𑁆𑀙𑀸 𑀢𑀩𑁆𑀪𑀸𑀕𑀺𑀬𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑀢𑁆𑀣 𑀬𑀲𑁆𑀫𑀸 𑀅𑀥𑀺𑀓𑀭𑀡𑀜𑁆𑀜𑀪𑀸𑀕𑀺𑀬𑀯𑀘𑀦𑁂𑀦 𑀅𑀢𑁆𑀣𑀸𑀧𑀢𑁆𑀢𑀺𑀦𑀬𑁂𑀦 𑀲𑀺𑀤𑁆𑀥𑀁. 𑀅𑀥𑀺𑀓𑀭𑀡𑀁 𑀢𑀩𑁆𑀪𑀸𑀕𑀺𑀬𑀁, 𑀢𑀲𑁆𑀫𑀸 ‘‘𑀅𑀥𑀺𑀓𑀭𑀡𑀁 𑀢𑀩𑁆𑀪𑀸𑀕𑀺𑀬𑀁 𑀳𑁄𑀢𑀻’’𑀢𑀺 𑀏𑀯𑀁 𑀉𑀤𑁆𑀤𑁂𑀲𑀁 𑀅𑀓𑀢𑁆𑀯𑀸 ‘‘𑀓𑀣𑀁 𑀅𑀥𑀺𑀓𑀭𑀡𑀁 𑀅𑀥𑀺𑀓𑀭𑀡𑀲𑁆𑀲 𑀢𑀩𑁆𑀪𑀸𑀕𑀺𑀬𑀁 𑀳𑁄𑀢𑀻’’𑀢𑀺 𑀧𑀼𑀘𑁆𑀙𑀸𑀧𑀼𑀩𑁆𑀩𑀗𑁆𑀕𑀫𑀦𑀺𑀤𑁆𑀤𑁂𑀲𑁄 𑀓𑀢𑁄. 𑀢𑀢𑁆𑀣𑀸𑀧𑀺 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀅𑀜𑁆𑀜𑀪𑀸𑀕𑀺𑀬𑀢𑀸 𑀓𑀺𑀜𑁆𑀘𑀸𑀧𑀺 𑀧𑀸𑀭𑀸𑀚𑀺𑀓𑁂𑀦 𑀅𑀦𑀼𑀤𑁆𑀥𑀁𑀲𑀺𑀪𑀸𑀥𑀺𑀓𑀸𑀭𑀢𑁆𑀢𑀸 𑀧𑀸𑀭𑀸𑀚𑀺𑀓𑀸𑀦𑀁𑀬𑁂𑀯 𑀯𑀲𑁂𑀦 𑀯𑀼𑀢𑁆𑀢𑀸, 𑀅𑀣 𑀔𑁄 𑀲𑁂𑀲𑀸𑀧𑀢𑁆𑀢𑀺𑀓𑁆𑀔𑀦𑁆𑀥𑀯𑀲𑁂𑀦𑀸𑀧𑀺 𑀯𑁂𑀤𑀺𑀢𑀩𑁆𑀩𑀸. 𑀬𑀸 𑀘 𑀲𑀸 𑀘𑁄𑀤𑀦𑀸 ‘‘𑀅𑀲𑀼𑀓𑁄 𑀦𑀸𑀫 𑀪𑀺𑀓𑁆𑀔𑀼 𑀲𑀗𑁆𑀖𑀸𑀤𑀺𑀲𑁂𑀲𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄 𑀳𑁄𑀢𑀻’’𑀢𑀺𑀆𑀤𑀺𑀓𑀸, 𑀢𑀢𑁆𑀣 ‘‘𑀲𑀗𑁆𑀖𑀸𑀤𑀺𑀲𑁂𑀲𑁂 𑀣𑀼𑀮𑁆𑀮𑀘𑁆𑀘𑀬𑀤𑀺𑀝𑁆𑀞𑀺 𑀳𑁄𑀢𑀺, 𑀤𑀼𑀩𑁆𑀪𑀸𑀲𑀺𑀢𑁂 𑀲𑀗𑁆𑀖𑀸𑀤𑀺𑀲𑁂𑀲𑀤𑀺𑀝𑁆𑀞𑀺 𑀳𑁄𑀢𑀻’’𑀢𑀺 𑀏𑀯𑀫𑀸𑀤𑀺𑀓𑀸 𑀯𑀺𑀦𑀬𑁂 𑀅𑀧𑀓𑀢𑀜𑁆𑀜𑀼𑀢𑀸𑀬, 𑀢𑀁𑀢𑀁𑀯𑀢𑁆𑀣𑀼𑀲𑀭𑀺𑀓𑁆𑀔𑀢𑀸𑀬 𑀯𑀸 𑀯𑀼𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀩𑁆𑀩𑀢𑁆𑀣𑀸𑀧𑀺 ‘‘𑀧𑀸𑀭𑀸𑀚𑀺𑀓𑀤𑀺𑀝𑁆𑀞𑀺 𑀳𑁄𑀢𑀻’’𑀢𑀺 𑀦 𑀯𑀼𑀢𑁆𑀢𑀁. 𑀢𑀣𑀸𑀲𑀜𑁆𑀜𑀺𑀦𑁄 𑀅𑀦𑀸𑀧𑀢𑁆𑀢𑀺𑀢𑁄. ‘‘𑀢𑀩𑁆𑀪𑀸𑀕𑀺𑀬𑀯𑀺𑀘𑀸𑀭𑀡𑀸𑀬’’𑀦𑁆𑀢𑀺 𑀢𑀩𑁆𑀪𑀸𑀕𑀺𑀬𑀧𑀤𑀦𑀺𑀤𑁆𑀤𑁂𑀲𑁂 𑀅𑀜𑁆𑀜𑀪𑀸𑀕𑀺𑀬𑀢𑀸𑀬𑀧𑀺 𑀦𑀺𑀤𑁆𑀤𑀺𑀝𑁆𑀞𑀢𑁆𑀢𑀸 𑀯𑀼𑀢𑁆𑀢𑀁.

𑀯𑀢𑁆𑀣𑀼𑀲𑀪𑀸𑀕𑀢𑀸𑀬𑀸𑀢𑀺 𑀅𑀦𑀼𑀯𑀸𑀤𑀯𑀢𑁆𑀣𑀼𑀲𑀪𑀸𑀕𑀢𑀸𑀬𑀸𑀢𑀺 𑀅𑀢𑁆𑀣𑁄. 𑀅𑀜𑁆𑀜𑀣𑀸 ‘‘𑀘𑀢𑀲𑁆𑀲𑁄 𑀯𑀺𑀧𑀢𑁆𑀢𑀺𑀬𑁄’’𑀢𑀺 𑀯𑀘𑀦𑀁 𑀯𑀺𑀭𑀼𑀚𑁆𑀛𑁂𑀬𑁆𑀬. 𑀲𑀪𑀸𑀯𑀲𑀭𑀺𑀓𑁆𑀔𑀸𑀲𑀭𑀺𑀓𑁆𑀔𑀢𑁄 𑀘𑀸𑀢𑀺 𑀲𑀪𑀸𑀯𑁂𑀦 𑀲𑀤𑀺𑀲𑀸𑀲𑀤𑀺𑀲𑀢𑁄. 𑀢𑀢𑁆𑀣 𑀛𑀸𑀦𑀸𑀤𑀺𑀯𑀢𑁆𑀣𑀼𑀯𑀺𑀲𑀪𑀸𑀕𑀢𑀸𑀬𑀧𑀺 𑀲𑀪𑀸𑀯𑀲𑀭𑀺𑀓𑁆𑀔𑀢𑀸𑀬 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺 𑀢𑀲𑁆𑀲𑁂𑀯 𑀢𑀩𑁆𑀪𑀸𑀕𑀺𑀬𑀸𑀯 𑀳𑁄𑀢𑀺. 𑀢𑀣𑀸 𑀯𑀢𑁆𑀣𑀼𑀯𑀲𑁂𑀦 𑀅𑀦𑀼𑀯𑀸𑀤𑀸𑀥𑀺𑀓𑀭𑀡𑀁, 𑀓𑀺𑀘𑁆𑀘𑀸𑀥𑀺𑀓𑀭𑀡𑀜𑁆𑀘 𑀧𑀸𑀝𑁂𑀓𑁆𑀓𑀁 𑀘𑀢𑀼𑀩𑁆𑀩𑀺𑀥𑀫𑁆𑀧𑀺 𑀯𑀼𑀢𑁆𑀢𑀜𑁆𑀜𑀪𑀸𑀕𑀺𑀬𑀁 𑀦 𑀚𑀸𑀢𑀁, 𑀢𑀲𑁆𑀫𑀸 𑀢𑀤𑀜𑁆𑀜𑀪𑀸𑀕𑀺𑀬𑀢𑀸𑀬 𑀯𑀺𑀤𑀺𑀢𑀸𑀬 𑀢𑀩𑁆𑀪𑀸𑀕𑀺𑀬𑀢𑀸 𑀧𑀸𑀭𑀺𑀬𑁂𑀲𑀬𑀼𑀢𑁆𑀢𑀺𑀬𑀸 𑀅𑀯𑀼𑀢𑁆𑀢𑀸𑀧𑀺 𑀲𑀺𑀚𑁆𑀛𑀢𑀻𑀢𑀺 𑀓𑀢𑁆𑀯𑀸 ‘‘𑀅𑀜𑁆𑀜𑀪𑀸𑀕𑀺𑀬𑀫𑁂𑀯 𑀧𑀞𑀫𑀁 𑀦𑀺𑀤𑁆𑀤𑀺𑀝𑁆𑀞’’𑀦𑁆𑀢𑀺𑀧𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺. 𑀏𑀓𑀁𑀲𑁂𑀦 𑀢𑀩𑁆𑀪𑀸𑀕𑀺𑀬𑀁 𑀦 𑀳𑁄𑀢𑀻𑀢𑀺 𑀲𑀭𑀺𑀓𑁆𑀔𑀯𑀲𑁂𑀦 𑀅𑀭𑀳𑀢𑁆𑀢𑀁 𑀆𑀧𑀢𑁆𑀢𑀺 𑀅𑀦𑀸𑀧𑀢𑁆𑀢𑀻𑀢𑀺 𑀯𑀺𑀯𑀸𑀤𑀲𑀩𑁆𑀪𑀸𑀯𑀢𑁄 𑀅𑀩𑁆𑀬𑀸𑀓𑀢𑀪𑀸𑀯𑁂𑀦 𑀯𑀺𑀯𑀸𑀤𑀸𑀥𑀺𑀓𑀭𑀡𑀲𑁆𑀲𑀧𑀺 𑀅𑀜𑁆𑀜𑀪𑀸𑀕𑀺𑀬𑀁 𑀲𑀺𑀬𑀸, 𑀧𑀸𑀴𑀺𑀬𑀁 𑀆𑀧𑀢𑁆𑀢𑀸𑀥𑀺𑀓𑀭𑀡𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀏𑀯𑀁 𑀯𑀼𑀢𑁆𑀢𑀁, 𑀆𑀤𑀺𑀢𑁄 𑀧𑀝𑁆𑀞𑀸𑀬𑀸𑀢𑀺 ‘‘𑀅𑀜𑁆𑀜𑀪𑀸𑀕𑀺𑀬𑀲𑁆𑀲 𑀅𑀥𑀺𑀓𑀭𑀡𑀲𑁆𑀲𑀸’’𑀢𑀺 𑀇𑀢𑁄 𑀧𑀝𑁆𑀞𑀸𑀬. ‘‘𑀫𑁂𑀣𑀼𑀦𑀭𑀸𑀕𑁂𑀦 𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑁄 𑀤𑁄𑀲𑁂𑀦𑀸𑀢𑀺𑀆𑀤𑀺𑀦𑀸 𑀲𑀭𑀺𑀓𑁆𑀔𑀢𑁄 𑀘𑀸’’𑀢𑀺 𑀮𑀺𑀔𑀺𑀢𑀁. 𑀢𑀁 𑀯𑀢𑁆𑀣𑀼𑀯𑀺𑀲𑀪𑀸𑀕𑀢𑀸𑀬 𑀏𑀯 𑀲𑀺𑀤𑁆𑀥𑀁. 𑀅𑀬𑀁 𑀧𑀦 𑀯𑀢𑁆𑀣𑀼𑀲𑀪𑀸𑀕𑀢𑀸𑀬𑀧𑀺 𑀲𑀢𑀺 𑀆𑀧𑀢𑁆𑀢𑀺𑀲𑀪𑀸𑀕𑀢𑀸 𑀲𑀭𑀺𑀓𑁆𑀔𑀢𑁄𑀢𑀺 𑀦𑁄 𑀢𑀓𑁆𑀓𑁄𑀢𑀺 𑀘, 𑀏𑀓𑀲𑁆𑀫𑀺𑀫𑁆𑀧𑀺 𑀳𑀺 𑀯𑀢𑁆𑀣𑀼𑀲𑁆𑀫𑀺𑀁 𑀆𑀧𑀢𑁆𑀢𑀺𑀪𑁂𑀤𑁄 𑀳𑁄𑀢𑀻𑀢𑀺 𑀆𑀘𑀭𑀺𑀬𑁄. 𑀧𑀭𑀢𑁄 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀲𑀫𑁆𑀩𑀦𑁆𑀥𑁄.

‘‘𑀓𑀺𑀘𑁆𑀘𑀫𑁂𑀯 𑀓𑀺𑀘𑁆𑀘𑀸𑀥𑀺𑀓𑀭𑀡’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀲𑀗𑁆𑀖𑀓𑀫𑁆𑀫𑀸𑀦𑀫𑁂𑀢𑀁 𑀅𑀥𑀺𑀯𑀘𑀦𑀁. 𑀓𑀫𑁆𑀫𑀮𑀓𑁆𑀔𑀡𑀦𑁆𑀢𑀺 𑀓𑀫𑁆𑀫𑀸𑀦𑀁 𑀲𑀪𑀸𑀯𑀁. 𑀢𑀁 𑀦𑀺𑀲𑁆𑀲𑀸𑀬𑀸𑀢𑀺 𑀧𑀼𑀩𑁆𑀩𑁂𑀯 𑀳𑀺 𑀲𑀁𑀯𑀺𑀥𑀸𑀬 𑀲𑀗𑁆𑀖𑁄 𑀓𑀫𑁆𑀫𑀁 𑀓𑀭𑁄𑀢𑀺. 𑀅𑀣 𑀯𑀸 𑀧𑀼𑀭𑀺𑀫𑀁 𑀧𑀼𑀭𑀺𑀫𑀦𑁆𑀢𑀺 𑀧𑀭𑀺𑀯𑀸𑀲𑀉𑀓𑁆𑀔𑁂𑀧𑀦𑀺𑀬𑀸𑀤𑀻𑀦𑀺 𑀲𑀗𑁆𑀖𑀓𑀫𑁆𑀫𑀸𑀦𑀺 𑀦𑀺𑀲𑁆𑀲𑀸𑀬 𑀅𑀩𑁆𑀪𑀸𑀦𑀑𑀲𑀸𑀭𑀡𑀸𑀤𑀺 𑀉𑀧𑁆𑀧𑀦𑁆𑀦𑀦𑁆𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀢𑀲𑁆𑀫𑀸 𑀓𑀺𑀜𑁆𑀘𑀸𑀧𑀺 𑀲𑀗𑁆𑀖𑀓𑀫𑁆𑀫𑀫𑁂𑀯 𑀓𑀺𑀘𑁆𑀘𑀸𑀥𑀺𑀓𑀭𑀡𑀁, 𑀢𑀣𑀸𑀧𑀺 𑀲𑁂𑀲𑀯𑀺𑀲𑁂𑀲𑁄 𑀮𑀩𑁆𑀪𑀢𑀻𑀢𑀺 𑀤𑀲𑁆𑀲𑁂𑀢𑀺.

𑁩𑁯𑁪. 𑀅𑀢𑁆𑀣𑀢𑁄 𑀏𑀓𑀁, 𑀢𑀲𑁆𑀫𑀸 𑀤𑁂𑀲𑀲𑁆𑀲 𑀅𑀢𑁆𑀣𑀫𑀯𑀢𑁆𑀯𑀸 ‘‘𑀮𑁂𑀲𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁 𑀓𑀺𑀭.

𑁩𑁯𑁫. 𑀲𑀯𑀢𑁆𑀣𑀼𑀓𑀁 𑀓𑀢𑁆𑀯𑀸𑀢𑀺 𑀧𑀼𑀕𑁆𑀕𑀮𑀲𑁆𑀲 𑀉𑀧𑀭𑀺 𑀆𑀭𑁄𑀧𑁂𑀢𑁆𑀯𑀸 𑀔𑀢𑁆𑀢𑀺𑀬𑀸𑀤𑀺𑀪𑀸𑀯𑁂𑀦 𑀏𑀓𑀚𑀸𑀢𑀺𑀓𑁄𑀧𑀺 𑀤𑀻𑀖𑀭𑀲𑁆𑀲𑀓𑀸𑀴𑀓𑁄𑀤𑀸𑀢𑀸𑀤𑀻𑀦𑀁 𑀤𑀺𑀝𑁆𑀞𑀲𑀼𑀢𑀧𑀭𑀺𑀲𑀗𑁆𑀓𑀺𑀢𑀸𑀦𑀁 𑀯𑀲𑁂𑀦 𑀅𑀜𑁆𑀜𑀪𑀸𑀕𑀺𑀬𑀢𑀸, 𑀤𑀻𑀖𑀁 𑀔𑀢𑁆𑀢𑀺𑀬𑀁 𑀅𑀚𑁆𑀛𑀸𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 𑀭𑀲𑁆𑀲𑀸𑀤𑀺𑀔𑀢𑁆𑀢𑀺𑀬𑀧𑀜𑁆𑀜𑀢𑁆𑀢𑀺𑀬𑀸 𑀆𑀥𑀸𑀭𑀪𑀸𑀯𑀢𑁄 𑀚𑀸𑀢𑀺𑀮𑁂𑀲𑁂𑀦 𑀘𑁄𑀤𑁂𑀢𑀺, 𑀏𑀓𑀁 𑀯𑀸 𑀔𑀢𑁆𑀢𑀺𑀬𑀁 𑀅𑀚𑁆𑀛𑀸𑀘𑀭𑀦𑁆𑀢𑀁 𑀤𑀺𑀲𑁆𑀯𑀸 𑀢𑀢𑁄 𑀯𑀺𑀲𑀺𑀝𑁆𑀞𑀜𑁆𑀜𑀪𑀸𑀕𑀪𑀽𑀢𑀁 𑀔𑀢𑁆𑀢𑀺𑀬𑀁 𑀚𑀸𑀢𑀺𑀮𑁂𑀲𑀁 𑀕𑀳𑁂𑀢𑁆𑀯𑀸 ‘‘𑀔𑀢𑁆𑀢𑀺𑀬𑁄 𑀤𑀺𑀝𑁆𑀞𑁄 𑀢𑁆𑀯𑀁 𑀔𑀢𑁆𑀢𑀺𑀬𑁄𑀲𑀻’’𑀢𑀺 𑀘𑁄𑀤𑁂𑀢𑀺 𑀤𑀺𑀝𑁆𑀞𑀸𑀤𑀺𑀅𑀜𑁆𑀜𑀪𑀸𑀕𑁂𑀦. 𑀏𑀢𑁆𑀣 𑀘 ‘‘𑀤𑀻𑀖𑀸𑀤𑀬𑁄, 𑀤𑀺𑀝𑁆𑀞𑀸𑀤𑀬𑁄 𑀘 𑀚𑀸𑀢𑀺𑀦𑀸𑀫𑀸𑀤𑀻𑀦𑀁 𑀯𑀢𑁆𑀣𑀼𑀪𑀽𑀢𑀢𑁆𑀢𑀸 𑀅𑀥𑀺𑀓𑀭𑀡’’𑀦𑁆𑀢𑀺 𑀮𑀺𑀔𑀺𑀢𑀁. 𑀢𑀁 ‘‘𑀅𑀥𑀺𑀓𑀭𑀡𑀪𑀸𑀯𑀸𑀦𑀺𑀬𑀫𑀢𑁄’’𑀢𑀺 𑀯𑀼𑀢𑁆𑀢𑀤𑁄𑀲𑀁 𑀦𑀸𑀢𑀺𑀓𑁆𑀓𑀫𑀢𑀺, 𑀅𑀝𑁆𑀞𑀓𑀣𑀸𑀬𑀁 ‘‘𑀔𑀢𑁆𑀢𑀺𑀬𑀚𑀸𑀢𑀺𑀧𑀜𑁆𑀜𑀢𑁆𑀢𑀺𑀬𑀸 𑀆𑀥𑀸𑀭𑀯𑀲𑁂𑀦 𑀅𑀥𑀺𑀓𑀭𑀡𑀢𑀸 𑀘 𑀯𑁂𑀤𑀺𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁. 𑀢𑀫𑁆𑀧𑀺 𑀦𑀸𑀫𑀕𑁄𑀢𑁆𑀢𑀢𑁄 𑀅𑀜𑁆𑀜𑀺𑀲𑁆𑀲𑀸 𑀦𑀸𑀫𑀕𑁄𑀢𑁆𑀢𑀧𑀜𑁆𑀜𑀢𑁆𑀢𑀺𑀬𑀸 𑀦𑀸𑀫 𑀓𑀲𑁆𑀲𑀘𑀺 𑀅𑀪𑀸𑀯𑀢𑁄 𑀦 𑀲𑀩𑁆𑀩𑀲𑀸𑀥𑀸𑀭𑀡𑀁, 𑀢𑀲𑁆𑀫𑀸 ‘‘𑀅𑀥𑀺𑀓𑀭𑀡𑀲𑁆𑀲𑀸’’𑀢𑀺 𑀧𑀤𑀼𑀤𑁆𑀥𑀸𑀭𑀡𑀁 𑀅𑀥𑀺𑀓𑀭𑀡𑀘𑀢𑀼𑀓𑁆𑀓𑀤𑀲𑁆𑀲𑀦𑀢𑁆𑀣𑀁, 𑀢𑀁 𑀲𑀫𑀸𑀦𑀯𑀘𑀦𑀤𑀲𑁆𑀲𑀦𑀢𑁆𑀣𑀦𑁆𑀢𑀺 𑀦𑁄 𑀢𑀓𑁆𑀓𑁄𑀢𑀺. 𑀢𑀢𑁆𑀣 𑀤𑀻𑀖𑀸𑀤𑀺𑀦𑁄 𑀯𑀸 𑀤𑀺𑀝𑁆𑀞𑀸𑀤𑀺𑀦𑁄 𑀯𑀸𑀢𑀺 𑀏𑀢𑁆𑀣 𑀤𑀻𑀖𑀸𑀤𑀺𑀢𑀸, 𑀤𑀺𑀝𑁆𑀞𑀸𑀤𑀺𑀢𑀸 𑀘 𑀅𑀜𑁆𑀜𑀪𑀸𑀕𑁄, 𑀬𑁄 𑀘𑀼𑀤𑀺𑀢𑀓𑁄 𑀇𑀢𑀭𑀲𑁆𑀲 𑀯𑀺𑀲𑁂𑀲𑁄 𑀬𑀢𑁄 𑀅𑀜𑁆𑀜𑁄𑀢𑀺 𑀯𑀼𑀘𑁆𑀘𑀢𑀺.

𑁩𑁯𑁯. 𑀮𑀳𑀼𑀓𑀁 𑀆𑀧𑀢𑁆𑀢𑀺𑀦𑁆𑀢𑀺 𑀧𑀸𑀭𑀸𑀚𑀺𑀓𑀢𑁄 𑀮𑀳𑀼𑀓𑀸𑀧𑀢𑁆𑀢𑀺 𑀲𑀗𑁆𑀖𑀸𑀤𑀺𑀲𑁂𑀲𑀸𑀤𑀺. 𑀢𑁂𑀦𑁂𑀯 𑀅𑀦𑁆𑀢𑁂 𑀢𑀁 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀪𑀺𑀓𑁆𑀔𑀼 𑀲𑀗𑁆𑀖𑀸𑀤𑀺𑀲𑁂𑀲𑀁 𑀅𑀚𑁆𑀛𑀸𑀧𑀚𑁆𑀚𑀦𑁆𑀢𑁄 𑀤𑀺𑀝𑁆𑀞𑁄 𑀳𑁄𑀢𑀻’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀆𑀧𑀢𑁆𑀢𑀺𑀮𑁂𑀲𑁄𑀧𑀺 𑀓𑀺𑀫𑀢𑁆𑀣𑀁 𑀚𑀸𑀢𑀺𑀮𑁂𑀲𑀸𑀤𑀬𑁄 𑀯𑀺𑀬 𑀦 𑀯𑀺𑀢𑁆𑀣𑀸𑀭𑀺𑀢𑁄𑀢𑀺 𑀘𑁂? 𑀢𑀣𑀸 𑀅𑀲𑀫𑁆𑀪𑀯𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁪𑁦𑁦. 𑀲𑀸𑀝𑀓𑀧𑀢𑁆𑀢𑁄 𑀲𑀭𑀻𑀭𑀝𑁆𑀞𑀧𑀢𑁆𑀢𑁄. 𑀆𑀧𑀢𑁆𑀢𑀺𑀬𑀸𑀢𑀺 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀬𑀸 𑀅𑀜𑁆𑀜𑀪𑀸𑀕𑀺𑀬𑀁 𑀲𑀗𑁆𑀖𑀸𑀤𑀺𑀲𑁂𑀲𑀸𑀤𑀺, 𑀅𑀥𑀺𑀓𑀭𑀡𑀜𑁆𑀘 𑀆𑀧𑀢𑁆𑀢𑀺𑀧𑀜𑁆𑀜𑀢𑁆𑀢𑀺𑀬𑀸. ‘‘𑀮𑁂𑀲𑁄 𑀦𑀸𑀫 𑀆𑀧𑀢𑁆𑀢𑀺𑀪𑀸𑀕𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀆𑀧𑀢𑁆𑀢𑀺𑀪𑀸𑀯𑀮𑁂𑀲𑁄 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄, 𑀢𑀲𑁆𑀫𑀸 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀢𑁄 𑀅𑀜𑁆𑀜𑀪𑀸𑀕𑀺𑀬𑀲𑁆𑀲 𑀆𑀧𑀢𑁆𑀢𑀺𑀧𑀜𑁆𑀜𑀢𑁆𑀢𑀺𑀬𑀸 𑀆𑀥𑀸𑀭𑀡𑀝𑁆𑀞𑁂𑀦 ‘‘𑀅𑀥𑀺𑀓𑀭𑀡’’𑀦𑁆𑀢𑀺 𑀲𑀗𑁆𑀔𑁆𑀬𑀁 𑀕𑀢𑀲𑁆𑀲 𑀲𑀗𑁆𑀖𑀸𑀤𑀺𑀲𑁂𑀲𑀸𑀤𑀺𑀦𑁄 𑀆𑀧𑀢𑁆𑀢𑀺𑀦𑀺𑀓𑀸𑀬𑀲𑁆𑀲 𑀆𑀧𑀢𑁆𑀢𑀺𑀪𑀸𑀯𑀮𑁂𑀲𑀁 𑀕𑀳𑁂𑀢𑁆𑀯𑀸 𑀘𑁄𑀤𑀦𑀸 𑀆𑀧𑀢𑁆𑀢𑀺𑀮𑁂𑀲𑀘𑁄𑀤𑀦𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑁪𑁦𑁮. 𑀅𑀦𑀸𑀧𑀢𑁆𑀢𑀺 𑀢𑀣𑀸𑀲𑀜𑁆𑀜𑀻 𑀘𑁄𑀤𑁂𑀢𑀺 𑀯𑀸 𑀘𑁄𑀤𑀸𑀧𑁂𑀢𑀺 𑀯𑀸𑀢𑀺 𑀆𑀧𑀢𑁆𑀢𑀜𑁆𑀜𑀪𑀸𑀕𑀺𑀬𑀘𑁄𑀤𑀦𑀸𑀬𑀫𑁂𑀯, 𑀦 𑀅𑀜𑁆𑀜𑀢𑁆𑀣. 𑀏𑀢𑁆𑀢𑀸𑀯𑀢𑀸 𑀧𑀞𑀫𑀤𑀼𑀝𑁆𑀞𑀤𑁄𑀲𑁂 𑀯𑀼𑀢𑁆𑀢𑀯𑀺𑀘𑀭𑀡𑀸𑀬 𑀲𑀁𑀲𑀦𑁆𑀤𑀺𑀢𑀁 𑀳𑁄𑀢𑀺, 𑀢𑀁 𑀇𑀥 𑀓𑀣𑀁 𑀧𑀜𑁆𑀜𑀸𑀬𑀢𑀻𑀢𑀺 𑀘𑁂? 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀸 𑀯𑀘𑀦𑀢𑁄. 𑀯𑀼𑀢𑁆𑀢𑀜𑁆𑀳𑀺 ‘‘𑀢𑀢𑁆𑀣 𑀇𑀥 𑀘 𑀆𑀧𑀢𑁆𑀢𑀜𑁆𑀜𑀪𑀸𑀕𑀺𑀬𑀘𑁄𑀤𑀦𑀸𑀬 𑀢𑀣𑀸𑀲𑀜𑁆𑀜𑀺𑀦𑁄𑀧𑀺 𑀅𑀦𑀸𑀧𑀢𑁆𑀢𑀻’’𑀢𑀺.

𑀅𑀜𑁆𑀜𑀸𑀪𑀸𑀕𑀺𑀬𑀲𑀺𑀓𑁆𑀔𑀁 𑀬𑁄, 𑀦𑁂𑀯 𑀲𑀺𑀓𑁆𑀔𑀢𑀺 𑀬𑀼𑀢𑁆𑀢𑀺𑀢𑁄. 𑀕𑀘𑁆𑀙𑁂 𑀯𑀺𑀦𑀬𑀯𑀺𑀜𑁆𑀜𑀽𑀳𑀺, 𑀅𑀜𑁆𑀜𑀪𑀸𑀕𑀺𑀬𑀢𑀜𑁆𑀘

𑀲𑁄𑀢𑀺.

𑀤𑀼𑀢𑀺𑀬𑀤𑀼𑀝𑁆𑀞𑀤𑁄𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀧𑀞𑀫𑀲𑀗𑁆𑀖𑀪𑁂𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁦𑁯. ‘‘𑀯𑀚𑁆𑀚𑀁 𑀦 𑀨𑀼𑀲𑁂𑀬𑁆𑀬𑀸’’𑀢𑀺 𑀘 𑀧𑀸𑀞𑁄.

𑁪𑁧𑁦. 𑀢𑁂𑀲𑀁 𑀅𑀦𑀼𑀭𑀽𑀧𑀸𑀚𑀸𑀦𑀦𑀢𑁄 𑀅𑀲𑀩𑁆𑀩𑀜𑁆𑀜𑀽 𑀅𑀲𑁆𑀲. ‘‘𑀦, 𑀪𑀺𑀓𑁆𑀔𑀯𑁂, 𑀅𑀲𑁂𑀦𑀸𑀲𑀦𑀺𑀓𑁂𑀦 𑀯𑀲𑁆𑀲𑀁 𑀉𑀧𑀕𑀦𑁆𑀢𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑁨𑁦𑁪) 𑀯𑀼𑀢𑁆𑀢𑀢𑁆𑀢𑀸 𑀧𑀝𑀺𑀓𑁆𑀔𑀺𑀢𑁆𑀢𑀫𑁂𑀯. 𑀢𑀺𑀓𑁄𑀝𑀺𑀧𑀭𑀺𑀲𑀼𑀤𑁆𑀥𑀦𑁆𑀢𑀺 𑀧𑀭𑀲𑁆𑀲 𑀧𑀸𑀧𑀧𑀲𑀗𑁆𑀕𑀦𑀺𑀯𑀸𑀭𑀡𑀢𑁆𑀣𑀁 𑀯𑀼𑀢𑁆𑀢𑀁, 𑀦 𑀧𑀝𑀺𑀘𑁆𑀘𑀓𑀫𑁆𑀫𑀦𑀺𑀯𑀸𑀭𑀡𑀢𑁆𑀣𑀁 𑀓𑁄𑀝𑀻𑀳𑀻𑀢𑀺 𑀆𑀓𑀸𑀭𑁂𑀳𑀺. 𑀧𑀭𑀺𑀲𑀼𑀤𑁆𑀥𑀦𑁆𑀢𑀺 𑀯𑀺𑀫𑀼𑀢𑁆𑀢𑀁. 𑀤𑀲𑀳𑀺 𑀮𑁂𑀲𑁂𑀳𑀺 𑀉𑀤𑁆𑀤𑀺𑀲𑁆𑀲 𑀓𑀢𑀁 𑀲𑀫𑀡𑀸 𑀧𑀭𑀺𑀪𑀼𑀜𑁆𑀚𑀦𑁆𑀢𑀺, 𑀅𑀲𑁆𑀲𑀫𑀡𑀸 𑀇𑀫𑁂𑀢𑀺 𑀲𑀸𑀲𑀦𑀲𑁆𑀲 𑀕𑀭𑀳𑀪𑀸𑀯𑁄 𑀆𑀕𑀘𑁆𑀙𑁂𑀬𑁆𑀬, 𑀕𑀭𑀳𑀧𑀘𑁆𑀘𑀬𑀸 𑀮𑁄𑀓𑁄 𑀯𑀸 𑀅𑀧𑀼𑀜𑁆𑀜𑀁 𑀅𑀭𑀺𑀬𑀽𑀧𑀯𑀸𑀤𑀁 𑀧𑀲𑀯𑁂𑀬𑁆𑀬, 𑀢𑁂𑀳𑀺 𑀯𑀺𑀫𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀯𑀸𑀕𑀼𑀭𑀦𑁆𑀢𑀺 𑀫𑀺𑀕𑀚𑀸𑀮𑀁. 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀸𑀢𑀺𑀆𑀤𑀺𑀦𑀸 𑀧𑀭𑁂𑀲𑀁 𑀅𑀢𑁆𑀣𑀸𑀬 𑀓𑀢𑁂 𑀓𑀧𑁆𑀧𑀺𑀬𑀪𑀸𑀯𑀁 𑀤𑀲𑁆𑀲𑁂𑀢𑁆𑀯𑀸 𑀪𑀺𑀓𑁆𑀔𑀽𑀦𑀜𑁆𑀘 𑀅𑀜𑁆𑀜𑁂𑀲𑀜𑁆𑀘 𑀅𑀢𑁆𑀣𑀸𑀬 𑀓𑀢𑁂 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀫𑀢𑀸𑀦𑀁 𑀧𑁂𑀢𑀓𑀺𑀘𑁆𑀘𑀢𑁆𑀣𑀸𑀬𑀸’’𑀢𑀺𑀆𑀤𑀺𑀫𑀸𑀳.

𑀬𑀁 𑀬𑀁 𑀳𑀻𑀢𑀺𑀆𑀤𑀺 𑀢𑀲𑁆𑀲 𑀓𑀸𑀭𑀡𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀧𑀼𑀦 𑀧𑀜𑁆𑀘𑀦𑁆𑀦𑀁 𑀲𑀳𑀥𑀫𑁆𑀫𑀺𑀓𑀸𑀦𑀁 𑀅𑀢𑁆𑀣𑀸𑀬 𑀓𑀢𑀁 𑀦 𑀓𑀧𑁆𑀧𑀢𑀻𑀢𑀺 𑀯𑀼𑀢𑁆𑀢𑀦𑁆𑀢𑀺 𑀓𑀺𑀭 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁄. 𑀕𑀡𑁆𑀞𑀺𑀧𑀤𑁂 ‘‘𑀪𑀺𑀓𑁆𑀔𑀽𑀦𑀫𑁂𑀯 𑀲𑀼𑀤𑁆𑀥𑀸𑀦𑀁 𑀅𑀢𑁆𑀣𑀸𑀬 𑀓𑀢𑀁 𑀦 𑀯𑀝𑁆𑀝𑀢𑀻’’𑀢𑀺 𑀮𑀺𑀔𑀺𑀢𑀁. 𑀅𑀧𑀭𑁂𑀳𑀺 𑀧𑀦 ‘‘𑀫𑀢𑀸𑀦𑀁 𑀧𑁂𑀢𑀓𑀺𑀘𑁆𑀘𑀢𑁆𑀣𑀸𑀬𑀸𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀧𑀺 𑀓𑀧𑁆𑀧𑀢𑀺, 𑀪𑀺𑀓𑁆𑀔𑀽𑀦𑀁𑀬𑁂𑀯 𑀅𑀢𑁆𑀣𑀸𑀬𑀸𑀢𑀺 𑀇𑀫𑀺𑀦𑀸 ‘𑀪𑀺𑀓𑁆𑀔𑀽𑀦𑀫𑁆𑀧𑀺 𑀤𑀢𑁆𑀯𑀸 𑀫𑀬𑀁 𑀪𑀼𑀜𑁆𑀚𑀺𑀲𑁆𑀲𑀸𑀫𑀸’𑀢𑀺 𑀓𑀢𑀫𑁆𑀧𑀺 𑀯𑀼𑀢𑁆𑀢𑀁. 𑀧𑀼𑀦 ‘𑀧𑀜𑁆𑀘𑀲𑀼 𑀏𑀓𑀁 𑀉𑀤𑁆𑀤𑀺𑀲𑁆𑀲𑀓𑀢𑀁 𑀇𑀢𑀭𑁂𑀲𑀁 𑀦 𑀓𑀧𑁆𑀧𑀢𑀻’𑀢𑀺 𑀤𑀲𑁆𑀲𑀦𑀢𑁆𑀣𑀁 ‘𑀧𑀜𑁆𑀘𑀲𑀼 𑀳𑀺 𑀲𑀳𑀥𑀫𑁆𑀫𑀺𑀓𑁂𑀲𑀽𑀢𑀺𑀆𑀤𑀺 𑀯𑀼𑀢𑁆𑀢’𑀦𑁆𑀢𑀺 𑀯𑀤𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀢𑀭𑀲𑁆𑀫𑀺𑀁 𑀧𑀦 𑀕𑀡𑁆𑀞𑀺𑀧𑀤𑁂 ‘‘𑀅𑀫𑁆𑀳𑀸𑀓𑀦𑁆𑀢𑀺 𑀘 𑀭𑀸𑀚𑀬𑀼𑀢𑁆𑀢𑀸𑀤𑀻𑀦𑀦𑁆𑀢𑀺 𑀘 𑀯𑀼𑀢𑁆𑀢𑁂 𑀯𑀝𑁆𑀝𑀢𑀻𑀢𑀺 𑀯𑀢𑁆𑀯𑀸 ‘𑀢𑀼𑀫𑁆𑀳𑀸𑀓’𑀦𑁆𑀢𑀺 𑀅𑀯𑀢𑁆𑀯𑀸 ‘𑀧𑁂𑀢𑀓𑀺𑀘𑁆𑀘𑀢𑁆𑀣𑀸𑀬𑀸𑀢𑀺 𑀯𑀼𑀢𑁆𑀢𑁂𑀧𑀺 𑀯𑀝𑁆𑀝𑀢𑀻’𑀢𑀺 𑀘 𑀤𑀲𑁆𑀲𑁂𑀢𑁆𑀯𑀸 𑀲𑀩𑁆𑀩𑀢𑁆𑀣 𑀯𑀼𑀢𑁆𑀢𑀸𑀦𑀁, 𑀆𑀤𑀺𑀲𑀤𑁆𑀤𑁂𑀦 𑀲𑀗𑁆𑀕𑀳𑀺𑀢𑀸𑀦𑀜𑁆𑀘 𑀮𑀓𑁆𑀔𑀡𑀁 𑀞𑀧𑁂𑀦𑁆𑀢𑁂𑀦 ‘𑀪𑀺𑀓𑁆𑀔𑀽𑀦𑀁𑀬𑁂𑀯𑀸’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘𑀪𑀺𑀓𑁆𑀔𑀽𑀦𑀁 𑀉𑀤𑁆𑀤𑀺𑀝𑁆𑀞𑁂 𑀏𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁂𑀦𑀸’𑀢𑀺 𑀯𑀼𑀢𑁆𑀢𑀁. 𑀦 ‘𑀢𑀼𑀫𑁆𑀳𑀸𑀓𑀁, 𑀅𑀫𑁆𑀳𑀸𑀓𑀜𑁆𑀘𑀸𑀢𑀺 𑀯𑀼𑀢𑁆𑀢𑁂 𑀅𑀦𑀸𑀧𑀢𑁆𑀢𑀻’𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀓𑀲𑁆𑀫𑀸? 𑀫𑀺𑀲𑁆𑀲𑀓𑀯𑀸𑀭𑀲𑁆𑀲 𑀅𑀪𑀸𑀯𑀸. 𑀮𑀓𑁆𑀔𑀡𑀁 𑀦𑀸𑀫 𑀯𑀼𑀢𑁆𑀢𑀸𑀦𑀁, 𑀯𑀼𑀢𑁆𑀢𑀲𑀤𑀺𑀲𑀸𑀦𑀜𑁆𑀘 𑀳𑁄𑀢𑀺. ‘𑀲𑀘𑁂 𑀧𑁂𑀢𑀓𑀺𑀘𑁆𑀘𑀢𑁆𑀣𑀸𑀬𑀸𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑁂 𑀪𑀺𑀓𑁆𑀔𑀽𑀦𑀁 𑀪𑁄𑀚𑀦𑀁 𑀲𑀦𑁆𑀥𑀸𑀬 𑀓𑀭𑁄𑀦𑁆𑀢𑀻’𑀢𑀺 𑀯𑀤𑀦𑁆𑀢𑀺 𑀫𑀳𑀸𑀅𑀝𑁆𑀞𑀓𑀣𑀸𑀬𑀜𑁆𑀘 ‘𑀢𑀲𑁆𑀫𑀺𑀁 𑀯𑀸𑀭𑁂 𑀘 𑀦 𑀢𑀼𑀫𑁆𑀳𑀸𑀓𑀦𑁆𑀢𑀺 𑀯𑀼𑀢𑁆𑀢𑁂 𑀯𑀝𑁆𑀝𑀢𑀻’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀢𑁂𑀦𑁂𑀯 𑀇𑀥𑀸𑀧𑀺 ‘𑀧𑁂𑀢𑀓𑀺𑀘𑁆𑀘𑀢𑁆𑀣𑀸𑀬, 𑀫𑀗𑁆𑀕𑀮𑀸𑀤𑀻𑀦𑀁 𑀯𑀸 𑀅𑀢𑁆𑀣𑀸𑀬 𑀓𑀢𑁂𑀧𑀺 𑀏𑀲𑁂𑀯 𑀦𑀬𑁄’𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀢𑁆𑀣𑀯𑀲𑁂𑀦 𑀯𑀼𑀢𑁆𑀢𑀁. ‘𑀅𑀯𑀥𑀸𑀭𑀡𑀢𑁆𑀣𑁂𑀦 𑀫𑀺𑀲𑁆𑀲𑀓𑁂 𑀯𑀝𑁆𑀝𑀢𑀻’𑀢𑀺 𑀘𑁂? ‘𑀓𑀧𑁆𑀧𑀺𑀬𑀫𑀁𑀲𑀲𑁆𑀲 𑀳𑀺 𑀧𑀝𑀺𑀕𑁆𑀕𑀳𑀡𑁂 𑀆𑀧𑀢𑁆𑀢𑀺 𑀦𑀢𑁆𑀣𑀻’𑀢𑀺 𑀯𑀘𑀦𑁂𑀦 𑀅𑀓𑀧𑁆𑀧𑀺𑀬𑀧𑀝𑀺𑀕𑁆𑀕𑀳𑀡𑁂 𑀆𑀧𑀢𑁆𑀢𑀻𑀢𑀺 𑀆𑀧𑀦𑁆𑀦𑀁, ‘𑀢𑀜𑁆𑀘 𑀕𑀳𑁂𑀢𑀩𑁆𑀩𑀁 𑀲𑀺𑀬𑀸’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀲𑀼𑀦𑁆𑀤𑀭𑀁 𑀯𑀺𑀬 𑀤𑀺𑀲𑁆𑀲𑀢𑀺, 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀬𑀢𑁆𑀣 𑀘𑀸𑀢𑀺 𑀪𑀺𑀓𑁆𑀔𑀽𑀦𑀁 𑀅𑀢𑁆𑀣𑀸𑀬 𑀓𑀢𑁂𑀧𑀺. 𑀢𑀫𑀢𑁆𑀣𑀁 𑀆𑀯𑀺 𑀓𑀸𑀢𑀼𑀁 ‘‘𑀲𑀘𑁂 𑀧𑀦𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀧𑀦 ‘‘𑀪𑀺𑀓𑁆𑀔𑀼𑀦𑀻𑀦𑀁 𑀤𑀼𑀓𑁆𑀓𑀝𑀁, 𑀇𑀢𑀭𑁂𑀲𑀁 𑀤𑀡𑁆𑀟𑀓𑀫𑁆𑀫𑀯𑀢𑁆𑀣𑀽’’𑀢𑀺 𑀯𑀤𑀦𑁆𑀢𑀺. 𑀓𑀧𑁆𑀧𑀁 𑀦𑀺𑀭𑀬𑀫𑁆𑀳𑀻𑀢𑀺 𑀅𑀲𑀗𑁆𑀔𑁆𑀬𑁂𑀬𑁆𑀬𑀓𑀧𑁆𑀧𑀁. 𑀯𑀺𑀯𑀝𑁆𑀝𑀝𑁆𑀞𑀸𑀬𑀺𑀓𑀸𑀮𑁂𑀬𑁂𑀯 𑀲𑀗𑁆𑀖𑀪𑁂𑀤𑁄 𑀳𑁄𑀢𑀻𑀢𑀺. 𑀓𑀧𑁆𑀧𑀦𑁆𑀢𑀺 𑀆𑀬𑀼𑀓𑀧𑁆𑀧𑀁.

𑁪𑁧𑁧. 𑀓𑀼𑀲𑀮𑀦𑁆𑀢𑀺 𑀔𑁂𑀫𑀁. 𑀆𑀧𑀢𑁆𑀢𑀺𑀪𑀬𑀸 𑀓𑀢𑀸 𑀮𑀚𑁆𑀚𑀻𑀳𑀻𑀢𑀺 𑀏𑀢𑁆𑀣 𑀆𑀧𑀢𑁆𑀢𑀺𑀪𑀬𑁂𑀦 𑀅𑀯𑀲𑁆𑀲𑀁 𑀆𑀭𑁄𑀘𑁂𑀦𑁆𑀢𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀮𑀚𑁆𑀚𑀻 𑀭𑀓𑁆𑀔𑀺𑀲𑁆𑀲𑀢𑀻’’𑀢𑀺 (𑀯𑀺𑀲𑀼𑀤𑁆𑀥𑀺. 𑁧.𑁪𑁨; 𑀧𑀸𑀭𑀸. 𑀅𑀝𑁆𑀞. 𑁧.𑁪𑁫) 𑀧𑁄𑀭𑀸𑀡𑀯𑀘𑀦𑀲𑁆𑀲𑀸𑀦𑀼𑀭𑀽𑀧𑀢𑁄 ‘‘𑀅𑀜𑁆𑀜𑁂𑀳𑀺 𑀮𑀚𑁆𑀚𑀻𑀳𑀻’’𑀢𑀺 𑀯𑀼𑀢𑁆𑀢𑀁. 𑀅𑀮𑀚𑁆𑀚𑀺𑀲𑁆𑀲𑀧𑀺 𑀅𑀦𑀸𑀭𑁄𑀘𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀬𑁂𑀯 ‘‘𑀬𑁂 𑀧𑀲𑁆𑀲𑀦𑁆𑀢𑀺 𑀬𑁂 𑀲𑀼𑀡𑀦𑁆𑀢𑀻’’𑀢𑀺 𑀯𑀘𑀦𑀢𑁄.

𑁪𑁧𑁬. 𑀅𑀲𑀫𑀦𑀼𑀪𑀸𑀲𑀦𑁆𑀢𑀲𑁆𑀲𑀸𑀢𑀺 𑀓𑀫𑁆𑀫𑀓𑀸𑀭𑀓𑁂 𑀓𑀢𑁆𑀢𑀼𑀦𑀺𑀤𑁆𑀤𑁂𑀲𑁄, 𑀲𑀫𑀦𑀼𑀪𑀸𑀲𑀦𑀓𑀫𑁆𑀫𑀁 𑀅𑀓𑀭𑀺𑀬𑀫𑀸𑀦𑀲𑁆𑀲𑀸𑀢𑀺 𑀅𑀢𑁆𑀣𑁄. 𑀑𑀤𑀺𑀲𑁆𑀲 𑀅𑀦𑀼𑀜𑁆𑀜𑀸𑀢𑁄 𑀦𑀸𑀫 𑀉𑀫𑁆𑀫𑀢𑁆𑀢𑀓𑀔𑀺𑀢𑁆𑀢𑀘𑀺𑀢𑁆𑀢𑀯𑁂𑀤𑀦𑀝𑁆𑀝𑀸𑀤𑀺𑀓𑁄 ‘‘𑀅𑀦𑀸𑀧𑀢𑁆𑀢𑀺 𑀆𑀤𑀺𑀓𑀫𑁆𑀫𑀺𑀓𑀲𑁆𑀲𑀸’’𑀢𑀺 𑀅𑀭𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑁂 𑀆𑀕𑀢𑀢𑁆𑀢𑀸 𑀅𑀢𑁆𑀣𑀻𑀢𑀺 𑀘𑁂? 𑀬𑀫𑁆𑀧𑀻𑀢𑀺𑀆𑀤𑀺. 𑀲𑀸 𑀧𑀦𑁂𑀲𑀸 𑀅𑀦𑀸𑀧𑀢𑁆𑀢𑀺. 𑀲𑁄 𑀯𑀼𑀘𑁆𑀘𑀢𑀻𑀢𑀺 𑀢𑀢𑁆𑀣 𑀆𑀕𑀢𑁄𑀧𑀺 𑀲𑀓𑀫𑁆𑀫𑀩𑁆𑀬𑀸𑀯𑀝𑁄𑀧𑀺 𑀏𑀯𑀁 𑀯𑀼𑀘𑁆𑀘𑀢𑀺. 𑀏𑀢𑁂𑀦𑀼𑀧𑀸𑀬𑁂𑀦𑀸𑀢𑀺 𑀅𑀲𑀫𑀦𑀼𑀪𑀸𑀲𑀦𑁆𑀢𑀲𑁆𑀲 𑀘 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀘 𑀯𑀼𑀢𑁆𑀢𑀢𑁆𑀣𑀯𑀲𑁂𑀦. 𑀞𑀧𑁂𑀢𑁆𑀯𑀸 𑀅𑀭𑀺𑀝𑁆𑀞𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀢𑀢𑁆𑀣 𑀆𑀤𑀺𑀓𑀫𑁆𑀫𑀺𑀓𑀧𑀤𑀸𑀪𑀸𑀯𑀸.

𑀢𑀺𑀯𑀗𑁆𑀕𑀺𑀓𑀦𑁆𑀢𑀺 𑀏𑀢𑁆𑀣 𑀯𑀸𑀘𑀸𑀬 𑀏𑀯 𑀧𑀝𑀺𑀦𑀺𑀲𑁆𑀲𑀚𑁆𑀚𑀦𑁆𑀢𑀲𑁆𑀲 𑀑𑀝𑁆𑀞𑀘𑀮𑀦𑀸𑀤𑀺𑀓𑀸𑀬𑀯𑀺𑀜𑁆𑀜𑀢𑁆𑀢𑀺 𑀳𑁄𑀢𑀺, 𑀢𑀲𑁆𑀫𑀸 𑀤𑀼𑀯𑀺𑀥𑀫𑁆𑀧𑀺 𑀯𑀺𑀜𑁆𑀜𑀢𑁆𑀢𑀺𑀁 𑀓𑀣𑁂𑀦𑁆𑀢𑀲𑁆𑀲 𑀳𑁄𑀢𑀺. 𑀯𑀘𑀻𑀪𑁂𑀤𑀁 𑀓𑀸𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀓𑀸𑀬𑀯𑀺𑀓𑀸𑀭𑀁 𑀓𑀭𑁄𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺𑀬𑀸 𑀪𑀯𑀺𑀢𑀩𑁆𑀩𑀁. 𑀓𑀲𑁆𑀫𑀸? 𑀢𑀺𑀯𑀗𑁆𑀕𑁂𑀲𑀼 𑀏𑀓𑀲𑁆𑀲 𑀧𑀭𑀺𑀳𑀻𑀦𑀢𑁆𑀢𑀸, 𑀢𑀲𑁆𑀫𑀸 𑀢𑀺𑀯𑀗𑁆𑀕𑀪𑀸𑀯𑁄 𑀆𑀧𑀢𑁆𑀢𑀺𑀬𑀸, 𑀅𑀗𑁆𑀕𑀳𑀸𑀦𑀺𑀪𑀸𑀯𑁄 𑀅𑀦𑀸𑀧𑀢𑁆𑀢𑀺𑀬𑀸𑀢𑀺 𑀕𑀳𑁂𑀢𑀩𑁆𑀩𑀁. 𑀏𑀢𑁆𑀣 𑀲𑀺𑀬𑀸 𑁋 𑀬𑀤𑀺 𑀅𑀗𑁆𑀕𑀳𑀸𑀦𑀺𑀪𑀸𑀯𑁂𑀦 𑀅𑀦𑀸𑀧𑀢𑁆𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀯𑀺𑀓𑀸𑀭𑀁 𑀅𑀓𑀢𑁆𑀯𑀸 𑀘𑀺𑀢𑁆𑀢𑁂𑀦𑁂𑀯 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺𑀬𑀸 𑀪𑀯𑀺𑀢𑀩𑁆𑀩𑀦𑁆𑀢𑀺? 𑀢𑀁 𑀦, 𑀓𑀲𑁆𑀫𑀸? 𑀅𑀝𑁆𑀞𑀓𑀣𑀸𑀬𑀁 ‘‘𑀓𑀸𑀬𑀯𑀺𑀓𑀸𑀭𑀁 𑀯𑀸 𑀯𑀘𑀻𑀪𑁂𑀤𑀁 𑀯𑀸 𑀅𑀓𑀭𑁄𑀦𑁆𑀢𑀲𑁆𑀲𑁂𑀯 𑀧𑀦 𑀆𑀧𑀚𑁆𑀚𑀦𑀢𑁄 𑀅𑀓𑀺𑀭𑀺𑀬’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁, ‘‘𑀘𑀺𑀢𑁆𑀢𑀁 𑀯𑀸 𑀅𑀦𑀼𑀧𑁆𑀧𑀸𑀤𑁂𑀦𑁆𑀢𑀲𑁆𑀲 𑀯𑀸’’𑀢𑀺 𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀘𑀺𑀢𑁆𑀢𑀜𑁆𑀘 𑀦𑀸𑀫 𑀯𑀺𑀜𑁆𑀜𑀢𑁆𑀢𑀺𑀧𑀝𑀺𑀩𑀤𑁆𑀥𑀁 𑀏𑀯𑀸𑀢𑀺 𑀯𑀺𑀲𑀼𑀁 𑀅𑀗𑁆𑀕𑀪𑀸𑀯𑁂𑀦𑁂𑀯 𑀯𑀼𑀢𑁆𑀢𑀢𑁆𑀢𑀸 𑀚𑀸𑀦𑀺𑀢𑀩𑁆𑀩𑀦𑁆𑀢𑀺 𑀘𑁂? 𑀢𑀁 𑀦, 𑀤𑁆𑀯𑀺𑀦𑁆𑀦𑀁𑀬𑁂𑀯 𑀅𑀓𑀺𑀭𑀺𑀬𑀸𑀢𑀺, 𑀢𑀲𑁆𑀫𑀸 𑀘𑀺𑀢𑁆𑀢𑁂𑀦 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀲𑁆𑀲𑀸𑀧𑀺 𑀆𑀧𑀢𑁆𑀢𑀺 𑀯𑀺𑀬 𑀤𑀺𑀲𑁆𑀲𑀢𑀺, 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀢𑀢𑁆𑀣 ‘‘𑀅𑀓𑀼𑀲𑀮𑀘𑀺𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀘𑁂? ‘‘𑀘𑀺𑀢𑁆𑀢𑀩𑀸𑀳𑀼𑀮𑁆𑀮𑀢𑁄 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀢𑁂𑀧𑀺 𑀓𑀺𑀭 𑀩𑀸𑀳𑀼𑀮𑁆𑀮𑀢𑁄 𑀯𑀤𑀦𑁆𑀢𑀺.

𑀧𑀞𑀫𑀲𑀗𑁆𑀖𑀪𑁂𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁧. 𑀤𑀼𑀢𑀺𑀬𑀲𑀗𑁆𑀖𑀪𑁂𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁨𑁨. 𑀲𑀜𑁆𑀜𑀻𑀢𑀺 𑀲𑀜𑁆𑀜𑀺𑀦𑁄.

𑀤𑀼𑀢𑀺𑀬𑀲𑀗𑁆𑀖𑀪𑁂𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁨. 𑀤𑀼𑀩𑁆𑀩𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁨𑁪. 𑀧𑀢𑀁 𑀧𑀢𑀺𑀢𑀁 𑀯𑀺𑀯𑀭𑀺 𑀯𑀺𑀯𑀝𑁆𑀝𑀬𑀺. 𑀏𑀓𑀢𑁄 𑀉𑀲𑁆𑀲𑀸𑀭𑁂𑀢𑀺 𑀘 𑀕𑀺𑀴𑀺𑀢𑀢𑁄 𑀞𑀧𑁂𑀢𑀺 𑀘. 𑀏𑀓𑀧𑀁𑀲𑀼𑀣𑀼𑀧𑀓𑀦𑀤𑀻𑀲𑀗𑁆𑀔𑀁 𑀤𑀻𑀖𑀫𑀽𑀮𑀓𑀧𑀡𑁆𑀡𑀲𑁂𑀯𑀸𑀮𑀁 𑀲𑁂𑀯𑀸𑀮𑀁 𑀤𑀡𑁆𑀟𑀺𑀲𑀺𑀧𑀺𑀧𑁆𑀧𑀭𑀺𑀁 𑀧𑀡𑀓𑀁 𑀧𑁂𑀲𑀺𑀝𑁆𑀞𑀺𑀁 𑀦𑀺𑀲𑁆𑀲𑀸𑀭𑁂𑀢𑀺. 𑀢𑀺𑀮𑀩𑀻𑀚𑀓𑀦𑁆𑀢𑀺 𑀲𑀼𑀔𑀼𑀫𑀫𑀽𑀮𑀧𑀡𑁆𑀡𑀓𑀁 𑀳𑀼𑀢𑁆𑀯𑀸 𑀉𑀤𑀓𑀧𑀺𑀝𑁆𑀞𑁂 𑀧𑀢𑁆𑀣𑀭𑀺𑀓𑀁 𑀉𑀤𑀓𑀧𑀧𑁆𑀧𑀝𑀓𑀁 𑀦𑀺𑀲𑁆𑀲𑀸𑀭𑁂𑀢𑀺.

𑁪𑁨𑁫-𑁬. ‘‘𑀤𑀼𑀩𑁆𑀩𑀘𑁆𑀘𑀚𑀸𑀢𑀺𑀓𑁄’’𑀢𑀺𑀧𑀺 𑀧𑀞𑀦𑁆𑀢𑀺. 𑀅𑀧𑀤𑀸𑀦𑁂𑀦𑀸𑀢𑀺 𑀧𑀼𑀭𑀸𑀡𑀓𑀫𑁆𑀫𑁂𑀦. ‘‘𑀓𑀺𑀁 𑀧𑀼𑀩𑁆𑀩𑁂𑀧𑀺 𑀫𑀬𑀁 𑀏𑀯𑀭𑀽𑀧𑀁 𑀓𑀭𑁄𑀫𑀸𑀢𑀺𑀆𑀤𑀺𑀦𑀸 𑀏𑀓𑀽𑀦𑀯𑀻𑀲𑀢𑀻’’𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀁 𑀓𑀺𑀭 𑀯𑀼𑀢𑁆𑀢𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀜𑁆𑀘 𑀅𑀦𑀼𑀫𑀸𑀦𑀲𑀼𑀢𑁆𑀢𑀝𑁆𑀞𑀓𑀣𑀸𑀬𑀜𑁆𑀘 ‘‘𑀲𑁄𑀴𑀲𑀯𑀢𑁆𑀣𑀼𑀓𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀲𑀫𑁂𑀢𑀺.

𑀤𑀼𑀩𑁆𑀩𑀘𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁩. 𑀓𑀼𑀮𑀤𑀽𑀲𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁩𑁧. 𑀦 𑀓𑁂𑀯𑀮𑀁 𑀯𑀺𑀳𑀸𑀭𑁄 𑀏𑀯 𑀓𑀻𑀝𑀸𑀕𑀺𑀭𑀺, 𑀲𑁄𑀧𑀺 𑀕𑀸𑀫𑁄 ‘‘𑀓𑀻𑀝𑀸𑀕𑀺𑀭𑀺’’𑀘𑁆𑀘𑁂𑀯 𑀯𑀼𑀘𑁆𑀘𑀢𑀺. 𑀕𑀸𑀫𑀜𑁆𑀳𑀺 𑀲𑀦𑁆𑀥𑀸𑀬 𑀧𑀭𑀢𑁄 ‘‘𑀦 𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀓𑀻𑀝𑀸𑀕𑀺𑀭𑀺𑀲𑁆𑀫𑀺𑀁 𑀯𑀢𑁆𑀣𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀓𑀲𑀁𑀯𑀘𑁆𑀙𑀭𑁂 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀲𑁆𑀲𑀢𑀺 𑀓𑀺𑀭, 𑀢𑀁 𑀲𑀦𑁆𑀥𑀸𑀬 ‘‘𑀤𑁆𑀯𑀻𑀳𑀺 𑀫𑁂𑀖𑁂𑀳𑀻’’𑀢𑀺 𑀯𑀼𑀢𑁆𑀢𑀁. 𑀲𑀫𑀥𑀺𑀓𑀦𑁆𑀢𑀺 𑀙 𑀚𑀦𑁂 𑀲𑀦𑁆𑀥𑀸𑀬. 𑀅𑀓𑀢𑀯𑀢𑁆𑀣𑀼𑀦𑁆𑀢𑀺 𑀦𑀯𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁. ‘‘𑀚𑀸𑀪𑀺𑀲𑀼𑀫𑀦𑀸𑀤𑀺𑀕𑀘𑁆𑀙𑀁 𑀅𑀮𑁆𑀮𑀸𑀦𑀁 𑀳𑀭𑀺𑀢𑀸𑀦𑀁 𑀏𑀯𑀸’’𑀢𑀺 𑀮𑀺𑀔𑀺𑀢𑀁. 𑀪𑀽𑀢𑀕𑀸𑀫𑀩𑀻𑀚𑀕𑀸𑀫𑀪𑁂𑀤𑀢𑁄 𑀧𑀦𑁂𑀲 𑀪𑁂𑀤𑁄. 𑀯𑀢𑀢𑁆𑀣𑀸𑀬𑀸𑀢𑀺 𑀯𑀢𑀺𑀅𑀢𑁆𑀣𑀸𑀬. 𑀬𑀁𑀓𑀺𑀜𑁆𑀘𑀻𑀢𑀺 𑀲𑁄𑀤𑀓𑀁 𑀯𑀸 𑀦𑀺𑀭𑀼𑀤𑀓𑀁 𑀯𑀸. 𑀆𑀭𑀸𑀫𑀸𑀤𑀺𑀅𑀢𑁆𑀣𑀸𑀬𑀸𑀢𑀺 𑀯𑀦𑀭𑀸𑀚𑀺𑀓𑀸𑀤𑀺𑀅𑀢𑁆𑀣𑀸𑀬. 𑀫𑀸𑀮𑀸𑀯𑀘𑁆𑀙𑀭𑁄𑀧𑀦𑀁 𑀓𑀼𑀮𑀤𑀽𑀲𑀓𑀁𑀬𑁂𑀯 𑀲𑀦𑁆𑀥𑀸𑀬, 𑀕𑀦𑁆𑀣𑀦𑀸𑀤𑀺𑀲𑀩𑁆𑀩𑀁 𑀦 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺. 𑀓𑀣𑀁 𑀧𑀜𑁆𑀜𑀸𑀬𑀢𑀻𑀢𑀺 𑀘𑁂? 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀩𑀼𑀤𑁆𑀥𑁂𑀦 𑀥𑀫𑁆𑀫𑁄’’𑀢𑀺𑀆𑀤𑀺. ‘‘𑀆𑀯𑁂𑀴𑀁 𑀆𑀩𑀺𑀴’’𑀦𑁆𑀢𑀺𑀧𑀺 𑀧𑀸𑀞𑁄.

𑀕𑁄𑀧𑁆𑀨𑀦𑀦𑁆𑀢𑀺 𑀕𑀦𑁆𑀣𑀦𑀁. 𑀯𑁂𑀞𑀺𑀫𑀦𑁆𑀢𑀺 𑀢𑀕𑁆𑀕𑀢𑀺𑀓𑀫𑁂𑀯. 𑀯𑁂𑀥𑀺𑀫𑀁 𑀅𑀜𑁆𑀜𑁂𑀦 𑀓𑁂𑀦𑀘𑀺 𑀧𑀼𑀧𑁆𑀨𑀁 𑀯𑁂𑀥𑁂𑀢𑁆𑀯𑀸 𑀓𑀢𑀁. 𑀓𑀡𑁆𑀝𑀓𑀫𑁆𑀧𑀺 𑀩𑀦𑁆𑀥𑀺𑀢𑀼𑀦𑁆𑀢𑀺 𑀏𑀢𑁆𑀣 ‘‘𑀲𑀬𑀁 𑀯𑀺𑀚𑁆𑀛𑀦𑀢𑁆𑀣𑀁 𑀦 𑀯𑀝𑁆𑀝𑀢𑀺. 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀚𑀸𑀮𑀫𑀬𑀁 𑀯𑀺𑀢𑀸𑀦𑀁 𑀚𑀸𑀮𑀯𑀺𑀢𑀸𑀦𑀁. 𑀧𑀼𑀧𑁆𑀨𑀧𑀝𑀺𑀘𑁆𑀙𑀓𑀁 𑀕𑀯𑀓𑁆𑀔𑀁 𑀯𑀺𑀬 𑀲𑀙𑀺𑀤𑁆𑀤𑀁 𑀓𑀭𑁄𑀦𑁆𑀢𑀺. 𑀢𑀸𑀮𑀧𑀡𑁆𑀡𑀕𑀼𑀴𑀓𑀦𑁆𑀢𑀺 𑀢𑀸𑀮𑀧𑀡𑁆𑀡𑀫𑀬𑀁 𑀧𑀼𑀦 𑀓𑀢𑀫𑁆𑀧𑀺 𑀧𑀝𑀺𑀙𑀺𑀚𑁆𑀚𑀓𑀫𑁂𑀯. 𑀥𑀫𑁆𑀫𑀭𑀚𑁆𑀚𑀼 𑀘𑁂𑀢𑀺𑀬𑀁 𑀯𑀸 𑀩𑁄𑀥𑀺𑀁 𑀯𑀸 𑀧𑀼𑀧𑁆𑀨𑀧𑁆𑀧𑀯𑁂𑀲𑀦𑀢𑁆𑀣𑀁 𑀆𑀯𑀺𑀚𑁆𑀛𑀺𑀢𑁆𑀯𑀸 𑀩𑀤𑁆𑀥𑀭𑀚𑁆𑀚𑀼. ‘‘𑀓𑀸𑀲𑀸𑀯𑁂𑀦 𑀩𑀤𑁆𑀥𑀫𑁆𑀧𑀺 𑀲𑀼𑀢𑁆𑀢𑀯𑀸𑀓𑀸𑀤𑀻𑀳𑀺 𑀩𑀤𑁆𑀥𑀁 𑀪𑀡𑁆𑀟𑀺𑀢𑀲𑀤𑀺𑀲’’𑀦𑁆𑀢𑀺 𑀮𑀺𑀔𑀺𑀢𑀁. 𑀅𑀁𑀲𑀪𑀡𑁆𑀟𑀺𑀓𑀁 𑀧𑀲𑀺𑀩𑁆𑀩𑀓𑁂 𑀧𑀓𑁆𑀔𑀺𑀢𑁆𑀢𑀲𑀤𑀺𑀲𑀢𑁆𑀢𑀸 𑀯𑁂𑀥𑀺𑀫𑀁 𑀦 𑀚𑀸𑀢𑀁, 𑀢𑀲𑁆𑀫𑀸 ‘‘𑀲𑀺𑀣𑀺𑀮𑀩𑀤𑁆𑀥𑀲𑁆𑀲 𑀅𑀦𑁆𑀢𑀭𑀦𑁆𑀢𑀭𑀸 𑀧𑀓𑁆𑀔𑀺𑀧𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. ‘‘𑀅𑀜𑁆𑀜𑀫𑀜𑁆𑀜𑀁 𑀅𑀨𑀼𑀲𑀸𑀧𑁂𑀢𑁆𑀯𑀸 𑀅𑀦𑁂𑀓𑀓𑁆𑀔𑀢𑁆𑀢𑀼𑀫𑁆𑀧𑀺 𑀧𑀭𑀺𑀓𑁆𑀔𑀺𑀧𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀧𑀽𑀭𑀺𑀢𑀦𑁆𑀢𑀺 𑀤𑀻𑀖𑀢𑁄 𑀧𑀲𑀸𑀭𑁂𑀢𑁆𑀯𑀸 𑀧𑀽𑀭𑀺𑀢𑀁. 𑀖𑀝𑀺𑀓𑀤𑀸𑀫𑀑𑀮𑀫𑁆𑀩𑀓𑁄𑀢𑀺 ‘‘𑀬𑀫𑀓𑀤𑀸𑀫𑀑𑀮𑀫𑁆𑀩𑀓𑁄’’𑀢𑀺 𑀮𑀺𑀔𑀺𑀢𑀁. ‘‘𑀕𑁂𑀡𑁆𑀟𑀼𑀔𑀭𑀧𑀢𑁆𑀢𑀤𑀸𑀫𑀸𑀦𑀁 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀘𑁂𑀮𑀸𑀤𑀻𑀳𑀺 𑀓𑀢𑀤𑀸𑀫𑀫𑁆𑀧𑀺 𑀦 𑀯𑀝𑁆𑀝𑀢𑀺 𑀅𑀓𑀧𑁆𑀧𑀺𑀬𑀸𑀦𑀼𑀮𑁄𑀫𑀢𑁆𑀢𑀸’’𑀢𑀺 𑀯𑀤𑀦𑁆𑀢𑀺.

‘‘𑀭𑁂𑀘𑀓𑀁 𑀦𑀸𑀫 𑀢𑀣𑀸𑀮𑀸𑀲𑀺𑀬𑀦𑀸𑀝𑀦𑀝𑀸𑀦𑀁 𑀦𑀘𑁆𑀘’’𑀦𑁆𑀢𑀺 𑀮𑀺𑀔𑀺𑀢𑀁. 𑀢𑀁 ‘‘𑀧𑀭𑀺𑀯𑀢𑁆𑀢𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀲𑀸𑀭𑀺𑀬𑁄 𑀦𑀸𑀫 𑀭𑀼𑀢𑀲𑀼𑀦𑀔𑀸 𑀲𑀺𑀗𑁆𑀕𑀸𑀮𑀓𑀫𑁆𑀫𑀓𑀼𑀭𑀼𑀗𑁆𑀕𑀓𑁂𑀴𑀺𑀧𑀦𑁂 𑀞𑀺𑀢𑀸’’𑀢𑀺 𑀓𑀺𑀭 𑀧𑀸𑀞𑁄. ‘‘𑀦𑀺𑀩𑀼𑀚𑁆𑀛𑀦𑁆𑀢𑀻’’𑀢𑀺 𑀧𑀸𑀴𑀺.

𑁪𑁩𑁨. 𑀅𑀩𑀮𑀩𑀮𑀸𑀤𑀺-𑀧𑀤𑀸𑀦𑀁 𑀉𑀧𑁆𑀧𑀝𑀺𑀧𑀸𑀝𑀺𑀬𑀸. 𑀬𑀣𑀸 𑀧𑀸𑀫𑁄𑀓𑁆𑀔𑀸𑀦𑀁 𑀯𑀲𑁂𑀦 𑀲𑀩𑁆𑀩𑁂𑀧𑀺 ‘‘𑀅𑀲𑁆𑀲𑀚𑀺𑀧𑀼𑀦𑀩𑁆𑀩𑀲𑀼𑀓𑀸’’𑀢𑀺 𑀯𑀼𑀢𑁆𑀢𑀸, 𑀢𑀣𑀸 𑀧𑀸𑀫𑁄𑀓𑁆𑀔𑀧𑁆𑀧𑀢𑁆𑀢𑀲𑀸𑀯𑀓𑀲𑁆𑀲 𑀯𑀲𑁂𑀦 𑀢𑀤𑀸𑀬𑀢𑁆𑀢𑀯𑀼𑀢𑁆𑀢𑀺𑀦𑁂 𑀲𑀩𑁆𑀩𑁂𑀧𑀺 ‘‘𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀕𑀘𑁆𑀙𑀣 𑀢𑀼𑀫𑁆𑀳𑁂 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺.