𑀧𑀸𑀭𑀸𑀚𑀺𑀓𑀯𑀡𑁆𑀡𑀦𑀸

𑀯𑁂𑀭𑀜𑁆𑀚𑀓𑀡𑁆𑀟𑁄

𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸

‘‘𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀯𑁂𑀲𑀸𑀮𑀺𑀬𑀁 𑀯𑀺𑀳𑀭𑀢𑀺 𑀫𑀳𑀸𑀯𑀦𑁂 𑀓𑀽𑀝𑀸𑀕𑀸𑀭𑀲𑀸𑀮𑀸𑀬𑀁. 𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀲𑀸𑀮𑀺𑀬𑀸 𑀅𑀯𑀺𑀤𑀽𑀭𑁂 𑀓𑀮𑀦𑁆𑀤𑀕𑀸𑀫𑁄 𑀦𑀸𑀫 𑀳𑁄𑀢𑀻’’𑀢𑀺 𑀯𑀺𑀦𑀬𑀦𑀺𑀤𑀸𑀦𑁂 𑀆𑀭𑀪𑀺𑀢𑀩𑁆𑀩𑁂 𑀯𑁂𑀭𑀜𑁆𑀚𑀓𑀡𑁆𑀟𑀲𑁆𑀲 𑀆𑀭𑀫𑁆𑀪𑁄 𑀓𑀺𑀫𑀢𑁆𑀣𑁄𑀢𑀺 𑀘𑁂? 𑀯𑀼𑀘𑁆𑀘𑀢𑁂 𑁋 𑀫𑀽𑀮𑀢𑁄 𑀧𑀪𑀼𑀢𑀺 𑀯𑀺𑀦𑀬𑀦𑀺𑀤𑀸𑀦𑀁 𑀤𑀲𑁆𑀲𑁂𑀢𑀼𑀁. 𑀬𑀤𑀺 𑀏𑀯𑀁 ‘‘𑀧𑀞𑀫𑀁 𑀆𑀯𑀼𑀲𑁄 𑀉𑀧𑀸𑀮𑀺 𑀧𑀸𑀭𑀸𑀚𑀺𑀓𑀁 𑀓𑀢𑁆𑀣 𑀧𑀜𑁆𑀜𑀢𑁆𑀢𑀦𑁆𑀢𑀺, 𑀯𑁂𑀲𑀸𑀮𑀺𑀬’’𑀦𑁆𑀢𑀺 𑀯𑀘𑀦𑁂𑀦 𑀯𑀺𑀭𑀼𑀚𑁆𑀛𑀢𑀻𑀢𑀺 𑀘𑁂? 𑀦 𑀯𑀺𑀭𑀼𑀚𑁆𑀛𑀢𑀺. 𑀓𑀲𑁆𑀫𑀸? 𑀓𑀢𑁆𑀣 𑀧𑀜𑁆𑀜𑀢𑁆𑀢𑀦𑁆𑀢𑀺 𑀳𑀺 𑀦𑀺𑀤𑀸𑀦𑀧𑀼𑀘𑁆𑀙𑀸. 𑀏𑀯𑀁 𑀲𑀦𑁆𑀢𑁂𑀧𑀺 ‘‘𑀧𑀞𑀫𑀲𑁆𑀲 𑀧𑀸𑀭𑀸𑀚𑀺𑀓𑀲𑁆𑀲 𑀓𑀺𑀁𑀦𑀺𑀤𑀸𑀦’’𑀦𑁆𑀢𑀺 𑀧𑀼𑀘𑁆𑀙𑀺𑀢𑁂 𑀲𑀸𑀥𑀸𑀭𑀡𑀫𑀳𑀸𑀦𑀺𑀤𑀸𑀦𑀯𑀺𑀲𑁆𑀲𑀚𑁆𑀚𑀦𑀁 𑀅𑀬𑀼𑀢𑁆𑀢𑀁 𑀯𑀺𑀬𑀸𑀢𑀺? 𑀦𑀸𑀬𑀼𑀢𑁆𑀢𑀁, 𑀲𑀩𑁆𑀩𑁂𑀲𑀁 𑀲𑀺𑀓𑁆𑀔𑀸𑀧𑀤𑀸𑀦𑀁 𑀧𑀸𑀝𑁂𑀓𑁆𑀓𑀁 𑀦𑀺𑀤𑀸𑀦𑀲𑁆𑀲 𑀧𑀼𑀝𑁆𑀞𑀢𑁆𑀢𑀸 𑀢𑀲𑁆𑀲 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀢𑁆𑀢𑀸 𑀘 𑀲𑀩𑁆𑀩𑀲𑀸𑀥𑀸𑀭𑀡𑀫𑀳𑀸𑀦𑀺𑀤𑀸𑀦𑀁 𑀧𑀞𑀫𑀫𑀸𑀳. 𑀏𑀓𑀦𑁆𑀢𑁂𑀦 𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀓𑁆𑀓𑀫𑁂𑀦 𑀧𑀸𑀭𑀸𑀚𑀺𑀓𑀸𑀤𑀻𑀦𑀺 𑀲𑀗𑁆𑀕𑀳𑀁 𑀆𑀭𑁄𑀧𑀺𑀢𑀸𑀦𑀺. 𑀓𑀣𑀁 𑀆𑀭𑁄𑀧𑀺𑀢𑀸𑀦𑀻𑀢𑀺 𑀘𑁂? 𑀆𑀬𑀲𑁆𑀫𑀢𑀸 𑀫𑀳𑀸𑀓𑀲𑁆𑀲𑀧𑁂𑀦 𑀅𑀦𑀼𑀓𑁆𑀓𑀫𑁂𑀦 𑀲𑀩𑁆𑀩𑁄𑀧𑀺 𑀯𑀺𑀦𑀬𑁄 𑀧𑀼𑀘𑁆𑀙𑀺𑀢𑁄, 𑀧𑀼𑀝𑁆𑀞𑁂𑀦 𑀘 𑀆𑀬𑀲𑁆𑀫𑀢𑀸 𑀉𑀧𑀸𑀮𑀺𑀢𑁆𑀣𑁂𑀭𑁂𑀦 𑀬𑀣𑀸𑀲𑀫𑁆𑀪𑀯𑀁 𑀦𑀺𑀭𑀦𑁆𑀢𑀭𑀁 𑀯𑀺𑀲𑁆𑀲𑀚𑁆𑀚𑀺𑀢𑀫𑁂𑀯. 𑀅𑀧𑀼𑀘𑁆𑀙𑀺𑀢𑀸𑀦𑀺𑀧𑀺 𑀯𑀺𑀦𑀻𑀢𑀯𑀢𑁆𑀣𑀼𑀆𑀤𑀻𑀦𑀺 𑀬𑀼𑀚𑁆𑀚𑀫𑀸𑀦𑀸𑀦𑀺 𑀯𑀢𑁆𑀣𑀽𑀦𑀺 𑀅𑀦𑁆𑀢𑁄𑀓𑀢𑁆𑀯𑀸 𑀯𑀺𑀲𑁆𑀲𑀚𑁆𑀚𑀦𑀓𑁆𑀓𑀫𑁂𑀦𑁂𑀯 𑀕𑀡𑀲𑀚𑁆𑀛𑀸𑀬𑀫𑀓𑀁𑀲𑀽𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀜𑁆𑀜𑀣𑀸 𑀯𑁂𑀭𑀜𑁆𑀚𑀓𑀡𑁆𑀟𑀁 𑀧𑀞𑀫𑀧𑀸𑀭𑀸𑀚𑀺𑀓𑀲𑁆𑀲𑁂𑀯 𑀦𑀺𑀤𑀸𑀦𑀦𑁆𑀢𑀺 𑀯𑀸 𑀅𑀦𑀥𑀺𑀓𑀸𑀭𑀺𑀓𑀁 𑀯𑀸 𑀦𑀺𑀧𑁆𑀧𑀬𑁄𑀚𑀦𑀁 𑀯𑀸 𑀧𑀸𑀝𑁂𑀓𑁆𑀓𑀁 𑀲𑀺𑀓𑁆𑀔𑀸𑀧𑀤𑀦𑀺𑀤𑀸𑀦𑀧𑀼𑀘𑁆𑀙𑀸𑀦𑀦𑁆𑀢𑀭𑀁 𑀢𑀤𑁂𑀯 𑀯𑀺𑀲𑁆𑀲𑀚𑁆𑀚𑁂𑀢𑀩𑁆𑀩𑀦𑁆𑀢𑀺 𑀯𑀸 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀆𑀤𑀺𑀢𑁄 𑀧𑀪𑀼𑀢𑀺 𑀯𑀺𑀦𑀬𑀦𑀺𑀤𑀸𑀦𑀁 𑀤𑀲𑁆𑀲𑁂𑀢𑀼𑀁 ‘‘𑀢𑁂𑀦 𑀲𑀫𑀬𑁂𑀦𑀸’’𑀢𑀺𑀆𑀤𑀺 𑀆𑀭𑀤𑁆𑀥𑀁.

𑀇𑀤𑀸𑀦𑀺 𑀦𑀺𑀤𑀸𑀦𑀪𑀡𑀦𑁂 𑀧𑀬𑁄𑀚𑀦𑀁 𑀯𑀓𑁆𑀔𑀸𑀫 𑁋 𑀯𑀺𑀦𑀬𑀲𑁆𑀲𑀆𑀡𑀸𑀤𑁂𑀲𑀦𑀢𑁆𑀢𑀸 𑀪𑀕𑀯𑀢𑁄 𑀢𑀸𑀯 𑀆𑀡𑀸𑀭𑀳𑀪𑀸𑀯𑀤𑀻𑀧𑀦𑀁, 𑀆𑀡𑀸𑀪𑀽𑀢𑀲𑁆𑀲 𑀘 𑀯𑀺𑀦𑀬𑀲𑁆𑀲 𑀅𑀦𑀜𑁆𑀜𑀯𑀺𑀲𑀬𑀪𑀸𑀯𑀤𑀻𑀧𑀦𑀁, 𑀆𑀡𑀸𑀬 𑀞𑀺𑀢𑀸𑀦𑀁 𑀲𑀸𑀯𑀓𑀸𑀦𑀁 𑀫𑀳𑀸𑀦𑀼𑀪𑀸𑀯𑀤𑀻𑀧𑀦𑀜𑁆𑀘𑀸𑀢𑀺 𑀢𑀺𑀯𑀺𑀥𑀫𑀲𑁆𑀲 𑀧𑀬𑁄𑀚𑀦𑀁. 𑀓𑀣𑀁? 𑀆𑀡𑀸𑀲𑀸𑀲𑀦𑀸𑀭𑀳𑁄 𑀳𑀺 𑀪𑀕𑀯𑀸 𑀧𑀳𑀻𑀦𑀓𑀺𑀮𑁂𑀲𑀢𑁆𑀢𑀸, 𑀅𑀥𑀺𑀕𑀢𑀕𑀼𑀡𑀯𑀺𑀲𑁂𑀲𑀢𑁆𑀢𑀸, 𑀮𑁄𑀓𑀚𑁂𑀝𑁆𑀞𑀲𑁂𑀝𑁆𑀞𑀢𑁆𑀢𑀸, 𑀢𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑀢𑁆𑀢𑀸 𑀘, 𑀅𑀭𑀲𑀭𑀽𑀧𑀢𑀸𑀤𑀻𑀳𑀺 𑀅𑀝𑁆𑀞𑀳𑀺 𑀅𑀓𑁆𑀓𑁄𑀲𑀯𑀢𑁆𑀣𑀽𑀳𑀺 𑀅𑀓𑀫𑁆𑀧𑀦𑀢𑁄 𑀪𑀕𑀯𑀢𑁄 𑀢𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑀺 𑀯𑁂𑀤𑀺𑀢𑀩𑁆𑀩𑀸, 𑀅𑀝𑁆𑀞𑀦𑁆𑀦𑀫𑁆𑀧𑀺 𑀢𑁂𑀲𑀁 𑀅𑀓𑁆𑀓𑁄𑀲𑀯𑀢𑁆𑀣𑀽𑀦𑀁 𑀅𑀢𑁆𑀢𑀦𑀺 𑀲𑀫𑁆𑀪𑀯𑀧𑀭𑀺𑀬𑀸𑀬𑀤𑀻𑀧𑀦𑀧𑀸𑀴𑀺𑀬𑀸 𑀧𑀳𑀻𑀦𑀓𑀺𑀮𑁂𑀲𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀢𑀺𑀲𑁆𑀲𑀦𑁆𑀦𑀜𑁆𑀘 𑀯𑀺𑀚𑁆𑀚𑀸𑀦𑀁 𑀅𑀥𑀺𑀕𑀫𑀧𑀭𑀺𑀤𑀻𑀧𑀦𑁂𑀦 𑀅𑀥𑀺𑀕𑀢𑀕𑀼𑀡𑀯𑀺𑀲𑁂𑀲𑀢𑀸 𑀯𑁂𑀤𑀺𑀢𑀩𑁆𑀩𑀸. ‘‘𑀦𑀸𑀳𑀁 𑀢𑀁 𑀩𑁆𑀭𑀸𑀳𑁆𑀫𑀡 𑀧𑀲𑁆𑀲𑀸𑀫𑀺 𑀲𑀤𑁂𑀯𑀓𑁂…𑀧𑁂… 𑀫𑀼𑀤𑁆𑀥𑀸𑀧𑀺 𑀢𑀲𑁆𑀲 𑀯𑀺𑀧𑀢𑁂𑀬𑁆𑀬𑀸’’𑀢𑀺 𑀘 ‘‘𑀚𑁂𑀝𑁆𑀞𑁄 𑀲𑁂𑀝𑁆𑀞𑁄 𑀮𑁄𑀓𑀲𑁆𑀲𑀸’’𑀢𑀺 𑀘 𑀯𑀘𑀦𑁂𑀦 𑀚𑁂𑀝𑁆𑀞𑀲𑁂𑀝𑁆𑀞𑀢𑀸 𑀯𑁂𑀤𑀺𑀢𑀩𑁆𑀩𑀸, 𑀇𑀤𑀜𑁆𑀘 𑀪𑀕𑀯𑀢𑁄 𑀆𑀡𑀸𑀭𑀳𑀪𑀸𑀯𑀤𑀻𑀧𑀦𑀧𑁆𑀧𑀬𑁄𑀚𑀦𑀁. ‘‘𑀆𑀕𑀫𑁂𑀳𑀺 𑀢𑁆𑀯𑀁 𑀲𑀸𑀭𑀺𑀧𑀼𑀢𑁆𑀢, 𑀆𑀕𑀫𑁂𑀳𑀺 𑀢𑁆𑀯𑀁 𑀲𑀸𑀭𑀺𑀧𑀼𑀢𑁆𑀢, 𑀢𑀣𑀸𑀕𑀢𑁄𑀯 𑀢𑀢𑁆𑀣 𑀓𑀸𑀮𑀁 𑀚𑀸𑀦𑀺𑀲𑁆𑀲𑀢𑀻’’𑀢𑀺 𑀯𑀘𑀦𑀁 𑀅𑀦𑀜𑁆𑀜𑀯𑀺𑀲𑀬𑀪𑀸𑀯𑀤𑀻𑀧𑀦𑀁. ‘‘𑀲𑀸𑀥𑀸𑀳𑀁, 𑀪𑀦𑁆𑀢𑁂, 𑀧𑀣𑀯𑀺𑀁 𑀧𑀭𑀺𑀯𑀢𑁆𑀢𑁂𑀬𑁆𑀬’’𑀦𑁆𑀢𑀺 𑀘 ‘‘𑀏𑀓𑀸𑀳𑀁, 𑀪𑀦𑁆𑀢𑁂, 𑀧𑀸𑀡𑀺𑀁 𑀅𑀪𑀺𑀦𑀺𑀫𑁆𑀫𑀺𑀦𑀺𑀲𑁆𑀲𑀸𑀫𑀻’’𑀢𑀺 𑀘 ‘‘𑀲𑀸𑀥𑀼, 𑀪𑀦𑁆𑀢𑁂, 𑀲𑀩𑁆𑀩𑁄 𑀪𑀺𑀓𑁆𑀔𑀼𑀲𑀗𑁆𑀖𑁄 𑀉𑀢𑁆𑀢𑀭𑀓𑀼𑀭𑀼𑀁 𑀧𑀺𑀡𑁆𑀟𑀸𑀬 𑀕𑀘𑁆𑀙𑁂𑀬𑁆𑀬𑀸’’𑀢𑀺 𑀘 𑀇𑀫𑁂𑀳𑀺 𑀣𑁂𑀭𑀲𑁆𑀲 𑀢𑀻𑀳𑀺 𑀲𑀻𑀳𑀦𑀸𑀤𑁂𑀳𑀺 𑀆𑀡𑀸𑀬 𑀞𑀺𑀢𑀸𑀦𑀁 𑀲𑀸𑀯𑀓𑀸𑀦𑀁 𑀫𑀳𑀸𑀦𑀼𑀪𑀸𑀯𑀢𑀸𑀤𑀻𑀧𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀲𑀸𑀯𑀢𑁆𑀣𑀺𑀬𑀸𑀤𑀻𑀲𑀼 𑀅𑀯𑀺𑀳𑀭𑀺𑀢𑁆𑀯𑀸 𑀓𑀺𑀫𑀢𑁆𑀣𑀁 𑀪𑀕𑀯𑀸 𑀯𑁂𑀭𑀜𑁆𑀚𑀸𑀬𑀫𑁂𑀯 𑀢𑀤𑀸 𑀯𑀺𑀳𑀸𑀲𑀻𑀢𑀺 𑀘𑁂? 𑀦𑀴𑁂𑀭𑀼𑀬𑀓𑁆𑀔𑀲𑁆𑀲 𑀧𑀻𑀢𑀺𑀲𑀜𑁆𑀚𑀦𑀦𑀢𑁆𑀣𑀁, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀪𑀺𑀓𑁆𑀔𑀸𑀯𑀲𑁂𑀦 𑀅𑀓𑀺𑀮𑀫𑀦𑀢𑁆𑀣𑀁, 𑀯𑁂𑀭𑀜𑁆𑀚𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀲𑀸𑀤𑀲𑀜𑁆𑀚𑀦𑀦𑀢𑁆𑀣𑀁, 𑀫𑀳𑀸𑀫𑁄𑀕𑁆𑀕𑀮𑁆𑀮𑀸𑀦𑀢𑁆𑀣𑁂𑀭𑀲𑁆𑀲 𑀆𑀦𑀼𑀪𑀸𑀯𑀤𑀻𑀧𑀦𑀝𑁆𑀞𑀸𑀦𑀪𑀽𑀢𑀢𑁆𑀢𑀸, 𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀳𑁂𑀢𑀼𑀪𑀽𑀢𑀧𑀭𑀺𑀯𑀺𑀢𑀓𑁆𑀓𑀦𑀝𑁆𑀞𑀸𑀦𑀪𑀽𑀢𑀢𑁆𑀢𑀸 𑀘. 𑀢𑁂𑀲𑀼 𑀧𑀘𑁆𑀙𑀺𑀫𑀁 𑀩𑀮𑀯𑀓𑀸𑀭𑀡𑀁, 𑀢𑁂𑀦 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀢𑁂𑀦 𑀲𑀫𑀬𑁂𑀦𑀸𑀢𑀺 𑀬𑁂𑀦 𑀓𑀸𑀮𑁂𑀦 𑀆𑀬𑀲𑁆𑀫𑀢𑁄…𑀧𑁂… 𑀢𑁂𑀦 𑀓𑀸𑀮𑁂𑀦𑀸’’𑀢𑀺. 𑀧𑀼𑀭𑀺𑀫𑁂𑀲𑀼 𑀘𑀢𑀽𑀲𑀼 𑀅𑀲𑀗𑁆𑀕𑀳𑀓𑀸𑀭𑀡𑁂𑀲𑀼 𑀧𑀞𑀫𑁂𑀦 𑀪𑀕𑀯𑀸 𑀫𑁂𑀢𑁆𑀢𑀸𑀪𑀸𑀯𑀦𑀸𑀤𑀺𑀦𑀸 𑀅𑀫𑀦𑀼𑀲𑁆𑀲𑀸𑀦𑀁 𑀘𑀺𑀢𑁆𑀢𑀲𑀁𑀭𑀓𑁆𑀔𑀡𑁂𑀦 𑀪𑀺𑀓𑁆𑀔𑀽𑀦𑀁 𑀆𑀤𑀭𑀁 𑀚𑀦𑁂𑀢𑀺. 𑀤𑀼𑀢𑀺𑀬𑁂𑀦 𑀧𑀭𑀺𑀲𑀸𑀯𑀘𑀭𑁂𑀦 𑀪𑀺𑀓𑁆𑀔𑀼𑀦𑀸 𑀏𑀯𑀁 𑀧𑀭𑀺𑀲𑀸 𑀲𑀗𑁆𑀕𑀳𑁂𑀢𑀩𑁆𑀩𑀸, 𑀏𑀯𑀁 𑀅𑀧𑁆𑀧𑀺𑀘𑁆𑀙𑁂𑀦 𑀲𑀦𑁆𑀢𑀼𑀝𑁆𑀞𑁂𑀦 𑀘 𑀪𑀯𑀺𑀢𑀩𑁆𑀩𑀦𑁆𑀢𑀺 𑀯𑀸 𑀤𑀲𑁆𑀲𑁂𑀢𑀺. 𑀢𑀢𑀺𑀬𑁂𑀦 𑀧𑀘𑁆𑀘𑀬𑁂 𑀦𑀺𑀭𑀧𑁂𑀓𑁆𑀔𑁂𑀦 𑀓𑀼𑀮𑀸𑀦𑀼𑀕𑁆𑀕𑀳𑁄 𑀓𑀸𑀢𑀩𑁆𑀩𑁄𑀢𑀺. 𑀘𑀢𑀼𑀢𑁆𑀣𑁂𑀦 𑀏𑀯𑀁 𑀫𑀳𑀸𑀦𑀼𑀪𑀸𑀯𑁂𑀦𑀸𑀧𑀺 𑀧𑀘𑁆𑀘𑀬𑀢𑁆𑀣𑀁 𑀦 𑀮𑁄𑀮𑀼𑀧𑁆𑀧𑀁 𑀓𑀸𑀢𑀩𑁆𑀩𑀁, 𑀓𑁂𑀯𑀮𑀁 𑀧𑀭𑀤𑀢𑁆𑀢𑀼𑀧𑀚𑀻𑀯𑀺𑀦𑀸 𑀪𑀯𑀺𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑁂𑀢𑀺. ‘‘𑀢𑁂𑀦𑀸𑀢𑀺𑀆𑀤𑀺𑀧𑀸𑀞𑀲𑁆𑀲…𑀧𑁂… 𑀯𑀺𑀦𑀬𑀲𑁆𑀲𑀢𑁆𑀣𑀯𑀡𑁆𑀡𑀦’’𑀦𑁆𑀢𑀺 𑀯𑀘𑀦𑀢𑁄 𑀅𑀜𑁆𑀜𑁄 𑀢𑁂𑀦𑀸𑀢𑀺𑀆𑀤𑀺𑀧𑀸𑀞𑁄, 𑀅𑀜𑁆𑀜𑁄 𑀯𑀺𑀦𑀬𑁄 𑀆𑀧𑀚𑁆𑀚𑀢𑀺.

‘‘𑀢𑁂𑀦𑀸𑀢𑀺𑀆𑀤𑀺𑀧𑀸𑀞𑀫𑁆𑀳𑀸, 𑀓𑁄 𑀅𑀜𑁆𑀜𑁄 𑀯𑀺𑀦𑀬𑁄 𑀇𑀥;

𑀢𑀲𑁆𑀲𑀢𑁆𑀣𑀁 𑀤𑀲𑁆𑀲𑀬𑀦𑁆𑀢𑁄𑀯, 𑀓𑀭𑁂 𑀯𑀺𑀦𑀬𑀯𑀡𑁆𑀡𑀦’’𑀦𑁆𑀢𑀺. 𑁋

𑀘𑁂? 𑀦𑀦𑀼 𑀯𑀼𑀢𑁆𑀢𑀁 𑀧𑀼𑀩𑁆𑀩𑁂𑀯 ‘‘𑀇𑀤𑀜𑁆𑀳𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀅𑀢𑁆𑀢𑀧𑀘𑁆𑀘𑀓𑁆𑀔𑀯𑀘𑀦𑀁 𑀦 𑀳𑁄𑀢𑀻’’𑀢𑀺𑀆𑀤𑀺, 𑀢𑀲𑁆𑀫𑀸 𑀉𑀧𑀸𑀮𑀺𑀢𑁆𑀣𑁂𑀭𑁂𑀦 𑀯𑀼𑀢𑁆𑀢𑀲𑁆𑀲 𑀢𑁂𑀦𑀸𑀢𑀺𑀆𑀤𑀺𑀧𑀸𑀞𑀲𑁆𑀲 𑀅𑀢𑁆𑀣𑀁 𑀦𑀸𑀦𑀧𑁆𑀧𑀓𑀸𑀭𑀢𑁄 𑀤𑀲𑁆𑀲𑀬𑀦𑁆𑀢𑁄 𑀓𑀭𑀺𑀲𑁆𑀲𑀸𑀫𑀺 𑀯𑀺𑀦𑀬𑀲𑁆𑀲 𑀪𑀕𑀯𑀢𑁄 𑀅𑀢𑁆𑀢𑀧𑀘𑁆𑀘𑀓𑁆𑀔𑀯𑀘𑀦𑀪𑀽𑀢𑀲𑁆𑀲 𑀅𑀢𑁆𑀣𑀯𑀡𑁆𑀡𑀦𑀦𑁆𑀢𑀺 𑀏𑀯𑀫𑁂𑀢𑁆𑀣 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀬𑀤𑀺 𑀏𑀯𑀁 ‘‘𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀯𑁂𑀭𑀜𑁆𑀚𑀸𑀬𑀁 𑀯𑀺𑀳𑀭𑀢𑀻𑀢𑀺 𑀏𑀯𑀫𑀸𑀤𑀺𑀯𑀘𑀦𑀧𑀝𑀺𑀫𑀡𑁆𑀟𑀺𑀢𑀦𑀺𑀤𑀸𑀦𑀁 𑀯𑀺𑀦𑀬𑀧𑀺𑀝𑀓𑀁 𑀓𑁂𑀦 𑀥𑀸𑀭𑀺𑀢’’𑀦𑁆𑀢𑀺𑀆𑀤𑀺𑀯𑀘𑀦𑀁 𑀯𑀺𑀭𑀼𑀚𑁆𑀛𑀢𑀺 ‘‘𑀢𑁂𑀦 𑀲𑀫𑀬𑁂𑀦𑀸’’𑀢𑀺𑀆𑀤𑀺𑀯𑀘𑀦𑀲𑁆𑀲 𑀯𑀺𑀦𑀬𑀧𑀺𑀝𑀓𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑀤𑀻𑀧𑀦𑀢𑁄𑀢𑀺 𑀘𑁂? 𑀦, 𑀅𑀜𑁆𑀜𑀢𑁆𑀣𑁂𑀧𑀺 𑀢𑀩𑁆𑀩𑁄𑀳𑀸𑀭𑀲𑀺𑀤𑁆𑀥𑀺𑀢𑁄 ‘‘𑀦𑀸𑀦𑀸𑀯𑀺𑀥𑀪𑀺𑀢𑁆𑀢𑀺𑀓𑀫𑁆𑀫𑀧𑀝𑀺𑀫𑀡𑁆𑀟𑀺𑀢𑀯𑀲𑀦𑁄 𑀧𑀼𑀭𑀺𑀲𑁄’’𑀢𑀺𑀆𑀤𑀻𑀲𑀼 𑀯𑀺𑀬. 𑀯𑀺𑀦𑀬𑀲𑁆𑀲𑀸𑀤𑀺𑀪𑀸𑀯𑁂𑀦 𑀲𑀗𑁆𑀕𑀻𑀢𑀺𑀓𑀸𑀭𑀓𑁂𑀳𑀺 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀯𑀺𑀦𑀬𑀧𑀭𑀺𑀬𑀸𑀧𑀦𑁆𑀦𑀢𑀸𑀧𑀺 𑀬𑀼𑀚𑁆𑀚𑀢𑀺 𑀢𑀲𑁆𑀲 𑀯𑀘𑀦𑀲𑁆𑀲. 𑀏𑀢𑁆𑀣𑀸𑀳 𑁋 𑀬𑀣𑀸 𑀲𑀼𑀢𑁆𑀢𑀦𑁆𑀢𑁂 ‘‘𑀏𑀓𑀁 𑀲𑀫𑀬’’𑀦𑁆𑀢𑀺 𑀘, 𑀅𑀪𑀺𑀥𑀫𑁆𑀫𑁂 𑀘 ‘‘𑀬𑀲𑁆𑀫𑀺𑀁 𑀲𑀫𑀬𑁂’’𑀢𑀺 𑀅𑀦𑀺𑀬𑀫𑀢𑁄 𑀯𑀼𑀢𑁆𑀢𑀁, 𑀢𑀣𑀸 𑀅𑀯𑀢𑁆𑀯𑀸 𑀇𑀥 ‘‘𑀢𑁂𑀦 𑀲𑀫𑀬𑁂𑀦𑀸’’𑀢𑀺 𑀧𑀞𑀫𑀁 𑀢𑀁𑀦𑀺𑀤𑁆𑀤𑁂𑀲𑁄𑀯 𑀓𑀲𑁆𑀫𑀸 𑀯𑀼𑀢𑁆𑀢𑁄𑀢𑀺? 𑀯𑀼𑀘𑁆𑀘𑀢𑁂 𑁋 𑀢𑀲𑁆𑀲 𑀢𑀲𑁆𑀲 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀲𑀫𑀬𑀲𑁆𑀲, 𑀬𑀲𑁆𑀲 𑀯𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀳𑁂𑀢𑀼𑀪𑀽𑀢𑀲𑁆𑀲 𑀲𑀫𑀬𑀲𑁆𑀲 𑀳𑁂𑀢𑀼 𑀪𑀕𑀯𑀸 𑀢𑀢𑁆𑀣 𑀢𑀢𑁆𑀣 𑀯𑀺𑀳𑀸𑀲𑀺, 𑀢𑀲𑁆𑀲 𑀘 𑀲𑀫𑀬𑀲𑁆𑀲 𑀅𑀢𑀻𑀢𑀲𑁆𑀲 𑀢𑁂𑀲𑀁 𑀲𑀗𑁆𑀕𑀻𑀢𑀺𑀓𑀸𑀭𑀓𑀸𑀦𑀁 𑀯𑀲𑀻𑀦𑀁 𑀲𑀼𑀯𑀺𑀤𑀺𑀢𑀢𑁆𑀢𑀸. 𑀓𑀣𑀁? ‘‘𑀬𑁂 𑀢𑁂 𑀪𑀺𑀓𑁆𑀔𑀽 𑀅𑀧𑁆𑀧𑀺𑀘𑁆𑀙𑀸 𑀢𑁂 𑀉𑀚𑁆𑀛𑀸𑀬𑀦𑁆𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄, ‘‘𑀅𑀣 𑀔𑁄 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀏𑀢𑀫𑀢𑁆𑀣𑀁 𑀆𑀭𑁄𑀘𑁂𑀲𑀼’’𑀦𑁆𑀢𑀺 𑀘 ‘‘𑀅𑀣 𑀔𑁄 𑀪𑀕𑀯𑀸 𑀏𑀢𑀲𑁆𑀫𑀺𑀁 𑀦𑀺𑀤𑀸𑀦𑁂 𑀲𑀦𑁆𑀦𑀺𑀧𑀸𑀢𑀸𑀧𑁂𑀢𑁆𑀯𑀸’’𑀢𑀺 𑀘 ‘‘𑀪𑀺𑀓𑁆𑀔𑀽𑀦𑀁 𑀢𑀤𑀦𑀼𑀘𑁆𑀙𑀯𑀺𑀓𑀁 𑀢𑀤𑀦𑀼…𑀧𑁂… 𑀤𑀲 𑀅𑀢𑁆𑀣𑀯𑀲𑁂 𑀧𑀝𑀺𑀘𑁆𑀘 𑀲𑀗𑁆𑀖𑀲𑀼𑀝𑁆𑀞𑀼𑀢𑀸𑀬𑀸’’𑀢𑀺 𑀘 ‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣𑀸’’𑀢𑀺 𑀘 𑀔𑀦𑁆𑀥𑀓𑁂𑀲𑀼 𑀘 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀧𑀩𑁆𑀩𑀚𑁆𑀚’’𑀦𑁆𑀢𑀺𑀆𑀤𑀺𑀯𑀺𑀦𑀬𑀓𑁆𑀓𑀫𑀲𑁆𑀲 𑀯𑀘𑀦𑀢𑁄 𑀬𑁄 𑀲𑁄 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀲𑀫𑀬𑁄, 𑀢𑀲𑁆𑀲 𑀢𑀲𑁆𑀲 𑀯𑀺𑀦𑀬𑀓𑁆𑀓𑀫𑀲𑁆𑀲 𑀲𑁄 𑀧𑀜𑁆𑀜𑀢𑁆𑀢𑀺𑀲𑀫𑀬𑁄 𑀘 𑀲𑀼𑀯𑀺𑀤𑀺𑀢𑁄 𑀢𑁂𑀲𑀁 𑀧𑀜𑁆𑀘𑀲𑀢𑀸𑀦𑀁 𑀥𑀫𑁆𑀫𑀥𑀭𑀸𑀦𑀁 𑀪𑀺𑀓𑁆𑀔𑀽𑀦𑀁, 𑀦𑀸𑀬𑀁 𑀦𑀬𑁄 𑀲𑀼𑀢𑁆𑀢𑀦𑁆𑀢𑀸𑀪𑀺𑀥𑀫𑁆𑀫𑁂𑀲𑀼 𑀲𑀫𑁆𑀪𑀯𑀢𑀺. 𑀢𑀲𑁆𑀫𑀸 𑀲𑀼𑀯𑀺𑀤𑀺𑀢𑀢𑁆𑀢𑀸 𑀢𑁂𑀦 𑀲𑀫𑀬𑁂𑀦 𑀳𑁂𑀢𑀼𑀪𑀽𑀢𑁂𑀦 𑀯𑀺𑀳𑀭𑀢𑀻𑀢𑀺 𑀯𑀺𑀳𑀭𑀢𑀺𑀧𑀤𑁂𑀦 𑀏𑀓𑀲𑀫𑁆𑀩𑀦𑁆𑀥𑀢𑁆𑀢𑀸 𑀘 𑀧𑀞𑀫𑀁 𑀬𑀁𑀦𑀺𑀤𑁆𑀤𑁂𑀲𑀸𑀤𑀺𑀦𑁄 𑀅𑀲𑀫𑁆𑀪𑀯𑀢𑁄 𑀘 𑀯𑀺𑀦𑀬𑀧𑀺𑀝𑀓𑁂 𑀢𑀁𑀦𑀺𑀤𑁆𑀤𑁂𑀲𑁄𑀯 𑀧𑀞𑀫𑀁 𑀯𑀼𑀢𑁆𑀢𑁄. 𑀓𑀣𑀁? 𑀏𑀢𑁆𑀣 ‘‘𑀬𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀲𑀸𑀮𑀺𑀬𑀸 𑀅𑀯𑀺𑀤𑀽𑀭𑁂 𑀓𑀮𑀦𑁆𑀤𑀕𑀸𑀫𑁄 𑀦𑀸𑀫 𑀳𑁄𑀢𑀻’’𑀢𑀺 𑀯𑀸 ‘‘𑀬𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀲𑀸𑀮𑀻…𑀧𑁂… 𑀳𑁄𑀢𑀻’’𑀢𑀺 𑀯𑀸 𑀅𑀲𑀫𑁆𑀪𑀯𑀢𑁄 𑀬𑀁𑀦𑀺𑀤𑁆𑀤𑁂𑀲𑁂𑀦 𑀅𑀯𑀢𑁆𑀯𑀸 𑀢𑀁𑀦𑀺𑀤𑁆𑀤𑁂𑀲𑀲𑁆𑀲𑁂𑀯 𑀲𑀫𑁆𑀪𑀯𑀢𑁄 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦…𑀧𑁂… 𑀓𑀮𑀦𑁆𑀤𑀕𑀸𑀫𑁄 𑀦𑀸𑀫 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺, 𑀓𑁂𑀯𑀮𑀁 𑀲𑀼𑀯𑀺𑀤𑀺𑀢𑀢𑁆𑀢𑀸 𑀯𑀸. 𑀅𑀦𑀺𑀬𑀫𑀦𑀺𑀤𑁆𑀤𑁂𑀲𑀯𑀘𑀦𑀦𑁆𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀦𑀺𑀬𑀫𑀦𑀺𑀤𑁆𑀤𑁂𑀲𑀯𑀘𑀦𑀫𑁂𑀯𑁂𑀢𑀁 𑀢𑀁𑀦𑀺𑀤𑁆𑀤𑁂𑀲𑀢𑁆𑀢𑀸, 𑀢𑀣𑀸𑀧𑀺 𑀲𑀫𑁆𑀧𑀢𑀺𑀓𑀸𑀮𑀯𑀲𑁂𑀦 𑀢𑀤𑀺𑀢𑀭𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀯𑀺𑀤𑀺𑀢𑀢𑁆𑀢𑀸 ‘‘𑀅𑀦𑀺𑀬𑀫𑀦𑀺𑀤𑁆𑀤𑁂𑀲𑀯𑀘𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀅𑀬𑀜𑁆𑀳𑀺 𑀲𑀩𑁆𑀩𑀲𑁆𑀫𑀺𑀫𑁆𑀧𑀺 𑀯𑀺𑀦𑀬𑁂 𑀬𑀼𑀢𑁆𑀢𑀻’’𑀢𑀺, 𑀢𑀁 𑀢𑀩𑁆𑀩𑀳𑀼𑀮𑁂𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀬𑀤𑀺 𑀲𑀩𑁆𑀩𑀁 𑀢𑁂𑀦𑀸𑀢𑀺 𑀧𑀤𑀁 𑀅𑀦𑀺𑀬𑀫𑀦𑀺𑀤𑁆𑀤𑁂𑀲𑀯𑀘𑀦𑀁 𑀪𑀯𑁂𑀬𑁆𑀬, 𑀢𑁂𑀦 𑀳𑀺 𑀪𑀺𑀓𑁆𑀔𑀯𑁂 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀦𑁆𑀢𑀺 𑀏𑀢𑁆𑀣 𑀇𑀤𑀫𑁆𑀧𑀺 𑀧𑀼𑀩𑁆𑀩𑁂 𑀲𑀺𑀤𑁆𑀥𑀢𑁆𑀣𑀁 𑀢𑁂𑀦𑀸𑀢𑀺 𑀧𑀤𑀁 𑀅𑀦𑀺𑀬𑀫𑀦𑀺𑀤𑁆𑀤𑁂𑀲𑀯𑀘𑀦𑀁 𑀪𑀯𑁂𑀬𑁆𑀬. ‘‘𑀢𑁂𑀦 𑀲𑀫𑀬𑁂𑀦 𑀩𑀼𑀤𑁆𑀥𑁄 𑀪𑀕𑀯𑀸 𑀉𑀭𑀼𑀯𑁂𑀮𑀸𑀬𑀁 𑀯𑀺𑀳𑀭𑀢𑀻’’𑀢𑀺𑀆𑀤𑀻𑀲𑀼 𑀯𑀼𑀢𑁆𑀢𑀁 𑀢𑁂𑀦𑀸𑀢𑀺 𑀧𑀤𑀜𑁆𑀘 𑀅𑀦𑀺𑀬𑀫𑀦𑀺𑀤𑁆𑀤𑁂𑀲𑀯𑀘𑀦𑀁 𑀪𑀯𑁂𑀬𑁆𑀬, 𑀦 𑀘 𑀳𑁄𑀢𑀺, 𑀢𑀲𑁆𑀫𑀸 𑀬𑁂𑀲𑀁 𑀢𑁂𑀦 𑀢𑀁𑀦𑀺𑀤𑁆𑀤𑁂𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀢𑁆𑀣𑁄 𑀅𑀯𑀺𑀤𑀺𑀢𑁄, 𑀢𑁂𑀲𑀁 𑀯𑀲𑁂𑀦𑀸𑀳 ‘‘𑀅𑀦𑀺𑀬𑀫𑀦𑀺𑀤𑁆𑀤𑁂𑀲𑀯𑀘𑀦𑀫𑁂𑀢’’𑀦𑁆𑀢𑀺. 𑀅𑀣 𑀯𑀸 𑀢𑀢𑁄 𑀧𑀞𑀫𑀁 𑀢𑀤𑀢𑁆𑀣𑀸𑀤𑀲𑁆𑀲𑀦𑀢𑁄 𑀧𑀘𑁆𑀙𑀸𑀧𑀺 𑀢𑀁𑀲𑀫𑁆𑀩𑀦𑁆𑀥𑁂𑀦 𑀬𑀁𑀦𑀺𑀤𑁆𑀤𑁂𑀲𑀤𑀲𑁆𑀲𑀦𑀢𑁄 𑀘 ‘‘𑀅𑀦𑀺𑀬𑀫𑀦𑀺𑀤𑁆𑀤𑁂𑀲𑀯𑀘𑀦𑀫𑁂𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀣 𑀯𑀸 𑀧𑀼𑀩𑁆𑀩𑀡𑁆𑀳𑀸𑀤𑀻𑀲𑀼 𑀅𑀬𑀁 𑀦𑀸𑀫𑀸𑀢𑀺 𑀅𑀦𑀺𑀬𑀫𑁂𑀢𑁆𑀯𑀸 𑀓𑀸𑀮𑀧𑀭𑀺𑀤𑀻𑀧𑀦𑀲𑁆𑀲 𑀲𑀫𑀬𑀲𑀤𑁆𑀤𑀲𑁆𑀲 𑀉𑀧𑀧𑀤𑀪𑀸𑀯𑁂𑀦𑀧𑀺 𑀏𑀯𑀁 𑀯𑀢𑁆𑀢𑀼𑀫𑀭𑀳𑀢𑀺 ‘‘𑀬𑀤𑀺𑀤𑀁 𑀅𑀦𑀺𑀬𑀫𑀦𑀺𑀤𑁆𑀤𑁂𑀲𑀯𑀘𑀦’’𑀦𑁆𑀢𑀺. 𑀅𑀣 𑀯𑀸 ‘‘𑀢𑁂𑀦𑀸’’𑀢𑀺 𑀯𑀼𑀢𑁆𑀢𑁂 𑀢𑁂𑀦 𑀖𑀝𑁂𑀦 𑀧𑀝𑁂𑀦𑀸𑀢𑀺 𑀲𑀩𑁆𑀩𑀢𑁆𑀣𑀧𑁆𑀧𑀲𑀗𑁆𑀕𑀦𑀺𑀯𑀸𑀭𑀡𑀢𑁆𑀣𑀁 𑀦𑀺𑀬𑀫𑀁 𑀓𑀭𑁄𑀢𑀺 ‘‘𑀲𑀫𑀬𑁂𑀦𑀸’’𑀢𑀺. 𑀓𑁂𑀦 𑀧𑀦 𑀲𑀫𑀬𑁂𑀦? 𑀧𑀭𑀪𑀸𑀕𑁂 𑀅𑀢𑁆𑀣𑀢𑁄 𑀲𑀺𑀤𑁆𑀥𑁂𑀦 𑀲𑀸𑀭𑀺𑀧𑀼𑀢𑁆𑀢𑀲𑁆𑀲 𑀧𑀭𑀺𑀯𑀺𑀢𑀓𑁆𑀓𑀲𑀫𑀬𑁂𑀦. 𑀏𑀢𑁆𑀣𑀸𑀳 𑁋 𑀯𑀺𑀢𑀓𑁆𑀓𑀲𑀫𑀬𑁄 𑀘𑁂 𑀇𑀥𑀸𑀥𑀺𑀧𑁆𑀧𑁂𑀢𑁄, ‘‘𑀧𑀭𑀢𑁄 𑀇𑀥 𑀧𑀦 𑀳𑁂𑀢𑀼𑀅𑀢𑁆𑀣𑁄 𑀓𑀭𑀡𑀢𑁆𑀣𑁄 𑀘 𑀲𑀫𑁆𑀪𑀯𑀢𑀺. 𑀬𑁄 𑀳𑀺 𑀲𑁄 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀲𑀫𑀬𑁄 𑀲𑀸𑀭𑀺𑀧𑀼𑀢𑁆𑀢𑀸𑀤𑀻𑀳𑀺𑀧𑀺 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑁄, 𑀢𑁂𑀦 𑀲𑀫𑀬𑁂𑀦 𑀳𑁂𑀢𑀼𑀪𑀽𑀢𑁂𑀦 𑀓𑀭𑀡𑀪𑀽𑀢𑁂𑀦 𑀘𑀸’’𑀢𑀺𑀆𑀤𑀺𑀯𑀘𑀦𑀁 𑀯𑀺𑀭𑀼𑀚𑁆𑀛𑀢𑀻𑀢𑀺? 𑀦, 𑀩𑀸𑀳𑀼𑀮𑁆𑀮𑁂𑀦 𑀯𑀼𑀢𑁆𑀢𑀢𑁆𑀢𑀸. 𑀲𑀼𑀢𑁆𑀢𑀦𑁆𑀢𑀸𑀪𑀺𑀥𑀫𑁆𑀫𑁂𑀲𑀼 𑀯𑀺𑀬 𑀅𑀯𑀢𑁆𑀯𑀸 𑀇𑀥 𑀯𑀺𑀦𑀬𑀧𑀺𑀝𑀓𑁂 𑀓𑀭𑀡𑀯𑀘𑀦𑁂𑀦 𑀓𑀲𑁆𑀫𑀸 𑀦𑀺𑀤𑁆𑀤𑁂𑀲𑁄𑀢𑀺 𑀳𑀺 𑀘𑁄𑀤𑀦𑀸. 𑀢𑀲𑁆𑀫𑀸 𑀢𑀲𑁆𑀲𑀸 𑀯𑀺𑀲𑁆𑀲𑀚𑁆𑀚𑀦𑁂 𑀩𑀸𑀳𑀼𑀮𑁆𑀮𑁂𑀦 𑀓𑀭𑀡𑀯𑀘𑀦𑀧𑁆𑀧𑀬𑁄𑀚𑀦𑀁 𑀯𑀢𑁆𑀢𑀼𑀓𑀸𑀫𑁄 𑀆𑀘𑀭𑀺𑀬𑁄 𑀆𑀳 ‘‘𑀬𑁄 𑀲𑁄 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀲𑀫𑀬𑁄’’𑀢𑀺𑀆𑀤𑀺. 𑀦 𑀲𑀫𑁆𑀧𑀢𑀺 𑀯𑀼𑀘𑁆𑀘𑀫𑀸𑀦𑀲𑁆𑀲𑁂𑀯 𑀓𑀭𑀡𑀯𑀘𑀦𑀲𑁆𑀲 𑀧𑀬𑁄𑀚𑀦𑀁 𑀯𑀢𑁆𑀢𑀼𑀓𑀸𑀫𑁄, 𑀇𑀫𑀲𑁆𑀲 𑀧𑀦 𑀳𑁂𑀢𑀼𑀅𑀢𑁆𑀣𑁄𑀯 𑀲𑀫𑁆𑀪𑀯𑀢𑀺, 𑀦 𑀓𑀭𑀡𑀢𑁆𑀣𑁄, 𑀢𑀲𑁆𑀫𑀸 𑀆𑀳 ‘‘𑀅𑀧𑀭𑀪𑀸𑀕𑁂 𑀅𑀢𑁆𑀣𑀢𑁄 𑀲𑀺𑀤𑁆𑀥𑁂𑀦𑀸’’𑀢𑀺𑀆𑀤𑀺. 𑀲𑀫𑀬𑀜𑁆𑀘𑀸𑀢𑀺 𑀆𑀕𑀫𑀦𑀧𑀘𑁆𑀘𑀬𑀲𑀫𑀯𑀸𑀬𑀁 𑀢𑀤𑀦𑀼𑀭𑀽𑀧𑀓𑀸𑀮𑀜𑁆𑀘 𑀉𑀧𑀸𑀤𑀸𑀬𑀸𑀢𑀺 𑀅𑀢𑁆𑀣𑁄. 𑀧𑀘𑁆𑀘𑀬𑀲𑀸𑀫𑀕𑁆𑀕𑀺𑀜𑁆𑀘 𑀆𑀕𑀫𑀦𑀓𑀸𑀮𑀜𑁆𑀘 𑀮𑀪𑀺𑀢𑁆𑀯𑀸 𑀚𑀸𑀦𑀺𑀲𑁆𑀲𑀸𑀫𑀸𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀏𑀢𑁆𑀣𑀸𑀳 𑁋 𑀬𑀣𑀸 ‘‘𑀏𑀓𑁄𑀯 𑀔𑁄, 𑀪𑀺𑀓𑁆𑀔𑀯𑁂, 𑀔𑀡𑁄 𑀲𑀫𑀬𑁄 𑀘𑀸’’𑀢𑀺 𑀏𑀢𑁆𑀣 𑀔𑀡𑀲𑀫𑀬𑀸𑀦𑀁 𑀏𑀓𑁄 𑀅𑀢𑁆𑀣𑁄, 𑀢𑀣𑀸 𑀓𑀸𑀮𑀜𑁆𑀘 𑀲𑀫𑀬𑀜𑁆𑀘 𑀉𑀧𑀸𑀤𑀸𑀬𑀸𑀢𑀺 𑀓𑀸𑀮𑀲𑀫𑀬𑀸𑀦𑀁 𑀏𑀓𑁄 𑀅𑀢𑁆𑀣𑁄 𑀲𑀺𑀬𑀸, 𑀅𑀧𑀺𑀘 𑀆𑀕𑀫𑀦𑀧𑀘𑁆𑀘𑀬𑀲𑀫𑀯𑀸𑀬𑁄 𑀘𑁂𑀢𑁆𑀣 𑀲𑀫𑀬𑁄 𑀓𑀸𑀮𑀲𑁆𑀲𑀸𑀧𑀺 𑀆𑀕𑀫𑀦𑀧𑀘𑁆𑀘𑀬𑀢𑁆𑀢𑀸 𑀲𑀫𑀬𑀕𑁆𑀕𑀳𑀡𑁂𑀦𑁂𑀯 𑀲𑁄 𑀕𑀳𑀺𑀢𑁄𑀢𑀺 𑀯𑀺𑀲𑀼𑀁 𑀓𑀸𑀮𑁄 𑀓𑀺𑀫𑀢𑁆𑀣𑀁 𑀕𑀳𑀺𑀢𑁄𑀢𑀺 𑀘? 𑀯𑀼𑀘𑁆𑀘𑀢𑁂 𑁋 𑀅𑀧𑁆𑀧𑁂𑀯 𑀦𑀸𑀫 𑀲𑁆𑀯𑁂𑀧𑀻𑀢𑀺 𑀓𑀸𑀮𑀲𑁆𑀲 𑀧𑀞𑀫𑀁 𑀦𑀺𑀬𑀫𑀺𑀢𑀢𑁆𑀢𑀸 𑀦 𑀲𑀫𑀬𑁄 𑀓𑀸𑀮𑀢𑁆𑀣𑁄. 𑀢𑀲𑁆𑀫𑀺𑀁 𑀲𑁆𑀯𑁂𑀢𑀺 𑀦𑀺𑀬𑀫𑀺𑀢𑀓𑀸𑀮𑁂 𑀇𑀢𑀭𑁂𑀲𑀁 𑀆𑀕𑀫𑀦𑀧𑀘𑁆𑀘𑀬𑀸𑀦𑀁 𑀲𑀫𑀯𑀸𑀬𑀁 𑀧𑀝𑀺𑀘𑁆𑀘 𑀉𑀧𑀲𑀗𑁆𑀓𑀫𑁂𑀬𑁆𑀬𑀸𑀫 𑀬𑀣𑀸𑀦𑀺𑀬𑀫𑀺𑀢𑀓𑀸𑀮𑁂𑀧𑀺 𑀧𑀼𑀩𑁆𑀩𑀡𑁆𑀳𑀸𑀤𑀺𑀧𑁆𑀧𑀪𑁂𑀤𑀁 𑀬𑀣𑀸𑀯𑀼𑀢𑁆𑀢𑀲𑀫𑀯𑀸𑀬𑀸𑀦𑀼𑀭𑀽𑀧𑀁 𑀓𑀸𑀮𑀜𑁆𑀘 𑀉𑀧𑀸𑀤𑀸𑀬𑀸𑀢𑀺 𑀲𑁆𑀯𑁂𑀢𑀺 𑀧𑀭𑀺𑀘𑁆𑀙𑀺𑀦𑁆𑀦𑀤𑀺𑀯𑀲𑁂 𑀧𑀼𑀩𑁆𑀩𑀡𑁆𑀳𑀸𑀤𑀺𑀓𑀸𑀮𑀦𑀺𑀬𑀢𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀢𑀲𑁆𑀫𑀸 𑀓𑀸𑀮𑀲𑀫𑀬𑀸𑀦𑀁 𑀦 𑀏𑀓𑀢𑁆𑀣𑀢𑁆𑀢𑀸 𑀓𑀸𑀮𑀲𑁆𑀲 𑀯𑀺𑀲𑀼𑀁 𑀕𑀳𑀡𑀫𑁆𑀧𑀺 𑀲𑀸𑀢𑁆𑀣𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀲𑁆𑀫𑀸 𑀔𑀡𑁂 𑀔𑀡𑁂 𑀢𑁆𑀯𑀁 𑀪𑀺𑀓𑁆𑀔𑀼 𑀚𑀸𑀬𑀲𑀺 𑀘 𑀚𑀻𑀬𑀲𑀺 𑀘 𑀫𑀻𑀬𑀲𑀺 𑀘𑁂𑀢𑀺 𑀪𑀺𑀓𑁆𑀔𑀼𑀦𑀺𑀬𑀸 𑀲𑀦𑁆𑀢𑀺𑀓𑁂 𑀅𑀪𑀺𑀓𑁆𑀔𑀡𑀁 𑀕𑀘𑁆𑀙𑀢𑀻𑀢𑀺 (𑀧𑀸𑀘𑀺. 𑁧𑁯𑁮) 𑀘 𑀔𑀡𑁂 𑀔𑀡𑁂 𑀪𑀸𑀲𑀢𑀺 𑀲𑀢𑁆𑀣𑀼𑀲𑀸𑀲𑀦𑀦𑁆𑀢𑀺 𑀘 𑀔𑀡𑀲𑀤𑁆𑀤𑁄 𑀅𑀦𑁂𑀓𑀢𑁆𑀣𑁄, 𑀢𑀣𑀸 𑀲𑀫𑀬𑀲𑀤𑁆𑀤𑁄 𑀘, 𑀢𑀲𑁆𑀫𑀸 𑀏𑀓𑀫𑁂𑀓𑁂𑀦 𑀦𑀺𑀬𑀫𑁂𑀦𑁆𑀢𑁄 ‘‘𑀏𑀓𑁄𑀯 𑀔𑁄, 𑀪𑀺𑀓𑁆𑀔𑀯𑁂, 𑀔𑀡𑁄 𑀘 𑀲𑀫𑀬𑁄 𑀘𑀸’’𑀢𑀺 𑀆𑀳. 𑀔𑀡𑀲𑀫𑀬𑀸𑀦𑀁 𑀅𑀢𑁆𑀣𑁄 𑀏𑀓𑀢𑁆𑀣𑁄 𑀬𑀼𑀚𑁆𑀚𑀢𑀺 𑀔𑀡𑁄 𑀑𑀓𑀸𑀲𑀮𑀸𑀪𑁄, 𑀅𑀝𑁆𑀞𑀓𑁆𑀔𑀡𑀯𑀚𑁆𑀚𑀺𑀢𑁄 𑀦𑀯𑀫𑁄 𑀔𑀡𑁄𑀢𑀺 𑀅𑀢𑁆𑀣𑁄. 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀉𑀘𑁆𑀙𑁂𑀤𑀸𑀤𑀬𑁄 𑀤𑀺𑀝𑁆𑀞𑀺𑀕𑀢𑀲𑀗𑁆𑀔𑀸𑀢𑁂 𑀲𑀫𑀬𑁂 𑀏𑀢𑁆𑀣 𑀧𑀯𑀤𑀦𑁆𑀢𑀻𑀢𑀺 𑀲𑀫𑀬𑀧𑁆𑀧𑀯𑀸𑀤𑀓𑁄. 𑀲𑁆𑀯𑁂𑀯 𑀢𑀺𑀦𑁆𑀤𑀼𑀓𑀸𑀘𑀻𑀭𑀲𑀗𑁆𑀔𑀸𑀢𑀸𑀬 𑀢𑀺𑀫𑁆𑀩𑀭𑀼𑀭𑀼𑀓𑁆𑀔𑀧𑀦𑁆𑀢𑀺𑀬𑀸 𑀧𑀭𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀢𑀺𑀦𑁆𑀤𑀼𑀓𑀸𑀘𑀻𑀭𑀁. 𑀏𑀓𑀲𑀸𑀮𑀓𑁂𑀢𑀺 𑀏𑀓𑁄 𑀲𑀸𑀮𑀭𑀼𑀓𑁆𑀔𑁄. ‘‘𑀓𑀼𑀝𑀺𑀓𑀸’’𑀢𑀺𑀧𑀺 𑀯𑀤𑀦𑁆𑀢𑀺. 𑀅𑀢𑁆𑀣𑀸𑀪𑀺𑀲𑀫𑀬𑀸𑀢𑀺 𑀅𑀢𑁆𑀢𑀦𑁄 𑀳𑀺𑀢𑀧𑀝𑀺𑀮𑀸𑀪𑀸. 𑀥𑀻𑀭𑁄𑀢𑀺 𑀘 𑀧𑀡𑁆𑀟𑀺𑀢𑁄 𑀯𑀼𑀘𑁆𑀘𑀢𑀺, 𑀦𑀸𑀜𑁆𑀜𑁄. 𑀲𑀫𑁆𑀫𑀸 𑀫𑀸𑀦𑀸𑀪𑀺𑀲𑀫𑀬𑀸𑀢𑀺 𑀲𑀼𑀝𑁆𑀞𑀼 𑀫𑀸𑀦𑀲𑁆𑀲 𑀧𑀳𑀸𑀦𑁂𑀦, 𑀲𑀫𑀼𑀘𑁆𑀙𑁂𑀤𑀯𑀲𑁂𑀦 𑀲𑀼𑀝𑁆𑀞𑀼 𑀫𑀸𑀦𑀧𑁆𑀧𑀳𑀸𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀤𑀼𑀓𑁆𑀔𑀲𑁆𑀲 𑀧𑀻𑀴𑀦𑀝𑁆𑀞𑁄𑀢𑀺𑀆𑀤𑀻𑀲𑀼 ‘‘𑀘𑀢𑀼𑀦𑁆𑀦𑀁 𑀲𑀘𑁆𑀘𑀸𑀦𑀁 𑀘𑀢𑀽𑀳𑀺 𑀆𑀓𑀸𑀭𑁂𑀳𑀺 𑀧𑀝𑀺𑀯𑁂𑀥𑁄’’𑀢𑀺𑀆𑀤𑀻𑀲𑀼 𑀔𑀦𑁆𑀥𑀧𑀜𑁆𑀘𑀓𑀲𑀗𑁆𑀔𑀸𑀢𑀲𑁆𑀲 𑀤𑀼𑀓𑁆𑀔𑀲𑁆𑀲 𑀤𑀼𑀓𑁆𑀔𑀸𑀓𑀸𑀭𑀢𑀸𑀬𑀝𑁆𑀞𑁄. 𑀲𑀗𑁆𑀔𑀢𑀝𑁆𑀞𑁄 𑀓𑀸𑀭𑀡𑀼𑀧𑁆𑀧𑀢𑁆𑀢𑀺𑀅𑀢𑁆𑀣𑁄, 𑀤𑀼𑀓𑁆𑀔𑀸𑀬 𑀯𑁂𑀤𑀦𑀸𑀬 𑀲𑀦𑁆𑀢𑀸𑀧𑀝𑁆𑀞𑁄. 𑀲𑀼𑀔𑀸𑀬 𑀯𑁂𑀤𑀦𑀸𑀬 𑀯𑀺𑀧𑀭𑀺𑀡𑀸𑀫𑀝𑁆𑀞𑁄. 𑀧𑀻𑀴𑀦𑀝𑁆𑀞𑀸𑀤𑀺𑀓𑁄𑀯 𑀅𑀪𑀺𑀲𑀫𑀬𑀝𑁆𑀞𑁄𑀢𑀺 𑀅𑀢𑁆𑀣𑁄 𑀤𑀝𑁆𑀞𑀩𑁆𑀩𑁄. 𑀕𑀩𑁆𑀪𑁄𑀓𑁆𑀓𑀦𑁆𑀢𑀺𑀲𑀫𑀬𑁄𑀢𑀺𑀆𑀤𑀻𑀲𑀼𑀧𑀺 𑀧𑀣𑀯𑀻𑀓𑀫𑁆𑀧𑀦𑀆𑀮𑁄𑀓𑀧𑀸𑀢𑀼𑀪𑀸𑀯𑀸𑀤𑀻𑀳𑀺 𑀤𑁂𑀯𑀫𑀦𑀼𑀲𑁆𑀲𑁂𑀲𑀼 𑀧𑀸𑀓𑀝𑁄. 𑀤𑀼𑀓𑁆𑀓𑀭𑀓𑀸𑀭𑀺𑀓𑀲𑀫𑀬𑁄𑀧𑀺 𑀓𑀸𑀴𑁄 𑀲𑀫𑀡𑁄 𑀕𑁄𑀢𑀫𑁄 𑀦 𑀓𑀸𑀴𑁄𑀢𑀺𑀆𑀤𑀺𑀦𑀸 𑀧𑀸𑀓𑀝𑁄. 𑀲𑀢𑁆𑀢𑀲𑀢𑁆𑀢𑀸𑀳𑀸𑀦𑀺 𑀘 𑀅𑀜𑁆𑀜𑀸𑀦𑀺 𑀘 𑀤𑀺𑀝𑁆𑀞𑀥𑀫𑁆𑀫𑀲𑀼𑀔𑀯𑀺𑀳𑀸𑀭𑀲𑀫𑀬𑁄.

𑀅𑀘𑁆𑀘𑀦𑁆𑀢𑀫𑁂𑀯 𑀢𑀁 𑀲𑀫𑀬𑀦𑁆𑀢𑀺 𑀆𑀭𑀫𑁆𑀪𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀢𑁆𑀢𑀲𑀦𑁆𑀦𑀺𑀝𑁆𑀞𑀸𑀦𑀸, 𑀢𑀸𑀯 𑀅𑀘𑁆𑀘𑀦𑁆𑀢𑀲𑀫𑁆𑀧𑀬𑁄𑀕𑁂𑀦 𑀢𑀲𑁆𑀫𑀺𑀁 𑀲𑀫𑀬𑁂. 𑀓𑀭𑀼𑀡𑀸𑀯𑀺𑀳𑀸𑀭𑁂𑀦 𑀯𑀺𑀳𑀸𑀲𑀻𑀢𑀺 𑀓𑀭𑀼𑀡𑀸𑀓𑀺𑀘𑁆𑀘𑀯𑀺𑀳𑀸𑀭𑁂𑀦 𑀢𑀲𑁆𑀫𑀺𑀁 𑀲𑀫𑀬𑁂 𑀯𑀺𑀳𑀸𑀲𑀻𑀢𑀺 𑀅𑀢𑁆𑀣𑁄. 𑀢𑀁 𑀲𑀫𑀬𑀜𑁆𑀳𑀺 𑀓𑀭𑀼𑀡𑀸𑀓𑀺𑀘𑁆𑀘𑀲𑀫𑀬𑀁. 𑀜𑀸𑀡𑀓𑀺𑀘𑁆𑀘𑀁 𑀓𑀭𑀼𑀡𑀸𑀓𑀺𑀘𑁆𑀘𑀦𑁆𑀢𑀺 𑀤𑁆𑀯𑁂 𑀪𑀕𑀯𑀢𑁄 𑀓𑀺𑀘𑁆𑀘𑀸𑀦𑀺, 𑀅𑀪𑀺𑀲𑀫𑁆𑀩𑁄𑀥𑀺 𑀜𑀸𑀡𑀓𑀺𑀘𑁆𑀘𑀁, 𑀫𑀳𑀸𑀓𑀭𑀼𑀡𑀸𑀲𑀫𑀸𑀧𑀢𑁆𑀢𑀺𑀁 𑀲𑀫𑀸𑀧𑀚𑁆𑀚𑀺𑀢𑁆𑀯𑀸 𑀯𑁂𑀦𑁂𑀬𑁆𑀬𑀲𑀢𑁆𑀢𑀸𑀯𑀮𑁄𑀓𑀦𑀁 𑀓𑀢𑁆𑀯𑀸 𑀢𑀤𑀦𑀼𑀭𑀽𑀧𑀓𑀭𑀡𑀁 𑀓𑀭𑀼𑀡𑀸𑀓𑀺𑀘𑁆𑀘𑀁. ‘‘𑀲𑀦𑁆𑀦𑀺𑀧𑀢𑀺𑀢𑀸𑀦𑀁 𑀯𑁄, 𑀪𑀺𑀓𑁆𑀔𑀯𑁂, 𑀤𑁆𑀯𑀬𑀁 𑀓𑀭𑀡𑀻𑀬’’𑀦𑁆𑀢𑀺 (𑀫. 𑀦𑀺. 𑁧.𑁨𑁭𑁩; 𑀉𑀤𑀸. 𑁧𑁨, 𑁨𑁮) 𑀳𑀺 𑀯𑀼𑀢𑁆𑀢𑀁, 𑀢𑀁 𑀪𑀕𑀯𑀸𑀧𑀺 𑀓𑀭𑁄𑀢𑀺𑀬𑁂𑀯. 𑀅𑀣 𑀯𑀸 𑀆𑀕𑀦𑁆𑀢𑀼𑀓𑁂𑀳𑀺 𑀪𑀺𑀓𑁆𑀔𑀽𑀳𑀺 𑀆𑀤𑀺𑀲𑀫𑀸𑀬𑁄𑀕𑀜𑁆𑀘. 𑀢𑀢𑁆𑀣 𑀓𑀭𑀼𑀡𑀸𑀓𑀺𑀘𑁆𑀘𑀁 𑀯𑀺𑀳𑀸𑀭𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀓𑀭𑀼𑀡𑀸𑀯𑀺𑀳𑀸𑀭𑁂𑀦 𑀯𑀺𑀳𑀸𑀲𑀻’’𑀢𑀺 𑀆𑀳. 𑀅𑀥𑀺𑀓𑀭𑀡𑀜𑁆𑀳𑀺 𑀓𑀸𑀮𑀢𑁆𑀣𑁄𑀢𑀺 𑀏𑀢𑁆𑀣 𑀳𑀺-𑀓𑀸𑀭𑁄 𑀓𑀸𑀭𑀡𑀢𑁆𑀣𑁄. 𑀢𑀢𑁆𑀣 𑀳𑀺 𑀅𑀪𑀺𑀥𑀫𑁆𑀫𑁂 𑀓𑀸𑀮𑀲𑀫𑀽𑀳𑀔𑀡𑀲𑀫𑀯𑀸𑀬𑀳𑁂𑀢𑀼𑀲𑀗𑁆𑀔𑀸𑀢𑀯𑀲𑁂𑀦 𑀧𑀜𑁆𑀘𑀯𑀺𑀥𑁄 𑀲𑀫𑀬𑀝𑁆𑀞𑁄 𑀤𑀝𑁆𑀞𑀩𑁆𑀩𑁄. 𑀓𑀸𑀮𑀲𑀫𑀽𑀳𑀝𑁆𑀞𑁄 𑀲𑀫𑀬𑁄 𑀓𑀣𑀁 𑀅𑀥𑀺𑀓𑀭𑀡𑀁 𑀳𑁄𑀢𑀺? 𑀅𑀥𑀺𑀓𑀭𑀡𑀫𑀼𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀁 𑀧𑀼𑀩𑁆𑀩𑀡𑁆𑀳𑁂 𑀚𑀸𑀢𑁄𑀢𑀺 𑀬𑀣𑀸, 𑀏𑀯𑀁 𑀓𑀸𑀮𑀝𑁆𑀞𑁄 𑀲𑀫𑀬𑀲𑀤𑁆𑀤𑁄 𑀤𑀝𑁆𑀞𑀩𑁆𑀩𑁄. 𑀓𑀣𑀁 𑀭𑀸𑀲𑀝𑁆𑀞𑁄? 𑀬𑀯𑀭𑀸𑀲𑀺𑀫𑁆𑀳𑀺 𑀚𑀸𑀢𑁄𑀢𑀺 𑀬𑀣𑀸. 𑀢𑀲𑁆𑀫𑀸 𑀬𑀲𑁆𑀫𑀺𑀁 𑀓𑀸𑀮𑁂 𑀧𑀼𑀜𑁆𑀚𑁂 𑀯𑀸 𑀘𑀺𑀢𑁆𑀢𑀁 𑀲𑀫𑀼𑀧𑁆𑀧𑀦𑁆𑀦𑀁, 𑀢𑀲𑁆𑀫𑀺𑀁 𑀓𑀸𑀮𑁂 𑀧𑀼𑀜𑁆𑀚𑁂 𑀯𑀸 𑀨𑀲𑁆𑀲𑀸𑀤𑀬𑁄 𑀉𑀧𑁆𑀧𑀚𑁆𑀚𑀦𑁆𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀥𑀺𑀓𑀭𑀡𑀜𑁆𑀳𑀻𑀢𑀺 𑀏𑀢𑁆𑀣 𑀅𑀪𑀺𑀥𑀫𑁆𑀫𑁂 𑀦𑀺𑀤𑁆𑀤𑀺𑀝𑁆𑀞𑀁 𑀅𑀥𑀺𑀓𑀭𑀡𑀁 𑀓𑀸𑀮𑀝𑁆𑀞𑁄 𑀲𑀫𑀽𑀳𑀝𑁆𑀞𑁄 𑀘 𑀳𑁄𑀢𑀺, ‘‘𑀬𑀲𑁆𑀫𑀺𑀁 𑀲𑀫𑀬𑁂’’𑀢𑀺 𑀯𑀼𑀢𑁆𑀢𑀁 𑀅𑀥𑀺𑀓𑀭𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀇𑀤𑀸𑀦𑀺 𑀪𑀸𑀯𑁂𑀦𑀪𑀸𑀯𑀮𑀓𑁆𑀔𑀡𑀜𑁆𑀘 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀢𑁆𑀣 𑀯𑀼𑀢𑁆𑀢𑀸𑀦’’𑀫𑀺𑀘𑁆𑀘𑀸𑀤𑀺𑀫𑀸𑀳. 𑀢𑀢𑁆𑀣 𑀅𑀪𑀺𑀥𑀫𑁆𑀫𑁂 𑀯𑀼𑀢𑁆𑀢𑀸𑀦𑀁 𑀪𑀸𑀯𑁄 𑀦𑀸𑀫 𑀓𑀺𑀦𑁆𑀢𑀺? 𑀉𑀧𑁆𑀧𑀢𑁆𑀢𑀺 𑀯𑀺𑀚𑁆𑀚𑀫𑀸𑀦𑀢𑀸, 𑀲𑀸 𑀢𑁂𑀲𑀁 𑀢𑀢𑁆𑀣 𑀯𑀼𑀢𑁆𑀢𑀸𑀦𑀁 𑀨𑀲𑁆𑀲𑀸𑀤𑀺𑀥𑀫𑁆𑀫𑀸𑀦𑀁, 𑀲𑀸 𑀧𑀦 𑀲𑀫𑀬𑀲𑁆𑀲 𑀪𑀸𑀯𑁂𑀦 𑀪𑀸𑀯𑁄 𑀮𑀓𑁆𑀔𑀻𑀬𑀢𑀺 𑀜𑀸𑀬𑀢𑀺, 𑀢𑀲𑁆𑀫𑀸 𑀢𑀢𑁆𑀣 𑀪𑀼𑀫𑁆𑀫𑀯𑀘𑀦𑀦𑀺𑀤𑁆𑀤𑁂𑀲𑁄 𑀓𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

𑀢𑀢𑁆𑀣 𑀔𑀡𑁄 𑀦𑀸𑀫 𑀅𑀝𑁆𑀞𑀓𑁆𑀔𑀡𑀯𑀺𑀦𑀺𑀫𑀼𑀢𑁆𑀢𑁄 𑀦𑀯𑀫𑁄 𑀔𑀡𑁄, 𑀢𑀲𑁆𑀫𑀺𑀁 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀲𑀫𑀯𑀸𑀬𑁄 𑀦𑀸𑀫 𑀘𑀓𑁆𑀔𑀼𑀦𑁆𑀤𑁆𑀭𑀺𑀬𑀸𑀤𑀺𑀓𑀸𑀭𑀡𑀲𑀸𑀫𑀕𑁆𑀕𑀻, 𑀢𑀲𑁆𑀫𑀺𑀁 𑀲𑀢𑀺 𑀉𑀧𑁆𑀧𑀚𑁆𑀚𑀢𑀺. 𑀳𑁂𑀢𑀼 𑀦𑀸𑀫 𑀭𑀽𑀧𑀸𑀤𑀺𑀆𑀭𑀫𑁆𑀫𑀡𑀁. 𑀢𑀲𑁆𑀫𑀸 𑀢𑀲𑁆𑀫𑀺𑀁 𑀔𑀡𑀓𑀸𑀭𑀡𑀲𑀫𑀯𑀸𑀬𑀳𑁂𑀢𑀼𑀫𑁆𑀳𑀺 𑀲𑀢𑀺 𑀢𑁂𑀲𑀁 𑀨𑀲𑁆𑀲𑀸𑀤𑀻𑀦𑀁 𑀪𑀸𑀯𑁄 𑀯𑀺𑀚𑁆𑀚𑀫𑀸𑀦𑀢𑀸 𑀳𑁄𑀢𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀇𑀥 𑀧𑀦 𑀳𑁂𑀢𑀼𑀅𑀢𑁆𑀣𑁄 𑀓𑀭𑀡𑀢𑁆𑀣𑁄 𑀘 𑀲𑀫𑁆𑀪𑀯𑀢𑀻𑀢𑀺 𑀏𑀢𑁆𑀣 𑀅𑀢𑁆𑀣𑀤𑁆𑀯𑀬𑀫𑁂𑀓𑀲𑁆𑀲 𑀲𑀫𑁆𑀪𑀯𑀢𑀻𑀢𑀺 𑀇𑀥 𑀯𑀺𑀦𑀬𑁂 𑀯𑀼𑀢𑁆𑀢𑀲𑁆𑀲 𑀲𑀫𑀬𑀲𑀤𑁆𑀤𑀲𑁆𑀲 𑀓𑀢𑁆𑀢𑀼𑀓𑀭𑀡𑀢𑁆𑀣𑁂 𑀢𑀢𑀺𑀬𑀸 𑀳𑁂𑀢𑀼𑀫𑁆𑀳𑀺 𑀘 𑀇𑀢𑁆𑀬𑀼𑀢𑁆𑀢𑀢𑁆𑀢𑀸. 𑀲𑁄 𑀤𑀼𑀩𑁆𑀩𑀺𑀜𑁆𑀜𑁂𑀬𑁆𑀬𑁄𑀢𑀺 ‘‘𑀢𑀣𑀸𑀕𑀢𑁄𑀯 𑀢𑀢𑁆𑀣 𑀓𑀸𑀮𑀁 𑀚𑀸𑀦𑀺𑀲𑁆𑀲𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑁂𑀦 𑀲𑀫𑀬𑁂𑀦𑀸𑀢𑀺 𑀢𑀲𑁆𑀲 𑀲𑀫𑀬𑀲𑁆𑀲 𑀓𑀸𑀭𑀡𑀸 ‘‘𑀅𑀦𑁆𑀦𑁂𑀦 𑀯𑀲𑀢𑀺 𑀯𑀺𑀚𑁆𑀚𑀸𑀬 𑀯𑀲𑀢𑀻’’𑀢𑀺 𑀬𑀣𑀸, 𑀅𑀦𑁆𑀦𑀁 𑀯𑀸 𑀯𑀺𑀚𑁆𑀚𑀁 𑀯𑀸 𑀮𑀪𑀸𑀫𑀻𑀢𑀺 𑀢𑀤𑀢𑁆𑀣𑀁 𑀯𑀲𑀢𑀻𑀢𑁆𑀬𑀢𑁆𑀣𑁄. 𑀏𑀯𑀁 ‘‘𑀢𑁂𑀦 𑀲𑀫𑀬𑁂𑀦 𑀯𑀺𑀳𑀭𑀢𑀻’’𑀢𑀺 𑀯𑀼𑀢𑁆𑀢𑁂 𑀳𑁂𑀢𑁆𑀯𑀢𑁆𑀣𑁂 𑀢𑀢𑀺𑀬𑀸 𑀤𑀝𑁆𑀞𑀩𑁆𑀩𑀸, 𑀢𑀲𑁆𑀫𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀲𑀫𑀬𑀜𑁆𑀘 𑀯𑀻𑀢𑀺𑀓𑁆𑀓𑀫𑀜𑁆𑀘 𑀑𑀮𑁄𑀓𑀬𑀫𑀸𑀦𑁄 𑀢𑀢𑁆𑀣 𑀢𑀢𑁆𑀣 𑀯𑀺𑀳𑀸𑀲𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑀺𑀬𑀧𑀸𑀭𑀸𑀚𑀺𑀓𑀸𑀤𑀻𑀲𑀼 ‘‘𑀇𑀘𑁆𑀙𑀸𑀫𑀳𑀁, 𑀪𑀺𑀓𑁆𑀔𑀯𑁂, 𑀅𑀤𑁆𑀥𑀫𑀸𑀲𑀁, 𑀧𑀝𑀺𑀲𑀮𑁆𑀮𑀻𑀬𑀺𑀢𑀼’’𑀦𑁆𑀢𑀺 (𑀧𑀸𑀭𑀸. 𑁧𑁬𑁨) 𑀏𑀯𑀫𑀸𑀤𑀻𑀲𑀼 𑀤𑀝𑁆𑀞𑀩𑁆𑀩𑀸, 𑀢𑀲𑁆𑀫𑀸 𑀤𑀼𑀢𑀺𑀬𑀸 𑀓𑀸𑀮𑀤𑁆𑀥𑀸𑀦𑁂 𑀅𑀘𑁆𑀘𑀦𑁆𑀢𑀲𑀁𑀬𑁄𑀕𑁂𑀢𑀺 𑀤𑀼𑀢𑀺𑀬𑀸𑀢𑁆𑀭 𑀲𑀫𑁆𑀪𑀯𑀢𑀺 ‘‘𑀫𑀸𑀲𑀫𑀥𑀻𑀢𑁂 𑀤𑀺𑀯𑀲𑀫𑀥𑀻𑀢𑁂’’𑀢𑀺 𑀬𑀣𑀸. 𑀇𑀥 𑀧𑀦 𑀳𑁂𑀢𑀼𑀅𑀢𑁆𑀣𑁄 𑀓𑀭𑀡𑀢𑁆𑀣𑁄 𑀘 𑀲𑀫𑁆𑀪𑀯𑀢𑀻𑀢𑀺 𑀏𑀢𑁆𑀣 𑀬𑀲𑁆𑀲 𑀓𑀭𑀡𑀯𑀘𑀦𑀲𑁆𑀲 𑀳𑁂𑀢𑀼𑀅𑀢𑁆𑀣𑁄 𑀲𑀫𑁆𑀪𑀯𑀢𑀺, 𑀢𑁂𑀦 𑀲𑀫𑀬𑁂𑀦 𑀳𑁂𑀢𑀼𑀪𑀽𑀢𑁂𑀦 𑀢𑀁 𑀢𑀁 𑀯𑀢𑁆𑀣𑀼𑀯𑀻𑀢𑀺𑀓𑁆𑀓𑀫𑀲𑀗𑁆𑀔𑀸𑀢𑀁 𑀯𑀻𑀢𑀺𑀓𑁆𑀓𑀫𑀲𑀫𑀬𑀲𑀗𑁆𑀔𑀸𑀢𑀁 𑀯𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀳𑁂𑀢𑀼𑀜𑁆𑀘 𑀅𑀧𑁂𑀓𑁆𑀔𑀫𑀸𑀦𑁄 𑀪𑀕𑀯𑀸 𑀢𑀢𑁆𑀣 𑀢𑀢𑁆𑀣 𑀯𑀺𑀳𑀸𑀲𑀺. 𑀬𑀲𑁆𑀲 𑀓𑀭𑀡𑀢𑁆𑀣𑁄 𑀲𑀫𑁆𑀪𑀯𑀢𑀺, 𑀢𑁂𑀦 𑀓𑀭𑀡𑀪𑀽𑀢𑁂𑀦 𑀲𑀫𑀬𑁂𑀦 𑀲𑀫𑁆𑀧𑀢𑁆𑀢𑁂𑀦 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀸𑀧𑀬𑀦𑁆𑀢𑁄 𑀪𑀕𑀯𑀸 𑀢𑀢𑁆𑀣 𑀢𑀢𑁆𑀣 𑀯𑀺𑀳𑀸𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀲𑀼𑀤𑀺𑀦𑁆𑀦𑀸𑀤𑀻𑀦𑀁 𑀯𑀻𑀢𑀺𑀓𑁆𑀓𑀫𑁄𑀯 𑀓𑀸𑀭𑀡𑀁 𑀦𑀸𑀫, 𑀢𑀲𑁆𑀲 𑀦𑀺𑀬𑀫𑀪𑀽𑀢𑁄 𑀓𑀸𑀮𑁄 𑀧𑀦 𑀓𑀭𑀡𑀫𑁂𑀯 𑀢𑀁 𑀓𑀸𑀮𑀁 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸𑀯 𑀲𑀺𑀓𑁆𑀔𑀸𑀧𑀤𑀲𑁆𑀲 𑀧𑀜𑁆𑀜𑀧𑁂𑀢𑀩𑁆𑀩𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀦𑀺𑀤𑁆𑀤𑁄𑀲𑀁. 𑀬𑀁 𑀧𑀦 𑀯𑀼𑀢𑁆𑀢𑀁 ‘‘𑀇𑀤𑀁 𑀓𑀭𑀡𑀁 𑀧𑀼𑀩𑁆𑀩𑀪𑀸𑀕𑀢𑁆𑀢𑀸 𑀧𑀞𑀫𑀁 𑀯𑀢𑁆𑀢𑀩𑁆𑀩𑀫𑁆𑀧𑀺 𑀧𑀘𑁆𑀙𑀸 𑀯𑀼𑀢𑁆𑀢’’𑀦𑁆𑀢𑀺, 𑀢𑀁 𑀤𑀼𑀯𑀼𑀢𑁆𑀢𑀁. 𑀳𑁂𑀢𑀼𑀅𑀢𑁆𑀣𑀢𑁄 𑀳𑀺 𑀬𑀣𑀸 𑀧𑀘𑁆𑀙𑀸 𑀓𑀭𑀡𑀢𑁆𑀣𑁄 𑀬𑁄𑀚𑀺𑀬𑀫𑀸𑀦𑁄 𑀅𑀦𑀼𑀓𑁆𑀓𑀫𑁂𑀦𑁂𑀯 𑀬𑁄𑀕𑀁 𑀕𑀘𑁆𑀙𑀢𑀺, 𑀢𑀣𑀸 𑀘 𑀬𑁄𑀚𑀺𑀢𑁄. 𑀬𑀁 𑀧𑀦 𑀅𑀝𑁆𑀞𑀓𑀣𑀸𑀘𑀭𑀺𑀬𑁄 𑀧𑀘𑁆𑀙𑀸 𑀯𑀼𑀢𑁆𑀢𑀁 𑀇𑀤𑀁 𑀓𑀭𑀡𑀢𑁆𑀣𑀁 𑀧𑀞𑀫𑀁 𑀬𑁄𑀚𑁂𑀢𑁆𑀯𑀸 𑀧𑀞𑀫𑀁 𑀯𑀼𑀢𑁆𑀢𑀁 𑀳𑁂𑀢𑀼𑀅𑀢𑁆𑀣𑀁 𑀧𑀘𑁆𑀙𑀸 𑀬𑁄𑀚𑁂𑀲𑀺, 𑀢𑀁 𑀬𑁄𑀚𑀦𑀸𑀲𑀼𑀔𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀆𑀘𑀭𑀺𑀬𑁂𑀦 𑀮𑀺𑀔𑀺𑀢𑀁. 𑀇𑀢𑁄 𑀧𑀝𑁆𑀞𑀸𑀬 𑀬𑀢𑁆𑀣 𑀬𑀢𑁆𑀣 ‘‘𑀆𑀘𑀭𑀺𑀬𑁂𑀦 𑀮𑀺𑀔𑀺𑀢’’𑀦𑁆𑀢𑀺 𑀯𑀸 ‘‘𑀆𑀘𑀭𑀺𑀬𑀲𑁆𑀲 𑀢𑀓𑁆𑀓𑁄’’𑀢𑀺 𑀯𑀸 𑀯𑀼𑀘𑁆𑀘𑀢𑀺, 𑀢𑀢𑁆𑀣 𑀢𑀢𑁆𑀣 𑀆𑀘𑀭𑀺𑀬𑁄 𑀦𑀸𑀫 𑀆𑀦𑀦𑁆𑀤𑀸𑀘𑀭𑀺𑀬𑁄 𑀓𑀮𑀲𑀧𑀼𑀭𑀯𑀸𑀲𑀻𑀢𑀺 𑀕𑀳𑁂𑀢𑀩𑁆𑀩𑁄. 𑀏𑀢𑁆𑀣𑀸𑀳 𑁋 𑀬𑀣𑀸 𑀲𑀼𑀢𑁆𑀢𑀦𑁆𑀢𑁂 ‘‘𑀏𑀓𑀁 𑀲𑀫𑀬𑀁 𑀪𑀕𑀯𑀸’’𑀢𑀺 𑀯𑀼𑀘𑁆𑀘𑀢𑀺, 𑀢𑀣𑀸 ‘‘𑀢𑁂𑀦 𑀲𑀫𑀬𑁂𑀦 𑀪𑀕𑀯𑀸 𑀯𑁂𑀭𑀜𑁆𑀚𑀸𑀬’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁, 𑀅𑀣 𑀲𑀯𑁂𑀯𑀘𑀦𑀁 𑀯𑀢𑁆𑀢𑀼𑀓𑀸𑀫𑁄 𑀣𑁂𑀭𑁄, 𑀢𑀣𑀸𑀕𑀢𑁄 𑀲𑀼𑀕𑀢𑁄𑀢𑀺𑀆𑀤𑀻𑀦𑀺𑀧𑀺 𑀯𑀢𑁆𑀢𑀩𑁆𑀩𑀸𑀦𑀺, 𑀅𑀣 𑀇𑀫𑀲𑁆𑀲𑁂𑀯 𑀧𑀤𑀤𑁆𑀯𑀬𑀲𑁆𑀲 𑀕𑀳𑀡𑁂 𑀓𑀺𑀜𑁆𑀘𑀺 𑀧𑀬𑁄𑀚𑀦𑀁 𑀅𑀢𑁆𑀣𑀺, 𑀢𑀁 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀓𑁂𑀲𑀜𑁆𑀘𑀺 𑀩𑀼𑀤𑁆𑀥𑀲𑁆𑀲 𑀪𑀕𑀯𑀢𑁄 𑀧𑀭𑀫𑀕𑀫𑁆𑀪𑀻𑀭𑀁 𑀅𑀚𑁆𑀛𑀸𑀲𑀬𑀓𑁆𑀓𑀫𑀁 𑀅𑀚𑀸𑀦𑀢𑀁 ‘‘𑀅𑀧𑀜𑁆𑀜𑀢𑁆𑀢𑁂 𑀲𑀺𑀓𑁆𑀔𑀸𑀧𑀤𑁂 𑀅𑀦𑀸𑀤𑀻𑀦𑀯𑀤𑀲𑁆𑀲𑁄…𑀧𑁂… 𑀅𑀪𑀺𑀯𑀺𑀜𑁆𑀜𑀸𑀧𑁂𑀲𑀻’’𑀢𑀺𑀆𑀤𑀺𑀓𑀁 (𑀧𑀸𑀭𑀸. 𑁩𑁬) ‘‘𑀅𑀣 𑀔𑁄 𑀪𑀕𑀯𑀸 𑀆𑀬𑀲𑁆𑀫𑀦𑁆𑀢𑀁 𑀲𑀼𑀤𑀺𑀦𑁆𑀦𑀁 𑀧𑀝𑀺𑀧𑀼𑀘𑁆𑀙𑀻’’𑀢𑀺𑀆𑀤𑀺𑀓𑀜𑁆𑀘 (𑀧𑀸𑀭𑀸. 𑁩𑁯) ‘‘𑀲𑀸𑀤𑀺𑀬𑀺 𑀢𑁆𑀯𑀁 𑀪𑀺𑀓𑁆𑀔𑀽𑀢𑀺. 𑀦𑀸𑀳𑀁 𑀪𑀕𑀯𑀸 𑀲𑀸𑀤𑀺𑀬𑀺’’𑀦𑁆𑀢𑀺𑀆𑀤𑀺𑀓𑀜𑁆𑀘 (𑀧𑀸𑀭𑀸. 𑁭𑁨) 𑀢𑀣𑀸 𑀧𑀼𑀭𑀸𑀡𑀯𑁄𑀳𑀸𑀭𑀺𑀓𑀁 𑀪𑀺𑀓𑁆𑀔𑀼𑀁 𑀧𑀼𑀘𑁆𑀙𑀺𑀢𑁆𑀯𑀸 𑀢𑁂𑀦 𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑁂𑀦 𑀤𑀼𑀢𑀺𑀬𑀧𑀸𑀭𑀸𑀚𑀺𑀓𑀧𑀜𑁆𑀜𑀸𑀧𑀦𑀜𑁆𑀘 𑀤𑁂𑀯𑀤𑀢𑁆𑀢𑀲𑁆𑀲 𑀧𑀩𑁆𑀩𑀚𑁆𑀚𑀸𑀦𑀼𑀚𑀸𑀦𑀦𑀜𑁆𑀘𑀸𑀢𑀺 𑀏𑀯𑀫𑀸𑀤𑀺𑀓𑀁 𑀯𑀺𑀦𑀬𑀧𑀭𑀺𑀬𑀢𑁆𑀢𑀺𑀁 𑀤𑀺𑀲𑁆𑀯𑀸 𑀩𑀼𑀤𑁆𑀥𑀲𑀼𑀩𑀼𑀤𑁆𑀥𑀢𑀁 𑀧𑀝𑀺𑀘𑁆𑀘 𑀲𑀗𑁆𑀓𑀸 𑀲𑀫𑁆𑀪𑀯𑁂𑀬𑁆𑀬, ‘‘𑀢𑀣𑀸 𑀓𑀺𑀁 𑀧𑀦 𑀢𑀼𑀬𑁆𑀳𑀁 𑀙𑀯𑀲𑁆𑀲 𑀔𑁂𑀴𑀸𑀲𑀓𑀲𑁆𑀲𑀸’’𑀢𑀺 (𑀘𑀽𑀴𑀯. 𑁩𑁩𑁬) 𑀏𑀯𑀫𑀸𑀤𑀺𑀓𑀁 𑀨𑀭𑀼𑀲𑀯𑀘𑀦𑀧𑀝𑀺𑀲𑀁𑀬𑀼𑀢𑁆𑀢𑀁 𑀯𑀺𑀦𑀬𑀧𑀭𑀺𑀬𑀢𑁆𑀢𑀺𑀁 𑀦𑀺𑀲𑁆𑀲𑀸𑀬 𑀔𑀻𑀡𑀸𑀲𑀯𑀢𑁆𑀢𑀁 𑀧𑀝𑀺𑀘𑁆𑀘 𑀲𑀗𑁆𑀓𑀸 𑀲𑀫𑁆𑀪𑀯𑁂𑀬𑁆𑀬, 𑀢𑀤𑀼𑀪𑀬𑀲𑀗𑁆𑀓𑀸𑀯𑀺𑀦𑁄𑀤𑀦𑀢𑁆𑀣𑀁 𑀆𑀬𑀲𑁆𑀫𑀢𑀸 𑀉𑀧𑀸𑀮𑀺𑀢𑁆𑀣𑁂𑀭𑁂𑀦 𑀇𑀤𑀫𑁂𑀯 𑀧𑀤𑀤𑁆𑀯𑀬𑀕𑁆𑀕𑀳𑀡𑀁 𑀲𑀩𑁆𑀩𑀢𑁆𑀣 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑁂𑀢𑀁 𑀤𑀻𑀧𑁂𑀢𑀺 𑁋 𑀓𑀸𑀫𑀁 𑀲𑀩𑁆𑀩𑀜𑁂𑀬𑁆𑀬𑀩𑀼𑀤𑁆𑀥𑀢𑁆𑀢𑀸 𑀩𑀼𑀤𑁆𑀥𑁄𑀬𑁂𑀯, 𑀪𑀕𑁆𑀕𑀲𑀩𑁆𑀩𑀤𑁄𑀲𑀢𑁆𑀢𑀸 𑀪𑀕𑀯𑀸𑀯, 𑀲𑁄 𑀲𑀢𑁆𑀣𑀸𑀢𑀺. 𑀧𑀭𑀢𑁄𑀧𑀺 𑀯𑀼𑀢𑁆𑀢𑀁 ‘‘𑀚𑀸𑀦𑀦𑁆𑀢𑀸𑀧𑀺 𑀢𑀣𑀸𑀕𑀢𑀸 𑀧𑀼𑀘𑁆𑀙𑀦𑁆𑀢𑀺…𑀧𑁂… 𑀅𑀦𑀢𑁆𑀣𑀲𑀁𑀳𑀺𑀢𑁂 𑀲𑁂𑀢𑀼𑀖𑀸𑀢𑁄 𑀢𑀣𑀸𑀕𑀢𑀸𑀦’’𑀦𑁆𑀢𑀺 (𑀧𑀸𑀭𑀸. 𑁧𑁬). 𑀲𑀼𑀢𑁆𑀢𑀦𑁆𑀢𑁂 𑀘 𑀯𑀼𑀢𑁆𑀢𑀁 ‘‘𑀲𑀡𑁆𑀳𑁂𑀦𑀧𑀺 𑀓𑁂𑀲𑀺 𑀯𑀺𑀦𑁂𑀫𑀺 𑀨𑀭𑀼𑀲𑁂𑀦𑀧𑀻’’𑀢𑀺𑀆𑀤𑀺 (𑀅. 𑀦𑀺. 𑁪.𑁧𑁧𑁧).

𑀅𑀲𑀸𑀥𑀸𑀭𑀡𑀳𑁂𑀢𑀼𑀫𑁆𑀳𑀻𑀢𑀺 𑀏𑀢𑁆𑀣 𑀓𑀼𑀲𑀮𑀫𑀽𑀮𑀸𑀦𑀺 𑀦 𑀅𑀓𑀼𑀲𑀮𑀸𑀦𑀁 𑀓𑀤𑀸𑀘𑀺 𑀫𑀽𑀮𑀸𑀦𑀺 𑀳𑁄𑀦𑁆𑀢𑀺, 𑀢𑀣𑀸 𑀅𑀓𑀼𑀲𑀮𑀫𑀽𑀮𑀸𑀦𑀺 𑀓𑀼𑀲𑀮𑀸𑀦𑀁, 𑀅𑀩𑁆𑀬𑀸𑀓𑀢𑀫𑀽𑀮𑀸𑀦𑀺 𑀦 𑀓𑀤𑀸𑀘𑀺 𑀓𑀼𑀲𑀮𑀸𑀦𑀦𑁆𑀢𑀺 𑀅𑀬𑀫𑁂𑀯 𑀦𑀬𑁄 𑀮𑀩𑁆𑀪𑀢𑀺, 𑀬𑀲𑁆𑀫𑀸 𑀓𑀼𑀲𑀮𑀸 𑀳𑁂𑀢𑀽 𑀢𑀁𑀲𑀫𑀼𑀝𑁆𑀞𑀸𑀦𑀸𑀦𑀁 𑀭𑀽𑀧𑀸𑀦𑀁 𑀳𑁂𑀢𑀼𑀧𑀘𑁆𑀘𑀬𑁂𑀦 𑀧𑀘𑁆𑀘𑀬𑁄 (𑀧𑀝𑁆𑀞𑀸. 𑁧.𑁧.𑁪𑁦𑁧 𑀆𑀤𑀬𑁄), 𑀢𑀲𑁆𑀫𑀸 𑀓𑀼𑀲𑀮𑀸𑀦𑀺 𑀓𑀼𑀲𑀮𑀸𑀦𑀁𑀬𑁂𑀯𑀸𑀢𑀺𑀆𑀤𑀺𑀦𑀬𑁄 𑀦 𑀮𑀩𑁆𑀪𑀢𑀺. 𑀧𑀼𑀘𑀺 𑀯𑀼𑀘𑁆𑀘𑀢𑁂 𑀓𑀼𑀝𑁆𑀞𑀸, 𑀢𑁂 𑀫𑀦𑁆𑀤𑀬𑀢𑀺 𑀦𑀸𑀲𑀬𑀢𑀻𑀢𑀺 𑀧𑀼𑀘𑀺𑀫𑀦𑁆𑀤𑁄. 𑀲𑀢𑁆𑀢𑀸𑀦𑀁 𑀳𑀺𑀢𑀲𑀼𑀔𑀦𑀺𑀧𑁆𑀨𑀸𑀤𑀦𑀸𑀥𑀺𑀫𑀼𑀢𑁆𑀢𑀢𑀦𑁆𑀢𑀺 𑀏𑀢𑁆𑀣 𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀲𑀢𑁆𑀢𑁂 𑀤𑁆𑀯𑀺𑀥𑀸 𑀪𑀺𑀦𑁆𑀤𑀺𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀫𑀦𑀼𑀲𑁆𑀲𑀸𑀦𑀁 𑀉𑀧𑀓𑀸𑀭𑀩𑀳𑀼𑀮𑀢’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀩𑀳𑀼𑀚𑀦𑀳𑀺𑀢𑀸𑀬𑀸𑀢𑀺 𑀩𑀳𑀼𑀦𑁄 𑀚𑀦𑀲𑁆𑀲 𑀳𑀺𑀢𑀢𑁆𑀣𑀸𑀬. 𑀧𑀜𑁆𑀜𑀸𑀲𑀫𑁆𑀧𑀢𑁆𑀢𑀺𑀬𑀸 𑀤𑀺𑀝𑁆𑀞𑀥𑀫𑁆𑀫𑀺𑀓𑀲𑀫𑁆𑀧𑀭𑀸𑀬𑀺𑀓𑀳𑀺𑀢𑀽𑀧𑀤𑁂𑀲𑀓𑁄 𑀳𑀺 𑀪𑀕𑀯𑀸. 𑀲𑀼𑀔𑀸𑀬𑀸𑀢𑀺 𑀲𑀼𑀔𑀢𑁆𑀣𑀸𑀬. 𑀘𑀸𑀕𑀲𑀫𑁆𑀧𑀢𑁆𑀢𑀺𑀬𑀸 𑀉𑀧𑀓𑀸𑀭𑀓𑀲𑀼𑀔𑀲𑀫𑁆𑀧𑀤𑀸𑀬𑀓𑁄 𑀳𑀺 𑀏𑀲. 𑀫𑁂𑀢𑁆𑀢𑀸𑀓𑀭𑀼𑀡𑀸𑀲𑀫𑁆𑀧𑀢𑁆𑀢𑀺𑀬𑀸 𑀮𑁄𑀓𑀸𑀦𑀼𑀓𑀫𑁆𑀧𑀸𑀬 𑀫𑀸𑀢𑀸𑀧𑀺𑀢𑀭𑁄 𑀯𑀺𑀬. 𑀮𑁄𑀓𑀲𑁆𑀲 𑀭𑀓𑁆𑀔𑀺𑀢𑀕𑁄𑀧𑀺𑀢𑀸 𑀳𑀺 𑀏𑀲. 𑀤𑁂𑀯𑀫𑀦𑀼𑀲𑁆𑀲𑀸𑀦𑀦𑁆𑀢𑀺 𑀏𑀢𑁆𑀣 𑀪𑀩𑁆𑀩𑀧𑀼𑀕𑁆𑀕𑀮𑁂 𑀯𑁂𑀦𑁂𑀬𑁆𑀬𑀲𑀢𑁆𑀢𑁂𑀬𑁂𑀯 𑀕𑀳𑁂𑀢𑁆𑀯𑀸 𑀢𑁂𑀲𑀁 𑀦𑀺𑀩𑁆𑀩𑀸𑀦𑀫𑀕𑁆𑀕𑀨𑀮𑀸𑀥𑀺𑀕𑀫𑀸𑀬 𑀅𑀢𑁆𑀢𑀦𑁄 𑀉𑀧𑁆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. ‘‘𑀅𑀢𑁆𑀣𑀸𑀬𑀸’’𑀢𑀺 𑀳𑀺 𑀯𑀼𑀢𑁆𑀢𑁂 𑀧𑀭𑀫𑀢𑁆𑀣𑀢𑁆𑀣𑀸𑀬 𑀦𑀺𑀩𑁆𑀩𑀸𑀦𑀸𑀬, ‘‘𑀳𑀺𑀢𑀸𑀬𑀸’’𑀢𑀺 𑀯𑀼𑀢𑁆𑀢𑁂 𑀢𑀁𑀲𑀫𑁆𑀧𑀸𑀧𑀓𑀫𑀕𑁆𑀕𑀢𑁆𑀣𑀸𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀫𑀕𑁆𑀕𑀢𑁄 𑀉𑀢𑁆𑀢𑀭𑀺 𑀳𑀺𑀢𑀁 𑀦𑀸𑀫 𑀦𑀢𑁆𑀣𑀻𑀢𑀺. 𑀲𑀼𑀔𑀸𑀬𑀸𑀢𑀺 𑀨𑀮𑀲𑀫𑀸𑀧𑀢𑁆𑀢𑀺𑀲𑀼𑀔𑀢𑁆𑀣𑀸𑀬 𑀢𑀢𑁄 𑀉𑀢𑁆𑀢𑀭𑀺 𑀲𑀼𑀔𑀸𑀪𑀸𑀯𑀢𑁄. 𑀤𑀺𑀝𑁆𑀞𑀺𑀲𑀻𑀮𑀲𑀗𑁆𑀖𑀸𑀢𑁂𑀦𑀸𑀢𑀺 𑀏𑀢𑁆𑀣 𑀲𑀫𑀸𑀥𑀺𑀁 𑀧𑀜𑁆𑀜𑀜𑁆𑀘 𑀅𑀕𑁆𑀕𑀳𑁂𑀢𑁆𑀯𑀸 𑀤𑀺𑀝𑁆𑀞𑀺𑀲𑀻𑀮𑀫𑀢𑁆𑀢𑀕𑁆𑀕𑀳𑀡𑀁 𑀲𑀩𑁆𑀩𑀲𑁂𑀓𑁆𑀔𑀸𑀲𑁂𑀓𑁆𑀔𑀲𑀸𑀫𑀜𑁆𑀜𑀢𑁆𑀢𑀸. 𑀓𑁄𑀲𑀫𑁆𑀩𑀓𑀲𑀼𑀢𑁆𑀢𑁂𑀧𑀺 (𑀫. 𑀦𑀺. 𑁧.𑁪𑁯𑁨) ‘‘𑀲𑀻𑀮𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀺, 𑀤𑀺𑀝𑁆𑀞𑀺𑀲𑀸𑀫𑀜𑁆𑀜𑀕𑀢𑁄 𑀯𑀺𑀳𑀭𑀢𑀻’’𑀢𑀺 𑀯𑀼𑀢𑁆𑀢𑀁. 𑀤𑀺𑀝𑁆𑀞𑀺𑀕𑁆𑀕𑀳𑀡𑁂𑀦 𑀧𑀜𑁆𑀜𑀸𑀧𑀺 𑀕𑀳𑀺𑀢𑀸𑀢𑀺 𑀘𑁂? 𑀦, 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀫𑁆𑀧𑀺 𑀧𑀜𑁆𑀜𑀸𑀬 𑀧𑀭𑀺𑀧𑀽𑀭𑀓𑀸𑀭𑀺𑀪𑀸𑀯𑀧𑁆𑀧𑀲𑀗𑁆𑀕𑀢𑁄, 𑀢𑀲𑁆𑀫𑀸 𑀏𑀓𑀮𑀓𑁆𑀔𑀡𑀸𑀦𑀫𑁆𑀧𑀺 𑀢𑀸𑀲𑀁 𑀧𑀜𑁆𑀜𑀸𑀤𑀺𑀝𑁆𑀞𑀻𑀦𑀁 𑀅𑀯𑀢𑁆𑀣𑀦𑁆𑀢𑀭𑀪𑁂𑀤𑁄 𑀅𑀢𑁆𑀣𑀺 𑀥𑀺𑀢𑀺𑀲𑀫𑀸𑀥𑀺𑀦𑁆𑀤𑁆𑀭𑀺𑀬𑀲𑀫𑁆𑀫𑀸𑀲𑀫𑀸𑀥𑀻𑀦𑀁 𑀯𑀺𑀬. 𑀅𑀜𑁆𑀜𑀸𑀲𑀻𑀢𑀺 𑀏𑀢𑁆𑀣 𑀲𑁄𑀢𑀤𑁆𑀯𑀸𑀭𑀸𑀦𑀼𑀲𑀸𑀭𑁂𑀦 𑀜𑀸𑀢𑀸, 𑀅𑀢𑁆𑀣𑀸 𑀲𑀼𑀢𑀸𑀢𑀺 𑀳𑀺 𑀯𑀼𑀘𑁆𑀘𑀦𑁆𑀢𑀺 ‘‘𑀲𑀼𑀢𑀫𑁂𑀢𑀁, 𑀪𑁄 𑀕𑁄𑀢𑀫, 𑀧𑀸𑀧𑀓𑀸 𑀲𑀫𑀸𑀘𑀸𑀭𑀸 𑀤𑀺𑀲𑁆𑀲𑀦𑁆𑀢𑀺 𑀘𑁂𑀯 𑀲𑀼𑀬𑁆𑀬𑀦𑁆𑀢𑀺 𑀘𑀸’’𑀢𑀺𑀆𑀤𑀻𑀲𑀼 𑀯𑀺𑀬. ‘‘𑀪𑀺𑀓𑁆𑀔𑀼 𑀔𑁄, 𑀉𑀧𑀸𑀮𑀺, 𑀲𑀗𑁆𑀖𑀁 𑀪𑀺𑀦𑁆𑀤𑀢𑀻’’𑀢𑀺𑀆𑀤𑀻𑀲𑀼 (𑀘𑀽𑀴𑀯. 𑁩𑁫𑁪) 𑀯𑀺𑀬 𑀅𑀯𑀥𑀸𑀭𑀡𑀢𑁆𑀣𑁂 𑀯𑀸. 𑀯𑁂𑀭𑀜𑁆𑀚𑀸𑀬𑀁 𑀪𑀯𑁄 𑀯𑀺𑀚𑁆𑀚𑀫𑀸𑀦𑁄. 𑀇𑀢𑁆𑀣𑀫𑁆𑀪𑀽𑀢𑀲𑁆𑀲 𑀏𑀯𑀁 𑀪𑀽𑀢𑀲𑁆𑀲. 𑀓𑀣𑀁 𑀪𑀽𑀢𑀲𑁆𑀲? 𑀲𑀓𑁆𑀬𑀧𑀼𑀢𑁆𑀢𑀲𑁆𑀲 𑀲𑀓𑁆𑀬𑀓𑀼𑀮𑀸 𑀧𑀩𑁆𑀩𑀚𑀺𑀢𑀲𑁆𑀲, 𑀏𑀯𑀁 𑀳𑀼𑀢𑁆𑀯𑀸 𑀞𑀺𑀢𑀲𑁆𑀲 𑀓𑀺𑀢𑁆𑀢𑀺𑀲𑀤𑁆𑀤𑁄 𑀅𑀩𑁆𑀪𑀼𑀕𑁆𑀕𑀢𑁄𑀢𑀺 𑀅𑀪𑀺𑀲𑀤𑁆𑀤𑁂𑀦 𑀬𑁄𑀕𑁂 𑀉𑀧𑀬𑁄𑀕𑀯𑀘𑀦𑀸𑀦𑀺 𑀳𑁄𑀦𑁆𑀢𑀻𑀢𑀺 𑀅𑀢𑁆𑀣𑁄.

𑀓𑀸𑀫𑀼𑀧𑀸𑀤𑀸𑀦𑀧𑀘𑁆𑀘𑀬𑀸 𑀏𑀯 𑀫𑁂𑀢𑁆𑀢𑀁 𑀪𑀸𑀯𑁂𑀢𑀺, 𑀩𑁆𑀭𑀳𑁆𑀫𑀮𑁄𑀓𑁂 𑀦𑀺𑀩𑁆𑀩𑀢𑁆𑀢𑀢𑀻𑀢𑀺 𑀇𑀫𑀺𑀦𑀸 𑀓𑀸𑀫𑀼𑀧𑀸𑀤𑀸𑀦𑀳𑁂𑀢𑀼 𑀓𑀫𑁆𑀫𑀁 𑀓𑀢𑁆𑀯𑀸 𑀓𑀸𑀫𑀪𑀯𑁂 𑀏𑀯 𑀦𑀺𑀩𑁆𑀩𑀢𑁆𑀢𑀢𑀻𑀢𑀺𑀯𑀸𑀤𑀻𑀦𑀁 𑀯𑀸𑀤𑁄 𑀧𑀝𑀺𑀓𑁆𑀔𑀺𑀢𑁆𑀢𑁄𑀢𑀺 𑀯𑀤𑀦𑁆𑀢𑀺, ‘‘𑀩𑁆𑀭𑀳𑁆𑀫𑀮𑁄𑀓𑁂 𑀧𑀡𑀻𑀢𑀸 𑀓𑀸𑀫𑀸’’𑀢𑀺 𑀲𑀼𑀢𑁆𑀯𑀸, 𑀓𑀧𑁆𑀧𑁂𑀢𑁆𑀯𑀸 𑀯𑀸 𑀧𑀘𑁆𑀙𑀸 ‘‘𑀢𑀢𑁆𑀣 𑀲𑀫𑁆𑀧𑀢𑁆𑀢𑀺𑀁 𑀅𑀦𑀼𑀪𑀯𑀺𑀲𑁆𑀲𑀸𑀫𑀻’’𑀢𑀺 𑀓𑀸𑀫𑀼𑀧𑀸𑀤𑀸𑀦𑀧𑀘𑁆𑀘𑀬𑀸 𑀢𑀤𑀼𑀧𑀕𑀁 𑀓𑀭𑁄𑀢𑀻𑀢𑀺 𑀩𑁆𑀭𑀳𑁆𑀫𑀮𑁄𑀓𑁂𑀧𑀺 𑀓𑀸𑀫𑀦𑀻𑀬𑀝𑁆𑀞𑁂𑀦 𑀓𑀸𑀫𑀸, ‘‘𑀢𑀤𑀸𑀭𑀫𑁆𑀫𑀡𑀢𑁆𑀢𑀸 𑀢𑀡𑁆𑀳𑀸 𑀓𑀸𑀫𑀼𑀧𑀸𑀤𑀸𑀦𑀦𑁆𑀢𑀺 𑀯𑀼𑀢𑁆𑀢𑀸’’𑀢𑀺 𑀘 𑀯𑀤𑀦𑁆𑀢𑀺, 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀓𑀫𑁆𑀫𑀜𑁆𑀘 𑀘𑀓𑁆𑀔𑀼𑀲𑁆𑀲 𑀚𑀦𑀓𑀓𑀸𑀭𑀡𑀁, 𑀓𑀫𑁆𑀫𑀲𑁆𑀲 𑀫𑀽𑀮𑀓𑀸𑀭𑀡𑀁 𑀢𑀡𑁆𑀳𑀸, 𑀢𑀲𑁆𑀫𑀸 𑀦 𑀫𑀽𑀮𑀓𑀸𑀭𑀡𑀁 𑀳𑁄𑀢𑀺 𑀚𑀦𑀓𑀁. 𑀭𑀽𑀧𑀢𑀡𑁆𑀳𑀸𑀤𑀬𑁄 𑀤𑀼𑀓𑁆𑀔𑀲𑀘𑁆𑀘𑀁 𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸, ‘‘𑀬𑀫𑁆𑀧𑀺𑀘𑁆𑀙𑀁 𑀦 𑀮𑀪𑀢𑀺, 𑀢𑀫𑁆𑀧𑀺 𑀤𑀼𑀓𑁆𑀔’’𑀦𑁆𑀢𑀺 (𑀤𑀻. 𑀦𑀺. 𑁨.𑁩𑁮𑁭; 𑀫. 𑀦𑀺. 𑁧.𑁧𑁩𑁧; 𑀯𑀺𑀪. 𑁧𑁯𑁦) 𑀯𑀘𑀦𑀢𑁄 𑀘. 𑀢𑀲𑁆𑀲 𑀫𑀽𑀮𑀓𑀸𑀭𑀡𑀪𑀸𑀯𑁂𑀦 𑀲𑀫𑀼𑀝𑁆𑀞𑀸𑀧𑀺𑀓𑀸𑀢𑀺 𑀢𑀲𑁆𑀲 𑀓𑀸𑀭𑀡𑀪𑀽𑀢𑀲𑁆𑀲 𑀇𑀫𑀲𑁆𑀲 𑀔𑀦𑁆𑀥𑀧𑀜𑁆𑀘𑀓𑀲𑁆𑀲 𑀲𑀫𑀼𑀝𑁆𑀞𑀸𑀧𑀺𑀓𑀸𑀢𑀺 𑀬𑁄𑀚𑁂𑀢𑀩𑁆𑀩𑀁. ‘‘𑀆𑀲𑀯𑀲𑀫𑀼𑀤𑀬𑀸 𑀅𑀯𑀺𑀚𑁆𑀚𑀸𑀲𑀫𑀼𑀤𑀬𑁄’’𑀢𑀺 (𑀫. 𑀦𑀺. 𑁧.𑁧𑁦𑁩) 𑀯𑀘𑀦𑀢𑁄 𑀢𑀲𑁆𑀲 𑀏𑀯 𑀓𑀸𑀭𑀡𑀦𑁆𑀢𑀺𑀧𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀅𑀧𑀺𑀘 ‘‘𑀭𑀽𑀧𑀸𑀤𑀺 𑀯𑀺𑀬 𑀢𑀡𑁆𑀳𑀸𑀧𑀺 𑀢𑀡𑁆𑀳𑀸𑀬 𑀉𑀧𑁆𑀧𑀢𑁆𑀢𑀺𑀧𑁆𑀧𑀳𑀸𑀦𑀝𑁆𑀞𑀸𑀦’’𑀦𑁆𑀢𑀺 𑀯𑀘𑀦𑀢𑁄 𑀭𑀽𑀧𑀸𑀤𑀺 𑀯𑀺𑀬 𑀢𑀡𑁆𑀳𑀸𑀧𑀺 𑀤𑀼𑀓𑁆𑀔𑀲𑀘𑁆𑀘𑀁 𑀓𑀢𑀁. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀭𑀽𑀧𑀢𑀡𑁆𑀳𑀸 𑀮𑁄𑀓𑁂 𑀧𑀺𑀬𑀭𑀽𑀧𑀁 𑀲𑀸𑀢𑀭𑀽𑀧𑀁, 𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀻’’𑀢𑀺 (𑀤𑀻. 𑀦𑀺. 𑁨.𑁪𑁦𑁦; 𑀯𑀺𑀪. 𑁨𑁦𑁩) 𑀘 ‘‘𑀏𑀢𑁆𑀣𑁂𑀲𑀸 𑀢𑀡𑁆𑀳𑀸 𑀧𑀳𑀻𑀬𑀫𑀸𑀦𑀸 𑀧𑀳𑀻𑀬𑀢𑀻’’𑀢𑀺 (𑀤𑀻. 𑀦𑀺. 𑁨.𑁪𑁦𑁧; 𑀫. 𑀦𑀺. 𑁧.𑁧𑁩𑁪) 𑀘. 𑀯𑀺𑀲𑀼𑀤𑁆𑀥𑀺𑀫𑀕𑁆𑀕𑁂 ‘‘𑀲𑀩𑁆𑀩𑀸𑀓𑀸𑀭𑁂𑀦 𑀧𑀦 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀜𑁆𑀘𑀓𑀁 𑀤𑀼𑀓𑁆𑀔𑀜𑁆𑀘𑁂𑀯 𑀅𑀭𑀺𑀬𑀲𑀘𑁆𑀘𑀜𑁆𑀘 𑀅𑀜𑁆𑀜𑀢𑁆𑀭 𑀢𑀡𑁆𑀳𑀸𑀬𑀸’’𑀢𑀺 𑀯𑀘𑀦𑀢𑁄 𑀇𑀥 𑀭𑀽𑀧𑀢𑀡𑁆𑀳𑀸𑀤𑀬𑁄 𑀤𑀼𑀓𑁆𑀔𑀲𑀘𑁆𑀘𑀦𑁆𑀢𑀺 𑀯𑀘𑀦𑀁 𑀯𑀺𑀭𑀼𑀚𑁆𑀛𑀢𑀻𑀢𑀺 𑀘𑁂? 𑀦, 𑀅𑀜𑁆𑀜𑀫𑀜𑁆𑀜𑀸𑀲𑀗𑁆𑀓𑀭𑀪𑀸𑀯𑁂𑀦 𑀤𑀲𑁆𑀲𑁂𑀢𑀼𑀁 𑀢𑀢𑁆𑀣 𑀢𑀢𑁆𑀣 𑀯𑀼𑀢𑁆𑀢𑀢𑁆𑀢𑀸. 𑀬𑀤𑀺 𑀢𑀡𑁆𑀳𑀸 𑀉𑀧𑀸𑀤𑀸𑀦𑀓𑁆𑀔𑀦𑁆𑀥𑀧𑀭𑀺𑀬𑀸𑀧𑀦𑁆𑀦𑀸 𑀦 𑀪𑀯𑁂𑀬𑁆𑀬, 𑀲𑀘𑁆𑀘𑀯𑀺𑀪𑀗𑁆𑀕𑁂 ‘‘𑀢𑀢𑁆𑀣 𑀓𑀢𑀫𑁂 𑀲𑀁𑀔𑀺𑀢𑁆𑀢𑁂𑀦 𑀧𑀜𑁆𑀘𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑀸 𑀤𑀼𑀓𑁆𑀔𑀸. 𑀲𑁂𑀬𑁆𑀬𑀣𑀺𑀤𑀁, 𑀭𑀽𑀧𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄 ..𑀧𑁂… 𑀯𑀺𑀜𑁆𑀜𑀸𑀡𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄’’𑀢𑀺 (𑀯𑀺𑀪. 𑁨𑁦𑁨) 𑀏𑀢𑁆𑀣 ‘‘𑀞𑀧𑁂𑀢𑁆𑀯𑀸 𑀢𑀡𑁆𑀳𑀁 𑀲𑀗𑁆𑀔𑀸𑀭𑀼𑀧𑀸𑀤𑀸𑀦𑀓𑁆𑀔𑀦𑁆𑀥𑁄’’𑀢𑀺 𑀯𑀢𑁆𑀢𑀩𑁆𑀩𑀁 𑀪𑀯𑁂𑀬𑁆𑀬, 𑀦 𑀘 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀤𑀼𑀓𑁆𑀔𑀲𑀘𑁆𑀘𑀧𑀭𑀺𑀬𑀸𑀧𑀦𑁆𑀦𑀸 𑀢𑀡𑁆𑀳𑀸𑀢𑀺 𑀘𑁂? 𑀦, 𑀳𑁂𑀢𑀼𑀨𑀮𑀲𑀗𑁆𑀓𑀭𑀤𑁄𑀲𑀧𑁆𑀧𑀲𑀗𑁆𑀕𑀢𑁄. 𑀦 𑀲𑀗𑁆𑀓𑀭𑀤𑁄𑀲𑁄𑀢𑀺 𑀘𑁂? 𑀲𑀘𑁆𑀘𑀯𑀺𑀪𑀗𑁆𑀕𑀧𑀸𑀴𑀺𑀬𑀜𑁆𑀳𑀺 𑀧𑀜𑁆𑀘𑀳𑀺 𑀓𑁄𑀝𑁆𑀞𑀸𑀲𑁂𑀳𑀺 𑀲𑀫𑀼𑀤𑀬𑀲𑀘𑁆𑀘𑀁 𑀦𑀺𑀤𑁆𑀤𑀺𑀝𑁆𑀞𑀁.

𑀓𑀣𑀁? 𑀢𑀡𑁆𑀳𑀸𑀢𑀺 𑀏𑀓𑁄 𑀯𑀸𑀭𑁄, 𑀢𑀡𑁆𑀳𑀸 𑀘 𑀅𑀯𑀲𑁂𑀲𑀸 𑀘 𑀓𑀺𑀮𑁂𑀲𑀸𑀢𑀺 𑀤𑀼𑀢𑀺𑀬𑁄, 𑀢𑀡𑁆𑀳𑀸 𑀘 𑀅𑀯𑀲𑁂𑀲𑀸 𑀘 𑀓𑀺𑀮𑁂𑀲𑀸 𑀅𑀯𑀲𑁂𑀲𑀸 𑀘 𑀅𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑀢𑀢𑀺𑀬𑁄, 𑀢𑀡𑁆𑀳𑀸 𑀘 𑀅𑀯𑀲𑁂𑀲𑀸 𑀘 𑀓𑀺𑀮𑁂𑀲𑀸 𑀅𑀯𑀲𑁂𑀲𑀸 𑀘 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀢𑀻𑀡𑀺 𑀘 𑀓𑀼𑀲𑀮𑀫𑀽𑀮𑀸𑀦𑀺 𑀲𑀸𑀲𑀯𑀸𑀦𑀻𑀢𑀺 𑀘𑀢𑀼𑀢𑁆𑀣𑁄, 𑀢𑀡𑁆𑀳𑀸 𑀘 𑀅𑀯𑀲𑁂𑀲𑀸 𑀘 𑀓𑀺𑀮𑁂𑀲𑀸 𑀅𑀯𑀲𑁂𑀲𑀸 𑀘 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀢𑀻𑀡𑀺 𑀘 𑀓𑀼𑀲𑀮𑀫𑀽𑀮𑀸𑀦𑀺 𑀲𑀸𑀲𑀯𑀸𑀦𑀺 𑀅𑀯𑀲𑁂𑀲𑀸 𑀘 𑀲𑀸𑀲𑀯𑀸 𑀓𑀼𑀲𑀮𑀸 𑀥𑀫𑁆𑀫𑀸𑀢𑀺 𑀧𑀜𑁆𑀘𑀫𑁄 𑀯𑀸𑀭𑁄𑀢𑀺. 𑀆𑀫 𑀦𑀺𑀤𑁆𑀤𑀺𑀝𑁆𑀞𑀁, 𑀢𑀣𑀸𑀧𑀺 𑀅𑀪𑀺𑀥𑀫𑁆𑀫𑀪𑀸𑀚𑀦𑀺𑀬𑁂𑀬𑁂𑀯, 𑀦 𑀅𑀜𑁆𑀜𑀲𑁆𑀫𑀺𑀁, 𑀲𑁄 𑀘 𑀦𑀬𑁄 𑀅𑀭𑀺𑀬𑀲𑀘𑁆𑀘𑀦𑀺𑀤𑁆𑀤𑁂𑀲𑁂 𑀦 𑀮𑀩𑁆𑀪𑀢𑀺. 𑀢𑀣𑀸 𑀳𑀺 𑀢𑀢𑁆𑀣 ‘‘𑀘𑀢𑁆𑀢𑀸𑀭𑀺 𑀲𑀘𑁆𑀘𑀸𑀦𑀺’’𑀘𑁆𑀘𑁂𑀯𑀸𑀳, 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀺𑀬𑀧𑀜𑁆𑀳𑀧𑀼𑀘𑁆𑀙𑀓𑁂𑀲𑀼 𑀯𑀺𑀬 ‘‘𑀘𑀢𑁆𑀢𑀸𑀭𑀺 𑀅𑀭𑀺𑀬𑀲𑀘𑁆𑀘𑀸𑀦𑀻’’𑀢𑀺 𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀲𑀼𑀢𑁆𑀢𑀦𑁆𑀢𑀪𑀸𑀚𑀦𑀺𑀬𑁄𑀯 𑀧𑀫𑀸𑀡𑀁 𑀢𑀢𑁆𑀣 𑀘 𑀢𑀡𑁆𑀳𑀸𑀬 𑀯𑀼𑀢𑁆𑀢𑀢𑁆𑀢𑀸. 𑀬𑀣𑀸𑀳 ‘‘𑀢𑀢𑁆𑀣 𑀓𑀢𑀫𑀁 𑀤𑀼𑀓𑁆𑀔𑀲𑀫𑀼𑀤𑀬𑀁 𑀅𑀭𑀺𑀬𑀲𑀘𑁆𑀘𑀁, 𑀬𑀸𑀬𑀁 𑀢𑀡𑁆𑀳𑀸 𑀧𑁄𑀦𑁄𑀪𑀯𑀺𑀓𑀸…𑀧𑁂… 𑀲𑁂𑀬𑁆𑀬𑀣𑀺𑀤𑀁, 𑀓𑀸𑀫𑀢𑀡𑁆𑀳𑀸’’𑀢𑀺𑀆𑀤𑀺 (𑀯𑀺𑀪. 𑁨𑁦𑁩). ‘‘𑀬𑀤𑀦𑀺𑀘𑁆𑀘𑀁 𑀢𑀁 𑀤𑀼𑀓𑁆𑀔’’𑀦𑁆𑀢𑀺 (𑀲𑀁. 𑀦𑀺. 𑁩.𑁧𑁫) 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀯𑀼𑀢𑁆𑀢𑀢𑁆𑀢𑀸 𑀢𑀢𑁆𑀣 𑀯𑀼𑀢𑁆𑀢𑀫𑁆𑀧𑀺 𑀧𑀫𑀸𑀡𑀫𑁂𑀯. ‘‘𑀧𑀞𑀫𑀁 𑀛𑀸𑀦𑀁 𑀉𑀧𑀲𑀫𑁆𑀧𑀚𑁆𑀚 𑀯𑀺𑀳𑀭𑀢𑀺 𑀧𑀣𑀯𑀻𑀓𑀲𑀺𑀡’’𑀦𑁆𑀢𑀺 (𑀥. 𑀲. 𑁧𑁮𑁬 𑀆𑀤𑀬𑁄) 𑀯𑀘𑀦𑀢𑁄 ‘‘𑀓𑀲𑀺𑀡𑀸𑀦𑀻’’𑀢𑀺 𑀛𑀸𑀦𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀓𑁂𑀘𑀺 ‘‘𑀉𑀕𑁆𑀕𑀳𑀦𑀺𑀫𑀺𑀢𑁆𑀢𑀧𑀝𑀺𑀪𑀸𑀕𑀦𑀺𑀫𑀺𑀢𑁆𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁. ‘‘𑀤𑁆𑀯𑀢𑁆𑀢𑀺𑀁𑀲𑀸𑀓𑀸𑀭𑀸𑀧𑀺 𑀧𑀡𑁆𑀡𑀢𑁆𑀢𑀺𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀝𑀺𑀓𑀽𑀮𑀸𑀢𑀺 𑀲𑀢𑀺 𑀧𑀝𑁆𑀞𑀧𑁂𑀢𑀩𑁆𑀩𑀸’’𑀢𑀺 𑀯𑀘𑀦𑀢𑁄 𑀲𑀢𑀺𑀕𑁄𑀘𑀭𑀸 𑀭𑀽𑀧𑀸𑀤𑀬𑁄 𑀘 𑀯𑁂𑀤𑀺𑀢𑀩𑁆𑀩𑀸.

𑀲𑀤𑁆𑀥𑀸𑀳𑀺𑀭𑁄𑀢𑁆𑀢𑀧𑁆𑀧𑀩𑀸𑀳𑀼𑀲𑀘𑁆𑀘𑀯𑀻𑀭𑀺𑀬𑀸𑀭𑀫𑁆𑀪𑁄𑀧𑀝𑁆𑀞𑀺𑀢𑀲𑀢𑀺𑀲𑀫𑁆𑀧𑀚𑀜𑁆𑀜𑀢𑀸𑀢𑀺 𑀇𑀫𑁂 𑀲𑀢𑁆𑀢 𑀲𑀤𑁆𑀥𑀫𑁆𑀫𑀸 𑀦𑀸𑀫. 𑀲𑀪𑀸𑀯𑀢𑁄𑀢𑀺 𑀤𑀼𑀓𑁆𑀔𑀢𑁄. 𑀦 𑀘𑀯𑀢𑀻𑀢𑀺 𑀤𑁂𑀯𑁂 𑀲𑀦𑁆𑀥𑀸𑀬. 𑀜𑀸𑀢𑁂𑀬𑁆𑀬𑀦𑁆𑀢𑀺 𑀜𑀸𑀢𑀩𑁆𑀩𑀁. 𑀤𑀝𑁆𑀞𑁂𑀬𑁆𑀬𑀦𑁆𑀢𑀺 𑀤𑀝𑁆𑀞𑀩𑁆𑀩𑀁. 𑀅𑀣 𑀯𑀸 𑀧𑀦 ‘‘𑀦𑀸𑀳𑀁 𑀕𑀫𑀦𑁂𑀦 𑀮𑁄𑀓𑀲𑁆𑀲 𑀅𑀦𑁆𑀢𑀁 𑀜𑀸𑀢𑁂𑀬𑁆𑀬’’𑀦𑁆𑀢𑀺 𑀯𑀤𑀸𑀫𑀻𑀢𑀺 𑀅𑀢𑁆𑀣𑁄. 𑀮𑁄𑀓𑀦𑁆𑀢𑀺 𑀔𑀦𑁆𑀥𑀮𑁄𑀓𑀁. 𑀕𑀫𑀦𑁂𑀦 𑀦 𑀧𑀢𑁆𑀢𑀩𑁆𑀩𑁄𑀢𑀺 𑀲𑀭𑀻𑀭𑀕𑀫𑀦𑁂𑀦, 𑀅𑀕𑀢𑀺𑀕𑀫𑀦𑁂𑀦 𑀯𑀸 𑀦 𑀧𑀢𑁆𑀢𑀩𑁆𑀩𑁄, 𑀅𑀭𑀺𑀬𑀕𑀫𑀦𑁂𑀦 𑀮𑁄𑀓𑀦𑁆𑀢𑀁 𑀧𑀢𑁆𑀯𑀸𑀯 𑀤𑀼𑀓𑁆𑀔𑀸 𑀅𑀢𑁆𑀣𑀺 𑀧𑀫𑁄𑀘𑀦𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀲𑀫𑀺𑀢𑀸𑀯𑀻𑀢𑀺 𑀲𑀫𑀺𑀢𑀓𑀺𑀮𑁂𑀲𑁄. 𑀆𑀳𑀸𑀭𑀝𑁆𑀞𑀺𑀢𑀺𑀓𑀸𑀢𑀺 𑀧𑀘𑁆𑀘𑀬𑀝𑁆𑀞𑀺𑀢𑀺𑀓𑀸. 𑀬𑁂 𑀓𑁂𑀘𑀺 𑀧𑀘𑁆𑀘𑀬𑀝𑁆𑀞𑀺𑀢𑀺𑀓𑀸, 𑀲𑀩𑁆𑀩𑁂 𑀢𑁂 𑀮𑀼𑀚𑁆𑀚𑀦𑀧𑀮𑀼𑀚𑁆𑀚𑀦𑀝𑁆𑀞𑁂𑀦 𑀏𑀓𑁄 𑀮𑁄𑀓𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀗𑁆𑀔𑀸𑀭𑀸 𑀳𑀺 𑀲𑀓𑀲𑀓𑀧𑀘𑁆𑀘𑀬𑀸𑀬𑀢𑁆𑀢𑀢𑀸𑀬 𑀲𑀢𑁆𑀢𑀸 𑀯𑀺𑀲𑀢𑁆𑀢𑀸 𑀲𑀢𑁆𑀢𑀸 𑀦𑀸𑀫. 𑀧𑀭𑀺𑀳𑀭𑀦𑁆𑀢𑀺 𑀧𑀭𑀺𑀘𑀭𑀦𑁆𑀢𑀺. 𑀤𑀺𑀲𑀸𑀢𑀺 𑀉𑀧𑀬𑁄𑀕𑀩𑀳𑀼𑀯𑀘𑀦𑀁. 𑀪𑀦𑁆𑀢𑀺 𑀧𑀝𑀺𑀪𑀦𑁆𑀢𑀺. 𑀓𑁂 𑀢𑁂? 𑀢𑁂𑀬𑁂𑀯 𑀯𑀺𑀭𑁄𑀘𑀫𑀸𑀦𑀸 𑀧𑀪𑀲𑁆𑀲𑀭𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸. 𑀅𑀝𑁆𑀞 𑀮𑁄𑀓𑀥𑀫𑁆𑀫𑀸 𑀲𑀗𑁆𑀔𑀸𑀭𑀸𑀯. ‘‘𑀲𑀺𑀦𑁂𑀭𑀼𑀲𑁆𑀲 𑀲𑀫𑀦𑁆𑀢𑀢𑁄’’𑀢𑀺 𑀯𑀘𑀦𑀢𑁄 𑀬𑀼𑀕𑀦𑁆𑀥𑀭𑀸𑀤𑀬𑁄 𑀲𑀺𑀦𑁂𑀭𑀼𑀁 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀭𑀺𑀫𑀡𑁆𑀟𑀮𑀸𑀓𑀸𑀭𑁂𑀦 𑀞𑀺𑀢𑀸𑀢𑀺 𑀯𑀤𑀦𑁆𑀢𑀺. 𑀧𑀭𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀘𑁆𑀘𑀼𑀕𑁆𑀕𑀢𑁄 𑀮𑁄𑀓𑀥𑀸𑀢𑀼 𑀅𑀬𑀁. ‘‘𑀫-𑀓𑀸𑀭𑁄 𑀧𑀤𑀲𑀦𑁆𑀥𑀺𑀓𑀭𑁄’’𑀢𑀺 𑀯𑀤𑀦𑁆𑀢𑀺. 𑀅𑀜𑁆𑀜𑀣𑀸𑀧𑀺 𑀮𑀓𑁆𑀔𑀡𑀸𑀤𑀺𑀪𑁂𑀤𑀢𑁄 𑀲𑀗𑁆𑀔𑀸𑀭𑀮𑁄𑀓𑀁, 𑀆𑀲𑀬𑀸𑀦𑀼𑀲𑀬𑀪𑁂𑀤𑀢𑁄 𑀲𑀢𑁆𑀢𑀮𑁄𑀓𑀁, 𑀘𑀓𑁆𑀓𑀯𑀸𑀴𑀸𑀤𑀺𑀧𑀭𑀺𑀫𑀸𑀡𑀢𑁄 𑀑𑀓𑀸𑀲𑀮𑁄𑀓𑀜𑁆𑀘 𑀲𑀩𑁆𑀩𑀣𑀸𑀧𑀺 𑀯𑀺𑀤𑀺𑀢𑀢𑁆𑀢𑀸 𑀮𑁄𑀓𑀯𑀺𑀤𑀽.

𑀯𑀺𑀫𑀼𑀢𑁆𑀢𑀺𑀜𑀸𑀡𑀤𑀲𑁆𑀲𑀦𑀁 𑀓𑀸𑀫𑀸𑀯𑀘𑀭𑀁 𑀧𑀭𑀺𑀢𑁆𑀢𑀁 𑀮𑁄𑀓𑀺𑀬𑀁, 𑀢𑁂𑀦 𑀲𑀩𑁆𑀩𑀁 𑀮𑁄𑀓𑀁 𑀓𑀣𑀁 𑀅𑀪𑀺𑀯𑀢𑀺? 𑀅𑀲𑀤𑀺𑀲𑀸𑀦𑀼𑀪𑀸𑀯𑀢𑁆𑀢𑀸 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀯𑀺𑀬. 𑀢𑀜𑁆𑀳𑀺 𑀅𑀢𑁆𑀢𑀦𑁄 𑀯𑀺𑀲𑀬𑁂 𑀪𑀕𑀯𑀢𑁄 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀕𑀢𑀺𑀓𑀁, 𑀮𑀳𑀼𑀢𑀭𑀧𑁆𑀧𑀯𑀢𑁆𑀢𑀺 𑀘 𑀪𑀯𑀗𑁆𑀕𑀘𑀺𑀢𑁆𑀢𑀤𑁆𑀯𑀬𑀸𑀦𑀦𑁆𑀢𑀭𑀁 𑀉𑀧𑁆𑀧𑀢𑁆𑀢𑀺𑀢𑁄. 𑀦 𑀓𑀲𑁆𑀲𑀘𑀺 𑀏𑀯𑀁𑀮𑀳𑀼𑀢𑀭𑀁 𑀘𑀺𑀢𑁆𑀢𑀁 𑀉𑀧𑁆𑀧𑀚𑁆𑀚𑀢𑀺, 𑀅𑀧𑀺 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲, 𑀢𑀲𑁆𑀲 𑀓𑀺𑀭𑁂𑀲 𑀘𑀺𑀢𑁆𑀢𑀯𑀸𑀭𑁄 𑀧𑀜𑁆𑀘𑀤𑀲𑀪𑀯𑀗𑁆𑀕𑀸𑀦𑀦𑁆𑀢𑀭𑀦𑁆𑀢𑀺. 𑀅𑀕𑁆𑀕𑀺𑀲𑀺𑀔𑀥𑀽𑀫𑀲𑀺𑀔𑀸 𑀘 𑀦𑀸𑀕𑀸 𑀓𑀺𑀭 𑀲𑀻𑀳𑀴𑀤𑀻𑀧𑁂. 𑀅𑀢𑁆𑀣𑀲𑁆𑀲 𑀤𑀻𑀧𑀓𑀁 𑀧𑀤𑀁 𑀅𑀢𑁆𑀣𑀧𑀤𑀁. 𑀏𑀓𑀢𑁆𑀣𑀤𑀻𑀧𑀓𑀁 𑀧𑀤𑀁, 𑀲𑀩𑁆𑀩𑀫𑁂𑀢𑀁 𑀯𑀸𑀓𑁆𑀬𑀦𑁆𑀢𑀺 𑀅𑀢𑁆𑀣𑁄. 𑀅𑀝𑁆𑀞 𑀤𑀺𑀲𑀸 𑀦𑀸𑀫 𑀅𑀝𑁆𑀞 𑀯𑀺𑀫𑁄𑀓𑁆𑀔𑀸, 𑀲𑀫𑀸𑀧𑀢𑁆𑀢𑀺𑀬𑁄 𑀯𑀸. 𑀲𑀢𑁆𑀣𑀯𑀸𑀳𑁄 𑀲𑀢𑁆𑀣𑀸𑀢𑀺 𑀦𑀺𑀧𑀸𑀢𑀺𑀢𑁄 𑀬𑀣𑀸 𑀧𑀺𑀲𑀺𑀢𑀸𑀲𑁄 𑀧𑀺𑀲𑀸𑀘𑁄. 𑀉𑀤𑀓𑁂 𑀫𑀡𑁆𑀟𑀽𑀓𑁄 𑀅𑀳𑀁 𑀆𑀲𑀺𑀁, 𑀦 𑀣𑀮𑁂 𑀫𑀡𑁆𑀟𑀽𑀓𑁄, 𑀯𑀸𑀭𑀺𑀫𑀢𑁆𑀢𑀫𑁂𑀯 𑀕𑁄𑀘𑀭𑁄, 𑀢𑀲𑁆𑀲 𑀫𑁂 𑀢𑀯 𑀥𑀫𑁆𑀫𑀁 𑀲𑀼𑀡𑀦𑁆𑀢𑀲𑁆𑀲 𑀲𑀻𑀲𑀁 𑀤𑀡𑁆𑀟𑁂𑀦 𑀲𑀦𑁆𑀦𑀺𑀭𑀼𑀫𑁆𑀪𑀺𑀢𑁆𑀯𑀸𑀢𑀺 𑀧𑀸𑀞𑀲𑁂𑀲𑁄. 𑀅𑀦𑀸𑀤𑀭𑀢𑁆𑀣𑁂 𑀯𑀸 𑀲𑀸𑀫𑀺𑀯𑀘𑀦𑀁. ‘‘𑀏𑀢𑁆𑀢𑀓𑁂𑀦𑀧𑀺 𑀏𑀯𑀭𑀽𑀧𑀸 𑀇𑀤𑁆𑀥𑀺 𑀪𑀯𑀺𑀲𑁆𑀲𑀢𑀻’’𑀢𑀺 𑀲𑀺𑀢𑀁 𑀓𑀢𑁆𑀯𑀸. 𑀯𑀺𑀫𑁄𑀓𑁆𑀔𑁄𑀢𑀺 𑀘𑁂𑀢𑁆𑀣 𑀫𑀕𑁆𑀕𑁄, 𑀢𑀤𑀦𑀦𑁆𑀢𑀭𑀺𑀓𑀁 𑀜𑀸𑀡𑀁 𑀦𑀸𑀫 𑀨𑀮𑀜𑀸𑀡𑀁, 𑀢𑀲𑁆𑀫𑀺𑀁 𑀔𑀡𑁂 𑀩𑀼𑀤𑁆𑀥𑁄 𑀦𑀸𑀫. 𑀲𑀩𑁆𑀩𑀲𑁆𑀲 𑀩𑀼𑀤𑁆𑀥𑀢𑁆𑀢𑀸𑀢𑀺 𑀓𑀢𑁆𑀢𑀭𑀺. 𑀩𑁄𑀥𑁂𑀢𑀸𑀢𑀺 𑀳𑁂𑀢𑀼𑀓𑀢𑁆𑀢𑀭𑀺. 𑀲𑁂𑀝𑁆𑀞𑀢𑁆𑀣𑀤𑀻𑀧𑀓𑀁 𑀯𑀘𑀦𑀁 𑀲𑁂𑀝𑁆𑀞𑀁 𑀦𑀸𑀫, 𑀢𑀣𑀸 𑀉𑀢𑁆𑀢𑀫𑀁. 𑀲𑀘𑁆𑀙𑀺𑀓𑀸𑀧𑀜𑁆𑀜𑀢𑁆𑀢𑀻𑀢𑀺 𑀲𑀩𑁆𑀩𑀥𑀫𑁆𑀫𑀸𑀦𑀁 𑀲𑀘𑁆𑀙𑀺𑀓𑀭𑀡𑀯𑀲𑁂𑀦 𑀲𑀬𑀫𑁆𑀪𑀼𑀢𑀸 𑀧𑀜𑁆𑀜𑀢𑁆𑀢𑀺, 𑀅𑀢𑁆𑀢𑀦𑀸 𑀏𑀯 𑀯𑀸 𑀜𑀸𑀢𑀸 𑀲𑀘𑁆𑀙𑀺𑀓𑀢𑀸𑀢𑀺𑀧𑀺 𑀲𑀘𑁆𑀙𑀺𑀓𑀸𑀧𑀜𑁆𑀜𑀢𑁆𑀢𑀺. 𑀪𑀕𑀻 𑀪𑀕𑀯𑀸 𑀘𑀻𑀯𑀭𑀧𑀺𑀡𑁆𑀟𑀧𑀸𑀢𑀸𑀤𑀻𑀦𑀁. 𑀪𑀚𑀻 𑀅𑀭𑀜𑁆𑀜𑀯𑀦𑀧𑀢𑁆𑀣𑀸𑀦𑀺 𑀧𑀦𑁆𑀢𑀸𑀦𑀺 𑀲𑁂𑀦𑀸𑀲𑀦𑀸𑀦𑀺. 𑀪𑀸𑀕𑀻 𑀅𑀢𑁆𑀣𑀥𑀫𑁆𑀫𑀯𑀺𑀫𑀼𑀢𑁆𑀢𑀺𑀭𑀲𑀲𑁆𑀲. 𑀭𑀸𑀕𑀸𑀤𑀺𑀓𑀺𑀮𑁂𑀲𑀕𑀡𑀪𑀕𑁆𑀕𑀫𑀓𑀸𑀲𑀺. 𑀪𑀸𑀯𑀺𑀢𑀢𑁆𑀢𑀦𑁄 𑀪𑀸𑀯𑀺𑀢𑀓𑀸𑀬𑁄. 𑀪𑀯𑀲𑁆𑀲 𑀅𑀦𑁆𑀢𑀁 𑀦𑀺𑀩𑁆𑀩𑀸𑀦𑀁 𑀫𑀕𑁆𑀕𑀸𑀥𑀺𑀕𑀫𑁂𑀦 𑀢𑀁 𑀕𑀢𑁄𑀢𑀺 𑀪𑀯𑀦𑁆𑀢𑀕𑁄.

‘‘𑀮𑁄𑀪𑀁, 𑀪𑀺𑀓𑁆𑀔𑀯𑁂, 𑀏𑀓𑀁 𑀥𑀫𑁆𑀫𑀁 𑀧𑀚𑀳𑀣𑀸’’𑀢𑀺𑀆𑀤𑀺𑀦𑀸 (𑀇𑀢𑀺𑀯𑀼. 𑁧) 𑀦𑀬𑁂𑀦 𑀏𑀓𑀓𑀸𑀤𑀺𑀯𑀲𑁂𑀦𑀸𑀕𑀢𑁂 𑀕𑀳𑁂𑀢𑁆𑀯𑀸 𑀯𑀤𑀢𑀺. 𑀲𑀁𑀓𑀺𑀮𑁂𑀲𑀢𑀡𑁆𑀳𑀸𑀤𑀺𑀝𑁆𑀞𑀺𑀤𑀼𑀘𑁆𑀘𑀭𑀺𑀢𑀲𑀁𑀓𑀺𑀮𑁂𑀲𑀯𑀲𑁂𑀦 𑀅𑀦𑀺𑀘𑁆𑀘𑀤𑀼𑀓𑁆𑀔𑀫𑀦𑀢𑁆𑀢𑀸𑀲𑀼𑀪𑁂𑀲𑀼 𑀦𑀺𑀘𑁆𑀘𑀦𑁆𑀢𑀺𑀆𑀤𑀺𑀯𑀺𑀧𑀭𑀺𑀬𑁂𑀲𑀸. 𑀘𑀻𑀯𑀭𑀳𑁂𑀢𑀼 𑀯𑀸, 𑀪𑀺𑀓𑁆𑀔𑀯𑁂, 𑀪𑀺𑀓𑁆𑀔𑀼𑀦𑁄 𑀢𑀡𑁆𑀳𑀸 𑀉𑀧𑁆𑀧𑀚𑁆𑀚𑀫𑀸𑀦𑀸 𑀉𑀧𑁆𑀧𑀚𑁆𑀚𑀢𑀺, 𑀧𑀺𑀡𑁆𑀟𑀧𑀸𑀢 𑀲𑁂𑀦𑀸𑀲𑀦𑀇𑀢𑀺𑀪𑀯𑀸𑀪𑀯𑀳𑁂𑀢𑀼 𑀯𑀸 (𑀅. 𑀦𑀺. 𑁪.𑁯). 𑀘𑁂𑀢𑁄𑀔𑀺𑀮𑀸 𑀲𑀢𑁆𑀣𑀭𑀺 𑀓𑀗𑁆𑀔𑀢𑀺, 𑀥𑀫𑁆𑀫𑁂, 𑀲𑀗𑁆𑀖𑁂, 𑀲𑀺𑀓𑁆𑀔𑀸𑀬, 𑀲𑀩𑁆𑀭𑀳𑁆𑀫𑀘𑀸𑀭𑀻𑀲𑀼 𑀓𑀼𑀧𑀺𑀢𑁄𑀢𑀺 (𑀤𑀻. 𑀦𑀺. 𑁩.𑁩𑁧𑁯; 𑀯𑀺𑀪. 𑁯𑁪𑁧) 𑀆𑀕𑀢𑀸 𑀧𑀜𑁆𑀘. 𑀓𑀸𑀫𑁂 𑀅𑀯𑀻𑀢𑀭𑀸𑀕𑁄 𑀳𑁄𑀢𑀺…𑀧𑁂… 𑀓𑀸𑀬𑁂, 𑀭𑀽𑀧𑁂, 𑀬𑀸𑀯𑀤𑀢𑁆𑀣𑀁 𑀉𑀤𑀭𑀸𑀯𑀤𑁂𑀳𑀓𑀁 𑀪𑀼𑀜𑁆𑀚𑀺𑀢𑁆𑀯𑀸, 𑀅𑀜𑁆𑀜𑀢𑀭𑀁 𑀤𑁂𑀯𑀦𑀺𑀓𑀸𑀬𑀁 𑀧𑀡𑀺𑀥𑀸𑀬 𑀩𑁆𑀭𑀳𑁆𑀫𑀘𑀭𑀺𑀬𑀁 𑀘𑀭𑀢𑀻𑀢𑀺 (𑀤𑀻. 𑀦𑀺. 𑁩.𑁩𑁨𑁦; 𑀯𑀺𑀪. 𑁯𑁪𑁧) 𑀆𑀕𑀢𑀸 𑀧𑀜𑁆𑀘 𑀯𑀺𑀦𑀺𑀩𑀦𑁆𑀥𑀸. 𑀯𑀺𑀯𑀸𑀤𑀫𑀽𑀮𑀸𑀦𑀺 𑀓𑁄𑀥𑁄 𑀉𑀧𑀦𑀸𑀳𑁄 𑀫𑀓𑁆𑀔𑁄 𑀧𑀴𑀸𑀲𑁄 𑀇𑀲𑁆𑀲𑀸 𑀫𑀘𑁆𑀙𑀭𑀺𑀬𑀁 𑀫𑀸𑀬𑀸 𑀲𑀸𑀞𑁂𑀬𑁆𑀬𑀁 𑀣𑀫𑁆𑀪𑁄 𑀲𑀸𑀭𑀫𑁆𑀪𑁄 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀺𑀢𑀸 𑀆𑀥𑀸𑀦𑀕𑁆𑀕𑀸𑀳𑀻 𑀤𑀼𑀧𑁆𑀧𑀝𑀺𑀦𑀺𑀲𑁆𑀲𑀕𑁆𑀕𑀺𑀢𑀸 (𑀅. 𑀦𑀺. 𑁬.𑁩𑁬; 𑀤𑀻. 𑀦𑀺. 𑁩.𑁩𑁨𑁫). 𑀯𑀺𑀪𑀗𑁆𑀕𑁂 𑀧𑀦 ‘‘𑀓𑁄𑀥𑁄 𑀫𑀓𑁆𑀔𑁄 𑀇𑀲𑁆𑀲𑀸 𑀲𑀸𑀞𑁂𑀬𑁆𑀬𑀁 𑀧𑀸𑀧𑀺𑀘𑁆𑀙𑀢𑀸 𑀲𑀦𑁆𑀤𑀺𑀝𑁆𑀞𑀺𑀧𑀭𑀸𑀫𑀸𑀲𑀺𑀢𑀸’’𑀢𑀺 (𑀯𑀺𑀪. 𑁯𑁪𑁪) 𑀆𑀕𑀢𑀁. 𑀢𑀡𑁆𑀳𑀁 𑀧𑀝𑀺𑀘𑁆𑀘 𑀧𑀭𑀺𑀬𑁂𑀲𑀦𑀸, 𑀧𑀭𑀺𑀬𑁂𑀲𑀦𑀁 𑀧𑀝𑀺𑀘𑁆𑀘 𑀮𑀸𑀪𑁄, 𑀮𑀸𑀪𑀁 𑀧𑀝𑀺𑀘𑁆𑀘 𑀯𑀺𑀦𑀺𑀘𑁆𑀙𑀬𑁄, 𑀏𑀯𑀁 𑀙𑀦𑁆𑀤𑀭𑀸𑀕𑁄, 𑀅𑀚𑁆𑀛𑁄𑀲𑀸𑀦𑀁, 𑀧𑀭𑀺𑀕𑁆𑀕𑀳𑁄, 𑀫𑀘𑁆𑀙𑀭𑀺𑀬𑀁, 𑀆𑀭𑀓𑁆𑀔𑁄, 𑀆𑀭𑀓𑁆𑀔𑀸𑀥𑀺𑀓𑀭𑀡𑀁, 𑀤𑀡𑁆𑀟𑀸𑀤𑀸𑀦𑀲𑀢𑁆𑀣𑀸𑀤𑀸𑀦…𑀧𑁂… 𑀅𑀓𑀼𑀲𑀮𑀸 𑀥𑀫𑁆𑀫𑀸 𑀲𑀫𑁆𑀪𑀯𑀦𑁆𑀢𑀻𑀢𑀺 (𑀤𑀻. 𑀦𑀺. 𑁨.𑁧𑁦𑁪; 𑁩.𑁩𑁫𑁯; 𑀅. 𑀦𑀺. 𑁯.𑁨𑁩; 𑀯𑀺𑀪. 𑁯𑁬𑁩) 𑀯𑀼𑀢𑁆𑀢𑀸𑀦𑀁. 𑀭𑀽𑀧𑀲𑀤𑁆𑀤𑀕𑀦𑁆𑀥𑀭𑀲𑀨𑁄𑀝𑁆𑀞𑀩𑁆𑀩𑀥𑀫𑁆𑀫𑀢𑀡𑁆𑀳𑀸𑀢𑀺 𑀙, 𑀢𑀸 𑀓𑀸𑀫𑀪𑀯𑀯𑀺𑀪𑀯𑀢𑀡𑁆𑀳𑀸𑀯𑀲𑁂𑀦𑁂𑀯 𑀅𑀝𑁆𑀞𑀸𑀭𑀲, 𑀢𑀸 𑀏𑀯 𑀅𑀚𑁆𑀛𑀢𑁆𑀢𑀺𑀓𑀲𑁆𑀲𑀼𑀧𑀸𑀤𑀸𑀬 𑀅𑀝𑁆𑀞𑀸𑀭𑀲, 𑀩𑀸𑀳𑀺𑀭𑀲𑁆𑀲𑀼𑀧𑀸𑀤𑀸𑀬 𑀅𑀝𑁆𑀞𑀸𑀭𑀲𑀸𑀢𑀺 𑀙𑀢𑁆𑀢𑀺𑀁𑀲, 𑀢𑀸 𑀅𑀢𑀻𑀢𑁂 𑀙𑀢𑁆𑀢𑀺𑀁𑀲, 𑀅𑀦𑀸𑀕𑀢𑁂 𑀙𑀢𑁆𑀢𑀺𑀁𑀲, 𑀧𑀘𑁆𑀘𑀼𑀧𑁆𑀧𑀦𑁆𑀦𑁂 𑀙𑀢𑁆𑀢𑀺𑀁𑀲𑀸𑀢𑀺 𑀏𑀯𑀁 𑀅𑀝𑁆𑀞𑀲𑀢𑀢𑀡𑁆𑀳𑀸𑀯𑀺𑀘𑀭𑀺𑀢𑀸𑀦𑀻𑀢𑀺. 𑀫𑀸𑀭𑁂𑀢𑀻𑀢𑀺 𑀫𑀸𑀭𑁄, 𑀧𑀫𑀸𑀤𑁄 ‘‘𑀧𑀫𑀸𑀤𑁄 𑀫𑀘𑁆𑀘𑀼𑀦𑁄 𑀧𑀤’’𑀦𑁆𑀢𑀺 (𑀥. 𑀧. 𑁨𑁧) 𑀯𑀘𑀦𑀢𑁄. 𑀲𑀫𑁆𑀫𑀸𑀆𑀚𑀻𑀯𑀯𑀺𑀦𑀸𑀲𑀦𑀢𑁄 𑀯𑀸 𑀓𑀺𑀮𑁂𑀲𑀸 𑀯𑀼𑀘𑁆𑀘𑀦𑁆𑀢𑀺 ‘‘𑀫𑀸𑀭𑁄’’𑀢𑀺, 𑀯𑀥𑀓𑀽𑀧𑀫𑀢𑁆𑀢𑀸 𑀔𑀦𑁆𑀥𑀸𑀯 𑀫𑀸𑀭𑀸. 𑀅𑀪𑀺𑀲𑀗𑁆𑀔𑀸𑀭𑀸 𑀚𑀸𑀢𑀺𑀤𑀼𑀓𑁆𑀔𑀸𑀪𑀺𑀦𑀺𑀩𑁆𑀩𑀢𑁆𑀢𑀸𑀧𑀦𑀢𑁄, 𑀚𑀸𑀢𑀲𑁆𑀲 𑀚𑀭𑀸𑀤𑀺𑀲𑀫𑁆𑀪𑀯𑀢𑁄 𑀘 𑀫𑀸𑀭𑀸. 𑀏𑀓𑀪𑀯𑀧𑀭𑀺𑀬𑀸𑀧𑀦𑁆𑀦𑀚𑀻𑀯𑀺𑀢𑀫𑀸𑀭𑀡𑀢𑁄 𑀫𑀘𑁆𑀘𑀼 𑀫𑀸𑀭𑁄. 𑀅𑀡𑀺𑀫𑀢𑀸 𑀦𑀸𑀫 𑀧𑀭𑀫𑀸𑀡𑀼 𑀯𑀺𑀬 𑀅𑀤𑀲𑁆𑀲𑀦𑀽𑀧𑀕𑀫𑀦𑀁. 𑀮𑀖𑀺𑀫𑀢𑀸 𑀲𑀭𑀻𑀭𑁂𑀦, 𑀘𑀺𑀢𑁆𑀢𑁂𑀦 𑀯𑀸 𑀲𑀻𑀖𑀕𑀫𑀦𑀁. 𑀫𑀳𑀺𑀫𑀢𑀸 𑀘𑀦𑁆𑀤𑀺𑀫𑀲𑀽𑀭𑀺𑀬𑀸𑀤𑀻𑀦𑀫𑁆𑀧𑀺𑀧𑀸𑀡𑀺𑀦𑀸 𑀧𑀭𑀸𑀫𑀲𑀦𑀸𑀤𑀺. 𑀧𑀢𑁆𑀢𑀺 𑀦𑀸𑀫 𑀬𑀣𑀺𑀘𑁆𑀙𑀺𑀢𑀤𑁂𑀲𑀧𑁆𑀧𑀢𑁆𑀢𑀺. 𑀧𑀓𑀸𑀲𑀦𑀢𑀸, 𑀮𑀸𑀪𑀓𑀲𑁆𑀲𑀢𑁆𑀣𑀲𑀸𑀥𑀦𑀁 𑀯𑀸 𑀧𑀸𑀓𑀫𑁆𑀫𑀁. 𑀈𑀲𑀢𑁆𑀢𑀁 𑀦𑀸𑀫 𑀲𑀬𑀁𑀯𑀲𑀺𑀢𑀸. 𑀯𑀲𑀺𑀢𑁆𑀢𑀁 𑀦𑀸𑀫 𑀅𑀧𑀭𑀯𑀲𑀺𑀢𑀸. 𑀬𑀢𑁆𑀣𑀓𑀸𑀫𑀸𑀯𑀲𑀸𑀬𑀺𑀢𑀁 𑀦𑀸𑀫 𑀬𑀢𑁆𑀣𑀺𑀘𑁆𑀙𑀢𑀺 𑀬𑀤𑀺𑀘𑁆𑀙𑀢𑀺 𑀬𑀸𑀯𑀤𑀺𑀘𑁆𑀙𑀢𑀺, 𑀢𑀢𑁆𑀣 𑀢𑀸𑀯 𑀢𑀤𑀢𑁆𑀣𑀲𑀸𑀥𑀦𑀁. 𑀧𑀻𑀴𑀦𑀲𑀗𑁆𑀔𑀢𑀲𑀦𑁆𑀢𑀸𑀧𑀯𑀺𑀧𑀭𑀺𑀡𑀸𑀫𑀝𑁆𑀞𑁂𑀦 𑀯𑀸 𑀤𑀼𑀓𑁆𑀔𑀫𑀭𑀺𑀬𑀲𑀘𑁆𑀘𑀦𑁆𑀢𑀺𑀆𑀤𑀺𑀫𑁆𑀳𑀺 𑀇𑀤𑀁 𑀘𑁄𑀤𑀦𑀸𑀧𑀼𑀩𑁆𑀩𑀗𑁆𑀕𑀫𑀁 𑀅𑀢𑁆𑀣𑀯𑀺𑀲𑁆𑀲𑀚𑁆𑀚𑀦𑀁 𑁋 𑀤𑀼𑀓𑁆𑀔𑀸𑀤𑀻𑀦𑀁 𑀅𑀜𑁆𑀜𑁂𑀧𑀺 𑀭𑀽𑀧𑀢𑀡𑁆𑀳𑀸𑀤𑀬𑁄 𑀅𑀢𑁆𑀣𑀸 𑀅𑀢𑁆𑀣𑀺, 𑀅𑀣 𑀓𑀲𑁆𑀫𑀸 𑀘𑀢𑁆𑀢𑀸𑀭𑁄 𑀏𑀯 𑀯𑀼𑀢𑁆𑀢𑀸𑀢𑀺 𑀘𑁂? 𑀅𑀜𑁆𑀜𑀲𑀘𑁆𑀘𑀤𑀲𑁆𑀲𑀦𑀯𑀲𑁂𑀦 𑀆𑀯𑀺𑀪𑀸𑀯𑀢𑁄.

‘‘𑀢𑀢𑁆𑀣 𑀓𑀢𑀫𑀁 𑀤𑀼𑀓𑁆𑀔𑁂𑀜𑀸𑀡𑀁, 𑀤𑀼𑀓𑁆𑀔𑀁 𑀆𑀭𑀩𑁆𑀪 𑀬𑀸 𑀉𑀧𑁆𑀧𑀚𑁆𑀚𑀢𑀺 𑀧𑀜𑁆𑀜𑀸’’𑀢𑀺𑀆𑀤𑀺𑀦𑀸𑀧𑀺 (𑀯𑀺𑀪. 𑁭𑁯𑁪) 𑀦𑀬𑁂𑀦 𑀏𑀓𑁂𑀓𑀲𑀘𑁆𑀘𑀸𑀭𑀫𑁆𑀫𑀡𑀯𑀲𑁂𑀦𑀸𑀧𑀺 𑀲𑀘𑁆𑀘𑀜𑀸𑀡𑀁 𑀯𑀼𑀢𑁆𑀢𑀁. ‘‘𑀬𑁄, 𑀪𑀺𑀓𑁆𑀔𑀯𑁂, 𑀤𑀼𑀓𑁆𑀔𑀁 𑀧𑀲𑁆𑀲𑀢𑀺, 𑀤𑀼𑀓𑁆𑀔𑀲𑀫𑀼𑀤𑀬𑀫𑁆𑀧𑀺 𑀲𑁄 𑀧𑀲𑁆𑀲𑀢𑀻’’𑀢𑀺𑀆𑀤𑀺𑀦𑀸 (𑀲𑀁. 𑀦𑀺. 𑁫.𑁧𑁧𑁦𑁦) 𑀦𑀬𑁂𑀦 𑀏𑀓𑀁 𑀲𑀘𑁆𑀘𑀁 𑀆𑀭𑀫𑁆𑀫𑀡𑀁 𑀓𑀢𑁆𑀯𑀸 𑀲𑁂𑀲𑁂𑀲𑀼 𑀓𑀺𑀘𑁆𑀘𑀦𑀺𑀧𑁆𑀨𑀢𑁆𑀢𑀺𑀯𑀲𑁂𑀦𑀸𑀧𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀬𑀤𑀸 𑀏𑀓𑁂𑀓𑀁 𑀲𑀘𑁆𑀘𑀁 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺, 𑀢𑀤𑀸 𑀲𑀫𑀼𑀤𑀬𑀤𑀲𑁆𑀲𑀦𑁂𑀦 𑀢𑀸𑀯 𑀲𑀪𑀸𑀯𑀢𑁄 𑀧𑀻𑀴𑀦𑀮𑀓𑁆𑀔𑀡𑀲𑁆𑀲𑀸𑀧𑀺 𑀤𑀼𑀓𑁆𑀔𑀲𑁆𑀲 𑀬𑀲𑁆𑀫𑀸 𑀢𑀁 𑀆𑀬𑀽𑀳𑀦𑀮𑀓𑁆𑀔𑀡𑁂𑀦 𑀲𑀫𑀼𑀤𑀬𑁂𑀦 𑀆𑀬𑀽𑀳𑀺𑀢𑀁 𑀲𑀗𑁆𑀔𑀢𑀁, 𑀢𑀲𑁆𑀫𑀸𑀲𑁆𑀲 𑀲𑁄 𑀲𑀗𑁆𑀔𑀢𑀝𑁆𑀞𑁄 𑀆𑀯𑀺 𑀪𑀯𑀢𑀺. 𑀬𑀲𑁆𑀫𑀸 𑀧𑀦 𑀫𑀕𑁆𑀕𑁄 𑀓𑀺𑀮𑁂𑀲𑀲𑀦𑁆𑀢𑀸𑀧𑀳𑀭𑁄 𑀲𑀼𑀲𑀻𑀢𑀮𑁄, 𑀢𑀲𑁆𑀫𑀸𑀲𑁆𑀲 𑀫𑀕𑁆𑀕𑀤𑀲𑁆𑀲𑀦𑁂𑀦 𑀲𑀦𑁆𑀢𑀸𑀧𑀝𑁆𑀞𑁄 𑀆𑀯𑀺 𑀪𑀯𑀢𑀺 𑀦𑀦𑁆𑀤𑀲𑁆𑀲 𑀅𑀘𑁆𑀙𑀭𑀸𑀤𑀲𑁆𑀲𑀦𑁂𑀦 𑀲𑀼𑀦𑁆𑀤𑀭𑀺𑀬𑀸 𑀅𑀦𑀪𑀺𑀭𑀽𑀧𑀪𑀸𑀯𑁄 𑀯𑀺𑀬. 𑀅𑀯𑀺𑀧𑀭𑀺𑀡𑀸𑀫𑀥𑀫𑁆𑀫𑀲𑁆𑀲 𑀧𑀦 𑀦𑀺𑀭𑁄𑀥𑀲𑁆𑀲 𑀤𑀲𑁆𑀲𑀦𑁂𑀦 𑀢𑀲𑁆𑀲 𑀯𑀺𑀧𑀭𑀺𑀡𑀸𑀫𑀝𑁆𑀞𑁄 𑀆𑀯𑀺 𑀪𑀯𑀢𑀻𑀢𑀺 𑀯𑀢𑁆𑀢𑀩𑁆𑀩𑀫𑁂𑀯 𑀦𑀢𑁆𑀣𑀺. 𑀲𑀪𑀸𑀯𑀢𑁄 𑀆𑀬𑀽𑀳𑀦𑀮𑀓𑁆𑀔𑀡𑀲𑁆𑀲𑀧𑀺 𑀲𑀫𑀼𑀤𑀬𑀲𑁆𑀲 𑀤𑀼𑀓𑁆𑀔𑀤𑀲𑁆𑀲𑀦𑁂𑀦 𑀦𑀺𑀤𑀸𑀦𑀝𑁆𑀞𑁄 𑀆𑀯𑀺 𑀪𑀯𑀢𑀺 𑀅𑀲𑀧𑁆𑀧𑀸𑀬𑀪𑁄𑀚𑀦𑀢𑁄 𑀉𑀧𑁆𑀧𑀦𑁆𑀦𑀩𑁆𑀬𑀸𑀥𑀺𑀤𑀲𑁆𑀲𑀦𑁂𑀦 𑀪𑁄𑀚𑀦𑀲𑁆𑀲 𑀩𑁆𑀬𑀸𑀥𑀺𑀦𑀺𑀤𑀸𑀦𑀪𑀸𑀯𑁄 𑀯𑀺𑀬. 𑀯𑀺𑀲𑀁𑀬𑁄𑀕𑀪𑀽𑀢𑀲𑁆𑀲 𑀦𑀺𑀭𑁄𑀥𑀲𑁆𑀲 𑀤𑀲𑁆𑀲𑀦𑁂𑀦 𑀲𑀁𑀬𑁄𑀕𑀝𑁆𑀞𑁄. 𑀦𑀺𑀬𑁆𑀬𑀸𑀦𑀪𑀽𑀢𑀲𑁆𑀲 𑀘 𑀫𑀕𑁆𑀕𑀲𑁆𑀲 𑀤𑀲𑁆𑀲𑀦𑁂𑀦 𑀧𑀮𑀺𑀩𑁄𑀥𑀝𑁆𑀞𑁄𑀢𑀺. 𑀢𑀣𑀸 𑀦𑀺𑀲𑁆𑀲𑀭𑀡𑀲𑁆𑀲𑀸𑀧𑀺 𑀦𑀺𑀭𑁄𑀥𑀲𑁆𑀲 𑀅𑀯𑀺𑀯𑁂𑀓𑀪𑀽𑀢𑀲𑁆𑀲 𑀲𑀫𑀼𑀤𑀬𑀲𑁆𑀲 𑀤𑀲𑁆𑀲𑀦𑁂𑀦 𑀯𑀺𑀯𑁂𑀓𑀝𑁆𑀞𑁄 𑀆𑀯𑀺 𑀪𑀯𑀢𑀺. 𑀫𑀕𑁆𑀕𑀤𑀲𑁆𑀲𑀦𑁂𑀦 𑀅𑀲𑀗𑁆𑀔𑀢𑀝𑁆𑀞𑁄. 𑀇𑀫𑀺𑀦𑀸 𑀳𑀺 𑀅𑀦𑀫𑀢𑀕𑁆𑀕𑁂 𑀲𑀁𑀲𑀸𑀭𑁂 𑀫𑀕𑁆𑀕𑁄 𑀦 𑀤𑀺𑀝𑁆𑀞𑀧𑀼𑀩𑁆𑀩𑁄, 𑀲𑁄𑀧𑀺 𑀘 𑀲𑀧𑁆𑀧𑀘𑁆𑀘𑀬𑀢𑁆𑀢𑀸 𑀲𑀗𑁆𑀔𑀢𑁄 𑀏𑀯𑀸𑀢𑀺 𑀅𑀧𑁆𑀧𑀘𑁆𑀘𑀬𑀥𑀫𑁆𑀫𑀲𑁆𑀲 𑀅𑀲𑀗𑁆𑀔𑀢𑀪𑀸𑀯𑁄 𑀅𑀢𑀺𑀯𑀺𑀬 𑀧𑀸𑀓𑀝𑁄 𑀳𑁄𑀢𑀺. 𑀤𑀼𑀓𑁆𑀔𑀤𑀲𑁆𑀲𑀦𑁂𑀦 𑀧𑀦𑀲𑁆𑀲 𑀅𑀫𑀢𑀝𑁆𑀞𑁄 𑀆𑀯𑀺 𑀪𑀯𑀢𑀺. 𑀤𑀼𑀓𑁆𑀔𑀜𑁆𑀳𑀺 𑀯𑀺𑀲𑀁, 𑀅𑀫𑀢𑀁 𑀦𑀺𑀩𑁆𑀩𑀸𑀦𑀦𑁆𑀢𑀺. 𑀢𑀣𑀸 𑀦𑀺𑀬𑁆𑀬𑀸𑀦𑀮𑀓𑁆𑀔𑀡𑀲𑁆𑀲𑀸𑀧𑀺 𑀫𑀕𑁆𑀕𑀲𑁆𑀲 𑀲𑀫𑀼𑀤𑀬𑀤𑀲𑁆𑀲𑀦𑁂𑀦 ‘‘𑀦𑀸𑀬𑀁 𑀳𑁂𑀢𑀼 𑀦𑀺𑀩𑁆𑀩𑀸𑀦𑀲𑁆𑀲 𑀧𑀢𑁆𑀢𑀺𑀬𑀸, 𑀅𑀬𑀁 𑀳𑁂𑀢𑀽’’𑀢𑀺 𑀳𑁂𑀢𑁆𑀯𑀢𑁆𑀣𑁄 𑀆𑀯𑀺 𑀪𑀯𑀢𑀺. 𑀦𑀺𑀭𑁄𑀥𑀤𑀲𑁆𑀲𑀦𑁂𑀦 𑀤𑀲𑁆𑀲𑀦𑀝𑁆𑀞𑁄 𑀧𑀭𑀫𑀲𑀼𑀔𑀼𑀫𑀭𑀽𑀧𑀸𑀦𑀺 𑀧𑀲𑁆𑀲𑀢𑁄 ‘‘𑀯𑀺𑀧𑁆𑀧𑀲𑀦𑁆𑀦𑀁 𑀯𑀢 𑀫𑁂 𑀘𑀓𑁆𑀔𑀽’’𑀢𑀺 𑀘𑀓𑁆𑀔𑀼𑀲𑁆𑀲 𑀯𑀺𑀧𑁆𑀧𑀲𑀦𑁆𑀦𑀪𑀸𑀯𑁄 𑀯𑀺𑀬. 𑀤𑀼𑀓𑁆𑀔𑀤𑀲𑁆𑀲𑀦𑁂𑀦 𑀅𑀥𑀺𑀧𑀢𑁂𑀬𑁆𑀬𑀝𑁆𑀞𑁄 𑀅𑀦𑁂𑀓𑀭𑁄𑀕𑀸𑀢𑀼𑀭𑀓𑀧𑀡𑀚𑀦𑀤𑀲𑁆𑀲𑀦𑁂𑀦 𑀇𑀲𑁆𑀲𑀭𑀚𑀦𑀲𑁆𑀲 𑀉𑀴𑀸𑀭𑀪𑀸𑀯𑁄 𑀯𑀺𑀬𑀸𑀢𑀺 𑀏𑀯𑀫𑁂𑀢𑁆𑀣 𑀮𑀓𑁆𑀔𑀡𑀯𑀲𑁂𑀦, 𑀏𑀓𑀲𑁆𑀲 𑀅𑀜𑁆𑀜𑀲𑀘𑁆𑀘𑀤𑀲𑁆𑀲𑀦𑀯𑀲𑁂𑀦 𑀘 𑀇𑀢𑀭𑁂𑀲𑀁 𑀢𑀺𑀡𑁆𑀡𑀁 𑀆𑀯𑀺𑀪𑀸𑀯𑀢𑁄 𑀏𑀓𑁂𑀓𑀲𑁆𑀲 𑀘𑀢𑁆𑀢𑀸𑀭𑁄 𑀅𑀢𑁆𑀣𑀸 𑀯𑀼𑀢𑁆𑀢𑀸. 𑀉𑀧𑀥𑀺𑀯𑀺𑀯𑁂𑀓𑁄 𑀦𑀺𑀓𑁆𑀓𑀺𑀮𑁂𑀲𑀢𑀸.

𑀧𑀝𑀺𑀧𑀓𑁆𑀔𑀁 𑀅𑀢𑁆𑀣𑀬𑀦𑁆𑀢𑀻𑀢𑀺 𑀧𑀘𑁆𑀘𑀢𑁆𑀣𑀺𑀓𑀸. 𑀧𑀢𑀺 𑀯𑀺𑀭𑀼𑀤𑁆𑀥𑀸 𑀅𑀫𑀺𑀢𑁆𑀢𑀸 𑀧𑀘𑁆𑀘𑀸𑀫𑀺𑀢𑁆𑀢𑀸. 𑀲𑀘𑁆𑀙𑀺𑀓𑀢𑁆𑀯𑀸 𑀧𑀯𑁂𑀤𑁂𑀢𑀻𑀢𑀺 𑀏𑀢𑁆𑀢𑀸𑀯𑀢𑀸 𑀪𑀕𑀯𑀢𑁄 𑀲𑀩𑁆𑀩𑀜𑁆𑀜𑀼𑀢𑀁 𑀤𑀻𑀧𑁂𑀢𑀺. 𑀢𑁂𑀦 𑀜𑀸𑀡𑀲𑀫𑁆𑀧𑀢𑁆𑀢𑀺𑀁 𑀤𑀻𑀧𑁂𑀢𑁆𑀯𑀸 𑀇𑀤𑀸𑀦𑀺 𑀓𑀭𑀼𑀡𑀸𑀲𑀫𑁆𑀧𑀢𑁆𑀢𑀺𑀁 𑀤𑀻𑀧𑁂𑀢𑀼𑀁 ‘‘𑀲𑁄 𑀥𑀫𑁆𑀫𑀁 𑀤𑁂𑀲𑁂𑀲𑀻’’𑀢𑀺𑀆𑀤𑀺𑀫𑀸𑀳. 𑀅𑀣 𑀯𑀸 𑀓𑀺𑀁 𑀲𑁄 𑀧𑀯𑁂𑀤𑁂𑀲𑀻𑀢𑀺? 𑀜𑀸𑀡𑀁, 𑀢𑀁 𑀲𑀩𑁆𑀩𑀁 𑀢𑀺𑀮𑁄𑀓𑀳𑀺𑀢𑀪𑀽𑀢𑀫𑁂𑀯. 𑀲𑁄 𑀥𑀫𑁆𑀫𑀁 𑀤𑁂𑀲𑁂𑀲𑀻𑀢𑀺 𑀓𑀻𑀤𑀺𑀲𑀁? ‘‘𑀆𑀤𑀺𑀓𑀮𑁆𑀬𑀸𑀡’’𑀦𑁆𑀢𑀺𑀆𑀤𑀺. 𑀅𑀦𑁂𑀦 𑀯𑀘𑀦𑁂𑀦 𑀯𑀢𑁆𑀢𑀼𑀁 𑀅𑀭𑀳𑀪𑀸𑀯𑀁 𑀤𑀻𑀧𑁂𑀢𑀺. 𑀲𑀸𑀲𑀦𑀥𑀫𑁆𑀫𑁄𑀢𑀺 𑀑𑀯𑀸𑀤𑀧𑀭𑀺𑀬𑀢𑁆𑀢𑀺. 𑀓𑀺𑀘𑁆𑀘𑀲𑀼𑀤𑁆𑀥𑀺𑀬𑀸𑀢𑀺 𑀓𑀺𑀮𑁂𑀲𑀧𑁆𑀧𑀳𑀸𑀦𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀓𑀺𑀘𑁆𑀘𑀲𑀼𑀤𑁆𑀥𑀺𑀬𑀸. 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁 𑀦𑀸𑀫 𑀲𑀺𑀓𑁆𑀔𑀢𑁆𑀢𑀬𑀁, 𑀦𑀯𑀓𑁄𑀝𑀺𑀲𑀳𑀲𑁆𑀲𑀸𑀦𑀻𑀢𑀺𑀆𑀤𑀺𑀓𑀁 𑀯𑀸. 𑀫𑀕𑁆𑀕𑀫𑁂𑀯 𑀩𑁆𑀭𑀳𑁆𑀫𑀘𑀭𑀺𑀬𑀁 𑀫𑀕𑁆𑀕𑀩𑁆𑀭𑀳𑁆𑀫𑀘𑀭𑀺𑀬𑀁. 𑀢𑀲𑁆𑀲 𑀧𑀓𑀸𑀲𑀓𑀁 𑀧𑀺𑀝𑀓𑀢𑁆𑀢𑀬𑀁 𑀇𑀥 𑀲𑀸𑀢𑁆𑀣𑀁 𑀲𑀩𑁆𑀬𑀜𑁆𑀚𑀦𑀁 𑀦𑀸𑀫. 𑀙𑀲𑀼 𑀅𑀢𑁆𑀣𑀧𑀤𑁂𑀲𑀼 𑀲𑀗𑁆𑀔𑁂𑀧𑀢𑁄 𑀓𑀸𑀲𑀦𑀁 𑀲𑀗𑁆𑀓𑀸𑀲𑀦𑀁. 𑀆𑀤𑀺𑀢𑁄 𑀓𑀸𑀲𑀦𑀁 𑀧𑀓𑀸𑀲𑀦𑀁. 𑀉𑀪𑀬𑀫𑁆𑀧𑀺 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀤𑁂𑀲𑀦𑀁 𑀯𑀺𑀯𑀭𑀡𑀁. 𑀧𑀼𑀦 𑀯𑀺𑀪𑀸𑀕𑀓𑀭𑀡𑀁 𑀯𑀺𑀪𑀚𑀦𑀁. 𑀑𑀧𑀫𑁆𑀫𑀸𑀤𑀺𑀦𑀸 𑀧𑀸𑀓𑀝𑀓𑀭𑀡𑀁 𑀉𑀢𑁆𑀢𑀸𑀦𑀻𑀓𑀭𑀡𑀁. 𑀲𑁄𑀢𑀽𑀦𑀁 𑀘𑀺𑀢𑁆𑀢𑀧𑀭𑀺𑀢𑁄𑀲𑀚𑀦𑀦𑁂𑀦, 𑀘𑀺𑀢𑁆𑀢𑀦𑀺𑀲𑀸𑀦𑁂𑀦 𑀘 𑀧𑀜𑁆𑀜𑀸𑀧𑀦𑀁 𑀯𑁂𑀤𑀺𑀢𑀩𑁆𑀩𑀁. 𑀩𑁆𑀬𑀜𑁆𑀚𑀦𑀧𑀤𑁂𑀲𑀼 𑀅𑀓𑁆𑀔𑀭𑀡𑀢𑁄 𑀅𑀓𑁆𑀔𑀭𑀁, ‘‘𑀏𑀓𑀓𑁆𑀔𑀭𑀧𑀤𑀫𑀓𑁆𑀔𑀭’’𑀦𑁆𑀢𑀺 𑀏𑀓𑁂. 𑀯𑀺𑀪𑀢𑁆𑀢𑀺𑀅𑀦𑁆𑀢𑀁 𑀧𑀤𑀁. 𑀩𑁆𑀬𑀜𑁆𑀚𑀬𑀢𑀻𑀢𑀺 𑀩𑁆𑀬𑀜𑁆𑀚𑀦𑀁, 𑀯𑀸𑀓𑁆𑀬𑀁. 𑀧𑀤𑀲𑀫𑀼𑀤𑀸𑀬𑁄 𑀯𑀸 𑀯𑀸𑀓𑁆𑀬𑀁. 𑀯𑀺𑀪𑀸𑀕𑀧𑀓𑀸𑀲𑁄 𑀆𑀓𑀸𑀭𑁄 𑀦𑀸𑀫. 𑀨𑀼𑀲𑀢𑀻𑀢𑀺 𑀨𑀲𑁆𑀲𑁄𑀢𑀺𑀆𑀤𑀺 𑀦𑀺𑀩𑁆𑀩𑀘𑀦𑀁 𑀦𑀺𑀭𑀼𑀢𑁆𑀢𑀺, 𑀦𑀺𑀭𑀼𑀢𑁆𑀢𑀺𑀬𑀸 𑀦𑀺𑀤𑁆𑀤𑀺𑀝𑁆𑀞𑀲𑁆𑀲 𑀅𑀧𑀤𑁂𑀲𑁄 𑀦𑀺𑀤𑁆𑀤𑁂𑀲𑁄 𑀦𑀸𑀫. 𑀨𑀼𑀲𑀢𑀻𑀢𑀺 𑀨𑀲𑁆𑀲𑁄, 𑀲𑁄 𑀢𑀺𑀯𑀺𑀥𑁄 𑁋 𑀲𑀼𑀔𑀯𑁂𑀤𑀦𑀻𑀬𑁄 𑀤𑀼𑀓𑁆𑀔𑀯𑁂𑀤𑀦𑀻𑀬𑁄 𑀅𑀤𑀼𑀓𑁆𑀔𑀫𑀲𑀼𑀔𑀯𑁂𑀤𑀦𑀻𑀬𑁄𑀢𑀺. 𑀏𑀢𑁂𑀲𑀼 𑀅𑀬𑀁 𑀬𑁄𑀚𑀦𑀸 𑁋 𑀅𑀓𑁆𑀔𑀭𑁂𑀳𑀺 𑀲𑀗𑁆𑀓𑀸𑀲𑀬𑀢𑀺, 𑀧𑀤𑁂𑀳𑀺 𑀧𑀓𑀸𑀲𑀬𑀢𑀺, 𑀩𑁆𑀬𑀜𑁆𑀚𑀦𑁂𑀳𑀺 𑀯𑀺𑀯𑀭𑀢𑀺, 𑀆𑀓𑀸𑀭𑁂𑀳𑀺 𑀯𑀺𑀪𑀚𑀢𑀺, 𑀦𑀺𑀭𑀼𑀢𑁆𑀢𑀻𑀳𑀺 𑀉𑀢𑁆𑀢𑀸𑀦𑀺𑀁 𑀓𑀭𑁄𑀢𑀺, 𑀦𑀺𑀤𑁆𑀤𑁂𑀲𑁂𑀳𑀺 𑀧𑀜𑁆𑀜𑀸𑀧𑁂𑀢𑀺. 𑀅𑀓𑁆𑀔𑀭𑁂𑀳𑀺 𑀯𑀸 𑀲𑀗𑁆𑀓𑀸𑀲𑀬𑀺𑀢𑁆𑀯𑀸 𑀧𑀤𑁂𑀳𑀺 𑀧𑀓𑀸𑀲𑁂𑀢𑀺, 𑀩𑁆𑀬𑀜𑁆𑀚𑀦𑁂𑀳𑀺 𑀯𑀺𑀯𑀭𑀺𑀢𑁆𑀯𑀸 𑀆𑀓𑀸𑀭𑁂𑀳𑀺 𑀯𑀺𑀪𑀚𑀢𑀺, 𑀦𑀺𑀭𑀼𑀢𑁆𑀢𑀻𑀳𑀺 𑀉𑀢𑁆𑀢𑀸𑀦𑀺𑀁 𑀓𑀢𑁆𑀯𑀸 𑀦𑀺𑀤𑁆𑀤𑁂𑀲𑁂𑀳𑀺 𑀧𑀜𑁆𑀜𑀸𑀧𑁂𑀢𑀺. 𑀅𑀓𑁆𑀔𑀭𑁂𑀳𑀺 𑀯𑀸 𑀉𑀕𑁆𑀖𑀸𑀝𑁂𑀢𑁆𑀯𑀸 𑀧𑀤𑁂𑀳𑀺 𑀯𑀺𑀦𑁂𑀢𑀺 𑀉𑀕𑁆𑀖𑀝𑀺𑀢𑀜𑁆𑀜𑀼𑀁, 𑀩𑁆𑀬𑀜𑁆𑀚𑀦𑁂𑀳𑀺 𑀯𑀺𑀯𑀭𑀺𑀢𑁆𑀯𑀸 𑀆𑀓𑀸𑀭𑁂𑀳𑀺 𑀯𑀺𑀦𑁂𑀢𑀺 𑀯𑀺𑀧𑀜𑁆𑀘𑀺𑀢𑀜𑁆𑀜𑀼𑀁, 𑀦𑀺𑀭𑀼𑀢𑁆𑀢𑀻𑀳𑀺 𑀦𑁂𑀢𑁆𑀯𑀸 𑀦𑀺𑀤𑁆𑀤𑁂𑀲𑁂𑀳𑀺 𑀯𑀺𑀦𑁂𑀢𑀺 𑀦𑁂𑀬𑁆𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀢𑁆𑀣𑁄𑀢𑀺 𑀪𑀸𑀲𑀺𑀢𑀢𑁆𑀣𑁄. 𑀢𑀲𑁆𑀲𑁂𑀯𑀢𑁆𑀣𑀲𑁆𑀲 𑀧𑀝𑀺𑀯𑀺𑀚𑁆𑀛𑀺𑀢𑀩𑁆𑀩𑁄 𑀲𑀓𑁄 𑀲𑀓𑁄 𑀪𑀸𑀯𑁄 𑀧𑀝𑀺𑀯𑁂𑀥𑁄 𑀦𑀸𑀫. 𑀢𑀁 𑀉𑀪𑀬𑀫𑁆𑀧𑀺 𑀅𑀢𑁆𑀣𑁄 𑀦𑀸𑀫. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀢𑁆𑀣𑀕𑀫𑁆𑀪𑀻𑀭𑀢𑀸𑀧𑀝𑀺𑀯𑁂𑀥𑀕𑀫𑁆𑀪𑀻𑀭𑀢𑀸𑀳𑀺 𑀲𑀸𑀢𑁆𑀣’’𑀦𑁆𑀢𑀺. 𑀥𑀫𑁆𑀫𑁄𑀢𑀺 𑀯𑀸 𑀤𑁂𑀲𑀦𑀸𑀢𑀺 𑀯𑀸 𑀩𑁆𑀬𑀜𑁆𑀚𑀦𑀫𑁂𑀯. 𑀦𑀺𑀤𑁆𑀤𑁄𑀲𑀪𑀸𑀯𑁂𑀦 𑀧𑀭𑀺𑀲𑀼𑀤𑁆𑀥𑀁 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀁, 𑀲𑀺𑀓𑁆𑀔𑀢𑁆𑀢𑀬𑀧𑀭𑀺𑀕𑁆𑀕𑀳𑀺𑀢𑁄 𑀫𑀕𑁆𑀕𑁄 𑀘, 𑀉𑀪𑀬𑀫𑁆𑀧𑀺 𑀩𑁆𑀭𑀳𑁆𑀫𑀘𑀭𑀺𑀬𑀧𑀤𑁂𑀦 𑀲𑀗𑁆𑀕𑀳𑀺𑀢𑀁. 𑀧𑀝𑀺𑀧𑀢𑁆𑀢𑀺𑀬𑀸𑀢𑀺 𑀧𑀝𑀺𑀧𑀢𑁆𑀢𑀺𑀳𑁂𑀢𑀼. 𑀆𑀕𑀫𑀩𑁆𑀬𑀢𑁆𑀢𑀺𑀢𑁄𑀢𑀺 𑀧𑀼𑀦𑀧𑁆𑀧𑀼𑀦𑀁 𑀅𑀥𑀻𑀬𑀫𑀸𑀦𑀸 𑀔𑀦𑁆𑀥𑀸𑀤𑀬𑁄 𑀧𑀸𑀓𑀝𑀸 𑀳𑁄𑀦𑁆𑀢𑀺. 𑀤𑀼𑀭𑀼𑀢𑁆𑀢𑀲𑀢𑁆𑀣𑀸𑀦𑀺 𑀅𑀥𑀻𑀬𑀫𑀸𑀦𑀸𑀦𑀺 𑀲𑀫𑁆𑀫𑁄𑀳𑀫𑁂𑀯𑀸𑀯𑀸𑀳𑀦𑁆𑀢𑀺.

𑁨-𑁩. 𑀓𑀘𑁆𑀘𑀺 𑀔𑀫𑀦𑀻𑀬𑀁 𑀲𑀻𑀢𑀼𑀡𑁆𑀳𑀸𑀤𑀺. 𑀓𑀘𑁆𑀘𑀺 𑀬𑀸𑀧𑀦𑀻𑀬𑀁 𑀬𑀣𑀸𑀮𑀤𑁆𑀥𑁂𑀳𑀺 𑀚𑀻𑀯𑀺𑀢𑀲𑀸𑀥𑀦𑁂𑀳𑀺 𑀚𑀻𑀯𑀺𑀢𑀁. 𑀅𑀧𑁆𑀧𑀸𑀩𑀸𑀥𑀦𑁆𑀢𑀺 𑀅𑀧𑁆𑀧𑁄𑀧𑀲𑀕𑁆𑀕𑀁, 𑀅𑀧𑁆𑀧𑀸𑀢𑀗𑁆𑀓𑀦𑁆𑀢𑀺 𑀅𑀧𑁆𑀧𑀭𑁄𑀕𑀁. 𑀓𑀘𑁆𑀘𑀺 𑀮𑀳𑀼𑀝𑁆𑀞𑀸𑀦𑀁 𑀲𑀭𑀻𑀭𑀓𑀺𑀘𑁆𑀘𑁂. 𑀓𑀘𑁆𑀘𑀺 𑀩𑀮𑀁 𑀲𑀫𑀡𑀓𑀺𑀘𑁆𑀘𑁂. 𑀓𑀘𑁆𑀘𑀺 𑀨𑀸𑀲𑀼𑀯𑀺𑀳𑀸𑀭𑁄 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀅𑀧𑁆𑀧𑀸𑀩𑀸𑀥𑀢𑀸𑀬, 𑀅𑀦𑀼𑀓𑁆𑀓𑀡𑁆𑀞𑀦𑀸𑀤𑀺𑀯𑀲𑁂𑀦 𑀯𑀸. 𑀲𑀢𑁆𑀢𑀲𑀝𑁆𑀞𑀺𑀢𑁄 𑀧𑀝𑁆𑀞𑀸𑀬 𑀧𑀘𑁆𑀙𑀺𑀫𑀯𑀬𑁄, 𑀉𑀢𑁆𑀢𑀭𑀸𑀫𑀼𑀔𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀮𑁄𑀓𑀯𑀺𑀯𑀭𑀡𑁂 𑀚𑀸𑀢𑁂 𑀇𑀥 𑀓𑀺𑀁 𑀑𑀮𑁄𑀓𑁂𑀲𑀺, 𑀦𑀢𑁆𑀣𑁂𑀢𑁆𑀣 𑀢𑀬𑀸 𑀲𑀤𑀺𑀲𑁄𑀧𑀻𑀢𑀺 𑀆𑀳 ‘‘𑀢𑁆𑀯𑀁 𑀲𑀤𑁂𑀯𑀓𑀲𑁆𑀲 𑀮𑁄𑀓𑀲𑁆𑀲 𑀅𑀕𑁆𑀕𑁄’’𑀢𑀺𑀆𑀤𑀺. 𑀆𑀲𑀪𑀺𑀁 𑀉𑀢𑁆𑀢𑀫𑀁. 𑀉𑀧𑀧𑀢𑁆𑀢𑀺𑀯𑀲𑁂𑀦 𑀤𑁂𑀯𑀸. 𑀭𑀽𑀧𑀸𑀦𑀁 𑀧𑀭𑀺𑀪𑁄𑀕𑀯𑀲𑁂𑀦, 𑀧𑀢𑁆𑀣𑀦𑀸𑀯𑀲𑁂𑀦 𑀯𑀸 𑀉𑀧𑁆𑀧𑀦𑁆𑀦𑀸 𑀭𑀸𑀕𑀲𑀫𑁆𑀧𑀬𑀼𑀢𑁆𑀢𑀸 𑀲𑁄𑀫𑀦𑀲𑁆𑀲𑀯𑁂𑀤𑀦𑀸𑀦𑀼𑀭𑀽𑀧𑀢𑁄 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀳𑀤𑀬𑀢𑀧𑁆𑀧𑀦𑀢𑁄 𑀅𑀫𑁆𑀩𑀭𑀲𑀸𑀤𑀬𑁄 𑀯𑀺𑀬 ‘‘𑀭𑀽𑀧𑀭𑀲𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺. 𑀢𑀣𑀸𑀕𑀢𑀲𑁆𑀲 𑀧𑀳𑀻𑀦𑀸𑀢𑀺 𑀅𑀥𑀺𑀓𑀸𑀭𑀯𑀲𑁂𑀦𑀸𑀳. 𑀢𑀣𑀸𑀕𑀢𑀲𑁆𑀲𑀧𑀺 𑀳𑀺 𑀓𑀲𑁆𑀲𑀘𑀺 𑀢𑁂 𑀧𑀳𑀻𑀦𑀸𑀢𑀺 𑀫𑀢𑁆𑀣𑀓𑀘𑁆𑀙𑀺𑀦𑁆𑀦𑀢𑀸𑀮𑁄 𑀯𑀺𑀬 𑀓𑀢𑀸. 𑀓𑀣𑀁? 𑀭𑀽𑀧𑀭𑀲𑀸𑀤𑀺𑀯𑀘𑀦𑁂𑀦 𑀯𑀺𑀧𑀸𑀓𑀥𑀫𑁆𑀫𑀥𑀫𑁆𑀫𑀸 𑀕𑀳𑀺𑀢𑀸, 𑀢𑁂 𑀯𑀺𑀚𑁆𑀚𑀫𑀸𑀦𑀸𑀧𑀺 𑀫𑀢𑁆𑀣𑀓𑀲𑀤𑀺𑀲𑀸𑀦𑀁 𑀢𑀡𑁆𑀳𑀸𑀯𑀺𑀚𑁆𑀚𑀸𑀦𑀁 𑀫𑀕𑁆𑀕𑀲𑀢𑁆𑀣𑁂𑀦 𑀙𑀺𑀦𑁆𑀦𑀢𑁆𑀢𑀸 𑀆𑀬𑀢𑀺𑀁 𑀢𑀸𑀮𑀧𑀦𑁆𑀢𑀺𑀲𑀤𑀺𑀲𑁂 𑀯𑀺𑀧𑀸𑀓𑀓𑁆𑀔𑀦𑁆𑀥𑁂 𑀦𑀺𑀩𑁆𑀩𑀢𑁆𑀢𑁂𑀢𑀼𑀁 𑀅𑀲𑀫𑀢𑁆𑀣𑀸 𑀚𑀸𑀢𑀸. 𑀢𑀲𑁆𑀫𑀸 𑀢𑀸𑀮𑀸𑀯𑀢𑁆𑀣𑀼 𑀯𑀺𑀬 𑀓𑀢𑀸. ‘‘𑀓𑀼𑀲𑀮𑀲𑁄𑀫𑀦𑀲𑁆𑀲𑀸𑀧𑀺 𑀏𑀢𑁆𑀣 𑀲𑀗𑁆𑀕𑀳𑀺𑀢𑀸’’𑀢𑀺 𑀯𑀤𑀦𑁆𑀢𑀺. 𑀧𑀞𑀫𑀫𑀕𑁆𑀕𑁂𑀦 𑀧𑀳𑀻𑀦𑀸 𑀓𑀫𑁆𑀫𑀧𑀣𑀝𑁆𑀞𑀸𑀦𑀺𑀬𑀸, 𑀤𑀼𑀢𑀺𑀬𑁂𑀦 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀑𑀴𑀸𑀭𑀺𑀓𑀸, 𑀢𑀢𑀺𑀬𑁂𑀦 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀓𑀸𑀫𑀭𑀸𑀕𑀝𑁆𑀞𑀸𑀦𑀺𑀬𑀸. 𑀘𑀢𑀼𑀢𑁆𑀣𑁂𑀦 𑀅𑀦𑀪𑀸𑀯𑀁𑀓𑀢𑀸 𑀭𑀽𑀧𑀭𑀸𑀕𑀸𑀭𑀽𑀧𑀭𑀸𑀕𑀝𑁆𑀞𑀸𑀦𑀺𑀬𑀸. 𑀅𑀧𑀭𑀺𑀳𑀸𑀦𑀥𑀫𑁆𑀫𑀢𑀁 𑀧𑀦 𑀤𑀻𑀧𑁂𑀦𑁆𑀢𑁄 ‘‘𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸’’𑀢𑀺 𑀆𑀳. 𑀢𑀤𑀗𑁆𑀕𑀧𑁆𑀧𑀳𑀸𑀦𑁂𑀦 𑀯𑀸 𑀧𑀳𑀻𑀦𑀸 𑀯𑀺𑀧𑀲𑁆𑀲𑀦𑀸𑀓𑁆𑀔𑀡𑁂, 𑀛𑀸𑀦𑀲𑁆𑀲 𑀧𑀼𑀩𑁆𑀩𑀪𑀸𑀕𑀓𑁆𑀔𑀡𑁂 𑀯𑀸, 𑀯𑀺𑀓𑁆𑀔𑀫𑁆𑀪𑀦𑀧𑁆𑀧𑀳𑀸𑀦𑁂𑀦 𑀉𑀘𑁆𑀙𑀺𑀦𑁆𑀦𑀫𑀽𑀮𑀸 𑀛𑀸𑀦𑀓𑁆𑀔𑀡𑁂. ‘‘𑀯𑀺𑀯𑀺𑀘𑁆𑀘𑁂𑀯 𑀓𑀸𑀫𑁂𑀳𑀻’’𑀢𑀺 (𑀧𑀸𑀭𑀸. 𑁧𑁧) 𑀳𑀺 𑀯𑀼𑀢𑁆𑀢𑀁. 𑀲𑀫𑀼𑀘𑁆𑀙𑁂𑀤𑀧𑁆𑀧𑀳𑀸𑀦𑁂𑀦 𑀢𑀸𑀮𑀸𑀯𑀢𑁆𑀣𑀼𑀓𑀢𑀸 𑀢𑀢𑀺𑀬𑀯𑀺𑀚𑁆𑀚𑀸𑀥𑀺𑀕𑀫𑀓𑁆𑀔𑀡𑁂. 𑀇𑀢𑁆𑀣𑀫𑁆𑀪𑀽𑀢𑀸 𑀧𑀦 𑀢𑁂 𑀭𑀽𑀧𑀭𑀲𑀸𑀤𑀬𑁄 𑀅𑀦𑀪𑀸𑀯𑀁𑀓𑀢𑀸 𑀆𑀬𑀢𑀺𑀫𑀦𑀼𑀧𑁆𑀧𑀸𑀤𑀥𑀫𑁆𑀫𑀸𑀢𑀺 𑀏𑀓𑀫𑁂𑀯𑀺𑀤𑀁 𑀅𑀢𑁆𑀣𑀧𑀤𑀁. 𑀧𑀞𑀫𑀸𑀬 𑀯𑀸 𑀅𑀪𑀺𑀦𑀺𑀩𑁆𑀪𑀺𑀤𑀸𑀬 𑀧𑀳𑀻𑀦𑀸, 𑀤𑀼𑀢𑀺𑀬𑀸𑀬 𑀉𑀘𑁆𑀙𑀺𑀦𑁆𑀦𑀫𑀽𑀮𑀸, 𑀢𑀢𑀺𑀬𑀸𑀬 𑀢𑀸𑀮𑀸𑀯𑀢𑁆𑀣𑀼𑀓𑀢𑀸. 𑀇𑀢𑁆𑀣𑀫𑁆𑀪𑀽𑀢𑀸 𑀬𑀲𑁆𑀫𑀸 𑀅𑀦𑀪𑀸𑀯𑀁𑀓𑀢𑀸 𑀦𑀸𑀫 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀆𑀬𑀢𑀺𑀁𑀅𑀦𑀉𑀧𑁆𑀧𑀸𑀤𑀥𑀫𑁆𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀅𑀣 𑀯𑀸 𑀤𑀼𑀓𑁆𑀔𑀜𑀸𑀡𑁂𑀦 𑀧𑀳𑀻𑀦𑀸, 𑀲𑀫𑀼𑀤𑀬𑀜𑀸𑀡𑁂𑀦 𑀉𑀘𑁆𑀙𑀺𑀦𑁆𑀦𑀫𑀽𑀮𑀸, 𑀦𑀺𑀭𑁄𑀥𑀜𑀸𑀡𑁂𑀦 𑀢𑀸𑀮𑀸𑀯𑀢𑁆𑀣𑀼𑀓𑀢𑀸, 𑀫𑀕𑁆𑀕𑀜𑀸𑀡𑁂𑀦 𑀅𑀦𑀪𑀸𑀯𑀁𑀓𑀢𑀸, 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑁂𑀦 𑀆𑀬𑀢𑀺𑀁 𑀅𑀦𑀼𑀧𑁆𑀧𑀸𑀤𑀥𑀫𑁆𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀮𑁄𑀓𑀺𑀬𑀫𑀕𑁆𑀕𑁂𑀦 𑀯𑀸 𑀧𑀳𑀻𑀦𑀸, 𑀤𑀲𑁆𑀲𑀦𑀫𑀕𑁆𑀕𑁂𑀦 𑀉𑀘𑁆𑀙𑀺𑀦𑁆𑀦𑀫𑀽𑀮𑀸, 𑀢𑀺𑀯𑀺𑀥𑁂𑀦 𑀪𑀸𑀯𑀦𑀸𑀫𑀕𑁆𑀕𑁂𑀦 𑀢𑀸𑀮𑀸𑀯𑀢𑁆𑀣𑀼𑀓𑀢𑀸𑀢𑀺𑀆𑀤𑀺. 𑀩𑁆𑀭𑀸𑀳𑁆𑀫𑀡𑀲𑁆𑀲 𑀅𑀯𑀺𑀲𑀬𑀢𑁆𑀢𑀸 𑀥𑀫𑁆𑀫𑀭𑀲𑀸 𑀦 𑀉𑀤𑁆𑀥𑀝𑀸.

𑁧𑁧. 𑀥𑀫𑁆𑀫𑀥𑀸𑀢𑀼𑀦𑁆𑀢𑀺 𑀏𑀢𑁆𑀣 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀁 𑀥𑀫𑁆𑀫𑀥𑀸𑀢𑀼 𑀦𑀸𑀫. 𑀅𑀦𑀼𑀓𑀫𑁆𑀧𑀯𑀘𑀦𑀸𑀦𑀼𑀭𑀽𑀧𑀁 ‘‘𑀧𑀼𑀡𑁆𑀡𑀘𑀦𑁆𑀤𑁄 𑀯𑀺𑀬𑀸’’𑀢𑀺 𑀯𑀼𑀢𑁆𑀢𑀁, 𑀲𑀽𑀭𑀺𑀬𑀯𑀘𑀦𑀁 ‘‘𑀲𑀼𑀧𑁆𑀧𑀝𑀺𑀯𑀺𑀤𑁆𑀥𑀢𑁆𑀢𑀸’’𑀢𑀺𑀯𑀘𑀦𑀸𑀦𑀼𑀭𑀽𑀧𑀁, 𑀧𑀣𑀯𑀻𑀲𑀫𑀘𑀺𑀢𑁆𑀢𑀢𑀸𑀬 𑀓𑀸𑀭𑀡𑀁 ‘‘𑀓𑀭𑀼𑀡𑀸𑀯𑀺𑀧𑁆𑀨𑀸𑀭’’𑀦𑁆𑀢𑀺 𑀯𑀤𑀦𑁆𑀢𑀺. 𑀧𑀝𑀺𑀘𑁆𑀙𑀸𑀤𑁂𑀢𑀩𑁆𑀩𑁂 𑀳𑀺 𑀅𑀢𑁆𑀢𑀦𑁄 𑀕𑀼𑀡𑁂 ‘‘𑀆𑀭𑀤𑁆𑀥𑀁 𑀔𑁄 𑀧𑀦 𑀫𑁂 𑀯𑀻𑀭𑀺𑀬’’𑀦𑁆𑀢𑀺𑀆𑀤𑀺𑀦𑀸 𑀧𑀓𑀸𑀲𑁂𑀦𑁆𑀢𑁄 𑀅𑀢𑁆𑀢𑀦𑁄 𑀓𑀭𑀼𑀡𑀸𑀯𑀺𑀧𑁆𑀨𑀸𑀭𑀁 𑀧𑀓𑀸𑀲𑁂𑀢𑀻𑀢𑀺 𑀕𑀳𑁂𑀢𑀩𑁆𑀩𑁄. 𑀯𑀭𑀪𑀽𑀭𑀺𑀫𑁂𑀥𑀲𑁄 𑀯𑀭𑀧𑀼𑀣𑀼𑀮𑀜𑀸𑀡𑁄, 𑀪𑀽𑀭𑀻𑀢𑀺 𑀯𑀸 𑀪𑀽𑀫𑀺, 𑀪𑀽𑀫𑀺 𑀯𑀺𑀬 𑀧𑀢𑁆𑀣𑀝𑀯𑀭𑀧𑀜𑁆𑀜𑁄𑀢𑀺 𑀅𑀢𑁆𑀣𑁄. 𑀅𑀩𑀼𑀚𑁆𑀛𑀺 𑀏𑀢𑁆𑀣𑀸𑀢𑀺𑀧𑀺 𑀅𑀥𑀺𑀓𑀭𑀡𑁂𑀦 𑀭𑀼𑀓𑁆𑀔𑁄 𑀩𑁄𑀥𑀺. 𑀲𑀬𑀁 𑀩𑀼𑀚𑁆𑀛𑀢𑀺, 𑀩𑀼𑀚𑁆𑀛𑀦𑁆𑀢𑀺 𑀯𑀸 𑀢𑁂𑀦 𑀢𑀁𑀲𑀫𑀗𑁆𑀕𑀺𑀦𑁄𑀢𑀺 𑀫𑀕𑁆𑀕𑁄 𑀩𑁄𑀥𑀺, 𑀏𑀯𑀁 𑀲𑀩𑁆𑀩𑀜𑁆𑀜𑀼𑀢𑀜𑁆𑀜𑀸𑀡𑀫𑁆𑀧𑀺. 𑀩𑀼𑀚𑁆𑀛𑀻𑀬𑀢𑀻𑀢𑀺 𑀦𑀺𑀩𑁆𑀩𑀸𑀦𑀁 𑀩𑁄𑀥𑀺. 𑀢𑀺𑀲𑁆𑀲𑀦𑁆𑀦𑀁 𑀯𑀺𑀚𑁆𑀚𑀸𑀦𑀁 𑀉𑀧𑀦𑀺𑀲𑁆𑀲𑀬𑀯𑀢𑁄 𑀬𑀣𑀸𑀲𑀫𑁆𑀪𑀯𑀁 𑀢𑀺𑀲𑁆𑀲𑁄 𑀯𑀺𑀚𑁆𑀚𑀸 𑀯𑁂𑀤𑀺𑀢𑀩𑁆𑀩𑀸. 𑀏𑀓𑀕𑁆𑀕𑀢𑀸𑀯𑀲𑁂𑀦 𑀢𑀺𑀓𑁆𑀔𑀪𑀸𑀯𑁄. 𑀢𑀺𑀓𑁆𑀔𑁄𑀧𑀺 𑀏𑀓𑀘𑁆𑀘𑁄 𑀲𑀭𑁄 𑀮𑀓𑁆𑀔𑀁 𑀧𑀢𑁆𑀯𑀸 𑀓𑀼𑀡𑁆𑀞𑁄 𑀳𑁄𑀢𑀺, 𑀦 𑀢𑀣𑀸 𑀇𑀤𑀁. 𑀲𑀢𑀺𑀦𑁆𑀤𑁆𑀭𑀺𑀬𑀯𑀲𑁂𑀦𑀲𑁆𑀲 𑀔𑀭𑀪𑀸𑀯𑁄, 𑀲𑀤𑁆𑀥𑀺𑀦𑁆𑀤𑁆𑀭𑀺𑀬𑀯𑀲𑁂𑀦 𑀯𑀺𑀧𑁆𑀧𑀲𑀦𑁆𑀦𑀪𑀸𑀯𑁄, 𑀅𑀦𑁆𑀢𑀭𑀸 𑀅𑀦𑁄𑀲𑀓𑁆𑀓𑀺𑀢𑁆𑀯𑀸 𑀓𑀺𑀮𑁂𑀲𑀧𑀘𑁆𑀘𑀢𑁆𑀣𑀺𑀓𑀸𑀦𑀁 𑀲𑀼𑀝𑁆𑀞𑀼 𑀅𑀪𑀺𑀪𑀯𑀦𑀢𑁄 𑀯𑀻𑀭𑀺𑀬𑀺𑀦𑁆𑀤𑁆𑀭𑀺𑀬𑀯𑀲𑁂𑀦𑀲𑁆𑀲 𑀲𑀽𑀭𑀪𑀸𑀯𑁄 𑀘 𑀯𑁂𑀤𑀺𑀢𑀩𑁆𑀩𑁄. 𑀫𑀕𑁆𑀕𑀯𑀺𑀚𑀸𑀬𑀦𑀢𑁆𑀣𑀁 𑀕𑀩𑁆𑀪𑀕𑁆𑀕𑀳𑀡𑀓𑀸𑀮𑁄 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀦𑀦𑁆𑀢𑀭𑀫𑀦𑀼𑀮𑁄𑀫𑀢𑁆𑀢𑀸.

𑀙𑀦𑁆𑀤𑁄𑀢𑀺 𑀘 𑀲𑀗𑁆𑀓𑀧𑁆𑀧𑁄𑀢𑀺 𑀘 𑀅𑀯𑀢𑁆𑀣𑀦𑁆𑀢𑀭𑀪𑁂𑀤𑀪𑀺𑀦𑁆𑀦𑁄 𑀭𑀸𑀕𑁄𑀯 𑁋

‘‘𑀲𑁂𑀦𑀳𑀸𑀢𑁆𑀣𑁆𑀬𑀗𑁆𑀕𑀫𑀼𑀧𑁂𑀢𑀺,

𑀭𑀢𑁆𑀢𑀳𑀤𑀬𑁄 𑀭𑀸𑀕𑁂𑀦;

𑀲𑀫𑁆𑀫𑀕𑀢𑁂 𑀭𑀢𑁆𑀢𑀓𑀸𑀫𑀫𑀼𑀧𑁂𑀢𑀺,

𑀓𑀸𑀫𑀧𑀢𑀺𑀢𑀁 𑀮𑁄𑀓𑀲𑁆𑀲 𑀫𑀸𑀢𑁆𑀭𑀸𑀮𑀫𑀢𑀻’’𑀢𑀺 𑁋

𑀆𑀤𑀻𑀲𑀼 𑀯𑀺𑀬 𑁋

𑀯𑀺𑀪𑀗𑁆𑀕𑁂𑀬𑁂𑀯 𑀓𑀺𑀜𑁆𑀘𑀸𑀧𑀺 𑀅𑀢𑁆𑀣𑁄 𑀯𑀼𑀢𑁆𑀢𑁄𑀢𑀺 𑀏𑀢𑁆𑀣 𑀅𑀬𑀫𑀥𑀺𑀧𑁆𑀧𑀸𑀬𑁄 𑁋 𑀯𑀺𑀪𑀗𑁆𑀕𑀧𑀸𑀴𑀺𑀁 𑀆𑀦𑁂𑀢𑁆𑀯𑀸 𑀇𑀥 𑀯𑀼𑀢𑁆𑀢𑁄𑀧𑀺 𑀲𑀩𑁆𑀩𑁂𑀲𑀁 𑀉𑀧𑀓𑀸𑀭𑀸𑀬 𑀦 𑀳𑁄𑀢𑀺, 𑀢𑀲𑁆𑀫𑀸 𑀢𑀁 𑀅𑀝𑁆𑀞𑀓𑀣𑀸𑀦𑀬𑁂𑀦𑁂𑀯 𑀧𑀓𑀸𑀲𑀬𑀺𑀲𑁆𑀲𑀸𑀫𑀻𑀢𑀺. 𑀇𑀢𑁄𑀢𑀺 𑀓𑀸𑀫𑁂𑀳𑀺. 𑀓𑀸𑀬𑀯𑀺𑀯𑁂𑀓𑀸𑀤𑀻𑀲𑀼 𑀉𑀧𑀥𑀺𑀯𑀺𑀯𑁂𑀓𑁄 𑀢𑀢𑀺𑀬𑁄, 𑀢𑀲𑁆𑀫𑀸 𑀢𑀢𑀺𑀬𑀁 𑀙𑀟𑁆𑀟𑁂𑀢𑁆𑀯𑀸 𑀤𑁆𑀯𑁂 𑀕𑀳𑁂𑀢𑁆𑀯𑀸 𑀢𑀤𑀗𑁆𑀕𑀸𑀤𑀻𑀲𑀼 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑀁 𑀕𑀳𑁂𑀢𑁆𑀯𑀸 ‘‘𑀢𑀬𑁄 𑀏𑀯𑀸’’𑀢𑀺 𑀯𑀼𑀢𑁆𑀢𑀸. 𑀏𑀯𑀁 𑀲𑀢𑀺 𑀘𑀺𑀢𑁆𑀢𑀯𑀺𑀓𑁆𑀔𑀫𑁆𑀪𑀦𑀸 𑀏𑀓𑀢𑁆𑀣𑀸 𑀏𑀯𑀸𑀢𑀺 𑀯𑀺𑀲𑁂𑀲𑁄 𑀦 𑀲𑀺𑀬𑀸𑀢𑀺 𑀘𑁂? 𑀅𑀧𑁆𑀧𑀦𑀸𑀯𑀸𑀭𑀢𑁆𑀢𑀸 𑀦 𑀧𑀦𑁂𑀯𑀁 𑀤𑀝𑁆𑀞𑀩𑁆𑀩𑀁. 𑀓𑀸𑀬𑀯𑀺𑀯𑁂𑀓𑀕𑁆𑀕𑀳𑀡𑁂𑀦 𑀧𑀼𑀩𑁆𑀩𑀪𑀸𑀕𑀕𑁆𑀕𑀳𑀡𑀁 𑀜𑀸𑀬𑀢𑀺, 𑀢𑀲𑁆𑀫𑀸 𑀘𑀺𑀢𑁆𑀢𑀯𑀺𑀯𑁂𑀓𑁄𑀢𑀺 𑀢𑀤𑀗𑁆𑀕𑀯𑀺𑀯𑁂𑀓𑁄 𑀯𑀼𑀢𑁆𑀢𑁄, 𑀯𑀺𑀓𑁆𑀔𑀫𑁆𑀪𑀦𑁂𑀦 𑀅𑀧𑁆𑀧𑀦𑀸𑀓𑀸𑀮𑁂𑀢𑀺 𑀕𑀳𑁂𑀢𑀩𑁆𑀩𑀁 𑀅𑀲𑀗𑁆𑀓𑀭𑀢𑁄. 𑀅𑀣 𑀯𑀸 𑀘𑀺𑀢𑁆𑀢𑀯𑀺𑀯𑁂𑀓𑁂𑀦 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑀸 𑀕𑀳𑀺𑀢𑀸, 𑀇𑀢𑀭𑁂𑀦 𑀯𑀺𑀓𑁆𑀔𑀫𑁆𑀪𑀦𑀯𑀺𑀯𑁂𑀓𑁄 𑀏𑀯𑀸𑀢𑀺𑀧𑀺 𑀬𑀼𑀢𑁆𑀢𑀁, 𑀓𑀺𑀮𑁂𑀲𑀓𑀸𑀫𑀢𑁆𑀢𑀸 𑀯𑀸 𑀤𑁆𑀯𑀻𑀲𑀼 𑀓𑀫𑁆𑀫𑁂𑀲𑀼 𑀧𑀭𑀺𑀬𑀸𑀧𑀦𑁆𑀦𑁄 𑀧𑀼𑀭𑀺𑀲𑁄 𑀯𑀺𑀬. 𑀬𑀣𑀸 𑀅𑀯𑀺𑀚𑁆𑀚𑀫𑀸𑀦𑁂𑀦 𑀅𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀮𑁄𑀓𑁂 ‘‘𑀲𑀨𑀮𑁄 𑀭𑀼𑀓𑁆𑀔𑁄’’𑀢𑀺 𑀯𑀼𑀘𑁆𑀘𑀢𑀺, 𑀢𑀣𑁂𑀯 𑀯𑀺𑀚𑁆𑀚𑀫𑀸𑀦𑁂𑀦 𑀯𑀺𑀚𑁆𑀚𑀫𑀸𑀦𑀧𑀜𑁆𑀜𑀢𑁆𑀢𑀺𑀯𑀲𑁂𑀦 𑀲𑀸𑀲𑀦𑁂 ‘‘𑀲𑀯𑀺𑀢𑀓𑁆𑀓𑀁 𑀲𑀯𑀺𑀘𑀸𑀭𑀁 𑀛𑀸𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀯𑀽𑀧𑀲𑀫𑀸𑀢𑀺 𑀏𑀢𑁆𑀣 𑀓𑁂𑀲𑀁 𑀯𑀽𑀧𑀲𑀫𑀸𑀢𑀺, 𑀓𑀺𑀁 𑀧𑀞𑀫𑀚𑁆𑀛𑀸𑀦𑀺𑀓𑀸𑀦𑀁, 𑀉𑀤𑀸𑀳𑀼 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀸𑀦𑀦𑁆𑀢𑀺? 𑀏𑀢𑁆𑀣 𑀬𑀤𑀺 𑀧𑀞𑀫𑀚𑁆𑀛𑀸𑀦𑀺𑀓𑀸𑀦𑀁, 𑀦𑀢𑁆𑀣𑀺 𑀢𑁂𑀲𑀁 𑀯𑀽𑀧𑀲𑀫𑁄. 𑀦 𑀳𑀺 𑀧𑀞𑀫𑀚𑁆𑀛𑀸𑀦𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀭𑀳𑀺𑀢𑀁 𑀅𑀢𑁆𑀣𑀺. 𑀬𑀤𑀺 𑀤𑀼𑀢𑀺𑀬𑀚𑁆𑀛𑀸𑀦𑀺𑀓𑀸𑀦𑀁, 𑀦𑀢𑁆𑀣𑁂𑀯 𑀯𑀽𑀧𑀲𑀫𑁄 𑀢𑀢𑁆𑀣 𑀢𑀤𑀪𑀸𑀯𑀸𑀢𑀺 𑀘𑁂? 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 ‘‘𑀲𑀫𑀢𑀺𑀓𑁆𑀓𑀫𑀸’’𑀢𑀺, 𑀲𑀫𑀢𑀺𑀓𑁆𑀓𑀫𑁄𑀧𑀺 𑀦 𑀢𑁂𑀲𑀁𑀬𑁂𑀯. 𑀓𑀺𑀦𑁆𑀢𑀼 𑀲𑀓𑀮𑀲𑁆𑀲𑀧𑀺 𑀧𑀞𑀫𑀚𑁆𑀛𑀸𑀦𑀥𑀫𑁆𑀫𑀭𑀸𑀲𑀺𑀲𑁆𑀲𑀸𑀢𑀺 𑀘𑁂? 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 ‘‘𑀑𑀴𑀸𑀭𑀺𑀓𑀲𑁆𑀲 𑀧𑀦 𑀲𑀫𑀢𑀺𑀓𑁆𑀓𑀫𑀸’’𑀢𑀺𑀆𑀤𑀺. 𑀲𑀩𑁆𑀩𑁂𑀧𑀺 𑀧𑀞𑀫𑀚𑁆𑀛𑀸𑀦𑀥𑀫𑁆𑀫𑀸 𑀑𑀴𑀸𑀭𑀺𑀓𑀸𑀯 𑀤𑀼𑀢𑀺𑀬𑀚𑁆𑀛𑀸𑀦𑀢𑁄, 𑀦 𑀓𑁂𑀯𑀮𑀁 𑀯𑀺𑀢𑀓𑁆𑀓𑀯𑀺𑀘𑀸𑀭𑀤𑁆𑀯𑀬𑀫𑁂𑀯𑀸𑀢𑀺 𑀘𑁂? 𑀦 𑀯𑀺𑀢𑀓𑁆𑀓𑀯𑀺𑀘𑀸𑀭𑀸𑀬𑁂𑀯 𑀢𑁂𑀳𑀺 𑀲𑀫𑁆𑀧𑀬𑀼𑀢𑁆𑀢𑀸𑀦𑀁 𑀑𑀴𑀸𑀭𑀺𑀓𑀪𑀸𑀯𑀢𑁄𑀢𑀺 𑀢𑁂𑀲𑁆𑀯𑁂𑀯 𑀆𑀤𑀻𑀦𑀯𑀤𑀲𑁆𑀲𑀦𑁂𑀦 𑀤𑀼𑀢𑀺𑀬𑀚𑁆𑀛𑀸𑀦𑀓𑁆𑀔𑀡𑁂 𑀢𑁂𑀲𑀁 𑀅𑀪𑀸𑀯𑁄 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀤𑀼𑀢𑀺𑀬𑀚𑁆𑀛𑀸𑀦𑀓𑁆𑀔𑀡𑁂 𑀅𑀧𑀸𑀢𑀼𑀪𑀸𑀯𑀸’’𑀢𑀺, 𑀬𑀲𑁆𑀲 𑀥𑀫𑁆𑀫𑀲𑁆𑀲𑀸𑀦𑀼𑀪𑀸𑀯𑁂𑀦, 𑀬𑁄𑀕𑁂𑀦 𑀯𑀸 𑀇𑀤𑀁 𑀛𑀸𑀦𑀁 ‘‘𑀲𑀫𑁆𑀧𑀲𑀸𑀤𑀦’’𑀦𑁆𑀢𑀺 𑀯𑀼𑀘𑁆𑀘𑀢𑀺 ‘‘𑀏𑀓𑁄𑀤𑀺𑀪𑀸𑀯’’𑀦𑁆𑀢𑀺 𑀘, 𑀢𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 𑀲𑀤𑁆𑀥𑀸𑀲𑀫𑀸𑀥𑀬𑁄 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀸. 𑀧𑀡𑀻𑀢𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑁂 (𑀧𑀸𑀘𑀺. 𑁨𑁫𑁭 𑀆𑀤𑀬𑁄) 𑀲𑀧𑁆𑀧𑀺𑀆𑀤𑀬𑁄 𑀯𑀺𑀬𑀸𑀢𑀺 𑀯𑀼𑀢𑁆𑀢𑁂 𑀅𑀬𑀁 𑀅𑀢𑁆𑀣𑀯𑀡𑁆𑀡𑀦𑀸 𑀦 𑀯𑀺𑀭𑀼𑀚𑁆𑀛𑀢𑀺. 𑀲𑀫𑀁 𑀧𑀲𑁆𑀲𑀢𑀻𑀢𑀺 𑀮𑀻𑀦𑀼𑀤𑁆𑀥𑀘𑁆𑀘𑀁 𑀧𑀳𑀸𑀬 𑀔𑀻𑀡𑀸𑀲𑀯𑀲𑁆𑀲 𑀙𑀲𑀼 𑀤𑁆𑀯𑀸𑀭𑁂𑀲𑀼 𑀇𑀝𑁆𑀞𑀸𑀦𑀺𑀝𑁆𑀞𑀙𑀴𑀸𑀭𑀫𑁆𑀫𑀡𑀸𑀧𑀸𑀣𑁂 𑀧𑀭𑀺𑀲𑀼𑀤𑁆𑀥𑀧𑀓𑀢𑀺𑀪𑀸𑀯𑀸𑀯𑀺𑀚𑀳𑀦𑀸𑀓𑀸𑀭𑀪𑀽𑀢𑀸 𑀉𑀧𑁂𑀓𑁆𑀔𑀸 𑀙𑀴𑀗𑁆𑀕𑀼𑀧𑁂𑀓𑁆𑀔𑀸. 𑀦𑀻𑀯𑀭𑀡𑀸𑀤𑀺𑀧𑀝𑀺𑀲𑀗𑁆𑀔𑀸𑀲𑀦𑁆𑀢𑀺𑀝𑁆𑀞𑀦𑀸𑀕𑀳𑀡𑁂 𑀫𑀚𑁆𑀛𑀢𑁆𑀢𑀪𑀽𑀢𑀸 𑀉𑀧𑁂𑀓𑁆𑀔𑀸, 𑀅𑀬𑀁 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸 𑀦𑀸𑀫. 𑀯𑀺𑀘𑀺𑀦𑀦𑁂 𑀫𑀚𑁆𑀛𑀢𑁆𑀢𑀪𑀽𑀢𑀸 𑀉𑀧𑁂𑀓𑁆𑀔𑀸 𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸 𑀦𑀸𑀫. 𑀢𑀢𑁆𑀣 𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑀼𑀧𑁂𑀓𑁆𑀔𑀸 𑀩𑁄𑀚𑁆𑀛𑀗𑁆𑀕𑀼𑀧𑁂𑀓𑁆𑀔𑀸 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸 𑀛𑀸𑀦𑀼𑀧𑁂𑀓𑁆𑀔𑀸 𑀧𑀸𑀭𑀺𑀲𑀼𑀤𑁆𑀥𑀼𑀧𑁂𑀓𑁆𑀔𑀸 𑀘 𑀅𑀢𑁆𑀣𑀢𑁄 𑀏𑀓𑀸 𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸𑀯, 𑀅𑀯𑀢𑁆𑀣𑀸𑀪𑁂𑀤𑁂𑀦 𑀪𑁂𑀤𑁄 𑀦𑁂𑀲𑀁. 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸𑀦𑀫𑁆𑀧𑀺 𑀏𑀓𑀢𑀸 𑀧𑀜𑁆𑀜𑀸𑀯𑀲𑁂𑀦, 𑀓𑀺𑀘𑁆𑀘𑀯𑀲𑁂𑀦 𑀧𑀦 𑀤𑀼𑀯𑀺𑀥𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀓𑀸𑀫𑀸𑀯𑀘𑀭𑀸, 𑀩𑁆𑀭𑀳𑁆𑀫𑀯𑀺𑀳𑀸𑀭𑀼𑀧𑁂𑀓𑁆𑀔𑀸 𑀭𑀽𑀧𑀸𑀯𑀘𑀭𑀸𑀢𑀺𑀆𑀤𑀺𑀦𑀸 𑀪𑀽𑀫𑀺𑀯𑀲𑁂𑀦. 𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀔𑀻𑀡𑀸𑀲𑀯𑀲𑁆𑀲𑁂𑀯, 𑀩𑁆𑀭𑀳𑁆𑀫𑀯𑀺𑀳𑀸𑀭𑀼𑀧𑁂𑀓𑁆𑀔𑀸 𑀢𑀺𑀡𑁆𑀡𑀫𑁆𑀧𑀺 𑀧𑀼𑀣𑀼𑀚𑁆𑀚𑀦𑀲𑁂𑀓𑁆𑀔𑀸𑀲𑁂𑀓𑁆𑀔𑀸𑀦𑀦𑁆𑀢𑀺 𑀏𑀯𑀁 𑀧𑀼𑀕𑁆𑀕𑀮𑀯𑀲𑁂𑀦. 𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀲𑁄𑀫𑀦𑀲𑁆𑀲𑀼𑀧𑁂𑀓𑁆𑀔𑀸𑀲𑀳𑀕𑀢𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸, 𑀩𑁆𑀭𑀳𑁆𑀫𑀯𑀺𑀳𑀸𑀭𑀼𑀧𑁂𑀓𑁆𑀔𑀸 𑀉𑀧𑁂𑀓𑁆𑀔𑀸𑀲𑀳𑀕𑀢𑀘𑀺𑀢𑁆𑀢𑀲𑀫𑁆𑀧𑀬𑀼𑀢𑁆𑀢𑀸 𑀏𑀯𑀸𑀢𑀺 𑀏𑀯𑀁 𑀘𑀺𑀢𑁆𑀢𑀯𑀲𑁂𑀦. 𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀙𑀴𑀸𑀭𑀫𑁆𑀫𑀡𑀸, 𑀩𑁆𑀭𑀳𑁆𑀫𑀯𑀺𑀳𑀸𑀭𑀼𑀧𑁂𑀓𑁆𑀔𑀸 𑀥𑀫𑁆𑀫𑀸𑀭𑀫𑁆𑀫𑀡𑀸𑀯𑀸𑀢𑀺 𑀆𑀭𑀫𑁆𑀫𑀡𑀯𑀲𑁂𑀦. 𑀯𑁂𑀤𑀦𑀼𑀧𑁂𑀓𑁆𑀔𑀸 𑀯𑁂𑀤𑀦𑀸𑀓𑁆𑀔𑀦𑁆𑀥𑁂𑀦 𑀲𑀗𑁆𑀕𑀳𑀺𑀢𑀸, 𑀇𑀢𑀭𑀸 𑀦𑀯 𑀲𑀗𑁆𑀔𑀸𑀭𑀓𑁆𑀔𑀦𑁆𑀥𑁂𑀦𑀸𑀢𑀺 𑀔𑀦𑁆𑀥𑀲𑀗𑁆𑀕𑀳𑀯𑀲𑁂𑀦. 𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀩𑁆𑀭𑀳𑁆𑀫𑀯𑀺𑀳𑀸𑀭𑀩𑁄𑀚𑁆𑀛𑀗𑁆𑀕𑀛𑀸𑀦𑀼𑀧𑁂𑀓𑁆𑀔𑀸 𑀧𑀸𑀭𑀺𑀲𑀼𑀤𑁆𑀥𑀺𑀢𑀢𑁆𑀭𑀫𑀚𑁆𑀛𑀢𑁆𑀢𑀼𑀧𑁂𑀓𑁆𑀔𑀸 𑀘 𑀅𑀢𑁆𑀣𑀢𑁄 𑀏𑀓𑀸, 𑀢𑀲𑁆𑀫𑀸 𑀏𑀓𑀓𑁆𑀔𑀡𑁂 𑀏𑀓𑀸𑀯 𑀲𑀺𑀬𑀸, 𑀦 𑀇𑀢𑀭𑀸, 𑀢𑀣𑀸 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀯𑀺𑀧𑀲𑁆𑀲𑀦𑀼𑀧𑁂𑀓𑁆𑀔𑀸𑀧𑀺. 𑀯𑁂𑀤𑀦𑀸𑀯𑀻𑀭𑀺𑀬𑀼𑀧𑁂𑀓𑁆𑀔𑀸𑀦𑀁 𑀏𑀓𑀓𑁆𑀔𑀡𑁂 𑀲𑀺𑀬𑀸 𑀉𑀧𑁆𑀧𑀢𑁆𑀢𑀻𑀢𑀺. 𑀙𑀴𑀗𑁆𑀕𑀼𑀧𑁂𑀓𑁆𑀔𑀸 𑀅𑀩𑁆𑀬𑀸𑀓𑀢𑀸, 𑀩𑁆𑀭𑀳𑁆𑀫𑀯𑀺𑀳𑀸𑀭𑀼𑀧𑁂𑀓𑁆𑀔𑀸 𑀓𑀼𑀲𑀮𑀸𑀩𑁆𑀬𑀸𑀓𑀢𑀸, 𑀢𑀣𑀸 𑀲𑁂𑀲𑀸. 𑀯𑁂𑀤𑀦𑀼𑀧𑁂𑀓𑁆𑀔𑀸 𑀧𑀦 𑀲𑀺𑀬𑀸 𑀅𑀓𑀼𑀲𑀮𑀸𑀧𑀺. 𑀏𑀯𑀁 𑀓𑀼𑀲𑀮𑀢𑁆𑀢𑀺𑀓𑀯𑀲𑁂𑀦. 𑀤𑀲𑀧𑁂𑀢𑀸 𑀲𑀗𑁆𑀔𑁂𑀧𑁂𑀦 𑀘𑀢𑁆𑀢𑀸𑀭𑁄𑀯 𑀥𑀫𑁆𑀫𑀸 𑀯𑀻𑀭𑀺𑀬𑀯𑁂𑀤𑀦𑀸𑀢𑀢𑁆𑀭𑀫𑀚𑁆𑀛𑀢𑁆𑀢𑀜𑀸𑀡𑀯𑀲𑁂𑀦. ‘‘𑀤𑀼𑀓𑁆𑀔𑀤𑁄𑀫𑀦𑀲𑁆𑀲𑀲𑀼𑀔𑀲𑁄𑀫𑀦𑀲𑁆𑀲𑀸𑀦’’𑀦𑁆𑀢𑀺 𑀏𑀯𑀁 𑀧𑀳𑀸𑀦𑀓𑁆𑀓𑀫𑁂𑀦 𑀅𑀯𑀢𑁆𑀯𑀸 𑀯𑀺𑀪𑀗𑁆𑀕𑁂 𑀯𑀼𑀢𑁆𑀢𑀦𑀬𑁂𑀦 𑀓𑀲𑁆𑀫𑀸 𑀯𑀼𑀢𑁆𑀢𑀸𑀦𑀻𑀢𑀺 𑀘𑁂? 𑀲𑀼𑀢𑁆𑀢𑀸𑀦𑀼𑀭𑀓𑁆𑀔𑀡𑀢𑁆𑀣𑀁. 𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀧𑀭𑀻𑀢𑀦𑁆𑀢𑀺 𑀏𑀢𑁆𑀣 ‘‘𑀆𑀭𑀫𑁆𑀫𑀡𑀯𑀲𑁂𑀦 𑀅𑀕𑁆𑀕𑀳𑁂𑀢𑁆𑀯𑀸 𑀇𑀝𑁆𑀞𑀸𑀦𑀺𑀝𑁆𑀞𑀯𑀺𑀧𑀭𑀻𑀢𑀸𑀓𑀸𑀭𑁂𑀦 𑀅𑀦𑀼𑀪𑀯𑀢𑀻𑀢𑀺 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑀺. 𑀓𑀲𑁆𑀫𑀸? 𑀏𑀓𑀁𑀬𑁂𑀯 𑀓𑀲𑀺𑀡𑀁 𑀆𑀭𑀩𑁆𑀪 𑀲𑀩𑁆𑀩𑁂𑀲𑀁 𑀧𑀯𑀢𑁆𑀢𑀺𑀢𑁄. 𑀢𑀢𑀺𑀬𑀚𑁆𑀛𑀸𑀦𑀢𑁄 𑀧𑀝𑁆𑀞𑀸𑀬 𑀉𑀧𑀓𑀸𑀭𑀸 𑀳𑀼𑀢𑁆𑀯𑀸 𑀆𑀕𑀢𑀸𑀢𑀺 𑀲𑀢𑀺𑀲𑀻𑀲𑁂𑀦 𑀤𑁂𑀲𑀦𑀸 𑀓𑀢𑀸, 𑀯𑀺𑀕𑀢𑀯𑀮𑀸𑀳𑀓𑀸𑀤𑀺𑀦𑀸 𑀲𑁄𑀫𑁆𑀫𑀢𑀸𑀬 𑀭𑀢𑁆𑀢𑀺𑀬𑀸 𑀯𑀮𑀸𑀳𑀓𑀸𑀤𑀺𑀦𑀸 𑀓𑀸𑀮𑀼𑀲𑁆𑀲𑀺𑀬𑁂 𑀲𑀢𑀺𑀧𑀺 𑀤𑀺𑀯𑀸 𑀯𑀺𑀬 𑀅𑀦𑀼𑀧𑀓𑀸𑀭𑀺𑀓𑀸 𑀦 𑀳𑁄𑀢𑀺 𑀭𑀢𑁆𑀢𑀺𑀁, 𑀢𑀲𑁆𑀫𑀸 ‘‘𑀅𑀢𑁆𑀢𑀦𑁄 𑀉𑀧𑀓𑀸𑀭𑀓𑀢𑁆𑀢𑁂𑀦 𑀯𑀸’’𑀢𑀺 𑀯𑀼𑀢𑁆𑀢𑀁. ‘‘𑀲𑀽𑀭𑀺𑀬𑀧𑁆𑀧𑀪𑀸𑀪𑀺𑀪𑀯𑀸, 𑀭𑀢𑁆𑀢𑀺𑀬𑀸 𑀅𑀮𑀸𑀪𑀸𑀢𑀺 𑀇𑀫𑁂 𑀤𑁆𑀯𑁂 𑀳𑁂𑀢𑀽 𑀅𑀧𑀭𑀺𑀲𑀼𑀤𑁆𑀥𑀢𑀸𑀬 𑀓𑀸𑀭𑀡𑀁. 𑀲𑁄𑀫𑁆𑀫𑀪𑀸𑀯𑁂𑀦, 𑀅𑀢𑁆𑀢𑀦𑁄 𑀉𑀧𑀓𑀸𑀭𑀓𑀢𑁆𑀢𑁂𑀦 𑀘𑀸𑀢𑀺 𑀇𑀫𑁂 𑀤𑁆𑀯𑁂 𑀲𑀪𑀸𑀕𑀢𑀸𑀬 𑀓𑀸𑀭𑀡’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀲𑁆𑀲𑀸 𑀅𑀧𑀭𑀺𑀲𑀼𑀤𑁆𑀥𑀸𑀬 𑀚𑀸𑀢𑀺𑀬𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀓𑀸𑀭𑀡𑀯𑀘𑀦𑀦𑁆𑀢𑀺 𑀏𑀓𑁂.

𑀛𑀸𑀦𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀼𑀩𑁆𑀩𑁂𑀦𑀺𑀯𑀸𑀲𑀓𑀣𑀸𑀯𑀡𑁆𑀡𑀦𑀸

𑁧𑁨. 𑀘𑀺𑀢𑁆𑀢𑁂𑀓𑀕𑁆𑀕𑀢𑀸𑀲𑀪𑀸𑀕𑀢𑁆𑀢𑀸 𑀛𑀸𑀦𑀸𑀦𑀁 ‘‘𑀓𑁂𑀲𑀜𑁆𑀘𑀺 𑀘𑀺𑀢𑁆𑀢𑁂𑀓𑀕𑁆𑀕𑀢𑀢𑁆𑀣𑀸𑀦𑀻’’𑀢𑀺 𑀆𑀳. 𑀓𑀼𑀲𑀮𑀸𑀦𑀁 𑀪𑀯𑁄𑀓𑁆𑀓𑀫𑀦𑀲𑀪𑀸𑀕𑀢𑁆𑀢𑀸 ‘‘𑀓𑁂𑀲𑀜𑁆𑀘𑀺 𑀪𑀯𑁄𑀓𑁆𑀓𑀫𑀦𑀢𑁆𑀣𑀸𑀦𑀻’’𑀢𑀺. 𑀅𑀲𑀪𑀸𑀕𑀢𑁆𑀢𑀸 𑀲𑁂𑀲𑀝𑁆𑀞𑀸𑀦𑁂𑀲𑀼 ‘‘𑀧𑀸𑀤𑀓𑀢𑁆𑀣𑀸𑀦𑀻’’𑀢𑀺 𑀅𑀯𑀢𑁆𑀯𑀸 ‘‘𑀧𑀸𑀤𑀓𑀸𑀦𑀻’’𑀢𑀺 𑀆𑀳. 𑀢𑁂𑀦 𑀧𑀸𑀤𑀓𑀪𑀽𑀢𑀸𑀦𑀫𑁆𑀧𑀺 𑀬𑀣𑀸𑀲𑀫𑁆𑀪𑀯𑀁 𑀘𑀺𑀢𑁆𑀢𑁂𑀓𑀕𑁆𑀕𑀢𑀸 𑀪𑀯𑁄𑀓𑁆𑀓𑀫𑀦𑀢𑀸𑀯𑀳𑀢𑀁, 𑀇𑀢𑀭𑁂𑀲𑀁 𑀬𑀣𑀸𑀲𑀫𑁆𑀪𑀯𑀁 𑀧𑀸𑀤𑀓𑀢𑀸𑀯𑀳𑀢𑀜𑁆𑀘 𑀤𑀻𑀧𑁂𑀢𑀺. 𑀅𑀲𑀪𑀸𑀕𑀢𑁆𑀢𑀸 𑀚𑀯𑀦𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀸𑀦𑀺 𑀲𑀫𑀸𑀦𑀸𑀦𑀺 𑀅𑀪𑀺𑀜𑁆𑀜𑀸𑀧𑀸𑀤𑀓𑀸𑀦𑀺 𑀘 𑀳𑁄𑀦𑁆𑀢𑀺, 𑀅𑀪𑀺𑀜𑁆𑀜𑀸𑀧𑀸𑀤𑀓𑀸𑀦𑀺 𑀘 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀸𑀦𑀺 𑀳𑁄𑀦𑁆𑀢𑀻𑀢𑀺𑀧𑀺 𑀤𑀻𑀧𑁂𑀢𑀺, 𑀢𑀣𑀸 𑀧𑀸𑀤𑀓𑀸𑀪𑀸𑀯𑀁 𑀤𑀻𑀧𑁂𑀢𑀺. 𑀅𑀪𑀺𑀜𑁆𑀜𑀸𑀬 𑀳𑀺 𑀘𑀢𑀼𑀢𑁆𑀣𑀫𑁂𑀯 𑀧𑀸𑀤𑀓𑀁, 𑀦 𑀇𑀢𑀭𑀸𑀦𑀺. 𑀢𑁂𑀲𑀼 𑀘𑀢𑀼𑀢𑁆𑀣𑀲𑁆𑀲 𑀢𑀢𑀺𑀬𑀁 𑀧𑀸𑀤𑀓𑀁, 𑀢𑀢𑀺𑀬𑀲𑁆𑀲 𑀤𑀼𑀢𑀺𑀬𑀁, 𑀤𑀼𑀢𑀺𑀬𑀲𑁆𑀲 𑀧𑀞𑀫𑀦𑁆𑀢𑀺. 𑀅𑀣 𑀯𑀸 ‘‘𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀻’’𑀢𑀺 𑀬𑀣𑀸𑀮𑀸𑀪𑀢𑁄 𑀯𑀼𑀢𑁆𑀢𑀁.

𑀯𑀺𑀦𑀬𑀦𑀺𑀤𑀸𑀦𑀦𑀺𑀫𑀺𑀢𑁆𑀢𑀁, 𑀯𑁂𑀭𑀜𑁆𑀚𑀦𑀺𑀯𑀸𑀲𑀓𑀧𑁆𑀧𑀦𑀁;

𑀲𑀢𑁆𑀣𑀼 𑀬𑀲𑁆𑀫𑀸 𑀢𑀲𑁆𑀫𑀸 𑀪𑀕𑀯𑀸, 𑀯𑀺𑀚𑁆𑀚𑀢𑁆𑀢𑀬𑀫𑀸𑀳 𑀯𑁂𑀭𑀜𑁆𑀚𑁂.

𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀯𑀺𑀦𑀬𑁂 𑀲𑀼𑀧𑁆𑀧𑀝𑀺𑀧𑀦𑁆𑀦𑁄 𑀪𑀺𑀓𑁆𑀔𑀼 𑀲𑀻𑀮𑀲𑀫𑁆𑀧𑀢𑁆𑀢𑀺𑀁 𑀦𑀺𑀲𑁆𑀲𑀸𑀬𑀸’’𑀢𑀺𑀆𑀤𑀺 (𑀧𑀸𑀭𑀸. 𑀅𑀝𑁆𑀞. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸). 𑀲𑀻𑀮𑀯𑀢𑁄 𑀳𑀺 𑀲𑀻𑀮𑀧𑀘𑁆𑀘𑀯𑁂𑀓𑁆𑀔𑀡𑀢𑁆𑀣𑀁 𑀭𑀢𑁆𑀢𑀺𑀝𑁆𑀞𑀸𑀦𑀤𑀺𑀯𑀸𑀞𑀸𑀦𑁂𑀲𑀼 𑀦𑀺𑀲𑀺𑀦𑁆𑀦𑀲𑁆𑀲 𑀦𑀺𑀲𑀚𑁆𑀚𑀦𑀢𑁄 𑀧𑀝𑁆𑀞𑀸𑀬 𑀅𑀢𑁆𑀢𑀦𑁄 𑀅𑀢𑀻𑀢𑀓𑀺𑀭𑀺𑀬𑀸𑀦𑀼𑀲𑁆𑀲𑀭𑀡𑀩𑀳𑀼𑀮𑀢𑀸𑀬 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀯𑀺𑀚𑁆𑀚𑀸 𑀅𑀧𑁆𑀧𑀓𑀲𑀺𑀭𑁂𑀦 𑀲𑀫𑀺𑀚𑁆𑀛𑀢𑀺. 𑀢𑀣𑀸 𑀅𑀢𑁆𑀢𑀸𑀦𑀁 𑀧𑀝𑀺𑀘𑁆𑀘 𑀲𑀢𑁆𑀢𑀸𑀦𑀁 𑀘𑀼𑀢𑀺𑀧𑀭𑀺𑀕𑁆𑀕𑀳𑀡𑀲𑀻𑀮𑀢𑀸𑀬 𑀘𑀼𑀢𑀽𑀧𑀧𑀸𑀢𑀜𑀸𑀡𑀁 𑀅𑀧𑁆𑀧𑀓𑀲𑀺𑀭𑁂𑀦 𑀲𑀫𑀺𑀚𑁆𑀛𑀢𑀺, 𑀉𑀤𑀓𑀸𑀤𑀻𑀲𑀼 𑀲𑀼𑀔𑀼𑀫𑀢𑁆𑀢 𑀤𑀲𑁆𑀲𑀦𑀲𑀻𑀮𑀢𑀸𑀬 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀲𑀫𑀺𑀚𑁆𑀛𑀢𑀺. 𑀬𑀲𑁆𑀫𑀸 𑀲𑀢𑁆𑀢𑀯𑀺𑀥𑀫𑁂𑀣𑀼𑀦𑀲𑀁𑀬𑁄𑀕𑀧𑀭𑀺𑀯𑀚𑁆𑀚𑀦𑁂𑀦, 𑀓𑀸𑀫𑀸𑀲𑀯𑀸𑀤𑀺𑀧𑀭𑀺𑀯𑀚𑁆𑀚𑀦𑁂𑀦 𑀯𑀸 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀔𑀡𑁆𑀟𑀸𑀤𑀺𑀪𑀸𑀯𑀁 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀫𑀸𑀲𑁆𑀲 𑀆𑀲𑀯𑀓𑁆𑀔𑀬𑀜𑀸𑀡𑀁 𑀅𑀧𑁆𑀧𑀓𑀲𑀺𑀭𑁂𑀦 𑀲𑀫𑀺𑀚𑁆𑀛𑀢𑀻𑀢𑀺 𑀏𑀢𑁆𑀣 𑀯𑀺𑀦𑀬𑀦𑀺𑀤𑀸𑀦𑁂 𑀯𑀺𑀚𑁆𑀚𑀢𑁆𑀢𑀬𑀫𑁂𑀯 𑀤𑀲𑁆𑀲𑀺𑀢𑀁, 𑀢𑀲𑁆𑀫𑀸 𑀆𑀳 ‘‘𑀬𑁂𑀲𑀜𑁆𑀘 𑀕𑀼𑀡𑀸𑀦𑀁 𑀤𑀸𑀬𑀓𑀁 𑀅𑀳𑁄𑀲𑀺, 𑀢𑁂𑀲𑀁 𑀏𑀓𑀤𑁂𑀲𑀁 𑀤𑀲𑁆𑀲𑁂𑀦𑁆𑀢𑁄’’𑀢𑀺, 𑀅𑀜𑁆𑀜𑀣𑀸 𑀯𑀺𑀚𑁆𑀚𑀢𑁆𑀢𑀬𑀧𑀝𑀺𑀮𑀸𑀪𑀫𑀢𑁆𑀢𑀧𑁆𑀧𑀲𑀗𑁆𑀕𑁄 𑀲𑀺𑀬𑀸𑀢𑀺.

𑀲𑁄 𑀏𑀯𑀦𑁆𑀢𑀺 𑀇𑀫𑀺𑀦𑀸 𑀓𑀺𑀜𑁆𑀘𑀸𑀧𑀺 𑀘𑀢𑀼𑀦𑁆𑀦𑀁 𑀛𑀸𑀦𑀸𑀦𑀁 𑀧𑀼𑀩𑁆𑀩𑀪𑀸𑀕𑀧𑀝𑀺𑀧𑀤𑀸𑀧𑀺 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺, 𑀦 𑀓𑁂𑀯𑀮𑀁 𑀧𑀼𑀭𑀺𑀫𑀚𑁆𑀛𑀸𑀦𑀢𑁆𑀢𑀺𑀓𑀫𑁂𑀯, 𑀢𑀣𑀸𑀧𑀺 𑀓𑁂𑀯𑀮𑀁 𑀧𑀼𑀭𑀺𑀫𑀚𑁆𑀛𑀸𑀦𑀢𑁆𑀢𑀺𑀓𑀫𑁂𑀯 𑀕𑀡𑁆𑀳𑀦𑁆𑀢𑁄 ‘‘𑀏𑀯𑀦𑁆𑀢𑀺 𑀘𑀢𑀼𑀢𑁆𑀣𑀚𑁆𑀛𑀸𑀦𑀓𑁆𑀓𑀫𑀦𑀺𑀤𑀲𑁆𑀲𑀦𑀫𑁂𑀢𑀁, 𑀇𑀫𑀺𑀦𑀸 𑀧𑀞𑀫𑀚𑁆𑀛𑀸𑀦𑀸𑀥𑀺𑀕𑀫𑀸𑀤𑀺𑀦𑀸 𑀓𑀫𑁂𑀦 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀧𑀝𑀺𑀮𑀪𑀺𑀢𑁆𑀯𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻’’𑀢𑀺 𑀆𑀳, 𑀢𑀁 𑀓𑀲𑁆𑀫𑀸𑀢𑀺 𑀘𑁂? 𑀲𑀫𑁆𑀪𑀸𑀭𑀪𑀽𑀫𑀺𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 (𑀯𑀺𑀲𑀼𑀤𑁆𑀥𑀺. 𑁨.𑁩𑁮𑁧) ‘‘𑀏𑀢𑁆𑀣 𑀘 𑀧𑀼𑀭𑀺𑀫𑀸𑀦𑀺 𑀢𑀻𑀡𑀺 𑀛𑀸𑀦𑀸𑀦𑀺 𑀬𑀲𑁆𑀫𑀸 𑀧𑀻𑀢𑀺𑀨𑀭𑀡𑁂𑀦 𑀘 𑀲𑀼𑀔𑀨𑀭𑀡𑁂𑀦 𑀘 𑀲𑀼𑀔𑀲𑀜𑁆𑀜𑀜𑁆𑀘 𑀮𑀳𑀼𑀲𑀜𑁆𑀜𑀜𑁆𑀘 𑀑𑀓𑁆𑀓𑀫𑀺𑀢𑁆𑀯𑀸 𑀮𑀳𑀼𑀫𑀼𑀤𑀼𑀓𑀫𑁆𑀫𑀜𑁆𑀜𑀓𑀸𑀬𑁄 𑀳𑀼𑀢𑁆𑀯𑀸 𑀇𑀤𑁆𑀥𑀺𑀁 𑀧𑀸𑀧𑀼𑀡𑀸𑀢𑀺, 𑀢𑀲𑁆𑀫𑀸 𑀇𑀫𑀺𑀦𑀸 𑀧𑀭𑀺𑀬𑀸𑀬𑁂𑀦 𑀇𑀤𑁆𑀥𑀺𑀮𑀸𑀪𑀸𑀬 𑀲𑀁𑀯𑀢𑁆𑀢𑀦𑀢𑁄 𑀲𑀫𑁆𑀪𑀸𑀭𑀪𑀽𑀫𑀺𑀬𑁄𑀢𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀘𑀢𑀼𑀢𑁆𑀣𑀚𑁆𑀛𑀸𑀦𑀁 𑀧𑀦 𑀇𑀤𑁆𑀥𑀺𑀮𑀸𑀪𑀸𑀬 𑀧𑀓𑀢𑀺𑀪𑀽𑀫𑀺 𑀏𑀯𑀸’’𑀢𑀺. 𑀇𑀤𑀫𑁂𑀯 𑀯𑀸 𑀅𑀢𑁆𑀣𑀁 𑀲𑀦𑁆𑀥𑀸𑀬𑀸𑀳 ‘‘𑀧𑀼𑀩𑁆𑀩𑁂 𑀇𑀫𑀸𑀦𑀺 𑀘𑀢𑁆𑀢𑀸𑀭𑀺 𑀛𑀸𑀦𑀸𑀦𑀺 𑀓𑁂𑀲𑀜𑁆𑀘𑀺 𑀅𑀪𑀺𑀜𑁆𑀜𑀸𑀧𑀸𑀤𑀓𑀸𑀦𑀻’’𑀢𑀺. 𑀬𑀤𑀺 𑀏𑀯𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀫𑁆𑀧𑀺 𑀅𑀦𑁆𑀢𑁄𑀓𑀢𑁆𑀯𑀸 𑀏𑀯𑀦𑁆𑀢𑀺 𑀓𑀺𑀫𑀢𑁆𑀣𑀁 𑀦 𑀯𑀼𑀢𑁆𑀢𑀁. 𑀢𑀜𑁆𑀳𑀺 𑀧𑀓𑀢𑀺𑀪𑀽𑀫𑀻𑀢𑀺 𑀘𑁂? 𑀦 𑀯𑀢𑁆𑀢𑀩𑁆𑀩𑀁, 𑀘𑀢𑀼𑀢𑁆𑀣𑀚𑁆𑀛𑀸𑀦𑀢𑁄 𑀧𑀭𑀲𑁆𑀲 𑀲𑀫𑀸𑀳𑀺𑀢𑀸𑀤𑀺𑀪𑀸𑀯𑀧𑁆𑀧𑀢𑁆𑀢𑀲𑁆𑀲 𑀘𑀺𑀢𑁆𑀢𑀲𑁆𑀲 𑀅𑀢𑁆𑀣𑀺𑀪𑀸𑀯𑀧𑁆𑀧𑀲𑀗𑁆𑀕𑀢𑁄. 𑀬𑀲𑁆𑀫𑀸 𑀬𑀲𑁆𑀫𑀺𑀁 𑀲𑀢𑀺 ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀸𑀬 𑀘𑀺𑀢𑁆𑀢𑀁 𑀅𑀪𑀺𑀦𑀺𑀦𑁆𑀦𑀸𑀫𑁂𑀲𑀺’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀲𑁆𑀫𑀺𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑀺𑀢𑁆𑀢𑁂 𑀧𑀓𑀢𑀺𑀪𑀽𑀫𑀺𑀪𑀸𑀯𑀧𑁆𑀧𑀢𑁆𑀢𑁂 𑀅𑀪𑀺𑀜𑁆𑀜𑀸𑀧𑀸𑀤𑀓𑁂 𑀚𑀸𑀢𑁂 𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀁 ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀸𑀬 𑀅𑀪𑀺𑀦𑀺𑀦𑁆𑀦𑀸𑀫𑁂𑀲𑀺’’𑀦𑁆𑀢𑀺 𑀆𑀳. 𑀅𑀪𑀺𑀦𑀻𑀳𑀸𑀭𑀓𑁆𑀔𑀫𑀁 𑀳𑁄𑀢𑀻𑀢𑀺 𑀏𑀢𑁆𑀣 𑀢𑀁 𑀇𑀤𑁆𑀥𑀺𑀯𑀺𑀥𑀸𑀥𑀺𑀕𑀫𑀢𑁆𑀣𑀸𑀬 𑀧𑀭𑀺𑀓𑀫𑁆𑀫𑀘𑀺𑀢𑁆𑀢𑀁 𑀅𑀪𑀺𑀦𑀻𑀳𑀭𑀢𑀺. 𑀓𑀲𑀺𑀡𑀸𑀭𑀫𑁆𑀫𑀡𑀢𑁄 𑀅𑀧𑀦𑁂𑀢𑁆𑀯𑀸 𑀇𑀤𑁆𑀥𑀺𑀯𑀺𑀥𑀸𑀪𑀺𑀫𑀼𑀔𑀁 𑀧𑁂𑀲𑁂𑀲𑀺. 𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀅𑀪𑀺𑀜𑁆𑀜𑀸𑀧𑀸𑀤𑀓𑀚𑁆𑀛𑀸𑀦𑀢𑁄 𑀇𑀤𑁆𑀥𑀺𑀯𑀺𑀥𑀜𑀸𑀡𑀸𑀤𑀻𑀦𑀁 𑀦𑀻𑀳𑀭𑀡𑀢𑁆𑀣’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀪𑀺𑀦𑀻𑀳𑀸𑀭𑀓𑁆𑀔𑀫𑀦𑁆𑀢𑀺 𑀅𑀢𑁆𑀣𑁄 𑀧𑀓𑀧𑁆𑀧𑀺𑀢𑁄.

𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀏𑀯𑀁 𑀆𑀦𑁂𑀜𑁆𑀚𑀧𑁆𑀧𑀢𑁆𑀢𑁂𑀢𑀺 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸 𑀤𑀼𑀢𑀺𑀬𑀯𑀺𑀓𑀧𑁆𑀧𑁂, 𑀦𑀻𑀯𑀭𑀡𑀤𑀽𑀭𑀻𑀪𑀸𑀯𑁂𑀦 𑀯𑀺𑀢𑀓𑁆𑀓𑀸𑀤𑀺𑀲𑀫𑀢𑀺𑀓𑁆𑀓𑀫𑁂𑀦𑀸𑀢𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀁 𑀓𑀺𑀘𑁆𑀘𑀲𑀗𑁆𑀕𑀡𑁆𑀳𑀦𑀢𑁄. 𑀅𑀬𑀁 𑀬𑁄𑀚𑀦𑀸 𑀧𑀞𑀫𑀯𑀺𑀓𑀧𑁆𑀧𑁂 𑀦 𑀲𑀫𑁆𑀪𑀯𑀢𑀺 ‘‘𑀧𑀭𑀺𑀲𑀼𑀤𑁆𑀥𑁂𑀢𑀺𑀆𑀤𑀻𑀲𑀼 𑀧𑀦𑀸’’𑀢𑀺 𑀯𑀘𑀦𑁂𑀦 ‘‘𑀏𑀯’’𑀦𑁆𑀢𑀺 𑀧𑀤𑀲𑁆𑀲 𑀅𑀦𑀼𑀧𑁆𑀧𑀩𑀦𑁆𑀥𑀦𑀺𑀯𑀸𑀭𑀡𑀢𑁄. 𑀢𑁂𑀦𑁂𑀯 ‘‘𑀉𑀧𑁂𑀓𑁆𑀔𑀸𑀲𑀢𑀺𑀧𑀸𑀭𑀺𑀲𑀼𑀤𑁆𑀥𑀺𑀪𑀸𑀯𑁂𑀦 𑀧𑀭𑀺𑀲𑀼𑀤𑁆𑀥𑁂’’𑀢𑀺𑀆𑀤𑀺𑀫𑀸𑀳. 𑀇𑀘𑁆𑀙𑀸𑀯𑀘𑀭𑀸𑀦𑀦𑁆𑀢𑀺 ‘‘𑀅𑀳𑁄 𑀯𑀢𑀸𑀳𑀁 𑀆𑀧𑀢𑁆𑀢𑀺𑀜𑁆𑀘𑁂𑀯 𑀆𑀧𑀦𑁆𑀦𑁄 𑀅𑀲𑁆𑀲𑀁, 𑀦 𑀘 𑀫𑀁 𑀪𑀺𑀓𑁆𑀔𑀽 𑀚𑀸𑀦𑁂𑀬𑁆𑀬𑀼’’𑀦𑁆𑀢𑀺𑀆𑀤𑀺𑀦𑀸 (𑀫. 𑀦𑀺. 𑁧.𑁬𑁦) 𑀦𑀬𑁂𑀦 𑀉𑀧𑁆𑀧𑀦𑁆𑀦𑀇𑀘𑁆𑀙𑀸𑀯𑀲𑁂𑀦 𑀧𑀯𑀢𑁆𑀢𑀸𑀦𑀁 𑀓𑁄𑀧𑀅𑀧𑀘𑁆𑀘𑀬𑀸𑀦𑀁 𑀅𑀪𑀸𑀯𑁂𑀦 𑀅𑀦𑀗𑁆𑀕𑀡𑁂𑀢𑀺 𑀅𑀢𑁆𑀣𑁄. 𑀏𑀢𑁆𑀣 𑀘 𑀧𑀦 𑀬𑀣𑀸𑀯𑀼𑀢𑁆𑀢𑀧𑁆𑀧𑀓𑀸𑀭𑀸 𑀇𑀘𑁆𑀙𑀸𑀧𑀺 𑀧𑀞𑀫𑀚𑁆𑀛𑀸𑀦𑀸𑀤𑀻𑀦𑀁 𑀅𑀥𑀺𑀕𑀫𑀸𑀬 𑀅𑀦𑁆𑀢𑀭𑀸𑀬𑀺𑀓𑀸 ‘‘𑀲𑀫𑁆𑀧𑀚𑀸𑀦𑀫𑀼𑀲𑀸𑀯𑀸𑀤𑁄 𑀔𑁄 𑀧𑀦𑀸𑀬𑀲𑁆𑀫𑀦𑁆𑀢𑁄 𑀅𑀦𑁆𑀢𑀭𑀸𑀬𑀺𑀓𑁄 𑀥𑀫𑁆𑀫𑁄’’𑀢𑀺 (𑀫𑀳𑀸𑀯. 𑁧𑁩𑁪) 𑀯𑀼𑀢𑁆𑀢𑀢𑁆𑀢𑀸, 𑀧𑀕𑁂𑀯 𑀇𑀘𑁆𑀙𑀸𑀯𑀘𑀭𑀸 𑀓𑁄𑀧𑀅𑀧𑀘𑁆𑀘𑀬𑀸, 𑀢𑀲𑁆𑀫𑀸 𑀯𑀼𑀢𑁆𑀢𑀁 ‘‘𑀛𑀸𑀦𑀧𑀝𑀺𑀮𑀸𑀪𑀧𑀘𑁆𑀘𑀦𑀻𑀓𑀸𑀦𑀁 𑀧𑀸𑀧𑀓𑀸𑀦𑀁 𑀇𑀘𑁆𑀙𑀸𑀯𑀘𑀭𑀸𑀦’’𑀦𑁆𑀢𑀺𑀆𑀤𑀺. 𑀓𑀢𑁆𑀣𑀘𑀺 𑀧𑀦 ‘‘𑀛𑀸𑀦𑀧𑀝𑀺𑀮𑀸𑀪𑀧𑀘𑁆𑀘𑀬𑀸𑀦𑀁 𑀇𑀘𑁆𑀙𑀸𑀯𑀘𑀭𑀸𑀦’’𑀦𑁆𑀢𑀺 𑀧𑁄𑀢𑁆𑀣𑀓𑁂𑀲𑀼 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀲𑁄 𑀧𑀫𑀸𑀤𑀮𑁂𑀔𑁄, 𑀕𑀡𑁆𑀞𑀺𑀧𑀤𑁂 𑀘 ‘‘𑀅𑀳𑁄 𑀯𑀢 𑀲𑀢𑁆𑀣𑀸 𑀫𑀫𑀜𑁆𑀜𑁂𑀯 𑀧𑀝𑀺𑀧𑀼𑀘𑁆𑀙𑀺𑀢𑁆𑀯𑀸 𑀥𑀫𑁆𑀫𑀁 𑀤𑁂𑀲𑁂𑀬𑁆𑀬𑀸’’𑀢𑀺 𑀬𑁄 𑀢𑀤𑀢𑁆𑀣𑁄 𑀮𑀺𑀔𑀺𑀢𑁄, 𑀲𑁄 𑀤𑀼𑀮𑁆𑀮𑀺𑀔𑀺𑀢𑁄. 𑀦 𑀳𑀺 𑀛𑀸𑀦𑀧𑀝𑀺𑀮𑀸𑀪𑀧𑀘𑁆𑀘𑀬𑀸 𑀓𑁄𑀧𑀸𑀤𑀬𑁄 𑀅𑀦𑀗𑁆𑀕𑀡𑀲𑀼𑀢𑁆𑀢𑁂 (𑀫. 𑀦𑀺. 𑁧.𑁫𑁭 𑀆𑀤𑀬𑁄) 𑀯𑀼𑀢𑁆𑀢𑀸, ‘‘𑀦 𑀘 𑀬𑀼𑀢𑁆𑀢𑀺𑀢𑁄 𑀲𑀫𑁆𑀪𑀯𑀦𑁆𑀢𑀺 𑀛𑀸𑀦𑀮𑀸𑀪𑀺𑀦𑁄 𑀢𑀤𑀪𑀸𑀯𑀸’’𑀢𑀺 𑀆𑀘𑀭𑀺𑀬𑁄 𑀯𑀤𑀢𑀺, 𑀢𑀁 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀏𑀢𑁆𑀣 𑀯𑀺𑀚𑁆𑀚𑀢𑁆𑀢𑀬𑀲𑁆𑀲 𑀉𑀢𑁆𑀢𑀭𑀼𑀢𑁆𑀢𑀭𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂’’𑀢𑀺𑀆𑀤𑀺𑀦𑀸 𑀧𑀼𑀦𑀧𑁆𑀧𑀼𑀦𑀁 𑀅𑀝𑁆𑀞𑀗𑁆𑀕𑀦𑀺𑀤𑀲𑁆𑀲𑀦𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀉𑀢𑁆𑀢𑀭𑀼𑀢𑁆𑀢𑀭𑀯𑀺𑀲𑁂𑀲𑀸 𑀘𑁂𑀪𑀸𑀲𑀁 𑀅𑀢𑁆𑀢𑀤𑀼𑀓𑁆𑀔𑀧𑀭𑀤𑀼𑀓𑁆𑀔𑀤𑀲𑁆𑀲𑀦𑀢𑀤𑀼𑀧𑀲𑀫𑀢𑁆𑀢𑀤𑀻𑀧𑀦𑀢𑁄 𑀯𑁂𑀤𑀺𑀢𑀩𑁆𑀩𑀸. 𑀪𑀕𑀯𑀸 𑀳𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑁂𑀦 𑀅𑀢𑁆𑀢𑀦𑁄 𑀅𑀦𑀦𑁆𑀢𑀲𑀁𑀲𑀸𑀭𑀤𑀼𑀓𑁆𑀔𑀁 𑀧𑀲𑁆𑀲𑀺𑀢𑁆𑀯𑀸, 𑀘𑀼𑀢𑀽𑀧𑀧𑀸𑀢𑀜𑀸𑀡𑁂𑀦 𑀧𑀭𑀲𑁆𑀲 𑀘 𑀮𑁄𑀓𑀲𑁆𑀲 𑀆𑀲𑀯𑀓𑁆𑀔𑀬𑀜𑀸𑀡𑁂𑀦 𑀢𑀤𑀼𑀪𑀬𑀯𑀽𑀧𑀲𑀫𑀢𑁆𑀢𑀜𑁆𑀘 𑀧𑀲𑁆𑀲𑀺𑀢𑁆𑀯𑀸 𑀢𑀁 𑀤𑁂𑀲𑁂𑀢𑀺, 𑀧𑀞𑀫𑁂𑀦 𑀯𑀸 𑀅𑀢𑁆𑀢𑀤𑀼𑀓𑁆𑀔𑀤𑀲𑁆𑀲𑀦𑀢𑁄 𑀅𑀢𑁆𑀢𑀲𑀺𑀦𑁂𑀳𑀧𑀭𑀺𑀘𑁆𑀘𑀸𑀕𑀁 𑀤𑀻𑀧𑁂𑀢𑀺. 𑀤𑀼𑀢𑀺𑀬𑁂𑀦 𑀧𑀭𑀤𑀼𑀓𑁆𑀔𑀤𑀲𑁆𑀲𑀦𑀢𑁄 𑀧𑀭𑁂𑀲𑀼 𑀓𑁄𑀧𑀧𑀭𑀺𑀘𑁆𑀘𑀸𑀕𑀁, 𑀢𑀢𑀺𑀬𑁂𑀦 𑀅𑀭𑀺𑀬𑀫𑀕𑁆𑀕𑀤𑀲𑁆𑀲𑀦𑀢𑁄 𑀫𑁄𑀳𑀧𑀭𑀺𑀘𑁆𑀘𑀸𑀕𑀜𑁆𑀘 𑀤𑀻𑀧𑁂𑀢𑀺. 𑀏𑀯𑀁 𑀦𑀸𑀦𑀸𑀕𑀼𑀡𑀯𑀺𑀲𑁂𑀲𑀤𑀻𑀧𑀦𑀢𑁄 𑀇𑀫𑀲𑁆𑀲𑁂𑀯 𑀮𑁄𑀓𑀺𑀬𑀸𑀪𑀺𑀜𑁆𑀜𑀸𑀤𑁆𑀯𑀬𑀲𑁆𑀲 𑀇𑀥 𑀕𑀳𑀡𑀁 𑀓𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀬𑀲𑁆𑀫𑀸 𑀅𑀢𑀻𑀢𑀚𑀸𑀢𑀺 𑀏𑀯 𑀦𑀺𑀯𑀸𑀲𑁄, 𑀢𑀲𑁆𑀫𑀸 ‘‘𑀅𑀢𑀻𑀢𑀚𑀸𑀢𑀻𑀲𑀽’’𑀢𑀺 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀘𑁂? 𑀦, 𑀚𑀸𑀢𑀺𑀬𑀸 𑀏𑀓𑀤𑁂𑀲𑁂𑀧𑀺 𑀦𑀺𑀯𑀸𑀲𑀯𑁄𑀳𑀸𑀭𑀲𑀺𑀤𑁆𑀥𑀺𑀤𑀲𑁆𑀲𑀦𑀢𑁄. 𑀧𑀸𑀴𑀺𑀬𑀁 𑀓𑀺𑀜𑁆𑀘𑀸𑀧𑀺 ‘‘𑀏𑀓𑀫𑁆𑀧𑀺 𑀚𑀸𑀢𑀺𑀁 𑀤𑁆𑀯𑁂𑀧𑀺 𑀚𑀸𑀢𑀺𑀬𑁄’’𑀢𑀺𑀆𑀤𑀺𑀯𑀘𑀦𑁂𑀦 𑀲𑀓𑀮𑀚𑀸𑀢𑀺𑀬𑀸 𑀅𑀦𑀼𑀲𑁆𑀲𑀭𑀡𑀫𑁂𑀯 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺 𑀯𑀺𑀬 𑀤𑀺𑀲𑁆𑀲𑀢𑀺, 𑀦 𑀏𑀯𑀁 𑀤𑀝𑁆𑀞𑀩𑁆𑀩𑀁. 𑀢𑀤𑁂𑀓𑀤𑁂𑀲𑀸𑀦𑀼𑀲𑁆𑀲𑀭𑀡𑀫𑁆𑀧𑀺 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺 𑀏𑀯𑀸𑀢𑀺 𑀤𑀲𑁆𑀲𑀦𑀢𑁆𑀣𑀁, 𑀪𑀼𑀫𑁆𑀫𑀯𑀘𑀦𑀁 𑀓𑀢𑀁 𑀑𑀓𑀸𑀲𑀸𑀤𑀺𑀲𑀗𑁆𑀕𑀳𑀢𑁆𑀣𑀜𑁆𑀘. ‘‘𑀙𑀺𑀦𑁆𑀦𑀯𑀝𑀼𑀫𑀓𑀸𑀦𑀼𑀲𑁆𑀲𑀭𑀡𑀸𑀤𑀻𑀲𑀽’’𑀢𑀺 𑀆𑀤𑀺-𑀲𑀤𑁆𑀤𑁂𑀦 𑀅𑀦𑀺𑀯𑀼𑀢𑁆𑀣𑀮𑁄𑀓𑀥𑀸𑀢𑀼𑀤𑀻𑀧𑀭𑀝𑁆𑀞𑀦𑀕𑀭𑀕𑀸𑀫𑀸𑀤𑀺𑀕𑁆𑀕𑀳𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀢𑁂𑀲𑀁 𑀙𑀺𑀦𑁆𑀦𑀯𑀝𑀼𑀫𑀓𑀸𑀦𑀁 𑀮𑁄𑀓𑀼𑀢𑁆𑀢𑀭𑀲𑀻𑀮𑀸𑀤𑀻𑀦𑀺 𑀦 𑀪𑀕𑀯𑀢𑀸 𑀩𑁄𑀥𑀺𑀲𑀢𑁆𑀢𑀓𑀸𑀮𑁂 𑀯𑀺𑀜𑁆𑀜𑀸𑀢𑀸𑀦𑀻’’𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀣𑀸𑀧𑀢𑁆𑀢𑀺𑀢𑁄 𑀮𑁄𑀓𑀺𑀬𑀸𑀦𑀺 𑀯𑀺𑀜𑁆𑀜𑀸𑀢𑀸𑀦𑀻𑀢𑀺 𑀆𑀧𑀚𑁆𑀚𑀢𑀺, 𑀢𑀁 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀸𑀥𑀺𑀓𑀸𑀭𑁂 ‘‘𑀅𑀭𑀺𑀬𑀸𑀦𑀁 𑀉𑀧𑀯𑀸𑀤𑀓𑀸’’𑀢𑀺 𑀯𑀘𑀦𑁂𑀦 𑀲𑀫𑁂𑀦𑁆𑀢𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀦 𑀳𑀺 𑀅𑀭𑀺𑀬𑁂 𑀅𑀧𑀲𑁆𑀲𑀦𑁆𑀢𑀲𑁆𑀲 𑀏𑀯𑀁 𑀳𑁄𑀢𑀺. 𑀓𑀺𑀫𑀢𑁆𑀣𑀁 𑀧𑀦𑁂𑀢𑁆𑀣 𑀅𑀦𑀼𑀲𑁆𑀲𑀢𑀺 𑀯𑀼𑀢𑁆𑀢𑀸, 𑀦𑀦𑀼 𑀏𑀲 𑀯𑀺𑀚𑁆𑀚𑀸𑀥𑀺𑀓𑀸𑀭𑁄𑀢𑀺 𑀘𑁂? 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀲𑀢𑀺𑀯𑀲𑁂𑀦 𑀦𑀺𑀩𑁆𑀩𑀢𑁆𑀢𑀺𑀢𑁄, 𑀅𑀢𑀻𑀢𑀥𑀫𑁆𑀫𑀸𑀦𑀁 𑀲𑀢𑀺𑀬𑀸 𑀯𑀺𑀲𑁂𑀲𑀸𑀥𑀺𑀓𑀸𑀭𑀢𑁆𑀢𑀸 𑀘. 𑀯𑀼𑀢𑁆𑀢𑀜𑁆𑀳𑀺 ‘‘𑀅𑀦𑀼𑀲𑁆𑀲𑀭𑀸𑀫𑀻’’𑀢𑀺.

‘‘𑀯𑀢𑁆𑀢𑀫𑀸𑀦𑁂𑀲𑀼 𑀯𑀺𑀚𑁆𑀚𑀸𑀦-𑀫𑀢𑀻𑀢𑁂𑀲𑁆𑀯𑀲𑁆𑀲 𑀲𑀭𑀢𑀺;

𑀅𑀦𑀸𑀕𑀢𑁂𑀲𑀼 𑀥𑀫𑁆𑀫𑁂𑀲𑀼, 𑀲𑀭𑀢𑀺 𑀯𑀺𑀚𑁆𑀚𑀸𑀦 𑀧𑀡𑀺𑀥𑀻’’𑀢𑀺.

𑀆𑀘𑀭𑀺𑀬𑀓𑀼𑀫𑀸𑀭𑀺𑀢𑁂𑀦 𑀲𑀺𑀮𑁄𑀓𑁄𑀧𑀺 𑀯𑀼𑀢𑁆𑀢𑁄.

𑀢𑀢𑁆𑀣 𑀭𑀸𑀕𑁂 𑀉𑀲𑁆𑀲𑀦𑁆𑀦𑀢𑀭𑁂 𑀢𑁂𑀚𑁄𑀲𑀁𑀯𑀝𑁆𑀝𑁄. 𑀤𑁄𑀲𑁂 𑀆𑀧𑁄𑀲𑀁𑀯𑀝𑁆𑀝𑁄. 𑀫𑁄𑀳𑁂 𑀯𑀸𑀬𑁄𑀲𑀁𑀯𑀝𑁆𑀝𑁄. 𑀓𑁂𑀘𑀺 ‘‘𑀤𑁄𑀲𑁂 𑀢𑁂𑀚𑁄𑀲𑀁𑀯𑀝𑁆𑀝𑁄, 𑀭𑀸𑀕𑁂 𑀆𑀧𑁄𑀲𑀁𑀯𑀝𑁆𑀝𑁄, 𑀫𑁄𑀳𑁂 𑀯𑀸𑀬𑁄𑀲𑀁𑀯𑀝𑁆𑀝𑁄’’𑀢𑀺 𑀯𑀤𑀦𑁆𑀢𑀺. 𑀬𑀲𑁆𑀫𑀸 𑀅𑀫𑀼𑀢𑁆𑀭𑀸𑀢𑀺 𑀘𑀺𑀢𑁆𑀢𑀁, 𑀯𑀘𑀦𑀁 𑀯𑀸 𑀪𑀯𑀸𑀤𑀺𑀦𑀺𑀬𑀫𑁂𑀦 𑀳𑁄𑀢𑀺, 𑀢𑀲𑁆𑀫𑀸 ‘‘𑀪𑀯𑁂 𑀯𑀸’’𑀢𑀺𑀆𑀤𑀺. 𑀏𑀯𑀁𑀦𑀸𑀫𑁄 𑀏𑀯𑀁𑀕𑁄𑀢𑁆𑀢𑁄𑀢𑀺 𑀧𑀤𑀤𑁆𑀯𑀬𑁂𑀦 𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀫𑀽𑀮𑀓𑀁 𑀧𑀜𑁆𑀜𑀢𑁆𑀢𑀺𑀲𑀗𑁆𑀔𑀸𑀢𑀁 𑀕𑁄𑀘𑀭𑀦𑀺𑀯𑀸𑀲𑀁 𑀤𑀻𑀧𑁂𑀢𑀺. 𑀧𑀯𑀢𑁆𑀢𑀨𑀮𑀪𑁄𑀚𑀦𑁄 𑀲𑀬𑀁𑀧𑀢𑀺𑀢𑀨𑀮𑀸𑀳𑀸𑀭𑁄. 𑀘𑀢𑀼𑀭𑀸𑀲𑀻𑀢𑀺𑀓𑀧𑁆𑀧𑀲𑀳𑀲𑁆𑀲𑀧𑀭𑀫𑀸𑀬𑀼𑀧𑀭𑀺𑀬𑀦𑁆𑀢𑁄 𑀯𑀸𑀢𑀺 𑀧𑀡𑀺𑀥𑀸𑀦𑀢𑁄 𑀧𑀼𑀩𑁆𑀩𑁂. 𑀧𑀝𑀺𑀦𑀺𑀯𑀢𑁆𑀢𑀦𑁆𑀢𑀲𑁆𑀲 𑀧𑀘𑁆𑀘𑀯𑁂𑀓𑁆𑀔𑀡𑀁 𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀁 𑀦 𑀳𑁄𑀢𑀺. ‘‘𑀧𑀼𑀩𑁆𑀩𑁂𑀦𑀺𑀯𑀸𑀲𑀸𑀦𑀼𑀲𑁆𑀲𑀢𑀺𑀜𑀸𑀡𑀮𑀸𑀪𑀻𑀦𑀁 𑀧𑀦𑁂𑀢𑀁 𑀆𑀦𑀼𑀪𑀸𑀯𑀧𑀭𑀺𑀤𑀻𑀧𑀦’’𑀦𑁆𑀢𑀺 𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀅𑀫𑀼𑀢𑁆𑀭𑀸𑀢𑀺 𑀏𑀢𑁆𑀣 𑀧𑀞𑀫𑀬𑁄𑀚𑀦𑀸𑀬𑀁 𑀲𑀻𑀳𑁄𑀓𑁆𑀓𑀦𑁆𑀢𑀯𑀲𑁂𑀦 𑀅𑀦𑀼𑀲𑁆𑀲𑀭𑀡𑀁 𑀯𑀼𑀢𑁆𑀢𑀁, 𑀢𑀜𑁆𑀘 𑀔𑁄 𑀅𑀦𑀼𑀮𑁄𑀫𑀯𑀲𑁂𑀦. ‘‘𑀧𑀝𑀺𑀮𑁄𑀫𑀯𑀲𑁂𑀦𑀸’’𑀢𑀺𑀧𑀺 𑀮𑀺𑀔𑀦𑁆𑀢𑀺, 𑀢𑀁 𑀤𑀼𑀯𑀺𑀜𑁆𑀜𑁂𑀬𑁆𑀬𑀁. 𑀲𑀻𑀳𑁄𑀓𑁆𑀓𑀦𑁆𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀅𑀦𑁂𑀓𑀸𑀲𑀼 𑀓𑀧𑁆𑀧𑀓𑁄𑀝𑀻𑀲𑀽’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀬𑀣𑀸 𑀢𑀦𑁆𑀢𑀺 𑀦𑀺𑀤𑀲𑁆𑀲𑀦𑁂𑀦 𑀧𑀝𑀺𑀧𑀢𑁆𑀢𑀺𑀲𑀸𑀥𑀸𑀭𑀡𑁂𑀦 𑀨𑀮𑀲𑀸𑀥𑀸𑀭𑀡𑀢𑀁 𑀤𑀲𑁆𑀲𑁂𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀆𑀤𑀭𑀁 𑀚𑀦𑁂𑀢𑀺, 𑀅𑀢𑁆𑀢𑀸𑀦𑀫𑁂𑀯𑁂𑀓𑀁 𑀉𑀓𑁆𑀓𑀁𑀲𑁂𑀢𑀻𑀢𑀺 𑀯𑀘𑀦𑀁 𑀦𑀺𑀯𑀸𑀭𑁂𑀢𑀺. ‘‘𑀲𑀸𑀥𑀼 𑀔𑁄 𑀧𑀦 𑀢𑀣𑀸𑀭𑀽𑀧𑀸𑀦𑀁 𑀅𑀭𑀳𑀢𑀁 𑀤𑀲𑁆𑀲𑀦𑀁 𑀳𑁄𑀢𑀻’’𑀢𑀺 𑀢𑀲𑁆𑀲 𑀧𑀼𑀩𑁆𑀩𑁂 𑀉𑀧𑁆𑀧𑀦𑁆𑀦𑀘𑀺𑀢𑁆𑀢𑁂 𑀏𑀯 𑀦𑀺𑀬𑁄𑀚𑁂𑀢𑀺. 𑀧𑀞𑀫𑀸 𑀅𑀪𑀺𑀦𑀺𑀩𑁆𑀪𑀺𑀤𑀸𑀢𑀺 𑀯𑀘𑀦𑁂𑀦 𑀅𑀯𑀺𑀚𑁆𑀚𑀡𑁆𑀟𑀓𑁄𑀲𑀲𑁆𑀲 𑀩𑀳𑀼𑀧𑀝𑀮𑀪𑀸𑀯𑀁 𑀤𑀲𑁆𑀲𑁂𑀢𑀺, 𑀢𑁂𑀦 𑀅𑀝𑁆𑀞𑀕𑀼𑀡𑀺𑀲𑁆𑀲𑀭𑀺𑀬𑀸𑀤𑀺𑀦𑀸 𑀅𑀦𑀪𑀺𑀦𑀺𑀩𑁆𑀪𑀺𑀤𑀁 𑀤𑀻𑀧𑁂𑀢𑀺.

𑀧𑀼𑀩𑁆𑀩𑁂𑀦𑀺𑀯𑀸𑀲𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁧𑁩. ‘‘𑀘𑀼𑀢𑀽𑀧𑀧𑀸𑀢𑀜𑀸𑀡𑀸𑀬𑀸’’𑀢𑀺 𑀨𑀮𑀽𑀧𑀘𑀸𑀭𑁂𑀦 𑀯𑀼𑀢𑁆𑀢𑀁. 𑀇𑀤𑀜𑁆𑀳𑀺 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀁 𑀭𑀽𑀧𑀸𑀭𑀫𑁆𑀫𑀡𑀢𑁆𑀢𑀸 𑀧𑀭𑀺𑀢𑁆𑀢𑀧𑀘𑁆𑀘𑀼𑀧𑁆𑀧𑀦𑁆𑀦𑀅𑀚𑁆𑀛𑀢𑁆𑀢𑀩𑀳𑀺𑀤𑁆𑀥𑀸𑀭𑀫𑁆𑀫𑀡𑀁 𑀳𑁄𑀢𑀺. 𑀦 𑀘𑀼𑀢𑀺𑀁 𑀯𑀸 𑀧𑀝𑀺𑀲𑀦𑁆𑀥𑀺𑀁 𑀯𑀸 𑀆𑀭𑀫𑁆𑀫𑀡𑀁 𑀓𑀭𑁄𑀢𑀺. 𑀢𑀲𑁆𑀫𑀸 ‘‘𑀬𑀣𑀸𑀓𑀫𑁆𑀫𑀽𑀧𑀕𑁂 𑀲𑀢𑁆𑀢𑁂 𑀧𑀚𑀸𑀦𑀸𑀫𑀻’’𑀢𑀺 (𑀧𑀸𑀭𑀸. 𑁧𑁩) 𑀯𑀘𑀦𑀁 𑀯𑀺𑀬 𑀨𑀮𑀽𑀧𑀘𑀸𑀭𑁂𑀦𑁂𑀯 𑀯𑀼𑀢𑁆𑀢𑀫𑀺𑀤𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀤𑀺𑀩𑁆𑀩𑀯𑀺𑀳𑀸𑀭𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 𑀓𑀸𑀭𑀡𑁄𑀧𑀘𑀸𑀭𑁂𑀦 𑀤𑀺𑀩𑁆𑀩𑀁. 𑀇𑀫𑀺𑀦𑀸 𑀧𑀦 𑀓𑁂𑀘𑀺 𑀆𑀘𑀭𑀺𑀬𑀸 ‘‘𑀓𑀼𑀲𑀮𑀸𑀓𑀼𑀲𑀮𑀸 𑀘𑀓𑁆𑀔𑀽 𑀤𑀺𑀩𑁆𑀩𑀘𑀓𑁆𑀔𑀼 𑀓𑀸𑀫𑀸𑀯𑀘𑀭’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑁂 𑀧𑀝𑀺𑀲𑁂𑀥𑀺𑀢𑀸 𑀳𑁄𑀦𑁆𑀢𑀺. 𑀘𑀢𑀼𑀢𑁆𑀣𑀚𑁆𑀛𑀸𑀦𑀧𑀜𑁆𑀜𑀸 𑀳𑀺 𑀏𑀢𑁆𑀣 𑀅𑀥𑀺𑀧𑁆𑀧𑁂𑀢𑀸. 𑀫𑀳𑀸𑀚𑀼𑀢𑀺𑀓𑀢𑁆𑀢𑀸 𑀫𑀳𑀸𑀕𑀢𑀺𑀓𑀢𑁆𑀢𑀸𑀢𑀺 𑀏𑀢𑁂𑀲𑀼 ‘‘𑀲𑀤𑁆𑀤𑀲𑀢𑁆𑀣𑀸𑀦𑀼𑀲𑀸𑀭𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀏𑀓𑀸𑀤𑀲𑀦𑁆𑀦𑀁 𑀉𑀧𑀓𑁆𑀓𑀺𑀮𑁂𑀲𑀸𑀦𑀁 𑀏𑀯𑀁 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑁄 𑀉𑀧𑀓𑁆𑀓𑀺𑀮𑁂𑀲𑀪𑀸𑀯𑁄 𑀘 𑀯𑁂𑀤𑀺𑀢𑀩𑁆𑀩𑁄, 𑀫𑀳𑀸𑀲𑀢𑁆𑀢𑀲𑁆𑀲 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀦𑀸𑀦𑀸𑀯𑀺𑀥𑀸𑀦𑀺 𑀭𑀽𑀧𑀸𑀦𑀺 𑀤𑀺𑀲𑁆𑀯𑀸 ‘‘𑀇𑀤𑀁 𑀦𑀼 𑀔𑁄 𑀓𑀺’’𑀦𑁆𑀢𑀺 𑀯𑀺𑀘𑀺𑀓𑀺𑀘𑁆𑀙𑀸 𑀉𑀤𑀧𑀸𑀤𑀺, 𑀲𑁄 𑀉𑀧𑀓𑁆𑀓𑀺𑀮𑁂𑀲𑁄 𑀉𑀧𑀓𑁆𑀓𑀺𑀮𑁂𑀲𑀲𑀼𑀢𑁆𑀢𑁂 (𑀫. 𑀦𑀺. 𑁩.𑁨𑁩𑁬 𑀆𑀤𑀬𑁄) ‘‘𑀯𑀺𑀘𑀺𑀓𑀺𑀘𑁆𑀙𑀸𑀥𑀺𑀓𑀭𑀡𑀜𑁆𑀘 𑀧𑀦 𑀫𑁂 𑀲𑀫𑀸𑀥𑀺𑀫𑁆𑀳𑀺 𑀘𑀯𑀺, 𑀲𑀫𑀸𑀥𑀺𑀫𑁆𑀳𑀺 𑀘𑀼𑀢𑁂 𑀑𑀪𑀸𑀲𑁄 𑀅𑀦𑁆𑀢𑀭𑀥𑀸𑀬𑀢𑀺 𑀤𑀲𑁆𑀲𑀦𑀜𑁆𑀘 𑀭𑀽𑀧𑀸𑀦’’𑀦𑁆𑀢𑀺 𑀯𑀘𑀦𑀢𑁄. 𑀢𑀢𑁄 ‘‘𑀭𑀽𑀧𑀸𑀦𑀺 𑀫𑁂 𑀧𑀲𑁆𑀲𑀢𑁄 𑀯𑀺𑀘𑀺𑀓𑀺𑀘𑁆𑀙𑀸 𑀉𑀧𑁆𑀧𑀚𑁆𑀚𑀢𑀺, 𑀇𑀤𑀸𑀦𑀺 𑀦 𑀓𑀺𑀜𑁆𑀘𑀺 𑀫𑀦𑀲𑀺 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀘𑀺𑀦𑁆𑀢𑀬𑀢𑁄 𑀅𑀫𑀦𑀲𑀺𑀓𑀸𑀭𑁄, 𑀢𑀢𑁄 𑀓𑀺𑀜𑁆𑀘𑀺 𑀅𑀫𑀦𑀲𑀺𑀓𑀭𑁄𑀦𑁆𑀢𑀲𑁆𑀲 𑀣𑀺𑀦𑀫𑀺𑀤𑁆𑀥𑀁 𑀉𑀤𑀧𑀸𑀤𑀺, 𑀢𑀢𑁄 𑀢𑀲𑁆𑀲 𑀧𑀳𑀸𑀦𑀢𑁆𑀣𑀁 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀭𑀽𑀧𑀸𑀦𑀺 𑀧𑀲𑁆𑀲𑀢𑁄 𑀳𑀺𑀫𑀯𑀦𑁆𑀢𑀸𑀤𑀻𑀲𑀼 𑀤𑀸𑀦𑀯𑀭𑀓𑁆𑀔𑀲𑀸𑀤𑀬𑁄 𑀧𑀲𑁆𑀲𑀦𑁆𑀢𑀲𑁆𑀲 𑀙𑀫𑁆𑀪𑀺𑀢𑀢𑁆𑀢𑀁 𑀉𑀤𑀧𑀸𑀤𑀺, 𑀢𑀢𑁄 𑀢𑀲𑁆𑀲 𑀧𑀳𑀸𑀦𑀢𑁆𑀣𑀁 ‘‘𑀫𑀬𑀸 𑀤𑀺𑀝𑁆𑀞𑀪𑀬𑀁 𑀧𑀓𑀢𑀺𑀬𑀸 𑀑𑀮𑁄𑀓𑀺𑀬𑀫𑀸𑀦𑀁 𑀦𑀢𑁆𑀣𑀺, 𑀅𑀤𑀺𑀝𑁆𑀞𑁂 𑀓𑀺𑀁 𑀦𑀸𑀫 𑀪𑀬’’𑀦𑁆𑀢𑀺 𑀘𑀺𑀦𑁆𑀢𑀬𑀢𑁄 𑀉𑀧𑁆𑀧𑀺𑀮𑀸𑀯𑀺𑀢𑀢𑁆𑀢𑀁 𑀉𑀤𑀧𑀸𑀤𑀺. 𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀉𑀧𑁆𑀧𑀺𑀮𑀁 𑀤𑀺𑀩𑁆𑀩𑀭𑀽𑀧𑀤𑀲𑁆𑀲𑁂𑀦𑁂𑀦𑀸’’𑀢𑀺 𑀯𑀼𑀢𑁆𑀢𑀁, ‘‘𑀢𑀁 𑀤𑀼𑀯𑀼𑀢𑁆𑀢𑀁 𑀧𑀭𑀢𑁄 𑀅𑀪𑀺𑀚𑀧𑁆𑀧𑀸𑀯𑀘𑀦𑁂𑀦 𑀢𑀤𑀢𑁆𑀣𑀲𑀺𑀤𑁆𑀥𑀺𑀢𑁄’’𑀢𑀺 𑀆𑀘𑀭𑀺𑀬𑁄 𑀯𑀤𑀢𑀺. 𑀢𑀢𑁄 𑀙𑀫𑁆𑀪𑀺𑀢𑀢𑁆𑀢𑀧𑁆𑀧𑀳𑀸𑀦𑀢𑁆𑀣𑀁 ‘‘𑀫𑀬𑀸 𑀯𑀻𑀭𑀺𑀬𑀁 𑀤𑀴𑁆𑀳𑀁 𑀧𑀕𑁆𑀕𑀳𑀺𑀢𑀁, 𑀢𑁂𑀦 𑀫𑁂 𑀇𑀤𑀁 𑀉𑀧𑁆𑀧𑀺𑀮𑀁 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀯𑀻𑀭𑀺𑀬𑀁 𑀲𑀺𑀣𑀺𑀮𑀁 𑀓𑀭𑁄𑀦𑁆𑀢𑀲𑁆𑀲 𑀓𑀸𑀬𑀤𑀼𑀝𑁆𑀞𑀼𑀮𑁆𑀮𑀁 𑀓𑀸𑀬𑀤𑀭𑀣𑁄 𑀓𑀸𑀬𑀸𑀮𑀲𑀺𑀬𑀁 𑀉𑀤𑀧𑀸𑀤𑀺, 𑀢𑀢𑁄 𑀢𑀁 𑀘𑀚𑀦𑁆𑀢𑀲𑁆𑀲 𑀅𑀘𑁆𑀘𑀸𑀭𑀤𑁆𑀥𑀯𑀻𑀭𑀺𑀬𑀁 𑀉𑀤𑀧𑀸𑀤𑀺, 𑀢𑀢𑁆𑀣 𑀤𑁄𑀲𑀁 𑀧𑀲𑁆𑀲𑀢𑁄 𑀅𑀢𑀺𑀮𑀻𑀦𑀯𑀻𑀭𑀺𑀬𑀁 𑀉𑀧𑀤𑀸𑀤𑀺, 𑀢𑀢𑁄 𑀢𑀁 𑀧𑀳𑀸𑀬 𑀲𑀫𑀧𑁆𑀧𑀯𑀢𑁆𑀢𑁂𑀦 𑀯𑀻𑀭𑀺𑀬𑁂𑀦 𑀙𑀫𑁆𑀪𑀺𑀢𑀢𑁆𑀢𑀪𑀬𑀸 𑀳𑀺𑀫𑀯𑀦𑁆𑀢𑀸𑀤𑀺𑀝𑁆𑀞𑀸𑀦𑀁 𑀧𑀳𑀸𑀬 𑀤𑁂𑀯𑀮𑁄𑀓𑀸𑀪𑀺𑀫𑀼𑀔𑀁 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀤𑁂𑀯𑀲𑀗𑁆𑀖𑀁 𑀧𑀲𑁆𑀲𑀢𑁄 𑀢𑀡𑁆𑀳𑀸𑀲𑀗𑁆𑀔𑀸𑀢𑀸 𑀅𑀪𑀺𑀚𑀧𑁆𑀧𑀸 𑀉𑀤𑀧𑀸𑀤𑀺, 𑀢𑀢𑁄 ‘‘𑀫𑀬𑁆𑀳𑀁 𑀏𑀓𑀚𑀸𑀢𑀺𑀓𑀭𑀽𑀧𑀁 𑀫𑀦𑀲𑀺 𑀓𑀭𑁄𑀦𑁆𑀢𑀲𑁆𑀲 𑀅𑀪𑀺𑀚𑀧𑁆𑀧𑀸 𑀉𑀧𑁆𑀧𑀦𑁆𑀦𑀸, 𑀢𑀲𑁆𑀫𑀸 𑀤𑀸𑀦𑀺 𑀦𑀸𑀦𑀸𑀯𑀺𑀥𑀁 𑀭𑀽𑀧𑀁 𑀫𑀦𑀲𑀺 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀓𑀸𑀮𑁂𑀦 𑀤𑁂𑀯𑀮𑁄𑀓𑀸𑀪𑀺𑀫𑀼𑀔𑀁, 𑀓𑀸𑀮𑁂𑀦 𑀫𑀦𑀼𑀲𑁆𑀲𑀮𑁄𑀓𑀸𑀪𑀺𑀫𑀼𑀔𑀁 𑀆𑀮𑁄𑀓𑀁 𑀯𑀟𑁆𑀠𑁂𑀢𑁆𑀯𑀸 𑀦𑀸𑀦𑀸𑀯𑀺𑀥𑀸𑀦𑀺 𑀭𑀽𑀧𑀸𑀦𑀺 𑀫𑀦𑀲𑀺 𑀓𑀭𑁄𑀢𑁄 𑀦𑀸𑀦𑀢𑁆𑀢𑀲𑀜𑁆𑀜𑀸 𑀉𑀤𑀧𑀸𑀤𑀺, 𑀢𑀢𑁄 ‘‘𑀦𑀸𑀦𑀸𑀯𑀺𑀥𑀭𑀽𑀧𑀸𑀦𑀺 𑀫𑁂 𑀫𑀦𑀲𑀺 𑀓𑀭𑁄𑀦𑁆𑀢𑀲𑁆𑀲 𑀦𑀸𑀦𑀢𑁆𑀢𑀲𑀜𑁆𑀜𑀸 𑀉𑀤𑀧𑀸𑀤𑀺, 𑀢𑀲𑁆𑀫𑀸 𑀤𑀸𑀦𑀺 𑀅𑀪𑀺𑀚𑀧𑁆𑀧𑀸𑀤𑀺𑀪𑀬𑀸 𑀇𑀝𑁆𑀞𑀸𑀤𑀺𑀦𑀺𑀫𑀺𑀢𑁆𑀢𑀕𑁆𑀕𑀸𑀳𑀁 𑀧𑀳𑀸𑀬 𑀏𑀓𑀚𑀸𑀢𑀺𑀓𑀫𑁂𑀯 𑀭𑀽𑀧𑀁 𑀫𑀦𑀲𑀺 𑀓𑀭𑀺𑀲𑁆𑀲𑀸𑀫𑀻’’𑀢𑀺 𑀢𑀣𑀸 𑀓𑀭𑁄𑀢𑁄 𑀅𑀪𑀺𑀦𑀺𑀚𑁆𑀛𑀸𑀬𑀺𑀢𑀢𑁆𑀢𑀁 𑀭𑀽𑀧𑀸𑀦𑀁 𑀉𑀤𑀧𑀸𑀤𑀺 𑀏𑀯𑀁 𑀧𑀳𑀻𑀦𑀉𑀧𑀓𑁆𑀓𑀺𑀮𑁂𑀲𑀲𑁆𑀲𑀸𑀧𑀺 𑀅𑀦𑀥𑀺𑀝𑁆𑀞𑀺𑀢𑀢𑁆𑀢𑀸. 𑀑𑀪𑀸𑀲𑀜𑁆𑀳𑀺 𑀔𑁄 𑀚𑀸𑀦𑀸𑀫𑀺, 𑀦 𑀘 𑀭𑀽𑀧𑀸𑀦𑀺 𑀧𑀲𑁆𑀲𑀸𑀫𑀻𑀢𑀺𑀆𑀤𑀺 𑀚𑀸𑀢𑀁.

𑀢𑀲𑁆𑀲𑀢𑁆𑀣𑁄 𑁋 𑀬𑀤𑀸 𑀧𑀭𑀺𑀓𑀫𑁆𑀫𑁄𑀪𑀸𑀲𑀫𑁂𑀯 𑀫𑀦𑀲𑀺 𑀓𑀭𑁄𑀫𑀺, 𑀢𑀤𑀸 𑀑𑀪𑀸𑀲𑀁 𑀲𑀜𑁆𑀚𑀸𑀦𑀸𑀫𑀺, 𑀤𑀺𑀩𑁆𑀩𑁂𑀦 𑀘𑀓𑁆𑀔𑀼𑀦𑀸 𑀭𑀽𑀧𑀸𑀦𑀺 𑀦 𑀘 𑀧𑀲𑁆𑀲𑀸𑀫𑀺, 𑀭𑀽𑀧𑀤𑀲𑁆𑀲𑀦𑀓𑀸𑀮𑁂 𑀘 𑀑𑀪𑀸𑀲𑀁 𑀦 𑀚𑀸𑀦𑀸𑀫𑀻𑀢𑀺. 𑀓𑀺𑀫𑀢𑁆𑀣𑀫𑀺𑀤𑀁 𑀯𑀼𑀢𑁆𑀢𑀁, 𑀦 𑀳𑀺 𑀏𑀢𑀁 𑀉𑀧𑀓𑁆𑀓𑀺𑀲𑁂𑀲𑀕𑀢𑀦𑁆𑀢𑀺? 𑀦 𑀓𑁂𑀯𑀮𑀁 𑀉𑀧𑀓𑁆𑀓𑀺𑀮𑁂𑀲𑀧𑁆𑀧𑀚𑀳𑀦𑀫𑁂𑀯𑁂𑀢𑁆𑀣 𑀓𑀢𑁆𑀢𑀩𑁆𑀩𑀁, 𑀬𑁂𑀦 𑀇𑀤𑀁 𑀯𑀺𑀲𑀼𑀤𑁆𑀥𑀁 𑀳𑁄𑀢𑀺, 𑀅𑀜𑁆𑀜𑀫𑁆𑀧𑀺 𑀢𑀤𑀼𑀢𑁆𑀢𑀭𑀺 𑀓𑀢𑁆𑀢𑀩𑁆𑀩𑀁 𑀅𑀢𑁆𑀣𑀻𑀢𑀺 𑀤𑀲𑁆𑀲𑀦𑀢𑁆𑀣𑀁. 𑀯𑀺𑀘𑀺𑀓𑀺𑀘𑁆𑀙𑀸 𑀘𑀺𑀢𑁆𑀢𑀲𑁆𑀲 𑀉𑀧𑀓𑁆𑀓𑀺𑀮𑁂𑀲𑁄𑀢𑀺𑀆𑀤𑀻𑀲𑀼 ‘‘𑀇𑀫𑁂 𑀥𑀫𑁆𑀫𑀸 𑀉𑀧𑀓𑁆𑀓𑀺𑀮𑁂𑀲𑀸𑀢𑀺 𑀆𑀤𑀻𑀦𑀯𑀤𑀲𑁆𑀲𑀦𑁂𑀦 𑀧𑀚𑀳𑀺𑀁, 𑀦 𑀫𑀬𑁆𑀳𑀁 𑀢𑀤𑀸 𑀉𑀧𑁆𑀧𑀦𑁆𑀦𑀢𑁆𑀢𑀸’’𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺. 𑀫𑀸𑀦𑀼𑀲𑀓𑀁 𑀯𑀸𑀢𑀺 𑀇𑀫𑀺𑀦𑀸 𑀲𑀪𑀸𑀯𑀸𑀢𑀺𑀓𑁆𑀓𑀫𑀁 𑀤𑀲𑁆𑀲𑁂𑀢𑀺. 𑀫𑀁𑀲𑀘𑀓𑁆𑀔𑀼𑀦𑀸 𑀯𑀺𑀬𑀸𑀢𑀺 𑀇𑀫𑀺𑀦𑀸 𑀧𑀭𑀺𑀬𑀢𑁆𑀢𑀺𑀕𑁆𑀕𑀳𑀡𑀁, 𑀯𑀡𑁆𑀡𑀫𑀢𑁆𑀢𑀸𑀭𑀫𑁆𑀫𑀡𑀢𑀜𑁆𑀘 𑀉𑀧𑀫𑁂𑀢𑀺. 𑀯𑀡𑁆𑀡𑀫𑀢𑁆𑀢𑁂 𑀳𑁂𑀢𑁆𑀣 𑀲𑀢𑁆𑀢-𑀲𑀤𑁆𑀤𑁄, 𑀦 ‘‘𑀲𑀩𑁆𑀩𑁂 𑀲𑀢𑁆𑀢𑀸 𑀆𑀳𑀸𑀭𑀝𑁆𑀞𑀺𑀢𑀺𑀓𑀸’’𑀢𑀺 (𑀅. 𑀦𑀺. 𑁧𑁦.𑁨𑁭) 𑀏𑀢𑁆𑀣 𑀯𑀺𑀬 𑀲𑀩𑁆𑀩𑀲𑀗𑁆𑀔𑀢𑁂𑀲𑀼, 𑀳𑀻𑀦𑀚𑀸𑀢𑀺𑀆𑀤𑀬𑁄 𑀫𑁄𑀳𑀲𑁆𑀲 𑀦𑀺𑀲𑁆𑀲𑀦𑁆𑀤𑁄 𑀯𑀺𑀧𑀸𑀓𑁄. 𑀓𑀸𑀬𑀤𑀼𑀘𑁆𑀘𑀭𑀺𑀢𑁂𑀦 𑀲𑀫𑀦𑁆𑀦𑀸𑀕𑀢𑀸 𑀧𑀼𑀩𑁆𑀩𑁂 𑀅𑀢𑀻𑀢𑀪𑀯𑁂 𑀅𑀳𑁂𑀲𑀼𑀁, 𑀲𑀫𑁆𑀧𑀢𑀺 𑀦𑀺𑀭𑀬𑀁 𑀉𑀧𑀧𑀦𑁆𑀦𑀸𑀢𑀺 𑀏𑀯𑀁 𑀧𑀸𑀞𑀲𑁂𑀲𑁂𑀦 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. ‘‘𑀬𑀣𑀸𑀓𑀫𑁆𑀫𑀽𑀧𑀕𑀜𑀸𑀡𑀜𑁆𑀳𑀺 𑀏𑀓𑀦𑁆𑀢𑀫𑀢𑀻𑀢𑀸𑀭𑀫𑁆𑀫𑀡𑀁, 𑀤𑀺𑀩𑁆𑀩𑀘𑀓𑁆𑀔𑀼 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀭𑀫𑁆𑀫𑀡’’𑀦𑁆𑀢𑀺 𑀉𑀪𑀺𑀦𑁆𑀦𑀁 𑀓𑀺𑀘𑁆𑀘𑀯𑀲𑁂𑀦 𑀯𑀼𑀢𑁆𑀢𑀁. 𑀫𑀳𑀮𑁆𑀮𑀓𑁄𑀢𑀺 𑀲𑀫𑀡𑀸𑀦𑀁 𑀲𑀸𑀭𑀼𑀧𑁆𑀧𑀫𑀲𑀸𑀭𑀼𑀧𑁆𑀧𑀁, 𑀮𑁄𑀓𑀸𑀘𑀸𑀭𑀁 𑀯𑀸 𑀦 𑀚𑀸𑀦𑀸𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀢𑁆𑀢𑀸 𑀕𑀼𑀡𑀧𑀭𑀺𑀥𑀁𑀲𑀦𑁂𑀦 𑀕𑀭𑀳𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀦𑀺𑀬𑀢𑁄 𑀲𑀫𑁆𑀩𑁄𑀥𑀺𑀧𑀭𑀸𑀬𑀦𑁄’’𑀢𑀺 (𑀲𑀁. 𑀦𑀺. 𑁨.𑁪𑁧; 𑁫.𑁯𑁯𑁮, 𑁧𑁦𑁦𑁪) 𑀯𑀼𑀢𑁆𑀢𑁄 𑀅𑀭𑀺𑀬𑀧𑀼𑀕𑁆𑀕𑀮𑁄 𑀫𑀕𑁆𑀕𑀸𑀯𑀭𑀡𑀁 𑀓𑀸𑀢𑀼𑀁 𑀲𑀫𑀢𑁆𑀣𑀁 𑀨𑀭𑀼𑀲𑀯𑀘𑀦𑀁 𑀬𑀤𑀺 𑀓𑀣𑁂𑀬𑁆𑀬, 𑀅𑀧𑀸𑀬𑀕𑀫𑀦𑀻𑀬𑀫𑁆𑀧𑀺 𑀓𑀭𑁂𑀬𑁆𑀬, 𑀢𑁂𑀦 𑀲𑁄 𑀅𑀧𑀸𑀬𑀼𑀧𑀕𑁄𑀧𑀺 𑀪𑀯𑁂𑀬𑁆𑀬, 𑀢𑀲𑁆𑀫𑀸 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀏𑀓𑁂. ‘‘𑀯𑀸𑀬𑀸𑀫𑀁 𑀫𑀸 𑀅𑀓𑀸𑀲𑀻𑀢𑀺 𑀣𑁂𑀭𑁂𑀦 𑀯𑀼𑀢𑁆𑀢𑀢𑁆𑀢𑀸 𑀫𑀕𑁆𑀕𑀸𑀯𑀭𑀡𑀁 𑀓𑀭𑁄𑀢𑀻’’𑀢𑀺 𑀯𑀤𑀦𑁆𑀢𑀺. 𑀧𑀼𑀩𑁆𑀩𑁂𑀯 𑀲𑁄𑀢𑀸𑀧𑀦𑁆𑀦𑁂𑀦 𑀅𑀧𑀸𑀬𑀤𑁆𑀯𑀸𑀭𑁄 𑀧𑀺𑀳𑀺𑀢𑁄, 𑀢𑀲𑁆𑀫𑀸𑀲𑁆𑀲 𑀲𑀕𑁆𑀕𑀸𑀯𑀭𑀡𑀁 𑀦𑀢𑁆𑀣𑀺. ‘‘𑀧𑀸𑀓𑀢𑀺𑀓𑀦𑁆𑀢𑀺 𑀧𑀯𑀢𑁆𑀢𑀺𑀯𑀺𑀧𑀸𑀓𑀁 𑀅𑀳𑁄𑀲𑀻’’𑀢𑀺 𑀯𑀤𑀦𑁆𑀢𑀺. ‘‘𑀯𑀼𑀤𑁆𑀥𑀺 𑀳𑁂𑀲𑀸, 𑀪𑀺𑀓𑁆𑀔𑀯𑁂, 𑀅𑀭𑀺𑀬𑀲𑁆𑀲 𑀯𑀺𑀦𑀬𑁂, 𑀬𑁄 𑀅𑀘𑁆𑀘𑀬𑀁 𑀅𑀘𑁆𑀘𑀬𑀢𑁄 𑀤𑀺𑀲𑁆𑀯𑀸 𑀬𑀣𑀸𑀥𑀫𑁆𑀫𑀁 𑀧𑀝𑀺𑀓𑀭𑁄𑀢𑀻’’𑀢𑀺 (𑀫. 𑀦𑀺. 𑁩.𑁩𑁭𑁦; 𑀤𑀻. 𑀦𑀺. 𑁧.𑁨𑁫𑁧) 𑀯𑀘𑀦𑀢𑁄 𑀧𑀸𑀓𑀢𑀺𑀓𑀁 𑀅𑀳𑁄𑀲𑀻𑀢𑀺 𑀏𑀓𑁂. 𑀲𑀘𑁂 𑀲𑁄 𑀦 𑀔𑀫𑀢𑀻𑀢𑀺 𑀲𑁄𑀢𑀸𑀧𑀦𑁆𑀦𑀸𑀤𑀻𑀦𑀁 𑀔𑀦𑁆𑀢𑀺𑀕𑀼𑀡𑀲𑁆𑀲 𑀫𑀦𑁆𑀤𑀢𑀸𑀬 𑀯𑀸 𑀆𑀬𑀢𑀺𑀁 𑀢𑀲𑁆𑀲 𑀲𑀼𑀝𑁆𑀞𑀼 𑀲𑀁𑀯𑀭𑀢𑁆𑀣𑀸𑀬 𑀯𑀸 𑀅𑀓𑁆𑀔𑀫𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀼𑀔𑀸𑀦𑀁 𑀯𑀸 𑀆𑀬𑀲𑁆𑀲 𑀆𑀭𑀫𑁆𑀫𑀡𑀸𑀤𑀺𑀦𑁄 𑀅𑀪𑀸𑀯𑀸 𑀓𑀸𑀮𑀓𑀜𑁆𑀘𑀺𑀓𑀸 𑀅𑀲𑀼𑀭𑀸 𑀳𑁄𑀦𑁆𑀢𑀺. ‘‘𑀇𑀢𑁄 𑀪𑁄 𑀲𑀼𑀕𑀢𑀺𑀁 𑀕𑀘𑁆𑀙𑀸’’𑀢𑀺 (𑀇𑀢𑀺𑀯𑀼. 𑁮𑁩) 𑀯𑀘𑀦𑀢𑁄 𑀫𑀦𑀼𑀲𑁆𑀲𑀕𑀢𑀺𑀧𑀺. 𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀯𑀺𑀚𑁆𑀚𑀸𑀢𑀺 𑀤𑀺𑀩𑁆𑀩𑀘𑀓𑁆𑀔𑀼𑀫𑁂𑀯 𑀤𑀲𑁆𑀲𑀦𑀝𑁆𑀞𑁂𑀦 𑀜𑀸𑀡𑀁, 𑀢𑀲𑁆𑀲 𑀢𑀲𑁆𑀲 𑀅𑀢𑁆𑀣𑀲𑁆𑀲 𑀯𑀺𑀦𑁆𑀤𑀦𑀝𑁆𑀞𑁂𑀦 𑀯𑀺𑀚𑁆𑀚𑀸𑀢𑀺 𑀅𑀢𑁆𑀣𑁄.

𑀤𑀺𑀩𑁆𑀩𑀘𑀓𑁆𑀔𑀼𑀜𑀸𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀆𑀲𑀯𑀓𑁆𑀔𑀬𑀜𑀸𑀡𑀓𑀣𑀸𑀯𑀡𑁆𑀡𑀦𑀸

𑁧𑁪. 𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂𑀢𑀺 𑀓𑀺𑀁 𑀧𑀼𑀭𑀺𑀫𑀲𑁆𑀫𑀺𑀁𑀬𑁂𑀯, 𑀉𑀤𑀸𑀳𑀼 𑀅𑀜𑁆𑀜𑀲𑁆𑀫𑀺𑀁𑀬𑁂𑀯 𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑀺𑀢𑁆𑀢𑁂. 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 𑀬𑀢𑁄 𑀯𑀼𑀝𑁆𑀞𑀸𑀬 𑀧𑀼𑀭𑀺𑀫𑀯𑀺𑀚𑁆𑀚𑀸𑀤𑁆𑀯𑀬𑀁 𑀅𑀥𑀺𑀕𑀢𑀁, 𑀢𑀤𑁂𑀯 𑀧𑀼𑀦 𑀲𑀫𑀸𑀧𑀚𑁆𑀚𑀦𑀯𑀲𑁂𑀦 𑀅𑀪𑀺𑀦𑀯𑀁 𑀅𑀪𑀺𑀡𑁆𑀳𑀁 𑀓𑀢𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀲𑁄 𑀏𑀯𑀁 𑀲𑀫𑀸𑀳𑀺𑀢𑁂 𑀘𑀺𑀢𑁆𑀢𑁂𑀢𑀺 𑀇𑀥 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑀺𑀢𑁆𑀢𑀁 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣𑀸𑀳 𑁋 𑀬𑀤𑀺 𑀢𑀤𑁂𑀯 𑀧𑀼𑀦 𑀲𑀫𑀸𑀧𑀚𑁆𑀚𑀦𑀯𑀲𑁂𑀦 𑀅𑀪𑀺𑀦𑀯𑀁 𑀓𑀢𑀁, 𑀅𑀣 𑀓𑀲𑁆𑀫𑀸 𑀧𑀼𑀩𑁆𑀩𑁂 𑀯𑀺𑀬 ‘‘𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀁 𑀅𑀪𑀺𑀜𑁆𑀜𑀸𑀧𑀸𑀤𑀓𑀁 𑀦𑀺𑀭𑁄𑀥𑀧𑀸𑀤𑀓𑀁 𑀲𑀩𑁆𑀩𑀓𑀺𑀘𑁆𑀘𑀲𑀸𑀥𑀓𑀁 𑀲𑀩𑁆𑀩𑀮𑁄𑀓𑀺𑀬𑀮𑁄𑀓𑀼𑀢𑁆𑀢𑀭𑀕𑀼𑀡𑀤𑀸𑀬𑀓𑀁 𑀇𑀥 𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑀺𑀢𑁆𑀢𑀁 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀅𑀯𑀢𑁆𑀯𑀸 ‘‘𑀇𑀥 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀁 𑀘𑀢𑀼𑀢𑁆𑀣𑀚𑁆𑀛𑀸𑀦𑀘𑀺𑀢𑁆𑀢𑀁 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁, 𑀦𑀦𑀼 𑀇𑀥 𑀢𑀣𑀸𑀯𑀘𑀦𑀝𑁆𑀞𑀸𑀦𑀫𑁂𑀯 𑀢𑀁 𑀅𑀭𑀳𑀢𑁆𑀢𑀫𑀕𑁆𑀕𑁂𑀦 𑀲𑀤𑁆𑀥𑀺𑀁 𑀲𑀩𑁆𑀩𑀕𑀼𑀡𑀦𑀺𑀧𑁆𑀨𑀸𑀤𑀦𑀢𑁄, 𑀦 𑀧𑀞𑀫𑀯𑀺𑀚𑁆𑀚𑀸𑀤𑁆𑀯𑀬𑀫𑀢𑁆𑀢𑀦𑀺𑀧𑁆𑀨𑀸𑀤𑀦𑀢𑁄𑀢𑀺? 𑀯𑀼𑀘𑁆𑀘𑀢𑁂 𑁋 𑀅𑀭𑀺𑀬𑀫𑀕𑁆𑀕𑀲𑁆𑀲 𑀩𑁄𑀚𑁆𑀛𑀗𑁆𑀕𑀫𑀕𑁆𑀕𑀗𑁆𑀕𑀛𑀸𑀦𑀗𑁆𑀕𑀧𑀝𑀺𑀧𑀤𑀸𑀯𑀺𑀫𑁄𑀓𑁆𑀔𑀯𑀺𑀲𑁂𑀲𑀦𑀺𑀬𑀫𑁄 𑀧𑀼𑀩𑁆𑀩𑀪𑀸𑀕𑀯𑀼𑀝𑁆𑀞𑀸𑀦𑀕𑀸𑀫𑀺𑀦𑀻𑀯𑀺𑀧𑀲𑁆𑀲𑀦𑀸𑀬 𑀲𑀗𑁆𑀔𑀸𑀭𑀼𑀧𑁂𑀓𑁆𑀔𑀸𑀲𑀗𑁆𑀔𑀸𑀢𑀸𑀬 𑀦𑀺𑀬𑀫𑁂𑀦 𑀅𑀳𑁄𑀲𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀺𑀧𑀲𑁆𑀲𑀦𑀸𑀧𑀸𑀤𑀓𑀫𑀺𑀥 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸, 𑀦 𑀢𑀤𑀸𑀭𑀫𑁆𑀫𑀡𑀫𑀢𑁆𑀢𑁂𑀦. 𑀧𑀭𑀺𑀬𑀸𑀬𑀢𑁄𑀢𑀺 𑀅𑀜𑁆𑀜𑁂𑀦𑀧𑀺 𑀧𑀓𑀸𑀭𑁂𑀦. ‘‘𑀇𑀫𑁂 𑀆𑀲𑀯𑀸’’𑀢𑀺 𑀅𑀬𑀁 𑀯𑀸𑀭𑁄 𑀓𑀺𑀫𑀢𑁆𑀣𑀁 𑀆𑀭𑀤𑁆𑀥𑁄? ‘‘𑀆𑀲𑀯𑀸𑀦𑀁 𑀔𑀬𑀜𑀸𑀡𑀸𑀬𑀸’’𑀢𑀺 𑀅𑀥𑀺𑀓𑀸𑀭𑀸𑀦𑀼𑀮𑁄𑀫𑀦𑀢𑁆𑀣𑀁. 𑀫𑀕𑁆𑀕𑀓𑁆𑀔𑀡𑁂 𑀳𑀺 𑀘𑀺𑀢𑁆𑀢𑀁 𑀯𑀺𑀫𑀼𑀘𑁆𑀘𑀢𑀺, 𑀨𑀮𑀓𑁆𑀔𑀡𑁂 𑀯𑀺𑀫𑀼𑀢𑁆𑀢𑀁 𑀳𑁄𑀢𑀻𑀢𑀺 𑀇𑀤𑀁 𑀏𑀓𑀢𑁆𑀢𑀦𑀬𑁂𑀦 𑀯𑀼𑀢𑁆𑀢𑀁. 𑀬𑀜𑁆𑀳𑀺 𑀯𑀺𑀫𑀼𑀘𑁆𑀘𑀫𑀸𑀦𑀁, 𑀢𑀤𑁂𑀯 𑀅𑀧𑀭𑀪𑀸𑀕𑁂 𑀯𑀺𑀫𑀼𑀢𑁆𑀢𑀁 𑀦𑀸𑀫 𑀳𑁄𑀢𑀺. 𑀬𑀜𑁆𑀘 𑀯𑀺𑀫𑀼𑀢𑁆𑀢𑀁, 𑀢𑀤𑁂𑀯 𑀧𑀼𑀩𑁆𑀩𑀪𑀸𑀕𑁂 𑀯𑀺𑀫𑀼𑀘𑁆𑀘𑀫𑀸𑀦𑀁 𑀦𑀸𑀫 𑀳𑁄𑀢𑀺. 𑀪𑀼𑀜𑁆𑀚𑀫𑀸𑀦𑁄 𑀏𑀯 𑀳𑀺 𑀪𑁄𑀚𑀦𑀧𑀭𑀺𑀬𑁄𑀲𑀸𑀦𑁂 𑀪𑀼𑀢𑁆𑀢𑀸𑀯𑀻 𑀦𑀸𑀫. ‘‘𑀇𑀫𑀺𑀦𑀸 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀁 𑀤𑀲𑁆𑀲𑁂𑀢𑀻’’𑀢𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀲𑁆𑀲 𑀘 𑀧𑀝𑁆𑀞𑀸𑀦𑁂 ‘‘𑀫𑀕𑁆𑀕𑀸 𑀯𑀼𑀝𑁆𑀞𑀳𑀺𑀢𑁆𑀯𑀸 𑀫𑀕𑁆𑀕𑀁 𑀧𑀘𑁆𑀘𑀯𑁂𑀓𑁆𑀔𑀢𑀺, 𑀨𑀮𑀁, 𑀦𑀺𑀩𑁆𑀩𑀸𑀦𑀁, 𑀧𑀳𑀻𑀦𑁂 𑀓𑀺𑀮𑁂𑀲𑁂 𑀧𑀘𑁆𑀘𑀯𑁂𑀓𑁆𑀔𑀢𑀻’’𑀢𑀺 𑀅𑀬𑀫𑀼𑀧𑁆𑀧𑀢𑁆𑀢𑀺𑀓𑁆𑀓𑀫𑁄 𑀯𑀼𑀢𑁆𑀢𑁄. 𑀧𑀯𑀢𑁆𑀢𑀺𑀓𑁆𑀓𑀫𑁄 𑀧𑀦𑁂𑀢𑁆𑀣 𑀲𑀭𑀽𑀧𑀢𑁄 𑀅𑀢𑁆𑀣𑀢𑁄𑀢𑀺 𑀤𑁆𑀯𑀺𑀥𑀸 𑀯𑀼𑀢𑁆𑀢𑁄. 𑀢𑀢𑁆𑀣 ‘‘𑀯𑀺𑀫𑀼𑀢𑁆𑀢𑀫𑀺𑀢𑀺 𑀜𑀸𑀡𑀁 𑀅𑀳𑁄𑀲𑀻’’𑀢𑀺 𑀲𑀭𑀽𑀧𑀢𑁄 𑀘𑀢𑀼𑀩𑁆𑀩𑀺𑀥𑀲𑁆𑀲𑀧𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀲𑁆𑀲 𑀧𑀯𑀢𑁆𑀢𑀺𑀓𑁆𑀓𑀫𑀦𑀺𑀤𑀲𑁆𑀲𑀦𑀁. ‘‘𑀔𑀻𑀡𑀸 𑀚𑀸𑀢𑀻’’𑀢𑀺𑀆𑀤𑀺 𑀅𑀢𑁆𑀣𑀢𑁄. 𑀢𑁂𑀦𑁂𑀯 𑀅𑀦𑁆𑀢𑁂 ‘‘𑀅𑀩𑁆𑀪𑀜𑁆𑀜𑀸𑀲𑀺’’𑀦𑁆𑀢𑀺 𑀧𑀼𑀕𑁆𑀕𑀮𑀸𑀥𑀺𑀝𑁆𑀞𑀸𑀦𑀁 𑀤𑁂𑀲𑀦𑀁 𑀅𑀓𑀸𑀲𑀺 𑀧𑀘𑁆𑀘𑀯𑁂𑀓𑁆𑀔𑀡𑀜𑀸𑀡𑀲𑁆𑀲 𑀢𑀣𑀸 𑀅𑀧𑁆𑀧𑀯𑀢𑁆𑀢𑀺𑀢𑁄. 𑀅𑀧𑁆𑀧𑀝𑀺𑀲𑀦𑁆𑀥𑀺𑀓𑀁 𑀳𑁄𑀢𑀻𑀢𑀺 𑀚𑀸𑀦𑀦𑁆𑀢𑁄 ‘‘𑀔𑀻𑀡𑀸 𑀚𑀸𑀢𑀻’’𑀢𑀺 𑀚𑀸𑀦𑀸𑀢𑀺 𑀦𑀸𑀫. ‘‘𑀤𑀺𑀩𑁆𑀩𑀘𑀓𑁆𑀔𑀼𑀦𑀸 𑀧𑀘𑁆𑀘𑀼𑀧𑁆𑀧𑀦𑁆𑀦𑀸𑀦𑀸𑀕𑀢𑀁𑀲𑀜𑀸𑀡’’𑀦𑁆𑀢𑀺 𑀅𑀦𑀸𑀕𑀢𑀁𑀲𑀜𑀸𑀡𑀲𑁆𑀲 𑀘 𑀤𑀺𑀩𑁆𑀩𑀘𑀓𑁆𑀔𑀼𑀲𑀦𑁆𑀦𑀺𑀲𑁆𑀲𑀺𑀢𑀢𑁆𑀢𑀸 𑀯𑀼𑀢𑁆𑀢𑀁.

𑀆𑀲𑀯𑀓𑁆𑀔𑀬𑀜𑀸𑀡𑀓𑀣𑀸𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀉𑀧𑀸𑀲𑀓𑀢𑁆𑀢𑀧𑀝𑀺𑀯𑁂𑀤𑀦𑀸𑀓𑀣𑀸𑀯𑀡𑁆𑀡𑀦𑀸

𑁧𑁫. 𑀓𑀡𑁆𑀡𑀲𑀼𑀔𑀢𑁄 𑀳𑀤𑀬𑀗𑁆𑀕𑀫𑀢𑁄𑀢𑀺 𑀯𑀘𑀦𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀦𑀢𑁆𑀢𑀼𑀓𑁆𑀓𑀁𑀲𑀦𑀢𑁄𑀢𑀺𑀆𑀤𑀺 𑀧𑀼𑀕𑁆𑀕𑀮𑀯𑀲𑁂𑀦, 𑀓𑀡𑁆𑀡𑀲𑀼𑀔𑀢𑁄𑀢𑀺 𑀲𑁄𑀢𑀺𑀦𑁆𑀤𑁆𑀭𑀺𑀬𑀁 𑀲𑀦𑁆𑀥𑀸𑀬. 𑀆𑀧𑀸𑀣𑀸𑀭𑀫𑀡𑀻𑀬𑀢𑁄𑀢𑀺 𑀜𑀸𑀡𑀸𑀧𑀸𑀣𑀸𑀭𑀫𑀡𑀻𑀬𑀢𑁄. 𑀲𑀬𑀫𑁂𑀯 𑀳𑁂𑀝𑁆𑀞𑀸𑀫𑀼𑀔𑀚𑀸𑀢𑀁 𑀯𑀸, 𑀫𑀕𑁆𑀕𑁄 𑀧𑀦 𑀅𑀲𑁄𑀓𑁄 𑀳𑁄𑀢𑀺. 𑀢𑀤𑀸 𑀳𑀺 𑀲𑁄𑀓𑁄 𑀧𑀳𑀻𑀬𑀫𑀸𑀦𑁄. 𑀘𑀭𑀺𑀬𑀸𑀤𑀺𑀅𑀦𑀼𑀓𑀽𑀮𑀢𑁄 𑀅𑀧𑁆𑀧𑀝𑀺𑀓𑀽𑀮𑀁. ‘‘𑀫𑀥𑀼𑀭𑀫𑀺𑀫’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀥𑀫𑁆𑀫𑀫𑀺𑀫’’𑀦𑁆𑀢𑀺 𑀯𑀘𑀦𑀁 𑀅𑀥𑀺𑀓𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀢𑀲𑁆𑀫𑀸 ‘‘𑀭𑀸𑀕𑀯𑀺𑀭𑀸𑀕𑀫𑀺𑀫’’𑀦𑁆𑀢𑀺 𑀏𑀯𑀁 𑀯𑀺𑀲𑀼𑀁 𑀯𑀺𑀲𑀼𑀁 𑀬𑁄𑀚𑁂𑀢𑁆𑀯𑀸 𑀧𑀼𑀦 𑀧𑀺𑀡𑁆𑀟𑁂𑀢𑁆𑀯𑀸 𑀥𑀫𑁆𑀫𑀫𑀺𑀫𑀁 𑀉𑀧𑁂𑀳𑀻𑀢𑀺 𑀬𑁄𑀚𑁂𑀢𑀩𑁆𑀩𑀁, ‘‘𑀥𑀫𑁆𑀫𑀫𑁂𑀯 𑀲𑀭𑀡𑀢𑁆𑀣𑀫𑀼𑀧𑁂𑀳𑀻’’𑀢𑀺 𑀧𑀞𑀦𑁆𑀢𑀺 𑀓𑀺𑀭𑀸𑀢𑀺 𑀤𑀻𑀧𑁂𑀢𑀺. 𑀲𑀭𑀡𑀕𑀢𑀸𑀦𑀁 𑀢𑁂𑀦𑁂𑀯 𑀲𑀭𑀡𑀕𑀫𑀦𑁂𑀦 𑀪𑀬𑀁 𑀲𑀦𑁆𑀢𑀸𑀲𑀁 𑀤𑀼𑀕𑁆𑀕𑀢𑀺𑀁 𑀧𑀭𑀺𑀓𑁆𑀓𑀺𑀮𑁂𑀲𑀁 𑀤𑀼𑀓𑁆𑀔𑀁 𑀳𑀺𑀁𑀲𑀢𑀻𑀢𑀺 𑀭𑀢𑀦𑀢𑁆𑀢𑀬𑀁 𑀲𑀭𑀡𑀁 𑀦𑀸𑀫. 𑀢𑀧𑁆𑀧𑀲𑀸𑀤𑀢𑀕𑁆𑀕𑀭𑀼𑀢𑀸𑀤𑀻𑀳𑀺 𑀯𑀺𑀳𑀢𑀓𑀺𑀮𑁂𑀲𑁄 𑀢𑀧𑁆𑀧𑀭𑀸𑀬𑀦𑀢𑀸𑀓𑀸𑀭𑀧𑁆𑀧𑀯𑀢𑁆𑀢𑁄 𑀘𑀺𑀢𑁆𑀢𑀼𑀧𑁆𑀧𑀸𑀤𑁄 𑀲𑀭𑀡𑀕𑀫𑀦𑀁. 𑀢𑀁𑀲𑀫𑀗𑁆𑀕𑀻𑀲𑀢𑁆𑀢𑁄 𑀲𑀭𑀡𑀁 𑀕𑀘𑁆𑀙𑀢𑀺. 𑀧𑀪𑁂𑀤𑁂𑀦 𑀧𑀦 𑀤𑀼𑀯𑀺𑀥𑀁 𑀲𑀭𑀡𑀕𑀫𑀦𑀁 𑀮𑁄𑀓𑀼𑀢𑁆𑀢𑀭𑀁 𑀮𑁄𑀓𑀺𑀬𑀦𑁆𑀢𑀺. 𑀢𑀢𑁆𑀣 𑀮𑁄𑀓𑀼𑀢𑁆𑀢𑀭𑀁 𑀤𑀺𑀝𑁆𑀞𑀲𑀘𑁆𑀘𑀸𑀦𑀁 𑀫𑀕𑁆𑀕𑀓𑁆𑀔𑀡𑁂 𑀲𑀭𑀡𑀕𑀫𑀦𑀼𑀧𑀓𑁆𑀓𑀺𑀮𑁂𑀲𑀲𑀫𑀼𑀘𑁆𑀙𑁂𑀤𑁂𑀦 𑀦𑀺𑀩𑁆𑀩𑀸𑀦𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸 𑀓𑀺𑀘𑁆𑀘𑀢𑁄 𑀲𑀓𑀮𑁂𑀧𑀺 𑀭𑀢𑀦𑀢𑁆𑀢𑀬𑁂 𑀇𑀚𑁆𑀛𑀢𑀺. 𑀮𑁄𑀓𑀺𑀬𑀁 𑀧𑀼𑀣𑀼𑀚𑁆𑀚𑀦𑀸𑀦𑀁 𑀲𑀭𑀡𑀕𑀫𑀦𑀼𑀧𑀓𑁆𑀓𑀺𑀮𑁂𑀲𑀁 𑀢𑀤𑀗𑁆𑀕𑀯𑀺𑀓𑁆𑀔𑀫𑁆𑀪𑀦𑁂𑀦 𑀆𑀭𑀫𑁆𑀫𑀡𑀢𑁄 𑀩𑀼𑀤𑁆𑀥𑀸𑀤𑀺𑀕𑀼𑀡𑀸𑀭𑀫𑁆𑀫𑀡𑀁 𑀳𑀼𑀢𑁆𑀯𑀸 𑀇𑀚𑁆𑀛𑀢𑀺. 𑀢𑀁 𑀅𑀢𑁆𑀣𑀢𑁄 𑀭𑀢𑀦𑀢𑁆𑀢𑀬𑁂 𑀲𑀤𑁆𑀥𑀸𑀧𑀝𑀺𑀮𑀸𑀪𑁄 𑀲𑀤𑁆𑀥𑀸𑀫𑀽𑀮𑀺𑀓𑀸 𑀘 𑀲𑀫𑁆𑀫𑀸𑀤𑀺𑀝𑁆𑀞𑀺. 𑀮𑁄𑀓𑀼𑀢𑁆𑀢𑀭𑀲𑁆𑀲 𑀘𑀢𑁆𑀢𑀸𑀭𑀺 𑀲𑀸𑀫𑀜𑁆𑀜𑀨𑀮𑀸𑀦𑀺 𑀯𑀺𑀧𑀸𑀓𑀨𑀮𑀁, 𑀲𑀩𑁆𑀩𑀤𑀼𑀓𑁆𑀔𑀓𑁆𑀔𑀬𑁄 𑀆𑀦𑀺𑀲𑀁𑀲𑀨𑀮𑀁. ‘‘𑀬𑁄 𑀘 𑀩𑀼𑀤𑁆𑀥𑀜𑁆𑀘 𑀥𑀫𑁆𑀫𑀜𑁆𑀘…𑀧𑁂… 𑀲𑀩𑁆𑀩𑀤𑀼𑀓𑁆𑀔𑀸 𑀧𑀫𑀼𑀘𑁆𑀘𑀢𑀻’’𑀢𑀺 (𑀥. 𑀧. 𑁧𑁯𑁦-𑁧𑁯𑁨) 𑀳𑀺 𑀯𑀼𑀢𑁆𑀢𑀁. 𑀮𑁄𑀓𑀺𑀬𑀲𑁆𑀲 𑀪𑀯𑀪𑁄𑀕𑀲𑀫𑁆𑀧𑀤𑀸. ‘‘𑀬𑁂 𑀓𑁂𑀘𑀺 𑀩𑀼𑀤𑁆𑀥𑀁 𑀲𑀭𑀡𑀁 𑀕𑀢𑀸𑀲𑁂’’𑀢𑀺 (𑀤𑀻. 𑀦𑀺. 𑁨.𑁩𑁩𑁨; 𑀲𑀁. 𑀦𑀺. 𑁧.𑁩𑁭) 𑀳𑀺 𑀯𑀼𑀢𑁆𑀢𑀁. 𑀮𑁄𑀓𑀺𑀬𑀲𑀭𑀡𑀕𑀫𑀦𑀁 𑀢𑀻𑀲𑀼 𑀯𑀢𑁆𑀣𑀽𑀲𑀼 𑀅𑀜𑁆𑀜𑀸𑀡𑀲𑀁𑀲𑀬𑀫𑀺𑀘𑁆𑀙𑀸𑀜𑀸𑀡𑀸𑀤𑀻𑀳𑀺 𑀲𑀁𑀓𑀺𑀮𑀺𑀲𑁆𑀲𑀢𑀺, 𑀦 𑀫𑀳𑀸𑀚𑀼𑀢𑀺𑀓𑀁 𑀳𑁄𑀢𑀺, 𑀦 𑀫𑀳𑀸𑀯𑀺𑀧𑁆𑀨𑀸𑀭𑀁. 𑀮𑁄𑀓𑀼𑀢𑁆𑀢𑀭𑀲𑁆𑀲 𑀦𑀢𑁆𑀣𑀺 𑀲𑀁𑀓𑀺𑀮𑁂𑀲𑁄. 𑀮𑁄𑀓𑀺𑀬𑀲𑁆𑀲 𑀲𑀸𑀯𑀚𑁆𑀚𑁄 𑀅𑀦𑀯𑀚𑁆𑀚𑁄𑀢𑀺 𑀤𑀼𑀯𑀺𑀥𑁄 𑀪𑁂𑀤𑁄. 𑀢𑀢𑁆𑀣 𑀅𑀜𑁆𑀜𑀲𑀢𑁆𑀣𑀸𑀭𑀸𑀤𑀻𑀲𑀼 𑀅𑀢𑁆𑀢𑀲𑀦𑁆𑀦𑀺𑀬𑁆𑀬𑀸𑀢𑀦𑀸𑀤𑀻𑀳𑀺 𑀲𑀸𑀯𑀚𑁆𑀚𑁄 𑀳𑁄𑀢𑀺, 𑀲𑁄 𑀅𑀦𑀺𑀝𑁆𑀞𑀨𑀮𑁄. 𑀅𑀦𑀯𑀚𑁆𑀚𑁄 𑀓𑀸𑀮𑀓𑀺𑀭𑀺𑀬𑀸𑀬, 𑀲𑁄 𑀅𑀯𑀺𑀧𑀸𑀓𑀢𑁆𑀢𑀸 𑀅𑀨𑀮𑁄. 𑀮𑁄𑀓𑀼𑀢𑁆𑀢𑀭𑀲𑁆𑀲 𑀦𑁂𑀯𑀢𑁆𑀣𑀺 𑀪𑁂𑀤𑁄. 𑀪𑀯𑀦𑁆𑀢𑀭𑁂𑀧𑀺 𑀳𑀺 𑀅𑀭𑀺𑀬𑀲𑀸𑀯𑀓𑁄 𑀅𑀜𑁆𑀜𑀁 𑀲𑀢𑁆𑀣𑀸𑀭𑀁 𑀦 𑀉𑀤𑁆𑀤𑀺𑀲𑀢𑀺. 𑀬𑁄 𑀓𑁄𑀘𑀺 𑀲𑀭𑀡𑀕𑀢𑁄 𑀕𑀳𑀝𑁆𑀞𑁄 𑀉𑀧𑀸𑀲𑀓𑁄. 𑀭𑀢𑀦𑀢𑁆𑀢𑀬𑀉𑀧𑀸𑀲𑀦𑀢𑁄 𑀉𑀧𑀸𑀲𑀓𑁄. 𑀧𑀜𑁆𑀘 𑀯𑁂𑀭𑀫𑀡𑀺𑀬𑁄 𑀲𑀻𑀮𑀁. 𑀲𑀢𑁆𑀣𑀲𑀢𑁆𑀢𑀫𑀁𑀲𑀫𑀚𑁆𑀚𑀯𑀺𑀲𑀯𑀸𑀡𑀺𑀚𑁆𑀚𑀸𑀭𑀳𑀺𑀢𑀁 𑀥𑀫𑁆𑀫𑁂𑀦 𑀚𑀻𑀯𑀺𑀓𑀁 𑀆𑀚𑀻𑀯𑁄. 𑀯𑀼𑀢𑁆𑀢𑀲𑀻𑀮𑀸𑀚𑀻𑀯𑀯𑀺𑀧𑀢𑁆𑀢𑀺 𑀯𑀺𑀧𑀢𑁆𑀢𑀺 𑀦𑀸𑀫. 𑀯𑀺𑀧𑀭𑀻𑀢𑀸 𑀲𑀫𑁆𑀧𑀢𑁆𑀢𑀺.

𑁧𑁬. 𑀮𑀘𑁆𑀙𑀸𑀫 𑀦𑀼 𑀔𑁄𑀢𑀺 𑀤𑀼𑀕𑁆𑀕𑀢𑁂 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀓𑁆𑀔𑀺𑀲𑁆𑀲𑀸𑀫 𑀦𑀼𑀔𑁄 𑀦𑁄𑀢𑀺 𑀲𑀫𑀺𑀤𑁆𑀥𑁂 𑀲𑀦𑁆𑀥𑀸𑀬. 𑀢𑀢𑁆𑀣 𑀯𑁂𑀭𑀜𑁆𑀚𑀸𑀬𑀁. 𑀧𑀕𑁆𑀕𑀬𑁆𑀳𑀢𑀻𑀢𑀺 𑀧𑀢𑁆𑀢𑀁 𑀧𑀕𑁆𑀕𑀳𑁄, 𑀢𑁂𑀦 𑀧𑀕𑁆𑀕𑀳𑁂𑀦 𑀧𑀢𑁆𑀢𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀫𑀸𑀤𑀸𑀬𑁂𑀯𑀸𑀢𑀺 𑀦𑀺𑀤𑀲𑁆𑀲𑀦𑀁. 𑀦 𑀘 𑀯𑀝𑁆𑀝𑀢𑀻𑀢𑀺 𑀧𑀼𑀦 𑀧𑀸𑀓𑀁 𑀓𑀺𑀜𑁆𑀘𑀸𑀧𑀺 𑀯𑀝𑁆𑀝𑀢𑀺, 𑀢𑀣𑀸𑀧𑀺 𑀦 𑀲𑀼𑀝𑁆𑀞𑀼 𑀧𑀓𑁆𑀓𑀢𑁆𑀢𑀸 𑀯𑀼𑀢𑁆𑀢𑀁, ‘‘𑀉𑀢𑁆𑀢𑀡𑁆𑀟𑀼𑀮𑀪𑀢𑁆𑀢𑀁 𑀮𑀪𑀺𑀢𑁆𑀯𑀸𑀧𑀺 𑀧𑀺𑀥𑁂𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀜𑁆𑀘𑁂𑀢𑁆𑀣 𑀲𑀸𑀥𑀓𑀁. ‘‘𑀲𑀸𑀯𑀓𑀸𑀦𑀁 𑀯𑀸 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀲𑁆𑀲𑀸𑀫𑀻’’𑀢𑀺 𑀇𑀫𑀺𑀦𑀸 𑀯𑀘𑀦𑁂𑀦 𑀆𑀚𑀻𑀯𑀧𑀸𑀭𑀺𑀲𑀼𑀤𑁆𑀥𑀺𑀲𑀻𑀮𑀁 𑀲𑀦𑁆𑀥𑀸𑀬 ‘‘𑀧𑀘𑁆𑀙𑀸 𑀲𑀻𑀮’’𑀦𑁆𑀢𑀺 𑀯𑀼𑀢𑁆𑀢𑀁. 𑀉𑀧𑀸𑀮𑀺𑀢𑁆𑀣𑁂𑀭𑁄𑀧𑀺 𑀢𑀁 𑀢𑀁 𑀯𑀢𑁆𑀣𑀼𑀁 𑀧𑀝𑀺𑀘𑁆𑀘 𑀪𑀕𑀯𑀢𑀸 𑀩𑀳𑀽𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀢𑁆𑀢𑀸𑀦𑀺 𑀅𑀢𑁆𑀣𑀻𑀢𑀺 𑀤𑀻𑀧𑁂𑀢𑀺. 𑀬𑀤𑀺 𑀏𑀯𑀁 𑀯𑁂𑀭𑀜𑁆𑀚𑀸𑀬𑀁 ‘‘𑀏𑀢𑀲𑁆𑀲 𑀪𑀕𑀯𑀸 𑀓𑀸𑀮𑁄’’𑀢𑀺 𑀯𑀘𑀦𑀁 𑀦 𑀲𑀫𑁂𑀢𑀻𑀢𑀺 𑀘𑁂? 𑀦, 𑀢𑀢𑁄 𑀧𑀼𑀩𑁆𑀩𑁂 𑀲𑀺𑀓𑁆𑀔𑀸𑀧𑀤𑀸𑀪𑀸𑀯𑀧𑁆𑀧𑀲𑀗𑁆𑀕𑀢𑁄. 𑀣𑁂𑀭𑁄 𑀧𑀦 𑀧𑀜𑁆𑀜𑀢𑁆𑀢𑀸𑀦𑀺 𑀞𑀧𑁂𑀢𑁆𑀯𑀸 𑀇𑀤𑀸𑀦𑀺 𑀧𑀜𑁆𑀜𑀧𑁂𑀢𑀩𑁆𑀩𑀸𑀦𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀧𑁆𑀧𑀳𑁄𑀦𑀓𑀸𑀦𑀺 𑀲𑀦𑁆𑀥𑀸𑀬𑀸𑀳. 𑀪𑀕𑀯𑀸𑀧𑀺 ‘‘𑀦 𑀢𑀸𑀯 𑀲𑀸𑀭𑀺𑀧𑀼𑀢𑁆𑀢 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀻’’𑀢𑀺 𑀪𑀤𑁆𑀤𑀸𑀮𑀺𑀲𑀼𑀢𑁆𑀢𑁂 (𑀫. 𑀦𑀺. 𑁨.𑁧𑁩𑁪; 𑀆𑀤𑀬𑁄) 𑀯𑀺𑀬 𑀏𑀓𑀘𑁆𑀘𑁂𑀲𑀼 𑀧𑀜𑁆𑀜𑀢𑁆𑀢𑁂𑀲𑀼𑀧𑀺 𑀢𑀢𑁄 𑀧𑀭𑀁 𑀧𑀜𑁆𑀜𑀧𑁂𑀢𑀩𑁆𑀩𑀸𑀦𑀺 𑀲𑀦𑁆𑀥𑀸𑀬𑀸𑀳. 𑀇𑀥𑁂𑀯 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀸𑀫𑀫𑁆𑀧𑀺 𑀧𑀘𑀦𑀁 𑀲𑀫𑀡𑀲𑀸𑀭𑀼𑀧𑁆𑀧𑀁 𑀦 𑀳𑁄𑀢𑀺 𑀦 𑀘 𑀯𑀝𑁆𑀝𑀢𑀻’’𑀢𑀺 𑀯𑀘𑀦𑀜𑁆𑀘, 𑀢𑀣𑀸 ‘‘𑀭𑀢𑁆𑀢𑀺𑀘𑁆𑀙𑁂𑀤𑁄 𑀯𑀸 𑀯𑀲𑁆𑀲𑀘𑁆𑀙𑁂𑀤𑁄 𑀯𑀸’’𑀢𑀺𑀆𑀤𑀺𑀯𑀘𑀦𑀸𑀦𑀺 𑀘 𑀅𑀢𑁆𑀣𑀺. 𑀅𑀜𑁆𑀜𑀣𑀸 ‘‘𑀤𑁆𑀯𑀻𑀳𑀸𑀓𑀸𑀭𑁂𑀳𑀺 𑀩𑀼𑀤𑁆𑀥𑀸 𑀪𑀕𑀯𑀦𑁆𑀢𑁄 𑀪𑀺𑀓𑁆𑀔𑀽 𑀧𑀝𑀺𑀧𑀼𑀘𑁆𑀙𑀦𑁆𑀢𑀻’’𑀢𑀺 𑀇𑀥𑁂𑀯𑁂𑀤𑀁 𑀧𑀸𑀴𑀺𑀞𑀧𑀦𑀁 𑀯𑀺𑀭𑀼𑀚𑁆𑀛𑀢𑀻𑀢𑀺 𑀆𑀘𑀭𑀺𑀬𑁂𑀦 𑀯𑀺𑀘𑀸𑀭𑀺𑀢𑀁, 𑀢𑀁 𑀲𑀼𑀦𑁆𑀤𑀭𑀁 𑀧𑀼𑀩𑁆𑀩𑁂𑀧𑀺 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀲𑀫𑁆𑀪𑀯𑀢𑁄. 𑀓𑀺𑀦𑁆𑀢𑀼 𑀇𑀥 𑀧𑀸𑀴𑀺𑀞𑀧𑀦𑀯𑀺𑀭𑁄𑀥𑀯𑀺𑀘𑀸𑀭𑀡𑀸 𑀧𑀦 𑀦𑀺𑀧𑁆𑀧𑀬𑁄𑀚𑀦𑀸 𑀯𑀺𑀬 𑀫𑀫 𑀤𑀺𑀲𑁆𑀲𑀢𑀺. 𑀓𑀲𑁆𑀫𑀸? 𑀉𑀧𑀸𑀮𑀺𑀢𑁆𑀣𑁂𑀭𑁂𑀦 𑀲𑀗𑁆𑀕𑀻𑀢𑀺𑀓𑀸𑀮𑁂 𑀯𑀼𑀢𑁆𑀢𑀧𑀸𑀞𑀢𑁆𑀢𑀸. 𑀭𑀢𑁆𑀢𑀺𑀘𑁆𑀙𑁂𑀤𑁄𑀢𑀺 𑀲𑀢𑁆𑀢𑀸𑀳𑀓𑀺𑀘𑁆𑀘𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑁄. ‘‘𑀲𑀢𑁆𑀢𑀸𑀳𑀓𑀭𑀡𑀻𑀬𑁂𑀦 𑀕𑀦𑁆𑀢𑁆𑀯𑀸 𑀭𑀢𑁆𑀢𑀺𑀘𑁆𑀙𑁂𑀤𑁄 𑀯𑀸 𑀯𑀲𑁆𑀲𑀘𑁆𑀙𑁂𑀤𑁄 𑀯𑀸 𑀏𑀓𑀪𑀺𑀓𑁆𑀔𑀼𑀦𑀸𑀧𑀺 𑀦 𑀓𑀢𑁄’’𑀢𑀺 𑀯𑀼𑀢𑁆𑀢𑀁 𑀓𑀺𑀭 𑀫𑀳𑀸𑀅𑀝𑁆𑀞𑀓𑀣𑀸𑀬𑀁, 𑀢𑀲𑁆𑀫𑀸 𑀯𑀲𑁆𑀲𑀘𑁆𑀙𑁂𑀤𑀲𑁆𑀲 𑀓𑀸𑀭𑀡𑁂 𑀲𑀢𑀺 𑀲𑀢𑁆𑀢𑀸𑀳𑀓𑀺𑀘𑁆𑀘𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀏𑀓𑁂. 𑀯𑀺𑀦𑀬𑀥𑀭𑀸 𑀧𑀦 𑀦𑀺𑀘𑁆𑀙𑀦𑁆𑀢𑀺, 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀥𑀺𑀧𑁆𑀧𑀸𑀬𑁄 𑀯𑀻𑀫𑀁𑀲𑀺𑀢𑀩𑁆𑀩𑁄, 𑀇𑀫𑀸𑀬 𑀯𑁂𑀭𑀜𑁆𑀚𑀸𑀬𑀁 𑀅𑀧𑁆𑀧𑀺𑀘𑁆𑀙𑀢𑀸𑀤𑀺𑀧𑀝𑀺𑀧𑀤𑀸𑀬 𑀧𑀲𑀦𑁆𑀦𑀸. 𑀲𑀸𑀮𑀻𑀦𑀁 𑀯𑀺𑀓𑀢𑀺 𑀲𑀸𑀮𑀺𑀯𑀺𑀓𑀢𑀺.

𑁧𑁭-𑁮. 𑀉𑀧𑀧𑀦𑁆𑀦𑀨𑀮𑁄𑀢𑀺 𑀩𑀳𑀼𑀨𑀮𑁄. ‘‘𑀔𑀼𑀤𑁆𑀤𑀁 𑀫𑀥𑀼’’𑀦𑁆𑀢𑀺 𑀧𑀸𑀞𑁄. 𑀣𑁂𑀭𑀁 𑀲𑀻𑀳𑀦𑀸𑀤𑀁 𑀦𑀤𑀸𑀧𑁂𑀢𑀼𑀁 𑀧𑀼𑀘𑁆𑀙𑀻𑀢𑀺 𑀇𑀫𑀺𑀦𑀸 𑀆𑀘𑀭𑀺𑀬𑁄 𑀬𑀁 𑀧𑀼𑀩𑁆𑀩𑁂 𑀆𑀡𑀸𑀬 𑀞𑀺𑀢𑀸𑀦𑀁 𑀲𑀸𑀯𑀓𑀸𑀦𑀁 𑀫𑀳𑀸𑀦𑀼𑀪𑀸𑀯𑀢𑀸𑀤𑀲𑁆𑀲𑀦𑀁 ‘‘𑀯𑁂𑀭𑀜𑁆𑀚𑀸𑀬𑀁 𑀦𑀺𑀯𑀸𑀲𑀧𑁆𑀧𑀬𑁄𑀚𑀦’’𑀦𑁆𑀢𑀺 𑀅𑀫𑁆𑀳𑁂𑀳𑀺 𑀯𑀼𑀢𑁆𑀢𑀁, 𑀢𑀁 𑀲𑀫𑁆𑀧𑀸𑀤𑁂𑀢𑀺, 𑀭𑀸𑀚𑀕𑀳𑁂 𑀯𑁂𑀭𑀜𑁆𑀚𑀸𑀬𑀜𑁆𑀘𑀸𑀢𑀺 𑀉𑀪𑀬𑀢𑁆𑀣 𑀯𑀺𑀢𑀓𑁆𑀓𑀼𑀧𑁆𑀧𑀸𑀤𑁂 𑀏𑀓𑀢𑁄 𑀧𑀺𑀡𑁆𑀟𑁂𑀢𑁆𑀯𑀸 𑀤𑀲𑁆𑀲𑁂𑀦𑁆𑀢𑁄 ‘‘𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺𑀫𑀸𑀳. 𑀓𑀸𑀮𑀁 𑀲𑀦𑁆𑀥𑀸𑀬 𑀘𑀺𑀭𑀁, 𑀞𑀺𑀢𑀺𑀁 𑀲𑀦𑁆𑀥𑀸𑀬 𑀘𑀺𑀭𑀸𑀢𑀺 𑀯𑀺𑀕𑁆𑀕𑀳𑁄.

𑀓𑀸𑀫𑀁 𑀳𑀺𑀦𑁄𑀢𑀺 𑀅𑀢𑁆𑀢𑀦𑁄 𑀨𑀮𑀦𑀺𑀩𑁆𑀩𑀢𑁆𑀢𑀺𑀬𑀸 𑀲𑀳𑀸𑀬𑀁 𑀕𑀘𑁆𑀙𑀢𑀻𑀢𑀺 𑀓𑀢𑁆𑀢𑀭𑀺 𑀳𑁂𑀢𑀼, 𑀢𑀣𑀸𑀧𑀺 𑀇𑀥 𑀢𑁂𑀦 𑀓𑀭𑀡𑀪𑀽𑀢𑁂𑀦 𑀢𑀲𑁆𑀲 𑀨𑀮𑀁 𑀳𑀺𑀦𑁄𑀢𑀺 𑀧𑀯𑀢𑁆𑀢𑀢𑀻𑀢𑀺 𑀳𑁂𑀢𑀼. 𑀢𑀣𑀸 𑀖𑀝𑀦𑁆𑀢𑀺 𑀢𑁂𑀦𑀸𑀢𑀺 𑀖𑀝𑁄. 𑀓𑀺𑀮𑀸𑀲𑀼𑀦𑁄𑀢𑀺 𑀧𑀬𑁄𑀚𑀦𑀸𑀪𑀸𑀯𑁂𑀦 𑀅𑀯𑀸𑀯𑀝𑀸. 𑀅𑀩𑁆𑀩𑁄𑀓𑀺𑀡𑁆𑀡𑀸𑀦𑀺 𑀯𑀺𑀲𑀪𑀸𑀕𑁂𑀳𑀺. 𑀆𑀕𑀸𑀫𑀺𑀦𑀺𑀬𑀸 𑀅𑀦𑀸𑀕𑀢𑁂𑀢𑀺 𑀅𑀢𑁆𑀣𑁄. 𑀇𑀫𑁂𑀲𑀁𑀬𑁂𑀯 𑀦𑁄𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀲𑀩𑁆𑀩𑀩𑀼𑀤𑁆𑀥𑀸𑀦𑀁 𑀳𑀻’’𑀢𑀺 𑀯𑀼𑀢𑁆𑀢𑀁. 𑀬𑀸𑀯𑀲𑀸𑀲𑀦𑀧𑀭𑀺𑀬𑀦𑁆𑀢𑀸𑀢𑀺 𑀬𑀸𑀯 𑀩𑀼𑀤𑁆𑀥𑀸 𑀥𑀭𑀦𑁆𑀢𑀺, 𑀢𑀸𑀯𑀸𑀢𑀺 𑀅𑀢𑁆𑀣𑁄. 𑀔𑀢𑁆𑀢𑀺𑀬𑀩𑁆𑀭𑀸𑀳𑁆𑀫𑀡𑀸𑀯 𑀉𑀘𑁆𑀘𑀸, 𑀢𑀢𑁆𑀣𑀸𑀧𑀺 𑀯𑀺𑀲𑁂𑀲𑀁 𑀤𑀲𑁆𑀲𑁂𑀢𑀼𑀁 ‘‘𑀉𑀘𑁆𑀘𑀦𑀻𑀘𑀉𑀴𑀸𑀭𑀼𑀴𑀸𑀭𑀪𑁄𑀕𑀸’’𑀢𑀺. ‘‘𑀫𑀦𑀲𑀺 𑀓𑀢𑁆𑀯𑀸’’𑀢𑀺𑀧𑀺 𑀧𑀸𑀞𑁄. 𑀉𑀧𑀲𑀫𑁆𑀧𑀸𑀤𑁆𑀬𑀉𑀧𑀲𑀫𑁆𑀧𑀸𑀤𑁆𑀬𑀇𑀘𑁆𑀘𑁂𑀢𑀁 𑀤𑁆𑀯𑀬𑀁 𑀫𑀸𑀕𑀥𑁂 ‘‘𑀉𑀧𑀲𑀫𑁆𑀧𑀚𑁆𑀚𑀸’’𑀢𑀺 𑀯𑀼𑀘𑁆𑀘𑀢𑀺. 𑀅𑀦𑀼𑀧𑀸𑀤𑀸𑀬𑀸𑀢𑀺 𑀆𑀭𑀫𑁆𑀫𑀡𑀓𑀭𑀡𑀯𑀲𑁂𑀦 𑀅𑀕𑁆𑀕𑀳𑁂𑀢𑁆𑀯𑀸. 𑀆𑀲𑀯𑁂𑀳𑀻𑀢𑀺 𑀓𑀢𑁆𑀢𑀭𑀺 𑀢𑀢𑀺𑀬𑀸𑀯𑀺𑀪𑀢𑁆𑀢𑀺. 𑀘𑀺𑀢𑁆𑀢𑀸𑀦𑀻𑀢𑀺 𑀧𑀘𑁆𑀘𑀢𑁆𑀢𑀩𑀳𑀼𑀯𑀘𑀦𑀁. 𑀯𑀺𑀫𑀼𑀘𑁆𑀘𑀺𑀁𑀲𑀽𑀢𑀺 𑀓𑀫𑁆𑀫𑀓𑀸𑀭𑀓𑁂. 𑀯𑀺𑀫𑁄𑀘𑀺𑀢𑀸𑀦𑀻𑀢𑀺 𑀅𑀥𑀺𑀧𑁆𑀧𑀸𑀬𑁄𑀢𑀺 𑀆𑀘𑀭𑀺𑀬𑁄. 𑀆𑀲𑀯𑁂𑀳𑀻𑀢𑀺 𑀧𑀤𑀜𑁆𑀘 𑀧𑀘𑁆𑀘𑀢𑁆𑀢𑁂 𑀓𑀭𑀡𑀯𑀘𑀦𑀁 𑀓𑀢𑁆𑀯𑀸 𑀕𑀡𑁆𑀞𑀺𑀧𑀤𑁂 𑀅𑀢𑁆𑀣𑁄 𑀧𑀓𑀸𑀲𑀺𑀢𑁄. 𑀬𑀤𑀺 𑀅𑀭𑀺𑀬𑀫𑀕𑁆𑀕𑁂𑀦 𑀦𑀺𑀭𑀼𑀤𑁆𑀥𑀸𑀦𑀁 𑀆𑀲𑀯𑀸𑀦𑀁 𑀯𑀲𑁂𑀦 𑀅𑀦𑀸𑀲𑀯𑀢𑀸, 𑀮𑁄𑀓𑁂 𑀘𑀺𑀢𑁆𑀢𑀸𑀦𑀺𑀧𑀺 𑀅𑀦𑀸𑀲𑀯𑀸 𑀲𑀺𑀬𑀼𑀁. 𑀦 𑀳𑀺 𑀦𑀺𑀭𑀼𑀤𑁆𑀥𑀸𑀦𑀺 𑀘𑀺𑀢𑁆𑀢𑀸𑀦𑀺 𑀆𑀭𑀫𑁆𑀫𑀡𑀸𑀦𑀺 𑀓𑀭𑁄𑀦𑁆𑀢𑀻𑀢𑀺 𑀢𑀸𑀦𑀺 𑀅𑀦𑀺𑀭𑀼𑀤𑁆𑀥𑀸𑀲𑀯𑀯𑀲𑁂𑀦 𑀲𑀸𑀲𑀯𑀸𑀦𑀻𑀢𑀺 𑀘𑁂. 𑀲𑁄𑀢𑀸𑀧𑀦𑁆𑀦𑀲𑁆𑀲 𑀫𑀕𑁆𑀕𑀘𑀺𑀢𑁆𑀢𑀁 𑀉𑀧𑀭𑀺𑀫𑀕𑁆𑀕𑀯𑀚𑁆𑀛𑀸𑀲𑀯𑀯𑀲𑁂𑀦 𑀲𑀸𑀲𑀯𑀁, 𑀅𑀯𑀲𑀺𑀝𑁆𑀞𑀸𑀲𑀯𑀲𑀫𑀼𑀘𑁆𑀙𑀺𑀦𑁆𑀤𑀦𑀸𑀦𑀼𑀪𑀸𑀯𑀢𑁆𑀢𑀸 𑀨𑀮𑀸𑀦𑀺 𑀲𑀸𑀲𑀯𑀸𑀦𑀺 𑀲𑀺𑀬𑀼𑀦𑁆𑀢𑀺? 𑀦, 𑀆𑀲𑀯𑀲𑀫𑀼𑀘𑁆𑀙𑀺𑀦𑁆𑀤𑀦𑀸𑀦𑀼𑀪𑀸𑀯𑀸𑀕𑀢𑀨𑀮𑀢𑁆𑀢𑀸. 𑀪𑀺𑀁𑀲𑀦𑀲𑁆𑀲 𑀓𑀭𑀡𑀁 𑀪𑀺𑀁𑀲𑀦𑀓𑀢𑀁, 𑀢𑀲𑁆𑀫𑀺𑀁 𑀪𑀺𑀁𑀲𑀦𑀓𑀢𑀲𑁆𑀫𑀺𑀁, 𑀪𑀺𑀁𑀲𑀦𑀓𑀺𑀭𑀺𑀬𑀸𑀬𑀸𑀢𑀺 𑀅𑀢𑁆𑀣𑁄. 𑀇𑀢𑁆𑀣𑀺𑀮𑀺𑀗𑁆𑀕𑀁 𑀯𑀺𑀧𑀮𑁆𑀮𑀸𑀲𑀁 𑀓𑀢𑁆𑀯𑀸 𑀦𑀧𑀼𑀁𑀲𑀓𑀮𑀺𑀗𑁆𑀕𑀁, 𑀧𑀼𑀭𑀺𑀲𑀮𑀺𑀗𑁆𑀕𑀁 𑀯𑀸 𑀓𑀢𑁆𑀯𑀸. 𑀦𑀺𑀫𑀺𑀢𑁆𑀢𑀢𑁆𑀣𑁂𑀢𑀺 𑀏𑀢𑁆𑀣 𑁋

‘‘𑀘𑀫𑁆𑀫𑀦𑀺 𑀤𑀻𑀧𑀺𑀦𑀁 𑀳𑀦𑁆𑀢𑀺, 𑀤𑀦𑁆𑀢𑁂𑀲𑀼 𑀳𑀦𑁆𑀢𑀺 𑀓𑀼𑀜𑁆𑀚𑀭𑀁;

𑀯𑀸𑀮𑁂𑀲𑀼 𑀘𑀸𑀫𑀭𑀺𑀁 𑀳𑀦𑁆𑀢𑀺, 𑀲𑀺𑀗𑁆𑀕𑁂𑀲𑀼 𑀲𑀭𑀪𑁄 𑀳𑀢𑁄’’𑀢𑀺. 𑁋

𑀅𑀥𑀺𑀓𑀭𑀡𑀁.

𑁨𑁦-𑁨𑁧. 𑀦𑀘𑀺𑀭𑀝𑁆𑀞𑀺𑀢𑀺𑀓𑀓𑀸𑀭𑀡𑁂 𑀓𑀣𑀺𑀢𑁂 𑀘𑀺𑀭𑀝𑁆𑀞𑀺𑀢𑀺𑀓𑀓𑀸𑀭𑀡𑀁 𑀅𑀢𑁆𑀣𑀢𑁄 𑀯𑀼𑀢𑁆𑀢𑀧𑀝𑀺𑀧𑀓𑁆𑀔𑀯𑀲𑁂𑀦 𑀓𑀺𑀜𑁆𑀘𑀸𑀧𑀺 𑀲𑀺𑀤𑁆𑀥𑀁, 𑀢𑀣𑀸𑀧𑀺 𑀢𑀁 𑀣𑁂𑀭𑀲𑁆𑀲 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀸𑀬 𑀑𑀓𑀸𑀲𑀓𑀸𑀭𑀡𑀸𑀥𑀺𑀧𑁆𑀧𑀸𑀬𑀢𑁄 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑁄𑀓𑀸𑀲𑀁 𑀧𑀸𑀧𑁂𑀢𑀼𑀁 𑀧𑀼𑀦 𑀪𑀕𑀯𑀦𑁆𑀢𑀁 ‘‘𑀓𑁄 𑀧𑀦, 𑀪𑀦𑁆𑀢𑁂, 𑀳𑁂𑀢𑀽’’𑀢𑀺 𑀧𑀼𑀘𑁆𑀙𑀺. 𑀪𑀕𑀯𑀸𑀧𑀺 𑀬𑀸𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀓𑀸𑀫𑁄 𑀩𑁆𑀬𑀸𑀓𑀸𑀲𑀺. ‘‘𑀆𑀲𑀯𑀝𑁆𑀞𑀸𑀦𑀻𑀬𑀸 𑀲𑀗𑁆𑀖𑁂 𑀧𑀸𑀢𑀼𑀪𑀯𑀦𑁆𑀢𑀻’’𑀢𑀺 𑀧𑀼𑀕𑁆𑀕𑀮𑀲𑁆𑀲 𑀲𑀗𑁆𑀖𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀯𑀼𑀢𑁆𑀢𑀁. 𑀆𑀤𑀭𑀢𑁆𑀣𑀯𑀲𑁂𑀦𑁂𑀯𑁂𑀢𑁆𑀣 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀯𑀼𑀢𑁆𑀢𑀦𑁆𑀢𑀺 𑀬𑀲𑁆𑀫𑀸 𑀣𑁂𑀭𑁄 𑀧𑀼𑀩𑁆𑀩𑁂 𑀭𑀸𑀚𑀕𑀳𑁂, 𑀲𑀫𑁆𑀧𑀢𑀺 𑀯𑁂𑀭𑀜𑁆𑀚𑀸𑀬𑀦𑁆𑀢𑀺 𑀤𑁆𑀯𑀺𑀓𑁆𑀔𑀢𑁆𑀢𑀼𑀁 𑀓𑀸𑀘𑀺, 𑀢𑀲𑁆𑀫𑀸 𑀆𑀤𑀭𑁂𑀦 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀬𑀫𑀸𑀦𑀁 𑀧𑀲𑁆𑀲𑀺𑀢𑁆𑀯𑀸 𑀲𑀬𑀫𑁆𑀧𑀺 𑀪𑀕𑀯𑀸 𑀆𑀤𑀭𑁂𑀦𑁂𑀯 ‘‘𑀆𑀕𑀫𑁂𑀳𑀺 𑀢𑁆𑀯𑀁 𑀲𑀸𑀭𑀺𑀧𑀼𑀢𑁆𑀢𑀸’’𑀢𑀺 𑀆𑀳. 𑀢𑁂𑀦𑁂𑀢𑀁 𑀤𑀻𑀧𑁂𑀢𑀺 ‘‘𑀫𑀸 𑀢𑁆𑀯𑀁 𑀧𑀼𑀦𑀧𑁆𑀧𑀼𑀦𑀁 𑀬𑀸𑀘𑀸𑀳𑀺, 𑀲𑀫𑁆𑀧𑀝𑀺𑀘𑁆𑀙𑀺𑀢𑀸𑀯 𑀫𑀬𑀸 𑀢𑁂 𑀬𑀸𑀘𑀦𑀸, 𑀧𑀼𑀩𑁆𑀩𑁂𑀦𑀦𑀼 𑀢𑀯𑀬𑀸𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀢𑀸𑀯 𑀫𑀬𑀸 𑀏𑀢𑁆𑀢𑀓𑁂 𑀓𑀸𑀮𑁂 𑀏𑀢𑁆𑀢𑀓𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀢𑁆𑀢𑀸𑀦𑀺, 𑀦 𑀢𑀸𑀯 𑀫𑁂 𑀲𑀸𑀯𑀓𑀸𑀦𑀁 𑀆𑀡𑀸𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀦𑀼𑀚𑀸𑀦𑀦𑀓𑀸𑀮𑁄 𑀲𑀫𑁆𑀧𑀢𑁆𑀢𑁄, 𑀢𑀓𑁆𑀓𑀸𑀦𑀼𑀫𑀸𑀦𑀯𑀲𑁂𑀦 𑀢𑀬𑀸 ‘𑀏𑀢𑀲𑁆𑀲 𑀪𑀕𑀯𑀸 𑀓𑀸𑀮𑁄’𑀢𑀺 𑀧𑀼𑀦𑀧𑁆𑀧𑀼𑀦𑀁 𑀦𑀺𑀤𑁆𑀤𑀺𑀲𑀺𑀬𑀫𑀸𑀦𑁄𑀧𑀺 𑀦𑁂𑀲 𑀲𑁄 𑀓𑀸𑀮𑁄, 𑀓𑀺𑀦𑁆𑀢𑀼 𑀢𑀣𑀸𑀕𑀢𑁄𑀯 𑀢𑀢𑁆𑀣 𑀓𑀸𑀮𑀁 𑀚𑀸𑀦𑀺𑀲𑁆𑀲𑀢𑀻’’𑀢𑀺. 𑀬𑀲𑁆𑀫𑀸 𑀧𑀦 ‘‘𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀓𑀸𑀮𑀢𑁄 𑀧𑀪𑀼𑀢𑀺 𑀆𑀡𑀸𑀧𑀸𑀢𑀺𑀫𑁄𑀓𑁆𑀔𑀫𑁂𑀯 𑀉𑀤𑁆𑀤𑀺𑀲𑀺𑀬𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀧𑁆𑀧𑀳𑁄𑀦𑀓𑀲𑀺𑀓𑁆𑀔𑀸𑀧𑀤𑀫𑁂𑀯 𑀲𑀦𑁆𑀥𑀸𑀬𑀸𑀳. ‘‘𑀢𑀢𑁆𑀣𑀸𑀢𑀺 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀸𑀧𑁂𑀓𑁆𑀔𑀁 𑀪𑀼𑀫𑁆𑀫𑀯𑀘𑀦’’𑀦𑁆𑀢𑀺 𑀏𑀓𑀫𑁂𑀯 𑀧𑀤𑀁 𑀯𑀼𑀢𑁆𑀢𑀁 𑀢𑀲𑁆𑀲𑀸 𑀲𑀺𑀤𑁆𑀥𑀺𑀬𑀸 𑀇𑀢𑀭𑀲𑁆𑀲 𑀲𑀺𑀤𑁆𑀥𑀺𑀢𑁄. ‘‘𑀲𑀸𑀯𑀓𑀸𑀦𑀁 𑀯𑀺𑀲𑀬𑀪𑀸𑀯𑀦𑁆𑀢𑀺 𑀇𑀫𑀺𑀦𑀸 𑀫𑀳𑀸𑀧𑀤𑀼𑀫𑀢𑁆𑀣𑁂𑀭𑀯𑀸𑀤𑁄 𑀧𑀝𑀺𑀓𑁆𑀔𑀺𑀢𑁆𑀢𑁄’’𑀢𑀺 𑀅𑀦𑀼𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁, 𑀢𑀁 𑀲𑀼𑀦𑁆𑀤𑀭𑀁 𑀯𑀺𑀬. 𑀲𑀫𑁆𑀫𑀼𑀔𑁂 𑀕𑀭𑀳𑀸. 𑀧𑀭𑀫𑁆𑀫𑀼𑀔𑁂 𑀉𑀧𑀯𑀸𑀤𑁄. ‘‘𑀦, 𑀪𑀺𑀓𑁆𑀔𑀯𑁂, 𑀊𑀦𑀤𑀲𑀯𑀲𑁆𑀲𑁂𑀦…𑀧𑁂… 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁭𑁫) 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀪𑀕𑀯𑀸 𑀩𑀼𑀤𑁆𑀥𑀢𑁆𑀢𑁂𑀦 𑀤𑀲𑀯𑀲𑁆𑀲𑀺𑀓𑁄 𑀳𑀼𑀢𑁆𑀯𑀸 𑀧𑀜𑁆𑀜𑀧𑁂𑀲𑀺 𑀊𑀦𑀤𑀲𑀯𑀲𑁆𑀲𑀺𑀓𑀲𑁆𑀲 𑀢𑀲𑁆𑀲 𑀢𑀣𑀸 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀬𑀸 𑀅𑀪𑀸𑀯𑀢𑁄. 𑀦 𑀢𑀤𑀸 𑀅𑀢𑀺𑀭𑁂𑀓𑀤𑀲𑀯𑀲𑁆𑀲𑀺𑀓𑁄𑀯 𑀤𑀲𑀯𑀲𑁆𑀲𑀺𑀓𑀸𑀦𑀁 𑀭𑀢𑁆𑀢𑀜𑁆𑀜𑀼𑀫𑀳𑀢𑁆𑀢𑀧𑁆𑀧𑀢𑁆𑀢𑀺𑀢𑁄, 𑀢𑀲𑁆𑀫𑀸 𑀢𑀁 𑀲𑀺𑀓𑁆𑀔𑀸𑀧𑀤𑀁 𑀯𑁂𑀭𑀜𑁆𑀚𑀸𑀬𑀁 𑀯𑀲𑁆𑀲𑀸𑀯𑀸𑀲𑀢𑁄 𑀧𑀼𑀩𑁆𑀩𑁂 𑀭𑀸𑀚𑀕𑀳𑁂 𑀏𑀯 𑀧𑀜𑁆𑀜𑀢𑁆𑀢𑀦𑁆𑀢𑀺 𑀲𑀺𑀤𑁆𑀥𑀁, 𑀢𑀲𑁆𑀫𑀺𑀁 𑀲𑀺𑀤𑁆𑀥𑁂 𑀲𑀺𑀤𑁆𑀥𑀫𑁂𑀯 ‘‘𑀬𑀸𑀯 𑀦 𑀲𑀗𑁆𑀖𑁄 𑀭𑀢𑁆𑀢𑀜𑁆𑀜𑀼𑀫𑀳𑀢𑁆𑀢𑀁 𑀧𑀢𑁆𑀢𑁄𑀢𑀺 𑀯𑀘𑀦𑀁 𑀇𑀢𑁄 𑀧𑀼𑀩𑁆𑀩𑁂 𑀧𑀞𑀫𑀬𑀸𑀘𑀦𑀸𑀬𑀧𑀺 𑀯𑀼𑀢𑁆𑀢’’𑀦𑁆𑀢𑀺. 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 𑀭𑀢𑁆𑀢𑀜𑁆𑀜𑀼𑀫𑀳𑀢𑁆𑀢𑀧𑁆𑀧𑀢𑁆𑀢𑀓𑀸𑀮𑁂 ‘‘𑀤𑁆𑀯𑁂 𑀲𑀺𑀓𑁆𑀔𑀸𑀧𑀤𑀸𑀦𑀻’’𑀢𑀺 𑀕𑀡𑀦𑀧𑀭𑀺𑀘𑁆𑀙𑁂𑀤𑀯𑀘𑀦𑀁 𑀧𑀞𑀫𑀬𑀸𑀘𑀦𑀸𑀬 𑀯𑀼𑀢𑁆𑀢𑀯𑀘𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀜𑁆𑀜𑀣𑀸 𑀭𑀢𑁆𑀢𑀜𑁆𑀜𑀼𑀫𑀳𑀢𑁆𑀢𑀧𑁆𑀧𑀢𑁆𑀢𑀓𑀸𑀮𑁂 𑀤𑁆𑀯𑁂 𑀏𑀯, 𑀦 𑀅𑀜𑁆𑀜𑀦𑁆𑀢𑀺 𑀆𑀧𑀚𑁆𑀚𑀢𑀺.

‘‘𑀅𑀣 𑀔𑁄 𑀆𑀬𑀲𑁆𑀫𑀢𑁄 𑀲𑀸𑀭𑀺𑀧𑀼𑀢𑁆𑀢𑀲𑁆𑀲𑀸’’𑀢𑀺𑀆𑀤𑀺𑀫𑁆𑀳𑀺 𑀅𑀬𑀫𑀸𑀤𑀺𑀢𑁄 𑀧𑀝𑁆𑀞𑀸𑀬 𑀅𑀢𑁆𑀣𑀯𑀺𑀪𑀸𑀯𑀦𑀸 𑁋 𑀅𑀬𑀁 𑀓𑀺𑀭𑀸𑀬𑀲𑁆𑀫𑀸 𑀅𑀲𑁆𑀲𑀚𑀺𑀢𑁆𑀣𑁂𑀭𑀢𑁄 𑀧𑀝𑀺𑀮𑀤𑁆𑀥𑀁 𑀏𑀓𑀕𑀸𑀣𑀸𑀫𑀢𑁆𑀢𑀓𑀁 𑀥𑀫𑁆𑀫𑀧𑀭𑀺𑀬𑀸𑀬𑀁 𑀦𑀬𑀲𑀢𑀲𑀳𑀲𑁆𑀲𑁂𑀳𑀺 𑀯𑀺𑀯𑁂𑀘𑁂𑀦𑁆𑀢𑁄 𑀅𑀭𑀳𑀢𑁆𑀢𑀁 𑀧𑀢𑁆𑀯𑀸 𑀲𑀸𑀯𑀓𑀧𑀸𑀭𑀫𑀻𑀜𑀸𑀡𑁂 𑀞𑀺𑀢𑁄 ‘‘𑀅𑀳𑁄 𑀯𑀢 𑀫𑀳𑀸𑀦𑀼𑀪𑀸𑀯𑁄𑀬𑀁 𑀲𑀤𑁆𑀥𑀫𑁆𑀫𑁄, 𑀬𑁄 𑀯𑀺𑀦𑀸𑀧𑀺 𑀥𑀫𑁆𑀫𑀲𑀸𑀫𑀺𑀦𑀸 𑀧𑀭𑀫𑁆𑀫𑀼𑀔𑀢𑁄 𑀲𑀼𑀢𑀫𑀢𑁆𑀢𑁂𑀧𑀺 𑀫𑀬𑁆𑀳𑀁 𑀫𑀳𑀦𑁆𑀢𑀁 𑀕𑀼𑀡𑀯𑀺𑀲𑁂𑀲𑀁 𑀚𑀦𑁂𑀲𑀺, 𑀲𑀸𑀥𑀼 𑀯𑀢𑀸𑀬𑀁 𑀲𑀤𑁆𑀥𑀫𑁆𑀫𑁄 𑀘𑀺𑀭𑀁 𑀢𑀺𑀝𑁆𑀞𑁂𑀬𑁆𑀬𑀸’’𑀢𑀺 𑀘𑀺𑀦𑁆𑀢𑁂𑀦𑁆𑀢𑁄 ‘‘𑀓𑀢𑀫𑁂𑀲𑀸𑀦𑀁 𑀦𑀼 𑀔𑁄 𑀩𑀼𑀤𑁆𑀥𑀸𑀦𑀁 𑀪𑀕𑀯𑀦𑁆𑀢𑀸𑀦𑀁…𑀧𑁂… 𑀦 𑀘𑀺𑀭𑀝𑁆𑀞𑀺𑀢𑀺𑀓’’𑀦𑁆𑀢𑀺 𑀢𑀫𑀢𑁆𑀣𑀁, 𑀓𑀸𑀭𑀡𑀜𑁆𑀘 𑀅𑀢𑁆𑀢𑀦𑁄 𑀅𑀕𑁆𑀕𑀲𑀸𑀯𑀓𑀜𑀸𑀡𑁂𑀦 𑀧𑀝𑀺𑀯𑀺𑀚𑁆𑀛𑀺𑀢𑁆𑀯𑀸 ‘‘𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀦𑁆𑀢𑀺𑀆𑀤𑀺𑀘𑀺𑀭𑀝𑁆𑀞𑀺𑀢𑀺𑀓𑀸𑀭𑀡’’𑀦𑁆𑀢𑀺 𑀦𑀺𑀝𑁆𑀞𑀁 𑀓𑀢𑁆𑀯𑀸 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑁄𑀓𑀸𑀲𑀓𑀭𑀡𑀢𑁆𑀣𑀁 𑀪𑀕𑀯𑀦𑁆𑀢𑀁 𑀧𑀼𑀘𑁆𑀙𑀺. 𑀢𑀢𑁄 𑀧𑀜𑁆𑀳𑀲𑁆𑀲 𑀯𑀺𑀲𑁆𑀲𑀚𑁆𑀚𑀦𑁂 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑁄𑀓𑀸𑀲𑁂 𑀲𑀫𑁆𑀧𑀢𑁆𑀢𑁂 ‘‘𑀏𑀢𑀲𑁆𑀲 𑀪𑀕𑀯𑀸 𑀓𑀸𑀮𑁄, 𑀏𑀢𑀲𑁆𑀲 𑀲𑀼𑀕𑀢 𑀓𑀸𑀮𑁄’’𑀢𑀺 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀁 𑀬𑀸𑀘𑀺. 𑀢𑀢𑁄 𑀪𑀕𑀯𑀸 𑀢𑀲𑁆𑀲𑀸 𑀬𑀸𑀘𑀦𑀸𑀬 𑀲𑀫𑁆𑀧𑀝𑀺𑀘𑁆𑀙𑀺𑀢𑀪𑀸𑀯𑀁, ‘‘𑀏𑀢𑀲𑁆𑀲 𑀪𑀕𑀯𑀸 𑀓𑀸𑀮𑁄’’𑀢𑀺 𑀯𑀼𑀢𑁆𑀢𑀓𑀸𑀮𑀲𑁆𑀲 𑀅𑀓𑀸𑀮𑀢𑀁, 𑀓𑀸𑀮𑀲𑁆𑀲 𑀘 𑀅𑀦𑀜𑁆𑀜𑀯𑀺𑀲𑀬𑀢𑀁 𑀤𑀻𑀧𑁂𑀦𑁆𑀢𑁄 ‘‘𑀆𑀕𑀫𑁂𑀳𑀺 𑀢𑁆𑀯’’𑀦𑁆𑀢𑀺𑀆𑀤𑀺𑀫𑀸𑀳, 𑀢𑀢𑁄 𑀪𑀕𑀯𑀸 𑀢𑀲𑁆𑀲 𑀬𑀸𑀘𑀦𑀁, 𑀲𑀢𑁆𑀢𑁂𑀲𑀼 𑀓𑀸𑀭𑀼𑀜𑁆𑀜𑀢𑀜𑁆𑀘 𑀧𑀝𑀺𑀘𑁆𑀘 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀅𑀦𑀼𑀧𑀚𑁆𑀛𑀸𑀬𑀓𑀸 𑀅𑀦𑀸𑀘𑀭𑀺𑀬𑀓𑀸 𑀅𑀦𑁄𑀯𑀤𑀺𑀬𑀫𑀸𑀦𑀸’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁬𑁪) 𑀦𑀬𑁂𑀦 𑀯𑁂𑀧𑀼𑀮𑁆𑀮𑀫𑀳𑀢𑁆𑀢𑀢𑀁 𑀧𑀝𑀺𑀘𑁆𑀘 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀉𑀧𑀚𑁆𑀛𑀸𑀬𑀯𑀢𑁆𑀢𑀸𑀤𑀻𑀦𑀺 𑀯𑀺𑀦𑀬𑀓𑀫𑁆𑀫𑀸𑀦𑀺, 𑀢𑀤𑀦𑀼𑀭𑀽𑀧𑀲𑀺𑀓𑁆𑀔𑀸𑀧𑀤𑀸𑀦𑀺 𑀘 𑀧𑀜𑁆𑀜𑀧𑁂𑀲𑀺. 𑀢𑀢𑁄 𑀅𑀦𑀼𑀓𑁆𑀓𑀫𑁂𑀦 𑀤𑁆𑀯𑀸𑀤𑀲𑀫𑀯𑀲𑁆𑀲𑀁 𑀯𑁂𑀭𑀜𑁆𑀚𑀸𑀬𑀁 𑀯𑀲𑀺. 𑀢𑀤𑀸 𑀘 𑀆𑀬𑀲𑁆𑀫𑀸 𑀲𑀸𑀭𑀺𑀧𑀼𑀢𑁆𑀢𑁄 𑀲𑀢𑁆𑀣𑀸𑀭𑀸 𑀦𑀺𑀤𑁆𑀤𑀺𑀝𑁆𑀞𑁂𑀲𑀼 𑀘𑀺𑀭𑀝𑁆𑀞𑀺𑀢𑀺𑀳𑁂𑀢𑀽𑀲𑀼 𑀚𑀸𑀢𑁂𑀲𑀼 ‘‘𑀦𑀯𑀗𑁆𑀕𑀲𑀢𑁆𑀣𑀼𑀲𑀸𑀲𑀦𑀫𑀳𑀢𑁆𑀢𑀢𑀸 𑀘 𑀲𑀫𑁆𑀧𑀢𑀺 𑀚𑀸𑀢𑀸, 𑀯𑀺𑀦𑀬𑀧𑀜𑁆𑀜𑀢𑁆𑀢𑀺 𑀘 𑀩𑀳𑀼𑀢𑀭𑀸 𑀚𑀸𑀢𑀸, 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀏𑀯𑁂𑀓𑁄 𑀦 𑀢𑀸𑀯 𑀲𑀸𑀯𑀓𑀸𑀦𑀁 𑀅𑀦𑀼𑀜𑁆𑀜𑀸𑀢𑁄, 𑀲𑁄 𑀘 𑀧𑀭𑀺𑀲𑀼𑀤𑁆𑀥𑁂𑀦 𑀲𑀗𑁆𑀖𑁂𑀦 𑀓𑀭𑀻𑀬𑀢𑀺. 𑀲𑀗𑁆𑀖𑁄𑀧𑀺 𑀏𑀢𑀭𑀳𑀺 𑀧𑀭𑀺𑀲𑀼𑀤𑁆𑀥𑁄 𑀧𑀘𑁆𑀙𑀺𑀫𑀓𑀲𑁆𑀲 𑀲𑁄𑀢𑀸𑀧𑀦𑁆𑀦𑀢𑁆𑀢𑀸’’𑀢𑀺 𑀘𑀺𑀦𑁆𑀢𑁂𑀢𑁆𑀯𑀸 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀅𑀦𑀼𑀚𑀸𑀦𑀸𑀧𑁂𑀢𑀼𑀓𑀸𑀫𑁄 𑀬𑀢𑁆𑀢𑀓𑁂𑀳𑀺 𑀘 𑀲𑀺𑀓𑁆𑀔𑀸𑀧𑀤𑁂𑀳𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀅𑀦𑀼𑀚𑀸𑀦𑀻𑀬𑀢𑀺, 𑀢𑀢𑁆𑀢𑀓𑀸𑀦𑀁 𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀧𑀼𑀩𑁆𑀩𑀗𑁆𑀕𑀫𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀬𑀸𑀘𑀦𑁆𑀢𑁄 𑀧𑀼𑀩𑁆𑀩𑀼𑀧𑁆𑀧𑀦𑁆𑀦𑀯𑀺𑀢𑀓𑁆𑀓𑀲𑀽𑀘𑀦𑀧𑀼𑀘𑁆𑀙𑀸𑀯𑀺𑀲𑁆𑀲𑀚𑁆𑀚𑀦𑀓𑁆𑀓𑀫𑀯𑀲𑁂𑀦 𑀬𑀸𑀘𑀦𑁄𑀓𑀸𑀲𑁂 𑀲𑀫𑁆𑀧𑀢𑁆𑀢𑁂 ‘‘𑀏𑀢𑀲𑁆𑀲 𑀪𑀕𑀯𑀸 𑀓𑀸𑀮𑁄’’𑀢𑀺𑀆𑀤𑀺𑀫𑀸𑀳.

𑀢𑀢𑁆𑀣 ‘‘𑀬𑀁 𑀪𑀕𑀯𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀬𑁆𑀬𑀸’’𑀢𑀺 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀧𑁆𑀧𑀳𑁄𑀦𑀓𑀲𑀺𑀓𑁆𑀔𑀸𑀧𑀤𑀁 𑀲𑀦𑁆𑀥𑀸𑀬𑀸𑀳, 𑀅𑀬𑀫𑀢𑁆𑀣𑁄 𑀪𑀤𑁆𑀤𑀸𑀮𑀺𑀲𑀼𑀢𑁆𑀢𑁂𑀦 (𑀫. 𑀦𑀺. 𑁨.𑁧𑁩𑁪 𑀆𑀤𑀬𑁄) 𑀤𑀻𑀧𑁂𑀢𑀩𑁆𑀩𑁄. 𑀢𑀢𑁆𑀣 𑀳𑀺 𑀩𑀳𑀽𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀧𑀜𑁆𑀜𑀢𑁆𑀢𑁂𑀲𑀼, 𑀧𑀜𑁆𑀜𑀧𑀺𑀬𑀫𑀸𑀦𑁂𑀲𑀼 𑀘 ‘‘𑀦 𑀢𑀸𑀯 𑀪𑀤𑁆𑀤𑀸𑀮𑀺 𑀲𑀢𑁆𑀣𑀸 𑀲𑀸𑀯𑀓𑀸𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀧𑁂𑀢𑀻’’𑀢𑀺𑀆𑀤𑀺 (𑀫. 𑀦𑀺. 𑁨.𑁧𑁪𑁫) 𑀯𑀼𑀢𑁆𑀢𑀁 𑀅𑀧𑀜𑁆𑀜𑀢𑁆𑀢𑀁 𑀉𑀧𑀸𑀤𑀸𑀬, 𑀢𑀣𑀸 𑀇𑀥𑀸𑀧𑀺 𑀅𑀧𑀜𑁆𑀜𑀢𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀧𑀭𑀺𑀲𑀼𑀤𑁆𑀥𑀢𑁆𑀢𑀸 𑀲𑀗𑁆𑀖𑀲𑁆𑀲 𑀲𑀫𑁆𑀧𑀢𑀺 𑀲𑀸𑀯𑀓𑀸𑀦𑀁 𑀆𑀡𑀸𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀦𑀸𑀦𑀼𑀚𑀸𑀦𑀸𑀫𑀻𑀢𑀺 𑀤𑀲𑁆𑀲𑁂𑀦𑁆𑀢𑁄 ‘‘𑀦𑀺𑀭𑀩𑁆𑀩𑀼𑀤𑁄’’𑀢𑀺𑀆𑀤𑀺𑀫𑀸𑀳. 𑀦 𑀳𑀺 𑀧𑀭𑀺𑀲𑀼𑀤𑁆𑀥𑁂 𑀲𑀗𑁆𑀖𑁂 𑀑𑀯𑀸𑀤𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀲𑁆𑀲 𑀅𑀦𑀼𑀤𑁆𑀤𑁂𑀲𑀓𑀸𑀭𑀡𑀁 𑀅𑀢𑁆𑀣𑀺, 𑀢𑀲𑁆𑀫𑀺𑀁 𑀲𑀢𑀺 𑀆𑀡𑀸𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀸𑀦𑀼𑀚𑀸𑀦𑀦𑀸𑀥𑀺𑀧𑁆𑀧𑀸𑀬𑀢𑁄. 𑀢𑀣𑀸 𑀘 𑀲𑁄 𑀢𑀢𑁄 𑀅𑀝𑁆𑀞𑀦𑁆𑀦𑀁𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀅𑀦𑀼𑀜𑁆𑀜𑀸𑀢𑁄. 𑀬𑀣𑀸𑀳 𑀧𑀸𑀢𑀺𑀫𑁄𑀓𑁆𑀔𑀞𑀧𑀦𑀓𑁆𑀔𑀦𑁆𑀥𑀓𑁂 (𑀘𑀽𑀴𑀯. 𑁩𑁮𑁬) ‘‘𑀦 𑀤𑀸𑀦𑀸𑀳𑀁, 𑀪𑀺𑀓𑁆𑀔𑀯𑁂, 𑀇𑀢𑁄 𑀧𑀭𑀁 𑀉𑀧𑁄𑀲𑀣𑀁 𑀓𑀭𑀺𑀲𑁆𑀲𑀸𑀫𑀺…𑀧𑁂… 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣𑀸’’𑀢𑀺. 𑀬𑀁 𑀧𑀦 𑀉𑀧𑀲𑀫𑁆𑀧𑀤𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁧𑁨𑁯) ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽 𑀅𑀜𑁆𑀜𑀢𑀭𑀁 𑀪𑀺𑀓𑁆𑀔𑀼𑀁 𑀉𑀧𑀲𑀫𑁆𑀧𑀸𑀤𑁂𑀢𑁆𑀯𑀸 𑀏𑀓𑀓𑀁 𑀑𑀳𑀸𑀬 𑀧𑀓𑁆𑀓𑀫𑀺𑀁𑀲𑀼…𑀧𑁂… 𑀲𑁄 𑀢𑀲𑁆𑀲𑀸 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀺𑀢𑁆𑀯𑀸 𑀘𑀺𑀭𑁂𑀦 𑀅𑀕𑀫𑀸𑀲𑀻’’𑀢𑀺 𑀯𑀢𑁆𑀣𑀼 𑀆𑀕𑀢𑀁, 𑀢𑀁 𑀲𑀼𑀤𑀺𑀦𑁆𑀦𑀯𑀢𑁆𑀣𑀼𑀢𑁄 𑀧𑀭𑀢𑁄 𑀉𑀧𑁆𑀧𑀦𑁆𑀦𑀫𑁆𑀧𑀺 𑀢𑀢𑁆𑀣 𑀬𑀣𑀸𑀥𑀺𑀓𑀸𑀭𑀁 𑀲𑀫𑁄𑀥𑀸𑀦𑁂𑀢𑀼𑀁 𑀯𑀼𑀢𑁆𑀢𑀁. 𑀢𑀣𑀸 𑀢𑀢𑁆𑀣𑁂𑀯 ‘‘𑀉𑀪𑀬𑀸𑀦𑀺 𑀔𑁄 𑀧𑀦𑀲𑁆𑀲 𑀧𑀸𑀢𑀺𑀫𑁄𑀓𑁆𑀔𑀸𑀦𑀺 𑀯𑀺𑀢𑁆𑀣𑀸𑀭𑁂𑀦 𑀲𑁆𑀯𑀸𑀕𑀢𑀸𑀦𑀺 𑀳𑁄𑀦𑁆𑀢𑀻’’𑀢𑀺𑀆𑀤𑀺𑀦𑀸 (𑀧𑀸𑀘𑀺. 𑁧𑁪𑁭; 𑀅. 𑀦𑀺. 𑁮.𑁫𑁨; 𑁧𑁦.𑁩𑁩) 𑀅𑀗𑁆𑀕𑀸𑀦𑀺𑀧𑀺 𑀯𑁂𑀤𑀺𑀢𑀩𑁆𑀩𑀸𑀦𑀺. 𑀦 𑀳𑀺 𑀆𑀤𑀺𑀢𑁄 𑀏𑀯 𑀉𑀪𑀢𑁄𑀧𑀸𑀢𑀺𑀫𑁄𑀓𑁆𑀔𑀸𑀦𑀺 𑀲𑀺𑀤𑁆𑀥𑀸𑀦𑀻𑀢𑀺. 𑀅𑀧𑀺𑀘 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀅𑀬𑀫𑀦𑀼𑀓𑁆𑀓𑀫𑁄 𑀯𑁂𑀤𑀺𑀢𑀩𑁆𑀩𑁄, 𑀲𑁂𑀬𑁆𑀬𑀣𑀺𑀤𑀁 𑁋 𑀭𑀸𑀳𑀼𑀮𑀓𑀼𑀫𑀸𑀭𑁂 𑀉𑀧𑁆𑀧𑀦𑁆𑀦𑁂 𑀩𑁄𑀥𑀺𑀲𑀢𑁆𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀙𑀩𑁆𑀩𑀲𑁆𑀲𑀸𑀦𑀺 𑀤𑀼𑀓𑁆𑀓𑀭𑀁 𑀓𑀢𑁆𑀯𑀸 𑀲𑀢𑁆𑀢𑀫𑁂 𑀅𑀪𑀺𑀲𑀫𑁆𑀩𑀼𑀤𑁆𑀥𑁄, 𑀢𑀲𑁆𑀫𑀺𑀁 𑀏𑀯 𑀲𑀁𑀯𑀘𑁆𑀙𑀭𑁂 𑀓𑀧𑀺𑀮𑀯𑀢𑁆𑀣𑀼𑀁 𑀕𑀦𑁆𑀢𑁆𑀯𑀸 𑀭𑀸𑀳𑀼𑀮𑀓𑀼𑀫𑀸𑀭𑀁 𑀧𑀩𑁆𑀩𑀸𑀚𑁂𑀲𑀺. 𑀅𑀫𑁆𑀩𑀮𑀝𑁆𑀞𑀺𑀓𑀭𑀸𑀳𑀼𑀮𑁄𑀯𑀸𑀤𑀲𑀼𑀢𑁆𑀢𑀝𑁆𑀞𑀓𑀣𑀸𑀬𑀁 (𑀫. 𑀦𑀺. 𑀅𑀝𑁆𑀞. 𑁨.𑁧𑁦𑁭 𑀆𑀤𑀬𑁄) ‘‘𑀅𑀬𑀜𑁆𑀳𑀺 𑀆𑀬𑀲𑁆𑀫𑀸 𑀲𑀢𑁆𑀢𑀯𑀲𑁆𑀲𑀺𑀓𑀓𑀸𑀮𑁂 𑀪𑀕𑀯𑀦𑁆𑀢𑀁 𑀘𑀻𑀯𑀭𑀓𑀡𑁆𑀡𑁂 𑀕𑀳𑁂𑀢𑁆𑀯𑀸 ‘𑀤𑀸𑀬𑀚𑁆𑀚𑀁 𑀫𑁂 𑀲𑀫𑀡 𑀤𑁂𑀳𑀺, 𑀤𑀸𑀬𑀚𑁆𑀚𑀁 𑀫𑁂 𑀲𑀫𑀡 𑀤𑁂𑀳𑀻’𑀢𑀺 𑀤𑀸𑀬𑀚𑁆𑀚𑀁 𑀬𑀸𑀘𑀫𑀸𑀦𑁄 𑀪𑀕𑀯𑀢𑀸 𑀥𑀫𑁆𑀫𑀲𑁂𑀦𑀸𑀧𑀢𑀺𑀲𑀸𑀭𑀺𑀧𑀼𑀢𑁆𑀢𑀢𑁆𑀣𑁂𑀭𑀲𑁆𑀲 𑀦𑀺𑀬𑁆𑀬𑀸𑀤𑁂𑀢𑁆𑀯𑀸 𑀧𑀩𑁆𑀩𑀸𑀚𑀺𑀢𑁄’’𑀢𑀺 𑀘 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀭𑀸𑀳𑀼𑀮𑀓𑀼𑀫𑀸𑀭𑀁 𑀆𑀭𑀩𑁆𑀪 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀻𑀳𑀺 𑀲𑀭𑀡𑀕𑀫𑀦𑁂𑀳𑀺 𑀲𑀸𑀫𑀡𑁂𑀭𑀧𑀩𑁆𑀩𑀚𑁆𑀚’’𑀦𑁆𑀢𑀺 (𑀫𑀳𑀸𑀯. 𑁧𑁦𑁫) 𑀯𑀼𑀢𑁆𑀢𑀢𑁆𑀢𑀸 𑀲𑀭𑀡𑀕𑀫𑀦𑀽𑀧𑀲𑀫𑁆𑀧𑀤𑀸 𑀧𑀞𑀫𑀯𑀲𑁆𑀲𑀩𑁆𑀪𑀦𑁆𑀢𑀭𑁂 𑀏𑀯 𑀧𑀝𑀺𑀓𑁆𑀔𑀺𑀢𑁆𑀢𑀸, 𑀜𑀢𑁆𑀢𑀺𑀘𑀢𑀼𑀢𑁆𑀣𑀓𑀫𑁆𑀫𑀯𑀲𑁂𑀦 𑀉𑀧𑀲𑀫𑁆𑀧𑀤𑀸 𑀅𑀦𑀼𑀜𑁆𑀜𑀸𑀢𑀸𑀢𑀺 𑀧𑀜𑁆𑀜𑀸𑀬𑀢𑀺. 𑀅𑀧𑀺𑀘 𑀭𑀸𑀳𑀼𑀮𑀯𑀢𑁆𑀣𑀼𑀫𑁆𑀳𑀺 ‘‘𑀦, 𑀪𑀺𑀓𑁆𑀔𑀯𑁂, 𑀅𑀦𑀦𑀼𑀜𑁆𑀜𑀸𑀢𑁄 𑀫𑀸𑀢𑀸𑀧𑀺𑀢𑀽𑀳𑀺 𑀧𑀼𑀢𑁆𑀢𑁄 𑀧𑀩𑁆𑀩𑀸𑀚𑁂𑀢𑀩𑁆𑀩𑁄, 𑀬𑁄 𑀧𑀩𑁆𑀩𑀸𑀚𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁧𑁦𑁫) 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀢𑀲𑁆𑀫𑀸 𑀇𑀢𑁄 𑀧𑀼𑀩𑁆𑀩𑁂𑀧𑀺 𑀲𑀺𑀓𑁆𑀔𑀸𑀧𑀤𑀸𑀦𑀺 𑀧𑀜𑁆𑀜𑀢𑁆𑀢𑀸𑀦𑀻𑀢𑀺 𑀲𑀺𑀤𑁆𑀥𑀁.

𑀲𑀼𑀢𑁆𑀯𑀸 𑀘 𑀬𑁄 𑀳𑁂𑀢𑀼𑀦𑀺𑀭𑁄𑀥𑀫𑀕𑁆𑀕𑀁,

𑀦𑀺𑀭𑁄𑀥𑀼𑀧𑀸𑀬𑀁 𑀧𑀝𑀺𑀯𑀺𑀚𑁆𑀛𑀺 𑀔𑀺𑀧𑁆𑀧𑀁;

𑀚𑀸𑀢𑁄𑀯𑀧𑁂𑀓𑁆𑀔𑁂𑀦 𑀅𑀲𑁂𑀲𑀫𑁂𑀢𑀁,

𑀮𑁄𑀓𑀁 𑀯𑀺𑀧𑀲𑁆𑀲𑀻 𑀲𑀼𑀕𑀢𑀕𑁆𑀕𑀲𑀺𑀲𑁆𑀲𑁄.

𑀲𑁄 𑀥𑀫𑁆𑀫𑀲𑁂𑀦𑀸𑀧𑀢𑀺 𑀅𑀕𑁆𑀕𑀲𑀺𑀲𑁆𑀲𑁄,

𑀲𑀤𑁆𑀥𑀫𑁆𑀫𑀭𑀸𑀚𑀲𑁆𑀲 𑀢𑀣𑀸𑀕𑀢𑀲𑁆𑀲;

𑀲𑀬𑀁 𑀫𑀼𑀦𑀺𑀦𑁆𑀤𑁂𑀦 𑀬𑀲𑀲𑁆𑀲 𑀧𑀢𑁆𑀢𑁄,

𑀅𑀦𑁂𑀓𑀲𑁄 𑀲𑁄𑀴𑀲𑀥𑀸 𑀧𑀲𑀢𑁆𑀣𑁄.

𑀢𑀲𑁆𑀫𑀸 𑀳𑀺 𑀲𑀺𑀓𑁆𑀔𑀸𑀧𑀤𑀩𑀦𑁆𑀥𑀓𑀸𑀮𑁄,

𑀜𑀸𑀢𑀼𑀫𑁆𑀧𑀺 𑀮𑁄𑀓𑁂 𑀅𑀢𑀺𑀪𑀸𑀭𑀺𑀬𑁄𑀯;

𑀧𑀕𑁂𑀯 𑀲𑀺𑀓𑁆𑀔𑀸𑀧𑀤𑀪𑀸𑀯𑀪𑁂𑀤𑁄,

𑀧𑀕𑁂𑀯 𑀅𑀜𑁆𑀜𑁄 𑀉𑀪𑀬𑀢𑁆𑀣 𑀢𑀢𑁆𑀣.

𑀧𑀘𑁆𑀘𑁂𑀓𑀩𑀼𑀤𑁆𑀥𑀸 𑀅𑀧𑀺 𑀢𑀁 𑀤𑁆𑀯𑀬𑀦𑁆𑀢𑀼,

𑀜𑀸𑀢𑀼𑀁 𑀦 𑀲𑀓𑁆𑀓𑀸𑀯 𑀧𑀕𑁂𑀯 𑀦𑁂𑀢𑀼𑀁;

𑀦𑀺𑀲𑁆𑀲𑀁𑀲𑀬𑀁 𑀢𑀢𑁆𑀣 𑀢𑀣𑀸𑀕𑀢𑁄𑀯,

𑀚𑀸𑀦𑀺𑀲𑁆𑀲𑀢𑀺𑀘𑁆𑀘𑀸𑀳 𑀢𑀣𑀸𑀕𑀢𑁄𑀢𑀺.

𑀇𑀘𑁆𑀘𑁂𑀢𑀫𑀢𑁆𑀣𑀁 𑀇𑀥 𑀪𑀺𑀓𑁆𑀔𑀼 𑀜𑀢𑁆𑀯𑀸,

𑀲𑀺𑀓𑁆𑀔𑀸𑀧𑀤𑀸𑀦𑀁 𑀓𑀫𑀪𑀸𑀯𑀪𑁂𑀤𑀁;

𑀜𑀸𑀢𑀼𑀁 𑀲𑀬𑀁 𑀦𑁄 𑀦 𑀧𑀭𑁂 𑀘 𑀦𑁂𑀢𑀼𑀁,

𑀧𑀭𑀺𑀬𑁂𑀲𑀺𑀢𑀩𑁆𑀩𑁄 𑀇𑀥 𑀬𑀼𑀢𑁆𑀢𑀺𑀫𑀕𑁆𑀕𑁄.

𑀢𑀢𑁆𑀣 𑀓𑀫𑀪𑁂𑀤𑁄 𑀲𑀺𑀓𑁆𑀔𑀸𑀧𑀤𑀸𑀦𑀁 𑀧𑀭𑀢𑁄 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀪𑀸𑀯𑀪𑁂𑀤𑁄 𑀢𑀸𑀯 𑀉𑀓𑁆𑀔𑀺𑀢𑁆𑀢𑀓𑀸𑀦𑀼𑀯𑀢𑁆𑀢𑀦𑀧𑀘𑁆𑀘𑀬𑀸 𑀪𑀺𑀓𑁆𑀔𑀼 𑀅𑀦𑀸𑀧𑀢𑁆𑀢𑀺𑀓𑁄, 𑀪𑀺𑀓𑁆𑀔𑀼𑀦𑀻 𑀧𑀦 𑀲𑀫𑀦𑀼𑀪𑀝𑁆𑀞𑀸 𑀧𑀸𑀭𑀸𑀚𑀺𑀓𑀸 𑀳𑁄𑀢𑀺. 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀧𑀝𑀺𑀘𑁆𑀙𑀸𑀤𑀦𑁂 𑀪𑀺𑀓𑁆𑀔𑀼𑀲𑁆𑀲 𑀤𑀼𑀓𑁆𑀓𑀝𑀁, 𑀪𑀺𑀓𑁆𑀔𑀼𑀦𑀺𑀬𑀸 𑀧𑀸𑀭𑀸𑀚𑀺𑀓𑀁. 𑀤𑀼𑀝𑁆𑀞𑀼𑀮𑁆𑀮𑀁 𑀆𑀭𑁄𑀘𑁂𑀦𑁆𑀢𑀲𑁆𑀲, 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀲𑁆𑀲 𑀘 𑀧𑀸𑀘𑀺𑀢𑁆𑀢𑀺𑀬𑀁. 𑀫𑀳𑀸𑀲𑀸𑀯𑀚𑁆𑀚𑀁 𑀧𑀸𑀭𑀸𑀚𑀺𑀓𑀁 𑀆𑀭𑁄𑀘𑁂𑀦𑁆𑀢𑀲𑁆𑀲, 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀲𑁆𑀲 𑀘 𑀪𑀺𑀓𑁆𑀔𑀼𑀲𑁆𑀲 𑀤𑀼𑀓𑁆𑀓𑀝𑀁. 𑀇𑀘𑁆𑀘𑁂𑀯𑀫𑀸𑀤𑀻𑀳𑀺 𑀅𑀪𑀸𑀯𑀪𑁂𑀤𑀲𑀺𑀓𑁆𑀔𑀸𑀧𑀤𑀸𑀦𑀁 𑀇𑀥 𑀪𑀸𑀯𑀪𑁂𑀤𑁂𑀦 𑀬𑀼𑀢𑁆𑀢𑀺𑀧𑀭𑀺𑀬𑁂𑀲𑀦𑀁 𑀲𑀸𑀥𑀬𑀫𑀸𑀦𑁄𑀧𑀺 𑀲𑀺𑀬𑀸 𑀅𑀦𑀼𑀫𑁆𑀫𑀸𑀤𑀯𑀺𑀖𑀸𑀢𑀪𑀸𑀕𑀻𑀢𑀺. 𑀏𑀢𑁆𑀢𑀸𑀯𑀢𑀸 𑀲𑀓𑀮𑀲𑁆𑀲𑀧𑀺 𑀯𑀺𑀦𑀬𑀧𑀺𑀝𑀓𑀲𑁆𑀲 𑀯𑀺𑀢𑀓𑁆𑀓𑀬𑀸𑀘𑀦𑀓𑀸𑀮𑀓𑀸𑀮𑀜𑁆𑀜𑀽𑀓𑀸𑀭𑀡𑀨𑀮𑀧𑀬𑁄𑀚𑀦𑁂𑀳𑀺 𑀲𑀢𑁆𑀢𑀳𑀺 𑀅𑀗𑁆𑀕𑁂𑀳𑀺 𑀧𑀝𑀺𑀫𑀡𑁆𑀟𑀺𑀢𑀁 𑀦𑀺𑀤𑀸𑀦𑀫𑀸𑀬𑀲𑁆𑀫𑀢𑀸 𑀉𑀧𑀸𑀮𑀺𑀢𑁆𑀣𑁂𑀭𑁂𑀦 𑀦𑀺𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀢𑀢𑁆𑀣 𑀣𑁂𑀭𑀲𑁆𑀲 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀳𑁂𑀢𑀼𑀪𑀽𑀢𑁄 𑀯𑀺𑀢𑀓𑁆𑀓𑁄 𑀦𑀸𑀫. 𑀢𑀲𑁆𑀲𑁂𑀯 ‘‘𑀏𑀢𑀲𑁆𑀲 𑀪𑀕𑀯𑀸 𑀓𑀸𑀮𑁄’’𑀢𑀺𑀆𑀤𑀺𑀦𑀸 𑀧𑀯𑀢𑁆𑀢𑀸 𑀬𑀸𑀘𑀦𑀸 𑀦𑀸𑀫. 𑀭𑀢𑁆𑀢𑀜𑁆𑀜𑀽𑀯𑁂𑀧𑀼𑀮𑁆𑀮𑀮𑀸𑀪𑀕𑁆𑀕𑀩𑀸𑀳𑀼𑀲𑀘𑁆𑀘𑀫𑀳𑀢𑁆𑀢𑀧𑁆𑀧𑀢𑁆𑀢𑀺 𑀓𑀸𑀮𑁄 𑀦𑀸𑀫. 𑀲𑀩𑁆𑀩𑀜𑁆𑀜𑀽 𑀏𑀯 𑀓𑀸𑀮𑀜𑁆𑀜𑀽 𑀦𑀸𑀫. 𑀆𑀲𑀯𑀝𑁆𑀞𑀸𑀦𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀧𑀸𑀢𑀼𑀪𑀸𑀯𑁄 𑀓𑀸𑀭𑀡𑀁 𑀦𑀸𑀫. ‘‘𑀢𑁂𑀲𑀁𑀬𑁂𑀯 𑀆𑀲𑀯𑀝𑁆𑀞𑀸𑀦𑀻𑀬𑀸𑀦𑀁 𑀥𑀫𑁆𑀫𑀸𑀦𑀁 𑀧𑀝𑀺𑀖𑀸𑀢𑀸𑀬𑀸’’𑀢𑀺 𑀯𑀘𑀦𑀢𑁄 𑀆𑀲𑀯𑀝𑁆𑀞𑀸𑀦𑀻𑀬𑀥𑀫𑁆𑀫𑀧𑀝𑀺𑀖𑀸𑀢𑁄 𑀨𑀮𑀁 𑀦𑀸𑀫. ‘‘𑀬𑀣𑀬𑀺𑀤𑀁 𑀩𑁆𑀭𑀳𑁆𑀫𑀘𑀭𑀺𑀬𑀁 𑀅𑀤𑁆𑀥𑀦𑀺𑀬𑀁 𑀅𑀲𑁆𑀲𑀸’’𑀢𑀺 𑀯𑀘𑀦𑀢𑁄 𑀲𑀸𑀲𑀦𑀩𑁆𑀭𑀳𑁆𑀫𑀘𑀭𑀺𑀬𑀲𑁆𑀲 𑀘𑀺𑀭𑀝𑁆𑀞𑀺𑀢𑀺 𑀧𑀬𑁄𑀚𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀯𑀺𑀢𑀓𑁆𑀓𑁄 𑀬𑀸𑀘𑀦𑀸 𑀓𑀸𑀮𑁄, 𑀓𑀸𑀮𑀜𑁆𑀜𑀽 𑀓𑀸𑀭𑀡𑀁 𑀨𑀮𑀁;

𑀧𑀬𑁄𑀚𑀦𑀦𑁆𑀢𑀺 𑀲𑀢𑁆𑀢𑀗𑁆𑀕𑀁, 𑀦𑀺𑀤𑀸𑀦𑀁 𑀯𑀺𑀦𑀬𑀲𑁆𑀲𑀺𑀥𑀸’’𑀢𑀺.

𑁨𑁨. 𑀅𑀦𑁆𑀢𑀺𑀫𑀫𑀡𑁆𑀟𑀮𑀦𑁆𑀢𑀺 𑀅𑀩𑁆𑀪𑀦𑁆𑀢𑀭𑀫𑀡𑁆𑀟𑀮𑀁. 𑀢𑀜𑁆𑀳𑀺 𑀇𑀢𑀭𑁂𑀲𑀁 𑀅𑀦𑁆𑀢𑁄 𑀳𑁄𑀢𑀺, 𑀔𑀼𑀤𑁆𑀤𑀓𑀫𑀡𑁆𑀟𑀮𑀁 𑀯𑀸. 𑀅𑀦𑀼𑀫𑀢𑀺𑀤𑀸𑀦𑀯𑀲𑁂𑀦 𑀢𑁂𑀲𑀁 𑀪𑀺𑀓𑁆𑀔𑀽𑀦𑀁 𑀤𑀢𑁆𑀯𑀸. 𑀢𑁂𑀲𑀁 𑀩𑀼𑀤𑁆𑀥𑀸𑀦𑀁 𑀘𑀸𑀭𑀺𑀓𑀸𑀬 𑀯𑀺𑀦𑁂𑀢𑀩𑁆𑀩𑀸 𑀯𑁂𑀦𑁂𑀬𑁆𑀬𑀲𑀢𑁆𑀢𑀸. 𑀑𑀘𑀺𑀦𑀦𑁆𑀢𑀸 𑀯𑀺𑀬𑀸𑀢𑀺 𑀩𑀳𑀼𑀧𑀼𑀧𑁆𑀨𑀁 𑀕𑀘𑁆𑀙𑀁 𑀫𑀸𑀮𑀸𑀓𑀸𑀭𑀸 𑀘𑀺𑀭𑀁 𑀑𑀘𑀺𑀦𑀦𑁆𑀢𑀺, 𑀏𑀯𑀁 𑀩𑀳𑀼𑀯𑁂𑀦𑁂𑀬𑁆𑀬𑁂𑀲𑀼 𑀕𑀸𑀫𑀸𑀤𑀻𑀲𑀼 𑀘𑀺𑀭𑀁 𑀯𑀲𑀦𑁆𑀢𑀸 𑀯𑁂𑀦𑁂𑀬𑁆𑀬𑀧𑀼𑀜𑁆𑀜𑀁 𑀧𑀭𑀺𑀳𑀭𑀦𑁆𑀢𑀸 𑀘𑀭𑀦𑁆𑀢𑀺. 𑀲𑀦𑁆𑀢𑀁 𑀲𑀼𑀔𑀁, 𑀦 𑀯𑁂𑀤𑀦𑀸𑀲𑀼𑀔𑀁 𑀯𑀺𑀬 𑀲𑀧𑀭𑀺𑀧𑁆𑀨𑀦𑁆𑀤𑀁. 𑀤𑀲𑀲𑀳𑀲𑁆𑀲𑀘𑀓𑁆𑀓𑀯𑀸𑀴𑁂𑀢𑀺 𑀤𑁂𑀯𑀸𑀦𑀁 𑀯𑀲𑁂𑀦 𑀯𑀼𑀢𑁆𑀢𑀁. 𑀫𑀦𑀼𑀲𑁆𑀲𑀸 𑀧𑀦 𑀇𑀫𑀲𑁆𑀫𑀺𑀁𑀬𑁂𑀯 𑀘𑀓𑁆𑀓𑀯𑀸𑀴𑁂 𑀩𑁄𑀥𑀦𑁂𑀬𑁆𑀬𑀸 𑀉𑀧𑁆𑀧𑀚𑁆𑀚𑀦𑁆𑀢𑀺. 𑀫𑀳𑀸𑀓𑀭𑀼𑀡𑀸𑀬 𑀥𑀼𑀯𑀁 𑀲𑀢𑁆𑀢𑀲𑀫𑀯𑀮𑁄𑀓𑀦𑀁. 𑀑𑀢𑀺𑀡𑁆𑀡𑁂𑀢𑀺 𑀧𑀭𑀺𑀲𑀫𑀚𑁆𑀛𑀁 𑀆𑀕𑀢𑁂, 𑀆𑀭𑁄𑀘𑀺𑀢𑁂 𑀯𑀸. 𑀬𑁂𑀦 𑀓𑀸𑀭𑀡𑁂𑀦 𑀫𑀬𑀁 𑀢𑀼𑀫𑁆𑀳𑀸𑀓𑀁 𑀤𑁂𑀬𑁆𑀬𑀥𑀫𑁆𑀫𑀁 𑀤𑀤𑁂𑀬𑁆𑀬𑀸𑀫, 𑀢𑀁 𑀓𑀼𑀢𑁄 𑀲𑀓𑁆𑀓𑀸 𑀮𑀤𑁆𑀥𑀼𑀁. 𑀩𑀳𑀼𑀓𑀺𑀘𑁆𑀘𑀸 𑀳𑀺 𑀖𑀭𑀸𑀯𑀸𑀲𑀸𑀢𑀺. 𑀤𑀼𑀢𑀺𑀬𑀯𑀺𑀓𑀧𑁆𑀧𑁂 𑀢𑀦𑁆𑀢𑀺 𑀤𑁂𑀬𑁆𑀬𑀥𑀫𑁆𑀫𑀁. ‘‘𑀢𑀼𑀫𑁆𑀳𑁂𑀳𑀺 𑀢𑀁 𑀓𑀼𑀢𑁄 𑀮𑀤𑁆𑀥𑀸’’𑀢𑀺 𑀅𑀦𑀼𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀓𑁂𑀘𑀺 𑀧𑀦 ‘‘𑀧𑀞𑀫𑀁 𑀓𑀺𑀭𑀺𑀬𑀁 𑀧𑁂𑀓𑁆𑀔𑀢𑀺, 𑀤𑀼𑀢𑀺𑀬𑀁 𑀤𑁂𑀬𑁆𑀬𑀥𑀫𑁆𑀫’’𑀦𑁆𑀢𑀺 𑀯𑀤𑀦𑁆𑀢𑀺. 𑀆𑀘𑀭𑀺𑀬𑁄 𑀧𑀦 ‘‘𑀧𑀞𑀫𑀬𑁄𑀚𑀦𑀸𑀬 𑀬𑀁 𑀤𑀸𑀦𑀧𑀼𑀜𑁆𑀜𑀁, 𑀢𑀁 𑀓𑀼𑀢𑁄 𑀮𑀩𑁆𑀪𑀸. 𑀧𑀼𑀜𑁆𑀜𑀦𑁆𑀢𑀭𑀸𑀬𑀩𑀳𑀼𑀮𑀸 𑀳𑀺 𑀖𑀭𑀸𑀯𑀸𑀲𑀸𑀢𑀺. 𑀤𑀼𑀢𑀺𑀬𑀬𑁄𑀚𑀦𑀸𑀬 𑀢𑁂𑀫𑀸𑀲𑀩𑁆𑀪𑀦𑁆𑀢𑀭𑁂 𑀬𑀫𑀳𑀁 𑀤𑀤𑁂𑀬𑁆𑀬𑀁, 𑀅𑀢𑀺𑀓𑁆𑀓𑀦𑁆𑀢𑀓𑀸𑀮𑀢𑁆𑀢𑀸 𑀢𑀫𑀳𑀁 𑀲𑀫𑁆𑀧𑀢𑀺 𑀓𑀼𑀢𑁄 𑀤𑀤𑁂𑀬𑁆𑀬𑀦𑁆𑀢𑀺 𑀤𑀲𑁆𑀲𑁂𑀢𑀻’’𑀢𑀺 𑀯𑀤𑀢𑀺. 𑀲𑀻𑀮𑀸𑀤𑀺𑀓𑀼𑀲𑀮𑀥𑀫𑁆𑀫𑀲𑀦𑁆𑀤𑀲𑁆𑀲𑀦𑀸𑀤𑀺𑀥𑀫𑁆𑀫𑀭𑀢𑀦𑀯𑀲𑁆𑀲𑀁.

𑁨𑁩. 𑀧𑀢𑁆𑀢𑀼𑀡𑁆𑀡𑀤𑁂𑀲𑁂 𑀧𑀢𑁆𑀢𑀼𑀡𑁆𑀡𑀁 𑀧𑀝𑀯𑀭𑀁. 𑀫𑀳𑀸𑀬𑀸𑀕𑀦𑁆𑀢𑀺 𑀫𑀳𑀸𑀤𑀸𑀦𑀁. 𑀧𑀭𑀺𑀧𑀼𑀡𑁆𑀡𑀲𑀗𑁆𑀓𑀧𑁆𑀧𑀦𑁆𑀢𑀺 𑀢𑁂𑀫𑀸𑀲𑀁 𑀲𑁄𑀢𑀩𑁆𑀩𑀁 𑀅𑀚𑁆𑀚 𑀲𑀼𑀡𑀺𑀦𑁆𑀢𑀺.

𑀢𑀢𑁆𑀭𑀺𑀤𑀦𑁆𑀢𑀺 𑀇𑀤𑀁 𑀓𑀸𑀭𑀡𑀁.

𑀉𑀧𑀸𑀮𑀺 𑀤𑀸𑀲𑀓𑁄𑀢𑀺 𑀆𑀘𑀭𑀺𑀬𑀧𑀭𑀫𑁆𑀧𑀭𑀢𑁄. 𑀩𑀸𑀳𑀺𑀭𑀩𑁆𑀪𑀦𑁆𑀢𑀭𑀦𑀺𑀤𑀸𑀦𑀁, 𑀲𑀺𑀓𑁆𑀔𑀸𑀧𑀤𑀸𑀦𑀁 𑀧𑀜𑁆𑀜𑀢𑁆𑀢𑀺𑀝𑁆𑀞𑀸𑀦𑀲𑀗𑁆𑀔𑀸𑀢𑀁 𑀆𑀯𑁂𑀡𑀺𑀓𑀦𑀺𑀤𑀸𑀦𑀜𑁆𑀘 𑀲𑀦𑁆𑀥𑀸𑀬𑀸𑀳 ‘‘𑀦𑀺𑀤𑀸𑀦𑀲𑁆𑀲 𑀧𑀪𑁂𑀤𑀤𑀻𑀧𑀦𑀢𑁄’’𑀢𑀺. 𑀣𑁂𑀭𑀯𑀸𑀤𑀸𑀤𑀺 𑀯𑀢𑁆𑀣𑀼𑀧𑁆𑀧𑀪𑁂𑀤𑁄. 𑀲𑀓𑀸𑀬 𑀧𑀝𑀺𑀜𑁆𑀜𑀸𑀬 𑀫𑁂𑀢𑁆𑀢𑀺𑀬𑀁 𑀪𑀺𑀓𑁆𑀔𑀼𑀦𑀺𑀁 𑀦𑀸𑀲𑁂𑀣𑀸𑀢𑀺𑀆𑀤𑀺 𑀧𑀭𑀲𑀫𑀬𑀯𑀺𑀯𑀚𑁆𑀚𑀦𑀢𑁄𑀢𑀺𑀆𑀤𑀺. 𑀯𑀺𑀪𑀗𑁆𑀕𑀦𑀬𑀪𑁂𑀤𑀤𑀲𑁆𑀲𑀦𑀢𑁄𑀢𑀺 𑀢𑀺𑀲𑁆𑀲𑁄 𑀇𑀢𑁆𑀣𑀺𑀬𑁄 𑀪𑀽𑀫𑀝𑁆𑀞𑀁 𑀣𑀮𑀝𑁆𑀞𑀦𑁆𑀢𑀺𑀆𑀤𑀺. 𑀏𑀢𑁆𑀣𑀸𑀳 𑁋 𑀓𑀺𑀁 𑀪𑀕𑀯𑀢𑁄 𑀫𑀸𑀭𑀸𑀯𑀝𑁆𑀝𑀦𑀧𑀝𑀺𑀖𑀸𑀢𑀸𑀬 𑀲𑀢𑁆𑀢𑀺 𑀦𑀢𑁆𑀣𑀻𑀢𑀺? 𑀅𑀢𑁆𑀣𑀺, 𑀢𑀣𑀸𑀧𑀺𑀲𑁆𑀲 𑀧𑀘𑁆𑀙𑀸 𑀉𑀧𑀕𑀼𑀢𑁆𑀢𑀓𑀸𑀮𑁂 𑀧𑀲𑀸𑀤𑀳𑁂𑀢𑀼𑀢𑁆𑀢𑀸 𑀅𑀥𑀺𑀯𑀸𑀲𑁂𑀢𑀺. 𑀏𑀢𑁆𑀣 𑀉𑀧𑀕𑀼𑀢𑁆𑀢𑀸𑀥𑀺𑀝𑁆𑀞𑀸𑀦𑀁 𑀯𑀢𑁆𑀢𑀩𑁆𑀩𑀁. 𑀩𑀼𑀤𑁆𑀥𑀸𑀦𑀁 𑀆𑀘𑀺𑀡𑁆𑀡𑀦𑁆𑀢𑀺 𑀤𑀺𑀚𑀤𑀲𑁆𑀲𑀦𑁂𑀦 𑀓𑀺𑀁𑀧𑀬𑁄𑀚𑀦𑀦𑁆𑀢𑀺 𑀘𑁂? 𑀫𑀸𑀭𑀸𑀯𑀝𑁆𑀝𑀦𑀳𑁂𑀢𑀼 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀜𑁆𑀜𑀦𑁆𑀢𑀭𑀸𑀬𑁄𑀢𑀺 𑀧𑀬𑁄𑀚𑀦𑀁.

𑀤𑀺𑀚𑁄𑀧𑀺 𑀲𑁄 𑀫𑀸𑀭𑀫𑀦𑁄𑀭𑀣𑀲𑁆𑀲,

𑀪𑀗𑁆𑀕𑀁 𑀓𑀭𑁄𑀦𑁆𑀢𑁄 𑀚𑀺𑀦𑀧𑀼𑀗𑁆𑀕𑀯𑀲𑁆𑀲;

𑀲𑀲𑁆𑀲𑀺𑀲𑁆𑀲𑀲𑀗𑁆𑀖𑀲𑁆𑀲 𑀅𑀤𑀸𑀲𑀺 𑀤𑀸𑀦𑀁,

𑀅𑀲𑁂𑀲𑀓𑀁 𑀓𑀧𑁆𑀧𑀺𑀬𑀪𑀡𑁆𑀟𑀪𑁂𑀤𑀁.

𑀓𑀺𑀁 𑀪𑀕𑀯𑀸 𑀲𑀲𑀺𑀲𑁆𑀲𑁄 𑀢𑀸𑀯 𑀫𑀳𑀦𑁆𑀢𑀁 𑀓𑀧𑁆𑀧𑀺𑀬𑀪𑀡𑁆𑀟𑀁 𑀉𑀩𑁆𑀪𑀡𑁆𑀟𑀺𑀓𑀁 𑀓𑀢𑁆𑀯𑀸 𑀅𑀕𑀫𑀸𑀲𑀻𑀢𑀺? 𑀦 𑀅𑀕𑀫𑀸𑀲𑀺, 𑀢𑁂𑀫𑀸𑀲𑀺𑀪𑀸𑀕𑀺𑀬𑀁 𑀧𑀦 𑀧𑀼𑀜𑁆𑀜𑀭𑀸𑀲𑀺𑀓𑀁 𑀤𑁂𑀬𑁆𑀬𑀥𑀫𑁆𑀫𑀁 𑀅𑀧𑁆𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀩𑁆𑀭𑀸𑀳𑁆𑀫𑀡𑀲𑁆𑀲 𑀉𑀧𑀸𑀬𑀢𑁄 𑀲𑀢𑁆𑀣𑀸 𑀅𑀤𑀸𑀲𑀺.

𑀢𑀤𑀜𑁆𑀜𑀣𑀸 𑀫𑀸𑀭𑀫𑀦𑁄𑀭𑀣𑁄𑀯,

𑀧𑀽𑀭𑁄 𑀲𑀺𑀬𑀸 𑀦𑁂𑀯 𑀤𑀺𑀚𑀲𑁆𑀲 𑀪𑀺𑀬𑁆𑀬𑁄;

𑀧𑀸𑀧𑀁 𑀫𑀳𑀦𑁆𑀢𑀁 𑀅𑀧𑀺 𑀧𑀸𑀧𑀼𑀡𑁂𑀬𑁆𑀬,

𑀫𑀺𑀘𑁆𑀙𑀸𑀪𑀺𑀫𑀸𑀦𑁂𑀦 𑀢𑀣𑀸𑀕𑀢𑁂 𑀲𑁄.

𑀢𑀲𑁆𑀫𑀸 𑀪𑀕𑀯𑀸 𑀅𑀲𑁆𑀲𑀸𑀤𑀺𑀬𑀦𑁆𑀢𑁄 𑀢𑀁 𑀤𑁂𑀬𑁆𑀬𑀥𑀫𑁆𑀫𑀁 𑀅𑀧𑁆𑀧𑀝𑀺𑀓𑁆𑀔𑀺𑀧𑀦𑁆𑀢𑁄 𑀉𑀧𑀸𑀬𑁂𑀦 𑀩𑁆𑀭𑀸𑀳𑁆𑀫𑀡𑀲𑁆𑀲 𑀧𑀼𑀜𑁆𑀜𑀩𑀼𑀤𑁆𑀥𑀺𑀁 𑀓𑀢𑁆𑀯𑀸, 𑀫𑀸𑀭𑀲𑁆𑀲 𑀘 𑀫𑀦𑁄𑀭𑀣𑀯𑀺𑀖𑀸𑀢𑀁 𑀓𑀢𑁆𑀯𑀸 𑀅𑀕𑀫𑀸𑀲𑀻𑀢𑀺, ‘‘𑀅𑀬𑀁 𑀦𑀬𑁄 𑀅𑀝𑁆𑀞𑀓𑀣𑀁 𑀯𑀺𑀦𑀸𑀧𑀺 𑀧𑀸𑀴𑀺𑀦𑀬𑀸𑀦𑀼𑀮𑁄𑀫𑀢𑁄 𑀲𑀺𑀤𑁆𑀥𑁄’’𑀢𑀺 𑀯𑀤𑀦𑁆𑀢𑀺. 𑀓𑀣𑀁? 𑁋

‘‘𑀲𑀢𑁆𑀣𑀸 𑀲𑀲𑀺𑀲𑁆𑀲𑁄 𑀬𑀤𑀺 𑀅𑀕𑁆𑀕𑀳𑁂𑀲𑀺,

𑀤𑀺𑀚𑀲𑁆𑀲 𑀢𑀁 𑀘𑀻𑀯𑀭𑀫𑀸𑀤𑀺𑀢𑁄𑀯;

𑀦𑀸𑀣𑀲𑁆𑀲 𑀦𑁄 𑀯𑀻𑀲𑀢𑀺𑀯𑀲𑁆𑀲𑀓𑀸𑀮𑁂,

𑀯𑀺𑀭𑀼𑀚𑁆𑀛𑀢𑁂 𑀚𑀻𑀯𑀓𑀬𑀸𑀘𑀦𑀸𑀧𑀺;

𑀢𑀣𑀸𑀧𑀺 𑀲𑀩𑁆𑀩𑀁 𑀲𑀼𑀯𑀺𑀘𑀸𑀭𑀬𑀺𑀢𑁆𑀯𑀸,

𑀬𑀼𑀢𑁆𑀢𑀁 𑀦𑀬𑀁 𑀘𑀺𑀦𑁆𑀢𑀬𑀺𑀢𑀼𑀁𑀯 𑀬𑀼𑀢𑁆𑀢’’𑀦𑁆𑀢𑀺.

𑀇𑀤𑀸𑀦𑀺 𑀆𑀬𑀲𑁆𑀫𑀸 𑀉𑀧𑀸𑀮𑀺𑀢𑁆𑀣𑁂𑀭𑁄 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸 𑀲𑀸𑀥𑀸𑀭𑀡𑀦𑀺𑀤𑀸𑀦𑀁 𑀤𑀲𑁆𑀲𑁂𑀢𑁆𑀯𑀸 𑀲𑀺𑀓𑁆𑀔𑀸𑀧𑀤𑀸𑀦𑀁 𑀧𑀸𑀝𑁂𑀓𑁆𑀓𑀁 𑀧𑀜𑁆𑀜𑀢𑁆𑀢𑀺𑀝𑁆𑀞𑀸𑀦𑀲𑀗𑁆𑀔𑀸𑀢𑀁 𑀦𑀺𑀤𑀸𑀦𑀫𑀸𑀤𑀺𑀁 𑀓𑀢𑁆𑀯𑀸 𑀧𑀼𑀕𑁆𑀕𑀮𑀧𑀜𑁆𑀜𑀢𑁆𑀢𑀺𑀅𑀦𑀼𑀧𑀜𑁆𑀜𑀢𑁆𑀢𑀺𑀯𑀺𑀪𑀸𑀕𑀸𑀧𑀢𑁆𑀢𑀺𑀪𑁂𑀤𑀦𑁆𑀢𑀭𑀸𑀧𑀢𑁆𑀢𑀺𑀆𑀤𑀺𑀓𑀁 𑀦𑀸𑀦𑀧𑁆𑀧𑀓𑀸𑀭𑀁 𑀯𑀺𑀥𑀺𑀁 𑀦𑀺𑀚𑁆𑀚𑀝𑀁 𑀦𑀺𑀕𑁆𑀕𑀼𑀫𑁆𑀩𑀁 𑀓𑀢𑁆𑀯𑀸 𑀤𑀲𑁆𑀲𑁂𑀢𑀼𑀁 ‘‘𑀅𑀣 𑀔𑁄 𑀪𑀕𑀯𑀸 𑀯𑁂𑀭𑀜𑁆𑀚𑀸𑀬𑀁 𑀬𑀣𑀸𑀪𑀺𑀭𑀦𑁆𑀢𑀁 𑀯𑀺𑀳𑀭𑀺𑀢𑁆𑀯𑀸’’𑀢𑀺𑀆𑀤𑀺𑀫𑀸𑀳𑀸𑀢𑀺. 𑀇𑀥 𑀞𑀢𑁆𑀯𑀸 𑁋

𑀲𑀺𑀓𑁆𑀔𑀸𑀧𑀤𑀸𑀦 𑀲𑀩𑁆𑀩𑁂𑀲𑀁, 𑀓𑀫𑀪𑁂𑀤𑀁 𑀧𑀓𑀸𑀲𑀬𑁂;

𑀢𑀲𑁆𑀫𑀺𑀁 𑀲𑀺𑀤𑁆𑀥𑁂 𑀦𑀺𑀤𑀸𑀦𑀸𑀦𑀁, 𑀓𑀫𑀲𑀺𑀤𑁆𑀥𑀺 𑀬𑀢𑁄 𑀪𑀯𑁂.

𑀢𑀢𑁆𑀣 𑀲𑀩𑁆𑀩𑀲𑀺𑀓𑁆𑀔𑀸𑀧𑀤𑀸𑀦𑀁 𑀬𑀣𑀸𑀲𑀫𑁆𑀪𑀯𑀁 𑀤𑁂𑀲𑀦𑀸𑀓𑁆𑀓𑀫𑁄 𑀧𑀳𑀸𑀦𑀓𑁆𑀓𑀫𑁄 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑁄𑀢𑀺 𑀘𑀢𑀼𑀩𑁆𑀩𑀺𑀥𑁄 𑀓𑀫𑁄 𑀮𑀩𑁆𑀪𑀢𑀺. 𑀢𑀢𑁆𑀣 𑀪𑀕𑀯𑀢𑀸 𑀭𑀸𑀚𑀕𑀳𑁂 𑀪𑀺𑀓𑁆𑀔𑀽𑀦𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀅𑀦𑀼𑀚𑀸𑀦𑀦𑁆𑀢𑁂𑀦 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀲𑁆𑀲 𑀬𑁄 𑀤𑁂𑀲𑀦𑀸𑀓𑁆𑀓𑀫𑁄 𑀅𑀦𑀼𑀜𑁆𑀜𑀸𑀢𑁄, 𑀢𑀁 𑀤𑁂𑀲𑀦𑀸𑀓𑁆𑀓𑀫𑀫𑀦𑀼𑀮𑁄𑀫𑁂𑀦𑁆𑀢𑁄 𑀆𑀬𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀧𑀞𑀫𑀁 𑀧𑀸𑀭𑀸𑀚𑀺𑀓𑀼𑀤𑁆𑀤𑁂𑀲𑀁 𑀧𑀼𑀘𑁆𑀙𑀺, 𑀢𑀤𑀦𑀦𑁆𑀢𑀭𑀁 𑀲𑀗𑁆𑀖𑀸𑀤𑀺𑀲𑁂𑀲𑀼𑀤𑁆𑀤𑁂𑀲𑀁, 𑀢𑀢𑁄 𑀅𑀦𑀺𑀬𑀢𑀼𑀤𑁆𑀤𑁂𑀲𑀁 𑀯𑀺𑀢𑁆𑀣𑀸𑀭𑀼𑀤𑁆𑀤𑁂𑀲𑀜𑁆𑀘 𑀧𑀼𑀘𑁆𑀙𑀺𑀢𑁆𑀯𑀸 𑀢𑀤𑀦𑀦𑁆𑀢𑀭𑀁 𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑀜𑁆𑀘 𑀢𑁂𑀦𑁂𑀯 𑀅𑀦𑀼𑀓𑁆𑀓𑀫𑁂𑀦 𑀧𑀼𑀘𑁆𑀙𑀺, 𑀦𑀺𑀤𑀸𑀦𑀼𑀤𑁆𑀤𑁂𑀲𑀦𑁆𑀢𑁄𑀕𑀥𑀸𑀦𑀜𑁆𑀘 𑀲𑀭𑀽𑀧𑁂𑀦 𑀅𑀦𑀼𑀤𑁆𑀤𑀺𑀝𑁆𑀞𑀸𑀦𑀁 𑀧𑀼𑀘𑁆𑀙𑀦𑀢𑁆𑀣𑀁 𑀔𑀦𑁆𑀥𑀓𑁂𑀧𑀺 𑀧𑀼𑀘𑁆𑀙𑀺. 𑀏𑀢𑁂𑀦 𑀘 𑀔𑀦𑁆𑀥𑀓𑁂 𑀧𑀜𑁆𑀜𑀢𑁆𑀢𑀸 𑀣𑀼𑀮𑁆𑀮𑀘𑁆𑀘𑀬𑀸 𑀲𑀗𑁆𑀕𑀳𑀺𑀢𑀸 𑀳𑁄𑀦𑁆𑀢𑀺. 𑀧𑀼𑀘𑁆𑀙𑀺𑀢𑀸𑀦𑀼𑀓𑁆𑀓𑀫𑁂𑀦𑁂𑀯 𑀉𑀧𑀸𑀮𑀺𑀢𑁆𑀣𑁂𑀭𑁄 𑀢𑀁 𑀲𑀩𑁆𑀩𑀁 𑀲𑀸𑀧𑀢𑁆𑀢𑀺𑀪𑁂𑀤𑀸𑀤𑀺𑀓𑀁 𑀤𑁂𑀲𑁂𑀦𑁆𑀢𑁄 𑀣𑀼𑀮𑁆𑀮𑀘𑁆𑀘𑀬𑀤𑀼𑀩𑁆𑀪𑀸𑀲𑀺𑀢𑀆𑀧𑀢𑁆𑀢𑀺𑀲𑀫𑀼𑀝𑁆𑀞𑀸𑀦𑀸𑀤𑀺𑀤𑀻𑀧𑀓𑀁 𑀅𑀦𑁆𑀢𑁄𑀓𑀢𑁆𑀯𑀸 𑀤𑁂𑀲𑁂𑀲𑀺, 𑀅𑀬𑀫𑁂𑀢𑁆𑀣 𑀤𑁂𑀲𑀦𑀸𑀓𑁆𑀓𑀫𑁄. 𑀉𑀪𑀢𑁄𑀯𑀺𑀪𑀗𑁆𑀕𑀔𑀦𑁆𑀥𑀓𑀢𑁄 𑀧𑀦 𑀉𑀘𑁆𑀘𑀺𑀦𑀺𑀢𑁆𑀯𑀸 𑀢𑀤𑀸 𑀧𑀭𑀺𑀯𑀸𑀭𑀧𑀸𑀴𑀺 𑀯𑀺𑀲𑀼𑀁 𑀓𑀢𑀸. 𑀇𑀫𑀫𑁂𑀯 𑀦𑀬𑀁 𑀲𑀦𑁆𑀥𑀸𑀬 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 ‘‘𑀏𑀢𑁂𑀦𑁂𑀯 𑀉𑀧𑀸𑀬𑁂𑀦 𑀔𑀦𑁆𑀥𑀓𑀧𑀭𑀺𑀯𑀸𑀭𑁂𑀧𑀺 𑀆𑀭𑁄𑀧𑁂𑀲𑀼’’𑀦𑁆𑀢𑀺𑀆𑀤𑀺 (𑀧𑀸𑀭𑀸. 𑀅𑀝𑁆𑀞. 𑁧.𑀧𑀞𑀫𑀫𑀳𑀸𑀲𑀗𑁆𑀕𑀻𑀢𑀺𑀓𑀣𑀸). 𑀅𑀧𑀺𑀘 𑀧𑀸𑀴𑀺𑀬𑀸 ‘‘𑀏𑀢𑁂𑀦𑁂𑀯𑀼𑀧𑀸𑀬𑁂𑀦 𑀉𑀪𑀢𑁄𑀯𑀺𑀦𑀬𑁂 𑀧𑀼𑀘𑁆𑀙𑀺. 𑀧𑀼𑀝𑁆𑀞𑁄 𑀧𑀼𑀝𑁆𑀞𑁄 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀯𑀺𑀲𑁆𑀲𑀚𑁆𑀚𑁂𑀲𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀫𑀳𑀸𑀓𑀲𑁆𑀲𑀧𑁄 𑀉𑀪𑀢𑁄𑀯𑀺𑀪𑀗𑁆𑀕𑁂 𑀏𑀯 𑀧𑀼𑀘𑁆𑀙𑀺. 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑁄 𑀧𑀦 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀦𑀺𑀯𑀭𑀲𑁂𑀲𑀁 𑀤𑁂𑀲𑁂𑀦𑁆𑀢𑁄 𑀔𑀦𑁆𑀥𑀓𑀧𑀭𑀺𑀯𑀸𑀭𑁂 𑀅𑀦𑁆𑀢𑁄𑀓𑀢𑁆𑀯𑀸 𑀤𑁂𑀲𑁂𑀲𑀺. 𑀢𑀤𑀸 𑀘 𑀔𑀦𑁆𑀥𑀓𑀧𑀭𑀺𑀯𑀸𑀭𑀧𑀸𑀴𑀺 𑀯𑀺𑀲𑀼𑀁 𑀓𑀢𑀸𑀢𑀺 𑀅𑀬𑀁 𑀤𑁂𑀲𑀦𑀸𑀓𑁆𑀓𑀫𑁄. 𑀬𑀤𑀺 𑀏𑀯𑀁 𑀦𑀺𑀤𑀸𑀦𑀼𑀤𑁆𑀤𑁂𑀲𑁄 𑀧𑀞𑀫𑀁 𑀤𑁂𑀲𑁂𑀢𑀩𑁆𑀩𑁄𑀢𑀺 𑀘𑁂? 𑀦, 𑀢𑀤𑀲𑀫𑁆𑀪𑀯𑀢𑁄. 𑀲𑁄 𑀳𑀺 ‘‘𑀬𑀲𑁆𑀲 𑀲𑀺𑀬𑀸 𑀆𑀧𑀢𑁆𑀢𑀻’’𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁧𑁩𑁪) 𑀦𑀬𑁂𑀦 𑀧𑀯𑀢𑁆𑀢𑀢𑁆𑀢𑀸 𑀧𑀞𑀫𑀁 𑀲𑀺𑀓𑁆𑀔𑀸𑀧𑀤𑀲𑀗𑁆𑀕𑀳𑀺𑀢𑀸𑀲𑀼 𑀆𑀧𑀢𑁆𑀢𑀻𑀲𑀼 𑀅𑀤𑀲𑁆𑀲𑀺𑀢𑀸𑀲𑀼 𑀦 𑀲𑀫𑁆𑀪𑀯𑀢𑀺. ‘‘𑀬𑀸𑀦𑀺 𑀫𑀬𑀸 𑀪𑀺𑀓𑁆𑀔𑀽𑀦𑀁 𑀧𑀜𑁆𑀜𑀢𑁆𑀢𑀸𑀦𑀺 𑀲𑀺𑀓𑁆𑀔𑀸𑀧𑀤𑀸𑀦𑀺, 𑀢𑀸𑀦𑀺 𑀦𑁂𑀲𑀁 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀁 𑀅𑀦𑀼𑀚𑀸𑀦𑁂𑀬𑁆𑀬’’𑀦𑁆𑀢𑀺 𑀯𑀘𑀦𑀢𑁄 𑀲𑀺𑀓𑁆𑀔𑀸𑀧𑀤𑀸𑀦𑁂𑀯 𑀧𑀞𑀫𑀁 𑀤𑁂𑀲𑁂𑀢𑀩𑁆𑀩𑀸𑀦𑀻𑀢𑀺 𑀧𑀸𑀭𑀸𑀚𑀺𑀓𑀼𑀤𑁆𑀤𑁂𑀲𑀓𑁆𑀓𑀫𑁄 𑀲𑀫𑁆𑀪𑀯𑀢𑀺.

𑀧𑀸𑀭𑀸𑀚𑀺𑀓𑀼𑀤𑁆𑀤𑁂𑀲𑀸𑀤𑀺𑀲𑀗𑁆𑀕𑀳𑀺𑀢𑀸𑀦𑀁 𑀆𑀧𑀢𑁆𑀢𑀺𑀅𑀓𑀼𑀲𑀮𑀸𑀦𑀁 𑀬𑀣𑁄𑀴𑀸𑀭𑀺𑀓𑀓𑁆𑀓𑀫𑁂𑀦 𑀧𑀳𑀸𑀢𑀩𑁆𑀩𑀢𑁆𑀢𑀸 𑀧𑀳𑀸𑀦𑀓𑁆𑀓𑀫𑁄𑀧𑁂𑀢𑁆𑀣 𑀲𑀫𑁆𑀪𑀯𑀢𑀺. 𑀉𑀧𑀲𑀫𑁆𑀧𑀦𑁆𑀦𑀲𑀫𑀦𑀦𑁆𑀢𑀭𑀁 ‘‘𑀢𑀸𑀯𑀤𑁂𑀯 𑀘𑀢𑁆𑀢𑀸𑀭𑀺 𑀅𑀓𑀭𑀡𑀻𑀬𑀸𑀦𑀺 𑀆𑀘𑀺𑀓𑁆𑀔𑀺𑀢𑀩𑁆𑀩𑀸𑀦𑀻’’𑀢𑀺 (𑀫𑀳𑀸𑀯. 𑁧𑁨𑁯) 𑀯𑀘𑀦𑀢𑁄 ‘‘𑀲𑀫𑀸𑀤𑀸𑀬 𑀲𑀺𑀓𑁆𑀔𑀢𑀺 𑀲𑀺𑀓𑁆𑀔𑀸𑀧𑀤𑁂𑀲𑀽’’𑀢𑀺 (𑀤𑀻. 𑀦𑀺. 𑁧.𑁧𑁯𑁩) 𑀯𑀘𑀦𑀢𑁄 𑀘 𑀬𑀣𑀸 𑀕𑀭𑀼𑀓𑀁 𑀆𑀘𑀺𑀓𑁆𑀔𑀡𑀁 𑀲𑀺𑀓𑁆𑀔𑀦𑁂𑀦 𑀧𑀝𑀺𑀧𑀢𑁆𑀢𑀺𑀓𑁆𑀓𑀫𑁄𑀧𑁂𑀢𑁆𑀣 𑀲𑀫𑁆𑀪𑀯𑀢𑀺, 𑀏𑀯𑀫𑀺𑀫𑁂𑀳𑀺 𑀢𑀻𑀳𑀺 𑀓𑀫𑁂𑀳𑀺 𑀤𑁂𑀲𑁂𑀢𑀩𑁆𑀩𑀸𑀦𑀫𑁆𑀧𑁂𑀢𑁂𑀲𑀁 𑀲𑀺𑀓𑁆𑀔𑀸𑀧𑀤𑀸𑀦𑀁 𑀬𑀣𑀸𑀲𑀫𑁆𑀪𑀯𑀁 𑀉𑀧𑁆𑀧𑀢𑁆𑀢𑀺𑀓𑁆𑀓𑀫𑁄 𑀲𑀫𑁆𑀪𑀯𑀢𑀺. 𑀢𑀣𑀸 𑀳𑀺 𑀬𑀁 𑀬𑀁 𑀲𑀸𑀥𑀸𑀭𑀡𑀁, 𑀢𑀁 𑀢𑀁 𑀪𑀺𑀓𑁆𑀔𑀼𑀁 𑀆𑀭𑀩𑁆𑀪 𑀉𑀧𑁆𑀧𑀦𑁆𑀦𑁂 𑀏𑀯 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀙𑀦𑁆𑀤𑀲𑁄 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑁂𑀬𑁆𑀬𑀸’’𑀢𑀺 𑀪𑀺𑀓𑁆𑀔𑀼𑀦𑀻𑀦𑀫𑁆𑀧𑀺 𑀧𑀜𑁆𑀜𑀢𑁆𑀢𑀁. 𑀅𑀜𑁆𑀜𑀣𑀸 𑀢𑀁 𑀪𑀺𑀓𑁆𑀔𑀼𑀦𑀻𑀦𑀁 𑀅𑀦𑀼𑀧𑁆𑀧𑀦𑁆𑀦𑀧𑀜𑁆𑀜𑀢𑁆𑀢𑀺 𑀲𑀺𑀬𑀸. 𑀢𑀢𑁄 ‘‘𑀅𑀦𑀼𑀧𑁆𑀧𑀦𑁆𑀦𑀧𑀜𑁆𑀜𑀢𑁆𑀢𑀺 𑀢𑀲𑁆𑀫𑀺𑀁 𑀦𑀢𑁆𑀣𑀻’’𑀢𑀺 (𑀧𑀭𑀺. 𑁨𑁪𑁭) 𑀧𑀭𑀺𑀯𑀸𑀭𑁂 𑀏𑀢𑀁 𑀯𑀘𑀦𑀁 𑀯𑀺𑀭𑀼𑀚𑁆𑀛𑀢𑀺, 𑀏𑀢𑁆𑀢𑀸𑀯𑀢𑀸 𑀧𑀼𑀭𑀺𑀫𑁂𑀦 𑀓𑀫𑀢𑁆𑀢𑀬𑁂𑀦 𑀧𑀞𑀫𑀁 𑀤𑁂𑀲𑁂𑀢𑀩𑁆𑀩𑀢𑀁 𑀧𑀢𑁆𑀢𑁂 𑀧𑀸𑀭𑀸𑀚𑀺𑀓𑀼𑀤𑁆𑀤𑁂𑀲𑁂 𑀧𑀞𑀫𑀼𑀧𑁆𑀧𑀦𑁆𑀦𑀢𑁆𑀢𑀸 𑀫𑁂𑀣𑀼𑀦𑀥𑀫𑁆𑀫𑀧𑀸𑀭𑀸𑀚𑀺𑀓𑀁 𑀲𑀩𑁆𑀩𑀧𑀞𑀫𑀁 𑀤𑁂𑀲𑁂𑀢𑀼𑀓𑀸𑀫𑁄 𑀉𑀧𑀸𑀮𑀺𑀢𑁆𑀣𑁂𑀭𑁄 ‘‘𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬’’𑀦𑁆𑀢𑀺 𑀯𑁂𑀲𑀸𑀮𑀺𑀫𑁂𑀯 𑀧𑀸𑀧𑁂𑀢𑁆𑀯𑀸 𑀞𑀧𑁂𑀲𑀺. 𑀅𑀜𑁆𑀜𑀣𑀸 𑀩𑀸𑀭𑀸𑀡𑀲𑀺𑀬𑀁 𑀧𑀜𑁆𑀜𑀢𑁆𑀢𑀸𑀦𑀁 ‘‘𑀦, 𑀪𑀺𑀓𑁆𑀔𑀯𑁂, 𑀫𑀦𑀼𑀲𑁆𑀲𑀫𑀁𑀲𑀁 𑀧𑀭𑀺𑀪𑀼𑀜𑁆𑀚𑀺𑀢𑀩𑁆𑀩’’𑀦𑁆𑀢𑀺 (𑀫𑀳𑀸𑀯. 𑁨𑁮𑁦) 𑀏𑀯𑀫𑀸𑀤𑀻𑀦𑀁 𑀤𑁂𑀲𑀦𑀸𑀥𑀺𑀧𑁆𑀧𑀸𑀬𑁂 𑀲𑀢𑀺 𑀩𑀸𑀭𑀸𑀡𑀲𑀺𑀁 𑀧𑀸𑀧𑁂𑀢𑁆𑀯𑀸 𑀞𑀧𑁂𑀬𑁆𑀬𑀸𑀢𑀺.

𑀅𑀩𑁆𑀪𑀦𑁆𑀢𑀭𑀦𑀺𑀤𑀸𑀦𑀓𑀣𑀸 𑀦𑀺𑀝𑁆𑀞𑀺𑀢𑀸.

𑀯𑁂𑀭𑀜𑁆𑀚𑀓𑀡𑁆𑀟𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧. 𑀧𑀸𑀭𑀸𑀚𑀺𑀓𑀓𑀡𑁆𑀟𑁄

𑁧. 𑀧𑀞𑀫𑀧𑀸𑀭𑀸𑀚𑀺𑀓𑀁

𑀲𑀼𑀤𑀺𑀦𑁆𑀦𑀪𑀸𑀡𑀯𑀸𑀭𑀯𑀡𑁆𑀡𑀦𑀸

𑀧𑀞𑀫𑀲𑁆𑀲𑁂𑀢𑁆𑀣 𑀦𑀺𑀤𑀸𑀦𑁂, 𑀞𑀢𑁆𑀯𑀸 𑀧𑀸𑀭𑀸𑀚𑀺𑀓𑀲𑁆𑀲 𑀯𑀺𑀜𑁆𑀜𑁂𑀬𑁆𑀬𑁄;

𑀘𑁄𑀤𑀦𑀸𑀧𑀭𑀺𑀳𑀸𑀭𑀦𑀬𑁄, 𑀧𑀼𑀕𑁆𑀕𑀮𑀯𑀢𑁆𑀣𑀼𑀧𑁆𑀧𑀓𑀸𑀲𑀦𑁂𑀬𑁂𑀯.

𑀢𑀢𑁆𑀣 𑀪𑀕𑀯𑀸 𑀯𑁂𑀭𑀜𑁆𑀚𑀸𑀬𑀁 𑀯𑀼𑀢𑁆𑀣𑀯𑀲𑁆𑀲𑁄 𑀅𑀦𑀼𑀧𑀼𑀩𑁆𑀩𑁂𑀦 𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀓𑀢𑁆𑀢𑀺𑀓𑀚𑀼𑀡𑁆𑀳𑀧𑀓𑁆𑀔𑁂 𑀏𑀯 𑀯𑁂𑀲𑀸𑀮𑀺𑀁 𑀧𑀸𑀧𑀼𑀡𑀺𑀢𑁆𑀯𑀸 𑀬𑀸𑀯 𑀧𑀞𑀫𑀧𑀸𑀭𑀸𑀚𑀺𑀓𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀁, 𑀢𑀸𑀯 𑀅𑀝𑁆𑀞 𑀯𑀲𑁆𑀲𑀸𑀦𑀺 𑀯𑁂𑀲𑀸𑀮𑀺𑀬𑀁𑀬𑁂𑀯 𑀯𑀺𑀳𑀭𑀦𑁆𑀢𑁄 𑀯𑀺𑀬 𑀧𑀸𑀴𑀺𑀓𑁆𑀓𑀫𑁂𑀦 𑀤𑀺𑀲𑁆𑀲𑀢𑀺, 𑀦 𑀘 𑀪𑀕𑀯𑀸 𑀢𑀸𑀯𑀢𑁆𑀢𑀓𑀁 𑀓𑀸𑀮𑀁 𑀢𑀢𑁆𑀣𑁂𑀯 𑀯𑀺𑀳𑀸𑀲𑀺. 𑀲𑁄 𑀳𑀺 𑀲𑀼𑀤𑀺𑀦𑁆𑀦𑀲𑁆𑀲 𑀲𑀸𑀯𑀓𑀸𑀦𑀁 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁 𑀉𑀧𑀲𑀫𑁆𑀧𑀤𑀜𑁆𑀘 𑀅𑀦𑀼𑀚𑀸𑀦𑀺𑀢𑁆𑀯𑀸 𑀬𑀣𑀸𑀪𑀺𑀭𑀦𑁆𑀢𑀁 𑀢𑀢𑁆𑀣 𑀯𑀺𑀳𑀭𑀺𑀢𑁆𑀯𑀸 𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀪𑁂𑀲𑀓𑀴𑀸𑀯𑀦𑀁 𑀧𑀢𑁆𑀯𑀸 𑀢𑀢𑁆𑀣 𑀢𑁂𑀭𑀲𑀫𑀁 𑀯𑀲𑁆𑀲𑀁 𑀯𑀲𑀺, 𑀢𑁂𑀦𑁂𑀯 𑀅𑀦𑀼𑀓𑁆𑀓𑀫𑁂𑀦 𑀲𑀸𑀯𑀢𑁆𑀣𑀺𑀁 𑀧𑀢𑁆𑀯𑀸 𑀘𑀼𑀤𑁆𑀤𑀲𑀫𑀁 𑀯𑀲𑁆𑀲𑀁 𑀯𑀲𑀺, 𑀧𑀦𑁆𑀦𑀭𑀲𑀫𑀁 𑀓𑀧𑀺𑀮𑀯𑀢𑁆𑀣𑀼𑀫𑁆𑀳𑀺, 𑀲𑁄𑀴𑀲𑀫𑀁 𑀆𑀴𑀯𑀺𑀬𑀁, 𑀢𑀢𑁄 𑀯𑀼𑀢𑁆𑀣𑀯𑀲𑁆𑀲𑁄 𑀘𑀸𑀭𑀺𑀓𑀁 𑀘𑀭𑀦𑁆𑀢𑁄 𑀭𑀸𑀚𑀕𑀳𑀁 𑀧𑀢𑁆𑀯𑀸 𑀲𑀢𑁆𑀢𑀭𑀲𑀫𑀁 𑀯𑀲𑀺, 𑀇𑀫𑀺𑀦𑀸 𑀅𑀦𑀼𑀓𑁆𑀓𑀫𑁂𑀦 𑀅𑀧𑀭𑀸𑀦𑀺𑀧𑀺 𑀢𑀻𑀡𑀺 𑀯𑀲𑁆𑀲𑀸𑀦𑀺 𑀢𑀢𑁆𑀣𑁂𑀯 𑀯𑀲𑀺. 𑀏𑀢𑁆𑀢𑀸𑀯𑀢𑀸 𑀪𑀕𑀯𑀸 𑀧𑀭𑀺𑀧𑀼𑀡𑁆𑀡𑀯𑀻𑀲𑀢𑀺𑀯𑀲𑁆𑀲𑁄 𑀭𑀸𑀚𑀕𑀳𑀢𑁄 𑀅𑀦𑀼𑀧𑀼𑀩𑁆𑀩𑁂𑀦 𑀯𑁂𑀲𑀸𑀮𑀺𑀁 𑀧𑀸𑀧𑀼𑀡𑀺, 𑀢𑀢𑁄 𑀉𑀧𑀲𑀫𑁆𑀧𑀤𑀸𑀬 𑀅𑀝𑁆𑀞𑀯𑀲𑁆𑀲𑀺𑀓𑁄 𑀲𑀼𑀤𑀺𑀦𑁆𑀦𑁄 𑀯𑁂𑀲𑀸𑀮𑀺𑀬𑀁𑀬𑁂𑀯 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀅𑀪𑀺𑀯𑀺𑀜𑁆𑀜𑀸𑀧𑁂𑀲𑀺, 𑀢𑀢𑁄 𑀪𑀕𑀯𑀸 𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 𑀧𑀞𑀫𑀁 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀧𑁂𑀲𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣 𑀬𑀲𑁆𑀫𑀸 𑀉𑀧𑀸𑀮𑀺𑀢𑁆𑀣𑁂𑀭𑁄 𑀇𑀢𑁄 𑀧𑀞𑀫𑀢𑀭𑀁 𑀢𑀢𑁆𑀣 𑀯𑁂𑀲𑀸𑀮𑀺𑀬𑀜𑁆𑀘 𑀧𑀜𑁆𑀜𑀢𑁆𑀢𑀲𑀺𑀓𑁆𑀔𑀸𑀧𑀤𑀸𑀦𑀺 𑀅𑀤𑀲𑁆𑀲𑁂𑀢𑀼𑀓𑀸𑀫𑁄, 𑀯𑀺𑀦𑀬𑀦𑀺𑀤𑀸𑀦𑀸𑀦𑀦𑁆𑀢𑀭𑀁 𑀧𑀞𑀫𑀧𑀸𑀭𑀸𑀚𑀺𑀓𑀫𑁂𑀯 𑀤𑀲𑁆𑀲𑁂𑀢𑀼𑀓𑀸𑀫𑁄, 𑀢𑀲𑁆𑀫𑀸 𑀯𑁂𑀲𑀸𑀮𑀺𑀬𑀁 𑀧𑀞𑀫𑀁 𑀦𑀺𑀯𑀸𑀲𑀁, 𑀧𑀘𑁆𑀙𑀸 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀧𑀜𑁆𑀜𑀢𑁆𑀢𑀺𑀓𑀸𑀮𑁂 𑀦𑀺𑀯𑀸𑀲𑀜𑁆𑀘 𑀏𑀓𑀢𑁄 𑀓𑀢𑁆𑀯𑀸 ‘‘𑀢𑀢𑁆𑀭 𑀲𑀼𑀤𑀁 𑀪𑀕𑀯𑀸 𑀯𑁂𑀲𑀸𑀮𑀺𑀬’’𑀦𑁆𑀢𑀺𑀆𑀤𑀺𑀫𑀸𑀳, 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀞𑀫𑀲𑁆𑀲𑁂𑀢𑁆𑀣 𑀦𑀺𑀤𑀸𑀦𑁂, 𑀞𑀢𑁆𑀯𑀸 …𑀧𑁂… 𑀧𑀓𑀸𑀲𑀦𑁂𑀬𑁂𑀯𑀸’’𑀢𑀺. 𑀢𑀲𑁆𑀫𑀸 𑀇𑀫𑀲𑁆𑀫𑀺𑀁 𑀧𑀞𑀫𑀧𑀸𑀭𑀸𑀚𑀺𑀓𑀲𑁆𑀲 𑀧𑀜𑁆𑀜𑀢𑁆𑀢𑀺𑀝𑁆𑀞𑀸𑀦𑀲𑀗𑁆𑀔𑀸𑀢𑁂 𑀦𑀺𑀤𑀸𑀦𑁂 𑀞𑀢𑁆𑀯𑀸 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀲𑀸𑀮𑀺𑀬𑀸 𑀅𑀯𑀺𑀤𑀽𑀭𑁂 𑀓𑀮𑀦𑁆𑀤𑀕𑀸𑀫𑁄 𑀦𑀸𑀫 𑀳𑁄𑀢𑀺…𑀧𑁂… 𑀅𑀜𑁆𑀜𑀢𑀭𑀁 𑀯𑀚𑁆𑀚𑀺𑀕𑀸𑀫𑀁 𑀉𑀧𑀦𑀺𑀲𑁆𑀲𑀸𑀬 𑀯𑀺𑀳𑀭𑀢𑀻’’𑀢𑀺 𑀏𑀢𑀲𑁆𑀫𑀺𑀁 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀧𑀼𑀕𑁆𑀕𑀮𑀧𑁆𑀧𑀓𑀸𑀲𑀦𑁂, ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑀚𑁆𑀚𑀻 𑀤𑀼𑀩𑁆𑀪𑀺𑀓𑁆𑀔𑀸 𑀳𑁄𑀢𑀺…𑀧𑁂… 𑀢𑀺𑀓𑁆𑀔𑀢𑁆𑀢𑀼𑀁 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀅𑀪𑀺𑀯𑀺𑀜𑁆𑀜𑀸𑀧𑁂𑀲𑀻’’𑀢𑀺 (𑀧𑀸𑀭𑀸. 𑁩𑁦) 𑀇𑀫𑀲𑁆𑀫𑀺𑀁 𑀯𑀢𑁆𑀣𑀼𑀧𑁆𑀧𑀓𑀸𑀲𑀦𑁂 𑀘 𑀘𑁄𑀤𑀦𑀸𑀦𑀬𑁄, 𑀧𑀭𑀺𑀳𑀸𑀭𑀦𑀬𑁄 𑀘 𑀯𑁂𑀤𑀺𑀢𑀩𑁆𑀩𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀢𑁆𑀭𑀸𑀬𑀁 𑀧𑀓𑀸𑀲𑀦𑀸 𑁋 𑀓𑀺𑀫𑀢𑁆𑀣𑀁 𑀣𑁂𑀭𑁂𑀦 𑀅𑀜𑁆𑀜𑁂𑀲𑀁 𑀲𑀺𑀓𑁆𑀔𑀸𑀧𑀤𑀸𑀦𑀁 𑀧𑀼𑀕𑁆𑀕𑀮𑀯𑀢𑁆𑀣𑀽𑀦𑀺 𑀯𑀺𑀬 𑀲𑀗𑁆𑀔𑁂𑀧𑀢𑁄 𑀅𑀯𑀢𑁆𑀯𑀸 𑀬𑀢𑁆𑀣 𑀘 𑀲𑁄 𑀉𑀧𑁆𑀧𑀦𑁆𑀦𑁄, 𑀬𑀣𑀸 𑀘 𑀥𑀫𑁆𑀫𑁂 𑀧𑀲𑀦𑁆𑀦𑁄, 𑀬𑀣𑀸 𑀘 𑀧𑀩𑁆𑀩𑀚𑀺𑀢𑁄, 𑀬𑀣𑀸 𑀘 𑀇𑀫𑀁 𑀯𑀢𑁆𑀣𑀼𑀁 𑀉𑀧𑁆𑀧𑀸𑀤𑁂𑀢𑀺, 𑀢𑀁 𑀲𑀩𑁆𑀩𑀁 𑀅𑀦𑀯𑀲𑁂𑀲𑁂𑀢𑁆𑀯𑀸 𑀧𑀼𑀕𑁆𑀕𑀮𑀯𑀢𑁆𑀣𑀽𑀦𑀺 𑀯𑀺𑀢𑁆𑀣𑀸𑀭𑀢𑁄 𑀯𑀼𑀢𑁆𑀢𑀸𑀦𑀻𑀢𑀺 𑀘𑁂? 𑀯𑀼𑀘𑁆𑀘𑀢𑁂 𑁋

𑀏𑀯𑀁 𑀲𑀤𑁆𑀥𑀸𑀬 𑀓𑀺𑀘𑁆𑀙𑁂𑀦, 𑀫𑀳𑀦𑁆𑀢𑁂 𑀪𑁄𑀕𑀜𑀸𑀢𑀓𑁂;

𑀳𑀺𑀢𑁆𑀯𑀸 𑀧𑀩𑁆𑀩𑀚𑀺𑀢𑀸𑀦𑀫𑁆𑀧𑀺, 𑀧𑁂𑀲𑀮𑀸𑀦𑀫𑁆𑀧𑀺 𑀲𑀩𑁆𑀩𑀲𑁄.

𑀲𑀩𑁆𑀩𑀮𑀸𑀫𑀓𑀥𑀫𑁆𑀫𑀸𑀬𑀁, 𑀫𑁂𑀣𑀼𑀦𑁄 𑀬𑀤𑀺 𑀲𑀫𑁆𑀪𑀯𑁂;

𑀦 𑀥𑀫𑁆𑀫𑀤𑁂𑀲𑀦𑀸𑀬𑁂𑀯, 𑀲𑀺𑀤𑁆𑀥𑀸 𑀯𑀺𑀭𑀢𑀺 𑀲𑀩𑁆𑀩𑀲𑁄.

𑀢𑀲𑁆𑀫𑀸 𑀦𑀯𑀗𑁆𑀕𑀲𑀤𑁆𑀥𑀫𑁆𑀫𑁂, 𑀲𑀢𑁆𑀣𑀸𑀭𑀸 𑀤𑁂𑀲𑀺𑀢𑁂𑀧𑀺 𑀘;

𑀯𑀺𑀦𑀬𑁄 𑀧𑀜𑁆𑀜𑀧𑁂𑀢𑀩𑁆𑀩𑁄, 𑀢𑀢𑁄 𑀥𑀫𑁆𑀫𑀯𑀺𑀲𑀼𑀤𑁆𑀥𑀺𑀳𑀺.

𑀯𑀺𑀦𑀬𑀸𑀪𑀸𑀯𑀢𑁄 𑀏𑀯𑀁, 𑀅𑀚𑁆𑀛𑀸𑀘𑀸𑀭𑁄 𑀪𑀯𑀺𑀲𑁆𑀲𑀢𑀺;

𑀢𑀲𑁆𑀫𑀸 𑀯𑀺𑀦𑀬𑀧𑀜𑁆𑀜𑀢𑁆𑀢𑀺, 𑀲𑀸𑀢𑁆𑀣𑀺𑀓𑀸 𑀧𑁂𑀲𑀮𑀲𑁆𑀲𑀧𑀺.

𑀅𑀦𑀸𑀤𑀻𑀦𑀯𑀤𑀲𑁆𑀲𑀸𑀯𑀻, 𑀬𑀲𑁆𑀫𑀸 𑀬𑀁 𑀧𑀸𑀧𑀫𑀸𑀘𑀭𑀺;

𑀯𑀺𑀦𑀬𑁄𑀬𑁂𑀯 𑀲𑀤𑁆𑀥𑀸𑀦𑀁, 𑀆𑀤𑀻𑀦𑀯𑀯𑀺𑀪𑀸𑀯𑀺𑀦𑁄.

𑀢𑀲𑁆𑀫𑀸 𑀲𑀤𑁆𑀥𑀸𑀦𑀼𑀲𑀸𑀭𑀻𑀦𑀁, 𑀯𑀺𑀦𑀬𑁄 𑀲𑀸𑀢𑁆𑀣𑀓𑁄𑀯 𑀬𑀁;

𑀥𑀫𑁆𑀫𑁄 𑀥𑀫𑁆𑀫𑀸𑀦𑀼𑀲𑀸𑀭𑀻𑀦𑀁, 𑀢𑀢𑁄 𑀉𑀪𑀬𑀤𑁂𑀲𑀦𑀸.

𑀅𑀧𑀺 𑀘 𑀬𑀤𑀺 𑀧𑀡𑁆𑀡𑀢𑁆𑀢𑀺𑀯𑀻𑀢𑀺𑀓𑁆𑀓𑀫𑀁 𑀅𑀓𑀭𑁄𑀦𑁆𑀢𑀲𑁆𑀲𑀸𑀧𑀺 𑀬𑀸𑀯 𑀩𑁆𑀭𑀳𑁆𑀫𑀮𑁄𑀓𑀸 𑀅𑀬𑀲𑁄 𑀧𑀢𑁆𑀣𑀝𑁄, 𑀧𑀕𑁂𑀯𑀜𑁆𑀜𑁂𑀲𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 𑀅𑀚𑁆𑀛𑀸𑀘𑀸𑀭𑀲𑁆𑀲 𑀧𑀸𑀓𑀝𑀪𑀸𑀯𑀤𑀻𑀧𑀦𑀁. 𑀓𑀣𑀁? 𑁋

𑀅𑀪𑀩𑁆𑀩𑁄 𑀅𑀭𑀳𑀢𑁆𑀢𑀲𑁆𑀲, 𑀲𑀼𑀤𑀺𑀦𑁆𑀦𑁄 𑀧𑀼𑀢𑁆𑀢𑀫𑀸𑀢𑀭𑁄;

𑀪𑀩𑁆𑀩𑀸𑀦𑀼𑀧𑁆𑀧𑀦𑁆𑀦𑀧𑀜𑁆𑀜𑀢𑁆𑀢𑀺, 𑀢𑀤𑀢𑁆𑀣𑀁 𑀦 𑀓𑀢𑀸 𑀅𑀬𑀁.

𑀦𑀦𑀼 𑀫𑀸𑀕𑀡𑁆𑀟𑀺𑀓𑀁 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑁆𑀯𑀸 𑀫𑀸𑀢𑀸𑀧𑀺𑀢𑀽𑀦𑀫𑀲𑁆𑀲𑀸 𑀳𑀺𑀢𑀢𑁆𑀣𑀁 𑀥𑀫𑁆𑀫𑀁 𑀤𑁂𑀲𑁂𑀢𑀻𑀢𑀺 𑀇𑀫𑀫𑀢𑁆𑀣𑀁 𑀤𑀲𑁆𑀲𑁂𑀢𑀼𑀁 𑀩𑀻𑀚𑀓𑀩𑀻𑀚𑀓𑀫𑀸𑀢𑀽𑀦𑀁 𑀅𑀭𑀳𑀢𑁆𑀢𑀼𑀧𑁆𑀧𑀢𑁆𑀢𑀺 𑀣𑁂𑀭𑁂𑀦 𑀤𑀻𑀧𑀺𑀢𑀸. ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀲𑀸𑀮𑀺𑀬𑀸 𑀅𑀯𑀺𑀤𑀽𑀭𑁂 𑀓𑀮𑀦𑁆𑀤𑀕𑀸𑀫𑁄 𑀦𑀸𑀫 𑀳𑁄𑀢𑀺, 𑀬𑁂𑀦 𑀲𑀫𑀬𑁂𑀦 𑀲𑀼𑀤𑀺𑀦𑁆𑀦𑁄 𑀧𑀼𑀭𑀸𑀡𑀤𑀼𑀢𑀺𑀬𑀺𑀓𑀸𑀬 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀻’’𑀢𑀺 𑀯𑀸 ‘‘𑀬𑁂𑀦 𑀲𑀫𑀬𑁂𑀦 𑀪𑀕𑀯𑀸 𑀧𑀞𑀫𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀧𑁂𑀲𑀻’’𑀢𑀺 𑀯𑀸 𑀯𑀘𑀦𑀁 𑀇𑀥 𑀦 𑀬𑀼𑀚𑁆𑀚𑀢𑀺. 𑀓𑀲𑁆𑀫𑀸? ‘‘𑀇𑀥 𑀧𑀦 𑀳𑁂𑀢𑀼𑀅𑀢𑁆𑀣𑁄 𑀓𑀭𑀡𑀢𑁆𑀣𑁄 𑀘 𑀲𑀫𑁆𑀪𑀯𑀢𑀻’’𑀢𑀺 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀯𑀘𑀦𑀜𑁆𑀳𑀺 𑀇𑀥 𑀦 𑀮𑀩𑁆𑀪𑀢𑀺. 𑀘𑀺𑀭𑀦𑀺𑀯𑀺𑀝𑁆𑀞𑁄 𑀳𑀺 𑀲𑁄 𑀕𑀸𑀫𑁄, 𑀦 𑀢𑀲𑁆𑀫𑀺𑀁𑀬𑁂𑀯 𑀲𑀫𑀬𑁂𑀢𑀺. 𑀬𑀲𑁆𑀫𑀸 𑀧𑀦 𑀲𑁄 𑀘𑀺𑀭𑀦𑀺𑀯𑀺𑀝𑁆𑀞𑁄𑀧𑀺 𑀘 𑀕𑀸𑀫𑁄 𑀅𑀢𑁆𑀢𑀦𑁄 𑀦𑀺𑀯𑀺𑀝𑁆𑀞𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀩𑁆𑀩𑀓𑀸𑀮𑀫𑀢𑁆𑀣𑀻𑀢𑀺 𑀯𑀢𑁆𑀢𑀩𑁆𑀩𑀢𑀁 𑀅𑀭𑀳𑀢𑀺, 𑀢𑁂𑀦 𑀧𑀭𑀺𑀬𑀸𑀬𑁂𑀦 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀯𑁂𑀲𑀸𑀮𑀺𑀬𑀸 𑀅𑀯𑀺𑀤𑀽𑀭𑁂 𑀓𑀮𑀦𑁆𑀤𑀕𑀸𑀫𑁄 𑀦𑀸𑀫 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁.

𑁨𑁫-𑁬. 𑀅𑀦𑀼𑀜𑁆𑀜𑀸𑀢𑁄𑀲𑀺 𑀧𑀦 𑀢𑁆𑀯𑀦𑁆𑀢𑀺 𑀲𑀫𑀡𑀯𑀢𑁆𑀢𑀤𑀲𑁆𑀲𑀦𑀢𑁆𑀣𑀁 𑀪𑀕𑀯𑀸 𑀧𑀼𑀘𑁆𑀙𑀢𑀺. 𑀫𑀸𑀢𑀸𑀧𑀺𑀢𑀽𑀳𑀺 𑀅𑀦𑀦𑀼𑀜𑁆𑀜𑀸𑀢𑀦𑁆𑀢𑀺 𑀏𑀢𑁆𑀣 𑀚𑀦𑀓𑁂𑀳𑁂𑀯 𑀅𑀦𑀦𑀼𑀜𑁆𑀜𑀸𑀢𑀤𑀲𑁆𑀲𑀦𑀢𑁆𑀣𑀁 𑀧𑀼𑀘𑁆𑀙𑀻𑀢𑀺 𑀯𑀼𑀢𑁆𑀢𑀁. 𑀦 𑀔𑁄 𑀲𑀼𑀤𑀺𑀦𑁆𑀦 𑀢𑀣𑀸𑀕𑀢𑀸𑀢𑀺 ‘‘𑀧𑀩𑁆𑀩𑀸𑀚𑁂𑀢𑀼 𑀫𑀁 𑀪𑀕𑀯𑀸’’𑀢𑀺 𑀬𑀸𑀘𑀦𑀸𑀯𑀲𑁂𑀦 𑀧𑀦𑁂𑀯𑀫𑀸𑀳, 𑀦 𑀪𑀕𑀯𑀸 𑀲𑀬𑀁 𑀲𑀭𑀡𑀸𑀦𑀺 𑀤𑀢𑁆𑀯𑀸 𑀧𑀩𑁆𑀩𑀸𑀚𑁂𑀲𑀺. 𑀤𑀼𑀓𑁆𑀔𑀲𑁆𑀲𑀸𑀢𑀺 𑀏𑀢𑁆𑀣 ‘‘𑀓𑀮𑀪𑀸𑀕𑀫𑁆𑀧𑀻’’𑀢𑀺 𑀧𑀸𑀞𑀲𑁂𑀲𑁄. 𑀯𑀺𑀓𑀧𑁆𑀧𑀤𑁆𑀯𑀬𑁂𑀧𑀻𑀢𑀺 𑀤𑀼𑀢𑀺𑀬𑀢𑀢𑀺𑀬𑀯𑀺𑀓𑀧𑁆𑀧𑁂𑀲𑀼. 𑀧𑀼𑀭𑀺𑀫𑀧𑀤𑀲𑁆𑀲𑀸𑀢𑀺 𑀓𑀺𑀜𑁆𑀘𑀻𑀢𑀺 𑀧𑀤𑀲𑁆𑀲. 𑀉𑀢𑁆𑀢𑀭𑀧𑀤𑁂𑀦𑀸𑀢𑀺 𑀤𑀼𑀓𑁆𑀔𑀲𑁆𑀲𑀸𑀢𑀺 𑀧𑀤𑁂𑀦. 𑀲𑀫𑀸𑀦𑀯𑀺𑀪𑀢𑁆𑀢𑀻𑀢𑀺 𑀲𑀸𑀫𑀺𑀯𑀘𑀦𑀁. 𑀬𑀣𑀸 𑀓𑀺𑀁? ‘‘𑀓𑀲𑁆𑀲𑀘𑀺 𑀤𑀼𑀓𑁆𑀔𑀲𑁆𑀲𑀸’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀓𑀺𑀜𑁆𑀘𑀺 𑀤𑀼𑀓𑁆𑀔𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀓𑀸𑀫𑀓𑀸 𑀯𑀺𑀦𑀸 𑀪𑀯𑀺𑀲𑁆𑀲𑀸𑀫𑀸𑀢𑀺 𑀢𑀬𑀸 𑀲𑀤𑁆𑀥𑀺𑀁 𑀅𑀫𑀭𑀺𑀢𑁆𑀯𑀸 𑀅𑀓𑀸𑀫𑀸 𑀚𑀻𑀯𑀺𑀲𑁆𑀲𑀸𑀫. 𑀲𑀘𑁂𑀧𑀺 𑀦 𑀫𑀭𑀸𑀫, 𑀅𑀓𑀸𑀫𑀓𑀸𑀯 𑀢𑀬𑀸 𑀯𑀺𑀬𑁄𑀕𑀁 𑀧𑀸𑀧𑀼𑀡𑀺𑀲𑁆𑀲𑀸𑀫, 𑀢𑀬𑀺 𑀚𑀻𑀯𑀫𑀸𑀦𑁂 𑀏𑀯 𑀦𑁄 𑀫𑀭𑀡𑀁 𑀪𑀯𑁂𑀬𑁆𑀬, 𑀫𑀭𑀡𑁂𑀦𑀧𑀺 𑀦𑁄 𑀢𑀬𑀸 𑀯𑀺𑀬𑁄𑀕𑀁 𑀫𑀬𑀁 𑀅𑀓𑀸𑀫𑀓𑀸𑀯 𑀧𑀸𑀧𑀼𑀡𑀺𑀲𑁆𑀲𑀸𑀫.

𑁩𑁦. 𑀓𑀢𑀺𑀧𑀸𑀳𑀁 𑀩𑀮𑀁 𑀕𑀸𑀳𑁂𑀢𑁆𑀯𑀸𑀢𑀺 𑀓𑀲𑁆𑀫𑀸 𑀧𑀦𑀸𑀬𑀁 𑀢𑀣𑀸 𑀧𑀩𑁆𑀩𑀚𑁆𑀚𑀸𑀬 𑀢𑀺𑀩𑁆𑀩𑀘𑁆𑀙𑀦𑁆𑀤𑁄 𑀅𑀦𑀼𑀜𑁆𑀜𑀸𑀢𑁄 𑀲𑀫𑀸𑀦𑁄 𑀓𑀢𑀺𑀧𑀸𑀳𑀁 𑀖𑀭𑁂𑀬𑁂𑀯 𑀯𑀺𑀮𑀫𑁆𑀩𑀺𑀢𑁆𑀯𑀸 𑀓𑀸𑀬𑀩𑀮𑀜𑁆𑀘 𑀅𑀕𑁆𑀕𑀳𑁂𑀲𑀻𑀢𑀺? 𑀅𑀦𑀼𑀫𑀢𑀺𑀤𑀸𑀦𑁂𑀦 𑀫𑀸𑀢𑀸𑀧𑀺𑀢𑀽𑀲𑀼 𑀲𑀳𑀸𑀬𑀓𑁂𑀲𑀼 𑀘 𑀢𑀼𑀝𑁆𑀞𑁄 𑀢𑁂𑀲𑀁 𑀘𑀺𑀢𑁆𑀢𑀢𑀼𑀝𑁆𑀞𑀢𑁆𑀣𑀁. 𑀓𑁂𑀲𑀼𑀘𑀺 𑀅𑀝𑁆𑀞𑀓𑀣𑀸𑀧𑁄𑀢𑁆𑀣𑀓𑁂𑀲𑀼 𑀓𑁂𑀘𑀺 𑀆𑀘𑀭𑀺𑀬𑀸 ‘‘𑀅𑀬𑀁 𑀲𑀼𑀤𑀺𑀦𑁆𑀦𑁄 𑀚𑀻𑀯𑀓𑀯𑀢𑁆𑀣𑀼𑀢𑁄 𑀧𑀘𑁆𑀙𑀸 𑀧𑀁𑀲𑀼𑀓𑀽𑀮𑀺𑀓𑀥𑀼𑀢𑀗𑁆𑀕𑀯𑀲𑁂𑀦 𑀧𑀁𑀲𑀼𑀓𑀽𑀮𑀺𑀓𑁄 𑀚𑀸𑀢𑁄’’𑀢𑀺 𑀲𑀜𑁆𑀜𑀸𑀬 ‘‘𑀕𑀳𑀧𑀢𑀺𑀘𑀻𑀯𑀭𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀁𑀲𑀼𑀓𑀽𑀮𑀺𑀓𑀥𑀼𑀢𑀗𑁆𑀕𑀯𑀲𑁂𑀦 𑀧𑀁𑀲𑀼𑀓𑀽𑀮𑀺𑀓𑁄 𑀳𑁄𑀢𑀻’’𑀢𑀺 𑀮𑀺𑀔𑀦𑁆𑀢𑀺, 𑀢𑀁 ‘‘𑀅𑀘𑀺𑀭𑀽𑀧𑀲𑀫𑁆𑀧𑀦𑁆𑀦𑁄’’𑀢𑀺 𑀯𑀘𑀦𑁂𑀦 𑀯𑀺𑀭𑀼𑀚𑁆𑀛𑀢𑀺. ‘‘𑀢𑀣𑀸 𑀲𑀼𑀤𑀺𑀦𑁆𑀦𑁄 𑀳𑀺 𑀪𑀕𑀯𑀢𑁄 𑀤𑁆𑀯𑀸𑀤𑀲𑀫𑁂 𑀯𑀲𑁆𑀲𑁂 𑀧𑀩𑁆𑀩𑀚𑀺𑀢𑁄, 𑀯𑀻𑀲𑀢𑀺𑀫𑁂 𑀯𑀲𑁆𑀲𑁂 𑀜𑀸𑀢𑀺𑀓𑀼𑀮𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄 𑀲𑀬𑀁 𑀧𑀩𑁆𑀩𑀚𑁆𑀚𑀸𑀬 𑀅𑀝𑁆𑀞𑀯𑀲𑁆𑀲𑀺𑀓𑁄 𑀳𑀼𑀢𑁆𑀯𑀸’’𑀢𑀺, ‘‘𑀪𑀕𑀯𑀢𑁄 𑀳𑀺 𑀩𑀼𑀤𑁆𑀥𑀢𑁆𑀢𑀁 𑀧𑀢𑁆𑀢𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀇𑀤𑀁 𑀯𑀢𑁆𑀣𑀁, 𑀏𑀢𑁆𑀣𑀦𑁆𑀢𑀭𑁂 𑀯𑀻𑀲𑀢𑀺 𑀯𑀲𑁆𑀲𑀸𑀦𑀺 𑀦 𑀓𑁄𑀘𑀺 𑀕𑀳𑀧𑀢𑀺𑀘𑀻𑀯𑀭𑀁 𑀲𑀸𑀤𑀺𑀬𑀺, 𑀲𑀩𑁆𑀩𑁂 𑀧𑀁𑀲𑀼𑀓𑀽𑀮𑀺𑀓𑀸𑀯 𑀅𑀳𑁂𑀲𑀼’’𑀦𑁆𑀢𑀺 𑀘 𑀯𑀼𑀢𑁆𑀢𑁂𑀦 𑀅𑀝𑁆𑀞𑀓𑀣𑀸𑀯𑀘𑀦𑁂𑀦 𑀯𑀺𑀭𑀼𑀚𑁆𑀛𑀢𑀺, 𑀧𑀩𑁆𑀩𑀚𑁆𑀚𑀸𑀬 𑀅𑀝𑁆𑀞𑀯𑀲𑁆𑀲𑀺𑀓𑁄, 𑀦 𑀉𑀧𑀲𑀫𑁆𑀧𑀤𑀸𑀬. 𑀉𑀧𑀲𑀫𑁆𑀧𑀤𑀁 𑀧𑀦 𑀚𑀻𑀯𑀓𑀯𑀢𑁆𑀣𑀼𑀢𑁄 (𑀫𑀳𑀸𑀯. 𑁩𑁨𑁬) 𑀧𑀘𑁆𑀙𑀸 𑀅𑀮𑀢𑁆𑀣, 𑀢𑀲𑁆𑀫𑀸 𑀅𑀯𑀲𑁆𑀲𑀺𑀓𑁄 𑀜𑀸𑀢𑀺𑀓𑀼𑀮𑀁 𑀧𑀺𑀡𑁆𑀟𑀸𑀬 𑀧𑀯𑀺𑀝𑁆𑀞𑁄 𑀲𑀺𑀬𑀸𑀢𑀺 𑀘𑁂? 𑀦, ‘‘𑀅𑀮𑀢𑁆𑀣 𑀔𑁄 𑀲𑀼𑀤𑀺𑀦𑁆𑀦𑁄 𑀓𑀮𑀦𑁆𑀤𑀧𑀼𑀢𑁆𑀢𑁄 𑀪𑀕𑀯𑀢𑁄 𑀲𑀦𑁆𑀢𑀺𑀓𑁂 𑀧𑀩𑁆𑀩𑀚𑁆𑀚𑀁, 𑀅𑀮𑀢𑁆𑀣 𑀉𑀧𑀲𑀫𑁆𑀧𑀤’’𑀦𑁆𑀢𑀺 𑀏𑀓𑀢𑁄 𑀅𑀦𑀦𑁆𑀢𑀭𑀁 𑀯𑀼𑀢𑁆𑀢𑀢𑁆𑀢𑀸. 𑀧𑀩𑁆𑀩𑀚𑁆𑀚𑀸𑀦𑀦𑁆𑀢𑀭𑀫𑁂𑀯 𑀳𑀺 𑀲𑁄 𑀉𑀧𑀲𑀫𑁆𑀧𑀦𑁆𑀦𑁄 𑀢𑁂𑀭𑀲𑀥𑀼𑀢𑀗𑁆𑀕𑀕𑀼𑀡𑁂 𑀲𑀫𑀸𑀤𑀸𑀬 𑀯𑀢𑁆𑀢𑀦𑁆𑀢𑁄 𑀅𑀝𑁆𑀞 𑀯𑀲𑁆𑀲𑀸𑀦𑀺 𑀯𑀚𑁆𑀚𑀺𑀕𑀸𑀫𑁂 𑀯𑀺𑀳𑀭𑀺𑀢𑁆𑀯𑀸 𑀦𑀺𑀲𑁆𑀲𑀬𑀫𑀼𑀢𑁆𑀢𑀢𑁆𑀢𑀸 𑀲𑀬𑀁𑀯𑀲𑀻 𑀳𑀼𑀢𑁆𑀯𑀸 ‘‘𑀏𑀢𑀭𑀳𑀺 𑀔𑁄 𑀯𑀚𑁆𑀚𑀻 𑀤𑀼𑀩𑁆𑀪𑀺𑀓𑁆𑀔𑀸’’𑀢𑀺𑀆𑀤𑀺𑀢𑀓𑁆𑀓𑀯𑀲𑁂𑀦 𑀬𑁂𑀦 𑀯𑁂𑀲𑀸𑀮𑀻 𑀢𑀤𑀯𑀲𑀭𑀺, 𑀢𑀲𑁆𑀫𑀸 ‘‘𑀧𑀁𑀲𑀼𑀓𑀽𑀮𑀺𑀓𑀥𑀼𑀢𑀗𑁆𑀕𑀯𑀲𑁂𑀦 𑀧𑀁𑀲𑀼𑀓𑀽𑀮𑀺𑀓𑁄 𑀳𑁄𑀢𑀻’’𑀢𑀺 𑀏𑀢𑁆𑀢𑀓𑁄𑀬𑁂𑀯 𑀧𑀸𑀞𑁄 𑀬𑁂𑀲𑀼 𑀧𑁄𑀢𑁆𑀣𑀓𑁂𑀲𑀼 𑀤𑀺𑀲𑁆𑀲𑀢𑀺, 𑀲𑁄𑀯 𑀧𑀫𑀸𑀡𑀢𑁄 𑀕𑀳𑁂𑀢𑀩𑁆𑀩𑁄. ‘‘𑀆𑀭𑀜𑁆𑀜𑀺𑀓𑁄 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀧𑀜𑁆𑀘 𑀲𑁂𑀦𑀸𑀲𑀦𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀲𑀗𑁆𑀕𑀳𑀺𑀢𑀸𑀦𑀺 𑀦𑁂𑀲𑀚𑁆𑀚𑀺𑀓𑀗𑁆𑀕𑀜𑁆𑀘 𑀯𑀺𑀳𑀸𑀭𑀲𑀪𑀸𑀕𑀢𑁆𑀢𑀸, ‘‘𑀧𑀺𑀡𑁆𑀟𑀧𑀸𑀢𑀺𑀓𑁄’’𑀢𑀺 𑀇𑀫𑀺𑀦𑀸 𑀧𑀜𑁆𑀘 𑀧𑀺𑀡𑁆𑀟𑀧𑀸𑀢𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺, ‘‘𑀧𑀁𑀲𑀼𑀓𑀽𑀮𑀺𑀓𑁄’’𑀢𑀺 𑀇𑀫𑀺𑀦𑀸 𑀤𑁆𑀯𑁂 𑀘𑀻𑀯𑀭𑀧𑀝𑀺𑀲𑀁𑀬𑀼𑀢𑁆𑀢𑀸𑀦𑀺 𑀲𑀗𑁆𑀕𑀳𑀺𑀢𑀸𑀦𑀻𑀢𑀺. 𑀜𑀸𑀢𑀺𑀖𑀭𑀽𑀧𑀕𑀫𑀦𑀓𑀸𑀭𑀡𑀤𑀻𑀧𑀦𑀸𑀥𑀺𑀧𑁆𑀧𑀸𑀬𑀢𑁄 𑀲𑀧𑀤𑀸𑀦𑀘𑀸𑀭𑀺𑀓𑀗𑁆𑀕𑀁 𑀯𑀺𑀲𑀼𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀫𑀸 𑀅𑀢𑀺𑀳𑀭𑀸𑀧𑁂𑀲𑀼’’𑀦𑁆𑀢𑀺 𑀓𑀸𑀮𑀩𑁆𑀬𑀢𑁆𑀢𑀬𑀯𑀲𑁂𑀦 𑀯𑀼𑀢𑁆𑀢𑀁. 𑀥𑀫𑁆𑀫𑀲𑁆𑀲𑀦𑁆𑀢𑀭𑀸𑀬𑀓𑀭𑀢𑀭𑀢𑁆𑀢𑀸 ‘‘𑀇𑀫𑀁 𑀦𑀬’’𑀦𑁆𑀢𑀺 𑀅𑀦𑀬𑁄𑀬𑁂𑀯.

𑀬𑁂𑀪𑀼𑀬𑁆𑀬𑁂𑀦 𑀳𑀺 𑀲𑀢𑁆𑀢𑀸𑀦𑀁, 𑀯𑀺𑀦𑀸𑀲𑁂 𑀧𑀘𑁆𑀘𑀼𑀧𑀝𑁆𑀞𑀺𑀢𑁂;

𑀅𑀦𑀬𑁄 𑀦𑀬𑀭𑀽𑀧𑁂𑀦, 𑀩𑀼𑀤𑁆𑀥𑀺𑀫𑀸𑀕𑀫𑁆𑀫 𑀢𑀺𑀝𑁆𑀞𑀢𑀺.

𑁩𑁬. 𑀅𑀧𑀜𑁆𑀜𑀢𑁆𑀢𑁂 𑀲𑀺𑀓𑁆𑀔𑀸𑀧𑀤𑁂𑀢𑀺 𑀏𑀢𑁆𑀣 𑀤𑀼𑀯𑀺𑀥𑀁 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀁. 𑀓𑀣𑀁? ‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣𑀸’’𑀢𑀺 𑀏𑀯𑀁 𑀲𑀉𑀤𑁆𑀤𑁂𑀲𑀸𑀦𑀼𑀤𑁆𑀤𑁂𑀲𑀪𑁂𑀤𑀢𑁄 𑀤𑀼𑀯𑀺𑀥𑀁. 𑀢𑀢𑁆𑀣 𑀧𑀸𑀢𑀺𑀫𑁄𑀓𑁆𑀔𑁂 𑀲𑀭𑀽𑀧𑀢𑁄 𑀆𑀕𑀢𑀸 𑀧𑀜𑁆𑀘 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑀸 𑀲𑀉𑀤𑁆𑀤𑁂𑀲𑀧𑀜𑁆𑀜𑀢𑁆𑀢𑀺 𑀦𑀸𑀫. 𑀲𑀸𑀧𑀺 𑀤𑀼𑀯𑀺𑀥𑀸 𑀲𑀧𑀼𑀕𑁆𑀕𑀮𑀸𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑀪𑁂𑀤𑀢𑁄. 𑀢𑀢𑁆𑀣 𑀬𑀲𑁆𑀲𑀸 𑀧𑀜𑁆𑀜𑀢𑁆𑀢𑀺𑀬𑀸 𑀅𑀦𑁆𑀢𑁄 𑀆𑀧𑀢𑁆𑀢𑀺𑀬𑀸 𑀲𑀳, 𑀯𑀺𑀦𑀸 𑀯𑀸 𑀧𑀼𑀕𑁆𑀕𑀮𑁄 𑀤𑀲𑁆𑀲𑀺𑀢𑁄, 𑀲𑀸 𑀲𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑀸. 𑀇𑀢𑀭𑀸 𑀅𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑀸𑀧𑀺 𑀤𑀼𑀯𑀺𑀥𑀸 𑀤𑀲𑁆𑀲𑀺𑀢𑀸𑀤𑀲𑁆𑀲𑀺𑀢𑀸𑀧𑀢𑁆𑀢𑀺𑀪𑁂𑀤𑀢𑁄. 𑀢𑀢𑁆𑀣 𑀅𑀤𑀲𑁆𑀲𑀺𑀢𑀸𑀧𑀢𑁆𑀢𑀺𑀓𑀸 𑀦𑀸𑀫 𑀅𑀝𑁆𑀞 𑀧𑀸𑀭𑀸𑀚𑀺𑀓𑀸 𑀥𑀫𑁆𑀫𑀸. ‘‘𑀧𑀸𑀭𑀸𑀚𑀺𑀓𑁄 𑀳𑁄𑀢𑀺 𑀅𑀲𑀁𑀯𑀸𑀲𑁄’’𑀢𑀺 𑀳𑀺 𑀧𑀼𑀕𑁆𑀕𑀮𑁄𑀯 𑀢𑀢𑁆𑀣 𑀤𑀲𑁆𑀲𑀺𑀢𑁄, 𑀦𑀸𑀧𑀢𑁆𑀢𑀺. 𑀤𑀲𑁆𑀲𑀺𑀢𑀸𑀧𑀢𑁆𑀢𑀺𑀓𑀸 𑀦𑀸𑀫 𑀪𑀺𑀓𑁆𑀔𑀼𑀦𑀻𑀧𑀸𑀢𑀺𑀫𑁄𑀓𑁆𑀔𑁂 ‘‘𑀲𑀢𑁆𑀢𑀭𑀲 𑀲𑀗𑁆𑀖𑀸𑀤𑀺𑀲𑁂𑀲𑀸 𑀥𑀫𑁆𑀫𑀸 𑀦𑀺𑀲𑁆𑀲𑀸𑀭𑀡𑀻𑀬𑀁 𑀲𑀗𑁆𑀖𑀸𑀤𑀺𑀲𑁂𑀲’’𑀦𑁆𑀢𑀺 𑀳𑀺 𑀢𑀢𑁆𑀣 𑀆𑀧𑀢𑁆𑀢𑀺 𑀤𑀲𑁆𑀲𑀺𑀢𑀸 𑀲𑀤𑁆𑀥𑀺𑀁 𑀧𑀼𑀕𑁆𑀕𑀮𑁂𑀦, 𑀢𑀣𑀸 𑀅𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑀸𑀧𑀺 𑀤𑀲𑁆𑀲𑀺𑀢𑀸𑀤𑀲𑁆𑀲𑀺𑀢𑀸𑀧𑀢𑁆𑀢𑀺𑀢𑁄𑀯 𑀤𑀼𑀯𑀺𑀥𑀸. 𑀢𑀢𑁆𑀣 𑀅𑀤𑀲𑁆𑀲𑀺𑀢𑀸𑀧𑀢𑁆𑀢𑀺𑀓𑀸 𑀦𑀸𑀫 𑀲𑁂𑀔𑀺𑀬𑀸 𑀥𑀫𑁆𑀫𑀸. 𑀲𑁂𑀲𑀸 𑀤𑀲𑁆𑀲𑀺𑀢𑀸𑀧𑀢𑁆𑀢𑀺𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀲𑀸𑀧𑀺 𑀤𑀼𑀯𑀺𑀥𑀸 𑀅𑀦𑀺𑀤𑁆𑀤𑀺𑀝𑁆𑀞𑀓𑀸𑀭𑀓𑀦𑀺𑀤𑁆𑀤𑀺𑀝𑁆𑀞𑀓𑀸𑀭𑀓𑀪𑁂𑀤𑀢𑁄. 𑀢𑀢𑁆𑀣 𑀅𑀦𑀺𑀤𑁆𑀤𑀺𑀝𑁆𑀞𑀓𑀸𑀭𑀓𑀸 𑀦𑀸𑀫 𑀲𑀼𑀓𑁆𑀓𑀯𑀺𑀲𑁆𑀲𑀝𑁆𑀞𑀺 𑀫𑀼𑀲𑀸𑀯𑀸𑀤 𑀑𑀫𑀲𑀯𑀸𑀤 𑀧𑁂𑀲𑀼𑀜𑁆𑀜 𑀪𑀽𑀢𑀕𑀸𑀫 𑀅𑀜𑁆𑀜𑀯𑀸𑀤𑀓 𑀉𑀚𑁆𑀛𑀸𑀧𑀦𑀓 𑀕𑀡𑀪𑁄𑀚𑀦 𑀧𑀭𑀫𑁆𑀧𑀭𑀪𑁄𑀚𑀦 𑀲𑀼𑀭𑀸𑀫𑁂𑀭𑀬 𑀅𑀗𑁆𑀕𑀼𑀮𑀺𑀧𑀢𑁄𑀤𑀓 𑀳𑀲𑀥𑀫𑁆𑀫 𑀅𑀦𑀸𑀤𑀭𑀺𑀬 𑀢𑀮𑀖𑀸𑀢𑀓𑀚𑀢𑀼𑀫𑀝𑁆𑀞𑀓 𑀲𑀺𑀓𑁆𑀔𑀸𑀧𑀤𑀸𑀦𑀁 𑀯𑀲𑁂𑀦 𑀧𑀜𑁆𑀘𑀤𑀲𑀯𑀺𑀥𑀸 𑀳𑁄𑀦𑁆𑀢𑀺. 𑀲𑁂𑀲𑀸𑀦𑀁 𑀧𑀼𑀕𑁆𑀕𑀮𑀦𑀺𑀤𑁆𑀤𑁂𑀲𑀸𑀦𑀁 𑀯𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀓𑀸𑀭𑀓𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀦𑀼𑀤𑁆𑀤𑁂𑀲𑀧𑀜𑁆𑀜𑀢𑁆𑀢𑀺𑀧𑀺 𑀧𑀤𑀪𑀸𑀚𑀦𑀦𑁆𑀢𑀭𑀸𑀧𑀢𑁆𑀢𑀺𑀯𑀺𑀦𑀻𑀢𑀯𑀢𑁆𑀣𑀼𑀧𑀝𑀺𑀓𑁆𑀔𑁂𑀧𑀧𑀜𑁆𑀜𑀢𑁆𑀢𑀺𑀅𑀯𑀼𑀢𑁆𑀢𑀲𑀺𑀤𑁆𑀥𑀺𑀯𑀲𑁂𑀦 𑀙𑀩𑁆𑀩𑀺𑀥𑀸 𑀳𑁄𑀦𑁆𑀢𑀺. 𑀢𑀢𑁆𑀣 ‘‘𑀬𑁂𑀪𑀼𑀬𑁆𑀬𑁂𑀦 𑀔𑀸𑀬𑀺𑀢𑀁 𑀆𑀧𑀢𑁆𑀢𑀺 𑀣𑀼𑀮𑁆𑀮𑀘𑁆𑀘𑀬𑀲𑁆𑀲𑀸’’𑀢𑀺 (𑀧𑀸𑀭𑀸. 𑁬𑁧) 𑀏𑀯𑀫𑀸𑀤𑀺𑀓𑀸 𑀧𑀤𑀪𑀸𑀚𑀦𑀺𑀬𑁂 𑀲𑀦𑁆𑀤𑀺𑀲𑁆𑀲𑀫𑀸𑀦𑀸𑀧𑀢𑁆𑀢𑀺 𑀧𑀤𑀪𑀸𑀚𑀦𑀲𑀺𑀓𑁆𑀔𑀸𑀧𑀤𑀁 𑀦𑀸𑀫. ‘‘𑀦 𑀢𑁆𑀯𑁂𑀯 𑀦𑀕𑁆𑀕𑁂𑀦 𑀆𑀕𑀦𑁆𑀢𑀩𑁆𑀩𑀁, 𑀬𑁄 𑀆𑀕𑀘𑁆𑀙𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺𑀆𑀤𑀺𑀓𑀸 (𑀧𑀸𑀭𑀸. 𑁫𑁧𑁭) 𑀅𑀦𑁆𑀢𑀭𑀸𑀧𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀁 𑀦𑀸𑀫. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑀺𑀯𑀸 𑀧𑀝𑀺𑀲𑀮𑁆𑀮𑀻𑀬𑀦𑁆𑀢𑁂𑀦 𑀤𑁆𑀯𑀸𑀭𑀁 𑀲𑀁𑀯𑀭𑀺𑀢𑁆𑀯𑀸 𑀧𑀝𑀺𑀲𑀮𑁆𑀮𑀻𑀬𑀺𑀢𑀼’’𑀦𑁆𑀢𑀺 (𑀧𑀸𑀭𑀸. 𑁭𑁫) 𑀏𑀯𑀫𑀸𑀤𑀺𑀓𑀸 𑀯𑀺𑀦𑀻𑀢𑀯𑀢𑁆𑀣𑀼𑀲𑀺𑀓𑁆𑀔𑀸𑀧𑀤𑀁 𑀦𑀸𑀫. ‘‘𑀮𑁄𑀳𑀺𑀢𑀼𑀧𑁆𑀧𑀸𑀤𑀓𑁄, 𑀪𑀺𑀓𑁆𑀔𑀯𑁂, 𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦 𑀉𑀧𑀲𑀫𑁆𑀧𑀸𑀤𑁂𑀢𑀩𑁆𑀩𑁄, 𑀉𑀧𑀲𑀫𑁆𑀧𑀦𑁆𑀦𑁄 𑀦𑀸𑀲𑁂𑀢𑀩𑁆𑀩𑁄’’𑀢𑀺 (𑀫𑀳𑀸𑀯. 𑁧𑁧𑁪) 𑀏𑀯𑀫𑀸𑀤𑀺𑀓𑀸 𑀧𑀝𑀺𑀓𑁆𑀔𑁂𑀧𑀲𑀺𑀓𑁆𑀔𑀸𑀧𑀤𑀁 𑀦𑀸𑀫. 𑀔𑀦𑁆𑀥𑀓𑁂𑀲𑀼 𑀧𑀜𑁆𑀜𑀢𑁆𑀢𑀤𑀼𑀓𑁆𑀓𑀝𑀣𑀼𑀮𑁆𑀮𑀘𑁆𑀘𑀬𑀸𑀦𑀺 𑀧𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀁 𑀦𑀸𑀫. ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀦𑀘𑁆𑀘𑀁 𑀯𑀸 𑀕𑀻𑀢𑀁 𑀯𑀸 𑀯𑀸𑀤𑀺𑀢𑀁 𑀯𑀸 𑀤𑀲𑁆𑀲𑀦𑀸𑀬 𑀕𑀘𑁆𑀙𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 (𑀧𑀸𑀘𑀺. 𑁮𑁩𑁪) 𑀇𑀫𑀺𑀦𑀸 𑀯𑀼𑀢𑁆𑀢𑁂𑀦 ‘‘𑀬𑀸 𑀧𑀦 𑀪𑀺𑀓𑁆𑀔𑀼𑀦𑀻 𑀦𑀘𑁆𑀘𑁂𑀬𑁆𑀬 𑀯𑀸 𑀕𑀸𑀬𑁂𑀬𑁆𑀬 𑀯𑀸 𑀯𑀸𑀤𑁂𑀬𑁆𑀬 𑀯𑀸 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀏𑀯𑀫𑀸𑀤𑀺𑀓𑀁 𑀬𑀁 𑀓𑀺𑀜𑁆𑀘𑀺 𑀅𑀝𑁆𑀞𑀓𑀣𑀸𑀬 𑀤𑀺𑀲𑁆𑀲𑀫𑀸𑀦𑀁 𑀆𑀧𑀢𑁆𑀢𑀺𑀚𑀸𑀢𑀁, 𑀯𑀺𑀦𑀬𑀓𑀫𑁆𑀫𑀁 𑀯𑀸 𑀅𑀯𑀼𑀢𑁆𑀢𑀲𑀺𑀤𑁆𑀥𑀺𑀲𑀺𑀓𑁆𑀔𑀸𑀧𑀤𑀁 𑀦𑀸𑀫. 𑀙𑀩𑁆𑀩𑀺𑀥𑀫𑁆𑀧𑁂𑀢𑀁 𑀙𑀳𑀺 𑀓𑀸𑀭𑀡𑁂𑀳𑀺 𑀉𑀤𑁆𑀤𑁂𑀲𑀸𑀭𑀳𑀁 𑀦 𑀳𑁄𑀢𑀻𑀢𑀺 𑀅𑀦𑀼𑀤𑁆𑀤𑁂𑀲𑀲𑀺𑀓𑁆𑀔𑀸𑀧𑀤𑀁 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑁂𑀬𑁆𑀬𑀣𑀺𑀤𑀁 𑁋 𑀧𑀜𑁆𑀘𑀳𑀺 𑀉𑀤𑁆𑀤𑁂𑀲𑁂𑀳𑀺 𑀬𑀣𑀸𑀲𑀫𑁆𑀪𑀯𑀁 𑀯𑀺𑀲𑀪𑀸𑀕𑀢𑁆𑀢𑀸 𑀣𑀼𑀮𑁆𑀮𑀘𑁆𑀘𑀬𑀤𑀼𑀩𑁆𑀪𑀸𑀲𑀺𑀢𑀸𑀦𑀁, 𑀲𑀪𑀸𑀕𑀯𑀢𑁆𑀣𑀼𑀓𑀫𑁆𑀧𑀺 𑀤𑀼𑀓𑁆𑀓𑀝𑀣𑀼𑀮𑁆𑀮𑀘𑁆𑀘𑀬𑀤𑁆𑀯𑀬𑀁 𑀅𑀲𑀪𑀸𑀕𑀸𑀧𑀢𑁆𑀢𑀺𑀓𑀢𑁆𑀢𑀸, 𑀅𑀦𑁆𑀢𑀭𑀸𑀧𑀢𑁆𑀢𑀺𑀧𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀸𑀦𑀁 𑀦𑀸𑀦𑀸𑀯𑀢𑁆𑀣𑀼𑀓𑀸𑀧𑀢𑁆𑀢𑀺𑀓𑀢𑁆𑀢𑀸, 𑀧𑀝𑀺𑀓𑁆𑀔𑁂𑀧𑀲𑀺𑀓𑁆𑀔𑀸𑀧𑀤𑀸𑀦𑀁 𑀓𑁂𑀲𑀜𑁆𑀘𑀺 𑀯𑀺𑀦𑀻𑀢𑀯𑀢𑁆𑀣𑀼𑀧𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀸𑀦𑀜𑁆𑀘 𑀅𑀤𑀲𑁆𑀲𑀺𑀢𑀸𑀧𑀢𑁆𑀢𑀺𑀓𑀢𑁆𑀢𑀸, 𑀅𑀤𑀲𑁆𑀲𑀺𑀢𑀯𑀢𑁆𑀣𑀼𑀓𑀢𑁆𑀢𑀸 𑀪𑁂𑀤𑀸𑀦𑀼𑀯𑀢𑁆𑀢𑀓𑀣𑀼𑀮𑁆𑀮𑀘𑁆𑀘𑀬𑀲𑁆𑀲, 𑀅𑀤𑀲𑁆𑀲𑀺𑀢𑀸𑀧𑀢𑁆𑀢𑀺𑀯𑀢𑁆𑀣𑀼𑀓𑀢𑁆𑀢𑀸 𑀅𑀯𑀼𑀢𑁆𑀢𑀲𑀺𑀤𑁆𑀥𑀺𑀲𑀺𑀓𑁆𑀔𑀸𑀧𑀤𑀸𑀦𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 ‘‘𑀤𑀼𑀯𑀺𑀥𑀁 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀸𑀧𑀦𑀁 𑀉𑀤𑁆𑀤𑁂𑀲𑀸𑀦𑀼𑀤𑁆𑀤𑁂𑀲𑀪𑁂𑀤𑀢𑁄’’𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀁 𑀲𑀫𑀸𑀲𑀢𑁄 𑀧𑀓𑀸𑀲𑀺𑀢𑀁 𑀳𑁄𑀢𑀺.

𑀢𑀢𑁆𑀣 𑀅𑀧𑀜𑁆𑀜𑀢𑁆𑀢𑁂 𑀲𑀺𑀓𑁆𑀔𑀸𑀧𑀤𑁂𑀢𑀺 𑀲𑀉𑀤𑁆𑀤𑁂𑀲𑀲𑀺𑀓𑁆𑀔𑀸𑀧𑀤𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀓𑀘𑁆𑀘𑁂 𑀆𑀘𑀭𑀺𑀬𑀸 𑀏𑀯𑀁 𑀓𑀺𑀭 𑀯𑀡𑁆𑀡𑀬𑀦𑁆𑀢𑀺 ‘‘𑀘𑀢𑁆𑀢𑀸𑀭𑁄 𑀧𑀸𑀭𑀸𑀚𑀺𑀓𑀸 𑀓𑀢𑀺𑀯𑀲𑁆𑀲𑀸𑀪𑀺𑀲𑀫𑁆𑀩𑀼𑀤𑁆𑀥𑁂𑀦 𑀪𑀕𑀯𑀢𑀸 𑀧𑀜𑁆𑀜𑀢𑁆𑀢𑀸𑀢𑀺𑀆𑀤𑀺𑀦𑀸 𑀧𑀼𑀘𑁆𑀙𑀁 𑀓𑀢𑁆𑀯𑀸 𑀢𑁂𑀲𑀼 𑀧𑀞𑀫𑀧𑀸𑀭𑀸𑀚𑀺𑀓𑁄 𑀯𑁂𑀲𑀸𑀮𑀺𑀬𑀁 𑀧𑀜𑁆𑀜𑀢𑁆𑀢𑁄 𑀧𑀜𑁆𑀘𑀯𑀲𑁆𑀲𑀸𑀪𑀺𑀲𑀫𑁆𑀩𑀼𑀤𑁆𑀥𑁂𑀦 𑀳𑁂𑀫𑀦𑁆𑀢𑀸𑀦𑀁 𑀧𑀞𑀫𑁂 𑀫𑀸𑀲𑁂 𑀤𑀼𑀢𑀺𑀬𑁂 𑀧𑀓𑁆𑀔𑁂 𑀤𑀲𑀫𑁂 𑀤𑀺𑀯𑀲𑁂 𑀅𑀟𑁆𑀠𑀢𑁂𑀬𑁆𑀬𑀧𑁄𑀭𑀺𑀲𑀸𑀬 𑀙𑀸𑀬𑀸𑀬 𑀧𑀼𑀭𑀢𑁆𑀣𑀸𑀪𑀺𑀫𑀼𑀔𑁂𑀦 𑀦𑀺𑀲𑀺𑀦𑁆𑀦𑁂𑀦 𑀅𑀟𑁆𑀠𑀢𑁂𑀭𑀲𑀸𑀦𑀁 𑀪𑀺𑀓𑁆𑀔𑀼𑀲𑀢𑀸𑀦𑀁 𑀫𑀚𑁆𑀛𑁂 𑀲𑀼𑀤𑀺𑀦𑁆𑀦𑀁 𑀓𑀮𑀦𑁆𑀤𑀧𑀼𑀢𑁆𑀢𑀁 𑀆𑀭𑀩𑁆𑀪 𑀧𑀜𑁆𑀜𑀢𑁆𑀢𑁄’’𑀢𑀺, 𑀢𑀁 𑀦 𑀬𑀼𑀚𑁆𑀚𑀢𑀺, 𑀓𑀲𑁆𑀫𑀸? 𑁋

𑀬𑀲𑁆𑀫𑀸 𑀤𑁆𑀯𑀸𑀤𑀲𑀫𑀁 𑀯𑀲𑁆𑀲𑀁, 𑀯𑁂𑀭𑀜𑁆𑀚𑀸𑀬𑀁 𑀯𑀲𑀺 𑀚𑀺𑀦𑁄;

𑀢𑀲𑁆𑀫𑀺𑀜𑁆𑀘 𑀲𑀼𑀤𑁆𑀥𑁄 𑀲𑀗𑁆𑀖𑁄𑀢𑀺, 𑀦𑁂𑀯 𑀧𑀸𑀭𑀸𑀚𑀺𑀓𑀁 𑀢𑀤𑀸.

𑀣𑁂𑀭𑀲𑁆𑀲 𑀲𑀸𑀭𑀺𑀧𑀼𑀢𑁆𑀢𑀲𑁆𑀲, 𑀲𑀺𑀓𑁆𑀔𑀸𑀧𑀜𑁆𑀜𑀢𑁆𑀢𑀺𑀬𑀸𑀘𑀦𑀸;

𑀢𑀲𑁆𑀫𑀺𑀁 𑀲𑀺𑀤𑁆𑀥𑀸𑀢𑀺 𑀲𑀺𑀤𑁆𑀥𑀸𑀯, 𑀕𑀭𑀼𑀓𑀸𑀧𑀢𑁆𑀢𑀺 𑀦𑁄 𑀢𑀤𑀸.

𑀑𑀯𑀸𑀤𑀧𑀸𑀢𑀺𑀫𑁄𑀓𑁆𑀔𑀜𑁆𑀘, 𑀓𑀺𑀁 𑀲𑀢𑁆𑀣𑀸 𑀘𑀢𑀼𑀯𑀲𑁆𑀲𑀺𑀓𑁄;

𑀧𑀝𑀺𑀓𑁆𑀔𑀺𑀧𑀺 𑀓𑀺𑀫𑀸𑀡𑀜𑁆𑀘, 𑀲𑀫𑀢𑁆𑀢𑀁 𑀅𑀦𑀼𑀚𑀸𑀦𑀺 𑀲𑁄.

𑀅𑀚𑀸𑀢𑀲𑀢𑁆𑀢𑀼𑀁 𑀦𑀺𑀲𑁆𑀲𑀸𑀬, 𑀲𑀗𑁆𑀖𑀪𑁂𑀤𑀫𑀓𑀸𑀲𑀺 𑀬𑀁;