𑀧𑀸𑀘𑀺𑀢𑁆𑀢𑀺𑀬𑀯𑀡𑁆𑀡𑀦𑀸

𑁫. 𑀧𑀸𑀘𑀺𑀢𑁆𑀢𑀺𑀬𑀓𑀡𑁆𑀟𑁄

𑁧. 𑀫𑀼𑀲𑀸𑀯𑀸𑀤𑀯𑀕𑁆𑀕𑁄

𑁧. 𑀫𑀼𑀲𑀸𑀯𑀸𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧. 𑀯𑀸𑀤𑀓𑁆𑀔𑀺𑀢𑁆𑀢𑁄𑀢𑀺 𑀏𑀢𑁆𑀣 𑀅𑀯𑀺𑀲𑁂𑀲𑁂𑀦 𑀯𑀸𑀤𑀚𑀧𑁆𑀧𑀯𑀺𑀢𑀡𑁆𑀟𑀲𑀗𑁆𑀔𑀸𑀢𑁄 𑀢𑀺𑀯𑀺𑀥𑁄𑀧𑀺 𑀓𑀣𑀸𑀫𑀕𑁆𑀕𑁄 ‘‘𑀯𑀸𑀤𑁄’’ 𑀇𑀘𑁆𑀘𑁂𑀯 𑀯𑀼𑀢𑁆𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀢𑁂𑀲𑀼 ‘‘𑀢𑀺𑀢𑁆𑀣𑀺𑀬𑁂𑀳𑀺 𑀲𑀤𑁆𑀥𑀺’’𑀦𑁆𑀢𑀺 𑀯𑀘𑀦𑀢𑁄 𑀞𑀧𑁂𑀢𑁆𑀯𑀸 𑀯𑀸𑀤𑀁 ‘‘𑀲𑁂𑀲𑀸’’𑀢𑀺 𑀯𑀤𑀦𑁆𑀢𑀺. 𑀙𑀮𑀚𑀸𑀢𑀺𑀦𑀺𑀕𑁆𑀕𑀳𑀝𑁆𑀞𑀸𑀦𑀓𑀼𑀲𑀮𑀢𑀸𑀬 𑀓𑀤𑀸𑀘𑀺 𑀓𑀢𑁆𑀣𑀘𑀺 𑀅𑀯𑀚𑀸𑀦𑀺𑀢𑁆𑀯𑀸 𑀧𑀝𑀺𑀚𑀸𑀦𑀸𑀢𑀺, 𑀢𑀣𑀸 𑀧𑀼𑀩𑁆𑀩𑁂 𑀓𑀺𑀜𑁆𑀘𑀺 𑀯𑀘𑀦𑀁 𑀧𑀝𑀺𑀚𑀸𑀦𑀺𑀢𑁆𑀯𑀸 𑀧𑀘𑁆𑀙𑀸 𑀅𑀯𑀚𑀸𑀦𑀸𑀢𑀺. 𑀏𑀯𑀁 𑀯𑀸 𑀅𑀜𑁆𑀜𑀣𑀸 𑀯𑀸 𑀅𑀜𑁆𑀜𑁂𑀦𑀜𑁆𑀜𑀁 𑀧𑀝𑀺𑀘𑀭𑀢𑀺. 𑀏𑀯𑀁 𑀧𑀯𑀢𑁆𑀢𑁄 𑀲𑀫𑁆𑀧𑀚𑀸𑀦𑀫𑀼𑀲𑀸 𑀪𑀸𑀲𑀁 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀅𑀲𑀘𑁆𑀘𑀸𑀬𑀦𑁆𑀢𑁄 𑀲𑀗𑁆𑀓𑁂𑀢𑀁 𑀓𑀢𑁆𑀯𑀸 𑀯𑀺𑀲𑀁𑀯𑀸𑀤𑁂𑀦𑁆𑀢𑁄 𑀏𑀯𑀁 𑀲𑁄 𑀯𑀸𑀤𑀓𑁆𑀔𑀺𑀢𑁆𑀢𑁄 𑀲𑀫𑀸𑀦𑁄 𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀼𑀜𑁆𑀘 𑀧𑀭𑀺𑀧𑀽𑀭𑁂𑀦𑁆𑀢𑁄 𑀯𑀺𑀘𑀭𑀢𑀻𑀢𑀺 𑀏𑀯𑀫𑀥𑀺𑀧𑁆𑀧𑀸𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀢𑁆𑀢𑀦𑁄 𑀯𑀸𑀤𑁂𑀢𑀺 𑀏𑀢𑁆𑀣 ‘‘𑀲𑀩𑁆𑀩𑁂 𑀥𑀫𑁆𑀫𑀸 𑀅𑀦𑀢𑁆𑀢𑀸’’𑀢𑀺 (𑀥. 𑀧. 𑁨𑁭𑁯; 𑀘𑀽𑀴𑀦𑀺. 𑀅𑀚𑀺𑀢𑀫𑀸𑀡𑀯𑀧𑀼𑀘𑁆𑀙𑀸𑀦𑀺𑀤𑁆𑀤𑁂𑀲 𑁭; 𑀦𑁂𑀢𑁆𑀢𑀺. 𑁫; 𑀫𑀳𑀸𑀦𑀺. 𑁨𑁭) 𑀧𑀞𑀫𑀫𑀸𑀭𑀤𑁆𑀥𑁂 𑀅𑀢𑁆𑀢𑀦𑁄 𑀯𑀸𑀤𑁂. ‘‘𑀬𑀁 𑀤𑀼𑀓𑁆𑀔𑀁 𑀢𑀤𑀦𑀢𑁆𑀢𑀸’’𑀢𑀺 (𑀲𑀁. 𑀦𑀺. 𑁩.𑁧𑁫) 𑀦𑁄 𑀲𑀫𑀬𑁄. ‘‘𑀲𑀩𑁆𑀩𑁂 𑀥𑀫𑁆𑀫𑀸’’𑀢𑀺 𑀯𑀼𑀢𑁆𑀢𑁂 𑀦𑀺𑀩𑁆𑀩𑀸𑀦𑀫𑁆𑀧𑀺 𑀲𑀗𑁆𑀕𑀳𑀁 𑀕𑀘𑁆𑀙𑀢𑀺. ‘‘𑀦𑀺𑀩𑁆𑀩𑀸𑀦𑀁 𑀧𑀭𑀫𑀁 𑀲𑀼𑀔’’𑀦𑁆𑀢𑀺 (𑀥. 𑀧. 𑁨𑁦𑁩-𑁨𑁦𑁪; 𑀫. 𑀦𑀺. 𑁨.𑁨𑁧𑁫) 𑀯𑀼𑀢𑁆𑀢𑀢𑁆𑀢𑀸 𑀧𑀦 𑀢𑀁 𑀦 𑀤𑀼𑀓𑁆𑀔𑀁. 𑀦𑁄 𑀞𑀸𑀦𑀫𑁂𑀢𑀁 𑀯𑀺𑀚𑁆𑀚𑀢𑀺. 𑀅𑀬𑀁 𑀧𑀭𑀯𑀸𑀤𑀻 ‘‘𑀬𑀁 𑀤𑀼𑀓𑁆𑀔𑀁 𑀢𑀤𑀦𑀢𑁆𑀢𑀸’’𑀢𑀺 𑀲𑀼𑀢𑁆𑀢𑀁 𑀤𑀲𑁆𑀲𑁂𑀢𑁆𑀯𑀸 𑀲𑀺𑀤𑁆𑀥𑀦𑁆𑀢𑀁 𑀲𑀫𑁆𑀪𑀫𑁂𑀢𑁆𑀯𑀸 ‘‘𑀯𑀺𑀭𑁄𑀥𑀺 𑀯𑀺𑀭𑀼𑀤𑁆𑀥𑁄’’𑀢𑀺 𑀯𑀼𑀢𑁆𑀢𑀁 𑀤𑁄𑀲𑀁 𑀆𑀭𑁄𑀧𑁂𑀲𑁆𑀲𑀢𑀻𑀢𑀺 𑀢𑀲𑁆𑀫𑀺𑀁 𑀧𑀞𑀫𑀯𑀸𑀤𑁂 𑀓𑀜𑁆𑀘𑀺 𑀤𑁄𑀲𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀆𑀭𑁄𑀧𑀺𑀢𑁂 𑀯𑀸 𑀤𑁄𑀲𑁂 𑀅𑀦𑀸𑀭𑁄𑀧𑀺𑀢𑁂 𑀯𑀸 ‘‘𑀦𑀸𑀬𑀁 𑀫𑀫 𑀯𑀸𑀤𑁄’’𑀢𑀺 𑀢𑀁 𑀅𑀯𑀚𑀸𑀦𑀺𑀢𑁆𑀯𑀸 ‘‘𑀦𑀺𑀩𑁆𑀩𑀸𑀦𑀦𑁆𑀢𑁆𑀯𑁂𑀯 𑀲𑀲𑁆𑀲𑀢’’𑀦𑁆𑀢𑀺, ‘‘𑀅𑀦𑀢𑁆𑀢𑀸 𑀇𑀢𑀺 𑀦𑀺𑀘𑁆𑀙𑀬𑀸’’𑀢𑀺 𑀘 𑀲𑀼𑀢𑁆𑀢𑀁 𑀤𑀺𑀲𑁆𑀯𑀸 𑀢𑀲𑁆𑀲 𑀧𑀞𑀫𑀯𑀸𑀤𑀲𑁆𑀲 𑀦𑀺𑀤𑁆𑀤𑁄𑀲𑀢𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀫𑀫𑁂𑀯 𑀅𑀬𑀁 𑀯𑀸𑀤𑁄’’𑀢𑀺 𑀢𑀫𑁂𑀯 𑀧𑀘𑁆𑀙𑀸 𑀧𑀝𑀺𑀚𑀸𑀦𑀸𑀢𑀺. 𑀏𑀯𑀁 𑀢𑀢𑁆𑀣 𑀬𑀣𑀸𑀯𑀼𑀢𑁆𑀢𑀫𑀸𑀦𑀺𑀲𑀁𑀲𑀁 𑀲𑀮𑁆𑀮𑀓𑁆𑀔𑁂𑀦𑁆𑀢𑁄 𑀢𑀁 𑀧𑀝𑀺𑀚𑀸𑀦𑀺𑀢𑁆𑀯𑀸 𑀬𑀤𑀺 𑀅𑀦𑀢𑁆𑀢𑀸 𑀲𑀩𑁆𑀩𑁂 𑀥𑀫𑁆𑀫𑀸, 𑀥𑀫𑁆𑀫𑀸 𑀏𑀯 𑀦 𑀢𑁂 𑀪𑀯𑀦𑁆𑀢𑀺. 𑀲𑀪𑀸𑀯𑀁 𑀥𑀸𑀭𑁂𑀦𑁆𑀢𑀻𑀢𑀺 𑀳𑀺 ‘‘𑀥𑀫𑁆𑀫𑀸’’𑀢𑀺 𑀯𑀼𑀘𑁆𑀘𑀦𑁆𑀢𑀺.

𑀅𑀬𑀜𑁆𑀘 𑀅𑀢𑁆𑀢-𑀲𑀤𑁆𑀤𑁄 𑀲𑀪𑀸𑀯𑀯𑀸𑀘𑀻𑀢𑀺 𑀏𑀯𑀁 𑀆𑀭𑁄𑀧𑀺𑀢𑁂 𑀯𑀸 𑀤𑁄𑀲𑁂 𑀅𑀦𑀸𑀭𑁄𑀧𑀺𑀢𑁂 𑀯𑀸 𑀤𑁄𑀲𑁄𑀢𑀺 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 ‘‘𑀦𑀸𑀬𑀁 𑀫𑀫 𑀯𑀸𑀤𑁄’’𑀢𑀺 𑀢𑀫𑁂𑀯 𑀧𑀞𑀫𑀯𑀸𑀤𑀁 𑀧𑀘𑁆𑀙𑀸 𑀅𑀯𑀚𑀸𑀦𑀸𑀢𑀺. 𑀅𑀣 𑀲𑁄 𑀧𑀭𑀯𑀸𑀤𑀻 𑀲𑀧𑀓𑁆𑀔𑀁 𑀧𑀝𑀺𑀲𑁂𑀥𑁂 𑀧𑀝𑀺𑀚𑀸𑀦𑀦𑀢𑁆𑀢𑀸𑀧𑀦𑀬𑀦𑀁. 𑀧𑀝𑀺𑀚𑀸𑀦𑀸𑀢𑀺 𑀧𑀢𑁆𑀬𑀸𑀲𑁆𑀲 𑀇𑀢𑀺 𑀯𑀘𑀦𑀢𑁄 ‘‘𑀧𑀝𑀺𑀜𑁆𑀜𑀸 𑀅𑀜𑁆𑀜𑀸 𑀲𑁄 𑀦𑀸𑀫 𑀢𑁂 𑀦𑀺𑀕𑁆𑀕𑀳𑁄’’𑀢𑀺 𑀯𑀼𑀢𑁆𑀢𑁄. 𑀲𑀪𑀸𑀯𑀸𑀢𑀺𑀭𑀺𑀢𑁆𑀢𑀁 𑀅𑀢𑁆𑀣𑀁 𑀧𑀝𑀺𑀲𑁂𑀥𑀸𑀥𑀺𑀧𑁆𑀧𑀸𑀬𑀢𑁄 𑀲𑀪𑀸𑀯𑀢𑁄 𑀅𑀢𑀺𑀭𑀺𑀢𑁆𑀢𑀁 𑀩𑀸𑀮𑀧𑀭𑀺𑀓𑀧𑁆𑀧𑀺𑀢𑀫𑀢𑁆𑀢𑀸𑀦𑀁 𑀲𑀦𑁆𑀥𑀸𑀬 ‘‘𑀅𑀦𑀢𑁆𑀢𑀸 𑀲𑀩𑁆𑀩𑁂 𑀥𑀫𑁆𑀫𑀸’’𑀢𑀺 𑀫𑁂 𑀧𑀝𑀺𑀜𑁆𑀜𑀸𑀢𑀓𑀣𑀸, 𑀲𑀸 𑀘 𑀢𑀤𑀯𑀢𑁆𑀣𑀸𑀬𑁂𑀯𑀸𑀢𑀺 𑀦 𑀫𑁂 𑀢𑀁 𑀧𑀝𑀺𑀜𑁆𑀜𑀸𑀢𑀢𑁆𑀢𑀸𑀧𑀦𑀬𑀦𑀁 𑀅𑀢𑁆𑀣𑀺, ‘‘𑀦𑀸𑀬𑀁 𑀫𑀫 𑀯𑀸𑀤𑁄’’𑀢𑀺 𑀅𑀯𑀚𑀸𑀦𑀦𑀁 𑀧𑀦 𑀲𑀪𑀸𑀯𑀲𑀗𑁆𑀔𑀸𑀢𑀁 𑀅𑀢𑁆𑀢𑀸𑀦𑀁 𑀲𑀦𑁆𑀥𑀸𑀬 ‘‘𑀅𑀦𑀢𑁆𑀢𑀸 𑀲𑀩𑁆𑀩𑁂 𑀥𑀫𑁆𑀫𑀸’’𑀢𑀺 𑀦 𑀯𑀤𑀸𑀫𑀻𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀓𑀢𑀦𑁆𑀢𑀺 𑀇𑀫𑀺𑀦𑀸 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦 𑀢𑀁 𑀧𑀼𑀩𑁆𑀩𑁂 𑀧𑀝𑀺𑀜𑁆𑀜𑀸𑀢𑀢𑁆𑀢𑀸𑀧𑀦𑀬𑀦𑀁 𑀓𑀸𑀭𑀡𑀁 𑀧𑀝𑀺𑀘𑁆𑀙𑀸𑀤𑁂𑀢𑀺. ‘‘𑀅𑀦𑀢𑁆𑀢𑀸 𑀲𑀩𑁆𑀩𑁂𑀯 𑀥𑀫𑁆𑀫𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀁 ‘‘𑀅𑀢𑁆𑀢-𑀲𑀤𑁆𑀤𑀲𑁆𑀲 𑀲𑀪𑀸𑀯𑀯𑀸𑀘𑀺𑀢𑁆𑀢𑀸’’𑀢𑀺 𑀇𑀤𑀁 𑀓𑀸𑀭𑀡𑀁 𑀧𑀝𑀺𑀘𑁆𑀘 𑀢𑁂𑀦 𑀧𑀼𑀩𑁆𑀩𑁂 𑀧𑀝𑀺𑀜𑁆𑀜𑀸𑀢𑀢𑁆𑀢𑀸𑀧𑀦𑀬𑀦𑀁 𑀓𑀢𑀁. 𑀢𑀫𑀜𑁆𑀜𑀓𑀸𑀭𑀡𑀁 𑀧𑀘𑁆𑀙𑀸 𑀤𑀲𑁆𑀲𑀺𑀢𑁂𑀦 𑀅𑀜𑁆𑀜𑁂𑀦 𑀓𑀸𑀭𑀡𑁂𑀦 𑀧𑀝𑀺𑀘𑁆𑀙𑀸𑀤𑁂𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑀬𑀲𑁆𑀫𑀸 𑀦 𑀓𑁂𑀯𑀮𑀁 𑀬𑀣𑀸𑀤𑀲𑁆𑀲𑀺𑀢𑀦𑀬𑁂𑀦 𑀲𑁄 𑀅𑀢𑁆𑀣𑀫𑁂𑀯 𑀅𑀯𑀚𑀸𑀦𑀸𑀢𑀺, 𑀧𑀝𑀺𑀚𑀸𑀦𑀸𑀢𑀺 𑀘, 𑀓𑀺𑀦𑁆𑀢𑀼 𑀯𑀘𑀦𑀫𑁆𑀧𑀺, 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀘𑀺. 𑀅𑀝𑁆𑀞. 𑁧) ‘‘𑀚𑀸𑀦𑀺𑀢𑀩𑁆𑀩𑀢𑁄’’𑀢𑀺 𑀧𑀞𑀫𑀁 𑀓𑀸𑀭𑀡𑀁 𑀯𑀢𑁆𑀯𑀸 𑀧𑀭𑀯𑀸𑀤𑀺𑀦𑀸 ‘‘𑀬𑀤𑀺 𑀚𑀸𑀦𑀺𑀢𑀩𑁆𑀩𑀢𑁄 𑀅𑀦𑀺𑀘𑁆𑀘𑀁, 𑀦𑀺𑀩𑁆𑀩𑀸𑀦𑀁 𑀢𑁂 𑀅𑀦𑀺𑀘𑁆𑀘𑀁 𑀲𑀺𑀬𑀸’’𑀢𑀺 𑀯𑀼𑀢𑁆𑀢𑁂 ‘‘𑀦 𑀫𑀬𑀸 ‘𑀚𑀸𑀦𑀺𑀢𑀩𑁆𑀩𑀢𑁄’𑀢𑀺 𑀓𑀸𑀭𑀡𑀁 𑀯𑀼𑀢𑁆𑀢𑀁, ‘𑀚𑀸𑀢𑀺𑀥𑀫𑁆𑀫𑀢𑁄’𑀢𑀺 𑀫𑀬𑀸 𑀯𑀼𑀢𑁆𑀢𑀁, 𑀢𑀁 𑀢𑀬𑀸 𑀩𑀥𑀺𑀭𑀢𑀸𑀬 𑀅𑀜𑁆𑀜𑁂𑀦 𑀲𑀮𑁆𑀮𑀓𑁆𑀔𑀺𑀢𑀦𑁆𑀢𑀺𑀆𑀤𑀻𑀦𑀺 𑀯𑀤𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘𑀚𑀸𑀦𑀺𑀢𑀩𑁆𑀩𑀢𑁄’𑀢𑀺 𑀯𑀢𑁆𑀯𑀸 𑀧𑀼𑀦 ‘𑀚𑀸𑀢𑀺𑀥𑀫𑁆𑀫𑀢𑁄’𑀢𑀺𑀆𑀤𑀻𑀦𑀺 𑀯𑀤𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀅𑀯𑀚𑀸𑀦𑀺𑀢𑁆𑀯𑀸 𑀧𑀼𑀦 𑀧𑀝𑀺𑀚𑀸𑀦𑀦𑁆𑀢𑁄 𑀢𑀁 𑀅𑀯𑀚𑀸𑀦𑀦𑀁 𑀇𑀫𑀺𑀦𑀸 𑀧𑀝𑀺𑀘𑁆𑀙𑀸𑀤𑁂𑀢𑀺 𑀦𑀸𑀫𑀸’’𑀢𑀺 𑀮𑀺𑀔𑀺𑀢𑀁.

𑁨. 𑀚𑀸𑀦𑀺𑀢𑁆𑀯𑀸 𑀚𑀸𑀦𑀦𑁆𑀢𑀲𑁆𑀲 𑀘𑀸𑀢𑀺 𑀚𑀸𑀦𑀺𑀢𑁆𑀯𑀸 𑀯𑀸 𑀚𑀸𑀦𑀦𑁆𑀢𑀲𑁆𑀲 𑀯𑀸𑀢𑀺 𑀅𑀢𑁆𑀣𑀤𑁆𑀯𑀬𑀁 𑀤𑀻𑀧𑁂𑀢𑀻𑀢𑀺.

𑁩. 𑀅𑀧𑀺𑀘 𑀫𑀺𑀘𑁆𑀙𑀸𑀯𑀸𑀘𑀸𑀧𑀭𑀺𑀬𑀸𑀧𑀦𑁆𑀦𑀸𑀢𑀺 𑀘𑀢𑀼𑀩𑁆𑀩𑀺𑀥𑀫𑀺𑀘𑁆𑀙𑀸𑀯𑀸𑀘𑀸𑀧𑀭𑀺𑀬𑀸𑀧𑀦𑁆𑀦𑀸. 𑀲𑀻𑀳𑀴𑀸𑀤𑀺𑀦𑀸𑀫𑀪𑁂𑀤𑀕𑀢𑀸𑀢𑀺 𑀓𑁂𑀘𑀺, 𑀢𑀲𑁆𑀫𑀸 𑀏𑀯𑀁 𑀯𑀤𑀢𑁄 𑀯𑀘𑀦𑀁, 𑀢𑀁𑀲𑀫𑀼𑀝𑁆𑀞𑀸𑀧𑀺𑀓𑀸 𑀘𑁂𑀢𑀦𑀸𑀢𑀺 𑀉𑀪𑀬𑀁 𑀯𑀼𑀢𑁆𑀢𑀦𑁆𑀢𑀺 𑀫𑀸𑀢𑀺𑀓𑀸𑀬𑀁 𑀉𑀪𑀺𑀦𑁆𑀦𑀁 𑀲𑀗𑁆𑀕𑀳𑀺𑀢𑀢𑁆𑀢𑀸. 𑀯𑀺𑀪𑀗𑁆𑀕𑁂 𑀢𑀁 𑀯𑀘𑀦𑀁 𑀬𑀲𑁆𑀫𑀸 𑀯𑀺𑀦𑀸 𑀯𑀺𑀜𑁆𑀜𑀢𑁆𑀢𑀺𑀬𑀸 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀯𑀸𑀘𑀲𑀺𑀓𑀸 𑀯𑀺𑀜𑁆𑀜𑀢𑁆𑀢𑀻’’𑀢𑀺 𑀯𑀺𑀜𑁆𑀜𑀢𑁆𑀢𑀺 𑀘 𑀤𑀲𑁆𑀲𑀺𑀢𑀸. ‘‘𑀏𑀯𑀁 𑀯𑀤𑀢𑁄 𑀯𑀘𑀦’’𑀦𑁆𑀢𑀺 𑀮𑁄𑀓𑀯𑁄𑀳𑀸𑀭𑁂𑀦 𑀯𑀢𑁆𑀯𑀸 𑀧𑀭𑀫𑀢𑁆𑀣𑀢𑁄 𑀤𑀲𑁆𑀲𑁂𑀦𑁆𑀢𑁄 ‘‘𑀢𑀁𑀲𑀫𑀼𑀝𑁆𑀞𑀸𑀧𑀺𑀓𑀸 𑀯𑀸 𑀘𑁂𑀢𑀦𑀸𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀘 𑀯𑀤𑀢𑀺. 𑀑𑀴𑀸𑀭𑀺𑀓𑁂𑀦𑁂𑀯𑀸𑀢𑀺 𑀘𑁂𑀢𑀦𑀸𑀲𑀫𑀼𑀝𑁆𑀞𑀸𑀦𑀯𑀸𑀘𑀸𑀦𑀁 𑀲𑀼𑀔𑀼𑀫𑀢𑁆𑀢𑀸 𑀯𑀺𑀲𑀬𑀯𑀲𑁂𑀦𑁂𑀯 𑀓𑀢𑀸𑀢𑀺.

𑁯. 𑀤𑀺𑀝𑁆𑀞𑀲𑁆𑀲 𑀳𑁄𑀢𑀻𑀢𑀺 𑀤𑀺𑀝𑁆𑀞𑁄 𑀅𑀲𑁆𑀲, 𑀅𑀦𑁂𑀦 𑀯𑀸 𑀉𑀧𑀘𑀸𑀭𑀚𑁆𑀛𑀸𑀦𑀯𑀲𑁂𑀦 𑀦 𑀫𑀬𑀸 𑀅𑀩𑁆𑀬𑀸𑀯𑀝𑁄 𑀫𑀢𑁄, ‘‘𑀦 𑀫𑀬𑀸 𑀧𑀯𑀦𑁆𑀢𑁄 𑀧𑀝𑁄 𑀤𑀺𑀝𑁆𑀞𑁄’’𑀢𑀺𑀆𑀤𑀺𑀁 𑀪𑀡𑀦𑁆𑀢𑀲𑁆𑀲 𑀘 𑀧𑀭𑀫𑀢𑁆𑀣𑀲𑀼𑀜𑁆𑀜𑀢𑀁 𑀉𑀧𑀸𑀤𑀸𑀬 𑀏𑀯 ‘‘𑀇𑀢𑁆𑀣𑀺𑀁 𑀦 𑀧𑀲𑁆𑀲𑀸𑀫𑀺, 𑀦 𑀘 𑀧𑀼𑀭𑀺𑀲’’𑀦𑁆𑀢𑀺 𑀪𑀡𑀦𑁆𑀢𑀲𑁆𑀲 𑀘 𑀦 𑀫𑀼𑀲𑀸𑀯𑀸𑀤𑁄.

𑁧𑁧. 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺𑀬𑁂𑀯𑀸𑀢𑀺 𑀏𑀢𑁆𑀣 ‘‘𑀤𑀼𑀩𑁆𑀪𑀸𑀲𑀺𑀢𑀸𑀧𑀢𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀓𑀲𑁆𑀫𑀸? ‘‘𑀓𑁂𑀴𑀺𑀁 𑀓𑀼𑀭𑀼𑀫𑀸𑀦𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸. ‘‘𑀯𑀸𑀘𑀸 𑀕𑀺𑀭𑀸…𑀧𑁂… 𑀯𑀸𑀘𑀲𑀺𑀓𑀸 𑀯𑀺𑀜𑁆𑀜𑀢𑁆𑀢𑀻’’𑀢𑀺 𑀉𑀚𑀼𑀓𑀁 𑀲𑀦𑁆𑀥𑀸𑀬, 𑀓𑀸𑀬𑁄 𑀦 𑀉𑀚𑀼𑀓𑁄.

𑀫𑀼𑀲𑀸𑀯𑀸𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀑𑀫𑀲𑀯𑀸𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁩. ‘‘𑀧𑀼𑀦 𑀅𑀭𑁂 𑀧𑀢𑁆𑀢𑁂𑀢𑀺 𑀧𑀼𑀦 𑀢𑀁 𑀞𑀸𑀦𑀁 𑀧𑀭𑀺𑀯𑀝𑁆𑀝𑁂𑀢𑁆𑀯𑀸 𑀆𑀕𑀢𑁂 𑀅𑀜𑁆𑀜𑀲𑁆𑀫𑀺𑀁 𑀅𑀭𑁂’’𑀢𑀺 𑀮𑀺𑀔𑀺𑀢𑀁. 𑀧𑀢𑀺𑀝𑁆𑀞𑀺𑀢𑀸𑀭𑀧𑁆𑀧𑀤𑁂𑀲𑀦𑁆𑀢𑀺 𑀪𑀽𑀫𑀺𑀁. 𑀧𑀼𑀦 𑀅𑀭𑁂𑀢𑀺 𑀧𑀼𑀦 𑀢𑀲𑁆𑀫𑀺𑀁𑀬𑁂𑀯 𑀅𑀭𑁂 𑀪𑀽𑀫𑀺𑀁 𑀧𑀢𑁆𑀢𑁂𑀢𑀺 𑀅𑀢𑁆𑀣𑁄𑀢𑀺 𑀓𑁂𑀘𑀺, 𑀢𑀁 𑀦 𑀲𑀼𑀦𑁆𑀤𑀭𑀁 𑀯𑀺𑀬. 𑀚𑀸𑀧𑀺𑀢𑁄𑀢𑀺 𑀧𑀭𑀸𑀚𑀺𑀢𑁄, ‘‘𑀧𑀭𑀸𑀚𑀺𑀢𑁄’’𑀢𑀺 𑀯𑀸 𑀧𑀸𑀞𑁄. 𑀧𑀸𑀧𑁂𑀲𑀻𑀢𑀺 𑀅𑀪𑀺𑀪𑀯𑀲𑀺. 𑀫𑀦𑀸𑀧𑀁 𑀪𑀸𑀲𑀫𑀸𑀦𑀲𑁆𑀲 𑀩𑁆𑀭𑀸𑀳𑁆𑀫𑀡𑀲𑁆𑀲 𑀕𑀭𑀼𑀁 𑀪𑀸𑀭𑀁. 𑀉𑀤𑀩𑁆𑀩𑀳𑀻𑀢𑀺 𑀆𑀓𑀟𑁆𑀠𑀻𑀢𑀺 𑀅𑀢𑁆𑀣𑁄, 𑀅𑀦𑀸𑀤𑀭𑀢𑁆𑀣𑁂 𑀯𑀸 𑀲𑀸𑀫𑀺𑀯𑀘𑀦𑀁. 𑀥𑀦𑀜𑁆𑀘 𑀦𑀁 𑀅𑀮𑀸𑀪𑁂𑀲𑀻𑀢𑀺 𑀬𑀣𑀸 𑀲𑁄 𑀥𑀦𑀁 𑀅𑀮𑀪𑀺, 𑀢𑀣𑀸 𑀅𑀓𑀸𑀲𑀻𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁫. 𑀧𑀼𑀩𑁆𑀩𑁂𑀢𑀺 𑀦𑀺𑀤𑀸𑀦𑁂. 𑀅𑀯𑀓𑀡𑁆𑀡𑀓𑀦𑁆𑀢𑀺 𑀙𑀺𑀦𑁆𑀦𑀓𑀡𑁆𑀡𑀓𑀦𑀸𑀫𑀁. 𑀚𑀯𑀓𑀡𑁆𑀡𑀓𑀦𑁆𑀢𑀺 𑀯𑀗𑁆𑀓𑀓𑀡𑁆𑀡𑀓𑀦𑀸𑀫𑀁. 𑀥𑀦𑀺𑀝𑁆𑀞𑀓𑀁 𑀥𑀦𑀯𑀟𑁆𑀠𑀓𑀦𑀸𑀫𑀁, 𑀲𑀺𑀭𑀺𑀯𑀟𑁆𑀠𑀓𑀦𑀸𑀫𑀁 𑀓𑀼𑀮𑀯𑀟𑁆𑀠𑀓𑀲𑁆𑀲𑁂𑀯 𑀦𑀸𑀫𑀁. 𑀢𑀘𑁆𑀙𑀓𑀓𑀫𑁆𑀫𑀦𑁆𑀢𑀺 𑀔𑀡𑀦𑀓𑀫𑁆𑀫𑀓𑀸𑀭𑀸 𑀓𑁄𑀝𑁆𑀞𑀓𑀸, 𑀧𑀸𑀲𑀸𑀡𑀓𑀫𑁆𑀫𑀓𑀸𑀭𑀸𑀢𑀺 𑀓𑁂𑀘𑀺. ‘‘𑀫𑀼𑀤𑁆𑀤𑀸𑀢𑀺 𑀧𑀩𑁆𑀩𑀕𑀡𑀦𑀸. 𑀕𑀡𑀦𑀸𑀢𑀺 𑀫𑀳𑀸𑀕𑀡𑀦𑀸’’𑀢𑀺 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. ‘‘𑀫𑀥𑀼𑀫𑁂𑀳𑀁 𑀑𑀫𑁂𑀳’’𑀦𑁆𑀢𑀺 𑀮𑀺𑀔𑀺𑀢𑀁. 𑀣𑀽𑀮𑀓𑀸𑀬𑀲𑁆𑀲 𑀫𑀁𑀲𑀽𑀧𑀘𑀬𑁄𑀢𑀺 𑀏𑀓𑁂. 𑀬𑀪 𑀫𑁂𑀣𑀼𑀦𑁂. 𑀯𑀻𑀢𑀭𑀸𑀕𑀢𑀸𑀤𑀻𑀳𑀺 𑀅𑀓𑁆𑀓𑁄𑀲𑀦𑁆𑀢𑁄𑀧𑀺 𑀓𑀺𑀮𑁂𑀲𑁂𑀳𑁂𑀯 𑀓𑀺𑀭 𑀅𑀓𑁆𑀓𑁄𑀲𑀢𑀺 𑀦𑀸𑀫, 𑀢𑀣𑀸 ‘‘𑀲𑁄𑀢𑀸𑀧𑀦𑁆𑀦𑁄’’𑀢𑀺 𑀅𑀓𑁆𑀓𑁄𑀲𑀦𑁆𑀢𑁄 𑀆𑀧𑀢𑁆𑀢𑀺𑀬𑀸 𑀅𑀓𑁆𑀓𑁄𑀲𑀢𑀺 𑀦𑀸𑀫𑀸𑀢𑀺 𑀏𑀓𑁂. 𑀮𑀺𑀗𑁆𑀕𑀸𑀬𑀢𑁆𑀢𑀢𑁆𑀢𑀸 𑀅𑀘𑁆𑀘𑁄𑀤𑀸𑀢𑀸𑀤𑀺𑀧𑀺 𑀮𑀺𑀗𑁆𑀕𑀫𑁂𑀯 𑀚𑀸𑀢𑀁.

𑁧𑁬. 𑀲𑀩𑁆𑀩𑀢𑁆𑀣 𑀯𑀤𑁂𑀢𑀻𑀢𑀺 𑀉𑀤𑁆𑀤𑁂𑀲𑁄. 𑀪𑀡𑀢𑀻𑀢𑀺 𑀯𑀺𑀢𑁆𑀣𑀸𑀭𑁄. 𑀯𑀤𑁂𑀢𑀻𑀢𑀺 𑀯𑀸 𑀇𑀫𑀺𑀦𑀸 𑀧𑀭𑀯𑀺𑀜𑁆𑀜𑀸𑀧𑀦𑀁 𑀤𑀻𑀧𑁂𑀢𑀺.

𑁨𑁬. 𑀅𑀜𑁆𑀜𑀸𑀧𑀤𑁂𑀲𑀯𑀸𑀭𑁂𑀲𑀼 𑀧𑀦 ‘‘𑀏𑀯𑀁 𑀯𑀤𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑀲𑁆𑀫𑀸? 𑀧𑀼𑀩𑁆𑀩𑁂 𑀤𑀲𑁆𑀲𑀺𑀢𑀉𑀤𑁆𑀤𑁂𑀲𑀓𑁆𑀓𑀫𑀦𑀺𑀤𑀲𑁆𑀲𑀦𑀢𑁆𑀣𑀁. 𑀧𑀼𑀩𑁆𑀩𑁂𑀧𑀺 ‘‘𑀳𑀻𑀦𑁂𑀦 𑀳𑀻𑀦𑀁, 𑀳𑀻𑀦𑁂𑀦 𑀉𑀓𑁆𑀓𑀝𑁆𑀞𑀁, 𑀉𑀓𑁆𑀓𑀝𑁆𑀞𑁂𑀦 𑀳𑀻𑀦𑀁, 𑀉𑀓𑁆𑀓𑀝𑁆𑀞𑁂𑀦 𑀉𑀓𑁆𑀓𑀝𑁆𑀞’’𑀦𑁆𑀢𑀺 𑀚𑀸𑀢𑁆𑀬𑀸𑀤𑀻𑀲𑀼 𑀏𑀓𑁂𑀓𑀲𑁆𑀫𑀺𑀁 𑀘𑀢𑀼𑀥𑀸 𑀘𑀢𑀼𑀥𑀸 𑀤𑀲𑁆𑀲𑀺𑀢𑀉𑀤𑁆𑀤𑁂𑀲𑀓𑁆𑀓𑀫𑀲𑁆𑀲 𑀦𑀺𑀤𑀲𑁆𑀲𑀦𑀁 ‘‘𑀏𑀯’’𑀦𑁆𑀢𑀺 𑀇𑀫𑀺𑀦𑀸 𑀓𑀭𑁄𑀢𑀺. ‘‘𑀳𑀻𑀦𑁂𑀦 𑀳𑀻𑀦𑀁 𑀯𑀤𑁂𑀢𑀻’’𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑁂𑀬𑁂𑀯 𑀳𑀺 ‘‘𑀏𑀯𑀁 𑀯𑀤𑁂𑀢𑀻’’𑀢𑀺 𑀯𑀼𑀢𑁆𑀢𑁂 𑀲𑁄 𑀆𑀓𑀸𑀭𑁄 𑀦𑀺𑀤𑀲𑁆𑀲𑀺𑀢𑁄 𑀳𑁄𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀜𑁆𑀜𑀣𑀸 𑀅𑀜𑁆𑀜𑀸𑀧𑀤𑁂𑀲𑁂𑀦 𑀲𑁄 𑀆𑀓𑀸𑀭𑁄 𑀦 𑀲𑀫𑁆𑀪𑀯𑀢𑀻𑀢𑀺 𑀆𑀧𑀚𑁆𑀚𑀢𑀺. 𑀦 𑀲𑀫𑁆𑀪𑀯𑀢𑀺 𑀏𑀯𑀸𑀢𑀺 𑀘𑁂? 𑀦, 𑀯𑀺𑀲𑁂𑀲𑀓𑀸𑀭𑀡𑀸𑀪𑀸𑀯𑀸, 𑀢𑀢𑁆𑀣 𑀅𑀦𑀸𑀧𑀢𑁆𑀢𑀺𑀧𑁆𑀧𑀲𑀗𑁆𑀕𑀢𑁄, 𑀅𑀦𑀺𑀬𑀫𑀦𑀺𑀤𑁆𑀤𑁂𑀲𑁂𑀦 𑀅𑀦𑀺𑀬𑀫𑀢𑁆𑀣𑀲𑀫𑁆𑀪𑀯𑀢𑁄 𑀘. ‘‘𑀲𑀦𑁆𑀢𑀺 𑀇𑀥𑁂𑀓𑀘𑁆𑀘𑁂 𑀘𑀡𑁆𑀟𑀸𑀮𑀸’’𑀢𑀺𑀆𑀤𑀺𑀦𑀸 𑀳𑀺 𑀅𑀦𑀺𑀬𑀫𑀦𑀺𑀤𑁆𑀤𑁂𑀲𑁂𑀦 𑀘𑀡𑁆𑀟𑀸𑀮𑀁 𑀯𑀸 𑀅𑀘𑀡𑁆𑀟𑀸𑀮𑀁 𑀯𑀸 𑀲𑀦𑁆𑀥𑀸𑀬 𑀪𑀡𑀦𑁆𑀢𑀲𑁆𑀲 𑀆𑀧𑀢𑁆𑀢𑀻𑀢𑀺 𑀅𑀦𑀺𑀬𑀫𑀢𑁆𑀣𑁄 𑀲𑀫𑁆𑀪𑀯𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀬𑀤𑀺 𑀏𑀯𑀁 𑀏𑀢𑁆𑀢𑀓𑀫𑁂𑀯 𑀯𑀢𑁆𑀢𑀩𑁆𑀩𑀁 𑀢𑀸𑀯𑀢𑀸 𑀧𑀼𑀩𑁆𑀩𑁂 𑀤𑀲𑁆𑀲𑀺𑀢𑀉𑀤𑁆𑀤𑁂𑀲𑀓𑁆𑀓𑀫𑀦𑀺𑀤𑀲𑁆𑀲𑀦𑀲𑀺𑀤𑁆𑀥𑀺𑀢𑁄𑀢𑀺? 𑀦, ‘‘𑀯𑀤𑁂𑀢𑀻’’𑀢𑀺 𑀇𑀫𑀺𑀦𑀸 𑀅𑀬𑁄𑀚𑀺𑀢𑁂 ‘‘𑀏𑀯’’𑀦𑁆𑀢𑀺 𑀧𑀤𑁂 𑀇𑀫𑀁 𑀦𑀸𑀫 𑀆𑀓𑀸𑀭𑀁 𑀤𑀲𑁆𑀲𑁂𑀢𑀻𑀢𑀺 𑀅𑀦𑀯𑀩𑁄𑀥𑀢𑁄. 𑀅𑀜𑁆𑀜𑀸𑀧𑀤𑁂𑀲𑀦𑀬𑁂𑀧𑀺 𑀧𑀭𑀯𑀺𑀜𑁆𑀜𑀸𑀧𑀦𑁂𑀬𑁂𑀯 𑀤𑀼𑀓𑁆𑀓𑀝𑀧𑀸𑀘𑀺𑀢𑁆𑀢𑀺𑀬𑀁 𑀯𑀺𑀬𑀸𑀢𑀺 𑀦𑀺𑀬𑀫𑀦𑀧𑀬𑁄𑀚𑀦𑀁 𑀯𑀸 ‘‘𑀯𑀤𑁂𑀢𑀻’’𑀢𑀺 𑀧𑀤𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀣 𑀯𑀸 𑀅𑀢𑁆𑀢𑀦𑁄 𑀲𑀫𑀻𑀧𑁂 𑀞𑀢𑁆𑀯𑀸 𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀆𑀡𑀸𑀧𑁂𑀦𑁆𑀢𑁄 𑀳𑀻𑀦𑁂𑀦 𑀳𑀻𑀦𑀁 𑀯𑀤𑁂𑀢𑀺 𑀪𑀡𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲. 𑀲𑀘𑁂 𑀲𑀬𑀁 𑀳𑀻𑀦𑁄 𑀳𑀻𑀦𑁂𑀦 𑀳𑀻𑀦𑀁 𑀘𑀡𑁆𑀟𑀸𑀮𑀁…𑀧𑁂… 𑀧𑀼𑀓𑁆𑀓𑀼𑀲𑀁 ‘‘𑀧𑀼𑀓𑁆𑀓𑀼𑀲𑁄’’𑀢𑀺 𑀪𑀡𑀢𑀺 𑀆𑀧𑀢𑁆𑀢𑀺 𑀯𑀸𑀘𑀸𑀬 𑀯𑀸𑀘𑀸𑀬 𑀧𑀸𑀘𑀺𑀢𑁆𑀢𑀺𑀬𑀲𑁆𑀲, 𑀏𑀲 𑀦𑀬𑁄 𑀅𑀜𑁆𑀜𑀸𑀧𑀤𑁂𑀲𑀯𑀸𑀭𑁂𑀲𑀼𑀧𑀻𑀢𑀺 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀅𑀬𑀫𑀢𑁆𑀣𑁄 𑀤𑀼𑀝𑁆𑀞𑀤𑁄𑀲𑁂𑀲𑀼 𑀧𑀭𑀺𑀬𑁂𑀲𑀺𑀢𑀩𑁆𑀩𑁄. 𑀅𑀜𑁆𑀜𑀣𑀸 ‘‘𑀯𑀤𑁂𑀢𑀺 𑀪𑀡𑀢𑀻’’𑀢𑀺 𑀏𑀢𑁂𑀲𑀁 𑀅𑀜𑁆𑀜𑀢𑀭𑀁 𑀉𑀪𑀬𑀢𑁆𑀣 𑀅𑀦𑀜𑁆𑀜𑀸𑀧𑀤𑁂𑀲𑀯𑀸𑀭𑀅𑀜𑁆𑀜𑀸𑀧𑀤𑁂𑀲𑀯𑀸𑀭𑁂𑀲𑀼, 𑀯𑀺𑀲𑁂𑀲𑁂𑀦 𑀯𑀸 𑀅𑀜𑁆𑀜𑀸𑀧𑀤𑁂𑀲𑀯𑀸𑀭𑁂𑀲𑀼 𑀦𑀺𑀭𑀢𑁆𑀣𑀓𑀁 𑀆𑀧𑀚𑁆𑀚𑀢𑀺 𑀯𑀺𑀦𑀸𑀬𑁂𑀯 𑀢𑁂𑀦 𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀲𑀫𑁆𑀪𑀯𑀢𑁄. 𑀅𑀢𑁆𑀢𑀢𑁄 𑀧𑀸𑀴𑀺𑀬𑀁 𑀅𑀯𑀼𑀢𑁆𑀢𑀢𑁆𑀢𑀸 𑀧𑀦𑁂𑀢𑁆𑀣 ‘‘𑀲𑀸𑀡𑀢𑁆𑀢𑀺𑀓’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀭𑀸𑀬𑀁 𑀧𑀤𑀲𑀦𑁆𑀥𑀺 𑀯𑀤𑁂𑀢𑀻𑀢𑀺 𑀯𑀤 𑀇𑀢𑀻𑀢𑀺. 𑀅𑀲𑀫𑁆𑀫𑀼𑀔𑀸 𑀯𑀤𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 ‘‘𑀲𑀫𑁆𑀫𑀼𑀔𑀸 𑀧𑀦 𑀲𑀢𑁆𑀢𑀳𑀺𑀧𑀺 𑀆𑀧𑀢𑁆𑀢𑀺𑀓𑁆𑀔𑀦𑁆𑀥𑁂𑀳𑀺 𑀯𑀤𑀦𑁆𑀢𑀲𑁆𑀲 𑀤𑀼𑀓𑁆𑀓𑀝’’𑀦𑁆𑀢𑀺 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸. 𑀤𑀯𑀓𑀫𑁆𑀬𑀢𑀸 𑀦𑀸𑀫 𑀓𑁂𑀴𑀺, 𑀢𑀁 𑀤𑀲𑁆𑀲𑁂𑀢𑀼𑀁 ‘‘𑀳𑀲𑀸𑀥𑀺𑀧𑁆𑀧𑀸𑀬𑀢𑀸’’𑀢𑀺 𑀯𑀼𑀢𑁆𑀢𑀁. ‘‘𑀅𑀲𑀫𑁆𑀫𑀼𑀔𑀸𑀧𑀺 𑀤𑀯𑀓𑀫𑁆𑀬𑀢𑀸𑀬 𑀯𑀤𑀦𑁆𑀢𑀲𑁆𑀲 𑀤𑀼𑀩𑁆𑀪𑀸𑀲𑀺𑀢𑀫𑁂𑀯𑀸’’𑀢𑀺 𑀆𑀘𑀭𑀺𑀬𑀸 𑀯𑀤𑀦𑁆𑀢𑀺. 𑀧𑀸𑀧𑀕𑀭𑀳𑀺𑀢𑀸𑀬 𑀓𑀼𑀚𑁆𑀛𑀺𑀢𑁆𑀯𑀸𑀧𑀺 𑀯𑀤𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁, 𑀅𑀲𑀫𑁆𑀫𑀼𑀔𑀸 𑀅𑀦𑀸𑀧𑀢𑁆𑀢𑀻𑀢𑀺.

𑀑𑀫𑀲𑀯𑀸𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑁂𑀲𑀼𑀜𑁆𑀜𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁩𑁬-𑁭. ‘‘𑀇𑀫𑀲𑁆𑀲 𑀲𑀼𑀢𑁆𑀯𑀸 𑀅𑀫𑀼𑀲𑁆𑀲𑀸’’𑀢𑀺 𑀧𑀸𑀞𑁄. ‘‘𑀇𑀫𑁂𑀲𑀁 𑀲𑀼𑀢𑁆𑀯𑀸’’𑀢𑀺 𑀦 𑀲𑀼𑀦𑁆𑀤𑀭𑀁. 𑀪𑁂𑀤𑀸𑀬𑀧𑀻𑀢𑀺 𑀪𑁂𑀤𑀸𑀬. 𑀢𑀺𑀡𑁆𑀡𑀫𑁆𑀧𑀺 𑀪𑀺𑀓𑁆𑀔𑀼𑀪𑀸𑀯𑀢𑁄𑀬𑁂𑀯 𑀦𑀺𑀧𑀚𑁆𑀚𑀦𑀢𑁄 ‘‘𑀪𑀺𑀓𑁆𑀔𑀽𑀦𑀁 𑀧𑁂𑀲𑀼𑀜𑁆𑀜𑁂’’𑀢𑀺 𑀩𑀳𑀼𑀯𑀘𑀦𑀁 𑀓𑀢𑀁.

𑁩𑁮-𑁯. ‘‘𑀇𑀢𑁆𑀣𑀦𑁆𑀦𑀸𑀫𑁄 𑀆𑀬𑀲𑁆𑀫𑀸 𑀘𑀡𑁆𑀟𑀸𑀮𑁄…𑀧𑁂… 𑀧𑀼𑀓𑁆𑀓𑀼𑀲𑁄𑀢𑀺 𑀪𑀡𑀢𑀻’’𑀢𑀺 𑀯𑀢𑁆𑀯𑀸 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀻𑀢𑀺 𑀬𑁄𑀚𑀦𑀸. 𑀅𑀜𑁆𑀜𑀣𑀸 ‘‘𑀧𑀼𑀓𑁆𑀓𑀼𑀲𑁄𑀢𑀺 𑀪𑀡𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀢𑀸 𑀆𑀧𑀚𑁆𑀚𑀢𑀺. 𑀏𑀢𑁆𑀣 𑀅𑀦𑀼𑀧𑀲𑀫𑁆𑀧𑀦𑁆𑀦𑀯𑀸𑀭𑁄 𑀮𑀩𑁆𑀪𑀫𑀸𑀦𑁄𑀧𑀺 𑀦 𑀉𑀤𑁆𑀥𑀝𑁄 𑀑𑀫𑀲𑀯𑀸𑀤𑁂 𑀤𑀲𑁆𑀲𑀺𑀢𑀦𑀬𑀢𑁆𑀢𑀸, 𑀲𑀗𑁆𑀔𑁂𑀧𑀢𑁄 𑀅𑀦𑁆𑀢𑁂 𑀤𑀲𑁆𑀲𑁂𑀢𑀼𑀓𑀸𑀫𑀢𑀸𑀬 𑀯𑀸. 𑀢𑀣𑀸 𑀳𑀺 𑀅𑀦𑁆𑀢𑁂 𑀢𑀻𑀡𑀺 𑀤𑀼𑀓𑁆𑀓𑀝𑀸𑀦𑀺 𑀤𑀲𑁆𑀲𑀺𑀢𑀸𑀦𑀺. 𑀢𑀸𑀦𑀺 𑀧𑀦 𑀤𑀲𑁆𑀲𑁂𑀦𑁆𑀢𑁄 𑀪𑀕𑀯𑀸 𑀬𑀲𑁆𑀫𑀸 ‘‘𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀻’’𑀢𑀺 𑀯𑀼𑀢𑁆𑀢𑀸𑀦𑀁 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀅𑀜𑁆𑀜𑀢𑀭𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀯𑀸 𑀉𑀪𑀬𑀯𑀺𑀧𑀮𑁆𑀮𑀸𑀲𑀯𑀲𑁂𑀦 𑀯𑀸 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀓𑀢𑁆𑀯𑀸 𑀤𑁆𑀯𑁂𑀧𑀺 𑀢𑀸𑀦𑀺 𑀏𑀓𑀢𑁄 𑀯𑀼𑀢𑁆𑀢𑀸𑀦𑀻𑀢𑀺 𑀤𑀲𑁆𑀲𑁂𑀢𑀼𑀓𑀸𑀫𑁄, 𑀢𑀲𑁆𑀫𑀸 𑀲𑀩𑁆𑀩𑀧𑀞𑀫𑀁𑀬𑁂𑀯 ‘‘𑀉𑀧𑀲𑀫𑁆𑀧𑀦𑁆𑀦𑁄 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀲𑀼𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 𑀆𑀳. ‘‘𑀤𑁆𑀯𑀻𑀲𑀼 𑀧𑀦𑁂𑀢𑁂𑀲𑀼 𑀬𑀲𑁆𑀫𑀸 𑀧𑀸𑀭𑀸𑀚𑀺𑀓𑀁 𑀅𑀚𑁆𑀛𑀸𑀧𑀦𑁆𑀦𑁄𑀧𑀺 𑀉𑀧𑀲𑀫𑁆𑀧𑀦𑁆𑀦𑁄 𑀢𑀸𑀤𑀺𑀲𑀁𑀬𑁂𑀯 𑀉𑀧𑀲𑀫𑁆𑀧𑀦𑁆𑀦𑀁 𑀔𑀼𑀁𑀲𑁂𑀢𑀼𑀓𑀸𑀫𑁄 𑀑𑀫𑀲𑀢𑀺, 𑀢𑀸𑀤𑀺𑀲𑀲𑁆𑀲 𑀲𑀼𑀢𑁆𑀯𑀸 𑀢𑀸𑀤𑀺𑀲𑀲𑁆𑀲 𑀧𑁂𑀲𑀼𑀜𑁆𑀜𑀁 𑀉𑀧𑀲𑀁𑀳𑀭𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲, 𑀢𑀲𑁆𑀫𑀸 ‘𑀉𑀧𑀲𑀫𑁆𑀧𑀦𑁆𑀦𑁄’𑀢𑀺 𑀇𑀤𑀁 𑀆𑀤𑀺𑀧𑀤𑀁 𑀲𑀩𑁆𑀩𑀢𑁆𑀣 𑀯𑀼𑀢𑁆𑀢’’𑀦𑁆𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁, 𑀅𑀦𑀯𑀲𑁂𑀲𑀆𑀧𑀢𑁆𑀢𑀺𑀁 𑀆𑀧𑀦𑁆𑀦𑀲𑁆𑀲 𑀧𑀼𑀦 𑀆𑀧𑀢𑁆𑀢𑀺𑀬𑀸 𑀅𑀲𑀫𑁆𑀪𑀯𑀢𑁄, 𑀢𑀲𑁆𑀫𑀸 𑀓𑁂𑀯𑀮𑀁 𑀫𑀸𑀢𑀺𑀓𑀸𑀬𑀁 𑀪𑀺𑀓𑁆𑀔𑀼𑀧𑀤𑀸𑀪𑀸𑀯𑀢𑁄𑀬𑁂𑀯 ‘‘𑀪𑀡𑀢𑀺 𑀉𑀧𑀲𑀁𑀳𑀭𑀢𑀻’’𑀢𑀺 𑀧𑀤𑀸𑀦𑀁 𑀓𑀸𑀭𑀓𑀦𑀺𑀤𑁆𑀤𑁂𑀲𑀸𑀪𑀸𑀯𑁂 𑀅𑀲𑀫𑁆𑀪𑀯𑀢𑁄 𑀏𑀯 𑀢𑀁 𑀆𑀤𑀺𑀧𑀤𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀇𑀤𑀁 𑀧𑀸𑀴𑀺𑀮𑁂𑀲𑀸𑀪𑀸𑀯𑀢𑁄 𑀅𑀦𑀸𑀡𑀢𑁆𑀢𑀺𑀓𑀫𑁂𑀯. ‘‘𑀦 𑀧𑀺𑀬𑀓𑀫𑁆𑀬𑀲𑁆𑀲, 𑀦 𑀪𑁂𑀤𑀸𑀥𑀺𑀧𑁆𑀧𑀸𑀬𑀲𑁆𑀲𑀸’’𑀢𑀺 𑀉𑀧𑀲𑀁𑀳𑀭𑀡𑀸𑀧𑁂𑀓𑁆𑀔𑀁 𑀲𑀸𑀫𑀺𑀯𑀘𑀦𑀁 𑀢𑀼𑀡𑁆𑀳𑀻𑀪𑀽𑀢𑀲𑁆𑀲 𑀯𑀘𑀦𑀧𑁆𑀧𑀬𑁄𑀚𑀦𑀸𑀪𑀸𑀯𑀢𑁄, 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀸𑀧𑀕𑀭𑀳𑀺𑀢𑀸𑀬 𑀪𑀡𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻’’𑀢𑀺.

𑀧𑁂𑀲𑀼𑀜𑁆𑀜𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀤𑀲𑁄𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁫-𑁬. 𑀲𑀩𑁆𑀩𑀫𑁂𑀢𑀁 𑀧𑀤𑀲𑁄 𑀥𑀫𑁆𑀫𑁄 𑀦𑀸𑀫𑀸𑀢𑀺 𑀏𑀢𑁆𑀣 𑀥𑀫𑁆𑀫𑁄 𑀦𑀸𑀫 𑀩𑀼𑀤𑁆𑀥𑀪𑀸𑀲𑀺𑀢𑁄𑀢𑀺 𑀏𑀯𑀁 𑀲𑀫𑁆𑀩𑀦𑁆𑀥𑁄. 𑀅𑀓𑁆𑀔𑀭𑀲𑀫𑀽𑀳𑁄𑀢𑀺 𑀅𑀲𑀫𑀢𑁆𑀢𑀧𑀤𑁂. 𑀧𑀘𑁆𑀘𑁂𑀓𑀩𑀼𑀤𑁆𑀥𑀪𑀸𑀲𑀺𑀢𑀁 𑀩𑀼𑀤𑁆𑀥𑀪𑀸𑀲𑀺𑀢𑁂 𑀏𑀯. 𑀅𑀦𑀼𑀧𑀸𑀲𑀓𑀕𑀳𑀝𑁆𑀞𑁂𑀳𑀺 𑀪𑀸𑀲𑀺𑀢𑁄 𑀇𑀲𑀺𑀪𑀸𑀲𑀺𑀢𑀸𑀤𑀺𑀲𑀗𑁆𑀕𑀳𑀁 𑀕𑀘𑁆𑀙𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀢𑁆𑀣𑀘𑀺 𑀧𑁄𑀢𑁆𑀣𑀓𑁂 ‘‘𑀤𑁂𑀯𑀢𑀸𑀪𑀸𑀲𑀺𑀢𑁄’’𑀢𑀺 𑀧𑀤𑀁 𑀦𑀢𑁆𑀣𑀺, 𑀬𑀢𑁆𑀣 𑀅𑀢𑁆𑀣𑀺, 𑀲𑀸 𑀧𑀸𑀴𑀺. 𑀕𑀸𑀣𑀸𑀩𑀦𑁆𑀥𑁂𑀧𑀺 𑀘 𑀏𑀲 𑀦𑀬𑁄𑀢𑀺 𑀏𑀓𑀫𑁂𑀯 𑀅𑀓𑁆𑀔𑀭𑀁 𑀯𑀢𑁆𑀯𑀸 𑀞𑀸𑀦𑀁 𑀮𑀩𑁆𑀪𑀢𑀺 𑀏𑀯. ‘‘𑀏𑀯𑀁 𑀫𑁂 𑀲𑀼𑀢’’𑀦𑁆𑀢𑀺𑀆𑀤𑀺𑀲𑀼𑀢𑁆𑀢𑀁 𑀪𑀡𑀸𑀧𑀺𑀬𑀫𑀸𑀦𑁄 𑀏𑀓𑀸𑀭𑀁 𑀯𑀢𑁆𑀯𑀸 𑀢𑀺𑀝𑁆𑀞𑀢𑀺 𑀘𑁂, 𑀅𑀦𑁆𑀯𑀓𑁆𑀔𑀭𑁂𑀦 𑀧𑀸𑀘𑀺𑀢𑁆𑀢𑀺𑀬𑀁, 𑀅𑀧𑀭𑀺𑀧𑀼𑀡𑁆𑀡𑀧𑀤𑀁 𑀯𑀢𑁆𑀯𑀸 𑀞𑀺𑀢𑁂 𑀅𑀦𑀼𑀩𑁆𑀬𑀜𑁆𑀚𑀦𑁂𑀦. 𑀧𑀤𑁂𑀲𑀼 𑀏𑀓𑀁 𑀧𑀞𑀫𑀧𑀤𑀁 𑀯𑀺𑀭𑀼𑀚𑁆𑀛𑀢𑀺 𑀘𑁂, 𑀅𑀦𑀼𑀧𑀤𑁂𑀦 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀝𑁆𑀞𑀓𑀣𑀸𑀦𑀺𑀲𑁆𑀲𑀺𑀢𑁄𑀢𑀺 𑀅𑀝𑁆𑀞𑀓𑀣𑀸𑀦𑀺𑀲𑁆𑀲𑀺𑀢𑀯𑀲𑁂𑀦 𑀞𑀺𑀢𑁄. 𑀧𑀼𑀩𑁆𑀩𑁂 𑀧𑀓𑀢𑀺𑀪𑀸𑀲𑀸𑀬 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀁 𑀲𑀦𑁆𑀥𑀸𑀬. 𑀧𑀸𑀴𑀺𑀦𑀺𑀲𑁆𑀲𑀺𑀢𑁄𑀢𑀺 𑀧𑀸𑀴𑀺𑀬𑀁 𑀏𑀯𑀸𑀕𑀢𑁄. 𑀫𑀕𑁆𑀕𑀓𑀣𑀸𑀤𑀻𑀦𑀺𑀧𑀺 𑀧𑀓𑀭𑀡𑀸𑀦𑀺.

𑁪𑁮. 𑀉𑀧𑀘𑀸𑀭𑀦𑁆𑀢𑀺 𑀤𑁆𑀯𑀸𑀤𑀲𑀳𑀢𑁆𑀣𑀁. ‘‘𑀑𑀧𑀸𑀢𑁂𑀢𑀻𑀢𑀺 𑀏𑀓𑀢𑁄 𑀪𑀡𑀢𑀺 𑀲𑀫𑀸𑀕𑀘𑁆𑀙𑀢𑀻’’𑀢𑀺 𑀮𑀺𑀔𑀺𑀢𑀁. 𑀓𑀺𑀜𑁆𑀘𑀸𑀧𑀺 𑀅𑀧𑀮𑀸𑀮𑀤𑀫𑀦𑀫𑁆𑀧𑀺 𑀲𑀻𑀮𑀼𑀧𑀤𑁂𑀲𑁄𑀧𑀺 𑀪𑀕𑀯𑀢𑁄 𑀓𑀸𑀮𑁂 𑀉𑀧𑁆𑀧𑀦𑁆𑀦𑁄, 𑀅𑀣 𑀔𑁄 𑀢𑁂𑀲𑀼 𑀬𑀁 𑀬𑀁 𑀩𑀼𑀤𑁆𑀥𑀯𑀘𑀦𑀢𑁄 𑀆𑀳𑀭𑀺𑀢𑁆𑀯𑀸 𑀯𑀼𑀢𑁆𑀢𑀁, 𑀢𑀁 𑀢𑀤𑁂𑀯 𑀆𑀧𑀢𑁆𑀢𑀺𑀯𑀢𑁆𑀣𑀼 𑀳𑁄𑀢𑀻𑀢𑀺 𑀯𑀺𑀜𑁆𑀜𑀸𑀧𑀦𑀢𑁆𑀣𑀁 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 ‘‘𑀯𑀤𑀦𑁆𑀢𑀻’’𑀢𑀺 𑀯𑀘𑀦𑁂𑀳𑀺 𑀲𑀺𑀣𑀺𑀮𑀁 𑀓𑀢𑀁. 𑀩𑀼𑀤𑁆𑀥𑀯𑀘𑀦𑀢𑁄 𑀆𑀳𑀭𑀺𑀢𑁆𑀯𑀸 𑀯𑀼𑀢𑁆𑀢𑀲𑁆𑀲 𑀩𑀳𑀼𑀮𑀢𑀸𑀬 𑀢𑀩𑁆𑀩𑀳𑀼𑀮𑀦𑀬𑁂𑀦 𑀢𑁂𑀲𑀼 𑀆𑀧𑀢𑁆𑀢𑀺 𑀯𑀼𑀢𑁆𑀢𑀸, 𑀢𑀲𑁆𑀫𑀸 𑀫𑀳𑀸𑀧𑀘𑁆𑀘𑀭𑀺𑀬𑀁 𑀢𑀲𑁆𑀲𑀸𑀥𑀺𑀧𑁆𑀧𑀸𑀬𑁄 𑀧𑀓𑀸𑀲𑀺𑀢𑁄𑀢𑀺 𑀅𑀢𑁆𑀣𑁄. ‘‘𑀲𑀩𑁆𑀩𑁂𑀲𑀫𑁂𑀯 𑀯𑀘𑀦𑀦𑁆𑀢𑀺 𑀅𑀧𑀭𑁂’’𑀢𑀺 𑀯𑀼𑀢𑁆𑀢𑀁. 𑀲𑀘𑁂 𑀆𑀘𑀭𑀺𑀬𑁄 𑀞𑀺𑀢𑁄 𑀦𑀺𑀲𑀺𑀦𑁆𑀦𑀸𑀦𑀁 𑀧𑀸𑀞𑀁 𑀤𑁂𑀢𑀺, ‘‘𑀦 𑀞𑀺𑀢𑁄 𑀦𑀺𑀲𑀺𑀦𑁆𑀦𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀲𑁆𑀲𑀸𑀫𑀻’’𑀢𑀺 𑀯𑀼𑀢𑁆𑀢𑀸𑀧𑀢𑁆𑀢𑀺𑀁 𑀦𑀸𑀧𑀚𑁆𑀚𑀢𑀻𑀢𑀺 𑀏𑀓𑁂. 𑀢𑁂𑀲𑀫𑁆𑀧𑀺 𑀧𑀸𑀞𑀤𑀸𑀦𑀁 𑀥𑀫𑁆𑀫𑀤𑁂𑀲𑀦𑀢𑁄 𑀦 𑀅𑀜𑁆𑀜𑀦𑁆𑀢𑀺 𑀢𑀁 𑀦 𑀬𑀼𑀢𑁆𑀢𑀁, 𑀙𑀢𑁆𑀢𑀧𑀸𑀡𑀺𑀓𑀸𑀤𑀻𑀦𑀁 𑀧𑀸𑀞𑀤𑀸𑀦𑁂𑀦 𑀅𑀦𑀸𑀧𑀢𑁆𑀢𑀺𑀧𑁆𑀧𑀲𑀗𑁆𑀕𑀢𑁄, 𑀆𑀧𑀢𑁆𑀢𑀺𑀪𑀸𑀯𑁄 𑀘 𑀲𑀺𑀤𑁆𑀥𑁄. 𑀯𑀼𑀢𑁆𑀢𑀜𑁆𑀳𑁂𑀢𑀁 𑁋

‘‘𑀉𑀪𑁄 𑀅𑀢𑁆𑀣𑀁 𑀦 𑀚𑀸𑀦𑀦𑁆𑀢𑀺, 𑀉𑀪𑁄 𑀥𑀫𑁆𑀫𑀁 𑀦 𑀧𑀲𑁆𑀲𑀭𑁂;

𑀬𑁄 𑀘𑀸𑀬𑀁 𑀫𑀦𑁆𑀢𑀁 𑀯𑀸𑀘𑁂𑀢𑀺, 𑀬𑁄 𑀘𑀸𑀥𑀫𑁆𑀫𑁂𑀦𑀥𑀻𑀬𑀢𑀻’’𑀢𑀺. (𑀧𑀸𑀘𑀺. 𑁬𑁪𑁭);

𑀏𑀢𑁆𑀣 𑀅𑀥𑀻𑀬𑀢𑀻𑀢𑀺 𑀅𑀢𑁆𑀣𑁄, 𑀢𑀲𑁆𑀫𑀸 𑀧𑀸𑀞𑀤𑀸𑀦𑀫𑁆𑀧𑀺 𑀥𑀫𑁆𑀫𑀤𑁂𑀲𑀦𑀸𑀯. 𑀲𑁂𑀔𑀺𑀬𑀝𑁆𑀞𑀓𑀣𑀸𑀬𑀁 (𑀧𑀸𑀘𑀺. 𑀅𑀝𑁆𑀞. 𑁬𑁩𑁪) ‘‘𑀥𑀫𑁆𑀫𑀧𑀭𑀺𑀘𑁆𑀙𑁂𑀤𑁄 𑀧𑀦𑁂𑀢𑁆𑀣 𑀧𑀤𑀲𑁄𑀥𑀫𑁆𑀫𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀅𑀬𑀫𑁂𑀯 𑀥𑀫𑁆𑀫𑁄 𑀲𑀩𑁆𑀩𑀢𑁆𑀣 𑀥𑀫𑁆𑀫𑀧𑀝𑀺𑀲𑀁𑀬𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑁂𑀲𑀼 𑀯𑁂𑀤𑀺𑀢𑀩𑁆𑀩𑁄. 𑀬𑀤𑀺 𑀏𑀯𑀁 𑀲𑀗𑁆𑀔𑀸𑀭𑀪𑀸𑀲𑀸𑀤𑀺𑀯𑀲𑁂𑀦 𑀘𑀺𑀢𑁆𑀢𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑀲𑁆𑀲 𑀲𑁂𑀔𑀺𑀬𑀯𑀲𑁂𑀦 𑀅𑀦𑀸𑀧𑀢𑁆𑀢𑀺 𑀲𑀺𑀬𑀸, 𑀢𑀢𑁄 𑀙𑀧𑀓𑀚𑀸𑀢𑀓𑀯𑀺𑀭𑁄𑀥𑁄. 𑀢𑀢𑁆𑀣 𑀫𑀦𑁆𑀢𑀸𑀦𑀁 𑀩𑀸𑀳𑀺𑀭𑀕𑀦𑁆𑀣𑀢𑁆𑀢𑀸𑀢𑀺 𑀘𑁂? 𑀦, 𑀢𑀤𑀥𑀺𑀧𑁆𑀧𑀸𑀬𑀸𑀚𑀸𑀦𑀦𑀢𑁄. 𑀅𑀬𑀜𑁆𑀳𑀺 𑀢𑀢𑁆𑀣 𑀅𑀥𑀺𑀧𑁆𑀧𑀸𑀬𑁄 ‘‘𑀩𑀸𑀳𑀺𑀭𑀓𑀕𑀦𑁆𑀣𑀲𑀗𑁆𑀔𑀸𑀢𑀫𑁆𑀧𑀺 𑀫𑀦𑁆𑀢𑀁 𑀉𑀘𑁆𑀘𑁂 𑀆𑀲𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀯𑀸𑀘𑁂𑀢𑀼𑀁 𑀫𑁂 𑀪𑀺𑀓𑁆𑀔𑀯𑁂 𑀅𑀫𑀦𑀸𑀧𑀁, 𑀧𑀕𑁂𑀯 𑀥𑀫𑁆𑀫𑀁 𑀤𑁂𑀲𑁂𑀢𑀼’’𑀦𑁆𑀢𑀺. ‘‘𑀢𑀤𑀸𑀧𑀺 𑀫𑁂, 𑀪𑀺𑀓𑁆𑀔𑀯𑁂, 𑀅𑀫𑀦𑀸𑀧𑀁 𑀦𑀻𑀘𑁂 𑀆𑀲𑀦𑁂 𑀦𑀺𑀲𑀻𑀤𑀺𑀢𑁆𑀯𑀸 𑀉𑀘𑁆𑀘𑁂 𑀆𑀲𑀦𑁂 𑀦𑀺𑀲𑀺𑀦𑁆𑀦𑀲𑁆𑀲 𑀫𑀦𑁆𑀢𑀁 𑀯𑀸𑀘𑁂𑀢𑀼𑀁, 𑀓𑀺𑀫𑀗𑁆𑀕𑀁 𑀧𑀦 𑀏𑀢𑀭𑀳𑀺…𑀧𑁂… 𑀥𑀫𑁆𑀫𑀁 𑀤𑁂𑀲𑁂𑀢𑀼’’𑀦𑁆𑀢𑀺 (𑀧𑀸𑀘𑀺. 𑁬𑁪𑁭) 𑀳𑀺 𑀅𑀬𑀁 𑀧𑀸𑀴𑀺 𑀬𑀣𑀸𑀯𑀼𑀢𑁆𑀢𑀫𑁂𑀯 𑀅𑀥𑀺𑀧𑁆𑀧𑀸𑀬𑀁 𑀤𑀻𑀧𑁂𑀢𑀺, 𑀦 𑀅𑀜𑁆𑀜𑀁. 𑀢𑁂𑀦𑁂𑀯 ‘‘𑀫𑀦𑁆𑀢𑀁 𑀯𑀸𑀘𑁂𑀢𑀼𑀁 𑀥𑀫𑁆𑀫𑀁 𑀤𑁂𑀲𑁂𑀢𑀼’’𑀦𑁆𑀢𑀺 𑀯𑀘𑀦𑀪𑁂𑀤𑁄 𑀓𑀢𑁄. 𑀅𑀜𑁆𑀜𑀣𑀸 𑀉𑀪𑀬𑀢𑁆𑀣 ‘‘𑀥𑀫𑁆𑀫𑀁 𑀤𑁂𑀲𑁂𑀢𑀼’’𑀫𑀺𑀘𑁆𑀘𑁂𑀯 𑀯𑀢𑁆𑀢𑀩𑁆𑀩𑀦𑁆𑀢𑀺.

𑀫𑀬𑀸 𑀲𑀤𑁆𑀥𑀺𑀁 𑀫𑀸 𑀯𑀤𑀸𑀢𑀺𑀆𑀤𑀺𑀫𑁆𑀳𑀺 𑀧𑀦 𑀅𑀦𑀼𑀕𑀡𑁆𑀞𑀺𑀧𑀤𑁂 𑀏𑀯𑀁 𑀯𑀼𑀢𑁆𑀢𑁄 ‘‘𑀲𑀘𑁂 𑀪𑀺𑀓𑁆𑀔𑀼 𑀲𑀸𑀫𑀡𑁂𑀭𑁂𑀦 𑀲𑀤𑁆𑀥𑀺𑀁 𑀯𑀢𑁆𑀢𑀼𑀓𑀸𑀫𑁄, 𑀢𑀣𑀸 𑀲𑀸𑀫𑀡𑁂𑀭𑁄𑀧𑀺 𑀪𑀺𑀓𑁆𑀔𑀼𑀦𑀸 𑀲𑀤𑁆𑀥𑀺𑀁 𑀯𑀢𑁆𑀢𑀼𑀓𑀸𑀫𑁄 𑀲𑀳𑀲𑀸 𑀑𑀧𑀸𑀢𑁂𑀢𑀺, ‘𑀬𑁂𑀪𑀼𑀬𑁆𑀬𑁂𑀦 𑀧𑀕𑀼𑀡𑀁 𑀕𑀦𑁆𑀣𑀁 𑀪𑀡𑀦𑁆𑀢𑀁 𑀑𑀧𑀸𑀢𑁂𑀢𑀻’’𑀢𑀺𑀆𑀤𑀻𑀲𑀼 𑀯𑀺𑀬 𑀅𑀦𑀸𑀧𑀢𑁆𑀢𑀺, 𑀦 𑀳𑀺 𑀏𑀢𑁆𑀢𑀸𑀯𑀢𑀸 𑀪𑀺𑀓𑁆𑀔𑀼 𑀲𑀸𑀫𑀡𑁂𑀭𑀲𑁆𑀲 𑀉𑀤𑁆𑀤𑀺𑀲𑀢𑀺 𑀦𑀸𑀫 𑀳𑁄𑀢𑀺. 𑀬𑀲𑁆𑀫𑀸 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀦𑀢𑁆𑀣𑀺, 𑀢𑀲𑁆𑀫𑀸𑀧𑀺 𑀬𑀼𑀢𑁆𑀢𑀫𑁂𑀯𑁂𑀢𑀁. 𑀲𑀘𑁂 𑀢𑀢𑁆𑀣 𑀯𑀺𑀘𑀸𑀭𑁂𑀢𑁆𑀯𑀸 𑀧𑀝𑀺𑀓𑁆𑀔𑀺𑀢𑁆𑀢𑀁 𑀲𑀺𑀬𑀸 𑀆𑀧𑀢𑁆𑀢𑀺, 𑀓𑀺𑀭𑀺𑀬𑀸𑀓𑀺𑀭𑀺𑀬𑀜𑁆𑀘 𑀦𑀸𑀧𑀚𑁆𑀚𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀘𑀺𑀢𑁆𑀢𑁂𑀦 𑀏𑀓𑀢𑁄 𑀯𑀢𑁆𑀢𑀼𑀓𑀸𑀫𑁄, 𑀅𑀣 𑀔𑁄 𑀦𑀁 ‘𑀏𑀓𑀢𑁄 𑀫𑀸 𑀯𑀤𑀸’𑀢𑀺 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸𑀧𑀺 𑀏𑀓𑀢𑁄 𑀯𑀤𑀦𑁆𑀢𑁄 𑀆𑀧𑀚𑁆𑀚𑀢𑀺. 𑀅𑀯𑀢𑁆𑀢𑀼𑀓𑀸𑀫𑀲𑁆𑀲 𑀲𑀳𑀲𑀸 𑀯𑀺𑀭𑀚𑁆𑀛𑀺𑀢𑁆𑀯𑀸 𑀏𑀓𑀢𑁄 𑀯𑀤𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘𑀫𑀬𑀸 𑀲𑀤𑁆𑀥𑀺𑀁 𑀫𑀸 𑀯𑀤𑀸𑀢𑀺 𑀯𑀼𑀢𑁆𑀢𑁄 𑀬𑀤𑀺 𑀯𑀤𑀢𑀺, 𑀅𑀦𑀸𑀧𑀢𑁆𑀢𑀻’𑀢𑀺. 𑀢𑀣𑀸𑀧𑀺 𑀆𑀘𑀭𑀺𑀬𑀸𑀦𑀁 𑀫𑀢𑀺𑀫𑀦𑀼𑀯𑀢𑁆𑀢𑀦𑁆𑀢𑁂𑀦 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀓𑀲𑁆𑀫𑀸? 𑀬𑀲𑁆𑀫𑀸 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀦𑀢𑁆𑀣𑀺, 𑀦𑀢𑁆𑀣𑀺𑀪𑀸𑀯𑀢𑁄𑀬𑁂𑀯 𑀆𑀧𑀢𑁆𑀢𑀺. 𑀲𑀘𑁂 𑀢𑀢𑁆𑀣 𑀅𑀦𑀸𑀧𑀢𑁆𑀢𑀺𑀅𑀯𑀘𑀦𑀁 𑀦 𑀲𑀫𑁆𑀪𑀯𑀢𑀺 𑀅𑀬𑀫𑀝𑁆𑀞𑀸𑀦𑀢𑁆𑀢𑀸’’𑀢𑀺.

𑀢𑀢𑁆𑀭𑀸𑀬𑀁 𑀯𑀺𑀘𑀸𑀭𑀡𑀸 𑁋 ‘‘𑀫𑀬𑀸 𑀲𑀤𑁆𑀥𑀺𑀁 𑀫𑀸 𑀯𑀤𑀸’’𑀢𑀺 𑀯𑀼𑀢𑁆𑀢𑁄 𑀬𑀤𑀺 𑀯𑀤𑀢𑀺, 𑀪𑀺𑀓𑁆𑀔𑀼𑀦𑁄 𑀅𑀦𑀸𑀧𑀢𑁆𑀢𑀻𑀢𑀺 𑀬𑀼𑀢𑁆𑀢𑀫𑁂𑀢𑀁 𑀪𑀺𑀓𑁆𑀔𑀼𑀦𑁄 𑀯𑀢𑁆𑀢𑀼𑀓𑀸𑀫𑀢𑀸𑀬𑀸𑀪𑀸𑀯𑀢𑁄, 𑀪𑀸𑀯𑁂𑀧𑀺 𑀲𑀚𑁆𑀛𑀸𑀬𑀓𑀭𑀡𑀸𑀤𑀻𑀲𑀼 𑀢𑀻𑀲𑀼 𑀅𑀦𑀸𑀧𑀢𑁆𑀢𑀺𑀢𑁄 𑀘. 𑀅𑀣 𑀲𑀸𑀫𑀡𑁂𑀭𑁂𑀦 𑀩𑁆𑀬𑀢𑁆𑀢𑀢𑀸𑀬 ‘‘𑀫𑀬𑀸 𑀲𑀤𑁆𑀥𑀺𑀁 𑀫𑀸 𑀯𑀤𑀸’’𑀢𑀺 𑀯𑀼𑀢𑁆𑀢𑁄 𑀪𑀺𑀓𑁆𑀔𑀼 𑀅𑀩𑁆𑀬𑀢𑁆𑀢𑀢𑀸𑀬 𑀯𑀤𑀢𑀺, 𑀆𑀧𑀢𑁆𑀢𑀺 𑀏𑀯 𑀯𑀢𑁆𑀢𑀼𑀓𑀸𑀫𑀢𑀸𑀲𑀩𑁆𑀪𑀸𑀯𑀢𑁄. 𑀲𑀳𑀲𑀸 𑀘𑁂 𑀯𑀤𑀢𑀺, 𑀅𑀦𑀸𑀧𑀢𑁆𑀢𑀺 𑀢𑀤𑀪𑀸𑀯𑀢𑁄. 𑀲𑀘𑁂 𑀪𑀺𑀓𑁆𑀔𑀼 𑀏𑀯𑀁 ‘‘𑀫𑀬𑀸 𑀲𑀤𑁆𑀥𑀺𑀁 𑀫𑀸 𑀯𑀤𑀸’’𑀢𑀺 𑀯𑀢𑁆𑀯𑀸 𑀢𑁂𑀦 𑀲𑀤𑁆𑀥𑀺𑀁 𑀲𑀬𑀁 𑀯𑀤𑀢𑀺, 𑀆𑀧𑀢𑁆𑀢𑀺 𑀏𑀯. 𑀦 𑀳𑀺 𑀏𑀢𑀁 𑀲𑀺𑀓𑁆𑀔𑀸𑀧𑀤𑀁 𑀓𑀺𑀭𑀺𑀬𑀸𑀓𑀺𑀭𑀺𑀬𑀁. 𑀬𑀤𑀺 𑀏𑀢𑀁 𑀲𑀺𑀓𑁆𑀔𑀸𑀧𑀤𑀁 𑀓𑀺𑀭𑀺𑀬𑀸𑀓𑀺𑀭𑀺𑀬𑀁 𑀪𑀯𑁂𑀬𑁆𑀬, 𑀬𑀼𑀢𑁆𑀢𑀁. 𑀢𑀢𑁆𑀣 𑀅𑀦𑀸𑀧𑀢𑁆𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀫𑀳𑀸𑀧𑀘𑁆𑀘𑀭𑀺𑀬𑀁 𑀇𑀫𑀺𑀦𑀸𑀯 𑀅𑀥𑀺𑀧𑁆𑀧𑀸𑀬𑁂𑀦 ‘‘𑀫𑀬𑀸 𑀲𑀤𑁆𑀥𑀺𑀁 𑀫𑀸 𑀯𑀤𑀸’’𑀢𑀺 𑀯𑀼𑀢𑁆𑀢𑀁 𑀲𑀺𑀬𑀸. 𑀦 𑀳𑀺 𑀲𑀸𑀫𑀡𑁂𑀭𑀲𑁆𑀲 𑀓𑀺𑀭𑀺𑀬𑀸 𑀇𑀥 𑀧𑀫𑀸𑀡𑀦𑁆𑀢𑀺, 𑀇𑀫𑀲𑁆𑀫𑀺𑀁 𑀧𑀦 𑀅𑀥𑀺𑀧𑁆𑀧𑀸𑀬𑁂 𑀯𑀼𑀢𑁆𑀢𑁂 𑀅𑀢𑀺𑀬𑀼𑀢𑁆𑀢𑀁𑀯𑀸𑀢𑀺 𑀅𑀢𑁆𑀣𑁄. 𑀅𑀓𑁆𑀔𑀭𑀢𑁆𑀣𑁄 𑀩𑁆𑀬𑀜𑁆𑀚𑀦𑀢𑁆𑀣𑁄. 𑀓𑀺𑀜𑁆𑀘𑀸𑀧𑀺 ‘‘𑀬𑀜𑁆𑀘 𑀧𑀤𑀁 𑀬𑀜𑁆𑀘 𑀅𑀦𑀼𑀧𑀤𑀁 𑀬𑀜𑁆𑀘 𑀅𑀦𑁆𑀯𑀓𑁆𑀔𑀭𑀁 𑀬𑀜𑁆𑀘 𑀅𑀦𑀼𑀩𑁆𑀬𑀜𑁆𑀚𑀦𑀁, 𑀲𑀩𑁆𑀩𑀫𑁂𑀢𑀁 𑀧𑀤𑀲𑁄𑀥𑀫𑁆𑀫𑁄 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁, 𑀢𑀣𑀸𑀧𑀺 ‘‘𑀧𑀤𑁂𑀦 𑀯𑀸𑀘𑁂𑀢𑀺, 𑀧𑀤𑁂 𑀧𑀤𑁂 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲, 𑀅𑀓𑁆𑀔𑀭𑀸𑀬 𑀯𑀸𑀘𑁂𑀢𑀺, 𑀅𑀓𑁆𑀔𑀭𑀓𑁆𑀔𑀭𑀸𑀬 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 𑀇𑀤𑀫𑁂𑀯 𑀤𑁆𑀯𑀬𑀁 𑀬𑁄𑀚𑀺𑀢𑀁, 𑀢𑀁 𑀓𑀲𑁆𑀫𑀸𑀢𑀺 𑀘𑁂? 𑀧𑀤𑁂𑀦 𑀅𑀦𑀼𑀧𑀤𑀅𑀦𑀼𑀩𑁆𑀬𑀜𑁆𑀚𑀦𑀸𑀦𑀁 𑀲𑀗𑁆𑀕𑀳𑀺𑀢𑀢𑁆𑀢𑀸. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀅𑀦𑀼𑀧𑀤𑀦𑁆𑀢𑀺 𑀤𑀼𑀢𑀺𑀬𑀧𑀸𑀤𑁄. 𑀅𑀦𑀼𑀩𑁆𑀬𑀜𑁆𑀚𑀦𑀦𑁆𑀢𑀺 𑀧𑀼𑀭𑀺𑀫𑀩𑁆𑀬𑀜𑁆𑀚𑀦𑁂𑀦 𑀲𑀤𑀺𑀲𑀁 𑀧𑀘𑁆𑀙𑀸𑀩𑁆𑀬𑀜𑁆𑀚𑀦’’𑀦𑁆𑀢𑀺 (𑀧𑀸𑀘𑀺. 𑀅𑀝𑁆𑀞. 𑁪𑁫), 𑀢𑀲𑁆𑀫𑀸 𑀅𑀦𑀼𑀧𑀤𑁂𑀓𑀤𑁂𑀲𑀫𑀢𑁆𑀢𑀫𑁂𑀯 𑀅𑀦𑀼𑀩𑁆𑀬𑀜𑁆𑀚𑀦𑀦𑁆𑀢𑀺 𑀲𑀺𑀤𑁆𑀥𑀁. ‘‘𑀅𑀓𑁆𑀔𑀭𑀸𑀦𑀼𑀩𑁆𑀬𑀜𑁆𑀚𑀦𑀲𑀫𑀽𑀳𑁄 𑀧𑀤’’𑀦𑁆𑀢𑀺 𑀘 𑀯𑀼𑀢𑁆𑀢𑀢𑁆𑀢𑀸 𑀧𑀤𑀫𑀢𑁆𑀢𑀫𑁂𑀯 𑀯𑀢𑁆𑀢𑀩𑁆𑀩𑀁 𑀢𑁂𑀦 𑀅𑀦𑀼𑀧𑀤𑀸𑀤𑀺𑀢𑁆𑀢𑀬𑀕𑁆𑀕𑀳𑀡𑀢𑁄𑀢𑀺 𑀘𑁂? 𑀦 𑀯𑀢𑁆𑀢𑀩𑁆𑀩𑀁 𑀯𑀘𑀦𑀯𑀺𑀲𑁂𑀲𑀢𑁄. 𑀧𑀤𑁂𑀦 𑀯𑀸𑀘𑁂𑀦𑁆𑀢𑁄 𑀳𑀺 𑀧𑀤𑁂 𑀯𑀸 𑀅𑀦𑀼𑀧𑀤𑁂 𑀯𑀸 𑀅𑀦𑀼𑀩𑁆𑀬𑀜𑁆𑀚𑀦𑁂 𑀯𑀸 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺. 𑀦 𑀅𑀓𑁆𑀔𑀭𑁂𑀦. 𑀅𑀓𑁆𑀔𑀭𑁂𑀦 𑀯𑀸𑀘𑁂𑀦𑁆𑀢𑁄 𑀧𑀦 𑀧𑀤𑀸𑀤𑀻𑀲𑀼 𑀅𑀜𑁆𑀜𑀢𑀭𑀲𑁆𑀫𑀺𑀁 𑀆𑀧𑀚𑁆𑀚𑀢𑀺. 𑀦 𑀳𑀺 ‘‘𑀯𑀭𑁄 𑀯𑀭𑀜𑁆𑀜𑀽 𑀯𑀭𑀤𑁄 𑀯𑀭𑀸𑀳𑀭𑁄’’𑀢𑀺𑀆𑀤𑀺𑀫𑁆𑀳𑀺 𑀧𑀞𑀫𑀁 𑀯-𑀓𑀸𑀭𑀁 𑀯𑀸𑀘𑁂𑀦𑁆𑀢𑁄 𑀤𑀼𑀢𑀺𑀬𑀸𑀤𑀺𑀯-𑀓𑀸𑀭𑁂 𑀑𑀧𑀸𑀢𑁂𑀢𑀺, 𑀧𑀞𑀫𑀁 𑀭𑁄-𑀓𑀸𑀭𑀁 𑀯𑀸𑀘𑁂𑀦𑁆𑀢𑁄 𑀤𑀼𑀢𑀺𑀬𑀭𑁄-𑀓𑀸𑀭𑁂 𑀑𑀧𑀸𑀢𑁂𑀢𑀺, 𑀧𑀞𑀫𑀁 𑀭-𑀓𑀸𑀭𑀁 𑀯𑀸𑀘𑁂𑀦𑁆𑀢𑁄 𑀤𑀼𑀢𑀺𑀬𑀭-𑀓𑀸𑀭𑁂 𑀑𑀧𑀸𑀢𑁂𑀢𑀺, 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸𑀢𑀺 𑀲𑀫𑁆𑀪𑀯𑀢𑀺. 𑀅𑀦𑀼𑀩𑁆𑀬𑀜𑁆𑀚𑀦𑀸𑀦𑀼𑀮𑁄𑀫𑀢𑁄 𑀲𑀫𑁆𑀪𑀯𑀢𑀺 𑀏𑀯𑀸𑀢𑀺 𑀘𑁂? 𑀦, ‘‘𑀧𑀤𑁂 𑀧𑀤𑁂 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀯𑀺𑀭𑀼𑀤𑁆𑀥𑀢𑁆𑀢𑀸. 𑀇𑀤𑀜𑁆𑀳𑀺 𑀯𑀘𑀦𑀁 𑀏𑀓𑀲𑁆𑀫𑀺𑀁 𑀧𑀤𑁂 𑀏𑀓𑀸 𑀆𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺. ‘‘𑀭𑀽𑀧𑀁 𑀅𑀦𑀺𑀘𑁆𑀘𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑁄 𑀭𑀽𑀢𑀺 𑀑𑀧𑀸𑀢𑁂𑀢𑀻’’𑀢𑀺 𑀯𑀘𑀦𑀢𑁄 𑀲𑀓𑀮𑀁 𑀧𑀸𑀤𑀁 𑀯𑀸𑀘𑁂𑀦𑁆𑀢𑀲𑁆𑀲 𑀧𑀞𑀫𑀅𑀓𑁆𑀔𑀭𑀫𑀢𑁆𑀢𑁂 𑀏𑀓𑀢𑁄 𑀯𑀼𑀢𑁆𑀢𑁂 𑀆𑀧𑀢𑁆𑀢𑀻𑀢𑀺 𑀲𑀺𑀤𑁆𑀥𑀦𑁆𑀢𑀺 𑀘𑁂? 𑀦, ‘‘𑀅𑀓𑁆𑀔𑀭𑀓𑁆𑀔𑀭𑀸𑀬 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀯𑀺𑀭𑀼𑀤𑁆𑀥𑀢𑁆𑀢𑀸, 𑀢𑀲𑁆𑀫𑀸 𑀭𑀽𑀢𑀺 𑀑𑀧𑀸𑀢𑁂𑀢𑀻𑀢𑀺 𑀯𑀢𑁆𑀢𑀼𑀁 𑀅𑀲𑀫𑁆𑀪𑀯𑀢𑁄 𑀭𑀽-𑀓𑀸𑀭𑀲𑁆𑀲 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀧𑀭𑀺𑀬𑀸𑀧𑀦𑁆𑀦𑀪𑀸𑀯𑀲𑀺𑀤𑁆𑀥𑀺𑀢𑁄 𑀢𑀁 𑀅𑀯𑀢𑁆𑀯𑀸 𑀓𑁂𑀯𑀮𑀁 𑀅𑀓𑁆𑀔𑀭𑀸𑀬 𑀯𑀸𑀘𑁂𑀦𑁆𑀢𑀲𑁆𑀲 𑀬𑀣𑀸𑀯𑀼𑀢𑁆𑀢𑀥𑀫𑁆𑀫𑀧𑀭𑀺𑀬𑀸𑀧𑀦𑁆𑀦𑀅𑀓𑁆𑀔𑀭𑀪𑀸𑀯𑀤𑀲𑁆𑀲𑀦𑀢𑁆𑀣𑀁 ‘‘𑀭𑀽𑀧𑀁 𑀅𑀦𑀺𑀘𑁆𑀘𑀦𑁆𑀢𑀺 𑀯𑀼𑀘𑁆𑀘𑀫𑀸𑀦𑁄’’𑀢𑀺 𑀯𑀼𑀢𑁆𑀢𑀁, 𑀯𑀘𑀦𑀲𑀺𑀮𑀺𑀝𑁆𑀞𑀢𑀸𑀯𑀲𑁂𑀦 𑀯𑀸 𑀅𑀦𑀼𑀩𑁆𑀬𑀜𑁆𑀚𑀦𑁂 𑀯𑁂𑀤𑀦𑀸𑀯𑀘𑀦𑀁 𑀯𑀺𑀬𑀸𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀤𑀲𑁄𑀥𑀫𑁆𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀧𑀞𑀫𑀲𑀳𑀲𑁂𑀬𑁆𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁦. ‘‘𑀦 𑀲𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀢𑀩𑁆𑀩’’𑀦𑁆𑀢𑀺 𑀪𑀸𑀯𑀯𑀲𑁂𑀦 𑀯𑀼𑀢𑁆𑀢𑀁, 𑀓𑁂𑀲𑀼𑀘𑀺 ‘‘𑀦 𑀲𑀳𑀲𑁂𑀬𑁆𑀬𑀸 𑀓𑀧𑁆𑀧𑁂𑀢𑀩𑁆𑀩𑀸’’𑀢𑀺 𑀧𑀸𑀞𑁄, 𑀦 𑀓𑀧𑁆𑀧𑁂𑀢𑀩𑁆𑀩𑀸 𑀪𑀺𑀓𑁆𑀔𑀼𑀦𑀸𑀢𑀺 𑀧𑀜𑁆𑀜𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀅𑀧𑀲𑁆𑀲𑁂𑀦𑀁 𑀯𑀸𑀢𑀺 𑀯𑀸𑀬𑀺𑀫𑀫𑀜𑁆𑀘𑀓𑀫𑁂𑀯 𑀳𑁄𑀢𑀻’’𑀢𑀺 𑀮𑀺𑀔𑀺𑀢𑀁. 𑀬𑀁 𑀏𑀢𑁂𑀲𑀁 𑀦 𑀓𑀧𑁆𑀧𑀢𑀺, 𑀢𑀁 𑀢𑁂𑀲𑀫𑁆𑀧𑀻𑀢𑀺 𑀉𑀧𑀚𑁆𑀛𑀸𑀬𑀸𑀤𑀻𑀦𑀁 𑀲𑀦𑁆𑀢𑀺𑀓𑀁 𑀅𑀕𑀦𑁆𑀢𑁆𑀯𑀸 𑀲𑀳𑀲𑁂𑀬𑁆𑀬𑀁 𑀓𑀧𑁆𑀧𑁂𑀬𑁆𑀬𑀸𑀢𑀺 𑀧𑀸𑀞𑀲𑁂𑀲𑁄.

𑁫𑁨. ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑁄 𑀦𑀸𑀫 𑀪𑀺𑀓𑁆𑀔𑀼𑀁 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑁄’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀫𑀸𑀢𑀼𑀕𑀸𑀫𑁄 𑀅𑀦𑀼𑀧𑀲𑀫𑁆𑀧𑀦𑁆𑀦𑁄𑀢𑀺 𑀘𑀢𑀼𑀢𑁆𑀣𑀭𑀢𑁆𑀢𑀺𑀬𑀁 𑀫𑀸𑀢𑀼𑀕𑀸𑀫𑁄 𑀤𑁆𑀯𑁂𑀧𑀺 𑀲𑀳𑀲𑁂𑀬𑁆𑀬𑀸𑀧𑀢𑁆𑀢𑀺𑀬𑁄 𑀚𑀦𑁂𑀢𑀻𑀢𑀺 𑀅𑀧𑀭𑁂’’𑀢𑀺 𑀯𑀼𑀢𑁆𑀢𑀁, ‘‘𑀪𑀺𑀓𑁆𑀔𑀼𑀁 𑀞𑀧𑁂𑀢𑁆𑀯𑀸…𑀧𑁂… 𑀧𑀦𑁆𑀦𑁄𑀢𑀺 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀽𑀢𑁄 𑀢𑀺𑀭𑀘𑁆𑀙𑀸𑀦𑀧𑀼𑀭𑀺𑀲𑁄 𑀅𑀥𑀺𑀧𑁆𑀧𑁂𑀢𑁄’’𑀢𑀺 𑀘, 𑀉𑀪𑀬𑀫𑁆𑀧𑀺 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑁂 𑀫𑀸𑀢𑀼𑀕𑀸𑀫𑁄 𑀦𑀸𑀫𑀸𑀢𑀺 𑀫𑀦𑀼𑀲𑁆𑀲𑀺𑀢𑁆𑀣𑀺𑀁𑀬𑁂𑀯 𑀕𑀳𑁂𑀢𑁆𑀯𑀸 𑀬𑀓𑁆𑀔𑀻 𑀧𑁂𑀢𑀻 𑀢𑀺𑀭𑀘𑁆𑀙𑀸𑀦𑀕𑀢𑀸 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀪𑀽𑀢𑀸 𑀦 𑀕𑀳𑀺𑀢𑀸 𑀢𑁂𑀲𑀼 𑀤𑀼𑀓𑁆𑀓𑀝𑀢𑁆𑀢𑀸. ‘‘𑀲𑀘𑁂 𑀧𑀦 𑀅𑀢𑁆𑀢𑀦𑁄𑀧𑀺 𑀲𑀺𑀓𑁆𑀔𑀸𑀧𑀤𑁂 𑀤𑀼𑀓𑁆𑀓𑀝𑀁 𑀪𑀯𑁂𑀬𑁆𑀬, 𑀅𑀣 𑀓𑀲𑁆𑀫𑀸 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀘 𑀯𑀼𑀢𑁆𑀢𑀁. ‘‘𑀅𑀧𑀭𑀺𑀓𑁆𑀔𑀺𑀢𑁆𑀢𑁂 𑀧𑀫𑀼𑀔𑁂 𑀅𑀦𑀸𑀧𑀢𑁆𑀢𑀻’’𑀢𑀺 𑀲𑀻𑀳𑀴𑀝𑁆𑀞𑀓𑀣𑀸𑀯𑀘𑀦𑀁, 𑀢𑀲𑁆𑀲𑀢𑁆𑀣𑀁 𑀤𑀻𑀧𑁂𑀢𑀼𑀁 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 ‘‘𑀪𑀽𑀫𑀺𑀬𑀁 𑀯𑀺𑀦𑀸 𑀚𑀕𑀢𑀺𑀬𑀸 𑀧𑀫𑀼𑀔𑀁 𑀲𑀦𑁆𑀥𑀸𑀬 𑀓𑀣𑀺𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀧𑀼𑀦 𑀯𑀲𑀢𑀻𑀢𑀺 𑀘𑀢𑀼𑀢𑁆𑀣𑀤𑀺𑀯𑀲𑁂 𑀯𑀲𑀢𑀺. 𑀪𑀺𑀓𑁆𑀔𑀼𑀦𑀺𑀧𑀦𑁆𑀦𑁂𑀢𑀺 𑀪𑀺𑀓𑁆𑀔𑀼𑀫𑁆𑀳𑀺 𑀦𑀺𑀧𑀦𑁆𑀦𑁂. 𑀲𑀦𑁆𑀦𑀺𑀧𑀢𑀺𑀢𑀫𑀡𑁆𑀟𑀧𑀁 𑀦𑀸𑀫 𑀫𑀳𑀸𑀯𑀺𑀳𑀸𑀭𑁂 𑀲𑀦𑁆𑀦𑀺𑀧𑀸𑀢𑀝𑁆𑀞𑀸𑀦𑀁. ‘‘𑀢𑀻𑀡𑀺 𑀘 𑀤𑀺𑀯𑀲𑀸𑀦𑀺 𑀤𑀼𑀓𑁆𑀓𑀝𑀔𑁂𑀢𑁆𑀢𑁂 𑀯𑀲𑀺𑀢𑁆𑀯𑀸 𑀘𑀢𑀼𑀢𑁆𑀣𑁂 𑀤𑀺𑀯𑀲𑁂 𑀲𑀳𑀲𑁂𑀬𑁆𑀬𑀸𑀧𑀢𑁆𑀢𑀺𑀧𑀳𑁄𑀦𑀓𑁂 𑀲𑀬𑀢𑀺, 𑀧𑀸𑀘𑀺𑀢𑁆𑀢𑀺𑀬𑁂𑀯𑀸’’𑀢𑀺 𑀏𑀓𑀘𑁆𑀘𑁂 𑀯𑀤𑀦𑁆𑀢𑀺 𑀓𑀺𑀭, 𑀢𑀁 𑀦 𑀬𑀼𑀢𑁆𑀢𑀁.

𑀧𑀞𑀫𑀲𑀳𑀲𑁂𑀬𑁆𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀤𑀼𑀢𑀺𑀬𑀲𑀳𑀲𑁂𑀬𑁆𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁫. ‘‘𑀅𑀣 𑀔𑁄 𑀢𑁂 𑀫𑀦𑀼𑀲𑁆𑀲𑀸’’𑀢𑀺 𑀘 ‘‘𑀢𑁂 𑀅𑀤𑁆𑀥𑀺𑀓𑀸’’𑀢𑀺 𑀘 𑀧𑀸𑀞𑁄. ‘‘𑀏𑀓𑀭𑀢𑁆𑀢’’𑀦𑁆𑀢𑀺𑀧𑀺 𑀅𑀢𑁆𑀣𑀺, 𑀲𑁄 𑀦 𑀲𑀼𑀦𑁆𑀤𑀭𑁄. 𑀧𑀡𑁆𑀟𑀓𑁂 𑀧𑀸𑀴𑀺𑀬𑀁 𑀤𑀼𑀓𑁆𑀓𑀝𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 ‘‘𑀉𑀪𑀢𑁄𑀩𑁆𑀬𑀜𑁆𑀚𑀦𑁂𑀳𑀺 𑀫𑀽𑀮𑀸𑀧𑀢𑁆𑀢𑀻𑀢𑀺 𑀤𑀺𑀲𑁆𑀲𑀢𑀻’’𑀢𑀺, ‘‘𑀅𑀦𑀺𑀫𑀺𑀢𑁆𑀢𑀸𑀤𑀬𑁄 𑀇𑀢𑁆𑀣𑀺𑀬𑁄𑀯𑀸’’𑀢𑀺 𑀘 𑀯𑀤𑀦𑁆𑀢𑀺 𑀉𑀪𑀢𑁄𑀩𑁆𑀬𑀜𑁆𑀚𑀦𑀓𑁂 𑀯𑀼𑀢𑁆𑀢𑀁 𑀯𑀺𑀬. 𑀓𑀺𑀜𑁆𑀘𑀸𑀧𑀺 𑀫𑀢𑀺𑀢𑁆𑀣𑀻 𑀧𑀸𑀭𑀸𑀚𑀺𑀓𑀯𑀢𑁆𑀣𑀼 𑀳𑁄𑀢𑀺, 𑀅𑀦𑀼𑀧𑀸𑀤𑀺𑀦𑁆𑀦𑀧𑀓𑁆𑀔𑁂 𑀞𑀺𑀢𑀢𑁆𑀢𑀸 𑀧𑀦 𑀇𑀥 𑀆𑀧𑀢𑁆𑀢𑀺𑀁 𑀦 𑀓𑀭𑁄𑀢𑀺. 𑀧𑀸𑀭𑀸𑀚𑀺𑀓𑀸𑀧𑀢𑁆𑀢𑀺𑀝𑁆𑀞𑀸𑀦𑀜𑁆𑀘𑁂𑀢𑁆𑀣 𑀦 𑀑𑀮𑁄𑀓𑁂𑀢𑀩𑁆𑀩𑀁.

𑀤𑀼𑀢𑀺𑀬𑀲𑀳𑀲𑁂𑀬𑁆𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀥𑀫𑁆𑀫𑀤𑁂𑀲𑀦𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁬. ‘‘𑀯𑀺𑀜𑁆𑀜𑀽 𑀧𑀝𑀺𑀩𑀮𑀸’’𑀢𑀺 𑀯𑀘𑀦𑀢𑁄 𑀅𑀯𑀺𑀜𑁆𑀜𑀽 𑀇𑀢𑁆𑀣𑀺𑀬𑀸𑀧𑀺 𑀤𑁂𑀲𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀇𑀥 𑀬𑀓𑁆𑀔𑀻𑀆𑀤𑀬𑁄 𑀫𑀦𑀼𑀲𑁆𑀲𑀺𑀢𑁆𑀣𑀻 𑀯𑀺𑀬 𑀅𑀦𑁄𑀴𑀸𑀭𑀺𑀓𑀢𑁆𑀢𑀸 𑀤𑀼𑀓𑁆𑀓𑀝𑀯𑀢𑁆𑀣𑀼𑀓𑀸 𑀚𑀸𑀢𑀸. 𑀢𑀺𑀭𑀘𑁆𑀙𑀸𑀦𑀕𑀢𑀫𑀦𑀼𑀲𑁆𑀲𑀯𑀺𑀕𑁆𑀕𑀳𑀺𑀢𑁆𑀣𑀺𑀬𑀸 𑀧𑀝𑀺𑀩𑀮𑀢𑀸𑀬 𑀯𑀼𑀢𑁆𑀢𑀢𑁆𑀢𑀸 𑀇𑀢𑀭𑀸𑀧𑀺 𑀤𑀼𑀓𑁆𑀓𑀝𑀯𑀢𑁆𑀣𑀼𑀬𑁂𑀯𑀸𑀢𑀺 𑀏𑀓𑁂. ‘‘𑀫𑀸𑀢𑀼𑀕𑀸𑀫𑀸𑀬𑀸’’𑀢𑀺 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁. ‘‘𑀅𑀝𑁆𑀞𑀓𑀣𑀸𑀤𑀺𑀧𑀸𑀞𑀁 𑀞𑀧𑁂𑀢𑁆𑀯𑀸 𑀤𑀫𑀺𑀴𑀸𑀤𑀺𑀦𑀸 𑀬𑀣𑀸𑀭𑀼𑀘𑀺 𑀓𑀣𑁂𑀢𑀼𑀁 𑀮𑀪𑀢𑀺 𑀓𑀺𑀭𑀸’’𑀢𑀺 𑀮𑀺𑀔𑀺𑀢𑀁, 𑀬𑀣𑀸 𑀬𑀓𑁆𑀔𑀻𑀆𑀤𑀬𑁄 𑀤𑀼𑀓𑁆𑀓𑀝𑀯𑀢𑁆𑀣𑀼𑀓𑀸 𑀚𑀸𑀢𑀸, 𑀢𑀣𑀸 𑀧𑀼𑀭𑀺𑀲𑀯𑀺𑀕𑁆𑀕𑀳𑀁 𑀕𑀳𑁂𑀢𑁆𑀯𑀸 𑀞𑀺𑀢𑁂𑀦 𑀬𑀓𑁆𑀔𑀸𑀤𑀺𑀦𑀸 𑀲𑀤𑁆𑀥𑀺𑀁 𑀞𑀺𑀢𑀲𑁆𑀲 𑀫𑀸𑀢𑀼𑀕𑀸𑀫𑀲𑁆𑀲 𑀥𑀫𑁆𑀫𑀁 𑀤𑁂𑀲𑁂𑀦𑁆𑀢𑁄 𑀤𑀼𑀓𑁆𑀓𑀝𑀁 𑀅𑀦𑀸𑀧𑀚𑁆𑀚𑀺𑀢𑁆𑀯𑀸 𑀓𑀲𑁆𑀫𑀸 𑀧𑀸𑀘𑀺𑀢𑁆𑀢𑀺𑀬𑀫𑀸𑀧𑀚𑁆𑀚𑀢𑀻𑀢𑀺 𑀘𑁂? 𑀈𑀲𑀓𑀫𑁆𑀧𑀺 𑀤𑀼𑀢𑀺𑀬𑀧𑀓𑁆𑀔𑀁 𑀅𑀪𑀚𑀦𑀢𑁄. 𑀫𑀦𑀼𑀲𑁆𑀲𑀫𑀸𑀢𑀼𑀕𑀸𑀫𑁄𑀧𑀺 𑀦 𑀤𑀼𑀢𑀺𑀬𑁄, 𑀧𑀕𑁂𑀯 𑀬𑀓𑁆𑀔𑀸𑀤𑀬𑁄𑀢𑀺. 𑀦 𑀤𑀼𑀢𑀺𑀬𑀸𑀦𑀺𑀬𑀢𑁂 𑀢𑀲𑁆𑀲 𑀤𑀼𑀢𑀺𑀬𑀢𑁆𑀢𑀸𑀢𑀺 𑀘𑁂? 𑀦 𑀢𑀢𑁆𑀣 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀧𑁂𑀓𑁆𑀔𑀸 𑀤𑀼𑀢𑀺𑀬𑀢𑀸, 𑀓𑀺𑀦𑁆𑀢𑀼 𑀦𑀺𑀲𑀚𑁆𑀚𑀸𑀧𑁂𑀓𑁆𑀔𑀸, 𑀇𑀥 𑀘 𑀦 𑀦𑀺𑀲𑀚𑁆𑀚𑀫𑀢𑁆𑀢𑀁, 𑀓𑀺𑀦𑁆𑀢𑀼 𑀤𑁂𑀲𑀦𑀸 𑀇𑀥𑀸𑀥𑀺𑀧𑁆𑀧𑁂𑀢𑀸. 𑀲𑀸 𑀘 𑀦𑀺𑀧𑀚𑁆𑀚𑀦𑀢𑁄 𑀑𑀴𑀸𑀭𑀺𑀓𑀸, 𑀢𑀲𑁆𑀫𑀸 𑀅𑀲𑀫𑀢𑁆𑀣𑀦𑀺𑀤𑀲𑁆𑀲𑀦𑀁.

𑀥𑀫𑁆𑀫𑀤𑁂𑀲𑀦𑀸𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀪𑀽𑀢𑀸𑀭𑁄𑀘𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁭. ‘‘𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑀯𑀢𑁆𑀣𑀼 𑀘 𑀇𑀤𑀜𑁆𑀘 𑀏𑀓𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁, 𑀦 𑀬𑀼𑀢𑁆𑀢𑀁. 𑀓𑀲𑁆𑀫𑀸? 𑀢𑀢𑁆𑀣 ‘‘𑀫𑁄𑀖𑀧𑀼𑀭𑀺𑀲𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀢𑁂 𑀅𑀭𑀺𑀬𑀫𑀺𑀲𑁆𑀲𑀓𑀸 𑀦 𑀳𑁄𑀦𑁆𑀢𑀻𑀢𑀺 𑀤𑁆𑀯𑁂𑀧𑀺 𑀏𑀓𑀲𑀤𑀺𑀲𑀸𑀦𑀻𑀢𑀺 𑀫𑀫 𑀢𑀓𑁆𑀓𑁄. ‘‘𑀅𑀭𑀺𑀬𑀸𑀧𑀺 𑀧𑀝𑀺𑀚𑀸𑀦𑀺𑀁𑀲𑀼, 𑀢𑁂𑀲𑀫𑁆𑀧𑀺 𑀅𑀩𑁆𑀪𑀦𑁆𑀢𑀭𑁂 𑀯𑀺𑀚𑁆𑀚𑀫𑀸𑀦𑀢𑁆𑀢𑀸 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑁆𑀲𑀸’’𑀢𑀺 𑀮𑀺𑀔𑀺𑀢𑀁. ‘‘𑀲𑀩𑁆𑀩𑁂𑀧𑀺 𑀪𑀽𑀢𑀁 𑀪𑀕𑀯𑀸𑀢𑀺 𑀧𑀼𑀣𑀼𑀚𑁆𑀚𑀦𑀅𑀭𑀺𑀬𑀸𑀦𑀁 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀲𑁆𑀲 𑀆𑀭𑁄𑀘𑀺𑀢𑀢𑁆𑀢𑀸 ‘𑀪𑀽𑀢’𑀦𑁆𑀢𑀺 𑀯𑀼𑀢𑁆𑀢𑀁, 𑀦 𑀅𑀢𑁆𑀢𑀦𑁄 𑀉𑀢𑁆𑀢𑀭𑀺𑀫𑀦𑀼𑀲𑁆𑀲𑀥𑀫𑁆𑀫𑀁 𑀲𑀦𑁆𑀥𑀸𑀬𑀸𑀢𑀺 𑀅𑀧𑀭𑁂’’𑀢𑀺 𑀯𑀼𑀢𑁆𑀢𑀁.

𑁭𑁭. 𑀧𑀼𑀩𑁆𑀩𑁂 𑀅𑀯𑀼𑀢𑁆𑀢𑁂𑀳𑀻𑀢𑀺 𑀘𑀢𑀼𑀢𑁆𑀣𑀧𑀸𑀭𑀸𑀚𑀺𑀓𑁂 𑀅𑀯𑀼𑀢𑁆𑀢𑁂𑀳𑀻𑀢𑀺.

𑀪𑀽𑀢𑀸𑀭𑁄𑀘𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀤𑀼𑀝𑁆𑀞𑀼𑀮𑁆𑀮𑀸𑀭𑁄𑀘𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁭𑁮-𑁮𑁦. ‘‘𑀢𑁂𑀦𑁂𑀯 𑀳𑀢𑁆𑀣𑁂𑀦 𑀉𑀧𑀓𑁆𑀓𑀫𑀺𑀢𑁆𑀯𑀸 𑀅𑀲𑀼𑀘𑀺𑀁 𑀫𑁄𑀘𑁂𑀲𑀻’’𑀢𑀺 𑀧𑀸𑀞𑁄 𑀲𑀫𑁆𑀧𑀢𑀺𑀧𑀸𑀞𑁄 𑀲𑀼𑀦𑁆𑀤𑀭𑁄. 𑀅𑀧𑀮𑁄𑀓𑁂𑀢𑁆𑀯𑀸𑀯 𑀓𑀸𑀢𑀩𑁆𑀩𑀸. 𑀦𑁄 𑀘𑁂, 𑀧𑀸𑀴𑀺𑀬𑀁𑀬𑁂𑀯 𑀯𑀼𑀢𑁆𑀢𑀁 𑀲𑀺𑀬𑀸. ‘‘𑀑𑀢𑁆𑀢𑀧𑁆𑀧𑁂𑀦𑀸’’𑀢𑀺 𑀯𑀢𑁆𑀢𑀩𑁆𑀩𑁂 𑀭𑀼𑀴𑁆𑀳𑀻𑀯𑀲𑁂𑀦 𑀧𑀭𑁂𑀲𑀼 ‘‘𑀳𑀺𑀭𑁄𑀢𑁆𑀢𑀧𑁆𑀧𑁂𑀦𑀸’’𑀢𑀺 𑀯𑀼𑀢𑁆𑀢𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀉𑀢𑁆𑀢𑀸𑀦𑀢𑁆𑀢𑀸 𑀦 𑀯𑀼𑀢𑁆𑀢𑀁, 𑀧𑀸𑀘𑀺𑀢𑁆𑀢𑀺𑀬𑀸𑀲𑀫𑁆𑀪𑀯𑀤𑀲𑁆𑀲𑀦𑁂𑀦𑁂𑀯 𑀳𑀺 𑀤𑀼𑀓𑁆𑀓𑀝𑀦𑁆𑀢𑀺 𑀲𑀺𑀤𑁆𑀥𑀁.

𑁮𑁩. 𑀢𑀢𑁆𑀣 ‘‘𑀓𑀫𑁆𑀫’’𑀦𑁆𑀢𑀺 𑀯𑀼𑀢𑁆𑀢𑀅𑀚𑁆𑀛𑀸𑀘𑀸𑀭𑁂𑀧𑀺 𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀢𑀁 𑀢𑀲𑁆𑀲 𑀤𑀡𑁆𑀟𑀓𑀫𑁆𑀫𑀯𑀢𑁆𑀣𑀼. ‘‘𑀢𑀢𑁆𑀣 𑀓𑀫𑁆𑀫𑀁 𑀆𑀧𑀦𑁆𑀦𑁄’’𑀢𑀺 𑀧𑀼𑀩𑁆𑀩𑁂𑀧𑀺 𑀮𑀺𑀔𑀺𑀢𑀁. 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 ‘‘𑀅𑀢𑁆𑀢𑀓𑀸𑀫𑀁 𑀆𑀧𑀦𑁆𑀦𑁄’’𑀢𑀺 𑀧𑀸𑀞𑁄, ‘‘𑀅𑀬𑀫𑁂𑀯 𑀕𑀳𑁂𑀢𑀩𑁆𑀩𑁄’’𑀢𑀺 𑀯𑀤𑀦𑁆𑀢𑀺, 𑀯𑀻𑀫𑀁𑀲𑀺𑀢𑀩𑁆𑀩𑀁.

𑀤𑀼𑀝𑁆𑀞𑀼𑀮𑁆𑀮𑀸𑀭𑁄𑀘𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀧𑀣𑀯𑀻𑀔𑀡𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁬. 𑀓𑀝𑀲𑀓𑁆𑀔𑀭𑀸 𑀲𑁂𑀢𑀫𑀢𑁆𑀢𑀺𑀓𑀸 𑀯𑀺𑀬 𑀫𑀼𑀤𑀼𑀓𑀸 𑀲𑀓𑁆𑀔𑀭𑀚𑀸𑀢𑀺. ‘‘𑀅𑀓𑀢𑀧𑀩𑁆𑀪𑀸𑀭𑁂𑀢𑀺 𑀅𑀯𑀮𑀜𑁆𑀚𑀺𑀢𑀩𑁆𑀩𑀝𑁆𑀞𑀸𑀦𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢’’𑀦𑁆𑀢𑀺 𑀮𑀺𑀔𑀺𑀢𑀁. ‘‘𑀅𑀦𑁄𑀯𑀲𑁆𑀲𑀓𑀝𑁆𑀞𑀸𑀦𑀤𑀲𑁆𑀲𑀦𑀢𑁆𑀣’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁. 𑀫𑀽𑀲𑀺𑀓𑀼𑀓𑁆𑀓𑀼𑀭𑀦𑁆𑀢𑀺 𑀫𑀽𑀲𑀺𑀓𑀸𑀳𑀺 𑀉𑀤𑁆𑀥𑀝𑀧𑀁𑀲𑀼. 𑀲𑀼𑀤𑁆𑀥𑀘𑀺𑀢𑁆𑀢𑀸𑀢𑀺 𑀓𑀺𑀜𑁆𑀘𑀸𑀧𑀺 ‘‘𑀏𑀯𑀁 𑀧𑀯𑀝𑁆𑀝𑀺𑀢𑁂 𑀧𑀣𑀯𑀻 𑀪𑀺𑀚𑁆𑀚𑀺𑀲𑁆𑀲𑀢𑀻’’𑀢𑀺 𑀚𑀸𑀦𑀦𑁆𑀢𑀺, 𑀦𑁄 𑀧𑀦 𑀘𑁂 𑀧𑀣𑀯𑀻𑀪𑁂𑀤𑀢𑁆𑀣𑀺𑀓𑀸, 𑀲𑀼𑀤𑁆𑀥𑀘𑀺𑀢𑁆𑀢𑀸 𑀦𑀸𑀫 𑀳𑁄𑀦𑁆𑀢𑀺. 𑀧𑀁𑀲𑀼𑀆𑀤𑀬𑁄 𑀤𑁆𑀯𑁂 𑀓𑁄𑀝𑁆𑀞𑀸𑀲𑀸 𑀆𑀧𑀢𑁆𑀢𑀺𑀓𑀭𑀸. 𑀓𑁂𑀘𑀺 ‘‘𑀲𑀩𑁆𑀩𑀘𑁆𑀙𑀦𑁆𑀦𑀸𑀤𑀻𑀲𑀼 𑀉𑀧𑀟𑁆𑀠𑁂 𑀤𑀼𑀓𑁆𑀓𑀝𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀲𑀘𑁂 𑀤𑀼𑀓𑁆𑀓𑀝𑀁, 𑀬𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. 𑀢𑀢𑁆𑀣 𑀬𑀼𑀢𑁆𑀢𑀁 𑀢𑀸𑀤𑀺𑀲𑀲𑁆𑀲 𑀯𑀢𑁆𑀣𑀼𑀦𑁄 𑀲𑀫𑁆𑀪𑀯𑀸, 𑀇𑀥 𑀧𑀦 𑀚𑀸𑀢𑀧𑀣𑀯𑀻 𑀘 𑀅𑀚𑀸𑀢𑀧𑀣𑀯𑀻 𑀘𑀸𑀢𑀺 𑀤𑁆𑀯𑁂𑀬𑁂𑀯 𑀯𑀢𑁆𑀣𑀽𑀦𑀺, 𑀢𑀲𑁆𑀫𑀸 𑀤𑁆𑀯𑀺𑀦𑁆𑀦𑀁 𑀏𑀓𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀦 𑀬𑀼𑀢𑁆𑀢𑀁. 𑀏𑀢𑁆𑀣𑀸𑀧𑀺 𑀤𑀼𑀓𑁆𑀓𑀝𑀯𑀘𑀦𑀁 𑀅𑀢𑁆𑀣𑀻𑀢𑀺 𑀘𑁂? 𑀢𑀁 𑀧𑀦 𑀲𑀜𑁆𑀜𑀸𑀯𑀲𑁂𑀦, 𑀦 𑀯𑀢𑁆𑀣𑀼𑀯𑀲𑁂𑀦𑀸𑀢𑀺 𑀦 𑀬𑀼𑀢𑁆𑀢𑀫𑁂𑀯.

𑁮𑁭. 𑀅𑀕𑁆𑀕𑀺𑀁 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀏𑀢𑁆𑀣 𑀏𑀢𑁆𑀢𑀸𑀯𑀢𑀸 𑀉𑀲𑀼𑀫𑀁 𑀕𑀡𑁆𑀳𑀸𑀢𑀺, 𑀢𑀲𑁆𑀫𑀸 𑀯𑀝𑁆𑀝𑀢𑀻𑀢𑀺 𑀓𑁂𑀘𑀺. 𑀏𑀯𑀁 𑀲𑀢𑀺 𑀧𑀣𑀯𑀺𑀬𑀸 𑀅𑀕𑁆𑀕𑀺𑀫𑁆𑀳𑀺 𑀓𑀢𑁂 𑀤𑀽𑀭𑀢𑁄𑀧𑀺 𑀪𑀽𑀫𑀺 𑀉𑀡𑁆𑀳𑀸 𑀳𑁄𑀢𑀺, 𑀢𑀢𑁆𑀢𑀓𑀁 𑀓𑁄𑀧𑁂𑀢𑀩𑁆𑀩𑀁 𑀲𑀺𑀬𑀸, 𑀦 𑀘 𑀓𑀧𑁆𑀧𑀢𑀺, 𑀢𑀲𑁆𑀫𑀸 𑀬𑀲𑁆𑀫𑀺𑀁 𑀞𑀸𑀦𑁂 𑀧𑀢𑀢𑀺, 𑀢𑀁 𑀲𑁄 𑀅𑀕𑁆𑀕𑀺 𑀟𑀳𑀢𑀺, 𑀢𑀲𑁆𑀫𑀸 𑀯𑀝𑁆𑀝𑀢𑀻𑀢𑀺 𑀏𑀓𑁂. 𑀅𑀟𑀳𑀺𑀢𑁂𑀧𑀺 ‘‘𑀅𑀤𑀟𑁆𑀠𑀸𑀬 𑀧𑀣𑀯𑀺𑀬𑀸 𑀅𑀕𑁆𑀕𑀺𑀁 𑀞𑀧𑁂𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀢𑁆𑀢𑀦𑀸 𑀧𑀸𑀢𑀦𑀸𑀬𑁂𑀯 𑀤𑁄𑀲𑁄 𑀧𑀢𑀺𑀢𑁂 𑀉𑀧𑀤𑀸𑀳𑁂𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀧𑀣𑀯𑀻𑀔𑀡𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀢𑁆𑀢𑁄 𑀯𑀡𑁆𑀡𑀦𑀸𑀓𑁆𑀓𑀫𑁂𑀦 𑀫𑀼𑀲𑀸𑀯𑀸𑀤𑀯𑀕𑁆𑀕𑁄 𑀧𑀞𑀫𑁄.

𑁨. 𑀪𑀽𑀢𑀕𑀸𑀫𑀯𑀕𑁆𑀕𑁄

𑁧. 𑀪𑀽𑀢𑀕𑀸𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁮𑁯. 𑀨𑀭𑀲𑀼𑀁 𑀦𑀺𑀕𑁆𑀕𑀳𑁂𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁄𑀢𑀺 𑀤𑀲𑁆𑀲𑀺𑀢𑀪𑀸𑀯𑀁 𑀚𑀸𑀦𑀸𑀧𑁂𑀢𑀺. 𑀓𑀲𑁆𑀫𑀸 𑀅𑀬𑀁 𑀨𑀭𑀲𑀼𑀁 𑀉𑀕𑁆𑀕𑀺𑀭𑀻𑀢𑀺 𑀘𑁂? 𑀫𑀦𑀼𑀲𑁆𑀲𑀸𑀦𑀦𑁆𑀢𑀺𑀆𑀤𑀺 𑀢𑀲𑁆𑀲 𑀧𑀭𑀺𑀳𑀸𑀭𑁄. ‘‘𑀆𑀓𑁄𑀝𑁂𑀲𑀺 𑀙𑀺𑀦𑁆𑀤𑀻𑀢𑀺 𑀘 𑀯𑀘𑀦𑀢𑁄 𑀭𑀼𑀓𑁆𑀔𑀤𑁂𑀯𑀢𑀸𑀦𑀁 𑀳𑀢𑁆𑀣𑀸𑀦𑀺 𑀙𑀺𑀚𑁆𑀚𑀦𑁆𑀢𑀺, 𑀦 𑀘𑀸𑀢𑀼𑀫𑀳𑀸𑀭𑀸𑀚𑀺𑀓𑀸𑀤𑀻𑀦𑀁 𑀯𑀺𑀬 𑀅𑀘𑁆𑀙𑁂𑀚𑁆𑀚𑀸𑀦𑀻’’𑀢𑀺 𑀯𑀤𑀦𑁆𑀢𑀺.

𑁯𑁦-𑁯𑁨. 𑀪𑀯𑀦𑁆𑀢𑀺 𑀅𑀳𑀼𑀯𑀼𑀜𑁆𑀘𑀸𑀢𑀺 𑀤𑁆𑀯𑀺𑀓𑀸𑀮𑀺𑀓𑁄 𑀪𑀽𑀢𑀲𑀤𑁆𑀤𑁄. 𑀬𑀤𑀺 𑀩𑀻𑀚𑀢𑁄 𑀦𑀺𑀩𑁆𑀩𑀢𑁆𑀢𑁂𑀦 𑀩𑀻𑀚𑀁 𑀤𑀲𑁆𑀲𑀺𑀢𑀁, 𑀢𑀤𑁂𑀯 𑀲𑀦𑁆𑀢𑀓𑀁 𑀬𑀤𑀺𑀤𑀁. 𑀲𑁄𑀯 𑀓𑀼𑀓𑁆𑀓𑀼𑀝𑁄 𑀫𑀁𑀲𑀺𑀫𑀓𑁆𑀔𑀺𑀢𑁄𑀢𑀺 𑀅𑀬𑀫𑁂𑀯 𑀳𑀺 𑀧𑀭𑀺𑀳𑀸𑀭𑁄. 𑀅𑀝𑁆𑀞𑀓𑀣𑀸𑀲𑀼𑀧𑀺 𑀳𑀺 ‘‘𑀩𑀻𑀚𑁂 𑀩𑀻𑀚𑀲𑀜𑁆𑀜𑀻’’𑀢𑀺 𑀮𑀺𑀔𑀺𑀢𑀁. 𑀬𑀁 𑀩𑀻𑀚𑀁 𑀪𑀽𑀢𑀕𑀸𑀫𑁄 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀺𑀁 𑀩𑀻𑀚𑁂 𑀪𑀽𑀢𑀕𑀸𑀫𑀩𑀻𑀚𑁂𑀢𑀺 𑀬𑁄𑀚𑁂𑀢𑁆𑀯𑀸. 𑀅𑀫𑀽𑀮𑀓𑀢𑁆𑀢𑀸 𑀓𑀺𑀭 𑀲𑀫𑁆𑀧𑀼𑀡𑁆𑀡𑀪𑀽𑀢𑀕𑀸𑀫𑁄 𑀦 𑀳𑁄𑀢𑀺, ‘‘𑀲𑀫𑀽𑀮𑀧𑀢𑁆𑀢𑁄 𑀏𑀯 𑀳𑀺 𑀪𑀽𑀢𑀕𑀸𑀫𑁄 𑀦𑀸𑀫𑀸’’𑀢𑀺 𑀓𑀸𑀭𑀡𑀁 𑀯𑀤𑀦𑁆𑀢𑀺. ‘‘𑀅𑀪𑀽𑀢𑀕𑀸𑀫𑀫𑀽𑀮𑀢𑁆𑀢𑀸𑀢𑀺 𑀪𑀽𑀢𑀕𑀸𑀫𑀢𑁄 𑀅𑀦𑀼𑀧𑁆𑀧𑀦𑁆𑀦𑀢𑁆𑀢𑀸 𑀅𑀪𑀽𑀢𑀕𑀸𑀫𑀫𑀽𑀮𑀁, 𑀪𑀽𑀢𑀕𑀸𑀫𑀲𑁆𑀲 𑀅𑀫𑀽𑀮𑀓𑀢𑁆𑀢𑀸 𑀯𑀸. 𑀦 𑀳𑀺 𑀢𑀢𑁄 𑀅𑀜𑁆𑀜𑁄 𑀪𑀽𑀢𑀕𑀸𑀫𑁄 𑀉𑀧𑁆𑀧𑀚𑁆𑀚𑀢𑀻’’𑀢𑀺 𑀤𑁆𑀯𑀺𑀥𑀸𑀧𑀺 𑀮𑀺𑀔𑀺𑀢𑀁. 𑀧𑀺𑀬𑀗𑁆𑀕𑀼 𑀅𑀲𑀦𑀭𑀼𑀓𑁆𑀔𑁄 𑀯𑀟𑁆𑀠𑀦𑀢𑁆𑀢𑀘𑁄 𑀔𑀚𑁆𑀚𑀨𑀮𑁄, ‘‘𑀧𑀻𑀢𑀲𑀸𑀮𑁄’’𑀢𑀺𑀧𑀺 𑀯𑀼𑀘𑁆𑀘𑀢𑀺. 𑀅𑀫𑀽𑀮𑀓𑀪𑀽𑀢𑀕𑀸𑀫𑁂 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻𑀢𑀺 𑀦𑀸𑀴𑀺𑀓𑁂𑀭𑀲𑁆𑀲𑁂𑀯𑀸𑀬𑀁. 𑀖𑀝𑀧𑀺𑀝𑁆𑀞𑀺𑀚𑀸𑀢𑀢𑁆𑀢𑀸, 𑀩𑀻𑀚𑀕𑀸𑀫𑀸𑀦𑀼𑀮𑁄𑀫𑀢𑁆𑀢𑀸 𑀘 𑀤𑀼𑀓𑁆𑀓𑀝𑀯𑀢𑁆𑀣𑀼. 𑀦 𑀯𑀸𑀲𑁂𑀢𑀩𑁆𑀩𑀁 ‘‘𑀤𑀼𑀭𑀽𑀧𑀘𑀺𑀡𑁆𑀡𑀢𑁆𑀢𑀸’’𑀢𑀺 𑀮𑀺𑀔𑀺𑀢𑀁, ‘‘𑀬𑁂𑀲𑀁 𑀭𑀼𑀓𑁆𑀔𑀸𑀦𑀁 𑀲𑀸𑀔𑀸 𑀭𑀼𑀳𑀢𑀻𑀢𑀺 𑀯𑀘𑀦𑀢𑁄 𑀬𑁂𑀲𑀁 𑀦 𑀭𑀼𑀳𑀢𑀺, 𑀢𑁂𑀲𑀁 𑀲𑀸𑀔𑀸𑀬 𑀓𑀧𑁆𑀧𑀺𑀬𑀓𑀭𑀡𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀲𑀺𑀤𑁆𑀥’’𑀦𑁆𑀢𑀺 𑀯𑀼𑀢𑁆𑀢𑀁. 𑀫𑀼𑀤𑁆𑀤𑀢𑀺𑀡𑀦𑁆𑀢𑀺 𑀢𑀲𑁆𑀲 𑀦𑀸𑀫𑀁. ‘‘𑀫𑀼𑀜𑁆𑀚𑀢𑀺𑀡𑀦𑁆𑀢𑀺 𑀧𑀸𑀞𑁄’’𑀢𑀺 𑀮𑀺𑀔𑀺𑀢𑀁.

𑀲𑀫𑀡𑀓𑀧𑁆𑀧𑁂𑀳𑀻𑀢𑀺 𑀲𑀫𑀡𑀯𑁄𑀳𑀸𑀭𑁂𑀳𑀺, 𑀢𑀲𑁆𑀫𑀸 𑀯𑀢𑁆𑀢𑀩𑁆𑀩𑀁 𑀪𑀺𑀓𑁆𑀔𑀼𑀦𑀸 ‘‘𑀓𑀧𑁆𑀧𑀺𑀬𑀁 𑀓𑀭𑁄𑀳𑀻’’𑀢𑀺. 𑀢𑀲𑁆𑀲 𑀆𑀡𑀢𑁆𑀢𑀺𑀬𑀸 𑀓𑀭𑁄𑀦𑁆𑀢𑁂𑀦𑀸𑀧𑀺 𑀲𑀸𑀫𑀡𑁂𑀭𑀸𑀤𑀺𑀦𑀸 ‘‘𑀓𑀧𑁆𑀧𑀺𑀬’’𑀦𑁆𑀢𑀺 𑀯𑀢𑁆𑀯𑀸𑀯 𑀅𑀕𑁆𑀕𑀺𑀧𑀭𑀺𑀚𑀺𑀢𑀁 𑀓𑀸𑀢𑀩𑁆𑀩𑀦𑁆𑀢𑀺 𑀲𑀺𑀤𑁆𑀥𑀁. 𑀅𑀕𑁆𑀕𑀺𑀧𑀭𑀺𑀚𑀺𑀢𑀸𑀤𑀻𑀦𑀺 𑀯𑀺𑀬 𑀓𑀧𑁆𑀧𑀺𑀬𑀢𑁆𑀢𑀸 𑀅𑀩𑀻𑀚𑀦𑀺𑀩𑁆𑀩𑀝𑁆𑀝𑀩𑀻𑀚𑀸𑀦𑀺𑀧𑀺 ‘‘𑀧𑀜𑁆𑀘𑀳𑀺 𑀲𑀫𑀡𑀓𑀧𑁆𑀧𑁂𑀳𑀻’’𑀢𑀺 (𑀘𑀽𑀴𑀯. 𑁨𑁫𑁦) 𑀏𑀢𑁆𑀣 𑀧𑀯𑀺𑀝𑁆𑀞𑀸𑀦𑀺, 𑀬𑀣𑀸𑀮𑀸𑀪𑀢𑁄 𑀯𑀸 𑀲𑀫𑀡𑀓𑀧𑁆𑀧𑀯𑀘𑀦𑀁 𑀕𑀳𑁂𑀢𑀩𑁆𑀩𑀁. ‘‘𑀓𑀧𑁆𑀧𑀺𑀬’𑀦𑁆𑀢𑀺 𑀯𑀢𑁆𑀢𑀼𑀓𑀸𑀫𑁄 ‘𑀓𑀧𑁆𑀧’𑀦𑁆𑀢𑀺 𑀘𑁂 𑀯𑀤𑀢𑀺, ‘𑀯𑀝𑁆𑀝𑀢𑀻’𑀢𑀺 𑀯𑀤𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀓𑀧𑁆𑀧𑀺𑀬’𑀦𑁆𑀢𑀺 𑀯𑀘𑀦𑀁 𑀲𑀓𑀲𑀓𑀪𑀸𑀲𑀸𑀬𑀧𑀺 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. ‘‘𑀓𑀧𑁆𑀧𑀺𑀬𑀦𑁆𑀢𑀺 𑀯𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀪𑀺𑀓𑁆𑀔𑀼𑀦𑀸 ‘𑀓𑀧𑁆𑀧𑀺𑀬𑀁’𑀇𑀘𑁆𑀘𑁂𑀯 𑀯𑀢𑁆𑀢𑀩𑁆𑀩𑀁, ‘‘𑀇𑀢𑀭𑁂𑀦 𑀧𑀦 𑀬𑀸𑀬 𑀓𑀸𑀬𑀘𑀺 𑀪𑀸𑀲𑀸𑀬𑀸’’𑀢𑀺 𑀯𑀤𑀦𑁆𑀢𑀺, 𑀯𑀻𑀫𑀁𑀲𑀺𑀢𑀩𑁆𑀩𑀁. ‘‘𑀉𑀘𑁆𑀙𑀼𑀁 𑀓𑀧𑁆𑀧𑀺𑀬𑀁 𑀓𑀭𑀺𑀲𑁆𑀲𑀸𑀫𑀻𑀢𑀺 𑀤𑀸𑀭𑀼𑀁 𑀯𑀺𑀚𑁆𑀛𑀢𑀻’’𑀢𑀺 𑀯𑀘𑀦𑀢𑁄 𑀓𑀧𑁆𑀧𑀺𑀬𑀁 𑀓𑀸𑀢𑀩𑁆𑀩𑀁 𑀲𑀦𑁆𑀥𑀸𑀬 𑀯𑀺𑀭𑀤𑁆𑀥𑁂𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀆𑀘𑀭𑀺𑀬𑀸 𑀧𑀦 ‘‘𑀓𑀧𑁆𑀧𑀺𑀬𑀁 𑀓𑀸𑀭𑁂𑀢𑀩𑁆𑀩𑀁 𑀲𑀦𑁆𑀥𑀸𑀬 𑀓𑀧𑁆𑀧𑀺𑀬𑀦𑁆𑀢𑀺 𑀲𑀺𑀢𑁆𑀣𑀸𑀤𑀺𑀁 𑀓𑀸𑀭𑁂𑀢𑀺, 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺, 𑀢𑀲𑁆𑀲 𑀓𑀸𑀭𑀡𑀁 𑀯𑀤𑀦𑁆𑀢𑀸 𑀓𑀸𑀢𑀼𑀁 𑀯𑀝𑁆𑀝𑀦𑀪𑀸𑀯𑁂𑀦𑁂𑀯 𑀯𑀺𑀭𑀚𑁆𑀛𑀺𑀢𑁆𑀯𑀸 𑀓𑀢𑁂𑀧𑀺 𑀓𑀧𑁆𑀧𑀺𑀬𑀁 𑀚𑀸𑀢𑀁. 𑀬𑀤𑀺 𑀦 𑀯𑀝𑁆𑀝𑁂𑀬𑁆𑀬, 𑀲𑀺𑀢𑁆𑀣𑀸𑀤𑀺𑀫𑁆𑀳𑀺 𑀓𑀢𑁂 𑀦 𑀯𑀝𑁆𑀝𑁂𑀬𑁆𑀬𑀸𑀢𑀺, 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁. 𑀉𑀝𑁆𑀞𑀺𑀢𑀲𑁂𑀯𑀸𑀮𑀖𑀝𑀁 𑀆𑀢𑀧𑁂 𑀦𑀺𑀓𑁆𑀔𑀺𑀧𑀺𑀢𑀼𑀁 𑀯𑀝𑁆𑀝𑀢𑀺, 𑀯𑀺𑀓𑁄𑀧𑁂𑀢𑀼𑀓𑀸𑀫𑀢𑀸𑀬 𑀲𑀢𑀺 𑀤𑀼𑀓𑁆𑀓𑀝𑀁 𑀬𑀼𑀢𑁆𑀢𑀁 𑀯𑀺𑀬. ‘‘𑀧𑀼𑀧𑁆𑀨𑀭𑀚𑁆𑀚𑀼𑀪𑀸𑀚𑀦𑀕𑀢𑀺𑀓𑀸, 𑀢𑀲𑁆𑀫𑀸 𑀦 𑀯𑀝𑁆𑀝𑀢𑀺. 𑀦𑀸𑀴𑁂 𑀯𑀸 𑀩𑀤𑁆𑀥𑀧𑀼𑀧𑁆𑀨𑀓𑀮𑀸𑀧𑁂 𑀦𑀸𑀴𑀲𑁆𑀫𑀺𑀁 𑀓𑀢𑁂𑀧𑀺 𑀯𑀝𑁆𑀝𑀢𑀺 𑀢𑀲𑁆𑀫𑀺𑀁 𑀧𑀼𑀧𑁆𑀨𑀲𑁆𑀲 𑀅𑀢𑁆𑀣𑀺𑀢𑀸𑀬𑀸’’𑀢𑀺 𑀯𑀤𑀦𑁆𑀢𑀺. 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 ‘‘𑀩𑀻𑀚𑀕𑀸𑀫𑁂𑀦 𑀪𑀽𑀢𑀕𑀸𑀫𑁄 𑀤𑀲𑁆𑀲𑀺𑀢𑁄 𑀅𑀦𑀯𑀲𑁂𑀲𑀧𑀭𑀺𑀬𑀸𑀤𑀸𑀦𑀢𑁆𑀣’’𑀦𑁆𑀢𑀺 𑀯𑀼𑀢𑁆𑀢𑀁.

𑀪𑀽𑀢𑀕𑀸𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀜𑁆𑀜𑀯𑀸𑀤𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁯𑁮-𑁯. 𑀅𑀜𑁆𑀜𑀁 𑀯𑀤𑀢𑀻𑀢𑀺 𑀅𑀜𑁆𑀜𑀯𑀸𑀤𑀓𑀁, ‘‘𑀯𑀘𑀦𑀁 𑀓𑀭𑁂𑀬𑁆𑀬𑀸’’𑀢𑀺 𑀮𑀺𑀔𑀺𑀢𑀁. ‘‘𑀢𑀼𑀡𑁆𑀳𑀻𑀪𑀽𑀢𑀲𑁆𑀲𑁂𑀢𑀁 𑀦𑀸𑀫’’𑀦𑁆𑀢𑀺 𑀧𑀸𑀞𑁄. 𑀉𑀕𑁆𑀖𑀸𑀢𑁂𑀢𑀼𑀓𑀸𑀫𑁄𑀢𑀺 𑀲𑀫𑁄𑀳𑀦𑀺𑀢𑀼𑀓𑀸𑀫𑁄, 𑀅𑀦𑁆𑀢𑀭𑀸𑀬𑀁 𑀓𑀢𑁆𑀢𑀼𑀓𑀸𑀫𑁄𑀢𑀺 𑀧𑁄𑀭𑀸𑀡𑀸.

𑁧𑁦𑁦. ‘‘𑀲𑀼𑀤𑀺𑀝𑁆𑀞𑁄 𑀪𑀦𑁆𑀢𑁂, 𑀦 𑀧𑀦𑁂𑀲𑁄 𑀓𑀳𑀸𑀧𑀡𑁄𑀢𑀺𑀆𑀤𑀻𑀲𑀼 𑀅𑀦𑀸𑀭𑁄𑀧𑀺𑀢𑁂 𑀤𑀼𑀓𑁆𑀓𑀝𑁂𑀦 𑀫𑀼𑀲𑀸𑀯𑀸𑀤𑀧𑀸𑀘𑀺𑀢𑁆𑀢𑀺𑀬𑀁, 𑀅𑀭𑁄𑀧𑀺𑀢𑁂 𑀧𑀸𑀘𑀺𑀢𑁆𑀢𑀺𑀬𑀤𑁆𑀯𑀬𑀁 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺, 𑀯𑀻𑀫𑀁𑀲𑀺𑀢𑀩𑁆𑀩𑀁.

𑁧𑁦𑁨. 𑀅𑀥𑀫𑁆𑀫𑁂𑀦 𑀯𑀸 𑀯𑀕𑁆𑀕𑁂𑀦 𑀯𑀸 𑀦 𑀓𑀫𑁆𑀫𑀸𑀭𑀳𑀲𑁆𑀲 𑀯𑀸𑀢𑀺 𑀏𑀢𑁆𑀣 ‘‘𑀫𑀬𑀺 𑀯𑀼𑀢𑁆𑀢𑁂 𑀫𑀁 𑀯𑀸 𑀅𑀜𑁆𑀜𑀁 𑀯𑀸 𑀲𑀗𑁆𑀖𑁄 𑀅𑀥𑀫𑁆𑀫𑁂𑀦 𑀯𑀸 𑀓𑀫𑁆𑀫𑀁, 𑀯𑀕𑁆𑀕𑁂𑀦 𑀯𑀸 𑀓𑀫𑁆𑀫𑀁 𑀓𑀭𑀺𑀲𑁆𑀲𑀢𑀺, 𑀦 𑀓𑀫𑁆𑀫𑀸𑀭𑀳𑀲𑁆𑀲 𑀯𑀸 𑀫𑁂, 𑀅𑀜𑁆𑀜𑀲𑁆𑀲 𑀯𑀸 𑀓𑀫𑁆𑀫𑀁 𑀓𑀭𑀺𑀲𑁆𑀲𑀢𑀻’’𑀢𑀺 𑀦 𑀓𑀣𑁂𑀢𑀻𑀢𑀺 𑀬𑁄𑀚𑁂𑀢𑀩𑁆𑀩𑀁.

𑀅𑀜𑁆𑀜𑀯𑀸𑀤𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀉𑀚𑁆𑀛𑀸𑀧𑀦𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁦𑁩. ‘‘𑀙𑀦𑁆𑀤𑀸𑀬𑀸’’𑀢𑀺 𑀅𑀓𑁆𑀔𑀭𑀓𑁆𑀔𑀭𑀸𑀬𑀸𑀢𑀺𑀆𑀤𑀺 𑀯𑀺𑀬 𑀮𑀺𑀗𑁆𑀕𑀯𑀺𑀧𑀮𑁆𑀮𑀸𑀲𑁂𑀦 𑀯𑀼𑀢𑁆𑀢𑀁, 𑀙𑀦𑁆𑀤𑀢𑁆𑀣𑀦𑁆𑀢𑀺 𑀯𑀸 𑀅𑀢𑁆𑀣𑁄. 𑀬𑁂𑀲𑀁 𑀲𑁂𑀦𑀸𑀲𑀦𑀸𑀦𑀺 𑀧𑀜𑁆𑀜𑀧𑁂𑀢𑀺, 𑀢𑁂𑀲𑀁 𑀅𑀢𑁆𑀢𑀦𑀺 𑀙𑀦𑁆𑀤𑀢𑁆𑀣𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄.

𑁧𑁦𑁬. 𑀅𑀦𑀼𑀧𑀲𑀫𑁆𑀧𑀦𑁆𑀦𑀦𑁆𑀢𑀺𑀆𑀤𑀻𑀲𑀼 𑀓𑀭𑀡𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀅𑀜𑁆𑀜𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑀦𑁆𑀢𑀺 𑀅𑀜𑁆𑀜𑁂𑀦 𑀅𑀦𑀼𑀧𑀲𑀫𑁆𑀧𑀦𑁆𑀦𑁂𑀦. 𑀢𑀲𑁆𑀲 𑀯𑀸𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲. ‘‘𑀲𑀫𑁆𑀫𑀼𑀢𑀺𑀓𑀸𑀮𑁂 𑀧𑀜𑁆𑀘𑀗𑁆𑀕𑀯𑀺𑀭𑀳𑀸𑀤𑀬𑁄 𑀅𑀲𑀫𑁆𑀫𑀢𑀸 𑀦𑀸𑀫𑀸’’𑀢𑀺, ‘‘𑀉𑀧𑀲𑀫𑁆𑀧𑀦𑁆𑀦𑁂𑀦 𑀮𑀤𑁆𑀥𑀲𑀫𑁆𑀫𑀼𑀢𑀺 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀦𑁂𑀦 𑀯𑀺𑀦𑀲𑁆𑀲𑀢𑀻’’𑀢𑀺 𑀘 𑀯𑀼𑀢𑁆𑀢𑀁. 𑀲𑀗𑁆𑀖𑁂𑀦𑀸𑀢𑀺 𑀲𑀩𑁆𑀩𑁂𑀦 𑀲𑀗𑁆𑀖𑁂𑀦 𑀓𑀫𑁆𑀫𑀯𑀸𑀘𑀸𑀬 𑀅𑀲𑁆𑀲𑀸𑀯𑁂𑀢𑁆𑀯𑀸 ‘‘𑀢𑀯𑁂𑀲𑁄 𑀪𑀸𑀭𑁄’’𑀢𑀺 𑀓𑁂𑀯𑀮𑀁 𑀆𑀭𑁄𑀧𑀺𑀢𑀪𑀸𑀭𑁄. 𑀓𑁂𑀯𑀮-𑀲𑀤𑁆𑀤𑁄 𑀳𑁂𑀢𑁆𑀣 𑀓𑀫𑁆𑀫𑀯𑀸𑀘𑀸𑀬 𑀅𑀲𑁆𑀲𑀸𑀯𑀺𑀢𑀪𑀸𑀯𑀫𑀢𑁆𑀢𑀫𑁂𑀯 𑀤𑀻𑀧𑁂𑀢𑀺. 𑀲𑀬𑀫𑁂𑀯𑀸𑀢𑀺 𑀇𑀢𑀭𑁂𑀲𑀁 𑀪𑀺𑀓𑁆𑀔𑀽𑀦𑀁 𑀅𑀦𑀼𑀫𑀢𑀺𑀬𑀸. 𑀅𑀪𑀽𑀢𑁂𑀦 𑀔𑀻𑀬𑀦𑀓𑀲𑁆𑀲 𑀆𑀤𑀺𑀓𑀫𑁆𑀫𑀺𑀓𑀲𑁆𑀲 𑀓𑀣𑀁 𑀅𑀦𑀸𑀧𑀢𑁆𑀢𑀻𑀢𑀺 𑀘𑁂? 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦. 𑀫𑀼𑀲𑀸𑀯𑀸𑀤𑁂 𑀆𑀧𑀢𑁆𑀢𑀺𑀬𑁂𑀯 𑀤𑁆𑀯𑁂 𑀧𑀸𑀘𑀺𑀢𑁆𑀢𑀺𑀬𑁄 𑀯𑀼𑀢𑁆𑀢𑀸 𑀯𑀺𑀬 𑀤𑀺𑀲𑁆𑀲𑀦𑁆𑀢𑀺 𑀧𑀼𑀩𑁆𑀩𑀧𑀬𑁄𑀕𑁂 𑀭𑀼𑀓𑁆𑀔𑀸𑀤𑀺𑀙𑀺𑀦𑁆𑀤𑀦𑀸𑀤𑀻𑀲𑀼 𑀯𑀺𑀬, 𑀯𑀺𑀘𑀸𑀭𑁂𑀢𑀩𑁆𑀩𑀁.

𑀉𑀚𑁆𑀛𑀸𑀧𑀦𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀞𑀫𑀲𑁂𑀦𑀸𑀲𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁧𑁦. ‘‘𑀏𑀯𑀜𑁆𑀘𑀺𑀤𑀁 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁 𑀳𑁄𑀢𑀻’’𑀢𑀺 𑀯𑀘𑀦𑀢𑁄, 𑀧𑀭𑀺𑀯𑀸𑀭𑁂 ‘‘𑀏𑀓𑀸 𑀧𑀜𑁆𑀜𑀢𑁆𑀢𑀺, 𑀏𑀓𑀸 𑀅𑀦𑀼𑀧𑀜𑁆𑀜𑀢𑁆𑀢𑀻’’𑀢𑀺 (𑀧𑀭𑀺. 𑁨𑁨𑁬) 𑀯𑀘𑀦𑀢𑁄 𑀘 𑀇𑀥 𑀅𑀢𑁆𑀣𑀺 𑀅𑀦𑀼𑀧𑀜𑁆𑀜𑀢𑁆𑀢𑀻𑀢𑀺 𑀲𑀺𑀤𑁆𑀥𑀁. 𑀓𑀺𑀜𑁆𑀘𑀸𑀧𑀺 𑀲𑀺𑀤𑁆𑀥𑀁, ‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣𑀸’’𑀢𑀺𑀆𑀤𑀺𑀦𑀸 𑀧𑀦 𑀧𑀜𑁆𑀜𑀢𑁆𑀢𑀺𑀝𑁆𑀞𑀸𑀦𑀁 𑀦 𑀧𑀜𑁆𑀜𑀸𑀬𑀢𑀺, 𑀓𑁂𑀯𑀮𑀁 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀝𑁆𑀞𑀫𑀸𑀲𑁂…𑀧𑁂… 𑀦𑀺𑀓𑁆𑀔𑀺𑀧𑀺𑀢𑀼’’𑀦𑁆𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁, 𑀢𑀁 𑀓𑀲𑁆𑀫𑀸𑀢𑀺 𑀘𑁂? 𑀧𑀞𑀫𑀧𑀜𑁆𑀜𑀢𑁆𑀢𑀺𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀯𑀢𑁆𑀢𑀩𑁆𑀩𑀢𑁄 𑀅𑀯𑀺𑀲𑁂𑀲𑀢𑁆𑀢𑀸 𑀦 𑀯𑀼𑀢𑁆𑀢𑀁. 𑀬𑀤𑀺 𑀏𑀯𑀁 𑀓𑀸 𑀏𑀢𑁆𑀣 𑀅𑀦𑀼𑀧𑀜𑁆𑀜𑀢𑁆𑀢𑀻𑀢𑀺? 𑀅𑀚𑁆𑀛𑁄𑀓𑀸𑀲𑁂𑀢𑀺. 𑀅𑀬𑀫𑀦𑀼𑀧𑀜𑁆𑀜𑀢𑁆𑀢𑀺 𑀧𑀜𑁆𑀜𑀢𑁆𑀢𑀺𑀬𑀫𑁆𑀧𑀺 𑀅𑀢𑁆𑀣𑀻𑀢𑀺 𑀘𑁂? 𑀅𑀢𑁆𑀣𑀺, 𑀢𑀁 𑀧𑀦 𑀑𑀓𑀸𑀲𑀫𑀢𑁆𑀢𑀤𑀻𑀧𑀦𑀁, 𑀤𑀼𑀢𑀺𑀬𑀁 𑀘𑀸𑀢𑀼𑀯𑀲𑁆𑀲𑀺𑀓𑀫𑀸𑀲𑀲𑀗𑁆𑀔𑀸𑀢𑀓𑀸𑀮𑀤𑀻𑀧𑀦𑀁. 𑀬𑀲𑁆𑀫𑀸 𑀉𑀪𑀬𑀫𑁆𑀧𑀺 𑀏𑀓𑀁 𑀓𑀸𑀮𑁄𑀓𑀸𑀲𑀁 𑀏𑀓𑀢𑁄 𑀓𑀢𑁆𑀯𑀸 ‘‘𑀅𑀚𑁆𑀛𑁄𑀓𑀸𑀲𑁂’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀤𑀻𑀧𑁂𑀦𑁆𑀢𑁄 𑀪𑀕𑀯𑀸 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂…𑀧𑁂… 𑀦𑀺𑀓𑁆𑀔𑀺𑀧𑀺𑀢𑀼’’𑀦𑁆𑀢𑀺 𑀆𑀳𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑁂𑀦𑁂𑀯 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀧𑀞𑀫𑀲𑁂𑀦𑀸𑀲𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁 ‘‘𑀬𑀢𑁆𑀣 𑀘 𑀬𑀤𑀸 𑀘 𑀲𑀦𑁆𑀣𑀭𑀺𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑀁 𑀲𑀩𑁆𑀩𑀫𑀺𑀥 𑀅𑀚𑁆𑀛𑁄𑀓𑀸𑀲𑀲𑀗𑁆𑀔𑁆𑀬𑀫𑁂𑀯 𑀕𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺. 𑀳𑁂𑀫𑀦𑁆𑀢𑀓𑀸𑀮𑀲𑁆𑀲 𑀅𑀦𑀸𑀧𑀢𑁆𑀢𑀺𑀲𑀫𑀬𑀢𑁆𑀢𑀸 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀦𑀺𑀤𑀸𑀦𑀸𑀦𑀧𑁂𑀓𑁆𑀔𑀦𑁆𑀢𑀺 𑀲𑀺𑀤𑁆𑀥𑀁, 𑀢𑀣𑀸 𑀳𑀺 𑀅𑀚𑁆𑀛𑁄𑀓𑀸𑀲𑀧𑀤𑀲𑀸𑀫𑀢𑁆𑀣𑀺𑀬𑁂𑀦 𑀅𑀬𑀁 𑀯𑀺𑀲𑁂𑀲𑁄 𑁋 𑀯𑀲𑁆𑀲𑀸𑀦𑀓𑀸𑀮𑁂 𑀑𑀯𑀲𑁆𑀲𑀓𑀝𑁆𑀞𑀸𑀦𑁂 𑀅𑀚𑁆𑀛𑁄𑀓𑀸𑀲𑁂, 𑀫𑀡𑁆𑀟𑀧𑀸𑀤𑀺𑀫𑁆𑀳𑀺 𑀘 𑀦 𑀯𑀝𑁆𑀝𑀢𑀺. 𑀳𑁂𑀫𑀦𑁆𑀢𑀓𑀸𑀮𑁂 𑀧𑀓𑀢𑀺𑀅𑀚𑁆𑀛𑁄𑀓𑀸𑀲𑁂 𑀦 𑀯𑀝𑁆𑀝𑀢𑀺, 𑀲𑀩𑁆𑀩𑀫𑀺𑀥 𑀑𑀯𑀲𑁆𑀲𑀓𑁂𑀧𑀺 𑀫𑀡𑁆𑀟𑀧𑀸𑀤𑀺𑀫𑁆𑀳𑀺 𑀯𑀝𑁆𑀝𑀢𑀺, 𑀢𑀜𑁆𑀘 𑀔𑁄 𑀬𑀢𑁆𑀣 𑀳𑀺𑀫𑀯𑀲𑁆𑀲𑁂𑀦 𑀲𑁂𑀦𑀸𑀲𑀦𑀁 𑀦 𑀢𑁂𑀫𑁂𑀢𑀺, 𑀕𑀺𑀫𑁆𑀳𑀓𑀸𑀮𑁂 𑀧𑀓𑀢𑀺𑀅𑀚𑁆𑀛𑁄𑀓𑀸𑀲𑁂𑀧𑀺 𑀯𑀝𑁆𑀝𑀢𑀺, 𑀢𑀜𑁆𑀘 𑀔𑁄 𑀅𑀓𑀸𑀮𑀫𑁂𑀖𑀸𑀤𑀲𑁆𑀲𑀦𑁂𑀬𑁂𑀯𑀸𑀢𑀺 𑀅𑀬𑀁 𑀯𑀺𑀲𑁂𑀲𑁄 ‘‘𑀅𑀝𑁆𑀞 𑀫𑀸𑀲𑁂’’𑀢𑀺 𑀘 ‘‘𑀅𑀯𑀲𑁆𑀲𑀺𑀓𑀲𑀗𑁆𑀓𑁂𑀢𑁂’’𑀢𑀺 𑀘 𑀏𑀢𑁂𑀲𑀁 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀲𑀸𑀫𑀢𑁆𑀣𑀺𑀬𑀢𑁄𑀧𑀺 𑀲𑀺𑀤𑁆𑀥𑁄.

𑀓𑀺𑀜𑁆𑀘 𑀪𑀺𑀬𑁆𑀬𑁄 𑁋 𑀅𑀝𑁆𑀞𑀓𑀣𑀸𑀬𑀁 𑀲𑀦𑁆𑀤𑀲𑁆𑀲𑀺𑀢𑀯𑀺𑀲𑁂𑀲𑁄𑀯. 𑀘𑀫𑁆𑀫𑀸𑀤𑀺𑀦𑀸 𑀑𑀦𑀤𑁆𑀥𑀓𑁄 𑀯𑀸 𑀦𑀯𑀯𑀸𑀬𑀺𑀫𑁄 𑀯𑀸 𑀦 𑀲𑀻𑀖𑀁 𑀯𑀺𑀦𑀲𑁆𑀲𑀢𑀺. 𑀓𑀸𑀬𑀸𑀦𑀼𑀕𑀢𑀺𑀓𑀢𑁆𑀢𑀸𑀢𑀺 𑀓𑀸𑀬𑁂 𑀬𑀢𑁆𑀣, 𑀢𑀢𑁆𑀣 𑀕𑀢𑀢𑁆𑀢𑀸. 𑀲𑀗𑁆𑀖𑀺𑀓𑀫𑀜𑁆𑀘𑀸𑀤𑀺𑀫𑁆𑀳𑀺 𑀓𑀸𑀬𑀁 𑀨𑀼𑀲𑀸𑀧𑁂𑀢𑁆𑀯𑀸 𑀯𑀺𑀳𑀭𑀺𑀢𑀼𑀁 𑀦 𑀯𑀝𑁆𑀝𑀢𑀻𑀢𑀺 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁄. ‘‘𑀲𑀗𑁆𑀖𑀺𑀓𑀁 𑀧𑀦 ‘𑀅𑀚𑁆𑀛𑁄𑀓𑀸𑀲𑀧𑀭𑀺𑀪𑁄𑀕𑁂𑀦 𑀧𑀭𑀺𑀪𑀼𑀜𑁆𑀚𑀣, 𑀪𑀦𑁆𑀢𑁂, 𑀬𑀣𑀸𑀲𑀼𑀔’𑀦𑁆𑀢𑀺 𑀤𑀸𑀬𑀓𑀸 𑀤𑁂𑀦𑁆𑀢𑀺 𑀲𑁂𑀦𑀸𑀲𑀦𑀁, 𑀏𑀯𑀭𑀽𑀧𑁂 𑀅𑀦𑀸𑀧𑀢𑁆𑀢𑀻’’𑀢𑀺 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀯𑀘𑀦𑀢𑁄, 𑀇𑀥 𑀘 𑀧𑀝𑀺𑀓𑁆𑀔𑁂𑀧𑀸𑀪𑀸𑀯𑀢𑁄 𑀯𑀝𑁆𑀝𑀢𑀺. ‘‘𑀅𑀜𑁆𑀜𑀜𑁆𑀘 𑀏𑀯𑀭𑀽𑀧𑀦𑁆𑀢𑀺 𑀅𑀧𑀭𑁂’’𑀢𑀺 𑀯𑀼𑀢𑁆𑀢𑀁. ‘‘𑀧𑀸𑀤𑀝𑁆𑀞𑀸𑀦𑀸𑀪𑀺𑀫𑀼𑀔𑀸𑀢𑀺 𑀦𑀺𑀲𑀻𑀤𑀦𑁆𑀢𑀲𑁆𑀲 𑀧𑀸𑀤𑀧𑀢𑀦𑀝𑁆𑀞𑀸𑀦𑀸𑀪𑀺𑀫𑀼𑀔𑀸’’𑀢𑀺 𑀮𑀺𑀔𑀺𑀢𑀁. 𑀲𑀫𑁆𑀫𑀚𑁆𑀚𑀦𑁆𑀢𑀲𑁆𑀲 𑀧𑀸𑀤𑀝𑁆𑀞𑀸𑀦𑀸𑀪𑀺𑀫𑀼𑀔𑀦𑁆𑀢𑀺 𑀆𑀘𑀭𑀺𑀬𑀲𑁆𑀲 𑀢𑀓𑁆𑀓𑁄.

𑁧𑁧𑁧. ‘‘𑀧𑀸𑀤𑀼𑀤𑁆𑀥𑀸𑀭𑁂𑀦𑀸𑀢𑀺 𑀩𑀳𑀺𑀉𑀧𑀘𑀸𑀭𑁂 𑀞𑀺𑀢𑀢𑁆𑀢𑀸’’𑀢𑀺 𑀮𑀺𑀔𑀺𑀢𑀁. 𑀕𑀘𑁆𑀙𑀦𑁆𑀢𑀺, 𑀤𑀼𑀓𑁆𑀓𑀝𑀁 𑀥𑀫𑁆𑀫𑀓𑀣𑀺𑀓𑀲𑁆𑀲 𑀯𑀺𑀬. 𑀓𑀲𑁆𑀫𑀸 𑀦 𑀧𑀸𑀘𑀺𑀢𑁆𑀢𑀺𑀬𑀁? 𑀧𑀘𑁆𑀙𑀸 𑀆𑀕𑀢𑁂𑀳𑀺 𑀯𑀼𑀟𑁆𑀠𑀢𑀭𑁂𑀳𑀺 𑀉𑀝𑁆𑀞𑀸𑀧𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀢𑁄. 𑀥𑀫𑁆𑀫𑀓𑀣𑀺𑀓𑀲𑁆𑀲 𑀧𑀦 𑀅𑀦𑀼𑀝𑁆𑀞𑀧𑁂𑀢𑀩𑁆𑀩𑀢𑁆𑀢𑀸. ‘‘𑀅𑀦𑀸𑀡𑀢𑁆𑀢𑀺𑀬𑀸 𑀧𑀜𑁆𑀜𑀢𑁆𑀢𑀺𑀬𑀫𑁆𑀧𑀺 𑀢𑀲𑁆𑀲 𑀪𑀸𑀭𑁄’’𑀢𑀺 𑀯𑀼𑀢𑁆𑀢𑀁.

𑁧𑁧𑁨. 𑀧𑀭𑀺𑀳𑀭𑀡𑁂𑀬𑁂𑀯𑀸𑀢𑀺 𑀏𑀢𑁆𑀣 𑀕𑀳𑁂𑀢𑁆𑀯𑀸 𑀯𑀺𑀘𑀸𑀭𑀡𑁂𑀢𑀺 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁄. 𑀅𑀢𑁆𑀢𑀦𑁄 𑀲𑀦𑁆𑀢𑀓𑀓𑀭𑀡𑁂𑀢𑀺 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄. 𑀩𑀻𑀚𑀦𑀻𑀧𑀢𑁆𑀢𑀓𑀁 𑀘𑀢𑀼𑀭𑀲𑁆𑀲𑀩𑀻𑀚𑀦𑀻.

𑁧𑁧𑁩. ‘‘𑀬𑁄 𑀪𑀺𑀓𑁆𑀔𑀼 𑀯𑀸 𑀲𑀸𑀫𑀡𑁂𑀭𑁄 𑀯𑀸…𑀧𑁂… 𑀮𑀚𑁆𑀚𑀻 𑀳𑁄𑀢𑀻’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀮𑀚𑁆𑀚𑀺𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀕𑀦𑁆𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀧𑀸𑀞𑁂 ‘‘𑀓𑁂𑀦𑀘𑀺 𑀧𑀮𑀺𑀩𑀼𑀤𑁆𑀥𑀁 𑀳𑁄𑀢𑀻’’𑀢𑀺 𑀘 𑀅𑀝𑁆𑀞𑀓𑀣𑀸𑀬𑀁 ‘‘𑀧𑀮𑀺𑀩𑀼𑀤𑁆𑀥’’𑀦𑁆𑀢𑀺 𑀘 𑀲𑁂𑀦𑀸𑀲𑀦𑀁𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀣𑀸𑀧𑀺 𑀅𑀢𑁆𑀣𑀻𑀢𑀺 𑀕𑀳𑁂𑀢𑀩𑁆𑀩𑀁. ‘‘𑀅𑀦𑀸𑀧𑀼𑀘𑁆𑀙𑀁 𑀯𑀸’’𑀢𑀺 𑀧𑀸𑀞𑁄.

𑀧𑀞𑀫𑀲𑁂𑀦𑀸𑀲𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀤𑀼𑀢𑀺𑀬𑀲𑁂𑀦𑀸𑀲𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁧𑁬-𑁭. 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀫𑀝𑁆𑀞𑀓𑀣𑀸𑀲𑀼, 𑀢𑀣𑀸𑀧𑀺 𑀧𑀤𑀝𑁆𑀞𑀸𑀤𑀬𑁄𑀧𑀺 𑀮𑀩𑁆𑀪𑀦𑁆𑀢𑀺 𑀏𑀯. 𑀅𑀦𑀼𑀕𑀡𑁆𑀞𑀺𑀧𑀤𑁂 ‘‘𑀅𑀜𑁆𑀜𑀁 𑀅𑀢𑁆𑀣𑀭𑀡𑀸𑀤𑀺 𑀅𑀓𑀧𑁆𑀧𑀺𑀬𑀢𑁆𑀢𑀸 𑀦 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀫𑀜𑁆𑀘𑀁 𑀯𑀸 𑀧𑀻𑀞𑀁 𑀯𑀸 𑀯𑀺𑀳𑀸𑀭𑁂 𑀯𑀸 𑀯𑀺𑀳𑀸𑀭𑀽𑀧𑀘𑀸𑀭𑁂 𑀯𑀸’𑀢𑀺 𑀇𑀫𑀺𑀦𑀸𑀧𑀺 𑀲𑀁𑀲𑀦𑁆𑀤𑀦𑀢𑁆𑀣𑀁 ‘𑀓𑀺𑀜𑁆𑀘𑀸𑀧𑀺 𑀯𑀼𑀢𑁆𑀢𑁄, 𑀅𑀣 𑀔𑁄’𑀢𑀺𑀆𑀤𑀺 𑀆𑀭𑀤𑁆𑀥’’𑀦𑁆𑀢𑀺 𑀘 𑀯𑀼𑀢𑁆𑀢𑀁. 𑀉𑀧𑀘𑀸𑀭𑀫𑀢𑁆𑀢𑀜𑁆𑀘𑁂𑀢𑀁 ‘‘𑀭𑀼𑀓𑁆𑀔𑀫𑀽𑀮𑁂’’𑀢𑀺, 𑀢𑀢𑁆𑀣 𑀯𑀢𑁆𑀢𑀩𑁆𑀩𑀁 𑀦𑀢𑁆𑀣𑀺.

𑁧𑁧𑁮. 𑀅𑀦𑀸𑀧𑀼𑀘𑁆𑀙𑀺𑀢𑁆𑀯𑀸𑀧𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀲𑀢𑀺𑀬𑀸 𑀕𑀘𑁆𑀙𑀢𑁄𑀧𑀺 𑀅𑀦𑀸𑀧𑀢𑁆𑀢𑀺, 𑀆𑀧𑀼𑀘𑁆𑀙𑀦𑀁 𑀧𑀦 𑀯𑀢𑁆𑀢𑀁 𑀲𑀜𑁆𑀘𑀺𑀘𑁆𑀘 𑀅𑀦𑀸𑀧𑀼𑀘𑁆𑀙𑀢𑁄 𑀯𑀢𑁆𑀢𑀪𑁂𑀤𑀤𑀼𑀓𑁆𑀓𑀝𑀢𑁆𑀢𑀸. 𑀧𑀼𑀕𑁆𑀕𑀮𑀺𑀓𑀲𑁂𑀦𑀸𑀲𑀦𑁂 𑀲𑀗𑁆𑀖𑀺𑀓𑀲𑁂𑀬𑁆𑀬𑀁, 𑀲𑀗𑁆𑀖𑀺𑀓𑀲𑁂𑀦𑀸𑀲𑀦𑁂 𑀯𑀸 𑀧𑀼𑀕𑁆𑀕𑀮𑀺𑀓𑀲𑁂𑀬𑁆𑀬𑀁 𑀅𑀢𑁆𑀣𑀭𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀬𑀼𑀢𑁆𑀢𑀁 𑀯𑀺𑀬. 𑀓𑀲𑁆𑀫𑀸? ‘‘𑀲𑁂𑀬𑁆𑀬𑀸𑀫𑀢𑁆𑀢𑀫𑁂𑀯 𑀦𑀲𑁆𑀲𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀇𑀥 𑀧𑀦 ‘‘𑀧𑀮𑀺𑀩𑀼𑀤𑁆𑀥𑀁 𑀧𑀮𑀺𑀩𑀼𑀤𑁆𑀥𑁄’’𑀢𑀺 𑀤𑀼𑀯𑀺𑀥𑀫𑁆𑀧𑀺 𑀅𑀢𑁆𑀣𑀺.

𑀤𑀼𑀢𑀺𑀬𑀲𑁂𑀦𑀸𑀲𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀦𑀼𑀧𑀔𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁨𑁧. 𑀙𑀩𑁆𑀩𑀕𑁆𑀕𑀺𑀬𑁂𑀲𑀼𑀬𑁂𑀯 𑀣𑁂𑀭𑀸 𑀪𑀺𑀓𑁆𑀔𑀽𑀢𑀺 𑀓𑁂𑀘𑀺. 𑀧𑀸𑀤𑁂 𑀥𑁄𑀯𑀺𑀢𑁆𑀯𑀸𑀢𑀺𑀆𑀤𑀺𑀫𑁆𑀳𑀺 𑀧𑀯𑀺𑀲𑀦𑁆𑀢𑀲𑁆𑀲 𑀯𑀸 𑀧𑀸𑀤𑀥𑁄𑀯𑀦𑀧𑀸𑀲𑀸𑀡𑀢𑁄 𑀬𑀸𑀯 𑀫𑀜𑁆𑀘𑀧𑀻𑀞𑀁 𑀧𑀲𑁆𑀲𑀸𑀯𑀢𑁆𑀣𑀸𑀬 𑀦𑀺𑀓𑁆𑀔𑀫𑀦𑁆𑀢𑀲𑁆𑀲 𑀯𑀸 𑀬𑀸𑀯 𑀧𑀲𑁆𑀲𑀸𑀯𑀝𑁆𑀞𑀸𑀦𑀦𑁆𑀢𑀺 𑀬𑁄𑀚𑀦𑀸 𑀓𑀸𑀢𑀩𑁆𑀩𑀸. 𑀏𑀯𑀁 𑀲𑀦𑁆𑀢𑁂 ‘‘𑀧𑀲𑁆𑀲𑀸𑀯𑀢𑁆𑀣𑀸𑀬 𑀦𑀺𑀓𑁆𑀔𑀫𑀦𑁆𑀢𑀲𑁆𑀲 𑀯𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀁, ‘‘𑀧𑀲𑁆𑀲𑀸𑀯𑀝𑁆𑀞𑀸𑀦𑀢𑁄 𑀦𑀺𑀓𑁆𑀔𑀫𑀦𑁆𑀢𑀲𑁆𑀲 𑀯𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀧𑀲𑁆𑀲𑀸𑀯𑀝𑁆𑀞𑀸𑀦𑀦𑁆𑀢𑀺 𑀓𑀢𑁆𑀣𑀘𑀺 𑀧𑁄𑀢𑁆𑀣𑀓𑁂. 𑀢𑀣𑀸 𑀳𑀺 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀅𑀦𑀼𑀧𑀔𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀧𑀯𑀺𑀲𑀦𑁆𑀢𑀲𑁆𑀲 𑀧𑀸𑀤𑀥𑁄𑀯𑀦𑀧𑀸𑀲𑀸𑀡𑀢𑁄 𑀬𑀸𑀯 𑀫𑀜𑁆𑀘𑀧𑀻𑀞𑀁 𑀦𑀺𑀓𑁆𑀔𑀫𑀦𑁆𑀢𑀲𑁆𑀲 𑀫𑀜𑁆𑀘𑀧𑀻𑀞𑀢𑁄 𑀬𑀸𑀯 𑀧𑀲𑁆𑀲𑀸𑀯𑀝𑁆𑀞𑀸𑀦𑀁, 𑀢𑀸𑀯 𑀉𑀧𑀘𑀸𑀭𑁄’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 ‘‘𑀧𑀸𑀤𑁂 𑀥𑁄𑀯𑀺𑀢𑁆𑀯𑀸 𑀧𑀯𑀺𑀲𑀦𑁆𑀢𑀲𑁆𑀲, 𑀧𑀲𑁆𑀲𑀸𑀯𑀢𑁆𑀣𑀸𑀬 𑀦𑀺𑀓𑁆𑀔𑀫𑀦𑁆𑀢𑀲𑁆𑀲 𑀘 𑀤𑁆𑀯𑀸𑀭𑁂 𑀦𑀺𑀓𑁆𑀔𑀺𑀢𑁆𑀢𑀧𑀸𑀤𑀥𑁄𑀯𑀦𑀧𑀸𑀲𑀸𑀡𑀢𑁄, 𑀧𑀲𑁆𑀲𑀸𑀯𑀝𑁆𑀞𑀸𑀦𑀢𑁄 𑀘 𑀫𑀜𑁆𑀘𑀧𑀻𑀞’’𑀦𑁆𑀢𑀺 𑀓𑀢𑁆𑀣𑀘𑀺 𑀧𑁄𑀢𑁆𑀣𑀓𑁂 𑀧𑀸𑀞𑁄, 𑀲𑁄 𑀅𑀧𑀸𑀞𑁄. 𑀓𑀲𑁆𑀫𑀸? 𑀫𑀜𑁆𑀘𑀧𑀻𑀞𑀸𑀦𑀁 𑀉𑀧𑀘𑀸𑀭𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀧𑀯𑀺𑀲𑀦𑁆𑀢𑀲𑁆𑀲 𑀬𑀸𑀯 𑀫𑀜𑁆𑀘𑀧𑀻𑀞𑀸𑀦𑀁 𑀉𑀧𑀘𑀸𑀭𑁄, 𑀦𑀺𑀓𑁆𑀔𑀫𑀦𑁆𑀢𑀲𑁆𑀲 𑀢𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀧𑀲𑁆𑀲𑀸𑀯𑀝𑁆𑀞𑀸𑀦𑀁 𑀯𑀘𑁆𑀘𑀓𑀼𑀝𑀺𑀘𑀗𑁆𑀓𑀫𑀝𑁆𑀞𑀸𑀦𑀦𑁆𑀢𑀺 𑀇𑀫𑀺𑀦𑀸 𑀅𑀢𑁆𑀣𑁂𑀦 𑀬𑀣𑀸 𑀲𑀁𑀲𑀦𑁆𑀤𑀢𑀺, 𑀢𑀣𑀸𑀯𑀺𑀥𑁄 𑀧𑀸𑀞𑁄𑀢𑀺 𑀆𑀘𑀭𑀺𑀬𑁄.

𑁧𑁨𑁨. 𑀉𑀧𑀘𑀸𑀭𑀁 𑀞𑀧𑁂𑀢𑁆𑀯𑀸𑀢𑀺 𑀇𑀥 𑀯𑀼𑀢𑁆𑀢𑀉𑀧𑀘𑀸𑀭𑀁 𑀞𑀧𑁂𑀢𑁆𑀯𑀸. ‘‘𑀤𑀲𑁆𑀲𑀦𑀲𑀯𑀦𑀽𑀧𑀘𑀸𑀭𑁂𑀧𑀺 𑀲𑀦𑁆𑀣𑀭𑀦𑁆𑀢𑀲𑁆𑀲𑀸’’𑀢𑀺 𑀮𑀺𑀔𑀺𑀢𑀁.

𑀅𑀦𑀼𑀧𑀔𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀦𑀺𑀓𑁆𑀓𑀟𑁆𑀠𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁨𑁬-𑁭. 𑀙𑀲𑀢𑁆𑀢𑀓𑁄𑀝𑁆𑀞𑀓𑀸𑀦𑀺 𑀯𑀸𑀢𑀺 𑀏𑀢𑁆𑀣 𑀤𑁆𑀯𑀸𑀭𑀓𑁄𑀝𑁆𑀞𑀓𑀁 𑀅𑀥𑀺𑀧𑁆𑀧𑁂𑀢𑀁. ‘‘𑀦𑀺𑀓𑁆𑀔𑀫𑀸’’𑀢𑀺 𑀯𑀘𑀦𑀁 𑀲𑀼𑀢𑁆𑀯𑀸𑀧𑀺 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀦𑀺𑀓𑁆𑀔𑀫𑀢𑀺, 𑀅𑀦𑀸𑀧𑀢𑁆𑀢𑀺; 𑀇𑀥 𑀅𑀕𑁆𑀕𑀺𑀲𑀸𑀮𑀸𑀤𑀺 𑀏𑀯 𑀉𑀧𑀘𑀸𑀭𑁄𑀢𑀺.

𑀦𑀺𑀓𑁆𑀓𑀟𑁆𑀠𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀯𑁂𑀳𑀸𑀲𑀓𑀼𑀝𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁨𑁯. ‘‘𑀧𑀫𑀸𑀡𑀫𑀚𑁆𑀛𑀺𑀫𑀲𑁆𑀲 𑀕𑀮𑀧𑁆𑀧𑀫𑀸𑀡𑁂 𑀤𑀺𑀦𑁆𑀦𑀢𑀼𑀮𑀸𑀧𑀺 𑀯𑁂𑀳𑀸𑀲𑀓𑀼𑀝𑀺𑀬𑁂𑀯𑀸’’𑀢𑀺 𑀮𑀺𑀔𑀺𑀢𑀁, ‘‘𑀦 𑀲𑀸 𑀇𑀥 𑀅𑀥𑀺𑀧𑁆𑀧𑁂𑀢𑀸’’𑀢𑀺 𑀯𑀼𑀢𑁆𑀢𑀁.

𑀯𑁂𑀳𑀸𑀲𑀓𑀼𑀝𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀫𑀳𑀮𑁆𑀮𑀓𑀯𑀺𑀳𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁩𑁫. 𑀬𑀸𑀯 𑀤𑁆𑀯𑀸𑀭𑀓𑁄𑀲𑀸𑀢𑀺 𑀤𑁆𑀯𑀸𑀭𑀲𑀫𑀻𑀧𑀸, 𑀬𑀸𑀯 𑀪𑀺𑀢𑁆𑀢𑀻𑀢𑀺 𑀅𑀢𑁆𑀣𑁄, 𑀢𑀁 𑀲𑀼𑀯𑀼𑀢𑁆𑀢𑀁. 𑀓𑀯𑀸𑀝𑀯𑀺𑀢𑁆𑀣𑀸𑀭𑀧𑁆𑀧𑀫𑀸𑀡𑁄𑀢𑀺 𑀳𑀢𑁆𑀣𑀧𑀸𑀲𑀲𑁆𑀲𑀸𑀥𑀺𑀧𑁆𑀧𑁂𑀢𑀢𑁆𑀢𑀸, 𑀲𑀫𑀦𑁆𑀢𑀸 𑀓𑀯𑀸𑀝𑀯𑀺𑀢𑁆𑀣𑀸𑀭𑀧𑁆𑀧𑀫𑀸𑀡𑀉𑀧𑀘𑀸𑀭𑀲𑁆𑀲 𑀕𑀳𑀺𑀢𑀢𑁆𑀢𑀸 𑀅𑀧𑀭𑀺𑀧𑀽𑀭𑀉𑀧𑀘𑀸𑀭𑀸𑀧𑀺 𑀳𑁄𑀢𑀺. 𑀆𑀮𑁄𑀓𑀁 𑀓𑀭𑁄𑀢𑀻𑀢𑀺 𑀆𑀮𑁄𑀓𑀁 𑀲𑀦𑁆𑀥𑁂𑀢𑀺 𑀧𑀺𑀥𑁂𑀢𑀻𑀢𑀺 𑀲𑀦𑁆𑀥𑀺 𑀏𑀯 𑀆𑀮𑁄𑀓𑀲𑀦𑁆𑀥𑀺𑀦𑀸𑀫𑀓𑀸 𑀳𑁄𑀦𑁆𑀢𑀺. 𑀯𑀸𑀢𑀧𑀸𑀦𑀓𑀯𑀸𑀝𑀮𑁂𑀧𑀓𑀫𑁆𑀫𑁂 𑀅𑀧𑁆𑀧𑀳𑀭𑀺𑀢𑀝𑁆𑀞𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀺.

𑁧𑁩𑁬. 𑀇𑀝𑁆𑀞𑀓𑀸𑀢𑀺 𑀙𑀤𑀦𑀓𑀧𑀸𑀮𑀸𑀲𑀺𑀮𑀸𑀤𑀺𑀇𑀝𑁆𑀞𑀓𑀸. 𑀙𑀤𑀦𑀽𑀧𑀭𑀻𑀢𑀺 𑀏𑀢𑁆𑀣 𑀧𑀞𑀫𑀁 𑀢𑀸𑀯 𑀏𑀓𑀯𑀸𑀭𑀁 𑀅𑀧𑀭𑀺𑀲𑁂𑀲𑀁 𑀙𑀸𑀤𑁂𑀢𑁆𑀯𑀸 𑀧𑀼𑀦 𑀙𑀸𑀤𑀦𑀤𑀡𑁆𑀟𑀓𑁂 𑀩𑀦𑁆𑀥𑀺𑀢𑁆𑀯𑀸 𑀤𑀼𑀢𑀺𑀬𑀯𑀸𑀭𑀁 𑀢𑀣𑁂𑀯 𑀙𑀸𑀤𑁂𑀢𑀩𑁆𑀩𑀁. ‘‘𑀢𑀢𑀺𑀬𑀯𑀸𑀭𑀘𑀢𑀼𑀢𑁆𑀣𑀯𑀸𑀭𑁂 𑀲𑀫𑁆𑀧𑀢𑁆𑀢𑁂 𑀤𑁆𑀯𑁂 𑀫𑀕𑁆𑀕𑁂 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀢𑀢𑀺𑀬𑀫𑀕𑁆𑀕𑀁 𑀆𑀡𑀸𑀧𑁂𑀢𑁆𑀯𑀸 𑀧𑀓𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀁 ‘‘𑀧𑀼𑀦𑀧𑁆𑀧𑀼𑀦𑀁 𑀙𑀸𑀤𑀸𑀧𑁂𑀢𑀻’’𑀢𑀺 𑀇𑀫𑀺𑀦𑀸 𑀬𑀼𑀚𑁆𑀚𑀢𑀺.

𑀧𑁄𑀭𑀸𑀡𑀸 𑀧𑀦 ‘‘𑀧𑀞𑀫𑀯𑀸𑀭𑁂𑀬𑁂𑀯 𑀢𑀬𑁄 𑀫𑀕𑁆𑀕𑁂 𑀅𑀥𑀺𑀝𑁆𑀞𑀸𑀢𑀼𑀁 𑀯𑀝𑁆𑀝𑀢𑀺, 𑀘𑀢𑀼𑀢𑁆𑀣𑀢𑁄 𑀧𑀝𑁆𑀞𑀸𑀬 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀁, 𑀘𑀢𑀼𑀢𑁆𑀣𑀮𑁂𑀧𑀢𑁄 𑀧𑀝𑁆𑀞𑀸𑀬 𑀆𑀧𑀢𑁆𑀢𑀻’’𑀢𑀺 𑀯𑀤𑀦𑁆𑀢𑀺. 𑀢𑀢𑁆𑀣 𑀙𑀤𑀦𑁂 𑀯𑀼𑀢𑁆𑀢𑀯𑀺𑀥𑀺𑀦𑀺𑀤𑀸𑀦𑁂𑀦 𑀲𑀫𑁂𑀢𑀺, 𑀮𑁂𑀧𑁂 𑀯𑀼𑀢𑁆𑀢𑀯𑀺𑀥𑀺𑀢𑀺𑀓𑀘𑁆𑀙𑁂𑀤𑁂𑀦 𑀲𑀫𑁂𑀢𑀺. 𑀢𑀣𑀸𑀧𑀺 𑀲𑁄 𑀦 𑀬𑀼𑀢𑁆𑀢𑁄𑀯. 𑀦𑀺𑀤𑀸𑀦𑁂, 𑀅𑀝𑁆𑀞𑀓𑀣𑀸𑀬𑀜𑁆𑀘 𑀲𑀺𑀤𑁆𑀥𑀮𑁂𑀧𑀢𑁆𑀢𑀸 𑀲𑀩𑁆𑀩𑀲𑁄𑀯𑀸𑀧𑀺 𑀅𑀘𑁆𑀙𑀦𑁆𑀦𑁂, 𑀙𑀦𑁆𑀦𑁂𑀯𑀸𑀧𑀺 𑀅𑀦𑁂𑀓𑀲𑁄 𑀧𑀭𑀺𑀬𑀸𑀬𑀲𑁆𑀲 𑀢𑀢𑀺𑀬𑀲𑁆𑀲𑁂𑀯 𑀅𑀥𑀺𑀝𑁆𑀞𑀸𑀦𑀦𑁆𑀢𑀺 𑀦𑁄 𑀲𑀫𑁂𑀢𑀻𑀢𑀺 𑀆𑀘𑀭𑀺𑀬𑁄. ‘‘𑀤𑁆𑀯𑁂 𑀫𑀕𑁆𑀕𑁂’’𑀢𑀺, ‘‘𑀤𑁆𑀯𑁂 𑀙𑀤𑀦𑁂’’𑀢𑀺 𑀘 ‘‘𑀢𑀢𑀺𑀬𑀯𑀸𑀭𑀢𑁄 𑀧𑀝𑁆𑀞𑀸𑀬 𑀏𑀯𑀁 𑀙𑀸𑀤𑀸𑀧𑁂𑀳𑀻’𑀢𑀺 𑀆𑀡𑀸𑀧𑁂𑀢𑁆𑀯𑀸 𑀧𑀓𑁆𑀓𑀫𑀺𑀢𑀩𑁆𑀩’’𑀦𑁆𑀢𑀺 𑀘 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄 𑀯𑀤𑀢𑀺 𑀓𑀺𑀭.

𑀫𑀳𑀮𑁆𑀮𑀓𑀯𑀺𑀳𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀲𑀧𑁆𑀧𑀸𑀡𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁪𑁦. 𑀲𑀧𑁆𑀧𑀸𑀡𑀓𑀲𑀺𑀓𑁆𑀔𑀸𑀧𑀤𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯.

𑀲𑀫𑀢𑁆𑀢𑁄 𑀯𑀡𑁆𑀡𑀦𑀸𑀓𑁆𑀓𑀫𑁂𑀦 𑀪𑀽𑀢𑀕𑀸𑀫𑀯𑀕𑁆𑀕𑁄 𑀤𑀼𑀢𑀺𑀬𑁄.

𑁩. 𑀑𑀯𑀸𑀤𑀯𑀕𑁆𑀕𑁄

𑁧. 𑀑𑀯𑀸𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁪𑁪. 𑀓𑀣𑀸𑀦𑀼𑀲𑀸𑀭𑁂𑀦𑀸𑀢𑀺 𑀬𑁄 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀢𑁆𑀣𑀺𑀓𑁄 𑀓𑀺𑀁𑀲𑀻𑀮𑁄 𑀓𑀺𑀁𑀲𑀫𑀸𑀘𑀸𑀭𑁄 𑀓𑀢𑀭𑀓𑀼𑀮𑀸 𑀧𑀩𑁆𑀩𑀚𑀺𑀢𑁄𑀢𑀺𑀆𑀤𑀺 𑀓𑀣𑀸𑀦𑀼𑀲𑀸𑀭𑁂𑀦𑀸𑀢𑀺 𑀅𑀢𑁆𑀣𑁄. 𑀲𑀕𑁆𑀕𑀫𑀕𑁆𑀕𑀕𑀫𑀦𑁂𑀧𑀻𑀢𑀺 𑀅𑀧𑀺-𑀲𑀤𑁆𑀤𑁂𑀦 𑀫𑁄𑀓𑁆𑀔𑀕𑀫𑀦𑁂𑀧𑀺. ‘‘𑀮𑀓𑁆𑀔𑀡𑀧𑁆𑀧𑀝𑀺𑀯𑁂𑀥𑀧𑀝𑀺𑀲𑀁𑀬𑀼𑀢𑁆𑀢𑁄’’𑀢𑀺 𑀅𑀝𑁆𑀞𑀕𑀭𑀼𑀥𑀫𑁆𑀫𑀸𑀦𑀼𑀲𑀸𑀭𑁂𑀦 𑀯𑀢𑁆𑀢𑀩𑁆𑀩𑀁 𑀥𑀫𑁆𑀫𑀓𑀣𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁.

𑁧𑁪𑁫-𑁧𑁪𑁭. 𑀦𑀺𑀲𑁆𑀲𑀻𑀫𑀦𑁆𑀢𑀺 𑀯𑀺𑀳𑀸𑀭𑁂 𑀩𑀤𑁆𑀥𑀲𑀻𑀫𑀢𑁄 𑀅𑀜𑁆𑀜𑀁 𑀅𑀩𑀤𑁆𑀥𑀲𑀻𑀫𑀁, 𑀕𑀸𑀫𑀲𑀻𑀫𑀸𑀤𑀺𑀦𑁆𑀢𑀺 𑀅𑀢𑁆𑀣𑁄. ‘‘𑀲𑀼𑀧𑀺𑀦𑀦𑁆𑀢𑁂𑀦𑀧𑀻’’𑀢𑀺 𑀦 𑀲𑀩𑁆𑀩𑁂𑀲𑀦𑁆𑀢𑀺 𑀇𑀥 𑀩𑀸𑀳𑀼𑀮𑁆𑀮𑀦𑀬𑁂𑀦 𑀯𑀼𑀢𑁆𑀢𑀁. 𑀙𑀩𑁆𑀩𑀕𑁆𑀕𑀺𑀬𑀸 𑀳𑀺 𑀓𑁂𑀘𑀺 𑀯𑀻𑀲𑀢𑀺𑀯𑀲𑁆𑀲𑀸𑀧𑀺 𑀅𑀢𑁆𑀣𑀺 𑀅𑀢𑀺𑀭𑁂𑀓𑀯𑀻𑀲𑀢𑀺𑀯𑀲𑁆𑀲𑀸𑀧𑀻𑀢𑀺 𑀇𑀫𑀺𑀦𑀸 𑀇𑀫𑀁 𑀫𑀚𑁆𑀛𑀺𑀫𑀩𑁄𑀥𑀺𑀓𑀸𑀮𑁂 𑀧𑀜𑁆𑀜𑀢𑁆𑀢𑀦𑁆𑀢𑀺 𑀯𑀺𑀜𑁆𑀜𑀸𑀬𑀢𑀺. ‘‘𑀲𑀻𑀮𑀯𑀸 𑀳𑁄𑀢𑀻’’𑀢𑀺 𑀯𑀢𑁆𑀯𑀸 𑀢𑀲𑁆𑀲 𑀘𑀢𑀼𑀩𑁆𑀩𑀺𑀥𑀢𑁆𑀢𑀸 𑀇𑀥 𑀅𑀥𑀺𑀧𑁆𑀧𑁂𑀢𑀲𑀻𑀮𑀫𑁂𑀯 𑀤𑀲𑁆𑀲𑁂𑀢𑀼𑀁 ‘‘𑀧𑀸𑀢𑀺𑀫𑁄𑀓𑁆𑀔𑀲𑀁𑀯𑀭𑀲𑀁𑀯𑀼𑀢𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀕𑀡𑁆𑀞𑀸𑀦𑀼𑀕𑀡𑁆𑀞𑀺𑀧𑀤𑁂𑀲𑀼 ‘‘𑀲𑀢𑀺𑀲𑀁𑀯𑀭𑀸𑀤𑀬𑁄 𑀇𑀥 𑀦𑀸𑀥𑀺𑀧𑁆𑀧𑁂𑀢𑀸, 𑀢𑁂𑀦 𑀯𑀺𑀪𑀗𑁆𑀕𑀧𑀸𑀞𑀁 𑀤𑀲𑁆𑀲𑁂𑀢𑀺 𑀅𑀝𑁆𑀞𑀓𑀣𑀸𑀘𑀭𑀺𑀬𑁄’’𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀣𑀢𑁄𑀢𑀺 𑀧𑀸𑀴𑀺𑀅𑀢𑁆𑀣𑀢𑁄. 𑀓𑀸𑀭𑀡𑀢𑁄𑀢𑀺 𑀓𑀸𑀭𑀡𑀽𑀧𑀧𑀢𑁆𑀢𑀺𑀢𑁄, 𑀅𑀝𑁆𑀞𑀓𑀣𑀸𑀢𑁄𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀅𑀣 𑀯𑀸 𑀓𑀸𑀭𑀡𑀢𑁄𑀢𑀺 𑀥𑀫𑁆𑀫𑀢𑁄, 𑀢𑁂𑀦 𑀅𑀢𑁆𑀣𑀢𑁄 𑀥𑀫𑁆𑀫𑀢𑁄𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀣 𑀯𑀸 𑀅𑀢𑁆𑀣𑀢𑁄𑀢𑀺 𑀨𑀮𑀢𑁄. ‘‘𑀓𑀸𑀭𑀡𑀢𑁄𑀢𑀺 𑀳𑁂𑀢𑀼𑀢𑁄. 𑀥𑀫𑁆𑀫𑀧𑀤𑀫𑁆𑀧𑀺 𑀚𑀸𑀢𑀓𑁂𑀦 𑀲𑀳𑀸’’𑀢𑀺 𑀮𑀺𑀔𑀺𑀢𑀁. 𑀧𑀜𑁆𑀳𑀁 𑀓𑀣𑁂𑀢𑀼𑀦𑁆𑀢𑀺 ‘‘𑀧𑀜𑁆𑀳𑀁 𑀧𑀼𑀝𑁆𑀞𑁄 𑀓𑀣𑁂𑀢𑀻’’𑀢𑀺 𑀏𑀢𑁆𑀣 𑀪𑀺𑀓𑁆𑀔𑀼𑀦𑀺𑀬𑀸 𑀧𑀼𑀝𑁆𑀞𑁂𑀦 ‘‘𑀦 𑀚𑀸𑀦𑀸𑀫𑀻’’𑀢𑀺 𑀦 𑀲𑀓𑁆𑀓𑀸 𑀓𑀣𑁂𑀢𑀼𑀁. ‘‘𑀦 𑀔𑁄 𑀧𑀦 𑀢𑀁 𑀪𑀕𑀯𑀦𑁆𑀢’’𑀦𑁆𑀢𑀺 𑀧𑀸𑀞𑁄. ‘‘𑀦 𑀔𑁄 𑀧𑀦𑁂𑀢’’𑀦𑁆𑀢𑀺 𑀘 𑀮𑀺𑀔𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁. ‘‘𑀓𑀸𑀲𑀸𑀬𑀯𑀢𑁆𑀣𑀯𑀲𑀦𑀸𑀬𑀸’’𑀢𑀺 𑀯𑀘𑀦𑀢𑁄 𑀧𑀸𑀭𑀸𑀚𑀺𑀓𑀸𑀬𑀧𑀺 𑀦 𑀯𑀝𑁆𑀝𑀢𑀺. 𑀪𑀺𑀓𑁆𑀔𑀼𑀦𑀺𑀬𑀸 𑀓𑀸𑀬𑀲𑀁𑀲𑀕𑁆𑀕𑀫𑁂𑀯 𑀯𑀼𑀢𑁆𑀢𑀁. 𑀫𑁂𑀣𑀼𑀦𑁂𑀦 𑀳𑀺 𑀪𑀺𑀓𑁆𑀔𑀼𑀦𑀻𑀤𑀽𑀲𑀓𑁄 𑀳𑁄𑀢𑀺.

𑁧𑁪𑁮-𑁯. 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀦𑁆𑀦𑀸 𑀦𑀸𑀫 𑀧𑀭𑀺𑀯𑀢𑁆𑀢𑀮𑀺𑀗𑁆𑀕𑀸, 𑀧𑀜𑁆𑀘𑀲𑀢𑀸 𑀲𑀸𑀓𑀺𑀬𑀸𑀦𑀺𑀬𑁄 𑀯𑀸. ‘‘𑀥𑀫𑁆𑀫𑀤𑁂𑀲𑀦𑀸𑀧𑀢𑁆𑀢𑀺𑀫𑁄𑀘𑀦𑀢𑁆𑀣𑀁 𑀧𑀦𑀸’’𑀢𑀺 𑀯𑀘𑀦𑀢𑁄 𑀫𑀸𑀢𑀼𑀕𑀸𑀫𑀕𑁆𑀕𑀳𑀡𑁂𑀦 𑀲𑀩𑁆𑀩𑀢𑁆𑀣 𑀪𑀺𑀓𑁆𑀔𑀼𑀦𑀻𑀲𑀗𑁆𑀕𑀳𑀁 𑀕𑀘𑁆𑀙𑀢𑀻𑀢𑀺 𑀲𑀺𑀤𑁆𑀥𑀁. 𑀪𑀺𑀓𑁆𑀔𑀼𑀦𑀺𑀕𑁆𑀕𑀳𑀡𑁂𑀦 𑀧𑀦 𑀫𑀸𑀢𑀼𑀕𑀸𑀫𑁄 𑀢𑀺𑀭𑀺𑀬𑀁 𑀢𑀭𑀡𑀲𑀺𑀓𑁆𑀔𑀸𑀧𑀤𑁂 (𑀧𑀸𑀘𑀺. 𑁧𑁮𑁭-𑁧𑁯𑁦) 𑀲𑀗𑁆𑀕𑀳𑀺𑀢𑁄, 𑀦 𑀅𑀜𑁆𑀜𑀢𑁆𑀣. ‘‘𑀑𑀲𑀸𑀭𑁂𑀢𑀩𑁆𑀩𑀸’’𑀢𑀺 𑀧𑀸𑀴𑀺𑀧𑀸𑀞𑁄, 𑀧𑀸𑀴𑀺 𑀑𑀲𑀸𑀭𑁂𑀢𑀩𑁆𑀩𑀸𑀢𑀺 𑀅𑀢𑁆𑀣𑁄. ‘‘𑀑𑀲𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀧𑀸𑀴𑀺. 𑀏𑀓𑀲𑁆𑀫𑀺𑀁 𑀞𑀸𑀦𑁂 𑀯𑀦𑁆𑀤𑀺𑀢𑁂 𑀤𑁄𑀲𑀸𑀪𑀸𑀯𑀢𑁄 𑀩𑀳𑀽𑀲𑀼 𑀏𑀓𑀸𑀬 𑀯𑀦𑁆𑀤𑀺𑀢𑁂 𑀯𑀝𑁆𑀝𑀢𑀻𑀢𑀺 𑀘𑁂? 𑀪𑀺𑀓𑁆𑀔𑀽𑀳𑀺 𑀓𑀢𑁆𑀢𑀩𑁆𑀩𑀁 𑀦𑀢𑁆𑀣𑀺, 𑀪𑀺𑀓𑁆𑀔𑀼𑀦𑀺𑀬𑀸𑀬𑁂𑀯 𑀓𑀢𑁆𑀢𑀩𑁆𑀩𑀁, 𑀢𑀲𑁆𑀫𑀸 𑀦 𑀯𑀝𑁆𑀝𑀢𑀺. ‘‘𑀬𑀢𑁆𑀣 𑀓𑀢𑁆𑀣𑀘𑀺 𑀦𑀺𑀲𑀺𑀦𑁆𑀦𑀸𑀬𑀸𑀢𑀺 𑀅𑀦𑁆𑀢𑁄𑀤𑁆𑀯𑀸𑀤𑀲𑀳𑀢𑁆𑀣𑁂 𑀦𑀺𑀲𑀺𑀦𑁆𑀦𑀸𑀬𑀸’’𑀢𑀺 𑀯𑀤𑀦𑁆𑀢𑀺. 𑀦 𑀦𑀺𑀫𑀦𑁆𑀢𑀺𑀢𑀸 𑀳𑀼𑀢𑁆𑀯𑀸 𑀕𑀦𑁆𑀢𑀼𑀓𑀸𑀫𑀸𑀢𑀺 𑀦𑀺𑀫𑀦𑁆𑀢𑀺𑀢𑀸 𑀳𑀼𑀢𑁆𑀯𑀸 𑀕𑀦𑁆𑀢𑀼𑀓𑀸𑀫𑀸 𑀪𑀺𑀓𑁆𑀔𑀽 𑀇𑀥 𑀦𑀸𑀥𑀺𑀧𑁆𑀧𑁂𑀢𑀸, 𑀯𑀲𑁆𑀲𑀁 𑀉𑀧𑀕𑀦𑁆𑀢𑀼𑀓𑀸𑀫𑀸𑀯 𑀅𑀥𑀺𑀧𑁆𑀧𑁂𑀢𑀸𑀢𑀺 𑀅𑀢𑁆𑀣𑁄. 𑀬𑀢𑁄 𑀧𑀦𑀸𑀢𑀺 𑀪𑀺𑀓𑁆𑀔𑀼𑀦𑀻𑀯𑀺𑀳𑀸𑀭𑀢𑁄. 𑀢𑀢𑁆𑀣𑀸𑀢𑀺 𑀪𑀺𑀓𑁆𑀔𑀼𑀦𑀻𑀯𑀺𑀳𑀸𑀭𑁂. 𑀓𑀺𑀜𑁆𑀘𑀸𑀧𑀺 ‘‘𑀑𑀯𑀸𑀤𑀤𑀸𑀬𑀓𑀸 𑀪𑀺𑀓𑁆𑀔𑀽’’𑀢𑀺 𑀯𑀘𑀦𑀢𑁄 𑀑𑀯𑀸𑀤𑀤𑀸𑀬𑀓𑁂𑀳𑁂𑀯 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀳𑁄𑀢𑀺, 𑀦 𑀲𑀩𑁆𑀩𑁂𑀳𑀻𑀢𑀺 𑀆𑀧𑀦𑁆𑀦𑁄, 𑀢𑀣𑀸𑀧𑀺 𑀅𑀲𑀢𑀺 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁂 𑀑𑀯𑀸𑀤𑀲𑀁𑀯𑀸𑀲𑀸𑀦𑀁 𑀅𑀢𑁆𑀣𑀸𑀬 𑀬𑀸𑀘𑀦𑀢𑁆𑀣𑀸𑀬 𑀅𑀯𑀲𑁆𑀲𑀁 𑀕𑀦𑁆𑀢𑀩𑁆𑀩𑀢𑁆𑀢𑀸 𑀅𑀜𑁆𑀜𑁂𑀳𑀺𑀧𑀺 𑀪𑀺𑀓𑁆𑀔𑀽𑀳𑀺 𑀲𑀪𑀺𑀓𑁆𑀔𑀼𑀓𑁄𑀧𑀺 𑀲𑀪𑀺𑀓𑁆𑀔𑀼𑀓𑁄 𑀏𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀲𑀸 𑀭𑀓𑁆𑀔𑀺𑀢𑀩𑁆𑀩𑀸𑀢𑀺 𑀯𑀲𑁆𑀲𑀘𑁆𑀙𑁂𑀤𑀸𑀧𑀢𑁆𑀢𑀺 𑀭𑀓𑁆𑀔𑀺𑀢𑀩𑁆𑀩𑀸. 𑀓𑀲𑁆𑀫𑀸? 𑀆𑀧𑀤𑀸𑀲𑀼 𑀳𑀻𑀢𑀺𑀆𑀤𑀺. ‘‘𑀅𑀬𑀁 𑀉𑀧𑁄𑀲𑀣𑁄 𑀘𑀸𑀢𑀼𑀤𑁆𑀤𑀲𑀺𑀓𑁄𑀢𑀺 𑀧𑀼𑀘𑁆𑀙𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀢𑁂𑀭𑀲𑀺𑀬𑀁𑀬𑁂𑀯, 𑀏𑀢𑀭𑀳𑀺 𑀧𑀦 𑀪𑀺𑀓𑁆𑀔𑀼𑀦𑀺𑀬𑁄 𑀘𑀸𑀢𑀼𑀤𑁆𑀤𑀲𑀺𑀬𑀁𑀬𑁂𑀯 𑀕𑀦𑁆𑀢𑁆𑀯𑀸 ‘‘𑀓𑀤𑀸 𑀅𑀬𑁆𑀬 𑀉𑀧𑁄𑀲𑀣𑁄’’𑀢𑀺 𑀧𑀼𑀘𑁆𑀙𑀦𑁆𑀢𑀺. ‘‘𑀚𑀸𑀬𑀸𑀬𑁄 𑀯𑀸 𑀚𑀸𑀭𑀺𑀬𑁄 𑀯𑀸’’𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀯𑀼𑀢𑁆𑀢𑀁 𑀓𑀺𑀭. ‘‘𑀕𑀘𑁆𑀙𑁂𑀬𑁆𑀬 𑀘𑁂, 𑀆𑀧𑀢𑁆𑀢𑀻’’𑀢𑀺 𑀧𑀸𑀞𑁄. 𑀤𑁆𑀯𑁂 𑀢𑀺𑀲𑁆𑀲𑁄𑀢𑀺 𑀤𑁆𑀯𑀻𑀳𑀺 𑀢𑀻𑀳𑀺. 𑀏𑀓𑀢𑁄 𑀆𑀕𑀢𑀸𑀦𑀁 𑀯𑀲𑁂𑀦 ‘‘𑀢𑀸𑀳𑀻’’𑀢𑀺 𑀩𑀳𑀼𑀯𑀘𑀦𑀁 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀏𑀓𑀸 𑀪𑀺𑀓𑁆𑀔𑀼𑀦𑀻 𑀯𑀸 𑀩𑀳𑀽 𑀪𑀺𑀓𑁆𑀔𑀼𑀦𑀻 𑀯𑀸 𑀩𑀳𑀽𑀳𑀺 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑁂𑀳𑀺 𑀑𑀯𑀸𑀤𑀢𑁆𑀣𑀸𑀬 𑀧𑁂𑀲𑀺𑀢𑀸’’𑀢𑀺 𑀯𑀘𑀦𑀲𑁆𑀲 𑀯𑀺𑀢𑁆𑀣𑀸𑀭𑁄 ‘‘𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀘 𑀅𑀬𑁆𑀬 𑀪𑀺𑀓𑁆𑀔𑀼𑀦𑀺𑀬𑁄 𑀘𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁄. ‘‘𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀘 𑀅𑀬𑁆𑀬 𑀪𑀺𑀓𑁆𑀔𑀼𑀦𑀺𑀬𑁄 𑀘𑀸’𑀢𑀺𑀆𑀤𑀺 𑀦𑀸𑀦𑀸𑀉𑀧𑀲𑁆𑀲𑀬𑁂𑀳𑀺 𑀧𑁂𑀲𑀺𑀢𑀸𑀬 𑀯𑀘𑀦’’𑀦𑁆𑀢𑀺 𑀘 ‘‘𑀅𑀧𑀭𑀺𑀧𑀼𑀡𑁆𑀡𑀲𑀗𑁆𑀖𑀧𑀼𑀕𑁆𑀕𑀮𑀦𑀸𑀦𑀸𑀯𑀸𑀲𑀤𑀼𑀢𑀺𑀬𑀯𑀘𑀦𑀯𑀲𑁂𑀦 𑀧𑀜𑁆𑀘𑀓𑁆𑀔𑀢𑁆𑀢𑀼𑀁 𑀉𑀧𑀲𑀗𑁆𑀓𑀫𑀦𑀁 𑀯𑀼𑀢𑁆𑀢’’𑀦𑁆𑀢𑀺 𑀘 𑀮𑀺𑀔𑀺𑀢𑀁. 𑀬𑀲𑁆𑀫𑀺𑀁 𑀆𑀯𑀸𑀲𑁂 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑁄 𑀦 𑀧𑀯𑀢𑁆𑀢𑀢𑀺, 𑀢𑀢𑁆𑀣𑀸𑀧𑀺 𑀬𑀸𑀘𑀦𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀬𑁂𑀦 𑀧𑀝𑀺𑀕𑁆𑀕𑀳𑀺𑀢𑀁, 𑀢𑁂𑀦 ‘‘𑀦𑀢𑁆𑀣𑀺 𑀓𑁄𑀘𑀺 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁄 𑀲𑀫𑁆𑀫𑀢𑁄’’𑀢𑀺𑀆𑀤𑀺 𑀯𑀢𑁆𑀢𑀩𑁆𑀩𑀁. 𑀅𑀢𑁆𑀣𑀺 𑀘𑁂 𑀲𑀫𑁆𑀫𑀢𑁄, 𑀦𑀺𑀤𑁆𑀤𑀺𑀲𑀺𑀢𑀩𑁆𑀩𑁄. ‘‘𑀲𑀬𑀫𑁂𑀯 𑀘𑁂 𑀲𑀫𑁆𑀫𑀢𑁄, 𑀅𑀳’𑀦𑁆𑀢𑀺 𑀯𑀢𑁆𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀘𑁂 𑀲𑀫𑁆𑀫𑀢𑁄 𑀯𑀸 𑀑𑀯𑀸𑀤𑀧𑀝𑀺𑀕𑁆𑀕𑀸𑀳𑀓𑁄 𑀯𑀸 𑀧𑀸𑀢𑀺𑀫𑁄𑀓𑁆𑀔𑀁 𑀉𑀤𑁆𑀤𑀺𑀲𑀢𑀺, 𑀅𑀜𑁆𑀜𑁂𑀦 𑀆𑀭𑁄𑀘𑀸𑀧𑁂𑀢𑀩𑁆𑀩𑀦𑁆𑀢𑀺 𑀏𑀓𑁂, ‘‘𑀅𑀢𑁆𑀢𑀦𑀸𑀧𑀺 𑀆𑀭𑁄𑀘𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀘 𑀯𑀤𑀦𑁆𑀢𑀺. 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 ‘‘𑀅𑀬𑁆𑀬𑀸𑀦𑀁 𑀧𑀯𑀸𑀭𑁂𑀢𑀻’’𑀢𑀺 𑀮𑀺𑀔𑀺𑀢𑀁, 𑀏𑀯𑀁 𑀲𑀢𑀺 ‘‘𑀅𑀬𑁆𑀬𑀲𑁆𑀲 𑀧𑀯𑀸𑀭𑁂𑀫𑀻’’𑀢𑀺 𑀯𑀢𑁆𑀢𑀩𑁆𑀩𑀁, 𑀧𑁄𑀢𑁆𑀣𑀓𑁂 𑀦𑀢𑁆𑀣𑀺.

𑀑𑀯𑀸𑀤𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀅𑀢𑁆𑀣𑀗𑁆𑀕𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁫𑁩. 𑀫𑀼𑀦𑀸𑀢𑀻𑀢𑀺 𑀚𑀸𑀦𑀸𑀢𑀺. 𑀅𑀦𑁆𑀢𑀭𑀥𑀸𑀬𑀢𑀺𑀧𑀻𑀢𑀺 𑀏𑀢𑁆𑀣 𑀢𑀤𑀼𑀢𑁆𑀢𑀫𑀁 𑀘𑁂 𑀅𑀢𑁆𑀣𑀺, 𑀢𑀁 𑀧𑀲𑁆𑀲𑀸𑀫𑀺, 𑀬𑀁 𑀯𑀺𑀘𑀺𑀢𑁆𑀢𑀁 𑀯𑀸, 𑀢𑀤𑀢𑁆𑀣𑀜𑁆𑀘. 𑀢𑀕𑁆𑀖 𑀓𑀸𑀭𑀡𑀁. 𑀲𑀳 𑀉𑀧𑁆𑀧𑀸𑀤𑀫𑀦𑀦𑁆𑀢𑀭𑀸 𑀓𑀺𑀭𑀺𑀬𑀸. 𑀬𑀫𑀸 𑀘 𑀢𑁂 𑀫𑀦𑀲𑀸 𑀓𑀢𑀢𑁆𑀭 𑀦𑁂𑀢𑁆𑀯𑀸𑀢𑀺. 𑀬𑀣𑀸 𑀧𑀸𑀢𑁄 𑀲𑀺𑀬𑀸 𑀧𑀸𑀢𑁄 𑀪𑀯𑀁 𑀧𑀸𑀢𑁄𑀯 𑀉𑀤𑀓𑀢𑁄 𑀉𑀕𑁆𑀕𑀦𑁆𑀢𑁆𑀯𑀸 𑀞𑀺𑀢𑀁, 𑀢𑀣𑀸 𑀯𑀺𑀭𑁄𑀘𑀫𑀸𑀦𑀁 𑀅𑀗𑁆𑀕𑀻𑀭𑀲𑀁 𑀩𑀼𑀤𑁆𑀥𑀁 𑀧𑀲𑁆𑀲, 𑀦 𑀓𑁂𑀯𑀮𑀁 𑀧𑀤𑀼𑀫𑀁 𑀯𑀺𑀬, 𑀯𑀺𑀭𑁄𑀘𑀫𑀸𑀦𑀁 𑀢𑀧𑀦𑁆𑀢𑀫𑀸𑀤𑀺𑀘𑁆𑀘𑀫𑀺𑀯𑀦𑁆𑀢𑀮𑀺𑀓𑁆𑀔𑁂𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀣 𑀯𑀸 𑀅𑀗𑁆𑀕𑀻𑀭𑀲𑀁 𑀩𑀼𑀤𑁆𑀥𑀁 𑀧𑀤𑀼𑀫𑀁𑀯 𑀯𑀺𑀭𑁄𑀘𑀫𑀸𑀦𑀁 𑀲𑀽𑀭𑀺𑀬𑀁𑀯 𑀢𑀧𑀦𑁆𑀢𑀁 𑀧𑀲𑁆𑀲 𑀩𑀼𑀤𑁆𑀥𑀁. 𑀬𑀣𑀸 𑀧𑀸𑀢𑁄 𑀲𑀺𑀬𑀸 𑀨𑀼𑀮𑁆𑀮𑀫𑀯𑀻𑀢𑀕𑀦𑁆𑀥𑀁 𑀓𑁄𑀓𑀦𑀼𑀤𑀲𑀗𑁆𑀔𑀸𑀢𑀁 𑀧𑀤𑀼𑀫𑀁 𑀧𑀲𑁆𑀲𑀲𑀺, 𑀢𑀣𑀸 𑀯𑀺𑀭𑁄𑀘𑀫𑀸𑀦𑀁 𑀅𑀗𑁆𑀕𑀻𑀭𑀲𑀁 𑀩𑀼𑀤𑁆𑀥𑀁 𑀧𑀲𑁆𑀲. 𑀉𑀪𑀬𑁂𑀦𑁂𑀯 𑀳𑀺 𑀪𑀕𑀯𑀢𑁄 𑀓𑀦𑁆𑀢𑀺 𑀤𑀻𑀧𑀺𑀢𑀸𑀢𑀺 𑀓𑀢𑁆𑀯𑀸 𑀤𑀻𑀧𑀺𑀢𑀕𑀼𑀡𑀲𑀼𑀪𑀁 𑀩𑀼𑀤𑁆𑀥𑀁 𑀲𑀓𑁆𑀓𑀢𑁆𑀯𑀸 𑀢𑀁 𑀓𑀦𑁆𑀢𑀺𑀁 𑀧𑀽𑀚𑁂𑀬𑁆𑀬. 𑀧𑀽𑀚𑀦𑁂𑀬𑁆𑀬𑀢𑁄𑀧𑀺 𑀯𑀻𑀢𑀺𑀦𑀸𑀫𑁂𑀬𑁆𑀬 𑀇𑀢𑀺 𑀮𑀓𑁆𑀔𑀬𑁂. ‘‘𑀏𑀓𑀢𑁄 𑀉𑀧𑀲𑀫𑁆𑀧𑀦𑁆𑀦𑀸𑀬𑀸’’𑀢𑀺 𑀧𑀸𑀴𑀺.

𑁧𑁫𑁬. ‘‘𑀏𑀓𑀢𑁄 𑀉𑀧𑀲𑀫𑁆𑀧𑀦𑁆𑀦𑀸𑀦’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀧𑀸𑀞𑁄. ‘‘𑀅𑀪𑀩𑁆𑀩𑁄 𑀢𑁆𑀯’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 𑀅𑀦𑀼𑀓𑀫𑁆𑀧𑀸𑀯𑀲𑁂𑀦 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀺𑀁 𑀲𑀗𑁆𑀖𑀺𑀓𑀸 𑀯𑀺𑀳𑀸𑀭𑀸 𑀦𑀺𑀓𑁆𑀓𑀟𑁆𑀠𑀸𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺 𑀯𑀺𑀬 𑀤𑀺𑀲𑁆𑀲𑀢𑀺. 𑀅𑀪𑀩𑁆𑀩𑁄 𑀳𑀺 𑀣𑁂𑀭𑁄 𑀲𑀜𑁆𑀘𑀺𑀘𑁆𑀘 𑀢𑀁 𑀓𑀸𑀢𑀼𑀁, 𑀕𑀯𑁂𑀲𑀺𑀢𑀩𑁆𑀩𑀸𑀯 𑀏𑀢𑁆𑀣 𑀬𑀼𑀢𑁆𑀢𑀻𑀢𑀺 𑀓𑁂𑀘𑀺. 𑀣𑁂𑀭𑁂𑀦 𑀲𑀺𑀓𑁆𑀔𑀸𑀧𑀤𑀧𑀜𑁆𑀜𑀢𑁆𑀢𑀺𑀢𑁄 𑀧𑀼𑀩𑁆𑀩𑁂 𑀓𑀢𑀦𑁆𑀢𑀺 𑀫𑀫 𑀢𑀓𑁆𑀓𑁄.

𑀅𑀢𑁆𑀣𑀗𑁆𑀕𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁬𑁨. ‘‘𑀏𑀓𑀭𑀢𑁆𑀢𑀫𑁆𑀧𑀺 𑀯𑀲𑀦𑁆𑀢𑀻’’𑀢𑀺 (𑀧𑀸𑀘𑀺. 𑁧𑁬𑁧) 𑀯𑀘𑀦𑀢𑁄 𑀬𑀢𑁆𑀣 𑀭𑀢𑁆𑀢𑀺𑀬𑀁 𑀦 𑀯𑀲𑀦𑁆𑀢𑀺, 𑀢𑀢𑁆𑀣 𑀕𑀦𑁆𑀢𑁆𑀯𑀸 𑀑𑀯𑀤𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀏𑀓𑁂. 𑀬𑀤𑀺 𑀏𑀯𑀁 𑀲𑀗𑁆𑀓𑁂𑀢𑀝𑁆𑀞𑀸𑀦𑀁 𑀕𑀦𑁆𑀢𑁆𑀯𑀸 𑀑𑀯𑀤𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁. ‘‘𑀢𑀢𑁄 𑀅𑀤𑁆𑀥𑀬𑁄𑀚𑀦𑁂𑀬𑁂𑀯 𑀲𑀪𑀺𑀓𑁆𑀔𑀼𑀓𑁄 𑀆𑀯𑀸𑀲𑁄 𑀇𑀘𑁆𑀙𑀺𑀢𑀩𑁆𑀩𑁄’’𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁄 𑀘𑁂 𑀅𑀤𑁆𑀥𑀬𑁄𑀚𑀦𑀁 𑀕𑀦𑁆𑀢𑁆𑀯𑀸 𑀑𑀯𑀤𑀺𑀢𑀼𑀓𑀸𑀫𑁄 𑀳𑁄𑀢𑀺, 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑁄 𑀘 𑀅𑀤𑁆𑀥𑀬𑁄𑀚𑀦𑀁 𑀕𑀦𑁆𑀢𑁆𑀯𑀸 𑀲𑁄𑀢𑀼𑀓𑀸𑀫𑁄, ‘‘𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀢𑀜𑁆𑀘 𑀦 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀦 𑀯𑀝𑁆𑀝𑀢𑀺. 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁂𑀦 𑀧𑀦 ‘‘𑀏𑀓𑀭𑀢𑁆𑀢𑀫𑁆𑀧𑀻’’𑀢𑀺 𑀯𑀼𑀢𑁆𑀢𑀁. 𑀢𑀢𑁄 𑀧𑀝𑁆𑀞𑀸𑀬 𑀉𑀧𑀲𑁆𑀲𑀬𑀁 𑀳𑁄𑀢𑀺, 𑀦 𑀉𑀧𑀲𑁆𑀲𑀬𑀲𑀗𑁆𑀔𑁂𑀧𑁂𑀦 𑀓𑀢𑀫𑀢𑁆𑀢𑁂𑀦𑀸𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀢𑁆𑀣 𑀯𑀸𑀲𑀽𑀧𑀕𑀢𑀸 𑀪𑀺𑀓𑁆𑀔𑀼𑀦𑀺𑀬𑁄, 𑀲𑁄 𑀉𑀧𑀲𑁆𑀲𑀬𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺, 𑀢𑀢𑁆𑀣 𑀦 𑀕𑀦𑁆𑀢𑁆𑀯𑀸 𑀑𑀯𑀸𑀤𑁄 𑀤𑀸𑀢𑀩𑁆𑀩𑁄. 𑀏𑀓𑀸𑀯𑀸𑀲𑁂 𑀤𑀺𑀯𑀸 𑀯𑀝𑁆𑀝𑀢𑀻𑀢𑀺 𑀏𑀓𑁂, 𑀯𑀺𑀘𑀸𑀭𑁂𑀢𑁆𑀯𑀸 𑀬𑀼𑀢𑁆𑀢𑀢𑀭𑀁 𑀕𑀳𑁂𑀢𑀩𑁆𑀩𑀁.

𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀆𑀫𑀺𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁬𑁪. ‘‘𑀉𑀧𑀲𑀫𑁆𑀧𑀦𑁆𑀦𑀁 𑀲𑀗𑁆𑀖𑁂𑀦 𑀅𑀲𑀫𑁆𑀫𑀢’’𑀦𑁆𑀢𑀺 𑀧𑀸𑀴𑀺𑀯𑀘𑀦𑀢𑁄, ‘‘𑀲𑀫𑁆𑀫𑀢𑁂𑀦 𑀯𑀸 𑀲𑀗𑁆𑀖𑁂𑀦 𑀯𑀸 𑀪𑀸𑀭𑀁 𑀓𑀢𑁆𑀯𑀸 𑀞𑀧𑀺𑀢𑁄’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀘 𑀅𑀝𑁆𑀞𑀳𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀫𑁆𑀫𑀢𑁂𑀦 𑀯𑀸 𑀯𑀺𑀧𑁆𑀧𑀯𑀲𑀺𑀢𑀼𑀓𑀸𑀫𑁂𑀦 ‘‘𑀬𑀸𑀯𑀸𑀳𑀁 𑀆𑀕𑀫𑀺𑀲𑁆𑀲𑀸𑀫𑀺, 𑀢𑀸𑀯 𑀢𑁂 𑀪𑀸𑀭𑁄 𑀳𑁄𑀢𑀽’’𑀢𑀺 𑀬𑀸𑀘𑀺𑀢𑁆𑀯𑀸 𑀞𑀧𑀺𑀢𑁄, 𑀢𑀲𑁆𑀲𑀸𑀪𑀸𑀯𑀢𑁄 𑀲𑀗𑁆𑀖𑁂𑀦 𑀯𑀸 𑀢𑀣𑁂𑀯 𑀪𑀸𑀭𑀁 𑀓𑀢𑁆𑀯𑀸 𑀞𑀧𑀺𑀢𑁄 𑀅𑀝𑁆𑀞𑀳𑀺 𑀕𑀭𑀼𑀥𑀫𑁆𑀫𑁂𑀳𑀺 𑀑𑀯𑀤𑀺𑀢𑀼𑀁 𑀮𑀪𑀢𑀺, 𑀧𑀕𑁂𑀯 𑀅𑀜𑁆𑀜𑁂𑀦 𑀥𑀫𑁆𑀫𑁂𑀦𑀸𑀢𑀺 𑀲𑀺𑀤𑁆𑀥𑀁. ‘‘𑀬𑁄 𑀧𑀦 𑀪𑀺𑀓𑁆𑀔𑀼 𑀅𑀲𑀫𑁆𑀫𑀢𑁄 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑁂𑀬𑁆𑀬, 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀧𑀕𑁂𑀯 𑀪𑀸𑀭𑀁 𑀓𑀢𑁆𑀯𑀸 𑀅𑀝𑁆𑀞𑀧𑀺𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀪𑀬𑀕𑀺𑀭𑀺𑀯𑀸𑀲𑀻𑀦𑀫𑁆𑀧𑀺 𑀇𑀤𑀫𑁂𑀯 𑀫𑀢𑀁, 𑀅𑀦𑀼𑀕𑀡𑁆𑀞𑀺𑀧𑀤𑁂 𑀧𑀦 𑀇𑀫𑀁 𑀦𑀬𑀁 𑀧𑀝𑀺𑀓𑁆𑀔𑀺𑀧𑀺𑀢𑁆𑀯𑀸 ‘‘𑀦𑀢𑁆𑀣𑀺 𑀓𑁄𑀘𑀻’’𑀢𑀺𑀆𑀤𑀺𑀦𑀸 ‘‘𑀏𑀢𑀭𑀳𑀺 𑀑𑀯𑀸𑀤𑀓𑁄 𑀅𑀲𑀫𑁆𑀫𑀢𑁄 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁄 𑀦𑀸𑀫𑀸’’𑀢𑀺 𑀯𑀢𑁆𑀯𑀸 ‘‘𑀬𑀁 𑀧𑀦 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁 ‘𑀉𑀧𑀲𑀫𑁆𑀧𑀦𑁆𑀦𑀁 𑀲𑀗𑁆𑀖𑁂𑀦 𑀓𑀫𑁆𑀫𑀯𑀸𑀘𑀸𑀬 𑀅𑀲𑀫𑁆𑀫𑀢𑀁, 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀧𑀦 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 𑀅𑀦𑀼𑀕𑁆𑀕𑀳𑀁 𑀓𑀭𑁄𑀣, 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀣, 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀘 𑀓𑀭𑁄𑀣 𑀨𑀸𑀲𑀼𑀯𑀺𑀳𑀸𑀭𑀦𑁆𑀢𑀺 𑀏𑀯𑀁 𑀬𑀸𑀘𑀺𑀢𑁆𑀯𑀸 𑀞𑀧𑀺𑀢𑁄 𑀪𑀺𑀓𑁆𑀔𑀼𑀲𑀗𑁆𑀖𑀁 𑀆𑀧𑀼𑀘𑁆𑀙𑀺𑀢𑁆𑀯𑀸, 𑀢𑀢𑁄 𑀲𑁄 𑀣𑁂𑀭𑁄 𑀪𑀺𑀓𑁆𑀔𑀼𑀦𑀺𑀬𑁄 𑀑𑀯𑀤𑀢𑀺, 𑀏𑀯𑀭𑀽𑀧𑀁 𑀪𑀺𑀓𑁆𑀔𑀼𑀲𑀗𑁆𑀖𑁂𑀦 𑀅𑀲𑀫𑁆𑀫𑀢𑀦𑁆𑀢𑀺, 𑀢𑀢𑁆𑀭 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀁. 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀅𑀲𑀫𑁆𑀫𑀢𑁄 𑀕𑀸𑀫𑀁 𑀑𑀯𑀸𑀤𑀢𑁆𑀣𑀸𑀬 𑀆𑀕𑀢𑀸𑀦𑀁 𑀪𑀺𑀓𑁆𑀔𑀼𑀦𑀻𑀦𑀁 𑀯𑀘𑀦𑀁 𑀲𑀼𑀢𑁆𑀯𑀸 𑀧𑀝𑀺𑀯𑀘𑀦𑀁 𑀤𑁂𑀦𑁆𑀢𑁄 𑀲𑀗𑁆𑀖𑀸𑀦𑀼𑀫𑀢𑀺𑀬𑀸, 𑀦 𑀜𑀢𑁆𑀢𑀺𑀘𑀢𑀼𑀢𑁆𑀣𑁂𑀦𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀅𑀦𑀼𑀕𑀡𑁆𑀞𑀺𑀧𑀤𑀫𑀢𑁂𑀦 𑀲𑀫𑁂𑀢𑀺, 𑀅𑀦𑁆𑀥𑀓𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀯𑀘𑀦𑀁 𑀢𑁂𑀦 𑀲𑀫𑁂𑀢𑀺, 𑀢𑀜𑁆𑀘 𑀧𑀸𑀴𑀺𑀯𑀘𑀦𑀁, 𑀦 𑀳𑀺 𑀑𑀯𑀸𑀤𑀧𑀝𑀺𑀕𑁆𑀕𑀸𑀳𑀓𑁄, 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀓𑁄 𑀯𑀸 ‘‘𑀧𑀸𑀲𑀸𑀤𑀺𑀓𑁂𑀦 𑀲𑀫𑁆𑀧𑀸𑀤𑁂𑀢𑀽’’𑀢𑀺 𑀯𑀘𑀦𑀫𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁄 𑀦𑀸𑀫 𑀳𑁄𑀢𑀺. 𑀳𑁄𑀢𑀻𑀢𑀺 𑀘𑁂, 𑀅𑀦𑀼𑀧𑀲𑀫𑁆𑀧𑀦𑁆𑀦𑁄𑀧𑀺 𑀢𑀢𑁆𑀢𑀓𑁂𑀦 𑀯𑀘𑀦𑁂𑀦 ‘‘𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁄 𑀳𑁄𑀢𑀽’’𑀢𑀺 𑀯𑀢𑁆𑀢𑀩𑁆𑀩𑁄. 𑀳𑁄𑀢𑀻𑀢𑀺 𑀘𑁂, 𑀬𑀁 𑀯𑀼𑀢𑁆𑀢𑀁 𑀕𑀡𑁆𑀞𑀸𑀦𑀼𑀕𑀡𑁆𑀞𑀺𑀧𑀤𑁂𑀲𑀼 ‘‘𑀅𑀲𑀫𑁆𑀫𑀢𑁄 𑀦𑀸𑀫 𑀅𑀲𑀫𑁆𑀫𑀢𑀪𑀸𑀯𑁂𑀦 ‘𑀩𑀳𑀼𑀲𑁆𑀲𑀼𑀢𑁄 𑀢𑁆𑀯𑀁 𑀑𑀯𑀤𑀸𑀳𑀻’𑀢𑀺 𑀲𑀗𑁆𑀖𑁂𑀦 𑀪𑀸𑀭𑀁 𑀓𑀢𑁆𑀯𑀸 𑀞𑀧𑀺𑀢𑁄’’𑀢𑀺. 𑀏𑀢𑁆𑀣 𑀩𑀸𑀳𑀼𑀲𑀘𑁆𑀘𑁂𑀦 𑀓𑀺𑀁 𑀧𑀬𑁄𑀚𑀦𑀁. 𑀅𑀦𑀼𑀕𑀡𑁆𑀞𑀺𑀧𑀤𑁂𑀬𑁂𑀯 ‘‘𑀅𑀪𑀬𑀕𑀺𑀭𑀺𑀯𑀸𑀲𑀻 𑀯𑀤𑀢𑀻𑀢𑀺 𑀲𑀼𑀢𑁆𑀯𑀸 𑀲𑀫𑁆𑀫𑀢𑁂𑀦 𑀯𑀸 𑀆𑀡𑀢𑁆𑀢𑁄 𑀑𑀯𑀤𑀺𑀢𑀼𑀁 𑀮𑀪𑀢𑀻𑀢𑀺 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁄 𑀧𑀘𑁆𑀙𑀸 𑀅𑀦𑀼𑀚𑀸𑀦𑀸𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑀺𑀁 𑀩𑀳𑀼𑀓𑀸𑀬. ‘‘𑀧𑀸𑀲𑀸𑀤𑀺𑀓𑁂𑀦 𑀲𑀫𑁆𑀧𑀸𑀤𑁂𑀢𑀽’’𑀢𑀺 𑀏𑀢𑁆𑀢𑀓𑀫𑀢𑁆𑀢𑁂𑀦 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁄 𑀳𑁄𑀢𑀺. 𑀅𑀝𑁆𑀞𑀓𑀣𑀸𑀬𑀁 ‘‘𑀪𑀸𑀭𑀁 𑀓𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀓𑀺𑀁 𑀧𑀬𑁄𑀚𑀦𑀁, 𑀢𑀢𑁆𑀢𑀓𑀫𑁆𑀧𑀺 𑀯𑀢𑁆𑀢𑀼𑀁 𑀅𑀜𑁆𑀜𑁄 𑀦 𑀮𑀪𑀢𑀺, 𑀢𑁂𑀦 𑀘 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀞𑀧𑁂𑀢𑁆𑀯𑀸 𑀩𑀸𑀮𑀁 𑀕𑀺𑀮𑀸𑀦𑀁 𑀕𑀫𑀺𑀓𑀁 𑀅𑀯𑀲𑁂𑀲𑁂𑀳𑀺 𑀑𑀯𑀸𑀤𑀁 𑀕𑀳𑁂𑀢𑀼’’𑀦𑁆𑀢𑀺 (𑀘𑀽𑀴𑀯. 𑁪𑁧𑁪) 𑀅𑀬𑀁 𑀧𑀸𑀴𑀺 𑀯𑀺𑀭𑀼𑀚𑁆𑀛𑁂𑀬𑁆𑀬. 𑀓𑀣𑀁? 𑀢𑀲𑁆𑀲 𑀳𑀺 ‘‘𑀦, 𑀪𑀺𑀓𑁆𑀔𑀯𑁂, 𑀑𑀯𑀸𑀤𑁄 𑀦 𑀧𑀘𑁆𑀘𑀸𑀳𑀭𑀺𑀢𑀩𑁆𑀩𑁄’’𑀢𑀺 (𑀘𑀽𑀴𑀯. 𑁪𑁧𑁫) 𑀘𑀦𑀢𑁄 𑀲𑀫𑁆𑀫𑀢𑀸𑀲𑀫𑁆𑀫𑀢𑀪𑀸𑀯𑁂𑀦 𑀦𑀢𑁆𑀣𑀺 𑀓𑁄𑀘𑀻𑀢𑀺 ‘‘𑀧𑀸𑀲𑀸𑀤𑀺𑀓𑁂𑀦 𑀲𑀫𑁆𑀧𑀸𑀤𑁂𑀢𑀽’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸, 𑀯𑀤𑀦𑁆𑀢𑁄 𑀘 𑀇𑀥 𑀧𑀞𑀫𑁂𑀦 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄 𑀳𑁄𑀢𑀻𑀢𑀺. 𑀳𑁄𑀢𑀼 𑀅𑀲𑀫𑁆𑀫𑀢𑀢𑁆𑀢𑀸, 𑀅𑀓𑀢𑀪𑀸𑀭𑀢𑁆𑀢𑀸 𑀘. 𑀇𑀫𑀲𑁆𑀲 𑀘 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑀢𑁆𑀢𑁂 𑀇𑀫𑀲𑁆𑀲 𑀔𑀻𑀬𑀦𑁂𑀦 𑀤𑀼𑀓𑁆𑀓𑀝𑀁 𑀲𑀺𑀬𑀸, 𑀲𑀩𑁆𑀩𑀫𑁂𑀢𑀁 𑀅𑀦𑀺𑀝𑁆𑀞𑀁, 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀬𑀫𑁂𑀢𑁆𑀣 𑀪𑀺𑀓𑁆𑀔𑀼𑀦𑁄𑀯𑀸𑀤𑀓𑁄 𑀦𑀸𑀫𑀸’’𑀢𑀺 𑀅𑀯𑀼𑀢𑁆𑀢𑀢𑁆𑀢𑀸 𑀢𑀣𑀸 𑀪𑀸𑀭𑀁 𑀓𑀢𑁆𑀯𑀸 𑀞𑀧𑀺𑀢𑁄 𑀑𑀯𑀤𑀺𑀢𑀼𑀁 𑀮𑀪𑀢𑀺𑀬𑁂𑀯, 𑀦𑀸𑀜𑁆𑀜𑁄𑀢𑀺 𑀆𑀘𑀭𑀺𑀬𑁄.

𑀆𑀫𑀺𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀘𑀻𑀯𑀭𑀤𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁬𑁯. 𑀲𑀸𑀤𑀺𑀬𑀺𑀲𑁆𑀲𑀲𑀻𑀢𑀺 𑀧𑀼𑀘𑁆𑀙𑀸.

𑀘𑀻𑀯𑀭𑀤𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀘𑀻𑀯𑀭𑀲𑀺𑀩𑁆𑀩𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁭𑁬. 𑀯𑀜𑁆𑀘𑁂𑀢𑁆𑀯𑀸𑀢𑀺 ‘‘𑀢𑀯 𑀜𑀸𑀢𑀺𑀓𑀸𑀬𑀸’’𑀢𑀺 𑀅𑀯𑀢𑁆𑀯𑀸 ‘‘𑀏𑀓𑀺𑀲𑁆𑀲𑀸 𑀪𑀺𑀓𑁆𑀔𑀼𑀦𑀺𑀬𑀸’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀢𑁆𑀯𑀸, 𑀢𑁂 𑀳𑀺 ‘‘𑀏𑀓𑀺𑀲𑁆𑀲𑀸’’𑀢𑀺 𑀯𑀘𑀦𑀁 𑀲𑀼𑀢𑁆𑀯𑀸 𑀅𑀜𑁆𑀜𑀸𑀢𑀺𑀓𑀸𑀬 𑀲𑀦𑁆𑀢𑀓𑀲𑀜𑁆𑀜𑀺𑀦𑁄 𑀲𑀺𑀩𑁆𑀩𑁂𑀲𑀼𑀁. 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 ‘‘𑀘𑀻𑀯𑀭𑀁 𑀦𑀸𑀫 𑀙𑀦𑁆𑀦𑀁 𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭𑀁 𑀘𑀻𑀯𑀭’’𑀦𑁆𑀢𑀺 𑀏𑀢𑁆𑀢𑀓𑀫𑁂𑀯 𑀧𑀸𑀴𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀘𑀻𑀯𑀭𑀦𑁆𑀢𑀺 𑀬𑀁 𑀦𑀺𑀯𑀸𑀲𑁂𑀢𑀼𑀁 𑀯𑀸 𑀧𑀸𑀭𑀼𑀧𑀺𑀢𑀼𑀁 𑀯𑀸’’𑀢𑀺𑀆𑀤𑀺. ‘‘𑀯𑀺𑀓𑀧𑁆𑀧𑀦𑀼𑀧𑀕𑀁 𑀧𑀘𑁆𑀙𑀺𑀫’’𑀦𑁆𑀢𑀺 𑀘 𑀮𑀺𑀔𑀺𑀢𑀁, 𑀲𑁄 𑀧𑀫𑀸𑀤𑀮𑁂𑀔𑁄.

𑀘𑀻𑀯𑀭𑀲𑀺𑀩𑁆𑀩𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀲𑀁𑀯𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁮𑁧. 𑀢𑀸 𑀪𑀺𑀓𑁆𑀔𑀼𑀦𑀺𑀬𑁄 𑀤𑀽𑀲𑀬𑀺𑀁𑀲𑀽𑀢𑀺 𑀯𑀺𑀧𑀭𑀺𑀡𑀸𑀫𑁄 𑀓𑀸𑀢𑀩𑁆𑀩𑁄.

𑁧𑁮𑁨-𑁪. 𑀲𑀫𑁆𑀧𑀤𑀦𑁆𑀢𑀻𑀢𑀺 𑀧𑀤𑀲𑀸 𑀕𑀘𑁆𑀙𑀦𑁆𑀢𑀺. 𑀯𑀼𑀢𑁆𑀢𑀦𑀬𑁂𑀦𑁂𑀯𑀸𑀢𑀺 ‘‘𑀲𑀫𑁆𑀧𑀢𑀦𑁆𑀢𑀺 𑀏𑀢𑁆𑀣𑀸𑀢𑀺 𑀲𑀫𑁆𑀧𑀸𑀢𑁄’’𑀢𑀺𑀆𑀤𑀺𑀦𑀸. 𑀧𑀤𑀕𑀢𑁂 𑀉𑀧𑀘𑀸𑀭𑁄 𑀦 𑀮𑀩𑁆𑀪𑀢𑀺, 𑀅𑀘𑁆𑀘𑀸𑀲𑀦𑁆𑀦𑀢𑁆𑀢𑀸 𑀫𑀺𑀲𑁆𑀲𑀁 𑀯𑀺𑀬 𑀳𑁄𑀢𑀻𑀢𑀺. 𑀓𑀼𑀓𑁆𑀓𑀼𑀝𑀯𑀲𑁆𑀲𑀺𑀢𑀧𑀭𑀺𑀘𑁆𑀙𑀺𑀦𑁆𑀦𑁄 𑀫𑀳𑀸𑀅𑀝𑁆𑀞𑀓𑀣𑀸𑀬𑀁. ‘‘𑀢𑀫𑁆𑀧𑀺 𑀯𑁄𑀳𑀸𑀭𑁂𑀦𑀸’’𑀢𑀺 𑀮𑀺𑀔𑀺𑀢𑀁. ‘‘𑀬𑁂𑀪𑀼𑀬𑁆𑀬𑁂𑀦 𑀢𑀣𑀸 𑀲𑀦𑁆𑀦𑀺𑀯𑁂𑀲𑁄 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀦 𑀧𑀫𑀸𑀤𑀮𑁂𑀔𑁄’’𑀢𑀺 𑀘, ‘‘𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁, 𑀢𑀢𑁄 𑀉𑀤𑁆𑀥𑀁 𑀅𑀤𑁆𑀥𑀬𑁄𑀚𑀦𑀮𑀓𑁆𑀔𑀡𑀲𑀫𑁆𑀧𑀢𑁆𑀢𑀁 𑀦𑀸𑀫 𑀳𑁄𑀢𑀻𑀢𑀺 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀘 𑀯𑀼𑀢𑁆𑀢𑀁. ‘‘𑀓𑀧𑁆𑀧𑀺𑀬𑀪𑀽𑀫𑀺 𑀓𑀺𑀭𑀸𑀬𑀁…𑀧𑁂… 𑀦 𑀯𑀤𑀦𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀤𑀼𑀤𑁆𑀤𑀲𑀜𑁆𑀳𑁂𑀢𑁆𑀣 𑀓𑀸𑀭𑀡𑀁. 𑀓𑀢𑀭𑀁 𑀧𑀦 𑀢𑀦𑁆𑀢𑀺? ‘‘𑀕𑀘𑁆𑀙𑀸𑀫𑀸𑀢𑀺 𑀲𑀁𑀯𑀺𑀤𑀳𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 ‘‘𑀕𑀘𑁆𑀙𑀸𑀫𑀸’’𑀢𑀺 𑀯𑀢𑁆𑀢𑀫𑀸𑀦𑀯𑀘𑀦𑀦𑁆𑀢𑀜𑁆𑀘, 𑀅𑀫𑀕𑁆𑀕𑁂 𑀪𑀺𑀓𑁆𑀔𑀼𑀦𑀼𑀧𑀲𑁆𑀲𑀬𑀸𑀤𑀺𑀫𑁆𑀳𑀺 𑀦 𑀲𑀫𑁆𑀪𑀯𑀢𑀺𑀬𑁂𑀯 𑀫𑀦𑀼𑀲𑁆𑀲𑀸𑀦𑀁 𑀅𑀦𑁆𑀢𑀭𑀖𑀭𑀸𑀤𑀺𑀫𑁆𑀳𑀺 𑀫𑀕𑁆𑀕𑀲𑀗𑁆𑀔𑁂𑀧𑀕𑀫𑀦𑀢𑁄, 𑀉𑀘𑁆𑀘𑀸𑀲𑀬𑀦𑀸𑀤𑀺𑀉𑀧𑁆𑀧𑀢𑁆𑀢𑀺𑀝𑁆𑀞𑀸𑀦𑀢𑁆𑀢𑀸 𑀘. 𑀦 𑀢𑀺𑀢𑁆𑀣𑀺𑀬𑀲𑁂𑀬𑁆𑀬𑀸𑀬 𑀯𑀸 𑀧𑀩𑁆𑀩𑀚𑀺𑀢𑀸𑀯𑀸𑀲𑀢𑁆𑀢𑀸. 𑀤𑁆𑀯𑀸𑀭𑁂𑀢𑀺 𑀲𑀫𑀻𑀧𑀢𑁆𑀣𑁂 𑀪𑀼𑀫𑁆𑀫𑀁, 𑀢𑀲𑁆𑀫𑀸 𑀢𑀁 𑀤𑀲𑁆𑀲𑁂𑀢𑀼𑀁 𑀧𑀼𑀦 ‘‘𑀭𑀣𑀺𑀓𑀸𑀬𑀸’’𑀢𑀺 𑀆𑀳. 𑀲𑁂𑀲𑀅𑀝𑁆𑀞𑀓𑀣𑀸𑀬𑀁 ‘‘𑀏𑀢𑁆𑀣𑀦𑁆𑀢𑀭𑁂 𑀲𑀁𑀯𑀺𑀤𑀳𑀺𑀢𑁂𑀧𑀺 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝’’𑀦𑁆𑀢𑀺 𑀆𑀕𑀢𑀢𑁆𑀢𑀸 𑀦 𑀲𑀫𑁂𑀢𑀺. ‘‘𑀕𑀸𑀫𑀦𑁆𑀢𑀭𑁂’’𑀢𑀺 𑀯𑀘𑀦𑀢𑁄 𑀅𑀜𑁆𑀜𑀕𑀸𑀫𑀲𑁆𑀲 𑀉𑀧𑀘𑀸𑀭𑁄𑀓𑁆𑀓𑀫𑀦𑁂 𑀏𑀯 𑀆𑀧𑀢𑁆𑀢𑀺. ‘‘𑀅𑀤𑁆𑀥𑀬𑁄𑀚𑀦𑁂’’𑀢𑀺 𑀯𑀘𑀦𑀢𑁄 𑀅𑀢𑀺𑀓𑁆𑀓𑀫𑀦𑁂𑀬𑁂𑀯 𑀬𑀼𑀢𑁆𑀢𑀁.

𑁧𑁮𑁫. 𑀭𑀝𑁆𑀞𑀪𑁂𑀤𑁂𑀢𑀺 𑀯𑀺𑀮𑁄𑀧𑁂. 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 ‘‘𑀢𑀬𑁄𑀧𑀺 𑀲𑀗𑁆𑀓𑁂𑀢𑀸 𑀓𑀸𑀮𑀤𑀺𑀯𑀲𑀫𑀕𑁆𑀕𑀯𑀲𑁂𑀦, 𑀢𑀢𑁆𑀣 𑀧𑀘𑁆𑀙𑀺𑀫𑁂𑀦𑁂𑀯 𑀆𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀇𑀫𑀺𑀦𑀸 𑀫𑀕𑁆𑀕𑁂𑀦𑀸’’𑀢𑀺 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀅𑀜𑁆𑀜𑁂𑀦 𑀕𑀘𑁆𑀙𑀦𑁆𑀢𑀺 𑀘𑁂, 𑀆𑀧𑀢𑁆𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄.

𑀲𑀁𑀯𑀺𑀥𑀸𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀦𑀸𑀯𑀸𑀪𑀺𑀭𑀼𑀳𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁮𑁯. 𑀦𑀤𑀺𑀬𑀸 𑀓𑀼𑀢𑁄 𑀕𑀸𑀫𑀦𑁆𑀢𑀭𑀦𑁆𑀢𑀺 𑀘𑁂? ‘‘𑀬𑀲𑁆𑀲𑀸 𑀦𑀤𑀺𑀬𑀸’’𑀢𑀺𑀆𑀤𑀺𑀫𑀸𑀳. 𑀕𑀸𑀫𑀦𑁆𑀢𑀭𑀕𑀡𑀦𑀸𑀬𑀸𑀢𑀺 𑀬𑀲𑁆𑀫𑀺𑀁 𑀕𑀸𑀫𑀢𑀺𑀢𑁆𑀣𑁂 𑀆𑀭𑀼𑀴𑁆𑀳𑁄, 𑀢𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀕𑀸𑀫𑀕𑀡𑀦𑀸𑀬. ‘‘𑀫𑀸𑀢𑀼𑀕𑀸𑀫𑁄𑀧𑀺 𑀇𑀥 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻’’𑀢𑀺 𑀆𑀘𑀭𑀺𑀬𑀲𑁆𑀲 𑀢𑀓𑁆𑀓𑁄, 𑀢𑁂𑀦𑁂𑀯 ‘‘𑀉𑀪𑀬𑀢𑁆𑀣 𑀏𑀓𑀢𑁄 𑀉𑀧𑀲𑀫𑁆𑀧𑀦𑁆𑀦𑀸𑀬 𑀤𑀼𑀓𑁆𑀓𑀝𑀁, 𑀲𑀺𑀓𑁆𑀔𑀫𑀸𑀦𑀸𑀬 𑀲𑀸𑀫𑀡𑁂𑀭𑀺𑀬𑀸 𑀅𑀦𑀸𑀧𑀢𑁆𑀢𑀻’’𑀢𑀺 𑀘 𑀦 𑀯𑀼𑀢𑁆𑀢𑀁. 𑀏𑀲𑁂𑀯 𑀦𑀬𑁄 𑀅𑀜𑁆𑀜𑁂𑀲𑀼𑀧𑀺 𑀏𑀯𑀭𑀽𑀧𑁂𑀲𑀼.

𑁧𑁯𑁧. ‘‘𑀮𑁄𑀓𑀲𑁆𑀲𑀸𑀤𑀫𑀺𑀢𑁆𑀢𑀲𑀦𑁆𑀣𑀯𑀯𑀲𑁂𑀦 𑀓𑁂𑀴𑀺𑀧𑀼𑀭𑁂𑀓𑁆𑀔𑀸𑀭𑀸 𑀲𑀁𑀯𑀺𑀤𑀳𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀓𑀼𑀲𑀮𑀘𑀺𑀢𑁆𑀢𑀁 𑀮𑁄𑀓𑀯𑀚𑁆𑀚𑀦𑁆𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀦 𑀯𑀢𑁆𑀢𑀩𑁆𑀩𑀁, ‘‘𑀓𑁂𑀴𑀺𑀧𑀼𑀭𑁂𑀓𑁆𑀔𑀸𑀭𑀸’’𑀢𑀺 𑀯𑀘𑀦𑀁 𑀬𑁂𑀪𑀼𑀬𑁆𑀬𑀢𑀸𑀬 𑀯𑀼𑀢𑁆𑀢𑀁. 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀘 ‘‘𑀢𑀻𑀡𑀺 𑀘𑀺𑀢𑁆𑀢𑀸𑀦𑀺 𑀢𑀺𑀲𑁆𑀲𑁄 𑀯𑁂𑀤𑀦𑀸’’𑀢𑀺 𑀯𑀼𑀢𑁆𑀢𑀁, 𑀲𑀁𑀯𑀺𑀤𑀳𑀦𑀓𑀸𑀮𑁂 𑀯𑀸 𑀓𑁂𑀴𑀺𑀧𑀼𑀭𑁂𑀓𑁆𑀔𑀸𑀭𑁄 𑀪𑀺𑀓𑁆𑀔𑀼 𑀲𑀁𑀯𑀺𑀤𑀳𑀢𑀺, 𑀆𑀧𑀢𑁆𑀢𑀺 𑀪𑀺𑀓𑁆𑀔𑀼𑀦𑁄 𑀕𑀸𑀫𑀦𑁆𑀢𑀭𑁄𑀓𑁆𑀓𑀫𑀦𑁂, 𑀅𑀤𑁆𑀥𑀬𑁄𑀚𑀦𑀸𑀢𑀺𑀓𑁆𑀓𑀫𑁂 𑀯𑀸. 𑀓𑀼𑀲𑀮𑀘𑀺𑀢𑁆𑀢𑁄 𑀯𑀸 𑀳𑁄𑀢𑀺 𑀧𑀘𑁆𑀘𑀯𑁂𑀓𑁆𑀔𑀦𑁆𑀢𑁄, 𑀘𑁂𑀢𑀺𑀬𑀸𑀤𑀻𑀦𑀺 𑀯𑀸 𑀧𑀲𑁆𑀲𑀦𑁆𑀢𑁄, 𑀅𑀩𑁆𑀬𑀸𑀓𑀢𑀘𑀺𑀢𑁆𑀢𑁄 𑀯𑀸 𑀳𑁄𑀢𑀺 𑀓𑀺𑀮𑀫𑀣𑀯𑀲𑁂𑀦 𑀦𑀺𑀤𑁆𑀤𑀸𑀬𑀦𑁆𑀢𑁄𑀢𑀺 𑀢𑀺𑀘𑀺𑀢𑁆𑀢𑀸𑀦𑀺 𑀕𑀳𑀺𑀢𑀸𑀦𑀻𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀦𑀸𑀯𑀸𑀪𑀺𑀭𑀼𑀳𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀧𑀭𑀺𑀧𑀸𑀘𑀺𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁯𑁨. 𑀘𑁂𑀝𑀓𑁂𑀢𑀺 𑀤𑀸𑀭𑀓𑁂. 𑀢𑀭𑀼𑀡𑀧𑁄𑀢𑀓𑁂𑀢𑀺 𑀧𑁄𑀭𑀸𑀡𑀸. ‘‘𑀧𑀸𑀧𑀪𑀺𑀓𑁆𑀔𑀽𑀦𑀁 𑀧𑀓𑁆𑀔𑀼𑀧𑀘𑁆𑀙𑁂𑀤𑀸𑀬 𑀇𑀤𑀁 𑀧𑀜𑁆𑀜𑀢𑁆𑀢𑀁, 𑀢𑀲𑁆𑀫𑀸 𑀧𑀜𑁆𑀘 𑀪𑁄𑀚𑀦𑁂𑀬𑁂𑀯𑀸𑀧𑀢𑁆𑀢𑀺 𑀯𑀼𑀢𑁆𑀢𑀸’’𑀢𑀺 𑀮𑀺𑀔𑀺𑀢𑀁.

𑁧𑁯𑁪-𑁭. 𑀦𑀺𑀧𑁆𑀨𑀸𑀤𑀺𑀢𑀦𑁆𑀢𑀺 𑀯𑀺𑀜𑁆𑀜𑀢𑁆𑀢𑀺𑀬𑀸 𑀦 𑀳𑁄𑀢𑀺, 𑀓𑀺𑀦𑁆𑀢𑀼 𑀧𑀭𑀺𑀓𑀣𑀸𑀤𑀻𑀳𑀺, 𑀢𑀲𑁆𑀫𑀸 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀅𑀦𑀸𑀧𑀢𑁆𑀢𑀺, 𑀢𑀁 𑀲𑀦𑁆𑀥𑀸𑀬 ‘‘𑀲𑀩𑁆𑀩𑀢𑁆𑀣 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁. ‘‘𑀓𑀣𑀸𑀦𑀼𑀲𑀸𑀭𑁂𑀦 𑀢𑀢𑁆𑀣 𑀧𑀲𑀻𑀤𑀺𑀢𑁆𑀯𑀸 𑀤𑁂𑀦𑁆𑀢𑀺, 𑀇𑀤𑀁 𑀧𑀭𑀺𑀧𑀸𑀘𑀺𑀢𑀁 𑀦 𑀳𑁄𑀢𑀺, 𑀯𑀝𑁆𑀝𑀦𑁆𑀢𑀻’’𑀢𑀺 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀢𑁆𑀢𑀸𑀢𑀺 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁄, 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄 𑀧𑀦 ‘‘𑀇𑀢𑀭𑀫𑁆𑀧𑀺 𑀯𑀝𑁆𑀝𑀢𑀺𑀬𑁂𑀯𑀸’’𑀢𑀺 𑀆𑀳. 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀬𑀲𑁆𑀫𑀸 𑀤𑁂𑀯𑀤𑀢𑁆𑀢𑁄 𑀧𑀓𑀢𑀺𑀬𑀸 𑀢𑀢𑁆𑀣 𑀪𑀺𑀓𑁆𑀔𑀼𑀦𑀺𑀧𑀭𑀺𑀧𑀸𑀘𑀺𑀢𑀁 𑀪𑀼𑀜𑁆𑀚𑀢𑀺, 𑀢𑀲𑁆𑀫𑀸 𑀇𑀫𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀁 𑀦𑀺𑀤𑀸𑀦𑀁 𑀓𑀢𑁆𑀯𑀸 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁.

𑀧𑀭𑀺𑀧𑀸𑀘𑀺𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀭𑀳𑁄𑀦𑀺𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁧𑁯𑁮. ‘‘𑀉𑀧𑀦𑀦𑁆𑀤𑀲𑁆𑀲 𑀘𑀢𑀼𑀢𑁆𑀣𑀲𑀺𑀓𑁆𑀔𑀸𑀧𑀤𑁂𑀦 𑀘𑀸’’𑀢𑀺 𑀧𑀸𑀞𑁄.

𑀭𑀳𑁄𑀦𑀺𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀲𑀫𑀢𑁆𑀢𑁄 𑀯𑀡𑁆𑀡𑀦𑀸𑀓𑁆𑀓𑀫𑁂𑀦 𑀑𑀯𑀸𑀤𑀯𑀕𑁆𑀕𑁄 𑀢𑀢𑀺𑀬𑁄.

𑁪. 𑀪𑁄𑀚𑀦𑀯𑀕𑁆𑀕𑁄

𑁧. 𑀆𑀯𑀲𑀣𑀧𑀺𑀡𑁆𑀟𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁦𑁩-𑁪. 𑀧𑀽𑀕𑀲𑁆𑀲𑀸𑀢𑀺 𑀧𑀽𑀕𑁂𑀦. 𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑁄𑀢𑀺 𑀦𑀺𑀲𑁆𑀲𑀭𑀡𑁂𑀦𑁂𑀢𑁆𑀣 𑀪𑀯𑀺𑀢𑀩𑁆𑀩𑀁, 𑀢𑀁 𑀫𑀬𑀁 𑀦 𑀚𑀸𑀦𑀸𑀫𑀸𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀲𑁆𑀲 𑀓𑀭𑀡𑀯𑀲𑁂𑀦 ‘‘𑀓𑀼𑀓𑁆𑀓𑀼𑀘𑁆𑀘𑀸𑀬𑀦𑁆𑀢𑁄’’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸 𑀳𑀺 𑀆𑀬𑀲𑁆𑀫𑀸 𑀉𑀧𑀸𑀮𑀺 𑀦𑀬𑀕𑁆𑀕𑀸𑀳𑁂𑀦 ‘‘𑀅𑀦𑀸𑀧𑀢𑁆𑀢𑀺 𑀆𑀯𑀼𑀲𑁄 𑀲𑀼𑀧𑀺𑀦𑀦𑁆𑀢𑁂𑀦𑀸’’𑀢𑀺 (𑀧𑀸𑀭𑀸. 𑁭𑁮) 𑀆𑀳, 𑀢𑀣𑀸 𑀣𑁂𑀭𑁄𑀧𑀺 ‘‘𑀅𑀦𑀸𑀧𑀢𑁆𑀢𑀺 𑀕𑀺𑀮𑀸𑀦𑀲𑁆𑀲𑀸’’𑀢𑀺 𑀓𑀲𑁆𑀫𑀸 𑀦 𑀧𑀭𑀺𑀘𑁆𑀙𑀺𑀦𑁆𑀤𑀢𑀻𑀢𑀺? 𑀅𑀦𑀢𑁆𑀢𑀸𑀥𑀺𑀓𑀸𑀭𑀢𑁆𑀢𑀸 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸, ‘‘𑀦𑀸𑀬𑀁 𑀅𑀢𑁆𑀢𑀦𑁄 𑀑𑀓𑀸𑀲𑁄’’𑀢𑀺 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸, 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀧𑀭𑀺𑀧𑀼𑀡𑁆𑀡𑀢𑁆𑀢𑀸. 𑀧𑀞𑀫𑀧𑀸𑀭𑀸𑀚𑀺𑀓𑀲𑀺𑀓𑁆𑀔𑀸𑀧𑀤𑁂 𑀧𑀭𑀺𑀧𑀼𑀡𑁆𑀡𑀁 𑀓𑀢𑁆𑀯𑀸 𑀧𑀜𑁆𑀜𑀢𑁆𑀢𑁂𑀬𑁂𑀯 𑀳𑀺 𑀲𑁄 𑀣𑁂𑀭𑁄 ‘‘𑀅𑀦𑀸𑀧𑀢𑁆𑀢𑀺 𑀲𑀼𑀧𑀺𑀦𑀦𑁆𑀢𑁂𑀦𑀸’’𑀢𑀺 𑀆𑀳 ‘‘𑀅𑀜𑁆𑀜𑀢𑁆𑀭 𑀲𑀼𑀧𑀺𑀦𑀦𑁆𑀢𑀸’’𑀢𑀺 𑀯𑀼𑀢𑁆𑀢𑀧𑀤𑀸𑀦𑀼𑀲𑀸𑀭𑁂𑀦𑀸𑀢𑀺. 𑀬𑀲𑁆𑀫𑀸 𑀑𑀤𑀺𑀲𑁆𑀲 𑀅𑀬𑀸𑀯𑀤𑀢𑁆𑀣𑁂𑀯 𑀤𑀸𑀬𑀓𑀸𑀦𑀁 𑀧𑀻𑀴𑀸 𑀦𑀢𑁆𑀣𑀺, 𑀢𑀲𑁆𑀫𑀸 ‘‘𑀅𑀦𑁄𑀤𑀺𑀲𑁆𑀲 𑀬𑀸𑀯𑀤𑀢𑁆𑀣𑁄’’𑀢𑀺 𑀯𑀼𑀢𑁆𑀢𑀁.

𑁨𑁦𑁮. ‘‘𑀅𑀦𑁆𑀢𑀭𑀸𑀫𑀕𑁆𑀕𑁂 𑀏𑀓𑀤𑀺𑀯𑀲’𑀦𑁆𑀢𑀺 𑀏𑀓𑀁𑀬𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀘 ‘‘𑀏𑀲𑁂𑀯 𑀦𑀬𑁄𑀢𑀺 𑀯𑀼𑀢𑁆𑀢𑀦𑀬𑀫𑁂𑀯 𑀤𑀲𑁆𑀲𑁂𑀢𑀼𑀁 𑀕𑀦𑁆𑀢𑁆𑀯𑀸 𑀧𑀘𑁆𑀘𑀸𑀕𑀘𑁆𑀙𑀦𑁆𑀢𑁄 𑀳𑀻𑀢𑀺𑀆𑀤𑀺𑀫𑀸𑀳𑀸’’𑀢𑀺 𑀘 ‘‘𑀲𑀼𑀤𑁆𑀥𑀘𑀺𑀢𑁆𑀢𑁄 𑀳𑀼𑀢𑁆𑀯𑀸 𑀧𑀓𑀢𑀺𑀕𑀫𑀦𑁂𑀯 𑀪𑀼𑀜𑁆𑀚𑀺𑀢𑀼𑀁 𑀮𑀪𑀢𑀻’’𑀢𑀺 𑀘 ‘‘𑀅𑀕𑀺𑀮𑀸𑀦𑀲𑁆𑀲 𑀕𑀺𑀮𑀸𑀦𑀲𑀜𑁆𑀜𑀺𑀦𑁄 𑀓𑀸𑀬𑁂𑀦 𑀲𑀫𑀼𑀝𑁆𑀞𑀸𑀢𑀻’’𑀢𑀺 𑀘 𑀮𑀺𑀔𑀺𑀢𑀁.

𑀆𑀯𑀲𑀣𑀧𑀺𑀡𑁆𑀟𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀕𑀡𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁦𑁯-𑁨𑁧𑁮. 𑀕𑀼𑀴𑁆𑀳𑀧𑀝𑀺𑀘𑁆𑀙𑀦𑁆𑀦𑁄𑀢𑀺 𑀅𑀧𑀸𑀓𑀝𑁄𑀯. 𑀏𑀓𑁄 𑀧𑀼𑀢𑁆𑀢𑁂𑀦𑀸𑀢𑀺 𑀏𑀓𑀲𑁆𑀲𑁂𑀓𑀁 𑀪𑀢𑁆𑀢𑀁 ‘‘𑀅𑀳𑀁 𑀅𑀜𑁆𑀜𑁂𑀦 𑀦𑀺𑀫𑀦𑁆𑀢𑀺𑀢𑁄’’𑀢𑀺 𑀦 𑀯𑀼𑀘𑁆𑀘𑀢𑀺. ‘‘𑀲𑀘𑁂 𑀏𑀓𑀢𑁄 𑀕𑀡𑁆𑀳𑀦𑁆𑀢𑀺 , 𑀕𑀡𑀪𑁄𑀚𑀦𑀁 𑀳𑁄𑀢𑀻’’𑀢𑀺 (𑀧𑀸𑀘𑀺. 𑀅𑀝𑁆𑀞. 𑁨𑁧𑁭-𑁨𑁧𑁮) 𑀯𑀼𑀢𑁆𑀢𑀢𑁆𑀢𑀸 𑀘𑀢𑁆𑀢𑀸𑀭𑁄 𑀉𑀧𑀸𑀲𑀓𑀸 𑀘𑀢𑁆𑀢𑀸𑀭𑁄 𑀪𑀺𑀓𑁆𑀔𑀽 𑀯𑀺𑀲𑀼𑀁 𑀯𑀺𑀲𑀼𑀁 𑀦𑀺𑀫𑀦𑁆𑀢𑁂𑀢𑁆𑀯𑀸 𑀳𑀢𑁆𑀣𑀧𑀸𑀲𑁂 𑀞𑀺𑀢𑀸𑀦𑀁 𑀘𑁂 𑀤𑁂𑀦𑁆𑀢𑀺, 𑀕𑀡𑀪𑁄𑀚𑀦𑀁 𑀳𑁄𑀢𑀺 𑀏𑀯𑀸𑀢𑀺 𑀏𑀓𑁂, 𑀢𑀁 𑀦 𑀬𑀼𑀢𑁆𑀢𑀁 𑀯𑀺𑀬. ‘‘𑀯𑀺𑀜𑁆𑀜𑀢𑁆𑀢𑀺𑀢𑁄 𑀧𑀲𑀯𑀦𑁂 𑀕𑀡𑀲𑁆𑀲 𑀏𑀓𑀢𑁄 𑀕𑀳𑀡𑁂 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀆𑀧𑀢𑁆𑀢𑀺, 𑀯𑀺𑀲𑀼𑀁 𑀕𑀳𑀡𑁂 𑀧𑀡𑀻𑀢𑀪𑁄𑀚𑀦𑀲𑀽𑀧𑁄𑀤𑀦𑀯𑀺𑀜𑁆𑀜𑀢𑁆𑀢𑀻𑀳𑀻’’𑀢𑀺 𑀮𑀺𑀔𑀺𑀢𑀁. ‘‘𑀯𑀺𑀜𑁆𑀜𑀢𑁆𑀢𑀺𑀢𑁄 𑀧𑀲𑀯𑀦𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀅𑀝𑁆𑀞𑀓𑀣𑀸𑀬𑀁 𑀅𑀦𑀼𑀜𑁆𑀜𑀸𑀢𑀁. 𑀲𑀽𑀧𑁄𑀤𑀦𑀸𑀤𑀺𑀯𑀲𑁂𑀦 𑀢𑀢𑁆𑀣 𑀆𑀧𑀢𑁆𑀢𑀺 𑀏𑀯𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀦 𑀬𑀼𑀢𑁆𑀢𑀁. 𑀓𑀲𑁆𑀫𑀸? 𑀧𑀭𑀺𑀯𑀸𑀭𑁂 (𑀧𑀭𑀺. 𑁧𑁬𑁮) 𑀏𑀯 𑀤𑁆𑀯𑀺𑀦𑁆𑀦𑀁 𑀆𑀓𑀸𑀭𑀸𑀦𑀁 𑀆𑀕𑀢𑀢𑁆𑀢𑀸, 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀦𑀼𑀜𑁆𑀜𑀸𑀢’’𑀦𑁆𑀢𑀺 𑀤𑀼𑀯𑀼𑀢𑁆𑀢𑀁. 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁𑀬𑁂𑀯 𑀧𑀸𑀓𑀝𑀦𑁆𑀢𑀺 ‘‘𑀧𑀤𑀪𑀸𑀚𑀦𑁂 𑀦 𑀯𑀼𑀢𑁆𑀢’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁. 𑀏𑀓𑀢𑁄 𑀕𑀡𑁆𑀳𑀦𑁆𑀢𑀻𑀢𑀺 𑀕𑀳𑀺𑀢𑀪𑀢𑁆𑀢𑀸𑀧𑀺 𑀅𑀜𑁆𑀜𑁂 𑀬𑀸𑀯 𑀕𑀡𑁆𑀳𑀦𑁆𑀢𑀺, 𑀢𑀸𑀯 𑀘𑁂 𑀢𑀺𑀝𑁆𑀞𑀦𑁆𑀢𑀺, 𑀏𑀓𑀢𑁄 𑀕𑀡𑁆𑀳𑀦𑁆𑀢𑀺𑀬𑁂𑀯 𑀦𑀸𑀫. ‘‘𑀕𑀘𑁆𑀙𑀢𑀺 𑀘𑁂, 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀤𑀦𑁆𑀢𑀺.

𑀏𑀢𑁆𑀣𑀸𑀳 𑁋 ‘‘𑀧𑀝𑀺𑀕𑁆𑀕𑀳𑀡𑀫𑁂𑀯 𑀳𑁂𑀢𑁆𑀣 𑀧𑀫𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀁, 𑀅𑀣 𑀓𑀲𑁆𑀫𑀸 𑀧𑀸𑀴𑀺𑀬𑀁 ‘‘𑀕𑀡𑀪𑁄𑀚𑀦𑀁 𑀦𑀸𑀫 𑀬𑀢𑁆𑀣 𑀘𑀢𑁆𑀢𑀸𑀭𑁄…𑀧𑁂… 𑀪𑀼𑀜𑁆𑀚𑀦𑁆𑀢𑀺, 𑀏𑀢𑀁 𑀕𑀡𑀪𑁄𑀚𑀦𑀁 𑀦𑀸𑀫𑀸’’𑀢𑀺 (𑀧𑀸𑀘𑀺. 𑁨𑁧𑁮) 𑀯𑀼𑀢𑁆𑀢𑀦𑁆𑀢𑀺? 𑀯𑀼𑀘𑁆𑀘𑀢𑀺 𑁋 𑀬𑀢𑁆𑀣𑀸𑀢𑀺 𑀉𑀧𑀬𑁄𑀕𑀢𑁆𑀣𑁂 𑀪𑀼𑀫𑁆𑀫𑀯𑀘𑀦𑀁. 𑀘𑀢𑁆𑀢𑀸𑀭𑁄𑀢𑀺 𑀕𑀡𑀲𑁆𑀲 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑀦𑀺𑀤𑀲𑁆𑀲𑀦𑀁. 𑀧𑀜𑁆𑀘𑀦𑁆𑀦𑀁 𑀪𑁄𑀚𑀦𑀸𑀦𑀦𑁆𑀢𑀺 𑀆𑀧𑀢𑁆𑀢𑀺𑀧𑁆𑀧𑀳𑁄𑀦𑀓𑀪𑁄𑀚𑀦𑀦𑀺𑀤𑀲𑁆𑀲𑀦𑀁. 𑀅𑀜𑁆𑀜𑀢𑀭𑁂𑀦 𑀪𑁄𑀚𑀦𑁂𑀦 𑀦𑀺𑀫𑀦𑁆𑀢𑀺𑀢𑀸𑀢𑀺 𑀅𑀓𑀧𑁆𑀧𑀺𑀬𑀦𑀺𑀫𑀦𑁆𑀢𑀦𑀦𑀺𑀤𑀲𑁆𑀲𑀦𑀁. 𑀦𑀺𑀫𑀦𑁆𑀢𑀦𑀯𑀲𑁂𑀦𑁂𑀯 𑀧𑀦 𑀕𑀡𑀪𑁄𑀚𑀦𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 ‘‘𑀦𑀺𑀫𑀦𑁆𑀢𑀺𑀢𑀸 𑀪𑀼𑀜𑁆𑀚𑀦𑁆𑀢𑀻𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀅𑀜𑁆𑀜𑀢𑀭𑀁 𑀪𑁄𑀚𑀦𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀻’’𑀢𑀺 𑀧𑀦 𑀦 𑀯𑀼𑀢𑁆𑀢𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀬𑀁𑀬𑁂𑀯 𑀧𑀸𑀓𑀝𑀢𑁆𑀢𑀸. 𑀬𑀁 𑀪𑀼𑀜𑁆𑀚𑀦𑁆𑀢𑀻𑀢𑀺 𑀏𑀯𑀁 𑀲𑀫𑁆𑀩𑀦𑁆𑀥𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀪𑀼𑀜𑁆𑀚𑀦𑁆𑀢𑀻𑀢𑀺 𑀧𑀝𑀺𑀕𑁆𑀕𑀸𑀳𑀓𑀦𑀺𑀬𑀫𑀯𑀘𑀦𑀁. 𑀦 𑀳𑀺 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀓𑀁 𑀪𑀺𑀓𑁆𑀔𑀽 𑀪𑀼𑀜𑁆𑀚𑀦𑁆𑀢𑀺. 𑀇𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺 ‘‘𑀕𑀡𑀲𑁆𑀲 𑀬𑀢𑁄 𑀧𑀝𑀺𑀕𑁆𑀕𑀳𑀺𑀢𑀸𑀳𑀸𑀭𑀪𑁄𑀚𑀦𑀳𑁂𑀢𑀼 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺. 𑀆𑀕𑀦𑁆𑀢𑀼𑀓𑀧𑀝𑁆𑀝𑀁 𑀫𑁄𑀖𑀲𑀼𑀢𑁆𑀢𑁂𑀦 𑀲𑀺𑀩𑁆𑀩𑀺𑀢𑁆𑀯𑀸 𑀞𑀧𑁂𑀦𑁆𑀢𑀺, 𑀢𑀢𑁆𑀣 𑀅𑀦𑀼𑀯𑀸𑀢𑁂 𑀬𑀣𑀸 𑀏𑀓𑀢𑀮𑀁 𑀳𑁄𑀢𑀺, 𑀢𑀣𑀸 𑀳𑀢𑁆𑀣𑁂𑀳𑀺 𑀖𑀝𑁆𑀝𑁂𑀢𑀺. 𑀯𑀮𑁂𑀢𑀻𑀢𑀺 𑀆𑀯𑀝𑁆𑀝𑁂𑀢𑀺. 𑀧𑀭𑀺𑀯𑀢𑁆𑀢𑀦𑀦𑁆𑀢𑀺 𑀲𑀼𑀢𑁆𑀢𑀁 𑀕𑀡𑁆𑀳𑀦𑁆𑀢𑀸𑀦𑀁 𑀲𑀼𑀔𑀕𑁆𑀕𑀳𑀡𑀢𑁆𑀣𑀁 𑀲𑀼𑀢𑁆𑀢𑀧𑀭𑀺𑀯𑀢𑁆𑀢𑀦𑀁 𑀓𑀭𑁄𑀢𑀺, 𑀧𑀝𑁆𑀝𑀁 𑀲𑀺𑀩𑁆𑀩𑀦𑁆𑀢𑀸𑀦𑀁 𑀲𑀼𑀔𑀲𑀺𑀩𑁆𑀩𑀦𑀢𑁆𑀣𑀁 𑀧𑀝𑁆𑀝𑀧𑀭𑀺𑀯𑀢𑁆𑀢𑀦𑀜𑁆𑀘. 𑀦𑀯𑀘𑀻𑀯𑀭𑀓𑀸𑀭𑀓𑁄 𑀇𑀥𑀸𑀥𑀺𑀧𑁆𑀧𑁂𑀢𑁄, 𑀦 𑀇𑀢𑀭𑁄𑀢𑀺. ‘‘𑀩𑀺𑀫𑁆𑀩𑀺𑀲𑀸𑀭𑀁 𑀆𑀧𑀼𑀘𑁆𑀙𑀺𑀢𑁆𑀯𑀸 𑀲𑀫𑁆𑀪𑀸𑀭𑁂 𑀓𑀬𑀺𑀭𑀫𑀸𑀦𑁂𑀬𑁂𑀯 𑀓𑀸𑀮𑀸 𑀅𑀢𑀺𑀓𑁆𑀓𑀦𑁆𑀢𑀸, 𑀧𑀘𑁆𑀙𑀸 𑀕𑀡𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑁂 𑀧𑀜𑁆𑀜𑀢𑁆𑀢𑁂 𑀪𑀕𑀯𑀦𑁆𑀢𑀁 𑀉𑀧𑀲𑀗𑁆𑀓𑀫𑀺𑀢𑁆𑀯𑀸 𑀧𑀼𑀘𑁆𑀙𑀻’’𑀢𑀺 𑀯𑀤𑀦𑁆𑀢𑀺, 𑀅𑀜𑁆𑀜𑀣𑀸 𑀅𑀝𑁆𑀞𑀓𑀣𑀸𑀬 𑀯𑀺𑀭𑀼𑀚𑁆𑀛𑀦𑀢𑁄.

𑁨𑁨𑁦. ‘‘𑀤𑁆𑀯𑁂 𑀢𑀬𑁄 𑀏𑀓𑀢𑁄𑀢𑀺 𑀬𑁂𑀧𑀺 𑀅𑀓𑀧𑁆𑀧𑀺𑀬𑀦𑀺𑀫𑀦𑁆𑀢𑀦𑀁 𑀲𑀸𑀤𑀺𑀬𑀺𑀢𑁆𑀯𑀸’’𑀢𑀺𑀆𑀤𑀺𑀯𑀘𑀦𑁂𑀦 𑀅𑀓𑀧𑁆𑀧𑀺𑀬𑀦𑀺𑀫𑀦𑁆𑀢𑀦𑀧𑀘𑁆𑀘𑀬𑀸 𑀏𑀯 𑀅𑀦𑀸𑀧𑀢𑁆𑀢𑀺, 𑀯𑀺𑀜𑁆𑀜𑀢𑁆𑀢𑀺𑀢𑁄 𑀆𑀧𑀢𑁆𑀢𑀺𑀬𑁂𑀯𑀸𑀢𑀺 𑀤𑀻𑀧𑁂𑀢𑀺. 𑀅𑀦𑀺𑀫𑀦𑁆𑀢𑀺𑀢𑁄 𑀘𑀢𑀼𑀢𑁆𑀣𑁄 𑀬𑀲𑁆𑀲 𑀢𑀤𑁂𑀢𑀁 𑀅𑀦𑀺𑀫𑀦𑁆𑀢𑀺𑀢𑀘𑀢𑀼𑀢𑁆𑀣𑀁. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. 𑀧𑀯𑁂𑀲𑁂𑀢𑁆𑀯𑀸𑀢𑀺 𑀦𑀺𑀲𑀻𑀤𑀸𑀧𑁂𑀢𑁆𑀯𑀸. 𑀘𑀻𑀯𑀭𑀤𑀸𑀦𑀲𑀫𑀬𑀮𑀤𑁆𑀥𑀓𑀘𑀢𑀼𑀓𑁆𑀓𑀁 𑀘𑀻𑀯𑀭𑀓𑀸𑀭𑀲𑀫𑀬𑀮𑀤𑁆𑀥𑀓𑀘𑀢𑀼𑀓𑁆𑀓𑀦𑁆𑀢𑀺 𑀏𑀯𑀫𑀸𑀤𑀻𑀦𑀺. 𑀢𑀸𑀦𑀺 𑀘𑀸𑀢𑀺 𑀬𑁂𑀳𑀺 𑀪𑁄𑀚𑀦𑁂𑀳𑀺 𑀯𑀺𑀲𑀗𑁆𑀓𑁂𑀢𑁄 𑀦𑀢𑁆𑀣𑀺, 𑀢𑀸𑀦𑀺. 𑀫𑀳𑀸𑀣𑁂𑀭𑁂𑀢𑀺 𑀉𑀧𑀲𑀫𑁆𑀧𑀦𑁆𑀦𑁂. 𑀅𑀝𑁆𑀞𑀢𑁆𑀯𑀸𑀢𑀺 𑀞𑀺𑀢𑁂𑀦 𑀦𑀺𑀫𑀺𑀢𑁆𑀢𑀁 𑀤𑀲𑁆𑀲𑀺𑀢𑀁 𑀳𑁄𑀢𑀺. 𑀢𑀢𑁆𑀣 𑀢𑀢𑁆𑀣 𑀕𑀦𑁆𑀢𑁆𑀯𑀸𑀢𑀺 𑀭𑀣𑀺𑀓𑀸𑀤𑀻𑀲𑀼 𑀪𑀺𑀓𑁆𑀔𑀼𑀲𑀫𑀻𑀧𑁂 𑀕𑀦𑁆𑀢𑁆𑀯𑀸. 𑀇𑀫𑀲𑁆𑀫𑀺𑀁 𑀧𑀦 𑀲𑀺𑀓𑁆𑀔𑀸𑀧𑀤𑁂 𑀓𑀢𑁆𑀣𑀘𑀺 𑀧𑁄𑀢𑁆𑀣𑀓𑁂 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀘𑀻𑀯𑀭𑀤𑀸𑀦𑀲𑀫𑀬𑁂 𑀕𑀡𑀪𑁄𑀚𑀦𑀁 𑀪𑀼𑀜𑁆𑀚𑀺𑀢𑀼𑀁. 𑀏𑀯𑀜𑁆𑀘𑀺𑀤𑀁 𑀪𑀕𑀯𑀢𑀸 𑀪𑀺𑀓𑁆𑀔𑀽𑀦’’𑀦𑁆𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺. 𑀓𑀢𑁆𑀣𑀘𑀺 ‘‘𑀪𑀼𑀜𑁆𑀚𑀺𑀢𑀼’’𑀦𑁆𑀢𑀺 𑀯𑀢𑁆𑀯𑀸 ‘‘𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣𑀸’’𑀢𑀺 𑀧𑀸𑀞𑁄, 𑀅𑀬𑀁 𑀲𑁄𑀪𑀦𑁄.

𑀕𑀡𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀧𑀭𑀫𑁆𑀧𑀭𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁨𑁨𑁧. 𑀅𑀥𑀺𑀝𑁆𑀞𑀺𑀢𑀸𑀢𑀺 𑀦𑀺𑀘𑁆𑀘𑀧𑁆𑀧𑀯𑀢𑁆𑀢𑀸. 𑀩𑀤𑀭𑀘𑀼𑀡𑁆𑀡𑀲𑀓𑁆𑀓𑀭𑀸𑀤𑀻𑀳𑀺 𑀬𑁄𑀚𑀺𑀢𑀁 𑀩𑀤𑀭𑀲𑀸𑀴𑀯𑀁. 𑀓𑀺𑀭𑀓𑀫𑁆𑀫𑀓𑀸𑀭𑁂𑀦𑀸𑀢𑀺 𑀓𑀺𑀭𑀲𑁆𑀲 𑀓𑀫𑁆𑀫𑀓𑀸𑀭𑁂𑀦.

𑁨𑁨𑁬. ‘‘𑀯𑀺𑀓𑀧𑁆𑀧𑁂𑀢𑁆𑀯𑀸 𑀕𑀡𑁆𑀳𑀸𑀳𑀻’’𑀢𑀺 𑀏𑀢𑁆𑀣𑀸𑀳𑀼 𑀧𑁄𑀭𑀸𑀡𑀢𑁆𑀣𑁂𑀭𑀸 ‘‘𑀪𑀕𑀯𑀢𑁄 𑀲𑀫𑁆𑀫𑀼𑀔𑀸 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀕𑁂𑀳𑀢𑁄 𑀦𑀺𑀓𑁆𑀔𑀫𑀺𑀢𑁆𑀯𑀸 𑀭𑀣𑀺𑀓𑀸𑀬 𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀲𑀦𑁆𑀢𑀺𑀓𑁂 𑀯𑀺𑀓𑀧𑁆𑀧𑁂𑀲𑀺, 𑀯𑀺𑀓𑀧𑁆𑀧𑁂𑀦𑁆𑀢𑁂𑀦 𑀧𑀦 ‘𑀫𑀬𑁆𑀳𑀁 𑀪𑀢𑁆𑀢𑀧𑀘𑁆𑀘𑀸𑀲𑀁 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑀫𑁆𑀫𑀻’𑀢𑀺 𑀯𑀢𑁆𑀢𑀩𑁆𑀩𑀁, 𑀇𑀢𑀭𑁂𑀦 𑀯𑀢𑁆𑀢𑀩𑁆𑀩𑀁 ‘𑀢𑀲𑁆𑀲 𑀲𑀦𑁆𑀢𑀓𑀁 𑀧𑀭𑀺𑀪𑀼𑀜𑁆𑀚 𑀯𑀸 𑀬𑀣𑀸𑀧𑀘𑁆𑀘𑀬𑀁 𑀯𑀸 𑀓𑀭𑁄𑀳𑀻’’’𑀢𑀺. 𑀧𑀜𑁆𑀘𑀲𑀼𑀲𑀳𑀥𑀫𑁆𑀫𑀺𑀓𑁂𑀲𑀽𑀢𑀺 𑀲𑀫𑁆𑀫𑀼𑀔𑀸 𑀞𑀺𑀢𑀲𑁆𑀲 𑀲𑀳𑀥𑀫𑁆𑀫𑀺𑀓𑀲𑁆𑀲 𑀬𑀲𑁆𑀲 𑀯𑀺𑀓𑀧𑁆𑀧𑁂𑀢𑀼𑀓𑀸𑀫𑁄, 𑀢𑀁 𑀲𑀳𑀥𑀫𑁆𑀫𑀺𑀓𑀁 𑀅𑀤𑀺𑀲𑁆𑀯𑀸 𑀕𑀳𑀝𑁆𑀞𑀲𑁆𑀲 𑀯𑀸 𑀲𑀦𑁆𑀢𑀺𑀓𑁂, 𑀲𑀬𑀫𑁂𑀯 𑀯𑀸 ‘‘𑀧𑀜𑁆𑀘𑀲𑀼 𑀲𑀳𑀥𑀫𑁆𑀫𑀺𑀓𑁂𑀲𑀼 𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀯𑀺𑀓𑀧𑁆𑀧𑁂𑀫𑀻’’𑀢𑀺 𑀯𑀢𑁆𑀯𑀸 𑀪𑀼𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀏𑀓𑁂, 𑀏𑀯𑀁 𑀲𑀢𑀺 𑀣𑁂𑀭𑁄 𑀢𑀲𑁆𑀫𑀺𑀁𑀬𑁂𑀯 𑀦𑀺𑀲𑀺𑀦𑁆𑀦𑁄𑀯 𑀢𑀣𑀸 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀢𑁆𑀯𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀻𑀢𑀺 𑀢𑀓𑁆𑀓𑁄 𑀤𑀺𑀲𑁆𑀲𑀢𑀺. 𑀫𑀳𑀸𑀧𑀘𑁆𑀘𑀭𑀺𑀬𑀸𑀤𑀻𑀲𑀼 𑀧𑀦 𑀧𑀭𑀫𑁆𑀫𑀼𑀔𑀸 𑀯𑀺𑀓𑀧𑁆𑀧𑀦𑀸𑀯 𑀯𑀼𑀢𑁆𑀢𑀸, 𑀲𑀸 ‘‘𑀢𑁂𑀦 𑀳𑀸𑀦𑀦𑁆𑀤, 𑀯𑀺𑀓𑀧𑁆𑀧𑁂𑀢𑁆𑀯𑀸 𑀕𑀡𑁆𑀳𑀸𑀳𑀻’’𑀢𑀺 𑀇𑀫𑀺𑀦𑀸 𑀲𑀫𑁂𑀢𑀺, 𑀢𑀣𑀸𑀧𑀺 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀧𑀭𑀫𑁆𑀧𑀭𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀢𑀲𑁆𑀫𑀸 𑀬𑁄 𑀪𑀺𑀓𑁆𑀔𑀼 𑀧𑀜𑁆𑀘𑀲𑀼 𑀲𑀳𑀥𑀫𑁆𑀫𑀺𑀓𑁂𑀲𑀼 𑀅𑀜𑁆𑀜𑀢𑀭𑀲𑁆𑀲 ‘𑀫𑀬𑁆𑀳𑀁 𑀪𑀢𑁆𑀢𑀧𑀘𑁆𑀘𑀸𑀲𑀁 𑀢𑀼𑀬𑁆𑀳𑀁 𑀤𑀫𑁆𑀫𑀻’𑀢𑀺 𑀯𑀸 ‘𑀯𑀺𑀓𑀧𑁆𑀧𑁂𑀫𑀻’𑀢𑀺 𑀯𑀸 𑀏𑀯𑀁 𑀲𑀫𑁆𑀫𑀼𑀔𑀸 𑀯𑀸 ‘𑀇𑀢𑁆𑀣𑀦𑁆𑀦𑀸𑀫𑀲𑁆𑀲 𑀤𑀫𑁆𑀫𑀻’𑀢𑀺 𑀯𑀸 ‘𑀯𑀺𑀓𑀧𑁆𑀧𑁂𑀫𑀻’𑀢𑀺 𑀯𑀸 𑀏𑀯𑀁 𑀧𑀭𑀫𑁆𑀫𑀼𑀔𑀸 𑀯𑀸’’𑀢𑀺 𑀯𑀘𑀦𑀢𑁄 𑀲𑀳𑀥𑀫𑁆𑀫𑀺𑀓𑀲𑁆𑀲 𑀲𑀦𑁆𑀢𑀺𑀓𑁂 𑀏𑀯 𑀯𑀢𑁆𑀢𑀩𑁆𑀩𑀁, 𑀦 𑀲𑀬𑀫𑁂𑀯𑀸𑀢𑀺 𑀤𑀺𑀲𑁆𑀲𑀢𑀺. 𑀬𑀲𑁆𑀫𑀸 𑀅𑀬𑀁 𑀧𑀘𑁆𑀙𑀺𑀫𑀦𑀬𑁄 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂𑀦𑀧𑀺 𑀲𑀫𑁂𑀢𑀺, 𑀢𑀲𑁆𑀫𑀸 𑀇𑀥 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀦𑀼𑀲𑀸𑀭𑁂𑀦 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 ‘‘𑀢𑁂 𑀫𑀦𑀼𑀲𑁆𑀲𑀸…𑀧𑁂… 𑀪𑁄𑀚𑀦𑀫𑀤𑀁𑀲𑀽’’𑀢𑀺 𑀯𑀘𑀦𑀢𑁄 𑀅𑀓𑀧𑁆𑀧𑀺𑀬𑀦𑀺𑀫𑀦𑁆𑀢𑀦𑀁 𑀧𑀜𑁆𑀜𑀸𑀬𑀢𑀺, 𑀢𑀣𑀸𑀧𑀺 𑀣𑁂𑀭𑀲𑁆𑀲 𑀓𑀼𑀓𑁆𑀓𑀼𑀘𑁆𑀘𑀼𑀧𑁆𑀧𑀢𑁆𑀢𑀺𑀓𑀸𑀭𑀡𑁂𑀦 𑀪𑀢𑁆𑀢𑁂𑀦 𑀲𑁄 𑀦𑀺𑀫𑀦𑁆𑀢𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀅𑀜𑁆𑀜𑀣𑀸 𑀧𑀭𑀢𑁄 ‘‘𑀤𑁆𑀯𑁂 𑀢𑀬𑁄 𑀦𑀺𑀫𑀦𑁆𑀢𑀦𑁂 𑀏𑀓𑀢𑁄 𑀪𑀼𑀜𑁆𑀚𑀢𑀻’’𑀢𑀺 𑀯𑀘𑀦𑁂𑀦, 𑀅𑀦𑀸𑀧𑀢𑁆𑀢𑀺𑀯𑀸𑀭𑁂𑀦 𑀘 𑀯𑀺𑀭𑀼𑀚𑁆𑀛𑀢𑀺.