𑁧. 𑀘𑀻𑀯𑀭𑀯𑀕𑁆𑀕𑁄

𑁧. 𑀧𑀞𑀫𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁫𑁯. 𑀲𑀫𑀺𑀢𑀸𑀯𑀺𑀦𑀸𑀢𑀺 𑀲𑀫𑀺𑀢𑀸’𑀦𑁂𑀦 𑀓𑀺𑀮𑁂𑀲𑀸𑀢𑀺 𑀲𑀫𑀺𑀢𑀸𑀯𑀻, 𑀢𑁂𑀦 𑀲𑀫𑀺𑀢𑀸𑀯𑀺𑀦𑀸. ‘‘𑀢𑀻𑀡𑀺 𑀘𑀻𑀯𑀭𑀸𑀦𑀻’’𑀢𑀺 𑀯𑀢𑁆𑀢𑀩𑁆𑀩𑁂 ‘‘𑀢𑀺𑀘𑀻𑀯𑀭’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀗𑁆𑀔𑁆𑀬𑀸𑀧𑀼𑀩𑁆𑀩𑁄 𑀤𑀺𑀕𑀼𑀦𑁂𑀓𑀯𑀘𑀦𑀦𑁆𑀢𑀺 𑀏𑀢𑁆𑀣 𑀮𑀓𑁆𑀔𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀁 𑀧𑀦 𑀅𑀥𑀺𑀝𑁆𑀞𑀺𑀢𑀲𑁆𑀲𑀧𑀺 𑀅𑀦𑀥𑀺𑀝𑁆𑀞𑀺𑀢𑀲𑁆𑀲𑀧𑀺 𑀦𑀸𑀫𑀁 ‘‘𑀏𑀓𑀭𑀢𑁆𑀢𑀫𑁆𑀧𑀺 𑀘𑁂 𑀪𑀺𑀓𑁆𑀔𑀼 𑀢𑀺𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀲𑁂𑀬𑁆𑀬𑀸’’𑀢𑀺𑀆𑀤𑀻𑀲𑀼 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑁂𑀦 𑀅𑀥𑀺𑀝𑁆𑀞𑀺𑀢𑀲𑁆𑀲 𑀦𑀸𑀫𑀁. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁫𑁮) 𑀏𑀢𑁆𑀣 𑀅𑀦𑀥𑀺𑀝𑁆𑀞𑀺𑀢𑀲𑁆𑀲 𑀦𑀸𑀫𑀁, 𑀇𑀥 𑀢𑀤𑀼𑀪𑀬𑀫𑁆𑀧𑀺 𑀲𑀫𑁆𑀪𑀯𑀢𑀺. ‘‘𑀪𑀕𑀯𑀢𑀸 𑀪𑀺𑀓𑁆𑀔𑀽𑀦𑀁 𑀢𑀺𑀘𑀻𑀯𑀭𑀁 𑀅𑀦𑀼𑀜𑁆𑀜𑀸𑀢𑀁 𑀳𑁄𑀢𑀻’’𑀢𑀺 𑀏𑀢𑁆𑀣 𑀅𑀥𑀺𑀝𑁆𑀞𑀺𑀢𑀫𑁂𑀯. ‘‘𑀅𑀜𑁆𑀜𑁂𑀦𑁂𑀯 𑀢𑀺𑀘𑀻𑀯𑀭𑁂𑀦 𑀕𑀸𑀫𑀁 𑀧𑀯𑀺𑀲𑀦𑁆𑀢𑀻’’𑀢𑀺 𑀏𑀢𑁆𑀣 𑀅𑀦𑀥𑀺𑀝𑁆𑀞𑀺𑀢𑀫𑁂𑀯. 𑀏𑀓𑀲𑁆𑀫𑀺𑀁𑀬𑁂𑀯 𑀳𑀺 𑀘𑀻𑀯𑀭𑁂 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑀁 𑀭𑀼𑀳𑀢𑀺, 𑀦 𑀇𑀢𑀭𑀲𑁆𑀫𑀺𑀁 𑀧𑀢𑁆𑀢𑀸𑀥𑀺𑀝𑁆𑀞𑀸𑀦𑀁 𑀯𑀺𑀬, 𑀢𑀲𑁆𑀫𑀸 𑀇𑀢𑀭𑀁 𑀅𑀢𑀺𑀭𑁂𑀓𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀓𑀣𑀜𑁆𑀳𑀺 𑀦𑀸𑀫 𑀙𑀩𑁆𑀩𑀕𑁆𑀕𑀺𑀬𑀸 𑀪𑀺𑀓𑁆𑀔𑀽 𑀅𑀢𑀺𑀭𑁂𑀓𑀘𑀻𑀯𑀭𑀁 𑀥𑀸𑀭𑁂𑀲𑁆𑀲𑀦𑁆𑀢𑀻’’𑀢𑀺𑀆𑀤𑀺.

𑁪𑁬𑁦-𑁧. 𑀧𑀞𑀫𑀧𑀜𑁆𑀜𑀢𑁆𑀢𑀺𑀬𑀸 𑀧𑀦𑁂𑀢𑁆𑀣 𑀏𑀓𑀭𑀢𑁆𑀢𑀫𑁆𑀧𑀺 𑀅𑀢𑀺𑀭𑁂𑀓𑀘𑀻𑀯𑀭𑀁 𑀥𑀸𑀭𑁂𑀬𑁆𑀬, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀢𑁄 𑀧𑀭𑀁 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑀲𑀸𑀳𑀧𑀭𑀫𑀁 𑀅𑀢𑀺𑀭𑁂𑀓𑀘𑀻𑀯𑀭𑀁 𑀥𑀸𑀭𑁂𑀢𑀼𑀁. 𑀏𑀯𑀜𑁆𑀘 𑀧𑀦, 𑀪𑀺𑀓𑁆𑀔𑀯𑁂, 𑀇𑀫𑀁 𑀲𑀺𑀓𑁆𑀔𑀸𑀧𑀤𑀁 𑀉𑀤𑁆𑀤𑀺𑀲𑁂𑀬𑁆𑀬𑀸𑀣 ‘𑀤𑀲𑀸𑀳𑀧𑀭𑀫𑀁 𑀅𑀢𑀺𑀭𑁂𑀓𑀘𑀻𑀯𑀭𑀁 𑀥𑀸𑀭𑁂𑀢𑀩𑁆𑀩𑀁, 𑀢𑀁 𑀅𑀢𑀺𑀓𑁆𑀓𑀸𑀫𑀬𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’’𑀦𑁆𑀢𑀺 𑀏𑀯𑀁 𑀪𑀕𑀯𑀸 𑀧𑀭𑀺𑀧𑀼𑀡𑁆𑀡𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀸𑀧𑁂𑀲𑀺. 𑀅𑀣 𑀧𑀘𑁆𑀙𑀺𑀫𑀩𑁄𑀥𑀺𑀬𑀁 𑀅𑀚𑀸𑀢𑀲𑀢𑁆𑀢𑀼𑀓𑀸𑀮𑁂 𑀓𑀣𑀺𑀦𑀁 𑀅𑀦𑀼𑀜𑁆𑀜𑀸𑀢𑀁, 𑀢𑀢𑁄 𑀧𑀝𑁆𑀞𑀸𑀬 𑀪𑀺𑀓𑁆𑀔𑀽 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀁 𑀪𑀺𑀓𑁆𑀔𑀼𑀦𑀸 𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂 𑀤𑀲𑀸𑀳…𑀧𑁂… 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀉𑀤𑁆𑀤𑀺𑀲𑀦𑁆𑀢𑀺, 𑀏𑀲 𑀦𑀬𑁄 𑀤𑀼𑀢𑀺𑀬𑀢𑀢𑀺𑀬𑀓𑀣𑀺𑀦𑁂𑀲𑀼𑀧𑀺. 𑀢𑀣𑀸𑀧𑀺 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀤𑀲𑀸𑀳𑀧𑀭𑀫𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀦𑀼𑀧𑀜𑁆𑀜𑀢𑁆𑀢𑀻’’𑀢𑀺 𑀏𑀢𑁆𑀢𑀓𑀁𑀬𑁂𑀯 𑀯𑀼𑀢𑁆𑀢𑀁, 𑀢𑀲𑁆𑀫𑀸 ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀁 𑀪𑀺𑀓𑁆𑀔𑀼𑀦𑀸 𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂’’𑀢𑀺 𑀯𑀘𑀦𑀁 𑀦 𑀧𑀜𑁆𑀜𑀢𑁆𑀢𑀺, 𑀦 𑀘 𑀅𑀦𑀼𑀧𑀜𑁆𑀜𑀢𑁆𑀢𑀻𑀢𑀺 𑀲𑀺𑀤𑁆𑀥𑀁. 𑀦 𑀳𑀺 𑀧𑀜𑁆𑀜𑀢𑁆𑀢𑀺𑀯𑀢𑁆𑀣𑀼𑀲𑁆𑀫𑀺𑀁, 𑀅𑀦𑀼𑀧𑀜𑁆𑀜𑀢𑁆𑀢𑀺𑀯𑀢𑁆𑀣𑀼𑀫𑁆𑀳𑀺 𑀯𑀸 𑀓𑀣𑀺𑀦𑀸𑀥𑀺𑀓𑀸𑀭𑁄 𑀤𑀺𑀲𑁆𑀲𑀢𑀻𑀢𑀺 𑀬𑀣𑀸𑀯𑀼𑀢𑁆𑀢𑀦𑀬𑁄𑀯 𑀲𑀸𑀭𑁄𑀢𑀺 𑀦𑀺𑀝𑁆𑀞𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁. 𑀅𑀣𑀸𑀧𑀺 𑀲𑀺𑀬𑀸 ‘‘𑀓𑀣𑀺𑀦𑀲𑁆𑀲𑀼𑀧𑁆𑀧𑀢𑁆𑀢𑀺𑀓𑀸𑀮𑀢𑁄 𑀧𑀝𑁆𑀞𑀸𑀬 𑀪𑀕𑀯𑀢𑁄 𑀯𑀘𑀦𑀁 𑀅𑀦𑀼𑀧𑀜𑁆𑀜𑀢𑁆𑀢𑀺𑀪𑀸𑀯𑁂𑀦 𑀯𑀼𑀢𑁆𑀢’’𑀦𑁆𑀢𑀺. 𑀬𑀤𑀺 𑀏𑀯𑀁 𑀤𑁆𑀯𑁂 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑁄 𑀲𑀺𑀬𑀼𑀁, 𑀢𑀢𑁄 𑀧𑀭𑀺𑀯𑀸𑀭𑁂 (𑀧𑀭𑀺. 𑁨𑁪) ‘‘𑀏𑀓𑀸 𑀅𑀦𑀼𑀧𑀜𑁆𑀜𑀢𑁆𑀢𑀻’’𑀢𑀺𑀯𑀘𑀦𑀯𑀺𑀭𑁄𑀥𑁄. 𑀅𑀧𑀺𑀘 𑀬𑀣𑀸𑀯𑀼𑀢𑁆𑀢𑀦𑀬𑀤𑀻𑀧𑀦𑀢𑁆𑀣𑀁 𑀇𑀥 𑀢𑀁 𑀯𑀘𑀦𑀁 𑀧𑀞𑀫𑀧𑀜𑁆𑀜𑀢𑁆𑀢𑀺𑀓𑀸𑀮𑁂 𑀅𑀯𑀢𑁆𑀯𑀸 𑀧𑀘𑁆𑀙𑀸 𑀯𑀼𑀢𑁆𑀢𑀁. 𑀏𑀢𑁆𑀣 𑀲𑀸𑀥𑀺𑀢𑀢𑁆𑀢𑀸 𑀤𑀼𑀢𑀺𑀬𑀢𑀢𑀺𑀬𑁂𑀲𑀼 𑀧𑀘𑁆𑀙𑀸 𑀯𑀼𑀢𑁆𑀢𑀧𑀞𑀫𑀧𑀜𑁆𑀜𑀢𑁆𑀢𑀻𑀲𑀼 𑀏𑀯𑀁 𑀯𑀼𑀢𑁆𑀢𑀁. 𑀅𑀜𑁆𑀜𑀣𑀸 𑀢𑀢𑁆𑀣𑀧𑀺 𑀢𑀁 𑀯𑀘𑀦𑀁 𑀧𑀘𑁆𑀙𑀸 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀅𑀦𑀼𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀧𑀘𑁆𑀙𑀸 𑀯𑀼𑀢𑁆𑀢𑀪𑀸𑀯𑀁 𑀲𑀦𑁆𑀥𑀸𑀬 𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀦𑁆𑀢𑀺𑀆𑀤𑀻𑀲𑀼 𑀅𑀦𑀼𑀧𑀜𑁆𑀜𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀁. 𑀲𑁂𑀓𑁆𑀔𑀧𑀼𑀣𑀼𑀚𑁆𑀚𑀦𑀸𑀦𑀁 𑀧𑁂𑀫𑀁, 𑀅𑀭𑀳𑀦𑁆𑀢𑀸𑀦𑀁 𑀕𑀸𑀭𑀯𑁄. 𑀤𑀲𑀫𑀁 𑀯𑀸 𑀦𑀯𑀫𑀁 𑀯𑀸𑀢𑀺 𑀏𑀢𑁆𑀣 𑀪𑀼𑀫𑁆𑀫𑀢𑁆𑀣𑁂 𑀉𑀧𑀬𑁄𑀕𑀯𑀘𑀦𑀁.

𑁪𑁬𑁨-𑁩. 𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀦𑁆𑀢𑀺 𑀇𑀤𑀁 𑀓𑁂𑀯𑀮𑀁 𑀘𑀻𑀯𑀭𑀧𑀮𑀺𑀩𑁄𑀥𑀸𑀪𑀸𑀯𑀫𑀢𑁆𑀢𑀤𑀻𑀧𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 ‘‘𑀦𑀝𑁆𑀞𑀁 𑀯𑀸 𑀯𑀺𑀦𑀝𑁆𑀞𑀁 𑀯𑀸 𑀤𑀟𑁆𑀠𑀁 𑀯𑀸 𑀘𑀻𑀯𑀭𑀸𑀲𑀸 𑀯𑀸 𑀉𑀧𑀘𑁆𑀙𑀺𑀦𑁆𑀦𑀸’’𑀢𑀺 𑀯𑀼𑀢𑁆𑀢𑀁. 𑀬𑀤𑀺 𑀤𑀲𑀸𑀳𑀧𑀭𑀫𑀁 𑀥𑀸𑀭𑁂𑀢𑀩𑁆𑀩𑀘𑀻𑀯𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁 𑀲𑀺𑀬𑀸, 𑀦𑀝𑁆𑀞𑀸𑀤𑀺𑀓𑀁 𑀲𑁄 𑀥𑀸𑀭𑁂𑀬𑁆𑀬. 𑀥𑀸𑀭𑀡𑀜𑁆𑀘𑁂𑀢𑁆𑀣 𑀞𑀧𑀦𑀁, 𑀧𑀭𑀺𑀪𑁄𑀕𑁄 𑀯𑀸. 𑀢𑀁 𑀤𑁆𑀯𑀬𑀁 𑀓𑀢𑁂𑀧𑀺 𑀬𑀼𑀚𑁆𑀚𑀢𑀺, 𑀅𑀓𑀢𑁂𑀧𑀺 𑀬𑀼𑀚𑁆𑀚𑀢𑀺, 𑀢𑀲𑁆𑀫𑀸 ‘‘𑀓𑀢𑀁 𑀯𑀸 𑀳𑁄𑀢𑀻’’𑀢𑀺𑀧𑀺 𑀦 𑀯𑀢𑁆𑀢𑀩𑁆𑀩𑀁. 𑀦 𑀳𑀺 𑀓𑀢𑀫𑁂𑀯 𑀅𑀢𑀺𑀓𑁆𑀓𑀸𑀫𑀬𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺, 𑀢𑀲𑁆𑀫𑀸 𑀬𑀁 𑀘𑀻𑀯𑀭𑀁 𑀉𑀧𑀸𑀤𑀸𑀬 ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀫𑁆𑀧𑀺 𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂 𑀤𑀲𑀸𑀳𑀧𑀭𑀫𑀁 𑀓𑀸𑀮𑀁 𑀥𑀸𑀭𑁂𑀢𑀩𑁆𑀩𑀦𑁆𑀢𑀺 𑀅𑀢𑁆𑀣𑁄 𑀦 𑀕𑀳𑁂𑀢𑀩𑁆𑀩𑁄. 𑀢𑀜𑁆𑀳𑀺 𑀘𑀻𑀯𑀭𑀁 𑀲𑀦𑁆𑀢𑀜𑁆𑀘𑁂, 𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂 𑀏𑀓𑀤𑀺𑀯𑀲𑀫𑁆𑀧𑀺 𑀧𑀭𑀺𑀳𑀸𑀭𑀁 𑀦 𑀮𑀩𑁆𑀪𑀢𑀺. 𑀅𑀧𑀺𑀘 ‘‘𑀘𑀻𑀯𑀭𑀁 𑀦𑀸𑀫 𑀯𑀺𑀓𑀧𑁆𑀧𑀦𑀼𑀧𑀕𑀁 𑀧𑀘𑁆𑀙𑀺𑀫’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀘 𑀓𑀢𑀁 𑀦𑀸𑀫 𑀳𑁄𑀢𑀺, 𑀢𑀲𑁆𑀫𑀸𑀧𑀺 𑀦 𑀢𑀁 𑀲𑀦𑁆𑀥𑀸𑀬 𑀥𑀸𑀭𑁂𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁 𑀅𑀲𑀫𑁆𑀪𑀯𑀢𑁄.

𑀅𑀦𑀼𑀕𑀡𑁆𑀞𑀺𑀧𑀤𑁂 𑀧𑀦𑁂𑀢𑀁 𑀯𑀼𑀢𑁆𑀢𑀁 ‘‘𑀢𑀢𑁆𑀣 𑀲𑀺𑀬𑀸 𑁋 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀘𑀻𑀯𑀭𑀁 𑀦𑀝𑁆𑀞𑀸𑀤𑀻𑀲𑀼 𑀅𑀜𑁆𑀜𑀢𑀭𑀁 𑀬𑀤𑀺 𑀪𑀯𑁂𑀬𑁆𑀬, 𑀓𑀢𑀫𑀁 𑀘𑀻𑀯𑀭𑀁 𑀤𑀲𑀸𑀳𑀧𑀭𑀫𑀁 𑀥𑀸𑀭𑁂𑀬𑁆𑀬. 𑀬𑀲𑁆𑀫𑀸 𑀥𑀸𑀭𑁂𑀢𑀩𑁆𑀩𑀘𑀻𑀯𑀭𑀁 𑀦𑀢𑁆𑀣𑀺, 𑀢𑀲𑁆𑀫𑀸 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀓𑀭𑀡𑀧𑀮𑀺𑀩𑁄𑀥𑀤𑀲𑁆𑀲𑀦𑀢𑁆𑀣𑀁 ‘𑀦𑀝𑁆𑀞𑀁 𑀯𑀸’𑀢𑀺𑀆𑀤𑀺𑀧𑀤𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀅𑀬𑀁 𑀧𑀦𑀢𑁆𑀣𑁄 ‘𑀦𑀝𑁆𑀞𑀁 𑀯𑀸’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭𑀲𑁆𑀫𑀺𑀁 𑀘𑀻𑀯𑀭𑁂 𑀅𑀲𑀢𑀺 𑀕𑀳𑁂𑀢𑀩𑁆𑀩𑁄, 𑀲𑀢𑀺 𑀢𑀁 𑀤𑀲𑀸𑀳𑀧𑀭𑀫𑀁 𑀅𑀢𑀺𑀓𑁆𑀓𑀸𑀫𑀬𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀏𑀲 𑀦𑀬𑁄 𑀲𑀩𑁆𑀩𑀢𑁆𑀣. ‘𑀓𑀢𑀁 𑀯𑀸 𑀳𑁄𑀢𑀻’𑀢𑀺 𑀯𑀼𑀢𑁆𑀢𑀘𑀻𑀯𑀭𑀫𑁂𑀯𑀸𑀥𑀺𑀧𑁆𑀧𑁂𑀢𑀁. 𑀓𑀲𑁆𑀫𑀸 𑀧𑀦 𑀓𑀢𑀘𑀻𑀯𑀭𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑀦𑁆𑀢𑀺 𑀦 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀧𑀸𑀓𑀝𑀢𑁆𑀢𑀸. 𑀓𑀣𑀁? 𑀦𑀝𑁆𑀞𑀯𑀺𑀦𑀝𑁆𑀞𑀘𑀻𑀯𑀭𑀸𑀤𑀻𑀦𑀁 𑀥𑀸𑀭𑀡𑀲𑁆𑀲 𑀅𑀪𑀸𑀯𑀢𑁄 𑀓𑀢𑀘𑀻𑀯𑀭𑀫𑁂𑀯 𑀇𑀥𑀸𑀥𑀺𑀧𑁆𑀧𑁂𑀢𑀦𑁆𑀢𑀺 𑀧𑀸𑀓𑀝𑀁. 𑀬𑀣𑀸 𑀓𑀺𑀁? 𑀬𑀣𑀸 𑀧𑀞𑀫𑀸𑀦𑀺𑀬𑀢𑁂 𑀫𑁂𑀣𑀼𑀦𑀓𑀸𑀬𑀲𑀁𑀲𑀕𑁆𑀕𑀭𑀳𑁄𑀦𑀺𑀲𑀚𑁆𑀚𑀸𑀦𑀫𑁂𑀯𑀸𑀕𑀢𑀢𑁆𑀢𑀸 𑀲𑁄𑀢𑀲𑁆𑀲 𑀭𑀳𑁄 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀯𑀼𑀢𑁆𑀢𑁄𑀢𑀺 𑀧𑀸𑀓𑀝𑁄, 𑀢𑀲𑁆𑀫𑀸 ‘𑀘𑀓𑁆𑀔𑀼𑀲𑁆𑀲 𑀭𑀳𑁄 𑀇𑀢𑀭𑀲𑁆𑀫𑀺𑀁 𑀅𑀢𑁆𑀣𑁂 𑀅𑀥𑀺𑀧𑁆𑀧𑁂𑀢𑁄’𑀢𑀺 𑀦 𑀯𑀼𑀢𑁆𑀢𑁄. 𑀏𑀯𑀁𑀲𑀫𑁆𑀧𑀤𑀫𑀺𑀤𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘𑀓𑀢𑀁 𑀯𑀸 𑀳𑁄𑀢𑀻’𑀢𑀺 𑀇𑀤𑀁 𑀦 𑀯𑀢𑁆𑀢𑀩𑁆𑀩𑀁, 𑀓𑀲𑁆𑀫𑀸? 𑀅𑀓𑀢𑀁 𑀅𑀢𑀺𑀓𑁆𑀓𑀸𑀫𑀬𑀢𑁄𑀧𑀺 𑀦𑀺𑀲𑁆𑀲𑀕𑁆𑀕𑀺𑀬𑀢𑁆𑀢𑀸, 𑀓𑀺𑀜𑁆𑀘𑀸𑀧𑀺 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺, 𑀇𑀥 𑀧𑀦 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑀫𑀥𑀺𑀧𑁆𑀧𑁂𑀢𑀁. 𑀢𑀲𑁆𑀫𑀺𑀁 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑁂 𑀅𑀓𑀢𑀁, 𑀅𑀭𑀚𑀺𑀢𑀁, 𑀅𑀓𑀧𑁆𑀧𑀺𑀬𑀓𑀢𑀜𑁆𑀘 ‘𑀇𑀫𑀁 𑀲𑀗𑁆𑀖𑀸𑀝𑀺𑀁 𑀅𑀥𑀺𑀝𑁆𑀞𑀸𑀫𑀻’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀢𑀤𑀢𑁆𑀣𑀤𑀻𑀧𑀦𑀢𑁆𑀣𑀁 ‘𑀓𑀢𑀁 𑀯𑀸 𑀳𑁄𑀢𑀻’𑀢𑀺 𑀯𑀼𑀢𑁆𑀢𑀁. 𑀇𑀢𑀭𑀣𑀸 ‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀁 𑀧𑀝𑀺𑀮𑀤𑁆𑀥𑁂’𑀢𑀺 𑀯𑀤𑁂𑀬𑁆𑀬, 𑀏𑀯𑀁 𑀲𑀦𑁆𑀢𑁂 𑀢𑀺𑀘𑀻𑀯𑀭𑀁 𑀤𑀲𑀸𑀳𑀁 𑀅𑀢𑀺𑀓𑁆𑀓𑀸𑀫𑀬𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀓𑀣𑀁 𑀧𑀜𑁆𑀜𑀸𑀬𑀢𑀻𑀢𑀺 𑀘𑁂? 𑀯𑀘𑀦𑀧𑁆𑀧𑀫𑀸𑀡𑀢𑁄. ‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀺𑀓𑀧𑁆𑀧𑁂𑀢𑀼’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 𑀇𑀥𑀸𑀧𑀺 ‘𑀅𑀢𑀺𑀭𑁂𑀓𑀘𑀻𑀯𑀭𑀁 𑀦𑀸𑀫 𑀅𑀦𑀥𑀺𑀝𑁆𑀞𑀺𑀢’𑀦𑁆𑀢𑀺 𑀏𑀢𑁆𑀢𑀓𑀫𑁂𑀯 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸. 𑀬𑀲𑁆𑀫𑀸 ‘𑀓𑀢𑀁 𑀯𑀸 𑀳𑁄𑀢𑀻’𑀢𑀺 𑀯𑀘𑀦𑁂𑀦 𑀇𑀥𑀸𑀥𑀺𑀧𑁆𑀧𑁂𑀢𑀘𑀻𑀯𑀭𑁂𑀦 𑀲𑀤𑁆𑀥𑀺𑀁 𑀲𑁂𑀲𑀫𑁆𑀧𑀺 𑀤𑀲𑀸𑀳𑀧𑀭𑀫𑀢𑁄 𑀉𑀢𑁆𑀢𑀭𑀺 𑀥𑀸𑀭𑁂𑀢𑀼𑀁 𑀦 𑀮𑀩𑁆𑀪𑀢𑀻𑀢𑀺 𑀅𑀦𑀼𑀚𑀸𑀦𑀦𑁆𑀢𑁄 ‘𑀅𑀢𑀺𑀭𑁂𑀓𑀘𑀻𑀯𑀭𑀁 𑀦𑀸𑀫 𑀅𑀦𑀥𑀺𑀝𑁆𑀞𑀺𑀢𑀁 𑀅𑀯𑀺𑀓𑀧𑁆𑀧𑀺𑀢’𑀦𑁆𑀢𑀺 𑀆𑀳. 𑀢𑀢𑁆𑀣 𑀲𑀺𑀬𑀸 𑁋 𑀬𑀣𑀸 ‘𑀅𑀯𑀺𑀓𑀧𑁆𑀧𑀺𑀢’𑀦𑁆𑀢𑀺 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀯𑀼𑀢𑁆𑀢𑀁, 𑀢𑀣𑀸 ‘𑀯𑀺𑀓𑀧𑁆𑀧𑀦𑀼𑀧𑀕𑀁 𑀧𑀘𑁆𑀙𑀺𑀫’𑀦𑁆𑀢𑀺𑀧𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀢𑀺𑀘𑀻𑀯𑀭𑀫𑁂𑀯 𑀤𑀲𑀸𑀳𑀧𑀭𑀫𑀁 𑀥𑀸𑀭𑁂𑀢𑀩𑁆𑀩𑀁 ‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺’𑀦𑁆𑀢𑀺𑀆𑀤𑀺𑀅𑀦𑀼𑀧𑀜𑁆𑀜𑀢𑁆𑀢𑀺𑀯𑀲𑁂𑀦. 𑀇𑀢𑀭𑀣𑀸 𑀏𑀓𑀸𑀳𑀸𑀢𑀺𑀓𑁆𑀓𑀫𑁂𑀧𑀺 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺 ‘𑀬𑁄 𑀧𑀦, 𑀪𑀺𑀓𑁆𑀔𑀼, 𑀅𑀢𑀺𑀭𑁂𑀓𑀘𑀻𑀯𑀭𑀁 𑀥𑀸𑀭𑁂𑀬𑁆𑀬, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’𑀦𑁆𑀢𑀺 𑀯𑀘𑀦𑀢𑁄. 𑀦 𑀢𑀺𑀘𑀻𑀯𑀭𑀢𑁄 𑀅𑀜𑁆𑀜𑀫𑁆𑀧𑀺 𑀘𑀻𑀯𑀭𑀁 𑀤𑀲𑀸𑀳𑀧𑀭𑀫𑀁 𑀥𑀸𑀭𑁂𑀢𑀩𑁆𑀩𑀁, 𑀢𑀢𑁄 𑀧𑀭𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 ‘𑀅𑀦𑁆𑀢𑁄𑀤𑀲𑀸𑀳’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀬𑀣𑀸𑀳 ‘𑀅𑀦𑀸𑀧𑀢𑁆𑀢𑀺 𑀅𑀦𑁆𑀢𑁄𑀤𑀲𑀸𑀳𑀁 𑀅𑀥𑀺𑀝𑁆𑀞𑁂𑀢𑀺, 𑀯𑀺𑀓𑀧𑁆𑀧𑁂𑀢𑀻’𑀢𑀺, 𑀇𑀢𑀭𑀣𑀸 ‘𑀅𑀦𑁆𑀢𑁄𑀤𑀲𑀸𑀳𑀁 𑀅𑀥𑀺𑀝𑁆𑀞𑁂𑀢𑀻’𑀢𑀺 𑀯𑀘𑀦𑀫𑀢𑁆𑀢𑀫𑁂𑀯 𑀪𑀯𑁂𑀬𑁆𑀬, 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑀬𑁂𑀦𑁂𑀯 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀇𑀤𑀁 𑀲𑀩𑁆𑀩𑀁 𑀅𑀧𑀭𑁂 𑀯𑀤𑀦𑁆𑀢𑀻’’𑀢𑀺. 𑀏𑀢𑁆𑀣 𑀅𑀦𑁆𑀢𑁄𑀓𑀣𑀺𑀦𑁂 𑀉𑀧𑁆𑀧𑀦𑁆𑀦𑀘𑀻𑀯𑀭𑀁 𑀓𑀢𑀫𑁂𑀯 𑀲𑀦𑁆𑀢𑀜𑁆𑀘𑁂, 𑀤𑀲𑀸𑀳𑀧𑀭𑀫𑀁 𑀥𑀸𑀭𑁂𑀢𑀩𑁆𑀩𑀦𑁆𑀢𑀺 𑀇𑀤𑀜𑁆𑀘𑀺𑀫𑀲𑁆𑀲 𑀲𑀸𑀥𑀦𑀢𑁆𑀣𑀁 𑀯𑀼𑀢𑁆𑀢𑀯𑀘𑀦𑀜𑁆𑀘 𑀧𑀭𑀢𑁄 𑀇𑀥𑁂𑀯 𑀯𑀼𑀢𑁆𑀢𑀯𑀺𑀘𑀸𑀭𑀡𑀸𑀬 𑀬𑀣𑀸𑀯𑀼𑀢𑁆𑀢𑀬𑀼𑀢𑁆𑀢𑀺𑀬𑀸 𑀘 𑀯𑀺𑀭𑀼𑀚𑁆𑀛𑀢𑀻𑀢𑀺 𑀦 𑀕𑀳𑁂𑀢𑀩𑁆𑀩𑀁.

𑀇𑀥𑁂𑀯 𑀯𑀼𑀢𑁆𑀢𑀯𑀺𑀘𑀸𑀭𑀡𑀸 𑀦𑀸𑀫 𑁋 ‘‘𑀲𑁆𑀯𑁂 𑀓𑀣𑀺𑀦𑀼𑀤𑁆𑀥𑀸𑀭𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀅𑀚𑁆𑀚 𑀉𑀧𑁆𑀧𑀦𑁆𑀦𑀘𑀻𑀯𑀭𑀁 𑀢𑀤𑀳𑁂𑀯 𑀅𑀦𑀥𑀺𑀝𑁆𑀞𑀳𑀦𑁆𑀢𑀲𑁆𑀲 𑀅𑀭𑀼𑀡𑀼𑀕𑁆𑀕𑀫𑀦𑁂 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀓𑀲𑁆𑀫𑀸? ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺’’𑀦𑁆𑀢𑀺𑀆𑀤𑀺𑀦𑀸 𑀲𑀺𑀓𑁆𑀔𑀸𑀧𑀤𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀅𑀦𑁆𑀢𑁄𑀓𑀣𑀺𑀦𑁂 𑀅𑀢𑀺𑀭𑁂𑀓𑀤𑀲𑀸𑀳𑀫𑁆𑀧𑀺 𑀧𑀭𑀺𑀳𑀸𑀭𑀁 𑀮𑀪𑀢𑀺, 𑀓𑀣𑀺𑀦𑀢𑁄 𑀉𑀤𑁆𑀥𑀁 𑀏𑀓𑀤𑀺𑀯𑀲𑀫𑁆𑀧𑀺 𑀦 𑀮𑀪𑀢𑀺. 𑀬𑀣𑀸 𑀓𑀺𑀁? 𑀬𑀣𑀸 𑀅𑀢𑁆𑀣𑀢𑀓𑀣𑀺𑀦𑁄 𑀲𑀗𑁆𑀖𑁄 𑀅𑀢𑁆𑀣𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀉𑀩𑁆𑀪𑀸𑀭𑀸 𑀏𑀓𑀤𑀺𑀯𑀲𑀸𑀯𑀲𑁂𑀲𑁂𑀧𑀺 𑀓𑀣𑀺𑀦𑀼𑀩𑁆𑀪𑀸𑀭𑁂 𑀆𑀦𑀺𑀲𑀁𑀲𑀁 𑀮𑀪𑀢𑀺, 𑀧𑀼𑀦𑀤𑀺𑀯𑀲𑁂 𑀦 𑀮𑀪𑀢𑀺. 𑀲𑀘𑁂 𑀲𑀢𑀺𑀲𑀫𑁆𑀫𑁄𑀲𑀸 𑀪𑀸𑀚𑀦𑀻𑀬𑀘𑀻𑀯𑀭𑀁 𑀦 𑀪𑀸𑀚𑀺𑀢𑀁, 𑀧𑀼𑀦𑀤𑀺𑀯𑀲𑁂 𑀅𑀦𑀢𑁆𑀣𑀢𑀓𑀣𑀺𑀦𑀸𑀦𑀫𑁆𑀧𑀺 𑀲𑀸𑀥𑀸𑀭𑀡𑀁 𑀳𑁄𑀢𑀺. 𑀤𑀺𑀯𑀲𑀸 𑀘𑁂 𑀲𑀸𑀯𑀲𑁂𑀲𑀸, 𑀅𑀢𑁆𑀣𑀢𑀓𑀣𑀺𑀦𑀲𑁆𑀲𑁂𑀯 𑀲𑀗𑁆𑀖𑀲𑁆𑀲 𑀧𑀸𑀧𑀼𑀡𑀸𑀢𑀺, 𑀏𑀯𑀫𑁂𑀯 𑀅𑀢𑁆𑀣𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀉𑀩𑁆𑀪𑀸𑀭𑀸 𑀅𑀦𑀥𑀺𑀝𑁆𑀞𑀺𑀢𑀁 𑀅𑀯𑀺𑀓𑀧𑁆𑀧𑀺𑀢𑀁 𑀯𑀝𑁆𑀝𑀢𑀺 𑀅𑀦𑀼𑀜𑁆𑀜𑀸𑀢𑀤𑀺𑀯𑀲𑀩𑁆𑀪𑀦𑁆𑀢𑀭𑀢𑁆𑀢𑀸. 𑀓𑀣𑀺𑀦𑀤𑀺𑀯𑀲𑁄 𑀕𑀡𑀦𑀼𑀧𑀕𑁄 𑀳𑁄𑀢𑀺, 𑀉𑀩𑁆𑀪𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀤𑀲𑀸𑀳𑀧𑀭𑀫𑀁 𑀓𑀸𑀮𑀁 𑀉𑀧𑁆𑀧𑀦𑁆𑀦𑀘𑀻𑀯𑀭𑀁 𑀧𑀭𑀺𑀳𑀸𑀭𑀁 𑀮𑀪𑀢𑀺, 𑀢𑀢𑁄 𑀧𑀭𑀁 𑀦 𑀮𑀪𑀢𑀺. 𑀓𑀲𑁆𑀫𑀸? ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑀲𑀸𑀳𑀧𑀭𑀫𑀁 𑀅𑀢𑀺𑀭𑁂𑀓𑀘𑀻𑀯𑀭𑀁 𑀥𑀸𑀭𑁂𑀢𑀼’’𑀦𑁆𑀢𑀺 𑀯𑀘𑀦𑀢𑁄. 𑀅𑀦𑁆𑀢𑁄𑀓𑀣𑀺𑀦𑁂𑀧𑀺 𑀏𑀓𑀸𑀤𑀲𑁂 𑀅𑀭𑀼𑀡𑀼𑀕𑁆𑀕𑀫𑀦𑁂 𑀦𑀺𑀲𑁆𑀲𑀕𑁆𑀕𑀺𑀬𑀧𑁆𑀧𑀲𑀗𑁆𑀕𑀁 ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀁 𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂’’𑀢𑀺 𑀅𑀬𑀁 𑀅𑀦𑀼𑀧𑀜𑁆𑀜𑀢𑁆𑀢𑀺 𑀯𑀸𑀭𑁂𑀢𑁆𑀯𑀸 𑀞𑀺𑀢𑀸, 𑀦 𑀘 𑀢𑁂 𑀤𑀺𑀯𑀲𑁂 𑀅𑀤𑀺𑀯𑀲𑁂 𑀅𑀓𑀸𑀲𑀻𑀢𑀺. 𑀢𑀣𑀸 𑀢𑀢𑀺𑀬𑀓𑀣𑀺𑀦𑁂 𑀘 𑀯𑀺𑀘𑀸𑀭𑀺𑀢𑀁 ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀁 𑀪𑀺𑀓𑁆𑀔𑀼𑀦𑀸 𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂 𑀪𑀺𑀓𑁆𑀔𑀼𑀦𑁄 𑀧𑀦𑁂𑀯 𑀅𑀓𑀸𑀮𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’𑀢𑀺 𑀯𑀤𑀦𑁆𑀢𑁂𑀦 𑀪𑀕𑀯𑀢𑀸 𑀬𑀁 𑀫𑀬𑀸 𑀳𑁂𑀝𑁆𑀞𑀸 𑀧𑀞𑀫𑀲𑀺𑀓𑁆𑀔𑀸𑀧𑀤𑁂 ‘𑀤𑀲𑀸𑀳𑀧𑀭𑀫𑀁 𑀅𑀢𑀺𑀭𑁂𑀓𑀘𑀻𑀯𑀭𑀁 𑀥𑀸𑀭𑁂𑀢𑀩𑁆𑀩’𑀦𑁆𑀢𑀺 𑀅𑀦𑀼𑀜𑁆𑀜𑀸𑀢𑀁, 𑀢𑀫𑁆𑀧𑀺 𑀓𑀣𑀺𑀦𑀫𑀸𑀲𑀢𑁄 𑀩𑀳𑀺 𑀉𑀧𑁆𑀧𑀦𑁆𑀦𑀫𑁂𑀯, 𑀦 𑀅𑀦𑁆𑀢𑁄𑀢𑀺 𑀤𑀻𑀧𑀺𑀢𑀁 𑀳𑁄𑀢𑀻’’𑀢𑀺 𑀘, ‘‘‘𑀓𑀸𑀮𑁂𑀧𑀺 𑀆𑀤𑀺𑀲𑁆𑀲 𑀤𑀺𑀦𑁆𑀦𑀁 𑀏𑀢𑀁 𑀅𑀓𑀸𑀮𑀘𑀻𑀯𑀭’𑀦𑁆𑀢𑀺 (𑀧𑀸𑀭𑀸. 𑁫𑁦𑁦) 𑀯𑀘𑀦𑀢𑁄 𑀓𑀣𑀺𑀦𑀼𑀩𑁆𑀪𑀸𑀭𑀢𑁄 𑀉𑀤𑁆𑀥𑀁 𑀤𑀲𑀸𑀳𑀧𑀭𑀺𑀳𑀸𑀭𑀁 𑀦 𑀮𑀪𑀢𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺, 𑀢𑁂𑀳𑀺 𑀲𑀤𑁆𑀥𑀺𑀁 𑀧𑀼𑀦 𑀓𑀣𑀺𑀦𑀼𑀩𑁆𑀪𑀸𑀭𑀢𑁄 𑀉𑀤𑁆𑀥𑀁 𑀧𑀜𑁆𑀘 𑀤𑀺𑀯𑀲𑀸𑀦𑀺 𑀮𑀪𑀢𑀻𑀢𑀺 𑀧𑀲𑀗𑁆𑀕𑁄𑀧𑀺 ‘𑀦𑀺𑀝𑁆𑀞𑀺𑀢𑀘𑀻𑀯𑀭…𑀧𑁂… 𑀔𑀺𑀧𑁆𑀧𑀫𑁂𑀯 𑀓𑀸𑀭𑁂𑀢𑀩𑁆𑀩’𑀦𑁆𑀢𑀺 𑀅𑀓𑀸𑀮𑀘𑀻𑀯𑀭𑀲𑁆𑀲 𑀉𑀧𑁆𑀧𑀢𑁆𑀢𑀺𑀓𑀸𑀮𑀁 𑀦𑀺𑀬𑀫𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀯𑀸𑀭𑀺𑀢𑁄 𑀳𑁄𑀢𑀺. 𑀢𑀤𑀼𑀪𑀬𑁂𑀦 𑀓𑀣𑀺𑀦𑀩𑁆𑀪𑀦𑁆𑀢𑀭𑁂 𑀉𑀧𑁆𑀧𑀦𑁆𑀦𑀘𑀻𑀯𑀭𑀁 𑀓𑀣𑀺𑀦𑀼𑀩𑁆𑀪𑀸𑀭𑀢𑁄 𑀉𑀤𑁆𑀥𑀁 𑀏𑀓𑀤𑀺𑀯𑀲𑀫𑁆𑀧𑀺 𑀧𑀭𑀺𑀳𑀸𑀭𑀁 𑀦 𑀮𑀪𑀢𑀻𑀢𑀺 𑀲𑀺𑀤𑁆𑀥𑀁 𑀳𑁄𑀢𑀻’’𑀢𑀺 𑀘. 𑀢𑀲𑁆𑀫𑀸 𑀤𑀼𑀯𑀺𑀥𑀫𑁆𑀧𑁂𑀢𑀁 𑀯𑀺𑀘𑀸𑀭𑀡𑀁 𑀲𑀦𑁆𑀥𑀸𑀬 𑀅𑀫𑁆𑀳𑁂𑀳𑀺 ‘‘𑀇𑀥𑁂𑀯 𑀯𑀼𑀢𑁆𑀢𑀯𑀺𑀘𑀸𑀭𑀡𑀸𑀬 𑀬𑀣𑀸𑀯𑀼𑀢𑁆𑀢𑀬𑀼𑀢𑁆𑀢𑀺𑀬𑀸 𑀘 𑀯𑀺𑀭𑀼𑀚𑁆𑀛𑀢𑀻𑀢𑀺 𑀦 𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀏𑀢𑁆𑀣𑀸𑀳 𑁋 ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀁 𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂’’𑀢𑀺 𑀇𑀤𑀁 𑀪𑀼𑀫𑁆𑀫𑀁 𑀓𑀺𑀁 𑀘𑀻𑀯𑀭𑀲𑁆𑀲 𑀉𑀧𑁆𑀧𑀢𑁆𑀢𑀺 𑀦𑀺𑀬𑀫𑁂𑀢𑀺, 𑀉𑀤𑀸𑀳𑀼 𑀥𑀸𑀭𑀡𑀁, 𑀉𑀤𑀸𑀳𑀼 𑀉𑀪𑀬𑀦𑁆𑀢𑀺, 𑀓𑀺𑀜𑁆𑀘𑁂𑀢𑁆𑀣, 𑀬𑀤𑀺 𑀉𑀧𑁆𑀧𑀢𑁆𑀢𑀺𑀁 𑀦𑀺𑀬𑀫𑁂𑀢𑀺, 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀫𑀸𑀲𑁂 𑀏𑀯 𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂 𑀉𑀧𑁆𑀧𑀦𑁆𑀦𑀘𑀻𑀯𑀭𑀁 𑀢𑀢𑁄 𑀧𑀝𑁆𑀞𑀸𑀬 𑀤𑀲𑀸𑀳𑀁 𑀥𑀸𑀭𑁂𑀢𑀩𑁆𑀩𑀁 𑀅𑀦𑀺𑀝𑁆𑀞𑀺𑀢𑁂𑀧𑀺 𑀢𑀲𑁆𑀫𑀺𑀁 𑀫𑀸𑀲𑁂𑀢𑀺 𑀆𑀧𑀚𑁆𑀚𑀢𑀺. 𑀅𑀣 𑀥𑀸𑀭𑀡𑀁 𑀦𑀺𑀬𑀫𑁂𑀢𑀺, 𑀅𑀦𑁆𑀢𑁄𑀓𑀣𑀺𑀦𑁂 𑀉𑀧𑁆𑀧𑀦𑁆𑀦𑀘𑀻𑀯𑀭𑀁 𑀉𑀩𑁆𑀪𑀢𑁂𑀧𑀺 𑀤𑀲𑀸𑀳𑀧𑀭𑀫𑀁 𑀥𑀸𑀭𑁂𑀢𑀩𑁆𑀩𑀦𑁆𑀢𑀺 𑀆𑀧𑀚𑁆𑀚𑀢𑀺. 𑀅𑀣 𑀉𑀪𑀬𑀁 𑀦𑀺𑀬𑀫𑁂𑀢𑀺, 𑀢𑀢𑀺𑀬𑀓𑀣𑀺𑀦𑁂 𑀯𑀺𑀬 𑀯𑀺𑀲𑁂𑀲𑁂𑀢𑁆𑀯𑀸 𑀯𑀢𑁆𑀢𑀩𑁆𑀩𑀦𑁆𑀢𑀺? 𑀯𑀼𑀘𑁆𑀘𑀢𑁂 𑁋 𑀓𑀸𑀫𑀁 𑀉𑀪𑀬𑀁 𑀦𑀺𑀬𑀫𑁂𑀢𑀺, 𑀦 𑀧𑀦 𑀯𑀺𑀲𑁂𑀲𑀦𑁂 𑀧𑀬𑁄𑀚𑀦𑀁 𑀅𑀢𑁆𑀣𑀺. 𑀬𑀁 𑀅𑀦𑁆𑀢𑁄𑀓𑀣𑀺𑀦𑁂 𑀉𑀧𑁆𑀧𑀦𑁆𑀦𑀘𑀻𑀯𑀭𑀁 𑀲𑀦𑁆𑀥𑀸𑀬 ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺’’𑀦𑁆𑀢𑀺 𑀯𑀼𑀢𑁆𑀢𑀁, 𑀦 𑀢𑀁 𑀲𑀦𑁆𑀥𑀸𑀬 ‘‘𑀥𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁, 𑀲𑀸𑀥𑀺𑀢𑀜𑁆𑀳𑁂𑀢𑀁. ‘‘𑀓𑀢𑀁 𑀯𑀸 𑀳𑁄𑀢𑀻’’𑀢𑀺𑀆𑀤𑀺𑀯𑀘𑀦𑀢𑁄 𑀢𑀤𑀢𑁆𑀣𑀲𑀺𑀤𑁆𑀥𑀺, 𑀢𑁂𑀦 𑀧𑀼𑀦 𑀯𑀺𑀲𑁂𑀲𑀦𑁂 𑀧𑀬𑁄𑀚𑀦𑀁 𑀦𑀢𑁆𑀣𑀺, 𑀦 𑀳𑀺 𑀓𑀢𑀫𑁂𑀯 𑀦𑀺𑀲𑁆𑀲𑀕𑁆𑀕𑀺𑀬𑀁 𑀓𑀭𑁄𑀢𑀺, 𑀦 𑀘 𑀦𑀝𑁆𑀞𑀸𑀤𑀺𑀓𑀁 𑀥𑀸𑀭𑁂𑀢𑀼𑀁 𑀲𑀓𑁆𑀓𑀸𑀢𑀺. 𑀬𑁂𑀦 𑀯𑀸 𑀅𑀥𑀺𑀧𑁆𑀧𑀸𑀬𑁂𑀦 𑀪𑀕𑀯𑀢𑀸 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀧𑀜𑁆𑀜𑀢𑁆𑀢𑀁, 𑀲𑁄 𑀅𑀥𑀺𑀧𑁆𑀧𑀸𑀬𑁄 𑀢𑀢𑀺𑀬𑀓𑀣𑀺𑀦𑁂 𑀧𑀓𑀸𑀲𑀺𑀢𑁄𑀢𑀺 𑀯𑁂𑀤𑀺𑀢𑀩𑁆𑀩𑁄. 𑀓𑀲𑁆𑀫𑀸 𑀢𑀢𑁆𑀣 𑀧𑀓𑀸𑀲𑀺𑀢𑁄𑀢𑀺 𑀘𑁂? 𑀯𑀺𑀲𑁂𑀲𑀯𑀺𑀥𑀸𑀦𑀤𑀲𑁆𑀲𑀦𑀸𑀥𑀺𑀧𑁆𑀧𑀸𑀬𑀢𑁄. 𑀯𑀺𑀲𑁂𑀲𑀯𑀺𑀥𑀸𑀦𑀜𑁆𑀳𑀺 ‘‘𑀦𑁄 𑀘𑀲𑁆𑀲 𑀧𑀸𑀭𑀺𑀧𑀽𑀭𑀻’’𑀢𑀺𑀆𑀤𑀺. 𑀢𑀢𑁆𑀣𑀸𑀧𑀺 ‘‘𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀅𑀯𑀢𑁆𑀯𑀸 ‘‘𑀅𑀓𑀸𑀮𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀯𑀺𑀲𑁂𑀲𑀦𑁂𑀦 𑀉𑀩𑁆𑀪𑀢𑁂𑀧𑀺 𑀓𑀣𑀺𑀦𑁂 𑀓𑀸𑀮𑀘𑀻𑀯𑀭𑀁 𑀅𑀢𑁆𑀣𑀻𑀢𑀺 𑀤𑀻𑀧𑁂𑀢𑀺. 𑀓𑀺𑀜𑁆𑀘𑁂𑀢𑀁? 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀫𑀸𑀲𑁂 𑀉𑀧𑁆𑀧𑀦𑁆𑀦𑀘𑀻𑀯𑀭𑀁, 𑀢𑁂𑀦𑁂𑀯 𑀢𑀢𑁆𑀣 ‘‘𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀏𑀓𑀸𑀤𑀲𑀫𑀸𑀲𑁂 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀉𑀧𑁆𑀧𑀢𑁆𑀢𑀺𑀦𑀺𑀬𑀫𑁂 𑀯𑀼𑀢𑁆𑀢𑀤𑁄𑀲𑀸𑀪𑀸𑀯𑀲𑀺𑀤𑁆𑀥𑀺. 𑀬𑀜𑁆𑀘 𑀢𑀢𑁆𑀣 ‘‘𑀓𑀸𑀮𑁂𑀧𑀺 𑀆𑀤𑀺𑀲𑁆𑀲 𑀤𑀺𑀦𑁆𑀦𑀁 𑀏𑀢𑀁 𑀅𑀓𑀸𑀮𑀘𑀻𑀯𑀭𑀁 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀲 𑀤𑁆𑀯𑁂 𑀅𑀢𑁆𑀣𑀯𑀺𑀓𑀧𑁆𑀧𑀸. 𑀆𑀤𑁂𑀲𑀯𑀲𑁂𑀦 ‘‘𑀅𑀓𑀸𑀮𑀘𑀻𑀯𑀭’’𑀦𑁆𑀢𑀺 𑀮𑀤𑁆𑀥𑀲𑀗𑁆𑀔𑁆𑀬𑀫𑁆𑀧𑀺 𑀓𑀸𑀮𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀓𑀸𑀮𑀧𑀭𑀺𑀳𑀸𑀭𑀁 𑀮𑀪𑀢𑀺, 𑀧𑀕𑁂𑀯𑀸𑀦𑀸𑀤𑁂𑀲𑀦𑁆𑀢𑀺 𑀅𑀬𑀁 𑀧𑀞𑀫𑁄 𑀯𑀺𑀓𑀧𑁆𑀧𑁄 𑀉𑀧𑁆𑀧𑀢𑁆𑀢𑀺𑀦𑀺𑀬𑀫𑁂 𑀯𑀼𑀢𑁆𑀢𑀤𑁄𑀲𑀸𑀪𑀸𑀯𑀫𑁂𑀯 𑀉𑀧𑀢𑁆𑀣𑀫𑁆𑀪𑁂𑀢𑀺. 𑀢𑀣𑀸 𑀆𑀤𑁂𑀲𑀯𑀲𑁂𑀦 𑀅𑀓𑀸𑀮𑀘𑀻𑀯𑀭𑀲𑀗𑁆𑀔𑁆𑀬𑀁 𑀕𑀢𑀁 𑀘𑀻𑀯𑀭𑀓𑀸𑀮𑁂 𑀉𑀧𑁆𑀧𑀦𑁆𑀦𑀢𑁆𑀢𑀸 𑀘𑀻𑀯𑀭𑀓𑀸𑀮𑀢𑁄 𑀧𑀭𑀁 𑀤𑀲𑀸𑀳𑀧𑀭𑀺𑀳𑀸𑀭𑀁 𑀦 𑀮𑀪𑀢𑀺, 𑀧𑀕𑁂𑀯𑀸𑀦𑀸𑀤𑁂𑀲𑀦𑁆𑀢𑀺 𑀅𑀬𑀁 𑀤𑀼𑀢𑀺𑀬𑁄 𑀥𑀸𑀭𑀡𑀦𑀺𑀬𑀫𑁂 𑀯𑀼𑀢𑁆𑀢𑀤𑁄𑀲𑀸𑀪𑀸𑀯𑀫𑁂𑀯 𑀉𑀧𑀢𑁆𑀣𑀫𑁆𑀪𑁂𑀢𑀺. 𑀬𑀤𑀺 𑀏𑀯𑀁 𑀆𑀤𑁂𑀲𑀯𑀲𑁂𑀦 𑀅𑀓𑀸𑀮𑀘𑀻𑀯𑀭𑀲𑁆𑀲 𑀅𑀓𑀸𑀮𑀘𑀻𑀯𑀭𑀢𑀸 𑀓𑀺𑀫𑀢𑁆𑀣𑀺𑀓𑀸𑀢𑀺 𑀘𑁂? 𑀲𑀗𑁆𑀖𑀼𑀤𑁆𑀤𑁂𑀲𑀺𑀓𑀲𑁆𑀲 𑀢𑀲𑁆𑀲 𑀅𑀢𑁆𑀣𑀢𑀓𑀣𑀺𑀦𑀲𑁆𑀲𑀧𑀺 𑀪𑀺𑀓𑁆𑀔𑀼𑀲𑀗𑁆𑀖𑀲𑁆𑀲 𑀲𑀸𑀥𑀸𑀭𑀡𑀪𑀸𑀯𑀢𑁆𑀣𑀺𑀓𑀸𑀢𑀺 𑀯𑁂𑀤𑀺𑀢𑀩𑁆𑀩𑀸.

𑀅𑀧𑀺𑀘 𑀧𑀼𑀕𑁆𑀕𑀮𑀲𑁆𑀲 𑀓𑀣𑀺𑀦𑀤𑀺𑀯𑀲𑀸𑀧𑀺 𑀤𑀺𑀯𑀲𑀸𑀯. 𑀏𑀯𑀁 𑀕𑀡𑀦𑀼𑀧𑀕𑀢𑁆𑀢𑀸 𑀅𑀓𑀸𑀮𑀘𑀻𑀯𑀭𑀲𑀗𑁆𑀔𑀬𑀸𑀧𑀝𑀺𑀮𑀸𑀪𑀸𑀦𑀼𑀪𑀸𑀯𑁂𑀦 ‘‘𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂’’𑀢𑀺 𑀯𑀘𑀦𑀸𑀧𑁂𑀓𑁆𑀔𑀲𑁆𑀲 𑀅𑀦𑀺𑀲𑁆𑀲𑀕𑁆𑀕𑀺𑀬𑀢𑁆𑀢𑀸 𑀢𑀤𑀦𑀼𑀮𑁄𑀫𑀢𑁆𑀢𑀸 ‘‘𑀓𑀸𑀮𑀘𑀻𑀯𑀭𑀲𑁆𑀲𑀧𑀻’’𑀢𑀺 𑀏𑀯𑀁 𑀲𑀩𑁆𑀩𑀣𑀸 𑀘𑀢𑀼𑀩𑁆𑀩𑀺𑀥𑀁 𑀏𑀢𑁆𑀣 𑀯𑀘𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀧𑀺𑀘 𑀅𑀢𑁆𑀣𑀺 𑀏𑀓𑀘𑁆𑀘𑁂𑀦 𑀓𑀣𑀺𑀦𑀼𑀤𑁆𑀥𑀸𑀭𑁂𑀦 𑀉𑀩𑁆𑀪𑀢𑁂 𑀓𑀣𑀺𑀦𑁂 𑀉𑀧𑁆𑀧𑀦𑁆𑀦𑀁 𑀏𑀓𑀘𑁆𑀘𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑀸𑀮𑀘𑀻𑀯𑀭𑀁 𑀳𑁄𑀢𑀺, 𑀏𑀓𑀘𑁆𑀘𑀲𑁆𑀲 𑀅𑀓𑀸𑀮𑀘𑀻𑀯𑀭𑀁, 𑀢𑀁 𑀲𑀻𑀫𑀸𑀢𑀺𑀓𑁆𑀓𑀦𑁆𑀢𑀲𑁆𑀲, 𑀦𑁄 𑀉𑀩𑁆𑀪𑀸𑀭𑀕𑀢𑀁. 𑀢𑀁 𑀤𑁆𑀯𑀺𑀦𑁆𑀦𑀁 𑀯𑀲𑁂𑀦 𑀉𑀩𑁆𑀪𑀢𑁂 𑀉𑀧𑁆𑀧𑀦𑁆𑀦𑀁 𑀞𑀧𑁂𑀢𑁆𑀯𑀸 𑀇𑀢𑀭𑁂𑀲𑀁 𑀅𑀜𑁆𑀜𑀢𑀭𑁂𑀦 𑀉𑀩𑁆𑀪𑀢𑁂 𑀉𑀧𑁆𑀧𑀦𑁆𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀜𑁆𑀳𑀺 𑀬𑀲𑁆𑀲 𑀉𑀩𑁆𑀪𑀢𑀁, 𑀢𑀲𑁆𑀲 𑀅𑀓𑀸𑀮𑀘𑀻𑀯𑀭𑀁, 𑀇𑀢𑀭𑀲𑁆𑀲 𑀓𑀸𑀮𑀘𑀻𑀯𑀭𑀁. 𑀢𑀣𑀸 𑀅𑀢𑁆𑀣𑀺 𑀏𑀓𑀘𑁆𑀘𑁂𑀦 𑀓𑀣𑀺𑀦𑀼𑀤𑁆𑀥𑀸𑀭𑁂𑀦 𑀉𑀩𑁆𑀪𑀢𑁂 𑀓𑀣𑀺𑀦𑁂 𑀉𑀧𑁆𑀧𑀦𑁆𑀦𑀁 𑀲𑀩𑁆𑀩𑀲𑁆𑀲𑀧𑀺 𑀅𑀓𑀸𑀮𑀘𑀻𑀯𑀭𑀫𑁂𑀯 𑀳𑁄𑀢𑀺. 𑀢𑀁 𑀬𑀣𑀸𑀞𑀧𑀺𑀢𑀁 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀅𑀢𑁆𑀣𑀺 𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂 𑀉𑀧𑁆𑀧𑀦𑁆𑀦𑀁 𑀞𑀧𑁂𑀢𑁆𑀯𑀸 𑀯𑀲𑁆𑀲𑀸𑀦𑀲𑁆𑀲 𑀧𑀘𑁆𑀙𑀺𑀫𑁂 𑀫𑀸𑀲𑁂 𑀉𑀧𑁆𑀧𑀦𑁆𑀦𑀁. 𑀢𑀣𑀸 𑀅𑀢𑁆𑀣𑀺 𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂 𑀉𑀧𑁆𑀧𑀦𑁆𑀦𑀁 𑀅𑀓𑀸𑀮𑀘𑀻𑀯𑀭𑀁, 𑀢𑀁 𑀳𑁂𑀫𑀦𑁆𑀢𑁂, 𑀕𑀺𑀫𑁆𑀳𑁂 𑀯𑀸 𑀉𑀧𑁆𑀧𑀦𑁆𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀯𑀁 𑀧𑀼𑀕𑁆𑀕𑀮𑀓𑀸𑀮𑀪𑁂𑀤𑀢𑁄 𑀩𑀳𑀼𑀯𑀺𑀥𑀢𑁆𑀢𑀸 𑀉𑀧𑁆𑀧𑀦𑁆𑀦𑀲𑁆𑀲 ‘‘𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀦 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀦𑁂𑀓𑀁𑀲𑀺𑀓𑀢𑁆𑀢𑀸 𑀇𑀫𑀫𑁆𑀧𑀺 𑀅𑀢𑁆𑀣𑀯𑀺𑀓𑀧𑁆𑀧𑀁 𑀤𑀲𑁆𑀲𑁂𑀢𑀼𑀁 ‘‘𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂𑀢𑀺 𑀪𑀺𑀓𑁆𑀔𑀼𑀦𑁄 𑀓𑀣𑀺𑀦𑀁 𑀉𑀩𑁆𑀪𑀢𑀁 𑀳𑁄𑀢𑀻’’𑀢𑀺. 𑀏𑀢𑁆𑀢𑀸𑀯𑀢𑀸 𑀲𑀺𑀤𑁆𑀥𑁂𑀧𑀺 ‘‘𑀅𑀝𑁆𑀞𑀦𑁆𑀦𑀁 𑀫𑀸𑀢𑀺𑀓𑀸𑀦𑀁 𑀅𑀜𑁆𑀜𑀢𑀭𑀸𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. ‘‘𑀥𑀸𑀭𑀬𑀸𑀫𑀻’’𑀢𑀺 𑀪𑀺𑀓𑁆𑀔𑀼𑀦𑀻𑀯𑀺𑀪𑀗𑁆𑀕𑁂 𑀆𑀕𑀢𑁄𑀢𑀺 𑀯𑀢𑁆𑀢𑀩𑁆𑀩𑁄. ‘‘𑀏𑀯’’𑀦𑁆𑀢𑀺 𑀯𑀘𑀦𑁂𑀦 𑀯𑀘𑀦𑀪𑁂𑀤𑁄 𑀢𑀢𑁆𑀣 𑀦𑀢𑁆𑀣𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺.

‘‘𑀯𑀺𑀓𑀧𑁆𑀧𑀦𑀼𑀧𑀕𑀁 𑀧𑀘𑁆𑀙𑀺𑀫’’𑀦𑁆𑀢𑀺 𑀇𑀤𑀁 𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀢𑁆𑀢𑀸 𑀯𑀼𑀢𑁆𑀢𑀁. ‘‘𑀅𑀥𑀺𑀝𑁆𑀞𑀸𑀦𑀼𑀧𑀕𑀁 𑀧𑀘𑁆𑀙𑀺𑀫’’𑀦𑁆𑀢𑀺 𑀅𑀲𑀩𑁆𑀩𑀲𑀗𑁆𑀕𑀸𑀳𑀺𑀓𑀁. 𑀦 𑀳𑀺 𑀬𑀢𑁆𑀢𑀓𑀁 𑀲𑀗𑁆𑀖𑀸𑀝𑀺 𑀅𑀥𑀺𑀝𑁆𑀞𑀸𑀦𑀼𑀧𑀕𑀁 𑀧𑀘𑁆𑀙𑀺𑀫𑀁, 𑀢𑀢𑁆𑀢𑀓𑀁 𑀅𑀦𑁆𑀢𑀭𑀯𑀸𑀲𑀓𑀸𑀤𑀺 𑀅𑀥𑀺𑀝𑁆𑀞𑀸𑀦𑀼𑀧𑀕𑀁 𑀧𑀘𑁆𑀙𑀺𑀫𑀁 𑀳𑁄𑀢𑀺 𑀅𑀥𑀺𑀝𑁆𑀞𑀸𑀦𑀲𑁆𑀲 𑀩𑀳𑀼𑀯𑀺𑀥𑀢𑁆𑀢𑀸. 𑀦 𑀏𑀯𑀁 𑀯𑀺𑀓𑀧𑁆𑀧𑀦𑀸𑀬 𑀪𑁂𑀤𑁄 𑀢𑀲𑁆𑀲𑀸 𑀏𑀓𑀯𑀺𑀥𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀏𑀓𑀸𑀤𑀲𑁂 𑀅𑀭𑀼𑀡𑀼𑀕𑁆𑀕𑀫𑀦𑁂 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺 𑀅𑀦𑁆𑀢𑀺𑀫𑀁 𑀞𑀧𑁂𑀢𑁆𑀯𑀸 𑀢𑀢𑁄 𑀧𑀼𑀭𑀺𑀫𑀢𑀭𑀲𑁆𑀫𑀺𑀦𑁆𑀢𑀺 𑀅𑀢𑁆𑀣𑁄 𑀯𑁂𑀤𑀺𑀢𑀩𑁆𑀩𑁄. 𑀅𑀦𑁆𑀢𑀺𑀫𑀁 𑀦𑀸𑀫 𑀅𑀧𑀭𑀓𑀢𑁆𑀢𑀺𑀓𑀸𑀬 𑀧𑀞𑀫𑀸𑀭𑀼𑀡𑀼𑀕𑁆𑀕𑀫𑀦𑀁. 𑀢𑀜𑁆𑀳𑀺 𑀓𑀸𑀮𑀢𑁆𑀢𑀸 𑀦𑀺𑀲𑁆𑀲𑀕𑁆𑀕𑀺𑀬𑀁 𑀦 𑀓𑀭𑁄𑀢𑀺, 𑀢𑁂𑀦𑁂𑀯𑀸𑀳 𑀅𑀘𑁆𑀘𑁂𑀓𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀝𑁆𑀞𑀓𑀣𑀸𑀬𑀁 ‘‘𑀙𑀝𑁆𑀞𑀺𑀢𑁄 𑀧𑀝𑁆𑀞𑀸𑀬 𑀧𑀦 𑀉𑀧𑁆𑀧𑀦𑁆𑀦𑀁 𑀅𑀦𑀘𑁆𑀘𑁂𑀓𑀘𑀻𑀯𑀭𑀫𑁆𑀧𑀺 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀞𑀧𑀺𑀢𑀘𑀻𑀯𑀭𑀫𑁆𑀧𑀺 𑀏𑀢𑀁 𑀧𑀭𑀺𑀳𑀸𑀭𑀁 𑀮𑀪𑀢𑀺𑀬𑁂𑀯𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁪𑁬-𑁯). 𑀇𑀫𑀁𑀬𑁂𑀯 𑀦𑀬𑀁 𑀲𑀦𑁆𑀥𑀸𑀬 ‘‘𑀅𑀘𑁆𑀘𑁂𑀓𑀘𑀻𑀯𑀭𑀲𑁆𑀲 𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀏𑀓𑀸𑀤𑀲𑀤𑀺𑀯𑀲𑀸𑀥𑀺𑀓𑁄 𑀫𑀸𑀲𑁄, 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀏𑀓𑀸𑀤𑀲𑀤𑀺𑀯𑀲𑀸𑀥𑀺𑀓𑀸 𑀧𑀜𑁆𑀘 𑀫𑀸𑀲𑀸, 𑀢𑀢𑁄 𑀧𑀭𑀁 𑀏𑀓𑀤𑀺𑀯𑀲𑀫𑁆𑀧𑀺 𑀧𑀭𑀺𑀳𑀸𑀭𑁄 𑀦𑀢𑁆𑀣𑀻’’𑀢𑀺 𑀢𑀢𑁆𑀣𑁂𑀯𑀸𑀳. 𑀇𑀫𑀲𑁆𑀫𑀺𑀁 𑀦𑀬𑁂 𑀲𑀺𑀤𑁆𑀥𑁂 𑀅𑀦𑀘𑁆𑀘𑁂𑀓𑀘𑀻𑀯𑀭𑀁 𑀤𑁆𑀯𑀸𑀤𑀲𑀸𑀳𑁂 𑀦 𑀮𑀪𑀢𑀻𑀢𑀺 𑀲𑀺𑀤𑁆𑀥𑀫𑁂𑀯 𑀳𑁄𑀢𑀺. 𑀢𑀢𑁄 ‘‘𑀅𑀦𑀘𑁆𑀘𑁂𑀓𑀘𑀻𑀯𑀭𑁂 𑀅𑀦𑀘𑁆𑀘𑁂𑀓𑀘𑀻𑀯𑀭𑀲𑀜𑁆𑀜𑀻, 𑀅𑀦𑀸𑀧𑀢𑁆𑀢𑀻’’𑀢𑀺 (𑀧𑀸𑀭𑀸. 𑁬𑁫𑁦) 𑀏𑀢𑁆𑀣 𑀅𑀘𑁆𑀘𑁂𑀓𑀘𑀻𑀯𑀭𑀲𑀤𑀺𑀲𑁂 𑀅𑀜𑁆𑀜𑀲𑁆𑀫𑀺𑀁 𑀅𑀦𑀥𑀺𑀝𑁆𑀞𑀺𑀢𑁂𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀢𑀢𑁆𑀣 𑀧𑀦 ‘‘𑀧𑀜𑁆𑀘 𑀫𑀸𑀲𑀸’’𑀢𑀺 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀯𑀘𑀦𑀁. 𑀯𑀲𑁆𑀲𑀺𑀓𑀲𑀸𑀝𑀺𑀓𑀜𑁆𑀘 𑀅𑀯𑀲𑁆𑀲𑀺𑀓𑀲𑀸𑀝𑀺𑀓𑀪𑀸𑀯𑀁 𑀧𑀢𑁆𑀯𑀸 𑀏𑀓𑀸𑀤𑀲𑀫𑀸𑀲𑁂 𑀧𑀭𑀺𑀳𑀸𑀭𑀁 𑀮𑀪𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀤𑀲𑀸𑀳𑀸𑀢𑀺𑀓𑁆𑀓𑀦𑁆𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀏𑀢𑁆𑀣 𑀆𑀧𑀢𑁆𑀢𑀺𑀯𑀼𑀝𑁆𑀞𑀸𑀦𑁂 ‘‘𑀤𑀲𑀸𑀳𑀧𑁆𑀧𑀝𑀺𑀘𑁆𑀙𑀦𑁆𑀦𑀁 𑀧𑀓𑁆𑀔𑀅𑀢𑀺𑀭𑁂𑀓𑀧𑀓𑁆𑀔𑀫𑀸𑀲𑀅𑀢𑀺𑀭𑁂𑀓𑀫𑀸𑀲𑀧𑀝𑀺𑀘𑁆𑀙𑀦𑁆𑀦’’𑀦𑁆𑀢𑀺𑀆𑀤𑀺𑀯𑀘𑀦𑀪𑁂𑀤𑁄 𑀯𑀺𑀬, 𑀦 𑀇𑀥 𑀯𑀘𑀦𑀪𑁂𑀤𑁄, 𑀢𑀲𑁆𑀫𑀸 𑀲𑀁𑀯𑀘𑁆𑀙𑀭𑀸𑀢𑀺𑀓𑁆𑀓𑀦𑁆𑀢𑀫𑁆𑀧𑀺 𑀤𑀲𑀸𑀳𑀸𑀢𑀺𑀓𑁆𑀓𑀦𑁆𑀢𑀫𑁂𑀯 𑀦𑀸𑀫, 𑀢𑀣𑀸 𑀤𑀼𑀢𑀺𑀬𑀓𑀣𑀺𑀦𑁂𑀧𑀺 𑀲𑀁𑀯𑀘𑁆𑀙𑀭𑀯𑀺𑀧𑁆𑀧𑀯𑀼𑀢𑁆𑀣𑀫𑁆𑀧𑀺 𑀭𑀢𑁆𑀢𑀺𑀯𑀺𑀧𑁆𑀧𑀯𑀼𑀢𑁆𑀣𑀫𑁂𑀯. 𑀢𑀢𑀺𑀬𑁂 𑀲𑀁𑀯𑀘𑁆𑀙𑀭𑀸𑀢𑀺𑀓𑁆𑀓𑀦𑁆𑀢𑀫𑁆𑀧𑀺 𑀫𑀸𑀲𑀸𑀢𑀺𑀓𑁆𑀓𑀦𑁆𑀢𑀫𑁂𑀯 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀅𑀦𑀥𑀺𑀝𑁆𑀞𑀺𑀢𑁂 𑀅𑀥𑀺𑀝𑁆𑀞𑀺𑀢𑀲𑀜𑁆𑀜𑀻 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺 𑀇𑀤𑀫𑁂𑀓𑀲𑁆𑀲 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀲𑁆𑀲 𑀆𑀤𑀺𑀧𑀤𑀤𑀻𑀧𑀦𑀁. 𑀏𑀲 𑀦𑀬𑁄 𑀅𑀯𑀺𑀓𑀧𑁆𑀧𑀺𑀢𑁂𑀢𑀺𑀆𑀤𑀻𑀲𑀼𑀧𑀺, 𑀢𑀲𑁆𑀫𑀸 𑀏𑀢𑁆𑀣 𑀅𑀝𑁆𑀞𑀲𑀼 𑀢𑀺𑀓𑀘𑁆𑀙𑁂𑀤𑁂𑀲𑀼 𑀏𑀓𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀇𑀢𑀭𑁂𑀲𑀁 𑀏𑀓𑁂𑀓𑀫𑀸𑀤𑀺𑀧𑀤𑀁 𑀯𑀺𑀢𑁆𑀣𑀸𑀭𑁂𑀳𑁆𑀯𑀸 𑀤𑁆𑀯𑁂 𑀤𑁆𑀯𑁂 𑀪𑀕𑀯𑀢𑀸𑀯 𑀲𑀗𑁆𑀔𑀺𑀢𑁆𑀢𑀢𑁆𑀢𑀸𑀢𑀺 𑀩𑀳𑀽𑀲𑀼𑀧𑀺 𑀢𑀺𑀓𑀘𑁆𑀙𑁂𑀤𑁂𑀲𑀼 𑀲𑀫𑁆𑀪𑀯𑀦𑁆𑀢𑁂𑀲𑀼 𑀏𑀓𑁄 𑀏𑀯 𑀯𑀼𑀘𑁆𑀘𑀢𑀺, ‘‘𑀅𑀬𑀁 𑀯𑀺𑀦𑀬𑀲𑁆𑀲 𑀥𑀫𑁆𑀫𑀢𑀸’’𑀢𑀺 𑀯𑀤𑀦𑁆𑀢𑀺. 𑀤𑀼𑀓𑁆𑀓𑀝𑀯𑀸𑀭𑁂𑀲𑀼 𑀧𑀦 𑀏𑀓𑀁 𑀤𑀼𑀓𑁆𑀓𑀝𑀁 𑀯𑀺𑀢𑁆𑀣𑀸𑀭𑁂𑀢𑁆𑀯𑀸 𑀲𑁂𑀲𑀸𑀦𑀺 𑀲𑀢𑁆𑀢 𑀢𑀣𑁂𑀯 𑀲𑀗𑁆𑀔𑀺𑀢𑁆𑀢𑀸𑀦𑀺. 𑀢𑀣𑀸 𑀅𑀦𑁆𑀢𑀺𑀫𑀦𑁆𑀢𑀺𑀫𑁄 𑀏𑀓𑁂𑀓𑁄 𑀅𑀦𑀸𑀧𑀢𑁆𑀢𑀺𑀓𑁄𑀝𑁆𑀞𑀸𑀲𑁄𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀅𑀦𑀸𑀧𑀢𑁆𑀢𑀺 𑀅𑀦𑁆𑀢𑁄𑀤𑀲𑀸𑀳𑀦𑁆𑀢𑀺 𑀅𑀬𑀁 𑀲𑀗𑁆𑀔𑁂𑀧𑀢𑁆𑀣𑁄 𑁋 𑀢𑀁 𑀤𑀲𑀸𑀳𑀧𑀭𑀫𑀁 𑀥𑀸𑀭𑁂𑀢𑀩𑁆𑀩𑀁. 𑀢𑀁 𑀅𑀢𑀺𑀭𑁂𑀓𑀘𑀻𑀯𑀭𑀁 𑀬𑀣𑀸𑀲𑀓𑀁 𑀅𑀥𑀺𑀝𑁆𑀞𑀸𑀦𑀁 𑀅𑀦𑁆𑀢𑁄𑀤𑀲𑀸𑀳𑀁 𑀅𑀥𑀺𑀝𑁆𑀞𑁂𑀢𑀺 𑀯𑀸 𑀯𑀺𑀓𑀧𑁆𑀧𑁂𑀢𑀺 𑀯𑀸 𑀯𑀺𑀲𑁆𑀲𑀚𑁆𑀚𑁂𑀢𑀺 𑀯𑀸 𑀅𑀢𑁆𑀢𑀦𑁄 𑀥𑀫𑁆𑀫𑀢𑀸𑀬 𑀦𑀲𑁆𑀲𑀢𑀺 𑀯𑀸 𑀯𑀺𑀦𑀲𑁆𑀲𑀢𑀺 𑀯𑀸 𑀟𑀬𑁆𑀳𑀢𑀺 𑀯𑀸 𑀅𑀜𑁆𑀜𑁄 𑀯𑀸 𑀢𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀸𑀢𑀺 𑀯𑀺𑀲𑁆𑀲𑀸𑀲𑀦𑁆𑀢𑁄 𑀯𑀸 𑀕𑀡𑁆𑀳𑀸𑀢𑀺 𑀧𑀸𑀘𑀺𑀢𑁆𑀢𑀺𑀬𑀢𑁄 𑀅𑀦𑀸𑀧𑀢𑁆𑀢𑀺. 𑀤𑀼𑀓𑁆𑀓𑀝𑀢𑁄 𑀧𑀦 𑀲𑀺𑀬𑀸 𑀆𑀧𑀢𑁆𑀢𑀺 𑀲𑀺𑀬𑀸 𑀅𑀦𑀸𑀧𑀢𑁆𑀢𑀺 𑀲𑀜𑁆𑀜𑀸𑀪𑁂𑀤𑁂𑀦. 𑀅𑀦𑁆𑀢𑀺𑀫𑀸𑀦𑀁 𑀧𑀦𑁂𑀢𑁆𑀣 𑀤𑁆𑀯𑀺𑀦𑁆𑀦𑀁 𑀧𑀤𑀸𑀦𑀁 𑀯𑀲𑁂𑀦 𑀅𑀦𑀘𑁆𑀙𑀺𑀦𑁆𑀦𑁂 𑀅𑀘𑁆𑀙𑀺𑀦𑁆𑀦𑀲𑀜𑁆𑀜𑀻 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑁂 𑀯𑀺𑀲𑁆𑀲𑀸𑀲𑀕𑁆𑀕𑀸𑀳𑀲𑀜𑁆𑀜𑀻 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺𑀆𑀤𑀺𑀓𑀸 𑀤𑁆𑀯𑁂 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀸, 𑀤𑁆𑀯𑁂 𑀘 𑀤𑀼𑀓𑁆𑀓𑀝𑀸 𑀲𑀗𑁆𑀔𑀺𑀢𑁆𑀢𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀏𑀢𑁆𑀣 𑀳𑀺 𑀬𑀤𑀺 𑀅𑀦𑁆𑀢𑁄𑀤𑀲𑀸𑀳𑀁 𑀅𑀥𑀺𑀝𑁆𑀞𑁂𑀢𑀺, 𑀤𑀲𑀸𑀳𑀧𑀭𑀫𑀁 𑀅𑀭𑀼𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸 𑀢𑀲𑁆𑀲 𑀤𑀺𑀯𑀲𑀪𑀸𑀕𑁂 𑀅𑀥𑀺𑀝𑁆𑀞𑀳𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀬𑀁 𑀢𑀸𑀯 𑀧𑀸𑀴𑀺𑀯𑀺𑀦𑀺𑀘𑁆𑀙𑀬𑁄.

𑀅𑀝𑁆𑀞𑀓𑀣𑀸𑀬𑀁 𑀧𑀦 𑀇𑀢𑁄 𑀕𑀭𑀼𑀓𑀢𑀭𑀸𑀦𑀻𑀢𑀺𑀆𑀤𑀺𑀫𑁆𑀳𑀺 𑀅𑀬𑀁 𑀘𑁄𑀤𑀦𑀸𑀧𑀼𑀩𑁆𑀩𑀗𑁆𑀕𑀫𑁄 𑀯𑀺𑀦𑀺𑀘𑁆𑀙𑀬𑁄 𑁋 𑀕𑀡𑁆𑀞𑀺𑀧𑀤𑁂 𑀧𑀦𑀲𑁆𑀲 𑀇𑀢𑁄 𑀦𑀺𑀲𑁆𑀲𑀝𑁆𑀞𑀘𑀻𑀯𑀭𑀤𑀸𑀦𑀢𑁄 𑀕𑀭𑀼𑀓𑀫𑁆𑀧𑀺 𑀜𑀢𑁆𑀢𑀺𑀤𑀼𑀢𑀺𑀬𑀓𑀫𑁆𑀫𑀁 𑀬𑀣𑀸 𑀅𑀧𑀮𑁄𑀓𑀦𑁂𑀦 𑀓𑀭𑁄𑀦𑁆𑀢𑀺, 𑀏𑀯𑀫𑀺𑀤𑀁 𑀜𑀢𑁆𑀢𑀺𑀬𑀸 𑀓𑀢𑁆𑀢𑀩𑁆𑀩𑀫𑁆𑀧𑀺 𑀧𑀓𑀢𑀺𑀯𑀘𑀦𑁂𑀦 𑀯𑀝𑁆𑀝𑀢𑀻𑀢𑀺. 𑀬𑀤𑀺 𑀏𑀯𑀁 𑀧𑀭𑀺𑀯𑀸𑀭𑁂 𑀓𑀫𑁆𑀫𑀯𑀕𑁆𑀕𑀲𑁆𑀲 𑀅𑀝𑁆𑀞𑀓𑀣𑀸𑀬𑀁 ‘‘𑀜𑀢𑁆𑀢𑀺𑀓𑀫𑁆𑀫𑀫𑁆𑀧𑀺 𑀏𑀓𑀁 𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸𑀯 𑀓𑀸𑀢𑀩𑁆𑀩𑀁, 𑀅𑀧𑀮𑁄𑀓𑀦𑀓𑀫𑁆𑀫𑀸𑀤𑀺𑀯𑀲𑁂𑀦 𑀦 𑀓𑀸𑀢𑀩𑁆𑀩’’𑀦𑁆𑀢𑀺 (𑀧𑀭𑀺. 𑀅𑀝𑁆𑀞. 𑁪𑁮𑁨) 𑀬𑀁 𑀯𑀼𑀢𑁆𑀢𑀁, 𑀢𑁂𑀦 𑀯𑀺𑀭𑀼𑀚𑁆𑀛𑁂𑀬𑁆𑀬. 𑀢𑁂𑀦𑁂𑀢𑀁 𑀯𑀼𑀘𑁆𑀘𑀢𑀺 ‘‘𑀢𑁂𑀲𑀁 𑀏𑀢𑀁 𑀅𑀦𑀼𑀮𑁄𑀫’’𑀦𑁆𑀢𑀺, 𑀢𑀲𑁆𑀫𑀸 𑀅𑀦𑀼𑀮𑁄𑀫𑀦𑀬𑁂𑀦𑁂𑀯 𑀢𑀁 𑀯𑀼𑀢𑁆𑀢𑀁. 𑀦𑀺𑀬𑀫𑀁 𑀧𑀦 𑀬𑀣𑀸 𑀤𑁆𑀯𑀺𑀦𑁆𑀦𑀁 𑀧𑀸𑀭𑀺𑀲𑀼𑀤𑁆𑀥𑀺𑀉𑀧𑁄𑀲𑀣𑁄 𑀯𑀺𑀦𑀸 𑀜𑀢𑁆𑀢𑀺𑀬𑀸 𑀳𑁄𑀢𑀺, 𑀏𑀯𑀁 𑀤𑁆𑀯𑀺𑀦𑁆𑀦𑀁 𑀦𑀺𑀲𑁆𑀲𑀝𑁆𑀞𑀘𑀻𑀯𑀭𑀤𑀸𑀦𑀫𑁆𑀧𑀻𑀢𑀺 𑀯𑀤𑀸𑀫, 𑀢𑀲𑁆𑀫𑀸 ‘‘𑀆𑀬𑀲𑁆𑀫𑀢𑁄 𑀤𑁂𑀫𑀸’’𑀢𑀺 𑀯𑀢𑁆𑀢𑀼𑀁 𑀯𑀝𑁆𑀝𑀢𑀺. 𑀓𑀣𑀁 𑀧𑀦𑁂𑀢𑀁 𑀜𑀸𑀢𑀩𑁆𑀩𑀦𑁆𑀢𑀺? 𑀢𑀤𑀦𑀼𑀮𑁄𑀫𑀢𑁆𑀢𑀸𑀢𑀺. 𑀏𑀓𑀤𑁂𑀯𑁂𑀤𑀁 𑀜𑀢𑁆𑀢𑀺𑀓𑀫𑁆𑀫𑀁 𑀅𑀧𑀮𑁄𑀓𑀦𑁂𑀦𑀸𑀧𑀺 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀸𑀥𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀦𑁆𑀢𑀺 𑀆𑀘𑀭𑀺𑀬𑁄. 𑀅𑀦𑀼𑀕𑀡𑁆𑀞𑀺𑀧𑀤𑁂 𑀧𑀦𑁂𑀢𑁆𑀣 𑀘𑁄𑀤𑀦𑀁 𑀓𑀢𑁆𑀯𑀸 ‘‘𑀏𑀢𑀁 𑀲𑀸𑀥𑀺𑀢𑀁. 𑀜𑀢𑁆𑀢𑀺𑀓𑀫𑁆𑀫𑀁 𑀏𑀓𑀁 𑀜𑀢𑁆𑀢𑀺𑀁 𑀞𑀧𑁂𑀢𑁆𑀯𑀸𑀯 𑀓𑀸𑀢𑀩𑁆𑀩’’𑀦𑁆𑀢𑀺 𑀧𑀸𑀴𑀺𑀬𑀸 𑀆𑀕𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀇𑀤𑀁 𑀧𑀦 𑀧𑀸𑀴𑀺𑀬𑀁 𑀦𑀸𑀕𑀢𑀁, 𑀮𑁂𑀲𑀢𑁄 𑀆𑀳𑀭𑀺𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀓𑀢𑁆𑀯𑀸 𑀏𑀢𑀁 𑀅𑀧𑀮𑁄𑀓𑀦𑁂𑀦𑀸𑀧𑀺 𑀯𑀝𑁆𑀝𑀢𑀻𑀢𑀺.

𑁪𑁬𑁮. 𑀏𑀲 𑀦𑀬𑁄𑀢𑀺 𑀅𑀜𑁆𑀜𑁂𑀲𑀁 𑀘𑀻𑀯𑀭𑁂𑀲𑀼 𑀉𑀧𑀘𑀺𑀓𑀸𑀤𑀻𑀳𑀺 𑀔𑀸𑀬𑀺𑀢𑁂𑀲𑀼 𑀫𑀫𑀧𑀺 𑀔𑀸𑀬𑀺𑀢𑀸𑀦𑀻𑀢𑀺𑀆𑀤𑀺. ‘‘𑀅𑀜𑁆𑀜𑁂𑀦 𑀓𑀢𑀁…𑀧𑁂… 𑀲𑀸𑀥𑀓’’𑀦𑁆𑀢𑀺 𑀯𑀘𑀦𑀢𑁄 𑀲𑀫𑀸𑀦𑀚𑀸𑀢𑀺𑀓𑀁, 𑀏𑀓𑀢𑁆𑀣𑀚𑀸𑀢𑀺𑀓𑀜𑁆𑀘 𑀢𑀢𑀺𑀬𑀓𑀣𑀺𑀦𑀁 𑀧𑀞𑀫𑀲𑀫𑀸𑀦𑀫𑁂𑀯𑀸𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺.

𑁪𑁬𑁯. 𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀼𑀦𑁆𑀢𑀺 𑀏𑀢𑁆𑀣 𑀢𑀺𑀘𑀻𑀯𑀭𑀁 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑁂𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀬𑀼𑀢𑁆𑀢𑀓𑀁, 𑀬𑀁 𑀯𑀸 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑁂𑀦 𑀅𑀥𑀺𑀝𑁆𑀞𑀸𑀢𑀼𑀁 𑀅𑀯𑀺𑀓𑀧𑁆𑀧𑁂𑀢𑀼𑀁 𑀅𑀦𑀼𑀚𑀸𑀦𑀸𑀫𑀺, 𑀢𑀲𑁆𑀲 𑀅𑀥𑀺𑀝𑁆𑀞𑀸𑀦𑀓𑀸𑀮𑀧𑀭𑀺𑀘𑁆𑀙𑁂𑀤𑀸𑀪𑀸𑀯𑀢𑁄 𑀲𑀩𑁆𑀩𑀓𑀸𑀮𑀁 𑀇𑀘𑁆𑀙𑀦𑁆𑀢𑀲𑁆𑀲 𑀅𑀥𑀺𑀝𑁆𑀞𑀸𑀢𑀼𑀁𑀬𑁂𑀯 𑀅𑀦𑀼𑀚𑀸𑀦𑀸𑀫𑀺, 𑀢𑀁 𑀓𑀸𑀮𑀧𑀭𑀺𑀘𑁆𑀙𑁂𑀤𑀁 𑀓𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑀼𑀁 𑀦𑀸𑀦𑀼𑀚𑀸𑀦𑀸𑀫𑀺. 𑀲𑀢𑀺 𑀧𑀦 𑀧𑀘𑁆𑀘𑀬𑁂 𑀬𑀤𑀸 𑀢𑀤𑀸 𑀯𑀸 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 ‘‘𑀅𑀦𑀸𑀧𑀢𑁆𑀢𑀺 𑀅𑀦𑁆𑀢𑁄𑀤𑀲𑀸𑀳𑀁 𑀅𑀥𑀺𑀝𑁆𑀞𑁂𑀢𑀺, 𑀯𑀺𑀓𑀧𑁆𑀧𑁂𑀢𑀻’’𑀢𑀺 𑀯𑀘𑀦𑀢𑁄 𑀲𑀺𑀤𑁆𑀥𑀁 𑀳𑁄𑀢𑀻𑀢𑀺 𑀯𑀼𑀢𑁆𑀢𑀫𑁂𑀢𑀁. 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼𑀁𑀬𑁂𑀯 𑀦𑀸𑀥𑀺𑀝𑁆𑀞𑀸𑀢𑀼𑀁. 𑀯𑀢𑁆𑀣𑀜𑁆𑀳𑀺 𑀓𑀢𑀧𑀭𑀺𑀬𑁄𑀲𑀺𑀢𑀁 𑀅𑀦𑁆𑀢𑁄𑀘𑀢𑀼𑀫𑀸𑀲𑁂 𑀯𑀲𑁆𑀲𑀸𑀦𑀤𑀺𑀯𑀲𑀁 𑀆𑀤𑀺𑀁 𑀓𑀢𑁆𑀯𑀸 𑀅𑀦𑁆𑀢𑁄𑀤𑀲𑀸𑀳𑁂 𑀅𑀥𑀺𑀝𑁆𑀞𑀸𑀢𑀼𑀁 𑀅𑀦𑀼𑀚𑀸𑀦𑀸𑀫𑀺, 𑀘𑀢𑀼𑀫𑀸𑀲𑀢𑁄 𑀉𑀤𑁆𑀥𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀓𑀢𑁆𑀯𑀸 𑀞𑀧𑀺𑀢𑀼𑀓𑀸𑀫𑁂𑀦 𑀯𑀺𑀓𑀧𑁆𑀧𑁂𑀢𑀼𑀁 𑀅𑀦𑀼𑀚𑀸𑀦𑀸𑀫𑀻𑀢𑀺 𑀅𑀢𑁆𑀣𑁄. 𑀲𑀼𑀕𑀢𑀘𑀻𑀯𑀭𑀢𑁄 𑀊𑀦𑀓𑀦𑁆𑀢𑀺 𑀢𑀺𑀡𑁆𑀡𑀫𑁆𑀧𑀺 𑀘𑀻𑀯𑀭𑀸𑀦𑀁 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁄. ‘‘𑀢𑀺𑀘𑀻𑀯𑀭𑀁 𑀧𑀦 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀅𑀥𑀺𑀝𑁆𑀞𑀸𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀸𑀤𑁂 𑀧𑀦 𑀲𑀢𑀺 𑀢𑀣𑀸𑀭𑀽𑀧𑀧𑀘𑁆𑀘𑀬𑁂 𑀯𑀝𑁆𑀝𑀢𑀺. 𑀬𑀣𑀸 𑀲𑀢𑀺 𑀧𑀘𑁆𑀘𑀬𑁂 𑀯𑀺𑀓𑀧𑁆𑀧𑁂𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀸𑀥𑀺𑀢𑀫𑁂𑀢𑀁, 𑀧𑀕𑁂𑀯 𑀅𑀜𑁆𑀜𑁂𑀦 𑀅𑀥𑀺𑀝𑁆𑀞𑀸𑀦𑁂𑀦 𑀅𑀥𑀺𑀝𑁆𑀞𑀸𑀢𑀼𑀁. ‘‘𑀅𑀦𑁆𑀢𑁄𑀤𑀲𑀸𑀳𑀁 𑀅𑀥𑀺𑀝𑁆𑀞𑁂𑀢𑀺, 𑀯𑀺𑀓𑀧𑁆𑀧𑁂𑀢𑀻’’𑀢𑀺 𑀅𑀦𑀺𑀬𑀫𑀢𑁄 𑀯𑀼𑀢𑁆𑀢𑀦𑁆𑀢𑀺 𑀲𑀗𑁆𑀖𑀸𑀝𑀺, 𑀉𑀢𑁆𑀢𑀭𑀸𑀲𑀗𑁆𑀕𑁄, 𑀅𑀦𑁆𑀢𑀭𑀯𑀸𑀲𑀓𑀦𑁆𑀢𑀺 𑀅𑀥𑀺𑀝𑁆𑀞𑀺𑀢𑀸𑀦𑀥𑀺𑀝𑁆𑀞𑀺𑀢𑀸𑀦𑀁 𑀲𑀫𑀸𑀦𑀫𑁂𑀯 𑀦𑀸𑀫𑀁. ‘‘𑀅𑀬𑀁 𑀲𑀗𑁆𑀖𑀸𑀝𑀻’’𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁧𑁨𑁬) 𑀳𑀺 𑀅𑀦𑀥𑀺𑀝𑁆𑀞𑀺𑀢𑀸 𑀯𑀼𑀢𑁆𑀢𑀸. ‘‘𑀢𑀺𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀲𑁂𑀬𑁆𑀬𑀸’’𑀢𑀺 𑀏𑀢𑁆𑀣 𑀅𑀥𑀺𑀝𑁆𑀞𑀺𑀢𑀸 𑀯𑀼𑀢𑁆𑀢𑀸. 𑀲𑀸𑀫𑀦𑁆𑀢𑀯𑀺𑀳𑀸𑀭𑁂 𑀯𑀸𑀢𑀺 𑀕𑁄𑀘𑀭𑀕𑀸𑀫𑀢𑁄 𑀯𑀺𑀳𑀸𑀭𑁂𑀢𑀺 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁄. 𑀤𑀽𑀭𑀢𑀭𑁂𑀧𑀺 𑀮𑀩𑁆𑀪𑀢𑁂𑀯𑀸𑀢𑀺 𑀆𑀘𑀭𑀺𑀬𑁄. 𑀅𑀦𑀼𑀕𑀡𑁆𑀞𑀺𑀧𑀤𑁂𑀧𑀺 ‘‘𑀲𑀸𑀫𑀦𑁆𑀢𑀯𑀺𑀳𑀸𑀭𑁂 𑀯𑀸𑀢𑀺 𑀤𑁂𑀲𑀦𑀸𑀲𑀻𑀲𑀫𑀢𑁆𑀢𑀁, 𑀢𑀲𑁆𑀫𑀸 𑀞𑀧𑀺𑀢𑀝𑁆𑀞𑀸𑀦𑀁 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀤𑀽𑀭𑁂 𑀞𑀺𑀢𑀫𑁆𑀧𑀺 𑀅𑀥𑀺𑀝𑁆𑀞𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀲𑀸𑀫𑀦𑁆𑀢𑀯𑀺𑀳𑀸𑀭𑁄 𑀦𑀸𑀫 𑀬𑀢𑁆𑀣 𑀢𑀤𑀳𑁂𑀯 𑀕𑀦𑁆𑀢𑁆𑀯𑀸 𑀦𑀺𑀯𑀢𑁆𑀢𑀺𑀢𑀼𑀁 𑀲𑀓𑁆𑀓𑀸. 𑀭𑀢𑁆𑀢𑀺𑀯𑀺𑀧𑁆𑀧𑀯𑀸𑀲𑀁 𑀭𑀓𑁆𑀔𑀦𑁆𑀢𑁂𑀦 𑀢𑀢𑁄 𑀤𑀽𑀭𑁂 𑀞𑀺𑀢𑀁 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀝𑁆𑀝𑀢𑀺, 𑀏𑀯𑀁 𑀓𑀺𑀭 𑀫𑀳𑀸𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀦𑁆𑀢𑀺. 𑀓𑁂𑀘𑀺 ‘‘𑀘𑀻𑀯𑀭𑀯𑀁𑀲𑁂 𑀞𑀧𑀺𑀢𑀁 𑀅𑀜𑁆𑀜𑁄 𑀧𑀭𑀺𑀯𑀢𑁆𑀢𑀺𑀢𑁆𑀯𑀸 𑀦𑀸𑀕𑀤𑀦𑁆𑀢𑁂 𑀞𑀧𑁂𑀢𑀺, 𑀢𑀁 𑀅𑀚𑀸𑀦𑀺𑀢𑁆𑀯𑀸 𑀅𑀥𑀺𑀝𑁆𑀞𑀳𑀦𑁆𑀢𑀲𑁆𑀲𑀧𑀺 𑀭𑀼𑀳𑀢𑀺 𑀘𑀻𑀯𑀭𑀲𑁆𑀲 𑀲𑀮𑁆𑀮𑀓𑁆𑀔𑀺𑀢𑀢𑁆𑀢𑀸’’𑀢𑀺 𑀯𑀤𑀦𑁆𑀢𑀺. 𑀅𑀥𑀺𑀝𑁆𑀞𑀳𑀺𑀢𑁆𑀯𑀸𑀢𑀺 𑀧𑀭𑀺𑀓𑁆𑀔𑀸𑀭𑀘𑁄𑀴𑀸𑀤𑀺𑀯𑀲𑁂𑀦. 𑀫𑀳𑀦𑁆𑀢𑀢𑀭𑀫𑁂𑀯𑀸𑀢𑀺𑀆𑀤𑀺 𑀲𑀩𑁆𑀩𑀸𑀥𑀺𑀝𑁆𑀞𑀸𑀦𑀲𑀸𑀥𑀸𑀭𑀡𑀮𑀓𑁆𑀔𑀡𑀁. 𑀢𑀢𑁆𑀣 𑀧𑀼𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀫𑁂𑀯𑀸𑀢𑀺 𑀅𑀥𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀲 𑀏𑀓𑀤𑁂𑀲𑀪𑀽𑀢𑀢𑁆𑀢𑀸. 𑀅𑀦𑀥𑀺𑀝𑁆𑀞𑀺𑀢𑀜𑁆𑀘𑁂, 𑀅𑀥𑀺𑀝𑁆𑀞𑀺𑀢𑀲𑁆𑀲 𑀅𑀧𑁆𑀧𑀪𑀸𑀯𑁂𑀦 𑀏𑀓𑀤𑁂𑀲𑀪𑀽𑀢𑀁 𑀅𑀥𑀺𑀝𑁆𑀞𑀺𑀢𑀲𑀗𑁆𑀔𑁆𑀬𑀫𑁂𑀯 𑀕𑀘𑁆𑀙𑀢𑀺. 𑀢𑀣𑀸 𑀅𑀥𑀺𑀝𑁆𑀞𑀺𑀢𑀜𑁆𑀘𑁂, 𑀅𑀦𑀥𑀺𑀝𑁆𑀞𑀺𑀢𑀲𑁆𑀲 𑀏𑀓𑀤𑁂𑀲𑀪𑀽𑀢𑀁 𑀅𑀦𑀥𑀺𑀝𑁆𑀞𑀺𑀢𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀻𑀢𑀺 𑀳𑀺 𑀮𑀓𑁆𑀔𑀡𑀁, 𑀦 𑀓𑁂𑀯𑀮𑀜𑁆𑀘𑁂𑀢𑁆𑀣 𑀤𑀼𑀢𑀺𑀬𑀧𑀝𑁆𑀝𑀫𑁂𑀯, 𑀢𑀢𑀺𑀬𑀧𑀝𑁆𑀝𑀸𑀤𑀺𑀓𑀫𑁆𑀧𑀺. 𑀬𑀣𑀸𑀳 ‘‘𑀅𑀦𑀼𑀚𑀸𑀦𑀸𑀫𑀺…𑀧𑁂… 𑀉𑀢𑀼𑀤𑁆𑀥𑀝𑀸𑀦𑀁 𑀤𑀼𑀲𑁆𑀲𑀸𑀦𑀁 𑀘𑀢𑀼𑀕𑁆𑀕𑀼𑀡𑀁 𑀲𑀗𑁆𑀖𑀸𑀝𑀺𑀁…𑀧𑁂… 𑀧𑀁𑀲𑀼𑀓𑀽𑀮𑁂 𑀬𑀸𑀯𑀤𑀢𑁆𑀣’’𑀦𑁆𑀢𑀺 (𑀫𑀳𑀸𑀯. 𑁩𑁪𑁮).

𑀅𑀯𑀲𑁂𑀲𑀸 𑀪𑀺𑀓𑁆𑀔𑀽𑀢𑀺 𑀯𑀓𑁆𑀔𑀫𑀸𑀦𑀓𑀸𑀮𑁂 𑀦𑀺𑀲𑀺𑀦𑁆𑀦𑀸 𑀪𑀺𑀓𑁆𑀔𑀽. 𑀢𑀲𑁆𑀫𑀸 𑀯𑀝𑁆𑀝𑀢𑀻𑀢𑀺 𑀬𑀣𑀸 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 𑀯𑀼𑀢𑁆𑀢𑀁, 𑀏𑀯𑀁 𑀧𑀭𑀺𑀓𑁆𑀔𑀸𑀭𑀘𑁄𑀴𑀫𑁆𑀧𑀺 𑀯𑀼𑀢𑁆𑀢𑀁, 𑀦 𑀢𑀲𑁆𑀲 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁄 𑀯𑀼𑀢𑁆𑀢𑁄, 𑀦 𑀘 𑀲𑀗𑁆𑀔𑁆𑀬𑀸𑀧𑀭𑀺𑀘𑁆𑀙𑁂𑀤𑁄, 𑀢𑀲𑁆𑀫𑀸 𑀢𑀻𑀡𑀺𑀧𑀺 𑀘𑀻𑀯𑀭𑀸𑀦𑀺 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 ‘‘𑀇𑀫𑀸𑀦𑀺 𑀘𑀻𑀯𑀭𑀸𑀦𑀺 𑀧𑀭𑀺𑀓𑁆𑀔𑀸𑀭𑀘𑁄𑀴𑀸𑀦𑀺 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀢𑁆𑀣𑁄. ‘‘𑀦𑀺𑀥𑀸𑀦𑀫𑀼𑀔𑀫𑁂𑀢’’𑀦𑁆𑀢𑀺 𑀓𑀣𑀁 𑀧𑀜𑁆𑀜𑀸𑀬𑀢𑀻𑀢𑀺 𑀘𑁂? ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀪𑀺𑀓𑁆𑀔𑀽𑀦𑀁 𑀧𑀭𑀺𑀧𑀼𑀡𑁆𑀡𑀁 𑀳𑁄𑀢𑀺 𑀢𑀺𑀘𑀻𑀯𑀭𑀁, 𑀅𑀢𑁆𑀣𑁄 𑀘 𑀳𑁄𑀢𑀺 𑀧𑀭𑀺𑀲𑁆𑀲𑀸𑀯𑀦𑁂𑀳𑀺𑀧𑀺 𑀣𑀯𑀺𑀓𑀸𑀳𑀺𑀧𑀻’’𑀢𑀺 𑀏𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀧𑀭𑀺𑀓𑁆𑀔𑀸𑀭𑀘𑁄𑀴’’𑀦𑁆𑀢𑀺 (𑀫𑀳𑀸𑀯. 𑁩𑁫𑁮) 𑀅𑀦𑀼𑀜𑁆𑀜𑀸𑀢𑀢𑁆𑀢𑀸. 𑀪𑀺𑀓𑁆𑀔𑀽𑀦𑀜𑁆𑀘 𑀏𑀓𑀫𑁂𑀯 𑀧𑀭𑀺𑀲𑁆𑀲𑀸𑀯𑀦𑀁, 𑀣𑀯𑀺𑀓𑀸 𑀯𑀸 𑀯𑀝𑁆𑀝𑀢𑀺, 𑀦 𑀤𑁆𑀯𑁂 𑀯𑀸 𑀢𑀻𑀡𑀺 𑀯𑀸𑀢𑀺 𑀧𑀝𑀺𑀓𑁆𑀔𑁂𑀧𑀸𑀪𑀸𑀯𑀢𑁄 𑀯𑀺𑀓𑀧𑁆𑀧𑀦𑀼𑀧𑀕𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀸𑀦𑀺, 𑀅𑀢𑀺𑀭𑁂𑀓𑀧𑁆𑀧𑀫𑀸𑀡𑀸𑀦𑀺 𑀯𑀸 𑀧𑀭𑀺𑀲𑁆𑀲𑀸𑀯𑀦𑀸𑀤𑀻𑀦𑀺 𑀧𑀭𑀺𑀓𑁆𑀔𑀸𑀭𑀸𑀦𑀺 𑀓𑀧𑁆𑀧𑀦𑁆𑀢𑀻𑀢𑀺 𑀲𑀺𑀤𑁆𑀥𑀁. 𑀬𑀤𑀺 𑀏𑀯𑀁 ‘‘𑀬𑀁𑀦𑀽𑀦𑀸𑀳𑀁 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑁂 𑀲𑀻𑀫𑀁 𑀩𑀦𑁆𑀥𑁂𑀬𑁆𑀬𑀁 𑀫𑀭𑀺𑀬𑀸𑀤𑀁 𑀞𑀧𑁂𑀬𑁆𑀬’’𑀦𑁆𑀢𑀺 (𑀫𑀳𑀸𑀯. 𑁩𑁪𑁬) 𑀯𑀘𑀦𑀯𑀺𑀭𑁄𑀥𑁄𑀢𑀺 𑀘𑁂? 𑀦, 𑀅𑀦𑀼𑀲𑀦𑁆𑀥𑀺𑀬𑀸 𑀅𑀚𑀸𑀦𑀦𑀢𑁄, 𑀯𑀺𑀭𑁄𑀥𑀢𑁄 𑀘. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀘𑀻𑀯𑀭𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁩𑁨𑁬 𑀆𑀤𑀬𑁄) 𑀧𑀞𑀫𑀁 𑀕𑀳𑀧𑀢𑀺𑀘𑀻𑀯𑀭𑀁 𑀅𑀦𑀼𑀜𑁆𑀜𑀸𑀢𑀁, 𑀢𑀢𑁄 𑀧𑀸𑀯𑀸𑀭𑀓𑁄𑀲𑀺𑀬𑀓𑁄𑀚𑀯𑀓𑀫𑁆𑀩𑀮𑀸𑀤𑀺. 𑀢𑀢𑁄 ‘‘𑀢𑁂𑀦 𑀔𑁄 𑀧𑀦 𑀲𑀫𑀬𑁂𑀦 𑀲𑀗𑁆𑀖𑀲𑁆𑀲 𑀉𑀘𑁆𑀘𑀸𑀯𑀘𑀸𑀦𑀺 𑀘𑀻𑀯𑀭𑀸𑀦𑀺 𑀉𑀧𑁆𑀧𑀦𑁆𑀦𑀸𑀦𑀺 𑀳𑁄𑀦𑁆𑀢𑀺. 𑀅𑀣 𑀔𑁄 𑀪𑀺𑀓𑁆𑀔𑀽𑀦𑀁 𑀏𑀢𑀤𑀳𑁄𑀲𑀺 ‘𑀓𑀺𑀁 𑀦𑀼 𑀔𑁄 𑀪𑀕𑀯𑀢𑀸 𑀘𑀻𑀯𑀭𑀁 𑀅𑀦𑀼𑀜𑁆𑀜𑀸𑀢𑀁, 𑀓𑀺𑀁 𑀅𑀦𑀦𑀼𑀜𑁆𑀜𑀸𑀢’’’𑀦𑁆𑀢𑀺 𑀏𑀢𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀙 𑀘𑀻𑀯𑀭𑀸𑀦𑀺 𑀔𑁄𑀫’’𑀦𑁆𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁩𑁩𑁯) 𑀓𑀧𑁆𑀧𑀺𑀬𑀘𑀻𑀯𑀭𑀚𑀸𑀢𑀺 𑀅𑀦𑀼𑀜𑁆𑀜𑀸𑀢𑀸, 𑀦 𑀧𑀦 𑀲𑀗𑁆𑀔𑁆𑀬𑀸𑀧𑀫𑀸𑀡𑀁. 𑀢𑀢𑁄 ‘‘𑀅𑀤𑁆𑀤𑀲 𑀪𑀕𑀯𑀸…𑀧𑁂… 𑀲𑀫𑁆𑀩𑀳𑀼𑀮𑁂 𑀪𑀺𑀓𑁆𑀔𑀽 𑀘𑀻𑀯𑀭𑁂𑀳𑀺 𑀉𑀩𑁆𑀪𑀡𑁆𑀟𑀺𑀢𑁂 𑀲𑀻𑀲𑁂𑀧𑀺 𑀘𑀻𑀯𑀭𑀪𑀺𑀲𑀺𑀁 𑀓𑀭𑀺𑀢𑁆𑀯𑀸 𑀔𑀦𑁆𑀥𑁂𑀧𑀺 𑀘𑀻𑀯𑀭𑀪𑀺𑀲𑀺𑀁 𑀓𑀭𑀺𑀢𑁆𑀯𑀸 𑀓𑀝𑀺𑀬𑀸𑀧𑀺 𑀘𑀻𑀯𑀭𑀪𑀺𑀲𑀺𑀁 𑀓𑀭𑀺𑀢𑁆𑀯𑀸 𑀆𑀕𑀘𑁆𑀙𑀦𑁆𑀢𑁂, 𑀤𑀺𑀲𑁆𑀯𑀸𑀦 𑀪𑀕𑀯𑀢𑁄 𑀏𑀢𑀤𑀳𑁄𑀲𑀺…𑀧𑁂… 𑀬𑁂𑀧𑀺 𑀔𑁄 𑀢𑁂 𑀓𑀼𑀮𑀧𑀼𑀢𑁆𑀢𑀸 𑀇𑀫𑀲𑁆𑀫𑀺𑀁 𑀥𑀫𑁆𑀫𑀯𑀺𑀦𑀬𑁂 𑀲𑀻𑀢𑀸𑀮𑀼𑀓𑀸 𑀲𑀻𑀢𑀪𑀻𑀭𑀼𑀓𑀸, 𑀢𑁂𑀧𑀺 𑀲𑀓𑁆𑀓𑁄𑀦𑁆𑀢𑀺 𑀢𑀺𑀘𑀻𑀯𑀭𑁂𑀦 𑀬𑀸𑀧𑁂𑀢𑀼𑀁, 𑀬𑀁𑀦𑀽𑀦𑀸𑀳𑀁 𑀪𑀺𑀓𑁆𑀔𑀽𑀦𑀁 𑀘𑀻𑀯𑀭𑁂 𑀲𑀻𑀫𑀁 𑀩𑀦𑁆𑀥𑁂𑀬𑁆𑀬𑀁 𑀫𑀭𑀺𑀬𑀸𑀤𑀁 𑀞𑀧𑁂𑀬𑁆𑀬𑀁 𑀢𑀺𑀘𑀻𑀯𑀭𑀁 𑀅𑀦𑀼𑀚𑀸𑀦𑁂𑀬𑁆𑀬’’𑀦𑁆𑀢𑀺 (𑀫𑀳𑀸𑀯. 𑁩𑁪𑁬) 𑀘𑀻𑀯𑀭𑀁 𑀅𑀦𑀼𑀜𑁆𑀜𑀸𑀢𑀁, 𑀢𑀜𑁆𑀘 𑀔𑁄 𑀏𑀓𑀫𑁂𑀯. 𑀙𑀩𑁆𑀩𑀕𑁆𑀕𑀺𑀬𑀸 𑀧𑀦 𑀫𑀺𑀘𑁆𑀙𑀸 𑀕𑀳𑁂𑀢𑁆𑀯𑀸 𑀩𑀳𑀽𑀦𑀺 𑀧𑀭𑀺𑀳𑀭𑀺𑀁𑀲𑀼. 𑀢𑀸𑀦𑀺 𑀦𑁂𑀲𑀁 𑀅𑀢𑀺𑀭𑁂𑀓𑀝𑁆𑀞𑀸𑀦𑁂 𑀞𑀺𑀢𑀸𑀦𑀺 𑀳𑁄𑀦𑁆𑀢𑀺. 𑀢𑀢𑁄 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀤𑀲𑀸𑀳𑀧𑀭𑀫𑀁 𑀅𑀢𑀺𑀭𑁂𑀓𑀘𑀻𑀯𑀭𑀁 𑀥𑀸𑀭𑁂𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁪𑁭) 𑀅𑀦𑀼𑀜𑁆𑀜𑀸𑀢𑀁, 𑀢𑁂𑀦𑁂𑀢𑀁 𑀧𑀜𑁆𑀜𑀸𑀬𑀢𑀺. 𑀅𑀢𑀺𑀭𑁂𑀓𑀸𑀦𑀺 𑀩𑀳𑀽𑀦𑀺 𑀘𑀻𑀯𑀭𑀸𑀦𑀺 𑀢𑁂 𑀧𑀭𑀺𑀳𑀭𑀺𑀁𑀲𑀼, ‘‘𑀢𑀸𑀦𑀺 𑀤𑀲𑀸𑀳𑀧𑀭𑀫𑀫𑁂𑀯 𑀥𑀸𑀭𑁂𑀢𑀼𑀁 𑀅𑀦𑀼𑀚𑀸𑀦𑀸𑀫𑀺, 𑀦 𑀢𑀫𑁂𑀯𑁂𑀓’’𑀦𑁆𑀢𑀺 𑀯𑀤𑀦𑁆𑀢𑁂𑀦 𑀬𑀸 𑀧𑀼𑀩𑁆𑀩𑁂 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑀲𑀗𑁆𑀔𑀸𑀢𑀸 𑀘𑀻𑀯𑀭𑁂 𑀲𑀻𑀫𑀸𑀩𑀤𑁆𑀥𑀸, 𑀫𑀭𑀺𑀬𑀸𑀤𑀸 𑀘 𑀞𑀧𑀺𑀢𑀸, 𑀢𑀸𑀬 𑀲𑀢𑀺𑀧𑀺 𑀢𑀺𑀘𑀻𑀯𑀭𑀩𑀸𑀳𑀼𑀮𑁆𑀮𑀧𑀭𑀺𑀳𑀭𑀡𑀓𑁆𑀓𑀫𑁄 𑀤𑀲𑁆𑀲𑀺𑀢𑁄 𑀤𑀺𑀯𑀲𑀧𑀭𑀺𑀘𑁆𑀙𑁂𑀤𑀯𑀲𑁂𑀦. 𑀢𑀢𑁄 𑀧𑀭𑀁 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀢𑀺𑀭𑁂𑀓𑀘𑀻𑀯𑀭𑀁 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁪𑁭) 𑀅𑀦𑀼𑀚𑀸𑀦𑀦𑁆𑀢𑁂𑀦 𑀯𑀺𑀦𑀸𑀧𑀺 𑀤𑀺𑀯𑀲𑀧𑀭𑀺𑀘𑁆𑀙𑁂𑀤𑁂𑀦 𑀅𑀢𑀺𑀭𑁂𑀓𑀘𑀻𑀯𑀭𑀧𑀭𑀺𑀳𑀭𑀡𑀓𑁆𑀓𑀫𑁄 𑀤𑀲𑁆𑀲𑀺𑀢𑁄𑀢𑀺 𑀤𑁆𑀯𑁂𑀧𑀺 𑀢𑀸𑀦𑀺 𑀦𑀺𑀥𑀸𑀦𑀫𑀼𑀔𑀸𑀦𑀻𑀢𑀺 𑀲𑀺𑀤𑁆𑀥𑀁. 𑀢𑀣𑀸 𑀧𑀭𑀺𑀓𑁆𑀔𑀸𑀭𑀘𑁄𑀴𑀸𑀥𑀺𑀝𑁆𑀞𑀸𑀦𑀫𑁆𑀧𑀺 𑀲𑀺𑀬𑀸, 𑀅𑀜𑁆𑀜𑀣𑀸 𑀇𑀢𑀭𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑀸𑀦𑀼𑀚𑀸𑀦𑀦𑀯𑀺𑀭𑁄𑀥𑁄 𑀲𑀺𑀬𑀸 𑀲𑀻𑀫𑀸𑀫𑀭𑀺𑀬𑀸𑀤𑀝𑁆𑀞𑀧𑀦𑀯𑀺𑀭𑁄𑀥𑀢𑁄. 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑀧𑀜𑁆𑀜𑀢𑁆𑀢𑀺𑀬𑁂𑀯 𑀢𑀺𑀘𑀻𑀯𑀭𑀫𑀭𑀺𑀬𑀸𑀤𑀸 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀸𑀝𑁂𑀓𑁆𑀓𑀁 𑀦𑀺𑀥𑀸𑀦𑀫𑀼𑀔𑀫𑁂𑀢’’𑀦𑁆𑀢𑀺. ‘‘𑀧𑀞𑀫𑀁 𑀢𑀺𑀘𑀻𑀯𑀭𑀁 𑀢𑀺𑀘𑀻𑀯𑀭𑀸𑀥𑀺𑀝𑁆𑀞𑀸𑀦𑁂𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀁, 𑀧𑀼𑀦 𑀧𑀭𑀺𑀳𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑁂𑀦 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀅𑀥𑀺𑀝𑁆𑀞𑀸𑀢𑀩𑁆𑀩𑀁, 𑀦 𑀢𑁆𑀯𑁂𑀯 𑀆𑀤𑀺𑀢𑁄𑀯 𑀇𑀤𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀬𑀣𑀸 𑀢𑀺𑀘𑀻𑀯𑀭𑀁 𑀧𑀭𑀺𑀳𑀭𑀺𑀢𑀼𑀁 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀕𑀺𑀮𑀸𑀦𑀲𑁆𑀲 𑀯𑀺𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺 𑀅𑀦𑀼𑀜𑁆𑀜𑀸𑀢𑀸, 𑀅𑀕𑀺𑀮𑀸𑀦𑀲𑁆𑀲𑀧𑀺 𑀲𑀸𑀲𑀗𑁆𑀓𑀲𑀺𑀓𑁆𑀔𑀸𑀧𑀤𑁂 (𑀧𑀸𑀭𑀸. 𑁬𑁫𑁨) 𑀢𑀲𑁆𑀲 𑀅𑀦𑁆𑀢𑀭𑀖𑀭𑁂 𑀦𑀺𑀓𑁆𑀔𑁂𑀧𑁄 𑀘, 𑀢𑀢𑁄𑀧𑀺 𑀲𑀢𑀺 𑀧𑀘𑁆𑀘𑀬𑁂 𑀙𑀸𑀭𑀢𑁆𑀢𑀯𑀺𑀧𑁆𑀧𑀯𑀸𑀲𑁄, 𑀢𑀢𑁄𑀧𑀺 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀧𑀘𑁆𑀘𑀼𑀤𑁆𑀥𑀸𑀭𑁄, 𑀧𑀘𑁆𑀘𑀼𑀤𑁆𑀥𑀝𑀫𑁆𑀧𑀺 𑀅𑀦𑁆𑀢𑁄𑀤𑀲𑀸𑀳𑁂 𑀅𑀥𑀺𑀝𑁆𑀞𑀸𑀢𑀼𑀁, 𑀅𑀲𑀓𑁆𑀓𑁄𑀦𑁆𑀢𑀲𑁆𑀲 𑀯𑀺𑀓𑀧𑁆𑀧𑀦𑀸 𑀘 𑀅𑀦𑀼𑀜𑁆𑀜𑀸𑀢𑀸. 𑀢𑀣𑁂𑀯 𑀤𑁆𑀯𑀺𑀦𑁆𑀦𑀫𑁆𑀧𑀺 𑀲𑀫𑁆𑀫𑀼𑀔𑀸𑀧𑀭𑀫𑁆𑀫𑀼𑀔𑀸𑀯𑀺𑀓𑀧𑁆𑀧𑀦𑀸𑀦𑀁 𑀧𑀭𑀲𑀦𑁆𑀢𑀓𑀢𑁆𑀢𑀸 𑀯𑀺𑀓𑀧𑁆𑀧𑀦𑀧𑀘𑁆𑀘𑀬𑁂 𑀅𑀲𑀢𑀺 ‘𑀧𑀭𑀺𑀓𑁆𑀔𑀸𑀭𑀘𑁄𑀴’𑀦𑁆𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀪𑀕𑀯𑀢𑀸 𑀅𑀦𑀼𑀜𑁆𑀜𑀸𑀢𑀁 𑀲𑀺𑀬𑀸, 𑀬𑀢𑁄 𑀢𑀤𑀥𑀺𑀧𑁆𑀧𑀸𑀬𑀜𑁆𑀜𑀽 𑀏𑀯𑀁 𑀯𑀤𑀦𑁆𑀢𑀻’’𑀢𑀺 𑀫𑀳𑀸𑀧𑀘𑁆𑀘𑀭𑀺𑀬𑀫𑁆𑀧𑀺 𑀯𑀼𑀢𑁆𑀢𑀁. 𑀧𑀼𑀩𑁆𑀩𑁂𑀢𑀺𑀆𑀤𑀺 ‘‘𑀧𑀸𑀝𑁂𑀓𑁆𑀓𑀁 𑀦𑀺𑀥𑀸𑀦𑀫𑀼𑀔’’𑀦𑁆𑀢𑀺 𑀯𑀼𑀢𑁆𑀢𑀲𑁆𑀲 𑀧𑀬𑁄𑀕𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀅𑀩𑀤𑁆𑀥𑀲𑀻𑀫𑀸𑀬𑀁 𑀤𑀼𑀧𑁆𑀧𑀭𑀺𑀳𑀸𑀭𑀦𑁆𑀢𑀺 𑀯𑀺𑀓𑀧𑁆𑀧𑀦𑀸𑀤𑀺𑀅𑀢𑁆𑀣𑀸𑀬 𑀉𑀧𑀘𑀸𑀭𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀧𑀺 𑀕𑀫𑀦𑀲𑀫𑁆𑀪𑀯𑀢𑁄.

𑀯𑀲𑁆𑀲𑀺𑀓𑀲𑀸𑀝𑀺𑀓𑀸 𑀅𑀦𑀢𑀺𑀭𑀺𑀢𑁆𑀢𑀧𑁆𑀧𑀫𑀸𑀡𑀸𑀢𑀺 𑀢𑀲𑁆𑀲𑀸 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀧𑀘𑁆𑀘𑀢𑁆𑀣𑀭𑀡𑀫𑁆𑀧𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀫𑁂𑀯𑀸𑀢𑀺 ‘‘𑀇𑀤𑀁, 𑀪𑀦𑁆𑀢𑁂, 𑀅𑀫𑁆𑀳𑀸𑀓𑀁 𑀲𑁂𑀦𑀸𑀲𑀦𑀲𑁆𑀲 𑀉𑀧𑀭𑀺 𑀅𑀢𑁆𑀣𑀭𑀺𑀢𑀩𑁆𑀩’’𑀦𑁆𑀢𑀺𑀆𑀤𑀺𑀦𑀸 𑀤𑀺𑀦𑁆𑀦𑀁 𑀦𑀸𑀥𑀺𑀝𑁆𑀞𑀸𑀢𑀩𑁆𑀩𑀁, ‘‘𑀇𑀤𑀁 𑀢𑀼𑀫𑁆𑀳𑀸𑀓’’𑀦𑁆𑀢𑀺 𑀤𑀺𑀦𑁆𑀦𑀁 𑀲𑀬𑀁 𑀅𑀥𑀺𑀧𑁆𑀧𑁂𑀢𑀁𑀯 𑀅𑀥𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀲𑀓𑀺𑀁 𑀅𑀥𑀺𑀝𑁆𑀞𑀺𑀢𑀁 𑀅𑀥𑀺𑀝𑁆𑀞𑀺𑀢𑀫𑁂𑀯 𑀳𑁄𑀢𑀺, 𑀦 𑀧𑀼𑀦 𑀧𑀘𑁆𑀘𑀼𑀤𑁆𑀥𑀭𑀻𑀬𑀢𑀺 𑀓𑀸𑀮𑀧𑀭𑀺𑀘𑁆𑀙𑁂𑀤𑀸𑀪𑀸𑀯𑀢𑁄’’𑀢𑀺 𑀮𑀺𑀔𑀺𑀢𑀁. ‘‘𑀏𑀓𑀯𑀘𑀦𑁂𑀦𑀧𑀺 𑀯𑀝𑁆𑀝𑀢𑀻𑀢𑀺 𑀅𑀧𑀭𑁂’’𑀢𑀺 𑀯𑀼𑀢𑁆𑀢𑀁. 𑀪𑁂𑀲𑀚𑁆𑀚𑀦𑀯𑀓𑀫𑁆𑀫𑀫𑀸𑀢𑀸𑀧𑀺𑀢𑀼𑀆𑀤𑀻𑀦𑀁 𑀅𑀢𑁆𑀣𑀸𑀬𑀸𑀢𑀺 𑀏𑀢𑁆𑀣 ‘‘𑀇𑀫𑀺𑀦𑀸 𑀪𑁂𑀲𑀚𑁆𑀚𑀁 𑀘𑁂𑀢𑀸𑀧𑁂𑀲𑁆𑀲𑀸𑀫𑀺, 𑀇𑀤𑀁 𑀫𑀸𑀢𑀼𑀬𑀸 𑀤𑀲𑁆𑀲𑀸𑀫𑀻’’𑀢𑀺 𑀞𑀧𑁂𑀦𑁆𑀢𑁂𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. ‘‘‘𑀇𑀤𑀁 𑀪𑁂𑀲𑀚𑁆𑀚𑀲𑁆𑀲, 𑀇𑀫𑀁 𑀫𑀸𑀢𑀼𑀬𑀸’𑀢𑀺 𑀯𑀺𑀪𑀚𑀦𑁆𑀢𑁂𑀦 𑀅𑀥𑀺𑀝𑁆𑀞𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀅𑀧𑀭𑁂’’𑀢𑀺 𑀯𑀼𑀢𑁆𑀢𑀁. ‘‘𑀲𑀓𑀪𑀸𑀯𑀁 𑀫𑁄𑀘𑁂𑀢𑁆𑀯𑀸 𑀞𑀧𑀦𑀁 𑀲𑀦𑁆𑀥𑀸𑀬𑀸𑀳𑀸’’𑀢𑀺 𑀮𑀺𑀔𑀺𑀢𑀁.

‘‘𑀧𑀼𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀅𑀬𑀁 𑀲𑀗𑁆𑀕𑀻𑀢𑀺𑀢𑁄 𑀧𑀝𑁆𑀞𑀸𑀬 𑀆𑀕𑀢𑀅𑀝𑁆𑀞𑀓𑀣𑀸𑀯𑀸𑀤𑁄. 𑀢𑀢𑁄 𑀧𑀭𑀁 𑀆𑀘𑀭𑀺𑀬𑀸𑀦𑀁 𑀢𑀢𑁆𑀣 𑀢𑀢𑁆𑀣 𑀬𑀼𑀢𑁆𑀢𑀺𑀯𑀺𑀘𑀸𑀭𑀡𑀸’’𑀢𑀺 𑀯𑀼𑀢𑁆𑀢𑀁. 𑀧𑀫𑀸𑀡𑀘𑀻𑀯𑀭𑀲𑁆𑀲𑀸𑀢𑀺 𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀲𑁆𑀲. 𑀤𑁆𑀯𑁂 𑀘𑀻𑀯𑀭𑀸𑀦𑀻𑀢𑀺 𑀲𑀳 𑀉𑀢𑁆𑀢𑀭𑀸𑀲𑀗𑁆𑀕𑁂𑀦. 𑀏𑀲 𑀦𑀬𑁄𑀢𑀺 𑀧𑀫𑀸𑀡𑀬𑀼𑀢𑁆𑀢𑁂𑀲𑀼 𑀬𑀢𑁆𑀣 𑀓𑀢𑁆𑀣𑀘𑀻𑀢𑀺𑀆𑀤𑀺𑀦𑀬𑁄𑀯. ‘‘𑀢𑀁 𑀅𑀢𑀺𑀓𑁆𑀓𑀸𑀫𑀬𑀢𑁄 𑀙𑁂𑀤𑀦𑀓’’𑀦𑁆𑀢𑀺 (𑀧𑀸𑀘𑀺. 𑁫𑁩𑁩) 𑀯𑀘𑀦𑀢𑁄 𑀉𑀢𑁆𑀢𑀭𑀺 𑀧𑀝𑀺𑀲𑀺𑀤𑁆𑀥𑀁, 𑀢𑀢𑁄 𑀳𑁂𑀝𑁆𑀞𑀸 𑀅𑀧𑁆𑀧𑀝𑀺𑀲𑀺𑀤𑁆𑀥𑀢𑁆𑀢𑀸 𑀯𑀝𑁆𑀝𑀢𑀺. 𑀢𑀢𑁆𑀣 𑀲𑀺𑀬𑀸 𑁋 𑀢𑀺𑀘𑀻𑀯𑀭𑀲𑁆𑀲 𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀁 𑀯𑀺𑀲𑀼𑀁 𑀲𑀼𑀢𑁆𑀢𑁂 𑀦𑀢𑁆𑀣𑀻𑀢𑀺, 𑀦 𑀯𑀢𑁆𑀢𑀩𑁆𑀩𑀁, 𑀲𑀺𑀓𑁆𑀔𑀸𑀓𑀭𑀡𑀻𑀬𑁂𑀳𑀺 𑀲𑀺𑀤𑁆𑀥𑀢𑁆𑀢𑀸. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? ‘‘‘𑀧𑀭𑀺𑀫𑀡𑁆𑀟𑀮𑀁 𑀦𑀺𑀯𑀸𑀲𑁂𑀲𑁆𑀲𑀸𑀫𑀺, 𑀧𑀸𑀭𑀼𑀧𑀺𑀲𑁆𑀲𑀸𑀫𑀺, 𑀲𑀼𑀧𑁆𑀧𑀝𑀺𑀘𑁆𑀙𑀦𑁆𑀦𑁄 𑀅𑀦𑁆𑀢𑀭𑀖𑀭𑁂 𑀕𑀫𑀺𑀲𑁆𑀲𑀸𑀫𑀻’𑀢𑀺 (𑀧𑀸𑀘𑀺. 𑁫𑁭𑁬-𑁫𑁭𑁯) 𑀯𑀘𑀦𑀢𑁄 𑀬𑀢𑁆𑀢𑀓𑁂𑀦 𑀧𑀫𑀸𑀡𑁂𑀦 𑀧𑀭𑀺𑀫𑀡𑁆𑀟𑀮𑀢𑀸, 𑀲𑀼𑀧𑁆𑀧𑀝𑀺𑀘𑁆𑀙𑀦𑁆𑀦𑀢𑀸 𑀘 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀓𑁆𑀓𑀫𑁂𑀦 𑀲𑀫𑁆𑀧𑀚𑁆𑀚𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁. 𑀢𑁂𑀲𑀁 𑀯𑀲𑁂𑀦 𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀦𑁆𑀢𑀺 𑀲𑀺𑀤𑁆𑀥𑀁, 𑀢𑀜𑁆𑀘 𑀔𑁄 𑀫𑀼𑀝𑁆𑀞𑀺𑀧𑀜𑁆𑀘𑀓𑀸𑀤𑀺 𑀬𑀣𑀸𑀯𑀼𑀢𑁆𑀢𑀫𑁂𑀯 𑀯𑀼𑀘𑁆𑀘𑀢𑁂. 𑀢𑁂𑀦𑁂𑀯𑀸𑀳 𑀮𑁂𑀲𑀁 𑀞𑀧𑁂𑀢𑁆𑀯𑀸 ‘‘𑀯𑀺𑀲𑀼𑀁 𑀲𑀼𑀢𑁆𑀢𑁂 𑀦𑀢𑁆𑀣𑀻’’𑀢𑀺.

𑀅𑀧𑀺𑀘𑁂𑀢𑁆𑀣 𑀅𑀥𑀺𑀧𑁆𑀧𑁂𑀢𑀁, 𑀢𑀣𑀸𑀧𑀺 𑀦 𑀲𑀫𑁂𑀢𑀺𑀬𑁂𑀯𑀸𑀢𑀺 𑀅𑀢𑁆𑀣𑁄, 𑀢𑀲𑁆𑀫𑀸 ‘‘𑀬𑀤𑀻’’𑀢𑀺𑀆𑀤𑀺𑀲𑀫𑁆𑀩𑀦𑁆𑀥𑁄 𑀅𑀤𑁆𑀥𑀸 𑀯𑀼𑀢𑁆𑀢𑁄. 𑀬𑀲𑁆𑀫𑀸 𑀧𑀭𑀺𑀘𑁆𑀙𑀺𑀦𑁆𑀦𑁄 𑀲𑀫𑁂𑀢𑀺 𑀘. 𑀇𑀢𑀭𑁂𑀲𑀼 𑀧𑀦 𑀏𑀓𑀘𑁆𑀘𑀲𑁆𑀫𑀺𑀁 𑀆𑀘𑀭𑀺𑀬𑀯𑀸𑀤𑁂 𑀦𑁂𑀯 𑀧𑀭𑀺𑀘𑁆𑀙𑁂𑀤𑁄 𑀅𑀢𑁆𑀣𑀺. 𑀏𑀓𑀘𑁆𑀘𑀲𑁆𑀫𑀺𑀁 𑀦 𑀧𑀼𑀩𑁆𑀩𑀸𑀧𑀭𑀁 𑀲𑀫𑁂𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀅𑀥𑀺𑀝𑁆𑀞𑀸𑀦𑀁 𑀅𑀥𑀺𑀝𑁆𑀞𑀸𑀦𑀫𑁂𑀯, 𑀧𑀭𑀺𑀪𑁄𑀕𑀓𑀸𑀮𑁂 𑀧𑀦 𑀅𑀭𑀚𑀺𑀢𑀁 𑀦 𑀯𑀝𑁆𑀝𑀢𑀺. 𑀇𑀤𑀁 𑀲𑀩𑁆𑀩𑀁 𑀢𑀺𑀘𑀻𑀯𑀭𑁂 𑀏𑀯. 𑀇𑀫𑀲𑁆𑀲 𑀧𑀦 𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀬𑀁 𑀲𑀗𑁆𑀔𑁂𑀧𑀯𑀺𑀦𑀺𑀘𑁆𑀙𑀬𑁄 𑁋 𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀳𑁂𑀫𑀦𑁆𑀢𑀸𑀦𑀁 𑀧𑀞𑀫𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀕𑀺𑀫𑁆𑀳𑀸𑀦𑀁 𑀧𑀞𑀫𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀉𑀧𑁆𑀧𑀦𑁆𑀦𑀘𑀻𑀯𑀭𑀁 𑀲𑀦𑁆𑀥𑀸𑀬 ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺.

𑀏𑀢𑁆𑀣𑀸𑀳 𑁋 ‘‘𑀭𑀚𑀓𑁂𑀳𑀺 𑀥𑁄𑀯𑀸𑀧𑁂𑀢𑁆𑀯𑀸 𑀲𑁂𑀢𑀁 𑀓𑀸𑀭𑀸𑀧𑁂𑀦𑁆𑀢𑀲𑁆𑀲𑀸𑀧𑀺 𑀅𑀥𑀺𑀝𑁆𑀞𑀸𑀦𑀁 𑀅𑀥𑀺𑀝𑁆𑀞𑀸𑀦𑀫𑁂𑀯𑀸’’𑀢𑀺 𑀯𑀘𑀦𑀢𑁄 𑀅𑀭𑀚𑀺𑀢𑁂𑀧𑀺 𑀅𑀥𑀺𑀝𑁆𑀞𑀸𑀦𑀁 𑀭𑀼𑀳𑀢𑀺, 𑀢𑁂𑀦 𑀲𑀽𑀘𑀺𑀓𑀫𑁆𑀫𑀁 𑀓𑀢𑁆𑀯𑀸 𑀭𑀚𑀺𑀢𑁆𑀯𑀸 𑀓𑀧𑁆𑀧𑀩𑀺𑀦𑁆𑀤𑀼𑀁 𑀤𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀦𑀺𑀬𑀫𑁄 𑀦 𑀓𑀸𑀢𑀩𑁆𑀩𑁄𑀢𑀺? 𑀯𑀼𑀘𑁆𑀘𑀢𑁂, 𑀓𑀸𑀢𑀩𑁆𑀩𑁄𑀯 𑀧𑀢𑁆𑀢𑁄 𑀯𑀺𑀬 𑀅𑀥𑀺𑀝𑁆𑀞𑀺𑀢𑁄. 𑀬𑀣𑀸 𑀧𑀼𑀦 𑀲𑁂𑀢𑀪𑀸𑀯𑀁, 𑀢𑀫𑁆𑀩𑀪𑀸𑀯𑀁 𑀯𑀸 𑀧𑀢𑁆𑀢𑁄 𑀅𑀥𑀺𑀝𑁆𑀞𑀸𑀦𑀁 𑀦 𑀯𑀺𑀚𑀳𑀢𑀺, 𑀦 𑀘 𑀧𑀦 𑀢𑀸𑀤𑀺𑀲𑁄 𑀅𑀥𑀺𑀝𑁆𑀞𑀸𑀦𑀁 𑀉𑀧𑀕𑀘𑁆𑀙𑀢𑀺, 𑀏𑀯𑀫𑁂𑀢𑀁 𑀤𑀝𑁆𑀞𑀩𑁆𑀩𑀦𑁆𑀢𑀺. ‘‘𑀬𑀢𑁄 𑀧𑀝𑁆𑀞𑀸𑀬 𑀧𑀭𑀺𑀪𑁄𑀕𑀸𑀤𑀬𑁄 𑀯𑀝𑁆𑀝𑀦𑁆𑀢𑀺, 𑀢𑀢𑁄 𑀧𑀝𑁆𑀞𑀸𑀬 𑀅𑀦𑁆𑀢𑁄𑀤𑀲𑀸𑀳𑁂 𑀅𑀥𑀺𑀝𑁆𑀞𑀸𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑀺.

𑀅𑀯𑀺𑀲𑁂𑀲𑁂𑀦 𑀯𑀼𑀢𑁆𑀢𑀯𑀘𑀦𑀦𑁆𑀢𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀁 𑀅𑀥𑀺𑀝𑁆𑀞𑁂𑀢𑀺, 𑀯𑀺𑀓𑀧𑁆𑀧𑁂𑀢𑀩𑁆𑀩𑀁 𑀯𑀺𑀓𑀧𑁆𑀧𑁂𑀢𑀻𑀢𑀺 𑀏𑀯𑀁 𑀲𑀯𑀺𑀲𑁂𑀲𑀁 𑀓𑀢𑁆𑀯𑀸 𑀅𑀯𑀘𑀦𑀁 ‘‘𑀦 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁫𑁮) 𑀇𑀫𑀺𑀦𑀸 𑀯𑀺𑀭𑀼𑀤𑁆𑀥𑀁 𑀯𑀺𑀬 𑀤𑀺𑀲𑁆𑀲𑀢𑀺. 𑀇𑀤𑀸𑀦𑀺 𑀇𑀤𑀁 𑀅𑀥𑀺𑀝𑁆𑀞𑀸𑀦𑀯𑀺𑀓𑀧𑁆𑀧𑀦𑀦𑀬𑀧𑀝𑀺𑀩𑀤𑁆𑀥𑀁 𑀔𑀦𑁆𑀥𑀓𑀁, 𑀧𑀭𑀺𑀯𑀸𑀭𑀜𑁆𑀘 𑀫𑀺𑀲𑁆𑀲𑁂𑀢𑁆𑀯𑀸 𑀧𑀓𑀺𑀡𑁆𑀡𑀓𑀁 𑀯𑀼𑀘𑁆𑀘𑀢𑀺 𑁋 𑀔𑀦𑁆𑀥𑀓𑁂 𑀢𑀸𑀯 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀺𑀓𑀧𑁆𑀧𑁂𑀢𑀼𑀁, 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀯𑀲𑁆𑀲𑀸𑀦𑀁 𑀘𑀸𑀢𑀼𑀫𑀸𑀲𑀁 𑀅𑀥𑀺𑀝𑁆𑀞𑀸𑀢𑀼𑀁, 𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀧𑀭𑀺𑀯𑀸𑀭𑁂 ‘‘𑀦 𑀦𑀯 𑀘𑀻𑀯𑀭𑀸𑀦𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀸𑀦𑀺, 𑀦 𑀦𑀯 𑀘𑀻𑀯𑀭𑀸𑀦𑀺 𑀯𑀺𑀓𑀧𑁆𑀧𑁂𑀢𑀩𑁆𑀩𑀸𑀦𑀻’’𑀢𑀺 (𑀧𑀭𑀺. 𑁩𑁨𑁯), ‘‘𑀤𑀲𑀓𑁂 𑀤𑀲, 𑀏𑀓𑀸𑀤𑀲𑀓𑁂 𑀏𑀓𑀸𑀤𑀲 𑀘𑀻𑀯𑀭𑀸𑀦𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀸𑀦𑀺, 𑀦 𑀯𑀺𑀓𑀧𑁆𑀧𑁂𑀢𑀩𑁆𑀩𑀸𑀦𑀻’’𑀢𑀺 (𑀧𑀭𑀺. 𑁩𑁩𑁧) 𑀘 𑀅𑀦𑁂𑀓𑀓𑁆𑀔𑀢𑁆𑀢𑀼𑀁 𑀯𑀘𑀦𑁂𑀦 𑀲𑀼𑀝𑁆𑀞𑀼 𑀤𑀴𑁆𑀳𑀁 𑀓𑀢𑁆𑀯𑀸 ‘‘𑀲𑀩𑁆𑀩𑀸𑀦𑀺 𑀘𑀻𑀯𑀭𑀸𑀦𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀸𑀦𑀺, 𑀦 𑀯𑀺𑀓𑀧𑁆𑀧𑁂𑀢𑀩𑁆𑀩𑀸𑀦𑀻’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀉𑀪𑁄𑀧𑀺 𑀢𑁂 𑀯𑀺𑀭𑀼𑀤𑁆𑀥𑀸 𑀯𑀺𑀬 𑀤𑀺𑀲𑁆𑀲𑀦𑁆𑀢𑀺, 𑀔𑀦𑁆𑀥𑀓𑁂 𑀏𑀯 𑀘 ‘‘𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀯𑀲𑁆𑀲𑀸𑀦𑀁 𑀘𑀸𑀢𑀼𑀫𑀸𑀲𑀁 𑀅𑀥𑀺𑀝𑁆𑀞𑀸𑀢𑀼𑀁 𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁫𑁮) 𑀯𑀼𑀢𑁆𑀢𑀁. 𑀢𑀤𑀝𑁆𑀞𑀓𑀣𑀸𑀬𑀁 ‘‘𑀯𑀲𑁆𑀲𑀺𑀓𑀲𑀸𑀝𑀺𑀓𑀸 𑀅𑀦𑀢𑀺𑀭𑀺𑀢𑁆𑀢𑀧𑁆𑀧𑀫𑀸𑀡𑀸 𑀦𑀸𑀫𑀁 𑀕𑀳𑁂𑀢𑁆𑀯𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀘𑀢𑁆𑀢𑀸𑀭𑁄 𑀯𑀲𑁆𑀲𑀺𑀓𑁂 𑀫𑀸𑀲𑁂 𑀅𑀥𑀺𑀝𑁆𑀞𑀸𑀢𑀩𑁆𑀩𑀸, 𑀢𑀢𑁄 𑀧𑀭𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁. 𑀇𑀤𑀜𑁆𑀘 𑀯𑀺𑀭𑀼𑀤𑁆𑀥𑀁 𑀯𑀺𑀬 𑀤𑀺𑀲𑁆𑀲𑀢𑀺 𑀅𑀜𑁆𑀜𑀫𑀜𑁆𑀜𑀁 𑀳𑁂𑀫𑀦𑁆𑀢𑁂 𑀧𑀘𑁆𑀘𑀼𑀤𑁆𑀥𑀸𑀭𑀲𑀫𑁆𑀪𑀯𑀢𑁄, 𑀯𑀲𑁆𑀲𑀸𑀦𑁂 𑀯𑀺𑀓𑀧𑁆𑀧𑀦𑀸𑀲𑀫𑁆𑀪𑀯𑀢𑁄 𑀘. 𑀢𑀣𑀸 𑀇𑀥 ‘‘𑀅𑀦𑀸𑀧𑀢𑁆𑀢𑀺 𑀅𑀦𑁆𑀢𑁄𑀤𑀲𑀸𑀳𑀁 𑀅𑀥𑀺𑀝𑁆𑀞𑁂𑀢𑀺 𑀯𑀺𑀓𑀧𑁆𑀧𑁂𑀢𑀻’’𑀢𑀺 𑀯𑀘𑀦𑀧𑁆𑀧𑀫𑀸𑀡𑀢𑁄 𑀲𑀩𑁆𑀩𑀢𑁆𑀣 𑀯𑀺𑀓𑀧𑁆𑀧𑀦𑀸𑀬 𑀅𑀧𑁆𑀧𑀝𑀺𑀲𑀺𑀤𑁆𑀥𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯) 𑀅𑀝𑁆𑀞𑀓𑀣𑀸𑀯𑀘𑀦𑀁 𑀧𑀭𑀺𑀯𑀸𑀭𑀯𑀘𑀦𑁂𑀦 𑀯𑀺𑀭𑀼𑀤𑁆𑀥𑀁 𑀯𑀺𑀬 𑀤𑀺𑀲𑁆𑀲𑀢𑀺, 𑀦 𑀳𑀺 𑀯𑀺𑀭𑀼𑀤𑁆𑀥𑀁 𑀢𑀣𑀸𑀕𑀢𑀸 𑀪𑀸𑀲𑀦𑁆𑀢𑀺, 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀦𑀬𑁄𑀯𑁂𑀢𑁆𑀣 𑀧𑀝𑀺𑀲𑀭𑀡𑀁, 𑀬𑁂𑀦 𑀲𑀩𑁆𑀩𑀫𑁆𑀧𑀺 𑀢𑀁 𑀏𑀓𑀭𑀲𑀁 𑀳𑁄𑀢𑀺. 𑀧𑀭𑀺𑀯𑀸𑀭𑀝𑁆𑀞𑀓𑀣𑀸𑀬𑀜𑁆𑀘 𑀯𑀼𑀢𑁆𑀢𑀁 ‘‘𑀦 𑀯𑀺𑀓𑀧𑁆𑀧𑁂𑀢𑀩𑁆𑀩𑀸𑀦𑀻𑀢𑀺 𑀅𑀥𑀺𑀝𑁆𑀞𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀦 𑀯𑀺𑀓𑀧𑁆𑀧𑁂𑀢𑀩𑁆𑀩𑀸𑀦𑀻’’𑀢𑀺 (𑀧𑀭𑀺. 𑀅𑀝𑁆𑀞. 𑁩𑁨𑁯). 𑀢𑀺𑀘𑀻𑀯𑀭𑀸𑀦𑀺 𑀅𑀥𑀺𑀝𑁆𑀞𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬, 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀤𑀻𑀦𑀺 𑀘 𑀅𑀢𑁆𑀢𑀦𑁄 𑀅𑀢𑁆𑀢𑀦𑁄 𑀅𑀥𑀺𑀝𑁆𑀞𑀸𑀦𑀔𑁂𑀢𑁆𑀢𑁂 𑀦 𑀅𑀓𑀸𑀫𑀸 𑀯𑀺𑀓𑀧𑁆𑀧𑁂𑀢𑀩𑁆𑀩𑀸𑀦𑀻𑀢𑀺 𑀅𑀢𑁆𑀣𑁄, 𑀅𑀯𑀲𑁂𑀲𑀧𑀸𑀴𑀺, 𑀅𑀢𑁆𑀣𑁄 𑀘 𑀇𑀥 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀲𑀩𑁆𑀩𑀫𑁆𑀧𑁂𑀢𑀁 𑀏𑀓𑀭𑀲𑀦𑁆𑀢𑀺.

𑀏𑀢𑁆𑀣𑀸𑀳 𑁋 𑀬𑀤𑀺 𑀏𑀯𑀁 ‘‘𑀦𑀯 𑀘𑀻𑀯𑀭𑀸𑀦𑀺 𑀦𑀸𑀥𑀺𑀝𑁆𑀞𑀸𑀢𑀩𑁆𑀩𑀸𑀦𑀻’’𑀢𑀺 𑀘 𑀯𑀢𑁆𑀢𑀩𑁆𑀩𑀁. 𑀯𑀺𑀓𑀧𑁆𑀧𑀺𑀢𑀓𑀸𑀮𑀢𑁄 𑀧𑀝𑁆𑀞𑀸𑀬 𑀳𑀺 𑀦𑀸𑀥𑀺𑀝𑁆𑀞𑀸𑀢𑀩𑁆𑀩𑀸𑀦𑀻𑀢𑀺? 𑀏𑀢𑁆𑀣 𑀯𑀼𑀘𑁆𑀘𑀢𑁂 𑁋 ‘‘𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀺𑀓𑀧𑁆𑀧𑁂𑀢𑀼𑀁…𑀧𑁂… 𑀧𑀭𑀺𑀓𑁆𑀔𑀸𑀭𑀘𑁄𑀴𑀁 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 𑀏𑀢𑁆𑀣 𑀲𑀩𑁆𑀩𑀢𑁆𑀣 𑀅𑀥𑀺𑀝𑁆𑀞𑀸𑀦𑁂 𑀧𑀝𑀺𑀲𑁂𑀥𑀸𑀤𑀲𑁆𑀲𑀦𑀢𑁄, 𑀯𑀺𑀓𑀧𑁆𑀧𑀦𑀸𑀬 𑀅𑀤𑀲𑁆𑀲𑀦𑀢𑁄 𑀘 ‘‘𑀢𑀢𑁄 𑀧𑀭’’𑀦𑁆𑀢𑀺 𑀤𑁆𑀯𑀻𑀲𑁆𑀯𑁂𑀯 𑀧𑀭𑀺𑀘𑁆𑀙𑁂𑀤𑀤𑀲𑁆𑀲𑀦𑀢𑁄 𑀘 ‘‘𑀦𑀯 𑀘𑀻𑀯𑀭𑀸𑀦𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀸𑀦𑀺, 𑀦 𑀯𑀺𑀓𑀧𑁆𑀧𑁂𑀢𑀩𑁆𑀩𑀸𑀦𑀺 𑀘𑁂𑀯 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀧𑀭𑁄 𑀦𑀬𑁄 𑁋 𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀼𑀁 𑀅𑀓𑀸𑀫𑀸. 𑀓𑀲𑁆𑀫𑀸? 𑀓𑀸𑀮𑁂 𑀉𑀧𑁆𑀧𑀦𑁆𑀦𑀁 𑀅𑀦𑀥𑀺𑀝𑁆𑀞𑀳𑀦𑁆𑀢𑀲𑁆𑀲 𑀓𑀸𑀮𑀸𑀢𑀺𑀓𑁆𑀓𑀫𑁂 𑀆𑀧𑀢𑁆𑀢𑀺𑀲𑀫𑁆𑀪𑀯𑀢𑁄, 𑀅𑀓𑀸𑀮𑁂 𑀉𑀧𑁆𑀧𑀦𑁆𑀦𑀁 𑀅𑀦𑀥𑀺𑀝𑁆𑀞𑀳𑀦𑁆𑀢𑀲𑁆𑀲 𑀤𑀲𑀸𑀳𑀸𑀢𑀺𑀓𑁆𑀓𑀫𑁂 𑀆𑀧𑀢𑁆𑀢𑀺𑀲𑀫𑁆𑀪𑀯𑀢𑁄 𑀘. 𑀢𑀢𑁆𑀣 𑀬𑀁 𑀓𑀸𑀮𑁂 𑀉𑀧𑁆𑀧𑀦𑁆𑀦𑀁 𑀅𑀧𑁆𑀧𑀳𑁄𑀦𑁆𑀢𑁂𑀧𑀺 𑀤𑀲𑀸𑀳𑁂 𑀓𑀸𑀮𑀸𑀢𑀺𑀓𑁆𑀓𑀫𑁂 𑀆𑀧𑀢𑁆𑀢𑀺𑀓𑀭𑀁, 𑀢𑀁 𑀦𑀺𑀲𑁆𑀲𑀚𑁆𑀚𑀦𑀓𑀸𑀮𑁂 ‘‘𑀇𑀤𑀁 𑀫𑁂, 𑀪𑀦𑁆𑀢𑁂, 𑀅𑀢𑀺𑀭𑁂𑀓𑀘𑀻𑀯𑀭𑀁 𑀥𑀸𑀭𑀺𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀇𑀫𑀸𑀳𑀁 𑀲𑀗𑁆𑀖𑀲𑁆𑀲𑀸’’𑀢𑀺𑀆𑀤𑀺𑀦𑀸 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁, 𑀇𑀢𑀭𑀁 𑀬𑀣𑀸𑀧𑀸𑀴𑀺𑀫𑁂𑀯. 𑀢𑀢𑁆𑀣 𑀧𑀞𑀫𑀦𑀬𑁄 ‘‘𑀬𑁄 𑀧𑀦, 𑀪𑀺𑀓𑁆𑀔𑀼, 𑀅𑀢𑀺𑀭𑁂𑀓𑀘𑀻𑀯𑀭𑀁 𑀥𑀸𑀭𑁂𑀬𑁆𑀬 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺 𑀇𑀫𑀸𑀬 𑀧𑀞𑀫𑀧𑀜𑁆𑀜𑀢𑁆𑀢𑀺𑀬𑀸 𑀯𑀲𑁂𑀦 𑀯𑀼𑀢𑁆𑀢𑁄, 𑀤𑀼𑀢𑀺𑀬𑁄 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑀸 𑀯𑀲𑁂𑀦 𑀯𑀼𑀢𑁆𑀢𑁄.

𑀬𑀣𑀸 𑀘 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀯𑀢𑁆𑀣𑀼𑀫𑁆𑀳𑀺 𑀅𑀲𑀢𑀺 𑀬𑀣𑀸𑀧𑀸𑀴𑀺𑀁 𑀅𑀯𑀢𑁆𑀯𑀸 𑀓𑁂𑀯𑀮𑀁 𑀆𑀧𑀢𑁆𑀢𑀺 𑀏𑀯 𑀤𑁂𑀲𑁂𑀢𑀩𑁆𑀩𑀸, 𑀬𑀣𑀸 𑀘 𑀯𑀲𑁆𑀲𑀺𑀓𑀲𑀸𑀝𑀺𑀓𑀦𑀺𑀲𑁆𑀲𑀚𑁆𑀚𑀦𑁂 𑀓𑁂𑀯𑀮𑀁 𑀧𑀭𑀺𑀬𑀺𑀝𑁆𑀞𑀫𑀢𑁆𑀢𑁂 𑀬𑀣𑀸𑀧𑀸𑀴𑀺𑀁 𑀅𑀯𑀢𑁆𑀯𑀸 𑀬𑀣𑀸𑀲𑀫𑁆𑀪𑀯𑀁 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁, 𑀢𑀣𑀸 𑀇𑀤𑀫𑁆𑀧𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀬𑀣𑀸 𑀲𑀁𑀯𑀘𑁆𑀙𑀭𑀸𑀢𑀺𑀓𑁆𑀓𑀦𑁆𑀢𑀁 𑀅𑀢𑀺𑀭𑁂𑀓𑀘𑀻𑀯𑀭𑀁 ‘‘𑀤𑀲𑀸𑀳𑀸𑀢𑀺𑀓𑁆𑀓𑀦𑁆𑀢’’𑀫𑀺𑀘𑁆𑀘𑁂𑀯 𑀯𑀼𑀘𑁆𑀘𑀢𑀺. 𑀲𑀁𑀯𑀘𑁆𑀙𑀭𑀯𑀺𑀧𑁆𑀧𑀯𑀼𑀢𑁆𑀣𑀢𑀺𑀘𑀻𑀯𑀭𑀁, 𑀫𑀸𑀲𑀸𑀢𑀺𑀓𑁆𑀓𑀦𑁆𑀢𑀜𑁆𑀘 ‘‘𑀭𑀢𑁆𑀢𑀺𑀯𑀺𑀧𑁆𑀧𑀯𑀼𑀢𑁆𑀣’’𑀦𑁆𑀢𑀺 𑀘 ‘‘𑀙𑀸𑀭𑀢𑁆𑀢𑀯𑀺𑀧𑁆𑀧𑀯𑀼𑀢𑁆𑀣’’𑀦𑁆𑀢𑀺 𑀘 𑀯𑀼𑀘𑁆𑀘𑀢𑀺, 𑀢𑀣𑀸 𑀇𑀤𑀫𑁆𑀧𑀺 ‘‘𑀤𑀲𑀸𑀳𑀸𑀢𑀺𑀓𑁆𑀓𑀦𑁆𑀢’’𑀫𑀺𑀘𑁆𑀘𑁂𑀯 𑀯𑀼𑀘𑁆𑀘𑀢𑀻𑀢𑀺 𑀏𑀓𑁂, 𑀢𑀲𑁆𑀫𑀸 𑀲𑀺𑀤𑁆𑀥𑀫𑀺𑀤𑀁 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀢𑀺𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀼𑀁 𑀅𑀓𑀸𑀫𑀸’’𑀢𑀺, 𑀢𑀣𑀸 𑀅𑀓𑀸𑀫𑀸 𑀦 𑀯𑀺𑀓𑀧𑁆𑀧𑁂𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀇𑀘𑁆𑀙𑀸𑀬 𑀳𑀺 𑀲𑀢𑀺 ‘‘𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀯𑀺𑀧𑁆𑀧𑀯𑀸𑀲𑀲𑀼𑀔𑀢𑁆𑀣𑀁 𑀯𑀺𑀓𑀧𑁆𑀧𑀦𑀸𑀬 𑀑𑀓𑀸𑀲𑁄 𑀤𑀺𑀦𑁆𑀦𑁄 𑀳𑁄𑀢𑀺, 𑀤𑀲𑀸𑀳𑀸𑀢𑀺𑀓𑁆𑀓𑀫𑁂 𑀘 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀘𑀦𑀢𑁄 𑀯𑀺𑀓𑀧𑁆𑀧𑁂𑀢𑀼𑀁 𑀅𑀦𑀼𑀚𑀸𑀦𑀸𑀫𑀻𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺. 𑀢𑀣𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀸 𑀅𑀓𑀸𑀫𑀸 𑀅𑀥𑀺𑀝𑁆𑀞𑀸𑀢𑀼𑀁 𑀤𑀲𑀸𑀳𑀸𑀢𑀺𑀓𑁆𑀓𑀫𑁂 𑀆𑀧𑀢𑁆𑀢𑀺𑀲𑀫𑁆𑀪𑀯𑀢𑁄. 𑀓𑀺𑀢𑁆𑀢𑀓𑀁 𑀓𑀸𑀮𑀦𑁆𑀢𑀺 𑀘𑁂? 𑀯𑀲𑁆𑀲𑀸𑀦𑀁 𑀘𑀸𑀢𑀼𑀫𑀸𑀲𑀁, 𑀇𑀘𑁆𑀙𑀸𑀬 𑀧𑀦 𑀲𑀢𑀺 𑀉𑀤𑁆𑀥𑀁𑀬𑁂𑀯 𑀯𑀺𑀓𑀧𑁆𑀧𑁂𑀢𑀩𑁆𑀩𑀁. ‘‘𑀲𑀩𑁆𑀩𑀢𑁆𑀣 𑀯𑀺𑀓𑀧𑁆𑀧𑀦𑀸𑀬 𑀅𑀧𑁆𑀧𑀝𑀺𑀲𑀺𑀤𑁆𑀥𑀪𑀸𑀯𑁄 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀳𑀺 𑀯𑀼𑀢𑁆𑀢𑀁. ‘‘𑀅𑀢𑁆𑀣𑀸𑀧𑀢𑁆𑀢𑀺 𑀳𑁂𑀫𑀦𑁆𑀢𑁂 𑀆𑀧𑀚𑁆𑀚𑀢𑀺, 𑀦𑁄 𑀕𑀺𑀫𑁆𑀳𑁂, 𑀦𑁄 𑀯𑀲𑁆𑀲𑁂’’𑀢𑀺 (𑀧𑀭𑀺. 𑁩𑁨𑁩) 𑀘 𑀯𑀼𑀢𑁆𑀢𑀁, 𑀢𑁂𑀦 𑀯𑀼𑀢𑁆𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀢𑀢𑁄 𑀧𑀭𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑀩𑁆𑀩𑀸’’𑀢𑀺.

𑀢𑀢𑁆𑀭𑀸𑀬𑀁 𑀯𑀺𑀘𑀸𑀭𑀡𑀸 𑁋 𑀓𑀤𑀸 𑀧𑀘𑁆𑀘𑀼𑀤𑁆𑀥𑀭𑀺𑀢𑀩𑁆𑀩𑀸, 𑀓𑀤𑀸 𑀯𑀺𑀓𑀧𑁆𑀧𑁂𑀢𑀩𑁆𑀩𑀸, 𑀓𑀺𑀜𑁆𑀘𑁂𑀢𑁆𑀣 𑀬𑀲𑁆𑀫𑀸 ‘‘𑀢𑀢𑁄 𑀧𑀭’’𑀦𑁆𑀢𑀺 𑀯𑀼𑀢𑁆𑀢𑀁. 𑀳𑁂𑀫𑀦𑁆𑀢𑀜𑁆𑀘 𑀧𑀢𑁆𑀢𑀫𑀢𑁆𑀢𑁂 𑀲𑀸 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀢𑀺, 𑀢𑀲𑁆𑀫𑀸 ‘‘𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀁 𑀅𑀥𑀺𑀝𑁆𑀞𑀸𑀦𑀲𑁆𑀲 𑀦𑀢𑁆𑀣𑀺𑀢𑀸𑀬, 𑀅𑀣 ‘‘𑀅𑀦𑁆𑀢𑁄𑀘𑀸𑀢𑀼𑀫𑀸𑀲𑁂 𑀯𑀺𑀓𑀧𑁆𑀧𑁂𑀢𑀩𑁆𑀩𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀁. ‘‘𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀦𑁆𑀢𑀺? 𑀏𑀢𑁆𑀣 𑀏𑀓𑀘𑁆𑀘𑁂 𑀯𑀤𑀦𑁆𑀢𑀺 ‘‘𑀯𑀢𑁆𑀢𑀩𑁆𑀩𑀫𑁂𑀢’’𑀦𑁆𑀢𑀺. 𑀬𑀣𑀸 𑀧𑀭𑀺𑀯𑀼𑀢𑁆𑀣𑀧𑀭𑀺𑀯𑀸𑀲𑁄, 𑀘𑀺𑀡𑁆𑀡𑀫𑀸𑀦𑀢𑁆𑀢𑁄 𑀘 𑀲𑀦𑁆𑀢𑁄 𑀦𑀺𑀝𑁆𑀞𑀺𑀢𑁂𑀲𑀼𑀧𑀺 𑀧𑀭𑀺𑀯𑀸𑀲𑀫𑀸𑀦𑀢𑁆𑀢𑀤𑀺𑀯𑀲𑁂𑀲𑀼, 𑀢𑀣𑀸 𑀦𑀺𑀝𑁆𑀞𑀺𑀢𑁂𑀲𑀼𑀧𑀺 𑀅𑀥𑀺𑀝𑁆𑀞𑀸𑀦𑀤𑀺𑀯𑀲𑁂𑀲𑀼 𑀲𑀸𑀥𑀺𑀝𑁆𑀞𑀸𑀦𑀫𑁂𑀢𑀦𑁆𑀢𑀺 𑀏𑀓𑁂. 𑀅𑀝𑁆𑀞𑀓𑀣𑀸𑀘𑀭𑀺𑀬𑀸𑀦𑀁 𑀇𑀤𑀁 𑀲𑀦𑁆𑀦𑀺𑀝𑁆𑀞𑀸𑀦𑀁 ‘‘𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀤𑀺𑀯𑀲𑁂 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀧𑀸𑀝𑀺𑀧𑀤𑀤𑀺𑀯𑀲𑁂 𑀯𑀺𑀓𑀧𑁆𑀧𑁂𑀢𑀩𑁆𑀩𑀸’’𑀢𑀺. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀧𑀭𑀺𑀯𑀸𑀭𑀝𑁆𑀞𑀓𑀣𑀸𑀬𑀁 ‘‘𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀲𑀺𑀬𑀸 𑀧𑀘𑁆𑀙𑀺𑀫𑁂 𑀧𑀸𑀝𑀺𑀧𑀤𑀤𑀺𑀯𑀲𑁂 𑀯𑀺𑀓𑀧𑁆𑀧𑁂𑀢𑁆𑀯𑀸 𑀞𑀧𑀺𑀢𑀁 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀦𑀺𑀯𑀸𑀲𑁂𑀦𑁆𑀢𑁄 𑀳𑁂𑀫𑀦𑁆𑀢𑁂 𑀆𑀧𑀚𑁆𑀚𑀢𑀺. 𑀓𑀼𑀭𑀼𑀦𑁆𑀤𑀺𑀬𑀁 𑀧𑀦 ‘𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀤𑀺𑀯𑀲𑁂 𑀅𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀳𑁂𑀫𑀦𑁆𑀢𑁂 𑀆𑀧𑀚𑁆𑀚𑀢𑀻’𑀢𑀺 𑀯𑀼𑀢𑁆𑀢𑀁, 𑀢𑀫𑁆𑀧𑀺 𑀲𑀼𑀯𑀼𑀢𑁆𑀢𑀁. ‘𑀘𑀸𑀢𑀼𑀫𑀸𑀲𑀁 𑀅𑀥𑀺𑀝𑁆𑀞𑀸𑀢𑀼𑀁, 𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼’𑀦𑁆𑀢𑀺 𑀳𑀺 𑀯𑀼𑀢𑁆𑀢’’𑀦𑁆𑀢𑀺 (𑀧𑀭𑀺. 𑀅𑀝𑁆𑀞. 𑁩𑁨𑁩). 𑀢𑀢𑁆𑀣 𑀓𑀼𑀭𑀼𑀦𑁆𑀤𑀺𑀦𑀬𑁄 𑀧𑀘𑁆𑀙𑀸 𑀯𑀼𑀢𑁆𑀢𑀢𑁆𑀢𑀸 𑀲𑀸𑀭𑀢𑁄 𑀤𑀝𑁆𑀞𑀩𑁆𑀩𑁄, 𑀦 𑀧𑀼𑀭𑀺𑀫𑁄. 𑀦𑀺𑀯𑀸𑀲𑁂𑀦𑁆𑀢𑁄 𑀳𑀺 𑀕𑀺𑀫𑁆𑀳𑁂𑀧𑀺 𑀑𑀭𑁂𑀦𑀤𑁆𑀥𑀫𑀸𑀲𑀁 𑀆𑀧𑀚𑁆𑀚𑀢𑀺 𑀏𑀯. 𑀇𑀥 𑀘 ‘‘𑀅𑀢𑁆𑀣𑀸𑀧𑀢𑁆𑀢𑀺 𑀳𑁂𑀫𑀦𑁆𑀢𑁂 𑀆𑀧𑀚𑁆𑀚𑀢𑀺, 𑀦𑁄 𑀕𑀺𑀫𑁆𑀳𑁂𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀓𑀼𑀭𑀼𑀦𑁆𑀤𑀺𑀯𑀘𑀦𑀲𑁆𑀲𑀸𑀬𑀫𑀢𑁆𑀣𑁄 𑀤𑀺𑀲𑁆𑀲𑀢𑀺.

‘‘𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀤𑀺𑀯𑀲𑁂 𑀅𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀢𑀲𑁆𑀫𑀺𑀁𑀬𑁂𑀯 𑀤𑀺𑀯𑀲𑁂 𑀅𑀯𑀺𑀓𑀧𑁆𑀧𑁂𑀦𑁆𑀢𑁄 𑀧𑀘𑁆𑀙𑀺𑀫𑀧𑀸𑀝𑀺𑀧𑀤𑀤𑀺𑀯𑀲𑁂 𑀅𑀧𑀘𑁆𑀘𑀼𑀤𑁆𑀥𑀸𑀭𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺, 𑀦, 𑀅𑀯𑀺𑀓𑀧𑁆𑀧𑀦𑀧𑀘𑁆𑀘𑀬𑀸 𑀤𑀲𑀸𑀳𑀧𑀭𑀺𑀳𑀸𑀭𑀲𑀫𑁆𑀪𑀯𑀢𑁄’’𑀢𑀺 𑀓𑀸𑀭𑀡𑀫𑁂𑀓𑁂 𑀯𑀤𑀦𑁆𑀢𑀺. 𑀏𑀯𑀁 𑀲𑀢𑀺 𑀳𑁂𑀫𑀦𑁆𑀢𑁂 𑀧𑀢𑁆𑀢𑀫𑀢𑁆𑀢𑁂 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀢𑀻𑀢𑀺 𑀆𑀧𑀚𑁆𑀚𑀢𑀺, 𑀢𑀜𑁆𑀘 𑀅𑀬𑀼𑀢𑁆𑀢𑀁. 𑀅𑀥𑀺𑀝𑁆𑀞𑀸𑀦𑀜𑁆𑀳𑀺 ‘‘𑀅𑀜𑁆𑀜𑀲𑁆𑀲 𑀤𑀸𑀦𑁂𑀦…𑀧𑁂… 𑀙𑀺𑀤𑁆𑀤𑀪𑀸𑀯𑁂𑀦𑀸𑀢𑀺 𑀇𑀫𑁂𑀳𑀺 𑀦𑀯𑀳𑀺 𑀓𑀸𑀭𑀡𑁂𑀳𑀺 𑀯𑀺𑀚𑀳𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯) 𑀯𑀼𑀢𑁆𑀢𑀁, 𑀦 ‘‘𑀅𑀥𑀺𑀝𑁆𑀞𑀸𑀦𑀔𑁂𑀢𑁆𑀢𑀸𑀢𑀺𑀓𑁆𑀓𑀫𑁂𑀦 𑀯𑀸’’𑀢𑀺. 𑀅𑀲𑀸𑀥𑀸𑀭𑀡𑀢𑁆𑀢𑀸 𑀦 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀦, ‘‘𑀙𑀺𑀤𑁆𑀤𑀪𑀸𑀯𑁂𑀦𑀸’’𑀢𑀺 𑀦 𑀯𑀢𑁆𑀢𑀩𑁆𑀩𑀧𑁆𑀧𑀲𑀗𑁆𑀕𑀢𑁄, 𑀙𑀺𑀤𑁆𑀤𑀪𑀸𑀯𑁂𑀦 𑀧𑀦 𑀢𑀺𑀘𑀻𑀯𑀭𑀲𑁆𑀲𑁂𑀯 𑀲𑀩𑁆𑀩𑀝𑁆𑀞𑀓𑀣𑀸𑀲𑀼 𑀅𑀥𑀺𑀝𑁆𑀞𑀸𑀦𑀯𑀺𑀚𑀳𑀦𑀲𑁆𑀲 𑀯𑀼𑀢𑁆𑀢𑀢𑁆𑀢𑀸. 𑀢𑀲𑁆𑀫𑀸 𑀳𑁂𑀫𑀦𑁆𑀢𑀲𑁆𑀲 𑀧𑀞𑀫𑀤𑀺𑀯𑀲𑁂 𑀅𑀧𑀘𑁆𑀘𑀼𑀤𑁆𑀥𑀸𑀭𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺, 𑀦 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀅𑀯𑀺𑀓𑀧𑁆𑀧𑀦𑀧𑀘𑁆𑀘𑀬𑀸. ‘‘𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 𑀯𑀘𑀦𑀢𑁄 𑀢𑀢𑁄 𑀅𑀥𑀺𑀝𑁆𑀞𑀸𑀦𑀁 𑀦 𑀯𑀺𑀚𑀳𑀢𑀻𑀢𑀺 𑀧𑀜𑁆𑀜𑀸𑀬𑀢𑀺. 𑀦 𑀳𑀺 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀲𑀺𑀬𑀸 𑀧𑀘𑁆𑀙𑀺𑀫𑁂 𑀧𑀸𑀝𑀺𑀧𑀤𑀤𑀺𑀯𑀲𑁂 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀳𑁂𑀫𑀦𑁆𑀢𑁂 𑀆𑀧𑀚𑁆𑀚𑀢𑀻𑀢𑀺 𑀯𑀼𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄, 𑀬𑀲𑁆𑀫𑀸 𑀢𑀁 𑀅𑀧𑀘𑁆𑀘𑀼𑀤𑁆𑀥𑀸𑀭𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀁 𑀳𑁂𑀫𑀦𑁆𑀢𑀲𑁆𑀲 𑀧𑀞𑀫𑀅𑀭𑀼𑀡𑀓𑁆𑀔𑀡𑁂 𑀏𑀯 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 ‘‘𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀤𑀺𑀯𑀲𑁂 𑀅𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁. 𑀧𑀘𑁆𑀘𑀼𑀤𑁆𑀥𑀝𑀁 𑀧𑀦 𑀳𑁂𑀫𑀦𑁆𑀢𑁂 𑀤𑀲𑀸𑀳𑀧𑀭𑀺𑀳𑀸𑀭𑀁 𑀮𑀪𑀢𑀺. ‘‘𑀤𑀲𑀸𑀳𑁂 𑀅𑀧𑁆𑀧𑀳𑁄𑀦𑁆𑀢𑁂 𑀘𑀻𑀯𑀭𑀓𑀸𑀮𑀁 𑀦𑀸𑀢𑀺𑀓𑁆𑀓𑀸𑀫𑁂𑀢𑀩𑁆𑀩𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁩𑁦) 𑀳𑀺 𑀯𑀼𑀢𑁆𑀢𑀁, 𑀢𑀜𑁆𑀘 𑀔𑁄 𑀲𑀫𑀬𑁂 𑀉𑀧𑁆𑀧𑀦𑁆𑀦𑀁 𑀘𑁂, 𑀦𑀸𑀲𑀫𑀬𑁂. 𑀢𑀣𑀸 𑀘 𑀲𑀸𑀥𑀺𑀢𑀁 𑀅𑀧𑀘𑁆𑀘𑀼𑀤𑁆𑀥𑀝𑀁 𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺, 𑀦𑁄 𑀘 𑀢𑀁 𑀧𑀭𑀺𑀤𑀳𑀺𑀢𑀁, 𑀢𑀲𑁆𑀫𑀸 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀤𑀺𑀯𑀲𑁂 𑀏𑀯 𑀧𑀘𑁆𑀘𑀼𑀤𑁆𑀥𑀭𑀡𑀜𑁆𑀘 𑀯𑀺𑀓𑀧𑁆𑀧𑀦𑀜𑁆𑀘 𑀓𑀢𑁆𑀢𑀩𑁆𑀩𑀦𑁆𑀢𑀺 𑀲𑀺𑀤𑁆𑀥𑀁, 𑀏𑀢𑁆𑀣 𑀘 𑀬𑀣𑀸 𑀅𑀢𑀺𑀭𑁂𑀓𑀘𑀻𑀯𑀭𑀁 𑀤𑀲𑀫𑁂 𑀤𑀺𑀯𑀲𑁂 𑀯𑀺𑀓𑀧𑁆𑀧𑁂𑀦𑁆𑀢𑁂𑀦 𑀤𑀲𑀸𑀳𑀧𑀭𑀫𑀁 𑀥𑀸𑀭𑀺𑀢𑀁 𑀳𑁄𑀢𑀺, 𑀅𑀦𑁆𑀢𑁄𑀤𑀲𑀸𑀳𑁂 𑀘 𑀯𑀺𑀓𑀧𑁆𑀧𑀺𑀢𑀁 𑀳𑁄𑀢𑀺, 𑀢𑀣𑀸 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀬 𑀯𑀺𑀓𑀧𑁆𑀧𑁂𑀦𑁆𑀢𑁂𑀦 𑀯𑀲𑁆𑀲𑀸𑀦𑀁 𑀘𑀸𑀢𑀼𑀫𑀸𑀲𑀁 𑀅𑀥𑀺𑀝𑁆𑀞𑀺𑀢𑀜𑁆𑀘 𑀳𑁄𑀢𑀺, 𑀢𑀢𑁄 𑀧𑀭𑀁 𑀅𑀦𑀸𑀧𑀢𑁆𑀢𑀺𑀔𑁂𑀢𑁆𑀢𑁂 𑀏𑀯 𑀯𑀺𑀓𑀧𑁆𑀧𑀦𑀸 𑀘 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸 𑀅𑀢𑁆𑀣𑀺 𑀯𑀺𑀓𑀧𑁆𑀧𑀦𑀸𑀔𑁂𑀢𑁆𑀢𑁂 𑀅𑀥𑀺𑀝𑁆𑀞𑀸𑀦𑀁, 𑀅𑀥𑀺𑀝𑁆𑀞𑀸𑀦𑀔𑁂𑀢𑁆𑀢𑁂 𑀘 𑀯𑀺𑀓𑀧𑁆𑀧𑀦𑀸𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀅𑀜𑁆𑀜𑀣𑀸 ‘‘𑀅𑀢𑁆𑀣𑀸𑀧𑀢𑁆𑀢𑀺 𑀅𑀥𑀺𑀝𑁆𑀞𑀸𑀦𑁂𑀦 𑀆𑀧𑀚𑁆𑀚𑀢𑀺, 𑀅𑀦𑀥𑀺𑀝𑁆𑀞𑀸𑀦𑁂𑀦 𑀆𑀧𑀚𑁆𑀚𑀢𑀺. 𑀅𑀢𑁆𑀣𑀸𑀧𑀢𑁆𑀢𑀺 𑀯𑀺𑀓𑀧𑁆𑀧𑀦𑀸𑀬 𑀆𑀧𑀚𑁆𑀚𑀢𑀺, 𑀅𑀯𑀺𑀓𑀧𑁆𑀧𑀦𑀸𑀬 𑀆𑀧𑀚𑁆𑀚𑀢𑀻’’𑀢𑀺 𑀤𑀼𑀓𑁂𑀲𑀼 𑀤𑁆𑀯𑁂 𑀤𑀼𑀓𑀸𑀦𑀺 𑀯𑀢𑁆𑀢𑀩𑁆𑀩𑀸𑀦𑀺 𑀲𑀺𑀬𑀼𑀁. 𑀢𑀢𑁆𑀣 𑀧𑀞𑀫𑀤𑀼𑀓𑁂 𑀧𑀞𑀫𑀧𑀤𑀁 𑀲𑀫𑁆𑀪𑀯𑀢𑀺. 𑀯𑀺𑀓𑀧𑁆𑀧𑀦𑀔𑁂𑀢𑁆𑀢𑁂 𑀳𑀺 𑀯𑀲𑁆𑀲𑀺𑀓𑀲𑀸𑀝𑀺𑀓𑀸𑀤𑀻𑀦𑀁 𑀅𑀥𑀺𑀝𑁆𑀞𑀸𑀦𑁂𑀦 𑀯𑀺𑀦𑀬𑀸𑀢𑀺𑀲𑀸𑀭𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺. 𑀏𑀢𑁂𑀦𑁂𑀯 𑀤𑀼𑀢𑀺𑀬𑀤𑀼𑀓𑁆𑀓𑀝𑀲𑁆𑀲 𑀤𑀼𑀢𑀺𑀬𑀧𑀤𑀁 𑀯𑀼𑀢𑁆𑀢𑀁 𑀳𑁄𑀢𑀺. 𑀅𑀦𑀥𑀺𑀝𑁆𑀞𑀸𑀦𑁂𑀦 𑀆𑀧𑀚𑁆𑀚𑀢𑀻𑀢𑀺 𑀦𑀢𑁆𑀣𑀺. 𑀅𑀦𑁆𑀢𑁄𑀤𑀲𑀸𑀳𑁂 𑀅𑀦𑀸𑀧𑀚𑁆𑀚𑀦𑀢𑁄, 𑀯𑀺𑀓𑀧𑁆𑀧𑀦𑀸𑀤𑀺𑀲𑀫𑁆𑀪𑀯𑀢𑁄 𑀘 𑀯𑀺𑀓𑀧𑁆𑀧𑀦𑀸𑀬 𑀆𑀧𑀚𑁆𑀚𑀢𑀻𑀢𑀺 𑀦𑀢𑁆𑀣𑀺 𑀲𑀩𑁆𑀩𑀢𑁆𑀣 𑀯𑀺𑀓𑀧𑁆𑀧𑀦𑀸𑀬 𑀅𑀧𑁆𑀧𑀝𑀺𑀲𑀺𑀤𑁆𑀥𑀢𑁆𑀢𑀸, 𑀢𑀲𑁆𑀫𑀸 𑀢𑀸𑀦𑀺 𑀤𑀼𑀓𑀸𑀦𑀺 ‘‘𑀦 𑀮𑀩𑁆𑀪𑀦𑁆𑀢𑀻’’𑀢𑀺 𑀦 𑀯𑀼𑀢𑁆𑀢𑀸𑀦𑀺. 𑀏𑀢𑁆𑀣𑀸𑀳 𑁋 𑀬𑀸 𑀲𑀸 ‘‘𑀅𑀢𑁆𑀣𑀸𑀧𑀢𑁆𑀢𑀺 𑀳𑁂𑀫𑀦𑁆𑀢𑁂 𑀆𑀧𑀚𑁆𑀚𑀢𑀻’’𑀢𑀺 (𑀧𑀭𑀺. 𑁩𑁨𑁩) 𑀯𑀘𑀦𑀧𑁆𑀧𑀫𑀸𑀡𑀢𑁄 𑀤𑀼𑀓𑁆𑀓𑀝𑀸𑀧𑀢𑁆𑀢𑀺 𑀲𑀸𑀥𑀺𑀢𑀸, 𑀲𑀸 𑀲𑀜𑁆𑀘𑀺𑀘𑁆𑀘 𑀅𑀧𑀘𑁆𑀘𑀼𑀤𑁆𑀥𑀭𑀦𑁆𑀢𑀲𑁆𑀲 𑀬𑀼𑀚𑁆𑀚𑀢𑀺, 𑀅𑀲𑀢𑀺𑀬𑀸 𑀘𑁂, 𑀓𑀜𑁆𑀘𑀺, 𑀅𑀦𑀸𑀧𑀢𑁆𑀢𑀺. 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀬 𑀧𑀘𑁆𑀘𑀼𑀤𑁆𑀥𑀝𑀁 𑀲𑀜𑁆𑀘𑀺𑀘𑁆𑀘 𑀅𑀯𑀺𑀓𑀧𑁆𑀧𑀬𑀢𑁄 𑀤𑀼𑀓𑁆𑀓𑀝𑁂𑀦 𑀲𑀳 𑀧𑀼𑀦𑀤𑀺𑀯𑀲𑁂 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀅𑀲𑀢𑀺𑀬𑀸 𑀅𑀯𑀺𑀓𑀧𑁆𑀧𑀬𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀫𑁂𑀯 𑀇𑀥 𑀧𑀞𑀫𑀧𑀜𑁆𑀜𑀢𑁆𑀢𑀺𑀬𑀸. 𑀬𑀁 𑀧𑀦 𑀯𑀼𑀢𑁆𑀢𑀁 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) ‘‘𑀯𑀲𑁆𑀲𑀺𑀓𑀲𑀸𑀝𑀺𑀓𑀸 𑀯𑀲𑁆𑀲𑀸𑀦𑀫𑀸𑀲𑀸𑀢𑀺𑀓𑁆𑀓𑀫𑁂𑀦𑀸𑀧𑀺, 𑀓𑀡𑁆𑀟𑀼𑀧𑀝𑀺𑀘𑁆𑀙𑀸𑀤𑀺 𑀆𑀩𑀸𑀥𑀯𑀽𑀧𑀲𑀫𑁂𑀦𑀸𑀧𑀺 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀢𑀺, 𑀢𑀲𑁆𑀫𑀸 𑀲𑀸 𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀩𑁆𑀩𑀸’’𑀢𑀺, 𑀢𑁂𑀦𑁂𑀢𑀁 𑀯𑀺𑀭𑀼𑀚𑁆𑀛𑀢𑀺, 𑀦 𑀓𑁂𑀯𑀮𑀁 𑀇𑀤𑀫𑁂𑀯, ‘‘𑀢𑀢𑁄 𑀧𑀭𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑀩𑁆𑀩𑀸’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀜𑁆𑀘 𑀯𑀺𑀭𑀼𑀚𑁆𑀛𑀢𑀺. 𑀢𑀢𑁄 𑀧𑀭𑀁 𑀦𑀸𑀫 𑀳𑀺 𑀳𑁂𑀫𑀦𑁆𑀢𑀁, 𑀢𑀢𑁆𑀣 𑀘𑁂 𑀧𑀘𑁆𑀘𑀼𑀤𑁆𑀥𑀸𑀭𑁄, ‘‘𑀯𑀲𑁆𑀲𑀺𑀓𑀲𑀸𑀝𑀺𑀓𑀸 𑀯𑀲𑁆𑀲𑀸𑀦𑀫𑀸𑀲𑀸𑀢𑀺𑀓𑁆𑀓𑀫𑁂𑀦𑀸𑀧𑀻’’𑀢𑀺𑀆𑀤𑀺 𑀦 𑀬𑀼𑀢𑁆𑀢𑀁 𑀅𑀥𑀺𑀝𑁆𑀞𑀸𑀦𑀸𑀪𑀸𑀯𑁂𑀦 𑀧𑀘𑁆𑀘𑀼𑀤𑁆𑀥𑀸𑀭𑀸𑀪𑀸𑀯𑀢𑁄. 𑀅𑀯𑀺𑀭𑁄𑀥𑁄 𑀘 𑀇𑀘𑁆𑀙𑀺𑀢𑀩𑁆𑀩𑁄, 𑀢𑀲𑁆𑀫𑀸 ‘‘𑀧𑀘𑁆𑀘𑀼𑀤𑁆𑀥𑀭𑀡𑀁 𑀯𑀢𑁆𑀢𑀫𑀢𑁆𑀢’’𑀦𑁆𑀢𑀺𑀯𑀸𑀤𑁄 𑀏𑀢𑁆𑀣𑀸𑀧𑀺 𑀲𑀫𑁆𑀪𑀯𑀢𑀻𑀢𑀺 𑀘𑁂? 𑀦, 𑀓𑀼𑀭𑀼𑀦𑁆𑀤𑀺 𑀯𑀘𑀦𑀯𑀺𑀭𑁄𑀥𑀢𑁄. 𑀢𑀢𑁆𑀣 𑀳𑀺 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀬 𑀧𑀘𑁆𑀘𑀼𑀤𑁆𑀥𑀸𑀭𑁄 𑀯𑀼𑀢𑁆𑀢𑁄, 𑀢𑀲𑁆𑀫𑀸 𑀯𑀲𑁆𑀲𑀸𑀦𑀤𑀺𑀯𑀲𑀢𑁆𑀢𑀸 𑀲𑀸𑀥𑀺𑀝𑁆𑀞𑀸𑀦𑀸𑀯𑀲𑀸 𑀧𑀘𑁆𑀘𑀼𑀤𑁆𑀥𑀭𑀻𑀬𑀢𑀻𑀢𑀺 𑀦 𑀧𑀘𑁆𑀘𑀼𑀤𑁆𑀥𑀸𑀭𑁄 𑀯𑀢𑁆𑀢𑀫𑀢𑁆𑀢𑀁, 𑀢𑀲𑁆𑀫𑀸 ‘‘𑀢𑀢𑁄 𑀧𑀭’’𑀦𑁆𑀢𑀺 𑀬𑀸𑀯 𑀧𑀼𑀡𑁆𑀡𑀫𑀸 𑀅𑀥𑀺𑀧𑁆𑀧𑁂𑀢𑀸 𑀲𑀺𑀬𑀸. 𑀬𑀣𑀸 𑀘𑀸𑀬𑀁 𑀯𑀺𑀓𑀧𑁆𑀧𑁄, 𑀢𑀣𑀸 ‘‘𑀯𑀲𑁆𑀲𑀸𑀦𑀫𑀸𑀲𑀸𑀢𑀺𑀓𑁆𑀓𑀫𑁂𑀦𑀸𑀧𑀺 𑀆𑀩𑀸𑀥𑀯𑀽𑀧𑀲𑀫𑁂𑀦𑀸𑀧𑀻’’𑀢𑀺 𑀇𑀤𑀫𑁆𑀧𑀺 𑀅𑀯𑀲𑁆𑀲𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑀩𑁆𑀩𑀢𑀸𑀬 𑀯𑀼𑀢𑁆𑀢𑀁 𑀲𑀺𑀬𑀸. 𑀏𑀯𑀜𑁆𑀘 𑀲𑀢𑀺 𑀇𑀥 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬 𑀢𑀤𑀯𑀘𑀦𑁂𑀦 𑀲𑀫𑁂𑀢𑀺. 𑀅𑀜𑁆𑀜𑀣𑀸 𑀇𑀥𑀧𑀺 𑀢𑀁 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺 𑀬𑀣𑀸𑀯𑀼𑀢𑁆𑀢𑁄𑀯 𑀯𑀺𑀥𑀺 𑀏𑀢𑁆𑀣 𑀲𑀫𑁆𑀪𑀯𑀢𑀺, 𑀓𑀺𑀜𑁆𑀘𑀸𑀧𑀺 𑀲𑀫𑁆𑀪𑀯𑀢𑀺, 𑀤𑀼𑀯𑀺𑀜𑁆𑀜𑀸𑀧𑀬𑀲𑁆𑀲 𑀧𑀦 𑀮𑁄𑀓𑀲𑁆𑀲 𑀲𑀼𑀯𑀺𑀜𑁆𑀜𑀸𑀧𑀦𑀢𑁆𑀣𑀁 𑀯𑀼𑀢𑁆𑀢𑀸. 𑀬𑀲𑁆𑀫𑀸 𑀧𑀦 𑀲𑀸 𑀯𑀲𑁆𑀲𑀸𑀦𑀸𑀢𑀺𑀓𑁆𑀓𑀫𑁂𑀦 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀢𑀺, 𑀳𑁂𑀫𑀦𑁆𑀢𑀧𑀞𑀫𑀸𑀭𑀼𑀡𑁂 𑀘 𑀅𑀧𑀘𑁆𑀘𑀼𑀤𑁆𑀥𑀸𑀭𑀧𑀘𑁆𑀘𑀬𑀸 𑀤𑀼𑀓𑁆𑀓𑀝𑀸 𑀲𑀸𑀥𑀺𑀢𑀸, 𑀢𑀲𑁆𑀫𑀸 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀬𑀫𑁂𑀯 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀯𑀺𑀓𑀧𑁆𑀧𑁂𑀢𑀩𑁆𑀩𑀸, 𑀅𑀯𑀺𑀓𑀧𑁆𑀧𑀺𑀢𑀸𑀬 ‘‘𑀦𑀺𑀲𑁆𑀲𑀕𑁆𑀕𑀺𑀬𑀸𑀧𑀚𑁆𑀚𑀦𑀫𑁂𑀯𑀸’’𑀢𑀺 𑀯𑀢𑁆𑀢𑀩𑁆𑀩𑀁. 𑀏𑀢𑁆𑀢𑀸𑀯𑀢𑀸𑀧𑀺 𑀲𑀦𑁆𑀢𑁄𑀲𑀁 𑀅𑀓𑀢𑁆𑀯𑀸 𑀯𑀺𑀦𑀺𑀘𑁆𑀙𑀬𑁄 𑀧𑀭𑀺𑀬𑁂𑀲𑀺𑀢𑀩𑁆𑀩𑁄. 𑀳𑁄𑀢𑀺 𑀘𑁂𑀢𑁆𑀣 𑁋

‘‘𑀏𑀯𑀁 𑀅𑀪𑀸𑀯𑀁 𑀯𑀺𑀦𑀬𑀲𑁆𑀲 𑀧𑀸𑀴𑀺,

𑀪𑀺𑀦𑁆𑀦𑀁 𑀅𑀪𑀺𑀦𑁆𑀦𑀜𑁆𑀘 𑀢𑀤𑀢𑁆𑀣𑀬𑀼𑀢𑁆𑀢𑀺𑀁;

𑀯𑀺𑀜𑁆𑀜𑀸𑀢𑀼𑀓𑀸𑀫𑁂𑀦 𑀢𑀤𑀢𑁆𑀣𑀯𑀺𑀜𑁆𑀜𑀽,

𑀧𑀭𑀺𑀬𑁂𑀲𑀺𑀢𑀩𑁆𑀩𑀸 𑀯𑀺𑀦𑀬𑁂 𑀯𑀺𑀜𑁆𑀜𑀸𑀬𑀸’’𑀢𑀺.

‘‘𑀢𑀼𑀬𑁆𑀳𑀁 𑀕𑀡𑁆𑀳𑀸𑀳𑀻’’𑀢𑀺 𑀯𑀼𑀢𑁆𑀢𑁂 𑀯𑀺𑀦𑀸𑀧𑀺 ‘‘𑀫𑀬𑁆𑀳𑀁 𑀕𑀡𑁆𑀳𑀸𑀫𑀻’’𑀢𑀺 𑀯𑀘𑀦𑁂𑀦 𑀲𑀼𑀤𑀺𑀦𑁆𑀦𑀁 𑀳𑁄𑀢𑀺. 𑀇𑀢𑀭𑁄 𑀘𑁂 𑀅𑀥𑀺𑀯𑀸𑀲𑁂𑀢𑀺, 𑀢𑁂𑀦𑀸𑀧𑀺 𑀲𑀼𑀕𑁆𑀕𑀳𑀺𑀢𑀁 𑀳𑁄𑀢𑀺, 𑀦𑁄 𑀘𑁂 𑀅𑀥𑀺𑀯𑀸𑀲𑁂𑀢𑀺, 𑀤𑁂𑀦𑁆𑀢𑁂𑀦 𑀲𑀼𑀤𑀺𑀦𑁆𑀦𑀁. 𑀢𑀁 𑀧𑀦 𑀯𑀢𑁆𑀣𑀼 𑀦 𑀓𑀲𑁆𑀲𑀘𑀺 𑀳𑁄𑀢𑀺. 𑀢𑀣𑀸 ‘‘𑀫𑀬𑁆𑀳𑀁 𑀕𑀡𑁆𑀳𑀸𑀫𑀻’’𑀢𑀺 𑀯𑀤𑀢𑀺, 𑀲𑀸𑀫𑀺𑀓𑁄 𑀘𑁂 𑀅𑀥𑀺𑀯𑀸𑀲𑁂𑀢𑀺, 𑀯𑀺𑀦𑀸𑀧𑀺 ‘‘𑀕𑀡𑁆𑀳𑀸𑀳𑀻’’𑀢𑀺 𑀯𑀘𑀦𑁂𑀦 𑀲𑀼𑀕𑁆𑀕𑀳𑀺𑀢𑀁. 𑀦𑁄 𑀘𑁂 𑀅𑀥𑀺𑀯𑀸𑀲𑁂𑀢𑀺, 𑀲𑀸𑀫𑀺𑀓𑀲𑁆𑀲𑁂𑀯 𑀢𑀁, 𑀦 𑀳𑀺 𑀢𑀲𑁆𑀲𑁂𑀢𑀁 𑀯𑀺𑀦𑀬𑀓𑀫𑁆𑀫𑀦𑁆𑀢𑀺 𑀏𑀢𑁆𑀣 𑀯𑀺𑀦𑀬𑀓𑀫𑁆𑀫𑀲𑁆𑀲𑀢𑁆𑀣𑀸𑀬 𑀘𑁂 𑀕𑀡𑁆𑀳𑀸𑀢𑀺, 𑀦 𑀯𑀝𑁆𑀝𑀢𑀺. 𑀦 𑀓𑁂𑀯𑀮𑀁 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀕𑀳𑀺𑀢𑀁, 𑀧𑀼𑀦 𑀢𑀲𑁆𑀲𑀧𑀺 𑀤𑁂𑀢𑀺, 𑀯𑀝𑁆𑀝𑀢𑀻𑀢𑀺 𑀘. 𑀢𑀣𑀸 𑀅𑀦𑀧𑁂𑀓𑁆𑀔𑁄 𑀳𑀼𑀢𑁆𑀯𑀸 𑀧𑀭𑀲𑁆𑀲 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀧𑀼𑀦 𑀢𑁂𑀦 𑀤𑀺𑀦𑁆𑀦𑀁 𑀯𑀸 𑀢𑀲𑁆𑀲 𑀯𑀺𑀲𑁆𑀲𑀸𑀲𑀦𑁆𑀢𑁄 𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀯𑀝𑁆𑀝𑀢𑀺. 𑀢𑀢𑁆𑀣𑀸𑀧𑀺 𑀯𑀺𑀦𑀬𑀓𑀫𑁆𑀫𑀯𑀲𑁂𑀦 𑀦 𑀯𑀝𑁆𑀝𑀢𑀻𑀢𑀺 𑀏𑀓𑁂. 𑀢𑁂 𑀏𑀯 ‘‘𑀫𑀳𑀦𑁆𑀢𑀁 𑀯𑀸 𑀔𑀼𑀤𑁆𑀤𑀓𑀁 𑀓𑀭𑁄𑀢𑀻’’𑀢𑀺 𑀏𑀢𑁆𑀣 ‘‘𑀢𑀺𑀘𑀻𑀯𑀭𑁂 𑀤𑀻𑀖𑀢𑁄 𑀯𑀺𑀤𑀢𑁆𑀣𑀺 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀙𑀺𑀦𑁆𑀤𑀺𑀢𑁆𑀯𑀸 𑀓𑀭𑁄𑀢𑀺, 𑀏𑀯𑀁 𑀲𑁂𑀲𑁂𑀲𑀼𑀧𑀻’’𑀢𑀺 𑀯𑀤𑀦𑁆𑀢𑀺. 𑀏𑀯𑀭𑀽𑀧𑁂𑀲𑀼 𑀞𑀸𑀦𑁂𑀲𑀼 𑀧𑁄𑀭𑀸𑀡𑀸𑀘𑀭𑀺𑀬𑀸𑀦𑀁 𑀓𑀣𑀸𑀫𑀕𑁆𑀕𑀁 𑀲𑀼𑀝𑁆𑀞𑀼 𑀆𑀘𑀭𑀺𑀬𑀓𑀼𑀮𑀲𑁂𑀯𑀦𑀸𑀬 𑀲𑀜𑁆𑀚𑀸𑀦𑀺𑀢𑁆𑀯𑀸 𑀢𑁂𑀦 𑀲𑀁𑀲𑀦𑁆𑀤𑀺𑀢𑁆𑀯𑀸 𑀲𑀢𑁄 𑀲𑀫𑁆𑀧𑀚𑀸𑀦𑁄 𑀳𑀼𑀢𑁆𑀯𑀸 𑀲𑁄𑀢𑀽𑀦𑀜𑁆𑀘 𑀘𑀺𑀢𑁆𑀢𑀁 𑀅𑀯𑀺𑀫𑁄𑀳𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀁. 𑀏𑀲𑀸 𑀅𑀫𑁆𑀳𑀸𑀓𑀁 𑀆𑀬𑀸𑀘𑀦𑀸.

𑀧𑀞𑀫𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀉𑀤𑁄𑀲𑀺𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁭𑁧. 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 𑀚𑀦𑀧𑀤𑀘𑀸𑀭𑀺𑀓𑀁 𑀧𑀓𑁆𑀓𑀫𑀦𑁆𑀢𑀺. 𑀓𑀲𑁆𑀫𑀸? 𑀓𑀺𑀜𑁆𑀘𑀸𑀧𑀺 ‘‘𑀦, 𑀪𑀺𑀓𑁆𑀔𑀯𑁂, 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 𑀕𑀸𑀫𑁄 𑀧𑀯𑀺𑀲𑀺𑀢𑀩𑁆𑀩𑁄, 𑀬𑁄 𑀧𑀯𑀺𑀲𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁩𑁬𑁨) 𑀧𑀞𑀫𑀁 𑀯𑀼𑀢𑁆𑀢𑀁. 𑀧𑀘𑁆𑀙𑀸 𑀧𑀦 ‘‘𑀧𑀜𑁆𑀘𑀺𑀫𑁂, 𑀪𑀺𑀓𑁆𑀔𑀯𑁂, 𑀧𑀘𑁆𑀘𑀬𑀸 𑀲𑀗𑁆𑀖𑀸𑀝𑀺𑀬𑀸 𑀦𑀺𑀓𑁆𑀔𑁂𑀧𑀸𑀬, 𑀉𑀢𑁆𑀢𑀭𑀸𑀲𑀗𑁆𑀕𑀲𑁆𑀲, 𑀅𑀦𑁆𑀢𑀭𑀯𑀸𑀲𑀓𑀲𑁆𑀲 𑀦𑀺𑀓𑁆𑀔𑁂𑀧𑀸𑀬 𑀕𑀺𑀮𑀸𑀦𑁄 𑀯𑀸 𑀳𑁄𑀢𑀺, 𑀯𑀲𑁆𑀲𑀺𑀓𑀲𑀗𑁆𑀓𑁂𑀢𑀁 𑀯𑀸, 𑀦𑀤𑀻𑀧𑀸𑀭𑀁 𑀕𑀦𑁆𑀢𑀼𑀁 𑀯𑀸, 𑀅𑀕𑁆𑀕𑀴𑀕𑀼𑀢𑁆𑀢𑀺𑀯𑀺𑀳𑀸𑀭𑁄 𑀯𑀸, 𑀅𑀢𑁆𑀣𑀢𑀓𑀣𑀺𑀦𑀁 𑀯𑀸 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸, 𑀅𑀝𑁆𑀞𑀓𑀣𑀸𑀬𑀫𑁆𑀧𑀺𑀲𑁆𑀲 ‘‘𑀧𑀜𑁆𑀘𑀲𑀼 𑀧𑁂𑀢𑁂𑀲𑀼 𑀅𑀕𑁆𑀕𑀴𑀕𑀼𑀢𑁆𑀢𑀺 𑀏𑀯 𑀧𑀫𑀸𑀡𑀁. 𑀕𑀼𑀢𑁆𑀢𑁂 𑀏𑀯 𑀳𑀺 𑀯𑀺𑀳𑀸𑀭𑁂 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀩𑀳𑀺 𑀕𑀦𑁆𑀢𑀼𑀁 𑀯𑀝𑁆𑀝𑀢𑀺, 𑀦𑀸𑀕𑀼𑀢𑁆𑀢𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀧𑀜𑁆𑀜𑀢𑁆𑀢𑁂𑀧𑀺 𑀓𑀣𑀺𑀦𑁂 ‘‘𑀢𑁂 𑀪𑀺𑀓𑁆𑀔𑀽 𑀅𑀕𑁆𑀕𑀴𑀕𑀼𑀢𑁆𑀢𑀺𑀯𑀺𑀳𑀸𑀭𑁂 𑀞𑀧𑁂𑀣𑀸’’𑀢𑀺 𑀯𑀢𑁆𑀯𑀸 𑀲𑀪𑀸𑀕𑀸𑀦𑀁 𑀳𑀢𑁆𑀣𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 𑀕𑀸𑀫𑀧𑁆𑀧𑀯𑁂𑀲𑁂 𑀮𑀤𑁆𑀥𑀓𑀧𑁆𑀧𑀺𑀬𑀸 𑀚𑀦𑀧𑀤𑀘𑀸𑀭𑀺𑀓𑀁 𑀧𑀓𑁆𑀓𑀸𑀫𑀺𑀁𑀲𑀽𑀢𑀺 𑀯𑁂𑀤𑀺𑀢𑀩𑁆𑀩𑀁.

𑁪𑁭𑁩. 𑀅𑀯𑀺𑀧𑁆𑀧𑀯𑀸𑀲𑀲𑀫𑁆𑀫𑀼𑀢𑀺𑀦𑁆𑀢𑀺 𑀅𑀯𑀺𑀧𑁆𑀧𑀯𑀸𑀲𑀢𑁆𑀣𑀁, 𑀯𑀺𑀧𑁆𑀧𑀯𑀸𑀲𑀧𑀘𑁆𑀘𑀬𑀸 𑀬𑀸 𑀆𑀧𑀢𑁆𑀢𑀺, 𑀢𑀤𑀪𑀸𑀯𑀢𑁆𑀣𑀁 𑀯𑀸 𑀲𑀫𑁆𑀫𑀼𑀢𑀺𑀁 𑀤𑀸𑀢𑀼𑀦𑁆𑀢𑀺 𑀅𑀢𑁆𑀣𑁄. 𑀢𑀢𑁄 𑀧𑀝𑁆𑀞𑀸𑀬 𑀯𑀝𑁆𑀝𑀢𑀺. 𑀓𑀺𑀢𑁆𑀢𑀓𑀁 𑀓𑀸𑀮𑀁 𑀯𑀝𑁆𑀝𑀢𑀻𑀢𑀺? 𑀫𑀸𑀲𑀁 𑀯𑀸 𑀅𑀢𑀺𑀭𑁂𑀓𑀁 𑀯𑀸 𑀬𑀸𑀯 𑀕𑀫𑀦𑁂 𑀲𑀉𑀲𑁆𑀲𑀸𑀳𑁄, 𑀢𑀸𑀯 𑀯𑀝𑁆𑀝𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀥𑀼𑀭𑀦𑀺𑀓𑁆𑀔𑁂𑀧𑀁 𑀓𑀭𑁄𑀦𑁆𑀢𑁂𑀦 𑀧𑀘𑁆𑀘𑀼𑀤𑁆𑀥𑀭𑀺𑀢𑀩𑁆𑀩’’𑀦𑁆𑀢𑀺. 𑀧𑀼𑀦 𑀲𑀫𑁆𑀫𑀼𑀢𑀺𑀤𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀻𑀢𑀺 𑀲𑀘𑁂 𑀤𑁆𑀯𑀸𑀤𑀲𑀦𑁆𑀦𑀁 𑀯𑀲𑁆𑀲𑀸𑀦𑀁 𑀅𑀘𑁆𑀘𑀬𑁂𑀦 𑀅𑀜𑁆𑀜𑁄 𑀭𑁄𑀕𑁄 𑀳𑁄𑀢𑀺, 𑀯𑀝𑁆𑀝𑀢𑀺, 𑀉𑀧𑀲𑀫𑁆𑀧𑀤𑀓𑀫𑁆𑀫𑀁 𑀯𑀺𑀬 𑀬𑀸𑀯𑀚𑀻𑀯𑀁 𑀏𑀓𑀸𑀲𑀫𑁆𑀫𑀼𑀢𑀺 𑀯𑀝𑁆𑀝𑀢𑀻𑀢𑀺 𑀘.

‘‘𑀓𑀢𑀁 𑀯𑀸 𑀳𑁄𑀢𑀻’’𑀢𑀺𑀆𑀤𑀺 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀦 𑀯𑀢𑁆𑀢𑀩𑁆𑀩𑀁, 𑀓𑀲𑁆𑀫𑀸? 𑀓𑀭𑀡𑀧𑀮𑀺𑀩𑁄𑀥𑁂 𑀉𑀧𑀘𑁆𑀙𑀺𑀦𑁆𑀦𑁂𑀧𑀺 𑀅𑀦𑀥𑀺𑀝𑁆𑀞𑀺𑀢𑀘𑀻𑀯𑀭𑀢𑁄 𑀯𑀺𑀧𑁆𑀧𑀯𑀸𑀲𑀧𑀘𑁆𑀘𑀬𑀸 𑀆𑀧𑀢𑁆𑀢𑀺𑀬𑀸 𑀅𑀲𑀫𑁆𑀪𑀯𑀢𑁄, 𑀢𑀲𑁆𑀫𑀸 ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀦𑁆𑀢𑀺 𑀪𑀺𑀓𑁆𑀔𑀼𑀦𑁄 𑀘𑀻𑀯𑀭𑀁 𑀅𑀥𑀺𑀝𑁆𑀞𑀺𑀢𑀁 𑀳𑁄𑀢𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀢𑁆𑀢𑀩𑁆𑀩𑀦𑁆𑀢𑀺 𑀘𑁂? 𑀦, 𑀢𑀤𑀸𑀬𑀢𑁆𑀢𑀢𑁆𑀢𑀸. 𑀅𑀥𑀺𑀝𑁆𑀞𑀸𑀦𑀜𑁆𑀳𑀺 𑀓𑀭𑀡𑀧𑀮𑀺𑀩𑁄𑀥𑀲𑁆𑀲 𑀦𑀺𑀝𑁆𑀞𑀸𑀧𑀦𑀸𑀬𑀢𑁆𑀢𑀁, 𑀢𑀲𑁆𑀫𑀸 ‘‘𑀓𑀢𑀁 𑀯𑀸𑀢𑀺𑀆𑀤𑀺 𑀯𑀼𑀢𑁆𑀢’’𑀦𑁆𑀢𑀺 𑀘 𑀯𑀼𑀢𑁆𑀢𑀁. 𑀢𑀢𑁆𑀣 𑀓𑀢𑀦𑁆𑀢𑀺 𑀧𑀼𑀩𑁆𑀩𑁂 𑀯𑀼𑀢𑁆𑀢𑀫𑁂𑀯.

𑁪𑁭𑁭-𑁮. 𑀅𑀯𑀺𑀧𑁆𑀧𑀯𑀸𑀲𑀮𑀓𑁆𑀔𑀡𑀯𑀯𑀢𑁆𑀣𑀸𑀧𑀦𑀢𑁆𑀣𑀦𑁆𑀢𑀺 𑀏𑀢𑁆𑀣 ‘‘𑀅𑀦𑁆𑀢𑁄𑀕𑀸𑀫𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀅𑀦𑁆𑀢𑁄𑀕𑀸𑀫𑁂 𑀯𑀢𑁆𑀣𑀩𑁆𑀩’’𑀦𑁆𑀢𑀺𑀆𑀤𑀺𑀯𑀘𑀦𑀢𑁄 𑀅𑀯𑀺𑀧𑁆𑀧𑀯𑀸𑀲𑀮𑀓𑁆𑀔𑀡𑀁 𑀯𑀯𑀢𑁆𑀣𑀸𑀧𑀺𑀢𑀁, 𑀢𑀩𑁆𑀩𑀺𑀧𑀭𑀻𑀢𑀦𑀬𑁂𑀦 𑀯𑀺𑀧𑁆𑀧𑀯𑀸𑀲𑀮𑀓𑁆𑀔𑀡𑀁 𑀯𑁂𑀤𑀺𑀢𑀩𑁆𑀩𑀁. 𑀕𑀸𑀫𑁄 𑀏𑀓𑀽𑀧𑀘𑀸𑀭𑁄𑀢𑀺𑀆𑀤𑀺𑀫𑁆𑀳𑀺 𑀧𑀦 𑀞𑀧𑁂𑀢𑁆𑀯𑀸 𑀲𑀢𑁆𑀣𑀁, 𑀭𑀼𑀓𑁆𑀔𑀫𑀽𑀮𑀁, 𑀅𑀚𑁆𑀛𑁄𑀓𑀸𑀲𑀜𑁆𑀘 𑀲𑁂𑀲𑁂𑀲𑀼 𑀧𑀭𑀺𑀓𑁆𑀔𑁂𑀧𑀸𑀧𑀭𑀺𑀓𑁆𑀔𑁂𑀧𑀯𑀲𑁂𑀦 𑀏𑀓𑀽𑀧𑀘𑀸𑀭𑀦𑀸𑀦𑀽𑀧𑀘𑀸𑀭𑀢𑀸 𑀯𑁂𑀤𑀺𑀢𑀩𑁆𑀩𑀸. 𑀬𑀲𑁆𑀫𑀸 𑀧𑀦 𑀲𑀢𑁆𑀣𑀁 𑀤𑀼𑀯𑀺𑀥𑀁 𑀦𑀺𑀯𑀺𑀝𑁆𑀞𑀁, 𑀅𑀦𑀺𑀯𑀺𑀝𑁆𑀞𑀜𑁆𑀘, 𑀢𑁂𑀲𑀼 𑀅𑀦𑀺𑀯𑀺𑀝𑁆𑀞𑀁 𑀏𑀓𑀓𑀼𑀮𑀲𑁆𑀲 𑀯𑀸 𑀦𑀸𑀦𑀸𑀓𑀼𑀮𑀲𑁆𑀲 𑀯𑀸 𑀅𑀧𑀭𑀺𑀓𑁆𑀔𑀺𑀢𑁆𑀢𑀫𑁂𑀯 𑀳𑁄𑀢𑀺, 𑀦𑀺𑀯𑀺𑀝𑁆𑀞𑀁 𑀲𑀺𑀬𑀸 𑀧𑀭𑀺𑀓𑁆𑀔𑀺𑀢𑁆𑀢𑀁, 𑀲𑀺𑀬𑀸 𑀅𑀧𑀭𑀺𑀓𑁆𑀔𑀺𑀢𑁆𑀢𑀁, 𑀢𑀲𑁆𑀫𑀸 𑀢𑀢𑁆𑀣 𑀧𑀭𑀺𑀓𑁆𑀔𑁂𑀧𑀸𑀤𑀺𑀯𑀲𑁂𑀦 𑀅𑀤𑀲𑁆𑀲𑁂𑀢𑁆𑀯𑀸 𑀅𑀩𑁆𑀪𑀦𑁆𑀢𑀭𑀯𑀲𑁂𑀦 𑀯𑀼𑀢𑁆𑀢𑁄. 𑀢𑀣𑀸 𑀅𑀩𑁆𑀪𑁄𑀓𑀸𑀲𑁂. 𑀭𑀼𑀓𑁆𑀔𑀫𑀽𑀮𑁂 𑀙𑀸𑀬𑀸𑀯𑀲𑁂𑀦. 𑀅𑀜𑁆𑀜𑀣𑀸 ‘‘𑀲𑀢𑁆𑀣𑁄 𑀏𑀓𑀽𑀧𑀘𑀸𑀭𑁄 𑀦𑀸𑀦𑀽𑀧𑀘𑀸𑀭𑁄’’𑀢𑀺𑀆𑀤𑀺 𑀉𑀤𑁆𑀤𑁂𑀲𑀯𑀺𑀭𑁄𑀥𑁄 𑀲𑀺𑀬𑀸 𑀯𑀺𑀪𑀗𑁆𑀕𑁂 𑀅𑀤𑀲𑁆𑀲𑀺𑀢𑀢𑁆𑀢𑀸, 𑀢𑀲𑁆𑀫𑀸 𑀲𑀢𑁆𑀣𑀲𑁆𑀲 𑀧𑀼𑀭𑀢𑁄 𑀘 𑀧𑀘𑁆𑀙𑀢𑁄 𑀘 𑀲𑀢𑁆𑀢𑀩𑁆𑀪𑀦𑁆𑀢𑀭𑀸, 𑀧𑀲𑁆𑀲𑀢𑁄 𑀘 𑀏𑀓𑀩𑁆𑀪𑀦𑁆𑀢𑀭𑀦𑁆𑀢𑀺 𑀅𑀬𑀫𑁂𑀓𑀽𑀧𑀘𑀸𑀭𑁄, 𑀢𑀢𑁄 𑀧𑀭𑀁 𑀦𑀸𑀦𑀽𑀧𑀘𑀸𑀭𑁄. 𑀢𑀣𑀸 𑀭𑀼𑀓𑁆𑀔𑀫𑀽𑀮𑀲𑁆𑀲 𑀬𑀢𑁆𑀣 𑀫𑀚𑁆𑀛𑀦𑁆𑀳𑀺𑀓𑁂 𑀓𑀸𑀮𑁂 𑀙𑀸𑀬𑀸 𑀨𑀭𑀢𑀺, 𑀅𑀬𑀁 𑀏𑀓𑀽𑀧𑀘𑀸𑀭𑁄. 𑀇𑀢𑀭𑁄 𑀦𑀸𑀦𑀽𑀧𑀘𑀸𑀭𑁄. 𑀓𑀲𑁆𑀫𑀸? 𑀢𑀢𑁆𑀣 𑀳𑀺 𑀧𑀭𑀺𑀓𑁆𑀔𑁂𑀧𑁄 𑀅𑀧𑁆𑀧𑀫𑀸𑀡𑀁. 𑀙𑀸𑀬𑀸𑀯 𑀧𑀫𑀸𑀡𑀁. 𑀅𑀚𑁆𑀛𑁄𑀓𑀸𑀲𑀲𑁆𑀲 𑀧𑀸𑀴𑀺𑀬𑀁 𑀯𑀼𑀢𑁆𑀢𑁄𑀯. ‘‘𑀲𑀢𑁆𑀣𑀸𑀤𑀻𑀦𑀁 𑀏𑀓𑀓𑀼𑀮𑀲𑀦𑁆𑀢𑀓𑀯𑀲𑁂𑀦 𑀏𑀓𑀽𑀧𑀘𑀸𑀭𑀢𑀸’’𑀢𑀺 𑀮𑀺𑀔𑀺𑀢𑀁, 𑀢𑀲𑁆𑀫𑀸 𑀦𑀺𑀯𑁂𑀲𑀦𑁂, 𑀉𑀤𑁄𑀲𑀺𑀢𑁂 𑀘 𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑁄𑀯 𑀅𑀝𑁆𑀝𑀸𑀤𑀻𑀲𑀽𑀢𑀺 𑀓𑀢𑁆𑀯𑀸 𑀲𑀁𑀔𑀺𑀢𑁆𑀢𑀁. 𑀢𑀢𑁄 𑀧𑀭𑀁 𑀔𑁂𑀢𑁆𑀢𑀥𑀜𑁆𑀜𑀓𑀭𑀡𑀆𑀭𑀸𑀫𑀯𑀺𑀳𑀸𑀭𑁂𑀲𑀼 𑀧𑀦 𑀧𑀭𑀺𑀓𑁆𑀔𑀺𑀢𑁆𑀢𑀸𑀧𑀭𑀺𑀓𑁆𑀔𑀺𑀢𑁆𑀢-𑀧𑀤𑀁 𑀧𑀼𑀦 𑀉𑀤𑁆𑀥𑀝𑀁 𑀲𑀢𑁆𑀣𑀯𑀺𑀪𑀗𑁆𑀕𑁂𑀦 𑀅𑀥𑀺𑀓𑀸𑀭𑀲𑁆𑀲 𑀧𑀘𑁆𑀙𑀺𑀦𑁆𑀦𑀢𑁆𑀢𑀸. ‘‘𑀦𑀸𑀦𑀸𑀕𑀩𑁆𑀪𑀸’’𑀢𑀺𑀆𑀤𑀺𑀯𑀘𑀦𑀁 𑀧𑀦 𑀅𑀲𑀫𑁆𑀪𑀯𑀢𑁄 𑀔𑁂𑀢𑁆𑀢𑀥𑀜𑁆𑀜𑀓𑀭𑀡𑀆𑀭𑀸𑀫𑁂𑀲𑀼 𑀦 𑀉𑀤𑁆𑀥𑀝𑀁. 𑀯𑀺𑀳𑀸𑀭𑁂 𑀲𑀫𑁆𑀪𑀯𑀦𑁆𑀢𑀫𑁆𑀧𑀺 𑀢𑀢𑁆𑀣 𑀧𑀘𑁆𑀙𑀺𑀦𑁆𑀦𑀢𑁆𑀢𑀸 𑀦 𑀉𑀤𑁆𑀥𑀝𑀁. 𑀓𑀼𑀮𑀁 𑀯𑀼𑀘𑁆𑀘𑀢𑀺 𑀲𑀸𑀫𑀺𑀓𑁄, 𑀢𑀲𑁆𑀫𑀸 ‘‘𑀏𑀓𑀓𑀼𑀮𑀲𑁆𑀲 𑀦𑀸𑀦𑀸𑀓𑀼𑀮𑀲𑁆𑀲𑀸’’𑀢𑀺 𑀇𑀫𑀺𑀦𑀸 𑀕𑀸𑀫𑀸𑀤𑀻𑀦𑀁 𑀘𑀼𑀤𑁆𑀤𑀲𑀦𑁆𑀦𑀁 𑀘𑀻𑀯𑀭𑀦𑀺𑀓𑁆𑀔𑁂𑀧𑀝𑁆𑀞𑀸𑀦𑀸𑀦𑀁 𑀲𑀸𑀥𑀸𑀭𑀡𑀸𑀲𑀸𑀥𑀸𑀭𑀡𑀪𑀸𑀯𑀁 𑀤𑀻𑀧𑁂𑀢𑀺. 𑀅𑀚𑁆𑀛𑁄𑀓𑀸𑀲𑀲𑁆𑀲 𑀧𑀦 𑀅𑀲𑀫𑁆𑀪𑀯𑀢𑁄 𑀦 𑀯𑀼𑀢𑁆𑀢𑀁. 𑀬𑀲𑁆𑀫𑀸 𑀧𑀦𑁂𑀢𑁆𑀣 𑀏𑀓𑀓𑀼𑀮𑀲𑁆𑀲, 𑀦𑀸𑀦𑀸𑀓𑀼𑀮𑀲𑁆𑀲 𑀘 𑀅𑀧𑀭𑀺𑀓𑁆𑀔𑀺𑀢𑁆𑀢𑁂𑀲𑀼 𑀕𑀸𑀫𑀸𑀤𑀻𑀲𑀼 𑀧𑀭𑀺𑀳𑀸𑀭𑀯𑀺𑀲𑁂𑀲𑁄 𑀓𑀺𑀜𑁆𑀘𑀸𑀧𑀺 𑀦𑀢𑁆𑀣𑀺, 𑀧𑀭𑀺𑀓𑁆𑀔𑀺𑀢𑁆𑀢𑁂𑀲𑀼 𑀧𑀦 𑀅𑀢𑁆𑀣𑀺, 𑀢𑀲𑁆𑀫𑀸 𑀏𑀓𑀦𑀸𑀦𑀸𑀓𑀼𑀮𑀕𑁆𑀕𑀳𑀡𑀁, 𑀏𑀓𑀦𑀸𑀦𑀽𑀧𑀘𑀸𑀭𑀕𑁆𑀕𑀳𑀡𑀜𑁆𑀘 𑀲𑀸𑀢𑁆𑀣𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀢𑁆𑀣𑀧𑀺 𑀅𑀬𑀁 𑀯𑀺𑀲𑁂𑀲𑁄 𑁋 𑀲𑀢𑁆𑀣𑁂, 𑀭𑀼𑀓𑁆𑀔𑀫𑀽𑀮𑁂 𑀘 𑀓𑀼𑀮𑀪𑁂𑀤𑀢𑁄𑀯 𑀪𑁂𑀤𑁄, 𑀦𑁄𑀧𑀘𑀸𑀭𑀪𑁂𑀤𑀢𑁄. 𑀅𑀚𑁆𑀛𑁄𑀓𑀸𑀲𑁂 𑀉𑀧𑀘𑀸𑀭𑀪𑁂𑀤𑀢𑁄 𑀘, 𑀲𑁄 𑀧𑀦 𑀧𑀸𑀴𑀺𑀬𑀁 𑀦 𑀤𑀲𑁆𑀲𑀺𑀢𑁄𑀢𑀺. ‘‘𑀢𑀁 𑀧𑀫𑀸𑀡𑀁 𑀅𑀢𑀺𑀓𑁆𑀓𑀫𑀺𑀢𑁆𑀯𑀸𑀢𑀺 𑀯𑀘𑀦𑀢𑁄 𑀆𑀓𑀸𑀲𑁂𑀧𑀺 𑀅𑀟𑁆𑀠𑀢𑁂𑀬𑁆𑀬𑀭𑀢𑀦𑀧𑁆𑀧𑀫𑀸𑀡𑁂 𑀤𑁄𑀲𑁄 𑀦𑀢𑁆𑀣𑀻’’𑀢𑀺 𑀯𑀤𑀦𑁆𑀢𑀺.

𑁪𑁭𑁯. ‘‘𑀲𑀪𑀸’’𑀢𑀺 𑀇𑀢𑁆𑀣𑀺𑀮𑀺𑀗𑁆𑀕𑀁. ‘‘𑀲𑀪𑀸𑀬’’𑀦𑁆𑀢𑀺 𑀦𑀧𑀼𑀁𑀲𑀓𑀮𑀺𑀗𑁆𑀕𑀁, 𑀢𑁂𑀦 𑀯𑀼𑀢𑁆𑀢𑀁 ‘‘𑀮𑀺𑀗𑁆𑀕𑀩𑁆𑀬𑀢𑁆𑀢𑀦𑀬𑁂𑀦𑀸’’𑀢𑀺. 𑀦𑀧𑀼𑀁𑀲𑀓𑀮𑀺𑀗𑁆𑀕𑀤𑀲𑁆𑀲𑀦𑀢𑁆𑀣𑀁 𑀓𑀺𑀭 ‘‘𑀲𑀪𑀸𑀬’’𑀦𑁆𑀢𑀺 𑀧𑀘𑁆𑀘𑀢𑁆𑀢𑀯𑀲𑁂𑀦 𑀦𑀺𑀤𑁆𑀤𑀺𑀝𑁆𑀞𑀁, 𑀢𑀲𑁆𑀲 𑀅𑀦𑀼𑀧𑀬𑁄𑀕𑀢𑁆𑀢𑀸 ‘‘𑀤𑁆𑀯𑀸𑀭𑀫𑀽𑀮’’𑀦𑁆𑀢𑀺𑀧𑀺. 𑀅𑀢𑁆𑀢𑀦𑁄 𑀦𑀺𑀓𑁆𑀔𑀺𑀢𑁆𑀢𑀝𑁆𑀞𑀸𑀦𑁂 𑀅𑀦𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀯𑀻𑀣𑀺𑀳𑀢𑁆𑀣𑀧𑀸𑀲𑁄 𑀦 𑀭𑀓𑁆𑀔𑀢𑀺, 𑀬𑀲𑁆𑀫𑀺𑀁 𑀖𑀭𑁂 𑀘𑀻𑀯𑀭𑀁 𑀦𑀺𑀓𑁆𑀔𑀺𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀺𑀁 𑀖𑀭𑁂 𑀯𑀢𑁆𑀣𑀩𑁆𑀩𑀁. ‘‘𑀲𑀪𑀸𑀬𑁂 𑀯𑀸 𑀯𑀢𑁆𑀣𑀩𑁆𑀩𑀁 𑀤𑁆𑀯𑀸𑀭𑀫𑀽𑀮𑁂 𑀯𑀸, 𑀳𑀢𑁆𑀣𑀧𑀸𑀲𑀸 𑀯𑀸 𑀦 𑀯𑀺𑀚𑀳𑀺𑀢𑀩𑁆𑀩’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. ‘‘𑀳𑀢𑁆𑀣𑀧𑀸𑀲𑁂𑀬𑁂𑀯 𑀅𑀭𑀼𑀡𑀁 𑀉𑀝𑁆𑀞𑀧𑁂𑀢𑀩𑁆𑀩’’𑀦𑁆𑀢𑀺 𑀦𑀺𑀬𑀫𑀺𑀢𑀢𑁆𑀢𑀸 𑀚𑀸𑀦𑀺𑀢𑀼𑀁 𑀦 𑀲𑀓𑁆𑀓𑀸𑀢𑀺 𑀘𑁂? 𑀅𑀦𑁆𑀢𑁄𑀖𑀭𑁂 𑀦 𑀲𑀓𑁆𑀓𑀸, 𑀢𑀣𑀸 𑀢𑀣𑀸 𑀯𑀼𑀢𑁆𑀢𑀢𑁆𑀢𑀸, 𑀢𑀲𑁆𑀫𑀸 ‘‘𑀬𑀼𑀢𑁆𑀢𑀺 𑀧𑀫𑀸𑀡’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀬𑀫𑀢𑁆𑀣𑁄 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 𑀧𑀓𑀸𑀲𑀺𑀢𑁄, 𑀧𑀼𑀦𑀧𑀺 𑀔𑀼𑀤𑁆𑀤𑀓𑀕𑀸𑀫𑁂 𑀲𑀩𑁆𑀩𑀲𑀸𑀥𑀸𑀭𑀡𑀕𑀸𑀫𑀤𑁆𑀯𑀸𑀭𑀯𑀲𑁂𑀦. 𑀲𑀘𑁂 𑀢𑀲𑁆𑀲 𑀤𑁆𑀯𑀸𑀭𑀤𑁆𑀯𑀬𑀁 𑀳𑁄𑀢𑀺, 𑀫𑀚𑁆𑀛𑁂 𑀘 𑀖𑀭𑀲𑀪𑀸𑀬𑀁, 𑀬𑀢𑁆𑀣𑀺𑀘𑁆𑀙𑀢𑀺, 𑀢𑀢𑁆𑀣 𑀯𑀲𑀺𑀢𑀩𑁆𑀩’’𑀦𑁆𑀢𑀺.

𑁪𑁮𑁦-𑁧. 𑀬𑀸𑀦𑀺 𑀦𑀺𑀯𑁂𑀲𑀦𑀸𑀤𑀻𑀦𑀺 𑀕𑀸𑀫𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀦𑁆𑀢𑀺, 𑀢𑀸𑀦𑀺 𑀦𑀺𑀯𑁂𑀲𑀦𑀸𑀤𑀻𑀦𑀻𑀢𑀺 𑀅𑀥𑀺𑀧𑁆𑀧𑁂𑀢𑀸𑀦𑀺. 𑀅𑀚𑁆𑀛𑁄𑀓𑀸𑀲𑁂 𑀅𑀧𑀭𑀺𑀲𑀗𑁆𑀓𑀺𑀢𑀫𑁆𑀧𑀺 𑀘𑀻𑀯𑀭𑀁 𑀅𑀢𑀺𑀭𑁂𑀓𑀲𑀢𑁆𑀢𑀩𑁆𑀪𑀦𑁆𑀢𑀭𑁂 𑀦𑀺𑀓𑁆𑀔𑀺𑀢𑁆𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺, 𑀏𑀢𑁆𑀣 𑀅𑀦𑁆𑀢𑁄𑀲𑀻𑀫𑀢𑀸 𑀦 𑀭𑀓𑁆𑀔𑀢𑀺, 𑀲𑀢𑁆𑀣𑁂 𑀧𑀦 𑀭𑀓𑁆𑀔𑀢𑀺. ‘‘𑀦𑀤𑀻𑀧𑀭𑀺𑀳𑀸𑀭𑁄 𑀘 𑀮𑀩𑁆𑀪𑀢𑀻’’𑀢𑀺 𑀯𑀘𑀦𑀢𑁄 𑀉𑀤𑀓𑀼𑀓𑁆𑀔𑁂𑀧𑀲𑀻𑀫𑀸𑀬𑀁 𑀧𑀭𑀺𑀳𑀸𑀭𑁄 𑀮𑀩𑁆𑀪𑀢𑀻𑀢𑀺 𑀲𑀺𑀤𑁆𑀥𑀁. 𑀲𑀸𑀫𑀦𑁆𑀢𑀯𑀺𑀳𑀸𑀭𑁄 𑀘𑁂 𑀏𑀓𑀲𑀻𑀫𑁄, 𑀘𑀻𑀯𑀭𑀁 𑀦 𑀦𑀺𑀲𑁆𑀲𑀕𑁆𑀕𑀺𑀬𑀁.

𑀇𑀤𑀸𑀦𑀺 𑁋

‘‘𑀙𑀺𑀦𑁆𑀦𑀁 𑀥𑀼𑀢𑀗𑁆𑀕𑀁 𑀲𑀸𑀲𑀗𑁆𑀓-𑀲𑀫𑁆𑀫𑀢𑁄 𑀲𑀦𑁆𑀢𑀭𑀼𑀢𑁆𑀢𑀭𑀁;

𑀅𑀘𑀻𑀯𑀭𑀲𑁆𑀲𑀸𑀦𑀸𑀧𑀢𑁆𑀢𑀺, 𑀧𑀘𑁆𑀘𑀼𑀤𑁆𑀥𑀸𑀭𑀸𑀤𑀺𑀲𑀺𑀤𑁆𑀥𑀺𑀢𑁄’’𑀢𑀺. 𑁋

𑀇𑀤𑀁 𑀧𑀓𑀺𑀡𑁆𑀡𑀓𑀁, 𑀢𑀢𑁆𑀣𑀸𑀬𑀁 𑀘𑁄𑀤𑀦𑀸𑀧𑀼𑀩𑁆𑀩𑀗𑁆𑀕𑀫𑁄 𑀯𑀺𑀦𑀺𑀘𑁆𑀙𑀬𑁄 𑁋 𑀓𑁂𑀘𑀺 ‘‘𑀤𑀺𑀕𑀼𑀡𑀁 𑀲𑀗𑁆𑀖𑀸𑀝𑀺’’𑀦𑁆𑀢𑀺 (𑀫𑀳𑀸𑀯. 𑁩𑁪𑁮) 𑀯𑀘𑀦𑀢𑁄 ‘‘𑀏𑀓𑀘𑁆𑀘𑀺𑀓𑀸 𑀲𑀗𑁆𑀖𑀸𑀝𑀺𑀧𑀺 𑀦𑀸𑀥𑀺𑀝𑁆𑀞𑀸𑀢𑀩𑁆𑀩𑀸. 𑀲𑀘𑁂 𑀅𑀥𑀺𑀝𑁆𑀞𑀸𑀢𑀺 𑀦 𑀭𑀼𑀳𑀢𑀻’’𑀢𑀺 𑀯𑀢𑁆𑀯𑀸 𑀉𑀧𑀲𑀫𑁆𑀧𑀤𑀸𑀧𑁂𑀓𑁆𑀔𑀸𑀦𑀫𑁆𑀧𑀺 𑀤𑀺𑀕𑀼𑀡𑀫𑁂𑀯 𑀲𑀗𑁆𑀖𑀸𑀝𑀺𑀁 𑀤𑀢𑁆𑀯𑀸 𑀉𑀧𑀲𑀫𑁆𑀧𑀸𑀤𑁂𑀦𑁆𑀢𑀺, 𑀢𑁂 𑀇𑀫𑀺𑀦𑀸 𑀲𑀼𑀢𑁆𑀢𑀮𑁂𑀲𑁂𑀦 𑀲𑀜𑁆𑀜𑀸𑀧𑁂𑀢𑀩𑁆𑀩𑀸. 𑀪𑀕𑀯𑀢𑀸 𑀳𑀺 ‘‘𑀙𑀺𑀦𑁆𑀦𑀓𑀁 𑀲𑀗𑁆𑀖𑀸𑀝𑀺𑀁 𑀙𑀺𑀦𑁆𑀦𑀓𑀁 𑀉𑀢𑁆𑀢𑀭𑀸𑀲𑀗𑁆𑀕𑀁 𑀙𑀺𑀦𑁆𑀦𑀓𑀁 𑀅𑀦𑁆𑀢𑀭𑀯𑀸𑀲𑀓’’𑀦𑁆𑀢𑀺 𑀧𑀞𑀫𑀁 𑀅𑀦𑀼𑀜𑁆𑀜𑀸𑀢𑀁. 𑀢𑀢𑁄 ‘‘𑀅𑀜𑁆𑀜𑀢𑀭𑀲𑁆𑀲 𑀪𑀺𑀓𑁆𑀔𑀼𑀦𑁄 𑀢𑀺𑀘𑀻𑀯𑀭𑁂 𑀓𑀭𑀺𑀬𑀫𑀸𑀦𑁂 𑀲𑀩𑁆𑀩𑀁 𑀙𑀺𑀦𑁆𑀦𑀓𑀁 𑀦𑀧𑁆𑀧𑀳𑁄𑀢𑀺. 𑀤𑁆𑀯𑁂 𑀙𑀺𑀦𑁆𑀦𑀓𑀸𑀦𑀺 𑀏𑀓𑀁 𑀅𑀘𑁆𑀙𑀺𑀦𑁆𑀦𑀓𑀁 𑀦𑀧𑁆𑀧𑀳𑁄𑀢𑀺. 𑀤𑁆𑀯𑁂 𑀅𑀘𑁆𑀙𑀺𑀦𑁆𑀦𑀓𑀸𑀦𑀺 𑀏𑀓𑀁 𑀙𑀺𑀦𑁆𑀦𑀓𑀁 𑀦𑀧𑁆𑀧𑀳𑁄𑀢𑀻’’𑀢𑀺 𑀇𑀫𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺𑀁 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀦𑁆𑀯𑀸𑀥𑀺𑀓𑀫𑁆𑀧𑀺 𑀆𑀭𑁄𑀧𑁂𑀢𑀼’’𑀦𑁆𑀢𑀺 (𑀫𑀳𑀸𑀯. 𑁩𑁬𑁦) 𑀅𑀦𑀼𑀜𑁆𑀜𑀸𑀢𑀁, 𑀢𑀲𑁆𑀫𑀸 𑀏𑀓𑀘𑁆𑀘𑀺𑀓𑀸𑀧𑀺 𑀲𑀗𑁆𑀖𑀸𑀝𑀺 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁. 𑀬𑀸 𑀙𑀺𑀚𑁆𑀚𑀫𑀸𑀦𑀸 𑀦𑀧𑁆𑀧𑀳𑁄𑀢𑀺, 𑀢𑀲𑁆𑀲𑀸 𑀓𑀼𑀢𑁄 𑀤𑀺𑀕𑀼𑀡𑀢𑀸𑀢𑀺. 𑀅𑀝𑁆𑀞𑀓𑀣𑀸𑀬𑀫𑁆𑀧𑀺𑀲𑁆𑀲 𑀯𑀼𑀢𑁆𑀢𑀁 ‘‘𑀅𑀦𑁆𑀯𑀸𑀥𑀺𑀓𑀫𑁆𑀧𑀺 𑀆𑀭𑁄𑀧𑁂𑀢𑀼𑀦𑁆𑀢𑀺 𑀆𑀕𑀦𑁆𑀢𑀼𑀓𑀧𑀢𑁆𑀢𑀫𑁆𑀧𑀺 𑀤𑀸𑀢𑀼𑀁. 𑀇𑀤𑀁 𑀧𑀦 𑀅𑀧𑁆𑀧𑀳𑁄𑀦𑀓𑁂 𑀆𑀭𑁄𑀧𑁂𑀢𑀩𑁆𑀩𑀁. 𑀲𑀘𑁂 𑀧𑀳𑁄𑀢𑀺, 𑀆𑀕𑀦𑁆𑀢𑀼𑀓𑀧𑀢𑁆𑀢𑀁 𑀦 𑀯𑀝𑁆𑀝𑀢𑀺, 𑀙𑀺𑀦𑁆𑀤𑀺𑀢𑀩𑁆𑀩𑀫𑁂𑀯𑀸’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁩𑁬𑁦). 𑀓𑀣𑀺𑀦𑀁 𑀧𑀦 𑀙𑀺𑀦𑁆𑀦𑀓𑀫𑁂𑀯 𑀯𑀝𑁆𑀝𑀢𑀺 𑀆𑀯𑁂𑀡𑀺𑀓𑀮𑀓𑁆𑀔𑀡𑀢𑁆𑀢𑀸, ‘‘𑀙𑀺𑀦𑁆𑀦𑀓𑀁 𑀤𑀺𑀕𑀼𑀡𑀁 𑀦𑀧𑁆𑀧𑀳𑁄𑀢𑀻’’𑀢𑀺 𑀯𑀘𑀦𑀸𑀪𑀸𑀯𑀢𑁄 𑀘𑀸𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁.

𑀥𑀼𑀢𑀗𑁆𑀕𑀦𑁆𑀢𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀦𑀁 𑀢𑁂𑀘𑀻𑀯𑀭𑀺𑀓𑀥𑀼𑀢𑀗𑁆𑀕𑀸𑀪𑀸𑀯𑀢𑁄 𑀢𑀺𑀘𑀻𑀯𑀭𑁂𑀦𑁂𑀯 𑀢𑁂𑀘𑀻𑀯𑀭𑀺𑀓𑁄𑀢𑀺. 𑀢𑁂𑀲𑀁 𑀅𑀥𑀺𑀝𑁆𑀞𑀸𑀦𑀸𑀪𑀸𑀯𑀢𑁄 ‘‘𑀅𑀥𑀺𑀝𑁆𑀞𑀺𑀢𑁂𑀦𑁂𑀯𑀸’’𑀢𑀺 𑀯𑀢𑁆𑀢𑀩𑁆𑀩𑀁 𑀳𑁄𑀢𑀽𑀢𑀺 𑀘𑁂? 𑀦, 𑀥𑀼𑀢𑀗𑁆𑀕𑀪𑁂𑀤𑁂𑀦 𑀯𑀺𑀭𑁄𑀥𑀧𑁆𑀧𑀲𑀗𑁆𑀕𑀢𑁄. 𑀘𑀢𑀼𑀢𑁆𑀣𑀘𑀻𑀯𑀭𑀲𑀸𑀤𑀺𑀬𑀦𑁂𑀦 𑀳𑀺 𑀥𑀼𑀢𑀗𑁆𑀕𑀪𑁂𑀤𑁄, 𑀦 𑀢𑀺𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑁂𑀦, 𑀦𑀸𑀧𑀺 𑀅𑀢𑀺𑀭𑁂𑀓𑀘𑀻𑀯𑀭𑀲𑀸𑀤𑀺𑀬𑀦𑁂𑀦, 𑀦𑀸𑀧𑀺 𑀅𑀢𑀺𑀭𑁂𑀓𑀘𑀻𑀯𑀭𑀥𑀸𑀭𑀡𑁂𑀦. 𑀬𑀲𑁆𑀫𑀸 𑀧𑀦 𑀪𑀺𑀓𑁆𑀔𑀽𑀦𑀁𑀬𑁂𑀯 𑀪𑀕𑀯𑀢𑀸 𑀅𑀥𑀺𑀝𑁆𑀞𑀸𑀦𑀯𑀲𑁂𑀦 𑀦𑀯 𑀘𑀻𑀯𑀭𑀸𑀦𑀺 𑀅𑀦𑀼𑀜𑁆𑀜𑀸𑀢𑀸𑀦𑀺, 𑀚𑀸𑀢𑀺𑀯𑀲𑁂𑀦 𑀘 𑀯𑀼𑀢𑁆𑀢𑀸𑀦𑀺, 𑀦 𑀏𑀯𑀁 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀦𑀁. 𑀢𑀲𑁆𑀫𑀸 𑀢𑁂𑀲𑀁 𑀘𑀻𑀯𑀭𑀦𑀺𑀬𑀫𑀸𑀪𑀸𑀯𑀸 𑀦 𑀢𑀁 𑀥𑀼𑀢𑀗𑁆𑀕𑀁 𑀅𑀦𑀼𑀜𑁆𑀜𑀸𑀢𑀁 𑀕𑀳𑀝𑁆𑀞𑀸𑀦𑀁 𑀯𑀺𑀬, 𑀢𑀲𑁆𑀫𑀸 𑀢𑀲𑁆𑀲 𑀲𑀫𑀸𑀤𑀸𑀦𑀯𑀺𑀥𑀸𑀦𑁂 𑀅𑀯𑀘𑀦𑀢𑁄 𑀘 𑀲𑀦𑁆𑀦𑀺𑀝𑁆𑀞𑀸𑀦𑀫𑁂𑀢𑁆𑀣 𑀕𑀦𑁆𑀢𑀩𑁆𑀩𑀁.

𑀲𑀸𑀲𑀗𑁆𑀓𑀲𑀫𑁆𑀫𑀢𑁄𑀢𑀺 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀁 𑀲𑀸𑀲𑀗𑁆𑀓𑀲𑀺𑀓𑁆𑀔𑀸𑀧𑀤𑁂 𑀯𑀺𑀲𑀼𑀁 𑀅𑀗𑁆𑀕𑀸𑀦𑀺 𑀦 𑀯𑀼𑀢𑁆𑀢𑀸𑀦𑀺, ‘‘𑀲𑁂𑀲𑀫𑁂𑀢𑁆𑀣 𑀘𑀻𑀯𑀭𑀯𑀕𑁆𑀕𑀲𑁆𑀲 𑀤𑀼𑀢𑀺𑀬𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀦𑀬𑁂𑀦 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀲𑀸𑀲𑀗𑁆𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁, 𑀦 𑀘 𑀧𑀦𑁂𑀢𑀁 𑀯𑀼𑀢𑁆𑀢𑀁. 𑀢𑀢𑁆𑀣 𑀭𑀢𑁆𑀢𑀺𑀯𑀺𑀧𑁆𑀧𑀯𑀸𑀲𑁄 𑀘𑀢𑀼𑀢𑁆𑀣𑀁 𑀅𑀗𑁆𑀕𑀁, 𑀇𑀥 𑀙𑀸𑀭𑀢𑁆𑀢𑀯𑀺𑀧𑁆𑀧𑀯𑀸𑀲𑁄, 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄𑀢𑀺, 𑀢𑀲𑁆𑀫𑀸 𑀅𑀗𑁆𑀕𑀲𑀸𑀫𑀜𑁆𑀜𑀢𑁄, 𑀲𑀫𑁆𑀫𑀼𑀢𑀺𑀲𑀸𑀫𑀜𑁆𑀜𑀢𑁄 𑀘 𑀲𑀸𑀲𑀗𑁆𑀓𑀲𑀺𑀓𑁆𑀔𑀸𑀧𑀤𑀫𑁂𑀯 𑀯𑀤𑀦𑁆𑀢𑀺. 𑀇𑀤𑀁 𑀦𑀺𑀧𑁆𑀧𑀤𑁂𑀲𑀁, 𑀢𑀁 𑀲𑀧𑁆𑀧𑀤𑁂𑀲𑀁 𑀫𑀸𑀲𑀧𑀭𑀫𑀢𑁆𑀢𑀸. 𑀢𑀢𑁆𑀣 𑀩𑀳𑀺𑀕𑀸𑀫𑁂𑀧𑀺 𑀕𑀸𑀫𑀲𑀻𑀫𑀁 𑀑𑀓𑁆𑀓𑀫𑀺𑀢𑁆𑀯𑀸 𑀯𑀲𑀺𑀢𑁆𑀯𑀸 𑀧𑀓𑁆𑀓𑀫𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺, 𑀇𑀥 𑀦 𑀢𑀣𑀸, 𑀇𑀥 𑀅𑀦𑀦𑁆𑀢𑀭𑁂 𑀅𑀦𑀦𑁆𑀢𑀭𑁂 𑀅𑀭𑀼𑀡𑀼𑀕𑁆𑀕𑀫𑀦𑁂 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀢𑀢𑁆𑀣 𑀲𑀢𑁆𑀢𑀫𑁂𑀢𑀺 𑀅𑀬𑀁 𑀇𑀫𑁂𑀲𑀁 𑀤𑁆𑀯𑀺𑀦𑁆𑀦𑀁 𑀯𑀺𑀲𑁂𑀲𑁄. 𑀅𑀗𑁆𑀕𑀸𑀦𑀺 𑀧𑀦 𑀘𑀻𑀯𑀭𑀦𑀺𑀓𑁆𑀔𑁂𑀧𑀗𑁆𑀕𑀲𑀫𑁆𑀧𑀢𑁆𑀢𑀺𑀢𑁄 𑀯𑀺𑀧𑀭𑀺𑀬𑀸𑀬𑁂𑀦, 𑀇𑀥 𑀯𑀼𑀢𑁆𑀢𑀦𑀬𑁂𑀦 𑀘 𑀲𑀺𑀤𑁆𑀥𑀢𑁆𑀢𑀸 𑀦 𑀯𑀼𑀢𑁆𑀢𑀸𑀦𑀺. 𑀢𑀸𑀦𑀺 𑀓𑀸𑀫𑀁 𑀦 𑀯𑀼𑀢𑁆𑀢𑀸𑀦𑀺, 𑀢𑀣𑀸𑀧𑀺 𑀘𑀢𑀼𑀢𑁆𑀣𑀫𑀗𑁆𑀕𑀁 𑀯𑀺𑀲𑁂𑀲𑀺𑀢𑀩𑁆𑀩𑀁, 𑀦 𑀧𑀦 𑀯𑀺𑀲𑁂𑀲𑀺𑀢𑀁. 𑀓𑀺𑀁𑀓𑀸𑀭𑀡𑀸? 𑀇𑀥 𑀯𑀼𑀢𑁆𑀢𑀦𑀺𑀲𑁆𑀲𑀚𑁆𑀚𑀦𑀓𑁆𑀓𑀫𑁂𑀦 𑀦𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀆𑀧𑀢𑁆𑀢𑀺𑀤𑁂𑀲𑀦𑀢𑁄, 𑀢𑀢𑁆𑀣𑀸𑀧𑀦𑁆𑀦𑀸𑀧𑀢𑁆𑀢𑀺𑀯𑀺𑀫𑁄𑀓𑁆𑀔𑀤𑀻𑀧𑀦𑀢𑁆𑀣𑀁. 𑀲𑀁𑀯𑀘𑁆𑀙𑀭𑀯𑀺𑀧𑁆𑀧𑀯𑀼𑀢𑁆𑀣𑀫𑁆𑀧𑀺 𑀭𑀢𑁆𑀢𑀺𑀯𑀺𑀧𑁆𑀧𑀯𑀼𑀢𑁆𑀣𑀫𑁂𑀯, 𑀧𑀕𑁂𑀯 𑀙𑀸𑀭𑀢𑁆𑀢𑀁 𑀯𑀺𑀧𑁆𑀧𑀯𑀼𑀢𑁆𑀣𑀁. 𑀏𑀯𑀁 𑀲𑀦𑁆𑀢𑁂𑀧𑀺 𑀢𑀢𑁆𑀣 𑀬𑀣𑀸𑀯𑀼𑀢𑁆𑀢𑀅𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀢𑀺 𑀢𑀢𑁆𑀣 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁. 𑀳𑁂𑀫𑀦𑁆𑀢𑁂 𑀯𑀸 𑀕𑀺𑀫𑁆𑀳𑁂 𑀯𑀸 𑀦𑀺𑀲𑁆𑀲𑀚𑁆𑀚𑀢𑀺 𑀘𑁂? 𑀇𑀥 𑀯𑀼𑀢𑁆𑀢𑀦𑀬𑁂𑀦𑀸𑀧𑀺 𑀦𑀺𑀲𑁆𑀲𑀚𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀜𑀸𑀧𑀦𑀢𑁆𑀣𑀁 𑀘𑀢𑀼𑀢𑁆𑀣𑀁 𑀅𑀗𑁆𑀕𑀁 𑀦 𑀯𑀺𑀲𑁂𑀲𑀺𑀢𑀦𑁆𑀢𑀺 𑀦𑁄 𑀢𑀓𑁆𑀓𑁄𑀢𑀺 𑀆𑀘𑀭𑀺𑀬𑁄. 𑀫𑀸𑀲𑀸𑀢𑀺𑀓𑁆𑀓𑀦𑁆𑀢𑀫𑁆𑀧𑀺 𑀘𑀻𑀯𑀭𑀁 ‘‘𑀤𑀲𑀸𑀳𑀸𑀢𑀺𑀓𑁆𑀓𑀦𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀦𑀺𑀲𑁆𑀲𑀝𑁆𑀞𑀫𑁂𑀯. 𑀤𑁆𑀯𑀬𑁂𑀦 𑀊𑀦𑀫𑀸𑀲𑀁 𑀳𑀼𑀢𑁆𑀯𑀸 ‘‘𑀤𑀲𑀸𑀳𑀸𑀢𑀺𑀓𑁆𑀓𑀦𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀫𑀸𑀲𑀸𑀢𑀺𑀓𑁆𑀓𑀦𑁆𑀢𑀦𑁆𑀢𑀺 𑀏𑀓𑁂. 𑀢𑀣𑀸𑀧𑀺 𑀲𑀘𑁂 𑀧𑀘𑁆𑀘𑀸𑀲𑀸𑀘𑀻𑀯𑀭𑀁 𑀳𑁄𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 ‘‘𑀤𑀲𑀸𑀳𑀸𑀢𑀺𑀓𑁆𑀓𑀦𑁆𑀢’’𑀦𑁆𑀢𑀺 𑀯𑀢𑁆𑀯𑀸, 𑀫𑀽𑀮𑀘𑀻𑀯𑀭𑀁 𑀧𑀦 ‘‘𑀫𑀸𑀲𑀸𑀢𑀺𑀓𑁆𑀓𑀦𑁆𑀢’’𑀦𑁆𑀢𑀺 𑀯𑀢𑁆𑀯𑀸 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁.

‘‘𑀲𑀦𑁆𑀢𑀭𑀼𑀢𑁆𑀢𑀭’’𑀦𑁆𑀢𑀺 𑀯𑀸 ‘‘𑀲𑀗𑁆𑀖𑀸𑀝𑀺’’𑀦𑁆𑀢𑀺 𑀯𑀸 ‘‘𑀘𑀻𑀯𑀭’’𑀦𑁆𑀢𑀺 𑀯𑀸 𑀓𑀺𑀁 𑀢𑀺𑀘𑀻𑀯𑀭𑀁, 𑀉𑀤𑀸𑀳𑀼 𑀅𑀜𑁆𑀜𑀫𑁆𑀧𑀻𑀢𑀺. 𑀓𑀺𑀜𑁆𑀘𑁂𑀢𑁆𑀣 𑁋 𑀬𑀤𑀺 𑀢𑀺𑀘𑀻𑀯𑀭𑀫𑁂𑀯 𑀧𑀝𑀺𑀲𑀺𑀤𑁆𑀥𑀁, 𑀧𑀭𑀺𑀬𑀸𑀧𑀦𑁆𑀦𑀯𑀲𑁂𑀦 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀘𑁆𑀙𑀺𑀦𑁆𑀤𑀦𑀥𑁄𑀯𑀸𑀧𑀦𑀯𑀺𑀜𑁆𑀜𑀢𑁆𑀢𑀺𑀆𑀤𑀺𑀯𑀺𑀭𑁄𑀥𑁄. 𑀅𑀣 𑀅𑀜𑁆𑀜𑀫𑁆𑀧𑀺, ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺’’𑀦𑁆𑀢𑀺 𑀏𑀯𑀫𑀸𑀤𑀺𑀦𑀸 𑀯𑀺𑀭𑁄𑀥𑁄𑀢𑀺? 𑀯𑀼𑀘𑁆𑀘𑀢𑁂 𑁋 𑀦 𑀦𑀺𑀬𑀫𑀢𑁄 𑀯𑁂𑀤𑀺𑀢𑀩𑁆𑀩𑀁 𑀬𑀣𑀸𑀲𑀫𑁆𑀪𑀯𑀁 𑀕𑀳𑁂𑀢𑀩𑁆𑀩𑀢𑁄. 𑀢𑀣𑀸 𑀳𑀺 ‘‘𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 𑀚𑀦𑀧𑀤𑀘𑀸𑀭𑀺𑀓𑀁 𑀧𑀓𑁆𑀓𑀫𑀦𑁆𑀢𑀻’’𑀢𑀺 (𑀧𑀸𑀭𑀸. 𑁪𑁭𑁧) 𑀏𑀯𑀫𑀸𑀤𑀻𑀲𑀼 𑀢𑀺𑀘𑀻𑀯𑀭𑀫𑁂𑀯. ‘‘𑀦, 𑀪𑀺𑀓𑁆𑀔𑀯𑁂, 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 𑀕𑀸𑀫𑁄 𑀧𑀯𑀺𑀲𑀺𑀢𑀩𑁆𑀩𑁄, 𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀁 𑀢𑀢𑁄 𑀘𑀻𑀯𑀭𑀁 𑀲𑀸𑀥𑀺𑀢𑀩𑁆𑀩’’𑀦𑁆𑀢𑀺 𑀏𑀯𑀫𑀸𑀤𑀻𑀲𑀼 𑀬𑀁𑀓𑀺𑀜𑁆𑀘𑀺, 𑀢𑀣𑀸 𑀲𑀕𑀼𑀡𑀁 𑀓𑀢𑁆𑀯𑀸 𑀲𑀗𑁆𑀖𑀸𑀝𑀺𑀬𑁄 𑀤𑀸𑀢𑀩𑁆𑀩𑀸, 𑀦𑀺𑀯𑀸𑀲𑀦𑀁 𑀤𑀸𑀢𑀩𑁆𑀩𑀁, 𑀲𑀗𑁆𑀖𑀸𑀝𑀺 𑀤𑀸𑀢𑀩𑁆𑀩𑀸, 𑀳𑀦𑁆𑀤 𑀢𑁂, 𑀆𑀯𑀼𑀲𑁄, 𑀲𑀗𑁆𑀖𑀸𑀝𑀺, 𑀤𑁂𑀳𑀺 𑀫𑁂 𑀧𑀝𑀦𑁆𑀢𑀺𑀆𑀤𑀻𑀲𑀼. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀲𑀩𑁆𑀩𑀜𑁆𑀳𑀺 𑀘𑀻𑀯𑀭𑀁 𑀲𑀗𑁆𑀖𑀝𑀺𑀢𑀝𑁆𑀞𑁂𑀦 ‘𑀲𑀗𑁆𑀖𑀸𑀝𑀻’𑀢𑀺 𑀯𑀼𑀘𑁆𑀘𑀢𑀻’’𑀢𑀺. 𑀢𑀣𑀸 ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺’’𑀦𑁆𑀢𑀺 𑀏𑀢𑁆𑀣𑀸𑀧𑀻𑀢𑀺 𑀏𑀓𑁂. 𑀅𑀦𑁆𑀢𑁄𑀲𑀫𑀬𑁂 𑀳𑀺 𑀬𑀸𑀯𑀤𑀢𑁆𑀣𑀁 𑀘𑀻𑀯𑀭𑀁 𑀅𑀦𑀼𑀜𑁆𑀜𑀸𑀢𑀁, 𑀢𑀁 𑀲𑀩𑁆𑀩𑀁 𑀓𑀭𑀺𑀬𑀫𑀸𑀦𑀁 𑀓𑀤𑀸 𑀦𑀺𑀝𑁆𑀞𑀸𑀦𑀁 𑀕𑀘𑁆𑀙𑀺𑀲𑁆𑀲𑀢𑀺, 𑀢𑀲𑁆𑀫𑀸 𑀢𑀺𑀘𑀻𑀯𑀭𑀫𑁂𑀯𑀸𑀢𑀺 𑀏𑀓𑁂. 𑀅𑀘𑀻𑀯𑀭𑀲𑁆𑀲𑀸𑀦𑀸𑀧𑀢𑁆𑀢𑀺 𑀧𑀘𑁆𑀘𑀼𑀤𑁆𑀥𑀸𑀭𑀸𑀤𑀺𑀲𑀺𑀤𑁆𑀥𑀺𑀢𑁄𑀢𑀺 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀉𑀤𑁄𑀲𑀺𑀢𑀲𑀺𑀓𑁆𑀔𑀸𑀧𑀤𑀲𑁆𑀲 𑀦𑀺𑀧𑁆𑀧𑀬𑁄𑀚𑀦𑀪𑀸𑀯𑀧𑁆𑀧𑀲𑀗𑁆𑀕𑀢𑁄 𑀢𑀺𑀘𑀻𑀯𑀭𑀯𑀺𑀧𑁆𑀧𑀯𑀸𑀲𑁂 𑀢𑁂𑀘𑀻𑀯𑀭𑀲𑁆𑀲 𑀆𑀧𑀢𑁆𑀢𑀻𑀢𑀺 𑀏𑀓𑁂. 𑀢𑀢𑁆𑀣𑁂𑀢𑀁 𑀯𑀼𑀘𑁆𑀘𑀢𑀺 𑀦 𑀳𑁄𑀢𑀺 𑀆𑀧𑀢𑁆𑀢𑀺 𑀧𑀘𑁆𑀘𑀼𑀤𑁆𑀥𑀸𑀭𑀸𑀤𑀺𑀲𑀺𑀤𑁆𑀥𑀺𑀢𑁄. ‘‘𑀅𑀦𑀸𑀧𑀢𑁆𑀢𑀺 𑀅𑀦𑁆𑀢𑁄𑀅𑀭𑀼𑀡𑁂 𑀧𑀘𑁆𑀘𑀼𑀤𑁆𑀥𑀭𑀢𑀺, 𑀯𑀺𑀲𑁆𑀲𑀚𑁆𑀚𑁂𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀣𑀸 𑀧𑀘𑁆𑀘𑀼𑀤𑁆𑀥𑀭𑀦𑁆𑀢𑀲𑁆𑀲, 𑀅𑀦𑁆𑀢𑁄𑀅𑀭𑀼𑀡𑁂 𑀯𑀺𑀲𑁆𑀲𑀚𑁆𑀚𑁂𑀦𑁆𑀢𑀲𑁆𑀲 𑀘 𑀬𑀸𑀯 𑀅𑀜𑁆𑀜𑁄 𑀦𑀸𑀥𑀺𑀝𑁆𑀞𑀸𑀢𑀺, 𑀢𑀸𑀯 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀺 𑀬𑀣𑀸𑀯𑀼𑀢𑁆𑀢𑀦𑀬𑁂𑀦. 𑀅𑀜𑁆𑀜𑀣𑀸 𑀲𑀢𑁆𑀢𑀩𑁆𑀪𑀦𑁆𑀢𑀭𑁂𑀦 𑀯𑀺𑀧𑁆𑀧𑀯𑀸𑀲𑀲𑁆𑀲𑀸𑀢𑀺 𑀯𑀺𑀧𑁆𑀧𑀯𑀸𑀲𑀢𑁄 𑀬𑀣𑀸𑀭𑀼𑀢𑀁𑀬𑁂𑀯 𑀲𑀢𑀺 𑀯𑀺𑀧𑁆𑀧𑀯𑀸𑀲𑁂 𑀯𑀺𑀧𑁆𑀧𑀯𑀸𑀲𑀢𑁄 𑀅𑀯𑀺𑀧𑁆𑀧𑀯𑀸𑀲𑁂 𑀲𑀢𑀺 𑀅𑀯𑀺𑀧𑁆𑀧𑀯𑀸𑀲𑀢𑁄𑀢𑀺.

𑀉𑀤𑁄𑀲𑀺𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀢𑀢𑀺𑀬𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁯𑁭. 𑀦𑀧𑁆𑀧𑀳𑁄𑀢𑀻𑀢𑀺 𑀮𑀸𑀫𑀓𑀧𑀭𑀺𑀘𑁆𑀙𑁂𑀤𑀁 𑀦 𑀧𑀸𑀧𑀼𑀡𑀸𑀢𑀺, 𑀢𑁂𑀦𑁂𑀯 𑀢𑀺𑀘𑀻𑀯𑀭𑀲𑁆𑀲 𑀫𑀼𑀝𑁆𑀞𑀺𑀧𑀜𑁆𑀘𑀓𑀸𑀤𑀺𑀮𑀸𑀫𑀓𑀧𑀭𑀺𑀘𑁆𑀙𑁂𑀤𑁄𑀯 𑀢𑀸𑀯 𑀯𑀼𑀢𑁆𑀢𑁄. 𑀘𑀻𑀯𑀭𑁂 𑀧𑀘𑁆𑀘𑀸𑀲𑀸 𑀘𑀻𑀯𑀭𑀧𑀘𑁆𑀘𑀸𑀲𑀸. 𑀢𑁂𑀦𑁂𑀢𑀁 𑀤𑀻𑀧𑁂𑀢𑀺 𑁋 𑀢𑀁 𑀘𑀻𑀯𑀭𑀁 𑀧𑀘𑁆𑀙𑀸 𑀮𑀩𑁆𑀪𑀢𑀼 𑀯𑀸 𑀫𑀸 𑀯𑀸, 𑀬𑀸𑀯 𑀲𑀸 𑀧𑀘𑁆𑀘𑀸𑀲𑀸 𑀙𑀺𑀚𑁆𑀚𑀢𑀺, 𑀢𑀸𑀯 𑀇𑀤𑀁 𑀫𑀽𑀮𑀘𑀻𑀯𑀭𑀁 𑀞𑀧𑁂𑀢𑀼𑀁 𑀅𑀦𑀼𑀚𑀸𑀦𑀸𑀫𑀻𑀢𑀺. ‘‘𑀘𑀻𑀯𑀭𑀧𑀘𑁆𑀘𑀸𑀲𑀸’’𑀢𑀺 𑀫𑀭𑀺𑀬𑀸𑀤𑀢𑁆𑀣𑁂 𑀦𑀺𑀲𑁆𑀲𑀓𑁆𑀓𑀯𑀘𑀦𑀁, 𑀪𑀼𑀫𑁆𑀫𑀢𑁆𑀣𑁂 𑀯𑀸 𑀧𑀘𑁆𑀘𑀢𑁆𑀢𑀯𑀘𑀦𑀁 𑀓𑀢𑀁.

𑁪𑁯𑁯-𑁫𑁦𑁦. 𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀁 …𑀧𑁂… 𑀘𑀻𑀯𑀭𑀸𑀲𑀸 𑀯𑀸 𑀉𑀧𑀘𑁆𑀙𑀺𑀦𑁆𑀦𑀸𑀢𑀺𑀆𑀤𑀺𑀫𑁆𑀳𑀺 𑀢𑀻𑀲𑀼 𑀘𑀻𑀯𑀭𑁂𑀲𑀼 𑀅𑀜𑁆𑀜𑀢𑀭𑀁 𑀓𑀢𑀁 𑀳𑁄𑀢𑀺, 𑀲𑁂𑀲𑀸 𑀅𑀢𑁆𑀣𑀺, 𑀭𑀓𑁆𑀔𑀢𑀺. 𑀘𑀻𑀯𑀭𑀧𑀮𑀺𑀩𑁄𑀥𑀲𑁆𑀲 𑀉𑀧𑀘𑁆𑀙𑁂𑀤𑁂, 𑀉𑀩𑁆𑀪𑀢𑀲𑁆𑀫𑀺𑀜𑁆𑀘 𑀓𑀣𑀺𑀦𑁂 𑀲𑀫𑀬𑁂 𑀯𑀸 𑀳𑁂𑀫𑀦𑁆𑀢𑀲𑁆𑀲 𑀲𑀫𑀬𑁂 𑀯𑀸 𑀅𑀓𑀸𑀮𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑁂𑀬𑁆𑀬, 𑀔𑀺𑀧𑁆𑀧𑀫𑁂𑀯 𑀓𑀸𑀭𑁂𑀢𑀩𑁆𑀩𑀁. 𑀲𑀢𑀺 𑀧𑀸𑀭𑀺𑀧𑀽𑀭𑀺𑀬𑀸 𑀧𑀘𑁆𑀘𑀸𑀲𑀸 𑀦 𑀭𑀓𑁆𑀔𑀢𑀺, 𑀅𑀲𑀢𑀺 𑀦𑀢𑁆𑀣𑀺 𑀘𑁂 𑀧𑀘𑁆𑀘𑀸𑀲𑀸, 𑀦 𑀭𑀓𑁆𑀔𑀢𑀺. ‘‘𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀏𑀓𑀸𑀤𑀲𑀫𑀸𑀲𑁂 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀯𑀘𑀦𑀢𑁄 𑀅𑀧𑀭𑀓𑀢𑁆𑀢𑀺𑀓𑀸 𑀅𑀢𑁆𑀣𑀢𑁂 𑀯𑀸 𑀅𑀦𑀢𑁆𑀣𑀢𑁂 𑀯𑀸 𑀲𑀫𑀬𑁄𑀯. 𑀳𑁂𑀫𑀦𑁆𑀢𑁄 𑀲𑀺𑀬𑀸 𑀲𑀫𑀬𑁄 𑀅𑀢𑁆𑀣𑀢𑁂, 𑀲𑀺𑀬𑀸 𑀅𑀲𑀫𑀬𑁄 𑀅𑀦𑀢𑁆𑀣𑀢𑁂. 𑀢𑀢𑁄 𑀧𑀭𑀁 𑀏𑀓𑀁𑀲𑀢𑁄 𑀅𑀲𑀫𑀬𑁄 𑀯𑀸𑀢𑀺. ‘‘𑀆𑀤𑀺𑀲𑁆𑀲 𑀤𑀺𑀦𑁆𑀦’’𑀦𑁆𑀢𑀺 𑀇𑀤𑀁 𑀇𑀥 𑀅𑀮𑀩𑁆𑀪𑀫𑀸𑀦𑀫𑁆𑀧𑀺 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀯𑀼𑀢𑁆𑀢𑀁 𑀪𑀺𑀓𑁆𑀔𑀼𑀦𑀻𑀦𑀁 𑀤𑀼𑀢𑀺𑀬𑀦𑀺𑀲𑁆𑀲𑀕𑁆𑀕𑀺𑀬𑁂 (𑀧𑀸𑀘𑀺. 𑁭𑁩𑁮 𑀆𑀤𑀬𑁄) 𑀲𑁂𑀲𑀁 𑀅𑀓𑀸𑀮𑀘𑀻𑀯𑀭𑀁 𑀯𑀺𑀬. 𑀢𑀢𑁆𑀣 𑀳𑀺 𑀪𑀺𑀓𑁆𑀔𑀼𑀦𑀺𑀲𑀗𑁆𑀖𑀲𑁆𑀲 ‘‘𑀲𑀫𑁆𑀧𑀢𑁆𑀢𑀸 𑀪𑀸𑀚𑁂𑀦𑁆𑀢𑀽’’𑀢𑀺 𑀏𑀯𑀁 𑀆𑀤𑀺𑀲𑁆𑀲 𑀤𑀺𑀦𑁆𑀦𑀫𑁂𑀯 ‘‘𑀅𑀓𑀸𑀮𑀘𑀻𑀯𑀭𑀁 𑀓𑀸𑀮𑀘𑀻𑀯𑀭’’𑀦𑁆𑀢𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀪𑀸𑀚𑁂𑀦𑁆𑀢𑀺𑀬𑀸 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀢𑀣𑀸 𑀳𑀺 𑀢𑀢𑁆𑀣 𑀬𑀣𑀸 ‘‘𑀅𑀓𑀸𑀮𑀘𑀻𑀯𑀭𑀁 𑀦𑀸𑀫 𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀏𑀓𑀸𑀤𑀲𑀫𑀸𑀲𑁂 𑀉𑀧𑁆𑀧𑀦𑁆𑀦𑀁, 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀲𑀢𑁆𑀢𑀫𑀸𑀲𑁂 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀇𑀤𑀁 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀯𑀼𑀢𑁆𑀢𑀁, 𑀏𑀯𑀁𑀲𑀫𑁆𑀧𑀤𑀫𑀺𑀤𑀁. 𑀬𑀤𑀺 𑀏𑀯𑀁 ‘‘𑀏𑀓𑀧𑀼𑀕𑁆𑀕𑀮𑀲𑁆𑀲 𑀇𑀤𑀁 𑀢𑀼𑀬𑁆𑀳𑀁 𑀤𑀫𑁆𑀳𑀻𑀢𑀺 𑀤𑀺𑀦𑁆𑀦’’𑀦𑁆𑀢𑀺 𑀇𑀤𑀁 𑀓𑀺𑀫𑀢𑁆𑀣𑀁 𑀯𑀼𑀢𑁆𑀢𑀁, 𑀦 𑀳𑀺 𑀢𑀁 𑀪𑀸𑀚𑀦𑀻𑀬𑀦𑁆𑀢𑀺 𑀘𑁂? 𑀅𑀪𑀸𑀚𑀦𑀻𑀬𑀲𑀸𑀫𑀜𑁆𑀜𑀢𑁄 𑀯𑀼𑀢𑁆𑀢𑀁 𑀳𑁄𑀢𑀺. 𑀬𑀣𑀸 𑀲𑀗𑁆𑀖𑀲𑁆𑀲 𑀆𑀤𑀺𑀲𑁆𑀲 𑀤𑀺𑀦𑁆𑀦𑀁 𑀅𑀢𑁆𑀣𑀢𑀓𑀣𑀺𑀦𑁂𑀳𑀺 𑀏𑀯 𑀪𑀺𑀓𑁆𑀔𑀽𑀳𑀺 𑀅𑀪𑀸𑀚𑀦𑀻𑀬𑀢𑁆𑀢𑀸 𑀅𑀓𑀸𑀮𑀘𑀻𑀯𑀭𑀁 𑀦𑀸𑀫 𑀚𑀸𑀢𑀁, 𑀏𑀯𑀁 𑀧𑀼𑀕𑁆𑀕𑀮𑀺𑀓𑀫𑁆𑀧𑀺 𑀇𑀢𑀭𑁂𑀳𑀻𑀢𑀺 𑀅𑀢𑁆𑀣𑁄. 𑀏𑀯𑀁 𑀲𑀦𑁆𑀢𑁂𑀧𑀺 𑀓𑀲𑁆𑀲𑀘𑀺 𑀲𑀺𑀬𑀸 ‘‘𑀆𑀤𑀺𑀲𑁆𑀲 𑀤𑀺𑀦𑁆𑀦𑀫𑁆𑀧𑀺 𑀤𑀲𑀸𑀳𑀫𑁂𑀯 𑀧𑀭𑀺𑀳𑀸𑀭𑀁 𑀮𑀪𑀢𑀻’’𑀢𑀺. 𑀢𑀲𑁆𑀲𑁂𑀢𑀁 𑀧𑀸𑀝𑀺𑀓𑀗𑁆𑀔𑀁. 𑀧𑀞𑀫𑀓𑀣𑀺𑀦𑁂 ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀁 𑀪𑀺𑀓𑁆𑀔𑀼𑀦𑀸 𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂’’𑀢𑀺 𑀇𑀤𑀜𑁆𑀳𑀺 𑀦𑀺𑀭𑀢𑁆𑀣𑀓𑀦𑁆𑀢𑀺. 𑀅𑀦𑀼𑀩𑁆𑀪𑀢𑀲𑁆𑀫𑀺𑀫𑁆𑀧𑀺 𑀳𑀺 𑀓𑀣𑀺𑀦𑁂 𑀤𑀲𑀸𑀳𑀧𑀭𑀫𑀫𑁂𑀯 𑀥𑀸𑀭𑁂𑀢𑀩𑁆𑀩𑀦𑁆𑀢𑀺 𑀯𑀺𑀜𑁆𑀜𑀸𑀢𑀢𑁆𑀢𑀸 𑀅𑀦𑀸𑀤𑀺𑀲𑁆𑀲 𑀤𑀺𑀦𑁆𑀦𑀫𑁂𑀯 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 𑀲𑀺𑀬𑀸𑀢𑀺 𑀘𑁂? 𑀏𑀯𑀁 𑀲𑀦𑁆𑀢𑁂𑀧𑀺 𑀅𑀦𑀸𑀤𑀺𑀲𑁆𑀲 𑀤𑀺𑀦𑁆𑀦𑀫𑁆𑀧𑀺 𑀅𑀦𑀢𑁆𑀣𑀢𑀓𑀣𑀺𑀦𑀸𑀦𑀁 𑀅𑀧𑀭𑀓𑀢𑁆𑀢𑀺𑀓𑀸𑀬 𑀤𑀲𑀸𑀳𑀫𑁂𑀯 𑀧𑀭𑀺𑀳𑀸𑀭𑀁 𑀮𑀪𑀢𑀺 ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀁 𑀪𑀺𑀓𑁆𑀔𑀼𑀦𑀸 𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂’’𑀢𑀺 𑀯𑀼𑀢𑁆𑀢𑀢𑁆𑀢𑀸. 𑀆𑀫𑀦𑁆𑀢𑀸𑀢𑀺 𑀘𑁂? ‘‘𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀏𑀓𑀸𑀤𑀲𑀫𑀸𑀲𑁂 𑀉𑀧𑁆𑀧𑀦𑁆𑀦’’𑀦𑁆𑀢𑀺 𑀯𑀘𑀦𑁂𑀦 𑀯𑀺𑀭𑀼𑀚𑁆𑀛𑀢𑀺, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀦𑀬𑁂𑀦𑁂𑀯𑁂𑀢𑁆𑀣 𑀲𑀦𑁆𑀦𑀺𑀝𑁆𑀞𑀸𑀦𑀁 𑀕𑀦𑁆𑀢𑀩𑁆𑀩𑀁.

𑀅𑀦𑀼𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁 ‘‘𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑀲𑀩𑁆𑀩𑀘𑀻𑀯𑀭𑀸𑀦𑀁 𑀬𑀸𑀯𑀤𑀢𑁆𑀣𑀘𑀻𑀯𑀭𑀯𑀲𑁂𑀦 𑀓𑀣𑀺𑀦𑀫𑀸𑀲𑀩𑁆𑀪𑀦𑁆𑀢𑀭𑁂 𑀤𑀲𑀸𑀳𑀸𑀢𑀺𑀓𑁆𑀓𑀫𑁂𑀧𑀺 𑀅𑀦𑀸𑀧𑀢𑁆𑀢𑀺 𑀧𑀭𑀺𑀳𑀸𑀭𑀲𑁆𑀲 𑀤𑀺𑀦𑁆𑀦𑀢𑁆𑀢𑀸. 𑀬𑀣𑀸 𑀓𑀣𑀺𑀦𑀫𑀸𑀲𑀩𑁆𑀪𑀦𑁆𑀢𑀭𑁂 𑀆𑀤𑀺𑀲𑁆𑀲 𑀤𑀺𑀦𑁆𑀦𑀫𑀓𑀸𑀮𑀘𑀻𑀯𑀭𑀁 𑀓𑀸𑀮𑀘𑀻𑀯𑀭𑀧𑀭𑀺𑀳𑀸𑀭𑀫𑁂𑀯 𑀮𑀪𑀢𑀺, 𑀢𑀣𑀸 𑀇𑀢𑀭𑀫𑀸𑀲𑁂𑀧𑀺 𑀮𑀪𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀲𑁆𑀫𑀸 𑀏𑀯𑀁 ‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀁 𑀪𑀺𑀓𑁆𑀔𑀼𑀦𑀸 𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂 𑀪𑀺𑀓𑁆𑀔𑀼𑀦𑁄 𑀧𑀦𑁂𑀯 𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’𑀢𑀺𑀆𑀤𑀺𑀦𑀸 𑀲𑀺𑀓𑁆𑀔𑀸𑀧𑀤𑁂 𑀲𑀺𑀤𑁆𑀥𑁂𑀧𑀺 𑀅𑀦𑀢𑁆𑀣𑀢𑀓𑀣𑀺𑀦𑀸𑀦𑀁 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀫𑀸𑀲𑀁 𑀅𑀦𑀼𑀚𑀸𑀦𑀦𑁆𑀢𑁂𑀦 ‘𑀅𑀓𑀸𑀮𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’𑀢𑀺 𑀯𑀼𑀢𑁆𑀢𑀁. 𑀏𑀯𑀜𑁆𑀳𑀺 𑀅𑀯𑀼𑀢𑁆𑀢𑁂 𑀅𑀓𑀸𑀮𑀘𑀻𑀯𑀭𑀁 𑀦𑀸𑀫 ‘𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀏𑀓𑀸𑀤𑀲𑀫𑀸𑀲𑁂 𑀉𑀧𑁆𑀧𑀦𑁆𑀦’𑀦𑁆𑀢𑀺 𑀦 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀏𑀯𑀜𑁆𑀳𑀺 𑀯𑀘𑀦𑀢𑁄 𑀅𑀦𑀢𑁆𑀣𑀢𑀓𑀣𑀺𑀦𑀸𑀦𑀁 𑀅𑀢𑁆𑀣𑀢𑀓𑀣𑀺𑀦𑀸𑀦𑀁 𑀯𑀺𑀬 𑀲𑀩𑁆𑀩𑀘𑀻𑀯𑀭𑀸𑀦𑀁 𑀧𑀘𑁆𑀙𑀺𑀫𑀓𑀢𑁆𑀢𑀺𑀓𑀫𑀸𑀲𑁂 𑀤𑀲𑀸𑀳𑀸𑀢𑀺𑀓𑁆𑀓𑀫𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀦 𑀳𑁄𑀢𑀻’’𑀢𑀺𑀆𑀤𑀺.

𑀪𑀺𑀬𑁆𑀬𑁄𑀧𑀺 𑀏𑀯𑀁 𑀯𑀼𑀢𑁆𑀢𑀁 𑁋 𑀬𑀁 𑀧𑀦 𑀫𑀬𑀸 ‘‘𑀧𑀞𑀫𑀓𑀣𑀺𑀦𑁂 𑀤𑀲𑀸𑀳𑀧𑀭𑀫𑀁 𑀅𑀢𑀺𑀭𑁂𑀓𑀘𑀻𑀯𑀭𑀁 𑀥𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀅𑀦𑀼𑀜𑁆𑀜𑀸𑀢𑀁, 𑀢𑀫𑁆𑀧𑀺 𑀓𑀣𑀺𑀦𑀫𑀸𑀲𑀢𑁄 𑀩𑀳𑀺 𑀉𑀧𑁆𑀧𑀦𑁆𑀦𑀫𑁂𑀯, 𑀦 𑀅𑀦𑁆𑀢𑁄𑀢𑀺 𑀅𑀬𑀫𑀢𑁆𑀣𑁄 𑀤𑀻𑀧𑀺𑀢𑁄 𑀳𑁄𑀢𑀺. 𑀓𑀣𑀁? 𑀅𑀢𑀺𑀭𑁂𑀓𑀘𑀻𑀯𑀭𑀲𑁆𑀲 𑀤𑀲𑀸𑀳𑀧𑀭𑀺𑀳𑀸𑀭𑀢𑁄 𑀉𑀤𑁆𑀥𑀁 𑀆𑀧𑀚𑁆𑀚𑀺𑀢𑀩𑁆𑀩𑀸𑀧𑀢𑁆𑀢𑀺𑀁 ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀁 𑀪𑀺𑀓𑁆𑀔𑀼𑀦𑀸 𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂’’𑀢𑀺 𑀅𑀦𑀼𑀧𑀜𑁆𑀜𑀢𑁆𑀢𑀺𑀬𑀸 𑀓𑀣𑀺𑀦𑀩𑁆𑀪𑀦𑁆𑀢𑀭𑁂 𑀯𑀸𑀭𑁂𑀢𑁆𑀯𑀸 𑀢𑀢𑁄 𑀉𑀤𑁆𑀥𑀁 𑀉𑀧𑁆𑀧𑀦𑁆𑀦𑁂𑀲𑀼 𑀤𑀲𑀸𑀳𑀸𑀢𑀺𑀓𑁆𑀓𑀫𑁂 𑀆𑀧𑀚𑁆𑀚𑀺𑀢𑀩𑁆𑀩𑀸𑀧𑀢𑁆𑀢𑀺𑀁 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀯𑀸𑀭𑁂𑀢𑀼𑀁 ‘‘𑀅𑀓𑀸𑀮𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀢𑁂𑀦 ‘‘𑀓𑀸𑀮𑁂𑀧𑀺 𑀆𑀤𑀺𑀲𑁆𑀲 𑀤𑀺𑀦𑁆𑀦𑀁, 𑀏𑀢𑀁 𑀅𑀓𑀸𑀮𑀘𑀻𑀯𑀭𑀁 𑀦𑀸𑀫𑀸’’𑀢𑀺 𑀯𑀘𑀦𑀢𑁄 𑀓𑀣𑀺𑀦𑀼𑀩𑁆𑀪𑀸𑀭𑀢𑁄 𑀉𑀤𑁆𑀥𑀁 𑀤𑀲𑀸𑀳𑀧𑀭𑀺𑀳𑀸𑀭𑀁 𑀦 𑀮𑀪𑀢𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺, 𑀢𑁂𑀳𑀺 𑀲𑀤𑁆𑀥𑀺𑀁 𑀧𑀼𑀦 𑀓𑀣𑀺𑀦𑀼𑀩𑁆𑀪𑀸𑀭𑀢𑁄 𑀉𑀤𑁆𑀥𑀁 𑀧𑀜𑁆𑀘 𑀤𑀺𑀯𑀲𑀸𑀦𑀺 𑀮𑀪𑀢𑀻𑀢𑀺 𑀧𑀲𑀗𑁆𑀕𑁄𑀧𑀺 ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀁 𑀪𑀺𑀓𑁆𑀔𑀼𑀦𑀸 𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂 𑀪𑀺𑀓𑁆𑀔𑀼𑀦𑁄 𑀧𑀦𑁂𑀯 𑀅𑀓𑀸𑀮𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑁂𑀬𑁆𑀬…𑀧𑁂… 𑀔𑀺𑀧𑁆𑀧𑀫𑁂𑀯 𑀓𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀅𑀓𑀸𑀮𑀘𑀻𑀯𑀭𑀲𑁆𑀲 𑀉𑀧𑁆𑀧𑀢𑁆𑀢𑀺𑀓𑀸𑀮𑀁 𑀦𑀺𑀬𑀫𑁂𑀢𑁆𑀯𑀸 𑀯𑀼𑀢𑁆𑀢𑀢𑁆𑀢𑀸 𑀦𑀺𑀯𑀸𑀭𑀺𑀢𑁄 𑀳𑁄𑀢𑀺, 𑀢𑀤𑀼𑀪𑀬𑁂𑀦 𑀓𑀣𑀺𑀦𑀩𑁆𑀪𑀦𑁆𑀢𑀭𑁂 𑀉𑀧𑁆𑀧𑀦𑁆𑀦𑀘𑀻𑀯𑀭𑀁 𑀓𑀣𑀺𑀦𑀼𑀩𑁆𑀪𑀸𑀭𑀢𑁄 𑀉𑀤𑁆𑀥𑀁 𑀏𑀓𑀤𑀺𑀯𑀲𑀫𑁆𑀧𑀺 𑀧𑀭𑀺𑀳𑀸𑀭𑀁 𑀦 𑀮𑀪𑀢𑀻𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀏𑀯𑀁 𑀅𑀧𑀭𑁂 𑀯𑀤𑀦𑁆𑀢𑀻𑀢𑀺.

𑀧𑀼𑀦𑀧𑀺 𑀯𑀼𑀢𑁆𑀢𑀁 𑁋 𑀆𑀘𑀭𑀺𑀬𑀸 𑀧𑀦 𑀏𑀯𑀁 𑀯𑀤𑁂𑀬𑁆𑀬𑀼𑀁 ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀁 𑀪𑀺𑀓𑁆𑀔𑀼𑀦𑀸 𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂 𑀪𑀺𑀓𑁆𑀔𑀼𑀦𑁄 𑀧𑀦𑁂𑀯 𑀅𑀓𑀸𑀮𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺 𑀏𑀢𑁆𑀣 ‘‘𑀦𑀺𑀝𑁆𑀞𑀺𑀢𑀘𑀻𑀯𑀭𑀲𑁆𑀫𑀺𑀁 𑀪𑀺𑀓𑁆𑀔𑀼𑀦𑀸 𑀉𑀩𑁆𑀪𑀢𑀲𑁆𑀫𑀺𑀁 𑀓𑀣𑀺𑀦𑁂’’𑀢𑀺 𑀯𑀤𑀦𑁆𑀢𑁄 𑀏𑀯𑀁 𑀯𑀺𑀜𑁆𑀜𑀸𑀧𑁂𑀢𑀺 ‘‘𑀏𑀢𑁆𑀣𑀦𑁆𑀢𑀭𑁂 𑀢𑀺𑀡𑁆𑀡𑀦𑁆𑀦𑀫𑁆𑀧𑀺 𑀅𑀓𑀸𑀮𑀘𑀻𑀯𑀭𑀸𑀦𑀁 𑀉𑀧𑁆𑀧𑀢𑁆𑀢𑀺 𑀅𑀪𑀸𑀯’’𑀦𑁆𑀢𑀺. 𑀓𑀲𑁆𑀫𑀸 𑀧𑀦 𑀧𑀤𑀪𑀸𑀚𑀦𑁂 𑀯𑀺𑀢𑁆𑀣𑀸𑀭𑀺𑀢𑀸𑀦𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀅𑀥𑀺𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀓𑀺𑀦𑁆𑀢𑀼 𑀧𑀞𑀫𑁂 𑀤𑀲𑀸𑀳𑀁 𑀅𑀦𑀼𑀚𑀸𑀦𑀺𑀢𑁆𑀯𑀸 𑀢𑀲𑁆𑀫𑀺𑀁 𑀅𑀧𑁆𑀧𑀳𑁄𑀦𑁆𑀢𑁂 𑀲𑀘𑁂 𑀧𑀘𑁆𑀘𑀸𑀲𑀸 𑀅𑀢𑁆𑀣𑀺, 𑀢𑀫𑁂𑀯 𑀯𑀟𑁆𑀠𑁂𑀢𑁆𑀯𑀸 𑀫𑀸𑀲𑀁 𑀅𑀦𑀼𑀚𑀸𑀦𑀦𑁆𑀢𑁄 𑀇𑀫𑀫𑁆𑀧𑀺 𑀅𑀢𑁆𑀣𑀯𑀺𑀲𑁂𑀲𑀁 𑀤𑀻𑀧𑁂𑀢𑀺 𑀅𑀓𑀸𑀮𑀘𑀻𑀯𑀭𑀁 𑀦𑀸𑀫 𑀲𑀫𑁆𑀫𑀼𑀔𑀻𑀪𑀽𑀢𑁂𑀦 𑀪𑀸𑀚𑁂𑀢𑀩𑁆𑀩𑀦𑁆𑀢𑀺𑀧𑀺 𑀤𑀻𑀧𑁂𑀢𑀺. 𑀢𑀁 𑀧𑀦 ‘‘𑀆𑀓𑀗𑁆𑀔𑀫𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀕𑁆𑀕𑀳𑁂𑀢𑀩𑁆𑀩’’𑀦𑁆𑀢𑀺 𑀇𑀫𑀺𑀦𑀸 𑀲𑀺𑀓𑁆𑀔𑀸𑀧𑀤𑁂𑀦 𑀯𑀟𑁆𑀠𑁂𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺, 𑀢𑀲𑁆𑀫𑀸 𑀢𑀻𑀡𑀺𑀧𑀺 𑀧𑀤𑀪𑀸𑀚𑀦𑁂 𑀯𑀺𑀢𑁆𑀣𑀸𑀭𑀺𑀢𑀸𑀦𑀻𑀢𑀺.

‘‘𑀔𑀺𑀧𑁆𑀧𑀫𑁂𑀯 𑀓𑀸𑀭𑁂𑀢𑀩𑁆𑀩𑀦𑁆𑀢𑀺 𑀤𑀲𑀸𑀳𑀸 𑀓𑀸𑀭𑁂𑀢𑀩𑁆𑀩’’𑀦𑁆𑀢𑀺 𑀇𑀤𑀁 𑀧𑀦 𑀧𑀳𑁄𑀦𑀓𑀪𑀸𑀯𑁂 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑀮𑀓𑁆𑀔𑀡𑁂𑀦𑀸𑀢𑀺 𑀤𑀻𑀧𑁂𑀢𑀼𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 ‘‘𑀏𑀯𑀁 𑀲𑀻𑀖𑀦𑁆𑀢𑀺 𑀯𑀸 𑀮𑀳𑀼𑀦𑁆𑀢𑀺 𑀯𑀸’’𑀢𑀺𑀆𑀤𑀺𑀦𑀸 𑀅𑀯𑀢𑁆𑀯𑀸 ‘‘𑀤𑀲𑀸𑀳𑀸’’𑀢𑀺 𑀯𑀼𑀢𑁆𑀢𑀁. 𑀅𑀢𑁆𑀣𑀢𑀓𑀣𑀺𑀦𑀲𑁆𑀲 𑀏𑀯𑀁 𑀳𑁄𑀢𑀼, 𑀅𑀦𑀢𑁆𑀣𑀢𑁂 𑀧𑀦 𑀓𑀣𑀺𑀦𑁂 𑀓𑀣𑀦𑁆𑀢𑀺 𑀯𑀼𑀢𑁆𑀢𑁂 𑀅𑀦𑀢𑁆𑀣𑀢𑀲𑁆𑀲 𑀧𑀝𑀺𑀓𑁆𑀔𑁂𑀧𑀢𑀁 𑀤𑀲𑁆𑀲𑁂𑀢𑀻𑀢𑀺 𑀯𑀼𑀢𑁆𑀢𑁄 𑀅𑀧𑀲𑁆𑀲𑀦𑁆𑀢𑁄 𑀯𑀺𑀖𑀸𑀢𑀁 𑀆𑀧𑀚𑁆𑀚𑀢𑀻𑀢𑀺. 𑀏𑀓𑀢𑀺𑀁𑀲𑁂 𑀅𑀭𑀼𑀡𑀼𑀕𑁆𑀕𑀫𑀦𑁂 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀫𑀳𑀦𑁆𑀢𑁂𑀦𑀧𑀺 𑀧𑀘𑁆𑀘𑀸𑀲𑀸𑀘𑀻𑀯𑀭𑁂𑀦 𑀲𑀳 𑀖𑀝𑀺𑀢𑀫𑁆𑀧𑀺 𑀢𑀩𑁆𑀪𑀸𑀯𑀁 𑀅𑀦𑀼𑀧𑀢𑀺𑀢𑁆𑀯𑀸 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺 𑀲𑀢𑀺 𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀲𑀫𑁆𑀪𑀯𑁂, 𑀅𑀲𑀢𑀺 𑀦 𑀳𑁄𑀢𑀺, 𑀧𑀼𑀦 𑀖𑀝𑀺𑀢𑁂 𑀳𑁄𑀢𑀺, 𑀅𑀜𑁆𑀜𑁂𑀦 𑀖𑀝𑀺𑀢𑁂 𑀦 𑀳𑁄𑀢𑀺. 𑀙𑀺𑀦𑁆𑀦𑀁 𑀅𑀜𑁆𑀜𑀯𑀢𑁆𑀣𑀼 𑀳𑁄𑀢𑀺. 𑀧𑀼𑀩𑁆𑀩𑀧𑀭𑀺𑀘𑁆𑀙𑁂𑀤𑀁 𑀅𑀢𑀺𑀓𑁆𑀓𑀦𑁆𑀢𑀁 𑀖𑀝𑀺𑀢𑀁 𑀧𑀼𑀦 𑀅𑀜𑁆𑀜𑀧𑀭𑀺𑀘𑁆𑀙𑁂𑀤𑀁 𑀮𑀪𑀢𑀻𑀢𑀺 𑀏𑀓𑁂, 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀅𑀜𑁆𑀜𑀢𑀭𑀲𑁆𑀫𑀺𑀁 𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀲𑀗𑁆𑀖𑀲𑁆𑀲 𑀯𑀸 𑀇𑀤𑀁 𑀅𑀓𑀸𑀮𑀘𑀻𑀯𑀭𑀦𑁆𑀢𑀺 𑀉𑀤𑁆𑀤𑀺𑀲𑁆𑀲 𑀤𑀺𑀦𑁆𑀦’𑀦𑁆𑀢𑀺 𑀏𑀢𑁆𑀣 𑀲𑀗𑁆𑀖𑀲𑁆𑀲 𑀤𑀺𑀦𑁆𑀦𑁂 𑀆𑀧𑀢𑁆𑀢𑀺 𑀦𑀸𑀫 𑀦𑀢𑁆𑀣𑀺, ‘𑀲𑁄𑀢𑀲𑁆𑀲 𑀭𑀳𑁄’𑀢𑀺𑀆𑀤𑀻𑀲𑀼 𑀯𑀺𑀬 𑀧𑀤𑀼𑀤𑁆𑀥𑀸𑀭𑁂𑀦 𑀯𑀼𑀢𑁆𑀢𑀁, 𑀢𑀲𑁆𑀲 𑀮𑀸𑀪𑀁 𑀲𑀦𑁆𑀥𑀸𑀬𑀸𑀢𑀺 𑀘𑁂? 𑀲𑀗𑁆𑀖𑀢𑁄 𑀯𑀸 𑀉𑀧𑁆𑀧𑀚𑁆𑀚𑁂𑀬𑁆𑀬𑀸𑀢𑀺 𑀅𑀦𑁂𑀦 𑀲𑀺𑀤𑁆𑀥𑀢𑁆𑀢𑀸 𑀅𑀥𑀺𑀓𑀫𑁂𑀯𑀸’’𑀢𑀺 𑀘 ‘‘𑀲𑀗𑁆𑀖𑁄 𑀘𑀻𑀯𑀭𑀸𑀦𑀺 𑀮𑀪𑀺𑀲𑁆𑀲𑀢𑀺 𑀕𑀡𑁄 𑀯𑀸’𑀢𑀺𑀆𑀤𑀺𑀦𑀸𑀧𑀺 𑀧𑀸𑀞𑁄 𑀅𑀢𑁆𑀣𑀻’’𑀢𑀺 𑀘 𑀯𑀼𑀢𑁆𑀢𑀁. 𑀕𑀡𑁆𑀞𑀺𑀧𑀤𑁂 𑀓𑁄𑀲𑀮𑁆𑀮𑀢𑁆𑀣𑀁 𑀧𑀦 𑀫𑀬𑀸 𑀲𑀩𑁆𑀩𑀁 𑀮𑀺𑀔𑀺𑀢𑀁, 𑀲𑀼𑀝𑁆𑀞𑀼 𑀯𑀺𑀘𑀸𑀭𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀁.

𑀢𑀢𑀺𑀬𑀓𑀣𑀺𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀧𑀼𑀭𑀸𑀡𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁦𑁩-𑁫𑁦𑁫. 𑀪𑀢𑁆𑀢𑀯𑀺𑀲𑁆𑀲𑀕𑁆𑀕𑀦𑁆𑀢𑀺 𑀪𑀢𑁆𑀢𑀓𑀺𑀘𑁆𑀘𑀸𑀥𑀺𑀝𑁆𑀞𑀸𑀦𑀁. 𑀪𑀢𑁆𑀢𑀓𑀺𑀘𑁆𑀘𑀸𑀥𑀺𑀝𑁆𑀞𑀸𑀦𑀯𑀺𑀪𑀸𑀕𑀦𑁆𑀢𑀺 𑀧𑁄𑀭𑀸𑀡𑀸. 𑀢𑀢𑁆𑀣 𑀦𑀸𑀫 𑀢𑁆𑀯𑀦𑁆𑀢𑀺 𑀢𑀢𑁆𑀣 𑀢𑀬𑀸 𑀓𑀢𑀓𑀫𑁆𑀫𑁂 𑀏𑀯𑀁 𑀅𑀓𑀢𑁆𑀢𑀩𑁆𑀩𑁂 𑀲𑀢𑀺 𑀥𑁄𑀯𑀸𑀧𑀺𑀲𑁆𑀲𑀲𑀺 𑀦𑀸𑀫. 𑀅𑀣 𑀯𑀸 𑀲𑁄 𑀦𑀸𑀫 𑀢𑁆𑀯𑀦𑁆𑀢𑀺 𑀅𑀢𑁆𑀣𑁄. 𑀉𑀪𑀢𑁄𑀲𑀗𑁆𑀖𑁂 𑀉𑀧𑀲𑀫𑁆𑀧𑀦𑁆𑀦𑀸𑀢𑀺 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀤𑀸𑀬 𑀧𑀝𑀺𑀓𑁆𑀔𑀺𑀢𑁆𑀢𑀢𑁆𑀢𑀸 𑀢𑀤𑀦𑀼𑀧𑀲𑀗𑁆𑀕𑀪𑀬𑀸 𑀏𑀯𑀁 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀧𑀼𑀭𑀸𑀡𑀘𑀻𑀯𑀭’’𑀦𑁆𑀢𑀺 𑀏𑀢𑁆𑀣 𑀧𑀼𑀭𑀸𑀡𑀪𑀸𑀯𑀤𑀻𑀧𑀦𑀢𑁆𑀣𑀫𑁂𑀯 ‘‘𑀲𑀓𑀺𑀁 𑀦𑀺𑀯𑀢𑁆𑀣𑀫𑁆𑀧𑀺 𑀲𑀓𑀺𑀁 𑀧𑀸𑀭𑀼𑀢𑀫𑁆𑀧𑀻’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 ‘‘𑀘𑀻𑀯𑀭𑀁 𑀦𑀸𑀫 𑀙𑀦𑁆𑀦𑀁 𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭𑀁 𑀘𑀻𑀯𑀭𑀁 𑀯𑀺𑀓𑀧𑁆𑀧𑀦𑀼𑀧𑀕𑀁 𑀧𑀘𑁆𑀙𑀺𑀫’’𑀦𑁆𑀢𑀺 𑀯𑀘𑀦𑀲𑁆𑀲 𑀑𑀓𑀸𑀲𑁄 𑀦 𑀚𑀸𑀢𑁄𑀢𑀺 𑀏𑀓𑁂. 𑀬𑀲𑁆𑀫𑀸 𑀯𑀺𑀓𑀧𑁆𑀧𑀦𑀼𑀧𑀕𑀧𑀘𑁆𑀙𑀺𑀫𑀁 𑀇𑀥 𑀦𑀸𑀥𑀺𑀧𑁆𑀧𑁂𑀢𑀁, 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀼𑀧𑀕𑀫𑁂𑀯𑀸𑀥𑀺𑀧𑁆𑀧𑁂𑀢𑀁, 𑀢𑁂𑀦𑁂𑀯 𑀦𑀺𑀲𑀻𑀤𑀦𑀧𑀘𑁆𑀘𑀢𑁆𑀣𑀭𑀡𑁂 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀦 𑀯𑀼𑀢𑁆𑀢𑀦𑁆𑀢𑀺 𑀏𑀓𑁂. 𑀚𑀸𑀢𑀺𑀧𑁆𑀧𑀫𑀸𑀡𑀸𑀯𑀘𑀦𑀢𑁄 𑀬𑀁 𑀓𑀺𑀜𑁆𑀘𑀺 𑀧𑀼𑀭𑀸𑀡𑀯𑀢𑁆𑀣𑀁 𑀥𑁄𑀯𑀸𑀧𑁂𑀦𑁆𑀢𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀫𑁂𑀯, 𑀢𑁂𑀦𑁂𑀯 ‘‘𑀅𑀦𑀸𑀧𑀢𑁆𑀢𑀺 𑀘𑀻𑀯𑀭𑀁 𑀞𑀧𑁂𑀢𑁆𑀯𑀸 𑀅𑀜𑁆𑀜𑀁 𑀧𑀭𑀺𑀓𑁆𑀔𑀸𑀭𑀁 𑀥𑁄𑀯𑀸𑀧𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀣𑀯𑀺𑀓𑀫𑁆𑀧𑀺 𑀳𑀺 𑀅𑀲𑀼𑀘𑀺𑀫𑀓𑁆𑀔𑀺𑀢𑀁 𑀧𑀭𑀺𑀪𑀼𑀢𑁆𑀢𑀁 𑀥𑁄𑀯𑀸𑀧𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀫𑁂𑀯 𑀑𑀴𑀸𑀭𑀺𑀓𑀢𑁆𑀢𑀸, 𑀅𑀧𑁆𑀧𑀢𑀺𑀭𑀽𑀧𑀢𑁆𑀢𑀸 𑀘. 𑀢𑁂𑀦𑁂𑀯 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀁 𑀇𑀫𑀲𑁆𑀫𑀺𑀁 𑀞𑀸𑀦𑁂 𑀘𑀻𑀯𑀭𑀧𑀭𑀺𑀘𑁆𑀙𑁂𑀤𑁄 𑀦 𑀯𑀼𑀢𑁆𑀢𑁄𑀢𑀺 𑀏𑀓𑁂, 𑀯𑀺𑀘𑀸𑀭𑁂𑀢𑁆𑀯𑀸 𑀬𑀼𑀢𑁆𑀢𑀢𑀭𑀁 𑀕𑀳𑁂𑀢𑀩𑁆𑀩𑀁. ‘‘𑀭𑀚𑀺𑀢𑁆𑀯𑀸 𑀓𑀧𑁆𑀧𑀁 𑀓𑀢𑁆𑀯𑀸𑀢𑀺 𑀓𑀧𑁆𑀧𑀺𑀬𑀁 𑀓𑀢𑀫𑁂𑀯 𑀦𑀺𑀯𑀸𑀲𑁂𑀢𑀼𑀁, 𑀧𑀸𑀭𑀼𑀧𑀺𑀢𑀼𑀁 𑀯𑀸 𑀯𑀝𑁆𑀝𑀢𑀺, 𑀦𑁂𑀢𑀭’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀫𑀺𑀦𑀸 𑀘 𑀫𑀚𑁆𑀛𑀺𑀫𑀢𑁆𑀣𑁂𑀭𑀯𑀸𑀤𑁄 𑀉𑀧𑀢𑁆𑀣𑀫𑁆𑀪𑀺𑀢𑁄 𑀳𑁄𑀢𑀺, 𑀦𑁄𑀧𑀢𑁆𑀣𑀫𑁆𑀪𑀺𑀢𑁄. 𑀭𑀚𑀺𑀢𑁆𑀯𑀸𑀢𑀺𑀆𑀤𑀺 𑀧𑀦 𑀯𑀺𑀦𑀬𑀯𑀺𑀥𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀫𑀫 𑀢𑀓𑁆𑀓𑁄. 𑀬𑀣𑀸 𑀅𑀜𑁆𑀜𑀸𑀢𑀺𑀓𑀸𑀬 𑀅𑀜𑁆𑀜𑀸𑀢𑀺𑀓𑀲𑀜𑁆𑀜𑀻𑀯𑀸𑀭𑁂 𑀢𑀻𑀡𑀺 𑀘𑀢𑀼𑀓𑁆𑀓𑀸𑀦𑀺, 𑀏𑀯𑀁 𑀯𑁂𑀫𑀢𑀺𑀓𑀜𑀸𑀢𑀺𑀓𑀯𑀸𑀭𑁂𑀲𑀼 𑀘𑀸𑀢𑀺 𑀦𑀯 𑀘𑀢𑀼𑀓𑁆𑀓𑀸𑀦𑀺 𑀳𑁄𑀦𑁆𑀢𑀺. 𑀏𑀢𑁆𑀣𑀸𑀳 𑁋 𑀏𑀓𑀯𑀸𑀭𑀁 𑀥𑁄𑀯𑀺𑀢𑁆𑀯𑀸 𑀥𑁄𑀯𑀦𑁂𑀲𑀼 𑀥𑀼𑀭𑀁 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀧𑀼𑀦 ‘‘𑀤𑀼𑀤𑁆𑀥𑁄𑀢’’𑀦𑁆𑀢𑀺 𑀫𑀜𑁆𑀜𑀫𑀸𑀦𑀸 𑀥𑁄𑀯𑀢𑀺, 𑀅𑀦𑀸𑀧𑀢𑁆𑀢𑀺𑀬𑀸 𑀪𑀯𑀺𑀢𑀩𑁆𑀩𑀁, 𑀤𑀼𑀢𑀺𑀬𑀯𑀸𑀭𑀁 𑀅𑀯𑀼𑀢𑁆𑀢𑀸 𑀥𑁄𑀯𑀢𑀺 𑀦𑀸𑀫 𑀳𑁄𑀢𑀻𑀢𑀺? 𑀯𑀼𑀘𑁆𑀘𑀢𑁂 𑁋 𑀲𑀘𑁂 𑀪𑀺𑀓𑁆𑀔𑀼 ‘‘𑀅𑀮𑀁 𑀏𑀢𑁆𑀢𑀸𑀯𑀢𑀸 𑀥𑁄𑀢𑁂𑀦𑀸’’𑀢𑀺 𑀧𑀝𑀺𑀓𑁆𑀔𑀺𑀧𑀢𑀺, 𑀧𑀼𑀦 𑀥𑁄𑀯𑀦𑁆𑀢𑀻 𑀅𑀯𑀼𑀢𑁆𑀢𑀸 𑀥𑁄𑀯𑀢𑀺 𑀦𑀸𑀫𑀸𑀢𑀺 𑀬𑀼𑀚𑁆𑀚𑀢𑀺. 𑀦𑁄 𑀘𑁂, 𑀯𑀼𑀢𑁆𑀢𑀸𑀯 𑀳𑁄𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀪𑀺𑀓𑁆𑀔𑀼𑀲𑁆𑀲 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑀦𑁂 𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸𑀬 𑀯𑀲𑁂𑀦 𑀆𑀧𑀢𑁆𑀢𑀺 𑀲𑀸𑀓𑀺𑀬𑀸𑀦𑀻𑀦𑀁 𑀯𑀺𑀬.

𑁫𑁦𑁬. 𑀏𑀓𑁂𑀦 𑀯𑀢𑁆𑀣𑀼𑀦𑀸𑀢𑀺 𑀬𑁂𑀦 𑀓𑁂𑀦𑀘𑀺 𑀧𑀞𑀫𑁂𑀦. ‘‘𑀢𑀺𑀡𑁆𑀡𑀁 𑀘𑀢𑀼𑀓𑁆𑀓𑀸𑀦𑀁 𑀯𑀲𑁂𑀦𑀸’’𑀢𑀺 𑀧𑀸𑀞𑁄. 𑀪𑀺𑀓𑁆𑀔𑀽𑀦𑀁 𑀲𑀦𑁆𑀢𑀺𑀓𑁂 𑀅𑀝𑁆𑀞𑀯𑀸𑀘𑀺𑀓𑀸𑀬 𑀉𑀧𑀲𑀫𑁆𑀧𑀦𑁆𑀦𑀸𑀬 𑀧𑀸𑀓𑀝𑀢𑁆𑀢𑀸 𑀢𑀁 𑀅𑀯𑀢𑁆𑀯𑀸 𑀲𑀸𑀓𑀺𑀬𑀸𑀦𑀺𑀬𑁄𑀯 𑀯𑀼𑀢𑁆𑀢𑀸 𑀅𑀧𑀸𑀓𑀝𑀢𑁆𑀢𑀸.

𑀧𑀼𑀭𑀸𑀡𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁦𑁮-𑁫𑁧𑁦. 𑀅𑀧𑀜𑁆𑀜𑀢𑁆𑀢𑁂 𑀲𑀺𑀓𑁆𑀔𑀸𑀧𑀤𑁂𑀢𑀺 𑀏𑀢𑁆𑀣 ‘‘𑀕𑀡𑀫𑁆𑀳𑀸 𑀑𑀳𑀻𑀬𑀦𑀲𑀺𑀓𑁆𑀔𑀸𑀧𑀤𑁂’’𑀢𑀺 𑀮𑀺𑀔𑀺𑀢𑀁. 𑀅𑀭𑀜𑁆𑀜𑀯𑀸𑀲𑀻𑀦𑀺𑀲𑁂𑀥𑀦𑀲𑀺𑀓𑁆𑀔𑀸𑀧𑀤𑁂 𑀅𑀧𑀜𑁆𑀜𑀢𑁆𑀢𑁂𑀢𑀺 𑀏𑀓𑁂, ‘‘𑀢𑀁 𑀦 𑀲𑀼𑀦𑁆𑀤𑀭’’𑀦𑁆𑀢𑀺 𑀯𑀤𑀦𑁆𑀢𑀺. 𑀯𑀺𑀳𑀢𑁆𑀣𑀢𑀸𑀬𑀸𑀢𑀺 𑀆𑀬𑀸𑀲𑁂𑀦.

𑁫𑁧𑁨. 𑀉𑀧𑀘𑀸𑀭𑁄𑀢𑀺 𑀤𑁆𑀯𑀸𑀤𑀲𑀳𑀢𑁆𑀣𑁄. 𑀫𑀳𑀸𑀧𑀘𑁆𑀘𑀭𑀺𑀬𑀁, 𑀓𑀼𑀭𑀼𑀦𑁆𑀤𑀺𑀬𑀜𑁆𑀘 𑀯𑀼𑀢𑁆𑀢𑀦𑁆𑀢𑀺 𑀏𑀢𑁆𑀣 𑀭𑀢𑁆𑀢𑀺𑀪𑀸𑀕𑁂 𑀥𑀫𑁆𑀫𑀓𑀣𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑁄 𑀩𑀳𑀽𑀲𑀼 𑀘𑀻𑀯𑀭𑁂𑀲𑀼 𑀫𑀳𑀸𑀚𑀦𑁂𑀦 𑀧𑀲𑀸𑀤𑀤𑀸𑀦𑀯𑀲𑁂𑀦 𑀧𑀝𑀺𑀓𑁆𑀔𑀺𑀢𑁆𑀢𑁂𑀲𑀼 𑀧𑀼𑀦𑀤𑀺𑀯𑀲𑁂 ‘‘𑀉𑀧𑀸𑀲𑀓𑀸𑀦𑀁 𑀧𑀲𑀸𑀤𑀤𑀸𑀦𑀸𑀦𑀺 𑀏𑀢𑀸𑀦𑀻’’𑀢𑀺 𑀲𑀼𑀤𑁆𑀥𑀘𑀺𑀢𑁆𑀢𑁂𑀦 𑀕𑀡𑁆𑀳𑀦𑁆𑀢𑀲𑁆𑀲 𑀤𑁄𑀲𑁄 𑀦𑀢𑁆𑀣𑀺, ‘‘𑀪𑀺𑀓𑁆𑀔𑀼𑀦𑀻𑀳𑀺𑀧𑀺 𑀤𑀺𑀦𑁆𑀦𑀸𑀦𑀺 𑀇𑀥 𑀲𑀦𑁆𑀢𑀻’’𑀢𑀺 𑀜𑀢𑁆𑀯𑀸 𑀕𑀡𑁆𑀳𑀢𑁄 𑀤𑁄𑀲𑁄. 𑀢𑀁 𑀅𑀘𑀺𑀢𑁆𑀢𑀓𑀪𑀸𑀯𑁂𑀦𑀸𑀢𑀺 𑀪𑀺𑀓𑁆𑀔𑀼𑀦𑀻𑀳𑀺 𑀤𑀺𑀦𑁆𑀦𑀪𑀸𑀯𑀁 𑀜𑀢𑁆𑀯𑀸 𑀩𑀳𑀽𑀲𑀼 𑀢𑀲𑁆𑀲𑀸 𑀘𑀻𑀯𑀭𑀲𑁆𑀲 𑀅𑀚𑀸𑀦𑀦𑁂𑀦𑀸𑀢𑀺 𑀅𑀢𑁆𑀣𑁄. 𑀧𑀁𑀲𑀼𑀓𑀽𑀮𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸𑀢𑀺 ‘‘𑀪𑀺𑀓𑁆𑀔𑀼𑀦𑀻𑀳𑀺 𑀦𑀼 𑀔𑁄 𑀤𑀺𑀦𑁆𑀦𑀁 𑀲𑀺𑀬𑀸’’𑀢𑀺 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 ‘‘𑀧𑀁𑀲𑀼𑀓𑀽𑀮𑀁 𑀕𑀡𑁆𑀳𑀸𑀫𑀻’’𑀢𑀺 𑀕𑀡𑁆𑀳𑀦𑁆𑀢𑀲𑁆𑀲 𑀯𑀝𑁆𑀝𑀢𑀺. 𑀓𑀼𑀭𑀼𑀦𑁆𑀤𑀺𑀆𑀤𑀻𑀲𑀼 𑀯𑀼𑀢𑁆𑀢𑁄𑀧𑀺 𑀅𑀢𑁆𑀣𑁄 𑀅𑀬𑀫𑁂𑀯, 𑀏𑀓𑀁, ‘‘𑀅𑀘𑀺𑀢𑁆𑀢𑀓𑀪𑀸𑀯𑁂𑀦𑀸’’𑀢𑀺 𑀯𑀘𑀦𑁂𑀦 ‘‘𑀬𑀣𑀸 𑀢𑀣𑀸 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀉𑀧𑁆𑀧𑀣𑁄𑀯 𑀧𑀝𑀺𑀲𑁂𑀥𑀺𑀢𑁄𑀢𑀺 𑀅𑀧𑀭𑁂. 𑀏𑀯𑀁 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁄 𑀦 𑀯𑀤𑀢𑀺, 𑀉𑀚𑀼𑀓𑀫𑁂𑀯 𑀯𑀤𑀢𑀻𑀢𑀺 𑀧𑀧𑀜𑁆𑀘𑀺𑀢𑀁. 𑀢𑀲𑁆𑀲𑁂𑀯 𑀯𑀺𑀲𑀬𑁄, 𑀢𑀲𑁆𑀲𑀸𑀬𑀁 𑀅𑀥𑀺𑀧𑁆𑀧𑀸𑀬𑁄 𑁋 𑀬𑀣𑀸 ‘‘𑀧𑀁𑀲𑀼𑀓𑀽𑀮𑀁 𑀕𑀡𑁆𑀳𑀺𑀲𑁆𑀲𑀢𑀻𑀢𑀺 𑀞𑀧𑀺𑀢𑀁 𑀓𑀸𑀫𑀁 𑀪𑀺𑀓𑁆𑀔𑀼𑀦𑀺𑀲𑀦𑁆𑀢𑀓𑀫𑁆𑀧𑀺 𑀅𑀯𑀺𑀓𑀧𑁆𑀧𑁂𑀢𑁆𑀯𑀸 𑀧𑀁𑀲𑀼𑀓𑀽𑀮𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀣𑀸 𑀥𑀫𑁆𑀫𑀓𑀣𑀺𑀓𑀲𑁆𑀲 𑀪𑀺𑀓𑁆𑀔𑀼𑀦𑀺𑀬𑀸 𑀤𑀺𑀦𑁆𑀦𑀫𑁆𑀧𑀺 𑀅𑀧𑀜𑁆𑀜𑀸𑀬𑀫𑀸𑀦𑀁 𑀯𑀝𑁆𑀝𑀢𑀻𑀢𑀺, 𑀢𑀲𑁆𑀫𑀸 𑀢𑀁 𑀯𑀼𑀢𑁆𑀢𑀁 𑀫𑀳𑀸𑀧𑀘𑁆𑀘𑀭𑀺𑀬𑀁, 𑀓𑀼𑀭𑀼𑀦𑁆𑀤𑀺𑀬𑀜𑁆𑀘 𑀅𑀘𑀺𑀢𑁆𑀢𑀓𑀪𑀸𑀯𑁂𑀦 𑀦 𑀲𑀫𑁂𑀢𑀻𑀢𑀺. 𑀧𑀝𑀺𑀓𑁆𑀔𑁂𑀧𑁄 𑀧𑀦 𑀯𑀺𑀓𑀧𑁆𑀧𑀕𑁆𑀕𑀳𑀡𑁂 𑀏𑀯 𑀭𑀼𑀳𑀢𑀺. 𑀅𑀜𑁆𑀜𑀣𑀸 𑀧𑀼𑀩𑁆𑀩𑀸𑀧𑀭𑀁 𑀯𑀺𑀭𑀼𑀚𑁆𑀛𑀢𑀻𑀢𑀺. 𑀢𑀁 𑀦 𑀬𑀼𑀢𑁆𑀢𑀁 𑀧𑀁𑀲𑀼𑀓𑀽𑀮𑁂𑀦 𑀅𑀲𑀫𑀸𑀦𑀢𑁆𑀢𑀸. 𑀧𑀁𑀲𑀼𑀓𑀽𑀮𑀪𑀸𑀯𑁂𑀦 𑀲𑀗𑁆𑀓𑀸𑀭𑀓𑀽𑀝𑀸𑀤𑀻𑀲𑀼 𑀞𑀧𑀺𑀢𑀁 𑀪𑀺𑀓𑁆𑀔𑀼𑀦𑀻𑀳𑀺, 𑀦 𑀢𑀁 𑀢𑀲𑁆𑀲𑀸 𑀲𑀦𑁆𑀢𑀓𑀁 𑀳𑀼𑀢𑁆𑀯𑀸 𑀞𑀺𑀢𑀁 𑀳𑁄𑀢𑀺. 𑀅𑀲𑁆𑀲𑀸𑀫𑀺𑀓𑀜𑁆𑀳𑀺 𑀧𑀁𑀲𑀼𑀓𑀽𑀮𑀁 𑀲𑀩𑁆𑀩𑀲𑀸𑀥𑀸𑀭𑀡𑀜𑁆𑀘, 𑀅𑀜𑁆𑀜𑁄𑀧𑀺 𑀕𑀳𑁂𑀢𑀼𑀁 𑀮𑀪𑀢𑀺. 𑀇𑀤𑀁 𑀧𑀼𑀩𑁆𑀩𑁂𑀯 ‘‘𑀪𑀺𑀓𑁆𑀔𑀼𑀦𑀻𑀦𑀁 𑀘𑀻𑀯𑀭’’𑀦𑁆𑀢𑀺 𑀚𑀸𑀦𑀺𑀢𑁆𑀯𑀸𑀧𑀺 𑀧𑀁𑀲𑀼𑀓𑀽𑀮𑀺𑀓𑁄 𑀕𑀳𑁂𑀢𑀼𑀁 𑀮𑀪𑀢𑀺 𑀢𑀤𑀸 𑀢𑀲𑁆𑀲𑀸 𑀅𑀲𑀦𑁆𑀢𑀓𑀢𑁆𑀢𑀸. ‘‘𑀧𑀁𑀲𑀼𑀓𑀽𑀮𑀁 𑀅𑀥𑀺𑀝𑁆𑀞𑀳𑀺𑀢𑁆𑀯𑀸’’𑀢𑀺 𑀲𑀮𑁆𑀮𑁂𑀔𑀓𑁆𑀓𑀫𑀦𑀺𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀫𑀁𑀲𑀁 𑀤𑀤𑀦𑁆𑀢𑁂𑀦 𑀢𑀣𑀸𑀕𑀢𑁂𑀦 𑀲𑀮𑁆𑀮𑁂𑀔𑀢𑁄 𑀓𑀧𑁆𑀧𑀺𑀬𑀫𑁆𑀧𑀺 𑀪𑀼𑀢𑁆𑀢𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀘𑀻𑀯𑀭𑀫𑀸𑀳 𑀬𑁄 𑀫𑀁𑀲𑀁 𑀓𑀣𑀦𑁆𑀢𑀺 𑀲𑀬𑀫𑀸𑀤𑀺𑀲𑁂𑀬𑁆𑀬𑀸𑀢𑀺.

𑀅𑀘𑀺𑀢𑁆𑀢𑀓𑀢𑁆𑀢𑀸 𑀓𑀣𑀁 𑀧𑀁𑀲𑀼𑀓𑀽𑀮𑀁 𑀯𑀝𑁆𑀝𑀢𑀻𑀢𑀺 𑀘𑁂? 𑀢𑀸𑀬 𑀢𑀲𑁆𑀲 𑀅𑀤𑀺𑀦𑁆𑀦𑀢𑁆𑀢𑀸, 𑀪𑀺𑀓𑁆𑀔𑀼𑀦𑀸𑀧𑀺 𑀢𑀢𑁄 𑀪𑀺𑀓𑁆𑀔𑀼𑀦𑀺𑀢𑁄 𑀅𑀕𑁆𑀕𑀳𑀺𑀢𑀢𑁆𑀢𑀸 𑀘. 𑀅𑀲𑁆𑀲𑀸𑀫𑀺𑀓𑀫𑁆𑀧𑀺 𑀳𑀺 𑀧𑀁𑀲𑀼𑀓𑀽𑀮𑀁 𑀅𑀜𑁆𑀜𑀺𑀲𑁆𑀲𑀸 𑀳𑀢𑁆𑀣𑀢𑁄 𑀕𑀡𑁆𑀳𑀸𑀢𑀺, 𑀦 𑀯𑀝𑁆𑀝𑀢𑀺 ‘‘𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀘𑀻𑀯𑀭𑀁 𑀧𑀝𑀺𑀕𑁆𑀕𑀡𑁆𑀳𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀮𑀓𑁆𑀔𑀡𑀲𑀫𑁆𑀪𑀯𑀢𑁄. 𑀅𑀜𑁆𑀜𑀸𑀢𑀺𑀓𑀸𑀬 𑀲𑀦𑁆𑀢𑀓𑀁 𑀜𑀸𑀢𑀺𑀓𑀸𑀬 𑀳𑀢𑁆𑀣𑀢𑁄 𑀕𑀡𑁆𑀳𑀸𑀢𑀺, 𑀯𑀝𑁆𑀝𑀢𑀻𑀢𑀺 𑀏𑀓𑁂. 𑀬𑀣𑀸 𑀲𑀺𑀓𑁆𑀔𑀫𑀸𑀦𑀲𑀸𑀫𑀡𑁂𑀭𑀸𑀤𑀻𑀦𑀁 𑀳𑀢𑁆𑀣𑀢𑁄 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺, 𑀢𑀣𑀸 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀜𑁆𑀘 ‘‘𑀅𑀜𑁆𑀜𑀸𑀢𑀺𑀓𑀸𑀬 𑀳𑀢𑁆𑀣𑀢𑁄 𑀕𑀳𑀡’’𑀦𑁆𑀢𑀺 (𑀓𑀗𑀔𑀸. 𑀅𑀝𑁆𑀞. 𑀘𑀻𑀯𑀭𑀧𑁆𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀅𑀗𑁆𑀕𑀁 𑀯𑀼𑀢𑁆𑀢𑀁. 𑀢𑀣𑀸 𑀜𑀸𑀢𑀺𑀓𑀸𑀬 𑀲𑀦𑁆𑀢𑀓𑀁 𑀲𑀺𑀓𑁆𑀔𑀫𑀸𑀦𑀸𑀬, 𑀲𑀸𑀫𑀡𑁂𑀭𑀺𑀬𑀸, 𑀉𑀧𑀸𑀲𑀓𑀲𑁆𑀲, 𑀉𑀧𑀸𑀲𑀺𑀓𑀸𑀬, 𑀪𑀺𑀓𑁆𑀔𑀼𑀲𑁆𑀲, 𑀲𑀸𑀫𑀡𑁂𑀭𑀲𑁆𑀲 𑀲𑀦𑁆𑀢𑀓𑀁 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀳𑀢𑁆𑀣𑀢𑁄 𑀕𑀡𑁆𑀳𑀦𑁆𑀢𑀲𑁆𑀲 𑀘 𑀅𑀦𑀸𑀧𑀢𑁆𑀢𑀺 𑀏𑀯𑀁 𑀬𑀣𑀸𑀯𑀼𑀢𑁆𑀢𑀮𑀓𑁆𑀔𑀡𑀸𑀲𑀫𑁆𑀪𑀯𑀢𑁄𑀢𑀺 𑀏𑀓𑁂, 𑀢𑁂𑀦𑁂𑀯 ‘‘𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸𑀬 𑀘𑀻𑀯𑀭𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀻’𑀢𑀺 𑀅𑀯𑀢𑁆𑀯𑀸 ‘𑀳𑀢𑁆𑀣𑀢𑁄 𑀧𑀝𑀺𑀕𑁆𑀕𑀡𑁆𑀳𑀸𑀢𑀺 𑀅𑀜𑁆𑀜𑀢𑁆𑀭 𑀧𑀸𑀭𑀺𑀯𑀢𑁆𑀢𑀓𑀸, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’𑀢𑀺 (𑀧𑀸𑀭𑀸. 𑁫𑁧𑁩) 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀅𑀜𑁆𑀜𑀸𑀢𑀺𑀓𑀸𑀬 𑀲𑀦𑁆𑀢𑀓𑀫𑁆𑀧𑀺 𑀏𑀓𑀢𑁄𑀉𑀧𑀲𑀫𑁆𑀧𑀦𑁆𑀦𑀸𑀬 𑀳𑀢𑁆𑀣𑀢𑁄 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀤𑀦𑁆𑀢𑀺, 𑀉𑀪𑁄𑀧𑁂𑀢𑁂 𑀦 𑀲𑀸𑀭𑀢𑁄 𑀤𑀝𑁆𑀞𑀩𑁆𑀩𑀸, 𑀓𑀸𑀭𑀡𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀁.

𑁫𑁧𑁪. 𑀓𑁄 𑀧𑀦 𑀯𑀸𑀤𑁄 𑀧𑀢𑁆𑀢𑀢𑁆𑀣𑀯𑀺𑀓𑀸𑀤𑀻𑀲𑀽𑀢𑀺 𑀅𑀦𑀥𑀺𑀝𑁆𑀞𑀸𑀢𑀩𑁆𑀩𑁂𑀲𑀼 𑀩𑀳𑀽𑀲𑀼 𑀧𑀝𑀮𑁂𑀲𑀼. 𑀢𑁂𑀦𑁂𑀯𑀸𑀳 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 ‘‘𑀧𑀢𑁆𑀢𑀢𑁆𑀣𑀯𑀺𑀓𑀸𑀤𑀺𑀫𑁆𑀳𑀺 𑀅𑀦𑀥𑀺𑀝𑁆𑀞𑀸𑀢𑀩𑁆𑀩𑀧𑀭𑀺𑀓𑁆𑀔𑀸𑀭𑁂’’𑀢𑀺. 𑀅𑀥𑀺𑀝𑁆𑀞𑀸𑀦𑀼𑀧𑀕𑁂𑀲𑀼 𑀯𑀸 𑀢𑁂𑀲𑀁 𑀧𑀭𑀺𑀓𑁆𑀔𑀸𑀭𑀢𑁆𑀢𑀸 𑀪𑀺𑀲𑀺𑀙𑀯𑀺𑀬𑀸 𑀯𑀺𑀬 𑀅𑀦𑀸𑀧𑀢𑁆𑀢𑀺. 𑀓𑀺𑀁 𑀧𑀝𑀧𑀭𑀺𑀲𑁆𑀲𑀸𑀯𑀦𑀁 𑀧𑀭𑀺𑀓𑁆𑀔𑀸𑀭𑀁 𑀦 𑀳𑁄𑀢𑀻𑀢𑀺? 𑀳𑁄𑀢𑀺, 𑀓𑀺𑀦𑁆𑀢𑀼 𑀢𑀁 𑀓𑀺𑀭 𑀦𑀺𑀯𑀸𑀲𑀦𑀸𑀤𑀺𑀘𑀻𑀯𑀭𑀲𑀡𑁆𑀞𑀸𑀦𑀢𑁆𑀢𑀸 𑀦 𑀯𑀝𑁆𑀝𑀢𑀺. 𑀢𑀲𑁆𑀫𑀸 𑀇𑀥 𑀦𑀺𑀯𑀸𑀲𑀦𑀸𑀤𑀺𑀘𑀻𑀯𑀭𑀲𑀸𑀥𑀦𑀁 𑀯𑀺𑀓𑀧𑁆𑀧𑀦𑀼𑀧𑀕𑀧𑀘𑁆𑀙𑀺𑀫𑀁 𑀘𑀻𑀯𑀭𑀁 𑀦𑀸𑀫. 𑀅𑀦𑀦𑁆𑀢𑀭𑀸𑀢𑀻𑀢𑁂 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀼𑀧𑀕𑀫𑁂𑀯𑀸𑀢𑀺 𑀲𑀦𑁆𑀦𑀺𑀝𑁆𑀞𑀸𑀦𑀁. 𑀏𑀯𑀁 𑀲𑀦𑁆𑀢𑁂 𑀓𑀗𑁆𑀔𑀸𑀯𑀺𑀢𑀭𑀡𑀺𑀬𑀁 (𑀓𑀗𑁆𑀔𑀸. 𑀅𑀝𑁆𑀞. 𑀘𑀻𑀯𑀭𑀧𑁆𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀓𑀧𑁆𑀧𑀦𑀼𑀧𑀕𑀧𑀘𑁆𑀙𑀺𑀫𑀢𑀸, 𑀧𑀸𑀭𑀺𑀯𑀢𑁆𑀢𑀓𑀸𑀪𑀸𑀯𑁄, 𑀅𑀜𑁆𑀜𑀸𑀢𑀺𑀓𑀸𑀬 𑀳𑀢𑁆𑀣𑀢𑁄 𑀕𑀳𑀡𑀦𑁆𑀢𑀺 𑀢𑀻𑀡𑁂𑀯 𑀅𑀗𑁆𑀕𑀸𑀦𑀺 𑀅𑀯𑀢𑁆𑀯𑀸 𑀅𑀧𑀭𑀺𑀓𑁆𑀔𑀸𑀭𑀢𑀸𑀢𑀺 𑀘𑀢𑀼𑀢𑁆𑀣𑀫𑀗𑁆𑀕𑀁 𑀯𑀢𑁆𑀢𑀩𑁆𑀩𑀦𑁆𑀢𑀺 𑀘𑁂? 𑀦 𑀯𑀢𑁆𑀢𑀩𑁆𑀩𑀁, 𑀇𑀫𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀧𑀢𑁆𑀢𑀢𑁆𑀣𑀯𑀺𑀓𑀸𑀤𑀺𑀧𑀭𑀺𑀓𑁆𑀔𑀸𑀭𑀲𑁆𑀲 𑀅𑀘𑀻𑀯𑀭𑀲𑀗𑁆𑀔𑁆𑀬𑀢𑁆𑀢𑀸. 𑀧𑀞𑀫𑀓𑀣𑀺𑀦𑀸𑀤𑀻𑀲𑀼 𑀯𑀺𑀓𑀧𑁆𑀧𑀦𑀼𑀧𑀕𑀢𑀸 𑀧𑀫𑀸𑀡𑀁, 𑀇𑀥 𑀓𑀸𑀬𑀧𑀭𑀺𑀪𑁄𑀕𑀼𑀧𑀕𑀢𑀸𑀢𑀺. ‘‘𑀅𑀜𑁆𑀜𑀁 𑀧𑀭𑀺𑀓𑁆𑀔𑀸𑀭’’𑀦𑁆𑀢𑀺 𑀉𑀤𑁆𑀥𑀭𑀺𑀢𑁆𑀯𑀸 ‘‘𑀧𑀢𑁆𑀢𑀢𑁆𑀣𑀯𑀺𑀓𑀸𑀤𑀺𑀁 𑀬𑀁𑀓𑀺𑀜𑁆𑀘𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀯𑀺𑀓𑀧𑁆𑀧𑀦𑀼𑀧𑀕𑀫𑁆𑀧𑀺 𑀧𑀢𑁆𑀢𑀢𑁆𑀣𑀯𑀺𑀓𑀸𑀤𑀺𑀁 𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀺, ‘‘𑀧𑀝𑀧𑀭𑀺𑀲𑁆𑀲𑀸𑀯𑀦𑀫𑁆𑀧𑀻’’𑀢𑀺 𑀯𑀼𑀢𑁆𑀢𑀝𑁆𑀞𑀸𑀦𑁂 𑀘 ‘‘𑀘𑀻𑀯𑀭𑀁 𑀦𑀸𑀫 𑀯𑀺𑀓𑀧𑁆𑀧𑀦𑀼𑀧𑀕𑀧𑀘𑁆𑀙𑀺𑀫’’𑀦𑁆𑀢𑀺 𑀯𑀘𑀦𑀢𑁄 𑀧𑀝𑀧𑀭𑀺𑀲𑁆𑀲𑀸𑀯𑀦𑀁 𑀘𑀻𑀯𑀭𑀫𑁂𑀯, 𑀦 𑀧𑀭𑀺𑀓𑁆𑀔𑀸𑀭𑀁. ‘‘𑀓𑁄 𑀧𑀦 𑀯𑀸𑀤𑁄𑀢𑀺 𑀦𑀺𑀕𑀫𑀦𑀯𑀘𑀦𑀫𑁆𑀧𑀺 𑀲𑀸𑀥𑀓’’𑀦𑁆𑀢𑀺 𑀓𑁂𑀘𑀺 𑀯𑀤𑀦𑁆𑀢𑀺, 𑀧𑀡𑁆𑀡𑀢𑁆𑀢𑀺𑀁 𑀅𑀚𑀸𑀦𑀦𑀢𑁄 𑀅𑀘𑀺𑀢𑁆𑀢𑀓𑀁, 𑀦 𑀯𑀢𑁆𑀣𑀼𑀁, ‘‘𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀲𑀦𑁆𑀢𑀓𑀪𑀸𑀯𑀸𑀚𑀸𑀦𑀦𑀢𑁄, 𑀘𑀻𑀯𑀭𑀪𑀸𑀯𑀸𑀚𑀸𑀦𑀦𑀢𑁄 𑀘 𑀅𑀘𑀺𑀢𑁆𑀢𑀓’’𑀦𑁆𑀢𑀺 𑀅𑀦𑀼𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁.

𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁧𑁫. 𑀧𑀭𑀺𑀓𑁆𑀔𑀸𑀭𑀸𑀦𑀦𑁆𑀢𑀺 𑀉𑀧𑀬𑁄𑀕𑀢𑁆𑀣𑁂 𑀲𑀸𑀫𑀺𑀯𑀘𑀦𑀁. 𑀏𑀓𑀲𑀸𑀝𑀓𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀁, ‘‘𑀅𑀜𑁆𑀜𑀸𑀢𑀓𑁄 𑀫𑁄𑀖𑀧𑀼𑀭𑀺𑀲𑀸’’𑀢𑀺 𑀯𑀘𑀦𑁂𑀦 𑀧𑀯𑀸𑀭𑀺𑀢𑁄𑀧𑀺 𑀅𑀤𑀸𑀢𑀼𑀓𑀸𑀫𑁄 𑀅𑀜𑁆𑀜𑀸𑀢𑀓𑁄 𑀅𑀧𑁆𑀧𑀯𑀸𑀭𑀺𑀢𑀝𑁆𑀞𑀸𑀦𑁂 𑀢𑀺𑀝𑁆𑀞𑀢𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀅𑀜𑁆𑀜𑀣𑀸 ‘‘𑀅𑀦𑀸𑀧𑀢𑁆𑀢𑀺 𑀧𑀯𑀸𑀭𑀺𑀢𑀸𑀦’’𑀦𑁆𑀢𑀺 𑀇𑀫𑀺𑀦𑀸 𑀯𑀺𑀭𑀼𑀚𑁆𑀛𑀢𑀺.

𑁫𑁧𑁭. 𑀦𑁂𑀯 𑀢𑀸𑀯 𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑀁, 𑀦 𑀪𑀜𑁆𑀚𑀺𑀢𑀩𑁆𑀩𑀦𑁆𑀢𑀺 𑀅𑀦𑀘𑁆𑀙𑀺𑀦𑁆𑀦𑀸𑀦𑀁 𑀘𑀻𑀯𑀭𑀸𑀦𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀸𑀦𑀁 𑀅𑀢𑁆𑀣𑀺𑀢𑀸𑀬, 𑀢𑀢𑁆𑀣 𑀧𑀘𑁆𑀘𑀸𑀲𑀸𑀲𑀩𑁆𑀪𑀸𑀯𑀢𑁄 𑀘. 𑀧𑀘𑁆𑀘𑀸𑀲𑀸 𑀓𑀺𑀢𑁆𑀢𑀓𑀁 𑀓𑀸𑀮𑀁 𑀭𑀓𑁆𑀔𑀢𑀻𑀢𑀺? 𑀬𑀸𑀯 𑀕𑀸𑀫𑀦𑁆𑀢𑀭𑀸, 𑀬𑀸𑀯 𑀅𑀤𑁆𑀥𑀬𑁄𑀚𑀦𑀸𑀢𑀺 𑀏𑀓𑁂. 𑀬𑀸𑀯 𑀤𑀲𑁆𑀲𑀦𑀲𑀯𑀦𑀽𑀧𑀘𑀸𑀭𑀸𑀢𑀺 𑀏𑀓𑁂. 𑀬𑀸𑀯 𑀅𑀜𑁆𑀜𑁂 𑀦 𑀧𑀲𑁆𑀲𑀦𑁆𑀢𑀻𑀢𑀺 𑀏𑀓𑁂. 𑀬𑀸𑀯 𑀧𑀘𑁆𑀘𑀸𑀲𑀸 𑀙𑀺𑀚𑁆𑀚𑀢𑀻𑀢𑀺 𑀏𑀓𑁂. 𑀬𑀸𑀯 𑀲𑀸𑀔𑀸𑀧𑀮𑀸𑀲𑀧𑀭𑀺𑀬𑁂𑀲𑀦𑀪𑀜𑁆𑀚𑀦𑀲𑀚𑁆𑀚𑀦𑀓𑀸𑀮𑀧𑀭𑀺𑀘𑁆𑀙𑁂𑀤𑀸𑀢𑀺 𑀏𑀓𑁂. 𑀇𑀤𑀁 𑀲𑀩𑁆𑀩𑀁 𑀬𑀣𑀸𑀲𑀫𑁆𑀪𑀯𑀁 𑀬𑀼𑀚𑁆𑀚𑀢𑀺. 𑀓𑀣𑀁 𑀧𑀜𑁆𑀜𑀸𑀬𑀢𑀻𑀢𑀺 𑀘𑁂? ‘‘𑀲𑀘𑁂 𑀧𑀦 𑀏𑀢𑁂𑀲𑀁 𑀯𑀼𑀢𑁆𑀢𑀧𑁆𑀧𑀓𑀸𑀭𑀸𑀦𑀁 𑀕𑀺𑀳𑀺𑀯𑀢𑁆𑀣𑀸𑀤𑀻𑀦𑀁 𑀪𑀺𑀲𑀺𑀙𑀯𑀺𑀧𑀭𑀺𑀬𑀦𑁆𑀢𑀸𑀦𑀁 𑀓𑀺𑀜𑁆𑀘𑀺 𑀦 𑀮𑀩𑁆𑀪𑀢𑀺, 𑀢𑁂𑀦 𑀢𑀺𑀡𑁂𑀦 𑀯𑀸 𑀧𑀡𑁆𑀡𑁂𑀦 𑀯𑀸 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀆𑀕𑀦𑁆𑀢𑀩𑁆𑀩’’𑀦𑁆𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀢𑁄.

𑀦 𑀢𑀸𑀯 𑀣𑁂𑀭𑀸𑀦𑀁 𑀤𑀸𑀢𑀩𑁆𑀩𑀸𑀦𑀻𑀢𑀺 𑀦 𑀢𑀸𑀯 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀤𑀸𑀢𑀩𑁆𑀩𑀸𑀦𑀺, 𑀬𑀤𑀸 𑀣𑁂𑀭𑀸 ‘‘𑀤𑁂𑀣𑀸𑀯𑀼𑀲𑁄’’𑀢𑀺 𑀯𑀤𑀦𑁆𑀢𑀺, 𑀢𑀤𑀸 𑀤𑀸𑀢𑀩𑁆𑀩𑀸𑀦𑀺. ‘‘𑀏𑀯𑀁 𑀲𑀢𑀺 𑀤𑀳𑀭𑀸𑀧𑀺 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀝𑁆𑀞𑀸𑀦𑁂 𑀢𑀺𑀝𑁆𑀞𑀦𑁆𑀢𑀺, 𑀲𑀸𑀔𑀸𑀧𑀮𑀸𑀲𑀁 𑀪𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺, 𑀦 𑀅𑀜𑁆𑀜𑀣𑀸. ‘𑀬𑁂𑀳𑀺 𑀓𑁂𑀳𑀺𑀘𑀺 𑀯𑀸 𑀅𑀘𑁆𑀙𑀺𑀦𑁆𑀦𑀁 𑀳𑁄𑀢𑀻’𑀢𑀺 𑀳𑀺 𑀯𑀼𑀢𑁆𑀢’’𑀦𑁆𑀢𑀺 𑀯𑀼𑀢𑁆𑀢𑀁. 𑀆𑀘𑀭𑀺𑀬𑁄 𑀧𑀦 𑀏𑀯𑀁 𑀯𑀤𑀢𑀺 ‘‘𑀅𑀢𑁆𑀢𑀦𑁄 𑀭𑀼𑀘𑀺𑀬𑀸𑀧𑀺 𑀤𑀸𑀢𑀼𑀁 𑀮𑀪𑀦𑁆𑀢𑀻’’𑀢𑀺. 𑀢𑀣𑀸 𑀳𑀺 𑀅𑀝𑁆𑀞𑀓𑀣𑀸𑀬𑀁 ‘‘𑀧𑀭𑀺𑀪𑁄𑀕𑀚𑀺𑀡𑁆𑀡𑀁 𑀯𑀸’𑀢𑀺 𑀏𑀢𑁆𑀣 𑀘 ‘𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑀸𑀦𑀁 𑀆𑀘𑀭𑀺𑀬𑀼𑀧𑀚𑁆𑀛𑀸𑀬𑀸𑀤𑀻𑀦𑀁 𑀅𑀢𑁆𑀢𑀦𑀸 𑀢𑀺𑀡𑀧𑀡𑁆𑀡𑁂𑀳𑀺 𑀧𑀝𑀺𑀘𑁆𑀙𑀸𑀤𑁂𑀢𑁆𑀯𑀸 𑀤𑀺𑀦𑁆𑀦𑀘𑀻𑀯𑀭𑀫𑁆𑀧𑀺 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻’𑀢𑀺 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀁. 𑀅𑀣𑀸𑀧𑀺 𑀲𑀺𑀬𑀸 𑀆𑀘𑀭𑀺𑀬𑀸𑀤𑀻𑀳𑀺 ‘‘𑀆𑀳𑀭𑀸𑀯𑀼𑀲𑁄’’𑀢𑀺 𑀯𑀼𑀢𑁆𑀢𑁂𑀬𑁂𑀯, 𑀦𑀸𑀯𑀼𑀢𑁆𑀢𑁂𑀢𑀺, 𑀦, ‘‘𑀓𑁂𑀳𑀺𑀘𑀺 𑀯𑀸 𑀅𑀘𑁆𑀙𑀺𑀦𑁆𑀦’’𑀦𑁆𑀢𑀺 𑀏𑀢𑁆𑀣 𑀯𑀼𑀢𑁆𑀢𑀮𑁂𑀲𑀢𑁄 𑀤𑀼𑀢𑀺𑀬𑀮𑁂𑀲𑀲𑁆𑀲 𑀅𑀯𑀺𑀲𑁂𑀲𑀪𑀸𑀯𑀧𑁆𑀧𑀲𑀗𑁆𑀕𑀢𑁄𑀢𑀺. 𑀅𑀣 𑀓𑀺𑀫𑀢𑁆𑀣𑀁 ‘‘𑀦 𑀢𑀸𑀯 𑀣𑁂𑀭𑀸𑀦𑀁 𑀤𑀸𑀢𑀩𑁆𑀩𑀸𑀦𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀬𑀸𑀯 𑀣𑁂𑀭𑀸𑀦𑀁 𑀅𑀢𑁆𑀣𑀸𑀬 𑀲𑀸𑀔𑀸𑀧𑀮𑀸𑀲𑀸𑀦𑀺 𑀪𑀜𑁆𑀚𑀢𑀺, 𑀢𑀸𑀯 𑀦 𑀤𑀸𑀢𑀩𑁆𑀩𑀸𑀦𑀺, 𑀢𑀢𑁄 𑀢𑀸𑀦𑀺 𑀣𑁂𑀭𑀼𑀤𑁆𑀤𑀺𑀲𑁆𑀲𑀓𑀸𑀦𑀺 𑀲𑀸𑀔𑀸𑀧𑀮𑀸𑀲𑀸𑀦𑀺 𑀲𑀬𑀁 𑀧𑀭𑀺𑀤𑀳𑀺𑀢𑁆𑀯𑀸 𑀯𑀺𑀦𑀸𑀧𑀺 𑀣𑁂𑀭𑀸𑀡𑀢𑁆𑀢𑀺𑀬𑀸 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀤𑀸𑀢𑀩𑁆𑀩𑀸𑀦𑀺, 𑀪𑀽𑀢𑀕𑀸𑀫𑀧𑀸𑀢𑀩𑁆𑀬𑀢𑀸𑀬 𑀧𑀸𑀘𑀺𑀢𑁆𑀢𑀺𑀬𑀁 𑀦 𑀳𑁄𑀢𑀺 𑀲𑀢𑁆𑀣𑀼𑀦𑀸𑀧𑀺 𑀅𑀦𑀼𑀜𑁆𑀜𑀸𑀢𑀢𑁆𑀢𑀸. ‘‘𑀢𑀺𑀡𑁂𑀦 𑀯𑀸 𑀧𑀡𑁆𑀡𑁂𑀦 𑀯𑀸’’𑀢𑀺 𑀳𑀺 𑀯𑀼𑀢𑁆𑀢𑀁, 𑀢𑀁 𑀓𑀧𑁆𑀧𑀺𑀬𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀦, ‘‘𑀢𑀤𑀮𑀸𑀪𑁂 𑀦 𑀢𑁆𑀯𑁂𑀯…𑀧𑁂… 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀘𑀦𑀯𑀺𑀭𑁄𑀥𑀢𑁄. 𑀏𑀢𑁆𑀣𑀸𑀳 𑁋 𑀤𑀼𑀓𑁆𑀓𑀝𑀪𑀬𑀸 𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀼 𑀘𑁂 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑀁, 𑀢𑀤𑀮𑀸𑀪𑁂 𑀣𑀼𑀮𑁆𑀮𑀘𑁆𑀘𑀬𑀯𑀢𑁆𑀣𑀼 𑀲𑀗𑁆𑀖𑀺𑀓𑀁, 𑀢𑀤𑀮𑀸𑀪𑁂 𑀧𑀸𑀭𑀸𑀚𑀺𑀓𑀯𑀢𑁆𑀣𑀼𑀧𑀺 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑀁 𑀲𑀺𑀬𑀸𑀢𑀺? 𑀦, 𑀧𑀸𑀭𑀸𑀚𑀺𑀓𑀲𑁆𑀲 𑀮𑁄𑀓𑀯𑀚𑁆𑀚𑀢𑁆𑀢𑀸. 𑀅𑀧𑀺𑀘 𑀦 𑀲𑀩𑁆𑀩𑀁 𑀪𑀽𑀢𑀕𑀸𑀫𑀁 𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀼𑀫𑁂𑀯, 𑀢𑀢𑁄 𑀤𑀼𑀓𑁆𑀓𑀝𑀸𑀤𑀺𑀯𑀢𑁆𑀣𑀼𑀧𑀺 𑀅𑀢𑁆𑀣𑀺, 𑀅𑀦𑀸𑀧𑀢𑁆𑀢𑀺𑀯𑀢𑁆𑀣𑀼𑀧𑀺 𑀓𑀸𑀮𑁄𑀤𑀺𑀲𑀓𑀁, 𑀢𑀲𑁆𑀫𑀸 𑀇𑀤𑀁 𑀢𑀤𑀸 𑀅𑀦𑀸𑀧𑀢𑁆𑀢𑀺𑀯𑀢𑁆𑀣𑀼𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀺𑀢𑁆𑀢𑀸𑀯𑀢𑀸 𑀪𑀺𑀓𑁆𑀔𑀼 𑀅𑀘𑁆𑀙𑀺𑀦𑁆𑀦𑀘𑀻𑀯𑀭𑁄 𑀦𑀝𑁆𑀞𑀘𑀻𑀯𑀭𑁄 𑀳𑁄𑀢𑀻𑀢𑀺? 𑀏𑀢𑁆𑀢𑀸𑀯𑀢𑀸 𑀦𑀕𑁆𑀕𑁄 𑀳𑁄𑀢𑀻𑀢𑀺 𑀏𑀓𑁂. 𑀯𑀺𑀓𑀧𑁆𑀧𑀦𑀼𑀧𑀕𑀧𑀘𑁆𑀙𑀺𑀫𑀪𑀸𑀯𑁂𑀦, 𑀯𑀺𑀓𑀧𑁆𑀧𑀦𑀼𑀧𑀕𑀧𑀘𑁆𑀙𑀺𑀫𑀫𑀸𑀤𑀺𑀁 𑀓𑀢𑁆𑀯𑀸 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀻𑀢𑀺 𑀏𑀓𑁂. 𑀦𑀺𑀯𑀸𑀲𑀦𑀧𑀸𑀭𑀼𑀧𑀦𑀼𑀧𑀕𑀸𑀪𑀸𑀯𑁂𑀦𑀸𑀢𑀺 𑀏𑀓𑁂. 𑀢𑀺𑀘𑀻𑀯𑀭𑀸𑀪𑀸𑀯𑁂𑀦𑀸𑀢𑀺 𑀏𑀓𑁂. 𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀸𑀪𑀸𑀯𑁂𑀦𑀸𑀢𑀺 𑀏𑀓𑁂. 𑀅𑀬𑀁 𑀏𑀓𑁂𑀯𑀸𑀤𑁄 𑀬𑀼𑀢𑁆𑀢𑁄 ‘‘𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀁 𑀢𑀢𑁄 𑀘𑀻𑀯𑀭𑀁 𑀲𑀸𑀤𑀺𑀢𑀩𑁆𑀩’’𑀦𑁆𑀢𑀺 𑀳𑀺 𑀯𑀘𑀦𑀢𑁄, 𑀢𑀲𑁆𑀫𑀸 𑀲𑀦𑁆𑀢𑀭𑀼𑀢𑁆𑀢𑀭𑁂 𑀲𑀢𑀺 𑀯𑀺𑀓𑀧𑁆𑀧𑀦𑀼𑀧𑀕𑀧𑀘𑁆𑀙𑀺𑀫𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀧𑀝𑀺𑀮𑀸𑀪𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀬𑀤𑀺 𑀏𑀯𑀁 ‘‘𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀧𑀝𑀺𑀮𑀪𑁂𑀬𑁆𑀬 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺 𑀲𑀺𑀓𑁆𑀔𑀸𑀧𑀤𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺 𑀘𑁂? 𑀢𑀦𑁆𑀦, 𑀢𑀤𑀢𑁆𑀣𑀲𑀺𑀤𑁆𑀥𑀺𑀢𑁄 𑀦𑀸𑀦𑀢𑁆𑀣𑀢𑁆𑀢𑀸 𑀥𑀸𑀢𑀽𑀦𑀁. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀬𑀣𑀸 𑀳𑀺 ‘‘𑀢𑀺𑀓𑁆𑀔𑀢𑁆𑀢𑀼𑀁 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀅𑀪𑀺𑀯𑀺𑀜𑁆𑀜𑀸𑀧𑁂𑀲𑀻’’𑀢𑀺 (𑀧𑀸𑀭𑀸. 𑁩𑁬) 𑀯𑀼𑀢𑁆𑀢𑁂 𑀧𑀯𑀢𑁆𑀢𑁂𑀲𑀻𑀢𑀺 𑀅𑀢𑁆𑀣𑁄, 𑀢𑀣𑀸 𑀇𑀥𑀸𑀧𑀺 ‘‘𑀘𑀻𑀯𑀭𑀁 𑀯𑀺𑀜𑁆𑀜𑀸𑀧𑁂𑀬𑁆𑀬𑀸’’𑀢𑀺 𑀯𑀺𑀜𑁆𑀜𑀢𑁆𑀢𑀺𑀬𑀸 𑀧𑀯𑀢𑁆𑀢𑁂𑀬𑁆𑀬 𑀉𑀧𑁆𑀧𑀸𑀤𑁂𑀬𑁆𑀬𑀸𑀢𑀺 𑀅𑀢𑁆𑀣𑁄.

𑀢𑁂𑀦 𑀦𑀺𑀯𑀢𑁆𑀣𑁄𑀢𑀺 𑀢𑀁𑀦𑀺𑀯𑀢𑁆𑀣𑁄. 𑀅𑀜𑁆𑀜𑀲𑁆𑀲 𑀅𑀮𑀸𑀪𑁂𑀦 𑀢𑀫𑁂𑀯 𑀧𑀭𑀺𑀪𑀼𑀜𑁆𑀚𑀢𑁄 𑀚𑀺𑀭𑀢𑀺, 𑀦 𑀮𑁂𑀲𑁂𑀦. 𑀅𑀢𑁆𑀢𑀦𑀸𑀢𑀺 𑀲𑀬𑀫𑁂𑀯 𑀯𑀢𑁆𑀢𑀼𑀁 𑀬𑀼𑀚𑁆𑀚𑀢𑀺, 𑀢𑀲𑁆𑀫𑀸 𑀅𑀬𑀼𑀢𑁆𑀢𑀧𑀭𑀺𑀪𑁄𑀕𑁂𑀦 𑀅𑀧𑀭𑀺𑀪𑀼𑀜𑁆𑀚𑀺𑀢𑁆𑀯𑀸 𑀬𑀼𑀢𑁆𑀢𑀧𑀭𑀺𑀪𑁄𑀕𑀯𑀲𑁂𑀦 𑀧𑀭𑀺𑀪𑀼𑀜𑁆𑀚𑀢𑁄 𑀚𑀺𑀡𑁆𑀡𑀁 𑀧𑀭𑀺𑀪𑁄𑀕𑀚𑀺𑀡𑁆𑀡𑀁 𑀦𑀸𑀫. 𑀢𑀲𑁆𑀲 𑀲𑀪𑀸𑀕𑀸𑀦𑀁 𑀅𑀘𑁆𑀙𑀺𑀦𑁆𑀦𑀓𑀸𑀮𑁂 𑀤𑀸𑀦𑀫𑁆𑀧𑀺 𑀬𑀼𑀢𑁆𑀢𑀧𑀭𑀺𑀪𑁄𑀕𑁂 𑀏𑀯 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀇𑀫𑁂 𑀓𑀺𑀭 𑀤𑁆𑀯𑁂 𑀮𑁂𑀲𑀸 𑀅𑀝𑁆𑀞𑀓𑀣𑀸𑀬𑁄, 𑀯𑀸𑀘𑁂𑀦𑁆𑀢𑀸𑀦𑀁 𑀆𑀘𑀭𑀺𑀬𑀸𑀦𑀁 𑀫𑀢𑀦𑁆𑀢𑀺 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁄 𑀆𑀳𑀸’’𑀢𑀺 𑀯𑀼𑀢𑁆𑀢𑀁.

𑁫𑁨𑁧. 𑀦𑀺𑀲𑀻𑀤𑀺𑀢𑀼𑀁 𑀯𑀸 𑀦𑀺𑀧𑀚𑁆𑀚𑀺𑀢𑀼𑀁 𑀯𑀸 𑀦 𑀮𑀪𑀢𑀻𑀢𑀺 𑀬𑀣𑀸𑀲𑀼𑀔𑀁 𑀦 𑀮𑀪𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸’’𑀢𑀺 𑀏𑀢𑁆𑀣𑀸𑀧𑀺 ‘‘𑀜𑀸𑀢𑀓𑀸𑀦𑀁 𑀧𑀯𑀸𑀭𑀺𑀢𑀸𑀦’’𑀦𑁆𑀢𑀺 𑀅𑀦𑀼𑀯𑀢𑁆𑀢𑀢𑀺 𑀏𑀯. 𑀅𑀢𑁆𑀣𑀸𑀬 𑀓𑀲𑁆𑀲? 𑀢𑀲𑁆𑀲𑁂𑀯 𑀅𑀜𑁆𑀜𑀲𑁆𑀲. 𑀬𑀣𑀸 𑀅𑀜𑁆𑀜𑀸𑀢𑀓𑁂 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁, 𑀢𑀣𑀸 𑀅𑀧𑁆𑀧𑀯𑀸𑀭𑀺𑀢𑁂𑀧𑀻𑀢𑀺 𑀤𑀲𑁆𑀲𑀦𑀢𑁆𑀣𑀁 ‘‘𑀜𑀸𑀢𑀓𑀸𑀦𑀁 𑀧𑀯𑀸𑀭𑀺𑀢𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀣𑀸 ‘‘𑀜𑀸𑀢𑀓𑁂 𑀜𑀸𑀢𑀓𑀲𑀜𑁆𑀜𑀻’’𑀢𑀺 𑀇𑀫𑀺𑀦𑀸 𑀲𑀺𑀤𑁆𑀥𑀢𑁆𑀢𑀸 𑀦 𑀦𑀺𑀘𑁆𑀘𑀁 𑀲𑁂𑀲𑀁 𑀆𑀧𑀚𑁆𑀚𑀢𑀺. 𑀅𑀧𑀺𑀘𑁂𑀢𑁆𑀣 𑀅𑀜𑁆𑀜𑀸𑀢𑀓𑀕𑁆𑀕𑀳𑀡𑁂𑀦 𑀅𑀧𑁆𑀧𑀯𑀸𑀭𑀺𑀢𑀕𑁆𑀕𑀳𑀡𑀁 𑀳𑁄𑀢𑀺, 𑀅𑀧𑁆𑀧𑀯𑀸𑀭𑀺𑀢𑀕𑁆𑀕𑀳𑀡𑁂𑀦 𑀅𑀜𑁆𑀜𑀸𑀢𑀓𑀕𑁆𑀕𑀳𑀡𑀁, 𑀅𑀜𑁆𑀜𑀸𑀢𑀓𑀸 𑀳𑀺 𑀅𑀧𑁆𑀧𑀯𑀸𑀭𑀺𑀢𑀸 𑀳𑁄𑀦𑁆𑀢𑀺. 𑀢𑀣𑀸 𑀜𑀸𑀢𑀓𑀕𑁆𑀕𑀳𑀡𑁂𑀦 𑀧𑀯𑀸𑀭𑀺𑀢𑀕𑁆𑀕𑀳𑀡𑀁 𑀳𑁄𑀢𑀺, 𑀓𑀢𑁆𑀣𑀘𑀺 𑀦 𑀳𑁄𑀢𑀺. 𑀦 𑀧𑀯𑀸𑀭𑀺𑀢𑀕𑁆𑀕𑀳𑀡𑁂𑀦 𑀜𑀸𑀢𑀓𑀕𑁆𑀕𑀳𑀡𑀁 𑀳𑁄𑀢𑀻𑀢𑀺 𑀇𑀫𑀲𑁆𑀲 𑀅𑀢𑁆𑀣𑀯𑀺𑀲𑁂𑀲𑀲𑁆𑀲 𑀤𑀲𑁆𑀲𑀦𑀢𑁆𑀣𑀁 ‘‘𑀜𑀸𑀢𑀓𑀸𑀦𑀁 𑀧𑀯𑀸𑀭𑀺𑀢𑀸𑀦’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀣𑀸 𑀳𑀺 𑀅𑀜𑁆𑀜𑀸𑀢𑀺𑀓𑀸𑀬 𑀪𑀺𑀓𑁆𑀔𑀼𑀦𑀺𑀬𑀸 𑀅𑀧𑁆𑀧𑀯𑀸𑀭𑀺𑀢𑀸𑀬 𑀘 𑀘𑀻𑀯𑀭𑀁 𑀅𑀜𑁆𑀜𑀢𑁆𑀭 𑀧𑀸𑀭𑀺𑀯𑀢𑁆𑀢𑀓𑀸 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀆𑀧𑀢𑁆𑀢𑀺. 𑀜𑀸𑀢𑀺𑀓𑀸𑀬 𑀧𑀦 𑀧𑀯𑀸𑀭𑀺𑀢𑀸𑀬 𑀘 𑀯𑀺𑀲𑁆𑀲𑀸𑀲𑀁 𑀕𑀡𑁆𑀳𑀸𑀢𑀺, 𑀅𑀦𑀸𑀧𑀢𑁆𑀢𑀺. 𑀢𑀣𑀸 𑀧𑀼𑀭𑀸𑀡𑀘𑀻𑀯𑀭𑀁 𑀜𑀸𑀢𑀺𑀓𑀸𑀬 𑀅𑀦𑀸𑀧𑀢𑁆𑀢𑀺, 𑀧𑀯𑀸𑀭𑀺𑀢𑀸𑀬 𑀧𑀦 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀜𑀸𑀢𑀓𑀸𑀦𑀜𑁆𑀘 𑀏𑀓𑀘𑁆𑀘𑀸𑀦𑀁 𑀧𑀼𑀭𑀸𑀡𑀘𑀻𑀯𑀭𑀁 𑀦𑀸𑀫 𑀤𑀸𑀢𑀼𑀁 𑀯𑀝𑁆𑀝𑀢𑀺, 𑀦 𑀧𑀯𑀸𑀭𑀺𑀢𑀸𑀦𑀁. 𑀢𑀺𑀓𑀘𑁆𑀙𑁂𑀤𑁄 𑀘 𑀫𑀸𑀢𑀺𑀓𑀸𑀧𑀤𑁂𑀦𑁂𑀯 𑀳𑁄𑀢𑀺, 𑀦 𑀅𑀜𑁆𑀜𑁂𑀦. 𑀢𑀢𑁆𑀣𑀸𑀧𑀺 𑀏𑀓𑁂𑀦𑁂𑀯, 𑀦 𑀤𑀼𑀢𑀺𑀬𑀸𑀤𑀻𑀳𑀻𑀢𑀺 𑀅𑀬𑀁 𑀯𑀺𑀦𑀬𑁂 𑀥𑀫𑁆𑀫𑀢𑀸 𑀯𑁂𑀤𑀺𑀢𑀩𑁆𑀩𑀸.

𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀢𑀢𑀼𑀢𑁆𑀢𑀭𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁨𑁨-𑁪. 𑀧𑀕𑁆𑀕𑀸𑀳𑀺𑀓𑀲𑀸𑀮𑀁 𑀯𑀸𑀢𑀺 𑀤𑀼𑀲𑁆𑀲𑀧𑀲𑀸𑀭𑀁 𑀯𑀸. 𑀳𑀢𑁆𑀣𑁂𑀦 𑀧𑀕𑁆𑀕𑀳𑁂𑀢𑁆𑀯𑀸 𑀞𑀢𑁆𑀯𑀸 𑀲𑀸𑀮𑀸𑀬𑀁 𑀧𑀲𑀸𑀭𑁂𑀢𑀩𑁆𑀩𑀤𑀼𑀲𑁆𑀲𑀁 𑀧𑀲𑀸𑀭𑁂𑀦𑁆𑀢𑀻𑀢𑀺 𑀘𑁄𑀤𑀦𑀸. 𑀢𑀺𑀘𑀻𑀯𑀭𑀺𑀓𑁂𑀦𑁂𑀯𑀸𑀢𑀺 𑀯𑀺𑀦𑀬𑀢𑀺𑀘𑀻𑀯𑀭𑀺𑀓𑁂𑀦. 𑀲𑁄 𑀳𑀺 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀞𑀧𑀺𑀢𑀧𑀭𑀺𑀓𑁆𑀔𑀸𑀭𑀘𑁄𑀴𑀸𑀤𑀻𑀲𑀼 𑀲𑀦𑁆𑀢𑁂𑀲𑀼𑀧𑀺 𑀢𑀺𑀘𑀻𑀯𑀭𑁂 𑀅𑀘𑁆𑀙𑀺𑀦𑁆𑀦𑁂 𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸 𑀕𑀳𑁂𑀢𑀼𑀁 𑀮𑀪𑀢𑀺. 𑀅𑀜𑁆𑀜𑀣𑀸𑀧𑀻𑀢𑀺 ‘‘𑀧𑀫𑀸𑀡𑀺𑀓𑀁 𑀢𑀺𑀘𑀻𑀯𑀭𑀁 𑀧𑀭𑀺𑀓𑁆𑀔𑀸𑀭𑀘𑁄𑀴𑀯𑀲𑁂𑀦 𑀅𑀥𑀺𑀝𑁆𑀞𑀳𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑁄 𑀢𑀲𑁆𑀫𑀺𑀁 𑀦𑀝𑁆𑀞𑁂 𑀩𑀳𑀽𑀦𑀺𑀧𑀺 𑀕𑀳𑁂𑀢𑀼𑀁 𑀮𑀪𑀢𑀺, 𑀦 𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫’’𑀦𑁆𑀢𑀺 𑀘, 𑀢𑀲𑁆𑀫𑀸 𑀢𑀁 𑀯𑀺𑀪𑀸𑀕𑀦𑁆𑀢𑀺 ‘‘𑀢𑀺𑀘𑀻𑀯𑀭𑀺𑀓𑀲𑁆𑀲 𑀢𑀁 𑀯𑀺𑀪𑀸𑀕𑀦𑁆𑀢𑀺 𑀅𑀢𑁆𑀣𑁄, 𑀦 𑀧𑀭𑀺𑀓𑁆𑀔𑀸𑀭𑀘𑁄𑀴𑀺𑀓𑀲𑁆𑀲𑀸’’𑀢𑀺 𑀘 𑀓𑁂𑀘𑀺 𑀯𑀤𑀦𑁆𑀢𑀺. 𑀆𑀘𑀭𑀺𑀬𑁄 𑀧𑀦 ‘‘𑀅𑀜𑁆𑀜𑁂𑀦𑀸𑀢𑀺 𑀅𑀢𑀺𑀘𑀻𑀯𑀭𑀺𑀓𑁂𑀦, 𑀅𑀜𑁆𑀜𑀣𑀸𑀢𑀺 𑀇𑀢𑁄 𑀯𑀼𑀢𑁆𑀢𑀕𑁆𑀕𑀳𑀡𑀧𑀭𑀺𑀘𑁆𑀙𑁂𑀤𑀢𑁄 𑀅𑀜𑁆𑀜𑁂𑀦𑀸’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀤𑀢𑀺. 𑀅𑀜𑁆𑀜𑀣𑀸𑀢𑀺 𑀧𑀦 𑀲𑀘𑁂 𑀢𑀻𑀡𑀺𑀧𑀺 𑀦𑀝𑁆𑀞𑀸𑀦𑀺, 𑀲𑀦𑁆𑀢𑀭𑀼𑀢𑁆𑀢𑀭𑀧𑀭𑀫𑀁 𑀕𑀡𑁆𑀳𑀺𑀢𑀩𑁆𑀩𑀁, 𑀲𑀘𑁂 𑀤𑁆𑀯𑁂 𑀯𑀸 𑀏𑀓𑀁 𑀯𑀸 𑀦𑀝𑁆𑀞𑀁, 𑀢𑁂𑀦 ‘‘𑀅𑀜𑁆𑀜𑀣𑀸𑀧𑀻’’𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺 𑀏𑀓𑁂. 𑀕𑀡𑁆𑀞𑀺𑀧𑀤𑁂𑀲𑀼 𑀯𑀺𑀘𑀸𑀭𑀡𑀸 𑀏𑀯 𑀦𑀢𑁆𑀣𑀺, 𑀢𑀲𑁆𑀫𑀸 𑀉𑀧𑀧𑀭𑀺𑀓𑁆𑀔𑀺𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀧𑀓𑀢𑀺𑀬𑀸 𑀲𑀦𑁆𑀢𑀭𑀼𑀢𑁆𑀢𑀭𑁂𑀦 𑀘𑀭𑀢𑀺, 𑀲𑀸𑀲𑀗𑁆𑀓𑀲𑀺𑀓𑁆𑀔𑀸𑀧𑀤𑀯𑀲𑁂𑀦 𑀯𑀸 𑀢𑀁𑀲𑀫𑁆𑀫𑀼𑀢𑀺𑀯𑀲𑁂𑀦 𑀯𑀸 𑀢𑀢𑀺𑀬𑀲𑁆𑀲 𑀅𑀮𑀸𑀪𑁂𑀦 𑀯𑀸.

𑁫𑁨𑁬. ‘‘𑀧𑀫𑀸𑀡𑀫𑁂𑀯 𑀯𑀝𑁆𑀝𑀢𑀻’’𑀢𑀺 𑀲𑀮𑁆𑀮𑁂𑀔𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀢𑀁 𑀫𑀺𑀘𑁆𑀙𑀸 𑀕𑀳𑁂𑀢𑁆𑀯𑀸 𑀜𑀸𑀢𑀓𑀸𑀤𑀺𑀝𑁆𑀞𑀸𑀦𑁂 𑀢𑀤𑀼𑀢𑁆𑀢𑀭𑀺 𑀕𑀡𑁆𑀳𑀦𑁆𑀢𑀲𑁆𑀲 𑀆𑀧𑀢𑁆𑀢𑀻𑀢𑀺 𑀘𑁂? 𑀢𑀁 𑀧𑀸𑀴𑀺𑀬𑀸 𑀦 𑀲𑀫𑁂𑀢𑀺, ‘‘𑀅𑀦𑀸𑀧𑀢𑁆𑀢𑀺 𑀜𑀸𑀢𑀓𑀸𑀦𑀁 𑀧𑀯𑀸𑀭𑀺𑀢𑀸𑀦’’𑀦𑁆𑀢𑀺 𑀳𑀺 𑀧𑀸𑀴𑀺. 𑀏𑀢𑁆𑀣 𑀘 𑀧𑀯𑀸𑀭𑀺𑀢𑀸 𑀦𑀸𑀫 𑀅𑀘𑁆𑀙𑀺𑀦𑁆𑀦𑀓𑀸𑀮𑀢𑁄 𑀧𑀼𑀩𑁆𑀩𑁂 𑀏𑀯 𑀧𑀯𑀸𑀭𑀺𑀢𑀸, 𑀦 𑀅𑀘𑁆𑀙𑀺𑀦𑁆𑀦𑀓𑀸𑀮𑁂. ‘‘𑀅𑀪𑀺𑀳𑀝𑁆𑀞𑀼𑀁 𑀧𑀯𑀸𑀭𑁂𑀬𑁆𑀬𑀸’’𑀢𑀺 𑀳𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀬𑁄 𑀅𑀘𑁆𑀙𑀺𑀦𑁆𑀦𑀓𑀸𑀮𑀲𑁆𑀲𑀢𑁆𑀣𑀸𑀬 𑀧𑀯𑀸𑀭𑁂𑀢𑀺, 𑀉𑀪𑁄𑀧𑀺 𑀅𑀧𑁆𑀧𑀯𑀸𑀭𑀺𑀢𑀸 𑀏𑀯𑀸𑀢𑀺 𑀯𑁂𑀤𑀺𑀢𑀩𑁆𑀩𑀸. 𑀢𑁂 𑀳𑀺 𑀅𑀘𑁆𑀙𑀺𑀦𑁆𑀦𑀓𑀸𑀭𑀡𑀸 𑀦𑀝𑁆𑀞𑀓𑀸𑀭𑀡𑀸𑀯 𑀤𑁂𑀦𑁆𑀢𑀺 𑀦𑀸𑀫. 𑀅𑀧𑀺𑀘 𑀬𑀣𑀸 𑀧𑀺𑀝𑁆𑀞𑀺𑀲𑀫𑀬𑁂 𑀲𑀢𑀼𑀧𑁆𑀧𑀸𑀤𑀁 𑀓𑀢𑁆𑀯𑀸 𑀜𑀸𑀢𑀓𑀧𑀯𑀸𑀭𑀺𑀢𑀝𑁆𑀞𑀸𑀦𑀢𑁄 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀦𑀺𑀧𑁆𑀨𑀸𑀤𑁂𑀦𑁆𑀢𑀲𑁆𑀲 𑀢𑁂𑀦 𑀲𑀺𑀓𑁆𑀔𑀸𑀧𑀤𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀢𑀣𑀸 𑀇𑀥𑀸𑀧𑀺 𑀜𑀸𑀢𑀓𑀧𑀯𑀸𑀭𑀺𑀢𑀝𑁆𑀞𑀸𑀦𑁂𑀧𑀺 𑀅𑀘𑁆𑀙𑀺𑀦𑁆𑀦𑀦𑀝𑁆𑀞𑀓𑀸𑀭𑀡𑀸 𑀦 𑀯𑀝𑁆𑀝𑀢𑀺, 𑀢𑀲𑁆𑀫𑀸 ‘‘𑀅𑀝𑁆𑀞𑀓𑀣𑀸𑀲𑀼 𑀧𑀫𑀸𑀡𑀫𑁂𑀯 𑀯𑀝𑁆𑀝𑀢𑀻’𑀢𑀺 𑀯𑀼𑀢𑁆𑀢𑀯𑀘𑀦𑀫𑁂𑀯 𑀧𑀫𑀸𑀡’’𑀦𑁆𑀢𑀺 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁄 𑀆𑀳, 𑀢𑀁 𑀅𑀬𑀼𑀢𑁆𑀢𑀁, 𑀓𑀲𑁆𑀫𑀸? 𑀬𑀲𑁆𑀫𑀸 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀢𑀤𑀼𑀢𑁆𑀢𑀭𑀺 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲 𑀧𑀜𑁆𑀜𑀢𑁆𑀢𑀁, 𑀢𑀲𑁆𑀫𑀺𑀜𑁆𑀘 ‘‘𑀅𑀜𑁆𑀜𑀸𑀢𑀓𑁄 𑀕𑀳𑀧𑀢𑀺 𑀯𑀸 𑀕𑀳𑀧𑀢𑀸𑀦𑀻 𑀯𑀸’’𑀢𑀺 𑀫𑀸𑀢𑀺𑀓𑀸𑀬 𑀧𑀸𑀴𑀺, 𑀯𑀺𑀪𑀗𑁆𑀕𑁂 𑀘 ‘‘𑀅𑀜𑁆𑀜𑀸𑀢𑀓𑁄 𑀦𑀸𑀫 𑀫𑀸𑀢𑀺𑀢𑁄 𑀯𑀸…𑀧𑁂… 𑀅𑀲𑀫𑁆𑀩𑀤𑁆𑀥𑁄’’𑀢𑀺 𑀧𑀸𑀴𑀺, 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 𑀘 ‘‘𑀜𑀸𑀢𑀓𑀸𑀦𑀁 𑀧𑀯𑀸𑀭𑀺𑀢𑀸𑀦’’𑀦𑁆𑀢𑀺 𑀧𑀸𑀴𑀺, 𑀢𑀲𑁆𑀫𑀸 𑀢𑀺𑀯𑀺𑀥𑀸𑀬𑀧𑀺 𑀧𑀸𑀴𑀺𑀬𑀸 𑀦 𑀲𑀫𑁂𑀢𑀻𑀢𑀺 𑀅𑀬𑀼𑀢𑁆𑀢𑀫𑁂𑀯, 𑀢𑀲𑁆𑀫𑀸 𑀓𑁂𑀯𑀮𑀁 𑀲𑀮𑁆𑀮𑁂𑀔𑀫𑁂𑀯 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀅𑀧𑀭𑁂. 𑀉𑀧𑀭𑀺 𑀓𑀸𑀡𑀫𑀸𑀢𑀸𑀲𑀺𑀓𑁆𑀔𑀸𑀧𑀤𑁂 𑀅𑀝𑁆𑀞𑀓𑀣𑀸𑀲𑀼 𑀧𑀦 ‘‘𑀢𑁂𑀲𑀫𑁆𑀧𑀺 𑀧𑀸𑀣𑁂𑀬𑁆𑀬𑀧𑀳𑁂𑀡𑀓𑀢𑁆𑀣𑀸𑀬 𑀧𑀝𑀺𑀬𑀢𑁆𑀢𑀢𑁄 𑀧𑀫𑀸𑀡𑀫𑁂𑀯 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁, 𑀦 𑀧𑀦 ‘‘𑀧𑀸𑀴𑀺𑀬𑀸 𑀦 𑀲𑀫𑁂𑀢𑀻’’𑀢𑀺 𑀯𑀼𑀢𑁆𑀢𑀁, 𑀦 𑀢𑀢𑁆𑀣 𑀘 𑀇𑀥 𑀘 𑀦𑀸𑀦𑀸𑀓𑀭𑀡𑀁 𑀧𑀜𑁆𑀜𑀸𑀬𑀢𑀺, 𑀢𑀲𑁆𑀫𑀸 𑀣𑁂𑀭𑀲𑁆𑀲 𑀮𑀤𑁆𑀥𑀺 𑀲𑀼𑀦𑁆𑀤𑀭𑀸 𑀯𑀺𑀬 𑀫𑀫 𑀔𑀸𑀬𑀢𑀺, 𑀯𑀻𑀫𑀁𑀲𑀺𑀢𑀩𑁆𑀩𑀁. 𑀬𑀲𑁆𑀫𑀸 𑀧𑀦𑀺𑀤𑀁 𑀲𑀺𑀓𑁆𑀔𑀸𑀧𑀤𑀁 𑀅𑀜𑁆𑀜𑀲𑁆𑀲𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑀦𑀯𑀢𑁆𑀣𑀼𑀲𑁆𑀫𑀺𑀁𑀬𑁂𑀯 𑀧𑀜𑁆𑀜𑀢𑁆𑀢𑀁, 𑀢𑀲𑁆𑀫𑀸 𑀇𑀥 ‘‘𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸’’𑀢𑀺 𑀦 𑀯𑀼𑀢𑁆𑀢𑀁. ‘‘𑀲𑁂𑀲𑀁 𑀉𑀢𑁆𑀢𑀸𑀦𑀢𑁆𑀣𑀫𑁂𑀯𑀸’’𑀢𑀺 𑀧𑀸𑀞𑁄. ‘‘𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸’’𑀢𑀺 𑀦𑀺𑀤𑀸𑀦𑀯𑀺𑀭𑁄𑀥𑀢𑁄 𑀦 𑀯𑀼𑀢𑁆𑀢𑀁. 𑀢𑀣𑀸𑀧𑀺 𑀅𑀦𑀦𑁆𑀢𑀭𑁂 𑀯𑀼𑀢𑁆𑀢𑀦𑀬𑁂𑀦 𑀮𑀩𑁆𑀪𑀢𑀻𑀢𑀺 𑀆𑀘𑀭𑀺𑀬𑁄. 𑀏𑀯𑀭𑀽𑀧𑁂𑀲𑀼 𑀕𑀳𑀧𑀢𑀺𑀧𑀝𑀺𑀲𑀁𑀬𑀼𑀢𑁆𑀢𑀲𑀺𑀓𑁆𑀔𑀸𑀧𑀤𑁂𑀲𑀼 𑀓𑀺𑀜𑁆𑀘𑀸𑀧𑀺 ‘‘𑀕𑀳𑀧𑀢𑀺 𑀦𑀸𑀫 𑀬𑁄 𑀓𑁄𑀘𑀺 𑀅𑀕𑀸𑀭𑀁 𑀅𑀚𑁆𑀛𑀸𑀯𑀲𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀧𑀜𑁆𑀘 𑀲𑀳𑀥𑀫𑁆𑀫𑀺𑀓𑁂 𑀞𑀧𑁂𑀢𑁆𑀯𑀸 𑀅𑀯𑀲𑁂𑀲𑀸 𑀘 𑀲𑀺𑀓𑁆𑀔𑀸𑀧𑀘𑁆𑀘𑀓𑁆𑀔𑀸𑀢𑀓𑁄 𑀘 𑀢𑀺𑀢𑁆𑀣𑀺𑀬𑁄 𑀘 𑀯𑁂𑀤𑀺𑀢𑀩𑁆𑀩𑁄.

𑀢𑀢𑀼𑀢𑁆𑀢𑀭𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀧𑀞𑀫𑀉𑀧𑀓𑁆𑀔𑀝𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁨𑁭-𑁮. 𑀅𑀧𑀺 𑀳𑁄𑀢𑀺 𑀘𑀺𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀫𑁂𑀬𑁆𑀬𑀸𑀢𑀺 𑀧𑀸𑀞𑀲𑁆𑀲 𑀫𑀬𑁆𑀳𑀦𑁆𑀢𑀺 𑀅𑀢𑁆𑀣𑁄. 𑀦 𑀇𑀫𑁂 𑀲𑀼𑀓𑀭𑀸, ‘‘𑀦 𑀇𑀫𑁂𑀲𑀁 𑀲𑀼𑀓𑀭𑀸’’𑀢𑀺 𑀯𑀸 𑀧𑀸𑀞𑁄. ‘‘𑀢𑀲𑁆𑀲 𑀦 𑀇𑀫𑁂𑀲𑀁 𑀲𑀼𑀓𑀭𑀸 𑀅𑀘𑁆𑀙𑀸𑀤𑁂𑀢𑀼𑀦𑁆𑀢𑀺 𑀅𑀢𑁆𑀣𑁄’’𑀢𑀺 𑀮𑀺𑀔𑀺𑀢𑀁. ‘‘𑀧𑀼𑀩𑁆𑀩𑁂 𑀅𑀧𑁆𑀧𑀯𑀸𑀭𑀺𑀢𑁄’’𑀢𑀺 𑀯𑀘𑀦𑀢𑁄 𑀢𑀲𑁆𑀫𑀺𑀁 𑀔𑀡𑁂 𑀧𑀯𑀸𑀭𑀺𑀢𑁄𑀧𑀺 𑀅𑀧𑁆𑀧𑀯𑀸𑀭𑀺𑀢𑁄𑀯 𑀳𑁄𑀢𑀻𑀢𑀺.

𑀧𑀞𑀫𑀉𑀧𑀓𑁆𑀔𑀝𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀤𑀼𑀢𑀺𑀬𑀉𑀧𑀓𑁆𑀔𑀝𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁩𑁨. 𑀤𑀼𑀢𑀺𑀬𑀉𑀧𑀓𑁆𑀔𑀝𑁂𑀦 𑀓𑀺𑀁𑀧𑀬𑁄𑀚𑀦𑀦𑁆𑀢𑀺? 𑀦𑀢𑁆𑀣𑀺, 𑀓𑁂𑀯𑀮𑀁 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀧𑀜𑁆𑀜𑀢𑁆𑀢𑀁 𑀪𑀺𑀓𑁆𑀔𑀼𑀦𑀺𑀬𑀸 𑀭𑀳𑁄𑀦𑀺𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀁 𑀯𑀺𑀬. 𑀏𑀯𑀁 𑀲𑀦𑁆𑀢𑁂 𑀢𑀦𑁆𑀢𑀺 𑀅𑀦𑀸𑀭𑁄𑀧𑁂𑀢𑀩𑁆𑀩𑀁 𑀪𑀯𑁂𑀬𑁆𑀬 𑀯𑀺𑀦𑀸𑀧𑀺 𑀢𑁂𑀦 𑀢𑀤𑀢𑁆𑀣𑀲𑀺𑀤𑁆𑀥𑀺𑀢𑁄, 𑀅𑀦𑀺𑀲𑁆𑀲𑀭𑀢𑁆𑀢𑀸, 𑀅𑀦𑀸𑀭𑁄𑀧𑁂𑀢𑀼𑀁 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀘. 𑀯𑀼𑀢𑁆𑀢𑀜𑁆𑀳𑁂𑀢𑀁 ‘‘𑀆𑀓𑀗𑁆𑀔𑀫𑀸𑀦𑁄, 𑀆𑀦𑀦𑁆𑀤, 𑀲𑀗𑁆𑀖𑁄…𑀧𑁂… 𑀲𑀫𑀽𑀳𑀦𑁂𑀬𑁆𑀬𑀸’’𑀢𑀺 (𑀤𑀻. 𑀦𑀺. 𑁨.𑁨𑁧𑁬). 𑀇𑀤𑀁 𑀲𑀩𑁆𑀩𑀫𑀓𑀸𑀭𑀡𑀁. 𑀦 𑀳𑀺 𑀩𑀼𑀤𑁆𑀥𑀸 𑀅𑀧𑁆𑀧𑀬𑁄𑀚𑀦𑀁 𑀯𑀸𑀘𑀁 𑀦𑀺𑀘𑁆𑀙𑀸𑀭𑁂𑀦𑁆𑀢𑀺, 𑀧𑀕𑁂𑀯 𑀲𑀺𑀓𑁆𑀔𑀸𑀧𑀤𑀁, 𑀢𑁂𑀦𑁂𑀯𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀢𑀜𑁆𑀳𑀺 𑀇𑀫𑀲𑁆𑀲 𑀅𑀦𑀼𑀧𑀜𑁆𑀜𑀢𑁆𑀢𑀺𑀲𑀤𑀺𑀲’’𑀦𑁆𑀢𑀺𑀆𑀤𑀺. 𑀅𑀦𑀼𑀧𑀜𑁆𑀜𑀢𑁆𑀢𑀺 𑀘 𑀦𑀺𑀧𑁆𑀧𑀬𑁄𑀚𑀦𑀸 𑀦𑀢𑁆𑀣𑀺, 𑀢𑀁𑀲𑀤𑀺𑀲𑀜𑁆𑀘𑁂𑀢𑀁, 𑀦 𑀦𑀺𑀧𑁆𑀧𑀬𑁄𑀚𑀦𑀦𑁆𑀢𑀺 𑀤𑀲𑁆𑀲𑀺𑀢𑀁 𑀳𑁄𑀢𑀺, 𑀏𑀯𑀁 𑀲𑀦𑁆𑀢𑁂 𑀓𑁄 𑀧𑀦𑁂𑀢𑁆𑀣 𑀯𑀺𑀲𑁂𑀲𑁄𑀢𑀺? 𑀢𑀢𑁄 𑀆𑀳 ‘‘𑀧𑀞𑀫𑀲𑀺𑀓𑁆𑀔𑀸𑀧𑀤𑁂 𑀏𑀓𑀲𑁆𑀲 𑀧𑀻𑀴𑀸 𑀓𑀢𑀸, 𑀤𑀼𑀢𑀺𑀬𑁂 𑀤𑁆𑀯𑀺𑀦𑁆𑀦𑀁, 𑀅𑀬𑀫𑁂𑀢𑁆𑀣 𑀯𑀺𑀲𑁂𑀲𑁄’’𑀢𑀺. 𑀇𑀫𑀺𑀦𑀸 𑀅𑀢𑁆𑀣𑀯𑀺𑀲𑁂𑀲𑁂𑀦 𑀓𑁄 𑀧𑀦𑀜𑁆𑀜𑁄 𑀅𑀢𑀺𑀭𑁂𑀓𑀢𑁆𑀣𑁄 𑀤𑀲𑁆𑀲𑀺𑀢𑁄𑀢𑀺? 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀢𑀸𑀯 𑀯𑀼𑀢𑁆𑀢𑀁 ‘‘𑀏𑀓𑀲𑁆𑀫𑀺𑀫𑁆𑀧𑀺 𑀯𑀢𑁆𑀣𑀼𑀲𑁆𑀫𑀺𑀁 𑀉𑀪𑀺𑀦𑁆𑀦𑀁 𑀧𑀻𑀴𑀸 𑀓𑀸𑀢𑀼𑀁 𑀯𑀝𑁆𑀝𑀢𑀻𑀢𑀺 𑀅𑀬𑀫𑀢𑀺𑀭𑁂𑀓𑀢𑁆𑀣𑁄 𑀤𑀲𑁆𑀲𑀺𑀢𑁄’’𑀢𑀺. 𑀢𑁂𑀦𑁂𑀢𑀁 𑀤𑀻𑀧𑁂𑀢𑀺 ‘‘𑀦 𑀓𑁂𑀯𑀮𑀁 𑀧𑀝𑀺𑀮𑀤𑁆𑀥𑀘𑀻𑀯𑀭𑀕𑀡𑀦𑀸𑀬𑁂𑀯 𑀆𑀧𑀢𑁆𑀢𑀺𑀕𑀡𑀦𑀸, 𑀧𑀻𑀴𑀺𑀢𑀧𑀼𑀕𑁆𑀕𑀮𑀲𑀗𑁆𑀔𑀸𑀢𑀯𑀢𑁆𑀣𑀼𑀕𑀡𑀦𑀸𑀬𑀧𑀻’’𑀢𑀺.

𑀳𑁄𑀦𑁆𑀢𑀺 𑀘𑁂𑀢𑁆𑀣 𑁋

‘‘𑀯𑀢𑁆𑀣𑀼𑀢𑁄 𑀕𑀡𑀦𑀸𑀬𑀸𑀧𑀺, 𑀲𑀺𑀬𑀸 𑀆𑀧𑀢𑁆𑀢𑀺 𑀦𑁂𑀓𑀢𑀸;

𑀇𑀢𑀺 𑀲𑀦𑁆𑀤𑀲𑁆𑀲𑀦𑀢𑁆𑀣𑀜𑁆𑀘, 𑀤𑀼𑀢𑀺𑀬𑀽𑀧𑀓𑁆𑀔𑀝𑀁 𑀇𑀥.

‘‘𑀓𑀸𑀬𑀲𑀁𑀲𑀕𑁆𑀕𑀲𑀺𑀓𑁆𑀔𑀸𑀬, 𑀯𑀺𑀪𑀗𑁆𑀕𑁂 𑀯𑀺𑀬 𑀓𑀺𑀦𑁆𑀢𑁂𑀢𑀁;

𑀏𑀓𑀺𑀢𑁆𑀣𑀺𑀬𑀸𑀧𑀺 𑀦𑁂𑀓𑀢𑀸, 𑀆𑀧𑀢𑁆𑀢𑀻𑀦𑀁 𑀧𑀬𑁄𑀕𑀢𑁄’’𑀢𑀺.

𑀅𑀧𑀺𑀘𑁂𑀢𑀁 𑀲𑀺𑀓𑁆𑀔𑀸𑀧𑀤𑀁 𑀢𑀁𑀚𑀸𑀢𑀺𑀓𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀩𑁆𑀩𑁂𑀲𑀼𑀧𑀺 𑀕𑀳𑁂𑀢𑀩𑁆𑀩𑀯𑀺𑀦𑀺𑀘𑁆𑀙𑀬𑀲𑁆𑀲 𑀦𑀬𑀤𑀲𑁆𑀲𑀦𑀧𑁆𑀧𑀬𑁄𑀚𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀆𑀳 𑀘 𑁋

‘‘𑀅𑀜𑁆𑀜𑀸𑀢𑀺𑀓𑀸𑀬 𑀩𑀳𑀼𑀢𑀸𑀬 𑀯𑀺𑀫𑀺𑀲𑁆𑀲𑀢𑀸𑀬,

𑀆𑀧𑀢𑁆𑀢𑀺𑀬𑀸𑀧𑀺 𑀩𑀳𑀼𑀢𑀸 𑀘 𑀯𑀺𑀫𑀺𑀲𑁆𑀲𑀢𑀸 𑀘;

𑀇𑀘𑁆𑀘𑁂𑀯𑀫𑀸𑀤𑀺𑀯𑀺𑀥𑀺𑀲𑀫𑁆𑀪𑀯𑀤𑀲𑁆𑀲𑀦𑀢𑁆𑀣𑀁,

𑀲𑀢𑁆𑀣𑀸 𑀉𑀧𑀓𑁆𑀔𑀝𑀫𑀺𑀤𑀁 𑀤𑀼𑀢𑀺𑀬𑀁 𑀅𑀯𑁄𑀘𑀸’’𑀢𑀺.

𑀢𑀲𑁆𑀲𑀸𑀬𑀁 𑀲𑀗𑁆𑀔𑁂𑀧𑀢𑁄 𑀅𑀥𑀺𑀧𑁆𑀧𑀸𑀬𑀧𑀼𑀩𑁆𑀩𑀗𑁆𑀕𑀫𑀸 𑀯𑀺𑀘𑀸𑀭𑀡𑀸 𑁋 𑀧𑀼𑀭𑀸𑀡𑀘𑀻𑀯𑀭𑀁 𑀏𑀓𑀫𑁂𑀯 𑀪𑀺𑀓𑁆𑀔𑀼 𑀪𑀺𑀓𑁆𑀔𑀼𑀦𑀻𑀳𑀺 𑀤𑁆𑀯𑀻𑀳𑀺, 𑀩𑀳𑀽𑀳𑀺 𑀯𑀸 𑀥𑁄𑀯𑀸𑀧𑁂𑀢𑀺, 𑀪𑀺𑀓𑁆𑀔𑀼𑀦𑀺𑀕𑀡𑀦𑀸𑀬 𑀧𑀸𑀘𑀺𑀢𑁆𑀢𑀺𑀬𑀕𑀡𑀦𑀸, 𑀢𑀣𑀸 𑀤𑁆𑀯𑀺𑀦𑁆𑀦𑀁, 𑀩𑀳𑀽𑀦𑀁 𑀯𑀸 𑀲𑀸𑀥𑀸𑀭𑀡𑀁 𑀏𑀓𑀫𑁂𑀯 𑀘𑀻𑀯𑀭𑀁 𑀅𑀜𑁆𑀜𑀢𑁆𑀭 𑀧𑀸𑀭𑀺𑀯𑀢𑁆𑀢𑀓𑀸 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀇𑀥𑀸𑀧𑀺 𑀢𑀣𑀸 𑀤𑁆𑀯𑀺𑀦𑁆𑀦𑀁, 𑀩𑀳𑀽𑀦𑀁 𑀯𑀸 𑀲𑀸𑀥𑀸𑀭𑀡𑀫𑁂𑀓𑀁 𑀯𑀺𑀜𑁆𑀜𑀸𑀧𑁂𑀢𑀺, 𑀯𑀺𑀜𑁆𑀜𑀢𑁆𑀢𑀧𑀼𑀕𑁆𑀕𑀮𑀕𑀡𑀦𑀸𑀬 𑀆𑀧𑀢𑁆𑀢𑀺𑀕𑀡𑀦𑀸. 𑀢𑀣𑀸 𑀅𑀜𑁆𑀜𑁂𑀲𑀼𑀧𑀺 𑀏𑀯𑀭𑀽𑀧𑁂𑀲𑀼 𑀲𑀺𑀓𑁆𑀔𑀸𑀧𑀤𑁂𑀲𑀼 𑀦𑀬𑁄 𑀦𑁂𑀢𑀩𑁆𑀩𑁄. 𑀅𑀬𑀁 𑀢𑀸𑀯 𑀩𑀳𑀼𑀢𑀸𑀬 𑀦𑀬𑁄. 𑀫𑀺𑀲𑁆𑀲𑀢𑀸𑀬 𑀧𑀦 𑀜𑀸𑀢𑀺𑀓𑀸𑀬, 𑀅𑀜𑁆𑀜𑀸𑀢𑀺𑀓𑀸𑀬 𑀘 𑀏𑀓𑀁 𑀥𑁄𑀯𑀸𑀧𑁂𑀢𑀺, 𑀏𑀓𑀢𑁄 𑀦𑀺𑀝𑁆𑀞𑀸𑀧𑀦𑁂 𑀏𑀓𑀁 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀣 𑀜𑀸𑀢𑀺𑀓𑀸 𑀧𑀞𑀫𑀁 𑀣𑁄𑀓𑀁 𑀥𑁄𑀯𑀺𑀢𑁆𑀯𑀸 𑀞𑀺𑀢𑀸, 𑀧𑀼𑀦 𑀅𑀜𑁆𑀜𑀸𑀢𑀺𑀓𑀸 𑀲𑀼𑀥𑁄𑀢𑀁 𑀓𑀭𑁄𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀅𑀣 𑀅𑀜𑁆𑀜𑀸𑀢𑀺𑀓𑀸 𑀧𑀞𑀫𑀁 𑀥𑁄𑀯𑀢𑀺, 𑀧𑀘𑁆𑀙𑀸 𑀜𑀸𑀢𑀺𑀓𑀸 𑀲𑀼𑀥𑁄𑀢𑀁 𑀓𑀭𑁄𑀢𑀺, 𑀅𑀜𑁆𑀜𑀸𑀢𑀺𑀓𑀸𑀬 𑀧𑀬𑁄𑀕𑀯𑀲𑁂𑀦 𑀪𑀺𑀓𑁆𑀔𑀼𑀦𑁄 𑀤𑀼𑀓𑁆𑀓𑀝𑀫𑁂𑀯. 𑀅𑀜𑁆𑀜𑀸𑀢𑀺𑀓𑀸𑀬 𑀘 𑀜𑀸𑀢𑀺𑀓𑀸𑀬 𑀘 𑀅𑀜𑁆𑀜𑀸𑀢𑀺𑀓𑀲𑀜𑁆𑀜𑀻, 𑀯𑁂𑀫𑀢𑀺𑀓𑁄, 𑀜𑀸𑀢𑀺𑀓𑀲𑀜𑁆𑀜𑀻 𑀯𑀸 𑀥𑁄𑀯𑀸𑀧𑁂𑀢𑀺, 𑀬𑀣𑀸𑀯𑀼𑀢𑁆𑀢𑀦𑀬𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀤𑀼𑀓𑁆𑀓𑀝𑀸𑀤𑀺𑀆𑀧𑀢𑁆𑀢𑀺𑀪𑁂𑀤𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀅𑀜𑁆𑀜𑀸𑀢𑀺𑀓𑀸𑀬 𑀘 𑀜𑀸𑀢𑀺𑀓𑀸𑀬 𑀘 𑀲𑀦𑁆𑀢𑀓𑀁 𑀘𑀻𑀯𑀭𑀁 𑀉𑀪𑁄𑀳𑀺 𑀏𑀓𑀢𑁄 𑀤𑀺𑀬𑁆𑀬𑀫𑀸𑀦𑀁 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲, 𑀅𑀜𑁆𑀜𑀸𑀢𑀺𑀓𑀸𑀬 𑀏𑀯 𑀳𑀢𑁆𑀣𑀢𑁄 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀘 𑀦𑀺𑀲𑁆𑀲𑀕𑁆𑀕𑀺𑀬𑀫𑁂𑀯. 𑀅𑀣 𑀜𑀸𑀢𑀺𑀓𑀸𑀬 𑀅𑀦𑀸𑀧𑀢𑁆𑀢𑀺. 𑀅𑀣 𑀉𑀪𑁄𑀲𑀼 𑀅𑀜𑁆𑀜𑀸𑀢𑀺𑀓𑀸𑀤𑀺𑀲𑀜𑁆𑀜𑀻 𑀯𑀼𑀢𑁆𑀢𑀦𑀬𑁂𑀦𑁂𑀯 𑀦𑀺𑀲𑁆𑀲𑀕𑁆𑀕𑀺𑀬𑀤𑀼𑀓𑁆𑀓𑀝𑀸𑀤𑀺𑀆𑀧𑀢𑁆𑀢𑀺𑀪𑁂𑀤𑀕𑀡𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀢𑀣𑀸 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑁂𑀲𑀼𑀧𑀺 𑀬𑀣𑀸𑀲𑀫𑁆𑀪𑀯𑀁 𑀦𑀬𑁄 𑀦𑁂𑀢𑀩𑁆𑀩𑁄. 𑀅𑀬𑀁 𑀫𑀺𑀲𑁆𑀲𑀢𑀸𑀬 𑀦𑀬𑁄. 𑀆𑀤𑀺-𑀲𑀤𑁆𑀤𑁂𑀦 𑀧𑀦 𑀅𑀦𑁂𑀓𑁂 𑀅𑀜𑁆𑀜𑀸𑀢𑀺𑀓𑀸 𑀯𑀺𑀜𑁆𑀜𑀢𑁆𑀢𑀸𑀯𑀺𑀜𑁆𑀜𑀢𑁆𑀢𑀧𑀼𑀕𑁆𑀕𑀮𑀕𑀡𑀦𑀸𑀬 𑀤𑀼𑀓𑁆𑀓𑀝𑀁. 𑀏𑀓𑁄 𑀤𑁂𑀢𑀺, 𑀏𑀓𑁄 𑀦 𑀤𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀅𑀣 𑀅𑀯𑀺𑀜𑁆𑀜𑀢𑁆𑀢𑁄 𑀤𑁂𑀢𑀺, 𑀦 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀅𑀣 𑀯𑀺𑀜𑁆𑀜𑀢𑁆𑀢𑀸𑀯𑀺𑀜𑁆𑀜𑀢𑁆𑀢𑀸𑀦𑀁 𑀲𑀸𑀥𑀸𑀭𑀡𑀁 𑀯𑀺𑀜𑁆𑀜𑀢𑁆𑀢𑁄 𑀤𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀫𑁂𑀯. 𑀉𑀪𑁄 𑀤𑁂𑀦𑁆𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀫𑁂𑀯. 𑀅𑀯𑀺𑀜𑁆𑀜𑀢𑁆𑀢𑁄 𑀤𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑁂𑀦 𑀅𑀦𑀸𑀧𑀢𑁆𑀢𑀺. 𑀯𑀺𑀜𑁆𑀜𑀢𑁆𑀢𑀲𑁆𑀲 𑀯𑀘𑀦𑁂𑀦 𑀅𑀯𑀺𑀜𑁆𑀜𑀢𑁆𑀢𑁄 𑀤𑁂𑀢𑀺, 𑀅𑀦𑀸𑀧𑀢𑁆𑀢𑀺 𑀏𑀯. 𑀢𑀣𑀸 𑀉𑀧𑀓𑁆𑀔𑀝𑀸𑀤𑀻𑀲𑀼𑀧𑀺 𑀬𑀣𑀸𑀲𑀫𑁆𑀪𑀯𑀁 𑀦𑀬𑁄 𑀦𑁂𑀢𑀩𑁆𑀩𑁄.

𑀤𑀼𑀢𑀺𑀬𑀉𑀧𑀓𑁆𑀔𑀝𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀭𑀸𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁩𑁭. ‘‘𑀦 𑀔𑁄 𑀫𑀬𑀁, 𑀆𑀯𑀼𑀲𑁄, 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀧𑀝𑀺𑀕𑁆𑀕𑀡𑁆𑀳𑀸𑀫…𑀧𑁂… 𑀓𑀸𑀮𑁂𑀦 𑀓𑀧𑁆𑀧𑀺𑀬’’𑀦𑁆𑀢𑀺 𑀇𑀢𑁄 𑀧𑀼𑀩𑁆𑀩𑁂 𑀏𑀯 𑀭𑀽𑀧𑀺𑀬𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑀲𑁆𑀲 𑀧𑀜𑁆𑀜𑀢𑁆𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀅𑀜𑁆𑀜𑀣𑀸 𑀆𑀬𑀲𑁆𑀫𑀸 𑀉𑀧𑀦𑀦𑁆𑀤𑁄 𑀫𑀁𑀲𑀲𑁆𑀲 𑀘𑁂𑀢𑀸𑀧𑀦𑁆𑀦𑀁 𑀏𑀓𑀫𑁆𑀧𑀺 𑀓𑀳𑀸𑀧𑀡𑀁 𑀳𑀢𑁆𑀣𑁂𑀦 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑁄 𑀢𑀢𑁄 𑀫𑀳𑀦𑁆𑀢𑀢𑀭𑀁 𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀓𑀣𑀁 𑀦 𑀧𑀝𑀺𑀕𑁆𑀕𑀡𑁆𑀳𑀺𑀲𑁆𑀲𑀢𑀺, 𑀏𑀯𑀁 𑀲𑀦𑁆𑀢𑁂𑀧𑀺 𑀘𑀻𑀯𑀭𑀧𑀝𑀺𑀲𑀁𑀬𑀼𑀢𑁆𑀢𑀢𑁆𑀢𑀸 𑀘𑀻𑀯𑀭𑀯𑀕𑁆𑀕𑁂 𑀲𑀗𑁆𑀕𑀸𑀬𑀺𑀁𑀲𑀽𑀢𑀺.

𑁫𑁩𑁮-𑁯. ‘‘𑀆𑀕𑀢𑀓𑀸𑀭𑀡𑀁 𑀪𑀜𑁆𑀚𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀦𑀦𑀼 𑀧𑀼𑀦 𑀘𑁄𑀤𑁂𑀢𑀼𑀁 𑀦 𑀮𑀪𑀢𑀻𑀢𑀺 𑀏𑀓𑁂. 𑀆𑀕𑀫𑀦𑀲𑁆𑀲 𑀲𑀸𑀢𑁆𑀣𑀓𑀁 𑀦 𑀳𑁄𑀢𑀺, 𑀘𑀻𑀯𑀭𑀁 𑀦 𑀮𑀪𑀺𑀲𑁆𑀲𑀢𑀺 𑀧𑀝𑀺𑀲𑀦𑁆𑀣𑀸𑀭𑀲𑁆𑀲 𑀓𑀢𑀢𑁆𑀢𑀸𑀢𑀺 𑀏𑀓𑁂. 𑀘𑁄𑀤𑀦𑀸𑀮𑀓𑁆𑀔𑀡𑀁 𑀦 𑀳𑁄𑀢𑀻𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀦𑁆𑀢𑀺 𑀏𑀓𑁂. ‘‘𑀞𑀢𑁆𑀯𑀸 𑀘𑁄𑀤𑁂𑀫𑀻’’𑀢𑀺 𑀆𑀕𑀢𑁄 𑀢𑀁 𑀞𑀸𑀦𑀁 𑀪𑀜𑁆𑀚𑀢𑀺, 𑀓𑀭𑁄𑀢𑀺 𑀘𑁂𑀓𑀁, 𑀢𑀻𑀡𑀺𑀧𑀺 𑀘𑁂 𑀓𑀭𑁄𑀢𑀺, 𑀏𑀓𑀫𑁂𑀯, 𑀏𑀓𑀯𑀘𑀦𑀢𑁆𑀢𑀸𑀢𑀺 𑀏𑀓𑁂. 𑀢𑀻𑀡𑀺 𑀞𑀸𑀦𑀸𑀦𑀺 𑀪𑀜𑁆𑀚𑀢𑀻𑀢𑀺 𑀏𑀓𑁂. 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄 ‘‘𑀦 𑀘𑁄𑀤𑀦𑀸𑀤𑀺𑀁 𑀪𑀜𑁆𑀚𑀢𑀺, 𑀘𑁄𑀤𑁂𑀢𑀼𑀓𑀸𑀫𑁄 𑀅𑀓𑀢𑁆𑀢𑀩𑁆𑀩𑀁 𑀅𑀓𑀸𑀲𑀺, 𑀢𑁂𑀦 𑀯𑀢𑁆𑀢𑀪𑁂𑀤𑁂 𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀤𑀢𑀺. 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁄 𑀧𑀦 ‘‘𑀆𑀲𑀦𑁂 𑀘𑁂 𑀦𑀺𑀲𑀻𑀤𑀢𑀺, 𑀏𑀓𑀸𑀬 𑀦𑀺𑀲𑀚𑁆𑀚𑀸𑀬 𑀤𑁆𑀯𑁂 𑀞𑀸𑀦𑀸𑀦𑀺 𑀪𑀜𑁆𑀚𑀢𑀺. 𑀆𑀫𑀺𑀲𑀁 𑀘𑁂 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀏𑀓𑁂𑀦 𑀧𑀝𑀺𑀕𑁆𑀕𑀳𑁂𑀦 𑀤𑁆𑀯𑁂 𑀞𑀸𑀦𑀸𑀦𑀺 𑀪𑀜𑁆𑀚𑀢𑀺. 𑀥𑀫𑁆𑀫𑀁 𑀘𑁂 𑀪𑀸𑀲𑀢𑀺, 𑀥𑀫𑁆𑀫𑀤𑁂𑀲𑀦𑀲𑀺𑀓𑁆𑀔𑀸𑀧𑀤𑁂 𑀯𑀼𑀢𑁆𑀢𑀧𑀭𑀺𑀘𑁆𑀙𑁂𑀤𑀸𑀬 𑀏𑀓𑀸𑀬 𑀯𑀸𑀘𑀸𑀬 𑀤𑁆𑀯𑁂 𑀞𑀸𑀦𑀸𑀦𑀺 𑀪𑀜𑁆𑀚𑀢𑀺, 𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀢𑀺. ‘‘𑀬𑀢𑁆𑀣𑀸’’𑀢𑀺 𑀯𑀼𑀢𑁆𑀢𑁂 𑀅𑀢𑁆𑀢𑀦𑁄 𑀏𑀯 𑀲𑀦𑁆𑀢𑀺𑀓𑀁 𑀕𑀦𑁆𑀢𑀩𑁆𑀩𑀦𑁆𑀢𑀺 𑀯𑀼𑀢𑁆𑀢𑀁 𑀯𑀺𑀬 𑀳𑁄𑀢𑀺. 𑀢𑁂𑀦 𑀯𑀼𑀢𑁆𑀢𑀁 ‘‘𑀩𑁆𑀬𑀜𑁆𑀚𑀦𑀁 𑀧𑀦 𑀦 𑀲𑀫𑁂𑀢𑀻’’𑀢𑀺. 𑀉𑀧𑀸𑀲𑀓𑁂𑀳𑀺 𑀆𑀡𑀢𑁆𑀢𑀸 𑀢𑀁. 𑀫𑀽𑀮𑀁 𑀅𑀲𑀸𑀤𑀺𑀬𑀦𑁆𑀢𑁂𑀦𑀸𑀢𑀺 𑀫𑀽𑀮𑀲𑁆𑀲 𑀅𑀓𑀧𑁆𑀧𑀺𑀬𑀪𑀸𑀯𑁂 𑀲𑀢𑀺 𑀅𑀲𑀸𑀤𑀺𑀬𑀦𑁆𑀢𑁂𑀦. 𑀢𑀜𑁆𑀘 𑀔𑁄 𑀘𑀺𑀢𑁆𑀢𑁂𑀦, 𑀦 𑀫𑀼𑀔𑁂𑀦. 𑀲𑀘𑁂 𑀏𑀯𑀁 𑀯𑀼𑀢𑁆𑀢𑁂 𑀅𑀓𑀧𑁆𑀧𑀺𑀬𑀁 𑀤𑀲𑁆𑀲𑁂𑀢𑀻𑀢𑀺 𑀓𑀢𑁆𑀯𑀸 𑀘𑀺𑀢𑁆𑀢𑁂𑀦 𑀅𑀓𑀧𑁆𑀧𑀺𑀬𑀁 𑀇𑀘𑁆𑀙𑀦𑁆𑀢𑁄𑀯 𑀫𑀼𑀔𑁂𑀦 𑀓𑀧𑁆𑀧𑀺𑀬𑀁 𑀦𑀺𑀤𑁆𑀤𑀺𑀲𑀢𑀺 ‘‘𑀘𑀻𑀯𑀭𑀁 𑀫𑁂 𑀤𑁂𑀣𑀸’’𑀢𑀺, 𑀦 𑀯𑀝𑁆𑀝𑀢𑀺. 𑀧𑀝𑀺𑀮𑀸𑀪𑁂 𑀭𑀽𑀧𑀺𑀬𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑁂𑀦 𑀆𑀧𑀢𑁆𑀢𑀺.

𑀢𑀢𑁆𑀭𑀸𑀬𑀁 𑀯𑀺𑀘𑀸𑀭𑀡𑀸 𑁋 𑀘𑀺𑀢𑁆𑀢𑁂𑀦 𑀲𑀸𑀤𑀺𑀬𑀦𑁆𑀢𑁄𑀧𑀺 𑀫𑀼𑀔𑁂𑀦 𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀦 𑀘𑁂 𑀯𑁄𑀳𑀭𑀢𑀺 ‘‘𑀓𑀳𑀸𑀧𑀡𑀸𑀭𑀳𑁂𑀦, 𑀧𑀸𑀤𑀸𑀭𑀳𑁂𑀦 𑀯𑀸 𑀓𑀧𑁆𑀧𑀺𑀬𑀪𑀡𑁆𑀟𑁂𑀦 𑀇𑀤𑀜𑁆𑀘𑀺𑀤𑀜𑁆𑀘 𑀆𑀳𑀭𑀸’’𑀢𑀺. 𑀓𑀺𑀜𑁆𑀘𑀸𑀧𑀺 𑀭𑀽𑀧𑀺𑀬𑀁 𑀲𑀦𑁆𑀥𑀸𑀬 𑀯𑀤𑀢𑀺, 𑀯𑀝𑁆𑀝𑀢𑀺 𑀏𑀯. 𑀓𑀲𑁆𑀫𑀸? 𑀓𑀜𑁆𑀘𑀺 𑀲𑀲𑁆𑀲𑀼𑀝𑁆𑀞𑀸𑀦𑀓𑀁 𑀪𑀽𑀫𑀺𑀧𑀤𑁂𑀲𑀁 𑀲𑀦𑁆𑀥𑀸𑀬 ‘‘𑀲𑀻𑀫𑀁 𑀤𑁂𑀫𑀸𑀢𑀺 𑀯𑀤𑀦𑁆𑀢𑀺, 𑀯𑀝𑁆𑀝𑀢𑀻’’𑀢𑀺 𑀯𑀘𑀦𑀢𑁄, ‘‘𑀯𑀺𑀳𑀸𑀭𑀲𑁆𑀲 𑀤𑁂𑀫𑀸’’𑀢𑀺 𑀯𑀼𑀢𑁆𑀢𑁂 ‘‘𑀧𑀝𑀺𑀓𑁆𑀔𑀺𑀧𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀘𑀦𑀢𑁄 𑀘. 𑀅𑀦𑀼𑀕𑀡𑁆𑀞𑀺𑀧𑀤𑁂 𑀧𑀦 𑀯𑀼𑀢𑁆𑀢𑀁 ‘‘𑀲𑀗𑁆𑀖𑀁 𑀲𑀦𑁆𑀥𑀸𑀬 ‘𑀯𑀺𑀳𑀸𑀭𑀲𑁆𑀲 𑀤𑁂𑀫𑀸’𑀢𑀺 𑀤𑀺𑀦𑁆𑀦𑀁 𑀕𑀭𑀼𑀪𑀡𑁆𑀟𑀁 𑀦 𑀳𑁄𑀢𑀺, 𑀤𑀓𑁆𑀔𑀺𑀡𑁄𑀤𑀓𑀁 𑀲𑀫𑁆𑀧𑀝𑀺𑀘𑁆𑀙𑀺𑀢𑀼𑀁, ‘𑀲𑀸𑀥𑀽’𑀢𑀺 𑀘 𑀯𑀢𑁆𑀢𑀼𑀁, 𑀅𑀦𑀼𑀫𑁄𑀤𑁂𑀢𑀼𑀜𑁆𑀘 𑀯𑀝𑁆𑀝𑀢𑀺. 𑀓𑀲𑁆𑀫𑀸? 𑀲𑀗𑁆𑀖𑀲𑁆𑀲 ‘𑀯𑀺𑀳𑀸𑀭𑁄’𑀢𑀺 𑀦𑀸𑀫𑀸𑀪𑀸𑀯𑀢𑁄, 𑀔𑁂𑀢𑁆𑀢𑀲𑁆𑀲𑁂𑀯 ‘𑀲𑀻𑀫𑀸’𑀢𑀺 𑀦𑀸𑀫𑀪𑀸𑀯𑀢𑁄 𑀘, 𑀘𑀺𑀢𑁆𑀢𑁂𑀦 𑀆𑀭𑀫𑁆𑀫𑀡𑀁 𑀓𑀢𑀁 𑀅𑀧𑁆𑀧𑀫𑀸𑀡𑀁, 𑀓𑀧𑁆𑀧𑀺𑀬𑀯𑁄𑀳𑀸𑀭𑁄𑀯 𑀧𑀫𑀸𑀡𑀁. 𑀓𑀧𑁆𑀧𑀺𑀬𑀫𑁂𑀯𑀸𑀘𑀺𑀓𑁆𑀔𑀺𑀢𑀢𑁆𑀢𑀸 ‘𑀦 𑀢𑁆𑀯𑁂𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦 𑀚𑀸𑀢𑀭𑀽𑀧𑀭𑀚𑀢𑀁 𑀲𑀸𑀤𑀺𑀢𑀩𑁆𑀩𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀦𑁆𑀢𑀺 𑀯𑀤𑀸𑀫𑀻’𑀢𑀺 (𑀫𑀳𑀸𑀯. 𑁨𑁯𑁯) 𑀯𑀘𑀦𑁂𑀦𑀧𑀺 𑀦 𑀯𑀺𑀭𑀼𑀚𑁆𑀛𑀢𑀺. 𑀓𑀧𑁆𑀧𑀺𑀬𑀯𑀘𑀦𑀧𑀘𑁆𑀘𑀬𑀸 𑀤𑀸𑀬𑀓𑁄 𑀲𑀬𑀫𑁂𑀯 𑀓𑀢𑁆𑀢𑀩𑁆𑀩𑀬𑀼𑀢𑁆𑀢𑀓𑀁 𑀚𑀸𑀦𑀺𑀲𑁆𑀲𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑀢𑁄 𑀤𑀸𑀬𑀓𑁂𑀦 𑀏𑀢𑀲𑁆𑀲 𑀅𑀥𑀺𑀧𑁆𑀧𑀸𑀬𑀁 𑀜𑀢𑁆𑀯𑀸 𑀓𑀧𑁆𑀧𑀺𑀬𑀓𑀸𑀭𑀓𑀲𑁆𑀲 𑀳𑀢𑁆𑀣𑁂 𑀞𑀧𑀺𑀢𑀁 𑀪𑀺𑀓𑁆𑀔𑀼𑀲𑁆𑀲 𑀲𑀦𑁆𑀢𑀓𑀫𑁂𑀯 𑀳𑁄𑀢𑀻’’𑀢𑀺. 𑀇𑀤𑀁 𑀲𑀩𑁆𑀩𑀫𑀬𑀼𑀢𑁆𑀢𑀁, 𑀓𑀲𑁆𑀫𑀸? 𑀲𑀻𑀫𑀸𑀯𑀺𑀳𑀸𑀭𑀯𑀘𑀦𑀲𑁆𑀲 𑀤𑀸𑀬𑀓𑀯𑀘𑀦𑀢𑁆𑀢𑀸. 𑀇𑀥 𑀘 𑀪𑀺𑀓𑁆𑀔𑀼𑀦𑁄 𑀯𑀘𑀦𑀁 𑀧𑀫𑀸𑀡𑀁. 𑀢𑁂𑀦𑁂𑀯𑀸𑀳 ‘‘𑀅𑀣𑀸𑀧𑀺 ‘𑀫𑀫 𑀢𑀴𑀸𑀓𑀁 𑀯𑀸 𑀧𑁄𑀓𑁆𑀔𑀭𑀡𑀺𑀁 𑀯𑀸 𑀲𑀗𑁆𑀖𑀲𑁆𑀲 𑀤𑀫𑁆𑀫𑀻’𑀢𑀺 𑀯𑀼𑀢𑁆𑀢𑁂 ‘𑀲𑀸𑀥𑀼, 𑀉𑀧𑀸𑀲𑀓, 𑀲𑀗𑁆𑀖𑁄 𑀧𑀸𑀦𑀻𑀬𑀁 𑀧𑀺𑀯𑀺𑀲𑁆𑀲𑀢𑀻’𑀢𑀺𑀆𑀤𑀻𑀦𑀺 𑀯𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺 𑀏𑀯𑀸’’𑀢𑀺. 𑀅𑀜𑁆𑀜𑀣𑀸 𑀔𑁂𑀢𑁆𑀢𑀁 𑀲𑀦𑁆𑀥𑀸𑀬 𑀪𑀺𑀓𑁆𑀔𑀼𑀦𑁄 𑀔𑁂𑀢𑁆𑀢𑀧𑀝𑀺𑀩𑀤𑁆𑀥𑀯𑀘𑀦𑀸𑀦𑀺 𑀲𑀻𑀫𑀸𑀯𑀘𑀦𑁂𑀦 𑀓𑀧𑁆𑀧𑀦𑁆𑀢𑀻𑀢𑀺 𑀆𑀧𑀚𑁆𑀚𑀢𑀺. 𑀅𑀯𑀺𑀳𑀸𑀭𑀲𑁆𑀲 𑀘 𑀪𑀺𑀓𑁆𑀔𑀼𑀲𑁆𑀲 𑀭𑀽𑀧𑀺𑀬𑀁 𑀤𑀲𑁆𑀲𑁂𑀢𑁆𑀯𑀸 ‘‘𑀇𑀤𑀁 𑀯𑀺𑀳𑀸𑀭𑀲𑁆𑀲 𑀤𑀫𑁆𑀫𑀻’’𑀢𑀺 𑀯𑀼𑀢𑁆𑀢𑁂 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀤𑀺𑀬𑁆𑀬𑀫𑀸𑀦𑀁 𑀚𑀸𑀦𑀦𑁆𑀢𑁂𑀦𑀸𑀧𑀺 𑀢𑀁 𑀅𑀧𑁆𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀁. 𑀢𑀣𑀸 𑀓𑀳𑀸𑀧𑀡𑀸𑀭𑀳𑀸𑀤𑀺𑀦𑁄 𑀅𑀓𑀧𑁆𑀧𑀺𑀬𑀪𑀡𑁆𑀟𑀪𑀸𑀯𑀁, 𑀓𑀳𑀸𑀧𑀡𑀸𑀤𑀺𑀪𑀸𑀯𑀫𑁂𑀯 𑀯𑀸 𑀚𑀸𑀦𑀦𑁆𑀢𑀫𑁂𑀯 𑀲𑀦𑁆𑀥𑀸𑀬 𑀢𑀣𑀸𑀯𑁄𑀳𑀭𑀦𑁆𑀢𑀲𑁆𑀲 𑀘 𑀅𑀦𑀸𑀧𑀢𑁆𑀢𑀻𑀢𑀺 𑀆𑀧𑀚𑁆𑀚𑀢𑀺. ‘‘𑀦 𑀢𑁆𑀯𑁂𑀯𑀸𑀳𑀁, 𑀪𑀺𑀓𑁆𑀔𑀯𑁂, 𑀓𑁂𑀦𑀘𑀺 𑀧𑀭𑀺𑀬𑀸𑀬𑁂𑀦𑀸’’𑀢𑀺 𑀦𑀺𑀧𑁆𑀧𑀤𑁂𑀲𑀢𑁄 𑀯𑀼𑀢𑁆𑀢𑀢𑁆𑀢𑀸 𑀦 𑀲𑀓𑁆𑀓𑀸 𑀮𑁂𑀲𑀁 𑀑𑀟𑁆𑀟𑁂𑀢𑀼𑀦𑁆𑀢𑀺 𑀦𑁄 𑀢𑀓𑁆𑀓𑁄, 𑀯𑀺𑀘𑀸𑀭𑁂𑀢𑁆𑀯𑀸 𑀧𑀦 𑀕𑀳𑁂𑀢𑀩𑁆𑀩𑀁. ‘‘𑀦𑁄 𑀘𑁂 𑀇𑀘𑁆𑀙𑀢𑀺, 𑀦 𑀓𑀣𑁂𑀢𑀩𑁆𑀩’’𑀦𑁆𑀢𑀺 𑀯𑀘𑀦𑀢𑁄 𑀬𑀣𑀸𑀯𑀼𑀢𑁆𑀢𑀲𑀸𑀫𑀺𑀘𑀺𑀬𑀸 𑀅𑀓𑀭𑀡𑁂 𑀅𑀦𑀸𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸𑀢𑀺 𑀤𑀲𑁆𑀲𑁂𑀢𑀺.

‘‘𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑁂𑀲𑀼 𑀯𑀺𑀬 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀯𑀘𑀦𑀢𑁄 𑀬𑀣𑀸𑀯𑀼𑀢𑁆𑀢𑀲𑀸𑀫𑀺𑀘𑀺𑀫𑁆𑀧𑀺 𑀦 𑀓𑀢𑁆𑀯𑀸 𑀘𑁂 𑀦𑀺𑀧𑁆𑀨𑀸𑀤𑁂𑀢𑀺, 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑁂𑀦 𑀓𑀸𑀭𑁂𑀢𑀩𑁆𑀩𑁄𑀢𑀺 𑀤𑀲𑁆𑀲𑁂𑀢𑀺. 𑀓𑀧𑁆𑀧𑀺𑀬𑀓𑀸𑀭𑀓𑀸 𑀲𑀬𑀫𑁂𑀯 𑀘𑁄𑀤𑁂𑀢𑁆𑀯𑀸 𑀤𑁂𑀦𑁆𑀢𑀺, 𑀯𑀝𑁆𑀝𑀢𑀺. ‘‘𑀲𑀬𑀁 𑀓𑀭𑀡𑀫𑁂𑀯 𑀧𑀝𑀺𑀓𑁆𑀔𑀺𑀢𑁆𑀢’’𑀦𑁆𑀢𑀺 𑀘 𑀯𑀤𑀦𑁆𑀢𑀺. 𑀧𑀺𑀡𑁆𑀟𑀧𑀸𑀢𑀸𑀤𑀻𑀦𑀁 …𑀧𑁂… 𑀏𑀲𑁂𑀯 𑀦𑀬𑁄𑀢𑀺 𑀏𑀢𑁆𑀣 ‘‘𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀤𑀦𑁆𑀢𑀺, 𑀢𑀁 𑀦 𑀲𑀼𑀦𑁆𑀤𑀭𑀁, 𑀤𑀤𑀦𑁆𑀢𑁂𑀲𑀼𑀧𑀻𑀢𑀺 𑀅𑀧𑀺-𑀲𑀤𑁆𑀤𑁂𑀦 𑀲𑀗𑁆𑀕𑀳𑀺𑀢𑀢𑁆𑀢𑀸 𑀦𑀺𑀲𑁆𑀲𑀕𑁆𑀕𑀺𑀬𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀚𑀸𑀢𑀭𑀽𑀧𑀭𑀚𑀢𑀁 ‘‘𑀲𑀗𑁆𑀖𑁂 𑀲𑀸𑀤𑀺𑀢𑁂 𑀤𑀼𑀓𑁆𑀓𑀝’’𑀦𑁆𑀢𑀺 𑀘 𑀯𑀺𑀓𑀧𑁆𑀧𑁂𑀦𑁆𑀢𑀺. 𑀢𑀁 𑀯𑀺𑀲𑁂𑀲𑁂𑀢𑁆𑀯𑀸 𑀦𑀯𑀼𑀢𑁆𑀢𑀢𑁆𑀢𑀸 𑀧𑀸𑀘𑀺𑀢𑁆𑀢𑀺𑀬𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺. ‘‘𑀦𑀺𑀲𑁆𑀲𑀕𑁆𑀕𑀺𑀬𑀫𑁂𑀯𑀸𑀢𑀺 𑀬𑁂𑀯𑀸𑀧𑀦𑀓𑀲𑀺𑀓𑁆𑀔𑀸𑀧𑀤𑁂𑀲𑀼 𑀲𑀺𑀬𑀸’’𑀢𑀺 𑀯𑀤𑀦𑁆𑀢𑀺, 𑀉𑀧𑀧𑀭𑀺𑀓𑁆𑀔𑀺𑀢𑀩𑁆𑀩𑀁. ‘‘𑀬𑀲𑁆𑀲 𑀓𑀲𑁆𑀲𑀘𑀺 𑀳𑀺 𑀅𑀜𑁆𑀜𑀲𑁆𑀲…𑀧𑁂… 𑀫𑀳𑀸𑀧𑀘𑁆𑀘𑀭𑀺𑀬𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀘𑀦𑀢𑁄 𑀅𑀧𑀩𑁆𑀩𑀚𑀺𑀢𑀸𑀦𑀁 𑀅𑀦𑁆𑀢𑀫𑀲𑁄 𑀫𑀸𑀢𑀸𑀧𑀺𑀢𑀽𑀦𑀫𑁆𑀧𑀺 𑀅𑀢𑁆𑀣𑀸𑀬 𑀲𑀫𑁆𑀧𑀝𑀺𑀘𑁆𑀙𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀤𑀲𑁆𑀲𑁂𑀢𑀺.

𑀲𑀩𑁆𑀩𑀢𑁆𑀣 𑀲𑀫𑁆𑀧𑀝𑀺𑀘𑁆𑀙𑀦𑀁 𑀦𑀸𑀫 ‘‘𑀉𑀕𑁆𑀕𑀡𑁆𑀳𑁂𑀬𑁆𑀬 𑀯𑀸 𑀉𑀕𑁆𑀕𑀡𑁆𑀳𑀸𑀧𑁂𑀬𑁆𑀬𑀯𑀸 𑀉𑀧𑀦𑀺𑀓𑁆𑀔𑀺𑀢𑁆𑀢𑀁 𑀯𑀸 𑀲𑀸𑀤𑀺𑀬𑁂𑀬𑁆𑀬𑀸’’𑀢𑀺 𑀏𑀯𑀁 𑀯𑀼𑀢𑁆𑀢𑀮𑀓𑁆𑀔𑀡𑀫𑁂𑀯. 𑀏𑀯𑀁 𑀲𑀦𑁆𑀢𑁂𑀧𑀺 𑀓𑀢𑁆𑀣𑀘𑀺 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀁, 𑀓𑀢𑁆𑀣𑀘𑀺 𑀦 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀁, 𑀓𑀢𑁆𑀣𑀘𑀺 𑀧𑀝𑀺𑀓𑁆𑀔𑀺𑀢𑁆𑀢𑀁 𑀲𑀸𑀤𑀺𑀢𑀼𑀁 𑀯𑀝𑁆𑀝𑀢𑀺, 𑀏𑀯𑀁 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑀁 𑀓𑀺𑀜𑁆𑀘𑀺 𑀯𑀝𑁆𑀝𑀢𑀺, 𑀇𑀤𑀁 𑀲𑀩𑁆𑀩𑀫𑁆𑀧𑀺 𑀤𑀲𑁆𑀲𑁂𑀢𑀼𑀁 ‘‘𑀲𑀘𑁂 𑀧𑀦𑀸’’𑀢𑀺 𑀯𑀺𑀢𑁆𑀣𑀸𑀭𑁄 𑀆𑀭𑀤𑁆𑀥𑁄. 𑀢𑀢𑁆𑀣 ‘‘𑀘𑁂𑀢𑀺𑀬𑀲𑁆𑀲…𑀧𑁂… 𑀦 𑀯𑀝𑁆𑀝𑀢𑀻’’𑀢𑀺 𑀯𑀘𑀦𑀢𑁄 𑀅𑀧𑁆𑀧𑀝𑀺𑀓𑁆𑀔𑀺𑀢𑁆𑀢𑀁 𑀯𑀺𑀳𑀸𑀭𑀲𑁆𑀲 𑀤𑀺𑀦𑁆𑀦𑀁 𑀲𑀸𑀤𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀲𑀺𑀤𑁆𑀥𑀁. 𑀢𑀣𑀸 𑀣𑁂𑀭𑀲𑁆𑀲 ‘‘𑀫𑀸𑀢𑀼𑀬𑀸 𑀤𑁂𑀫𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑁂𑀧𑀺 𑀧𑀝𑀺𑀕𑁆𑀕𑀳𑀡𑁂 𑀆𑀧𑀢𑁆𑀢𑀺 𑀧𑀸𑀘𑀺𑀢𑁆𑀢𑀺𑀬𑀫𑁂𑀯. 𑀲𑀸𑀧𑀢𑁆𑀢𑀺𑀓𑁄 𑀳𑁄𑀢𑀻𑀢𑀺 𑀏𑀢𑁆𑀣 𑀓𑀸𑀬 𑀆𑀧𑀢𑁆𑀢𑀺𑀬𑀸 𑀲𑀸𑀧𑀢𑁆𑀢𑀺𑀓𑁄 𑀳𑁄𑀢𑀻𑀢𑀺? 𑀤𑀼𑀓𑁆𑀓𑀝𑀸𑀧𑀢𑁆𑀢𑀺𑀬𑀸𑀢𑀺 𑀏𑀓𑁂. 𑀦 𑀬𑀸𑀬 𑀓𑀸𑀬𑀘𑀺, 𑀓𑁂𑀯𑀮𑀁 𑀅𑀝𑁆𑀞𑀸𑀦𑁂 𑀘𑁄𑀤𑁂𑀢𑀻𑀢𑀺 𑀓𑀢𑁆𑀯𑀸 ‘‘𑀲𑀸𑀧𑀢𑁆𑀢𑀺𑀓𑁄’’𑀢𑀺 𑀯𑀼𑀢𑁆𑀢𑀁. 𑀬𑀣𑀸 𑀓𑀣𑀦𑁆𑀢𑀺? ‘‘𑀧𑀜𑁆𑀘𑀳𑀺, 𑀪𑀺𑀓𑁆𑀔𑀯𑁂, 𑀅𑀗𑁆𑀕𑁂𑀳𑀺 𑀲𑀫𑀦𑁆𑀦𑀸𑀕𑀢𑁄 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑁄 𑀧𑀡𑀸𑀫𑁂𑀢𑀩𑁆𑀩𑁄…𑀧𑁂… 𑀧𑀡𑀸𑀫𑁂𑀦𑁆𑀢𑁄 𑀅𑀦𑀢𑀺𑀲𑀸𑀭𑁄’’𑀢𑀺 (𑀫𑀳𑀸𑀯. 𑁬𑁮) 𑀏𑀢𑁆𑀣 𑀦 𑀲𑀫𑁆𑀫𑀸𑀯𑀢𑁆𑀢𑀦𑁆𑀢𑀁𑀬𑁂𑀯 𑀅𑀧𑀡𑀸𑀫𑁂𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁. 𑀬𑀣𑀸𑀳 𑁋 ‘‘𑀦 𑀘, 𑀪𑀺𑀓𑁆𑀔𑀯𑁂, 𑀅𑀲𑀫𑁆𑀫𑀸𑀯𑀢𑁆𑀢𑀦𑁆𑀢𑁄 𑀦 𑀧𑀡𑀸𑀫𑁂𑀢𑀩𑁆𑀩𑁄, 𑀬𑁄 𑀦 𑀧𑀡𑀸𑀫𑁂𑀬𑁆𑀬, 𑀆𑀧𑀢𑁆𑀢𑀺𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀫𑀳𑀸𑀯. 𑁬𑁮), 𑀢𑀲𑁆𑀫𑀸 𑀅𑀥𑀺𑀫𑀢𑁆𑀢𑀧𑁂𑀫𑀸𑀤𑀺𑀅𑀪𑀸𑀯𑁂𑀧𑀺 𑀅𑀧𑀡𑀸𑀫𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺 𑀤𑀺𑀲𑁆𑀲𑀢𑀺. 𑀅𑀧𑀺𑀘 ‘‘𑀲𑀸𑀢𑀺𑀲𑀸𑀭𑁄 𑀳𑁄𑀢𑀻’’𑀢𑀺 𑀯𑀼𑀢𑁆𑀢𑀁. 𑀏𑀯𑀁𑀲𑀫𑁆𑀧𑀤𑀫𑀺𑀤𑀁 𑀤𑀝𑁆𑀞𑀩𑁆𑀩𑀁. 𑀅𑀝𑁆𑀞𑀓𑀣𑀸𑀬 ‘‘𑀲𑀸𑀢𑀺𑀲𑀸𑀭𑁄 𑀳𑁄𑀢𑀻𑀢𑀺 𑀲𑀤𑁄𑀲𑁄 𑀳𑁄𑀢𑀺, 𑀆𑀧𑀢𑁆𑀢𑀺𑀁 𑀆𑀧𑀚𑁆𑀚𑀢𑀻’’𑀢𑀺 (𑀫𑀳𑀸𑀯. 𑀅𑀝𑁆𑀞. 𑁬𑁮) 𑀯𑀼𑀢𑁆𑀢𑀢𑁆𑀢𑀸 𑀦 𑀬𑀼𑀢𑁆𑀢𑀦𑁆𑀢𑀺 𑀘𑁂? 𑀦, 𑀢𑀤𑀦𑀦𑁆𑀢𑀭𑀫𑁂𑀯 𑀢𑀁𑀫𑀺𑀘𑁆𑀙𑀸𑀕𑀸𑀳𑀦𑀺𑀯𑀢𑁆𑀢𑀦𑀢𑁆𑀣𑀁, 𑀢𑀲𑁆𑀫𑀸 ‘‘𑀦 𑀲𑀫𑁆𑀫𑀸𑀯𑀢𑁆𑀢𑀦𑁆𑀢𑁄 𑀧𑀡𑀸𑀫𑁂𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀅𑀦𑀸𑀧𑀢𑁆𑀢𑀺𑀓𑀸 𑀓𑀢𑀸𑀢𑀺. 𑀤𑀼𑀓𑁆𑀓𑀝𑀸𑀧𑀢𑁆𑀢𑀺 𑀳𑁄𑀢𑀻𑀢𑀺 𑀆𑀘𑀭𑀺𑀬𑁄, 𑀯𑀻𑀫𑀁𑀲𑀺𑀢𑀩𑁆𑀩𑀁. ‘‘𑀓𑀧𑁆𑀧𑀺𑀬𑀪𑀡𑁆𑀟𑀫𑁆𑀧𑀺 𑀅𑀓𑀧𑁆𑀧𑀺𑀬𑀫𑁂𑀯𑀸𑀢𑀺 𑀢𑀴𑀸𑀓𑀢𑁄 𑀦𑀺𑀧𑁆𑀨𑀦𑁆𑀦𑀥𑀜𑁆𑀜𑁂𑀦 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀮𑀤𑁆𑀥𑀁 𑀕𑁄𑀭𑀲𑀫𑁆𑀧𑀺 𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁.

𑀓𑀧𑁆𑀧𑀺𑀬𑀯𑁄𑀳𑀸𑀭𑁂𑀧𑀺 𑀯𑀺𑀥𑀸𑀦𑀁 𑀯𑀓𑁆𑀔𑀸𑀫, 𑀲𑁂𑀬𑁆𑀬𑀣𑀺𑀤𑀁 𑁋 ‘‘𑀉𑀤𑀓𑀯𑀲𑁂𑀦𑀸’’𑀢𑀺𑀆𑀤𑀺. 𑀤𑀼𑀩𑁆𑀩𑀺𑀦𑀺𑀩𑁆𑀪𑁄𑀕𑀁 𑀳𑁄𑀢𑀻𑀢𑀺 𑀇𑀤𑀁 𑀧𑀭𑀢𑁄 ‘‘𑀢𑀲𑁆𑀲𑁂𑀯 𑀅𑀓𑀧𑁆𑀧𑀺𑀬𑀁. 𑀓𑀲𑁆𑀫𑀸? 𑀥𑀜𑁆𑀜𑀲𑁆𑀲 𑀯𑀺𑀘𑀸𑀭𑀺𑀢𑀢𑁆𑀢𑀸’’𑀢𑀺 𑀇𑀫𑀺𑀦𑀸 𑀅𑀲𑀤𑀺𑀲𑀁, 𑀢𑀲𑁆𑀫𑀸 𑀲𑀼𑀯𑀼𑀢𑁆𑀢𑀁. 𑀇𑀤𑀜𑁆𑀳𑀺 𑀪𑀺𑀓𑁆𑀔𑀼𑀲𑁆𑀲 𑀧𑀬𑁄𑀕𑀯𑀲𑁂𑀦 𑀆𑀤𑀺𑀢𑁄 𑀧𑀝𑁆𑀞𑀸𑀬 𑀉𑀧𑁆𑀧𑀦𑁆𑀦𑁂𑀦 𑀫𑀺𑀲𑁆𑀲𑀦𑁆𑀢𑀺. 𑀅𑀓𑀢𑀧𑀼𑀩𑁆𑀩𑀁 𑀦𑀯𑀲𑀲𑁆𑀲𑀁 𑀦𑀸𑀫. 𑀔𑀮𑁂 𑀯𑀸 𑀞𑀢𑁆𑀯𑀸 𑀭𑀓𑁆𑀔𑀢𑀻𑀢𑀺 ‘‘𑀇𑀤𑀁 𑀯𑀸 𑀏𑀢𑁆𑀢𑀓𑀁 𑀯𑀸 𑀫𑀸 𑀕𑀡𑁆𑀳, 𑀇𑀤𑀁 𑀕𑀳𑁂𑀢𑀼𑀁 𑀮𑀩𑁆𑀪𑀢𑀻’’𑀢𑀺 𑀯𑀸 ‘‘𑀇𑀢𑁄 𑀅𑀧𑀦𑁂𑀳𑀺, 𑀇𑀥 𑀧𑀼𑀜𑁆𑀚𑀁 𑀓𑀭𑁄𑀳𑀻’’𑀢𑀺 𑀏𑀯𑀫𑀸𑀤𑀺𑀦𑀸 𑀯𑀸 𑀧𑀬𑁄𑀕𑁂𑀦 𑀘𑁂 𑀭𑀓𑁆𑀔𑀢𑀺, 𑀢𑀁 𑀅𑀓𑀧𑁆𑀧𑀺𑀬𑀁. ‘‘𑀲𑀘𑁂 ‘𑀫𑀬𑀺𑀞𑀺𑀢𑁂 𑀭𑀓𑁆𑀔𑀺𑀢𑀁 𑀳𑁄𑀢𑀻’𑀢𑀺 𑀭𑀓𑁆𑀔𑀢𑀺, 𑀕𑀡𑁆𑀳𑀦𑁆𑀢𑁂 𑀯𑀸 𑀧𑀲𑁆𑀲𑀺𑀢𑁆𑀯𑀸 ‘𑀓𑀺𑀁 𑀓𑀭𑁄𑀣𑀸’𑀢𑀺, 𑀪𑀡𑀢𑀺 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀁 𑀬𑀼𑀢𑁆𑀢𑀁. 𑀭𑀽𑀧𑀺𑀬𑀧𑀝𑀺𑀕𑁆𑀕𑀳𑀡𑀲𑀺𑀓𑁆𑀔𑀸𑀧𑀤𑁂 ‘‘𑀤𑁆𑀯𑀸𑀭𑀁 𑀧𑀺𑀤𑀳𑀺𑀢𑁆𑀯𑀸 𑀭𑀓𑁆𑀔𑀦𑁆𑀢𑁂𑀦 𑀯𑀲𑀺𑀢𑀩𑁆𑀩’’𑀦𑁆𑀢𑀺 𑀳𑀺 𑀯𑀼𑀢𑁆𑀢𑀁. 𑀢𑀲𑁆𑀲𑁂𑀯 𑀢𑀁 𑀅𑀓𑀧𑁆𑀧𑀺𑀬𑀁. 𑀓𑀲𑁆𑀫𑀸? 𑀅𑀧𑀼𑀩𑁆𑀩𑀲𑁆𑀲 𑀅𑀦𑀼𑀧𑁆𑀧𑀸𑀤𑀺𑀢𑀢𑁆𑀢𑀸. 𑀳𑁂𑀝𑁆𑀞𑀸 ‘‘𑀲𑀲𑁆𑀲𑀁 𑀓𑀢𑁆𑀯𑀸 𑀆𑀳𑀭𑀣𑀸’’𑀢𑀺 𑀯𑀢𑁆𑀢𑀼𑀁 𑀧𑀦 𑀦 𑀯𑀝𑁆𑀝𑀢𑀻𑀢𑀺. 𑀧𑀡𑁆𑀡𑁂𑀧𑀺 𑀏𑀲𑁂𑀯 𑀦𑀬𑁄. ‘‘𑀧𑀓𑀢𑀺𑀬𑀸 𑀲𑀬𑀫𑁂𑀯 𑀓𑀭𑁄𑀦𑁆𑀢𑀸𑀦𑀁 𑀉𑀲𑁆𑀲𑀸𑀳𑀚𑀦𑀦𑀢𑁄’’𑀢𑀺 𑀯𑀼𑀢𑁆𑀢𑀁. 𑀓𑀲𑁆𑀫𑀸? ‘‘𑀓𑀳𑀸𑀧𑀡𑀸𑀦𑀁 𑀯𑀺𑀘𑀸𑀭𑀺𑀢𑀢𑁆𑀢𑀸’’𑀢𑀺 𑀯𑀘𑀦𑀢𑁄, 𑀧𑀕𑁂𑀯 𑀉𑀝𑁆𑀞𑀸𑀧𑀺𑀢𑀢𑁆𑀢𑀸𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺. 𑀲𑀘𑁂 𑀤𑀸𑀬𑀓𑀸 𑀯𑀸 𑀲𑀗𑁆𑀖𑀲𑁆𑀲 𑀕𑀸𑀫𑀔𑁂𑀢𑁆𑀢𑀸𑀭𑀸𑀫𑀸𑀤𑀺𑀁 𑀓𑁂𑀡𑀺𑀬𑀸 𑀕𑀳𑀺𑀢𑀫𑀦𑀼𑀲𑁆𑀲𑀸 𑀯𑀸 𑀢𑀢𑁆𑀣 𑀓𑀼𑀝𑀼𑀫𑁆𑀩𑀺𑀦𑁄 ‘‘𑀇𑀫𑁂 𑀲𑀗𑁆𑀖𑀲𑁆𑀲 𑀓𑀳𑀸𑀧𑀡𑀸 𑀆𑀳𑀝𑀸’’𑀢𑀺 𑀯𑀤𑀦𑁆𑀢𑀺, ‘‘𑀦 𑀓𑀧𑁆𑀧𑀢𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀢𑁆𑀢𑀩𑁆𑀩𑀁. 𑀓𑀧𑁆𑀧𑀺𑀬𑀓𑀸𑀭𑀓𑀸𑀯 𑀘𑁂 𑀯𑀤𑀦𑁆𑀢𑀺, ‘‘𑀲𑀗𑁆𑀖𑀲𑁆𑀲 𑀓𑀳𑀸𑀧𑀡𑀸 𑀦 𑀓𑀧𑁆𑀧𑀦𑁆𑀢𑀺, 𑀲𑀧𑁆𑀧𑀺𑀆𑀤𑀻𑀦𑀺 𑀯𑀝𑁆𑀝𑀦𑁆𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁, 𑀢𑀲𑁆𑀫𑀸 ‘‘𑀲𑀗𑁆𑀖𑀲𑁆𑀲 𑀓𑀧𑁆𑀧𑀺𑀬𑀓𑀸𑀭𑀓𑁂 𑀯𑀸 𑀕𑀼𑀢𑁆𑀢𑀝𑁆𑀞𑀸𑀦𑀁 𑀯𑀸 𑀆𑀘𑀺𑀓𑁆𑀔𑀣𑀸’’𑀢𑀺 𑀯𑀢𑁆𑀯𑀸 𑀢𑁂𑀳𑀺 𑀲𑀫𑁆𑀧𑀸𑀤𑀺𑀢𑀁 𑀓𑁂𑀦𑀘𑀺 𑀅𑀓𑀢𑁆𑀢𑀩𑁆𑀩𑀢𑀸𑀬 ‘‘𑀇𑀫𑀺𑀦𑀸 𑀲𑀧𑁆𑀧𑀺𑀁 𑀆𑀳𑀭𑀸𑀳𑀻’’𑀢𑀺 𑀯𑀺𑀘𑀸𑀭𑁂𑀢𑀺 𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀇𑀢𑀭𑁂𑀲𑀁 𑀓𑀧𑁆𑀧𑀺𑀬𑀁 𑀧𑀭𑀢𑁄 𑀧𑀢𑁆𑀢𑀘𑀢𑀼𑀓𑁆𑀓𑁂 𑀘𑀢𑀼𑀢𑁆𑀣𑀧𑀢𑁆𑀢𑁄 𑀯𑀺𑀬. 𑀯𑀼𑀢𑁆𑀢𑀜𑁆𑀳𑀺 𑀢𑀢𑁆𑀣 ‘‘𑀇𑀫𑁂 𑀓𑀳𑀸𑀧𑀡𑁂 𑀕𑀳𑁂𑀢𑁆𑀯𑀸 𑀇𑀫𑀁 𑀤𑁂𑀳𑀻’𑀢𑀺 𑀓𑀳𑀸𑀧𑀡𑁂 𑀤𑀸𑀧𑁂𑀢𑁆𑀯𑀸 𑀕𑀳𑀺𑀢𑁄, 𑀅𑀬𑀁 𑀧𑀢𑁆𑀢𑁄 𑀏𑀢𑀲𑁆𑀲𑁂𑀯 𑀪𑀺𑀓𑁆𑀔𑀼𑀦𑁄 𑀦 𑀯𑀝𑁆𑀝𑀢𑀺, 𑀤𑀼𑀩𑁆𑀩𑀺𑀘𑀸𑀭𑀺𑀢𑀢𑁆𑀢𑀸, 𑀅𑀜𑁆𑀜𑁂𑀲𑀁 𑀧𑀦 𑀯𑀝𑁆𑀝𑀢𑀺, 𑀫𑀽𑀮𑀲𑁆𑀲 𑀅𑀲𑀫𑁆𑀧𑀝𑀺𑀘𑁆𑀙𑀺𑀢𑀢𑁆𑀢𑀸’’𑀢𑀺𑀆𑀤𑀺. 𑀬𑀤𑀺 𑀏𑀯𑀁 𑀲𑀩𑁆𑀩𑁂𑀲𑀁 𑀅𑀓𑀧𑁆𑀧𑀺𑀬𑀁. 𑀓𑀲𑁆𑀫𑀸? 𑀓𑀳𑀸𑀧𑀡𑀸𑀦𑀁 𑀯𑀺𑀘𑀸𑀭𑀺𑀢𑀢𑁆𑀢𑀸𑀢𑀺. 𑀇𑀤𑀁 𑀤𑀼𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀦, 𑀫𑀽𑀮𑀲𑁆𑀲 𑀲𑀫𑁆𑀧𑀝𑀺𑀘𑁆𑀙𑀺𑀢𑀝𑁆𑀞𑀸𑀦𑀁 𑀲𑀦𑁆𑀥𑀸𑀬 𑀇𑀫𑀲𑁆𑀲 𑀯𑀼𑀢𑁆𑀢𑀢𑁆𑀢𑀸 𑀧𑀢𑁆𑀢𑀘𑀢𑀼𑀓𑁆𑀓𑁂 𑀤𑀼𑀢𑀺𑀬𑀢𑀢𑀺𑀬𑀧𑀢𑁆𑀢𑀸 𑀯𑀺𑀬, 𑀢𑁂𑀦𑁂𑀯 𑀯𑀼𑀢𑁆𑀢𑀁 𑀲𑀬𑀁𑀓𑀸𑀭𑀺𑀯𑀸𑀭𑁂 ‘‘𑀦 𑀓𑀧𑁆𑀧𑀢𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀢𑁆𑀢𑀩𑁆𑀩’𑀦𑁆𑀢𑀺. 𑀢𑀢𑁄 𑀧𑀭𑀁 𑀫𑀽𑀮𑀁 𑀲𑀫𑁆𑀧𑀝𑀺𑀘𑁆𑀙𑀢𑀺 𑀦𑀸𑀫.

𑀫𑀳𑀸𑀯𑀺𑀲𑀬𑀲𑀺𑀓𑁆𑀔𑀢𑁆𑀢𑀸, 𑀭𑀸𑀚𑀲𑀺𑀓𑁆𑀔𑀸𑀧𑀤𑀁 𑀇𑀤𑀁;

𑀭𑀜𑁆𑀜𑁄 𑀯𑀺𑀬 𑀤𑀼𑀯𑀺𑀜𑁆𑀜𑁂𑀬𑁆𑀬𑀁, 𑀘𑀺𑀢𑁆𑀢𑀸𑀥𑀺𑀧𑁆𑀧𑀸𑀬𑀢𑁄𑀧𑀺 𑀯𑀸.

𑀭𑀸𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀘𑀻𑀯𑀭𑀯𑀕𑁆𑀕𑁄 𑀧𑀞𑀫𑁄.