𑁨. 𑀓𑁄𑀲𑀺𑀬𑀯𑀕𑁆𑀕𑁄

𑁧. 𑀓𑁄𑀲𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁪𑁨. 𑀓𑁄𑀲𑀺𑀬𑀓𑀸𑀭𑀓𑁄𑀢𑀺 𑀏𑀢𑁆𑀣 𑀓𑁄𑀲𑀁 𑀓𑀭𑁄𑀦𑁆𑀢𑀻𑀢𑀺 ‘‘𑀓𑁄𑀲𑀓𑀸𑀭𑀸’’𑀢𑀺 𑀮𑀤𑁆𑀥𑀯𑁄𑀳𑀸𑀭𑀸𑀦𑀁 𑀧𑀸𑀡𑀓𑀸𑀦𑀁 𑀓𑁄𑀲𑀢𑁄 𑀦𑀺𑀩𑁆𑀩𑀢𑁆𑀢𑀁 𑀓𑁄𑀲𑀺𑀬𑀁 𑀦𑀸𑀫. 𑀅𑀢𑁆𑀢𑀦𑀸 𑀓𑀢𑀁 𑀘𑁂? 𑀦𑀺𑀲𑁆𑀲𑀚𑁆𑀚𑀦𑀓𑀸𑀮𑁂 ‘‘𑀲𑀬𑀁 𑀓𑀢𑀁 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀁. 𑀉𑀪𑁄𑀳𑀺 𑀘𑁂 𑀓𑀢𑀁, 𑀬𑀣𑀸𑀧𑀸𑀞𑀫𑁂𑀯 𑀯𑀢𑁆𑀢𑀩𑁆𑀩𑀁. 𑀅𑀢𑁆𑀢𑀦𑀸 𑀘 𑀧𑀭𑁂𑀳𑀺 𑀘 𑀯𑀺𑀧𑁆𑀧𑀓𑀢𑀁 𑀅𑀢𑁆𑀢𑀦𑀸 𑀧𑀭𑀺𑀬𑁄𑀲𑀸𑀧𑁂𑀢𑀻𑀢𑀺𑀆𑀤𑀺𑀘𑀢𑀼𑀓𑁆𑀓𑀫𑁆𑀧𑀺 𑀲𑀫𑁆𑀪𑀯𑀦𑁆𑀢𑀁 𑀦 𑀤𑀲𑁆𑀲𑀺𑀢𑀁. 𑀯𑀺𑀦𑀬𑀥𑀫𑁆𑀫𑀢𑀸 𑀳𑁂𑀲𑀸, 𑀬𑀤𑀺𑀤𑀁 𑀏𑀓𑀲𑁆𑀫𑀺𑀁 𑀢𑀺𑀓𑁂 𑀯𑀸 𑀘𑀢𑀼𑀓𑁆𑀓𑁂 𑀯𑀸 𑀤𑀲𑁆𑀲𑀺𑀢𑁂 𑀇𑀢𑀭𑀁 𑀲𑀫𑁆𑀪𑀯𑀦𑁆𑀢𑀫𑁆𑀧𑀺 𑀦 𑀯𑀼𑀘𑁆𑀘𑀢𑀻𑀢𑀺.

𑀓𑁄𑀲𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀲𑀼𑀤𑁆𑀥𑀓𑀸𑀴𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁪𑁭. 𑀲𑀼𑀤𑁆𑀥𑀓𑀸𑀴𑀓𑀸𑀦𑀦𑁆𑀢𑀺 𑀏𑀢𑁆𑀣 𑀬𑀣𑀸 𑀧𑀞𑀫𑁂 ‘‘𑀏𑀓𑁂𑀦𑀧𑀺 𑀓𑁄𑀲𑀺𑀬𑀁𑀲𑀼𑀦𑀸’’𑀢𑀺 𑀯𑀼𑀢𑁆𑀢𑀁, 𑀢𑀣𑀸 𑀇𑀥 ‘‘𑀏𑀓𑁂𑀦𑀧𑀺 𑀅𑀜𑁆𑀜𑁂𑀦 𑀅𑀫𑀺𑀲𑁆𑀲𑁂𑀢𑁆𑀯𑀸’’𑀢𑀺 𑀯𑀘𑀦𑀸𑀪𑀸𑀯𑀢𑁄 𑀅𑀜𑁆𑀜𑁂𑀳𑀺 𑀫𑀺𑀲𑁆𑀲𑀪𑀸𑀯𑁂 𑀲𑀢𑀺𑀧𑀺 𑀅𑀧𑀜𑁆𑀜𑀸𑀬𑀫𑀸𑀦𑀭𑀽𑀧𑀓𑀁 ‘‘𑀲𑀼𑀤𑁆𑀥𑀓𑀸𑀴𑀓’’𑀫𑀺𑀘𑁆𑀘𑁂𑀯 𑀯𑀼𑀘𑁆𑀘𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀲𑀼𑀤𑁆𑀥𑀓𑀸𑀴𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀤𑁆𑀯𑁂𑀪𑀸𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁫𑁨. ‘‘𑀥𑀸𑀭𑀬𑀺𑀢𑁆𑀯𑀸 𑀤𑁆𑀯𑁂 𑀢𑀼𑀮𑀸 𑀆𑀤𑀸𑀢𑀩𑁆𑀩𑀸’’𑀢𑀺 𑀯𑀘𑀦𑀢𑁄 𑀬𑀣𑀸 𑀢𑀼𑀮𑀸𑀥𑀸𑀭𑀡𑀸𑀬 𑀓𑀸𑀴𑀓𑀸 𑀅𑀥𑀺𑀓𑀸 𑀦 𑀳𑁄𑀦𑁆𑀢𑀺, 𑀢𑀣𑀸 𑀓𑀸𑀴𑀓𑀸𑀦𑀁 𑀤𑁆𑀯𑁂 𑀪𑀸𑀯𑀸 𑀕𑀳𑁂𑀢𑀩𑁆𑀩𑀸 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦. 𑀓𑀣𑀁 𑀧𑀜𑁆𑀜𑀸𑀬𑀢𑀻𑀢𑀺? 𑀲𑀼𑀤𑁆𑀥𑀓𑀸𑀴𑀓𑀧𑀝𑀺𑀲𑁂𑀥𑀦𑀦𑀺𑀤𑀸𑀦𑁂𑀦. 𑀢𑀢𑀺𑀬𑀁 𑀑𑀤𑀸𑀢𑀸𑀦𑀁 𑀘𑀢𑀼𑀢𑁆𑀣𑀁 𑀕𑁄𑀘𑀭𑀺𑀬𑀸𑀦𑀦𑁆𑀢𑀺 𑀳𑁂𑀝𑁆𑀞𑀺𑀫𑀧𑀭𑀺𑀘𑁆𑀙𑁂𑀤𑁄. 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀏𑀓𑀲𑁆𑀲𑀧𑀺 𑀓𑀸𑀴𑀓𑀮𑁄𑀫𑀲𑁆𑀲 𑀅𑀢𑀺𑀭𑁂𑀓𑀪𑀸𑀯𑁂 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺 (𑀓𑀗𑁆𑀔𑀸. 𑀅𑀝𑁆𑀞. 𑀤𑁆𑀯𑁂𑀪𑀸𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀯𑀼𑀢𑁆𑀢𑀁, 𑀢𑀁 𑀢𑀼𑀮𑀸𑀥𑀸𑀭𑀡𑀸𑀬 𑀓𑀺𑀜𑁆𑀘𑀸𑀧𑀺 𑀦 𑀲𑀫𑁂𑀢𑀺, 𑀅𑀘𑀺𑀢𑁆𑀢𑀓𑀢𑁆𑀢𑀸 𑀧𑀦 𑀲𑀺𑀓𑁆𑀔𑀸𑀧𑀤𑀲𑁆𑀲 𑀧𑀼𑀩𑁆𑀩𑁂 𑀢𑀼𑀮𑀸𑀬 𑀥𑀸𑀭𑀬𑀺𑀢𑁆𑀯𑀸 𑀞𑀧𑀺𑀢𑁂𑀲𑀼 𑀏𑀓𑀫𑁆𑀧𑀺 𑀮𑁄𑀫𑀁 𑀢𑀢𑁆𑀣 𑀧𑀢𑁂𑀬𑁆𑀬 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄𑀢𑀺 𑀦𑁄 𑀢𑀓𑁆𑀓𑁄. 𑀅𑀜𑁆𑀜𑀣𑀸 𑀤𑁆𑀯𑁂 𑀢𑀼𑀮𑀸 𑀦𑀸𑀤𑀸𑀢𑀩𑁆𑀩𑀸, 𑀊𑀦𑀓𑀢𑀭𑀸 𑀆𑀤𑀸𑀢𑀩𑁆𑀩𑀸 𑀲𑀺𑀬𑀼𑀁. 𑀦 𑀳𑀺 𑀮𑁄𑀫𑀁 𑀕𑀡𑁂𑀢𑁆𑀯𑀸 𑀢𑀼𑀮𑀸𑀥𑀸𑀭𑀡𑀸 𑀓𑀭𑀻𑀬𑀢𑀺. 𑀅𑀣 𑀕𑀡𑁂𑀢𑁆𑀯𑀸𑀯 𑀓𑀸𑀢𑀩𑁆𑀩𑀁. 𑀓𑀺𑀁 𑀢𑀼𑀮𑀸𑀥𑀸𑀭𑀡𑀸𑀬 𑀧𑀬𑁄𑀚𑀦𑀦𑁆𑀢𑀺 𑀓𑁂𑀘𑀺. ‘‘𑀕𑁄𑀘𑀭𑀺𑀬𑀑𑀤𑀸𑀢𑁂𑀲𑀼 𑀏𑀓𑀫𑁂𑀯 𑀤𑀺𑀕𑀼𑀡𑀁 𑀓𑀢𑁆𑀯𑀸 𑀕𑀳𑁂𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺, 𑀅𑀝𑁆𑀞𑀓𑀣𑀸𑀬𑀁 𑀅𑀯𑀺𑀘𑀸𑀭𑀺𑀢𑀢𑁆𑀢𑀸 𑀯𑀻𑀫𑀁𑀲𑀺𑀢𑀩𑁆𑀩𑀁.

𑀤𑁆𑀯𑁂𑀪𑀸𑀕𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀙𑀩𑁆𑀩𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁬𑁨. 𑀦𑀯𑀁 𑀦𑀸𑀫 𑀓𑀭𑀡𑀁 𑀉𑀧𑀸𑀤𑀸𑀬𑀸𑀢𑀺 𑀇𑀤𑀁 𑀆𑀤𑀺𑀓𑀭𑀡𑀢𑁄 𑀧𑀝𑁆𑀞𑀸𑀬 𑀯𑀲𑁆𑀲𑀕𑀡𑀦𑀁 𑀤𑀻𑀧𑁂𑀢𑀺. 𑀓𑀭𑀺𑀢𑁆𑀯𑀸 𑀯𑀸𑀢𑀺 𑀯𑀘𑀦𑀁 𑀦𑀺𑀝𑁆𑀞𑀸𑀦𑀤𑀺𑀯𑀲𑀢𑁄 𑀧𑀝𑁆𑀞𑀸𑀬𑀸𑀢𑀺 𑀤𑀻𑀧𑁂𑀢𑀺. 𑀥𑀸𑀭𑁂𑀢𑀩𑁆𑀩𑀦𑁆𑀢𑀺 𑀯𑀘𑀦𑀁 𑀧𑀦 𑀧𑀭𑀺𑀪𑁄𑀕𑀢𑁄 𑀧𑀝𑁆𑀞𑀸𑀬𑀸𑀢𑀺 𑀤𑀻𑀧𑁂𑀢𑀺, 𑀬𑀲𑁆𑀫𑀸 𑀮𑀤𑁆𑀥𑀲𑀫𑁆𑀫𑀼𑀢𑀺𑀓𑀲𑁆𑀲 𑀕𑀢𑀕𑀢𑀝𑁆𑀞𑀸𑀦𑁂 𑀙𑀦𑁆𑀦𑀁 𑀙𑀦𑁆𑀦𑀁 𑀯𑀲𑁆𑀲𑀸𑀦𑀁 𑀑𑀭𑀢𑁄𑀯 𑀓𑀢𑀸𑀦𑀺 𑀩𑀳𑀽𑀦𑀺𑀧𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸 𑀅𑀜𑁆𑀜𑀁 𑀦𑀯𑀦𑁆𑀢𑀺 𑀓𑀺𑀁 𑀓𑀢𑀢𑁄 𑀅𑀜𑁆𑀜𑀁, 𑀉𑀤𑀸𑀳𑀼 𑀥𑀸𑀭𑀺𑀢𑀢𑁄 𑀅𑀜𑁆𑀜𑀦𑁆𑀢𑀺? 𑀓𑀺𑀜𑁆𑀘𑁂𑀢𑁆𑀣 𑀬𑀤𑀺 𑀓𑀢𑀢𑁄 𑀅𑀜𑁆𑀜𑀁, 𑀢𑁂𑀲𑀼 𑀅𑀜𑁆𑀜𑀢𑀭𑀁 𑀤𑀼𑀓𑁆𑀓𑀢𑀁 𑀯𑀸 𑀧𑀭𑀺𑀪𑁄𑀕𑀚𑀺𑀡𑁆𑀡𑀁 𑀯𑀸 𑀧𑀼𑀦 𑀓𑀸𑀢𑀼𑀁 𑀯𑀝𑁆𑀝𑀢𑀺, 𑀢𑀜𑁆𑀘 𑀔𑁄 𑀯𑀺𑀦𑀸𑀧𑀺 𑀧𑀼𑀭𑀸𑀡𑀲𑀦𑁆𑀣𑀢𑀲𑁆𑀲 𑀲𑀼𑀕𑀢𑀯𑀺𑀤𑀢𑁆𑀣𑀺𑀁 𑀅𑀧𑁆𑀧𑀝𑀺𑀲𑀺𑀤𑁆𑀥𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸. 𑀓𑀢𑀢𑁄 𑀳𑀺 𑀅𑀜𑁆𑀜𑀁 𑀧𑀝𑀺𑀲𑀺𑀤𑁆𑀥𑀁, 𑀇𑀤𑀜𑁆𑀘 𑀧𑀼𑀩𑁆𑀩𑀓𑀢𑀦𑁆𑀢𑀺 𑀢𑀢𑁄 𑀅𑀦𑀦𑁆𑀢𑀭𑀲𑀺𑀓𑁆𑀔𑀸𑀧𑀤𑀯𑀺𑀭𑁄𑀥𑁄 𑀳𑁄𑀢𑀺. 𑀅𑀣 𑀥𑀸𑀭𑀺𑀢𑀢𑁄 𑀅𑀜𑁆𑀜𑀁 𑀦𑀸𑀫, 𑀲𑀫𑁆𑀫𑀼𑀢𑀺 𑀦𑀺𑀭𑀢𑁆𑀣𑀺𑀓𑀸 𑀆𑀧𑀚𑁆𑀚𑀢𑀺, 𑀧𑀞𑀫𑀓𑀢𑀁 𑀘𑁂 𑀅𑀧𑀭𑀺𑀪𑀼𑀢𑁆𑀢𑀁, 𑀲𑀢𑀺𑀬𑀸𑀧𑀺 𑀲𑀫𑁆𑀫𑀼𑀢𑀺𑀬𑀸 𑀅𑀜𑁆𑀜𑀁 𑀦𑀯𑀁 𑀦 𑀯𑀝𑁆𑀝𑀢𑀻𑀢𑀺 𑀅𑀥𑀺𑀧𑁆𑀧𑀸𑀬𑁄? 𑀢𑀢𑁆𑀭𑀺𑀤𑀁 𑀲𑀦𑁆𑀦𑀺𑀝𑁆𑀞𑀸𑀦𑀦𑀺𑀤𑀲𑁆𑀲𑀦𑀁 𑁋 𑀦𑀺𑀝𑁆𑀞𑀸𑀦𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀙𑀦𑁆𑀦𑀁 𑀙𑀦𑁆𑀦𑀁 𑀯𑀲𑁆𑀲𑀸𑀦𑀁 𑀧𑀭𑀺𑀘𑁆𑀙𑁂𑀤𑁄 𑀯𑁂𑀤𑀺𑀢𑀩𑁆𑀩𑁄. 𑀢𑀢𑁆𑀣 𑀘 𑀲𑀢𑁆𑀢𑀫𑁂 𑀯𑀲𑁆𑀲𑁂 𑀲𑀫𑁆𑀧𑀢𑁆𑀢𑁂 𑀙𑀩𑁆𑀩𑀲𑁆𑀲𑀸𑀦𑀺 𑀧𑀭𑀺𑀧𑀼𑀡𑁆𑀡𑀸𑀦𑀺 𑀳𑁄𑀦𑁆𑀢𑀺. 𑀢𑀜𑁆𑀘 𑀔𑁄 𑀫𑀸𑀲𑀧𑀭𑀺𑀘𑁆𑀙𑁂𑀤𑀯𑀲𑁂𑀦, 𑀦 𑀯𑀲𑁆𑀲𑀧𑀭𑀺𑀘𑁆𑀙𑁂𑀤𑀯𑀲𑁂𑀦. 𑀲𑀢𑁆𑀢𑀫𑁂 𑀧𑀭𑀺𑀧𑀼𑀡𑁆𑀡𑀜𑁆𑀘 𑀊𑀦𑀓𑀜𑁆𑀘 𑀯𑀲𑁆𑀲𑀁 𑀦𑀸𑀫, 𑀢𑀲𑁆𑀫𑀸 𑀯𑀺𑀧𑁆𑀧𑀓𑀢𑀲𑁆𑀲𑁂𑀯 𑀲𑀘𑁂 𑀙𑀩𑁆𑀩𑀲𑁆𑀲𑀸𑀦𑀺 𑀧𑀽𑀭𑁂𑀦𑁆𑀢𑀺, 𑀧𑀼𑀦 𑀦𑀺𑀝𑁆𑀞𑀸𑀦𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀙𑀩𑁆𑀩𑀲𑁆𑀲𑀸𑀦𑀺 𑀮𑀪𑀦𑁆𑀢𑀺. 𑀢𑀜𑁆𑀘 𑀔𑁄 𑀧𑀭𑀺𑀪𑀼𑀢𑁆𑀢𑀁 𑀯𑀸 𑀳𑁄𑀢𑀼 𑀅𑀧𑀭𑀺𑀪𑀼𑀢𑁆𑀢𑀁 𑀯𑀸, 𑀥𑀸𑀭𑀺𑀢𑀫𑁂𑀯 𑀦𑀸𑀫. 𑀬𑀲𑁆𑀫𑀸 ‘‘𑀦𑀯𑀁 𑀦𑀸𑀫 𑀓𑀭𑀡𑀁 𑀉𑀧𑀸𑀤𑀸𑀬 𑀯𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀙𑀦𑁆𑀦𑀁 𑀯𑀲𑁆𑀲𑀸𑀦𑀁 𑀧𑀭𑀢𑁄 𑀢𑀫𑁂𑀯 𑀧𑀼𑀩𑁆𑀩𑀓𑀢𑀁 𑀤𑀼𑀓𑁆𑀓𑀢𑀪𑀸𑀯𑁂𑀦, 𑀧𑀭𑀺𑀪𑁄𑀕𑀚𑀺𑀡𑁆𑀡𑀢𑀸𑀬 𑀯𑀸 𑀯𑀺𑀚𑀝𑁂𑀢𑁆𑀯𑀸 𑀧𑀼𑀦 𑀓𑀭𑁄𑀢𑀺, 𑀦𑀺𑀝𑁆𑀞𑀸𑀦𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀙𑀩𑁆𑀩𑀲𑁆𑀲𑀧𑀭𑀫𑀢𑀸 𑀥𑀸𑀭𑁂𑀢𑀩𑁆𑀩𑀁, 𑀅𑀢𑀺𑀭𑁂𑀓𑀁 𑀯𑀸. 𑀅𑀦𑁆𑀢𑁄 𑀘𑁂 𑀓𑀭𑁄𑀢𑀺, 𑀢𑀤𑁂𑀯 𑀅𑀜𑁆𑀜𑀁 𑀦𑀯𑀁 𑀦𑀸𑀫 𑀳𑁄𑀢𑀺 𑀓𑀭𑀡𑀁 𑀉𑀧𑀸𑀤𑀸𑀬, 𑀢𑀲𑁆𑀫𑀸 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀅𑀜𑁆𑀜𑀣𑀸 ‘‘𑀦𑀯𑀁 𑀦𑀸𑀫 𑀓𑀭𑀡𑀁 𑀉𑀧𑀸𑀤𑀸𑀬𑀸’’𑀢𑀺 𑀇𑀫𑀺𑀦𑀸 𑀦 𑀓𑁄𑀘𑀺 𑀯𑀺𑀲𑁂𑀲𑁄 𑀅𑀢𑁆𑀣𑀺. 𑀏𑀯𑀁 𑀲𑀦𑁆𑀢𑁂 𑀓𑀺𑀁 𑀳𑁄𑀢𑀺? 𑀅𑀝𑁆𑀞𑀼𑀧𑁆𑀧𑀢𑁆𑀢𑀻𑀢𑀺. ‘‘𑀬𑀸𑀘𑀦𑀩𑀳𑀼𑀮𑀸 𑀯𑀺𑀜𑁆𑀜𑀢𑁆𑀢𑀺𑀩𑀳𑀼𑀮𑀸 𑀯𑀺𑀳𑀭𑀦𑁆𑀢𑀻’’𑀢𑀺 𑀳𑀺 𑀢𑀢𑁆𑀣 𑀯𑀼𑀢𑁆𑀢𑀁, 𑀢𑀜𑁆𑀘 𑀅𑀜𑁆𑀜𑀲𑁆𑀲 𑀓𑀭𑀡𑀁 𑀤𑀻𑀧𑁂𑀢𑀺. 𑀬𑀤𑀺 𑀏𑀯𑀁 𑀢𑀁 𑀦𑀺𑀩𑁆𑀩𑀺𑀲𑁂𑀲𑀫𑁂𑀯 𑀆𑀧𑀚𑁆𑀚𑀢𑀻𑀢𑀺? 𑀦𑀸𑀧𑀚𑁆𑀚𑀢𑀺. 𑀅𑀬𑀁 𑀧𑀦𑀲𑁆𑀲 𑀯𑀺𑀲𑁂𑀲𑁄, 𑀬𑀲𑁆𑀫𑀸 ‘‘𑀅𑀜𑁆𑀜𑁂𑀦 𑀓𑀢𑀁 𑀧𑀝𑀺𑀮𑀪𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀣𑁄 𑀯𑀺𑀲𑁂𑀲𑁄𑀢𑀺. 𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? ‘‘𑀦𑀯𑀁 𑀦𑀸𑀫 𑀓𑀭𑀡𑀁 𑀉𑀧𑀸𑀤𑀸𑀬 𑀯𑀼𑀘𑁆𑀘𑀢𑀻’’𑀢𑀺 𑀯𑀼𑀢𑁆𑀢𑁂 𑀅𑀢𑀺𑀭𑁂𑀓𑀘𑀻𑀯𑀭𑀲𑁆𑀲 𑀉𑀧𑁆𑀧𑀢𑁆𑀢𑀺 𑀯𑀺𑀬 𑀧𑀝𑀺𑀮𑀸𑀪𑁂𑀦𑀲𑁆𑀲 𑀉𑀧𑁆𑀧𑀢𑁆𑀢𑀺 𑀦𑀯𑀢𑀸 𑀆𑀧𑀚𑁆𑀚𑀢𑀺. 𑀢𑀢𑁄 𑀧𑀝𑀺𑀮𑀤𑁆𑀥𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀙𑀩𑁆𑀩𑀲𑁆𑀲𑀧𑀭𑀫𑀢𑀸 𑀥𑀸𑀭𑁂𑀢𑀩𑁆𑀩𑀁. 𑀑𑀭𑁂𑀦 𑀘𑁂 𑀙𑀦𑁆𑀦𑀁 𑀯𑀲𑁆𑀲𑀸𑀦𑀁…𑀧𑁂… 𑀓𑀸𑀭𑀸𑀧𑁂𑀬𑁆𑀬, 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀦𑀯𑀁 𑀦𑀸𑀫 𑀓𑀭𑀡𑀫𑁂𑀯 𑀉𑀧𑀸𑀤𑀸𑀬 𑀯𑀼𑀘𑁆𑀘𑀢𑀺, 𑀦 𑀧𑀝𑀺𑀮𑀸𑀪𑀁. 𑀑𑀭𑁂𑀦 𑀙𑀦𑁆𑀦𑀁 𑀯𑀲𑁆𑀲𑀸𑀦𑀁 𑀅𑀢𑁆𑀢𑀦𑁄 𑀅𑀦𑀼𑀧𑁆𑀧𑀦𑁆𑀦𑀢𑁆𑀢𑀸 ‘‘𑀦𑀯’’𑀦𑁆𑀢𑀺 𑀲𑀗𑁆𑀔𑁆𑀬𑀁 𑀕𑀢𑀁, 𑀅𑀧𑁆𑀧𑀝𑀺𑀮𑀤𑁆𑀥𑀁 𑀘𑁂 𑀓𑀸𑀭𑀸𑀧𑁂𑀬𑁆𑀬, 𑀬𑀣𑀸 𑀮𑀸𑀪𑁄, 𑀢𑀣𑀸 𑀓𑀭𑁂𑀬𑁆𑀬 𑀯𑀸 𑀓𑀸𑀭𑀸𑀧𑁂𑀬𑁆𑀬 𑀯𑀸𑀢𑀺 𑀘 𑀦 𑀳𑁄𑀢𑀺. 𑀓𑀲𑁆𑀫𑀸? 𑀬𑀲𑁆𑀫𑀸 𑀅𑀜𑁆𑀜𑁂𑀦 𑀓𑀢𑀁 𑀧𑀝𑀺𑀮𑀪𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀺, 𑀅𑀦𑀸𑀧𑀢𑁆𑀢𑀻𑀢𑀺 𑀯𑀺𑀲𑁂𑀲𑁄𑀢𑀺.

𑀙𑀩𑁆𑀩𑀲𑁆𑀲𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀦𑀺𑀲𑀻𑀤𑀦𑀲𑀦𑁆𑀣𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁬𑁫. 𑀦𑀸𑀲𑁆𑀲𑀼𑀥 𑀓𑁄𑀘𑀻𑀢𑀺 𑀏𑀢𑁆𑀣 𑀅𑀲𑁆𑀲𑀼𑀥-𑀇𑀢𑀺 𑀅𑀯𑀥𑀸𑀭𑀡𑀢𑁆𑀣𑁂 𑀦𑀺𑀧𑀸𑀢𑁄. 𑀢𑀢𑁆𑀣 𑀓𑀺𑀜𑁆𑀘𑀸𑀧𑀺 ‘‘𑀏𑀯𑀁 𑀪𑀦𑁆𑀢𑁂𑀢𑀺 𑀔𑁄 𑀢𑁂 𑀪𑀺𑀓𑁆𑀔𑀽’’𑀢𑀺 𑀩𑀳𑀼𑀯𑀘𑀦𑀁 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀢𑁂 𑀪𑀺𑀓𑁆𑀔𑀽 𑀪𑀕𑀯𑀢𑁄 𑀧𑀝𑀺𑀲𑁆𑀲𑀼𑀡𑀺𑀢𑁆𑀯𑀸 𑀇𑀥 𑀢𑁂𑀲𑀼 𑀪𑀺𑀓𑁆𑀔𑀽𑀲𑀼 𑀓𑁄𑀘𑀺 𑀪𑀕𑀯𑀦𑁆𑀢𑀁 𑀦𑀸𑀲𑁆𑀲𑀼𑀥 𑀉𑀧𑀲𑀗𑁆𑀓𑀫𑀢𑀺 𑀅𑀜𑁆𑀜𑀢𑁆𑀭 𑀏𑀓𑁂𑀦𑀸𑀢𑀺 𑀅𑀢𑁆𑀣𑁄 𑀕𑀳𑁂𑀢𑀩𑁆𑀩𑁄. 𑀢𑀁 𑀲𑀼𑀕𑁆𑀕𑀸𑀳𑀁 𑀏𑀓𑀸𑀳𑀁 𑀪𑀦𑁆𑀢𑁂 𑀪𑀕𑀯𑀦𑁆𑀢𑀁 𑀯𑀭𑀦𑁆𑀢𑀺𑀆𑀤𑀻𑀲𑀼 (𑀫𑀳𑀸𑀯. 𑁩𑁩𑁭) 𑀯𑀺𑀬, 𑀅𑀦𑀼𑀚𑀸𑀦𑀸𑀫𑀺…𑀧𑁂… 𑀬𑀣𑀸𑀲𑀼𑀔𑀁 𑀫𑀁 𑀤𑀲𑁆𑀲𑀦𑀸𑀬 𑀉𑀧𑀲𑀗𑁆𑀓𑀫𑀦𑁆𑀢𑀽𑀢𑀺 𑀤𑀲𑁆𑀲𑀦𑀢𑁆𑀣𑀸𑀬 𑀉𑀧𑀲𑀗𑁆𑀓𑀫𑀦𑁆𑀢𑀼.

𑁫𑁬𑁬-𑁭. ‘‘𑀫𑀬𑀁 𑀆𑀬𑀲𑁆𑀫𑀦𑁆𑀢𑀁 𑀉𑀧𑀲𑁂𑀦’’𑀦𑁆𑀢𑀺 𑀢𑀲𑁆𑀲 𑀕𑀡𑀧𑀸𑀫𑁄𑀓𑁆𑀔𑀢𑁆𑀢𑀸 𑀯𑀼𑀢𑁆𑀢𑀁. 𑀆𑀭𑀜𑁆𑀜𑀺𑀓𑀧𑀺𑀡𑁆𑀟𑀧𑀸𑀢𑀺𑀓𑀧𑀁𑀲𑀼𑀓𑀽𑀮𑀺𑀓𑀯𑀲𑁂𑀦 𑀲𑀩𑁆𑀩𑀸𑀦𑀺 𑀯𑀼𑀢𑁆𑀢𑀸𑀦𑀺. 𑀢𑁂𑀦𑁂𑀯𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀦𑁆𑀣𑀢𑁂 𑀘𑀢𑀼𑀢𑁆𑀣𑀘𑀻𑀯𑀭𑀲𑀜𑁆𑀜𑀺𑀢𑀸𑀬𑀸’’𑀢𑀺. 𑀓𑀺𑀁 𑀲𑀩𑁆𑀩𑁂𑀧𑀺 𑀢𑁂 𑀘𑀻𑀯𑀭𑀁 𑀦 𑀩𑀼𑀚𑁆𑀛𑀦𑁆𑀢𑀻𑀢𑀺 𑀘𑁂? 𑀬𑀣𑀸 𑀳𑁄𑀢𑀼. 𑀓𑀢𑀫𑀁 𑀘𑀻𑀯𑀭𑀁 𑀦𑀸𑀫𑀸𑀢𑀺? 𑀙𑀦𑁆𑀦𑀁 𑀅𑀜𑁆𑀜𑀢𑀭𑀁 𑀯𑀺𑀓𑀧𑁆𑀧𑀦𑀼𑀧𑀕𑀁 𑀧𑀘𑁆𑀙𑀺𑀫𑀦𑁆𑀢𑀺. 𑀓𑀺𑀜𑁆𑀘 𑀯𑀸𑀬𑀺𑀫𑀁 𑀅𑀯𑀸𑀬𑀺𑀫𑀦𑁆𑀢𑀺? 𑀯𑀸𑀬𑀺𑀫𑀫𑁂𑀯𑀸𑀢𑀺. 𑀓𑀢𑀭𑀲𑀼𑀢𑁆𑀢𑁂𑀦𑀸𑀢𑀺? 𑀅𑀤𑁆𑀥𑀸 𑀲𑁄 𑀲𑀼𑀢𑁆𑀢𑀫𑁂𑀯 𑀦 𑀧𑀲𑁆𑀲𑀢𑀺, 𑀲𑀺𑀯𑁂𑀬𑁆𑀬𑀓𑀁 𑀤𑀼𑀲𑁆𑀲𑀬𑀼𑀕𑀁, 𑀇𑀤𑁆𑀥𑀺𑀫𑀬𑀺𑀓𑀜𑁆𑀘 𑀤𑁂𑀯𑀤𑀢𑁆𑀢𑀺𑀬𑀜𑁆𑀘 𑀅𑀘𑀻𑀯𑀭𑀁 𑀓𑀭𑁄𑀢𑀺. 𑀬𑀤𑀺 𑀏𑀯𑀁 𑀅𑀯𑀸𑀬𑀺𑀫𑀫𑁆𑀧𑀻𑀢𑀺 𑀯𑀤𑀸𑀫𑀻𑀢𑀺. 𑀏𑀯𑀁 𑀲𑀦𑁆𑀢𑁂 𑀲𑀺𑀤𑁆𑀥𑀸 𑀲𑀦𑁆𑀣𑀢𑁂 𑀘𑀻𑀯𑀭𑀲𑀜𑁆𑀜𑀺𑀢𑀸 𑀓𑀫𑁆𑀩𑀮𑀲𑀻𑀲𑁂𑀦 𑀉𑀡𑁆𑀡𑀸𑀫𑀬𑀲𑀸𑀫𑀜𑁆𑀜𑀢𑁄. 𑀓𑀺𑀁 𑀧𑀦 𑀢𑁂 𑀲𑀦𑁆𑀣𑀢𑀁 𑀅𑀥𑀺𑀝𑁆𑀞𑀳𑀺𑀁𑀲𑀽𑀢𑀺? 𑀤𑀼𑀝𑁆𑀞𑀼 𑀅𑀥𑀺𑀝𑁆𑀞𑀳𑀺𑀁𑀲𑀼 𑀅𑀘𑀻𑀯𑀭𑀢𑁆𑀢𑀸, 𑀦 𑀅𑀥𑀺𑀝𑁆𑀞𑀸𑀦𑀼𑀧𑀕𑀢𑁆𑀢𑀸 𑀘 𑀲𑀦𑁆𑀣𑀢𑀲𑁆𑀲. 𑀅𑀣 𑀦𑀸𑀥𑀺𑀝𑁆𑀞𑀳𑀺𑀁𑀲𑀼, 𑀧𑀼𑀩𑁆𑀩𑁂𑀯 𑀢𑀢𑁆𑀣 𑀅𑀘𑀻𑀯𑀭𑀲𑀜𑁆𑀜𑀺𑀦𑁄 𑀏𑀢𑁂𑀢𑀺 𑀓𑀢𑁆𑀯𑀸 𑀢𑀢𑁆𑀣 𑀘𑀻𑀯𑀭𑀲𑀜𑁆𑀜𑀺𑀢𑀸𑀬 𑀢𑀤𑀼𑀪𑀬𑀁 𑀦 𑀬𑀼𑀚𑁆𑀚𑀢𑀻𑀢𑀺. 𑀓𑀺𑀁 𑀧𑀦𑁂𑀢𑀁 𑀅𑀥𑀺𑀝𑁆𑀞𑀸𑀦𑀼𑀧𑀕𑀁 𑀦𑀢𑁆𑀣𑀻𑀢𑀺? 𑀢𑀢𑁆𑀣𑁂𑀯𑀸𑀕𑀢𑀁, 𑀅𑀧𑀺𑀘𑁂𑀢𑀁 𑀅𑀯𑀺𑀓𑀧𑁆𑀧𑀦𑀼𑀧𑀕𑀁 𑀘𑁂, 𑀘𑀻𑀯𑀭𑀁 𑀦 𑀳𑁄𑀢𑀺, 𑀅𑀜𑁆𑀜𑀣𑀸 ‘‘𑀘𑀻𑀯𑀭𑀁 𑀦𑀸𑀫 𑀙𑀦𑁆𑀦𑀁 𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭’’𑀦𑁆𑀢𑀺 𑀏𑀢𑁆𑀢𑀸𑀯𑀢𑀸 𑀲𑀺𑀤𑁆𑀥𑀁 ‘‘𑀯𑀺𑀓𑀧𑁆𑀧𑀦𑀼𑀧𑀕𑀁 𑀧𑀘𑁆𑀙𑀺𑀫’’𑀦𑁆𑀢𑀺 𑀦 𑀯𑀢𑁆𑀢𑀩𑁆𑀩𑀁. 𑀅𑀣 𑀦 𑀯𑀺𑀓𑀧𑁆𑀧𑀦𑀼𑀧𑀕𑀫𑁆𑀧𑀺 𑀘𑀻𑀯𑀭𑀫𑁂𑀯 𑀲𑀺𑀤𑁆𑀥𑀁, 𑀅𑀦𑀥𑀺𑀝𑁆𑀞𑀸𑀦𑀼𑀧𑀕𑀁, 𑀅𑀯𑀺𑀓𑀧𑁆𑀧𑀦𑀼𑀧𑀕𑀜𑁆𑀘 𑀏𑀓𑀚𑁆𑀛𑀁 ‘‘𑀘𑀻𑀯𑀭’’𑀦𑁆𑀢𑀺 𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺. 𑀢𑁂𑀦𑁂𑀯𑀸𑀳 ‘‘𑀢𑁂𑀘𑀻𑀯𑀭𑀺𑀓𑀲𑁆𑀲 𑀘𑀢𑀼𑀢𑁆𑀣𑀘𑀻𑀯𑀭𑀁 𑀯𑀢𑁆𑀢𑀫𑀸𑀦𑀁 𑀅𑀁𑀲𑀓𑀸𑀲𑀸𑀯𑀫𑁂𑀯 𑀯𑀝𑁆𑀝𑀢𑀻’’𑀢𑀺.

𑀅𑀧𑀺𑀘 𑀲𑀦𑁆𑀣𑀢𑁂 𑀘𑀻𑀯𑀭𑀲𑀜𑁆𑀜𑀺𑀢𑀸 𑀦 𑀓𑁂𑀯𑀮𑀁 𑀢𑁂𑀲𑀁𑀬𑁂𑀯, 𑀅𑀜𑁆𑀜𑁂𑀲𑀫𑁆𑀧𑀺 𑀅𑀦𑀼𑀩𑀦𑁆𑀥𑀢𑀺 𑀏𑀯 ‘‘𑀧𑀼𑀭𑀸𑀡𑀲𑀦𑁆𑀣𑀢𑀁 𑀦𑀸𑀫 𑀲𑀓𑀺𑀁 𑀦𑀺𑀯𑀢𑁆𑀣𑀫𑁆𑀧𑀺 𑀲𑀓𑀺𑀁 𑀧𑀸𑀭𑀼𑀢𑀫𑁆𑀧𑀻’’𑀢𑀺 𑀯𑀘𑀦𑀢𑁄. 𑀅𑀝𑁆𑀞𑀓𑀣𑀸𑀘𑀭𑀺𑀬𑁄 𑀧𑀦𑀲𑁆𑀲 𑀅𑀘𑀻𑀯𑀭𑀢𑀁 𑀲𑀦𑁆𑀥𑀸𑀬𑀪𑀸𑀲𑀺𑀢𑀢𑁆𑀣𑀤𑀻𑀧𑀦𑁂𑀦 𑀤𑀻𑀧𑁂𑀢𑀺. 𑀦𑀺𑀯𑀢𑁆𑀣𑀧𑀸𑀭𑀼𑀢𑀦𑁆𑀢𑀺 𑀏𑀢𑁂𑀲𑀁 𑀦𑀺𑀲𑀺𑀦𑁆𑀦𑀜𑁆𑀘𑁂𑀯 𑀦𑀺𑀧𑀦𑁆𑀦𑀜𑁆𑀘𑀸𑀢𑀺 𑀅𑀢𑁆𑀣𑁄. 𑀅𑀧𑀺𑀘 𑀏𑀯𑀁 𑀲𑀦𑁆𑀢𑁂𑀧𑀺 𑀲𑀦𑁆𑀣𑀢𑁂 𑀘𑀻𑀯𑀭𑀲𑀜𑁆𑀜𑀺𑀢𑀸 𑀅𑀦𑀼𑀩𑀦𑁆𑀥𑀢𑀺 𑀏𑀯. 𑀔𑀦𑁆𑀥𑀓𑁂 (𑀫𑀳𑀸𑀯. 𑁩𑁫𑁮) 𑀳𑀺 ‘‘𑀦𑀺𑀲𑀻𑀤𑀦𑀁 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 𑀘, 𑀧𑀭𑀺𑀯𑀸𑀭𑁂 (𑀧𑀭𑀺. 𑁩𑁨𑁯) ‘‘𑀦𑀯 𑀘𑀻𑀯𑀭𑀸𑀦𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀸𑀦𑀻’’𑀢𑀺 𑀘 𑀦𑀺𑀲𑀻𑀤𑀦𑀲𑀺𑀓𑁆𑀔𑀸𑀧𑀤𑁂 ‘‘𑀤𑀲𑀸 𑀯𑀺𑀤𑀢𑁆𑀣𑀻’’𑀢𑀺 𑀘 𑀇𑀥 ‘‘𑀦𑀺𑀲𑀻𑀤𑀦𑀁 𑀦𑀸𑀫 𑀲𑀤𑀲𑀁 𑀯𑀼𑀘𑁆𑀘𑀢𑀻’’𑀢𑀺 𑀘 𑀯𑀼𑀢𑁆𑀢𑀁, 𑀅𑀝𑁆𑀞𑀓𑀣𑀸𑀬𑀜𑁆𑀘𑀲𑁆𑀲 ‘‘𑀲𑀦𑁆𑀣𑀢𑀲𑀤𑀺𑀲𑀁 𑀲𑀦𑁆𑀣𑀭𑀺𑀢𑁆𑀯𑀸 𑀏𑀓𑀲𑁆𑀫𑀺𑀁 𑀅𑀦𑁆𑀢𑁂 𑀲𑀼𑀕𑀢𑀯𑀺𑀤𑀢𑁆𑀣𑀺𑀬𑀸 𑀯𑀺𑀤𑀢𑁆𑀣𑀺𑀫𑀢𑁆𑀢𑀧𑀤𑁂𑀲𑁂 𑀤𑁆𑀯𑀻𑀲𑀼 𑀞𑀸𑀦𑁂𑀲𑀼 𑀨𑀸𑀮𑁂𑀢𑁆𑀯𑀸 𑀢𑀺𑀲𑁆𑀲𑁄 𑀤𑀲𑀸 𑀓𑀭𑀻𑀬𑀦𑁆𑀢𑀺, 𑀢𑀸𑀳𑀺 𑀤𑀲𑀸𑀳𑀺 𑀲𑀤𑀲𑀁 𑀦𑀸𑀫 𑀯𑀼𑀘𑁆𑀘𑀢𑀻’’𑀢𑀺 𑀘 ‘‘𑀦𑀺𑀲𑀻𑀤𑀦𑀁 𑀯𑀼𑀢𑁆𑀢𑀦𑀬𑁂𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀫𑁂𑀯, 𑀢𑀜𑁆𑀘 𑀔𑁄 𑀧𑀫𑀸𑀡𑀬𑀼𑀢𑁆𑀢𑀁 𑀏𑀓𑀫𑁂𑀯, 𑀤𑁆𑀯𑁂 𑀦 𑀯𑀝𑁆𑀝𑀦𑁆𑀢𑀻’’𑀢𑀺 𑀘 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀦𑀺𑀲𑀻𑀤𑀦𑀁 𑀦𑀸𑀫 𑀦𑀯𑀦𑁆𑀦𑀁 𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭𑀁 𑀘𑀻𑀯𑀭𑀁 𑀅𑀥𑀺𑀝𑁆𑀞𑀸𑀢𑀩𑁆𑀩𑀁, 𑀢𑀜𑁆𑀘 𑀲𑀦𑁆𑀣𑀢𑀲𑀤𑀺𑀲𑀁 𑀏𑀴𑀓𑀮𑁄𑀫𑀫𑀬𑀲𑀦𑁆𑀣𑀢𑀯𑀺𑀲𑁂𑀲𑀦𑁆𑀢𑀺 𑀲𑀺𑀤𑁆𑀥𑀁, 𑀢𑀣𑀸 𑀦𑀺𑀲𑀻𑀤𑀦𑀫𑁂𑀯 𑀦𑀺𑀲𑀻𑀤𑀦𑀲𑀦𑁆𑀣𑀢𑀜𑁆𑀘 𑀲𑀺𑀤𑁆𑀥𑀁. 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀘 ‘‘𑀏𑀓𑀫𑁂𑀯𑀸’’𑀢𑀺 𑀯𑀼𑀢𑁆𑀢𑀁. 𑀢𑀲𑁆𑀫𑀺𑀁 𑀲𑀺𑀤𑁆𑀥𑁂 𑀲𑀺𑀤𑁆𑀥𑀸 𑀲𑀦𑁆𑀣𑀢𑁂 𑀘𑀻𑀯𑀭𑀲𑀜𑁆𑀜𑀺𑀢𑀸𑀢𑀺 𑀅𑀢𑁆𑀣𑁄. 𑀓𑀲𑁆𑀫𑀸? 𑀲𑀦𑁆𑀣𑀢𑀲𑀸𑀫𑀜𑁆𑀜𑀢𑁄.

𑀏𑀢𑁆𑀣𑀸𑀳 𑁋 𑀓𑀣𑀁 𑀅𑀤𑀲𑀫𑁂𑀯 𑀲𑀦𑁆𑀣𑀢𑀁 𑀘𑀻𑀯𑀭𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀺. 𑀅𑀦𑁂𑀓𑀫𑁆𑀧𑀺 𑀅𑀦𑀥𑀺𑀝𑁆𑀞𑀺𑀢𑀫𑁆𑀧𑀺 𑀫𑀳𑀦𑁆𑀢𑀫𑁆𑀧𑀺 𑀯𑀝𑁆𑀝𑀢𑀺, 𑀬𑀢𑁄 𑀲𑀤𑀲𑀫𑁂𑀯 𑀲𑀦𑁆𑀣𑀢𑀁 𑀘𑀻𑀯𑀭𑀲𑀗𑁆𑀔𑁆𑀬𑀁 𑀕𑀘𑁆𑀙𑀢𑀺, 𑀢𑀢𑁄 𑀅𑀥𑀺𑀝𑁆𑀞𑀸𑀦𑀜𑁆𑀘 𑀉𑀧𑀕𑀘𑁆𑀙𑀢𑀻𑀢𑀺. 𑀅𑀲𑀦𑁆𑀣𑀢𑀧𑀭𑀺𑀬𑀸𑀧𑀦𑁆𑀦𑀢𑁆𑀢𑀸 𑀑𑀭𑁂𑀦 𑀘 𑀙𑀦𑁆𑀦𑀁 𑀯𑀲𑁆𑀲𑀸𑀦𑀁 𑀯𑀺𑀦𑀸𑀧𑀺 𑀲𑀫𑁆𑀫𑀼𑀢𑀺𑀁, 𑀢𑀜𑁆𑀘 𑀧𑁄𑀭𑀸𑀡𑀁 𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 𑀏𑀯, 𑀦 𑀅𑀯𑀺𑀲𑁆𑀲𑀚𑁆𑀚𑁂𑀢𑁆𑀯𑀸 ‘‘𑀢𑀜𑁆𑀘 𑀔𑁄 𑀧𑀫𑀸𑀡𑀬𑀼𑀢𑁆𑀢𑀁 𑀏𑀓𑀫𑁂𑀯, 𑀤𑁆𑀯𑁂 𑀦 𑀯𑀝𑁆𑀝𑀦𑁆𑀢𑀻’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁪𑁬𑁯) 𑀯𑀘𑀦𑀢𑁄𑀢𑀺. 𑀅𑀣𑀸𑀧𑀺 𑀲𑀺𑀬𑀸 𑀲𑀦𑁆𑀣𑀢𑀁 𑀲𑀬𑀦𑀢𑁆𑀣𑀫𑁂𑀯 𑀓𑀭𑀻𑀬𑀢𑀺, 𑀦𑀺𑀲𑀻𑀤𑀦𑀁 𑀅𑀲𑀦𑁆𑀣𑀢𑀫𑁂𑀯𑀸𑀢𑀺. 𑀢𑀜𑁆𑀘 𑀦 𑀦𑀺𑀬𑀫𑀢𑁄 ‘‘𑀧𑀼𑀭𑀸𑀡𑀲𑀦𑁆𑀣𑀢𑀁 𑀦𑀸𑀫 𑀲𑀓𑀺𑀁 𑀦𑀺𑀯𑀢𑁆𑀣𑀁 𑀲𑀓𑀺𑀁 𑀧𑀸𑀭𑀼𑀢𑀫𑁆𑀧𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸𑀢𑀺. 𑀏𑀢𑁆𑀣 𑀯𑀼𑀘𑁆𑀘𑀢𑀺, 𑀦 𑀏𑀢𑁆𑀣 𑀓𑀸𑀭𑀡𑀁 𑀧𑀭𑀺𑀬𑁂𑀲𑀺𑀢𑀩𑁆𑀩𑀁 𑀯𑀺𑀦𑀬𑀧𑀜𑁆𑀜𑀢𑁆𑀢𑀺𑀬𑀸 𑀅𑀦𑀜𑁆𑀜𑀯𑀺𑀲𑀬𑀢𑁆𑀢𑀸.

𑀲𑀦𑁆𑀣𑀢𑀲𑁆𑀲 𑀧𑀦 𑀅𑀘𑀻𑀯𑀭𑀪𑀸𑀯𑁂 𑀅𑀬𑀁 𑀬𑀼𑀢𑁆𑀢𑀺 𑁋 𑀆𑀤𑀺𑀢𑁄 ‘‘𑀢𑀻𑀡𑀺 𑀲𑀦𑁆𑀣𑀢𑀸𑀦𑀺 𑀧𑀦 𑀯𑀺𑀦𑀬𑀓𑀫𑁆𑀫𑀁 𑀓𑀢𑁆𑀯𑀸 𑀧𑀝𑀺𑀮𑀪𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀦𑁆𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀢𑀸𑀦𑀺 𑀅𑀓𑀧𑁆𑀧𑀺𑀬𑀸𑀦𑀻𑀢𑀺 𑀲𑀺𑀤𑁆𑀥𑀁, 𑀪𑀕𑀯𑀢𑀸 𑀘 𑀔𑁄𑀫𑀸𑀤𑀻𑀦𑀺 𑀙 𑀅𑀦𑀼𑀜𑁆𑀜𑀸𑀢𑀸𑀦𑀻𑀢𑀺 𑀓𑁄𑀲𑁂𑀬𑁆𑀬𑀁 𑀓𑀧𑁆𑀧𑀺𑀬𑀦𑁆𑀢𑀺 𑀲𑀺𑀤𑁆𑀥𑀁. 𑀏𑀯𑀁 𑀲𑀦𑁆𑀢𑁂 𑀲𑀼𑀤𑁆𑀥𑀓𑁄𑀲𑁂𑀬𑁆𑀬𑀫𑁆𑀧𑀺 𑀘𑀻𑀯𑀭𑀁 𑀓𑀧𑁆𑀧𑀺𑀬𑀁 𑀚𑀸𑀢𑀁, 𑀧𑀕𑁂𑀯 𑀓𑁄𑀲𑀺𑀬𑀫𑀺𑀲𑁆𑀲𑀓𑀲𑀦𑁆𑀣𑀢𑀘𑀻𑀯𑀭𑀦𑁆𑀢𑀺 𑀆𑀧𑀚𑁆𑀚𑀢𑀺. 𑀢𑀣𑀸 𑀓𑀫𑁆𑀩𑀮𑀜𑁆𑀘 𑀅𑀦𑀼𑀜𑁆𑀜𑀸𑀢𑀁, 𑀢𑀜𑁆𑀘 𑀲𑀼𑀤𑁆𑀥𑀺𑀓𑀫𑁆𑀧𑀺 𑀳𑁄𑀢𑀺 𑀚𑀸𑀢𑀺𑀓𑀸𑀴𑀓𑀪𑀸𑀯𑁂𑀦, 𑀧𑀕𑁂𑀯 𑀑𑀤𑀸𑀢𑀕𑁄𑀘𑀭𑀺𑀬𑀫𑀺𑀲𑁆𑀲𑀓𑀲𑀦𑁆𑀣𑀢𑀘𑀻𑀯𑀭𑀦𑁆𑀢𑀺 𑀆𑀧𑀚𑁆𑀚𑀢𑀺. 𑀢𑀢𑁄 𑀘 𑀅𑀜𑁆𑀜𑀫𑀜𑁆𑀜𑀯𑀺𑀭𑁄𑀥𑁄, 𑀢𑀲𑁆𑀫𑀸 𑀦 𑀲𑀦𑁆𑀣𑀢𑀁 𑀘𑀻𑀯𑀭𑀁 𑀦𑀸𑀫 𑀳𑁄𑀢𑀺, 𑀦𑀺𑀲𑀻𑀤𑀦𑀁 𑀧𑀦 𑀳𑁄𑀢𑀺 𑀢𑀲𑁆𑀲 𑀧𑀫𑀸𑀡𑀲𑀡𑁆𑀞𑀸𑀦𑀧𑀭𑀺𑀘𑁆𑀙𑁂𑀤𑀲𑀫𑁆𑀪𑀯𑀢𑁄. 𑀏𑀢𑁆𑀣𑀸𑀳𑀼 𑀓𑁂𑀘𑀺 𑀆𑀘𑀭𑀺𑀬𑀸 ‘‘𑀤𑀼𑀯𑀺𑀥𑀁 𑀦𑀺𑀲𑀻𑀤𑀦𑀁 𑀲𑀦𑁆𑀣𑀢𑀁, 𑀅𑀲𑀦𑁆𑀣𑀢𑀜𑁆𑀘. 𑀢𑀢𑁆𑀣 𑀲𑀦𑁆𑀣𑀢𑀁 𑀲𑀦𑁆𑀣𑀢𑀫𑁂𑀯. 𑀅𑀲𑀦𑁆𑀣𑀢𑀁 𑀔𑁄𑀫𑀸𑀤𑀺𑀙𑀩𑁆𑀩𑀺𑀥𑀁, 𑀢𑀤𑀦𑀼𑀮𑁄𑀫𑀁 𑀯𑀸 𑀳𑁄𑀢𑀺, 𑀅𑀬𑀫𑁂𑀢𑁂𑀲𑀁 𑀯𑀺𑀲𑁂𑀲𑁄’’𑀢𑀺.

𑀏𑀢𑁆𑀣𑀸𑀳 𑁋 𑀓𑀲𑁆𑀫𑀸 𑀧𑀦𑁂𑀢𑁆𑀣 ‘‘𑀲𑀦𑁆𑀣𑀢𑀁 𑀧𑀦 𑀪𑀺𑀓𑁆𑀔𑀼𑀦𑀸’’𑀢𑀺 𑀲𑀺𑀓𑁆𑀔𑀸𑀧𑀤𑀁 𑀅𑀧𑀜𑁆𑀜𑀸𑀧𑁂𑀢𑁆𑀯𑀸 ‘‘𑀦𑀺𑀲𑀻𑀤𑀦𑀲𑀦𑁆𑀣𑀢’’𑀦𑁆𑀢𑀺 𑀧𑀜𑁆𑀜𑀢𑁆𑀢𑀦𑁆𑀢𑀺? 𑀘𑀻𑀯𑀭𑀲𑀜𑁆𑀜𑀺𑀢𑀸𑀬 𑀲𑀦𑁆𑀣𑀢𑀸𑀦𑀁 𑀉𑀚𑁆𑀛𑀺𑀢𑀢𑁆𑀢𑀸 𑀢𑁂𑀲𑀁 𑀅𑀘𑀻𑀯𑀭𑀪𑀸𑀯𑀤𑀲𑁆𑀲𑀦𑀢𑁆𑀣𑀁 𑀢𑀣𑀸 𑀧𑀜𑁆𑀜𑀢𑁆𑀢𑀦𑁆𑀢𑀺 𑀯𑀼𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀢𑁂 𑀪𑀺𑀓𑁆𑀔𑀽 𑀥𑀼𑀢𑀗𑁆𑀕𑀪𑁂𑀤𑀪𑀬𑀸 𑀢𑀸𑀦𑀺 𑀉𑀚𑁆𑀛𑀺𑀢𑁆𑀯𑀸 𑀢𑁂𑀭𑀲𑀸𑀧𑀺 𑀥𑀼𑀢𑀗𑁆𑀕𑀸𑀦𑀺 𑀲𑀫𑀸𑀤𑀺𑀬𑀺𑀁𑀲𑀼, 𑀲𑀻𑀲𑀤𑀲𑁆𑀲𑀦𑀯𑀲𑁂𑀦 𑀢𑀻𑀡𑁂𑀯 𑀯𑀼𑀢𑁆𑀢𑀸𑀦𑀺, 𑀪𑀕𑀯𑀸 𑀘 𑀢𑁂𑀲𑀁 𑀲𑀦𑁆𑀣𑀢𑀁 𑀅𑀦𑀼𑀚𑀸𑀦𑀺, 𑀢𑀢𑁄 𑀦𑁂𑀲𑀁 𑀏𑀯𑀁 𑀳𑁄𑀢𑀺 ‘‘𑀦𑀺𑀲𑀻𑀤𑀦𑀘𑀻𑀯𑀭𑀲𑀡𑁆𑀞𑀸𑀦𑀫𑁆𑀧𑁂𑀢𑀁 𑀦𑀺𑀲𑀻𑀤𑀦𑀲𑀦𑁆𑀣𑀢𑀁 𑀦𑁄 𑀅𑀦𑀼𑀜𑁆𑀜𑀸𑀢𑀁, 𑀘𑀢𑀼𑀢𑁆𑀣𑀘𑀻𑀯𑀭𑀪𑀸𑀯𑁂𑀦 𑀧𑀕𑁂𑀯 𑀓𑀢𑀲𑀦𑁆𑀣𑀢𑀁 𑀯𑀸’’𑀢𑀺. 𑀢𑀢𑁄 𑀲𑀦𑁆𑀣𑀢𑁂 𑀦𑁂𑀲𑀁 𑀘𑀻𑀯𑀭𑀲𑀜𑁆𑀜𑀺𑀢𑀸 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀢𑀤𑀢𑁆𑀣𑀁 𑀪𑀕𑀯𑀢𑀸 𑀦𑀺𑀲𑀻𑀤𑀦𑀲𑀦𑁆𑀣𑀢𑀦𑁆𑀢𑀺 𑀧𑀜𑁆𑀜𑀢𑁆𑀢𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. ‘‘𑀧𑀘𑁆𑀙𑀺𑀫𑀸𑀦𑀺 𑀤𑁆𑀯𑁂 𑀯𑀝𑁆𑀝𑀦𑁆𑀢𑀻’’𑀢𑀺 𑀓𑀣𑀁 𑀧𑀜𑁆𑀜𑀸𑀬𑀢𑀻𑀢𑀺 𑀘𑁂? ‘‘𑀅𑀦𑀸𑀧𑀢𑁆𑀢𑀺 𑀅𑀜𑁆𑀜𑁂𑀦 𑀓𑀢𑀁 𑀧𑀝𑀺𑀮𑀪𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀢𑀻’’𑀢𑀺 𑀯𑀘𑀦𑀢𑁄𑀢𑀺.

𑀦𑀺𑀲𑀻𑀤𑀦𑀲𑀦𑁆𑀣𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀏𑀴𑀓𑀮𑁄𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁭𑁨-𑁩. 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀲𑁆𑀲𑀸𑀢𑀺 𑀇𑀫𑀺𑀦𑀸 𑀧𑀓𑀢𑀺𑀬𑀸 𑀤𑀻𑀖𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀲𑁆𑀲 𑀉𑀧𑁆𑀧𑀦𑁆𑀦𑀸𑀦𑀺𑀧𑀺 𑀢𑀺𑀬𑁄𑀚𑀦𑀧𑀭𑀫𑀫𑁂𑀯 𑀳𑀭𑀺𑀢𑀩𑁆𑀩𑀸𑀦𑀺, 𑀧𑀕𑁂𑀯 𑀅𑀧𑁆𑀧𑀝𑀺𑀧𑀦𑁆𑀦𑀲𑁆𑀲𑀸𑀢𑀺 𑀤𑀲𑁆𑀲𑁂𑀢𑀺. 𑀅𑀤𑁆𑀥𑀸𑀦𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀯𑀸 𑀲𑀫𑁆𑀩𑀦𑁆𑀥𑁄. 𑀢𑁂𑀦𑁂𑀯 𑀯𑀸𑀲𑀸𑀥𑀺𑀧𑁆𑀧𑀸𑀬𑀲𑁆𑀲 𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀕𑀫𑀦𑀼𑀲𑁆𑀲𑀸𑀳𑀢𑁆𑀢𑀸 ‘‘𑀅𑀧𑁆𑀧𑀝𑀺𑀧𑀦𑁆𑀦𑁄’’𑀢𑀺 𑀲𑀗𑁆𑀔𑁆𑀬𑀁 𑀕𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀲𑀺𑀤𑁆𑀥𑀸. 𑀇𑀫𑀲𑁆𑀫𑀺𑀁 𑀅𑀢𑁆𑀣𑀯𑀺𑀓𑀧𑁆𑀧𑁂 𑀳𑀺 𑀪𑀺𑀓𑁆𑀔𑀼𑀦𑁄 𑀧𑀦𑁂𑀯 𑀏𑀴𑀓𑀮𑁄𑀫𑀸𑀦𑀺 𑀉𑀧𑁆𑀧𑀚𑁆𑀚𑁂𑀬𑁆𑀬𑀼𑀁…𑀧𑁂… 𑀅𑀲𑀦𑁆𑀢𑁂𑀧𑀺 𑀳𑀸𑀭𑀓𑁂 𑀅𑀤𑁆𑀥𑀸𑀦𑀁 𑀫𑀕𑁆𑀕𑀧𑁆𑀧𑀝𑀺𑀧𑀦𑁆𑀦𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀦𑁆𑀢𑀺 𑀬𑁄𑀚𑀦𑀸 𑀯𑁂𑀤𑀺𑀢𑀩𑁆𑀩𑀸. 𑀆𑀓𑀗𑁆𑀔𑀫𑀸𑀦𑁂𑀦 𑀪𑀺𑀓𑁆𑀔𑀼𑀦𑀸 𑀧𑀝𑀺𑀕𑁆𑀕𑀳𑁂𑀢𑀩𑁆𑀩𑀸𑀦𑀻𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀸𑀦𑀁𑀬𑁂𑀯 𑀢𑀺𑀬𑁄𑀚𑀦𑀸𑀢𑀺𑀓𑁆𑀓𑀫𑁂 𑀆𑀧𑀢𑁆𑀢𑀺𑀁 𑀤𑀲𑁆𑀲𑁂𑀢𑀺. 𑀢𑁂𑀦 𑀅𑀦𑀸𑀓𑀗𑁆𑀔𑀫𑀸𑀦𑁂𑀦 𑀧𑀭𑀲𑀦𑁆𑀢𑀓𑀸𑀦𑀺 𑀧𑀝𑀺𑀕𑁆𑀕𑀳𑀺𑀢𑀸𑀦𑀺 𑀅𑀢𑀺𑀭𑁂𑀓𑀢𑀺𑀬𑁄𑀚𑀦𑀁 𑀳𑀭𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺 𑀲𑀺𑀤𑁆𑀥𑀸. 𑀅𑀬𑀫𑀢𑁆𑀣𑁄 ‘‘𑀪𑀺𑀓𑁆𑀔𑀼𑀦𑁄 𑀉𑀧𑁆𑀧𑀚𑁆𑀚𑁂𑀬𑁆𑀬𑀼’’𑀦𑁆𑀢𑀺 𑀇𑀫𑀺𑀦𑀸, ‘‘𑀅𑀘𑁆𑀙𑀺𑀦𑁆𑀦𑀁 𑀧𑀝𑀺𑀮𑀪𑀺𑀢𑁆𑀯𑀸’’𑀢𑀺 𑀇𑀫𑀺𑀦𑀸 𑀘 𑀤𑀻𑀧𑀺𑀢𑁄𑀯 𑀳𑁄𑀢𑀻𑀢𑀺. 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 𑀘 ‘‘𑀅𑀜𑁆𑀜𑀁 𑀪𑀺𑀓𑁆𑀔𑀼𑀁 𑀳𑀭𑀸𑀧𑁂𑀦𑁆𑀢𑁄 𑀕𑀘𑁆𑀙𑀢𑀺 𑀘𑁂, 𑀤𑁆𑀯𑀺𑀦𑁆𑀦𑀁 𑀅𑀦𑀸𑀧𑀢𑁆𑀢𑀻𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀤𑁆𑀯𑁂 𑀪𑀺𑀓𑁆𑀔𑀽 𑀢𑀺𑀬𑁄𑀚𑀦𑀧𑀭𑀫𑀁 𑀧𑀢𑁆𑀯𑀸 𑀅𑀜𑁆𑀜𑀫𑀜𑁆𑀜𑀲𑁆𑀲 𑀪𑀡𑁆𑀟𑀁 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀘𑁂 𑀳𑀭𑀦𑁆𑀢𑀺, 𑀅𑀦𑀸𑀧𑀢𑁆𑀢𑀻𑀢𑀺 𑀲𑀺𑀤𑁆𑀥𑀁, 𑀢𑁂𑀦𑁂𑀯 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 ‘‘𑀅𑀜𑁆𑀜𑀁 𑀳𑀭𑀸𑀧𑁂𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑀺𑀁 𑀳𑀭𑀸𑀧𑁂𑀢𑀺? 𑀚𑀸𑀦𑀦𑁆𑀢𑀁 𑀅𑀚𑀸𑀦𑀦𑁆𑀢𑀁. 𑀓𑀺𑀜𑁆𑀘𑁂𑀢𑁆𑀣 𑀬𑀤𑀺 𑀚𑀸𑀦𑀦𑁆𑀢𑀁, ‘‘𑀅𑀜𑁆𑀜𑁄 𑀳𑀭𑀺𑀲𑁆𑀲𑀢𑀻𑀢𑀺 𑀞𑀧𑁂𑀢𑀺, 𑀢𑁂𑀦 𑀳𑀭𑀺𑀢𑁂𑀧𑀺 𑀆𑀧𑀢𑁆𑀢𑀺𑀬𑁂𑀯𑀸’’𑀢𑀺 𑀏𑀓𑀁𑀲𑀢𑁄 𑀦 𑀯𑀢𑁆𑀢𑀩𑁆𑀩𑀁. 𑀚𑀸𑀦𑀦𑁆𑀢𑁄𑀧𑀺 𑀳𑀺 𑀏𑀓𑀘𑁆𑀘𑁄 𑀳𑀭𑀢𑀻𑀢𑀺. 𑀢𑀢𑁄 𑀅𑀝𑁆𑀞𑀓𑀣𑀸𑀬 𑀯𑀺𑀭𑀼𑀚𑁆𑀛𑀢𑀺. 𑀅𑀣 𑀅𑀚𑀸𑀦𑀦𑁆𑀢𑀁, ‘‘𑀅𑀜𑁆𑀜𑀲𑁆𑀲 𑀬𑀸𑀦𑁂 𑀯𑀸 𑀪𑀡𑁆𑀟𑁂 𑀯𑀸 𑀅𑀚𑀸𑀦𑀦𑁆𑀢𑀲𑁆𑀲 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀺𑀬𑁄𑀚𑀦𑀁 𑀅𑀢𑀺𑀓𑁆𑀓𑀸𑀫𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀻’’𑀢𑀺 𑀧𑀸𑀴𑀺𑀬𑀸 𑀯𑀺𑀭𑀼𑀚𑁆𑀛𑀢𑀺, 𑀅𑀣 𑀉𑀪𑁄𑀧𑀺 𑀏𑀓𑀢𑁄 𑀏𑀓𑀁 𑀪𑀡𑁆𑀟𑀁 𑀳𑀭𑀸𑀧𑁂𑀦𑁆𑀢𑀺, 𑀢𑀫𑁆𑀧𑀺 𑀦𑀺𑀲𑁆𑀲𑀕𑁆𑀕𑀺𑀬𑀁 𑀲𑀺𑀬𑀸. 𑀅𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀬𑀼𑀢𑁆𑀢𑀺𑀬𑀸 𑀯𑀺𑀭𑀼𑀚𑁆𑀛𑀢𑀺 ‘‘𑀢𑀺𑀬𑁄𑀚𑀦𑀧𑀭𑀫𑀁 𑀲𑀳𑀢𑁆𑀣𑀸 𑀳𑀭𑀺𑀢𑀩𑁆𑀩𑀸𑀦𑀺 𑀅𑀲𑀦𑁆𑀢𑁂 𑀳𑀸𑀭𑀓𑁂’’𑀢𑀺 𑀅𑀯𑀺𑀲𑁂𑀲𑁂𑀦 𑀘 𑀧𑀸𑀴𑀺 𑀯𑀼𑀢𑁆𑀢𑀸. 𑀳𑀸𑀭𑀓𑁄𑀧𑀺 𑀲𑀘𑁂𑀢𑀦𑁄 𑀅𑀘𑁂𑀢𑀦𑁄𑀢𑀺 𑀤𑀼𑀯𑀺𑀥𑁄. 𑀲𑀘𑁂𑀢𑀦𑁄𑀧𑀺 𑀏𑀴𑀓𑀮𑁄𑀫𑀪𑀸𑀯𑀁 𑀯𑀸 ‘‘𑀅𑀳𑀫𑀺𑀤𑀁 𑀳𑀭𑀸𑀫𑀻’’𑀢𑀺 𑀯𑀸 ‘‘𑀫𑀁 𑀏𑀲 𑀇𑀤𑀁 𑀳𑀭𑀸𑀧𑁂𑀢𑀻’’𑀢𑀺 𑀯𑀸 𑀚𑀸𑀦𑀦𑀸𑀚𑀸𑀦𑀦𑀯𑀲𑁂𑀦 𑀤𑀼𑀯𑀺𑀥𑁄 𑀳𑁄𑀢𑀺. 𑀢𑀢𑁆𑀣 𑀅𑀘𑁂𑀢𑀦𑁄 𑀦𑀸𑀫 𑀳𑀸𑀭𑀓𑁄 𑀦𑀤𑀻𑀲𑁄𑀢𑁄 𑀯𑀸 𑀦𑀸𑀯𑀸 𑀯𑀸 𑀅𑀲𑁆𑀲𑀸𑀫𑀺𑀓𑀬𑀸𑀦𑀁 𑀯𑀸 𑀳𑁄𑀢𑀺. 𑀲𑀘𑁂𑀢𑀦𑁄 𑀧𑀸𑀓𑀝𑁄𑀯. 𑀢𑀢𑁆𑀣 ‘‘𑀫𑀁 𑀏𑀲 𑀇𑀤𑀁 𑀳𑀭𑀸𑀧𑁂𑀢𑀻’’𑀢𑀺 𑀏𑀢𑁆𑀢𑀓𑀁 𑀚𑀸𑀦𑀦𑁆𑀢𑀁 𑀫𑀦𑀼𑀲𑁆𑀲𑀁 𑀯𑀸 𑀢𑀺𑀭𑀘𑁆𑀙𑀸𑀦𑀕𑀢𑀁 𑀯𑀸 𑀅𑀜𑁆𑀜𑀁 𑀳𑀭𑀸𑀧𑁂𑀢𑀺, 𑀅𑀦𑀸𑀧𑀢𑁆𑀢𑀻𑀢𑀺 𑀅𑀦𑀼𑀕𑀡𑁆𑀞𑀺𑀧𑀤𑀦𑀬𑁄. 𑀅𑀬𑀁 𑀧𑀸𑀴𑀺𑀬𑀸, 𑀅𑀝𑁆𑀞𑀓𑀣𑀸𑀬 𑀘 𑀏𑀓𑀭𑀲𑁄 𑀯𑀺𑀦𑀺𑀘𑁆𑀙𑀬𑁄, ‘‘𑀅𑀲𑀦𑁆𑀢𑁂 𑀳𑀸𑀭𑀓𑁂’’𑀢𑀺 𑀓𑀺𑀜𑁆𑀘𑀸𑀧𑀺 𑀇𑀤𑀁 𑀅𑀯𑀺𑀲𑁂𑀲𑀢𑁄 𑀯𑀼𑀢𑁆𑀢𑀁, ‘‘𑀅𑀜𑁆𑀜𑀲𑁆𑀲 𑀬𑀸𑀦𑁂 𑀯𑀸 𑀪𑀡𑁆𑀟𑁂 𑀯𑀸 𑀅𑀚𑀸𑀦𑀦𑁆𑀢𑀲𑁆𑀲𑀸’’𑀢𑀺 𑀯𑀘𑀦𑀢𑁄 𑀧𑀦 𑀲𑀘𑁂𑀢𑀦𑁄𑀯 𑀳𑀸𑀭𑀓𑁄 𑀢𑀢𑁆𑀣 𑀅𑀥𑀺𑀧𑁆𑀧𑁂𑀢𑁄𑀢𑀺 𑀧𑀜𑁆𑀜𑀸𑀬𑀢𑀺, 𑀲𑁄 𑀘 𑀏𑀴𑀓𑀮𑁄𑀫𑀪𑀸𑀯𑀜𑁆𑀘 ‘‘𑀇𑀤𑀁 𑀳𑀭𑀸𑀫𑀻’’𑀢𑀺 𑀘 𑀚𑀸𑀦𑀦𑁆𑀢𑁄 𑀦𑀸𑀥𑀺𑀧𑁆𑀧𑁂𑀢𑁄. 𑀢𑁂𑀦 𑀯𑀼𑀢𑁆𑀢𑀁 ‘‘𑀅𑀜𑁆𑀜𑁄 𑀳𑀭𑀺𑀲𑁆𑀲𑀢𑀻𑀢𑀺 𑀞𑀧𑁂𑀢𑀺, 𑀢𑁂𑀦 𑀳𑀭𑀺𑀢𑁂𑀧𑀺 𑀆𑀧𑀢𑁆𑀢𑀺𑀬𑁂𑀯𑀸’’𑀢𑀺𑀆𑀤𑀺. 𑀢𑀢𑁆𑀣 𑀳𑁂𑀢𑀼𑀓𑀢𑁆𑀢𑀼𑀦𑁄 𑀅𑀪𑀸𑀯𑀢𑁄𑀯. 𑀧𑀸𑀴𑀺𑀬𑀜𑁆𑀳𑀺 ‘‘𑀅𑀜𑁆𑀜𑀁 𑀳𑀭𑀸𑀧𑁂𑀢𑀻’’𑀢𑀺 𑀳𑁂𑀢𑀼𑀓𑀢𑁆𑀢𑀼𑀯𑀲𑁂𑀦 𑀯𑀼𑀢𑁆𑀢𑀸. 𑀇𑀢𑀭𑁂 𑀤𑁆𑀯𑁂 𑀚𑀸𑀦𑀦𑁆𑀢𑀸 𑀇𑀥 𑀲𑀫𑁆𑀪𑀯𑀦𑁆𑀢𑀺. ‘‘𑀅𑀚𑀸𑀦𑀦𑁆𑀢𑀲𑁆𑀲 𑀧𑀓𑁆𑀔𑀺𑀧𑀺𑀢𑁆𑀯𑀸’’𑀢𑀺 𑀧𑀸𑀴𑀺𑀬𑀁 ‘‘𑀏𑀲 𑀳𑀭𑀸𑀧𑁂𑀢𑀻’’𑀢𑀺 𑀯𑀸 ‘‘𑀇𑀤𑀁 𑀞𑀸𑀦𑀁 𑀅𑀢𑀺𑀓𑁆𑀓𑀫𑀸𑀧𑁂𑀢𑀻’’𑀢𑀺 𑀯𑀸 𑀚𑀸𑀦𑀦𑁆𑀢𑀲𑁆𑀲 𑀬𑀸𑀦𑁂 𑀯𑀸 𑀪𑀡𑁆𑀟𑁂 𑀯𑀸 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑀺𑀬𑁄𑀚𑀦𑀁 𑀅𑀢𑀺𑀓𑁆𑀓𑀫𑀸𑀧𑁂𑀢𑀺, 𑀦 𑀦𑀺𑀲𑁆𑀲𑀕𑁆𑀕𑀺𑀬𑀸 𑀳𑁄𑀦𑁆𑀢𑀻𑀢𑀺 𑀤𑀻𑀧𑁂𑀢𑀺.

‘‘𑀳𑀭𑀸𑀧𑁂𑀢𑀻’’𑀢𑀺 𑀇𑀤𑀁 𑀳𑁂𑀢𑀼𑀓𑀢𑁆𑀢𑀼𑀯𑀘𑀦𑀢𑀁 𑀲𑀸𑀥𑁂𑀢𑀺, 𑀢𑀲𑁆𑀫𑀸 𑀅𑀝𑁆𑀞𑀓𑀣𑀸𑀬𑀁 ‘‘𑀲𑀸𑀫𑀺𑀓𑀲𑁆𑀲 𑀅𑀚𑀸𑀦𑀦𑁆𑀢𑀲𑁆𑀲𑁂𑀯𑀸’’𑀢𑀺 𑀇𑀤𑀁 ‘‘𑀫𑀁 𑀏𑀲 𑀳𑀭𑀸𑀧𑁂𑀢𑀻’’𑀢𑀺 𑀏𑀯𑀁 𑀅𑀚𑀸𑀦𑀦𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. ‘‘𑀲𑀸𑀭𑁂𑀢𑀺 𑀘𑁄𑀤𑁂𑀢𑀺 𑀅𑀦𑀼𑀩𑀦𑁆𑀥𑀸𑀧𑁂𑀢𑀻’’𑀢𑀺 𑀇𑀤𑀁 ‘‘𑀫𑀁 𑀏𑀲 𑀇𑀤𑀁 𑀞𑀸𑀦𑀁 𑀅𑀢𑀺𑀓𑁆𑀓𑀫𑀸𑀧𑁂𑀢𑀻’’𑀢𑀺 𑀏𑀯𑀁 𑀚𑀸𑀦𑀦𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀅𑀚𑀸𑀦𑀦𑁆𑀢𑁄𑀧𑀺 𑀲𑀸𑀭𑀡𑀸𑀤𑀻𑀳𑀺 𑀞𑀺𑀢𑀝𑁆𑀞𑀸𑀦𑀁 𑀦𑀸𑀢𑀺𑀓𑁆𑀓𑀫𑀢𑀺, 𑀦 𑀯𑀸 𑀅𑀦𑀼𑀩𑀦𑁆𑀥𑀢𑀺. 𑀅𑀣 𑀲𑀸𑀭𑀡𑀸𑀤𑀻𑀳𑀺 𑀅𑀦𑀢𑀺𑀓𑁆𑀓𑀫𑀺𑀢𑁆𑀯𑀸 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀅𑀢𑀺𑀓𑁆𑀓𑀫𑀢𑀺 𑀆𑀧𑀢𑁆𑀢𑀺 𑀏𑀯 𑀪𑀺𑀓𑁆𑀔𑀼𑀦𑁄 𑀳𑁂𑀢𑀼𑀓𑀢𑁆𑀢𑀼𑀪𑀸𑀯𑀸𑀲𑀫𑁆𑀪𑀯𑀢𑁄.

𑀇𑀤𑀸𑀦𑀺 𑀬𑀣𑀸𑀞𑀺𑀢𑀝𑁆𑀞𑀸𑀦𑀢𑁄 𑀧𑀝𑁆𑀞𑀸𑀬 𑀯𑀓𑁆𑀔𑀸𑀫, ‘‘𑀅𑀲𑀦𑁆𑀢𑁂𑀧𑀺 𑀳𑀸𑀭𑀓𑁂’’𑀢𑀺 𑀳𑀸𑀭𑀓𑀸𑀮𑀸𑀪𑀧𑀘𑁆𑀘𑀬𑀸𑀧𑀺 𑀲𑀬𑀁 𑀳𑀭𑀡𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀫𑁂𑀯, 𑀧𑀕𑁂𑀯 𑀲𑀢𑀺 𑀳𑀸𑀭𑀓𑁂𑀢𑀺 𑀅𑀬𑀫𑁂𑀓𑁄 𑀅𑀢𑁆𑀣𑁄. 𑀅𑀯𑀥𑀸𑀭𑀡𑀢𑁆𑀣𑀁 𑀅𑀧𑀺-𑀲𑀤𑁆𑀤𑀁 𑀕𑀳𑁂𑀢𑁆𑀯𑀸 𑀅𑀲𑀦𑁆𑀢𑁂 𑀏𑀯 𑀳𑀸𑀭𑀓𑁂 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀲𑀢𑀺 𑀧𑀦 𑀳𑀸𑀭𑀓𑁂 𑀦 𑀢𑁂𑀦 𑀳𑀭𑀸𑀧𑁂𑀦𑁆𑀢𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀅𑀬𑀁 𑀤𑀼𑀢𑀺𑀬𑁄 𑀅𑀢𑁆𑀣𑁄. ‘‘𑀲𑀗𑁆𑀖𑀢𑁄 𑀯𑀸…𑀧𑁂… 𑀅𑀢𑁆𑀢𑀦𑁄 𑀯𑀸 𑀥𑀦𑁂𑀦𑀸’’𑀢𑀺 𑀇𑀫𑀺𑀦𑀸 𑀓𑀺𑀜𑁆𑀘𑀸𑀧𑀺 𑀅𑀘𑀺𑀢𑁆𑀢𑀓𑀫𑀺𑀤𑀁 𑀲𑀺𑀓𑁆𑀔𑀸𑀧𑀤𑀁, 𑀲𑀗𑁆𑀖𑀸𑀤𑀺𑀢𑁄 𑀧𑀦 𑀅𑀢𑁆𑀢𑀦𑀸 𑀆𑀓𑀗𑁆𑀔𑀫𑀸𑀦𑁂𑀦 𑀧𑀝𑀺𑀕𑁆𑀕𑀳𑀺𑀢𑀲𑁆𑀲𑁂𑀯 𑀏𑀴𑀓𑀮𑁄𑀫𑀲𑁆𑀲 𑀢𑀺𑀬𑁄𑀚𑀦𑀸𑀢𑀺𑀓𑁆𑀓𑀫𑁂 𑀆𑀧𑀢𑁆𑀢𑀺, 𑀦 𑀅𑀚𑀸𑀦𑀢𑁄 𑀅𑀧𑁆𑀧𑀝𑀺𑀕𑁆𑀕𑀳𑀺𑀢𑀲𑁆𑀲 𑀘𑀻𑀯𑀭𑀸𑀤𑀻𑀲𑀼 𑀓𑀼𑀢𑁄𑀘𑀺 𑀮𑀕𑁆𑀕𑀲𑁆𑀲 𑀅𑀢𑀺𑀓𑁆𑀓𑀫𑀦𑁂𑀢𑀺 𑀤𑀻𑀧𑁂𑀢𑀺. 𑀅𑀦𑀼𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀓𑀫𑁆𑀩𑀮𑀲𑁆𑀲 𑀉𑀧𑀭𑀺 𑀦𑀺𑀧𑀚𑁆𑀚𑀺𑀢𑁆𑀯𑀸 𑀕𑀘𑁆𑀙𑀦𑁆𑀢𑀲𑁆𑀲 𑀲𑀘𑁂 𑀏𑀓𑀫𑁆𑀧𑀺 𑀮𑁄𑀫𑀁 𑀘𑀻𑀯𑀭𑁂 𑀮𑀕𑁆𑀕𑀁 𑀳𑁄𑀢𑀺, 𑀆𑀧𑀢𑁆𑀢𑀺 𑀏𑀯 𑀓𑀫𑁆𑀩𑀮𑀢𑁄 𑀯𑀺𑀚𑀝𑀺𑀢𑀢𑁆𑀢𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀓𑀫𑁆𑀩𑀮𑀲𑁆𑀲 𑀧𑀝𑀺𑀕𑁆𑀕𑀳𑀺𑀢𑀢𑁆𑀢𑀸 𑀅𑀢𑁆𑀢𑀦𑁄 𑀇𑀘𑁆𑀙𑀸𑀬 𑀧𑀝𑀺𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀻𑀢𑀺 𑀬𑀼𑀢𑁆𑀢𑀁. 𑀬𑀲𑁆𑀫𑀸 ‘‘𑀅𑀦𑀸𑀧𑀢𑁆𑀢𑀺 𑀓𑀢𑀪𑀡𑁆𑀟𑁂’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀁 𑀅𑀦𑁂𑀓𑀫𑁆𑀧𑀺 𑀓𑀢𑀪𑀡𑁆𑀟𑀝𑁆𑀞𑀸𑀦𑀺𑀬𑀫𑁂𑀯 𑀳𑁄𑀢𑀺. 𑀢𑀜𑁆𑀳𑀺 𑀅𑀦𑁂𑀦 𑀧𑀝𑀺𑀕𑁆𑀕𑀳𑀺𑀢𑀁, 𑀦 𑀮𑁄𑀫𑀁. 𑀅𑀣 𑀮𑁄𑀫𑀫𑁆𑀧𑀺 𑀅𑀕𑁆𑀕𑀳𑀺𑀢𑀫𑁂𑀯 𑀳𑁄𑀢𑀺, 𑀓𑀢𑀪𑀡𑁆𑀟𑀁 𑀤𑀼𑀧𑁆𑀧𑀭𑀺𑀳𑀸𑀭𑀺𑀬𑀮𑁄𑀫𑀯𑀺𑀦𑀺𑀩𑁆𑀪𑁄𑀕𑀓𑀢𑀪𑀡𑁆𑀟𑁄 𑀦𑀺𑀬𑀫𑁄. 𑀏𑀯𑀁 𑀲𑀦𑁆𑀢𑁂 𑀅𑀓𑀢𑀪𑀡𑁆𑀟𑁂 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁, 𑀓𑀢𑀪𑀡𑁆𑀟𑁂 𑀢𑀺𑀓𑀤𑀼𑀓𑁆𑀓𑀝𑀜𑁆𑀘 𑀦𑀬𑀢𑁄 𑀤𑀲𑁆𑀲𑁂𑀢𑀩𑁆𑀩𑀁 𑀪𑀯𑁂𑀬𑁆𑀬, 𑀅𑀜𑁆𑀜𑀣𑀸 𑀢𑀺𑀓𑀲𑁆𑀲 𑀤𑀲𑁆𑀲𑀺𑀢𑀢𑁆𑀢𑀸. 𑀲𑀉𑀲𑁆𑀲𑀸𑀳𑀢𑁆𑀢𑀸𑀢𑀺 𑀅𑀧𑁆𑀧𑀝𑀺𑀧𑁆𑀧𑀲𑁆𑀲𑀤𑁆𑀥𑀕𑀫𑀦𑀢𑁆𑀢𑀸. 𑀅𑀘𑀺𑀢𑁆𑀢𑀓𑀢𑁆𑀢𑀸 𑀘𑀸𑀢𑀺 𑀪𑀺𑀓𑁆𑀔𑀼𑀦𑁄 𑀉𑀲𑁆𑀲𑀸𑀳𑀸𑀦𑀼𑀭𑀽𑀧𑀁 𑀮𑁄𑀫𑀸𑀦𑀁 𑀢𑀺𑀬𑁄𑀚𑀦𑀸𑀢𑀺𑀓𑁆𑀓𑀫𑀦𑀢𑁄 𑀯𑀺𑀦𑀸𑀧𑀺 𑀧𑀬𑁄𑀕𑀘𑀺𑀢𑁆𑀢𑁂𑀦 𑀳𑀭𑀡𑀘𑀺𑀢𑁆𑀢𑁂𑀦 𑀆𑀧𑀚𑁆𑀚𑀢𑀺 𑀏𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀲𑀸 𑀅𑀦𑀸𑀧𑀢𑁆𑀢𑀺 𑀧𑀸𑀴𑀺𑀬𑀸 𑀦 𑀲𑀫𑁂𑀢𑀻𑀢𑀺 𑀅𑀦𑁆𑀢𑁄 𑀧𑀦 𑀧𑀬𑁄𑀕𑁂𑀦 𑀢𑀺𑀬𑁄𑀚𑀦𑀧𑀭𑀫𑀁 𑀅𑀢𑀺𑀓𑁆𑀓𑀫𑀺𑀢𑀢𑁆𑀢𑀸 𑀅𑀦𑀸𑀧𑀢𑁆𑀢𑀺. ‘‘𑀢𑀺𑀬𑁄𑀚𑀦𑀁 𑀳𑀭𑀢𑀻’’𑀢𑀺 𑀇𑀫𑀺𑀦𑀸 𑀢𑀺𑀬𑁄𑀚𑀦𑀁 𑀧𑀤𑀲𑀸 𑀦𑁂𑀢𑀼𑀓𑀸𑀫𑁄𑀧𑀺 𑀅𑀦𑁆𑀢𑁄𑀢𑀺𑀬𑁄𑀚𑀦𑁂 𑀧𑀤𑁂 𑀧𑀤𑁂 𑀤𑀼𑀓𑁆𑀓𑀝𑀁 𑀦𑀸𑀧𑀚𑁆𑀚𑀢𑀻𑀢𑀺 𑀤𑀲𑁆𑀲𑁂𑀢𑀺, 𑀢𑀁 𑀬𑀼𑀢𑁆𑀢𑀁 ‘‘𑀢𑀺𑀬𑁄𑀚𑀦𑀁 𑀯𑀸𑀲𑀸𑀥𑀺𑀧𑁆𑀧𑀸𑀬𑁄 𑀕𑀦𑁆𑀢𑁆𑀯𑀸 𑀢𑀢𑁄 𑀧𑀭𑀁 𑀳𑀭𑀢𑀻’𑀢𑀺 𑀯𑀘𑀦𑀲𑁆𑀲𑀢𑁆𑀣𑀺𑀢𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀧𑀼𑀦𑀧𑀺 𑀯𑀼𑀢𑁆𑀢𑀁 ‘‘𑀅𑀜𑁆𑀜𑀁 𑀳𑀭𑀸𑀧𑁂𑀢𑀻𑀢𑀺 ‘𑀇𑀤𑀁 𑀳𑀭𑀺𑀲𑁆𑀲𑀸𑀫𑀻’𑀢𑀺 𑀲𑀉𑀲𑁆𑀲𑀸𑀳𑀫𑁂𑀯 𑀅𑀜𑁆𑀜𑀁 𑀳𑀭𑀸𑀧𑁂𑀢𑀻𑀢𑀺 𑀅𑀢𑁆𑀣𑁄. 𑀇𑀢𑀭𑀣𑀸 𑀕𑀘𑁆𑀙𑀦𑁆𑀢𑀲𑁆𑀲 𑀲𑀻𑀲𑁂 𑀞𑀧𑁂𑀲𑀺, 𑀢𑀲𑁆𑀫𑀺𑀁 𑀅𑀚𑀸𑀦𑀦𑁆𑀢𑁂𑀧𑀺 𑀅𑀦𑀸𑀧𑀢𑁆𑀢𑀺 𑀲𑀺𑀬𑀸’’𑀢𑀺. 𑀲𑀘𑁂 𑀧𑀦 ‘‘𑀅𑀕𑀘𑁆𑀙𑀦𑁆𑀢𑁂 𑀬𑀸𑀦𑁂 𑀯𑀸’’𑀢𑀺𑀆𑀤𑀺𑀦𑀸 𑀦𑀬𑁂𑀦 𑀯𑀼𑀢𑁆𑀢𑀢𑁆𑀢𑀸 𑀳𑀭𑀡𑀸𑀤𑀻𑀳𑀺 𑀚𑀦𑀺𑀢𑀉𑀲𑁆𑀲𑀸𑀳𑀸𑀦𑀁 𑀳𑀢𑁆𑀣𑀺𑀆𑀤𑀻𑀦𑀁 ‘𑀇𑀤𑀁 𑀓𑀭𑀺𑀲𑁆𑀲𑀸𑀫𑀸’𑀢𑀺 𑀯𑀸 ‘𑀳𑀭𑀺𑀲𑁆𑀲𑀸𑀫𑀸’𑀢𑀺 𑀯𑀸 𑀆𑀪𑁄𑀕𑁂 𑀚𑀦𑀺𑀢𑁂 𑀏𑀯 𑀅𑀦𑀸𑀧𑀢𑁆𑀢𑀺, 𑀦 𑀅𑀚𑀦𑀺𑀢𑁂𑀢𑀺 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄 𑀆𑀳𑀸’’𑀢𑀺 𑀘 𑀯𑀼𑀢𑁆𑀢𑀁. 𑀧𑀭𑀺𑀯𑀢𑁆𑀢𑁂𑀢𑁆𑀯𑀸 𑀞𑀧𑀺𑀢𑁂𑀢𑀺 𑀤𑁆𑀯𑀺𑀦𑁆𑀦𑀫𑁆𑀧𑀺 𑀩𑀳𑀺 𑀦𑀺𑀓𑁆𑀔𑀺𑀧𑀺𑀢𑀢𑁆𑀢𑀸𑀢𑀺 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄. 𑀩𑀳𑀺𑀲𑀻𑀫𑀸𑀬 𑀞𑀧𑀺𑀢𑀁 𑀪𑀡𑁆𑀟𑀺𑀓𑀁 𑀅𑀦𑁆𑀢𑁄 𑀅𑀦𑁆𑀢𑁄𑀲𑀻𑀫𑀸𑀬𑀁 𑀞𑀧𑀺𑀢𑀁 𑀩𑀳𑀺 𑀓𑀭𑁄𑀢𑁄 𑀅𑀦𑀸𑀧𑀢𑁆𑀢𑀻𑀢𑀺 𑀓𑁂𑀘𑀺, 𑀦 𑀲𑀼𑀦𑁆𑀤𑀭𑀁 𑀯𑀺𑀬.

𑁫𑁭𑁫. 𑀧𑀝𑀺𑀮𑀪𑀺𑀢𑁆𑀯𑀸 𑀳𑀭𑀢𑀻𑀢𑀺 𑀧𑀞𑀫𑀢𑀺𑀬𑁄𑀚𑀦𑀢𑁄 𑀧𑀭𑀁 𑀳𑀭𑀢𑀺, 𑀦 𑀤𑀼𑀢𑀺𑀬𑀸𑀤𑀺𑀢𑁄𑀢𑀺 𑀅𑀢𑁆𑀣𑁄. 𑀓𑀢𑀪𑀡𑁆𑀟𑁂 𑀉𑀧𑁆𑀧𑀦𑁆𑀦𑁄𑀓𑀸𑀲𑀸𑀪𑀸𑀯𑀸 𑀅𑀦𑀸𑀧𑀢𑁆𑀢𑀺.

𑀏𑀴𑀓𑀮𑁄𑀫𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀏𑀴𑀓𑀮𑁄𑀫𑀥𑁄𑀯𑀸𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁮𑁧. 𑀓𑀺𑀜𑁆𑀘𑀸𑀧𑀺 𑀧𑀼𑀭𑀸𑀡𑀘𑀻𑀯𑀭𑀥𑁄𑀯𑀦𑀲𑀺𑀓𑁆𑀔𑀸𑀧𑀤𑁂 𑀘𑀻𑀯𑀭𑀁 𑀞𑀧𑁂𑀢𑁆𑀯𑀸 ‘‘𑀅𑀜𑁆𑀜𑀁 𑀧𑀭𑀺𑀓𑁆𑀔𑀸𑀭𑀁 𑀥𑁄𑀯𑀸𑀧𑁂𑀢𑀻’’𑀢𑀺 (𑀧𑀸𑀭𑀸. 𑁫𑁦𑁭) 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 𑀯𑀼𑀢𑁆𑀢𑀁. 𑀇𑀫𑀲𑁆𑀲 𑀧𑀦 𑀲𑀺𑀓𑁆𑀔𑀸𑀧𑀤𑀲𑁆𑀲 𑀉𑀧𑁆𑀧𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀏𑀴𑀓𑀮𑁄𑀫𑀥𑁄𑀯𑀸𑀧𑀦𑀸𑀤𑀺𑀦𑀸 𑀆𑀧𑀢𑁆𑀢𑀻𑀢𑀺 𑀏𑀓𑁂. 𑀲𑀸 𑀯𑀸 𑀅𑀦𑀸𑀧𑀢𑁆𑀢𑀺 𑀫𑀽𑀮𑀸𑀧𑀢𑁆𑀢𑀺𑀢𑁄 𑀏𑀯, 𑀦 𑀇𑀫𑀫𑁆𑀳𑀸𑀢𑀺 𑀏𑀓𑁂. 𑀏𑀴𑀓𑀮𑁄𑀫𑀸𑀦𑀁 𑀅𑀧𑀭𑀺𑀓𑁆𑀔𑀸𑀭𑀢𑁆𑀢𑀸 𑀪𑀝𑁆𑀞𑀁 𑀅𑀕𑁆𑀕𑀳𑀡𑀫𑁂𑀯𑀸𑀢𑀺 𑀏𑀓𑁂. 𑀇𑀫𑀲𑁆𑀲 𑀅𑀦𑁆𑀢𑀺𑀫𑀦𑀬𑀲𑁆𑀲 𑀅𑀢𑁆𑀣𑀧𑁆𑀧𑀓𑀸𑀲𑀦𑀢𑁆𑀣𑀁 𑀇𑀤𑀁 𑀧𑀜𑁆𑀳𑀸𑀓𑀫𑁆𑀫𑀁 𑁋 ‘‘𑀥𑁄𑀯𑀸𑀧𑁂𑀢𑀻’’𑀢𑀺 𑀇𑀤𑀁 𑀭𑀚𑀸𑀧𑀦𑀯𑀺𑀚𑀝𑀸𑀧𑀦𑀕𑁆𑀕𑀳𑀡𑁂𑀦 𑀦𑀺𑀧𑁆𑀧𑀤𑁂𑀲𑀯𑀸𑀘𑀺𑀧𑀤𑀁, 𑀉𑀤𑀸𑀳𑀼 𑀅𑀕𑁆𑀕𑀳𑀡𑁂𑀦 𑀲𑀧𑁆𑀧𑀤𑁂𑀲𑀯𑀸𑀘𑀺𑀧𑀤𑀁. 𑀓𑀺𑀜𑁆𑀘𑁂𑀢𑁆𑀣 𑀬𑀤𑀺 𑀦𑀺𑀧𑁆𑀧𑀤𑁂𑀲𑀯𑀸𑀘𑀺𑀧𑀤𑀁, 𑀲𑀩𑁆𑀩𑀢𑁆𑀣 𑀇𑀤𑀫𑁂𑀯 𑀯𑀢𑁆𑀢𑀩𑁆𑀩𑀁, 𑀦 𑀇𑀢𑀭𑀸𑀦𑀺. 𑀅𑀣 𑀲𑀧𑁆𑀧𑀤𑁂𑀲𑀯𑀸𑀘𑀺𑀧𑀤𑀁, ‘‘𑀅𑀯𑀼𑀢𑁆𑀢𑀸 𑀥𑁄𑀯𑀢𑀺, 𑀅𑀧𑀭𑀺𑀪𑀼𑀢𑁆𑀢𑀁 𑀥𑁄𑀯𑀸𑀧𑁂𑀢𑀻’’𑀢𑀺 𑀏𑀢𑁆𑀣 𑀯𑀺𑀭𑁄𑀥𑁄. ‘‘𑀅𑀯𑀼𑀢𑁆𑀢𑀸 𑀭𑀚𑀢𑀺 𑀯𑀺𑀚𑀝𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀢𑁄𑀢𑀺? 𑀤𑁂𑀲𑀦𑀸𑀯𑀺𑀮𑀸𑀲𑀫𑀢𑁆𑀢𑀁 𑀪𑀕𑀯𑀢𑁄 𑀯𑀘𑀦𑀁, 𑀓𑀢𑁆𑀣𑀘𑀺 𑀢𑀺𑀓𑀧𑀤𑀯𑀘𑀦𑀁, 𑀓𑀢𑁆𑀣𑀘𑀺 𑀏𑀓𑀧𑀤𑀯𑀘𑀦𑀁, 𑀦𑀺𑀧𑁆𑀧𑀤𑁂𑀲𑀧𑀤𑀫𑁂𑀯 𑀢𑁂 𑀯𑀤𑀦𑁆𑀢𑀻𑀢𑀺. 𑀲𑀘𑁂 ‘‘𑀓𑀢𑀪𑀡𑁆𑀟𑀁 𑀥𑁄𑀯𑀸𑀧𑁂𑀢𑀻’’𑀢𑀺 𑀏𑀢𑁆𑀣 𑀧𑀝𑀺𑀯𑀺𑀭𑁄𑀥𑁄, ‘‘𑀓𑀢𑀪𑀡𑁆𑀟𑀁 𑀯𑀺𑀚𑀝𑀸𑀧𑁂𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀢𑁄 𑀅𑀦𑀸𑀧𑀢𑁆𑀢𑀺 𑀏𑀯𑀸𑀢𑀺 𑀘𑁂? 𑀦, 𑀅𑀓𑀢𑀪𑀡𑁆𑀟𑀲𑁆𑀲 𑀲𑀼𑀤𑁆𑀥𑀮𑁄𑀫𑀲𑁆𑀲 𑀯𑀺𑀚𑀝𑀸𑀧𑀦𑀁 𑀇𑀢𑁄 𑀯𑀸 𑀤𑀸𑀢𑀩𑁆𑀩𑀁. 𑀉𑀤𑀓𑀸𑀤𑀺𑀥𑁄𑀯𑀦𑀯𑀲𑁂𑀦 𑀧𑀺𑀡𑁆𑀟𑁂𑀢𑁆𑀯𑀸 𑀞𑀺𑀢𑀸𑀦𑀁 𑀯𑀺𑀚𑀝𑀸𑀧𑀦𑀁 𑀮𑀩𑁆𑀪𑀢𑀻𑀢𑀺 𑀘𑁂? 𑀧𑀼𑀭𑀸𑀡𑀲𑀦𑁆𑀣𑀢𑀲𑁆𑀲 𑀯𑀺𑀚𑀝𑀸𑀧𑀦𑁂 𑀅𑀦𑀸𑀧𑀢𑁆𑀢𑀺𑀬𑀸 𑀪𑀯𑀺𑀢𑀩𑁆𑀩𑀁, 𑀦 𑀘 𑀢𑀁 𑀬𑀼𑀢𑁆𑀢𑀁 ‘‘𑀅𑀧𑀭𑀺𑀪𑀼𑀢𑁆𑀢𑀁 𑀥𑁄𑀯𑀸𑀧𑁂𑀢𑀻’’𑀢𑀺 𑀯𑀘𑀦𑀢𑁄. 𑀢𑁂𑀦 𑀧𑀭𑀺𑀪𑀼𑀢𑁆𑀢𑀁 𑀥𑁄𑀯𑀸𑀧𑁂𑀢𑀺 𑀭𑀚𑀸𑀧𑁂𑀢𑀺 𑀯𑀺𑀚𑀝𑀸𑀧𑁂𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀫𑁂𑀯𑀸𑀢𑀺 𑀲𑀺𑀤𑁆𑀥𑀁 𑀳𑁄𑀢𑀺, 𑀢𑀜𑁆𑀘 𑀧𑀭𑀺𑀪𑀼𑀢𑁆𑀢𑀁 𑀦𑀸𑀫 𑀓𑀢𑀪𑀡𑁆𑀟𑀫𑁂𑀯 𑀳𑁄𑀢𑀺. 𑀦 𑀳𑀺 𑀲𑀓𑁆𑀓𑀸 𑀏𑀴𑀓𑀮𑁄𑀫𑀸𑀦𑀺 𑀧𑀭𑀺𑀪𑀼𑀜𑁆𑀚𑀺𑀢𑀼𑀁, 𑀅𑀜𑁆𑀜𑀣𑀸 ‘‘𑀧𑀭𑀺𑀪𑀼𑀢𑁆𑀢𑀁 𑀥𑁄𑀯𑀸𑀧𑁂𑀢𑀻’’𑀢𑀺 𑀯𑀘𑀦𑀁 𑀦𑀺𑀭𑀢𑁆𑀣𑀓𑀁 𑀳𑁄𑀢𑀺. 𑀦 𑀳𑀺 𑀏𑀢𑁆𑀣 ‘‘𑀧𑀼𑀭𑀸𑀡𑀸𑀦𑀺 𑀏𑀴𑀓𑀮𑁄𑀫𑀸𑀦𑀺 𑀥𑁄𑀯𑀸𑀧𑁂𑀬𑁆𑀬 𑀯𑀸’’𑀢𑀺 𑀯𑀘𑀦𑀁 𑀅𑀢𑁆𑀣𑀺 𑀧𑀼𑀭𑀸𑀡𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑁂 𑀯𑀺𑀬. 𑀢𑀢𑁆𑀣 𑀆𑀤𑀺𑀦𑁆𑀦𑀓𑀧𑁆𑀧𑀯𑀲𑁂𑀦, 𑀇𑀥 𑀢𑀁 𑀮𑀺𑀔𑀺𑀢𑀁. 𑀮𑁂𑀔𑀤𑁄𑀲𑁄𑀢𑀺 𑀘𑁂? 𑀦, 𑀯𑀺𑀲𑁂𑀲𑀳𑁂𑀢𑀼𑀦𑁄 𑀅𑀪𑀸𑀯𑀸, 𑀧𑀼𑀭𑀸𑀡𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑁂 𑀅𑀧𑀭𑀺𑀪𑀼𑀢𑁆𑀢𑀁 𑀓𑀢𑀪𑀡𑁆𑀟𑀁 𑀦𑀸𑀫, ‘‘𑀓𑀫𑁆𑀩𑀮𑀓𑁄𑀚𑀯𑀲𑀦𑁆𑀣𑀢𑀸𑀤𑀺’’𑀦𑁆𑀢𑀺 𑀯𑀘𑀦𑀢𑁄 𑀘. 𑀓𑀺𑀜𑁆𑀘𑀸𑀧𑀺 𑀇𑀫𑀺𑀦𑀸 𑀲𑀤𑁆𑀤𑁂𑀦 𑀅𑀬𑀫𑀢𑁆𑀣𑁄 𑀲𑀺𑀤𑁆𑀥𑁄, ‘‘𑀥𑁄𑀯𑀸𑀧𑁂𑀢𑀻’’𑀢𑀺 𑀇𑀤𑀁 𑀧𑀦 𑀲𑀺𑀬𑀸 𑀦𑀺𑀧𑁆𑀧𑀤𑁂𑀲𑀁. 𑀲𑀺𑀬𑀸 𑀲𑀧𑁆𑀧𑀤𑁂𑀲𑀁. 𑀢𑀜𑁆𑀳𑀺 ‘‘𑀅𑀯𑀼𑀢𑁆𑀢𑀸 𑀥𑁄𑀯𑀢𑀻’’𑀢𑀺𑀆𑀤𑀻𑀲𑀼 𑀦𑀺𑀧𑁆𑀧𑀤𑁂𑀲𑀁. ‘‘𑀓𑀢𑀪𑀡𑁆𑀟𑀁 𑀥𑁄𑀯𑀸𑀧𑁂𑀢𑀻’’𑀢𑀺 𑀏𑀢𑁆𑀣 𑀲𑀧𑁆𑀧𑀤𑁂𑀲𑀁. ‘‘𑀅𑀓𑀢𑀪𑀡𑁆𑀟𑀁 𑀥𑁄𑀯𑀸𑀧𑁂𑀢𑀺 𑀭𑀚𑀸𑀧𑁂𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 ‘‘𑀯𑀺𑀚𑀝𑀸𑀧𑁂𑀢𑀺, 𑀅𑀦𑀸𑀧𑀢𑁆𑀢𑀻’’𑀢𑀺 𑀯𑀘𑀦𑀧𑁆𑀧𑀫𑀸𑀡𑀢𑁄 𑀅𑀦𑀸𑀧𑀢𑁆𑀢𑀺 𑀏𑀯𑀸𑀢𑀺 𑀘𑁂? 𑀦, 𑀯𑀘𑀦𑀧𑁆𑀧𑀫𑀸𑀡𑀢𑁄 𑀏𑀯 𑀆𑀧𑀢𑁆𑀢𑀻𑀢𑀺 𑀆𑀧𑀚𑁆𑀚𑀦𑀢𑁄. ‘‘𑀅𑀧𑀭𑀺𑀪𑀼𑀢𑁆𑀢𑀁 𑀥𑁄𑀯𑀸𑀧𑁂𑀢𑀻’’𑀢𑀺 𑀯𑀘𑀦𑀫𑁂𑀯 𑀳𑀺 𑀢𑀁 𑀅𑀧𑀭𑀺𑀪𑀼𑀢𑁆𑀢𑀁 𑀲𑀦𑁆𑀣𑀢𑀁 𑀯𑀺𑀚𑀝𑀸𑀧𑁂𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀤𑀻𑀧𑁂𑀢𑀺 𑀘𑁂? 𑀲𑀺𑀤𑁆𑀥𑀁 𑀧𑀭𑀺𑀪𑀼𑀢𑁆𑀢𑀁 𑀯𑀺𑀚𑀝𑀸𑀧𑁂𑀦𑁆𑀢𑀲𑁆𑀲 𑀆𑀧𑀢𑁆𑀢𑀺 𑀏𑀯𑀸𑀢𑀺.

𑀏𑀴𑀓𑀮𑁄𑀫𑀥𑁄𑀯𑀸𑀧𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀭𑀽𑀧𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁮𑁩-𑁪. 𑀲𑀩𑁆𑀩𑀫𑁆𑀧𑀻𑀢𑀺 𑀢𑀺𑀯𑀺𑀥𑀫𑁆𑀧𑀺. ‘‘𑀫𑀼𑀢𑁆𑀢𑀸 𑀫𑀡𑀺 𑀯𑁂𑀴𑀼𑀭𑀺𑀬𑁄 𑀲𑀗𑁆𑀔𑁄’𑀢𑀺𑀆𑀤𑀺 𑀧𑀦 𑀓𑀺𑀜𑁆𑀘𑀸𑀧𑀺 𑀭𑀸𑀚𑀲𑀺𑀓𑁆𑀔𑀸𑀧𑀤𑁂 ‘𑀦 𑀯𑀝𑁆𑀝𑀢𑀻’𑀢𑀺 𑀧𑀲𑀗𑁆𑀕𑀢𑁄 𑀯𑀼𑀢𑁆𑀢𑀁, 𑀲𑀭𑀽𑀧𑀢𑁄 𑀧𑀦 𑀆𑀧𑀢𑁆𑀢𑀺𑀤𑀲𑁆𑀲𑀦𑀯𑀲𑁂𑀦 𑀲𑀓𑀝𑁆𑀞𑀸𑀦𑁂𑀧𑀺 𑀯𑀢𑁆𑀢𑀼𑀫𑀸𑀭𑀤𑁆𑀥’’𑀦𑁆𑀢𑀺 𑀯𑀼𑀢𑁆𑀢𑀁. 𑀓𑀣𑀫𑁂𑀢𑀁? 𑀫𑀼𑀢𑁆𑀢𑀸𑀤𑀻𑀦𑀁 𑀲𑀓𑀝𑁆𑀞𑀸𑀦𑀁 𑀚𑀸𑀢𑀁, 𑀦 𑀳𑀺 𑀢𑀸𑀦𑀺 𑀇𑀥 𑀧𑀸𑀴𑀺𑀬𑀁 𑀤𑀺𑀲𑁆𑀲𑀦𑁆𑀢𑀻𑀢𑀺 𑀇𑀫𑀲𑁆𑀲 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀸𑀦𑀺, 𑀭𑀸𑀚𑀲𑀺𑀓𑁆𑀔𑀸𑀧𑀤𑀲𑁆𑀲𑀧𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀸𑀦𑀻𑀢𑀺. 𑀦 𑀓𑁂𑀯𑀮𑀁 𑀳𑀺𑀭𑀜𑁆𑀜𑀲𑀼𑀯𑀡𑁆𑀡𑀫𑁂𑀯, 𑀅𑀜𑁆𑀜𑀫𑁆𑀧𑀺 𑀔𑁂𑀢𑁆𑀢𑀯𑀢𑁆𑀣𑀸𑀤𑀺𑀓𑀁 ‘‘𑀅𑀓𑀧𑁆𑀧𑀺𑀬𑀁 𑀦 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩’’𑀦𑁆𑀢𑀺 𑀲𑀸𑀫𑀜𑁆𑀜𑁂𑀦, 𑀦 𑀲𑀭𑀽𑀧𑀢𑁄. 𑀧𑀸𑀴𑀺𑀬𑀁 𑀧𑀦 𑀲𑀭𑀽𑀧𑀢𑁄 ‘‘𑀘𑀻𑀯𑀭𑀘𑁂𑀢𑀸𑀧𑀦𑁆𑀦𑀁 𑀦𑀸𑀫 𑀳𑀺𑀭𑀜𑁆𑀜𑀁 𑀯𑀸 𑀲𑀼𑀯𑀡𑁆𑀡𑀁 𑀯𑀸 𑀫𑀼𑀢𑁆𑀢𑀸 𑀯𑀸 𑀫𑀡𑀺 𑀯𑀸’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀭𑀸𑀚𑀲𑀺𑀓𑁆𑀔𑀸𑀧𑀤𑀫𑁂𑀯𑀲𑁆𑀲 𑀲𑀓𑀝𑁆𑀞𑀸𑀦𑀁. 𑀫𑀼𑀢𑁆𑀢𑀸𑀫𑀡𑀺𑀕𑁆𑀕𑀳𑀡𑁂𑀦 𑀘𑁂𑀢𑁆𑀣 𑀢𑀚𑁆𑀚𑀸𑀢𑀺𑀬𑀕𑁆𑀕𑀳𑀡𑀁 𑀲𑀺𑀤𑁆𑀥𑀫𑁂𑀯𑀸𑀢𑀺 𑀦𑀸𑀕𑀢𑁄 𑀇𑀫𑀲𑁆𑀲 𑀧𑀞𑀫𑀫𑁂𑀯 𑀧𑀜𑁆𑀜𑀢𑁆𑀢𑀢𑁆𑀢𑀸. 𑀬𑀤𑀺 𑀏𑀯𑀁 𑀇𑀥 𑀅𑀦𑀸𑀕𑀢𑀢𑁆𑀢𑀸 𑀓𑀢𑀭𑀁 𑀦𑁂𑀲𑀁 𑀲𑀓𑀝𑁆𑀞𑀸𑀦𑀦𑁆𑀢𑀺? 𑀇𑀤𑀫𑁂𑀯 𑀅𑀢𑁆𑀣𑀢𑁄, 𑀦𑁄 𑀲𑀭𑀽𑀧𑀢𑁄.

𑀓𑀣𑀁? 𑀏𑀢𑀸𑀦𑀺 𑀳𑀺 𑀭𑀢𑀦𑀲𑀺𑀓𑁆𑀔𑀸𑀧𑀤𑁂 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀽𑀦𑀺, 𑀤𑀼𑀓𑁆𑀓𑀝𑀯𑀢𑁆𑀣𑀽𑀦𑀺 𑀘 𑀏𑀓𑀢𑁄 ‘‘𑀭𑀢𑀦’’𑀦𑁆𑀢𑀺 𑀆𑀕𑀢𑀸𑀦𑀺, ‘‘𑀭𑀢𑀦𑀲𑀫𑁆𑀫𑀢’’𑀦𑁆𑀢𑀺 𑀓𑀧𑁆𑀧𑀺𑀬𑀯𑀢𑁆𑀣𑀼 𑀆𑀕𑀢𑀁. 𑀢𑁂𑀲𑀼 𑀘 𑀤𑀲𑀲𑀼 𑀭𑀢𑀦𑁂𑀲𑀼 𑀭𑀚𑀢𑀚𑀸𑀢𑀭𑀽𑀧𑀤𑁆𑀯𑀬𑀁 𑀇𑀥 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼, 𑀅𑀯𑀲𑁂𑀲𑀁 𑀤𑀼𑀓𑁆𑀓𑀝𑀯𑀢𑁆𑀣𑀽𑀢𑀺 𑀲𑀺𑀤𑁆𑀥𑀁. 𑀇𑀥 𑀘 𑀲𑀺𑀤𑁆𑀥𑀢𑁆𑀢𑀸 𑀏𑀯 𑀭𑀢𑀦𑀲𑀺𑀓𑁆𑀔𑀸𑀧𑀤𑀲𑁆𑀲 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 ‘‘𑀭𑀢𑀦𑀲𑀫𑁆𑀫𑀢𑀁 𑀯𑀺𑀲𑁆𑀲𑀸𑀲𑀁 𑀕𑀡𑁆𑀳𑀸𑀢𑀺, 𑀢𑀸𑀯𑀓𑀸𑀮𑀺𑀓𑀁 𑀕𑀡𑁆𑀳𑀸𑀢𑀺, 𑀧𑀁𑀲𑀼𑀓𑀽𑀮𑀲𑀜𑁆𑀜𑀺𑀲𑁆𑀲𑀸’’𑀢𑀺 𑀯𑀼𑀢𑁆𑀢𑀁, 𑀦 𑀭𑀢𑀦𑀁 𑀯𑀼𑀢𑁆𑀢𑀁. 𑀲𑀢𑁆𑀢𑀯𑀺𑀥𑀥𑀜𑁆𑀜𑀤𑀸𑀲𑀺𑀤𑀸𑀲𑀔𑁂𑀢𑁆𑀢𑀸𑀤𑀺 𑀧𑀦 𑀩𑁆𑀭𑀳𑁆𑀫𑀚𑀸𑀮𑀸𑀤𑀺𑀲𑀼𑀢𑁆𑀢𑀯𑀲𑁂𑀦 (𑀤𑀻. 𑀦𑀺. 𑁧.𑁧 𑀆𑀤𑀬𑁄) 𑀅𑀓𑀧𑁆𑀧𑀺𑀬𑀦𑁆𑀢𑀺 𑀲𑀺𑀤𑁆𑀥𑀁, 𑀢𑀲𑁆𑀫𑀸 𑀇𑀥 𑀤𑀼𑀓𑁆𑀓𑀝𑀯𑀢𑁆𑀣𑀽𑀢𑀺 𑀲𑀺𑀤𑁆𑀥𑀁, 𑀢𑁂𑀦𑁂𑀯 𑀅𑀦𑀼𑀬𑁄𑀕𑀯𑀢𑁆𑀢𑁂 ‘‘𑀥𑀫𑁆𑀫𑀁 𑀚𑀸𑀦𑀸𑀢𑀺, 𑀥𑀫𑁆𑀫𑀸𑀦𑀼𑀮𑁄𑀫𑀁, 𑀯𑀺𑀦𑀬𑀁, 𑀯𑀺𑀦𑀬𑀸𑀦𑀼𑀮𑁄𑀫𑀁 𑀚𑀸𑀦𑀸𑀢𑀻’’𑀢𑀺 (𑀧𑀭𑀺. 𑁪𑁪𑁨) 𑀯𑀼𑀢𑁆𑀢𑀁. 𑀢𑀣𑀸 𑀆𑀫𑀓𑀫𑀁𑀲𑀫𑁆𑀧𑀺 𑀤𑀼𑀓𑁆𑀓𑀝𑀯𑀢𑁆𑀣𑀼𑀁 𑀆𑀧𑀚𑁆𑀚𑀢𑀻𑀢𑀺? 𑀦, 𑀇𑀥 𑀯𑀺𑀦𑀬𑁂 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀫𑀦𑀼𑀲𑁆𑀲𑀺𑀓𑀸𑀩𑀸𑀥𑁂 𑀆𑀫𑀓𑀫𑀁𑀲’’𑀦𑁆𑀢𑀺𑀆𑀤𑀺𑀦𑀸 (𑀫𑀳𑀸𑀯. 𑁨𑁬𑁪), 𑀢𑀲𑁆𑀫𑀸 𑀦 𑀆𑀫𑀓𑀫𑀁𑀲𑀁 𑀲𑀼𑀢𑁆𑀢𑁂 𑀆𑀕𑀢𑀫𑁆𑀧𑀺 𑀤𑀼𑀓𑁆𑀓𑀝𑀯𑀢𑁆𑀣𑀼 𑀳𑁄𑀢𑀺, 𑀢𑀣𑀸𑀧𑀺 𑀅𑀢𑁆𑀢𑀦𑁄 𑀧𑀭𑀺𑀪𑁄𑀕𑀢𑁆𑀣𑀸𑀬 𑀧𑀝𑀺𑀕𑁆𑀕𑀳𑀡𑁂 𑀤𑀼𑀓𑁆𑀓𑀝𑀫𑁂𑀯𑀸𑀢𑀺 𑀦𑁄 𑀢𑀓𑁆𑀓𑁄𑀢𑀺 𑀆𑀘𑀭𑀺𑀬𑁄. ‘‘𑀇𑀥 𑀦𑀺𑀓𑁆𑀔𑀺𑀧𑀸𑀳𑀻’𑀢𑀺 𑀯𑀼𑀢𑁆𑀢𑁂 𑀉𑀧𑀦𑀺𑀓𑁆𑀔𑀺𑀢𑁆𑀢𑀲𑀸𑀤𑀺𑀬𑀦𑀫𑁂𑀯 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺. ‘‘𑀅𑀓𑀧𑁆𑀧𑀺𑀬𑀯𑀺𑀘𑀸𑀭𑀡𑀸 𑀏𑀯 𑀦 𑀯𑀝𑁆𑀝𑀢𑀻𑀢𑀺 𑀘𑁂? 𑀓𑀧𑁆𑀧𑀺𑀬𑀜𑁆𑀘 𑀅𑀓𑀧𑁆𑀧𑀺𑀬𑀜𑁆𑀘 𑀦𑀺𑀲𑁆𑀲𑀸𑀬 𑀞𑀺𑀢𑀦𑁆𑀢𑀺 𑀏𑀢𑁆𑀣 𑀢𑀁 𑀲𑀬𑀁 𑀅𑀧𑀭𑀺𑀪𑁄𑀕𑀸𑀭𑀳𑀁 𑀳𑀼𑀢𑁆𑀯𑀸 𑀢𑀤𑀕𑁆𑀖𑀦𑀓𑀁 𑀓𑀧𑁆𑀧𑀺𑀬𑀪𑀡𑁆𑀟𑀁 𑀧𑀭𑀺𑀪𑁄𑀕𑀸𑀭𑀳𑀁 𑀳𑀼𑀢𑁆𑀯𑀸 𑀞𑀺𑀢𑀦𑁆𑀢𑀺 𑀅𑀢𑁆𑀣𑁄’’𑀢𑀺 𑀮𑀺𑀔𑀺𑀢𑀁, ‘‘𑀧𑀁𑀲𑀼𑀓𑀽𑀮𑀪𑀸𑀯𑁂𑀦 𑀞𑀺𑀢𑀢𑁆𑀢𑀸, 𑀕𑀼𑀢𑁆𑀢𑀝𑁆𑀞𑀸𑀦𑀸𑀘𑀺𑀓𑁆𑀔𑀦𑀲𑁆𑀲 𑀓𑀧𑁆𑀧𑀺𑀬𑀢𑁆𑀢𑀸 𑀘 𑀓𑀧𑁆𑀧𑀺𑀬𑀁 𑀦𑀺𑀲𑁆𑀲𑀸𑀬 𑀞𑀺𑀢𑀁. ‘𑀇𑀤𑀁 𑀕𑀡𑁆𑀳𑀸’𑀢𑀺𑀆𑀤𑀺𑀦𑀸 𑀯𑀤𑀦𑁆𑀢𑀲𑁆𑀲 𑀅𑀓𑀧𑁆𑀧𑀺𑀬𑀢𑁆𑀢𑀸 𑀅𑀓𑀧𑁆𑀧𑀺𑀬𑀁 𑀦𑀺𑀲𑁆𑀲𑀸𑀬 𑀞𑀺𑀢’’𑀦𑁆𑀢𑀺 𑀘. 𑀏𑀯𑀫𑁆𑀧𑀺 𑀓𑀧𑁆𑀧𑀺𑀬𑀜𑁆𑀘 𑀅𑀓𑀧𑁆𑀧𑀺𑀬𑀜𑁆𑀘𑀸𑀢𑀺 ‘‘𑀇𑀫𑀲𑁆𑀫𑀺𑀁 𑀑𑀓𑀸𑀲𑁂 𑀞𑀧𑀺𑀢𑀁, 𑀓𑀺𑀁 𑀦 𑀧𑀲𑁆𑀲𑀲𑀻𑀢𑀺 𑀙𑁂𑀓𑀢𑀭𑁂 𑀇𑀫𑁂𑀯 𑀓𑀳𑀸𑀧𑀡𑁂’’𑀢𑀺𑀆𑀤𑀺𑀯𑀘𑀦𑀲𑁆𑀲 𑀓𑀧𑁆𑀧𑀺𑀬𑀢𑁆𑀢𑀸 𑀓𑀧𑁆𑀧𑀺𑀬𑀁 𑀦𑀺𑀲𑁆𑀲𑀸𑀬 𑀞𑀺𑀢𑀁. ‘‘𑀇𑀤𑀁 𑀕𑀡𑁆𑀳𑀸’’𑀢𑀺 𑀯𑀼𑀢𑁆𑀢𑁂 𑀤𑀼𑀩𑁆𑀩𑀺𑀘𑀸𑀭𑀺𑀢𑀢𑁆𑀢𑀸 𑀅𑀢𑁆𑀢𑀦𑁄 𑀅𑀓𑀧𑁆𑀧𑀺𑀬𑀢𑁆𑀢𑀸 𑀢𑀢𑁄 𑀆𑀕𑀢𑀁 𑀅𑀓𑀧𑁆𑀧𑀺𑀬𑀁 𑀦𑀺𑀲𑁆𑀲𑀸𑀬 𑀞𑀺𑀢𑀫𑁂𑀯 𑀳𑁄𑀢𑀺. ‘‘𑀇𑀤𑀁 𑀕𑀡𑁆𑀳𑀸’𑀢𑀺 𑀯𑀼𑀢𑁆𑀢𑁂 𑀢𑁂𑀦 𑀕𑀳𑀺𑀢𑁂 ‘𑀉𑀕𑁆𑀕𑀡𑁆𑀳𑀸𑀧𑁂𑀬𑁆𑀬 𑀯𑀸’𑀢𑀺 𑀯𑀼𑀢𑁆𑀢𑀯𑀺𑀥𑀺𑀁 𑀦 𑀧𑀸𑀧𑀼𑀡𑀸𑀢𑀺, 𑀓𑁂𑀯𑀮𑀁 𑀤𑀼𑀩𑁆𑀩𑀺𑀘𑀸𑀭𑀺𑀢𑀢𑁆𑀢𑀸 𑀢𑀲𑁆𑀲𑁂𑀯 𑀢𑀁 𑀅𑀓𑀧𑁆𑀧𑀺𑀬𑀁 𑀳𑁄𑀢𑀺, 𑀫𑀽𑀮𑀧𑀝𑀺𑀕𑁆𑀕𑀳𑀡𑀲𑁆𑀲 𑀲𑀼𑀤𑁆𑀥𑀢𑁆𑀢𑀸 𑀧𑀭𑀢𑁄 𑀧𑀢𑁆𑀢𑀘𑀢𑀼𑀓𑁆𑀓𑁂 𑀢𑀢𑀺𑀬𑀧𑀢𑁆𑀢𑁄 𑀯𑀺𑀬𑀸𑀢𑀺 𑀘 𑀏𑀯𑀁 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄 𑀯𑀤𑀢𑀻’’𑀢𑀺 𑀅𑀦𑀼𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁. 𑀓𑀺𑀁 𑀩𑀳𑀼𑀦𑀸, 𑀯𑀺𑀲𑀼𑀤𑁆𑀥𑀸𑀕𑀫𑀢𑁆𑀢𑀸 𑀓𑀧𑁆𑀧𑀺𑀬𑀁. 𑀤𑀼𑀩𑁆𑀩𑀺𑀘𑀸𑀭𑀡𑀸𑀬 𑀲𑀢𑀺 𑀅𑀓𑀧𑁆𑀧𑀺𑀬𑀁 𑀦𑀺𑀲𑁆𑀲𑀸𑀬 𑀞𑀺𑀢𑀁 𑀳𑁄𑀢𑀻𑀢𑀺 𑀦𑁄 𑀢𑀓𑁆𑀓𑁄𑀢𑀺 𑀆𑀘𑀭𑀺𑀬𑁄. ‘‘𑀏𑀯𑀁 𑀲𑀗𑁆𑀖𑀕𑀡𑀸𑀤𑀻𑀦𑀫𑁆𑀧𑀺 𑀅𑀢𑁆𑀣𑀸𑀬 𑀧𑀭𑀺𑀘𑁆𑀘𑀢𑁆𑀢𑁂𑀧𑀺 𑀢𑁂𑀦 𑀲𑀫𑀸𑀦𑀕𑀢𑀺𑀓𑀢𑁆𑀢𑀸 𑀞𑀧𑁂𑀢𑁆𑀯𑀸 𑀆𑀧𑀢𑁆𑀢𑀺𑀯𑀺𑀲𑁂𑀲’’𑀦𑁆𑀢𑀺 𑀯𑀼𑀢𑁆𑀢𑀁.

𑀦 𑀓𑀺𑀜𑁆𑀘𑀺 𑀓𑀧𑁆𑀧𑀺𑀬𑀪𑀡𑁆𑀟𑀁 𑀘𑁂𑀢𑀸𑀧𑀺𑀢𑀦𑁆𑀢𑀺 𑀘𑁂𑀢𑀸𑀧𑀺𑀢𑀜𑁆𑀘𑁂, 𑀉𑀧𑀸𑀬𑀸𑀪𑀸𑀯𑀁 𑀤𑀲𑁆𑀲𑁂𑀢𑀺. ‘‘𑀉𑀧𑀦𑀺𑀓𑁆𑀔𑁂𑀧𑀁 𑀞𑀧𑁂𑀢𑁆𑀯𑀸𑀢𑀺 𑀲𑀘𑁂 𑀲𑁄 𑀉𑀧𑀸𑀲𑀓𑁄 ‘𑀅𑀢𑀺𑀩𑀳𑀼𑀁 𑀏𑀢𑀁 𑀳𑀺𑀭𑀜𑁆𑀜𑀁, 𑀇𑀤𑀁 𑀪𑀦𑁆𑀢𑁂 𑀅𑀚𑁆𑀚𑁂𑀯 𑀦 𑀯𑀺𑀦𑀸𑀲𑁂𑀢𑀩𑁆𑀩’𑀦𑁆𑀢𑀺 𑀯𑀢𑁆𑀯𑀸 𑀲𑀬𑀁 𑀉𑀧𑀦𑀺𑀓𑁆𑀔𑁂𑀧𑀤𑁂𑀲𑁂 𑀞𑀧𑁂𑀢𑀺, 𑀅𑀜𑁆𑀜𑁂𑀦 𑀯𑀸 𑀞𑀧𑀸𑀧𑁂𑀢𑀺, 𑀏𑀢𑀁 𑀉𑀧𑀦𑀺𑀓𑁆𑀔𑁂𑀧𑀁 𑀞𑀧𑁂𑀢𑁆𑀯𑀸 𑀢𑀢𑁄 𑀮𑀤𑁆𑀥𑀁 𑀉𑀤𑀬𑀁 𑀧𑀭𑀺𑀪𑀼𑀜𑁆𑀚𑀦𑁆𑀢𑁄 𑀲𑀗𑁆𑀖𑁄 𑀧𑀘𑁆𑀘𑀬𑁂 𑀧𑀭𑀺𑀪𑀼𑀜𑁆𑀚𑀢𑀺 𑀦𑀸𑀫𑀸’’𑀢𑀺 𑀯𑀼𑀢𑁆𑀢𑀁.

𑁫𑁮𑁫. 𑀅𑀬𑀁 𑀓𑀺𑀭 𑀇𑀢𑁆𑀣𑀁𑀮𑀓𑁆𑀔𑀡𑀲𑀫𑁆𑀧𑀦𑁆𑀦𑁄 𑀉𑀓𑁆𑀓𑀁𑀲𑀢𑁄. 𑀏𑀯𑀁 𑀅𑀗𑁆𑀕𑀲𑀫𑁆𑀧𑀦𑁆𑀦𑁄𑀧𑀺 𑀅𑀧𑀭𑀪𑀸𑀕𑁂 𑀮𑁄𑀪𑀯𑀲𑁂𑀦 𑀯𑀸 𑀅𑀜𑁆𑀜𑁂𑀦 𑀯𑀸 𑀓𑀸𑀭𑀡𑁂𑀦 𑀲𑀘𑁂 𑀦𑀺𑀫𑀺𑀢𑁆𑀢𑀁 𑀓𑀢𑁆𑀯𑀸 𑀧𑀸𑀢𑁂𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀲𑁂𑀦𑀸𑀲𑀦𑀫𑁆𑀧𑀺 𑀧𑀭𑀺𑀪𑁄𑀕𑁂 𑀧𑀭𑀺𑀪𑁄𑀕𑁂𑀢𑀺 𑀧𑀯𑁂𑀲𑁂 𑀧𑀯𑁂𑀲𑁂. 𑀲𑁄 𑀳𑀺 𑀓𑀸𑀭𑀡𑀦𑁆𑀢𑀭𑁂𑀦 𑀭𑀼𑀓𑁆𑀔𑀫𑀽𑀮𑀺𑀓𑀲𑁆𑀲, 𑀅𑀩𑁆𑀪𑁄𑀓𑀸𑀲𑀺𑀓𑀲𑁆𑀲𑀧𑀺 𑀯𑀝𑁆𑀝𑀢𑀺 𑀏𑀯, 𑀞𑀸𑀦𑀦𑀺𑀲𑀚𑁆𑀚𑀸𑀤𑀺𑀯𑀲𑁂𑀦 𑀦𑀺𑀯𑀸𑀲𑀸𑀥𑀺𑀧𑁆𑀧𑀸𑀬𑁂 𑀲𑀢𑀺 𑀧𑀭𑀺𑀪𑁄𑀕𑁂 𑀧𑀭𑀺𑀪𑁄𑀕𑁂 𑀧𑀘𑁆𑀘𑀯𑁂𑀓𑁆𑀔𑀺𑀢𑀩𑁆𑀩𑀁. 𑀪𑁂𑀲𑀚𑁆𑀚𑀲𑁆𑀲 𑀲𑀢𑀺𑀧𑀘𑁆𑀘𑀬𑀢𑀸 𑀲𑀩𑁆𑀩𑀓𑀸𑀮𑀫𑁆𑀧𑀻𑀢𑀺 𑀏𑀓𑁂. 𑀅𑀲𑀦𑁆𑀦𑀺𑀳𑀺𑀢𑀲𑁆𑀲 𑀧𑀘𑁆𑀙𑀸𑀪𑀢𑁆𑀢𑀫𑁂𑀯, 𑀲𑀦𑁆𑀦𑀺𑀳𑀺𑀢𑀲𑁆𑀲 𑀧𑀼𑀭𑁂𑀪𑀢𑁆𑀢𑀫𑁆𑀧𑀻𑀢𑀺 𑀦𑁄 𑀢𑀓𑁆𑀓𑁄𑀢𑀺 𑀆𑀘𑀭𑀺𑀬𑁄. ‘‘𑀬𑀸𑀫𑀓𑀸𑀮𑀺𑀓𑀁 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀬𑀸𑀯𑀚𑀻𑀯𑀺𑀓𑀁 𑀆𑀳𑀸𑀭𑀢𑁆𑀣𑀸𑀬…𑀧𑁂… 𑀧𑀝𑀺𑀕𑁆𑀕𑀡𑁆𑀳𑀸𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲. 𑀅𑀚𑁆𑀛𑁄𑀳𑀸𑀭𑁂 𑀅𑀚𑁆𑀛𑁄𑀳𑀸𑀭𑁂 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 (𑀧𑀸𑀘𑀺. 𑁨𑁪𑁪) 𑀳𑀺 𑀯𑀼𑀢𑁆𑀢𑀁. 𑀤𑀼𑀓𑁆𑀓𑀝𑀜𑁆𑀳𑀺 𑀯𑀺𑀓𑀸𑀮𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑁂 𑀆𑀕𑀢𑀁 𑀯𑀺𑀓𑀸𑀮𑁂 𑀆𑀧𑀚𑁆𑀚𑀢𑀺, 𑀦𑁄 𑀓𑀸𑀮𑁂 𑀆𑀳𑀸𑀭𑀓𑀸𑀮𑀢𑁆𑀢𑀸, 𑀲𑀦𑁆𑀦𑀺𑀥𑀺𑀲𑀺𑀓𑁆𑀔𑀸𑀧𑀤𑁂 𑀆𑀕𑀢𑀁 𑀧𑀦 𑀓𑀸𑀮𑁂𑀧𑀺 𑀲𑀦𑁆𑀦𑀺𑀥𑀺𑀚𑀸𑀢𑀢𑁆𑀢𑀸, 𑀢𑁂𑀦𑁂𑀯 𑀢𑀢𑁆𑀣 𑀲𑀢𑁆𑀢𑀸𑀳𑀓𑀸𑀮𑀺𑀓𑀬𑀸𑀯𑀚𑀻𑀯𑀺𑀓𑀤𑁆𑀯𑀬𑀫𑁂𑀯 𑀯𑀼𑀢𑁆𑀢𑀦𑁆𑀢𑀺. ‘‘𑀲𑀢𑀺 𑀧𑀘𑁆𑀘𑀬𑁂’’𑀢𑀺 𑀯𑀘𑀦𑀢𑁄 𑀦𑀸𑀬𑀁 𑀯𑀺𑀲𑁂𑀲𑁄 𑀮𑀩𑁆𑀪𑀢𑀻𑀢𑀺 𑀘𑁂? 𑀦, 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀢𑁄, 𑀯𑀘𑀦𑀸𑀦𑀺𑀬𑀫𑀢𑁄 𑀘. 𑀲𑀦𑁆𑀦𑀺𑀥𑀺𑀲𑀺𑀓𑁆𑀔𑀸𑀧𑀤𑁂 𑀳𑀺 ‘‘𑀅𑀦𑀸𑀧𑀢𑁆𑀢𑀺 𑀬𑀸𑀯𑀓𑀸𑀮𑀺𑀓𑀁 𑀬𑀸𑀯𑀓𑀸𑀮𑀁 𑀦𑀺𑀤𑀳𑀺𑀢𑁆𑀯𑀸 𑀪𑀼𑀜𑁆𑀚𑀢𑀺. 𑀬𑀸𑀫𑀓𑀸𑀮𑀺𑀓𑀁 𑀬𑀸𑀫𑁂 𑀦𑀺𑀤𑀳𑀺𑀢𑁆𑀯𑀸 𑀪𑀼𑀜𑁆𑀚𑀢𑀻’’𑀢𑀺 (𑀧𑀸𑀘𑀺. 𑁨𑁫𑁬) 𑀏𑀢𑁆𑀣 𑀯𑀘𑀦𑀧𑁆𑀧𑀫𑀸𑀡𑀢𑁄 𑀬𑀸𑀫𑀓𑀸𑀮𑀺𑀓𑀁 𑀦 𑀧𑀼𑀭𑁂𑀪𑀢𑁆𑀢𑁂, 𑀦 𑀧𑀘𑁆𑀙𑀸𑀪𑀢𑁆𑀢𑁂, 𑀦 𑀤𑀺𑀯𑀲𑁂, 𑀦 𑀭𑀢𑁆𑀢𑀺𑀬𑀁 𑀬𑀸𑀫𑀫𑁂𑀯 𑀦𑀺𑀤𑀳𑀺𑀢𑁆𑀯𑀸 𑀪𑀼𑀜𑁆𑀚𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀻𑀢𑀺 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑁄. 𑀢𑀣𑀸 𑀢𑀢𑁆𑀣𑁂𑀯 ‘‘𑀬𑀸𑀫𑀓𑀸𑀮𑀺𑀓𑀁 𑀬𑀸𑀫𑀁 𑀦𑀺𑀤𑀳𑀺𑀢𑁆𑀯𑀸 𑀪𑀼𑀜𑁆𑀚𑀢𑀺, 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀲𑀢𑁆𑀢𑀸𑀳𑀁 𑀦𑀺𑀤𑀳𑀺𑀢𑁆𑀯𑀸 𑀪𑀼𑀜𑁆𑀚𑀢𑀻’’𑀢𑀺 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀁, 𑀦 𑀯𑀼𑀢𑁆𑀢𑀁 ‘‘𑀲𑀢𑀺 𑀧𑀘𑁆𑀘𑀬𑁂’’𑀢𑀺, 𑀢𑀲𑁆𑀫𑀸 𑀲𑀢𑀺𑀧𑀘𑁆𑀘𑀬-𑀯𑀘𑀦𑀁 𑀓𑀢𑁆𑀣𑀘𑀺 𑀳𑁄𑀢𑀺, 𑀓𑀢𑁆𑀣𑀘𑀺 𑀦 𑀳𑁄𑀢𑀻𑀢𑀺 𑀯𑀘𑀦𑀸𑀦𑀺𑀬𑀫𑀢𑁄 𑀆𑀧𑀢𑁆𑀢𑀺𑀬𑀸𑀧𑀺 𑀅𑀦𑀺𑀬𑀫𑁄 𑀲𑀺𑀬𑀸. 𑀏𑀯𑀁 𑀲𑀦𑁆𑀢𑁂𑀧𑀺 𑀬𑀣𑀸𑀯𑀼𑀢𑁆𑀢𑀤𑀼𑀓𑁆𑀓𑀝𑀁 𑀆𑀧𑀚𑁆𑀚𑀢𑀺 𑀏𑀯. 𑀦 𑀅𑀦𑀸𑀳𑀸𑀭𑀧𑁆𑀧𑀬𑁄𑀚𑀦𑀢𑁆𑀢𑀸 𑀬𑀸𑀫𑀓𑀸𑀮𑀺𑀓𑀸𑀤𑀻𑀦𑀦𑁆𑀢𑀺 𑀘𑁂? 𑀦, 𑀲𑀧𑁆𑀧𑀺𑀆𑀤𑀺𑀫𑀺𑀲𑁆𑀲𑀪𑁄𑀚𑀦𑀲𑁆𑀲 𑀧𑀡𑀻𑀢𑀪𑁄𑀚𑀦𑀪𑀸𑀯𑀧𑁆𑀧𑀢𑁆𑀢𑀺𑀢𑁄. 𑀅𑀧𑀺𑀘 𑀲𑀩𑁆𑀩𑀓𑀸𑀮𑀺𑀓𑁂𑀲𑀼 𑀬𑀸𑀯𑀓𑀸𑀮𑀺𑀓𑀁 𑀑𑀴𑀸𑀭𑀺𑀓𑀁, 𑀢𑀁 𑀆𑀳𑀸𑀭𑀢𑁆𑀣𑀸𑀬 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀓𑀸𑀮𑁂 𑀅𑀦𑀸𑀧𑀢𑁆𑀢𑀺, 𑀧𑀕𑁂𑀯 𑀅𑀦𑁄𑀴𑀸𑀭𑀺𑀓𑀁 𑀬𑀸𑀫𑀓𑀸𑀮𑀺𑀓𑀸𑀤𑀺𑀁, 𑀆𑀳𑀸𑀭𑀢𑁆𑀣𑀸𑀬 𑀏𑀯 𑀅𑀦𑀼𑀜𑁆𑀜𑀸𑀢𑀢𑁆𑀢𑀸. 𑀬𑀸𑀯𑀓𑀸𑀮𑀺𑀓𑁂 𑀏𑀯 𑀅𑀦𑀸𑀧𑀢𑁆𑀢𑀻𑀢𑀺 𑀘𑁂? 𑀦, 𑀅𑀦𑀸𑀳𑀸𑀭𑀢𑁆𑀣𑀸𑀬 𑀕𑀡𑁆𑀳𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀲𑀫𑁆𑀪𑀯𑀢𑁄 𑀇𑀢𑀭𑀁 𑀆𑀳𑀸𑀭𑀢𑁆𑀣𑀸𑀬 𑀕𑀡𑁆𑀳𑀦𑁆𑀢𑀲𑁆𑀲 𑀯𑀺𑀬, 𑀢𑀲𑁆𑀫𑀸 𑀬𑀣𑀸𑀯𑀼𑀢𑁆𑀢𑀫𑁂𑀯𑁂𑀢𑁆𑀣 𑀲𑀦𑁆𑀦𑀺𑀝𑁆𑀞𑀸𑀦𑀁 𑀧𑀸𑀴𑀺𑀁, 𑀬𑀼𑀢𑁆𑀢𑀺𑀜𑁆𑀘 𑀅𑀦𑀼𑀮𑁄𑀫𑁂𑀢𑀻𑀢𑀺.

𑀤𑁂𑀲𑀦𑀸𑀲𑀼𑀤𑁆𑀥𑀻𑀢𑀺 𑀏𑀢𑁆𑀣 𑀤𑁂𑀲𑀦𑀸 𑀦𑀸𑀫 𑀯𑀺𑀦𑀬𑀓𑀫𑁆𑀫𑀁, 𑀢𑁂𑀦 𑀯𑀼𑀝𑁆𑀞𑀸𑀦𑀫𑁆𑀧𑀺 𑀤𑁂𑀲𑀦𑀸 𑀏𑀯 𑀦𑀸𑀫 𑀳𑁄𑀢𑀻𑀢𑀺. ‘‘𑀧𑀝𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺 𑀅𑀯𑀢𑁆𑀯𑀸 ‘‘𑀧𑀝𑀺𑀲𑁂𑀯𑀢𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀧𑀝𑀺𑀕𑁆𑀕𑀳𑀡𑁂 𑀧𑀦 𑀲𑀢𑀺𑀁 𑀅𑀓𑀢𑁆𑀯𑀸 𑀧𑀭𑀺𑀪𑁄𑀕𑁂 𑀓𑀭𑁄𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺. 𑀔𑀻𑀡𑀸𑀲𑀯𑀸 𑀓𑀢𑀓𑀺𑀘𑁆𑀘𑀢𑁆𑀢𑀸 𑀯𑀺𑀪𑀢𑁆𑀢𑀤𑀸𑀬𑀸𑀤𑀸 𑀯𑀺𑀬 𑀳𑁄𑀦𑁆𑀢𑀺, 𑀢𑁂𑀦 𑀢𑁂𑀲𑀁 𑀲𑀸𑀫𑀺𑀧𑀭𑀺𑀪𑁄𑀕𑀸 𑀳𑁄𑀦𑁆𑀢𑀺. 𑀅𑀜𑁆𑀜𑀣𑀸 𑀬𑀸𑀯𑀓𑀸𑀮𑀺𑀓𑀪𑀸𑀯𑀁 𑀅𑀦𑀢𑀺𑀓𑁆𑀓𑀦𑁆𑀢𑀢𑁆𑀢𑀸 𑀯𑀺𑀭𑀼𑀚𑁆𑀛𑀢𑀺. 𑀇𑀡𑀧𑀭𑀺𑀪𑁄𑀕𑁄 𑀦 𑀯𑀝𑁆𑀝𑀢𑀺, 𑀪𑁂𑀲𑀚𑁆𑀚𑁂 𑀆𑀧𑀢𑁆𑀢𑀺𑀢𑁄, 𑀇𑀢𑀭𑀲𑁆𑀫𑀺𑀁 𑀅𑀬𑀼𑀢𑁆𑀢𑀧𑀭𑀺𑀪𑁄𑀕𑀢𑁄, 𑀇𑀡𑀁 𑀯𑀺𑀬 𑀅𑀦𑀦𑀼𑀜𑁆𑀜𑀸𑀢𑀪𑀼𑀢𑁆𑀢𑀢𑁆𑀢𑀸 𑀘. ‘‘𑀆𑀤𑀺𑀢𑁄 𑀧𑀝𑁆𑀞𑀸𑀬 𑀳𑀺 𑀅𑀮𑀚𑁆𑀚𑀻 𑀦𑀸𑀫 𑀦𑀢𑁆𑀣𑀺, 𑀢𑀲𑁆𑀫𑀸 𑀦 𑀓𑁄𑀘𑀺 𑀲𑀗𑁆𑀓𑀺𑀢𑀩𑁆𑀩𑁄’’𑀢𑀺 𑀮𑀺𑀔𑀺𑀢𑀁. 𑀪𑀸𑀭𑀪𑀽𑀢𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀬𑁄. 𑀬𑀣𑀸𑀤𑀸𑀦𑀫𑁂𑀯 𑀕𑀳𑀺𑀢𑀢𑁆𑀢𑀸𑀢𑀺 𑀏𑀢𑁆𑀣 ‘‘𑀅𑀢𑁆𑀢𑀦𑁄 𑀳𑀢𑁆𑀣𑁂𑀦 𑀘𑁂 𑀤𑁂𑀢𑀺, 𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁, ‘‘𑀅𑀢𑀺𑀭𑁂𑀓𑀪𑀸𑀕𑀁 𑀕𑀳𑁂𑀢𑁆𑀯𑀸 𑀧𑀼𑀦𑀤𑀺𑀯𑀲𑁂 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀉𑀤𑁆𑀥𑀝𑀪𑀸𑀕𑀁 𑀢𑀢𑁆𑀣𑁂𑀯 𑀤𑀸𑀧𑁂𑀢𑀺, 𑀯𑀝𑁆𑀝𑀢𑀻’’𑀢𑀺 𑀘. 𑀧𑀭𑀺𑀯𑀢𑁆𑀢𑀓𑀁 𑀤𑁂𑀢𑀺, 𑀥𑀫𑁆𑀫𑀺𑀬𑀜𑁆𑀘𑁂, 𑀯𑀝𑁆𑀝𑀢𑀺. 𑀦𑁄 𑀅𑀥𑀫𑁆𑀫𑀺𑀬𑀁. ‘‘𑀢𑀁 𑀥𑀫𑁆𑀫𑀸𑀦𑀼𑀕𑁆𑀕𑀳𑁂𑀦 𑀉𑀕𑁆𑀕𑀡𑁆𑀳𑀺𑀢𑀼𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀓𑁂𑀦 𑀮𑁂𑀲𑁂𑀦𑀸𑀢𑀺 𑀘𑁂? ‘‘𑀅𑀮𑀩𑁆𑀪𑀫𑀸𑀦𑀸𑀬 𑀲𑀸𑀫𑀕𑁆𑀕𑀺𑀬𑀸 𑀅𑀦𑀸𑀧𑀢𑁆𑀢𑀺 𑀲𑀫𑁆𑀪𑁄𑀕𑁂 𑀲𑀁𑀯𑀸𑀲𑁂’’𑀢𑀺 (𑀫𑀳𑀸𑀯. 𑁧𑁩𑁦) 𑀇𑀫𑀺𑀦𑀸 𑀉𑀧𑀲𑀫𑁆𑀧𑀤𑀓𑁆𑀔𑀦𑁆𑀥𑀓𑀯𑀘𑀦𑀮𑁂𑀲𑁂𑀦.

𑁫𑁮𑁬. 𑀅𑀲𑁆𑀲𑀢𑀺𑀬𑀸 𑀤𑀺𑀦𑁆𑀦𑀦𑁆𑀢𑀺 𑀏𑀢𑁆𑀣 ‘‘𑀅𑀲𑁆𑀲𑀢𑀺𑀬𑀸 𑀤𑀺𑀦𑁆𑀦𑀁 𑀦𑀸𑀫 𑀅𑀧𑀭𑀺𑀘𑁆𑀘𑀢𑁆𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀤𑀼𑀲𑁆𑀲𑀦𑁆𑀢𑁂 𑀩𑀤𑁆𑀥𑀓𑀳𑀸𑀧𑀡𑀸𑀤𑀻𑀦𑀺 𑀲𑀢𑀺𑀁 𑀧𑀝𑀺𑀮𑀪𑀺𑀢𑁆𑀯𑀸 𑀤𑀸𑀬𑀓𑀸 𑀘𑁂 𑀧𑀼𑀦 𑀕𑀡𑁆𑀳𑀦𑁆𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀫𑁂𑀯 𑀤𑁂𑀲𑁂𑀢𑀩𑁆𑀩𑀁. 𑀢𑁂𑀦 𑀅𑀓𑀧𑁆𑀧𑀺𑀬𑀪𑀡𑁆𑀟𑁂𑀦 𑀢𑁂 𑀘𑁂 𑀤𑀸𑀬𑀓𑀸 𑀲𑀧𑁆𑀧𑀺𑀆𑀤𑀻𑀦𑀺 𑀓𑀺𑀡𑀺𑀢𑁆𑀯𑀸 𑀲𑀗𑁆𑀖𑀲𑁆𑀲 𑀤𑁂𑀦𑁆𑀢𑀺, 𑀢𑀲𑁆𑀲𑀧𑀺 𑀪𑀺𑀓𑁆𑀔𑀼𑀦𑁄 𑀓𑀧𑁆𑀧𑀢𑀺 𑀤𑀸𑀬𑀓𑀸𑀦𑀁𑀬𑁂𑀯 𑀲𑀦𑁆𑀢𑀓𑀢𑁆𑀢𑀸. 𑀪𑀺𑀓𑁆𑀔𑀼𑀦𑀸 𑀳𑀺 ‘𑀯𑀢𑁆𑀣𑀁 𑀕𑀡𑁆𑀳𑀸𑀫𑀻’𑀢𑀺 𑀯𑀢𑁆𑀣𑀲𑀜𑁆𑀜𑀸𑀬 𑀏𑀯 𑀕𑀳𑀺𑀢𑀁, 𑀦 𑀭𑀽𑀧𑀺𑀬𑀲𑀜𑁆𑀜𑀸𑀬. 𑀇𑀤𑀜𑁆𑀘 𑀲𑀺𑀓𑁆𑀔𑀸𑀧𑀤𑀁 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀉𑀕𑁆𑀕𑀳𑀡𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀘 𑀢𑁂𑀦 𑀢𑀁 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀧𑀭𑁂𑀲𑀁 𑀯𑀸 𑀅𑀢𑁆𑀣𑀸𑀬 𑀕𑀳𑀺𑀢𑀁. 𑀅𑀣 𑀢𑁂 𑀤𑀸𑀬𑀓𑀸 𑀦𑁄 𑀘𑁂 𑀆𑀕𑀦𑁆𑀢𑁆𑀯𑀸 𑀕𑀡𑁆𑀳𑀦𑁆𑀢𑀺, 𑀤𑀸𑀬𑀓𑁂 𑀧𑀼𑀘𑁆𑀙𑀺𑀢𑁆𑀯𑀸 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀘𑁂 𑀧𑀭𑀺𑀘𑁆𑀘𑀢𑁆𑀢𑀁, 𑀲𑀗𑁆𑀖𑁂 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀆𑀧𑀢𑁆𑀢𑀺 𑀤𑁂𑀲𑁂𑀢𑀩𑁆𑀩𑀸. 𑀦𑁄 𑀘𑁂, 𑀆𑀧𑀢𑁆𑀢𑀺 𑀏𑀯 𑀤𑁂𑀲𑁂𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀧𑀼𑀩𑁆𑀩𑀸𑀧𑀭𑀯𑀺𑀭𑀼𑀤𑁆𑀥𑀁. 𑀆𑀧𑀢𑁆𑀢𑀺𑀤𑁂𑀲𑀦𑀸𑀬 𑀳𑀺 𑀲𑀢𑀺 𑀭𑀽𑀧𑀺𑀬𑀁 𑀧𑀝𑀺𑀕𑁆𑀕𑀳𑀺𑀢𑀦𑁆𑀢𑀺 𑀲𑀺𑀤𑁆𑀥𑀁, 𑀢𑀲𑁆𑀫𑀺𑀁 𑀲𑀺𑀤𑁆𑀥𑁂 ‘‘𑀢𑀢𑁄 𑀉𑀧𑁆𑀧𑀦𑁆𑀦𑀁 𑀢𑀲𑁆𑀲𑀧𑀺 𑀓𑀧𑁆𑀧𑀢𑀻’’𑀢𑀺 𑀇𑀤𑀁 𑀦 𑀬𑀼𑀚𑁆𑀚𑀢𑀻𑀢𑀺. 𑀓𑀧𑁆𑀧𑀢𑀺 𑀏𑀯𑀸𑀢𑀺 𑀘𑁂? 𑀦, 𑀯𑀢𑁆𑀣𑀼𑀁 𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀆𑀧𑀢𑁆𑀢𑀺 𑀤𑁂𑀲𑁂𑀢𑀩𑁆𑀩𑀸𑀢𑀺 𑀦 𑀬𑀼𑀚𑁆𑀚𑀢𑀺. 𑀅𑀘𑀺𑀢𑁆𑀢𑀓𑀢𑁆𑀢𑀸 𑀲𑀺𑀓𑁆𑀔𑀸𑀧𑀤𑀲𑁆𑀲 𑀬𑀼𑀚𑁆𑀚𑀢𑀻𑀢𑀺 𑀘𑁂? 𑀦, 𑀲𑀩𑁆𑀩𑀢𑁆𑀣 ‘‘𑀭𑀽𑀧𑀺𑀬𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺 𑀯𑀘𑀦𑀢𑁄. ‘‘𑀭𑀽𑀧𑀺𑀬𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑀁, 𑀅𑀜𑁆𑀜𑀣𑀸 𑀲𑀩𑁆𑀩𑀢𑁆𑀣 ‘‘𑀭𑀽𑀧𑀺𑀬’’𑀦𑁆𑀢𑀺 𑀧𑀤𑀁 𑀦𑀺𑀭𑀢𑁆𑀣𑀓𑀁 𑀳𑁄𑀢𑀺 𑀯𑀺𑀦𑀸𑀧𑀺 𑀢𑁂𑀦 𑀢𑀤𑀢𑁆𑀣𑀲𑀺𑀤𑁆𑀥𑀺𑀢𑁄. 𑀅𑀦𑁂𑀦 𑀘 𑀯𑀢𑁆𑀣𑀁 𑀧𑀝𑀺𑀕𑁆𑀕𑀳𑀺𑀢𑀁, 𑀤𑀸𑀬𑀓𑁂𑀦 𑀘 𑀯𑀢𑁆𑀣𑀫𑁂𑀯 𑀤𑀺𑀦𑁆𑀦𑀁, 𑀯𑀢𑁆𑀣𑀕𑀢𑀫𑁆𑀧𑀺 𑀭𑀽𑀧𑀺𑀬𑀁 𑀣𑁂𑀬𑁆𑀬𑀘𑀺𑀢𑁆𑀢𑁂𑀦 𑀕𑀡𑁆𑀳𑀦𑁆𑀢𑁄 𑀧𑀤𑀯𑀸𑀭𑁂𑀦 𑀓𑀸𑀭𑁂𑀢𑀩𑁆𑀩𑁄. 𑀅𑀝𑁆𑀞𑀓𑀣𑀸𑀬𑀜𑁆𑀘 ‘‘𑀭𑀽𑀧𑀺𑀬𑁂 𑀅𑀭𑀽𑀧𑀺𑀬𑀲𑀜𑁆𑀜𑀻𑀢𑀺 𑀲𑀼𑀯𑀡𑁆𑀡𑀸𑀤𑀻𑀲𑀼 𑀔𑀭𑀧𑀢𑁆𑀢𑀸𑀤𑀺𑀲𑀜𑁆𑀜𑀻’’𑀢𑀺 𑀯𑀼𑀢𑁆𑀢𑀁 ‘‘𑀭𑀽𑀧𑀺𑀬𑀁 𑀧𑀝𑀺𑀕𑁆𑀕𑀡𑁆𑀳𑀸𑀢𑀻’’𑀢𑀺 𑀯𑀘𑀦𑀯𑀲𑁂𑀦.

‘‘𑀅𑀧𑀺𑀘 𑀧𑀼𑀜𑁆𑀜𑀓𑀸𑀫𑀸’’𑀢𑀺𑀆𑀤𑀺 𑀧𑀦 𑀯𑀺𑀥𑀸𑀦𑀦𑁆𑀢𑀭𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀢𑁂𑀦𑁂𑀯 𑀳𑀺 ‘‘𑀇𑀫𑀲𑁆𑀫𑀺𑀁 𑀕𑁂𑀳𑁂 𑀇𑀤𑀁 𑀮𑀤𑁆𑀥𑀦𑁆𑀢𑀺 𑀲𑀮𑁆𑀮𑀓𑁆𑀔𑁂𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀅𑀜𑁆𑀜𑀣𑀸 𑀲𑀮𑁆𑀮𑀓𑁆𑀔𑀡𑁂 𑀯𑀺𑀫𑀢𑀺𑀯𑀲𑁂𑀦, 𑀯𑀺𑀫𑀢𑀺𑀬𑀸 𑀘 𑀲𑀢𑀺 𑀦𑀺𑀲𑁆𑀲𑀕𑁆𑀕𑀺𑀬𑀫𑁂𑀯 ‘‘𑀭𑀽𑀧𑀺𑀬𑁂 𑀯𑁂𑀫𑀢𑀺𑀓𑁄’’𑀢𑀺𑀆𑀤𑀺 𑀯𑀘𑀦𑀢𑁄𑀢𑀺. 𑀇𑀤𑀁 𑀯𑀺𑀥𑀸𑀦𑀁 𑀦𑀺𑀭𑀢𑁆𑀣𑀓𑀫𑁂𑀯 𑀆𑀧𑀚𑁆𑀚𑀢𑀺, 𑀦 𑀘 𑀦𑀺𑀭𑀢𑁆𑀣𑀓𑀁. 𑀓𑀲𑁆𑀫𑀸? 𑀤𑀼𑀲𑁆𑀲𑀦𑁆𑀢𑁂 𑀩𑀤𑁆𑀥𑀓𑀳𑀸𑀧𑀡𑀸𑀤𑀺 𑀅𑀲𑁆𑀲𑀢𑀺𑀬𑀸 𑀤𑀺𑀦𑁆𑀦𑀁 𑀯𑀢𑁆𑀣𑀲𑀜𑁆𑀜𑀸𑀬 𑀧𑀝𑀺𑀕𑁆𑀕𑀳𑀺𑀢𑀜𑁆𑀘, 𑀢𑀢𑁄 𑀦 𑀭𑀽𑀧𑀺𑀬𑀁 𑀤𑀺𑀦𑁆𑀦𑀜𑁆𑀘 𑀳𑁄𑀢𑀺 𑀧𑀝𑀺𑀕𑁆𑀕𑀳𑀺𑀢𑀜𑁆𑀘𑀸𑀢𑀺. 𑀏𑀢𑁆𑀣 𑀆𑀧𑀢𑁆𑀢𑀺𑀤𑁂𑀲𑀦𑀸𑀓𑀺𑀘𑁆𑀘𑀁 𑀦𑀢𑁆𑀣𑀺, 𑀢𑀁 𑀧𑀦 𑀤𑀸𑀬𑀓𑀸𑀦𑀫𑁂𑀯 𑀧𑀝𑀺𑀤𑀸𑀢𑀩𑁆𑀩𑀁. 𑀢𑀢𑁄 𑀉𑀧𑁆𑀧𑀦𑁆𑀦𑀁 𑀓𑀧𑁆𑀧𑀺𑀬𑀪𑀡𑁆𑀟𑀜𑁆𑀘 𑀲𑀩𑁆𑀩𑁂𑀲𑀁 𑀓𑀧𑁆𑀧𑀢𑀻𑀢𑀺 𑀇𑀫𑀲𑁆𑀲 𑀯𑀺𑀥𑀸𑀦𑀦𑁆𑀢𑀭𑀤𑀲𑁆𑀲𑀦𑀢𑁆𑀣𑀁 ‘‘𑀅𑀧𑀺𑀘 𑀧𑀼𑀜𑁆𑀜𑀓𑀸𑀫𑀸’’𑀢𑀺𑀆𑀤𑀻𑀢𑀺 𑀦𑁄 𑀢𑀓𑁆𑀓𑁄𑀢𑀺 𑀆𑀘𑀭𑀺𑀬𑁄.

𑀭𑀽𑀧𑀺𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁮𑁭. ‘‘𑀚𑀸𑀢𑀭𑀽𑀧𑀭𑀚𑀢𑀧𑀭𑀺𑀯𑀢𑁆𑀢𑀦’’𑀦𑁆𑀢𑀺 𑀉𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁂𑀦 𑀯𑀼𑀢𑁆𑀢𑀁, 𑀢𑀣𑀸 ‘‘𑀭𑀽𑀧𑀺𑀬𑀁 𑀦𑀸𑀫 𑀲𑀢𑁆𑀣𑀼𑀯𑀡𑁆𑀡𑁄 𑀓𑀳𑀸𑀧𑀡𑁄’’𑀢𑀺𑀆𑀤𑀺 𑀧𑀸𑀴𑀺𑀯𑀘𑀦𑀜𑁆𑀘. ‘‘𑀅𑀭𑀽𑀧𑀺𑀬𑁂 𑀭𑀽𑀧𑀺𑀬𑀲𑀜𑁆𑀜𑀻 𑀭𑀽𑀧𑀺𑀬𑀁 𑀘𑁂𑀢𑀸𑀧𑁂𑀢𑀻’’𑀢𑀺𑀆𑀤𑀺 𑀢𑀺𑀓𑀯𑀘𑀦𑀢𑁄, ‘‘𑀤𑀼𑀓𑁆𑀓𑀝𑀯𑀢𑁆𑀣𑀼𑀦𑀸 𑀧𑀦 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀁 𑀘𑁂𑀢𑀸𑀧𑁂𑀦𑁆𑀢𑀲𑁆𑀲…𑀧𑁂… 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀸𑀘𑀺𑀢𑁆𑀢𑀺𑀬𑀁 𑀕𑀭𑀼𑀓𑀲𑁆𑀲 𑀘𑁂𑀢𑀸𑀧𑀺𑀢𑀢𑁆𑀢𑀸’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀘 𑀧𑀦 𑀅𑀦𑀼𑀓𑁆𑀓𑀝𑁆𑀞𑀧𑀭𑀺𑀘𑁆𑀙𑁂𑀤𑁄𑀧𑁂𑀢𑁆𑀣 𑀮𑀩𑁆𑀪𑀢𑀻𑀢𑀺 𑀲𑀺𑀤𑁆𑀥𑀁. 𑀲𑀢𑁆𑀣𑀼𑀯𑀡𑁆𑀡𑁄 𑀘 𑀓𑀳𑀸𑀧𑀡𑁄 𑀘 𑀢𑀢𑁄 𑀬𑁂 𑀘𑀜𑁆𑀜𑁂 𑀯𑁄𑀳𑀸𑀭𑀁 𑀕𑀘𑁆𑀙𑀦𑁆𑀢𑀻𑀢𑀺 𑀏𑀯𑀫𑁂𑀢𑁆𑀣 𑀲𑀫𑀼𑀘𑁆𑀘𑀬𑁄 𑀯𑁂𑀤𑀺𑀢𑀩𑁆𑀩𑁄. 𑀇𑀫𑀲𑁆𑀫𑀺𑀁 𑀧𑀦 𑀲𑀺𑀓𑁆𑀔𑀸𑀧𑀤𑁂 ‘‘𑀦𑀸𑀦𑀧𑁆𑀧𑀓𑀸𑀭𑀓𑀁 𑀦𑀸𑀫 𑀓𑀢𑀫𑁆𑀧𑀺 𑀅𑀓𑀢𑀫𑁆𑀧𑀺 𑀓𑀢𑀸𑀓𑀢𑀫𑁆𑀧𑀻’’𑀢𑀺 𑀏𑀢𑁆𑀣 𑀯𑀺𑀪𑀢𑁆𑀢𑀸𑀦𑀁 𑀢𑀺𑀡𑁆𑀡𑀁 𑀭𑀽𑀧𑀺𑀬𑀸𑀭𑀽𑀧𑀺𑀬𑀸𑀦𑀜𑁆𑀘 𑀤𑁆𑀯𑀺𑀦𑁆𑀦𑀁 𑀯𑀲𑁂𑀦 𑀧𑀜𑁆𑀘 𑀢𑀺𑀓𑀸 𑀯𑀼𑀢𑁆𑀢𑀸, 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀳𑀺 𑀢𑀤𑀦𑀼𑀮𑁄𑀫𑀢𑁄 𑀏𑀓𑁄 𑀢𑀺𑀓𑁄 𑀤𑀲𑁆𑀲𑀺𑀢𑁄𑀢𑀺 𑀲𑀩𑁆𑀩𑁂 𑀙 𑀳𑁄𑀦𑁆𑀢𑀺.

𑀏𑀢𑁆𑀣𑀸𑀳 𑁋 𑀅𑀜𑁆𑀜𑀲𑁆𑀫𑀺𑀁 𑀲𑀺𑀓𑁆𑀔𑀸𑀧𑀤𑁂 𑀏𑀓𑀲𑁆𑀫𑀺𑀁 𑀢𑀺𑀓𑀘𑁆𑀙𑁂𑀤𑁂 𑀤𑀲𑁆𑀲𑀺𑀢𑁂 𑀲𑀢𑀺𑀧𑀺 𑀲𑀫𑁆𑀪𑀯𑁂 𑀇𑀢𑀭𑁂 𑀦 𑀤𑀲𑁆𑀲𑀻𑀬𑀦𑁆𑀢𑀺, 𑀇𑀥𑁂𑀯 𑀓𑀲𑁆𑀫𑀸 𑀤𑀲𑁆𑀲𑀺𑀢𑁄𑀢𑀺? ‘‘𑀦𑀸𑀦𑀧𑁆𑀧𑀓𑀸𑀭𑀓’’𑀦𑁆𑀢𑀺 𑀫𑀸𑀢𑀺𑀓𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀇𑀥𑁂𑀯 𑀦𑀸𑀦𑀧𑁆𑀧𑀓𑀸𑀭𑀪𑀸𑀯𑀤𑀲𑁆𑀲𑀦𑀢𑁆𑀣𑀦𑁆𑀢𑀺. 𑀦 𑀓𑀬𑀯𑀺𑀓𑁆𑀓𑀬𑀲𑀺𑀓𑁆𑀔𑀸𑀧𑀤𑁂𑀧𑀺 𑀯𑀢𑁆𑀢𑀩𑁆𑀩𑀧𑁆𑀧𑀲𑀗𑁆𑀕𑀢𑁄𑀢𑀺 𑀘𑁂? 𑀦, 𑀇𑀥 𑀤𑀲𑁆𑀲𑀺𑀢𑀦𑀬𑀢𑁆𑀢𑀸. 𑀅𑀣 𑀘 𑀭𑀽𑀧𑀺𑀬𑀲𑁆𑀲 𑀯𑀺𑀪𑀗𑁆𑀕𑁂 ‘‘𑀬𑁂 𑀯𑁄𑀳𑀸𑀭𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀅𑀦𑁆𑀢𑁂 𑀯𑀼𑀢𑁆𑀢𑀢𑁆𑀢𑀸 𑀲𑀢𑁆𑀣𑀼𑀯𑀡𑁆𑀡𑀸𑀤𑀬𑁄 𑀯𑀴𑀜𑁆𑀚𑀦𑀼𑀧𑀕𑀸 𑀏𑀯𑀸𑀢𑀺 𑀲𑀺𑀤𑁆𑀥𑀁. 𑀢𑀢𑁄 𑀅𑀯𑀴𑀜𑁆𑀚𑀦𑀼𑀧𑀕𑁂𑀳𑀺 𑀚𑀸𑀢𑀭𑀽𑀧𑀭𑀚𑀢𑁂𑀳𑀺 𑀯𑁄𑀳𑀸𑀭𑁂𑀦 𑀦 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀆𑀧𑀚𑁆𑀚𑀢𑀺, 𑀢𑀲𑁆𑀫𑀸 𑀢𑀁 𑀆𑀧𑀚𑁆𑀚𑀦𑀢𑁆𑀣𑀦𑁆𑀢𑀺 𑀤𑀲𑁆𑀲𑁂𑀦𑁆𑀢𑁂𑀦 ‘‘𑀓𑀢𑁂𑀦 𑀓𑀢𑀁 𑀘𑁂𑀢𑀸𑀧𑁂𑀢𑀻’’𑀢𑀺𑀆𑀤𑀬𑁄 𑀢𑀺𑀓𑀸 𑀯𑀼𑀢𑁆𑀢𑀸𑀢𑀺, 𑀏𑀯𑀁 𑀲𑀦𑁆𑀢𑁂 𑀭𑀽𑀧𑀺𑀬𑀯𑀺𑀪𑀗𑁆𑀕𑁂 ‘‘𑀬𑁂 𑀘 𑀯𑁄𑀳𑀸𑀭𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀦 𑀯𑀢𑁆𑀢𑀩𑁆𑀩𑀁, 𑀢𑀲𑁆𑀫𑀺𑀁 𑀧𑀤𑁂 𑀅𑀯𑀼𑀢𑁆𑀢𑁂 𑀅𑀯𑀴𑀜𑁆𑀚𑀦𑀼𑀧𑀕𑀸𑀧𑀺 𑀲𑀗𑁆𑀕𑀳𑀁 𑀕𑀢𑀸𑀯 𑀳𑁄𑀦𑁆𑀢𑀻𑀢𑀺 𑀓𑀢𑀸𑀤𑀻𑀳𑀺 𑀢𑀺𑀓𑀢𑁆𑀢𑀬𑀲𑁆𑀲 𑀯𑀢𑁆𑀢𑀩𑁆𑀩𑀧𑀬𑁄𑀚𑀦𑀁 𑀦 𑀪𑀯𑀺𑀲𑁆𑀲𑀢𑀻𑀢𑀺 𑀘𑁂? 𑀦, 𑀓𑀧𑁆𑀧𑀺𑀬𑀪𑀡𑁆𑀟𑁂𑀦 𑀓𑀧𑁆𑀧𑀺𑀬𑀪𑀡𑁆𑀟𑀧𑀅𑀯𑀢𑁆𑀢𑀦𑀲𑁆𑀲𑀸𑀧𑀺 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀪𑀸𑀯𑀧𑁆𑀧𑀲𑀗𑁆𑀕𑀢𑁄. ‘‘𑀬𑁂 𑀯𑁄𑀳𑀸𑀭𑀁 𑀕𑀘𑁆𑀙𑀦𑁆𑀢𑀻’’𑀢𑀺 𑀯𑀘𑀦𑁂𑀦𑀧𑀺 𑀓𑀫𑀼𑀓 𑀓𑀣𑀮 𑀓𑀁𑀲𑀪𑀸𑀚𑀦 𑀲𑀸𑀝𑀓𑀸𑀤𑀺𑀧𑀭𑀺𑀯𑀢𑁆𑀢𑀦𑀲𑁆𑀲𑀧𑀺 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀪𑀸𑀯𑀧𑁆𑀧𑀲𑀗𑁆𑀕𑁄 𑀏𑀯𑀸𑀢𑀺 𑀘𑁂? 𑀦, 𑀓𑀢𑀸𑀤𑀺𑀯𑀘𑀦𑁂𑀦 𑀚𑀸𑀢𑀭𑀽𑀧𑀸𑀤𑀺𑀅𑀓𑀧𑁆𑀧𑀺𑀬𑀯𑀢𑁆𑀣𑀽𑀦𑀜𑁆𑀜𑁂𑀯 𑀅𑀥𑀺𑀧𑁆𑀧𑁂𑀢𑀪𑀸𑀯𑀤𑀻𑀧𑀦𑀢𑁄, 𑀢𑀲𑁆𑀫𑀸 𑀉𑀪𑀬𑁂𑀦𑀧𑀺 𑀬𑀤𑁂𑀢𑀁 𑀓𑀢𑀸𑀓𑀢𑀸𑀤𑀺𑀪𑁂𑀤𑀁 𑀧𑀸𑀓𑀢𑀺𑀓𑀭𑀽𑀧𑀺𑀬𑀁 𑀬𑀜𑁆𑀘 𑀓𑀳𑀸𑀧𑀡𑀫𑀸𑀲𑀓𑀲𑀗𑁆𑀔𑁂𑀧𑀁, 𑀬𑀜𑁆𑀘 𑀓𑀳𑀸𑀧𑀡𑀸𑀤𑀺𑀯𑁄𑀳𑀸𑀭𑀽𑀧𑀕𑀁, 𑀉𑀪𑀬𑀫𑁆𑀧𑁂𑀢𑀁 𑀇𑀥 𑀘 𑀅𑀦𑀦𑁆𑀢𑀭𑀸𑀢𑀻𑀢𑀲𑀺𑀓𑁆𑀔𑀸𑀧𑀤𑁂 𑀘 𑀭𑀽𑀧𑀺𑀬𑀁 𑀦𑀸𑀫𑀸𑀢𑀺 𑀅𑀥𑀺𑀧𑁆𑀧𑁂𑀢𑀢𑁆𑀣𑀲𑀺𑀤𑁆𑀥𑀺 𑀳𑁄𑀢𑀺, 𑀦 𑀢𑀡𑁆𑀟𑀼𑀮𑀸𑀤𑀻𑀦𑀺, 𑀢𑀢𑁆𑀣 𑀓𑀢𑀸𑀤𑀺𑀯𑁄𑀳𑀸𑀭𑀸𑀲𑀫𑁆𑀪𑀯𑀢𑁄. 𑀏𑀢𑁆𑀢𑀸𑀯𑀢𑀸 𑀓𑀢𑀸𑀤𑀺𑀢𑀺𑀓𑀢𑁆𑀢𑀬𑀧𑁆𑀧𑀬𑁄𑀚𑀦𑀁 𑀯𑀼𑀢𑁆𑀢𑀁.

𑀇𑀤𑀸𑀦𑀺 𑀲𑁂𑀲𑀢𑁆𑀢𑀺𑀓𑀸𑀦𑀺 𑀯𑀼𑀘𑁆𑀘𑀢𑀺 𑁋 𑀏𑀢𑁆𑀣 𑀳𑀺 𑀬𑀣𑀸𑀯𑀼𑀢𑁆𑀢𑀧𑁆𑀧𑀪𑁂𑀤𑀁 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼 𑀭𑀽𑀧𑀺𑀬𑀁 𑀦𑀸𑀫, 𑀲𑁂𑀲𑀁 𑀤𑀼𑀓𑁆𑀓𑀝𑀯𑀢𑁆𑀣𑀼𑀧𑀺 𑀓𑀧𑁆𑀧𑀺𑀬𑀯𑀢𑁆𑀣𑀼𑀧𑀺 𑀦 𑀭𑀽𑀧𑀺𑀬𑀦𑁆𑀢𑀺 𑀅𑀭𑀽𑀧𑀺𑀬𑀁 𑀦𑀸𑀫 𑀳𑁄𑀢𑀻𑀢𑀺 𑀓𑀢𑁆𑀯𑀸 ‘‘𑀅𑀭𑀽𑀧𑀺𑀬𑁂 𑀅𑀭𑀽𑀧𑀺𑀬𑀲𑀜𑁆𑀜𑀻 𑀧𑀜𑁆𑀘𑀦𑁆𑀦𑀁 𑀲𑀳𑀥𑀫𑁆𑀫𑀺𑀓𑀸𑀦𑀁 𑀅𑀦𑀸𑀧𑀢𑁆𑀢𑀻’’𑀢𑀺 𑀇𑀤𑀁 𑀦 𑀏𑀓𑀁𑀲𑀺𑀓𑀁 𑀆𑀧𑀚𑁆𑀚𑀢𑀺 𑀤𑀼𑀓𑁆𑀓𑀝𑀯𑀢𑁆𑀣𑀼𑀫𑁆𑀳𑀺 𑀤𑀼𑀓𑁆𑀓𑀝𑀸𑀧𑀚𑁆𑀚𑀦𑀢𑁄. 𑀇𑀥 𑀯𑀘𑀦𑀧𑁆𑀧𑀫𑀸𑀡𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀢𑁄 𑀅𑀜𑁆𑀜𑀁 𑀅𑀦𑁆𑀢𑀫𑀲𑁄 𑀫𑀼𑀢𑁆𑀢𑀸𑀤𑀺𑀧𑀺 𑀅𑀭𑀽𑀧𑀺𑀬𑀫𑁂𑀯 𑀦𑀸𑀫. 𑀢𑀢𑁆𑀣 𑀧𑀜𑁆𑀘𑀦𑁆𑀦𑀁 𑀲𑀳𑀥𑀫𑁆𑀫𑀺𑀓𑀸𑀦𑀁 𑀅𑀦𑀸𑀧𑀢𑁆𑀢𑀻𑀢𑀺 𑀘𑁂? 𑀦, 𑀭𑀸𑀚𑀲𑀺𑀓𑁆𑀔𑀸𑀧𑀤𑀯𑀺𑀭𑁄𑀥𑀢𑁄. 𑀢𑀢𑁆𑀣 𑀳𑀺 ‘‘𑀫𑀼𑀢𑁆𑀢𑀸 𑀯𑀸 𑀫𑀡𑀺 𑀯𑀸’’𑀢𑀺 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀫𑀼𑀢𑁆𑀢𑀸𑀤𑀺 𑀅𑀓𑀧𑁆𑀧𑀺𑀬𑀁 𑀤𑀼𑀓𑁆𑀓𑀝𑀯𑀢𑁆𑀣𑀽𑀢𑀺 𑀘 𑀲𑀺𑀤𑁆𑀥𑀁 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀽𑀲𑀼 𑀅𑀪𑀸𑀯𑀸. 𑀏𑀯𑀁 𑀲𑀦𑁆𑀢𑁂 ‘‘𑀅𑀭𑀽𑀧𑀺𑀬𑁂 𑀅𑀭𑀽𑀧𑀺𑀬𑀲𑀜𑁆𑀜𑀻 𑀧𑀜𑁆𑀘𑀦𑁆𑀦𑀁 𑀲𑀳𑀥𑀫𑁆𑀫𑀺𑀓𑀸𑀦𑀁 𑀅𑀦𑀸𑀧𑀢𑁆𑀢𑀻’’𑀢𑀺 𑀲𑀼𑀤𑁆𑀥𑀓𑀧𑁆𑀧𑀺𑀬𑀪𑀡𑁆𑀟𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀦 𑀲𑀩𑁆𑀩𑀁 𑀅𑀭𑀽𑀧𑀺𑀬𑀁. 𑀢𑀢𑁄 𑀅𑀜𑁆𑀜𑀢𑁆𑀣 𑀧𑀦 ‘‘𑀅𑀭𑀽𑀧𑀺𑀬𑁂 𑀭𑀽𑀧𑀺𑀬𑀲𑀜𑁆𑀜𑀻’’𑀢𑀺𑀆𑀤𑀺𑀢𑀺𑀓𑀤𑀼𑀓𑁆𑀓𑀝𑁂 𑀘 𑀅𑀝𑁆𑀞𑀓𑀣𑀸𑀬𑀁 𑀤𑀲𑁆𑀲𑀺𑀢𑀢𑀺𑀓𑁂 𑀘 𑀲𑀩𑁆𑀩𑀁 𑀅𑀭𑀽𑀧𑀺𑀬𑀁 𑀦𑀸𑀫𑀸𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀢𑀲𑁆𑀫𑀸 𑀅𑀭𑀽𑀧𑀺𑀬𑀪𑀸𑀯𑀤𑀻𑀧𑀦𑀢𑁆𑀣𑀁 𑀤𑀼𑀢𑀺𑀬𑁄 𑀢𑀺𑀓𑁄 𑀯𑀼𑀢𑁆𑀢𑁄. 𑀢𑀤𑀢𑁆𑀣𑀫𑁂𑀯 𑀅𑀝𑁆𑀞𑀓𑀣𑀸𑀬𑀁 𑀤𑀲𑁆𑀲𑀺𑀢𑁄 𑀏𑀓𑁄 𑀢𑀺𑀓𑁄. 𑀓𑀲𑁆𑀫𑀸 𑀦 𑀧𑀸𑀴𑀺𑀬𑀁 𑀲𑁄 𑀯𑀼𑀢𑁆𑀢𑁄𑀢𑀺 𑀘𑁂? 𑀢𑀢𑁆𑀣 𑀘𑁂𑀢𑀸𑀧𑀺𑀢𑀅𑀭𑀽𑀧𑀺𑀬𑁂 𑀭𑀽𑀧𑀺𑀬𑀙𑀟𑁆𑀟𑀦𑀓𑀲𑀫𑁆𑀫𑀼𑀢𑀺𑀓𑀺𑀘𑁆𑀘𑀸𑀪𑀸𑀯𑀢𑁄. 𑀢𑀲𑁆𑀫𑀺𑀜𑁆𑀳𑀺 𑀢𑀺𑀓𑁂 𑀯𑀼𑀢𑁆𑀢𑁂 𑀓𑀧𑁆𑀧𑀺𑀬𑀯𑀢𑁆𑀣𑀼𑀦𑁄𑀧𑀺 𑀅𑀭𑀽𑀧𑀺𑀬𑀙𑀟𑁆𑀟𑀦𑀓𑀲𑀫𑁆𑀫𑀼𑀢𑀺 𑀤𑀸𑀢𑀩𑁆𑀩𑀸𑀢𑀺 𑀆𑀧𑀚𑁆𑀚𑀢𑀺, 𑀢𑀲𑁆𑀲 𑀯𑀲𑁂𑀦 𑀭𑀽𑀧𑀺𑀬𑀙𑀟𑁆𑀟𑀦𑀓𑀲𑀫𑁆𑀫𑀼𑀢𑀺 𑀏𑀯 𑀦 𑀯𑀢𑁆𑀢𑀩𑁆𑀩𑀸𑀢𑀺? 𑀦, 𑀭𑀽𑀧𑀺𑀬𑀲𑁆𑀲𑀧𑀺 𑀲𑀫𑁆𑀫𑀼𑀢𑀺𑀓𑀺𑀘𑁆𑀘𑀸𑀪𑀸𑀯𑀧𑁆𑀧𑀲𑀗𑁆𑀕𑀢𑁄, 𑀢𑀲𑁆𑀫𑀸 𑀭𑀽𑀧𑀺𑀬𑁂 𑀭𑀽𑀧𑀺𑀬𑀲𑀜𑁆𑀜𑀻 𑀓𑀧𑁆𑀧𑀺𑀬𑀯𑀢𑁆𑀣𑀼𑀁 𑀘𑁂𑀢𑀸𑀧𑁂𑀢𑀺 𑀧𑀢𑁆𑀢𑀘𑀢𑀼𑀓𑁆𑀓𑁂 𑀢𑀢𑀺𑀬𑀧𑀢𑁆𑀢𑀁 𑀯𑀺𑀬, 𑀢𑀁 𑀲𑀗𑁆𑀖𑀸𑀤𑀻𑀦𑀁 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁, 𑀦𑀺𑀲𑁆𑀲𑀝𑁆𑀞𑀁 𑀧𑀦 𑀅𑀜𑁆𑀜𑁂𑀲𑀁 𑀓𑀧𑁆𑀧𑀢𑀺 𑀢𑀢𑀺𑀬𑀧𑀢𑁆𑀢𑁄 𑀯𑀺𑀬. 𑀅𑀣 𑀲𑀫𑁆𑀧𑀝𑀺𑀘𑁆𑀙𑀺𑀢𑀭𑀽𑀧𑀺𑀬𑁂𑀦 𑀘𑁂𑀢𑀸𑀧𑀺𑀢𑀁 𑀳𑁄𑀢𑀺 𑀤𑀼𑀢𑀺𑀬𑀧𑀢𑁆𑀢𑁄 𑀯𑀺𑀬, 𑀢𑀁 𑀯𑀺𑀦𑀸𑀧𑀺 𑀲𑀫𑁆𑀫𑀼𑀢𑀺𑀬𑀸 𑀬𑁄 𑀓𑁄𑀘𑀺 𑀪𑀺𑀓𑁆𑀔𑀼 𑀙𑀟𑁆𑀟𑁂𑀢𑀺, 𑀯𑀝𑁆𑀝𑀢𑀺. 𑀢𑀢𑁄 𑀧𑀭𑀁 ‘‘𑀲𑀘𑁂 𑀢𑀢𑁆𑀣 𑀆𑀕𑀘𑁆𑀙𑀢𑀺 𑀆𑀭𑀸𑀫𑀺𑀓𑁄 𑀯𑀸’’𑀢𑀺𑀆𑀤𑀺𑀦𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩𑀁. 𑀢𑀢𑁆𑀣 ‘‘𑀭𑀽𑀧𑀺𑀬𑁂’’𑀢𑀺 𑀯𑀸 ‘‘𑀅𑀭𑀽𑀧𑀺𑀬𑁂’’𑀢𑀺 𑀯𑀸 𑀲𑀩𑁆𑀩𑀢𑁆𑀣 𑀪𑀼𑀫𑁆𑀫𑀧𑁆𑀧𑀢𑁆𑀢𑁂 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁, 𑀉𑀧𑀬𑁄𑀕𑀧𑁆𑀧𑀢𑁆𑀢𑁂 𑀧𑀭𑀲𑀦𑁆𑀢𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀏𑀢𑁆𑀣𑀸𑀳 𑁋 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂𑀦 𑀭𑀽𑀧𑀺𑀬𑀧𑀝𑀺𑀕𑁆𑀕𑀳𑀡𑀁 𑀯𑀸𑀭𑀺𑀢𑀁, 𑀇𑀫𑀺𑀦𑀸 𑀲𑀼𑀤𑁆𑀥𑀸𑀕𑀫𑁂𑀦 𑀓𑀧𑁆𑀧𑀺𑀬𑀓𑀸𑀭𑀓𑀲𑁆𑀲 𑀳𑀢𑁆𑀣𑁂 𑀓𑀧𑁆𑀧𑀺𑀬𑀁 𑀦𑀺𑀲𑁆𑀲𑀸𑀬 𑀞𑀺𑀢𑁂𑀦 𑀲𑀁𑀯𑁄𑀳𑀸𑀭𑁄 𑀯𑀸𑀭𑀺𑀢𑁄𑀢𑀺.

𑁫𑁮𑁯. 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀦𑀸 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀁…𑀧𑁂… 𑀅𑀧𑀭𑀸𑀧𑀭𑀧𑀭𑀺𑀯𑀢𑁆𑀢𑀦𑁂 𑀇𑀫𑀺𑀦𑀸𑀢𑀺 𑀏𑀢𑁆𑀣 𑀏𑀓𑀲𑁆𑀫𑀺𑀁 𑀏𑀯 𑀯𑀢𑁆𑀣𑀼𑀲𑁆𑀫𑀺𑀁 𑀤𑁆𑀯𑀺𑀦𑁆𑀦𑀁 𑀲𑀺𑀓𑁆𑀔𑀸𑀧𑀤𑀸𑀦𑀁 𑀯𑀲𑁂𑀦 𑀏𑀓𑀢𑁄 𑀆𑀧𑀢𑁆𑀢𑀺 𑀯𑀼𑀢𑁆𑀢𑀸, 𑀢𑀁 𑀧𑀦 𑀧𑀘𑁆𑀙𑀺𑀫𑀲𑁆𑀲 𑀯𑀲𑁂𑀦 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁. 𑀏𑀢𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑀁 𑀆𑀧𑀦𑁆𑀦𑀫𑁆𑀧𑀺 𑀆𑀧𑀚𑁆𑀚𑀢𑀻𑀢𑀺 𑀏𑀓𑁂. 𑀧𑀭𑀲𑁆𑀲 𑀭𑀽𑀧𑀺𑀬𑀕𑁆𑀕𑀳𑀡𑀁 𑀧𑀭𑀺𑀯𑀢𑁆𑀢𑀦𑀦𑁆𑀢𑀺 𑀭𑀽𑀧𑀺𑀬𑁂 𑀅𑀕𑁆𑀕𑀳𑀺𑀢𑁂 𑀢𑀲𑁆𑀲 𑀅𑀪𑀸𑀯𑀢𑁄 𑀇𑀫𑀺𑀦𑀸𑀯 𑀆𑀧𑀢𑁆𑀢𑀺, 𑀦 𑀧𑀼𑀭𑀺𑀫𑁂𑀦 𑀑𑀫𑀲𑀯𑀸𑀤𑁄 𑀯𑀺𑀬. 𑀫𑀼𑀲𑀸𑀯𑀸𑀤𑁂𑀦 𑀫𑀼𑀲𑀸 𑀯𑀤𑀦𑁆𑀢𑀲𑁆𑀲𑀸𑀧𑀺 𑀳𑀺 𑀑𑀫𑀲𑀯𑀸𑀤𑁂𑀦𑁂𑀯 𑀆𑀧𑀢𑁆𑀢𑀺. 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀦𑀸 𑀤𑀼𑀓𑁆𑀓𑀝…𑀧𑁂… 𑀏𑀲𑁂𑀯 𑀦𑀬𑁄𑀢𑀺 𑀏𑀢𑀲𑁆𑀲 𑀬𑀼𑀢𑁆𑀢𑀺𑀁 𑀤𑀲𑁆𑀲𑁂𑀦𑁆𑀢𑁄 ‘‘𑀬𑁄 𑀳𑀺 𑀅𑀬’’𑀦𑁆𑀢𑀺 𑀆𑀳.

𑀯𑀟𑁆𑀠𑀺𑀁 𑀧𑀬𑁄𑀚𑁂𑀦𑁆𑀢𑀲𑁆𑀲𑀸𑀢𑀺 𑀏𑀢𑁆𑀣 𑀇𑀤𑀁 𑀕𑀳𑁂𑀢𑁆𑀯𑀸 𑀲𑀢𑀺 𑀫𑀸𑀲𑁂, 𑀲𑀢𑀺 𑀲𑀁𑀯𑀘𑁆𑀙𑀭𑁂 ‘‘𑀏𑀢𑁆𑀢𑀓𑀁 𑀤𑁂𑀳𑀻’’𑀢𑀺 𑀘𑁂 𑀯𑀤𑀢𑀺. 𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑁄 𑀳𑁄𑀢𑀺. 𑀯𑀺𑀦𑀸 𑀓𑀧𑁆𑀧𑀺𑀬𑀓𑀸𑀭𑀓𑁂𑀦 ‘‘𑀏𑀢𑁆𑀢𑀓𑀸 𑀯𑀼𑀟𑁆𑀠𑀺 𑀳𑁄𑀢𑀼, 𑀏𑀢𑁆𑀢𑀓𑀁 𑀕𑀡𑁆𑀳𑀸’’𑀢𑀺 𑀯𑀤𑀢𑁄 𑀤𑀼𑀓𑁆𑀓𑀝𑀁 𑀓𑀬𑀯𑀺𑀓𑁆𑀓𑀬𑀮𑀓𑁆𑀔𑀡𑀸𑀪𑀸𑀯𑀢𑁄. ‘‘𑀫𑀽𑀮𑁂 𑀫𑀽𑀮𑀲𑀸𑀫𑀺𑀓𑀸𑀦’’𑀦𑁆𑀢𑀺𑀆𑀤𑀺 𑀓𑀧𑁆𑀧𑀺𑀬𑀓𑀭𑀡𑀽𑀧𑀸𑀬𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀦 𑀓𑁂𑀯𑀮𑀁 𑀦𑀺𑀲𑁆𑀲𑀝𑁆𑀞𑀁 𑀅𑀧𑀭𑀺𑀪𑁄𑀕𑀁 𑀳𑁄𑀢𑀺, 𑀧𑀼𑀦 𑀏𑀯𑀁 𑀓𑀢𑁂 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀺. 𑀢𑀲𑁆𑀲𑀧𑀺 𑀧𑀭𑀺𑀪𑁄𑀕𑁂 𑀫𑀽𑀮𑀲𑁆𑀲 𑀓𑀧𑁆𑀧𑀺𑀬𑀓𑀭𑀡𑀽𑀧𑀸𑀬𑁄 𑀘𑁂 𑀦 𑀳𑁄𑀢𑀺, 𑀓𑀧𑁆𑀧𑀺𑀬𑀁 𑀆𑀘𑀺𑀓𑁆𑀔𑀺𑀢𑀩𑁆𑀩𑀦𑁆𑀢𑀺 𑀬𑀣𑀸 𑀧𑀸𑀴𑀺𑀬𑀸 𑀘𑁂𑀢𑁆𑀣 𑀓𑀧𑁆𑀧𑀺𑀬𑀓𑀭𑀡𑀽𑀧𑀸𑀬𑁄, 𑀲𑁄 𑀘 𑀢𑀢𑀺𑀬𑀧𑀢𑁆𑀢𑁂𑀧𑀺, ‘‘𑀬𑀣𑀸 𑀘 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀕𑀳𑀺𑀢𑁂 𑀏𑀯𑀭𑀽𑀧𑀼𑀧𑀸𑀬𑁄, 𑀢𑀣𑀸 𑀲𑀗𑁆𑀖𑀸𑀤𑀺𑀅𑀢𑁆𑀣𑀸𑀬 𑀕𑀳𑀺𑀢𑁂𑀧𑀺 𑀏𑀲𑁄 𑀯𑀸’’𑀢𑀺 𑀯𑀼𑀢𑁆𑀢𑀁. 𑀇𑀫𑁂 𑀓𑀺𑀭 𑀧𑀞𑀫𑀤𑀼𑀢𑀺𑀬𑀧𑀢𑁆𑀢𑁂 𑀬𑀸𑀯 𑀕𑀳𑀝𑁆𑀞𑁂𑀦 𑀧𑀭𑀺𑀯𑀢𑁆𑀢𑁂𑀢𑀺, 𑀢𑀸𑀯 𑀦 𑀓𑀧𑁆𑀧𑀺𑀬𑀓𑀭𑀡𑀽𑀧𑀸𑀬𑁄, 𑀅𑀦𑁂𑀓𑀧𑀼𑀭𑀺𑀲𑀬𑀼𑀕𑀫𑁆𑀧𑀺 ‘‘𑀅𑀓𑀧𑁆𑀧𑀺𑀬𑀸 𑀏𑀯𑀸’’𑀢𑀺 𑀅𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀁. 𑀅𑀦𑀼𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀲𑀗𑁆𑀖𑀲𑀦𑁆𑀢𑀓𑀁 𑀓𑀧𑁆𑀧𑀺𑀬𑀪𑀡𑁆𑀟𑀁 𑀯𑀺𑀓𑁆𑀓𑀺𑀡𑀺𑀢𑁆𑀯𑀸 𑀆𑀕𑀢𑀓𑀳𑀸𑀧𑀡𑀸𑀦𑀺𑀧𑀺 𑀧𑀝𑀺𑀕𑁆𑀕𑀳𑀡𑀁 𑀫𑁄𑀘𑁂𑀢𑁆𑀯𑀸𑀯 𑀲𑀫𑁆𑀧𑀝𑀺𑀘𑁆𑀙𑀺𑀢𑀩𑁆𑀩𑀸𑀦𑀺, 𑀢𑀲𑁆𑀫𑀸 𑀓𑀧𑁆𑀧𑀺𑀬𑀓𑀸𑀭𑀓𑁄 𑀘𑁂 𑀇𑀫𑀸𑀦𑀺 𑀢𑀸𑀦𑀺 𑀓𑀳𑀸𑀧𑀡𑀸𑀦𑀻𑀢𑀺 𑀯𑀤𑀢𑀺, 𑀦 𑀯𑀝𑁆𑀝𑀢𑀺𑀬𑁂𑀯, 𑀧𑀝𑀺𑀓𑁆𑀔𑀺𑀧𑀺𑀢𑀩𑁆𑀩𑀁, 𑀦 𑀯𑀺𑀘𑀸𑀭𑁂𑀢𑀩𑁆𑀩𑀁, 𑀯𑀺𑀘𑀸𑀭𑁂𑀢𑀺 𑀘𑁂? 𑀲𑀩𑁆𑀩𑁂𑀲𑀁 𑀦 𑀓𑀧𑁆𑀧𑀢𑀺. 𑀧𑀝𑀺𑀕𑁆𑀕𑀳𑀡𑀁 𑀫𑁄𑀘𑁂𑀢𑁆𑀯𑀸 𑀲𑀫𑁆𑀧𑀝𑀺𑀘𑁆𑀙𑀺𑀢𑀸𑀦𑀺 𑀘𑁂 𑀯𑀺𑀘𑀸𑀭𑁂𑀢𑀺, 𑀢𑀲𑁆𑀲𑁂𑀯 𑀦 𑀯𑀝𑁆𑀝𑀢𑀻’’𑀢𑀺 𑀅𑀪𑀺𑀓𑁆𑀔𑀡𑀁 𑀯𑀼𑀢𑁆𑀢𑀁.

𑀭𑀽𑀧𑀺𑀬𑀲𑀁𑀯𑁄𑀳𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀓𑀬𑀯𑀺𑀓𑁆𑀓𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁯𑁩. 𑀧𑀝𑀧𑀺𑀮𑁄𑀢𑀺𑀓𑀸𑀦𑀦𑁆𑀢𑀺 𑀧𑀝𑀧𑀺𑀮𑁄𑀢𑀺𑀓𑁂𑀳𑀺. ‘‘𑀅𑀚𑁆𑀛𑀸𑀘𑀭𑀢𑀺, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀇𑀤𑀁 𑀧𑀼𑀭𑀺𑀫𑀲𑀺𑀓𑁆𑀔𑀸𑀧𑀤𑁂𑀧𑀺 𑀯𑁂𑀤𑀺𑀢𑀩𑁆𑀩𑀁. ‘‘𑀓𑀬𑀺𑀢𑀜𑁆𑀘 𑀳𑁄𑀢𑀺 𑀯𑀺𑀓𑁆𑀓𑀬𑀺𑀢𑀜𑁆𑀘𑀸’’𑀢𑀺 𑀏𑀢𑁂𑀲𑀁 𑀧𑀤𑀸𑀦𑀁 𑀯𑀺𑀧𑀭𑀻𑀢𑀢𑁄 ‘‘𑀅𑀢𑁆𑀢𑀦𑁄 𑀪𑀡𑁆𑀟’’𑀦𑁆𑀢𑀺𑀆𑀤𑀺 𑀯𑀼𑀢𑁆𑀢𑀁. 𑀓𑀲𑁆𑀫𑀸? ‘‘𑀇𑀫𑀺𑀦𑀸 𑀇𑀫’’𑀦𑁆𑀢𑀺 𑀯𑀘𑀦𑀸𑀦𑀼𑀭𑀽𑀧𑀢𑁄. 𑀲𑀤𑁆𑀥𑀸𑀤𑁂𑀬𑁆𑀬𑀯𑀺𑀦𑀺𑀧𑀸𑀢𑀦𑀁 𑀧𑀦𑁂𑀢𑁆𑀣 𑀅𑀝𑁆𑀞𑀸𑀦𑀧𑀤𑀸𑀦𑀁 𑀯𑀲𑁂𑀦 𑀯𑁂𑀤𑀺𑀢𑀩𑁆𑀩𑀁.

𑀓𑀬𑀯𑀺𑀓𑁆𑀓𑀬𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀓𑁄𑀲𑀺𑀬𑀯𑀕𑁆𑀕𑁄 𑀤𑀼𑀢𑀺𑀬𑁄.