𑁩. 𑀧𑀢𑁆𑀢𑀯𑀕𑁆𑀕𑁄

𑁧. 𑀧𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁫𑁯𑁮. 𑀩𑀳𑀽 𑀧𑀢𑁆𑀢𑁂 𑀲𑀦𑁆𑀦𑀺𑀘𑀬𑀦𑁆𑀢𑀺 𑀏𑀢𑁆𑀣 𑀲𑀦𑁆𑀦𑀺𑀘𑀬𑀦𑁆𑀢𑀺 𑀪𑀸𑀯𑀦𑀧𑀼𑀁𑀲𑀓𑀁, 𑀩𑀳𑀽 𑀧𑀢𑁆𑀢𑁂 𑀯𑀸 𑀕𑀳𑁂𑀢𑁆𑀯𑀸 𑀲𑀦𑁆𑀦𑀺𑀘𑀬𑀁 𑀓𑀭𑀺𑀲𑁆𑀲𑀦𑁆𑀢𑀻𑀢𑀺 𑀅𑀢𑁆𑀣𑁄. ‘‘𑀅𑀟𑁆𑀠𑀢𑁂𑀭𑀲𑀧𑀮𑀫𑀸𑀲𑀸𑀦𑀁 𑀕𑀸𑀳𑀺𑀓𑀸’’𑀢𑀺 𑀮𑀺𑀔𑀺𑀢𑀁. 𑀏𑀢𑁆𑀣 𑁋

‘‘𑀓𑀼𑀟𑀼𑀯𑁄 𑀘𑀢𑀼𑀧𑀮𑁂𑀬𑁆𑀬𑁄, 𑀓𑀼𑀟𑀼𑀯𑀸𑀦𑀁 𑀘𑀢𑀼𑀕𑁆𑀕𑀼𑀡𑀁;

𑀧𑀢𑁆𑀣𑀁 𑀘𑀢𑀼𑀕𑁆𑀕𑀼𑀡𑁄 𑀫𑀸𑀲𑀸-𑀢𑀺 𑀓𑀫𑀸𑀳𑀼 𑀘𑀢𑀼𑀕𑁆𑀕𑀼𑀡’’𑀦𑁆𑀢𑀺. 𑁋

𑀆𑀤𑀺𑀁 𑀮𑁄𑀓𑀯𑁄𑀳𑀸𑀭𑀁 𑀤𑀲𑁆𑀲𑁂𑀢𑁆𑀯𑀸𑀯 𑀓𑁂𑀘𑀺 𑀧𑀧𑀜𑁆𑀘𑁂𑀦𑁆𑀢𑀺.

𑁬𑁦𑁨. 𑀔𑀸𑀤𑀦𑀦𑁆𑀢𑀺 𑀔𑀸𑀤𑀦𑀻𑀬𑀁 𑀲𑀽𑀧𑀸𑀤𑀺. ‘‘𑀩𑁆𑀬𑀜𑁆𑀚𑀦𑀲𑁆𑀲 𑀫𑀢𑁆𑀢𑀸 𑀦𑀸𑀫 𑀑𑀤𑀦𑀢𑁄 𑀘𑀢𑀼𑀢𑁆𑀣𑁄 𑀪𑀸𑀕𑁄’’𑀢𑀺 (𑀫. 𑀦𑀺. 𑀅𑀝𑁆𑀞. 𑁨.𑁩𑁮𑁭) 𑀩𑁆𑀭𑀳𑁆𑀫𑀸𑀬𑀼𑀲𑀼𑀢𑁆𑀢𑀝𑁆𑀞𑀓𑀣𑀸𑀬𑀁 𑀯𑀼𑀢𑁆𑀢𑀢𑁆𑀢𑀸 𑀆𑀮𑁄𑀧𑀲𑁆𑀲 𑀘𑀢𑀼𑀢𑁆𑀣𑀪𑀸𑀕𑀁 𑀩𑁆𑀬𑀜𑁆𑀚𑀦𑀁 𑀅𑀦𑀼𑀭𑀽𑀧𑀦𑁆𑀢𑀺 𑀕𑀳𑁂𑀢𑀩𑁆𑀩𑀁. ‘‘𑀪𑀺𑀓𑁆𑀔𑀼𑀦𑀺𑀬𑀸 𑀧𑀢𑁆𑀢𑀲𑀦𑁆𑀦𑀺𑀘𑀬𑀲𑁆𑀲 𑀯𑀸𑀭𑀺𑀢𑀢𑁆𑀢𑀸 𑀢𑀤𑀦𑀼𑀮𑁄𑀫𑀢𑁄 𑀪𑀺𑀓𑁆𑀔𑀽𑀦𑀫𑁆𑀧𑀺 𑀤𑀼𑀢𑀺𑀬𑁄 𑀯𑀸𑀭𑀺𑀢𑁄’’𑀢𑀺 𑀯𑀼𑀢𑁆𑀢𑀁, 𑀢𑀁 𑀦 𑀬𑀼𑀢𑁆𑀢𑀁, 𑀧𑀸𑀴𑀺𑀬𑀜𑁆𑀳𑀺 ‘‘𑀲𑀦𑁆𑀦𑀺𑀘𑀬𑀁 𑀓𑀭𑁂𑀬𑁆𑀬𑀸𑀢𑀺 𑀅𑀦𑀥𑀺𑀝𑁆𑀞𑀺𑀢𑁄 𑀅𑀯𑀺𑀓𑀧𑁆𑀧𑀺𑀢𑁄’’𑀢𑀺 (𑀧𑀸𑀘𑀺. 𑁭𑁩𑁫) 𑀯𑀼𑀢𑁆𑀢𑀁. 𑀲𑁄 𑀳𑀺 𑀓𑀣𑀺𑀦𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁩𑁦𑁬 𑀆𑀤𑀬𑁄) 𑀦𑀺𑀘𑀬𑀲𑀦𑁆𑀦𑀺𑀥𑀺 𑀯𑀺𑀬 𑀏𑀓𑁄𑀧𑀺 𑀧𑀼𑀦𑀤𑀺𑀯𑀲𑁂 ‘‘𑀲𑀦𑁆𑀦𑀺𑀘𑀬𑁄’’𑀢𑀺 𑀯𑀼𑀘𑁆𑀘𑀢𑀺. 𑀅𑀦𑀦𑁆𑀢𑀭𑀲𑀺𑀓𑁆𑀔𑀸𑀧𑀤𑁂 𑀧𑀦 ‘‘𑀤𑀼𑀢𑀺𑀬𑁄 𑀯𑀸𑀭𑀺𑀢𑁄𑀢𑀺 𑀅𑀥𑀺𑀝𑁆𑀞𑀸𑀦𑀁 𑀦𑀺𑀬𑀢𑀁, 𑀢𑀲𑁆𑀫𑀸 𑀤𑁆𑀯𑁂 𑀧𑀢𑁆𑀢𑁂 𑀅𑀥𑀺𑀝𑁆𑀞𑀸𑀢𑀼𑀁 𑀦 𑀮𑀪𑀢𑀺. 𑀲𑀘𑁂 𑀏𑀓𑀢𑁄 𑀅𑀥𑀺𑀝𑁆𑀞𑀸𑀢𑀺, 𑀤𑁆𑀯𑁂𑀧𑀺 𑀦 𑀅𑀥𑀺𑀝𑁆𑀞𑀺𑀢𑀸 𑀳𑁄𑀦𑁆𑀢𑀺. 𑀯𑀺𑀲𑀼𑀁 𑀯𑀺𑀲𑀼𑀁 𑀅𑀥𑀺𑀝𑁆𑀞𑀸𑀢𑀺, 𑀤𑀼𑀢𑀺𑀬𑁄 𑀅𑀦𑀥𑀺𑀝𑁆𑀞𑀺𑀢𑁄’’𑀢𑀺 𑀯𑀤𑀦𑁆𑀢𑀺. 𑀯𑀺𑀓𑀧𑁆𑀧𑁂𑀢𑀼𑀁 𑀧𑀦 𑀩𑀳𑀽𑀧𑀺 𑀮𑀪𑀢𑀺. 𑀇𑀤𑀸𑀦𑀺 𑀯𑀢𑁆𑀢𑀩𑁆𑀩𑀁 𑀲𑀦𑁆𑀥𑀸𑀬 ‘‘𑀦𑀸𑀫𑀫𑀢𑁆𑀢𑁂 𑀯𑀺𑀲𑁂𑀲𑁄’’𑀢𑀺 𑀯𑀼𑀢𑁆𑀢𑀁. 𑀢𑀢𑁆𑀣 𑀦𑀸𑀫𑀦𑁆𑀢𑀺 𑀫𑀚𑁆𑀛𑀺𑀫𑁄 𑀫𑀚𑁆𑀛𑀺𑀫𑁄𑀫𑀓𑁄 𑀫𑀚𑁆𑀛𑀺𑀫𑀼𑀓𑁆𑀓𑀝𑁆𑀞𑁄𑀢𑀺𑀆𑀤𑀺.

𑁬𑁦𑁮. ‘‘𑀧𑀸𑀓𑀲𑁆𑀲 𑀳𑀺 𑀊𑀦𑀢𑁆𑀢𑀸 𑀧𑀢𑁆𑀢𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀻’’𑀢𑀺 𑀯𑀘𑀦𑀢𑁄 𑀅𑀥𑀺𑀝𑁆𑀞𑀺𑀢𑀧𑀢𑁆𑀢𑁄𑀧𑀺 𑀔𑀭𑀧𑀸𑀓𑁂𑀦 𑀲𑁂𑀢𑀢𑁆𑀢𑀸 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀢𑀻𑀢𑀺 𑀘𑁂? 𑀦, 𑀅𑀥𑀺𑀝𑁆𑀞𑀸𑀦𑀯𑀺𑀚𑀳𑀦𑁂𑀲𑀼 𑀦𑀯𑀲𑀼 𑀅𑀦𑀸𑀕𑀢𑀢𑁆𑀢𑀸, 𑀢𑀲𑁆𑀫𑀸 𑀧𑀞𑀫𑀧𑀸𑀓𑀸𑀦𑀁 𑀏𑀯 𑀊𑀦𑀢𑁆𑀢𑀸 𑀧𑀢𑁆𑀢𑀲𑀗𑁆𑀔𑁆𑀬𑀁 𑀦 𑀕𑀘𑁆𑀙𑀢𑀺, 𑀢𑀲𑁆𑀫𑀺𑀁 𑀲𑀢𑀺 𑀅𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀢𑀼𑀁 𑀦 𑀯𑀝𑁆𑀝𑀢𑀺. ‘‘𑀊𑀦𑀧𑀜𑁆𑀘𑀩𑀦𑁆𑀥𑀦𑁂𑀦𑀸’’𑀢𑀺 𑀳𑀺 𑀯𑀼𑀢𑁆𑀢𑀁. 𑀙𑀺𑀤𑁆𑀤𑁂, 𑀭𑀸𑀚𑀺𑀬𑀸 𑀯𑀸 𑀳𑀺 𑀲𑀢𑀺 𑀢𑁂𑀳𑀺 𑀅𑀥𑀺𑀝𑁆𑀞𑀸𑀦𑀁 𑀯𑀺𑀚𑀳𑀢𑀻𑀢𑀺 𑀯𑀺𑀚𑀳𑀺𑀢𑁂 𑀦𑀸𑀬𑀁 𑀧𑀝𑀺𑀲𑁂𑀥𑁄, 𑀢𑀲𑁆𑀫𑀸 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸, 𑀯𑀺𑀓𑀧𑁆𑀧𑁂𑀢𑁆𑀯𑀸𑀧𑀺 𑀅𑀜𑁆𑀜𑀁 𑀯𑀺𑀜𑁆𑀜𑀸𑀧𑁂𑀢𑀼𑀁 𑀦 𑀮𑀪𑀢𑀺.

𑀏𑀯𑀁 𑀧𑀢𑁆𑀢𑀓𑀸𑀭𑀓𑁄 𑀫𑀽𑀮𑀁 𑀮𑀪𑀺𑀢𑁆𑀯𑀸𑀢𑀺 𑀏𑀢𑁆𑀣 𑀧𑀘𑀺𑀢𑁆𑀯𑀸 𑀞𑀧𑀺𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬. 𑀤𑀸𑀢𑀼𑀓𑀸𑀫𑁄 𑀳𑀼𑀢𑁆𑀯𑀸𑀢𑀺 𑀏𑀢𑁆𑀣 𑀤𑀺𑀦𑁆𑀦𑀤𑀺𑀯𑀲𑀢𑁄, 𑀲𑀼𑀢𑀤𑀺𑀯𑀲𑀢𑁄 𑀯𑀸 𑀧𑀝𑁆𑀞𑀸𑀬 𑀤𑀲𑀸𑀳𑀁 𑀯𑁂𑀤𑀺𑀢𑀩𑁆𑀩𑀁. 𑀮𑀺𑀗𑁆𑀕𑀧𑀭𑀺𑀯𑀢𑁆𑀢𑁂𑀦 𑀧𑀦 𑀤𑀲𑀸𑀳𑀸𑀢𑀺𑀓𑁆𑀓𑀫𑁂 𑀧𑀢𑁆𑀢𑀲𑀸𑀫𑀺𑀓𑀲𑁆𑀲 𑀪𑀺𑀓𑁆𑀔𑀼𑀲𑁆𑀲, 𑀪𑀺𑀓𑁆𑀔𑀼𑀦𑀺𑀬𑀸 𑀧𑀦 𑀭𑀢𑁆𑀢𑀸𑀢𑀺𑀓𑁆𑀓𑀫𑁂 𑀦𑀺𑀲𑁆𑀲𑀕𑁆𑀕𑀺𑀬𑀁.

𑀧𑀢𑁆𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁨. 𑀊𑀦𑀧𑀜𑁆𑀘𑀩𑀦𑁆𑀥𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁧𑁨-𑁩. 𑀩𑀳𑀽 𑀧𑀢𑁆𑀢𑁂 𑀯𑀺𑀜𑁆𑀜𑀸𑀧𑁂𑀦𑁆𑀢𑀻𑀢𑀺 𑀏𑀓𑀫𑁂𑀓𑀁 𑀯𑀺𑀜𑁆𑀜𑀸𑀧𑁂𑀦𑁆𑀢𑀸 𑀩𑀳𑀽 𑀪𑀺𑀓𑁆𑀔𑀽 𑀩𑀳𑀽 𑀧𑀢𑁆𑀢𑁂 𑀯𑀺𑀜𑁆𑀜𑀸𑀧𑁂𑀦𑁆𑀢𑀺, 𑀩𑀳𑀽 𑀯𑀸 𑀪𑀺𑀓𑁆𑀔𑀽 𑀧𑀢𑁆𑀢𑁂 𑀯𑀺𑀜𑁆𑀜𑀸𑀧𑁂𑀦𑁆𑀢𑀻𑀢𑀺 𑀅𑀢𑁆𑀣𑁄. ‘‘𑀦, 𑀪𑀺𑀓𑁆𑀔𑀯𑁂, 𑀧𑀢𑁆𑀢𑁄 𑀯𑀺𑀜𑁆𑀜𑀸𑀧𑁂𑀢𑀩𑁆𑀩𑁄, 𑀬𑁄 𑀯𑀺𑀜𑁆𑀜𑀸𑀧𑁂𑀬𑁆𑀬, 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀊𑀦𑀧𑀜𑁆𑀘𑀩𑀦𑁆𑀥𑀦𑁂𑀦 𑀲𑀫𑀽𑀳𑀢𑀁 𑀳𑁄𑀢𑀺 𑀦 𑀳𑁄𑀢𑀻𑀢𑀺? 𑀦 𑀳𑁄𑀢𑀺 𑀢𑀫𑁂𑀯 𑀕𑀳𑁂𑀢𑁆𑀯𑀸 ‘‘𑀯𑀺𑀜𑁆𑀜𑀸𑀧𑁂𑀢𑀺, 𑀧𑀬𑁄𑀕𑁂 𑀤𑀼𑀓𑁆𑀓𑀝’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸𑀢𑀺 𑀏𑀓𑁂. 𑀧𑀝𑀺𑀮𑀸𑀪𑀫𑁆𑀧𑀺 𑀧𑀭𑀺𑀬𑀸𑀤𑀺𑀬𑀺𑀢𑁆𑀯𑀸 𑀢𑀁 𑀤𑀼𑀓𑁆𑀓𑀝𑀁 𑀯𑀼𑀢𑁆𑀢𑀁, 𑀢𑀲𑁆𑀫𑀸 𑀢𑀁 ‘‘𑀧𑀝𑀺𑀮𑀸𑀪𑁂𑀦 𑀦𑀺𑀲𑁆𑀲𑀕𑁆𑀕𑀺𑀬𑁄 𑀳𑁄𑀢𑀻’’𑀢𑀺 𑀇𑀫𑀺𑀦𑀸 𑀲𑀫𑀽𑀳𑀢𑀁 𑀳𑁄𑀢𑀺. 𑀅𑀜𑁆𑀜𑀣𑀸 𑀲𑀤𑀼𑀓𑁆𑀓𑀝𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀆𑀧𑀚𑁆𑀚𑀢𑀺 𑀅𑀦𑀸𑀧𑀢𑁆𑀢𑀺𑀯𑀸𑀭𑀯𑀺𑀭𑁄𑀥𑁄 𑀘. 𑀬𑀸 𑀓𑀸𑀘𑀺 𑀧𑀦 𑀅𑀓𑀢𑀯𑀺𑀜𑁆𑀜𑀢𑁆𑀢𑀺 𑀅𑀦𑀦𑀼𑀜𑁆𑀜𑀸𑀢𑀓𑀸𑀮𑁂 𑀤𑀼𑀓𑁆𑀓𑀝𑀫𑁂𑀯. 𑀪𑀺𑀦𑁆𑀦𑁂𑀦𑀸𑀢𑀺 𑀇𑀢𑁆𑀣𑀫𑁆𑀪𑀽𑀢𑀮𑀓𑁆𑀔𑀡𑁂, 𑀪𑁂𑀤𑁂𑀦𑀸𑀢𑀺 𑀯𑀸 𑀅𑀢𑁆𑀣𑁄, 𑀳𑁂𑀢𑁆𑀯𑀢𑁆𑀣𑁂 𑀓𑀭𑀡𑀯𑀘𑀦𑀁.

𑀊𑀦𑀧𑀜𑁆𑀘𑀩𑀦𑁆𑀥𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁩. 𑀪𑁂𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁨𑁦. ‘‘𑀲𑀸 𑀅𑀳𑁄𑀲𑀺 𑀲𑀼𑀯𑀡𑁆𑀡𑀫𑀸𑀮𑀸’’𑀢𑀺 𑀯𑀘𑀦𑀢𑁄 𑀞𑀧𑁂𑀢𑁆𑀯𑀸 𑀲𑀳𑀥𑀫𑁆𑀫𑀺𑀓𑁂 𑀅𑀜𑁆𑀜𑁂𑀲𑀁 𑀬𑀣𑀸𑀲𑀼𑀔𑀁 𑀭𑀽𑀧𑀺𑀬𑀁 𑀤𑀸𑀢𑀼𑀁 𑀯𑀝𑁆𑀝𑀢𑀺 𑀉𑀕𑁆𑀕𑀡𑁆𑀳𑀸𑀧𑁂𑀢𑀼𑀁, 𑀲𑀩𑁆𑀬𑁄𑀳𑀸𑀭𑀸𑀧𑁂𑀪𑀼𑀜𑁆𑀘𑀸𑀢𑀺 𑀆𑀘𑀭𑀺𑀬𑁄, 𑀯𑀻𑀫𑀁𑀲𑀺𑀢𑀩𑁆𑀩𑀁 𑀇𑀤𑁆𑀥𑀺𑀫𑀲𑁆𑀲 𑀇𑀤𑁆𑀥𑀺𑀯𑀺𑀲𑀬𑀢𑁆𑀢𑀸.

𑁬𑁨𑁨. ‘‘𑀬𑁂𑀲𑀁 𑀫𑀁𑀲𑀁 𑀓𑀧𑁆𑀧𑀢𑀻’’𑀢𑀺 𑀯𑀘𑀦𑁂𑀦 𑀬𑁂𑀲𑀁 𑀫𑀁𑀲𑀁 𑀦 𑀓𑀧𑁆𑀧𑀢𑀺, 𑀢𑁂𑀲𑀁 𑀲𑀧𑁆𑀧𑀺𑀆𑀤𑀺 𑀓𑀺𑀜𑁆𑀘𑀸𑀧𑀺 𑀦 𑀓𑀧𑁆𑀧𑀢𑀺, 𑀦 𑀧𑀦 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀽𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀢𑀣𑀸 𑀦 𑀧𑀡𑀻𑀢𑀪𑁄𑀚𑀦𑀯𑀢𑁆𑀣𑀽𑀢𑀺. 𑀉𑀕𑁆𑀕𑀳𑀺𑀢𑀓𑀁 𑀓𑀢𑁆𑀯𑀸 𑀦𑀺𑀓𑁆𑀔𑀺𑀢𑁆𑀢𑀦𑁆𑀢𑀺 𑀅𑀚𑁆𑀛𑁄𑀳𑀭𑀡𑀢𑁆𑀣𑀁 𑀦𑀺𑀓𑁆𑀔𑀺𑀢𑁆𑀢𑀁. 𑀇𑀢𑀭𑀜𑁆𑀳𑀺 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀅𑀚𑁆𑀛𑁄𑀳𑀭𑀺𑀢𑀼𑀁 𑀯𑀝𑁆𑀝𑀢𑀺. 𑀉𑀪𑀬𑁂𑀲𑀫𑁆𑀧𑀻𑀢𑀺 𑀧𑀘𑁆𑀙𑀸𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑁂𑀳𑀺, 𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑁂𑀳𑀺 𑀘 𑀓𑀢𑀸𑀦𑀁. ‘‘𑀫𑀁𑀲𑀲𑁆𑀲 𑀅𑀓𑀧𑁆𑀧𑀺𑀬𑀢𑁆𑀢𑀸’’𑀢𑀺 𑀓𑀸𑀭𑀡𑀧𑀢𑀺𑀭𑀽𑀧𑀓𑀁 𑀯𑀢𑁆𑀯𑀸. 𑀔𑀸𑀤𑀺𑀁𑀲𑀽𑀢𑀺 ‘‘𑀯𑀺𑀓𑀸𑀮𑁂 𑀓𑁂𑀯𑀮𑀁 𑀦𑀯𑀦𑀻𑀢𑀫𑁂𑀯 𑀔𑀸𑀤𑀺𑀢𑀼𑀓𑀸𑀫𑁂𑀦 𑀤𑀥𑀺𑀢𑀓𑁆𑀓𑀕𑀢𑀸𑀦𑀺 𑀅𑀧𑀦𑁂𑀢𑀩𑁆𑀩𑀸𑀦𑀺, 𑀧𑀘𑀺𑀢𑀼𑀓𑀸𑀫𑀲𑁆𑀲 𑀲𑀸𑀫𑀁𑀧𑀸𑀓𑀁 𑀦 𑀳𑁄𑀢𑀻𑀢𑀺 𑀣𑁂𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑁄’’𑀢𑀺 𑀯𑀼𑀢𑁆𑀢𑀁. ‘‘𑀔𑀬𑀁 𑀕𑀫𑀺𑀲𑁆𑀲𑀢𑀻’’𑀢𑀺 𑀯𑀘𑀦𑀢𑁄 𑀔𑀻𑀭𑀁 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀓𑁆𑀓𑀲𑀧𑁆𑀧𑀺 𑀯𑀺𑀓𑀸𑀮𑁂 𑀓𑀧𑁆𑀧𑀢𑀻𑀢𑀺 𑀲𑀺𑀤𑁆𑀥𑀁. 𑀪𑁂𑀲𑀚𑁆𑀚𑁂𑀳𑀻𑀢𑀺 𑀬𑀸𑀯𑀚𑀻𑀯𑀺𑀓𑀪𑁂𑀲𑀚𑁆𑀚𑁂𑀳𑀺. 𑀓𑀢𑀢𑁂𑀮𑀁 𑀧𑀼𑀭𑁂𑀪𑀢𑁆𑀢𑀦𑁆𑀢𑀺 𑀅𑀧𑀘𑀺𑀢𑁆𑀯𑀸 𑀓𑀢𑀁 𑀏𑀯. 𑀉𑀡𑁆𑀳𑁄𑀤𑀓𑁂𑀦𑀸𑀢𑀺 𑀢𑀸𑀧𑀦𑀪𑀸𑀯𑀁 𑀤𑀻𑀧𑁂𑀢𑀻𑀢𑀺 𑀓𑁂𑀘𑀺, 𑀢𑀁 𑀦 𑀲𑀼𑀦𑁆𑀤𑀭𑀁. 𑀦𑀺𑀩𑁆𑀩𑀝𑁆𑀝𑀺𑀢𑀢𑁆𑀢𑀸𑀢𑀺 𑀧𑀺𑀜𑁆𑀜𑀸𑀓𑀸𑀤𑀺𑀢𑁄. ‘‘𑀢𑁂𑀮𑀢𑁆𑀣𑀸𑀬 𑀧𑀝𑀺𑀕𑁆𑀕𑀳𑀺𑀢…𑀧𑁂… 𑀤𑀼𑀓𑁆𑀓𑀝𑀫𑁂𑀯𑀸’’𑀢𑀺 𑀯𑀘𑀦𑀢𑁄 𑀅𑀢𑁂𑀮𑀢𑁆𑀣𑀸𑀬 𑀧𑀝𑀺𑀕𑁆𑀕𑀳𑀺𑀢𑁂𑀳𑀺, 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀦𑁆𑀢𑁂𑀳𑀺𑀧𑀺 𑀓𑀢𑀢𑁂𑀮𑀁 𑀓𑀢𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀲𑀢𑁆𑀢𑀸𑀳𑀁 𑀯𑀝𑁆𑀝𑀢𑀻𑀢𑀺 𑀙𑀸𑀬𑀸 𑀤𑀺𑀲𑁆𑀲𑀢𑀺, 𑀓𑀭𑀫𑀦𑁆𑀤𑀁 𑀭𑀼𑀓𑁆𑀔𑀲𑀸𑀭𑁄𑀢𑀺 𑀓𑁂𑀘𑀺.

𑁬𑁨𑁩. 𑀅𑀯𑀲𑀓𑀲𑀝𑁂 𑀬𑀲𑁆𑀫𑀸 𑀔𑀻𑀭𑀸𑀤𑀻𑀦𑀺 𑀧𑀓𑁆𑀔𑀺𑀧𑀺𑀢𑁆𑀯𑀸 𑀢𑁂𑀮𑀁 𑀧𑀘𑀦𑁆𑀢𑀺, 𑀢𑀲𑁆𑀫𑀸 𑀓𑀲𑀝𑀁 𑀦 𑀯𑀝𑁆𑀝𑀢𑀺, 𑀢𑁂𑀮𑀫𑁂𑀯 𑀯𑀝𑁆𑀝𑀢𑀺, 𑀢𑁂𑀦 𑀯𑀼𑀢𑁆𑀢𑀁 ‘‘𑀧𑀓𑁆𑀓𑀢𑁂𑀮𑀓𑀲𑀝𑁂 𑀯𑀺𑀬 𑀓𑀼𑀓𑁆𑀓𑀼𑀘𑁆𑀘𑀸𑀬𑀢𑀻’’𑀢𑀺. 𑀯𑀲𑀸𑀬 𑀲𑀤𑁆𑀥𑀺𑀁 𑀧𑀓𑁆𑀓𑀢𑁆𑀢𑀸 𑀦 𑀯𑀝𑁆𑀝𑀢𑀻𑀢𑀺 𑀘𑁂? 𑀯𑀤𑀣, 𑀪𑀦𑁆𑀢𑁂, 𑀦𑀯𑀦𑀻𑀢𑁂 𑀤𑀥𑀺𑀕𑀼𑀴𑀺𑀓𑀸𑀢𑀺𑀆𑀤𑀺𑀲𑀫𑁆𑀩𑀦𑁆𑀥𑁄. 𑀫𑀥𑀼𑀫𑁆𑀳𑀺 𑀘𑀢𑁆𑀢𑀸𑀭𑁄 𑀓𑀸𑀮𑀺𑀓𑀸 𑀬𑀣𑀸𑀲𑀫𑁆𑀪𑀯𑀁 𑀬𑁄𑀚𑁂𑀢𑀩𑁆𑀩𑀸, 𑀉𑀘𑁆𑀙𑀼𑀫𑁆𑀳𑀺 𑀘, 𑀓𑀣𑀁? 𑀲𑀫𑀓𑁆𑀔𑀺𑀓𑀁 𑀲𑁂𑀴𑀓𑀁 𑀫𑀥𑀼 𑀬𑀸𑀯𑀓𑀸𑀮𑀺𑀓𑀁. 𑀅𑀦𑁂𑀮𑀓𑀁 𑀉𑀤𑀓𑀲𑀫𑁆𑀪𑀺𑀦𑁆𑀦𑀁 𑀬𑀸𑀫𑀓𑀸𑀮𑀺𑀓𑀁, 𑀅𑀲𑀫𑁆𑀪𑀺𑀦𑁆𑀦𑀁 𑀲𑀢𑁆𑀢𑀸𑀳𑀓𑀸𑀮𑀺𑀓𑀁, 𑀫𑀥𑀼𑀲𑀺𑀝𑁆𑀞𑀁 𑀧𑀭𑀺𑀲𑀼𑀤𑁆𑀥𑀁 𑀬𑀸𑀯𑀚𑀻𑀯𑀺𑀓𑀁. 𑀢𑀣𑀸 𑀉𑀘𑁆𑀙𑀼 𑀯𑀸 𑀭𑀲𑁄 𑀯𑀸 𑀲𑀓𑀲𑀝𑁄 𑀬𑀸𑀯𑀓𑀸𑀮𑀺𑀓𑁄, 𑀦𑀺𑀓𑁆𑀓𑀲𑀝𑁄 𑀉𑀤𑀓𑀲𑀫𑁆𑀪𑀺𑀦𑁆𑀦𑁄 𑀬𑀸𑀫𑀓𑀸𑀮𑀺𑀓𑁄, 𑀅𑀲𑀫𑁆𑀪𑀺𑀦𑁆𑀦𑁄 𑀲𑀢𑁆𑀢𑀸𑀳𑀓𑀸𑀮𑀺𑀓𑁄, 𑀲𑀼𑀓𑁆𑀔𑀓𑀲𑀝𑀁 𑀬𑀸𑀯𑀚𑀻𑀯𑀺𑀓𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀓𑀲𑁆𑀫𑀸? 𑀉𑀤𑀓𑀲𑀫𑁆𑀪𑁂𑀤𑀯𑀺𑀲𑁂𑀲𑀢𑁄.

𑀓𑀺𑀁 𑀯𑀼𑀢𑁆𑀢𑀁 𑀳𑁄𑀢𑀺? 𑀘𑀢𑀽𑀲𑀼 𑀓𑀸𑀮𑀺𑀓𑁂𑀲𑀼 𑀧𑀼𑀩𑁆𑀩𑀁 𑀧𑀼𑀩𑁆𑀩𑀁 𑀕𑀭𑀼𑀓𑀁, 𑀅𑀧𑀭𑀁 𑀅𑀧𑀭𑀁 𑀮𑀳𑀼𑀓𑀁. 𑀢𑁂𑀲𑀼 𑀘𑀸𑀬𑀁 𑀉𑀤𑀓𑀲𑀫𑁆𑀪𑁂𑀤𑁄 𑀕𑀭𑀼𑀓𑀁 𑀮𑀳𑀼𑀓𑀁 𑀓𑀭𑁄𑀢𑀺, 𑀮𑀳𑀼𑀓𑀜𑁆𑀘 𑀕𑀭𑀼𑀓𑀁. 𑀅𑀫𑁆𑀩𑀭𑀲𑀸𑀤𑀻𑀦𑀺 𑀳𑀺 𑀬𑀸𑀯𑀓𑀸𑀮𑀺𑀓𑀢𑁆𑀢𑀸 𑀕𑀭𑀼𑀓𑀸𑀦𑀺, 𑀉𑀤𑀓𑀲𑀫𑁆𑀪𑁂𑀤𑁄 𑀧𑀦 𑀢𑀸𑀦𑀺 𑀅𑀫𑁆𑀩𑀧𑀸𑀦𑀸𑀤𑀺𑀲𑀫𑀜𑁆𑀜𑀁 𑀤𑀢𑁆𑀯𑀸 𑀮𑀳𑀼𑀓𑀸𑀦𑀺 𑀬𑀸𑀫𑀓𑀸𑀮𑀺𑀓𑀸𑀦𑀺 𑀓𑀭𑁄𑀢𑀺. ‘‘𑀨𑀸𑀡𑀺𑀢𑀁 𑀦𑀸𑀫 𑀉𑀘𑁆𑀙𑀼𑀫𑁆𑀳𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀉𑀘𑁆𑀙𑀼𑀭𑀲𑀁 𑀉𑀧𑀸𑀤𑀸𑀬𑀸’’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀉𑀘𑁆𑀙𑀼𑀭𑀲𑁄 𑀲𑀢𑁆𑀢𑀸𑀳𑀓𑀸𑀮𑀺𑀓𑁄𑀢𑀺 𑀲𑀺𑀤𑁆𑀥𑀁. 𑀢𑀢𑁆𑀣 ‘‘𑀉𑀤𑀓𑀲𑀫𑁆𑀪𑁂𑀤𑁄 𑀢𑀁 𑀬𑀸𑀫𑀓𑀸𑀮𑀺𑀓𑀁 𑀓𑀭𑁄𑀢𑀻’’𑀢𑀺𑀆𑀤𑀺𑀁 𑀩𑀳𑀼𑀁 𑀯𑀢𑁆𑀯𑀸 𑀬𑁄𑀚𑀺𑀢𑀸.

𑀅𑀧𑀺𑀘𑁂𑀢𑁆𑀣 𑀉𑀘𑁆𑀙𑀼𑀭𑀲𑁄 ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀘𑁆𑀙𑀼𑀭𑀲’’𑀦𑁆𑀢𑀺 (𑀫𑀳𑀸𑀯. 𑁩𑁦𑁦) 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀕𑀼𑀴𑁄𑀤𑀓𑀁 𑀯𑀺𑀬 𑀉𑀘𑁆𑀙𑀼𑀭𑀲𑀲𑀸𑀫𑀜𑁆𑀜𑀢𑁄 𑀉𑀤𑀓𑁂𑀦 𑀅𑀲𑀫𑁆𑀪𑀺𑀦𑁆𑀦𑁄𑀧𑀺 𑀅𑀕𑀺𑀮𑀸𑀦𑀲𑁆𑀲 𑀯𑀝𑁆𑀝𑀢𑀺, 𑀢𑁂𑀦𑁂𑀯𑀸𑀳 𑀅𑀝𑁆𑀞𑀓𑀣𑀸𑀬𑀁 ‘‘𑀉𑀘𑁆𑀙𑀼𑀭𑀲𑁄 𑀦𑀺𑀓𑀲𑀝𑁄 𑀧𑀘𑁆𑀙𑀸𑀪𑀢𑁆𑀢𑀁 𑀯𑀝𑁆𑀝𑀢𑀻’’𑀢𑀺 (𑀫𑀳𑀸. 𑀅𑀝𑁆𑀞. 𑁩𑁦𑁦). 𑀅𑀬𑀁 𑀲𑀩𑁆𑀩𑁄 𑀦𑁄 𑀢𑀓𑁆𑀓𑁄𑀢𑀺 𑀆𑀘𑀭𑀺𑀬𑁄. 𑀓𑁂𑀘𑀺 𑀧𑀦𑀸𑀳𑀼 ‘‘𑀨𑀸𑀡𑀺𑀢𑀁 𑀦𑀸𑀫 𑀉𑀘𑁆𑀙𑀼𑀫𑁆𑀳𑀸 𑀦𑀺𑀩𑁆𑀩𑀢𑁆𑀢’𑀦𑁆𑀢𑀺 𑀯𑀘𑀦𑀢𑁄, ‘𑀉𑀘𑁆𑀙𑀼𑀭𑀲𑀁 𑀉𑀧𑀸𑀤𑀸𑀬𑀸’𑀢𑀺 𑀅𑀝𑁆𑀞𑀓𑀣𑀸𑀯𑀘𑀦𑀢𑁄 𑀘 𑀉𑀘𑁆𑀙𑀼𑀭𑀲𑁄 𑀨𑀸𑀡𑀺𑀢𑀫𑁂𑀯, 𑀢𑀲𑁆𑀫𑀸 𑀕𑀼𑀴𑁂 𑀯𑀺𑀬 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺. 𑀓𑁂𑀘𑀺 ‘‘𑀯𑀼𑀢𑁆𑀢𑀦𑀬𑁂𑀦 𑀲𑀢𑁆𑀢𑀸𑀳𑀓𑀸𑀮𑀺𑀓𑁄𑀯 𑀲𑀫𑀸𑀦𑁄 ‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀉𑀘𑁆𑀙𑀼𑀭𑀲’𑀦𑁆𑀢𑀺 𑀯𑀺𑀲𑀼𑀁 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀅𑀲𑀫𑁆𑀪𑀺𑀦𑁆𑀦𑁄𑀧𑀺 𑀅𑀕𑀺𑀮𑀸𑀦𑀲𑁆𑀲 𑀯𑀝𑁆𑀝𑀢𑀻’’𑀢𑀺 𑀯𑀤𑀦𑁆𑀢𑀺. 𑀓𑁂𑀘𑀺 ‘‘𑀯𑀼𑀢𑁆𑀢𑀦𑀬𑁂𑀦 𑀯𑀺𑀲𑀼𑀁 𑀅𑀦𑀼𑀜𑁆𑀜𑀸𑀢𑀢𑁆𑀢𑀸 𑀏𑀯 𑀲𑀫𑁆𑀪𑀺𑀦𑁆𑀦𑁄 𑀯𑀸 𑀅𑀲𑀫𑁆𑀪𑀺𑀦𑁆𑀦𑁄 𑀯𑀸 𑀬𑀸𑀫𑀓𑀸𑀮𑀺𑀓𑁄𑀯, 𑀕𑀼𑀴𑁄𑀤𑀓𑀁 𑀧𑀦 𑀲𑀢𑁆𑀢𑀸𑀳𑀓𑀸𑀮𑀺𑀓𑀫𑁂𑀯𑀸’’𑀢𑀺 𑀯𑀤𑀦𑁆𑀢𑀺. 𑀓𑁂𑀘𑀺 ‘‘𑀕𑀼𑀴𑁄𑀤𑀓𑀁 𑀯𑀺𑀬 𑀲𑁄 𑀤𑀼𑀯𑀺𑀥𑁄𑀧𑀺 𑀲𑀢𑁆𑀢𑀸𑀳𑀓𑀸𑀮𑀺𑀓𑁄𑀬𑁂𑀯𑀸’’𑀢𑀺 𑀯𑀤𑀦𑁆𑀢𑀺.

𑀢𑀢𑁆𑀣𑀸𑀬𑀁 𑀧𑀞𑀫𑀸𑀘𑀭𑀺𑀬𑀯𑀸𑀤𑁂 𑀯𑀺𑀘𑀸𑀭𑀡𑀸 𑁋 𑀨𑀸𑀡𑀺𑀢𑀸𑀦𑀼𑀫𑀢𑀺𑀬𑀸𑀬𑁂𑀯 𑀉𑀘𑁆𑀙𑀼𑀭𑀲𑀸𑀦𑀼𑀫𑀢𑀺𑀬𑀸 𑀲𑀺𑀤𑁆𑀥𑀺𑀢𑁄 𑀯𑀺𑀲𑀼𑀁 ‘‘𑀉𑀘𑁆𑀙𑀼𑀭𑀲’’𑀦𑁆𑀢𑀺 𑀉𑀤𑁆𑀥𑀭𑀺𑀢𑁆𑀯𑀸 𑀅𑀦𑀼𑀫𑀢𑀺 𑀦𑀺𑀭𑀢𑁆𑀣𑀺𑀓𑀸𑀢𑀺 𑀆𑀧𑀚𑁆𑀚𑀢𑀺, 𑀢𑀣𑀸 ‘‘𑀉𑀘𑁆𑀙𑀼𑀭𑀲𑁄 𑀦𑀺𑀓𑀲𑀝𑁄 𑀧𑀘𑁆𑀙𑀸𑀪𑀢𑁆𑀢𑀁 𑀯𑀝𑁆𑀝𑀢𑀻’’𑀢𑀺 𑀅𑀝𑁆𑀞𑀓𑀣𑀸𑀧𑀺 𑀦𑀺𑀭𑀢𑁆𑀣𑀺𑀓𑀸. ‘‘𑀲𑀢𑁆𑀢𑀸𑀳𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀢𑀩𑁆𑀩𑀁 𑀲𑀺𑀬𑀸𑀢𑀺, 𑀦 𑀘 𑀢𑀣𑀸 𑀲𑀓𑁆𑀓𑀸 𑀯𑀢𑁆𑀢𑀼𑀁. 𑀧𑀘𑁆𑀙𑀸𑀪𑀢𑁆𑀢𑀁 𑀯𑀝𑁆𑀝𑀦𑀓𑀭𑀲𑀸𑀥𑀺𑀓𑀸𑀭𑀢𑁆𑀢𑀸𑀢𑀺 𑀘𑁂? 𑀦, 𑀢𑀲𑁆𑀫𑀺𑀁 𑀅𑀥𑀺𑀓𑀸𑀭𑁂 𑀲𑀢𑁆𑀢𑀸𑀳𑀓𑀸𑀮𑀺𑀓𑀲𑁆𑀲 𑀅𑀯𑀢𑁆𑀢𑀩𑁆𑀩𑀧𑁆𑀧𑀲𑀗𑁆𑀕𑀢𑁄. 𑀓𑀸𑀮𑀪𑁂𑀤𑀁 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀭𑀲𑀸𑀥𑀺𑀓𑀸𑀭𑁂 𑀑𑀢𑀺𑀡𑁆𑀡𑀢𑁆𑀢𑀸 𑀯𑀼𑀢𑁆𑀢𑁄𑀢𑀺 𑀘𑁂? 𑀦 𑀲𑀓𑁆𑀓𑀸 ‘‘𑀦𑀺𑀓𑀲𑀝𑁄 𑀲𑀢𑁆𑀢𑀸𑀳𑀁 𑀯𑀝𑁆𑀝𑀢𑀻’’𑀢𑀺 𑀯𑀢𑁆𑀢𑀼𑀁. 𑀧𑀘𑁆𑀙𑀸𑀪𑀢𑁆𑀢𑀁 𑀯𑀝𑁆𑀝𑀦𑀓𑀭𑀲𑀸𑀥𑀺𑀓𑀸𑀭𑀢𑁆𑀢𑀸 𑀦 𑀯𑀢𑁆𑀢𑀩𑁆𑀩𑀦𑁆𑀢𑀺 𑀘𑁂? 𑀦, 𑀏𑀯𑀜𑁆𑀳𑀺 𑀯𑀼𑀢𑁆𑀢𑁂 𑀢𑀤𑀜𑁆𑀜𑀭𑀲𑁄 𑀯𑀺𑀬 𑀅𑀬𑀫𑁆𑀧𑀺 𑀧𑀘𑁆𑀙𑀸𑀪𑀢𑁆𑀢𑀫𑁂𑀯 𑀯𑀝𑁆𑀝𑀢𑀺, 𑀦 𑀢𑀢𑁄 𑀧𑀭𑀦𑁆𑀢𑀺 𑀆𑀧𑀚𑁆𑀚𑀢𑀺. 𑀢𑀢𑁄 𑀧𑀭𑀁 𑀅𑀧𑀭𑀺𑀪𑁄𑀕𑀢𑁆𑀢𑀸 ‘‘𑀧𑀘𑁆𑀙𑀸𑀪𑀢𑁆𑀢𑀁 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀦, 𑀬𑀸𑀯𑀓𑀸𑀮𑀺𑀓𑀪𑀸𑀯𑀧𑁆𑀧𑀲𑀗𑁆𑀕𑀢𑁄. 𑀦 𑀲𑁄 𑀧𑀲𑀗𑁆𑀕𑁄 𑀆𑀪𑀺𑀤𑁄𑀲𑀺𑀓𑀲𑁆𑀲𑀸𑀧𑀺 𑀉𑀘𑁆𑀙𑀼𑀭𑀲𑀲𑁆𑀲 𑀧𑀸𑀓𑁂𑀦 𑀨𑀸𑀡𑀺𑀢𑀸𑀤𑀺𑀪𑀸𑀯𑀧𑁆𑀧𑀲𑀗𑁆𑀕𑀢𑁄. 𑀅𑀬𑀫𑁂𑀯 𑀢𑀢𑀺𑀬𑀘𑀢𑀼𑀢𑁆𑀣𑀸𑀘𑀭𑀺𑀬𑀯𑀸𑀤𑁂𑀲𑀼 𑀯𑀺𑀘𑀸𑀭𑀡𑀸. 𑀤𑀼𑀢𑀺𑀬𑀯𑀸𑀤𑁂 𑀯𑀺𑀘𑀸𑀭𑀡𑀸 𑀯𑀼𑀢𑁆𑀢𑀸, 𑀯𑀺𑀫𑀤𑁆𑀤𑁄 𑀧𑀦𑁂𑀢𑁆𑀣 𑀪𑁂𑀲𑀚𑁆𑀚𑀓𑁆𑀔𑀦𑁆𑀥𑀓𑁂 (𑀫𑀳𑀸𑀯. 𑁩𑁦𑁦) 𑀆𑀯𑀺 𑀪𑀯𑀺𑀲𑁆𑀲𑀢𑀺. 𑀨𑀸𑀡𑀺𑀢𑀁 𑀦𑀸𑀫 𑀉𑀘𑁆𑀙𑀼𑀫𑁆𑀳𑀸 𑀦𑀺𑀩𑁆𑀩𑀢𑁆𑀢𑀦𑁆𑀢𑀺 𑀫𑀥𑀼𑀓𑀢𑀸𑀮𑀦𑀸𑀴𑀺𑀓𑁂𑀭𑀨𑀸𑀡𑀺𑀢𑀸𑀤𑀺𑀢𑁄 𑀉𑀓𑁆𑀓𑀝𑀯𑀢𑁆𑀣𑀼𑀢𑁄 𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀨𑀸𑀡𑀺𑀢𑀲𑁆𑀲 𑀯𑀺𑀲𑁂𑀲𑀯𑀘𑀦𑀁, 𑀢𑁂𑀦𑁂𑀢𑀁 𑀧𑀜𑁆𑀜𑀸𑀬𑀢𑀺 ‘‘𑀦𑀺𑀲𑁆𑀲𑀕𑁆𑀕𑀺𑀬𑀯𑀢𑁆𑀣𑀼𑀪𑀽𑀢𑀁 𑀇𑀥 𑀨𑀸𑀡𑀺𑀢𑀁 𑀦𑀸𑀫 𑀉𑀘𑁆𑀙𑀼𑀫𑁆𑀳𑀸 𑀦𑀺𑀩𑁆𑀩𑀢𑁆𑀢𑀫𑁂𑀯, 𑀦 𑀫𑀥𑀼𑀓𑀸𑀤𑀺𑀢𑁄 𑀦𑀺𑀩𑁆𑀩𑀢𑁆𑀢’’𑀦𑁆𑀢𑀺. 𑀏𑀢𑁆𑀢𑀸𑀯𑀢𑀸 𑀬𑀁𑀓𑀺𑀜𑁆𑀘𑀺 𑀉𑀘𑁆𑀙𑀼𑀫𑁆𑀳𑀸 𑀦𑀺𑀩𑁆𑀩𑀢𑁆𑀢𑀁, 𑀦 𑀢𑀁 𑀲𑀩𑁆𑀩𑀁 𑀨𑀸𑀡𑀺𑀢𑀫𑁂𑀯 𑀦𑀸𑀫𑀸𑀢𑀺 𑀲𑀸𑀥𑀺𑀢𑀁 𑀳𑁄𑀢𑀺. 𑀢𑁂𑀦𑁂𑀯 𑀔𑀦𑁆𑀥𑀓𑁂 𑀨𑀸𑀡𑀺𑀢𑀁 𑀧𑀞𑀫𑀁 𑀅𑀦𑀼𑀚𑀸𑀦𑀺𑀢𑁆𑀯𑀸𑀯 𑀧𑀘𑁆𑀙𑀸 𑀉𑀘𑁆𑀙𑀼𑀭𑀲𑁄 𑀅𑀦𑀼𑀜𑁆𑀜𑀸𑀢𑁄, 𑀢𑀣𑀸 𑀢𑀢𑁆𑀣𑁂𑀯 𑀕𑀼𑀴𑀁, 𑀕𑀼𑀴𑁄𑀤𑀓𑀜𑁆𑀘.

𑀉𑀘𑁆𑀙𑀼𑀭𑀲𑀁 𑀉𑀧𑀸𑀤𑀸𑀬 𑀅𑀧𑀓𑁆𑀓𑀸 𑀯𑀸𑀢𑀺𑀆𑀤𑀺𑀫𑁆𑀳𑀺 𑀧𑀦 𑀬𑁂𑀲𑀁 𑀮𑀤𑁆𑀥𑀺 ‘‘𑀉𑀘𑁆𑀙𑀼𑀭𑀲𑁄 𑀬𑀸𑀫𑀓𑀸𑀮𑀺𑀓𑁄’’𑀢𑀺. ‘‘𑀢𑁂 𑀅𑀧𑀓𑁆𑀓𑀸 𑀯𑀸𑀢𑀺 𑀲𑀸𑀫𑀁 𑀪𑀺𑀓𑁆𑀔𑀼𑀦𑀸 𑀅𑀧𑀓𑁆𑀓𑀸 𑀯𑀸. 𑀅𑀯𑀢𑁆𑀣𑀼𑀓𑀧𑀓𑁆𑀓𑀸 𑀯𑀸𑀢𑀺 𑀯𑀺𑀦𑀸 𑀯𑀢𑁆𑀣𑀼𑀦𑀸 𑀧𑀓𑁆𑀓𑀸 𑀯𑀸’’𑀢𑀺 𑀅𑀢𑁆𑀣𑀁 𑀯𑀡𑁆𑀡𑀬𑀦𑁆𑀢𑀺, 𑀢𑀁 𑀦 𑀬𑀼𑀢𑁆𑀢𑀁 ‘‘𑀉𑀘𑁆𑀙𑀼𑀭𑀲𑀁 𑀉𑀧𑀸𑀤𑀸𑀬𑀸’’𑀢𑀺 𑀇𑀫𑀲𑁆𑀲 𑀯𑀘𑀦𑀲𑁆𑀲 𑀧𑀬𑁄𑀚𑀦𑀸𑀪𑀸𑀯𑀧𑁆𑀧𑀲𑀗𑁆𑀕𑀢𑁄, 𑀪𑀺𑀓𑁆𑀔𑀼𑀦𑁄 𑀧𑀘𑀦𑀸𑀥𑀺𑀓𑀸𑀭𑀸𑀪𑀸𑀯𑀸. 𑀲𑀸𑀫𑀧𑀸𑀓𑁄 𑀇𑀥𑀸𑀥𑀺𑀧𑁆𑀧𑁂𑀢𑁄𑀢𑀺 𑀘𑁂? 𑀲𑀸𑀫𑀁 𑀅𑀧𑀓𑁆𑀓𑀲𑁆𑀲 𑀉𑀘𑁆𑀙𑀼𑀭𑀲𑀲𑁆𑀲 𑀢𑁂𑀲𑀁 𑀅𑀢𑁆𑀢𑀦𑁄𑀫𑀢𑀺𑀬𑀸 𑀨𑀸𑀡𑀺𑀢𑀪𑀸𑀯𑀲𑀺𑀤𑁆𑀥𑀺𑀢𑁄 𑀘 𑀧𑀭𑀢𑁄 ‘‘𑀧𑀼𑀭𑁂𑀪𑀢𑁆𑀢𑀁 𑀧𑀝𑀺𑀕𑁆𑀕𑀳𑀺𑀢𑁂𑀦 𑀅𑀧𑀭𑀺𑀲𑁆𑀲𑀸𑀯𑀺𑀢𑀉𑀘𑁆𑀙𑀼𑀭𑀲𑁂𑀦 𑀓𑀢𑀨𑀸𑀡𑀺𑀢’’𑀦𑁆𑀢𑀺𑀆𑀤𑀺𑀦𑀬𑀤𑀲𑁆𑀲𑀦𑀢𑁄 𑀘 𑀢𑀁 𑀅𑀬𑀼𑀢𑁆𑀢𑀁, 𑀢𑀢𑁆𑀣 ‘‘𑀅𑀧𑀭𑀺𑀲𑁆𑀲𑀸𑀯𑀺𑀢𑀉𑀘𑁆𑀙𑀼𑀭𑀲𑁂𑀦 𑀲𑀬𑀁𑀓𑀢𑀁 𑀦𑀺𑀭𑀸𑀫𑀺𑀲𑀫𑁂𑀯 𑀯𑀝𑁆𑀝𑀢𑀻’’𑀢𑀺 𑀯𑀘𑀦𑀁 𑀬𑀁 𑀢𑀢𑁆𑀣 𑀓𑀲𑀝𑀁 𑀲𑀸𑀫𑀧𑀸𑀓𑀁 𑀦 𑀚𑀦𑁂𑀢𑀺, 𑀲𑀯𑀢𑁆𑀣𑀼𑀓𑀧𑀝𑀺𑀕𑁆𑀕𑀳𑀺𑀢𑀓𑀢𑀁𑀬𑁂𑀯 𑀢𑀁 𑀓𑀭𑁄𑀢𑀻𑀢𑀺 𑀤𑀻𑀧𑁂𑀢𑀺, 𑀢𑀲𑁆𑀫𑀸 𑀧𑀝𑀺𑀕𑁆𑀕𑀳𑁂𑀢𑀼𑀁 𑀦 𑀯𑀝𑁆𑀝𑀢𑀺 𑀯𑀺𑀓𑀸𑀮𑁂𑀢𑀺 𑀧𑁄𑀭𑀸𑀡𑀸. ‘‘𑀓𑁄𑀝𑁆𑀝𑀺𑀢𑀉𑀘𑁆𑀙𑀼𑀨𑀸𑀡𑀺𑀢𑀁 ‘𑀭𑀚𑀦𑀧𑀸𑀓𑀁 𑀯𑀺𑀬 𑀑𑀴𑀸𑀭𑀺𑀓𑀁 𑀲𑀯𑀢𑁆𑀣𑀼𑀓𑀧𑀓𑁆𑀓𑀁 𑀦𑀸𑀫 𑀳𑁄𑀢𑀻’𑀢𑀺 𑀲𑀜𑁆𑀜𑀸𑀬 𑀧𑀼𑀭𑁂𑀪𑀢𑁆𑀢𑀫𑁂𑀯 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁. 𑀫𑀳𑀸𑀅𑀝𑁆𑀞𑀓𑀣𑀸𑀘𑀭𑀺𑀬𑀸 ‘‘𑀏𑀯𑀁 𑀨𑀸𑀡𑀺𑀢𑀕𑁆𑀕𑀳𑀡𑀁 𑀅𑀫𑀥𑀼𑀭𑀁, 𑀢𑀲𑁆𑀫𑀸 𑀧𑀘𑁆𑀙𑀸𑀪𑀢𑁆𑀢𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀤𑀺𑀁𑀲𑀼. 𑀓𑀺𑀁 𑀫𑀥𑀼𑀭𑀢𑀸𑀬, 𑀅𑀫𑀥𑀼𑀭𑀢𑀸𑀬 𑀯𑀸𑀢𑀺? 𑀅𑀢𑁆𑀣𑀫𑁂𑀯 𑀤𑀲𑁆𑀲𑁂𑀢𑀼𑀁 𑀫𑀳𑀸𑀧𑀘𑁆𑀘𑀭𑀺𑀬𑀁 𑀢𑀣𑀸 𑀯𑀼𑀢𑁆𑀢𑀦𑁆𑀢𑀺 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄 𑀆𑀳 𑀓𑀺𑀭. 𑀢𑀁 𑀬𑀼𑀢𑁆𑀢𑀦𑁆𑀢𑀺 𑀉𑀘𑁆𑀙𑀼𑀢𑁄 𑀦𑀺𑀩𑁆𑀩𑀢𑁆𑀢𑀢𑁆𑀢𑀸 𑀯𑀼𑀢𑁆𑀢𑀁, 𑀢𑁂𑀦𑁂𑀯𑀸𑀳 ‘‘𑀔𑀡𑁆𑀟𑀲𑀓𑁆𑀔𑀭𑀁 𑀧𑀦…𑀧𑁂… 𑀯𑀝𑁆𑀝𑀢𑀻’’𑀢𑀺. ‘‘𑀢𑀁 𑀔𑀻𑀭𑀖𑀝𑁂 𑀧𑀓𑁆𑀔𑀺𑀧𑀺𑀢𑁆𑀯𑀸 𑀧𑀘𑀦𑁆𑀢𑀻’’𑀢𑀺 𑀮𑀺𑀔𑀺𑀢𑀁. 𑀚𑀮𑁆𑀮𑀺𑀓𑀸 𑀦𑀸𑀫 𑀨𑁂𑀡𑀸𑀤𑀺.

𑀪𑁂𑀲𑀚𑁆𑀚𑁄𑀤𑀺𑀲𑀁 𑀯𑀤𑀦𑁆𑀢𑁂𑀦 𑀇𑀢𑀭𑁂 𑀅𑀢𑁆𑀣𑀼𑀤𑁆𑀥𑀸𑀭𑀯𑀲𑁂𑀦 𑀯𑀼𑀢𑁆𑀢𑀸. ‘‘𑀆𑀳𑀸𑀭𑀢𑁆𑀣𑀁 𑀨𑀭𑀺𑀢𑀼𑀁 𑀲𑀫𑀢𑁆𑀣𑀸𑀦𑀻’’𑀢𑀺 𑀔𑀦𑁆𑀥𑀓𑁂 (𑀫𑀳𑀸𑀯. 𑁨𑁬𑁦) ‘‘𑀬𑀁 𑀪𑁂𑀲𑀚𑁆𑀚𑀜𑁆𑀘𑁂𑀯 𑀅𑀲𑁆𑀲 𑀪𑁂𑀲𑀚𑁆𑀚𑀲𑀫𑁆𑀫𑀢𑀜𑁆𑀘 𑀮𑁄𑀓𑀲𑁆𑀲, 𑀆𑀳𑀸𑀭𑀢𑁆𑀣𑀜𑁆𑀘 𑀨𑀭𑁂𑀬𑁆𑀬𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀯𑀼𑀢𑁆𑀢𑀁. 𑀏𑀢𑁆𑀣 𑀯𑀺𑀘𑀸𑀭𑀡𑀸 𑀪𑁂𑀲𑀚𑁆𑀚𑀓𑁆𑀔𑀦𑁆𑀥𑀓𑁂 𑀆𑀯𑀺 𑀪𑀯𑀺𑀲𑁆𑀲𑀢𑀺.

𑁬𑁨𑁪. 𑀤𑁆𑀯𑀸𑀭𑀯𑀸𑀢𑀧𑀸𑀦𑀓𑀯𑀸𑀝𑀸𑀦𑀻𑀢𑀺 𑀤𑁆𑀯𑀸𑀭𑀲𑁆𑀲 𑀘 𑀯𑀸𑀢𑀧𑀸𑀦𑀸𑀦𑀜𑁆𑀘 𑀓𑀯𑀸𑀝𑀸𑀦𑀺. 𑀓𑀲𑀸𑀯𑀧𑀓𑁆𑀔𑁂𑀧𑀫𑀢𑁆𑀢𑁂𑀦 𑀳𑀺 𑀢𑀸𑀦𑀺 𑀅𑀢𑁆𑀢𑀦𑁄 𑀲𑀪𑀸𑀯𑀁 𑀧𑀭𑀺𑀘𑁆𑀘𑀚𑀺𑀢𑀸𑀦𑀺 𑀳𑁄𑀦𑁆𑀢𑀺, 𑀢𑀲𑁆𑀫𑀸 ‘‘𑀫𑀓𑁆𑀔𑁂𑀢𑀩𑁆𑀩𑀸𑀦𑀻’’𑀢𑀺 𑀯𑀼𑀢𑁆𑀢𑀁. ‘‘𑀓𑀲𑀸𑀯𑁄 𑀦𑀸𑀫 𑀓𑀦𑀓𑀮𑀫𑁆𑀩𑀸𑀤𑀻𑀦𑀺𑀧𑀻’’𑀢𑀺 𑀯𑀤𑀦𑁆𑀢𑀺. 𑀅𑀥𑀺𑀝𑁆𑀞𑁂𑀢𑀻𑀢𑀺 ‘‘𑀇𑀤𑀸𑀦𑀺 𑀅𑀚𑁆𑀛𑁄𑀳𑀭𑀡𑀻𑀬𑀁 𑀦 𑀪𑀯𑀺𑀲𑁆𑀲𑀢𑀺, 𑀩𑀸𑀳𑀺𑀭𑀧𑀭𑀺𑀪𑁄𑀕𑁄 𑀪𑀯𑀺𑀲𑁆𑀲𑀢𑀻’’𑀢𑀺 𑀘𑀺𑀢𑁆𑀢𑀁 𑀉𑀧𑁆𑀧𑀸𑀤𑁂𑀢𑀺. 𑀇𑀥 ‘‘𑀯𑀺𑀓𑀧𑁆𑀧𑁂𑀢𑀻’’𑀢𑀺 𑀧𑀤𑀁 𑀦𑀢𑁆𑀣𑀺. 𑀅𑀥𑀺𑀝𑁆𑀞𑀸𑀦𑀫𑁆𑀧𑀺 𑀫𑀼𑀔𑀸𑀭𑀼𑀴𑁆𑀳𑀺𑀬𑀸 𑀯𑀼𑀢𑁆𑀢𑀁 ‘‘𑀇𑀫𑀁 𑀦𑀯𑀦𑀻𑀢𑀁 𑀅𑀥𑀺𑀝𑁆𑀞𑀸𑀫𑀻’’𑀢𑀺 𑀅𑀯𑀢𑁆𑀢𑀩𑁆𑀩𑀢𑁄.

𑁬𑁨𑁫. 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀧𑀦 𑀦 𑀯𑀝𑁆𑀝𑀢𑀻𑀢𑀺 𑀯𑀺𑀲𑁆𑀲𑀸𑀲𑀸𑀪𑀸𑀯𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁. 𑀲𑀘𑁂 𑀲𑀯𑀺𑀲𑁆𑀲𑀸𑀲𑁄, 𑀯𑀝𑁆𑀝𑀢𑀻𑀢𑀺 ‘‘𑀧𑀭𑀺𑀪𑀼𑀜𑁆𑀚 𑀢𑁆𑀯’’𑀦𑁆𑀢𑀺 𑀏𑀢𑁆𑀢𑀸𑀯𑀢𑀸 𑀯𑀺𑀲𑁆𑀲𑀚𑁆𑀚𑀺𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀉𑀪𑀺𑀦𑁆𑀦𑀁 𑀅𑀦𑀸𑀧𑀢𑁆𑀢𑀻𑀢𑀺 𑀲𑀫𑁆𑀩𑀦𑁆𑀥𑁄. 𑀲𑀘𑁂 𑀦 𑀯𑀺𑀲𑁆𑀲𑀚𑁆𑀚𑀺𑀢𑀁, 𑀆𑀧𑀢𑁆𑀢𑀺 𑀳𑁄𑀢𑀻𑀢𑀺 𑀲𑀺𑀤𑁆𑀥𑀁. 𑀢𑀲𑁆𑀫𑀸 𑀉𑀪𑀺𑀦𑁆𑀦𑀁 𑀲𑀦𑁆𑀢𑀓𑀁 𑀘𑀻𑀯𑀭𑀁 𑀅𑀜𑁆𑀜𑀢𑀭𑁂𑀦 𑀲𑀫𑁆𑀫𑀼𑀔𑀻𑀪𑀽𑀢𑁂𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀦𑁄 𑀘𑁂 𑀅𑀥𑀺𑀝𑁆𑀞𑀸𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀻𑀢𑀺𑀧𑀺 𑀬𑀼𑀚𑁆𑀚𑀢𑀺. 𑀓𑀸𑀓𑀦𑀺𑀓𑀫𑀢𑁆𑀢𑀜𑁆𑀘𑁂 𑀫𑀽𑀮𑀁 𑀅𑀤𑀺𑀦𑁆𑀦𑀁, ‘‘𑀦 𑀅𑀥𑀺𑀝𑁆𑀞𑀸𑀦𑀼𑀧𑀕𑀁…𑀧𑁂… 𑀲𑀓𑀪𑀸𑀯𑀁 𑀦 𑀉𑀧𑁂𑀢𑀻’’𑀢𑀺 𑀇𑀫𑀺𑀦𑀸 𑀏𑀢𑀁 𑀲𑀤𑀺𑀲𑀁 𑀦 𑀳𑁄𑀢𑀺, 𑀆𑀪𑀺𑀥𑀫𑁆𑀫𑀺𑀓𑀕𑀡𑀸𑀦𑀁 𑀤𑀺𑀦𑁆𑀦𑀁 𑀯𑀺𑀬 𑀘 𑀦 𑀳𑁄𑀢𑀺. 𑀓𑀲𑁆𑀫𑀸? 𑀆𑀪𑀺𑀥𑀫𑁆𑀫𑀺𑀓𑀸 𑀳𑀺 𑀅𑀦𑀼𑀧𑀲𑀫𑁆𑀧𑀦𑁆𑀦𑀸𑀧𑀺 𑀳𑁄𑀦𑁆𑀢𑀺, 𑀧𑀘𑁆𑀙𑀸 𑀆𑀪𑀺𑀥𑀫𑁆𑀫𑀺𑀓𑀪𑀽𑀢𑀸𑀦𑀫𑁆𑀧𑀺 𑀢𑀁 𑀲𑀸𑀥𑀸𑀭𑀡𑀁 𑀳𑁄𑀢𑀻𑀢𑀺. 𑀏𑀢𑁆𑀣 𑀤𑁆𑀯𑁂𑀧𑀺 𑀉𑀧𑀲𑀫𑁆𑀧𑀦𑁆𑀦𑀸 𑀏𑀯, 𑀤𑁆𑀯𑀺𑀦𑁆𑀦𑀫𑁆𑀧𑀺 𑀢𑀢𑁆𑀣 𑀬𑀣𑀸𑀓𑀸𑀫𑀓𑀭𑀡𑀻𑀬𑀢𑀸 𑀅𑀢𑁆𑀣𑀺 𑀫𑀫𑀢𑁆𑀢𑀜𑁆𑀘, 𑀦 𑀏𑀯𑀁 𑀢𑀤𑀜𑁆𑀜𑁂𑀲𑀁 𑀲𑀸𑀥𑀸𑀭𑀡𑀁, 𑀦 𑀘 𑀤𑁆𑀯𑁂 𑀢𑀬𑁄 𑀪𑀺𑀓𑁆𑀔𑀽 ‘‘𑀏𑀓𑀢𑁄 𑀯𑀲𑁆𑀲𑀺𑀲𑁆𑀲𑀸𑀫𑀸’’𑀢𑀺 𑀓𑀭𑁄𑀦𑁆𑀢𑀺, 𑀭𑀓𑁆𑀔𑀢𑀺 𑀢𑀸𑀯. ‘‘𑀅𑀯𑀺𑀪𑀢𑁆𑀢𑀢𑁆𑀢𑀸 𑀅𑀦𑀸𑀧𑀢𑁆𑀢𑀻’’𑀢𑀺 𑀇𑀫𑀺𑀦𑀸 𑀘 𑀇𑀤𑀁 𑀲𑀤𑀺𑀲𑀁, 𑀬𑁂𑀦 𑀫𑀽𑀮𑁂𑀦 𑀧𑀝𑀺𑀕𑁆𑀕𑀳𑀺𑀢𑀁, 𑀢𑀲𑁆𑀲 𑀲𑀘𑁂 𑀇𑀢𑀭𑁄 𑀤𑁂𑀢𑀺, 𑀲𑁄 𑀯𑀸 𑀢𑀁 𑀇𑀢𑀭𑀲𑁆𑀲 𑀤𑁂𑀢𑀺, 𑀲𑀢𑀺 𑀧𑀝𑀺𑀕𑁆𑀕𑀳𑀡𑁂 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀦𑀺𑀲𑁆𑀲𑀕𑁆𑀕𑀺𑀬𑀢𑁆𑀢𑀸, 𑀢𑀲𑁆𑀫𑀸 𑀢𑀁 𑀘𑀻𑀯𑀭𑀁 𑀤𑁆𑀯𑀻𑀲𑀼 𑀲𑀫𑁆𑀫𑀼𑀔𑀻𑀪𑀽𑀢𑁂𑀦 𑀏𑀓𑁂𑀦 𑀅𑀥𑀺𑀝𑁆𑀞𑀸𑀢𑀩𑁆𑀩𑀁. 𑀓𑀺𑀜𑁆𑀘𑀸𑀧𑀺 𑀏𑀢𑁆𑀣 𑀧𑀬𑁄𑀕𑁄 𑀦 𑀤𑀺𑀲𑁆𑀲𑀢𑀺 𑀲𑀫𑀸𑀦𑀧𑀭𑀺𑀓𑁆𑀔𑀸𑀭𑀸𑀦𑀁 𑀤𑁆𑀯𑀺𑀦𑁆𑀦𑀁 𑀅𑀥𑀺𑀝𑁆𑀞𑀸𑀦𑀧𑀬𑁄𑀕𑀸𑀪𑀸𑀯𑀢𑁄, 𑀢𑀣𑀸𑀧𑀺 𑀲𑀫𑀸𑀦𑀲𑀩𑁆𑀩𑀪𑀡𑁆𑀟𑀓𑀸𑀦𑀁 𑀤𑁆𑀯𑀺𑀦𑁆𑀦𑀁 𑀢𑁂𑀮𑀸𑀤𑀺 𑀬𑁂𑀦 𑀧𑀝𑀺𑀕𑁆𑀕𑀳𑀺𑀢𑀁, 𑀢𑀲𑁆𑀲 𑀓𑀸𑀮𑀸𑀢𑀺𑀓𑁆𑀓𑀫𑁂 𑀆𑀧𑀢𑁆𑀢𑀺𑀲𑀫𑁆𑀪𑀯𑀢𑁄, 𑀅𑀦𑀥𑀺𑀝𑁆𑀞𑀸𑀦𑁂 𑀤𑀼𑀮𑁆𑀮𑀪𑀯𑀺𑀲𑁂𑀲𑀳𑁂𑀢𑀼𑀢𑁆𑀢𑀸 𑀘 ‘‘𑀅𑀥𑀺𑀝𑁆𑀞𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀢𑀁 𑀅𑀬𑀼𑀢𑁆𑀢𑀁 𑀧𑀢𑁆𑀢𑀘𑀻𑀯𑀭𑀲𑀢𑁆𑀢𑀸𑀳𑀓𑀸𑀮𑀺𑀓𑀸𑀦𑀁 𑀅𑀲𑀤𑀺𑀲𑀯𑀺𑀥𑀸𑀦𑀢𑁆𑀢𑀸. 𑀏𑀢𑁆𑀣 𑀧𑀢𑁆𑀢𑀘𑀻𑀯𑀭𑀜𑁆𑀳𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀪𑀸𑀯𑀁 𑀉𑀧𑀕𑀢𑀫𑁂𑀯 𑀅𑀦𑀥𑀺𑀝𑁆𑀞𑀳𑀦𑁆𑀢𑀲𑁆𑀲 𑀓𑀸𑀮𑀸𑀢𑀺𑀓𑁆𑀓𑀫𑁂 𑀆𑀧𑀢𑁆𑀢𑀺, 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀧𑀦 𑀧𑀭𑀲𑀦𑁆𑀢𑀓𑀲𑀸𑀥𑀸𑀭𑀡𑀫𑁆𑀧𑀺 𑀧𑀝𑀺𑀕𑁆𑀕𑀳𑀺𑀢𑀁 𑀧𑀝𑀺𑀕𑁆𑀕𑀸𑀳𑀓𑀲𑁆𑀲 𑀓𑀸𑀮𑀸𑀢𑀺𑀓𑁆𑀓𑀫𑁂 𑀆𑀧𑀢𑁆𑀢𑀺𑀓𑀭𑀁. 𑀧𑀝𑀺𑀕𑁆𑀕𑀳𑀡𑀜𑁆𑀘𑁂𑀢𑁆𑀣 𑀧𑀫𑀸𑀡𑀁, 𑀦 𑀢𑀢𑁆𑀣 𑀲𑀓𑀲𑀦𑁆𑀢𑀓𑀢𑀸, 𑀲𑀢𑁆𑀢𑀸𑀳𑀓𑀸𑀮𑀺𑀓𑀜𑁆𑀘 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀲𑀩𑁆𑀩𑁂𑀲𑀫𑁆𑀧𑀺 𑀅𑀦𑀚𑁆𑀛𑁄𑀳𑀭𑀡𑀻𑀬𑀁. 𑀧𑀢𑁆𑀢𑀘𑀻𑀯𑀭𑀁 𑀅𑀜𑁆𑀜𑀲𑁆𑀲 𑀧𑀭𑀺𑀪𑀼𑀜𑁆𑀚𑀢𑁄 𑀅𑀦𑀸𑀧𑀢𑁆𑀢𑀺. 𑀇𑀤𑀜𑁆𑀘 𑀓𑀸𑀮𑀸𑀢𑀺𑀓𑁆𑀓𑀦𑁆𑀢𑀫𑁆𑀧𑀺 𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀧𑀘𑁆𑀙𑀸 𑀮𑀤𑁆𑀥𑀁 𑀓𑀧𑁆𑀧𑀢𑀺. 𑀧𑀢𑁆𑀢𑀘𑀻𑀯𑀭𑀁 𑀧𑀦 𑀢𑀁 𑀢𑀲𑁆𑀲 𑀯𑀺𑀦𑀬𑀓𑀫𑁆𑀫𑀦𑁆𑀢𑀺 𑀓𑀧𑁆𑀧𑀢𑀻𑀢𑀺. 𑀅𑀯𑀺𑀪𑀢𑁆𑀢𑀲𑁆𑀲𑀧𑀺 𑀇𑀫𑀲𑁆𑀲 𑀤𑀸𑀦𑀁 𑀭𑀼𑀳𑀢𑀺, 𑀦 𑀧𑀢𑁆𑀢𑀘𑀻𑀯𑀭𑀲𑁆𑀲. 𑀯𑀼𑀢𑁆𑀢𑀜𑁆𑀳𑁂𑀢𑀁 𑀅𑀝𑁆𑀞𑀓𑀣𑀸𑀬𑀁 ‘‘𑀤𑁆𑀯𑀺𑀦𑁆𑀦𑀁 𑀲𑀦𑁆𑀢𑀓𑀁 𑀳𑁄𑀢𑀺…𑀧𑁂… 𑀲𑀘𑁂𑀧𑀺 𑀅𑀯𑀺𑀪𑀚𑀺𑀢𑁆𑀯𑀸 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀻𑀦𑀁 𑀤𑁂𑀦𑁆𑀢𑀺, 𑀅𑀤𑀺𑀦𑁆𑀦𑀫𑁂𑀯 𑀳𑁄𑀢𑀻’’𑀢𑀺. 𑀬𑀲𑁆𑀲 𑀤𑀸𑀦𑀫𑁂𑀯 𑀦 𑀭𑀼𑀳𑀢𑀺, 𑀢𑀲𑁆𑀲 𑀓𑀼𑀢𑁄 𑀅𑀥𑀺𑀝𑁆𑀞𑀸𑀦𑀁. 𑀏𑀓𑁄 𑀘𑁂 𑀧𑀢𑁆𑀢𑀘𑀻𑀯𑀭𑀁 𑀤𑀲𑀫𑁂 𑀤𑀺𑀯𑀲𑁂 𑀇𑀢𑀭𑀲𑁆𑀲 𑀤𑁂𑀢𑀺. 𑀢𑀢𑁄 𑀧𑀝𑁆𑀞𑀸𑀬 𑀲𑁄 𑀤𑀲 𑀤𑀺𑀯𑀲𑁂 𑀧𑀭𑀺𑀳𑀭𑀺𑀢𑀼𑀁 𑀮𑀪𑀢𑀺, 𑀦 𑀢𑀣𑀸 𑀲𑀢𑁆𑀢𑀸𑀳𑀓𑀸𑀮𑀺𑀓𑀦𑁆𑀢𑀺 𑀲𑀩𑁆𑀩𑀣𑀸 𑀉𑀧𑀧𑀭𑀺𑀓𑁆𑀔𑀺𑀬𑀫𑀸𑀦𑀁 𑀲𑀭𑀺𑀓𑁆𑀔𑀁 𑀦𑀓𑁆𑀔𑀫𑀢𑀻𑀢𑀺 𑀦 𑀢𑀁 𑀲𑀸𑀭𑀢𑁄 𑀤𑀝𑁆𑀞𑀩𑁆𑀩𑀦𑁆𑀢𑀺 𑀆𑀘𑀭𑀺𑀬𑀲𑁆𑀲 𑀢𑀓𑁆𑀓𑁄. ‘‘𑀯𑀺𑀦𑀬𑀓𑀫𑁆𑀫𑀯𑀲𑁂𑀦 𑀧𑀦 𑀅𑀦𑀺𑀲𑁆𑀲𑀚𑁆𑀚𑀺𑀢𑁆𑀯𑀸 𑀲𑀳𑀲𑀸 𑀯𑀺𑀭𑀼𑀚𑁆𑀛𑀺𑀢𑁆𑀯𑀸 𑀓𑀲𑁆𑀲𑀘𑀺 𑀧𑀭𑀺𑀘𑁆𑀘𑀢𑁆𑀢𑀫𑁆𑀧𑀺 𑀧𑀼𑀦 𑀧𑀝𑀺𑀮𑀪𑀺𑀢𑁆𑀯𑀸 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀦 𑀯𑀝𑁆𑀝𑀢𑀻’’𑀢𑀺 𑀯𑀼𑀢𑁆𑀢𑀁, 𑀲𑀘𑁂 𑀤𑁂𑀲𑀦𑁆𑀢𑀭𑀺𑀢𑀁, 𑀲𑀫𑀼𑀤𑁆𑀤𑀦𑁆𑀢𑀭𑀺𑀢𑀁 𑀯𑀸 𑀘𑀻𑀯𑀭𑀁 𑀦𑀺𑀲𑁆𑀲𑀕𑁆𑀕𑀺𑀬𑀁 𑀚𑀸𑀢𑀁, 𑀢𑀁 𑀇𑀥 𑀞𑀺𑀢𑁂𑀦 𑀪𑀺𑀓𑁆𑀔𑀼𑀦𑀸 𑀏𑀓𑀲𑁆𑀲 𑀯𑀦𑁆𑀢𑁂𑀦 𑀘𑀺𑀢𑁆𑀢𑁂𑀦 𑀘𑀢𑁆𑀢𑀁 𑀓𑀢𑁆𑀯𑀸 𑀅𑀦𑀧𑁂𑀓𑁆𑀔𑀺𑀢𑁆𑀯𑀸 𑀆𑀧𑀢𑁆𑀢𑀺𑀁 𑀤𑁂𑀲𑁂𑀢𑁆𑀯𑀸 𑀢𑀲𑁆𑀲 𑀯𑀺𑀲𑁆𑀲𑀸𑀲𑁂𑀦 𑀧𑀼𑀦 𑀕𑀳𑁂𑀢𑁆𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀁, ‘‘𑀧𑀢𑁆𑀢𑀸𑀤𑀻𑀲𑀼 𑀘 𑀅𑀬𑀫𑁂𑀯 𑀦𑀬𑁄’’𑀢𑀺 𑀘 𑀯𑀼𑀢𑁆𑀢𑀁, ‘‘𑀢𑀸𑀮𑀦𑀸𑀴𑀺𑀓𑁂𑀭𑀨𑀸𑀡𑀺𑀢𑀫𑁆𑀧𑀺 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀏𑀯𑀸’’𑀢𑀺 𑀘. ‘‘𑀤𑁆𑀯𑀺𑀦𑁆𑀦𑀁 𑀲𑀦𑁆𑀢𑀓𑀁 𑀏𑀓𑁂𑀦 𑀧𑀝𑀺𑀕𑁆𑀕𑀳𑀺𑀢𑀁 𑀲𑀢𑁆𑀢𑀸𑀳𑀓𑀸𑀮𑀺𑀓𑀁 𑀲𑀢𑁆𑀢𑀸𑀳𑀸𑀢𑀺𑀓𑁆𑀓𑀫𑁂 𑀆𑀧𑀢𑁆𑀢𑀺𑀁 𑀦 𑀓𑀭𑁄𑀢𑀺, 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀧𑀦 𑀤𑁆𑀯𑀺𑀦𑁆𑀦𑀫𑁆𑀧𑀺 𑀦 𑀯𑀝𑁆𑀝𑀢𑀻’’𑀢𑀺 𑀘 ‘‘𑀧𑀭𑀲𑀦𑁆𑀢𑀓𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀞𑀧𑀺𑀢𑁂𑀧𑀺 𑀏𑀲𑁂𑀯 𑀦𑀬𑁄’’𑀢𑀺 𑀘 𑀓𑁂𑀘𑀺 𑀯𑀤𑀦𑁆𑀢𑀺. 𑀤𑀼𑀓𑁆𑀓𑀝𑀯𑀢𑁆𑀣𑀼𑀪𑀽𑀢𑀁 𑀲𑀧𑁆𑀧𑀺𑀆𑀤𑀺 𑀦𑀺𑀲𑁆𑀲𑀚𑁆𑀚𑀺𑀢𑀩𑁆𑀩𑀁 𑀧𑀼𑀦 𑀧𑀭𑀺𑀪𑀼𑀜𑁆𑀚𑀺𑀢𑀼𑀁 𑀯𑀝𑁆𑀝𑀢𑀻𑀢𑀺 𑀯𑀺𑀥𑀸𑀦𑀁 𑀦 𑀤𑀺𑀲𑁆𑀲𑀢𑀻𑀢𑀺.

𑀪𑁂𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁪. 𑀯𑀲𑁆𑀲𑀺𑀓𑀲𑀸𑀝𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁨𑁭. ‘‘𑀏𑀓𑀫𑁂𑀯 𑀓𑀢𑁆𑀯𑀸’’𑀢𑀺 𑀯𑀘𑀦𑁂𑀦 𑀯𑀲𑁆𑀲𑀺𑀓𑀲𑀸𑀝𑀺𑀓𑀮𑀓𑁆𑀔𑀡𑁂𑀦 𑀜𑀸𑀢𑀓𑀸𑀦𑀫𑁆𑀧𑀺 𑀲𑀢𑀼𑀧𑁆𑀧𑀸𑀤𑀁 𑀓𑀭𑁄𑀦𑁆𑀢𑁂𑀦 𑀏𑀓𑀫𑁂𑀯 𑀕𑀳𑁂𑀢𑀩𑁆𑀩𑀦𑁆𑀢𑀺 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁄. 𑀘𑀢𑀼𑀩𑁆𑀩𑀺𑀥𑀁 𑀔𑁂𑀢𑁆𑀢𑀦𑁆𑀢𑀺 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 𑀢𑀺𑀯𑀺𑀥𑀁 𑀤𑀺𑀲𑁆𑀲𑀢𑀺, 𑀢𑀁 𑀧𑀦 𑀏𑀯𑀁 𑀕𑀳𑁂𑀢𑀩𑁆𑀩𑀁, 𑀬𑀲𑁆𑀫𑀺𑀁 𑀔𑁂𑀢𑁆𑀢𑁂 𑀧𑀭𑀺𑀬𑁂𑀲𑀺𑀢𑀼𑀁 𑀮𑀪𑀢𑀺, 𑀢𑀁 𑀧𑀭𑀺𑀬𑁂𑀲𑀦𑀔𑁂𑀢𑁆𑀢𑀁 𑀦𑀸𑀫, ‘‘𑀏𑀯𑀁 𑀓𑀭𑀡𑀦𑀺𑀯𑀸𑀲𑀦𑀸𑀥𑀺𑀝𑁆𑀞𑀸𑀦𑀔𑁂𑀢𑁆𑀢𑀸𑀦𑀺𑀧𑀻’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀧𑀘𑁆𑀙𑀺𑀫𑁂𑀦 𑀧𑀼𑀭𑀺𑀫𑀕𑁆𑀕𑀸𑀳𑁄 𑀯𑁂𑀤𑀺𑀢𑀩𑁆𑀩𑁄, 𑀦 𑀧𑀼𑀭𑀺𑀫𑁂𑀦 𑀧𑀘𑁆𑀙𑀺𑀫𑀕𑁆𑀕𑀸𑀳𑁄, 𑀬𑀣𑀸𑀮𑀸𑀪𑀦𑁆𑀢𑀺 𑀆𑀘𑀭𑀺𑀬𑁄. 𑀢𑀲𑁆𑀲𑀢𑁆𑀣𑁄 𑁋 𑀅𑀥𑀺𑀝𑁆𑀞𑀸𑀦𑀔𑁂𑀢𑁆𑀢𑁂𑀦 𑀧𑀘𑁆𑀙𑀺𑀫𑁂𑀦 𑀧𑀼𑀭𑀺𑀫𑀸𑀦𑀁 𑀢𑀺𑀡𑁆𑀡𑀁 𑀕𑀸𑀳𑁄 𑀳𑁄𑀢𑀺, 𑀢𑀣𑀸 𑀦𑀺𑀯𑀸𑀲𑀦𑀔𑁂𑀢𑁆𑀢𑁂𑀦 𑀤𑁆𑀯𑀺𑀦𑁆𑀦𑀁 𑀧𑀼𑀭𑀺𑀫𑀸𑀦𑀁. 𑀓𑀭𑀡𑀔𑁂𑀢𑁆𑀢𑁂𑀦 𑀧𑀦 𑀏𑀓𑀲𑁆𑀲𑁂𑀯 𑀧𑀼𑀭𑀺𑀫𑀲𑁆𑀲 𑀕𑀸𑀳𑁄 𑀳𑁄𑀢𑀻𑀢𑀺. 𑀏𑀢𑁆𑀣 𑀧𑀦 𑀓𑀺𑀜𑁆𑀘𑀸𑀧𑀺 𑀓𑀭𑀡𑀔𑁂𑀢𑁆𑀢𑀦𑀺𑀯𑀸𑀲𑀦𑀔𑁂𑀢𑁆𑀢𑀸𑀦𑀁 𑀓𑀸𑀮𑀢𑁄 𑀦𑀸𑀦𑀢𑁆𑀢𑀁 𑀦𑀢𑁆𑀣𑀺, 𑀓𑀺𑀭𑀺𑀬𑀢𑁄 𑀧𑀦 ‘‘𑀅𑀝𑁆𑀞𑀺𑀁 𑀓𑀢𑁆𑀯𑀸 𑀦𑀺𑀯𑀸𑀲𑁂𑀢𑀩𑁆𑀩’’𑀦𑁆𑀢𑀺 𑀧𑀸𑀴𑀺𑀯𑀘𑀦𑀢𑁄, 𑀢𑀲𑁆𑀫𑀸 𑀤𑁆𑀯𑀺𑀥𑀸 𑀓𑀢𑁆𑀯𑀸 𑀯𑀼𑀢𑁆𑀢𑀁 𑀅𑀜𑁆𑀜𑀢𑀭𑀸𑀪𑀸𑀯𑁂𑀦, 𑀢𑀤𑀢𑁆𑀣𑀲𑀺𑀤𑁆𑀥𑀺𑀢𑁄 𑀘, 𑀓𑀣𑀁 𑀧𑀦𑁂𑀢𑁆𑀣 𑀦𑀸𑀦𑀢𑁆𑀢𑀁 𑀦𑀢𑁆𑀣𑀻𑀢𑀺 𑀧𑀜𑁆𑀜𑀸𑀬𑀢𑀻𑀢𑀺 𑀘𑁂? 𑀧𑀸𑀴𑀺𑀢𑁄, ‘‘𑀅𑀟𑁆𑀠𑀫𑀸𑀲𑁄 𑀲𑁂𑀲𑁄 𑀕𑀺𑀫𑁆𑀳𑀸𑀦𑀦𑁆𑀢𑀺 𑀓𑀢𑁆𑀯𑀸 𑀦𑀺𑀯𑀸𑀲𑁂𑀢𑀩𑁆𑀩’’𑀦𑁆𑀢𑀺 𑀳𑀺 𑀧𑀸𑀴𑀺, 𑀢𑀣𑀸 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀢𑁄 (𑀓𑀗𑁆𑀔𑀸. 𑀅𑀝𑁆𑀞. 𑀯𑀲𑁆𑀲𑀺𑀓𑀲𑀸𑀝𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸) 𑀘.

𑀢𑀣𑀸𑀳 ‘‘𑀧𑀘𑁆𑀙𑀺𑀫𑁄 𑀅𑀟𑁆𑀠𑀫𑀸𑀲𑁄 𑀓𑀭𑀡𑀦𑀺𑀯𑀸𑀲𑀦𑀔𑁂𑀢𑁆𑀢𑀫𑁆𑀧𑀻’’𑀢𑀺, 𑀇𑀫𑀺𑀦𑀸 𑀦𑀬𑁂𑀦 𑀢𑀺𑀯𑀺𑀥𑀫𑁂𑀯 𑀔𑁂𑀢𑁆𑀢𑀦𑁆𑀢𑀺𑀧𑀺 𑀲𑀺𑀤𑁆𑀥𑀁. 𑀲𑀫𑀦𑁆𑀢𑀧𑀸𑀲𑀸𑀤𑀺𑀓𑀸𑀬𑀁 𑀧𑀦 𑀓𑀢𑁆𑀣𑀘𑀺 𑀧𑁄𑀢𑁆𑀣𑀓𑁂 ‘‘𑀚𑁂𑀝𑁆𑀞𑀫𑀽𑀮𑀧𑀼𑀡𑁆𑀡𑀫𑀸𑀲𑀺𑀬𑀸 𑀧𑀘𑁆𑀙𑀺𑀫𑀧𑀸𑀝𑀺𑀧𑀤𑀤𑀺𑀯𑀲𑀢𑁄 𑀧𑀝𑁆𑀞𑀸𑀬 𑀬𑀸𑀯 𑀓𑀸𑀴𑀧𑀓𑁆𑀔𑀼𑀧𑁄𑀲𑀣𑁄, 𑀅𑀬𑀫𑁂𑀓𑁄 𑀅𑀤𑁆𑀥𑀫𑀸𑀲𑁄 𑀧𑀭𑀺𑀬𑁂𑀲𑀦𑀔𑁂𑀢𑁆𑀢𑀜𑁆𑀘𑁂𑀯 𑀓𑀭𑀡𑀔𑁂𑀢𑁆𑀢𑀜𑁆𑀘. 𑀏𑀢𑀲𑁆𑀫𑀺𑀜𑁆𑀳𑀺 𑀅𑀦𑁆𑀢𑀭𑁂 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀅𑀮𑀤𑁆𑀥𑀁 𑀧𑀭𑀺𑀬𑁂𑀲𑀺𑀢𑀼𑀁, 𑀮𑀤𑁆𑀥𑀁 𑀓𑀸𑀢𑀼𑀜𑁆𑀘 𑀯𑀝𑁆𑀝𑀢𑀺, 𑀦𑀺𑀯𑀸𑀲𑁂𑀢𑀼𑀁, 𑀅𑀥𑀺𑀝𑁆𑀞𑀸𑀢𑀼𑀜𑁆𑀘 𑀦 𑀯𑀝𑁆𑀝𑀢𑀻’’𑀢𑀺 𑀧𑀸𑀞𑁄 𑀤𑀺𑀲𑁆𑀲𑀢𑀺, 𑀲𑁄 𑀅𑀧𑀸𑀞𑁄 𑀬𑀣𑀸𑀯𑀼𑀢𑁆𑀢𑀧𑀸𑀴𑀺𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀯𑀺𑀭𑁄𑀥𑀢𑁄, 𑀢𑀲𑁆𑀫𑀸 𑀢𑀢𑁆𑀣 ‘‘𑀅𑀮𑀤𑁆𑀥𑀁 𑀧𑀭𑀺𑀬𑁂𑀲𑀺𑀢𑀼𑀁 𑀯𑀝𑁆𑀝𑀢𑀺, 𑀓𑀸𑀢𑀼𑀁, 𑀦𑀺𑀯𑀸𑀲𑁂𑀢𑀼𑀁, 𑀅𑀥𑀺𑀝𑁆𑀞𑀸𑀢𑀼𑀜𑁆𑀘 𑀦 𑀯𑀝𑁆𑀝𑀢𑀻’’𑀢𑀺 𑀧𑀸𑀞𑁄 𑀯𑁂𑀤𑀺𑀢𑀩𑁆𑀩𑁄. 𑀏𑀯𑀁 𑀢𑀸𑀯 𑀧𑀘𑁆𑀙𑀺𑀫𑁂𑀦 𑀧𑀼𑀭𑀺𑀫𑀕𑁆𑀕𑀸𑀳𑀲𑀺𑀤𑁆𑀥𑀺 𑀯𑁂𑀤𑀺𑀢𑀩𑁆𑀩𑀸, 𑀦 𑀧𑀼𑀭𑀺𑀫𑁂𑀦 𑀓𑀭𑀡𑀔𑁂𑀢𑁆𑀢𑀸𑀤𑀻𑀦𑀁 𑀕𑀸𑀳𑁄 𑀲𑀫𑁆𑀪𑀯𑀢𑀺. ‘‘𑀫𑀸𑀲𑁄 𑀲𑁂𑀲𑁄 𑀕𑀺𑀫𑁆𑀳𑀸𑀦𑀦𑁆𑀢𑀺 𑀯𑀲𑁆𑀲𑀺𑀓𑀲𑀸𑀝𑀺𑀓𑀘𑀻𑀯𑀭𑀁 𑀧𑀭𑀺𑀬𑁂𑀲𑀺𑀢𑀩𑁆𑀩’’𑀦𑁆𑀢𑀺 𑀏𑀢𑁆𑀢𑀓𑀫𑁂𑀯 𑀳𑀺 𑀯𑀼𑀢𑁆𑀢𑀁, 𑀦, 𑀅𑀝𑁆𑀞𑀓𑀣𑀸𑀬𑀁 ‘‘𑀅𑀬𑀫𑁂𑀓𑁄 𑀅𑀤𑁆𑀥𑀫𑀸𑀲𑁄 𑀧𑀭𑀺𑀬𑁂𑀲𑀦𑀔𑁂𑀢𑁆𑀢𑀜𑁆𑀘𑁂𑀯 𑀓𑀭𑀡𑀔𑁂𑀢𑁆𑀢𑀜𑁆𑀘𑀸’’𑀢𑀺 𑀯𑀼𑀢𑁆𑀢𑀢𑁆𑀢𑀸𑀢𑀺 𑀘𑁂? 𑀦, 𑀢𑀲𑁆𑀲 𑀮𑁂𑀔𑀦𑀤𑁄𑀲𑀢𑁆𑀢𑀸, 𑀢𑀣𑀸 𑀲𑀸𑀥𑀺𑀢𑀁. 𑀓𑀭𑀡𑀔𑁂𑀢𑁆𑀢𑁂𑀦 𑀧𑀦 𑀦𑀺𑀯𑀸𑀲𑀦𑀔𑁂𑀢𑁆𑀢𑀕𑁆𑀕𑀸𑀳𑁄 𑀅𑀢𑁆𑀣𑀺 𑀓𑀸𑀮𑀦𑀸𑀦𑀢𑁆𑀢𑀸𑀪𑀸𑀯𑀢𑁄, 𑀢𑁂𑀦𑁂𑀯 𑀧𑀼𑀩𑁆𑀩𑁂 𑀬𑀣𑀸𑀮𑀸𑀪𑀕𑁆𑀕𑀳𑀡𑀁 𑀓𑀢𑀁, 𑀢𑀣𑀸 𑀘 𑀲𑀸𑀥𑀺𑀢𑀫𑁂𑀯, 𑀦 𑀪𑁂𑀤𑁄 𑀧𑀦𑀢𑁆𑀣𑀺, 𑀧𑀬𑁄𑀚𑀦𑀁 𑀯𑀼𑀢𑁆𑀢𑀫𑁂𑀯. 𑀦𑀺𑀯𑀸𑀲𑀦𑀓𑁆𑀔𑁂𑀢𑁆𑀢𑁂𑀦 𑀅𑀥𑀺𑀝𑁆𑀞𑀸𑀦𑀓𑁆𑀔𑁂𑀢𑁆𑀢𑀕𑁆𑀕𑀸𑀳𑁄 𑀦𑀢𑁆𑀣𑀺 𑀏𑀯, 𑀦 𑀳𑀺 𑀧𑀼𑀭𑀺𑀫𑁂𑀦 𑀧𑀘𑁆𑀙𑀺𑀫𑀕𑁆𑀕𑀸𑀳𑁄 𑀯𑁂𑀤𑀺𑀢𑀩𑁆𑀩𑁄. 𑀦 𑀧𑀸𑀴𑀺𑀯𑀺𑀭𑁄𑀥𑀢𑁄𑀢𑀺 𑀘𑁂? 𑀦, 𑀢𑀤𑀢𑁆𑀣𑀸𑀚𑀸𑀦𑀦𑀢𑁄. ‘‘𑀫𑀸𑀲𑁄 𑀲𑁂𑀲𑁄 𑀕𑀺𑀫𑁆𑀳𑀸𑀦𑀦𑁆𑀢𑀺 𑀅𑀤𑁆𑀥𑀫𑀸𑀲𑁄 𑀲𑁂𑀲𑁄 𑀕𑀺𑀫𑁆𑀳𑀸𑀦’’𑀦𑁆𑀢𑀺 𑀏𑀢𑁆𑀣 𑀇𑀢𑀺-𑀲𑀤𑁆𑀤𑀲𑁆𑀲 𑀳𑀺 𑀇𑀢𑁄 𑀧𑀝𑁆𑀞𑀸𑀬𑀸𑀢𑀺 𑀅𑀢𑁆𑀣𑁄. 𑀧𑀭𑀢𑁄 𑀆𑀧𑀢𑁆𑀢𑀺𑀔𑁂𑀢𑁆𑀢𑀤𑀲𑁆𑀲𑀦𑀢𑁄 𑀇𑀢𑀭𑀲𑁆𑀲 𑀅𑀦𑀸𑀧𑀢𑁆𑀢𑀺𑀔𑁂𑀢𑁆𑀢𑀪𑀸𑀯𑁄 𑀤𑀲𑁆𑀲𑀺𑀢𑁄𑀯 𑀳𑁄𑀢𑀺. 𑀤𑀺𑀦𑁆𑀦𑀧𑀼𑀩𑁆𑀩𑀢𑁄𑀧𑀺 𑀜𑀸𑀢𑀓𑀧𑀯𑀸𑀭𑀺𑀢𑀝𑁆𑀞𑀸𑀦𑀢𑁄 𑀦𑀺𑀧𑁆𑀨𑀸𑀤𑁂𑀦𑁆𑀢𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀁 𑀧𑀺𑀝𑁆𑀞𑀺𑀲𑀫𑀬𑀢𑁆𑀢𑀸, 𑀧𑀓𑀢𑀺𑀬𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀤𑀸𑀬𑀓𑀸 𑀦𑀸𑀫 𑀲𑀗𑁆𑀖𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀅𑀧𑀯𑀸𑀭𑁂𑀢𑁆𑀯𑀸 𑀅𑀦𑀼𑀲𑀁𑀯𑀘𑁆𑀙𑀭𑀁 𑀤𑁂𑀦𑁆𑀢𑀸, 𑀢𑀢𑁆𑀣 𑀲𑀢𑀼𑀧𑁆𑀧𑀸𑀤𑁄𑀯 𑀯𑀝𑁆𑀝𑀢𑀺. 𑀯𑀢𑁆𑀢𑀪𑁂𑀤𑁂 𑀤𑀼𑀓𑁆𑀓𑀝𑀦𑁆𑀢𑀺 𑀢𑀤𑀜𑁆𑀜𑁂𑀲𑀼.

‘‘𑀲𑀘𑁂 𑀓𑀢…𑀧𑁂… 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑁂 𑀅𑀥𑀺𑀝𑁆𑀞𑀸𑀢𑀩𑁆𑀩𑀸…𑀧𑁂… 𑀙 𑀫𑀸𑀲𑁂 𑀧𑀭𑀺𑀳𑀸𑀭𑀁 𑀮𑀪𑀢𑀻’’𑀢𑀺 𑀯𑀘𑀦𑀢𑁄 𑀅𑀦𑁆𑀢𑁄𑀯𑀲𑁆𑀲𑁂𑀧𑀺 𑀬𑀸𑀯 𑀯𑀲𑁆𑀲𑀸𑀦𑀲𑁆𑀲 𑀧𑀘𑁆𑀙𑀺𑀫𑀤𑀺𑀯𑀲𑀸 𑀅𑀓𑀢𑀸 𑀧𑀭𑀺𑀳𑀸𑀭𑀁 𑀮𑀪𑀢𑀻𑀢𑀺 𑀤𑀻𑀧𑀺𑀢𑀁 𑀳𑁄𑀢𑀺. 𑀓𑀲𑁆𑀫𑀸 𑀦 𑀯𑀺𑀘𑀸𑀭𑀺𑀢𑀦𑁆𑀢𑀺 𑀘𑁂? 𑀅𑀢𑁆𑀣𑀸𑀧𑀢𑁆𑀢𑀺𑀲𑀺𑀤𑁆𑀥𑀢𑁆𑀢𑀸. ‘‘𑀙 𑀫𑀸𑀲𑁂 𑀧𑀭𑀺𑀳𑀸𑀭𑀁 𑀮𑀪𑀢𑀻’’𑀢𑀺 𑀯𑀘𑀦𑁂𑀦 𑀅𑀓𑀢𑀸 𑀮𑀪𑀢𑀻𑀢𑀺 𑀲𑀺𑀤𑁆𑀥𑀫𑁂𑀯, 𑀢𑀁 𑀓𑀺𑀜𑁆𑀘𑀸𑀧𑀺 𑀲𑀺𑀤𑁆𑀥𑀁, 𑀲𑀭𑀽𑀧𑁂𑀦 𑀧𑀦 𑀅𑀦𑀸𑀕𑀢𑀢𑁆𑀢𑀸 𑀲𑀭𑀽𑀧𑁂𑀦 𑀤𑀲𑁆𑀲𑁂𑀢𑀼𑀁, 𑀤𑀼𑀲𑁆𑀲𑀤𑁆𑀥𑀸𑀧𑀬𑀢𑁆𑀢𑀸 𑀉𑀧𑀧𑀢𑁆𑀢𑀺𑀢𑁄 𑀤𑀲𑁆𑀲𑁂𑀢𑀼𑀜𑁆𑀘 𑀇𑀤𑀫𑀸𑀭𑀤𑁆𑀥𑀁 𑀆𑀘𑀭𑀺𑀬𑁂𑀦, ‘‘𑀬𑀣𑀸 𑀘𑁂𑀢𑁆𑀣, 𑀏𑀯𑀁 𑀓𑀣𑀺𑀦𑀩𑁆𑀪𑀦𑁆𑀢𑀭𑁂 𑀉𑀧𑁆𑀧𑀦𑁆𑀦𑀘𑀻𑀯𑀭𑀫𑁆𑀧𑀺 𑀳𑁂𑀝𑁆𑀞𑀸 𑀯𑀼𑀢𑁆𑀢𑀦𑀬𑁂𑀦𑁂𑀯 𑀧𑀝𑀺𑀧𑀚𑁆𑀚𑀺𑀢𑀩𑁆𑀩’’𑀦𑁆𑀢𑀺 𑀅𑀦𑀼𑀕𑀡𑁆𑀞𑀺𑀧𑀤𑁂 𑀯𑀼𑀢𑁆𑀢𑀁, 𑀢𑀁 𑀤𑀼𑀯𑀼𑀢𑁆𑀢𑀁 𑀢𑀢𑁆𑀣𑁂𑀯 𑀧𑀼𑀩𑁆𑀩𑀸𑀧𑀭𑀯𑀺𑀭𑁄𑀥𑀢𑁄. 𑀬𑀜𑁆𑀘𑁂𑀢𑁆𑀣 𑀅𑀝𑁆𑀞𑀓𑀣𑀸𑀯𑀘𑀦𑀁 𑀲𑀸𑀥𑀓𑀢𑁆𑀢𑁂𑀦 𑀯𑀼𑀢𑁆𑀢𑀁, 𑀢𑀁 𑀢𑀫𑀢𑁆𑀣𑀁 𑀦 𑀲𑀸𑀥𑁂𑀢𑀺. ‘‘𑀬𑀤𑀺 𑀦𑀧𑁆𑀧𑀳𑁄𑀢𑀺 𑀬𑀸𑀯 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸 𑀧𑀭𑀺𑀳𑀸𑀭𑀁 𑀮𑀪𑀢𑀻’’𑀢𑀺 𑀯𑀘𑀦𑀁 𑀅𑀧𑁆𑀧𑀳𑁄𑀦𑁆𑀢𑀲𑁆𑀲 𑀬𑀸𑀯 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸 𑀢𑀸𑀯 𑀧𑀭𑀺𑀳𑀸𑀭𑀔𑁂𑀢𑁆𑀢𑀁, 𑀢𑀢𑁄 𑀧𑀭𑀁 𑀏𑀓𑀤𑀺𑀯𑀲𑁄𑀧𑀺 𑀦 𑀳𑁄𑀢𑀻𑀢𑀺 𑀤𑀻𑀧𑁂𑀢𑀺, 𑀢𑀲𑁆𑀫𑀸 𑀅𑀧𑁆𑀧𑀳𑁄𑀦𑀓𑀪𑀸𑀯𑁂𑀦 𑀅𑀓𑀢𑀸𑀯 𑀬𑀸𑀯 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸 𑀧𑀭𑀺𑀳𑀸𑀭𑀁 𑀮𑀪𑀢𑀺, 𑀢𑀢𑁄 𑀧𑀭𑀁 𑀦 𑀮𑀪𑀢𑀻𑀢𑀺 𑀲𑀺𑀤𑁆𑀥𑀁. 𑀢𑀣𑀸 𑀢𑀤𑁂𑀯 𑀯𑀘𑀦𑀁 𑀓𑀢𑀧𑀭𑀺𑀳𑀸𑀭𑀁 𑀦 𑀮𑀪𑀢𑀻𑀢𑀺 𑀤𑀻𑀧𑁂𑀢𑀺, 𑀢𑀲𑁆𑀫𑀸 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀤𑀺𑀯𑀲𑁂𑀬𑁂𑀯 𑀅𑀥𑀺𑀝𑁆𑀞𑀸𑀢𑀩𑁆𑀩𑀸. ‘‘𑀅𑀧𑁆𑀧𑀳𑁄𑀦𑁆𑀢𑁂 𑀤𑀲𑀸𑀳𑁂 𑀅𑀦𑁆𑀢𑁄𑀯𑀲𑁆𑀲𑁂 𑀓𑀭𑀡𑀧𑀭𑀺𑀬𑁄𑀲𑀸𑀦𑀁𑀬𑁂𑀯 𑀧𑀫𑀸𑀡’’𑀦𑁆𑀢𑀺 𑀮𑀺𑀔𑀺𑀢𑀁.

𑀏𑀢𑁆𑀣𑀸𑀳 𑁋 ‘‘𑀏𑀓𑀸𑀳𑀤𑁆𑀯𑀻𑀳𑀸𑀤𑀺𑀯𑀲𑁂𑀦𑀸’’𑀢𑀺𑀆𑀤𑀺 𑀦 𑀯𑀢𑁆𑀢𑀩𑁆𑀩𑀁. 𑀓𑀲𑁆𑀫𑀸? 𑀕𑀺𑀫𑁆𑀳𑀤𑀺𑀯𑀲𑀸𑀦𑀁 𑀅𑀦𑀥𑀺𑀝𑁆𑀞𑀸𑀦𑀓𑀸𑀮𑀢𑁆𑀢𑀸, 𑀢𑀲𑁆𑀫𑀸 𑀏𑀯 ‘‘𑀅𑀦𑁆𑀢𑁄𑀤𑀲𑀸𑀳𑁂 𑀯𑀸 𑀢𑀤𑀳𑁂𑀬𑁂𑀯 𑀯𑀸 𑀅𑀥𑀺𑀝𑁆𑀞𑀸𑀢𑀩𑁆𑀩𑀸’𑀢𑀺 𑀘 𑀲𑀸𑀫𑀜𑁆𑀜𑀢𑁄 𑀦 𑀯𑀢𑁆𑀢𑀩𑁆𑀩𑀁 𑀕𑀺𑀫𑁆𑀳𑀤𑀺𑀯𑀲𑀸𑀦𑀁 𑀅𑀥𑀺𑀝𑁆𑀞𑀸𑀦𑀔𑁂𑀢𑁆𑀢𑀪𑀸𑀯𑀧𑁆𑀧𑀲𑀗𑁆𑀕𑀢𑁄’’𑀢𑀺. 𑀏𑀢𑁆𑀣 𑀯𑀼𑀘𑁆𑀘𑀢𑀺 𑁋 𑀦, 𑀢𑀤𑀢𑁆𑀣𑀸𑀚𑀸𑀦𑀦𑀢𑁄. 𑀤𑀲𑀸𑀳𑀸𑀦𑀸𑀕𑀢𑀸𑀬 𑀯𑀲𑁆𑀲𑀽𑀧𑀦𑀸𑀬𑀺𑀓𑀸𑀬 𑀕𑀺𑀫𑁆𑀳𑀤𑀺𑀯𑀲𑀸 𑀤𑀲𑀸𑀳𑀸 𑀳𑁄𑀦𑁆𑀢𑀺, 𑀧𑀞𑀫𑀤𑀺𑀯𑀲𑁂 𑀘 𑀮𑀤𑁆𑀥𑀸 𑀦𑀺𑀝𑁆𑀞𑀺𑀢𑀸 𑀯𑀲𑁆𑀲𑀺𑀓𑀲𑀸𑀝𑀺𑀓𑀸 𑀤𑀲𑀸𑀳𑀸𑀢𑀺𑀓𑁆𑀓𑀦𑁆𑀢𑀸𑀧𑀺 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑀁 𑀅𑀥𑀺𑀝𑁆𑀞𑀸𑀦𑀔𑁂𑀢𑁆𑀢𑀁 𑀅𑀧𑁆𑀧𑀢𑁆𑀢𑀢𑁆𑀢𑀸 𑀦 𑀘 𑀢𑀸𑀯 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺, 𑀯𑀼𑀢𑁆𑀢𑀜𑁆𑀘𑁂𑀢𑀁 ‘‘𑀯𑀲𑁆𑀲𑀽𑀧𑀦𑀸𑀬𑀺𑀓𑀢𑁄 𑀧𑀼𑀩𑁆𑀩𑁂 𑀤𑀲𑀸𑀳𑀸𑀢𑀺𑀓𑁆𑀓𑀫𑁂𑀧𑀺 𑀅𑀦𑀸𑀧𑀢𑁆𑀢𑀻’’𑀢𑀺.

𑀅𑀦𑁆𑀢𑁄𑀤𑀲𑀸𑀳𑁂 𑀅𑀥𑀺𑀝𑁆𑀞𑀸𑀢𑀩𑁆𑀩𑀸𑀢𑀺 𑀇𑀤𑀁 𑀦 𑀅𑀯𑀺𑀲𑁂𑀲𑁂𑀦 𑀏𑀢𑀲𑁆𑀫𑀺𑀁 𑀅𑀦𑁆𑀢𑀭𑁂 𑀕𑀺𑀫𑁆𑀳𑀤𑀺𑀯𑀲𑁂𑀧𑀺 𑀅𑀥𑀺𑀝𑁆𑀞𑀸𑀢𑀩𑁆𑀩𑀦𑁆𑀢𑀺 𑀇𑀫𑀫𑀢𑁆𑀣𑀁 𑀤𑀻𑀧𑁂𑀢𑀼𑀁 𑀯𑀼𑀢𑁆𑀢𑀁, 𑀓𑀺𑀦𑁆𑀢𑀼 𑀕𑀺𑀫𑁆𑀳𑀤𑀺𑀯𑀲𑁂 𑀘𑁂 𑀉𑀧𑁆𑀧𑀦𑁆𑀦𑀸, 𑀅𑀥𑀺𑀝𑁆𑀞𑀸𑀦𑀔𑁂𑀢𑁆𑀢𑁂 𑀘 𑀅𑀦𑁆𑀢𑁄𑀤𑀲𑀸𑀳𑀁 𑀳𑁄𑀢𑀺, 𑀅𑀦𑁆𑀢𑁄𑀤𑀲𑀸𑀳𑁂 𑀔𑁂𑀢𑁆𑀢𑁂𑀬𑁂𑀯 𑀅𑀥𑀺𑀝𑁆𑀞𑀸𑀢𑀩𑁆𑀩𑀸, 𑀦 𑀔𑁂𑀢𑁆𑀢𑀦𑁆𑀢𑀺 𑀓𑀢𑁆𑀯𑀸 𑀤𑀲𑀸𑀳𑀁 𑀅𑀢𑀺𑀓𑁆𑀓𑀫𑀺𑀢𑀩𑁆𑀩𑀦𑁆𑀢𑀺 𑀤𑀻𑀧𑁂𑀢𑀼𑀁 𑀯𑀼𑀢𑁆𑀢𑀁. 𑀓𑀲𑁆𑀫𑀸? 𑀕𑀺𑀫𑁆𑀳𑀤𑀺𑀯𑀲𑀸𑀦𑀫𑁆𑀧𑀺 𑀕𑀡𑀦𑀽𑀧𑀕𑀢𑁆𑀢𑀸, 𑀢𑀲𑁆𑀫𑀸 𑀅𑀔𑁂𑀢𑁆𑀢𑀤𑀺𑀯𑀲𑁂𑀧𑀺 𑀕𑀡𑁂𑀢𑁆𑀯𑀸 𑀔𑁂𑀢𑁆𑀢𑁂 𑀏𑀯 ‘‘𑀅𑀦𑁆𑀢𑁄𑀤𑀲𑀸𑀳𑁂 𑀅𑀥𑀺𑀝𑁆𑀞𑀸𑀢𑀩𑁆𑀩𑀸’’𑀢𑀺 𑀯𑀼𑀢𑁆𑀢𑀁 𑀳𑁄𑀢𑀻𑀢𑀺.

𑀯𑀲𑁆𑀲𑀺𑀓𑀲𑀸𑀝𑀺𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁫. 𑀘𑀻𑀯𑀭𑀅𑀘𑁆𑀙𑀺𑀦𑁆𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁩𑁨. 𑀲𑀸𑀫𑀦𑁆𑀢𑀺 𑀲𑀓𑀲𑀜𑁆𑀜𑀺𑀢𑀸𑀦𑀺𑀬𑀫𑀦𑀢𑁆𑀣𑀁 𑀯𑀼𑀢𑁆𑀢𑀁. 𑀲𑀓𑀲𑀜𑁆𑀜𑀺𑀢𑀸𑀬𑁂𑀯 𑀳𑀺 𑀅𑀘𑁆𑀙𑀺𑀦𑁆𑀤𑀸𑀧𑀦𑀅𑀘𑁆𑀙𑀺𑀦𑁆𑀤𑀦𑁂𑀲𑀼 𑀦𑀺𑀲𑁆𑀲𑀕𑁆𑀕𑀺𑀬𑀁, 𑀢𑀲𑁆𑀫𑀸 𑀦𑀺𑀲𑁆𑀲𑀕𑁆𑀕𑀺𑀬𑀫𑀽𑀮𑀗𑁆𑀕𑀦𑀺𑀤𑀲𑁆𑀲𑀦𑀫𑁂𑀢𑀁. ‘‘𑀘𑀻𑀯𑀭’’𑀦𑁆𑀢𑀺 𑀯𑀼𑀢𑁆𑀢𑀢𑁆𑀢𑀸 ‘‘𑀅𑀘𑀻𑀯𑀭𑀁 𑀅𑀘𑁆𑀙𑀺𑀦𑁆𑀤𑀦𑁆𑀢𑀲𑁆𑀲 𑀦 𑀦𑀺𑀲𑁆𑀲𑀕𑁆𑀕𑀺𑀬’’𑀦𑁆𑀢𑀺 𑀯𑀼𑀢𑁆𑀢𑀫𑁂𑀯 𑀳𑁄𑀢𑀺. ‘‘𑀤𑀢𑁆𑀯𑀸𑀢𑀺 𑀤𑀢𑁆𑀯𑀸 𑀯𑀸 𑀤𑀸𑀧𑁂𑀢𑁆𑀯𑀸 𑀯𑀸’’𑀢𑀺 𑀓𑀺𑀜𑁆𑀘𑀸𑀧𑀺 𑀧𑀤𑀪𑀸𑀚𑀦𑀁 𑀬𑀼𑀚𑁆𑀚𑀢𑀺, 𑀅𑀜𑁆𑀜𑀲𑁆𑀲 𑀧𑀦 𑀲𑀦𑁆𑀢𑀓𑀁 𑀅𑀜𑁆𑀜𑀲𑁆𑀲 𑀪𑀺𑀓𑁆𑀔𑀼𑀦𑁄 𑀤𑀸𑀧𑁂𑀢𑁆𑀯𑀸 𑀢𑀁 𑀲𑀬𑀁 𑀯𑀸 𑀅𑀘𑁆𑀙𑀺𑀦𑁆𑀤𑁂𑀬𑁆𑀬, 𑀢𑁂𑀦𑁂𑀯 𑀯𑀸 𑀅𑀘𑁆𑀙𑀺𑀦𑁆𑀤𑀸𑀧𑁂𑀬𑁆𑀬𑀸𑀢𑀺 𑀅𑀦𑀺𑀝𑁆𑀞𑀧𑁆𑀧𑀲𑀗𑁆𑀕𑀪𑀬𑀸 𑀦 𑀯𑀼𑀢𑁆𑀢𑀁, 𑀅𑀢𑁆𑀣𑀢𑁄 𑀧𑀦 𑀅𑀢𑁆𑀢𑀦𑁄 𑀲𑀦𑁆𑀢𑀓𑀁 𑀅𑀜𑁆𑀜𑁂𑀦 𑀲𑀤𑁆𑀥𑀺𑀯𑀺𑀳𑀸𑀭𑀺𑀓𑀸𑀤𑀺𑀦𑀸 𑀤𑀸𑀧𑁂𑀢𑁆𑀯𑀸, 𑀅𑀜𑁆𑀜𑀲𑁆𑀲 𑀲𑀦𑁆𑀢𑀓𑀁 𑀯𑀸 𑀢𑀲𑁆𑀲 𑀯𑀺𑀲𑁆𑀲𑀸𑀲𑀸 𑀤𑀸𑀧𑁂𑀢𑁆𑀯𑀸 𑀢𑀁 𑀅𑀘𑁆𑀙𑀺𑀦𑁆𑀤𑁂𑀬𑁆𑀬 𑀯𑀸 𑀅𑀘𑁆𑀙𑀺𑀦𑁆𑀤𑀸𑀧𑁂𑀬𑁆𑀬 𑀯𑀸 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁, 𑀢𑀜𑁆𑀘 𑀔𑁄 𑀅𑀦𑀧𑁂𑀓𑁆𑀔𑁄 𑀤𑀢𑁆𑀯𑀸. 𑀬𑀤𑀺 𑀏𑀯𑀁 ‘‘𑀘𑀚𑀺𑀢𑁆𑀯𑀸 𑀤𑀺𑀦𑁆𑀦𑀁 𑀅𑀘𑁆𑀙𑀺𑀦𑁆𑀤𑀺𑀢𑁆𑀯𑀸 𑀕𑀡𑁆𑀳𑀦𑁆𑀢𑁄 𑀪𑀡𑁆𑀟𑀕𑁆𑀖𑁂𑀦 𑀓𑀸𑀭𑁂𑀢𑀩𑁆𑀩𑁄’’𑀢𑀺 𑀇𑀤𑀁 𑀓𑀺𑀦𑁆𑀢𑀺 𑀘𑁂? 𑀲𑀓𑀲𑀜𑁆𑀜𑀸𑀬 𑀅𑀕𑁆𑀕𑀳𑁂𑀢𑁆𑀯𑀸 𑀅𑀜𑁆𑀜𑀸𑀬 𑀣𑁂𑀬𑁆𑀬𑀸𑀬 𑀕𑀡𑁆𑀳𑀦𑁆𑀢𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑁂𑀦𑁂𑀯 𑀯𑀼𑀢𑁆𑀢𑀁 ‘‘𑀲𑀓𑀲𑀜𑁆𑀜𑀸𑀬 𑀕𑀳𑀺𑀢𑀢𑁆𑀢𑀸 𑀧𑀦𑀲𑁆𑀲 𑀧𑀸𑀭𑀸𑀚𑀺𑀓𑀁 𑀦𑀢𑁆𑀣𑀻’’𑀢𑀺, 𑀅𑀧𑀺𑀘 ‘‘𑀅𑀦𑀸𑀧𑀢𑁆𑀢𑀺 𑀲𑁄 𑀯𑀸 𑀤𑁂𑀢𑀺, 𑀢𑀲𑁆𑀲 𑀯𑀸 𑀯𑀺𑀲𑁆𑀲𑀲𑀦𑁆𑀢𑁄 𑀕𑀡𑁆𑀳𑀸𑀢𑀻’’𑀢𑀺 𑀯𑀘𑀦𑀢𑁄𑀧𑀺 𑀢𑀁 𑀲𑀺𑀤𑁆𑀥𑀫𑁂𑀯. 𑀏𑀢𑁆𑀢𑀸𑀯𑀢𑀸 𑀢𑀸𑀯𑀓𑀸𑀮𑀺𑀓𑀁 𑀓𑀢𑁆𑀯𑀸 𑀤𑀺𑀦𑁆𑀦𑀁 𑀅𑀘𑁆𑀙𑀺𑀦𑁆𑀤𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺 𑀲𑀸𑀥𑀺𑀢𑀸 𑀳𑁄𑀢𑀺. ‘‘𑀅𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀉𑀧𑀚𑁆𑀛𑀁 𑀕𑀡𑁆𑀳𑀺𑀲𑁆𑀲𑀢𑀻’’𑀢𑀺𑀆𑀤𑀺𑀯𑀘𑀦𑀁 𑀲𑀸𑀫𑀡𑁂𑀭𑀲𑁆𑀲 𑀤𑀸𑀦𑀁 𑀤𑀻𑀧𑁂𑀢𑀺, 𑀢𑀜𑁆𑀘 𑀇𑀥 𑀦𑀸𑀥𑀺𑀧𑁆𑀧𑁂𑀢𑀁. 𑀧𑀸𑀴𑀺𑀬𑀁 (𑀧𑀸𑀭𑀸. 𑁬𑁩𑁩-𑁬𑁩𑁪) 𑀉𑀧𑀲𑀫𑁆𑀧𑀦𑁆𑀦𑁂 𑀢𑀺𑀓𑀧𑀸𑀘𑀺𑀢𑁆𑀢𑀺𑀬𑀁 𑀯𑀺𑀬 𑀅𑀦𑀼𑀧𑀲𑀫𑁆𑀧𑀦𑁆𑀦𑁂 𑀢𑀺𑀓𑀤𑀼𑀓𑁆𑀓𑀝𑀫𑁆𑀧𑀺 𑀆𑀕𑀢𑀦𑁆𑀢𑀺 𑀘𑁂? 𑀦, 𑀢𑀤𑀥𑀺𑀧𑁆𑀧𑀸𑀬𑀸𑀚𑀸𑀦𑀦𑀢𑁄. 𑀅𑀦𑀼𑀧𑀲𑀫𑁆𑀧𑀦𑁆𑀦𑀓𑀸𑀮𑁂 𑀏𑀯𑀁 𑀤𑀢𑁆𑀯𑀸 𑀅𑀜𑁆𑀜𑀲𑁆𑀲 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀦𑁆𑀦𑀁 𑀤𑀺𑀲𑁆𑀯𑀸 𑀓𑀼𑀧𑀺𑀢𑁄 𑀘𑁂 𑀅𑀘𑁆𑀙𑀺𑀦𑁆𑀤𑀢𑀺, 𑀉𑀧𑀲𑀫𑁆𑀧𑀦𑁆𑀦𑀲𑁆𑀲𑁂𑀯 𑀯𑀸 ‘‘𑀲𑀺𑀓𑁆𑀔𑀁 𑀧𑀘𑁆𑀘𑀓𑁆𑀔𑀸𑀬 𑀢𑀼𑀫𑁆𑀳𑀸𑀓𑀁 𑀲𑀦𑁆𑀢𑀺𑀓𑁂 𑀉𑀧𑀲𑀫𑁆𑀧𑀚𑁆𑀚𑀺𑀲𑁆𑀲𑀸𑀫𑀻’’𑀢𑀺 𑀯𑀤𑀦𑁆𑀢𑀲𑁆𑀲 𑀤𑀢𑁆𑀯𑀸 𑀧𑀼𑀦 𑀅𑀘𑁆𑀙𑀺𑀦𑁆𑀤𑀢𑀺 𑀘𑁂, 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀅𑀬𑀫𑁂𑀢𑁆𑀣 𑀅𑀥𑀺𑀧𑁆𑀧𑀸𑀬𑁄.

𑁬𑁩𑁩. 𑀲𑀓𑀺𑀁 𑀆𑀡𑀢𑁆𑀢𑁄 𑀩𑀳𑀼𑀓𑀫𑁆𑀧𑀺 𑀅𑀘𑁆𑀙𑀺𑀦𑁆𑀤𑀢𑀺, 𑀦𑀺𑀲𑁆𑀲𑀕𑁆𑀕𑀺𑀬𑀦𑁆𑀢𑀺 𑀏𑀓𑀩𑀤𑁆𑀥𑀢𑁆𑀢𑀸 𑀏𑀓𑀁 𑀧𑀸𑀘𑀺𑀢𑁆𑀢𑀺𑀬𑀁, 𑀢𑀁 𑀲𑀦𑁆𑀥𑀸𑀬𑁂𑀢𑀁 𑀯𑀼𑀢𑁆𑀢𑀁 ‘‘𑀆𑀡𑀢𑁆𑀢𑁄 𑀩𑀳𑀽𑀦𑀺 𑀕𑀡𑁆𑀳𑀸𑀢𑀺, 𑀏𑀓𑀁 𑀧𑀸𑀘𑀺𑀢𑁆𑀢𑀺𑀬’’𑀦𑁆𑀢𑀺. 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀯𑀢𑁆𑀣𑀼𑀕𑀡𑀦𑀸𑀬 𑀆𑀧𑀢𑁆𑀢𑀺𑀬𑁄’’𑀢𑀺 𑀯𑀼𑀢𑁆𑀢𑀁, 𑀢𑀁 𑀆𑀡𑀢𑁆𑀢𑀺𑀬𑀸 𑀩𑀳𑀼𑀢𑁆𑀢𑀸 ‘‘𑀲𑀩𑁆𑀩𑀸𑀦𑀺 𑀕𑀡𑁆𑀳𑀸’’𑀢𑀺 𑀯𑀤𑀦𑁆𑀢𑀲𑁆𑀲 𑀕𑀸𑀳𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑁂𑀦𑁂𑀯 𑀢𑀢𑁆𑀣 𑀯𑀼𑀢𑁆𑀢𑀁 ‘‘𑀏𑀓𑀯𑀸𑀘𑀸𑀬 𑀲𑀫𑁆𑀩𑀳𑀼𑀮𑀸 𑀆𑀧𑀢𑁆𑀢𑀺𑀬𑁄’’𑀢𑀺. 𑀏𑀯𑀁 𑀲𑀦𑁆𑀢𑁂 𑀧𑀸𑀴𑀺𑀯𑀘𑀦𑀁, 𑀅𑀝𑁆𑀞𑀓𑀣𑀸𑀯𑀘𑀦𑀤𑁆𑀯𑀬𑀜𑁆𑀘 𑀅𑀜𑁆𑀜𑀫𑀜𑁆𑀜𑀁 𑀲𑀫𑁂𑀢𑀺, 𑀧𑀭𑀲𑀦𑁆𑀢𑀓𑀫𑁆𑀧𑀺 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺 𑀧𑀁𑀲𑀼𑀓𑀽𑀮𑀜𑁆𑀘, 𑀢𑁂𑀦 ‘‘𑀤𑀼𑀲𑁆𑀲𑀦𑁆𑀢𑁂 𑀩𑀤𑁆𑀥𑀭𑀽𑀧𑀺𑀬𑀁 𑀯𑀺𑀬𑀸’’𑀢𑀺 𑀯𑀼𑀢𑁆𑀢𑀁, 𑀢𑀁 𑀢𑀤𑀢𑁆𑀣𑀦𑀺𑀬𑀫𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀁, 𑀬𑀣𑀸𑀯𑀙𑀸𑀤𑀺𑀢𑀁 𑀅𑀘𑁆𑀙𑀺𑀦𑁆𑀤𑀦𑀘𑀺𑀢𑁆𑀢𑁂𑀦 𑀲𑀘𑀺𑀢𑁆𑀢𑀓𑀁, 𑀯𑀘𑀻𑀓𑀫𑁆𑀫𑀁 𑀧𑀦 𑀓𑁂𑀯𑀮𑀁 𑀅𑀘𑁆𑀙𑀺𑀦𑁆𑀤𑀸𑀧𑁂𑀦𑁆𑀢𑀲𑁆𑀲𑁂𑀯 ‘‘𑀤𑁂𑀳𑀻’’𑀢𑀺 𑀩𑀮𑀓𑁆𑀓𑀸𑀭𑁂𑀦 𑀕𑀡𑁆𑀳𑀢𑁄𑀧𑀺 𑀯𑁂𑀤𑀺𑀢𑀩𑁆𑀩𑀁, 𑀢𑀁 𑀦 𑀬𑀼𑀢𑁆𑀢𑀁 ‘‘𑀅𑀦𑀸𑀧𑀢𑁆𑀢𑀺 𑀲𑁄 𑀯𑀸 𑀤𑁂𑀢𑀻’’𑀢𑀺 𑀯𑀘𑀦𑀢𑁄. ‘‘𑀢𑀼𑀝𑁆𑀞𑁄 𑀯𑀸 𑀤𑀼𑀝𑁆𑀞𑁄 𑀯𑀸 𑀤𑁂𑀢𑀺, 𑀅𑀦𑀸𑀧𑀢𑁆𑀢𑀺𑀬𑁂𑀯𑀸’’𑀢𑀺 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀯𑀘𑀦𑀢𑁄 𑀯𑀸𑀢𑀺 𑀘𑁂? 𑀦, 𑀉𑀪𑀬𑀢𑁆𑀣 𑀅𑀢𑁆𑀢𑀦𑁄 𑀭𑀼𑀘𑀺𑀬𑀸 𑀤𑀸𑀦𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀢𑁆𑀢𑀸, 𑀧𑀲𑀬𑁆𑀳𑀸𑀯𑀳𑀸𑀭𑁂 𑀅𑀦𑀸𑀧𑀢𑁆𑀢𑀺𑀧𑁆𑀧𑀲𑀗𑁆𑀕𑀢𑁄 𑀘. ‘‘𑀪𑀺𑀓𑁆𑀔𑀼𑀲𑁆𑀲 𑀲𑀸𑀫𑀁 𑀘𑀻𑀯𑀭𑀁 𑀤𑀢𑁆𑀯𑀸’𑀢𑀺 𑀧𑀸𑀴𑀺𑀯𑀘𑀦𑀢𑁄 𑀘 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬 𑀅𑀗𑁆𑀕𑀯𑀯𑀢𑁆𑀣𑀸𑀦𑁂 ‘𑀉𑀧𑀲𑀫𑁆𑀧𑀦𑁆𑀦𑀢𑀸’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀘 𑀉𑀪𑀬𑀢𑁆𑀣 𑀤𑀸𑀦𑀳𑀭𑀡𑁂𑀲𑀼 𑀪𑀺𑀓𑁆𑀔𑀼𑀪𑀸𑀯𑁄 𑀇𑀘𑁆𑀙𑀺𑀢𑀩𑁆𑀩𑁄𑀢𑀺 𑀤𑀻𑀧𑁂𑀢𑀻’’𑀢𑀺 𑀯𑀤𑀦𑁆𑀢𑀺, 𑀇𑀤𑀫𑀬𑀼𑀢𑁆𑀢𑀦𑁆𑀢𑀺 𑀦𑁄 𑀢𑀓𑁆𑀓𑁄𑀢𑀺 𑀆𑀘𑀭𑀺𑀬𑁄. 𑀓𑀲𑁆𑀫𑀸? 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀘𑀻𑀯𑀭𑀁 𑀤𑀢𑁆𑀯𑀸 𑀢𑀁 𑀉𑀧𑀲𑀫𑁆𑀧𑀦𑁆𑀦𑀓𑀸𑀮𑁂 𑀅𑀘𑁆𑀙𑀺𑀦𑁆𑀤𑀦𑁆𑀢𑀲𑁆𑀲 𑀅𑀦𑀸𑀧𑀢𑁆𑀢𑀺𑀧𑁆𑀧𑀲𑀗𑁆𑀕𑀢𑁄. ‘‘𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀘𑀻𑀯𑀭𑀁 𑀯𑀸 𑀅𑀜𑁆𑀜𑀁 𑀯𑀸 𑀧𑀭𑀺𑀓𑁆𑀔𑀸𑀭𑀁 𑀤𑀢𑁆𑀯𑀸…𑀧𑁂… 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀯𑀘𑀦𑀢𑁄 𑀤𑀼𑀓𑁆𑀓𑀝𑀁 𑀢𑀢𑁆𑀣 𑀳𑁄𑀢𑀻𑀢𑀺 𑀘𑁂? 𑀦𑀸𑀲𑀺𑀤𑁆𑀥𑀢𑁆𑀢𑀸, 𑀤𑀸𑀦𑀓𑀸𑀮𑁂 𑀏𑀯 𑀉𑀧𑀲𑀫𑁆𑀧𑀦𑁆𑀦𑀢𑀸 𑀧𑀫𑀸𑀡𑀦𑁆𑀢𑀺 𑀅𑀲𑀺𑀤𑁆𑀥𑀫𑁂𑀢𑀁 𑀅𑀝𑁆𑀞𑀓𑀣𑀸𑀬 𑀯𑀸 𑀧𑀸𑀴𑀺𑀬𑀸 𑀯𑀸 𑀬𑀼𑀢𑁆𑀢𑀺𑀢𑁄 𑀯𑀸, 𑀢𑀲𑁆𑀫𑀸 𑀢𑀁 𑀦 𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀅𑀦𑀼𑀧𑀲𑀫𑁆𑀧𑀦𑁆𑀦𑀲𑁆𑀲 𑀘𑀻𑀯𑀭𑀁 𑀤𑀢𑁆𑀯𑀸 𑀢𑀲𑁆𑀲𑁂𑀯 𑀅𑀦𑀼𑀧𑀲𑀫𑁆𑀧𑀦𑁆𑀦𑀓𑀸𑀮𑁂𑀬𑁂𑀯 𑀘𑀻𑀯𑀭𑀁 𑀅𑀘𑁆𑀙𑀺𑀦𑁆𑀤𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀁, 𑀉𑀧𑀲𑀫𑁆𑀧𑀦𑁆𑀦𑀓𑀸𑀮𑁂 𑀯𑀸 𑀤𑀢𑁆𑀯𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀓𑀸𑀮𑁂 𑀅𑀘𑁆𑀙𑀺𑀦𑁆𑀤𑀦𑁆𑀢𑀲𑁆𑀲 𑀤𑀼𑀓𑁆𑀓𑀝𑀦𑁆𑀢𑀺 𑀢𑀲𑁆𑀲 𑀯𑀘𑀦𑀲𑁆𑀲 𑀇𑀤𑀁 𑀯𑀺𑀓𑀧𑁆𑀧𑀦𑁆𑀢𑀭𑀜𑁆𑀘 𑀲𑀫𑁆𑀪𑀯𑀢𑀺, 𑀢𑀲𑁆𑀫𑀸 (𑀧𑀸𑀭𑀸. 𑁬𑁩𑁧 𑀆𑀤𑀬𑁄) 𑀯𑀺𑀓𑀧𑁆𑀧𑀦𑁆𑀢𑀭𑀲𑁆𑀲 𑀲𑀫𑁆𑀪𑀯𑀢𑁄 𑀘 𑀦 𑀬𑀼𑀢𑁆𑀢𑀁, 𑀬𑀲𑁆𑀫𑀸 𑀅𑀦𑀼𑀧𑀲𑀫𑁆𑀧𑀦𑁆𑀦𑀓𑀸𑀮𑁂 𑀤𑀢𑁆𑀯𑀸 𑀉𑀧𑀲𑀫𑁆𑀧𑀦𑁆𑀦𑀓𑀸𑀮𑁂 𑀅𑀘𑁆𑀙𑀺𑀦𑁆𑀤𑀦𑁆𑀢𑀲𑁆𑀲 𑀯𑀺𑀲𑀼𑀁 𑀤𑀼𑀓𑁆𑀓𑀝𑀁 𑀦 𑀧𑀜𑁆𑀜𑀢𑁆𑀢𑀁, 𑀢𑀲𑁆𑀫𑀸 𑀧𑀼𑀭𑀸𑀡𑀘𑀻𑀯𑀭𑀥𑁄𑀯𑀸𑀧𑀦𑀸𑀤𑀺𑀲𑀺𑀓𑁆𑀔𑀸𑀧𑀤𑁂𑀲𑀼 𑀯𑀺𑀬 𑀅𑀧𑀭𑀪𑀸𑀕𑁂 𑀉𑀧𑀲𑀫𑁆𑀧𑀦𑁆𑀦𑀢𑀸 𑀘𑁂𑀢𑁆𑀣 𑀧𑀫𑀸𑀡𑀁, 𑀢𑀲𑁆𑀫𑀸 ‘‘𑀉𑀧𑀲𑀫𑁆𑀧𑀦𑁆𑀦𑀢𑀸’’𑀢𑀺 𑀅𑀗𑁆𑀕𑁂𑀲𑀼 𑀯𑀼𑀢𑁆𑀢𑀢𑁆𑀢𑀸 𑀘 𑀢𑀁 𑀦 𑀬𑀼𑀢𑁆𑀢𑀦𑁆𑀢𑀺 𑀅𑀢𑁆𑀣𑁄. 𑀏𑀢𑁆𑀣 ‘‘𑀧𑀘𑁆𑀘𑀸𑀲𑀻𑀲𑀦𑁆𑀢𑀲𑁆𑀲𑁂𑀯 𑀤𑀸𑀦𑀫𑀥𑀺𑀧𑁆𑀧𑁂𑀢𑀁, 𑀦 𑀦𑀺𑀲𑁆𑀲𑀝𑁆𑀞𑀤𑀸𑀦’’𑀦𑁆𑀢𑀺 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁄 𑀯𑀤𑀢𑀺 𑀓𑀺𑀭, 𑀯𑀻𑀫𑀁𑀲𑀺𑀢𑀩𑁆𑀩𑀁.

𑀘𑀻𑀯𑀭𑀅𑀘𑁆𑀙𑀺𑀦𑁆𑀤𑀦𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁬. 𑀲𑀼𑀢𑁆𑀢𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁩𑁭. 𑀙𑀝𑁆𑀞𑁂 𑀓𑀺𑀜𑁆𑀘𑀸𑀧𑀺 ‘‘𑀲𑀸𑀫𑀁 𑀲𑀼𑀢𑁆𑀢𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸’’𑀢𑀺 𑀯𑀼𑀢𑁆𑀢𑀁, 𑀫𑀸𑀢𑀺𑀓𑀸𑀝𑁆𑀞𑀓𑀣𑀸𑀬𑀁 𑀧𑀦 ‘‘𑀘𑀻𑀯𑀭𑀢𑁆𑀣𑀸𑀬 𑀲𑀸𑀫𑀁 𑀯𑀺𑀜𑁆𑀜𑀢𑁆𑀢𑀁 𑀲𑀼𑀢𑁆𑀢’’𑀦𑁆𑀢𑀺 𑀅𑀯𑀢𑁆𑀯𑀸 𑀓𑁂𑀯𑀮𑀁 ‘‘𑀘𑀻𑀯𑀭𑀢𑁆𑀣𑀸𑀬 𑀯𑀺𑀜𑁆𑀜𑀸𑀧𑀺𑀢𑀲𑀼𑀢𑁆𑀢’’𑀦𑁆𑀢𑀺 𑀅𑀗𑁆𑀕𑁂𑀲𑀼 𑀯𑀼𑀢𑁆𑀢𑀢𑁆𑀢𑀸 𑀅𑀜𑁆𑀜𑁂𑀦 𑀘𑀻𑀯𑀭𑀢𑁆𑀣𑀸𑀬 𑀯𑀺𑀜𑁆𑀜𑀢𑁆𑀢𑀁 𑀲𑀼𑀢𑁆𑀢𑀫𑁆𑀧𑀺 𑀲𑀗𑁆𑀕𑀳𑀁 𑀕𑀘𑁆𑀙𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀲𑀸𑀫𑀦𑁆𑀢𑀺 𑀘𑁂𑀢𑁆𑀣 𑀓𑀲𑁆𑀲𑀘𑀺 𑀦𑀺𑀬𑀫𑀦𑀁. ‘‘𑀲𑀸𑀫𑀁 𑀯𑀺𑀜𑁆𑀜𑀸𑀧𑁂𑀢𑁆𑀯𑀸’’𑀢𑀺 𑀓𑀺𑀜𑁆𑀘𑀸𑀧𑀺 𑀯𑀼𑀢𑁆𑀢𑀁, 𑀢𑀣𑀸𑀧𑀺 ‘‘𑀲𑀸𑀫𑀁 𑀯𑀸𑀬𑀸𑀧𑁂𑀬𑁆𑀬𑀸’’𑀢𑀺 𑀅𑀢𑁆𑀢𑀦𑁄 𑀅𑀢𑁆𑀣𑀸𑀬 𑀯𑀸𑀬𑀸𑀧𑁂𑀬𑁆𑀬𑀸𑀢𑀺 𑀏𑀯𑀁 𑀲𑀫𑁆𑀩𑀦𑁆𑀥𑁄, 𑀅𑀢𑁆𑀣𑁄 𑀘 𑀯𑁂𑀤𑀺𑀢𑀩𑁆𑀩𑁄, 𑀧𑀸𑀴𑀺𑀬𑀁 𑀧𑀦 𑀆𑀲𑀦𑁆𑀦𑀧𑀤𑁂𑀦 𑀬𑁄𑀚𑀦𑀸 𑀓𑀢𑀸, 𑀢𑀲𑁆𑀫𑀸 𑀲𑀸𑀫𑀁 𑀯𑀺𑀜𑁆𑀜𑀢𑁆𑀢𑀁 𑀲𑀼𑀢𑁆𑀢𑀦𑁆𑀢𑀺 𑀅𑀜𑁆𑀜𑀯𑀺𑀜𑁆𑀜𑀢𑁆𑀢𑀁 𑀓𑀧𑁆𑀧𑀺𑀬𑀁 𑀆𑀧𑀚𑁆𑀚𑀢𑀺, 𑀳𑀢𑁆𑀣𑀓𑀫𑁆𑀫𑀬𑀸𑀘𑀦𑀯𑀲𑁂𑀦 𑀮𑀤𑁆𑀥𑀢𑀦𑁆𑀢𑀯𑀸𑀬𑁄𑀧𑀺 𑀓𑀧𑁆𑀧𑀺𑀬𑁄. 𑀯𑀺𑀓𑀧𑁆𑀧𑀦𑀼𑀧𑀕𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀁 𑀘𑁂, 𑀢𑀦𑁆𑀢𑁂 𑀯𑀻𑀢𑀁𑀬𑁂𑀯 𑀲𑀓𑀺𑀁 𑀅𑀥𑀺𑀝𑁆𑀞𑀸𑀢𑀩𑁆𑀩𑀁, 𑀧𑀼𑀦 𑀅𑀥𑀺𑀝𑁆𑀞𑀸𑀦𑀓𑀺𑀘𑁆𑀘𑀁 𑀦𑀢𑁆𑀣𑀺 𑀅𑀥𑀺𑀝𑁆𑀞𑀺𑀢𑁂𑀦 𑀏𑀓𑀻𑀪𑀸𑀯𑀽𑀧𑀕𑀫𑀦𑀢𑁄. ‘‘𑀲𑀘𑁂 𑀧𑀦 𑀧𑀭𑀺𑀘𑁆𑀙𑁂𑀤𑀁 𑀤𑀲𑁆𑀲𑁂𑀢𑁆𑀯𑀸𑀯 𑀘𑀺𑀦𑀲𑀸𑀝𑀓𑀁 𑀯𑀺𑀬, 𑀅𑀦𑁆𑀢𑀭𑀦𑁆𑀢𑀭𑀸 𑀅𑀥𑀺𑀝𑁆𑀞𑀺𑀢𑀁 𑀳𑁄𑀢𑀺, 𑀧𑀼𑀦 𑀅𑀥𑀺𑀝𑁆𑀞𑀸𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. ‘‘𑀧𑀝𑀺𑀮𑀸𑀪𑁂𑀦𑀸𑀢𑀺 𑀯𑀘𑀦𑁂𑀦 𑀯𑀸𑀬𑀸𑀧𑁂𑀢𑁆𑀯𑀸 𑀞𑀧𑁂𑀲𑁆𑀲𑀸𑀫𑀻𑀢𑀺𑀆𑀤𑀺 𑀏𑀓𑀲𑁆𑀫𑀺𑀁 𑀅𑀦𑁆𑀢𑁄𑀕𑀥𑀁 𑀳𑁄𑀢𑀻’’𑀢𑀺 𑀯𑀤𑀦𑁆𑀢𑀺.

𑀲𑀼𑀢𑁆𑀢𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁭. 𑀫𑀳𑀸𑀧𑁂𑀲𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁪𑁨. 𑀯𑀺𑀲𑀺𑀝𑁆𑀞𑀁 𑀓𑀧𑁆𑀧𑀜𑁆𑀘 𑀢𑀲𑁆𑀲 𑀯𑀘𑀦𑁂𑀦 𑀯𑀺𑀲𑀺𑀝𑁆𑀞𑀁 𑀓𑀢𑀜𑁆𑀘 𑀧𑀫𑀸𑀡𑀁, 𑀦 𑀆𑀫𑀺𑀲𑀤𑀸𑀦𑀁. 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 ‘‘𑀘𑀻𑀯𑀭’’𑀦𑁆𑀢𑀺 𑀉𑀤𑁆𑀥𑀭𑀺𑀢𑁆𑀯𑀸 𑀯𑀺𑀪𑀸𑀕𑁄 𑀯𑀼𑀢𑁆𑀢𑁄, 𑀢𑀁 𑀦 𑀲𑀫𑁂𑀢𑀻𑀢𑀺.

𑀫𑀳𑀸𑀧𑁂𑀲𑀓𑀸𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁮. 𑀅𑀘𑁆𑀘𑁂𑀓𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁪𑁬. ‘‘𑀅𑀦𑀼𑀚𑀸𑀦𑀸𑀫𑀺, 𑀪𑀺𑀓𑁆𑀔𑀯𑁂, 𑀅𑀘𑁆𑀘𑁂𑀓𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑀼’’𑀦𑁆𑀢𑀺, ‘‘𑀬𑀸𑀯 𑀧𑀯𑀸𑀭𑀡𑀸 𑀧𑀯𑀸𑀭𑀺𑀢𑀸’’𑀢𑀺 𑀘 𑀬𑀁 𑀯𑀼𑀢𑁆𑀢𑀁, 𑀢𑁂 𑀧𑀦 𑀪𑀺𑀓𑁆𑀔𑀽 𑀢𑀲𑁆𑀲 𑀯𑀘𑀦𑀲𑁆𑀲 𑀅𑀢𑁆𑀣𑀁 𑀫𑀺𑀘𑁆𑀙𑀸 𑀕𑀳𑁂𑀢𑁆𑀯𑀸 𑀅𑀘𑁆𑀘𑁂𑀓𑀘𑀻𑀯𑀭𑀁 𑀦𑀺𑀓𑁆𑀔𑀺𑀧𑀦𑁆𑀢𑀸 𑀘𑀻𑀯𑀭𑀓𑀸𑀮𑀲𑀫𑀬𑀁 𑀅𑀢𑀺𑀓𑁆𑀓𑀸𑀫𑁂𑀲𑀼𑀁. 𑀓𑀺𑀫𑀺𑀤𑀁 𑀯𑀺𑀪𑀢𑁆𑀢𑀁, 𑀉𑀤𑀸𑀳𑀼 𑀅𑀯𑀺𑀪𑀢𑁆𑀢𑀦𑁆𑀢𑀺? 𑀯𑀺𑀪𑀢𑁆𑀢𑀁, 𑀧𑀼𑀕𑁆𑀕𑀮𑀺𑀓𑀁 𑀯𑀸. 𑀢𑁂𑀦𑁂𑀯 𑀧𑀭𑀢𑁄 ‘‘𑀅𑀫𑁆𑀳𑀸𑀓𑀁, 𑀆𑀯𑀼𑀲𑁄, 𑀅𑀘𑁆𑀘𑁂𑀓𑀘𑀻𑀯𑀭𑀸𑀦𑀻’’𑀢𑀺 𑀯𑀼𑀢𑁆𑀢𑀁, 𑀅𑀯𑀺𑀪𑀢𑁆𑀢𑀁 𑀧𑀦 𑀲𑀗𑁆𑀖𑀺𑀓𑀢𑁆𑀢𑀸 𑀦 𑀓𑀲𑁆𑀲𑀘𑀺 𑀦𑀺𑀲𑁆𑀲𑀕𑁆𑀕𑀺𑀬𑀁 𑀓𑀭𑁄𑀢𑀺.

𑀅𑀧𑀺𑀘 ‘‘𑀅𑀘𑁆𑀘𑁂𑀓𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑀼’’𑀦𑁆𑀢𑀺 𑀇𑀫𑀺𑀦𑀸 𑀲𑀸𑀫𑀜𑁆𑀜𑀯𑀘𑀦𑁂𑀦 𑀯𑀲𑁆𑀲𑀽𑀧𑀦𑀸𑀬𑀺𑀓𑀤𑀺𑀯𑀲𑀢𑁄 𑀧𑀝𑁆𑀞𑀸𑀬, 𑀧𑀺𑀝𑁆𑀞𑀺𑀲𑀫𑀬𑀢𑁄 𑀧𑀝𑁆𑀞𑀸𑀬 𑀯𑀸 𑀬𑀸𑀯 𑀧𑀯𑀸𑀭𑀡𑀸 𑀦𑀺𑀓𑁆𑀔𑀺𑀧𑀺𑀢𑀼𑀁 𑀯𑀝𑁆𑀝𑀢𑀺 𑀏𑀯 𑀲𑀗𑁆𑀖𑀺𑀓𑀢𑁆𑀢𑀸, 𑀧𑀼𑀕𑁆𑀕𑀮𑀺𑀓𑀫𑁆𑀧𑀺 ‘‘𑀯𑀲𑁆𑀲𑀁𑀯𑀼𑀢𑁆𑀣𑀓𑀸𑀮𑁂 𑀕𑀡𑁆𑀳𑀣𑀸’’𑀢𑀺 𑀤𑀺𑀦𑁆𑀦𑀢𑁆𑀢𑀸. 𑀢𑀸𑀤𑀺𑀲𑀜𑁆𑀳𑀺 𑀬𑀸𑀯 𑀯𑀲𑁆𑀲𑀁𑀯𑀼𑀢𑁆𑀣𑁄 𑀳𑁄𑀢𑀺, 𑀢𑀸𑀯 𑀦 𑀢𑀲𑁆𑀲𑁂𑀯, 𑀤𑀸𑀬𑀓𑀲𑁆𑀲 𑀲𑀦𑁆𑀢𑀓𑀁 𑀳𑁄𑀢𑀺, 𑀢𑀣𑀸 𑀇𑀢𑁄 𑀢𑀢𑀺𑀬𑀯𑀲𑁆𑀲𑁂, 𑀘𑀢𑀼𑀢𑁆𑀣𑀯𑀲𑁆𑀲𑁂 𑀯𑀸 ‘‘𑀧𑀯𑀸𑀭𑀡𑀸𑀬 𑀕𑀡𑁆𑀳𑀣𑀸’’𑀢𑀺𑀆𑀤𑀺𑀦𑀸 𑀤𑀺𑀦𑁆𑀦𑀫𑁆𑀧𑀺 𑀦𑀺𑀓𑁆𑀔𑀺𑀧𑀺𑀢𑁆𑀯𑀸 𑀬𑀣𑀸𑀤𑀸𑀦𑀫𑁂𑀯 𑀕𑀳𑁂𑀢𑀩𑁆𑀩𑀁. 𑀅𑀬𑀫𑀢𑁆𑀣𑁄 𑀅𑀝𑁆𑀞𑀓𑀣𑀸𑀬𑀁 (𑀧𑀸𑀭𑀸. 𑀅𑀝𑁆𑀞. 𑁨.𑁬𑁪𑁬-𑁯 𑀆𑀤𑀬𑁄) 𑀧𑀸𑀓𑀝𑁄. 𑀢𑀸𑀦𑀺 𑀘𑀻𑀯𑀭𑀓𑀸𑀮𑀲𑀫𑀬𑀸𑀢𑀺𑀓𑁆𑀓𑀫𑁂 𑀦 𑀦𑀺𑀲𑁆𑀲𑀕𑁆𑀕𑀺𑀬𑀸𑀦𑀻𑀢𑀺 𑀘𑁂? 𑀦, 𑀉𑀤𑁆𑀤𑀺𑀲𑁆𑀲 𑀤𑀺𑀦𑁆𑀦𑀢𑁆𑀢𑀸. 𑀬𑀲𑁆𑀫𑀸 𑀅𑀬𑀁 𑀲𑀫𑀬𑁄 ‘‘𑀓𑀸𑀮𑁂𑀧𑀺 𑀆𑀤𑀺𑀲𑁆𑀲 𑀤𑀺𑀦𑁆𑀦’’𑀦𑁆𑀢𑀺 𑀏𑀢𑁆𑀣 ‘‘𑀓𑀸𑀮𑁄’’𑀢𑀺 𑀆𑀕𑀢𑁄, 𑀕𑀡𑀪𑁄𑀚𑀦𑀲𑀺𑀓𑁆𑀔𑀸𑀧𑀤𑀸𑀤𑀻𑀲𑀼 ‘‘𑀲𑀫𑀬𑁄’’𑀢𑁆𑀯𑁂𑀯 𑀆𑀕𑀢𑁄, 𑀢𑀲𑁆𑀫𑀸 𑀇𑀥 𑀢𑁂𑀲𑀁 𑀏𑀓𑀢𑁆𑀣𑀢𑀸𑀤𑀲𑁆𑀲𑀦𑀢𑁆𑀣𑀁 𑀏𑀓𑀢𑁄 ‘‘𑀘𑀻𑀯𑀭𑀓𑀸𑀮𑀲𑀫𑀬𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀫𑀸𑀢𑀺𑀓𑀸𑀬𑀁 𑀧𑀦𑁂𑀢𑁆𑀣 𑀢𑀸𑀤𑀺𑀲𑀁 𑀘𑀻𑀯𑀭𑀁 𑀅𑀢𑁆𑀢𑀦𑁄 𑀲𑀦𑁆𑀢𑀓𑀪𑀸𑀯𑀁 𑀉𑀧𑀕𑀢𑀁 𑀧𑀼𑀕𑁆𑀕𑀮𑀺𑀓𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀁, 𑀢𑁂𑀦𑁂𑀯𑀸𑀳 ‘‘𑀪𑀺𑀓𑁆𑀔𑀼𑀦𑁄 𑀧𑀦𑁂𑀯 𑀅𑀘𑁆𑀘𑁂𑀓𑀘𑀻𑀯𑀭𑀁 𑀉𑀧𑁆𑀧𑀚𑁆𑀚𑁂𑀬𑁆𑀬𑀸’’𑀢𑀺. 𑀅𑀢𑁆𑀢𑀦𑁄 𑀓𑀼𑀝𑀺𑀬𑀸 𑀯𑀲𑁆𑀲𑀁𑀯𑀼𑀢𑁆𑀣𑀲𑁆𑀲 𑀪𑀺𑀓𑁆𑀔𑀼𑀦𑁄 𑀳𑀺 𑀤𑀸𑀢𑀼𑀁 𑀅𑀮𑀪𑀦𑁆𑀢𑁄 𑀅𑀦𑁆𑀢𑁄𑀯𑀲𑁆𑀲𑁂 𑀏𑀯 𑀤𑀸𑀦𑀓𑀺𑀘𑁆𑀘𑀁 𑀧𑀭𑀺𑀦𑀺𑀝𑁆𑀞𑀸𑀧𑁂𑀢𑁆𑀯𑀸 𑀕𑀘𑁆𑀙𑀢𑀺, 𑀢𑀣𑀸 𑀲𑀗𑁆𑀖𑀲𑁆𑀲. 𑀢𑀲𑁆𑀫𑀸 𑀇𑀤𑀁 𑀅𑀘𑁆𑀘𑁂𑀓𑀘𑀻𑀯𑀭𑀁 𑀅𑀢𑁆𑀣𑀺 𑀉𑀧𑁆𑀧𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀲𑀗𑁆𑀖𑀲𑁆𑀲 𑀯𑀸 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀲𑀦𑁆𑀢𑀓𑀪𑀸𑀯𑀁 𑀉𑀧𑀕𑀘𑁆𑀙𑀦𑁆𑀢𑀁, 𑀬𑀁 𑀦 𑀯𑀲𑁆𑀲𑀸𑀯𑀸𑀲𑀺𑀓𑀪𑀸𑀯𑁂𑀦 𑀤𑀺𑀦𑁆𑀦𑀁, 𑀅𑀢𑁆𑀣𑀺 𑀉𑀧𑁆𑀧𑀦𑁆𑀦𑀓𑀸𑀮𑀢𑁄 𑀧𑀝𑁆𑀞𑀸𑀬 𑀅𑀦𑀼𑀧𑀕𑀦𑁆𑀢𑁆𑀯𑀸 𑀯𑀲𑁆𑀲𑀁𑀯𑀼𑀢𑁆𑀣𑀓𑀸𑀮𑁂𑀬𑁂𑀯 𑀧𑀼𑀕𑁆𑀕𑀮𑀲𑁆𑀲 𑀯𑀸 𑀲𑀗𑁆𑀖𑀲𑁆𑀲 𑀯𑀸 𑀉𑀧𑀕𑀘𑁆𑀙𑀦𑁆𑀢𑀁, 𑀬𑀁 𑀯𑀲𑁆𑀲𑀸𑀯𑀸𑀲𑀺𑀓𑀪𑀸𑀯𑁂𑀦 𑀉𑀧𑁆𑀧𑀚𑁆𑀚𑀺𑀢𑁆𑀯𑀸 𑀲𑀫𑀬𑁂 𑀤𑀺𑀦𑁆𑀦𑀁, 𑀅𑀢𑁆𑀣𑀺 𑀲𑀫𑀬𑁂 𑀤𑀺𑀦𑁆𑀦𑀫𑁆𑀧𑀺 𑀧𑀼𑀕𑁆𑀕𑀮𑀲𑁆𑀲 𑀲𑀦𑁆𑀢𑀓𑀪𑀸𑀯𑀁 𑀅𑀦𑀼𑀧𑀕𑀘𑁆𑀙𑀦𑁆𑀢𑀁, 𑀲𑀗𑁆𑀖𑀲𑀦𑁆𑀢𑀓𑀪𑀸𑀯𑀁 𑀯𑀸 𑀤𑀸𑀬𑀓𑀲𑀦𑁆𑀢𑀓𑀪𑀸𑀯𑀁 𑀯𑀸 𑀉𑀧𑀕𑀘𑁆𑀙𑀦𑁆𑀢𑀁, 𑀈𑀤𑀺𑀲𑀁 𑀲𑀦𑁆𑀥𑀸𑀬 ‘‘𑀲𑀜𑁆𑀜𑀸𑀡𑀁 𑀓𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑀩𑁆𑀩’’𑀦𑁆𑀢𑀺 𑀯𑀼𑀢𑁆𑀢𑀁. 𑀇𑀤𑀁 𑀅𑀢𑀺𑀭𑁂𑀓𑀲𑀁𑀯𑀘𑁆𑀙𑀭𑀫𑁆𑀧𑀺 𑀦𑀺𑀓𑁆𑀔𑀺𑀧𑀺𑀢𑀼𑀁 𑀮𑀪𑀢𑀺 𑀅𑀢𑁆𑀢𑀦𑁄 𑀲𑀦𑁆𑀢𑀓𑀪𑀸𑀯𑀁 𑀅𑀦𑀼𑀧𑀕𑀢𑀢𑁆𑀢𑀸, 𑀢𑀲𑁆𑀫𑀸 ‘‘𑀤𑀲𑀸𑀳𑀸𑀦𑀸𑀕𑀢’’𑀦𑁆𑀢𑀺 𑀇𑀢𑁄 𑀅𑀜𑁆𑀜𑀁 𑀲𑀦𑁆𑀥𑀸𑀬 𑀯𑀼𑀢𑁆𑀢𑀦𑁆𑀢𑀺 𑀲𑀺𑀤𑁆𑀥𑀫𑁂𑀢𑀦𑁆𑀢𑀺. 𑀤𑀲𑀸𑀳𑀢𑁄 𑀧𑀼𑀭𑁂𑀢𑀭𑀁 𑀮𑀪𑀺𑀢𑁆𑀯𑀸 𑀬𑀸𑀯 𑀧𑀯𑀸𑀭𑀡𑀸 𑀦𑀺𑀓𑁆𑀔𑀺𑀧𑀺𑀢𑀼𑀁 𑀦 𑀮𑀪𑀢𑀺, 𑀢𑀲𑁆𑀫𑀸 𑀲𑀓𑀪𑀸𑀯𑀽𑀧𑀕𑀢𑀫𑁂𑀯 𑀅𑀥𑀺𑀝𑁆𑀞𑀸𑀢𑀩𑁆𑀩𑀁, 𑀢𑀁𑀬𑁂𑀯 𑀲𑀦𑁆𑀥𑀸𑀬 ‘‘𑀤𑀲𑀸𑀳𑀸𑀦𑀸𑀕𑀢’’𑀦𑁆𑀢𑀺 𑀯𑀼𑀢𑁆𑀢𑀁, 𑀬𑀢𑁄 ‘‘𑀅𑀦𑁆𑀢𑁄𑀲𑀫𑀬𑁂 𑀅𑀥𑀺𑀝𑁆𑀞𑁂𑀢𑀺, 𑀯𑀺𑀓𑀧𑁆𑀧𑁂𑀢𑀻’’𑀢𑀺 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 𑀯𑀼𑀢𑁆𑀢𑀁. 𑀲𑀜𑁆𑀜𑀸𑀡𑀁 𑀓𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀓𑀁 𑀧𑀦 𑀧𑀭𑀲𑁆𑀲 𑀤𑀸𑀢𑀩𑁆𑀩𑀢𑀸𑀬 𑀲𑀓𑀪𑀸𑀯𑀁 𑀅𑀦𑀼𑀧𑀕𑀢𑀁, 𑀦 𑀳𑀺 𑀢𑀁 𑀲𑀦𑁆𑀥𑀸𑀬 ‘‘𑀅𑀥𑀺𑀝𑁆𑀞𑁂𑀢𑀺, 𑀯𑀺𑀓𑀧𑁆𑀧𑁂𑀢𑀻’’𑀢𑀺 𑀲𑀓𑁆𑀓𑀸 𑀯𑀢𑁆𑀢𑀼𑀁, 𑀦 𑀘 𑀢𑀁 𑀇𑀫𑀲𑁆𑀫𑀺𑀁 𑀅𑀢𑁆𑀣𑁂 𑀦𑀺𑀲𑁆𑀲𑀕𑁆𑀕𑀺𑀬𑀁 𑀳𑁄𑀢𑀺 𑀲𑀗𑁆𑀖𑀲𑁆𑀲 𑀦𑀺𑀲𑁆𑀲𑀕𑁆𑀕𑀺𑀬𑀸𑀪𑀸𑀯𑀢𑁄, 𑀅𑀝𑁆𑀞𑀓𑀣𑀸𑀬𑀫𑁆𑀧𑀺 𑀅𑀬𑀫𑀢𑁆𑀣𑁄 𑀲𑀼𑀝𑁆𑀞𑀼 𑀧𑀸𑀓𑀝𑁄𑀯. 𑀓𑀢𑀫𑀁 𑀲𑀜𑁆𑀜𑀸𑀡𑀁 𑀓𑀢𑁆𑀯𑀸 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀘𑁂? 𑀧𑀭𑀲𑀦𑁆𑀢𑀓𑀁 𑀘𑀻𑀯𑀭𑀁 𑀲𑀗𑁆𑀖𑀺𑀓𑀫𑁂𑀯 𑀳𑁄𑀢𑀺, 𑀢𑀢𑁄 ‘‘𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀲𑀼𑀔𑀁 𑀤𑀸𑀢𑀼𑀁 𑀪𑀯𑀺𑀲𑁆𑀲𑀢𑀻’’𑀢𑀺 𑀇𑀫𑀺𑀦𑀸 𑀳𑀺 𑀧𑀭𑀲𑁆𑀲 𑀲𑀦𑁆𑀢𑀓𑀪𑀸𑀯𑁄 𑀤𑀲𑁆𑀲𑀺𑀢𑁄.

‘‘𑀢𑀢𑁄 𑀧𑀭𑀁 𑀏𑀓𑀤𑀺𑀯𑀲𑀫𑁆𑀧𑀺 𑀧𑀭𑀺𑀳𑀸𑀭𑁄 𑀦𑀢𑁆𑀣𑀻𑀢𑀺 𑀤𑀲𑀸𑀳𑀧𑀭𑀫𑀢𑁄 𑀉𑀤𑁆𑀥𑀁 𑀅𑀦𑀼𑀧𑀕𑀢𑀢𑁆𑀢𑀸’’𑀢𑀺 𑀮𑀺𑀔𑀺𑀢𑀁, 𑀇𑀢𑁄 𑀲𑀫𑀬𑀢𑁄 𑀉𑀤𑁆𑀥𑀫𑁂𑀯 𑀤𑀲𑀸𑀳𑀲𑁆𑀲 𑀅𑀦𑀼𑀧𑀕𑀢𑀢𑁆𑀢𑀸 𑀲𑀫𑀬𑀢𑁄 𑀧𑀭𑀁 𑀤𑀲𑀸𑀳𑀁 𑀦 𑀮𑀪𑀢𑀻𑀢𑀺 𑀓𑀺𑀭𑀲𑁆𑀲 𑀅𑀥𑀺𑀧𑁆𑀧𑀸𑀬𑁄. ‘‘𑀏𑀢𑀁 𑀧𑀭𑀺𑀳𑀸𑀭𑀁 𑀮𑀪𑀢𑀺𑀬𑁂𑀯𑀸’’𑀢𑀺 𑀏𑀢𑁆𑀣 ‘‘𑀏𑀓𑀸𑀤𑀲𑀫𑀁 𑀅𑀭𑀼𑀡𑀁 𑀘𑀻𑀯𑀭𑀫𑀸𑀲𑁂 𑀉𑀝𑁆𑀞𑁂𑀢𑀻’’𑀢𑀺 𑀓𑀸𑀭𑀡𑀁 𑀮𑀺𑀔𑀺𑀢𑀁. 𑀅𑀦𑀼𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀅𑀦𑀥𑀺𑀝𑁆𑀞𑀳𑀺𑀢𑁆𑀯𑀸 𑀏𑀓𑀸𑀤𑀲𑀤𑀺𑀯𑀲𑁂 𑀦𑀺𑀓𑁆𑀔𑀺𑀧𑀺𑀢𑀼𑀁 𑀮𑀪𑀢𑀻’𑀢𑀺 𑀯𑀤𑀦𑁆𑀢𑁄 𑀪𑀕𑀯𑀸 𑀇𑀢𑀭𑀫𑁆𑀧𑀺 𑀅𑀦𑀘𑁆𑀘𑁂𑀓𑀘𑀻𑀯𑀭𑀸𑀤𑀺𑀁 𑀅𑀦𑀼𑀚𑀸𑀦𑀸𑀢𑀺, 𑀅𑀘𑁆𑀘𑁂𑀓𑀘𑀻𑀯𑀭𑀫𑀼𑀔𑁂𑀦𑀸𑀢𑀺 𑀅𑀧𑀭𑁂’’𑀢𑀺 𑀯𑀼𑀢𑁆𑀢𑀁. 𑀏𑀢𑁆𑀣 𑀓𑀢𑀭𑀁 𑀲𑀼𑀪𑀸𑀲𑀺𑀢𑀁? 𑀉𑀪𑀬𑀫𑁆𑀧𑀻𑀢𑀺 𑀏𑀓𑁂. 𑀓𑀣𑀁? 𑀧𑀞𑀫𑀁 ‘‘𑀅𑀘𑁆𑀘𑁂𑀓𑀘𑀻𑀯𑀭𑀲𑁆𑀲 𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀤𑀲𑀤𑀺𑀯𑀲𑀸𑀥𑀺𑀓𑁄 𑀫𑀸𑀲𑁄, 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀤𑀲𑀤𑀺𑀯𑀲𑀸𑀥𑀺𑀓𑀸 𑀧𑀜𑁆𑀘𑀫𑀸𑀲𑀸’’𑀢𑀺 𑀇𑀫𑀺𑀦𑀸 𑀲𑀫𑁂𑀢𑀺, 𑀅𑀦𑀼𑀕𑀡𑁆𑀞𑀺𑀧𑀤𑀮𑀤𑁆𑀥𑀺𑀬𑀸 𑀳𑀺 𑀏𑀢𑁆𑀣 ‘‘𑀏𑀓𑀸𑀤𑀲𑀤𑀺𑀯𑀲𑀸𑀥𑀺𑀓𑁄’’𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺, 𑀤𑀼𑀢𑀺𑀬𑀁 ‘‘𑀤𑀲𑀸𑀳𑀸𑀦𑀸𑀕𑀢𑀦𑁆𑀢𑀺…𑀧𑁂… 𑀤𑀲𑀸𑀳𑁂𑀦 𑀅𑀲𑀫𑁆𑀧𑀢𑁆𑀢𑀸𑀢𑀺 𑀅𑀢𑁆𑀣𑁄’’𑀢𑀺 𑀇𑀫𑀺𑀦𑀸 𑀲𑀫𑁂𑀢𑀺. 𑀇𑀫𑀲𑁆𑀲 𑀦𑀬𑀲𑁆𑀲 𑀯𑀲𑁂𑀦 ‘‘𑀧𑀜𑁆𑀘𑀫𑀺𑀢𑁄 𑀧𑀝𑁆𑀞𑀸𑀬 𑀉𑀧𑁆𑀧𑀦𑁆𑀦𑀲𑁆𑀲 𑀘𑀻𑀯𑀭𑀲𑁆𑀲 𑀦𑀺𑀥𑀸𑀦𑀓𑀸𑀮𑁄 𑀤𑀲𑁆𑀲𑀺𑀢𑁄 𑀳𑁄𑀢𑀻’’𑀢𑀺 𑀧𑀸𑀞𑁄 𑀬𑀼𑀚𑁆𑀚𑀢𑀺. 𑀢𑀣𑀸 𑀕𑀡𑁆𑀞𑀺𑀧𑀤𑀮𑀤𑁆𑀥𑀺𑀬𑀸 ‘‘𑀦𑀯𑀸𑀳𑀸𑀦𑀸𑀕𑀢𑀁 𑀓𑀢𑁆𑀢𑀺𑀓𑀢𑁂𑀫𑀸𑀲𑀺𑀓𑀧𑀼𑀡𑁆𑀡𑀫’’𑀦𑁆𑀢𑀺 𑀯𑀢𑁆𑀢𑀩𑁆𑀩𑀢𑀁 𑀆𑀧𑀚𑁆𑀚𑀢𑀺, 𑀢𑀲𑁆𑀲 𑀯𑀲𑁂𑀦 ‘‘𑀓𑀸𑀫𑀜𑁆𑀘𑁂𑀲 𑀤𑀲𑀸𑀳𑀧𑀭𑀫𑀁 𑀅𑀢𑀺𑀭𑁂𑀓𑀘𑀻𑀯𑀭𑀁 𑀥𑀸𑀭𑁂𑀢𑀩𑁆𑀩𑀦𑁆𑀢𑀺 𑀇𑀫𑀺𑀦𑀸𑀯 𑀲𑀺𑀤𑁆𑀥𑁄, 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀯𑀲𑁂𑀦 𑀧𑀦 𑀅𑀧𑀼𑀩𑁆𑀩𑀁 𑀯𑀺𑀬 𑀅𑀢𑁆𑀣𑀁 𑀤𑀲𑁆𑀲𑁂𑀢𑁆𑀯𑀸 𑀲𑀺𑀓𑁆𑀔𑀸𑀧𑀤𑀁 𑀞𑀧𑀺𑀢’’𑀦𑁆𑀢𑀺 𑀅𑀬𑀁 𑀧𑀸𑀞𑁄 𑀬𑀼𑀚𑁆𑀚𑀢𑀺. 𑀓𑁄 𑀧𑀦𑁂𑀢𑁆𑀣 𑀲𑀸𑀭𑁄𑀢𑀺? 𑀬𑁄 𑀧𑀘𑁆𑀙𑀸 𑀯𑀼𑀢𑁆𑀢𑁄, 𑀲𑁄𑀯 𑀲𑀸𑀭𑁄. 𑀢𑁂𑀦𑁂𑀯 𑀅𑀝𑁆𑀞𑀓𑀣𑀸𑀘𑀭𑀺𑀬𑁂𑀦 ‘‘𑀧𑀜𑁆𑀘𑀫𑀺𑀢𑁄 𑀧𑀝𑁆𑀞𑀸𑀬𑀸’’𑀢𑀺 𑀯𑀼𑀢𑁆𑀢𑀁. 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂𑀳𑀺 𑀅𑀝𑁆𑀞𑀓𑀣𑀸𑀬 𑀘 𑀲𑀤𑁆𑀥𑀺𑀁 𑀲𑀁𑀲𑀦𑁆𑀤𑀦𑀢𑁄, ‘‘𑀤𑀲𑀸𑀳𑀸𑀦𑀸𑀕𑀢’’𑀦𑁆𑀢𑀺 𑀧𑀸𑀴𑀺𑀬𑀸 𑀲𑀁𑀲𑀦𑁆𑀤𑀦𑀢𑁄 𑀘 𑀏𑀢𑁆𑀣 𑀕𑀡𑁆𑀞𑀺𑀧𑀤𑀮𑀤𑁆𑀥𑀺𑀧𑀺 𑀧𑀸𑀴𑀺𑀬𑀸 𑀲𑀫𑁂𑀢𑀺.

𑀓𑀣𑀁? 𑀬𑀲𑁆𑀫𑀸 𑀧𑀯𑀸𑀭𑀡𑀸𑀤𑀺𑀯𑀲𑁂 𑀅𑀭𑀼𑀡𑀼𑀕𑁆𑀕𑀫𑀦𑁂 𑀪𑀺𑀓𑁆𑀔𑀼 𑀯𑀲𑁆𑀲𑀁𑀯𑀼𑀢𑁆𑀣𑁄 𑀳𑁄𑀢𑀺, 𑀢𑀲𑁆𑀫𑀸 𑀇𑀫𑀺𑀦𑀸 𑀤𑀲𑀫𑁂𑀦 𑀅𑀳𑁂𑀦 𑀲𑀤𑁆𑀥𑀺𑀁 𑀙𑀝𑁆𑀞𑀺𑀢𑁄 𑀧𑀝𑁆𑀞𑀸𑀬 𑀦𑀯𑀤𑀺𑀯𑀲𑀸 𑀤𑀲 𑀅𑀳𑀸𑀦𑀻𑀢𑀺 𑀤𑀲𑀸𑀳𑀁, 𑀢𑁂𑀦 𑀤𑀲𑀸𑀳𑁂𑀦, 𑀲𑀳𑀬𑁄𑀕𑀢𑁆𑀣𑁂 𑀓𑀭𑀡𑀯𑀘𑀦𑀁. 𑀓𑀢𑁆𑀢𑀺𑀓𑀢𑁂𑀫𑀸𑀲𑀺𑀓𑀧𑀼𑀡𑁆𑀡𑀫𑀸 𑀘𑀻𑀯𑀭𑀲𑀫𑀬𑀁 𑀅𑀲𑀫𑁆𑀧𑀢𑁆𑀢𑀸𑀢𑀺 𑀓𑀢𑁆𑀯𑀸 ‘‘𑀅𑀦𑀸𑀕𑀢𑀸’’𑀢𑀺 𑀯𑀼𑀘𑁆𑀘𑀢𑀺. 𑀬𑀣𑀸 𑀅𑀧𑀭𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸𑀬 𑀯𑀲𑁆𑀲𑀺𑀓𑀲𑀸𑀝𑀺𑀓𑀁 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀯𑀺𑀓𑀧𑁆𑀧𑁂𑀦𑁆𑀢𑁄 ‘‘𑀘𑀸𑀢𑀼𑀫𑀸𑀲𑀁 𑀅𑀥𑀺𑀝𑁆𑀞𑀸𑀢𑀼𑀁 𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀏𑀯𑀁𑀲𑀫𑁆𑀧𑀤𑀫𑀺𑀤𑀦𑁆𑀢𑀺. 𑀏𑀢𑁆𑀣 𑀯𑀼𑀘𑁆𑀘𑀢𑀻𑀢𑀺 𑀘𑁂? 𑀦, 𑀇𑀫𑀲𑁆𑀲 𑀦𑀺𑀧𑁆𑀧𑀬𑁄𑀚𑀦𑀪𑀸𑀯𑀧𑁆𑀧𑀲𑀗𑁆𑀕𑀢𑁄. 𑀅𑀘𑁆𑀘𑁂𑀓𑀘𑀻𑀯𑀭𑀧𑀝𑀺𑀕𑁆𑀕𑀳𑀡𑀓𑀸𑀮𑀁 𑀦𑀺𑀬𑀫𑀺𑀢𑀦𑁆𑀢𑀺 𑀘𑁂? 𑀦, ‘‘𑀙𑀝𑁆𑀞𑀺𑀢𑁄 𑀧𑀝𑁆𑀞𑀸𑀬 𑀉𑀧𑁆𑀧𑀦𑁆𑀦𑀘𑀻𑀯𑀭𑀁 𑀅𑀘𑁆𑀘𑁂𑀓𑀫𑁂𑀯 𑀦 𑀳𑁄𑀢𑀺. 𑀧𑀞𑀫𑀓𑀣𑀺𑀦𑁂𑀦 𑀲𑀺𑀤𑁆𑀥𑀢𑁆𑀢𑀸’’𑀢𑀺 𑀧𑁄𑀭𑀸𑀡𑀝𑁆𑀞𑀓𑀣𑀸𑀕𑀡𑁆𑀞𑀺𑀧𑀤𑁂𑀲𑀼 𑀯𑀼𑀢𑁆𑀢𑀢𑁆𑀢𑀸 𑀢𑀢𑁄 𑀉𑀧𑀭𑀺 ‘‘𑀅𑀘𑁆𑀘𑁂𑀓𑀘𑀻𑀯𑀭’’𑀦𑁆𑀢𑀺 𑀯𑀼𑀘𑁆𑀘𑀢𑀺, 𑀧𑀝𑀺𑀕𑁆𑀕𑀡𑁆𑀳𑀦𑁆𑀢𑀲𑁆𑀲 𑀆𑀧𑀢𑁆𑀢𑀺𑀲𑀗𑁆𑀕𑀳𑁄 𑀘. 𑀦 𑀘 𑀲𑀸 𑀆𑀧𑀢𑁆𑀢𑀺 𑀧𑀸𑀴𑀺𑀬𑀸, 𑀅𑀝𑁆𑀞𑀓𑀣𑀸𑀬, 𑀬𑀼𑀢𑁆𑀢𑀺𑀢𑁄 𑀯𑀸 𑀲𑀫𑁆𑀪𑀯𑀢𑀺. 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀫𑀢𑁆𑀢𑀯𑀲𑁂𑀦 𑀯𑀼𑀢𑁆𑀢𑀦𑁆𑀢𑀺 𑀘𑁂? 𑀦, 𑀤𑀲𑀸𑀳𑀸𑀥𑀺𑀘𑁆𑀘𑀓𑀸𑀭𑀺𑀓𑀸 𑀅𑀝𑁆𑀞𑀼𑀧𑁆𑀧𑀢𑁆𑀢𑀺𑀧𑀸𑀬𑀁 𑀦 𑀤𑀺𑀲𑁆𑀲𑀢𑀺. ‘‘𑀪𑀺𑀓𑁆𑀔𑀽 𑀅𑀘𑁆𑀘𑁂𑀓𑀘𑀻𑀯𑀭𑀁 𑀧𑀝𑀺𑀕𑁆𑀕𑀳𑁂𑀢𑁆𑀯𑀸 𑀘𑀻𑀯𑀭𑀓𑀸𑀮𑀲𑀫𑀬𑀁 𑀅𑀢𑀺𑀓𑁆𑀓𑀸𑀫𑁂𑀦𑁆𑀢𑀻’’𑀢𑀺 𑀏𑀢𑁆𑀣 𑀏𑀢𑁆𑀢𑀺𑀓𑀸 𑀏𑀯 𑀳𑀺 𑀅𑀝𑁆𑀞𑀼𑀧𑁆𑀧𑀢𑁆𑀢𑀺. 𑀢𑀣𑀸 𑀳𑀺 𑀧𑀭𑀺𑀯𑀸𑀭𑁂 (𑀧𑀭𑀺. 𑁪𑁭-𑁫𑁩) ‘‘𑀓𑀺𑀲𑁆𑀫𑀺𑀁 𑀯𑀢𑁆𑀣𑀼𑀲𑁆𑀫𑀺’’𑀦𑁆𑀢𑀺 𑀆𑀭𑀪𑀺𑀢𑁆𑀯𑀸 𑀏𑀢𑁆𑀢𑀓𑀫𑁂𑀯 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩𑀁. 𑀅𑀘𑁆𑀘𑁂𑀓𑀘𑀻𑀯𑀭𑀁 𑀘𑀻𑀯𑀭𑀓𑀸𑀮𑀁 𑀦𑀸𑀢𑀺𑀓𑁆𑀓𑀸𑀫𑁂𑀢𑀩𑁆𑀩𑀁, 𑀇𑀢𑀭𑀁 𑀅𑀢𑀺𑀓𑁆𑀓𑀸𑀫𑁂𑀢𑀩𑁆𑀩𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 𑀇𑀤𑀁 𑀧𑀜𑁆𑀜𑀢𑁆𑀢𑀦𑁆𑀢𑀺 𑀘𑁂? 𑀦, 𑀅𑀘𑁆𑀘𑁂𑀓𑀘𑀻𑀯𑀭𑀲𑁆𑀲𑁂𑀯 𑀅𑀧𑀭𑀸𑀥𑀤𑀲𑁆𑀲𑀦𑀢𑁄, 𑀯𑀺𑀲𑁂𑀲𑀓𑀸𑀭𑀡𑀸𑀪𑀸𑀯𑀸, ‘‘𑀓𑀸𑀫𑀜𑁆𑀘𑁂𑀲 𑀤𑀲𑀸𑀳𑀧𑀭𑀫𑀁 𑀅𑀢𑀺𑀭𑁂𑀓𑀘𑀻𑀯𑀭𑀁 𑀥𑀸𑀭𑁂𑀢𑀩𑁆𑀩𑀦𑁆𑀢𑀺 𑀇𑀫𑀺𑀦𑀸𑀯 𑀲𑀺𑀤𑁆𑀥𑁄’’𑀢𑀺𑀆𑀤𑀺𑀯𑀘𑀦𑀯𑀺𑀭𑁄𑀥𑀢𑁄 𑀘 𑀬𑀣𑀸𑀯𑀼𑀢𑁆𑀢𑀯𑀘𑀦𑀸𑀲𑀫𑁆𑀪𑀯𑀢𑁄 𑀘.

𑀓𑀣𑀁? 𑀤𑀲𑀸𑀳𑁂𑀦 𑀲𑀳 𑀓𑀢𑁆𑀢𑀺𑀓𑀧𑀼𑀡𑁆𑀡𑀫𑀸 ‘‘𑀅𑀦𑀸𑀕𑀢𑀸’’𑀢𑀺 𑀳𑀺 𑀯𑀼𑀢𑁆𑀢𑁂 𑀤𑀲𑀸𑀳𑀢𑁄 𑀅𑀜𑁆𑀜𑀸 𑀲𑀸 𑀧𑀼𑀡𑁆𑀡𑀫𑀸𑀢𑀺 𑀆𑀧𑀚𑁆𑀚𑀢𑀺. 𑀅𑀦𑀜𑁆𑀜𑀸 𑀘𑁂, 𑀲𑀳-𑀲𑀤𑁆𑀤𑁄 𑀦 𑀲𑀫𑁆𑀪𑀯𑀢𑀺, 𑀦 𑀳𑀺 𑀅𑀢𑁆𑀢𑀦𑀸𑀯 𑀅𑀢𑁆𑀢𑀦𑁄 𑀬𑁄𑀕𑁄 𑀲𑀫𑁆𑀪𑀯𑀢𑀺, 𑀅𑀦𑀸𑀕𑀢-𑀲𑀤𑁆𑀤𑁄 𑀘 𑀦 𑀲𑀫𑁆𑀪𑀯𑀢𑀺. 𑀆𑀕𑀢𑀸 𑀲𑀫𑁆𑀧𑀢𑁆𑀢𑀸 𑀏𑀯 𑀳𑀺 𑀲𑀸 𑀧𑀼𑀡𑁆𑀡𑀫𑀸. 𑀘𑀻𑀯𑀭𑀲𑀫𑀬𑀲𑁆𑀲 𑀅𑀦𑀦𑁆𑀢𑀭𑀢𑁆𑀢𑀸 𑀏𑀓𑀻𑀪𑀸𑀯𑀁 𑀅𑀦𑀸𑀕𑀢𑀢𑁆𑀢𑀸 𑀅𑀦𑀸𑀕𑀢𑀸𑀬𑁂𑀯𑀸𑀢𑀺 𑀘𑁂? 𑀦, 𑀢𑀣𑀸𑀧𑀺 𑀅𑀦𑀸𑀕𑀢-𑀲𑀤𑁆𑀤𑀲𑁆𑀲 𑀲𑀫𑁆𑀪𑀯𑀢𑁄, 𑀆𑀕𑀫𑀦𑀲𑀫𑁆𑀪𑀯𑁂 𑀲𑀢𑀺𑀬𑁂𑀯 𑀳𑀺 𑀅𑀦𑀸𑀕𑀢-𑀲𑀤𑁆𑀤𑁄 𑀲𑀫𑁆𑀪𑀯𑀢𑀺, 𑀦 𑀳𑀺 𑀦𑀺𑀩𑁆𑀩𑀸𑀦𑀁, 𑀧𑀜𑁆𑀜𑀢𑁆𑀢𑀺 𑀯𑀸 ‘‘𑀅𑀦𑀸𑀕𑀢𑀸’’𑀢𑀺 𑀯𑀼𑀘𑁆𑀘𑀢𑀺. 𑀦𑀺𑀩𑁆𑀩𑀸𑀦𑀁 𑀯𑀺𑀬 𑀔𑀡𑀢𑁆𑀢𑀬𑀁, 𑀲𑀸 𑀘 𑀧𑀼𑀡𑁆𑀡𑀫𑀸 𑀦 𑀓𑀤𑀸𑀘𑀺 𑀲𑀫𑀬𑀪𑀸𑀯𑀁 𑀧𑀸𑀧𑀼𑀡𑀸𑀢𑀻𑀢𑀺 𑀅𑀬𑀼𑀢𑁆𑀢𑀫𑁂𑀯. ‘‘𑀢𑀢𑁄 𑀧𑀭𑀁 𑀯𑀺𑀓𑀧𑁆𑀧𑁂𑀢𑀼’’𑀦𑁆𑀢𑀺 𑀧𑀦 𑀯𑀘𑀦𑀁 𑀧𑀺𑀝𑁆𑀞𑀺𑀲𑀫𑀬𑀁 𑀕𑀳𑁂𑀢𑁆𑀯𑀸 𑀞𑀺𑀢𑀢𑁆𑀢𑀸 𑀲𑀫𑁆𑀪𑀯𑀢𑀺. 𑀅𑀧𑀺𑀘 𑀧𑀯𑀸𑀭𑀡𑀸𑀬𑀁 𑀅𑀭𑀼𑀡𑁂 𑀘 𑀉𑀝𑁆𑀞𑀺𑀢𑁂 𑀲𑀸 𑀧𑀼𑀡𑁆𑀡𑀫𑀸 𑀘𑀻𑀯𑀭𑀲𑀫𑀬𑀁 𑀏𑀓𑀸𑀳𑀸𑀦𑀸𑀕𑀢𑀸 𑀏𑀯𑀸𑀧𑀚𑁆𑀚𑀢𑀺 𑀧𑀼𑀩𑁆𑀩𑁂 𑀲𑀳𑀬𑁄𑀕𑀧𑀢𑁆𑀢𑀢𑁆𑀢𑀸. 𑀏𑀯𑀁 𑀲𑀦𑁆𑀢𑁂 𑀏𑀓𑀻𑀪𑀸𑀯𑀕𑀢𑀸𑀧𑀺 𑀲𑀸 𑀘𑀻𑀯𑀭𑀲𑀫𑀬𑀁 𑀅𑀦𑀸𑀕𑀢𑀸 𑀏𑀯 𑀚𑀸𑀢𑀸𑀢𑀺 𑀲𑀩𑁆𑀩𑀤𑀸 𑀦 𑀢𑀣𑀸𑀯𑀺𑀕𑁆𑀕𑀳𑀓𑀭𑀡𑀯𑀘𑀦𑀢𑁆𑀣𑀁 𑀓𑁄𑀘𑀺𑀤𑁂𑀯 𑀯𑀘𑀦𑀢𑁄 𑀤𑀻𑀧𑁂𑀢𑀻𑀢𑀺 𑀯𑁂𑀤𑀺𑀢𑀩𑁆𑀩𑀁.

𑀓𑀺𑀫𑀢𑁆𑀣𑀁 𑀧𑀦𑁂𑀢𑁆𑀣 ‘‘𑀤𑀲𑀤𑀺𑀯𑀲𑀸𑀥𑀺𑀓𑁄 𑀫𑀸𑀲𑁄’’𑀢𑀺𑀆𑀤𑀺 𑀯𑀼𑀢𑁆𑀢𑀦𑁆𑀢𑀺? 𑀢𑀁 𑀧𑀸𑀭𑀺𑀧𑀽𑀭𑀺𑀲𑀫𑁆𑀪𑀯𑀢𑁄. 𑀧𑀜𑁆𑀘𑀫𑀺𑀬𑀜𑁆𑀳𑀺 𑀧𑀼𑀭𑁂 𑀅𑀭𑀼𑀡𑀁 𑀉𑀧𑁆𑀧𑀦𑁆𑀦𑀅𑀘𑁆𑀘𑁂𑀓𑀘𑀻𑀯𑀭𑀲𑁆𑀲 𑀤𑀲𑀤𑀺𑀯𑀲𑀸𑀥𑀺𑀓𑁄 𑀫𑀸𑀲𑁄𑀬𑁂𑀯 𑀧𑀭𑀺𑀧𑀽𑀭𑁄𑀢𑀺 𑀓𑀢𑁆𑀯𑀸 𑀢𑀣𑀸 𑀯𑀼𑀢𑁆𑀢𑀁. 𑀅𑀧𑀺𑀘 𑀢𑀲𑁆𑀲𑀸 𑀧𑀜𑁆𑀘𑀫𑀺𑀬𑀸 𑀤𑀺𑀯𑀲𑀪𑀸𑀕𑁄𑀧𑀺 𑀲𑀫𑁆𑀧𑀢𑁆𑀢𑀸𑀬 𑀭𑀢𑁆𑀢𑀺𑀬𑀸 ‘‘𑀳𑀺𑀬𑁆𑀬𑁄’’𑀢𑀺 𑀯𑀼𑀘𑁆𑀘𑀢𑀺, 𑀧𑀕𑁂𑀯 𑀧𑀼𑀭𑁂 𑀅𑀭𑀼𑀡𑀁, 𑀢𑁂𑀦𑁂𑀯𑀸𑀳 ‘‘𑀳𑀺𑀬𑁆𑀬𑁄 𑀔𑁄, 𑀆𑀯𑀼𑀲𑁄, 𑀅𑀫𑁆𑀳𑀸𑀓’’𑀦𑁆𑀢𑀺𑀆𑀤𑀺. ‘‘𑀏𑀯𑀁 𑀲𑀦𑁆𑀢𑁂 ‘𑀙𑀝𑁆𑀞𑀺𑀢𑁄 𑀧𑀝𑁆𑀞𑀸𑀬𑀸’𑀢𑀺 𑀯𑀼𑀢𑁆𑀢𑀧𑀞𑀫𑀧𑀸𑀞𑀲𑁆𑀲 𑀯𑀲𑁂𑀦 ‘𑀅𑀦𑀘𑁆𑀘𑁂𑀓𑀘𑀻𑀯𑀭𑀫𑁆𑀧𑀺 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀞𑀧𑀺𑀢𑀁 𑀢𑀺𑀘𑀻𑀯𑀭𑀫𑁆𑀧𑀺 𑀏𑀢𑀁 𑀧𑀭𑀺𑀳𑀸𑀭𑀁 𑀮𑀪𑀢𑀺𑀬𑁂𑀯𑀸’’’𑀢𑀺 𑀘 ‘‘𑀤𑀲𑀤𑀺𑀯𑀲𑀸𑀥𑀺𑀓𑁄 𑀫𑀸𑀲𑁄’’𑀢𑀺𑀆𑀤𑀺 𑀘 𑀬𑀁 𑀮𑀺𑀔𑀺𑀢𑀁. 𑀢𑀁 𑀦, ‘‘𑀧𑀜𑁆𑀘𑀫𑀺𑀢𑁄 𑀧𑀝𑁆𑀞𑀸𑀬𑀸’’𑀢𑀺 𑀧𑀸𑀞𑁂 𑀲𑀚𑁆𑀚𑀺𑀢𑁂𑀯 𑀏𑀢𑁂𑀦 𑀧𑀭𑀺𑀬𑀸𑀬𑁂𑀦 𑀬𑀣𑀸𑀯𑀼𑀢𑁆𑀢𑀅𑀢𑁆𑀣𑀲𑀫𑁆𑀪𑀯𑀢𑁄, 𑀦 𑀢𑀸𑀦𑀺 𑀞𑀸𑀦𑀸𑀦𑀺 𑀧𑀼𑀦 𑀲𑀚𑁆𑀚𑀺𑀢𑀸𑀦𑀺. 𑀬𑀣𑀸𑀞𑀺𑀢𑀯𑀲𑁂𑀦𑁂𑀯 𑀅𑀚𑁆𑀛𑀼𑀧𑁂𑀓𑁆𑀔𑀺𑀢𑀩𑁆𑀩𑀸𑀦𑀻𑀢𑀺 𑀦𑁄 𑀢𑀓𑁆𑀓𑁄𑀢𑀺 𑀆𑀘𑀭𑀺𑀬𑁄. 𑀇𑀤𑀁 𑀲𑀺𑀓𑁆𑀔𑀸𑀧𑀤𑀁 𑀧𑀼𑀡𑁆𑀡𑀫𑀸𑀬𑀁 𑀅𑀦𑀺𑀲𑁆𑀲𑀕𑁆𑀕𑀺𑀬𑀢𑁆𑀣𑀫𑁂𑀯𑀸𑀢𑀺 𑀉𑀧𑀢𑀺𑀲𑁆𑀲𑀢𑁆𑀣𑁂𑀭𑁄. ‘‘𑀧𑀯𑀸𑀭𑀡𑀸𑀫𑀸𑀲𑀲𑁆𑀲 𑀚𑀼𑀡𑁆𑀳𑀧𑀓𑁆𑀔𑀧𑀜𑁆𑀘𑀫𑀺𑀢𑁄 𑀧𑀝𑁆𑀞𑀸𑀬𑀸’’𑀢𑀺 𑀧𑀸𑀞𑁂 𑀲𑀚𑁆𑀚𑀺𑀢𑁂 𑀏𑀢𑁂𑀦 𑀧𑀭𑀺𑀬𑀸𑀬𑁂𑀦 𑀬𑀣𑀸𑀯𑀼𑀢𑁆𑀢𑁄 𑀉𑀧𑁆𑀧𑀦𑁆𑀦𑀲𑁆𑀲 𑀘𑀻𑀯𑀭𑀲𑁆𑀲 𑀦𑀺𑀥𑀸𑀦𑀓𑀸𑀮𑁄 𑀤𑀲𑁆𑀲𑀺𑀢𑁄 𑀳𑁄𑀢𑀺, ‘‘𑀅𑀘𑁆𑀘𑁂𑀓𑀘𑀻𑀯𑀭𑀦𑁆𑀢𑀺 𑀅𑀘𑁆𑀘𑀸𑀬𑀺𑀓𑀘𑀻𑀯𑀭𑀁 𑀯𑀼𑀘𑁆𑀘𑀢𑀻’’𑀢𑀺𑀆𑀤𑀺 𑀧𑀸𑀞𑁄. ‘‘𑀙𑀝𑁆𑀞𑀺𑀢𑁄 𑀧𑀝𑁆𑀞𑀸𑀬𑀸’’𑀢𑀺 𑀘 ‘‘𑀓𑀸𑀫𑀜𑁆𑀘𑁂𑀲 𑀤𑀲𑀸𑀳𑀧𑀭𑀫’’𑀦𑁆𑀢𑀺𑀆𑀤𑀺 𑀘 𑀬𑀁 𑀮𑀺𑀔𑀺𑀢𑀁, 𑀢𑀁 𑀦 𑀧𑀸𑀞𑁄, 𑀢𑀲𑁆𑀫𑀸 𑀏𑀓𑀸𑀤𑀲𑀤𑀺𑀯𑀲𑀁 𑀧𑀭𑀺𑀳𑀸𑀭𑀁 𑀮𑀪𑀢𑀻𑀢𑀺 𑀓𑀢𑁆𑀯𑀸 𑀆𑀘𑀭𑀺𑀬𑁂𑀦 ‘‘𑀧𑀜𑁆𑀘𑀫𑀺𑀢𑁄 𑀧𑀝𑁆𑀞𑀸𑀬𑀸’’𑀢𑀺 𑀮𑀺𑀔𑀸𑀧𑀺𑀢𑁄 𑀓𑀺𑀭. ‘‘𑀧𑀯𑀸𑀭𑀡𑀸𑀫𑀸𑀲𑀲𑁆𑀲 𑀚𑀼𑀡𑁆𑀳𑀧𑀓𑁆𑀔𑀙𑀝𑁆𑀞𑀺𑀢𑁄 𑀧𑀝𑁆𑀞𑀸𑀬 𑀧𑀦 𑀉𑀧𑁆𑀧𑀦𑁆𑀦𑀁 𑀅𑀦𑀘𑁆𑀘𑁂𑀓𑀘𑀻𑀯𑀭𑀫𑁆𑀧𑀺 𑀧𑀘𑁆𑀘𑀼𑀤𑁆𑀥𑀭𑀺𑀢𑁆𑀯𑀸 𑀞𑀧𑀺𑀢𑀁 𑀢𑀺𑀘𑀻𑀯𑀭𑀫𑁆𑀧𑀺 𑀏𑀢𑀁 𑀧𑀭𑀺𑀳𑀸𑀭𑀁 𑀮𑀪𑀢𑀺𑀬𑁂𑀯𑀸𑀢𑀺 𑀧𑀸𑀞𑁄’’𑀢𑀺 𑀘 ‘‘𑀅𑀘𑁆𑀘𑁂𑀓𑀘𑀻𑀯𑀭𑀲𑁆𑀲 𑀅𑀦𑀢𑁆𑀣𑀢𑁂 𑀓𑀣𑀺𑀦𑁂 𑀏𑀓𑀸𑀤𑀲𑀤𑀺𑀯𑀲𑀸𑀥𑀺𑀓𑁄 𑀫𑀸𑀲𑁄, 𑀅𑀢𑁆𑀣𑀢𑁂 𑀓𑀣𑀺𑀦𑁂 𑀏𑀓𑀸𑀤𑀲𑀤𑀺𑀯𑀲𑀸𑀥𑀺𑀓𑀸 𑀧𑀜𑁆𑀘𑀫𑀸𑀲𑀸𑀢𑀺 𑀧𑀸𑀞𑁄’’𑀢𑀺 𑀘 𑀏𑀢𑁆𑀣 𑀧𑀧𑀜𑁆𑀘𑁂𑀦𑁆𑀢𑀺, 𑀢𑀲𑁆𑀫𑀸 𑀲𑀼𑀝𑁆𑀞𑀼 𑀲𑀮𑁆𑀮𑀓𑁆𑀔𑁂𑀢𑁆𑀯𑀸 𑀓𑀣𑁂𑀢𑀩𑁆𑀩𑀁, 𑀢𑀼𑀡𑁆𑀳𑀻𑀪𑀽𑀢𑁂𑀦 𑀯𑀸 𑀪𑀯𑀺𑀢𑀩𑁆𑀩𑀁.

𑀅𑀘𑁆𑀘𑁂𑀓𑀘𑀻𑀯𑀭𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁯. 𑀲𑀸𑀲𑀗𑁆𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁫𑁨. ‘‘𑀢𑀺𑀡𑁆𑀡𑀁 𑀘𑀻𑀯𑀭𑀸𑀦𑀁 𑀅𑀜𑁆𑀜𑀢𑀭𑀁 𑀘𑀻𑀯𑀭𑀦𑁆𑀢𑀺 𑀇𑀤𑀁 𑀢𑀺𑀘𑀻𑀯𑀭𑁂 𑀏𑀯 𑀅𑀬𑀁 𑀯𑀺𑀥𑀺, 𑀇𑀢𑀭𑀲𑁆𑀫𑀺𑀁 𑀬𑀣𑀸𑀲𑀼𑀔𑀦𑁆𑀢𑀺 𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢’’𑀦𑁆𑀢𑀺 𑀯𑀤𑀦𑁆𑀢𑀺. ‘‘𑀅𑀢𑀺𑀭𑁂𑀓𑀙𑀸𑀭𑀢𑁆𑀢𑀁 𑀯𑀺𑀧𑁆𑀧𑀯𑀲𑀦𑁆𑀢𑀻’’𑀢𑀺 𑀢𑀲𑁆𑀫𑀺𑀁𑀬𑁂𑀯 𑀲𑁂𑀦𑀸𑀲𑀦𑁂 𑀯𑀸𑀲𑁄 𑀦 𑀯𑀺𑀧𑁆𑀧𑀯𑀸𑀲𑁄𑀢𑀺 𑀓𑀢𑁆𑀯𑀸 𑀯𑀼𑀢𑁆𑀢𑀁. 𑀓𑀲𑁆𑀫𑀸? 𑀘𑀻𑀯𑀭𑀧𑁆𑀧𑀯𑀢𑁆𑀢𑀺𑀚𑀸𑀦𑀦𑀢𑁄. 𑀏𑀢𑁆𑀣 𑀓𑀺𑀜𑁆𑀘𑀸𑀧𑀺 ‘‘𑀆𑀭𑀜𑁆𑀜𑀓𑀁 𑀦𑀸𑀫 𑀲𑁂𑀦𑀸𑀲𑀦𑀁 𑀧𑀜𑁆𑀘𑀥𑀦𑀼𑀲𑀢𑀺𑀓𑀁 𑀧𑀘𑁆𑀙𑀺𑀫’’𑀦𑁆𑀢𑀺 𑀯𑀘𑀦𑀢𑁄 𑀅𑀢𑀺𑀭𑁂𑀓𑀢𑁄𑀧𑀺 𑀯𑀼𑀢𑁆𑀢𑀁, 𑀆𑀭𑀜𑁆𑀜𑀓𑀫𑁂𑀯 𑀧𑀦 𑀲𑁂𑀦𑀸𑀲𑀦𑀁 𑀳𑁄𑀢𑀺, 𑀥𑀼𑀢𑀗𑁆𑀕𑀁 𑀭𑀓𑁆𑀔𑀢𑀺 𑀘𑀻𑀯𑀭𑀧𑁆𑀧𑀯𑀢𑁆𑀢𑀺𑀚𑀸𑀦𑀦𑀧𑀮𑀺𑀩𑁄𑀥𑀲𑀫𑁆𑀪𑀯𑀢𑁄.

𑁬𑁫𑁩. ‘‘𑀕𑀸𑀯𑀼𑀢𑀢𑁄 𑀅𑀢𑀺𑀭𑁂𑀓𑀧𑁆𑀧𑀫𑀸𑀡𑁂𑀦 𑀮𑀪𑀢𑀻’’𑀢𑀺 𑀬𑀁 𑀯𑀼𑀢𑁆𑀢𑀁, 𑀢𑀁 𑀓𑀣𑀁 𑀧𑀜𑁆𑀜𑀸𑀬𑀢𑀻𑀢𑀺 𑀘𑁂? ‘‘𑀲𑀺𑀬𑀸 𑀘 𑀢𑀲𑁆𑀲 𑀪𑀺𑀓𑁆𑀔𑀼𑀦𑁄 𑀓𑁄𑀘𑀺𑀤𑁂𑀯 𑀧𑀘𑁆𑀘𑀬𑁄 𑀢𑁂𑀦 𑀘𑀻𑀯𑀭𑁂𑀦 𑀯𑀺𑀧𑁆𑀧𑀯𑀸𑀲𑀸𑀬𑀸’’𑀢𑀺 𑀯𑀘𑀦𑀢𑁄. 𑀬𑁄𑀚𑀦𑀧𑁆𑀧𑀫𑀸𑀡𑁂𑀧𑀺 𑀲𑀺𑀬𑀸𑀢𑀺 𑀘𑁂? 𑀦, ‘‘𑀧𑀼𑀦 𑀕𑀸𑀫𑀲𑀻𑀫𑀁 𑀑𑀓𑁆𑀓𑀫𑀺𑀢𑁆𑀯𑀸 𑀯𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀻’’𑀢𑀺 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 𑀅𑀦𑀼𑀜𑁆𑀜𑀸𑀢𑀢𑁆𑀢𑀸. 𑀬𑀤𑀺 𑀏𑀯𑀁 ‘‘𑀬𑁄𑀚𑀦𑀧𑁆𑀧𑀫𑀸𑀡𑁂 𑀦 𑀮𑀪𑀢𑀻’’𑀢𑀺 𑀇𑀤𑀁 𑀓𑀺𑀦𑁆𑀢𑀺? 𑀇𑀤𑀁 𑀦𑀺𑀩𑀤𑁆𑀥𑀸𑀯𑀸𑀲𑀯𑀲𑁂𑀦𑁂𑀯 𑀯𑀼𑀢𑁆𑀢𑀁. 𑀢𑀢𑁆𑀣 𑀥𑀼𑀢𑀗𑁆𑀕𑀁 𑀪𑀺𑀚𑁆𑀚𑀢𑀻𑀢𑀺? 𑀦 𑀪𑀺𑀚𑁆𑀚𑀢𑀺, 𑀓𑀺𑀦𑁆𑀢𑀼 𑀦 𑀇𑀥 𑀥𑀼𑀢𑀗𑁆𑀕𑀸𑀥𑀺𑀓𑀸𑀭𑁄 𑀅𑀢𑁆𑀣𑀻𑀢𑀺. 𑀅𑀣 𑀓𑀲𑁆𑀫𑀸 ‘‘𑀅𑀬𑀁 𑀥𑀼𑀢𑀗𑁆𑀕𑀘𑁄𑀭𑁄𑀢𑀺 𑀯𑁂𑀤𑀺𑀢𑀩𑁆𑀩𑁄’’𑀢𑀺 𑀯𑀼𑀢𑁆𑀢𑀦𑁆𑀢𑀺? 𑀅𑀲𑀫𑁆𑀪𑀯𑀢𑁄. 𑀓𑀣𑀁 𑀧𑀜𑁆𑀜𑀸𑀬𑀢𑀻𑀢𑀺? 𑀅𑀗𑁆𑀕𑁂𑀲𑀼 𑀅𑀪𑀸𑀯𑀢𑁄. 𑀥𑀼𑀢𑀗𑁆𑀕𑀥𑀭𑀲𑁆𑀲 𑀧𑀢𑀺𑀭𑀽𑀧𑀲𑁂𑀦𑀸𑀲𑀦𑀤𑀻𑀧𑀦𑀢𑁄 𑀥𑀼𑀢𑀗𑁆𑀕𑀥𑀭𑀢𑀸 𑀢𑀲𑁆𑀲 𑀲𑀺𑀤𑁆𑀥𑀸. 𑀯𑀘𑀦𑀧𑁆𑀧𑀫𑀸𑀡𑀢𑁄𑀢𑀺 𑀘𑁂? 𑀦, 𑀯𑀘𑀦𑀧𑁆𑀧𑀫𑀸𑀡𑀢𑁄 𑀘 𑀧𑀸𑀴𑀺𑀬𑁂𑀯 𑀧𑀫𑀸𑀡𑀁. ‘‘𑀅𑀦𑀸𑀧𑀢𑁆𑀢𑀺 𑀧𑀼𑀦 𑀕𑀸𑀫𑀲𑀻𑀫𑀁 𑀑𑀓𑁆𑀓𑀫𑀺𑀢𑁆𑀯𑀸 𑀯𑀲𑀺𑀢𑁆𑀯𑀸 𑀧𑀓𑁆𑀓𑀫𑀢𑀻’’𑀢𑀺 𑀳𑀺 𑀯𑀼𑀢𑁆𑀢𑀁. 𑀕𑀸𑀫𑀲𑀻𑀫𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀓𑀺𑀢𑁆𑀢𑀓𑀁 𑀓𑀸𑀮𑀁 𑀯𑀲𑀺𑀢𑁆𑀯𑀸 𑀧𑀓𑁆𑀓𑀫𑀺𑀢𑀩𑁆𑀩𑀦𑁆𑀢𑀺 𑀘𑁂? 𑀧𑀼𑀦𑀤𑀺𑀯𑀲𑁂𑀬𑁂𑀯, 𑀢𑀲𑁆𑀫𑀸 𑀅𑀝𑁆𑀞𑀫𑁄 𑀅𑀭𑀼𑀡𑁄 𑀦𑀺𑀩𑀤𑁆𑀥𑀸𑀯𑀸𑀲𑁂 𑀯𑀸 𑀕𑀦𑁆𑀢𑀩𑁆𑀩𑀝𑁆𑀞𑀸𑀦𑁂 𑀯𑀸 𑀉𑀝𑁆𑀞𑁂𑀢𑀩𑁆𑀩𑁄𑀢𑀺 𑀏𑀓𑁂. 𑀅𑀦𑁆𑀢𑁄𑀙𑀸𑀭𑀢𑁆𑀢𑀦𑁆𑀢𑀺 𑀏𑀓𑁂. 𑀬𑀸𑀯 𑀦𑀺𑀩𑀤𑁆𑀥𑀸𑀯𑀸𑀲𑀁 𑀦 𑀓𑀧𑁆𑀧𑁂𑀢𑀻𑀢𑀺 𑀏𑀓𑁂. 𑀬𑀸𑀯 𑀫𑀕𑁆𑀕𑀧𑀭𑀺𑀲𑁆𑀲𑀫𑀯𑀺𑀦𑁄𑀤𑀦𑀸𑀢𑀺 𑀏𑀓𑁂. 𑀲𑀢𑀺 𑀅𑀦𑁆𑀢𑀭𑀸𑀬𑁂 𑀅𑀦𑁆𑀢𑁄𑀙𑀸𑀭𑀢𑁆𑀢𑀁 𑀯𑀲𑀢𑀺, 𑀅𑀦𑀸𑀧𑀢𑁆𑀢𑀺. 𑀦𑀺𑀩𑀤𑁆𑀥𑀸𑀯𑀸𑀲𑀓𑀧𑁆𑀧𑀦𑁂 𑀲𑀢𑀺 𑀅𑀭𑀼𑀡𑀼𑀕𑁆𑀕𑀫𑀦𑁂 𑀆𑀧𑀢𑁆𑀢𑀺. 𑀲𑀘𑁂 𑀢𑀁𑀲𑀢𑁆𑀢𑀫𑁄 𑀤𑀺𑀯𑀲𑁄, 𑀢𑀤𑀳𑁂𑀯 𑀦𑀺𑀓𑁆𑀔𑀺𑀢𑁆𑀢𑀘𑀻𑀯𑀭𑀁 𑀕𑀳𑁂𑀢𑀩𑁆𑀩𑀁, 𑀧𑀘𑁆𑀘𑀼𑀤𑁆𑀥𑀭𑀺𑀢𑀩𑁆𑀩𑀁 𑀯𑀸𑀢𑀺 𑀏𑀓𑁂. 𑀲𑀘𑁂 𑀅𑀦𑁆𑀢𑀭𑀸 𑀦𑀯𑀫𑀕𑁆𑀕𑀧𑀸𑀢𑀼𑀪𑀸𑀯𑁂𑀦 𑀯𑀸 𑀦𑀯𑀕𑀸𑀫𑀲𑀦𑁆𑀦𑀺𑀯𑁂𑀲𑁂𑀦 𑀯𑀸, 𑀢𑀁 𑀲𑁂𑀦𑀸𑀲𑀦𑀁 𑀅𑀗𑁆𑀕𑀲𑀫𑁆𑀧𑀢𑁆𑀢𑀺𑀢𑁄 𑀧𑀭𑀺𑀳𑀸𑀬𑀢𑀺. 𑀢𑀤𑀳𑁂𑀯 𑀘𑀻𑀯𑀭𑀁 𑀕𑀳𑁂𑀢𑀩𑁆𑀩𑀁 𑀯𑀸 𑀧𑀘𑁆𑀘𑀼𑀤𑁆𑀥𑀭𑀺𑀢𑀩𑁆𑀩𑀁 𑀯𑀸. 𑀙𑀸𑀭𑀢𑁆𑀢𑀁 𑀯𑀺𑀧𑁆𑀧𑀯𑀲𑀦𑁆𑀢𑀲𑁆𑀲 𑀘𑁂 𑀧𑀭𑀺𑀳𑀸𑀬𑀢𑀺, 𑀅𑀦𑀸𑀧𑀢𑁆𑀢𑀺 𑀅𑀦𑀼𑀜𑁆𑀜𑀸𑀢𑀤𑀺𑀯𑀲𑀢𑁆𑀢𑀸𑀢𑀺 𑀏𑀓𑁂. 𑀆𑀧𑀢𑁆𑀢𑀺 𑀏𑀯 𑀅𑀦𑀗𑁆𑀕𑀲𑀫𑁆𑀧𑀢𑁆𑀢𑀺𑀢𑁄𑀢𑀺 𑀏𑀓𑁂. 𑀬𑀼𑀢𑁆𑀢𑀢𑀭𑀁 𑀧𑀦𑁂𑀢𑁆𑀣 𑀯𑀺𑀘𑀸𑀭𑁂𑀢𑁆𑀯𑀸 𑀕𑀳𑁂𑀢𑀩𑁆𑀩𑀁. 𑀲𑀘𑁂 𑀥𑀼𑀢𑀗𑁆𑀕𑀥𑀭𑁄 𑀳𑁄𑀢𑀺, 𑀕𑀸𑀫𑀲𑀻𑀫𑀸𑀬𑀁 𑀅𑀯𑀲𑀺𑀢𑁆𑀯𑀸 𑀧𑀘𑁆𑀙𑀺𑀫𑀧𑁆𑀧𑀫𑀸𑀡𑀬𑀼𑀢𑁆𑀢𑁂 𑀞𑀸𑀦𑁂 𑀯𑀲𑀺𑀢𑁆𑀯𑀸 𑀧𑀓𑁆𑀓𑀫𑀺𑀢𑀩𑁆𑀩𑀁. 𑀧𑀞𑀫𑀁 𑀩𑀤𑁆𑀥𑀅𑀯𑀺𑀧𑁆𑀧𑀯𑀸𑀲𑀲𑀻𑀫𑁄 𑀘𑁂 𑀕𑀸𑀫𑁄 𑀳𑁄𑀢𑀺, 𑀅𑀜𑁆𑀜𑀲𑁆𑀫𑀺𑀫𑁆𑀧𑀺 𑀫𑀸𑀲𑁂 𑀅𑀦𑁆𑀢𑁄𑀲𑀻𑀫𑀸𑀬 𑀯𑀲𑀢𑁄 𑀅𑀦𑀸𑀧𑀢𑁆𑀢𑀺. 𑀧𑁄𑀭𑀸𑀡𑀕𑀡𑁆𑀞𑀺𑀧𑀤𑁂 ‘‘𑀬𑀣𑀸𑀯𑀼𑀢𑁆𑀢𑀲𑁂𑀦𑀸𑀲𑀦𑁂 𑀯𑀲𑀦𑁆𑀢𑁂𑀦𑀸𑀧𑀺 𑀙𑀸𑀭𑀢𑁆𑀢𑀫𑁂𑀯 𑀘𑀻𑀯𑀭𑀁 𑀕𑀸𑀫𑁂 𑀦𑀺𑀓𑁆𑀔𑀺𑀧𑀺𑀢𑀩𑁆𑀩𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁂𑀦 𑀅𑀜𑁆𑀜𑀁 𑀅𑀦𑁆𑀢𑁄𑀙𑀸𑀭𑀢𑁆𑀢𑀫𑁆𑀧𑀺 𑀅𑀜𑁆𑀜𑀫𑁆𑀧𑀺 𑀯𑀲𑀢𑁄 𑀆𑀧𑀢𑁆𑀢𑀺𑀬𑁂𑀯𑀸’’𑀢𑀺 𑀯𑀼𑀢𑁆𑀢𑀁.

𑀲𑀸𑀲𑀗𑁆𑀓𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑁧𑁦. 𑀧𑀭𑀺𑀡𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁬𑁫𑁭. 𑀤𑁂𑀣𑀸𑀯𑀼𑀲𑁄 𑀅𑀫𑁆𑀳𑀸𑀓𑀦𑁆𑀢𑀺 𑀏𑀢𑁆𑀣 𑀅𑀓𑀢𑀯𑀺𑀜𑁆𑀜𑀢𑁆𑀢𑀺 𑀳𑁄𑀢𑀺 𑀦 𑀳𑁄𑀢𑀻𑀢𑀺? 𑀳𑁄𑀢𑀺, 𑀬𑀤𑀺 𑀏𑀯𑀁 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀲𑀺𑀓𑁆𑀔𑀸𑀧𑀤𑀲𑁆𑀲 𑀘 𑀇𑀫𑀲𑁆𑀲 𑀘 𑀓𑀺𑀁 𑀦𑀸𑀦𑀸𑀓𑀭𑀡𑀦𑁆𑀢𑀺? 𑀢𑀁 𑀅𑀜𑁆𑀜𑀸𑀢𑀓𑀅𑀧𑁆𑀧𑀯𑀸𑀭𑀺𑀢𑁂𑀬𑁂𑀯 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲, 𑀇𑀤𑀁 𑀜𑀸𑀢𑀓𑀧𑀯𑀸𑀭𑀺𑀢𑁂𑀧𑀺, 𑀢𑀁 𑀅𑀦𑀘𑁆𑀙𑀺𑀦𑁆𑀦𑀘𑀻𑀯𑀭𑀲𑁆𑀲𑁂𑀯, 𑀇𑀤𑀁 𑀢𑀲𑁆𑀲𑀧𑀺, 𑀢𑀁 𑀘𑀻𑀯𑀭𑀁𑀬𑁂𑀯 𑀯𑀺𑀜𑁆𑀜𑀸𑀧𑁂𑀦𑁆𑀢𑀲𑁆𑀲, 𑀇𑀤𑀁 𑀅𑀘𑀻𑀯𑀭𑀫𑁆𑀧𑀺. 𑀏𑀯𑀁 𑀲𑀦𑁆𑀢𑁂 𑀇𑀤𑀁 𑀢𑀁 𑀅𑀦𑁆𑀢𑁄𑀓𑀢𑁆𑀯𑀸 𑀞𑀺𑀢𑀁 𑀳𑁄𑀢𑀺, 𑀢𑀲𑁆𑀫𑀸 𑀤𑁆𑀯𑀺𑀦𑁆𑀦𑀫𑁆𑀧𑀺 𑀅𑀗𑁆𑀕𑀲𑀫𑁆𑀧𑀢𑁆𑀢𑀺𑀬𑀸 𑀲𑀢𑀺 𑀓𑁂𑀦 𑀪𑀯𑀺𑀢𑀩𑁆𑀩𑀦𑁆𑀢𑀺? 𑀇𑀫𑀺𑀦𑀸 𑀪𑀯𑀺𑀢𑀩𑁆𑀩𑀁 𑀇𑀫𑀲𑁆𑀲 𑀦𑀺𑀧𑁆𑀧𑀤𑁂𑀲𑀢𑁄𑀢𑀺 𑀏𑀓𑁂. 𑀤𑁆𑀯𑀻𑀳𑀺𑀧𑀺 𑀪𑀯𑀺𑀢𑀩𑁆𑀩𑀁 𑀉𑀪𑀺𑀦𑁆𑀦𑀫𑁆𑀧𑀺 𑀅𑀗𑁆𑀕𑀲𑀺𑀤𑁆𑀥𑀺𑀢𑁄𑀢𑀺 𑀏𑀓𑁂. 𑀇𑀫𑀸𑀦𑀺 𑀢𑀲𑁆𑀲 𑀅𑀗𑁆𑀕𑀸𑀦𑀺 𑀯𑀺𑀓𑀧𑁆𑀧𑀦𑀼𑀧𑀕𑀘𑀻𑀯𑀭𑀢𑀸, 𑀲𑀫𑀬𑀸𑀪𑀸𑀯𑁄, 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺, 𑀢𑀸𑀬 𑀘 𑀧𑀝𑀺𑀮𑀸𑀪𑁄𑀢𑀺 𑀘𑀢𑁆𑀢𑀸𑀭𑀺. 𑀇𑀫𑀲𑁆𑀲 𑀧𑀦 𑀲𑀗𑁆𑀖𑁂 𑀧𑀭𑀺𑀡𑀢𑀪𑀸𑀯𑁄, 𑀜𑀢𑁆𑀯𑀸 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑀦𑀁, 𑀧𑀝𑀺𑀮𑀸𑀪𑁄𑀢𑀺 𑀢𑀻𑀡𑀺. 𑀏𑀢𑁆𑀣 𑀧𑀞𑀫𑁄 𑀯𑀸𑀤𑁄 𑀅𑀬𑀼𑀢𑁆𑀢𑁄 𑀓𑀢𑁆𑀯𑀸𑀧𑀺 𑀑𑀓𑀸𑀲𑀁 𑀅𑀝𑁆𑀞𑀓𑀣𑀸𑀬𑀁, 𑀧𑀭𑀺𑀯𑀸𑀭𑁂 𑀘 𑀅𑀯𑀺𑀘𑀸𑀭𑀺𑀢𑀢𑁆𑀢𑀸. 𑀬𑀤𑀺 𑀏𑀯𑀁 𑀢𑀢𑁆𑀣 𑀅𑀗𑁆𑀕𑁂𑀲𑀼 ‘‘𑀅𑀦𑀜𑁆𑀜𑀧𑀭𑀺𑀡𑀢𑀢𑀸’’𑀢𑀺 𑀯𑀢𑁆𑀢𑀩𑁆𑀩𑀦𑁆𑀢𑀺 𑀘𑁂? 𑀦 𑀯𑀢𑁆𑀢𑀩𑁆𑀩𑀁, 𑀅𑀢𑁆𑀣𑀢𑁄 𑀲𑀺𑀤𑁆𑀥𑀢𑁆𑀢𑀸. 𑀧𑀭𑀺𑀡𑀢𑀲𑀺𑀓𑁆𑀔𑀸𑀧𑀤𑀤𑁆𑀯𑀬𑀲𑀺𑀤𑁆𑀥𑀺𑀢𑁄, 𑀧𑀭𑀺𑀡𑀢𑀲𑀜𑁆𑀜𑀺𑀢𑁄, 𑀆𑀧𑀢𑁆𑀢𑀺𑀲𑀫𑁆𑀪𑀯𑀢𑁄 𑀘 ‘‘𑀫𑀬𑁆𑀳𑀫𑁆𑀧𑀺 𑀤𑁂𑀣𑀸’’𑀢𑀺 𑀯𑀤𑀢𑀺, ‘‘𑀯𑀝𑁆𑀝𑀢𑀻’’𑀢𑀺 𑀅𑀦𑀼𑀤𑁆𑀤𑀺𑀝𑁆𑀞𑀁, ‘‘𑀅𑀫𑁆𑀳𑀸𑀓𑀫𑁆𑀧𑀺 𑀅𑀢𑁆𑀣𑀻’’𑀢𑀺 𑀯𑀼𑀢𑁆𑀢𑀢𑁆𑀢𑀸 𑀯𑀝𑁆𑀝𑀢𑀺. ‘‘𑀲𑀗𑁆𑀖𑀲𑁆𑀲 𑀧𑀭𑀺𑀡𑀢𑀁…𑀧𑁂… 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀏𑀢𑁆𑀣 ‘‘𑀧𑀼𑀕𑁆𑀕𑀮𑀲𑁆𑀲𑀸’’𑀢𑀺 𑀦 𑀯𑀼𑀢𑁆𑀢𑀁, 𑀬𑀢𑁄 𑀲𑀼𑀤𑁆𑀥𑀧𑀸𑀘𑀺𑀢𑁆𑀢𑀺𑀬𑀯𑀲𑁂𑀦 𑀆𑀕𑀢𑀢𑁆𑀢𑀸. ‘‘𑀅𑀜𑁆𑀜𑀘𑁂𑀢𑀺𑀬𑀲𑁆𑀲𑀸’’𑀢𑀺 𑀦 𑀯𑀼𑀢𑁆𑀢𑀁 𑀲𑀗𑁆𑀖𑀲𑁆𑀲 𑀅𑀘𑁂𑀢𑀺𑀬𑀢𑁆𑀢𑀸, 𑀢𑀲𑁆𑀫𑀸𑀬𑁂𑀯 ‘‘𑀘𑁂𑀢𑀺𑀬𑀲𑁆𑀲 𑀧𑀭𑀺𑀡𑀢𑀁…𑀧𑁂… 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’’𑀢𑀺 𑀏𑀢𑁆𑀣𑀸𑀧𑀺 ‘‘𑀅𑀜𑁆𑀜𑀲𑀗𑁆𑀖𑀲𑁆𑀲 𑀅𑀜𑁆𑀜𑀧𑀼𑀕𑁆𑀕𑀮𑀲𑁆𑀲𑀸’’𑀢𑀺 𑀦 𑀯𑀼𑀢𑁆𑀢𑀁. ‘‘𑀬𑀢𑁄 𑀢𑀣𑀸 𑀇𑀥 𑀘 ‘𑀧𑀼𑀕𑁆𑀕𑀮𑀲𑁆𑀲 𑀧𑀭𑀺𑀡𑀢𑀁…𑀧𑁂… 𑀆𑀧𑀢𑁆𑀢𑀺 𑀤𑀼𑀓𑁆𑀓𑀝𑀲𑁆𑀲𑀸’𑀢𑀺 𑀏𑀢𑁆𑀣 𑀘 ‘𑀅𑀢𑁆𑀢𑀦𑁄𑀧𑀻’𑀢𑀺 𑀓𑀺𑀜𑁆𑀘𑀸𑀧𑀺 𑀦 𑀯𑀼𑀢𑁆𑀢𑀁, 𑀢𑀣𑀸𑀧𑀺 𑀲𑀫𑁆𑀪𑀯𑀢𑀻’’𑀢𑀺 𑀯𑀤𑀦𑁆𑀢𑀺. 𑀢𑀁 𑀧𑀦 𑀇𑀥 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑀦𑀸𑀥𑀺𑀓𑀸𑀭𑀢𑁆𑀢𑀸 𑀇𑀫𑀲𑁆𑀲 𑀲𑀺𑀓𑁆𑀔𑀸𑀧𑀤𑀲𑁆𑀲 𑀦 𑀯𑀼𑀢𑁆𑀢𑀦𑁆𑀢𑀺 𑀏𑀓𑁂. 𑀢𑀢𑀼𑀢𑁆𑀢𑀭𑀺𑀲𑀺𑀓𑁆𑀔𑀸𑀧𑀤𑁂 ‘‘𑀅𑀜𑁆𑀜𑀲𑁆𑀲𑀢𑁆𑀣𑀸𑀬𑀸’’𑀢𑀺 (𑀧𑀸𑀭𑀸. 𑀅𑀝𑁆𑀞. 𑁨.𑁫𑁨𑁬) 𑀧𑀤𑀁 𑀯𑀺𑀬𑀸𑀢𑀺 𑀏𑀓𑁂. 𑀢𑀁 𑀦, 𑀏𑀢𑁆𑀣 𑀧𑀼𑀕𑁆𑀕𑀮𑀧𑀭𑀺𑀡𑀸𑀫𑀦𑀲𑀺𑀓𑁆𑀔𑀸𑀧𑀤𑁂 𑀅𑀯𑀼𑀢𑁆𑀢𑀢𑁆𑀢𑀸. 𑀥𑀫𑁆𑀫𑀲𑀺𑀭𑀺𑀢𑁆𑀣𑁂𑀭𑁄 𑀧𑀦𑀸𑀳 𑁋

‘‘𑀅𑀢𑁆𑀢𑀦𑁄 𑀅𑀜𑁆𑀜𑀢𑁄 𑀮𑀸𑀪𑀁, 𑀲𑀗𑁆𑀖𑀲𑁆𑀲𑀜𑁆𑀜𑀲𑁆𑀲 𑀯𑀸 𑀦𑀢𑀁;

𑀧𑀭𑀺𑀡𑀸𑀫𑁂𑀬𑁆𑀬 𑀦𑀺𑀲𑁆𑀲𑀕𑁆𑀕𑀺, 𑀧𑀸𑀘𑀺𑀢𑁆𑀢𑀺𑀬𑀫𑁆𑀧𑀺 𑀤𑀼𑀓𑁆𑀓𑀝’’𑀦𑁆𑀢𑀺.

𑀢𑀲𑁆𑀲𑀢𑁆𑀣𑁄 𑁋 𑀲𑀗𑁆𑀖𑀲𑁆𑀲 𑀧𑀭𑀺𑀡𑀢𑀁 𑀅𑀢𑁆𑀢𑀦𑁄 𑀧𑀭𑀺𑀡𑀸𑀫𑁂𑀬𑁆𑀬 𑀦𑀺𑀲𑁆𑀲𑀕𑁆𑀕𑀺𑀬𑀁. 𑀢𑀤𑁂𑀯 𑀅𑀜𑁆𑀜𑀢𑁄 𑀧𑀭𑀺𑀡𑀸𑀫𑁂𑀬𑁆𑀬 𑀧𑀸𑀘𑀺𑀢𑁆𑀢𑀺𑀬𑀁. 𑀅𑀜𑁆𑀜𑀲𑁆𑀲 𑀧𑀭𑀺𑀡𑀢𑀁 𑀅𑀢𑁆𑀢𑀦𑁄 𑀯𑀸 𑀧𑀭𑀲𑁆𑀲 𑀯𑀸 𑀧𑀭𑀺𑀡𑀸𑀫𑁂𑀬𑁆𑀬 𑀤𑀼𑀓𑁆𑀓𑀝𑀦𑁆𑀢𑀺, 𑀢𑀲𑁆𑀫𑀸 𑀅𑀜𑁆𑀜𑀸𑀢𑀓𑀯𑀺𑀜𑁆𑀜𑀢𑁆𑀢𑀺𑀆𑀤𑀻𑀲𑀼 𑀯𑀼𑀢𑁆𑀢𑀸𑀧𑀢𑁆𑀢𑀺𑀲𑀫𑁆𑀪𑀯𑀢𑁄 𑀇𑀥 𑀧𑀭𑀺𑀡𑀢𑀤𑁆𑀯𑀬𑁂 ‘‘𑀅𑀢𑁆𑀢𑀦𑁄’’𑀢𑀺 𑀧𑀤𑀁 𑀦 𑀯𑀼𑀢𑁆𑀢𑀁. 𑀢𑀲𑁆𑀫𑀺𑀜𑁆𑀳𑀺 𑀯𑀼𑀢𑁆𑀢𑁂 𑀤𑀼𑀓𑁆𑀓𑀝𑀫𑀢𑁆𑀢𑀧𑁆𑀧𑀲𑀗𑁆𑀕𑁄 𑀲𑀺𑀬𑀸, 𑀅𑀯𑀼𑀢𑁆𑀢𑁂 𑀧𑀦𑁂𑀢𑁂𑀲𑀼 𑀯𑀼𑀢𑁆𑀢𑀸𑀧𑀢𑁆𑀢𑀻𑀦𑀁 𑀬𑀣𑀸𑀕𑀫𑀫𑀜𑁆𑀜𑀢𑀭𑀸 𑀘 𑀇𑀥 𑀅𑀯𑀼𑀢𑁆𑀢𑀲𑀺𑀤𑁆𑀥𑀺 𑀤𑀼𑀓𑁆𑀓𑀝𑀜𑁆𑀘𑀸𑀢𑀺 𑀤𑁆𑀯𑁂 𑀆𑀧𑀢𑁆𑀢𑀺𑀬𑁄 𑀏𑀓𑀢𑁄 𑀳𑁄𑀦𑁆𑀢𑀻𑀢𑀺 𑀯𑀺𑀦𑀬𑀥𑀭𑀸𑀦𑀁 𑀅𑀦𑀯𑀲𑁂𑀲𑀜𑀸𑀡𑀲𑁆𑀲 𑀑𑀓𑀸𑀲𑁄 𑀓𑀢𑁄 𑀳𑁄𑀢𑀻𑀢𑀺.

𑀇𑀢𑀺 𑀢𑀺𑀁𑀲𑀓𑀓𑀡𑁆𑀟𑀁 𑀲𑀸𑀭𑀫𑀡𑁆𑀟𑀁,

𑀅𑀮𑀫𑁂𑀢𑀁 𑀯𑀺𑀦𑀬𑀲𑁆𑀲 𑀲𑀸𑀭𑀫𑀡𑁆𑀟𑁂;

𑀇𑀥 𑀦𑀺𑀝𑁆𑀞𑀺𑀢𑀲𑀩𑁆𑀩𑀲𑀸𑀭𑀫𑀡𑁆𑀟𑀁,

𑀯𑀺𑀦𑀬𑀯𑀲𑁂𑀦 𑀧𑀼𑀦𑀸𑀢𑀺 𑀲𑀸𑀭𑀫𑀡𑁆𑀟𑀦𑁆𑀢𑀺.

𑀧𑀭𑀺𑀡𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀦𑀺𑀝𑁆𑀞𑀺𑀢𑁄 𑀧𑀢𑁆𑀢𑀯𑀕𑁆𑀕𑁄 𑀢𑀢𑀺𑀬𑁄.

𑀦𑀺𑀲𑁆𑀲𑀕𑁆𑀕𑀺𑀬𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.