𑁨. 𑀤𑀼𑀢𑀺𑀬𑀅𑀦𑀺𑀬𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸

𑁪𑁫𑁩. 𑀤𑀼𑀢𑀺𑀬𑁂 𑀓𑁂𑀲𑀼𑀘𑀺 𑀧𑁄𑀢𑁆𑀣𑀓𑁂𑀲𑀼 ‘‘𑀦 𑀳𑁂𑀯 𑀔𑁄 𑀧𑀦 𑀧𑀝𑀺𑀘𑁆𑀙𑀦𑁆𑀦𑀁 𑀆𑀲𑀦𑀁 𑀳𑁄𑀢𑀺 𑀆𑀲𑀦’’𑀦𑁆𑀢𑀺 𑀮𑀺𑀔𑀺𑀢𑀁. ‘‘𑀆𑀲𑀦𑀦𑁆𑀢𑀺 𑀅𑀥𑀺𑀓𑀁, 𑀉𑀤𑁆𑀥𑀭𑀺𑀢𑀸𑀦𑀼𑀭𑀽𑀧’’𑀦𑁆𑀢𑀺 𑀮𑀺𑀔𑀺𑀢𑀁. 𑀤𑁆𑀯𑁂𑀧𑀺 𑀭𑀳𑀸 𑀇𑀥 𑀅𑀥𑀺𑀧𑁆𑀧𑁂𑀢𑀸 𑀓𑀸𑀬𑀲𑀁𑀲𑀕𑁆𑀕𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀭𑀳𑁄𑀦𑀺𑀲𑀚𑁆𑀚𑀕𑁆𑀕𑀳𑀡𑀢𑁄. 𑀬𑀤𑀺 𑀏𑀯𑀁 ‘‘𑀫𑀸𑀢𑀼𑀕𑀸𑀫𑁄 𑀦𑀸𑀫 𑀯𑀺𑀜𑁆𑀜𑀽 𑀧𑀝𑀺𑀩𑀮𑀸’’𑀢𑀺 𑀓𑀺𑀫𑀢𑁆𑀣𑀁 𑀯𑀼𑀢𑁆𑀢𑀦𑁆𑀢𑀺? 𑀅𑀬𑀫𑁂𑀯 𑀳𑀺 𑀫𑀸𑀢𑀼𑀕𑀸𑀫𑁄 𑀤𑁆𑀯𑀺𑀦𑁆𑀦𑀫𑁆𑀧𑀺 𑀓𑀸𑀬𑀲𑀁𑀲𑀕𑁆𑀕𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀦𑀁 𑀏𑀓𑀢𑁄 𑀯𑀢𑁆𑀣𑀼𑀪𑀽𑀢𑁄, 𑀢𑀲𑁆𑀫𑀸 𑀯𑀼𑀢𑁆𑀢𑀁. 𑀓𑀸𑀬𑀲𑀁𑀲𑀕𑁆𑀕𑀲𑁆𑀲 𑀯𑀢𑁆𑀣𑀼𑀪𑀽𑀢𑁄 𑀤𑀲𑁆𑀲𑀺𑀢𑁄, 𑀦 𑀇𑀢𑀭𑀲𑁆𑀲𑀸𑀢𑀺 𑀓𑀢𑁆𑀯𑀸 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀫𑁂𑀯 𑀲𑀦𑁆𑀥𑀸𑀬 𑀢𑀲𑁆𑀲𑀸 𑀯𑀢𑁆𑀣𑀼𑀁 𑀤𑀲𑁆𑀲𑁂𑀦𑁆𑀢𑁄 𑀏𑀯𑀫𑀸𑀳.

𑀏𑀢𑁆𑀣𑀸𑀳 𑁋 𑀬𑀣𑀸 𑀧𑀞𑀫𑁂 𑀅𑀦𑀥𑀺𑀧𑁆𑀧𑁂𑀢𑀸𑀧𑀺 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸 𑀲𑀫𑁆𑀪𑀯𑀯𑀺𑀲𑁂𑀲𑀤𑀲𑁆𑀲𑀦𑀢𑁆𑀣𑀁 𑀯𑀼𑀢𑁆𑀢𑀸, 𑀇𑀥𑀸𑀧𑀺 𑀓𑀸𑀬𑀲𑀁𑀲𑀕𑁆𑀕𑁄, 𑀓𑀲𑁆𑀫𑀸 𑀦 𑀢𑀲𑁆𑀲 𑀯𑀲𑁂𑀦 𑀘𑀓𑁆𑀔𑀼𑀲𑁆𑀲 𑀭𑀳𑁄 𑀕𑀳𑁂𑀢𑀩𑁆𑀩𑁄𑀢𑀺? 𑀆𑀫 𑀦 𑀕𑀳𑁂𑀢𑀩𑁆𑀩𑁄, 𑀦 𑀘 𑀕𑀳𑀺𑀢𑁄, 𑀕𑀳𑀺𑀢𑁄 𑀏𑀯 𑀧𑀦 𑀦𑀺𑀲𑀚𑁆𑀚𑀯𑀲𑁂𑀦, 𑀦 𑀳𑀺 𑀅𑀗𑁆𑀕𑀲𑁆𑀲 𑀦𑀺𑀲𑀚𑁆𑀚𑀸 𑀯𑀺𑀲𑁂𑀲𑁄𑀢𑀺. 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑁂 𑀲𑀢𑀺 𑀓𑀣𑀁 𑀘𑀓𑁆𑀔𑀼𑀲𑁆𑀲 𑀭𑀳𑁄𑀢𑀺 𑀘𑁂? 𑀤𑀽𑀭𑀢𑁆𑀢𑀸. 𑀧𑀞𑀫𑁂 𑀓𑀲𑁆𑀫𑀸 𑀇𑀢𑁆𑀣𑀺𑀲𑀢𑀫𑁆𑀧𑀺 𑀅𑀦𑀸𑀧𑀢𑁆𑀢𑀺𑀁 𑀦 𑀓𑀭𑁄𑀢𑀺, 𑀇𑀥 𑀓𑀲𑁆𑀫𑀸 𑀏𑀓𑀸𑀧𑀺 𑀓𑀭𑁄𑀢𑀻𑀢𑀺 𑀘𑁂? 𑀦𑁄 𑀯𑀼𑀘𑁆𑀘𑀢𑀺 𑀲𑀺𑀤𑁆𑀥𑀢𑁆𑀢𑀸. 𑀲𑀺𑀤𑁆𑀥𑀁 𑀳𑁄𑀢𑀺, 𑀬𑀤𑀺𑀤𑀁 𑀅𑀜𑁆𑀜𑀢𑀭𑁄 𑀪𑀺𑀓𑁆𑀔𑀼 𑀯𑁂𑀲𑀸𑀮𑀺𑀬𑀁 𑀫𑀳𑀸𑀯𑀦𑁂…𑀧𑁂… 𑀤𑁆𑀯𑀸𑀭𑀁 𑀯𑀺𑀯𑀭𑀺𑀢𑁆𑀯𑀸 𑀦𑀺𑀧𑀦𑁆𑀦𑁄 𑀳𑁄𑀢𑀺…𑀧𑁂… 𑀲𑀫𑁆𑀩𑀳𑀼𑀮𑀸 𑀇𑀢𑁆𑀣𑀺𑀬𑁄 𑀬𑀸𑀯𑀤𑀢𑁆𑀣𑀁 𑀓𑀢𑁆𑀯𑀸 𑀧𑀓𑁆𑀓𑀫𑀺𑀁𑀲𑀽𑀢𑀺 (𑀧𑀸𑀭𑀸. 𑁭𑁭). 𑀢𑀲𑁆𑀫𑀸 𑀦 𑀫𑁂𑀣𑀼𑀦𑀲𑁆𑀲 𑀫𑀸𑀢𑀼𑀕𑀸𑀫𑁄 𑀤𑀼𑀢𑀺𑀬𑁄 𑀳𑁄𑀢𑀺. 𑀇𑀢𑁆𑀣𑀺𑀬𑁄 𑀳𑀺 𑀅𑀜𑁆𑀜𑀫𑀜𑁆𑀜𑀺𑀲𑁆𑀲𑀸 𑀯𑀚𑁆𑀚𑀁 𑀧𑀝𑀺𑀘𑁆𑀙𑀸𑀤𑁂𑀦𑁆𑀢𑀺, 𑀢𑁂𑀦𑁂𑀯 𑀪𑀺𑀓𑁆𑀔𑀼𑀦𑀻𑀦𑀁 𑀯𑀚𑁆𑀚𑀧𑀝𑀺𑀘𑁆𑀙𑀸𑀤𑀦𑁂 𑀧𑀸𑀭𑀸𑀚𑀺𑀓𑀁 𑀧𑀜𑁆𑀜𑀢𑁆𑀢𑀁. 𑀢𑀣𑀸 ‘‘𑀆𑀬𑀲𑁆𑀫𑀸 𑀉𑀤𑀸𑀬𑀻 𑀢𑀸 𑀇𑀢𑁆𑀣𑀺𑀬𑁄 𑀯𑀺𑀳𑀸𑀭𑀁 𑀧𑁂𑀓𑁆𑀔𑀸𑀧𑁂𑀢𑁆𑀯𑀸 𑀢𑀸𑀲𑀁 𑀇𑀢𑁆𑀣𑀻𑀦𑀁 𑀯𑀘𑁆𑀘𑀫𑀕𑁆𑀕’’𑀦𑁆𑀢𑀺 (𑀧𑀸𑀭𑀸. 𑁨𑁮𑁩) 𑀏𑀢𑁆𑀣 ‘‘𑀬𑀸 𑀧𑀦 𑀢𑀸 𑀇𑀢𑁆𑀣𑀺𑀬𑁄 𑀳𑀺𑀭𑀺𑀫𑀦𑀸, 𑀢𑀸 𑀦𑀺𑀓𑁆𑀔𑀫𑀺𑀢𑁆𑀯𑀸 𑀪𑀺𑀓𑁆𑀔𑀽 𑀉𑀚𑁆𑀛𑀸𑀧𑁂𑀦𑁆𑀢𑀻’’𑀢𑀺 (𑀧𑀸𑀭𑀸. 𑁨𑁮𑁩) 𑀯𑀘𑀦𑀢𑁄 𑀤𑀼𑀝𑁆𑀞𑀼𑀮𑁆𑀮𑀲𑁆𑀲 𑀫𑀸𑀢𑀼𑀕𑀸𑀫𑁄 𑀤𑀼𑀢𑀺𑀬𑁄 𑀳𑁄𑀢𑀻𑀢𑀺 𑀲𑀺𑀤𑁆𑀥𑀦𑁆𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀉𑀪𑀬𑀢𑁆𑀣𑀸𑀧𑀺 𑀉𑀫𑁆𑀫𑀢𑁆𑀢𑀓𑀸𑀤𑀺𑀓𑀫𑁆𑀫𑀺𑀓𑀸𑀦𑀁 𑀅𑀦𑀸𑀧𑀢𑁆𑀢𑀻𑀢𑀺 𑀢𑁂𑀲𑀁 𑀧𑀸𑀝𑁂𑀓𑁆𑀓𑀁 𑀦𑀺𑀤𑀸𑀦𑁂 𑀆𑀕𑀢𑀁, 𑀆𑀤𑀺𑀓𑀫𑁆𑀫𑀺𑀓𑀸𑀦𑀁 𑀅𑀦𑀸𑀧𑀢𑁆𑀢𑀻𑀢𑀺 𑀅𑀢𑁆𑀣𑁄. 𑀅𑀦𑀼𑀕𑀡𑁆𑀞𑀺𑀧𑀤𑁂 𑀧𑀦 ‘‘𑀅𑀘𑁂𑀮𑀓𑀯𑀕𑁆𑀕𑁂 𑀭𑀳𑁄𑀧𑀝𑀺𑀘𑁆𑀙𑀦𑁆𑀦𑀸𑀲𑀦𑀲𑀺𑀓𑁆𑀔𑀸𑀧𑀤𑁂 ‘𑀯𑀺𑀜𑁆𑀜𑀽 𑀧𑀼𑀭𑀺𑀲𑁄 𑀤𑀼𑀢𑀺𑀬𑁄 𑀳𑁄𑀢𑀻’𑀢𑀺 (𑀧𑀸𑀘𑀺. 𑁨𑁮𑁮) 𑀇𑀫𑀲𑁆𑀲 𑀅𑀦𑀼𑀭𑀽𑀧𑀢𑁄 ‘𑀇𑀢𑁆𑀣𑀻𑀦𑀁 𑀲𑀢𑀫𑁆𑀧𑀺 𑀅𑀦𑀸𑀧𑀢𑁆𑀢𑀺𑀁 𑀦 𑀓𑀭𑁄𑀢𑀻’𑀢𑀺 𑀯𑀼𑀢𑁆𑀢’’𑀦𑁆𑀢𑀺 𑀘, ‘‘𑀤𑀼𑀢𑀺𑀬𑀸𑀦𑀺𑀬𑀢𑁂 ‘𑀇𑀢𑁆𑀣𑀻𑀧𑀺 𑀧𑀼𑀭𑀺𑀲𑁄𑀧𑀻’𑀢𑀺 𑀇𑀤𑀁 𑀪𑀺𑀓𑁆𑀔𑀼𑀦𑀻𑀯𑀕𑁆𑀕𑁂 𑀑𑀲𑀸𑀦𑀲𑀺𑀓𑁆𑀔𑀸𑀧𑀤𑀲𑁆𑀲, 𑀅𑀘𑁂𑀮𑀓𑀯𑀕𑁆𑀕𑁂 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑀸𑀲𑀦𑀲𑀺𑀓𑁆𑀔𑀸𑀧𑀤𑀲𑁆𑀲 𑀘 𑀅𑀦𑀸𑀧𑀢𑁆𑀢𑀺𑀯𑀸𑀭𑁂 ‘𑀬𑁄 𑀓𑁄𑀘𑀺 𑀯𑀺𑀜𑁆𑀜𑀽 𑀧𑀼𑀭𑀺𑀲𑁄 𑀤𑀼𑀢𑀺𑀬𑁄’𑀢𑀺 𑀯𑀼𑀢𑁆𑀢𑀁. 𑀇𑀫𑁂𑀲𑀁 𑀅𑀦𑀼𑀭𑀽𑀧𑀢𑁄 𑀯𑀼𑀢𑁆𑀢𑀦𑁆𑀢𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀘 𑀯𑀼𑀢𑁆𑀢𑀁.

𑀤𑀼𑀢𑀺𑀬𑀅𑀦𑀺𑀬𑀢𑀲𑀺𑀓𑁆𑀔𑀸𑀧𑀤𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀧𑀓𑀺𑀡𑁆𑀡𑀓𑀯𑀡𑁆𑀡𑀦𑀸

𑀅𑀧𑀺𑀘𑁂𑀢𑁆𑀣 𑀇𑀤𑀁 𑀧𑀓𑀺𑀡𑁆𑀡𑀓𑀁, 𑀲𑁂𑀬𑁆𑀬𑀣𑀺𑀤𑀁 𑁋 𑀇𑀤𑀁 𑀅𑀦𑀺𑀬𑀢𑀓𑀡𑁆𑀟𑀁 𑀦𑀺𑀧𑁆𑀧𑀬𑁄𑀚𑀦𑀁 𑀅𑀧𑀼𑀩𑁆𑀩𑀸𑀪𑀸𑀯𑀢𑁄𑀢𑀺 𑀘𑁂? 𑀦, 𑀕𑀭𑀼𑀓𑀮𑀳𑀼𑀓𑀪𑁂𑀤𑀪𑀺𑀦𑁆𑀦𑀸𑀧𑀢𑁆𑀢𑀺𑀭𑁄𑀧𑀦𑀸𑀭𑁄𑀧𑀦𑀓𑁆𑀓𑀫𑀮𑀓𑁆𑀔𑀡𑀤𑀻𑀧𑀦𑀧𑁆𑀧𑀬𑁄𑀚𑀦𑀢𑁄. 𑀏𑀢𑁆𑀣 𑀳𑀺 ‘‘𑀲𑀸 𑀘𑁂 𑀏𑀯𑀁 𑀯𑀤𑁂𑀬𑁆𑀬 ‘𑀅𑀬𑁆𑀬𑁄 𑀫𑀬𑀸 𑀤𑀺𑀝𑁆𑀞𑁄 𑀦𑀺𑀲𑀺𑀦𑁆𑀦𑁄 𑀫𑀸𑀢𑀼𑀕𑀸𑀫𑀲𑁆𑀲 𑀫𑁂𑀣𑀼𑀦𑀁 𑀥𑀫𑁆𑀫𑀁 𑀧𑀝𑀺𑀲𑁂𑀯𑀦𑁆𑀢𑁄’𑀢𑀺, 𑀲𑁄 𑀘 𑀢𑀁 𑀧𑀝𑀺𑀚𑀸𑀦𑀸𑀢𑀺, 𑀆𑀧𑀢𑁆𑀢𑀺𑀬𑀸 𑀓𑀸𑀭𑁂𑀢𑀩𑁆𑀩𑁄…𑀧𑁂… 𑀦𑀺𑀲𑀚𑁆𑀚𑀸𑀬 𑀓𑀸𑀭𑁂𑀢𑀩𑁆𑀩𑁄’’𑀢𑀺𑀆𑀤𑀺𑀦𑀸 (𑀧𑀸𑀭𑀸. 𑁪𑁪𑁬) 𑀆𑀧𑀢𑁆𑀢𑀺𑀬𑀸 𑀕𑀭𑀼𑀓𑀸𑀬 𑀮𑀳𑀼𑀓𑀸𑀬 𑀘 𑀭𑁄𑀧𑀦𑀓𑁆𑀓𑀫𑀮𑀓𑁆𑀔𑀡𑀁, 𑀓𑀸𑀭𑁂𑀢𑀩𑁆𑀩𑁄𑀢𑀺 𑀇𑀫𑀺𑀦𑀸 𑀅𑀦𑀸𑀭𑁄𑀧𑀦𑀓𑁆𑀓𑀫𑀮𑀓𑁆𑀔𑀡𑀜𑁆𑀘 𑀤𑀲𑁆𑀲𑀺𑀢𑀁. 𑀮𑀓𑁆𑀔𑀡𑀤𑀻𑀧𑀦𑀢𑁄 𑀆𑀤𑀺𑀫𑁆𑀳𑀺, 𑀅𑀦𑁆𑀢𑁂 𑀯𑀸 𑀉𑀤𑁆𑀤𑀺𑀲𑀺𑀢𑀩𑁆𑀩𑀦𑁆𑀢𑀺 𑀘𑁂? 𑀦, 𑀅𑀲𑀫𑁆𑀪𑀯𑀢𑁄. 𑀓𑀣𑀁? 𑀦 𑀢𑀸𑀯 𑀆𑀤𑀺𑀫𑁆𑀳𑀺 𑀲𑀫𑁆𑀪𑀯𑀢𑀺, 𑀬𑁂𑀲𑀫𑀺𑀤𑀁 𑀮𑀓𑁆𑀔𑀡𑀁, 𑀢𑁂𑀲𑀁 𑀲𑀺𑀓𑁆𑀔𑀸𑀧𑀤𑀸𑀦𑀁 𑀅𑀤𑀲𑁆𑀲𑀺𑀢𑀢𑁆𑀢𑀸. 𑀦 𑀅𑀦𑁆𑀢𑁂, 𑀕𑀭𑀼𑀓𑀫𑀺𑀲𑁆𑀲𑀓𑀢𑁆𑀢𑀸, 𑀢𑀲𑁆𑀫𑀸 𑀕𑀭𑀼𑀓𑀮𑀳𑀼𑀓𑀸𑀦𑀁 𑀫𑀚𑁆𑀛𑁂 𑀏𑀯 𑀉𑀤𑁆𑀤𑀺𑀲𑀺𑀢𑀩𑁆𑀩𑀦𑁆𑀢𑀺 𑀅𑀭𑀳𑀢𑀺 𑀉𑀪𑀬𑀸𑀫𑀺𑀲𑁆𑀲𑀓𑀢𑁆𑀢𑀸. 𑀬𑀸 𑀢𑀢𑁆𑀣 𑀮𑀳𑀼𑀓𑀸𑀧𑀢𑁆𑀢𑀺 𑀤𑀲𑁆𑀲𑀺𑀢𑀸, 𑀲𑀸𑀧𑀺 𑀕𑀭𑀼𑀓𑀸𑀤𑀺𑀓𑀸. 𑀢𑁂𑀦𑁂𑀯𑀸𑀳 ‘‘𑀫𑁂𑀣𑀼𑀦𑀥𑀫𑁆𑀫𑀲𑀦𑁆𑀦𑀺𑀲𑁆𑀲𑀺𑀢𑀓𑀺𑀮𑁂𑀲𑀲𑀗𑁆𑀔𑀸𑀢𑁂𑀦 𑀭𑀳𑀲𑁆𑀲𑀸𑀤𑁂𑀦𑀸’’𑀢𑀺𑀆𑀤𑀺, 𑀢𑀲𑁆𑀫𑀸 𑀕𑀭𑀼𑀓𑀸𑀦𑀁 𑀏𑀯 𑀅𑀦𑀦𑁆𑀢𑀭𑀁 𑀉𑀤𑁆𑀤𑀺𑀝𑁆𑀞𑀸𑀢𑀺𑀧𑀺 𑀏𑀓𑁂. 𑀏𑀯𑀁 𑀲𑀦𑁆𑀢𑁂 𑀧𑀞𑀫𑀫𑁂𑀯𑀸𑀮𑀁 𑀢𑀸𑀯𑀢𑀸 𑀮𑀓𑁆𑀔𑀡𑀤𑀻𑀧𑀦𑀲𑀺𑀤𑁆𑀥𑀺𑀢𑁄, 𑀓𑀺𑀁 𑀤𑀼𑀢𑀺𑀬𑁂𑀦𑀸𑀢𑀺 𑀘𑁂? 𑀦, 𑀑𑀓𑀸𑀲𑀦𑀺𑀬𑀫𑀧𑀘𑁆𑀘𑀬𑀫𑀺𑀘𑁆𑀙𑀸𑀕𑀸𑀳𑀦𑀺𑀯𑀸𑀭𑀡𑀧𑁆𑀧𑀬𑁄𑀚𑀦𑀢𑁄. ‘‘𑀧𑀝𑀺𑀘𑁆𑀙𑀦𑁆𑀦𑁂 𑀆𑀲𑀦𑁂 𑀅𑀮𑀁𑀓𑀫𑁆𑀫𑀦𑀺𑀬𑁂’’𑀢𑀺 𑀑𑀓𑀸𑀲𑀦𑀺𑀬𑀫𑀢𑁄 𑀳𑀺 𑀢𑀩𑁆𑀩𑀺𑀧𑀭𑀻𑀢𑁂 𑀑𑀓𑀸𑀲𑁂 𑀇𑀤𑀁 𑀮𑀓𑁆𑀔𑀡𑀁 𑀦 𑀯𑀺𑀓𑀧𑁆𑀧𑀺𑀢𑀦𑁆𑀢𑀺 𑀫𑀺𑀘𑁆𑀙𑀸𑀕𑀸𑀳𑁄 𑀳𑁄𑀢𑀺, 𑀢𑀦𑁆𑀦𑀺𑀯𑀸𑀭𑀡𑀢𑁄 𑀤𑀼𑀢𑀺𑀬𑀫𑁆𑀧𑀺 𑀲𑀸𑀢𑁆𑀣𑀓𑀫𑁂𑀯𑀸𑀢𑀺 𑀅𑀥𑀺𑀧𑁆𑀧𑀸𑀬𑁄. 𑀓𑀲𑁆𑀫𑀸? 𑀑𑀓𑀸𑀲𑀪𑁂𑀤𑀢𑁄, 𑀭𑀳𑁄𑀪𑁂𑀤𑀤𑀻𑀧𑀦𑀢𑁄, 𑀭𑀳𑁄𑀦𑀺𑀲𑀚𑁆𑀚𑀲𑁆𑀲𑀸𑀤𑀪𑁂𑀤𑀤𑀻𑀧𑀦𑀢𑁄. 𑀑𑀓𑀸𑀲𑀦𑀺𑀬𑀫𑀪𑀸𑀯𑁂 𑀘 𑀭𑀳𑁄𑀦𑀺𑀲𑀚𑁆𑀚𑀲𑁆𑀲𑀸𑀤𑀪𑁂𑀤𑁄 𑀚𑀸𑀢𑁄. 𑀤𑁆𑀯𑀺𑀦𑁆𑀦𑀁 𑀭𑀳𑁄𑀦𑀺𑀲𑀚𑁆𑀚𑀲𑀺𑀓𑁆𑀔𑀸𑀧𑀤𑀸𑀦𑀁 𑀦𑀸𑀦𑀢𑀸𑀚𑀸𑀦𑀦𑀜𑁆𑀘 𑀲𑀺𑀬𑀸, 𑀢𑀣𑀸 𑀓𑀸𑀬𑀲𑀁𑀲𑀕𑁆𑀕𑀪𑁂𑀤𑀤𑀻𑀧𑀦𑀢𑁄. 𑀦𑀸𑀮𑀁𑀓𑀫𑁆𑀫𑀦𑀺𑀬𑁂𑀧𑀺 𑀳𑀺 𑀑𑀓𑀸𑀲𑁂 𑀅𑀧𑁆𑀧𑀝𑀺𑀘𑁆𑀙𑀦𑁆𑀦𑁂, 𑀧𑀝𑀺𑀘𑁆𑀙𑀦𑁆𑀦𑁂𑀧𑀺 𑀯𑀸 𑀦𑀺𑀲𑀺𑀦𑁆𑀦𑀸𑀬 𑀯𑀸𑀢𑀧𑀸𑀦𑀓𑀯𑀸𑀝𑀙𑀺𑀤𑁆𑀤𑀸𑀤𑀻𑀳𑀺 𑀦𑀺𑀓𑁆𑀔𑀦𑁆𑀢𑀓𑁂𑀲𑀸𑀤𑀺𑀕𑁆𑀕𑀳𑀡𑁂𑀦 𑀓𑀸𑀬𑀲𑀁𑀲𑀕𑁆𑀕𑁄 𑀮𑀩𑁆𑀪𑀢𑀻𑀢𑀺 𑀏𑀯𑀫𑀸𑀤𑀬𑁄𑀧𑀺 𑀦𑀬𑀸 𑀯𑀺𑀢𑁆𑀣𑀸𑀭𑀢𑁄 𑀯𑁂𑀤𑀺𑀢𑀩𑁆𑀩𑀸. ‘‘𑀪𑀺𑀓𑁆𑀔𑀼𑀧𑀸𑀢𑀺𑀫𑁄𑀓𑁆𑀔𑁂 𑀆𑀕𑀢𑀦𑀬𑀢𑁆𑀢𑀸 𑀪𑀺𑀓𑁆𑀔𑀼𑀦𑀻𑀧𑀸𑀢𑀺𑀫𑁄𑀓𑁆𑀔𑁂 𑀇𑀤𑀁 𑀓𑀡𑁆𑀟𑀁 𑀧𑀭𑀺𑀳𑀻𑀦𑀦𑁆𑀢𑀺 𑀯𑁂𑀤𑀺𑀢𑀩𑁆𑀩’’𑀦𑁆𑀢𑀺 𑀯𑀤𑀦𑁆𑀢𑀺. 𑀅𑀢𑁆𑀣𑀼𑀧𑁆𑀧𑀢𑁆𑀢𑀺𑀬𑀸 𑀢𑀢𑁆𑀣 𑀅𑀦𑀼𑀧𑀦𑁆𑀦𑀢𑁆𑀢𑀸𑀢𑀺 𑀏𑀓𑁂. 𑀢𑀁 𑀅𑀦𑁂𑀓𑀢𑁆𑀣𑀪𑀸𑀯𑀤𑀻𑀧𑀦𑀢𑁄 𑀅𑀬𑀼𑀢𑁆𑀢𑀁. 𑀲𑀩𑁆𑀩𑀩𑀼𑀤𑁆𑀥𑀓𑀸𑀮𑁂 𑀳𑀺 𑀪𑀺𑀓𑁆𑀔𑀽𑀦𑀁 𑀧𑀜𑁆𑀘𑀦𑁆𑀦𑀁, 𑀪𑀺𑀓𑁆𑀔𑀼𑀦𑀻𑀦𑀁 𑀘𑀢𑁆𑀢𑀸𑀭𑁄 𑀘 𑀉𑀤𑁆𑀤𑁂𑀲𑀸 𑀲𑀦𑁆𑀢𑀺. 𑀧𑀸𑀢𑀺𑀫𑁄𑀓𑁆𑀔𑀼𑀤𑁆𑀤𑁂𑀲𑀧𑀜𑁆𑀜𑀢𑁆𑀢𑀺𑀬𑀸 𑀅𑀲𑀸𑀥𑀸𑀭𑀡𑀢𑁆𑀢𑀸 𑀢𑀢𑁆𑀣 𑀦𑀺𑀤𑁆𑀤𑀺𑀝𑁆𑀞𑀲𑀗𑁆𑀖𑀸𑀤𑀺𑀲𑁂𑀲𑀧𑀸𑀘𑀺𑀢𑁆𑀢𑀺𑀬𑀸𑀦𑀦𑁆𑀢𑀺 𑀏𑀓𑁂. 𑀢𑀸𑀲𑀁 𑀪𑀺𑀓𑁆𑀔𑀼𑀦𑀻𑀦𑀁 𑀉𑀩𑁆𑀪𑀚𑀸𑀡𑀼𑀫𑀡𑁆𑀟𑀮𑀺𑀓𑀅𑀝𑁆𑀞𑀯𑀢𑁆𑀣𑀼𑀓𑀯𑀲𑁂𑀦 𑀓𑀸𑀬𑀲𑀁𑀲𑀕𑁆𑀕𑀯𑀺𑀲𑁂𑀲𑁄 𑀧𑀸𑀭𑀸𑀚𑀺𑀓𑀯𑀢𑁆𑀣𑀼, ‘‘𑀳𑀢𑁆𑀣𑀕𑁆𑀕𑀳𑀡𑀁 𑀯𑀸 𑀲𑀸𑀤𑀺𑀬𑁂𑀬𑁆𑀬, 𑀓𑀸𑀬𑀁 𑀯𑀸 𑀢𑀤𑀢𑁆𑀣𑀸𑀬 𑀉𑀧𑀲𑀁𑀳𑀭𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁬𑁭𑁪-𑁬𑁭𑁫) 𑀯𑀘𑀦𑀢𑁄 𑀲𑀸𑀤𑀺𑀬𑀦𑀫𑁆𑀧𑀺, ‘‘𑀲𑀦𑁆𑀢𑀺𑀝𑁆𑀞𑁂𑀬𑁆𑀬 𑀯𑀸’’𑀢𑀺 (𑀧𑀸𑀘𑀺. 𑁬𑁭𑁫) 𑀯𑀘𑀦𑀢𑁄 𑀞𑀸𑀦𑀫𑁆𑀧𑀺, ‘‘𑀲𑀗𑁆𑀓𑁂𑀢𑀁 𑀯𑀸 𑀕𑀘𑁆𑀙𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁬𑁭𑁫) 𑀯𑀘𑀦𑀢𑁄 𑀕𑀫𑀦𑀫𑁆𑀧𑀺, ‘‘𑀙𑀦𑁆𑀦𑀁 𑀯𑀸 𑀅𑀦𑀼𑀧𑀯𑀺𑀲𑁂𑀬𑁆𑀬𑀸’’𑀢𑀺 (𑀧𑀸𑀘𑀺. 𑁬𑁭𑁫) 𑀯𑀘𑀦𑀢𑁄 𑀧𑀝𑀺𑀘𑁆𑀙𑀦𑁆𑀦𑀝𑁆𑀞𑀸𑀦𑀧𑀯𑁂𑀲𑁄𑀧𑀺, 𑀢𑀣𑀸 ‘‘𑀭𑀢𑁆𑀢𑀦𑁆𑀥𑀓𑀸𑀭𑁂 𑀅𑀧𑁆𑀧𑀤𑀻𑀧𑁂 𑀧𑀝𑀺𑀘𑁆𑀙𑀦𑁆𑀦𑁂 𑀑𑀓𑀸𑀲𑁂 𑀏𑀓𑁂𑀦𑁂𑀓𑀸 𑀲𑀦𑁆𑀢𑀺𑀝𑁆𑀞𑁂𑀬𑁆𑀬 𑀯𑀸 𑀲𑀮𑁆𑀮𑀧𑁂𑀬𑁆𑀬 𑀯𑀸’’𑀢𑀺 (𑀧𑀸𑀘𑀺. 𑁮𑁩𑁮) 𑀯𑀘𑀦𑀢𑁄 𑀤𑀼𑀝𑁆𑀞𑀼𑀮𑁆𑀮𑀯𑀸𑀘𑀸𑀧𑀺 𑀧𑀸𑀘𑀺𑀢𑁆𑀢𑀺𑀬𑀯𑀢𑁆𑀣𑀼𑀓𑀦𑁆𑀢𑀺 𑀓𑀢𑁆𑀯𑀸 𑀢𑀸𑀲𑀁 𑀅𑀜𑁆𑀜𑀣𑀸 𑀅𑀦𑀺𑀬𑀢𑀓𑀡𑁆𑀟𑀲𑁆𑀲 𑀅𑀯𑀢𑁆𑀢𑀩𑁆𑀩𑀢𑀸𑀧𑀢𑁆𑀢𑀺𑀢𑁄𑀧𑀺 𑀦 𑀯𑀼𑀢𑁆𑀢𑀦𑁆𑀢𑀺 𑀢𑁂𑀲𑀁 𑀅𑀥𑀺𑀧𑁆𑀧𑀸𑀬𑁄.

𑀧𑀓𑀺𑀡𑁆𑀡𑀓𑀯𑀡𑁆𑀡𑀦𑀸 𑀦𑀺𑀝𑁆𑀞𑀺𑀢𑀸.

𑀅𑀦𑀺𑀬𑀢𑀓𑀡𑁆𑀟𑀁 𑀦𑀺𑀝𑁆𑀞𑀺𑀢𑀁.