𑁩𑁯𑁪. 𑀯𑀝𑁆𑀝𑀓𑀚𑀸𑀢𑀓𑀁 (𑁬-𑁨-𑁯)

𑁧𑁨𑁮. 𑀧𑀡𑀻𑀢𑀁 𑀪𑀼𑀜𑁆𑀚𑀲𑁂 𑀪𑀢𑁆𑀢𑀁, 𑀲𑀧𑁆𑀧𑀺𑀢𑁂𑀮𑀜𑁆𑀘 𑀫𑀸𑀢𑀼𑀮;

𑀅𑀣 𑀓𑁂𑀦 𑀦𑀼 𑀯𑀡𑁆𑀡𑁂𑀦, 𑀓𑀺𑀲𑁄 𑀢𑁆𑀯𑀫𑀲𑀺 𑀯𑀸𑀬𑀲.

𑁧𑁨𑁯. 𑀅𑀫𑀺𑀢𑁆𑀢𑀫𑀚𑁆𑀛𑁂 𑀯𑀲𑀢𑁄, 𑀢𑁂𑀲𑀼 𑀆𑀫𑀺𑀲𑀫𑁂𑀲𑀢𑁄;

𑀦𑀺𑀘𑁆𑀘𑀁 𑀉𑀩𑁆𑀩𑀺𑀕𑁆𑀕𑀳𑀤𑀬𑀲𑁆𑀲, 𑀓𑀼𑀢𑁄 𑀓𑀸𑀓𑀲𑁆𑀲 𑀤𑀴𑁆𑀳𑀺𑀬𑀁.

𑁧𑁩𑁦. 𑀦𑀺𑀘𑁆𑀘𑀁 𑀉𑀩𑁆𑀩𑁂𑀕𑀺𑀦𑁄 [𑀉𑀩𑁆𑀩𑀺𑀕𑁆𑀕𑀺𑀦𑁄 (𑀲𑁆𑀬𑀸. 𑀓.), 𑀉𑀩𑁆𑀩𑁂𑀥𑀺𑀦𑁄 (𑀲𑀻.)] 𑀓𑀸𑀓𑀸, 𑀥𑀗𑁆𑀓𑀸 𑀧𑀸𑀧𑁂𑀦 𑀓𑀫𑁆𑀫𑀼𑀦𑀸;

𑀮𑀤𑁆𑀥𑁄 𑀧𑀺𑀡𑁆𑀟𑁄 𑀦 𑀧𑀻𑀡𑁂𑀢𑀺, 𑀓𑀺𑀲𑁄 𑀢𑁂𑀦𑀲𑁆𑀫𑀺 𑀯𑀝𑁆𑀝𑀓.

𑁧𑁩𑁧. 𑀮𑀽𑀔𑀸𑀦𑀺 𑀢𑀺𑀡𑀩𑀻𑀚𑀸𑀦𑀺, 𑀅𑀧𑁆𑀧𑀲𑁆𑀦𑁂𑀳𑀸𑀦𑀺 𑀪𑀼𑀜𑁆𑀚𑀲𑀺;

𑀅𑀣 𑀓𑁂𑀦 𑀦𑀼 𑀯𑀡𑁆𑀡𑁂𑀦, 𑀣𑀽𑀮𑁄 𑀢𑁆𑀯𑀫𑀲𑀺 𑀯𑀝𑁆𑀝𑀓.

𑁧𑁩𑁨. 𑀅𑀧𑁆𑀧𑀺𑀘𑁆𑀙𑀸 𑀅𑀧𑁆𑀧𑀘𑀺𑀦𑁆𑀢𑀸𑀬, 𑀅𑀤𑀽𑀭𑀕𑀫𑀦𑁂𑀦 𑀘;

𑀮𑀤𑁆𑀥𑀸𑀮𑀤𑁆𑀥𑁂𑀦 𑀬𑀸𑀧𑁂𑀦𑁆𑀢𑁄, 𑀣𑀽𑀮𑁄 𑀢𑁂𑀦𑀲𑁆𑀫𑀺 𑀯𑀸𑀬𑀲.

𑁧𑁩𑁩. 𑀅𑀧𑁆𑀧𑀺𑀘𑁆𑀙𑀲𑁆𑀲 𑀳𑀺 𑀧𑁄𑀲𑀲𑁆𑀲, 𑀅𑀧𑁆𑀧𑀘𑀺𑀦𑁆𑀢𑀲𑀼𑀔𑀲𑁆𑀲 [𑀅𑀧𑁆𑀧𑀘𑀺𑀦𑁆𑀢𑀺𑀲𑀼𑀔𑀲𑁆𑀲 (𑀲𑀻. 𑀲𑁆𑀬𑀸. 𑀧𑀻.)] 𑀘;

𑀲𑀼𑀲𑀗𑁆𑀕𑀳𑀺𑀢𑀫𑀸𑀦𑀲𑁆𑀲 [𑀲𑀼𑀲𑀗𑁆𑀕𑀳𑀺𑀢𑀧𑀫𑀸𑀡𑀲𑁆𑀲 (𑀲𑀻. 𑀲𑁆𑀬𑀸. 𑀧𑀻.)], 𑀯𑀼𑀢𑁆𑀢𑀻 𑀲𑀼𑀲𑀫𑀼𑀤𑀸𑀦𑀬𑀸𑀢𑀺.

𑀯𑀝𑁆𑀝𑀓𑀚𑀸𑀢𑀓𑀁 𑀦𑀯𑀫𑀁.