𑀦𑀫𑁄 𑀢𑀲𑁆𑀲 𑀪𑀕𑀯𑀢𑁄 𑀅𑀭𑀳𑀢𑁄 𑀲𑀫𑁆𑀫𑀸𑀲𑀫𑁆𑀩𑀼𑀤𑁆𑀥𑀲𑁆𑀲

𑀔𑀼𑀤𑁆𑀤𑀓𑀦𑀺𑀓𑀸𑀬𑁂

𑀚𑀸𑀢𑀓𑀧𑀸𑀴𑀺

(𑀧𑀞𑀫𑁄 𑀪𑀸𑀕𑁄)

𑁧. 𑀏𑀓𑀓𑀦𑀺𑀧𑀸𑀢𑁄

𑁧. 𑀅𑀧𑀡𑁆𑀡𑀓𑀯𑀕𑁆𑀕𑁄

𑁧. 𑀅𑀧𑀡𑁆𑀡𑀓𑀚𑀸𑀢𑀓𑀁

𑁧. 𑀅𑀧𑀡𑁆𑀡𑀓𑀁 𑀞𑀸𑀦𑀫𑁂𑀓𑁂, 𑀤𑀼𑀢𑀺𑀬𑀁 𑀆𑀳𑀼 𑀢𑀓𑁆𑀓𑀺𑀓𑀸;

𑀏𑀢𑀤𑀜𑁆𑀜𑀸𑀬 𑀫𑁂𑀥𑀸𑀯𑀻, 𑀢𑀁 𑀕𑀡𑁆𑀳𑁂 𑀬𑀤𑀧𑀡𑁆𑀡𑀓𑀦𑁆𑀢𑀺 [𑀢𑀁 𑀕𑀡𑁆𑀳𑁂𑀬𑁆𑀬 𑀅𑀧𑀡𑁆𑀡𑀓𑀁 (𑀓.)].

𑀅𑀧𑀡𑁆𑀡𑀓𑀚𑀸𑀢𑀓𑀁 𑀧𑀞𑀫𑀁.

𑁨. 𑀯𑀡𑁆𑀡𑀼𑀧𑀣𑀚𑀸𑀢𑀓𑀁

𑁨. 𑀅𑀓𑀺𑀮𑀸𑀲𑀼𑀦𑁄 𑀯𑀡𑁆𑀡𑀼𑀧𑀣𑁂 [𑀯𑀡𑁆𑀡𑀧𑀣𑁂 (𑀓.)] 𑀔𑀡𑀦𑁆𑀢𑀸, 𑀉𑀤𑀗𑁆𑀕𑀡𑁂 𑀢𑀢𑁆𑀣 𑀧𑀧𑀁 𑀅𑀯𑀺𑀦𑁆𑀤𑀼𑀁;

𑀏𑀯𑀁 𑀫𑀼𑀦𑀻 𑀯𑀻𑀭𑀺𑀬 [𑀫𑀼𑀦𑀺 𑀯𑀺𑀭𑀺𑀬 (𑀧𑀻.), 𑀫𑀼𑀦𑀺 𑀯𑀻𑀭𑀺𑀬 (𑀲𑁆𑀬𑀸. 𑀓.)] 𑀩𑀮𑀽𑀧𑀧𑀦𑁆𑀦𑁄, 𑀅𑀓𑀺𑀮𑀸𑀲𑀼 𑀯𑀺𑀦𑁆𑀤𑁂 𑀳𑀤𑀬𑀲𑁆𑀲 𑀲𑀦𑁆𑀢𑀺𑀦𑁆𑀢𑀺.

𑀯𑀡𑁆𑀡𑀼𑀧𑀣𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁩. 𑀲𑁂𑀭𑀺𑀯𑀯𑀸𑀡𑀺𑀚𑀚𑀸𑀢𑀓𑀁

𑁩. 𑀇𑀥 𑀘𑁂 𑀦𑀁 [𑀇𑀥 𑀘𑁂 𑀳𑀺 𑀦𑀁 (𑀲𑀻. 𑀧𑀻.)] 𑀯𑀺𑀭𑀸𑀥𑁂𑀲𑀺, 𑀲𑀤𑁆𑀥𑀫𑁆𑀫𑀲𑁆𑀲 𑀦𑀺𑀬𑀸𑀫𑀢𑀁 [𑀦𑀺𑀬𑀸𑀫𑀓𑀁 (𑀲𑁆𑀬𑀸. 𑀓.)];

𑀘𑀺𑀭𑀁 𑀢𑁆𑀯𑀁 𑀅𑀦𑀼𑀢𑀧𑁆𑀧𑁂𑀲𑀺 [𑀅𑀦𑀼𑀢𑀧𑁂𑀲𑁆𑀲𑀲𑀺 (𑀲𑀻. 𑀧𑀻.), 𑀅𑀦𑀼𑀢𑀧𑁆𑀧𑀺𑀲𑁆𑀲𑀲𑀺 (?)], 𑀲𑁂𑀭𑀺𑀯𑀸𑀬𑀁𑀯 𑀯𑀸𑀡𑀺𑀚𑁄𑀢𑀺.

𑀲𑁂𑀭𑀺𑀯𑀯𑀸𑀡𑀺𑀚𑀚𑀸𑀢𑀓𑀁 𑀢𑀢𑀺𑀬𑀁.

𑁪. 𑀘𑀽𑀴𑀲𑁂𑀝𑁆𑀞𑀺𑀚𑀸𑀢𑀓𑀁

𑁪. 𑀅𑀧𑁆𑀧𑀓𑁂𑀦𑀧𑀺 𑀫𑁂𑀥𑀸𑀯𑀻, 𑀧𑀸𑀪𑀢𑁂𑀦 𑀯𑀺𑀘𑀓𑁆𑀔𑀡𑁄;

𑀲𑀫𑀼𑀝𑁆𑀞𑀸𑀧𑁂𑀢𑀺 𑀅𑀢𑁆𑀢𑀸𑀦𑀁, 𑀅𑀡𑀼𑀁 𑀅𑀕𑁆𑀕𑀺𑀁𑀯 𑀲𑀦𑁆𑀥𑀫𑀦𑁆𑀢𑀺.

𑀘𑀽𑀴 [𑀘𑀼𑀮𑁆𑀮 (𑀲𑀻.), 𑀘𑀼𑀮𑁆𑀮𑀓 (𑀲𑁆𑀬𑀸. 𑀧𑀻.)] 𑀲𑁂𑀝𑁆𑀞𑀺𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁫. 𑀢𑀡𑁆𑀟𑀼𑀮𑀦𑀸𑀴𑀺𑀚𑀸𑀢𑀓𑀁

𑁫. [𑀓𑀺𑀫𑀕𑁆𑀖𑀢𑀻 𑀢𑀡𑁆𑀟𑀼𑀮𑀦𑀸𑀴𑀺𑀓𑀸 𑀘, 𑀩𑀸𑀭𑀸𑀡𑀲𑀻 𑀅𑀦𑁆𑀢𑀭𑀩𑀸𑀳𑀺𑀭𑀸𑀦𑀺; 𑀅𑀲𑁆𑀲𑀧𑀜𑁆𑀘𑀲𑀢𑁂 𑀢𑀸𑀦𑀺, 𑀏𑀓𑀸 𑀢𑀡𑁆𑀟𑀼𑀮𑀦𑀸𑀴𑀺𑀓𑀸𑀢𑀺; (𑀲𑁆𑀬𑀸.)] 𑀓𑀺𑀫𑀕𑁆𑀖𑀢𑀺 𑀢𑀡𑁆𑀟𑀼𑀮𑀦𑀸𑀴𑀺𑀓𑀸𑀬, 𑀅𑀲𑁆𑀲𑀸𑀦 𑀫𑀽𑀮𑀸𑀬 𑀯𑀤𑁂𑀳𑀺 𑀭𑀸𑀚 [𑀦𑀸𑀴𑀺𑀓𑀸 𑀘 (𑀲𑀻.), 𑀦𑀸𑀴𑀺𑀓𑀸𑀬 (𑀓. 𑀲𑀻. 𑀅𑀝𑁆𑀞.)];

𑀩𑀸𑀭𑀸𑀡𑀲𑀺𑀁 𑀲𑀦𑁆𑀢𑀭𑀩𑀸𑀳𑀺𑀭𑀢𑁄 [𑀩𑀸𑀳𑀺𑀭𑀦𑁆𑀢𑀁 (𑀲𑀻.)], 𑀅𑀬𑀫𑀕𑁆𑀖𑀢𑀺 𑀢𑀡𑁆𑀟𑀼𑀮𑀦𑀸𑀴𑀺𑀓𑀸𑀢𑀺 [𑀓𑀺𑀫𑀕𑁆𑀖𑀢𑀻 𑀯𑀡𑁆𑀟𑀼𑀮𑀦𑀸𑀴𑀺𑀓𑀸 𑀘, 𑀩𑀸𑀭𑀸𑀡𑀲𑀻 𑀅𑀦𑁆𑀢𑀭𑀩𑀸𑀳𑀺𑀭𑀸𑀦𑀺; 𑀅𑀲𑁆𑀲𑀧𑀜𑁆𑀘𑀲𑀢𑁂 𑀢𑀸𑀦𑀺, 𑀏𑀓𑀸 𑀢𑀡𑁆𑀟𑀼𑀮𑀦𑀸𑀴𑀺𑀓𑀸𑀢𑀺; (𑀲𑁆𑀬𑀸.)].

𑀢𑀡𑁆𑀟𑀼𑀮𑀦𑀸𑀴𑀺𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁬. 𑀤𑁂𑀯𑀥𑀫𑁆𑀫𑀚𑀸𑀢𑀓𑀁

𑁬. 𑀳𑀺𑀭𑀺𑀑𑀢𑁆𑀢𑀧𑁆𑀧𑀲𑀫𑁆𑀧𑀦𑁆𑀦𑀸, 𑀲𑀼𑀓𑁆𑀓𑀥𑀫𑁆𑀫𑀲𑀫𑀸𑀳𑀺𑀢𑀸;

𑀲𑀦𑁆𑀢𑁄 𑀲𑀧𑁆𑀧𑀼𑀭𑀺𑀲𑀸 𑀮𑁄𑀓𑁂, 𑀤𑁂𑀯𑀥𑀫𑁆𑀫𑀸𑀢𑀺 𑀯𑀼𑀘𑁆𑀘𑀭𑁂𑀢𑀺.

𑀤𑁂𑀯𑀥𑀫𑁆𑀫𑀚𑀸𑀢𑀓𑀁 𑀙𑀝𑁆𑀞𑀁.

𑁭. 𑀓𑀝𑁆𑀞𑀳𑀸𑀭𑀺𑀚𑀸𑀢𑀓𑀁

𑁭. 𑀧𑀼𑀢𑁆𑀢𑁄 𑀢𑁆𑀬𑀸𑀳𑀁 𑀫𑀳𑀸𑀭𑀸𑀚, 𑀢𑁆𑀯𑀁 𑀫𑀁 𑀧𑁄𑀲 𑀚𑀦𑀸𑀥𑀺𑀧;

𑀅𑀜𑁆𑀜𑁂𑀧𑀺 𑀤𑁂𑀯𑁄 𑀧𑁄𑀲𑁂𑀢𑀺, 𑀓𑀺𑀜𑁆𑀘 [𑀓𑀺𑀜𑁆𑀘𑀺 (𑀓.)] 𑀤𑁂𑀯𑁄 𑀲𑀓𑀁 𑀧𑀚𑀦𑁆𑀢𑀺.

𑀓𑀝𑁆𑀞𑀳𑀸𑀭𑀺 [𑀓𑀝𑁆𑀞𑀯𑀸𑀳𑀦 (𑀓.)] 𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁮. 𑀕𑀸𑀫𑀡𑀺𑀚𑀸𑀢𑀓𑀁

𑁮. 𑀅𑀧𑀺 𑀅𑀢𑀭𑀫𑀸𑀦𑀸𑀦𑀁, 𑀨𑀮𑀸𑀲𑀸𑀯 𑀲𑀫𑀺𑀚𑁆𑀛𑀢𑀺;

𑀯𑀺𑀧𑀓𑁆𑀓𑀩𑁆𑀭𑀳𑁆𑀫𑀘𑀭𑀺𑀬𑁄𑀲𑁆𑀫𑀺, 𑀏𑀯𑀁 𑀚𑀸𑀦𑀸𑀳𑀺 𑀕𑀸𑀫𑀡𑀻𑀢𑀺.

𑀕𑀸𑀫𑀡𑀺𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁯. 𑀫𑀖𑀤𑁂𑀯𑀚𑀸𑀢𑀓𑀁

𑁯. 𑀉𑀢𑁆𑀢𑀫𑀗𑁆𑀕𑀭𑀼𑀳𑀸 𑀫𑀬𑁆𑀳𑀁, 𑀇𑀫𑁂 𑀚𑀸𑀢𑀸 𑀯𑀬𑁄𑀳𑀭𑀸;

𑀧𑀸𑀢𑀼𑀪𑀽𑀢𑀸 𑀤𑁂𑀯𑀤𑀽𑀢𑀸, 𑀧𑀩𑁆𑀩𑀚𑁆𑀚𑀸𑀲𑀫𑀬𑁄 𑀫𑀫𑀸𑀢𑀺.

𑀫𑀖𑀤𑁂𑀯 [𑀫𑀔𑀸𑀤𑁂𑀯 (𑀲𑀻. 𑀧𑀻.), 𑀤𑁂𑀯𑀤𑀽𑀢 (𑀓.)] 𑀚𑀸𑀢𑀓𑀁 𑀦𑀯𑀫𑀁.

𑁧𑁦. 𑀲𑀼𑀔𑀯𑀺𑀳𑀸𑀭𑀺𑀚𑀸𑀢𑀓𑀁

𑁧𑁦. 𑀬𑀜𑁆𑀘 𑀅𑀜𑁆𑀜𑁂 𑀦 𑀭𑀓𑁆𑀔𑀦𑁆𑀢𑀺, 𑀬𑁄 𑀘 𑀅𑀜𑁆𑀜𑁂 𑀦 𑀭𑀓𑁆𑀔𑀢𑀺;

𑀲 𑀯𑁂 𑀭𑀸𑀚 𑀲𑀼𑀔𑀁 𑀲𑁂𑀢𑀺, 𑀓𑀸𑀫𑁂𑀲𑀼 𑀅𑀦𑀧𑁂𑀓𑁆𑀔𑀯𑀸𑀢𑀺.

𑀲𑀼𑀔𑀯𑀺𑀳𑀸𑀭𑀺𑀚𑀸𑀢𑀓𑀁 𑀤𑀲𑀫𑀁.

𑀅𑀧𑀡𑁆𑀡𑀓𑀯𑀕𑁆𑀕𑁄 𑀧𑀞𑀫𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀯𑀭𑀸𑀧𑀡𑁆𑀡𑀓 𑀯𑀡𑁆𑀡𑀼𑀧𑀣 𑀲𑁂𑀭𑀺𑀯𑀭𑁄, 𑀲𑀼𑀯𑀺𑀘𑀓𑁆𑀔𑀡 𑀢𑀡𑁆𑀟𑀼𑀮𑀦𑀸𑀴𑀺𑀓𑀲𑁆𑀲𑀸;

𑀳𑀺𑀭𑀺 𑀧𑀼𑀢𑁆𑀢𑀯𑀭𑀼𑀢𑁆𑀢𑀕𑀸𑀫𑀡𑀺𑀦𑀸, 𑀬𑁄 𑀘 𑀦 𑀭𑀓𑁆𑀔𑀢𑀺 𑀢𑁂𑀦 𑀤𑀲𑀸𑀢𑀺.

𑁨. 𑀲𑀻𑀮𑀯𑀕𑁆𑀕𑁄

𑁧𑁧. 𑀮𑀓𑁆𑀔𑀡𑀫𑀺𑀕𑀚𑀸𑀢𑀓𑀁

𑁧𑁧. 𑀳𑁄𑀢𑀺 𑀲𑀻𑀮𑀯𑀢𑀁 𑀅𑀢𑁆𑀣𑁄, 𑀧𑀝𑀺𑀲𑀦𑁆𑀣𑀸𑀭 [𑀧𑀝𑀺𑀲𑀦𑁆𑀥𑀸𑀭 (𑀓.)] 𑀯𑀼𑀢𑁆𑀢𑀺𑀦𑀁;

𑀮𑀓𑁆𑀔𑀡𑀁 𑀧𑀲𑁆𑀲 𑀆𑀬𑀦𑁆𑀢𑀁, 𑀜𑀸𑀢𑀺𑀲𑀗𑁆𑀖𑀧𑀼𑀭𑀓𑁆𑀔𑀢𑀁 [𑀧𑀼𑀭𑀓𑁆𑀔𑀺𑀢𑀁 (𑀲𑁆𑀬𑀸.), 𑀧𑀼𑀭𑁂𑀓𑁆𑀔𑀺𑀢𑀁 (𑀓.)];

𑀅𑀣 𑀧𑀲𑁆𑀲𑀲𑀺𑀫𑀁 𑀓𑀸𑀴𑀁, 𑀲𑀼𑀯𑀺𑀳𑀻𑀦𑀁𑀯 𑀜𑀸𑀢𑀺𑀪𑀻𑀢𑀺.

𑀮𑀓𑁆𑀔𑀡𑀫𑀺𑀕𑀚𑀸𑀢𑀓𑀁 𑀧𑀞𑀫𑀁.

𑁧𑁨. 𑀦𑀺𑀕𑁆𑀭𑁄𑀥𑀫𑀺𑀕𑀚𑀸𑀢𑀓𑀁

𑁧𑁨. 𑀦𑀺𑀕𑁆𑀭𑁄𑀥𑀫𑁂𑀯 𑀲𑁂𑀯𑁂𑀬𑁆𑀬, 𑀦 𑀲𑀸𑀔𑀫𑀼𑀧𑀲𑀁𑀯𑀲𑁂;

𑀦𑀺𑀕𑁆𑀭𑁄𑀥𑀲𑁆𑀫𑀺𑀁 𑀫𑀢𑀁 𑀲𑁂𑀬𑁆𑀬𑁄, 𑀬𑀜𑁆𑀘𑁂 𑀲𑀸𑀔𑀲𑁆𑀫𑀺 [𑀲𑀸𑀔𑀲𑁆𑀫𑀺𑀁 (𑀲𑀻. 𑀧𑀻.)] 𑀚𑀻𑀯𑀺𑀢𑀦𑁆𑀢𑀺.

𑀦𑀺𑀕𑁆𑀭𑁄𑀥𑀫𑀺𑀕𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁧𑁩. 𑀓𑀡𑁆𑀟𑀺𑀚𑀸𑀢𑀓𑀁

𑁧𑁩. 𑀥𑀺𑀭𑀢𑁆𑀣𑀼 𑀓𑀡𑁆𑀟𑀺𑀦𑀁 𑀲𑀮𑁆𑀮𑀁, 𑀧𑀼𑀭𑀺𑀲𑀁 𑀕𑀸𑀴𑁆𑀳𑀯𑁂𑀥𑀺𑀦𑀁;

𑀥𑀺𑀭𑀢𑁆𑀣𑀼 𑀢𑀁 𑀚𑀦𑀧𑀤𑀁, 𑀬𑀢𑁆𑀣𑀺𑀢𑁆𑀣𑀻 𑀧𑀭𑀺𑀡𑀸𑀬𑀺𑀓𑀸;

𑀢𑁂 𑀘𑀸𑀧𑀺 𑀥𑀺𑀓𑁆𑀓𑀺𑀢𑀸 [𑀥𑀺𑀓𑁆𑀓𑀢𑀸 (?)] 𑀲𑀢𑁆𑀢𑀸, 𑀬𑁂 𑀇𑀢𑁆𑀣𑀻𑀦𑀁 𑀯𑀲𑀁𑀕𑀢𑀸𑀢𑀺.

𑀓𑀡𑁆𑀟𑀺𑀚𑀸𑀢𑀓𑀁 𑀢𑀢𑀺𑀬𑀁.

𑁧𑁪. 𑀯𑀸𑀢𑀫𑀺𑀕𑀚𑀸𑀢𑀓𑀁

𑁧𑁪. 𑀦 𑀓𑀺𑀭𑀢𑁆𑀣𑀺 𑀭𑀲𑁂𑀳𑀺 𑀧𑀸𑀧𑀺𑀬𑁄, 𑀆𑀯𑀸𑀲𑁂𑀳𑀺 𑀯 [𑀯𑀸 (𑀲𑀩𑁆𑀩𑀢𑁆𑀣)] 𑀲𑀦𑁆𑀣𑀯𑁂𑀳𑀺 𑀯𑀸;

𑀯𑀸𑀢𑀫𑀺𑀕𑀁 𑀕𑀳𑀦𑀦𑀺𑀲𑁆𑀲𑀺𑀢𑀁 [𑀕𑁂𑀳𑀦𑀺𑀲𑁆𑀲𑀺𑀢𑀁 (𑀲𑀻. 𑀧𑀻.)], 𑀯𑀲𑀫𑀸𑀦𑁂𑀲𑀺 𑀭𑀲𑁂𑀳𑀺 𑀲𑀜𑁆𑀚𑀬𑁄𑀢𑀺.

𑀯𑀸𑀢𑀫𑀺𑀕𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁧𑁫. 𑀔𑀭𑀸𑀤𑀺𑀬𑀚𑀸𑀢𑀓𑀁

𑁧𑁫. 𑀅𑀝𑁆𑀞𑀓𑁆𑀔𑀼𑀭𑀁 𑀔𑀭𑀸𑀤𑀺𑀬𑁂, 𑀫𑀺𑀕𑀁 𑀯𑀗𑁆𑀓𑀸𑀢𑀺𑀯𑀗𑁆𑀓𑀺𑀦𑀁;

𑀲𑀢𑁆𑀢𑀳𑀺 𑀓𑀸𑀮𑀸𑀢𑀺𑀓𑁆𑀓𑀦𑁆𑀢𑀁 [𑀲𑀢𑁆𑀢𑀳𑀺 𑀓𑀮𑀸𑀳’𑀢𑀺𑀓𑁆𑀓𑀦𑁆𑀢𑀁 (𑀲𑀻.), 𑀲𑀢𑁆𑀢𑀓𑀸𑀮𑁂𑀳’𑀢𑀺𑀓𑁆𑀓𑀦𑁆𑀢𑀁 (𑀲𑁆𑀬𑀸.), 𑀲𑀢𑁆𑀢𑀳𑀺 𑀓𑀸𑀮𑀸𑀳’𑀢𑀺𑀓𑁆𑀓𑀦𑁆𑀢𑀁 (𑀧𑀻.)], 𑀦 𑀦𑀁 𑀑𑀯𑀤𑀺𑀢𑀼𑀲𑁆𑀲𑀳𑁂𑀢𑀺.

𑀔𑀭𑀸𑀤𑀺𑀬𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁧𑁬. 𑀢𑀺𑀧𑀮𑁆𑀮𑀢𑁆𑀣𑀫𑀺𑀕𑀚𑀸𑀢𑀓𑀁

𑁧𑁬. 𑀫𑀺𑀕𑀁 𑀢𑀺𑀧𑀮𑁆𑀮𑀢𑁆𑀣 [𑀢𑀺𑀧𑀮𑁆𑀮𑀢𑁆𑀢 (𑀓.)] 𑀫𑀦𑁂𑀓𑀫𑀸𑀬𑀁, 𑀅𑀝𑁆𑀞𑀓𑁆𑀔𑀼𑀭𑀁 𑀅𑀟𑁆𑀠𑀭𑀢𑁆𑀢𑀸𑀧𑀧𑀸𑀬𑀺𑀁 [𑀅𑀟𑁆𑀠𑀭𑀢𑁆𑀢𑀸𑀯𑀧𑀸𑀬𑀺𑀁 (𑀲𑀻. 𑀧𑀻.)];

𑀏𑀓𑁂𑀦 𑀲𑁄𑀢𑁂𑀦 𑀙𑀫𑀸𑀲𑁆𑀲𑀲𑀦𑁆𑀢𑁄, 𑀙𑀳𑀺 𑀓𑀮𑀸𑀳𑀺𑀢𑀺𑀪𑁄𑀢𑀺 [𑀓𑀮𑀸𑀳𑀢𑀺𑀪𑁄𑀢𑀺 (𑀲𑀻. 𑀲𑁆𑀬𑀸. 𑀧𑀻.)] 𑀪𑀸𑀕𑀺𑀦𑁂𑀬𑁆𑀬𑁄𑀢𑀺.

𑀢𑀺𑀧𑀮𑁆𑀮𑀢𑁆𑀣𑀫𑀺𑀕𑀚𑀸𑀢𑀓𑀁 𑀙𑀝𑁆𑀞𑀁.

𑁧𑁭. 𑀫𑀸𑀮𑀼𑀢𑀚𑀸𑀢𑀓𑀁

𑁧𑁭. 𑀓𑀸𑀴𑁂 𑀯𑀸 𑀬𑀤𑀺 𑀯𑀸 𑀚𑀼𑀡𑁆𑀳𑁂, 𑀬𑀤𑀸 𑀯𑀸𑀬𑀢𑀺 𑀫𑀸𑀮𑀼𑀢𑁄;

𑀯𑀸𑀢𑀚𑀸𑀦𑀺 𑀳𑀺 𑀲𑀻𑀢𑀸𑀦𑀺, 𑀉𑀪𑁄𑀢𑁆𑀣𑀫𑀧𑀭𑀸𑀚𑀺𑀢𑀸𑀢𑀺.

𑀫𑀸𑀮𑀼𑀢𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁧𑁮. 𑀫𑀢𑀓𑀪𑀢𑁆𑀢𑀚𑀸𑀢𑀓𑀁

𑁧𑁮. 𑀏𑀯𑀁 𑀘𑁂 𑀲𑀢𑁆𑀢𑀸 𑀚𑀸𑀦𑁂𑀬𑁆𑀬𑀼𑀁, 𑀤𑀼𑀓𑁆𑀔𑀸𑀬𑀁 𑀚𑀸𑀢𑀺𑀲𑀫𑁆𑀪𑀯𑁄;

𑀦 𑀧𑀸𑀡𑁄 𑀧𑀸𑀡𑀺𑀦𑀁 𑀳𑀜𑁆𑀜𑁂, 𑀧𑀸𑀡𑀖𑀸𑀢𑀻 𑀳𑀺 𑀲𑁄𑀘𑀢𑀻𑀢𑀺.

𑀫𑀢𑀓𑀪𑀢𑁆𑀢𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁧𑁯. 𑀆𑀬𑀸𑀘𑀺𑀢𑀪𑀢𑁆𑀢𑀚𑀸𑀢𑀓𑀁

𑁧𑁯. 𑀲𑀘𑁂 𑀫𑀼𑀘𑁆𑀘𑁂 [𑀫𑀼𑀜𑁆𑀘𑁂 (𑀲𑀻. 𑀲𑁆𑀬𑀸. 𑀧𑀻.)] 𑀧𑁂𑀘𑁆𑀘 𑀫𑀼𑀘𑁆𑀘𑁂 [𑀫𑀼𑀜𑁆𑀘𑁂 (𑀲𑀻. 𑀲𑁆𑀬𑀸. 𑀧𑀻.)], 𑀫𑀼𑀘𑁆𑀘𑀫𑀸𑀦𑁄 𑀳𑀺 𑀩𑀚𑁆𑀛𑀢𑀺;

𑀦 𑀳𑁂𑀯𑀁 𑀥𑀻𑀭𑀸 𑀫𑀼𑀘𑁆𑀘𑀦𑁆𑀢𑀺, 𑀫𑀼𑀢𑁆𑀢𑀺 𑀩𑀸𑀮𑀲𑁆𑀲 𑀩𑀦𑁆𑀥𑀦𑀦𑁆𑀢𑀺.

𑀆𑀬𑀸𑀘𑀺𑀢𑀪𑀢𑁆𑀢𑀚𑀸𑀢𑀓𑀁 𑀦𑀯𑀫𑀁.

𑁨𑁦. 𑀦𑀴𑀧𑀸𑀦𑀚𑀸𑀢𑀓𑀁

𑁨𑁦. 𑀤𑀺𑀲𑁆𑀯𑀸 𑀧𑀤𑀫𑀦𑀼𑀢𑁆𑀢𑀺𑀡𑁆𑀡𑀁, 𑀤𑀺𑀲𑁆𑀯𑀸𑀦𑁄𑀢𑀭𑀺𑀢𑀁 𑀧𑀤𑀁;

𑀦𑀴𑁂𑀦 𑀯𑀸𑀭𑀺𑀁 𑀧𑀺𑀲𑁆𑀲𑀸𑀫 [𑀧𑀺𑀯𑀺𑀲𑁆𑀲𑀸𑀫 (𑀲𑀻. 𑀲𑁆𑀬𑀸. 𑀧𑀻.)], 𑀦𑁂𑀯 [𑀦 𑀘 (𑀓.)] 𑀫𑀁 𑀢𑁆𑀯𑀁 𑀯𑀥𑀺𑀲𑁆𑀲𑀲𑀻𑀢𑀺.

𑀦𑀴𑀧𑀸𑀦𑀚𑀸𑀢𑀓𑀁 𑀤𑀲𑀫𑀁.

𑀲𑀻𑀮𑀯𑀕𑁆𑀕𑁄 𑀤𑀼𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀅𑀣 𑀮𑀓𑁆𑀔𑀡 𑀲𑀸𑀔 𑀥𑀺𑀭𑀢𑁆𑀣𑀼 𑀧𑀼𑀦, 𑀦 𑀓𑀺𑀭𑀢𑁆𑀣𑀺 𑀭𑀲𑁂𑀳𑀺 𑀔𑀭𑀸𑀤𑀺𑀬𑀸;

𑀅𑀢𑀺𑀪𑁄𑀢𑀺 𑀯𑀭 [𑀭𑀲 (𑀲𑀩𑁆𑀩𑀢𑁆𑀣)] 𑀫𑀸𑀮𑀼𑀢 𑀧𑀸𑀡, 𑀫𑀼𑀘𑁆𑀘𑁂𑀦 𑀦𑀴𑀅𑀯𑁆𑀳𑀬𑀦𑁂𑀦 𑀪𑀯𑀦𑁆𑀢𑀺 𑀤𑀲𑀸𑀢𑀺.

𑁩. 𑀓𑀼𑀭𑀼𑀗𑁆𑀕𑀯𑀕𑁆𑀕𑁄

𑁨𑁧. 𑀓𑀼𑀭𑀼𑀗𑁆𑀕𑀫𑀺𑀕𑀚𑀸𑀢𑀓𑀁

𑁨𑁧. 𑀜𑀸𑀢𑀫𑁂𑀢𑀁 𑀓𑀼𑀭𑀼𑀗𑁆𑀕𑀲𑁆𑀲, 𑀬𑀁 𑀢𑁆𑀯𑀁 𑀲𑁂𑀧𑀡𑁆𑀡𑀺 𑀲𑀺𑀬𑁆𑀬𑀲𑀺 [𑀲𑁂𑀬𑁆𑀬𑀲𑀺 (𑀲𑀻. 𑀲𑁆𑀬𑀸. 𑀧𑀻.)];

𑀅𑀜𑁆𑀜𑀁 𑀲𑁂𑀧𑀡𑁆𑀡𑀺 𑀕𑀘𑁆𑀙𑀸𑀫𑀺, 𑀦 𑀫𑁂 𑀢𑁂 𑀭𑀼𑀘𑁆𑀘𑀢𑁂 𑀨𑀮𑀦𑁆𑀢𑀺.

𑀓𑀼𑀭𑀼𑀗𑁆𑀕𑀫𑀺𑀕𑀚𑀸𑀢𑀓𑀁 𑀧𑀞𑀫𑀁.

𑁨𑁨. 𑀓𑀼𑀓𑁆𑀓𑀼𑀭𑀚𑀸𑀢𑀓𑀁

𑁨𑁨. 𑀬𑁂 𑀓𑀼𑀓𑁆𑀓𑀼𑀭𑀸 𑀭𑀸𑀚𑀓𑀼𑀮𑀫𑁆𑀳𑀺 𑀯𑀤𑁆𑀥𑀸, 𑀓𑁄𑀮𑁂𑀬𑁆𑀬𑀓𑀸 𑀯𑀡𑁆𑀡𑀩𑀮𑀽𑀧𑀧𑀦𑁆𑀦𑀸;

𑀢𑁂𑀫𑁂 𑀦 𑀯𑀚𑁆𑀛𑀸 𑀫𑀬𑀫𑀲𑁆𑀫 𑀯𑀚𑁆𑀛𑀸, 𑀦𑀸𑀬𑀁 𑀲𑀖𑀘𑁆𑀘𑀸 𑀤𑀼𑀩𑁆𑀩𑀮𑀖𑀸𑀢𑀺𑀓𑀸𑀬𑀦𑁆𑀢𑀺.

𑀓𑀼𑀓𑁆𑀓𑀼𑀭𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁨𑁩. 𑀕𑁄𑀚𑀸𑀦𑀻𑀬𑀚𑀸𑀢𑀓𑀁

𑁨𑁩. 𑀅𑀧𑀺 𑀧𑀲𑁆𑀲𑁂𑀦 𑀲𑁂𑀫𑀸𑀦𑁄, 𑀲𑀮𑁆𑀮𑁂𑀪𑀺 𑀲𑀮𑁆𑀮𑀮𑀻𑀓𑀢𑁄;

𑀲𑁂𑀬𑁆𑀬𑁄𑀯 𑀯𑀴𑀯𑀸 𑀕𑁄𑀚𑁄 [𑀪𑁄𑀚𑁆𑀚𑁄 (𑀲𑀻.), 𑀪𑁄𑀚𑁆𑀛𑁄 (𑀲𑁆𑀬𑀸. 𑀧𑀻.)], 𑀬𑀼𑀜𑁆𑀚 𑀫𑀜𑁆𑀜𑁂𑀯 𑀲𑀸𑀭𑀣𑀻𑀢𑀺.

𑀕𑁄𑀚𑀸𑀦𑀻𑀬 [𑀪𑁄𑀚𑀸𑀚𑀸𑀦𑀻𑀬 (𑀲𑀻. 𑀲𑁆𑀬𑀸. 𑀧𑀻.)] 𑀚𑀸𑀢𑀓𑀁 𑀢𑀢𑀺𑀬𑀁.

𑁨𑁪. 𑀆𑀚𑀜𑁆𑀜𑀚𑀸𑀢𑀓𑀁

𑁨𑁪. 𑀬𑀤𑀸 𑀬𑀤𑀸 𑀬𑀢𑁆𑀣 𑀬𑀤𑀸, 𑀬𑀢𑁆𑀣 𑀬𑀢𑁆𑀣 𑀬𑀤𑀸 𑀬𑀤𑀸;

𑀆𑀚𑀜𑁆𑀜𑁄 𑀓𑀼𑀭𑀼𑀢𑁂 𑀯𑁂𑀕𑀁, 𑀳𑀸𑀬𑀦𑁆𑀢𑀺 𑀢𑀢𑁆𑀣 𑀯𑀸𑀴𑀯𑀸𑀢𑀺.

𑀆𑀚𑀜𑁆𑀜𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁨𑁫. 𑀢𑀺𑀢𑁆𑀣𑀚𑀸𑀢𑀓𑀁

𑁨𑁫. 𑀅𑀜𑁆𑀜𑀫𑀜𑁆𑀜𑁂𑀳𑀺 𑀢𑀺𑀢𑁆𑀣𑁂𑀳𑀺, 𑀅𑀲𑁆𑀲𑀁 𑀧𑀸𑀬𑁂𑀳𑀺 𑀲𑀸𑀭𑀣𑀺;

𑀅𑀘𑁆𑀘𑀸𑀲𑀦𑀲𑁆𑀲 𑀧𑀼𑀭𑀺𑀲𑁄, 𑀧𑀸𑀬𑀸𑀲𑀲𑁆𑀲𑀧𑀺 𑀢𑀧𑁆𑀧𑀢𑀻𑀢𑀺.

𑀢𑀺𑀢𑁆𑀣𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁨𑁬. 𑀫𑀳𑀺𑀴𑀸𑀫𑀼𑀔𑀚𑀸𑀢𑀓𑀁

𑁨𑁬. 𑀧𑀼𑀭𑀸𑀡𑀘𑁄𑀭𑀸𑀦 𑀯𑀘𑁄 𑀦𑀺𑀲𑀫𑁆𑀫, 𑀫𑀳𑀺𑀴𑀸𑀫𑀼𑀔𑁄 𑀧𑁄𑀣𑀬𑀫𑀦𑁆𑀯𑀘𑀸𑀭𑀻;

𑀲𑀼𑀲𑀜𑁆𑀜𑀢𑀸𑀦𑀜𑁆𑀳𑀺 𑀯𑀘𑁄 𑀦𑀺𑀲𑀫𑁆𑀫, 𑀕𑀚𑀼𑀢𑁆𑀢𑀫𑁄 𑀲𑀩𑁆𑀩𑀕𑀼𑀡𑁂𑀲𑀼 𑀅𑀝𑁆𑀞𑀸𑀢𑀺.

𑀫𑀳𑀺𑀴𑀸𑀫𑀼𑀔𑀚𑀸𑀢𑀓𑀁 𑀙𑀝𑁆𑀞𑀁.

𑁨𑁭. 𑀅𑀪𑀺𑀡𑁆𑀳𑀚𑀸𑀢𑀓𑀁

𑁨𑁭. 𑀦𑀸𑀮𑀁 𑀓𑀩𑀴𑀁 𑀧𑀤𑀸𑀢𑀯𑁂, 𑀦 𑀘 𑀧𑀺𑀡𑁆𑀟𑀁 𑀦 𑀓𑀼𑀲𑁂 𑀦 𑀖𑀁𑀲𑀺𑀢𑀼𑀁;

𑀫𑀜𑁆𑀜𑀸𑀫𑀺 𑀅𑀪𑀺𑀡𑁆𑀳𑀤𑀲𑁆𑀲𑀦𑀸, 𑀦𑀸𑀕𑁄 𑀲𑁆𑀦𑁂𑀳𑀫𑀓𑀸𑀲𑀺 [𑀲𑀺𑀦𑁂𑀳𑀫𑀓𑀸𑀲𑀺 (𑀲𑀻. 𑀲𑁆𑀬𑀸. 𑀧𑀻.)] 𑀓𑀼𑀓𑁆𑀓𑀼𑀭𑁂𑀢𑀺.

𑀅𑀪𑀺𑀡𑁆𑀳𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁨𑁮. 𑀦𑀦𑁆𑀤𑀺𑀯𑀺𑀲𑀸𑀮𑀚𑀸𑀢𑀓𑀁

𑁨𑁮. 𑀫𑀦𑀼𑀜𑁆𑀜𑀫𑁂𑀯 𑀪𑀸𑀲𑁂𑀬𑁆𑀬, 𑀦𑀸𑀫𑀦𑀼𑀜𑁆𑀜𑀁 𑀓𑀼𑀤𑀸𑀘𑀦𑀁;

𑀫𑀦𑀼𑀜𑁆𑀜𑀁 𑀪𑀸𑀲𑀫𑀸𑀦𑀲𑁆𑀲, 𑀕𑀭𑀼𑀁 𑀪𑀸𑀭𑀁 𑀉𑀤𑀤𑁆𑀥𑀭𑀺;

𑀥𑀦𑀜𑁆𑀘 𑀦𑀁 𑀅𑀮𑀸𑀪𑁂𑀲𑀺, 𑀢𑁂𑀦 𑀘𑀢𑁆𑀢𑀫𑀦𑁄 𑀅𑀳𑀽𑀢𑀺.

𑀦𑀦𑁆𑀤𑀺𑀯𑀺𑀲𑀸𑀮𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁨𑁯. 𑀓𑀡𑁆𑀳𑀚𑀸𑀢𑀓𑀁

𑁨𑁯. 𑀬𑀢𑁄 𑀬𑀢𑁄 𑀕𑀭𑀼 𑀥𑀼𑀭𑀁, 𑀬𑀢𑁄 𑀕𑀫𑁆𑀪𑀻𑀭𑀯𑀢𑁆𑀢𑀦𑀻;

𑀢𑀤𑀸𑀲𑁆𑀲𑀼 𑀓𑀡𑁆𑀳𑀁 𑀬𑀼𑀜𑁆𑀚𑀦𑁆𑀢𑀺, 𑀲𑁆𑀯𑀸𑀲𑁆𑀲𑀼 𑀢𑀁 𑀯𑀳𑀢𑁂 𑀥𑀼𑀭𑀦𑁆𑀢𑀺.

𑀓𑀡𑁆𑀳𑀚𑀸𑀢𑀓𑀁 𑀦𑀯𑀫𑀁.

𑁩𑁦. 𑀫𑀼𑀦𑀺𑀓𑀚𑀸𑀢𑀓𑀁

𑁩𑁦. 𑀫𑀸 𑀫𑀼𑀦𑀺𑀓𑀲𑁆𑀲 𑀧𑀺𑀳𑀬𑀺, 𑀆𑀢𑀼𑀭𑀦𑁆𑀦𑀸𑀦𑀺 𑀪𑀼𑀜𑁆𑀚𑀢𑀺;

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀪𑀼𑀲𑀁 𑀔𑀸𑀤, 𑀏𑀢𑀁 𑀤𑀻𑀖𑀸𑀬𑀼𑀮𑀓𑁆𑀔𑀡𑀦𑁆𑀢𑀺.

𑀫𑀼𑀦𑀺𑀓𑀚𑀸𑀢𑀓𑀁 𑀤𑀲𑀫𑀁.

𑀓𑀼𑀭𑀼𑀗𑁆𑀕𑀯𑀕𑁆𑀕𑁄 𑀢𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀓𑀼𑀭𑀼𑀗𑁆𑀕𑀲𑁆𑀲 𑀓𑀼𑀓𑁆𑀓𑀼𑀭𑀕𑁄𑀚𑀯𑀭𑁄, 𑀧𑀼𑀦 𑀯𑀸𑀴𑀯𑀲𑁆𑀲𑀲𑀺𑀭𑀺𑀯𑁆𑀳𑀬𑀦𑁄 [𑀲𑀺𑀭𑀺𑀯𑀬𑀦𑁄 (𑀲𑀩𑁆𑀩𑀢𑁆𑀣)];

𑀫𑀳𑀺𑀴𑀸𑀫𑀼𑀔𑀦𑀸𑀫𑀦𑀼𑀜𑁆𑀜𑀯𑀭𑁄, 𑀯𑀳𑀢𑁂 𑀥𑀼𑀭 𑀫𑀼𑀦𑀺𑀓𑁂𑀦 𑀤𑀲𑀸𑀢𑀺.

𑁪. 𑀓𑀼𑀮𑀸𑀯𑀓𑀯𑀕𑁆𑀕𑁄

𑁩𑁧. 𑀓𑀼𑀮𑀸𑀯𑀓𑀚𑀸𑀢𑀓𑀁

𑁩𑁧. 𑀓𑀼𑀮𑀸𑀯𑀓𑀸 𑀫𑀸𑀢𑀮𑀺 𑀲𑀺𑀫𑁆𑀩𑀮𑀺𑀲𑁆𑀫𑀺𑀁, 𑀈𑀲𑀸𑀫𑀼𑀔𑁂𑀦 𑀧𑀭𑀺𑀯𑀚𑁆𑀚𑀬𑀲𑁆𑀲𑀼;

𑀓𑀸𑀫𑀁 𑀘𑀚𑀸𑀫 𑀅𑀲𑀼𑀭𑁂𑀲𑀼 𑀧𑀸𑀡𑀁, 𑀫𑀸 𑀫𑁂 𑀤𑀺𑀚𑀸 𑀯𑀺𑀓𑁆𑀓𑀼𑀮𑀯𑀸 [𑀫𑀸𑀬𑀺𑀫𑁂 𑀤𑀺𑀚𑀸 𑀯𑀺𑀓𑀼𑀮𑀸𑀯𑀸 (𑀲𑀻. 𑀲𑁆𑀬𑀸. 𑀧𑀻.)] 𑀅𑀳𑁂𑀲𑀼𑀦𑁆𑀢𑀺.

𑀓𑀼𑀮𑀸𑀯𑀓𑀚𑀸𑀢𑀓𑀁 𑀧𑀞𑀫𑀁.

𑁩𑁨. 𑀦𑀘𑁆𑀘𑀚𑀸𑀢𑀓𑀁

𑁩𑁨. 𑀭𑀼𑀤𑀁 𑀫𑀦𑀼𑀜𑁆𑀜𑀁 𑀭𑀼𑀘𑀺𑀭𑀸 𑀘 𑀧𑀺𑀝𑁆𑀞𑀺, 𑀯𑁂𑀴𑀼𑀭𑀺𑀬𑀯𑀡𑁆𑀡𑀽𑀧𑀦𑀺𑀪𑀸 [𑀯𑀡𑁆𑀡𑀽𑀧𑀝𑀺𑀪𑀸 (𑀲𑁆𑀬𑀸.), 𑀯𑀡𑁆𑀡𑀲𑀦𑁆𑀦𑀺𑀪𑀸 (𑀓.)] 𑀘 𑀕𑀻𑀯𑀸;