𑁬. 𑀙𑀓𑁆𑀓𑀦𑀺𑀧𑀸𑀢𑁄

𑁧. 𑀅𑀯𑀸𑀭𑀺𑀬𑀯𑀕𑁆𑀕𑁄

𑁩𑁭𑁬. 𑀅𑀯𑀸𑀭𑀺𑀬𑀚𑀸𑀢𑀓𑀁 (𑁬-𑁧-𑁧)

𑁧. 𑀫𑀸𑀲𑀼 𑀓𑀼𑀚𑁆𑀛 𑀪𑀽𑀫𑀺𑀧𑀢𑀺, 𑀫𑀸𑀲𑀼 𑀓𑀼𑀚𑁆𑀛 𑀭𑀣𑁂𑀲𑀪;

𑀓𑀼𑀤𑁆𑀥𑀁 𑀅𑀧𑁆𑀧𑀝𑀺𑀓𑀼𑀚𑁆𑀛𑀦𑁆𑀢𑁄, 𑀭𑀸𑀚𑀸 𑀭𑀝𑁆𑀞𑀲𑁆𑀲 𑀧𑀽𑀚𑀺𑀢𑁄.

𑁨. 𑀕𑀸𑀫𑁂 𑀯𑀸 𑀬𑀤𑀺 𑀯𑀸𑀭𑀜𑁆𑀜𑁂, 𑀦𑀺𑀦𑁆𑀦𑁂 𑀯𑀸 𑀬𑀤𑀺 𑀯𑀸 𑀣𑀮𑁂;

𑀲𑀩𑁆𑀩𑀢𑁆𑀣 𑀅𑀦𑀼𑀲𑀸𑀲𑀸𑀫𑀺, 𑀫𑀸𑀲𑀼 𑀓𑀼𑀚𑁆𑀛 [𑀫𑀸𑀲𑁆𑀲𑀼 𑀓𑀼𑀚𑁆𑀛𑀺 (𑀲𑀻. 𑀧𑀻.)] 𑀭𑀣𑁂𑀲𑀪.

𑁩. 𑀅𑀯𑀸𑀭𑀺𑀬𑀧𑀺𑀢𑀸 𑀦𑀸𑀫, 𑀅𑀳𑀼 𑀕𑀗𑁆𑀕𑀸𑀬 𑀦𑀸𑀯𑀺𑀓𑁄;

𑀧𑀼𑀩𑁆𑀩𑁂 𑀚𑀦𑀁 𑀢𑀸𑀭𑁂𑀢𑁆𑀯𑀸𑀦, 𑀧𑀘𑁆𑀙𑀸 𑀬𑀸𑀘𑀢𑀺 𑀯𑁂𑀢𑀦𑀁;

𑀢𑁂𑀦𑀲𑁆𑀲 𑀪𑀡𑁆𑀟𑀦𑀁 𑀳𑁄𑀢𑀺, 𑀦 𑀘 𑀪𑁄𑀕𑁂𑀳𑀺 𑀯𑀟𑁆𑀠𑀢𑀺.

𑁪. 𑀅𑀢𑀺𑀡𑁆𑀡𑀁𑀬𑁂𑀯 𑀬𑀸𑀘𑀲𑁆𑀲𑀼, 𑀅𑀧𑀸𑀭𑀁 𑀢𑀸𑀢 𑀦𑀸𑀯𑀺𑀓;

𑀅𑀜𑁆𑀜𑁄 𑀳𑀺 𑀢𑀺𑀡𑁆𑀡𑀲𑁆𑀲 𑀫𑀦𑁄, 𑀅𑀜𑁆𑀜𑁄 𑀳𑁄𑀢𑀺 𑀧𑀸𑀭𑁂𑀲𑀺𑀦𑁄 [𑀢𑀭𑁂𑀲𑀺𑀦𑁄 (𑀲𑀻. 𑀧𑀻.), 𑀢𑀺𑀭𑁂𑀲𑀺𑀦𑁄 (𑀲𑁆𑀬𑀸.)].

𑁫. 𑀕𑀸𑀫𑁂 𑀯𑀸 𑀬𑀤𑀺 𑀯𑀸𑀭𑀜𑁆𑀜𑁂, 𑀦𑀺𑀦𑁆𑀦𑁂 𑀯𑀸 𑀬𑀤𑀺 𑀯𑀸 𑀣𑀮𑁂;

𑀲𑀩𑁆𑀩𑀢𑁆𑀣 𑀅𑀦𑀼𑀲𑀸𑀲𑀸𑀫𑀺, 𑀫𑀸𑀲𑀼 𑀓𑀼𑀚𑁆𑀛𑀺𑀢𑁆𑀣 𑀦𑀸𑀯𑀺𑀓.

𑁬. 𑀬𑀸𑀬𑁂𑀯𑀸𑀦𑀼𑀲𑀸𑀲𑀦𑀺𑀬𑀸, 𑀭𑀸𑀚𑀸 𑀕𑀸𑀫𑀯𑀭𑀁 𑀅𑀤𑀸;

𑀢𑀸𑀬𑁂𑀯𑀸𑀦𑀼𑀲𑀸𑀲𑀦𑀺𑀬𑀸, 𑀦𑀸𑀯𑀺𑀓𑁄 𑀧𑀳𑀭𑀻 𑀫𑀼𑀔𑀁.

𑁭. 𑀪𑀢𑁆𑀢𑀁 𑀪𑀺𑀦𑁆𑀦𑀁 𑀳𑀢𑀸 𑀪𑀭𑀺𑀬𑀸, 𑀕𑀩𑁆𑀪𑁄 𑀘 𑀧𑀢𑀺𑀢𑁄 𑀙𑀫𑀸;

𑀫𑀺𑀕𑁄𑀯 𑀚𑀸𑀢𑀭𑀽𑀧𑁂𑀦, 𑀦 𑀢𑁂𑀦𑀢𑁆𑀣𑀁 𑀅𑀩𑀦𑁆𑀥𑀺 𑀲𑀽𑀢𑀺 [𑀅𑀯𑀟𑁆𑀠𑀺𑀢𑀼𑀦𑁆𑀢𑀺 (𑀲𑀻. 𑀲𑁆𑀬𑀸.), 𑀅𑀯𑀟𑁆𑀠𑀺 𑀲𑀽𑀢𑀺 (?)].

𑀅𑀯𑀸𑀭𑀺𑀬𑀚𑀸𑀢𑀓𑀁 𑀧𑀞𑀫𑀁.

𑁩𑁭𑁭. 𑀲𑁂𑀢𑀓𑁂𑀢𑀼𑀚𑀸𑀢𑀓𑀁 (𑁬-𑁧-𑁨)

𑁮. 𑀫𑀸 𑀢𑀸𑀢 𑀓𑀼𑀚𑁆𑀛𑀺 𑀦 𑀳𑀺 𑀲𑀸𑀥𑀼 𑀓𑁄𑀥𑁄, 𑀩𑀳𑀼𑀫𑁆𑀧𑀺 𑀢𑁂 𑀅𑀤𑀺𑀝𑁆𑀞𑀫𑀲𑁆𑀲𑀼𑀢𑀜𑁆𑀘;

𑀫𑀸𑀢𑀸 𑀧𑀺𑀢𑀸 𑀤𑀺𑀲𑀢𑀸 [𑀤𑀺𑀲𑀸 𑀢𑀸𑀢 (𑀲𑁆𑀬𑀸.), 𑀤𑀺𑀲𑀸 𑀢𑀸 (𑀧𑀻.)] 𑀲𑁂𑀢𑀓𑁂𑀢𑀼, 𑀆𑀘𑀭𑀺𑀬𑀫𑀸𑀳𑀼 𑀤𑀺𑀲𑀢𑀁 𑀧𑀲𑀢𑁆𑀣𑀸.

𑁯. 𑀅𑀕𑀸𑀭𑀺𑀦𑁄 𑀅𑀦𑁆𑀦𑀤𑀧𑀸𑀦𑀯𑀢𑁆𑀣𑀤𑀸 [𑀅𑀦𑁆𑀦𑀧𑀸𑀦𑀯𑀢𑁆𑀣𑀤𑀸 (𑀲𑁆𑀬𑀸. 𑀓.)], 𑀅𑀯𑁆𑀳𑀸𑀬𑀺𑀓𑀸 𑀢𑀫𑁆𑀧𑀺 𑀤𑀺𑀲𑀁 𑀯𑀤𑀦𑁆𑀢𑀺;

𑀏𑀲𑀸 𑀤𑀺𑀲𑀸 𑀧𑀭𑀫𑀸 𑀲𑁂𑀢𑀓𑁂𑀢𑀼, 𑀬𑀁 𑀧𑀢𑁆𑀯𑀸 𑀤𑀼𑀓𑁆𑀔𑀻 𑀲𑀼𑀔𑀺𑀦𑁄 𑀪𑀯𑀦𑁆𑀢𑀺.

𑁧𑁦. 𑀔𑀭𑀸𑀚𑀺𑀦𑀸 𑀚𑀝𑀺𑀮𑀸 𑀧𑀗𑁆𑀓𑀤𑀦𑁆𑀢𑀸, 𑀤𑀼𑀫𑁆𑀫𑀓𑁆𑀔𑀭𑀽𑀧𑀸 [𑀤𑀼𑀫𑀼𑀓𑁆𑀔𑀭𑀽𑀧𑀸 (𑀲𑀻. 𑀲𑁆𑀬𑀸.), 𑀤𑀼𑀫𑁆𑀫𑀼𑀓𑁆𑀔𑀭𑀽𑀧𑀸 (𑀧𑀻. 𑀓.)] 𑀬𑁂𑀫𑁂 𑀚𑀧𑁆𑀧𑀦𑁆𑀢𑀺 𑀫𑀦𑁆𑀢𑁂;

𑀓𑀘𑁆𑀘𑀺 𑀦𑀼 𑀢𑁂 𑀫𑀸𑀦𑀼𑀲𑀓𑁂 𑀧𑀬𑁄𑀕𑁂, 𑀇𑀤𑀁 𑀯𑀺𑀤𑀽 𑀧𑀭𑀺𑀫𑀼𑀢𑁆𑀢𑀸 𑀅𑀧𑀸𑀬𑀸.

𑁧𑁧. 𑀧𑀸𑀧𑀸𑀦𑀺 𑀓𑀫𑁆𑀫𑀸𑀦𑀺 𑀓𑀢𑁆𑀯𑀸𑀦 𑀭𑀸𑀚, 𑀩𑀳𑀼𑀲𑁆𑀲𑀼𑀢𑁄 𑀘𑁂 𑀦 [𑀩𑀳𑀼𑀲𑁆𑀲𑀼𑀢𑁄 𑀦𑁂𑀯 (𑀲𑀻. 𑀲𑁆𑀬𑀸.)] 𑀘𑀭𑁂𑀬𑁆𑀬 𑀥𑀫𑁆𑀫𑀁;

𑀲𑀳𑀲𑁆𑀲𑀯𑁂𑀤𑁄𑀧𑀺 𑀦 𑀢𑀁 𑀧𑀝𑀺𑀘𑁆𑀘, 𑀤𑀼𑀓𑁆𑀔𑀸 𑀧𑀫𑀼𑀜𑁆𑀘𑁂 𑀘𑀭𑀡𑀁 𑀅𑀧𑀢𑁆𑀯𑀸.

𑁧𑁨. 𑀲𑀳𑀲𑁆𑀲𑀯𑁂𑀤𑁄𑀧𑀺 𑀦 𑀢𑀁 𑀧𑀝𑀺𑀘𑁆𑀘, 𑀤𑀼𑀓𑁆𑀔𑀸 𑀧𑀫𑀼𑀜𑁆𑀘𑁂 𑀘𑀭𑀡𑀁 𑀅𑀧𑀢𑁆𑀯𑀸;

𑀫𑀜𑁆𑀜𑀸𑀫𑀺 𑀯𑁂𑀤𑀸 𑀅𑀨𑀮𑀸 𑀪𑀯𑀦𑁆𑀢𑀺, 𑀲𑀲𑀁𑀬𑀫𑀁 𑀘𑀭𑀡𑀫𑁂𑀯 [𑀘𑀭𑀡𑀜𑁆𑀜𑁂𑀯 (𑀲𑀻. 𑀲𑁆𑀬𑀸. 𑀧𑀻.)] 𑀲𑀘𑁆𑀘𑀁.

𑁧𑁩. 𑀦 𑀳𑁂𑀯 𑀯𑁂𑀤𑀸 𑀅𑀨𑀮𑀸 𑀪𑀯𑀦𑁆𑀢𑀺, 𑀲𑀲𑀁𑀬𑀫𑀁 𑀘𑀭𑀡𑀫𑁂𑀯 𑀲𑀘𑁆𑀘𑀁;

𑀓𑀺𑀢𑁆𑀢𑀺𑀜𑁆𑀳𑀺 𑀧𑀧𑁆𑀧𑁄𑀢𑀺 𑀅𑀥𑀺𑀘𑁆𑀘 𑀯𑁂𑀤𑁂, 𑀲𑀦𑁆𑀢𑀺𑀁 𑀧𑀼𑀡𑁂𑀢𑀺 [𑀲𑀦𑁆𑀢𑀁 𑀧𑀼𑀦𑁂’𑀢𑀺 (𑀲𑀻. 𑀧𑀻.)] 𑀘𑀭𑀡𑁂𑀦 𑀤𑀦𑁆𑀢𑁄𑀢𑀺.

𑀲𑁂𑀢𑀓𑁂𑀢𑀼𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁩𑁭𑁮. 𑀤𑀭𑀻𑀫𑀼𑀔𑀚𑀸𑀢𑀓𑀁 (𑁬-𑁧-𑁩)

𑁧𑁪. 𑀧𑀗𑁆𑀓𑁄 𑀘 𑀓𑀸𑀫𑀸 𑀧𑀮𑀺𑀧𑁄 𑀘 𑀓𑀸𑀫𑀸, 𑀪𑀬𑀜𑁆𑀘 𑀫𑁂𑀢𑀁 𑀢𑀺𑀫𑀽𑀮𑀁 𑀧𑀯𑀼𑀢𑁆𑀢𑀁;

𑀭𑀚𑁄 𑀘 𑀥𑀽𑀫𑁄 𑀘 𑀫𑀬𑀸 𑀧𑀓𑀸𑀲𑀺𑀢𑀸, 𑀳𑀺𑀢𑁆𑀯𑀸 𑀢𑀼𑀯𑀁 𑀧𑀩𑁆𑀩𑀚 𑀩𑁆𑀭𑀳𑁆𑀫𑀤𑀢𑁆𑀢.

𑁧𑁫. 𑀕𑀥𑀺𑀢𑁄 [𑀕𑀣𑀺𑀢𑁄 (𑀲𑀻.)] 𑀘 𑀭𑀢𑁆𑀢𑁄 𑀘 𑀅𑀥𑀺𑀫𑀼𑀘𑁆𑀙𑀺𑀢𑁄 𑀘, 𑀓𑀸𑀫𑁂𑀲𑁆𑀯𑀳𑀁 𑀩𑁆𑀭𑀸𑀳𑁆𑀫𑀡 𑀪𑀺𑀁𑀲𑀭𑀽𑀧𑀁;

𑀢𑀁 𑀦𑀼𑀲𑁆𑀲𑀳𑁂 𑀚𑀻𑀯𑀺𑀓𑀢𑁆𑀣𑁄 𑀧𑀳𑀸𑀢𑀼𑀁, 𑀓𑀸𑀳𑀸𑀫𑀺 𑀧𑀼𑀜𑁆𑀜𑀸𑀦𑀺 𑀅𑀦𑀧𑁆𑀧𑀓𑀸𑀦𑀺.

𑁧𑁬. 𑀬𑁄 𑀅𑀢𑁆𑀣𑀓𑀸𑀫𑀲𑁆𑀲 𑀳𑀺𑀢𑀸𑀦𑀼𑀓𑀫𑁆𑀧𑀺𑀦𑁄, 𑀑𑀯𑀚𑁆𑀚𑀫𑀸𑀦𑁄 𑀦 𑀓𑀭𑁄𑀢𑀺 𑀲𑀸𑀲𑀦𑀁;

𑀇𑀤𑀫𑁂𑀯 𑀲𑁂𑀬𑁆𑀬𑁄 𑀇𑀢𑀺 𑀫𑀜𑁆𑀜𑀫𑀸𑀦𑁄, 𑀧𑀼𑀦𑀧𑁆𑀧𑀼𑀦𑀁 𑀕𑀩𑁆𑀪𑀫𑀼𑀧𑁂𑀢𑀺 𑀫𑀦𑁆𑀤𑁄.

𑁧𑁭. 𑀲𑁄 𑀖𑁄𑀭𑀭𑀽𑀧𑀁 𑀦𑀺𑀭𑀬𑀁 𑀉𑀧𑁂𑀢𑀺, 𑀲𑀼𑀪𑀸𑀲𑀼𑀪𑀁 𑀫𑀼𑀢𑁆𑀢𑀓𑀭𑀻𑀲𑀧𑀽𑀭𑀁;

𑀲𑀢𑁆𑀢𑀸 𑀲𑀓𑀸𑀬𑁂 𑀦 𑀚𑀳𑀦𑁆𑀢𑀺 𑀕𑀺𑀤𑁆𑀥𑀸, 𑀬𑁂 𑀳𑁄𑀦𑁆𑀢𑀺 𑀓𑀸𑀫𑁂𑀲𑀼 𑀅𑀯𑀻𑀢𑀭𑀸𑀕𑀸.

𑁧𑁮. 𑀫𑀻𑀴𑁆𑀳𑁂𑀦 𑀮𑀺𑀢𑁆𑀢𑀸 𑀭𑀼𑀳𑀺𑀭𑁂𑀦 𑀫𑀓𑁆𑀔𑀺𑀢𑀸, 𑀲𑁂𑀫𑁆𑀳𑁂𑀦 𑀮𑀺𑀢𑁆𑀢𑀸 𑀉𑀧𑀦𑀺𑀓𑁆𑀔𑀫𑀦𑁆𑀢𑀺;

𑀬𑀁 𑀬𑀜𑁆𑀳𑀺 𑀓𑀸𑀬𑁂𑀦 𑀨𑀼𑀲𑀦𑁆𑀢𑀺 𑀢𑀸𑀯𑀤𑁂, 𑀲𑀩𑁆𑀩𑀁 𑀅𑀲𑀸𑀢𑀁 𑀤𑀼𑀔𑀫𑁂𑀯 𑀓𑁂𑀯𑀮𑀁.

𑁧𑁯. 𑀤𑀺𑀲𑁆𑀯𑀸 𑀯𑀤𑀸𑀫𑀺 𑀦 𑀳𑀺 𑀅𑀜𑁆𑀜𑀢𑁄 𑀲𑀯𑀁, 𑀧𑀼𑀩𑁆𑀩𑁂𑀦𑀺𑀯𑀸𑀲𑀁 𑀩𑀳𑀼𑀓𑀁 𑀲𑀭𑀸𑀫𑀺;

𑀘𑀺𑀢𑁆𑀭𑀸𑀳𑀺 𑀕𑀸𑀣𑀸𑀳𑀺 𑀲𑀼𑀪𑀸𑀲𑀺𑀢𑀸𑀳𑀺, 𑀤𑀭𑀻𑀫𑀼𑀔𑁄 𑀦𑀺𑀚𑁆𑀛𑀸𑀧𑀬𑀺 𑀲𑀼𑀫𑁂𑀥𑀦𑁆𑀢𑀺.

𑀤𑀭𑀻𑀫𑀼𑀔𑀚𑀸𑀢𑀓𑀁 𑀢𑀢𑀺𑀬𑀁.

𑁩𑁭𑁯. 𑀦𑁂𑀭𑀼𑀚𑀸𑀢𑀓𑀁 (𑁬-𑁧-𑁪)

𑁨𑁦. 𑀓𑀸𑀓𑁄𑀮𑀸 𑀓𑀸𑀓𑀲𑀗𑁆𑀖𑀸 𑀘, 𑀫𑀬𑀜𑁆𑀘 𑀧𑀢𑀢𑀁 𑀯𑀭𑀸 [𑀯𑀭 (𑀓.) 𑀫𑀬𑀦𑁆𑀢𑀺𑀧𑀤𑀲𑁆𑀲 𑀳𑀺 𑀯𑀺𑀲𑁂𑀲𑀦𑀁];

𑀲𑀩𑁆𑀩𑁂𑀯 𑀲𑀤𑀺𑀲𑀸 𑀳𑁄𑀫, 𑀇𑀫𑀁 𑀆𑀕𑀫𑁆𑀫 𑀧𑀩𑁆𑀩𑀢𑀁.

𑁨𑁧. 𑀇𑀥 𑀲𑀻𑀳𑀸 𑀘 𑀩𑁆𑀬𑀕𑁆𑀖𑀸 𑀘, 𑀲𑀺𑀗𑁆𑀕𑀸𑀮𑀸 𑀘 𑀫𑀺𑀕𑀸𑀥𑀫𑀸;

𑀲𑀩𑁆𑀩𑁂𑀯 𑀲𑀤𑀺𑀲𑀸 𑀳𑁄𑀦𑁆𑀢𑀺, 𑀅𑀬𑀁 𑀓𑁄 𑀦𑀸𑀫 𑀧𑀩𑁆𑀩𑀢𑁄.

𑁨𑁨. 𑀇𑀫𑀁 𑀦𑁂𑀭𑀽𑀢𑀺 [𑀦𑁂𑀭𑀼𑀦𑁆𑀢𑀺 (𑀲𑀻. 𑀲𑁆𑀬𑀸.)] 𑀚𑀸𑀦𑀦𑁆𑀢𑀺, 𑀫𑀦𑀼𑀲𑁆𑀲𑀸 𑀧𑀩𑁆𑀩𑀢𑀼𑀢𑁆𑀢𑀫𑀁;

𑀇𑀥 𑀯𑀡𑁆𑀡𑁂𑀦 𑀲𑀫𑁆𑀧𑀦𑁆𑀦𑀸, 𑀯𑀲𑀦𑁆𑀢𑀺 𑀲𑀩𑁆𑀩𑀧𑀸𑀡𑀺𑀦𑁄.

𑁨𑁩. 𑀅𑀫𑀸𑀦𑀦𑀸 𑀬𑀢𑁆𑀣 𑀲𑀺𑀬𑀸, 𑀲𑀦𑁆𑀢𑀸𑀦𑀁 𑀯𑀸 𑀯𑀺𑀫𑀸𑀦𑀦𑀸;

𑀳𑀻𑀦𑀲𑀫𑁆𑀫𑀸𑀦𑀦𑀸 𑀯𑀸𑀧𑀺, 𑀦 𑀢𑀢𑁆𑀣 𑀯𑀲𑀢𑀺𑀁 𑀯𑀲𑁂 [𑀯𑀲𑀢𑀻 𑀯𑀲𑁂 (𑀲𑁆𑀬𑀸.), 𑀯𑀲 𑀤𑀺𑀯𑀲𑁂 (𑀧𑀻.)].

𑁨𑁪. 𑀬𑀢𑁆𑀣𑀸𑀮𑀲𑁄 𑀘 𑀤𑀓𑁆𑀔𑁄 𑀘, 𑀲𑀽𑀭𑁄 𑀪𑀻𑀭𑀼 𑀘 𑀧𑀽𑀚𑀺𑀬𑀸;

𑀦 𑀢𑀢𑁆𑀣 𑀲𑀦𑁆𑀢𑁄 𑀯𑀲𑀦𑁆𑀢𑀺, 𑀅𑀯𑀺𑀲𑁂𑀲𑀓𑀭𑁂 𑀦𑀭𑁂 [𑀦𑀕𑁂 (𑀲𑀻. 𑀲𑁆𑀬𑀸. 𑀧𑀻.)].

𑁨𑁫. 𑀦𑀸𑀬𑀁 𑀦𑁂𑀭𑀼 𑀯𑀺𑀪𑀚𑀢𑀺, 𑀳𑀻𑀦𑀉𑀓𑁆𑀓𑀝𑁆𑀞𑀫𑀚𑁆𑀛𑀺𑀫𑁂;

𑀅𑀯𑀺𑀲𑁂𑀲𑀓𑀭𑁄 𑀦𑁂𑀭𑀼, 𑀳𑀦𑁆𑀤 𑀦𑁂𑀭𑀼𑀁 𑀚𑀳𑀸𑀫𑀲𑁂𑀢𑀺.

𑀦𑁂𑀭𑀼𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁩𑁮𑁦. 𑀆𑀲𑀗𑁆𑀓𑀚𑀸𑀢𑀓𑀁 (𑁬-𑁧-𑁫)

𑁨𑁬. 𑀆𑀲𑀸𑀯𑀢𑀻 𑀦𑀸𑀫 𑀮𑀢𑀸, 𑀚𑀸𑀢𑀸 𑀘𑀺𑀢𑁆𑀢𑀮𑀢𑀸𑀯𑀦𑁂;

𑀢𑀲𑁆𑀲𑀸 𑀯𑀲𑁆𑀲𑀲𑀳𑀲𑁆𑀲𑁂𑀦, 𑀏𑀓𑀁 𑀦𑀺𑀩𑁆𑀩𑀢𑁆𑀢𑀢𑁂 𑀨𑀮𑀁.

𑁨𑁭. 𑀢𑀁 𑀤𑁂𑀯𑀸 𑀧𑀬𑀺𑀭𑀼𑀧𑀸𑀲𑀦𑁆𑀢𑀺, 𑀢𑀸𑀯 𑀤𑀽𑀭𑀨𑀮𑀁 𑀲𑀢𑀺𑀁;

𑀆𑀲𑀻𑀲𑁂𑀯 [𑀆𑀲𑀺𑀁𑀲𑁂𑀯 (𑀲𑀻. 𑀲𑁆𑀬𑀸. 𑀧𑀻.)] 𑀢𑀼𑀯𑀁 𑀭𑀸𑀚, 𑀆𑀲𑀸 𑀨𑀮𑀯𑀢𑀻 𑀲𑀼𑀔𑀸.

𑁨𑁮. 𑀆𑀲𑀻𑀲𑀢𑁂𑀯 [𑀆𑀲𑀺𑀁𑀲𑁂𑀣𑁂𑀯 (𑀲𑀻. 𑀲𑁆𑀬𑀸. 𑀧𑀻.)] 𑀲𑁄 𑀧𑀓𑁆𑀔𑀻, 𑀆𑀲𑀻𑀲𑀢𑁂𑀯 [𑀆𑀲𑀺𑀁𑀲𑁂𑀣𑁂𑀯 (𑀲𑀻. 𑀲𑁆𑀬𑀸. 𑀧𑀻.)] 𑀲𑁄 𑀤𑀺𑀚𑁄;

𑀢𑀲𑁆𑀲 𑀘𑀸𑀲𑀸 [𑀢𑀲𑁆𑀲𑁂𑀯𑀸𑀲𑀸 (𑀲𑁆𑀬𑀸.)] 𑀲𑀫𑀺𑀚𑁆𑀛𑀢𑀺, 𑀢𑀸𑀯 𑀤𑀽𑀭𑀕𑀢𑀸 𑀲𑀢𑀻;

𑀆𑀲𑀻𑀲𑁂𑀯 𑀢𑀼𑀯𑀁 𑀭𑀸𑀚, 𑀆𑀲𑀸 𑀨𑀮𑀯𑀢𑀻 𑀲𑀼𑀔𑀸.

𑁨𑁯. 𑀲𑀫𑁆𑀧𑁂𑀲𑀺 𑀔𑁄 𑀫𑀁 𑀯𑀸𑀘𑀸𑀬, 𑀦 𑀘 𑀲𑀫𑁆𑀧𑁂𑀲𑀺 [𑀲𑀁𑀲𑁂𑀲𑀺 (𑀓.)] 𑀓𑀫𑁆𑀫𑀼𑀦𑀸;

𑀫𑀸𑀮𑀸 𑀲𑁂𑀭𑁂𑀬𑁆𑀬𑀓𑀲𑁆𑀲𑁂𑀯, 𑀯𑀡𑁆𑀡𑀯𑀦𑁆𑀢𑀸 𑀅𑀕𑀦𑁆𑀥𑀺𑀓𑀸.

𑁩𑁦. 𑀅𑀨𑀮𑀁 𑀫𑀥𑀼𑀭𑀁 𑀯𑀸𑀘𑀁, 𑀬𑁄 𑀫𑀺𑀢𑁆𑀢𑁂𑀲𑀼 𑀧𑀓𑀼𑀩𑁆𑀩𑀢𑀺;

𑀅𑀤𑀤𑀁 𑀅𑀯𑀺𑀲𑁆𑀲𑀚𑀁 𑀪𑁄𑀕𑀁, 𑀲𑀦𑁆𑀥𑀺 𑀢𑁂𑀦𑀲𑁆𑀲 𑀚𑀻𑀭𑀢𑀺.

𑁩𑁧. 𑀬𑀜𑁆𑀳𑀺 𑀓𑀬𑀺𑀭𑀸 𑀢𑀜𑁆𑀳𑀺 𑀯𑀤𑁂, 𑀬𑀁 𑀦 𑀓𑀬𑀺𑀭𑀸 𑀦 𑀢𑀁 𑀯𑀤𑁂;

𑀅𑀓𑀭𑁄𑀦𑁆𑀢𑀁 𑀪𑀸𑀲𑀫𑀸𑀦𑀁, 𑀧𑀭𑀺𑀚𑀸𑀦𑀦𑁆𑀢𑀺 𑀧𑀡𑁆𑀟𑀺𑀢𑀸.

𑁩𑁨. 𑀩𑀮𑀜𑁆𑀘 𑀯𑀢 𑀫𑁂 𑀔𑀻𑀡𑀁, 𑀧𑀸𑀣𑁂𑀬𑁆𑀬𑀜𑁆𑀘 𑀦 𑀯𑀺𑀚𑁆𑀚𑀢𑀺;

𑀲𑀗𑁆𑀓𑁂 𑀧𑀸𑀡𑀽𑀧𑀭𑁄𑀥𑀸𑀬, 𑀳𑀦𑁆𑀤 𑀤𑀸𑀦𑀺 𑀯𑀚𑀸𑀫𑀳𑀁.

𑁩𑁩. 𑀏𑀢𑀤𑁂𑀯 𑀳𑀺 𑀫𑁂 𑀦𑀸𑀫𑀁, 𑀬𑀁 𑀦𑀸𑀫𑀲𑁆𑀫𑀺 𑀭𑀣𑁂𑀲𑀪;

𑀆𑀕𑀫𑁂𑀳𑀺 𑀫𑀳𑀸𑀭𑀸𑀚, 𑀧𑀺𑀢𑀭𑀁 𑀆𑀫𑀦𑁆𑀢𑀬𑀸𑀫𑀳𑀦𑁆𑀢𑀺.

𑀆𑀲𑀗𑁆𑀓𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁩𑁮𑁧. 𑀫𑀺𑀕𑀸𑀮𑁄𑀧𑀚𑀸𑀢𑀓𑀁 (𑁬-𑁧-𑁬)

𑁩𑁪. 𑀦 𑀫𑁂 𑀭𑀼𑀘𑁆𑀘𑀺 𑀫𑀺𑀕𑀸𑀮𑁄𑀧, 𑀬𑀲𑁆𑀲 𑀢𑁂 𑀢𑀸𑀤𑀺𑀲𑀻 𑀕𑀢𑀻;

𑀅𑀢𑀼𑀘𑁆𑀘𑀁 𑀢𑀸𑀢 𑀧𑀢𑀲𑀺, 𑀅𑀪𑀽𑀫𑀺𑀁 𑀢𑀸𑀢 𑀲𑁂𑀯𑀲𑀺.

𑁩𑁫. 𑀘𑀢𑀼𑀓𑁆𑀓𑀡𑁆𑀡𑀁𑀯 𑀓𑁂𑀤𑀸𑀭𑀁, 𑀬𑀤𑀸 𑀢𑁂 𑀧𑀣𑀯𑀻 𑀲𑀺𑀬𑀸;

𑀢𑀢𑁄 𑀢𑀸𑀢 𑀦𑀺𑀯𑀢𑁆𑀢𑀲𑁆𑀲𑀼, 𑀫𑀸𑀲𑁆𑀲𑀼 𑀏𑀢𑁆𑀢𑁄 𑀧𑀭𑀁 𑀕𑀫𑀺.

𑁩𑁬. 𑀲𑀦𑁆𑀢𑀺 𑀅𑀜𑁆𑀜𑁂𑀧𑀺 𑀲𑀓𑀼𑀡𑀸, 𑀧𑀢𑁆𑀢𑀬𑀸𑀦𑀸 𑀯𑀺𑀳𑀗𑁆𑀕𑀫𑀸;

𑀅𑀓𑁆𑀔𑀺𑀢𑁆𑀢𑀸 𑀯𑀸𑀢𑀯𑁂𑀕𑁂𑀦, 𑀦𑀝𑁆𑀞𑀸 𑀢𑁂 𑀲𑀲𑁆𑀲𑀢𑀻𑀲𑀫𑀸.

𑁩𑁭. 𑀅𑀓𑀢𑁆𑀯𑀸 𑀅𑀧𑀦𑀦𑁆𑀤𑀲𑁆𑀲 [𑀅𑀧𑀭𑀡𑁆𑀡𑀲𑁆𑀲 (𑀲𑀻. 𑀲𑁆𑀬𑀸. 𑀧𑀻.)], 𑀧𑀺𑀢𑀼 𑀯𑀼𑀤𑁆𑀥𑀲𑁆𑀲 𑀲𑀸𑀲𑀦𑀁;

𑀓𑀸𑀮𑀯𑀸𑀢𑁂 𑀅𑀢𑀺𑀓𑁆𑀓𑀫𑁆𑀫, 𑀯𑁂𑀭𑀫𑁆𑀪𑀸𑀦𑀁 𑀯𑀲𑀁 𑀅𑀕𑀸 [𑀕𑀢𑁄 (𑀲𑀻.)].

𑁩𑁮. 𑀢𑀲𑁆𑀲 𑀧𑀼𑀢𑁆𑀢𑀸 𑀘 𑀤𑀸𑀭𑀸 𑀘, 𑀬𑁂 𑀘𑀜𑁆𑀜𑁂 𑀅𑀦𑀼𑀚𑀻𑀯𑀺𑀦𑁄;

𑀲𑀩𑁆𑀩𑁂 𑀩𑁆𑀬𑀲𑀦𑀫𑀸𑀧𑀸𑀤𑀼𑀁, 𑀅𑀦𑁄𑀯𑀸𑀤𑀓𑀭𑁂 𑀤𑀺𑀚𑁂.

𑁩𑁯. 𑀏𑀯𑀫𑁆𑀧𑀺 𑀇𑀥 𑀯𑀼𑀤𑁆𑀥𑀸𑀦𑀁, 𑀬𑁄 𑀯𑀸𑀓𑁆𑀬𑀁 𑀦𑀸𑀯𑀩𑀼𑀚𑁆𑀛𑀢𑀺;

𑀅𑀢𑀺𑀲𑀻𑀫𑀘𑀭𑁄 [𑀅𑀢𑀺𑀲𑀻𑀫𑀁 𑀘𑀭𑁄 (𑀲𑀻. 𑀲𑁆𑀬𑀸. 𑀓.)] 𑀤𑀺𑀢𑁆𑀢𑁄, 𑀕𑀺𑀚𑁆𑀛𑁄𑀯𑀸𑀢𑀻𑀢𑀲𑀸𑀲𑀦𑁄;

𑀲𑀩𑁆𑀩𑁂 𑀩𑁆𑀬𑀲𑀦𑀁 𑀧𑀧𑁆𑀧𑁄𑀦𑁆𑀢𑀺, 𑀅𑀓𑀢𑁆𑀯𑀸 𑀩𑀼𑀤𑁆𑀥𑀲𑀸𑀲𑀦𑀦𑁆𑀢𑀺.

𑀫𑀺𑀕𑀸𑀮𑁄𑀧𑀚𑀸𑀢𑀓𑀁 𑀙𑀝𑁆𑀞𑀁.

𑁩𑁮𑁨. 𑀲𑀺𑀭𑀺𑀓𑀸𑀴𑀓𑀡𑁆𑀡𑀺𑀚𑀸𑀢𑀓𑀁 (𑁬-𑁧-𑁭)

𑁪𑁦. 𑀓𑀸 𑀦𑀼 𑀓𑀸𑀴𑁂𑀦 𑀯𑀡𑁆𑀡𑁂𑀦, 𑀦 𑀘𑀸𑀧𑀺 [𑀦 𑀘𑀸𑀲𑀺 (𑀲𑀻.)] 𑀧𑀺𑀬𑀤𑀲𑁆𑀲𑀦𑀸;

𑀓𑀸 𑀯𑀸 𑀢𑁆𑀯𑀁 𑀓𑀲𑁆𑀲 𑀯𑀸 𑀥𑀻𑀢𑀸, 𑀓𑀣𑀁 𑀚𑀸𑀦𑁂𑀫𑀼 𑀢𑀁 𑀫𑀬𑀁.

𑁪𑁧. 𑀫𑀳𑀸𑀭𑀸𑀚𑀲𑁆𑀲𑀳𑀁 𑀥𑀻𑀢𑀸, 𑀯𑀺𑀭𑀽𑀧𑀓𑁆𑀔𑀲𑁆𑀲 𑀘𑀡𑁆𑀟𑀺𑀬𑀸;

𑀅𑀳𑀁 𑀓𑀸𑀴𑀻 𑀅𑀮𑀓𑁆𑀔𑀺𑀓𑀸, 𑀓𑀸𑀴𑀓𑀡𑁆𑀡𑀻𑀢𑀺 𑀫𑀁 𑀯𑀺𑀤𑀽;

𑀑𑀓𑀸𑀲𑀁 𑀬𑀸𑀘𑀺𑀢𑁄 𑀤𑁂𑀳𑀺, 𑀯𑀲𑁂𑀫𑀼 𑀢𑀯 𑀲𑀦𑁆𑀢𑀺𑀓𑁂.

𑁪𑁨. 𑀓𑀺𑀁𑀲𑀻𑀮𑁂 𑀓𑀺𑀁𑀲𑀫𑀸𑀘𑀸𑀭𑁂, 𑀧𑀼𑀭𑀺𑀲𑁂 𑀦𑀺𑀯𑀺𑀲𑀲𑁂 𑀢𑀼𑀯𑀁;

𑀧𑀼𑀝𑁆𑀞𑀸 𑀫𑁂 𑀓𑀸𑀴𑀺 𑀅𑀓𑁆𑀔𑀸𑀳𑀺, 𑀓𑀣𑀁 [𑀬𑀣𑀸 (𑀲𑀻. 𑀧𑀻.)] 𑀚𑀸𑀦𑁂𑀫𑀼 𑀢𑀁 𑀫𑀬𑀁.

𑁪𑁩. 𑀫𑀓𑁆𑀔𑀻 𑀧𑀴𑀸𑀲𑀻 𑀲𑀸𑀭𑀫𑁆𑀪𑀻, 𑀇𑀲𑁆𑀲𑀼𑀓𑀻 𑀫𑀘𑁆𑀙𑀭𑀻 𑀲𑀞𑁄;

𑀲𑁄 𑀫𑀬𑁆𑀳𑀁 𑀧𑀼𑀭𑀺𑀲𑁄 𑀓𑀦𑁆𑀢𑁄, 𑀮𑀤𑁆𑀥𑀁 𑀬𑀲𑁆𑀲 𑀯𑀺𑀦𑀲𑁆𑀲𑀢𑀺.

𑁪𑁪. 𑀓𑁄𑀥𑀦𑁄 𑀉𑀧𑀦𑀸𑀳𑀻 𑀘, 𑀧𑀺𑀲𑀼𑀡𑁄 𑀘 𑀯𑀺𑀪𑁂𑀤𑀓𑁄;

𑀓𑀡𑁆𑀟𑀓𑀯𑀸𑀘𑁄 [𑀅𑀡𑁆𑀟𑀓𑀯𑀸𑀘𑁄 (𑀓. 𑀲𑀻. 𑀧𑀻.)] 𑀨𑀭𑀼𑀲𑁄, 𑀲𑁄 𑀫𑁂 𑀓𑀦𑁆𑀢𑀢𑀭𑁄 𑀢𑀢𑁄.

𑁪𑁫. 𑀅𑀚𑁆𑀚 𑀲𑀼𑀯𑁂𑀢𑀺 𑀧𑀼𑀭𑀺𑀲𑁄, 𑀲𑀤𑀢𑁆𑀣𑀁 𑀦𑀸𑀯𑀩𑀼𑀚𑁆𑀛𑀢𑀺;

𑀑𑀯𑀚𑁆𑀚𑀫𑀸𑀦𑁄 𑀓𑀼𑀧𑁆𑀧𑀢𑀺, 𑀲𑁂𑀬𑁆𑀬𑀁 𑀲𑁄 𑀅𑀢𑀺𑀫𑀜𑁆𑀜𑀢𑀺.

𑁪𑁬. 𑀤𑀯𑀧𑁆𑀧𑀮𑀼𑀤𑁆𑀥𑁄 [𑀤𑁂𑀯𑀧𑁆𑀧𑀮𑀼𑀤𑁆𑀥𑁄 (𑀓.), 𑀤𑀯𑀧𑁆𑀧𑀮𑀤𑁆𑀥𑁄 (𑀧𑀻.)] 𑀧𑀼𑀭𑀺𑀲𑁄, 𑀲𑀩𑁆𑀩𑀫𑀺𑀢𑁆𑀢𑁂𑀳𑀺 𑀥𑀁𑀲𑀢𑀺;

𑀲𑁄 𑀫𑀬𑁆𑀳𑀁 𑀧𑀼𑀭𑀺𑀲𑁄 𑀓𑀦𑁆𑀢𑁄, 𑀢𑀲𑁆𑀫𑀺𑀁 𑀳𑁄𑀫𑀺 𑀅𑀦𑀸𑀫𑀬𑀸.

𑁪𑁭. 𑀅𑀧𑁂𑀳𑀺 𑀏𑀢𑁆𑀢𑁄 𑀢𑁆𑀯𑀁 𑀓𑀸𑀴𑀺, 𑀦𑁂𑀢𑀁 𑀅𑀫𑁆𑀳𑁂𑀲𑀼 𑀯𑀺𑀚𑁆𑀚𑀢𑀺;

𑀅𑀜𑁆𑀜𑀁 𑀚𑀦𑀧𑀤𑀁 𑀕𑀘𑁆𑀙, 𑀦𑀺𑀕𑀫𑁂 𑀭𑀸𑀚𑀥𑀸𑀦𑀺𑀬𑁄.

𑁪𑁮. 𑀅𑀳𑀫𑁆𑀧𑀺 𑀔𑁄 𑀢𑀁 [𑀘𑁂𑀢𑀁 (𑀲𑀻.)] 𑀚𑀸𑀦𑀸𑀫𑀺, 𑀦𑁂𑀢𑀁 𑀢𑀼𑀫𑁆𑀳𑁂𑀲𑀼 𑀯𑀺𑀚𑁆𑀚𑀢𑀺;

𑀲𑀦𑁆𑀢𑀺 𑀮𑁄𑀓𑁂 𑀅𑀮𑀓𑁆𑀔𑀺𑀓𑀸, 𑀲𑀗𑁆𑀖𑀭𑀦𑁆𑀢𑀺 𑀩𑀳𑀼𑀁 𑀥𑀦𑀁;

𑀅𑀳𑀁 𑀤𑁂𑀯𑁄 𑀘 𑀫𑁂 𑀪𑀸𑀢𑀸, 𑀉𑀪𑁄 𑀦𑀁 𑀯𑀺𑀥𑀫𑀸𑀫𑀲𑁂.

𑁪𑁯. 𑀓𑀸 𑀦𑀼 𑀤𑀺𑀩𑁆𑀩𑁂𑀦 𑀯𑀡𑁆𑀡𑁂𑀦, 𑀧𑀣𑀩𑁆𑀬𑀸 𑀲𑀼𑀧𑀢𑀺𑀝𑁆𑀞𑀺𑀢𑀸;

𑀓𑀸 𑀯𑀸 𑀢𑁆𑀯𑀁 𑀓𑀲𑁆𑀲 𑀯𑀸 𑀥𑀻𑀢𑀸, 𑀓𑀣𑀁 𑀚𑀸𑀦𑁂𑀫𑀼 𑀢𑀁 𑀫𑀬𑀁.

𑁫𑁦. 𑀫𑀳𑀸𑀭𑀸𑀚𑀲𑁆𑀲𑀳𑀁 𑀥𑀻𑀢𑀸, 𑀥𑀢𑀭𑀝𑁆𑀞𑀲𑁆𑀲 𑀲𑀺𑀭𑀻𑀫𑀢𑁄 [𑀥𑀢𑀭𑀝𑁆𑀞𑀲𑀺𑀭𑀻𑀫𑀢𑁄 (𑀲𑁆𑀬𑀸. 𑀓.)];

𑀅𑀳𑀁 𑀲𑀺𑀭𑀻 𑀘 𑀮𑀓𑁆𑀔𑀻 𑀘, 𑀪𑀽𑀭𑀺𑀧𑀜𑁆𑀜𑀸𑀢𑀺 𑀫𑀁 𑀯𑀺𑀤𑀽;

𑀑𑀓𑀸𑀲𑀁 𑀬𑀸𑀘𑀺𑀢𑁄 𑀤𑁂𑀳𑀺, 𑀯𑀲𑁂𑀫𑀼 𑀢𑀯 𑀲𑀦𑁆𑀢𑀺𑀓𑁂.

𑁫𑁧. 𑀓𑀺𑀁𑀲𑀻𑀮𑁂 𑀓𑀺𑀁𑀲𑀫𑀸𑀘𑀸𑀭𑁂, 𑀧𑀼𑀭𑀺𑀲𑁂 𑀦𑀺𑀯𑀺𑀲𑀲𑁂 𑀢𑀼𑀯𑀁;

𑀧𑀼𑀝𑁆𑀞𑀸 𑀫𑁂 𑀮𑀓𑁆𑀔𑀺 𑀅𑀓𑁆𑀔𑀸𑀳𑀺, 𑀓𑀣𑀁 [𑀬𑀣𑀸 (𑀲𑀻. 𑀧𑀻.)] 𑀚𑀸𑀦𑁂𑀫𑀼 𑀢𑀁 𑀫𑀬𑀁.

𑁫𑁨. 𑀬𑁄 𑀘𑀸𑀧𑀺 𑀲𑀻𑀢𑁂 𑀅𑀣𑀯𑀸𑀧𑀺 𑀉𑀡𑁆𑀳𑁂, 𑀯𑀸𑀢𑀸𑀢𑀧𑁂 𑀟𑀁𑀲𑀲𑀭𑀻𑀲𑀧𑁂 𑀘;

𑀔𑀼𑀥𑀁 [𑀔𑀼𑀤𑁆𑀤𑀁 (𑀲𑁆𑀬𑀸. 𑀓.), 𑀔𑀼𑀤𑀁 (𑀧𑀻.)] 𑀧𑀺𑀧𑀸𑀲𑀁 𑀅𑀪𑀺𑀪𑀼𑀬𑁆𑀬 𑀲𑀩𑁆𑀩𑀁, 𑀭𑀢𑁆𑀢𑀺𑀦𑁆𑀢𑀺𑀯𑀁 𑀬𑁄 𑀲𑀢𑀢𑀁 𑀦𑀺𑀬𑀼𑀢𑁆𑀢𑁄;

𑀓𑀸𑀮𑀸𑀕𑀢𑀜𑁆𑀘 𑀦 𑀳𑀸𑀧𑁂𑀢𑀺 𑀅𑀢𑁆𑀣𑀁, 𑀲𑁄 𑀫𑁂 𑀫𑀦𑀸𑀧𑁄 𑀦𑀺𑀯𑀺𑀲𑁂 𑀘 𑀢𑀫𑁆𑀳𑀺.

𑁫𑁩. 𑀅𑀓𑁆𑀓𑁄𑀥𑀦𑁄 𑀫𑀺𑀢𑁆𑀢𑀯𑀸 𑀘𑀸𑀕𑀯𑀸 𑀘, 𑀲𑀻𑀮𑀽𑀧𑀧𑀦𑁆𑀦𑁄 𑀅𑀲𑀞𑁄𑀚𑀼𑀪𑀽𑀢𑁄 [𑀅𑀲𑀞𑁄 𑀉𑀚𑁆𑀚𑀼𑀪𑀽𑀢𑁄 (𑀧𑀻.)];

𑀲𑀗𑁆𑀕𑀸𑀳𑀓𑁄 𑀲𑀔𑀺𑀮𑁄 𑀲𑀡𑁆𑀳𑀯𑀸𑀘𑁄, 𑀫𑀳𑀢𑁆𑀢𑀧𑀢𑁆𑀢𑁄𑀧𑀺 𑀦𑀺𑀯𑀸𑀢𑀯𑀼𑀢𑁆𑀢𑀺;

𑀢𑀲𑁆𑀫𑀺𑀁𑀳𑀁 [𑀢𑀲𑁆𑀫𑀸𑀳𑀁 (𑀲𑀻. 𑀧𑀻.)] 𑀧𑁄𑀲𑁂 𑀯𑀺𑀧𑀼𑀮𑀸 𑀪𑀯𑀸𑀫𑀺, 𑀊𑀫𑀺 𑀲𑀫𑀼𑀤𑁆𑀤𑀲𑁆𑀲 𑀬𑀣𑀸𑀧𑀺 𑀯𑀡𑁆𑀡𑀁.

𑁫𑁪. 𑀬𑁄 𑀘𑀸𑀧𑀺 𑀫𑀺𑀢𑁆𑀢𑁂 𑀅𑀣𑀯𑀸 𑀅𑀫𑀺𑀢𑁆𑀢𑁂, 𑀲𑁂𑀝𑁆𑀞𑁂 𑀲𑀭𑀺𑀓𑁆𑀔𑁂 𑀅𑀣 𑀯𑀸𑀧𑀺 𑀳𑀻𑀦𑁂;

𑀅𑀢𑁆𑀣𑀁 𑀘𑀭𑀦𑁆𑀢𑀁 𑀅𑀣𑀯𑀸 𑀅𑀦𑀢𑁆𑀣𑀁, 𑀆𑀯𑀻 𑀭𑀳𑁄 𑀲𑀗𑁆𑀕𑀳𑀫𑁂𑀯 𑀯𑀢𑁆𑀢𑁂 [𑀯𑀢𑁆𑀢𑁄 (𑀲𑁆𑀬𑀸. 𑀓.)].

𑀯𑀸𑀘𑀁 𑀦 𑀯𑀚𑁆𑀚𑀸 𑀨𑀭𑀼𑀲𑀁 𑀓𑀤𑀸𑀘𑀺, 𑀫𑀢𑀲𑁆𑀲 𑀚𑀻𑀯𑀲𑁆𑀲 𑀘 𑀢𑀲𑁆𑀲 𑀳𑁄𑀫𑀺.

𑁫𑁫. 𑀏𑀢𑁂𑀲𑀁 𑀬𑁄 𑀅𑀜𑁆𑀜𑀢𑀭𑀁 𑀮𑀪𑀺𑀢𑁆𑀯𑀸, 𑀓𑀦𑁆𑀢𑀸 𑀲𑀺𑀭𑀻 [𑀓𑀦𑁆𑀢𑀲𑀺𑀭𑀺𑀁 (𑀓𑀢𑁆𑀣𑀘𑀺), 𑀓𑀦𑁆𑀢𑀁 𑀲𑀺𑀭𑀺𑀁 (𑀲𑁆𑀬𑀸.) 𑀅𑀝𑁆𑀞𑀓𑀣𑀸𑀬𑀁 𑀤𑀼𑀢𑀺𑀬𑀢𑀢𑀺𑀬𑀧𑀸𑀞𑀦𑁆𑀢𑀭𑀸𑀦𑀺] 𑀫𑀚𑁆𑀚𑀢𑀺 𑀅𑀧𑁆𑀧𑀧𑀜𑁆𑀜𑁄;

𑀢𑀁 𑀤𑀺𑀢𑁆𑀢𑀭𑀽𑀧𑀁 𑀯𑀺𑀲𑀫𑀁 𑀘𑀭𑀦𑁆𑀢𑀁, 𑀓𑀭𑀻𑀲𑀞𑀸𑀦𑀁𑀯 [𑀓𑀭𑀻𑀲𑀚𑀸𑀢𑀁 𑀯 (𑀲𑀻. 𑀲𑁆𑀬𑀸.)] 𑀯𑀺𑀯𑀚𑁆𑀚𑀬𑀸𑀫𑀺.

𑁫𑁬. 𑀅𑀢𑁆𑀢𑀦𑀸 𑀓𑀼𑀭𑀼𑀢𑁂 𑀮𑀓𑁆𑀔𑀺𑀁, 𑀅𑀮𑀓𑁆𑀔𑀺𑀁 𑀓𑀼𑀭𑀼𑀢𑀢𑁆𑀢𑀦𑀸;

𑀦 𑀳𑀺 𑀮𑀓𑁆𑀔𑀺𑀁 𑀅𑀮𑀓𑁆𑀔𑀺𑀁 𑀯𑀸, 𑀅𑀜𑁆𑀜𑁄 𑀅𑀜𑁆𑀜𑀲𑁆𑀲 𑀓𑀸𑀭𑀓𑁄𑀢𑀺.

𑀲𑀺𑀭𑀺𑀓𑀸𑀴𑀓𑀡𑁆𑀡𑀺𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁩𑁮𑁩. 𑀓𑀼𑀓𑁆𑀓𑀼𑀝𑀚𑀸𑀢𑀓𑀁 (𑁬-𑁧-𑁮)

𑁫𑁭. 𑀲𑀼𑀘𑀺𑀢𑁆𑀢𑀧𑀢𑁆𑀢𑀙𑀤𑀦, 𑀢𑀫𑁆𑀩𑀘𑀽𑀴 𑀯𑀺𑀳𑀗𑁆𑀕𑀫;

𑀑𑀭𑁄𑀳 𑀤𑀼𑀫𑀲𑀸𑀔𑀸𑀬, 𑀫𑀼𑀥𑀸 𑀪𑀭𑀺𑀬𑀸 𑀪𑀯𑀸𑀫𑀺 𑀢𑁂.

𑁫𑁮. 𑀘𑀢𑀼𑀧𑁆𑀧𑀤𑀻 𑀢𑁆𑀯𑀁 𑀓𑀮𑁆𑀬𑀸𑀡𑀺, 𑀤𑁆𑀯𑀺𑀧𑀤𑀸𑀳𑀁 𑀫𑀦𑁄𑀭𑀫𑁂;

𑀫𑀺𑀕𑀻 𑀧𑀓𑁆𑀔𑀻 𑀅𑀲𑀜𑁆𑀜𑀼𑀢𑁆𑀢𑀸, 𑀅𑀜𑁆𑀜𑀁 𑀧𑀭𑀺𑀬𑁂𑀲 𑀲𑀸𑀫𑀺𑀓𑀁.

𑁫𑁯. 𑀓𑁄𑀫𑀸𑀭𑀺𑀓𑀸 𑀢𑁂 𑀳𑁂𑀲𑁆𑀲𑀸𑀫𑀺, 𑀫𑀜𑁆𑀚𑀼𑀓𑀸 𑀧𑀺𑀬𑀪𑀸𑀡𑀺𑀦𑀻;

𑀯𑀺𑀦𑁆𑀤 𑀫𑀁 𑀅𑀭𑀺𑀬𑁂𑀦 𑀯𑁂𑀤𑁂𑀦, 𑀲𑀸𑀯𑀬 𑀫𑀁 𑀬𑀤𑀺𑀘𑁆𑀙𑀲𑀺.

𑁬𑁦. 𑀓𑀼𑀡𑀧𑀸𑀤𑀺𑀦𑀺 𑀮𑁄𑀳𑀺𑀢𑀧𑁂, 𑀘𑁄𑀭𑀺 𑀓𑀼𑀓𑁆𑀓𑀼𑀝𑀧𑁄𑀣𑀺𑀦𑀺;

𑀦 𑀢𑁆𑀯𑀁 𑀅𑀭𑀺𑀬𑁂𑀦 𑀯𑁂𑀤𑁂𑀦, 𑀫𑀫𑀁 𑀪𑀢𑁆𑀢𑀸𑀭𑀫𑀺𑀘𑁆𑀙𑀲𑀺.

𑁬𑁧. 𑀏𑀯𑀫𑁆𑀧𑀺 𑀘𑀢𑀼𑀭𑀸 [𑀘𑀸𑀢𑀼𑀭𑀸 (𑀲𑁆𑀬𑀸. 𑀓.)] 𑀦𑀸𑀭𑀻, 𑀤𑀺𑀲𑁆𑀯𑀸𑀦 𑀲𑀥𑀦𑀁 [𑀧𑀯𑀭𑀁 (𑀲𑀻. 𑀲𑁆𑀬𑀸. 𑀧𑀻.)] 𑀦𑀭𑀁;

𑀦𑁂𑀦𑁆𑀢𑀺 𑀲𑀡𑁆𑀳𑀸𑀳𑀺 𑀯𑀸𑀘𑀸𑀳𑀺, 𑀩𑀺𑀴𑀸𑀭𑀻 𑀯𑀺𑀬 𑀓𑀼𑀓𑁆𑀓𑀼𑀝𑀁.

𑁬𑁨. 𑀬𑁄 𑀘 𑀉𑀧𑁆𑀧𑀢𑀺𑀢𑀁 𑀅𑀢𑁆𑀣𑀁, 𑀦 𑀔𑀺𑀧𑁆𑀧𑀫𑀦𑀼𑀩𑀼𑀚𑁆𑀛𑀢𑀺;

𑀅𑀫𑀺𑀢𑁆𑀢𑀯𑀲𑀫𑀦𑁆𑀯𑁂𑀢𑀺, 𑀧𑀘𑁆𑀙𑀸 𑀘 𑀅𑀦𑀼𑀢𑀧𑁆𑀧𑀢𑀺.