𑁨. 𑀔𑀭𑀧𑀼𑀢𑁆𑀢𑀯𑀕𑁆𑀕𑁄

𑁩𑁮𑁬. 𑀔𑀭𑀧𑀼𑀢𑁆𑀢𑀚𑀸𑀢𑀓𑀁 (𑁬-𑁨-𑁧)

𑁭𑁬. 𑀲𑀘𑁆𑀘𑀁 𑀓𑀺𑀭𑁂𑀯𑀫𑀸𑀳𑀁𑀲𑀼, 𑀯𑀲𑁆𑀢𑀁 [𑀪𑀲𑁆𑀢𑀁 (𑀲𑀻. 𑀧𑀻.), 𑀓𑀮𑀓𑀁 (𑀲𑁆𑀬𑀸.), 𑀕𑀭𑀁 (𑀓.)] 𑀩𑀸𑀮𑁄𑀢𑀺 𑀧𑀡𑁆𑀟𑀺𑀢𑀸;

𑀧𑀲𑁆𑀲 𑀩𑀸𑀮𑁄 𑀭𑀳𑁄𑀓𑀫𑁆𑀫𑀁, 𑀆𑀯𑀺𑀓𑀼𑀩𑁆𑀩𑀁 𑀦 𑀩𑀼𑀚𑁆𑀛𑀢𑀺.

𑁭𑁭. 𑀢𑁆𑀯𑀁 𑀔𑁄𑀧𑀺 [𑀢𑁆𑀯𑀁 𑀦𑀼 𑀔𑁄 (𑀲𑀻. 𑀲𑁆𑀬𑀸.), 𑀢𑁆𑀯𑀜𑁆𑀘 𑀔𑁄 (𑀧𑀻.)] 𑀲𑀫𑁆𑀫 𑀩𑀸𑀮𑁄𑀲𑀺, 𑀔𑀭𑀧𑀼𑀢𑁆𑀢 𑀯𑀺𑀚𑀸𑀦𑀳𑀺;

𑀭𑀚𑁆𑀚𑀼𑀬𑀸 𑀳𑀺 [𑀭𑀚𑁆𑀚𑀼𑀬𑀸𑀲𑀺 (𑀧𑀻.)] 𑀧𑀭𑀺𑀓𑁆𑀔𑀺𑀢𑁆𑀢𑁄, 𑀯𑀗𑁆𑀓𑁄𑀝𑁆𑀞𑁄 𑀑𑀳𑀺𑀢𑁄𑀫𑀼𑀔𑁄.

𑁭𑁮. 𑀅𑀧𑀭𑀫𑁆𑀧𑀺 𑀲𑀫𑁆𑀫 𑀢𑁂 𑀩𑀸𑀮𑁆𑀬𑀁 [𑀅𑀬𑀫𑁆𑀧𑀺 𑀲𑀫𑁆𑀫 𑀢𑁂 𑀩𑀸𑀮𑁄 (𑀓.)], 𑀬𑁄 𑀫𑀼𑀢𑁆𑀢𑁄 𑀦 𑀧𑀮𑀸𑀬𑀲𑀺;

𑀲𑁄 𑀘 𑀩𑀸𑀮𑀢𑀭𑁄 𑀲𑀫𑁆𑀫, 𑀬𑀁 𑀢𑁆𑀯𑀁 𑀯𑀳𑀲𑀺 𑀲𑁂𑀦𑀓𑀁.

𑁭𑁯. 𑀬𑀁 𑀦𑀼 𑀲𑀫𑁆𑀫 𑀅𑀳𑀁 𑀩𑀸𑀮𑁄, 𑀅𑀚𑀭𑀸𑀚 𑀯𑀺𑀚𑀸𑀦𑀳𑀺;

𑀅𑀣 𑀓𑁂𑀦 𑀲𑁂𑀦𑀓𑁄 𑀩𑀸𑀮𑁄, 𑀢𑀁 𑀫𑁂 𑀅𑀓𑁆𑀔𑀸𑀳𑀺 𑀧𑀼𑀘𑁆𑀙𑀺𑀢𑁄.

𑁮𑁦. 𑀉𑀢𑁆𑀢𑀫𑀢𑁆𑀣𑀁 𑀮𑀪𑀺𑀢𑁆𑀯𑀸𑀦, 𑀪𑀭𑀺𑀬𑀸𑀬 𑀬𑁄 𑀧𑀤𑀲𑁆𑀲𑀢𑀺 [𑀪𑀬𑀺𑀬𑀸 𑀬𑁄 𑀧𑀤𑀲𑁆𑀲𑀢𑀺 (𑀧𑀻.), 𑀪𑀬𑀺𑀬𑀸 𑀦 𑀪𑀯𑀺𑀲𑁆𑀲𑀢𑀺 (𑀓.)];

𑀢𑁂𑀦 𑀚𑀳𑀺𑀲𑁆𑀲𑀢𑀢𑁆𑀢𑀸𑀦𑀁, 𑀲𑀸 𑀘𑁂𑀯𑀲𑁆𑀲 𑀦 𑀳𑁂𑀲𑁆𑀲𑀢𑀺.

𑁮𑁧. 𑀦 𑀯𑁂 𑀧𑀺𑀬𑀫𑁆𑀫𑁂𑀢𑀺 [𑀦 𑀧𑀺𑀬𑀫𑁂𑀢𑀺 (𑀓.), 𑀦 𑀧𑀺𑀬𑀫𑁂𑀤𑀦𑁆𑀢𑀺 (𑀓𑀢𑁆𑀣𑀘𑀺)] 𑀚𑀦𑀺𑀦𑁆𑀤 𑀢𑀸𑀤𑀺𑀲𑁄, 𑀅𑀢𑁆𑀢𑀁 𑀦𑀺𑀭𑀁𑀓𑀢𑁆𑀯𑀸 𑀧𑀺𑀬𑀸𑀦𑀺 𑀲𑁂𑀯𑀢𑀺 [𑀲𑁂𑀯𑀬𑁂 (?)];

𑀅𑀢𑁆𑀢𑀸𑀯 𑀲𑁂𑀬𑁆𑀬𑁄 𑀧𑀭𑀫𑀸 𑀘 𑀲𑁂𑀬𑁆𑀬𑁄, 𑀮𑀩𑁆𑀪𑀸 𑀧𑀺𑀬𑀸 𑀑𑀘𑀺𑀢𑀢𑁆𑀣𑁂𑀦 𑀧𑀘𑁆𑀙𑀸𑀢𑀺.

𑀔𑀭𑀧𑀼𑀢𑁆𑀢𑀚𑀸𑀢𑀓𑀁 𑀧𑀞𑀫𑀁.

𑁩𑁮𑁭. 𑀲𑀽𑀘𑀺𑀚𑀸𑀢𑀓𑀁 (𑁬-𑁨-𑁨)

𑁮𑁨. 𑀅𑀓𑀓𑁆𑀓𑀲𑀁 𑀅𑀨𑀭𑀼𑀲𑀁, 𑀔𑀭𑀥𑁄𑀢𑀁 𑀲𑀼𑀧𑀸𑀲𑀺𑀬𑀁;

𑀲𑀼𑀔𑀼𑀫𑀁 𑀢𑀺𑀔𑀺𑀡𑀕𑁆𑀕𑀜𑁆𑀘, 𑀓𑁄 𑀲𑀽𑀘𑀺𑀁 𑀓𑁂𑀢𑀼𑀫𑀺𑀘𑁆𑀙𑀢𑀺.

𑁮𑁩. 𑀲𑀼𑀫𑀚𑁆𑀚𑀜𑁆𑀘 𑀲𑀼𑀧𑀸𑀲𑀜𑁆𑀘, 𑀅𑀦𑀼𑀧𑀼𑀩𑁆𑀩𑀁 [𑀅𑀦𑀼𑀧𑀼𑀩𑁆𑀩 (𑀲𑀻. 𑀲𑁆𑀬𑀸.)] 𑀲𑀼𑀯𑀝𑁆𑀝𑀺𑀢𑀁;

𑀖𑀦𑀖𑀸𑀢𑀺𑀫𑀁 𑀧𑀝𑀺𑀣𑀤𑁆𑀥𑀁, 𑀓𑁄 𑀲𑀽𑀘𑀺𑀁 𑀓𑁂𑀢𑀼𑀫𑀺𑀘𑁆𑀙𑀢𑀺.

𑁮𑁪. 𑀇𑀢𑁄 𑀤𑀸𑀦𑀺 𑀧𑀢𑀸𑀬𑀦𑁆𑀢𑀺, 𑀲𑀽𑀘𑀺𑀬𑁄 𑀩𑀴𑀺𑀲𑀸𑀦𑀺 𑀘;

𑀓𑁄𑀬𑀁 𑀓𑀫𑁆𑀫𑀸𑀭𑀕𑀸𑀫𑀲𑁆𑀫𑀺𑀁, 𑀲𑀽𑀘𑀺𑀁 𑀯𑀺𑀓𑁆𑀓𑁂𑀢𑀼𑀫𑀺𑀘𑁆𑀙𑀢𑀺.

𑁮𑁫. 𑀇𑀢𑁄 𑀲𑀢𑁆𑀣𑀸𑀦𑀺 𑀕𑀘𑁆𑀙𑀦𑁆𑀢𑀺, 𑀓𑀫𑁆𑀫𑀦𑁆𑀢𑀸 𑀯𑀺𑀯𑀺𑀥𑀸 𑀧𑀼𑀣𑀽;

𑀓𑁄𑀬𑀁 𑀓𑀫𑁆𑀫𑀸𑀭𑀕𑀸𑀫𑀲𑁆𑀫𑀺𑀁, 𑀲𑀽𑀘𑀺𑀁 𑀯𑀺𑀓𑁆𑀓𑁂𑀢𑀼𑀫𑀺𑀘𑁆𑀙𑀢𑀺 [𑀫𑀭𑀳𑀢𑀺 (𑀲𑀻. 𑀲𑁆𑀬𑀸. 𑀧𑀻.)].

𑁮𑁬. 𑀲𑀽𑀘𑀺𑀁 𑀓𑀫𑁆𑀫𑀸𑀭𑀕𑀸𑀫𑀲𑁆𑀫𑀺𑀁, 𑀯𑀺𑀓𑁆𑀓𑁂𑀢𑀩𑁆𑀩𑀸 𑀧𑀚𑀸𑀦𑀢𑀸;

𑀆𑀘𑀭𑀺𑀬𑀸𑀯 𑀚𑀸𑀦𑀦𑁆𑀢𑀺 [𑀆𑀘𑀭𑀺𑀬𑀸 𑀲𑀜𑁆𑀚𑀸𑀦𑀦𑁆𑀢𑀺 (𑀓.), 𑀆𑀘𑀭𑀺𑀬𑀸 𑀧𑀚𑀸𑀦𑀦𑁆𑀢𑀺 (𑀲𑁆𑀬𑀸.), 𑀆𑀘𑀭𑀺𑀬𑀸𑀯 𑀲𑀜𑁆𑀚𑀸𑀦𑀦𑁆𑀢𑀺 (𑀧𑀻.)], 𑀓𑀫𑁆𑀫𑀁 𑀲𑀼𑀓𑀢𑀤𑀼𑀓𑁆𑀓𑀝𑀁 [𑀤𑀼𑀓𑁆𑀓𑀢𑀁 (𑀲𑀻. 𑀧𑀻.)].

𑁮𑁭. 𑀇𑀫𑀁 𑀘𑁂 [𑀇𑀫𑀜𑁆𑀘 (𑀲𑀻. 𑀲𑁆𑀬𑀸. 𑀧𑀻.)] 𑀢𑁂 𑀧𑀺𑀢𑀸 𑀪𑀤𑁆𑀤𑁂, 𑀲𑀽𑀘𑀺𑀁 𑀚𑀜𑁆𑀜𑀸 𑀫𑀬𑀸 𑀓𑀢𑀁;

𑀢𑀬𑀸 𑀘 𑀫𑀁 𑀦𑀺𑀫𑀦𑁆𑀢𑁂𑀬𑁆𑀬, 𑀬𑀜𑁆𑀘𑀢𑁆𑀣𑀜𑁆𑀜𑀁 𑀖𑀭𑁂 𑀥𑀦𑀦𑁆𑀢𑀺.

𑀲𑀽𑀘𑀺𑀚𑀸𑀢𑀓𑀁 𑀤𑀼𑀢𑀺𑀬𑀁.

𑁩𑁮𑁮. 𑀢𑀼𑀡𑁆𑀟𑀺𑀮𑀚𑀸𑀢𑀓𑀁 (𑁬-𑁨-𑁩)

𑁮𑁮. 𑀦𑀯𑀙𑀦𑁆𑀦𑀓𑁂 [𑀦𑀯𑀙𑀦𑁆𑀤𑀓𑁂 (𑀲𑀻. 𑀧𑀻.), 𑀦𑀯𑀘𑁆𑀙𑀤𑁆𑀤𑀓𑁂 (𑀲𑁆𑀬𑀸.)] 𑀤𑀸𑀦𑀺 [𑀤𑁄𑀡𑀺 (𑀓.), 𑀤𑀸𑀦𑀁, 𑀤𑀸𑀦𑁂 (𑀓𑀢𑁆𑀣𑀘𑀺)] 𑀤𑀺𑀬𑁆𑀬𑀢𑀺, 𑀧𑀼𑀡𑁆𑀡𑀸𑀬𑀁 𑀤𑁄𑀡𑀺 𑀲𑀼𑀯𑀸𑀫𑀺𑀦𑀻 𑀞𑀺𑀢𑀸;

𑀩𑀳𑀼𑀓𑁂 𑀚𑀦𑁂 𑀧𑀸𑀲𑀧𑀸𑀡𑀺𑀓𑁂, 𑀦𑁄 𑀘 𑀔𑁄 𑀫𑁂 𑀧𑀝𑀺𑀪𑀸𑀢𑀺 𑀪𑀼𑀜𑁆𑀚𑀺𑀢𑀼𑀁.

𑁮𑁯. 𑀢𑀲𑀲𑀺 𑀪𑀫𑀲𑀺 𑀮𑁂𑀡𑀫𑀺𑀘𑁆𑀙𑀲𑀺, 𑀅𑀢𑁆𑀢𑀸𑀡𑁄𑀲𑀺 𑀓𑀼𑀳𑀺𑀁 𑀕𑀫𑀺𑀲𑁆𑀲𑀲𑀺;

𑀅𑀧𑁆𑀧𑁄𑀲𑁆𑀲𑀼𑀓𑁆𑀓𑁄 𑀪𑀼𑀜𑁆𑀚 𑀢𑀼𑀡𑁆𑀟𑀺𑀮, 𑀫𑀁𑀲𑀢𑁆𑀣𑀸𑀬 𑀳𑀺 𑀧𑁄𑀲𑀺𑀢𑀸𑀫𑁆𑀳𑀲𑁂 [𑀧𑁄𑀲𑀺𑀬𑀸𑀫𑀲𑁂 (𑀲𑀻. 𑀲𑁆𑀬𑀸. 𑀧𑀻.)].

𑁯𑁦. 𑀑𑀕𑀳 𑀭𑀳𑀤𑀁 𑀅𑀓𑀤𑁆𑀤𑀫𑀁, 𑀲𑀩𑁆𑀩𑀁 𑀲𑁂𑀤𑀫𑀮𑀁 𑀧𑀯𑀸𑀳𑀬;

𑀕𑀡𑁆𑀳𑀸𑀳𑀺 𑀦𑀯𑀁 𑀯𑀺𑀮𑁂𑀧𑀦𑀁, 𑀬𑀲𑁆𑀲 𑀕𑀦𑁆𑀥𑁄 𑀦 𑀓𑀤𑀸𑀘𑀺 𑀙𑀺𑀚𑁆𑀚𑀢𑀺.

𑁯𑁧. 𑀓𑀢𑀫𑁄 𑀭𑀳𑀤𑁄 𑀅𑀓𑀤𑁆𑀤𑀫𑁄, 𑀓𑀺𑀁𑀲𑀼 𑀲𑁂𑀤𑀫𑀮𑀦𑁆𑀢𑀺 𑀯𑀼𑀘𑁆𑀘𑀢𑀺;

𑀓𑀢𑀫𑀜𑁆𑀘 𑀦𑀯𑀁 𑀯𑀺𑀮𑁂𑀧𑀦𑀁, 𑀬𑀲𑁆𑀲 𑀕𑀦𑁆𑀥𑁄 𑀦 𑀓𑀤𑀸𑀘𑀺 𑀙𑀺𑀚𑁆𑀚𑀢𑀺.

𑁯𑁨. 𑀥𑀫𑁆𑀫𑁄 𑀭𑀳𑀤𑁄 𑀅𑀓𑀤𑁆𑀤𑀫𑁄, 𑀧𑀸𑀧𑀁 𑀲𑁂𑀤𑀫𑀮𑀦𑁆𑀢𑀺 𑀯𑀼𑀘𑁆𑀘𑀢𑀺;

𑀲𑀻𑀮𑀜𑁆𑀘 𑀦𑀯𑀁 𑀯𑀺𑀮𑁂𑀧𑀦𑀁, 𑀢𑀲𑁆𑀲 𑀕𑀦𑁆𑀥𑁄 𑀦 𑀓𑀤𑀸𑀘𑀺 𑀙𑀺𑀚𑁆𑀚𑀢𑀺.

𑁯𑁩. 𑀦𑀦𑁆𑀤𑀦𑁆𑀢𑀺 𑀲𑀭𑀻𑀭𑀖𑀸𑀢𑀺𑀦𑁄, 𑀦 𑀘 𑀦𑀦𑁆𑀤𑀦𑁆𑀢𑀺 𑀲𑀭𑀻𑀭𑀥𑀸𑀭𑀺𑀦𑁄;

𑀧𑀼𑀡𑁆𑀡𑀸𑀬 𑀘 𑀧𑀼𑀡𑁆𑀡𑀫𑀸𑀲𑀺𑀬𑀸, 𑀭𑀫𑀫𑀸𑀦𑀸𑀯 𑀚𑀳𑀦𑁆𑀢𑀺 𑀚𑀻𑀯𑀺𑀢𑀦𑁆𑀢𑀺.

𑀢𑀼𑀡𑁆𑀟𑀺𑀮𑀚𑀸𑀢𑀓𑀁 𑀢𑀢𑀺𑀬𑀁.

𑁩𑁮𑁯. 𑀲𑀼𑀯𑀡𑁆𑀡𑀓𑀓𑁆𑀓𑀝𑀚𑀸𑀢𑀓𑀁 (𑁬-𑁨-𑁪)

𑁯𑁪. 𑀲𑀺𑀗𑁆𑀕𑀻𑀫𑀺𑀕𑁄 𑀆𑀬𑀢𑀘𑀓𑁆𑀔𑀼𑀦𑁂𑀢𑁆𑀢𑁄, 𑀅𑀝𑁆𑀞𑀺𑀢𑁆𑀢𑀘𑁄 𑀯𑀸𑀭𑀺𑀲𑀬𑁄 𑀅𑀮𑁄𑀫𑁄;

𑀢𑁂𑀦𑀸𑀪𑀺𑀪𑀽𑀢𑁄 𑀓𑀧𑀡𑀁 𑀭𑀼𑀤𑀸𑀫𑀺, 𑀳𑀭𑁂 𑀲𑀔𑀸 𑀓𑀺𑀲𑁆𑀲 𑀦𑀼 𑀫𑀁 𑀚𑀳𑀸𑀲𑀺.

𑁯𑁫. 𑀲𑁄 𑀧𑀲𑁆𑀲𑀲𑀦𑁆𑀢𑁄 𑀫𑀳𑀢𑀸 𑀨𑀡𑁂𑀦, 𑀪𑀼𑀚𑀗𑁆𑀕𑀫𑁄 𑀓𑀓𑁆𑀓𑀝𑀫𑀚𑁆𑀛𑀧𑀢𑁆𑀢𑁄;

𑀲𑀔𑀸 𑀲𑀔𑀸𑀭𑀁 𑀧𑀭𑀺𑀢𑀸𑀬𑀫𑀸𑀦𑁄, 𑀪𑀼𑀚𑀗𑁆𑀕𑀫𑀁 𑀓𑀓𑁆𑀓𑀝𑀓𑁄 𑀕𑀳𑁂𑀲𑀺.

𑁯𑁬. 𑀦 𑀯𑀸𑀬𑀲𑀁 𑀦𑁄 𑀧𑀦 𑀓𑀡𑁆𑀳𑀲𑀧𑁆𑀧𑀁, 𑀖𑀸𑀲𑀢𑁆𑀣𑀺𑀓𑁄 𑀓𑀓𑁆𑀓𑀝𑀓𑁄 𑀅𑀤𑁂𑀬𑁆𑀬;

𑀧𑀼𑀘𑁆𑀙𑀸𑀫𑀺 𑀢𑀁 𑀆𑀬𑀢𑀘𑀓𑁆𑀔𑀼𑀦𑁂𑀢𑁆𑀢, 𑀅𑀣 𑀓𑀺𑀲𑁆𑀲 𑀳𑁂𑀢𑀼𑀫𑁆𑀳 𑀉𑀪𑁄 𑀕𑀳𑀻𑀢𑀸.

𑁯𑁭. 𑀅𑀬𑀁 𑀧𑀼𑀭𑀺𑀲𑁄 𑀫𑀫 𑀅𑀢𑁆𑀣𑀓𑀸𑀫𑁄, 𑀬𑁄 𑀫𑀁 𑀕𑀳𑁂𑀢𑁆𑀯𑀸𑀦 𑀤𑀓𑀸𑀬 𑀦𑁂𑀢𑀺;

𑀢𑀲𑁆𑀫𑀺𑀁 𑀫𑀢𑁂 𑀤𑀼𑀓𑁆𑀔𑀫𑀦𑀧𑁆𑀧𑀓𑀁 𑀫𑁂, 𑀅𑀳𑀜𑁆𑀘 𑀏𑀲𑁄 𑀘 𑀉𑀪𑁄 𑀦 𑀳𑁄𑀫.

𑁯𑁮. 𑀫𑀫𑀜𑁆𑀘 𑀤𑀺𑀲𑁆𑀯𑀸𑀦 𑀧𑀯𑀤𑁆𑀥𑀓𑀸𑀬𑀁, 𑀲𑀩𑁆𑀩𑁄 𑀚𑀦𑁄 𑀳𑀺𑀁𑀲𑀺𑀢𑀼𑀫𑁂𑀯 𑀫𑀺𑀘𑁆𑀙𑁂;

𑀲𑀸𑀤𑀼𑀜𑁆𑀘 𑀣𑀽𑀮𑀜𑁆𑀘 𑀫𑀼𑀤𑀼𑀜𑁆𑀘 𑀫𑀁𑀲𑀁, 𑀓𑀸𑀓𑀸𑀧𑀺 𑀫𑀁 𑀤𑀺𑀲𑁆𑀯𑀸𑀦 [𑀤𑀺𑀲𑁆𑀯 (𑀲𑀻. 𑀧𑀻.)] 𑀯𑀺𑀳𑁂𑀞𑀬𑁂𑀬𑁆𑀬𑀼𑀁.

𑁯𑁯. 𑀲𑀘𑁂𑀢𑀲𑁆𑀲 𑀳𑁂𑀢𑀼𑀫𑁆𑀳 𑀉𑀪𑁄 𑀕𑀳𑀻𑀢𑀸, 𑀉𑀝𑁆𑀞𑀸𑀢𑀼 𑀧𑁄𑀲𑁄 𑀯𑀺𑀲𑀫𑀸𑀯𑀫𑀸𑀫𑀺 [𑀯𑀺𑀲𑀫𑀸𑀘𑀫𑀸𑀫𑀺 (𑀲𑀻. 𑀧𑀻. 𑀓.)];

𑀫𑀫𑀜𑁆𑀘 𑀓𑀸𑀓𑀜𑁆𑀘 𑀧𑀫𑀼𑀜𑁆𑀘 𑀔𑀺𑀧𑁆𑀧𑀁, 𑀧𑀼𑀭𑁂 𑀯𑀺𑀲𑀁 𑀕𑀸𑀴𑁆𑀳𑀫𑀼𑀧𑁂𑀢𑀺 𑀫𑀘𑁆𑀘𑀁.

𑁧𑁦𑁦. 𑀲𑀧𑁆𑀧𑀁 𑀧𑀫𑁄𑀓𑁆𑀔𑀸𑀫𑀺 𑀦 𑀢𑀸𑀯 𑀓𑀸𑀓𑀁, 𑀧𑀝𑀺𑀩𑀦𑁆𑀥𑀓𑁄 [𑀧𑀝𑀺𑀩𑀤𑁆𑀥𑀓𑁄 (𑀲𑀻. 𑀧𑀻.)] 𑀳𑁄𑀳𑀺𑀢𑀺 [𑀳𑁄𑀢𑀺 𑀳𑀺 (𑀲𑁆𑀬𑀸.)] 𑀢𑀸𑀯 𑀓𑀸𑀓𑁄;

𑀧𑀼𑀭𑀺𑀲𑀜𑁆𑀘 𑀤𑀺𑀲𑁆𑀯𑀸𑀦 𑀲𑀼𑀔𑀺𑀁 𑀅𑀭𑁄𑀕𑀁, 𑀓𑀸𑀓𑀁 𑀧𑀫𑁄𑀓𑁆𑀔𑀸𑀫𑀺 𑀬𑀣𑁂𑀯 𑀲𑀧𑁆𑀧𑀁.

𑁧𑁦𑁧. 𑀓𑀸𑀓𑁄 𑀢𑀤𑀸 𑀤𑁂𑀯𑀤𑀢𑁆𑀢𑁄 𑀅𑀳𑁄𑀲𑀺, 𑀫𑀸𑀭𑁄 𑀧𑀦 𑀓𑀡𑁆𑀳𑀲𑀧𑁆𑀧𑁄 𑀅𑀳𑁄𑀲𑀺;

𑀆𑀦𑀦𑁆𑀤𑀪𑀤𑁆𑀤𑁄 𑀓𑀓𑁆𑀓𑀝𑀓𑁄 𑀅𑀳𑁄𑀲𑀺, 𑀅𑀳𑀁 𑀢𑀤𑀸 𑀩𑁆𑀭𑀸𑀳𑁆𑀫𑀡𑁄 𑀳𑁄𑀫𑀺 𑀲𑀢𑁆𑀣𑀸𑀢𑀺 [𑀢𑀢𑁆𑀣𑀸𑀢𑀺 (𑀲𑀻. 𑀧𑀻.)].

𑀲𑀼𑀯𑀡𑁆𑀡𑀓𑀓𑁆𑀓𑀝𑀚𑀸𑀢𑀓𑀁 𑀘𑀢𑀼𑀢𑁆𑀣𑀁.

𑁩𑁯𑁦. 𑀫𑀬𑁆𑀳𑀓𑀚𑀸𑀢𑀓𑀁 (𑁬-𑁨-𑁫)

𑁧𑁦𑁨. 𑀲𑀓𑀼𑀡𑁄 𑀫𑀬𑁆𑀳𑀓𑁄 𑀦𑀸𑀫, 𑀕𑀺𑀭𑀺𑀲𑀸𑀦𑀼𑀤𑀭𑀻𑀘𑀭𑁄;

𑀧𑀓𑁆𑀓𑀁 𑀧𑀺𑀧𑁆𑀨𑀮𑀺𑀫𑀸𑀭𑀼𑀬𑁆𑀳, 𑀫𑀬𑁆𑀳𑀁 𑀫𑀬𑁆𑀳𑀦𑁆𑀢𑀺 𑀓𑀦𑁆𑀤𑀢𑀺.

𑁧𑁦𑁩. 𑀢𑀲𑁆𑀲𑁂𑀯𑀁 𑀯𑀺𑀮𑀧𑀦𑁆𑀢𑀲𑁆𑀲, 𑀤𑀺𑀚𑀲𑀗𑁆𑀖𑀸 𑀲𑀫𑀸𑀕𑀢𑀸;

𑀪𑀼𑀢𑁆𑀯𑀸𑀦 𑀧𑀺𑀧𑁆𑀨𑀮𑀺𑀁 𑀬𑀦𑁆𑀢𑀺, 𑀯𑀺𑀮𑀧𑀢𑁆𑀯𑁂𑀯 𑀲𑁄 𑀤𑀺𑀚𑁄.

𑁧𑁦𑁪. 𑀏𑀯𑀫𑁂𑀯 𑀇𑀥𑁂𑀓𑀘𑁆𑀘𑁄, 𑀲𑀗𑁆𑀖𑀭𑀺𑀢𑁆𑀯𑀸 𑀩𑀳𑀼𑀁 𑀥𑀦𑀁;

𑀦𑁂𑀯𑀢𑁆𑀢𑀦𑁄 𑀦 𑀜𑀸𑀢𑀻𑀦𑀁, 𑀬𑀣𑁄𑀥𑀺𑀁 𑀧𑀝𑀺𑀧𑀚𑁆𑀚𑀢𑀺.

𑁧𑁦𑁫. 𑀦 𑀲𑁄 𑀅𑀘𑁆𑀙𑀸𑀤𑀦𑀁 𑀪𑀢𑁆𑀢𑀁, 𑀦 𑀫𑀸𑀮𑀁 𑀦 𑀯𑀺𑀮𑁂𑀧𑀦𑀁;

𑀅𑀦𑀼𑀪𑁄𑀢𑀺 [𑀦𑀸𑀦𑀼𑀪𑁄𑀢𑀺 (𑀲𑁆𑀬𑀸. 𑀓.)] 𑀲𑀓𑀺𑀁 𑀓𑀺𑀜𑁆𑀘𑀺, 𑀦 𑀲𑀗𑁆𑀕𑀡𑁆𑀳𑀸𑀢𑀺 𑀜𑀸𑀢𑀓𑁂.

𑁧𑁦𑁬. 𑀢𑀲𑁆𑀲𑁂𑀯𑀁 𑀯𑀺𑀮𑀧𑀦𑁆𑀢𑀲𑁆𑀲, 𑀫𑀬𑁆𑀳𑀁 𑀫𑀬𑁆𑀳𑀦𑁆𑀢𑀺 𑀭𑀓𑁆𑀔𑀢𑁄;

𑀭𑀸𑀚𑀸𑀦𑁄 𑀅𑀣 𑀯𑀸 𑀘𑁄𑀭𑀸, 𑀤𑀸𑀬𑀤𑀸 𑀬𑁂 𑀯 [𑀬𑁂 𑀘 (𑀲𑁆𑀬𑀸. 𑀓.)] 𑀅𑀧𑁆𑀧𑀺𑀬𑀸;

𑀥𑀦𑀫𑀸𑀤𑀸𑀬 𑀕𑀘𑁆𑀙𑀦𑁆𑀢𑀺, 𑀯𑀺𑀮𑀧𑀢𑁆𑀯𑁂𑀯 𑀲𑁄 𑀦𑀭𑁄.

𑁧𑁦𑁭. 𑀥𑀻𑀭𑁄 [𑀥𑀻𑀭𑁄 𑀘 (𑀲𑀻.)] 𑀪𑁄𑀕𑁂 𑀅𑀥𑀺𑀕𑀫𑁆𑀫, 𑀲𑀗𑁆𑀕𑀡𑁆𑀳𑀸𑀢𑀺 𑀘 𑀜𑀸𑀢𑀓𑁂;

𑀢𑁂𑀦 𑀲𑁄 𑀓𑀺𑀢𑁆𑀢𑀺𑀁 𑀧𑀧𑁆𑀧𑁄𑀢𑀺, 𑀧𑁂𑀘𑁆𑀘 𑀲𑀕𑁆𑀕𑁂 𑀧𑀫𑁄𑀤𑀢𑀻𑀢𑀺 [𑀲𑀕𑁆𑀕𑁂 𑀘 𑀫𑁄𑀤𑀢𑀻𑀢𑀺 (𑀲𑀻. 𑀧𑀻.)].

𑀫𑀬𑁆𑀳𑀓𑀚𑀸𑀢𑀓𑀁 𑀧𑀜𑁆𑀘𑀫𑀁.

𑁩𑁯𑁧. 𑀯𑀺𑀚𑁆𑀚𑀸𑀥𑀭𑀚𑀸𑀢𑀓𑀁 (𑁬-𑁨-𑁬)

𑁧𑁦𑁮. 𑀤𑀼𑀩𑁆𑀩𑀡𑁆𑀡𑀭𑀽𑀧𑀁 𑀢𑀼𑀯𑀫𑀭𑀺𑀬𑀯𑀡𑁆𑀡𑀻, 𑀧𑀼𑀭𑀓𑁆𑀔𑀢𑁆𑀯𑀸 [𑀧𑀼𑀭𑀓𑁆𑀔𑀺𑀢𑁆𑀯𑀸 (𑀲𑁆𑀬𑀸. 𑀓.)] 𑀧𑀜𑁆𑀚𑀮𑀺𑀓𑁄 𑀦𑀫𑀲𑁆𑀲𑀲𑀺;

𑀲𑁂𑀬𑁆𑀬𑁄 𑀦𑀼 𑀢𑁂 𑀲𑁄 𑀉𑀤𑀯𑀸 [𑀉𑀤𑀸𑀳𑀼 (𑀲𑁆𑀬𑀸. 𑀓.)] 𑀲𑀭𑀺𑀓𑁆𑀔𑁄, 𑀦𑀸𑀫𑀁 𑀧𑀭𑀲𑁆𑀲𑀢𑁆𑀢𑀦𑁄 𑀘𑀸𑀧𑀺 𑀩𑁆𑀭𑀽𑀳𑀺.

𑁧𑁦𑁯. 𑀦 𑀦𑀸𑀫𑀕𑁄𑀢𑁆𑀢𑀁 𑀕𑀡𑁆𑀳𑀦𑁆𑀢𑀺 𑀭𑀸𑀚, 𑀲𑀫𑁆𑀫𑀕𑁆𑀕𑀢𑀸𑀦𑀼𑀚𑁆𑀚𑀼𑀕𑀢𑀸𑀦 [𑀲𑀫𑀕𑁆𑀕𑀢𑀸𑀦𑀼𑀚𑁆𑀚𑀼𑀕𑀢𑀸𑀦 (𑀲𑁆𑀬𑀸.), 𑀲𑀫𑀼𑀕𑁆𑀕𑀢𑀸𑀦𑀼𑀚𑁆𑀚𑀼𑀕𑀢𑀸𑀦 (𑀓.)] 𑀤𑁂𑀯𑀸;

𑀅𑀳𑀜𑁆𑀘 𑀢𑁂 𑀦𑀸𑀫𑀥𑁂𑀬𑁆𑀬𑀁 𑀯𑀤𑀸𑀫𑀺, 𑀲𑀓𑁆𑀓𑁄𑀳𑀫𑀲𑁆𑀫𑀻 𑀢𑀺𑀤𑀲𑀸𑀦𑀫𑀺𑀦𑁆𑀤𑁄.

𑁧𑁧𑁦. 𑀬𑁄 𑀤𑀺𑀲𑁆𑀯𑀸 𑀪𑀺𑀓𑁆𑀔𑀼𑀁 𑀘𑀭𑀡𑀽𑀧𑀧𑀦𑁆𑀦𑀁, 𑀧𑀼𑀭𑀓𑁆𑀔𑀢𑁆𑀯𑀸 𑀧𑀜𑁆𑀚𑀮𑀺𑀓𑁄 𑀦𑀫𑀲𑁆𑀲𑀢𑀺;

𑀧𑀼𑀘𑁆𑀙𑀸𑀫𑀺 𑀢𑀁 𑀤𑁂𑀯𑀭𑀸𑀚𑁂𑀢𑀫𑀢𑁆𑀣𑀁, 𑀇𑀢𑁄 𑀘𑀼𑀢𑁄 𑀓𑀺𑀁 𑀮𑀪𑀢𑁂 𑀲𑀼𑀔𑀁 𑀲𑁄.

𑁧𑁧𑁧. 𑀬𑁄 𑀤𑀺𑀲𑁆𑀯𑀸 𑀪𑀺𑀓𑁆𑀔𑀼𑀁 𑀘𑀭𑀡𑀽𑀧𑀧𑀦𑁆𑀦𑀁, 𑀧𑀼𑀭𑀓𑁆𑀔𑀢𑁆𑀯𑀸 𑀧𑀜𑁆𑀚𑀮𑀺𑀓𑁄 𑀦𑀫𑀲𑁆𑀲𑀢𑀺;

𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀮𑀪𑀢𑁂 𑀧𑀲𑀁𑀲𑀁, 𑀲𑀕𑁆𑀕𑀜𑁆𑀘 𑀲𑁄 𑀬𑀸𑀢𑀺 𑀲𑀭𑀻𑀭𑀪𑁂𑀤𑀸.

𑁧𑁧𑁨. 𑀮𑀓𑁆𑀔𑀻 𑀯𑀢 𑀫𑁂 𑀉𑀤𑀧𑀸𑀤𑀺 𑀅𑀚𑁆𑀚, 𑀬𑀁 𑀯𑀸𑀲𑀯𑀁 𑀪𑀽𑀢𑀧𑀢𑀺𑀤𑁆𑀤𑀲𑀸𑀫;

𑀪𑀺𑀓𑁆𑀔𑀼𑀜𑁆𑀘 𑀤𑀺𑀲𑁆𑀯𑀸𑀦 𑀢𑀼𑀯𑀜𑁆𑀘 𑀲𑀓𑁆𑀓, 𑀓𑀸𑀳𑀸𑀫𑀺 𑀧𑀼𑀜𑁆𑀜𑀸𑀦𑀺 𑀅𑀦𑀧𑁆𑀧𑀓𑀸𑀦𑀺.

𑁧𑁧𑁩. 𑀅𑀤𑁆𑀥𑀸 𑀳𑀯𑁂 𑀲𑁂𑀯𑀺𑀢𑀩𑁆𑀩𑀸 𑀲𑀧𑀜𑁆𑀜𑀸, 𑀩𑀳𑀼𑀲𑁆𑀲𑀼𑀢𑀸 𑀬𑁂 𑀩𑀳𑀼𑀞𑀸𑀦𑀘𑀺𑀦𑁆𑀢𑀺𑀦𑁄;

𑀪𑀺𑀓𑁆𑀔𑀼𑀜𑁆𑀘 𑀤𑀺𑀲𑁆𑀯𑀸𑀦 𑀫𑀫𑀜𑁆𑀘 𑀭𑀸𑀚, 𑀓𑀭𑁄𑀳𑀺 𑀧𑀼𑀜𑁆𑀜𑀸𑀦𑀺 𑀅𑀦𑀧𑁆𑀧𑀓𑀸𑀦𑀺.

𑁧𑁧𑁪. 𑀅𑀓𑁆𑀓𑁄𑀥𑀦𑁄 𑀦𑀺𑀘𑁆𑀘𑀧𑀲𑀦𑁆𑀦𑀘𑀺𑀢𑁆𑀢𑁄, 𑀲𑀩𑁆𑀩𑀸𑀢𑀺𑀣𑀻𑀬𑀸𑀘𑀬𑁄𑀕𑁄 𑀪𑀯𑀺𑀢𑁆𑀯𑀸;

𑀦𑀺𑀳𑀘𑁆𑀘 𑀫𑀸𑀦𑀁 𑀅𑀪𑀺𑀯𑀸𑀤𑀬𑀺𑀲𑁆𑀲𑀁, 𑀲𑀼𑀢𑁆𑀯𑀸𑀦 𑀤𑁂𑀯𑀺𑀦𑁆𑀤 𑀲𑀼𑀪𑀸𑀲𑀺𑀢𑀸𑀦𑀻𑀢𑀺.

𑀯𑀺𑀚𑁆𑀚𑀸𑀥𑀭 [𑀥𑀚𑀯𑀺𑀳𑁂𑀞𑀓 (𑀲𑀻. 𑀧𑀻.), 𑀧𑀩𑁆𑀩𑀚𑀺𑀢𑀯𑀺𑀳𑁂𑀞𑀓 (𑀲𑁆𑀬𑀸.)] 𑀚𑀸𑀢𑀓𑀁 𑀙𑀝𑁆𑀞𑀁.

𑁩𑁯𑁨. 𑀲𑀺𑀗𑁆𑀖𑀧𑀼𑀧𑁆𑀨𑀚𑀸𑀢𑀓𑀁 (𑁬-𑁨-𑁭)

𑁧𑁧𑁫. 𑀬𑀫𑁂𑀢𑀁 [𑀬𑀫𑁂𑀓𑀁 (𑀧𑀻.)] 𑀯𑀸𑀭𑀺𑀚𑀁 𑀧𑀼𑀧𑁆𑀨𑀁, 𑀅𑀤𑀺𑀦𑁆𑀦𑀁 𑀉𑀧𑀲𑀺𑀗𑁆𑀖𑀲𑀺;

𑀏𑀓𑀗𑁆𑀕𑀫𑁂𑀢𑀁 𑀣𑁂𑀬𑁆𑀬𑀸𑀦𑀁, 𑀕𑀦𑁆𑀥𑀣𑁂𑀦𑁄𑀲𑀺 𑀫𑀸𑀭𑀺𑀲.

𑁧𑁧𑁬. 𑀦 𑀳𑀭𑀸𑀫𑀺 𑀦 𑀪𑀜𑁆𑀚𑀸𑀫𑀺, 𑀆𑀭𑀸 𑀲𑀺𑀗𑁆𑀖𑀸𑀫𑀺 𑀯𑀸𑀭𑀺𑀚𑀁;

𑀅𑀣 𑀓𑁂𑀦 𑀦𑀼 𑀯𑀡𑁆𑀡𑁂𑀦, 𑀕𑀦𑁆𑀥𑀣𑁂𑀦𑁄𑀢𑀺 𑀯𑀼𑀘𑁆𑀘𑀢𑀺.

𑁧𑁧𑁭. 𑀬𑁄𑀬𑀁 𑀪𑀺𑀲𑀸𑀦𑀺 𑀔𑀡𑀢𑀺, 𑀧𑀼𑀡𑁆𑀟𑀭𑀻𑀓𑀸𑀦𑀺 𑀪𑀜𑁆𑀚𑀢𑀺;

𑀏𑀯𑀁 𑀆𑀓𑀺𑀡𑁆𑀡𑀓𑀫𑁆𑀫𑀦𑁆𑀢𑁄, 𑀓𑀲𑁆𑀫𑀸 𑀏𑀲𑁄 𑀦 𑀯𑀼𑀘𑁆𑀘𑀢𑀺.

𑁧𑁧𑁮. 𑀆𑀓𑀺𑀡𑁆𑀡𑀮𑀼𑀤𑁆𑀤𑁄 𑀧𑀼𑀭𑀺𑀲𑁄, 𑀥𑀸𑀢𑀺𑀘𑁂𑀮𑀁𑀯 𑀫𑀓𑁆𑀔𑀺𑀢𑁄;

𑀢𑀲𑁆𑀫𑀺𑀁 𑀫𑁂 𑀯𑀘𑀦𑀁 𑀦𑀢𑁆𑀣𑀺, 𑀢𑀜𑁆𑀘𑀸𑀭𑀳𑀸𑀫𑀺 𑀯𑀢𑁆𑀢𑀯𑁂.

𑁧𑁧𑁯. 𑀅𑀦𑀗𑁆𑀕𑀡𑀲𑁆𑀲 𑀧𑁄𑀲𑀲𑁆𑀲, 𑀦𑀺𑀘𑁆𑀘𑀁 𑀲𑀼𑀘𑀺𑀕𑀯𑁂𑀲𑀺𑀦𑁄;

𑀯𑀸𑀮𑀕𑁆𑀕𑀫𑀢𑁆𑀢𑀁 𑀧𑀸𑀧𑀲𑁆𑀲, 𑀅𑀩𑁆𑀪𑀸𑀫𑀢𑁆𑀢𑀁𑀯 𑀔𑀸𑀬𑀢𑀺.

𑁧𑁨𑁦. 𑀅𑀤𑁆𑀥𑀸 𑀫𑀁 𑀬𑀓𑁆𑀔 𑀚𑀸𑀦𑀸𑀲𑀺, 𑀅𑀣𑁄 𑀫𑀁 𑀅𑀦𑀼𑀓𑀫𑁆𑀧𑀲𑀺;

𑀧𑀼𑀦𑀧𑀺 𑀬𑀓𑁆𑀔 𑀯𑀚𑁆𑀚𑀸𑀲𑀺, 𑀬𑀤𑀸 𑀧𑀲𑁆𑀲𑀲𑀺 𑀏𑀤𑀺𑀲𑀁.

𑁧𑁨𑁧. 𑀦𑁂𑀯 𑀢𑀁 𑀉𑀧𑀚𑀻𑀯𑀸𑀫𑀺, 𑀦𑀧𑀺 𑀢𑁂 𑀪𑀢𑀓𑀸𑀫𑁆𑀳𑀲𑁂 [𑀪𑀢𑀓𑀫𑁆𑀳𑀲𑁂 (𑀲𑀻. 𑀧𑀻.), 𑀪𑀢𑀺𑀓𑀫𑁆𑀳𑀲𑁂 (𑀲𑁆𑀬𑀸.)];

𑀢𑁆𑀯𑀫𑁂𑀯 𑀪𑀺𑀓𑁆𑀔𑀼 𑀚𑀸𑀦𑁂𑀬𑁆𑀬, 𑀬𑁂𑀦 𑀕𑀘𑁆𑀙𑁂𑀬𑁆𑀬 𑀲𑀼𑀕𑁆𑀕𑀢𑀺𑀦𑁆𑀢𑀺.

𑀲𑀺𑀗𑁆𑀖𑀧𑀼𑀧𑁆𑀨 [𑀪𑀺𑀲𑀧𑀼𑀧𑁆𑀨 (𑀲𑀻. 𑀧𑀻.), 𑀉𑀧𑀲𑀺𑀗𑁆𑀖𑀧𑀼𑀧𑁆𑀨 (𑀲𑁆𑀬𑀸.)] 𑀚𑀸𑀢𑀓𑀁 𑀲𑀢𑁆𑀢𑀫𑀁.

𑁩𑁯𑁩. 𑀯𑀺𑀖𑀸𑀲𑀸𑀤𑀚𑀸𑀢𑀓𑀁 (𑁬-𑁨-𑁮)

𑁧𑁨𑁨. 𑀲𑀼𑀲𑀼𑀔𑀁 𑀯𑀢 𑀚𑀻𑀯𑀦𑁆𑀢𑀺, 𑀬𑁂 𑀚𑀦𑀸 𑀯𑀺𑀖𑀸𑀲𑀸𑀤𑀺𑀦𑁄;

𑀤𑀺𑀝𑁆𑀞𑁂𑀯 𑀥𑀫𑁆𑀫𑁂 𑀧𑀸𑀲𑀁𑀲𑀸, 𑀲𑀫𑁆𑀧𑀭𑀸𑀬𑁂 𑀘 𑀲𑀼𑀕𑁆𑀕𑀢𑀻.

𑁧𑁨𑁩. 𑀲𑀼𑀓𑀲𑁆𑀲 [𑀲𑀼𑀯𑀲𑁆𑀲 (𑀲𑀻. 𑀲𑁆𑀬𑀸. 𑀧𑀻.)] 𑀪𑀸𑀲𑀫𑀸𑀦𑀲𑁆𑀲, 𑀦 𑀦𑀺𑀲𑀸𑀫𑁂𑀣 𑀧𑀡𑁆𑀟𑀺𑀢𑀸;

𑀇𑀤𑀁 𑀲𑀼𑀡𑀸𑀣 𑀲𑁄𑀤𑀭𑀺𑀬𑀸, 𑀅𑀫𑁆𑀳𑁂𑀯𑀸𑀬𑀁 𑀧𑀲𑀁𑀲𑀢𑀺.

𑁧𑁨𑁪. 𑀦𑀸𑀳𑀁 𑀢𑀼𑀫𑁆𑀳𑁂 𑀧𑀲𑀁𑀲𑀸𑀫𑀺, 𑀓𑀼𑀡𑀧𑀸𑀤𑀸 𑀲𑀼𑀡𑀸𑀣 𑀫𑁂;

𑀉𑀘𑁆𑀙𑀺𑀝𑁆𑀞𑀪𑁄𑀚𑀺𑀦𑁄 [𑀪𑁄𑀚𑀦𑀸 (𑀓.)] 𑀢𑀼𑀫𑁆𑀳𑁂, 𑀦 𑀢𑀼𑀫𑁆𑀳𑁂 𑀯𑀺𑀖𑀸𑀲𑀸𑀤𑀺𑀦𑁄.

𑁧𑁨𑁫. 𑀲𑀢𑁆𑀢𑀯𑀲𑁆𑀲𑀸 𑀧𑀩𑁆𑀩𑀚𑀺𑀢𑀸, 𑀫𑁂𑀚𑁆𑀛𑀸𑀭𑀜𑁆𑀜𑁂 [𑀫𑀚𑁆𑀛𑁂𑀭𑀜𑁆𑀜𑁂 (𑀓.)] 𑀲𑀺𑀔𑀡𑁆𑀟𑀺𑀦𑁄;

𑀯𑀺𑀖𑀸𑀲𑁂𑀦𑁂𑀯 𑀬𑀸𑀧𑁂𑀦𑁆𑀢𑀸, 𑀫𑀬𑀁 𑀘𑁂 𑀪𑁄𑀢𑁄 𑀕𑀸𑀭𑀬𑁆𑀳𑀸;

𑀓𑁂 𑀦𑀼 𑀪𑁄𑀢𑁄 𑀧𑀲𑀁𑀲𑀺𑀬𑀸.

𑁧𑁨𑁬. 𑀢𑀼𑀫𑁆𑀳𑁂 𑀲𑀻𑀳𑀸𑀦𑀁 𑀩𑁆𑀬𑀕𑁆𑀖𑀸𑀦𑀁, 𑀯𑀸𑀴𑀸𑀦𑀜𑁆𑀘𑀸𑀯𑀲𑀺𑀝𑁆𑀞𑀓𑀁;

𑀉𑀘𑁆𑀙𑀺𑀝𑁆𑀞𑁂𑀦𑁂𑀯 𑀬𑀸𑀧𑁂𑀦𑁆𑀢𑀸, 𑀫𑀜𑁆𑀜𑀺𑀯𑁆𑀳𑁄 𑀯𑀺𑀖𑀸𑀲𑀸𑀤𑀺𑀦𑁄.

𑁧𑁨𑁭. 𑀬𑁂 𑀩𑁆𑀭𑀸𑀳𑁆𑀫𑀡𑀲𑁆𑀲 𑀲𑀫𑀡𑀲𑁆𑀲, 𑀅𑀜𑁆𑀜𑀲𑁆𑀲 𑀯𑀸 [𑀅𑀜𑁆𑀜𑀲𑁆𑀲 𑀘 (𑀲𑀻. 𑀲𑁆𑀬𑀸.), 𑀅𑀜𑁆𑀜𑀲𑁆𑀲𑁂𑀯 (𑀧𑀻.)] 𑀯𑀦𑀺𑀩𑁆𑀩𑀺𑀦𑁄 [𑀯𑀡𑀺𑀩𑁆𑀩𑀺𑀦𑁄 (𑀲𑀻. 𑀲𑁆𑀬𑀸.)];

𑀤𑀢𑁆𑀯𑀸𑀯 [𑀤𑀢𑁆𑀯𑀸𑀦 (𑀧𑀻. 𑀓.)] 𑀲𑁂𑀲𑀁 𑀪𑀼𑀜𑁆𑀚𑀦𑁆𑀢𑀺, 𑀢𑁂 𑀚𑀦𑀸 𑀯𑀺𑀖𑀸𑀲𑀸𑀤𑀺𑀦𑁄𑀢𑀺.

𑀯𑀺𑀖𑀸𑀲𑀸𑀤𑀚𑀸𑀢𑀓𑀁 𑀅𑀝𑁆𑀞𑀫𑀁.

𑁩𑁯𑁪. 𑀯𑀝𑁆𑀝𑀓𑀚𑀸𑀢𑀓𑀁 (𑁬-𑁨-𑁯)

𑁧𑁨𑁮. 𑀧𑀡𑀻𑀢𑀁 𑀪𑀼𑀜𑁆𑀚𑀲𑁂 𑀪𑀢𑁆𑀢𑀁, 𑀲𑀧𑁆𑀧𑀺𑀢𑁂𑀮𑀜𑁆𑀘 𑀫𑀸𑀢𑀼𑀮;

𑀅𑀣 𑀓𑁂𑀦 𑀦𑀼 𑀯𑀡𑁆𑀡𑁂𑀦, 𑀓𑀺𑀲𑁄 𑀢𑁆𑀯𑀫𑀲𑀺 𑀯𑀸𑀬𑀲.

𑁧𑁨𑁯. 𑀅𑀫𑀺𑀢𑁆𑀢𑀫𑀚𑁆𑀛𑁂 𑀯𑀲𑀢𑁄, 𑀢𑁂𑀲𑀼 𑀆𑀫𑀺𑀲𑀫𑁂𑀲𑀢𑁄;

𑀦𑀺𑀘𑁆𑀘𑀁 𑀉𑀩𑁆𑀩𑀺𑀕𑁆𑀕𑀳𑀤𑀬𑀲𑁆𑀲, 𑀓𑀼𑀢𑁄 𑀓𑀸𑀓𑀲𑁆𑀲 𑀤𑀴𑁆𑀳𑀺𑀬𑀁.

𑁧𑁩𑁦. 𑀦𑀺𑀘𑁆𑀘𑀁 𑀉𑀩𑁆𑀩𑁂𑀕𑀺𑀦𑁄 [𑀉𑀩𑁆𑀩𑀺𑀕𑁆𑀕𑀺𑀦𑁄 (𑀲𑁆𑀬𑀸. 𑀓.), 𑀉𑀩𑁆𑀩𑁂𑀥𑀺𑀦𑁄 (𑀲𑀻.)] 𑀓𑀸𑀓𑀸, 𑀥𑀗𑁆𑀓𑀸 𑀧𑀸𑀧𑁂𑀦 𑀓𑀫𑁆𑀫𑀼𑀦𑀸;

𑀮𑀤𑁆𑀥𑁄 𑀧𑀺𑀡𑁆𑀟𑁄 𑀦 𑀧𑀻𑀡𑁂𑀢𑀺, 𑀓𑀺𑀲𑁄 𑀢𑁂𑀦𑀲𑁆𑀫𑀺 𑀯𑀝𑁆𑀝𑀓.

𑁧𑁩𑁧. 𑀮𑀽𑀔𑀸𑀦𑀺 𑀢𑀺𑀡𑀩𑀻𑀚𑀸𑀦𑀺, 𑀅𑀧𑁆𑀧𑀲𑁆𑀦𑁂𑀳𑀸𑀦𑀺 𑀪𑀼𑀜𑁆𑀚𑀲𑀺;

𑀅𑀣 𑀓𑁂𑀦 𑀦𑀼 𑀯𑀡𑁆𑀡𑁂𑀦, 𑀣𑀽𑀮𑁄 𑀢𑁆𑀯𑀫𑀲𑀺 𑀯𑀝𑁆𑀝𑀓.

𑁧𑁩𑁨. 𑀅𑀧𑁆𑀧𑀺𑀘𑁆𑀙𑀸 𑀅𑀧𑁆𑀧𑀘𑀺𑀦𑁆𑀢𑀸𑀬, 𑀅𑀤𑀽𑀭𑀕𑀫𑀦𑁂𑀦 𑀘;

𑀮𑀤𑁆𑀥𑀸𑀮𑀤𑁆𑀥𑁂𑀦 𑀬𑀸𑀧𑁂𑀦𑁆𑀢𑁄, 𑀣𑀽𑀮𑁄 𑀢𑁂𑀦𑀲𑁆𑀫𑀺 𑀯𑀸𑀬𑀲.

𑁧𑁩𑁩. 𑀅𑀧𑁆𑀧𑀺𑀘𑁆𑀙𑀲𑁆𑀲 𑀳𑀺 𑀧𑁄𑀲𑀲𑁆𑀲, 𑀅𑀧𑁆𑀧𑀘𑀺𑀦𑁆𑀢𑀲𑀼𑀔𑀲𑁆𑀲 [𑀅𑀧𑁆𑀧𑀘𑀺𑀦𑁆𑀢𑀺𑀲𑀼𑀔𑀲𑁆𑀲 (𑀲𑀻. 𑀲𑁆𑀬𑀸. 𑀧𑀻.)] 𑀘;

𑀲𑀼𑀲𑀗𑁆𑀕𑀳𑀺𑀢𑀫𑀸𑀦𑀲𑁆𑀲 [𑀲𑀼𑀲𑀗𑁆𑀕𑀳𑀺𑀢𑀧𑀫𑀸𑀡𑀲𑁆𑀲 (𑀲𑀻. 𑀲𑁆𑀬𑀸. 𑀧𑀻.)], 𑀯𑀼𑀢𑁆𑀢𑀻 𑀲𑀼𑀲𑀫𑀼𑀤𑀸𑀦𑀬𑀸𑀢𑀺.

𑀯𑀝𑁆𑀝𑀓𑀚𑀸𑀢𑀓𑀁 𑀦𑀯𑀫𑀁.

𑁩𑁯𑁫. 𑀧𑀸𑀭𑀸𑀯𑀢𑀚𑀸𑀢𑀓𑀁 (𑁬-𑁨-𑁧𑁦)

𑁧𑁩𑁪. 𑀘𑀺𑀭𑀲𑁆𑀲𑀁 𑀯𑀢 𑀧𑀲𑁆𑀲𑀸𑀫𑀺, 𑀲𑀳𑀸𑀬𑀁 𑀫𑀡𑀺𑀥𑀸𑀭𑀺𑀦𑀁;

𑀲𑀼𑀓𑀢𑀸 [𑀲𑀼𑀓𑀢𑀸𑀬 (𑀲𑀻. 𑀧𑀻.)] 𑀫𑀲𑁆𑀲𑀼𑀓𑀼𑀢𑁆𑀢𑀺𑀬𑀸, 𑀲𑁄𑀪𑀢𑁂 𑀯𑀢 𑀫𑁂 𑀲𑀔𑀸.

𑁧𑁩𑁫. 𑀧𑀭𑀽𑀴𑁆𑀳𑀓𑀘𑁆𑀙𑀦𑀔𑀮𑁄𑀫𑁄, 𑀅𑀳𑀁 𑀓𑀫𑁆𑀫𑁂𑀲𑀼 𑀩𑁆𑀬𑀸𑀯𑀝𑁄;

𑀘𑀺𑀭𑀲𑁆𑀲𑀁 𑀦𑁆𑀳𑀸𑀧𑀺𑀢𑀁 𑀮𑀤𑁆𑀥𑀸, 𑀮𑁄𑀫𑀁 𑀢𑀁 𑀅𑀚𑁆𑀚𑀁 𑀳𑀸𑀭𑀬𑀺𑀁 [𑀅𑀧𑀳𑀸𑀭𑀬𑀺𑀁 (𑀲𑀻. 𑀧𑀻.)].

𑁧𑁩𑁬. 𑀬𑀁 𑀦𑀼 𑀮𑁄𑀫𑀁 𑀅𑀳𑀸𑀭𑁂𑀲𑀺, 𑀤𑀼𑀮𑁆𑀮𑀪𑀁 𑀮𑀤𑁆𑀥 𑀓𑀧𑁆𑀧𑀓𑀁;

𑀅𑀣 𑀓𑀺𑀜𑁆𑀘𑀭𑀳𑀺 𑀢𑁂 𑀲𑀫𑁆𑀫, 𑀓𑀡𑁆𑀞𑁂 𑀓𑀺𑀡𑀺𑀓𑀺𑀡𑀸𑀬𑀢𑀺 [𑀇𑀤𑀁 𑀓𑀡𑁆𑀞𑁂 𑀓𑀺𑀡𑀸𑀬𑀢𑀺 (𑀓.), 𑀓𑀡𑁆𑀞𑁂 𑀓𑀺𑀁𑀦𑀺𑀓𑀺𑀮𑀸𑀬𑀢𑀺 (𑀲𑁆𑀬𑀸.)].

𑁧𑁩𑁭. 𑀫𑀦𑀼𑀲𑁆𑀲𑀲𑀼𑀔𑀼𑀫𑀸𑀮𑀸𑀦𑀁, 𑀫𑀡𑀺 𑀓𑀡𑁆𑀞𑁂𑀲𑀼 𑀮𑀫𑁆𑀩𑀢𑀺;

𑀢𑁂𑀲𑀸𑀳𑀁 𑀅𑀦𑀼𑀲𑀺𑀓𑁆𑀔𑀸𑀫𑀺, 𑀫𑀸 𑀢𑁆𑀯𑀁 𑀫𑀜𑁆𑀜𑀺 𑀤𑀯𑀸 𑀓𑀢𑀁.

𑁧𑁩𑁮. 𑀲𑀘𑁂𑀧𑀺𑀫𑀁 𑀧𑀺𑀳𑀬𑀲𑀺, 𑀫𑀲𑁆𑀲𑀼𑀓𑀼𑀢𑁆𑀢𑀺𑀁 𑀲𑀼𑀓𑀸𑀭𑀺𑀢𑀁;

𑀓𑀸𑀭𑀬𑀺𑀲𑁆𑀲𑀸𑀫𑀺 𑀢𑁂 𑀲𑀫𑁆𑀫, 𑀫𑀡𑀺𑀜𑁆𑀘𑀸𑀧𑀺 𑀤𑀤𑀸𑀫𑀺 𑀢𑁂.

𑁧𑁩𑁯. 𑀢𑁆𑀯𑀜𑁆𑀜𑁂𑀯 𑀫𑀡𑀺𑀦𑀸 𑀙𑀦𑁆𑀦𑁄, 𑀲𑀼𑀓𑀢𑀸𑀬 𑀘 𑀫𑀲𑁆𑀲𑀼𑀬𑀸;

𑀆𑀫𑀦𑁆𑀢 𑀔𑁄 𑀢𑀁 𑀕𑀘𑁆𑀙𑀸𑀫𑀺, 𑀧𑀺𑀬𑀁 𑀫𑁂 𑀢𑀯 𑀤𑀲𑁆𑀲𑀦𑀦𑁆𑀢𑀺.