𑁩𑁯𑁫. 𑀧𑀸𑀭𑀸𑀯𑀢𑀚𑀸𑀢𑀓𑀁 (𑁬-𑁨-𑁧𑁦)

𑁧𑁩𑁪. 𑀘𑀺𑀭𑀲𑁆𑀲𑀁 𑀯𑀢 𑀧𑀲𑁆𑀲𑀸𑀫𑀺, 𑀲𑀳𑀸𑀬𑀁 𑀫𑀡𑀺𑀥𑀸𑀭𑀺𑀦𑀁;

𑀲𑀼𑀓𑀢𑀸 [𑀲𑀼𑀓𑀢𑀸𑀬 (𑀲𑀻. 𑀧𑀻.)] 𑀫𑀲𑁆𑀲𑀼𑀓𑀼𑀢𑁆𑀢𑀺𑀬𑀸, 𑀲𑁄𑀪𑀢𑁂 𑀯𑀢 𑀫𑁂 𑀲𑀔𑀸.

𑁧𑁩𑁫. 𑀧𑀭𑀽𑀴𑁆𑀳𑀓𑀘𑁆𑀙𑀦𑀔𑀮𑁄𑀫𑁄, 𑀅𑀳𑀁 𑀓𑀫𑁆𑀫𑁂𑀲𑀼 𑀩𑁆𑀬𑀸𑀯𑀝𑁄;

𑀘𑀺𑀭𑀲𑁆𑀲𑀁 𑀦𑁆𑀳𑀸𑀧𑀺𑀢𑀁 𑀮𑀤𑁆𑀥𑀸, 𑀮𑁄𑀫𑀁 𑀢𑀁 𑀅𑀚𑁆𑀚𑀁 𑀳𑀸𑀭𑀬𑀺𑀁 [𑀅𑀧𑀳𑀸𑀭𑀬𑀺𑀁 (𑀲𑀻. 𑀧𑀻.)].

𑁧𑁩𑁬. 𑀬𑀁 𑀦𑀼 𑀮𑁄𑀫𑀁 𑀅𑀳𑀸𑀭𑁂𑀲𑀺, 𑀤𑀼𑀮𑁆𑀮𑀪𑀁 𑀮𑀤𑁆𑀥 𑀓𑀧𑁆𑀧𑀓𑀁;

𑀅𑀣 𑀓𑀺𑀜𑁆𑀘𑀭𑀳𑀺 𑀢𑁂 𑀲𑀫𑁆𑀫, 𑀓𑀡𑁆𑀞𑁂 𑀓𑀺𑀡𑀺𑀓𑀺𑀡𑀸𑀬𑀢𑀺 [𑀇𑀤𑀁 𑀓𑀡𑁆𑀞𑁂 𑀓𑀺𑀡𑀸𑀬𑀢𑀺 (𑀓.), 𑀓𑀡𑁆𑀞𑁂 𑀓𑀺𑀁𑀦𑀺𑀓𑀺𑀮𑀸𑀬𑀢𑀺 (𑀲𑁆𑀬𑀸.)].

𑁧𑁩𑁭. 𑀫𑀦𑀼𑀲𑁆𑀲𑀲𑀼𑀔𑀼𑀫𑀸𑀮𑀸𑀦𑀁, 𑀫𑀡𑀺 𑀓𑀡𑁆𑀞𑁂𑀲𑀼 𑀮𑀫𑁆𑀩𑀢𑀺;

𑀢𑁂𑀲𑀸𑀳𑀁 𑀅𑀦𑀼𑀲𑀺𑀓𑁆𑀔𑀸𑀫𑀺, 𑀫𑀸 𑀢𑁆𑀯𑀁 𑀫𑀜𑁆𑀜𑀺 𑀤𑀯𑀸 𑀓𑀢𑀁.

𑁧𑁩𑁮. 𑀲𑀘𑁂𑀧𑀺𑀫𑀁 𑀧𑀺𑀳𑀬𑀲𑀺, 𑀫𑀲𑁆𑀲𑀼𑀓𑀼𑀢𑁆𑀢𑀺𑀁 𑀲𑀼𑀓𑀸𑀭𑀺𑀢𑀁;

𑀓𑀸𑀭𑀬𑀺𑀲𑁆𑀲𑀸𑀫𑀺 𑀢𑁂 𑀲𑀫𑁆𑀫, 𑀫𑀡𑀺𑀜𑁆𑀘𑀸𑀧𑀺 𑀤𑀤𑀸𑀫𑀺 𑀢𑁂.

𑁧𑁩𑁯. 𑀢𑁆𑀯𑀜𑁆𑀜𑁂𑀯 𑀫𑀡𑀺𑀦𑀸 𑀙𑀦𑁆𑀦𑁄, 𑀲𑀼𑀓𑀢𑀸𑀬 𑀘 𑀫𑀲𑁆𑀲𑀼𑀬𑀸;

𑀆𑀫𑀦𑁆𑀢 𑀔𑁄 𑀢𑀁 𑀕𑀘𑁆𑀙𑀸𑀫𑀺, 𑀧𑀺𑀬𑀁 𑀫𑁂 𑀢𑀯 𑀤𑀲𑁆𑀲𑀦𑀦𑁆𑀢𑀺.

𑀧𑀸𑀭𑀸𑀯𑀢𑀚𑀸𑀢𑀓𑀁 [𑀓𑀸𑀓𑀚𑀸𑀢𑀓𑀁 (𑀲𑀻. 𑀧𑀻.), 𑀫𑀡𑀺𑀚𑀸𑀢𑀓𑀁 (𑀲𑁆𑀬𑀸.)] 𑀤𑀲𑀫𑀁.

𑀔𑀭𑀧𑀼𑀢𑁆𑀢𑀯𑀕𑁆𑀕𑁄 [𑀲𑁂𑀦𑀓𑀯𑀕𑁆𑀕𑁄 (𑀲𑀻. 𑀧𑀻.), 𑀔𑀼𑀭𑀧𑀼𑀢𑁆𑀢𑀯𑀕𑁆𑀕𑁄 (𑀲𑁆𑀬𑀸.), 𑀲𑀽𑀘𑀺𑀯𑀕𑁆𑀕𑁄 (𑀓.)] 𑀤𑀼𑀢𑀺𑀬𑁄.

𑀢𑀲𑁆𑀲𑀼𑀤𑁆𑀤𑀸𑀦𑀁 𑁋

𑀅𑀣 𑀧𑀲𑁆𑀲 𑀲𑀲𑀽𑀘𑀺 𑀘 𑀢𑀼𑀡𑁆𑀟𑀺𑀮𑀓𑁄, 𑀫𑀺𑀕 𑀫𑀬𑁆𑀳𑀓𑀧𑀜𑁆𑀘𑀫𑀧𑀓𑁆𑀔𑀺𑀯𑀭𑁄;

𑀅𑀣 𑀧𑀜𑁆𑀚𑀮𑀺 𑀯𑀸𑀭𑀺𑀚 𑀫𑁂𑀚𑁆𑀛 𑀧𑀼𑀦, 𑀅𑀣 𑀯𑀝𑁆𑀝 𑀓𑀧𑁄𑀢𑀯𑀭𑁂𑀦 𑀤𑀲𑀸𑀢𑀺.

𑀅𑀣 𑀯𑀕𑁆𑀕𑀼𑀤𑁆𑀤𑀸𑀦𑀁 𑁋

𑀅𑀣 𑀯𑀕𑁆𑀕𑀁 𑀧𑀓𑀺𑀢𑁆𑀢𑀺𑀲𑁆𑀲𑀁, 𑀙𑀦𑀺𑀧𑀸𑀢𑀁 𑀯𑀭𑀼𑀢𑁆𑀢𑀫𑁂;

𑀅𑀯𑀸𑀭𑀺𑀬𑀸 𑀘 𑀔𑀭𑁄 𑀘 [𑀲𑁂𑀦𑀓 (𑀲𑀻.), 𑀲𑀽𑀘𑀺 𑀘 (𑀲𑁆𑀬𑀸. 𑀓.)], 𑀤𑁆𑀯𑁂 𑀘 𑀯𑀼𑀢𑁆𑀢𑀸 𑀲𑀼𑀩𑁆𑀬𑀜𑁆𑀚𑀦𑀸𑀢𑀺.

𑀙𑀓𑁆𑀓𑀦𑀺𑀧𑀸𑀢𑀁 𑀦𑀺𑀝𑁆𑀞𑀺𑀢𑀁.