𑁩𑁬𑁩. 𑀳𑀺𑀭𑀺𑀚𑀸𑀢𑀓𑀁 (𑁫-𑁨-𑁩)

𑁭𑁦. 𑀳𑀺𑀭𑀺𑀁 𑀢𑀭𑀦𑁆𑀢𑀁 𑀯𑀺𑀚𑀺𑀕𑀼𑀘𑁆𑀙𑀫𑀸𑀦𑀁, 𑀢𑀯𑀸𑀳𑀫𑀲𑁆𑀫𑀻 𑀇𑀢𑀺 𑀪𑀸𑀲𑀫𑀸𑀦𑀁;

𑀲𑁂𑀬𑁆𑀬𑀸𑀦𑀺 𑀓𑀫𑁆𑀫𑀸𑀦𑀺 𑀅𑀦𑀸𑀤𑀺𑀬𑀦𑁆𑀢𑀁, 𑀦𑁂𑀲𑁄 𑀫𑀫𑀦𑁆𑀢𑀺 𑀇𑀢𑀺 𑀦𑀁 𑀯𑀺𑀚𑀜𑁆𑀜𑀸.

𑁭𑁧. 𑀬𑀜𑁆𑀳𑀺 𑀓𑀬𑀺𑀭𑀸 𑀢𑀜𑁆𑀳𑀺 𑀯𑀤𑁂, 𑀬𑀁 𑀦 𑀓𑀬𑀺𑀭𑀸 𑀦 𑀢𑀁 𑀯𑀤𑁂;

𑀅𑀓𑀭𑁄𑀦𑁆𑀢𑀁 𑀪𑀸𑀲𑀫𑀸𑀦𑀁, 𑀧𑀭𑀺𑀚𑀸𑀦𑀦𑁆𑀢𑀺 𑀧𑀡𑁆𑀟𑀺𑀢𑀸.

𑁭𑁨. 𑀦 𑀲𑁄 𑀫𑀺𑀢𑁆𑀢𑁄 𑀬𑁄 𑀲𑀤𑀸 𑀅𑀧𑁆𑀧𑀫𑀢𑁆𑀢𑁄, 𑀪𑁂𑀤𑀸𑀲𑀗𑁆𑀓𑀻 𑀭𑀦𑁆𑀥𑀫𑁂𑀯𑀸𑀦𑀼𑀧𑀲𑁆𑀲𑀻;

𑀬𑀲𑁆𑀫𑀺𑀜𑁆𑀘 𑀲𑁂𑀢𑀻 𑀉𑀭𑀲𑀻𑀯 𑀧𑀼𑀢𑁆𑀢𑁄, 𑀲 𑀯𑁂 𑀫𑀺𑀢𑁆𑀢𑁄 𑀬𑁄 𑀅𑀪𑁂𑀚𑁆𑀚𑁄 𑀧𑀭𑁂𑀳𑀺.

𑁭𑁩. 𑀧𑀸𑀫𑁄𑀚𑁆𑀚𑀓𑀭𑀡𑀁 𑀞𑀸𑀦𑀁, 𑀧𑀲𑀁𑀲𑀸𑀯𑀳𑀦𑀁 𑀲𑀼𑀔𑀁;

𑀨𑀮𑀸𑀦𑀺𑀲𑀁𑀲𑁄 𑀪𑀸𑀯𑁂𑀢𑀺, 𑀯𑀳𑀦𑁆𑀢𑁄 𑀧𑁄𑀭𑀺𑀲𑀁 𑀥𑀼𑀭𑀁.

𑁭𑁪. 𑀧𑀯𑀺𑀯𑁂𑀓𑀭𑀲𑀁 𑀧𑀺𑀢𑁆𑀯𑀸, 𑀭𑀲𑀁 𑀉𑀧𑀲𑀫𑀲𑁆𑀲 𑀘;

𑀦𑀺𑀤𑁆𑀤𑀭𑁄 𑀳𑁄𑀢𑀺 𑀦𑀺𑀧𑁆𑀧𑀸𑀧𑁄, 𑀥𑀫𑁆𑀫𑀧𑁆𑀧𑀻𑀢𑀺𑀭𑀲𑀁 𑀧𑀺𑀯𑀦𑁆𑀢𑀺.

𑀳𑀺𑀭𑀺𑀚𑀸𑀢𑀓𑀁 𑀢𑀢𑀺𑀬𑀁.